ആന്‍റണി ജോണിന്റേത് ഇരട്ടത്താപ്പെന്ന് ഡീൻ കുര്യാക്കോസ്
Wednesday, April 2, 2025 1:09 AM IST
കോതമംഗലം: രാജപാത വിഷയത്തിൽ ആന്‍റണി ജോണ് എംഎൽഎയുടേത് ഇരട്ടത്താപ്പെന്ന് ഡീൻ കുര്യാക്കോസ് എംപി.
ആലുവ - മൂന്നാർ രാജപാത തുറക്കണമെന്നാവശ്യപ്പെട്ട് നടന്ന ജനമുന്നേറ്റ സമരത്തിൽ പങ്കെടുത്തതിന്‍റെ പേരിൽ ബിഷപ് മാർ ജോർജ് പുന്നക്കോട്ടിലിനെതിരേ വനം വകുപ്പ് എടുത്ത കേസ് പിൻവലിക്കണമെന്നാവശ്യപ്പെട്ട് കേരള കോണ്ഗ്രസ് സംസ്ഥാന കമ്മിറ്റി നടത്തിയ ഉപവാസ സമരത്തിന്‍റെ സമാപന സമ്മേളനം ഉദ്ഘാടനം ചെയ്യുകയായിരുന്നു എംപി.
വിഷയവുമായി ബന്ധപ്പെട്ട് എംപി വിളിച്ചുചേർത്ത സർവകക്ഷിയോഗം കോതമംഗലം എംഎൽഎ ബഹിഷ്കരിക്കുകയായിരുന്നു. ജനങ്ങൾ ഒന്നടങ്കം ഈ വിഷയത്തിൽ സംഘടിച്ചപ്പോൾ മാത്രമാണ് എംഎൽഎ തിരിഞ്ഞുനോക്കിയത്. വനം വകുപ്പ് എടുത്തിട്ടുള്ള കേസുകൾ പിൻവലിച്ച് രാജപാത തുറക്കുംവരെ ശക്തമായ സമരപരിപാടികളുമായി യുഡിഎഫ് മുന്നോട്ടു പോകുമെന്നും എംപി പറഞ്ഞു.
ടി.യു. കുരുവിള അധ്യക്ഷത വഹിച്ചു. പി.സി. തോമസ്, മോൻസ് ജോസഫ് എംഎൽഎ, ജോയ് ഏബ്രഹാം, ഫ്രാൻസിസ് ജോർജ് എംപി, അപു ജോണ് ജോസഫ്, ഷിബു തെക്കുംപുറം തുടങ്ങിയവർ പ്രസംഗിച്ചു.