ഓട്ടത്തിനിടെ കെഎസ്ആർടിസി ബസിൽനിന്നു പുക ഉയർന്നു
1464014
Saturday, October 26, 2024 4:01 AM IST
മൂലമറ്റം: ഓടിക്കൊണ്ടിരുന്ന കെഎസ്ആർടിസി ബസിൽനിന്നു പുക ഉയർന്നത് പരിഭ്രാന്തി പരത്തി. തൊടുപുഴയിൽ നിന്നു മൂലമറ്റം വഴി പീരുമേടിന് പോകുന്ന കെഎസ്ആർടിസി ബസിൽ നിന്നാണ് പുക ഉയർന്നത്.
ഇതോടെ വാഹനം നിർത്തി യാത്രക്കാർ പുറത്തിറങ്ങി. ഇന്നലെ രാവിലെ ഒൻപതോടെ ഡിസി കോളജിനും ഇടുക്ക് പാറയ്ക്കുമിടക്ക് വച്ചാണ് വാഹനത്തിൽ നിന്നും പുക ഉയർന്നത്. ബസിന്റെ ഫാൻ ബെൽറ്റ് പൊട്ടിയതാണ് സംഭവത്തിനു കാരണം.
കെഎസ്ആർടിസിയുടെ പഴക്കം ചെന്ന ബസുകളാണ് ഹൈറേഞ്ച് പാതകളിലൂടെ ഓടുന്നതിലധികവും. അപകട സാധ്യതയുള്ള മലന്പ്രദേശങ്ങളിലൂടെയാണ് ഇത്തരം ബസുകൾ സർവീസ് നടത്തുന്നത്. യാത്രക്കാരുടെ സുരക്ഷയെ കരുതി പുതിയ ബസുകൾ സർവീസ് നടത്തണമെന്ന് നാട്ടുകാർ ആവശ്യപ്പെട്ടു.
കഴിഞ്ഞ ദിവസം വണ്ണപ്പുറം-ചേലച്ചുവട് റൂട്ടിലോടുന്ന സ്വകാര്യ ബസിൽ നിന്നും ഇത്തരത്തിൽ പുക ഉയർന്നിരുന്നു. കുത്തനെയുള്ള കയറ്റവും വളവുകളുമുള്ള മേഖലകളിൽ ഇത്തരം സംഭവങ്ങൾ ആവർത്തിക്കുന്നത് യാത്രക്കാരിൽ ഭീതിയുയർത്തിയിട്ടുണ്ട്.