ADVERTISEMENT

ADVERTISEMENT

അഭിഷേകാഗ്നി കൺവൻഷൻ പന്തലിനു കാൽനാട്ടി

അഗളി: 13 മുതൽ 16 വരെ ജെല്ലിപ്പാറയിൽ നടക്കുന്ന അഭിഷേകാഗ്നി കൺവൻഷനു മുന്നോടിയായി പന്തൽ കാൽനാട്ടുകർമം നടത്തി.

താവളം സെഹിയോൻ ധ്യാനകേന്ദ്രം ജോയിന്‍റ് ഡയറക്ടർ ഫാ.ആന്‍റണി നെടുംപുറത്ത് തിരുക്കർമങ്ങൾക്കു നേതൃത്വം നൽകി.

ഫാ. ബിജോയ് ചോതിരക്കാട്ട്, കൈക്കാരന്മാരായ മത്തായി ഊടുപുയിൽ, ഷിബിൻ കുരുവിലംകാട്ടിൽ, കൺവീനർമാരായ ജയ്സൺ പനന്താനത്ത്, സാബു ചാലാനിയിൽ എന്നിവരുടെ നേതൃത്വത്തിൽ വിവിധ കമ്മറ്റികൾക്കും രൂപംനൽകി.

ADVERTISEMENT

ഷൊർണൂരിലെ അമ്മമാർക്ക് ആശ്വാസമായി അങ്കണവാടി കം ക്രഷർ തുറന്നു

ഷൊർണൂർ: വനിത ശിശുവികസന വകുപ്പ് ഐസിഡിഎസ് ഒറ്റപ്പാലം അഡീഷണൽ വകുപ്പ് നടപ്പിലാക്കുന്ന അങ്കണവാടി കം ക്രഷിന്‍റെ ഉദ്ഘാടനം പി. മമ്മിക്കുട്ടി എംഎൽഎ നിർവഹിച്ചു ഷൊർണൂർ നഗരസഭയിൽ ആദ്യമായി ആരംഭിച്ച ക്രഷ് ലക്ഷംവീട് കോളനി അങ്കണവാടിയിലാണ് തുടക്കംകുറിച്ചത്. ജോലിക്കുപോകുന്ന വീട്ടമ്മമാരുടെ ആറുമാസംമുതൽ മൂന്നുവയസുവരെ പ്രായമുള്ള കുഞ്ഞുങ്ങളെ രാവിലെ ഏഴരമുതൽ രാത്രി ഏഴുവരെ പരിപാലിക്കുകയാണ് ലക്ഷ്യം. ഷിഫ്റ്റ് സമ്പ്രദായത്തിൽ അങ്കണവാടി വർക്കറും ഹെൽപ്പറുമുണ്ടാകുമെന്ന പ്രത്യേകതകൂടിയുണ്ട്. നഗരസഭ ചെയർമാൻ എം.കെ. ജയപ്രകാശ് അധ്യക്ഷനായി. നഗരസഭ വൈസ് ചെയർപേഴ്സൺ പി. സിന്ധു, കൗൺസിലർമാരായ കെ. കൃഷ്ണകുമാർ, പി. ജിഷ, ടി. ലത എന്നിവർ പ്രസംഗിച്ചു.

അട്ടപ്പാടി ചുരത്തിൽ ചുമർചിത്രമൊരുക്കി വിദ്യാർഥികൾ

മണ്ണാർക്കാട്: ചുമർചിത്രം വരച്ച് കാടുകാക്കാൻ ഒരുങ്ങുകയാണ് തവനൂർ കാർഷിക എൻജിനീയറിംഗ് കോളജിലെ എൻഎസ്എസ് വിദ്യാർഥികളും വനംവകുപ്പും. സൈലന്‍റ് വാലിയിലേക്കും അട്ടപ്പാടി മലനിരകളിലേക്കും ചുരംകയറി പോകുമ്പോൾ റോഡിന്‍റെ വശത്തെ മതിലിൽ ഒരുക്കിയിട്ടുള്ള മനോഹരമായ ചുവർചിത്രം ഇനി കാടുകാക്കലിന്‍റെ സന്ദേശമോതും. ജന്തുജാലങ്ങളുമായി അനുഗൃഹീതമായ അട്ടപ്പാടി ചുരംറോഡ് മാലിന്യത്തിൽ മുങ്ങിയിരുന്നു. വനത്തിലൂടെ കടന്നുപോകുന്ന പാതയുടെ ഇരുവശത്തും ആളുകൾ മാലിന്യമെറിഞ്ഞതോടെ ചുരം ചീഞ്ഞുനാറാൻ തുടങ്ങി. ബോധവത്കരണ പോസ്റ്ററുകളും അറിയിപ്പുകളുമെല്ലാം സ്ഥാപിച്ചെങ്കിലും ഫലപ്രദമായില്ല. തുടർന്നാണ് പാറക്കെട്ടുകളിലും മതിലുകളിലുമെല്ലാം മനോഹരമായ ചിത്രങ്ങൾ വരയ്ക്കാമെന്ന ആശയം എൻഎസ്എസ് വോളന്‍റിയർമാർക്കു തോന്നിയത്. മണ്ണാർക്കാട് ഫോറസ്റ്റ് ഡിവിഷൻ പ്രോത്സാഹനവുമായെത്തിയതോടെ ചുമർചിത്രവും യാഥാർഥ്യമായി. എൻഎസ്എസ് സപ്തദിന ക്യാന്പിന്‍റെ ഭാഗമായാണ് ഈ സൗന്ദര്യവത്കരണം. പത്താംവളവ് എത്തുന്നതിനു മുമ്പ് ഏകദേശം 500 മീറ്റർ മാറിയാണ് 750 ചതുരശ്രഅടി വിസ്തീർണത്തിൽ ചുവർചിത്രം ഒരുക്കിയത്. കോളജ് എൻഎസ്എസ് പ്രോഗ്രാം ഓഫീസർ അസിസ്റ്റന്‍റ് പ്രഫസർ വൈശാഖ് വേണുവും മണ്ണാർക്കാട് റേഞ്ച് ഫോറസ്റ്റ് ഓഫീസർ സുബൈറും ഡെപ്യൂട്ടി ഓഫീസർ അഷ്റഫും കൈകോർത്തതോടെയാണ് വിദ്യാർഥികളുടെ സൗന്ദര്യവത്കരണം യാഥാർഥ്യമായത്.

സൗജന്യ സമ്മർ ഫുട്ബോൾ കോച്ചിംഗ്ക്യാമ്പ് തുടങ്ങി

മണ്ണാർക്കാട്: മണ്ണാർക്കാട് ഫുട്ബോൾ അസോസിയേഷനും ലിൻഷ മെഡിക്കൽസ് ഫുട്ബോൾ ക്ലബ്ബും സംയുക്തമായി സംഘടിപ്പിക്കുന്ന സൗജന്യ സമ്മർ ഫുട്ബോൾ കോച്ചിംഗ് ക്യാമ്പിലേക്ക് സെലക‌്ഷൻ ലഭിച്ച 50 കുട്ടികൾക്ക് കേരള പോലീസ് മുൻ ഹെഡ് കോച്ച് വിവേകിന്‍റെ നേതൃത്വത്തിൽ പരിശീലനം ആരംഭിച്ചു. മുബാസ് ഗ്രൗണ്ടിൽ നടന്ന ചടങ്ങിൽ എംഎഫ്എ പ്രസിഡന്‍റ് മുഹമ്മദ് ചെറൂട്ടി അധ്യക്ഷത വഹിച്ചു. കുട്ടികൾക്കുള്ള ജഴ്സി വിതരണം മദർ കെയർ ആശുപത്രി എംഡി ഷാജി മുല്ലപ്പള്ളി നിർവഹിച്ചു. ക്യാമ്പിന്‍റെ ഉദ്ഘാടനം ഉഗാണ്ട ദേശീയ ഫുട്ബോൾ താരവും ലിൻഷ മെഡിക്കൽസ് ഫുട്ബോൾ ടീം അംഗവുമായ യാസർ മുഗർവ നിർവഹിച്ചു. എംഎഫ്എ ജനറൽ സെക്രട്ടറി ഫിറോസ് ബാബു, ട്രഷറർ സലിം മറ്റത്തൂർ, ലിൻഷ മെഡിക്കൽസ് ഫുട്ബോൾ ക്ലബ് മാനേജർ ഷമീർ ബാബു മങ്ങാടൻ, എംഎഫ്എ ഭാരവാഹികളായ ഇബ്രാഹിം ഡിലൈറ്റ്, ഫിഫ മുഹമ്മദ് അലി, റഹീം എം. ഷൗക്കത്ത്, സി. അലി, ഷിഹാബ് കുന്നത്ത്, ഷിബു കാഞ്ഞിരം തുടങ്ങിയവർ പങ്കെടുത്തു.

കൺവൻഷൻ നാനാജാതി മതസ്ഥർക്കുവേണ്ടിയുള്ള ആത്മീയ ഉണർവ്: ഫാ. സേവ്യർഖാൻ വട്ടായിൽ

അഗളി: ജെല്ലിപ്പാറ സെന്‍റ് പീറ്റേഴ്സ് ഇടവകയിൽ നാളെമുതൽ ആരംഭിക്കുന്ന അഭിഷേകാഗ്നി കൺവെൻഷൻ നാനാജാതി മതസ്ഥർക്കുവേണ്ടിയുള്ള ആത്മീയ ഉണർവാണെന്ന് ഫാ. സേവ്യർഖാൻ വട്ടായിൽ. കൺവൻഷനോടനുബന്ധിച്ച് താവളം റൂഹ മൗണ്ട് മോണാസ്ട്രിയിൽ നടത്തിയ പത്രസമ്മേളനത്തിൽ സംസാരിക്കുകയായിരുന്നു അദ്ദേഹം. അട്ടപ്പാടിയിലെ കർഷകരും മറ്റു വിഭാഗക്കാരും ഏറെ കഷ്ടതയിലൂടെയാണ് കടന്നുപോകുന്നത്. പകലന്തിവരെയും തുടർന്നും പണിയെടുക്കുന്ന കർഷകർക്ക് സ്വസ്ഥമായി ഉറങ്ങാനാകുന്നില്ല. സമസ്തമേഖലകളിലും കർഷകർ വെല്ലുവിളി നേരിടുകയാണ്. രാപ്പകൽഭേദമില്ലാതെ പക്ഷിമൃഗാദികൾ കാർഷികവിളകൾ തിന്നൊടുക്കുമ്പോൾ കാട്ടാനപോലുള്ള വലിയ മൃഗങ്ങൾ കൃഷിനാശത്തിനൊപ്പം കൃഷിയിടവും ചവിട്ടിനിരപ്പാക്കുന്നു. ഇതിനുപുറമേ കീടബാധയും പ്രകൃതിക്ഷോഭങ്ങളും കർഷകരെ നിലയില്ലാക്കയത്തിലേക്ക് നയിക്കുന്നു. അട്ടപ്പാടി വൃദ്ധരുടെ നാടായി മാറുന്നു. അട്ടപ്പാടിയിൽ വിവാഹങ്ങൾ നടക്കാത്ത സ്ഥിതിവിശേഷമായിക്കഴിഞ്ഞു. അട്ടപ്പാടിയിലേക്ക് പെൺകുട്ടികളെ അയയ്ക്കാൻ ആരും തയാറാകുന്നില്ല. ജീവിക്കാൻ ഉതകുന്ന വേതനം ലഭിക്കുന്ന തൊഴിൽതേടിയും വിവാഹസാഹചര്യം ഒരുക്കുന്നതിനുമായി യുവതലമുറ അട്ടപ്പാടി വിടുകയാണിപ്പോൾ. മദ്യ, മയക്കുമരുന്നുകളുടെ പ്രസരണം വർധിച്ചിരിക്കുന്നു. സ്വസ്ഥത നഷ്ടപ്പെട്ട ജനവിഭാഗങ്ങളെ സമസ്തമേഖലകളിലും കാണുന്നു. ഈ അവസരത്തിൽ അഭിഷേകാഗ്നി പോലുള്ള ആത്മജ്ഞാനങ്ങൾക്കു പ്രസക്തിയുണ്ടെന്നു ഫാ. വട്ടായിൽ ചൂണ്ടിക്കാട്ടി. സെഹിയോൻ മിനിസ്ട്രീസ് ഡയറക്ടറും പിഡിഎഫ് മോണാസ്ട്രി സ്ഥാപകഡയറക്ടറുമായ ഫാ. സേവ്യർഖാൻ വട്ടായിലും സംഘവുമാണ് കൺവൻഷൻ നയിക്കുന്നത്. നാലുദിവസങ്ങളിലായി നടക്കുന്ന കൺവൻഷനുകളിൽ രോഗികൾക്കുവേണ്ടിയുള്ള പ്രത്യേക പ്രാർഥന, വെഞ്ചരിച്ച മെഡൽ കൊടുത്ത് കുട്ടികൾക്കുവേണ്ടിയുള്ള പ്രാർഥന, എല്ലാ ദിവസവും രാവിലെ 9 മുതൽ 4 വരെ തൈലംപൂശി പ്രാർഥന, കുട്ടികളുടെ പഠനോപകരണങ്ങൾ വെഞ്ചരിച്ചുനൽകൽ, കടബാധ്യത, രോഗപീഡകൾ, കുടുംബ തകർച്ച, ആത്മഹത്യ, ദുരന്തമരണങ്ങൾ എന്നിങ്ങനെയുള്ള തിന്മകളിൽനിന്നു മുക്തിനേടാൻ പ്രത്യേക പ്രാർഥനയും ഉണ്ടാകും. 13 മുതൽ 16 വരെ വൈകുന്നേരം നാലുമുതൽ രാത്രി 9 വരെയാണ് കൺവൻഷൻ. ദൂരെനിന്ന് എത്തുന്നവർക്ക് സൗജന്യ താമസസൗകര്യവും ഭക്ഷണവും ഒരുക്കിയിട്ടുണ്ട്. ബിഷപ് മാർ പീറ്റർ കൊച്ചുപുരയ്ക്കൽ, വികാരി ജനറാൾ മോൺ. ജീജോ ചാലയ്ക്കൽ തുടങ്ങിയവർ തിരുക്കർമങ്ങളിൽ സന്ദേശം നൽകും. സെന്‍റ് പീറ്റേഴ്സ് ഇടവകവികാരി ഫാ. ജോൺ മരിയ വിയാനി ഒലക്കേങ്കിൽ, പിഡിഎം അഡ്മിനിസ്ട്രേറ്റർ റെജി അറയ്ക്കൽ, കൈക്കാരന്മാർ, കൺവീനർമാർ എന്നിവർ പത്രസമ്മേളനത്തിൽ പങ്കെടുത്തു.

ടോൾവിഷയം: കമ്പനിയുടെ നിലപാടിൽ പ്രതിഷേധിച്ച് കോൺഗ്രസ് മാർച്ച്

വടക്കഞ്ചേരി: പന്നിയങ്കര ടോൾ പ്ലാസയിൽ പ്രദേശവാസികളുടെ ടോൾ സംബന്ധിച്ച സർവകക്ഷി യോഗതീരുമാനത്തിന് വിരുദ്ധമായി പ്രവർത്തിക്കുന്ന ടോൾ കമ്പനി നിലപാടിനെതിരെ കോൺഗ്രസ് ബ്ലോക്ക് കമ്മിറ്റി ടോൾ പ്ലാസയിലേക്ക് മാർച്ച്നടത്തി. ടോൾബൂത്തുകൾക്കു മുന്നിൽ എസ്ഐ ബാബുവിന്‍റെ നേതൃത്വത്തിൽ പ്രവർത്തകരെ പോലീസ് തടഞ്ഞു.തുടർന്ന് ടോൾ കൊള്ളക്കും കമ്പനിയുടെ ധിക്കാര നടപടികൾക്കുമെതിരെ പ്രവർത്തകർ മുദ്രാവാക്യങ്ങളുയർത്തി. കോൺഗ്രസ് ബ്ലോക്ക് പ്രസിഡന്‍റ് അഡ്വ.എം. ദിലീപ് ഉദ്ഘാടനം ചെയ്തു. സുരേഷ് വേലായുധൻ അധ്യക്ഷത വഹിച്ചു.വി.എം. സെയ്തലവി, ചാർളി മാത്യു, റെജി കെ. മാത്യു, ആന്‍റോ, കെ.എം.ശശീന്ദ്രൻ, എം.കെ. ശ്രീനിവാസൻ, കെ.സുദേവൻ കണ്ണമ്പ്ര, ബാബു മാധവൻ എന്നിവർ പ്രസംഗിച്ചു. ടോൾപ്ലാസയിൽ നിന്നും ഏഴര കിലോമീറ്റർ ദൂരപരിധിയിലുള്ളവർക്കു മാത്രമെ സൗജന്യപ്രവേശനം അനുവദിക്കൂ എന്ന നിലപാടിലാണ് ടോൾകമ്പനി. അതിനപ്പുറം എഡിഎം പരിശോധിച്ച് കണ്ടെത്തിയിട്ടുള്ള പ്രദേശങ്ങളിലുള്ളവർക്കുകൂടി സൗജന്യപ്രവേശനം നൽകണമെന്നതായിരുന്നു സർവകക്ഷി യോഗത്തിലെ തീരുമാനം. ഇത് കാറ്റിൽ പറത്തിയാണ് ടോൾകമ്പനി പ്രവർത്തിക്കുന്നത്. കമ്പനി പറയുന്ന ദൂരപരിധിയിൽ രേഖകൾ സമർപ്പിച്ചവർക്ക് ഏത് ട്രാക്കിലൂടെ വേണമെങ്കിലും കടന്നുപോകാം. രേഖകൾ സമർപ്പിച്ച വാഹനങ്ങൾ കടന്നുപോകുമ്പോൾ ഫാസ് ടാഗ് വഴി പണം നഷ്ടപ്പെടുന്നുണ്ടെന്ന പരാതികളുമുണ്ട്.

സിഐടിയു സമരം; ചർച്ച വീണ്ടും പരാജയം

ഷൊർണൂർ: സിഐടിയു കുടിൽകെട്ടി സമരം ചെയ്യുന്ന കുളപ്പുള്ളിയിലെ സ്ഥാപന ഉടമയുമായി ലേബർ ഓഫീസർ നടത്തിയ ചർച്ച പരാജയപ്പെട്ടു. യോഗത്തിനെത്തിയ ഉടമ ചർച്ചയ്ക്കു നിൽക്കാതെ ഹൈക്കോടതി തനിക്ക് അനുകൂലമായി നൽകിയ വിധി നടപ്പാക്കാൻ തയാറാകണമെന്ന് ആവശ്യപ്പെട്ടു. എന്നാൽ ലേബർ കാർഡില്ലാത്ത തൊഴിലാളികളെ സ്ഥാപനഉടമ നീക്കം ചെയ്യണമെന്നു സിഐടിയുവും ആവശ്യപ്പെട്ടതോടെയാണ് ചർച്ച പൊളിഞ്ഞത്. ജില്ലാ ലേബർ ഓഫീസറുടെ സാന്നിധ്യത്തിൽ വീണ്ടും ചർച്ച നടക്കും. അതേസമയം, താൻ ആത്മഹത്യയുടെ വക്കിലാണെന്നാണ് സ്ഥാപന ഉടമ പറയുന്നത്. സ്ഥാപനം ഇപ്പോൾ അടച്ചിട്ടിരിക്കുകയാണ്. കുളപ്പുള്ളിയിൽ കെട്ടിടനിർമാണ സാമഗ്രികൾ വിൽക്കുന്ന പ്രകാശ് സ്റ്റീൽ കടയ്ക്കുമുൻമ്പിലാണ് സിഐടിയു ചുമട്ടുതൊഴിലാളികൾ സമരം നടത്തിവരുന്നത്. നേരത്തെയും ലേബർ ഓഫീസറുടെ സാന്നിധ്യത്തിൽ ചർച്ച നടന്നതു പരാജയപ്പെട്ടിരുന്നു. തുടർന്ന് സ്ഥാപനഉടമ പ്രകാശിനു തൊഴിലാളികളിൽനിന്ന് മർദനമേറ്റതായും പരാതി ഉയർന്നു. സ്ഥാപനത്തിൽ കയറ്റിറക്കിനായി സ്ഥാപിച്ച യന്ത്രം പ്രവർത്തിപ്പിക്കാൻ തങ്ങളെ അനുവദിക്കണമെന്നായിരുന്നു ചുമട്ടുതൊഴിലാളികളുടെ ആവശ്യം. കയറ്റാനും ഇറക്കാനും രണ്ടുപേർവീതവും ഒരാൾ യന്ത്രത്തിന്‍റെ ബെൽറ്റിലും എന്ന രീതിയിൽ ജോലി നൽകണമെന്ന്‌ തൊഴിലാളിനേതാക്കൾ ആവശ്യപ്പെട്ടു. എന്നാൽ യന്ത്രം പ്രവർത്തിപ്പിക്കുന്നതിനും സ്വന്തംതൊഴിലാളികളെ ഉപയോഗിച്ച് കയറ്റിറക്കു ചെയ്യുന്നതിനും കോടതിയുത്തരവുണ്ടെന്നായിരുന്നു സ്ഥാപനയുടമയുടെ നിലപാട്. ജില്ലാ ലേബർ ഓഫീസറുടെ സാനിധ്യത്തിൽ ഒറ്റപ്പാലം ലേബർ ഓഫീസിൽ നടന്ന ചർച്ചയിലും ഇതായിരുന്നു വാദം. സമരം അവസാനിപ്പിക്കാൻ ചർച്ചയ്ക്ക്‌ തയാറാണെന്ന്‌ വ്യാപാരി വ്യവസായി ഏകോപനസമിതി ജില്ലാനേതാക്കളും അറിയിച്ചിരുന്നു.

കാൽവരിമല പ്രതീക്ഷയുടെ കൂടാരമാകും: ഡോ.യൂഹാനോൻ മാർ തിയഡോഷ്യസ്

കല്ലടിക്കോട്: വാക്കോടൻ മലയിൽ നിർമിതമായ കാൽവരിമല ഏവർക്കും പ്രതീക്ഷയുടെ കൂടാരമായി മാറുമെന്ന് മൂവാറ്റുപുഴ രൂപതാധ്യക്ഷൻ ഡോ.യൂഹാനോൻ മാർ തിയഡോഷ്യസ് മെത്രാപ്പൊലീത്ത പറഞ്ഞു. ഇരുമ്പാമുട്ടി സെന്‍റ് ജോസഫ് മലങ്കര കത്തോലിക്ക പള്ളിയിൽനിന്നും നാല്പതാം വെള്ളിയാഴ്ച ആണ്ടുതോറും നടത്തിവരുന്ന വാക്കോടൻ കാൽവരി കുരിശുമലകയറ്റത്തിൽ പങ്കെടുത്ത് സന്ദേശം നൽകുകയായിരുന്നു അദ്ദേഹം. കുരിശുമലയെ തീർഥാടനകേന്ദ്രമായി പ്രഖ്യാപിച്ചു. കുരിശുമലയിൽ പുതുതായി പണികഴിപ്പിച്ച ചാപ്പലിന്‍റേയും കൽകുരിശിന്‍റേയും കൽവിളക്കിന്‍റേയും കൂദാശാകർമവും നിർവഹിച്ചു. ഫാ. മാത്യു തടത്തിൽ, ഫാ. ജോവാക്കിം പണ്ടാരങ്കുടിയിൽ, ഫാ. ഐസക് കോച്ചേരിയിൽ മറ്റ് വൈദീകർ, രാഷ്ട്രീയ നേതാക്കൾ തുടങ്ങിയവർ നേതൃത്വം നൽകി.

വിശ്വാസികൾ ക്രിസ്തീയദർശനത്തിൽ ജീവിക്കണം: മാർ പീറ്റർ കൊച്ചുപുരയ്ക്കൽ

അഗളി: അനുസരണം, വിധേയത്വം എന്നീ ക്രിസ്തീയദർശനത്തിൽ ഊന്നി ദൈവഹിതത്തിനു സ്വയം സമർപ്പിച്ചുവേണം വിശ്വാസികൾ ജീവിക്കാനെന്നു ബിഷപ് മാർ പീറ്റർ കൊച്ചുപുരയ്ക്കൽ. നാല്പതാം വെള്ളി ആചരണത്തിന്‍റെ ഭാഗമായി ചിന്നമലയാറ്റൂർ എന്നറിയപ്പെടുന്ന അട്ടപ്പാടി ജെല്ലിപ്പാറ കാൽവരി മൗണ്ട് തീർഥാടന കേന്ദ്രത്തിലേക്ക് നടന്ന കുരിശുമലതീർഥാടനത്തിൽ സന്ദേശം നൽകുകയായിരുന്നു ബിഷപ്. സ്വയം ജീവിതം അവസാനിപ്പിക്കുന്ന പ്രവണത വർധിച്ചുവരുന്ന സാഹചര്യത്തിൽ ഏവരും ദൈവഹിതം മനസിലാക്കി സമചിത്തതയോടെ സാഹചര്യങ്ങളെ വിലയിരുത്തി ജീവിക്കണമെന്നും ബിഷപ് പറഞ്ഞു. ഇന്നലെ വൈകുന്നേരം 3.30ന് സെന്‍റ് പീറ്റേഴ്സ് പള്ളിയിൽ നടന്ന തിരുകർമ്മങ്ങൾക്ക് താവളം ഫെറോന വികാരി ഫാ. ബിജു പ്ലാത്തോട്ടത്തിൽ മുഖ്യകാർമികത്വം വഹിച്ചു. തുടർന്ന് ബിഷപ്പിന്‍റെ നേതൃത്വത്തിൽ നടന്ന കുരിശിന്‍റെ വഴിയിൽ ആയിരങ്ങൾ മല ചവിട്ടി പുണ്യം നേടി. സംസ്ഥാനത്തിന് അകത്തുനിന്നും പുറത്തുനിന്നുമായി വിശ്വാസികളും വൈദികരും സന്യസ്ഥരും ഒഴുകിയെത്തി. ഇടവക വികാരി ഫാ. ജോൺ മരിയ വിയാനി ഒലക്കേങ്കിൽ, ഫാ. ബിജോയി ചോതിരക്കോട്ടിൽ, ഫാ. സൈമൺ കൊള്ളന്നൂർ, കൈക്കാരന്മാരായ മത്തായി ഊടുപുഴയിൽ, ഷിബിൻ കുരുവിലംകാട്ടിൽ, കൺവീനർമാരായ ജയ്സൺ പനന്താനത്ത്, സാബു ചാലാനിയിൽ എന്നിവർ നേതൃത്വം നൽകി.

മദ്യം ലഹരിയല്ലെന്നു സർക്കാർ പ്രചരിപ്പിക്കുന്നു: വി.എം. സുധീരൻ

പാലക്കാട്: പ്രകടനപത്രികയിൽ പറഞ്ഞ കാര്യങ്ങൾ വിസ്മരിച്ച് കേരളത്തെ മദ്യത്തിൽ മുക്കിക്കൊല്ലുകയാണ് ഇടതുപക്ഷ സർക്കാർ ചെയ്യുന്നതെന്ന് കോണ്‍ഗ്രസ് നേതാവ് വി.എം. സുധീരൻ. മദ്യം ലഹരിയല്ല, മയക്കുമരുന്നാണ് ലഹരി എന്ന മട്ടിലാണ് സർക്കാരിന്‍റെ പ്രചാരണം. ഇതു കേരളത്തെ ദുരന്തത്തിലേക്ക് തള്ളിവിടുമെന്നും അദ്ദേഹം എലപ്പുള്ളിയിൽ മാധ്യമങ്ങളോടു പറഞ്ഞു. തെരഞ്ഞെടുപ്പ് പ്രകടനപത്രികയിലെ വാഗ്ദാനങ്ങൾ എല്ലാം ഇടതുപക്ഷ സർക്കാർ ലംഘിച്ചിരിക്കുകയാണ്. മദ്യവർജനമാണ് ലക്ഷ്യംവയ്ക്കുന്നതെന്നായിരുന്നു പ്രകടനപത്രികയിലെ വാഗ്ദാനം. എന്നാൽ മദ്യഷാപ്പുകളുടെ എണ്ണം വർധിപ്പിക്കുകയാണ് സർക്കാർ ചെയ്തത്. യുഡിഎഫ് അധികാരത്തിൽ നിന്ന് ഒഴിയുന്പോൾ 29 ബാറുകൾ ഉണ്ടായിരുന്ന സ്ഥാനത്ത് ഇന്നത് ആയിരത്തിലേറെയായി ഉയർന്നു. കേരളത്തെ മദ്യവത്കരിക്കാനാണ് സർക്കാർ ശ്രമിക്കുന്നത്. ഒരു വശത്ത് മദ്യവർജനം എന്നു പ്രഖ്യാപിക്കുന്പോഴും യഥേഷ്ടം ബ്രൂവറികൾ സ്ഥാപിക്കാനാണ് സർക്കാർ നീക്കം നടത്തുന്നത്. ഐടി മേഖലയിലും മറ്റും മദ്യം വിളന്പാൻ സൗകര്യം ഒരുക്കുന്നു. വിനോദസഞ്ചാരത്തിന്‍റെ പേരിൽ ഡ്രൈ ഡേകളിൽ പോലും സർക്കാർ ഇളവുവരുത്തി. മദ്യലഹരിയിൽ അക്രമവും മറ്റും നാൾക്കുനാൾ പെരുകുന്പോൾ മദ്യവർജനം നടപ്പാക്കുമെന്ന് പറയുന്നത് വിരോധാഭാസമാണ്. സർക്കാർ തെറ്റായ നടപടികളിൽ നിന്നും പിന്തിരിയണം. മദ്യം വർജിക്കുക എന്ന പ്രചരണം അഴിച്ചുവിട്ട് ജനങ്ങളോട് ഏറ്റവും വലിയ വഞ്ചനയാണ് സർക്കാർ കാണിക്കുന്നതെന്നും വി.എം. സുധീരൻ കുറ്റപ്പെടുത്തി. സർക്കാരിന്‍റെ എലപ്പുള്ളിയിലെ ബ്രൂവറിയോടുള്ള സമീപനം സുതാര്യമല്ല. ബ്രൂവറി നിർമിക്കാൻ വേണ്ടി സർക്കാർ നിരത്തുന്ന അവകാശവാദങ്ങളെല്ലാം പൊള്ളയാണ്. രൂക്ഷമായ ജലക്ഷാമം നേരിടുന്ന പ്രദേശമാണ് എലപ്പുള്ളി. ഭൂഗർഭജലത്തിന്‍റെ തോത് പോലും കുറയുന്നുവെന്നാണ് പഠനങ്ങൾ തെളിയിക്കുന്നത്. ഇവിടെ മദ്യനിർമാണ ശാല സ്ഥാപിക്കാനുള്ള നീക്കത്തിൽ നിന്നും സർക്കാർ പിന്തിരിയണമെന്നും വി.എം. സുധീരൻ ആവശ്യപ്പെട്ടു. കെപിസിസി വൈസ് പ്രസിഡന്‍റ് വി.ടി. ബൽറാം, എലപ്പുള്ളി പഞ്ചായത്ത് പ്രസിഡന്‍റ് കെ. രേവതി ബാബു, ഡിസിസി ജനറൽ സെക്രട്ടറി പത്മഗിരീശൻ, പാലക്കാട് ശാസ്ത്രവേദി ജില്ലാ പ്രസിഡന്‍റ് ഡോ. ലക്ഷ്മി ആർ. ചന്ദ്രൻ, സെക്രട്ടറി കെ.വി. പുണ്യകുമാരി, എലപ്പുള്ളി മണ്ഡലം പ്രസിഡന്‍റ് ഡി. രമേശൻ എന്നിവരും വി.എം. സുധീരനൊപ്പം ഉണ്ടായിരുന്നു. ശാസ്ത്രവേദി ജില്ലാ കമ്മിറ്റി എലപ്പുള്ളി മദ്യനിർമാണശാല സാമൂഹ്യ പാരിസ്ഥിതിക പ്രത്യാഘാത സാധ്യതാപഠനത്തെക്കുറിച്ച് സംഘടിപ്പിച്ച പരിപാടിയിൽ പങ്കെടുക്കാനെത്തിയതായിരുന്നു സുധീരൻ. അതേസമയം കെപിസിസി രാഷ്ട്രീയകാര്യസമിതി അംഗം ഡോ. ശൂരനാട് രാജശേഖരന്‍റെ നിര്യാണത്തെതുടർന്ന് പരിപാടി മാറ്റിവച്ചു.

ചുഴലിക്കാറ്റും അനുബന്ധ ദുരന്തങ്ങളും; മോക് എക്സർസൈസ് നടത്തി

പാലക്കാട്: ചുഴലിക്കാറ്റ്, മറ്റ് അനുബന്ധ പ്രകൃതി ദുരന്തങ്ങളെ നേരിടാനും നിലവിലുള്ള സൗകര്യങ്ങൾ വിലയിരുത്തുന്നതിനുമായി ജില്ലയിൽ മോക്ഡ്രിൽ നടന്നു. ദേശീയ ദുരന്ത നിവാരണ അഥോറിറ്റിയും സംസ്ഥാന ദുരന്ത നിവാരണ അഥോറിറ്റിയും ചേർന്നാണ് മോക്ഡ്രിൽ നടത്തിയത്. രാവിലെ എട്ടുമണിയോടെ സംസ്ഥാനത്ത് റെഡ് അലർട്ട് പ്രഖ്യാപിക്കുകയും ചുഴലിക്കാറ്റിനും ശക്തമായ മഴയ്ക്കും സാധ്യത ഉണ്ടെന്നുള്ള അറിയിപ്പ് ലഭിച്ചു. ചുഴലിക്കാറ്റ് രാവിലെ പത്തിനും 11 നും ഇടയിൽ നിലം തൊടുമെന്ന അറിയിപ്പിനെ തുടർന്ന് ജില്ലാ ദുരന്ത നിവാരണ അഥോറിറ്റി ചീഫ് എക്സിക്യൂട്ടീവ് ഓഫീസറായ എ ഡിഎം കെ. മണികണ്ഠന്‍റെ നേതൃത്വത്തിൽ രാവിലെ ഒന്പത് മുതൽ കളക്ടറേറ്റിൽ കണ്‍ട്രോൾ റൂം തുറന്നു. ജില്ലാ ദുരന്ത നിവാരണ അഥോറിറ്റി ചെയർപേഴ്സണായ ജില്ലാ കളക്ടർ ജി. പ്രിയങ്ക പ്രവർത്തനങ്ങൾ വിലയിരുത്തുകയും ആവശ്യമായ നിർദേശങ്ങൾ ടീമിന് നൽകുകയും ചെയ്തു. മോക്ഡ്രില്ല് വിജയകരമായി പൂർത്തിയാക്കാനായെന്നും ഇത്തവണ ഉണ്ടായ പോരായ്മകൾ ഉൾക്കൊണ്ട് പ്രവർത്തിക്കാൻ എല്ലാവരും ശ്രദ്ധിക്കണമെന്നും ജില്ലാ കളക്ടർ പറഞ്ഞു. ഗ്യാസ് പടർന്നതിനെ തുടർന്ന് പരിസരവാസികളെ പ്രദേശത്ത് നിന്ന് ഒഴിപ്പിക്കുകയും വാതകം ശ്വസിച്ചതിനെ തുടർന്ന് കുഴഞ്ഞുവീണവരെ ആശുപത്രികളിൽ എത്തിച്ച് ആവശ്യമായ വൈദ്യസഹായം നൽകുകയും ഒടിഞ്ഞുവീണ മരവും ടാങ്കർ ലോറിയും നീക്കം ചെയ്യുന്നതും മോക് ഡ്രില്ലിൽ ഉൾപ്പെടുത്തിയിരുന്നു. ഡെപ്യൂട്ടി ഇൻസിഡെന്‍റ് കമാൻഡറായ ജില്ലാ പ്ലാനിംഗ് ഓഫീസർ പി. ആർ. രത്നേഷ്, പോലീസ്, ഫയർ ഫോഴ്സ്, ഡി ഇ ഒസി, എൻഡിആർഎഫ്, ഹെൽത്ത്, ട്രാൻസ്പോർട്ട് എന്നീ വിവിധ വിഭാഗങ്ങളിലെ ഉദ്യോഗസ്ഥരും വോളന്‍റിയർമാരും മോക്ഡ്രില്ലിൽ പങ്കാളികളായി.

മസ്റ്ററിംഗ് പൂർത്തിയാക്കണമെന്നു എൽപിജി ഓപ്പണ്‍ ഫോറം

പാലക്കാട്: ജില്ലാതല എൽപിജി ഓപ്പണ്‍ഫോറം യോഗം കളക്ടറേറ്റ് കോണ്‍ഫറൻസ് ഹാളിൽ നടത്തി. അഡീഷണൽ ജില്ലാ മജിസ്ട്രേറ്റ് കെ. മണികണ്ഠൻ അധ്യക്ഷനായി. മസ്റ്ററിംഗിനായി അവശേഷിക്കുന്ന ഉപഭോക്താക്കൾ പെട്ടെന്ന് പൂർത്തിയാക്കണമെന്നു ഓയിൽ കന്പനി പ്രതിനിധികൾ ആവശ്യപ്പെട്ടു. ഉപഭോക്താക്കൾക്ക് എൽപിജി ലഭ്യതയുമായി ബന്ധപ്പെട്ട പരാതികൾ പരിഹരിക്കാനായി 8137067808 എന്ന നന്പറിൽ ബന്ധപ്പെടണമെന്നു എൽപിജി ഡിസ്ട്രിബ്യൂട്ടേഴ്സ് ഫെഡറേഷൻ അറിയിച്ചു. ജില്ലാ സപ്ലൈ ഓഫീസർ, താലൂക്ക് സപ്ലൈ ഓഫീസർമാർ, ഓയിൽ കന്പനി പ്രതിനിധികൾ, ഉപഭോക്തൃ സംഘടന പ്രതിനിധികൾ, എൽപിജി ഡീലർമാർ, പ്രൈവറ്റ് ബോട്ട്ലിംഗ് പ്ലാന്‍റ് ഉടമകൾ തുടങ്ങിയവർ യോഗത്തിൽ പങ്കെടുത്തു.

യുവക്ഷേത്ര കോളജിൽ കരിയർ ഗൈഡൻസ് സെമിനാർ

മുണ്ടൂർ: യുവക്ഷേത്ര കോളജും ഫ്രെയിം ഫൗണ്ടേഷനും ജനപ്രകാശവും ചേർന്നു സംഘടിപ്പിച്ച കരിയർ ഗൈഡൻസ് പ്രോഗ്രാം ഡയറക്ടർ റവ.ഡോ. മാത്യു ജോർജ് വാഴയിൽ ഉദ്ഘാടനം ചെയ്തു. ജനപ്രകാശം ടൈംസ് മാർക്കറ്റിംഗ് എക്സിക്യൂട്ടീവ് ഫാ. ജയ്സൺ കൊള്ളന്നൂർ അധ്യക്ഷനായിരുന്നു. വൈസ് പ്രിൻസിപ്പൽ റവ.ഡോ. ജോസഫ് ഓലിക്കൽകൂനൽ ആശംസകളർപ്പിച്ചു. കരിയർ എക്സ്പർട്ടും തൃശൂർ സെന്‍റ് തോമസ് കോളേജ് ഫിസിക്സ് വിഭാഗം അസിസ്റ്റന്‍റ് പ്രഫസർ ഡോ. ഡെയ്സണ്‌ പാണേങ്ങാടൻ കരിയർ ഗൈഡൻസ് സെമിനാറിൽ ക്ലാസെടുത്തു. ജില്ലയിലെ വിവിധ സ്കൂളുകളിൽനിന്നായി ഇരുനൂറിലധികം വിദ്യാർഥികൾ പങ്കെടുത്ത പരിപാടിയിൽ രൂപതയുടെ വിവിധ വിദ്യാഭ്യാസസ്ഥാപന പ്രതിനിധികൾ അവരുടെ സ്ഥാപനത്തെയും കോഴ്സുകളും പരിചയപ്പെടുത്തി. കോ-ഓർഡിനേറ്റർ റവ.ഡോ. എബിൻ കൊളമ്പിൽ സ്വാഗതവും വിദ്യാർഥിനി ഐറിൻ ജിബോയ് നന്ദിയും പറഞ്ഞു.

കുടിശിക ഉടൻ നൽകണമെന്നു കെഎസ്ഇബി പെൻഷനേഴ്സ് അസോസിയേഷൻ

പാലക്കാട്: കെഎസ്ഇബി പെൻഷനേഴ്സ് അസോസിയേഷൻ ജില്ലാതല പ്രവർത്തക കൺവൻഷൻ വിക്‍ടോറിയ കോളജിനു സമീപം ജില്ലാ പെൻഷൻ ഭവനിൽ ചേർന്നു. അസോസിയേഷൻ സംസ്ഥാന വൈസ് പ്രസിഡന്‍റ് എം.ടി. വർഗീസ് ഉദ്ഘാടനം ചെയ്തു. സംസ്ഥാന വൈസ് പ്രസിഡന്‍റ് പി.എസ്. ഉദയകുമാർ കേന്ദ്രകമ്മിറ്റി റിപ്പോർട്ട് അവതരിപ്പിച്ചു ജില്ലാ പ്രസിഡന്‍റ് പ്രസാദ് മാത്യുയോഗത്തിൽ അധ്യക്ഷത വഹിച്ചു. ജില്ലാ സെക്രട്ടറി കെ. ഹരി, സംസ്ഥാന സെക്രട്ടറി ടി.ആർ. പ്രേംകുമാർ, ജില്ലാ വനിതാ കൺവീനർ കെ.എസ്. ചിത്ര, പാലക്കാട് ഡിവിഷൻ സെക്രട്ടറി കെ. ശ്രീകുമാർ എന്നിവർ പ്രസംഗിച്ചു. മുടങ്ങിയ പെൻഷൻ ഡിഎ കുടിശിക വിതരണം ചെയ്യണമെന്നും പെൻഷൻഫണ്ടിൽ കെഎസ്ഇബിയുടെ തുക ഉടൻ നിക്ഷേപിക്കണമെന്നും യോഗം ആവശ്യപ്പെട്ടു. പവർ സെക്രട്ടറിയും കെഎസ്ഇബി മാനേജ്മെന്‍റും പുലർത്തിവരുന്ന നിസംഗതയ്ക്കു പരിഹാരം കാണണമെന്നും ആവശ്യപ്പെട്ടു. പാലക്കാട്, ചിറ്റൂർ, മണ്ണാർക്കാട്, പട്ടാന്പി, ആലത്തൂർ, ഷൊർണൂർ ഡിവിഷനിലെ പ്രവർത്തകർ പങ്കെടുത്തു.

പ്രകൃതികൃഷിയിലൂടെ കാലാവസ്ഥാവ്യതിയാനത്തെ നിയന്ത്രിക്കാൻ കഴിയണം: ഷബിൽ കൃഷ്ണ

എലപ്പുള്ളി: ഗാന്ധിയൻ രീതിയിലുള്ള പ്രകൃതികൃഷിയിലൂടെ കാലാവസ്ഥാവ്യതിയാനത്തെ നിയന്ത്രിക്കാൻ കഴിയണമെന്നും പ്രാദേശികവും അഹിംസാത്മകവുമായ ഇടപെടലുകൾക്കു കർഷകരെയും കർഷകത്തൊഴിലാളികളെയും സജ്ജരാക്കുന്നതിനുള്ള പദ്ധതികൾക്കു രൂപംനൽകാൻ പഞ്ചായത്തുകൾ മുന്നോട്ടുവരണമെന്നും പരിസ്ഥിതിഗവേഷകനും എഴുത്തുകാരനുമായ ഷബിൽ കൃഷ്ണ. രാമശേരി ഗാന്ധി ആശ്രമത്തിൽ സംഘടിപ്പിച്ച പഠനക്ലാസിൽ "പരിസ്ഥിതിയും ആരോഗ്യവും ഗാന്ധിയുടെ രീതിശാസ്ത്രം " എന്ന വിഷയം അവതരിപ്പിക്കുകയായിരുന്നു അദ്ദേഹം. ഗാന്ധിആശ്രമം ട്രസ്റ്റി പുതുശേരി ശ്രീനിവാസൻ മോഡറേറ്ററായ പഠനക്ലാസിൽ കർഷകഅവാർഡ് ജേതാവ് പി. ഭുവനേശ്വരി, വാവോലിതോട് ഫാർമേഴ്സ് ക്ലബ് പ്രസിഡന്‍റ് വി. പ്രദീപ്, പരിസ്ഥിതി പ്രവർത്തകൻ ഉണ്ണികൃഷ്ണൻ മായന്നൂർ, മഹേഷ് അകത്തേതറ, എൻ. ദേവിലക്ഷ്മി, സർവോദയകേന്ദ്രം നിർവാഹക സമിതി അംഗം അനിത നാവുക്കോട്, എം.എം. കൃഷ്ണൻകുട്ടി, രാധാകൃഷ്ണൻ രാമച്ചൻകാട്, രാജകുമാരൻ എരട്ടക്കുളം തുടങ്ങിയവർ ചർച്ചയിൽ പങ്കെടുത്തു.

കിഴക്കേത്തല റോഡിലൂടെ പോകാൻ മൂക്കുപൊത്താതെ വയ്യെന്നു നാട്ടുകാർ

കൊടുവായൂർ: കിഴക്കേത്തല റോഡരികിൽ വീടുകൾക്കുസമീപം മാലിന്യംതള്ളിയത് നീക്കംചെയ്യണമെന്നു നാട്ടുകാർ‌. കൊടുവായൂർ പ്രധാന പാതയ്ക്കരുകിലാണ് മാലിന്യം കുമിഞ്ഞുകിടക്കുന്നത്. ജില്ലയിൽ പഞ്ചായത്തുകൾതോറും മാലിന്യമുക്തമെന്ന് മത്സരിച്ചു പ്രഖ്യാപനം നടത്തുമ്പോഴും കൊടുവായൂരിൽ ഇതൊന്നും അറിഞ്ഞമട്ടില്ല. മഴ ചാറിയിൽ മാലിന്യത്തിനു സമീപം കൊതുകുശല്യം കൂടുന്നതു പകർച്ചവ്യാധികൾക്കു ഇടയാക്കുമെന്നു പരിസരവാസികൾ ആരോപിച്ചു. താലൂക്കിലെ പ്രധാന വാണിജ്യകേന്ദ്രമായ കൊടുവായൂരിലെ മിക്കയിടത്തും ഇതാണ് അവസ്ഥ.

മലന്പുഴ ഉദ്യാനത്തിൽ "ശങ്ക' തീർക്കാൻ പെടാപ്പാട്

മലന്പുഴ: ഉദ്യാനത്തിലെത്തുന്ന വിനോദസഞ്ചാരികൾക്കു ആ ശങ്ക തീർക്കാൻ പെടാപ്പാട്. ലക്ഷങ്ങൾ മുടക്കി ഉദ്യാനത്തിൽ പണിതീർത്ത ഇ ടോയ്‌ലറ്റുകൾ തുരുന്പുപിടിച്ചു നശിക്കുന്നു. വർഷങ്ങളായി പ്രവർത്തനരഹിതമായി കിടക്കുന്ന ടോയ്‌ലറ്റുകൾ ഉദ്ഘാടനശേഷം മൂന്നുമാസംപോലും തികച്ചു പ്രവർത്തിച്ചില്ല. ഉദ്യാനത്തിലെ നൂൽപ്പാലം കടന്നാൽ ഒരു കംഫർട്ട് സ്റ്റേഷനുണ്ടെങ്കിലും തിരക്കുകുറഞ്ഞ ദിവസങ്ങളിലും സ്റ്റാഫ് ഇല്ലാത്ത ദിവസങ്ങളിലും പ്രവർത്തിക്കാറില്ല. വിനോദസഞ്ചാരികൾക്ക് അതിനാൽ പ്രവേശനകവാടം വരെ ശങ്കനിവൃത്തിക്കായി എത്തേണ്ട ഗതികേടാണ്. ഇ ടോയ്‌ലറ്റ് പ്രദേശത്തു മറ്റൊരു കംഫർട്ട് സ്റ്റേഷൻ തുടങ്ങണമെന്നാണ് വിനോദസഞ്ചാരികളുടെ ആവശ്യം.

ഗ്രൈന്‍ററിൽ നിന്ന് ഷോക്കേറ്റ് വീട്ടമ്മ മരിച്ചു

പാലക്കാട്: ഗ്രൈൻഡറിൽനിന്ന് ഷോക്കേറ്റ് മങ്കര മഞ്ഞക്കരയിൽ കല്ലിങ്കൽ കെ.ജി. കൃഷ്ണദാസിന്‍റെ ഭാര്യ ശുഭാബായി (50) മരിച്ചു. വ്യാഴാഴ്ച രാത്രി ഒന്പതിനായിരുന്നു സംഭവം. അപകടസമയത്ത് ശുഭ മാത്രമായിരുന്നു വീട്ടിലുണ്ടായിരുന്നത്. പുറത്തുപോയ കൃഷ്ണദാസ് തിരികെ എത്തിയപ്പോൾ ശുഭാബായി ബോധമില്ലാതെ കിടക്കുന്നതാണ് കണ്ടത്. ഉടൻതന്നെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.

പ്ലാസ്റ്റിക്മാലിന്യങ്ങൾ മണ്ണിട്ടുമൂടുന്നതായി ആരോപിച്ച് രണ്ടാംദിനവും നഗരസഭയുടെ പ്രവൃത്തികൾ തടഞ്ഞു

ഒറ്റപ്പാലം: നഗരസഭയുടെ ഖരമാലിന്യ സംസ്കരണ പ്ലാന്‍റിൽ കുന്നുകൂടിക്കിടക്കുന്ന അജൈവമാലിന്യം നീക്കാനുള്ള പദ്ധതിയെ മറയാക്കി ഇവ മണ്ണിട്ടുമൂടുന്നുവെന്നാരോപിച്ച് രണ്ടാംദിവസവും ബിജെപി പ്രവർത്തകർ പ്രവൃത്തികൾ തടഞ്ഞു. പ്രതിഷേധക്കാർ പുറത്തുനിന്ന് മണ്ണ് കയറ്റിവന്ന രണ്ട് ലോറികൾ തടഞ്ഞിട്ട് റവന്യൂവകുപ്പിന് കൈമാറി. നഗരസഭയുടെ നിർദേശപ്രകാരം രേഖകളില്ലാതെ മണ്ണ് കയറ്റിവന്ന വാഹനങ്ങളാണ് തടഞ്ഞിട്ടത്. ഒറ്റപ്പാലം എഎസ്പി അശോക് കൃഷ്ണ, മുൻസിപ്പൽ എൻജിനീയർ കെ. ജയപ്രകാശ്, ഹെൽത്ത് ഇൻസ്പെക്ടർ സി. വിസ്മൽ, വില്ലേജ് ഓഫീസർ കെ. സാജൻ എന്നിവർ സ്ഥലത്തെത്തി സമരക്കാരുമായി ചർച്ച നടത്തിയെങ്കിലും ഫലമുണ്ടായില്ല. രേഖകൾ പ്രകാരമാണ് മണ്ണ് കടത്തിയതെന്ന് നഗരസഭാ ഉദ്യോഗസ്ഥൻമാർ വ്യക്തമാക്കിയെങ്കിലും രേഖകൾ കാണണമെന്ന നിലപാടിൽ സമരക്കാർ ഉറച്ചുനിന്നു. എന്നാൽ ബന്ധപ്പെട്ടവരുടെ പക്കൽ രേഖകൾ ഉണ്ടായിരുന്നില്ല. മണിക്കുറുകൾ നീണ്ടുനിന്ന വാദപ്രതിവാദങ്ങൾക്കൊടുവിലാണ് മണ്ണ് കയറ്റിവന്ന വാഹനങ്ങൾ റവന്യൂ വിഭാഗം കസ്റ്റഡിലെടുത്തത്. ഗ്രൗണ്ടിൽ നടന്നുവരുന്ന മുഴുവൻ പ്രവർത്തികളും നിർത്തിവച്ചതായി നഗരസഭ ഉദ്യോഗസ്ഥർ വ്യക്തമാക്കി. രേഖകൾ ഇല്ലാതെ കോടികൾ മുടക്കിയുള്ള പദ്ധതിയെ ചൊല്ലിയാണ് ബിജെപി അഴിമതി ആരോപണമുയർത്തി സമരമാരംഭിച്ചിരിക്കുന്നത്. 1.68 കോടി രൂപ ചെലവിൽ വിജയവാഡയിൽ നിന്നുള്ള കമ്പനിയാണ് ഇതിന്‍റെ കരാർ ഏറ്റെടുത്തിട്ടുള്ളതെന്നും ഇതിനുള്ള നടപടികളാണു പുരോഗമിക്കുന്നതെന്നും നേരത്തെ മാലിന്യം നീക്കിയതിനു കൃത്യം രേഖയുണ്ടെന്നും നഗരസഭാ അധികൃതർ പറയുന്നു. മറ്റ് ആരോപണങ്ങൾ അടിസ്ഥാനരഹിതമാണെന്നും നഗരസഭാ ഉപാധ്യക്ഷൻ കെ.രാജേഷ് പറഞ്ഞു. ബിജെപി മണ്ഡലം പ്രസിഡന്‍റ് സി. സുമേഷ്, ജനറൽ സെക്രട്ടറി എ. സരൂപ്, കെ. പ്രമോദ്കുമാർ, സുരേഷ് കോണിക്കൽ, കെ.മധു എന്നിവരുടെ നേതൃത്വത്തിലാണ് സമരം നടന്നത്.

പാതയോരങ്ങളിൽ ചക്കക്കച്ചവടം തകൃതി

ചിറ്റൂർ: വിഷുവരവറിയിച്ച് താലൂക്കിൽ വഴിയോരങ്ങളിലെല്ലാം ചക്കവിപണി സജീവം. മുൻകാലങ്ങളിൽ ഒരു ചക്കക്ക് മൊത്തവിലയുണ്ടായിരുന്നത് ഇപ്പോൾ കിലോക്ക് 30 രൂപ എന്ന തോതിലാണ് വില്പന. മുന്പ് ലഭിച്ചിരുന്ന വിലയുടെ മൂന്നിരട്ടി വില ഇപ്പോൾ ലഭിക്കുന്നുണ്ട്. കോയമ്പത്തൂർ, പൊള്ളാച്ചി അന്തർസംസ്ഥാന പാതകളിലാണ് റോഡരികിൽ ചക്കവില്പന. തമിഴ്നാട്ടിലേക്കുള്ള യാത്രക്കാൻ വാഹനം നിർത്തി രണ്ടുംമൂന്നും വീതമാണ് കൊണ്ടുപോകുന്നത്. കോയമ്പത്തൂരിൽ വിൽക്കപ്പെടുന്നവയെല്ലാം പാലക്കാട് നിന്നും കൊണ്ടുപോയവയാണ്. പാലക്കാടൻ ചക്കയ്ക്ക് രുചി കൂടുതലാണെന്നാണ് തമിഴ്നാട്ടിൽ നിന്നും എത്തുന്നവർ പറയുന്നത്. താലൂക്കിൽ വീടുകളിലും വനാതിർത്തികളിലും കൂടിയ തോതിൽ പ്ലാവ് മരങ്ങളുണ്ട്. കാട്ടാനഭയത്തിൽ വനാതിർത്തിയിൽ പ്ലാവ് ഇപ്പോൾ വെച്ചുപിടിപ്പിക്കുന്നില്ല.

ഉടമസ്ഥാവകാശം മാറിയ കെട്ടിടത്തിന് മുൻബാധ്യതയുണ്ടെങ്കിലും നികുതി സ്വീകരിക്കണമെന്നു മനുഷ്യാവകാശ കമ്മീഷൻ

പാലക്കാട്: മുൻ ഉടമയുടെ നികുതി കുടിശികയുടെ പേരിൽ ഇപ്പോഴത്തെ ഉടമയിൽനിന്നും കെട്ടിടനികുതി സ്വീകരിക്കാത്തത് നിയമവിരുദ്ധമാണെന്ന് മനുഷ്യാവകാശ കമ്മീഷൻ ചെയർപേഴ്സൻ ജസ്റ്റിസ് അലക്സാണ്ടർ തോമസ്. 2018 ൽ ഉടമസ്ഥാവകാശം മാറ്റിയ കെട്ടിടത്തിന് പുതിയ ഉടമയിൽ നിന്ന് 5 കൊല്ലം നികുതി സ്വീകരിച്ചശേഷമാണ് മുൻ ഉടമ നികുതി ഒടുക്കാനുണ്ടെന്ന് പറഞ്ഞ് 2023 മുതൽ പുതിയ ഉടമയിൽ നിന്നും കെട്ടിടനികുതി സ്വീകരിക്കാതിരിക്കുന്നത്. 2023-24 മുതലുള്ള നികുതി സ്വീകരിക്കണമെന്ന് ജസ്റ്റിസ് അലക്സാണ്ടർ തോമസ് ഉത്തരവിട്ടു. പാലക്കാട് നഗരസഭാ സെക്രട്ടറിക്കാണ് കമ്മീഷൻ നിർദേശം നൽകിയത്. പെരുവെന്പ് സ്വദേശി സി. മോഹനൻ സമർപ്പിച്ച പരാതിയിലാണ് നടപടി. 2018 ലാണ് പരാതിക്കാരൻ കെട്ടിടം വാങ്ങിയത്. 2018 ജൂണ്‍ 6 ന് കെട്ടിടത്തിന്‍റെ ഉടമസ്ഥാവകാശം പാലക്കാട് നഗരസഭ മാറ്റി നൽകി. അന്നുമുതൽ 2022 വരെയുള്ള കെട്ടിട നികുതി പുതിയ ഉടമ ഒടുക്കുകയും ചെയ്തു. 2023 ൽ നികുതി ഒടുക്കാൻ ചെന്നപ്പോൾ കെട്ടിടത്തിന്‍റെ മുൻ ഉടമ 2013 മുതൽ 2017 വരെ നികുതി ഒടുക്കിയിട്ടില്ലെന്നും അത് ഒടുക്കിയാൽ മാത്രമേ 2023 മുതലുള്ള നികുതി സ്വീകരിക്കാൻ കഴിയുകയുള്ളൂവെന്നും നഗരസഭ വ്യക്തമാക്കിയതായി പരാതിയിൽ പറഞ്ഞു. 3 വർഷത്തെ കാലാവധി കഴിഞ്ഞശേഷം ജപ്തിനടപടികൾ സ്വീകരിക്കാൻ പാടില്ലെന്ന് നിയമത്തിൽ വ്യവസ്ഥ ചെയ്തിട്ടുണ്ടെന്ന് കമ്മീഷൻ ഉത്തരവിൽ പറഞ്ഞു. ഇതുപ്രകാരം പരാതിക്കാരന്‍റെ ബാധ്യത ഒഴിവാക്കി 2023-24 മുതലുള്ള നികുതി സ്വീകരിക്കണമെന്ന് ജസ്റ്റിസ് അലക്സാണ്ടർ തോമസ് നിർദേശം നൽകി.

ഭൂരിഭാഗം ആദിവാസികൾക്കും അർഹതപ്പെട്ട ഭൂമി നൽകി: മന്ത്രി ആർ. ബിന്ദു

പാലക്കാട്: സർക്കാരിന്‍റെ ക്രിയാത്മക ഇടപെടലുകളിലൂടെ 80 ശതമാനം ആദിവാസികൾക്കും അർഹതപ്പെട്ട ഭൂമി നൽകാൻ സാധിച്ചെന്ന് മന്ത്രി ആർ. ബിന്ദു. അഡീഷണൽ സ്കിൽ അക്വിസിഷൻ പ്രോഗ്രാം (അസാപ്) കേരളയും പാലക്കാട് ജില്ലാ ഭരണകൂടവും റഫ്ബില ഇന്‍റർനാഷണൽ കന്പനിയുമായി ചേർന്ന് അട്ടപ്പാടിയിൽ നടപ്പിലാക്കിയ ‘സൂപ്പർ 100’ പദ്ധതിയുടെ സമാപനം ഉദ്ഘാടനം ചെയ്ത് പ്രസംഗിക്കുകയായിരുന്നു മന്ത്രി. ശേഷിക്കുന്നവർക്ക് സർക്കാരിന്‍റെ കാലാവധി പൂർത്തിയാക്കുന്നതിനു മുന്പ് ഭൂമി നൽകുമെന്നും മന്ത്രി പറഞ്ഞു. ആദിവാസി വിദ്യാർഥികൾക്ക് ഉന്നത വിദ്യാഭ്യാസ മേഖലയിലെ അവസരങ്ങൾ മനസിലാക്കാൻ സഹായിക്കുന്ന പരിശീലനമാണ് സൂപ്പർ 100. ആദിവാസി സമൂഹത്തിന്‍റെ സന്പത്തും പാരന്പര്യഅറിവുകളും പലരും തട്ടിയെടുക്കാൻ ശ്രമിക്കുന്പോൾ തിരിച്ചറിവോടെ സമൂഹത്തിന്‍റെ മുന്നിൽ നടക്കാൻ വിദ്യാർഥികൾക്കാവണമെന്നും മന്ത്രി പറഞ്ഞു. അട്ടപ്പാടി മേഖലയിലുള്ള 108 പട്ടികവർഗ വിദ്യാർഥികൾക്ക് വിവിധ നൈപുണ്യ വികസന പരിപാടികൾ ഈ അധ്യയന വർഷത്തിൽ നടപ്പിലാക്കലാണ് പദ്ധതിയുടെ ലക്ഷ്യം. പുതുശേരി ഇ.കെ. നായനാർ മെമ്മോറിയൽ കണ്‍വൻഷൻ സെന്‍ററിൽ നടന്ന ചടങ്ങിൽ എ. പ്രഭാകരൻ എംഎൽഎ അധ്യക്ഷനായി. റബ്ഫില ഇന്‍റർനാഷണൽ മാനേജിംഗ് ഡയറക്ടർ ജി. കൃഷ്ണകുമാർ മുഖ്യാതിഥിയായി. ജില്ലാ കളക്ടർ ജി. പ്രിയങ്ക, ജില്ലാ പഞ്ചായത്ത് അംഗം പത്മിനി ടീച്ചർ, അസാപ് കേരള ഹെഡ് വി.വി. വിജിൽ കുമാർ, അഗളി ഹയർസെക്കൻഡറി സ്കൂൾ പ്രധാന അധ്യാപിക ആർ. ഷമിമോൾ, എംആർഎസ് മുക്കാലി മാനേജർ സി.ബി. രാധാകൃഷ്ണൻ എന്നിവർ പ്രസംഗിച്ചു.

കേന്ദ്ര വനംനിയമം ഭേദഗതി ചെയ്യണം: കെ. മുരളീധരൻ

നെന്മാറ: മലയോര കർഷകരുടെയും ജനങ്ങളുടെയും ജീവനും സ്വത്തിനും പരിരക്ഷ ലഭിക്കുംവിധം കേന്ദ്ര വനനിയമം ഭേദഗതി ചെയ്യണമെന്ന് മുൻ കെപിസിസി പ്രസിഡന്‍റ് കെ. മുരളീധരൻ ആവശ്യപ്പെട്ടു. ജില്ലാ യുഡിഎഫ് കമ്മിറ്റി നെന്മാറ ഡിഎഫ്ഒ ഓഫീസിലേക്ക് നടത്തിയ പ്രതിഷേധമാർച്ച് ഉദ്ഘാടനംചെയ്ത് പ്രസംഗിക്കുകയായിരുന്നു മുരളീധരൻ. നിലവിലുള്ള നിയമവ്യവസ്ഥകളിലൂടെ കർഷകർക്കും ജനങ്ങൾക്കും സംരക്ഷണം ലഭിക്കുന്നില്ലെന്നു മാത്രമല്ല അവരെ ശത്രുക്കളായി കണ്ട് ദ്രോഹിക്കുന്ന അവസ്ഥയാണ് നിലവിലുള്ളതെന്ന് അദ്ദേഹം ആരോപിച്ചു. മലയോരമേഖലയിലുള്ള കർഷകരുടെ അരക്ഷിതാവസ്ഥയ്ക്ക് പരിഹാരമുണ്ടാക്കാൻ അവരെ വിശ്വാസത്തിലെടുത്ത് സംരക്ഷിക്കുവാനുള്ള നിയമം ഉണ്ടാവണമെന്ന് മുരളീധരൻ പറഞ്ഞു. കൃഷിയിടങ്ങളിൽ ഇറങ്ങുന്ന വന്യമൃഗങ്ങളെ തുരത്താൻ ശാസ്ത്രീയമായ സംവിധാനങ്ങൾ ഒരുക്കണം. വന്യമൃഗങ്ങൾ അഴിഞ്ഞാടി മനുഷ്യ ജീവനുകൾ കവരുന്പോൾ സംസ്ഥാന സർക്കാരും വനംവകുപ്പും നിസംഗത പാലിക്കുന്നത് പാവപ്പെട്ട ജനങ്ങളെ കുരുതി കൊടുക്കുന്നതിനു തുല്യമാണെന്ന് അദ്ദേഹം കുറ്റപ്പെടുത്തി. ജില്ലാ ചെയർമാൻ മരക്കാർ മാരായമംഗലം അധ്യക്ഷത വഹിച്ചു. ജില്ലാ കണ്‍വീനർ പി. ബാലഗോപാൽ, മുൻ എംഎൽഎമാരായ കളത്തിൽ അബ്ദുള്ള, കെ.എ. ചന്ദ്രൻ, യുഡിഎഫ് നേതാക്കളായ സി.എൻ. വിജയ കൃഷ്ണൻ, കെ.എ. തുളസി, സി. ചന്ദ്രൻ, എൻ.വി. സാബു, വി. അനിൽകുമാർ, പി. കലാധരൻ, ടി.എം. ചന്ദ്രൻ, സുരേഷ് വേലായുധൻ, വേണു കൊങ്ങോട്ട്, മോഹൻ കാട്ടാശേരി, കെ. ശിവാനന്ദൻ, എം.എ. സുൽത്താൻ, കെ.ആർ. പത്മകുമാർ, മുഹമ്മദ് ഇക്ബാൽ, കെ.ജി. എൽദോ, പി. പത്മഗിരീഷ്, സി.സി. സുനിൽ, വിനോദ് ചക്രയി, കെ. ഗുരുവായൂരപ്പൻ എന്നിവർ പ്രസംഗിച്ചു. നെന്മാറ ബസ് സ്റ്റാൻഡ് പരിസരത്തു നിന്നാരംഭിച്ച പ്രതിഷേധമാർച്ചിൽ രണ്ടായിരത്തോളം പ്രവർത്തകർ പങ്കെടുത്തു.

എല്ലാ വിഭാഗം തൊഴിലാളികൾക്കും മിനിമംകൂലി ഉറപ്പുവരുത്തണം: ഐഎൻടിയുസി

പാലക്കാട്‌: പദ്ധതി തൊഴിലാളികൾ ഉൾപ്പെടെ എല്ലാ വിഭാഗം തൊഴിലാളികൾക്കും മിനിമംകൂലി ഉറപ്പു വരുത്താൻ കേന്ദ്ര-സംസ്ഥാന സർക്കാരുകൾ തയാറാവണമെന്നും കുറഞ്ഞ വേതനം അടിച്ചേൽപ്പിക്കുന്നതു വഞ്ചനയാണെന്നും ഐഎൻടിയുസി ജില്ലാ നേതൃസമ്മേളനം. ജില്ലാ പ്രസിഡന്‍റ് എസ്.കെ. അനന്തകൃഷ്ണൻ അധ്യക്ഷത വഹിച്ച യോഗം കെപിസിസി ജനറൽ സെക്രട്ടറി സി. ചന്ദ്രൻ ഉദ്ഘാടനം ചെയ്തു. നിർവാഹക സമിതിയംഗം സി.വി. ബാലചന്ദ്രൻ മുഖ്യപ്രഭാഷണം നടത്തി. സംസ്ഥാന വൈസ് പ്രസിഡന്‍റ് കെ. അപ്പു, ജില്ലാ ഭാരവാഹികളായ എൻ. മുരളീധരൻ, ആർ. നാരായണൻ, എം.കെ. മുകേഷ് കുമാർ, എം. നടരാജൻ, എച്ച്. മുബാറക്, ആശാ വർക്കേഴ്സ് ജില്ലാ പ്രസിഡന്‍റ് സമീന, മാലതി കൃഷ്ണൻ, റീജണൽ പ്രസിഡന്‍റുമാർ, സംഘടനാ പ്രതിനിധികൾ പ്രസംഗിച്ചു.

"നമ്മ കോവൈ' ആപ് പുറത്തിറക്കി കോർപറേഷൻ

കോയന്പത്തൂർ: പൊതുജനങ്ങൾക്കു നഗരഭരണകൂടവുമായി ബന്ധപ്പെടാൻ "നമ്മ കോവൈ' മൊബൈൽ അപ്ലിക്കേഷൻ ആപ് പുറത്തിറക്കി കോയന്പത്തൂർ കോർപറേഷൻ. നഗരവാസികൾക്ക് അവരുടെ വാർഡുകളിൽ നേരിടുന്ന പരാതികളും പ്രശ്നങ്ങളും ഫോട്ടോകൾ സഹിതം സമർപ്പിക്കാൻ ആപ് ഉപയോഗിക്കാം. കോർപറേഷൻ കമ്മീഷണർ, മേയർ എന്നിവരുൾപ്പെടെ കോർപറേഷനിലെ എല്ലാ ഉന്നത ഉദ്യോഗസ്ഥരുടെയും നേരിട്ടു ബന്ധപ്പെടാനുളള സംവിധാനവും ഒരുക്കിയിട്ടുണ്ട്. മൊബൈൽ ആപ് ഉപയോഗിച്ചു സമീപത്തുള്ള വൈദ്യുത ഓഫീസ്, പോസ്റ്റ് ഓഫീസ്, പോലീസ് സ്റ്റേഷനുകൾ, അഞ്ചു സോണുകളിലെയും കോർപറേഷൻ ഓഫീസുകൾ, പൊതു ടോയ്‌ലറ്റുകൾ എന്നിവയുടെ സ്ഥാനം ആളുകൾക്ക് എളുപ്പത്തിൽ കണ്ടെത്താൻ കഴിയും. വിവിധ ക്ഷേമ പദ്ധതികളെക്കുറിച്ചും കോർപറേഷനിൽ നിന്നുള്ള ഏറ്റവും പുതിയ അറിയിപ്പുകളും ആപിലൂടെ ലഭ്യമാക്കും. കഴിഞ്ഞ ദിവസം മന്ത്രി വി. സെന്തിൽ ബാലാജി, ജില്ലാ കളക്ടർ പവൻകുമാർ, നഗരഭരണ മേധാവികൾ എന്നിവർചേർന്ന് ആപ് സംവിധാനം ഉദ്ഘാടനം ചെയ്തു. സേവനം ഉടൻതന്നെ ലഭ്യമാകുമെന്നു കോർപറേഷൻ അധികൃതർ അറിയിച്ചു.

അഗളി പുതുജീവനിൽ തയ്യൽപരിശീലനം അഞ്ചാംവർഷത്തിലേക്ക്

അഗളി: പുതുജീവൻ അഗതി മന്ദിരം നടപ്പാക്കിവരുന്ന തയ്യൽപരിശീലനം അഞ്ചാം വർഷത്തിലേക്ക്. രണ്ടുമാസം നീണ്ടുനിൽക്കുന്ന ക്ലാസുകളിലൂടെ അന്പതിലധികംപേരെ ഇതിനകം തയ്യൽജോലികൾക്ക് പ്രാപ്തരാക്കാൻ പുതുജീവനു കഴിഞ്ഞു. പുതുതായി ആരംഭിച്ച ബാച്ചിൽ 35 കുട്ടികളും മുതിർന്നവരും ചേർന്നിട്ടുണ്ട്. അഗളി ഗ്രാമപഞ്ചായത്ത് വൈസ് പ്രസിഡന്‍റ് ശ്രീലക്ഷ്മി ശ്രീകുമാർ പുതിയ ബാച്ചിന്‍റെ ഉദ്ഘാടനം നിർവഹിച്ചു. ഗ്രാമപഞ്ചായത്ത് അംഗം സുനിൽ ജി. പുത്തൂർ പ്രസംഗിച്ചു. പരിശീലനം നേടിയ കുട്ടികൾ നിർമിച്ച തുണിത്തരങ്ങളും പേപ്പർ പൂക്കളും കുഷ്യൻസുകളും പ്രദർശിപ്പിച്ചു. പുതുജീവൻ ഡയറക്ടർ ഫാ. ബിബിൻ ചെറുകുന്നേൽ സ്വാഗതവും തയ്യൽയൂണിറ്റ് ഇൻചാർജ് കൊച്ചുറാണി ഷാജി നന്ദിയും പറഞ്ഞു.

ലഹരിവിരുദ്ധസന്ദേശവുമായി മിനി മാരത്തണ്‍

പാലക്കാട്: ജില്ലാ സ്പോർട്സ് കൗണ്‍സിൽ, ജില്ലാ ഭരണകൂടം, ജില്ലാ പഞ്ചായത്ത് എന്നിവയുടെ സംയുക്താഭിമുഖ്യത്തിൽ ലഹരിവിരുദ്ധ കാന്പയിനിന്‍റെ ഭാഗമായി മിനി മാരത്തോണ്‍ നടത്തി. ഗവ. മോയൻസ് സ്കൂൾ മുതൽ അഞ്ചുവിളക്കു വരെയാണ് മാരത്തോണ്‍ നടത്തിയത്. സ്പോർട്സാണ് ലഹരി എന്ന സന്ദേശത്തിൽ സ്പോർട്സ് കൗണ്‍സിൽ പ്രസിഡന്‍റ് അഡ്വ.കെ. പ്രേംകുമാർ എംഎൽഎ മാരത്തോണ്‍ ഫ്ളാഗ് ഓഫ് ചെയ്തു. ജില്ലാ പഞ്ചായത്ത് പ്രസിഡന്‍റ് കെ. ബിനുമോൾ അധ്യക്ഷത വഹിച്ച പരിപാടിയിൽ ജില്ലാ കളക്ടർ ജി. പ്രിയങ്ക ലഹരിവിരുദ്ധസന്ദേശം നൽകി. സ്പോർട്സ് കൗണ്‍സിൽ സെക്രട്ടറി വി.ആർ. അർജുൻ ലഹരിവിരുദ്ധ പ്രതിജ്ഞ ചൊല്ലിക്കൊടുത്തു. സ്പോർട്സ് കൗണ്‍സിൽ വൈസ് പ്രസിഡന്‍റ് സി. ഹരിദാസ്, ഡെപ്യൂട്ടി കമ്മീഷണർ ഓഫ് എക്സൈസ് വൈ. ഷിബു, അഡീഷണൽ എസ്പി. സി.സി. ഹരിദാസൻ, സോഷ്യൽ ജസ്റ്റിസ് ജില്ലാ ഓഫീസർ വി. അശ്വതി, സംസ്ഥാന സ്പോർട്സ് കൗണ്‍സിൽ നോമിനി എം. രാമചന്ദ്രൻ, ജില്ലാ കായിക അസോയിയേഷൻ ഭാരവാഹികൾ, കായിക താരങ്ങൾ, വിദ്യാർഥികൾ, എൻഎസ്എസ്, സ്കൗട്ട് ആൻഡ് ഗൈഡ് കേഡറ്റ്സുൾപ്പടെ ആയിരത്തോളം പേർ മിനിമാരത്തോണിന്‍റെ ഭാഗമായി.

വളവുകളിലെ അപകടങ്ങൾ ഒഴിവാക്കി എഐവൈഎഫ് പ്രവർത്തകർ

വടക്കഞ്ചേരി: എഐവൈഎഫ് ഭഗത് സിംഗ് യൂത്ത് ഫോഴ്സിന്‍റെ നേതൃത്വത്തിൽ വടക്കഞ്ചേരി- കിഴക്കഞ്ചേരി റോഡിൽ പാളയം ചേരത്തോട് വളവുകളിലെ മണ്ണുംമണലും മാറ്റി അപകടകെണികൾ ഒഴിവാക്കി. ഏതുസമയവും ചങ്ങലക്കണ്ണിപ്പോലെ വാഹനങ്ങൾ കടന്നുപോകുന്ന ഈ റോഡിൽ ഇരുചക്രവാഹനങ്ങൾ അപകടത്തിൽപ്പെടുന്നത് നിത്യസംഭവമായിരുന്നു. റോഡിൽ നിറയുന്ന മണ്ണും മണലുമായിരുന്നു അപകടകാരികളായിരുന്നത്. ഇതെല്ലാം നീക്കം ചെയ്തായിരുന്നു പ്രവർത്തകരുടെ സേവനം. പ്രദേശത്ത് അപായ സൂചനാബോർഡുകൾ സ്ഥാപിക്കണമെന്നും എഐവൈഎഫ് ആവശ്യപ്പെട്ടു. സിപിഐ എൽസി സെക്രട്ടറി സുരേഷ് കുമാർ, ബ്ലോക്ക് പഞ്ചായത്തംഗം അലീമ, എഐവൈഎഫ് നേതാക്കളായ രതീഷ് രാമചന്ദ്രൻ, കാജാ ഹുസൈൻ, രതീഷ് കളപ്പാടം, ഷാബു ഇളങ്കാവ് എന്നിവർ നേതൃത്വം നൽകി .

ജൈവവൈവിധ്യ പരിപാലനത്തിനു പ്രത്യേക കർമപദ്ധതി അണിയറയിൽ

ഷൊർണൂർ: സംസ്ഥാന ജൈവവൈവിധ്യ ബോർഡിന്‍റെ നിർദേശപ്രകാരം മുതുതല പഞ്ചായത്തിൽ ജൈവവൈവിധ്യ പരിപാലന കർമപദ്ധതിയൊരുക്കുന്നു. പ്രാദേശികാടിസ്ഥാനത്തിൽ, കാലാവസ്ഥാവ്യതിയാനം ഉൾക്കൊണ്ട് പരിസ്ഥിതിസംരക്ഷണത്തിന് സുസ്ഥിരവികസനപദ്ധതി പഞ്ചായത്തിലെ ജൈവവൈവിധ്യ പരിപാലന സമിതികൾവഴിയാണ് (ബിഎംസി) തയാറാക്കുന്നത്. കാർഷികവിളകളുടെ വൈവിധ്യം സംരക്ഷിക്കുക, വളർത്തുമൃഗപരിപാലനം, മണ്ണിന്‍റെ ഗുണമേന്മയും ജലസമ്പത്തും നിലനിർത്തുക, മത്സ്യയിനങ്ങൾ, കാവ്, തോട്, കുളം എന്നിവ സംരക്ഷിക്കുക എന്നിവ പദ്ധതിയുടെ ലക്ഷ്യങ്ങളാണ്. അധിനിവേശ സസ്യങ്ങളെ നേരിടാനുള്ള മാർഗങ്ങൾ കണ്ടെത്തുക, വന്യമൃഗങ്ങളുടെയും കീടങ്ങളുടെയും ശല്യത്തിൽനിന്ന് കൃഷിയെ രക്ഷിക്കുക, ദുരന്തങ്ങളെ നേരിടാനുള്ള പദ്ധതി തയാറാക്കുക എന്നിവയും ലക്ഷ്യങ്ങളാണ്. വാർഷിക പദ്ധതിയിൽ 30 ശതമാനം ഈ ലക്ഷ്യങ്ങൾ നേടാൻ നീക്കിവയ്ക്കുകയും വേണം. പഞ്ചായത്തിൽ ഇതിനായി നിർവഹണസമിതി രൂപവത്കരിച്ച് വോളന്‍റിയർമാർക്ക് വിവരശേഖരണത്തിനുള്ള പരിശീലനം നൽകി. മൂന്നുവാർഡുകളിൽപ്പെട്ട അഞ്ചിടത്ത് കൃഷി, ആവാസവ്യവസ്ഥ എന്നിവ പരിഗണിച്ച് പദ്ധതിനിർദേശങ്ങൾ ക്ഷണിക്കുന്നതിന് യോഗങ്ങൾ ചേർന്നു. സ്കൂൾ ജൈവ ക്ലബുകൾ, പാടശേഖരസമിതികൾ, ജൈവകർഷകർ എന്നിവർ നൽകിയ പദ്ധതിനിർദേശങ്ങൾ വിദഗ്‌ധസമിതി പരിശോധിച്ചു. ബിഎംസി ചെയർപേഴ്സൻ പഞ്ചായത്ത് പ്രസിഡന്‍റ് എ. ആനന്ദവല്ലിയും കൺവീനർ പി.എൻ. പരമേശ്വരനും കോ-ഓർഡിനേറ്റർ എ.പി. ഉണ്ണിക്കൃഷ്ണനുമാണ്. കൂടാതെ, പഞ്ചായത്ത് സ്ഥിരംസമിതി അധ്യക്ഷ ബുഷറ സമദ്, കിസാൻ സർവീസ് സൊസൈറ്റി പ്രസിഡന്‍റ് അരുൺ പുല്ലാനിക്കോട്, വി.സി. സുഗതകുമാരി, അസിസ്റ്റന്‍റ് സെക്രട്ടറി എച്ച്.കെ. സുനിൽ എന്നിവരുടെയും നേതൃത്വത്തിലാണ് പ്രവർത്തനങ്ങൾ നടക്കുന്നത്. പദ്ധതിരൂപരേഖ ഈ മാസാവസാനം പ്രകാശനംചെയ്യാനാണ് ശ്രമം.

ജില്ലാ കളക്ടർ- വിദ്യാർഥി മുഖാമുഖം പരിപാടിക്കു തുടക്കം

പാലക്കാട്: സമൂഹത്തിൽ നിരന്തരമായ മത്സരംനേരിടുന്ന വിദ്യാർഥികൾ ജീവിതത്തിൽ ആഗ്രഹിക്കുന്ന വിജയം കൈവരിക്കണമെങ്കിൽ കഠിനാധ്വാനവും നൈപുണ്യവികസനവും വായനയും അനിവാര്യമാണെന്നു ജില്ലാ കളക്ടർ ജി. പ്രിയങ്ക. പ്രചോദനാത്മക ബുധനാഴ്ച എന്നപേരിൽ എല്ലാ ബുധനാഴ്ചയും വിദ്യാർഥികളുമായി നേരിട്ടു സംവദിക്കുന്നതിന്‍റെ ഉദ്ഘാടനം നിർവഹിക്കുകയായിരുന്നു കളക്ടർ. കളക്ടറുടെ ചേംബറിലും ജില്ലാ പബ്ലിക് ലൈബ്രറിയിലുമായി നടക്കുന്ന പരിപാടി വിഭാവനം ചെയ്തതും ജില്ലാകളക്ടർ പ്രിയങ്ക തന്നെ. ജില്ലാ പബ്ലിക് ലൈബ്രറി, സംസ്ഥാന വിദ്യാഭ്യാസവകുപ്പ് , സ്റ്റേറ്റ് ബാങ്ക് ഓഫ് ഇന്ത്യ എന്നിവയുടെ സഹകരണത്തോടെയാണ് ജില്ലാ ഭരണകൂടം ഈ പദ്ധതി നടപ്പിലാക്കുന്നത്. പാലക്കാട് പി.എം.ജി. ഹൈ സ്കൂളിലെ 25 വിദ്യാര്‌ഥികളാണ് കഴിഞ്ഞദിവസത്തെ ആദ്യപരിപാടിയിൽ ജില്ലാ കളക്ടറുമായി മുഖാമുഖത്തിനെത്തിയത്. ജില്ലാ പബ്ലിക് ലൈബ്രറി സെക്രട്ടറി ടി.ആർ. അജയൻ, സ്റ്റേറ്റ് ബാങ്ക് ഓഫ് ഇന്ത്യ ചീഫ് മാനേജർ വിനോദ് കുമാർ, പിഎംജി ഹൈസ്കൂൾ ഹെഡ് മിസ്ട്രസ് നിർമ്മല എന്നിവരും കുട്ടികളുമായി സംവദിച്ചു. പങ്കെടുത്ത എല്ലാ വിദ്യാർഥികൾക്കും കളക്ടർ ഒപ്പിട്ട പുസ്തകങ്ങൾ സമ്മാനിച്ചു. എല്ലാ ബുധനാഴ്ചകളിലും പാലക്കാട് ജില്ലയിലെ ഓരോ സ്കൂളുകളിലെ വിദ്യാർഥികളുമായി ഈ സമാഗമം തുടരും.

കോട്ടേക്കുളത്ത് കുളക്കരയിൽ വായനശാലയും പാർക്കും; പ്രാരംഭനടപടികൾക്കു തുടക്കം

വടക്കഞ്ചേരി: കിഴക്കഞ്ചേരി പഞ്ചായത്തിലെ പതിനൊന്നാം വാർഡായ കോട്ടേക്കുളത്ത് കുളത്തിന്‍റെ പാർശ്വഭിത്തികെട്ടി നവീകരിക്കുന്നതിനൊപ്പം വായനശാലയും കുട്ടികളുടെ പാർക്കും നിർമിക്കുന്നതിനുള്ള പ്രാഥമിക പ്രവർത്തനങ്ങൾക്കു തുടക്കമായി. ഇതിന്‍റെ ഭാഗമായി ചെറുകിട ജലസേചന വകുപ്പിൽനിന്നും അസിസ്റ്റന്‍റ് എക്സിക്യൂട്ടീവ് എൻജിനീയർ, എഇ, ഓവർസിയർ എന്നിവർ സ്ഥലത്തെത്തി പരിശോധന നടത്തി എസ്റ്റിമേറ്റ് തയാറാക്കി പ്രാരംഭ നടപടികൾക്കു തുടക്കം കുറിച്ചു. കർഷക യൂണിയൻ- എം ജില്ലാ പ്രസിഡന്‍റ് വിൽസൺ കണ്ണാടൻ, വാർഡ് മെംബർ റോയ് മാസ്റ്റർ, ഹരിദാസ് എന്നിവരുടെ നേതൃത്വത്തിൽ ഇറിഗേഷൻ വകുപ്പിനുനൽകിയ നിവേദനത്തെ തുടർന്നാണ് കുളക്കരയിൽ വായനശാലയും കുട്ടികളുടെ പാർക്കിനുമുള്ള പദ്ധതി തയാറാകുന്നത്.

വിഷുവിപണിയിൽ താരമായി താമരച്ചക്ക

വടക്കഞ്ചേരി: വിഷുവിപണിയിൽ ഇക്കുറി താരമായി നിറഞ്ഞുനിൽക്കുന്നത് താമരച്ചക്കയാണ്. കുഞ്ഞൻചക്ക എന്നതുതന്നെയാണ് താമരച്ചക്കയ്ക്ക് വിപണിമൂല്യമുണ്ടാക്കുന്നത്. അതും തനിനാടനാകുമ്പോൾ ഈ ഇനം ചക്ക ചൂടപ്പംപോലെ വിറ്റുപോകുമെന്നാണ് കച്ചവടക്കാരും കണക്കുകൂട്ടുന്നത്. വിളകളുടെ വിസ്മയമുള്ള കണിയമംഗലം തട്ടാംപടവ് പുത്തൻപുരയിൽ സാജുവിന്‍റെ തോട്ടത്തിൽനിന്നാണ് ഈ കൗതുകച്ചക്ക വിപണിയിലെത്തുന്നത്. കടച്ചക്കയുടെ വലിപ്പമേ ഇതിനുള്ളുവെങ്കിലും സാധാരണ ചക്ക തന്നെയാണ് ഇതെന്ന് സാജു പറഞ്ഞു . ഒരു ചക്ക കഷ്ടി ഒരുകിലോയെ തൂക്കംവരൂ. തിങ്ങിനിറഞ്ഞ് ചുളയുമുണ്ട്. നല്ല മധുരവും. കുരുവിനും ചുളയ്ക്കും വലുപ്പകുറവാണെന്നുമാത്രം. കുലകളായാണ് ഉണ്ടച്ചക്ക എന്നുപേരുള്ള ഈ ചക്ക ഉണ്ടാകുന്നത്. ഒരു കുലയിൽതന്നെ എട്ടും പത്തും ചക്കയുണ്ടാകും. പ്ലാവിൻതടിയിൽ ചക്ക നിറഞ്ഞുനിൽക്കുന്നതുകാണാനും നല്ല ചന്തമാണ്. നാനോ ചക്കയായതിനാൽ വിഷുവിന് കണിയൊരുക്കാനും സൗകര്യമാണ്.

ഖരമാലിന്യ സംസ്കരണ ഗ്രൗണ്ടിൽ പ്ലാസ്റ്റിക് മാലിന്യങ്ങൾ മണ്ണിട്ടുമൂടാനുള്ള ശ്രമം തടഞ്ഞു

ഒറ്റപ്പാലം: നഗരസഭയുടെ ഉടമസ്ഥതയിലുള്ള പനമണ്ണ ട്രഞ്ചിംഗ് ഗ്രൗണ്ടിൽ ഖരമാലിന്യ സംസ്കരണവുമായി ബന്ധപ്പെട്ട് വൻ ക്രമക്കേട്. പ്ലാസ്റ്റിക് മാലിന്യങ്ങൾ വേർതിരിക്കാതെ മണ്ണിട്ട് മൂടുന്നതടക്കമുള്ള പ്രവൃത്തികൾ ബിജെപിയുടെ നേതൃത്വത്തിൽ ജനപ്രതിനിധികൾ തടഞ്ഞു. ജൈവമാലിന്യ സംസ്കരണത്തിനായി ജൈവമാലിന്യങ്ങൾ മാത്രം സംസ്കരിക്കാൻ രണ്ടു ഘട്ടങ്ങളിലായി എംസികെ കമ്പനിക്ക് കൊടുത്തിട്ടുള്ള കരാർ നിയമം ലംഘിച്ചുകൊണ്ടാണന്നും പരാതി ഉയർന്നു. എസികെ കുട്ടി അസോസിയേറ്റ്സിന് ആ പ്രവൃത്തികൾ ചെയ്യുന്നതിന് അംഗീകാരമില്ലായിരുന്നുവെന്നാണ് വിവരം. അംഗീകാരമില്ലാത്ത ഈ കമ്പനിക്കാണ് ബയോ മൈനിംഗ് നടത്തുന്നതിന് നഗരസഭ കരാർ നൽകിയത്. ആറുകോടിയോളം രൂപ ഇതിനുവേണ്ടി നൽകികഴിഞ്ഞുവെന്നാണ് കണക്ക്. എന്നാൽ പ്ലാസ്റ്റിക് മാലിന്യങ്ങൾ നീക്കാതെ ജൈവമാലിന്യത്തോടൊപ്പം പ്ലാസ്റ്റിക് മാലിന്യങ്ങളും മണ്ണിട്ട് മൂടുകയാണ് ചെയ്തിട്ടുള്ളതെന്നാണ് പരാതി. മുനിസിപ്പൽസെക്രട്ടറി അടക്കമുള്ള ഭരണസമിതിയുടെ അറിവോടും അംഗീകാരത്തോടും കൂടിയാണ് ഇതിൽ വ്യാപകമായ അഴിമതി നടന്നിട്ടുള്ളതെന്നാണ് ആക്ഷേപം. മൂന്നാംഘട്ടം ബയോമൈനിംഗിനായി രണ്ടുകോടി 20 ലക്ഷം രൂപയും പുതിയ കമ്പനിക്ക് വകയിരുത്തി കൊണ്ട് നഗരസഭ സെക്രട്ടറി അംഗീകാരം നൽകിയിരിക്കുകയാണന്നും പരാതിയുണ്ട്. ഈ സാഹചര്യം നിലനിൽക്കെയാണ് 18ന് മന്ത്രി എം.ബി. രാജേഷ് ഗ്രൗണ്ടിൽ പൂന്തോട്ടം ഉദ്ഘാടനം ചെയ്യാൻ എത്തുന്നത്. ഇതിനെതിരെ ബിജെപി ശക്തമായി പ്രതിഷേധിക്കുമെന്ന് നേതാക്കൾ പറഞ്ഞു.

സാമുദായികസമ്മേളനം ക്രൈസ്തവവിശ്വാസം പ്രഘോഷിക്കാൻ: മോൺ. ജീജോ ചാലയ്ക്കൽ

പാലക്കാട്‌: 26, 27 തിയതികളിൽ പാലക്കാട്‌ നടക്കുന്ന കത്തോലിക്കാ കോൺഗ്രസിന്‍റെ അന്തർദേശീയ സാമുദായികസമ്മേളനം ക്രൈസ്തവവിശ്വാസം പ്രഘോഷിക്കുന്നതിനുവേണ്ടിയാണെന്ന് രൂപത വികാരി ജനറാൾ മോൺ. ജീജോ ചാലയ്ക്കൽ പറഞ്ഞു. ലോകത്താകമാനമുള്ള ക്രൈസ്തവരുടെ സാമുദായിക ഐക്യമാണ് സമ്മേളനലക്ഷ്യം. അന്തർദേശീയ സാമുദായിക സമ്മേളനത്തിന്‍റെ ഭാഗമായുള്ള രൂപതയിലെ എല്ലാ സംഘടനകളുടെയും സന്യാസ, വൈദിക പ്രതിനിധികളുടെയും വിവിധ കമ്മിറ്റി കൺവീനർമാരുടെയും സംഗമം ഉദ്ഘാടനംചെയ്ത്‌ പ്രസംഗിക്കുകയായിരുന്നു അദ്ദേഹം. കത്തോലിക്ക കോൺഗ്രസ്‌ രൂപത പ്രസിഡന്‍റ് ബോബി ബാസ്റ്റ്യൻ പൂവത്തിങ്കൽ അധ്യക്ഷത വഹിച്ചു. രൂപത ഡയറക്ടർ ഫാ. ചെറിയാൻ ആഞ്ഞിലിമൂട്ടിൽ മുഖ്യപ്രഭാഷണം നടത്തി. ഫാ. ജോസ്‌ കൊച്ചുപറമ്പിൽ, ഫാ. ബിജു കല്ലിങ്കൽ, ഫാ. സജി വട്ടുകളത്തിൽ, ഫാ. ജിതിൻ വേലിക്കകത്ത്‌, ഫാ. ടോജി ചെല്ലംകോട്ട്‌, ഫാ. ജിതിൻ ചെറുവത്തൂർ, സിസ്റ്റർ വത്സ തെരേസ്‌, ഗ്ലോബൽ വൈസ്‌ പ്രസിഡന്‍റ് തോമസ്‌ ആന്‍റണി, ജെയിംസ്‌ പടമാടൻ, അഭിഷേക്‌ പുന്നാംതടത്തിൽ, ജിജോ അറയ്ക്കൽ, ജോസ്‌ മുക്കട തുടങ്ങിയവർ പ്രസംഗിച്ചു.

കെസിവൈഎം രൂപത കർമപദ്ധതി പ്രകാശനം

പാലക്കാട്: കെസിവൈഎം പാലക്കാട് രൂപതയുടെ 2025 പ്രവർത്തനവർഷ ഉദ്ഘാടനവും കർമപദ്ധതി പ്രകാശനവും ഒറ്റപ്പാലം സെന്‍റ് ജോസഫ് ഫൊറോന പള്ളിയിൽ നടത്തി. ഫൊറോന വികാരി ഫാ. സണ്ണി വാഴേപറന്പിൽ കർമപദ്ധതി പ്രകാശനം ചെയ്തു. കെസിവൈഎം രൂപത പ്രസിഡന്‍റ് അഭിഷേക് പുന്നാംതടത്തിൽ അധ്യക്ഷത വഹിച്ചു. സംസ്ഥാന പ്രസിഡന്‍റ് എബിൻ കണിവയലിൽ പൊതുസമ്മേളനം ഉദ്ഘാടനം ചെയ്തു. കേരളത്തിന്‍റെ സമകാലീന സാമൂഹ്യ രാഷ്ട്രീയ മേഖലകളിൽ ക്രൈസ്തവ യുവത്വം ശക്തമായ സാന്നിധ്യമായി മാറണമെന്ന് അദ്ദേഹം ആഹ്വാനം തെയ്തു. രൂപത ഡയറക്ടർ ഫാ. ജോബിൻ മേലേമുറിയിൽ, ഉപാധ്യക്ഷ ബിൻസി, ജനറൽ സെക്രട്ടറി ലിജോമോൻ അലോഷ്യസ്, ഒറ്റപ്പാലം ഫൊറോന പ്രസിഡന്‍റ് ലിന്‍റോ തോമസ്, ഫൊറോന ഡയറക്ടർ ഫാ. ഡെബിൻ ആക്കാട്ട്, രൂപത സെക്രട്ടറി ജിത്ത് ജോയ് പ്രസംഗിച്ചു.

യൂത്ത് കോണ്‍ഗ്രസ് കളക്ടറേറ്റ് മാർച്ചിൽ സംഘർഷം

പാലക്കാട്: മാസപ്പടികേസിൽ മുഖ്യമന്ത്രിയുടെ മകൾ വീണ വിജയനെ പ്രതിചേർത്ത സാഹചര്യത്തിൽ മുഖ്യമന്ത്രിയുടെ രാജി ആവശ്യപ്പെട്ട് യൂത്ത് കോൺഗ്രസ് ജില്ലാകമ്മിറ്റിയുടെ നേതൃത്വത്തിൽ കളക്ടറേറ്റിലേക്ക് നടത്തിയ മാർച്ചിൽ സംഘർഷം. സ്വന്തം മകളെ ഉപയോഗിച്ച് 2.75 കോടിരൂപ കൈക്കൂലിയായി വാങ്ങിയ പിണറായി വിജയന് മുഖ്യമന്ത്രികസേരയിൽ ഇരിക്കാൻ അർഹതയില്ലെന്നും രാജിവെച്ച് പുറത്തുപോകണമെന്നും യൂത്ത് കോണ്‍ഗ്രസ് ആവശ്യപ്പെട്ടു. ഇന്നലെ ഉച്ചയ്ക്ക് 12 മണിയോടെ ഡിസിസി ഓഫീസ് പരിസരത്തുനിന്നും ആരംഭിച്ച മാർച്ച് സിവിൽസ്റ്റേഷന് സമീപം പോലീസ് ബാരിക്കേഡ്കെട്ടി തടഞ്ഞു. പ്രതിഷേധവുമായി എത്തിയ പ്രവർത്തകർ ബാരിക്കേഡ് മറികടിക്കാൻ ശ്രമിച്ചതോടെ പോലീസും യൂത്ത് കോണ്‍ഗ്രസ് പ്രവർത്തകരും തമ്മിൽ നേരിയ സംഘർഷം ഉണ്ടാവുകയും പിന്നാലെ പ്രവർത്തകർക്ക് നേരെ ജനപീരങ്കി പ്രയോഗിക്കുകയും ചെയ്തു. തുടർന്ന് പോലീസ് പ്രവർത്തകരെ അറസ്റ്റ് ചെയ്തു നീക്കി. യൂത്ത് കോണ്‍ഗ്രസ് അഖിലേന്ത്യാ സെക്രട്ടറി പി. എൻ. വൈശാഖ് നാരായണസ്വാമി പ്രതിഷേധ മാർച്ച് ഉദ്ഘാടനം ചെയ്തു. ജില്ലാ പ്രസിഡന്‍റ് കെ .എസ്. ജയഘോഷ് അധ്യക്ഷനായി. സംസ്ഥാന ഭാരവാഹികളായ പ്രതീഷ് മാധവൻ, വിനോദ് ചെറാട്, ജിതേഷ് നാരായണൻ, ജില്ലാ ഭാരവാഹികളായ രതീഷ് പുതുശേരി, പി.ടി. അജ്മൽ, ശ്യാം ദേവദാസ്, എ. ഷഫീഖ്, ഡി. ദിലീപ്, കെഎസ് യു ജില്ലാ പ്രസിഡന്‍റ് നിഖിൽ കണ്ണാടി, സംസ്ഥാന ഭാരവാഹികളായ അജാസ് കുഴൽമന്ദം, ഗൗജ വിജയകുമാർ, യൂത്ത് കോണ്‍ഗ്രസ് നിയോജകമണ്ഡലം പ്രസിഡന്‍റുമാരായ വിനോദ് കളത്തൊടി, നസീർ മാസ്റ്റർ, പി.എസ്. വിപിൻ, സാജൻ കോട്ടപ്പാടം, മുകുന്ദൻ കുഴൽമന്ദം, റിനാസ് യൂസഫ് എന്നിവർ നേതൃത്വം നൽകി.

നെൽപ്പാടങ്ങളിൽ വെള്ളംകയറി വൈക്കോൽ നശിച്ചു; കർഷകർക്കു കണ്ണീർ

നെന്മാറ: ശക്തമായ വേനൽമഴയിൽ വരണ്ടുണങ്ങിയ നെൽപ്പാടങ്ങളിൽ വെള്ളംനിറഞ്ഞു. കൊയ്ത്ത് പൂർത്തിയായ നെൽപ്പാടങ്ങളിലെ വൈക്കോൽ സംഭരിക്കാൻ കർഷകർക്ക് സാവകാശം കിട്ടിയില്ല. നെൽപ്പാടങ്ങളിൽ ദിവസങ്ങളായി വെള്ളം കെട്ടിനിന്നതിനെ തുടർന്ന് ചീഞ്ഞുതുടങ്ങിയ വൈക്കോൽ സംഭരിക്കാനും കർഷകർക്ക് കഴിഞ്ഞില്ല. കാലികളെ വളർത്തുന്ന കർഷകർ ഇതോടെ ദുരിതത്തിലായി. പാടങ്ങളിൽ വെള്ളംനിറഞ്ഞതോടെ കലപ്പ ഉപയോഗിച്ച് ഉഴുതുമറിക്കാൻകഴിയാത്ത കർഷകർ പരീക്ഷണാടിസ്ഥാനത്തിൽ ലഭ്യമായ വെള്ളത്തിൽ വൈക്കോൽ മണ്ണിൽ വളമായി ചേരുന്നതിനായി ഉഴുതുമറിച്ചു തുടങ്ങി. സാധാരണ വൈക്കോൽ വിറ്റാൽ കൊയ്ത്ത്കൂലിയും നിലം ഉഴുന്നതിനുള്ള ചെലവും ലഭിക്കുമായിരുന്നു. ഈ വർഷം വൈക്കോൽ നഷ്ടമായതോടെ പ്രാഥമികപണികൾക്ക് പണം കണ്ടെത്തേണ്ട സ്ഥിതിയായി. വൈക്കോൽ മുഖേന കിട്ടിയ അധികാദായവും നഷ്ടമായി. നെന്മാറ, കൈപ്പഞ്ചേരി, കയറാടി, പയ്യാങ്കോട് പ്രദേശത്തുള്ള നെൽപ്പാടങ്ങളിലാണ് വൈക്കോൽ ഉഴുതുമറിക്കുന്നത് ആരംഭിച്ചത്. തുടർച്ചയായ ദിവസങ്ങളിലെ മഴയിൽ വൈക്കോൽ നഷ്ടമായതോടെ പ്രാദേശികമായി വൈക്കോലിന് വില ഉയർന്നുതുടങ്ങി. ഒരു കെട്ടിന് 85 രൂപ വരെയാണ് കർഷകർക്ക് കിട്ടിയിരുന്നത്. ഇപ്പോൾ 125 രൂപയ്ക്ക് മുകളിൽ വില പറഞ്ഞ് വ്യാപാരികൾ വരുന്നുണ്ടെങ്കിലും വിൽക്കാൻ വൈക്കോൽ ഇല്ലാത്ത സ്ഥിതിയാണ്. മഴ ഇനിയും തുടർന്നാൽ വൈക്കോൽ റോളുകൾക്ക് 200 രൂപയ്ക്ക് മുകളിൽ വില വരുമെന്ന് ക്ഷീര കർഷകർ പറയുന്നു. സ്വന്തമായി നെൽകൃഷിയുള്ള ക്ഷീരകർഷകർക്ക് പോലും വൈക്കോൽ വാങ്ങിക്കേണ്ട സ്ഥിതിയാണ്. കൊയ്ത്തുകഴിഞ്ഞ നെൽപ്പാടങ്ങളിലെ വൈക്കോൽ ചുറ്റി കെട്ടുകളാക്കാനും കഴിയാത്ത സ്ഥിതിയുണ്ട്. ചില പാടങ്ങളിൽ റോളുകളാക്കിയ വൈക്കോൽ കൊണ്ടുപോകാൻ കഴിയാത്തത് നനഞ്ഞു തുടങ്ങി. തുടർച്ചയായ ദിവസങ്ങളിൽ മഴ ലഭിച്ചതോടെ നെൽപ്പാടത്ത് കിടക്കുന്ന വൈക്കോൽ നിറം കുറഞ്ഞു പൂപ്പലുകൾ കയറിയും ഗുണനിലവാരം കുറയുന്നതായി കർഷകർ പറയുന്നു. നെന്മാറ, അയിലൂർ മേഖലകളിലെ പകുതിയിലേറെ കർഷകരുടെയും വൈക്കോൽ ചീഞ്ഞു നാശമായി. വൈക്കോൽ വിൽക്കാറുള്ള കർഷകരുടെ നനഞ്ഞ വൈക്കോൽ സംഭരിക്കാനും കച്ചവടക്കാർ എത്തുന്നില്ലെന്നും പരാതിയുണ്ട്.

കാർഷിക കാർണിവലിനൊരുങ്ങി തൃത്താല

തൃത്താല: സുസ്ഥിര തൃത്താലയുടെ ഭാഗമായി സംഘടിപ്പിക്കുന്ന വിഷു-റംസാൻ കാർഷിക കാർണിവൽ 11, 12, 13 തീയതികളിൽ നടക്കും. നാഗലശ്ശേരി വാഴക്കാട് പാടശേഖരത്തിലാണ് പരിപാടി. കാർഷികോത്സവത്തിന്‍റെ ഭാഗമായി വിളവെടുപ്പ് മഹോത്സവം, ഉത്പന്നങ്ങളുടെ വിപണനമേള, നാടൻ കലാരൂപങ്ങളുടെ അവതരണം, നാടൻഭക്ഷ്യവിഭവമേള, മത്സ്യവിപണന മേള, സാംസ്കാരിക ഘോഷയാത്ര എന്നീ വൈവിധ്യങ്ങളായ പരിപാടികളാണ് ആസൂത്രണം ചെയ്തിട്ടുള്ളത്. കൃഷിവകുപ്പ്, ആത്മ, മത്സ്യബന്ധന വകുപ്പ്, മൃഗസംരക്ഷണ വകുപ്പ്, ക്ഷീരവികസന വകുപ്പ്, കുടുംബശ്രീ, മണ്ണ് പര്യവേഷണ വകുപ്പ്, തദ്ദേശസ്ഥാപനങ്ങൾ തുടങ്ങിയ സ്ഥാപനങ്ങളും ഏജൻസികളും കാർഷിക മേളയിൽ പങ്കാളികളാകും. മേളയുടെ ഭാഗമായി നാടൻ ഭക്ഷ്യവിഭവങ്ങളുടെ ഭക്ഷ്യമേള, ലൈവ് ഫിഷ് വിപണനമേള എന്നിവയും ഒരുക്കും. 13ന് സമാപന സമ്മേളനം തദ്ദേശസ്വയംഭരണഎക്സൈസ്പാർലിമെന്‍ററികാര്യ വകുപ്പ് മന്ത്രി എം.ബി. രാജേഷ് ഉദ്ഘാടനം ചെയ്യും. തൃത്താല ബ്ലോക്ക് പഞ്ചായത്ത് പ്രസിഡന്‍റ് അഡ്വ. വി.പി. റജീന അധ്യക്ഷയാകും.

അരവിന്ദ് കണ്ണാശുപത്രിയിൽ നവീന ബൈനോക്കുലർ വിഷൻ ക്ലിനിക് തുടങ്ങി

കോയമ്പത്തൂർ: അരവിന്ദ് കണ്ണാശുപത്രിയിൽ അത്യാധുനിക ആംബ്ലിയോപിയയും ബൈനോക്കുലർ വിഷൻ ക്ലിനിക്കും ഉദ്ഘാടനം ചെയ്തു. ആംബ്ലിയോപിയ, മിഡ് റേഞ്ച് ഡീവിയേറ്റഡ് ഐ, ഡിജിറ്റൽ ഐ സ്ട്രെയിൻ തുടങ്ങിയ രോഗചികിത്സയ്ക്ക് ഉതകുന്നതാണ് പുതിയ സംവിധാനം. കിടത്തിചികിത്സ അടക്കമുളള സൗകര്യവും ലഭ്യമാണ്. പുതിയ ക്ലിനിക്കിന്‍റെ ഉദ്ഘാടനം ബൈനോക്സ് സിഇഒ ഒലിയുള്ള അബ്ദുൾ നിർവഹിച്ചു. പീഡിയാട്രിക് വിഭാഗം ഉൾപ്പെടെ എല്ലാ പ്രായത്തിലുള്ളവർക്കും ക്ലിനിക്കിൽ സേവനം ലഭിക്കുമെന്നു അധികൃതർ അറിയിച്ചു.

ഒറ്റപ്പാലത്തെ അമ്മമാർക്ക് ആശ്വാസമായി അങ്കണവാടി കം ക്രഷിനു തുടക്കം

ഒറ്റപ്പാലം: സ്വകാര്യ ഡേകെയറുകൾക്കു തുല്യമായ രീതിയിൽ കുഞ്ഞുങ്ങൾക്ക് പകൽസംരക്ഷണം നൽകുന്ന അങ്കണവാടി കം ക്രഷ് പദ്ധതി ഒറ്റപ്പാലത്തും യാഥാർഥ്യമായി. പദ്ധതി ഉദ്ഘാടനം അഡ്വ.കെ.പ്രേംകുമാർ എംഎൽഎ നിർവഹിച്ചു. 29ാം വാർഡിലെ വിദ്യാജ്യോതി അങ്കണവാടിയിലാണ് പദ്ധതി നടപ്പാക്കിയത്. വനിതാ ശിശു വികസന വകുപ്പും ഒറ്റപ്പാലം നഗരസഭാ ഐസിഡിഎസും സംയുക്തമായാണ് പദ്ധതി നടപ്പിലാക്കിയത്. നഗരസഭയിലെ ആദ്യത്തെ അങ്കണവാടി കം ക്രഷ് പദ്ധതിയാണിത്. വിവിധ സ്ഥാപനങ്ങളിൽ ജോലി ചെയ്യുന്നവരും വീട്ടിൽ കുട്ടികളെ നോക്കാൻ ആളില്ലാത്തതുമായ വീടുകളിലെ അമ്മമാരുടെ ആറുമാസംമുതൽ മൂന്നുവയസുവരെയുള്ള കുട്ടികളെ സ്വകാര്യ ഡേ കെയറുകൾക്ക് തുല്യമായ രീതിയിൽ പരിചരിക്കുകയാണ് പദ്ധതിയുടെ ലക്ഷ്യം. രാവിലെ ഏഴുമുതൽ രാത്രി ഏഴുവരെയാണ് പ്രവർത്തനസമയം. ഉദ്ഘാടന ചടങ്ങിൽ നഗരസഭാ ചെയർപേഴ്സണ്‍ ജാനകിദേവി അധ്യക്ഷയായി.

ബസുകൾ കയറാതെ കൊടുവായൂർ സ്റ്റാൻഡ്; കാത്തിരിപ്പുകാർ പുറത്തെ മരത്തണലിൽ

കൊടുവായൂർ: കോടികൾ ചെലവഴിച്ച് കൊടുവായൂരിൽ നിർമിച്ച ബസ് സ്റ്റാൻഡ് യാത്രികർക്കു പ്രയോജനപ്പെടുത്തണമെന്ന ആവശ്യശക്തം. കൊടുംവെയിലിൽപോലും പലരും ബസ് കാത്തുനിൽക്കുന്നത് സ്റ്റാൻഡിനു മുന്നിലെ മരത്തണലിലാണ്. കൈക്കുഞ്ഞുമായി നിൽക്കുന്ന അമ്മമാരും വയോധികരുമെല്ലാം ഇവിടത്തെ സ്ഥിരംകാഴ്ച. 2012-13 ൽ പി.കെ. ബിജു എംപിയുടെ പ്രദേശിക ആസ്തി വികസന ഫണ്ട് ഉപയോഗിച്ചാണ് ബസ് സ്റ്റാൻഡും കമ്യൂണിറ്റി ഹാളും നിർമിച്ചത്. ആർഭാടമായി ഉദ്ഘാടനം നടത്തിയെങ്കിലും ഒരുവർഷത്തിനകം സ്റ്റാൻഡിൽ ബസ് കയറുന്നതു നിലച്ചു. കൊടുവായൂരിൽ വന്നുപോകുന്ന തമിഴ്നാട് സർക്കാർബസ് മാത്രമാണ് സ്റ്റാൻഡിൽകയറി നിർത്തിയിടാറുളളത്. നിലവിൽ ലോറി, കാർ അടക്കമുള്ള വാഹനങ്ങളുടെ പാർക്കിംഗ് കേന്ദ്രമായി ബസ് സ്റ്റാൻഡ് മാറിയിട്ടുണ്ട്. സ്റ്റാൻഡിലേക്കു കയറിയിറങ്ങുന്ന വഴിയും സഞ്ചാരയോഗ്യമല്ലാതായി. ബസുകൾ സ്റ്റാൻഡിൽ ക‍യറാറില്ലാത്തതിനാൽ എല്ലാവരുടെയും നിൽപ് പുറത്തെ മരത്തണലിലാണ്.

സഞ്ചാരസ്വാതന്ത്ര്യം നേടിയെടുക്കാൻ ശ്രമദാനത്തിലൂടെ വഴിവെട്ടി നാട്ടുകാർ

മുതലമട: ഗായത്രിപുഴയ്ക്ക് കുറികെയുള്ള പള്ളം- ചുള്ളിയാർപുഴ പാലത്തിനു തടസമായി നിൽക്കുന്ന അപ്രോച്ച് റോഡിനായി വഴിവെട്ടി നാട്ടുകാർ. പള്ളം, പട്ടർപള്ളം, തിരുമികുളമ്പ്, ലവച്ചള്ള, മല്ലൻകുളമ്പ് തുടങ്ങിയിടങ്ങളിലെ നൂറുകണക്കിനു നാട്ടുകാരും വിദ്യാർഥികളുമാണ് അപ്രോച്ച് റോഡിനായി വഴിയൊരുക്കാൻ രംഗത്തിറങ്ങിയത്. യാത്രാസൗകര്യം നിഷേധിക്കപ്പെട്ട ഈ പ്രദേശത്തെ പൊതുജനങ്ങൾക്കും വിദ്യാർഥികൾക്കും ചുള്ളിയാർമേട് എത്താനുള്ള ഏക ആശ്രയമാണ് പള്ളം ചുള്ളിയാർ പുഴപ്പാലം. ഗ്രാമപഞ്ചായത്ത് ഓഫീസ്, കൃഷിഭവൻ, ആശുപത്രി, ഹൈസ്കൂളുകൾ,അക്ഷയകേന്ദ്രം തുടങ്ങി നിരവധി സേവനങ്ങൾക്കായി നൂറുകണക്കിന് പൊതുജനങ്ങളും വിദ്യാർഥികളുമെല്ലാം തകർന്ന പാലത്തിന്‍റെ അവശിഷ്ടങ്ങൾക്കിടയിലൂടെയാണ് യാത്ര ചെയ്യുന്നത്. സാങ്കേതികത്വത്തിന്‍റെ പേരിൽ പാലംനിർമാണവും സ്ഥലം ഏറ്റെടുപ്പുമെല്ലാം മുടങ്ങിക്കിടക്കുന്ന സാഹചര്യത്തിലാണ് നാട്ടുകാർതന്നെ രംഗത്തെത്തി വഴിവെട്ടിത്തുടങ്ങിയത്.

പുഴ വഴിമാറി; മാന്നന്നൂർ തടയണയ്ക്കു സമീപത്തെ കർഷകർ ആധിയിൽ

ഒറ്റപ്പാലം: മാന്നന്നൂർ ഉരുക്കുതടയണക്കു സമീപത്തെ കർഷകർ ഭീതിയിൽ. ശക്തമായി പെയ്യുന്ന വേനൽമഴയാണ് മാന്നനൂരിലെ കർഷകരെ ആശങ്കയിലാക്കുന്നത്. പുനർനിർമാണത്തിനായി പുഴയിലെ നീരൊഴുക്ക്‌ ഗതിമാറ്റാൻ സ്ഥാപിച്ച ബണ്ടുപൊട്ടിയതാണ് ആശങ്കയ്ക്കുകാരണം. യന്ത്രമുപയോഗിച്ച് പുഴയിലെ മണൽകൊണ്ട് വലിയ ബണ്ടുകെട്ടി വെള്ളത്തിന്‍റെ ഒഴുക്ക് പൈങ്കുളം ഭാഗത്തേക്കു ഗതിമാറ്റിയാണ് മാന്നനൂർ ഉരുക്കുതടയണയുടെ സംരക്ഷണഭിത്തികളുടെ നിർമാണം നടത്തിയത്. എന്നാൽ ഈ ബണ്ട് 20 മീറ്ററോളം പൊട്ടിയെന്നാണ് പ്രദേശവാസികൾ പറയുന്നത്. ഇതോടെ, തകർന്ന സംരക്ഷണഭിത്തിക്ക്‌ പുറകിലൂടെയും കൃഷിയിടത്തിനു സമീപത്തുകൂടിയുമാണിപ്പോൾ പുഴയൊഴുകുന്നത്. വീണ്ടും പുഴയിൽ നീരൊഴുക്ക് കൂടിയാൽ കൃഷിഭൂമി ഇടിയുന്ന സ്ഥിതിയുണ്ടാകും. നേരത്തേ, പുഴയിലെ വെള്ളം കുറഞ്ഞതോടെ കഴിഞ്ഞമഴയിൽ തകർന്ന തടയണയുടെ പുനർനിർമാണം തുടങ്ങിയിരുന്നു. എന്നാൽ, വേനൽമഴയിൽ പുഴയിലെ വെള്ളം കൂടിയതോടെ പണികൾ നിർത്തിവച്ചു. യന്ത്രങ്ങളും മോട്ടോർ ഉൾപ്പെടെയുള്ളവയും പുഴയിൽനിന്ന്‌ കരയിലേക്കു മാറ്റിയിട്ടുണ്ട്. ഇതോടെ, കർഷകരും ആശങ്കയിലാണ്. പുനർനിർമാണം പൂർത്തിയായില്ലെങ്കിൽ, മഴയിൽ വെള്ളംകൂടിയാൽ കൃഷിഭൂമികൾ കൂടുതൽ നഷ്ടപ്പെടും.

കണിവെള്ളരികൃഷിക്കു തിരിച്ചടി

ഷൊർണൂർ: വേനൽമഴ വില്ലനായി, വിഷുവിപണി ലക്ഷ്യമിട്ടിരുന്ന കണിവെള്ളരികൃഷി വെള്ളത്തിലായി. കഴിഞ്ഞ ദിവസങ്ങളിൽ ഇടിവെട്ടിപെയ്ത വേനൽമഴമൂലം വെള്ളരിക്കയെല്ലാം ചീഞ്ഞളിഞ്ഞ അവസ്ഥയിലാണെന്നു കർഷകർ പറയുന്നു. വിഷുവിപണിയിലേക്കായി മുണ്ടക്കോട്ടുകുറുശ്ശി പാടശേഖരത്തിൽമാത്രം ഒരുക്കിയ 10 ഏക്കറോളം കണിവെള്ളരിക്കൃഷിയാണ് വേനൽമഴ കാരണം നശിച്ചുതുടങ്ങിയത്. അന്പതുദിവസത്തോളം പരിപാലിച്ചാണ് കണിവെള്ളരി കൃഷിചെയ്യുന്നത്. പത്തിലേറെ കർഷകരാണ് വിഷുവിപണി ലക്ഷ്യമിട്ട് മുണ്ടക്കോട്ടുകുറുശ്ശി പാടശേഖരത്തിൽ കൃഷിയിറക്കിയത്. വിഷു വിപണിക്കായി വിളവെടുക്കാൻ ദിവസങ്ങൾ മാത്രമേയുണ്ടായിരുന്നുള്ളൂ. നിലവിൽ അഞ്ചുടണ്ണിലേറെ നഷ്ടംവന്നതായി കർഷകർ പറഞ്ഞു. ഇനിയും മഴതുടർന്നാൽ കൂടുതൽ ഭാഗങ്ങളിലെ വിളകൾ നശിക്കുമെന്ന് കർഷകർ പറയുന്നു. വിഷുവിന്‍റെ നാലുദിവസമാണ് കണിവെള്ളരിയുടെ കച്ചവടം കൂടുതൽ നടക്കുക. ഇതാണ് കർഷകർക്കു പ്രതീക്ഷനൽകുന്ന വിപണി. വിഷുകഴിഞ്ഞാൽ പിന്നെ വെള്ളരിക്ക് ആവശ്യക്കാർ കുറയും. ഇതോടെ വിലയും കുറയും. കണിവെള്ളരിക്ക് വിപണിയിൽ ഇപ്പോൾ 15 രൂപയോളം കർഷകർക്കു ലഭിക്കുന്നുണ്ട്. കഴിഞ്ഞവർഷം 50 സെന്‍റ് സ്ഥലത്തുനിന്ന് ഏഴുടൺ കണിവെള്ളരി ലഭിച്ചിരുന്നു. ഇത്തവണ പാട്ടത്തിനെടുത്ത ഭൂമിയിലുൾപ്പെടെയായി രണ്ടരയേക്കറിൽ കൃഷിചെയ്തതാണ്. എന്നാൽ, രണ്ടുടണ്ണിലേറെ കേടുവന്നു. ഏകദേശം ഒരുലക്ഷത്തിലേറെ രൂപയുടെ നഷ്ടമുണ്ടായതായി കർഷകനായ ഞഴുകിൽ അലി പറഞ്ഞു. ആ ഒരേക്കറിൽ തണ്ണിമത്തനും 30 സെന്‍റ് സ്ഥലത്ത് കുമ്പളം, പൊട്ടുവെള്ളരി, കണിവെള്ളരി ഉൾപ്പെടെയും കൃഷിചെയ്തിട്ടുണ്ട്. എന്നാൽ, വേനൽമഴയിൽ ഭൂരിഭാഗവും നശിച്ചു. ഒരുടണ്ണിലേറെ കുമ്പളം ചീഞ്ഞ് ചെടിയുൾപ്പെടെ നശിച്ചു. നഷ്ടം കർഷകർതന്നെ വഹിക്കേണ്ട സ്ഥിതിയാണെന്നും ആനുകൂല്യങ്ങൾ പഞ്ചായത്തിൽനിന്നോ ബ്ലോക്കിൽനിന്നോ ലഭിക്കുന്നില്ലെന്നും പരാതിയുണ്ട്.

പുഴയിൽ കാണാതായ യുവാവിന്‍റെ മൃതദേഹം കണ്ടെത്തി

കല്ലടിക്കോട്: കരിമ്പ പഞ്ചായത്ത് ആറ്റില വെള്ളച്ചാട്ടത്തിനുതാഴെ തരിപ്പപ്പതി മുണ്ടനാട് കരിമല മാവിൻചോടിനുസമീപം പുഴയിൽ കാണാതായ യുവാവിന്‍റെ മൃതദേഹം കണ്ടെത്തി. അട്ടപ്പാടിയിൽനിന്നു തേനെടുക്കാനെത്തിയ സംഘത്തിൽപ്പെട്ട അട്ടപ്പാടി കരുവാര ഉന്നതിയിലെ മുരുകന്‍റെ മകൻ മണികണ്ഠന്‍റെ(24) മൃതദേഹമാണ് തെരച്ചിലിനൊടുവിൽ കണ്ടെത്തിയത്. ഫയർഫോഴ്സും സ്കൂബ ടീമും കഴിഞ്ഞ ദിവസെ തെരച്ചിൽ നടത്തിയെങ്കിലും കണ്ടെത്താനായിരുന്നില്ല. ഇന്നലെ ആർഎഫ് ടീമും സ്കൂബ ടീമും ഫയർഫോഴ്സും പോലീസും ചേർന്നുനടത്തിയ തെരച്ചിലിലാണ് മൃതദേഹം കണ്ടെത്തിയത്. തിങ്കളാഴ്ച രാത്രി എട്ടരയോടെയാണ് ഒമ്പതംഗ സംഘം തേൻ ശേഖരിക്കാനായി ഈ പ്രദേശത്ത് എത്തിയത്. മണികണ്ഠന്‍റെ അച്ഛനടക്കമുള്ളവർ സംഘത്തിലുണ്ടായിരുന്നു. പാലക്കയം പുഴയിൽ കരിപ്പപ്പതി ഭാഗത്ത് മണികണ്ഠൻ മുങ്ങിപ്പോവുകയായിരുന്നു.

യുവാവിന്‍റെ മൃതദേഹം കണ്ടെടുത്തു

ചിറ്റൂർ: കുളിക്കാനിറങ്ങി കാണാതായ യുവാവിന്‍റെ മൃതദേഹം കണ്ടെടുത്തു. വടകരപ്പതി ഒഴലപ്പതി പരേതനായ മാരിയപ്പന്‍റെ മകൻ മണികണ്ഠന്‍റെ(29) മൃതദേഹമാണ് കണ്ടെത്തിയത്. ചൊവ്വാഴ്ച ഉച്ചയ്ക്ക് ഒരുമണിയോടെയാണ് സംഭവം. സുഹൃത്തുക്കളുമൊത്ത് കിണർപ്പള്ളം കുളത്തിന്‍റെ കരയിലിരുന്നതായിരുന്നു മണികണ്ഠൻ. അല്പസമയത്തിനുശേഷം കുളിക്കാനായി വസ്ത്രങ്ങൾ അഴിച്ചുവച്ച് കുളത്തിലിറങ്ങിയതായി സുഹൃത്തുക്കൾ പറഞ്ഞു. ഏറെസമയം കഴിഞ്ഞിട്ടും കാണാത്തതിനെതുടർന്ന് കൊഴിഞ്ഞാമ്പാറ പോലീസിനെയും ചിറ്റൂർ അഗ്നിരക്ഷാസേനയെയും വിവരമറിയിച്ചു. ചൊവ്വാഴ്ച രണ്ടുമണി മുതൽ ആറുമണിവരെ അഗ്നിരക്ഷാസേന കുളത്തിൽ തെരച്ചിൽ നടത്തിയെങ്കിലും കണ്ടെത്താനായില്ല. ഇരുട്ടായതിനെതുടർന്ന് തെരച്ചിൽ അവസാനിപ്പിക്കുകയായിരുന്നു. ഇന്നലെ രാവിലെ അഗ്നിരക്ഷാസേന സീനിയർ ഫയർ ആൻഡ് റെസ്ക്യൂ ഓഫീസർ കെ. സജിത്ത് മോന്‍റെ നേതൃത്വത്തിൽ സിങ്കിയും പാതാളക്കരണ്ടിയും ഉപയോഗിച്ചുനടത്തിയ തെരച്ചിലിൽ ചെളിയിൽ അകപ്പെട്ട മൃതദേഹം പുറത്തെടുത്തു. ജില്ലാ ആശുപത്രി മോർച്ചറിയിലെത്തിച്ച മൃതദേഹം കൊഴി ഞ്ഞാമ്പാറ പോലീസിന്‍റെ ഇൻക്വസ്റ്റിനുശേഷം പോസ്റ്റമോർട്ടം നടത്തി. കുമാരിയാണ് അമ്മ. സഹോദരങ്ങൾ: ശക്തി, നാഗരാജ്, ധനലക്ഷ്മി.

ടോൾകമ്പനിയുടെ നിലപാട് സർവകക്ഷി യോഗതീരുമാനങ്ങൾക്കു വിരുദ്ധം

വടക്കഞ്ചേരി: പന്നിയങ്കര ടോൾപ്ലാസയിൽ പ്രദേശവാസികളുടെ ടോൾ സംബന്ധിച്ച ചർച്ച കഴിഞ്ഞ് മണിക്കൂറുകൾ കഴിയുംമുന്പ് ടോൾകമ്പനി മലക്കം മറിഞ്ഞു. ഇന്നലെ സൗജന്യപ്രവേശനത്തിനു രേഖകൾ നൽകാൻ മൂലങ്കോട് കവളപ്പാടത്തുനിന്നുള്ളവർ ചെന്നപ്പോഴാണ് ടോൾ കമ്പനി നിലപാട് മാറ്റിയത്. കവളപ്പാടത്തേക്ക് ടോൾപ്ലാസയിൽ നിന്നും 8.3 കിലോമീറ്റർ ദൂരമുണ്ടെന്നും അതിനാൽ സൗജന്യപാസിന് രേഖകൾ സ്വീകരിക്കാനാകില്ലെന്നായിരുന്നു ടോൾ അധികൃതരുടെ മറുപടി. ഏഴര കിലോമീറ്റർ ദൂരപരിധിയിലുള്ളവർക്ക് സൗജന്യപാസ് അനുവദിക്കൂ എന്ന സമീപനമായിരുന്നു അധികൃതർ സ്വീകരിച്ചത്. എന്നാൽ ഏഴര കിലോമീറ്ററിനപ്പുറം പാലക്കാട് എഡിഎം പരിശോധിച്ച് കണ്ടെത്തിയ ചില പ്രത്യേക പോയിന്‍റുകളിലെ വാഹനങ്ങൾക്കുകൂടി സൗജന്യപ്രവേശനം നൽകുമെന്നായിരുന്നു തിങ്കളാഴ്ച വൈകുന്നേരം എംപി, എംഎൽഎമാർ ഉൾപ്പെടെയുള്ള ജനപ്രതിനിധികളും രാഷ്ട്രീയ പാർട്ടി പ്രതിനിധികളും മറ്റു സമരക്കാരും പങ്കെടുത്ത സർവകക്ഷി യോഗത്തിൽ തീരുമാനിച്ചിരുന്നത്. ഈ തീരുമാനത്തിനു വിരുദ്ധമായാണ് ടോൾ കമ്പനി പ്രവർത്തിക്കുന്നത്. ഈ പ്രശ്നം ഇനി മറ്റു പ്രദേശങ്ങളിലും ഉണ്ടാകും.

ലഹരിവിരുദ്ധ ദിനാചരണം

പാലക്കയം: സെന്‍റ് മേരീസ്‌ പള്ളിയും കത്തോലിക്ക കോൺഗ്രസും ചേർന്ന് ലഹരിവിരുദ്ധ ദിനാചരണം നടത്തി.കുട്ടികളുടെ ലീഡർ അൽന മരിയ പ്രതിജ്ഞ ചൊല്ലിക്കൊടുത്തു. ലഹരിയിൽ നിന്നകലാം വായനയോടടുക്കാം എന്ന പദ്ധതിക്കു തുടക്കംകുറിച്ചു. ഇടവകവികാരി ഫാ. ചെറിയാൻ ആഞ്ഞിലിമൂട്ടിൽ, കൈക്കാരന്മാരായ ഷാജു കാഞ്ഞിരപ്പാറ, മാത്യു മുണ്ടൻപറമ്പിൽ, അനിറ്റ മരിയ തുടങ്ങിയവർ നേതൃത്വം നൽകി.

കഞ്ചിക്കോട്‌ മുതൽ കല്ലടിക്കോടുവരെ കാട്ടാനകൾ കൊന്നതു 18 പേരെ

കല്ലടിക്കോട്‌: കഞ്ചിക്കോട്‌ മുതൽ കല്ലടിക്കോടുവരെ കഴിഞ്ഞ ഒന്പതുവർഷത്തിനിടയിൽ കാട്ടാനയുടെ ആക്രമണത്തിൽ മരിച്ചതു 18 പേർ.11 പേർക്കു പരിക്കേറ്റു. ഈ പ്രദേശത്തു കാട്ടാനകൾ കഴിഞ്ഞ പത്തുവർഷത്തിനിടയിൽ നശിപ്പിച്ചതു 12 കോടിയുടെ കാർഷികവിളകളാണ്. സ്ഥിരമായി കാട്ടാനകൾ ഇറങ്ങാറുള്ള ഈ മേഖലയിൽ ആവശ്യത്തിനു വാച്ചർമാരെ നിയമിക്കാനോ ആവശ്യമായ സുരക്ഷാക്രമീകരണങ്ങൾ ഏർപ്പെടുത്താനോ വനംവകുപ്പ്‌ അധികൃതർ തയാറായിട്ടില്ല. കാട്ടാനകൾ കൃഷിയിടത്തിൽ എത്തിയെന്ന് അറിയിച്ചാൽ അവർ വന്ന് കാട്ടാനകളെ വനത്തിലേക്കു കയറ്റിവിടുമെന്നല്ലാതെ മറ്റു നടപടികളൊന്നും സ്വീകരിക്കാറുമില്ല. വാളയാർ മുതൽ മുണ്ടനാട്‌ വരെയുള്ള മലയോരമേഖലയിൽ കാട്ടാനകൾ ഇറങ്ങി കൃഷി നശിപ്പിക്കുന്നതു തടയാൻ വൈദ്യുതിവേലി നിർമിക്കാൻ രൂപരേഖ തയാറാക്കുകയും ചില ഭാഗങ്ങളിൽ വേലി നിർമിക്കുകയും ചെയ്തിരുന്നു. എന്നാൽ കാട്ടാനകൾ ഈ വേലി തകർത്തു കൃഷിയിടത്തിൽ കടന്ന് കൃഷികൾ നശിപ്പിക്കുന്നതും ആളുകളെ ആക്രമിക്കുന്നതും പതിവാണ്. കാട്ടാനകളുടെ ആക്രമണം തടയാൻ കയറംകോട്‌ വടക്കുംമുറിയിൽ സ്ഥിരമായി കുങ്കി ആനയെ നിർത്തണമെന്നും ട്രഞ്ചുകളും റെയിൽ ഫെൻസിംഗും സോളാർ വൈദ്യുതിവേലിയും നിർമിക്കണമെന്നുമുള്ള ആവശ്യം ശക്തമായിട്ടുണ്ട്‌.

ക്രിസ്ത്യൻ മിഷനറിമാരെ അവഹേളിക്കുകയും ആക്രമിക്കുകയും ചെയ്യുന്നത് അവസാനിപ്പിക്കണം: മാർ പീറ്റർ കൊച്ചുപുരയ്ക്കൽ

വടക്കഞ്ചേരി: രാജ്യത്ത് എവിടെയും ക്രിസ്ത്യൻ മിഷനറിമാർക്കു നിർഭയം പ്രവർത്തിക്കാൻ കേന്ദ്ര-സംസ്ഥാന സർക്കാരുകൾ വേണ്ടതെല്ലാം ചെയ്യണമെന്ന് രൂപതാധ്യക്ഷൻ മാർ പീറ്റർ കൊച്ചുപുരയ്ക്കൽ. വടക്കഞ്ചേരി സെന്‍റ് ഫ്രാൻസിസ് സ്കൂളിൽ കിന്‍റർ ഗാർട്ടൻ വിംഗിന്‍റെ ആശീർവാദവും ഉദ്ഘാടനവും നിർവഹിച്ച് സന്ദേശം നൽകുകയായിരുന്നു ബിഷപ്്. മിഷനറിമാരുടെ സേവനയാത്രകൾ സാഹസികമാണ്. അവകാശനിഷേധത്തിനെതിരെ പോരാടിയതിനാണ് മധ്യപ്രദേശിലെ ജബൽപുരിൽ വൈദികർക്കു നേരെ ആക്രമണമുണ്ടായത്. ക്രിസ്ത്യൻ മിഷനറിമാരെ അകാരണമായി അവഹേളിക്കുകയും ആക്രമിക്കുകയും ചെയ്യുന്നത് അവസാനിപ്പിക്കണമെന്ന് ബിഷപ് പറഞ്ഞു. നാടിന്‍റെ ഉന്നതമായ സംസ്കാരവും സഹിഷ്ണുതയും നിലനിർത്താനുതകുംവിധമാണ് ക്രിസ്ത്യൻ വിദ്യാഭ്യാസ സ്ഥാപനങ്ങളുടെ സേവനങ്ങൾ. സമത്വത്തോടെ വർണ-മതഭേദമില്ലാതെ പരസ്പര സ്നേഹത്തിലധിഷ്ഠിതമായ വിദ്യാഭ്യാസമൂല്യങ്ങളാണ് ഇവിടെയെല്ലാം പകർന്നുനൽകുന്നതെ ന്ന്് ബിഷപ് പറഞ്ഞു. ബംഗളൂരു സെന്‍റ് ലൂയിസ് പ്രൊവിൻസ് പ്രൊവിൻഷ്യൽ സുപ്പീരിയർ ഫാ. തോമസ് പാലക്കുടിയിൽ അധ്യക്ഷത വഹിച്ചു. പ്രിൻസിപ്പൽ ഫാ. ജോബി വർഗീസ്, സ്കൂൾ വൈസ് പ്രിൻസിപ്പൽമാരായ ഫാ. ആനന്ദ് റാവു, ഫാ. നോയൽ, സ്കൂൾ മാനേജർ ഫാ. മാത്യു പുത്തൻപറമ്പിൽ, അഡ്മിനിസ്ട്രേറ്റർ ഫാ. ബേബി പാറേക്കാട്ടിൽ, പിടിഎ പ്രസിഡന്‍റ് റോബിൻ സക്കറിയ, വൈസ് പ്രസിഡന്‍റ് വർഷ കണ്ണൻ എന്നിവർ പ്രസംഗിച്ചു. കിന്‍റർഗാർട്ടൻ കുട്ടികളുടെ ഗ്രാഡ്വേഷൻ സെറിമണിയും കലാപരിപാടികളും ഉണ്ടായിരുന്നു.

വന്യജീവി ആക്രമണം; കർഷകർ പന്തംകൊളുത്തി പ്രതിഷേധിച്ചു

വടക്കഞ്ചേരി: വന്യമൃഗആക്രമണം തുടർക്കഥയായിട്ടും ജനങ്ങളുടെ ജീവനും സ്വത്തിനും സംരക്ഷണം നൽകാതെ നിഷ്ക്രിയത്വം തുടരുന്ന വനംവകുപ്പിന്‍റെ നിലപാടിൽ പ്രതിഷേധിച്ച് കിഫയുടെ നേതൃത്വത്തിൽ പാലക്കുഴിയിൽ പന്തംകൊളുത്തി പ്രതിഷേധിച്ചു. ജില്ലാ കമ്മിറ്റി അംഗം ചാർളി മാത്യു ഉദ്ഘാടനം ചെയ്തു. ഭാരവാഹികളായ ജോസ് ഊന്നുപാലം, ബെന്നി വെമ്പിയിൽ, അജയ് മാത്യു, ഷിന്‍റോ, തോമസ് വെമ്പിയിൽ, സിബി മുണ്ടത്താനം, ടോമി ജോർജ്, ജോഷി ആന്‍റണി എന്നിവർ പ്രസംഗിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]