ജനശ്രദ്ധ നേടി ന്യൂമാൻ എൻസിസിയുടെ ജീവകാരുണ്യ പദ്ധതി
1464022
Saturday, October 26, 2024 4:12 AM IST
തൊടുപുഴ: ന്യൂമാൻ കോളജ് എൻസിസി സമൂഹത്തിലെ പാർശ്വവത്കരിക്കപ്പെട്ടവർക്കായി നടത്തുന്ന വിവിധ സാമൂഹിക സേവന പദ്ധതികളെ ഒരു കുടക്കീഴിലാക്കി ആവിഷ്കരിച്ച റൊട്ടി, കപ്പഡ, മക്കാൻ പദ്ധതി ശ്രദ്ധേയമാകുന്നു.
മനുഷ്യന്റെ അടിസ്ഥാന ആവശ്യങ്ങളായ ഭക്ഷണം, വസ്ത്രം, പാർപ്പിടം എന്നിവ ശേഖരിക്കുന്നതിനും പങ്കുവയ്ക്കുന്നതിനും സമൂഹത്തിൽ ബോധവത്കരണം നൽകുകയും അത് അർഹരായവർക്ക് എത്തിച്ചുനൽകാൻ സഹായിക്കുകയും ചെയ്യുകയെന്നതാണ് പദ്ധതിയിലൂടെ വിഭാവനം ചെയ്യുന്നത്. നിർധനർക്ക് വസ്ത്രം എത്തിക്കുകയെന്ന ലക്ഷ്യത്തോടെ ആരംഭിച്ച ഷെയർ എ ക്ലോത്ത് പദ്ധതിയുടെ ഉദ്ഘാടനം വൈസ് പ്രിൻസിപ്പൽ പ്രഫ. ബിജു പീറ്റർ നിർവഹിച്ചു.
സുമനസുകളുടെ സഹായത്തോടെ ശേഖരിക്കുന്ന വസ്ത്രം പ്രത്യേകം സജ്ജീകരിച്ചിരിക്കുന്ന ക്ലോത്ത് ബാങ്കിൽ സൂക്ഷിച്ച് ആവശ്യക്കാർക്ക് വിതരണം ചെയ്യുന്നതാണ് പദ്ധതിയിലൂടെ ലക്ഷ്യമിടുന്നതെന്ന് എൻസിസി ഓഫീസർ ക്യാപ്റ്റൻ പ്രജീഷ് സി. മാത്യു അറിയിച്ചു.
സീനിയർ അണ്ടർ ഓഫീസർ എസ്. ആദർശ്, അണ്ടർ ഓഫീസർമാരായ സാരംഗ് ഷാജി, എം.ആർ.രാധിക, ബി. അഖിൽ കുമാർ, അഷ്ബിൻ തോമസ്, ആഷിത മുരുകൻ, അനശ്വര രവി തുടങ്ങിയവർ പ്രസംഗിച്ചു.