കാർ ട്രാവലറുമായി കൂട്ടിയിടിച്ച് രണ്ടു പേർ മരിച്ചു
Wednesday, April 2, 2025 1:09 AM IST
കൊണ്ടോട്ടി: പെരുന്നാൾ ആഘോഷിക്കാൻ മൈസൂരുവിലേക്കു പോകുന്നതിനിടെ കുടുംബം സഞ്ചരിച്ച കാർ കർണാടക നഞ്ചൻകോട് വച്ച് ട്രാവലറുമായി കൂട്ടിയിടിച്ച് മലപ്പുറം ജില്ലയിലെ കൊണ്ടോട്ടി സ്വദേശികളായ സഹോദരങ്ങൾക്കു ദാരുണാന്ത്യം.
മൊറയൂർ അരിന്പ്ര അത്തിക്കുന്ന് മന്നിയിൽ അബ്ദുൾ അസീസിന്‍റെ മക്കളായ മുഹമ്മദ് ഷഹ്സാദ് (24), മുസ്കാനുൽ ഫിർദൗസ് (21) എന്നിവരാണു മരിച്ചത്.
അപകടത്തിൽ ഏഴു പേർക്കു പരിക്കേറ്റു. കൊണ്ടോട്ടിക്കടുത്ത് മൊറയൂർ അരിന്പ്രയിലെ വീട്ടിൽനിന്നു ചൊവ്വാഴ്ച പുലർച്ചെ ഒന്നോടെ മൈസൂരു കൊപ്പയിലെ ഭാര്യ രേഷ്മയുടെ വീട്ടിലേക്ക് പെരുന്നാൾ ആഘോഷിക്കാൻ പോകുന്നതിനിടെ രാവിലെ എട്ടിനായിരുന്നു അപകടം.
കാർ ഓടിച്ചിരുന്ന ഷഹ്സാദ് സംഭവസ്ഥലത്ത് വച്ചുതന്നെ മരിച്ചു. ഷഹ്സാദ് വിദേശത്തുനിന്നു പെരുന്നാളിന് അവധിക്കെത്തിയതായിരുന്നു. കർണാടക രജിസ്ട്രേഷനിലുള്ള ട്രാവലറുമായാണു കാർ കൂട്ടിയിടിച്ചത്.
അബ്ദുൾ അസീസ് (50), അസീസിന്‍റെ മറ്റു മക്കളായ മുഹമ്മദ് അദ്നാൻ (18), മുഹമ്മദ് ആദിൽ (16), സഹ്ദിയ സുൽഫ (25), സഹ്ദിയയുടെ മക്കളായ ആദം റബീഹ് (അഞ്ച്), അയ്യത്ത് (എട്ട് മാസം), അബ്ദുൾ അസീസിന്‍റെ സഹോദരൻ മുഹമ്മദലിയുടെ മകൻ മുഹമ്മദ് ഷാനിജ് (15) എന്നിവരാണു പരിക്കേറ്റു ചികിത്സയിലുള്ളത്. ഇവരെ ഗുണ്ടൽപേട്ടയിലെ വിവിധ ആശുപത്രികളിൽ പ്രവേശിപ്പിച്ചു.
അബ്ദുൾ അസീസിന്‍റെ ആദ്യഭാര്യയിലെ മകനാണു മരിച്ച മുഹമ്മദ് ഷഹ്സാദ്. കൊണ്ടോട്ടി തുറക്കൽ ചെമ്മലപ്പറന്പ് സ്വദേശിയും ആശാ പ്രവർത്തകയുമായ ഫാത്തിമയാണ് അമ്മ. മൈസൂരു കൊപ്പ സ്വദേശിയായ രേഷ്മയാണു മരിച്ച മുസ്കാനുൽ ഫിർദൗസിന്‍റെ അമ്മ.
വിദേശത്തുള്ള സൽമാനുൽ ഫാരിസ് സഹോദരനാണ്. മൈസൂരുവിൽ താമസിച്ച് കച്ചവട സ്ഥാപനം നടത്തുകയാണ് രേഷ്മ. അബ്ദുൾ അസീസ് കുടുംബമായി മൊറയൂർ അരിന്പ്രയിലാണ് താമസം.