മലവെള്ളപ്പാച്ചിലിൽ സ്കൂട്ടർ ഒഴുകിപ്പോയി; യാത്രക്കാരൻ രക്ഷപ്പെട്ടു
1464241
Sunday, October 27, 2024 4:27 AM IST
തൊടുപുഴ: ശക്തമായ മഴയിൽ തോട്ടിലുണ്ടായ വെള്ളപ്പാച്ചിലിൽ സ്കൂട്ടർ ഒഴുകിപ്പോയി. സ്കൂട്ടർ യാത്രക്കാരനെ നാട്ടുകാർ രക്ഷപ്പെടുത്തി. വണ്ണപ്പുറം മുള്ളരിങ്ങാട് അമയൽതൊട്ടി ഭാഗത്ത് ഇന്നലെ വൈകുന്നേരമാണ് സംഭവം. വെട്ടിക്കൽ ജമാലാണ് ഒഴുക്കിൽപ്പെട്ടത്. ഇഷ്ടികക്കളത്തിലെ ജോലി കഴിഞ്ഞ് വീട്ടിലേയ്ക്ക് മടങ്ങുന്നതിനിടെയാണ് അപകടം. തോട് കരകവിഞ്ഞ് റോഡിൽ വെള്ളം കയറിയതോടെയാണ് സ്കൂട്ടർ ഒഴുകിപ്പോയത്.
ജമാൽ ശക്തമായ ഒഴുക്കിൽ പ്പെട്ടെങ്കിലും നാട്ടുകാർ കരയ്ക്കു കയറ്റി. എന്നാൽ സ്കൂട്ടർ മലവെള്ളപ്പാച്ചിലിൽ ഒഴുകിപ്പോയി. കഴിഞ്ഞ ബുധനാഴ്ച വണ്ണപ്പുറം കോട്ടപ്പാറയ്ക്കു സമീപം ഒഴുക്കിൽപ്പെട്ട് വീട്ടമ്മ മരിച്ചിരുന്നു.
കൂവപ്പുറം തേവരുകുന്നേൽ ദിവാകരന്റെ ഭാര്യ ഓമനയാണ് മരിച്ചത്. ദിവാകരനും ഒഴുക്കിൽപ്പെട്ടെങ്കിലും രക്ഷപെട്ടു. ഏതാനും ദിവസങ്ങളായി വണ്ണപ്പുറം, മുള്ളരിങ്ങാട് മേഖലയിൽ ശക്തമായ മഴയാണ് പെയ്യുന്നത്.