മുല്ലപ്പെരിയാർ ഡാം: തമിഴ്നാടിന്റെ നീക്കം അംഗീകരിക്കരുത്
1463785
Friday, October 25, 2024 4:02 AM IST
ഉപ്പുതറ: മുല്ലപ്പെരിയാർ ഡാം ബലപ്പെടുത്താനുള്ള തമിഴ്നാടിന്റെ ഏകപക്ഷീയ തീരുമാനം അംഗീകരിക്കരുതെന്ന് മുല്ലപ്പെരിയാർ സമരസമിതി കേന്ദ്രകമ്മിറ്റി സർക്കാരിനോട് ആവശ്യപ്പെട്ടു.ഡാം ബലപ്പെടുത്താനുള്ള സാമഗ്രികൾ കൊണ്ടു പോകാൻ അനുമതി നൽകരുത്.
സുപ്രീം കോടതിയുടെ നിർദേശ പ്രകാരം കേന്ദ്ര ജല കമ്മീഷൻ ഡാമിന്റെ ബലക്ഷയം പരിശോധിക്കാനിരിക്കെ തമിഴ്നാട് നടത്തുന്ന നീക്കം അംഗീകരിക്കാനാവില്ല. ഇതു സുപ്രീം കോടതിയുടെ നിരീക്ഷണത്തിനും നിർദേശത്തിനും എതിരാണെന്നും യോഗം വിലയിരുത്തി.
ഇക്കാര്യം സുപ്രീം കോടതിയുടെശ്രദ്ധയിൽ കൊണ്ടുവരാൻ സംസ്ഥാന സർക്കാർ നടപടി സ്വീകരിക്കണമെന്നും മുല്ലപ്പെരിയാർ പ്രശ്നത്തിൽ തമിഴ്നാട് കാണിക്കുന്ന ജാഗ്രത കേരള സർക്കാരിനും ഉണ്ടാകണമെന്നും യോഗം ആവശ്യപ്പെട്ടു.
ചെയർമാൻ ഷാജി പി. ജോസഫ് അധ്യക്ഷത വഹിച്ചു. ഫാ. ജോയി നിരപ്പേൽ, സിബി മുത്തുമാക്കുഴി, പി.ഡി. ജോസഫ്, അഡ്വ.സ്റ്റീഫൻ ഐസക്, റോജി ദാനിയേൽ, സി.എസ്. രാജേന്ദ്രൻ എന്നിവർ പ്രസംഗിച്ചു.