നിയമസഭയിൽ ഓണാഘോഷം

തിരുവനന്തപുരം: നിയമസഭയിൽ സംഘടിപ്പിച്ച ഓണാഘോഷപരിപാടികൾ സ്പീക്കർ എ.എൻ. ഷംസീർ ഉദ്ഘാടനം ചെയ്തു. ജീവനക്കാർക്കുവേണ്ടി കായിക, കലാമത്സരങ്ങളും അത്തപ്പൂക്കള മത്സരവും സംഘടിപ്പിച്ചു. ഉച്ചയ്ക്കുശേഷം ശങ്കരനാരായണൻ തമ്പി ലോഞ്ചിൽ ജീവനക്കാരുടെ കലാപരിപാടികളും അരങ്ങേറി.

ഉച്ചയ്ക്ക് ഒരുക്കിയ ഓണസദ്യയിൽ മന്ത്രി ജി.ആർ. അനിൽ, ഗവ. ചീഫ് വിപ്പ് ഡോ. എൻ. ജയരാജ്, എംഎൽഎമാരായ ടി.പി. രാമകൃഷ്ണൻ, വി.കെ.പ്രശാന്ത്, സി.കെ. ഹരീന്ദ്രൻ, യു. പ്രതിഭ, ആന്‍റണിരാജു, മാത്യു ടി. തോമസ്, ജോബ് മൈക്കിൾ തുടങ്ങിയവരും മന്ത്രിമാരുടെ പേഴ്സണൽ സ്റ്റാഫ് അംഗങ്ങളും നിയമസഭാ ജീവനക്കാരും പങ്കെടുത്തു.

ADVERTISEMENT

കിളിയൂര്‍ സ്‌നേഹസദനം ആശ്രമത്തില്‍ ഓണാഘോഷം

വെള്ളറട: കിളിയൂര്‍ സ്‌നേഹ സദനം അഭയ കേന്ദ്രത്തില്‍ തുമ്പി കുടുംബശ്രീയുടെ ആഭിമുഖ്യത്തിൽ ഓണാഘോഷം സംഘടിപ്പിച്ചു. അന്തേവാസികള്‍ക്ക് ഓണക്കോടി വിതരണം, ഭക്ഷണ വിതരണം, ഓണക്കിറ്റ് വിതരണം എന്നിവയുണ്ടായിരുന്നു.ഓണാഘോഷം ഫാ. ബെന്നിയും സിവില്‍ പോലീസ് ഓഫീസര്‍ പ്രദീപും ചേര്‍ന്ന് ഉദ്ഘാടനം ചെയ്തു. തുടര്‍ന്ന് ഇരുവരും ഓണസന്ദേശങ്ങള്‍ നല്‍കി. മുന്‍ വാര്‍ഡ് മെമ്പര്‍ പ്ലാന്‍ങ്കാല ജോണ്‍സണ്‍ തുമ്പി കുടുംബശ്രീ സെക്രട്ടറി സജിത, പ്രസിഡന്‍റ് ശാന്തി തുടങ്ങിയവർ പ്രസംഗിച്ചു.

ഭാരത് മ്യൂസിക്കില്‍ ഓണാഘോഷം

തിരുവനന്തപുരം: സംഗീതത്തിലും നൃത്തകലയിലും പരിശീലനം നടത്തിവരുന്ന കുട്ടികള്‍ക്കു മുന്നില്‍ തന്‍റെ അനുഭവങ്ങൾ പങ്കിട്ട് വാവ സുരേഷ് ഓണമാഘോഷിച്ചു. നെടുമങ്ങാട് ചുള്ളിമാനൂരില്‍ പ്രവര്‍ത്തിക്കുന്ന ഭാരത് മ്യൂസിക്ക് അക്കാദമിയുടെ ഓണാഘോഷ വേദിയില്‍ മുഖ്യാതിഥിയായി എത്തിയ വാവ സുരേഷ് തന്‍റെ മനസു തുറന്നപ്പോള്‍ പിന്നിട്ട വഴികള്‍ എത്രമാത്രം ദുരിത പൂര്‍ണമായിരുന്നുവെന്ന് പലര്‍ക്കും മനസിലാക്കാൻ സാധിച്ചു. സ്വന്തമായി ഒരു വീടില്ലാത്ത താന്‍ ഇന്നും തിരുവനന്തപുരത്ത് ഒരു ലോഡ്ജില്‍ വാടകക്കാണ് താമസിക്കുന്നതെന്നും സര്‍ക്കാര്‍ യാതൊരു സഹായവും ചെയ്തിട്ടില്ലെന്നും വാവ സുരേഷ് ചൂണ്ടിക്കാട്ടി. പ്രേംനസീര്‍ സുഹൃത് സമിതി സംസ്ഥാന സെക്രട്ടറി തെക്കന്‍ സ്റ്റാര്‍ ബാദുഷ അധ്യക്ഷത വഹിച്ച ചടങ്ങ് വാര്‍ഡ് മെമ്പര്‍ ഷീബ ഉല്‍ഘാടനം ചെയ്തു. ആനാട് പഞ്ചായത് പ്രസിഡന്‍റ് ശ്രീലേഖ ഓണ വിളംബരംനല്‍കി. സുഹൃത് സമിതി പ്രസിഡന്‍റ് പനച്ചമൂട് ഷാജഹാന്‍, മ്യൂസിക്ക് അക്കാദമി ഡയറക്ടര്‍ ഷംനാദ് ഭാരത്, ഗായകന്‍ അലോഷ്യസ് പെരേര, സിപിഐ സംസ്ഥാന കൗണ്‍സില്‍ മെമ്പര്‍ പാട്ടത്തില്‍ ഷൗക്കത്ത്, എസ് ട്രാക്‌സ് ഡയറക്ടര്‍ ഷൗക്കത്ത്, ഷാജഹാന്‍ കരകുളം, നടന്‍ ഷാജഹാന്‍, അനീഷ് മുല്ലശേരി, ഗോപന്‍ ശാസ്തമംഗലം, പ്രവീണ്‍, സൈനുലാബ്ദീന്‍, ഷംസുന്നീസ, ചന്ദന, പ്രതിഭ മണി എന്നിവര്‍ സംസാരിച്ചു. വിവിധ കലാപരിപാടികളും ഓണ സദ്യയും നടത്തി.

ഒരിക്കല്‍ ഉദ്ഘാടനം ചെയ്ത ബസ് വീണ്ടും ഓണക്കാല സര്‍വീസ് ആക്കാനുള്ള ശ്രമം പാളി

വെള്ളറട : കെഎസ്ആര്‍ടിസി വെള്ളറട ഡിപ്പോയില്‍നിന്നും പുതുതായി സര്‍വീസ് ആരംഭിച്ച് മാസങ്ങള്‍ കഴിഞ്ഞ ബസ്, പുതിയ സര്‍വീസ് എന്ന വ്യാജേനെ വീണ്ടും സര്‍വീസ് ആരംഭിക്കാനുള്ള കെഎസ്ആര്‍ടിസി യുടെ ശ്രമം പാളി. ഇന്നലെ പാറശാല എംഎല്‍എ. സി.കെ. ഹരീന്ദ്രനെ കൊണ്ട് സര്‍വീസ് ആരംഭിക്കാനായിരുന്നു ശ്രമം. ഹരീന്ദ്രന് അസൗകര്യമുണ്ടായതിനാൽ ബസ് സര്‍വീസ് പുനഃരാരംഭിക്കാന്‍ കഴിഞ്ഞില്ല. കാലപ്പഴക്കം ചെന്ന ബസുകള്‍ കാരണം പല സര്‍വീസുകളും നിര്‍ത്തിവച്ചിരിക്കുകയാണ്. പല റൂട്ടുകളിലും ബസുകള്‍ സര്‍വീസ് നടത്തുന്നില്ല. യാത്രാത്തിരക്ക് രൂക്ഷമായിരിക്കെ നിലവില്‍ ഓടിക്കൊണ്ടിരിക്കുന്ന ബസുപയോഗിച്ചുതന്നെ വീണ്ടും സര്‍വീസ് നടത്താമെന്നു കരുതിയതാണു പാളിയത്. കെഎസ് ആര്‍ടിസി ഭരണകക്ഷി സംഘടനയുടെ നേതാക്കന്മാര്‍ എംഎല്‍എയുമായി ചേർന്നു പുതിയ സര്‍വീസ് ആരംഭിക്കാനുള്ള നീക്കം പാളിയതോടെ യാത്രക്കാരാണ് ബുദ്ധിമുട്ട് അനുഭവിക്കുന്നത്. നിരവധി റൂട്ടുകളില്‍ ബസ് ഇല്ലാത്തതുകാരണം സര്‍വീസ് റദ്ദ് ചെയ്തിരിക്കുമ്പോഴാണ് നിലവില്‍ ഓടിക്കൊണ്ടിരുന്ന ബസ് പുതിയ റൂട്ടില്‍ പുതിയ സര്‍വീസായി ആരംഭിക്കാനുള്ള ശ്രമം പാളിയത്. ഇതിനെതിരെ പ്രതിഷേധം ശക്തമായിട്ടുണ്ട്. യാത്രക്കാര്‍ സ്റ്റേ ഷന്‍ മാസ്റ്ററുമായി തട്ടിക്കയറി.

പുത്തൻവിളയിൽ പൈപ്പ്പൊട്ടി: ജലവിതരണം പൂർണമായും മുടങ്ങി

പേരൂർക്കട: വാട്ടർ അഥോറിറ്റി പേരൂർക്കട സെക്‌ഷൻ പരിധിയിൽ വരുന്ന പുത്തൻ വിളയിൽ പൈപ്പ് പൊട്ടി ജലവിതരണം മുടങ്ങി. കുടപ്പനക്കുന്നിൽനിന്നു മടത്തിനടയിലേക്കു നീളുന്ന റോഡിൽ 300 മീറ്റർ പിന്നിടുമ്പോഴാണ് പുത്തൻ വിളയെത്തുന്നത്. പേരൂർക്കട സെക്‌ഷൻ പരിധിയിൽനിന്നു കുടപ്പനക്കുന്നിലേക്ക് ജലം എത്തിച്ച ശേഷമാണ് ഈ ഭാഗത്തേക്ക് വിതരണം ചെയ്യുന്നത്. ഇതുവഴി ജലം കടന്നുപോകുന്ന 200 എംഎം പിവിസി പൈപ്പിലായിരുന്നു ചോർച്ച. പൈപ്പ് പൊട്ടിയതിനെത്തുടർന്ന് പാതിരിപ്പള്ളി, അക്ഷയ ഗാർഡൻസ്, പുത്തൻ വിള, ഗ്രീസ് ഗാർഡൻസ്, മഠത്തുനട തുടങ്ങിയ നിരവധി സ്ഥലങ്ങളിൽ ജലവിതരണം മുടങ്ങി. എംഎൽഎ റോഡിൽനന്നു പുത്തൻവിളയിലേക്കു ജലം കൊണ്ടുപോകുന്ന പൈപ ്പിന്‍റെ ജോയിന്‍റിലായിരുന്നു ചോർച്ച. സംഭവം ശ്രദ്ധയിൽപ്പെട്ടതിനെ തുടർന്നു വാട്ടർ അഥോറിറ്റി അധികൃത സ്ഥലത്തെത്തി അറ്റകുറ്റപ്പണി പൂർത്തീകരിച്ചുവെങ്കിലും വീണ്ടും ചോർച്ചയുണ്ടാകുകയായിരുന്നു. ജല ചോ ർച്ചയുള്ള ഭാഗത്തു നാട്ടുകാർ ചേർന്നു മരത്തിന്‍റെ ചില്ലകൾ നാട്ടുകയായിരുന്നു. കൊടും വളവുകടന്നു വരുന്നതിനു സമീപത്താണ് പൈപ്പു പൊട്ടിയിരിക്കുന്നത്. അതുകൊണ്ടുതന്നെ ഇതുവഴി വലിയ വാഹനങ്ങൾ കടന്നു പോകുന്നതു ദുഷ്കരമായിട്ടുണ്ട്. അവധി ദിവസങ്ങൾ കടന്നുവരുന്നതിനാൽ പൈപ്പിലെ ചോർച്ച സംബന്ധിച്ചു അറ്റകുറ്റപ്പണി വീണ്ടും എന്നുണ്ടാകും എന്ന കാര്യത്തിൽ ഉറപ്പില്ല. ഓണദിനങ്ങളിൽ ചില സ്ഥലങ്ങളിൽ കുടിവെള്ളം പൂർണമായും മറ്റു സ്ഥലങ്ങളിൽ ഭാഗികമായും മുടങ്ങുന്നതിലുള്ള പ്രതിഷേധത്തിലാണു നാട്ടുകാർ.

മാരായമുട്ടം പോലീസ് സ്റ്റേഷനില്‍ ഓണാഘോഷം

വെള്ളറട : മാരായമുട്ടം പോലീസ് സ്റ്റേഷനില്‍ സംഘടിപ്പിച്ച ഓണാഘോഷം സര്‍ക്കിള്‍ ഇന്‍സ്‌പെക്ടര്‍ ധനപാലന്‍ ഉദ്ഘാടനം ചെയ്തു. പോലീസ് സേനയിലെ കുടുംബാംഗങ്ങളും വിദ്യാർഥികളുമടക്കം നിരവധി പേർ പങ്കെടുത്തു. ഓണാഘോഷത്തിന്‍റെ ഭാഗമായി പോലീസ് സ്‌റ്റേഷനു മുന്നില്‍ അത്തപ്പൂക്കളം ഒരുക്കി. എ എസ്ഐ സനല്‍ എസ്. കുമാര്‍, ജയന്‍ വെള്ളറട തുടങ്ങിയവര്‍ ഓണസന്ദേശം നൽകി.

ഗുഡ്സ് വാഹനം മതിലിൽ ഇടിച്ച് അപകടം: രണ്ടുപേർക്കു പരിക്ക്

കാട്ടാക്കട: നിയന്ത്രണം തെറ്റിയ ഗുഡ്സ് വാഹനം മതിലിൽ ഇടിച്ച് അപകടം. ഗുഡ്സ് വാഹനത്തിന്‍റെ ഡ്രൈവർക്കും ഒപ്പം ഉണ്ടായിരുന്ന ഒരാൾക്കും ഗുരുതര പരിക്ക്. ഒപ്പമുണ്ടായിരുന്ന മറ്റൊരാൾക്കും പരിക്കുണ്ട്. കാട്ടാക്കട അഗ്നിശമനസേന എത്തി വാഹനം വെട്ടിപ്പൊളിച്ചാണ് ഡ്രൈവർ അഭിജിത്തി(21) നെ പുറത്തെടുത്തത്. ഇയാളുടെ കാൽ പൂർണമായും ഒടിഞ്ഞ അവസ്ഥയിലാണ്. ഇദ്ദേഹത്തെ മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു. ഗുരുതര പരിക്കേറ്റ മറ്റൊരാളെയും നിസാര പരിക്കേറ്റ ഒരാളെയും കാട്ടാക്കട നെയ്യാർ മെഡിസിറ്റിയിലും പ്രവേശിച്ചു. വ്യാഴാഴ്ച പുലർച്ചെ 5.15 ഓടെയായിരുന്നു അപകടം. ശബ്ദംകേട്ട് ഓടിക്കൂടിയ സമീപവാസികളാണ് അഗ്നിരക്ഷാ സേന, ആംബുലൻസ്, പോലീസ് എന്നിവരെ വിവരം അറിയിച്ചത്. കിള്ളി-കൂന്താണി റോഡിലെ ചെറിയവളവിൽ എത്തിയപ്പോൾ വാഹനം നിയന്ത്രണംതെറ്റി വലതു വശത്തേക്ക് പാഞ്ഞ് സമീപത്തെ മതിലിലും ഗേറ്റിലുമായി ഇടിച്ച് നിൽക്കുകയായിരുന്നു. വാഹനത്തിന്‍റെ മുൻവശം പൂർണമായും തകർന്ന നിലയിലാണ്. ഗേറ്റും തകർന്നിട്ടുണ്ട്. ഡ്രൈവർ ഉറങ്ങിയതാണു കാരണമെന്നാണ് പ്രാഥമിക നിഗമനം. ഇടിയുടെ ആഘാതത്തിൽ തല വാഹനത്തിന്‍റെ ചില്ലിലും മാതിലിലുമായി ഇടിച്ചു ഒരാളുടെ ബോധം നഷ്ടപ്പെട്ടിരുന്നു. കാട്ടാക്കടയിലെ സ്വകാര്യ ഇവൻ മാനേജ്മെന്‍റ് സ്ഥാപനത്തിലെ ജീവനക്കാരായ ഇവർ ജോലി സ്ഥലത്തു നിന്നും മടങ്ങി വരുമ്പോഴായിരുന്നു അപകടം. പോലീസ് തുടർ നടപടികൾ സ്വീകരിച്ചു. കാട്ടാക്കട അഗ്നിരക്ഷാനിലയത്തിലെ സീനിയർ ഫയർ ആൻഡ് റെസ്ക്യൂ ഓഫീസർ വിനു, ഫയർ ആൻഡ് റെസ് ക്യൂ ഓഫീസർ എ.കെ. അനു, ബി. അനു, അരുൺകുമാർ, ഡ്രൈ വർ വിജിൻ, ഹോം ഗാർഡ് സുമേഷ്, ഫയർമാൻ ആനന്ദ്, ഹോം ഗാർഡ് രതീഷ് എന്നിവരാണ് രക്ഷാപ്രവർത്തനം നടത്തിയത്.

കഞ്ചാവ് വില്പന; യുവാവ് അറസ്റ്റിൽ

നെടുമങ്ങാട്: ഓണത്തിരക്കിൽ ഓട്ടോറിക്ഷയിൽ സഞ്ചരിച്ച് വാഹനയാത്രക്കാർക്കും വീടുകളിലും സ്കൂൾ വിദ്യാർഥികൾക്കും കഞ്ചാവ് വില്പന പതിവാക്കിയ പനവൂർകരിക്കുഴി ഹയർആൽദാറുൽ എ. ഷജീറിനെ (44) പോലീസ് അറസ്റ്റ് ചെയ്തു. തിരുവനന്തപുരം ഡാൻസാഫ് ടീമും നെടുമങ്ങാട് പോലീസും ചേർന്നാണു ഇയാളെ അറസ്റ്റ് ചെയ്തത്. റൂറൽ ജില്ലാ പോലീസ് മേധാവിയുടെ നിർദേശപ്രകാരം നർകോട്ടിക് സെൽ ഡിവൈഎസ്പിയുടെ നേ തൃത്വത്തിൽ പരിശോധന ശക്തമാക്കിയതായി നെടുമങ്ങാട് സിഐ രാജേഷ്‌കുമാർ അറിയിച്ചു.

പ്രേംജിത് സ്മാരക ഗ്രന്ഥശാല വാർഷികവും ഓണാഘോഷവും

നെടുമങ്ങാട്: പറണ്ടോട് ധീര ജവാൻ പ്രേംജിത് സ്മാരക റസിഡൻസ് അസോസിയേഷൻ ആൻഡ് ഗ്രന്ഥശാലയുടെ മൂന്നാമത് വാർഷികവും ഓണാഘോഷവും റിട്ട. ജില്ലാ സെഷൻസ് ജഡ്ജി എ.കെ. ഗോപകുമാർ ഉദ്‌ഘാടനം ചെയ്തു. ഒരു വർഷം നീണ്ടുനിന്ന പത്ര-പുസ്തക വായനാ മത്സര വിജയികൾക്കുള്ള സ്വർണ്ണ സമ്മാനവും പ്രശംസാപത്ര വിതരണവും, വിവിധ അവാർഡുകളും, ഓണക്കിറ്റ് വിതരണത്തിനും ചടങ്ങിനോടനുബന്ധിച്ചു നടന്നു. റസിഡൻസ് അസോസിയേഷൻ ആൻഡ് ഗ്രന്ഥശാല പ്രസിഡന്‍റ് കണ്ടമത്ത് ഭാസ്കരൻ നായർ അധ്യക്ഷത വഹിച്ചു. സാഹിത്യകാരൻ ആര്യനാട് സത്യൻ പുരസ്കാര ജേതാക്കളെ പ്രഖ്യാപിച്ചു. എസ്.ആർ. ഗായത്രി, എസ്. ആദിത്യൻ, ബി.സി. ആവണി തുടങ്ങിയവർ ഒന്നും രണ്ടും മൂന്നും സ്ഥാനങ്ങൾ നേടി. മൂന്നാമത് ധീര ജവാൻ പുരസ്കാരം കരാട്ടെ മാസ്റ്റർ പറണ്ടോട് സലീമിനു സമ്മാനിച്ചു. ബ്ലോക്ക് പഞ്ചായത്ത് പ്രതിനിധികളായ എ.എം. ഷാജി, കണ്ണൻ എസ്. ലാൽ , കെ.കെ രതീഷ്, കെ. രാജേന്ദ്രൻ നായർ, റസിഡൻസ് അസോസിയേഷൻ ഭാരവാഹികളായ വി.സി. അഭിലാഷ്, എസ്. സുധാകരൻ നായർ, അജയ് അനിൽ, കാരട്ടെ മാസ്റ്റർ അനിൽകുമാർ, ആർ.ഡി. ശിവാനന്ദൻ, വലിയകലുങ്ക് കൃഷ്ണൻ നായർ, ആർ. ഷീന ടീച്ചർ, എസ്. വിജയകുമാരി, ഉഷാകുമാരി തുടങ്ങിയവർ പ്രസംഗിച്ചു. ഭാരവാഹികൾ: കണ്ടമത്ത് ഭാസ്കരൻ നായർ -പ്രസിഡന്‍റ്, ആർ. വിഷ്ണു - വൈസ് പ്രസിഡന്‍റ്, വി.സി. അഭിലാഷ് - സെക്രട്ടറി, എം. വിശാഖ്- ജോയിന്‍റ് സെക്രട്ടറി, ശ്രീജിത് ഭുവൻ - ട്രഷറർ, എം. പീതാംബരൻ നായർ - രക്ഷാധികാരി.

ഓണം ആഘോഷിക്കാൻ നെയ്യാർഡാം ഒരുങ്ങി

നെയ്യാർഡാം: ഇനി ഇവിടെ ഓണരാവുകളും പകലുകളും. ഓണത്തിനായി നെയ്യാർഡാം ഒരുങ്ങിക്കഴിഞ്ഞു. അമ്യൂസ്‌മെന്‍റ് പാർക്കും വൈദ്യുത ദീപാലങ്കാരവും കലാപരിപാടികളുമൊക്കെയായി ഓണത്തെ വരവേൽക്കാൻ നെയ്യാർഡാം സഞ്ചാരികളെ കാത്തിരിക്കുകയാണ്. കുട്ടികളുടെ പാർക്കിന്‍റെ നവീകരണവും ഉദ്യാനത്തിലെ ശില്പങ്ങളിലെ ചായംതേക്കലുമൊക്കെ പൂർത്തിയാക്കി. ഇന്നു തുടങ്ങുന്ന ഓണം വാരാഘോഷം എട്ടിന് സാംസ്കാരിക ഘോഷയാത്രയോടെ സമാപിക്കും. സഞ്ചാരകേന്ദ്രവും പരിസരവുമൊക്കെ ദീപാലങ്കാര പ്രഭയിലാണ്. കള്ളിക്കാട് പഞ്ചായത്തും വിവിധ സർക്കാർ വകുപ്പുകളും ജില്ലാ ടൂറിസം പ്രമോഷൻ കൗൺസിലും ചേർന്നാണ് ‘ഓണം ടൂറിസം വാരാഘോഷം’ സംഘടിപ്പിച്ചിട്ടുള്ളത്. ജലസേചന വകുപ്പിന്‍റെ നേതൃത്വത്തിലാണ് മോടിപിടിപ്പിക്കൽ പൂർത്തിയാക്കിയത്. ഫിഷറീസ്, ഡിടിപിസി, വനം, റവന്യു, തദ്ദേശസ്ഥാപനങ്ങൾ, പോലീസ് എന്നിവർ അവരവരുടെ മേഖലകളിൽ ദീപാലങ്കാരം നടത്തും. കൂടാതെ കള്ളിക്കാട് പഞ്ചായത്തിന്‍റെ നേതൃത്വത്തിൽ കള്ളിക്കാട് ജംഗ്ഷൻ മുതൽ നെയ്യാർഡാം വരെ വൈദ്യുത ദീപാലങ്കാരവുമുണ്ട്. ആഘോഷദിവസങ്ങളിൽ വൈകുന്നേരം കലാപരിപാടികൾ ഉണ്ടാകും. സഞ്ചാരികൾക്കായി അമ്യൂസ്‌മെന്‍റ് പാർക്ക് ഒരുക്കുന്നത് ഇറിഗേഷൻ വകുപ്പാണ്. നക്ഷത്ര അക്വേറിയം, മാൻ, ചീങ്കണ്ണി പാർക്ക് എന്നിവയും സന്ദർശിക്കാനാകും. വൈദ്യുത ദീപാലങ്കാരങ്ങളുടെ സ്വിച്ച് ഓൺ കർമവും ആഘോഷത്തിന്‍റെ ഉദ്‌ഘാടനവും സി.കെ. ഹരീന്ദ്രൻ എംഎൽഎ നിർവഹിച്ചു. ആഘോഷത്തിന്‍റെ പ്രധാന ആകർഷണമായ വർണശബളമായ സാംസ്‌കാരിക ഘോഷയാത്ര തിങ്കളാഴ്ചയാണ്. തുടർന്ന് സാംസ്‌കാരിക സമ്മേളനം. സഞ്ചാരികൾക്ക് എല്ലാ സൗകര്യവും ഉണ്ടാകും. വെർച്വൽ റിയാലിറ്റി ഷോ, അമ്യൂസ്‌മെന്‍റ് പാർക്ക്, റോസ് ഗാർഡൻ എന്നിവയാണ് ഇത്തവണത്തെ ആഘോഷത്തിനു മാറ്റുകൂട്ടുന്നത്. ഇൻഫർമേഷൻ സെന്‍ററും പുതുക്കിയിട്ടുണ്ട്. പ്രവേശനഫീസ് 10 രൂപയായി തുടരും. തുക ഓൺലൈൻ ആയും സ്വീകരിക്കും.

ഓണം കളക്‌ഷനുമായി കുശാല്‍സ് ജ്വല്ലറി

തിരുവനന്തപുരം: ഓണം ആഘോഷിക്കുന്ന മലയാളികള്‍ക്ക് ഉത്സവകാല ആഭരണ കളക്‌ഷനുമായി കുശാല്‍സ് ഫാഷന്‍ ആന്‍ഡ് സില്‍വര്‍ ജ്വല്ലറി. നിരവധി പുതിയ മോഡലുകളാണ് കുശാല്‍സ് അവതരിപ്പിക്കുന്നത്. കാശുമാല ഡിസൈനിലുള്ള ആഭരണങ്ങളും മുത്തുകള്‍ പതിച്ച ഗുട്ട പുഷാലുവും യഥാക്രമം 2690 രൂപ, 3390 രൂപ എന്നീ വിലകളില്‍ ലഭിക്കും. രാജ്യമെമ്പാടുമുള്ള നൂറില്‍പരം ജ്വല്ലറി സ്റ്റോറുകളില്‍നിന്നും ഓണ്‍ലൈനായും ആഭരണങ്ങള്‍ വാങ്ങാം.

ആനക്കാംപൊയിൽ-മേപ്പാടി തുരങ്കപാത: പ്രോട്ടോടൈപ്പ് മാതൃക തയാറാക്കിയത് മാർ ബസേലിയോസ് കോളജ് വിദ്യാർഥികൾ

കോഴിക്കോട്: തുരങ്കപാതയുടെ നിർമാണോദ്ഘാടനം കഴിഞ്ഞദിവസം സംഘടിപ്പിച്ചപ്പോൾ വാട് സാപ്പ് ഗ്രൂപ്പുകളിലൂടെ നാട്ടുകാർ ചർച്ച ചെയ്‌തത് തിരുവനന്തപുരത്തെ ഒരുകൂട്ടം വിദ്യാർഥികളുടെ ദീർഘവീക്ഷണത്തെക്കുറിച്ചാണ്. ആനക്കാംപൊയിൽ-മേപ്പാടി തുരങ്കപാതയുടെ പ്രോട്ടോടൈപ്പ് മാതൃക തയാറാക്കി നൽകിയത് മാർ ബസേലിയോസ് കോളജിലെ വിദ്യാർഥികളായിരുന്നു. പദ്ധതിയുടെ നിർമാണത്തിനുള്ള പഠനങ്ങൾ തുടങ്ങിയ ശേഷം നിർമാണച്ചുതലയുള്ള കൊങ്കൺ റെയിൽവേ കമ്പനിയാണ് പ്രോട്ടോടൈപ്പ് മാതൃക നിർമിക്കാൻ വിദ്യാർഥികളുടെ സഹായം തേടിയത്. കോഴിക്കോട് എൻഐടിയിൽ നിന്നെത്തിയ ഏബ്രഹാം ടി മാത്യുവായിരുന്നു അക്കാലത്ത് കോളജ് പ്രിൻസിപ്പൽ. കമ്പനിയുടെ എൻജിനീയർമാരുമായി അധ്യാപകരും വിദ്യാർഥികളും ചർച്ച നടത്തി. തുടർന്ന് 2022-ൽ മാതൃകയുടെ നിർമാണം തുടങ്ങി. കോളജിലെ സിവിൽ എൻജിനിയറിംഗ് വിഭാഗത്തിലെ എട്ടു വിദ്യാർഥികളാണു നിർമാണച്ചുമതല നിർവഹിച്ചത്. വകുപ്പ് മേധാവി ഡോ. എസ്. ജയശ്രീ, അധ്യാപിക അനുപമ കൃഷ്ണ‌ൻ എന്നിവരുടെ മേൽനോട്ടത്തിലാണു മാതൃകയുടെ നിർമാണം പൂർത്തിയാക്കിയത്. കോളജ് പ്രിൻസിപ്പൽ വിശ്വനാഥ റാവുവിന്‍റെ നേതൃത്വത്തിൽ പ്രോട്ടോടൈപ്പ് മാതൃക പൊതുമരാമത്തുവകുപ്പിനു കൈമാറുകയായിരുന്നു. തുരങ്കം നിർമിക്കുന്ന തിരുവമ്പാടി മണ്ഡലത്തിന്‍റെ എംഎൽഎ ലിന്‍റോ ജോസഫ് കോളജിലെത്തി ആഘോഷപൂർവം മാതൃക സ്വീകരിച്ചു.

ട്രിവാൻഡ്രം സ്പിന്നിംഗ് മിൽസിൽ ഓണാഘോഷവും പ്രതിഭാപുരസ്കാരവും

തിരുവനന്തപുരം: പൊതുമേഖലാ സ്ഥാപനമായ ട്രിവാൻഡ്രം സ്പിന്നിംഗ് മിൽസിൽ നടന്ന ഓണാഘോഷം സ്പിന്നിംഗ് മിൽസ് ചെയർമാൻ സണ്ണി തോമസ് ഉദ്ഘാടനം ചെയ്തു. ഒരു സമൂഹം എങ്ങനെ ആയിരക്കണമെന്നുള്ള മാനവമനസിന്‍റെ സങ്കല്പങ്ങളാണ് ഓണത്തിലൂടെ ഘോഷിക്കപ്പെടുന്നതെന്ന് സണ്ണി തോമസ് പറഞ്ഞു. മാനേജിംഗ് ഡയറക്ടർ ഡോ. കെ.എസ്. കൃപകുമാർ അധ്യക്ഷത വഹിച്ചു. മത്സര പരീക്ഷകളിൽ ഉന്നത വിജയം നേടിയ ജീവനക്കാരുടെ മക്കൾക്കുള്ള പുരസ്കാര സമർപ്പണം മാനേജിംഗ് ഡയറക്ടർ നിർവഹിച്ചു. ഡപ്യൂട്ടി മാനേജർ ശ്രീജിത് ആർ. പിള്ള, പി.എസ്. ഇന്ദുലേഖ, വി.എസ്. ശ്രീനാഥ്, സുമേഷ് ജി. നായർ, ആർ. രമ്യ, ആർ. രാജി എന്നിവർ പ്രസംഗിച്ചു.

പിഎന്‍ബി മെറ്റ്‌ലൈഫ് ബിഗ് എഫ്എമ്മുമായി സഹകരിക്കുന്നു

തിരുവനന്തപുരം: പിഎന്‍ബി മെറ്റ്‌ലൈഫ് ഇന്ത്യ ഇന്‍ഷുറന്‍സ് കമ്പനി ലിമിറ്റഡ് (പിഎന്‍ബി മെറ്റ്‌ലൈഫ്) ഈ ഓണക്കാലത്ത് ബിഗ് എഫ്എമ്മുമായി സഹകരിച്ച് "ബിഗ് മാവേലി' എന്ന പേരില്‍ വിവിധ ആഘോഷ പരിപാടികള്‍ സംഘടിപ്പിക്കുന്നു. തിരുവോണദിനം വരെ കമ്പനിയുടെ കേരളത്തിലെ ഏഴു പ്രധാന ശാഖകളില്‍ നടക്കുന്ന ആഘോഷങ്ങളുടെ ഭാഗമായി ഒരു ദശലക്ഷത്തിലധികം ആളുകളിലേക്ക് എത്തിച്ചേരാന്‍ "ബിഗ് മാവേലി' ലക്ഷ്യമിടുന്നതായി പിഎന്‍ബി മെറ്റ്‌ലൈഫ് അധികൃതര്‍ അറിയിച്ചു.

കലയും സംസ്‌കാരവും വിദേശ വേദികളില്‍ പ്രചരിപ്പിക്കണം: അശ്വതി തിരുനാള്‍ ഗൗരി ലക്ഷ്മിബായി

തിരുവനന്തപുരം: ഭാരതത്തിന്‍റെ തനതു കലയും സംസ്‌കാരവും വിദേശ വേദികളില്‍ പ്രചരിപ്പിക്കാന്‍ നിരന്തര പരിശ്രമം വേണമെന്നു തിരുവിതാംകൂർ രാജകുടുംബാംഗം ഡോ. അശ്വതി തിരുനാള്‍ ഗൗരി ലക്ഷ്മി ഭായ്. മുന്‍ മിസിസ് ഗ്രാന്‍ഡ് യൂണിവേഴ്‌സും പ്രമുഖ ഭരതനാട്യം നര്‍ത്തകിയുമായ ഡോ. ശശിലേഖ നായര്‍ രൂപം നല്‍കിയ ശശിലേഖ നായര്‍ ഫൗണ്ടേഷന്‍ ഫോര്‍ എഡ്യൂക്കേഷന്‍ ആന്‍ഡ് ഇന്‍റര്‍നാഷണല്‍ ആര്‍ട്ടിന്‍റെ (എസ്ഫിയ) ഉദ്ഘാടനം ഗോകുലം ഗ്രാന്‍ഡ് ഹോട്ടലില്‍ നിര്‍വഹിച്ചു പ്രസംഗിക്കുകയായിരുന്നു അവര്‍. ചിത്രകാരന്‍ ഡോ. ജിതേഷ്ജി അധ്യക്ഷത വഹിച്ചു. മുന്‍ അംബാസിഡര്‍ ടി.പി. ശ്രീനിവാസന്‍, സംഗീത നാടക അക്കാദമി മുന്‍ ചെയര്‍മാന്‍ സൂര്യ കൃഷ്ണമൂര്‍ത്തി എന്നിവര്‍ മുഖ്യാതിഥികളായി. മുതിര്‍ന്ന ദൃശ്യ-മാധ്യമ പ്രവര്‍ത്തകന്‍ അനില്‍ അടൂര്‍, കാന്തല്ലൂര്‍ അശോകവനം ഗോത്ര പൈതൃക കലാ ഗ്രാമം ചെയര്‍മാന്‍ ഡോ. എസ്. അശോക് കുമാര്‍ എന്നിവരെ ചടങ്ങില്‍ ആദരിച്ചു. ‌ 2021ലെ മിസിസ് ഗ്രാന്‍ഡ് യൂണിവേഴ്‌സ്, മിസിസ് ഏഷ്യ ഇന്‍റര്‍നാഷണല്‍ ചാമിംഗ് 2018, മിസിസ് ഇന്ത്യ കേരള - 2018 എന്നീ മത്സര ജേതാവും ഭരതനാട്യം നര്‍ത്തകിയുമായ ഡോ. ശശിലേഖ ഏറെക്കാലം ബ്രിട്ടനില്‍ പ്രവാസിയായിരുന്നു. വിദ്യാഭ്യാസത്തെ കലാ പഠനവുമായി സമന്വയിപ്പിച്ച് പുതുതലമുറയെ കൂടുതല്‍ സര്‍ഗാത്മകമാക്കുക, വിവിധ രാജ്യങ്ങളുടെ കലകളെയും സംസ്‌കാരത്തെയും അറിയുകയും ആഗോളവത്കരിക്കുകയും ചെയ്യുക എന്നതാണ് ഫൗണ്ടേഷന്‍റെ പ്രധാന ലക്ഷ്യമെന്നു ഡോ. ശശിലേഖ പറഞ്ഞു.

പാപ്പനംകോട് പൂഴിക്കുന്നിൽ ഭീമന്‍ പൂക്കളം

നേമം: ജില്ലയിലെ ഒണാഘോഷങ്ങള്‍ പൊടിപൊടിക്കുമ്പോള്‍ പാപ്പനംകോട് പൂഴിക്കുന്നില്‍ പതിവ് തെറ്റിക്കാതെ പൗരസമിതിയുടെ നേതൃത്വത്തില്‍ പൂക്കളും ഇലകളും മാത്രം ഉപയോഗിച്ചുള്ള ഭീമന്‍ പൂക്കളം ഇത്തവണയും വലിപ്പത്തില്‍ ഒന്നാമതായി. മതമൈത്രിയിലൂടെ വൈവിധ്യ ചിത്രങ്ങള്‍ ഇതിനോടകം അത്തക്കളത്തില്‍ ഇടം പിടിച്ചു. ഇരുപതടി നീളവും പതിനഞ്ചടി വീതിയുമുള്ള വലിയ പൂക്കളം ജില്ലയില്‍ തന്നെ ഏറ്റവും വലിയ അത്തപൂക്കളമാണെന്നു സംഘാടകര്‍ അവകാശപ്പെടുന്നു. എല്ലാവര്‍ഷവും വലിയ പൂക്കളമൊരുക്കുന്നതിനാല്‍ ആദ്യദിവസം മുതല്‍ തന്നെ വലിയ ജനശ്രദ്ധയാണ് പൂഴിക്കുന്നിലെ പൂക്കളത്തിനു ലഭിക്കുന്നത്. അത്തമൊരുക്കാന്‍ ആവശ്യമായ പൂക്കള്‍ തോവാളയില്‍ നിന്നാണ് എത്തിക്കുന്നത്. ഒരോ ദിവസത്തേയും പൂക്കളങ്ങള്‍ നാട്ടുകാരിലാരെങ്കിലും സ്‌പോണ്‍സര്‍ ചെയ്യുകയാണ് പതിവ്. രാത്രി പന്ത്രണ്ടിനുശേഷം ആരംഭിക്കുന്ന അത്തമൊരുക്കല്‍ പുലര്‍ച്ചെ വരെ നീളും. കൃത്രിമമായ പൊടികളും മറ്റും ഉപയോഗിക്കാതെ പൂവും ഇലയുംമാത്രം കൊണ്ടു തയാറാക്കുന്ന അത്തക്കളത്തില്‍ ഒരു വശം പൂക്കളവും മറുവശത്ത് സ്‌പോണ്‍സറുടെ താല്‍പര്യമനുസരിച്ചുള്ള ചിത്രവുമായിരിക്കും. ചിത്രങ്ങള്‍ക്ക് നിറം പകരാന്‍ ഓരോ നിറത്തിലുള്ള പൂക്കളാണ് ഉപയോഗിക്കുന്നത്. അത്തത്തിനു തുടക്കംകുറിച്ച് ആദ്യ ദിവസം ലക്ഷ്മി ദേവിയുടെ രൂപമാണ് പൂക്കളില്‍ വിടര്‍ന്നത്. പിന്നീട് അയ്യപ്പന്‍, ആറ്റുകാല്‍ ദേവി, ശ്രീകൃഷ്ണന്‍, കന്യകാമറിയം, യേശുക്രിസ്തു തുടങ്ങിയ രൂപങ്ങളും പൂക്കളത്തെ വേറിട്ടതാക്കി. പൗരസമിതി അംഗങ്ങളുടെ ഭാവനയില്‍ വിരിയുന്ന ഡിസൈനുകളാണു പൂക്കളത്തില്‍ തെളിയുന്നത്. പൂഴിക്കുന്ന് പൗരസമിതിയുടെ 38-ാമത് വാര്‍ഷികവും ഓണാഘോഷവുമാണ് ഇത്തവണ നടക്കുന്നത്. കലാസാംസ്‌കാരിക സമ്മേളനവും ഓണക്കിറ്റ് വിതരണവുമടക്കം നിരവധി പരിപാടികള്‍ ഓണാഘോഷത്തോടൊപ്പം സംഘടിപ്പിച്ചിട്ടുണ്ട്. ഉത്രാടദിനത്തില്‍ കഥകളിയുടെ രൂപമായിരുന്നു പൂക്കളത്തില്‍. വെള്ളായണി ക്ഷേത്രത്തില്‍ ഓണക്കോടി ചാര്‍ത്തല്‍ നടന്നു നേമം: ഓണത്തോടനുബന്ധിച്ചു വെള്ളായണി ദേവീക്ഷേത്രത്തില്‍ ഉത്രാടത്തിനു നടന്നുവരുന്ന ഓണക്കോടി ചാര്‍ത്തുന്ന ചടങ്ങ് നടന്നു. ഉച്ചയ്ക്ക് ദീപാരാധനയ്ക്ക് ശേഷമാണ് ഓണക്കോടി ദേവിക്കു ചാര്‍ത്തിയത്. കണിയാര്‍ സമുദായത്തില്‍പ്പെട്ട ചക്രപാണി നന്തുണി മീട്ടി ഓണപ്പാട്ട് പാടിയതിനുശേഷമാ ണ് ദേവിക്കു കോടി ചാര്‍ത്തിയത്. മഞ്ഞള്‍ മുക്കിയ നേര്യതില്‍ ശംഖ്, ശൂലം എന്നിവയുടെ ചിത്രം നൂലില്‍ നെയ്താണ് ദേവിക്ക് ചാര്‍ത്തുന്നത്. ഒന്നാം ഓണം മുതല്‍ നാലാം ഓണം വരെ ക്ഷേത്രത്തില്‍ പ്രത്യേക ഉച്ചപൂജയും ഉണ്ടായിരിക്കും. നാലാം ഓണത്തിനു ശേഷം കോടി മാറ്റും. ഓണകോടി ദേവിക്ക് സമര്‍പ്പിക്കാനും ഓണപ്പാട്ട് കേള്‍ക്കാനുമായി നിരവധി ഭക്തജനങ്ങള്‍ ക്ഷേത്രത്തിലെത്തിയിരുന്നു. ക്ഷേത്രമൂത്ത വാത്തി എസ്. ശിവകുമാര്‍ ചടങ്ങുകള്‍ക്കു നേതൃത്വം നല്‍കി. കെ. പുരുഷോത്തമന്‍ നായര്‍, രാധാകൃഷ്ണന്‍ നായര്‍, കെ.രാമചന്ദ്രന്‍ നായര്‍, പി. വിജയന്‍ നായര്‍, രമേശ് കുമാര്‍, രാധാകൃഷ്ണന്‍ നായര്‍, എസ്. വിജയകുമാര്‍, ശ്രീകണ്ഠന്‍ നായര്‍, മാവറത്തല കുടുംബാംഗം വിക്രമന്‍ നായര്‍, ദേവസ്വം ഉദ്യോഗസ്ഥര്‍ തുടങ്ങിയവര്‍ പങ്കെടുത്തു. യൂണിവേഴ്സിറ്റി സ്റ്റേഡിയത്തിന് മുകളിൽ ഡ്രോണ്‍ ലൈറ്റ് ഷോ തിരുവനന്തപുരം: ഓണം വാരാഘോഷത്തോടനുബന്ധിച്ച് ആകാശത്ത് ദൃശ്യവിസ്മയമൊരുക്കുന്ന ആയിരത്തോളം ഡ്രോണുകളുടെ ലൈറ്റ് ഷോയ്ക്ക് ഇന്നു തുടക്കമാകും. യൂണിവേഴ്സിറ്റി സ്റ്റേഡിയത്തിനു മുകളിലായി 250 അടി ഉയരത്തിൽ രാത്രി 8.45 മുതൽ 9.15 വരെയാണു മൂന്നു ദിവസത്തെ ഡ്രോണ്‍ ലൈറ്റ് ഷോ നടക്കുക. തലസ്ഥാനത്ത് ആദ്യമായാണു കേരള ടൂറിസം വകുപ്പിന്‍റെ നേതൃത്വത്തിൽ ഇത്തരമൊരു ലൈറ്റ് ഷോ സംഘടിപ്പിക്കുന്നത്. വിനോദസഞ്ചാരികൾക്കും പൊതുജനങ്ങൾക്കും പുത്തൻ കാഴ്ചാനുഭവം ലഭ്യമാക്കുന്ന ലൈറ്റ് ഷോ ഓണാഘോഷങ്ങൾക്കു മാറ്റു കൂട്ടും. സ്റ്റേഡിയത്തിലും പരിസരപ്രദേശങ്ങളിലും നിന്ന് ആകർഷകമായ ദൃശ്യവിസ്മയം വീക്ഷിക്കാവുന്നതാണ്. എൽഇഡി ലൈറ്റുകളാൽ പ്രത്യേകം രൂപകൽപന ചെയ്ത ഡ്രോണുകളാണ് ലൈറ്റ് ഷോയുടെ ഭാഗമാകുന്നത്. ആഗോള മുൻനിര ഡ്രോണ്‍ ടെക്നോളജി കന്പനിയായ ബോട്‌ലാബ് ഡൈനാമിക്സാണ് ലൈറ്റ് ഷോ ഒരുക്കുക്കുന്നത്. 2022 ജനുവരി 29നു രാഷ്ട്രപതി ഭവനിൽ ബീറ്റിംഗ് റിട്രീറ്റ് ചടങ്ങിനായി 1,000 ഡ്രോണുകൾ ഉപയോഗിച്ച് ഇന്ത്യയിലെ ഏറ്റവും വലിയ ഡ്രോണ്‍ ലൈറ്റ് ഷോ സംഘടിപ്പിച്ചതിന്‍റെ റിക്കാർഡുള്ള കന്പനിയാണ് ബോട്ട്ലാബ് ഡൈനാമിക്സ്. ഡ്രോണ്‍ ലൈറ്റ് ഷോ ഞായറാഴ്ച സമാപിക്കും.

ഉത്രാടദിനത്തിൽ ഓടിയും തളർന്നും ഒരുങ്ങിയും നഗരം

തിരുവനന്തപുരം: തിരുവോണത്തിനൊരുങ്ങി നഗരം. ഓണ സദ്യയ്ക്കായി വിഭവങ്ങൾ വാങ്ങാനായുള്ള വലിയ തിരക്കാണ് ഉത്രാടദിനമായ ഇന്നലെ ജില്ലയിൽ അനുഭവപ്പെട്ടത്. കച്ചവടകേന്ദ്രങ്ങളിലെല്ലാം വലിയ തിരക്കാണ് ഉണ്ടായത്. പച്ചക്കറികൾ വാങ്ങാനും ഓണപ്പുടവ എടുക്കാനും വ്യാപാര സ്ഥാപനങ്ങളിൽ വലിയ തിരക്കാണുണ്ടായത്. കിഴേക്കേ കോട്ടയും പഴവങ്ങാടിയും ചാലയുമൊക്കെ ജനങ്ങളെക്കൊണ്ടുനിറഞ്ഞു. തിരുവോണം കെങ്കേമമാക്കാനുള്ള അവസാനഘട്ട ഒരുക്കത്തിലാണു മലയാളികൾ. സദ്യ ഒരുക്കിയും അത്തപൂക്കളവുമായി ഇന്നൊരുദിവസം മലയാളികൾക്ക് ഉത്സവമാണ്. ഇന്നു രാവിലെ ക്ഷേത്രങ്ങളിലെ തിരക്കു കണക്കിലെടുത്തു പോലീസ് സുരക്ഷ ശക്തമാക്കിയിട്ടുണ്ട്. നഗരത്തിലെ പ്രധാന ഹോട്ടലുകളെല്ലാം ഓണസദ്യ ഒരുക്കുന്നുണ്ട്. നേരത്തേ സദ്യ ബുക്ക് ചെയ്തു കാത്തിരിക്കുന്നവർ ഏറെയാണ്. സദ്യ ഓണ്‍ലൈനായുള്ള ബുക്കിംഗ് കഴിഞ്ഞ വർഷേത്തക്കാൾ ഇരട്ടിയെന്നാണു ഹോട്ടൽ ഉടമകൾ പറയുന്നത്. സർക്കാരിന്‍റെ ഓണാഘോഷത്തിന്‍റെ ഭാഗമായി നഗരത്തിലെ 32 കേന്ദ്രങ്ങളിൽ കലാപരിപാടികൾ നടക്കും. വെള്ളയന്പലം മുതൽ കിഴക്കേകോട്ട വരെയുള്ള വീഥിയുടെ ഇരുഭാഗവും ദീപാലങ്കൃതമാക്കിയിട്ടുണ്ട്. ഓണാഘോഷം ഇന്ന് നിശാഗന്ധി: ഒന്നിച്ചൊന്നായ്- ജി.എസ്. പ്രദീപ്, പ്രമോദ് പയ്യന്നൂർ വൈകുന്നേരം 6.30ന്, മെഗാഷോ സുരാജ് വെഞ്ഞാറമൂട് രാത്രി 8.30ന്. സൂര്യകാന്തി: രാഗമാലിക വൈകുന്നേരം ഏഴിന്. സെൻട്രൽ സ്റ്റേഡിയം: ഓണം വൈബ്സ് ഗാനമേള വൈകുന്നേരം ഏഴിന്. പൂജപ്പുര: ബിജു നാരായണൻ ഗാനമേള വൈകുന്നേരം ഏഴിന്. ഭാരത് ഭവൻ: മോഹിനിയാട്ടം വൈകുന്നേരം 6.15ന്, കുച്ചിപ്പുടി 7.15ന്. ഗാന്ധിപാർക്ക്: കഥാപ്രസംഗം വൈകുന്നേരം 5.30ന്. മ്യൂസിയം പരിസരം: യോഗ വൈകുന്നേരം ആറിന്, കളരിപ്പയറ്റ് ഏഴിന്. ഓണാഘോഷം നാളെ നിശാഗന്ധി ഓഡിറ്റോറിയം: ജൈം ലൈവ് ഫ്യൂഷൻ വൈകുന്നേരം ആറിന്, മെഗാ മ്യൂസിക് ഷോ ഏഴിന്. സൂര്യകാന്തി: രാഗമാലിക വൈകുന്നേരം ഏഴിന്. സെൻട്രൽ സ്റ്റേഡിയം: നല്ലോണം വൈകുന്നേരം ഏഴിന്. പൂജപ്പുര: ഓണം വൈബ്സ് റീ ലോഡഡ് സംഗീത പരിപാടി വൈകുന്നേരം ഏഴിന്. ഭാരത് ഭവൻ: ഭരതനാട്യം വൈകുന്നേരം 6.15ന്. ഗാന്ധിപാർക്ക്: കഥാപ്രസംഗം- വസന്തകുമാർ സാംബശിവൻ വൈകുന്നേരം 5.30ന്. ആക്കുളം: പുനലൂർ ആർ. വിശ്വംഭരന്‍റെ ഗാനമേള വൈകുന്നേരം ആറിന്.

ഓണാഘോഷവും ആര്‍ട്ടിസ്റ്റുകളെ ആദരിക്കലും

വെള്ളറട: സിനിമ സീരിയല്‍ സപ്പോര്‍ട്ടിംഗ് ആര്‍ട്ടിസ്റ്റ് കമ്മ്യൂണിറ്റിയുടെ ആഭിമുഖ്യത്തില്‍ പൊന്നോണ പുലരി എന്ന പേരില്‍ ഓണാഘോഷവും ആര്‍ട്ടിസ്റ്റുകളെ ആദരിക്കലും നടന്നു. വി.കെ. പ്രശാന്ത് എംഎല്‍എ ഉദ്ഘാടനം ചെയ്തു. ഷാജി പെരുങ്കടവിള അധ്യക്ഷനായി. സിനിമ ഡയറക്ടര്‍ അനില്‍ ദേവ് ഓണസന്ദേശം നല്‍കി. തുടര്‍ന്ന് ബി. ഷാജഹാന്‍ ആര്‍ട്ടിസ്റ്റുകളെ ആദരിച്ചു. രാകേഷ് കൊഞ്ചിറ, ഷിബു മംഗലക്കല്‍, റെജി രവീന്ദ്രന്‍, ആന്‍ മേരി, വിനോദ് തിരുമല, കുമാര്‍, രാജീവന്‍, രഘുനാഥ്, ഗോപന്‍ ഓച്ചിറ, വിനോദ്, ഷാജി ലാല്‍, ശ്രീകുമാര്‍, പ്രവീണ്‍ തിക്കുറിച്ചി എന്നിവര്‍ പ്രസംഗിച്ചു.

വെള്ളായണി നിലമക്കരിയിൽ പുഷ്പക്കൃഷി വിളവെടുത്തു

നേമം : വെള്ളായണി നിലമക്കരി പാടശേഖരത്തിലെ പുഷ്പകൃഷിയുടെ വിളവെടുപ്പ് നടന്നു. നേമം കൃഷിഭവനും നിലമക്കരി പാടശേഖര സമിതിയും ചേര്‍ന്നാണ് പൂക്കൃഷി നടത്തിയത്. പുഷ്പകൃഷിയുടെ വിളവെടുപ്പ് മന്ത്രി വി. ശിവന്‍കുട്ടി നിര്‍വഹിച്ചു. തുടര്‍ കൃഷിക്കും ടൂറിസത്തിനുമായി പുതിയ പദ്ധതികള്‍ തയാറാക്കിയാല്‍ എല്ലാ സഹായങ്ങളും ചെയ്യുമെന്നു മന്ത്രി പറഞ്ഞു. കല്ലിയൂര്‍ പഞ്ചായത്ത് പ്രസിഡന്‍റ് എം. സോമശേഖരന്‍ നായര്‍, കൗണ്‍സിലര്‍മാരായ എം.ആര്‍. ഗോപന്‍, ശ്രീദേവി, ആശാനാഥ്, ദീപിക, സൗമ്യ, ജില്ലാ പഞ്ചായത്ത് അംഗം ഭഗത് റൂഫസ്, ബ്ലോക്ക് അംഗം ജയലക്ഷ്മി, പഞ്ചായത്തംഗം ആതിര, കൃഷി ഓഫീസര്‍ കെ.ജി. ബിനുലാല്‍, പാപ്പനംകോട് അജയന്‍, കെ.ജി. സനല്‍കുമാര്‍, ബി.ആര്‍. ബിജു, സിന്ധു, കരുമം ശശികുമാര്‍ തുടങ്ങിയവര്‍ പങ്കെടുത്തു. ചടങ്ങില്‍ കര്‍ഷക തൊഴിലാളികളെ ആദരിച്ചു. കാര്‍ഷിക വികസന സമിതി, പുഞ്ചക്കരി വാക്കേഴ്‌സ് ക്ലബ്, എന്‍എസ്എസ് യൂണിറ്റ്, വിവിധ റസിഡന്‍സ് അസോസിയേഷനുകള്‍ എന്നിവയുടെ സഹകരണത്തോടെയാണ് പുഷ്പക്കൃഷി നടത്തിയത്.

ഭിന്നശേഷിക്കാർക്ക് മുച്ചക്ര വാഹനങ്ങൾ ‍വിതരണം ചെയ്തു

നെടുമങ്ങാട്: വെള്ളനാട് ബ്ലോക്ക് പഞ്ചായത്തിന്‍റെയും വനിതാ ശിശുവികസന വകുപ്പിന്‍റെയും സംയുക്താഭിമുഖ്യത്തിൽ ബ്ലോക്ക് പഞ്ചായത്തിലെ ഭിന്നശേഷിക്കാർക്ക് മുച്ചക്രവാഹനങ്ങൾ വിതരണം ചെയ്തു. അടൂർ പ്രകാശ് എം പി ഉദ്ഘാടനം ചെയ്തു. ബ്ലോക്ക് പഞ്ചായത്ത് പ്രസിഡന്‍റ് എസ്. ഇന്ദുലേഖ അധ്യക്ഷയായി. വൈസ് പ്രസിഡന്‍റ് എസ്.എൽ. കൃഷ്ണകുമാരി, അംഗങ്ങളായ സരള, ശ്രീക്കുട്ടി സതീഷ്, വി.ജെ. സുനിത, എസ്.എസ്. ഫർസാന, എ.എം. ഷാജി, വി. രമേഷ്, സി. വിജയൻ, കണ്ണൻ എസ്. ലാൽ, ടി. സുനിൽ കുമാർ, സെക്രട്ടറി എസ്. ജീവൻ, സിഡിപിഒമാരായ ലേഖ, വി. ബിന്ദു തുടങ്ങിയവർ സംസാരിച്ചു. ബ്ലോക്ക് പരിധിയിലെ 18 പേർക്കാണ് മുച്ചക്രവാഹനങ്ങൾ വിതരണം ചെയ്തത്.

എസ്ബിഐ വലിയമലയ ശാഖയുടെ ഉപഭോക്‌തൃ സേവന കേന്ദ്രം

വിതുര: അഗ്രി തനിമ ഫാർമേഴ്സ് പ്രൊഡ്യൂസർ കമ്പനിയുടെ നേതൃത്വത്തിൽ പനയ്ക്കോട് ബാങ്ക് ജംഗ്ഷനിൽ ആരംഭിച്ച സ്റ്റേറ്റ് ബാങ്ക് ഓഫ് ഇന്ത്യ വലിയമല ശാഖയുടെ ഉപഭോക്തൃ സേവന കേന്ദ്രം പഞ്ചായത്ത് പ്രസിഡന്‍റ് വി.ജെ. സുരേഷ് ഉദ്ഘാടനം ചെയ്തു. അഗ്രി തനിമ എംഡി സി. പ്രഭാകരൻ അധ്യക്ഷത വഹിച്ചു. എസ്ബിഐ വലിയമല ശാഖാമാനേജർ അനുരാജേന്ദ്രൻ ആദ്യ നിക്ഷേപം സ്വീകരിച്ചു. പഞ്ചായത്തംഗങ്ങളായ സന്ധ്യ എസ്. നായർ, ജെ. അശോകൻ, തച്ചൻകോട് വേണുഗോപാൽ, എസ്ബിഐ വിതുര ശാഖാ മാനേജർ ആർ. തേജസ്, സേവ് സൊല്യൂഷൻസ് കേരള സ്റ്റേറ്റ് മാനേജർ രജീഷ് എൻ. നായർ, എസ്.എസ്. പ്രേംകുമാർ, ഡോ. അനുപമ വി. സുധാകരൻ, ഫാ. പുഷ്പരാജ്, വിജയരാജ്, വേണുക്കുട്ടൻ, വി. സദാശിവൻനായർ, ജി.ഉദയകുമാർ, ഐ. സെൽവരാജ്, രേഷ്മ ബി.ആർ. എന്നിവർ സംസാരിച്ചു. രാവിലെ എട്ടു മുതൽ രാത്രി എട്ടു വരെ പ്രവർത്തിക്കുന്ന കേന്ദ്രത്തിൽ എസ്ബിഐ വലിയമല ബ്രാഞ്ചിന്‍റെ 34 തരം സേവനങ്ങൾ ലഭ്യമാണ്.

തോട്ടം തൊഴിലാളികൾക്ക് ഓണക്കിറ്റ് വിതരണം ചെയ്തു

വിതുര: വാമനപുരം മണ്ഡലത്തില പൊൻമുടി ലയങ്ങളിൽ താമസിക്കുന്ന തോട്ടം തൊഴിലാളികൾക്ക് ഓണക്കിറ്റുകൾ വിതരണം ചെയ്തു. ഡി.കെ. മുരളി എംഎൽഎ വിതരണോദ്ഘാടനം നിർവഹിച്ചു. ട്രിവാൻട്രം ജീപ്പേഴ്സ് ക്ലബാണു മുൻ വർഷത്തെ പോലെ ഈ വർഷവും 175 ഓളം തൊഴിലാളികൾക്ക് ഭക്ഷ്യധാന്യ കിറ്റ് തയാറാക്കി നൽകിയത്. പെരിങ്ങമ്മല പഞ്ചായത്ത് പ്രസിഡന്‍റ് ഷിനു മടത്തറ, മെമ്പർമാരായ രാധാമണി, കലയപുരം അൻസാരി, പി.എസ്. മധു, വിനേഷ് കുമാർ, സുചിത്ര കുമാരി, ക്ലബ് ഭാരവാഹികളായ ദിലീപ്, അനുശങ്കർ, രമേഷ് പിള്ള, ക്യാപ്റ്റൻ അരുൺ മോഹൻ, വെഞ്ഞാറമൂട് രാജമൗലി തുടങ്ങിയവർ പങ്കെടുത്തു.

സഹോദരനെ വെട്ടിയ കേസിലെ പ്രതി അറസ്റ്റില്‍

പൂന്തുറ: സഹോദരനെ വെട്ടിപ്പരിക്കേല്‍പ്പിച്ച കേസിലെ പ്രതിയെ പൂന്തുറ പോലീസ് അറസ്റ്റ് ചെയ്തു. പൂന്തുറ മുട്ടത്തറ ചേരിയാമുട്ടം അനീഷ് ടിറ്റോ (29) ആണ് പിടിയിലായത്. ചൊവ്വാഴ്ച രാത്രിയി ൽ ഇയാളുടെ ഇളയ സഹോദരനായ നോയല്‍ മരിയനുമായി വീട്ടില്‍വെച്ച് വാക്കേറ്റമുണ്ടാകുകയും തുടര്‍ന്നു സമീപത്തുണ്ടായിരുന്ന കത്തിയെടുത്ത് നോയല്‍ മരിയനെ വെട്ടിപ്പരിക്കേല്‍പ്പിക്കുകയുമായിരുന്നു. ശരീരത്തില്‍ ആഴത്തില്‍ മുറിവേറ്റ നോയല്‍ ആശുപത്രിയില്‍ ചികിത്സ തേടി. അനീഷ് റൗഡി ലിസ്റ്റില്‍ ഉള്‍പ്പെട്ടിട്ടുള്ള ആളാണ്. പൂന്തുറ എസ്എച്ച്ഒ സജീവിന്‍റെ നേതൃത്വത്തില്‍ എസ്ഐ സുനില്‍, ഗ്രേഡ് എസ്ഐ ജോണ്‍, സിപിഒമാരായ ഷിബു, അരുണ്‍ പി. ദാസ് , ബിനു എന്നിവരുള്‍പ്പെട്ട പോലീസ് സംഘം അറസ്റ്റ് ചെയ്ത പ്രതിയെ കോടതിറിമാന്‍ഡ് ചെയ്തു.

നവോഥാനമാണ് കേരളത്തെ പുരോഗതിയിലെത്തിച്ചത്: മുഖ്യമന്ത്രി

നേമം: നവോഥാന മാറ്റങ്ങളാണു കേരളത്തെ ഇന്നു കാണുന്ന പുരോഗതിയിലെത്തിച്ചതെന്നു മുഖ്യമന്ത്രി പിണറായി വിജയന്‍. എസ്എന്‍ഡിപി യോഗം പെരിങ്ങമ്മല ശാഖയുടെ ശ്രീനാരായണീയം കണ്‍വന്‍ഷന്‍ സെന്‍ററിന്‍റെ ഉദ്ഘാടനം നിര്‍വഹിച്ച് സംസാരിക്കുകയായിരുന്നു അദ്ദേഹം. നവോത്ഥാന പ്രസ്ഥാനങ്ങളുണ്ടായിരുന്ന മറ്റ് സംസ്ഥാനങ്ങളില്‍ ഇന്നും വേര്‍തിരിവുകളും ജാതി ചിന്തകളും നിലനില്‍ക്കുമ്പോള്‍ മാറ്റങ്ങള്‍ ഉള്‍കൊണ്ട കേരളം മാതൃകയാണെന്ന് മുഖ്യമന്ത്രി പറഞ്ഞു.കേരളത്തിനു വെളിച്ചം പകര്‍ന്ന ശ്രീനാരായണ ഗുരുവിന്‍റെ ദര്‍ശനങ്ങളെ ദുരുപയോഗം ചെയ്ത് സ്വന്തമാക്കാന്‍ ചില വര്‍ഗീയ ശക്തികള്‍ ശ്രമിക്കുന്നു. വര്‍ഗീയത ഏതു രൂപത്തിലായാലും സമൂഹത്തിനു വിനാശകരമാണ്. അതു മനുഷ്യരുടെ മനസില്‍ നട്ടു പിടിപ്പിക്കുന്നവരെ തിരിച്ചറിയണം. മനുഷ്യനെ ഭിന്നിപ്പിക്കാനല്ല ഒരുമിപ്പിക്കാനാണ് സനാതന ധര്‍മത്തെ ശ്രീനാരായണ ഗുരു ഉപയോഗപ്പെടു ത്തിയത്. സമൂഹം ജാതിയുടെയും അനാചാരങ്ങളുടെയും അന്ധവിശ്വാസങ്ങളുടെയും ഇരുട്ടിലായപ്പോള്‍ വിദ്യ കൊണ്ട് പ്രബുദ്ധരാകാനും സംഘടന കൊണ്ട് ശക്തരാകാനും നിര്‍ദേശിച്ചത് ഗുരുവായിരുന്നു- മുഖ്യമന്ത്രി കൂട്ടിച്ചേർത്തു. ചടങ്ങില്‍ യോഗം ജനറല്‍ സെക്രട്ടറി വെള്ളാപള്ളി നടേശന്‍ അധ്യക്ഷനായി. മന്ത്രി ജി.ആര്‍. അനില്‍, അടൂര്‍ പ്രകാശ് എംപി, എംഎല്‍എമാരായ എം. വിന്‍സന്‍റ്, വി. ജോയി, വി. ശശി, യോഗം കോവളം യൂണിയന്‍ പ്രസിഡന്‍റ് ടി.എന്‍. സുരേഷ്, സെക്രട്ടറി തോട്ടം പി. കാര്‍ത്തികേയന്‍, ബിജെപി സംസ്ഥാന ജനറല്‍ സെക്രട്ടറി എസ്. സുരേഷ്, ശാഖ പ്രസിഡന്‍റ് എസ്.കെ. ശ്രീകണ്ഠന്‍, സെക്രട്ടറി എ.വി. അശോക് കുമാര്‍, എസ്. സുശീലന്‍ തുടങ്ങിയവര്‍ പങ്കെടുത്തു. ജനറല്‍ സെക്രട്ടറിയായി 30 വര്‍ഷം പൂര്‍ത്തിയാക്കിയ വെള്ളാപള്ളി നടേശനെയും അഞ്ചു പ്രമുഖരെയും ആദരിച്ചു.

വട്ടപ്പാറയിൽ 33 ലിറ്റര്‍ വ്യാജ മദ്യവും 20 ലിറ്റര്‍ കോടയും പിടികൂടി

വെഞ്ഞാറമൂട്: വട്ടപ്പാറ പോലീസ് നടത്തിയ പരിശോധനയില്‍ 33 ലിറ്റര്‍ വ്യാജമദ്യവും 20 ലിറ്റർ കോടയും രണ്ടു ലക്ഷം രൂപയും വാറ്റുപകരണങ്ങളും പിടികൂടി. സംഭവവുമായി ബന്ധപ്പെട്ട് ഒരാള്‍ അറസ്റ്റിലായി. തേക്കട കൊഞ്ചിറ പെരുംകൂര്‍ ചരുവിള പുത്തന്‍ വീട്ടില്‍ നിന്നും കൊഞ്ചിറ പെരുംകൂര്‍ കാര്‍ത്തികയില്‍ വാടകയ്ക്ക് താമസിക്കുന്ന സതീശനാണ്(64) അറസ്റ്റിലായത്. കുറച്ചു കാലമായി പ്രതി കൊഞ്ചിറയില്‍ വാടക വീട് കേന്ദ്രീകരിച്ചു വ്യാജ മദ്യനിര്‍മാണവും വില്പനയും നടത്തി വരുന്നതായി റൂറല്‍ ജില്ലാ പോലീസ് മേധാവി സുദര്‍ശനനു വിവരം ലഭിച്ചിരുന്നു. ഈ വിവരം അദ്ദേഹം നെടുമങ്ങാട് പോലീസ് സബ് ഡിവിഷനിലേക്കും വട്ടപ്പാറ പോലീസിനും കൈമാറി. തുടര്‍ന്ന് നെടുമങ്ങാട് എഎസ്പി അച്യുത് അശോക്, വട്ടപ്പാറ സിഐ ശീജിത്ത്, എസ്ഐമാരായ ബിനിമോള്‍, പ്രദീപ്, മനോജ്, സിവിള്‍ പോലീസ് ഓഫീസര്‍മാരായ സൂരജ്, സജീവ്, പ്രശാന്ത്, ബിനോയി, മാധവന്‍ എന്നിവര്‍ അടങ്ങിയ സംഘം നടത്തിയ പരിശോധനയില്‍ പ്രതിയെ പിടികൂടുകയായിരുന്നു. കോടതിയില്‍ ഹാജരാക്കിയ പ്രതിയെ റിമാൻഡ് ചെയ്തു.

നെയ്യാര്‍ മേള: ഓണം വാരാഘോഷ പരിപാടികള്‍ക്ക് ഇന്നു തുടക്കം

നെയ്യാറ്റിൻകര: ഇസ്തിരിപ്പെട്ടി മുതല്‍ റാന്തല്‍ വരെ, പൂട്ടും താക്കോലും മുതല്‍ പാക്കുവെട്ടി വരെ, ടെലിഫോണുകള്‍ മുതല്‍ കാമറകള്‍ വരെ... നെയ്യാര്‍ മേളയില്‍ ഒരുക്കിയ ഇന്നലെകളിലെ കൗതുകവിജ്ഞാന പ്രദര്‍ശനം ഏറെ ശ്രദ്ധേയമാകുന്നു. അവണാകുഴി സ്വദേശിയായ രാജേന്ദ്രനാണ് ഈ കലവറകളുടെ സൂക്ഷിപ്പുകാരന്‍. ബിഎച്ച്ഇഎല്ലിലെ റിട്ട. സബ് അഡീഷണല്‍ എൻജി നീയറായിരുന്ന അദ്ദേഹം പുതുതലമുറകളിലേയ്ക്കു വിജ്ഞാനത്തിന്‍റെ പ്രകാശം ചൊരിയുന്ന നിരവധി വിഭവങ്ങള്‍ പ്രദര്‍ശനത്തില്‍ ഒരുക്കിയിട്ടുണ്ട്. കേരള സംസ്ഥാന വിനോദസഞ്ചാര വകുപ്പിന്‍റെയും തദ്ദേശ സ്വയംഭരണ സ്ഥാപനങ്ങളുടെയും സഹകരണത്തോടെ കേരള സംസ്ഥാന വ്യാപാരി വ്യവസായി സമിതി നെയ്യാറ്റിൻകര ഏരിയ കമ്മിറ്റി ആറാലുംമൂട് ഗ്രൗണ്ടില്‍ സംഘടിപ്പിച്ചിരിക്കുന്ന നെയ്യാർ മേളയിലെ പ്രധാന ആകര്‍ഷണങ്ങളിലൊന്നായി പുരാവസ്തു പ്രദര്‍ശനം മാറിക്കഴിഞ്ഞു. സംസ്ഥാന സര്‍ക്കാരിന്‍റെ ഓണം വാരാഘോഷങ്ങളുടെ വേദി കൂടിയാണ് നെയ്യാര്‍ മേള. ഓണം വാരാഘോഷങ്ങളുടെ ഭാഗമായ കലാവിരുന്നുകള്‍ക്ക് ഇന്നു നെയ്യാര്‍ മേളയില്‍ തുടക്കം കുറിക്കും. വ്യവസായ വാണിജ്യ വകുപ്പിന്‍റെ ആഭിമുഖ്യത്തിൽ തിരുവനന്തപുരം ജില്ലാ വ്യവസായ കേന്ദ്രം സംഘടിപ്പിക്കുന്ന വ്യവസായ ഉൽപന്ന പ്രദർശന വിപണനവും നെയ്യാർ മേളയുടെ ഭാഗമായി ക്രമീകരിച്ചിരിക്കുന്നു. നാടൻ ഭക്ഷ്യ ഉൽപ്പന്നങ്ങൾ മുതല്‍ കരകൗശലവസ്തുക്കള്‍ വരെ നീളുന്ന വൈവിധ്യമാര്‍ന്ന സ്റ്റാളുകള്‍ വ്യവസായ വകുപ്പ് മേളയില്‍ ഉള്‍പ്പെടുത്തിയിട്ടുണ്ട്. കാര്‍ണിവല്‍, അമ്യൂസ്മെന്‍റ് പാര്‍ക്ക്, വാട്ടര്‍ ഫൗണ്ടയിന്‍, ഭക്ഷ്യമേള എന്നിവയും നെയ്യാര്‍ മേളയിലെത്തുന്ന സന്ദര്‍ശകരെ വരവേല്‍ക്കുന്നു.

മത്സ്യഫെഡിന്‍റെ വിവേചനം തുടരുന്നു: പി. സ്റ്റെല്ലസ്

തിരുവനന്തപുരം: കേരളീയർ നാടെങ്ങും ഓണം ആഘോഷിക്കുന്പോൾ മത്സ്യത്തൊഴിലാളികൾക്ക് മത്സ്യഫെഡ് നൽകേണ്ട മണ്ണെണ്ണയുടെ സബ്സിഡി തുക ഓണാഘോഷ വേളയിൽ നൽകാത്തതിലൂടെ ഈ സമൂഹത്തോട് മത്സ്യഫെഡിന്‍റെ ജനാധിപത്യവിരുദ്ധത പ്രകടമായെന്ന് ഫെഡറേഷൻ സംസ്ഥാന പ്രസിഡന്‍റ് പി. സ്റ്റെല്ലസ്. മത്സ്യബന്ധനത്തിനു പോകുന്ന വള്ളങ്ങൾക്ക് മത്സ്യഫെഡ് വിതരണം ചെയ്യുന്ന മണ്ണെണ്ണ ഒരു ലിറ്ററിനു 100 രൂപ 20 പൈസ കൊടുത്തു വാങ്ങിയാണ് മത്സ്യബന്ധനം നടത്തി പോകുന്നത്. ഈ തുകയിൽ നിന്നാണ് 25 രൂപ സബ്സിഡി തുകയായി മത്സ്യഫെഡ് നൽകിവരുന്നത്. എന്നാൽ ഇപ്പോൾ മൂന്നുമാസമായി സബ്സിഡി കുടിശിഖയാണ്. ഓണസമയത്ത് മത്സ്യത്തൊഴിലാളികൾക്ക് കൊടുക്കാതിരുന്നത് മത്സ്യഫെഡിന്‍റെ ഭാഗത്തുനിന്നും മനഃപൂർവമുള്ള വിവേചനവും ഗുരുതരമായ വീഴ്ചയുമാണന്നും അദ്ദേഹം പറഞ്ഞു.

ഓണം മനുഷ്യരെ ഒന്നിപ്പിക്കുന്ന ദേശീയോത്സവം: ഡോ. കായംകുളം യൂനുസ്

തിരുവനന്തപുരം: ഓണം ജാതി, മത, വർഗ വ്യത്യാസമില്ലാതെ എല്ലാവിഭാഗം ജനങ്ങളും ഒത്തൊരുമയോടെ ആഘോഷിക്കേണ്ട ദേശീയോത്സവമാണെന്നു പ്രമുഖ എഴുത്തുകാരനും സാംസ്കാരിക പ്രവർത്തകനുമായ ഡോ. കായംകുളം യൂനുസ്. വ്യത്യസ്ത ആശയങ്ങളുടെ പേരിൽ മനുഷ്യ സമൂഹത്തെ വിഭജിക്കാനല്ല നോക്കേണ്ടതെന്നും പകരം അവരെ കൂട്ടിയിണക്കി മുന്നോട്ടു നയിക്കാൻ ഓണം പോലെയുള്ള സംസ്കാരികോ ത്സവങ്ങൾക്കു കഴിയുമെന്നും അദ്ദേഹം ചൂണ്ടിക്കാട്ടി. പൂജപ്പുര യുവജന ഗ്രന്ഥശാലയുടെയും പുണ്യം ചാരിറ്റബിൾ സൊസൈറ്റി യുടെയും ആഭിമുഖ്യത്തിൽ സംഘടിപ്പിച്ച ഓണാഘോഷ പരിപാടിയിൽ പങ്കെടുത്തു പ്രസംഗിക്കുകയായിരുന്നു അദ്ദേഹം. എസ്. വിശ്വംഭരൻ നായർ അധ്യക്ഷത വഹിച്ചു. ഡോ. ജി. രാജേന്ദ്രൻ പിള്ള, പി. ഗോപകുമാർ, കെ. സുകുമാരൻ, പൂജപ്പുര എസ്. ശ്രീകുമാർ, ജി. രാധാകൃഷ് ണൻ, വേണു ഹരിദാസ്, യമുന അനിൽ, ജി. രാമചന്ദ്രൻ നായർ എന്നിവർ പ്രസംഗിച്ചു.

ഓണപ്പാട്ടുമായി വയലാറിന്‍റെ മകൾ ഇന്ദുലേഖ

എസ്. മഞ്ജുളാദേവി തിരുവനന്തപുരം: രാഘവപറന്പിലെ തിരുമുറ്റത്ത് കുട്ടികൾക്കൊപ്പം അത്തപ്പൂക്കളമൊരുക്കാനും ഉൗഞ്ഞാലാടാനും തിരുവോണസദ്യ ഉണ്ണാനും ഓടിയെത്താറുണ്ടായിരുന്നു വയലാർ രാമവർമ. തുന്പപ്പൂക്കളത്തിൽ തിരുവോണത്തിനു തുന്പിതുള്ളാൻ ഇരുന്നപ്പോൾ... എന്ന് എഴുതിയ മലയാളത്തിന്‍റെ ഗന്ധർവകവിക്കു ഓണവും ഹൃദയോത്സവം തന്നെയായിരുന്നു. എല്ലാ തിരക്കുകളും മാറ്റിവച്ച് ചേർത്തലയിലെ വീട്ടിൽ അമ്മ അംബാലിക തന്പുരാട്ടിയ്ക്കൊപ്പമിരുന്ന് തിരുവോണസദ്യ ഉണ്ണാനും ഓണം കൂടാനും വയലാർ എത്തുന്പോൾ മക്കളായ ശരത്ചന്ദ്രവർമയും ഇന്ദുലേഖയും യമുനയും സിന്ധുവും ആഘോഷത്തിമിർപ്പിലാവും. പാരിജാതത്തെയും ജമന്തിപ്പൂക്കളെയും ചെത്തിയെയും ചെന്പരത്തിയെയും മലയാളികളുടെ ഹൃദയത്തിലേക്കങ്ങനെ വാടാതെ അടർത്തിവച്ച വയലാറിന്‍റെ വീടൊരു വൃന്ദാവനമായിരുന്നു. തൊടി നിറയെ നൂറുനൂറു പൂക്കൾ! എങ്കിലും കുട്ടികൾ പാടത്തും പറന്പിലും നടന്ന് അടർത്തിയെടുക്കുന്ന നാട്ടുപൂക്കളാണ് അത്തപ്പൂക്കളമൊരുക്കാൻ അധികവും എടുക്കുക. തുന്പപ്പൂവും കാക്കപ്പൂവും വയലറ്റ് നിറത്തിലെ കങ്കനുള്ളി പൂവും ഇലക്കുന്പിൾ നിറയെ പറിച്ചെടുത്ത് വരുന്പോൾ കുട്ടികൾക്കൊപ്പം വയലാറും കൂടും. പൂക്കൾക്കൊപ്പം നല്ല ചേലുള്ള പച്ചിലകളും വയലാർ ഇറുത്തെടുത്തു കൊണ്ടുവന്ന് അത്തപ്പൂക്കളത്തിൽ നിരത്തിവയ്ക്കും. ഇത്തവണ ആദ്യമായി ഒരോണപ്പാട്ടെഴുതുന്പോൾ വയലാറിന്‍റെ മകളും കവയിത്രിയുമായ ഇന്ദുലേഖ വയലാർ രാഘവ പറന്പിലെ ഓണത്തെ തൊട്ടെഴുതി. ശ്രാവണം മെയ്യിൽ മാലേയമണിഞ്ഞു നാണിച്ചു പൊൻകതിർ ചൂടി, തുന്പക്കുടത്തിനെ കുന്പിളിൽ ഒതുക്കി അത്തച്ചമയവും വന്നെത്തി ഉത്രാടപ്പൂവിളി കേട്ടുണരാൻ ഇന്ദുലേഖയെ മലയാള ഗാനാസ്വാദകർ അറിയും. ഇന്ദുലേഖേ...ഇന്ദുലേഖേ... ഇന്ദ്രസദസിലെ നൃത്തലോലെ... എന്ന ഗാനത്തിൽ വയലാർ ഓമനമകളുടെ പേരെടുത്ത് വച്ചിട്ടുണ്ട്. വയലാറിന്‍റെ ഇന്ദുലേഖയുടെ ഓണപ്പാട്ട് പൊൻകതിരോണം ഇന്നലെ സന്ധ്യയ്ക്കു യൂട്യൂബിൽ പ്രകാശിതമായി. വയലാർ ഗാനങ്ങളെ മലയാളികളുടെ അനുഭൂതിയാക്കി മാറ്റുന്ന പ്രശസ്ത ഗായകൻ കല്ലറ ഗോപനാണ് പൊൻകതിരോണം എന്ന ഓണപ്പാട്ട് പാടിയിരിക്കുന്നത്. ഓണത്തിന്‍റെ ആഹ്ലാദാരവവും സ്നിഗ്ധതയും നിറയുന്ന സംഗീതം പന്തളം സുരേഷ് കുമാർ വർമയുടേതാണ്. ഇന്ദുലേഖയുടെ മൂത്തമകൾ കവിതയുടെ ഭർത്താവാണ് സുരേഷ് കുമാർ വർമ. ആദ്യമായെഴുതിയ ഓണപ്പാട്ടിനെ കുറിച്ച് ഇന്ദുലേഖ പറയുന്നു. ഇതെന്‍റെ ബാല്യത്തിലെ ഓണത്തെക്കുറിച്ചുള്ള ഓർമകളാണ്. ഞങ്ങൾക്കൊപ്പം ഓണം കൊണ്ടാടാൻ അച്ഛൻ എത്തുന്പോൾ ഞങ്ങൾ ഹൃദയം കൊണ്ട് അനുഭവിച്ചിരുന്ന ഓണം. അച്ഛൻ തന്നെയായിരുന്നു ഞങ്ങളുടെ ആഘോഷം. ഈ ഓണപ്പാട്ടിലേക്ക് ഞാൻ എത്തുന്നതും ഒരു നിയോഗം പോലെയെന്നു തോന്നുന്നുണ്ട്. എന്‍റെ ഇളയമകൾ രേവതിയുടെ ഭർത്താവ് ജയകൃഷ്ണനാണ് ഇതിനൊരു നിമിത്തമായി മാറിയത്. മുത്തശ്ശി അമ്മയും അച്ഛനും അമ്മയും (ഭാരതി തന്പുരാട്ടി) ഞങ്ങൾ കുട്ടികളും ഒന്നിച്ച് ആഘോഷിച്ച ഓണത്തിന്‍റെ ഓർമകളാണ് ഗാനമായി വന്നത്. ഞങ്ങൾ അനുഭവിച്ച ഓണത്തിന്‍റെ ആഹ്ലാദം ഒരു പാട്ടിൽ ഒതുക്കാൻ കഴിയില്ല. എങ്കിലും ആർപ്പും വിളിയും കുരവയും കോടിയും എല്ലാത്തിനുമുപരി സ്നേഹ കൂട്ടായ്മയും നിറയുന്ന ഓണനാളുകളെ സാക്ഷാത്കരിക്കാൻ ശ്രമിക്കുകയായിരുന്നു. ജാതിമത ഭേദങ്ങൾക്കെല്ലാം അതീതമായി മലയാളം ഒന്നാവുന്ന ഒരാഘോഷമല്ലെ ഓണം. സ്നേഹിക്കയില്ല ഞാൻ നോവുമാത്മാവിനെ സ്നേഹിച്ചിടാത്തൊരു തത്വശാസ്ത്രത്തെയും... എന്നെഴുതിയ അച്ഛന്‍റെ മനസ് തന്നെയാണ് ഞങ്ങളെ ഇന്നും ചേർത്തുനിർത്തുന്നത്. അച്ഛന്‍റെ വേർപാടിനു ശേഷം അച്ഛന്‍റെ സ്ഥാനത്തു നിന്നും ഞങ്ങളെ മുന്നോട്ടു നടത്തിയത് ചേട്ടനാണ്. (പ്രശസ്ത ഗാനരചയിതാവ് കൂടിയായ വയലാർ ശരത്ചന്ദ്രവർമ) ഇന്നും ഓണക്കാലത്തും ഞങ്ങൾ എല്ലാവരും ഒന്നിച്ചുകൂടും. അമ്മയും ചേട്ടനും ചേട്ടത്തിയമ്മയും യമുനയും ഞങ്ങളുടെ കുടുംബാംഗങ്ങളും ചേർന്നാണ് ഓണം ആഘോഷിക്കുക. ഇളയ സഹോദരി സിന്ധു ജീവിച്ചിരുന്ന കാലത്തും സിന്ധുവും എല്ലാ കാര്യത്തിലും മുന്നിലുണ്ടായിരുന്നു. വയലാറിന്‍റെ മകൾ ആദ്യമെഴുതിയ ഓണപ്പാട്ട് പാടാൻ സാധിച്ചത് ഒരു സുകൃതമായി അനുഭവപ്പെടുന്നുവെന്നു കല്ലറ ഗോപൻ പറഞ്ഞു. നീണ്ട വർഷങ്ങളായി വയലാറിന്‍റെ ഗാനങ്ങൾ പാടിനടക്കുന്ന ഗായകനാണെങ്കിലും വയലാറിനെ നേരിട്ടു കാണാൻ സാധിച്ചിട്ടില്ല. ശരത്ചന്ദ്ര വർമയുടെ ധാരാളം ഗാനങ്ങൾ പാടാൻ സാധിച്ചിട്ടുണ്ട്. ഇപ്പോൾ ഇന്ദുലേഖ വയലാറിന്‍റെ ഗാനം പാടാൻ കഴിഞ്ഞതും വയലാറിന്‍റെ അനുഗ്രഹമായി കാണുന്നുവെന്നും കല്ലറ ഗോപൻ. നന്ദകുമാർ വർമയാണ് പൊൻകതിരോണത്തിന്‍റെ നിർമാണം.

വിദ്യാര്‍ഥിയുടെ മരണം; കേസെടുത്തു

പേരൂര്‍ക്കട: പനിബാധിച്ച് വിദ്യാര്‍ഥി മരിക്കാനിടയായത് ആശുപത്രിയുടെ അനാസ്ഥമൂലമാണെന്നുള്ള രക്ഷിതാക്കളുടെ പരാതിയില്‍ കരമന പോലീസ് കേസെടുത്തു. സ്വകാര്യാശുപത്രിക്കെതിരേയാണ് കേസെടുത്തിരിക്കുന്നത്. കരമന കാലടി സൗത്ത് വരമ്പില്‍ വീട്ടില്‍ വിനീഷ്-സന്ധ്യ ദമ്പതികളുടെ മകന്‍ ഏകനാഥ് ആണ് കഴിഞ്ഞ 30ന് മരണപ്പെട്ടത്. ഡെങ്കിപ്പനിബാധ മൂലമായിരുന്നു കുട്ടിയുടെ മരണം. നഗരത്തിലെ രണ്ടു സ്വകാര്യാശുപത്രികളിലും ഒരു സര്‍ക്കാര്‍ ആശുപത്രിയിലുമാണ് കുട്ടിയെ പ്രവേശിപ്പിച്ചിരുന്നത്. എന്നാല്‍ ആശുപത്രി അധികൃതര്‍ രോഗകാരണം കൃത്യമായി കണ്ടെത്തി നല്‍കിയില്ലെന്നാണ് രക്ഷിതാക്കള്‍ പറയുന്നത്. അന്വേഷണം പൂര്‍ത്തീകരിച്ചാല്‍ മാത്രമേ നിജസ്ഥിതി വ്യക്തമാകുകയുള്ളൂവെന്നും അന്വേഷണം നടന്നുവരുന്നുണ്ടെന്നും കരമന പോലീസ് അറിയിച്ചു.

കണ്ണമ്മൂല പള്ളിയിൽ വിശുദ്ധ മദർ തെരേസയുടെ തിരുനാളിനു നാളെ കൊടിയേറും

തിരുവനന്തപുരം: കണ്ണമ്മൂല പള്ളിയിൽ വിശുദ്ധ മദർ തെരേസയുടെ തിരുനാളിനു നാളെ കൊടിയേറും. 14 നു സമാപിക്കും. നാളെ വൈകുന്നേരം 5.15നു ജപമാല. 5.45നു വികാരി ഫാ. ബിജോ അരഞ്ഞാണിയിൽ കൊടിയേറ്റ് കർമം നിർവഹിക്കും. തുടർന്ന് ഫാ. സച്ചിൻ മരങ്ങാട്ടിന്‍റെ കാർമികത്വത്തിൽ വിശുദ്ധ കുർബാനയും മധ്യസ്ഥപ്രാർഥനയും. തുടർന്നുള്ള തിരുനാൾ ദിനങ്ങളിൽ വൈകുന്നേരം 5.30നു ജപമാലയും ആറിന് വിശുദ്ധ കുർബാനയും മധ്യസ്ഥ പ്രാർഥനയും നടക്കും. 13നു വൈകുന്നേരം അഞ്ചിനു ജപമാല. തുടർന്ന് പ്രസുദേന്തി വാഴ്ച. 5.30നു വിശുദ്ധ കുർബാനയ്ക്കും മധ്യസ്ഥപ്രാർഥനയ്ക്കും ശേഷം ആഘോ ഷമായ തിരുനാൾ പ്രദക്ഷിണ വും ഉണ്ടായിരിക്കും. പ്രധാന തിരുനാൾ ദിനമായ 14 നു രാവിലെ 6.15ന് സപ്ര, വിശുദ്ധ കുർബാന. 9.15 ന് സപ്രയ്ക്കു ശേഷം ഫാ. ഗ്രിഗറി മേപ്പുറത്തിന്‍റെ കാർമികത്വത്തിൽ റാസ കുർബാന. ഫാ. ജോർജ് കാളാശേരി ആർച്ച് ഡീക്കനായിരിക്കും. തുടർന്നു തിരുനാൾ പ്രദക്ഷിണത്തിനുശേഷം കൊടിയിറക്കുന്നതോടെ തിരുനാൾ സമാപിക്കും.

ബസിന്‍റെ ആക്‌സില്‍ ഒടിഞ്ഞു; ഡ്രൈവര്‍ അപകടം ഒഴിവാക്കി

പേരൂര്‍ക്കട: യാത്രയ്ക്കിടെ ബസിന്‍റെ ആക്‌സില്‍ ഒടിഞ്ഞു, ഡ്രൈവറുടെ മനസാന്നിദ്ധ്യം അപകടമൊഴിവാക്കി. ബുധനാഴ്ച രാവിലെ ആറോടെ പാളയം ചന്ദ്രശേഖരന്‍ നായര്‍ സ്റ്റേഡിയത്തിനു സമീപത്തെ റോഡിലായിരുന്നു സംഭവം. ഏകദേശം 20 യാത്രക്കാരുമായി വന്ന നെയ്യാറ്റിന്‍കര ഡിപ്പോയിലെ കെഎസ്ആര്‍ടിസി സിറ്റി ബസാണ് അപകടത്തില്‍പ്പെട്ടത്. സിഗ്നല്‍പോയിന്‍റ് പിന്നിട്ടെത്തിയ ബസിന്‍റെ ആക്‌സില്‍ ഒടിഞ്ഞ് റോഡിലൂടെ ഉരയുകയായിരുന്നു. വന്‍ ശബ്ദംകേട്ട ഡ്രൈവര്‍ ഉടന്‍തന്നെ ബസ് നിര്‍ത്തി. റോഡില്‍നിന്ന് അല്‍പ്പം ദിശമാറിയാണ് ബസ് നിന്നത്. സിഗ്നല്‍ പിന്നിട്ടു വന്നതുകൊണ്ട് ബസിനു പിറകിലും മുന്നിലുമായി വാഹനങ്ങള്‍ ഉണ്ടായിരുന്നുവെങ്കിലും അപകടമൊന്നും ഉണ്ടായില്ല. സംഭവത്തെ തുടര്‍ന്ന് റോഡില്‍ ഒരുമണിക്കൂറിലേറെ ഗതാഗതതടസം ഉണ്ടായി. ബസ് റോഡില്‍ നിര്‍ത്തിയിട്ടിരിക്കുന്നുവന്നു ധരിച്ചെത്തുന്ന വാഹനങ്ങള്‍ പിറകില്‍ ക്യൂവായി നിന്നതോടെയാണ് ഗതാഗതതടസം ഉണ്ടായത്. പിന്നീടാണ് ബസ് കേടായതാണെന്നു ഇവര്‍ക്കു മനസിലായത്. യാത്രക്കാരെ മറ്റൊരു വാഹനത്തില്‍ കയറ്റിവിടുകയായിരുന്നു. മ്യൂസിയം പോലീസ് സ്ഥലത്തെത്തി മേല്‍നടപടികള്‍ സ്വീകരിച്ചു. ഡിപ്പോയില്‍ നിന്ന് ജീവനക്കാരെത്തി ബസ് സംഭവസ്ഥലത്തുനിന്നു നീക്കി.

പുല്ലുവിളയിൽ നിരവധി പേരെ കടിച്ച തെരുവുനായ പിടിയിൽ

ഇതുവരെ കടിയേറ്റത് നാൽപതോളം പേർക്ക് പൂവാർ : ഒരു രാവും പകലും പുല്ലുവിള, പുതിയതുറ, പള്ളം, കൊച്ചുപള്ളി, കരിച്ചൽ തീരദേശ മേഖലയെ പേടിയുടെ മുൾമുനയിൽ നിർത്തിതേർവാഴ്ച നടത്തിയ ഭ്രാന്തൻ നായയെ ഒടുവിൽ പിടികൂടി. രണ്ടു ദിവസത്തിൽ നാലു കിലോമീറ്റർ ചുറ്റളവിൽ ഓടി നടന്നു മുപ്പതു പേരെ കടിച്ച് പരിക്കേൽപ്പിച്ചശേഷമാണ് നായയെ പിടികൂടാനായത്. ഇനി പത്തു ദിവസം നിരീക്ഷണത്തിലാക്കുമെന്ന് അധികൃതർ. വീടിനു മുറ്റത്ത് കളിച്ചുനിന്ന കുട്ടികളെയും വീടിനുള്ളിൽ നിന്നിരുന്ന വീട്ടമ്മമാരെയും ഗർഭിണിയായ യുവതിയെയും, വഴിയാത്രക്കാർ ഉൾപ്പെടെ കണ്ണിൽ കണ്ടവരെയെല്ലാം തെരുവുനായ ഓടിച്ചിട്ടു കടിച്ചുകീറി. പട്ടിയെ കണ്ടെത്താൻ നാട്ടുകാർ സംഘടിച്ച് നടത്തിയ നിരന്തര ശ്രമവും പാഴായി. എത്രയും പെട്ടെന്നു പിടികൂടണമെന്ന ആവശ്യം ശക്തമായതോടെ കരിംകുളം പഞ്ചായത്ത് അധികൃതരും രംഗത്തിറങ്ങി. ഇന്നലെ ഉച്ചയൊടെ ആറ്റിങ്ങലിൽനിന്ന് ഒരു സംഘം പട്ടി പിടിത്തക്കാരും കരിംകുളത്തെത്തി. ഇവർ നടത്തിയ മണിക്കൂറുകൾ നീണ്ട പരിശ്രമത്തിനൊടുവിൽ പള്ളം ഉരിയരിക്കുന്ന് എന്ന സ്ഥലത്തുനിന്നു പട്ടിയെ പിടികൂടുകയായിരുന്നു. ചൊവ്വാഴ്ച വൈകുന്നേരം അഞ്ചു മണിയോടെ പള്ളം തീരത്ത് ഒരാളെ കടിച്ചു തുടങ്ങിയ നായ ഇന്നലെ വൈകുന്നേരം നാലരവരെയും ആക്രമണം തുടർന്നു. പുല്ലുവിള സ്വദേശികളായ അർജുൻ (16), രാജം (71), പത്രോസ് ഫ്രാൻസിസ് (50), പ്രമോദ് (36), ജോസഫ് (48), റോബിൻസൺ (17), പുഷ്പം (70), റോഷൻ (13), സബി മിഖാലെ (70), പുതിയതുറ സ്വദേശികളായ ജൂസ (53), ലിബിൻ (7), ഷെർളി (26), ക്ലിമൻസ് (62), ബിബിയോ ജോയ് (21), കഴിവൂർ സ്വദേശി റജികുമാർ (30) ഉൾപ്പെടെയുള്ളവരെയാണ് ഇന്നലെ കടിച്ചത്. രണ്ടു ദിവസമായി പേടിച്ചരണ്ട ജനം പുറത്തിറങ്ങാൻ പോലും ഭയപ്പെട്ടു. കുട്ടികൾ ഉൾപ്പെടെ യുള്ളവർ പുറത്തിറങ്ങിയതു കൂട്ടമായി വടികളുമായാണ്. കടിയേറ്റ പലരുടെയും പരിക്ക് ഗുരുതരമാണെന്നും ഇവർ വിവിധ ആശുപത്രികളിൽ ചികിത്സ തുടരുന്നതായും അധികൃതർ പറയുന്നു. മുഖത്ത് കടിയേറ്റ കുട്ടിയെ കൂടുതൽ ചികിത്സക്കായി മെഡിക്കൽ കോളജിലേക്കു മാറ്റിയതായും അറിയുന്നു. മൂന്നുമാസം ഗർഭിണിയായ യുവതിക്കും വാക്സീൻ നൽകേണ്ടി വന്നു. ചൊവ്വാഴ്ചയും പതിനഞ്ച് പേർക്കു കടിയേറ്റിരുന്നു. പുല്ലുവിള സ്വദേശികളായ മിഥുൻ (16), പനിയമ്മ (64), സുവർണ (ഏഴ്), ആന്‍റ ണി (52) കൊച്ചുപള്ളി സ്വദേശികളായ ദീപ (22),സൗമ്യ (28), . ഗോര പ്രസാദ് (32), ജ്ഞാനമ്മ (73), ബിജു (48), ലോർദോൻ ജോൺ ബ്രിട്ടോ, റജി, അടിമലത്തുറ സ്വദേശി പീറ്റർ, പള്ളം സ്വദേശി റൈസൺ (54) എന്നിവർക്കാണ് ആദ്യ ദിവസം കടിയേറ്റത്. റൈസനെന്ന യുവാവിനെ കടിച്ച് പരിക്കേൽപ്പിച്ച ശേഷം രാത്രി മുഴുവൻ നാലg കിലോമീറ്ററിനുള്ളിൽ കണ്ണിൽ കണ്ടവരെയെല്ലാം കടിച്ച് പറിച്ചു. ചാരക്കളറിലുള്ള നായയാണ് കടിച്ചതെന്ന് ആക്രമണത്തിന് ഇരയായവർ പറഞ്ഞ ലക്ഷണം വച്ചാണ് നായപിടിത്തക്കാർ നായ യെ പിടികൂടിയത്.

ഓണത്തിരക്കിലമർന്നു നാടും നഗരവും; ഇന്ന് ഉത്രാടപ്പാച്ചിൽ

തിരുവനന്തപുരം: അവസാനഘട്ട ഓണവട്ടങ്ങൾ ഒരുക്കാനുള്ള തിരക്കിൽ നാടും നഗരവും. അത്തമുദിച്ചതു മുതൽ തുടങ്ങിയ ആഘോഷങ്ങളുടെ കലാശക്കൊട്ടിന്‍റെ മണിക്കൂറുകളാണിനി. വിഭവസമൃദ്ധമായ ഓണ സദ്യയ്ക്കുള്ള സാധനങ്ങൾ വാങ്ങാനും തിരുവോണപ്പൂക്കളം ഒരുക്കാനുള്ള പൂവും വാങ്ങാനുമായുള്ള പാച്ചിലിൽ ഇന്ന് ഉത്രാടം അവസാനിക്കുന്നതോടെ നാളെ മലയാളക്കരയിൽ തിരുവോണത്തിന്‍റെ ആഘോഷത്തേരെത്തും. തിരുവോണം പുലരാൻ മണിക്കൂറുകൾ ബാക്കി നിൽക്കേ പോരായ്മകളും കുറവുകളും നികത്താനുള്ള തത്രപ്പാടിലായിരുന്ന ജനം. ഇന്നലത്തെ പകൽ മഴ മാറി നിന്നതോടെ നഗരം വിപണിയുടെ തിരക്കിലായിരുന്നു. പച്ചക്കറി, വസ്ത്ര വിപണിയായിരുന്നു ഇന്നലെ ഏറെ സജീവമായത്. ഇതിനു പുറമേ തെരുവു കച്ചവടക്കാരും നാടൽ പച്ചക്കറി ഉൾപ്പന്നങ്ങളുമായി നിരത്തുകളിലെത്തിയിരുന്നു. പുത്തൻ ഓണക്കോടി എടുക്കുന്നതിന് വസ്ത്രശാലകളിൽ സാധാരണപോലെ തിരക്കേറി. ഗൃഹോപകരണക്കങ്ങൾ, വിവിധതരം പായകൾ, കളിപ്പാട്ടങ്ങൾ, സുഗന്ധവ്യഞ്ജനങ്ങൾ, തുണിത്തരങ്ങൾ, ബാഗുകൾ, കൗതുക വസ്തുക്കൾ,തുടങ്ങിയവ കുറഞ്ഞ വിലയിൽ ലഭ്യമാക്കിയാണ് തെരുവുകച്ചവടക്കാർ ഓണവിപണി കൈയടക്കിയത്. കാൽനടയാത്രക്കാരടക്കം സാധനങ്ങൾ വാങ്ങാൻ തിരക്കുകൂട്ടുന്നതിനാൽ ചിലയിടങ്ങിൽ നീണ്ട നിരയും കാണപ്പെട്ടു. പൂ വിപണിയിലും തിരക്കേറി. ക്ലബുകളുടേയും മറ്റു സാസ്കാരിക സംഘടനകളുടെയും നേതൃത്വത്തിലുള്ള ഓണാഘോഷങ്ങളുടെ ഭാഗമായി ഏറ്റവും ചെലവേറിയതും വലുതുമായ പൂക്കളം തീർക്കുന്നത് തിരുവോണത്തിനാണ്. ഇതിനാൽ ഇന്നും പൂ വിപണിയിൽ തിരക്കേറും. ഇന്നലെ വൈകുന്നേരത്തോടെ നഗരം തിരക്കിലമർന്നു. കെഎസ്ആർടിസി ദീർഘ ദൂര ട്രിപ്പുകളിലും ഫാസ്റ്റ് പാസഞ്ചറുകളിലുമടക്കം നിൽക്കാനിടമില്ലാത്തവണ്ണം ജനബാഹുല്യമായിരുന്നു. ബസ് സ്റ്റാൻഡിലെയും പരിസരത്തെയും സ്ഥിതിയും വ്യത്യസ്തമായിരുന്നില്ല. ഓണത്തിനു മുൻപ് നാട്ടിലെത്താനുള്ള തത്രപ്പാടിൽ സ്റ്റാൻഡിലത്തെിയവരായിരുന്നു ഏറെയും. സംസ്ഥാന സർക്കാരിന്‍റെ ഓണം വാരാഘോഷത്തിന്‍റെ സംസ്ഥാനതല ഉദ്ഘാടനം ഇന്നലെ വൈകുന്നേരം മുഖ്യമന്ത്രി പിണറായി വിജയൻ നിർവഹിച്ചു. ഇതോടൊപ്പം തലസ്ഥാന നഗരത്തിൽ ഓണത്തിമിർപ്പുകൾക്കൊപ്പം കലാപൂരത്തിനും തിരിതെളിഞ്ഞു. നഗരമാകെ വർണ വിളക്കുകൾ കൂടി തെളിഞ്ഞതോടെ നഗരം ഉത്സാന്തരീക്ഷത്തിലാണ്. ഓണം വാരാഘോഷം: വേദികളിൽ ഇന്ന് നിശാഗന്ധിയിൽ: ഫ്യൂഷൻ മ്യൂസിക് "മെലോഡിയ' വൈകുന്നേരം. ഏഴിന് സൂര്യകാന്തി: ലൗലി ജനാർദ്ദനന്‍റെ ഗാനമേള വൈകുന്നേരം ഏഴിന് കനകക്കുന്ന് ഗേറ്റിൽ: പഞ്ചാരിമേളം. വൈകുന്നേരം അഞ്ചിന് സെൻട്രൽ സ്റ്റേഡിയം: നരേഷ് അയ്യരും ടീമും അവതരിപ്പിക്കുന്ന മെഗാ മ്യൂസിക്കൽ ഇവന്‍റ്. വൈകുന്നേരം ഏഴിന് ഭാരത് ഭവൻ: ശാസ്ത്രീയ സംഗീതം. വൈകുന്നേരം അഞ്ചു മുതൽ വൈലോപ്പിള്ളി സംസ്കൃതി ഭവൻ: ശാസ്ത്രീയ നൃത്തം വൈകുന്നേരം ആറു മുതൽ കാര്യവട്ടം ഗ്രീൻ ഫീൽഡ് സ്റ്റേഡിയം: രമ്യാ നന്പീശനും സംഘവും അവതരിപ്പിക്കുന്ന മെഗാ ഷോ. വൈകുന്നേരം ആറിന്.

കരകുളത്തെ അതിദാരിദ്ര്യ മുക്ത പഞ്ചായത്തായി പ്രഖ്യാപിച്ചു

നെടുമങ്ങാട്: നെടുമങ്ങാട് നിയോജക മണ്ഡലത്തിലെ ആദ്യ അതിദാരിദ്ര്യ മുക്ത പഞ്ചായത്തായി കരകുളം പഞ്ചായത്തിനെ തെരഞ്ഞെടുത്തു. മന്ത്രി ജി.ആര്‍. അനില്‍ പ്രഖ്യാപനം നടത്തി. സര്‍വേയിലൂടെ കണ്ടെത്തിയ അതിദാരിദ്രര്‍ക്ക് അടിസ്ഥാന രേഖകള്‍ ഉള്‍പ്പെടെ പാര്‍പ്പിടം, ഭക്ഷണം, മരുന്ന് എന്നിവയെല്ലാം നല്‍കിക്കൊണ്ടാണ് പദ്ധതി നടപ്പിലാക്കിയത്. പ്രഖ്യാപന ചടങ്ങില്‍ പഞ്ചായത്ത് പ്രസിഡന്‍റ് യു.ലേഖാറാണി അധ്യക്ഷത വഹിച്ചു. പഞ്ചായത്ത് വൈസ് പ്രസിഡന്‍റ് പി.സുനില്‍, വി. രാജീവ്, ഉഷാകുമാരി, വീണാരാജീവ് തുടങ്ങിയവര്‍ സംസാരിച്ചു.

ഓണാഘോഷവും സംയുക്ത സമ്മേളനവും

നെടുമങ്ങാട്: അരുവിക്കര വൈഎംസിയുടെ നേതൃത്വത്തിൽ സംഘടിപ്പിച്ച ഓണാഘോഷവും സംയുക്ത സമ്മേളനവും അഡ്വ. ജി. സ്റ്റീഫൻ എംഎൽഎ ഉദ്ഘാടനം ചെയ്തു. ജമന്തിപ്പൂക്കളുടെ വിളവെടുപ്പും 150 നിർധന കുടുംബങ്ങൾക്ക് ഓണക്കിറ്റു നൽകുന്നതിന്‍റെ വിതരണവും ഇതോടനുബന്ധിച്ചു നടന്നു. തിരുവനന്തപുരം വൈഎംസിഎ പ്രസിഡന്‍റ് അഡ്വ. ഇടിക്കുള സക്കറിയ അധ്യക്ഷത വഹിച്ചു. മുഖ്യാതിഥിയായി തിരുവനന്തപുരം റൂറൽ അഡിഷണൽ സൂപ്രണ്ട് ഓഫ് പോലീസ് ജെ.കെ. ദിനിൽ ഓണ സന്ദേശം നൽകി. അരുവിക്കര പഞ്ചായത്ത് പ്രസിഡന്‍റ് ആർ. കല കർഷകരെ ആദരിച്ചു.അത്തപ്പൂക്കളമത്സര വിജയികൾക്ക് അരുവിക്കര സർക്കിൾ ഇൻസ്പെക്ടർ മുരളി കൃഷ്ണ കാഷ് അവാർഡ് വിതരണം ചെയ്തു. നെടുമങ്ങാട് ബ്ലോക്ക് മെമ്പർ വിജയൻ നായർ, റവ. ജി സ്റ്റുവർട്ട്, സത്യാനന്ദൻ, ജെ. ശോഭന ദാസ്, ബിറ്റി വർഗീസ്, എസ്.വി. മോഹൻ, എ. ക്രിസ്തുധരൻ എന്നിവർ പങ്കെടുത്തു വൈഎംസിഎ ഡയറക്ടർ ബോർഡ് മെമ്പർ ഡോ. ആർതർ ജേക്കബ് സ്വാഗതവും ഡോ. തോമസ് ഫിലിപ്പ് നന്ദിയും പറഞ്ഞു.

പാച്ചല്ലൂർ ജലഘോഷയാത്രയും ഓണം വാരാഘോഷവും: അവലോകന യോഗം ചേർന്നു

തിരുവല്ലം: പാച്ചല്ലൂർ പൊഴിക്കരയിൽ അഞ്ചുമുതൽ ഏഴുുവരെയുള്ള തിയതികളിൽ സംഘടിപ്പിക്കുന്ന ഓണം വാരാഘോഷത്തിന്‍റെ ഭാഗമായി അവലോകന യോഗം ചേർന്നു. ടൂറിസം വകുപ്പും ജില്ലാ ടൂറിസം പ്രമോഷൻ കൗൺസിലും വെള്ളാർ വാർഡ് ജനകീയ സമിതിയും സംയുക്തമായാണ് പരിപാടികൾ സംഘടിപ്പിക്കുന്നത്. സംഘാടകസമിതി ചെയർമാനും നഗരസഭ കൗൺസിലറുമായ പനത്തുറ പി. ബൈജു അധ്യക്ഷത വഹിച്ചു. പോലീസ്, കോസ്റ്റ്ഗാഡ്, ഫയർഫോഴ്സ്, ജലഗതാഗത വകുപ്പ്, ആരോഗ്യ വകപ്പ്, നഗരസഭ അധികൃതർ തുടങ്ങിയവർ യോഗത്തിൽ പങ്കെടുത്തു. കൗൺസിലർ എസ്.എം. ബഷീർ, എ.ജെ. സുകാർണോ, തിരുവല്ലം എസ്ഐ നൗഷാദ്, കോസ്റ്റ് ഗാർഡ് എസ്ഐ സുരേഷ്, ഇറിഗേഷൻ വകുപ്പ് എഇ ഉണ്ണികൃഷ്ണൻ, ആരോഗ്യ വകുപ്പ് എച്ച്ഐ രാജ്കുമാർ, നഗരസഭ എച്ച്ഐ അനുരൂപ് എന്നിവർ പ്രസംഗിച്ചു. വിവിധ സബ് കമ്മിറ്റികളും രൂപീകരിച്ചു. ആറിനു വൈകുന്നേരം നാലിനു മന്ത്രി വി. ശിവൻകുട്ടി ഉദ്ഘാടനം ചെയ്യുന്ന ജലഘോഷയാത്രയിൽ ജനപ്രതിനിധികളും വിവിധ സാമൂഹിക-സാമുദായിക -സാംസ്കാരിക രംഗത്തെ പ്രമുഖരും പങ്കെടുക്കും. അഞ്ചുനു വൈകുന്നേരം അഞ്ചിനു തിരുവനന്തപുരം നളന്ദ അവതരിപ്പിക്കുന്ന നാടൻപാട്ടും, ആറിനു വൈകുന്നേരം നാലിനു ചെണ്ടമേളവും തുടർന്ന് തിരുവനന്തപുരം വേഴ്സ് അവതരിപ്പിക്കുന്ന ഗാനമേളയും അഞ്ചിനു മജലഘോഷയാത്രയും ഉണ്ടായിരിക്കും. ‌ ഏഴിന് വൈകുന്നേരം അഞ്ചുമുതൽ പൊഴിക്കരയിലുള്ള നിശാ വേദിയിൽ തിരുവാതിര, കൈകൊട്ടിക്കളി, സിനിമാറ്റിക് ഡാൻസ് എന്നിവ സംഘടിപ്പിച്ചിട്ടുണ്ടെന്നും സംഘാടകസമിതി ഭാരവാഹികൾ അറിയിച്ചു. കോ-ഓഡിനേറ്റർ ഡി. ജയകുമാർ പരിപാടി വിശദീകരിച്ചു. ജനറൽകൺവീനർ എസ്. ഉദയരാജ് സ്വാഗതവും പ്രോഗ്രാം കമ്മിറ്റി കൺവീനർ എസ്. പ്രശാന്തൻ നന്ദിയും പറഞ്ഞു.

ഓട്ടോയില്‍ കടത്താന്‍ ശ്രമിച്ച നാലു കിലോ കഞ്ചാവുമായി യുവതി പിടിയില്‍

വലിയതുറ: ഓണത്തിനു മുന്നോടിയായി വില്‍പ്പനയ്ക്കായി ഓട്ടോയില്‍ കടത്താന്‍ ശ്രമിച്ച നാലു കിലോ കഞ്ചാവുമായി യുവതിയെ തിരുവനന്തപുരം ഡാന്‍സാഫ് സംഘം പിടികൂടി. വലിയവേളി സ്വദേശിനി ബിന്ദു (30) ആണ് സംഘത്തിന്‍റെ പിടിയിലായത്. കഴിഞ്ഞ ദിവസം വേളി ടൂറിസ്റ്റ് വില്ലേജ് വഴി ഓട്ടോയില്‍ കഞ്ചാവ് കടത്താന്‍ ശ്രമിക്കവേയാണ് ഇവര്‍ പിടിയിലായത്. വെട്ടുകാട് ബാലനഗറില്‍ നിന്നും വലിയ വേളിയിലേയ്ക്ക് പോകാനെന്നു പറഞ്ഞാണ് ഇവര്‍ ഓട്ടോയില്‍ കയറിയതെന്ന് ഓട്ടോ ഡ്രൈവര്‍ പോലീസ് അധികൃതർക്കു മൊഴി നൽകിയിട്ടു ണ്ട്. തിരുവനന്തപുരം സിറ്റി ഡാന്‍സാഫ് സംഘത്തിനു ലഭിച്ച രഹസ്യ വിവരത്തിന്‍റെ അടിസ്ഥാനത്തിലാണ് വാഹന പരിശോധന നടത്തിയതും കഞ്ചാവ് പിടികൂടിയതും. ബിന്ദുവിന്‍റെ ഭര്‍ത്താവ് കാര്‍ലോസ് മുമ്പ് കഞ്ചാവു കേസുകളില്‍ പ്രതിയാണ്. കഞ്ചാവ് ലഭിച്ചതിന്‍റെ ഉറവിടത്തെക്കുറിച്ച് വിശദമായി ചോദ്യം ചെയ്ത ശേഷം ബിന്ദുവിനെ കോടതിയില്‍ ഹാജരാക്കുമെന്നു ബന്ധപ്പെട്ട അധികൃതര്‍ വ്യക്തമാക്കി. ഓണത്തിനു മുന്നോടിയായി കടലോര മേഖലകളില്‍ കഞ്ചാവും മദ്യവും ലഹരിമരുന്നു കടത്തും വില്‍പ്പനയും ഗണ്യമായി നടക്കുന്നതായി പ്രദേശവാസികള്‍ പറയുന്നു. വെട്ടുകാട്, വലിയതുറ, ശംഖുംമുഖം, കൊ ച്ചുവേളി, വലിയവേളി തുടങ്ങിയ സ്ഥലങ്ങളില്‍ പോലീസ് പടോളിംഗ് ശക്തമാക്കണമെന്നാണ് സമീപവാസികള്‍ ആവശ്യപ്പെടുന്നത്. ശംഖുംമുഖം ബീച്ചിലും പരിസരങ്ങളിലും ലഹരി മരുന്നു മാഫിയാകള്‍ തമ്പടിച്ചിരിക്കുന്നതായും സൂചനകള്‍ ലഭിക്കുന്നുണ്ട്.

രാഹുൽഗാന്ധിക്ക് ഐക്യദാർഢ്യം പ്രഖ്യാപിച്ച് കോൺഗ്രസ് പ്രകടനം നടത്തി

വെള്ളറട: രാഹുൽ ഗാന്ധി നയിക്കുന്ന വോട്ടര്‍ അധികാര്‍ യാത്രക്ക് ഐക്യദാർഢ്യം പ്രഖ്യാപിച്ച് കോൺഗ്രസ് മാരായമുട്ടം മണ്ഡലം കമ്മിറ്റിയുടെ മാരായമുട്ടം ഹൈസ്‌കൂള്‍ ജംഗ്ഷനില്‍നിന്നും ആരംഭിച്ച് മാരായമുട്ടം ജംഗ്ഷന്‍ വരെ പ്രകടനം നടത്തി. മണ്ഡലം പ്രസിഡന്‍റ് ബിനില്‍ മണലുവിളയുടെ നേതൃത്വത്തില്‍ നടത്തിയ പ്രകടനം മാരായമുട്ടത്ത് കര്‍ഷക കോണ്‍ഗ്രസ് സംസ്ഥാന വൈസ് പ്രസിഡന്‍റ് എം.എസ്. അനില്‍ ഉദ്ഘാടനം ചെയ്തു. ബ്ലോക്ക് നേതാക്കളായായ അഡ്വ. ഷിബു ശ്രീധര്‍, മണ്ണൂര്‍ ശ്രീകുമാര്‍, വടകര ജയന്‍, അരുവിക്കര മണികണ്ഠന്‍, തത്തിയൂര്‍ സുരേന്ദ്രന്‍, മലക്കുളങ്ങര ജോണി, ശ്രീരാഗം ശ്രീകുമാര്‍, അനന്തന്‍ മാരായമുട്ടം, കാക്കണം ജീബു, ഇടഞ്ഞി സുരേഷ് തൃപ്പവൂര്‍ അഖില്‍, കോട്ടയ്ക്കല്‍ മധു, കാക്കണം ബാബു, റെജി കരിക്കത്തുക്കുളം, കോട്ടയ്ക്കല്‍ സന്തോഷ്, ചുള്ളിയൂര്‍ അനീഷ്, വടകര രാജീവ്, തുളസി ധരന്‍ ആശാരി, വടകര രാജേഷ്, ചുള്ളിയൂര്‍ അഭിജിത്ത്, തോപ്പില്‍ അജീഷ്, കാക്കണം രതീഷ്, സുരേഷ്, ജെസ്റ്റിന്‍ എന്നിവര്‍ സംസാരിച്ചു.

ആക്‌സില്‍ പൊട്ടിയ കാര്‍ സ്കൂട്ടറും ഓട്ടോറിക്ഷയും ഇടിച്ചുതെറിപ്പിച്ചു

വെള്ളറട: ആക്‌സില്‍ പൊട്ടിയതിനെത്തുടർന്നു നിയന്ത്രണം നഷ്ടപ്പെട്ട കാർ രണ്ടു വാഹനങ്ങളെ തകര്‍ത്തു. ചെറിയ കൊല്ലയ്ക്കും ഉണ്ടന്‍കോടിനും സമീപത്തുവച്ചു നിയന്ത്രണം നഷ്ടപ്പെട്ട കാറാണ് ഓട്ടോറിക്ഷയും സ്കൂട്ടറും ഇ‌ടിച്ചു തെറിപ്പിച്ചശേഷം നിന്നത്. ചെറിയ കൊല്ലയില്‍നിന്നും കാരക്കോണത്തേക്കു പോവുകയായിരുന്ന കെഎല്‍. 19 എഫ് 6336 നമ്പര്‍ കാറാണ് അപകടം സൃഷ്ടിച്ചത്. ആദ്യം കാരകോണത്തുനിന്നു വെള്ളറടയിലേക്ക് വരികയായിരുന്ന പൂജപ്പുര സ്വദേശി രാജേഷ് ഓടിച്ചിരുന്ന ഓട്ടോയെ ഇടിച്ചു മറിച്ചശേഷം റോഡിന്‍റെ വലതുവശത്തുകൂടി ഒതുങ്ങി പോവുകയായിരുന്ന സ്‌കൂട്ടര്‍ യാത്രികന്‍ സുരേഷിനെയും ഇടിച്ചു വീഴ്ത്തി. ഗുരുതരമായി പരിക്കേറ്റ സുരേഷിനെ ഉടന്‍തന്നെ കാരക്കോണം മെഡിക്കല്‍ കോളജ് ആശുപത്രിയിൽ പ്രവേശിപ്പിച്ചു. കാര്‍ വേഗത കുറവായിരുന്നുവെങ്കിലും വലതുവശത്തെ ആക്‌സില്‍ പൊട്ടിയതാണ് അപകടത്തിനു കാരണമായത്. നടുറോഡില്‍ നടന്ന അപകടത്തെ തുടര്‍ന്ന് വെള്ളറട കാരക്കോണം റോഡിൽ വാഹന ഗതാഗതം തടസടപ്പെട്ടു. വെള്ളറട എസ്ഐ പ്രമോദിന്‍റെ നേതൃത്വത്തിലുള്ള പോലീസ് സംഘം മേല്‍നടപടികള്‍ സ്വീകരിച്ചശേഷം അപകടത്തില്‍പെട്ട വാഹനങ്ങളെ റോഡുവക്കിലേക്കു മാറ്റി ഗതാഗതം പുനഃസ്ഥാപിച്ചു.

വാർഷികാഘോഷവും ഓപ്പോൾ പദ്ധതി ഉദ്ഘാടനവും

പൂവാർ: പൂവാർ റോട്ടറി ക്ലബിന്‍റെ അഞ്ചാമത് വാർഷികവും ഓണാഘോഷവും ഓപ്പോൾ പദ്ധതി ഉദ്ഘാടനവും മുൻ ചീഫ് സെക്രട്ടറിയും കവിയും സാഹിത്യകാരനുമായ വി. ജോയ് നിർവഹിച്ചു. നെയ്യാറ്റിൻകര ഗ്രേസ് ഗാർഡനിൽ അഡ്വ. എ അജികുമാറിന്‍റെ അധ്യക്ഷത വഹിച്ചു. റവന്യൂ ഡിസ്ട്രിക്ട് ഡയറക്ടർ ഷാജ് ശ്രീധരൻ, ഡിസ്ട്രിക്ട് ഓപ്പോൾ പ്രോജക്ട് ചെയർമാൻ ജോഷ് ജോസഫ്, അസിസ്റ്റന്‍റ് ഗവർണർ ജി.ആർ. വിജീഷ് കുമാർ, ചാർട്ടർ പ്രസിഡന്‍റ് രാജൻ വി. പൊഴിയൂർ, സെക്രട്ടറി ഭക്തവത്സലൻ, ട്രഷറർ രാജു സെൽവരാജ്, ഓപ്പോൾ പദ്ധതി ചെയർപേഴ്സൺ അനിത ഡിനി, വൈസ് പ്രസിഡന്‍റ് സി.പ്രഭാകരൻ, ജോയിന്‍റ് സെക്രട്ടറി കുമാർ മണിയൻ, എ. അനിൽകുമാർ, അയിര സുനിൽകുമാർ, സിദ്ധാർഥ കുമാർ, ഡോ. ഹരിത ജെ. ആർ, എൻ. ദിവാകരൻ, പെരിങ്ങമ്മല എം. അജേഷ് എന്നിവർ സംസാരിച്ചു. ചടങ്ങിൽ പുതിയ പ്രസിഡന്‍റായി ഡിനി ദർബലിനെ തെരഞ്ഞെടുത്തു. ഓപ്പോൾ പദ്ധതിയുടെ ഭാഗമായി നിർധന കുടുംബാംഗവും വനിതാ ഡ്രൈവറുമായ വി. ബിനിത ബാബുവിന് മിനി ടിപ്പർ ലോറി കൈമാറി. നിർധനർക്കുള്ള വീട് മെയിന്‍റനൻസ് ഫണ്ട്, പത്തോളം കാൻസർ രോഗികൾക്ക് ചികിത്സാ ധനസഹായം, കെഎസ്ആർടിസി പൂവാർ ഡിപ്പോയ്ക്ക് വാട്ടർപ്യൂരിഫയർ, വിദ്യാർഥിക്ക് ലാപ്പ്ടോപ്പ് എന്നിവയും കൈമാറി.

കല്ലിയൂർ വൈസ് പ്രസിഡന്‍റ് തെരഞ്ഞെടുപ്പ്

നേമം: കല്ലിയൂര്‍ പഞ്ചായത്തില്‍ വൈസ് പ്രസിഡന്‍റ് തെരഞ്ഞെടുപ്പു ഇന്നു നടക്കും. വൈസ് പ്രസിഡന്‍റായിരുന്ന എല്‍. ശാന്തിമതിയെ തെരഞ്ഞെടുപ്പ് കമ്മീഷന്‍ അയോഗ്യയാക്കിയാക്കിയതിനെ തുടര്‍ന്നാണ് തെരഞ്ഞെടുപ്പ്. ബിജെപി ഭരണസമിതിക്കെതിരേ സിപിഎം കൊണ്ടുവന്ന അവിശ്വാസ പ്രമേയത്തിന് അനുകൂലമായി വോട്ടു ചെയ്തതിനെ തുടര്‍ന്നാണ് കോണ്‍ഗ്രസംഗം എല്‍. ശാന്തിമതിയെ അയോഗ്യയാക്കിയത്. അവിശ്വാസം വിജയിച്ചതോടെ സിപിഎമ്മിനു ഭരണം ലഭിച്ചു. ബിജെപി ഭരണ സമിതിക്കെതിരേ സിപിഎം കൊണ്ടുവന്ന അവിശ്വാസ പ്രമേയത്തിന് അനുകൂലമായി ബിജെപിയിലെ പൂങ്കുളം വാര്‍ഡ് അംഗം സുധര്‍മയും കൂറുമാറി വോട്ടു ചെയ്തിരുന്നെങ്കിലും സുധര്‍മ്മയ്‌ക്കെതിരായ കേസ് തള്ളുകയായിരുന്നു. 21 അംഗങ്ങളുള്ള പഞ്ചായത്തില്‍ പതിനൊന്നു പേരുടെ പിന്തുണയാണ് സിപിഎമ്മിനു ലഭിച്ചത്. കോണ്‍ഗ്രസിന്‍റെ ശേഷിക്കുന്ന ഏക അംഗം വിട്ടുനില്‍ക്കാനാണ് സാധ്യത. ഭരണപക്ഷമായ എല്‍ഡിഎഫിനു പത്തും ബിജെപിക്ക് ഒന്‍പതും കോണ്‍ഗ്രസിന് ഒന്നുമാണ് നിലവിലെ അംഗബലം.

നെടുമങ്ങാ‌ട് ഓണം വാരാഘോഷം : ആവേശംതീർത്ത് വിളംബര ഘോഷയാത്ര

നെടുമങ്ങാട്: ഓണാഘോഷ പരിപാടികളുടെ പ്രചരണാര്‍ഥം സംസ്ഥാന സര്‍ക്കാരും സംസ്ഥാന ടൂറിസം വകുപ്പും നെടുമങ്ങാട് നഗരസഭയും സംയുക്തമായി സംഘടിപ്പിച്ച ഓണം വിളംബര ഘോഷയാത്ര കാണികളിൽ ആവേശമുണർത്തി. മന്ത്രി ജി.ആര്‍. അനില്‍ ഘോഷയാത്രയ്ക്ക് നേതൃത്വം നല്‍കി. റോളര്‍ സ്‌കേറ്റിംഗിന്‍റെ ചടുലതയില്‍ ആരംഭിച്ച ഘോഷയാത്രക്ക് ഭീമാകാരമായ ബൊമ്മ കളിയും പൂക്കാവടിയും പുലിക്കളിയും തെയ്യവും കഥകളി ഉള്‍പ്പെടെയുള്ള വിവിധ കലാരൂപങ്ങളും അഴകു പകർന്നു. നാട്ടിന്‍പുറത്തെ ഐതിഹ്യ കഥകളിലെ രൂപങ്ങളും, മാവേലിയും വാമനനും ഘോഷയാത്ര യുടെ ഭാഗമായി. കരാട്ടെ, കളരി അടക്കമുള്ള ആയോധന കലകള്‍ കാണികളില്‍ ആവേശം സൃഷ്ടിച്ചപ്പോള്‍ ബാന്‍ഡ്, ചെണ്ട, ശിങ്കാരി മേളങ്ങള്‍ യാത്രയ്ക്ക് താളം പകർന്നു. തിരുവാതിര, മോഹിനിയാട്ടം, നാടോടി നൃത്തം ഉള്‍പ്പടെയുള്ള നൃത്ത രൂപങ്ങളോടൊപ്പം കോല്‍ക്കളിയും, ബ്രേക്ക് ഡാന്‍സും രഥയാത്രയും ഘോഷയാത്രയിൽ അണിനിരന്നു. ആന വേഷത്തിൽ അരിക്കൊമ്പനായി കലാകാരന്മാർ എത്തിയ കാഴ്ച കാണികളില്‍ നവ്യാനുഭവം പകർന്നു. നെടുമങ്ങാട് നഗരസഭയുടെ 39 വാര്‍ഡുകളും വിളംബര ഘോഷയാത്രയില്‍ അണിചേര്‍ന്നു. ജനപ്രതിനിധികള്‍, റസിഡന്‍സ് അസോസിയേഷനുകള്‍, വിവിധ വിദ്യാലയങ്ങള്‍, സര്‍ക്കാര്‍ സ്ഥാപനങ്ങള്‍, കുടുംബശ്രീ അംഗങ്ങള്‍, ഹരിതകര്‍മ സേനാ പ്രവര്‍ത്തകര്‍, തൊഴിലുറപ്പ് തൊഴിലാളികള്‍ എന്നിവര്‍ ജാഥയുടെ ഭാഗമായി. നഗരസഭയുടെ മുന്നില്‍നിന്ന് ആരംഭിച്ച ഘോഷയാത്ര കല്ലിംഗല്‍ ഗ്രൗണ്ടില്‍ സമാപിച്ചു.

"സർക്കാർ തീരുമാനം പിൻവലിയ്ക്കണം'

വെഞ്ഞാറമൂട്: 20 വർഷത്തിൽ കൂടുതൽ പഴക്കമുള്ള സ്വകാര്യ വാഹനങ്ങളുടെ ഫിറ്റ്നസ് പുതുക്കുന്നതിനുള്ള രജിസ്ട്രേഷൻ ഫീസ് പത്തിരട്ടിയായി വർധിപ്പിച്ചത് പിൻവലിക്കണമെന്ന് കേരള സ്റ്റേറ്റ് യൂസ്ഡ് വെഹിക്കിൾ ഡീലേഴ്‌സ് ആൻഡ് ബ്രോക്കേഴ്സ് അസോസിയേഷൻ തിരുവനന്തപുരം ജില്ലാ സെക്രട്ടേറിയറ്റ് കമ്മിറ്റി സർക്കാരിനോട് ആവശ്യപ്പെട്ടു. സാധാരണക്കാരുടെ ചെറുകിട വാഹനങ്ങൾക്കു ഫീസ് വർധനവിലൂടെ ജനങ്ങൾക്ക് അധിക സാമ്പത്തിക ബാധ്യത സൃഷ്ടിക്കുന്നു. ആയതിനാൽ സർക്കാരിന്‍റെ നടപടി പുന പരിശോധിച്ചില്ലെങ്കിൽ ശക്തമായ പ്രതിഷേധവും നിയമനടപടികളും സ്വീകരിക്കാനാണു കമ്മിറ്റി തീരുമാനിച്ചിട്ടുള്ളതാതെന്നും ഭാരവാഹികൾ പറഞ്ഞു. സംസ്ഥാന ജോയിന്‍റ് സെക്രട്ടറി എച്ച്. നാസിം, ജില്ലാ പ്രസിഡന്‍റ് ഉദയകുമാർ, ജില്ലാ ജനറൽ സെക്രട്ടറി ഷിഹാസ് വെഞ്ഞാറമൂട് ജില്ലാ ട്രഷറർ അയ്യൂബ് റാവുത്തർ എന്നിവർ യോഗത്തിൽ പങ്കെടുത്തു.

ഓണക്കാല ഉല്ലാസ-തീർഥാടന യാത്രകളുമായി വെഞ്ഞാറമൂട് കെഎസ്ആർടിസി

വെഞ്ഞാറമൂട്: ഓണക്കാല ഉല്ലാസ - തീർത്ഥാടന യാത്രകളുമായി വെഞ്ഞാറമൂട് കെഎസ്ആർടിസി. 435 ഓളം ട്രിപ്പുകളാണു ചുരുങ്ങിയ കാലയളവിൽ നടത്തിയത്. ഇത്തവണ ഓണകാലത്ത് ഒട്ടനവധി ട്രിപ്പുകളാണ് സാധാരണക്കാരെ പരിഗണിച്ചു ക്രമീകരിച്ചിരിയ്ക്കുന്നത്. 11, 18 തീയതികളിൽ ആറന്മുള വള്ളസദ്യ, ആറിനു വയനാട്, തേക്കടി, വാഗമൺ, പൊന്മുടി യാത്രകളും ഏഴിന് ഇലവീഴാപ്പൂഞ്ചിറ, രാമയ്‌ക്കൽമേട്, സൂര്യകാന്തിപാടം, കുംഭാവുരുട്ടി യാത്രകളും പത്തിന് ഓക്സിവാലി - സൈലന്‍റ് വാലി യാത്രകളും 13നു കെജെ റോയൽസ് ഹൗസ് ബോട്ട് യാത്ര യാത്രയും ഉണ്ടായിരിക്കും. 14ന് തെന്മലയിലേക്കാണ് യാത്ര സംഘടിപ്പിക്കുന്നത്.

ചാല ക്ഷേത്രത്തിലെ കാണിക്കവഞ്ചി കവര്‍ച്ച; മോഷ്ടാവിനെപ്പറ്റി സൂചനയില്ല

പേരൂര്‍ക്കട: ചാല ക്ഷേത്രത്തിലെ കാണിക്കവഞ്ചി കവര്‍ച്ചയുമായി ബന്ധപ്പെട്ട് മോഷ്ടാവിനെ ഇനിയും പിടികൂടാനായില്ല. ചാല മുത്തുമാരിയമ്മന്‍ ക്ഷേത്രത്തിലെ കാണിക്കവഞ്ചിയാണു കഴിഞ്ഞ ഞായറാഴ്ച മോഷ്ടാവ് കവര്‍ന്നത്. ക്ഷേത്രകോമ്പൗണ്ടിലുണ്ടായിരുന്ന കാണിക്കവഞ്ചിയാണ് മോഷ്ടാവ് എടുത്തുകൊണ്ടുപോയത്. വഞ്ചിയില്‍ 3000-ഓളം രൂപയാണ് ഉണ്ടായിരുന്നതെന്നു ക്ഷേത്രഭാരവാഹികള്‍ പോലീസില്‍ നല്‍കിയ പരാതിയില്‍ പറഞ്ഞിരുന്നു. സിസിടിവി ദൃശ്യങ്ങള്‍ പരിശോധിച്ചപ്പോള്‍ മോഷ്ടാവ് ക്ഷേത്രത്തിനു സമീപത്തേക്ക് നടന്നുവരുന്ന ദൃശ്യം മാത്രമാണ് ലഭിച്ചത്. പരിശോധനയില്‍ ഇയാള്‍ അന്യസംസ്ഥാനക്കാരനാണെന്നും പോലീസ് സ്റ്റേഷന്‍ പരിധിയിലെ മോഷ്ടാക്കളുടെ ലിസ്റ്റില്‍ പെടുന്നയാള്‍ അല്ലെന്നുമാണ് ഫോര്‍ട്ട് പോലീസ് പറയുന്നത്. മോഷ്ടാവിനെ കണ്ടെത്താനുള്ള അന്വേഷണം പോലീസ് ഊര്‍ജിമാക്കിയിരിക്കുകയാണ്.

ബോധ് രാജ് നേപ്പാളിലേക്ക് മടങ്ങുന്നു; സിക്ക് ചാരിറ്റി കേന്ദ്രത്തിന്‍റെ കൈത്താങ്ങിൽ

തിരുവനന്തപുരം: ബന്ധുക്കളോട് പിണങ്ങി നാടുവിട്ട ബോധ് രാജ് ഇന്നു ബന്ധുക്കൾക്കൊപ്പം കേരളത്തിൽ നിന്നു നേപ്പാളിലേക്ക് മടങ്ങും. തിരിച്ചു പോകാൻ മാർഗമില്ലാതെ പ്രതിസന്ധിയിലായ ഇദ്ദേഹത്തിനു സഹായമായതു വട്ടപ്പാറ സിക്ക് ചാരിറ്റി കേന്ദ്രത്തിന്‍റെ ഇടപെടലാണ്. ഇക്കഴിഞ്ഞ ജൂണിലാണ് നേപ്പാൾ സ്വദേശിയായ ബോധ് രാജ് ഭാര്യയോടും മക്കളോടും പിണങ്ങി നാടുവിട്ടത്. ജോലി തേടിയെത്തിയത് തിരുവനന്തപുരത്ത്. എന്നാൽ ജോലി അന്വേഷിച്ചു നടക്കുന്നതിനിടയിൽ അദ്ദേഹത്തിന്‍റെ പേഴ്സ് നഷ്ടപ്പെട്ടു. ഐഡി കാർഡടക്കമുള്ള രേഖകൾ അതിലായിരുന്നു. ഐഡി കാർഡില്ലാത്തതിനാൽ ജോലിക്കു കയറാനായില്ല. വീട്ടിലേക്കു തിരിച്ചു പോകും കഴിഞ്ഞില്ല. ഇതോടെ കഴുത്തിൽ മുറിവേൽപ്പിച്ച് ആത്മഹത്യയ്ക്കു ശ്രമിച്ച ഇദ്ദേഹത്തെ നാട്ടുകാർ ചേർന്നു മെഡിക്കൽ കോളജ് ആശുപത്രിയിലെത്തിച്ചു. തുടർന്നു സുഖം പ്രാപിച്ച ബോധ് രാജിനെ ജനറൽ ആശുപത്രിയിലേക്ക് മാറ്റി. ഇവിടെ വച്ചു പരിചരിച്ച നഴ്സുമാരോട് നാട്ടിൽ പോകണമെന്നു പറഞ്ഞു. തുടർന്നു ജനറൽ ഹോസ്പിറ്റലിലെ സൈക്യാട്രിക് സോഷ്യൽ വർക്കർ സന്ധ്യ സോണിയുടെ ഇടപെടലിനെ തുടർന്ന് ഇദ്ദേഹത്തെ സിക്ക് ചാരിറ്റി കേന്ദ്രത്തിൽ പ്രവേശിപ്പിക്കുകയായിരുന്നു. ഇതിന്‍റെ പ്രവർത്തകർ നേപ്പാളിലെ ഇയാളുടെ ബന്ധുക്കളുമായി ബന്ധപ്പെടുകയും കഴിഞ്ഞ ദിവസം അവർ തലസ്ഥാനത്ത് എത്തിച്ചേരുകയും ചെയ്തു. നിയമപരമായി അദ്ദേഹത്തെ ബന്ധുക്കൾക്കു കൈമാറുകയും ചെയ്തു. ഇതോടെ ബോധ് രാജിനും ആശ്വാസമായി.

തൊളിക്കോട് പഞ്ചായത്തിൽ ഓണക്കിറ്റിന് അമിതവില ഈടാക്കിയെന്ന് ആരോപണം

വിതുര: ഓണം വിപണന മേളയുടെ ഭാഗമായി തൊളിക്കോട് പഞ്ചായത്ത് സിഡിഎസ് കുടുംബശ്രീയുടെ നേതൃത്വത്തിൽ വിതരണം ചെയ്ത ഓണക്കിറ്റിന് അമിത വില ഈടാക്കിയെന്ന് ആരോപണം. കുടുംബശ്രീ ജില്ലാ മിഷന്‍റെ നിർദേശാനുസരണം സംരംഭകരെ പ്രോത്സാഹിപ്പിക്കുകയെന്ന ലക്ഷ്യത്തോടെ പ്രാദേശികമായി ഉത്പാദിപ്പിച്ച പലചരക്ക് വിഭവങ്ങൾ ഉൾപ്പെടെ ഉൾപ്പെടുത്തി 750 രൂപയ്ക്കാണ് കിറ്റ് വിതരണം ചെയ്തു തുടങ്ങിയത്. സിഡിഎസിനു കീഴിലെ വിവിധ എഡിഎസുകളുടെ പരിധിയിലെ കുടുംബശ്രീ യൂണിറ്റുകൾ നിർബന്ധമായും ഒരു കിറ്റെങ്കിലും വാങ്ങണമെന്നായിരുന്നു നിബന്ധന. പഞ്ചായത്തിൽ ആകെ 382 യൂണിറ്റുകളാണ് ഉള്ളത്. കിറ്റ് കൈയിൽ കിട്ടിയവർ കടയിൽ നിന്നും വാങ്ങുന്നതിനേക്കാൾ കൂടുതൽ ലാഭം ഉണ്ടാകുമെന്ന് കരുതി. എന്നാൽ കിറ്റിലെ സാധനങ്ങൾ പരിശോധിച്ചവർ ഞെട്ടി. 750 രൂപയുടെ കിറ്റിൽ വിപണി വില കണക്കാക്കിയാൽ 600 താഴെ രൂപയുടെ സാധനങ്ങൾ മാത്രമേയുള്ളൂ. അരി ഉൾപ്പെടെ 18 പല ചരക്ക് സാധനങ്ങളാണ് ഉണ്ടായി രുന്നത്. 19-ാമത്തെ ഇനമായി കിറ്റും ഉൾപ്പെടുത്തി. ഇതിന് 40 രൂപയാണ് ഈടാക്കിയത്. കിറ്റ് കൈയിൽ ക്കിട്ടിയ പലരും തിരിച്ച് ഏൽപ്പിച്ചതോടെയാണു സംഭവം വിവാദമായത്. പിന്നാലെ 750 രൂപയുടെ കിറ്റിന്‍റെ വില സിഡിഎസ് അംഗങ്ങൾ യോഗം ചേർന്ന് 650 ആയി കുറച്ചു. എങ്കിലും ലാഭമില്ലെന്നാണ് പരാതി. ഓണക്കിറ്റ് വിതരണത്തിനു പിന്നിലെ അഴിമതി പുറത്തു കൊണ്ടുവരണമെന്നും വിശദമായ അന്വേഷണം നടത്തണമെന്നും പഞ്ചായത്ത് അംഗവും മഹിളാ കോൺഗ്രസ് സംസ്ഥാന സെക്രട്ടറിയുമായ ഷെമി ഷംനാദ് ആവശ്യപ്പെട്ടു. ഓണക്കിറ്റിലെ അഴിമതി ചൂണ്ടിക്കാട്ടി കുടുംബശ്രീ ജില്ലാ മിഷനു തുരുത്തി എഡിഎസ് അംഗം സജീന ഷാജഹാൻ പരാതിയും നൽകിയിട്ടുണ്ട്. ഓണക്കിറ്റിലെ വിഭവങ്ങളുടെ വില നിശ്ചയിച്ചത് സംരംഭകരാണെന്നും ഇക്കാര്യത്തിൽ സിഡിഎസ് ഇടപെട്ടിട്ടില്ലെന്നും സിഡിഎസ് ചെയർപെഴ്സൺ ഷംന നവാസ് പറഞ്ഞു. വില കൂടുതലാണെന്ന് പരാതി വന്നതോടെ ഉടൻ തന്നെ സിഡിഎസ് നടപടി എടുത്ത് വില കുറച്ചു. മൊത്ത വ്യാപാര വില ഉയർത്തിക്കാട്ടി ഓണക്കിറ്റിന് അമിതി വിലയാണെന്ന തരത്തിൽ ചിലർ പ്രചാരണം നടത്തുന്നുണ്ടെന്നും അവർ ആരോപിച്ചു.

നെയ്യാറ്റിൻകര മേലാരിയോട് വിശുദ്ധ മദര്‍ തെരേസാ തീര്‍ഥാടന തിരുനാളിന് ഏഴിനു തുടക്കം

നെയ്യാറ്റിന്‍കര: മദര്‍ തെരേസയുടെ നാമഥേയത്തിലെ ആദ്യ ദേവാലയമായ നെയ്യാറ്റിന്‍കര രൂപതയിലെ മേലാരിയോട് വിശുദ്ധ മദര്‍ തെരേസാ തീര്‍ഥാടന തിരുനാളിന് ഏഴിനു തുക്കമാവും. വൈകുന്നേരം 6.30ന് ഇടവക വികാരി ഫാ. കെ.പി. ജോണ്‍ കൊടിയേറ്റുകര്‍മം നിർവഹിക്കും. എട്ടിനു മാതാവിന്‍റെ ജനന തിരുനാള്‍ ദിനത്തില്‍ രാവിലെ ഒന്പതു മുതല്‍ ലീജിയന്‍ ഓഫ് മേരി സംഘടിപ്പിക്കുന്ന അഖണ്ഡ ജപമാല, വൈകുന്നേരം ദിവ്യബലിയെ തുടര്‍ന്ന് മാതാവിന്‍റെ തിരുസ്വരൂപം വഹിച്ച് ആഘോഷമായ തിരുസ്വരൂപ പ്രദക്ഷിണം എന്നിവയുണ്ടാകും. 13 ന് വൈകുന്നേരം ദിവ്യബലിയെ തുടര്‍ന്ന് ആഘോഷമായ ചപ്രദക്ഷിണം. 14ന് ദിവ്യബലിയെ തുടര്‍ന്ന് ആഘോഷമായ ദിവ്യകാരുണ്യ പ്രദക്ഷിണം. നെയ്യാറ്റിന്‍കര രൂപതയിലെ വിവിധ വൈദികര്‍ തിരുകര്‍മ്മങ്ങളില്‍ മുഖ്യ കാര്‍മികത്വം വഹിക്കും. തിരുനാള്‍ ദിനങ്ങളില്‍ വൈകുന്നേരം അഞ്ചു മുതല്‍ ബൈബിള്‍ പാരായണം, ജപമാല, ലിറ്റിനി, നൊവേന ദിവ്യബലി എന്നിവയുണ്ടാവും. വിശുദ്ധ മദര്‍ തെരേസയുടെ തിരുശേഷിപ്പു വണങ്ങി പ്രാര്‍ഥിക്കാനുളള പ്രത്യേക ക്രമീകരണം പളളിയില്‍ ഒരുക്കിയിട്ടുണ്ടെന്ന് വികാരി അറിയിച്ചു.

പുല്ലുവിള മേഖലയിൽ തെരുവുനായ ആക്രമണം: 15 പേർക്കു കടിയേറ്റു

പൂവാർ: തീരദേശത്തെ പേടിയുടെ മുൾമുനയിൽ നിർത്തി രാത്രിയിൽ തെരുവു നായയുടെ തേർവാഴ്ച. ഏഴു വയസുകാരി ഉൾപ്പെടെ പതിനഞ്ചോളം പേരെ കടിച്ച് പരിക്കേൽപ്പിച്ചു. നിരവധി പേർ കടിയേൽക്കാതെ രക്ഷപ്പെട്ടതു തലനാരിഴയ്ക്ക്. പലരുടെയും പരിക്ക് ഗുരുതരമെന്ന് ആശുപത്രി അധികൃതർ അറിയിച്ചു. പുല്ലുവിള സ്വദേശികളായ മിഥുൻ (16), പനിയമ്മ (64), സുവർണ്ണ (ഏഴ്), ആന്‍റണി (52), കൊച്ചുപള്ളി സ്വദേശികളായ ദീപ (22), സൗമ്യ (28), ഗോര പ്രസാദ് (32), ജ്ഞാനമ്മ (73), ബിജു (48), ലോർദോൻ ജോൺ ബ്രിട്ടോ, റജി, അടിമലത്തുറ സ്വദേശി പീറ്റർ, പള്ളം സ്വദേശി റൈസൺ (54) എന്നിവർക്കാണ് കടിയേറ്റത്. വൈകുന്നേരം ആറു മണി മുതൽ രാത്രി ഒൻപതര വരെ കടിയേറ്റവർ പുല്ലുവിള പ്രാഥമികാരോഗ്യ കേന്ദ്രത്തിൽ ചികിത്സക്കായി എത്തി. ഇവരെയെല്ലാം കൂടുതൽ ചികിത്സക്കായി തിരുവനന്തപുരം ജനറൽ ആശുപത്രിയിലേക്ക് മാറ്റി. വൈകുന്നേരം ആറോടെ പള്ളം മേഖലയിലാണ് തെരുവുനായ ആദ്യമെത്തിയത്. റൈസനെ കടിച്ചു പരിക്കേൽപ്പിച്ച ശേഷം നാലു കിലോമീറ്ററിനുള്ളിൽ കണ്ണിൽ കണ്ടവരെയെല്ലാം തെരുവുനായ കടിച്ചുപറിച്ചു. ആൾക്കാരുടെ കാലിലും മുതികിലും പുറകിലും വയറിലുമെല്ലാമാണ് കടിയേറ്റത്. പുറത്തിറങ്ങി നടക്കുന്ന കൂടുതൽ പേരെ ഇനിയും കടിക്കാൻ സാധ്യതയുണ്ടെന്നും അധികൃതർ പറയുന്നു. മൂന്നരമണിക്കൂറുകൊണ്ട് ഇത്രയും പേരെ കടിച്ച നായ നിരവധി തെരുവുനായകളെയും ആക്രമിച്ചതായി നാട്ടുകാർ പറയുന്നു. ‌ ചാരക്കളറിലുള്ള നായയാണ് കടിച്ചതെന്ന് ആക്രമണത്തിനിറയായവർ പറയുന്നു. വിവരം ഡിഎംഒ ഉൾപ്പെടെയുള്ള അറിയിച്ചതായി പുല്ലുവിള മെഡിക്കൽ ഓഫീസർ മിനി പറഞ്ഞു.

കുറ്റിച്ചലിൽ മകന്‍റെ മർദനമേറ്റ് അച്ഛൻ മരിച്ചു

സംഭവം കുടുംബ വഴക്ക് പരിഹരിക്കാനെത്തിയപ്പോൾ കുറ്റിച്ചൽ: കുടുംബ വഴക്കു പരിഹരിക്കാനെത്തിയ അച്ഛൻ മകന്‍റെ മർദനമേറ്റു മരിച്ചു. കുറ്റിച്ചൽ ചപ്പാത്ത് വഞ്ചിക്കുഴിയിലാണ് സംഭവം. വഞ്ചിക്കുഴി മാർത്തോമാ പള്ളിക്കു സമീപം താമസിക്കുന്ന രവീന്ദ്രനാണു മകന്‍റെ മർദനമേറ്റ് കൊല്ലപ്പെട്ടത്. സംഭവത്തിൽ മകൻ നിഷാദ് നെയ്യാർ ഡാം പോലീസ് അറസ്റ്റു ചെയ്തു. കോടതിയിൽ ഹാജരാകിയ നിഷാദിനെ റിമാൻഡു ചെയ്തു. കുടുംബവഴക്കാണ് കൊലപാതകത്തിലേക്ക് കലാശിച്ചതെന്നാണ് പോലീസ് പറയുന്നത്. തിങ്കളാഴ്ച രാത്രി 10 മണിയോടെയായിരുന്നു സംഭവം. രാത്രി മദ്യപിച്ച് വീട്ടിലെത്തിയ നിഷാദ് ഭാര്യയും അമ്മയുമായി വാക്കുതർക്കത്തിലേർപ്പെട്ടു. തുടർന്നു നിഷാദ് ആത്മഹത്യയ്ക്കും ശ്രമിച്ചു. ഇതിനെ തുടർന്നു വഴക്കു പരിഹരിക്കാനെത്തിയ രവീന്ദ്രന്‍റെ നെഞ്ചിൽ നിഷാദ് ചവിട്ടി വീഴ്ത്തുകയായിരുന്നു. പിന്നാലെ വീട്ടുകാർ പോലീസിനെ വിളിച്ചു വരുത്തി. പോലീസ് എത്തുന്ന സമയം വരെയും നിഷാദ് രവീന്ദ്രനെ മർദിച്ചുവെന്നാണ് വിവരം. ആക്രമണത്തിൽ ഗുരുതരാവസ്ഥയിലായ രവീന്ദ്രനെ അടുത്തുള്ള സ്വകാര്യ ആശുപത്രിയിൽ പ്രവേശിപ്പിച്ചെങ്കിലും 12 മണിയോടെ രവീന്ദ്രൻ മരിച്ചു. ഹൃദ്രോഗി കൂടിയായ രവീന്ദ്രൻ അതിന്‍റെ ചികിത്സ തുടരുന്നയാളാണ്. സ്വകാര്യ ആയുർവേദ ആശുപത്രിയിലെ ജീവനക്കാരനാണ് നിഷാദ്. ഇയാൾക്കെതിരെ കൊലക്കുറ്റം ചുമത്താനാണ് പോലീസിന്‍റെ തീരുമാനം. വസ ന്തയാണ് രവീന്ദ്രന്‍റെ ഭാര്യ. സംഭവത്തിൽ നെയ്യാർ ഡാം പോലീസ് വിശദമായ അന്വേഷണം ആരംഭിച്ചിട്ടുണ്ട്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]