താലൂക്ക് ആശുപത്രിക്കു 97.11 കോടി, കുന്നംകുളത്ത് 372 കോടിയുടെ പദ്ധതികൾ

കുന്നംകുളം താലൂക്ക് ആശുപത്രി നവീകരണത്തിനായി കിഫ്ബിയിൽനിന്നും 97.11 കോടി രൂപയുടെ ഭരണാനുമതി ലഭിച്ചു. കെട്ടിട നിർമാണത്തിനും അനുബന്ധ സൗകര്യങ്ങൾക്കുമായാണു തുക. എട്ടു നിലകളിലായി 1,30,000 ചതുരശ്ര അടി കെട്ടിടമാണ് നിർ‌മിക്കുന്നത്. 100 കിടക്കകളോടു കൂടിയ ആശുപത്രി ബ്ലോക്കിൽ അത്യാഹിത വിഭാഗവും ട്രോമാകെയർ യൂണിറ്റും ഒപി വിഭാഗവും കൂടാതെ ഓപ്പറേഷൻ തിയേറ്ററുകൾ, ഇന്‍റൻസീവ് കെയർ യൂണിറ്റുകൾ, വിവിധ പരിശോധനാ ലാബുകൾ തുടങ്ങിയവയുമുണ്ടാകും.

372 കോടി രൂപയുടെ വികസന പദ്ധതികളാണ് കുന്നംകുളം നിയോജക മണ്ഡലത്തിൽ കിഫ്ബി ഫണ്ടിംഗിലൂടെ നടപ്പാക്കുന്നത്.

ഒരു കോടി രൂപ വീതം വിനിയോഗിച്ചു കുന്നംകുളത്തും അക്കിക്കാവിലും രജിസ്ട്രാർ ഓഫീസുകൾ നിർമിച്ചു. ഇവയുടെ ഉദ്ഘാടനവും കഴിഞ്ഞു. കടവല്ലൂർ സർക്കാർ സ്കൂളിനെ അന്താരാഷ്ട്ര നിലവാരത്തിലേക്ക് ഉയർത്തുന്നതിനായി അഞ്ചുകോടി രൂപ വകയിരുത്തി. നിർമാണം അവസാനഘട്ടത്തിലാണ്.

പഴഞ്ഞി ഗവ. സ്കൂളിനു മൂന്നു കോടി, എരുമപ്പെട്ടി ഗവ. സ്കൂളിന് 3.32 കോടി, കുന്നംകുളം ബോയ്സ് സ്കൂൾ, ഗേൾസ് സ്കൂൾ, വേലൂർ ആർഎസ്ആർവിഎച്ച്എസ് എന്നീ സ്കൂളുകൾക്ക് ഒരു കോടി രൂപ വീതവും അനുവദിച്ചിട്ടുണ്ട്. ഇവയുടെ ടെൻഡർ നടപടികൾ നടന്നുവരുന്നു. അക്കിക്കാവ്-എരുമപ്പെട്ടി-കടങ്ങോട് റോഡിന് 12.05 കോടി രൂപയും കിഫ്ബി വഴി അനുവദിച്ചിട്ടുണ്ട്. കേച്ചേരി-അക്കിക്കാവ് ബൈപാസിന് 32.66 കോടി രൂപയുടേയും കുന്നംകുളം നഗര വികസനത്തിന് 100 കോടി രൂപയുടേയും കുന്നംകുളം റിംഗ് റോഡിന് 82 കോടി രൂപയുടേയും ഡിപിആർ സമർപ്പിച്ചു.

വാഴാനി പുഴയുടെ ഭാഗമായിട്ടുള്ള കാഞ്ഞിരക്കോട് മുതൽ കീഴ്തണ്ടിലം വരെ ചെക്ക് ഡാമുകളും സ്ലൂയിസ് വാൽവുകളും സംരക്ഷണ ഭിത്തിയും നിർമിക്കുന്നതിനായി 26.5 കോടിയുടെ ഡിപിആറും സമർപ്പിച്ചിട്ടുമുണ്ട്.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.