മേൽപാലം, ഗസ്റ്റ് ഹൗസ്; ഗുരുവായൂരിൽ 105 കോടിയുടെ പദ്ധതികൾ : Deepika.com Covid-19 KIIFB News

മേൽപാലം, ഗസ്റ്റ് ഹൗസ്; ഗുരുവായൂരിൽ 105 കോടിയുടെ പദ്ധതികൾ

സംസ്ഥന സർക്കാരിന്‍റെ കിഫ്ബി പദ്ധതിയിലൂടെ 105 കോടി രൂപയുടെ വികസന പദ്ധതികൾ കൊണ്ടുവന്ന് ഗുരുവായൂർ നിയോജക മണ്ഡലത്തിനു പുതിയ മുഖം നൽകിയിരിക്കുകയാണ് കെ.വി. അബ്ദുൾ ഖാദർ എംഎൽഎ. വിദ്യാഭ്യാസ സ്ഥാപനങ്ങളുടെ നവീകരണം, യാത്രാപ്രശ്നങ്ങൾക്കു പരിഹാരം കാണാൻ പാലങ്ങൾ, ആശുപത്രികളുടെ സൗകര്യം വർധിപ്പിക്കൽ, ക്ഷേത്രനഗരിയിൽ തീർഥാടകർക്കുള്ള സൗകര്യത്തിനായി അത്യാധുനിക ഗസ്റ്റ് ഹൗസ് എന്നിവയാണ് പദ്ധതിയിലൂടെ നിർമിക്കുന്നത്.

24 കോടി മുടക്കി ഗുരുവായൂരിൽ നിർമിക്കുന്ന ഗസ്റ്റ് ഹൗസിന്‍റെ പ്രവൃത്തി കോവിഡ് കാലത്തും തടസമില്ലാതെ തുടരുകയാണ്. തുക അനുവദിച്ച ഗുരുവായൂർ മേൽപാലം കരാർ നടപടികളോടടുക്കുകയാണ്. 25 കോടി രൂപയാണ് മേൽ‌പാലത്തിന് അനുവദിച്ചിട്ടുള്ളത്.
അലൈൻമെന്‍റിന് അംഗീകാരം ലഭിച്ചാൽ ഉടൻ 40 കോടി ചെലവഴിച്ച് ചിങ്ങനാത്തുകടവ് പാലത്തിന്‍റെ നിർമാണവും ആരംഭിക്കും.

മണത്തല ഗവ. ഹയർ സെക്കൻഡറി സ്കൂൾ അഞ്ചു കോടി രൂപ ചെലവിലും, കൊച്ചന്നൂർ സ്കൂൾ മൂന്നു കോടി ചെലവിട്ടും നവീകരിച്ചു. ഓരോ കോടി രൂപവീതം മുടക്കിയാണ് പുന്നയൂർക്കുളം ചെറായി സ്കൂളും ചമ്മന്നൂർ സ്കൂളും നവീകരിച്ചത്. മന്ദലാംകുന്ന് ഗവ. യുപി സ്കൂൾ നവീകരിക്കാൻ 60 ലക്ഷം ചെലവാക്കി.

ചാവക്കാട് താലൂക്ക് ആശുപത്രിയിൽ മൂന്നു കോടിരൂപയുടെ വികസന പദ്ധതികളാണ് പൂർത്തിയാക്കിയത്. ചാവക്കാട് ബീച്ച് ടൂറിസം പദ്ധതിയുടെ ഭാഗമായി കഫ്ബിയിലുടെ ലഭിച്ച രണ്ടു കോടി രൂപ ഉപയോഗിച്ചുള്ള പ്രവൃത്തികൾ പുരോഗമിക്കുകയാണ്.

ഇതിനുപുറമെ സർക്കാരിന്‍റെ ബജറ്റ് വിഹിതം ഉപയോഗിച്ചും എംഎൽഎയുടെ ആസ്തി വികസന ഫണ്ടുപയോഗിച്ചുമുള്ള വികസനങ്ങളും നടക്കുന്നുണ്ട്.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.