ADVERTISEMENT

ADVERTISEMENT

കോടതി സന്ദർശിച്ച് വിദ്യാർഥികൾ

കാട്ടാക്കട: ലീഗൽ സർവീസ് അഥോറിറ്റിയുടെ നിയമാവബോധ പരിപാടി 'സംവാദ'യുടെ ഭാഗമായി കുളത്തുമ്മൽ ഗവ. ഹയർ സെക്കൻഡറി സ്‌കൂൾ വിദ്യാർഥികൾ കാട്ടാക്കട ഒന്നാം ക്ലാസ് കോടതിയുടെ പ്രവർത്തനങ്ങൾ കണ്ട് വിലയിരുത്തി.

അതിവേഗ പോക്‌സോ സ്‌പെഷ്യൽ കോടതി ജഡ്ജി എസ്. രമേഷ് കുമാർ പരിപാടി ഉദ്ഘാടനം ചെയ്തു. കാട്ടാക്കട ബാർ അസോസിയേഷൻ സെക്രട്ടറി പി.ബൈജു അധ്യക്ഷനായി. അഭിഭാഷകരായ എം.എസ്. ചിത്രാറാണി, ജയകുമാർ എന്നിവർ ക്ലാസെടുത്തു.

ഒന്നാം ക്ലാസ് കോടതി ജഡ്ജി ശിവ ശരത്, പഞ്ചായത്ത് പ്രസിഡന്‍റ് കെ.അനിൽകുമാർ, അഡ്വേക്കറ്റ് ക്ലാർക്ക് അസോസിയേഷൻ പ്രസിഡന്‍റ് ഷാജഹാൻ, ജയകുമാർ, പ്രിയങ്ക തുടങ്ങിയവർ സംസാരിച്ചു.

ADVERTISEMENT

കേരളം ഭരിക്കുന്നത് ശബരിമലയിലെ സ്വർണം മോഷ്ടിച്ചവർ: അഡ്വ. ചാണ്ടി ഉമ്മൻ എംഎൽഎ

കിളിമാനൂർ: വിശ്വാസികളെ വഞ്ചിച്ച് ശബരിമലയിലെ സ്വർണം മോഷ്ടിച്ച ആളുകളാണ് കേരളം ഭരിക്കുന്നതെന്ന് അഡ്വ. ചാണ്ടി ഉമ്മൻ എംഎൽഎ. അഴിമതിക്ക് കുടപിടിക്കുന്നവരാണ് ഇപ്പോൾ സംസ്ഥാനവും ദേവസ്വവും ഭരിക്കുന്നത് എന്നും അദ്ദേഹം കൂട്ടിച്ചേർത്തു. കാരേറ്റ് കേന്ദ്രമാക്കി പ്രവർത്തിക്കുന്ന പ്രിയദർശിനി എഡ്യുക്കേഷണൽ ആൻഡ് ചാരിറ്റബിൾ ട്രസ്റ്റിന്‍റെ 2025 പ്രിയദർശിനി വിദ്യാഭ്യാസ അവാർഡ് വിതരണവും സാമ്പത്തികമായി പിന്നോക്കം നിൽക്കുന്ന കുടുംബങ്ങൾക്കുള്ള ഭക്ഷ്യധാന്യ വസ്തുക്കളുടെ വിതരണവും ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. കാരേറ്റ് ആർ കെ വി ഓഡിറ്റോറിയത്തിൽ നടന്ന പരിപാടിയിൽ ട്രസ്റ്റ് ചെയർമാൻ എ.അഹമ്മദ് കബീർ അധ്യക്ഷനായിരുന്നു. നഗരൂർ എ. ഇബ്രാഹീംകുട്ടി, ജില്ലാ കോൺഗ്രസ് കമ്മിറ്റി ജനറൽ സെക്രട്ടറി എ. ഷിഹാബുദ്ദീൻ, മുൻ ബ്ലോക്ക് പ്രസിഡണ്ട് എം. കെ.ഗംഗാധര തിലകൻ, ജനപ്രതിനിധികളായ ജി.രവീന്ദ്ര ഗോപാൽ ബി.ജയചന്ദ്രൻ, ജി. ശാന്തകുമാരി, എ. എസ്. ആശ, ട്രസ്റ്റ് വൈസ് ചെയർമാൻ പുല്ലയിൽ ശ്രീധരൻപിള്ള, യുഡിഎഫ് ചെയർമാൻ എസ് വിശ്വംഭരൻ, ട്രസ്റ്റ് സെക്രട്ടറി എസ്.സുസ്മിത, സി.എസ്.സൈജു എന്നിവർ പങ്കെടുത്തു.

കുടിശിക അടച്ചില്ല;പോലീസ് സ്റ്റേഷനിലെ ഫോൺ വിഛേദിച്ചു

പേരൂര്‍ക്കട: തമ്പാനൂര്‍ പോലീസ് സ്റ്റേഷനിലെ ലാന്‍ഡ് ലൈന്‍ വിഛേദിച്ചു. കുടിശിക തുക അടയ്ക്കാത്തതാണ് ഫോണ്‍ ബന്ധം വിഛേദിക്കാന്‍ കാരണമെന്നാണു സൂചന. മേട്ടുക്കട ബിഎസ്എന്‍എല്‍ സെക്‌ഷന്‍ പരിധിയിലുള്ള സ്ഥലമാണ് സ്റ്റേഷന്‍. സ്റ്റേഷന്‍ ലാന്‍ഡ് ലൈന്‍ നമ്പരായ 0471 2326543 രണ്ടാഴ്ചയായി പ്രവര്‍ത്തനരഹിതമാണ്. സ്റ്റേഷന്‍റെ സേവനം ലഭിക്കുന്നതിന് പൊതുജനങ്ങള്‍ പ്രധാനമായി ആശ്രയിക്കുന്ന ലാന്‍ഡ് ലൈന്‍ കണക്ഷന്‍ എത്രയും വേഗം പുനസ്ഥാപിക്കുമെന്നാണു പോലീസുകാരുടെ പ്രതീക്ഷ.

ഗേറ്റിൽ കുടുങ്ങിയ തെരുവ് നായയെ ഫയർഫോഴ്സ് രക്ഷപെടുത്തി

വിഴിഞ്ഞം : വീടിന്‍റെ ഗേറ്റിൽ കുടുങ്ങിയ തെരുവ് നായയെ വിഴിഞ്ഞം ഫയർ ഫോഴ്സ് രക്ഷപ്പെടുത്തി.വിഴിഞ്ഞം, കോട്ടപ്പുറം സ്വദേശി ജാസിയുടെ വീടിന്‍റെ ഗേറ്റിൽ തല കുടുങ്ങി അവശനായ നായയെയാണ് ഫയർ & റെസ്ക്യൂ ഫോഴ്സ് എത്തി രക്ഷപ്പെടുത്തിയത്. രാവിലെ വീട്ടുകാർ ഉറക്കം എണീറ്റപ്പോഴാണ് നായകുടുങ്ങിയ വിവരം അറിഞ്ഞത്. വീട്ടുകാർക്ക് വീടിന്‍റെ ഗേറ്റിന് പുത്തിറങ്ങാൻ കഴിയാത്ത അവസ്ഥയായി.അങ്ങനെയാണ് സേനയുടെ സഹായം തേടിയത്. സേന എത്തി കട്ടർ ഉപയോഗിച്ച് ഗേറ്റിന്‍റെ ഇരുമ്പ് കമ്പികൾ മുറിച്ച് നീക്കി നായയെ രക്ഷിച്ചു.അതിന് ശേഷമാണ് വീട്ടുകാർക്ക് പുറത്ത് ഇറങ്ങാനായത്

വീട്ടമ്മയുടെ മരണം ആത്മഹത്യയെന്ന് പോലീസ്

നെയ്യാറ്റിന്‍കര : മുട്ടയ്ക്കാട് സ്വദേശിനി സലിതകുമാരി (50) ആത്മഹത്യ ചെയ്തതാണെന്ന് പോലീസിന്‍റെ പ്രാഥമിക നിഗമനം. ശരീരത്തില്‍ മണ്ണെണ്ണയുടെ അംശമുണ്ടായിരുന്നായും ആത്മഹത്യാക്കുറിപ്പ് കണ്ടെടുത്തുവെന്നും പോലീസ് അറിയിച്ചു. മുട്ടയ്ക്കാട് കെന്‍സായില്‍ പരേതനായ സ്റ്റെല്ലസ് ഗബ്രിയേലിന്‍റെ ഭാര്യ സലിതകുമാരി വീട്ടില്‍ രാവിലെ ചായ തയാറാക്കുന്നതിനിടയില്‍ പാചകവാതക അടുപ്പില്‍ നിന്ന് തീ പടര്‍ന്ന് മരണമടഞ്ഞുവെന്നായിരുന്നു ആദ്യ നിഗമനം . പിന്നീട് പോലീസ് വീട്ടില്‍ നിന്നും സലിതകുമാരി എഴുതിയതെന്ന് കരുതപ്പെടുന്ന ആത്മഹത്യാക്കുറിപ്പ് കണ്ടെടുത്തു. മകന് എഴുതിയിരിക്കുന്ന കത്തില്‍ പ്രാദേശിക കോണ്‍ഗ്രസ് നേതാവിനെക്കുറിച്ച് പരാമര്‍ശമുണ്ട്. നഗരസഭ കൗണ്‍സിലര്‍ കൂടിയായ അദ്ദേഹം സലിതകുമാരിയോട് മുന്പ് മോശമായി പെരുമാറിയിട്ടുണ്ടെന്ന് മകന്‍ രാഹുല്‍ മാധ്യമങ്ങളോട് കഴിഞ്ഞ ദിവസം പറഞ്ഞു. ആത്മഹത്യാക്കുറിപ്പ് വിശദമായി പരിശോധിക്കുമെന്നും സലിതകുമാരിയുടെ കൈപ്പടയാണെന്ന് വ്യക്തമായാല്‍ കൗണ്‍സിലര്‍ക്കെതിരെ ആത്മഹത്യാ പ്രേരണാ കുറ്റം ചുമത്തി കേസെടുക്കുമെന്നും പോലീസ് അറിയിച്ചു.

പെട്രോളുമായി ആത്മഹത്യാഭീഷണി; പിന്തിരിപ്പിച്ച് ഫയർഫോഴ്സ്

നെടുമങ്ങാട് : പെട്രോൾ ഒഴിച്ച് ആത്മഹത്യ ഭീഷണി മുഴക്കിയ ആളെ ഫയർഫോഴ്സ് അനുനയിപ്പിച്ച് പിന്തിരിപ്പിച്ചു. കേശവദാസപുരം വിവേകാനന്ദ നഗറിൽ കുര്യാക്കോസ് (55)ആണ് പെട്രോളുമായി ാത്മഹത്യ ഭീഷണി മുഴക്കിയത്. നെടുമങ്ങാട് ഹിന്ദ് മെഡിക്കൽസിൽ ഇന്നലെ ഉച്ചക്ക് 12നാണ് സംഭവം. ഹിന്ദ് മെഡിക്കൽസ് മുൻ ഉടമയുമായുമുള്ള സാന്പത്തിക ഇടപാടാണ് ആത്മഹത്യാഭീഷണിക്കു കാരണം. മുൻ മെഡിക്കൽ ഷോപ്പ് ഉടമ 58 ലക്ഷം രൂപ കൊടുക്കാനുണ്ടെന്ന് ആരോപിച്ചാണ് രണ്ട് കന്നാസ് പെട്രോളുമായി കുര്യാക്കോസ് എത്തി ആത്മഹത്യ ഭീഷണി മുഴക്കിയത്. മെഡിക്കൽ സ്റ്റോറിന് മുന്നിൽ ഉണ്ടായിരുന്ന ട്രാഫിക് പോലീസ് ഫയർഫോഴ്സിനെ വിവരം അറിയിച്ചു. ഫയർഫോഴ്സ് മെഡിക്കൽ സ്റ്റോറിന് പുറകിൽ കൂടെ എത്തി കുര്യാക്കോസിനെ അനുനയിപ്പിച്ചു കീഴടക്കുകയായിരുന്നു. നെടുമങ്ങാട് : പെട്രോൾ ഒഴിച്ച് ആത്മഹത്യ ഭീഷണി മുഴക്കിയ ആളെ ഫയർഫോഴ്സ് അനുനയിപ്പിച്ച് പിന്തിരിപ്പിച്ചു. കേശവദാസപുരം വിവേകാനന്ദ നഗറിൽ കുര്യാക്കോസ് (55)ആണ് പെട്രോളുമായി ാത്മഹത്യ ഭീഷണി മുഴക്കിയത്. നെടുമങ്ങാട് ഹിന്ദ് മെഡിക്കൽസിൽ ഇന്നലെ ഉച്ചക്ക് 12നാണ് സംഭവം. ഹിന്ദ് മെഡിക്കൽസ് മുൻ ഉടമയുമായുമുള്ള സാന്പത്തിക ഇടപാടാണ് ആത്മഹത്യാഭീഷണിക്കു കാരണം. മുൻ മെഡിക്കൽ ഷോപ്പ് ഉടമ 58 ലക്ഷം രൂപ കൊടുക്കാനുണ്ടെന്ന് ആരോപിച്ചാണ് രണ്ട് കന്നാസ് പെട്രോളുമായി കുര്യാക്കോസ് എത്തി ആത്മഹത്യ ഭീഷണി മുഴക്കിയത്. മെഡിക്കൽ സ്റ്റോറിന് മുന്നിൽ ഉണ്ടായിരുന്ന ട്രാഫിക് പോലീസ് ഫയർഫോഴ്സിനെ വിവരം അറിയിച്ചു. ഫയർഫോഴ്സ് മെഡിക്കൽ സ്റ്റോറിന് പുറകിൽ കൂടെ എത്തി കുര്യാക്കോസിനെ അനുനയിപ്പിച്ചു കീഴടക്കുകയായിരുന്നു.

ശാസ്താംകോട്ടയുടെ ചരിത്ര ഏടുകളില്‍ ബ്രൂക്കിനും സ്ഥാനം: മാര്‍ ക്ലീമിസ് ബാവ

ശാസ്താംകോട്ട : ശാസ്താംകോട്ടയുടെ ചരിത്ര ഏടുകളില്‍ ബ്രൂക്കിനും സ്ഥാനം രേഖപ്പെടുത്തിരിക്കുന്നുവെന്നു മലങ്കര കത്തോലിക്കാ സഭാ മേജർ ആർച്ച് ബിഷപ് കർദിനാൾ മാര്‍ ബസേലിയോസ് ക്ലീമിസ് കാതോലിക്കാബാവ. രാജഗിരി ബ്രൂക്ക് ഇന്‍റര്‍നാഷണല്‍ സ്‌കൂളിന്‍റെ വാര്‍ഷികവും ബ്രൂക്കിന്‍റെ സ്ഥാപക ഡയറക്ടര്‍ റവ.ഡോ. ജി.ഏബ്രഹാം തലോത്തിലിന്‍റെ നാമഹേതുക തിരുനാള്‍ ആഘോഷവും ഉദ്ഘാടനം ചെയ്തു പ്രസംഗിക്കുകയായിരുന്നു കതോലിക്കബാവ. പത്തനംതിട്ട ബിഷപ് ഡോ. സാമുവല്‍ മാര്‍ ഐറേനിയോസ് അധ്യക്ഷത വഹിച്ചു. മാര്‍ത്താണ്ഡം ബിഷപ് ഡോ. വിന്‍സെന്‍റ് മാര്‍ പൗലോസ് അനുഗ്രഹ പ്രഭാഷണം നടത്തി. മാവേലിക്കര വികാരി ജനറാൾ മോൺ. ജോബ് കല്ലുവിളയില്‍, ശാസ്താംകോട്ട പഞ്ചായത്ത് പ്രസിഡന്‍റ് ആര്‍.ഗീത, പിടിഎ പ്രസിഡന്‍റ് ആര്‍.ഗിരികുമാര്‍ തുടങ്ങിയവർ പ്രസംഗിച്ചു. സമൂഹത്തിൽ നാനാതുറകളിലുള്ളവരുടെ സ്നേ ഹവും സഹകരണവുമാണ് ബ്രൂക്കിന്‍റെ ഈ വളർച്ചയ്ക്ക് കാരണമെന്ന് മറുപടി പ്രസംഗത്തിൽ ഫാ.ഏബ്രഹാം തലോത്തില്‍ പറഞ്ഞു. കായംകുളം ചേതന സോഷ്യല്‍ സര്‍വീസ് സൊസൈറ്റി സിഇഒ ഫാ. തോമസ് ചെറുപുഷ്പം സ്വാഗതം പറഞ്ഞു. പ്രിന്‍സിപ്പല്‍ ബോണിഫെസിയ വിന്‍സെന്‍റ്, അഡ്മിനിസ്‌ട്രേറ്റര്‍ കൊച്ചുമോള്‍ കെ. സാമുവല്‍, സെക്രട്ടറി ജോജി ടി. കോശി തുടങ്ങിയവർ നേതൃത്വം നല്‍കി.

മയക്കുമരുന്ന് കേസ് പ്രതിയുടെ വസ്തുവകകൾ കണ്ടുകെട്ടി

തിരുവനന്തപുരം: നഗരത്തിൽ സ്ഥിരമായി മയക്കുമരുന്ന് കച്ചവടം നടത്തി നിരവധി കേസുകളിൽ ഉൾപ്പെട്ട തന്പാനൂർ ഫയർഫോഴ്സ് സ്റ്റേഷനു സമീപം കീഴേപുളിക്കൽ വീട്ടിൽ താമസിക്കുന്ന വിഷ്ണു എസ്. കുമാർ (25) ന്‍റെ വാഹനങ്ങളുൾപ്പടെയുള്ള വസ്തുവകകൾ എൻഡിപിഎസ് നിയമപ്രകാരമുള്ള കോംപീറ്റന്‍റ് അഥോറിറ്റി ഉത്തരവ് പ്രകാരം പോലീസ് കണ്ടു കെട്ടി. 2024 നവംബറിൽ 10 ഗ്രാം എംഡിഎംഎയുമായി സിറ്റി ഡാൻസാഫ് സംഘവും തുന്പ പോലീസും സംയുക്തമായി നടത്തിയ റെയിഡിൽ വിഷ്ണുവിനെ പിടികൂടിയിരുന്നു. ജാമ്യത്തിൽ ഇറങ്ങിയ വിഷ്ണു വീണ്ടും മയക്കുമരുന്ന് കച്ചവടത്തിലേർപ്പെട്ടു. ജൂണിൽ ബംഗളൂരുവിൽ നിന്ന് കാർ മാർഗം 47 ഗ്രാം എംഡിഎംഎ കടത്തുന്നതിനിടെ മോഷണ കേസുകളിൽ പ്രതിയായ രമേഷിനോടൊപ്പം ഡാൻസാഫ് സംഘം പേരൂർക്കട പോലീസ് സ്റ്റേഷൻ പരിധിയിൽ വച്ച് പിടികൂടിയിരുന്നു. വിഴിഞ്ഞം പോലീസ് സ്റ്റേഷനിലും മയക്കുമരുന്ന് കേസിൽ ഇയാൾ ഉൾപ്പെട്ടിട്ടുണ്ട്. ഇയാൾക്കെതിരെ പേരൂർക്കട ഐഎസ്എച്ച്ഒ എം. ഉമേഷ് നൽകിയ വിവരങ്ങളുടെ അടിസ്ഥാനത്തിൽ ഡിഐജിയും സിറ്റി പോലീസ് കമ്മീഷണറുമായ തോംസണ്‍ ജോസ് കോംപീറ്റന്‍റ് അഥോറിറ്റിക്ക് സമർപ്പിച്ച റിപ്പോർട്ടിന്‍റെ അടിസ്ഥാനത്തിലാണ് വാഹനങ്ങളും നിക്ഷേപങ്ങളും കണ്ടുകെട്ടിയത്. തിരുവനന്തപുരം നഗരത്തിൽ മയക്കുമരുന്ന് കച്ചവടത്തിലേർപ്പെട്ടിരിക്കുന്ന ചില്ലറ, മൊത്ത ലഹരി വിൽപ്പനക്കാർക്കെതിരെ വരും ദിവസങ്ങളിലും ഇത്തരത്തിലുള്ള ശക്തമായ നടപടികൾ തുടരുമെന്ന് സിറ്റി പോലീസ് കമ്മീഷണർ അറിയിച്ചു.

ഇക്ബാൽ കോളജിൽ സംഘർഷം: പോലീസുകാരന് പരിക്കേറ്റു

പാലോട്: കോളജ് യൂണിയൻ തെര‍ഞ്ഞെടുപ്പുമായി ബന്ധപ്പെട്ട് ഫലപ്രഖ്യാപനം വന്നതിനു പിന്നാലെ പെരിങ്ങമ്മല ഇക്ബാൽ കോളജിൽ എസ്എഫ്ഐ -കെഎസ്‌യു പ്രവർത്തകർ തമ്മിലുണ്ടായ സംഘട്ടനത്തിൽ പോലീസുകാരന് പരിക്കേറ്റു. കമ്പ് കൊണ്ടുള്ള ഏറിൽ വിതുര പോലീസ് സ്റ്റേഷനിലെ സിവിൽ പോലീസ് ഓഫിസർ വി.എസ്. വിജിത്തിന്‍റെ തലയ്ക്കാണ് പരിക്കേറ്റത്. ആദ്യം പാലോട് ആശുപത്രിയിലും പിന്നീട് ശസ്ത്രക്രിയയ്ക്കായി മെഡിക്കൽ കോളജ് ആശുപത്രിയിലേക്കും മാറ്റി. ഇരുവിഭാഗം പ്രവർത്തകർക്കും പരിക്കുണ്ട്. നെടുമങ്ങാട് ഡിവൈഎസ്പിയുടെ നേതൃത്വത്തിൽ പാലോട്, വിതുര, വലിയമല സ്റ്റേഷനുകളിലെപോലീസ് എത്തിയാണ് സംഘട്ടനം അവസാനിപ്പിച്ചത്. തെര‍ഞ്ഞെടുപ്പിൽ കെഎസ്‌യു മുഴുവൻ ജനറൽ സീറ്റും പിടിച്ചെടുത്തു. തുടർന്ന് ആഹ്ളാദ പ്രകടനം നടത്താൻ ശ്രമിക്കവെ എസ്എഫ്ഐ മുദ്രാവാക്യങ്ങളുമായി രംഗത്തിറങ്ങി തടസപ്പടുത്തിയത് കെഎസ് യുക്കാരെ ചൊടിപ്പിച്ചു. ഇതോടെ സ്ഥിഗതികൾ വഷളായി. ഇതിനിടെയാണ് ആരോ വലിച്ചെറിഞ്ഞ കമ്പ് കൊണ്ട് പൊലീസുകാരന് തലയിൽ ആഴത്തിലുള്ള മുറിവേറ്റത്. സംഘർഷം അയവ് വന്നതിനെ തുടർന്ന് കെഎസ് യു കോളജിൽ നിന്നും പ്രകടനം നടത്തി പാലോട് അവസാനിപ്പിച്ചു. ഇക്ബാൽ കോളജിൽ മുഴുവൻ സീറ്റും കെഎസ് യു നേടി പാലോട്: പെരിങ്ങമ്മല ഇക്ബാൽ കോളജ് യൂണിയൻ തെരഞ്ഞെടുപ്പിൽ മുഴുവൻ ജനറൽ സീറ്റും നേടി കെഎസ്‌യുവിന് തിളക്കമാർന്ന വിജയം. എസ്എഫ്ഐയിൽ നിന്നും യൂണിയൻ തിരിച്ചു പിടിക്കുകയായിരുന്നു. വിജയിച്ച കെഎസ് യു യൂണിയൻ ഭാരവാഹികൾ: മുഹമ്മദ് എസ്. ഫൈസ്( ചെയർമാൻ), അസ്ന നവാസ്( വൈസ്. ചെയർമാൻ), എസ്. അംജത് മുഹമ്മദ്( ജനറൽ സെക്രട്ടറി), ആർ. അഭിഷേക്, എസ്.മുഹമ്മദ് ഹാരിസ് ( യൂണിയൻ കൗൺസിലർ), അൽ അമീൻ( ആർട്സ് ക്ലബ് സെക്രട്ടറി), എസ്. മുഹമ്മദ് സഹിൽ( മാഗസിൻ എഡിറ്റർ), എ. ആഷിഫ, എസ്.എസ്. ആമിന( ലേഡി റെപ്).

എസ്എംടിഎഫിന്‍റെ "സംസ്ക്കാര'യുടെ പ്രഖ്യാപനം നടത്തി

തിരുവനന്തപുരം: സ്വതന്ത്ര മത്സ്യ തൊഴിലാളി ഫെഡറേഷന്‍റെ കലാസാഹിത്യസാംസ്കാരിക വിഭാഗമായ സംസ്കാരയുടെ പ്രഖ്യാപനം നടത്തി. തീരദേശവും ഉൾനാടൻ മേഖലയിലുമുളള മത്സ്യ തൊഴിലാളി സമൂഹത്തിലെ കലാസാംസ്കാരിക പാരന്പര്യങ്ങളെ സംരക്ഷിക്കുകയും പ്രോത്സാഹിപ്പിക്കുകയും, പുതുതലമുറയിൽ സൃഷ്ടി ബോധം വളർത്തുകയും ചെയ്യുക എന്നതാണ് സംഘടനയുടെ ലക്ഷ്യം. സംഘം ആരംഭിക്കുന്ന ആദ്യഘട്ട പ്രവർത്തനങ്ങളായി തീരദേശ കലാകാരന്മാരെ കണ്ടെത്തി പ്രോത്സാഹിപ്പിക്കുന്ന കലാസംഗമം, സാംസ്കാരിക പഠന ക്യാന്പുകൾ, മത്സ്യത്തൊഴിലാളികളുടെ ജീവിതാനുഭവങ്ങളെ ആസ്പദമാക്കിയ ഡോക്യുമെന്‍ററികൾ എന്നിവ ഉൾപ്പെടുത്തി. സംഘടനയുടെ ചെയർമാനായി ആർട്ടിസ്റ്റ് ഡഗ്ളസ് വി. ഹരിഹരപുരത്തെയും കണ്‍വീനർമാരായി മരിയക്കുട്ടി ജസ്റ്റിനെയും ജോയ് എം. സക്കറിയയെയും നിയോഗിച്ചു. തീരദേശ മേഖലകളിലെ ഫെഡറേഷൻ യൂണിറ്റുകളുമായി സഹകരിച്ച് ഈ പ്രവർത്തനങ്ങളുടെ ഒൗദ്യോഗിക ഉദ്ഘാടനം അടുത്ത മാസം തിരുവനന്തപുരത്ത് നടക്കുമെന്ന് ഫെഡറേഷൻ സംസ്ഥാന പ്രസിഡന്‍റ് പി. സ്റ്റെല്ലസ്, സ്റ്റേറ്റ് ചീഫ് കോ-ഓർഡിനേറ്റർ ഡോ. എഫ്.എം. ലാസർ എന്നിവർ അറിയിച്ചു.

കോവളത്തെ കൊലപാതകം: തെളിവെടുപ്പ് നടത്തി

കോവളം: കോവളത്ത് സഹോദരിയുടെ വീട്ടിൽ താമസിച്ചിരുന്നയാളെ ടെറസിൽ കൊല്ലപ്പെട്ട നിലയിൽ കണ്ടെത്തിയ സംഭവത്തിൽ റിമാൻഡിലായിരുന്ന പ്രതിയെ പോലീസ് കസ്റ്റഡിയിൽ വാങ്ങി സ്ഥലത്ത് എത്തിച്ച് തെളിവെടുപ്പ് നടത്തി. കോവളം നെടുമം പറമ്പിൽ വീ ട്ടിൽ രാജേന്ദ്രൻ(60) കൊല്ലപ്പെട്ട കേസിൽ റിമാൻഡിലായിരുന്ന ഓട്ടോ ഡ്രൈവർ വെള്ളാർ മുക്കോട്ട് വീട്ടിൽ രാജീവിനെ(42) ആണ് കോവളം സി. ഐ ജയപ്രകാശിന്‍റെ നേതൃത്വത്തിലുള്ള പ്രത്യേക അന്വേഷണ സംഘം ഇന്നലെ തെളിവെടുപ്പിന് കൊണ്ടുവന്നത്. സംഭവങ്ങൾ പ്രതി പോലീസിനോടു വിശദീകരിച്ചു. സ്വാഭാവിക മരണമെന്ന് പോലീസ് ആദ്യം കരുതിയെങ്കിലും പോസ്‌റ്റ്മോർട്ടത്തിലെ കണ്ടെത്തലാണ് കേസിൽ വഴിത്തിരിവായത്. പ്രതിയെ തിരികെ കോടതി ഹാജരാക്കുമെന്ന് എസ്എച്ച്‌ഒ അറിയിച്ചു.

ഓട്ടോറിക്ഷ മറിഞ്ഞ് മൂന്ന് പേർക്ക് പരിക്ക്

വിഴിഞ്ഞം: നിയന്ത്രണം തെറ്റിയ ഓട്ടോ മറിഞ്ഞ് ഡ്രൈവർ ഉൾപ്പെടെ മൂന്ന് മത്സ്യത്തൊഴിലാളികൾക്ക് പരിക്കേറ്റു. ഇന്നലെ വൈകുന്നേരം നാലോടെ വിഴിഞ്ഞം തെന്നൂർക്കോണത്തായിരുന്നു അപകടം. മത്സ്യബന്ധനത്തിനായി പുതിയതുറ സ്വദേശികളുമായി വന്ന ഓട്ടോ നിയന്ത്രണം തെറ്റി റോഡിന്‍റെ വശത്തേക്ക് മറിയുകയായിരുന്നു. സമീപത്ത് നിർത്തിയിരുന്ന സ്കൂട്ടറിനെയും ഇടിച്ച് തെറിപ്പിച്ചു. ഡ്രൈവർ പുതിയ തുറ സ്വദേശി സുനിലിനും മറ്റ് രണ്ട് പേർക്കും പരിക്കേറ്റു. ഇവരെ വിഴിഞ്ഞം സർക്കാർ ആശുപത്രിയിൽ പ്രവേശിപ്പിച്ചു. വിഴിഞ്ഞം പോലീസ് കേസെടുത്തു

നെടുമങ്ങാട് ഗവ.കോളജ് യൂണിയൻ കെഎസ്‌യുവിന് : ആഹ്ലാദപ്രകടനത്തിനിടെ കെഎസ്‌യു-എസ്എഫ്ഐ സംഘർഷം

നെടുമങ്ങാട് : ഗവൺമെന്‍റ് കോളജ് യൂണിയൻ തെരഞ്ഞെടുപ്പിൽ കെഎസ്‌യു പ്രധാന സീറ്റുകളിൽ വിജയിച്ചു. തുടർന്നുള്ള ആഹ്ലാദപ്രകടനം സംഘർഷത്തിൽ കലാശിച്ചു.ചെയർമാനായി കെഎസ്‌യുവിലെ മുഹമ്മദ്‌ അമീൻ, വൈസ് ചെയർപേഴ്സൺ ഗൗരി നന്ദന(കെഎസ്യു)ജന.സെക്രട്ടറി എ.എസ്.കാഷ്യപ്(കെഎസ്‌യു)ആർട്സ് ക്ലബ്‌ സെക്രട്ടറി വി.എസ്.ശ്രീജ (കെഎസ്‌യു)മാഗസിൻ എഡിറ്റർ ഹബിൻ മുഹമ്മദ്‌ (എസ്എഫ്ഐ) യൂണിവേഴ്സിറ്റി യൂണിയൻ കൗൺസിലർമാരായി ആദിത്യ കൃഷ്ണൻ,ഗംഗാ രാജേഷ്(എസ്എഫ്ഐ) എന്നിവരെ തെരഞ്ഞെടുത്തു. കോളജ് യൂണിയൻ തെരഞ്ഞെടുപ്പിനുശേഷം ടൗണിൽ നടത്തിയ ആഹ്ലാദപ്രകടനത്തിനിടെയാണ് സംഘർഷം നടന്നത്. നെടുമങ്ങാട് ഗവ.കോളജിലെ പ്രധാനപ്പെട്ട സീറ്റുകൾ നേടിയ കെഎസ്‌യു പ്രകടനത്തിനു പിന്നാലെ എസ്എഫ്ഐ പ്രവർത്തകരും പ്രകടനമായെത്തി. തുടർന്ന് കച്ചേരി ജംഗ്‌ഷനിൽ ഒത്തു കൂടിയവർ പരസ്പരം പോർ വിളികളുമായി ഏറെ നേരം സംഘർഷാവസ്ഥ സൃഷ്ടിച്ചു. പിരിഞ്ഞു പോകലിനിടയിൽ എസ്എഫ്ഐ പ്രവർത്തകരുടെ ഭാഗത്തുനിന്ന് കല്ലേറ് നടത്തിയെന്ന് ആരോപിച്ച് കെഎസ്‌യു- യൂത്ത് കോൺഗ്രസ് പ്രവർത്തകർ പ്രതിഷേധവുമായി രംഗത്തുവന്നു. വീണ്ടും സംഘർഷാവസ്ഥയായി. തുടർന്ന് പോലീസ് ഇരു വിഭാഗങ്ങളിളെയും പ്രവർത്തകരെ അനുനയിച്ച് പിരിച്ചുവിട്ടു. എന്നാൽ, പിരിഞ്ഞ് പോകവെ കോടതി പരിസരത്തെ മറവിൽ നിന്ന് ഡിവൈഎഫ്ഐ നേതാക്കളെ കല്ലെറിഞ്ഞന്നാരോപിച്ചു നേതാക്കൾ പ്രതിഷേധവുമായി വന്നു.പൊലീസ് ഇടപെട്ട് ഇരു വിഭാഗത്തെയും പിരിച്ചു വിട്ട ശേഷം സ്ഥലത്തു ക്യാമ്പ് ചെയ്യുന്നു.

അപ്രതീക്ഷിതമായി പായ്ക്കപ്പൽ; ആദ്യം ആശങ്ക, പിന്നെ ആശ്വാസം

വിഴിഞ്ഞം: തുറമുഖത്തിന് സമീപം അപ്രതീക്ഷിതമായി കൂറ്റൻ പായ്ക്കപ്പൽ പ്രത്യക്ഷപ്പെട്ടു. പരിചിതമല്ലാത്ത തരത്തിലുള്ള കടൽ യാനം കണ്ട് സംശയം തോന്നിയ മത്സ്യത്തൊഴിലാളികൾ മറൈൻ എൻഫോഴ്സ്മെന്‍റിലും തീരദേശ പോലീസിലും വിളിച്ച് തിരക്കി. സേനകളും അറിയില്ലെന്ന് പറഞ്ഞതോടെ സംശയം ആശങ്കയ്ക്ക് വഴിമാറി. ഒടുവിൽ കോസ്റ്റൽ പോലീസ് ബോട്ടുമായി കടലിൽ ഇറങ്ങി നടത്തിയ പരിശോധനയിൽ നേവിയുടെ ട്രെയിനികളാണെന്ന് കണ്ടെത്തിയതോടെയാണ് ആശങ്കയകന്നത്. ഇന്നലെ ഉച്ചക്ക് പന്ത്രണ്ടോടെയാണ് നേവിയുടെ പായ്ക്കപ്പൽ സുദർശിനി വിഴിഞ്ഞം തുറമുഖത്തിന് സമീപം നങ്കൂരമിട്ടത്. കൊച്ചിയിൽ നിന്ന് തമിഴ്നാട്ടിലേക്ക് പോകുന്നതിനിടയിൽ വിഴിഞ്ഞം അന്താരാഷ്ട്ര തുറമുഖം കാണണമെന്നുള്ള ട്രെയിനികളുടെ ആഗ്രഹമാണ് പായ്ക്കപ്പൽ തീരത്തോട് ചേർന്ന് അടുപ്പിക്കാനുള്ള കാരണം. തുറമുഖത്തിന്‍റെ അതിർത്തിക്കുള്ളിൽ പ്രവേശിക്കുന്നതിന് മുൻപ് ഇത്തരം യാനങ്ങൾ പോർട്ട് അധികൃതരെ അറിയിക്കണമെന്നുണ്ട്. വിഴിഞ്ഞത്ത് അന്താരാഷ്ട്ര തുറമുഖത്തിന്‍റെയും മാരിടൈം ബോർഡിന്‍റെയും തുറമുഖത്തിന് സമീപം പായ്ക്കപ്പൽ നങ്കൂരമിട്ടെങ്കിലും അധികൃതർ അറിഞ്ഞില്ല. ഇതും തുടക്കത്തിൽ സംശയത്തിനിടവരുത്തി. എന്നാൽ തീരസംരക്ഷണ സേനക്ക് നിർദ്ദേശം നൽകിയതായും അറിയുന്നു. കടലിൽ സംശയകരമായ സാഹചര്യത്തിൽ ഏതെങ്കിലും യാനങ്ങളെ കണ്ടാൽ ഉടൻ വിവരമറിയിക്കണമെന്ന് മത്സ്യത്തൊഴിലാളികൾക്ക് അധികൃതർ നേരത്തെ നിർദ്ദേശം നൽകിയിരുന്നു. ഇതനുസരിച്ചാണ് ഇന്നലെയും വിവരം കൈമാറിയത്. കുറച്ച് സമയം ചിലവഴിച്ചശേഷം പായ്ക്കപ്പൽ കൊച്ചിയിലേക്ക് മടങ്ങി. എന്നാൽ തീരത്ത് നിന്ന് കഷ്ടിച്ച് നാല് കിലോമീറ്ററിന് സമീപം വരെ പായ്ക്കപ്പൽ അടുത്തിട്ടും അധികൃതർ അറിഞ്ഞില്ല. കപ്പൽ വന്ന് മടങ്ങിയത് അന്താരാഷ്ട്ര തുറമുഖത്ത് ചരക്കുമായി വന്ന് വാർഫിൽ അടുക്കാൻ ഊഴം കാത്ത് നങ്കൂരമിട്ടിരുന്ന കണ്ടെയ്നർ കപ്പലുകൾക്ക് സമീപത്തിലൂടെയെന്ന് മത്സ്യത്തൊഴിലാളികൾ പറയുന്നു. ഏറെ സുരക്ഷവേണ്ട തീരത്ത് അപ്രതീക്ഷിതമായി വ്യത്യസ്ത തരത്തിലുള്ള കപ്പൽ എത്തിയതാണ് മത്സ്യത്തൊഴിലാളികളുടെ സംശയത്തിനും ആശങ്കക്കും വഴിതെളിച്ചത്.

ലഹരിക്കെതിരെ ബോധവത്ക്കരണം

വിഴിഞ്ഞം : കേരള മത്സ്യ തൊഴിലാളി ക്ഷേമനിധി ബോർഡ്‌ - പൂവാർ മത്സ്യ ഭവൻ എന്നിവരുടെ നേതൃത്വത്തിൽ മത്സ്യത്തൊഴിലാളികളുടെ കൂട്ടായ്മയിൽ ലഹരിക്കെതിരെ ബോധവത്ക്കരണവും വാഹന പ്രചരണ ജാഥയും സംഘടിപ്പിച്ചു. പൊഴിയൂർ മുതൽ വിഴിഞ്ഞം വരെയുള്ള തീരദേശ മേഖലയിൽ സഞ്ചരിച്ച നടത്തിയ ബോധവത്കരണ പരിപാടി കുളത്തൂർ പഞ്ചായത്ത് പ്രസിഡന്‍റ് ഗീതാ സുരേഷ് ഉദ്ഘാടനം ചെയ്തു. പൂവാർ പഞ്ചായത്ത് പ്രസിഡന്‍റ് ലോറൻസ് അധ്യക്ഷത വഹിച്ചു. പ്രചരണ റാലി മത്സ്യത്തൊഴിലാളി ക്ഷേമനിധി ബോർഡ് കമ്മീഷണർ സലിം ഫ്ലാഗ് ഓഫ് ചെയ്തു. സന്നദ്ധ പ്രവർത്തകർക്കുള്ള ജേഴ്സി റീജണൽ എക്സിക്യൂട്ടീവ് അനിത പുറത്തിറക്കി. ജാഥ ക്യാപ്റ്റൻ രാഹുൽ പ്രതിജ്ഞ ചൊല്ലിക്കൊടുത്തു. എക്സൈസ് ഇൻസ്പെക്ടർ ഷംസുദ്ദീൻ ലഹരിക്കെതിരെ ബോധവൽക്കരണ ക്ലാസെടുത്തു. പരുത്തിയൂർ പൂവാർ പള്ളം അടിമലത്തുറ വിഴിഞ്ഞം എന്നീ പ്രദേശങ്ങളിലെ ജനപ്രതിനിധികളും ഉദ്യോഗസ്ഥരും റാലിക്ക് വൻ വരവേൽപ്പ് നൽകി പങ്കാളികളായി.

സത്യം തുറന്നുപറയുന്നതിനാല്‍ വേട്ടയാടപ്പെടുന്നു: വെള്ളാപ്പള്ളി നടേശൻ

നെയ്യാറ്റിന്‍കര : സത്യം തുറന്നു പറയുന്നതിനാല്‍ വേട്ടയാടപ്പെടുന്നുവെന്ന് എസ്എന്‍ഡിപി യോഗം ജനറല്‍ സെക്രട്ടറി വെള്ളാപ്പള്ളി നടേശന്‍. നെയ്യാറ്റിന്‍കര എസ്എന്‍ ഓഡിറ്റോറിയത്തില്‍ ഇന്നലെ സംഘടിപ്പിച്ച എസ്എന്‍ഡിപി യോഗം ശാഖാ നേതൃസംഗമത്തില്‍ അധ്യക്ഷപ്രസംഗം നടത്തുകയായിരുന്നു അദ്ദേഹം. ശ്രീനാരായണീയര്‍ എന്നൊരു ജാതിയില്ല. ഈഴവരെന്ന് തന്നെ വ്യക്തമായി പറയണം. പ്രതിഫലേച്ഛയില്ലാതെ എസ്എന്‍ഡിപി യോഗത്തില്‍ പ്രവര്‍ത്തിച്ചവരാരും നശിച്ചിട്ടില്ല. ജനസംഖ്യാനുപാതത്തില്‍ അര്‍ഹതപ്പെട്ട രാഷ്ട്രീയാധികാരം വേണം. എന്നാല്‍ പലരും എസ്എന്‍ഡിപി യോഗത്തെ രാഷ്ട്രീയവളര്‍ച്ചയ്ക്കായി ഏണിപ്പടിയായി ഉപയോഗിച്ചിട്ടുണ്ട്. മലപ്പുറം ബാലികേറാമലയെന്ന് അറിയില്ലായിരുന്നുവെന്നും വെള്ളാപ്പള്ളി കൂട്ടിച്ചേര്‍ത്തു. നെയ്യാറ്റിന്‍കര, നേമം, പാറശാല, കുഴിത്തുറ യൂണിയനുകള്‍ സംയുക്തമായി സംഘടിപ്പിച്ച നേതൃസംഗമത്തില്‍ എസ്എന്‍ഡിപി യോഗം വൈസ് പ്രസിഡന്‍റ് തുഷാര്‍ വെള്ളാപ്പളി സംഘടനാ വിശദീകരണം നടത്തി. മൈക്രോഫിനാന്‍സിന് എസ്എന്‍ഡിപി യോഗവുമായി നേരിട്ട് ഒരു ബന്ധവുമില്ലെന്നും യോഗത്തെ കേരളത്തിലെ എല്ലാ രാഷ്ട്രീയകക്ഷികളും സമുദായങ്ങളും ഭയക്കുന്നുവെന്നും ഗുരുദേവന്‍ കേവലം വിപ്ലവകാരിയാണെന്ന് പ്രചരിപ്പിക്കുന്നവര്‍ക്ക് വ്യക്തമായ ഗൂഢോദ്ദേശ്യമുണ്ടെന്നും അദ്ദേഹം കൂട്ടിച്ചേര്‍ത്തു. യോഗം ദേവസ്വം സെക്രട്ടറി അരയക്കണ്ടി സന്തോഷ്, നേതൃ സംഗമം കോര്‍ഡിനേറ്റര്‍ പത്മകുമാര്‍, വിവിധ യൂണിയനുകളുടെ ഭാരവാഹികളായ കെ.വി സൂരജ് കുമാര്‍, ആവണി ബി. ശ്രീകണ്ഠന്‍, സുപ്രിയാ സുരേന്ദ്രന്‍, മേലാംകോട് വി. സുധാകരന്‍, ജയന്‍ എസ്. ഊരന്പ്, ഹിന്ദുസ്ഥാന്‍ ബി. മണികണ്ഠന്‍ എന്നിവര്‍ പ്രസംഗിച്ചു. നാലായിരത്തോളം അംഗങ്ങള്‍ പങ്കെടുത്തുവെന്ന് സംഘാടകര്‍ അറിയിച്ചു.

പീഡനത്തിനു ശേഷം മോഷണം: പ്രതി പിടിയിൽ

മാറനല്ലൂർ: പ്രായപൂർത്തിയാകാത്ത പെൺകുട്ടിയെ പീഡിപ്പിച്ച ശേഷം മോഷണം നടത്തിയ പ്രതി പിടിയിൽ. തിരുവനന്തപുരം ആറ്റുകാൽ ശിങ്കാരത്തോപ്പ് എംഎസ്ടി നഗറിൽ സുധീഷ് (28) ആണ് പിടിയിലായത്. കാട്ടാക്കട വീരണ കാവ്സ്വദേശിയായ 16 കാരിയെ പീഡിപ്പിച്ച ശേഷം ഓഗസ്റ്റ് 25 ന് മാറനല്ലൂർ പോലീസ് സ്റ്റേഷൻ പരിധിയിലെ മൊബൈൽ ഷോപ്പിൽ മോഷണം നടത്തിയിരുന്നു ശേഷം ഇയാൾ തമിഴ്നാട്ടിലേക്ക് കടക്കുകയായിരുന്നു. പെൺകുട്ടിയെ ഇയാൾ ഇൻസ്റ്റാഗ്രാം വഴി പരിചയപ്പെടുകയായിരുന്നു എന്നാണ് പോലീസിൽ മൊഴി നൽകിയിട്ടുള്ളത്. മോഷണവുമായി ബന്ധപ്പെട്ട് ഇയാളുടെ ബന്ധുവായ കൂട്ടുപ്രതി ഷിനുമോൻ (25) നേരത്തെ പോലീസ് പിടിയിലായിരുന്നു. പ്രായപൂർത്തി ആകാത്ത പെൺകുട്ടിയെ പീഡിപ്പിച്ചതിന് കാട്ടാക്കട പോലീസ് കേസ് രജിസ്റ്റർ ചെയ്തിട്ടുണ്ട്. സുധീഷ് തിരുവനന്തപുരം ഫോർട്ട് പോലീസ് സ്റ്റേഷനിലെ റൗഡി ലിസ്റ്റിൽ പെട്ട പ്രതിയാണ്. പിടിച്ചുപറി കേസിൽ ഇയാൾ ദിണ്ടിക്കൽ ജയിലിൽ ശിക്ഷ അനുഭവിച്ചിരുന്നു. നേരത്തെ രണ്ടു പോക്സോ കേസുകളിലും തിരുവനന്തപുരത്തെ നിരവധി മോഷണകേസുകളിലെയും പ്രതിയാണ് പിടിയിലായ സുധീഷ്. തമിഴ്നാട് തിരുനെൽവേലിയിൽ നിന്നുമാണ് മാറനല്ലൂർ എസ് ഏച്ച് ഓ ഷിബുവിന്‍റെ നേതൃത്വത്തിൽ പോലീസ് ഇയാളെ പിടികൂടിയത് .പ്രതിയെ കോടതിയിൽ ഹാജരാക്കും

മാർ ഗ്രിഗോറിയോസ് അനുസ്മരണം: അവർ 150 പേർ അധ്യാപകരായി

തിരുവനന്തപുരം: അവർ150 പേർ ഒരു ദിനത്തേക്ക് അധ്യാപകരായി. നാലാഞ്ചിറ സെന്‍റ് ജോൺസ് മോഡൽ ഹയർ സെക്കൻഡറി സ്കൂളിലാണ് സ്കൂൾ ഭരണം പൂർണമായി വിദ്യാർഥികൾക്ക് നൽകി മാതൃക ആയത്. സ്കൂൾ സ്ഥാപകനും രക്ഷാധികാരിയുമായിരുന്ന ബനഡിക്ട് മാർ ഗ്രിഗോറിയോസ് മെത്രാപോലീത്തായുടെ മുപ്പത്തി ഒന്നാമത് ഓർമ ദിനത്തിന്‍റെയും സ്കൂൾ ഹയർ സെക്കൻഡറി വിഭാഗത്തിന്‍റെ രജത ജൂബിലി ആഘോഷങ്ങളുടേയും ഭാഗമായിട്ടായിരുന്നു ഒരു ദിനം സ്കൂൾ ഭരണം വിദ്യാർത്ഥികൾക്ക് എന്ന പരിപാടി സംഘടിപ്പിച്ചതെന്ന് പ്രിൻസിപ്പൽ ഫാ. ജോസ് ചരുവിൽ പറഞ്ഞു. ഈ വർഷത്തെ അന്താരാഷ്ട്ര അധ്യാപക ദിനാചരണത്തിന്‍റെ മുഖ്യ സന്ദേശമായ അധ്യാപനത്തെ ഒരു സഹകരണ തൊഴിലായി പുനർരൂപകൽപ്പന ചെയ്യുക മുൻ നിർത്തി ആയിരുന്നു വിദ്യാർഥികൾക്ക് അധ്യാപകരാൻ അവസരം നൽകിയത്. വിദ്യാഭ്യാസത്തിൽ ടീം വർക്കിന്‍റെ പരിവർത്തന ശക്തിക്ക് ഊന്നൽ നൽകുക എന്നതാണ് ഈ വർഷം അന്താരാഷ്‌ ട്ര തലത്തിൽ മുന്നോട്ടു വക്കുന്ന പ്രമേയം. സ്കൂൾ ഭരണത്തിന്‍റെ പ്രതീകമായി താക്കോൽ പ്രിൻസിപ്പൽ ഫാ. ജോസ് ചരുവിൽ സ്റ്റുഡന്‍റ് പ്രിൻസിപ്പൽ അലൻ സജിക്കും സ്റ്റുഡന്‍റ്സ് വൈസ് പ്രിൻസിപ്പൽ സൂര്യ നന്ദക്കും കൈമാറി. വൈസ് പ്രിൻസിപ്പൽ അജീഷ് കുമാർ, പിടിഎ പ്രസിഡന്‍റ് ഡോ.ആൻജലോ മാത്യു എന്നിവർ പങ്കെടുത്തു.

ദൈവാശ്രയ ബോധം നഷ്ടപ്പെടരുത്: കര്‍ദിനാള്‍ മാര്‍ ബസേലിയോസ് ക്ലീമിസ് കാതോലിക്കാ ബാവ

തിരുവനന്തപുരം: വിശ്വാസ ജീവിതത്തില്‍ ദൈവാശ്രയ ബോധം നഷ്ടപ്പെടരുതെന്നു മലങ്കര കത്തോലിക്കാ സഭ മേജര്‍ ആര്‍ച്ച് ബിഷപ്പ് കര്‍ദിനാള്‍ മാര്‍ ബസേലിയോസ് ക്ലീമിസ് കാതോലിക്കാ ബാവ. മലങ്കര സുറിയാനി കത്തോലിക്കാ സഭയുടെ തിരുവനന്തപുരം മേജര്‍ അതിഭദ്രാസനം നടത്തുന്ന 33-ാമത് മലങ്കര കാത്തലിക് ബൈബിള്‍ കണ്‍വെന്‍ഷന്‍ പട്ടം സെന്‍റ് മേരീസ് ഹാളില്‍ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. നഷ്ടമായ രക്ഷയുടെ ആനന്ദം തിരികെ എത്തിക്കുന്നതിന് ഈ ബൈബിള്‍ കണ്‍വെന്‍ഷന്‍ സഹായിക്കും. യുവതീയുവാക്കളും കുഞ്ഞുങ്ങളും ദൈവാശ്രയ ബോധത്തില്‍ വളരണം. ചെറുപ്രായത്തില്‍ മയക്കുമരുന്നിന് അടിമകളാകുന്ന കുഞ്ഞുങ്ങള്‍ നമ്മെ വേദനിപ്പിക്കുന്നു. നമുക്ക് ആശ്രയിക്കാവുന്നത് മാറ്റമില്ലാത്തവനായ യേശുക്രിസ്തുവില്‍ മാത്രമാണ്. സ്വര്‍ഗത്തിലും ഭൂമിയിലും അധികാരമുള്ളവന്‍റെ കൈപിടിച്ച് നമുക്ക് മുന്നേറാമെന്നും കര്‍ദിനാള്‍ മാര്‍ ബസേലിയോസ് ക്ലീമിസ് കാതോലിക്കാ ബാവ പറഞ്ഞു. ഫാ.ഡാനിയേല്‍ പൂവണ്ണത്തിലാണ് മൂന്നു ദിവസം നീണ്ടു നില്‍ക്കുന്ന മലങ്കര കാത്തലിക് ബൈബിള്‍ കണ്‍വെന്‍ഷനു നേതൃത്വം നല്‍കുന്നത്. ഇന്നു വൈകുന്നേരം തിരുവനന്തപുരം മേജര്‍ അതിഭദ്രാസനത്തിന്റെ നിയുക്ത സഹായ മെത്രാന്‍ മോണ്‍. ജോണ്‍ കുറ്റിയില്‍ അനുഗ്രഹ പ്രഭാഷണം നടത്തും. സമാപനദിവസമായ നാളെ തിരുവനന്തപുരം ലത്തീന്‍ അതിരൂപത സഹായ മെത്രാന്‍ ഡോ.ആര്‍. ക്രിസ്തുദാസ് സമാപന സന്ദേശം നല്‍കും. തിരുവനന്തപുരം വൈദിക ജില്ലാ സമിതിയാണ് കണ്‍വെന്‍ഷന് നേതൃത്വം നല്‍കുന്നത്.

കേരളത്തിന്‍റെ പൊതുവിതരണ ശൃംഖല മാതൃക: മന്ത്രി കെ.എൻ.ബാലഗോപാൽ

തിരുവനന്തപുരം: കേരളത്തിന്‍റെ പൊതുവിതരണ ശൃംഖല മറ്റുസംസ്ഥാനങ്ങൾക്ക് മാതൃകയാണെന്നും വിലക്കയറ്റം തടയുന്നതിനും ഭക്ഷ്യസുരക്ഷ ഉറപ്പാക്കുന്നതിനും സർക്കാർ മെഷനറികൾ വഹിക്കുന്ന പങ്ക് വലുതാണെന്നും ധനകാര്യ മന്ത്രി കെ.എൻ.ബാലഗോപാൽ. ഭക്ഷ്യ പൊതുവിതരണ വകുപ്പ് നിശാഗാന്ധിയിൽ നടത്തിയ വിഷൻ 2031 സംസ്ഥാനതല സെമിനാർ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. സംസ്ഥാനം ജനങ്ങൾക്ക് ഭക്ഷ്യസുരക്ഷ ഉറപ്പാക്കുന്നത് അതിവിശാലമായ പൊതുവിതരണ ശൃംഖലയുടെ കരുത്തിലാണ്. ഭക്ഷ്യസുരക്ഷ ഉറപ്പാക്കുന്നതിൽ സർക്കാർ ഇടപെടൽ വിജയകരമായി നടപ്പാക്കാമെന്നതിന്‍റെ ഉദാഹരണമായിരുന്നു ഇത്തവണത്തെ ഓണക്കാലം. ഓണവിപണിയിൽ ഒരു സാധനത്തിനും ഉത്സവക്കാല വിലവർധന ഉണ്ടായില്ല. കേന്ദ്ര സർക്കാരിന്‍റെ ഒരുവിധ സഹായവും ഉണ്ടായില്ല. സപ്ലൈകോ ഔട്ട്‌ലെറ്റുകളിൽ 20 കിലോഗ്രാം അരി വീതം 25 രുപ നിരക്കിലാണ് നൽകിയത്. ഒരു കുടുംബത്തിന് 44 കിലോ അരിവരെ സൗജന്യ നിരക്കിലും ന്യായ വിലയിലും ലഭ്യമാക്കി. പണപ്പെരുപ്പത്തിന്‍റെ കാര്യത്തിൽ റാങ്കിങ്ങിൽ കാർഷികവ്യവസായ മേഖലകളിൽ മുന്നിൽ നിൽക്കുന്ന പല സംസ്ഥാനങ്ങൾക്കും താഴെയാണ് നമ്മുടെ സ്ഥാനം- മന്ത്രി പറഞ്ഞു. ഭക്ഷ്യ പൊതുവിതരണ മന്ത്രി ജി.ആർ.അനിൽ അധ്യക്ഷത വഹിച്ച ചടങ്ങിൽ കൃഷി മന്ത്രി പി.പ്രസാദ് മുഖ്യാതിഥിയായി. ഭക്ഷ്യ പൊതുവിതരണ വകുപ്പ് സെക്രട്ടറി എം.ജി.രാജമാണിക്യം വകുപ്പിന്‍റെ ഒമ്പത് വർഷത്തെ പ്രവർത്തന റിപ്പോർട്ട് അവതരിപ്പിച്ചു. ധനകാര്യ കമ്മീഷൻ ചെയർമാൻ കെ എൻ ഹരിലാൽ, ഐ ഐ ടി ഡൽഹി പ്രൊഫസർ ഋതിക എസ് ഖേര, ആസൂത്രണ ബോർഡംഗം രവി രാമൻ, ഭക്ഷ്യ കമ്മീഷൻ ചെയർമാൻ ഡോ ജിനു സക്കറിയ ഉമ്മൻ, സപ്ലൈകോ മാനേജിംഗ് ഡയറക്ടർ ജയകൃഷ്ണൻ, ലീഗൽ മെട്രോളജി കൺട്രോളർ ജെ കിഷോർ കുമാർ, പൊതുവിതരണ ഉപഭോക്തൃകാര്യ കമ്മീഷണർ ഹിമ കെ , റേഷനിംഗ് കൺട്രോളർ ജ്യോതികൃഷ്ണ ബി തുടങ്ങിയവർ പങ്കെടുത്തു.

ഷാഫി പറന്പിലിനെതിരായ പോലീസ് നടപടി : യൂത്ത് കോണ്‍ഗ്രസിന്‍റെ സെക്രട്ടേറിയറ്റ് മാർച്ചിൽ സംഘർഷം; പോലീസ് ലാത്തിവീശി

തിരുവനന്തപുരം: ഷാഫി പറന്പിൽ എംപിക്കെതിരായ പോലീസ് നടപടിയിൽ പ്രതിഷേധിച്ച് തലസ്ഥാനത്ത് യൂത്ത് കോണ്‍ഗ്രസ് നടത്തിയ സെക്രട്ടേറിയറ്റ് മാർച്ചിൽ സംഘർഷം. പ്രവർത്തകർക്കു നേരെ പോലീസ് ലാത്തി വീശി. ലാത്തിച്ചാർജിൽ പ്രവർത്തകരിൽ ചിലർക്ക് പരിക്കേറ്റു. പരിക്കേറ്റവരുൾപ്പെടെ റോഡിൽ കുത്തിയിരുന്നു പ്രതിഷേധിച്ചതോടെ സെക്രട്ടേറിയറ്റ് പരിസരം രാത്രി ഏറെ നേരം സംഘർഷത്തിന്‍റെ പിടിയിലമർന്നു. ഷാഫി പറന്പിലിനെതിരായ പോലീസ് നടപടിയിൽ പ്രതിഷേധിച്ച് ഇന്നലെ രാത്രി പത്തരയോടെയാണ് യൂത്ത് കോണ്‍ഗ്രസ് പ്രവർത്തകർ സെക്രട്ടേറിയേറ്റിലേക്ക് മാർച്ച് നടത്തിയത്. സംസ്ഥാന വ്യാപകമായി തെരുവിൽ പോലീസിനെതിരായി പ്രതിഷേധങ്ങളുയർന്ന പശ്ചാത്തലത്തിൽ സെക്രട്ടേറിയറ്റിന് കനത്ത പോലീസ് കാവലാണ് ഏർപ്പെടുത്തിയിരുന്നത്. പ്രതിഷേധ മുദ്രാവാക്യങ്ങളുമായി സെക്രട്ടേറിയറ്റിനു മുന്നിലേക്ക് ഇരച്ചെത്തിയ പ്രവർത്തകരുടെ വൈകാരിക പ്രതികരണങ്ങൾക്കു പിന്നാലെ പോലീസ് ലാത്തിച്ചാർജ് നടത്തി. പ്രവർത്തകരിൽ ചിലരെ പോലീസ് വളഞ്ഞിട്ടു തല്ലി. ഇതു തടുക്കാൻ ശ്രമിക്കുന്നതിനിടയിൽ പോലീസും പ്രവർത്തകരും തമ്മിൽ ഉന്തും തള്ളും വാക്കേറ്റവുമുണ്ടായി. ആദ്യഘട്ടത്തിൽ തന്നെ പോലീസ് ലാത്തി വീശിയിട്ടും പിന്തിരിയാൻ കൂട്ടാക്കാതെ പ്രവർത്തകർ പോലീസിനോടേറ്റുമുട്ടുന്ന കാഴ്ചയ്ക്കാണ് നഗരം സാക്ഷ്യം വഹിച്ചത്. ലാത്തിച്ചാർജിൽ പരിക്കേറ്റ പ്രവർത്തകർ ഉൾപ്പെടെയുള്ളവർ റോഡിൽ കുത്തിയിരുന്നു പ്രതിഷേധിച്ചതോടെ സെക്രട്ടേറിയറ്റ് പരിസരം ഏറെ നേരം സംഘർഷാന്തരീക്ഷത്തിലമർന്നു.

കെട്ടിടം ഉദ്ഘാടനം ചെയ്തു

പേരൂര്‍ക്കട: കേരളത്തിലെ പൊതുവിദ്യാഭ്യാസ മേഖല രാജ്യത്തുതന്നെ ഉയര്‍ന്ന നിലവാരത്തിലാണെന്നു മന്ത്രി വി. ശിവന്‍കുട്ടി പറഞ്ഞു. പിഎംജി ഗവ. സിറ്റി വൊക്കേഷണല്‍ ഹയര്‍സെക്കന്‍ഡറി സ്‌കൂളിലെ പുതിയ ബഹുനില മന്ദിരത്തിന്‍റെ ഉദ്ഘാടനം നിര്‍വഹിക്കുകയായിരുന്നു മന്ത്രി. പൊതുമരാമത്ത് പ്ലാന്‍ ഫണ്ടും എംഎല്‍എയുടെ ആസ്തി വികസന ഫണ്ടും ചേര്‍ത്ത് 4.19 കോടി രൂപ വിനിയോഗിച്ചാണു പുതിയ മന്ദിരം നിര്‍മിച്ചത്. 13,225 ചതുരശ്രയടി വിസ്തീര്‍ണത്തില്‍ നിര്‍മിച്ച കെട്ടിടത്തില്‍ മൂന്ന് നിലകളിലായി 11 ക്ലാസ് മുറികള്‍, ഓഫീസ് മുറി, സ്റ്റാഫ് റൂമുകള്‍, ലൈബ്രറി എന്നിവയുണ്ട്. വി.കെ. പ്രശാന്ത് എംഎല്‍എ അധ്യക്ഷത വഹിച്ചു. സ്‌കൂള്‍ പ്രിന്‍സിപ്പല്‍ വി.എസ്. സുജിന്‍, പ്രധാനാധ്യാപിക എസ്. ജിജി, കുന്നുകുഴി വാര്‍ഡ് കൗണ്‍സിലര്‍ എ. മേരി പുഷ്പം, പൊതുമരാമത്ത് കെട്ടിട വിഭാഗം സൂപ്രണ്ടിംഗ് എന്‍ജിനീയര്‍ പി. ഇന്ദു എന്നിവര്‍ പങ്കെടുത്തു.

പഞ്ചായത്ത് പടിക്കൽ ധർണ നടത്തി

വെള്ളറട : തൊഴിലുറപ്പ് പദ്ധതിയുടെ മറവില്‍ സാധാരണക്കാരുടെ നികുതി പണമായ 3.70 കോടി രൂപ വെള്ളറട പഞ്ചായത്ത് പ്രസിഡന്‍റ് എം. രാജ് മോഹന്‍ വെട്ടിച്ചുവെന്നാരോപിച്ചും പ്രസിഡന്‍റിന്‍റെ രാജി ആവശ്യപ്പെട്ടും സിപിഎം വെള്ളറട പഞ്ചായത്ത് പടിക്കല്‍ ധര്‍ണ നടത്തി. പ്രകടനമായാണു പ്രതിഷേധക്കാര്‍ പഞ്ചായത്തിനു മുന്നിലെത്തിയത്. തുടര്‍ന്നു നടന്ന സമരം കര്‍ഷക കോണ്‍ഗ്രസ് നേതാവും പഞ്ചായത്ത് മുന്‍ പ്രസിഡന്‍റുമായ എന്‍. രതീന്ദ്രന്‍ ഉദ്ഘാടനം ചെയ്തു. ഡി.കെ. ശശി, കെ.എസ്. മോഹനന്‍, വി. സനാതനന്‍, എം.ആര്‍. രംഗനാഥന്‍, പനച്ചമൂട് ഉദയന്‍, സി. ജ്ഞാനദാസ്, എസ്. പ്രദീപ്, വി. നളിനകുമാര്‍, അഡ്വ. സന്തോഷ് കുമാര്‍, ടി.എൽ. രാജ്, നിലമാംമൂട് ഉദയന്‍, പനച്ചമൂട് ഷാം, ഷിഹാബുദീന്‍ തുടങ്ങിയവർ പ്രസംഗിച്ചു.

കോണ്‍ഗ്രസ് ജനനന്മ യാത്ര സംഘടിപ്പിച്ചു

വെള്ളറട: ആര്യന്‍കോട് പഞ്ചായത്ത് ഭരണസമിതിയുടെ ദുര്‍ഭരണത്തിനെതിരെ കോണ്‍ഗ്രസ് ചെമ്പൂര് മണ്ഡലം കമ്മിറ്റിയുടെ നേതൃത്വത്തിലാണ് രണ്ടു ദിവസത്തെ പദയാത്ര സംഘടിപ്പിച്ചത്. പദയാത്ര വെള്ളിയാഴ്ച ചെമ്പൂര് സമാപിക്കും. മണ്ഡലം പ്രസിഡന്‍റ് സാം കുമാര്‍ ജാഥ ക്യാപ്റ്ററായ പദയാത്ര നെയ്യാറ്റിന്‍കര സനല്‍ ഉദ്ഘാടനം ചെയ്തു. ഗിരീഷ് കുമാര്‍, മണികണ്ഠന്‍, ബ്രമിന്‍ ചന്ദ്രന്‍, ഉഷ കുമാരി, ജോണി, വീരേന്ദ്ര കുമാര്‍, വി.ജെ. വില്‍ഫ്രണ്ട്‌സണ്‍, വിഭു കുമാര്‍, രാജന്‍, റാബി തുടങ്ങിയവര്‍ പ്രസംഗിച്ചു. ഇന്നു ചെന്പൂരിൽ നടക്കുന്ന സമാപന സമ്മേളനം കെപിസിസി ജനറല്‍ സെക്രട്ടറി മര്യാപുരം ശ്രീകുമാര്‍ ഉദ്ഘാടനം ചെയ്യും.

ലോക മാനസികാരോഗ്യദിനം: വാക്കത്തണ്‍ സംഘടിപ്പിച്ചു

പേരൂര്‍ക്കട: ലോക മാനസികാരോഗ്യദിനത്തിന്‍റെ ഭാഗമായി തിരുവനന്തപുരം രാജ്ഭവന്‍ മുതല്‍ മാനവീയം വീഥി വരെ വോക്ക് വിത്ത് കളക്ടര്‍ എന്ന പേരില്‍ വാക്കത്തണ്‍ സംഘടിപ്പിച്ചു. ജില്ലാ വനിത ശിശു വികസന ഓഫീസ്, മിഷന്‍ ശക്തി ഡിസ്ട്രിക്റ്റ് സങ്കല്‍പ്പ് ഹബ് ഫോര്‍ എംപവര്‍മെന്‍റ് ഓഫ് വിമന്‍, ലയണ്‍സ് ക്ലബ് എന്നിവ സംയുക്തമായി സംഘടിപ്പിച്ച വാക്കത്തണ്‍ ജില്ലാകളക്ടര്‍ അനുകുമാരി ഫ്ളാഗ് ഓഫ് ചെയ്തു. ജില്ലാ വനിത ശിശു വികസന ഓഫീസര്‍ പി.എസ്. തസ്നീം, മിഷന്‍ കോ-ഓര്‍ഡിനേറ്റര്‍ നീതു എസ്. സൈനു തുടങ്ങിയവര്‍ പങ്കെടുത്തു.

നെയ്യാറ്റിൻകര കുടുംബക്കോടതിയില്‍ വ്യാജ ബോംബ് ഭീഷണി

നെയ്യാറ്റിൻകര: നെയ്യാറ്റിൻകര കുടുംബകോടതിയില്‍ ബോംബ് ഭീഷണിയെന്ന് ഇ മെയില്‍ സന്ദേശം. പോലീസ് അന്വേഷണം ആരംഭിച്ചു. കുടുംബകോടതിയില്‍ ഇന്നലെ ലഭിച്ച സന്ദേശം രാവിലെ തന്നെ നെയ്യാറ്റിന്‍കര പോലീസിനു കൈമാറി. തുടര്‍ന്ന് പോലീസും ആന്‍റി ബോംബ് സ്ക്വാഡും ഡോഗ് സ്ക്വാഡും ഫയര്‍ ആന്‍ഡ് റസ്ക്യൂ യൂണിറ്റ് ടീമും സംയുക്തമായി കോടതിയും പരിസരവും പരിശോധിച്ചു. കോടതി നടപടികള്‍ക്ക് യാതൊരു വിധ തടസവും വരാതെയായിരുന്നു പോലീസിന്‍റെ നേതൃത്വത്തിലുള്ള പരിശോധന. വിശദപരിശോധന പൂര്‍ത്തിയായെങ്കിലും ബോംബോ മറ്റു സ്ഫോടക വസ്തുക്കളോ ലഭിച്ചിട്ടില്ലെന്നു പോലീസ് അറിയിച്ചു. എന്തായാലും, ഭീഷണി സന്ദേശത്തിന്‍റെ പേരില്‍ പോലീസ് കേസെടുത്ത് ഊര്‍ജിതമായ അന്വേഷണം തുടങ്ങിയിട്ടുണ്ട്.

ഒരു രൂപയുടെ റവന്യൂ സ്റ്റാമ്പ് കിട്ടാനില്ല

വെള്ളറട : മലയോരമേഖലയായ വെള്ളറട പ്രദേശത്ത് റവന്യൂ സ്റ്റാമ്പിനു ക്ഷാമം. റവന്യൂ സ്റ്റാമ്പ് കിട്ടാതായതോടെ പ്രദേശത്തെ പല എഴുത്തു സംബന്ധമായ പ്രവര്‍ത്തനങ്ങളെല്ലാം തടസപ്പെട്ടിരിക്കുകയാണ്. പാറശാല, നെയ്യാറ്റിന്‍കര, കാട്ടാക്കട ട്രഷറികളില്‍ നിന്നാണ് വെള്ളറട മേഖലയിലേക്കു റവന്യൂ സ്റ്റാമ്പ് എത്തുന്നത്. ഒരു മാസത്തോളമായി ഗ്രാമീണ മേഖലയില്‍ റവന്യൂ സ്റ്റാമ്പ് കിട്ടാക്കനിയായി മാറി. വെണ്ടര്‍മാര്‍ റവന്യൂ സ്റ്റാമ്പ് കിട്ടും എന്ന പ്രതീക്ഷയില്‍ ട്രഷറിയെ സമീപിക്കുമ്പോള്‍ കിട്ടാനില്ലെന്ന മറുപടിയാണ് അവർക്കും ലഭിക്കുന്നത്. ഇതു നിമിത്തം പല ഉദ്യോഗാർഥികള്‍ക്കും ലോണ്‍ സംബന്ധമായ കാര്യങ്ങള്‍ക്കു ബാങ്കിനെ സമീപിക്കാനോ മറ്റോ കഴിയാത്ത സാഹചര്യമാണ്. റവന്യൂ സ്റ്റാമ്പ് ലഭിക്കാൻ അടിയന്തര നടപടികള്‍ സ്വീകരിക്കണമെന്നാണ് ഗുണഭോക്തള്‍ ആവശ്യപ്പെടുന്നു.

വിജ്ഞാന കേരളം പദ്ധതി: തൊഴില്‍മേള സംഘടിപ്പിച്ചു

പാറശാല: കേരള സര്‍ക്കാരിന്‍റെ വിജ്ഞാന കേരളം ജനകീയ പദ്ധതിയുടെ ഭാഗമായി പാറശാല ബ്ലോക്ക് പഞ്ചായത്തിന്‍റെ ആഭിമുഖ്യത്തില്‍ കുടുംബശ്രീയുടെ സഹകരണത്തോടെ വിജ്ഞാന കേരളം തൊഴില്‍മേള സംഘടിപ്പിച്ചു. പാറശാല ജയ മഹേഷ് ഓഡിറ്റോറിയത്തില്‍ സി.കെ. ഹരീന്ദ്രന്‍ എംഎല്‍എ മേള ഉദ്ഘാടനം ചെയ്തു. ബ്ലോക്ക് പഞ്ചായത്ത് പ്രസിഡന്‍റ് അഡ്വ. എസ്.കെ. ബെന്‍ഡാര്‍വിന്‍ അധ്യക്ഷത വഹിച്ചു. ഓഫര്‍ ലെറ്റര്‍ കൈമാറല്‍ ചടങ്ങ് ജില്ലാ പഞ്ചായത്ത് പ്രസിഡന്‍റ് അഡ്വ. ഡി. സുരേഷ് കുമാര്‍ നിര്‍വഹിച്ചു. ആശംസകള്‍ നേര്‍ന്നുകൊണ്ട് പഞ്ചായത്ത് പ്രസിഡന്‍റുമാരായ എല്‍. മഞ്ജുസ്മിത, ലോറെന്‍സ് ബ്ലോക്ക് പഞ്ചായത്ത് വൈസ് പ്രസിഡന്‍റ് അല്‍വേഡിസ, ബ്ലോക്ക് പഞ്ചായത്ത് സ്ഥിരംസമിതി അധ്യക്ഷരായ എസ്. ആര്യദേവന്‍, വിനിതകുമാരി, ജെ. ജോജി ബ്ലോക്ക് പഞ്ചായത്ത് അംഗങ്ങളായ വൈ. സതീഷ്, അനിഷ, അഡ്വ. രാഹില്‍ ആര്‍. നാഥ്, ശാലിനി സുരേഷ്, ആദര്‍ശ്, എം. കുമാര്‍, ജെ. സോണിയ, രേണുക, ഷിനി, വിജ്ഞാന കേരളം ഡിഎംസി ജിന്‍രാജ്, ജോയിന്‍റ് ബിഡിഒ രാജീവ് തുടങ്ങിയവര്‍ പങ്കെടുത്തു.

മയക്കുമരുന്നുമായി ബംഗാൾ സ്വദേശി പിടിയിൽ

കോവളം: മയക്കുമരുന്നുമായി ബംഗാൾ സ്വദേശി എക്സെെസ് സംഘത്തിന്‍റെ പിടിയിലായി.പശ്ചിമ ബംഗാൾ സ്വദേശി ബുള്ളറ്റ് മണ്ഡൽ (32) ആണ് പിടിയിലായത്. വിഴിഞ്ഞം തീയേറ്റർ ജംഗ്ഷനു സമീപത്തു നിന്നും പിടികൂടിയ ഇയാളുടെ പക്കൽ നിന്നും 7.2 ഗ്രാം ബ്രൗൺ ഷുഗറും 200 ഗ്രാം കഞ്ചാവും മോഷ്ടിച്ച ആറു മൊബൈൽ ഫോണുകളും കണ്ടെടുത്തു. നെയ്യാറ്റിൻകര റേഞ്ച് എക്സെെസ് ഇൻസ്പെക്ടർ അജയകുമാർ, പ്രീവന്‍റീവ് ഓഫീസർമാരായ അരുൺകുമാർ, രജിത്,സുരേഷ് കുമാർ,സിഇഒമാരായ ഷിന്‍റോ എബ്രഹാം, ശ്രീനുസന്ദകുമാർ എന്നിവരടങ്ങിയ സംഘമാണ് പിടികൂടിയത്. എക്സൈസിനു ലഭിച്ച രഹസ്യവിവരത്തിന്‍റെ അടിസ്ഥാനത്തിൽ മണിക്കൂറുകൾ നീണ്ട നിരീക്ഷണത്തിനൊടുവിലാണ് പ്രതിയെ പിടികൂടിയത്. ഇയാളുമായി ബന്ധമുള്ളവരെയും പിടികൂടാനുണ്ടെന്ന് എക്സെെസ് ഉദ്യോഗസ്ഥർ പറഞ്ഞു.

കെഎസ്ആര്‍ടിസിയില്‍ നിര്‍മിതബുദ്ധി പ്രയോജനപ്പെടുത്തും: മന്ത്രി

നേമം: വാഹനങ്ങള്‍ ഓടിക്കാനും ഷെഡ്യൂള്‍ ചെയ്യാനുമായി കെഎസ്ആര്‍ടിസിയില്‍ നിര്‍മിത ബുദ്ധി പ്രയോജനപ്പെടുത്തുമെന്നു മന്ത്രി കെ.ബി. ഗണേഷ് കുമാര്‍. പാപ്പനംകോട് സെന്‍ട്രല്‍ വര്‍ക്‌സില്‍ ശീതികരിച്ച് ആധുനീകവത്കരിച്ച വര്‍ക് ഷോപ്പിന്‍റെയും നവീകരിച്ച സ്റ്റോറിന്‍റെ യും ഡ്രൈവിംഗ് സ്‌കൂളിന്‍റെയും ഐഡിടിആര്‍ എക്സ്റ്റന്‍ഷന്‍ സെന്‍ററിന്‍റെയും ഉദ്ഘാടനം നിര്‍വഹിക്കുകയായിരുന്നു മന്ത്രി. രാഷ്ട്രീയം മറന്നു കെഎസ്ആര്‍ടിസിയെ രക്ഷപ്പെടുത്താന്‍ എല്ലാവരും ഒരുമിച്ചു നില്‍ക്കണം. പ്ലാസ്റ്റിക്ക് കുപ്പിയിടാന്‍ പാടില്ലെന്നു പറഞ്ഞതു സ്‌നേഹം കൊണ്ടാണ്. ജനങ്ങളുടെ മുമ്പില്‍ ജീവനക്കാര്‍ പരിഹാസ കഥാപാത്രമാകരുത്. മന്ത്രി കൂട്ടിച്ചേർത്തു. കെഎസ്ആര്‍ടിസിക്ക് ഡ്രൈവിംഗ് സ്‌കൂള്‍ വഴി രണ്ടര കോടി രൂപയുടെ ലാഭമുണ്ടായിട്ടുണ്ട്. ബജറ്റ് ടൂറിസത്തിന്‍റെ മാതൃകയില്‍ എല്ലാ സ്‌കൂളുകളിലേയും കുട്ടികളെ കെഎസ്ആര്‍ടിസി ബസുകളില്‍ കയറ്റി വ്യവസായ സ്ഥാപനങ്ങളില്‍ സന്ദര്‍ശനത്തിനു സൗകര്യമൊരുക്കും. സ്‌കൂളുകളില്‍ എസ്പിസി മാതൃകയില്‍ റോഡ് സേഫ്റ്റി കേഡറ്റ് പദ്ധതി കൊണ്ടുവരുമെന്നും മന്ത്രി പറഞ്ഞു. മന്ത്രി വി.ശിവന്‍കുട്ടി അധ്യക്ഷനായി. സിഎംഡി ഡോ. പി.എസ്. പ്രമോജ് ശങ്കര്‍, ട്രാന്‍സ്‌പോര്‍ട്ട് കമ്മീഷണര്‍ നാഗരാജു ചകിലം, ഡയറക്ടര്‍ ബോര്‍ഡ് അംഗങ്ങളായ കെ.എസ്. വിജയശ്രീ, വൈ.അഹമദ് കബീര്‍, കൗണ്‍സിലര്‍ ജി.എസ്. ആശാനാഥ്, എ. ഷാജി തുടങ്ങിയവര്‍ പങ്കെടുത്തു.

അതിക്രമിച്ചു കയറി കടയുടമയേയും സഹായിയേയും മർദിച്ചെന്നു പരാതി

മലയിൻകീഴ്: കടയിൽ അതിക്രമിച്ചു കയറി കടയുടമയായ സ്ത്രീയെയും ഒപ്പം സഹായത്തിനുണ്ടായിരുന്ന ആളെയും മർദിച്ചതായി പരാതി. മദ്യപിച്ച് കടയിലെത്തിയ പ്രദേശവാസിയായ ആൾ അക്രമാസക്തനായി കടഅടിച്ചുതകർക്കുകയായിരുന്നു. മലയിൻകീഴ് വിളവൂർക്കൽ നാലാംകല്ല് കുണ്ടാംകോണം ആരാമത്തിൽ താമസിക്കുന്ന ലില്ലിയെയാണ് പ്രദേശവാസിയായ മദ്യപിച്ചെത്തി മുഖത്തടിച്ചത്. തുടർന്ന് കടയിലുള്ള സാധനങ്ങൾ റോഡിലേക്ക് വലിച്ചെറിയുകയും കടയുടെ ബോർഡ് അടിച്ചു തകർക്കുകയും ചെയ്തു. മുൻപും ഇയാൾ അക്രമം നടത്തിയതിനു മലയിൻകീഴ് പോലീസിൽ പരാതി നൽകിയിരുന്നു. അന്ന് ഇയാളെ പോലീസ് വിലക്കി വിട്ടിരുന്നു. തുടർന്ന് ഇപ്പോഴാണ് ഇയാൾ വീണ്ടും ഇവിടെ ആക്രമണം നടത്തിയത്. മലയിൻകീഴ് പോലീസ് പരാതി സ്വീകരിച്ച് അന്വേഷണം ആരംഭിച്ചു.

യുവാവിനെ കാട്ടുപന്നി ആക്രമിച്ചു

പാലോട്: ബൈക്ക് യാത്രക്കാരനായ യുവാവിനെ കാട്ടുപന്നി ആക്രമിച്ചു. ചൊവ്വാഴ്ച രാത്രി ഏഴിന് പനവൂർ - പേരയം റോഡിൽ അജയപുരത്തായിരുന്നു സംഭവം. പേരയം സ്വദേശിയായ സിദ്ധാർഥിനാ(26)ണ് ഗുരുതര പരിക്കേറ്റത്. ജോലികഴിഞ്ഞ് തിരികെ വീട്ടിലേക്ക് മടങ്ങുന്നതിനിടെ അജയപുരത്ത് ഒരു സ്വകാര്യപുരയിടത്തിൽ നിന്നും റോഡിലേക്ക് പാഞ്ഞെത്തിയ കാട്ടുപന്നി സിദ്ധാർഥ് സഞ്ചരിച്ച ബൈക്കിൽ ഇടിക്കുകയായിരുന്നു. ഇടിയുടെ ആഘാതത്തിൽ റോ ഡിലേക്കു തെറിച്ചുവീണ സി ദ്ധാർഥിന്‍റെ തോളെല്ലിനു സാരമായി പരിക്കേറ്റു. നാട്ടുകാരാണു സിദ്ധാർഥിനെ നെടുമങ്ങാട് ജില്ലാ ആശുപത്രിയിൽ പ്രവേശിപ്പിച്ചത്.

ബസ് സർവീസ് ഇല്ല: പനയമുട്ടം-ചേപ്പിലോട് പ്രദേശവാസികൾ യാത്രാദുരിതത്തിൽ

നെടുമങ്ങാട്: ബസ് സർവീസ് ആവശ്യത്തിന് ഇല്ലാതെ പനയമുട്ടം-ചേപ്പിലോട് നിവാസികൾ യാത്രാദുരിതത്തിൽ. വിദ്യാർഥികളും ഗ്രാമീണ മേഖലയിൽനിന്ന് ടൗണിൽ ജോലിക്ക് പോകുന്നവരുമുൾപ്പെടെ സ്ഥിരം യാത്രക്കാരാണ് വലയുന്നത്. രാവിലെയും വൈകുന്നേരവും തിരക്കുള്ള സമയത്ത് ഓപ്പറേറ്റു ചെയ്തിരുന്ന രണ്ടു സർവീസുകൾ നിറുത്തിവച്ചിരിക്കുന്നതാണ് യാത്രാദുരിതത്തിന് ഇടയാക്കിയതെന്നു യാത്രക്കാർ പറയുന്നു. രാവിലെ ഏഴിന് ആദ്യ സർവീസ് വന്നുമടങ്ങിയാൽ പിന്നെ 8.15-നെ ബസുള്ളു. നെടുമങ്ങാടും സിറ്റിയിലും പഠിക്കുന്ന കുട്ടികളും സ്ഥലവാസികളും കൂടുതലായി ആശ്രയിക്കുന്നത് ഈ സർവീസിനെയാണ്. മിക്ക ദിവസങ്ങളിലും ഇതു മുടക്കമായിരിക്കും. സർവീസുള്ള ദിവസങ്ങളിൽ ഓവർലോഡ് കാരണം കയറ്റം കയറാനാകാതെനിന്നു പോകാറുമുണ്ട്. 8.50ന് സ്‌കൂളിൽ എത്തേണ്ട വിദ്യാർഥികൾ മിക്കപ്പോഴും ഒമ്പതു മണി കഴിയും. ഇക്കാരണത്താൽ പ്രദേശത്തെ കുട്ടികൾ പതിവായി ക്ലാസിനു പുറത്തു നിൽക്കേണ്ട അവസ്ഥയാണെന്നും പരാതിയുണ്ട്. കൊവിഡിന് മുമ്പ് രാവിലെ 7.30ന് നെടുമങ്ങാട് നിന്നു പനയമുട്ടത്തേക്കു നടത്തിയിരുന്ന സർവീസ് ഇപ്പോൾ ഓടിക്കുന്നില്ല. ഇതേക്കാൾ ദുരിതപൂർണമാണ് വൈകുന്നേരത്തെ കാഴ്ച. 4.10ന് ചേപ്പിലോടു ബസ് പുറപ്പെട്ടുകഴിഞ്ഞാൽ 5.10നാണ് അടുത്ത സർവീസ്. തിരക്കു കാരണം വിദ്യാർഥികൾക്ക് ബസിൽ കയറാൻ കഴിയില്ല. വേറെ സർവീസ് ഇല്ലാത്തതിനാൽ കുട്ടികൾ ഫുട്‌ബോർഡിൽ നിന്നായിരിക്കും മിക്കവാറും യാത്ര ചെയ്യുന്നത്. ഇതുമൂലം നിരവധി അപകടങ്ങളും ഉണ്ടായിട്ടുണ്ട്. ആനാട് എസ്എൻവിഎച്ച്എസ്എസിലും നെടുമങ്ങാട്ടെ സമാന്തര വിദ്യാലയങ്ങളിലും ഗവണ്മെന്‍റ് കോളജിലും ടെക്നിക്കൽ സ്‌കൂളിലും പഠിക്കുന്ന കുട്ടികൾ ബസിൽ ഇടം കിട്ടാതെ കിലോമീറ്ററുകൾ കാൽനടയായി വീടുകളിൽ എത്തുമ്പോൾ നേരമിരുട്ടും. കുട്ടികൾ മടങ്ങിയെത്തുംവരെ രക്ഷിതാക്കളുടെയുള്ളിൽ തീയാണ്. തിരക്ക് മുൻനിറുത്തി ഇതേസമയത്ത് മുമ്പ് ഓടിച്ചിരുന്ന ബസും നിറുത്തലാക്കിയിട്ട് രണ്ടുവർഷമായി. നിർത്തിവച്ച സർവീസുകൾ പുനഃസ്ഥാപിക്കണം എന്നാവശ്യപ്പെട്ട് നെടുമങ്ങാട് ഡിടിഒ അടക്കമുള്ളവർക്ക് നിവേദനം നൽകിയിട്ടും നടപടിയായിട്ടില്ലെന്നും ആക്ഷേപമുണ്ട്.

തെരുവു നായ ശല്യം രൂക്ഷം : ബിജെപി കൗണ്‍സിലര്‍മാര്‍ നായയുമായി കൗണ്‍സിലെത്തി

നെയ്യാറ്റിൻകര : തെരുവു നായകളുടെ ശല്യം വര്‍ധിച്ചുവെന്ന് ആരോപിച്ച് ബിജെപി കൗണ്‍സിലര്‍മാര്‍ നായയെയും കൊണ്ട് കൗണ്‍സില്‍ ഹാളിലെത്തി. നടുത്തളത്തില്‍ കുത്തിയിരുന്ന് പ്രതിഷേധിച്ചു. നെയ്യാറ്റിന്‍കര നഗരസഭയിലെ ബിജെപി പാർലമെന്‍ററി പാർട്ടി ലീഡർ ഷിബുരാജ് കൃഷ്ണയുടെ നേതൃത്വത്തില്‍ മഞ്ചത്തല സുരേഷ്, കല, വേണുഗോപാൽ, മരങ്ങാലി ബിനു, അജിത, സുമ എന്നീ കൗണ്‍സിലര്‍മാരാണ് ഇന്നലെ കൗണ്‍സില്‍ യോഗത്തില്‍ പ്രതിഷേധിച്ചത്. കൗൺസിൽ യോഗങ്ങളിൽ തെരുവു നായകൾക്കെതിരെ നടപടികൾ സ്വീകരിക്കണമെന്നു നിരന്തരം ആവശ്യപ്പെട്ടിട്ടുണ്ടെന്ന് ബിജെപി കൗണ്‍സിലര്‍മാര്‍ പറഞ്ഞു. എന്നാല്‍ യാതൊരുവിധ സത്വര നടപടിയും സ്വീകരിക്കപ്പെട്ടില്ല. നിരവധി പേർ തെരുവു നായകളുടെ ആക്രമണത്തിനു വിധേയരായി. നായകളുടെ കടിയേറ്റവര്‍ക്ക് നെയ്യാറ്റിന്‍കര ജനറല്‍ ആശുപത്രിയില്‍ കുത്തിവെയ്പിനുള്ള സൗകര്യമില്ലെന്നും കൗണ്‍സിലര്‍മാര്‍ ആരോപിച്ചു.

എം. സുജനപ്രിയന്‍ പുരസ്‌കാരം ആര്‍. കുമാരന്

തിരുവനന്തപുരം : നഗരസഭ മുന്‍ ഡെപ്യൂട്ടി മേയറും സിപിഎം നേതാവുമായ എം. സുജനപ്രിയന്‍റെ പേരിലുള്ള പ്രതീക്ഷ ചാരിറ്റബിള്‍ സൊസൈറ്റിയുടെ പുരസ്‌കാരത്തിന് ആര്‍. കുമാരനെ തെരഞ്ഞെടുത്തു. തിരുവനന്തപുരം ജില്ലാ അസംഘടിത തൊഴിലാളി വെല്‍ഫയര്‍ കോ-ഓപ്പറേറ്റീവ് സൊസൈറ്റി പ്രസിഡന്‍റാണ് ആര്‍. കുമാരന്‍. വിളവൂര്‍ക്കല്‍ പഞ്ചായത്ത് വൈസ് പ്രസിഡന്‍റ്, നേമം ബ്ലോക്ക് പഞ്ചായത്ത് അംഗം, വിളപ്പില്‍ സഹകരണ ബാങ്ക് ഭരണസമിതി അംഗം എന്നീ സ്ഥാനങ്ങളും പാര്‍ലമെന്‍ററി രംഗത്ത് വഹിച്ചിട്ടുണ്ട്. ഡോ. അശോക് രാജന്‍ ചെയര്‍മാനും അഡ്വ. വാഴമുട്ടം ഉണ്ണി, അഡ്വ. പൗര്‍ണമി എന്നിവര്‍ അംഗങ്ങളുമായ ജൂറിയാണ് പുരസ്‌ക്കാരം നിര്‍ണയിച്ചത്. പ്രതീക്ഷ ചാരിറ്റബിള്‍ സൊസൈറ്റിയുടെ വാര്‍ഷിക പൊതുയോഗത്തില്‍ ആര്‍. കുമാരനു പുരസ്‌കാരം നമ്മാനിക്കുമെന്നു സെക്രട്ടറി വി.എം. അനില്‍ അറിയിച്ചു.

വിലക്കയറ്റത്തിൽ കേരളം നന്പർ വണ്‍: പ്രതിപക്ഷ നേതാവ്

തിരുവനന്തപുരം: കേരളത്തിന് ഇന്ത്യയിൽ ഒരു ഒന്നാംസ്ഥാനമുണ്ട്, അത് വിലക്കയറ്റത്തിലാണെന്നു പ്രതിപക്ഷ നേതാവ് വി.ഡി. സതീശൻ. സെക്രട്ടേറിയറ്റ് ആക്ഷൻ കൗണ്‍സിൽ സംഘടിപ്പിച്ച നിയമസഭാ മാർച്ച് ഉദ്ഘാടനം ചെയ്യുകയായിരുന്നു പ്രതിപക്ഷ നേതാവ്. പങ്കാളിത്ത പെൻഷൻ പിൻവലിച്ച് ഒപി എസ് പുനഃസ്ഥാപിക്കുക, സംഘടനാ നേതാക്കളുടെ പ്രമോഷൻ തടഞ്ഞ നടപടി റദ്ദാക്കുക, സർക്കാർ വിഹിതത്തോടെ മെഡിസെപ്പ് നടപ്പാക്കുക, ആശ്രിത നിയമന അവകാശം സംരക്ഷിക്കുക തുടങ്ങിയ ആവശ്യങ്ങളുന്നയിച്ചായിരുന്നു നിയമസഭാ മാർച്ച്. സെക്രട്ടേറിയറ്റ് ആക്‌ഷൻ കൗണ്‍സിൽ കണ്‍വീനർ എം.എസ്. ഇർഷാദ് അധ്യക്ഷത വഹിച്ചു. കെ.പി. പുരുഷോത്തമൻ, എസ്. പ്രദീപ് കുമാർ, ബി.നൗഷാദ്, സി.ഡി. ശ്രീനിവാസ്, ഷിബു ജോസഫ്, വി.എ. ബിനു, കെ.എം. അനിൽകുമാർ, എ. സുധീർ, ജി.ആർ. ഗോവിന്ദ്, ആർ. രാമചന്ദ്രൻ നായർ, ആർ. ശ്രീലാൽ, എൻ. സുരേഷ് കുമാർ, സി.സി. റൈസ്റ്റണ്‍ പ്രകാശ് എന്നിവർ പ്രസംഗിച്ചു. സെക്രട്ടേറിയറ്റു പരിസരത്തുനിന്നു നിയമസഭാ മന്ദിരത്തിലേക്കു നടത്തിയ മാർച്ചിൽ നൂറുകണക്കിനു ജീവനക്കാർ പങ്കെടുത്തു.

ദേശീയ തപാല്‍ദിനം : ഇന്നലെകളുടെ മായാമുദ്രകളുമായി അഞ്ചല്‍പ്പെട്ടി

നെയ്യാറ്റിന്‍കര: രാജഭരണകാലത്തെ ഓര്‍മകളുമായി നെയ്യാറ്റിന്‍കര ടൗണിലെ അഞ്ചല്‍പ്പെട്ടി. ആധുനിക തപാല്‍ സംവിധാനങ്ങൾ കാര്യക്ഷമമായി തുടരുന്നുവെങ്കിലും നെയ്യാറ്റിന്‍കരക്കാര്‍ക്ക് അഞ്ചല്‍പ്പെട്ടി ഇന്നും ഗൃഹാതുരതയുടെ അടയാളമാണ്. തിരുവിതാംകൂര്‍ ചരിത്രത്തിലെ പഴയ തപാല്‍ സന്പ്രദായത്തിന്‍റെ ശേഷിപ്പാണ് അഞ്ചടി ഉയരത്തില്‍ സ്ഥിതി ചെയ്യുന്ന ഈ ഉരുക്കുപ്പെട്ടി. രാജഭരണകാലത്ത് തപാല്‍ സര്‍വീസിനെ അഞ്ചല്‍ എന്നാണ് വിളിച്ചിരുന്നത്. തപാലുരുപ്പടികള്‍ മേല്‍വിലാസക്കാര്‍ക്ക് എത്തിക്കുന്നയാൾ അഞ്ചല്‍ ശിപായി, അഞ്ചലോട്ടക്കാരന്‍ എന്നൊക്കെ അറിയപ്പെട്ടു. പെട്ടിയില്‍ നിക്ഷേപിക്കപ്പെടുന്ന തപാലുരുപ്പടികള്‍ അഞ്ചലാപ്പീസിലെത്തിച്ച് കൃത്യമായി തരം തിരിച്ചു ശരിയായ മേല്‍വിലാസക്കാരന് എത്തിച്ചുനല്‍കിയിരുന്നു. അഞ്ചല്‍ശിപായിമാരുടെ വഴി മുടക്കുന്നത് കുറ്റമായി കണക്കാക്കിയിരുന്നുവെന്നതും കൗതുകകരമായ ചരിത്രം. നെയ്യാറ്റിന്‍കര ടൗണില്‍ സ്ഥാപിച്ചിട്ടുള്ള അഞ്ചല്‍പ്പെട്ടിയില്‍ തിരുവിതാംകൂര്‍ രാജമുദ്ര കാണാം. ആറേഴു പേരെങ്കിലും ഒരുമിച്ച് ശ്രമിച്ചാലേ ഈ കനമുള്ള പെട്ടി ഉയര്‍ത്താനാവുകയുള്ളൂ. ഈ അഞ്ചല്‍പ്പെട്ടി നെയ്യാറ്റിന്‍കരയില്‍ നിന്നും തിരുവനന്തപുരത്തേയ്ക്ക് മാറ്റി സ്ഥാപിക്കാനൊരു നീക്കം നടന്നെങ്കിലും തദ്ദേശീയരുടെ കടുത്ത പ്രതിഷേധത്താല്‍ ഫലപ്രാപ്തിയിലെത്തിയില്ല. ഇപ്പോഴും അഞ്ചല്‍പ്പെട്ടിയില്‍ ആളുകള്‍ കത്തുകള്‍ നിക്ഷേപിക്കുകയും തപാല്‍ ജീവനക്കാര്‍ അഞ്ചല്‍പ്പെട്ടി തുറന്നു കത്തുകള്‍ ശേഖരിച്ച് നെയ്യാറ്റിന്‍കര പോസ്റ്റോഫീസിലെത്തിച്ച് യഥാവിധി തരംതിരിക്കുകയും മേല്‍വിലാസക്കാര്‍ക്ക് എത്തിച്ചുകൊടുക്കുക

പോക്‌സോ കേസില്‍ പ്രതി അറസ്റ്റില്‍

പേരൂര്‍ക്കട: പോക്‌സോ കേസിലെ പ്രതിയെ കന്‍റോൺമെന്‍റ് എസി സ്റ്റ്യുവര്‍ട്ട് കീലറിന്‍റെ നേതൃത്വത്തില്‍ മ്യൂസിയം സിഐ വിമല്‍, എസ്ഐമാരായ വിപിന്‍, ബാലസുബ്രഹ്‌മണ്യം, സൂരജ്, എഎസ്ഐമാരായ അനില്‍കുമാര്‍, രാജേഷ്, സിപിഒമാരായ ഷൈന്‍, ഷീല, ദീപു, പ്രവീണ്‍, സുല്‍ഫി, ഷിനി എന്നിവര്‍ ചേര്‍ന്ന് അറസ്റ്റുചെയ്തു. നെയ്യാറ്റിന്‍കര ആറാംമട പ്ലാങ്കാവിള അഴുകറത്തല ചാനല്‍ക്കര വീട്ടില്‍ അബു താഹിര്‍ (26) ആണ് അറസ്റ്റിലായത്. ഈവര്‍ഷം ജൂലൈ മാസം 27-നാണ് കേസിനാസ്പദമായ സംഭവം. പ്ലാമൂടുള്ള ഒരു ട്രെയിനിംഗ് സ്ഥാപനത്തിലെ പ്രായപൂര്‍ത്തിയാകാത്ത കുട്ടിയാണ് അപമാനിക്കപ്പെട്ടത്. സ്ഥാപനത്തിലേക്കു പോകാന്‍ കിഴക്കേക്കോട്ടയില്‍ ബസ് കാത്തുനില്‍ക്കുകയായിരുന്ന പെണ്‍കുട്ടിയുടെ സമീപമെത്തിയ പ്രതി ഓട്ടോറിക്ഷയില്‍ കുട്ടിയെ കയറ്റുകയും പ്ലാമൂടുള്ള ഒരു വിജനമായ സ്ഥലത്ത് എത്തിച്ചശേഷം കുട്ടിയെ അപമാ നിച്ചുവെന്നാണു പരാതി.

തട്ടുകട ഉടമയെ വെട്ടിയ ആറംഗ സംഘത്തില്‍ ഒരാള്‍ പിടിയില്‍

പേരൂര്‍ക്കട: തട്ടുകട ഉടമയെ വെട്ടിപ്പരിക്കേല്‍പ്പിച്ച ആറംഗസംഘത്തിലെ ഒരാളെ ഫോര്‍ട്ട് പോലീസ് പിടികൂടി. ഊരൂട്ടമ്പലത്തു താമസിക്കുന്ന അനൂപ് (21) ആണ് പിടിയിലായത്. തിങ്കളാഴ്ച പുലര്‍ച്ചെ ഒരുമണിയോടുകൂടിയാണ് സംഭവം. ശ്രീവരാഹം സ്വദേശി അജിത്ത് (26) ആണ് ഗുരുതരമായി പരിക്കേറ്റു ചികിത്സയില്‍ കഴിയുന്നത്. ശ്രീവരാഹം ക്ഷേത്രത്തിനു സമീപം തട്ടുകട നടത്തിവരുന്ന അജിത്ത് മദ്യപാനി സംഘത്തോടു സ്ഥലത്തിരുന്ന് മദ്യപിക്കരുതെന്നു പറഞ്ഞതാണ് പ്രകോപനത്തിനു കാരണമായത്. പ്രതികളിലൊരാള്‍ കൈയില്‍ കരുതിയിരുന്ന വെട്ടുകത്തി ഉപയോഗിച്ച് അജിത്തിന്‍റെ തലയ്ക്കു വെട്ടി. വെട്ടു തടയാന്‍ ശ്രമിച്ചപ്പോള്‍ കൈക്കും വെട്ടേറ്റു. അനൂപിനൊപ്പം മറ്റുള്ള പ്രതികള്‍ അജിത്തിനെ ആക്രമിച്ചു പരിക്കേല്‍പ്പിച്ചു. അറസ്റ്റിലായ പ്രതിയെ കോടതി റിമാന്‍ഡ് ചെയ്തു.

കുരങ്ങ് ആക്രമണം: വിദ്യാർഥിക്ക് പരിക്കേറ്റു

പാലോട്∙ കാക്കാണിക്കര എസ്എൻഎൽപി സ്കൂളിനു സമീപം ബിനുകുമാറിന്‍റെ വീട്ടിൽ കൂട്ടമായി എത്തിയ കുരങ്ങുകൾ വലിയ നഷ്ടം വരുത്തുകയും ബിനുകുമാറിന്‍റെ മകൾ വീണ(14)യെ ആക്രമിക്കുകയും ചെയ്തു. ശല്യക്കാരായ കുരങ്ങുകളെ തുരത്താൻ ശ്രമിക്കവെയാണ് വീണയെ ആക്രമിച്ചത്. കുട്ടിയുടെ കൈയിൽ മുറിവേറ്റതിനെ തുടർന്ന് ഭരതന്നൂരിലെ ആശുപത്രിയിൽ ചികിത്സ നൽകി. കൂട്ടമായി എത്തിയ കുരങ്ങുകൾ സീലിംഗ് മുഴുവൻ ഇളക്കിയെറിഞ്ഞു. വീട്ടുപകരണങ്ങളും ആഹാര സാധനങ്ങളും നശിപ്പിച്ചു. താമസിക്കാനാവാത്ത വിധം വീട് മലിനമാക്കുകയും ചെയ്തു. കഴിഞ്ഞ ഏതാനും ദിവസങ്ങളായി ഇവിടെ കുരങ്ങുകളുടെ ശല്യം രൂക്ഷമാണ്. പാലോട് ഫോറസ്റ്റ് ഉദ്യോഗസ്ഥരും ആർആർടി സംഘവും സ്ഥലത്തെത്തി കുരങ്ങുകളെ ഓടിച്ചു വിട്ടു. കൂടു സ്ഥാപിക്കുന്നത് ഉൾപ്പെടെ നടപടികൾ സ്വീകരിച്ചു കുരങ്ങ് ശല്യം നിയന്ത്രിക്കുമെന്നു വനം വകുപ്പ് അറിയിച്ചു. കാക്കാണിക്കര എസ്എൻ എൽപി സ്കൂളിലും കുരങ്ങ് ശല്യം അധ്യയനത്തെ ബാധിക്കുന്നതായി അധികൃതർ പറയുന്നു. കൂട്ടമായി എത്തി ക്ലാസുമുറികളിൽ കയറി പാഠപുസ്തകങ്ങൾ അടക്കം വലിച്ചു വാരിയിടുന്നുണ്ട്. പാചകപ്പുരയ് ക്കകത്തുവരെ കയറി ഭക്ഷണം വയ്ക്കുന്നതിനു തടസം സൃഷ്ടിക്കുന്നു. സ്കൂളിലെ ബൾബുകൾ, പൈപ്പുകൾ എന്നിവ വ്യാപക മായി നശിപ്പിച്ചു. വാട്ടർടാങ്ക് അടക്കം പലപ്പോഴും മലിനമാക്കുന്നു. കഴിഞ്ഞ ദിവസം ക്ലാസ് മുറികളിലെ സ്പീക്കറിന്‍റെ വയറുകൾ വ്യാപകമായി വലിച്ചു പൊട്ടിച്ചു നശിപ്പിച്ചിരുന്നു. .

യുവാവിനെ കാപ്പ പ്രകാരം കരുതൽ തടങ്കലിൽ പാർപ്പിച്ചു

വെഞ്ഞാറമൂട്: കാപ്പ പ്രകരം തീരുവനന്തപുരം സെൻട്രൽ ജയിലിലിൽ കരുതൽ തടങ്കലിൽ പാർപ്പിച്ചു. കോലിയക്കോട് സ്വദേശി ജയ നെ (46 ) യാണ് കാപ്പ പ്രകരം തടങ്കലിൽപാർപ്പിച്ചത്. വേളാവൂർ വാഴാഡ് ദേവീ ക്ഷേത്ര മോഷണം ഉൾപ്പടെ നിരവധി മോഷണ-അക്രമ കേസുകളിലെ പ്രതിയാണ് ജയൻ. വേളാവൂർ ഉല്ലാസ് നഗർ മുണ്ടക്കൽ വാരം പ്രദേശങ്ങളിലെ പൊതുശല്യക്കാരൻകൂടിയാണു തടങ്കലിൽ ആയ ജയൻ. സ്ഥിരമായി ഒരു വളർത്തു നായയുമായി കറങ്ങി നടന്നു പകൽ സമയങ്ങളിൽ മോഷണം നടത്തേണ്ടുന്ന സ്ഥലങ്ങൾ നോക്കി വാക്കും. തുടർന്ന് രാത്രി മോഷണം നടത്തും. മദ്യപിച്ചു പൊതുശല്യമായിരുന്ന ഇയാൾ കഴിഞ്ഞ ആഗസ്റ്റ് 30ന് പാളയംകെട്ട് ചരുവിള പുത്തൻവീട്ടിൽ ശശിയെ വെട്ടി കൊലപ്പെടുത്താൻ ശ്രമിച്ച കേസിൽ റിമാൻഡിൽ കഴിഞ്ഞു വരവേ കാപ്പ ചുമത്തണം എന്നാവശ്യപ്പെട്ടുകൊണ്ട് തിരുവനന്തപുരം റൂറൽ ജില്ലാ പോലീസ് മേധാവി സുദർശൻ നൽകിയ റിപ്പോർട്ട്‌ പ്രകരം ജില്ലാ കളക്ടർ അനുകുമാരി കരുതൽ തടങ്കലിന് ഉത്തരവിടുകയായിരുന്ന. കുഞ്ചാലുമൂട് സ്പെഷൽ സബ് ജയിലിലിൽ എത്തി വെഞ്ഞാറമൂട് ഇൻസ്‌പെക്ടർ ആസാദ് അബ്ദുൾകലാം പ്രതിയെ അറസ്റ്റ് രേഖപ്പെടുത്തി സെൻട്രൽ ജയിലിൽ പാർപ്പിച്ചു.

നിരന്തര ഉപദ്രവം; പിതാവ് മകന്‍റെ തലയ്ക്കടിച്ചു

മെഡിക്കല്‍കോളജ്: നിരന്തരമുള്ള ഉപദ്രവം നിമിത്തം പിതാവ് മകനെ തലയ്ക്കടിച്ചു പരിക്കേല്‍പ്പിച്ചു. ഗുരുതരമായി പരിക്കേറ്റ മകന്‍ തിരുവനന്തപുരം മെഡിക്കല്‍കോളജ് ആശുപത്രിയിലെ ഐസിയുവില്‍ ചികിത്സയില്‍. ഇന്നലെ പകല്‍സമയത്തായി രുന്നു കേസിനാസ്പദമായ സംഭവം. വഞ്ചിയൂര്‍ സ്റ്റേഷന്‍ പരിധിയില്‍ തോപ്പില്‍ ലെയിന്‍ ശ്രീവിഹാറില്‍ ഹൃദിക് (28) ആണ് ഗുരുതരാവസ്ഥയില്‍ ചികിത്സയിലുള്ളത്. തന്‍റെ നിലവിലുള്ള ബൈക്കിനു പകരം ഉയര്‍ന്ന വിലയുള്ള ബൈക്ക് വാങ്ങി നല്‍കണമെന്ന് ആവശ്യപ്പെട്ട് ഹൃദിക് വീട്ടില്‍ മാതാപിതാക്കളുമായി വഴക്കുണ്ടാക്കാറുണ്ടായിരുന്നതായി പോലീസ് പറയുന്നു. സംഭവദിവസം ശല്യം സഹിക്കാനാകാതെ വന്നതോടെ പിതാവ് വിദ്യാനന്ദന്‍ (54) കമ്പിപ്പാരയെടുത്ത് ഹൃദികിന്‍റെ തലയ്ക്കടിക്കുകയായിരുന്നു. സംഭവത്തിനുശേഷം വിദ്യാനന്ദന്‍ ഒളിവിലാണ്. വഞ്ചിയൂര്‍ പോലീസ് കേസെടുത്ത് അന്വേഷണം ആരംഭിച്ചു.

ദീപിക കളർ ഇന്ത്യ: സമ്മാന വിതരണം ഇന്ന്

തിരുവനന്തപുരം: ദീപിക കളർ ഇന്ത്യ മത്സര വിജയികൾക്ക് ഇന്ന് സമ്മാനങ്ങൾ വിതരണം ചെയ്യും. പട്ടം സെന്‍റ് മേരീസ് ഹയർ സെക്കൻഡറി സ്കൂളിൽ നടക്കുന്ന പരിപാടി വി.കെ. പ്രശാന്ത് എംഎൽഎ ഉദ്ഘാടനം ചെയ്യും. രാഷ്ട്രദീപിക ലിമിറ്റഡ് ഡയറക്ടർ ജോണി കുരുവിള അധ്യക്ഷത വഹിക്കും. സെന്‍റ് മേരീസ് എച്ച്എസ്എസ് പ്രിൻസിപ്പൽ ഫാ. നെൽസൻ വലിയവീട്ടിൽ, പ്രധാനാധ്യാപകൻ റെജി ലൂക്കോസ് തുടങ്ങിയവർ ആശംസകൾ അർപ്പിക്കും. ദീപിക റസിഡന്‍റ് മാനേജർ ഡോ. വർക്കി ആറ്റുപുറത്ത് കോർ എപ്പിസ് കോപ്പ സ്വാഗതവും സർക്കുലേഷൻ മാനേജർ ഇ.വി. വർക്കി നന്ദിയും പറയും.

ഭാര്യയെ കൊലപ്പെടുത്തിയശേഷം ഭര്‍ത്താവ് ആശുപത്രി കെട്ടിടത്തില്‍നിന്നു ചാടി മരിച്ചു

മെഡിക്കല്‍കോളജ്: ഭാര്യയെ കഴുത്തുഞെരിച്ച് കൊലപ്പെടുത്തിയശേഷം ഭര്‍ത്താവ് ആശുപത്രിക്കെട്ടിടത്തില്‍ നിന്നു ചാടി ആത്മഹത്യ ചെയ്തു. കരകുളം മുക്കോല ഹൈസ്‌കൂള്‍ ജംഗ്ഷന്‍ ശ്രീ ധര്‍മ്മശാസ്താ ക്ഷേത്രത്തിനു സമീപം അനുഗ്രഹ ഭവനില്‍ ജയന്തി (63) ആണ് ദാരുണമായി മരിച്ചത്. സംഭവത്തിനുശേഷം ഇവരുടെ ഭര്‍ത്താവ് ഭാസുരന്‍ ആശാരി (73) ആശുപത്രിക്കെട്ടിടത്തില്‍ നിന്നു താഴേക്കു ചാടി ആത്മഹത്യ ചെയ്യുകയായിരുന്നു. വ്യാഴാഴ്ച പുലര്‍ച്ചെ 4 മണിയോടുകൂടി പട്ടം എസ്.യു.ടി ആശുപത്രിയിലാണ് സംഭവം. ഇരുവൃക്കകള്‍ക്കും തകരാര്‍ സംഭവിച്ച ജയന്തി കഴിഞ്ഞ ഒന്നരവര്‍ഷമായി ആശുപത്രിയിലെ ഡോക്ടര്‍മാരുടെ പരിചരണത്തിലായിരുന്നു. ഈമാസം ഒന്നാംതീയതിയാണ് ഇവര്‍ ആശുപത്രിയില്‍ അഡ്മിറ്റായത്. ചികിത്സയില്‍ കഴിയുന്ന രണ്ടാംനിലയിലെ 218-ാം നമ്പര്‍ മുറിയില്‍ വച്ച് ഭാസുരന്‍ ആശാരി കേബിള്‍വയര്‍ ഉപയോഗിച്ച് ജയന്തിയുടെ കഴുത്ത് ഞെരിച്ച് കൊലപ്പെടുത്തുകയായിരുന്നു. അതിനുശേഷം കെട്ടിടത്തിന്റെ അഞ്ചാംനിലയിലെത്തി അവിടെനിന്നു താഴേക്കു ചാടുകയായിരുന്നു. ആശുപത്രിജീവനക്കാര്‍ ആത്മഹത്യയില്‍ നിന്നു പിന്തിരിപ്പിക്കുന്നതിനു മുമ്പുതന്നെ ഇദ്ദേഹം താഴേക്കു ചാടി. ശരീരമാസകലം ഒടിവുണ്ടാകുകയും തലയ്ക്ക് ക്ഷതമേല്‍ക്കുകയും ചെയ്ത ഭാസുരന്‍ ആശാരിയെ ഉടന്‍തന്നെ വിദഗ്ധ ചികിത്സയ്ക്കായി പ്രവേശിപ്പിച്ചുവെങ്കിലും 9 മണിയോടുകൂടി മരണപ്പെടുകയായിരുന്നു. ഭാര്യയുടെ അസുഖംമൂലമുള്ള മനോവിഷമവും സാമ്പത്തിക വൈഷമ്യവുമാണ് കൊലപാതകത്തിലേക്കും ആത്മഹത്യയിലേക്കും നയിച്ചതെന്നു മെഡിക്കല്‍കോളജ് പോലീസ് അറിയിച്ചു. മക്കള്‍: രജനി, രഞ്ജിത്ത് (ഗള്‍ഫ്).

അഞ്ചുപവൻ ആഭരണം മോഷ്ടിച്ച യുവാവ് പിടിയിൽ

പേരൂര്‍ക്കട: മേലാറന്നൂരില്‍ രഹസ്യമായി സൂക്ഷിച്ചിരുന്ന താക്കോല്‍ എടുത്ത് ഡോര്‍ തുറന്ന് അലമാരയില്‍ സൂക്ഷിച്ചിരുന്ന സ്വര്‍ണമാല കവര്‍ന്ന സംഭവത്തില്‍ മോഷ്ടാവിനെ കരമന സിഐ അനൂപ്, എസ്ഐമാരായ ശ്രീജിത്ത്, അജിത്ത്, എസ്സിപിഒമാരായ കൃഷ്ണകുമാര്‍, ശ്യാംമോഹന്‍, സിപിഒമാരായ ഹിരണ്‍, അജികുമാര്‍, ശരത്ചന്ദ്രന്‍ എന്നിവര്‍ ചേര്‍ന്നു പിടികൂടി. ബീമാപ്പള്ളി മില്‍ക്ക് കോളനി ടി.സി 46/585 സമീറ മന്‍സിലില്‍ നസറുദ്ദീന്‍ ഷാ (35) ആണ് പിടിയിലായത്. തിങ്കളാഴ്ച പുലര്‍ച്ചെ മേലാറന്നൂരിലെ ഒരു ഇരുനില വീടിന്‍റെ താഴത്തെ നിലയില്‍ സൂക്ഷിച്ചിരുന്ന അഞ്ചു പവന്‍ തൂക്കവും അഞ്ചു ലക്ഷം രൂപ വിലയും വരുന്ന നവരത്‌നങ്ങള്‍ പതിച്ച മാലയാണ് പ്രതി കവര്‍ന്നത്. കവര്‍ച്ച നടന്ന വീട്ടില്‍ സ്ഥാപിച്ചിരുന്ന സിസിടിവി കാമറയില്‍ മോഷ്ടാവിന്‍റെ ദൃശ്യങ്ങള്‍ ലഭിച്ചതുകൊണ്ടാണ് പ്രതിയെ പിടികൂടാന്‍ പോലീസിനു സാധിച്ചത്. നസറുദീൻഷായുടെ പേരിൽ കേരളത്തിലെ വിവിധ സ്റ്റേഷനുകളിലായി 20 മോഷണക്കേസുകളുണ്ട്. പ്രതിയെ റിമാന്‍ഡ് ചെയ്തു.

വിഴിഞ്ഞം തുറമുഖം റെയിൽവേ : ജനങ്ങളെ പറ്റിക്കാൻ ശ്രമമെന്ന് ജനകീയ പ്രതിരോധ സമിതി

വിഴിഞ്ഞം: വിഴിഞ്ഞം അന്താരാഷ്ട്ര തുറമുഖവുമായി ബന്ധിപ്പിച്ചുള്ള റെയിൽവേ നിർമാണത്തിലെ അവ്യക്തതക്കും ജനങ്ങളുടെ ആശങ്കക്കും അവസാനമില്ല. റെയിൽവേ കണക്ടിവിറ്റിക്ക് സ്ഥലം ഏറ്റെടുക്കില്ല എന്നു പറയുന്ന അധികാരികൾ ടണൽ പാതയുടെ മുഴുവൻ വിവരങ്ങളും ജനങ്ങൾക്ക്‌ മനസിലാകുന്ന തരത്തിൽ ധവളപത്രം പുറപ്പെടുവിക്കണമെന്നു ജനകീയ പ്രതിരോധ സമിതി ചെയർമാൻ വെങ്ങാനൂർ ഗോപകുമാറും സെക്രട്ടറി മുല്ലൂർ മോഹനചന്ദ്രൻ നായരും ആവശ്യപ്പെട്ടു. 2008-ൽ 3000ഏക്കർ ഭൂമി ഏറ്റെടുത്ത് വിജ്ഞാപനം വന്നതുപോലെ ജനങ്ങളെ പറ്റിക്കാനുള്ള ശ്രമമാണ് ഇപ്പോൾ നടക്കുന്നതെന്നും ജനകീയ സമിതി പ്രസ്താവനയിൽ പറഞ്ഞു. ടണൽ പാതയുടെ മധ്യത്തിൽ നിന്നും 20-മീറ്റർ ദൂരത്തിൽ കിണർ, വീട് എന്നിവയ്ക്ക് നിർമാണനുമതി കൊടുക്കില്ലെന്നായിരുന്നു നിർമാണവുമായി ബന്ധപ്പെട്ടു റെയിൽവെ ഇതുവരെ പറഞ്ഞിരുന്നത്. എന്നാൽ ഇന്നലെ നടന്ന ഉന്നതതല യോഗത്തിൽ മധ്യ ത്തിൽനിന്നും രണ്ടു വശങ്ങളിലേയ്ക്കും 200 മീറ്ററിനുള്ളിൽ നിർമാണ പ്രവർത്തനങ്ങൾ നടത്താൻ അനുമതി നൽകില്ലെന്നാണ്. ഈ തീരുമാനം നൂറു കണക്കിന്ന് ആൾക്കാരെ ഏറെ പ്രതികൂലമായി ബാധിക്കും. ബാലരാമപുരം മുതൽ വിഴിഞ്ഞം കരിമ്പള്ളിക്കര വരെ നീളുന്നതാണ് നിർദിഷ്ട തുരങ്കപാത. തുറമുഖത്ത് എത്തുന്നതിനും ഒരുകിലോമീറ്റർ മുൻപ് മുതൽ പാതാ ഭൂമിക്ക് പുറത്തു കൂടി കടന്നുപോകുമെന്നാണറിവ്. എന്നാൽ ആയിരക്കണക്കിനു കുടുംബങ്ങളെ ബാധിക്കുന്ന പ്രശ്നങ്ങളെക്കുറിച്ചു പൊതുജനത്തിനു വ്യക്തമായ യാതൊരറിവും ഇല്ല. ഭൂമിക്കടിയിലൂടെ കടന്നുപോകുന്ന പാത നിരവധി കുടുംബങ്ങളുടെ വസ്തുക്കളെയും വീടുകളെയും കീറി മുറിച്ചാകും പോവുക. മുകളിലൂടെയുള്ള നിർമാണ പ്രവർത്തനങ്ങൾക്കു കടുത്ത നിയന്ത്രണം വരുന്നതോടെ വിഴിഞ്ഞം തുറമുഖ വികസനത്തിൽ പ്രതീക്ഷയർപ്പിച്ചിരിക്കുന്ന ഒരു വിഭാഗത്തിന് കനത്ത തിരിച്ചടിയാകും ഉണ്ടാവുക. പത്തു വർഷമായി അനന്തമായി നീളുന്ന ചർച്ചകളും അലൈൻമെന്‍റ് മാറ്റിയുള്ള പരിപാടികളും തുടരുന്നെങ്കിലും പൊതുജനാഭിപ്രായ രൂപികരണവും നടന്നില്ല. ജനത്തിന് ആകെ അറിയാവുന്നത് ഉഹാപോകങ്ങൾ മാത്രം. ഇത്തരം നിലപാടിനു പിന്നിൽ തുറമുഖ വികസനത്തെ തകർക്കാൻ വലിയ ശക്തികൾ വീണ്ടും ശ്രമിക്കുന്നതായാണു ജനകീയസമര സമിതി ആരോപിക്കുന്നത്. കോടിക്കണക്കിന് രൂപ ചെലവഴിച്ച് അടിപാത നിർമി ക്കേണ്ടി വന്നാൽ ഭൂഉടമകൾക്ക് ഫലത്തിൽ ഈ ഭൂമികൊണ്ട് ഒരു പ്രയോജനവുമില്ല. സർക്കാർ ഏറ്റെടുത്ത് ജനങ്ങളുടെ ഭൂമിക്ക് മാന്യമായ വില നൽകണം. അല്ലാത്തപക്ഷം ശക്തമായ സമരവുമായി ജനങ്ങൾക്ക്‌ ഇറങ്ങേണ്ടിവരുന്ന സാഹചര്യമാണുള്ളത്. റിംഗ് റോഡിന് ഭൂമി എറ്റെടുത്ത സർക്കാർ ഇതുവരെ ജനങ്ങൾക്ക് ഒരു രൂപ പോലും നൽകിയിട്ടില്ല.ഇതുപോലെ റെയിൽവേയുടെ പേരിൽ ജനങ്ങളെ കബളിപ്പിക്കാനുള്ള ശ്രമമാണ് നടക്കുന്നത്. ബാലരാമപുരം - വിഴിഞ്ഞം റെയിൽ പാതയുടെ ധവളപത്രം പുറപ്പെടുവിച്ച് സർക്കാർ ജനങ്ങളുടെ ആശങ്ക അവസാനിപ്പിച്ചിലെങ്കിൽ ഒറ്റകെട്ടായി ചെറുക്കുമെന്ന് ജനകീയ പ്രതിരോധ സമിതിനേതാക്കൾ അറിയിച്ചു.

സൈക്കിൾ യാത്രക്കാരൻ കാറിടിച്ച് മരിച്ചു

പോത്തൻകോട്: സൈക്കിൾ യാത്രക്കാരൻ കാറിടിച്ച് മരിച്ചു. അരിയോട്ട്കോണം കുന്നിൽ വീട്ടിൽ വിജയൻ (57) ആണ് മരിച്ചത്. കാട്ടായിക്കോണം ഒരുവാമൂലയിൽ ഇന്നലെ രാത്രി 10.15 നായിരുന്നു അപകടം. പോത്തൻകോട് നിന്നും വീട്ടിലേക്കു സൈക്കിളിൽ വരികയായിരുന്ന വിജയനെ അമിത വേഗതയിൽ വന്ന കാർ ഇടിച്ചു തെറിപ്പിക്കുകയായിരുന്നു. സംഭവ സ്ഥലത്തുവച്ച് തന്നെ മരിച്ചു. ഇറക്കമുള്ള ഭാഗത്ത് അമിത വേഗതയിലെത്തിയ കാർ മറ്റു രണ്ടു കാറുകളെ ഓവർടേക്ക് ചെയ്താണ് എതിരേ വന്ന സൈക്കിളിൽ ഇടിച്ചത്. മൃതദേഹം മെഡി.കോളേജ് ആശുപത്രിയിൽ പോസ്റ്റുമാർട്ടത്തിനു ശേഷം ബന്ധുക്കൾക്ക് വിട്ടു നൽകി. പോത്തൻകോട് പോലീസ് കേസെടുത്തു

ഡപ്യൂട്ടി സെക്രട്ടറി ഫ്ലാറ്റിൽ മരിച്ച നിലയില്‍

മെഡിക്കല്‍കോളജ്: നിയമസഭാ ഡെപ്യൂട്ടി സെക്രട്ടറിയെ ഫ്‌ളാറ്റിനുള്ളില്‍ തൂങ്ങിമരിച്ച നിലയില്‍ കണ്ടെത്തി. പട്ടം പിഎഫ് റോഡ് വൃന്ദാവന്‍ ഗാര്‍ഡന്‍സ് ഫ്‌ളാറ്റ് നമ്പര്‍ 206-ല്‍ ടി. പ്രേമാനന്ദ് (57) ആണ് മരിച്ചത്. വിആര്‍എസ് വാങ്ങി വിരമിച്ചയാളാണ് പ്രേമാനന്ദ്. ഇന്നലെ ഉച്ചതിരിഞ്ഞ് 2.25നാണ് മുറിക്കുള്ളില്‍ തൂങ്ങിയനിലയില്‍ മൃതദേഹം കണ്ടെത്തുന്നത്. കുടുംബപ്രശ്‌നങ്ങളാണ് ആത്മഹത്യക്കു കാരണമെന്നു കാണിച്ച് ഇദ്ദേഹം എഴുതിയ ആത്മഹത്യാക്കുറിപ്പ് മുറിയില്‍ നിന്നു പോലീസ് കണ്ടെത്തി. മെഡിക്കല്‍കോളജ് പോലീസ് മേല്‍നടപടികള്‍ സ്വീകരിച്ചു. മൃതദേഹം തിരുവനന്തപുരം മെഡിക്കല്‍കോളജ് ആശുപത്രി മോര്‍ച്ചറിയില്‍‌.

സംസ്ഥാന വ്യാപാരി വ്യവസായി സമിതി ധര്‍ണ സംഘടിപ്പിച്ചു

നെയ്യാറ്റിന്‍കര: ഓൺലൈൻ വ്യാപാരവും വഴിയോര കച്ചവടവും നിയന്ത്രിക്കുക, ചെറുകിട വ്യാപാര മേഖലയെ സംരക്ഷിക്കാന്‍ സാന്പത്തിക ഉത്തേജക പാക്കേജുകള്‍ പ്രഖ്യാപിക്കുക, വിവിധ ലൈസന്‍സ് ഫീസുകള്‍ കുറയ്ക്കുക മുതലായ വിവിധ ആവശ്യങ്ങൾ ഉന്നയിച്ച് കേരള സംസ്ഥാന വ്യാപാരി വ്യവസായി സമിതി പഞ്ചായത്ത് കമ്മിറ്റി പെരുങ്കടവിള പഞ്ചായത്ത് ഓഫീസിനു മുന്നില്‍ ധര്‍ണ സംഘടിപ്പിച്ചു. സമിതി ഏരിയാ ജോയിന്‍റ് സെക്രട്ടറി എ.എസ്. സജികുമാർ അധ്യക്ഷത വഹിച്ചു. ജില്ലാ കമ്മിറ്റി അംഗവും ഏരിയാ പ്രസിഡന്‍റുമായ പി. ബാലചന്ദ്രൻനായർ ധർണ ഉദ്ഘാടനം ചെയ്തു. ഏരിയാ കമ്മിറ്റി ഭാരവാഹി കൊടങ്ങാവിള ഷിബു, അംഗങ്ങളായ കാക്കണം സുരേന്ദ്രൻ, എസ്. സുനിൽ, ബീന എസ്. നായർ, മിഥുൻ നാരായണൻ, യൂണിറ്റ് ആക്ടിംഗ് സെക്രട്ടറി വൈ.എസ്. ബിനുകുമാർ എന്നിവര്‍ പ്രസംഗിച്ചു. തുടര്‍ന്നു വിവിധ ആവശ്യങ്ങളടങ്ങിയ നിവേദനം പഞ്ചായത്ത് സെക്രട്ടറിക്കു നല്‍കി.

ലാല്‍ ബഹാദൂര്‍ ശാസ്ത്രിയുടെ ജന്മ വാര്‍ഷികം ആഘോഷിച്ചു

തിരുവനന്തപുരം: ഇന്ത്യയുടെ രണ്ടാമത്തെ പ്രധാനമന്ത്രി ലാല്‍ ബഹാദൂര്‍ ശാസ്ത്രിയുടെ ജന്മവാര്‍ഷികം കെഎന്‍എംഎസ് ആചരിച്ചു. പനവിളയിലെ ലാല്‍ ബഹാദൂര്‍ ശാസ്ത്രിപ്രതിമയില്‍ സംസ്ഥാന പ്രസിഡന്‍റ് ഡോ. ജെ. ലോറന്‍സും ഭാരവാഹികളും പുഷ്പാര്‍ച്ചന നടത്തി. ജനറല്‍ സെക്രട്ടറി അഡ്വ: എം.എച്ച്. ജയരാജന്‍, വൈസ് പ്രസിഡന്‍റുമാരായ ബാലരാമപുരം മനോഹര്‍, സി. ജോണ്‍സന്‍, അഡ്വ. കെ.എം. പ്രഭകുമാര്‍, വര്‍ക്കിംഗ് പ്രസിഡന്‍റ് ഡോ.പാളയം അശോക്, ട്രഷറര്‍ ആര്‍.പി. ക്ലിന്‍റ്, കെ.പി. സൂരജ്, ജയരാജന്‍ നെയ്യാറ്റിന്‍കര, സത്യരാജന്‍ നെയ്യാറ്റിന്‍കര, ആര്‍. വിജോദ്, കെ.കെ. അജയലാല്‍, ജിതിന്‍ ലോറന്‍സ് എന്നിവര്‍ പങ്കെടുത്തു.

നെടുമങ്ങാട് - കന്യാകുമാരി സൂപ്പർഫാസ്റ്റ് ഉദ്ഘാടനം

നെടുമങ്ങാട്: കെഎസ്ആർടിസി നെടുമങ്ങാട് ഡിപ്പോയിൽ നിന്നും കന്യാകുമാരി സൂപ്പർ ഫാസ്റ്റ് സർവീസ് ആരംഭിച്ചു. മലയോരനിവാസികളുടെ ഏറെനാളത്തെ ആവശ്യമാണ് നിറവേറിയത്. ഉച്ചയ്ക്ക് 1.30ന് നെടുമങ്ങാട് നിന്നും ആരംഭിച്ച് ആര്യനാട്- കാട്ടാക്കട- നെയ്യാറ്റിൻകര വഴിയാണ് സർവീസ് ക്രമീകരിച്ചിട്ടുള്ളതെന്ന് മന്ത്രി ജി.ആർ. അനിൽ അറിയിച്ചു. നേരത്തെ, പുത്തൻപാലം വഴി വെഞ്ഞാറമൂട് എത്തിച്ചേർന്ന് അവിടെനിന്നും വെമ്പായം വഴി തിരികെ നെടുമങ്ങാട് എത്തി കന്യാകുമാരിക്ക് പുറപ്പെടുന്ന വിധത്തിൽ കന്യാകുമാരി ട്രിപ്പ് നിശ്ചയിച്ചിരുന്നെങ്കിലും യാത്രക്കാരുടെ ആവശ്യം പരിഗണിച്ച് മന്ത്രി ഇടപെട്ട് മാറ്റം വരുത്തുകയായിരുന്നു. പുതിയ സർവീസ് മന്ത്രി ജി.ആർ. അനിൽ ഫ്‌ളാഗ് ഓഫ് ചെയ്ത് ഉദ്‌ഘാടനം നിർവഹിച്ചു. ഡിപ്പോയിൽ സൊസൈറ്റി ഫോർ എമർജൻസി മെഡിസിൻ ഇന്ത്യയുടെ സഹകരണത്തോടെ ആരംഭിച്ച എമർജൻസി മെഡിക്കൽ കെയർ യൂണിറ്റും ജി.ആർ. അനിൽ ഉദ്‌ഘാടനം ചെയ്തു. നഗരസഭ ചെയർപേഴ്‌സൺ സി.എസ്. ശ്രീജ,അസി. ട്രാൻസ്പോർട്ട് ഓഫീസർ ഷെർസിൻ തുടങ്ങിയവർ പങ്കെടുത്തു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]