എൽഎഫ് കോളജിൽ അധ്യാപക വിദ്യാർഥി സംഗമം

ഗുരുവായൂർ: ലിറ്റിൽഫ്ലവർ കോളജിൽ രസതന്ത്ര വിഭാഗം അസോസിയേഷൻ ഉദ്ഘാടനത്തിന്‍റെ ഭാഗമായി പൂർവ അധ്യാപക അനധ്യാപക വിദ്യാർഥി സംഗമം നടത്തി. മുൻ പ്രിൻസിപ്പൽ സിസ്റ്റർ ഡോ.മോളി ക്ലെയർ ഉദ്ഘാടനം ചെയ്തു. പ്രിൻസിപ്പൽ ഡോ. സി.ജെ. ബിൻസി അധ്യക്ഷത വഹിച്ചു.

ചടങ്ങിൽ പൂർവ അധ്യാപക അനധ്യാപകരെ ആദരിച്ചു. ഇന്ത്യൻ നോളജ് സിസ്റ്റവും കേരള നോളജ് സിസ്റ്റവുമായി ബന്ധപ്പെട്ട രസതന്ത്ര പ്രദർശനവും ഉണ്ടായി. സംസ്കൃത വിഭാഗം മേധാവി ഡോ. പി.ജി. ജസ്റ്റിൻ എക്സ്പോ ഉദ്ഘാടനം ചെയ്തു.

ADVERTISEMENT

വണ്‍വേ; ആദ്യദിനം ശാന്തം

തൃശൂർ: തിക്കില്ല, തിരക്കില്ല, വാഹനങ്ങളുടെ പരക്കംപാച്ചിലും ഇല്ല. നഗരത്തിൽ പുതിയതായി ഏർപ്പെടുത്തിയ വണ്‍വേ സംവിധാനത്തിന്‍റെ ആദ്യദിനത്തിൽ നിരത്തുകൾ ശാന്തം, പക്ഷേ, നഗരത്തിലെ മറ്റു റോഡുകളിൽ ഇതോടെ തിരക്ക് വർധിച്ചതും കച്ചവടസ്ഥാപനങ്ങളിലേക്ക് ആളുകൾ കുറഞ്ഞതും യാത്രക്കാരെയും കച്ചവടക്കാരെയും ഒരുപോലെ ബാധിച്ചു. വാഹനങ്ങളുടെ അലക്ഷ്യമായ പാർക്കിംഗും എണ്ണത്തിലെ വർധനവും കാരണം തിരക്കേറെയുണ്ടായിരുന്ന പോസ്റ്റ് ഓഫീസ് റോഡിലും വീതികുറഞ്ഞ അക്കാദമി റോഡിലും പോലീസ് നടത്തിയ ഗതാഗത പരിഷ്കാരം ഏറെക്കുറെ വിജയം കണ്ടെങ്കിലും മറ്റുള്ളവർക്ക് ഉപകാരമാണോ ഉപദ്രവമാണോ എന്ന് വരുംദിവസങ്ങളിൽ കണ്ടറിയണം. പോസ്റ്റ് ഓഫീസ് റോഡിൽ മുന്പും നിരവധിതവണ വണ്‍വേ സംവിധാനം ഏർപ്പെടുത്തിയിട്ടുണ്ട്. പ്രതിഷേധങ്ങളെതുടർന്നു പിൻവലിക്കുകയായിരുന്നു. നേരത്തേ മുന്നറിയിപ്പില്ലാതെ ആന്പക്കാടൻ ജംഗ്ഷനിൽ ബാരിക്കേഡ് സ്ഥാപിച്ചതു യാത്രാദുരിതം വർധിപ്പിച്ചതിനുപിറകെയാണ് പുതിയ രണ്ടിടങ്ങളിലെ പരിഷ്കാരം. ഇതറിയാതെ പതിവുപോലെ വന്ന യാത്രികരെ പോലീസ് തിരിച്ചുവിടുകയും ചെയ്തിരുന്നു. ആദ്യത്തെ കുറച്ചുദിവസം കർശന നടപടികൾ ഉണ്ടാകില്ലെങ്കിലും വരുംദിവസങ്ങളിൽ നടപടി കൂടുതൽ കർശനമാക്കാനാണു പോലീസ് തീരുമാനം. പലയിടങ്ങളിലും മുന്നറിയിപ്പുബോർഡുകൾ സ്ഥാപിക്കാത്തതും യാത്രക്കാരെ നട്ടംതിരിക്കുന്നുണ്ട്. നഗരത്തിലെതന്നെ മറ്റു വണ്‍വേ റോഡുകളായ സെന്‍റ് മേരീസ് റോഡ്, സെന്‍റ് തോമസ് കോളജിനു സമീപത്തുകൂടിയുള്ള പാലയ്ക്കൽ അങ്ങാടി റോഡ്, ബാലഭവൻ റോഡ്, ബെനറ്റ് റോഡ് എന്നിവിടങ്ങളിലും വർഷങ്ങളായി വൺവേ സംവിധാനം ഉണ്ടെങ്കിലും തിരക്കേറെയുള്ള സമയങ്ങളിലും നിരവധിപ്പേർ ഇതു ലംഘിക്കുന്നുണ്ട്. അതിൽ നടപടികൾ സ്വീകരിക്കാതെയുള്ള പുതിയ വണ്‍വേ സംവിധാനം പ്രതിഷേധങ്ങൾക്കും വഴിയൊരുക്കുന്നുണ്ട്.

വടക്കാഞ്ചേരിയിൽ ഗതാഗതതടസം: പൊറുതിമുട്ടി ജനങ്ങൾ

വടക്കാഞ്ചേരി: തിരക്കേറിയ പകൽസമയത്ത് തൃശുർ - ഷൊർണൂർ സംസ്ഥാനപാതയിൽ ഗതാഗതതടസം. വടക്കാഞ്ചേരി ഫൊറോന പള്ളി മുതൽ പരുത്തിപ്ര വരെയുള്ള റോഡിൽ ഇന്നലെ രാവിലെ മുതൽ റോഡിന്‍റെ അറ്റകുറ്റപ്പണികൾ നടത്തിയതുമൂലമാണ് രാവിലെ മുതൽ വൈകീട്ടുവരെ വാഹനഗതാഗതം തടസപ്പെട്ടത്. റോഡിലെ കുഴികൾ അടയ്ക്കുന്നതിനെതുടർന്ന് ഗതാഗതം ഒറ്റവരിയായി നിയന്ത്രിച്ചതാണ് ഗതാഗതക്കുരുക്കിനു കാരണമായത്. റോഡിലെ പൊടിപടലങ്ങൾ മെഷിനറി ഉപയോഗിച്ചു നീക്കം ചെയ്യുന്നതോടെ പ്രദേശത്തെ വ്യാപാരസ്ഥാപനങ്ങളിലേക്ക് പൊടികയറിയതിനെതുടർന്ന് വ്യാപാരികളും തൊഴിലാളികളുംതമ്മിൽ നേരിയതോതിൽ വാക്കേറ്റത്തിന് ഇടയാക്കി. രോഗികളുമായി വന്ന ആംബുലൻസുകളും ഗതാഗതനിയന്ത്രണത്തിൽപ്പെട്ടതു വിവാദമായി. ഇന്നലെ രാവിലെ ആരംഭിച്ച പ്രവൃത്തികൾ ഏറെ വൈകീട്ടാണ് അവസാനിച്ചത്. പൊതുമരാമത്ത് നിരത്തുവിഭാഗം ഇത്തരം പ്രവൃത്തികൾ നടത്തേണ്ടതു രാത്രിയാണന്നും നാട്ടുകാരിൽ ചിലർ അഭിപ്രായപ്പെട്ടു.

വള്ളത്തോൾനഗർ കുടുംബ ആരോഗ്യകേന്ദ്രം പുതിയ രണ്ടുനിലക്കെട്ടിടത്തിൽ

ചേലക്കര: വള്ളത്തോൾനഗർ ഗ്രാമപഞ്ചായത്തിലെ കുടുംബ ആരോഗ്യകേന്ദ്രം പുതിയ രണ്ടുനിലക്കെട്ടിടത്തിലേക്ക് മാറ്റുന്നതിന്‍റെ ഉദ്ഘാടനം ചെറുതുരുത്തി കോഴിമാംപറമ്പ് ക്ഷേത്രപരിസരത്തുള്ള കുടുംബആരോഗ്യകേന്ദ്രം ഹാളിൽ നടന്നു. മുൻ എംഎൽഎയും ഇപ്പോഴത്തെ എംപിയുമായ കെ. രാധാകൃഷ്ണന്‍റെ ആസ്തിവികസന ഫണ്ടിൽ നിന്ന് ഒരു കോടി രൂപ നൽകി നിർമാണം പൂർത്തിയാക്കിയ കെട്ടിടത്തിന്‍റെ ഉദ്ഘാടനം കെ. രാധാകൃഷ്ണൻ എംപി നിർവഹിച്ചു. യു.ആർ. പ്രദീപ് എംഎൽഎ അധ്യക്ഷത വഹിച്ചു. അസിസ്റ്റന്‍റ്് എൻജിനീയർ സുജിത്ത്, ഗ്രാമപഞ്ചായത്ത് വൈസ് പ്രസിഡന്‍റ് പി. നിർമലദേവി, തൃശൂർ ജില്ലാ പഞ്ചായത്ത ്അംഗം പി. സാബിറ, ബ്ലോക്ക് ഗ്രാമപഞ്ചായത്ത് അംഗങ്ങളായ എം.പി. സുചിത്ര, പി.എം. നൗഫൽ, ഗ്രാമപഞ്ചായത്ത് അംഗങ്ങളായ കെ.ആർ. ഗിരീഷ് കുമാർ, പി.എ. യൂസഫ് ബിന്ദു, വാർഡ്മെമ്പർ താജുന്നിസ, ഗ്രാമപഞ്ചായത്ത് പ്രസിഡന്‍റ്് ഷെയ്ഖ് അബ്ദുൽഖാദർ, മെഡിക്കൽ ഓഫീസർ ഡോ. പി. എ. സഫീർ എന്നിവർ പ്രസംഗിച്ചു.

എറവിൽ പച്ചക്കറിക്കടയുടെ പൂട്ട് തകർത്ത് പണം കവർന്നു

അരിമ്പൂർ: പച്ചക്കറിക്കടയുടെ പൂട്ട് കുത്തിത്തുറന്ന് അകത്ത് കടന്ന മോഷ്ടാവ് മേശവലുപ്പിൽ സൂക്ഷിച്ചിരുന്ന 9000 രൂപ കവർന്നു. തൃശൂർ - വാടാനപ്പള്ളി സംസ്ഥാന പാതയിൽ കരുവാൻ വളവിലുള്ള എറവ് സ്വദേശി കാരാമൽ വീട്ടിൽ സജീഷിന്‍റെ "മുടിയൻസ്' എന്ന കടയിലാണ് മോഷണം നടന്നത്. സമീപത്തെ നീലങ്കാവിൽ ജോസിന്‍റെ വീട്ടിൽ നിന്നും സൈക്കിളും മോഷണം പോയിട്ടുണ്ട്. രാവിലെ പച്ചക്കറിക്കട തുറക്കാനെത്തിയപ്പോഴാണ് മോഷണവിവരം അറിയുന്നത്. കടയുടെ മുൻവശത്തെ ഗ്രില്ലിലെ പൂട്ട് കമ്പിപ്പാര ഉപയോഗിച്ച് തകർത്ത നിലയിലായിരുന്നു. ഇതിനുപയോഗിച്ച കമ്പി സമീപത്ത് തന്നെ കിടക്കുന്നുമുണ്ട്. മേശവലുപ്പിൽ ഉണ്ടായിരുന്ന പണം മാത്രമാണ് നഷ്ടപ്പെട്ടത്. ഇതിനുശേഷം മോഷ്ടാവ് പച്ചക്കറിക്കടയ്ക്ക് എതിർവശത്തുള്ള ജോസിന്‍റെ വീടിനോട് ചേർന്ന് മലവിസർജനം നടത്തുകയും ഉടുമുണ്ട് അവിടെയിട്ട് അയയിൽ കിടന്നിരുന്ന മുണ്ട് എടുത്ത് സ്ഥലം വിടുകയായിരുന്നു. ഒപ്പം അവിടെ ഇരുന്ന സൈക്കിളും മോഷ്ടിച്ചു. പരാതിയെതുടർന്ന് അന്തിക്കാട് പോലീസ് സ്ഥലത്ത് എത്തി അന്വേഷണം നടത്തി.

മലയണ്ണാനുകളെ വെടിവച്ചു കൊന്ന രണ്ടുപേർ പിടിയിൽ

മാന്ദാംമംഗലം: മലയണ്ണാനുകളെ വെടിവച്ചുകൊന്ന രണ്ടുപേർ മാന്ദാമംഗലം വനംവകുപ്പിന്‍റെ പിടിയിലായി. മാന്ദാമംഗലം സ്വദേശി ഞാറംപിള്ളി വീട്ടിൽ കിരൺ, മച്ചമ്പിള്ളി വീട്ടിൽ സുധീഷ് എന്നിവരാണ് പിടിയിലായത്. എയർഗൺ ഉപയോഗിച്ച് പിടികൂടിയ മലയണ്ണാനുകളെ പാകംചെയ്ത് കഴിക്കുന്നതിനിടെയാണ് ഇവർ പിടിയിലായത്. മാന്ദാമംഗലം ഫോറസ്റ്റ് സ്റ്റേഷൻ ഡെപ്യൂട്ടി റേഞ്ച് ഫോറസ്റ്റ് ഓഫീസർ എസ്. രാജേഷ്, ബീറ്റ് ഓഫീസർമാരായ ടി.യു. രാജ്‌കുമാർ, എം.ബി. ബിജേഷ്, ഫോറസ്റ്റ് വാച്ചറായ പി.വി. അമ്മിണി എന്നിവരുടെ നേതൃത്വത്തിലുള്ള സംഘമാണ് പ്രതികളെ പിടികൂടിയത്.

പോക്സോ: 19 കാരന് 38 വർഷം കഠിനതടവും പിഴയും

ചാവക്കാട്: പ്രായപൂർത്തിയാകാത്ത പെൺകുട്ടിയെ വീട്ടിൽ അതിക്രമിച്ചു കയറി ലൈംഗികപീഡനം നടത്തിയ കേസിൽ 19കാരന് 38 വർഷം കഠിനതടവും 96,000 രൂപ പിഴയും. പിഴ അടയ്ക്കാത്ത പക്ഷം 19 മാസവും 5 ദിവസവും കൂടി അധികതടവ് അനുഭവിക്കണം. പിഴത്തുകയിൽനിന്നും 50,000 രൂപ അതിജീവിതയ്ക്കു നൽകാനും ഉത്തരവായി. വെങ്കിടങ്ങ് പാടൂർ ഇടിയഞ്ചിറ വെട്ടേക്കാട്ട് നവീൻ കൃഷ്ണയെയാണ് ചാവക്കാട് പ്രത്യേക അതിവേഗ കോടതി ജഡ്ജി എസ്. ലിഷ ശിക്ഷിച്ചത്. പീഡനവിവരം കുട്ടിയുടെ പിതാവ് പാവറട്ടി പോലീസ് സ്റ്റേഷനിൽ അറിയിച്ചതിന് തുടർന്ന് എസ്എച്ച്ഒ എം.കെ. രമേഷ് കുറ്റപത്രം സമർപ്പിച്ചു. പ്രോസിക്യൂഷന് വേണ്ടി സ്പെഷ്യൽ പബ്ലിക് പ്രോസിക്യൂട്ടർ സിജു മുട്ടത്ത്, അഡ്വ. സി. നിഷ എന്നിവർ ഹാജരായി.

വാഴാനി ഡാം തുറക്കും

വടക്കാഞ്ചേരി: വാഴാനി ഡാമിലെ ജലവിതാനം ക്രമീകരിക്കുന്നതിനായി ഡാമിന്‍റെ ഷട്ടറുകൾ നാളെ രാവിലെ 11ന് തുറക്കുമെന്ന് വാഴാനി ഡാം അസിസ്റ്റന്‍റ്് എക്സിക്യൂട്ടീവ് എൻജിനീയർ അറിയിച്ചു. നിലവിൽ ഡാമിന്‍റെ ജലനിരപ്പ് 60. 24 ശതമാനമാണ്. ഇത് സംഭരണശേഷിയുടെ 89 ശതമാനം വരും. വാണിംഗ് ലെവലിൽ ജലനിരപ്പ് എത്തിയില്ലെങ്കിലും ന്യൂനമർദ്ദ സാധ്യത ഉൾപ്പെടെ മുന്നിൽക്കണ്ട് മുൻകരുതലിന്‍റെ ഭാഗമായിട്ടാണ് ഷട്ടറുകളിലൂടെ അധികജലം പുറത്തേയ്ക്ക് ഒഴുക്കുന്നത്. പ്രാദേശിക സാഹചര്യങ്ങൾ വിലയിരുത്തിയും തദ്ദേശസ്വയംഭരണ സ്ഥാപന മേധാവികളുമായി ചർച്ച ചെയ്തും ആവശ്യമായ മുന്നറിയിപ്പുകൾ നൽകിയും ജനങ്ങളുടെ സുരക്ഷ ഉറപ്പ് വരുത്തി പകൽ സമയങ്ങളിൽ സ്പീൽവേ ഷട്ടറുകൾ ഘട്ടം ഘട്ടമായി ഒരു ദിവസം പരമാവധി 10 സെ.മി. എന്ന രീതിയിൽ പരമാവധി 30 സെ.മി. വരെ തുറന്ന് വാഴാനി ഡാമിൽ നിന്നും അധികജലം പുറത്തേയ്ക്ക് ഒഴുക്കി ഡാമിന്‍റെ ജലനിരപ്പ് ക്രമീകരിക്കുന്നതിനാണ് ജില്ലാ കളക്ടർ ഉത്തരവിട്ടിരിക്കുന്നത്. വടക്കാഞ്ചേരി കേച്ചേരി, മൂക്കൊല പുഴകളിലെ ജലനിരപ്പ് ഉയരാൻ സാധ്യതയുള്ളതിനാൽ പൊതുജനങ്ങൾ ജാഗ്രത പാലിക്കണമെന്നും അറിയിപ്പിൽ പറയുന്നു.

യുവതിയുടെ സ്വകാര്യചിത്രം പ്രചരിപ്പിച്ചു; യുവാവ് എയർപോർട്ടിൽ പിടിയിൽ

പുന്നയൂർക്കുളം: വാട്സാപ്പിലൂടെ യുവതിയുടെ സ്വകാര്യ ചിത്രങ്ങൾ പ്രചരിപ്പിച്ച് ഭീഷണിപ്പെടുത്തിയ കേസിൽ യുവാവിനെ എയർപോർട്ടിൽ പിടിക്കുടി. എടക്കഴിയൂർ വട്ടംപറമ്പിൽ ഇമ്രാജിനെ(37)യാണ് കരിപ്പൂർ വിമാനത്താവളത്തിൽനിന്ന് വടക്കേക്കാട് എസ്എച്ച്ഒ എം.കെ.രമേശിന്‍റെ നേതൃത്വത്തിൽ അറസ്റ്റ് ചെയ്തത്. മുപ്പതുകാരിയായ യുവതിയെ കഴിഞ്ഞവർഷം ജൂലെെമുതൽ നിരന്തരം ശല്യപ്പെടുത്തുകയും ചിത്രങ്ങൾ പ്രചരിപ്പിക്കുകയും ചെയ്തിരുന്നു. ഇവരുടെ സുഹൃത്തുക്കൾക്കും ബന്ധുക്കൾക്കും സ്വകാര്യചിത്രങ്ങൾ വാട്സാപ്പിൽ അയച്ചുകൊടുത്ത് ഭീഷണിപ്പെടുത്തിയെന്നാണ് പരാതി. കഴിഞ്ഞ സെപ്റ്റംബറിൽ യുവതി പരാതി നൽകിയെങ്കിലും ഇയാൾ ഗൾഫിലേക്കുകടന്നു. തുടർന്ന് പോലീസ് ലുക്കൗട്ട് സർക്കുലർ പുറപ്പെടുവിച്ചിരുന്നു. ഗൾഫിൽനിന്ന് തിരിച്ചെത്തിയപ്പോഴാണ് വിമാനത്താവളത്തിൽ പിടിയിലായത്. സി. ബിന്ദുരാജ്, പ്രതീഷ്, പ്രജിത്ത് എന്നിവരും അറസ്റ്റ് സംഘത്തിൽ ഉണ്ടായിരുന്നു.

ഗണപതിവിഗ്രഹത്തിന് സ്വീകരണം

ഗുരുവായൂര്‍: കേരള ക്ഷേത്ര സംരക്ഷണ സമിതി ഗണേശോത്സവത്തിന്‍റെ ഭാഗമായി നിമജ്ജനം ചെയ്യുന്നുള്ള പ്രധാന ഗണപതി വിഗ്രഹത്തിന് ഗുരുവായൂരിൽ സ്വീകരണം നൽകി. പൂഷ്പാലങ്കാരത്തോടെയുള്ള ഗണപതി വിഗ്രഹത്തെ ഇന്നലെ വൈകീട്ട് മഞ്ജുളാല്‍ പരിസരത്ത് വരവേറ്റു. തുടര്‍ന്ന് നാഗസ്വരത്തിന്‍റേ യും താലപ്പൊലിയുടേയും അകമ്പടിയോടെ വിഗ്രഹത്തെ ക്ഷേത്രസന്നിധിയിലേക്ക് നാമജപ ഘോഷയാത്രയായി ആനയിച്ചു. സ്വീകരണ ചടങ്ങില്‍ സ്വാഗത സംഘം രക്ഷാധികാരി ടി.വി. ശ്രീനിവാസന്‍ മുഖ്യപ്രഭാഷണം നടത്തി. ജനറല്‍ കണ്‍വീനര്‍ കെ.എസ്. പവിത്രന്‍ അധ്യക്ഷനായി.

സുസ്ഥിര പാലിയേറ്റീവ്കെയര്‍ സൊസൈറ്റിയുടെ പ്രവര്‍ത്തനം അനധികൃതമെന്ന് ബിജെപി

പുതുക്കാട്: താലൂക്ക് ആശുപത്രിയിലെ സുസ്ഥിര പാലിയേറ്റീവ് കെയര്‍ സൊസൈറ്റി അനധികൃതമായി പ്രവര്‍ത്തിക്കുന്നതെന്ന ആരോപണവുമായി ബിജെപി ആശുപത്രി കെട്ടിടത്തില്‍ പ്രവര്‍ത്തിക്കുന്ന പാലിയേറ്റീവ് കെയര്‍ സൊസൈറ്റി ആശുപത്രി വികസനത്തിന് തടസമാണെന്നും സ്ഥാപനത്തെ ആശുപത്രി കെട്ടിടത്തില്‍നിന്നും മാറ്റണമെന്നും ബിജെപി പുതുക്കാട് മണ്ഡലം വൈസ് പ്രസിഡന്‍റ് ജോയ് മഞ്ഞളി ആവശ്യപ്പെട്ടു. സൊസൈറ്റിയായി രജിസ്റ്റര്‍ ചെയ്തിട്ടുള്ള സ്ഥാപനത്തിന്‍റെ പ്രവര്‍ത്തനം സംബന്ധിച്ച് കരാര്‍ ലഭ്യമല്ലെന്ന് ആശുപത്രി അധികൃതര്‍ നല്‍കിയ വിവരാവകാശ രേഖയില്‍ പറയുന്നു. ത്രിതല പഞ്ചായത്തുകളുടെ ഫണ്ടുപയോഗിച്ച് 2006ല്‍ പ്രവര്‍ത്തനമാരംഭിച്ച സൊസൈറ്റിയുടെ സേവന-സന്നദ്ധ പ്രവര്‍ത്തനങ്ങള്‍ തടയുന്നതിനുളള നീക്കം രാഷ്ട്രീയ പ്രേരിതമാണെന്ന് സുസ്ഥിര പാലിയേറ്റീവ് സൊസൈറ്റി പ്രസിഡന്‍റ്് പി. തങ്കം പറഞ്ഞു. മേഖലയില്‍ കിടപ്പുരോഗികളും മാരകമായ രോഗങ്ങള്‍ ബാധിച്ചവരും നിരവധിയുണ്ടായിരുന്ന കാലത്ത് ബ്ലോക്ക്പഞ്ചായത്തിന് കീഴിലുള്ള താലൂക്ക് ആശുപത്രിയില്‍ ത്രിതല പഞ്ചായത്തുകളുടെ ഫണ്ട് ഉപയോഗിച്ചാണ് സൊസൈറ്റി പ്രവര്‍ത്തനം ആരംഭിച്ചത്. മുന്‍ മന്ത്രി സി. രവീന്ദ്രനാഥ് എംഎല്‍എ ആയിരിക്കെ മൂന്ന് സര്‍ക്കാര്‍ ആശുപത്രി അധികൃതര്‍ ഏര്‍പ്പെട്ട കരാര്‍ നിലവിലുണ്ട്. നിലവില്‍ 1000 രോഗികളും 300 കിടപ്പുരോഗികള്‍ക്കും സുസ്ഥിര പാലിയേറ്റീവ് സൊസൈറ്റിയുടെ സേവനം ലഭിക്കുന്നുണ്ട്. പൂര്‍ണമായും സേവന സന്നദ്ധരായ ഡോക്ടര്‍മാരും പരിശീലനം നേടിയ നഴ്‌സുമാരുമാണ് ഇവിടെ പ്രവര്‍ത്തിക്കുന്നത്. സൊസൈറ്റിയുടെ ആംബുലന്‍സ്, ഫ്രീസര്‍ തുടങ്ങിയ സൗകര്യങ്ങളെല്ലാം ആശുപത്രിക്കുവേണ്ടിയാണ് പ്രവര്‍ത്തിക്കുന്നതെന്നും പി. തങ്കം പറഞ്ഞു.

‌മുരിങ്ങൂരിൽ സർവീസ് റോഡ് ടാറിംഗ്: എറണാകുളം ദിശയിൽ പൂർത്തിയായി

മുരിങ്ങൂർ: വെള്ളിയാഴ്ച രാത്രി പത്തുമണിയോടെ മുരിങ്ങൂർ ഡിംസ് മീഡിയ കോളജിന്‍റെ സമീപത്തുനിന്നു എറണാകുളം ദിശയിലേക്കുള്ള ട്രാക്കിൽ ആരംഭിച്ച ടാറിംഗ് ഇന്നലെ പുലർച്ചെ യോടെ പൂർത്തിയായി. ഇന്നലെരാത്രി പത്തരയോടെ തൃശൂർ ഭാഗത്തേയ്ക്കുള്ള നിർദിഷ്ട അടിപ്പാതയോടുചേർന്നുള്ള സർവീസ് റോഡും ടാർ ചെയ്യുമെന്നാണ് ബന്ധപ്പെട്ടവർ അറിയിച്ചത്. കൊരട്ടി, മേലൂർ, കാടുകുറ്റി പഞ്ചായത്തുകളിലെ പ്രസിഡന്‍റുമാരും എൽഡിഎഫ് ജനപ്രതിനിധികളും നേതാക്കളും ഇന്നലെ രാവിലെ മുതൽ മുരിങ്ങൂർ ജംഗ്ഷനിൽ അനിശ്ചിതകാല നിരാഹാരം തുടങ്ങുമെന്ന പ്രഖ്യാപനം വന്നതോടെയാണ് സർവീസ് റോഡുകളുടെ ടാറിംഗ് വേഗത്തിലാക്കാൻ എൻഎച്ച്എഐയും നിർമാണ കമ്പനിയും തീരുമാനിച്ചത്. കോയമ്പത്തൂരിൽനിന്നു ടാറിംഗ് മിശ്രിതം എത്തുന്നതിൽ പ്രാരംഭഘട്ടത്തിൽ ചെറിയൊരു താമസം നേരിട്ടിരുന്നു. കൂടാതെ ടാറിംഗ് പ്രവൃത്തികളുടെ ഗുണനിലവാരത്തിന്‍റെ കാര്യത്തിലും ചെറിയ ആശങ്ക നാട്ടുകാർ പങ്കുവയ്ക്കുന്നുണ്ട്. തൃശൂർ ഭാഗത്തേക്കുപോകുന്ന ഭാരവാഹനങ്ങൾ ഒഴിച്ചുള്ളവ പൊങ്ങം, ചിറങ്ങര, കൊരട്ടി എന്നിവിടങ്ങളിൽനിന്നും ഗ്രാമീണ റോഡുകളിലൂടെ വഴിതിരിച്ചുവിട്ടാണ് ഹൈവേയിലെ കുരുക്കിനു പോലീസ് പരിഹാരംകണ്ടത്. എങ്കിലും ഹൈവേയിൽ വാഹനങ്ങളുടെ നീണ്ടനിര രൂപപ്പെട്ടിരുന്നു. ഗ്രാമീണ, പൊതുമരാമത്ത് റോഡുകളിലും രൂക്ഷമായ ഗതാഗതക്കുരുക്ക് രൂപപ്പെട്ടു. പോലീസിന്‍റെ മേൽനോട്ടത്തിൽ ടാറിംഗ് നടക്കുന്ന ഭാഗത്ത് 15 മിനിറ്റ് ഇടവിട്ട് വാഹനങ്ങൾ എതിർദിശകളിലൂടെ വഴിതിരിച്ചുവിട്ടാണ് പണികൾ നടത്തിയത്. പൊങ്ങം മുതൽ മുരിങ്ങൂർവരെ ഇരുദിശകളിലും സർവീസ് റോഡ് പൂർത്തിയാക്കിയതിനുശേഷം മാത്രമേ പ്രധാനപാത പൊളിക്കാവൂ എന്ന പൊതുവികാരം മാനിക്കാതെ അധികൃതർ എടുത്ത തീരുമാനമാണ് ഗതാഗതക്കുരുക്ക് അതിരൂക്ഷമാകാൻ കാരണമായത്.

പേരാമ്പ്രയില്‍ സര്‍വീസ് റോഡ് ടാറിംഗ് തുടരുന്നു

കൊടകര: ദേശീയപാതയില്‍ അടിപ്പാതനിര്‍മാണം നടക്കുന്ന പേരാമ്പ്രയില്‍ സര്‍വീസ് റോഡുകളുടെ ടാറിംഗ് പണി പുരോഗമിക്കുന്നു. പേരാമ്പ്ര പെട്രോള്‍പമ്പിനു സമീപം ചാലക്കുടി ഭാഗത്തേക്കുള്ള സര്‍വിസ് റോഡിലാണ് ഇന്നലെ ടാറിംഗ് നടന്നത്. ഇതിന്‍റെ ഭാഗമായി ചാലക്കുടി ഭാഗത്തേയ്ക്കുള്ള പാതയില്‍ രാവിലെ കുറച്ചുനേരത്തേയ്ക്ക് ഗതാഗതക്കുരുക്ക് അനുഭവപ്പെട്ടെങ്കിലും പോലീസ് ഇടപെട്ട് വാഹനങ്ങളെ നിയന്ത്രിച്ച് കടത്തിവിട്ടതിനാല്‍ രൂക്ഷമായ ഗതാഗതക്കുരുക്ക് ഒഴിവായി. നിര്‍മാണപ്രവര്‍ത്തനങ്ങളുടെ ഭാഗമായി സര്‍വീസ് റോഡുകള്‍ക്ക് കേടുവന്ന ഭാഗത്തും കുഴികള്‍ രൂപപ്പെട്ട ഭാഗത്തുമാണ് റീടാറിംഗ് നടത്തുന്നത്. പേരാമ്പ്ര അപ്പോളോ ടയേഴ്‌സിനു സമീപം ഇത്തരത്തില്‍ കേടുവന്ന റോഡിന്‍റന്‍റെ ഭാഗങ്ങള്‍ പൂര്‍ണമായും ടാറിംഗ് നടത്തി സഞ്ചാരയോഗ്യമാക്കിയിട്ടുണ്ട്.

ക്ഷേത്രത്തില്‌ മോഷണം: പ്രതി അറസ്റ്റിൽ

കയ്പമംഗലം: ശ്രീനാരയണപുരത്ത് ക്ഷേത്രഭണ്ഡാരം കുത്തിപ്പൊളിച്ച് മോഷണം നടത്തിയ കേസിലെ പ്രതിയെ അറസ്റ്റ് ചെയ്തു. കൊരട്ടി തിരുമുടിക്കുന്ന് സ്വദേശി മരോട്ടിക്കുടി വീട്ടിൽ ഷിന്‍റോ(21)യെയാണ് ചാലക്കുടിയിൽനിന്നു അറസ്റ്റ് ചെയ്തത്. ഇക്കഴിഞ്ഞ 10ന് രാത്രിയിലാണ് കൊച്ചിൻ ദേവസ്വം ബോർഡിന്‍റെ കീഴിലുള്ള ശ്രീനാരായണപുരം ശ്രീകൃഷ്ണക്ഷേത്രത്തിലെ ഭണ്ഡാരം കുത്തിപ്പൊളിച്ച് 7500 രൂപയോളം കവർന്നത്. ഇയാളുടെ പക്കൽനിന്നു 7,430 രൂപയും പിടിച്ചെടുത്തു. ഇയാളെ സംഭവസ്ഥലത്ത് കൊണ്ടുവന്ന് തെളിവെടുത്തു. ഷിന്‍റോ കറുകുറ്റിയിലുള്ള ക്ഷേത്രത്തിലെ ഭണ്ഡാരങ്ങൾ കുത്തിപ്പൊളിച്ച് 5000 രൂപ മോഷ്ടിച്ച കേസിലും ചാലക്കുടി പോലീസ് സ്റ്റേഷൻ പരിധിയിലെ വെട്ടുകടവിലുള്ള കപ്പേളയുടെ ഭണ്ഡാരം കുത്തിപ്പൊളിച്ച് 3000 രൂപയോളം മോഷ്ടിച്ച കേസിലും പ്രതിയാണെന്ന് പോലീസ് പറഞ്ഞു. ഷിന്‍റോയെ ചോദ്യംചെയതിൽ മതിലകം പോലീസ് സ്റ്റേഷൻ പരിധിയിലെ അഞ്ചാംപരത്തിയിലുള്ള ഉമാമഹേശ്വരി ക്ഷേത്രത്തിലും കരിനാട്ട് കുടുബക്ഷേത്രത്തിലും മോഷണശ്രമം നടത്തിയതും കൊടകര വഴിയമ്പലത്തുള്ള കപ്പേളയിലെ ഭണ്ഡാരം കുത്തിപ്പൊളിച്ചതും ഇയാളാണെന്ന് കണ്ടെത്തി. മതിലകം സ്റ്റേഷൻ എസ്എച്ച്ഒ എം.കെ. ഷാജി, എസ്ഐമാരായ അശ്വിൻ റോയ്, ടി.എൻ. പ്രദീപൻ, ഗ്രേഡ് എഎസ്ഐ പ്രജീഷ്, സിപിഒമാരായ പ്രബിൻ, സതീഷ്, സനീഷ്, വിഷ്ണു എന്നിവരാണ് കേസ് അന്വേഷണസംഘത്തിൽ ഉണ്ടായിരുന്നത്.

ചെറുകിട പ്രസുകളെ മലിനീകരണനിയന്ത്രണബോര്‍ഡിന്‍റെ പരിധിയില്‍നിന്ന് ഒഴിവാക്കണം

ഇരിങ്ങാലക്കുട: ചെറുകിട പ്രസുകളെ മലിനീകരണനിയന്ത്രണബോര്‍ഡിന്‍റെ പരിധിയില്‍നിന്ന് ഒഴിവാക്കണമെന്ന് കേരള പ്രിന്‍റേഴ്‌സ് അസോസിയേഷന്‍ ആവശ്യപ്പെട്ടു. സംഘടനയുടെ റൂബി ജൂബിലി തൃശൂര്‍ ജില്ലാ സമ്മേളനത്തിലാണ് ഇക്കാര്യം ആവശ്യപ്പെട്ടത്. സംസ്ഥാന പ്രസിഡന്‍റ് വൈ. വിജയന്‍ ഉദ്ഘാടനം നിര്‍വഹിച്ചു. ജില്ലാ പ്രസിഡന്‍റ് സണ്ണി കുണ്ടുകുളം അധ്യക്ഷതവഹിച്ചു. ജില്ലാ നിരീക്ഷകന്‍ എം.എസ്. വികാസ് മുഖ്യപ്രഭാഷണംനടത്തി. സംസ്ഥാന ജില്ലാ ഭാരവാഹികളായ എം.എസ്. വികാസ്, രാജീവ് ഉപ്പത്ത്, പി.സി. സിദ്ധന്‍, കെ.എന്‍. പ്രകാശ്, പി. ബിജു, സി.കെ. ഷിജുമോന്‍, ടി.എസ്. ബൈജു, ബൈജു ജോസഫ് തുടങ്ങിയവര്‍ സംസാരിച്ചു. പള്ളിവളവ്: ചെറുകിട പ്രിന്‍റിംഗ് സ്ഥാപനങ്ങളെ ബാധിക്കുന്നഓൺലൈൻ ലൈസൻസ് പുതുക്കൽ സംബന്ധിച്ചുള്ള സങ്കീർണതകളും തെറ്റായ വ്യവസ്ഥകളും പരിഹരിക്കുന്നതിന് സർക്കാർ നടപടികൾ സ്വീകരിക്കണമെന്ന് മതിലകത്തുനടന്ന കേരള പ്രിന്‍റേഴ്സ് അസോസിയേഷൻ കൊടുങ്ങല്ലൂർ മേഖല റൂബി ജൂബിലി സമ്മേളനം ആവശ്യപ്പെട്ടു. ‌മതിലകം വ്യാപാരഭവനിൽ ജില്ലാ പ്രസിഡന്‍റ് സണ്ണി കുണ്ടുകുളം സമ്മേളനം ഉദ്ഘാടനംചെയ്തു. മേഖലാ പ്രസിഡന്‍റ് ടി.എൽ. സത്യന്‍ അധ്യക്ഷതവഹിച്ചു. രാജീവ് ഉപ്പത്ത് വിഷയം അവതരിപ്പിച്ചു. വിദ്യാഭ്യാസ പുരസ്കാരസമർപ്പണം ജില്ലാ സെക്രട്ടറി പി. ബിജു നിർവഹിച്ചു. ജില്ലാ ട്രഷറർ സി.കെ. ഷിജുമോൻ, നാട്ടിക മേഖല പ്രസിഡന്‍റ് ജോസ് താടിക്കാരൻ എന്നിവർ സംസാരിച്ചു. മേഖലാ സെക്രട്ടറി വാർഷിക റിപ്പോർട്ടും മേഖലാ ട്രഷറർ പി.കെ. അലി കണക്കുകളും അവതരിപ്പിച്ചു. കേരള ബാലസാഹിത്യ അക്കാദമി പുരസ്കാരം ലഭിച്ച സുനിൽ പി. മതിലകത്തിനെ ആദരിച്ചു.

സ്ഥിരതാമസക്കാരായ വോട്ടർമാരുടെ പേരുകൾ വെട്ടാൻ ശ്രമം: കോൺഗ്രസ് പരാതിനൽകി

ചാലക്കുടി: നഗരസഭയിലെ വിആർ പുരം വാർഡിൽ സ്ഥിരതാമസക്കാരായ വോട്ടർമാരുടെ പേരുകൾ വോട്ടർപട്ടികയിൽനിന്നു നീക്കംചെയ്യണമെന്ന് ആവശ്യപ്പെട്ട് ആക്ഷേപംനൽകിയ സിപിഎം പ്രവർത്തകന്‍റെ നടപടിക്കെതിരേ വാർഡ് കോൺഗ്രസ് കമ്മിറ്റി നഗരസഭ സെക്രട്ടറിക്ക് പരാതിനൽകി. വാർഡിലെ 50 ഓളം വോട്ടർമാരുടെ പേരുകൾ നീക്കംചെയ്യാനാണ് ആക്ഷേപം നൽകിയത്. നഗരസഭ ഉദ്യോഗസ്ഥൻ ആക്ഷേപം സംബന്ധിച്ച് നോട്ടീസ് നൽകാൻ എത്തിയപ്പോള്‌ താമസമില്ലായെന്ന് ആക്ഷേപത്തിൽ പറഞ്ഞിട്ടുള്ള പല വോട്ടർമാരും നേരിട്ട് നോട്ടീസ് കൈപ്പറ്റിയിരുന്നു. ചില വോട്ടർമാർ പഠനത്തിനും ജോലിക്കും പോയിവരുമുണ്ട്. നോട്ടീസ് കൈപ്പറ്റിയ വോട്ടർമാരോ, വീട്ടുകാരോ രേഖകൾ സഹിതം നഗരസഭ ഓഫീസിൽ നേരിട്ട് ഹിയറിംഗിന് ഹാജരാകണമെന്നാണ് നോട്ടിസിൽ പറഞ്ഞിട്ടുള്ളത്. ഇത്തരം വോട്ടർമാരുടെ പേരുകൾ വെട്ടാൻ അപേക്ഷനൽകിയ നടപടിക്കെതിരേ സെക്രട്ടറിക്ക് കോൺഗ്രസ് പരാതി നല്കി. നോട്ടീസ് ലഭിച്ച വോട്ടർമാരും വീട്ടുകാരും നഗരസഭ ഓഫീസിൽ സെക്രട്ടറിക്ക് മുൻപിൽ ആക്ഷേപം ഉന്നയിച്ചു. നിലവിലുള്ള താമസക്കാരായ വോട്ടർമാരുടെ പേരുകൾ നീക്കം ചെയ്യാൻ ആക്ഷേപംകൊടുത്ത് ഇവർ നഗരസഭ ഓഫീസിൽ ഹാജരാകേണ്ടിവരുന്ന അവസ്ഥ ഒഴിവാക്കണമെന്നും ഇത്തരം പരാതികൾ ഉദ്യോഗസ്ഥർ നേരിട്ടു പരിശോധിച്ച് പരിഹരിക്കണമെന്നും ഇത്തരത്തിൽ ആക്ഷേപം കൊടുക്കുന്നവർക്കെതിരേ നടപടി സ്വീകരിക്കണമെന്നും വാർഡ് കോൺഗ്രസ് കമ്മിറ്റി ആവശ്യപ്പെട്ടു.

പൊതുസ്ഥലത്ത് മാലിന്യം തള്ളി: പതിനായിരം പിഴ

ചാവക്കാട്: പൊതുസ്ഥലത്തു മാലിന്യം തള്ളിയവർക്കെതിരേ നടപടിയായി 10,000 രൂപ പിഴ ചുമത്തി. നഗരസഭയിലെ മൂന്നാം വാർഡ് പുതിയറയിൽ മാലിന്യം തള്ളുന്നതിനെതിരെ ലഭിച്ച പരാതിയെതുടർന്ന് നഗരസഭ ആരോഗ്യവിഭാഗം ഉദ്യോഗസ്ഥർ നടത്തിയ പരിശോധനയിലാണ് കുറ്റക്കാരെ കണ്ടെത്തിയത്. മാലിന്യം തള്ളിയവരെക്കൊണ്ടുതന്നെ അത് നീക്കം ചെയ്യിക്കുകയും പിഴ ചുമത്തുകയും ചെയ്തു. മാലിന്യസംസ്കരണത്തിൽ കർശന നിലപാട് സ്വീകരിക്കുമെന്ന് നഗരസഭ സെക്രട്ടറി എം.എസ്. ആകാശ് അറിയിച്ചു.

എസ്പി പ്രദേശവാസികളോട്: അധികം ഒച്ച വേണ്ട, അതൊക്കെ കൈയിൽ വച്ചാൽമതി

മുരിങ്ങൂർ: പ്രദേശത്തു രൂപപ്പെടുന്ന വെള്ളക്കെട്ടുമായി ബന്ധപ്പെട്ട് പ്രദേശവാസികൾ പ്രോജക്ട് ഡയറക്ടർക്കുനേരേ ശകാരവർഷവുമായി രംഗത്തെത്തി. ഇതോടെ കളക്ടർ അടക്കമുള്ള ഉദ്യോഗസ്ഥർ തിരിച്ചുനടന്നു. വെള്ളം എവിടേക്കാണ് ഒഴുക്കിവിടേണ്ടത് എന്നു തീരുമാനിക്കാതെയാണോ കാന നിർമിക്കുന്നതെന്നു നാട്ടുകാർ ചോദിച്ചു. സാങ്കേതികപരിജ്ഞാനമുള്ളള ആരും സ്ഥലത്തില്ലെന്നും നാട്ടുകാർ പറഞ്ഞു. വെള്ളക്കെട്ടിനു പരിഹാരം കണ്ടിട്ടു പോയാൽ മതിയെന്നു പ്രദേശവാസികൾ ശഠിച്ചതോടെ പ്രശ്നം സങ്കീർണമായി. അധികം ഒച്ച വേണ്ടെന്നും അതൊക്കെ കൈയിൽ വച്ചാൽ മതിയെന്നും എസ്പി ബി. കൃഷ്ണകുമാർ വ്യക്തമാക്കി. തങ്ങൾ ജനങ്ങളുടെ പ്രശ്നങ്ങൾക്ക‌ു പരിഹാരം കാണാനാണ് വന്നതെന്നും അദ്ദേഹം പറഞ്ഞു. മാസങ്ങളായി തുടരുന്ന പ്രശ്നമാണ് ഇതെന്നും നാളിതുവരെ പരിഹാരം കാണാൻ അധികൃതർക്കു കഴിഞ്ഞിട്ടില്ലെന്നുമായിരുന്നു നാട്ടുകാരുടെ മറുപടി.

തിലകൻ തന്ത്രിയുടെ ത്രയോദശ ശ്രാദ്ധസപര്യ ഇന്ന്

കൊടുങ്ങല്ലൂർ: തിലകൻ തന്ത്രികളുടെ പതിമൂന്നാമത് ശ്രാദ്ധത്തിന്‍റെ ഭാഗമായി നടത്തുന്ന ത്രയോദശ ശ്രാദ്ധസപര്യ ഇന്നുനടക്കുമെന്നു ഭാരവാഹികള്‌ പത്രസമ്മേളനത്തില്‌ അറിയിച്ചു. രാവിലെ എട്ടിന് തന്ത്ര പാഠശാലയിൽ നടക്കുന്ന ഗുരുപൂജ ചടങ്ങുകൾക്ക് വനിതകൾ കാർമികത്വംവഹിക്കും. തുടർന്ന് 10ന് ഗുരുദേവ കൺവൻഷൻ സെന്‍ററിൽ നടക്കുന്ന സത്സംഗത്തിൽ വൈദികസംഘം ആചാര്യൻ പ്രകാശൻ തന്ത്രികൾ അധ്യക്ഷതവഹിക്കും. പാലക്കാട് ദയാനന്ദാശ്രമത്തിലെ സംപൂജ്യ കൃഷ്ണാത്മാനന്ദ സരസ്വതി സ്വാമി ഉദ്ഘാടനവും അനുഗ്രഹഭാഷണവും നിർവഹിക്കും. വൈദിക സംഘത്തിന്‍റെ പന്ത്രണ്ടാമത് താന്ത്രികതിലകപുരസ്കാരം ഡോ.എം.വി. നടേശന് സമ്മാനിക്കും. ജ്യോതിഷ പണ്ഡിതൻ കാക്കശേരി രവീന്ദ്രൻ പണിക്കർക്കുള്ള സമാദരവ് ഡോ. വിഷ്ണുഭാരതീയ സ്വാമി സമർപ്പിക്കും. പ്രതിഭകൾക്കുള്ള ആദരവ് കൂറ്റനാട് രാവുണ്ണിപണിക്കരും നിർധന രോഗികൾക്ക് ചികിത്സാധനസഹായസേവാനിധി എ.ആർ. ശ്രീകുമാറും വിദ്യാഭ്യാസ പ്രോത്സാഹന പുരസ്കാരങ്ങൾ പി.കെ. പ്രസന്നനും സമർപ്പിക്കും. സി.ബി. പ്രകാശൻ തന്ത്രി, എം.എൻ. നന്ദകുമാർ തന്ത്രി, ഇ.കെ. ലാലപ്പൻ തന്ത്രി, പി.സി. ബൈജു തന്ത്രി, എ.ബി. വിശ്വംഭരൻ തന്ത്രി എന്നിവർ വാർത്താസമ്മേളനത്തിൽ പങ്കെടുത്തു.

തെരുവുനായ കടിച്ചയാളെ വീണ്ടും ആക്രമിച്ചു

പരിയാരം: തെരുവുനായ ആക്രമണം പതിവായിമാറിയ പരിയാരത്ത് കഴിഞ്ഞദിവസം തെരുവുനായയുടെ കടിയേറ്റയാൾക്കുനേരെ വീണ്ടും ആക്രമണം. മാവേലി സ്റ്റോപ്പിലെ വ്യപാരിയെയാണ് വീണ്ടും തെരുവുനായ ആക്രമിച്ചത്. കഴിഞ്ഞ ആഴ്ച തെരുവുനായയുടെ കടിയേറ്റേ വ്യാപാരി ചികിത്സയിലായിരുന്നു. ഇന്നലെ കടയുടെ മുൻപിൽ നില്ക്കുമ്പോഴാണ് വീണ്ടും ആക്രമിച്ചത്. ഈ പരിസരത്ത് സ്ഥിരമായി നാട്ടുകാരെ ആക്രമിക്കുന്ന തെരുവുനായയാണ് ആക്രമിച്ചത്. പഞ്ചായത്ത് അധികൃതർക്ക് നാട്ടുകാർ പരാതിനല്കിയെങ്കിലും യാതൊരു പ്രതികരണവും ഇല്ലാത്ത അവസ്ഥയാണ്.

പൂകൃഷി വിളവെടുത്തു

കോടാലി: കൊരേച്ചാല്‍ ശ്രീദുര്‍ഗാ സ്വയംഭൂ കിരാതപാര്‍വതിക്ഷേത്ര മൈതാനിയില്‍ കൃഷിചെയ്ത ചെണ്ടുമല്ലി വിളവെടുത്തു. ശബരിമലക്ഷേത്രം മുന്‍ മേല്‍ശാന്തി എ.വി. ഉണ്ണികൃഷ്ണന്‍ നമ്പൂതിരി വിളവെടുപ്പ് ഉദ്ഘാടനംചെയ്തു. ക്ഷേത്രം ട്രസ്റ്റ് കമ്മിറ്റി വൈസ് പ്രസിഡന്‍റ് സുധീഷ് വെട്ടിയാട്ടില്‍ അധ്യക്ഷതവഹിച്ചു. പൂകൃഷിക്ക് മേല്‍നോട്ടംവഹിച്ച ദിവാകരന്‍ കുറ്റിലിക്കാടനെ ചടങ്ങില്‍ ആദരിച്ചു.

വിജ്ഞാനകേരളം പ്രദേശിക തൊഴിൽമേള

ചാലക്കുടി: നഗരസഭയുടെയും ബ്ലോക്ക് പഞ്ചായത്തിന്‍റെയും സംയുക്താഭിമുഖ്യത്തിൽ പ്രാദേശിക തൊഴിൽമേളനടത്തി. ‌വിജ്ഞാനകേരളം തൊഴിൽമേളയുടെ ഭാഗമായി ഗ്രാമപഞ്ചായത്തുകളുടെയും കുടുംബശ്രീയുടെയും സഹകരണത്തോടെയാണ് തൊഴിൽമേള. സനീഷ്കുമാർ ജോസഫ് എംഎൽഎ ഉദ്ഘാടനംചെയ്തു. നഗരസഭ ചെയർപേഴ്സൺ ഷിബു വാലപ്പൻ അധ്യക്ഷതവഹിച്ചു. ബ്ലോക്ക് പഞ്ചായത്ത് പ്രസിഡന്‍റ് വേണു കണ്‌ഠരുമഠത്തിൽ മുഖ്യാതിഥിയായി. 100 ലേറെ തൊഴിലന്വേഷകരും 20ലേറെ തൊഴിൽ സ്ഥാപനങ്ങളും മേളയിൽ പങ്കെടുത്തു. നഗരസഭ വികസനകാര്യ സ്റ്റാൻഡിംഗ് കമ്മിറ്റി ചെയർമാൻ കെ.വി. പോൾ, കില കോ-ഓർഡിനേറ്റർ വി.കെ. ശ്രീധരൻ, ബ്ലോക്ക് പഞ്ചായത്ത് വൈസ് പ്രസിഡന്‍റ് വനജ ദിവാകരൻ, കാടുകുറ്റി ഗ്രാമപഞ്ചായത്ത് പ്രസിഡന്‍റ് പ്രിൻസി ഫ്രാൻസിസ്, കോടശരി ഗ്രാമപഞ്ചായത്ത് പ്രസിഡന്‍റ് കെ.പി. ജെയിംസ്, ബ്ലോക്ക് ആരോഗ്യ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ സി.വി. ആന്‍റണി, വാർഡ് കൗൺസിലർ നിത പോൾ, ബ്ലോക്ക് പഞ്ചായത്ത് സെക്രട്ടറി പി.ജി. പ്രദീപ്, നഗരസഭാ സെക്രട്ടറി കെ. പ്രമോദ്, ജോയിന്‍റ് ബ്ലോക്ക് ഡെവലപ്മെന്‍റ് ഓഫീസർ പി. ജഗദീഷ്, മോഡൽ ബോയ്സ് ഹൈസ്കൂൾ ഹെഡ്മിസ്ട്രസ് പി. മിനി തുടങ്ങിയവർ പ്രസംഗിച്ചു.

രംഗരേസ് ക്രൈസ്റ്റ് വിദ്യാനികേതനില്‍ അരങ്ങേറി

ഇരിങ്ങാലക്കുട: വിദ്യാര്‍ഥിഹൃദയങ്ങളില്‍ ദേശാഭിമാനമുണര്‍ത്തി ക്രൈസ്റ്റ് വിദ്യാനികേതന്‍ സംഘടിപ്പിച്ച കളേഴ്‌സ് ഓഫ് ഇന്ത്യ പ്രോഗ്രാം രംഗരേസ് ശ്രദ്ധേയമായി. ഒന്ന്, രണ്ട് ക്ലാസുകളിലെ മുന്നൂറ്റിഎഴുപതോളം കുരുന്നുകളെ അണിനിരത്തി ഭാരതത്തിന്‍റെ വ്യത്യസ്ത സംസ്‌കാരങ്ങളും സംസ്ഥാനങ്ങളുടെ വൈവിധ്യവും ഐക്യവും അരങ്ങേറി. റിട്ട.സുബൈദാര്‍ പി.എ. വര്‍ഗീസ്, പി.പി. വിന്‍സെന്‍റ് എന്നിവര്‍ വിശിഷ്ടാതിഥികളായി.‍ പ്രിന്‍സിപ്പല്‍ ഫാ. ജോയ് ആലപ്പാട്ട്, മാനേജര്‍ ഫാ. ജോയ് പീണിക്കപറമ്പില്‍, റെജിന്‍ പാലത്തിങ്കല്‍, ഡീന തോമസ് എന്നിവര്‍ സന്നിഹിതരായി.

പിടികിട്ടാപ്പുള്ളി പിടിയിൽ

മാള: മടത്തുംപടി ചക്കാട്ടിക്കുന്നിൽ യുവാവിനെ മർദിച്ച സംഭവത്തിലെ പ്രതി പിടിയിൽ. പുത്തൻവേലിക്കര ചെമ്പിശേരി ഗോകുൽ(30)നെയാണ് പുത്തൻവേലിക്കരയിൽനിന്നു അറസ്റ്റ് ചെയ്തത്. ജാമ്യംനേടിയശേഷം ഒളിവിൽ പോയതിനെ തുടർന്ന് ഇയാളെ പിടികൂടുന്നതിനായി കോടതി പിടികിട്ടാപ്പുള്ളി വാറണ്ട് പുറപ്പെടുവിച്ചിരുന്നു. ഈ വാറണ്ട് പ്രകാരമാണ് ഇയാളെ അറസ്റ്റ് ചെയ്തത്. മാള പോലീസ് സ്റ്റേഷൻ എസ്എച്ച്ഒ സജിൻ ശശി, എസ്ഐ ബെന്നി, ജിഎസ്‌സിപിഒ മാരായ ഉണ്ണികൃഷ്ണൻ, ജിബിൻ എന്നിവർ ചേർന്നാണ് പ്രതിയെ പിടികൂടിയത്.

അതിരപ്പിള്ളി ഉന്നതി നിവാസികൾക്കായി പരാതിപരിഹാര അദാലത്ത് നടത്തി

അതിരപ്പിള്ളി: മേഖലയിലെ ഉന്നതി നിവാസികൾക്കായി വിവിധ വകുപ്പുകളുടെ സഹകരണത്തോടെ പരാതിപരിഹാര അദാലത്ത് നടത്തി. തൃശൂർ റൂറൽ ജില്ലാ പോലീസ് മേധാവി ബി. കൃഷ്ണകുമാറിന്‍റെ നേതൃത്വത്തിലാണ് അദാലത്ത് നടത്തിയത്. തുടർന്ന് വാഴച്ചാൽ ഉന്നതിയിൽ വിവിധ വകുപ്പുകളിലെ പ്രതിനിധികളോടൊത്ത് സന്ദർശനംനടത്തി. കണ്ണൻകുഴിയിലെ അതിരപ്പിള്ളി ഗ്രാമ പഞ്ചായത്ത് കമ്മ്യൂണിറ്റിഹാളിൽ നടത്തിയ പരാതി പരിഹാരഅദാലത്തിൽ വാഴച്ചാൽ, പൊകലപ്പാറ, പിള്ളപ്പാറ, പൊരിങ്ങൽകുത്ത് ഉന്നതികളിൽനിന്നു കണ്ണംകുഴി എസ്‌സി ഉന്നതിയിൽ നിന്നുമായി നൂറോളംപേർ പങ്കെടുത്തു. 82 പരാതികൾ സ്വീകരിച്ചു. പരാതികൾ തുടർ നടപടികൾക്കായി ബന്ധപ്പെട്ട ഉദ്യോഗസ്ഥർക്കായി കൈമാറുകയും അതിൽ സ്വീകരിക്കാവുന്നതായ നടപടികൾ ഉന്നതി നിവാസികളെ അറിയിക്കുകയുംചെയ്തു. തൃശൂർ റൂറൽ സ്പെഷൽ ബ്രാഞ്ച് ഡിവൈഎസ്പി പി.ആർ. ബിജോയ്‌, മലക്കപ്പാറ എസ്എച്ച്ഒ കെ. കുമാർ. സബ് ഇൻസ്‌പെക്ടർമാരായ കെ.എ. മാർട്ടിൻ, അനിൽ, വനിതാ പോലീസ് സ്റ്റേഷൻ എസ്എച്ച്ഒ ഇൻചാർജ് എസ്ഐ ഇ.യു. സൗമ്യ, ഡെപ്യൂട്ടി എക്സെെസ് കമ്മീഷണർ വി. സുഭാഷ്, എക്സൈസ് സർക്കിൾ ഇൻസ്പെക്ടർ എൻ. ശങ്കർ എന്നീ ഉദ്യോഗസ്ഥരും പങ്കെടുത്തു. കറുകുറ്റി അപ്പോളോ അഡ്‌ലക്സ് ആശുപത്രിയിലെ ഡോ. അമലിന്‍റെ നേതൃത്വത്തിലുള്ള മെഡിക്കൽസംഘം ഉന്നതി നിവാസികൾക്കായി സൗജന്യ മെഡിക്കൽ ക്യാമ്പും നടത്തി.

കേരള ഡബിള്‍സ് ബാഡ്മിന്‍റണ്‍ ടൂര്‍ണമെന്‍റ് ഇന്ന്

ഇരിങ്ങാലക്കുട: സീനിയര്‍ ചേംബര്‍ ഇന്‍റര്‍നാഷണല്‍ ഇരിങ്ങാലക്കുട ലീജിയന്‍ സംഘടിപ്പിക്കുന്ന ഓള്‍ കേരള ഡബിള്‍സ് ബാഡ്മിന്‍റണ്‍ ടൂര്‍ണമെന്‍റ് ഇന്ന് ക്രൈസ്റ്റ് അക്വാട്ടിക് ഷട്ടില്‍ അക്കാദമിയില്‍ നടക്കും. 100 + കാറ്റഗറിയില്‍ മവിസ് 350 ഷട്ടില്‍ ഉപയോഗിച്ചാണ് മത്സരങ്ങള്‍. കളിക്കാരുടെ കുറഞ്ഞ പ്രായം 40 വയസാണ്. ആകെ 32 ടീമുകള്‍ക്ക് പങ്കെടുക്കാം. 115+ കാറ്റഗറിയില്‍ ഫെതര്‍ ഷട്ടില്‍ ആണ് ഉപയോഗിക്കുന്നത്. കളിക്കാരുടെ കുറഞ്ഞപ്രായം 50 വയസ്. 16 ടീമുകള്‍ക്ക് പങ്കെടുക്കാം. ഇരുവിഭാഗങ്ങളിലെയും വിജയികള്‍ക്ക് 6,000 രൂപയും രണ്ടാംസ്ഥാനക്കാര്‍ക്ക് 4,000 രൂപയും സെമിഫൈനലിസ്റ്റുകള്‍ക്ക് ആയിരംരൂപയും നല്‍കുമെന്ന് സംഘാടകസമിതി അംഗങ്ങളായ വില്‍സണ്‍ കാഞ്ഞാണിക്കാരന്‍, ജോണ്‍ പാറക്ക, സെബാസ്റ്റ്യന്‍ വെള്ളാനിക്കാരന്‍, ജയന്‍ നമ്പ്യാര്‍, പീറ്റര്‍ ജോസഫ്, ആള്‍ജോ ജോസഫ്, വി.പി. അജിത് കുമാര്‍ എന്നിവര്‍ അറിയിച്ചു.

വ്യാപാരി കുഴഞ്ഞുവീണു മരിച്ചു

കയ്പമംഗലം: ചെന്ത്രാപ്പിന്നിയിൽ വ്യാപാരി കുഴഞ്ഞു വീണ് മരിച്ചു. ചെന്ത്രാപ്പിന്നി ഹൈസ്കൂളിന് പടിഞ്ഞാറ് ഭാഗത്ത് താമസിക്കുന്ന മാമ്മക്കാനത്ത്പരേതനായ ഇസ്മായിൽ (ഖാലിദ്) മകൻ ഷാനവാസാണ് (51) മരിച്ചത്. ഇന്നലെ രാവിലെ പതിനൊന്നോടെയായിരുന്നു സംഭവം. കട തുറന്ന ശേഷം മീൻ വാങ്ങി വീട്ടിൽ എത്തിയതായിരുന്നു. പെട്ടന്ന് കുഴഞ്ഞുവീണ ഇദ്ദേഹത്തെ ഉടൻ തന്നെ ആശുപത്രിയിൽ എത്തിയെങ്കിലും മരിച്ചു.‌ ചിറക്കൽ പള്ളിക്ക് സമീപം ബോചെ ടീ ആന്‍ഡ് ഇലക്ട്രിക് സ്കൂട്ടർ വ്യാപാര സ്ഥാപനം നടത്തുകയാണ്. കബറടക്കം നടത്തി.

ഭർത്താവ് മരിച്ച് 33-ാം ദിവസം ഭാര്യയും മരിച്ചു

ചേറ്റുവ: ഭർത്താവ് മരിച്ച് 33-ാം ദിവസം ഭാര്യയും മരിച്ചു. ചേറ്റുവ കടവിന് പടിഞ്ഞാറ് മന്നത്ത് മാടക്കായിൽ താമസിക്കുന്ന മന്നത്ത് പരേതനായ കുഞ്ഞപ്പുവിന്‍റെ ഭാര്യ തങ്ക (72) ആണ് മരിച്ചത്. സിഎംപി നേതാവായിരുന്ന ഭർത്താവ് കുഞ്ഞപ്പു കഴിഞ്ഞ മാസം 20 നായിരുന്നു മരിച്ചത്. മക്കൾ: സുജാത, ഉഷ, ഗീത, ലത, പരേതയായ ഷീജ. മരുമക്കൾ: പ്രദീപ്, കുമാർ, പ്രകാശൻ, പരേതരായ സുബ്രഹ്മണ്യൻ, ചന്ദ്രൻ.

ഭിന്നശേഷികുട്ടികളുടെ പ്രദർശന വിപണനമേള ശ്രദ്ധനേടി

തൃശൂർ: അയ്യന്തോൾ സിവിൽ സ്റ്റേഷനിൽനടന്ന കൂടെ 4.0 പ്രദർശനവിപണന മേളയിൽ ഭിന്നശേഷികുട്ടികൾ നിർമിച്ച ഉൽപ്പന്നങ്ങൾ ശ്രദ്ധേയമായി. ഭിന്നശേഷികുട്ടികളുടെ കഴിവുകൾ പുറത്തുകൊണ്ടുവരാനും സാന്പത്തിക സ്വയംപര്യാപ്തതയ്ക്കു പിന്തുണ നൽകാനും ലക്ഷ്യമിട്ട് ജില്ലാ ഭരണകൂടം സംഘടിപ്പിച്ച മേളയിൽ ജില്ലയിലെ ബഡ്സ് സ്കൂളുകളിലും മറ്റ് സ്പെഷൽ സ്കൂളുകളിലുമായി പഠിക്കുന്ന കുട്ടികളാണ് ആഭരണങ്ങൾ, കരകൗശലവസ്തുക്കൾ, സോപ്പ്, ഫിനോയിൽ, ബാഗുകൾ, അച്ചാർ, വിവിധതരം ഭക്ഷണവസ്തുക്കൾ തുടങ്ങിയ ഉൽപ്പന്നങ്ങൾ തയാറാക്കിയത്. സമാപനദിവസമായ ഇന്നലെ ജില്ലാ കളക്ടർ അർജുൻ പാണ്ഡ്യൻ മേള സന്ദർശിച്ച് കുട്ടികളുടെ നിർമാണങ്ങൾ കാണുകയും അവരെ അഭിനന്ദിക്കുകയും ചെയ്തു. പകരം കളക്ടർക്കു സ്നേഹസമ്മാനങ്ങൾ നൽകി കുട്ടികൾ നന്ദി അറിയിച്ചു. പെരിങ്ങണ്ടൂർ പോപ്പ് പോൾ മേഴ്സി ഹോമിലെ വിദ്യാർഥികൾ ചെണ്ടമേളത്തോടെയാണ് കളക്ടറെ സ്വീകരിച്ചത്. സബ് കളക്ടർ അഖിൽ വി. മേനോനും കളക്ടറോടൊപ്പം ഉണ്ടായിരുന്നു.

ഡിജിറ്റൽ യൂണിവേഴ്സിറ്റിയും ജ്യോതി എൻജി. കോളജും ധാരണാപത്രം ഒപ്പുവച്ചു

തൃശൂർ: സൈബർ സുരക്ഷാമേഖലയിൽ ഗവേഷണവും പരിശീലനവും വിപുലീകരിക്കുന്നതിനായി ജ്യോതി എൻജിനീയറിംഗ് കോളജ് സൈബർ സെക്യൂരിറ്റി വിഭാഗവും കേരള ഡിജിറ്റൽ യൂണിവേഴ്സിറ്റിയും കേരള സ്റ്റേറ്റ് ഓഡിറ്റ് ആൻഡ് അഷ്വറൻസ് സെന്‍ററും തമ്മിൽ ധാരണാപത്രം ഒപ്പുവച്ചു. കരാറിന്‍റെ ഭാഗമായി സൈബർ സുരക്ഷാ ഓഡിറ്റ്, എത്തിക്കൽ ഹാക്കിംഗ്, സുരക്ഷാ വിലയിരുത്തലുകൾ, ഇന്‍റേണ്‍ഷിപ്പുകൾ, ഹാക്കത്തോണുകൾ, ഗവേഷണപദ്ധതികൾ, വിദഗ്ധ ക്ലാസുകൾ എന്നിവ സംയുക്തമായി സംഘടിപ്പിക്കും. വിദ്യാർഥികൾക്ക് ആധുനിക സുരക്ഷാസാങ്കേതികവിദ്യകളിൽ പ്രാവീണ്യം വർധിപ്പിക്കുകയും വ്യവസായ, അക്കാദമിക് സഹകരണത്തിലൂടെ തൊഴിൽസാധ്യതകൾ വികസിപ്പിക്കുകയുമാണ് ലക്ഷ്യം. കേരള സ്റ്റേറ്റ് ഓഡിറ്റ് ആൻഡ് അഷ്വറൻസ് സെന്‍റർ തലവൻ എം.ഡി. മെറാജ് ഉദീൻ, സെക്യൂരിറ്റി അനലിസ്റ്റ് യാസിക്ക്, കോളജ് എക്സിക്യൂട്ടീവ് മാനേജർ ഫാ. ഡേവിഡ് നെറ്റിക്കാടൻ, അക്കാദമിക് ഡയറക്ടർ റവ.ഡോ. ജോസ് കണ്ണന്പുഴ, സൈബർ സെക്യൂരിറ്റി വിഭാഗം മേധാവി ഡോ. ഗീതു മേരി ജോർജ് എന്നിവർ പ്രസംഗിച്ചു .

വിദ്യാർഥികളെ കൊള്ളയടിക്കാൻ അനുവദിക്കില്ല: എഐഎസ്എഫ്

തൃശൂർ: കാർഷികസർവകലാശാലയിൽ വിവിധ കോഴ്സുകളുടെ ഫീസ് കുത്തനേ കൂട്ടിയതു വിദ്യാർഥിവിരുദ്ധമെന്നും ഇത്തരം കച്ചവടതന്ത്രങ്ങൾ ഇടതുനയമല്ലെന്നും എഐഎസ്എഫ് ജില്ലാ സെക്രട്ടറി മിഥുൻ പോട്ടക്കാരൻ പറഞ്ഞു. ഫീസ് വർധനയ്ക്കെതിരേ ഇടതുവിദ്യാർഥിസംഘടനകൾ സംയുക്തമായി സംഘടിപ്പിച്ച പ്രതിഷേധപരിപാടി ഉദ്ഘാടനം ചെയ്യുകയായിരുന്നു അദ്ദേഹം. ബിരുദത്തിനു 50000 രൂപയായും ബിരുദാനന്തരബിരുദത്തിനു 55000 രൂപയായും പിഎച്ച്ഡിക്കു 60000 രൂപയായുമായാണ് സെമസ്റ്റർ ഫീസ് ഉയർത്തിയിരിക്കുന്നത്. ഇതു യഥാക്രമം 12000, 17780, 18780 രൂപയായിരുന്നു. സർവകലാശാലയുടെ സാമ്പത്തികബാധ്യതയെ മറികടക്കാനാണു ഫീസ് വർധിപ്പിക്കുന്നതെന്ന വാദം അംഗീകരിക്കാനാവില്ലെന്നും പറഞ്ഞു. എസ്എഫ്ഐ യൂണിറ്റ് പ്രസിഡന്‍റ് എബിൻ അധ്യക്ഷത വഹിച്ചു. എഐഎസ്എഫ് ജില്ലാ പ്രസിഡന്‍റ് കെ.എസ്. അഭിറാം, കേരള അഗ്രികൾച്ചർ യൂണിവേഴ്സിറ്റി ജനറൽ സെക്രട്ടറി മെഹറിൻ, യുയുസി നന്ദിത, ജനറൽ സെക്രട്ടറി അഫ്സൽ, ജോയിന്‍റ് സെക്രട്ടറി ആനന്ദ് എന്നിവർ പ്രസംഗിച്ചു. എഐഎസ്എഫ് യൂണിറ്റ് പ്രസിഡന്‍റ് ഇഹ്ത്തിഷം സ്വാഗതവും ജനറൽ സെക്രട്ടറി അഭയ് നന്ദിയും പറഞ്ഞു. ഫീസ് വർധിപ്പിക്കാനുള്ള അക്കാദമിക് കൗൺസിൽ തീരുമാനം അംഗീകരിക്കില്ലെന്നും പിൻവലിക്കണമെന്നും ആർവൈഎഫ് ജില്ലാ സെക്രട്ടറി ആസാദ് കാഷ്മീരിയും പ്രസിഡന്‍റ് വിഷ്ണു രവീന്ദ്രനും ആവശ്യപ്പെട്ടു.

ആമ്പല്ലൂരിലെ ടാറിംഗ്; ദേശീയപാതയില്‍ മണിക്കൂറുകള്‍നീണ്ട ഗതാഗതക്കുരുക്ക്

ആമ്പല്ലൂര്‍: അടിപ്പാത നിര്‍മാണം നടക്കുന്ന ആമ്പല്ലൂരില്‍ സര്‍വീസ് റോഡില്‍ ടാറിംഗ് ആരംഭിച്ചതോടെ വന്‍ഗതാഗതക്കുരുക്ക്. തൃശൂര്‍ ഭാഗത്തേക്കുള്ള പാതയിലാണ് ഗതാഗതക്കുരുക്ക് അനുഭവപ്പെട്ടത്. പുതുക്കാട് കടന്നു വാഹനങ്ങളുടെ നിര നീണ്ടു. പുതുക്കാടുമുതല്‍ ആമ്പല്ലൂര്‍വരെയുള്ള സര്‍വീസ് റോഡും മണിക്കൂറുകളോളം സ്തംഭിച്ചു. ബസുകള്‍ ഉള്‍പ്പടെയുള്ള വാഹനങ്ങള്‍ ബസാര്‍ റോഡിലൂടെ കടന്നുപോകുന്നതും ഗതാഗതക്കുരുക്കിനിടയാക്കി. തൃശൂര്‍ ഭാഗത്തേക്കുള്ള ചെറുവാഹനങ്ങള്‍ നന്തിക്കര, പുതുക്കാട് എന്നിവിടങ്ങളില്‍ വഴിതിരിഞ്ഞാണ് പോയിരുന്നത്. ബന്ധപ്പെട്ട ഉദ്യോഗസ്ഥര്‍ ഇല്ലാതെയാണ് ആമ്പല്ലൂരില്‍ ടാറിംഗ് നടത്തിയിരുന്നത്. മൂന്നുവരിപ്പാതയിലൂടെ എത്തുന്ന വാഹനങ്ങള്‍ ആമ്പല്ലൂരില്‍ സര്‍വീസ് റോഡിലൂടെയാണ് ഒറ്റവരിയായി കടത്തിവിട്ടിരുന്നത്. ആംബുലന്‍സ് ഉള്‍പ്പടെ നൂറുകണക്കിനു വാഹനങ്ങള്‍ മണിക്കൂറുകളോളം കുരുക്കില്‍പ്പെട്ട് വലഞ്ഞിട്ടും ഗതാഗതം സുഗമമാക്കാന്‍ അധികൃതര്‍ യാതൊരു നടപടിയും എടുക്കുന്നില്ലെന്നാണ് ആക്ഷേപം.

മുരിങ്ങൂരിലും ടാറിംഗ് നടപടികൾക്കു തുടക്കം

മുരിങ്ങൂർ: അടിപ്പാതനിർമാണം നടക്കുന്ന ദേശീയപാതയിലെ മുരിങ്ങൂർ ജംഗ്ഷനിൽ സർവീസ് റോഡുകളുടെ ടാറിംഗിനായുള്ള മുന്നൊരുക്കങ്ങൾ തുടങ്ങി. ഇന്നലെ രാത്രിയോടെയാണ് മെഷനറികളും അനുബന്ധവാഹനങ്ങളും എത്തിയത്. എട്ടരയോടെ ടാറിംഗിനുമുമ്പ് ചെയ്യുന്ന പ്രഷർ പമ്പുകൾ ഉപയോഗിച്ചുള്ള പൊടിനീക്കൽ തുടങ്ങി. കുഴികളിൽ മെറ്റലിട്ട് അടച്ചുള്ള റോഡ് ലെവൽ ചെയ്യലും ആരംഭിച്ചിട്ടുണ്ട്. വാഹനബാഹുല്യം കുറഞ്ഞ് രാത്രി പത്തരയോടെ ടാറിംഗ് തുടങ്ങുമെന്നാണ് നിർമാണ കമ്പനി അധികൃതർ പറഞ്ഞത്. മുരിങ്ങൂർ, പെരുമ്പി, ചിറങ്ങര ഭാഗങ്ങളെല്ലാം പൊടിനിറഞ്ഞ് ഇരുചക്രവാഹന യാത്രികരടക്കം ഏറെ ദുരിതത്തിലായതോടെ പ്രതിഷേധങ്ങളും ഉയർന്നിരുന്നു. വ്യാഴാഴ്ച രാത്രി സർവീസ് റോഡുകൾ ടാർ ചെയ്യുമെന്നു ഡിവൈഎസ്പിയുടെ സാന്നിധ്യത്തിൽ കൊരട്ടി, കാടുകുറ്റി, മേലൂർ പഞ്ചായത്തിലെ പ്രസിഡന്‍റുമാർ അടക്കമുള്ള ജനപ്രതിനിധികൾക്ക് എൻഎച്ച്എഐ പ്രോജക്ട് എൻജീനിയർ അമൽ ഉറപ്പുനൽകിയെങ്കിലും പാലിക്കപ്പെട്ടിരുന്നില്ല. വ്യാഴാഴ്ച ഉച്ചതിരിഞ്ഞ് മൂന്നുമണിമുതൽ ചാലക്കുടി റസ്റ്റ് ഹൗസിൽ രണ്ടരമണിക്കൂറോളം ഹൈവേ ഉദ്യോഗസ്ഥനെ ബന്ദിയാക്കിയതിനെതുടർന്നു നടന്ന ചർച്ചയിലാണ് വ്യാഴാഴ്ചതന്നെ ടാർ ചെയ്യാമെന്ന് ഉറപ്പുനൽകിയത്. എന്നാൽ, വെള്ളിയാഴ്ച പകലും നടപടി സ്വീകരിക്കാത്തതിനെതുടർന്നു കൊരട്ടി, കാടുകുറ്റി, മേലുർ പഞ്ചായത്തിലെ പ്രസിഡന്‍റുമാരും ജനപ്രതിനിധികളും എൽഡിഎഫും മുരിങ്ങൂർ ജംഗ്ഷനിൽ ഇന്നുരാവിലെമുതൽ അനിശ്ചിതകാല നിരാഹാരസമരം നടത്തുമെന്നു പ്രഖ്യാപിച്ചിരുന്നു. തുടർന്നു സമ്മർദങ്ങൾക്കു വഴങ്ങിയാണ് രാത്രി പ്രാരംഭനടപടികളെടുത്തതും രാത്രി പത്തരയോടെ ടാർ ചെയ്യാൻ എൻഎച്ച്എഐയും നിർമാണക്കമ്പനിയും സന്നദ്ധമായതും.

സൈബര്‍ ഭീഷണികള്‍ക്കെതിരേ ക്രൈസ്റ്റില്‍ അന്താരാഷ്ട്ര സെമിനാര്‍

ഇരിങ്ങാലക്കുട: ക്രൈസ്റ്റ് കോളജ് കമ്പ്യൂട്ടര്‍ സയന്‍സ് വിഭാഗത്തിന്‍റെ ആഭിമുഖ്യത്തില്‍ സൈബര്‍ ഭീഷണികള്‍ക്കെതിരേ അക്കാദമിക് ഇന്‍ഡസ്ട്രിയല്‍ സമീപനങ്ങള്‍ എന്ന വിഷയത്തെ അടിസ്ഥാനമാക്കി അന്താരാഷ്ട്ര സെമിനാര്‍ നടന്നു. കോളജ് പ്രിന്‍സിപ്പല്‍ റവ.ഡോ. ജോളി ആന്‍ഡ്രൂസ് സിഎംഐ സെമിനാര്‍ ഉദ്ഘാടനംചെയ്തു. വൈസ് പ്രിന്‍സിപ്പല്‍ ഡോ. സേവ്യര്‍ ജോസഫ്, സെല്‍ഫ് ഫിനാന്‍സിംഗ് കോ-ഓര്‍ഡിനേറ്റര്‍ ഡോ.ടി. വിവേകാനന്ദന്‍, ഡിപ്പാര്‍ട്ട്‌മെന്‍റ് മേധാവി കെ.കെ. പ്രിയങ്ക, വര്‍ഷാ ഗണേഷ് എന്നിവര്‍ പ്രസംഗിച്ചു. അബുദാബിയിലെ ലീഡ് സൈബര്‍ സെക്യൂരിറ്റി വിദഗ്ധ ശ്രീലക്ഷ്മിയും കൊച്ചി സയന്‍സ് ആന്‍ഡ് ടെക്‌നോളജി സര്‍വകലാശാല പ്രഫസര്‍ ഡോ.പി. വിനോദും നയിച്ച സെമിനാറില്‍ സൈബര്‍ ഭീഷണികളെ തിരിച്ചറിയാനും പ്രതിരോധിക്കാനും വേണ്ട നവീന മാര്‍ഗങ്ങള്‍, സുരക്ഷാസംവിധാനങ്ങള്‍, പരിശീലന രീതികള്‍ എന്നിവയെല്ലാം ചര്‍ച്ചചെയ്തു.

കത്തീഡ്രല്‍ കെസിവൈഎമ്മിന്‍റെ കേശദാനം മഹാദാനം

ഇരിങ്ങാലക്കുട: കത്തീഡ്രല്‍ കെസിവൈഎം കേശദാനം മഹാദാനം സംഘടിപ്പിച്ചു. അമല മെഡിക്കല്‍ കോളജിന്‍റെ സഹകരണത്തോടെ നടന്ന പരിപാടിയുടെ ഭാഗമായി കാന്‍സര്‍ രോഗികള്‍ക്ക് വിഗ് നിര്‍മിക്കുന്നതിന് മുടി ദാനംചെയ്യുന്നതിനായി നൂറോളംപേര്‍ തയാറായി. ഇരിങ്ങാലക്കുട കത്തീഡ്രല്‍ കെസിവൈഎം പ്രസിഡന്‍റ് ഗോഡ്‌സണ്‍ റോയ് അധ്യക്ഷതവഹിച്ചു. ഇരിങ്ങാലക്കുട അസിസ്റ്റന്‍റ് വികാരി ഫാ. ഓസ്റ്റിന്‍ പാറക്കല്‍ ഉദ്ഘാടനംനിര്‍വഹിച്ചു. കെസിവൈഎം വര്‍ക്കിംഗ് ഡയറക്ടര്‍ ഫാ. ബെല്‍ഫിന്‍ കോപ്പുള്ളി, പ്രോഗ്രാം കണ്‍വീനര്‍മാരായ അന്ന ടോമി, ജോസഫ് കരോളിന്‍ എന്നിവര്‍ സംസാരിച്ചു. ഏറ്റവും കൂടുതല്‍ വിദ്യാര്‍ഥികളെ പങ്കെടുപ്പിച്ച സ്‌കൂള്‍ വിഭാഗത്തില്‍നിന്ന് ലിറ്റില്‍ഫ്ലവര്‍ ഇരിങ്ങാലക്കുട സ്‌കൂളിനെയും കോളജ് വിഭാഗത്തില്‍നിന്ന് സെന്‍റ് ജോസഫ്‌സ് കോളജിനെയും തെരഞ്ഞെടുത്തു.

പൊന്മാനിക്കുടം കടവിൽ ബാരിക്കേഡ് സ്ഥാപിച്ചു

പൊന്മാനിക്കുടം: ബൈക്ക് യാത്രികനായ യുവാവ് പുഴയില്‍വീണുമരിച്ച പൊൻമാനിക്കുടം കടവിൽ ബാരിക്കേഡ് സ്ഥാപിച്ച് ബിജെപി പ്രവർത്തകർ. അപകടസാധ്യത ഉണ്ടായിരുന്ന പ്രദേശത്താണ് യുവാവിന് ജീവൻ നഷ്ടമായത്. പണ്ടുമുതലെ പ്രദേശവാസികൾ ഇവിടെ ബാരിക്കേഡ് വേണമെന്ന ആവശ്യം ഉന്നയിച്ചിരുന്നുവെങ്കിലും അധികൃതർ അവഗണിച്ചതാണ് ദുരന്തത്തിന് കാരണമെന്ന് ബിജെപി ആരോപിച്ചു. പെരിഞ്ഞനം പഞ്ചായത്ത് കമ്മിറ്റി പ്രസിഡന്‍റ് രമേശൻ ഞാറ്റുവെട്ടി, ജനറൽ സെക്രട്ടറി സുരേഷ് ബാബു എന്നിവരുടെ നേതൃത്വത്തിലായിരുന്നു ബാരിക്കേഡ് സ്ഥാപിച്ചത്. കടവിൽ എത്രയുംപെട്ടെന്ന് സ്ഥിരമായ സുരക്ഷാസംവിധാനം ഒരുക്കണമെന്ന് ബിജെപി ആവശ്യപ്പെട്ടു.

സഹപാഠികളുടെ വീട്ടില്‍ വെളിച്ചമെത്തിച്ച് സ്റ്റുഡന്‍റ് പോലീസ് കേഡറ്റുകള്‍

ചെമ്പുച്ചിറ: സഹപാഠികളുടെ വീട്ടിലെ വൈദ്യുതിബില്‍ അടച്ചുതീര്‍ത്ത് എസ്പിസി കേഡറ്റുകള്‍. ചെമ്പുച്ചിറ സര്‍ക്കാര്‍ ഹയര്‍സെക്കന്‍ഡറി സ്‌കൂളിലെ സ്റ്റുഡന്‍റ് പോലീസ് കേഡറ്റുകളാണ് മാതൃകയായത്. സഹോദരങ്ങളായ സഹപാഠികളുടെ വീട്ടിലെ വൈദ്യുതിബില്‍ അടയ്ക്കാന്‍ കഴിയാഞ്ഞതിനെ തുടര്‍ന്ന് അധികൃതര്‍ കണ്ക്ഷന്‍ വിഛേദിച്ചിരുന്നു. ഇതറിഞ്ഞ കേഡറ്റുകള്‍ അടുത്താഴ്ച സ്‌കൂളില്‍നടക്കുന്ന ക്യാമ്പിലെ ആദ്യദിനത്തിലെ പ്രഭാതഭക്ഷണം ഉപേക്ഷിച്ച് അതിനായികരുതിയ തുകയെടുത്ത് സഹപാഠികളുടെ വീട്ടിലെ വൈദ്യുതി ബില്‍ അടയ്ക്കുകയായിരുന്നു. എസ്പിസി യൂണിറ്റിന്‍റെ ചുമതലയുള്ള അധ്യാപകരായ പി.കെ. അജിത, വിസ്മി വര്‍ഗീസ് എന്നിവരുടെ നേതൃത്വത്തില്‍ കേഡറ്റുകള്‍ സഹപാഠികളുടെ വീട്ടിലെത്തി ബില്ലടച്ച രശീതി കൈമാറി.

മാധ്യമങ്ങളുടെ പങ്ക് അഭിനന്ദനാർഹം: കളക്ടര്‌

ചാലക്കുടി: ദേശീയപാതയിലെ യാത്രാദുരിതം അധികാരികളുടെ ശ്രദ്ധയിലെത്തിക്കാൻ ചാലക്കുടി മേഖലയിലെ മാധ്യമപ്രവർത്തകരുടെ കാര്യക്ഷമമായ ഇടപെടൽ അഭിനന്ദനാർഹമാണെന്നു ജില്ലാ കളക്‌ടർ അർജുൻ പാണ്ഡ്യൻ പറഞ്ഞു. അന്തരിച്ച യുവമാധ്യമപ്രവർത്തകൻ മധു സമ്പാളൂരിനെ അനുസ്‌മരിക്കാൻ പ്രസ് ഫോറം, നിർമല കോളജ് ആർട്‌സ് ആൻഡ് സയൻസിന്‍റെ സഹകരണത്തോടെ നടത്തിയ 'മധുസ്‌മൃതി'യുടെ ഭാഗമായി നടത്തിയ മാധ്യമ സെമിനാർ ഉദ്ഘാടനംചെയ്യുകയായിരുന്നു അദ്ദേഹം. ദേശീയപാതയിലെ പ്രശ്നങ്ങൾക്ക് അടിയന്തര പരിഹാരം കാണുമെന്നും കളക്‌ടർ കൂട്ടിച്ചേർത്തു. മുതിർന്ന മാധ്യമപ്രവർത്തകൻ സി.കെ. പോളിനെ കളക്ടർ ആദരിച്ചു. പ്രസിഡന്‍റ് ഭരിത പ്രതാപ് അധ്യക്ഷതവഹിച്ചു. മുൻ പ്രസിഡന്‍റ് കെ.എൻ. വേണു അനുസ്‌മരണപ്രഭാഷണംനടത്തി. നിർമല കോളജ് പ്രിൻസിപ്പൽ ഡോ. ഷാജു ഔസേപ്പ്, പഞ്ചായത്ത് പ്രസിഡന്‍റ് എം.എസ്. സുനിത, ബ്ലോക്ക് പഞ്ചായത്ത് വൈസ് പ്രസിഡന്‍റ് വനജ ദിവാകരൻ, പഞ്ചായത്ത് അംഗം പി.ആർ. ബിബിൻരാജ്, സെക്രട്ടറി അക്ഷര ഉണ്ണിക്കൃഷ്‌ണൻ, വിത്സൻ മേച്ചേരി, ആർജെ ടി.ആർ. ശരത് എന്നിവർ പ്രസംഗിച്ചു.

പുതിയ പോലീസ് എയ്ഡ്പോസ്റ്റ് ആരംഭിച്ചു

ഇരിങ്ങാലക്കുട: ബസ് സ്റ്റാന്‍ഡില്‍ പണിതീര്‍ത്ത പോലീസ് എയ്ഡ്പോസ്റ്റ് പ്രവര്‍ത്തനം ആരംഭിച്ചു. നഗരസഭാ ചെയര്‍പേഴ്സണ്‍ മേരിക്കുട്ടി ജോയ് ഉദ്ഘാടനംനിർവഹിച്ചു. നഗരസഭാ വൈസ് ചെയര്‍മാന്‍ ബൈജു കുറ്റിക്കാടന്‍ അധ്യക്ഷതവഹിച്ചു. സ്റ്റാന്‍ഡിംഗ്കമ്മിറ്റി ചെയര്‍മാന്‍മാരായ ജെയ്സണ്‍ പാറേക്കാടന്‍, ഫെനി എബിന്‍ വെള്ളാനിക്കാരന്‍, അഡ്വ. ജിഷ ജോബി, കൗണ്‍സിലര്‍മാരായ സോണിയ ഗിരി, സിജു യോഹന്നാന്‍, എസ്ഐ കൃഷ്ണപ്രസാദ്, നഗരസഭാ സെക്രട്ടറി എം.എച്ച്. ഷാജിക്, വെസ്റ്റ് ലയണ്‍സ് ക്ലബ് പ്രസിഡന്‍റ് സി.ജെ. ആന്‍റോ എന്നിവര്‍ സംസാരിച്ചു. നഗരസഭയ്ക്കുവേണ്ടി ഇരിങ്ങാലക്കുട വെസ്റ്റ് ലയണ്‍സ് ക്ലബിന്‍റെ നേതൃത്വത്തില്‍ ഭാസിരാജാണ് പോലീസ് എയ്ഡ്പോസ്റ്റ് പണിയുന്നതിനുള്ള സാമ്പത്തിക സഹായം നല്‍കിയത്.

താക്കോല്‍ കാണാനില്ല; നിര്‍മാണ അപാകത പരിശോധിക്കാനെത്തിയ സംഘം മടങ്ങി

ഇരിങ്ങാലക്കുട: ഠാണാവിലുള്ള കൂടല്‍മാണിക്യം ദേവസ്വംവക സംഗമേശ്വര കോംപ്ലക്‌സിന്‍റെ നിര്‍മാണ അപാകതകള്‍ പരിശോധിക്കാന്‍ കോടതി ഉത്തരവിന്‍റെ അടിസ്ഥാനത്തിലെത്തിയ പൊതുമരാമത്ത് സംഘം പരിശോധന നടത്താന്‍കഴിയാതെ മടങ്ങി. കോംപ്ലക്‌സിന്‍റെ താക്കോല്‍ കാണാനില്ല എന്ന മറുപടിയാണ് രാവിലെ പത്തിന് സ്ഥലത്തെത്തിയ പൊതുമരാമത്ത് കെട്ടിടവിഭാഗം ഉദ്യോഗസ്ഥര്‍ക്ക് ദേവസ്വം ജീവനക്കാരനില്‍നിന്നു ലഭിച്ചത്. കെട്ടിടനിര്‍മാണത്തിനായി തന്‍റെ കെെയില്‍നിന്നു 1,63,80,000 രൂപ ദേവസ്വം കൈപ്പറ്റിയെന്നും എന്നാല്‍ സമയബന്ധിതമായി നിര്‍മാണം പൂര്‍ത്തീകരിക്കാത്തതിന്‍റെ പേരിലും നിര്‍മാണത്തിലുണ്ടായ കുറവുകളുടെ പേരിലും കെട്ടിടം ഉപയോഗിക്കാനോ, വാടകയ്ക്ക് കൊടുക്കാനോ കഴിഞ്ഞില്ലെന്നും പണം തിരിച്ചുനല്‍കണമെന്നും ആവശ്യപ്പെട്ട് പ്രവാസി വ്യവസായിയും ഇരിങ്ങാലക്കുട കണ്‌ഠേശ്വരം സ്വദേശിയുമായ കാക്കര ജനാര്‍ദനന്‍ കോടതിയില്‍ ഹര്‍ജി നല്‍കി. തുടര്‍ന്നാണ് നിര്‍മാണ അപാകതകള്‍ പരിശോധിക്കാന്‍ ഇരിങ്ങാലക്കുട സബ് കോടതി ഉത്തരവിട്ടത്. പതിനൊന്നുവരെ കെട്ടിടവിഭാഗം അസി. എന്‍ജിനീയര്‍ പി.എസ്. സുജേഷ്, ഓവര്‍സിയര്‍മാരായ സരിജ, നീതു എന്നിവര്‍ കാത്തുനിന്നെങ്കിലും താക്കോലുമായി ദേവസ്വത്തില്‍നിന്നും ആരുമെത്തിയില്ല. ഇതു സംബന്ധിച്ച നോട്ടീസ് ദേവസ്വം അധികൃതര്‍ക്ക് നേരത്തെതന്നെ നല്‍കിയിരുന്നതായി ഹര്‍ജിക്കാരന്‍റെ അഭിഭാഷകരായ അഡ്വ. മഹേഷ് മേനോന്‍ അറിയിച്ചു. പരിശോധന നടത്താന്‍ കഴിയാത്ത സാഹചര്യം വിശദീകരിച്ച് കോടതിക്ക് റിപ്പോര്‍ട്ട് നല്‍കുമെന്ന് പൊതുമരാമത്തുവകുപ്പ് ഉദ്യോഗസ്ഥര്‍ അറിയിച്ചു. ഹര്‍ജിക്കാരനായ കാക്കര ജനാര്‍ദനനും സ്ഥലത്തെത്തിയിരുന്നു.

മദ്യപാനികളുടെ അഹങ്കാരം; പാടശേഖരം മുഴുവൻ മദ്യക്കുപ്പികൾ

പുന്നംപറമ്പ്: തെക്കുംകര പഞ്ചായത്തിലെ മണലിത്തറ - വിരുപ്പാക്ക റോഡരികിലെ പാടശേഖരത്തിൽ മദ്യപാനികളുടെ വിളയാട്ടം. റോഡരികിലിരുന്നു മദ്യപിച്ചശേഷം കുപ്പികളും പ്ലാസ്റ്റിക് മാലിന്യങ്ങളും സമീപത്തെ പാടശേഖരത്തിലേക്ക് വലിച്ചെറിയുകയാണ് പതിവ്. മണലിത്തറ സ്വദേശി ബോബന്‍റെ ഒരു ഏക്കർ വരുന്ന പാടശേഖരത്തിൽ നിന്നാണ് കഴിഞ്ഞദിവസം പാടശേഖരസമിതി ഭാരവാഹികളും നാട്ടുകാരും കർഷകരും ചേർന്ന് മദ്യകുപ്പികളും പ്ലാസ്റ്റിക്ക് മാലിന്യങ്ങളും പറുക്കിയെടുത്തത്. ഈപ്രദേശത്തേക്ക് പോലീസിന്‍റെ വരവ് കുറവായതിനാലാണ് ഇവിടെ മദ്യപാനികൾ രാത്രിസമയങ്ങളിൽ താണ്ഡവമാടുന്നതെന്ന് കർഷകർ പറഞ്ഞു. കഴിഞ്ഞദിവസം കൃഷിയിറക്കാൻ ട്രാക്ടർ പാടശേഖരത്തേക്ക് ഇറക്കിയതോടെയാണ് മദ്യകുപ്പികളും പ്ലാസ്റ്റിക് മാലിന്യങ്ങളും കണ്ടെത്തിയത്. കൃഷിയിടത്തിൽ ഇനിയും ചില്ലുകുപ്പികൾ പൊട്ടിക്കിടക്കുന്നുണ്ട്. നെൽച്ചെടികൾ നടാനിറങ്ങുന്ന തൊഴിലാളികളുടെ കാലിൽ കുപ്പിചില്ല് കയറുമോ എന്ന ആശങ്കയിലാണ് പ്രദേശത്തെ നെൽകർഷകർ.

ജൂബിലിയിൽ നവീകരിച്ച ജെറിയാട്രിക് വിഭാഗം ഉദ്ഘാടനം ചെയ്തു

തൃശൂർ: ലോക വയോജനദിനത്തോടനുബന്ധിച്ച് ജൂബിലി മിഷൻ മെഡിക്കൽ കോളജിലെ നവീകരിച്ച ജെറിയാട്രിക് മെഡിസിൻ ഒപിയും ഫിസിക്കൽ ആൻഡ് മെഡിക്കൽ റീഹാബിലിറ്റേഷൻ ഒപിയും ആശുപത്രി ഡയറക്ടർ ഫാ. റെന്നി മുണ്ടൻകുരിയൻ ഉദ്ഘാടനം ചെയ്തു. ഇതോടെ തൃശൂരിൽ ആദ്യമായി ഈസ് ഡിമെൻഷ്യ ടെക്നോളജി പ്രൈവറ്റ് ലിമിറ്റഡ് നടത്തുന്ന മറവി രോഗചികിത്സയ്ക്കുളള ഡിമെൻഷ്യ കഫേയുടെ പ്രവർത്തനങ്ങൾക്കു തുടക്കമായി. ഇനിമുതൽ ഡിമെൻഷ്യ പരിചരണവും വിആർ തെറാപ്പി സംവിധാനങ്ങളും പൊതുജനങ്ങൾക്ക് ഇവിടെ ലഭ്യമാകും. ഓർമശക്തി മെച്ചപ്പെടുത്തുന്നതിനുള്ള മെമ്മറി വർക്ക് ബുക്ക് ആശുപത്രി ഡയറക്ടർ വയോജനങ്ങൾക്കു പരിചയപ്പെടുത്തി.

വിമല കോളജിൽ മെഹ്ഫിൽ ഇ ഖവ്വാലി

തൃശൂർ: വിമല കോളജ് (ഓട്ടോണമസ്) ഇംഗ്ലീഷ് ഗവേഷണവിഭാഗം കോളജ് ഓഡിറ്റോറിയത്തിൽ "മെഹ്ഫിൽ ഇ ഖവ്വാലി' എന്ന പേരിൽ സംഗീതയാത്ര സംഘടിപ്പിച്ചു. ഇംഗ്ലീഷ് ഗവേഷണവിഭാഗത്തിലെ ക്വാളിറ്റി അഷ്വറൻസ് സെൽ വിഭാവനംചെയ്ത "ദ ലിറിക് ലൂം' പരന്പരയുടെ ഭാഗമായിട്ടാണ് പരിപാടി നടത്തിയത്. വിമല കോളജ് യുജിസി സെന്‍റർ ഫോർ വിമൻസ് സ്റ്റഡീസ്, സാരംഗ് മ്യൂസിക് ക്ലബ്, ഹിന്ദി വകുപ്പ്, ഇംഗ്ലീഷ് വിഭാഗം പൂർവവിദ്യാർഥിസംഘടന എന്നിവയുടെ സഹകരണത്തോടെ നടന്ന സംഗീതപരിപാടിയിൽ പരന്പരാഗത ഖവ്വാലി സംഗീതത്തിന്‍റെ മെഹ്ഫിൽ അന്തരീക്ഷം പുനരാവിഷ്കരിച്ച് പ്രമുഖ ഗായകരും തബല കലാകാരന്മാരും ശ്രോതാക്കൾക്കു മാസ്മരികമായ സംഗീതാനുഭവം സമ്മാനിച്ചു. പ്രിൻസിപ്പൽ സിസ്റ്റർ ഡോ. ബീന ജോസ്, വൈസ് പ്രിൻസിപ്പൽ ഡോ. മാലിനി, ഹെഡ് ഓഫ് ദി ഡിപ്പാർട്ട്മെന്‍റ് സിസ്റ്റർ ഡോ. ടെൻസി വർഗീസ് എന്നിവർ സന്നിഹിതരായി.

പോലീസ് ക്ലിയറൻസ് സർട്ടിഫിക്കറ്റ് നിർബന്ധമാക്കി

ഗുരുവായൂർ: ക്ഷേത്രവുമായി ബന്ധപ്പെട്ട് ജോലി ചെയ്യുന്നവർക്ക് പോലീസ് ക്ലിയറൻസ് സർട്ടിഫിക്കറ്റ് നിർബന്ധമാക്കി. ക്ഷേത്രത്തിൽ ജോലി ചെയ്തിരുന്നയാൾ കുറ്റകൃത്യത്തിൽ ഉൾപ്പെട്ടതിനെ തുടർന്ന് സുരക്ഷാ ഏജൻസികളുടെ മുന്നറിയിപ്പിലാണ് പിസിസി നിർബന്ധമാക്കിയത്. ക്ഷേത്രത്തിൽ പാരമ്പര്യ അവകാശിയുടെ സഹായിയായി തിരിവിശേഷം എന്ന പ്രവൃത്തി ഒരു വർഷമായി ക്ഷേത്രത്തിൽ നിർവഹിച്ചു വന്നിരുന്ന ആളെയാണ് പത്തിരിപ്പാലയിൽ വച്ച് പോലീസ് പിടികൂട്ടിയത്. ഇയാളെകുറിച്ച് ദേവസ്വത്തിന് യാതൊരു അറിവും ഇല്ലായിരുന്നു. ഈ സാഹചര്യത്തിലാണ് ക്ഷേത്രവുമായി ബന്ധപ്പെട്ട് ജോലി എടുക്കുന്ന മുഴുവൻപേരുടെയും വിവരങ്ങൾ ദേവസ്വം ശേഖരിക്കുന്നത്. ക്ഷേത്രവുമായി ബന്ധപ്പെട്ട പ്രവൃത്തി ചെയ്യുന്ന മുഴുവൻ പേരും സെപ്റ്റംബർ ഒമ്പതിനുള്ളിൽ ആധാർ, ഫോട്ടോ, പിസിസി എന്നിവ സമർപ്പിക്കണമെന്ന് ക്ഷേത്രം ഡെപ്യൂട്ടി അഡ്മിനിസ്ട്രേറ്റർ സർക്കുലറിലൂടെ അറിയിച്ചു. ഇതേസമയം സുരക്ഷയുടെ ഭാഗമായി ക്ഷേത്രപരിസരത്തെ മുഴുവൻ വ്യാപാര സ്ഥാപനങ്ങളിലുള്ളവരും പിസിസി സമർപ്പിക്കണമെന്ന് ദേവസ്വം അഡ്മിനിസ്ട്രേറ്റർ ഒ.ബി. അരുൺകുമാർ അറിയിച്ചു.

വടക്കാഞ്ചേരിയിൽ കെഎസ്ഇബി ഓഫീസ് മാർച്ച് നടത്തി

വടക്കാഞ്ചേരി: മേഖലയിൽ തുടർച്ചയായി ഉണ്ടാകുന്ന വൈദ്യുതി അപകടങ്ങളിൽ നടപടി ആവശ്യപ്പെട്ട് വടക്കാഞ്ചേരി കെഎസ്ഇബി ഓഫീസിലേക്ക് മണ്ഡലം കോൺഗ്രസ് കമ്മിറ്റി മാർച്ചും ധർണയും നടത്തി. ഡിസിസി ജനറൽ സെക്രട്ടറി ഷാഹിത റഹ്മാൻ ധർണ ഉദ്ഘാടനം ചെയ്തു. സംഭവത്തിൽ നടപടികൾ ഉണ്ടായില്ലെങ്കിൽ ശക്തമായ സമരം തുടരുമെന്നും ഷാഹിത റഹ്മാൻ പറഞ്ഞു. മണ്ഡലം കോൺഗ്രസ് കമ്മിറ്റി പ്രസിഡന്‍റ്് എം.എച്ച്. ഷാനവാസ് അധ്യക്ഷത വഹിച്ചു. യൂത്ത് കോൺഗ്രസ് അഖിലേന്ത്യ സെക്രട്ടറി പി.എൻ. വൈശാഖ് മുഖ്യപ്രഭാഷണം നടത്തി. നേതാക്കളായ ജയൻ മംഗലം, ടി.വി. സണ്ണി, ബുഷ്റ റഷീദ്, നെബീസ നാസറലി, കെ.കെ. അബൂബക്കർ, ബിജു കൃഷ്ണൻ, ബിജു ഇസ്മയിൽ, സൈറാബാനു എന്നിവർ പ്രസംഗിച്ചു.

കടങ്ങോട് പഞ്ചായത്തിലെ പോളിംഗ് ബൂത്തുകൾ മാറ്റിനിശ്ചയിക്കണമെന്നു കോൺഗ്രസ്

എരുമപ്പെട്ടി: വരാനിരിക്കുന്ന ത്രിതല പഞ്ചായത്ത് തെരഞ്ഞെടുപ്പിൽ കടങ്ങോട് പഞ്ചായത്തിലെ 13-ാം വാർഡിലെ രണ്ടാംനമ്പർ പോളിംഗ്ബൂത്ത് മാറ്റി നിശ്ചയിക്കണമെന്ന് മുൻവാർഡ് മെമ്പർ പി.സി. ഗോപാലകൃഷ്ണന്‍റെ നേതൃത്വത്തിലുള്ള കോൺഗ്രസ് നേതാക്കൾ ആവശ്യപ്പെട്ടു. പോളിംഗ് ബൂത്തുകളുടെ അശാസ്ത്രീയത പരിഹരിക്കണമെന്ന് നേതാക്കൾ ആവശ്യപ്പെട്ടു. ബൂത്തിലെ നൂറുകണക്കിന് വോട്ടർമാർ ഒപ്പിട്ട നിവേദനം സംസ്ഥാന തെരഞ്ഞെടുപ്പ് കമ്മീഷനും കളക്ടർക്കും സമർപ്പിച്ചിട്ടുണ്ടെന്നും നേതാക്കൾ പത്രസമ്മേളനത്തിൽ അറിയിച്ചു. പോളിംഗ് ബൂത്തുകളുടെ അശാസ്ത്രീയത സംബന്ധിച്ച് പഞ്ചായത്ത് സെക്രട്ടറിയ്ക്ക് പരാതി നൽകിയിരുന്നെങ്കിലും ഭരണകക്ഷി സമ്മർദ്ദം മൂലം പരിഹാരമുണ്ടായില്ലെന്നും നേതാക്കൾ ആരോപിച്ചു. എരുമപ്പെട്ടി പ്രസ് ക്ലബിൽ നടന്ന പത്രസമ്മേളനത്തിൽ മുൻ വാർഡ് മെമ്പറും കോൺഗ്രസ് കടവല്ലൂർ ബ്ലോക്ക് വൈസ് പ്രസിഡന്‍റ്് പി.സി. ഗോപാലകൃഷ്ണൻ, കടങ്ങോട് മണ്ഡലം പ്രസിഡന്‍റ്് ഷറഫു പന്നിത്തടം, യുഡിഎഫ് മണ്ഡലം ചെയർമാൻ സജീവ് ചാത്തനാത്ത്, കോൺഗ്രസ് ബ്ലോക്ക് സെക്രട്ടറിയും മുൻ മെമ്പറുമായ ജെസി വിത്സൻ, എയ്യാൽ ബൂത്ത് പ്രസിഡന്‍റ്് കെ.എം. മുഹമ്മദ് എന്നിവർ പങ്കെടുത്തു.

ടോറസ്‌ലോറി പാടത്തേക്ക് മറിഞ്ഞു

വടക്കാഞ്ചേരി: ടോറസ്‌ലോറി പാടത്തേക്ക് മറിഞ്ഞു. തൃശൂർ - ഷൊർണൂർ സംസ്ഥാന പാതയിൽ മുള്ളൂർക്കര മാർക്കറ്റിനു സമീപത്തെ പാടത്തേക്കാണ് ടോറസ്‌ലോറി മറിഞ്ഞത്. വാഹനങ്ങൾ പരിശോധിക്കുന്നതിനിടെ പോലീസ് കൈകാണിച്ചപ്പോൾ വാഹനം സൈഡൊതുക്കി നിർത്തുന്നതിനിടെയാണ് റോഡിന്‍റെ സൈഡ്ഭിത്തി ഇടിഞ്ഞ് ലോറി സമീപത്തെ പാടത്തേക്കു മറിഞ്ഞത്. ഇന്നലെ രാവിലെയായിരുന്നു അപകടം. കരിങ്കല്ല് കയറ്റി തൃശൂർ ഭാഗത്തേക്കു പോകുന്നതിനിടെയാണ് മറിഞ്ഞത്. ആർക്കും പരിക്കില്ല.

മാവ് ഭീഷണി ഒഴിവാക്കാൻ ധർണ നടത്തി

ഒല്ലൂർ: ഒല്ലൂർ-തൃക്കൂർ പിഡബ്ല്യുഡി റോഡിൽ മരത്താക്കര തോട്ടപ്പടി സെന്‍ററിൽ പ്രായമേറിയതും കേടുവന്നതുമായ മാവ് യാത്രക്കാർക്കു ഭീഷണിയായി, റോഡിലേക്ക് എപ്പോൾ വേണമെങ്കിലും വീഴാവുന്ന നിലയിലാണ് മാവ്. സ്കൂൾവിദ്യാർഥികളടക്കം ഏറെപ്പേരും നിരവധി വാഹനങ്ങളും കടന്നുപോകുന്ന റോഡാണിത്. വളരെ അപകടകരമായ അവസ്ഥയിൽ നിൽക്കുന്ന മാവ് വെട്ടിമാറ്റണമെന്നു പിഡബ്ല്യുഡി, ഗ്രാമപഞ്ചായത്ത് അധികാരികളോട് ആവശ്യപ്പെട്ടിട്ടും ഒരു നടപടിയും ഉണ്ടാവാത്തതിൽ പ്രതിഷേധിച്ച് നാട്ടുകാരും രാഷ്ട്രീയപാർട്ടി പ്രതിനിധികളും ജനപ്രതിനിധികളും ചേർന്ന് മാവിനുമുന്പിൽ പ്രതിഷേധധർണ നടത്തി. ആർഡിഒയ്ക്കു ഭീമഹർജിയും തയാറാക്കിനൽകി. ധർണ ഡിസിസി ജനറൽ സെക്രട്ടറി ജെയ്ജു സെബാസ്റ്റ്യൻ ഉദ്ഘാടനം ചെയ്തു. വാർഡ് മെന്പർ ഷീബ ഷാജൻ അധ്യക്ഷത വഹിച്ചു. ബ്ലോക്ക് മെന്പർ നന്ദൻ കുന്നത്ത്, മുൻപഞ്ചായത്ത് പ്രസിഡന്‍റ് ജോണി ചിറയത്ത്, പഞ്ചായത്ത് മെന്പർ ജോസഫ് പടമാടൻ, ആൽജോ ചാണ്ടി, ഷാജു തൊമ്മാന, ബാബു മൊയലൻ, ദിനേശൻ പൊന്നന്പാലൻ, ബാബു പെരിഞ്ചേരി, വറീത് ചാണ്ടി, സാബു ചിറയത്ത്, സോജി കുര്യൻ തുടങ്ങിയവർ സംസാരിച്ചു.

കാറും ഓട്ടോയും കൂട്ടിയിടിച്ച് ഓട്ടോ ഡ്രൈവർ മരിച്ചു

മുളങ്കുന്നത്തുകാവ്: വെളപ്പായ കനാൽപ്പാലത്തിനുസമീപം കാറും ഓട്ടോറിക്ഷയും കൂട്ടിയിടിച്ചുണ്ടായ അപകടത്തിൽ ഗുരുതരപരിക്കേറ്റ ഓട്ടോ ഡ്രൈവർ മരിച്ചു. വെളപ്പായ ആക്കോടിക്കാവ് മൂന്നനൂർ രുക്മിണിയുടെ മകൻ ഗോപി(55)യാണ് മരിച്ചത്. ഇന്നലെ രാവിലെയാണ് അപകടം. ഗോപി ഓടിച്ചിരുന്ന ഓട്ടോറിക്ഷയുടെ പിറകിൽ കാർ ഇടിക്കുകയായിരുന്നു. ഇടിയുടെ ആഘാതത്തിൽ നിയന്ത്രണംവിട്ടു മറിഞ്ഞ ഓട്ടോയുടെ അടിയിൽപ്പെട്ട ഗോപിയെ ഗുരുതരപരിക്കുകളോടെ മെഡിക്കൽ കോളജ് ആശുപത്രിയിൽ എത്തിച്ചുവെങ്കിലും മരിച്ചിരുന്നു. ഭാര്യ: ഇന്ദിര. മക്കൾ: രേഷ്മ, രഞ്ജിത്ത്. മരുമക്കൾ: ശ്യാം, ട്രീസ.

ട്രെയിൻതട്ടി അജ്ഞാത സ്ത്രീ മരിച്ചു

വടക്കാഞ്ചേരി: ട്രെയിൻതട്ടി അജ്ഞാത സ്ത്രീയെ മരിച്ച നിലയിൽ കണ്ടെത്തി. അകമല ക്ഷേത്രത്തിനു സമീപത്തെ റെയിൽവേ ട്രാക്കിലാണ് സ്ത്രീയുടെ മൃതദേഹം കണ്ടെത്തിയത്. 50 വയസ് തോന്നിക്കും. കറുത്തനിറത്തിലുള്ള സാരിയാണ് ധരിച്ചിരിക്കുന്നത്. വടക്കാഞ്ചേരി പോലിസ് സ്ഥലത്തെത്തി മേൽ നടപടികൾ സ്വീകരിച്ചു.

മരിച്ചനിലയിൽ കണ്ടെത്തി

മായന്നൂർ: ഒറ്റക്ക് താമസിക്കുന്ന വയോധികയെ മരിച്ചനിലയിൽ കണ്ടെത്തി. മായന്നൂർ രാജീവ് ഭവൻ കോളനിയിൽ മൂസാരിപ്പുരക്കൽ കാർത്യായനി (70) യാണ് മരിച്ചത്. മൃതദേഹത്തിന് രണ്ടു ദിവസത്തെ പഴക്കമുണ്ടെന്നാണ് പ്രാഥമിക നിഗമനം. ദുർഗന്ധം വന്നതിനെ തുടർന്ന് പരിസരവാസികൾ നടത്തിയ അന്വേഷണത്തിലാണ് മൃതദേഹം കണ്ടെത്തിയത്. പോലീസ് സ്ഥലത്തെത്തി മേൽ നടപടികൾ സ്വീകരിച്ചു.

പകരംവന്ന ഉദ്യോഗസ്ഥനെ പഞ്ചായത്ത് ചാലക്കുടിയിൽ തടഞ്ഞുവച്ചു

ചാലക്കുടി: ദേശീയപാതയിൽ അടിപ്പാത നിർമാണം നടക്കുന്ന മുരിങ്ങൂരിലെ ഗതാഗതക്കുരുക്ക് സംബന്ധിച്ചു ചർച്ചചെയ്യാൻ എത്താമെന്നു സമ്മതിച്ച എൻഎച്ച്എഐ പ്രോജക്ട് ഡയറക്ടർ എത്തിയില്ല. ഇതോടെ പകരം എത്തിയ എൻജിനീയറെ എൽഡിഎഫ് ജനപ്രതിനിധികൾ തടഞ്ഞുവച്ചു. രാത്രിതന്നെ മുരിങ്ങൂരിൽ റോഡ് ടാറിംഗ് ആരംഭിക്കാമെന്ന ഉറപ്പിലാണ് മണിക്കൂറുകൾക്കുശേഷം എൻജിനീയറെ മോചിപ്പിച്ചത്. എൻഎച്ച്എഐ സൈറ്റ് എൻജിനീയർ അമലിനെയാണ് മണിക്കൂറുകളോളം പൊതുമരാമത്ത് വകുപ്പ് റസ്റ്റ് ഹൗസിൽ തടഞ്ഞുവച്ചത്. പ്രോജക്ട് ഡയറക്ടർ എത്താതെ എൻജിനീയറെ മോചിപ്പിക്കില്ലെന്ന നിലപാടിലായിരുന്നു ജനപ്രതിനിധികൾ. വിവരമറിഞ്ഞ് ചാലക്കുടി എസ്ഐ ഋഷിപ്രസാദിന്‍റെ നേതൃത്വത്തിൽ എത്തിയ പോലീസിനെ കൊരട്ടി പഞ്ചായത്ത് വികസനസമിതി ചെയർമാൻ കെ.ആർ. സുമേഷ് റസ്റ്റ് ഹൗസിന്‍റെ ഗേറ്റ് അടച്ച് തടഞ്ഞു. പോലീസ് ബലപ്രയോഗത്തിലൂടെ സുമേഷിനെ മാറ്റിയാണ് അകത്തുകടന്നത്. പോലീസ് എത്തിയപ്പോൾ എൻജിനീയറെ തടഞ്ഞുവച്ച മുറിയുടെ വാതിൽ ജനപ്രതിനിധികൾ അകത്തുനിന്നും കുറ്റിയിട്ടു. അടച്ചിട്ട വാതിലിനു മുന്പിൽ കെ.ആർ. സുമേഷും മറ്റു പഞ്ചായത്ത് അംഗങ്ങളും കുത്തിയിരുന്നു. തുടർന്നു സ്ഥലത്തെത്തിയ ഡിവൈഎസ്പി പി.സി. ബിജുകുമാർ സിപിഎം ഏരിയാ സെക്രട്ടറി കെ.എസ്. അശോകനുമായി നടത്തിയ ചർച്ചയെതുടർന്ന് അടച്ചിട്ട മുറി ഉള്ളിൽനിന്നു തുറന്നു. ഡിവൈഎസ്പി, പഞ്ചായത്ത് പ്രസിഡന്‍റുമാരും എൻജിനീയറുമായി ചർച്ച നടത്തിയശേഷമാണു പ്രശ്നപരിഹാരമായത്. മേലൂർ പഞ്ചായത്ത് പ്രസിഡന്‍റ് എം.എസ്. സുനിത, കൊരട്ടി പഞ്ചായത്ത് പ്രസിഡന്‍റ് പി.സി. ബിജു, കാടുകുറ്റി പഞ്ചായത്ത് പ്രസിഡന്‍റ് പ്രിൻസി ഫ്രാൻസിസ്, ഡെന്നീസ് കെ. ആന്‍റണി, പഞ്ചായത്ത് അംഗങ്ങൾ തുടങ്ങിയവർ ചർച്ചയിൽ പങ്കെടുത്തു.

ഒടുവിൽ ടാറിംഗ്,

തൃശൂർ: മണിക്കൂറുകൾ നീണ്ട ഗതാഗതക്കുരുക്കുകൾക്കും സുപ്രീംകോടതിവരെ ഇടപെട്ട നിയമവ്യവഹാരങ്ങൾക്കുംശേഷം ദേശീയപാതയിലെ സർവീസ് റോഡുകളിൽ ടാറിംഗ് ആരംഭിച്ചു. മുടിക്കോടും കല്ലിടുക്കിലും ആന്പല്ലൂരിലും ടാറിംഗ് തുടങ്ങിയിട്ടുണ്ട്. ടോൾപിരിവ് ഹൈക്കോടതി തടഞ്ഞ് രണ്ടാഴ്ച പിന്നിടുന്പോഴാണ് ഗതാഗതക്കുരുക്ക് ഒഴിവാക്കാനുള്ള ഫലപ്രദമായ നടപടിയിലേക്കു കരാർ കന്പനിയും എൻഎച്ച്എഐയും കടക്കുന്നത്. ചാലക്കുടിയിൽ എൽഡിഎഫ് ജനപ്രതിനിധികൾ നാഷണൽ ഹൈവേ അഥോറിറ്റി ഓഫ് ഇന്ത്യ‍യിലെ സൈറ്റ് എൻജിനീയറെ തടഞ്ഞുവച്ച സംഭവവുമുണ്ടായി. മുരിങ്ങൂരിൽ ഇന്നലെ രാത്രിതന്നെ ടാറിംഗ് നടത്തുമെന്ന ഉറപ്പു വാങ്ങിയെടുത്ത ശേഷമാണ് സമരം അവസാനിപ്പിച്ചത്. ആമ്പല്ലൂരിൽ ചാലക്കുടിക്കു പോകുന്ന പാതയിലാണ് ടാറിംഗ് നടത്തുന്നത്. ഇരുഭാഗത്തേക്കുമുള്ള സര്‍വീസ് റോഡുകളില്‍ ടാറിംഗ് ഇന്നു പൂര്‍ത്തിയാക്കുമെന്ന് അധികൃതര്‍ അറിയിച്ചു. ഗതാഗതക്കുരുക്ക് എത്രയും വേഗം പരിഹരിച്ച് ടോള്‍ പിരിവ് പുനരാരംഭിക്കുന്നതിനാണ് ദ്രുതഗതിയിലുള്ള ടാറിംഗ്. മാസങ്ങളായി തകര്‍ന്നുകിടന്ന റോഡ് ചെയ്യണമെന്നാവശ്യപ്പെട്ട് നിരവധി പരാതികള്‍ ദേശീയപാത അഥോറിറ്റിക്കു നല്‍കിയെങ്കിലും യാതൊരു നടപടിയും ഉണ്ടായിരുന്നില്ല. ടോള്‍ പിരിവ് നിര്‍ത്തിവച്ച സാഹചര്യം വന്നതോടെയാണ് സര്‍വീസ് റോഡുകള്‍ സഞ്ചാരയോഗ്യമാക്കാന്‍ തയാറായത്. അടിപ്പാത നിർമാണം നടക്കുന്ന മുടിക്കോടും കല്ലിടുക്കിലും സർവീസ് റോഡ് റീടാറിംഗ് ആരംഭിച്ചിട്ടുണ്ട്. ഇന്നലെ ഉച്ചകഴിഞ്ഞാണ് ഇവിടെ ടാറിംഗ് ആരംഭിച്ചത്. കല്ലിടുക്കിൽ തൃശൂർ ഭാഗത്തേക്കുള്ള ടാറിംഗ് ഏകദേശം പൂർത്തിയായി. മുടിക്കോടും കല്ലിടുക്കിലും പാലക്കാട് ഭാഗത്തേക്കുള്ള സർവീസ് റോഡിന്‍റെ ടാറിംഗ് പുരോഗമിക്കുന്നു. ടാറിംഗ് ആരംഭിച്ചതോടെ ഇരുഭാഗത്തും ഏർപ്പെടുത്തിയ ഗതാഗതനിയന്ത്രണത്തെതുടർന്ന് ദേശീയപാതയിൽ ഗതാഗതക്കുരുക്ക് രൂക്ഷമായിരുന്നു. കല്ലിടുക്ക് മുതൽ പീച്ചിറോഡ് ജംഗ്ഷൻവരെ വാഹനങ്ങളുടെനിര നീണ്ടു.

തൃശൂരിൽ വീണ്ടും വണ്‍വേ പരീക്ഷണം

വട്ടംചുറ്റുമോ എന്നു കണ്ടറിയാം തൃശൂർ: നഗരത്തിലെ തിക്കും തിരക്കും കുറയ്ക്കാനായി ട്രാഫിക് റെഗുലേറ്ററി കമ്മിറ്റിയുടെ പുതിയ നീക്കം. നാളെമുതൽ ചെട്ടിയങ്ങാടി മുതൽ എംഒ റോഡ് വരെയുള്ള പോസ്റ്റ് ഓഫീസ് റോഡിലും സാഹിത്യ അക്കാദമി റോഡിലും വണ്‍വേ സിസ്റ്റം പ്രാബല്യത്തിൽ വരുമെന്നു സിറ്റി ട്രാഫിക് എൻഫോഴ്സ്മെന്‍റ് യൂണിറ്റ് സ്റ്റേഷൻ ഹൗസ് ഓഫീസർ അറിയിച്ചു. ഇടുങ്ങിയ റോഡും വാഹനങ്ങളുടെ പെരുപ്പവുംമൂലം ബുദ്ധിമുട്ടിലാകുന്ന യാത്രികർക്കു സുഗമമായ ഗതാഗതത്തിനു വഴിയൊരുക്കുക എന്നതാണ് ലക്ഷ്യം. പോസ്റ്റ് ഓഫിസ് റോഡിൽ എംഒ റോഡിൽനിന്ന് വാഹനങ്ങൾക്കു ചെട്ടിയങ്ങാടിയിലേക്ക് പോകാം. എന്നാൽ ചെട്ടിയങ്ങാടിയിൽനിന്ന് എംഒ റോഡിലേക്കു വാഹനങ്ങൾക്കു പ്രവേശനം ഉണ്ടായിരിക്കുന്നതല്ല. പോസ്റ്റ് ഓഫീസ് റോഡിൽ ഫ്രൂട്സ് കച്ചവടം നടത്തുന്നവർ വാഹനങ്ങൾ ഒരു വരിയായി നിർത്തി രാവിലെ ഒന്പതിനുമുന്പ് കയറ്റിറക്കുകൾ നടത്തണം. സാഹിത്യ അക്കാദമി റോഡിൽ സാഹിത്യ അക്കാദമി ജംഗ്ഷനിൽനിന്നു ഫൈൻ ആർട്സ് കോളജ് ജംഗ്ഷനിലേക്കു വാഹനങ്ങൾക്കു പ്രവേശനം അനുവദിച്ചിട്ടുണ്ടെങ്കിലും ഫൈൻ ആർട്സ് കോളജ് ജംഗ്ഷനിൽനിന്നു സാഹിത്യ അക്കാദമി ജംഗ്ഷനിലേക്കു പ്രവേശനം ഉണ്ടായിരിക്കില്ല. വണ്‍വേ നിയമം തെറ്റിക്കുന്നവർക്കെതിരേ കർശനനടപടികൾ സ്വീകരിക്കുമെന്നു സ്റ്റേഷൻ ഹൗസ് ഓഫീസർ അറിയിച്ചു.

വീണ്ടും ദർഘാസ് ക്ഷണിച്ച് റെയിൽവേ, അടങ്കൽതുക 140 കോടി കുറഞ്ഞു

തൃശൂർ: ആധുനിക സൗകര്യങ്ങളോടെ വിമാനത്താവള മാതൃകയിൽ നിർമിക്കുമെന്ന് അവകാശപ്പെട്ടിരുന്ന തൃശൂർ റെയിൽവേ സ്റ്റേഷന്‍റെ നവീകരണത്തിനുള്ള ദർഘാസ് വീണ്ടും ക്ഷണിച്ച് റെയിൽവേ. അമൃത് ഭാരത് സ്റ്റേഷൻ പദ്ധതിപ്രകാരം ഈ വർഷം ആദ്യത്തിൽ ക്ഷണിച്ച 393.57 കോടി രൂപ അടങ്കലുള്ള കരാർനടപടികൾ നിർമാണം പൂർത്തിയാകുംമുന്പേ റദ്ദാക്കിയതിനുശേഷമാണ് 253.76 കോടി രൂപയുടെ പുതിയ അടങ്കൽതുക ക്ഷണിച്ചിരിക്കുന്നത്. 30 മാസമാണ് നിർമാണകാലാവധി. കരാർരേഖകൾ സമർപ്പിക്കുവാനുള്ള അവസാനതീയതി സെപ്റ്റംബർ 19 ആണ്. 2026 ആദ്യം നിർമാണം ആരംഭിക്കാനാകുമെന്നാണ് കരുതുന്നതെന്നു റെയിൽവേ ഉദ്യോഗസ്ഥർ അറിയിച്ചു. സ്റ്റേഷൻ വികസനപദ്ധതിക്കു റെയിൽവേ ബോർഡിന്‍റെ അനുമതി ലഭിച്ച് ഒന്പതുമാസം പിന്നിട്ടിട്ടും രൂപരേഖ അന്തിമമാക്കിയിട്ടും ടെൻഡർ നടപടികളാകാതിരുന്നതു പലവിധ പരാതികളും ഉയർത്തുന്നതിനിടെയാണ് പുതിയ ദർഘാസുമായി റെയിൽവേ രംഗത്തുവന്നിരിക്കുന്നത്. വിമാനത്താവളങ്ങളിലേതുപോലെയുള്ള തുറസായ ഇടങ്ങൾ, കാൽനട മേൽപ്പാലങ്ങൾ, വിശാലമായ പാർക്കിംഗ് സൗകര്യം തുടങ്ങി അടിമുടി മാറ്റത്തോടെ ഒരുക്കാൻ ആലോചിച്ചിരുന്ന സ്റ്റേഷനിൽ 2024 ഒക്ടോബർ 30നാണ് സ്റ്റേഷൻ പുനർനിർമാണപദ്ധതിക്കു റെയിൽവേ ബോർഡിന്‍റെ അന്തിമാനുമതി ലഭിച്ചത്. ഇതിനുപിന്നാലെ പുതിയ സ്റ്റേഷന്‍റെ രൂപരേഖ കേന്ദ്രമന്ത്രി സുരേഷ് ഗോപി സമൂഹമാധ്യമങ്ങളിലൂടെ പുറത്തുവിടുകയും ചെയ്തിരുന്നു. നവംബർ മൂന്നിന് കേന്ദ്ര റെയിൽവേ മന്ത്രി അശ്വിനി വൈഷ്ണവ് തൃശൂർ സ്റ്റേഷൻ സന്ദർശിച്ച് പദ്ധതിയുടെ ഔദ്യോഗികപ്രഖ്യാപനം നടത്തി. സ്റ്റേഷൻ വികസനത്തിനു ടെൻഡർ ക്ഷണിച്ചുള്ള ആദ്യ വിജ്ഞാപനം 2025 ജനുവരി 25നു റെയിൽവേ പ്രസിദ്ധീകരിച്ചിരുന്നു. ഇതുപ്രകാരം മാർച്ച് ആറിനു ടെൻഡർ തുറക്കാനും തീരുമാനിച്ചിരുന്നു. ഇതാണ് പിന്നീട് റദ്ദാക്കിയത്. മധ്യകേരളത്തിലെ പ്രധാന സ്റ്റേഷനുകളിൽ ഒന്നായ തൃശൂരിന്‍റെ വികസനപ്രഖ്യാപനം യാത്രക്കാർക്കും റെയിൽവേക്കും ഏറെ പ്രതീക്ഷ നൽകിയിരുന്നെങ്കിലും പുതിയ ദർഘാസും പ്രതീക്ഷകളുടെ പാളത്തിൽ കയറി മുന്നോട്ടുപോകുമോ ഇല്ലയോ എന്നറിയാൻ കാത്തിരിക്കുകയാണ് യാത്രക്കാർ.

ബെസ്റ്റ് പെർഫോർമർ പുരസ്കാരം നേടി തൃശൂർ കോർപറേഷൻ

തൃശൂർ: കേന്ദ്ര സർക്കാർ ഇന്ത്യയിലെ നഗരങ്ങളുടെ ശുചിത്വനിലവാരം നിശ്ചയിക്കുന്നതിനായി നടത്തുന്ന സ്വച്ഛ് സർവേക്ഷൻ 2024 റാങ്കിംഗിൽ ബിഗ് സിറ്റി കാറ്റഗറിയിൽ കേരളത്തിൽ രണ്ടാംസ്ഥാനം ലഭിച്ച തൃശൂർ കോർപറേഷന് സംസ്ഥാന സർക്കാരിന്‍റെ ബെസ്റ്റ് പെർഫോർമർ പുരസ്കാരം ലഭിച്ചു. ചരിത്രത്തിലാദ്യമായാണ് കേരളത്തിൽനിന്നുള്ള നഗരസഭകൾ ശുചിത്വ റാങ്കിംഗിൽ ആദ്യ നൂറിൽ എത്തുന്നത്. കഴിഞ്ഞ തവണ ദേശീയ റാങ്കിംഗിൽ ഉണ്ടായിരുന്ന 333-ാംസ്ഥാനത്തുനിന്നാണ് 58-ാംസ്ഥാനത്തേക്കു തൃശൂർ കോർപറേഷൻ മുന്നേറിയത്. തിരുവനന്തപുരത്തു നടന്ന ചടങ്ങിൽ മന്ത്രി എം.ബി. രാജേഷിൽനിന്ന് മേയർ എം.കെ. വർഗീസ്, തദ്ദേശസ്വയംഭരണ വകുപ്പ് ജില്ലാ ജോയിന്‍റ് ഡയറക്ടർ ഡി. സാജു, ജില്ലാ അസിസ്റ്റന്‍റ് ഡയറക്ടർ ബിന്ദു പരമേശ്വരൻ, കോർപറേഷൻ സെക്രട്ടറി വി.പി. ഷിബു, ക്ലീൻ സിറ്റി മാനേജർ പി.വി. അജിത്, സീനിയർ പബ്ലിക് ഹെൽത്ത് ഇൻസ്പെക്ടർമാരായ മനേഷ് ബാബു, ഐ.വി. രാജീവ്, ബാബു ലൂയിസ്, ജയപ്രകാശ്, ശുചിത്വ മിഷൻ യംഗ് പ്രഫഷണൽ രാഹുൽ രാജീവ് തുടങ്ങിയവർ ചേർന്നാണ് അവാർഡ് ഏറ്റുവാങ്ങിയത്.

നഗരസഭ തൊഴില്‍മേളകൾ ഇന്നും നാളെയും

ഇരിങ്ങാലക്കുട: പ്രാദേശിക തൊഴിലവസരങ്ങള്‍ക്ക് പ്രാധാന്യം നല്‍കിക്കൊണ്ട് ഇരിങ്ങാലക്കുട നഗരസഭയും കുടുംബശ്രീയും വിജ്ഞാന കേരളം പദ്ധതിയുടെ ഭാഗമായി സംഘടിപ്പിക്കുന്ന തൊഴില്‍ മേള - "കര്‍മ 2025' ഇന്നു രാവിലെ 10 ന് ടൗണ്‍ ഹാളില്‍ നടക്കും. നഗരസഭ ചെയര്‍പേഴ്സണ്‍ മേരിക്കുട്ടി ജോയ് ഉദ്ഘാടനം ചെയ്യും. 30ല്‍ അധികം സ്ഥാപനങ്ങളില്‍നിന്നായി 300ല്‍പരം ഒഴിവുകളാണ് കണ്ടെത്തിയിട്ടുള്ളത്. കൂടുതല്‍ വിവരങ്ങള്‍ക്കും തൊഴില്‍ അന്വേഷകര്‍ക്കും തൊഴില്‍ദാതാക്കള്‍ക്കും മേള കഴിഞ്ഞും നഗരസഭയില്‍ പ്രവര്‍ത്തിക്കുന്ന ജോബ് സ്റ്റേഷന്‍ വഴി ബന്ധപ്പെടാവുന്നതാണ്. ചാലക്കുടി: ബ്ലോക്ക്‌ പഞ്ചായത്തും നഗരസഭയും ഗ്രാമ‌പഞ്ചായത്തുകളുടെയും കുടുംബശ്രീയുടെ സഹകരണത്തോടെ സംയുക്തമായി സംഘടിപ്പിക്കുന്ന പ്രാദേശിക തൊഴിൽ മേള നാളെ ഗവ. മോഡൽ ഹയർ സെക്കൻഡറി സ്കൂളിൽ നടത്തും. തൊഴിൽ മേളയിൽ പങ്കെടുക്കുവാൻ പ്രാദേശികമായും അല്ലാതെയുമുള്ള തൊഴിൽ അന്വേഷകർക്ക് മുൻകൂട്ടി രജിസ്ട്രർ ചെയ്യുന്നതിന് സൗകര്യം ഒരുക്കിയിട്ടുണ്ട്. തൊഴിൽ മേള സനീഷ് കുമാർ ജോസഫ് എംഎൽഎ ഉദ്ഘാടനം ചെയ്യും. നഗരസഭ ചെയർപേഴ്സൻ ഷിബു വാലപ്പൻ അധ്യക്ഷത വഹിക്കും. തൊഴിൽ സംരംഭകർക്കും അന്വേഷകർക്കും അന്നേ ദിവസം സ്പോട്ട് അഡ്മിഷന് സൗകര്യമുണ്ടാകും. ചെയർപേഴ്സൻ ഷിബു വാലപ്പൻ, ബ്ലോക്ക് പഞ്ചായത്ത് പ്രസിഡന്‍റ് വേണു കണ്ടരുമഠത്തിൽ, എൽഡിഎഫ് ലീഡർ സി.എസ്. സുരേഷ്, രാധിക രാജൻ, ടി.കെ. ബാബു തുടങ്ങിയവർ പത്രസമ്മേളനത്തിൽ പങ്കെടുത്തു.

ചന്ദനക്കടത്തുസംഘത്തിലെ ഒരാള്‍ പിടിയില്‍

വെള്ളിക്കുളങ്ങര: ഫോറസ്റ്റ് റേഞ്ചിലെ വിവിധ ഭാഗങ്ങളില്‍‌നിന്നും ചന്ദനം മുറിച്ചുകടത്തിയ സംഘത്തിലെ ഒരാളെ വനപാലകര്‍ പിടികൂടി. കൊടുങ്ങ മഞ്ഞപ്പിള്ളി വീട്ടില്‍ വിഷ്ണു (28)ആണ് പിടിയിലായതെന്ന് വെള്ളിക്കുളങ്ങര റേഞ്ച് ഫോറസ്റ്റ് ഓഫീസര്‍ കെ. എസ്. ഷിനോജ് അറിയിച്ചു. ഇഞ്ചക്കുണ്ട് ഭാഗത്തുനിന്ന് മൂവര്‍സംഘം ചന്ദനം മുറിക്കുന്ന സമയത്ത് നാട്ടുകാരുടെ സഹായത്തോടെ പിടികൂടാനൊരുങ്ങുമ്പോള്‍ മോഷ്ടാക്കള്‍ ഓടി രക്ഷപെട്ടു. തുടര്‍ന്ന് നടത്തിയ തിരച്ചിലിനൊടുവിലാണ് ഈ കേസിലെ പ്രതികളില്‍ ഒരാളായ വിഷ്ണുവിനെ മുപ്ലിയം ഫോറസ്റ്റ് സ്റ്റേഷന്‍ ഡെപ്യൂട്ടി റേഞ്ച് ഓഫീസര്‍ പി.എ. അനൂ പിന്‍റെ നേതൃത്വത്തില്‍ പിടികൂടിയത്. അറസ്റ്റ് രേഖപ്പെടുത്തി ചാലക്കുടി ജുഡീഷ്യല്‍ ഫസ്റ്റ് ക്ലാസ് മജിസ്‌ട്രേറ്റ് കോടതിയില്‍ ഹാജരാക്കിയ പ്രതിയെ പതിനാലു ദിവസത്തേക്ക് റിമാന്‍ഡ് ചെയ്തു. ഈ കേസില്‍ ഉള്‍പ്പെട്ടിട്ടുള്ള മറ്റു രണ്ടുപേരെ പിടികൂടാന്‍ ഊര്‍ജിതമായ അന്വേഷണം നടത്തിവരികയാണ്. ബീറ്റ് ഫോറസ്റ്റ് ഓഫിസര്‍മാരായ എം.എ. രാകേഷ്, കെ.എസ്. ദിപു, എം.സി. ഷനിത, കെ.ജെ. ജിന്‍ഷ, ഡ്രൈവര്‍ ടി.കെ. അഭിലാഷ് എന്നിവരും പ്രതിയെ പിടികൂടിയ വനപാലക സംഘത്തില്‍ ഉണ്ടായിരുന്നു.

ഡിഇഒ ഓഫീസിനു മുന്‍പില്‍ കെപിഎസ്ടിഎ ധര്‍ണ നടത്തി

ഇരിങ്ങാലക്കുട: മെഡിസെപ്പിന്‍റെ പേരില്‍ അധ്യാപകരെയും ജീവനക്കാരെയും വഞ്ചിക്കുകയാണെ ന്നും ആരോഗ്യ ഇന്‍ഷ്വറന്‍സ് കാര്യത്തില്‍ ജീവനക്കാര്‍ക്ക് ഓപ്ഷന്‍ സൗകര്യം ഉറപ്പാക്കണമെന്നും ആവശ്യപ്പെട്ട് ഡിഇഒ ഓഫിസിനു മുന്‍പില്‍ കെപിഎസ്ടിഎ സംഘടിപ്പിച്ച ധര്‍ണ നഗരസഭ ചെയര്‍പഴ്‌സന്‍ മേരിക്കുട്ടി ജോയ് ഉദ്ഘാടനം ചെയ്തു. കെപിഎസ്ടിഎ വിദ്യാഭ്യാസ ജില്ലാ പ്രസിഡന്‍റ്് പ്രവീണ്‍ എം.കുമാര്‍ അധ്യക്ഷത വഹിച്ചു. സംസ്ഥാന വൈസ് പ്രസിഡന്‍റ്് സാജു ജോര്‍ജ്, സംസ്ഥാന എക്‌സിക്യൂട്ടീവ് അംഗം ആന്‍റോ പി. തട്ടില്‍, വിദ്യാഭ്യാസ ജില്ലാ സെക്രട്ടറി ഷിജി ശങ്കര്‍, നിധിന്‍ ടോണി, എം.ജെ. ഷാജി, മുഹമ്മദ് റാഫി, സി.ജെ. ദാമു, സുരേഷ്‌കുമാര്‍, ബി. ബിജു, എന്‍.പി. രജനി, എം. സീന, കെ.എം. റാഫി, കെ.ഇ.അജി, മെല്‍വിന്‍ ഡേവിസ്, ജോസ് പോള്‍ എന്നിവര്‍ പ്രസംഗിച്ചു.

മാള ഡോ. രാജു ഡേവിസ് സ്കൂളില്‍ ടിബറ്റന്‍ കവി ടെന്‍സില്‍ സ്യുണ്ട്യു

മാള: പ്രശസ്ത ടിബറ്റന്‍ കവി ടെന്‍സില്‍ സ്യുണ്ട്യു ഡോ. രാജു ഡേവിസ് ഇന്‍റര്‍നാഷണല്‍ സ് കൂളിലെത്തി. 25ഓളം രാജ്യങ്ങളിലൂടെയുള്ള അദ്ദേഹത്തിന്‍റെ പ്രസംഗപര്യടനത്തിന്‍റെ ഭാഗമായാണ് ഇവിടെ എത്തിയത്. അമേരിക്കയിലെ പല യൂണിവേഴ്സിറ്റികളിലും അദ്ദേഹത്തിന്‍റെ പുസ്തകങ്ങള്‍ സിലബസില്‍ ഉള്‍പ്പെടുത്തിയിട്ടുണ്ട്. 17 ഭാഷകളിലേക്ക് ഈ പുസ്തകങ്ങള്‍ പരിഭാഷപ്പെടുത്തിയിട്ടുള്ളതാണ്. ടിബറ്റില്‍ സ്വാതന്ത്രപ്രസ്ഥാനത്തിന്‍റെ പ്രമുഖ മുഖമാണിദ്ദേഹം. ഇന്ത്യയടക്കം ലോകത്തിലെ പല രാജ്യങ്ങളിലും ജനാധിപത്യത്തിന്‍റെ അടിസ്ഥാനശിലയായ വോട്ടവകാശത്തെച്ചൊല്ലി പ്രതിഷേധങ്ങള്‍ ഉയര്‍ന്നുവരികയാണെന്നും ആയത് ജനാധിപത്യ വ്യവസ്ഥയ്ക്ക് ഭൂഷണമല്ലെന്നും അദ്ദേഹം പറഞ്ഞു. ടിബറ്റില്‍ ജനാ ധിപത്യം പൂര്‍ണമായും അടിച്ചമര്‍ത്തിയിരിക്കുകയാണ്.ഇന്ത്യയെപ്പോലെ ചില ഒറ്റപ്പെട്ട രാജ്യങ്ങളുടെ സഹകരണം ടിബറ്റന്‍ ജനതക്കുണ്ടെന്നും അദ്ദേഹം കൂട്ടിച്ചേർത്തു. ചെയര്‍മാന്‍ ഡോ. രാജു ഡേവിസ് പെരേപ്പാടന്‍ അധ്യക്ഷത വഹിച്ചു. ഡയറക്ടര്‍ അന്ന ഗ്രേസ് രാജു, പ്രിന്‍സിപ്പൽ ഇ. ടി. ലത, അഞ്ജലി വര്‍ഗീസ്, കെ.ഇ. അമ്മിണി, എം.എ. ഗ്രീഷ്മ, പൂജ ബി. പൈ, ശ്രേയ സൂരജ്, വി.എസ്. അനുപമ, ഷെറില്‍ മേരി എന്നിവര്‍ പ്രസംഗിച്ചു.

ജനാധിപത്യത്തെ ഇല്ലായ്മ ചെയ്യാനുള്ള നീക്കത്തിന്‍റെ ഭാഗം: തോമസ് ഉണ്ണിയാടൻ

ഇരിങ്ങാലക്കുട: ബിജെപി സർക്കാർ പാർലമെന്‍റിൽ അവതരിപ്പിച്ച മന്ത്രിമാർ, ഭരണാധികാരികൾ എന്നിവരെ "ജയിലിലടയ്ക്കൽ ബിൽ'ഭരണഘടനാ വിരുദ്ധവും ഫെഡറൽ സംവിധാനത്തെ തകർക്കുന്നതുമാണെന്നും കേരള കോൺഗ്രസ് ഡെപ്യൂട്ടി ചെയർമാൻ തോമസ് ഉണ്ണിയാടൻ. കുറ്റം ചെയ്യുന്നവർ ആരായാലും ശിക്ഷിക്കപ്പെടുക‌തന്നെ വേണം. പക്ഷേ, ബിജെപി ഇതരനേതാക്കളേയും മുഖ്യമന്ത്രിമാരേയും മന്ത്രിമാരേയും ഭരണനേതൃത്വവും ഉദ്യോഗസ്ഥ - പോലീസ് കൂട്ടുകെട്ടും ചേർന്ന് ഒട്ടനവധി കള്ളക്കേസിൽ കുടുക്കുന്ന ഇപ്പോഴത്തെ സാഹചര്യത്തിൽ കേന്ദ്രത്തിന്‍റെ പെട്ടെന്നുള്ള ഈ നീക്കം ശുദ്ധ ഉദ്ദേശത്തോടെയല്ലെന്നും ഉണ്ണിയാടൻ പറഞ്ഞു. കേരള കോ ൺഗ്രസ് ഇരിങ്ങാലക്കുട നിയോജകമണ്ഡലം നേതൃസംഗമം ഉദ് ഘാടനം ചെയ്തുപ്രസംഗിക്കുകയായിരുന്നു അദ്ദേഹം. ഇരിങ്ങാലക്കുടയിൽ നടന്ന നേതൃ‌സംഗമത്തിൽ നിയോജകമണ്ഡലം പ്രസിഡന്‍റ്് റോക്കി ആളൂക്കാരൻ അധ്യക്ഷത വഹിച്ചു. സംസ്ഥാന ജനറൽ സെക്രട്ടറി മിനി മോഹൻദാസ് മുഖ്യപ്രഭാഷണം നടത്തി. ഭാരവാഹികളായ സേതുമാധവൻ പറയംവളപ്പിൽ, പി.ടി. ജോർജ്, സിജോയ് തോമസ്, ജോസ് ചെമ്പകശേരി, മാഗി വിൻസെന്‍റ്്, ശങ്കർ പഴയാറ്റിൽ, ഫെനി എബിൻ വെള്ളാനിക്കാരൻ, അഡ്വ. ഷൈനി ജോജോ, എം. എസ്. ശ്രീധരൻ മുതിരപ്പറമ്പിൽ, ലാസർ കോച്ചേരി, എബിൻ വെള്ളാനിക്കാരൻ, ടോം ജോസ്, ഫിലിപ്പ് ഓളാട്ടുപുറം, നൈജു ജോസഫ്, എൻ.ഡി. പോൾ, ജോമോൻ ജോൺസൻ, വിനോദ് ചേലൂക്കാരൻ എന്നിവർ പ്രസംഗിച്ചു.

മോദിയും പിണറായിയും ഒരേപാതയിലൂടെ സഞ്ചരിക്കുന്നു: ഷിബു ബേബി ജോൺ

കയ്പമംഗലം: കേന്ദ്ര സർക്കാരിനെ നിരന്തരം പ്രീണിപ്പിക്കുന്ന പിണറായി വിജയന്‍റെ സമീപനം കേരളത്തിൽ ബിജെപിയെ കൂട്ടുപിടിച്ച് വർഗീയ ധ്രുവീകരണത്തിലൂടെ എങ്ങ നെയും അധികാരത്തിൽ കടിച്ചുതൂങ്ങുക എന്നതാണെന്ന് ആർഎസ്പി സംസ്ഥാന സെക്ര ട്ടറി ഷിബു ബേബി ജോൺ ആരോപിച്ചു.ആർഎസ്പിയുടെ ജില്ലാതല ഫണ്ട് ഏറ്റുവാങ്ങ ലും കയ്പമംഗലം മണ്ഡലം നേതൃയോഗവും ശ്രീനാരായണപുരം മോഹൻ മെമ്മോറിയൽ ഹാളിൽ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ജനാധിപത്യം അട്ടിമറിച്ച് കള്ളവോട്ടുചേർത്ത് അധികാരം പിടിച്ചെടുക്കുന്ന ബിജെപി തന്ത്രങ്ങൾക്കെതിരെ പ്രതിപക്ഷ നേതാവ് രാഹുൽ ഗാന്ധി നടത്തുന്ന പോരാട്ടത്തിന് പ്രത്യക്ഷ പിന്തുണ നല്കാത്ത പിണറായി വിജയനെ തിരിച്ചറിയണമെന്നും ഈ അപകട കരമായ അവസ്ഥയ്ക്ക് ജനങ്ങൾ 2026 ൽ മറുപടി നല്കുമെന്നും അദ്ദേഹം പറഞ്ഞു. ആർഎസ്പി ജില്ലാ സെക്രട്ടറി എം.പി. ജോബി അധ്യക്ഷത വഹിച്ചു. കേന്ദ്ര കമ്മിറ്റിയംഗം പി.ജി. പ്രസന്നകുമാർ, സംസ്ഥാനകമ്മിറ്റിയംഗം വാഴയിൽ അസീസ്, പി.ഡി. സാജൻ, സജിൻ ആർ. കൃഷ്ണൻ, അഡ്വ. കെ.എം. ശ്രീജിത്ത്, പി.ബി. സുഭഗൻ, കെ.കെ. സൗദാമിനി തുടങ്ങിയവർ പ്രസംഗിച്ചു.

ഭൂമിയുടെ ന്യായവില പുനര്‍നിര്‍ണയം തുടങ്ങി

എടതിരിഞ്ഞി: വില്ലേജിലെ ഭൂമിയുടെ ന്യായവില സംബന്ധിച്ച നടപടികള്‍ വിലയിരുത്താന്‍ ആര്‍ഡിഒയുടെ നേതൃത്വത്തിലുള്ള ഉദ്യോഗസ്ഥസംഘം സ്ഥലത്തെത്തി പരിശോധന നടത്തി. ഇരിങ്ങാലക്കുട ആര്‍ഡിഒ പി. ഷിബു, മുകുന്ദപുരം താലൂക്ക് ഡെപ്യൂട്ടി തഹസില്‍ദാര്‍ എ.വി. സജിത, വില്ലേജ് ഓഫീസര്‍ പി.എസ്. സുജിത്ത്, അസിസ്റ്റന്‍റ് കെ.ജെ. വിന്‍സന്‍ എന്നിവരാണ് സ്ഥലത്തെത്തിയത്. വില്ലേജിലെ ന്യായവില സംബന്ധിച്ച അപാകങ്ങള്‍ പരിഹരിച്ച് പുനര്‍നിര്‍ണയിക്കുന്നതിന് കഴിഞ്ഞ മാസം 18 ന് ജില്ലാ കളക്ടര്‍ ഉത്തരവിട്ടിരുന്നു. വില്ലേജ് ഓഫീസറുടെ നേതൃത്വത്തില്‍ ഇതിന്‍റെ ഔദ്യോഗിക ജോലികള്‍ ആരംഭിക്കുകയും ഫീല്‍ഡ് പരിശോധന നടപടികള്‍ നടന്നുവരികയുമാണ്. ഓരോ അഞ്ചുവര്‍ഷം കൂടുമ്പോഴും ന്യായവില പുതുക്കുന്നതിന്‍റെ ഭാഗമായി പുനഃപരിശോധിക്കാമെന്ന സര്‍ക്കാര്‍ ഉത്തരവുണ്ട്. 2018-ല്‍ സംസ്ഥാനത്തെ ന്യായവില പുനര്‍‌നിര്‍ണയിക്കാന്‍ സര്‍ക്കാര്‍ തീരുമാനിച്ചിരുന്നെങ്കിലും എടതിരിഞ്ഞി വില്ലേജില്‍ തുടര്‍നടപടികളുണ്ടായില്ല. അതുകൊണ്ടുതന്നെ വില്ലേജിലെ ഉയര്‍ന്ന ന്യായവിലയ്ക്കു പരിഹാരമുണ്ടായില്ല. ഇതിന്‍റെ അടിസ്ഥാനത്തിലാണ് എടതിരിഞ്ഞി വില്ലേജിലെ ന്യായവില സംബന്ധിച്ച പ്രശ്നങ്ങള്‍ പരിഹരിക്കാന്‍ കളക്ടറുടെ നിര്‍ദേശപ്രകാരം നടപടിയാരംഭിച്ചിരിക്കുന്നത്. വില്ലേജിലെ എല്ലാ സര്‍വേ നമ്പറുകളിലുള്ള ഭൂമികളും പരിശോധിച്ച് വില സംബന്ധിച്ച അപാകങ്ങള്‍ രേഖപ്പെടുത്തി റിപ്പോര്‍ട്ടാക്കും. വില്ലേജിലെ മുഴുവന്‍ ഭൂവുടമകള്‍ക്കും പ്രയോജനപ്പെടാവുന്ന രീതിയില്‍ ഭൂമിയുടെ ന്യായവില കുറയ്ക്കുന്നതിനായി സര്‍ക്കാരിലേക്ക് ഒറ്റ നിര്‍ദേശം നല്‍കാനാണു നീക്കം. വില്ലേജില്‍നിന്ന് നല്‍കുന്ന റിപ്പോര്‍ട്ട് ആര്‍ഡിഒ, ജില്ലാ കളക്ടര്‍ എന്നിവര്‍ വഴി സര്‍ക്കാരിലേക്കു സമര്‍പ്പിക്കും.

കോരേച്ചാല്‍ ക്ഷേത്രമൈതാനിയില്‍ ചെണ്ടുമല്ലിവസന്തം

കോടാലി: ക്ഷേത്രമൈതാനിയിലെ ഒരേക്കര്‍ സ്ഥലത്ത് ഓറഞ്ചും മഞ്ഞയും നിറത്തിലുള്ള ആയിരക്കണക്കിനു ചെണ്ടുമല്ലിപ്പൂക്കള്‍ വിരിഞ്ഞത് മനോഹരകാഴ്ചയൊരുക്കുന്നു. കോടാലി കൊരേച്ചാല്‍ ശ്രീദുര്‍ഗ കിരാതപാര്‍വതി ക്ഷേത്രസമിതിയാണ് ഓണത്തെ വരവേല്‍ക്കാന്‍ ചെണ്ടുമല്ലി കൃഷിചെയ്തത്. നാംധാരി എന്ന ഹൈബ്രിഡ് ഇനത്തിലുള്ള ചെണ്ടുമല്ലിത്തൈകളാണ് കൃഷിക്ക് ഉപയോഗിച്ചത്. മറ്റത്തൂര്‍ കൃഷിഭവന്‍ മുഖേന രണ്ടായിരത്തിഅഞ്ഞൂറോളം തൈകള്‍ വാങ്ങി കഴിഞ്ഞ ജൂണിലാണ് ക്ഷേത്രസമിതി ഭാരവാഹികളുടെ നേതൃത്വത്തില്‍ പൂകൃഷിക്കു തുടക്കംകുറിച്ചത്. ഓണക്കാലത്തേക്കാവശ്യമായ പൂക്കള്‍ ജനങ്ങള്‍ക്കു കുറഞ്ഞവിലയ്ക്കു പ്രാദേശികവിപണിയില്‍ ലഭ്യമാക്കാന്‍ ലക്ഷ്യമിട്ടാണു പൂകൃഷി നടത്തിയതെന്ന് ക്ഷേത്രം ട്രസ്റ്റ് കമ്മിറ്റി സെക്രട്ടറി സുരേഷ് കടുപ്പശേരിക്കാരന്‍ പറഞ്ഞു. ക്ഷേത്രക്കമ്മിറ്റി അംഗങ്ങളും വനിത കൂട്ടായ്മയായ ഭഗിനിമണ്ഡല്‍ പ്രവര്‍ത്തകരും ഭക്ത ജനങ്ങളുംകൂടിയാണു കളകള്‍നീക്കിയും വളപ്രയോഗം നടത്തിയും ചെടികളെ പരിപാലിച്ചുവളര്‍ത്തിയത്. ഒാഗസ്റ്റ് തുടക്കത്തില്‍ത്തന്നെ ചെടികള്‍ പൂത്തു. മഞ്ഞയും ഓറഞ്ചുമായി രണ്ടുനിറത്തിലുള്ള ആയിരക്കണക്കിനു പൂക്കളാണ് ക്ഷേത്രമൈതാനത്ത് വിടര്‍ന്നുനിൽക്കുന്നത്. ചെണ്ടുമല്ലിപ്പൂക്കളുടെ വിളവെടുപ്പ് നാളെ രാവിലെ 10ന് ശബരിമല മുന്‍ മേല്‍ശാന്തി എ.വി. ഉണ്ണികൃഷ്ണന്‍ നമ്പൂതിരി നിര്‍വഹിക്കും.

തൃശൂർ സഹോദയ ബാസ്കറ്റ്ബോൾ: ദേവമാതാ, പാവറട്ടി സ്കൂളുകൾക്കു വിജയം

മുണ്ടൂർ: നിർമൽജ്യോതി സെൻട്രൽ സ്കൂളും ദേവമാത ഇന്‍റർനാഷണൽ സ്കൂളും സംയുക്തമായി സംഘടിപ്പിച്ച തൃശൂർ സഹോദയ സ്കൂൾ കോംപ്ലക്സ് ജില്ലാതല ബാസ്കറ്റ്ബോൾ ടൂർണമെന്‍റ്് ആവേശോജ്വലമായി സമാപിച്ചു. തൃശൂർ ജില്ലയിലെ നാല്പതോളം സിബിഎസ്ഇ സ്കൂളുകൾ മാറ്റുരച്ച ടൂർണമെന്‍റിൽ പാട്ടുരായ്ക്കൽ ദേവമാത സിഎംഐ പബ്ലിക് സ്കൂളിന് പൊൻതിളക്കം. അണ്ടർ 19 ബോയ്സ്, അണ്ടർ 19 ഗേൾസ്, അണ്ടർ 17 ഗേൾസ് വിഭാഗങ്ങളിൽ ദേവമാതാ സിഎംഐ പബ്ലിക് സ്കൂൾ ഒന്നാം സ്ഥാനം കരസ്ഥമാക്കി. അണ്ടർ 17 ബോയ്സ് വിഭാഗത്തിൽ പാവറട്ടി സെന്‍റ്് ജോസഫ് സ്കൂൾ ഒന്നാംസ്ഥാനം കരസ്ഥമാക്കി.സമാപനച്ചടങ്ങിൽ മുണ്ടൂർ നിർമൽ ്യോതി സെൻട്രൽ സ്കൂൾ പ്രിൻസിപ്പൽ സിസ്റ്റർ മേഴ്സി ജോസഫ് എസ്എച്ചും ദേവമാതാ ഇന്‍റർനാഷണൽ സ്കൂൾ പ്രിൻസിപ്പൽ ഫാ. സിന്‍റോ നങ്ങിണി സിഎംഐ യും ചേർന്ന് വിജയികൾക്കു സമ്മാനദാനം നിർവഹിച്ചു.

മുള്ളൂർക്കരയിലെ കെഎസ്‌യു - എസ്എഫ്ഐ സംഘർഷം: കെഎസ്‌യു നേതാക്കൾക്കെതിരേ കേസ്

വടക്കാഞ്ചേരി: മുള്ളൂർക്കരയിൽ കെഎസ്‌യു - എസ്എഫ്ഐ സംഘർഷം. എസ്എഫ്ഐ പ്രവർത്തകൻ ദേശമംഗലം സ്വദേശി ആദിത്യന്‍റെ പരാതിയിൽ ഗണേഷ് ആറ്റൂർ ഉൾപ്പെടെ ഏഴു പേർക്കെതിരേ കൊലക്കുറ്റം ഉൾപ്പെടെയുള്ള വകുപ്പ് ചേർത്ത് വടക്കാഞ്ചേരി പോലീസ് കേസെടുത്തു. മുള്ളൂർക്കരയിൽ ചൊവ്വാഴ്ച വൈകിട്ടായിരുന്നു കെഎസ്‌യു - എസ്എഫ്ഐ സംഘർഷം. കെഎസ്‌യു പ്രവർത്തകരായ ഗണേഷ് ആറ്റൂർ, അൽഅമീൻ,അസലാം, ജിജേഷ് എന്നിവരെ കൂടാതെ കണ്ടാലറിയാവുന്ന മൂന്നുപേരെ കൂടി ചേർത്ത് വടക്കാഞ്ചേരി പോലീസ് കൊലക്കുറ്റം ഉൾപ്പെടെയുള്ള വിവിധ വകുപ്പുകൾ ചേർത്താണ് കേസെടുത്തത്. സംഘർഷത്തിൽ ഗുരുതരമായി പരിക്കേറ്റ് തൃശൂർ ഗവ. മെഡിക്കൽ കോളജ് ആശുപത്രിയിൽ ചികിത്സയിൽകഴിയുന്ന ദേശമംഗലം വട്ടപ്പറമ്പിൽ വീട്ടിൽ വി.എസ്. ആദിത്യന്‍റെ മൊഴിയുടെ അടിസ്ഥാനത്തിലാണ് കേസെടുത്തിരിക്കുന്നത്. കാലിക്കട്ട്് യൂണിവേഴ്സിറ്റി ഡിസോൺ കലോത്സവവുമായി ബന്ധപ്പെട്ട് കിള്ളിമംഗലം കോളജിലും മാള കോളജിലും എസ്എഫ്ഐ, കെ എസ്യു വിദ്യാർഥികൾ തമ്മിൽ സംഘർഷമുണ്ടായതിന്‍റെ മുൻവൈരാഗ്യത്താൽ മുള്ളൂർക്കര റെയിൽവേ ഗേറ്റ് കഴിഞ്ഞുള്ള ചായക്കടയുടെ മുൻവശത്ത് വച്ച് ആദിത്യനേയും സഹപാഠിയായ എൽദോസിനെയും കെഎസ്‌യു പ്രവർത്തകരായ ഗണേശ്, അസലം, അൽഅമീൻ, ജിജേഷ് എന്നിവരും കണ്ടാലറിയാവുന്ന മറ്റ് മൂന്നുപേരും ചേർന്ന് ഇരുമ്പ് കമ്പി ഉപയോഗിച്ച് തലയ്്ക്ക് അടിക്കുകയായിരുന്നു. പോക്കറ്റിൽ നിന്നും ഗണേഷ് 8000 രൂപയും മൊബൈൽഫോണും തട്ടിയെടുക്കുകയും ചെയ്തുവെന്നും എഫ്ഐആറിൽ പറയുന്നു. വടക്കാഞ്ചേരി എസ്ഐ ഡി.എസ്.ആനന്ദിനാണ് കേസിന്‍റെ അന്വേഷണ ചുമതല.

അമലയിൽ ലോക കൊതുകുദിനാചരണം

തൃശൂർ: അമല മെഡിക്കൽ കോളജിൽ വിവിധ പരിപാടികളോടെ നടത്തിയ ലോക കൊതുകു ദിനാചരണത്തിന്‍റെ ഉദ്ഘാടനം ജില്ലാ പഞ്ചായത്ത് പ്രസിഡന്‍റ് വി.എസ്. പ്രിൻസ് നിർവഹിച്ചു. ജില്ലാ പഞ്ചായത്ത് മെന്പർ ജിമ്മി ചൂണ്ടൽ, അമല ഡയറക്ടർ ഫാ. ജൂലിയസ് അറയ്ക്കൽ, ജോയിന്‍റ് ഡയറക്ടർ ഫാ. ഷിബു പുത്തൻപുരയ്ക്കൽ, വൈസ് പ്രിൻസിപ്പൽ ഡോ. ദീപ്തി രാമകൃഷ്ണൻ, കമ്യൂണിറ്റി മെഡിസിൻ മേധാവി ഡോ.സി.ആർ. സാജു, എന്‍റമോളജിസ്റ്റ് മുഹമ്മദ് റാഫി എന്നിവർ പ്രസംഗിച്ചു. കാന്പസിന് അകത്തും പുറത്തും പരിസരശുചീകരണം, പഞ്ചായത്തടിസ്ഥാനത്തിൽ ബോധവത്കരണം, ക്വിസ് മത്സരം, കൊതുകുനിരീക്ഷണം, ഉറവിടനശീകരണം, കൂത്താടിനശീകരണം തുടങ്ങിയ വിവിധ പ്രവർത്തനങ്ങളാണ് ഒരാഴ്ചയോളം നീണ്ടുനിന്ന പരിപാടിയുടെ ഭാഗമായി സംഘടിപ്പിച്ചത്.

കുത്തിയിരിപ്പുസമരം നടത്തി

തിരുവില്വാമല: പഞ്ചായത്തിൽനിന്ന് സ്ഥലംമാറിപ്പോയ അസിസ്റ്റന്‍റ് എൻജിനീയർ, സെക്രട്ടറി എന്നിവർക്കു പകരക്കാരെ നിയമിക്കാത്തതുമൂലം പഞ്ചായത്തിലെ വിവിധ പദ്ധതികൾ അവതാളത്തിലായി. എൻജിനീയറിംഗ് വിഭാഗത്തിന്‍റെ പ്രവർത്തനങ്ങൾ പൂർണമായും നിലച്ചമട്ടാണ്. എംഎൽഎ ഫണ്ട് ഉപയോഗിച്ചുള്ള റോഡുകളുടെ പണിയും അവതാളത്തിലാണ്. നാലു വർഷത്തിനുള്ളിൽ അഞ്ച് സെക്രട്ടറിമാരാണ് ഇവിടെ വന്നുപോയത്. ഉദ്യോഗസ്ഥരെ അടിയന്തരമായി നിയമിക്കണമെന്ന് ആവശ്യപ്പെട്ട് പഴയന്നൂർ ബ്ലോക്ക് പഞ്ചായത്ത് അസി. എക്സിക്യൂട്ടീവ് എൻജിനീയറുടെ ഓഫീസിനുമുന്നിൽ പഞ്ചായത്ത് പ്രസിഡന്‍റ് കെ. പത്മജ, വൈസ് പ്രസിഡന്‍റ് എം. ഉദയൻ എന്നിവരടക്കമുള്ള ഭരണസമിതിയിലെ ആറ് അംഗങ്ങൾ കുത്തിയിരിപ്പുസമരം നടത്തി.

മേളപ്രമാണി ചൊവ്വല്ലൂര്‍ മോഹനവാര്യര്‍ക്ക് വീരശൃംഖല സമ്മാനിച്ചു

ഗുരുവായൂര്‍: മേളപ്രാമാണി ചൊവ്വല്ലൂര്‍ മോഹനവാര്യര്‍ക്ക് വാദ്യകലാകാരന്മാരുടേയും ആസ്വാദകരുടേയും സാനിധ്യത്തിൽ ഗുരുവായൂരിന്‍റെ വീരശൃംഖല സമ്മാനിച്ചു. ഗുരുവായൂര്‍ തന്ത്രി ചേന്നാസ് ദിനേശന്‍ നമ്പൂതിരിപ്പാട് ഭദ്രദീപം കൊളുത്തിയ ചടങ്ങിൽ കോഴിക്കോട് സാമൂതിരിയുടെ പ്രതിനിധി ഗിരിധർ വർമ വീരശൃംഖല അണിയിച്ചു. കഥകളി കുലപതി കലാമണ്ഡലം ഗോപി ഉദ്ഘാടനം ചെയ്തു.കോട്ടയ്ക്കൽ ആര്യവൈദ്യശാല മാനേജിംഗ് ട്രസ്റ്റി ഡോ. പി.എം. വാര്യർ അധ്യക്ഷനായി. മേളപ്രാമാണിമാരായ മട്ടന്നൂര്‍ ശങ്കരന്‍ക്കുട്ടിയും പെരുവനം കുട്ടന്‍മാരാരും ചേര്‍ന്ന് മോഹനവാര്യര്‍ക്ക് ഉപഹാരവും നല്‍കി. മുതിര്‍ന്ന മേളം കലാകാരന്‍ കിഴക്കൂട്ട് അനിയന്‍മാരാര്‍ കീര്‍ത്തിചക്രവും നാദസ്വരം വിദ്വാന്‍ തിരുവിഴ ജയശങ്കര്‍ കീര്‍ത്തിശംഖും സമ്മാനിച്ചു. മമ്മിയൂര്‍ ദേവസ്വം ചെയര്‍മാന്‍ ജി.കെ. പ്രകാശന്‍, പാറമേക്കാവ് ദേവസ്വം സെക്രട്ടറി ജി. രാജേഷ് കുമാര്‍, എന്‍.പി. വിജയകൃഷ്ണന്‍, വി. കലാധരന്‍, ജയരാജ് വാര്യര്‍, അന്തിക്കാട് പദ്മനാഭന്‍, വി.പി. ഉണ്ണികൃഷ്ണന്‍, ഗുരുവായൂര്‍ മുരളി തുടങ്ങിയവര്‍ പ്രസംഗിച്ചു. രാത്രി മട്ടന്നൂര്‍ ശങ്കരന്‍ക്കുട്ടിയും മക്കളായ മട്ടന്നൂര്‍ ശ്രീകാന്തും മട്ടന്നൂര്‍ ശ്രീരാജും ചേര്‍ന്ന് തായമ്പക അവതരിപ്പിച്ചു.

സെന്‍റ് അലോഷ്യസ് കോളജിൽ ദേശീയ സെമിനാർ

തൃശൂർ: എൽത്തുരുത്ത് സെന്‍റ് അലോഷ്യസ് കോളജ് ഇംഗ്ലീഷ് ഗവേഷണവിഭാഗം ന്യൂ വോയ്സസ്, ന്യൂ ക്വസ്റ്റ്യൻസ്: എമേർജിംഗ് തീംസ് ഇൻ ഹ്യൂമാനിറ്റീസ്, ലിറ്ററേച്ചർ ആൻഡ് കൾച്ചർ എന്ന വിഷയത്തിൽ ദേശീയസെമിനാർ സംഘടിപ്പിച്ചു. കേരള സർവകലാശാല ഡീൻ പ്രഫ. മീന ടി. പിള്ള ഉദ്ഘാടനം ചെയ്തു. പ്രിൻസിപ്പൽ ഡോ. ഇ.ഡി. ഡയസ് അധ്യക്ഷത വഹിച്ചു. ഇംഗ്ലീഷ് ഗവേഷണ വിഭാഗത്തിന്‍റെ നേതൃത്വത്തിൽ നടക്കുന്ന ക്രിസാലിസ് ഓണ്‍ലൈൻ പ്രഭാഷണപരന്പരയുടെ അന്പതാം സമ്മേളനത്തിന്‍റെ ഭാഗമായാണ് സെമിനാർ സംഘടിപ്പിച്ചത്. മാനേജർ ഫാ. തോമസ് ചക്രമാക്കിൽ അനുഗ്രഹപ്രഭാഷണം നടത്തി. കോളജ് അഡ്മിനിസ്ട്രേറ്റർ ഫാ. അരുണ്‍ ജോസ്, ഐക്യുഎസി കോഓർഡിനേറ്റർ ഡോ.കെ.ബി. ലിബിസണ്‍, ഇംഗ്ലീഷ് വിഭാഗം മേധാവി സൂസൻ ജോഷി, സെമിനാർ കോഓർഡിനേറ്റർ ഡോ. അതീത കെ. ഉണ്ണി, കോളജ് റിസർച്ച് ഡയറക്ടർ ഡോ. സി. ബെറ്റ്സി പോൾ തുടങ്ങിയവർ പ്രസംഗിച്ചു. ഡോ. ടി. മുരളീധരൻ, പ്രഫ. ലത നായർ, പ്രഫ. മീന ടി. പിള്ള എന്നിവർ പാനൽചർച്ചയിൽ പങ്കെടുത്തു. പ്രബന്ധ അവതരണങ്ങൾ, പോസ്റ്റർ പ്രദർശനം, ക്വിസ് മത്സരം തുടങ്ങിയവയും ഉണ്ടായിരുന്നു. സമാപനസമ്മേളനത്തിൽ ഡൽഹി സർവകലാശാലയിലെ പ്രഫ. നന്ദിനി സി. സെൻ പ്രഭാഷണം നടത്തി. രാജ്യത്തെ വിവിധ സംസ്ഥാനങ്ങളിൽനിന്നുള്ള വിദ്യാർഥികളും ഗവേഷകരും അധ്യാപകരും നേരിട്ടും ഓണ്‍ലൈനിലുമായി സെമിനാറിന്‍റെ ഭാഗമായി.

പാലപ്പിള്ളിയിൽ പുലിയിറങ്ങി പശുവിനെ കൊന്നു

പാലപ്പിള്ളി: പുലിയിറങ്ങി പശുവിനെ കൊന്നു. ഇന്നലെ വൈകീട്ടാണ് ചീനിക്കുന്ന് ഭാഗത്തെ റബർ തോട്ടത്തിൽ പശുവിനെ ചത്തനിലയിൽ കണ്ടത്. ചിമ്മിനി ഡാം റോഡിനോടുചേർന്നുള്ള തോട്ടത്തിലാണ് പുലിയിറങ്ങിയത്. ഡാമിലേക്കു പോയ യാത്രക്കാരാണ് പശുവിനെ ചത്തനിലയിൽ കണ്ടത്. ജനവാസമേഖലയിൽ പുലിയിറങ്ങിയതോടെ നാട്ടുകാർ ഭീതിയിലാണ്. പുലിയെ പിടികൂടുന്നതിനുള്ള കൂട് സ്ഥാപിക്കണമെന്ന് മലയോരകർഷക സംരക്ഷണ സമിതി ആവശ്യപ്പെട്ടു.

പ്രവർത്തനം നിലച്ച് ക്രിമറ്റോറിയം; അനക്കമില്ലാതെ അധികൃതർ

ലാലൂർ: കോർപറേഷന്‍റെ കീഴിൽ ലാലൂരിൽ ആരംഭിച്ച ഗ്യാസ് ക്രിമറ്റോറിയത്തിന്‍റെ പ്രവർത്തനം നിലച്ചിട്ട് മാസങ്ങൾ പിന്നിട്ടിട്ടും അനക്കമില്ലാതെ അധികാരികൾ. പുകക്കുഴലിനു സംഭവിച്ച കേടുപാടാണ് പ്രവർത്തനം നിലയ്ക്കാൻ ഇടയാക്കിയത്. കോർപറേഷൻ ആരോഗ്യ സ്റ്റാൻഡിംഗ് കമ്മിറ്റി ചെയർമാന്‍റെ ഡിവിഷനിൽ പ്രവർത്തിക്കുന്ന ഈ സ്ഥാപനം 1999 ൽ 10 ലക്ഷം രൂപ ചെലവഴിച്ചാണ് ആദ്യം പ്രവർത്തനം ആരംഭിച്ചത്. അന്ന് വൈദ്യുതിയിലായിരുന്നു പ്രവർത്തനം. 2012 ൽ മന്ത്രി സി.എൻ. ബാലകൃഷ്ണനാണ് ഇതിനെ ഗ്യാസ് ക്രിമറ്റോറിയമായി മാറ്റുകയും ഉദ്ഘാടനം നടത്തുകയും ചെയ്തത്. എന്നാൽ പലവിധ തകരാറുകൾ നേരിട്ടിരുന്ന ഇവിടെ സെമി ഓട്ടോമാറ്റിക് സംവിധാനത്തിൽ എൽപിജി ഗ്യാസിൽ പ്രവർത്തിക്കുന്ന രണ്ട് യൂണിറ്റുകൾ കൂടി സജ്ജമാക്കിയതോടെ പ്രശ്നങ്ങൾക്കു താത്കാലിക പരിഹാരമാകുകയായിരുന്നു. ഒരേസമയം രണ്ടു മൃതദേഹങ്ങൾവരെ സംസ്കരിച്ചിരുന്ന ഇവിടെ പുകക്കുഴലിനുണ്ടായ കേടുപാടുകളോടെയാണ് വീണ്ടും പൂട്ടുവീണത്. സംസ്കാരകർമങ്ങൾക്കിടെ പുക മുകളിലേക്കു പോകാത്തതുമൂലം ടാങ്കുകളുട‌െയും സംസ്കരണപ്ലാന്‍റിന്‍റെയും പ്രവർത്തനം താളം തെറ്റി. നേരത്തേ ഒരുമണിക്കൂർമാത്രം വേണ്ടിവന്നിരുന്ന സംസ്കരണചടങ്ങുകൾക്കു നാലും അഞ്ചും മണിക്കൂറുകൾ സമയമെടുക്കാൻ തുടങ്ങിയതോടെ സംസ്കരിക്കുന്ന മൃതദേഹങ്ങളുടെ എണ്ണവും ചുരുക്കി. ജീവനക്കാരുടെ എണ്ണവും നാലിൽനിന്ന് രണ്ടായി കുറഞ്ഞു. സ്വകാര്യശ്മശാനങ്ങളിൽ ഭീമമായ നിരക്ക് വാങ്ങിയിരുന്ന സമയത്തും കോർപറേഷൻ പരിധിയിലുള്ള ബിപിഎൽ കാർഡുടമകൾക്കു 2000 രൂപയും എപിഎൽക്കാർക്ക് 2500 രൂപയും മറ്റുള്ളവർക്കു 3500 രൂപയുംമാത്രമാണ് ഇവിടെ ഈടാക്കിയിരുന്നുള്ളൂ. ക്രിമറ്റോറിയം പൂട്ടിയതോടെ മെഡിക്കൽ കോളജിൽനിന്നും ജില്ലയിലെ വിവിധ ആശുപത്രികളിൽനിന്നും കൊണ്ടുവരുന്ന അനാഥമൃതദേഹങ്ങൾ സംസ്കരിക്കാനും വഴിയില്ലാതെ പോലീസും നട്ടംതിരിയുകയാണ്.

മുത്തശിമാർക്കുള്ള മാക്സി തയ്ക്കുന്ന തിരക്കിലാണ് എൻഎസ്എസ് വിദ്യാർഥികൾ

എരുമപ്പെട്ടി: മാക്സികൾ തയ്ക്കുന്ന തിരക്കിലാണ് മരത്തംകോട് സ്കൂളിലെ എൻഎസ്എസ് വിദ്യാർഥികൾ. വൃദ്ധസദനത്തിലെ മുത്തശിമാർക്ക് ഓണക്കോടിയായി നൽകുവാനാണ് ഇവർ മാക്സികൾ തയ്ക്കുന്നത്. സ്കൂളിലെ എൻഎസ്എസ് വൊളന്‍റിയർമാരും സൂചിയും നൂലും എന്ന പേരിലുള്ള തയ്യൽ യൂണിറ്റിലെ അംഗങ്ങളുമായ ഹംദ, റോമിത്ത്, ലിയ, നിവേദ്യ കൃഷ്ണ, മിസ്ന എന്നിവരാണ് മാക്സികൾ തയ്ക്കുന്നത്. ചിറമനേങ്ങാട് കനിവ് വൃദ്ധസദനത്തിലെ 20 മുത്തശിമാർക്കാണ് ഇവർ ഓണക്കോടിയായി മാക്സികൾ സമ്മാനിക്കുന്നത്. വൃദ്ധ സദനത്തിൽ ചെന്ന് അവരുടെ ഇഷ്ടങ്ങൾ മനസിലാക്കിയാണ് വിദ്യാർഥികൾ മാക്സികൾ ഒരുക്കുന്നത്. എൻഎസ്എസ് അസിസ്റ്റന്‍റ് പ്രോഗ്രാം ഓഫീസർ ഡോ. എൻ.എ.വിനീതയാണ് ഈ ആശയം മുന്നോട്ട് വെച്ചത്. പ്രോഗ്രാം ഓഫീസർ രേഷ്മ പടിക്കവളപ്പിൽ, പ്രിൻസിപ്പൽ വി. സ്മിത, ലാബ് അസിസ്റ്റന്‍റ് ലിജി തോമസ് എന്നിവരും സഹായത്തിനുണ്ട്. പിടിഎ, എംപിടിഎ, എസ്എംസി കമ്മറ്റികളുടെ സഹകരണവും ഇവർക്ക് പ്രോത്സാഹനമാണ്. തൊഴിൽ അധിഷ്ഠിത വിദ്യാഭ്യാസവും അതോടൊപ്പം സാമൂഹിക ജീവകാരുണ്യ പ്രവർത്തനവുമാണ് എൻഎസ്എസ് യൂണിറ്റ് ഇത്തരം പ്രവർത്തനങ്ങളിലൂടെ മുന്നോട്ട് വെക്കുന്ന ആശയം. മുൻപും സ്വാതന്ത്ര്യ ദിനാഘോഷത്തിൻന്‍റെ ഭാഗമായി ദേശീയപതാക തയ്ച്ച് വില്പന നടത്തി ആ പണം കൊണ്ട് വൃദ്ധസദനത്തിലേക്ക് ഓണക്കോടി വാങ്ങി നൽകിയിരുന്നു. കഴിഞ്ഞവർഷം അങ്കണവാടിയിലെ കുട്ടികൾക്ക് ജുബ്ബകൾ തയ്ച്ച് നൽകിയിരുന്നു. ഇത്തരത്തിൽ വ്യത്യസ്തമായ ഒട്ടേറെ ജീവകാരുണ്യ സാമൂഹിക പ്രവർത്തനങ്ങളാണ് മരത്തംകോട് ഗവ.ഹയർ സെക്കൻഡറി സ്കൂളിലെ എൻഎസ്എസ് യൂണിറ്റ് നടത്തിയിട്ടുള്ളത്. ഈ ഓണം വൃദ്ധസദനത്തിലെ മുത്തശിമാരോടൊത്ത് ആഘോഷിക്കുവാനുള്ള തയ്യാറെടുപ്പിലാണ് എൻഎസ്എസ് വിദ്യാർഥികൾ.

വിദേശത്ത് മരിച്ചയാളുടെ സംസ്കാരം നടത്തി

പുന്നംപറമ്പ്: കഴിഞ്ഞ ദിവസം വിദേശത്ത് മരിച്ച കരുമത്ര സ്വദേശിയായ യുവാവിന്‍റെ മൃതദേഹം നാട്ടിലെത്തിച്ച് സംസ്കരിച്ചു. ജോലി സ്ഥലമായ ദുബായിലാണ് തൂങ്ങിമരിച്ചനിലയിൽ കണ്ടെത്തിയത്. കരുമത്ര കോച്ചാട്ടിൽ വീട്ടിൽ രവീന്ദ്രൻ മകൻ വിനോദ് (31) ആണ് മരിച്ചത്. വിനോദ് മരിച്ച വിവരം വിദേശത്തു നിന്നു കൂട്ടുകാരാണ് നാട്ടിലുള്ള ബന്ധുക്കളെ വിവരം അറിയിച്ചത്. വിനോദ് അവിവാഹിതനാണ്. രണ്ടു വർഷത്തോളമായി വിനോദ് ദുബായിലാണ് ജോലി നോക്കുന്നത്. അമ്മ: മല്ലിക. സഹോദരൻ വിമൽ നാട്ടിൽ ഓട്ടോ ഡ്രൈവറാണ്. മൃതദേഹം ഇന്നലെ പുലർച്ചെ നാട്ടിലെത്തിച്ച് സംസ്കരിച്ചു.

പുഴയിൽ വീണ് കാണാതായ യുവാവിന്‍റെ മൃതദേഹം കണ്ടെത്തി

കയ്പമംഗലം: പെരിഞ്ഞനം പൊൻമാനിക്കുടത്ത് പുഴയിൽ വീണ് കാണാതായ ബൈക്ക് യാത്രികന്‍റെ മൃതദേഹം കണ്ടെത്തി. ഇന്നലെ രാവിലെ മുതൽ എൻഡിആർഎഫ് സംഘം നടത്തിയ തെരച്ചിലിലാണ് പൊന്മാനിക്കുടം കടവിന്‍റെ അരക്കിലോമീറ്റർ തെക്കു മാറി അഖിൽ രാജിന്‍റെ മൃതദേഹം കണ്ടെത്തിയത്. കയ്പമംഗലം പോലീസ് മേൽ നടപടികൾ സ്വീകരിച്ചു. ചൊവ്വാഴ്‌ച രാത്രി ഒമ്പതോടെയാണ് ബൈക്ക് യാത്രികൻ കോവിലകം സ്വദേശി പുന്നക്കത്തറ വീട്ടിൽ അഖിൽ രാജിനെ പുഴയിൽ വീണ് കാണാതായത്. ഫയർ ഫോഴ്‌സിന്‍റെ തെരച്ചിലിൽ ബൈക്ക് കണ്ടെത്തിയെങ്കിലും യുവാവിനെ കണ്ടെത്തിയിരുന്നില്ല. സംസ്കാരം നടത്തി. അമ്മ: ശാലിനി. സഹോദരി: വേണി.

അടിപ്പാത നിര്‍മാണം: പൊടിയില്‍ മുങ്ങി ആമ്പല്ലൂര്‍

ആമ്പല്ലൂര്‍: അടിപ്പാതനിര്‍മാണത്തെതുടര്‍ന്നുള്ള പൊടിപടലത്തില്‍ മുങ്ങി ശ്വാസംമുട്ടുകയാണ് ആമ്പല്ലൂര്‍. മഴ മാറിയതോടെ രൂക്ഷമായ പൊടിശല്യംമൂലം പൊറുതിമുട്ടുകയാണ് വ്യാപാരികളും വാഹന യാത്രക്കാരും. വ്യാപാരസ്ഥാപനങ്ങളിലെ സാധനങ്ങളിലും ഉപകരണങ്ങളിലും പൊടി നിറഞ്ഞിരിക്കുകയാണ്. സ്ഥാപനങ്ങള്‍ക്കു മുന്പില്‍ വാഹനങ്ങള്‍ അല്പസമയം നിര്‍ത്തിയിട്ടാല്‍പോലും പൊടി നിറഞ്ഞ് വാഹനങ്ങള്‍ കാണാനാവാത്ത സ്ഥിതിയാവുമെന്നു വ്യാപാരികള്‍ പറഞ്ഞു. പൊടിശല്യംമൂലം ജീവനക്കാര്‍ക്ക് ആരോഗ്യപ്രശ്നങ്ങളുമുണ്ടാവുന്നുണ്ട്. സ്ഥാപനങ്ങളുടെ പ്രവര്‍ത്തനംതന്നെ അവസാനിപ്പിച്ചു. എന്നിട്ടും ഈ വിഷയത്തില്‍ ആരും ഇടപെടുന്നില്ലെന്നാണ് വ്യാപാരികളുടെ പരാതി. പൊടിശല്യത്തെതുടര്‍ന്നു കഴിഞ്ഞദിവസം വ്യാപാരികള്‍ അടിപ്പാതനിര്‍മാണം തടഞ്ഞിരുന്നു. ടാങ്കറില്‍ വെള്ളമെത്തിച്ച് റോഡ് നനച്ചുനല്‍കണമെന്നാണ് വ്യാപാരികളുടെ ആവശ്യം. അടിപ്പാതനിര്‍മാണത്തിന്‍റെ പ്രവര്‍ത്തനങ്ങള്‍ ആരംഭിച്ചിട്ട് ഒരുവര്‍ഷമായെങ്കിലും നിര്‍മാണത്തിലെ മെല്ലെപ്പോക്കാണ് പ്രശ്‌നങ്ങള്‍ക്കെല്ലാം കാരണം. മഴ പെയ്താല്‍ ചെളിയും വെയില്‍ ഉദിച്ചാല്‍ പൊടിശല്യവുമാണ് ഇപ്പോള്‍ ആമ്പല്ലൂരിലെ സ്ഥിതി. പല സമയങ്ങളിലും ദേശീയപാതയില്‍ കാഴ്ചമറയ്ക്കുന്ന തരത്തിലാണ് പൊടി ഉയരുന്നത്. ഈ സമയങ്ങളില്‍ ഇരുചക്രവാഹന യാത്രികര്‍ക്കു സഞ്ചരിക്കാന്‍പോലും ബുദ്ധിമുട്ടാണ്. പരാതി ഉയരുമ്പോള്‍ അധികൃതര്‍ ഇടപെട്ട് ഓരോ തവണ കുഴി അടയ്ക്കാൻ മെറ്റലും പാറപ്പൊടിയും കലര്‍ന്ന മിശ്രിതമാണ് ഉപയോഗിക്കുന്നത്. അറ്റകുറ്റപ്പണികള്‍ക്കു പിന്നാലെ മഴ പെയ്യുന്നതോടെ ഇത് ഇളകും. മഴയ്ക്കു പിറകെ വെയില്‍ എത്തുന്നതോടെ ദേശീയപാതയും പരിസരപ്രദേശങ്ങളും വീണ്ടും പൊടിപടലങ്ങളാല്‍ മുങ്ങും.

മാന്ദാമംഗലത്തു കെഎസ്എഫ്ഡിസി തിയേറ്റർ കോംപ്ലക്സ്; ഭൂമി കൈമാറി

ഒല്ലൂർ: ടൂറിസം സർക്യൂട്ടിന്‍റെയും അന്താരാഷ്ട്ര സുവോളജിക്കൽ പാർക്ക് ഉൾപ്പെടെയുള്ള പുത്തൂരിന്‍റെയും വികസനത്തിന് ആക്കംകൂട്ടുന്ന മാന്ദാമംഗലം മൾട്ടിപർപ്പസ് തിയേറ്റർ കോംപ്ലക്സിനുള്ള ഭൂമിയുടെ രേഖ റവന്യൂ മന്ത്രി കെ. രാജൻ സാംസ്കാരിക മന്ത്രി സജി ചെറിയാനു കൈമാറി. മാന്ദാമംഗലം വില്ലേജിൽപ്പെട്ട ഒരു ഏക്കർ റവന്യൂ പുറമ്പോക്കുഭൂമിയാണ് സംസ്കാരികവകുപ്പിനു കൈമാറിയത്. ഭൂമി ലഭ്യമാക്കുന്നതിനു കഴിഞ്ഞ ഏപ്രിൽ ഒമ്പതിനു റവന്യൂ മന്ത്രി കെ. രാജന്‍റെ അധ്യക്ഷതയിൽ സാംസ്കാരിക മന്ത്രി സജി ചെറിയാന്‍റെ സാന്നിധ്യത്തിൽ യോഗം ചേർന്നിരുന്നു. റവന്യൂ മന്ത്രി നിർദേശിച്ചതനുസരിച്ച്, റവന്യൂ, വനം, സാംസ്കാരിക വകുപ്പ് ഉദ്യോഗസ്ഥർ സ്ഥലം പരിശോധിക്കുകയും ഭൂമി തിട്ടപ്പെടുത്തി റിപ്പോർട്ട് കളക്ടർക്കു കൈമാറുകയും ചെയ്തിരുന്നു. കളക്ടറുടെ റിപ്പോർട്ട് സർക്കാർ പരിശോധിച്ച്, ഭൂമിയുടെ ഉടമസ്ഥാവകാശം റവന്യൂ വകുപ്പിൽ നിലനിർത്തി, വ്യവസ്ഥകളോടെ സാംസ്കാരികവകുപ്പിനു കൈമാറാൻ തീരുമാനിച്ചു. ഒരപ്പൻകെട്ട് വെള്ളച്ചാട്ടം, പീച്ചി ഡാം, കേരള ഫോറസ്റ്റ് റിസർച്ച് ഇൻസ്റ്റിറ്റ്യൂട്ട് - അന്താരാഷ്ട്ര പൂന്തോട്ടം - ചിത്രശലഭ മ്യൂസിയം, പുത്തൂർ സുവോളജിക്കൽ പാർക്ക്, പുത്തൂർ കായൽ ടൂറിസം, കച്ചിത്തോട്, വല്ലൂർ കുത്ത്, ചിയ്യാരം വാക്കിംഗ് സ്ട്രീറ്റ് തുടങ്ങി ഒല്ലൂർ മണ്ഡലത്തിലെ പ്രകൃതിരമണീയമായ വിനോദസഞ്ചാര കേന്ദ്രങ്ങൾ ചേർന്നതാണ് ഒല്ലൂർ ടൂറിസം സർക്യൂട്ട്. പുത്തൂർ സുവോളജിക്കൽ പാർക്കിനു സമീപമാണ് തിയേറ്റർ കോംപ്ലക് സ് സ്ഥാപിക്കുന്നത്. റവന്യൂ മന്ത്രിയുടെ ചേംബറിൽ നടന്ന രേഖകൈമാറ്റ ചടങ്ങിൽ കേരള ചലച്ചിത്ര വികസന കോർപറേഷൻ (കെഎസ്എഫ് ഡിസി) ചെയർപേഴ്സൺ കെ. മധു, സാംസ്കാരികവകുപ്പ് ഡയറക്ടർ ദിവ്യ എസ്. അയ്യർ, റവന്യൂ വകുപ്പ് അഡീഷണൽ സെക്രട്ടറി അനു എസ്. നായർ, കെഎസ്എഫ്ഡിസി മാനേജിംഗ് ഡയറക്ടർ പി.എസ്. പ്രിയദർശനൻ തുടങ്ങിയവർ പങ്കെടുത്തു.

അളഗപ്പ എന്‍ടിസി മില്‍ ജീവനക്കാരെ തൊഴിലാളികള്‍ തടഞ്ഞു

അളഗപ്പനഗര്‍: അടച്ചുപൂട്ടിയ അളഗപ്പ എന്‍ടിസി മില്‍ തുറന്നുപ്രവര്‍ത്തിക്കാത്തതില്‍ പ്രതിഷേധിച്ച് തൊഴിലാളികള്‍ മാനേജ്‌മെന്‍റ് ജീവനക്കാരെ തടഞ്ഞു. സംയുക്ത ട്രേഡ് യൂണിയന്‍റെ നേതൃത്വത്തിലായിരുന്നു പ്രതിഷേധം. അഞ്ചരവര്‍ഷമായി അടച്ചുപൂട്ടിയ അളഗപ്പ ടെക്‌സ്‌റ്റൈല്‍ മിൽ ഉള്‍പ്പടെയുള്ള എന്‍ടിസി മില്ലുകള്‍ തുറന്നുപ്രവര്‍ത്തിക്കാന്‍ കേന്ദ്രമന്ത്രി സുരേഷ് ഗോപി ഇടപെടണമെന്നു യൂണിയനുകള്‍ ആവശ്യപ്പെട്ടു. എട്ടുമാസത്തെ ശമ്പളകുടിശിക നല്‍കുക, പിരിഞ്ഞുപോയവര്‍ക്കു ഗ്രാറ്റുവിറ്റി നല്‍കുക, ഇഎസ്‌ഐ ആനുകൂല്യം നല്‍കുക, അര്‍ഹരായവര്‍ക്കു ബോ ണസ് നല്‍കുക എന്നീ ആവശ്യങ്ങള്‍ ഉന്നയിച്ച് മില്‍ ഗേറ്റിനു മുന്പില്‍ തൊഴിലാളികള്‍ ധര്‍ണ നടത്തി. ഡിസിസി ജനറല്‍ സെക്രട്ടറി കെ. ഗോപാലകൃഷ്ണന്‍ ധര്‍ണ ഉദ്ഘാടനം ചെയ്തു. എഐടിയുസി യൂണിയൻ ജനറല്‍ സെക്രട്ടറി കെ. ഉണ്ണികൃഷ്ണന്‍ അധ്യക്ഷത വഹിച്ചു. സിഐടിയു യൂണിയൻ ജനറല്‍ സെക്രട്ടറി ആന്‍റോ ഇല്ലിക്കല്‍, ബിഎംഎസ് നേതാവ് എം. തുളസീദാസ്, കെ. രാധാകൃഷ്ണന്‍, എം.ജി. ജുനീഷ്, ഇ.ആര്‍. മുരളി എന്നിവര്‍ പ്രസംഗിച്ചു. പുതുക്കാട് എസ്എച്ച്ഒയുടെ നേതൃത്വത്തില്‍ പോലീസ് സംഘവും സ്ഥലത്തെത്തിയിരുന്നു.

കാര്‍യാത്രക്കാരനെ ആക്രമിച്ച കേസില്‍ രണ്ടുപേർ അറസ്റ്റില്‍

ഇരിങ്ങാലക്കുട: കാര്‍ തട്ടിയതിനെതുടര്‍ന്നുണ്ടായ തര്‍ക്കത്തില്‍ കാര്‍ യാത്രക്കാരനെ ആക്രമിച്ച കേസില്‍ രണ്ടു പ്രതികള്‍ അറസ്റ്റില്‍. കൊറ്റനെല്ലൂര്‍ കുതിരത്തടം സ്വദേശി വേലംപറമ്പില്‍ അബ്ദുള്‍ ഷാഹിദ് (29), പട്ടേപ്പാടം തൈപ്പറമ്പില്‍ നിഖില്‍ (30) എന്നിവരാണ് അറസ്റ്റിലായത്. പുത്തന്‍ചിറ കൊട്ടിക്കല്‍ മുഹമ്മദ് സിദ്ദിഖിന്‍റെ ബന്ധുവിന്‍റെ കാറില്‍ ഈ കേസിലെ ഒന്നാംപ്രതിയും ആളൂര്‍ പോലീസ് സ്റ്റേഷന്‍ റൗഡിയുമായ ആളൂര്‍ മുരിയാട് ഉള്ളാട്ടിക്കുളം മില്‍ജോയുടെ (29) കാര്‍ തട്ടിയതു ചോദ്യംചെയ്തതിലുള്ള വൈരാഗ്യത്തില്‍ സിദ്ധിഖിനെയും കൂട്ടുകാരെയും ഭീഷണിപ്പെടുത്തി ആക്രമിച്ചു പരിക്കേല്‍പ്പിക്കുകയായിരുന്നു. മില്‍ജോയെ മുമ്പ് അറസ്റ്റ് ചെയ്തിരുന്നു. പ്രതികളായ അബ്ദുള്‍ ഷാഹിദ്, നിഖില്‍ എന്നിവരെ കഴിഞ്ഞദിവസം ആനന്ദപുരത്ത് യുവാവിനെ ആക്രമിച്ച് വാച്ചും മൊബൈല്‍ഫോണും കവര്‍ച്ചചെയ്ത കേസില്‍ ഉള്‍പ്പെട്ടതിനെതുടര്‍ന്ന് അറസ്റ്റുചെയ്ത് ജയിലിലാക്കിയിരുന്നു. തുടര്‍ന്ന് ഇരിങ്ങാലക്കുടയിലെ കേസിലേക്കുവേണ്ടി കോടതിയുടെ അനുമതിയോടെയാണ് ഇരുവരെയും അറസ്റ്റുചെയ്തത്.

രാജീവ് ഗാന്ധി വിഭാഗീയതയുടെ രക്തസാക്ഷി: തേറന്പിൽ

തൃശൂർ: വിഭാഗീയതയുടെ രക്തസാക്ഷിയാണ് രാജീവ് ഗാന്ധിയെന്നു മുൻ നിയമസഭാ സ്പീക്കർ തേറന്പിൽ രാമകൃഷ്ണൻ. ആസാം -പഞ്ചാബ് പ്രശ്നപരിഹാരത്തിനായി രാജീവ് ഗാന്ധി സ്വീകരിച്ച നിയമപരമായ സമീപനങ്ങൾ മണിപ്പുർ കലാപം അവസാനിപ്പിക്കാൻ മോദിയുടെ ഭാഗത്തുനിന്നുണ്ടായില്ല. രാജ്യത്തു വിഭാഗീയത വളർത്താനാണ് ഇന്നത്തെ ഭരണാധികാരികൾ ശ്രമിക്കുന്നത്. വോട്ടുകൊള്ളയും ജനാധിപത്യധ്വംസനങ്ങളുംവഴി രാജ്യത്തെ ബാധിച്ച ഭയത്തിൽനിന്നു ജനങ്ങളെ മോചിപ്പിക്കാൻ രാഹുൽ ഗാന്ധി നടത്തുന്ന പോരാട്ടങ്ങൾക്കു പ്രതിപക്ഷകക്ഷികൾ നൽകുന്ന പിന്തുണ ശുഭകരമാണ്. ഇന്ത്യയെ വീണ്ടെടുക്കാനുള്ള തീവ്രശ്രമത്തിന്‍റെ ഭാഗമാണീ പോരാട്ടമെന്നും അദ്ദേഹം പറഞ്ഞു. രാജീവ് ഗാന്ധിയുടെ 81-ാം ജന്മദിനത്തിന്‍റെ ഭാഗമായി ഡിസിസി സംഘടിപ്പിച്ച സദ്ഭാവനാദിനാചരണവും പൂഷ്പാർച്ചനയും അനുസ്മരണവും ഉദ്ഘാടനംചെയ്തു പ്രസംഗിക്കുകയായിരുന്നു തേറന്പിൽ. ഡിസിസി പ്രസിഡന്‍റ് അഡ്വ. ജോസഫ് ടാജറ്റ്, ടി.വി. ചന്ദ്രമോഹൻ, ഒ. അബ്ദുറഹ്‌മാൻകുട്ടി, ജോസ് വള്ളൂർ, സുനിൽ അന്തിക്കാട്, രാജേന്ദ്രൻ അരങ്ങത്ത്, ജോണ്‍ ഡാനിയൽ, ഷാജി കോടങ്കണ്ടത്ത്, ഐ.പി. പോൾ, സി.ഒ. ജേക്കബ്, ഡോ. നിജി ജസ്റ്റിൻ, ലാലി ജെയിംസ്, ആൻസി ജേക്കബ്, വില്ലി ജിജോ, കെ.കെ. ബാബു, അഡ്വ. വി. സുരേഷ് കുമാർ, അഡ്വ. സിജോ കടവിൽ, ബൈജു വർഗീസ്, രാജൻ പല്ലൻ, കെ.വി. ദാസൻ, കെ.എച്ച്. ഉസ്മാൻ ഖാൻ, കെ.ബി. ജയറാം, പി. ശിവശങ്കരൻ, എം.എസ്. ശിവരാമകൃഷ്ണൻ, സജീവൻ കുരിയച്ചിറ, രവി താണിക്കൽ, സന്തോഷ് ഐത്താടൻ, സത്താർ ആദൂർ, പി.ഡി. റപ്പായി, കെ. സുരേഷ്, ആശിഷ് മൂത്തേടത്ത്, ജേക്കബ് പൂലിക്കോട്ടിൽ, ജോർജ് ചാണ്ടി എന്നിവർ പങ്കെടുത്തു.

സ്റ്റേറ്റ് ജൂണിയര്‍ അത്‌ലറ്റിക്‌സ് മീറ്റില്‍ താരമായി പി.എന്‍. അഭിയ

ഇരിങ്ങാലക്കുട: തിരുവനന്തപുരത്തു നടന്ന കേരളാ സ്റ്റേറ്റ് ജൂണിയര്‍ അത്‌ലറ്റിക്‌സ് മീറ്റില്‍ താരമായി ക്രൈസ്റ്റ് കോളജ് വിദ്യാര്‍ഥി പി.എന്‍. അഭിയ. രണ്ട് ഗോള്‍ഡ് മെഡലും ഒരു സില്‍വര്‍ മെഡലുമാണ് നേടിയത്. തൃശൂര്‍ ജില്ലയെ പ്രതി നിധീകരിച്ചു മത്സരിച്ച അഭിയ 100 മീറ്ററില്‍ വെള്ളി, 200 മീറ്ററില്‍ സ്വര്‍ണം, 4 X100 മീറ്റർ റിലേയിൽ സ്വര്‍ണം എന്നിവ കരസ്ഥമാക്കി. സ്‌‌പോര്‍ട്‌സ് കൗണ്‍സില്‍ ഹോസ്റ്റല്‍ താരമായ അഭിയ ക്രൈസ്റ്റ് കോളജില്‍ സേവിയര്‍ പൗലോസിന്‍റെ കീഴിലാണു പരിശീലിക്കുന്നത്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]