സ്വരുമ ചാരിറ്റബിള് സൊസൈറ്റിയുടെ ഒന്നാം വാര്ഷികം നാളെ
1464008
Saturday, October 26, 2024 4:01 AM IST
നെടുങ്കണ്ടം: വിവിധ രോഗാവസ്ഥകളില് കഴിയുന്ന കിടപ്പുരോഗികള്ക്കും നിര്ധനരോഗികള്ക്കും സഹായങ്ങള് എത്തിച്ചുനല്കുന്ന നെടുങ്കണ്ടം സ്വരുമ ചാരിറ്റബിള് സൊസൈറ്റിയുടെ ഒന്നാം വാര്ഷികം നാളെ ഉച്ചകഴിഞ്ഞ് മൂന്നിന് നെടുങ്കണ്ടം ലയണ്സ് ക്ലബ് ഹാളില് നടക്കുമെന്നു ഭാരവാഹികള് അറിയിച്ചു.
കിടപ്പുരോഗികള്ക്കും നിരാലംബർക്കും അശരണർക്കും ആരോഗ്യപരവും സാമ്പത്തികപരവുമായ ആവശ്യങ്ങള് ഒരു പരിധിവരെ നടത്തിക്കൊടുക്കാന് സ്വരുമയ്ക്കു കഴിഞ്ഞിട്ടുണ്ടെന്ന് ഭാരവാഹികള് പറഞ്ഞു. നെടുങ്കണ്ടം, ഉടുമ്പന്ചോല, കരുണാപുരം, പാമ്പാടുംപാറ പഞ്ചായത്തുകളില് ഒരു വര്ഷത്തിനിടെ സ്വരുമ 22 ലക്ഷത്തോളം രൂപയുടെ സഹായങ്ങള് എത്തിച്ചുനല്കിയിട്ടുണ്ട്. 94 വോളണ്ടിയര്മാരുടെ നേതൃത്വത്തിലാണു പ്രവര്ത്തനങ്ങള് നടന്നുവരുന്നത്.
സൗജന്യ നഴ്സിംഗ് കെയര്, സൗജന്യ ഫിസിയോതെറാപ്പി എന്നിവ വോളണ്ടിയര്മാര് നല്കിവരുന്നുണ്ട്. നിര്ധനരോഗികള്ക്ക് എട്ടു ലക്ഷം രൂപയുടെ സൗജന്യ മെഡിക്കല് ഉപകരണങ്ങള് വാങ്ങിനല്കി. കിഡ്നി രോഗികള്ക്ക് ഒമ്പത് ലക്ഷം രൂപയുടെ സൗജന്യ മരുന്നുകളും നല്കി. വിശേഷദിവസങ്ങളില് നിരാലംബരായവര്ക്ക് അഞ്ച് ലക്ഷം രൂപയുടെ ഫുഡ് കിറ്റുകളും ഒരുവര്ഷത്തിനിടെ നല്കിയിട്ടുണ്ട്. 24 മണിക്കൂറും പ്രവര്ത്തിക്കുന്ന ഹെല്പ് ലൈന് നമ്പരിലൂടെ(8075842317) ഏതൊരാള്ക്കും ഏതുസമയത്തും സേവനങ്ങള് ലഭിക്കും.
ഒന്നാം വാര്ഷികാഘോഷം ജില്ലാ പഞ്ചായത്ത് പ്രസിഡന്റ് കെ.ടി. ബിനു ഉദ്ഘാടനം ചെയ്യുമെന്ന് സ്വരുമ പ്രസിഡന്റ് കെ.സി. സെബാസ്റ്റ്യന്, സെക്രട്ടറി ബിനു തോമസ്, കണ്വീനര് എം.ജെ. സാബു, കോ-ഓര്ഡിനേറ്റര് സന്ധ്യ രാജേഷ് എന്നിവര് അറിയിച്ചു.