ADVERTISEMENT

ADVERTISEMENT

ലഹരിവിരുദ്ധ കാന്പയിൻ: കൂട്ടയോട്ടം നടത്തി

കൽപ്പറ്റ: പോരാടാം ഒന്നായി ലഹരിക്കെതിരേ എന്ന മുദ്രാവാക്യം ഉയർത്തി കേരള പോലീസ് അസോസിയേഷൻ, വ്യാപാരി വ്യവസായി ഏകോപനസമിതി യൂത്ത് വിംഗ് ജില്ലാ കമ്മിറ്റികളുടെ സംയുക്താഭിമുഖ്യത്തിൽ നഗരത്തിൽ കൂട്ടയോട്ടം നടത്തി.

സിവിൽ സ്റ്റേഷൻ പരിസരത്തുനിന്നു പുതിയ സ്റ്റാൻഡിലേക്കാണ് കൂട്ടയോട്ടം നടത്തിയത്. ജില്ലാ പോലീസ് മേധാവി തപോഷ് ബസുമതാരി ഉദ്ഘാടനം ചെയ്തു. സിനിമാതാരം അബു സലിം, ക്രിക്കറ്റ് താരം സജ്ന സജീവൻ എന്നിവർ ചേർന്ന് ഫ്ളാഗ്ഓഫ് കർമം നിർവഹിച്ചു.

നാർകോടിക് സെൽ ഡിവൈഎസ്പി എം.കെ. ഭരതൻ, കെപിഒഎ ജില്ലാ സെക്രട്ടറി പി.സി. സജീവ് സംസ്ഥാന നിർവാഹക സമിതി അംഗം കെ.എം. ശശിധരൻ, പോലീസ് അസോസിയേഷൻ ജില്ലാ സെക്രട്ടറി ഇർഷാദ് മുബാറക്ക്, പ്രസിഡന്‍റ് ബിപിൻ സണ്ണി, ട്രഷറർ എം.ബി. ബിഗേഷ്, സംസ്ഥാന നിർവാഹക സമിതി അംഗം ജോർജ് നിറ്റസ്,

വ്യാപാരി വ്യവസായി ഏകോപന സമിതി യൂത്ത് വിംഗ് ജില്ലാ പ്രസിഡന്‍റ് പി. സംഷാദ്, സെക്രട്ടറി സന്തോഷ് അന്പലവയൽ, കെവിവിഇഎസ് ജില്ലാ പ്രസിഡന്‍റ് ജോജിൻ ടി. ജോയ്, ട്രഷറർ നൗഷാദ് കാക്കവയൽ, നേതാക്കളായ താരിഖ് കടവൻ, സി. ഷൈജൽ തുടങ്ങിയവർ നേതൃത്വം നൽകി.

ADVERTISEMENT

ബിദർക്കാട് ടൗണിൽ വീണ്ടും കാട്ടാന ഇറങ്ങി

ഗൂഡല്ലൂർ: നെല്ലാക്കോട്ട പഞ്ചായത്തിലെ ബിദർക്കാട് ടൗണിൽ വീണ്ടും കാട്ടാന ഇറങ്ങി. ടൗണിൽ കാട്ടാന ഇറങ്ങുന്നത് നിത്യസംഭവമായി മാറിയിരിക്കുകയാണ്. സമീപത്തെ വനത്തിൽ നിന്നാണ് കാട്ടാന ഇറങ്ങുന്നത്. പകൽ സമയം വനത്തിൽ കഴിയുന്ന ഒറ്റകൊന്പൻ നേരം ഇരുട്ടിയാൽ ജനവാസ മേഖലയിലേക്ക് ഇറങ്ങുകയാണ്. ഇന്നലെ പുലർച്ചെ ആറോടെയാണ് ആന പഞ്ചോറയിൽ നിന്ന് നേരെ റോഡിലേക്ക് ഇറങ്ങിയത്. റോഡിലൂടെ നടന്നു പെട്രോൾ പന്പ് കഴിഞ്ഞ് വനത്തിലേക്ക് പിന്തിരിയുകയായിരുന്നു. ആനയെ കണ്ട് വാഹന യാത്രക്കാർ ഓടി രക്ഷപ്പെട്ടു. ആനയുടെ റോഡിലൂടെയുള്ള സഞ്ചാരം വാഹന യാത്രക്കാർക്കും പ്രഭാത സവാരിക്കാർക്കും കടുത്ത ഭീഷണിയായിരിക്കുകയാണ്. കൃഷിയിടങ്ങളിൽ ഇറങ്ങി വൻ കൃഷിനാശവും വരുത്തുന്നുണ്ട്. ജനങ്ങൾ ഭീതിയോടെയാണ് കഴിയുന്നത്. ബിദർക്കാടിലാണ് ബിദർക്കാട് റേഞ്ച് ഓഫീസ് പ്രവൃത്തിക്കുന്നത്. ഇതിന് അൽപം ദൂരെ നെല്ലാക്കോട്ട റേഞ്ച് ഓഫീസും പ്രവൃത്തിക്കുന്നുണ്ട്. ഉദ്യോഗസ്ഥരുടെ കാര്യക്ഷമതയില്ലായ്മ കാരണം ഈ മേഖല കാട്ടാനയുടെ വിഹാരകേന്ദ്രമായി മാറിയിരിക്കുകയാണ്. ആന ശല്യത്തിന് പരിഹാരം കാണണമെന്ന് ജനങ്ങൾ ആവശ്യപ്പെട്ടുവരികയാണ്. ശാശ്വതമായ പരിഹാരം കാണാൻ വനംവകുപ്പിന് സാധിക്കുന്നില്ല. കാട്ടുകൊന്പനെ വനത്തിലേക്ക് തുരത്തുകയും വനാതിർത്തികളിൽ കിടങ്ങ് നിർമിക്കുകയും സോളാർ വേലി സ്ഥാപിക്കുകയും ചെയ്യണമെന്നാണ് നാട്ടുകാർ ആവശ്യപ്പെടുന്നത്.

പോസ്റ്റ്ഓഫീസ് കെട്ടിടത്തിന്‍റെ തകർന്ന ഭാഗങ്ങൾ നന്നാക്കാൻ നടപടി വേണമെന്ന്

പുൽപ്പള്ളി: പതിറ്റാണ്ടുകൾ പഴക്കമുള്ള പുൽപ്പള്ളി ടൗണിലെ പോസ്റ്റ് ഓഫീസ് കെട്ടിടത്തിന്‍റെ തകർന്ന ഭാഗങ്ങൾ നന്നാക്കാൻ നടപടി വേണമെന്ന് നാട്ടുകാരും ജീവനക്കാരും ആവശ്യപ്പെട്ടു. കെട്ടിടത്തിന്‍റ സണ്‍ഷേഡാണ് ഏത് നിമിഷവും തകർന്ന് വീഴാവുന്ന അവസ്ഥയിലുള്ളത്. തപാൽ ഓഫീസിലെത്തുന്ന പലരും തലനാരിഴയ്ക്കാണ് രക്ഷപ്പെടുന്നത്. കെട്ടിടത്തിന്‍റെ പല ഭാഗങ്ങളിലെ കോണ്‍ക്രീറ്റ് പാളികളും അടർന്നു വീണുകൊണ്ടിരിക്കുകയാണ്. കഴിഞ്ഞ ദിവസം പെൻഷൻ വാങ്ങാനെത്തിയ വയോധികൻ കോണ്‍ക്രിറ്റ് കഷണം വിഴുന്നതിൽ നിന്ന് തലനാരിഴക്കാണ് രക്ഷപ്പെട്ടത്. ഓഫീസ് കെട്ടിടം അപകടനിലയിൽ ആയിട്ടും നവീകരിക്കാൻ നടപടിയിലെന്നാണ് നാട്ടുകാരുടെ ആക്ഷേപം. കഴിഞ്ഞ വർഷം കെട്ടിടത്തിന്‍റെ മുൻഭാഗങ്ങളിലെ സണ്‍ഷേഡ് നന്നാക്കിയെങ്കിലും കെട്ടിടത്തിന്‍റെ പിൻഭാഗത്തും സൈഡിലുമുള്ള സണ്‍ഷേഡുകൾ നന്നാക്കാൻ അധികൃതർ തയാറാകാത്തതാണ് ഓഫീസിലെത്തുന്ന ജനങ്ങളെ വലയ്ക്കുന്നത്.

കെ.കെ. മമ്മൂട്ടി പടിഞ്ഞാറത്തറ ബാങ്ക് പ്രസിഡന്‍റ്

പടിഞ്ഞാറത്തറ: സർവീസ് സഹകരണ ബാങ്ക് പ്രസിഡന്‍റായി കെ.കെ. മമ്മൂട്ടിയെയും വൈസ് പ്രസിഡന്‍റായി എം.പി. ചെറിയാനെയും തെരഞ്ഞെടുത്തു. വൈത്തിരി സഹകരണ യൂണിറ്റ് ഇൻസ്പെക്ടർ ശ്രീജിത്ത് തെരഞ്ഞെടുപ്പ് നിയന്ത്രിച്ചു. പ്രസിഡന്‍റായി മമ്മൂട്ടിയുടെയും വൈസ് പ്രസിഡന്‍റായി ചെറിയാന്‍റെയും പേര് യഥാക്രമം പി.കെ. വർഗീസ്, എൻ.കെ. അബ്ദുൾ മുനീർ എന്നിവർ നിർദേശിച്ചു. കെ. അബ്ദുൾ നിസാർ, എ.എം. ശാന്തകുമാരി എന്നിവർ പിന്താങ്ങി. പ്രസിസന്‍റിനും വൈസ് പ്രസിഡന്‍റിനും യുഡിഎഫ് പഞ്ചായത്ത് കമ്മിറ്റി സ്വീകരണം നൽകി.

മൂപ്പൈനാട് പഞ്ചായത്ത് പ്രസിഡന്‍റ് തെരഞ്ഞെടുപ്പ് 24ന്

കൽപ്പറ്റ: മൂപ്പൈനാട് പഞ്ചായത്ത് പ്രസിഡന്‍റ് തെരഞ്ഞെടുപ്പ് 24ന് നടത്തും. കോണ്‍ഗ്രസ് ടിക്കറ്റിൽ കടച്ചിക്കുന്ന് വാർഡിൽനിന്നു ഭരണസമിതിയിലെത്തുകയും പിന്നീട് പാർട്ടി നടപടിക്ക് വിധേയനാകുകയും ചെയ്ത വി.എൻ. ശശീന്ദ്രൻ രാജിവച്ച ഒഴിവിലാണ് തെരഞ്ഞെടുപ്പ്. കോണ്‍ഗ്രസിലെ ആർ. ഉണ്ണിക്കൃഷ്ണൻ യുഡിഎഫിന്‍റെ പ്രസിഡന്‍റ് സ്ഥാനാർഥിയാകുമെന്നാണ് സൂചന. പാർട്ടി മൂപ്പൈനാട് മണ്ഡലം മുൻ മണ്ഡലം പ്രസിഡന്‍റാണ് ഇദ്ദേഹം. 16 അംഗങ്ങളാണ് മൂപ്പൈനാട് പഞ്ചായത്ത് ഭരണസമിതിയിൽ. പ്രസിഡന്‍റ് പദം രാജിവച്ച വി.എൻ. ശശീന്ദ്രൻ ഒഴികെ യുഡിഎഫിന് 10 അംഗങ്ങളുണ്ട്. അഞ്ച് അംഗങ്ങളാണ് ഇടതുപക്ഷത്തിന്. യുഡിഎഫ് നിരയിൽ മുസ് ലിം ലീഗിന് ആറും കോണ്‍ഗ്രസിന് നാലും അംഗങ്ങളാണുള്ളത്. പഞ്ചായത്ത് ഭരണസമിതിയുടെ തുടക്കത്തിൽ മുസ്ലിം ലീഗിലെ എ.കെ. റഫീഖായിരുന്നു പഞ്ചായത്ത് പ്രസിഡന്‍റ്. യുഡിഎഫ് ധാരണയനുസരിച്ച് ഇദ്ദേഹം രാജിവച്ച മുറയ്ക്കാണ് കർഷക കോണ്‍ഗ്രസ് മുൻ ജില്ലാ പ്രസിഡന്‍റുമായി വി.എൻ. ശശീന്ദ്രൻ പ്രസിഡന്‍റായത്. കോണ്‍ഗ്രസ് ധാരണപ്രകാരം, ഭരണസമിതി കാലാവധി പൂർത്തിയാക്കാൻ ഒരുവർഷം ബാക്കിയുള്ളപ്പോൾ ശശീന്ദ്രൻ പ്രസിഡന്‍റ് പദം ഒഴിയേണ്ടതായിരുന്നു. എന്നാൽ പാർട്ടി ജില്ലാ നേതൃത്വം ഉൾപ്പെടെ ആവശ്യപ്പെട്ടിട്ടും രാജിവയ്ക്കാൻ അദ്ദേഹം തയാറായില്ല. ഈ സാഹചര്യത്തിൽ കെപിസിസി നിർദേശപ്രകാരം ശശീന്ദ്രന്‍റെ പാർട്ടി അംഗത്വം ഡിസിസി പ്രസിഡന്‍റ് സസ്പെൻഡ് ചെയ്തു. തുടർന്നും പ്രസിഡന്‍റ് പദവിയിൽ തുടർന്ന ശശീന്ദ്രനെതിരേ ഭരണസമിതിയിലെ യുഡിഎഫ് അംഗങ്ങൾ അവിശ്വാസ പ്രമേയത്തിന് നോട്ടീസ് നൽകി. അവിശ്വാസ പ്രമേയത്തിൽ ചർച്ചയ്ക്കും വോട്ടെടുപ്പിനും തീയതി നിശ്ചയിച്ചിരിക്കേയാണ് ശശീന്ദ്രൻ പ്രസിഡന്‍റ് സ്ഥാനം രാജിവച്ചത്.

കെപിഎ ജില്ലാ കണ്‍വൻഷൻ: സംഘാടക സമിതി രൂപീകരിച്ചു

കൽപ്പറ്റ: മേയ് 10ന് മുട്ടിലിൽ ചേരുന്ന കേരള പോലീസ് അസോസിയേഷൻ(കെപിഎ)ജില്ലാ കണ്‍വൻഷൻ നടത്തിപ്പിന് സംഘാടക സമിതി രൂപീകരിച്ചു. ഇതിനുചേർന്ന യോഗം സ്പെഷൽ ബ്രാഞ്ച് ഡിവൈഎസ്പി എം.എം. അബ്ദുൾകരീം ഉദ്ഘാടനം ചെയ്തു. അസോസിയേഷൻ ജില്ലാ പ്രസിഡന്‍റ് ബിപിൻ സണ്ണി അധ്യക്ഷത വഹിച്ചു. കെപിഒഎ ജില്ലാ സെക്രട്ടറി പി.സി. സജീവ്, ജില്ലാ പോലീസ് സഹകരണ സംഘം പ്രസിഡന്‍റ് കെ.എം. ശശിധരൻ, അസോസിയേഷൻ ജില്ലാ സെക്രട്ടറി ഇർഷാദ് മുബാറക് എന്നിവർ പ്രസംഗിച്ചു. ‌ ഭാരവാഹികളായി വി. ലതീഷ്കുമാർ(ചെയർമാൻ), പി.ജി. രതീഷ്, എം.കെ. ഷജീർ(വൈസ് ചെയർമാൻ), ടി.പി. റിയാസ്(കണ്‍വീനർ), അബ്ദുൾ നാസിർ, പി.എസ്. അജീഷ്(ജോയിന്‍റ് കണ്‍വീനർ) എന്നിവരെ തെരഞ്ഞെടുത്തു. കണ്‍വൻഷന്‍റെ ഭാഗമായി മെഡിക്കൽ ക്യാന്പ്, രക്തദാന ക്യാന്പ്, ഫുട്ബോൾ, ക്രിക്കറ്റ്, ഷട്ടിൽ ബാഡ്മിന്‍റണ്‍ മത്സരം എന്നിവ നടത്തും.

ബെയ്‌ലി വനിതാ സംരംഭത്തിന് കൈത്താങ്ങായി സാൻതോം ട്രസ്റ്റ്

കൽപ്പറ്റ: പുഞ്ചിരിമട്ടം ഉരുൾ ദുരന്തബാധിതരായ വനിതകളിൽ ഒരു സംഘം രൂപീകരിച്ച ലൈഫ് ലൈൻ വയനാട് റിപ്പണിൽ ബെയ്‌ലി എന്ന പേരിൽ ആരംഭിച്ച ബാഗ് നിർമാണ യൂണിറ്റിന് കൈത്താങ്ങുമായി സാൻതോം വയനാട് ട്രസ്റ്റ്. കൽപ്പറ്റ ആസ്ഥാനമായി പ്രവർത്തിക്കുന്ന ട്രസ്റ്റ് ഭാരവാഹികളായ റവ.ഡോ.തോമസ് ജോസഫ് തേരകം, ബിജോയ് വള്ളിപ്പാലം, ജോസഫ് പുല്ലം, ഇത്തമ്മ ജോസഫ് എന്നിവർ യൂണിറ്റ് സന്ദർശിച്ച് ഷെൽഫുകൾ, കസേരകൾ, സ്ക്രീൻ പ്രിന്‍റിംഗിനുള്ള മേശ എന്നിവ കൈമാറി. ലൈഫ് ലൈൻ വയനാട് പ്രസിഡന്‍റ് നിഖിത, ട്രഷറർ റസിയ എന്നിവരുടെ നേതൃത്വത്തിൽ സാമഗ്രികൾ ഏറ്റുവാങ്ങി. സംരംഭത്തിന്‍റെ പ്രവർത്തനം, വിപണന മേഖലയിൽ നേരിടുന്ന പ്രശ്നങ്ങൾ എന്നിവ സംബന്ധിച്ച് ലൈഫ് ലൈൻ ഭാരവാഹികളുമായി ചർച്ച നടത്തിയ ട്രസ്റ്റ് പ്രതിനിധികൾ സ്ഥാപനം പ്രവർത്തിക്കുന്ന കെട്ടിടത്തിന്‍റെ ഏപ്രിലിലെ വാടക വാഗ്ദാനം ചെയ്തു. ബാഗ് നിർമാണത്തിന് ആവശ്യമായ ഗുണമേൻമയുള്ള ചണം പശ്ചിമബംഗാളിൽനിന്നു മൊത്തവില അടിസ്ഥാനത്തിൽ ലഭ്യമാക്കുന്നതിന് സന്നദ്ധത അറിയിച്ചു. ഉത്പന്നങ്ങളുടെ വിപണി വിപുലീകരണത്തിന് സഹായം വാഗ്ദാനം ചെയ്തു.

മനുഷ്യാവകാശ കമ്മീഷൻ ഇടപെട്ടു: മകൾക്ക് രേഖകൾ നൽകാമെന്ന് മാതാവ്

കൽപ്പറ്റ: ജനിച്ച മതത്തിൽ നിന്നും വിട്ടു നിന്നതിന്‍റെ പേരിൽ വീട്ടുകാരുമായി കലഹിച്ച് പോയ മകളുടെ വ്യക്തിപരമായ രേഖകൾ തിരികെ നൽകാൻ തയാറാണെന്ന് മാതാവ് അറിയിച്ചതായി സുൽത്താൻ ബത്തേരി പോലീസ് ഇൻസ്പെക്ടർ മനുഷ്യാവകാശ കമ്മീഷനെ അറിയിച്ചു. തന്‍റെ ജനന സർട്ടിഫിക്കറ്റ്, പാസ്പോർട്ട്, വിദ്യാഭ്യാസ രേഖകൾ എന്നിവ മാതാവ് വിട്ടുനൽകുന്നില്ലെന്ന് പരാതിപ്പെട്ട് എറണാകുളത്ത് താമസിക്കുന്ന യുവതി സമർപ്പിച്ച പരാതിയിൽ ആവശ്യമായ നടപടികൾ സ്വീകരിക്കാൻ കമ്മീഷൻ ജുഡീഷൽ അംഗം കെ. ബൈജുനാഥ് സുൽത്താൻ ബത്തേരി എസ്എച്ച്ഒക്ക് നിർദേശം നൽകിയിരുന്നു. യുവതിയുടെ അമ്മ ഹൈദരാബാദിലാണ് താമസിക്കുന്നതെന്നും ഫോണിൽ ബന്ധപ്പെട്ടതായും പോലീസ് റിപ്പോർട്ടിൽ പറയുന്നു. പരാതിക്കാരിയുടെ ഓടപ്പള്ളം പള്ളിപ്പടിയിലെ വീട് അടഞ്ഞുകിടക്കുകയാണ്. 2022 ൽ മകളുടെ പാസ്പോർട്ട് പോലീസിന്‍റെ മധ്യസ്ഥതയിൽ തിരികെ നൽകിയതായി മാതാവ് അറിയിച്ചതായി പോലീസ് പറഞ്ഞു. 2019 ൽ മകൾ നിരീശ്വരവാദിയായി വീട്വിട്ട് കുസാറ്റിൽ പഠിക്കാൻ പോയതാണെന്നും മാതാവ് പറഞ്ഞു. മുൻകൂട്ടി അറിയിച്ചാൽ താൻ സുൽത്താൻ ബത്തേരിയിലെത്തി രേഖകൾ മടക്കി നൽകാമെന്ന് മാതാവ് പറഞ്ഞതായി പോലീസ് റിപ്പോർട്ടിൽ പറഞ്ഞു. പരാതിക്കാരിക്ക് സുൽത്താൻ ബത്തേരി പോലീസുമായി ബന്ധപ്പെടാമെന്നും കമ്മീഷൻ ഉത്തരവിൽ പറഞ്ഞു.

കോണ്‍ഗ്രസ് നേതാക്കളെ കേസിൽ കുടുക്കുന്നതിൽ പ്രതിഷേധം

കൽപ്പറ്റ: കോണ്‍ഗ്രസ് നേതാക്കളെ കേസിൽകുടുക്കി പീഡിപ്പിക്കാൻ ശ്രമിക്കുന്നതിനെതിരേ ജില്ലാ കോണ്‍ഗ്രസ് കമ്മിറ്റിയുടെ നേതൃത്വത്തിൽ കൽപ്പറ്റയിൽ പ്രതിഷേധ പ്രകടനം നടത്തി. എഐസിസി അംഗം പി.കെ. ജയലക്ഷ്മി പ്രതിഷേധ യോഗം ഉദ്ഘാടനം ചെയ്തു. 1938 ൽ പ്രസിദ്ധീകരണമാരംഭിച്ച പാർട്ടി പത്രമായ നാഷണൽ ഹെറാൾഡ് ദിനപത്രത്തിന്‍റെ പ്രചാരണം 2008 ൽ നിന്നതിനു ശേഷം മുംബൈയിലും ഡൽഹിയിലും ലക്നൗവിലും ഉള്ള ഓഫീസുകളിലെ ജീവനക്കാരുടെ കോന്പൻസേഷൻ കൊടുത്തു പിരിച്ചുവിട്ടത് സോണിയാ ഗാന്ധിയും ഇന്ത്യൻ നാഷണൽ കോണ്‍ഗ്രസുമാണ്. അതിനുവേണ്ടി ചെലവ് ചെയ്ത 90 കോടി രൂപ തിരിച്ചു ലഭിക്കാത്തതിനാലും സ്ഥാപനങ്ങൾ അനാഥമാകാതിരിക്കുവാനും പാർട്ടിക്ക് വേണ്ടി സോണിയയും രാഹുലും അടങ്ങുന്ന അഞ്ചഗ സമിതി ഏറ്റെടുത്തത് കള്ളപ്പണമാണെന്ന ഇഡിയുടെ കണ്ടെത്തലും കേസെടുക്കലും രാഷ്ട്രീയമായി കോണ്‍ഗ്രസിനെ ഇല്ലായ്മ ചെയ്യാനാണെന്ന് പി.കെ. ജലയക്ഷ്മി ആരോപിച്ചു. യോഗത്തിൽ ഡിസിസി വൈസ് പ്രസിഡന്‍റ് ഒ.വി. അപ്പച്ചൻ അധ്യക്ഷത വഹിച്ചു. കെപിസിസി അംഗം പി.പി. ആലി, എൻ.കെ. വർഗീസ്, മുനിസിപ്പൽ ചെയർമാൻ ടി.ജെ. ഐസക്, എം.എ. ജോസഫ്, ബിനു തോമസ്, എം.ജി. ബിജു, പി.കെ. അബ്ദുൾ റഹിമാൻ, പി. വിനോദ് കുമാർ, ജയപ്രസാദ്, ഉമ്മർ കുണ്ടാട്ടിൽ, ബി. സുരേഷ് ബാബു, പോൾ കൂവക്കൽ, ജോയ് തൊട്ടിത്തറ, ഒ.വി. റോയ്, ജോസ് പടിഞ്ഞാറത്തറ, ഹർഷൻ കോങ്ങാടൻ, ഫൈസൽ പാപ്പിന, പി.കെ. ജോസ്, കെ.കെ. രാജേന്ദ്രൻ, ആർ. ഉണ്ണികൃഷ്ണൻ, ഒ.പി. അബ്ദു റഹിമാൻ തുടങ്ങിയവർ പ്രസംഗിച്ചു.

ഋതുകൃഷ്ണൻ കേരള ടീമിൽ

അന്പലവയൽ: മണിപ്പുരിലെ ഇംഫാലിൽ നടക്കുന്ന ദേശീയ സ്കൂൾ ഗെയിംസിൽ അണ്ടർ 19 ഫുട്ബോൾ ചാന്പ്യൻഷിപ്പിൽ പങ്കെടുക്കുന്ന കേരള ടീമിൽ വയനാട് സ്വദേശി ഇടം നേടി. അന്പലവയൽ ഗവ.വൊക്കേഷണൽ ഹയർ സെക്കൻഡറി സ്കൂൾ പ്ലസ് ടു വിദ്യാർഥി ഋതു കൃഷ്ണനാണ് കേരളത്തിന്‍റെ ജഴ്സിയണിയുക. അന്പലവയൽ നെല്ലാറച്ചാൽ മുറിക്കാനാട് രാധാകൃഷ്ണൻ-ശ്രീജാമോൾ ദന്പതികളുടെ മകനാണ് ഋതു. പറപ്പൂർ എഫ്സിക്കുവേണ്ടി ദേശീയ അണ്ടർ 17 ഐ ലീഗ് ചാന്പ്യൻഷിപ്പിലും സംസ്ഥാന സബ്ജൂണിയർ, ജൂണിയർ ചാന്പ്യൻഷിപ്പിൽ ൽ വയനാട് ടീമിനുവേണ്ടിയും കളിച്ചിട്ടുണ്ട്.

ഗോകുലിന്‍റെ കസ്റ്റഡി മരണം: കളക്ടറേറ്റ് മാർച്ചും ധർണയും നടത്തി

കൽപ്പറ്റ: ഗോകുലിന്‍റെ കസ്റ്റഡി മരണത്തിന് ഉത്തരവാദികളായ പോലീസുകാരെ സർവീസിൽ നിന്ന് നീക്കം ചെയ്ത് ജുഡീഷൽ അന്വേഷണം നടത്തുക, പോക്സൊയുടെ മറവിൽ നടത്തുന്ന ആദിവാസി വേട്ട അവസാനിപ്പിക്കുക എന്നീ ആവശ്യങ്ങൾ ഉന്നയിച്ച് ആദിവാസി ഭാരത് മഹാസഭയുടെയും ഭൂസമര സമിതിയുടെയും സിപിഐ (എംഎൽ) റെഡ് സ്റ്റാറിന്‍റെയും ആഭിമുഖ്യത്തിൽ കളക്ടറേറ്റിലേക്ക് മാർച്ച് നടത്തി. തുടർന്ന് നടന്ന ധർണ സിപിഐ (എംഎൽ) റെഡ് സ്റ്റാർ കേന്ദ്രകമ്മിറ്റി അംഗം എം.കെ. ദാസൻ ഉദ്ഘാടനം ചെയ്തു. പോലീസ് പ്രതികളായതിനാൽ ജുഡീഷൽ അന്വേഷണം നടത്തി കുറ്റവാളികൾക്ക് കർശനശിക്ഷ ഉറപ്പാക്കണമെന്നും അദ്ദേഹം പറഞ്ഞു. എം.കെ. ഷിബു അധ്യക്ഷത വഹിച്ചു. വർഗീസ് വട്ടേക്കാട്, ടി.ജെ. ഡിക്സണ്‍, ടി.സി. സുബ്രഹ്മണ്യൻ, എ.എം. അഖിൽ കുമാർ, വി.എ. ബാലകൃഷ്ണൻ, കെ.വി. പ്രകാശൻ തുടങ്ങിയവർ പ്രസംഗിച്ചു. പി.എം. ജോർജ്, പി.ടി. പ്രേമാനന്ദ്, ബിജി ലാലിച്ചൻ, സി.ജെ. ജോണ്‍സണ്‍, കെ.ജി. മനോഹരൻ തുടങ്ങിയവർ മാർച്ചിന് നേതൃത്വം നൽകി.

നഞ്ചൻകോട്-നിലന്പൂർ റെയിൽപാത യാഥാർഥ്യമാക്കണമെന്ന്

ഗൂഡല്ലൂർ: നഞ്ചൻകോട്-നിലന്പൂർ റെയിൽപാത യാഥാർഥ്യമാക്കണമെന്ന് നീലഗിരി ജില്ലാ വ്യാപാരി സംഘം പ്രസിഡന്‍റ് മുഹമ്മദ് ഫാറൂഖ് കേന്ദ്ര റെയിൽവേ മന്ത്രിക്ക് നൽകിയ നിവേദനത്തിൽ ആവശ്യപ്പെട്ടു. റെയിൽവേ പദ്ധതി യാഥാർഥ്യമായാൽ നീലഗിരിയിലെ ആയിരക്കണക്കിന് ആളുകൾക്ക് ഉപകാരപ്രദമാകും. വ്യാപാരികൾക്കും ഇത് വലിയ ആശ്വാസമാകും. 2009ലാണ് മുതുമല വന്യജീവി സങ്കേതത്തിലൂടെ കടന്നു പോകുന്ന ഗൂഡല്ലൂർ-മൈസൂർ ദേശീയ പാതയിൽ രാത്രി യാത്രാനിരോധനം ഏർപ്പെടുത്തിയത്. റെയിൽപാതയുടെ പ്രവൃത്തികൾ ആരംഭിക്കുന്പോൾ വനമേഖലയിൽ മേൽപാലം നിർമിക്കും ഇതോടെ യാത്രാ പ്രശ്നത്തിനും പരിഹാരമാകുമെന്ന് നിവേദനത്തിൽ ചൂണ്ടികാട്ടിയിട്ടുണ്ട്.

പന്ത്രണ്ടാമത് വയനാട് മഴ മഹോത്സവം ജൂലൈയിൽ

കൽപ്പറ്റ: ജില്ലാ ഭരണകൂടം, ജില്ലാ ടൂറിസം പ്രമോഷൻ കൗണ്‍സിൽ, കേരള ടൂറിസം എന്നിവയുടെ സഹകരണത്തോടെ വയനാട് ടൂറിസം ഓർഗനൈസേഷൻ(ഡബ്ല്യുടിഒ) സംഘടിപ്പിക്കുന്ന 12-ാമത് മഴമഹോത്സവം സ്പ്ലാഷ്-2025 ജൂലൈ 11 മുതൽ 13 വരെ ബത്തേരി സപ്ത റിസോർട്ടിൽ നടക്കും. ഡബ്ല്യുടിഒ പ്രസിഡന്‍റ് കെ.ആർ. വാഞ്ചീശ്വരൻ, വൈസ് പ്രസിഡന്‍റ് സി.സി. അഷ്റഫ്, ട്രഷറർ ബാബു വൈദ്യർ, മാനേജ്മെന്‍റ് കമ്മിറ്റി അംഗങ്ങളായ ഇ.കെ. അനിൽ, ബിജു തോമസ്, എം.ജെ. സുനിൽകുമാർ, സ്പ്ലാഷ്-2025 കണ്‍വീനർ വിഷ്ണു എം. ദാസ് എന്നിവർ വാർത്താസമ്മേളനത്തിൽ അറിയിച്ചതാണ് വിവരം. 12, 13 തീയതികളിൽ നടത്തുന്ന ബിസിസനസ് ടു ബിസിനസ് മീറ്റാണ് മഴമഹോത്സവത്തിലെ പ്രധാന പരിപാടി. മഡ് ഫുട്ബോൾ, വോളിബോൾ മത്സരങ്ങൾ, സാംസ്കാരിക പരിപാടികൾ എന്നിവയും സ്പ്ലാഷിന്‍റെ ഭാഗമാണ്. കേരളത്തിന് അകത്തും പുറത്തും നിന്നായി 200 ഓളം ടൂറിസം സംരംഭകരും 500 ഓളം ട്രാവൽ ഏജന്‍റുമാരും ബിസിനസ് ടു ബിസിനസ് മീറ്റർ പങ്കെടുക്കും. വയനാടിന്‍റെ വിനോദ സഞ്ചാര മേഖലയ്ക്ക് ഉണർവു പകരാനും തദ്ദേശീയ ടൂറിസം വികസനത്തിനും വിഭാവനം ചെയ്ത മഴമഹോത്സവം ഇതിനകം വിദേശ രാജ്യങ്ങളിലടക്കം ശ്രദ്ധ നേടിയതായി ഡബ്ല്യുടിഒ ഭാഹവാഹികൾ പറഞ്ഞു.

ക്രൈസ്തവർ ഇന്ന് പെസഹാ ആചരിക്കും

പുൽപ്പള്ളി: ക്രൈസ്തവ വിശ്വാസി സമൂഹം അന്പത് നോന്പാചരണത്തിന്‍റെ പ്രധാന ദിനങ്ങളിലേക്ക് കടന്നതോടെ വിശ്വാസി സമൂഹത്തിന് ഇനി പ്രാർത്ഥനയുടെ നാളുകൾ. കുരിശുമരണത്തിനുമുന്പ് ശിഷ്യൻമാർക്കൊപ്പം യേശുക്രിസ്തുവിന്‍റെ അന്ത്യ അത്താഴത്തിന്‍റെ ഓർമ്മപുതുക്കിയാണ് ക്രൈസ്തവർ ഇന്ന് പെസഹാവ്യാഴം ആചരിക്കുന്നത്. വിനയത്തിന്‍റെയും ത്യാഗത്തിന്‍റെയും സഹനത്തിന്‍റെയും വിശുദ്ധവാരാചരണം പെസഹാ വ്യാഴത്തെ തീവ്രമാക്കും. അന്പത് നോന്പാചരണത്തിന്‍റെ പ്രധാന ദിനമായ ഇന്ന് ദേവാലയങ്ങളിൽ കാൽ കഴുകൽ ശുശ്രൂഷയും മറ്റ് പ്രാർത്ഥനകളും നടക്കും. അന്ത്യ അത്താഴവേളയിൽ യേശു ശിഷ്യൻമാരുടെ പാദങ്ങൾ കഴുകി ചുംബിച്ചതിന്‍റെ സ്മരണയിലാണ് ഇന്ന് കാൽകഴുകൽ ശുശ്രൂഷ പള്ളികളിൽ നടക്കുന്നത്. യേശുദേവന്‍റെ കുരിശു മരണത്തിന്‍റെ സ്മരണയിൽ ക്രൈസ്തവർ നാളെ ദുഖവെള്ളി ആചരിക്കും. ഗാഗുൽത്താമലയിലേക്ക് കുരിശുമായി പീഢകൾ സഹിച്ച് യേശു നടത്തിയ അവസാന യാത്രയുടേയും അതിന് ശേഷമുള്ള കുരിശു മരണത്തിന്‍റെയും ഓർമ്മ പുതുക്കിയാണ് ദുഖവെള്ളി ആചരിക്കുന്നത്. ദുഖവെള്ളി ശുശ്രൂഷയിലും കുരിശിന്‍റെ വഴിയിലും വിശ്വാസികൾ പങ്കുചേരും. മാനവരാശിയുടെ പാപമോചനത്തിനും കുരിശിൽ മരണം വരിച്ച യേശുക്രിസ്തുവിന്‍റെ ഉയിർപ്പിനെ അനുസ്മരിച്ച് ശനിയാഴ്ച വൈകുന്നേരം മുതൽ ദേവാലയങ്ങളിൽ ഉയിർപ്പ് തിരുനാളിന്‍റെ ചടങ്ങുകളും നടക്കും.

സന്തോഷ സന്ദേശവുമായി ഹാപ്പി ഫാമിലി ശിൽപങ്ങൾ

സുൽത്താൻ ബത്തേരി: ഹാപ്പിനസ് നഗരമെന്ന പേരിൽ അറിയപ്പെടുന്ന സുൽത്താൻ ബത്തേരിയിൽ സന്തോഷ സൂചിക ഉയർത്തുന്നതിന്‍റ ഭാഗമായി നവീനമായ പദ്ധതിയുമായി നഗരസഭയും ജെസിഐ ബത്തേരിയും മുന്നോട്ടുവന്നു. ഹാപ്പി ഫാമിലി എന്ന പേരിൽ നിർമിച്ച പുതിയ ശിൽപങ്ങൾ ജനങ്ങൾക്ക് സന്തോഷം പകരുകയാണ്. നഗരത്തിലെ ചുങ്കത്ത് മൈസൂരു, ഉൗട്ടി റോഡുകൾ തിരിയുന്ന പ്രധാന ജംഗ്ഷനിലാണ് ഈ ശിൽപങ്ങൾ സ്ഥാപിച്ചിരിക്കുന്നത്. പ്രശസ്ത ശിൽപി ബിനു തത്തുപാറയാണ് ഈ മനോഹര സൃഷ്ടികൾ രൂപകൽപ്പന ചെയ്തിരിക്കുന്നത്. സന്തോഷ കുടുംബത്തിന്‍റെ പ്രതീകമായി അച്ഛനും അമ്മയും രണ്ട് കുട്ടികളുമടങ്ങുന്ന കുടുംബത്തിന്‍റെ ആകൃതിയിലാണ് ഈ ശിൽപങ്ങൾ ഒരുക്കിയിരിക്കുന്നത്. രൂപകല്പനയും നിർമാണവും സ്ക്വയർ പൈപ്പുകൾ വെൽഡ് ചെയ്ത് അതിന് ഫൈബർ കൊണ്ടു പുറംചട്ടയുണ്ടാക്കി. ആധുനിക ശൈലിയിലുള്ള ചതുരാകൃതികളിലൂടെയാണ് ശിൽപങ്ങൾ. മുഴുവൻ രൂപങ്ങൾക്കും നീല, പച്ച, മഞ്ഞ, പിങ്ക്, വെള്ള, ഓറഞ്ച് തുടങ്ങിയ സന്തോഷം പകരുന്ന നിറങ്ങൾ നൽകിയിട്ടുണ്ട്.

ബീച്ചനഹള്ളി ഡാം തുറന്നുവിട്ടതോടെ കബനി നദിയിൽ ജലവിതാനം താഴ്ന്നു

പുൽപ്പള്ളി: കുടിയേറ്റ മേഖലയിലെ പ്രധാന ജലസ്രോതസായ കബനി നദിയിൽ ജലനിരപ്പ് അതിവേഗം താഴുന്നത് ആശങ്കയ്ക്കിടയാക്കുന്നു. ഒരാഴ്ചക്കുള്ളിലാണ് ജലനിരപ്പ് വൻതോതിൽ കുറഞ്ഞത്. കർണാടകയിൽ കൃഷിക്കും കുടിവെള്ളത്തിനുമായി ബീച്ചനഹള്ളി അണക്കെട്ടിൽ നിന്ന് കൂടുതൽ വെള്ളം എടുത്തുതുടങ്ങിയതാണ് ഇതിന് കാരണം. ജില്ലയിൽ പല ഭാഗങ്ങളിലും വേനൽമഴ ലഭിക്കുന്നുണ്ടെങ്കിലും കബനിയിലൂടെ ഒഴുകിയെത്തുന്ന വെള്ളം ബീച്ചനഹള്ളി ഡാം തുറന്ന് കൊടുത്തതോടെ പുഴയുടെ പല ഭാഗങ്ങളും വറ്റിവരണ്ട അവസ്ഥയാണ്. വേനൽമഴ ലഭിച്ചില്ലെങ്കിൽ കബനി നദിയിൽ നീരൊഴുക്ക് കുറയുന്നത് ജലക്ഷാമത്തിനിടയാക്കും. ഈ അവസ്ഥ തുടർന്നാൽ താമസിയാതെ കബനി കുടിവെള്ള പദ്ധതിയേയും ജലക്ഷാമം ദോഷകരമായി ബാധിക്കുമോ എന്ന ആശങ്കയിലാണ് ജനങ്ങൾ. കബനി നദിയിൽ ജലവിതാനം കുത്തനെ താഴ്ന്നതോടെ പുഴയിൽ പാറക്കെട്ടുകൾ മാത്രമായ അവസ്ഥയാണ്.

ടൗണ്‍ഷിപ് നിർമാണം ആറുമാസത്തിനകം പൂർത്തിയാക്കും: എസ്. സുഹാസ്

കൽപ്പറ്റ: പുഞ്ചിരിമട്ടം ഉരുൾ ദുരന്തബാധിതരുടെ പുനരധിവാസത്തിന് എൽസ്റ്റൻ എസ്റ്റേറ്റിൽ ഏറ്റെടുത്ത ഭൂമിയിൽ ടൗണ്‍ഷിപ് നിർമാണം ആറ് മാസത്തിനകം പൂർത്തിയാക്കുമെന്ന് സ്പെഷൽ ഓഫീസർ എസ്. സുഹാസ്. ടൗണ്‍ഷിപ്പ് പ്രാരംഭപ്രവർത്തനങ്ങൾ വിലയിരുത്തുന്നതിന് എൽസ്റ്റൻ എസ്റ്റേറ്റിലെ പുൽപ്പാറയിൽ എത്തിയ അദ്ദേഹം മാധ്യമപ്രവർത്തകരുമായി സംസാരിക്കുകയായിരുന്നു. ടൗണ്‍ഷിപ് നിർമാണത്തിന് ഭൂമി കരാർ സ്ഥാപനത്തിന് കൈമാറിയിട്ടുണ്ട്. മുഖ്യമന്ത്രി ശിലാസ്ഥാപനം നടത്തിയ വീടിന്‍റെ പണി തുടങ്ങി. റോഡ് പ്രവൃത്തിക്ക് അടുത്ത ദിവസം തുടക്കമാകും. ടൗണ്‍ഷിപ്പിൽ എത്ര വീടുകൾ നിർമിക്കണമെന്നതിൽ ഭവന പദ്ധതി അന്തിമ ഗുണഭോക്തൃ പട്ടിക പ്രസിദ്ധപ്പെടുത്തുന്നതോടെ വ്യക്തതയാകും. ഏറ്റെടുത്ത ഭൂമിയിലെ തേയിലഫാക്ടറി കെട്ടിടം പൊതു ആവശ്യത്തിന് ഉപയോഗപ്പെടുത്തും. മഴക്കാലത്ത് ഷെൽട്ടർ ആയി പ്രയോജനപ്പെടുത്താവുന്നതാണ് കെട്ടിടമെന്നും സ്പെഷൽ ഓഫീസർ പറഞ്ഞു.

കാറ്റിലും മഴയിലും ഫാം തകർന്നു: 3,500 ഓളം കോഴികൾ ചത്തു

കൽപ്പറ്റ: കാറ്റിലും മഴയിലും കോഴിഫാം തകർന്ന് 3,500 ഓളം കോഴികൾ ചത്തു. വയനാട് നടവയൽ പുഞ്ചക്കുന്നിൽ കഴിഞ്ഞ ദിവസമാണ് സംഭവം. പുത്തൻപറന്പിൽ ജോബിഷിന്‍റെ ഫാമാണ് തകർന്നത്. കനത്ത മഴയ്ക്കിലെ ഫാമിന്‍റെ മേൽക്കൂര പൂർണമായും കാറ്റെടുത്തു. ഏഴ് ലക്ഷം രൂപയുടെ നഷ്ടം കണക്കാക്കുന്നതായി ജോബിഷ് പറഞ്ഞു. കാറ്റും മഴയും നടവയൽ ഉൾപ്പെടെ പൂതാടി പഞ്ചായത്തിന്‍റെ വിവിധ ഭാഗങ്ങളിൽ നാശം വിതച്ചു. നിരവധി തോട്ടങ്ങളിൽ റബർ മരങ്ങളും വാഴയും ഒടിഞ്ഞുവീണു.

ക്ഷീര സംഘം പാലളവ് നിർത്തിയതിൽ പ്രതിഷേധവുമായി കർണാടക അതിർത്തി ഗ്രാമങ്ങളിലെ ക്ഷീരകർഷകർ

പുൽപ്പള്ളി: കേരളത്തിലെ ക്ഷീരസംഘങ്ങളിൽ പാലളക്കാൻ അനുവദിക്കണമെന്നാവശ്യപ്പെട്ട് കർണാടക അതിർത്തി ഗ്രാമങ്ങളിലെ ക്ഷീര കർഷകർ കബനിഗിരി ക്ഷീരസംഘം ഓഫീസിന് മുൻപിൽ പാലുമായി പ്രതിഷേധിച്ചു. ഒരു മാസം മുൻപ് നിർത്തിവച്ച പാൽ അളവ് പുനരാരംഭിച്ചെങ്കിലും മുന്നറിയിപ്പില്ലാതെ പാൽ അളവ് വീണ്ടും നിർത്തിവച്ചതിനാണ് ക്ഷീര കർഷകർ പ്രതിഷേധിച്ചത്. വീട്ടമ്മാർ ഉൾപ്പടെയുള്ളവർ പ്രതിഷേധിക്കാനെത്തി. മൈസൂരു ക്ഷീര സംഘം യൂണിയന്‍റെ പരാതിയുള്ളതിനാലാണ് കേരളത്തിലെ ക്ഷീര സംഘങ്ങളിൽ പാൽ സംഭരിക്കാൻ കഴിയാത്തതെന്നും കർഷകരെ ബുദ്ധിമുട്ടിക്കുന്നതിനോട് താത്പര്യമില്ലെന്നും അതേസമയം അനധികൃതമായി കർണാടകയിൽ നിന്നുള്ള പാൽ സംഭരിക്കുന്നതിന് സാങ്കേതിക പ്രയാസങ്ങളുണ്ടെന്നും കർണാടക മൃഗസംരക്ഷണ മന്ത്രിയോ ക്ഷീരസംഘം യൂണിയനോ ആവശ്യപ്പെട്ടാൽ കേരളത്തിൽ പാൽ അളക്കുന്നതിന് തടസമില്ലെന്നാണ് അധികൃതരുടെ നിലപാട്. കേരളത്തിലെക്ഷീര സംഘങ്ങളിൽ വർഷങ്ങളായി പാൽ അളന്നതിനാൽ കർണാടകയിലെ അധികൃതർ പാൽ വാങ്ങാൻ തയാറാകുന്നില്ലെന്നാണ് കർഷകർ പറയുന്നത്. ക്ഷീരമേഖലകളെ ആശ്രയിച്ചു കഴിയുന്ന ക്ഷീരകർഷകരെ സഹായിക്കണമെന്ന് പ്രതിഷേധക്കാർ ആവശ്യപ്പെട്ടു.

ശ്രേയസ് ലഹരി വിരുദ്ധ കൂട്ടായ്മ നടത്തി

പുൽപ്പള്ളി: ലഹരിക്കെതിരേ എല്ലാ കോണുകളിൽ നിന്നും ശബ്ദം ഉയരണമെന്ന് ബത്തേരി ബിഷപ് ഡോ. ജോസഫ് മാർ തോമസ് പറഞ്ഞു. ശ്രേയസ് പുൽപ്പള്ളി മേഖലയുടെ നേതൃത്വത്തിൽ നടത്തിയ ലഹരി വിരുദ്ധ കൂട്ടായ്മ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ബോധവത്കരണ റാലിയോടെ ആയിരുന്നു തുടക്കം. ടൗണിൽ ലഹരിക്കെതിരേ വിവിധ തരത്തിലുള്ള കലാരൂപങ്ങളോടെ ആയിരുന്നു റാലി. ഫാ. ജോർജ് കാലായിൽ അധ്യക്ഷത വഹിച്ചു. ഗ്രാമപഞ്ചായത്ത് പ്രസിഡന്‍റുമാരായ ടി.എസ്. ദിലീപ് കുമാർ, പി.കെ. വിജയൻ, ജില്ലാ പഞ്ചായത്ത് അംഗം ബിന്ദു പ്രകാശ്, പുൽപ്പള്ളി സിഐ കെ.എസ്. അജേഷ്, കെ.ഒ. ഷാൻസണ്‍, അജിൻ തോമസ് എന്നിവർ പ്രസംഗിച്ചു. കുട്ടികൾ ഫ്ളാഷ് മോബും അവതരിപ്പിച്ചു.

മരക്കടവ്, തോണിക്കടവ് പ്രദേശങ്ങളിൽ ലഹരി സംഘങ്ങളുടെ വിളയാട്ടം

പുൽപ്പള്ളി: മരക്കടവ് പ്രദേശത്ത് ലഹരി സംഘങ്ങളുടെ വിളയാട്ടം വർധിച്ചതോടെ നാടിന്‍റെ സമാധാനാന്തരീക്ഷം തകരുന്നു. കർണാടകയിൽ നിന്ന് കബനിതീരംവഴി എത്തുന്ന ലഹരി വസ്തുക്കൾ ടൗണിൽ എത്തിച്ച് വില്പന നടത്തുന്ന സംഘങ്ങൾ വർധിച്ചു. യുവാക്കൾ ഉൾപ്പെടുയുള്ളവരാണ് ലഹരി വില്പനയിൽ സജീവമായി പ്രവർത്തിക്കുന്നത്. പുൽപ്പള്ളി മേഖലയിൽ 24 മണിക്കൂറും എക്സൈസിന്‍റെ നിരീക്ഷണമുണ്ടായിട്ടും ലഹരി വില്പന സംഘങ്ങളെ പിടികൂടാൻ കഴിയുന്നില്ലെന്നാണ് നാട്ടുകാർ പറയുന്നത്. ലഹരി തേടുന്ന യുവാക്കളുടെ എണ്ണം വർധിച്ചതോടെ ലഹരി വില്പന സംഘങ്ങളെ സഹായിക്കാൻ കൂടുതൽ യുവാക്കളും രംഗത്തുണ്ട്. ഇവരാണ് വില്പന മേഖലയിൽ സജീവമായിരിക്കുന്നത്. ലഹരി വില്പന സംഘങ്ങളെ പിടികൂടാൻ എക്സൈസും പോലീസും തയാറാകാത്തത് കാരണം ഇവരെപ്പറ്റിയുള്ള വിവരങ്ങൾ കൈമാറാനും ആളുകൾക്ക് കഴിയാത്ത അവസ്ഥയാണ്. മരക്കടവിൽ കഴിഞ്ഞ ദിവസം ലഹരി സംഘങ്ങൾ തമ്മിൽ ഏറ്റുമുട്ടിയെങ്കിലും പരാതി നൽകാതെ പ്രശ്നം ഒതുക്കിതീർക്കുകയാണുണ്ടായത്. മേഖലയിൽ വർധിച്ചുവരുന്ന ലഹരി വില്പന സംഘങ്ങളെ നിയന്ത്രിക്കാൻ പോലീസും എക്സൈസും കർശന നടപടി സ്വീകരിക്കണമെന്നാണ് ജനങ്ങളുടെ ആവശ്യം.

വൈക്കോൽ സംഭരണകേന്ദ്രത്തിൽ തീപിടിത്തം

വെള്ളമുണ്ട: തരുവണ ടൗണ്‍ പരിസരത്തെ വൈക്കോൽ സംഭരണകേന്ദ്രത്തിൽ തീപിടിത്തം. 500 ഓളം വൈക്കോൽ കറ്റ കത്തിനശിച്ചു. ഇന്നലെ ഉച്ചയോടെയാണ് സംഭവം. ശങ്കരോത്ത് ഷമീറിന്‍റെതാണ് സംഭരണകേന്ദ്രം. മാനന്തവാടിയിൽനിന്നു അഗ്നി-രക്ഷാസേനയുടെ രണ്ട് യൂണിറ്റ് എത്തി മൂന്നു മണിക്കൂറോളം പരിശ്രമിച്ചാണ് തീയണച്ചത്. സ്റ്റേഷൻ ഓഫീസർ പി.കെ. ഭരതൻ, അസിസ്റ്റന്‍റ് സ്റ്റേഷൻ ഓഫീസർ ഐ. ജോസഫ്, ഫയർ ആൻഡ് റെസ്ക്യൂ ഓഫീസർമാരായ എം.പി. രമേശ്, കെ.എ. സനൂപ്, ടി. ബിനീഷ് ബേബി, വി.ഡി. അമൃതേഷ്, ദീപ്തലാൽ, ആർ.സി. ലെജിത്, ജെ. ജ്യോതിസൻ, ഹോം ഗാർഡുമാരായ ജോളി ജയിംസ്, വി.ജി. രൂപേഷ്, പി.യു. ജോബി എന്നിവരാണ് രക്ഷാപ്രവർത്തനം നടത്തിയത്.

കത്തിനശിച്ച പീടിക പുനർനിർമിച്ചു നൽകി

സുൽത്താൻ ബത്തേരി: ഷോർട്ട് സർക്യൂട്ട് മൂലം ഉണ്ടായ തീപിടിത്തത്തിൽ കത്തിനശിച്ച പീടിക വ്യാപാരി വ്യവസായി ഏകോപന സമിതി ജില്ലാ കമ്മിറ്റി പുനർനിർമിച്ചുനിൽകി. മൂലങ്കാവിലെ റെജിമോന്‍റെ കടയാണ് പുനർനിർമിച്ചത്. ഫെബ്രുവരി 15നായിരുന്നു തീപിടിത്തം. കടയിലുണ്ടായിരുന്ന ഫാൻസി, ഫു‌ട്‌വേർ ഇനങ്ങളും ഫോട്ടോസ്റ്റാറ്റ് മെഷീൻ, ഫ്രിഡ്ജ് എന്നിവയും നശിച്ചു. ഏകദേശം മൂന്നു ലക്ഷം രൂപയുടെ നഷ്ടമാണ് ഉണ്ടായത്. പുനർനിർമിച്ച പീടിക വിഷുക്കൈനീട്ടമായി റെജിമോനു കൈമാറി. സമിതി ജില്ലാ പ്രസിഡന്‍റ് ജോജിൻ ടി. ജോയി ഷോപ്പ് ഉദ്ഘാടനം ചെയ്തു. മൂലങ്കാവ് യൂണിറ്റ് പ്രസിഡന്‍റ് സോമൻ അധ്യക്ഷത വഹിച്ചു. സമിതി വനിതാവിംഗ് സംസ്ഥാന പ്രസിഡന്‍റ് ശ്രീജ ശിവദാസ്, യൂത്ത്വിംഗ് ജില്ലാ പ്രസിഡന്‍റ് സംഷാദ് ബത്തേരി, ബത്തേരി നിയോജകമണ്ഡലം ചെയർമാൻ എം.ആർ. സുരേഷ്ബാബു, കണ്‍വീനർ സണ്ണി മണ്ഡപത്തിൽ, ട്രഷറർ അനിൽ കൊട്ടാരം, ബത്തേരി യൂണിറ്റ് പ്രസിഡന്‍റ് പി.വി. മത്തായി, സെക്രട്ടറി യൂനുസ് ചേനക്കൽ, ശ്രീജിത്ത്, നൗഷാദ് മിന്നാരം, ശ്രീജിത്ത് ജയപ്രകാശ്, അബ്ദുൾ ജലീൽ എന്നിവർ പ്രസംഗിച്ചു.

എൽസ്റ്റൻ എസ്റ്റേറ്റ് തൊഴിലാളികൾ വിഷുദിനത്തിൽ പട്ടിണിസമരം നടത്തി

കൽപ്പറ്റ: പുഞ്ചിരിമട്ടം ഉരുൾ ദുരന്തബാധിതർക്ക് ടൗണ്‍ഷിപ് നിർമിക്കുന്നതിന് സർക്കാർ ഏറ്റെടുത്ത എൽസ്റ്റൻ എസ്റ്റേറ്റിലെ തൊഴിലാളികൾ വിഷു ദിനത്തിൽ പട്ടിണി സമരം നടത്തി. മാനേജ്മെന്‍റ് കുടിശികയാക്കിയ ആനുകൂല്യങ്ങളും കൂലിബാക്കിയും ഉടൻ ലഭ്യമാക്കണമെന്ന് ആവശ്യപ്പെട്ടായിരുന്നു സമരം. ഐഎൻടിയുസി ജില്ലാ പ്രസിഡന്‍റ് പി.പി. ആലി ഉദ്ഘാടനം ചെയ്തു. കെ.കെ. രാജേന്ദ്രൻ അധ്യക്ഷത വഹിച്ചു. വിവിധ ട്രേഡ് യൂണിയൻ നേതാക്കളായ യു. കരുണൻ, എൻ.ഒ. ദേവസി, ഡി. രാജൻ, എം. സെയ്തലവി, നജീബ് പിണങ്ങോട്, കെ. സുരേഷ്, മുഹമ്മദ്ബാവ പെരുന്തട്ട, അഹമ്മദുകുട്ടി പെരുന്തട്ട എന്നിവർ പ്രസംഗിച്ചു.

അരിച്ചാക്കിൽ നെല്ലിനം വ്യക്തമാക്കണം: മനുഷ്യാവകാശ കമ്മീഷൻ

കൽപ്പറ്റ: അരി തരം മാറ്റി വിൽക്കുന്നത് തടയാൻ ചാക്കുകളിൽ നെല്ലിനത്തിന്‍റെ വിവരം ഉൾപ്പെടുത്തണമെന്ന ആവശ്യം പരിഗണിക്കണമെന്ന് മനുഷ്യാവകാശ കമ്മീഷൻ ജുഡീഷൽ അംഗം കെ. ബൈജുനാഥ് ഭക്ഷ്യസുരക്ഷാ കമ്മീഷണർക്ക് നിർദേശം നൽകി. അരി നിറം കലർത്തി വിൽക്കുന്നതു തടയുന്നതിന് നടപടി ആവശ്യപ്പെട്ട് അന്പലവയൽ കുന്നേൽ അജി തോമസ് സമർപ്പിച്ച ഹർജിയിലാണ് കമ്മീഷൻ നിർദേശം. അരിയുടെ ഗുണനിലവാരം ഉറപ്പാക്കുന്നതിന് റൈസ് ക്വാളിറ്റി സ്റ്റാൻഡേർഡൈസേഷൻ നടപ്പാക്കുന്നത് പരിശോധിക്കണമെന്നും കമ്മീഷൻ നിർദേശിച്ചു. ഹർജിയിൽ കമ്മീഷൻ ഭക്ഷ്യസുരക്ഷാ കമ്മീഷണറുടെ റിപ്പോർട്ട് തേടിയിരുന്നു. ഭക്ഷ്യസാധനങ്ങളിൽ മായം കലർത്തുന്നത് കർശനമായി തടയുന്നുണ്ടെന്നും പരിശോധനകൾ നടത്തുന്നുണ്ടെന്നുമാണ് കമ്മീണർ അറിയിച്ചത്. 2023 ഏപ്രിൽ മുതൽ 2024 ജൂണ്‍ വരെ നടത്തിയ 1,233 സാംപിൾ പരിശോധനയിൽ അരിയിൽ നിറം ചേർക്കുന്നത് കണ്ടെത്താൻ കഴിഞ്ഞിട്ടില്ല. 54 സാംപിളുകൾ ഉപയോഗയോഗ്യമല്ലെന്ന് കണ്ടെത്തിയതായും കമ്മീഷണറുടെ റിപ്പോർട്ടിലുണ്ട്.

പട്ടയം ക്രമവത്കരണത്തിന് അധിക തുക: നിർദേശം തള്ളണമെന്ന് കെ.ജെ. ദേവസ്യ

കൽപ്പറ്റ: ഭൂവില, സബ്ഡിവിഷൻ ചാർജ്, വൃക്ഷവില തുടങ്ങിയവ അടച്ച് നേടിയ പട്ടയത്തിന്‍റെ ക്രമവത്കരണത്തിന് എന്ന പേരിൽ അധികതുക ഈടാക്കുന്നതിന് റവന്യു വകുപ്പ് നിയമ വകുപ്പിന്‍റെ അംഗീകാരത്തിന് രഹസ്യസ്വാഭാവത്തോടെ സമർപ്പിച്ച നിർദേശം തള്ളണമെന്ന് കേരള കോണ്‍ഗ്രസ്-എം സംസ്ഥാന ജനറൽ സെക്രട്ടറി കെ.ജെ. ദേവസ്യ മുഖ്യമന്ത്രി പിണറായി വിജയനും പ്രതിപക്ഷ നേതാവ് വി.ഡി. സതീശനും നൽകിയ നിവേദനത്തിൽ ആവശ്യപ്പെട്ടു. റവന്യു വകുപ്പിന്‍റെ നീക്കത്തിന് ന്യായീകരണമില്ല. ജനങ്ങളെ കുരുക്കിലാക്കാനും അവരുടെ മൗലികാവകാശം കവരാനുമുള്ള പദ്ധതിക്ക് സർക്കാർ കൂട്ടുനിൽക്കരുത്. ഭൂനിയമങ്ങളിലെ അപാകതകൾ പരിഹരിക്കണം. ജനപക്ഷ നിലപാടും ഏകീകൃത അവകാശ സ്വാഭാവമുള്ള ഭൂപരിഷ്കരണ നിയമം നടപ്പാക്കാൻ തയാറാകണം. 2023ൽ ഭേദഗതി ചെയ്ത ഭൂനിയമത്തിന് ചട്ടങ്ങളുണ്ടാക്കാൻ കഴിയാത്തത് ഗുരുതര വീഴ്ചയാണ്. റവന്യു ഭൂമി, ജൻമഭൂമി തുടങ്ങി വിവിധ അവകാശക്രമങ്ങളിലുള്ള പട്ടയഭൂമിയിൽ വീടുകൾക്കു പുറമേ ജീവനോപാധികൾക്കായും നിർമാണം നടന്നിട്ടുണ്ട്. ഇതെല്ലാം അനധികൃതമാണെന്ന് ആരോപിച്ച് തത്പരകക്ഷികൾ ഇടപെട്ടതിനെത്തുടർന്ന് വിവിധതരം ഭൂമികളിൽ നിർമാണാനുമതിക്ക് ഹൈക്കോടതിയുടേതടക്കം കർശന വിലക്കുകൾ ഉണ്ടായി. ഈ സാഹചര്യത്തിലാണ് 2023ൽ നിയമം ഭേദഗതി ചെയ്തത്. നിയമസഭ ഐകകണ്ഠ്യേനയാണ് നിയമ ഭേദഗതി പാസാക്കിയതെന്ന് നിവേദനത്തിൽ ചൂണ്ടിക്കാട്ടി.

പുനരധിവാസത്തിന് ഏറ്റെടുത്ത ഭൂമിയിലെ തൊഴിലാളി പ്രശ്നം: മുഖ്യമന്ത്രിക്ക് നിവേദനം നൽകി

കൽപ്പറ്റ: പുഞ്ചിരിമട്ടം ഉരുൾ ദുരന്തബാധിതരുടെ പുനരധിവാസത്തിന് ഏറ്റെടുത്ത എൽസ്റ്റൻ എസ്റ്റേറ്റിലെ തൊഴിലാളികളുടെ പ്രശ്നം പരിഹരിക്കുന്നതിന് മുഖ്യമന്ത്രി പിണറായി വിജയന് ടി. സിദ്ദിഖ് എംഎൽഎ നിവേദനം നൽകി. ടൗണ്‍ഷിപ് നിർമാണത്തിന് ഏറ്റെടുത്ത തേയിലത്തോട്ടത്തിൽ നിലവിൽ ജോലി ചെയ്യുന്നവർക്കും ജോലിയിൽനിന്നു വിരമിച്ചവർക്കും എസ്റ്റേറ്റ് മാനേജ്മെന്‍റ് ആനുകൂല്യങ്ങൾ നൽകാനുണ്ട്. തൊഴിലാളികളുടെ ജോലി സുരക്ഷയിൽ സർക്കാരോ മാനേജ്മെന്‍റോ ഉറപ്പ് നൽകിയിട്ടില്ല. തൊഴിലാളികളും വിവിധ ട്രേഡ് യൂണിയൻ നേതാക്കളും പറയുന്നതനുസരിച്ച് പ്രൊവിഡന്‍റ് ഫണ്ട്, ഗ്രാറ്റുവിറ്റി, കൂലി ബാക്കി ഉൾപ്പെടെ ഏകദേശം 11 കോടി രൂപയാണ് മാനേജ്മെന്‍റ് നൽകേണ്ടത്. പുനരധിവാസത്തിന് തൊഴിലാളികൾ എതിരല്ല. ആനുകൂല്യങ്ങളും തൊഴിൽ സുരക്ഷയിൽ ഉറപ്പും എന്ന ന്യായമായ ആവശ്യം മാത്രമാണ് അവർ ഉന്നയിക്കുന്നത്. വിഷയത്തിൽ മുഖ്യമന്ത്രി അടിയന്തരമായി ഇടപെടണം. തൊഴിലാളികളുടെ ആശങ്ക പരിഹരിക്കണമെന്നും നിവേദനത്തിൽ ആവശ്യപ്പെട്ടു.

മരുതോലിപ്പടി റോഡ് ഉദ്ഘാടനം ചെയ്തു

ചെന്നലോട്: തരിയോട് പഞ്ചായത്തിലെ ചെന്നലോട് വാർഡിൽ ഉൾപ്പെട്ട മരുതോലിപ്പടി റോഡ് തൊഴിലുറപ്പ് പദ്ധതിയിൽ ഉൾപ്പെടുത്തി കോണ്‍ക്രീറ്റ് ചെയ്തു. റോഡ് ഉദ്ഘാടനം പഞ്ചായത്ത് പ്രസിഡന്‍റ് ഷമീം പാറക്കണ്ടി നിർവഹിച്ചു. വികസന സമിതി അംഗം എ.കെ. മുബഷിർ അധ്യക്ഷത വഹിച്ചു. വികസന സമിതി അംഗങ്ങൾ, തൊഴിലുറപ്പ് തൊഴിലാളികൾ, പ്രദേശവാസികൾ തുടങ്ങിയവർ പങ്കെടുത്തു. ഷൈനി കൂവക്കൽ സ്വാഗതവും ഷാജി മരുതോലിക്കൽ നന്ദിയും പറഞ്ഞു.

ക്രാഷ്ഗാർഡ് റോപ്പ് ഫെൻസിംഗ് നിർമാണത്തിൽ അപാകതയെന്ന്

കാട്ടിക്കുളം: പാൽവെളിച്ചം, കുറുവ പ്രദേശങ്ങളിലെ ക്രാഷ്ഗാർഡ് റോപ്പ് ഫെൻസിംഗ് നിർമാണത്തിൽ അപാകതയുണ്ടെന്ന് വന്യമൃഗശല്യ പ്രതിരോധ ആക്‌ഷൻ കമ്മിറ്റി ആരോപിച്ചു. വേലിയുടെ ഭാഗം തകർത്ത് ജനവാസകേന്ദ്രത്തിൽ ഇറങ്ങിയ കാട്ടാന ഒഴുകയിൽ അഖിൽ, പാപ്പിനിശേരി തോമസ്, ഇദ്ദേഹത്തിന്‍റെ സഹോദരങ്ങളായ ബിനോയ്, ജോണ്‍സണ്‍ എന്നിവരുടെ വാഴ, റബർ, കമുക് കൃഷികൾ നശിപ്പിച്ചതായി യോഗം ചൂണ്ടിക്കാട്ടി. 2017ൽ ആക്‌ഷൻ കമ്മറ്റിയുടെ നേതൃത്വത്തിൽ ഡിഎഫ്ഒയുടെ കാര്യാലയത്തിനു സമരം സംഘടിപ്പിച്ചതിനെത്തുടർന്ന് പാൽവെളിച്ചം, കുറുവ പ്രദേശത്ത് റെയിൽ ഫെൻസിംഗിനു 10 കോടി രൂപ അനുവദിച്ചിരുന്നു. വനം അധികൃതരുടെ പിടിപ്പുകേടുമൂലം ഈ പ്രവൃത്തി 2.5 കോടി രൂപയുടെ ക്രാഷ്ഗാർഡ് ഫെൻസിംഗ് പദ്ധതിയായി മാറി. ഇതുമായി ബന്ധപ്പെട്ടും വിവാദവും സമരവും നടന്നു. ഒടുവിൽ മന്ത്രി ഒ.ആർ. കേളുവിന്‍റെ ഇടപെടലിനെത്തുടർന്നാണ് ഇപ്പോഴത്തെ പ്രവൃത്തി നടന്നത്. ഈ പദ്ധതിയും നിർവഹണത്തിലെ അപാകം മൂലം ജനങ്ങൾക്ക് പ്രയോജനപ്പെടാത്ത സ്ഥിതിയാണ്. ഇതേക്കുറിച്ച് അന്വേഷിച്ച് നടപടി സ്വീകരിക്കണമെന്ന് യോഗം വനം മന്ത്രിയോട് ആവശ്യപ്പെട്ടു. ചെയർമാൻ ടി.സി. ജോസഫ് അധ്യക്ഷത വഹിച്ചു. സന്തോഷ് തോൽപ്പെട്ടി, വി.ആർ. ജയചന്ദ്രൻ, നാസർ ബാവലി, ടി. സന്തോഷ്കുമാർ എന്നിവർ പ്രസംഗിച്ചു.

അവധിക്കാല ഫുട്ബോൾ പരിശീലനം

ചെന്നലോട്: ഗവ.യുപി സ്കൂളിൽ ന്ധസമ്മർ സ്ട്രൈക്കേഴ്സ്’ എന്ന പേരിൽ അവധിക്കാല ഫുട്ബോൾ പരിശീലനം തുടങ്ങി. തരിയോട് പഞ്ചായത്ത് പ്രസിഡന്‍റ് ഷമീം പാറക്കണ്ടി ഉദ്ഘാടനം ചെയ്തു. പിടിഎ പ്രസിഡന്‍റ് വി.കെ. വിനു അധ്യക്ഷത വഹിച്ചു. ഉഷ ജോർജ്, ചലഞ്ചേഴ്സ് ആർട്സ് ആൻഡ് സ്പോർട്സ് ക്ലബ് പ്രസിഡന്‍റ് പി. മൊയ്തൂട്ടി, യു.പി. മോഹൻദാസ്, കോച്ച് ഷൈജൽ അഹമ്മദ് എന്നിവർ പ്രസംഗിച്ചു. പ്രധാനാധ്യാപിക കെ. ജയരത്നം സ്വാഗതവും സ്റ്റാഫ് സെക്രട്ടറി പി. നസീറ നന്ദിയും പറഞ്ഞു.

പൂർവ വിദ്യാർഥി സംഗമം ഇന്ന്

കൽപ്പറ്റ: മുട്ടിൽ ഡബ്ല്യുഎംഒ ആർട്സ് ആൻഡ് സയൻസ് കോളജിൽ ഫിസിക്സ് വിഭാഗം പൂർവ വിദ്യാർഥി സംഗമവും യാത്രയയപ്പ് സമ്മേളനവും ഇന്ന് നടക്കും. 1995 മുതലുള്ള മൂന്നു ദശകങ്ങളിലെ ഫിസിക്സ് ബിരുദബിരുദാനന്തര ബാച്ചുകളുടെ സംഗമം ആയിരിക്കും. പൂർവ അധ്യാപകരെ ആദരിക്കൽ, വിദ്യാർഥികളുടെ അനുഭവങ്ങൾ പങ്കുവയ്ക്കൽ, ഗവേഷണ രംഗത്തെയും വിദ്യാഭ്യാസ മേഖലയിലെയും പുതിയ മുന്നേറ്റത്തെ കുറിച്ചുള്ള അവതരണങ്ങൾ എന്നിവ ഉണ്ടായിരിക്കും. ഫിസിക്സ് വിഭാഗം മുൻ മേധാവിയും ഈ വർഷം വിരമിക്കുകയും ചെയ്യുന്ന ഡോ.കെ.ജി. ബിജുവിന് യാത്രയയപ്പ് നൽകും. പൂർവ വിദ്യാർഥികളുടെ വിവിധ കലാപരിപാടികളും നടക്കും.

ഗോകുലിന്‍റെ മരണം: കളക്ടറേറ്റ് മാർച്ചും ധർണയും ഇന്ന്

കൽപ്പറ്റ: അന്പലവയൽ നെല്ലാറച്ചാൽ പുതിയപാടി ഉന്നതിയിലെ ഗോകുലിനെ(17)പോലീസ് സ്റ്റേഷനിൽ നിയമവിരുദ്ധ കസ്റ്റഡിയിലിരിക്കെ ശുചിമുറിയിൽ തൂങ്ങിമരിച്ച നിലയിൽ കണ്ട സംഭവത്തിൽ സമഗ്രാന്വേഷണം ആവശ്യപ്പെട്ട് ആദിവാസി ഭാരത് മഹാസഭ(എബിഎം), ഭൂസമര സമിതി, സിപിഐ(എംഎൽ)റെഡ്സ്റ്റാർ എന്നിവയുടെ സംയുക്താഭിമുഖ്യത്തിൽ ഇന്നു രാവിലെ 10ന് കളക്ടറേറ്റ് മാർച്ചും ധർണയും നടത്തും. സിപിഐ(എംഎൽ)റെഡ്സ്റ്റാർ കേന്ദ്ര സമിതിയംഗം എം.കെ. ദാസൻ ഉദ്ഘാടനം ചെയ്യും. എബിഎം സംസ്ഥാന കണ്‍വീനർ ടി.ആർ. ചന്ദ്രൻ, വയനാട് പ്രകൃതി സംരക്ഷണ സമിതി പ്രസിഡന്‍റ് എൻ. ബാദുഷ, പശ്ചിമഘട്ട സംരക്ഷണ സമിതി പ്രസിഡന്‍റ് വർഗീസ് വട്ടേക്കാട്ടിൽ, ടിയുസിഐ സംസ്ഥാന സെക്രട്ടറി ടി.സി. സുബ്രഹ് മണ്യൻ, കൾച്ചറൽ ഫോറം സംസ്ഥാന കണ്‍വീനർ വി.എ. ബാലകൃഷ്ണൻ, എഐകെകഐസ് സംസ്ഥാന കണ്‍വീനർ കെ. ബാബുരാജ്, വേണുഗോപാൽ കുനിയിൽ, പി.എം. ജോർജ്, പി.ടി. പ്രേമാനന്ദ്, ബിജി ലാലിച്ചൻ, ഭൂസമരസമിതി കണ്‍വീനർ എം.കെ. ഷിബു എന്നിവർ പ്രസംഗിക്കും.

ബത്തേരിയിൽ വാഹനാപകടം: രണ്ട് യുവാക്കൾ മരിച്ചു

സുൽത്താൻ ബത്തേരി: മൾട്ടി ആക്സിൽ ലോറിയിൽ ഇടിച്ച ബൈക്കിലെ യാത്രക്കാരായ രണ്ട് യുവാക്കൾ മരിച്ചു. കട്ടയാട് രത്നഗിരി രാജന്‍റെ മകൻ അഖിൽ (28), കാവുങ്കര ഉന്നതിയിലെ മണിയുടെ മകൻ മനു(26) എന്നിവരാണ് മരിച്ചത്. തിങ്കളാഴ്ച രാത്രി പത്തരയോടെ മാനിക്കുനി വേർഹൗസ് ഗോഡൗണിന് മുന്പിലാണ് സംഭവം. കൽപ്പറ്റ ഭാഗത്തേക്ക് പോകുകയായിരുന്ന ലോറിയെ മറികടക്കാൻ ശ്രമിക്കുന്നതിനിടെ ബൈക്ക് നിയന്ത്രണംവിട്ട് അപകടത്തിൽപ്പെടുകയായിരുന്നു. ആശുപത്രിയിൽ എത്തിച്ചപ്പോഴേക്കും ഇരുവരും മരിച്ചു. ടൗണിലെ സ്വകാര്യ ആശുപത്രി ഡോക്ടറുടെ ഡ്രൈവറായി ജോലിചെയ്തുവരികയായിരുന്നു അഖിൽ. രാത്രി ഡോക്ടറുടെ താമസസ്ഥലത്തുപോയി മടങ്ങുകയായിരുന്നു അഖിലും സുഹൃത്തായ മനുവും. മുത്തച്ഛൻ നടത്തുന്ന പശു ഫാമിന്‍റെ നോട്ടക്കാരനാണ് മനു. രണ്ടു യുവാക്കളുടെയും സംസ്കാരം ഇന്നലെ വൈകുന്നേരം വീട്ടുവളപ്പിൽ നടന്നു. രുക്മിണിയാണ് അഖിലിന്‍റെ മാതാവ്. സഹോദരി: രേഖ. മനുവിന്‍റെ മാതാവ്: തങ്കമണി. സഹോദരി: അനിത.

കോണ്‍ഗ്രസ് നീലഗിരി ജില്ലാ സെക്രട്ടറി വീട്ടിൽ മരിച്ച നിലയിൽ

ഗൂഡല്ലൂർ: കോണ്‍ഗ്രസ് നീലഗിരി ജില്ലാ സെക്രട്ടറി മഞ്ചൂർ മേൽകൊട്ടാരക്കണ്ടി രാജ്കുമാറിനെ (62) വീട്ടിൽ മരിച്ചനിലയിൽ കണ്ടെത്തി. വിമുക്തഭടനാണ് രാജ്കുമാർ. വർഷങ്ങളായി ഭാര്യയുമായി അകന്നുകഴിയുന്ന ഇദ്ദേഹം മഞ്ചൂരിൽ വാടകവീട്ടിലാണ് താമസിച്ചിരുന്നത്. ഇന്നലെ വീട്ടിൽനിന്നു ദുർഗന്ധം വമിക്കുന്നത് ശ്രദ്ധയിൽപ്പെട്ട പരിസരവാസികൾ അറിയിച്ചതനുസരിച്ച് പോലീസ് എത്തി പരിശോധിച്ചപ്പോഴാണ് മരിച്ച നിലയിൽ കണ്ടത്. മൃതദേഹത്തിന് നാലുദിവസത്തെ പഴക്കമുണ്ട്.

സർക്യൂട്ട് ബസ് സർവീസ് ആരംഭിക്കും

ഉൗട്ടി: സമ്മർ സീസണ്‍ പ്രമാണിച്ച് ഉൗട്ടിയിൽ സർക്യൂട്ട് ബസ് സർവീസ് ആരംഭിക്കും. പ്രതിവർഷം ഏപ്രിൽ 16 മുതലാണ് സർക്യൂട്ട് ബസ് സർവീസ് ആരംഭിക്കാറുള്ളത്. ജൂണ്‍ ആറ് വരെ സർവീസ് ഉണ്ടാകും. അരമണിക്കൂർ ഇടവിട്ട് സഞ്ചാര കേന്ദ്രങ്ങളിലേക്ക് ബസ് സർവീസ് ഉണ്ടാകും. ഇതുമായി ബന്ധപ്പെട്ട് ഉൗട്ടിയിൽ യോഗം ചേർന്നു. ട്രാൻസ്പോർട്ട്, ടൂറിസം വകുപ്പ് അധികൃതർ യോഗത്തിൽ പങ്കെടുത്തു.

എൽഡിഎഫ് കണ്‍വൻഷൻ

പുൽപ്പള്ളി: എൽഡിഎഫ് പഞ്ചായത്ത് കണ്‍വൻഷൻ ബത്തേരി നിയോജകമണ്ഡലം കമ്മിറ്റി കണ്‍വീനർ ടി.ജെ. ചാക്കോച്ചൻ ഉദ്ഘാടനം ചെയ്തു. സിപിഎം ഏരിയ സെക്രട്ടറി ബൈജു നന്പിക്കൊല്ലി അധ്യക്ഷത വഹിച്ചു. കേരള കോണ്‍ഗ്രസ്-എം ജില്ലാ സെക്രട്ടറി വിത്സണ്‍ നെടുംകൊന്പിൽ, കോണ്‍ഗ്രസ്-എസ് ജില്ലാ ട്രഷറർ കെ.ആർ. ജയരാജൻ, എൽഡിഎഫ് പഞ്ചായത്ത് കമ്മിറ്റി കണ്‍വീനർ സി.കെ. ശിവദാസൻ, ശരത്, കെ.പി. ഗീരിഷ് എന്നിവർ പ്രസംഗിച്ചു.

മന്ത്രി ഒ.ആര്‍. കേളു റോഡ് ഉദ്ഘാടനം ചെയ്തു

മാനന്തവാടി: നിര്‍മാണം പൂര്‍ത്തിയായ ഇല്ലത്തുമൂല - കാത്തിരിക്കല്‍ - ചോയിമൂല റോഡ് പട്ടികജാതിവര്‍ഗപിന്നാക്ക ക്ഷേമ മന്ത്രി ഒ.ആര്‍. കേളു ഉദ്ഘാടനം ചെയ്തു. ഡിവിഷന്‍ കൗണ്‍സിലര്‍ അബ്ദുള്‍ ആസിഫ് അധ്യക്ഷത വഹിച്ചു. വി.ആര്‍, പ്രവിജ്, ശാരദ സജീവന്‍, ജി. രാമചന്ദ്രന്‍, തങ്കമണി, പി.ടി. ബിജു, കെ. സൈനബ, സുമിത്ര ബാലന്‍ എ. ജയരാജന്‍, കെ.എം. സലിം, ഷൈനി ജോണ്‍സണ്‍ എന്നിവര്‍ പ്രസംഗിച്ചു. മുത്തലീബ് സ്വാഗതവും ബിജു കൊള്ളിക്കാട്ടില്‍ നന്ദിയും പറഞ്ഞു. ഒ.ആര്‍. കേളുവിന്‍റെ ആസ്തി വികസന നിധിയില്‍നിന്നു അനുവദിച്ച 25 ലക്ഷം രൂപ ചെലവഴിച്ചാണ് പ്രവൃത്തി നടത്തിയത്.

ഒപ്പം കാന്പയിൻ: രജിസ്ട്രേഷൻ തുടങ്ങി

കൽപ്പറ്റ: ദുരന്തത്തെ അതിജീവിച്ചവരെ മാനസികമായി ശക്തീകരിക്കുന്നതിനും പിന്തുണ നൽകുന്നതിനും ശാസ്ത്ര സാഹിത്യ പരിഷത്ത് യുവ സമിതി ന്ധഒപ്പംന്ധ എന്ന പേരിൽ നടത്തുന്ന കാന്പയിനിന്‍റെ രജിസ്ട്രേഷൻ തുടങ്ങി. 18നും 30നും ഇടയിൽ പ്രായമുള്ള യുവജനങ്ങൾക്ക് കാന്പയിനിന്‍റെ ഭാഗമാകാം. ദുരന്തബാധിത പ്രദേശങ്ങളിൽ ഭവന സന്ദർശനം, ലഘുലേഖ വിതരണം, സായാഹ്ന ചർച്ചാസദസ് തുടങ്ങിയവ കാന്പയിൻ പ്രവർത്തനങ്ങളിൽ ഉൾപ്പെടും. ഇതുമായി ബന്ധപ്പെട്ട് പ്രവർത്തിക്കുന്നവർക്കു താമസസൗകര്യം, ഭക്ഷണം, യാത്രാച്ചെലവ് എന്നിവ യുവസമിതി നൽകും. താത്പര്യമുള്ളവർ രജിസ്ട്രേഷൻ https://forms.gle/rgi6yqD7LZ9eY33x8 എന്ന ഗൂഗിൾ ഫോം മുഖേന 18ന് മുന്പ് നടത്തണം. ഫോണ്‍ : 9447648006, 8593858732.

ചാലക്കല്‍ ഉന്നതി റോഡ് സിപിഎം പ്രവര്‍ത്തകര്‍ സഞ്ചാരയോഗ്യമാക്കി

മുള്ളന്‍കൊല്ലി: പഞ്ചായത്തിലെ 16ാം വാര്‍ഡിലുള്ള ചാലക്കല്‍ ഉന്നതി റോഡ് സിപിഎം ലോക്കല്‍ കമ്മിറ്റിയുടെ നേതൃത്വത്തില്‍ സഞ്ചാരയോഗ്യമാക്കി. റോഡ് നന്നാക്കുന്നതിന് അധികാരികള്‍ നടപടി സ്വീകരിക്കാത്ത സാഹചര്യത്തിലായിരുന്നു സിപിഎം ഇടപെടല്‍. ലോക്കല്‍ കമ്മിറ്റി സെക്രട്ടറി സി.പി. വിന്‍സന്റ്, ഏരിയ കമ്മിറ്റി അംഗങ്ങളായ പി.എ. മുഹമ്മദ്, കെ.വി. ജോബി, ലോക്കല്‍ കമ്മിറ്റി അംഗങ്ങളായ സി.പി. റിയാസ്, ബി. അനീഷ്, റെനില്‍ സെബാസ്റ്റ്യന്‍, സണ്ണി ജോസഫ്, ഭാസി, ഉണ്ണിക്കുട്ടന്‍, പഞ്ചായത്തംഗങ്ങളായ മഞ്ജു ഷാജി, സുധ നടരാജന്‍, അമ്മിണി സന്തോഷ്, പാര്‍ട്ടി പ്രവര്‍ത്തകരായ ഷെല്‍ജന്‍ ചാലക്കല്‍, സിനോജ് ജോസ്, സണ്ണി വടാനക്കവല, പി.ജെ. ജോസഫ് തുടങ്ങിയവര്‍ നേതൃത്വം നല്‍കി.

’ക്ഷേമ പെൻഷനും ഇൻസെന്‍റീവും യഥാസമയം വിതരണം ചെയ്യണം’

കൽപ്പറ്റ: വീടുകളിൽ ലഭ്യമാക്കുന്ന ക്ഷേമ പെൻഷനും സഹകരണ ജീവനക്കാർക്കുള്ള ഇൻസെന്‍റീവും യഥാസമയം വിതരണം ചെയ്യണമെന്ന് കോ ഓപ്പറേറ്റീവ് ബാങ്ക് ഡെപ്പോസിറ്റ് കളക്ടേഴ്സ് അസോസിയേഷൻ ജില്ലാ കമ്മിറ്റി സർക്കാരിനോട് ആവശ്യപ്പെട്ടു. വി.ജെ. ലൂക്കോസ് അധ്യക്ഷത വഹിച്ചു. പോക്കു മുണ്ടോളി, കെ.വി. വിശാഖ്, പ്രിൻസ് ജോസഫ്, അജിലാൽ എന്നിവർ പ്രസംഗിച്ചു.

ഊട്ടിയിൽ ലോഡ്ജുകളിലും റിസോർട്ടുകളിലും വാടക വർധിപ്പിച്ചതായി പരാതി

ഊട്ടി: സമ്മർ സീസണ്‍ പ്രമാണിച്ച് ഊട്ടിയിൽ ലോഡ്ജുകളിലും ഹോട്ടലുകളിലും റിസോർട്ടുകളിലും വാടക വർധിപ്പിച്ചതായി പരാതി. 800 രൂപ മുതൽ 1000 രൂപ ഉണ്ടായിരുന്ന റൂമുകൾക്ക് 2,000 രൂപ മുതൽ 3,000 രൂപ വരെയാണ് ഇപ്പോഴത്തെ വാടക. വാടക വർധനയ്ക്കെതിരെ വിനോദ സഞ്ചാരികൾ രംഗത്തെത്തിയിട്ടുണ്ട്.

കുരിശിന്‍റെവഴി നടത്തി

കയ്യൂന്നി: 40-ാം വെള്ളിയോടനുബന്ധിച്ച് കയ്യൂന്നി ഫാത്തിമ മാതാ പള്ളി, പനംചിറ സെന്‍റ് സെബാസ്റ്റ്യൻസ് പള്ളി, ചുള്ളിയോട് സെന്‍റ് ഫ്രാൻസിസ് അസീസി പള്ളി എന്നിവയുടെ സംയുക്താഭിമുഖ്യത്തിൽ ബത്തേരി അസംപ്ഷൻ ഫൊറോന പള്ളിയിലേക്ക് പദയാത്രയായി കുരിശിന്‍റെവഴി നടത്തി. മൂന്നു ഇടവകകളിൽനിന്നായി നൂറുകണക്കിനു വിശ്വാസികൾ പങ്കെടുത്തു. കയ്യൂന്നി പള്ളി വികാരി ഫാ. ജോണ്‍ പൊൻപാറയ്ക്കൽ, അസിസ്റ്റന്‍റ് വികാരി ഫാ. ജോമിൻ നാക്കുഴിക്കാട്ട്, പനംചിറ പള്ളി വികാരി ഫാ. മാത്തുക്കുട്ടി താഴത്തുവീട്ടിൽ ചുള്ളിയോട് പള്ളി വികാരി ഫാ. ജയ്സണ്‍ കള്ളിയാട്ട് എന്നിവർ നേതൃത്വം നൽകി. അസംപ്ഷൻ പള്ളിയിൽ ശുശ്രൂഷകൾക്ക് വികാരി ഫാ. തോമസ് മണക്കുന്നേൽ, ഫാ. അനീഷ് കാട്ടാംകോട്ടിൽ, ഫാ. അഭിഷേക് കണ്ടത്തിൻകര, ഫാ. ജൂഡ് വട്ടക്കുന്നേൽ എന്നിവർ നേതൃത്വം നൽകി.

ലഹരിവിരുദ്ധ സദസും കിറ്റ് വിതരണവും നടത്തി

ചീരാൽ: താഴത്തൂർ യുവരശ്മി ലൈബ്രറിയും സഹായി ചാരിറ്റബിൾ സൊസൈറ്റിയും സംയുക്തമായി ഭക്ഷ്യക്കിറ്റ് വിതരണവും ലഹരിവിരുദ്ധ സദസും നടത്തി. കിടപ്പുരോഗികൾക്കും അവശത അനുഭവിക്കുന്ന കുടുംബങ്ങൾക്കുമാണ് കിറ്റ് വീടുകളിൽ എത്തിച്ചു നൽകിയത്. ലഹരിവിരുദ്ധ സദസ് ബത്തേരി താലൂക്ക് ലൈബ്രറി കൗണ്‍സിൽ സെക്രട്ടറി പി.കെ. സത്താർ ഉദ്ഘാടനം ചെയ്തു. ഗ്രന്ഥശാല പ്രസിഡന്‍റ് കെ.സി.കെ. തങ്ങൾ അധ്യക്ഷത വഹിച്ചു. വി.എസ്. സദാശിവൻ, ടി. ഗംഗാധരൻ, എ. സലിം, എം. മൊയ്തീൻകുട്ടി, സുരേഷ്ബാബു വൈശാലി, ഇ.ജെ. ജോസഫ്, എം. കുഞ്ഞാലൻ, മനു ആശിഷ് നായർ, സന്ധ്യ, കെ. ഷൗക്കത്തലി എന്നിവർ പ്രസംഗിച്ചു. ജെ.എ. രാജു ലഹരിവിരുദ്ധ ക്ലാസെടുത്തു.

വ്യാപാരോത്സവം: നറുക്കെടുപ്പ് നടത്തി

കൽപ്പറ്റ: കേരള വ്യാപാരി വ്യവസായി ഏകോപന സമിതി ജില്ലാ കമ്മിറ്റി ജില്ലാ ടൂറിസം പ്രമോഷൻ കൗണ്‍സിന്‍റെ സഹകരണത്തോടെ നടത്തുന്ന വയനാട് വ്യാപാരോത്സവത്തിന്‍റെ ഭാഗമായി പത്താമത് ആഴ്ചയിലെ സമ്മാനക്കൂപ്പണ്‍ നറുക്കെടുപ്പ് നടത്തി. ബൈപാസിലെ എക്സ്പോ ഗ്രൗണ്ടിൽ ജില്ലാ പഞ്ചായത്ത് ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ ജുനൈദ് കൈപ്പാണി നറുക്കെടുത്തു. സമിതി ജില്ലാ വൈസ് പ്രസിഡന്‍റ് ഇ. ഹൈദ്രു അധ്യക്ഷത വഹിച്ചു. റഫീഖ് വൈത്തിരി, ബാവ അക്സ, നിസാർ ദിൽവേ, അന്പിളി കൽപ്പറ്റ, കെ.എം. സൗദ, സാലിഹ് തുടങ്ങിയവർ പങ്കെടുത്തു.

ലഹരി വിരുദ്ധ ബോധവത്കരണ സെമിനാർ നടത്തി

വൈത്തിരി: സെന്‍റ് ജോസഫ്സ് ദേവാലയത്തിൽ വിദ്യാഭ്യാസ ശുശ്രൂഷാസമിതി ജനമൈത്രി പോലീസിന്‍റെ സഹകരണത്തോടെ ലഹരി വിരുദ്ധ ബോധവത്കരണ സെമിനാർ നടത്തി. വികാരി ഫാ.ജോണ്‍സണ്‍ കൊച്ചുപറന്പിൽ ഉദ്ഘാടനം ചെയ്തു. പാരീഷ് കൗണ്‍സിൽ സെക്രട്ടറി സാബു കെ.ജെ. അധ്യക്ഷത വഹിച്ചു. ഇടവക വിദ്യാഭ്യാസ സമിതി കോഓർഡിനേറ്റർ മിനി ദേവസി, ആനിമേറ്റർ സിസ്റ്റർ ജിജി സെബാസ്റ്റ്യൻ, ബിനു ആന്‍റണി, അരുൾ സന്പത്ത് എന്നിവർ പ്രസംഗിച്ചു. ജനമൈത്രി പോലീസ് ജില്ലാ അസി.നോഡൽ ഓഫീസർ കെ.എം. ശശിധരൻ, പോലീസ് ഫാമിലി കൗണ്‍സലർ എം.ആർ. സംഗീത, എസ്പിസി പ്രോജക്ട് കോ ഓർഡിനേറ്റർ ദീപ എന്നിവർ ക്ലാസ് നയിച്ചു. ലഹരിവിരുദ്ധ ബോധവത്കരണ ക്ലാസ് നടത്തി കൽപ്പറ്റ: തിരുഹൃദയ ദേവാലയത്തിൽ ലഹരിവിരുദ്ധ ബോധവത്കരണ ക്ലാസ് നടത്തി. വികാരി ഫാ.വിൻസന്‍റ് പുളിക്കൽ അധ്യക്ഷത വഹിച്ചു. ഷീബ ബിജു, റെജി എന്നിവർ പ്രസംഗിച്ചു. ഡിസിആർസി കൗണ്‍സലർ അനില വി. ഏബ്രഹാം, സിഎപി പ്രോജക്ട് അസിസ്റ്റന്‍റ് ടി.കെ. ദീപ എന്നിവർ ക്ലാസെടുത്തു.

വലിയ ആഴ്ചയിലേക്കുള്ള പ്രവേശനത്തിന് തുടക്കംകുറിച്ച് ഓശാന ഞായർ ആചരിച്ചു

പുൽപ്പള്ളി: യേശുവിന്‍റെ പീഡാനുഭവത്തിന്‍റെയും കുരിശുമരണത്തിന്‍റെയും ഉത്ഥാനത്തിന്‍റെയും ഓർമ ഉണർത്തുന്ന 50 നോന്പിലെ വലിയ ആഴ്ചയിലേക്കുള്ള പ്രവേശനത്തിന് തുടക്കംകുറിച്ച് ക്രൈസ്തവ സമൂഹം ഓശാന ഞായർ ആചരിച്ചു. ദേവാലയങ്ങളിൽ ശുശ്രൂഷകളുടെ ഭാഗമായി കുരുത്തോല വിതരണവും പ്രദക്ഷിണവും നടന്നു. പയ്യന്പള്ളി സെന്‍റ് കാതറിൻസ് ഫൊറോന ദേവാലയത്തിൽ കുരുത്തോലപ്പെരുന്നാൾ ശുശ്രൂഷകൾക്ക് വികാരി ഫാ.സെബാസ്റ്റ്യൻ ഏലംകുന്നേൽ, അസി.വികാരി ഫാ.ജിജോ പല്ലാട്ടുകുന്നേൽ എന്നിവർ നേതൃത്വം നൽകി. പൂതാടി സെന്‍റ് മേരീസ് യാക്കോബായ സുറിയാനി പള്ളിയിൽ ശുശ്രൂഷയ്ക്ക് വികാരി ഫാ.അജു ചാക്കോ അരത്തമ്മാംമൂട്ടിൽ നേതൃത്വം നൽകി. ഉപ്പട്ടി സെന്‍റ് ജോർജ് മലങ്കര സുറിയാനി കത്തോലിക്ക പള്ളിയിൽ ഓശാന ശുശ്രൂഷകൾക്കും കുരുത്തോല പ്രദക്ഷിണത്തിനും വികാരി ഫാ. വർഗീസ് കൊല്ലമാവുടി നേതൃത്വം നൽകി. മീനങ്ങാടി സെന്‍റ് പീറ്റേഴ്സ് ആൻഡ് സെന്‍റ് പോൾസ് യാക്കോബായ സുറിയാനി കത്തീഡ്രലിൽ ഓശാന ശുശ്രൂഷകളിൽ വികാരി ഫാ.ബിജുമോൻ കർലോട്ടുകുന്നേൽ മുഖ്യകാർമികനായി. ജോർജ് മനയത്ത് കോർ എപ്പിസ്കോപ്പ സഹകാർമികത്വം വഹിച്ചു. മാനന്തവാടി സെന്‍റ് തോമസ് ഓർത്തഡോക്സ് പള്ളിയിൽ ഓശാനപ്പെരുന്നാൾ ശുശ്രൂഷകളിൽ വികാരി ഫാ. ജിയോ ജോർജ് കാർമികനായി. കുരുത്തോല പ്രദക്ഷിണം നടന്നു. ആണ്ടൂർ നിത്യസഹായമാതാ പള്ളിയിൽ ഓശാനപ്പെരുന്നാൾ ആഘോഷത്തിന്‍റെ ഭാഗമായി പ്രദക്ഷിണം നടത്തി. വികാരി ഫാ.വിക്ടർ മെന്‍റോണ്‍സ നേതൃത്വം നൽകി. മുള്ളൻകൊല്ലി സെന്‍റ് മേരീസ് ഫൊറോന ദേവാലയത്തിൽ നടന്ന കുരുത്തോല പ്രദക്ഷിണത്തിനും വിശുദ്ധ കുർബാനയ്ക്കും ഫാ. ജസ്റ്റിൻ മൂന്നനാൽ മുഖ്യകാർമികത്വം വഹിച്ചു. പുൽപ്പള്ളി തിരുഹൃദയ ദേവാലയത്തിലെ തിരുകർമങ്ങൾക്ക് ഫാ. ജോർജ് മൈലാടൂർ, ശിശുമല ഉണ്ണീശോ ദേവാലയത്തിൽ ഫാ. ബിജു മാവറയിൽ, മരകാവ് സെന്‍റ് തോമസ് ദേവാലയത്തിൽ ഫാ. ജെയിംസ് പുത്തൻപറന്പിൽ, പട്ടാണിക്കൂപ്പ് ഉണ്ണീശോ പള്ളിയിൽ ഫാ. ജോണ്‍ പുതുക്കുളത്തിൽ, പെരിക്കല്ലൂർ സെന്‍റ് തോമസ് ദേവാലയത്തിൽ ഫാ. ജോർജ് കപ്പുകാലായിൽ, കബനിഗിരി സെന്‍റ് മേരീസ് ദേവാലയത്തിൽ ഫാ. ജോണി കല്ലുപുര, സീതാമൗണ്ട് സെന്‍റ് ജോസഫ്സ് പള്ളിയിൽ ഫാ. മനോജ് കറുത്തേടത്ത്, പാടിച്ചിറ സെന്‍റ് സെബാസ്റ്റ്യൻസ് പള്ളിയിൽ ഫാ. മാത്യു പെരുമാട്ടിക്കുന്നേൽ, ആടിക്കൊല്ലി സെന്‍റ് സെബാസ്റ്റ്യൻസ് ദേവാലയത്തിൽ ഫാ. സോമി വടയാപറന്പിൽ, മരക്കടവ് സെന്‍റ് ജോസഫ്സ് ദേവാലയത്തിൽ ഫാ. ജയിംസ് ചന്പക്കര, ചീയന്പം മാർ ബസേലിയോസ് ദേവാലയത്തിൽ ഫാ. മത്തായിക്കുഞ്ഞ് ചാത്താനാട്ടുകുടി, ചെറ്റപ്പാലം സെന്‍റ് മേരീസ് ദേവാലയത്തിൽ ഫാ. കുര്യാക്കോസ് വെള്ളച്ചാലിൽ, പുൽപ്പള്ളി സെന്‍റ് ജോർജ് സിംഹാസന കത്തീഡ്രലിൽ ഫാ. ഷിനോജ് പുന്നശേരി, പുൽപ്പള്ളി സെന്‍റ് ജോർജ് മലങ്കര കത്തോലിക്കാ പള്ളിയിൽ ഫാ. ചാക്കോ ചേലംപറന്പത്ത്, എള്ളുമന്നം സെന്‍റ് ജോർജ് ദേവാലയത്തിൽ വികാരി ഫാ. ജോമേഷ് തേക്കിലക്കാട്ടിൽ ഓശാന തിരുകർമങ്ങൾക്കും കുരുത്തോല പ്രദക്ഷിണത്തിനും കാർമികത്വം വഹിച്ചു.

തിരുനാൾ

അപ്പപ്പാറ സെന്‍റ് ജോർജ് പള്ളി കാട്ടിക്കുളം: അപ്പപ്പാറ സെന്‍റ് ജോർജ് ദേവാലയത്തിൽ ഇടവക മധ്യസ്ഥനായ വിശുദ്ധ ഗീവർഗീസിന്‍റെയും പരിശുദ്ധ കന്യകാമറിയത്തിന്‍റെയും വിശുദ്ധ സെബസ്റ്റ്യാനോസിന്‍റെയും തിരുനാൾ 25 മുതൽ 28 വരെ ആഘോഷിക്കും. 25ന് വൈകുന്നേരം 4.15ന് വികാരി ഫാ.ജോമോൻ ജേക്കബ് കളപ്പറന്പത്ത് കൊടിയേറ്റും. ദിവ്യബലിയിൽ പയ്യന്പള്ളി സെന്‍റ് കാതറിൻസ് ഫൊറോന വികാരി ഫാ.സെബാസ്റ്റ്യൻ ഏലംകുന്നേൽ കാർമികനാകും. 26ന് വൈകുന്നേരം അഞ്ചിന് കാട്ടിക്കുളം ഡിവൈൻ പ്രൊവിഡൻസ് സെമിനാരിയിലെ ഫാ.അലക്സ് കൂന്താനം ആഘോഷമായ തിരുനാൾ കുർബാന അർപ്പിക്കും. തുടർന്ന് ലദിഞ്ഞ്, പ്രദക്ഷിണം, സ്നേഹവിരുന്ന്. 27ന് രാവിലെ 10.30ന് കാട്ടിക്കുളം കാർമൽ നികേതൻ നൊവിഷ്യേറ്റ് ഹൗസിലെ ഫാ.ലിജോ കരിപ്പാമറ്റത്തിലിന്‍റെ കാർമികത്വത്തിൽ ആഘോഷമായ ദിവ്യബലി. തുടർന്ന് പ്രദക്ഷിണം, നേർച്ചഭക്ഷണം. 28ന് രാവിലെ ഏഴിന് വിശുദ്ധ കുർബാന. തോൽപ്പെട്ടി സെന്‍റ് ആന്‍റണീസ് പള്ളി കാട്ടിക്കുളം: തോൽപ്പെട്ടി സെന്‍റ് ആന്‍റണീസ് ദേവാലയത്തിൽ വിശുദ്ധ അന്തോനീസിന്‍റെ തിരുനാൾ 27, 28, 29 തീയതികളിൽ ആഘോഷിക്കും. 27ന് വൈകുന്നേരം അഞ്ചിന് വികാരി ഫാ.ഫ്രെഡിൻ ജോസഫ് കൊടിയേറ്റും. ദിവ്യബലിയിലും നൊവേനയിലും പിലാക്കാവ് സെന്‍റ് ജോസഫ്സ് പള്ളി വികാരി ഫാ.പി.എം. അനീഷ് കാർമികനാകും. 28ന് വൈകുന്നേരം അഞ്ചിന് ജപമാല. 5.30ന് മാനന്തവാടി അമലോദ്ഭവമാതാ ദേവാലയം വികാരി ഫാ.വില്യം രാജന്‍റെ കാർമികത്വത്തിൽ ദിവ്യബലി, നൊവേന. രാത്രി ഏഴിന് പ്രദക്ഷിണം, വാഴ്‌വ്, ആകാശവിസ്മയം. 29ന് രാവിലെ 10.30ന് ജപമാല. 11ന് പാക്കം സെന്‍റ് ആന്‍റണീസ് പള്ളി വികാരി ഫാ.ജയ്സണ്‍ കളത്തിപ്പറന്പിലിന്‍റെ കാർമികത്വത്തിൽ ആഘോഷമായ തിരുനാൾ ദിവ്യബലി, നൊവേന. 12.15ന് പ്രദക്ഷിണം, നേർച്ചഭക്ഷണം. വൈകുന്നേരം 6.45ന് കൊടിയിറക്കൽ. രാത്രി ഏഴിന് മതബോധന വാർഷികം. എട്ടിന് മാനന്തവാടി രാഗ്തരംഗ് ഓർക്കസ്ട്രയുടെ ഗാനമേള.

എൽസ്റ്റൻ എസ്റ്റേറ്റിൽ തൊഴിലാളികൾ പന്തൽ കെട്ടി അനിശ്ചിതകാല സമരം തുടങ്ങി

കൽപ്പറ്റ: മേപ്പാടി പുഞ്ചിരിമട്ടം ഉരുൾദുരന്തബാധിതരുടെ പുനരധിവാസത്തിന് സർക്കാർ ഏറ്റെടുത്ത എൽസ്റ്റൻ എസ്റ്റേറ്റിലെ പുൽപ്പാറ ഡിവിഷനിൽ തൊഴിലാളികൾ പന്തൽ കെട്ടി അനിശ്ചിതകാല സമരം തുടങ്ങി. ടൗണ്‍ഷിപ് നിർമാണത്തിന് പ്രാരംഭ പ്രവർത്തനങ്ങൾ നടന്നുവരുന്നതിനിടെയാണ് ട്രേഡ് യൂണിയൻ സംയുക്ത സമിതിയുടെ നേൃതൃത്വത്തിൽ സമരം. എസ്റ്റേറ്റ് മാനേജ്മെന്‍റ് നൽകാനുള്ള ആനുകൂല്യങ്ങൾ കുടിശിക സഹിതം ലഭ്യമാക്കണമെന്നതാണ് തൊഴിലാളികളുടെ ആവശ്യം. 2005ലെ ദുരന്ത നിവാരണ നിയമപ്രകാരം ഏറ്റെടുത്ത ഭൂമി ടൗണ്‍ഷിപ് നിർമാണത്തിന് സജ്ജമാക്കുന്നതിന്‍റെ ഭാഗമായി തേയിലച്ചെടികളും ചെറുമരങ്ങളും മണ്ണുമാന്തി യന്ത്രങ്ങൾ ഉപയോഗിച്ച് പിഴുതുമാറ്റുന്ന ജോലിയാണ് നടന്നുവരുന്നത്. ഇന്നലെ അനിശ്ചിതകാല സമരം ആരംഭിച്ച തൊഴിലാളികൾ തോട്ടത്തിൽ ടൗണ്‍ഷിപിനു നടത്തുന്ന പ്രവൃത്തികൾ തടസപ്പടുത്തിയില്ല. ആനുകൂല്യങ്ങളുടെ കാര്യത്തിൽ വ്യക്തമായ തീരുമാനം അടിയന്തരമായി ഉണ്ടാകുന്നില്ലെങ്കിൽ സമരം ശക്തമാക്കുമെന്ന് ട്രേഡ് യൂണിയൻ സംയുക്ത സമിതി ഭാരവാഹികൾ പറഞ്ഞു. പുനരധിവാസത്തിന് എൽസ്റ്റൻ എസ്റ്റേറ്റ് ഭൂമി ഏറ്റെടുക്കാമെന്ന ഇടക്കാല ഉത്തരവ് വെള്ളിയാഴ്ച ഹൈക്കോടതി ഡിവിഷൻ ബെഞ്ച് പുറപ്പടുവിച്ചിരുന്നു. നേരത്തേ തീരുമാനിച്ച 26 കോടി രൂപയ്ക്കു പുറമേ 17 കോടി രൂപ കൂടി നഷ്ടപരിഹാരമായി തോട്ടം മാനേജ്മെന്‍റിന് നൽകണമെന്നും കോടതി ഉത്തരവായി. ഈ തുക വെള്ളിയാഴ്ചതന്നെ കോടതിയിൽ സർക്കാർ കെട്ടിവച്ചു. ഇതിനു പിന്നാലെ ഭൂമി ഏറ്റെടുത്തതായും അത്രിക്രമിച്ചുകയറുന്നത് ശിക്ഷാർഹമാണെന്നും വ്യക്തമാക്കുന്ന ബോർഡ് ജില്ലാ കളക്ടറുടെ നേതൃത്വത്തിൽ സ്ഥലത്ത് സ്ഥാപിച്ചു. ശനിയാഴ്ച രാവിലെ ഭൂമിയിൽ ടൗണ്‍ഷിപ്പ് നിർമാണത്തിനു പ്രാരംഭ ജോലികൾ തുടങ്ങി. ഈ സമയം തൊഴിലാളികൾ പ്രതിഷേധവുമായി എത്തിയെങ്കിലും പ്രവൃത്തി തടസപ്പെടുത്തിയില്ല. പുൽപ്പാറ ഉൾപ്പെടെ എൽസ്റ്റൻ എസ്റ്റേറ്റിലെ മൂന്നു ഡിവിഷനുകളിൽ വിരമിച്ചശേഷവും ജോലിയിൽ തുടരുന്നവരടക്കം 300 ഓളം തൊഴിലാളികളുണ്ട്. ഇത്രയും പേർക്ക് ഏകദേശം 11 കോടി രൂപയുടെ ആനുകൂല്യങ്ങൾ മാനേജ്മെന്‍റ് നൽകാനുണ്ട്. പ്രൊവിഡന്‍റ് ഫണ്ട്, ഗ്രാറ്റുവിറ്റി, ലീവ് വിത്ത് വേജസ്, ബോണസ്, മെഡിക്കൽ ആനുകൂല്യം, വെതർ പ്രൊട്ടക്ടീവ് ആനുകൂല്യം, കൂലിക്കുടിശിക എന്നീ ഇനങ്ങളിലാണിത്. സർക്കാരിൽനിന്നു നഷ്ടപരിഹാരം ലഭിക്കുന്ന മുറയ്ക്ക് തൊഴിലാളികൾക്ക് ആനുകൂല്യം നൽകാമെന്ന നിലപാടിലാണ് തോട്ടം മാനേജ്മെന്‍റ്. പുനരധിവാസത്തിന് ഏറ്റെടുക്കുന്ന ഭൂമിയിലെ തൊഴിലാളി പ്രശ്നത്തിന് പരിഹാരം കാണണമെന്ന് ട്രേഡ് യൂണിയനുകൾ ഒറ്റയ്ക്കും കൂട്ടായും മാസങ്ങൾ മുന്പ് ജില്ലാ ഭരണകൂടത്തോട് ആവശ്യപ്പെട്ടതാണ്. എന്നാൽ പ്രശ്നപരിഹാരത്തിന് നടപടികൾ ഉണ്ടായില്ല. ഇതേത്തുടർന്ന് തൊഴിലാളികൾ കളക്ടറേറ്റ് പടിക്കൽ സത്യഗ്രഹം ഉൾപ്പെടെ സമരപരിപാടികളിലേക്ക് നീങ്ങിയ സാഹചര്യത്തിൽ കളക്ടറേറ്റിൽ അഡീഷണൽ ലേബർ കമ്മീഷണറുടെ സാന്നിധ്യത്തിൽ ചർച്ച നടന്നെങ്കിലും ആനുകൂല്യങ്ങളുടെ കാര്യത്തിൽ തീരുമാനമായില്ല. തൊഴിലാളി പ്രശ്നത്തിൽ ശനിയാഴ്ച ഉച്ചയ്ക്ക് കളക്ടറേറ്റിൽ സബ് കളക്ടർ മിസാൽ സാഗർ ഭരത്, വൈത്തിരി തഹസിൽദാർ എന്നിവരുമായി ട്രേഡ് യൂണിയൻ സംയുക്ത സമിതി നേതാക്കൾ ചർച്ച നടത്തിയിരുന്നു. സമിതിയെ പ്രതിനിധാനം ചെയ്ത് പി. ഗഗാറിൻ, കെ.ടി. ബാലകൃഷ്ണൻ(വയനാട് ലേബർ യൂണിയൻ), പി.പി. ആലി(മലബാർ എസ്റ്റേറ്റ് വർക്കേഴ്സ് യൂണിയൻ-ഐഎൻടിയുസി), എൻ.ഒ. ദേവസി (എസ്റ്റേറ്റ് മസ്ദൂർ യൂണിയൻ-എച്ച്എംഎസ്), എൻ. വേണുഗോപാൽ(കോഴിക്കോട് ഡിസ്ട്രിക്ട് പ്ലാന്‍റേഷൻ ലേബർ കോണ്‍ഗ്രസ്-ഐഎൻടിയുസി) എന്നിവരാണ് ചർച്ചയിൽ പങ്കെടുത്തത്. പുനരധിവാസത്തിന് ഭൂമി ഏറ്റെടുക്കുന്നതിനു മുന്പ് തൊഴിലാളി പ്രശ്നം പരിഹൃതമാകാത്തതിനു കാരണം ഉദ്യോഗസ്ഥതലത്തിലെ വീഴ്ചകളാണെന്ന് ചർച്ചയ്ക്കിടെ ട്രേഡ് യൂണിയൻ നേതാക്കൾ ആരോപിച്ചു. ടൗണ്‍ഷിപ് നിർമാണം തടസപ്പെടുത്തുന്നതിന് തൊഴിലാളികളെ നിർബന്ധിതരാക്കരുതെന്ന് മുന്നറിയിപ്പ് നൽകി. ഈ ചർച്ചയുടെ തുടർച്ച നാളെ കളക്ടറേറ്റിൽ നിശ്ചയിച്ചിട്ടുണ്ട്. ടൗണ്‍ഷിപ്പിന് ഏറ്റെടുക്കുന്ന ഡിവിഷനിലേതടക്കം എൽസ്റ്റൻ എസ്റ്റേറ്റിലെ തൊഴിലാളികളുടെ തൊഴിൽ സുരക്ഷയിൽ ഉറപ്പും ചർച്ചയിൽ ട്രേഡ് യൂണിയൻ സംയുക്ത സമിതി ഉന്നയിക്കും.

അപകടത്തിൽ യുവാവ് മരിച്ചു

മാനന്തവാടി: സ്കൂട്ടർ അപകടത്തിൽ യുവാവ് മരിച്ചു. മലപ്പുറം തിരൂരങ്ങാടി ഉപ്പുംതറ മുഹമ്മദ് സലീമിന്‍റെ മകൻ മുഹമ്മദ് അജ്സലാണ്(20) മരിച്ചത്. സഹയാത്രികൻ ഇസ്മയിലിന്(20)പരിക്കേറ്റു. ഇന്നലെ വള്ളിയൂർക്കാവിൽ അഗ്നി-രക്ഷാ നിലയത്തിനു സമീപമായിരുന്നു അപകടം. ഗവ.മെഡിക്കൽ കോളജ് ആശുപത്രിയിലായിരുന്നു മുഹമ്മദ് അജ്സലിന്‍റെ മരണം. സ്നേഹിതർക്കൊപ്പം വയനാട് സന്ദർശനത്തിന് എത്തിയതായിരുന്നു യുവാവ്.

മരത്തിൽനിന്നു വീണ് അധ്യാപകൻ മരിച്ചു

മാനന്തവാടി: ചോലയിറക്കുന്നതിനിടെ മരത്തിൽനിന്നു വീണ് അധ്യാപകൻ മരിച്ചു. കല്ലോടി സെന്‍റ് ജോസഫ്സ് സ്കൂൾ അധ്യാപകൻ ഇല്ലിക്കൽ ജയ്സനാണ്(47)മരിച്ചത്. ഇന്നലെ ഉച്ചയോടെയാണ് അപകടം. ഉടൻ ഗവ.മെഡിക്കൽ കോളജ് ആശുപത്രിയിൽ എത്തിച്ചെങ്കിലും രക്ഷിക്കാനായില്ല. പരേതനായ ഒൗസേപ്പ്-ഏലിയാമ്മ ദന്പതികളുടെ മകനാണ്. ഭാര്യ: ജിൻസി(അധ്യാപിക, വാളേരി ഗവ.ഹൈസ്കൂൾ). മക്കൾ: നിസ, സിയ.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]