ADVERTISEMENT

ADVERTISEMENT

കെപിഎ ജില്ലാ കണ്‍വൻഷൻ: സംഘാടക സമിതി രൂപീകരിച്ചു

കൽപ്പറ്റ: മേയ് 10ന് മുട്ടിലിൽ ചേരുന്ന കേരള പോലീസ് അസോസിയേഷൻ(കെപിഎ)ജില്ലാ കണ്‍വൻഷൻ നടത്തിപ്പിന് സംഘാടക സമിതി രൂപീകരിച്ചു. ഇതിനുചേർന്ന യോഗം സ്പെഷൽ ബ്രാഞ്ച് ഡിവൈഎസ്പി എം.എം. അബ്ദുൾകരീം ഉദ്ഘാടനം ചെയ്തു. അസോസിയേഷൻ ജില്ലാ പ്രസിഡന്‍റ് ബിപിൻ സണ്ണി അധ്യക്ഷത വഹിച്ചു.

കെപിഒഎ ജില്ലാ സെക്രട്ടറി പി.സി. സജീവ്, ജില്ലാ പോലീസ് സഹകരണ സംഘം പ്രസിഡന്‍റ് കെ.എം. ശശിധരൻ, അസോസിയേഷൻ ജില്ലാ സെക്രട്ടറി ഇർഷാദ് മുബാറക് എന്നിവർ പ്രസംഗിച്ചു. ‌

ഭാരവാഹികളായി വി. ലതീഷ്കുമാർ(ചെയർമാൻ), പി.ജി. രതീഷ്, എം.കെ. ഷജീർ(വൈസ് ചെയർമാൻ), ടി.പി. റിയാസ്(കണ്‍വീനർ), അബ്ദുൾ നാസിർ, പി.എസ്. അജീഷ്(ജോയിന്‍റ് കണ്‍വീനർ) എന്നിവരെ തെരഞ്ഞെടുത്തു.

കണ്‍വൻഷന്‍റെ ഭാഗമായി മെഡിക്കൽ ക്യാന്പ്, രക്തദാന ക്യാന്പ്, ഫുട്ബോൾ, ക്രിക്കറ്റ്, ഷട്ടിൽ ബാഡ്മിന്‍റണ്‍ മത്സരം എന്നിവ നടത്തും.

ADVERTISEMENT

വോൾട്ടേജ് ക്ഷാമം രൂക്ഷമായി

ഗൂഡല്ലൂർ: നെല്ലാക്കോട്ട പഞ്ചായത്തിലെ പാട്ടവയൽ, ബിദർക്കാട്, ചന്തംകുന്ന്, മുക്കട്ടി, ചെറുകുന്ന്, കൈവട്ട ഭാഗങ്ങളിൽ വോൾട്ടേജ് ക്ഷാമം രൂക്ഷമായി. വോൾട്ടേജ് ക്ഷാമം കാരണം ചിലയിടങ്ങളിൽ തെരുവ് വിളക്കുകൾ കത്തുന്നില്ലെന്ന് പരാതി ഉയർന്നിട്ടുണ്ട്. ഈ മേഖലയിൽ കാട്ടാന ശല്യം രൂക്ഷമാണ്.അതുകൊണ്ട് തന്നെ വെളിച്ചക്കുറവ് വലിയ പ്രയാസമായി മാറിയിരിക്കുകയാണ്. വോൾട്ടേജ് പ്രശ്നത്തിന് ശാശ്വത പരിഹാരം കാണണമെന്ന് നാട്ടുകാർ ആവശ്യപ്പെട്ടു.

പരിക്കേറ്റ കാട്ടുപോത്തിന് ചികിത്സ നൽകി

ഊട്ടി: കുന്നൂർ ചിന്നകരുന്പാലത്തിൽ കാലിന് പരിക്ക് പറ്റി ജനവാസ മേഖലയിൽ ചുറ്റിത്തിരിഞ്ഞിരുന്ന കാട്ടുപോത്തിന് വനംവകുപ്പ് ചികിത്സ നൽകി. മയക്കുവെടിവച്ച് പിടികൂടിയാണ് ഡോ. രാജേഷ്കുമാറിന്‍റെ നേതൃത്വത്തിലുള്ള മെഡിക്കൽ സംഘം ചികിത്സ നൽകിയത്. 350 കുടുംബങ്ങൾ ഉള്ള മേഖലയാണിത്. കാട്ടുപോത്ത് ജനങ്ങൾക്ക് ഭീഷണിയായിരുന്നു. കുന്നൂർ റേഞ്ചർ രവീന്ദ്രനാഥിന്‍റെ നേതൃത്വത്തിലുള്ള വനംവകുപ്പ് ഉദ്യോഗസ്ഥർ കാട്ടുപോത്തിനെ നിരീക്ഷിച്ചു വരികയാണ്.

വീടിന് മുകളിലേക്ക് മരം വീണു

പന്തല്ലൂർ: കനത്ത മഴയെത്തുടർന്ന് റോഡിലേക്ക് കൊളപ്പള്ളിയിൽ വീടിന് മുകളിലേക്ക് മരം വീണു. ആർക്കും പരുക്കില്ല. ശക്തമായ കാറ്റിലും മഴയിലുമാണ് നാശം സംഭവിച്ചത്. അയ്യംകൊല്ലി-കൊളപ്പള്ളി പാതയിൽ മരം വീണ് ഗതാഗതവും തടസപ്പെട്ടു. നീലഗിരിയിലെ ചില ഇടങ്ങളിൽ വേനൽ മഴ തുടരുകയാണ്. പലഭാഗത്തും നാശനഷ്ടങ്ങൾ സംഭവിക്കുകയും ചെയ്തിട്ടുണ്ട്.

കാട്ടാനക്കൂട്ടം കൃഷി നശിപ്പിച്ചു

ഗൂഡല്ലൂർ: തുറപ്പള്ളി മേഖലയിൽ കൃഷിയിടത്തിൽ ഇറങ്ങിയ കാട്ടാനക്കൂട്ടം കൃഷി നശിപ്പിച്ചു. കഴിഞ്ഞ ദിവസം രാത്രിയിലാണ് സംഭവം. കുനിൽവയൽ, ഇരുവയൽ, ഏച്ചംവയൽ ഭാഗത്ത് വൻ കൃഷിനാശമാണ് വരുത്തിയത്. മുരളി, രാധാകൃഷ്ണൻ, രാജേഷ് എന്നിവരുടെ കൃഷികളാണ് നശിപ്പിച്ചത്. പാവൽ കൃഷിയാണ് വ്യാപകമായി നശിപ്പിച്ചത്. നാല് ആനകളാണ് നാശം വരുത്തിയത്. ഇതുസംബന്ധിച്ച് വനംവകുപ്പിന് പരാതി നൽകി.

യൂക്കാലി മരങ്ങൾ മുറിച്ചു കടത്തി: രണ്ട് പേർ അറസ്റ്റിൽ

ഉൗട്ടി: ഉൗട്ടി താലൂക്കിലെ സോളൂർ പഞ്ചായത്തിലെ മണിക്കലിൽ അനുമതിയില്ലാതെ യൂക്കാലി മരങ്ങൾ മുറിച്ചു കടത്തിയ സംഭവത്തിൽ രണ്ട് പേരെ വനംവകുപ്പ് അറസ്റ്റു ചെയ്തു. സോളൂർ തൂണേരി സ്വദേശി ഷണ്‍മുഖവേൽ (43), കോത്തഗിരി നെടുകുള സ്വദേശി പ്രവിത്കുമാർ (49) എന്നിവരെയാണ് അറസ്റ്റു ചെയ്തത്. 40 യൂക്കാലി മരങ്ങൾ മുറിക്കാൻ അനുമതി വാങ്ങിയ ശേഷം 250 മരങ്ങൾ മുറിച്ചു കടത്തുകയായിരുന്നു.

ദാഹം തീർക്കാന്‍ കാട്ടാനക്കൂട്ടം ജലസ്രോതസുകൾ തേടിയിറങ്ങുന്നു

ഉൗട്ടി: കുന്നൂർ-മേട്ടുപാളയം ദേശീയ പാതയിൽ പാതയോരത്ത് സ്ഥിതി ചെയ്യുന്ന പാറയിടുക്കിലെ ജലസ്രോതസിൽ ഇറങ്ങി ദാഹം തീർക്കുന്ന കാട്ടാനക്കൂട്ടത്തിന്‍റെ വീഡിയോ ദൃശ്യം സമൂഹ മാധ്യമങ്ങളിൽ വൈറലായി. വേനൽചൂട് ശക്തമായതോടെ ദാഹജലത്തിനായി കാട്ടാനകൾ നെട്ടോട്ടത്തിലാണ്. അതിനിടയിലാണ് അൽപം ജലം കണ്ടെത്തിയ ഭാഗത്ത് ആനകൾ കൂട്ടത്തോടെ ഇറങ്ങിയത്. ദാഹം തീർത്ത സന്തോഷത്തോടെ മടങ്ങുകയും ചെയ്തു. കൂട്ടത്തിൽ രണ്ട് ആനകുട്ടികളുമുണ്ടായിരുന്നു.

മക്കിയാട് ഫയർ സ്റ്റേഷൻ: കെട്ടിട നിർമാണത്തിന് ഭരണാനുമതി

കൽപ്പറ്റ: വടക്കേവയനാട്ടിലെ തൊണ്ടർനാട് പഞ്ചായത്തിൽപ്പെട്ട മക്കിയാട് അഗ്നി-രക്ഷാസേനയുടെ പുതിയ നിലയം സ്ഥാപിക്കുന്നു. മക്കിയാട് ബെനഡിക്ടൻ ആശ്രമം സൗജ്യമായി ലഭ്യമാക്കിയ 30 സെന്‍റ് ഭൂമിയാണ് സ്റ്റേഷന് ഉപയോഗപ്പെടുത്തുക. ഏഴ് കോടി രൂപ ചെലവ് കണക്കാക്കുന്ന കെട്ടിട നിർമാണത്തിന് ഭരണാനുമതി നൽകി സർക്കാർ ഉത്തരവായി. പുഞ്ചിരിമട്ടം ഉരുൾ ദുരന്തത്തിന്‍റെ പശ്ചാത്തലത്തിൽ എസ്എഎസ്‌സിഐ(സ്പെഷൽ അസിസ്റ്റൻസ് ടു സ്റ്റേറ്റ്സ് ഫോർ കാപിറ്റൽ ഇൻവെസ്റ്റ്മെന്‍റ്) സ്കീമിൽ 529.5 കോടി രൂപയുടെ വായ്പ കേന്ദ്ര സർക്കാർ സംസ്ഥാനത്തിന് ലഭ്യമാക്കിയിരുന്നു. ഈ തുകയുടെ ഭാഗമാണ് മക്കിയാട് സ്റ്റേഷൻ നിർമാണത്തിന് ചെലവഴിക്കുന്നത്. 876.78 ചതുരശ്ര മീറ്റർ പ്ലിന്ത് ഏരിയയുള്ളതാണ് നിർമിക്കുന്ന കെട്ടിടം.

അവധിക്കാലത്ത് സേവനവുമായി വിദ്യാർഥികൾ

മാനന്തവാടി: അവധിക്കാലത്ത് സേവനവുമായി ഹിൽ ബ്ലൂംസ് സ്കൂൾ വിദ്യാർഥികൾ. ഗവ.മെഡിക്കൽ കോളജ് ആശുപത്രിയിൽ മുന്പ് കൊവിഡ് വാർഡായി ഉപയോഗിച്ചിരുന്ന കെട്ടിടത്തിന്‍റെ ഭാഗങ്ങൾ കുട്ടികൾ വൃത്തിയാക്കി. മെഡിക്കൽ ഉപകരണങ്ങൾ ക്രമീകരിച്ചു. കെവിൻ ഷാജി, എയ്ഞ്ചലിറ്റ ലെമക്ക്, സിയാൻഡ, ഇഷ മാത്യു, അമയ അനിൽ, ഹീര മരിയ, ലെന എലിസബത്ത്, റോമ റേച്ചൽ, എം.ജെ. ജെസെ, അന്ന മരിയ, ഹന്ന മരിയ, അനറ്റ് അന്ന, ഇവാൻ അഗസ്റ്റിൻ, അലൈൻ അബ്ദുള്ള, മാളവിക ദീപക്, ആദ്യ സന്തോഷ് എന്നിവർ പങ്കെടുത്തു. അധ്യാപകരായ സ്മിത മാത്യു, ഷബീന ഇബ്രാഹിം, റെൻസി, മോഹനൻ, ഗ്രേസി എന്നിവർ നേതൃത്വം നൽകി.

പ്രവാസിയുടെ വീട്ടിൽ മോഷണം

പനമരം: കൈതക്കൽ കാപ്പി ഡിപ്പോയ്ക്ക് സമീപം വീട്ടിൽ മോഷണം. വിദേശത്ത് ജോലി ചെയ്യുന്ന കയ്യാലകത്ത് നിസാമിന്‍റെ വീട്ടിലാണ് കഴിഞ്ഞ ദിവസം കള്ളൻ കയറിയത്. നിസാമിന്‍റെ ഭാര്യയും മക്കളും ബന്ധുഗൃഹത്തിൽ വിവാഹത്തിനു പോയതിനാൽ വീട്ടിൽ ആളുണ്ടായിരുന്നില്ല. രാവിലെ പാൽക്കാരനാണ് വീടിന്‍റെ അടുക്കള വാതിൽ കുത്തിത്തുറന്ന നിലയിൽ കണ്ടത്. അദ്ദേഹം വിവരം അറിയിച്ചതനുസരിച്ച് സ്ഥലത്തെിയ പോലീസും വിരലടയാള വിദഗ്ധരും വീട്ടിൽ പരിശോധന നടത്തി. വീട്ടിൽനിന്നു ആഭരണങ്ങളും പണവും കവർന്നതായാണ് വിവരം.

ആംബുലൻസ് ഡ്രൈവറെ മർദിച്ചതായി പരാതി

മാനന്തവാടി: ഗവ.മെഡിക്കൽ കോളജ് ആശുപത്രിയിലെ ആംബുലൻസ് ഡ്രൈവർ രഞ്ജിത്തിനെ പൂക്കോടിനു സമീപം കാർ ഡ്രൈവർ മർദിച്ചതായി പരാതി. കഴിഞ്ഞദിവസം രോഗിയുമായി കോഴിക്കോടിനുപോയി മടങ്ങുന്പോഴാണ് സംഭവമെന്ന് രഞ്ജിത്ത് പറയുന്നു. പരിക്കേറ്റ രഞ്ജിത്ത് ചികിത്സയിലാണ്. കാർ ഡ്രൈവർക്കെതിരേ നിയമ നടപടി സ്വീകരിക്കണമെന്ന് കേരള ഗവ.ഹോസ്പിറ്റൽ ഡെവലപ്മെന്‍റ് സൊസൈറ്റി എംപ്ലോയീസ് യൂണിയൻ(സിഐടിയു) മെഡിക്കൽ കോളജ് ബ്രാഞ്ച് കമ്മിറ്റി പ്രസിഡന്‍റ് ഷിബു, സെക്രട്ടറി സജു എന്നിവർ ആവശ്യപ്പെട്ടു.

ഡോ. ദാഹിർ മുഹമ്മദിനെ ആദരിച്ചു

പനമരം: മികച്ച ഡോക്ടർക്കുള്ള സംസ്ഥാന അവാർഡ് കരസ്ഥമാക്കിയ ദാഹിർ മുഹമ്മദിനെ ഗവ.ഹയർ സെക്കൻഡറി സ്കൂൾ എസ്പിസി യൂണിറ്റിന്‍റെ നേതൃത്വത്തിൽ ആദരിച്ചു. പിടിഎ പ്രസിഡന്‍റ് സി.കെ. മുനീർ അധ്യക്ഷത വഹിച്ചു. ജില്ലാ പഞ്ചായത്ത് ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ ജുനൈദ് കൈപ്പാണി പൊന്നാടയണിച്ചു. ജില്ലാ പഞ്ചായത്ത് ഡിവിഷൻ അംഗം ബിന്ദു പ്രകാശ് മുഖ്യപ്രഭാഷണം നടത്തി. പഞ്ചായത്ത് വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ കെ.ടി. സുബൈർ, ടി. നവാസ്, കെ. രേഖ എന്നിവർ പ്രസംഗിച്ചു.

ഗതാഗത നിയന്ത്രണം ഏർപ്പെടുത്തും

ഉൗട്ടി: വസന്തോത്സവം പ്രമാണിച്ച് ഉൗട്ടിയിൽ പോലീസ് ഗതാഗത നിയന്ത്രണം ഏർപ്പെടുത്തും. മേയ് ഒന്ന് മുതലാണ് ഗതാഗത നിയന്ത്രണം ഏർപ്പെടുത്തുക. സീസണ്‍ സമയങ്ങളിൽ ദിനംപ്രതി ആയിരക്കണക്കിന് സഞ്ചാരികളാണ് ഉൗട്ടിയിലെത്തുക. വാഹനങ്ങളുടെ ആധിക്യം കാരണം വൻഗതാഗത കുരുക്ക് അനുഭവപ്പെടാറുണ്ട്. ഇതേത്തുടർന്നാണ് ഗതാഗത നിയന്ത്രണം ഏർപ്പെടുത്തുന്നത്. ഇതിനായി ഈ വർഷം പോലീസിന് പ്രത്യേക സൗകര്യം ഏർപ്പെടുത്തിയിട്ടുണ്ടെന്ന് ജില്ലാ പോലീസ് സൂപ്രണ്ട് എം.എസ്. നിഷ അറിയിച്ചു. ഈ പദ്ധതിയുടെ ഉദ്ഘാടനം ഇന്നലെ ഉൗട്ടിയിൽ എസ്പി നിർവഹിച്ചു. മഴയും വെയിലും കൊള്ളാത്ത രൂപത്തിലുള്ള സംവിധാനമാണ് ഏർപ്പെടുത്തിയിരിക്കുന്നത്. നഗരത്തിലെ പ്രധാന ഇടങ്ങളിൽ പത്ത് ചെറിയ ഒൗട്ട് പോസ്റ്റുകളാണ് സ്ഥാപിച്ചിരിക്കുന്നത്.

ദൈവദശകം ലോകം അംഗീകരിച്ച വിശ്വ പ്രാർത്ഥന: സ്വാമി അസംഗാനന്ദ ഗിരി

പുൽപ്പള്ളി: ശ്രീനാരായണ ഗുരുദേവൻ രചിച്ച ദൈവദശകം നിത്യ പ്രാർത്ഥന മാത്രമല്ല, ലോകം മുഴുവൻ ഏറ്റെടുത്ത വിശ്വ പ്രാർത്ഥനാഗീതമാണെന്ന് ശിവഗിരി മഠം സന്യാസി സ്വാമി അസംഗാനന്ദ ഗിരി പറഞ്ഞു. പുൽപ്പള്ളി ജയശ്രീ കോളജ് ഓഡിറ്റോറിയത്തിൽ നടന്ന ഗുരുധർമ്മ പ്രചരണസഭ വയനാട് ജില്ല ധർമ്മ മീമാംസ പരിഷത്ത് വാർഷിക പൊതുയോഗം ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. ഗുരുധർമ്മ പ്രചരണ സഭ ജില്ലാ പ്രസിഡന്‍റ് കെ.ആർ. ജയരാജ് അധ്യക്ഷത വഹിച്ചു. ഗുരുധർമ്മ പ്രചരണ സഭ കേന്ദ്ര സമിതി രജിസ്ട്രാർ കെ.ടി. സുകുമാരൻ അടിമാലി പ്രഭാഷണം നടത്തി. സ്വാമിനി മാതാ നാരായണ ചൈതന്യമയി, ഡോ.വി. സതീഷ് കുമാർ, എക്സൈസ് ഓഫീസർ നിക്കോളാസ് ജോസ് എന്നിവർ ക്ലാസെടുത്തു. യുവജനസഭ കേന്ദ്ര സമിതി ചെയർമാൻ രാജേഷ് സഹദേവൻ മുഖ്യപ്രഭാഷണം നടത്തി. മാതൃസഭ കേന്ദ്ര സമിതി എക്സിക്യൂട്ടീവ് കമ്മിറ്റി അംഗം പി. പുഷ്പവല്ലി പ്രവർത്തനറിപ്പോർട്ട് അവതരിപ്പിച്ചു. ജില്ലാ വൈസ് പ്രസിഡന്‍റ് പി. പവിത്രൻ, കേന്ദ്ര സമിതി അംഗങ്ങളായ സരസു നാരായണൻകുട്ടി, കെ.ആർ. ഗോപി, യുവജനസഭ പ്രസിഡന്‍റ് എം.ആർ. അജികുമാർ, സെക്രട്ടറി എം.വി. ബാബു, ഭാരവാഹികളായ ഓമന ബഷി, ആർ.എസ്. സൗമ്യ, കെ.കെ. കൃഷ്ണൻകുട്ടി, പ്രകാശൻ പനവല്ലി, ശിവരാമൻ പാറക്കുഴി, സുഭദ്ര രാജൻ എന്നിവർ പ്രസംഗിച്ചു. പുതിയ ഭാരവാഹികളായി കെ.ആർ. ജയരാജ് (ജിഡിപിഎസ് ജില്ലാ പ്രസിഡന്‍റ്), എൻ.എൻ. ചന്ദ്രബാബു (ജില്ലാ സെക്രട്ടറി), സജിനി (മാതൃസഭ ജില്ലാ പ്രസിഡന്‍റ്), നിഷാ രാജൻ (സെക്രട്ടറി), കെ.ജി. അരുണ്‍ (യുവജനസഭ ജില്ലാ പ്രസിഡന്‍റ്), എം.വി. ബാബു (യുവജനസഭ ജില്ലാ സെക്രട്ടറി) എന്നിവരെ തെരഞ്ഞെടുത്തു.

ക്ലീൻ സിറ്റിയിൽ മാലിന്യം തള്ളുന്നു

സുൽത്താൻ ബത്തേരി: ക്ലീൻ സിറ്റി എന്ന പേരിനു കളങ്കം ചാർത്തി സാമൂഹികവിരുദ്ധർ നഗര പരിധിയിൽ റോഡ് അരികിൽ മാലിന്യം തള്ളുന്നു. കാരക്കണ്ടിയിൽനിന്നു ഹെലിപ്പാഡ് ഗ്രൗണ്ടിനു പിന്നീലൂടെ പോകുന്ന റോഡിന്‍റെ അരികിലാണ് മാലിന്യം നിക്ഷേപിക്കുന്നത്. ഉപയോഗിച്ച ഡയപർ ഉൾപ്പെടെ മാലിന്യമാണ് വഴിയോരത്ത് വലിച്ചെറിയുന്നത്. ഇത് യാത്രക്കാർക്ക് അലോസരമാകുന്നുണ്ട്. മാലിന്യം വലിച്ചെറിഞ്ഞാൽ പിഴ ഇടാക്കുന്ന നഗരസഭയാണ് ബത്തേരി. നിരത്തിൽ തുപ്പിയതിന് പിഴയീടാക്കിയ സംസ്ഥാനത്തെ ആദ്യ നഗരസഭയുമാണിത്. മാലിന്യം നിരത്തുവക്കിൽ തള്ളുന്നത് ശ്രദ്ധയിൽപ്പെടുത്തിയിട്ടും നഗരസഭാധികൃതർ നടപടി സ്വീകരിക്കുന്നില്ലെന്നു പ്രദേശവാസികൾ പറയുന്നു.

തെരുവുനായ ആക്രമണത്തിൽ 12കാരിക്ക് ഗുരുതര പരിക്ക്

കണിയാന്പറ്റ: തെരുവുനായകളുടെ ആക്രമണത്തിൽ 12 കാരിക്ക് ഗുരുതര പരിക്കേറ്റു. കണിയാന്പറ്റ പള്ളിത്താഴയിൽ ഇന്നലെ രാലിലെ ആറോടെയാണ് സംഭവം. മദ്രസയിലേക്ക് പോകുകയായിരുന്ന പാറക്കൽ നൗഷാദിന്‍റെ മക്കൾ സിയാ ഫാത്തിമയെയാണ് ഒരുകൂട്ടം തെരുവുനായകൾ അക്രമിച്ചത്. ബാലികയുടെ തലയിലും പുറത്തും ഉരത്തിലും നായയുടെ കടിയും മാന്തുമേറ്റു. നിലവിളി കേട്ട് എത്തിയ പ്രദേശവാസികളാണ് കുട്ടിയെ തെരുവുനായകളിൽനിന്നു രക്ഷിച്ചത്. ബാലികയെ കൈനാട്ടി ജനറൽ ആശുപത്രിയിൽ പ്രവേശിപ്പിച്ചു. ടൗണിലും സമീപങ്ങളിലും വർധിച്ച തെരുവുനായ ശല്യത്തിന് അടിയന്തര പരിഹാരം കാണണമെന്ന് നാട്ടുകാർ ആവശ്യപ്പെട്ടു.

പുഞ്ചിരിമട്ടം ദുരന്തം: റിപ്പണിൽ വീടുകളുടെ ശിലാസ്ഥാപനം 20ന്

കൽപ്പറ്റ: പുഞ്ചിരിമട്ടം ഉരുൾ ദുരന്തബാധിതരിൽ 10 കുടുംബങ്ങൾക്ക് മേപ്പാടി റിപ്പണിൽ ഡോ.കെ.പി. ഹുസൈൻ ചാരിറ്റബിൾ ട്രസ്റ്റിന്‍റെ സഹകരണത്തോടെ ഹെൽപിംഗ് ഹാൻഡ്സ് ചാരിറ്റബിൾ ട്രസ്റ്റ് ഭവന പദ്ധതി നടപ്പാക്കുന്നു. വീടുകളുടെ ശിലാസ്ഥാപനം 20ന് രാവിലെ 10.30ന് യുഎഇ ഫാത്തിമ ഹെൽത്ത് കെയർ ഗ്രൂപ്പ് ചെയർമാൻ ഡോ.കെ.പി. ഹുസൈൻ നിർവഹിക്കും. ഹെൽപിംഗ് ഹാൻഡ്സ് വയനാട് ചാപ്റ്റർ ചെയർമാൻ ഡോ.ജമാലുദ്ദീൻ ഫാറൂഖി, പ്രസിഡന്‍റ് കെ.വി. നിയാസ്, സെക്രട്ടറി എം.കെ. നൗഫൽ എന്നിവർ പങ്കെടുക്കും. ഡോ.കെ.പി. ഹുസൈൻ ചാരിറ്റബിൾ ട്രസ്റ്റ് സ്പോണ്‍സർ ചെയ്ത ഭൂമിയിലാണ് ഭവന പദ്ധതി നടപ്പാക്കുന്നത്.

പണത്തിനോടുള്ള ആർത്തി കുട്ടികളിൽ പോലും മയക്കുമരുന്ന് കച്ചവടം നടത്തുവാൻ പ്രേരിപ്പിക്കുന്നു: മാർ ജോസ് പൊരുന്നേടം

മാനന്തവാടി: പണത്തിനോടുള്ള ആർത്തിയാണ് കുട്ടികളിൽ പോലും മയക്കുമരുന്ന് കച്ചവടം നടത്തുവാൻ പ്രേരിപ്പിക്കുന്നതെന്ന് മാനന്തവാടി ബിഷപ് മാർ ജോസ് പൊരുന്നേടം. കണിയാരം സെന്‍റ്ജോസഫ് കത്തീഡ്രൽ ദേവാലയത്തിൽ പെസഹാ വ്യാഴാഴ്ച നടന്ന കാൽകഴുകൽ ശുശ്രൂഷയ്ക്ക് നേതൃത്വം നൽകി പ്രസംഗിക്കുകയായിരുന്നു ബിഷപ്പ്. മയക്ക് മരുന്നിനെ പോലും മാധ്യമങ്ങൾ മഹത്വവൽക്കരിച്ച് വാർത്ത നൽകുയാണ്. ഇത്തരം വാർത്തകൾ കണ്ടാണ് യുവാക്കൾ ഉൾപ്പെടെ മയക്കുമരുന്ന് കച്ചവടത്തിലേക്ക് എത്തുന്നത്. ഇത്തരം വാർത്തകൾ മാധ്യമങ്ങൾ വലിയ പ്രാധാന്യത്തോടെ കൊടുക്കുന്പോൾ അത്തരം പ്രശസ്തി തങ്ങൾക്കും ലഭിക്കണമെന്ന് ചിന്തയാണ് കൂടുതൽ യുവാക്കളെ ഇത്തരം മയക്ക് കച്ചവടത്തിലേക്ക് പ്രേരിപ്പിക്കുന്നത്. തെറ്റിനെപ്പോലും മഹത്വവത്കരിക്കുന്ന കാഴ്ചയാണ് ഇന്ന് സമൂഹത്തിൽ കാണുന്നത്. തെറ്റുകൾ ഏറ്റുപറഞ്ഞ് മറ്റുള്ളവരുടെ മുൻപിൽ മുട്ടുമടക്കാനുള്ള മടി ഇന്ന് സമൂഹത്തിൽ വർധിച്ചു വരികയാണ്. ഇത്തരം നുണകൾ പറയുന്പോൾ സമൂഹം നശിക്കുകയാണ്. യേശുക്രിസ്തു ചെയ്തതു പോലെ മറ്റുള്ളവർക്ക് മുൻപിൽ മുട്ടുമടക്കാനുള്ള മനസാണ് പെസഹ ആചരണം നൽകുന്ന സന്ദേശമെന്നും ബിഷപ്പ് കൂട്ടിച്ചേർത്തു. കണിയാരം കത്തീഡ്രൽ ദേവാലയത്തിൽ നടന്ന തിരുകർമ്മങ്ങൾക്ക് ഇടവക വികാരി ഫാ. സോണി വാഴക്കാട്ട് സഹകാർമികത്വം വഹിച്ചു. യേശു ശിഷ്യൻമാരുടെ കാലുകൾ കഴുകിയതിന്‍റെ സ്മരണയുയർത്തി ദേവാലയങ്ങളിൽ കാൽകഴുകൽ ശുശ്രൂഷയും പ്രാർഥനകളും നടന്നു. ഇന്ന് യേശുവിന്‍റെ പീഢാനുഭവത്തിന്‍റെ ഓർമ ആചരിച്ച് ക്രൈസ്തവ സമൂഹം ദുഃഖവെള്ളി ആചരിക്കും.

മുള്ളൻകൊല്ലി-മരക്കടവ് റോഡ് പ്രവൃത്തി കുറ്റമറ്റതാക്കണമെന്ന്

മുള്ളൻകൊല്ലി: കേന്ദ്രാവിഷ്കൃത ഭാരത്മാല പദ്ധതിയിൽ ഉൾപ്പെടുത്തി 15 കോടി രൂപ ചെലവിൽ നടത്തുന്ന മുള്ളൻകൊല്ലി-മരക്കടവ് റോഡ് നവീകരണം കുറ്റമറ്റതാക്കണമെന്ന് ബിജെപി പഞ്ചായത്ത് കമ്മിറ്റി ആവശ്യപ്പെട്ടു. റോഡ് പ്രവൃത്തിയിൽ അപാകതകൾ ഏറെയാണ്. എസ്റ്റിമേറ്റ് പ്രകാരമുള്ള കലുങ്കുകളുടെയും സൈഡ് ഭിത്തിയുടെയും നിർമാണം അടക്കം ഒഴിവാക്കിയാണ് പണി നടത്തുന്നത്. ജൽജീവൻ മിഷനും പൊതുമരാമത്തു വകുപ്പും തമ്മിലുള്ള തർക്കത്തെത്തുടർന്ന് വർഷത്തോളം ജനങ്ങൾ അനുഭവിച്ച ദുരിതത്തിനുശേഷം പ്രവൃത്തി ആരംഭിച്ചപ്പോഴാണ് ഇത്തരം അപാകതകൾ കടന്നുകൂടിയത്. എസ്റ്റിമേറ്റ് പ്രകാരം കബനിഗിരി സ്കൂൾ പരിസരം, അറുപതുകവല, ഹോസ്പിറ്റൽ കവല, പാടിച്ചിറ ടൗണ്‍ എന്നിവിടങ്ങളിൽ കലുങ്ക് നിർമിക്കേണ്ടതാണ്. പഴയ കലുങ്കുകൾ കാൽ നൂറ്റാണ്ടിലേറെ പഴക്കമുള്ളതും വീതി കുറഞ്ഞതുമാണ്. റോഡിൽ വീതി കുറഞ്ഞ ഭാഗങ്ങളിലും അപകടസാധ്യതയുള്ള സ്ഥലങ്ങളിലും പാർശ്വഭിത്തി നിർമാണം നടത്തുന്നില്ല. പാടിച്ചിറയിൽ അഴുക്കുചാലുകൾ നിർമിക്കാൻ നടപടിയില്ല. പാടിച്ചിറ കിഴക്കേക്കുന്ന്, പള്ളിക്കുന്ന് ഉൾപ്പെടെ പ്രദേശങ്ങളിൽനിന്നു മഴവെള്ളം പാടിച്ചിറ ടൗണിലാണ് എത്തുന്നത്. ഗതാഗത തടസത്തിനു കാരണമാകുന്ന ഇലക്ട്രിക് പോസ്റ്റുകൾ മാറ്റി സ്ഥാപിക്കുന്നതിനും നടപടി ഉണ്ടാകണമെന്ന് യോഗം ആവശ്യപ്പെട്ടു. രാജൻ പാറയ്ക്കൽ അധ്യക്ഷത വഹിച്ചു. സദാശിവൻ കളത്തിൽ, ജോബിഷ് മാവുടി, ആശ ഷാജി, രഞ്ജിത്ത് ഇടമല, പി.എൻ. സന്തോഷ്, കുമാരൻ പൊയ്ക്കാട്ടിൽ, ബെന്നി കുളങ്ങര, സതീശൻ കുറ്റിക്കാട്ടിൽ എന്നിവർ പ്രസംഗിച്ചു.

ചേലക്കൊല്ലിയിലെ റോഡിലേക്ക് തള്ളി നിൽക്കുന്ന മരങ്ങൾ യാത്രക്കാർക്ക് ഭീഷണിയായി

സുൽത്താൻ ബത്തേരി: മൂന്നാനക്കുഴി-പാപ്ലശേരി-ഇരുളം റോഡിലെ ചേലക്കൊല്ലി ഭാഗത്ത് മരങ്ങൾ യാത്രക്കാർക്ക് ഭീഷണിയായി. റോഡിലേക്ക് തള്ളിനിൽക്കുന്ന മരങ്ങൾ വാഹനങ്ങൾ അപകടത്തിൽപ്പെടുന്നതിന് കാരണമാകുകയാണ്. മരങ്ങൾ ഡ്രൈവർമാർക്ക് റോഡിൽ ദൂരക്കാഴ്ച മറയ്ക്കുകയാണ്. 50 വർഷത്തിലേറെ പഴക്കമുള്ളതാണ് മരങ്ങളിൽ പലതും. റോഡ് മറച്ച് മരങ്ങൾ നിൽക്കുന്നതിനാൽ എതിരേ വരുന്ന വാഹനങ്ങൾ അടുത്തെത്തുന്പോൾ മാത്രമാണ് ഡ്രൈവർമാർക്ക് കാണാനാകുന്നത്. വനം വകുപ്പിന്‍റെ അധീനതയിലാണ് ചേലക്കൊല്ലി ഉൾപ്പെടെ പാപ്ലശേരി മുതൽ ഇരുളം വരെ റോഡിൽ ഏറിയ ഭാഗവും. അപകടാവസ്ഥയിലുള്ള മരങ്ങൾ മുറിച്ചുമാറ്റുന്നതിന് പ്രദേശവാസികൾ വനം അധികാരികൾക്ക് പരാതി നൽകിയിരുന്നു. ഇതേത്തുടർന്ന് റോഡിലേക്ക് മറിയാൻ സാധ്യതയുള്ള മരങ്ങളിൽ ചിലത് മുറിച്ചുനീക്കി. എന്നാൽ ചേലക്കൊല്ലി വളവിൽ കാൽനടയാത്രക്കാർക്കും വാഹനങ്ങൽക്കും ഒരുപോലെ തടസമായി നിൽക്കുന്ന മരം മുറിച്ചില്ല.

വാണിജ്യവാതക സിലിണ്ടറുകൾ തുറസായ സ്ഥലത്ത് കയറ്റിയിറക്കുന്നു

സുരക്ഷാ സംവിധാനങ്ങളൊരുക്കുന്നില്ല സുൽത്താൻ ബത്തേരി: സുരക്ഷാസംവിധാനങ്ങൾ ഇല്ലാതെ തുറസായ സ്ഥലത്ത് വാണിജ്യ വാതക സിലിണ്ടറുകൾ വാഹനങ്ങളിൽ കയറ്റിയിറക്കുന്നത് ജീവനും സ്വത്തിനും ഭീഷണിയാകുന്നുവെന്ന പരാതിയുമായി കുടുംബങ്ങൾ. സുൽത്താൻ ബത്തേരി പട്ടരുപടിയിലെ കുടുംബങ്ങളാണ് വാണിജ്യവാതക സിലിണ്ടറുകൾ തുറസായ സ്ഥലത്ത് വാഹനങ്ങളിൽ കയറ്റിയിറക്കുന്നതിനെതിരേ പരാതിയും പ്രതിഷേധവുമായി രംഗത്തെത്തിയത്. സുൽത്താൻ ബത്തേരി പാട്ടവയൽ റോഡരികിൽ നൂറുകണക്കിന് കുടുംബങ്ങളും വിദ്യാഭ്യാസ സ്ഥാപനവും ആരാധനായലവുമുള്ള പട്ടരുപടിയിലാണ് സ്വകാര്യവ്യക്തിയുടെ ഉടമസ്ഥതയിലുള്ള തുറസായ സ്ഥലത്ത് വാണിജ്യവാതക സിലിണ്ടറുകൾ എത്തിച്ച് കയറ്റിയിറക്കുന്നത്. കഴിഞ്ഞ ഒരുമാസക്കാലമായി ചുറ്റും ഗ്രീൻനെറ്റ്കെട്ടിമറച്ച ഭൂമിയിൽ വലിയ വാഹനത്തിൽ എത്തിക്കുന്ന വാണിജ്യാടിസ്ഥാനത്തിലുള്ള വാതക സിലിണ്ടുറുകൾ മറ്റ് വാഹനങ്ങളിലേക്ക് കയറ്റി ഇവിടെനിന്ന് കൊണ്ടുപോകുകയാണ് ചെയ്യുന്നതെന്നാണ് ആരോപണം. രാത്രികാലങ്ങളിലും പുലർച്ചെയുമായാണ് പാചകവാതകം നിറച്ച സിലിണ്ടറുകൾ എത്തിച്ച് മാറ്റികയറ്റുന്നത്. യാതൊരു സുരക്ഷാ സംവിധാനങ്ങളും ഒരുക്കാതെയും നിയമങ്ങളോ മാനദണ്ഡങ്ങളോ പാലിക്കാതെയുമാണ് ഇത്തരം പ്രവർത്തനം നടക്കുന്നതെന്നും നാട്ടുകാർ ആരോപിക്കുന്നു. പ്രദേശവാസികളുടെ ജീവനും സ്വത്തിനും ഭീഷണിയായിരിക്കുന്ന ഈ പ്രവർത്തനത്തെക്കുറിച്ച് അന്വേഷണം നടത്തി തങ്ങൾക്ക് സുരക്ഷ ഉറപ്പുവരുത്തുവാനുള്ള നടപടി അധികൃതരുടെ ഭാഗത്തുനിന്നും ഉണ്ടാകണമെന്നാണ് പ്രദേശവാസികൾ ആവശ്യപ്പെടുന്നത്.

ബിദർക്കാട് ടൗണിൽ വീണ്ടും കാട്ടാന ഇറങ്ങി

ഗൂഡല്ലൂർ: നെല്ലാക്കോട്ട പഞ്ചായത്തിലെ ബിദർക്കാട് ടൗണിൽ വീണ്ടും കാട്ടാന ഇറങ്ങി. ടൗണിൽ കാട്ടാന ഇറങ്ങുന്നത് നിത്യസംഭവമായി മാറിയിരിക്കുകയാണ്. സമീപത്തെ വനത്തിൽ നിന്നാണ് കാട്ടാന ഇറങ്ങുന്നത്. പകൽ സമയം വനത്തിൽ കഴിയുന്ന ഒറ്റകൊന്പൻ നേരം ഇരുട്ടിയാൽ ജനവാസ മേഖലയിലേക്ക് ഇറങ്ങുകയാണ്. ഇന്നലെ പുലർച്ചെ ആറോടെയാണ് ആന പഞ്ചോറയിൽ നിന്ന് നേരെ റോഡിലേക്ക് ഇറങ്ങിയത്. റോഡിലൂടെ നടന്നു പെട്രോൾ പന്പ് കഴിഞ്ഞ് വനത്തിലേക്ക് പിന്തിരിയുകയായിരുന്നു. ആനയെ കണ്ട് വാഹന യാത്രക്കാർ ഓടി രക്ഷപ്പെട്ടു. ആനയുടെ റോഡിലൂടെയുള്ള സഞ്ചാരം വാഹന യാത്രക്കാർക്കും പ്രഭാത സവാരിക്കാർക്കും കടുത്ത ഭീഷണിയായിരിക്കുകയാണ്. കൃഷിയിടങ്ങളിൽ ഇറങ്ങി വൻ കൃഷിനാശവും വരുത്തുന്നുണ്ട്. ജനങ്ങൾ ഭീതിയോടെയാണ് കഴിയുന്നത്. ബിദർക്കാടിലാണ് ബിദർക്കാട് റേഞ്ച് ഓഫീസ് പ്രവൃത്തിക്കുന്നത്. ഇതിന് അൽപം ദൂരെ നെല്ലാക്കോട്ട റേഞ്ച് ഓഫീസും പ്രവൃത്തിക്കുന്നുണ്ട്. ഉദ്യോഗസ്ഥരുടെ കാര്യക്ഷമതയില്ലായ്മ കാരണം ഈ മേഖല കാട്ടാനയുടെ വിഹാരകേന്ദ്രമായി മാറിയിരിക്കുകയാണ്. ആന ശല്യത്തിന് പരിഹാരം കാണണമെന്ന് ജനങ്ങൾ ആവശ്യപ്പെട്ടുവരികയാണ്. ശാശ്വതമായ പരിഹാരം കാണാൻ വനംവകുപ്പിന് സാധിക്കുന്നില്ല. കാട്ടുകൊന്പനെ വനത്തിലേക്ക് തുരത്തുകയും വനാതിർത്തികളിൽ കിടങ്ങ് നിർമിക്കുകയും സോളാർ വേലി സ്ഥാപിക്കുകയും ചെയ്യണമെന്നാണ് നാട്ടുകാർ ആവശ്യപ്പെടുന്നത്.

പോസ്റ്റ്ഓഫീസ് കെട്ടിടത്തിന്‍റെ തകർന്ന ഭാഗങ്ങൾ നന്നാക്കാൻ നടപടി വേണമെന്ന്

പുൽപ്പള്ളി: പതിറ്റാണ്ടുകൾ പഴക്കമുള്ള പുൽപ്പള്ളി ടൗണിലെ പോസ്റ്റ് ഓഫീസ് കെട്ടിടത്തിന്‍റെ തകർന്ന ഭാഗങ്ങൾ നന്നാക്കാൻ നടപടി വേണമെന്ന് നാട്ടുകാരും ജീവനക്കാരും ആവശ്യപ്പെട്ടു. കെട്ടിടത്തിന്‍റ സണ്‍ഷേഡാണ് ഏത് നിമിഷവും തകർന്ന് വീഴാവുന്ന അവസ്ഥയിലുള്ളത്. തപാൽ ഓഫീസിലെത്തുന്ന പലരും തലനാരിഴയ്ക്കാണ് രക്ഷപ്പെടുന്നത്. കെട്ടിടത്തിന്‍റെ പല ഭാഗങ്ങളിലെ കോണ്‍ക്രീറ്റ് പാളികളും അടർന്നു വീണുകൊണ്ടിരിക്കുകയാണ്. കഴിഞ്ഞ ദിവസം പെൻഷൻ വാങ്ങാനെത്തിയ വയോധികൻ കോണ്‍ക്രിറ്റ് കഷണം വിഴുന്നതിൽ നിന്ന് തലനാരിഴക്കാണ് രക്ഷപ്പെട്ടത്. ഓഫീസ് കെട്ടിടം അപകടനിലയിൽ ആയിട്ടും നവീകരിക്കാൻ നടപടിയിലെന്നാണ് നാട്ടുകാരുടെ ആക്ഷേപം. കഴിഞ്ഞ വർഷം കെട്ടിടത്തിന്‍റെ മുൻഭാഗങ്ങളിലെ സണ്‍ഷേഡ് നന്നാക്കിയെങ്കിലും കെട്ടിടത്തിന്‍റെ പിൻഭാഗത്തും സൈഡിലുമുള്ള സണ്‍ഷേഡുകൾ നന്നാക്കാൻ അധികൃതർ തയാറാകാത്തതാണ് ഓഫീസിലെത്തുന്ന ജനങ്ങളെ വലയ്ക്കുന്നത്.

കെ.കെ. മമ്മൂട്ടി പടിഞ്ഞാറത്തറ ബാങ്ക് പ്രസിഡന്‍റ്

പടിഞ്ഞാറത്തറ: സർവീസ് സഹകരണ ബാങ്ക് പ്രസിഡന്‍റായി കെ.കെ. മമ്മൂട്ടിയെയും വൈസ് പ്രസിഡന്‍റായി എം.പി. ചെറിയാനെയും തെരഞ്ഞെടുത്തു. വൈത്തിരി സഹകരണ യൂണിറ്റ് ഇൻസ്പെക്ടർ ശ്രീജിത്ത് തെരഞ്ഞെടുപ്പ് നിയന്ത്രിച്ചു. പ്രസിഡന്‍റായി മമ്മൂട്ടിയുടെയും വൈസ് പ്രസിഡന്‍റായി ചെറിയാന്‍റെയും പേര് യഥാക്രമം പി.കെ. വർഗീസ്, എൻ.കെ. അബ്ദുൾ മുനീർ എന്നിവർ നിർദേശിച്ചു. കെ. അബ്ദുൾ നിസാർ, എ.എം. ശാന്തകുമാരി എന്നിവർ പിന്താങ്ങി. പ്രസിസന്‍റിനും വൈസ് പ്രസിഡന്‍റിനും യുഡിഎഫ് പഞ്ചായത്ത് കമ്മിറ്റി സ്വീകരണം നൽകി.

മൂപ്പൈനാട് പഞ്ചായത്ത് പ്രസിഡന്‍റ് തെരഞ്ഞെടുപ്പ് 24ന്

കൽപ്പറ്റ: മൂപ്പൈനാട് പഞ്ചായത്ത് പ്രസിഡന്‍റ് തെരഞ്ഞെടുപ്പ് 24ന് നടത്തും. കോണ്‍ഗ്രസ് ടിക്കറ്റിൽ കടച്ചിക്കുന്ന് വാർഡിൽനിന്നു ഭരണസമിതിയിലെത്തുകയും പിന്നീട് പാർട്ടി നടപടിക്ക് വിധേയനാകുകയും ചെയ്ത വി.എൻ. ശശീന്ദ്രൻ രാജിവച്ച ഒഴിവിലാണ് തെരഞ്ഞെടുപ്പ്. കോണ്‍ഗ്രസിലെ ആർ. ഉണ്ണിക്കൃഷ്ണൻ യുഡിഎഫിന്‍റെ പ്രസിഡന്‍റ് സ്ഥാനാർഥിയാകുമെന്നാണ് സൂചന. പാർട്ടി മൂപ്പൈനാട് മണ്ഡലം മുൻ മണ്ഡലം പ്രസിഡന്‍റാണ് ഇദ്ദേഹം. 16 അംഗങ്ങളാണ് മൂപ്പൈനാട് പഞ്ചായത്ത് ഭരണസമിതിയിൽ. പ്രസിഡന്‍റ് പദം രാജിവച്ച വി.എൻ. ശശീന്ദ്രൻ ഒഴികെ യുഡിഎഫിന് 10 അംഗങ്ങളുണ്ട്. അഞ്ച് അംഗങ്ങളാണ് ഇടതുപക്ഷത്തിന്. യുഡിഎഫ് നിരയിൽ മുസ് ലിം ലീഗിന് ആറും കോണ്‍ഗ്രസിന് നാലും അംഗങ്ങളാണുള്ളത്. പഞ്ചായത്ത് ഭരണസമിതിയുടെ തുടക്കത്തിൽ മുസ്ലിം ലീഗിലെ എ.കെ. റഫീഖായിരുന്നു പഞ്ചായത്ത് പ്രസിഡന്‍റ്. യുഡിഎഫ് ധാരണയനുസരിച്ച് ഇദ്ദേഹം രാജിവച്ച മുറയ്ക്കാണ് കർഷക കോണ്‍ഗ്രസ് മുൻ ജില്ലാ പ്രസിഡന്‍റുമായി വി.എൻ. ശശീന്ദ്രൻ പ്രസിഡന്‍റായത്. കോണ്‍ഗ്രസ് ധാരണപ്രകാരം, ഭരണസമിതി കാലാവധി പൂർത്തിയാക്കാൻ ഒരുവർഷം ബാക്കിയുള്ളപ്പോൾ ശശീന്ദ്രൻ പ്രസിഡന്‍റ് പദം ഒഴിയേണ്ടതായിരുന്നു. എന്നാൽ പാർട്ടി ജില്ലാ നേതൃത്വം ഉൾപ്പെടെ ആവശ്യപ്പെട്ടിട്ടും രാജിവയ്ക്കാൻ അദ്ദേഹം തയാറായില്ല. ഈ സാഹചര്യത്തിൽ കെപിസിസി നിർദേശപ്രകാരം ശശീന്ദ്രന്‍റെ പാർട്ടി അംഗത്വം ഡിസിസി പ്രസിഡന്‍റ് സസ്പെൻഡ് ചെയ്തു. തുടർന്നും പ്രസിഡന്‍റ് പദവിയിൽ തുടർന്ന ശശീന്ദ്രനെതിരേ ഭരണസമിതിയിലെ യുഡിഎഫ് അംഗങ്ങൾ അവിശ്വാസ പ്രമേയത്തിന് നോട്ടീസ് നൽകി. അവിശ്വാസ പ്രമേയത്തിൽ ചർച്ചയ്ക്കും വോട്ടെടുപ്പിനും തീയതി നിശ്ചയിച്ചിരിക്കേയാണ് ശശീന്ദ്രൻ പ്രസിഡന്‍റ് സ്ഥാനം രാജിവച്ചത്.

ബെയ്‌ലി വനിതാ സംരംഭത്തിന് കൈത്താങ്ങായി സാൻതോം ട്രസ്റ്റ്

കൽപ്പറ്റ: പുഞ്ചിരിമട്ടം ഉരുൾ ദുരന്തബാധിതരായ വനിതകളിൽ ഒരു സംഘം രൂപീകരിച്ച ലൈഫ് ലൈൻ വയനാട് റിപ്പണിൽ ബെയ്‌ലി എന്ന പേരിൽ ആരംഭിച്ച ബാഗ് നിർമാണ യൂണിറ്റിന് കൈത്താങ്ങുമായി സാൻതോം വയനാട് ട്രസ്റ്റ്. കൽപ്പറ്റ ആസ്ഥാനമായി പ്രവർത്തിക്കുന്ന ട്രസ്റ്റ് ഭാരവാഹികളായ റവ.ഡോ.തോമസ് ജോസഫ് തേരകം, ബിജോയ് വള്ളിപ്പാലം, ജോസഫ് പുല്ലം, ഇത്തമ്മ ജോസഫ് എന്നിവർ യൂണിറ്റ് സന്ദർശിച്ച് ഷെൽഫുകൾ, കസേരകൾ, സ്ക്രീൻ പ്രിന്‍റിംഗിനുള്ള മേശ എന്നിവ കൈമാറി. ലൈഫ് ലൈൻ വയനാട് പ്രസിഡന്‍റ് നിഖിത, ട്രഷറർ റസിയ എന്നിവരുടെ നേതൃത്വത്തിൽ സാമഗ്രികൾ ഏറ്റുവാങ്ങി. സംരംഭത്തിന്‍റെ പ്രവർത്തനം, വിപണന മേഖലയിൽ നേരിടുന്ന പ്രശ്നങ്ങൾ എന്നിവ സംബന്ധിച്ച് ലൈഫ് ലൈൻ ഭാരവാഹികളുമായി ചർച്ച നടത്തിയ ട്രസ്റ്റ് പ്രതിനിധികൾ സ്ഥാപനം പ്രവർത്തിക്കുന്ന കെട്ടിടത്തിന്‍റെ ഏപ്രിലിലെ വാടക വാഗ്ദാനം ചെയ്തു. ബാഗ് നിർമാണത്തിന് ആവശ്യമായ ഗുണമേൻമയുള്ള ചണം പശ്ചിമബംഗാളിൽനിന്നു മൊത്തവില അടിസ്ഥാനത്തിൽ ലഭ്യമാക്കുന്നതിന് സന്നദ്ധത അറിയിച്ചു. ഉത്പന്നങ്ങളുടെ വിപണി വിപുലീകരണത്തിന് സഹായം വാഗ്ദാനം ചെയ്തു.

മനുഷ്യാവകാശ കമ്മീഷൻ ഇടപെട്ടു: മകൾക്ക് രേഖകൾ നൽകാമെന്ന് മാതാവ്

കൽപ്പറ്റ: ജനിച്ച മതത്തിൽ നിന്നും വിട്ടു നിന്നതിന്‍റെ പേരിൽ വീട്ടുകാരുമായി കലഹിച്ച് പോയ മകളുടെ വ്യക്തിപരമായ രേഖകൾ തിരികെ നൽകാൻ തയാറാണെന്ന് മാതാവ് അറിയിച്ചതായി സുൽത്താൻ ബത്തേരി പോലീസ് ഇൻസ്പെക്ടർ മനുഷ്യാവകാശ കമ്മീഷനെ അറിയിച്ചു. തന്‍റെ ജനന സർട്ടിഫിക്കറ്റ്, പാസ്പോർട്ട്, വിദ്യാഭ്യാസ രേഖകൾ എന്നിവ മാതാവ് വിട്ടുനൽകുന്നില്ലെന്ന് പരാതിപ്പെട്ട് എറണാകുളത്ത് താമസിക്കുന്ന യുവതി സമർപ്പിച്ച പരാതിയിൽ ആവശ്യമായ നടപടികൾ സ്വീകരിക്കാൻ കമ്മീഷൻ ജുഡീഷൽ അംഗം കെ. ബൈജുനാഥ് സുൽത്താൻ ബത്തേരി എസ്എച്ച്ഒക്ക് നിർദേശം നൽകിയിരുന്നു. യുവതിയുടെ അമ്മ ഹൈദരാബാദിലാണ് താമസിക്കുന്നതെന്നും ഫോണിൽ ബന്ധപ്പെട്ടതായും പോലീസ് റിപ്പോർട്ടിൽ പറയുന്നു. പരാതിക്കാരിയുടെ ഓടപ്പള്ളം പള്ളിപ്പടിയിലെ വീട് അടഞ്ഞുകിടക്കുകയാണ്. 2022 ൽ മകളുടെ പാസ്പോർട്ട് പോലീസിന്‍റെ മധ്യസ്ഥതയിൽ തിരികെ നൽകിയതായി മാതാവ് അറിയിച്ചതായി പോലീസ് പറഞ്ഞു. 2019 ൽ മകൾ നിരീശ്വരവാദിയായി വീട്വിട്ട് കുസാറ്റിൽ പഠിക്കാൻ പോയതാണെന്നും മാതാവ് പറഞ്ഞു. മുൻകൂട്ടി അറിയിച്ചാൽ താൻ സുൽത്താൻ ബത്തേരിയിലെത്തി രേഖകൾ മടക്കി നൽകാമെന്ന് മാതാവ് പറഞ്ഞതായി പോലീസ് റിപ്പോർട്ടിൽ പറഞ്ഞു. പരാതിക്കാരിക്ക് സുൽത്താൻ ബത്തേരി പോലീസുമായി ബന്ധപ്പെടാമെന്നും കമ്മീഷൻ ഉത്തരവിൽ പറഞ്ഞു.

കോണ്‍ഗ്രസ് നേതാക്കളെ കേസിൽ കുടുക്കുന്നതിൽ പ്രതിഷേധം

കൽപ്പറ്റ: കോണ്‍ഗ്രസ് നേതാക്കളെ കേസിൽകുടുക്കി പീഡിപ്പിക്കാൻ ശ്രമിക്കുന്നതിനെതിരേ ജില്ലാ കോണ്‍ഗ്രസ് കമ്മിറ്റിയുടെ നേതൃത്വത്തിൽ കൽപ്പറ്റയിൽ പ്രതിഷേധ പ്രകടനം നടത്തി. എഐസിസി അംഗം പി.കെ. ജയലക്ഷ്മി പ്രതിഷേധ യോഗം ഉദ്ഘാടനം ചെയ്തു. 1938 ൽ പ്രസിദ്ധീകരണമാരംഭിച്ച പാർട്ടി പത്രമായ നാഷണൽ ഹെറാൾഡ് ദിനപത്രത്തിന്‍റെ പ്രചാരണം 2008 ൽ നിന്നതിനു ശേഷം മുംബൈയിലും ഡൽഹിയിലും ലക്നൗവിലും ഉള്ള ഓഫീസുകളിലെ ജീവനക്കാരുടെ കോന്പൻസേഷൻ കൊടുത്തു പിരിച്ചുവിട്ടത് സോണിയാ ഗാന്ധിയും ഇന്ത്യൻ നാഷണൽ കോണ്‍ഗ്രസുമാണ്. അതിനുവേണ്ടി ചെലവ് ചെയ്ത 90 കോടി രൂപ തിരിച്ചു ലഭിക്കാത്തതിനാലും സ്ഥാപനങ്ങൾ അനാഥമാകാതിരിക്കുവാനും പാർട്ടിക്ക് വേണ്ടി സോണിയയും രാഹുലും അടങ്ങുന്ന അഞ്ചഗ സമിതി ഏറ്റെടുത്തത് കള്ളപ്പണമാണെന്ന ഇഡിയുടെ കണ്ടെത്തലും കേസെടുക്കലും രാഷ്ട്രീയമായി കോണ്‍ഗ്രസിനെ ഇല്ലായ്മ ചെയ്യാനാണെന്ന് പി.കെ. ജലയക്ഷ്മി ആരോപിച്ചു. യോഗത്തിൽ ഡിസിസി വൈസ് പ്രസിഡന്‍റ് ഒ.വി. അപ്പച്ചൻ അധ്യക്ഷത വഹിച്ചു. കെപിസിസി അംഗം പി.പി. ആലി, എൻ.കെ. വർഗീസ്, മുനിസിപ്പൽ ചെയർമാൻ ടി.ജെ. ഐസക്, എം.എ. ജോസഫ്, ബിനു തോമസ്, എം.ജി. ബിജു, പി.കെ. അബ്ദുൾ റഹിമാൻ, പി. വിനോദ് കുമാർ, ജയപ്രസാദ്, ഉമ്മർ കുണ്ടാട്ടിൽ, ബി. സുരേഷ് ബാബു, പോൾ കൂവക്കൽ, ജോയ് തൊട്ടിത്തറ, ഒ.വി. റോയ്, ജോസ് പടിഞ്ഞാറത്തറ, ഹർഷൻ കോങ്ങാടൻ, ഫൈസൽ പാപ്പിന, പി.കെ. ജോസ്, കെ.കെ. രാജേന്ദ്രൻ, ആർ. ഉണ്ണികൃഷ്ണൻ, ഒ.പി. അബ്ദു റഹിമാൻ തുടങ്ങിയവർ പ്രസംഗിച്ചു.

ഋതുകൃഷ്ണൻ കേരള ടീമിൽ

അന്പലവയൽ: മണിപ്പുരിലെ ഇംഫാലിൽ നടക്കുന്ന ദേശീയ സ്കൂൾ ഗെയിംസിൽ അണ്ടർ 19 ഫുട്ബോൾ ചാന്പ്യൻഷിപ്പിൽ പങ്കെടുക്കുന്ന കേരള ടീമിൽ വയനാട് സ്വദേശി ഇടം നേടി. അന്പലവയൽ ഗവ.വൊക്കേഷണൽ ഹയർ സെക്കൻഡറി സ്കൂൾ പ്ലസ് ടു വിദ്യാർഥി ഋതു കൃഷ്ണനാണ് കേരളത്തിന്‍റെ ജഴ്സിയണിയുക. അന്പലവയൽ നെല്ലാറച്ചാൽ മുറിക്കാനാട് രാധാകൃഷ്ണൻ-ശ്രീജാമോൾ ദന്പതികളുടെ മകനാണ് ഋതു. പറപ്പൂർ എഫ്സിക്കുവേണ്ടി ദേശീയ അണ്ടർ 17 ഐ ലീഗ് ചാന്പ്യൻഷിപ്പിലും സംസ്ഥാന സബ്ജൂണിയർ, ജൂണിയർ ചാന്പ്യൻഷിപ്പിൽ ൽ വയനാട് ടീമിനുവേണ്ടിയും കളിച്ചിട്ടുണ്ട്.

ഗോകുലിന്‍റെ കസ്റ്റഡി മരണം: കളക്ടറേറ്റ് മാർച്ചും ധർണയും നടത്തി

കൽപ്പറ്റ: ഗോകുലിന്‍റെ കസ്റ്റഡി മരണത്തിന് ഉത്തരവാദികളായ പോലീസുകാരെ സർവീസിൽ നിന്ന് നീക്കം ചെയ്ത് ജുഡീഷൽ അന്വേഷണം നടത്തുക, പോക്സൊയുടെ മറവിൽ നടത്തുന്ന ആദിവാസി വേട്ട അവസാനിപ്പിക്കുക എന്നീ ആവശ്യങ്ങൾ ഉന്നയിച്ച് ആദിവാസി ഭാരത് മഹാസഭയുടെയും ഭൂസമര സമിതിയുടെയും സിപിഐ (എംഎൽ) റെഡ് സ്റ്റാറിന്‍റെയും ആഭിമുഖ്യത്തിൽ കളക്ടറേറ്റിലേക്ക് മാർച്ച് നടത്തി. തുടർന്ന് നടന്ന ധർണ സിപിഐ (എംഎൽ) റെഡ് സ്റ്റാർ കേന്ദ്രകമ്മിറ്റി അംഗം എം.കെ. ദാസൻ ഉദ്ഘാടനം ചെയ്തു. പോലീസ് പ്രതികളായതിനാൽ ജുഡീഷൽ അന്വേഷണം നടത്തി കുറ്റവാളികൾക്ക് കർശനശിക്ഷ ഉറപ്പാക്കണമെന്നും അദ്ദേഹം പറഞ്ഞു. എം.കെ. ഷിബു അധ്യക്ഷത വഹിച്ചു. വർഗീസ് വട്ടേക്കാട്, ടി.ജെ. ഡിക്സണ്‍, ടി.സി. സുബ്രഹ്മണ്യൻ, എ.എം. അഖിൽ കുമാർ, വി.എ. ബാലകൃഷ്ണൻ, കെ.വി. പ്രകാശൻ തുടങ്ങിയവർ പ്രസംഗിച്ചു. പി.എം. ജോർജ്, പി.ടി. പ്രേമാനന്ദ്, ബിജി ലാലിച്ചൻ, സി.ജെ. ജോണ്‍സണ്‍, കെ.ജി. മനോഹരൻ തുടങ്ങിയവർ മാർച്ചിന് നേതൃത്വം നൽകി.

നഞ്ചൻകോട്-നിലന്പൂർ റെയിൽപാത യാഥാർഥ്യമാക്കണമെന്ന്

ഗൂഡല്ലൂർ: നഞ്ചൻകോട്-നിലന്പൂർ റെയിൽപാത യാഥാർഥ്യമാക്കണമെന്ന് നീലഗിരി ജില്ലാ വ്യാപാരി സംഘം പ്രസിഡന്‍റ് മുഹമ്മദ് ഫാറൂഖ് കേന്ദ്ര റെയിൽവേ മന്ത്രിക്ക് നൽകിയ നിവേദനത്തിൽ ആവശ്യപ്പെട്ടു. റെയിൽവേ പദ്ധതി യാഥാർഥ്യമായാൽ നീലഗിരിയിലെ ആയിരക്കണക്കിന് ആളുകൾക്ക് ഉപകാരപ്രദമാകും. വ്യാപാരികൾക്കും ഇത് വലിയ ആശ്വാസമാകും. 2009ലാണ് മുതുമല വന്യജീവി സങ്കേതത്തിലൂടെ കടന്നു പോകുന്ന ഗൂഡല്ലൂർ-മൈസൂർ ദേശീയ പാതയിൽ രാത്രി യാത്രാനിരോധനം ഏർപ്പെടുത്തിയത്. റെയിൽപാതയുടെ പ്രവൃത്തികൾ ആരംഭിക്കുന്പോൾ വനമേഖലയിൽ മേൽപാലം നിർമിക്കും ഇതോടെ യാത്രാ പ്രശ്നത്തിനും പരിഹാരമാകുമെന്ന് നിവേദനത്തിൽ ചൂണ്ടികാട്ടിയിട്ടുണ്ട്.

പന്ത്രണ്ടാമത് വയനാട് മഴ മഹോത്സവം ജൂലൈയിൽ

കൽപ്പറ്റ: ജില്ലാ ഭരണകൂടം, ജില്ലാ ടൂറിസം പ്രമോഷൻ കൗണ്‍സിൽ, കേരള ടൂറിസം എന്നിവയുടെ സഹകരണത്തോടെ വയനാട് ടൂറിസം ഓർഗനൈസേഷൻ(ഡബ്ല്യുടിഒ) സംഘടിപ്പിക്കുന്ന 12-ാമത് മഴമഹോത്സവം സ്പ്ലാഷ്-2025 ജൂലൈ 11 മുതൽ 13 വരെ ബത്തേരി സപ്ത റിസോർട്ടിൽ നടക്കും. ഡബ്ല്യുടിഒ പ്രസിഡന്‍റ് കെ.ആർ. വാഞ്ചീശ്വരൻ, വൈസ് പ്രസിഡന്‍റ് സി.സി. അഷ്റഫ്, ട്രഷറർ ബാബു വൈദ്യർ, മാനേജ്മെന്‍റ് കമ്മിറ്റി അംഗങ്ങളായ ഇ.കെ. അനിൽ, ബിജു തോമസ്, എം.ജെ. സുനിൽകുമാർ, സ്പ്ലാഷ്-2025 കണ്‍വീനർ വിഷ്ണു എം. ദാസ് എന്നിവർ വാർത്താസമ്മേളനത്തിൽ അറിയിച്ചതാണ് വിവരം. 12, 13 തീയതികളിൽ നടത്തുന്ന ബിസിസനസ് ടു ബിസിനസ് മീറ്റാണ് മഴമഹോത്സവത്തിലെ പ്രധാന പരിപാടി. മഡ് ഫുട്ബോൾ, വോളിബോൾ മത്സരങ്ങൾ, സാംസ്കാരിക പരിപാടികൾ എന്നിവയും സ്പ്ലാഷിന്‍റെ ഭാഗമാണ്. കേരളത്തിന് അകത്തും പുറത്തും നിന്നായി 200 ഓളം ടൂറിസം സംരംഭകരും 500 ഓളം ട്രാവൽ ഏജന്‍റുമാരും ബിസിനസ് ടു ബിസിനസ് മീറ്റർ പങ്കെടുക്കും. വയനാടിന്‍റെ വിനോദ സഞ്ചാര മേഖലയ്ക്ക് ഉണർവു പകരാനും തദ്ദേശീയ ടൂറിസം വികസനത്തിനും വിഭാവനം ചെയ്ത മഴമഹോത്സവം ഇതിനകം വിദേശ രാജ്യങ്ങളിലടക്കം ശ്രദ്ധ നേടിയതായി ഡബ്ല്യുടിഒ ഭാഹവാഹികൾ പറഞ്ഞു.

ക്രൈസ്തവർ ഇന്ന് പെസഹാ ആചരിക്കും

പുൽപ്പള്ളി: ക്രൈസ്തവ വിശ്വാസി സമൂഹം അന്പത് നോന്പാചരണത്തിന്‍റെ പ്രധാന ദിനങ്ങളിലേക്ക് കടന്നതോടെ വിശ്വാസി സമൂഹത്തിന് ഇനി പ്രാർത്ഥനയുടെ നാളുകൾ. കുരിശുമരണത്തിനുമുന്പ് ശിഷ്യൻമാർക്കൊപ്പം യേശുക്രിസ്തുവിന്‍റെ അന്ത്യ അത്താഴത്തിന്‍റെ ഓർമ്മപുതുക്കിയാണ് ക്രൈസ്തവർ ഇന്ന് പെസഹാവ്യാഴം ആചരിക്കുന്നത്. വിനയത്തിന്‍റെയും ത്യാഗത്തിന്‍റെയും സഹനത്തിന്‍റെയും വിശുദ്ധവാരാചരണം പെസഹാ വ്യാഴത്തെ തീവ്രമാക്കും. അന്പത് നോന്പാചരണത്തിന്‍റെ പ്രധാന ദിനമായ ഇന്ന് ദേവാലയങ്ങളിൽ കാൽ കഴുകൽ ശുശ്രൂഷയും മറ്റ് പ്രാർത്ഥനകളും നടക്കും. അന്ത്യ അത്താഴവേളയിൽ യേശു ശിഷ്യൻമാരുടെ പാദങ്ങൾ കഴുകി ചുംബിച്ചതിന്‍റെ സ്മരണയിലാണ് ഇന്ന് കാൽകഴുകൽ ശുശ്രൂഷ പള്ളികളിൽ നടക്കുന്നത്. യേശുദേവന്‍റെ കുരിശു മരണത്തിന്‍റെ സ്മരണയിൽ ക്രൈസ്തവർ നാളെ ദുഖവെള്ളി ആചരിക്കും. ഗാഗുൽത്താമലയിലേക്ക് കുരിശുമായി പീഢകൾ സഹിച്ച് യേശു നടത്തിയ അവസാന യാത്രയുടേയും അതിന് ശേഷമുള്ള കുരിശു മരണത്തിന്‍റെയും ഓർമ്മ പുതുക്കിയാണ് ദുഖവെള്ളി ആചരിക്കുന്നത്. ദുഖവെള്ളി ശുശ്രൂഷയിലും കുരിശിന്‍റെ വഴിയിലും വിശ്വാസികൾ പങ്കുചേരും. മാനവരാശിയുടെ പാപമോചനത്തിനും കുരിശിൽ മരണം വരിച്ച യേശുക്രിസ്തുവിന്‍റെ ഉയിർപ്പിനെ അനുസ്മരിച്ച് ശനിയാഴ്ച വൈകുന്നേരം മുതൽ ദേവാലയങ്ങളിൽ ഉയിർപ്പ് തിരുനാളിന്‍റെ ചടങ്ങുകളും നടക്കും.

സന്തോഷ സന്ദേശവുമായി ഹാപ്പി ഫാമിലി ശിൽപങ്ങൾ

സുൽത്താൻ ബത്തേരി: ഹാപ്പിനസ് നഗരമെന്ന പേരിൽ അറിയപ്പെടുന്ന സുൽത്താൻ ബത്തേരിയിൽ സന്തോഷ സൂചിക ഉയർത്തുന്നതിന്‍റ ഭാഗമായി നവീനമായ പദ്ധതിയുമായി നഗരസഭയും ജെസിഐ ബത്തേരിയും മുന്നോട്ടുവന്നു. ഹാപ്പി ഫാമിലി എന്ന പേരിൽ നിർമിച്ച പുതിയ ശിൽപങ്ങൾ ജനങ്ങൾക്ക് സന്തോഷം പകരുകയാണ്. നഗരത്തിലെ ചുങ്കത്ത് മൈസൂരു, ഉൗട്ടി റോഡുകൾ തിരിയുന്ന പ്രധാന ജംഗ്ഷനിലാണ് ഈ ശിൽപങ്ങൾ സ്ഥാപിച്ചിരിക്കുന്നത്. പ്രശസ്ത ശിൽപി ബിനു തത്തുപാറയാണ് ഈ മനോഹര സൃഷ്ടികൾ രൂപകൽപ്പന ചെയ്തിരിക്കുന്നത്. സന്തോഷ കുടുംബത്തിന്‍റെ പ്രതീകമായി അച്ഛനും അമ്മയും രണ്ട് കുട്ടികളുമടങ്ങുന്ന കുടുംബത്തിന്‍റെ ആകൃതിയിലാണ് ഈ ശിൽപങ്ങൾ ഒരുക്കിയിരിക്കുന്നത്. രൂപകല്പനയും നിർമാണവും സ്ക്വയർ പൈപ്പുകൾ വെൽഡ് ചെയ്ത് അതിന് ഫൈബർ കൊണ്ടു പുറംചട്ടയുണ്ടാക്കി. ആധുനിക ശൈലിയിലുള്ള ചതുരാകൃതികളിലൂടെയാണ് ശിൽപങ്ങൾ. മുഴുവൻ രൂപങ്ങൾക്കും നീല, പച്ച, മഞ്ഞ, പിങ്ക്, വെള്ള, ഓറഞ്ച് തുടങ്ങിയ സന്തോഷം പകരുന്ന നിറങ്ങൾ നൽകിയിട്ടുണ്ട്.

ബീച്ചനഹള്ളി ഡാം തുറന്നുവിട്ടതോടെ കബനി നദിയിൽ ജലവിതാനം താഴ്ന്നു

പുൽപ്പള്ളി: കുടിയേറ്റ മേഖലയിലെ പ്രധാന ജലസ്രോതസായ കബനി നദിയിൽ ജലനിരപ്പ് അതിവേഗം താഴുന്നത് ആശങ്കയ്ക്കിടയാക്കുന്നു. ഒരാഴ്ചക്കുള്ളിലാണ് ജലനിരപ്പ് വൻതോതിൽ കുറഞ്ഞത്. കർണാടകയിൽ കൃഷിക്കും കുടിവെള്ളത്തിനുമായി ബീച്ചനഹള്ളി അണക്കെട്ടിൽ നിന്ന് കൂടുതൽ വെള്ളം എടുത്തുതുടങ്ങിയതാണ് ഇതിന് കാരണം. ജില്ലയിൽ പല ഭാഗങ്ങളിലും വേനൽമഴ ലഭിക്കുന്നുണ്ടെങ്കിലും കബനിയിലൂടെ ഒഴുകിയെത്തുന്ന വെള്ളം ബീച്ചനഹള്ളി ഡാം തുറന്ന് കൊടുത്തതോടെ പുഴയുടെ പല ഭാഗങ്ങളും വറ്റിവരണ്ട അവസ്ഥയാണ്. വേനൽമഴ ലഭിച്ചില്ലെങ്കിൽ കബനി നദിയിൽ നീരൊഴുക്ക് കുറയുന്നത് ജലക്ഷാമത്തിനിടയാക്കും. ഈ അവസ്ഥ തുടർന്നാൽ താമസിയാതെ കബനി കുടിവെള്ള പദ്ധതിയേയും ജലക്ഷാമം ദോഷകരമായി ബാധിക്കുമോ എന്ന ആശങ്കയിലാണ് ജനങ്ങൾ. കബനി നദിയിൽ ജലവിതാനം കുത്തനെ താഴ്ന്നതോടെ പുഴയിൽ പാറക്കെട്ടുകൾ മാത്രമായ അവസ്ഥയാണ്.

ടൗണ്‍ഷിപ് നിർമാണം ആറുമാസത്തിനകം പൂർത്തിയാക്കും: എസ്. സുഹാസ്

കൽപ്പറ്റ: പുഞ്ചിരിമട്ടം ഉരുൾ ദുരന്തബാധിതരുടെ പുനരധിവാസത്തിന് എൽസ്റ്റൻ എസ്റ്റേറ്റിൽ ഏറ്റെടുത്ത ഭൂമിയിൽ ടൗണ്‍ഷിപ് നിർമാണം ആറ് മാസത്തിനകം പൂർത്തിയാക്കുമെന്ന് സ്പെഷൽ ഓഫീസർ എസ്. സുഹാസ്. ടൗണ്‍ഷിപ്പ് പ്രാരംഭപ്രവർത്തനങ്ങൾ വിലയിരുത്തുന്നതിന് എൽസ്റ്റൻ എസ്റ്റേറ്റിലെ പുൽപ്പാറയിൽ എത്തിയ അദ്ദേഹം മാധ്യമപ്രവർത്തകരുമായി സംസാരിക്കുകയായിരുന്നു. ടൗണ്‍ഷിപ് നിർമാണത്തിന് ഭൂമി കരാർ സ്ഥാപനത്തിന് കൈമാറിയിട്ടുണ്ട്. മുഖ്യമന്ത്രി ശിലാസ്ഥാപനം നടത്തിയ വീടിന്‍റെ പണി തുടങ്ങി. റോഡ് പ്രവൃത്തിക്ക് അടുത്ത ദിവസം തുടക്കമാകും. ടൗണ്‍ഷിപ്പിൽ എത്ര വീടുകൾ നിർമിക്കണമെന്നതിൽ ഭവന പദ്ധതി അന്തിമ ഗുണഭോക്തൃ പട്ടിക പ്രസിദ്ധപ്പെടുത്തുന്നതോടെ വ്യക്തതയാകും. ഏറ്റെടുത്ത ഭൂമിയിലെ തേയിലഫാക്ടറി കെട്ടിടം പൊതു ആവശ്യത്തിന് ഉപയോഗപ്പെടുത്തും. മഴക്കാലത്ത് ഷെൽട്ടർ ആയി പ്രയോജനപ്പെടുത്താവുന്നതാണ് കെട്ടിടമെന്നും സ്പെഷൽ ഓഫീസർ പറഞ്ഞു.

കാറ്റിലും മഴയിലും ഫാം തകർന്നു: 3,500 ഓളം കോഴികൾ ചത്തു

കൽപ്പറ്റ: കാറ്റിലും മഴയിലും കോഴിഫാം തകർന്ന് 3,500 ഓളം കോഴികൾ ചത്തു. വയനാട് നടവയൽ പുഞ്ചക്കുന്നിൽ കഴിഞ്ഞ ദിവസമാണ് സംഭവം. പുത്തൻപറന്പിൽ ജോബിഷിന്‍റെ ഫാമാണ് തകർന്നത്. കനത്ത മഴയ്ക്കിലെ ഫാമിന്‍റെ മേൽക്കൂര പൂർണമായും കാറ്റെടുത്തു. ഏഴ് ലക്ഷം രൂപയുടെ നഷ്ടം കണക്കാക്കുന്നതായി ജോബിഷ് പറഞ്ഞു. കാറ്റും മഴയും നടവയൽ ഉൾപ്പെടെ പൂതാടി പഞ്ചായത്തിന്‍റെ വിവിധ ഭാഗങ്ങളിൽ നാശം വിതച്ചു. നിരവധി തോട്ടങ്ങളിൽ റബർ മരങ്ങളും വാഴയും ഒടിഞ്ഞുവീണു.

ക്ഷീര സംഘം പാലളവ് നിർത്തിയതിൽ പ്രതിഷേധവുമായി കർണാടക അതിർത്തി ഗ്രാമങ്ങളിലെ ക്ഷീരകർഷകർ

പുൽപ്പള്ളി: കേരളത്തിലെ ക്ഷീരസംഘങ്ങളിൽ പാലളക്കാൻ അനുവദിക്കണമെന്നാവശ്യപ്പെട്ട് കർണാടക അതിർത്തി ഗ്രാമങ്ങളിലെ ക്ഷീര കർഷകർ കബനിഗിരി ക്ഷീരസംഘം ഓഫീസിന് മുൻപിൽ പാലുമായി പ്രതിഷേധിച്ചു. ഒരു മാസം മുൻപ് നിർത്തിവച്ച പാൽ അളവ് പുനരാരംഭിച്ചെങ്കിലും മുന്നറിയിപ്പില്ലാതെ പാൽ അളവ് വീണ്ടും നിർത്തിവച്ചതിനാണ് ക്ഷീര കർഷകർ പ്രതിഷേധിച്ചത്. വീട്ടമ്മാർ ഉൾപ്പടെയുള്ളവർ പ്രതിഷേധിക്കാനെത്തി. മൈസൂരു ക്ഷീര സംഘം യൂണിയന്‍റെ പരാതിയുള്ളതിനാലാണ് കേരളത്തിലെ ക്ഷീര സംഘങ്ങളിൽ പാൽ സംഭരിക്കാൻ കഴിയാത്തതെന്നും കർഷകരെ ബുദ്ധിമുട്ടിക്കുന്നതിനോട് താത്പര്യമില്ലെന്നും അതേസമയം അനധികൃതമായി കർണാടകയിൽ നിന്നുള്ള പാൽ സംഭരിക്കുന്നതിന് സാങ്കേതിക പ്രയാസങ്ങളുണ്ടെന്നും കർണാടക മൃഗസംരക്ഷണ മന്ത്രിയോ ക്ഷീരസംഘം യൂണിയനോ ആവശ്യപ്പെട്ടാൽ കേരളത്തിൽ പാൽ അളക്കുന്നതിന് തടസമില്ലെന്നാണ് അധികൃതരുടെ നിലപാട്. കേരളത്തിലെക്ഷീര സംഘങ്ങളിൽ വർഷങ്ങളായി പാൽ അളന്നതിനാൽ കർണാടകയിലെ അധികൃതർ പാൽ വാങ്ങാൻ തയാറാകുന്നില്ലെന്നാണ് കർഷകർ പറയുന്നത്. ക്ഷീരമേഖലകളെ ആശ്രയിച്ചു കഴിയുന്ന ക്ഷീരകർഷകരെ സഹായിക്കണമെന്ന് പ്രതിഷേധക്കാർ ആവശ്യപ്പെട്ടു.

ശ്രേയസ് ലഹരി വിരുദ്ധ കൂട്ടായ്മ നടത്തി

പുൽപ്പള്ളി: ലഹരിക്കെതിരേ എല്ലാ കോണുകളിൽ നിന്നും ശബ്ദം ഉയരണമെന്ന് ബത്തേരി ബിഷപ് ഡോ. ജോസഫ് മാർ തോമസ് പറഞ്ഞു. ശ്രേയസ് പുൽപ്പള്ളി മേഖലയുടെ നേതൃത്വത്തിൽ നടത്തിയ ലഹരി വിരുദ്ധ കൂട്ടായ്മ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ബോധവത്കരണ റാലിയോടെ ആയിരുന്നു തുടക്കം. ടൗണിൽ ലഹരിക്കെതിരേ വിവിധ തരത്തിലുള്ള കലാരൂപങ്ങളോടെ ആയിരുന്നു റാലി. ഫാ. ജോർജ് കാലായിൽ അധ്യക്ഷത വഹിച്ചു. ഗ്രാമപഞ്ചായത്ത് പ്രസിഡന്‍റുമാരായ ടി.എസ്. ദിലീപ് കുമാർ, പി.കെ. വിജയൻ, ജില്ലാ പഞ്ചായത്ത് അംഗം ബിന്ദു പ്രകാശ്, പുൽപ്പള്ളി സിഐ കെ.എസ്. അജേഷ്, കെ.ഒ. ഷാൻസണ്‍, അജിൻ തോമസ് എന്നിവർ പ്രസംഗിച്ചു. കുട്ടികൾ ഫ്ളാഷ് മോബും അവതരിപ്പിച്ചു.

മരക്കടവ്, തോണിക്കടവ് പ്രദേശങ്ങളിൽ ലഹരി സംഘങ്ങളുടെ വിളയാട്ടം

പുൽപ്പള്ളി: മരക്കടവ് പ്രദേശത്ത് ലഹരി സംഘങ്ങളുടെ വിളയാട്ടം വർധിച്ചതോടെ നാടിന്‍റെ സമാധാനാന്തരീക്ഷം തകരുന്നു. കർണാടകയിൽ നിന്ന് കബനിതീരംവഴി എത്തുന്ന ലഹരി വസ്തുക്കൾ ടൗണിൽ എത്തിച്ച് വില്പന നടത്തുന്ന സംഘങ്ങൾ വർധിച്ചു. യുവാക്കൾ ഉൾപ്പെടുയുള്ളവരാണ് ലഹരി വില്പനയിൽ സജീവമായി പ്രവർത്തിക്കുന്നത്. പുൽപ്പള്ളി മേഖലയിൽ 24 മണിക്കൂറും എക്സൈസിന്‍റെ നിരീക്ഷണമുണ്ടായിട്ടും ലഹരി വില്പന സംഘങ്ങളെ പിടികൂടാൻ കഴിയുന്നില്ലെന്നാണ് നാട്ടുകാർ പറയുന്നത്. ലഹരി തേടുന്ന യുവാക്കളുടെ എണ്ണം വർധിച്ചതോടെ ലഹരി വില്പന സംഘങ്ങളെ സഹായിക്കാൻ കൂടുതൽ യുവാക്കളും രംഗത്തുണ്ട്. ഇവരാണ് വില്പന മേഖലയിൽ സജീവമായിരിക്കുന്നത്. ലഹരി വില്പന സംഘങ്ങളെ പിടികൂടാൻ എക്സൈസും പോലീസും തയാറാകാത്തത് കാരണം ഇവരെപ്പറ്റിയുള്ള വിവരങ്ങൾ കൈമാറാനും ആളുകൾക്ക് കഴിയാത്ത അവസ്ഥയാണ്. മരക്കടവിൽ കഴിഞ്ഞ ദിവസം ലഹരി സംഘങ്ങൾ തമ്മിൽ ഏറ്റുമുട്ടിയെങ്കിലും പരാതി നൽകാതെ പ്രശ്നം ഒതുക്കിതീർക്കുകയാണുണ്ടായത്. മേഖലയിൽ വർധിച്ചുവരുന്ന ലഹരി വില്പന സംഘങ്ങളെ നിയന്ത്രിക്കാൻ പോലീസും എക്സൈസും കർശന നടപടി സ്വീകരിക്കണമെന്നാണ് ജനങ്ങളുടെ ആവശ്യം.

വൈക്കോൽ സംഭരണകേന്ദ്രത്തിൽ തീപിടിത്തം

വെള്ളമുണ്ട: തരുവണ ടൗണ്‍ പരിസരത്തെ വൈക്കോൽ സംഭരണകേന്ദ്രത്തിൽ തീപിടിത്തം. 500 ഓളം വൈക്കോൽ കറ്റ കത്തിനശിച്ചു. ഇന്നലെ ഉച്ചയോടെയാണ് സംഭവം. ശങ്കരോത്ത് ഷമീറിന്‍റെതാണ് സംഭരണകേന്ദ്രം. മാനന്തവാടിയിൽനിന്നു അഗ്നി-രക്ഷാസേനയുടെ രണ്ട് യൂണിറ്റ് എത്തി മൂന്നു മണിക്കൂറോളം പരിശ്രമിച്ചാണ് തീയണച്ചത്. സ്റ്റേഷൻ ഓഫീസർ പി.കെ. ഭരതൻ, അസിസ്റ്റന്‍റ് സ്റ്റേഷൻ ഓഫീസർ ഐ. ജോസഫ്, ഫയർ ആൻഡ് റെസ്ക്യൂ ഓഫീസർമാരായ എം.പി. രമേശ്, കെ.എ. സനൂപ്, ടി. ബിനീഷ് ബേബി, വി.ഡി. അമൃതേഷ്, ദീപ്തലാൽ, ആർ.സി. ലെജിത്, ജെ. ജ്യോതിസൻ, ഹോം ഗാർഡുമാരായ ജോളി ജയിംസ്, വി.ജി. രൂപേഷ്, പി.യു. ജോബി എന്നിവരാണ് രക്ഷാപ്രവർത്തനം നടത്തിയത്.

കത്തിനശിച്ച പീടിക പുനർനിർമിച്ചു നൽകി

സുൽത്താൻ ബത്തേരി: ഷോർട്ട് സർക്യൂട്ട് മൂലം ഉണ്ടായ തീപിടിത്തത്തിൽ കത്തിനശിച്ച പീടിക വ്യാപാരി വ്യവസായി ഏകോപന സമിതി ജില്ലാ കമ്മിറ്റി പുനർനിർമിച്ചുനിൽകി. മൂലങ്കാവിലെ റെജിമോന്‍റെ കടയാണ് പുനർനിർമിച്ചത്. ഫെബ്രുവരി 15നായിരുന്നു തീപിടിത്തം. കടയിലുണ്ടായിരുന്ന ഫാൻസി, ഫു‌ട്‌വേർ ഇനങ്ങളും ഫോട്ടോസ്റ്റാറ്റ് മെഷീൻ, ഫ്രിഡ്ജ് എന്നിവയും നശിച്ചു. ഏകദേശം മൂന്നു ലക്ഷം രൂപയുടെ നഷ്ടമാണ് ഉണ്ടായത്. പുനർനിർമിച്ച പീടിക വിഷുക്കൈനീട്ടമായി റെജിമോനു കൈമാറി. സമിതി ജില്ലാ പ്രസിഡന്‍റ് ജോജിൻ ടി. ജോയി ഷോപ്പ് ഉദ്ഘാടനം ചെയ്തു. മൂലങ്കാവ് യൂണിറ്റ് പ്രസിഡന്‍റ് സോമൻ അധ്യക്ഷത വഹിച്ചു. സമിതി വനിതാവിംഗ് സംസ്ഥാന പ്രസിഡന്‍റ് ശ്രീജ ശിവദാസ്, യൂത്ത്വിംഗ് ജില്ലാ പ്രസിഡന്‍റ് സംഷാദ് ബത്തേരി, ബത്തേരി നിയോജകമണ്ഡലം ചെയർമാൻ എം.ആർ. സുരേഷ്ബാബു, കണ്‍വീനർ സണ്ണി മണ്ഡപത്തിൽ, ട്രഷറർ അനിൽ കൊട്ടാരം, ബത്തേരി യൂണിറ്റ് പ്രസിഡന്‍റ് പി.വി. മത്തായി, സെക്രട്ടറി യൂനുസ് ചേനക്കൽ, ശ്രീജിത്ത്, നൗഷാദ് മിന്നാരം, ശ്രീജിത്ത് ജയപ്രകാശ്, അബ്ദുൾ ജലീൽ എന്നിവർ പ്രസംഗിച്ചു.

എൽസ്റ്റൻ എസ്റ്റേറ്റ് തൊഴിലാളികൾ വിഷുദിനത്തിൽ പട്ടിണിസമരം നടത്തി

കൽപ്പറ്റ: പുഞ്ചിരിമട്ടം ഉരുൾ ദുരന്തബാധിതർക്ക് ടൗണ്‍ഷിപ് നിർമിക്കുന്നതിന് സർക്കാർ ഏറ്റെടുത്ത എൽസ്റ്റൻ എസ്റ്റേറ്റിലെ തൊഴിലാളികൾ വിഷു ദിനത്തിൽ പട്ടിണി സമരം നടത്തി. മാനേജ്മെന്‍റ് കുടിശികയാക്കിയ ആനുകൂല്യങ്ങളും കൂലിബാക്കിയും ഉടൻ ലഭ്യമാക്കണമെന്ന് ആവശ്യപ്പെട്ടായിരുന്നു സമരം. ഐഎൻടിയുസി ജില്ലാ പ്രസിഡന്‍റ് പി.പി. ആലി ഉദ്ഘാടനം ചെയ്തു. കെ.കെ. രാജേന്ദ്രൻ അധ്യക്ഷത വഹിച്ചു. വിവിധ ട്രേഡ് യൂണിയൻ നേതാക്കളായ യു. കരുണൻ, എൻ.ഒ. ദേവസി, ഡി. രാജൻ, എം. സെയ്തലവി, നജീബ് പിണങ്ങോട്, കെ. സുരേഷ്, മുഹമ്മദ്ബാവ പെരുന്തട്ട, അഹമ്മദുകുട്ടി പെരുന്തട്ട എന്നിവർ പ്രസംഗിച്ചു.

അരിച്ചാക്കിൽ നെല്ലിനം വ്യക്തമാക്കണം: മനുഷ്യാവകാശ കമ്മീഷൻ

കൽപ്പറ്റ: അരി തരം മാറ്റി വിൽക്കുന്നത് തടയാൻ ചാക്കുകളിൽ നെല്ലിനത്തിന്‍റെ വിവരം ഉൾപ്പെടുത്തണമെന്ന ആവശ്യം പരിഗണിക്കണമെന്ന് മനുഷ്യാവകാശ കമ്മീഷൻ ജുഡീഷൽ അംഗം കെ. ബൈജുനാഥ് ഭക്ഷ്യസുരക്ഷാ കമ്മീഷണർക്ക് നിർദേശം നൽകി. അരി നിറം കലർത്തി വിൽക്കുന്നതു തടയുന്നതിന് നടപടി ആവശ്യപ്പെട്ട് അന്പലവയൽ കുന്നേൽ അജി തോമസ് സമർപ്പിച്ച ഹർജിയിലാണ് കമ്മീഷൻ നിർദേശം. അരിയുടെ ഗുണനിലവാരം ഉറപ്പാക്കുന്നതിന് റൈസ് ക്വാളിറ്റി സ്റ്റാൻഡേർഡൈസേഷൻ നടപ്പാക്കുന്നത് പരിശോധിക്കണമെന്നും കമ്മീഷൻ നിർദേശിച്ചു. ഹർജിയിൽ കമ്മീഷൻ ഭക്ഷ്യസുരക്ഷാ കമ്മീഷണറുടെ റിപ്പോർട്ട് തേടിയിരുന്നു. ഭക്ഷ്യസാധനങ്ങളിൽ മായം കലർത്തുന്നത് കർശനമായി തടയുന്നുണ്ടെന്നും പരിശോധനകൾ നടത്തുന്നുണ്ടെന്നുമാണ് കമ്മീണർ അറിയിച്ചത്. 2023 ഏപ്രിൽ മുതൽ 2024 ജൂണ്‍ വരെ നടത്തിയ 1,233 സാംപിൾ പരിശോധനയിൽ അരിയിൽ നിറം ചേർക്കുന്നത് കണ്ടെത്താൻ കഴിഞ്ഞിട്ടില്ല. 54 സാംപിളുകൾ ഉപയോഗയോഗ്യമല്ലെന്ന് കണ്ടെത്തിയതായും കമ്മീഷണറുടെ റിപ്പോർട്ടിലുണ്ട്.

പട്ടയം ക്രമവത്കരണത്തിന് അധിക തുക: നിർദേശം തള്ളണമെന്ന് കെ.ജെ. ദേവസ്യ

കൽപ്പറ്റ: ഭൂവില, സബ്ഡിവിഷൻ ചാർജ്, വൃക്ഷവില തുടങ്ങിയവ അടച്ച് നേടിയ പട്ടയത്തിന്‍റെ ക്രമവത്കരണത്തിന് എന്ന പേരിൽ അധികതുക ഈടാക്കുന്നതിന് റവന്യു വകുപ്പ് നിയമ വകുപ്പിന്‍റെ അംഗീകാരത്തിന് രഹസ്യസ്വാഭാവത്തോടെ സമർപ്പിച്ച നിർദേശം തള്ളണമെന്ന് കേരള കോണ്‍ഗ്രസ്-എം സംസ്ഥാന ജനറൽ സെക്രട്ടറി കെ.ജെ. ദേവസ്യ മുഖ്യമന്ത്രി പിണറായി വിജയനും പ്രതിപക്ഷ നേതാവ് വി.ഡി. സതീശനും നൽകിയ നിവേദനത്തിൽ ആവശ്യപ്പെട്ടു. റവന്യു വകുപ്പിന്‍റെ നീക്കത്തിന് ന്യായീകരണമില്ല. ജനങ്ങളെ കുരുക്കിലാക്കാനും അവരുടെ മൗലികാവകാശം കവരാനുമുള്ള പദ്ധതിക്ക് സർക്കാർ കൂട്ടുനിൽക്കരുത്. ഭൂനിയമങ്ങളിലെ അപാകതകൾ പരിഹരിക്കണം. ജനപക്ഷ നിലപാടും ഏകീകൃത അവകാശ സ്വാഭാവമുള്ള ഭൂപരിഷ്കരണ നിയമം നടപ്പാക്കാൻ തയാറാകണം. 2023ൽ ഭേദഗതി ചെയ്ത ഭൂനിയമത്തിന് ചട്ടങ്ങളുണ്ടാക്കാൻ കഴിയാത്തത് ഗുരുതര വീഴ്ചയാണ്. റവന്യു ഭൂമി, ജൻമഭൂമി തുടങ്ങി വിവിധ അവകാശക്രമങ്ങളിലുള്ള പട്ടയഭൂമിയിൽ വീടുകൾക്കു പുറമേ ജീവനോപാധികൾക്കായും നിർമാണം നടന്നിട്ടുണ്ട്. ഇതെല്ലാം അനധികൃതമാണെന്ന് ആരോപിച്ച് തത്പരകക്ഷികൾ ഇടപെട്ടതിനെത്തുടർന്ന് വിവിധതരം ഭൂമികളിൽ നിർമാണാനുമതിക്ക് ഹൈക്കോടതിയുടേതടക്കം കർശന വിലക്കുകൾ ഉണ്ടായി. ഈ സാഹചര്യത്തിലാണ് 2023ൽ നിയമം ഭേദഗതി ചെയ്തത്. നിയമസഭ ഐകകണ്ഠ്യേനയാണ് നിയമ ഭേദഗതി പാസാക്കിയതെന്ന് നിവേദനത്തിൽ ചൂണ്ടിക്കാട്ടി.

പുനരധിവാസത്തിന് ഏറ്റെടുത്ത ഭൂമിയിലെ തൊഴിലാളി പ്രശ്നം: മുഖ്യമന്ത്രിക്ക് നിവേദനം നൽകി

കൽപ്പറ്റ: പുഞ്ചിരിമട്ടം ഉരുൾ ദുരന്തബാധിതരുടെ പുനരധിവാസത്തിന് ഏറ്റെടുത്ത എൽസ്റ്റൻ എസ്റ്റേറ്റിലെ തൊഴിലാളികളുടെ പ്രശ്നം പരിഹരിക്കുന്നതിന് മുഖ്യമന്ത്രി പിണറായി വിജയന് ടി. സിദ്ദിഖ് എംഎൽഎ നിവേദനം നൽകി. ടൗണ്‍ഷിപ് നിർമാണത്തിന് ഏറ്റെടുത്ത തേയിലത്തോട്ടത്തിൽ നിലവിൽ ജോലി ചെയ്യുന്നവർക്കും ജോലിയിൽനിന്നു വിരമിച്ചവർക്കും എസ്റ്റേറ്റ് മാനേജ്മെന്‍റ് ആനുകൂല്യങ്ങൾ നൽകാനുണ്ട്. തൊഴിലാളികളുടെ ജോലി സുരക്ഷയിൽ സർക്കാരോ മാനേജ്മെന്‍റോ ഉറപ്പ് നൽകിയിട്ടില്ല. തൊഴിലാളികളും വിവിധ ട്രേഡ് യൂണിയൻ നേതാക്കളും പറയുന്നതനുസരിച്ച് പ്രൊവിഡന്‍റ് ഫണ്ട്, ഗ്രാറ്റുവിറ്റി, കൂലി ബാക്കി ഉൾപ്പെടെ ഏകദേശം 11 കോടി രൂപയാണ് മാനേജ്മെന്‍റ് നൽകേണ്ടത്. പുനരധിവാസത്തിന് തൊഴിലാളികൾ എതിരല്ല. ആനുകൂല്യങ്ങളും തൊഴിൽ സുരക്ഷയിൽ ഉറപ്പും എന്ന ന്യായമായ ആവശ്യം മാത്രമാണ് അവർ ഉന്നയിക്കുന്നത്. വിഷയത്തിൽ മുഖ്യമന്ത്രി അടിയന്തരമായി ഇടപെടണം. തൊഴിലാളികളുടെ ആശങ്ക പരിഹരിക്കണമെന്നും നിവേദനത്തിൽ ആവശ്യപ്പെട്ടു.

മരുതോലിപ്പടി റോഡ് ഉദ്ഘാടനം ചെയ്തു

ചെന്നലോട്: തരിയോട് പഞ്ചായത്തിലെ ചെന്നലോട് വാർഡിൽ ഉൾപ്പെട്ട മരുതോലിപ്പടി റോഡ് തൊഴിലുറപ്പ് പദ്ധതിയിൽ ഉൾപ്പെടുത്തി കോണ്‍ക്രീറ്റ് ചെയ്തു. റോഡ് ഉദ്ഘാടനം പഞ്ചായത്ത് പ്രസിഡന്‍റ് ഷമീം പാറക്കണ്ടി നിർവഹിച്ചു. വികസന സമിതി അംഗം എ.കെ. മുബഷിർ അധ്യക്ഷത വഹിച്ചു. വികസന സമിതി അംഗങ്ങൾ, തൊഴിലുറപ്പ് തൊഴിലാളികൾ, പ്രദേശവാസികൾ തുടങ്ങിയവർ പങ്കെടുത്തു. ഷൈനി കൂവക്കൽ സ്വാഗതവും ഷാജി മരുതോലിക്കൽ നന്ദിയും പറഞ്ഞു.

ക്രാഷ്ഗാർഡ് റോപ്പ് ഫെൻസിംഗ് നിർമാണത്തിൽ അപാകതയെന്ന്

കാട്ടിക്കുളം: പാൽവെളിച്ചം, കുറുവ പ്രദേശങ്ങളിലെ ക്രാഷ്ഗാർഡ് റോപ്പ് ഫെൻസിംഗ് നിർമാണത്തിൽ അപാകതയുണ്ടെന്ന് വന്യമൃഗശല്യ പ്രതിരോധ ആക്‌ഷൻ കമ്മിറ്റി ആരോപിച്ചു. വേലിയുടെ ഭാഗം തകർത്ത് ജനവാസകേന്ദ്രത്തിൽ ഇറങ്ങിയ കാട്ടാന ഒഴുകയിൽ അഖിൽ, പാപ്പിനിശേരി തോമസ്, ഇദ്ദേഹത്തിന്‍റെ സഹോദരങ്ങളായ ബിനോയ്, ജോണ്‍സണ്‍ എന്നിവരുടെ വാഴ, റബർ, കമുക് കൃഷികൾ നശിപ്പിച്ചതായി യോഗം ചൂണ്ടിക്കാട്ടി. 2017ൽ ആക്‌ഷൻ കമ്മറ്റിയുടെ നേതൃത്വത്തിൽ ഡിഎഫ്ഒയുടെ കാര്യാലയത്തിനു സമരം സംഘടിപ്പിച്ചതിനെത്തുടർന്ന് പാൽവെളിച്ചം, കുറുവ പ്രദേശത്ത് റെയിൽ ഫെൻസിംഗിനു 10 കോടി രൂപ അനുവദിച്ചിരുന്നു. വനം അധികൃതരുടെ പിടിപ്പുകേടുമൂലം ഈ പ്രവൃത്തി 2.5 കോടി രൂപയുടെ ക്രാഷ്ഗാർഡ് ഫെൻസിംഗ് പദ്ധതിയായി മാറി. ഇതുമായി ബന്ധപ്പെട്ടും വിവാദവും സമരവും നടന്നു. ഒടുവിൽ മന്ത്രി ഒ.ആർ. കേളുവിന്‍റെ ഇടപെടലിനെത്തുടർന്നാണ് ഇപ്പോഴത്തെ പ്രവൃത്തി നടന്നത്. ഈ പദ്ധതിയും നിർവഹണത്തിലെ അപാകം മൂലം ജനങ്ങൾക്ക് പ്രയോജനപ്പെടാത്ത സ്ഥിതിയാണ്. ഇതേക്കുറിച്ച് അന്വേഷിച്ച് നടപടി സ്വീകരിക്കണമെന്ന് യോഗം വനം മന്ത്രിയോട് ആവശ്യപ്പെട്ടു. ചെയർമാൻ ടി.സി. ജോസഫ് അധ്യക്ഷത വഹിച്ചു. സന്തോഷ് തോൽപ്പെട്ടി, വി.ആർ. ജയചന്ദ്രൻ, നാസർ ബാവലി, ടി. സന്തോഷ്കുമാർ എന്നിവർ പ്രസംഗിച്ചു.

അവധിക്കാല ഫുട്ബോൾ പരിശീലനം

ചെന്നലോട്: ഗവ.യുപി സ്കൂളിൽ ന്ധസമ്മർ സ്ട്രൈക്കേഴ്സ്’ എന്ന പേരിൽ അവധിക്കാല ഫുട്ബോൾ പരിശീലനം തുടങ്ങി. തരിയോട് പഞ്ചായത്ത് പ്രസിഡന്‍റ് ഷമീം പാറക്കണ്ടി ഉദ്ഘാടനം ചെയ്തു. പിടിഎ പ്രസിഡന്‍റ് വി.കെ. വിനു അധ്യക്ഷത വഹിച്ചു. ഉഷ ജോർജ്, ചലഞ്ചേഴ്സ് ആർട്സ് ആൻഡ് സ്പോർട്സ് ക്ലബ് പ്രസിഡന്‍റ് പി. മൊയ്തൂട്ടി, യു.പി. മോഹൻദാസ്, കോച്ച് ഷൈജൽ അഹമ്മദ് എന്നിവർ പ്രസംഗിച്ചു. പ്രധാനാധ്യാപിക കെ. ജയരത്നം സ്വാഗതവും സ്റ്റാഫ് സെക്രട്ടറി പി. നസീറ നന്ദിയും പറഞ്ഞു.

പൂർവ വിദ്യാർഥി സംഗമം ഇന്ന്

കൽപ്പറ്റ: മുട്ടിൽ ഡബ്ല്യുഎംഒ ആർട്സ് ആൻഡ് സയൻസ് കോളജിൽ ഫിസിക്സ് വിഭാഗം പൂർവ വിദ്യാർഥി സംഗമവും യാത്രയയപ്പ് സമ്മേളനവും ഇന്ന് നടക്കും. 1995 മുതലുള്ള മൂന്നു ദശകങ്ങളിലെ ഫിസിക്സ് ബിരുദബിരുദാനന്തര ബാച്ചുകളുടെ സംഗമം ആയിരിക്കും. പൂർവ അധ്യാപകരെ ആദരിക്കൽ, വിദ്യാർഥികളുടെ അനുഭവങ്ങൾ പങ്കുവയ്ക്കൽ, ഗവേഷണ രംഗത്തെയും വിദ്യാഭ്യാസ മേഖലയിലെയും പുതിയ മുന്നേറ്റത്തെ കുറിച്ചുള്ള അവതരണങ്ങൾ എന്നിവ ഉണ്ടായിരിക്കും. ഫിസിക്സ് വിഭാഗം മുൻ മേധാവിയും ഈ വർഷം വിരമിക്കുകയും ചെയ്യുന്ന ഡോ.കെ.ജി. ബിജുവിന് യാത്രയയപ്പ് നൽകും. പൂർവ വിദ്യാർഥികളുടെ വിവിധ കലാപരിപാടികളും നടക്കും.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]