കേരള കോണ്ഗ്രസ് പ്രതിഷേധ സമര സംഗമം ഇന്ന് ചെറുതോണിയിൽ
1464021
Saturday, October 26, 2024 4:12 AM IST
ചെറുതോണി: കാർഷിക, ഭൂപ്രശ്നങ്ങളിൽ എൽഡിഎഫിന്റെ വാഗ്ദാന ലംഘനങ്ങളിലും വികസനരംഗത്തെ അവഗണനയിലും പ്രതിഷേധിച്ച് കേരള കോണ്ഗ്രസ് ജില്ലാകമ്മിറ്റിയുടെ നേതൃത്വത്തിൽ ഇന്നു ചെറുതോണിയിൽ പ്രതിഷേധ മാർച്ചും സമര സംഗമ പൊതുസമ്മേളനവും നടത്തും. രാവിലെ 10.30ന് പുതിയ ബസ്സ്റ്റാന്റിൽ നിന്നാരംഭിക്കുന്ന പ്രതിഷേധ മാർച്ച് പാർട്ടി ഡെപ്യൂട്ടി ചെയർമാൻ കെ. ഫ്രാൻസിസ് ജോർജ് എംപി ഉദ്ഘാടനം ചെയ്യും.
തുടർന്ന് ടൗണിൽ നടക്കുന്ന സമര സംഗമം പാർട്ടി ചെയർമാൻ പി.ജെ.ജോസഫ് എംഎൽഎ ഉദ്ഘാടനം ചെയ്യും. ജില്ലാ പ്രസിഡന്റ് പ്രഫ. എം.ജെ.ജേക്കബ് അധ്യക്ഷത വഹിക്കും. വർക്കിംഗ് ചെയർമാൻ പി.സി.തോമസ്, എക്സിക്യൂട്ടീവ് ചെയർമാൻ മോൻസ് ജോസഫ് എംഎൽഎ, സെക്രട്ടറി ജനറൽ ജോയി ഏബ്രഹാം, ചീഫ് കോ-ഓർഡിനേറ്റർ ടി.യു. കുരുവിള, തോമസ് ഉണ്ണിയാടൻ എക്സ് എംഎൽഎ തുടങ്ങിയവർ പ്രസംഗിക്കും.
ജില്ല, നിയോജകമണ്ഡലം, സംസ്ഥാന, മണ്ഡല തലങ്ങളിലുള്ള ഭാരവാഹികൾ പ്രതിഷേധമാർച്ചിന് നേതൃത്വം നൽകും.നിയമസഭ പാസാക്കിയ ഭൂപതിവ് ബിൽ ചട്ടങ്ങൾ രൂപീകരിച്ച് യാഥാർഥ്യമാക്കുക, നിർമാണനിരോധനം പിൻവലിക്കുക, പട്ടയ വിതരണം പൂർത്തിയാക്കുക, സിഎച്ച്ആർ ഭൂമി വിഷയത്തിലുള്ള സർക്കാർ ഇരട്ടത്താപ്പ് നയം അവസാനിപ്പിക്കുക, വന്യജീവിശല്യം തടയാൻ നടപടി സ്വീകരിക്കുക,
നഷ്ടപരിഹാര തുക ഉയർത്തുക, വനം വകുപ്പിന്റെ ജനവിരുദ്ധ നയങ്ങൾ അവസാനിപ്പിക്കുക, മുല്ലപ്പെരിയാർ പ്രശ്നം പരിഹരിക്കാൻ സർക്കാർ സജീവമായി ഇടപെടുക, 12,000 കോടിയുടെ ഇടുക്കി പാക്കേജിന് പണം അനുവദിക്കുക, ഇടുക്കി ആസ്ഥാനവികസനത്തിന് മാസ്റ്റർ പ്ലാൻ തയാറാക്കുക തുടങ്ങിയ ആവശ്യങ്ങൾ ഉന്നയിച്ചാണ് സമരമെന്ന് നേതാക്കൾ അറിയിച്ചു.