ADVERTISEMENT

ADVERTISEMENT

സ്ത്രീ ക്ലിനിക്കുകള്‍ പ്രവര്‍ത്തനം തുടങ്ങി

കോട്ടയം: ജില്ലയിലെ എല്ലാ ജനകീയ ആരോഗ്യകേന്ദ്രങ്ങളിലും സ്ത്രീകള്‍ക്കായുള്ള പ്രത്യേക ക്ലിനിക്കുകള്‍ക്കു തുടക്കമായി. സ്ത്രീകളുടെ സമഗ്ര ആരോഗ്യസംരക്ഷണവും സൗകര്യപ്രദമായ ചികിത്സാലഭ്യതയും ഉറപ്പാക്കുന്നതിനായി ആരംഭിച്ചതാണ് പ്രത്യേക വനിത വെല്‍നെസ് ക്ലിനിക്. എല്ലാ ചൊവ്വാഴ്ചകളിലുമാണ് ജനകീയ ആരോഗ്യകേന്ദ്രങ്ങളില്‍ ക്ലിനിക്കുകള്‍ പ്രവര്‍ത്തിക്കുന്നത്.

സ്ത്രീകളിലുണ്ടാകുന്ന വിളര്‍ച്ച, പ്രമേഹം, രക്താതിമര്‍ദം, കാന്‍സര്‍ സ്‌ക്രീനിംഗ് തുടങ്ങിയവയും മറ്റ് ആരോഗ്യ പ്രശ്‌നങ്ങളും ക്ലിനിക്കുകളിലൂടെ കണ്ടെത്താൻ സാധിക്കും. ജനകീയ ആരോഗ്യകേന്ദ്രങ്ങള്‍ കേന്ദ്രീകരിച്ച് സ്ത്രീകള്‍ക്കും കുട്ടികള്‍ക്കുമായി ക്ലിനിക്കുകള്‍, അയല്‍ക്കൂട്ട സ്‌ക്രീനിംഗ് ക്യാമ്പുകള്‍, വിദഗ്ധ സ്പെഷലിസ്റ്റ് സേവനങ്ങള്‍ എന്നിവ സ്ത്രീ ക്ലിനിക്കുകളുടെ നേതൃത്വത്തില്‍ നടത്തും.

ആരോഗ്യമുള്ള സ്ത്രീകള്‍, ശക്തമായ സമൂഹം എന്ന പ്രമേയത്തെ അടിസ്ഥാനമാക്കി 2026 മാര്‍ച്ച് എട്ടു വരെ ആരോഗ്യവകുപ്പ് സ്ത്രീകളുടെയും കുട്ടികളുടെയും ആരോഗ്യത്തിനായി സ്ത്രീ കാമ്പയിന്‍ സംഘടിപ്പിക്കുന്നുണ്ട്. ഇതിന്‍റെ ആദ്യ ഘട്ടമായാണ് സ്ത്രീ ക്ലിനിക് നടപ്പാക്കുന്നത്. കൂടാതെ അയല്‍ക്കൂട്ട സ്‌ക്രീനിംഗ് ക്യാമ്പുകള്‍, വിദഗ്ധ പരിശോധനാ ക്യാമ്പുകള്‍, തുടര്‍ ചികിത്സ (റഫറല്‍ സംവിധാനം), ബോധവത്കരണ പ്രവര്‍ത്തനങ്ങള്‍ എന്നിവയും കാമ്പയിന്‍റെ ഭാഗമായി നടത്തുന്നുണ്ട്.

ADVERTISEMENT

ഓര്‍മച്ചെപ്പില്‍ "ദൈവസ്‌നേഹത്തിന്‍റെ വിളക്കുമാടം’

റെജി ജോസഫ് കോട്ടയം: കാലംചെയ്ത മുന്‍ തൃശൂര്‍ ആര്‍ച്ച് ബിഷപ് മാര്‍ ജേക്കബ് തൂങ്കുഴിയെക്കുറിച്ചുള്ള കുറിപ്പുകളുടെ സമാഹാരമാണ് ‘’ദൈവസ്‌നേഹത്തിന്‍റെ വിളക്കുമാടം’’. തൂങ്കുഴി കുടുംബാംഗങ്ങളെയും പാലാ രൂപതയിലെ വിളക്കുമാടം സെന്‍റ് സേവ്യേഴ്‌സ് മാതൃ ഇടവകയെയും കരുതലോടെ സ്‌നേഹിച്ച പിതാവായിരുന്നു കാലംചെയ്ത മാര്‍ ജേക്കബ് തൂങ്കുഴി. കുടുംബയോഗത്തിന്‍റെ രക്ഷാധികാരിയുമായിരുന്നു പിതാവ്. ആരോഗ്യപ്രശ്‌നങ്ങളുണ്ടായിരിക്കെയും അദ്ദേഹത്തിന്‍റെ ആഗ്രഹപ്രകാരം ഇക്കൊല്ലം മാര്‍ച്ചില്‍ കുടുംബയോഗസമ്മേളനം നടത്തിയത് വിശ്രമ ജീവിതം നയിച്ചിരുന്ന തൃശൂരിലാണ്. വീല്‍ ചെയറില്‍ എത്തി കുടുംബാംഗങ്ങോളോട് കുശലം പറഞ്ഞും അനുഗ്രഹം ചൊരിഞ്ഞും സ്‌നേഹവിരുന്നില്‍ പങ്കെടുത്തുമാണ് പിതാവ് പിരിഞ്ഞതെന്ന് കുടുംബയോഗം സെക്രട്ടറി മാത്യു സഖറിയാസ് തൂങ്കുഴി അനുസ്മരിച്ചു. വിളക്കുമാടം തൂങ്കുഴി കുര്യന്‍-മാമ്മി ദമ്പതികളുടെ പുത്രനായ മാര്‍ ജേക്കബ് തൂങ്കുഴി (ചാക്കോച്ചന്‍) യുടെ പ്രൈമറി വിദ്യാഭ്യാസം വിളക്കുമാടത്തും ഹൈസ്‌കൂള്‍ പഠനം ഭരണങ്ങാനത്തുമായിരുന്നു. ഇതിനുശേഷമാണ് സെമിനാരി പഠനത്തിന് പോയത്. പാലാ രൂപതയിലെയും വിളക്കുമാടം ഇടവകയിലെയും നിരവധി പരിപാടികള്‍ക്ക് മാര്‍ തൂങ്കുഴിയുടെ സാന്നിധ്യമുണ്ടായിരുന്നു. മാതൃ ഇടവകയില്‍ നിരവധി തവണ വിശുദ്ധ കുര്‍ബാന അര്‍പ്പിക്കുകയും ചെയ്തു. റോമില്‍നിന്ന് ഉപരിപഠനത്തിനുശേഷം തിരികെ വന്ന് തലശേരി അതിരൂപതയുടെ പ്രഥമ ബിഷപ്പും പാലാ രൂപത കുടക്കച്ചിറ ഇടവകാംഗവുമായിരുന്ന മാര്‍ സെബാസ്റ്റ്യന്‍ വള്ളോപ്പള്ളിയുടെ സെക്രട്ടറിയായും രൂപത ചാന്‍സലറുമായും സേവനമനുഷ്ഠിച്ചു. തുടര്‍ന്നാണ് അവിടെ മൈനര്‍ സെമിനാരി റെക്ടറായത്.

കോട്ടയം സ്വദേശിയില്‍നിന്ന് ഒന്നേകാല്‍ കോടി തട്ടിയെടുത്ത ഉത്തർപ്രദേശുകാരൻ അറസ്റ്റില്‍

കോട്ടയം: ഗോള്‍ഡ് മൈനിംഗ് കമ്പനിയില്‍ പണം നിക്ഷേപിച്ചാല്‍ കൂടുതല്‍ ലാഭം ലഭിക്കുമെന്ന് പറഞ്ഞു വിശ്വസിപ്പിച്ച് കളത്തിപ്പടി സ്വദേശിയില്‍നിന്ന് ഒന്നേകാല്‍ കോടി രൂപ തട്ടിയെടുത്ത ഉത്തർപ്രദേശ് സ്വദേശി അറസ്റ്റില്‍. ഉത്തര്‍പ്രദേശ് സ്വദേശി ദീപേഷാ(25)ണ് അറസ്റ്റിലായത്. 2024 ലാണു കേസിനാസ്പദമായ സംഭവം. ദീപേഷിന്‍റെ ഫോണ്‍ നമ്പരില്‍നിന്നും വാട്സ് ആപ്പ് കോള്‍ വിളിച്ച് ന്യു മൗണ്ട് ഗോള്‍ഡ് കാപ്പിറ്റല്‍ ഗോള്‍ഡ് മൈനിംഗ് കമ്പനിയെക്കുറിച്ചു വിശദീകരിച്ചും ഈ കമ്പനിയില്‍ പണം ഇന്‍വെസ്റ്റ് ചെയ്താല്‍ ഷെയര്‍ മാര്‍ക്കറ്റിലെപ്പോലെ റിസ്‌കില്ലാതെ സ്ഥിരമായി വലിയ തുക കിട്ടുമെന്നു പറഞ്ഞുവിശ്വസിപ്പിച്ചുമാണ് തട്ടിപ്പ് നടത്തിയത്. തുടര്‍ന്ന് ഇടപാടുകാരന്‍ മലയാളി ആണെന്നറിഞ്ഞ് മലയാളത്തില്‍ ഇതേ കാര്യങ്ങളെപ്പറ്റി ഫോണില്‍ സംസാരിച്ചു. ഫോണിലൂടെ നല്‍കിയ ഒരു ആപ്പ് ഡൗണ്‍ലോഡ് ചെയ്യിച്ച് അതിലൂടെ പല തവണകളായി പല അക്കൗണ്ടുകളിലേക്ക് പണം വാങ്ങുകയായിരുന്നു. വിശ്വാസ്യതയ്ക്കായി ലാഭവിഹിതവും വിശ്വാസ്യതയ്ക്കായി ചെറിയ തുകകള്‍ ലാഭവിഹിതം എന്ന പേരില്‍ തിരികെ നല്‍കുകയും ചെയ്തിരുന്നു. കഴിഞ്ഞ ഓഗസ്റ്റ് 19നു പണം നഷ്ടപ്പെട്ട വ്യക്തി 4300 ഡോളര്‍ പിന്‍വലിക്കാന്‍ അപേക്ഷ കൊടുത്തപ്പോള്‍ പണം അക്കൗണ്ടില്‍ ലഭിച്ചില്ല. തുടര്‍ന്ന് പ്രതികളുടെ ഫോണ്‍ നമ്പരിലേക്കു വിളിച്ചപ്പോള്‍ നമ്പര്‍ നിലവിലില്ലെന്ന് അറിഞ്ഞതോടെയാണ് പറ്റിക്കപ്പെടുകയാണെന്നു വ്യക്തമായത്. പലതവണയായി 1,17,78,700 രൂപ നിക്ഷേപിച്ചിരുന്നു. പരാതിയെ തുടര്‍ന്നു കോട്ടയം ഈസ്റ്റ് സ്റ്റേഷനില്‍ രജിസ്റ്റര്‍ ചെയ്ത കേസില്‍ ജില്ലാ പോലീസ് മേധാവിയുടെ നിര്‍ദേശപ്രകാരം ജില്ലാ ക്രൈം ബ്രാഞ്ച് അന്വേഷണം നടത്തുകയായിരുന്നു. കേസില്‍ ഉള്‍പ്പെട്ട ദീപേഷ് ഉത്തര്‍പ്രദേശില്‍ ഉണ്ടെന്ന് കണ്ടെത്തുകയും പ്രതിയുടെ താമസസ്ഥലത്തുനിന്നും അറസ്റ്റ് ചെയ്യുകയുമായിരുന്നു.

ജില്ലയിലെ മൂന്ന് പച്ചത്തുരുത്തുകള്‍ക്ക് സംസ്ഥാനതല അംഗീകാരം

കോട്ടയം: ജില്ലയിലെ മൂന്ന് പച്ചത്തുരുത്തുകള്‍ക്ക് സംസ്ഥാനതല അംഗീകാരം ലഭിച്ചു. തദ്ദേശ സ്വയംഭരണ വിഭാഗത്തില്‍ കല്ലറ പഞ്ചായത്തിന് അഞ്ചാം സ്ഥാനവും ഇതേ വിഭാഗത്തില്‍ കടനാട് പഞ്ചായത്തിന് പ്രത്യേക ജൂറി പുരസ്‌കാരവും വാഴൂര്‍ പഞ്ചായത്തിനു പ്രത്യേക ബഹുമതിയും ലഭിച്ചു. തിരുവനന്തപുരം ടാഗോര്‍ തിയറ്ററില്‍ നടന്ന ചടങ്ങില്‍ മുഖ്യമന്ത്രി പിണറായി വിജയന്‍ പുരസ്‌കാരവും ബഹുമതിപത്രവും നല്‍കി. കല്ലറ പഞ്ചായത്തിലെ പെരുന്തുരുത്ത് എസ്‌കെവി യുപിഎസ് ഗ്രൗണ്ടിന് സമീപം 25 സെന്‍റ് ഭൂമിയില്‍ ഒരുക്കിയിട്ടുള്ള പച്ചത്തുരുത്ത് ജൈവവൈവിധ്യത്തിന്‍റെയും ഔഷധസസ്യ സമൃദ്ധിയുടെയും വേറിട്ട കാഴ്ചയായി കണ്ടെത്തി. 52 ഇനങ്ങളിലുള്ള ഇരുനൂറിലധികം സസ്യങ്ങളാണ് ഇവിടെയുള്ളത്. ജില്ലാതലത്തില്‍ ഒന്നാം സ്ഥാനവും കല്ലറയിലെ പച്ചത്തുരുത്തിനായിരുന്നു. കടനാട് തോടിന്‍റെ ഇരുകരകളിലുമായി കടനാട് പഞ്ചായത്ത് വച്ചുപിടിപ്പിച്ച പച്ചത്തുരുത്തിനാണ് പ്രത്യേക ജൂറി പുരസ്‌കാരം ലഭിച്ചത്.

ജില്ലാ പഞ്ചായത്ത് സ്ത്രീപക്ഷ നവകേരളം; സംവാദവും വിപണനമേളയും ഇന്നുമുതല്‍

കോട്ടയം: ജില്ലാ പഞ്ചായത്ത് സ്ത്രീപക്ഷ നവകേരളം എന്നപേരില്‍ സംവാദവും വിപണന മേളയും ഇന്നുമുതല്‍ 20 വരെ കോട്ടയം മാമ്മന്‍ മാപ്പിള ഹാളില്‍ രാവിലെ 10മുതല്‍ വൈകുന്നേരം അഞ്ചുവരെ നടത്തും. വനിതാ ശിശുവികസന വകുപ്പ് മുഖേനയാണ് മൂന്നു ദിവസത്തെ സ്ത്രീപക്ഷ ലിംഗ സമത്വ കാഴ്ചപ്പാടുള്ള നവകേരള സൃഷ്ടിക്കായി സംവാദം നടത്തുന്നത്. ഇന്നു രാവിലെ 10ന് ജില്ലാ പഞ്ചായത്ത് വൈസ് പ്രസിഡന്‍റ് ജോസ് പുത്തന്‍കാലയുടെ അധ്യക്ഷതയില്‍ ചേരുന്ന സമ്മേളനത്തില്‍ ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗര്‍ ഉദ്ഘാടനം ചെയ്യും. ജില്ലാ പോലീസ് ചീഫ് ഷാഹുല്‍ ഹമീദ് മുഖ്യപ്രഭാഷണം നടത്തും. നിഷ ജോസ് കെ. മാണി വിശിഷ്ടാതിഥിയായിരിക്കും. തുടര്‍ന്ന് ജനാധിപത്യ പ്രക്രിയയില്‍ സ്ത്രീകളുടെ പങ്കാളിത്തം എന്നവിഷയത്തില്‍ പാനല്‍ ചര്‍ച്ച നടത്തും. ഇ.എസ്. ബിജിമോള്‍, ലതികാ സുഭാഷ്, ഷീജ അനില്‍, പ്രഫ. റോണി കെ. ബേബി, ഡോ. പി.എം. ആരതി എന്നിവര്‍ പങ്കെടുക്കും. ഉച്ചകഴിഞ്ഞ് രണ്ടുമുതല്‍ മഴവില്‍ ഫിലിം സൊസൈറ്റിയുടെ നേതൃത്വത്തില്‍ നടത്തപ്പെടുന്ന സിനിമ പ്രദര്‍ശനവും പാനല്‍ ചര്‍ച്ചയും നടക്കും. നാളെ രാവിലെ ജില്ലാ പഞ്ചായത്ത് പ്രസിഡന്‍റിന്‍റെ അധ്യക്ഷതയില്‍ കൂടുന്ന സമ്മേളനം സാമൂഹ്യ പ്രവര്‍ത്തക ദയാബായി ഉദ്ഘാടനം ചെയ്യും. ജില്ലാ കളക്ടര്‍ ചേതന്‍ കുമാര്‍ മീണ മുഖ്യപ്രഭാഷണം നടത്തും. തുടര്‍ന്ന് അതിജീവിതമാര്‍ അനുഭവങ്ങള്‍ പങ്കുവയ്ക്കും. ഉച്ചകഴിഞ്ഞ് രണ്ടു മുതല്‍ ഡിജിറ്റല്‍ മാര്‍ക്കറ്റിംഗിനെക്കുറിച്ചു ക്ലാസ്. തുടര്‍ന്ന് മാതംഗി സത്യമൂര്‍ത്തിയുടെ കര്‍ണാട്ടിക് മ്യൂസിക്. 20നു രാവിലെ ഒമ്പതിന് യോഗ ക്ലാസും യോഗ ഡെമോണ്‍സ്‌ട്രേഷനും. തുടര്‍ന്ന് സ്ത്രീയും മാനസിക ആരോഗ്യവും എന്ന വിഷയത്തില്‍ ക്ലാസും ചര്‍ച്ചയും- ഡോ. എം.കെ. അരുഷ്മ നേതൃത്വ നല്‍കും. വൈകുന്നേരം നടക്കുന്ന സമാപന സമ്മേളനത്തില്‍ ജില്ലാ പഞ്ചായത്ത് മുന്‍ പ്രസിഡന്‍റ് കെ.വി. ബിന്ദു അധ്യക്ഷത വഹിക്കും. കോട്ടയം മുനിസിപ്പല്‍ ചെയര്‍പേഴ്‌സണ്‍ ബിന്‍സി സെബാസ്റ്റ്യന്‍ മുഖ്യാതിഥിയായിരിക്കും. തുടര്‍ന്ന് വിവിധ കലാപരിപാടികളും അരങ്ങേറും. പത്രസമ്മേളനത്തില്‍ ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗര്‍, വൈസ് പ്രസിഡന്‍റ് ജോസ് പുത്തന്‍കാല, ജില്ലാ പഞ്ചായത്ത് അംഗം പി.എം. മാത്യു, ജില്ലാ വനിത ശിശു വികസന ഓഫീസര്‍ ടിജു റേച്ചല്‍ തോമസ് എന്നിവര്‍ പങ്കെടുത്തു.

വേമ്പനാട്ട് കായലില്‍ മത്സ്യ കണക്കെടുപ്പും പരിസ്ഥിതി സര്‍വേയും 26ന്

കോട്ടയം: അന്തര്‍ദേശീയ പ്രാധാന്യമുള്ള നീര്‍ത്തടമായ വേമ്പനാട് കായലില്‍ 26ന് വാര്‍ഷിക മത്സ്യ കണക്കെടുപ്പ് നടത്തും. മത്സ്യ ഇനങ്ങള്‍, മത്സ്യ ലഭ്യത എന്നിവ സംബന്ധിച്ച് പരിസ്ഥിതി സംഘടനകളായ അശോക ട്രസ്റ്റ് ഫോര്‍ റിസര്‍ച്ച് ഇന്‍ ഇക്കോളജി ആന്‍ഡ് എന്‍വയണ്‍മെന്‍റ്, കമ്യൂണിറ്റി എന്‍വയണ്‍മെന്‍റല്‍ റിസര്‍ച്ച് എന്നിവ സംസ്ഥാന തണ്ണീര്‍ത്തട അഥോറിറ്റിയുടെ സഹായത്തോടെയാണു കണക്കെടുക്കുന്നത്. ഗവേഷകരുടെയും വിദ്യാര്‍ഥികളുടെയും മത്സ്യത്തൊഴിലാളികളുടെയും പരിസ്ഥിതി പ്രവര്‍ത്തകരുടെയും സഹകരണത്തോടെയാണ് വിവിധ പ്രദേശങ്ങള്‍ കേന്ദ്രീകരിച്ചുള്ള സര്‍വേ. 26ന് വൈകുന്നേരം തണ്ണീര്‍മുക്കം കെടിഡിസിയില്‍ നടക്കുന്ന സമ്മേളനത്തില്‍ പ്രാഥമിക റിപ്പോര്‍ട്ടും കണ്ടെത്തലുകളും അവതരിപ്പിക്കും. കേരള യൂണിവേഴ്‌സിറ്റി ഓഫ് ഫിഷറീസ് ആന്‍ഡ് ഓഷ്യന്‍ സ്റ്റഡീസ് (കുഫോസ്) വൈസ് ചാന്‍സലര്‍ ഉദ്ഘാടനം ചെയ്യും. വേമ്പനാട്ട് കായലില്‍ മത്സ്യ ഇനങ്ങള്‍ വര്‍ധിച്ചതായാണു കഴിഞ്ഞ സര്‍വേ വ്യക്തമാക്കുന്നത്. 2023ല്‍ 41 ഇനം മത്സ്യങ്ങളെ കണ്ടെത്തിയ സ്ഥാനത്ത് കഴിഞ്ഞ വര്‍ഷം 85 ഇനങ്ങളെ കണ്ടെത്തി. ഇവയില്‍ 71 ഇനം ചിറകുമത്സ്യങ്ങളും 11 ഇനം തോടുമത്സ്യങ്ങളും ഉള്‍പ്പെടും. അതേസമയം മത്സ്യലഭ്യതയിലും മത്സ്യങ്ങളുടെ തൂക്കത്തിലും കുറവുവന്നു. 500-600 ഗ്രാം തൂക്കം ലഭിച്ചിരുന്ന ആറ്റുകൊഞ്ചിന്‍റെ ശരാശരി തൂക്കം 300 ഗ്രാമിലേക്കു കുറഞ്ഞു. കായല്‍ മലിനീകരണമാണു തൂക്കവും ലഭ്യതയും കുറയാന്‍ കാരണം. വിവിധയിനം വലകള്‍ ഉപയോഗിച്ചു നടത്തിയ കണക്കെടുപ്പില്‍ ഏറ്റവും ഇനങ്ങള്‍ ലഭിച്ചത് അറിഞ്ഞില്‍, പരല്‍ ഇനങ്ങളാണ്. കുട്ടനാട് ആര്‍ ബ്ലോക്കില്‍ പുല്ലന്‍ മത്സ്യം കൂടുതലായി കണ്ടെത്തിയിരുന്നു. മത്സ്യ സര്‍വേയ്ക്കു പുറമെ വെള്ളത്തിന്‍റെ ഗുണമേന്മ, താപനില, മലിനീകരണ തോത്, കളകള്‍, ജൈവസമ്പത്ത് തുടങ്ങിയവയുടെ കണക്കെടുപ്പും നൂറംഗ സംഘം നടത്തും.

വടംവലി മത്സരം; ജയിക്കാൻ‍ പലതുണ്ട് വിദ്യകൾ‍

ജെവിന്‍ കോട്ടൂര്‍ കോട്ടയം: ഫുട്‌ബോളും ക്രിക്കറ്റുംപോലെ നാട്ടിന്‍പുറങ്ങളില്‍ ആവേശമാണ് വടംവലി മത്സരം. ഓരോ പ്രദേശത്തുമുണ്ട് പ്രശസ്തമായ ഒരു വടംവലി ടീം. വടംവലിയാണ് ഓണക്കളിയിലെ കേമന്‍. ആണുങ്ങൾക്കൊപ്പം പെണ്ണുങ്ങളും വടംവലിക്കിറങ്ങാന്‍ മടിക്കാറില്ല. ക്ലബ്ബുകളും സ്ഥാപനങ്ങളും സംഘടനകളും പതിനായിരങ്ങൾ സമ്മാനത്തുകയുള്ള വടംവലി മത്സരം സംഘടിപ്പിക്കുന്നുണ്ട്. എണ്‍പതും നൂറും ടീമുകള്‍ അണിനിരക്കുന്ന വീറുറ്റ മത്സരം രണ്ടും മൂന്നും ദിവസം നീളുന്ന സാഹചര്യം. കൈയടിച്ചും ആര്‍ത്തുവിളിച്ചും വടംവലിക്കാര്‍ക്ക് ഉശിരുപകരുന്ന പരിശീലകരുടെ ശരീരഭാഷ കാണാന്‍ അതിലേറെ രസം. കൈയൂക്കും തടിമിടുക്കും മാത്രമല്ല, പതിയെ കയറിപ്പിടിക്കുന്ന ചുവടുകളും ആവേശ അനൗണ്‍സ്‌മെന്‍റും ഒന്നിച്ചെത്തുമ്പോഴാണ് വടംവലി മത്സരം അതിരുവിട്ടുകയറുന്നത്. ആരോഗ്യത്തിനൊപ്പം ബുദ്ധിയും ചടുലതയും ഒന്നിച്ചാണ് മത്സരത്തിലെ വിധി നിര്‍ണയിക്കുക. സംസ്ഥാനത്ത് 400ല്‍പ്പരം പ്രഫഷണല്‍ വടംവലി ക്ലബ്ബുകള്‍ പ്രവര്‍ത്തിക്കുന്നതായാണ് കണക്ക്. എല്ലാ ജില്ലകളിലും വടംവലി അസോസിയേഷനുകളും അവയുടെ പ്രവര്‍ത്തനങ്ങളും സജീവം. ഒരുലക്ഷം രൂപയും പോത്തുകുട്ടിയും വരെ ഒന്നാം സമ്മാനം നല്‍കുന്ന മത്സരങ്ങള്‍ കേരളത്തില്‍ നടക്കുന്നുണ്ട്. പ്രഫഷണല്‍ മത്സരങ്ങളില്‍ എതിര്‍ ടീമിനെ വലിച്ചു നിലംപൊത്തിക്കാന്‍ ചിലപ്പോള്‍ സമയമേറെ എടുക്കും. ക്ഷമയോടെ, കാത്തിരുന്ന് ചെറുചുവടുകളായി എതിര്‍ ടീമിനെ വരുതിയിലാക്കുന്നതാണ് വലിയ മത്സരങ്ങളിലെ പതിവു രീതി. ഇതാണ് കാഴ്ചക്കാരില്‍ ആവേശം നിറയ്ക്കുന്നത്. വടംവലി മത്സരത്തിലെ ഓരോ ടീമിലും ഏഴു പേരുണ്ടാകും. മത്സരത്തിനു വിവിധ ഭാര, വര്‍ഗീകരണങ്ങളുണ്ട്. കൂടാതെ ഏഴു പേരുടെയും ഭാരം അവര്‍ ഉള്‍പ്പെടുന്ന വിഭാഗം അനുസരിച്ച് നിര്‍ണയിക്കപ്പെടുന്നതിനേക്കാള്‍ കൂടുതലാകരുത്. ടീം അംഗങ്ങളുടെ ആകെ തൂക്കം പരമാവധി 450 മുതല്‍ 460 കിലോഗ്രാം വരെയായിരിക്കണം. പ്രഫഷണല്‍ ടീമുകള്‍ വമ്പന്‍ മത്സരങ്ങള്‍ക്കു പോകുമ്പോള്‍ കൂടുതല്‍ മത്സരാര്‍ഥികള്‍ ഉണ്ടാകും. അതില്‍നിന്നും നിശ്ചയിച്ചിരിക്കുന്ന ടീമംഗങ്ങളുടെ തൂക്കം കണക്കാക്കിയായിരിക്കും ഏഴു പേര്‍ വലിക്കാനിറങ്ങുക. അതേസമയം എട്ടു പേരടങ്ങുന്ന വടംവലി മത്സരവുമുണ്ട്. ഇതു മത്സരാര്‍ഥികള്‍ നേരെ നിന്നു വലിക്കുന്നതാണ്. ഈ മത്സരത്തില്‍ അംഗങ്ങളുടെ പരമാവധി ഭാരം 520 കിലോഗ്രാമാണ്. ഇരു ടീമുകളും ഒരു കോര്‍ട്ടില്‍ വടത്തിന് ഇരുവശത്തുമായി അണിനിരക്കും. വടത്തിന് സാധാരണമായി 10 സെന്‍റിമീറ്റര്‍ വ്യാസമുണ്ടാകും. വടത്തിന്‍റെ നടുവില്‍ അടയാളമായി നിറമുള്ള തൂവാല കെട്ടാറുണ്ട്. ഈ അടയാളത്തില്‍ നിന്നും മീറ്റര്‍ അകലത്തില്‍ ഇരുവശത്തേക്കും ഓരോ അടയാളങ്ങളും ഉണ്ടാകും. ഏത് ടീമാണോ എതിര്‍ ടീമിനെ ആദ്യം തങ്ങളുടെ വശത്തേക്കു വലിച്ച് വശങ്ങളിലെ അടയാളങ്ങളെ നടുവിലത്തെ വരയില്‍നിന്ന് ക്രോസ് ചെയ്യിപ്പിക്കുന്നത് അവരാണ് വിജയി. 1920 വരെ ഒളിമ്പിക്‌സില്‍ വടംവലി ഉള്‍പ്പെടുത്തിയിരുന്നെങ്കിലും പിന്നീട് നിരവധിയായ പ്രശ്‌നങ്ങളെ തുടര്‍ന്നും പങ്കെടുക്കുന്ന രാജ്യങ്ങളുടെ എണ്ണം കുറഞ്ഞതോടെയും ഒഴിവാക്കുകയായിരുന്നു. പരിശീലനം പ്രധാനം പ്രഫഷണല്‍ വടംവലി മത്സരങ്ങളില്‍ ടീമുകള്‍ പരിശീലനത്തിനു വലിയ പ്രാധാന്യം നല്കുന്നുണ്ട്. മാസങ്ങള്‍ക്കു മുന്‍പേ തൂക്കം കൃത്യമാക്കാനുള്ള ശ്രമവും പരിശീലനവും തുടങ്ങും. ഭക്ഷണം നിയന്ത്രിച്ചാലേ ഇതു സാധ്യമാകൂ. തോളിലേക്കു വടം ഇട്ടുള്ള വലിക്കാണ് ഏറെ പ്രചാരം. മത്സരക്കളത്തില്‍ ഹരിയാന എന്നാണ് ഇതിന്‍റെ പേര്. എല്ലാ ദിവസവും ടീമംഗങ്ങളുടെ തൂക്കം നോക്കിയാണു പരിശീലനം. ടീമിന്‍റെ ആകെ ഭാരം നിശ്ചിത പരിധിയില്‍നിന്നു 30 കിലോഗ്രാമില്‍ ഏറിയാല്‍ ഭക്ഷണക്രമം മാറും. തൂക്കം കൂടിയ ആള്‍ക്കു ഭക്ഷണം പരിമിതപ്പെടുത്തും. അവര്‍ക്കു ചോറ് ഒഴിവാക്കി ചപ്പാത്തി നല്‍കും. നോണ്‍ വെജിറ്റേറിയന്‍ വര്‍ജിക്കേണ്ടി വരും. ഉണക്കിയെടുക്കല്‍ എന്നാണ് ഇതിനു കളിക്കാര്‍ പറയുന്നത്. കൈക്കുഴയുടെയും കാല്‍ക്കുഴയുടെയും പേശികളുടെയും ബലം കൂട്ടാന്‍ പ്രത്യേകതരം വ്യായാമമുറകളുണ്ട്. കൊയ്‌ത്തൊഴിഞ്ഞ പാടത്തും തിരക്കില്ലാത്ത മണ്ണുറോഡിലും മൈതാനങ്ങളിലും വടംവലിച്ചുള്ള പഴയ രീതി മാറി. ഇപ്പോള്‍ ന്യൂജെന്‍ ഇനത്തില്‍ കാലുറപ്പിച്ച് നില്‍ക്കാന്‍ റെഡിമെയ്ഡ് ട്രാക്കുകള്‍ റെഡി.

പൊന്‍കുന്നം-തമ്പലക്കാട്-കപ്പാട് റോഡ് നവീകരണം ഇടവേളയില്ലാതെ പൂര്‍ത്തിയാക്കണമെന്ന് പ്രദേശവാസികൾ

കാഞ്ഞിരപ്പള്ളി: പൊന്‍കുന്നം-തമ്പലക്കാട്-കപ്പാട് റോഡ് നവീകരണം ഇടവേളയില്ലാതെ പൂര്‍ത്തിയാക്കണമെന്ന ആവശ്യവുമായി പ്രദേശവാസികൾ. ആറുമാസം മുന്പ് നവീകരണം നിലച്ച റോഡിന്‍റെ നിര്‍മാണം വീണ്ടും പുനരാരംഭിക്കാനിരിക്കെയാണ് പ്രദേശവാസികള്‍ ആവശ്യം ഉന്നയിച്ചത്. കാഞ്ഞിരപ്പള്ളി-ഈരാറ്റുപേട്ട റോഡില്‍നിന്ന് കപ്പാട് മുതല്‍ പൊന്‍കുന്നം വരെയുള്ള ഭാഗത്തെ എട്ടു കിലോമീറ്റര്‍ ദൂരത്തെ നവീകരണ പ്രവര്‍ത്തനങ്ങളാണ് മുടങ്ങിക്കിടക്കുന്നത്. നാട്ടുകാരുടെ പ്രതിഷേധത്തെത്തുടര്‍ന്ന് നിര്‍മാണം ആരംഭിച്ചെങ്കിലും നാലു മാസം മുന്പ് നിലച്ചു. പൊന്‍കുന്നത്ത് തുടങ്ങുന്ന ഒരു കിലോമീറ്റര്‍ ഭാഗവും തമ്പലക്കാട് മേഖലയില്‍ ചെറിയ ഭാഗങ്ങളിലായി ഇടയ്ക്കിടയ്ക്കുമായി കുറച്ച് ഭാഗങ്ങളാണ് ടാര്‍ ചെയ്തിരിക്കുന്നത്. ഇതില്‍ തമ്പലക്കാട് ഷാപ്പ്പടി-കപ്പാട് റോഡില്‍ ഒരു കിലോമീറ്ററോളം ദൂരം ഒരു വശം മാത്രമാണ് ടാര്‍ ചെയ്തിരിക്കുന്നത്. പദ്ധതിക്കായി 2022-23 ബജറ്റില്‍ ഒരു കോടി രൂപയും 2024ല്‍ 1.75 കോടി രൂപയും വകയിരുത്തിയതായി അധികൃതര്‍ അറിയിച്ചിരുന്നു. വൻ കുഴികളായിരുന്ന ഭാഗത്ത് ടാറിംഗ് ചെയ്യുന്നതിനായി മെറ്റല്‍ നിരത്തിയെങ്കിലും ടാറിംഗ് നിലച്ചതോടെ ഇവ ഇളകിപ്പോയിത്തുടങ്ങിയിരുന്നു. ഇവ വീണ്ടും മെറ്റലിട്ട് മൂടിയിട്ടുണ്ട്. ദേശീയപാത വഴി എത്തുന്ന വാഹനങ്ങള്‍ക്ക് കാഞ്ഞിരപ്പള്ളി ടൗണില്‍ പ്രവേശിക്കാതെ പൊന്‍കുന്നത്തുനിന്ന് കപ്പാട് എത്തി ഈരാറ്റുപേട്ട ഭാഗത്തേക്കു പോകാന്‍ കഴിയുന്ന എളുപ്പ വഴി കൂടിയാണിത്. ഇനിയും ഘട്ടം ഘട്ടമായി നിര്‍മാണം നടത്താതെ എത്രയും വേഗം റോഡ് സഞ്ചാരയോഗ്യമാക്കണമെന്നാണ് നാട്ടുകാരുടെ ആവശ്യം.

പൈക തിയറ്റർപ്പടി-ഉരുളികുന്നം ഭജനമന്ദിരം റോഡ് പുനർനിർമാണം തുടങ്ങി

എലിക്കുളം: പഞ്ചായത്ത് ഒന്നാം വാർഡിലെ പൈക തീയറ്റർപ്പടി-ഉരുളികുന്നം ഭജനമന്ദിരം റോഡിന്‍റെ നവീകരണം തുടങ്ങി. കയറ്റവും വീതിക്കുറവും മൂലം യാത്രാദുരിതമേറെയായിരുന്ന റോഡിന്‍റെ വികസനം പ്രദേശവാസികൾക്ക് ഗുണമാകും. പഞ്ചായത്ത് ഫണ്ട് 9.50 ലക്ഷം രൂപയും ജോസ് കെ. മാണി എംപിയുടെ ഫണ്ട് അഞ്ചുലക്ഷം രൂപയും വിനിയോഗിച്ചാണ് നിർമാണം. ഇടപ്പാടി കയറ്റം കുറച്ച് വീതികൂട്ടി നിർമാണം നടത്തുകയാണ്. റോഡരികിലെ സ്ഥലം കൂടി വികസനത്തിന് ലഭിച്ചതോടെ വീതി കൂട്ടുന്നതിന്‍റെയും കയറ്റം കുറയ്ക്കുന്നതിന്‍റെയും ജോലികൾ അവസാന ഘട്ടത്തിലായി. ഏതാനും ദിവസങ്ങൾക്കുള്ളിൽ കോൺക്രീറ്റിംഗ് നടത്തുമെന്ന് വാർഡംഗം സിനി ജോയി അറിയിച്ചു. ഒന്നര കിലോമീറ്റർ ദൂരമുള്ള റോഡിന്‍റെ പൊളിഞ്ഞ മറ്റു ഭാഗങ്ങൾ മുമ്പ് പുനർനിർമിച്ചിരുന്നു.

തിലകന്‍റെ പേര് മോശമാക്കാൻ ഒരു പാർക്കും ലേക്കും!

മുണ്ടക്കയം ഈസ്റ്റ്‌: മഹാനടൻ തിലകന്‍റെ സ്മരണയ്ക്കായി ജന്മനാടായ മണിക്കല്ലിൽ നിർമിച്ച തിലകൻ സ്മാരക ലേക്ക് ആൻഡ് പാർക്ക് നാശത്തിന്‍റെ വക്കിൽ. ഉൾനാടൻ ടൂറിസം സാധ്യത തുറക്കുന്നതായിരുന്നു പെരുവന്താനം പഞ്ചായത്തിലെ മണിക്കല്ലിൽ ആരംഭിച്ച തിലകൻ സ്മാരക ലേക്ക് ആൻഡ് പാർക്ക്. മണിക്കൽ റബർ എസ്റ്റേറ്റിലെ ജീവനക്കാരനായിരുന്നു തിലകന്‍റെ പിതാവ്. തിലകൻ പ്രാഥമിക വിദ്യാഭ്യാസം നടത്തിയതും നാടകാഭിനയത്തിന് തുടക്കംകുറിച്ചതും മണിക്കലിലാണ്. തുടക്കം ഗംഭീരം പെരുവന്താനം പഞ്ചായത്ത് 1.15 കോടി രൂപ ചെലവഴിച്ചാണ് പാർക്ക് നിർമിച്ചത്. 2020 സെപ്റ്റംബർ 14ന് അന്നത്തെ എൽഡിഎഫ് ഭരണസമിതിയാണ് പാർക്ക് തുറന്നത്. ഓപ്പൺ തിയറ്റർ, കൊട്ടവഞ്ചി, ഇരിപ്പിടങ്ങൾ, പെഡൽ ബോട്ട് എന്നിവ ഒരുക്കി. കൂടാതെ സ്ത്രീകൾക്കും പുരുഷന്മാർക്കും ടോയ്‌ലറ്റ് സൗകര്യവും കോഫിഷോപ്പും ഉണ്ടായിരുന്നു. ഓരോ ദിവസവും നൂറുകണക്കിന് ആളുകളാണ് പാർക്കിലെത്തി ആസ്വദിച്ച് മടങ്ങിയിരുന്നത്. മൂന്നു സിനിമകളുടെ ഷൂട്ടിംഗ് ലൊക്കേഷനായും പാർക്ക് മാറി. പ്രധാന ടൂറിസ്റ്റ് കേന്ദ്രമായ പാഞ്ചാലിമേട്ടിലേക്കുള്ള യാത്രയിൽ പല ആളുകളും വിശ്രമകേന്ദ്രമായി മണിക്കൽ പാർക്ക് തെരഞ്ഞെടുത്തു. ഇതോടെ മാണിക്കൽ പാർക്കിനു പ്രസിദ്ധിയും ലഭിച്ചു. ഉപേക്ഷിക്കപ്പെട്ടപ്പോൾ ആദ്യ സമയത്തു പ്രവേശന ഫീസ് ഇനത്തിൽ പ്രതിദിനം 8,500 രൂപ വരെ ലഭിച്ചിരുന്നു. തദ്ദേശീയരായ അഞ്ചു പേർക്ക് ജോലിയും നൽകി. എന്നാൽ, ഒരു വർഷം പിന്നിടും മുമ്പേ കോവിഡ് നിയന്ത്രണങ്ങളുടെ ഭാഗമായി പാർക്ക് അടച്ചു. പിന്നീടുവന്ന യുഡിഎഫ് പെരുവന്താനം പഞ്ചായത്ത് ഭരണസമിതി പാർക്ക് തുറന്നു പ്രവർത്തിക്കാൻ നടപടി സ്വീകരിച്ചില്ല. ഇതിനെതിരേ വലിയ വിമർശനം ഉയർന്നു. ഇതോടെ സ്വകാര്യ വ്യക്തിക്ക് കരാർ അടിസ്ഥാനത്തിൽ പാർക്കിന്‍റെ ചുമതല നൽകാൻ നീക്കമുണ്ടായി. എന്നാൽ, പ്രതിഷേധം ഉയർന്നതോടെ ഇതു നിലച്ചു. പാർക്ക് തുറക്കുമെന്നു നിലവിലെ ഭരണസമിതി നിരവധി തവണ പ്രഖ്യാപനം നടത്തിയെങ്കിലും ഒന്നുമുണ്ടായില്ല. നിലച്ചിട്ട് അഞ്ചു വർഷം; ലക്ഷങ്ങളുടെ മുതൽ പാർക്കിന്‍റെ പ്രവർത്തനം നിലച്ചിട്ട് അഞ്ചു വർഷം. കൊട്ടവഞ്ചിയും ബോട്ടുകളുമെല്ലാം തുരുമ്പെടുത്തു നശിക്കുന്നു. ലക്ഷങ്ങൾ മുടക്കി പണിത കെട്ടിടവും വെറുതേ കിടന്നു നശിക്കുന്നു. പാർക്കിലെ ഇരിപ്പിടങ്ങളും പൂന്തോട്ടവുമെല്ലാം കാടുകയറി. പൊതുഖജനാവിൽനിന്ന് ഒന്നേകാൽ കോടിയോളം രൂപ മുടക്കി നിർമിച്ച പാർക്കും അനുബന്ധ സൗകര്യങ്ങളും വെറുതേ കിടന്നു നശിക്കാൻ കാരണം രാഷ്‌ട്രീയപ്പോര് തന്നെ. ഇടതുമുന്നണി കൊണ്ടുവന്ന പദ്ധതി പഞ്ചായത്ത് നേരിട്ടാണ് നടത്തിയിരുന്നത്. ഇതിനായി താത്കാലിക ജീവനക്കാരെയും നിയോഗിച്ചിരുന്നു. പിന്നീട് വന്ന യുഡിഎഫ് ഭരണസമിതി നിലവിൽ ഉണ്ടായിരുന്ന താത്കാലിക ജീവനക്കാരെ മാറ്റി കരാറടിസ്ഥാനത്തിൽ സ്വകാര്യ വ്യക്തിക്കു നടത്തിപ്പ് കൊടുക്കാൻ തീരുമാനിച്ചതോടെയാണ് പോരു തുടങ്ങിയത്. പാർക്ക് തുറന്നു പ്രവർത്തിച്ചാൽ മുൻ എൽഡിഎഫ് ഭരണസമിതി ഇതിന്‍റെ നേട്ടം കൊയ്യുമെന്ന രാഷ്‌ട്രീയ നിലപാടാണ് പിന്നീട് വന്ന യുഡിഎഫ് ഭരണസമിതി ഇതു തുറക്കാൻ മുൻകൈയെടുക്കാത്തതിനു കാരണമെന്നു നാട്ടുകാർ കുറ്റപ്പെടുത്തുന്നു. ഏകയവും കയത്തിൽ മണിക്കൽ ലേക്ക് ആൻഡ് പാർക്ക് പദ്ധതിക്ക് ഒപ്പം പെരുവന്താനം പഞ്ചായത്തിൽ കൊണ്ടുവന്ന മറ്റൊരു പ്രധാന പദ്ധതിയായിരുന്നു ഏകയം ടൂറിസം പദ്ധതി. മുൻ പഞ്ചായത്ത് പ്രസിഡന്‍റ് കെ.ടി. ബിനുവിന്‍റെ നേതൃത്വത്തിലായിരുന്നു പാഞ്ചാലിമേട് ടൂറിസ്റ്റ് കേന്ദ്രത്തിനൊപ്പം ഏകയം ടൂറിസം പദ്ധതിയും ആവിഷ്കരിച്ചത്. പുലിമുരുകൻ അടക്കമുള്ള പ്രധാന സിനിമകളുടെ ലൊക്കേഷനായ ഇവിടം ടൂറിസത്തിന്‍റെ അനന്ത സാധ്യതകൾ നിലനിൽക്കുന്ന പ്രദേശമാണ്. എന്നാൽ, ഇവിടെ വലിയ ടൂറിസം പദ്ധതി വിഭാവനം ചെയ്തെങ്കിലും പിന്നീട് വന്ന ഭരണസമിതി ഇതിനുവേണ്ടി ഒന്നും ചെയ്തില്ല.

ഉഴവൂർ കോളജ് വോളി: മാള ഹോളിഗ്രെയ്സും ചങ്ങനാശേരി അസംപ്ഷനും ജേതാക്കൾ

ഉഴവൂർ: സെന്‍റ് സ്റ്റീഫൻസ് കോളജിന്‍റെ നേതൃത്വത്തിലുള്ള ഇന്‍റർ കൊളീജിയറ്റ് വോളിബോളിൽ പുരുഷ വിഭാഗത്തിൽ മാള ഹോളിഗ്രെയ്സ് കോളജും വനിതാ വിഭാഗത്തിൽ ചങ്ങനാശേരി അസംപ്ഷൻ കോളജും ജേതാക്കളായി. 22-25, 25-23, 25-22, 27-25 എന്ന സ്‌കോറിന് എസ്എൻജി കോളജ് ചേലന്നൂരിനെ തോൽപ്പിച്ചാണ് ഹോളിഗ്രെയ്സ് കോളജ് 35-ാമത് ബിഷപ് തറയിൽ മെമ്മോറിയൽ ട്രോഫിയിൽ മുത്തമിട്ടത്. പാലാ അൽഫോൻസ കോളജിനെ നേരിട്ടുള്ള ഗെയിമുകൾക്ക് അടിയറവു പറയിച്ചാണ് അസംപ്ഷൻ കോളജ് വനിതാ വിഭാഗത്തിൽ സിസ്റ്റർ ഗോരേത്തി മെമ്മോറിയൽ ട്രോഫി നേടിയത്. സ്‌കോർ: 25-22, 25-22, 25-16. സമാപന സമ്മേളനത്തിൽ പ്രിൻസിപ്പൽ ഡോ. സിൻസി ജോസഫ് അധ്യക്ഷത വഹിച്ചു. പൂർവവിദ്യാർഥിയും വോളിബോൾ മുൻ ദേശീയതാരവുമായിരുന്ന പോലീസ് സർക്കിൾ ഇൻസ്പെക്ടർ ജിജോ ജോർജ് വിജയികൾക്ക് ട്രോഫികൾ വിതരണം ചെയ്തു. പഞ്ചായത്ത് പ്രസിഡന്‍റ് ഇൻ ചാർജ് കെ.എം. തങ്കച്ചൻ, മുൻ പ്രിൻസിപ്പൽ ഡോ. സ്റ്റീഫൻ മാത്യൂസ്, ടൂർണമെന്‍റ് കൺവീനർ ക്യാപ്റ്റൻ ജെയ്സ് കുര്യൻ, കായികവിഭാഗം മേധാവിയും ടൂർണമെന്‍റ് സെക്രട്ടറിയുമായ ഡോ. മാത്യൂസ് ഏബ്രഹാം എന്നിവർ പ്രസംഗിച്ചു. ഇന്നും നാളെയുമായി 18-ാമത് ബിഷപ് കുന്നശേരി മെമ്മോറിയൽ ഫുട്‌ബോൾ ടൂർണമെന്‍റും പത്താമത് ഗോൾഡൻ ജൂബിലി മെമ്മോറിയൽ ടൂർണമെന്‍റും നടക്കും.

ഉഴവൂർ കെ.ആർ. നാരായണൻ ആശുപത്രിയിൽ ഇ-ഹെൽത്ത് പദ്ധതിക്ക് തുടക്കം

ഉഴവൂർ: ഡോ. കെ.ആർ. നാരായണൻ സ്മാരക സ്‌പെഷാലിറ്റി ആശുപത്രിയിൽ ഇ-ഹെൽത്ത് പദ്ധതിക്കു തുടക്കമായി. ബ്ലോക്ക് പഞ്ചായത്ത് പ്രസിഡന്‍റ് രാജു ജോൺ ചിറ്റേത്ത് ഉദ്ഘാടനം നിർവഹിച്ചു. യുഎച്ച്‌ഐഡി കാർഡുകളും വിതരണം ചെയ്തു. പുതിയ പദ്ധതി യാഥാർഥ്യമായതോടെ ഒപി ടിക്കറ്റ് കൗണ്ടർ പൂർണമായും കംപ്യൂട്ടർവത്കരിച്ചു. ബ്ലോക്ക് പഞ്ചായത്ത് വൈസ് പ്രസിഡന്‍റ് ഡോ. സിന്ധുമോൾ ജേക്കബ് അധ്യക്ഷത വഹിച്ചു. പി.എൻ. രാമചന്ദ്രൻ, കെ.എം. തങ്കച്ചൻ, ഡോ. സി.ജെ. സിതാര, ബൈജു ജോൺ, ഷെറി മാത്യു, വിനോദ് പുളിക്കനിരപ്പേൽ, ഡോ. റെക്സൺ പോൾ, ഡോ. വിപിൻ മോഹൻ, പി. പ്രിയ, രാജേഷ് രാജൻ എന്നിവർ പ്രസംഗിച്ചു.

സെന്‍റ് ജോസഫ്‌സ് കോളജില്‍ അസ്ത്ര ഫെസ്റ്റ്

പാലാ: ദേശീയതല ടെക്‌നിക്കല്‍ ഫെസ്റ്റ് "അസ്ത്ര' 19, 20 തീയതികളില്‍ ചൂണ്ടച്ചേരി സെന്‍റ് ജോസഫ്‌സ് എന്‍ജിനിയറിംഗ് കോളജില്‍ നടത്തും. ടെക്‌നിക്കല്‍, ജനറല്‍, ഇന്‍ഫോര്‍മല്‍ എന്നീ വിഭാഗങ്ങളിലായി വിവിധ മത്സരങ്ങള്‍ ഉള്‍പ്പെടുത്തിയിരിക്കുന്ന ഈ പരിപാടി രാജ്യത്തിന്‍റെ വിവിധ ഭാഗങ്ങളില്‍നിന്നുള്ള വിദ്യാര്‍ഥികളുടെ പങ്കാളിത്തം കൊണ്ട് ശ്രദ്ധേയമാണ്. ഇതിനകം തന്നെ നൂറിലധികം രജിസ്‌ട്രേഷനുകള്‍ ലഭിച്ചതായി സംഘാടകര്‍ പറഞ്ഞു. പുതുതായി ഉള്‍പ്പെടുത്തിയിട്ടുള്ള ടീം-ബേസ്ഡ് ഇവന്‍റുകള്‍ മത്സരാര്‍ഥികളില്‍ സഹകരണം, സൃഷ്ടിപരമായ ചിന്ത, പ്രശ്‌നപരിഹാര ശേഷി എന്നിവ വളര്‍ത്തുന്നതിനും പ്രോത്സാഹിപ്പിക്കുന്നതിനും സഹായകരമായിരിക്കും. ദേശീയ ടെക് ഫെസ്റ്റായ അസ്ത്ര വിദ്യാര്‍ഥികള്‍ക്ക് അവരുടെ കഴിവുകള്‍ പ്രകടിപ്പിക്കാനും ആശയങ്ങള്‍ കൈമാറാനും സഹപാഠികളുമായും വ്യവസായ വിദഗ്ധരുമായും ബന്ധം സ്ഥാപിക്കാനും ഒരു മികച്ച വേദിയായി മാറുന്നുവെന്നും രജിസ്‌ട്രേഷന്‍ www.asthra.sjcet.in എന്ന വെബ്സൈറ്റ് വഴി ചെയ്യാമെന്നും ഡോ. അനുജ ജോര്‍ജ്, ആഷ്‌ലി തോമസ്, ഡോ. നേവി ജോര്‍ജ്, ജോബി ജോര്‍ജ് എന്നിവര്‍ പറഞ്ഞു.

മിനിസ്റ്റേഴ്സ് എക്‌സലന്‍സ് അവാര്‍ഡ്

അരുവിത്തുറ സെന്‍റ് ജോർജ് കോളജ് അരുവിത്തുറ: ഉന്നത വിദ്യാഭ്യാസ രംഗത്തെ മികവിന്‍റെ നിറവിന് അരുവിത്തുറ സെന്‍റ് ജോർജ് കോളജ് സംസ്ഥാന സർക്കാർ പുരസ്കാരം നേടി. നാക് റീ അക്രഡിറ്റേഷന്‍റെ പുതിയ മാനദണ്ഡങ്ങൾ അനുസരിച്ച് ജില്ലയിൽ ആദ്യമായി ഏഴുവർഷം കലാവധിയോടെ എ പ്ലസ് പ്ലസ് അംഗീകാരം നേടിയതും അന്താരാഷ്‌ട്ര നിലവാരമുള്ള കാമ്പസും പഠനസൗകര്യങ്ങളും നാക് നിർദേശിക്കുന്ന ഏഴിന യോഗ്യതകളും പരിപൂർണമായും നടപ്പിലാക്കിയതും പരിഗണിച്ചാണ് ഉന്നത വിദ്യാഭ്യാസ വകുപ്പിന്‍റെ മിനിസ്റ്റേഴ്സ് എക്സലൻസ് അവാർഡ് കോളജ് നേടിയത്. തിരുവനന്തപുരം ടാഗോർ തിയറ്ററിൽ നടന്ന ചടങ്ങിൽ ഉന്നത വിദ്യാഭ്യാസ വകുപ്പുമന്ത്രി ഡോ. ആർ. ബിന്ദുവിൽനിന്നു കോളജ് വൈസ് പ്രിൻസിപ്പൽ ഡോ. ജിലു ആനി ജോൺ, ബർസാർ ആൻഡ് കോഴ്സ് കോ-ഓർഡിനേറ്റർ ഫാ. ബിജു കുന്നക്കാട്ട്, ഐക്യുഎസി കോ-ഓർഡിനേറ്റർ ഡോ. സുമേഷ് ജോർജ്, നാക് കോ-ഓർ‌ഡിനേറ്റർ ഡോ. മിഥുൻ ജോൺ, അനധ്യാപക പ്രതിനിധി ബെഞ്ജിത്ത് സേവ്യർ തുടങ്ങിയവർ ചേർന്ന് പുരസ്കാരം ഏറ്റുവാങ്ങി. പാലാ സെന്‍റ് തോമസ് കോളജ് ഓഫ് ടീച്ചര്‍ എഡ്യൂക്കേഷൻ പാലാ: ഉന്നത വിദ്യാഭ്യാസ വകുപ്പിന്‍റെ കീഴില്‍ പ്രവര്‍ത്തിക്കുന്ന കോളജുകളില്‍ ദേശീയ തലത്തില്‍ ഉയര്‍ന്ന നിലവാരം പുലര്‍ത്തുന്ന കോളജുകള്‍ക്ക് ഏര്‍പ്പെടുത്തിയ മിനിസ്റ്റേഴ്സ് ഏക്‌സലന്‍സ് അവാര്‍ഡ് പാലാ സെന്‍റ് തോമസ് കോളജ് ഓഫ് ടീച്ചര്‍ എഡ്യൂക്കേഷന് ലഭിച്ചു.തിരുവനന്തപുരം ടാഗോര്‍ തിയറ്ററില്‍ നടന്ന ചടങ്ങില്‍ ഉന്നത വിദ്യാഭ്യാസ വകുപ്പുമന്ത്രി ഡോ. ആര്‍. ബിന്ദുവില്‍ നിന്ന് പ്രിന്‍സിപ്പല്‍ പ്രഫ. ടി.സി. തങ്കച്ചന്‍, ഐക്യുഎസി കോ-ഓര്‍ഡിനേറ്ററും വൈസ് പ്രിന്‍സിപ്പലുമായ ഡോ. ലവിന ഡൊമിനിക് എന്നിവര്‍ ചേര്‍ന്ന് പുരസ്‌കാരം ഏറ്റുവാങ്ങി നാക് അക്രഡിറ്റേഷനിലെ നാലാമത്തെ സൈക്കിളില്‍ 3.35 പോയിന്‍റോടെ എ പ്ലസ് ഗ്രേഡ് ലഭിച്ചു. കേരളത്തിലെ അധ്യാപക പരിശീലന കേന്ദ്രങ്ങളില്‍ ഏറ്റവും ഉയര്‍ന്ന അംഗീകാരമാണിത്. അതോടൊപ്പം കേരള ഇന്‍സ്റ്റിറ്റ്യൂഷണല്‍ റാങ്ക് ഫ്രെയിംവര്‍ക്കില്‍ ആറാം സ്ഥാനമുള്ള കോളജ് മഹാത്മാഗാന്ധി യൂണിവേഴ്സിറ്റിയുടെ കിഴിലുള്ള അംഗീകൃത ഗവേഷണകേന്ദ്രം കൂടിയാണ്.

മഞ്ഞപ്പിത്തം: വലവൂര്‍ ഐഐഐടിയില്‍ പരിശോധന

പാലാ: വിദ്യാര്‍ഥികളില്‍ മഞ്ഞപ്പിത്തം വ്യാപകമായതിനെത്തുടര്‍ന്ന് പഠനം നിര്‍ത്തിവച്ച വലവൂരിലെ ട്രിപ്പിള്‍ ഐഐടി കാമ്പസില്‍ വിവിധ വകുപ്പ് അധികൃതരുടെ നേതൃത്വത്തില്‍ പരിശോധന നടത്തി. കോട്ടയത്തുനിന്നെത്തിയ ഡെപ്യൂട്ടി ഡിഎംഒ ഡോ. ജെസി പരിശോധനകള്‍ക്കു നേതൃത്വം നല്‍കി. കാമ്പസിലെ കുടിവെള്ള വിതരണ സംവിധാനങ്ങള്‍ പരിശോധിച്ച് സാമ്പിളുകളെടുത്തു. റവന്യൂ, പഞ്ചായത്ത്, ഭക്ഷ്യസുരക്ഷാ വകുപ്പ്, പൊലൂഷന്‍ കണ്‍ട്രോള്‍ ഉദ്യോഗസ്ഥര്‍ തുടങ്ങി‍യവർ പരിശോധനാ സംഘത്തിലുണ്ടായിരുന്നു. ജില്ലാ കളക്‌ടറുടെ നിര്‍ദേശപ്രകാരമാണ് ഉദ്യോഗസ്ഥസംഘം പരിശോധന നടത്തിയത്. ശൗചാലയ സംവിധാനങ്ങളും കാമ്പസിലെ ഹോസ്റ്റലുകളും സംഘം പരിശോധിച്ചു. എടുത്ത സാമ്പിളുകളുടെ പരിശോധനാഫലം വന്നതിനു ശേഷമേ രോഗം വ്യാപകമായതു സംബന്ധിച്ച് കൃത്യമായ നിഗമനത്തിലെത്താൻ കഴിയൂയെന്ന് ആരോഗ്യവകുപ്പ് ജീവനക്കാര്‍ പറഞ്ഞു. ഇന്നും പരിശോധനകള്‍ തുടരും. ഹോസ്റ്റലുകളും പരിശോധിക്കും അതേസമയം, കാമ്പസിനു പുറത്തു വിദ്യാര്‍ഥികള്‍ കൂടുതലായി താമസിക്കുന്ന സ്വകാര്യ ഹോസ്റ്റലുകളിലും പരിശോധന നടത്തണമെന്നു നാട്ടുകാര്‍ ആവശ്യപ്പെട്ടു. ചില ഹോസ്റ്റലുകളില്‍ 200ലധികം വിദ്യാര്‍ഥികള്‍ താമസിക്കുന്നുണ്ട്. സ്വകാര്യ ഹോസ്റ്റലുകളിലെ കുടിവെള്ള സ്രോതസുകള്‍, മാലിന്യ സംസ്‌കരണം എന്നിവ സംബന്ധിച്ച് മുമ്പും പരാതികള്‍ ഉയര്‍ന്നിരുന്നു. ഒക്ടോബര്‍ 16 വരെയാണ് കാമ്പസിന് അവധി നല്‍കിയിരിക്കുന്നത്.

കെ.എം. മാണി കാന്‍സര്‍ സെന്‍റര്‍ റേഡിയേഷന്‍ ബ്ലോക്കിന് തറക്കല്ലിട്ടു

പാലാ: റേഡിയേഷന്‍ ഓങ്കാളജി ബ്ലോക്കിനു പാലാ കെ.എം. മാണി സ്മാരക ഗവ. ജനറല്‍ ആശുപത്രിയില്‍ തറക്കല്ലിട്ടു. ഇന്നലെ ആശുപത്രി അങ്കണത്തില്‍ നടന്ന ചടങ്ങില്‍ ജോസ് കെ. മാണി എംപിയാണ് ശിലാസ്ഥാപനം നടത്തി. എംപി ഫണ്ടില്‍നിന്ന് അനുവദിച്ച 2.45 കോടി രൂപ വിനിയോഗിച്ചാണ് കെട്ടിടം നിര്‍മിക്കുന്നത്. വര്‍ധിച്ചുവരുന്ന കാന്‍സര്‍ രോഗം കണ്ടെത്തി മുന്‍കൂട്ടി പ്രതിരോധിക്കാനും ചെലവേറിയ ചികിത്സകളില്‍നിന്നു മോചനവും ലക്ഷ്യമാക്കി പ്രദേശിക തലത്തില്‍ ആദ്യമായാണ് ഇങ്ങനെ ഒരു സമഗ്ര പദ്ധതി തയാറാക്കുന്നതെന്ന് അദ്ദേഹം പറഞ്ഞു. ശിലാസ്ഥാപനച്ചടങ്ങില്‍ നഗരസഭാ ചെയര്‍പേഴ്‌സണ്‍ തോമസ് പീറ്റര്‍ അധ്യക്ഷത വഹിച്ചു. വൈസ് ചെയര്‍പേഴ്‌സണ്‍ ബിജി ജോജോ, ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗര്‍, ജോസ് പുത്തന്‍കാലാ, രാജേഷ് വാളിപ്ലാക്കല്‍, ഡോ. ടി.പി. അഭിലാഷ്, ഡോ. വാസ് സുകുമാരന്‍, ലിസിക്കുട്ടി മാത്യു, ഡോ. അന്‍സാര്‍ മുഹമ്മദ്, ഡോ. പി.എസ്. ശബരീനാഥ്, ജയ്‌സണ്‍ മാന്തോട്ടം തുടങ്ങിയവര്‍ പ്രസംഗിച്ചു.

യുവജാഗരൺ കലാജാഥയ്ക്ക് അരുവിത്തുറ കോളജിൽ സ്വീകരണം

അരുവിത്തുറ: നാഷണൽ സർവീസ് സ്കീമിന്‍റെയും സംസ്ഥാന എയ്ഡ്സ് കൺട്രോൾ സൊസൈറ്റിയുടെയും കെഎസ്ആർടിസിയുടെയും ആഭിമുഖ്യത്തിൽ സംഘടിപ്പിച്ച യുവജാഗരൺ കലാജാഥയ്ക്കും എയ്ഡ്സ് ബോധവത്കരണ കാക്കാരശി നാടകത്തിനും അരുവിത്തുറ സെന്‍റ് ജോർജ് കോളജിൽ സ്വീകരണം നൽകി. സമഗ്ര ആരോഗ്യ സുരക്ഷാ കാമ്പയിന്‍റെയും എയ്ഡ്സ് ബോധവത്കരണത്തിന്‍റെയും ഭാഗമായാണ് യാത്ര സംഘടിപ്പിച്ചത്. ബോധവത്കരണ പരിപാടി സെന്‍റ് ജോർജസ് കോളജ് ബർസാർ റവ.ഫാ. ബിജു കുന്നയ്ക്കാട്ട് ഉദ്ഘാടനം ചെയ്തു. ചടങ്ങിൽ വൈസ് പ്രിൻസിപ്പൽ ഡോ. ജിലു ആനി ജോൺ, എൻഎസ്എസ് പ്രോഗ്രാം ഓഫീസർമാരായ ഡോ. ഡെന്നി തോമസ്, മരിയ ജോസ് എന്നിവർ പ്രസംഗിച്ചു. വോളന്‍റിയർ സെക്രട്ടറിമാരായ നിർമ്മൽ പ്രകാശ്, ഏയ്ഞ്ചൽ മരിയ ജോസ്, അബിനേഷ് രാജേഷ്, ജ്വാല അന്ന ജോർജ് എന്നിവർ നേതൃത്വം നൽകി. എയ്ഡ്സ് രോഗത്തിന്‍റെ കാരണങ്ങൾ, രോഗാവസ്ഥ, മുൻ കരുതലുകൾ, ചികിത്സ തുടങ്ങിയ വിഷയങ്ങൾ പരാമർശിക്കുന്ന കാക്കാശേരി നാടകം വിദ്യാർഥികൾക്ക് പുതിയ അനുഭവമായി.

ചെമ്പിന്‍റെ ഫോട്ടോഗ്രഫർ വിജയന്‍റെ ജീവൻ രക്ഷിക്കാൻ ഗ്രാമം കൈകോർക്കും

വൈക്കം: ചെമ്പിന്‍റെ ഗ്രാമകാഴ്ചകളും കായൽ മനോഹാരിതയും ഒപ്പിയെടുത്ത് നിരവധി അവാർഡുകൾ വാരിക്കൂട്ടിയ ചെമ്പിന്‍റെ പ്രിയഫോട്ടോഗ്രഫർ കെ.ബി. വിജയന്‍റെ ചികിത്സയ്ക്കായി ചെമ്പ് ഗ്രാമംകൈകോർക്കുന്നു. രക്താർബുദബാധയെത്തുടർന്നു ചികിത്സയ്ക്കു വിധേയനായ വിജയന് രക്താർബുദത്തെ തത്കാലത്തേക്കു പ്രതിരോധിക്കാനായെങ്കിലും രോഗം പൂർണമായി മാറ്റണമെങ്കിൽ മജ്ജ മാറ്റിവയ്ക്കേണ്ടത് അനിവാര്യമാണെന്നു ഡോക്ടർ പറഞ്ഞു. തികച്ചും നിർധനനായ വിജയന് കൂട്ടായി ഭാര്യ മാത്രമേയുള്ളൂ. മജ്ജമാറ്റിവയ്ക്കൽ ശസ്ത്രക്രിയയ്ക്കായി ലക്ഷങ്ങൾ ചെലവുവരും. ചെമ്പിന്‍റെ ഖ്യാതി പുറംലോകത്തെത്തിച്ച കലാകാരന്‍റെ ജീവൻ തിരിച്ചുപിടിക്കാൻ സുമനസുകളുടെ സഹായം തേടാൻ ചികിത്സാ സഹായനിധി രൂപീകരിക്കാൻ ശ്രമം നടന്നുവരികയാണെന്നു പഞ്ചായത്ത് പ്രസിഡന്‍റ് സുകന്യ സുകുമാരൻ, വൈസ് പ്രസിഡന്‍റ് കെ.കെ. രമേശൻ എന്നിവർ പറഞ്ഞു. K.B. vijayan, A/C No. 2013962108, IFSC CODE. CBIN0280958.

കേരള ഭാഗ്യക്കുറി സംരക്ഷണ സമിതി സമരപ്രഖ്യാപന കണ്‍വന്‍ഷന്‍

കോട്ടയം: ലോട്ടറിയുടെ ജിഎസ്ടി 40 ശതമാനമായി വര്‍ധിപ്പിക്കാനുള്ള തീരുമാനത്തില്‍നിന്നു കേന്ദ്രസര്‍ക്കാര്‍ പിന്തിരിയണമെന്നു കേരള ഭാഗ്യക്കുറി സംരക്ഷണ സമിതി സംസ്ഥാന സമരപ്രഖ്യാപന കണ്‍വന്‍ഷന്‍ കേന്ദ്രസര്‍ക്കാരിനോടാവശ്യപ്പെട്ടു. നിലവില്‍ ലോട്ടറിക്ക് ജിഎസ്ടി 28 ശതമാനമാണ്. അത് 40 ശതമാനമാക്കിയത് കേരള ഭാഗ്യക്കുറിയെ തകര്‍ക്കും. തൊഴിലാളികളുടെ വരുമാനത്തെ ബാധിക്കും. 2017-ല്‍ ജിഎസ്ടി ആരംഭിച്ചതു മുതല്‍ 12 ശതമാനം മാത്രമായിരുന്നു ലോട്ടറിക്കുള്ള നികുതി. 2020-ല്‍ അത് 28 ശതമാനമാക്കി വര്‍ധിപ്പിച്ചു. ഇപ്പോഴത് 40 ശതമാനമാക്കി. ഫലത്തില്‍, 350 ശതമാനത്തിന്‍റെ വര്‍ധന. മറ്റൊരു മേഖലയിലും ഇത്തരമൊരു ഭീമമായ വര്‍ധനയില്ല. ലോട്ടറിയുടെ ജിഎസ്ടി വര്‍ധിപ്പിക്കാനുള്ള നീക്കത്തില്‍നിന്നു പിന്തിരിയണമെന്നാവശ്യപ്പെട്ട് ഭാഗ്യക്കുറി സംരക്ഷണസമിതിയുടെ നേതൃത്വത്തില്‍ നാളെ രാവിലെ 10നു കോട്ടയം ഹെഡ്പോസ്റ്റ് ഓഫീസിലേക്ക് മാര്‍ച്ചും ധര്‍ണയും നടത്തും. പത്രസമ്മേളനത്തില്‍ ടി.എസ്.എന്‍. ഇളയത്, സിജോ പ്ലാത്തോട്ടം, ചന്ദ്രിക ഉണ്ണിക്കൃഷ്ണന്‍, പി.കെ. ആനന്ദക്കുട്ടന്‍ എന്നിവര്‍ പങ്കെടുത്തു.

മനയ്ക്കച്ചിറ-ചങ്ങനാശേരി അഞ്ചുവിളക്ക് റോഡില്‍ പോത്തോട് ഭാഗത്ത് റോഡ് ഉയര്‍ത്തുന്നു

ചങ്ങനാശേരി: എസി റോഡില്‍ മനയ്ക്കച്ചിറയില്‍ ആരംഭിച്ച് ചങ്ങനാശേരി അഞ്ചുവിളക്ക് ജംഗ്ഷനില്‍ സമാപിക്കുന്ന റോഡിന്‍റെ പോത്തോട് ഭാഗത്ത് റോഡ് ഉയര്‍ത്തുന്ന ജോലികള്‍ക്ക് തുടക്കമായി. ഇരുവശവും പാടത്തെ വെള്ളത്താല്‍ ചുറ്റപ്പെട്ടു കിടക്കുന്ന ഈ ഭാഗത്ത് 60 മീറ്റര്‍ നീളത്തിൽ 40 സെന്‍റിമീറ്റര്‍ മെറ്റലിട്ട് ഉയര്‍ത്തി ഇന്‍റര്‍ലോക്ക് പാകിയാണ് നവീകരിക്കുന്നത്. പൊതുമരാമത്ത് വകുപ്പാണ് റോഡ് നവീകരണം നടത്തുന്നത്. മഴക്കാലത്ത് റോഡിന്‍റെ ഈ ഭാഗത്ത് വെള്ളക്കെട്ടുണ്ടായി, ഇരുചക്രവാഹനങ്ങളുള്‍പ്പെടെ വാഹനങ്ങളുടെ ഗതാഗതവും കാല്‍നടപ്പും ദുഃസഹമാകുന്നതു പതിവാണ്. ഇത്തവണ ജൂണ്‍ മുതല്‍ ഓഗസ്റ്റ് വരെയുള്ള മാസങ്ങളിലുണ്ടായ മഴയത്ത് നിരവധി ദിവസങ്ങളില്‍ ഇവിടെ രൂക്ഷമായ വെള്ളക്കെട്ടാണ് അനുഭവപ്പെട്ടത്. ഇതോടെ പോത്തോട് ഭാഗത്തെ നിരവധി വീടുകളും വെള്ളത്തിലാകുന്നതും സാധാരണമാണ്. ഈ റോഡിന്‍റെ ശോച്യാവസ്ഥ ദീപിക റിപ്പോര്‍ട്ട് ചെയ്തിരുന്നു. ഇതിന്‍റെ അടിസ്ഥാനത്തില്‍ വാര്‍ഡ് കൗണ്‍സിലര്‍ സന്തോഷ് ആന്‍റണി നല്‍കിയ നിവേദനത്തെത്തുടര്‍ന്നാണ് റോഡ് ഉയര്‍ത്തുന്നതിന് പൊതുമരാമത്തുവകുപ്പ് പണം അനുവദിച്ചത്. ഈയാഴ്ച അവസാനത്തോടെ റോഡില്‍ ഇന്‍റര്‍ലോക്ക് പാകുന്ന ജോലികള്‍ പൂര്‍ത്തിയാകും. പണ്ടകശാല പാലം മുതല്‍ പോത്തോട് കലുങ്കു വരെ റോഡ് വികസനത്തിനു പദ്ധതി ഈ റോഡിലെ പണ്ടകശാല പാലം മുതല്‍ പോത്തോട് കലുങ്കു വരെയുള്ള ഇരുനൂറ് മീറ്റര്‍ വീതി കൂട്ടുന്ന പദ്ധതികളുടെ നടപടികള്‍ പുരോഗമിക്കുകയാണ്. മുന്‍ എംഎല്‍എ സി.എഫ്. തോമസ് ഈ പദ്ധതിക്കായി 2017ല്‍ 1.25 കോടി രൂപ അനുവദിച്ചിരുന്നു. ജോബ് മൈക്കിള്‍ എംഎല്‍എയുടെ ഇടപെടലിലാണ് പദ്ധതിയുടെ നടപടികള്‍ പുരോഗമിക്കുന്നത്. ഇത്രയും ഭാഗത്ത് റോഡ് നവീകരണം പൂര്‍ത്തിയായാല്‍ ഈ റോഡിലെ യാത്ര സുഗമമാകും. റോഡ് ഉയര്‍ത്തുന്നത് വാഹനസഞ്ചാരത്തിന് ഏറെ ഗുണകരമാകും പോത്തോട് ഭാഗത്ത് 60 മീറ്റര്‍ ഭാഗത്ത് റോഡ് ഉയര്‍ത്തുന്നത് മാര്‍ക്കറ്റിലേക്കുള്ള വാഹന സഞ്ചാരത്തിന് ഏറെ ഉപകരിക്കും. ജനങ്ങളുടെ ബുദ്ധിമുട്ട് മനസിലാക്കി പൊതുമരാമത്തുവകുപ്പില്‍ നിരന്തരമായ ഇടപെടലുകള്‍ നടത്തിയാണ് പദ്ധതി പ്രാബല്യത്തിലാക്കിയത്. തിങ്കളാഴ്ചയോടെ നിര്‍മാണം പൂര്‍ത്തിയാകും. സന്തോഷ് ആന്‍റണി മുണ്ടയ്ക്കല്‍ വാര്‍ഡ് കൗണ്‍സിലര്‍, ചങ്ങനാശേരി നഗരസഭ പോത്തോട് നിവാസികള്‍ക്ക് വലിയ ആശ്വാസം ഈ റോഡുണ്ടായിട്ട് 40 വര്‍ഷത്തോളമായി. പാടം നികത്തി നിര്‍മിച്ച റോഡിലെ വെള്ളക്കെട്ട് പോത്തോട് നിവാസികളുടെ ജീവിതത്തിന് ഏറെ ദുരിതമായിരുന്നു. വാഹനത്തിലും കാല്‍നടയായും സഞ്ചരിക്കാനാവാത്ത അവസ്ഥയായിരുന്നു. ഇതിനു പരിഹാരമുണ്ടായത് ആശ്വാസം. ടി.ടി. മനോജ് തൈപ്പറമ്പില്‍ പോത്തോട് നിവാസി

പുതിയ ബസ് വേണം; തിരുനെൽവേലിക്ക് പോകാൻ

ചങ്ങനാശേരി ഡിപ്പോയിലെ തിരുനെല്‍വേലി ബസിന് എന്‍ജിന്‍ പണി ചങ്ങനാശേരി: ചങ്ങനാശേരി ഡിപ്പോയില്‍നിന്നും തിരുനെല്‍വേലിക്കുള്ള ഫാസ്റ്റ് പാസഞ്ചര്‍ ബസ് എന്‍ജിന്‍ തകരാറിനെത്തുടര്‍ന്ന് പണിക്കു കയറ്റി. സര്‍വീസ് നടത്തുന്നതിനിടെ ചെങ്ങന്നൂരില്‍വച്ച് കേടായ ഈ ബസ് അവിടെ സര്‍വീസ് അവസാനിപ്പിക്കുകയായിരുന്നു. കാല്‍ നൂറ്റാണ്ടിലധികമായി ചങ്ങനാശേരി ഡിപ്പോയില്‍നിന്നും സര്‍വീസ് നടത്തുന്ന ഇന്‍റര്‍സ്റ്റേറ്റ് സര്‍വീസുകളിലൊന്നാണിത്. ഇന്‍റര്‍‌സ്റ്റേറ്റ് പെര്‍മിറ്റുള്ള ബസ് പുനലൂര്‍ ഡിപ്പോയില്‍നിന്നും പകരം വരുത്തിയാണ് ഇപ്പോള്‍ സര്‍വീസ് നടത്തുന്നത്. തിരുനെല്‍വേലി സര്‍വീസിന് പുതിയ ബസ് അനുവദിക്കണമെന്നാണ് ആവശ്യം. രാവിലെ 7.15ന് ചങ്ങനാശേരിയില്‍ നിന്നാരംഭിച്ച് ചെങ്ങന്നൂര്‍, പന്തളം, അടൂര്‍, പത്തനാപുരം, പുനലൂര്‍, തെന്മല, ആര്യങ്കാവ്, തെങ്കാശിവഴി 1.30ന് തിരുനെല്‍വേലിയില്‍ എത്തുന്നതാണ് ഈ സര്‍വീസ്. അവിടെനിന്നും 2.30ന് തിരികെ കോട്ടയത്തേക്കുപോയി രാത്രി പത്തിന് ചങ്ങനാശേരിയിലെത്തി അവസാനിക്കുന്ന സര്‍വീസാണിത്. വിദ്യാര്‍ഥികള്‍, ഉദ്യോഗസ്ഥർ, വ്യാപാരികള്‍ ഉള്‍പ്പെട്ട നിരവധി യാത്രക്കാര്‍ ആര്യങ്കാവ്, ചെങ്കോട്ട, തെങ്കാശി, തിരുനെല്‍വേലി തുടങ്ങിയ ഭാഗങ്ങളിലേക്ക് യാത്രചെയ്യുന്ന ബസാണിത്. പഴക്കംചെന്ന ബസാണ് ഈ റൂട്ടില്‍ സര്‍വീസ് നടത്തുന്നത്. 425 കിലോമീറ്റര്‍ ദൂരമുള്ള ഈ സര്‍വീസിന് ഇരുപതിനായിരത്തോളം രൂപ കളക്‌ഷനുണ്ട്. അടുത്തിടെ കെഎസ്ആര്‍ടിസി പുതിയ ബസുകള്‍ ഇറക്കിയെങ്കിലും പേരിനുപോലും ഒരു ബസ് ചങ്ങനാശേരിക്ക് ലഭിച്ചിരുന്നില്ല. വേളാങ്കണ്ണി സര്‍വീസിന് സൂപ്പര്‍ എക്‌സ്പ്രസ് ബസ് അനുവദിക്കണം മറ്റൊരു ഇന്‍റര്‍‌സ്റ്റേറ്റ് സര്‍വീസായ വേളാങ്കണ്ണി സര്‍വീസ് സ്വിഫ്റ്റ് ഏറ്റെടുത്തതോടെ പ്രതിസന്ധിയിലാണ് നീങ്ങുന്നത്. ഡീലക്‌സ് ബസാണ് സര്‍വീസ് നടത്തുന്നത്. ഈ സര്‍വീസിനായി സൂപ്പര്‍ എക്‌സ്പ്രസ് നല്‍കാമെന്ന് മുഖ്യമന്ത്രിയും ഗതാഗതമന്ത്രിയും ഉറപ്പ് നല്‍കിയെങ്കിലും ബസ് എത്തിയിട്ടില്ല. അതേസമയം, പാലക്കാട് ഡിപ്പോയില്‍നിന്നു വേളാങ്കണ്ണിക്ക് പുതിയ ഇന്‍റര്‍‌സ്റ്റേറ്റ് സര്‍വീസിന് പ്രെപ്പോസല്‍ കെഎസ്ആര്‍ടിസി ചീഫ് ഓഫീസില്‍ അനുമതിക്കായി നല്‍കിയിരിക്കുകയാണ്. അതേ സമയം, വരുമാനക്കുറവു പറഞ്ഞ് ചങ്ങനാശേരി ഡിപ്പോയില്‍നിന്നുള്ള പളനി, കോയമ്പത്തൂര്‍ സര്‍വീസുകള്‍ നിര്‍ത്തലാക്കിയിരുന്നു. ചങ്ങനാശേരിയില്‍നിന്നു ബംഗളൂരുവിലേക്ക് ബസ് സര്‍വീസ് ആരംഭിക്കണമെന്ന ആവശ്യം ശക്തമായിട്ടുണ്ട്.

അനുമോദിച്ചു

കടുത്തുരുത്തി: ജനവാസമേഖലയിലില്‍ പൊതുസ്ഥലത്തോ, താമസസ്ഥലത്തോ കാണപ്പെടുന്ന വന്യമൃഗങ്ങളെ അപകടകാരികളായി കണക്കാക്കാമെന്നും അവയെ വെടിവയ്ക്കാമെന്നും 1972-ലെ കേന്ദ്ര വന്യജീവി സംരക്ഷണ നിയമത്തില്‍ ഭേദഗതി വരുത്താന്‍ സംസ്ഥാന വനംവകുപ്പ് മന്ത്രി എ.കെ. ശശീന്ദ്രന്‍റെ നേതൃത്വത്തില്‍ ചേര്‍ന്ന മന്ത്രിസഭാ യോഗം അംഗീകാരം നല്‍കിയതില്‍ എന്‍സിപിഎസ് കോട്ടയം ജില്ലാ കമ്മിറ്റി അഭിനന്ദിച്ചു. ജില്ലാ കമ്മിറ്റി ഓഫീസില്‍ നടന്ന യോഗത്തില്‍ പ്രസിഡന്‍റ് ബെന്നി മൈലാടൂര്‍ അധ്യക്ഷത വഹിച്ചു. സംസ്ഥാന ജനറല്‍ സെക്രട്ടറി സുഭാഷ് പുഞ്ചക്കോട്ടില്‍ യോഗം ഉദ്ഘാടനം ചെയ്തു. സംസ്ഥാന സെക്രട്ടറി കാണക്കാരി അരവിന്ദാക്ഷന്‍, കോട്ടയം ജില്ലയുടെ ചാര്‍ജുള്ള സംസ്ഥാന സെക്രട്ടറി മുരളി പുത്തന്‍വേലി, കിസാന്‍സഭ സംസ്ഥാന പ്രസിഡന്‍റ് ജോസ ്കുറ്റിയാനിമാറ്റം, കിസാന്‍ സഭ ജില്ല പ്രസിഡന്‍റ് ജോര്‍ജ് മങ്കുഴിക്കരി, സാബു മുരിക്കവേലി, ബാബു കപ്പക്കാല, അഡ്വ. ഐക്ക് മാണി, അഫ്‌സല്‍ മഠത്തില്‍, ഉണ്ണിരാജ് പത്മാലയം, മാത്യു പാമ്പാടി എന്നിവര്‍ പ്രസംഗിച്ചു.

സെക്രട്ടറിയും എൻജിനിയറുമില്ല; വെള്ളൂർ പഞ്ചായത്തിൽ നിർമാണ പ്രവർത്തനങ്ങൾ അവതാളത്തിൽ

വെള്ളൂർ: വെള്ളൂർ പഞ്ചായത്തിൽ സെക്രട്ടറിയും പൊതുമരാമത്ത് എൻജിനിയറുമില്ലാത്തതിനാൽ നിർമാണ പ്രവർത്തങ്ങൾ അവതാളത്തിലായി. സെക്രട്ടറിയും എൻജിനിയറുമില്ലാതായിട്ട് രണ്ടു മാസമായി. റോഡ് അറ്റകുറ്റപ്പണി, കെട്ടിടനിർമാണം തുടങ്ങിയവ നിർവഹണ ഉദ്യോഗസ്ഥർ ഇല്ലാത്തതിനാൽ പൂർത്തിയാക്കാനാകുന്നില്ലെ ന്നു പ്രതിപക്ഷാംഗങ്ങൾ കുറ്റപ്പെടുത്തി. തെരഞ്ഞെടുപ്പ് വിജ്ഞാപനം വരുന്നതിനു മുമ്പ് ചെയ്തു തീർക്കേണ്ട നിരവധി ജോലികളാണ് മുടങ്ങിയത്. ഒട്ടുമിക്ക ഗൃഹനിർമാണവും പ്രതിസന്ധിയിലായി. ഓവർസിയർ തസ്തികയിൽ ആവശ്യത്തിന് ആളില്ലാത്തതിനാൽ അതുമൂലവും പദ്ധതി പ്രവർത്തനങ്ങൾ ഇഴഞ്ഞുനീങ്ങുകയാണ്. ഉദ്യോഗസ്ഥരെ നിയമിച്ച് പ്രവർത്തനങ്ങൾ സമയബന്ധിതമായി പൂർത്തിയാക്കിയില്ലെങ്കിൽ പഞ്ചായത്തുപടിക്കൽ ഉപവാസ സമരമടക്കമുള്ള പ്രക്ഷോഭങ്ങൾ ആരംഭിക്കുന്നതിന് യുഡിഎഫ് പാർലമെന്‍ററി പാർട്ടി യോഗം തീരുമാനിച്ചു. പ്രതിപക്ഷ നേതാവ് കുര്യാക്കോസ് തോട്ടത്തിൽ, പി.പി. ബേബി, നിയാസ് കൊടിയനേഴത്ത്, ശാലിനി മോഹനൻ, സുമാതോമസ് എന്നിവർ പ്രസംഗിച്ചു.

നീലംപേരൂര്‍ പടയണി: ഇന്ന് പ്ലാവില നിര്‍ത്ത്

നീലംപേരൂര്‍: പള്ളി ഭഗവതി ക്ഷേത്രത്തിലെ പടയണി മഹോത്സവത്തിന്‍റെ മൂന്നാം ഘട്ടത്തിലെ മൂന്നാം ദിവസമായ ഇന്നലെ പ്ലാവിലക്കോലമായ ഹനുമാന്‍ എത്തി. ഇന്ന് കുടംപൂജ കളി, തോത്താകളി എന്നിവയോടെ പ്ലാവില നിർത്ത് ആഘോഷിക്കും. പ്ലാവിലക്കോലങ്ങളായ ഭീമന്‍, താപസന്‍, ആന, ഹനുമാന്‍ തുടങ്ങിയവ ദേവിയുടെ മുന്നില്‍ എഴുന്നെള്ളിക്കും. പ്രകൃതിദത്തമായ തടി, കമുകിന്‍ വാരി, വാഴക്കച്ചി, താമരയില, വാഴപ്പോള, ചെത്തിപ്പൂ എന്നിവ ഉപയോഗിച്ചാണ് അന്നങ്ങളും കോലങ്ങളും നിര്‍മിക്കുന്നത്. ഇതാണു മറ്റ് ആഘോഷങ്ങളില്‍നിന്നു നീലംപേരൂര്‍ പടയണിയെ വ്യത്യസ്തമാക്കുന്നത്. ക്ഷേത്രമൈതാനത്ത് ചെറിയന്നങ്ങളുടേയും വലിയന്നങ്ങളുടേയും കോലങ്ങളുടേയും നിര്‍മാണം അതിവേഗം പുരോഗമിക്കുകയാണ്. 20ന് മകം പടണിയും 21ന് പൂരം പടയണിയും അരങ്ങേറും.

കാറും ബുള്ളറ്റും കൂട്ടിയിടിച്ചു; യുവാവിനു ഗുരുതര പരിക്ക്

പെരുവ: നിയന്ത്രണംവിട്ടെത്തിയ കാറും ബുള്ളറ്റും കൂട്ടിയിടിച്ചു ബുള്ളറ്റ് യാത്രക്കാരനായ യുവാവിനു ഗുരുതര പരിക്ക്. കഴിഞ്ഞ ദിവസം വൈകുന്നേരം ആറോടെ തലയോലപ്പറമ്പ് - പെരുവ റോഡില്‍ കാഞ്ഞിരവളവിന് സമീപമാണ് അപകടം. വൈക്കം മറവന്തുരുത്ത് സ്വദേശി പടിഞ്ഞാറേമേനാത്ത് മിഥുന്‍ സോമന്‍ (32) ആണ് പരിക്കേറ്റത്. മിഥുനെ ഉടന്‍തന്നെ സമീപത്തെ സ്വകാര്യ ആശുപത്രിയിലും തുടർന്നു വിദഗ്ദ്ധ ചികിത്സയ്ക്കായി തെള്ളകത്തെ സ്വകാര്യ ആശുപത്രിയിലേക്കും മാറ്റി. തലയോലപ്പറമ്പ് ഭാഗത്തു നിന്നെത്തിയ കാറും പെരുവയില്‍നിന്നു വൈക്കത്തേക്ക് പോവുകയായിരുന്ന ബുള്ളറ്റുമാണ് കൂട്ടിയിടിച്ചത്. വെള്ളൂര്‍ പോലീസ് സ്ഥലത്തെത്തി മേല്‍നടപടികള്‍ സ്വീകരിച്ചു.

കീഴൂർ-ഞീഴൂർ റോഡ് ഗതാഗതയോഗ്യമാക്കണമെന്ന്

കടുത്തുരുത്തി: വർഷങ്ങളായി തകര്‍ന്നു തരിപ്പണമായ റോഡിലൂടെ കാല്‍നടയാത്രയ്ക്കുള്ള സൗകര്യമെങ്കിലും ഒരുക്കണമെന്ന ആവശ്യവുമായി നാട്ടുകാര്‍ രംഗത്ത്. കീഴൂര്‍-അറുനൂറ്റിമംഗലം-ഞീഴൂര്‍ റോഡ് ഗതാഗത യോഗ്യമാക്കണമന്നാണ് നാട്ടുകാരുടെ ആവശ്യം. കീഴൂര്‍ മുതൽ അറുനൂറ്റിമംഗലം വരെയുള്ള റോഡ് പൂര്‍ണമായും തകര്‍ന്നു. വാട്ടര്‍ അഥോറിറ്റി പൈപ്പുലൈനിനായി കുത്തിപ്പൊളിച്ചതാണ് റോഡ് തകരാന്‍ കാരണം. അറുനൂറ്റിമംഗലം മുതല്‍ ഞീഴൂര്‍വരെ പല സ്ഥലങ്ങളിലായി റോഡ് തകര്‍ന്നു കിടക്കുകയാണ്. ഇതുവഴി കാൽനടയാത്രപോലും ദുഷ്കരമാണ്. ഇരുചക്രവാഹന യാത്രക്കാര്‍ ഇവിടെ അപകടത്തിൽപ്പെടുന്നത് പതിവാണെന്ന് നാട്ടുകാര്‍ പറയുന്നു. ദിവസവും സ്‌കൂള്‍ വാഹനങ്ങള്‍ ഉള്‍പ്പെടെ നൂറുകണക്കിന് വാഹനങ്ങള്‍ സഞ്ചരിക്കുന്ന റോഡാണിത്. റോഡ് നിര്‍മാണത്തിന്‍റെ ടെന്‍ഡര്‍ നടപടികള്‍ പൂര്‍ത്തിയായെന്ന് അധികൃതര്‍ ഇടയ്ക്കിടയ്ക്ക് പ്രസ്താവന ഇറക്കുന്നതല്ലാതെ നിര്‍മാണ പ്രവര്‍ത്തനങ്ങള്‍ ഒന്നും നടക്കുന്നില്ലെന്നും നാട്ടുകാര്‍ ആരോപിക്കുന്നു. എത്രയും വേഗം ടാറിംഗ് പൂര്‍ത്തിയാക്കി റോഡ് സഞ്ചാരയോഗ്യമാക്കണമെന്നു നാട്ടുകാര്‍ ആവശ്യപ്പെട്ടു.

ടോൾ -ചുങ്കം റോഡ് ഉന്നത നിലവാരത്തിൽ നിർമിക്കും

നാലരക്കോടിയുടെ പദ്ധതിക്ക് അനുമതി തലയോലപ്പറമ്പ്: കുണ്ടും കുഴിയുമായി തകർന്ന ടോൾ-ചുങ്കം റോഡ് ബി എംആൻഡ് ബിസി നിലവാരത്തിൽ പുനർനിർമിക്കുന്നു. നാലരക്കോടി രൂപയുടെ പദ്ധതിക്കാണ് ഭരണാനുമതി ലഭിച്ചത്. ടോൾ-ചുങ്കം- പാലാംകടവ് - തലയോലപറമ്പ് റോഡിലെ ടോൾമുതൽ ചുങ്കംവരെയുള്ള മൂന്നര കിലോമീറ്റർ ദൂരമാണ് ആധുനിക നിലവാരത്തിൽ പുനർനിർമിക്കുന്നത്. തകർച്ച ഇങ്ങനെ ഇരു വശങ്ങളിലും നടപ്പാതയും ടോൾ ഭാഗത്ത് വെള്ളക്കെട്ട് ഒഴിവാക്കാൻ ഓടയും നിർമിക്കും.18 വർഷംമുമ്പ് ആലപ്പുഴയിലേക്കു മൂവാറ്റുപുഴയാറിലെ ശുദ്ധജലം എത്തിക്കാനായി ജപ്പാൻ കുടിവെള്ള പദ്ധതിയുടെ ഭാഗമായി കൂറ്റൻ പൈപ്പുകൾ സ്ഥാപിച്ചതോടെയാണ് ടോൾ മുതൽ ചുങ്കം വരെയുള്ള റോഡ് തകർച്ചാ ഭീഷണിയിലായത്. പൈപ്പുകൾ സ്ഥാപിച്ച ശേഷം റോഡ് സഞ്ചാരയോഗ്യമാക്കണമെന്നായിരുന്നു കരാർ. പൈപ്പ് സ്ഥാപിച്ച് മാസങ്ങൾ കഴിഞ്ഞിട്ടും റോഡ് ഗതാഗതയോഗ്യമാക്കാതിരുന്നതിനാൽ വിവിധ രാഷ്‌ട്രീയ പാർട്ടികളും പ്രദേശവാസികളും പ്രതിഷേധവുമായി വന്നതോടെയാണ് റോഡ് സഞ്ചാരയോഗ്യമാക്കിയത്. അന്നു തുടങ്ങിയ പൊട്ടൽ മാസങ്ങൾ കഴിഞ്ഞ് ടോൾ-പാലാംകടവ് റോഡിലെ ടോൾമുതൽ ചുങ്കംവരെയുള്ള ഭാഗത്തെ കുഴികൾ താത്കാലികമായി പിഡബ്ല്യുഡി അധികൃതർ അടച്ചപ്പോൾ പല ഭാഗങ്ങളിലും പൈപ്പ് പൊട്ടി വെള്ളം ഒഴുകി റോഡ് വീണ്ടും തകർന്നു. പിന്നീട് മാസങ്ങളുടെ കാത്തിരി പ്പിനു ശേഷമാണ് തകർന്ന ഭാഗംപുനർനിർമിച്ചത്. കരാർ കമ്പനി റോഡ് പിഡബ്ല്യുഡിക്കു കൈമാറാത്തതുമൂലം ഇവിടെ നിർമാണം നടക്കാത്ത സ്ഥിതിയിലായിരുന്നു. മറവൻതുരുത്ത് പഞ്ചായത്ത് നിരന്തരമായി രേഖാമൂലം ആവശ്യപ്പെട്ടതിന്‍റെ അടിസ്ഥാനത്തിൽ ഒരുവർഷം മുമ്പ് റോഡ് പിഡബ്ല്യുഡിക്കു കൈമാറി. 2012നു ശേഷം ടാറിംഗ് നടക്കാത്ത റോഡിൽ വലിയ കുഴികൾ രൂപപ്പെട്ടു. തുടർന്ന് താത്കാലികമായി കുഴികൾ അടയ്ക്കുകയായിരുന്നു. സാങ്കേതികാനുമതി ലഭിച്ച് ടെൻഡർ നടപടി പൂർത്തീകരിച്ചാലുടൻ നിർമാണം ആരം ഭിക്കുമെന്ന് സി.കെ.ആശ എംഎൽഎ പറഞ്ഞു.

പരിസ്ഥിതി സൗഹൃദ ദിനങ്ങള്‍ക്ക് ഐക്യദാര്‍ഢ്യം : സിഎംഎസിൽ പ്രകൃതിസൗഹൃദ ആരാധന

കോട്ടയം: പരിസ്ഥിതി സൗഹൃദ ദിനങ്ങള്‍ക്ക് ഐക്യദാര്‍ഢ്യം പ്രഖ്യാപിച്ചു കോട്ടയം സിഎംഎസ് കോളജ് പ്രകൃതി സൗഹൃദ ആരാധന സംഘടിപ്പിക്കുന്നു. ഇന്നു രാവിലെ എട്ടിനു കോളജ് മൈതാനത്താണ് പരിപാടി. സിഎസ്‌ഐ മധ്യകേരള മഹായിടവക പരിസ്ഥിതി വകുപ്പിന്‍റെ സഹകരണത്തോടെയാണ് വേറിട്ട ആരാധന ഒരുക്കിയിരിക്കുന്നത്. പ്രകൃതിയുടെ സംരക്ഷകനായ വിശുദ്ധ ഫ്രാന്‍സിസ് അസീസിയുടെ ഓര്‍മത്തിരുനാള്‍ ദിനമായ ഒക്‌ടോബര്‍ നാലുവരെയാണ് ആചരണം. ഈ ദിനങ്ങളില്‍ പൊതുഭവനമായ ഭൂമിയുടെ സംരക്ഷണം, പ്രകൃതിയുമായുള്ള മനുഷ്യന്‍റെ ബന്ധം എന്നിവയ്ക്കു പ്രാധാന്യം നല്‍കുന്നു. ആരാധനയ്ക്ക് സിഎസ്‌ഐ മധ്യകേരള മഹായിടവക ബിഷപ് ഡോ. മലയില്‍ സാബു കോശി ചെറിയാന്‍ തിരി തെളിച്ചു തുടക്കംകുറിക്കും. പ്രകൃതിയുമായി ചേര്‍ന്നു നില്‍ക്കുന്ന ഈ ആരാധനയില്‍, ബിഷപ്പും വൈദികരും വിദ്യാര്‍ഥികളും ഉള്‍പ്പെടെയുള്ളവര്‍ കോളജ് പുല്‍ത്തകിടിയില്‍ ഇരുന്നായിരിക്കും പങ്കെടുക്കുന്നത്. പ്രകൃതി സൗഹൃദ ഗാനങ്ങള്‍, ഭജന്‍, പ്രാര്‍ഥനകള്‍, വേദവായന എന്നിവയും ആരാധനയുടെ ഭാഗമായി നടക്കും. തുടര്‍ന്ന് റവ. ഡോ. വിജി വര്‍ഗീസ് ഈപ്പന്‍ ദൂത് നല്‍കും. ആരാധനയ്ക്കുശേഷം പ്രകൃതി സംരക്ഷണ സന്ദേശം ഉയര്‍ത്തിപ്പിടിച്ച് ബിഷപ് കോളജ് കാമ്പസില്‍ വൃക്ഷത്തൈ നടും. പരിപാടിക്ക് കോളജ് പ്രിന്‍സിപ്പല്‍ ഡോ. അഞ്ജു ശോശന്‍ ജോര്‍ജ്, മഹായിടവക പരിസ്ഥിതി വകുപ്പ് ഡയറക്ടര്‍ ഡോ. മാത്യു കോശി പുന്നയ്ക്കാട്, കോളജ് ബര്‍സാര്‍ റവ. ഡോ. ഷിജു സാമുവല്‍, ചാപ്ലയിന്‍ റവ. ടിബു ഉമ്മന്‍ ജോര്‍ജ്, പരിസ്ഥിതി വകുപ്പ് കണ്‍വീനര്‍ റവ. അനില്‍ തോമസ് എന്നിവര്‍ നേതൃത്വം നല്‍കും.

പുസ്തകമായി മാറിയവരുടെ ജീവിതം ആസ്വാദ്യകഥകളായി

ജിബിന്‍ കുര്യന്‍ കോട്ടയം: അനുഭവങ്ങളും കഥകളും ജീവിതവും പറഞ്ഞ് മനുഷ്യന്‍ പുസ്തകമായി മാറിയപ്പോള്‍ കേട്ടിരുന്നവര്‍ക്ക് ആസ്വാദ്യതയുള്ള ഒരു കഥയും നോവലും വായിച്ചതിനുമപ്പുറമുള്ള നവ്യമായ വായനാനുഭൂതി. കോട്ടയം ദര്‍ശന സാംസ്‌കാരിക കേന്ദ്രത്തിന്‍റെ റൂബി ജൂബിലിയുടെ ഭാഗമായി കോട്ടയം ഡ്രീം സെറ്റേഴ്‌സ് ഇവന്‍റ്സ് ആന്‍ഡ് ട്രെയിനിംഗ്‌സിന്‍റെ സഹകരണത്തോടെ ആരംഭിച്ച ‘ഹ്യൂമന്‍ ലൈബ്രറി’ വായനയുടെ പുതിയ ലോകത്തിലേക്ക് ശ്രോതാക്കളെ കൂട്ടിക്കൊണ്ടുപോയി. ഹ്യൂമന്‍ ലൈബ്രറിയില്‍ വായിക്കുന്നതും അറിയുന്നതും മനുഷ്യരെയാണ്. അനുഭവങ്ങളും അതിജീവനവുമൊക്കെ മറ്റുള്ളവരുടെ മുമ്പില്‍ സത്യസന്ധമായി തുറന്നു പറയാനും അവരുടെ ചോദ്യങ്ങള്‍ക്ക് ഉത്തരം പറയാനും തയാറായി അഞ്ചു പ്രമുഖ വ്യക്തിത്വങ്ങളാണ് പുസ്‌തകങ്ങളായി മാറിയത്. എംജി യൂണിവേഴ്‌സിറ്റി മുന്‍ എന്‍എസ്എസ് കോ-ഓര്‍ഡിനേറ്ററും സമ്പൂര്‍ണ സാക്ഷരതാ യജ്ഞം കോ-ഓര്‍ഡിനേറ്ററുമായ പ്രഫ. തോമസ് ഏബ്രഹാം, റിട്ടയേഡ് സബ് ഇന്‍സ്‌പെക്ടറും കാര്‍ട്ടൂണിസ്റ്റും എഴുത്തുകാരനുമായ രേഖ വെള്ളത്തൂവല്‍, റിട്ടയേ‍ഡ് ടീച്ചറും സാമൂഹ്യപ്രവര്‍ത്തകയുമായ മേരി ജോണ്‍, അവയവദാന കാമ്പയിന്‍ കോ-ഓര്‍ഡിനേറ്റര്‍ കുര്യന്‍ തൂമ്പുങ്കല്‍, റിട്ടയേ‍ഡ് പഞ്ചായത്ത് സെക്രട്ടറി മുരളി പുല്ലംവേലില്‍ എന്നിവര്‍ ഹ്യൂമന്‍ ലൈബ്രറിയില്‍ അറിവനുഭവങ്ങള്‍ പങ്കുവച്ചു. കാലവും ചരിത്രവും സംസ്‌കാരവും അനുഭവങ്ങളും ജീവിതത്തിന്‍റെ ഭ്രമാത്മകമായ നിഗൂഢതകളും വിഹ്വലതകളും ബന്ധങ്ങളുടെ ആര്‍ദ്രതയും തീവ്രതയും ഒക്കെ ഇവര്‍ കേള്‍വിക്കാർക്കായി പങ്കുവച്ചു. അനുഭവങ്ങളും അതിജീവനവും മറ്റുള്ളവരുടെ മുമ്പില്‍ പങ്കുവയ്ക്കുക മാത്രമല്ല, ശ്രോതാക്കളുടെ ചോദ്യങ്ങള്‍ക്ക് ഉത്തരവും നല്‍കി. ഹ്യൂമന്‍ ലൈബ്രറിയില്‍ പങ്കെടുക്കാനെത്തിയവരെ ആദ്യം അഞ്ച് ഗ്രൂപ്പുകളായി തിരിച്ചു. പുസ്തകങ്ങളായി മാറിയ വ്യക്തികള്‍ ഓരോ ഗ്രൂപ്പിലും 10 മുതല്‍ 15 മിനിറ്റ് വരെ മാറിമാറി സംസാരിക്കുകയും ചോദ്യങ്ങള്‍ക്ക് ഉത്തരം നല്‍കുകയും ചെയ്തു. ചായസത്കാരത്തോടെയാണ് ഹ്യൂമന്‍ ലൈബ്രറി പൂര്‍ത്തിയായത്. നിസാരമായ തോല്‍വികളില്‍, തിരിച്ചടികളില്‍, ഏകാന്തതകളില്‍ ആകുലമാവുന്ന മനസുകള്‍ക്ക് നല്ലൊരു തെറാപ്പികൂടിയാണ് മനുഷ്യ പുസ്തകങ്ങളെന്ന് ആമുഖസന്ദേശം നല്‍കി ദര്‍ശന സാംസ്‌കാരിക കേന്ദ്രം ഡയറക്ടര്‍ ഫാ. എമില്‍ പുള്ളിക്കാട്ടില്‍ ചൂണ്ടിക്കാട്ടി. മനുഷ്യരെ കൂടുതല്‍ കരുതാനും മനസിലാക്കാനും നല്ല മനുഷ്യസ്‌നേഹിയാകാനും ഹ്യൂമന്‍ ലൈബ്രറിയിലൂടെ സാധിക്കുമെന്ന് കോട്ടയം ഡ്രീം സെറ്റേഴ്‌സ് ഇവന്‍റ്സ് ആന്‍ഡ് ട്രെയിനിംഗ്‌സിന്‍റെ സിഇഒയും ഹ്യൂമന്‍ ലൈബ്രറിയുടെ മുഖ്യ സംഘാടകനുമായ എ.പി. തോമസ് പറഞ്ഞു. ഹ്യൂമന്‍ ലൈബ്രറിയുടെ രണ്ടാം ഘട്ടം വിപുലമായ രീതിയില്‍ അടുത്ത മാസം നടത്തും. രണ്ടാം ഘട്ടത്തില്‍ അനുഭവും അതിജീവനവും പങ്കുവയ്ക്കുവാന്‍ തയാറുള്ളവര്‍ക്ക് 944711 4328 എന്ന ഫോണ്‍ നമ്പറില്‍ രജിസ്റ്റര്‍ ചെയ്യാം.

മലയാള കലാ അക്കാദമി പുരസ്‌കാരം-2025 ഡോ. വസന്തകുമാര്‍ സാംബശിവന്

കോട്ടയം: കാഥികനും അധ്യാപകനും അഭിഭാഷകനുമായിരുന്ന അഡ്വ. ജോര്‍ജ് ചാത്തമ്പടത്തിന്‍റെ പേരിലുള്ള മലയാള കലാ അക്കാദമി പുരസ്‌കാരം -2025 ഡോ. വസന്തകുമാര്‍ സാംബശിവന്. 25,000 രൂപയും ഫലകവുമടങ്ങുന്നതാണ് അവാര്‍ഡ്. 25ന് വൈകുന്നേരം നാലിനു കോട്ടയം പബ്ലിക് ലൈബ്രറി ഹാളില്‍ നടക്കുന്ന ചടങ്ങില്‍ വസന്തകുമാറിന് അവാര്‍ഡ് നല്‍കും. ലൈബ്രറി പ്രസിഡന്‍റ് ഏബ്രഹാം ഇട്ടിച്ചെറിയ അധ്യക്ഷത വഹിക്കുന്ന സമ്മേളനത്തില്‍ മലയാള കലാ അക്കാദമി ഡയറക്ടറും ചീഫ് വിപ്പുമായ ഡോ.എന്‍. ജയരാജ് എംഎല്‍എ അവാര്‍ഡ് സമ്മാനിക്കും. കോട്ടയം പബ്ലിക് ലൈബ്രറിയുടെ കലാ-സാംസ്‌കാരിക വിഭാഗമായ കെപിഎല്‍ കള്‍ച്ചറല്‍ സൊസൈറ്റിയുടെ സഹകരണത്തോടെ നടക്കുന്ന ചാത്തമ്പടം അനുസ്മരണ ചടങ്ങില്‍ വൈകുന്നേരം അഞ്ചിനു ഡോ. വസന്തകുമാര്‍ സാംബശിവന്‍ ‘നിരപരാധി’ എന്ന കഥാപ്രസംഗം അവതരിപ്പിക്കും. പഴയിടം മുരളി, ഡോ. നടുവട്ടം സത്യശീലന്‍, പ്രഫ. കെ.വി. തോമസുകുട്ടി, വി.ജി. മിനീഷ് കുമാര്‍, അഞ്ചല്‍ ഗോപന്‍, വിനോദ് ചമ്പക്കര എന്നിവരടങ്ങുന്ന ജൂറി കമ്മിറ്റിയാണ് അവാര്‍ഡ് ജേതാവിനെ തെരഞ്ഞെടുത്തത്.

കേരള ഭാഗ്യക്കുറി സംരക്ഷണ സമിതി സമരപ്രഖ്യാപന കണ്‍വന്‍ഷന്‍

കോട്ടയം: ലോട്ടറിയുടെ ജിഎസ്ടി 40 ശതമാനമായി വര്‍ധിപ്പിക്കാനുള്ള തീരുമാനത്തില്‍നിന്നു കേന്ദ്രസര്‍ക്കാര്‍ പിന്തിരിയണമെന്നു കേരള ഭാഗ്യക്കുറി സംരക്ഷണ സമിതി സംസ്ഥാന സമരപ്രഖ്യാപന കണ്‍വന്‍ഷന്‍ കേന്ദ്രസര്‍ക്കാരിനോടാവശ്യപ്പെട്ടു. നിലവില്‍ ലോട്ടറിക്ക് ജിഎസ്ടി 28 ശതമാനമാണ്. അത് 40 ശതമാനമാക്കിയത് കേരള ഭാഗ്യക്കുറിയെ തകര്‍ക്കും. തൊഴിലാളികളുടെ വരുമാനത്തെ ബാധിക്കും. 2017-ല്‍ ജിഎസ്ടി ആരംഭിച്ചതു മുതല്‍ 12 ശതമാനം മാത്രമായിരുന്നു ലോട്ടറിക്കുള്ള നികുതി. 2020-ല്‍ അത് 28 ശതമാനമാക്കി വര്‍ധിപ്പിച്ചു. ഇപ്പോഴത് 40 ശതമാനമാക്കി. ഫലത്തില്‍, 350 ശതമാനത്തിന്‍റെ വര്‍ധന. മറ്റൊരു മേഖലയിലും ഇത്തരമൊരു ഭീമമായ വര്‍ധനയില്ല. ലോട്ടറിയുടെ ജിഎസ്ടി വര്‍ധിപ്പിക്കാനുള്ള നീക്കത്തില്‍നിന്നു പിന്തിരിയണമെന്നാവശ്യപ്പെട്ട് ഭാഗ്യക്കുറി സംരക്ഷണസമിതിയുടെ നേതൃത്വത്തില്‍ നാളെ രാവിലെ 10നു കോട്ടയം ഹെഡ്പോസ്റ്റ് ഓഫീസിലേക്ക് മാര്‍ച്ചും ധര്‍ണയും നടത്തും. പത്രസമ്മേളനത്തില്‍ ടി.എസ്.എന്‍. ഇളയത്, സിജോ പ്ലാത്തോട്ടം, ചന്ദ്രിക ഉണ്ണിക്കൃഷ്ണന്‍, പി.കെ. ആനന്ദക്കുട്ടന്‍ എന്നിവര്‍ പങ്കെടുത്തു.

ബസേലിയസ് ട്രോഫിയിൽ മുത്തമിട്ട് പഴഞ്ഞി എംഡി കോളജ്

കോട്ടയം: 19-ാമത് ഉപ്പൂട്ടില്‍ കുര്യന്‍ ഏബ്രഹാം മെമ്മോറിയല്‍ ഇന്‍റര്‍കൊളീജിയറ്റ് ബസേലിയസ് ട്രോഫി ഫുട്‌ബോള്‍ ഫൈനലില്‍ പഴഞ്ഞി എംഡി കോളജ് ജേതാക്കള്‍. ഇന്നലെ രാവിലെ എട്ടിന് കോളജ് മൈതാനത്ത് നടന്ന വാശിയേറിയ മത്സരത്തില്‍ തേവര എസ്എച്ച് കോളജിനെ എതിരില്ലാതെ മൂന്നു ഗോളുകള്‍ക്ക് പരാജയപ്പെടുത്തിയാണ് എംഡി കോളജ് കിരീടം സ്വന്തമാക്കിയത്. കോളജ് പൂര്‍വവിദ്യാര്‍ഥിയും ജില്ലാ ഡെപ്യൂട്ടി പ്ലാനിംഗ് ഓഫീസറുമായ പി.എ. അമാനത്ത് വിജയികള്‍ക്ക് ഉപ്പൂട്ടില്‍ കുര്യന്‍ ഏബ്രഹാം മെമ്മോറിയല്‍ എവറോളിംഗ് ട്രോഫിയും റണ്ണറപ്പിന് ഇ.എസ്. മാത്യു ചേപ്പാട് മെമ്മോറിയല്‍ ട്രോഫിയും സമ്മാനിച്ചു. ബസേലിയസ് കോളജ് പ്രിന്‍സിപ്പല്‍ പ്രഫ.ഡോ. ബിജു തോമസ് അധ്യക്ഷത വഹിച്ചു. ബസേലിയസ് ട്രോഫി ഫുട്‌ബോള്‍ മത്സരത്തിന്‍റെ ഓര്‍ഗനൈസിംഗ് കമ്മിറ്റി ജനറല്‍ കണ്‍വീനര്‍ ഫാ. ജിബി കെ. പോള്‍, സെക്രട്ടറി ശ്രാവണ്‍ ശശികുമാര്‍, കോളജ് യൂണിയന്‍ ചെയര്‍പേഴ്‌സണ്‍ അമിത് മാത്യു തോമസ്, ഓള്‍ ഇന്ത്യാ ഫുട്‌ബോള്‍ ഫെഡറേഷന്‍ അംഗം എസ്. അച്ചു, കോളജ് സ്‌പോര്‍ട്‌സ് സെക്രട്ടറി റെയ്‌സോ റെജി എന്നിവര്‍ പ്രസംഗിച്ചു.

ലോകസുറിയാനി സമ്മേളന പ്രതിനിധികൾ കുറവിലങ്ങാട് പള്ളിയിൽ

കുറവിലങ്ങാട്: ലോകസുറിയാനി സമ്മേളന പ്രതിനിധികൾ ക്രൈസ്തവ ചരിത്രത്തിന്‍റെ വേരുകൾ കണ്ടും കേട്ടുമറിയാൻ കുറവിലങ്ങാട് പള്ളിയിലെത്തി. അവിഭക്ത നസ്രാണി സഭയുടെ കേന്ദ്രമായിരുന്ന കുറവിലങ്ങാട് ആദ്യ നൂറ്റാണ്ടിൽ തുടങ്ങുന്ന ക്രൈസ്തവ പാരമ്പര്യവും ലോകചരിത്രത്തിലെ ആദ്യ മരിയൻ പ്രത്യക്ഷീകരണവുമാണ് കുറവിലങ്ങാട് സന്ദർശിക്കാൻ പ്രേരിപ്പിച്ചതെന്നു സംഘത്തിലെ അംഗങ്ങൾ പറഞ്ഞു. പള്ളിയിലെ ചുവരുകളിലെ സുറിയാനി ലിഖിതങ്ങളും പഴമ പേറുന്ന ശിലാരൂപങ്ങളുമൊക്കെ കൗതുകത്തോടെയാണ് സംഘം കണ്ടതും ചോദിച്ചറിഞ്ഞതും. പള്ളിയിലെത്തിയ സംഘം റംശാ നമസ്‌കാരം നടത്തി. പാരമ്പര്യ നസ്രാണി കലാരൂപങ്ങളായ മാർഗംകളിയും പരിചമുട്ടും സംഘത്തിനായി മർത്ത്മറിയം വിശ്വാസപരിശീലന കേന്ദ്രത്തിലെ വിദ്യാർഥികൾ അവതരിപ്പിച്ചു. ഫാ. തോമസ് മണക്കാട്ട് സ്മാരക ദേവമാതാ മ്യൂസിയത്തിലെ കാഴ്ചകൾ ചോദിച്ചറിയാൻ സംഘാംഗങ്ങൾ പ്രത്യേക താത്പര്യം കാട്ടി. കോട്ടയം സീരിയിൽ നടക്കുന്ന ലോകസുറിയാനി സംഗമത്തിൽ പങ്കെടുക്കുന്ന അറുപതോളം പേരാണ് പള്ളി സന്ദർശിച്ചത്. ഇത്രയും ചരിത്രപ്രാധാന്യമുള്ള പള്ളിയിലെത്താൻ കഴിഞ്ഞതിലുള്ള സന്തോഷം പലരും പങ്കുവച്ചു. പാലാ രൂപതാധ്യക്ഷൻ മാർ ജോസഫ് കല്ലറങ്ങാട്ട് ആഗോളസംഘത്തിനൊപ്പം പ്രാർഥനകളിൽ പങ്കുചേർന്നു. ആർച്ച്പ്രീസ്റ്റ് റവ.ഡോ. തോമസ് മേനാച്ചേരി, അസി. വികാരിമാരായ ഫാ. തോമസ് താന്നിമലയിൽ, ഫാ. ജോസഫ് ചൂരയ്ക്കൽ, പാസ്റ്ററൽ അസിസ്റ്റന്‍റുമാരായ ഫാ. ജോസ് കോട്ടയിൽ, ഫാ. പോൾ മഠത്തിക്കുന്നേൽ എന്നിവരുടെ നേതൃത്വത്തിൽ കൈക്കാരന്മാരും പള്ളിയോഗാംഗങ്ങളും കുടുംബകൂട്ടായ്മ പ്രതിനിധികളും ചേർന്നു സംഘത്തെ സ്വീകരിച്ചു. ഡോ. എലെയ്ൻ ജെ. ഡൊസ്രാമാക്‌സ് (ഫ്രാൻസ്), ഡോ. ഹെറാൾഡ് സെർമാൻ (ജർമനി), ഡോ. ഫ്രാങ്കൊയ്സ് ബ്രിക്വൽ (ഫ്രാൻസ്), ഡോ. എ. മുരിയേൽ ഡെബി (ഫ്രാൻസ്), സീരി ഡയറക്ടർ റവ. ഡോ. ജേക്കബ് തെക്കേപ്പറമ്പിൽ, പ്രഫ. ഡാനിയേൽ മക്നോട്ടി, പ്രവർട്ട് ആൽബെറിക് മാറ, റവ. ഡോ. ആൻഡ്രൂസ് മേക്കാട്ടുകുന്നേൽ തുടങ്ങിയവർ ആശയങ്ങൾ പങ്കുവച്ചു.

കെഇ ട്രോഫി നാഷണൽ വോളിബോൾ ടൂർണമെന്‍റ്: നടുവണ്ണൂർ, ഭാരതിയാർ സ്കൂളുകൾ ജേതാക്കൾ

മാന്നാനം: കുര്യാക്കോസ് ഏലിയാസ് ഇംഗ്ലീഷ് മീഡിയം സ്കൂൾ ആതിഥേയത്വം വഹിച്ച നാഷണൽ ഇന്‍റർ സ്കൂൾ വോളിബോൾ ടൂർണമെന്‍റിൽ ആൺകുട്ടികളുടെ വിഭാഗത്തിൽ നടുവണ്ണൂർ എച്ച്എസ്എസ് കോഴിക്കോടും പെൺകുട്ടികളുടെ വിഭാഗത്തിൽ സേലം ഭാരതിയാർ മെട്രിക് എച്ച്എസ്എസും ജേതാക്കൾ. ബാസ്കറ്റ്ബോൾ ടൂർണമെന്‍റ് അണ്ടർ 16 വിഭാഗത്തിൽ കോട്ടയം ഗിരിദീപം സ്കൂളും അണ്ടർ 19 ആൺകുട്ടികളുടെ വിഭാഗത്തിൽ വേലമ്മാൾ ഇന്‍റർനാഷണൽ സ്കൂൾ പൊന്നേരിയും അണ്ടർ 19 പെൺകുട്ടികളുടെ കാറ്റഗറിയിൽ കോട്ടയം മൗണ്ട് കാർമൽ എച്ച്എസ്എസും ജേതാക്കളായി. മാന്നാനം സെന്‍റ് ജോസഫ്സ് ആശ്രമം പ്രിയോർ റവ.ഡോ. കുര്യൻ ചാലങ്ങാടി സിഎംഐ അധ്യക്ഷത വഹിച്ച സമാപന സമ്മേളനത്തിൽ രാജ്യാന്തര വോളിബോൾ താരവും ഇന്ത്യൻ വോളിബോൾ ടീം മുൻ ക്യാപ്റ്റനുമായ അബ്ദുൾ റസാഖ് വിശിഷ്ടാതിഥിയായിരുന്നു. വിജയികൾക്ക് കെഇ സ്കൂൾ പ്രിൻസിപ്പൽ റവ.ഡോ. ജയിംസ് മുല്ലശേരി സിഎംഐ ട്രോഫികളും അവാർഡുകളും വിതരണം ചെയ്തു. കെഇ റസിഡന്‍റ്സ് പ്രിഫെക്ട് ഫാ. ഷൈജു സേവ്യർ സിഎംഐ, സ്കൂൾ ബർസാർ ഫാ. ബിബിൻ തോമസ് സിഎംഐ, ഏറ്റുമാനൂർ ബ്ലോക്ക് പഞ്ചായത്ത് മെംബർ അന്നമ്മ മാണി, പിടിഎ പ്രസിഡന്‍റ് അഡ്വ. ജയ്സൺ ജോസഫ്, വൈസ് പ്രസിഡന്‍റ് ഇന്ദു പി. നായർ തുടങ്ങിയവർ പ്രസംഗിച്ചു.

പഞ്ചായത്തിന് വാടക നൽകില്ല; സ്വകാര്യ വ്യക്തിക്കു നൽകും

കെഎസ്ഇബിയുടെ വാടക കുടിശിക 40 ലക്ഷം രൂപ; നിയമനടപടിയുമായി പഞ്ചായത്ത് കൂരോപ്പട: പഞ്ചായത്തിനു വാടകയും വാടക കുടിശികയും നല്‍കാന്‍ തയാറാകാത്ത കെഎസ്ഇബി കാല്‍ ലക്ഷത്തോളം രൂപ വാടക നല്‍കി സ്വകാര്യ കെട്ടിടത്തിലേക്കു മാറി. പഞ്ചായത്തിന്‍റെ ഷോപ്പിംഗ് കോംപ്ലക്‌സില്‍ പ്രവര്‍ത്തിച്ചിരുന്ന വൈദ്യുതി ഓഫീസാണ് പഞ്ചായത്ത് വാടക ആവശ്യപ്പെട്ടതിനെത്തുടര്‍ന്ന് സ്വകാര്യ വ്യക്തിയുടെ കെട്ടിടത്തിലേക്കു കാല്‍ ലക്ഷം രൂപ വാടക നല്‍കി മാറിയത്. വൈദ്യുതി ബോര്‍ഡ് കൂരോപ്പട പഞ്ചായത്തിനു നല്‍കാനുള്ളത് 40 ലക്ഷം രൂപയുടെ വാടക കുടിശികയാണ്. 2016ല്‍ വൈദ്യുതി ബോര്‍ഡ് സെക്‌ഷന്‍ ഓഫീസ് ആരംഭിച്ചപ്പോള്‍ അന്നത്തെ പഞ്ചായത്ത് ഭരണസമിതി രണ്ടു വര്‍ഷത്തേക്കു വാടക രഹിതമായി പഞ്ചായത്തിന്‍റെ കെട്ടിടം നല്‍കിയിരുന്നു. 2018 ഫെബ്രുവരിയില്‍ വാടക ഇളവ് അവസാനിച്ചു. 2018 ഫെബ്രുവരി മുതല്‍ 2025 ഫെബ്രുവരി വരെയുള്ള വാടകയിനത്തില്‍ കെഎസ്ഇബി പഞ്ചായത്തിന് നല്‍കാനുള്ളത് 40 ലക്ഷം രൂപയാണ്. ഇപ്പോഴത്തെ ഭരണസമിതി അധികാരത്തില്‍ വന്ന ഉടനെതന്നെ വാടക കുടിശിക നല്‍കണമെന്നാവശ്യപ്പെട്ടു പല തവണ നോട്ടീസ് നല്‍കിയിരുന്നു. എന്നാല്‍, യാതൊരു നടപടികളുമുണ്ടായില്ല. ധനവകുപ്പ് വാടക വാങ്ങുന്നതില്‍ വീഴ്ച വരുത്തിയതിനു പഞ്ചായത്തിനു നോട്ടീസും കര്‍ശന നടപടി ഉണ്ടാകുമെന്ന മുന്നറിയിപ്പും നല്‍കിയിട്ടുണ്ട്. പഞ്ചായത്ത് ഭരണസമിതി യോഗം ഏകകണ്ഠമായി കെഎസ്ബിയില്‍നിന്നു വാടക ഈടാക്കാനുള്ള നടപടികൾക്കു പിന്തുണ പ്രഖ്യാപിച്ചു. വൈദ്യുതി മന്ത്രിയെ നേരില്‍കണ്ട സര്‍വകക്ഷി സംഘം സാമ്പത്തിക വരുമാനത്തില്‍ പിന്നാക്കം നില്‍ക്കുന്ന പഞ്ചായത്തിനു കെഎസ്ഇബി വാടക കുടിശിക നല്‍കണമെന്ന നിവേദനവും നല്‍കിയിട്ടുണ്ട്. എന്നാൽ, സ്വകാര്യ വ്യക്തിയുടെ കെട്ടിടത്തിലേക്ക് ഓഫീസ് മാറ്റിയത് ജനപ്രതിനിധികളെയോ പൊതുപ്രവര്‍ത്തകരെയോ അറിയിച്ചിട്ടില്ലെന്നു പഞ്ചായത്ത് പ്രസിഡന്‍റ് അമ്പിളി മാത്യുവും സെക്രട്ടറി എസ്. സുനിമോളും പറഞ്ഞു. വാടക കുടിശിക ഈടാക്കാനുള്ള നിയമ നടപടിയുമായി മുന്നോട്ടു പോകുമെന്നു പഞ്ചായത്ത് പ്രസിഡന്‍റ് പറഞ്ഞു.

നരനായാട്ട്; കടിയേറ്റത്‍ പതിനായിരങ്ങള്‍ക്ക്

കോട്ടയം: 2024 ജനുവരി മുതല്‍ 2025 ഓഗസ്റ്റ് വരെ തെരുവുനായ്ക്കളും വീട്ടില്‍ വളര്‍ത്തുന്ന നായ്ക്കളും അടക്കമുള്ളവയുടെ കടിയേറ്റവര്‍ നാല്‍പതിനായിരത്തോളം വരും. ഏറ്റവും കൂടുതല്‍ കടിയേറ്റത് ഇക്കൊല്ലം ഫെബ്രുവരി മുതല്‍ ജൂലൈ വരെയാണ്. 2024-25 വര്‍ഷം 3,504 തെരുവുനായ്ക്കള്‍ക്കു പേവിഷ പ്രതിരോധ വാക്‌സിനെടുത്തു. കോട്ടയം നഗരസഭയുടെ എബിസി സെന്‍ററില്‍ ഇക്കാലയളവില്‍ രണ്ടായിരം തെരുവുനായ്ക്കള്‍ക്കു വന്ധ്യംകരണം നടത്തി. ആകെയുള്ള തെരുവുനായകളുടെ നൂറിലൊന്നുപോലും വരില്ല ഈ നിരക്ക്. ജില്ലയില്‍ കോട്ടയം നഗരസഭയില്‍ മാത്രമാണ് വന്ധ്യംകരണ സൗകര്യമുള്ളത്. കോട്ടയം മെഡിക്കല്‍ കോളജില്‍ ഇക്കൊല്ലം ഇതുവരെ 1700 പേര്‍ക്ക് പേവിഷ പ്രതിരോധ കുത്തിവയ്പ് നല്‍കി. ഇതില്‍ നരിയും പൂച്ചയും മരപ്പട്ടിയും നീര്‍നായയുമൊക്കെ കടിച്ചവരും ഉണ്ടെങ്കിലും തെരുവുനായകളാണ് കടിയില്‍ മുന്‍നിരയിലുള്ളത്. ജില്ല, താലൂക്ക് ആശുപത്രികളില്‍ വാക്‌സിനേഷന്‍ എടുത്തവരുടെ കണക്കെടുത്താല്‍ എണ്ണം അയ്യായിരത്തോളം വരും. നായ കടിച്ചാല്‍ നാലു തവണയായി നാലു കുത്തിവയ്‌പെടുക്കണം. സര്‍ക്കാര്‍ ആശുപത്രികളില്‍ വാക്‌സിന്‍ സൗജന്യമാണ്. എന്നാല്‍ അലര്‍ജി തുടങ്ങിയ പ്രശ്‌നങ്ങളുള്ളവര്‍ വാക്‌സിന്‍ പുറത്തുനിന്ന് വിലകൊടുത്തു വാങ്ങണം. 18 വയസില്‍ താഴെയുള്ളവര്‍ക്ക് അലര്‍ജിയുണ്ടെങ്കിലും വാക്‌സിന്‍ വില സര്‍ക്കാര്‍ വഹിക്കും. തെരുവുനായകളുടെ കടി ചില്ലറ പരിക്കല്ല. മുഖവും ചുണ്ടും കൈകാലുകളും ആഴത്തില്‍ കടിച്ചു കീറും. മുറിവ് മാത്രമല്ല, ഇരയുടെ ഞരമ്പുകള്‍ വരെ പറിഞ്ഞുപോകും. അതിനാല്‍ അടിയന്തര ശസ്ത്രക്രിയ പലര്‍ക്കും വേണ്ടിവരും. പ്ലാസ്റ്റിക് സര്‍ജറി ഉള്‍പ്പെടെ വേറെയും നടപടികള്‍ക്ക് പണവും സമയവും കണ്ടെത്തേണ്ടിവന്നേക്കാം. നായയുടെയോ നായക്കൂട്ടത്തിന്‍റെ കടന്നാക്രമണത്തില്‍ ബോധം നഷ്ടപ്പെട്ടു വീഴുന്നവരുമുണ്ട്. ആഴ്ചകളോളം ഉറങ്ങാനും ഉണ്ണാനും സാധിക്കാത്ത വിധം ഭീതി അവരെ വിട്ടുമാറില്ല. കുട്ടികള്‍ക്ക് കടിയേറ്റാല്‍ രക്ഷിതാക്കളുടെ ആശങ്കയും ചെറുതല്ല. പരിക്ക് ഗുരുതരമെങ്കില്‍ ആശുപത്രികളില്‍ ദിവസങ്ങള്‍ കഴിയേണ്ടിവരാം. അലര്‍ജി പ്രശ്‌നങ്ങളുള്ളവര്‍ക്ക് വാക്‌സിനേഷന്‍ സങ്കീര്‍ണമാണ്. കടിയേല്‍ക്കുന്നവര്‍ക്ക് നാലു ദിവസം ജോലിയും പഠനവും വരുമാനവും മറ്റും നഷ്ടമാകും. വാക്‌സിനേഷന്‍ നടത്തിയാലും പേവിഷ ബാധയുണ്ടാകുമോ എന്ന ആശങ്ക മാസങ്ങളോളം നിലനില്‍ക്കും. നരിയും കുറുക്കനും കടിച്ചാല്‍ മുറിവില്‍തന്നെയാണ് വാക്‌സിനേഷന്‍ നല്‍കുക. സോപ്പുലായനിയില്‍ മുറിവ് ഒരു മണിക്കൂറോളം കഴുമ്പോഴുള്ള വേദനയും നീറ്റലും അതിലേറെ അസഹനീയം. തിങ്കളാഴ്ച കോട്ടയത്ത് സംഭവിച്ചത് കോട്ടയം നഗരസഭ ആസ്ഥാനത്തിന് വിളിപ്പാടകലെ തിങ്കളാഴ്ച വൈകുന്നേരം ആറിന് ശാസ്ത്രി റോഡിലെ ബസ് കാത്തിരിപ്പുകേന്ദ്രം കൈയടക്കിയ തെരുവുനായപ്പടയില്‍ ഒരെണ്ണം റോഡിനു കുറുകെ ചാടി ബൈക്ക് യാത്രക്കാരനെ നിലംപരിശാക്കി. കുത്തിറക്കത്തില്‍ മൂന്നു തവണ തകിടം മറിഞ്ഞ ബൈക്കിനടിയില്‍ യുവാവും നായയും പെട്ടു. ഓടിക്കൂടിയവര്‍ ബൈക്ക് ഉയര്‍ത്തി യുവാവിന് പ്രാഥമിക ശുശ്രൂഷകള്‍ നല്‍കി. പരിക്കേറ്റ നായ എവിടേക്കോ പാഞ്ഞു. ഇതേസമയം ചോരവാര്‍ന്ന് വേദനയില്‍ പുളഞ്ഞ ബൈക്കുകാരനുനേരേ നായക്കൂട്ടം പാഞ്ഞടുത്തു. ജനം പൊതിഞ്ഞതിനാല്‍ ബൈക്കുകാരനെ നായകള്‍ കടിച്ചുകീറിയില്ല. നഗരം നിറഞ്ഞ നായക്കൂട്ടത്തിലെ വലിയൊരു സംഘം ബസ് കാത്തിരിപ്പുകേന്ദ്രങ്ങളും സ്റ്റാന്‍ഡുകളും കിടപ്പാടമാക്കിയിട്ട് കാലമേറെയായി. വളരെ കുറച്ച് നായകളെ മാത്രമേ പിടികൂടി വന്ധ്യംകരിക്കാനോ പതിരോധ കുത്തിവയ്‌പെടുക്കാനോ സാധിച്ചത്. പ്രഥമശുശ്രൂഷയും വാക്സിനേഷനും പ്രധാനം കോട്ടയം: മൃഗങ്ങളുടെ കടിയേറ്റാല്‍ പ്രഥമ ശുശ്രൂഷയും കൃത്യസമയത്തുള്ള വാക്സിനേഷനും ഏറെ പ്രധാനമെന്ന് ജില്ലാ മെഡിക്കല്‍ ഓഫീസര്‍ ഡോ.എന്‍. പ്രിയ. നായ, പൂച്ച തുടങ്ങിയ മൃഗങ്ങള്‍ കടിക്കുകയോ മാന്തുകയോ ചെയ്താല്‍ എത്രയും വേഗം സോപ്പും വെള്ളവും ഉപയോഗിച്ച് 15 മിനിട്ട് ഒഴുകുന്ന വെള്ളത്തില്‍ നന്നായി കഴുകണം. പൈപ്പില്‍നിന്ന് വെള്ളം നേരിട്ട് തുറന്നുവച്ച് കഴുകുന്നതാണ് ഉത്തമം. മുറിവു കഴുകുന്ന വ്യക്തി നിര്‍ബന്ധമായും കൈയുറ ധരിക്കണം. ഇങ്ങനെ കഴുകിയാല്‍ ഭൂരിഭാഗം അണുക്കളും ഇല്ലാതാകും. മുഖം, കഴുത്ത്, കൈകള്‍ എന്നീ ഭാഗങ്ങളില്‍ കടിയേറ്റാല്‍ നാഡികളിലൂടെ വൈറസ് വളരെ പെട്ടെന്ന് തലച്ചോറിലെത്താന്‍ സാധ്യതയുള്ളതിനാല്‍ പ്രത്യേകം ശ്രദ്ധിക്കണം. മുറിവ് അമര്‍ത്തുകയോ ഉരച്ച് കഴുകുകയോ കെട്ടിവയ്ക്കുകയോ ചെയ്യരുത്. മൃഗങ്ങളുടെ കടിയോ മാന്തലോ പോറലോ ഉമിനീരുമായി സമ്പര്‍ക്കമോ വന്നാല്‍ ഉടന്‍തന്നെ അടുത്തുള്ള സര്‍ക്കാര്‍ ആശുപത്രിയിലെത്തി ഡോക്ടറുടെ നിര്‍ദേശപ്രകാരം കുത്തിവയ്പ് എടുക്കണം. കടിയേറ്റ ദിവസത്തിനു പുറമേ 3,7,28 ദിവസങ്ങളില്‍ കുത്തിവയ്പ് എടുക്കണം. നിര്‍ദേശിക്കുന്ന ദിവസങ്ങളില്‍തന്നെ വാക്സിന്‍ എടുക്കണം. മുഴുവന്‍ ഡോസും പൂര്‍ത്തിയാക്കണം. ജില്ലയിലെ എല്ലാ സര്‍ക്കാര്‍ ആരോഗ്യ കേന്ദ്രങ്ങളിലും താലൂക്ക്, ജനറല്‍, ജില്ലാ ആശുപത്രികളിലും മെഡിക്കല്‍ കോളജിലും വാക്സിന്‍ (ഐഡിആര്‍വി) സൗജന്യമായി ലഭിക്കും. മുറിവിന്‍റെ സ്ഥാനം, ആഴം എന്നിവ അനുസരിച്ച് ആവശ്യമെങ്കില്‍ ഡോക്ടറുടെ നിര്‍ദേശാനുസരണം ഇമ്യൂണോഗ്ലോബുലിന്‍ കൂടി എടുക്കേണ്ടതാണ്. ജില്ലയില്‍ മെഡിക്കല്‍ കോളജ്, കോട്ടയം ജനറല്‍ ആശുപത്രി, ചങ്ങനാശേരി, പാലാ, കാഞ്ഞിരപ്പള്ളി താലൂക്ക് ആസ്ഥാന ആശുപത്രി. പാമ്പാടി, കുറുവിലങ്ങാട്, വൈക്കം താലൂക്ക് ആസ്ഥാന ആശുപത്രി എന്നിവിടങ്ങളില്‍ ഇമ്യൂണോഗ്ലോബുലിന്‍ ലഭ്യമാണ്. പേവിഷബാധ വന്നാല്‍ രക്ഷയില്ല കോട്ടയം: നായ്ക്കളുടെയോ പൂച്ചകളുടെയോ കടിയോ മാന്തലോ മൂലം ശരീരത്തില്‍ മുറിവുണ്ടായാല്‍ നിര്‍ബന്ധമായി ചികിത്സ തേടണം. പരിക്ക് നിസാരമെന്നു വിചാരിക്കരുത്. പേവിഷബാധയുടെ ലക്ഷണം കാണിച്ചുതുടങ്ങിയാല്‍ ചികിത്സയില്ല. വൈറസുകള്‍ തലച്ചോറില്‍ എത്തി അവിടെനിന്ന് ഞരമ്പുകളിലൂടെ ഉമിനീര്‍ ഗ്രന്ഥി, കണ്ണ് തുടങ്ങി പല ഭാഗങ്ങളിലേക്കും വ്യാപിക്കും. കടിച്ച മൃഗം നിരീക്ഷണത്തിലായിരിക്കണം. പേയുണ്ടെങ്കില്‍ പത്തു ദിവസത്തിനുള്ളില്‍ ചത്തുപോകും. മാന്തിയാലും കടിയേറ്റാലും വെള്ളത്തില്‍ പതിനഞ്ച് മിനിറ്റ് സോപ്പിട്ട് കഴുകണം. ഏറിയ പങ്ക് വൈറസും ഇങ്ങനെ നശിക്കും. മുറിവുകള്‍ കെട്ടിവയ്ക്കാതെ വേഗം അലോപ്പതി ചികിത്സ തേടണം. കുത്തിവയ്പിന് പാര്‍ശ്വഫലങ്ങള്‍ ഒന്നുമില്ല. ഗര്‍ഭിണികള്‍ക്കും കുട്ടികള്‍ക്കും ഒരേ ഡോസ് തന്നെയാണ് നല്‍കുന്നത്. ഒന്ന്, മൂന്ന്, ഏഴ്, 21 എന്ന ക്രമത്തില്‍ നാല് കുത്തിവയ്പെടുക്കണം. ഇതിനുശേഷം മൂന്നു മാസത്തിനുള്ളില്‍ കടിയേറ്റാല്‍ വീണ്ടും ഡോസേജിന്‍റെ ആവശ്യമില്ല. സാധാരണയായി 90 ശതമാനവും നായകളില്‍നിന്നാണ് പേബാധ ഏല്‍ക്കുന്നത്. റാബിസ് ബാധിച്ച മൃഗങ്ങളുടെ പാല്‍, മാംസം എന്നിവ അപകടകാരിയല്ല. ചൂടേറ്റാല്‍ വൈറസ് ചത്തുപോകും. അതിനാല്‍ തിളപ്പിച്ച പാലും വേവിച്ച ഇറച്ചിയും ധൈര്യമായി കഴിക്കാം. പാല്‍ തിളപ്പിക്കാതെ കുടിക്കരുത്. സ്വകാര്യ അന്യായം ഫയല്‍ ചെയ്യും കഴിഞ്ഞ മാസം 20നു കോട്ടയം ചന്തക്കവലയില്‍ ബസിറങ്ങി നടന്നുപോകുമ്പോഴാണ് തെരുവുനായ കടിച്ചത്. ജില്ലാ ആശുപത്രിയിലും തുടര്‍ന്ന് മെഡിക്കല്‍ കോളജിലും ചികിത്സ തേടി. ഇന്നു നാലാമത്തെ പ്രതിരോധ കുത്തിവയ്പ് എടുക്കുകയാണ്. എന്നെയും മറ്റ് ഏഴു പേരെയും കടിച്ച നായ അന്നു വൈകുന്നേരം ചത്തുവീണു. പരിശോധനയില്‍ നായയ്ക്ക് പേബാധയുള്ളതായി കണ്ടെത്തി. ട്രേഡ് യൂണിയന്‍ ഭാരവാഹിയായ എനിക്ക് പൊതുപ്രവര്‍ത്തനം ഒരു മാസമായി തടസപ്പെട്ടിരിക്കുകയാണ്. തെരുവു നായകളെ നിര്‍മാര്‍ജനം ചെയ്യണമെന്നാവശ്യപ്പെട്ട് മുഖ്യമന്ത്രിക്കും തദ്ദേശ സ്വയംഭരണ മന്ത്രിക്കും നിവേദനം നല്‍കി. ഹൈക്കോടതിയില്‍ ഒരു സ്വകാര്യ അന്യായം ഉടന്‍ ഫയല്‍ ചെയ്യും. പി.ജെ. വര്‍ഗീസ്മുന്‍ ചെയര്‍മാന്‍, കോട്ടയം നഗരസഭ നായകളെ കാണുന്നതേ പേടി... രണ്ടു മാസം മുമ്പ് റബര്‍ ടാപ്പിംഗിന് പോകുമ്പോഴാണ് നായകടിയേറ്റത്. പിന്നിലൂടെ ഓടിവന്ന് കാലില്‍ കടിക്കുകയായിരുന്നു. മല്‍പ്പിടിത്തത്തില്‍ നായ മുഖവും കടിച്ചു വികൃതമാക്കി. മെഡിക്കല്‍ കോളജ് ആശുപത്രിയില്‍ പോയാണ് വാക്‌സിനേഷന്‍ എടുത്തത്. പരിക്കും വേദനയും മൂലം ഒരു മാസം വീട്ടില്‍ കഴിയേണ്ടിവന്നു. ഇപ്പോള്‍ നായകളെ കാണുമ്പോള്‍തന്നെ ഭയമാണ്. തെരുവുനായ ഭീഷണി ഇപ്പോഴും പ്രദേശത്തുണ്ട്. ജോബി അമ്പാട്ട് സൗത്ത് പാമ്പാടി തൊഴില്‍ നഷ്ടം നേരിട്ടു വളര്‍ത്തു കോഴിയെ ഓടിക്കുന്ന ശബ്ദം കേട്ട് വീടിനു മുറ്റത്തേക്ക് ഇറങ്ങിയപ്പോഴാണ് എവിടെനിന്നോ പാഞ്ഞെത്തിയ നായയുടെ കടിയേറ്റത്. കാലും മുഖവുമെല്ലാം നായ കടിച്ചുപറിച്ചു. മെഡിക്കല്‍ കോളജില്‍ പോയി നാലു കുത്തിവയ്പ് എടുത്തു. ജോലിക്കാരനായ എനിക്ക് മൂന്നു മാസം ജോലിക്കു പോകാന്‍ സാധിച്ചില്ല. ചികിത്സയ്ക്ക് വലിയ തോതില്‍ പണച്ചെലവുണ്ടായി. മൂന്നുമാസം ജോലിയില്‍ നിന്നുള്ള വരുമാനവും നിലച്ചു. നായകടി ഭീതി ഇപ്പോഴും വിട്ടുമാറിയിട്ടില്ല. അനീഷ് ചാത്തംപുരയിടം കുറ്റിക്കല്‍ മരുന്ന് പുറത്തുനിന്നു വാങ്ങേണ്ടിവന്നു മണര്‍കാട് പള്ളി കവലയ്ക്കും കാവുംപടിക്കും ഇടയ്ക്ക് അധ്യാപക ബാങ്കിനു മുന്നില്‍ വച്ച് ഓഗസ്റ്റ് എട്ടിനാണ് നായയുടെ കടിയേറ്റത്. കാലിന്‍റെ പിന്‍ഭാഗത്താണു കടിയേറ്റത്. ലോട്ടറി വിറ്റ് ഉപജീവനം നടത്തുന്ന എനിക്ക് മണര്‍കാട് ഹെല്‍ത്ത് സെന്‍ററില്‍നിന്നുമാണ് ബൂസ്റ്റപ്പ് ഡോസ് ലഭിച്ചത്. വേദനമൂലം പിന്നീട് ലോട്ടറി വില്‍ക്കാന്‍ സാധിക്കാത്ത അവസ്ഥ നേരിട്ടു. ആശുപത്രിയില്‍നിന്നു മരുന്നു ലഭിക്കാത്തതുമൂലം പുറത്തുനിന്നുള്ള മരുന്ന് വാങ്ങിയാണ് കുത്തിവയ്പ് നടത്തിയത്. ടി.എസ്. ശ്രീകാന്ത്പുത്തന്‍പറമ്പില്‍, കൊങ്ങാണ്ടൂര്‍ വീട്ടിൽ എല്ലാവരുടെയും ഉറക്കം നഷ്ടപ്പെട്ടു ട്യൂഷനു പോകുമ്പോള്‍ വാഴപ്പള്ളി കല്‍ക്കുളത്തുകാവ് ക്ഷേത്രത്തിനു സമീപമാണ് മകന്‍ ഭാഗ്യനാഥിന് തെരുവുനായയുടെ കടിയേറ്റത്. ഉടനെ ചങ്ങനാശേരി ജനറല്‍ ആശുപത്രിയില്‍ എത്തിച്ച് വേണ്ട ശുശ്രൂഷകളും കുത്തിവയ്പുമെടുത്തു. രണ്ടു ദിവസങ്ങളിലായി രണ്ടു കുട്ടികളെ ഉള്‍പ്പെടെ എട്ടുപേരെയാണ് ഈ നായ കടിച്ചത്. കടിച്ച നായ ചാകുകയും പരിശോധനയില്‍ പേവിഷബാധയുണ്ടെന്ന് സ്ഥിരീകരിക്കുകയും ചെയ്തതോടെ മനോവിഷമം കൂടിയെന്നു മാത്രമല്ല വീട്ടില്‍ എല്ലാവരുടെയും ഉറക്കം നഷ്ടപ്പെട്ടു. തുടര്‍ന്ന് കോട്ടയം മെഡിക്കല്‍ കോളജില്‍ വിദഗ്ധ പരിശോധന നടത്തിയശേഷമാണ് ആശ്വാസമായത്. കെ.വി. ഹാരിഷ് കേളമ്മാട്ട്, വാഴപ്പള്ളി

കാര്‍ഡമം പ്ലാന്‍റേഴ്സ് ഫെഡ. സോണല്‍ മീറ്റിംഗ്

കോട്ടയം: കാര്‍ഡമം പ്ലാന്‍റേഴ്സ് ഫെഡറേഷന്‍ കോട്ടയം സോണല്‍ മീറ്റിംഗ് പാലാ ബേസ് ഇലവന്‍ കണ്‍വെന്‍ഷന്‍ സെന്‍ററില്‍ മാര്‍ മാത്യു അറയ്ക്കല്‍ ഉദ്ഘാടനം ചെയ്തു. മാര്‍ ജോസഫ് കല്ലറങ്ങാട്ട് സന്ദേശം നല്‍കി. കാര്‍ഡമം പ്ലാന്‍റേഴ്സ് ഫെഡറേഷന്‍ ചെയര്‍മാന്‍ സ്റ്റനി പൊത്തന്‍ അധ്യക്ഷത വഹിച്ചു. ഫെഡറേഷന്‍ സെക്രട്ടറി പി.ആര്‍. സന്തോഷ്, എംപിമാരായ ഫ്രാന്‍സിസ് ജോര്‍ജ്, ജോസ് കെ. മാണി, മാണി സി. കാപ്പന്‍ എംഎല്‍എ, ഇടുക്കി ജില്ലാ പഞ്ചായത്ത് പ്രസിഡന്‍റ് രാരിച്ചന്‍ നീറണാക്കുന്നേല്‍, ഡിജോ കാപ്പന്‍, എന്‍എസ്എസ് ഹൈറേഞ്ച് യൂണിയന്‍ പ്രസിഡന്‍റ് ആര്‍. മണിക്കുട്ടന്‍ എന്നിവര്‍ പ്രസംഗിച്ചു. ഫെഡറേഷന്‍റെ രൂപീകരണത്തിനും കാര്‍ഡമം മേഖലയ്ക്കും നല്‍കിയ സമഗ്ര സംഭാവനകൾ പരിഗണിച്ച് അന്തരിച്ച സാജന്‍ കുര്യന്‍ കളരിക്കലിനുവേണ്ടി അദ്ദേഹത്തിന്‍റെ സഹധര്‍മിണിയെയും കുടുംബാംഗങ്ങളെയും ആദരിച്ചു. പ്ലാന്‍ററും വ്യവസായിയും പൊതുപ്രവര്‍ത്തകനുമായ ജോര്‍ജ് ജെ. മാത്യു, ഏലം കയറ്റുമതിക്കാരനും പ്ലാന്‍ററും ഫെഡറേഷൻ അഡ്വൈസറി ബോര്‍ഡ് മെമ്പറുമായ ടി.ടി. ജോസ് മാസ് എന്‍റര്‍പ്രൈസസ്, ഫെഡറേഷന്‍ മെമ്പറും പ്ലാന്‍ററും വ്യവസായിയും സിഐഐ കേരള വൈസ് ചെയര്‍മാനുമായ ജോസഫ് മൈക്കിള്‍ കള്ളിവയലില്‍, ഫെഡറേഷന്‍ മെമ്പറും കര്‍ഷക മോര്‍ച്ച സംസ്ഥാന അധ്യക്ഷനുമായ ഷാജി രാഘവന്‍ എന്നിവരെയും ആദരിച്ചു. യോഗത്തില്‍ ഫെഡറേഷന്‍ ഭാരവാഹികളും കമ്മിറ്റി അംഗങ്ങളും കോട്ടയം മേഖലയിലെ ഏലം കര്‍ഷകരും ഉള്‍പ്പെടെ നിരവധി പ്രമുഖര്‍ പങ്കെടുത്തു.

ഷോക്കേറ്റ് ചികിത്സയിലായിരുന്ന വിദ്യാര്‍ഥി മരിച്ചു

കടുത്തുരുത്തി: റെയില്‍വേ സ്റ്റേഷനില്‍ നിര്‍ത്തിയിട്ടിരുന്നു ഗുഡ്സ് ട്രെയിന്‍റെ മുകളിലുടെ പാളം മുറിച്ചു കടക്കാന്‍ ശ്രമിക്കുന്നതിനിടെ വൈദ്യൂതാഘാതമേറ്റ് കോട്ടയം മെഡിക്കല്‍ കോളജില്‍ ചികിത്സയിലായിരുന്ന വിദ്യാര്‍ഥി മരിച്ചു. കടുത്തുരുത്തി ഗവണ്‍മെന്‍റ് പോളിടെക്നിക്കിലെ രണ്ടാം വര്‍ഷ കംപ്യൂട്ടര്‍ എന്‍ജിനിയറിംഗ് വിദ്യാര്‍ഥി എറണാകുളം കുമ്പളം ശ്രീനിലയം വീട്ടില്‍ രതീഷ് കുമാറിന്‍റെ ഏകമകന്‍ എസ്.ആര്‍. അദ്വൈത് (18) ആണ് മരിച്ചത്. കഴിഞ്ഞ ചൊവ്വാഴ്ച വൈകുന്നേരം നാലോടെ ആപ്പാഞ്ചിറ (വൈക്കം റോഡ് ) റെയില്‍വേ സ്റ്റേഷനിലാണ് അപകടം. ക്ലാസ് കഴിഞ്ഞ് വീട്ടിലക്ക് മടങ്ങുമ്പോഴാണ് അപകടത്തില്‍പെട്ടത്. റെയില്‍വേ സ്റ്റേഷനിലെത്തിയ അദ്വൈത് ട്രാക്കില്‍ കിടന്ന് ഗുഡ്‌സ് ട്രെയിനിന് മുകളിലൂടെ പാളം മുറിച്ചു കടക്കാന്‍ ശ്രമിക്കുമ്പോഴായിരുന്നു അപകടം. ഷോക്കേറ്റ് താഴെ വീണ അദ്വൈതിനെ റെയില്‍വേ ജീവനക്കാരും യാത്രക്കാരും ചേര്‍ന്ന് മുട്ടുചിറ എച്ച്ജിഎം ആശുപത്രിയില്‍ എത്തിക്കുകയായിരുന്നു. പിന്നീട് വിദഗ്ധ ചികിത്സയ്ക്കായി കോട്ടയം മെഡിക്കല്‍ കോളജിലേക്ക് മാറ്റി. മെഡിക്കല്‍ കോളേജിലെ തീവ്ര പരിചരണ യൂണിറ്റില്‍ ചികിത്സയിലിരിക്കെ ഇന്നലെ രാവിലെ മരിച്ചു. ഇന്നലെ കടുത്തുരുത്തി ഗവണ്‍മെന്‍റ് പോളിടെക്‌നിക്ക് കോളജില്‍ പൊതുദര്‍ശനത്തിന് വച്ച ശേഷം വീട്ടിലെത്തിച്ച് രാത്രിയോടെ സംസ്‌കാരം നടത്തി.

മഞ്ഞപ്പിത്തം: കോട്ടയം ഐഐഐടി അടച്ചു

പാലാ: വിദ്യാര്‍ഥികളില്‍ മഞ്ഞപ്പിത്തം വ്യാപകമായതിനെത്തുടര്‍ന്ന് വലവൂരിലെ കോട്ടയം ട്രിപ്പിള്‍ ഐടി കാമ്പസ് ഒക്ടോബര്‍ ആറുവരെ അടച്ചു. മഞ്ഞപ്പിത്തം പകരുന്നത് തടയാന്‍ മുന്‍ കരുതലെടുക്കുന്നതിന്‍റെ ഭാഗമായാണ് തത്കാലത്തേക്ക് അടച്ചതെന്ന് കാമ്പസ് രജിസ്ട്രാര്‍ എം. രാധാകൃഷ്ണന്‍ പറഞ്ഞു. 20ല്‍ പരം കുട്ടികള്‍ ചേര്‍പ്പുങ്കലിലെ സ്വകാര്യ ആശുപത്രിയില്‍ ചികിത്സ തേടിയിരുന്നു. ഇതിന്‍റെ അടിസ്ഥാനത്തില്‍ ആരോഗ്യ വകുപ്പ് അധികൃതര്‍ പരിശോധന നടത്തിയിരുന്നു. ആന്ധ്രാ സ്വദേശിയായ വിദ്യാര്‍ഥിക്കാണ് ആദ്യം രോഗമുണ്ടായത്. തുടര്‍ന്ന് മറ്റു വിദ്യാര്‍ഥികള്‍ക്കും പകരുകയായിരുന്നു. ഇതിനെത്തുടര്‍ന്നാണ് ആരോഗ്യ വകുപ്പ് അധികൃതരുടെ നിര്‍ദേശ പ്രകാരം കാമ്പസിന് അവധി നല്‍കിയത്. രോഗം നിയന്ത്രണ വിധേയമാണെന്ന് ട്രിപ്പിള്‍ ഐടി അധികൃതര്‍ പറഞ്ഞു. രോഗം പിടിപെട്ട കുട്ടികളില്‍നിന്ന് മറ്റു കുട്ടികള്‍ക്ക് അണുബാധയുണ്ടാകുവാനുള്ള സാധ്യതകൂടി കണക്കിലെടുത്താണ് അടുത്തമാസംവരെ അവധി നല്‍കിയത്. അതേസമയം കാമ്പസിലെ മാലിന്യ സംസ്‌കരണം സര്‍ക്കാര്‍ നിര്‍ദേശിച്ചിരിക്കുന്ന മാനദണ്ഡങ്ങള്‍ പ്രകാരമാണെന്നും ഇതു സംബന്ധിച്ചുള്ള പ്രചാരണങ്ങള്‍ അടിസ്ഥാന രഹിതമാണെന്നും അധികൃതര്‍ പറയുന്നു. അതേസമയം കാമ്പസിന് സമീപത്തുള്ള സ്വകാര്യ ഹോസ്റ്റലുകളുടെ ശൗചാലയ മാലിന്യ സംസ്‌കരണം സംബന്ധിച്ച് പരിശോധന നടത്താന്‍ അധികൃതര്‍ തയാറാവുന്നില്ലെന്ന് നാട്ടുകാര്‍ ആരോപിച്ചു.

വന്യജീവി നിയമഭേദഗതി ബില്ല് തട്ടിപ്പ്: ബിജെപി

കോട്ടയം: സംസ്ഥാനം കൊണ്ടുവന്ന വനം-വന്യജീവി നിയമ ഭേദഗതി ബില്‍ കര്‍ഷകരുടെ കണ്ണില്‍ പൊടിയിടാനുള്ള തട്ടിപ്പ് മാത്രമാണെന്ന് ബിജെപി സംസ്ഥാന ഉപാധ്യക്ഷന്‍ ഷോണ്‍ ജോര്‍ജും കര്‍ഷക മോര്‍ച്ച സംസ്ഥാന പ്രസിഡന്‍റ് ഷാജി രാഘവനും പത്രസമ്മേളനത്തിൽ പറഞ്ഞു. നിയമസഭയില്‍ രണ്ടു മുന്നണികളും സംയുക്തമായി ഈ ബില്ലിനെ പിന്തുണയ്ക്കുന്നത് വസ്തുതകള്‍ മറച്ചുവയ്ക്കാനും കഴിഞ്ഞ കാലങ്ങളില്‍ കര്‍ഷകരോട് കാട്ടിയ ദ്രോഹ നിലപാടുകളില്‍നിന്ന് ശ്രദ്ധ തിരിക്കാനും വേണ്ടിയാണ്. വന്യമൃഗങ്ങളുടെ ആക്രമണം കഴിഞ്ഞ 10 വര്‍ഷമായി ഉണ്ടായിട്ടുള്ള ഒന്നല്ല. കേരളത്തിലെ രണ്ടു മുന്നണികള്‍ക്കും വലിയ സ്വാധീനമുള്ള ഗവണ്‍മെന്‍റുണ്ടായ കാലഘട്ടത്തില്‍പോലും നടപ്പിലാക്കാന്‍ ശ്രമിക്കാത്ത ഭേദഗതികളുമായാണ് ഇപ്പോള്‍ രംഗത്തു വന്നിട്ടുള്ളത്. ഇത് കര്‍ഷകരോടുള്ള ആത്മാര്‍ഥതയല്ല മറിച്ചു തെരഞ്ഞെടുപ്പ് ലക്ഷ്യംവച്ചുള്ള തന്ത്രം മാത്രമാണ്. 1972ൽ പാസാക്കിയ വനം-വന്യജീവി സംരക്ഷണ നിയമത്തെയാണ് ഭേദഗതി വരുത്തിയിരിക്കുന്നതെന്നു പറയുന്നത്. ചീഫ് ഫോറസ്റ്റ് കണ്‍സര്‍വേറ്റര്‍ക്ക് പുറത്ത് കളക്ടര്‍മാര്‍ക്ക് വലിയ മൃഗങ്ങളെ വെടിവച്ചു കൊല്ലുന്നതിനുള്ള അവകാശം കൊടുക്കുന്നതാണു പുതിയ നിയമം എന്നാണു പറയുന്നത്. നിലവിലെ നിയമം ഇതിനു പര്യാപ്തമാണ് എന്നതാണു വസ്തുത. കേന്ദ്ര വനം മന്ത്രാലയം സംസ്ഥാന ഗവണ്‍മെന്‍റിന് നല്‍കിയിട്ടുള്ള കത്തില്‍ കൃത്യമായി സെക്‌ഷന്‍ 11 (ഐ)എ, 11 (ഐ)ബി പ്രകാരം ചീഫ് വൈല്‍ഡ് ലൈഫ് വാര്‍ഡനോ ചീഫ് വൈല്‍ഡ് ലൈഫ് വാര്‍ഡന്‍ ചുമതലപ്പെടുത്തുന്ന ഉദ്യോഗസ്ഥനോ, മനുഷ്യജീവനോ സ്വത്തുക്കള്‍ക്കോ ഭീഷണിയാകുന്ന വന്യമൃഗങ്ങളെ കൊല്ലാന്‍ അനുമതി നല്‍കണമെന്ന് കാണിച്ചിട്ടുണ്ട്. ഈ കത്ത് 2025 ഏപ്രില്‍ മൂന്നിനു ഡപ്യൂട്ടി ഇന്‍സ്‌പെക്ടര്‍ ജനറല്‍ ഓഫ് ഫോറസ്റ്റ് സംസ്ഥാന ഗവര്‍മെന്റിനെ അയച്ചിട്ടുള്ളതുമാണ്. ഇത്രയും വ്യക്തമായ ഉത്തരവ് നിലനില്‍ക്കേ ഇപ്പോള്‍ വീണ്ടും വന്യജീവികളെ വെടിവയ്ക്കാന്‍ അനുമതി തേടാനുള്ള സംസ്ഥാന സര്‍ക്കാര്‍ തീരുമാനം ജനങ്ങളെ കബളിപ്പിക്കാനാണെന്ന് ഷോണ്‍ ജോര്‍ജും ഷാജി രാഘവനും പറഞ്ഞു.

അരുണാപുരത്ത് നഗരസഭയുടെ മിനി ആശുപത്രി

പാലാ: നഗരസഭയുടെ ചുമതലയില്‍ രണ്ടാമത് ഹെല്‍ത്ത് ആൻഡ് വെല്‍നസ് സെന്‍റര്‍ പാലാ കെ.എം. മാണി ബൈപാസില്‍ അരുണാപുരത്ത് തുറന്നു. ഈ മേഖലയിലുള്ളവര്‍ക്ക് ഇനി ഡോക്ടറെ കാണാന്‍ നഗരത്തിരക്കിലേക്കും ആശുപത്രി ക്യൂവിലേക്കും പോകേണ്ടതില്ല. സ്ഥിരം ഡോക്ടറുടെയും നഴ്‌സിന്‍റെയും സേവനവും ഫാര്‍മസി സൗകര്യവും ഇവിടെയുണ്ട്. നാഷണല്‍ ഹെല്‍ത്ത് മിഷന്‍റെ സഹകരണത്തോടെ നഗരസഭയില്‍ അനുവദിച്ച രണ്ടാമത് ഹെല്‍ത്ത് സെന്‍ററാണ് അരുണാപുരത്ത് ഇന്നലെ പ്രവര്‍ത്തനമാരംഭിച്ചത്. പ്രഥമ ഹെല്‍ത്ത് സെന്‍റര്‍ നേരത്തേ മുണ്ടുപാലം പരമലക്കുന്നില്‍ പ്രവര്‍ത്തനം ആരംഭിച്ചിരുന്നു. സാധാരണക്കാരായ രോഗികള്‍ക്ക് ചികിത്സാച്ചെലവുകള്‍ ഇല്ലാതെ ആരോഗ്യസുരക്ഷ ഉറപ്പാക്കുകയാണ് പദ്ധതിയുടെ ലക്ഷ്യം. ജനറല്‍ ആശുപത്രിയിലെ മെഡിസിന്‍ വിഭാഗത്തിലെ തിരക്ക് ഒഴിവാക്കുന്നതിനും മണിക്കൂറുകള്‍ ക്യൂ നില്‍ക്കേണ്ട സഹചര്യം ഇല്ലാതാക്കാനും ഹെല്‍ത്ത് സെന്‍റര്‍ സേവനം പ്രയോജനപ്പെടുത്താം. ഉച്ചയ്ക്ക് 12 മുതല്‍ വൈകുന്നേരം ആറുവരെ ഹെല്‍ത്ത് സെന്‍റര്‍ പ്രവര്‍ത്തിക്കും. മൈനര്‍ ഡ്രസിംഗ്, രോഗീ നിരീക്ഷണം, ജീവിതശൈലീ രോഗനിര്‍ണയം, റഫറല്‍ സംവിധാനം, ബോധവത്കരണ ക്ലാസുകള്‍, ഗര്‍ഭിണികള്‍ക്കായുള്ള പരിശോധനകള്‍, കുട്ടികള്‍ക്കായുള്ള പ്രതിരോധ കുത്തിവയ്പ് സേവനങ്ങള്‍ എന്നിവ ഇവിടെനിന്നു ലഭ്യമാണ്. ഹെല്‍ത്ത് സെന്‍ററിന്‍റെ പ്രവര്‍ത്തനോദ്ഘാടനം ജോസ് കെ. മാണി എംപി നിർവഹിച്ചു. നഗരസഭാ ചെയര്‍പേഴ്‌സണ്‍ തോമസ് പീറ്റര്‍ അധ്യക്ഷത വഹിച്ചു. വാര്‍ഡ് കൗണ്‍സിലറും വികസനകാര്യ സ്റ്റാന്‍ഡിംഗ് കമ്മിറ്റി ചെയര്‍മാനുമായ സാവിയോ കാവുകാട്ട്, വൈസ് ചെയര്‍പേഴ്‌സണ്‍ ബിജി ജോജോ, സ്വാമി വീതസംഗാനന്ദ, ആന്‍റോ പടിഞ്ഞാറെക്കര, ജോസിന് ബിനോ, ഷാജു തുരുത്തേല്‍, ജോസ് ജെ. ചീരാംകുഴി, സിജി പ്രസാദ്, നീന ചെറുവള്ളി, മായാ പ്രദീപ് എന്നിവര്‍ പ്രസംഗിച്ചു.‌

ലോകസുറിയാനി സമ്മേളന പ്രതിനിധികൾ കുറവിലങ്ങാട് പള്ളിയിൽ

കുറവിലങ്ങാട്: ലോകസുറിയാനി സമ്മേളന പ്രതിനിധികൾ ക്രൈസ്തവ ചരിത്രത്തിന്‍റെ വേരുകൾ കണ്ടും കേട്ടുമറിയാൻ കുറവിലങ്ങാട് പള്ളിയിലെത്തി. അവിഭക്ത നസ്രാണി സഭയുടെ കേന്ദ്രമായിരുന്ന കുറവിലങ്ങാട് ആദ്യ നൂറ്റാണ്ടിൽ തുടങ്ങുന്ന ക്രൈസ്തവ പാരമ്പര്യവും ലോകചരിത്രത്തിലെ ആദ്യ മരിയൻ പ്രത്യക്ഷീകരണവുമാണ് കുറവിലങ്ങാട് സന്ദർശിക്കാൻ പ്രേരിപ്പിച്ചതെന്നു സംഘത്തിലെ അംഗങ്ങൾ പറഞ്ഞു. പള്ളിയിലെ ചുവരുകളിലെ സുറിയാനി ലിഖിതങ്ങളും പഴമ പേറുന്ന ശിലാരൂപങ്ങളുമൊക്കെ കൗതുകത്തോടെയാണ് സംഘം കണ്ടതും ചോദിച്ചറിഞ്ഞതും. പള്ളിയിലെത്തിയ സംഘം റംശാ നമസ്‌കാരം നടത്തി. പാരമ്പര്യ നസ്രാണി കലാരൂപങ്ങളായ മാർഗംകളിയും പരിചമുട്ടും സംഘത്തിനായി മർത്ത്മറിയം വിശ്വാസപരിശീലന കേന്ദ്രത്തിലെ വിദ്യാർഥികൾ അവതരിപ്പിച്ചു. പള്ളിയിലെ ഫാ. തോമസ് മണക്കാട്ട് സ്മാരക ദേവമാതാ മ്യൂസിയത്തിലെ കാഴ്ചകൾ ചോദിച്ചറിയാൻ സംഘാംഗങ്ങൾ പ്രത്യേക താത്പര്യം കാട്ടി. കോട്ടയം സീരിയിൽ നടക്കുന്ന ലോകസുറിയാനി സംഗമത്തിൽ പങ്കെടുക്കുന്ന അറുപതോളം പേരാണ് പള്ളി സന്ദർശിച്ചത്. ഇത്രയും ചരിത്രപ്രാധാന്യമുള്ള പള്ളിയിലെത്താൻ കഴിഞ്ഞതിലുള്ള സന്തോഷം പലരും പങ്കുവച്ചു. പാലാ രൂപതാധ്യക്ഷൻ മാർ ജോസഫ് കല്ലറങ്ങാട്ട് ആഗോളസംഘത്തിനൊപ്പം പ്രാർഥനകളിൽ പങ്കുചേർന്നു. ആർച്ച്പ്രീസ്റ്റ് റവ.ഡോ. തോമസ് മേനാച്ചേരി, അസി. വികാരിമാരായ ഫാ. തോമസ് താന്നിമലയിൽ, ഫാ. ജോസഫ് ചൂരയ്ക്കൽ, പാസ്റ്ററൽ അസിസ്റ്റന്‍റുമാരായ ഫാ. ജോസ് കോട്ടയിൽ, ഫാ. പോൾ മഠത്തിക്കുന്നേൽ എന്നിവരുടെ നേതൃത്വത്തിൽ കൈക്കാരന്മാരും പള്ളിയോഗാംഗങ്ങളും കുടുംബകൂട്ടായ്മ പ്രതിനിധികളും ചേർന്നു സംഘത്തെ സ്വീകരിച്ചു. ഡോ. എലെയ്ൻ ജെ. ഡൊസ്രാമാക്‌സ് (ഫ്രാൻസ്), ഡോ. ഹെറാൾഡ് സെർമാൻ (ജർമനി), ഡോ. ഫ്രാങ്കൊയ്സ് ബ്രിക്വൽ (ഫ്രാൻസ്), ഡോ. എ. മുരിയേൽ ഡെബി (ഫ്രാൻസ്), സീരി ഡയറക്ടർ റവ. ഡോ. ജേക്കബ് തെക്കേപ്പറമ്പിൽ, പ്രഫ. ഡാനിയേൽ മക്നോട്ടി, പ്രവർട്ട് ആൽബെറിക് മാറ, റവ. ഡോ. ആൻഡ്രൂസ് മേക്കാട്ടുകുന്നേൽ തുടങ്ങിയവർ ആശയങ്ങൾ പങ്കുവച്ചു.

ഡോക്ടർ വരും പോകും; നാട്ടുകാർ അറിയുന്നില്ല

എരുമേലി: എരുമേലി സർക്കാർ ആശുപത്രിയിൽ ഇടയ്ക്കിടെ സ്പെഷലിസ്റ്റ് ഡോക്ടർമാർ എത്തുന്നുണ്ടെങ്കിലും ആശുപത്രിയിലെ ക്രമീകരണങ്ങളിലെ പാളിച്ച മൂലം അതിന്‍റെ പ്രയോജനം രോഗികൾക്കു കിട്ടുന്നില്ലെന്നു പരാതി. പലപ്പോഴും സ്പെഷലിസ്റ്റ് ഡോക്ടർമാർ എത്തുന്നത് രോഗികൾ അറിയുന്നില്ല. ഗൈനക്കോളജി ഡോക്ടറുടെ സേവനം എരുമേലി സർക്കാർ ആശുപത്രിയിൽ ഇക്കഴിഞ്ഞ ദിവസം ഉണ്ടെന്ന വിവരം നാട്ടിലാരും അറിഞ്ഞില്ല. ഡ്യൂട്ടിയിൽ എത്തിയ സ്പെഷൽ ഡോക്ടർക്കു മുമ്പിൽ ഒപിയിൽ എത്തിയ പനി ബാധിച്ചവർ ഉൾപ്പെടെയുള്ള രോഗികളെ വരെ പറഞ്ഞുവിടുകയാണത്രേ ജീവനക്കാർ. ആശുപത്രിയിൽ സ്പെഷാലിറ്റി സേവനത്തിന് എത്തുന്ന ഡോക്ടർമാർക്കു മുന്നിൽ പലപ്പോഴും മറ്റു രോഗങ്ങളുമായി വരുന്നവരാണ് എത്തുന്നത്. ഇവിടെ വരുന്ന സ്പെഷലിസ്റ്റ് ഡോക്ടർമാരും ഇക്കാര്യത്തിൽ പലവട്ടം പരാതി പറഞ്ഞു. തങ്ങളുടെ സേവനം സംബന്ധിച്ചു പൊതുജനങ്ങളെ അറിയിക്കുന്നില്ലെന്നാണ് ഡോക്ടർമാർ പറയുന്നത്. എല്ലാം ആശമാർക്ക് ‌ഹെൽത്ത്‌ വിഭാഗം ഉദ്യോഗസ്ഥർ സകല ജോലിയും ആശാ വർക്കർമാരെ ഏൽപ്പിച്ച മട്ടിലാണ് കാര്യങ്ങളെന്നാണ് ആക്ഷേപം. ആശാ വർക്കർമാരും അങ്കണവാടി ടീച്ചർമാരും നൽകുന്ന വിവരങ്ങൾ രേഖയാക്കി ഒരു വിഭാഗം ഉദ്യോഗസ്ഥർ ജോലി തീർക്കുകയാണെന്ന് ആശാ വർക്കർമാരും അങ്കണവാടി ടീച്ചർമാരും ആരോപിക്കുന്നു. കിണർവെള്ളം മലിനം എരുമേലി ടൗണിലും പരിസരങ്ങളിലും കിണർവെള്ളം മലിനമാണെന്ന പരാതിയും ശക്തമാണ്. കൃത്യമായി ഇവ ശുചീകരിക്കാൻ സാധിക്കുമെന്നും എന്നാൽ, ഹെൽത്ത്‌ വിഭാഗം ഉദ്യോഗസ്ഥർ ഫീൽഡിൽ വേണ്ടത്ര വരാത്തതിനാൽ തങ്ങൾക്ക് ഒന്നും ചെയ്യാൻ പറ്റുന്നില്ലെന്നും ആശാ പ്രവർത്തകരും അങ്കണവാടി ജീവനക്കാരും പറയുന്നു. ഒട്ടേറെ പേർ കിണറുകളുടെ ശുചീകരണം സംബന്ധിച്ച സംശയങ്ങൾ ഉന്നയിക്കുന്നുണ്ടെന്നും ഇവർ പറയുന്നു.

റോഡിലേക്ക് ഇറക്കി സ്ഥാപിച്ചിരിക്കുന്ന ദിശാബോർഡ് അപകടഭീഷണി

മുണ്ടക്കയം: റോഡിലേക്ക് ഇറക്കി സ്ഥാപിച്ചിരിക്കുന്ന ദിശാബോർഡ് അപകടഭീഷണി ഉയർത്തുന്നു. മുണ്ടക്കയം-എരുമേലി സംസ്ഥാന പാതിയിൽ വരിക്കാനി കവലയ്ക്കും കരിനിലത്തിനുമിടയിൽ പഴയ എസ്എൻ സ്കൂളിന് സമീപം റോഡിനോട് ചേർന്നുനിൽക്കുന്ന ദിശാബോർഡാണ് അപകടഭീഷണിയിലുള്ളത്. മുന്പ് ഇവിടെ സ്കൂൾ പ്രവർത്തിച്ചിരുന്ന സമയത്ത് വാഹനങ്ങളുടെ വേഗം കുറയ്ക്കാനായി സ്കൂളും സീബ്ര ലൈനുമുണ്ടെന്ന് കാണിച്ചിരുന്ന ദിശാബോർഡാണ് അപകടഭീഷണി ഉയർത്തുന്നത്. സാധാരണയായി റോഡിൽനിന്നു മൂന്ന് അടിയോളം അകലം പാലിച്ചാണ് ദിശാബോർഡുകൾ സ്ഥാപിക്കുന്നത്. എന്നാൽ, ഇവിടെ സ്ഥാപിച്ചിരിക്കുന്ന ദിശാബോർഡ് റോഡിലെ ടാറിംഗിനോട് ചേർന്നുനിൽക്കുന്നതിനാൽ വാഹനം ഇടിക്കാനുള്ള സാധ്യത ഏറെയാണ്. ഒരേസമയം ഇരുദിശകളിൽനിന്ന് ബസുകളടക്കമുള്ള വലിയ വാഹനങ്ങൾ വരുമ്പോൾ റോഡിന്‍റെ വശം ചേർത്ത് വാഹനം എടുക്കുകയും ഇത് ദിശാബോർഡിൽ ഇടിക്കാൻ ഇടയാക്കുകയും ചെയ്യുന്നുണ്ട്. കൂടാതെ റോഡിനോട് ചേർന്നുനിൽക്കുന്ന ദിശാബോർഡ് അടുത്തു വരുമ്പോൾ മാത്രമാണ് ഡ്രൈവർമാരുടെ ശ്രദ്ധയിൽപ്പെടുന്നത്. ഉടൻ വാഹനം വെട്ടിച്ചുമാറ്റുന്നതും അപകടങ്ങൾക്കിടയാക്കുന്നുണ്ട്. റോഡിലേക്ക് ഇറക്കി സ്ഥാപിച്ചിരിക്കുന്ന ദിശാബോർഡ് മാറ്റിസ്ഥാപിക്കാൻ അധികൃതർ അടിയന്തര നടപടി സ്വീകരിക്കണമെന്ന ആവശ്യമാണ് ഉയരുന്നത്.

സാംസ്‌കാരിക നിലയത്തിന് തറക്കല്ലിട്ടു

കാഞ്ഞിരപ്പള്ളി: പഞ്ചായത്ത് 18-ാം വാർഡിലെ ഞള്ളമറ്റത്ത് പുതുതായി നിർമിക്കുന്ന സാംസ്‌കാരിക നിലയത്തിന്‍റെ നിർമാണ പ്രവർത്തനങ്ങൾ ആരംഭിച്ചു. പൊതുജനങ്ങൾക്ക് സമ്മേളിക്കാനുള്ള ഹാൾ വേണമെന്ന ദീർഘനാളായുള്ള ആവശ്യമാണ് പുതിയ കെട്ടിടം നിർമിക്കുന്നതിലൂടെ പരിഹരിക്കപ്പെടുന്നത്. നിലവിൽ ഗ്രാമസഭകളും തെരഞ്ഞെടുപ്പ് ബൂത്തും അസൗകര്യങ്ങളേറെയുള്ള ഒരു കെട്ടിടത്തിലായിരുന്നു പ്രവർത്തിച്ചിരുന്നത്. മൂന്നു നിലയിലുള്ള കെട്ടിടം നിർമിക്കാനാണ് ഫൗണ്ടേഷൻ ഇട്ടിരിക്കുന്നത്. ഇതിനായി 30 ലക്ഷം രൂപ ജില്ലാ പഞ്ചായത്ത്‌ അനുവദിച്ചിരുന്നു. കെട്ടിട നിർമാണത്തിന്‍റെ ശിലാസ്ഥാപനകർമം ജില്ലാ പഞ്ചായത്തംഗം ജെസി ഷാജൻ നിർവഹിച്ചു. ബ്ലോക്ക്‌ പഞ്ചായത്ത്‌ പ്രസിഡന്‍റ് അജിത രതീഷ് അധ്യക്ഷത വഹിച്ചു. വൈസ് പ്രസിഡന്‍റ് ജോളി മടുക്കക്കുഴി, പഞ്ചായത്ത്‌ പ്രസിഡന്‍റ് കെ.ആർ. തങ്കപ്പൻ, റിജോ വാളാന്തറ, ഡാനി ജോസ്, സെബാസ്റ്റ്യൻ ഒറ്റപ്ലാക്കൽ, സ്റ്റനിസ്ലാവോസ് വെട്ടിക്കാട്ട്, ഷാജി വടക്കേടത്ത്, സജി മുട്ടത്ത്, ജോസഫ് മുസോളിനി എന്നിവർ പ്രസംഗിച്ചു.

വന്യജീവി ആക്രമണം: ഹെൽപ്പ് ഡെസ്ക് തുറന്നു

മുണ്ടക്കയം: വന്യജീവി ആക്രമണിനെതിരേ വനംവകുപ്പിന്‍റെ സഹകരണത്തോടെ മുണ്ടക്കയം പഞ്ചായത്ത് ഓഫീസിൽ ഹെൽപ്പ് ഡെസ്ക് പ്രവർത്തനം ആരംഭിച്ചു. പഞ്ചായത്ത് പ്രസിഡന്‍റ് രേഖ ദാസ് ഹെൽപ്പ് ഡെസ്കിന്‍റെ ഉദ്ഘാടനം നിർവഹിച്ചു. പഞ്ചായത്തംഗങ്ങളായ സി.വി. അനിൽകുമാർ, ഷിജി ഷാജി, ദിലീഷ് ദിവാകരൻ, പ്രസന്ന ഷിബു, വനംവകുപ്പ് ഉദ്യോഗസ്ഥരായ ബിനു മാത്യു, പി. ശ്രീകുമാർ, സൗമ്യ എസ്. നായർ, ജെ. ഹിമ, ആർ. അഞ്ചു തുടങ്ങിയവർ പങ്കെടുത്തു. ഡെപ്യൂട്ടി റേഞ്ച് ഫോറസ്റ്റ് ഓഫീസർ മനോജ് കെ. ചന്ദ്രൻ പദ്ധതി വിശദീകരണം നടത്തി. പഞ്ചായത്തിന്‍റെ പ്രവർത്തനസമയങ്ങളിൽ തുടർച്ചയായ 15 ദിവസം ഹെൽപ്പ് ഡെസ്കിന്‍റെ സേവനം ലഭ്യമാണ്.

ഏകദിന വ്യവസായ സംരംഭകത്വ അവബോധ ക്ലാസ്

പെരുവന്താനം: കേന്ദ്ര ചെറുകിട വ്യവസായ മന്ത്രാലയവും പെരുവന്താനം സെന്‍റ് ആന്‍റണീസ് കോളജും സംയുക്തമായി നാളെ രാവിലെ പത്തുമുതൽ പെരുവന്താനം പഞ്ചായത്ത് കമ്യൂണിറ്റി ഹാളിൽ വ്യവസായ സംരംഭകത്വ അവബോധ ക്ലാസ് നടത്തും. പെരുവന്താനം പഞ്ചായത്ത് വൈസ് പ്രസിഡന്‍റ് ഇ.ആര്‍. ബൈജു ഉദ്ഘാടനം നിർവഹിക്കും. എംഎസ്എംഇ തൃശൂർ കോ-ഓർഡിനേറ്റർ ജെതുറാം അധ്യക്ഷത വഹിക്കും. ഡോ. ആന്‍റണി ജോസഫ് കല്ലമ്പള്ളി മുഖ്യപ്രഭാഷണം നടത്തും. വകുപ്പ് മേധാവി ക്രിസ്റ്റി ജോസ്, ആതിര വിജയൻ, ജോസ് ആന്‍റണി, നാൻസി ഡിക്രൂസ്, നെജി നാസർ തുടങ്ങിയവർ പ്രസംഗിക്കും. സൗജന്യ ഏകദിന പരിശീലന പരിപാടിയെത്തുടർന്ന് പെരുവന്താനം സെന്‍റ് ആന്‍റണീസ് കോളജിൽ 22 മുതൽ 45 ദിവസത്തെ സൗജന്യ ഫാഷൻ ഡിസൈനിംഗ്, എംബ്രോയ്ഡറി മേക്കിംഗ് പ്രോഗ്രാം ആരംഭിക്കും. എസ്‌സി വിഭാഗത്തിന് മുൻഗണനയുണ്ട്. പ്രോഗ്രാം വിജയകരമായി പൂർത്തിയാക്കുന്നവർക്ക് സർട്ടിഫിക്കറ്റുകളും വിതരണം ചെയ്യും. പ്രോഗ്രാമിൽ വ്യവസായം തുടങ്ങുന്നതിനുള്ള മാർഗനിർദേശം, വായ്പകൾ, സബ്‌സിഡികൾ, മാർക്കറ്റിംഗ് എന്നീ മേഖലകളിലും വിദഗ്ധർ ക്ലാസുകൾ നയിക്കും. ഫോൺ: 8086913266.

റോൾബോളിൽ സുവര്‍ണനേട്ടം; സഹോദരങ്ങളെ ആദരിച്ചു

കാഞ്ഞിരപ്പള്ളി: തമിഴ്‌നാട് നാമക്കലിൽ നടന്ന സൗത്ത്‌സോണ്‍ മിനി ബോയ്‌സ് റോള്‍ബോള്‍ ചാമ്പ്യന്‍ഷിപ്പില്‍ കുന്നുംഭാഗം സെന്‍റ് ജോസഫ്‌സ് പബ്ലിക് സ്‌കൂളിലെ വിദ്യാര്‍ഥികളും സഹോദരങ്ങളുമായ ഡാനിയേലിനും ഡിയോണിനും സുവര്‍ണ നേട്ടം. അഞ്ചാം ക്ലാസ് വിദ്യാർഥിയായ ഡിയോണ്‍ അണ്ടര്‍-11 വിഭാഗത്തിലും മൂന്നാം ക്ലാസ് വിദ്യാർഥിയായ ഡാനിയേല്‍ അണ്ടര്‍-9 വിഭാഗത്തിലുമാണ് കേരളത്തിനുവേണ്ടി മത്സരിച്ചത്. മികച്ച വിജയം കരസ്ഥമാക്കിയ ഇവരെ ദ്രോണാചാര്യ കെ.പി. തോമസ് മാഷ് പുരസ്‌കാരങ്ങള്‍ നല്‍കി ആദരിച്ചു. സ്കൂളിൽ നടന്ന അനുമോദന സമ്മേളനത്തിൽ പ്രിന്‍സിപ്പൽ സിസ്റ്റർ ലിറ്റില്‍ റോസ് എസ്എബിഎസ്, പിടിഎ പ്രസിഡന്‍റ് ആന്‍റണി മാര്‍ട്ടിന്‍, പഞ്ചായത്ത് പ്രസിഡന്‍റ് സി.ആര്‍. ശ്രീകുമാര്‍, വൈസ് പ്രസിഡന്‍റ് സതി സുരേന്ദ്രന്‍, പഞ്ചായത്ത് മെംബര്‍ അമ്പിളി ശിവദാസ്, കെ. ബാലചന്ദ്രന്‍, ഡോ. സാവന്‍ സാറാ മാത്യു, വ്യാപാരി വ്യവസായി ഏകോപന സമിതി പ്രസിഡന്‍റ് റെജി മാത്യു കാവുങ്കല്‍, ലാലിറ്റ് എസ്. തകടിയേല്‍, കെ.ആര്‍. ഷൈജു എന്നിവര്‍ പ്രസംഗിച്ചു. കാലായില്‍ ലിബിന്‍-ജിനി ദന്പതികളുടെ മക്കളാണ് ഇവർ‌.

"കാവലും കരുതലും' സെമിനാർ

കാഞ്ഞിരമറ്റം: കാഞ്ഞിരമറ്റം മാർ സ്ലീവാ പള്ളിയുടെ ശതോത്തര രജത ജൂബിലിയോടനുബന്ധിച്ച് ഇടവകയിലെ മാതാപിതാക്കൾക്കും കുട്ടികൾക്കുമായി കാവലും കരുതലും എന്ന പേരിൽ പേരന്‍റിംഗ് സെമിനാർ ലിറ്റിൽ ഫ്ലവർ ഹൈസ്കൂൾ ഹാളിൽ നടത്തി. കാഞ്ഞിരമറ്റം ഇടവകയിൽ പ്രവർത്തിക്കുന്ന വിൻസെന്‍റ് ഡി പോൾ സൊസൈറ്റി ഹോളിക്രോസ് കോൺഫറൻസിന്‍റെ നേതൃത്വത്തിൽ നടത്തിയ പരിപാടി സൊസൈറ്റിയുടെ പാലാ സെൻട്രൽ കൗൺസിൽ ആധ്യാത്മികോപദേഷ്ടാവ് ഫാ. ജോസ് കോട്ടയിൽ ഉദ്ഘാടനം ചെയ്തു. വികാരി ഫാ. ജോസഫ് മണ്ണനാൽ അധ്യക്ഷത വഹിച്ചു. ഹോളിക്രോസ് കോൺഫറൻസ് പ്രസിഡന്‍റ് രാജൻ തോമസ് ഓലിക്കൽ, ഹെഡ്മാസ്റ്റർ റെജി സെബാസ്റ്റ്യൻ, ഫാ. ജോസഫ് മഠത്തിപ്പറമ്പിൽ, കെ.എസ്. ടോമിച്ചൻ പിരിയമ്മാക്കൽ എന്നിവർ പ്രസംഗിച്ചു. സാജൻ പാപ്പച്ചൻ ഓഡിയോ വിഷ്വൽ പരിപാടി നടത്തി.

കൂട്ടിക്കലിൽ അങ്കണവാടി കലോത്സവം

കൂട്ടിക്കൽ: കൂട്ടിക്കൽ പഞ്ചായത്തിലെ 24 അങ്കണവാടികളിലെ മുഴുവൻ കുട്ടികളെയും പങ്കെടുപ്പിച്ചുകൊണ്ട് അങ്കണവാടി കലോത്സവം "വർണം 2k25' ഏന്തയാർ സെന്‍റ് ജോസഫ് പള്ളി ഓഡിറ്റോറിയത്തിൽ നടത്തി. നൂറോളം കുട്ടികൾ കലോത്സവത്തിൽ പങ്കെടുത്തു. പഞ്ചായത്ത് പ്രസിഡന്‍റ് ബിജോയ് ജോസ് മുണ്ടുപാലം കലോത്സവം ഉദ്ഘാടനം ചെയ്തു. വൈസ് പ്രസിഡന്‍റ് രജനി സുധീർ അധ്യക്ഷത വഹിച്ചു. ബ്ലോക്ക് പഞ്ചായത്ത് മെംബർ അനു ഷിജു മുഖ്യപ്രഭാഷണം നടത്തി. പഞ്ചായത്തംഗങ്ങളായ പി.എസ്. സജിമോൻ, കെ.എൻ. വിനോദ്, ജസി ജോസ്, ജേക്കബ് ചാക്കോ, എം.വി. ഹരിഹരൻ, രജനി സലിലൻ, എ.എസ്. സിന്ധു, ആൻസി അഗസ്റ്റിൻ, ടി.എൻ. മായ, സൗമ്യ ഷെമീർ, കെ.എസ്. മോഹനൻ, സെന്‍റ് ജോസഫ് പള്ളി വികാരി ഫാ. സേവ്യർ മാമ്മൂട്ടിൻ, സിഡിഎസ് ചെയർപേഴ്സൺ ആശാ ബിജു, ഐസിഡിഎസ് സൂപ്പർവൈസർ എസ്. സിന്ധു എന്നിവർ പ്രസംഗിച്ചു.

കോ-ഓപ്പറേറ്റീവ് എംപ്ലോയീസ് യൂണിയൻ ജില്ലാ സമ്മേളനം: സ്വാഗതസംഘം രൂപീകരിച്ചു

പൊൻകുന്നം: കേരള കോ-ഓപ്പറേറ്റീവ് എംപ്ലോയീസ് യൂണിയൻ (സിഐടിയു) കോട്ടയം ജില്ലാ സമ്മേളനത്തിന്‍റെ ഭാഗമായി സ്വാഗതസംഘം രൂപീകരിച്ചു. സിപിഎം വാഴൂർ ഏരിയാ കമ്മിറ്റി ഓഫീസിൽ നടന്ന രൂപീകരണയോഗം സിഐടിയു ജില്ലാ ജോയിന്‍റ് സെക്രട്ടറി ഡി. ബൈജു ഉദ്ഘാടനം ചെയ്തു. സംസ്ഥാന കമ്മിറ്റിയംഗം എസ്. ശ്രീരേഖ അധ്യക്ഷത വഹിച്ചു. ഗിരീഷ് എസ്. നായർ, വി.ജി. ലാൽ, പി.കെ. നസീർ, ഐ.എസ്. രാമചന്ദ്രൻ, ടി.ആർ. രവിചന്ദ്രൻ, ടി.എൻ. ഗിരീഷ് കുമാർ, പി.കെ. സജികുമാർ, ബി. ഗൗതം, ജില്ലാ പ്രസിഡന്‍റ് പി.കെ. സുജിത്ത്, എ.ജെ. ഗിരീഷ് കുമാർ തുടങ്ങിയവർ പ്രസംഗിച്ചു. ഭാരവാഹികളായി ടി.ആർ. രഘുനാഥൻ, കെ. അനിൽകുമാർ, റെജി സഖറിയ, കെ. രാജേഷ്, വി.ജി. ലാൽ, ബി. സുരേഷ് കുമാർ, ഡി. ബൈജു, സി.ആർ. ശ്രീകുമാർ-രക്ഷാധികാരികൾ, ഗിരീഷ് എസ്. നായർ-ചെയർമാൻ, ഐ.എസ്. രാമചന്ദ്രൻ, പ്രഫ. എം.കെ. രാധാകൃഷ്ണൻ, ടി.ആർ. രവിചന്ദ്രൻ-വൈസ് ചെയർമാൻ, എ.ജെ. ഗിരീഷ് കുമാർ-കൺവീനർ, പി.ബി. സുരേഷ്, പി.ജി. ജയമോൾ, പി.കെ. സജികുമാർ-ജോയിന്‍റ് കൺവീനർമാർ, ടി.എൻ. ഗിരീഷ് കുമാർ-ട്രഷറർ എന്നിവരെയും 251 അംഗ ജനറൽ കമ്മിറ്റിയേയും തെരഞ്ഞെടുത്തു. ഒക്ടോബർ 11ന് പൊൻകുന്നം ലീലാമഹൽ ഓഡിറ്റോറിയത്തിൽ സമ്മേളനം നടക്കും.

ഭൂപതിവ് ചട്ടഭേദഗതി: കോൺഗ്രസ് പ്രതിഷേധിച്ചു

കൊക്കയാര്‍: സര്‍ക്കാരിന്‍റെ ഭൂപതിവ് ചട്ട ഭേദഗതി തട്ടിപ്പിനെതിരേ കോണ്‍ഗ്രസ് കൊക്കയാര്‍ മണ്ഡലം കമ്മിറ്റിയുടെ നേതൃത്വത്തില്‍ പ്രതിഷേധ സമരം നടത്തി. നാരകംപുഴ യൂണിയന്‍ ബാങ്ക് ജംഗ്ഷനില്‍ നടന്ന പ്രതിഷേധസമരം ഡിസിസി അംഗം നൗഷാദ് വെംബ്ലി ഉദ്ഘാടനം ചെയ്തു. മണ്ഡലം പ്രസിഡന്‍റ് സണ്ണി തുരുത്തിപ്പള്ളി അധ്യക്ഷത വഹിച്ചു. സ്വര്‍ണലത അപ്പുക്കുട്ടന്‍, സുരേഷ് ഓലിക്കല്‍, അയൂബ്ഖാന്‍ കട്ടപ്ലാക്കല്‍, പി.ജെ. വര്‍ഗീസ്, കെ.എച്ച്. തൗഫീക്,പി.കെ. ഷാജി, ഡി. രാജീവ്, മാത്യു കമ്പിയില്‍, ഐസിമോള്‍ വിപിന്‍, പി.പി. ശ്രിനവാസന്‍, സ്റ്റാന്‍ലി സണ്ണി, സുനിത ജയപ്രകാശ് എന്നിവർ പ്രസംഗിച്ചു. പെരുവന്താനം: കോൺഗ്രസ് പെരുവന്താനം മണ്ഡലം കമ്മിറ്റിയുടെ നേതൃത്വത്തിൽ ഭൂപതിവ് ചട്ടഭേദഗതിയുടെ പകർപ്പ് കത്തിച്ച് പ്രതിഷേധിച്ചു. ഭൂപതിവ് ചട്ടഭേദഗതിയുടെ മറവിൽ ജില്ലയിലെ ഭൂപ്രശ്നങ്ങൾ സങ്കീർണമാക്കിയ ഇടതുസർക്കാരിന്‍റെ കർഷക വഞ്ചനയ്ക്കെതിരേ കോൺഗ്രസ് നടത്തിവരുന്ന സമരത്തിന്‍റെ ഭാഗമായാണ് പ്രതിഷേധിച്ചത്.

റേഡിയേഷന്‍ ഓങ്കോളജി കേന്ദ്രത്തിന്‍റെ നിര്‍മാണോദ്ഘാടനം ഇന്ന് പാലായിൽ

കോട്ടയം: ജില്ലയില്‍ ആരോഗ്യവകുപ്പിന് കീഴിലുള്ള ആദ്യ റേഡിയേഷന്‍ ഓങ്കോളജി കേന്ദ്രത്തിന്‍റെ നിര്‍മാണോദ്ഘാടനം ഇന്നു പാലാ ജനറല്‍ ആശുപത്രിയില്‍ നടക്കും. ഉച്ചകഴിഞ്ഞ് മൂന്നിന് ജോസ് കെ. മാണി എംപി തറക്കല്ലിടും. ജോസ് കെ. മാണി എംപിയുടെ പ്രാദേശിക വികസന ഫണ്ടില്‍നിന്ന് 2.45 കോടി രൂപ ചെലവിട്ട് 4996 ചതുരശ്ര അടി വിസ്തീര്‍ണത്തിലാണ് റേഡിയേഷന്‍ ഓങ്കോളജി ബ്ലോക്ക് നിര്‍മിക്കുന്നത്. ഇവിടേക്കാവശ്യമായ യന്ത്രങ്ങള്‍ വാങ്ങുന്നതിനു ജില്ലാ പഞ്ചായത്ത് 1.05 കോടി രൂപയും പാലാ നഗരസഭ 1.67 കോടി രൂപയും അനുവദിച്ചിട്ടുണ്ട്. കെട്ടിട നിര്‍മാണത്തിനുവേണ്ടി ദേശീയ ആരോഗ്യ മിഷന്‍ ഒരു കോടി രൂപ നല്‍കും. കെട്ടിടം പൂര്‍ത്തിയാകുന്നതോടെ കേന്ദ്ര ആണവോര്‍ജവകുപ്പ് ആധുനിക റേഡിയേഷന്‍ സംവിധാനം ഒരുക്കുന്നതിനായി അനുവദിച്ച അഞ്ചു കോടി രൂപയുടെ ഗ്രാന്‍റും ലഭ്യമാകുമെന്ന് ജോസ് കെ. മാണി എംപി പറഞ്ഞു.

ആല്‍സ്ഹൈമേഴ്‌സ് ദിനാചരണം ഇന്ന്

രാമപുരം: മാര്‍ ആഗസ്തീനോസ് കോളജ് സോഷ്യല്‍ വര്‍ക്ക് വിഭാഗവും പാലാ ഡിമെന്‍ഷ്യ കെയറും സംയുക്തമായി ലോക ആല്‍സ്ഹൈമേഴ്‌സ് ദിനം ആചരിക്കും. ഇന്നു രാവിലെ 11ന് ഡിമെന്‍ഷ്യ അവബോധന പരിപാടി വിശ്വാസ് ഫുഡ് പ്രോഡക്‌ട് മാനേജിംഗ് ഡയറക്ടര്‍ സോണി മാത്യു ഉദ്ഘാടനം നിര്‍വഹിക്കും. പ്രിന്‍സിപ്പല്‍ ഡോ. റെജി വര്‍ഗീസ് മേക്കാടന്‍ അധ്യക്ഷത വഹിക്കും. ഫാ. ജോവാനി കുറുവാച്ചിറ, മനോജ് സി. ജോര്‍ജ്, സിജു തോമസ് എന്നിവര്‍ പ്രസംഗിക്കും. വിദ്യാര്‍ഥികളുടെ നേതൃത്വത്തില്‍ നടത്തുന്ന മെമ്മറി വോക്ക് പാലാ ഡിവൈഎസ്പി കെ. സദന്‍ ഫ്‌ളാഗ് ഓഫ് ചെയ്യും.

അരുവിത്തുറ കോളജിന് സംസ്ഥാന സർക്കാർ പുരസ്കാരം

അരുവിത്തുറ: ഉന്നത വിദ്യാഭ്യാസ രംഗത്തെ മികവ് പരിഗണിച്ച് അരുവിത്തുറ സെന്‍റ് ജോർജ് കോളജിന് ഉന്നത വിദ്യാഭ്യാസ വകുപ്പിന്‍റെ മിനിസ്റ്റേഴ്സ് എക്സലൻസ് അവാർഡ്. നാക് റീ അക്രഡിറ്റേഷന്‍റെ പുതിയ മാനദണ്ഡങ്ങൾ അനുസരിച്ച് ജില്ലയിൽ ആദ്യമായി ഏഴുവർഷം കാലാവധിയോടെ എ പ്ലസ് പ്ലസ് അംഗീകാരം നേടിയതും രാജ്യാന്തര നിലവാരമുള്ള കാമ്പസും പഠന സൗകര്യങ്ങളും നാക് നിർദേശിക്കുന്ന ഏഴ് ഇന യോഗ്യതകളും പൂർണമായും നടപ്പിലാക്കിയതും പരിഗണിച്ചാണ് അവാർഡ്. തിരുവനന്തപുരം ടാഗോർ തിയറ്ററിൽ നടന്ന ചടങ്ങിൽ ഉന്നത വിദ്യാഭ്യാസ വകുപ്പ് മന്ത്രി ഡോ. ആർ. ബിന്ദുവിൽ നിന്നും വൈസ് പ്രിൻസിപ്പാൾ ഡോ. ജിലു ആനി ജോൺ, ബർസാർ ആൻഡ് കോഴ്സ് കോഓർഡിനേറ്റർ റവ.ഫാ. ബിജു കുന്നയ്ക്കാട്ട്, ഐക്യുഎസി കോഓഡിനേറ്റർ ഡോ. സുമേഷ് ജോർജ്, നാക് കോഓഡിനേറ്റർ ഡോ. മിഥുൻ ജോൺ, അനധ്യാപക പ്രതിനിധി ബെഞ്ജിത്ത് സേവ്യർ തുടങ്ങിയവർ ചേർന്ന് പുരസ്കാരം ഏറ്റുവാങ്ങി. പ്രിൻസിപ്പാൾ പ്രഫ.ഡോ. സിബി ജോസഫിനെയും അധ്യാപകരെയും അനധ്യാപകരെയും വിദ്യാർഥികളെയും കോളജ് മാനേജർ വെരി. റവ.ഫാ. സെബാസ്റ്റ്യൻ വെട്ടുകല്ലേൽ അഭിനന്ദിച്ചു.

കോട്ടയം മത്സര വള്ളംകളി: രജിസ്‌ട്രേഷന്‍ ആരംഭിച്ചു

കുമരകം: 124-ാമത് കോട്ടയം താഴത്തങ്ങാടി മത്സര വള്ളംകളിയുടെ ചെറുവള്ളങ്ങളുടെ രജിസ്‌ട്രേഷന്‍ ആരംഭിച്ചു. രജിസ്‌ട്രേഷന്‍റെ ഉദ്ഘാടനം ഫ്രാന്‍സിസ് ജോര്‍ജ് എംപി നിര്‍വഹിച്ചു. ആദ്യ രജിസ്‌ട്രേഷന്‍ ഫോം വേലങ്ങാടന്‍ ചുരുളന്‍ വള്ളത്തിനുവേണ്ടി വര്‍ഗീസ് വേലങ്ങാടന്‍ നല്‍കി. രജിസ്‌ട്രേഷന്‍ 24ന് വൈകുന്നേരം നാലിന് അവസാനിക്കും. തുടര്‍ന്ന് ക്യാപ്റ്റന്മാരുടെ യോഗവും ട്രാക്ക്, ഹീറ്റ്‌സ് നിര്‍ണയവും നടക്കും. ജില്ലാ ടൂറിസം വകുപ്പ്, തിരുവാര്‍പ്പ് പഞ്ചായത്ത്, കോട്ടയം നഗരസഭ എന്നിവരുടെ സഹകരണത്തോടെ കോട്ടയം വെസ്റ്റ് ക്ലബാണ് വള്ളംകളി സംഘടിപ്പിക്കുന്നത്. ചെറുവള്ളങ്ങളെക്കൂടാതെ ചാമ്പ്യന്‍സ് ബോട്ട് ലീഗില്‍ നെഹ്റു ട്രോഫിയിലെ ആദ്യ സ്ഥാനക്കാരായ ഒമ്പത് ചുണ്ടന്‍ വള്ളങ്ങള്‍ മത്സരത്തിനായി അണിനിരക്കും. 27നാണ് വള്ളംകളി. 9447052 184, 9605323272, 9447888156.

കുമരകം സ്വദേശി പ്രിന്‍സ് ജോണ്‍സണിന് ന്യൂയോര്‍ക്ക് സ്റ്റേറ്റ് ടീച്ചര്‍ അവാര്‍ഡ്

കുമരകം: കുമരകം സ്വദേശിയായ അധ്യാപകന് ന്യൂയോര്‍ക്ക് സ്റ്റേറ്റ് ടീച്ചര്‍ ഓഫ് ദ ഇയര്‍ 2026 പുരസ്‌കാരം ലഭിച്ചു. കുമരകം 12-ാം വാര്‍ഡില്‍ വാഴവേലിത്തറ കമാന്‍ഡര്‍ മാത്യു ജോണ്‍സണ്‍-ഏലിയാമ്മ ദമ്പതികളുടെ പുത്രന്‍ പ്രിന്‍സ് ജോണ്‍സണിനാണ് അവാര്‍ഡ് ലഭിച്ചത്. മന്‍ഹാട്ടന്‍ ഫുഡ് ആന്‍ഡ് ഫിനാന്‍സ് ഹൈസ്‌കൂള്‍ അധ്യാപകനാണ് പ്രിന്‍സ്.

കല്ലുങ്കത്ര-കരീമഠം-ചീപ്പുങ്കല്‍ റോഡ് ഉന്നത നിലവാരത്തിൽ നിർമിക്കും

അയ്മനം: പഞ്ചായത്തില്‍ ഉള്‍പ്പെടുന്ന കല്ലുങ്കത്ര-കരീമഠം-ചീപ്പുങ്കല്‍ റോഡ് ഉന്നത നിലവാരത്തിൽ നിർമിക്കും. കേന്ദ്രസര്‍ക്കാരിന്‍റെ റോഡ് വികസന പദ്ധതിയായ പ്രധാനമന്ത്രി ഗ്രാമീണ സഡക് യോജന പദ്ധതിയില്‍ ഉള്‍പ്പെടുത്തിയതോടെയാണ് ഇതിനു വഴിതെളിഞ്ഞത്. ആറു മീറ്റര്‍ വീതിയെങ്കിലുമുള്ള മണ്‍റോഡുകളെയാണ് പിഎംജിഎസ്‌വൈ നാലാം പദ്ധതിയില്‍ ഉള്‍പ്പെടുത്തിയിരിക്കുന്നത്. റോഡ് ഉന്നത നിലവാരത്തില്‍ നിര്‍മിക്കാനുള്ള വിശദമായ പ്രോജക്ട് റിപ്പോര്‍ട്ട് അധികൃതര്‍ തയാറാക്കുമെന്ന് ഫ്രാന്‍സിസ് ജോര്‍ജ് എംപി അറിയിച്ചു. അഞ്ചു കിലോമീറ്റർ ലാഭം നിലവില്‍ റോഡ് കല്ലുങ്കത്രയില്‍നിന്നു പടിഞ്ഞാട്ട് ചെങ്ങളവന്‍പറമ്പ് വരെയും ചീപ്പുങ്കല്‍നിന്നു കോലടിച്ചിറ വരെയും എത്തിനില്‍ക്കുന്നതാണ്. ഇടയ്ക്കുള്ള മൂന്നര കിലോമീറ്റര്‍ ദൂരം പാടശേഖരത്തിലൂടെയാണ് റോഡ് നിര്‍മിക്കേണ്ടത്. റോഡ് പൂര്‍ത്തിയാകുന്നതോടെ ചേര്‍ത്തല, വൈക്കം ഭാഗത്തുനിന്നു വരുന്ന വാഹനങ്ങള്‍ക്കു കുമരകത്തെത്താതെ കോട്ടയം ടൗണിലും മെഡിക്കല്‍ കോളജിലും വേഗത്തിലെത്താന്‍ കഴിയുമെന്ന് ഫ്രാന്‍സിസ് ജോര്‍ജ് പറഞ്ഞു. ചേര്‍ത്തല-കുമരകം-കോട്ടയം റോഡിനു സമാന്തര പാതയാകുന്നതോടെ വാഹനങ്ങള്‍ക്കു കോട്ടയത്ത് എത്തുന്നതിന് അഞ്ചു കിലോമീറ്റര്‍ ദൂരം ലാഭിക്കാം. കുമരകത്തെ ഗതാഗതക്കുരുക്കിനു പരിഹാരവുമാകും. അയ്മനത്തിനും ഗുണം‌ കുമരകത്തെ അയ്മനവുമായി ബന്ധിപ്പിക്കുന്ന പ്രധാന റോഡായി മാറുന്നതോടെ അയ്മനം പഞ്ചായത്തിന്‍റെ ടൂറിസം വികസനത്തിനും കാര്‍ഷിക മേഖലയുടെ പുരോഗതിക്കും ഇതു ഗുണകരമാകും. പിഎംജിഎസ്‌വൈ പദ്ധതിയില്‍ ഈ റോഡ് ഉള്‍പ്പെടുത്തി നിര്‍മിക്കണമെന്നാവശ്യപ്പെട്ട് അയ്മനം മണ്ഡലം കോണ്‍ഗ്രസ് കമ്മിറ്റിയും കേരള കോണ്‍ഗ്രസ് മണ്ഡലം കമ്മിറ്റിയും ഫ്രാന്‍സിസ് ജോര്‍ജ് എംപിക്കു നിവേദനം നല്‍കിയിരുന്നു. കേരള കോണ്‍ഗ്രസ് സംസ്ഥാന ജനറല്‍ സെക്രട്ടറി എ.കെ. ജോസഫ്, കോണ്‍ഗ്രസ് ബ്ലോക്ക് കമ്മിറ്റി വൈസ് പ്രസിഡന്‍റ് ജയ്‌മോന്‍ കരീമഠം, കോണ്‍ഗ്രസ് മണ്ഡലം പ്രസിഡന്‍റ് ഒളശ ആന്‍റണി, ബാബു കെ. ഏബ്രഹാം, മനോജ് കോയിത്തറ എന്നിവര്‍ നിവേദക സംഘത്തില്‍ ഉണ്ടായിരുന്നു.

തിരുഹൃദയസമാജം നാടിന്‍റെ ഹൃദയത്തുടിപ്പ്: മാര്‍ മാത്യു മൂലക്കാട്ട്

കോട്ടയം: തിരുഹൃദയസമാജം നാടിന്‍റെ ഹൃദയത്തുടിപ്പാണെന്ന് കോട്ടയം ആര്‍ച്ച്ബിഷപ് മാര്‍ മാത്യു മൂലക്കാട്ട്. 1925-ല്‍ സ്ഥാപിതമായ കിഴക്കേ നട്ടാശേരി തിരുഹൃദയസമാജത്തിന്‍റെ ശതാബ്ദി ആഘോഷ സമാപന സമ്മേളനം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. തിരുക്കുടുംബ ക്‌നാനായ കത്തോലിക്ക പള്ളിയില്‍ മാര്‍ മാത്യു മൂലക്കാട്ടിന്‍റെ മുഖ്യകാര്‍മികത്വത്തില്‍ നടന്ന കൃതജ്ഞതാ ദിവ്യബലിക്കുശേഷം സംഘടനയുടെ ശതാബ്ദി സ്മാരക മന്ദിരത്തിന്‍റെ വെഞ്ചരിപ്പും ആര്‍ച്ച്ബിഷപ് നിര്‍വഹിച്ചു. തിരുഹൃദയസമാജം പ്രസിഡന്‍റ് കെ.ജെ. ജോസഫ് കൊച്ചുപാലത്താനത്ത് അധ്യക്ഷത വഹിച്ചു. സംഘടനയുടെ ആധ്യാത്മിക ഉപദേഷ്ടാവും വികാരിയുമായ ഫാ. ഷൈജു കല്ലുവെട്ടാംകുഴി അനുഗ്രഹ പ്രഭാഷണവും റവ. ഡോ. തോമസ് പുതിയകുന്നേല്‍, റവ. ഡോ. മാത്യു കുരിയത്തറ, ജോസ് ജെ. മറ്റത്തില്‍ എന്നിവര്‍ ശതാബ്ദി ആശംസാസന്ദേശവും നല്‍കി. സെക്രട്ടറി ബെന്നി മാളിയേക്കമറ്റം, ജനറല്‍ കണ്‍വീനര്‍ ജോയി മണപ്പള്ളില്‍, ഭാരവാഹികളായ സിബി തച്ചിരിക്കമാലില്‍, സിബി കൊട്ടിപ്പള്ളില്‍, ജോബി കൊച്ചുപാലത്താനം, ഡോ. ജെയ്‌സണ്‍ ഫിലിപ്പ് ആലപ്പാട്ട്, അലക്‌സ് കാവില്‍ എന്നിവര്‍ പ്രസംഗിച്ചു. തിരുഹൃദയസമാജത്തിന്‍റെ ആരോഗ്യ-വിദ്യാഭ്യാസ-സാമൂഹ്യ മേഖലകളില്‍ ഒരു വര്‍ഷം നീണ്ടുനിന്ന ശതാബ്ദി കര്‍മപരിപാടികള്‍ക്കാണ് സമാപനമായത്.

ഈ യാത്ര റിസ്്കാണ് ! ചങ്ങനാശേരി റെയില്‍വേ സ്റ്റേഷൻ- ഗുഡ്സ്ഷെഡ് റോഡ് യാത്ര

ചങ്ങനാശേരി: ചങ്ങനാശേരി റെയില്‍വേ സ്റ്റേഷനില്‍നിന്നു ഗുഡ്സ്ഷെഡ് റോഡിലേക്ക് രണ്ടാംകവാടം തുറക്കണമെന്ന ആവശ്യം ശക്തമാകുന്നു. വാഴൂര്‍ റോഡിലൂടെ എത്തുന്ന നൂറുകണക്കിനു യാത്രക്കാര്‍ സെന്‍റ് ആന്‍സ് സ്‌കൂള്‍ ജംഗ്ഷനുമുമ്പിലെ സ്‌റ്റോപ്പിലിറങ്ങിയാണ് റെയില്‍വേ സ്റ്റേഷനിലെത്തുന്നത്. ഈ യാത്രക്കാരും ട്രെയിനില്‍നിന്നിറങ്ങി വാഴൂര്‍ റോഡിലേക്ക് പോകേണ്ടവരും ഇപ്പോള്‍ ഏറെ അപകടഭീഷണി നേരിട്ട് മൂന്നാംട്രാക്ക് കാല്‍നടയായി മുറിച്ചുകടന്ന് പോകേണ്ട അവസ്ഥയാണ്. വാഴൂര്‍ റോഡ് ഭാഗത്തുനിന്നെത്തുന്നവര്‍ റെയില്‍പാതകള്‍ മുറിച്ചുകടന്ന് ഒന്നാം പ്ലാറ്റ്‌ഫോമിലുള്ള സ്റ്റേഷനില്‍ എത്തി ടിക്കറ്റെടുത്ത് തിരിച്ച് ഫുട് ഓവര്‍ബ്രിഡ്ജിലൂടെ രണ്ട്, മൂന്ന് പ്ലാറ്റ്ഫോമുകളിലെത്തി ട്രെയിനില്‍ കയറിപ്പെടാനുള്ള റിസ്‌കും ദുരിതവും ഭാരിച്ചതുതന്നെ.

കൊച്ചുകുട്ടികളുമായി സ്ത്രീകള്‍ പാതമുറിച്ചുകടക്കുന്നത് അത്യന്തം അപകടഭീഷണി നിറഞ്ഞതാണ്. ഇങ്ങനെ പാത മുറിച്ചുകടക്കുന്നതിനിടയില്‍ പലരും അപകടത്തില്‍പ്പെട്ടിട്ടുണ്ട്. നാലു പേർ മരണപ്പെട്ടിട്ടുണ്ട്. ഈ സാഹചര്യത്തിലാണ് ഗുഡ്‌സ്‌ഷെഡ് റോഡിലേക്ക് രണ്ടാംകവാടം ഉടനെ തുറക്കണമെന്ന ആവശ്യം ശക്തമാകുന്നത്. ഒന്നാം പ്ലാറ്റ്‌ഫോം ചങ്ങനാശേരിയില്‍ നിര്‍ത്താത്ത ഫാസ്റ്റ് ട്രെയിനുകള്‍ക്കുള്ള ലൂപ്പ് ലൈനായതിനാല്‍ ഒന്നാം പ്ലാറ്റ് ഫോമില്‍നിന്നു രണ്ടും മൂന്നും പ്ലാറ്റ്ഫോമിലേക്കുള്ള നടപ്പാലം പ്രവര്‍ത്തന സജ്ജമായിട്ടുണ്ട്. ഇതോടു ചേര്‍ന്നു ലിഫ്റ്റ് നിര്‍മാണം പൂര്‍ത്തിയായി വരികയാണ്. രണ്ടാം കവാടം: നടപടികള്‍ പുരോഗതിയില്‍: കൊടിക്കുന്നില്‍ സുരേഷ് എംപി ചങ്ങനാശേരി റെയില്‍വേ സ്‌റ്റേഷനില്‍ കഴിഞ്ഞ പത്തു വര്‍ഷത്തിനിടെ നിരവധി വികസന പദ്ധതികളാണ് നടന്നത്. കോട്ടയം ജില്ലയിലെ കോട്ടയം കഴിഞ്ഞാല്‍ സൗകര്യങ്ങളുടെ കാര്യത്തില്‍ ചങ്ങനാശേരി രണ്ടാമതാണ്. അമൃത് ഭാരത് പദ്ധതിയില്‍ ഇപ്പോള്‍ ആറരക്കോടിയുടെ വികസനമാണ് നടക്കുന്നത്. ഒന്ന്, രണ്ട്, മൂന്ന് പ്ലാറ്റ്‌ഫോമുകളെ ബന്ധിപ്പിക്കുന്ന രണ്ടാമത്തെ ഫുഡ് ഓവര്‍ബ്രിഡ്ജ് തുറന്നുകഴിഞ്ഞു. ഇതോടു ചേര്‍ന്നുതന്നെ ലിഫ്റ്റിന്‍റെ നിര്‍മാണവും പുരോഗമിക്കുകയാണ്. ഒക്‌ടോബര്‍ അവസാനത്തോടെ ഇതു തുറക്കും. ഗുഡ്സ്ഷെഡ് റോഡിലേക്കുള്ള രണ്ടാം കവാടത്തിന് റെയില്‍വേ ബോര്‍ഡിന്‍റെ അംഗീകാരം ലഭിച്ചിട്ടുണ്ട്. നടപടികള്‍ പുരോഗമിക്കുകയാണ്. രണ്ടാം കവാടം അത്യാവശ്യം ചങ്ങനാശേരി റെയില്‍വേ സ്‌റ്റേഷനില്‍ നിരവധി വികസന പ്രവര്‍ത്തനങ്ങളാണ് നടന്നുവരുന്നത്. വാഴൂര്‍ റോഡ് ഭാഗത്തുനിന്നുള്ള യാത്രക്കാരുടെ സൗകര്യാര്‍ഥം ഗുഡ്‌ഷെഡ് റോഡിലേക്ക് രണ്ടാംകവാടം തുറക്കാനുള്ള നടപടികള്‍ റെയില്‍വേ അധികൃതര്‍ വേഗത്തിലാക്കണം. മാത്തുക്കുട്ടി പ്ലാത്താനം കേരള കോണ്‍ഗ്രസ് നിയോജകമണ്ഡലം പ്രസിഡന്‍റ് നിയമപരമായ പാര്‍ക്കിംഗ് അനുവദിക്കണം ഗുഡ്‌സ്ഷെഡ് റോഡിൽ ഇരുചക്രവാഹനങ്ങള്‍ക്ക് പാര്‍ക്കിംഗ് ഫീസ് ഈടാക്കി പാക്കിംഗ് ക്രമീകരിക്കണം. വാഹനങ്ങളുടെ സുരക്ഷ ഉറപ്പാക്കണം. ഗുഡ്‌ഷെഡ് റോഡ് ഭാഗത്തുകൂടിഎത്തുന്ന യാത്രക്കാര്‍ക്ക് ടിക്കറ്റ് എടുക്കുന്നതിനായി മൂന്നാം പ്ലാറ്റ്‌ഫോമില്‍ വെന്‍ഡിംഗ് മിഷന്‍ സ്ഥാപിക്കണം. രമേശ് മാത്യു കരിങ്ങട സ്ഥിരം ട്രെയിന്‍ യാത്രക്കാരന്‍ രണ്ട്, മൂന്ന് പ്ലാറ്റ്ഫോമുകളില്‍ ടിക്കറ്റ് എടുക്കാന്‍ സൗകര്യംവേണം ഗുഡ്‌സ്ഷെഡ് റോഡിലൂടെ മൂന്നാം പ്ലാറ്റ്ഫോമില്‍ എത്തുന്ന യാത്രക്കാര്‍ക്ക് ടിക്കറ്റെടുക്കാന്‍ ഈ പ്ലാറ്റ്‌ഫോമില്‍ സൗകര്യം ഏര്‍പ്പെടുത്തണം. ഡിസ്‌പ്ലേ ബോര്‍ഡ് സ്ഥാപിക്കുന്നതുവരെ പ്ലാറ്റ് ഫോമുകളില്‍ കോച്ച് പൊസിഷന്‍ പ്രദര്‍ശിപ്പാക്കാന്‍ നടപടി വേണം. സിയാദ് അബ്ദുറഹിമാന്‍ കോണ്‍ഗ്രസ് ഇസ്റ്റ് മണ്ഡലം പ്രസിഡന്‍റ് യാത്രക്കാര്‍ക്ക് സുരക്ഷിതം, ഗുണകരം രണ്ട്, മൂന്ന് പ്ലാറ്റ്ഫോമുകളിലാണ് ട്രെയിനുകള്‍ക്ക് സ്റ്റോപ്പുള്ളത്. അതിനാല്‍ കൂടുതല്‍ യാത്രക്കാരും ഗുഡ്‌സ് ഷെഡ് റോഡുവഴിയാണ് റെയില്‍വേ സ്‌റ്റേഷനിലേക്കു പ്രവേശിക്കുന്നത്. യാത്രക്കാരുടെ സുരക്ഷ പരിഗണിച്ച് രണ്ടാംകവാടം തുറക്കാനുള്ള നടപടികള്‍ വേഗത്തിലാക്കണം. ടിറ്റി ജോസ് കോട്ടപ്പുറം കേരളകോണ്‍ഗ്രസ്-എം ടൗണ്‍ ഈസ്റ്റ് മണ്ഡലം പ്രസിഡന്‍റ്

അധികൃതര്‍ കാണുന്നില്ലേ? പെരുന്ന ബസ് സ്റ്റാന്‍ഡിലെ ഇരിപ്പിടങ്ങള്‍ തകര്‍ന്നു

ചങ്ങനാശേരി: എന്തൊരുകഷ്ടം. പെരുന്ന ബസ് സ്റ്റാന്‍ഡിലെത്തുന്ന യാത്രക്കാര്‍ നിന്നു മടുക്കുന്നു. ഇരിപ്പിടങ്ങള്‍ ഭൂരിപക്ഷവും തര്‍ന്നിട്ട് വര്‍ഷങ്ങള്‍ പിന്നിട്ടു. യാത്രക്കാരുടെ പരാതികള്‍ മാധ്യമങ്ങള്‍ ചൂണ്ടിക്കാട്ടിയിട്ടും നഗരസഭാധികാരികള്‍ പരിഗണിക്കുന്നില്ല. ദിവസവും നൂറിലേറെ സ്വകാര്യബസുകളും മുപ്പതിലേറെ കെഎസ്ആര്‍ടിസി ബസുകളും സര്‍വീസുകള്‍ ആരംഭിക്കുന്ന ബസ് സ്റ്റാന്‍ഡാണിത്.ആലപ്പുഴ, വിവിധ കുട്ടനാടന്‍ മേഖലകള്‍, പായിപ്പാട്, മാന്താനം, മല്ലപ്പള്ളി, പത്തനംതിട്ട മേഖലകളിലേക്കുള്ള വിദ്യാര്‍ഥികളടക്കം ആയിരക്കണക്കുന്ന യാത്രക്കാര്‍ എത്തുന്ന ബസ് സ്റ്റാന്‍ഡാണിത്. വയോജനങ്ങള്‍, ഗര്‍ഭിണികള്‍ എന്നിവരൊക്കെ ബസ് വരുന്നതുവരെ കാത്തിരിക്കാന്‍ ഇരിപ്പിടമില്ലാതെ ബുദ്ധിമുട്ടുകയാണ്. ഇരിപ്പിടങ്ങള്‍ തകര്‍ന്ന സീറ്റുകളില്‍ കമ്പികള്‍ അവശേഷിച്ചിരിക്കുകയാണ്.

സെന്‍റ് വിന്‍സെന്‍റ് ഡി പോളിന്‍റെയും ഫ്രഡറിക് ഓസാനാമിന്‍റെയും തിരുനാള്‍

ചങ്ങനാശേരി: സെന്‍റ് വിന്‍സെന്‍റ് ഡി പോളിന്‍റെയും വാഴ്ത്തപ്പെട്ട ഫ്രഡറിക് ഓസാനാമിന്‍റെയും തിരുനാളും ജിയോര്‍ജിയോ ഫ്രസാറ്റി വിശുദ്ധരുടെ ഗണത്തിലേക്ക് ചേര്‍ക്കപ്പെട്ടതിന്‍റെ ആചരണവും സെന്‍റ് വിന്‍സെന്‍റ് പുവര്‍ഹോമിലെ അന്തേവാസികളോടൊപ്പം നടത്തി. ചങ്ങനാശേരി, തുരുത്തി, തൃക്കൊടിത്താനം, ഏരിയാ കൗണ്‍സിലുകളുടെയും ചങ്ങനാശേരി സെന്‍ട്രല്‍ കൗണ്‍സിലിന്‍റെയും സംയുക്താഭിമുഖ്യത്തില്‍ നടത്തിയ സമ്മേളനത്തില്‍ ചങ്ങനാശേരി അതിരൂപത വികാരി ജനറാള്‍ മോണ്‍. മാത്യു ചങ്ങങ്കരി മുഖ്യസന്ദേശവും ആത്മീയ ഉപദേഷ്ടാവ് ഫാ. ജോസഫ് പനക്കേഴം ആമുഖ സന്ദേശവും നല്‍കി. ചങ്ങനാശേരി ഏരിയ കൗണ്‍സില്‍ പ്രസിഡന്‍റ് പി.വി. ജെയിംസ് അധ്യക്ഷത വഹിച്ചു. സെന്‍ട്രല്‍ കൗണ്‍സില്‍ സെക്രട്ടറി തോമസ് വര്‍ഗീസ്, സെന്‍റ് ആന്‍സ് കോണ്‍വന്‍റ് മദര്‍ സിസ്റ്റര്‍ എല്‍സിന്‍ എഫ്‌സിസി, തൃക്കൊടിത്താനം ഏരിയ കൗണ്‍സില്‍ പ്രസിഡന്‍റ് മാത്യൂസ് ജോസഫ്, തുരുത്തി ഏരിയ കൗണ്‍സില്‍ പ്രസിഡന്‍റ് എം.എം. മാത്യു, സോണല്‍ ഓഫീസര്‍ കെ.എം. തോമസ് എന്നിവര്‍ പ്രസംഗിച്ചു.

വടംവലി മത്സരം സീസണ്‍ -2: വേങ്ങാട് ടീം ജേതാക്കളായി

ചങ്ങനാശേരി: ചെത്തിപ്പുഴ സര്‍ഗക്ഷേത്ര കള്‍ച്ചറല്‍ അക്കാദമിക് മീഡിയ സെന്‍റര്‍ സ്‌പോര്‍ട്‌സ് ആന്‍ഡ് വെല്‍നസ് ഫോറത്തിന്റെയും യംഗ് ലീഡേഴ്സ് ഫോറത്തിന്‍റെയും അഭിമുഖ്യത്തില്‍ അഖില കേരള പ്രഫഷണല്‍ ജിമ്പയര്‍ ചങ്ങനാശേരി വടംവലിമത്സരം സീസണ്‍ -2 ചെത്തിപ്പുഴ സര്‍ഗക്ഷേത്ര അങ്കണത്തില്‍ അരങ്ങേറി. മുപ്പത്തിയഞ്ച് ടീമുകള്‍ പങ്കെടുത്ത വടംവലി മത്സരത്തില്‍ കവിത വേങ്ങാട് വടംവലി ടീം ഒന്നാം സമ്മാനം നേടി. യുവതാര വരാന്തരപ്പള്ളി തൃശൂര്‍, വടംവലി ടീം രണ്ടാം സമ്മാനം കരസ്ഥമാക്കി. ലയണ്‍സ് പുത്തൂര്‍ തൃശൂര്‍ വടംവലി ടീം മൂന്നാം സമ്മാനം കരസ്ഥമാക്കി. ജോബ് മൈക്കിള്‍ എംഎല്‍എ ഉദ്ഘാടനം നിര്‍വഹിച്ച ചടങ്ങില്‍ സര്‍ഗക്ഷേത്ര രക്ഷാധികാരി ഫാ. തോമസ് കല്ലുകളം അധ്യക്ഷത വഹിച്ചു. ജോര്‍ജ് പടനിലം ഫൗണ്ടേഷന്‍ ട്രസ്റ്റ് സ്ഥാപകന്‍ ഡോ. ജോര്‍ജ് പടനിലം വിശിഷ്ടാതിഥിയായിരുന്ന വേദിയില്‍ സര്‍ഗക്ഷേത്ര ഡയറക്ടര്‍ ഫാ. അലക്‌സ് പ്രായിക്കളം ആമുഖപ്രഭാഷണം നടത്തി.

ഫാത്തിമാപുരത്ത് മദ്യവിരുദ്ധ സമിതി പ്രവര്‍ത്തന വര്‍ഷം ഉദ്ഘാടനം ചെയ്തു

ചങ്ങനാശേരി: ഫാത്തിമാപുരം പള്ളിയില്‍ നടന്ന മദ്യവിരുദ്ധ സമിതി പ്രവര്‍ത്തന വര്‍ഷം ഉദ്ഘാടനം കെസിബിസി മദ്യവിരുദ്ധ സമിതി അതിരൂപത ഡയറക്ടര്‍ ഫാ. ജിന്‍സ് ചോരേറ്റ് ചാമക്കാല ഉദ്ഘാടനം ചെയ്തു. വികാരി റവ. ഡോ. തോമസ് പാറത്തറ അധ്യഷത വഹിച്ചു. അതിരൂപത ജനറല്‍ സെക്രട്ടറി തോമസുകുട്ടി മണക്കുന്നേല്‍ വിഷയാവതരണം നടത്തി. അതിരൂപത ഫിനാന്‍സ് സെക്രട്ടറി ബേബിച്ചന്‍ പുത്തന്‍പറമ്പില്‍, ഓര്‍ഗനൈസിംഗ് സെക്രട്ടറി ഔസേപ്പച്ചന്‍ ചെറുകാട്, യൂണിറ്റ് പ്രസിഡന്‍റ് ജോസ് കടംന്തോട്, ജനറല്‍ സെക്രട്ടറി ഷാജി കരിങ്ങട, സിസി അമ്പാട്ട്, ജോസഫ് പുളിമുട്ടില്‍, സജി നാലുപറയില്‍ എന്നിവര്‍ പ്രസംഗിച്ചു.

പെട്രോള്‍ പമ്പില്‍ ആക്രമണം: പ്രതികൾ പിടിയില്‍

മാമ്മൂട്: പെട്രോള്‍ പമ്പില്‍ ആക്രമണം നടത്തിയ യുവാക്കൾ പിടിയിൽ. നിരവധി ക്രിമിനൽക്കേസുകളില്‍ പ്രതിയായ മാമ്മൂട് തട്ടാരുപറമ്പില്‍ വിജയ്, ശാന്തിപുരം കാലായില്‍ അജിത്ത് കുമാര്‍, മാമ്മൂട് പുന്നമൂട്ടില്‍ ബിബിന്‍ ജോസഫ് എന്നിവരാണ് തൃക്കൊടിത്താനം പോലീസിന്‍റെ പിടിയിലായത്. മാമ്മൂട് കൊച്ചുറോഡ് ഭാഗത്ത് പ്രവര്‍ത്തിച്ചുവരുന്ന പെട്രോള്‍ പമ്പിലെ ഉടമയ്ക്കും ജീവനക്കാര്‍ക്കും നേരേയാണ് ഇവര്‍ ആക്രമണം നടത്തിയത്. പെട്രോള്‍ അടിക്കാന്‍ എത്തിയ പ്രതികളുടെ വാഹനത്തിന്‍റെ പെട്രോള്‍ ടാങ്കിന് അടപ്പില്ല എന്ന് ഉടമ പറയുകയും തുടര്‍ന്ന് ഒരു പ്രകോപനമില്ലാതെ വിപിന്‍ വണ്ടിയില്‍ നിന്നിറങ്ങി ചീത്തവിളിച്ചുകൊണ്ടു അവിടെ കിടന്നിരുന്ന ഒരു കല്ലെടുത്ത് പമ്പുടമയുടെ തലയുടെ പുറകില്‍ ഇടിക്കുകയായിരുന്നു ഉടനെ ജീവന്‍ രക്ഷാര്‍ഥം ഓഫീസിലേക്ക് കയറിപ്പോയ പമ്പ് ഉടമയുടെ പുറകെ പ്രതിയോടൊപ്പം വണ്ടിയില്‍ ഉണ്ടായിരുന്ന മൂന്നുപേര്‍കൂടി വാനില്‍നിന്ന് ഇറങ്ങിവന്ന് ഓഫീസിലേക്ക് ഓടിക്കയറുകയും സ്ഥാപനത്തിന്‍റെ ഗ്ലാസ് ഡോര്‍ ചവിട്ടി പൊട്ടിച്ച് ഓഫീസിനുള്ളില്‍ കയറി പമ്പ് ഉടമയെയും ഭാര്യാ പിതാവിനെയും മര്‍ദിക്കുകയുമാണുണ്ടായത് . തുടര്‍ന്ന് പമ്പ് ഉടമ പോലീസ് സ്റ്റേഷനിലറിയിച്ചതിനെ തുടര്‍ന്ന് ഇന്‍സ്‌പെക്ടര്‍ എം.ജെ. അരുണിന്‍റെ നേതൃത്യത്തിലുള്ള പോലീസ് സംഘം പ്രതികളെ പിന്തുടര്‍ന്ന് പിടികൂടുകയായിരുന്നു.

പെരുവ-പിറവം-പെരുവാമൂഴി റോഡിന് തുക അനുവദിച്ചു

കടുത്തുരുത്തി: പെരുവ - പിറവം - പെരുവാമൂഴി റോഡ് നവീകരണത്തിനു സര്‍ക്കാര്‍ തുക അനുവദിച്ചു. റോഡ് നിര്‍മാണ പദ്ധതി റീ ടെന്‍ഡര്‍ ചെയ്തതായും മോന്‍സ് ജോസഫ് എംഎല്‍എ അറിയിച്ചു. ഉന്നത നിലവാരത്തില്‍ വികസിപ്പിക്കാൻ അനുമതി നല്‍കുകയും പിന്നീട് മുടങ്ങിപ്പോവുകയും ചെയ്ത പെരുവ - പിറവം - പെരുവാമൂഴി റോഡിന്‍റെ നിര്‍മാണം ടെന്‍ഡര്‍ ഓപ്പണ്‍ ചെയ്ത് എഗ്രിമെന്‍റ് വച്ചാലുടന്‍ നിർമാണം തുടങ്ങുമെന്ന് എംഎല്‍എ അറിയിച്ചു. കടുത്തുരുത്തി, പിറവം മണ്ഡലങ്ങളെ ബന്ധിപ്പിച്ചുള്ള റോഡ് പദ്ധതി മുടങ്ങിയതിൽ ജനങ്ങള്‍ അനുഭവിക്കുന്ന കഷ്ടപ്പാടുകളും യാത്രാദുരിതവും തുടര്‍ച്ചയായുണ്ടാകുന്ന അപകടങ്ങളും എംഎല്‍എമാരായ മോന്‍സ് ജോസഫ്, അനൂപ് ജേക്കബ് എന്നിവര്‍ മന്ത്രിമാരായ മുഹമ്മദ് റിയാസ്, കെ.എന്‍. ബാലഗോപാല്‍ എന്നിവരുടെ ശ്രദ്ധയില്‍പ്പെടുത്തി ചര്‍ച്ച ചെയ്തതിനെത്തുടര്‍ന്നാണ് റോഡ് നിര്‍മാണത്തിനാവശ്യമായ ഫണ്ട് അനുവദിച്ചത്. പെരുവ - പിറവം - പെരുവാമൂഴി റോഡ് നിര്‍മാണ പ്രവര്‍ത്തനങ്ങളുടെ ടെന്‍ഡര്‍ നടപടികള്‍ പൂര്‍ത്തീകരിച്ചതായി മോന്‍സ് ജോസഫ് അറിയിച്ചു. പിഡബ്ല്യുഡി, കെഎസ്പി എൻജിനിയറിംഗ് വിഭാഗവും ബന്ധപ്പെട്ട കണ്‍സള്‍ട്ടന്‍സിയും സംയുക്തമായി പരിശോധിച്ചു തയാറാക്കിയ പ്രോജക്ട് പ്രകാരമാണ് നിര്‍മാണം നടപ്പാക്കുന്നത്. പെരുവ - പിറവം റോഡില്‍ ഇപ്പോള്‍ നിലനില്‍ക്കുന്ന ദുര്‍ഘടാവസ്ഥ പരിഹരിക്കുന്നത് സംബന്ധിച്ചു എംഎല്‍എമാര്‍ ഉന്നയിച്ച ആവശ്യത്തിനു പ്രത്യേക അനുമതി സര്‍ക്കാര്‍ നല്‍കിയിട്ടില്ല. ഇക്കാര്യങ്ങള്‍ ഗൗരവമായി കണക്കിലെടുത്ത് അടിയന്തര അറ്റകുറ്റപ്പണി നടത്തണമെന്ന ആവശ്യമാണ് സര്‍ക്കാരിന്‍റെ ശ്രദ്ധയില്‍പ്പെടുത്തിയിരുന്നത്. എന്നാല്‍, ഇപ്പോള്‍ പുതുക്കി അനുവദിച്ചിരിക്കുന്ന മെഗാ എസ്റ്റിമേറ്റില്‍ ഉള്‍പ്പെടുത്തി റോഡ് സഞ്ചാരയോഗ്യമാക്കാനാണ് സര്‍ക്കാര്‍ നിര്‍ദേശിച്ചിട്ടുള്ളത്.

റോഡ് നന്നാക്കാത്തതിനെതിരേ പെരുവയില്‍ വ്യാപാരികളുടെ സമരം

പെരുവ: തകര്‍ന്നുകിടക്കുന്ന പെരുവ-പിറവം റോഡിന്‍റെ ശോച്യാവസ്ഥ പരിഹരിക്കണമെന്നാവശ്യപ്പെട്ട് കേരള വ്യാപാരി വ്യവസായി ഏകോപന സമിതി പെരുവ യൂണിറ്റിന്‍റെ നേതൃത്വത്തില്‍ പ്രകടനവും സമ്മേളനവും നടത്തി. മാസങ്ങളായി പെരുവ മുതല്‍ വടുകുന്നപ്പുഴ വരെയുള്ള ഭാഗം റോഡ് പൂര്‍ണമായും തകര്‍ന്നുകിടക്കുകയാണ്. കാല്‍നടയാത്ര പോലും സാധ്യമല്ലാത്ത നിലയിലാണ് റോഡുള്ളത്. പൊടിശല്യവും അഴുക്കുവെള്ളം തെറിക്കുന്നതും ഒഴിവാക്കാന്‍ വ്യാപാര സ്ഥാപനങ്ങള്‍ അടച്ചിടേണ്ട സ്ഥിതിയാണ് ഇവിടെയുള്ളതെന്നു വ്യാപാരികള്‍ പറയുന്നു. പെരുവ കവലയില്‍ നടന്ന പ്രതിഷേധ സമ്മേളനം വ്യാപാരി വ്യവസായി ഏകോപന സമിതി യൂണിറ്റ് പ്രസിഡന്‍റ് രാജുമോന്‍ പഴേമ്പിള്ളി ഉദ്ഘാടനം ചെയ്തു. ഭാരവാഹികളായ തോമസ് ചെറിയാന്‍, ബേബി ജോര്‍ജ്, സാജു ജോസഫ്, പി.കെ. മോഹന്‍ദാസ്, ടി.എം. രാജന്‍, സുധാ സുശീലന്‍ തുടങ്ങിയവര്‍ പ്രസംഗിച്ചു.

കുടവെച്ചൂർ പള്ളിയിൽ എട്ടാമിടം തിരുനാൾ സമാപിച്ചു

വെച്ചൂർ: മരിയൻ തീർഥാടനകേന്ദ്രമായ കുടവെച്ചൂർ പള്ളിയിൽ എട്ടാമിടം തിരുനാൾ സമാപിച്ചു. ഇന്നലെ രാവിലെ അഞ്ചു മുതൽ എട്ടുവരെ ഫാ. അനിൽ കിളിയേലിക്കുടിയുടെ കാർമികത്വത്തിൽ വിശുദ്ധകുർബാനയിൽ നൂറുകണക്കിന് വിശ്വാസികൾ പങ്കെടുത്തു. പത്തിനു നടന്ന തിരുനാൾ കുർബാനയ്ക്ക് ഫാ. വർഗീസ് പാലാട്ടി മുഖ്യകാർമികത്വം വഹിച്ചു. ഫാ.വിനു മുളവരിക്കൽ സഹകാർമികത്വം വഹിച്ചു. റവ.ഡോ. മാർട്ടിൻ ശങ്കുരിക്കൽ സന്ദേശം നല്കി. ഉച്ചകഴിഞ്ഞ് 3.30ന് നടന്ന വിശുദ്ധ കുർബാനയ്ക്ക് ഫാ. ജിമ്മി ഓലിക്കൽ മുഖ്യകാർമികത്വം വഹിച്ചു. ഫാ. സജി കോട്ടയിൽ, ഫാ. ഡൊമിനിക് വളകൊടിയിൽ എന്നിവർ സഹകാർമികത്വം വഹിച്ചു. തുടർന്ന് തിരുനാൾ പ്രദക്ഷിണം, കൊടിയിറക്കം, നീന്തു നേർച്ച തുടങ്ങിയവ നടന്നു. രാത്രി ഒൻപതിന് സഹവികാരി ഫാ. ആന്‍റണി കളത്തിലിന്‍റെ കാർമികത്വത്തിൽ നടന്ന കൃതജ്ഞതാബലിയോടെ തിരുനാൾ ആഘോഷത്തിനു സമാപനമായി. തിരുനാൾ പരിപാടികൾക്കു വികാരി ഫാ. പോൾ ആത്തപ്പിള്ളി, സഹവികാരി ഫാ. ആന്‍റണി കളത്തിൽ, കൈക്കാരൻ വക്കച്ചൻ മണ്ണത്താലിൽ, ഏബ്രഹാം റോജിഭവൻ, വൈസ് ചെയർമാൻ സേവ്യർ മീനപ്പള്ളി, ജനറൽ സെക്രട്ടറി ബിജു മിത്രംപള്ളി, പാരീഷ് കൗൺസിൽ സെക്രട്ടറി റോബിൻ മണ്ണത്താലിൽ തുടങ്ങിയവർ നേതൃത്വം നൽകി.

അനുസ്മരണ സമ്മേളനം

വൈക്കം: ചെമ്പൈ സംഗീതോത്സവത്തിന്‍റെ സുവർണ ജൂബിലിയുടെ ഭാഗമായി വൈക്കം മഹാദേവ ക്ഷേത്രത്തിൽ നടന്ന ചെമ്പൈ അനുസ്മരണ സമ്മേളനം ഗവൺമെന്‍റ് ചീഫ് വിപ്പ് ഡോ. എൻ. ജയരാജ് ഉദ്ഘാടനം ചെയ്തു. ഗുരുവായൂർ ദേവസ്വം ചെയർമാൻ വി.കെ. വിജയൻ അധ്യക്ഷത വഹിച്ചു. നഗരസഭാ ചെയർപേഴ്സൺ പ്രീതാ രാജേഷ്, കേരള കലാമണ്ഡലം മുൻ ഡെപ്യൂട്ടി രജിസ്ട്രാർ വി. കലാധരൻ, നഗരസഭാ അംഗം കെ.ബി. ഗിരിജകുമാരി, ദേവസ്വം ഭരണസമിതിയംഗം സി. മനോജ്, കെ.പി. വിശ്വനാഥൻ, അഡ്മിനിസ്ട്രേറ്റർ ഒ.ബി. അരുൺകുമാർ എന്നിവർ പ്രസംഗിച്ചു.

ക്രിസ്ത്യന്‍ എയ്ഡഡ് മേഖലയോടുള്ള വിവേചനം അവസാനിപ്പിക്കണമെന്ന്

കടുത്തുരുത്തി: അധ്യാപക നിയമനത്തില്‍ ഭിന്നശേഷി സംവരണവുമായി ബന്ധപ്പെട്ട് ക്രിസ്ത്യന്‍ മാനേജ്മെന്‍റിനു കീഴിലുള്ള എയ്ഡഡ് മേഖലയോട് സംസ്ഥാന സര്‍ക്കാര്‍ സ്വീകരിച്ചിട്ടുള്ള വിവേചനം അവസാനിപ്പിക്കണമെന്ന് പിതൃവേദി കടുത്തുരുത്തി സെന്‍റ് മേരീസ് ഫൊറോനാ താഴത്തുപള്ളി യൂണിറ്റ് സമ്മേളനം ആവശ്യപ്പെട്ടു. ക്രിസ്ത്യന്‍ മാനേജ്മെന്‍റിനു കീഴിലുള്ള എയ്ഡഡ് സ്‌കൂളുകളില്‍ നിയമനം ലഭിച്ചിട്ടുള്ള അധ്യാപകരുടെ നിയമന അംഗീകാരത്തിന്‍റെ കാര്യത്തില്‍ സര്‍ക്കാര്‍ നിസംഗത പുലര്‍ത്തുകയാണ്. ഭിന്നശേഷി സംവരണവുമായി ബന്ധപ്പെട്ടുള്ള കാര്യത്തില്‍ എന്‍എസ്എസ് മാനേജ്മെന്‍റ് സുപ്രീംകോടതയില്‍നിന്നു നേടിയിട്ടുള്ള വിധിന്യായത്തില്‍ സമാനസ്വഭാവമുള്ള എല്ലാ മാനേജ്മെന്‍റുകള്‍ക്കും ഉത്തരവ് ബാധകമാക്കിയിരുന്നു. എന്നാല്‍ സംസ്ഥാന സര്‍ക്കാര്‍ ഈ കാര്യത്തില്‍ വിവേചനം കാണിക്കുന്നുവെന്നു യോഗം അഭിപ്രായപ്പെട്ടു. ഫൊറോന വികാരി ഫാ. മാത്യു ചന്ദ്രന്‍കുന്നേല്‍ സമ്മേളനം ഉദ്ഘാടനം ചെയ്തു. പ്രസിഡന്‍റ് മനോജ് ജോസഫ് അധ്യക്ഷത വഹിച്ചു. യോഗത്തില്‍ ഫ്രാന്‍സിസ് തൂമ്പുങ്കല്‍, മാത്യു പൈലോ കോച്ചേരി എന്നിവര്‍ പ്രസംഗിച്ചു.

എസ്എച്ച് തേവരയും പഴഞ്ഞി എംഡിയും ഫൈനലില്‍

കോട്ടയം: 19-ാമത് ഉപ്പൂട്ടില്‍ കുര്യന്‍ ഏബ്രഹാം മെമ്മോറിയല്‍ ഇന്‍റര്‍ കൊളീജിയറ്റ് ബസേലിയസ് ട്രോഫി ഫുട്‌ബോള്‍ ഫൈനല്‍ ഇന്ന്. ഇന്നലെ രാവിലെ 8.30ന് നടന്ന ആദ്യസെമിഫൈനല്‍ മത്സരത്തില്‍ ബസേലിയസ് കോളജിനെ എതിരില്ലാതെ രണ്ടു ഗോളുകള്‍ക്ക് പരാജയപ്പെടുത്തിയാണ് തേവര എസ്എച്ച് കോളജ് ഫൈനലിലേക്ക് കടന്നത്. തുടര്‍ന്നു നടന്ന രണ്ടാം സെമിഫൈനലില്‍ മൂവാറ്റുപുഴ നിര്‍മല കോളജിനെ പെനാലിറ്റി ഷൂട്ടൗട്ടില്‍ 5-4ന് പരാജയപ്പെടുത്തി പഴഞ്ഞി എംഡി കോളജ് ഫൈനലിലേക്ക് പ്രവേശിച്ചു. വിജയികള്‍ക്ക് ഉപ്പൂട്ടില്‍ കുര്യന്‍ ഏബ്രഹാം മെമ്മോറിയാല്‍ എവറോളിംഗ് ട്രോഫിയും റണ്ണറപ്പിന് ഇ.എസ്. മാത്യു ചേപ്പാട് മെമ്മോറിയല്‍ ട്രോഫിയും സമ്മാനിക്കും. സമാപനസമ്മേളനത്തില്‍ ജില്ലാ അസി. പ്ലാനിംഗ് ഓഫീസര്‍ പി.എ. അമാനത്ത് മുഖ്യാതിഥിയാകും. കോളജ് പ്രിന്‍സിപ്പല്‍ പ്രഫ. ഡോ. ബിജു തോമസ് അധ്യക്ഷത വഹിക്കും.

അതിരമ്പുഴ പള്ളിയിൽ വ്യാകുലമാതാവിന്‍റെ ദർശനത്തിരുനാൾ

അതിരമ്പുഴ: സെന്‍റ് മേരീസ് ഫൊറോനാ പള്ളിയിൽ പരിശുദ്ധ വ്യാകുലമാതാവിന്‍റെ ദർശനത്തിരുനാളിനു നാളെ കൊടിയേറും. തിരുനാൾ 21ന് സമാപിക്കും. നാളെ രാവിലെ ആറിന് വിശുദ്ധ കുർബാന. ഏഴിന് വികാരി ഫാ. മാത്യു പടിഞ്ഞാറേക്കുറ്റ് കൊടിയേറ്റും. ആധ്യാത്മിക പിതാവ് ഫാ. ഏബ്രഹാം കാടാത്തുകുളം, അസി. വികാരിമാരായ ഫാ. അനീഷ് കാമിച്ചേരി, ഫാ. അലൻ മാലിത്തറ, ഫാ. ടോണി മണക്കുന്നേൽ എന്നിവർ സഹകാർമികരാകും. തുടർന്ന് മധ്യസ്ഥപ്രാർഥന, വിശുദ്ധ കുർബാന, വചനസന്ദേശം - ഫാ. മാർട്ടിൻ തൈപ്പറമ്പിൽ. വ്യാഴാഴ്ച രാവിലെ ആറിന് വിശുദ്ധ കുർബാന, ഏഴിന് എലക്തോർ വാഴ്ച, വിശുദ്ധ കുർബാന, വചനസന്ദേശം, പ്രസുദേന്തി തെരഞ്ഞെടുപ്പ്. വൈകുന്നേരം 4.45ന് റംശ, മധ്യസ്ഥപ്രാർഥന, 5.15ന് വിശുദ്ധ കുർബാന, വചനസന്ദേശം - ഫാ. ആന്‍റണി പോരൂക്കര. തുടർന്ന് വാഹന വെഞ്ചരിപ്പ്. വെള്ളിയാഴ്ച രാവിലെ ആറിന് വിശുദ്ധ കുർബാന, മധ്യസ്ഥപ്രാർഥന, ഏഴിന് വിശുദ്ധ കുർബാന. വൈകുന്നേരം 4.45ന് റംശ, 5.15ന് മധ്യസ്ഥപ്രാർഥന, പ്രസുദേന്തി വാഴിക്കൽ, ഇടവകക്കാരായ വൈദികർ ചേർന്ന് അർപ്പിക്കുന്ന വിശുദ്ധ കുർബാന. മുഖ്യകാർമികൻ - ഫാ. മാത്യു പൗവ്വഞ്ചിറ. വചനസന്ദേശം - റവ. ഡോ. ജോസ് തെക്കേപ്പുറത്ത്. സെമിത്തേരി സന്ദർശനം. ശനിയാഴ്ച രാവിലെ ആറിന് വിശുദ്ധ കുർബാന, മധ്യസ്ഥപ്രാർഥന, ഏഴിന് വിശുദ്ധ കുർബാന, വചനസന്ദേശം, മേരി നാമധാരികളുടെ സംഗമം. വൈകുന്നേരം 4.45ന് റംശ, അഞ്ചിന് മധ്യസ്ഥപ്രാർഥന, തിരിവെഞ്ചരിപ്പ്, വിശുദ്ധ കുർബാന - റവ. ഡോ. ജോസഫ് മുണ്ടകത്തിൽ, വചനസന്ദേശം - റവ. ഡോ. ജോർജ് കുടിലിൽ (ചീഫ് എഡിറ്റർ, ദീപിക). പ്രദക്ഷിണം, കപ്ലോൻ വാഴ്ച. പ്രധാന തിരുനാൾ ദിനമായ ഞായറാഴ്ച രാവിലെ 5.15ന് ചെറിയപള്ളിയിൽ വിശുദ്ധ കുർബാന. ആറിന് വിശുദ്ധ കുർബാന - ഫാ. മാത്യു പടിഞ്ഞാറേക്കുറ്റ്. തുടർന്ന് പരിശുദ്ധ വ്യാകുലമാതാവിന്‍റെയും വിശുദ്ധ സെബസ്ത്യാനോസിന്‍റെയും തിരുസ്വരൂപങ്ങൾ മോണ്ടളത്തിൽ പ്രതിഷ്ഠിക്കും. 7.45ന് വിശുദ്ധ കുർബാന, വചനസന്ദേശം. 10ന് ആഘോഷമായ തിരുനാൾ റാസ - ഫാ. ജയിംസ് കുടിലിൽ, വചന സന്ദേശം - റവ. ഡോ. മാണി പുതിയിടം. വൈകുന്നേരം 4.45ന് റംശ. 5.15ന് വിശുദ്ധ കുർബാന, വചനസന്ദേശം - ഫാ. സിറിയക്ക് കോട്ടയിൽ. തുടർന്ന് തിരുനാൾ പ്രദക്ഷിണം, കൊടിയിറക്ക്, സമാപനാശീർവാദം. കൈക്കാരന്മായ തോമസ് ജോസഫ് പുതുശേരി, ജോൺസൺ ജോസഫ് തോട്ടത്തിൽ, സാബു സ്കറിയ തെക്കേടത്ത്, ബെന്നി മാത്യു മൂഴിയാങ്കൽ, പ്രസുദേന്തി രാജു കുടിലിൽ എന്നിവർ നേതൃത്വം നൽകും.

മെഡിക്കൽ കോളജിൽ സന്ദർശക പാസിന് പുതിയ ക്രമീകരണം

ഗാന്ധിനഗര്‍: മെഡിക്കല്‍ കോളജ് ആശുപത്രിയില്‍ രോഗീസന്ദര്‍ശകര്‍ക്ക് പുതിയ ക്രമീകരണം. ഇന്നലെ മുതല്‍ പാസ് നല്‍കുന്ന കൗണ്ടറില്‍ കംപ്യൂട്ടര്‍ വത്കരണം നടത്തി. ഇനി മുതല്‍ ആശുപത്രിയില്‍ കിടത്തിച്ചികിത്സയിലുള്ള രോഗികളെ കാണാന്‍ പാസെടുക്കാന്‍ ക്യൂവില്‍ നില്‍ക്കുന്ന സന്ദര്‍ശകര്‍ക്ക് രോഗിയുടെ പേര്, വാര്‍ഡ്, ഐപി നമ്പര്‍, ഫോണ്‍ നമ്പര്‍ എന്നിവയെല്ലാം അറിഞ്ഞിരിക്കണം. പാസ് നല്‍കുന്ന കൗണ്ടറില്‍ സന്ദര്‍കരോട് രോഗിയെ സംബന്ധിച്ചുള്ള ഈ വിവരങ്ങള്‍ തിരക്കി രേഖപ്പെടുത്തിയതിന് ശേഷമേ പാസ് നല്‍കുകയുള്ളൂ. ഒരാള്‍ക്ക് മൂന്നു പാസ് മാത്രമേ അനുവദിക്കൂ. 10 രൂപയാണ് പാസ് നിരക്ക്. ഒരു രോഗിയുടെ പേരില്‍ മൂന്ന് സന്ദര്‍ശകര്‍ വാര്‍ഡിലേക്ക് കയറിപ്പോയിക്കഴിഞ്ഞാല്‍ ഒരു മണിക്കൂര്‍ കഴിഞ്ഞു മാത്രമേ ആ രോഗിയെ കാണാന്‍ വരുന്ന മറ്റു സന്ദര്‍ശകർക്ക് പാസ് നല്‍കുകയുള്ളൂ. ഉച്ചയ്ക്ക് ഒന്നര മുതല്‍ പാസ് നല്‍കിത്തുടങ്ങും. എന്നാല്‍ രോഗിയുടെ പേരും വാര്‍ഡും മാത്രമേ ഒട്ടുമിക്ക സന്ദര്‍ശകര്‍ക്ക് അറിയാന്‍ കഴിയൂ. ഐപി നമ്പരോ, ഫോണ്‍ നമ്പരോ മറ്റോ അറിയാന്‍ സാധിക്കില്ല. എന്നാല്‍ ഇത്തരക്കാര്‍ക്ക് പാസ് നല്‍കില്ലെന്ന വ്യവസ്ഥ കൗണ്ടറില്‍ ഇരിക്കുന്നവരും സന്ദര്‍ശകരും തമ്മില്‍ വലിയ തര്‍ക്കത്തിനിടവരുത്തും. ഇന്നലെയും ഇതിന്‍റെ പേരില്‍ തര്‍ക്കമുണ്ടായി.

ചാരിറ്റബിള്‍ ട്രസ്റ്റിന്‍റെ ഉദ്ഘാടനവും കുടുംബസംഗമവും

ചമ്പക്കര: പാലാക്കുന്നേല്‍ ഫാ. ജോബ് ഐക്കരേട്ട് മെമ്മോറിയല്‍ ചാരിറ്റബിള്‍ ട്രസ്റ്റിന്‍റെ ഉദ്ഘാടനവും ഐക്കരേട്ട് കുടുംബസംഗമവും കല്യാണ്‍ ആര്‍ച്ച്ബിഷപ് സെബാസ്റ്റ്യന്‍ വാണിയപ്പുരയ്ക്കല്‍ ഉദ്ഘാടനം നിര്‍വഹിച്ചു. പ്രസിഡന്‍റ് ഡോ. പി.എം. ചാക്കോ അധ്യക്ഷത വഹിച്ചു. ഫാ. ജസ്റ്റിന്‍ എളംപുളശേരില്‍, കോ-ഓര്‍ഡിനേറ്റര്‍ ജിജോ കരോട്ടുപാലയ്ക്കല്‍, സെക്രട്ടറി ജിമ്മി ജോസഫ്, ബിജോയ് സ്‌കറിയ, ജോസി പാലാക്കുന്നേല്‍, മിറാഷ് തുരുത്തിപ്പറമ്പില്‍, ജോബി വള്ളാട്ട് എന്നിവര്‍ പ്രസംഗിച്ചു.

കുടുംബശക്തീകരണ പദ്ധതി: ഗുണഭോക്തൃ സംഗമം സംഘടിപ്പിച്ചു

കോട്ടയം: കോട്ടയം സോഷ്യല്‍ സര്‍വീസ് സൊസൈറ്റിയുടെ നേതൃത്വത്തില്‍ സേവ് എ ഫാമിലി പ്ലാനുമായി സഹകരിച്ച് നടപ്പിലാക്കുന്ന കുടുംബശക്തീകരണ പദ്ധതിയുടെ ഭാഗമായി ഗുണഭോക്തൃ സംഗമം സംഘടിപ്പിച്ചു. തെള്ളകം ചൈതന്യയില്‍ സംഘടിപ്പിച്ച സംഗമത്തിന്‍റെ ഉദ്ഘാടനം സൊസൈറ്റി എക്സിക്യൂട്ടീവ് ഡയറക്ടര്‍ ഫാ. സുനില്‍ പെരുമാനൂര്‍ നിര്‍വഹിച്ചു. പദ്ധതിയിലേക്ക് തെരഞ്ഞെടുക്കപ്പെട്ട കുടുംബങ്ങള്‍ക്ക് ആറ് വര്‍ഷം പ്രതിമാസ ധനസഹായം ലഭ്യമാക്കി വിദ്യാഭ്യാസം, ആരോഗ്യം വരുമാന പദ്ധതി, തൊഴില്‍ നൈപുണ്യ വികസനം, അടിസ്ഥാന സൗകര്യ വികസനം തുടങ്ങിയ വിവിധ മേഖലകളില്‍ പുരോഗതി കൈവരിക്കത്തക്ക വിധത്തിലാണ് പദ്ധതി നടപ്പിലാക്കുന്നത്. സംഗമത്തോടനുബന്ധിച്ച് നടത്തപ്പെട്ട ബോധവത്കരണ ക്ലാസിന് സേവ് എ ഫാമിലി പ്ലാന്‍ കോ-ഓര്‍ഡിനേറ്റര്‍ നിത്യമോള്‍ ബാബു നേതൃത്വം നല്‍കി.

ചൂട്ടുവേലിയിൽ കടയുടമ ഹരിതകർമസേനയെ അസഭ്യം പറഞ്ഞു: പ്രതിഷേധം

കുമാരനല്ലൂര്‍: കോട്ടയം നഗരസഭയിലെ ഹരിതകര്‍മസേനാഗംഗങ്ങളെ കടയുടമ അസഭ്യം പറഞ്ഞതിനെത്തുടര്‍ന്നു പ്രതിഷേധം. കോട്ടയം നഗരസഭയിലെ കുമാരനല്ലൂര്‍ ഡിവിഷനില്‍പ്പെട്ട ചൂട്ടുവേലി എസ്എച്ച് മൗണ്ട് ഭാഗത്ത് കടയില്‍ പ്ലാസ്റ്റിക്ക് വേസ്റ്റ് ശേഖരിക്കാൻ ചെന്ന ഹരിതകര്‍മസേനാംഗങ്ങളെയാണ് കടയുടമ അസഭ്യം പറഞ്ഞതായി പരാതിയുള്ളത്. പ്ലാസ്റ്റിക്ക് മാലിന്യത്തിനൊപ്പം ഇയാൾ പച്ചക്കറി മാലിന്യങ്ങളും പതിവായി നിറയ്ക്കാറുണ്ടായിരുന്നു. ഇത് പാടില്ലെന്നു ഹരിതകര്‍മ സേനാംഗങ്ങള്‍ പലതവണ മുന്നറിയിപ്പു കൊടുത്തെങ്കിലും ഇയാൾ ഇത് പാലിക്കാറില്ല. കഴിഞ്ഞ ദിവസവും ഹരിതകര്‍മസേനാംഗങ്ങള്‍ പ്ലാസ്റ്റിക്ക് എടുക്കാന്‍ ചെന്നപ്പോള്‍ മറ്റു മാലിന്യങ്ങള്‍ ഇതിന്‍റെ കൂടെ നിറച്ചിരിക്കുന്നതായി കണ്ടെത്തി. ഇതേക്കുറിച്ച് പറഞ്ഞതോടെ ഇയാൾ ഹരിതസേനാംഗങ്ങളെ അസഭ്യം പറയുകയായിരുന്നു. ഇത് സംബന്ധിച്ച് നഗരസഭാ ചെയര്‍പേഴ്‌സണെ വിവരം അറിയിച്ചെങ്കിലും നടപടി ഉണ്ടായില്ല. തുടര്‍ന്ന് ജനാധിപത്യ മഹിളാ അസോസിയേഷന്‍റെ നേതൃത്വത്തില്‍ ഞായറാഴ്ച ഗാന്ധിനഗര്‍ പോലീസില്‍ പരാതി നല്‍കി. തുടര്‍ന്ന് ഇന്നലെ ഹരിതകര്‍മസേനാംഗങ്ങളും ജനാധിപത്യ മഹിളാ അസോസിയേഷന്‍ പ്രവര്‍ത്തകരും ചൂട്ടുവേലിയിലെ കടയ്ക്കു മുന്നിലെത്തി പ്രതിഷേധിച്ചു. കടയുടമയെ അറസ്റ്റ് ചെയ്യണമെന്ന് ആവശ്യപ്പെട്ടായിരുന്നു പ്രതിഷേധം. എന്നാല്‍ ഇയാൾ സ്ഥലത്തുണ്ടായിരുന്നില്ല. ഇതേത്തുടര്‍ന്ന് കട അടയ്ക്കണമെന്ന് ആവശ്യപ്പെട്ട് പ്രതിഷേധം കടുപ്പിച്ചു. പിന്നീട് കട അടച്ച ശേഷമാണു പ്രവര്‍ത്തകര്‍ പിന്‍വാങ്ങിയത്. ഗാന്ധിനഗര്‍ പോലീസ് സ്ഥലത്തെത്തി.

പുതുപ്പള്ളി എക്യുമെനിക്കല്‍ കുടുംബസംഗമം

പുതുപ്പള്ളി: പുതുപ്പള്ളി എക്യുമെനിക്കല്‍ ഫെലോഷിപ്പിന്‍റെ നേതൃത്വത്തില്‍ കുടുംബസംഗമവും ഡോ. ജോസഫ് മാര്‍ ബര്‍ണബാസ് സഫ്രഗന്‍ മെത്രാപ്പോലീത്തായെ ആദരിക്കലും 20നു നടക്കും. പുതുപ്പള്ളി പഞ്ചായത്ത് കമ്യൂണിറ്റി ഹാളില്‍ രാവിലെ 9.30ന് ആരംഭിക്കുന്ന സംഗമം ഉച്ചയ്ക്ക് ഒന്നിനു സമാപിക്കും. എക്യുമെനിക്കല്‍ ഫെലോഷിപ്പ് പ്രസിഡന്‍റ് ഫാ. ജോസഫ് മാത്യു കിളിരൂപ്പറമ്പില്‍ അധ്യക്ഷതവഹിച്ചു. ഡോ. ജോസഫ് മാര്‍ ബര്‍ണബാസ് സഫ്രഗന്‍ മെത്രാപ്പോലീത്ത ഉദ്ഘാടനം ചെയ്യും. റവ. ഡോ. കെ.വി. സൈമണ്‍ ആദരിക്കലും ഉപഹാരസമര്‍പ്പണവും നടത്തും. ഫാ. ജെന്‍റി മുകളേല്‍ വിശിഷ്ടാതിഥികളെ പരിചയപ്പെടുത്തും. ഫാ. ജോസഫ് പുത്തന്‍പുരയ്ക്കല്‍ വചനപ്രഘോഷണവും രാജേഷ് കുളങ്ങര പ്രഭാഷണവും നടത്തും. ജയിംസ്കുട്ടി പി. ചാക്കോ, പി.സി. മാമ്മന്‍ എന്നിവര്‍ പ്രസംഗിക്കും.

നിഖ്യാ വിശ്വാസപ്രമാണത്തിന്‍റെ 1700-ാമത് വാര്‍ഷികാഘോഷങ്ങള്‍ നാളെ

കോട്ടയം: സിഎസ്‌ഐ ബിഷപ് മാണി ഇന്‍സ്റ്റിറ്റ്യൂട്ടും ബിഷപ് മാണി ഫൗണ്ടേഷനും സംയുക്തമായി സംഘടിപ്പിക്കുന്ന നിഖ്യാ വിശ്വാസ പ്രമാണത്തിന്‍റെ 1700-ാമത് വാര്‍ഷികാഘോഷങ്ങള്‍ നാളെ സിഎസ്‌ഐ റിട്രീറ്റ് സെന്‍ററില്‍ നടക്കും. ഉച്ചകഴിഞ്ഞ് രണ്ടിനു ചങ്ങനാശേരി ആര്‍ച്ച്ബിഷപ് മാര്‍ തോമസ് തറയില്‍ ഉദ്ഘാടനം ചെയ്യും. ബിഷപ് ഡോ. മലയില്‍ സാബു കോശി ചെറിയാന്‍ അധ്യക്ഷത വഹിക്കും. റവ. ഡോ. കെ.എം. ജോര്‍ജ് വിഷയാവതരണം നടത്തും. വിവിധ സഭകളുടെ കോട്ടയം ഭദ്രാസനാധിപരായ ഡോ. യൂഹന്നാന്‍ മാര്‍ ദിയസ്‌ക്കോറസ്, ഡോ. തോമസ് മാര്‍ തിമോത്തിയോസ്, തോമസ് മാര്‍ തിമോത്തിയോസ് എന്നിവര്‍ പ്രസംഗിക്കും.

ശബ്ദ ഹിയറിംഗില്‍ സൗജന്യ കേള്‍വിപരിശോധന ആരംഭിച്ചു

ചങ്ങനാശേരി: ശബ്ദ ഹിയറിംഗില്‍ കേരളത്തിലെ 19 ബ്രാഞ്ചുകളില്‍ കേള്‍വിക്കുറവ് സംബന്ധിച്ച് സംശയനിവാരണവും കേള്‍വി പരിശോധനയും ശ്രവണസഹായികളുടെ ട്രയലുമായുള്ള ക്യാമ്പ് ആരംഭിച്ചു. അനൂപ് ജേക്കബ് എംഎല്‍എ ഉദ്ഘാടനം ചെയ്തു. ബോബന്‍ ടി. തെക്കേല്‍, കോട്ടയം റെയില്‍വേ സ്റ്റേഷന്‍മാസ്റ്റര്‍ ജിജി ആറുപറയില്‍, മുനിസിപ്പല്‍ കൗണ്‍സിലര്‍ അജിത് പൂഴിത്തുറ, പിഡബ്ല്യുഡി കോണ്‍ട്രാക്ടര്‍ മനൂപ് വി. മാത്യു, മാത്യു നീരാക്കല്‍ എന്നിവര്‍ പ്രസംഗിച്ചു. ശബ്ദ ഹിയറിംഗില്‍ 20 വരെ നടക്കുന്ന സൗജന്യ ക്യാമ്പ് ഐഎംഎ കോട്ടയം ബ്രാഞ്ച് പ്രസിഡന്‍റും ഇന്നര്‍ വീല്‍ ക്ലബ് ഓഫ് കോട്ടയം പ്രസിഡന്‍റുമായ ഡോ. രാജലക്ഷ്മി സന്ദര്‍ശിച്ചു. പുതുപ്പളളി മാര്‍ ഇവാനിയോസ് ഹോസ്പിറ്റല്‍ ഗൈനക്കോളജിസ്റ്റ് ഡോ. ലൈലാ മാത്യു സന്നിഹിതയായിരുന്നു. ചെവിക്കുളളില്‍ സുരക്ഷിതമായി വയ്ക്കുന്ന, പുറത്തു കാണാനാവാത്ത വിദേശനിര്‍മിത ബ്രാന്‍ഡഡ് ശ്രവണ സഹായികള്‍ കുറഞ്ഞ നിരക്കിലും ഡിസ്‌കൗണ്ടിലും ക്യാമ്പില്‍ ലഭിക്കും. ബാറ്ററി ശ്രവണ സഹായികള്‍ മാറ്റി പുതിയ റീചാര്‍ജിംഗ് ശ്രവണ സഹായികളാക്കാനും അവസരമുണ്ട്. കേരളത്തില്‍ 18 വര്‍ഷമായി ശബ്ദ ഹിയറിംഗ് പ്രവര്‍ത്തിക്കുന്നു. എക്‌സ്‌ചേഞ്ച് സൗകര്യവും ലഭ്യം. ക്ലിനിക്കുകള്‍: കഞ്ഞിക്കുഴി, ചങ്ങനാശേരി, കറുകച്ചാല്‍, പാലാ, മുടിയൂര്‍ക്കര, പൊന്‍കുന്നം, കടുത്തുരുത്തി. ഫോൺ: 95449 95558.

മാതാപിതാക്കളുടെ സ്മരണയ്ക്ക് 25 സ്‌നേഹവീടുകളുമായി ആണ്ടൂക്കുന്നേല്‍ കുടുംബാംഗങ്ങള്‍

പാലാ: കരൂര്‍ ഞാവള്ളില്‍ ആണ്ടൂക്കുന്നേല്‍ കുട്ടപ്പന്‍ എന്ന കുര്യന്‍ ചാണ്ടിയുടെയും ഭാര്യ സിസിലി യുടെയും ഓര്‍മകള്‍ ഇനി 25 സ്‌നേഹവീടുകളായി ഉയര്‍ന്നുനില്‍ക്കും. ആദ്യ ഘട്ടമെന്ന നിലയില്‍ പാവപ്പെട്ട പതിനൊന്ന് കുടുംബങ്ങള്‍ക്ക് ആലയം ഒരുക്കിയിരിക്കുകയാണ് ഞാവള്ളില്‍ ആണ്ടൂക്കുന്നേല്‍ കുര്യന്‍ ചാണ്ടി മെമ്മോറിയല്‍ ഇന്‍ഫന്‍റ് ജീസസ് ചാരിറ്റബിള്‍ ട്രസ്റ്റ്. ഇനി പതിനാല് കുടുംബങ്ങള്‍ക്കുകൂടി തലചായ്ക്കാനൊരിടം ഒരുക്കാനുള്ള ശ്രമവും ഇതോടൊപ്പം ആരംഭിക്കും. അങ്ങനെ ഇരുപത്തഞ്ച് സ്നേഹവീടുകള്‍ കരൂര്‍ വൈദ്യശാലപ്പടിയിലെ ഇന്‍ഫന്‍റ് ജീസസ് നഗറില്‍ ഉയരും. മൂന്ന് ഏക്കര്‍ സ്ഥലം വാങ്ങിയാണ് ഭവനപദ്ധതി ആരംഭിച്ചത്. എല്ലാവിധ സൗകര്യങ്ങളോടും കൂടിയ വീടുകളാണ് നിര്‍മിച്ചുനല്‍കുന്നത്. ആദ്യഘട്ടത്തില്‍ പണിതീര്‍ത്ത പതിനൊന്ന് വീടുകളുടെ വെഞ്ചരിപ്പും പുതുതായി നിര്‍മിക്കുന്ന പതിനാല് വീടുകളുടെ കല്ലിടീല്‍ ചടങ്ങും 18ന് വൈകുന്നേരം മൂന്നിന് പാലാ ബിഷപ് മാര്‍ ജോസഫ് കല്ലറങ്ങാട്ട് നിര്‍വഹിക്കുമെന്ന് ട്രസ്റ്റ് ഭാരവാഹികളായ മാത്യു അലക്സാണ്ടര്‍ (ബോബി), സിന്‍ലെറ്റ് മാത്യു, അലിക് മാത്യു, ഫെലിക്സ് മാത്യു, ചാണ്ടിക്കുഞ്ഞ്, ബോണി തോമസ് എന്നിവര്‍ പത്രസമ്മേളനത്തില്‍ അറിയിച്ചു. പ്രചോദനം പാലാ രൂപതയുടെ ഹോം പ്രോജക്ട് പാലാ രൂപതാ ബിഷപ് മാര്‍ ജോസഫ് കല്ലറങ്ങാട്ട് മുന്‍കൈ എടുത്ത് നടത്തുന്ന പാവങ്ങള്‍ക്കുള്ള വീട് എന്ന ഹോം പ്രോജക്ടിന്‍റെ പ്രചോദനത്താലാണ് തങ്ങളും കഴിയുന്നത്ര വീടുകള്‍ നിര്‍മിച്ചു നല്‍കുന്നതെന്ന് മാത്യു അലക്സാണ്ടര്‍ (ബോബി) പറഞ്ഞു. പാലാ രൂപതയില്‍ സ്വന്തമായി വീടുകള്‍ ഇല്ലാത്തവരായി ആരും ഉണ്ടാവരുതെന്ന് മാര്‍ കല്ലറങ്ങാട്ടുമായി സംസാരിക്കാന്‍ ഇടവന്നപ്പോള്‍ പറഞ്ഞിരുന്നു. ജാതി-മത ഭേദമന്യേ അര്‍ഹതപ്പെട്ട പാവപ്പെട്ട കുടുംബങ്ങളെ കണ്ടെത്തിയാണ് വീട് നിര്‍മിച്ച് കൊടുത്തിട്ടുള്ളത്. ഓരോ വീടിനും 15 ലക്ഷത്തോളം രൂപ ചെലവഴിച്ചായിരുന്നു നിര്‍മാണം. 800 ചതുരശ്രയടിയില്‍ മൂന്നു മുറികളും ഹാളും അടുക്കളയും ബാത്ത് റൂമും ഉള്‍പ്പെടുന്നതാണ് ഓരോ വീടും. വീടുകളുടെ വെഞ്ചരിപ്പ്, ഓഫീസ് സമുച്ചയത്തിന്‍റെ ഉദ്ഘാടനം, 14 വീടുകളുടെ കല്ലിടീല്‍ എന്നീ ചടങ്ങുകളില്‍ മന്ത്രിമാരായ വി.എന്‍. വാസവന്‍, എം.ബി. രാജേഷ്, റോഷി അഗസ്റ്റിന്‍, പ്രതിപക്ഷ നേതാവ് വി.ഡി. സതീശന്‍, എംപിമാരായ ഫ്രാന്‍സിസ് ജോര്‍ജ്, അടൂര്‍ പ്രകാശ്, ജോസ് കെ. മാണി, മാണി സി. കാപ്പന്‍ എംഎല്‍എ, കരൂര്‍ പഞ്ചായത്ത് പ്രസിഡന്‍റ് അനസ്യ രാമന്‍, ഡിവൈന്‍ റിട്രീറ്റ് സെന്‍റര്‍ ഡയറക്ടര്‍ ഫാ. ജോര്‍ജ് പനയ്ക്കല്‍, അന്ത്യാളം പള്ളി വികാരി ഫാ. ജോസഫ് ചെറുകരക്കുന്നേല്‍, കരൂര്‍ പള്ളി വികാരി ഫാ. ഫിലിപ്പ് കുളങ്ങര എന്നിവര്‍ പങ്കെടുക്കും. അതിഥികളായി എത്തുന്ന കുടുംബങ്ങളിലെ കുട്ടികളുടെ വിദ്യാഭ്യാസ കാര്യത്തിനും വേണ്ട സഹായം നല്‍കാന്‍ ട്രസ്റ്റ് മുന്നോട്ട് വരുമെന്നും ട്രസ്റ്റ് ഭാരവാഹികള്‍ പറഞ്ഞു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]