ബാങ്കുകൾ ജപ്തി നടപടികൾ നിർത്തണം: എംപി
1464232
Sunday, October 27, 2024 4:17 AM IST
തൊടുപുഴ: ജില്ലയിൽ ബാങ്കുകൾ ആരംഭിച്ചിരിക്കുന്ന ജപ്തി നടപടികൾ നിർത്തിവയ്ക്കണമെന്ന് ഡീൻ കുര്യാക്കോസ് എംപി ആവശ്യപ്പെട്ടു. നവംബർ, ഡിസംബർ മാസങ്ങളിലായി ജപ്തി നടത്തുമെന്നു കാണിച്ച് നൂറുകണക്കിന് ആളുകളുടെ പേരിലാണ് നോട്ടീസ് അയച്ചിരിക്കുന്നത്.
വിവിധ ബാങ്കുകൾ സർഫാസി, സഹകരണ നിയമങ്ങളും ഇതരനിയമങ്ങളും അനുസരിച്ചുള്ള നോട്ടീസ് നൽകിക്കഴിഞ്ഞു. ജപ്തി നടപടികൾ നിർത്തിവയ്ക്കാനും അധിക പലിശയും പിഴപ്പലിശയും ഒഴിവാക്കി തിരിച്ചടവിന് പരമാവധി തവണകൾ പുനഃക്രമീകരിച്ച് നൽകി കടക്കെണിയിലായവരെ രക്ഷിക്കുന്നതിനു നടപടികൾ സ്വീകരിക്കണമെന്നാവശ്യപ്പെട്ട് മുഖ്യമന്ത്രി, ധനമന്ത്രി, റവന്യു മന്ത്രി എന്നിവർക്ക് എംപി കത്തയച്ചു.
2018 ലെ പ്രളയം ജില്ലയിലെ കാർഷികമേഖലയെ തകർത്തെറിഞ്ഞു. കാർഷികമേഖലയുടെ തകർച്ച ജില്ലയിലെ ചെറുകിട സംരംഭങ്ങൾ, വ്യാപാരമേഖല, ടൂറിസം മേഖല എന്നിവയെയും പ്രതിസന്ധിയിലാക്കി.
കഴിഞ്ഞ വേനലിൽ ഏലം ഉൾപ്പെടെയുള്ള വിളകൾ കരിഞ്ഞുണങ്ങി. കാർഷിക, വിദ്യാഭ്യാസ,ചെറുകിട സംരംഭക, ഭവന നിർമാണ വായ്പകൾ എടുത്തിട്ടുള്ള സാധാരണക്കാർ ഭീതിയുടെ വക്കിലാണ്. റിക്കവറി നടപടികൾക്കായി ബാങ്കുകൾ ഏർപ്പെടുത്തിയിരിക്കുന്ന ഏജൻസികൾ വായ്പ കുടിശികക്കാരെ ഭീഷണിപ്പെടുത്തുകയാണെന്നും എംപി പറഞ്ഞു.