ആരോഗ്യവകുപ്പ് അഡീഷണല്‍ ചീഫ് സെക്രട്ടറിക്ക് അറസ്റ്റ് വാറന്‍റ്
Thursday, January 9, 2025 2:33 AM IST
കൊച്ചി: ആരോഗ്യവകുപ്പ് അഡീഷണല്‍ ചീഫ് സെക്രട്ടറി രാജന്‍ ഖൊബ്രഗഡെയ്ക്ക് ഹൈക്കോടതിയുടെ അറസ്റ്റ് വാറന്‍റ്. ഈ മാസം 20ന് അറസ്റ്റ് ചെയ്തു ഹാജരാക്കാന്‍ പോലീസിന് ഹൈക്കോടതി ഡിവിഷന്‍ ബെഞ്ച് നിര്‍ദേശം നൽകി.
ഭിന്നശേഷിക്കാരനായ ഡോക്ടര്‍ക്കു പ്രമോഷന്‍ നല്‍കണമെന്ന ഉത്തരവ് ഇറക്കാത്തതിലാണ് കടുത്ത നടപടി. ആരോഗ്യവകുപ്പിലെ ഉദ്യോഗസ്ഥനായ ഡോ. ബി. ഉണ്ണിക്കൃഷ്ണന് നല്‍കിയ കോടതിയലക്ഷ്യ ഹര്‍ജിയിലാണു നടപടി.
2023ലായിരുന്നു ഡോ. ഉണ്ണിക്കൃഷ്ണനു നിയമനം നല്‍കണമെന്ന് ഹൈക്കോടതി ഡിവിഷന്‍ ബെഞ്ച് വിധിച്ചത്. ഇതിനെതിരേ സര്‍ക്കാര്‍ നല്‍കിയ അപ്പീലും പുനഃപരിശോധനാഹര്‍ജിയും സുപ്രീംകോടതി തള്ളി.
തുടര്‍ന്നാണ് ഉത്തരവിറക്കാന്‍ കഴിഞ്ഞ സെപ്റ്റംബറില്‍ ഹൈക്കോടതി ആരോഗ്യവകുപ്പിന് നിര്‍ദേശം നല്‍കിയത്. എന്നാല്‍, ഡോ. ബി. ഉണ്ണിക്കൃഷ്ണന് അനുകൂലമായി തീരുമാനമെടുക്കണമെന്ന ഉത്തരവ് ആരോഗ്യവകുപ്പ് നടപ്പാക്കിയില്ല. ഇതോടെയാണു കോടതിയലക്ഷ്യ ഹര്‍ജിയില്‍ ജസ്റ്റീസുമാരായ എ. മുഹമ്മദ് മുഷ്താഖ്, സി. ജയചന്ദ്രന്‍ എന്നിവരുള്‍പ്പെട്ട ഡിവിഷന്‍ ബെഞ്ച്അറസ്റ്റ് വാറന്‍റ് പുറപ്പെടുവിച്ചത്.