ADVERTISEMENT

ADVERTISEMENT

ചെത്തിപ്പുഴ ആശുപത്രിയില്‍ രാജ്യാന്തര സമ്മേളനം തുടങ്ങി

ചങ്ങനാശേരി: എംജി സര്‍വകലാശാലയിലെ ഡോ.എന്‍. രാധാകൃഷ്ണന്‍ ഇന്‍റര്‍നാഷനല്‍ സെന്‍റര്‍ ഫോര്‍ മെഡിക്കല്‍ ഇന്നൊവേഷന്‍റെ നേതൃത്വത്തില്‍ ചെത്തിപ്പുഴ സെന്‍റ് തോമസ് ആശുപത്രിയില്‍ ആരംഭിച്ച "റിഥം -2025’ രാജ്യാന്തര സമ്മേളനം എംജി സര്‍വകലാശാല വൈസ് ചാന്‍സലര്‍ ഡോ. സി.ടി. അരവിന്ദകുമാര്‍ ഉദ്ഘാടനം ചെയ്തു.

ആശുപത്രി എക്‌സിക്യൂട്ടീവ് ഡയറക്ടര്‍ ഫാ. ജയിംസ് പി. കുന്നത്ത് അധ്യക്ഷത വഹിച്ചു. കോട്ടയം മെഡിക്കല്‍ കോളജ് ആശുപത്രി പ്രിന്‍സിപ്പല്‍ ഡോ. വര്‍ഗീസ് പി. പുന്നൂസ് മുഖ്യപ്രഭാഷണം നടത്തി. ജോബ് മൈക്കിള്‍ എംഎല്‍എ, സെന്‍റ് തോമസ് ആശുപത്രി മാനേജര്‍ മോണ്‍. ജോണ്‍ തെക്കേക്കര, അസോസിയേറ്റ് ഡയറക്ടര്‍ ഫാ. ജോഷി മുപ്പതില്‍ചിറ, എന്‍ആര്‍ഐസിഎംഐ ചെയര്‍മാനും സെന്‍റ് തോമസ് ഇന്‍സ്റ്റിറ്റ്യൂട്ട് ഓഫ് റിസര്‍ച്ച് ഓണ്‍ വീനസ് ഡിസീസ് മെഡിക്കല്‍ ഡയറക്ടറുമായ ഡോ. എന്‍. രാധാകൃഷ്ണന്‍, സെന്‍റ് തോമസ് ആശുപത്രി കാര്‍ഡിയോളജി വിഭാഗം ഡോ. അബ്ദുൾ ഖാദര്‍, മാര്‍ അത്തനാസിയോസ് കോളജ് ഫോര്‍ അഡ്വാന്‍സ് സ്റ്റഡീസ് പ്രിന്‍സിപ്പല്‍ ഫാ. ഏബ്രഹാം മുളമൂട്ടില്‍, പുഷ്പഗിരി മെഡിക്കല്‍ കോളജ് ജനറല്‍ സര്‍ജറി വിഭാഗം പ്രഫ. റോബിന്‍സണ്‍ പി. ജോര്‍ജ്, ഡോ. സി. ചന്ദന എന്നിവര്‍ പ്രസംഗിച്ചു.

ADVERTISEMENT

വിശ്വസിക്കാനാവാതെ വീട്ടുടമ ഡിന്നി

നിര്‍മാണം പൂര്‍ത്തിയാക്കി താമസം ആരംഭിക്കാനിരിക്കുന്ന വീട്ടിലുണ്ടായ അപ്രതീക്ഷിത സംഭവത്തിന്‍റെ ഞെട്ടലിലാണ് വീട്ടുടമ ഇളപ്പാനി മണ്ണനാല്‍ ഡിന്നി സെബാസ്റ്റ്യനും കുടുംബവും. ഏറെക്കുറെ നിര്‍മാണം പൂര്‍ത്തിയായ വീട്ടിലേക്ക് നവംബര്‍ 29നു പാലുകാച്ചല്‍ നടത്തി കയറി താമസിക്കാനിരിക്കെ അപ്രതീക്ഷിതമായാണ് ഈ സംഭവമുണ്ടാകുന്നത്. കൊലപാതകം നടന്നതിന്‍റെ തലേ ആഴ്ചയിലാണ് സോണിയും ഭാര്യയും മണ്ണ് നിരത്തുന്നതിനുള്‍പ്പെടെയുള്ള ജോലികള്‍ക്ക് ഇവിടെ എത്തുന്നത്. പിന്നീട് 15നു വീണ്ടും ജോലിക്കെത്താമെന്നു പറഞ്ഞാണ് ഇരുവരും മടങ്ങിയത്. 14നു രാവിലെ കൊലപാതകം നടത്തി മൃതദേഹം കുഴിച്ചിട്ടിട്ടു മടങ്ങിയ സോണി അയര്‍ക്കുന്നം ജംഗ്ഷനില്‍ തങ്ങുകയായിരുന്നു. ഈ ദിവസം രാവിലെ നിര്‍മാണം നടക്കുന്ന വീട്ടിലെത്തിയ വീട്ടുടമ ഡിന്നി മുറ്റത്ത് ചിപ്‌സ് നിരത്താന്‍ തീരുമാനിച്ചു. ഡിന്നി സോണിയെ ഫോണില്‍ വിളിച്ചു ജോലിക്കു വരാന്‍ ആവശ്യപ്പെട്ടു. കൊലപാതകം നടത്തിയ ദിവസം വീണ്ടും ഇയാള്‍ ഇവിടെ ജോലിക്കെത്തി പിറകുവശത്തെ മുറ്റത്തെ മണ്ണ് ഇടിച്ചുറപ്പിക്കുകയും ചിപ്‌സ് നിരത്തുകയും ചെയ്തു. മൃതദേഹം കുഴിച്ചിട്ടു സ്ഥലത്തും മണ്ണിട്ടതായി പോലീസ് സംശയിക്കുന്നുണ്ട്.

അയര്‍ക്കുന്നം നിവാസികള്‍ ഉണർന്നതു ഞെട്ടിക്കുന്ന വാർത്തകൾ കേട്ട്

അയര്‍ക്കുന്നം: അയര്‍ക്കുന്നം നിവാസികള്‍ ഇന്നലെ ഉണര്‍ന്നപ്പോള്‍ കേട്ടതു കൊലപാതകവും മോഷണവും. രാവിലെ ഒന്‍പതോടെയാണ് കൊങ്ങാണ്ടൂര്‍ പോളയ്ക്കല്‍ ബെന്നിയുടെ വീട്ടില്‍നിന്ന് 12 പവന്‍ സ്വര്‍ണവും 28,000 രൂപയും മോഷണം പോയ വിവരം നാട്ടിലറിഞ്ഞത്. തൊട്ടുപിന്നാലെ ഇളപ്പാനി ജംഗ്ഷനു സമീപത്തുള്ള നിര്‍മാണം നടക്കുന്ന വീട്ടില്‍ ഇതര സംസ്ഥാന തൊഴിലാളി ഭാര്യയെ കൊന്നു കുഴിച്ചുമൂടിയെന്ന വാര്‍ത്തയുമെത്തി. ഇതോടെ പ്രദേശവാസികള്‍ ഞെട്ടലിലായി. മണിക്കൂറുകള്‍ക്കം നിര്‍മാണത്തിലിരിക്കുന്ന വീടും പരിസരവും നാട്ടുകാരെക്കൊണ്ടു നിറഞ്ഞു. ഉച്ചകഴിഞ്ഞതോടെ പ്രതിയായ സോണിയെ പോലീസ് സംഘത്തിന്‍റെ അകമ്പടിയോടെ ഇവിടെ എത്തിച്ചു തെളിവെടുപ്പ് നടത്തി. ആദ്യം അല്‍പനയുടെ മൃതദേഹം കുഴിച്ചിട്ടിരിക്കുന്ന സ്ഥലം പ്രതി പോലീസിനു ചൂണ്ടിക്കാണിച്ചു കൊടുത്തു. തുടര്‍ന്നു കൊലപാതകം നടത്തിയ രീതിയിലും ഇയാള്‍ വിവരിച്ചു. ഈ സമയത്ത് ജില്ലാ പോലീസ് ചീഫ് എ. ഷാഹുല്‍ ഹമീദ് ഉള്‍പ്പെടെയുള്ള ഉയര്‍ന്ന പോലീസ് ഉദ്യോഗസ്ഥരും സ്ഥലത്തെത്തിയിരുന്നു. പിന്നീട് വീടിരിക്കുന്ന സ്ഥലത്തിനു മുകള്‍വശത്തുള്ള പറമ്പില്‍നിന്നും അല്‍പ്പനയുടെ ചെരിപ്പും സോണി പോലീസിനു കാണിച്ചുകൊടുത്തു. തുടര്‍ന്നു മൃതദേഹം കുഴിച്ചിട്ട സ്ഥലത്തെ മണ്ണ് നീക്കി മൃതദേഹം പുറത്തെടുക്കുകയായിരുന്നു. പോലീസിനു സഹായമായതു സിസിടിവി ദൃശ്യം മുന്‍കൂട്ടി നടത്തിയ കൃത്യമായ പ്ലാനിംഗിലൂടെയാണ് സോണി ഭാര്യ അല്‍പനയെ കൊലപ്പെടുത്തി കുഴിച്ചുമൂടിയത്. എന്നാല്‍ സിസിടിവി ദൃശ്യങ്ങള്‍ ലഭിച്ചതോടെ പോലീസിനു കാര്യങ്ങള്‍ ബോധ്യപ്പെടുകയും പ്രതിയെ പിടികൂടുകയുമായിരുന്നു. നിര്‍മാണത്തിലിരിക്കുന്ന വീടിനു സമീപം വിജനമാണെന്ന് വ്യക്തമായി അറിയാവുന്ന തൊഴിലാളിയായിരുന്നു സോണി. ഈ വീട്ടിലേക്കു വരുന്ന വഴിയിലുള്ള ഒരു വീട്ടില്‍ സിസിടിവി ഉണ്ടെന്ന കാര്യം സോണിക്ക് അറിയില്ലായിരുന്നു. ഇവര്‍ ഓട്ടോയില്‍ ഇവിടെ വന്നിറങ്ങുന്നതും നടന്നുപോകുന്നതും സിസിടിവി ദൃശ്യത്തിലുണ്ട്. കുറച്ചു സമയത്തിനുശേഷം സോണി മാത്രമാണ് തിരികെ മടങ്ങിയത്. ഭാര്യയെ കാണാനില്ലെന്ന് അയര്‍ക്കുന്നം പോലീസില്‍ പരാതി നല്‍കിയതോടെ പോലീസ് ആദ്യം പരിശോധിച്ചത് ഈ പ്രദേശത്തെ സിസിടിവി ദൃശ്യങ്ങളാണ്. ഇതോടെ കാര്യങ്ങള്‍ ബോധ്യപ്പെടുകയായിരുന്നു. അല്‍പനയ്ക്കു മറ്റൊരാളുമായി ഉണ്ടായിരുന്ന അടുപ്പമാണ് കൊലപാതകത്തില്‍ കലാശിച്ചത്. അയര്‍ക്കുന്നത്തും സമീപ പ്രദേശങ്ങളിലും നിര്‍മാണ മേഖലയിൽ ജോലി ചെയ്തു വരികയായിരുന്നു സോണിയും ഭാര്യ അല്‍പനയും. ഇവരുടെ മക്കള്‍ അമയന്നൂര്‍ സ്‌കൂളിലായിരുന്നു പഠിച്ചിരുന്നത്. അല്‍പനയുടെ സൗഹൃദത്തെ ചൊല്ലി സോണി നിരന്തരം വഴക്കിടുക പതിവായിരുന്നു. കൊലപാതകം മുന്‍കൂട്ടി തീരുമാനിച്ചാണ് ഇയാള്‍ അല്‍പനയുമായി 14നു രാവിലെ ഇളപ്പാനി ജംഗ്ഷനു സമീപത്തെ വീട്ടില്‍ എത്തിയത്. ഇവിടെവച്ചു ഭാര്യയെ കൊലപ്പെടുത്തി കുഴിച്ചുമൂടിയശേഷം മടങ്ങുകയായിരുന്നു. അല്‍പനയുടെ തല കരിങ്കല്ല് ഭിത്തിയില്‍ ഇടിപ്പിച്ചും കമ്പിപ്പാരയ്ക്ക് അടിച്ചുമാണ് കൊലപാതകം നടത്തിയതെന്ന് പോലീസ് പറഞ്ഞു. തുടര്‍ന്നു വീടിന്‍റെ പിന്നില്‍ രണ്ടടി താഴ്ചയില്‍ കുഴിച്ചിട്ടു. ഏതാനും ദിവസങ്ങള്‍ക്കു മുമ്പ് ഇവിടെ മണ്ണിട്ടു നികത്തിയതിനാലാണ് മൃതദേഹം കുഴിച്ചിടാന്‍ ഈ സ്ഥലം തെഞ്ഞെടുത്തതെന്ന് പ്രതി പോലീസിനോട് പറഞ്ഞു. ഭാര്യ മറ്റൊരാള്‍ക്കൊപ്പം പോയതായിട്ടാണു ഇയാള്‍ കൊലപാതകത്തിനുശേഷം എല്ലാവരോടും പറഞ്ഞിരുന്നത്. ആദ്യഘട്ടത്തില്‍ ഇയാള്‍ പോലീസില്‍ പരാതി നല്കാന്‍പോലും തയാറായിരുന്നില്ല. പിന്നീടു സുഹൃത്തുക്കള്‍ പറഞ്ഞതോടെയാണ് പരാതി നല്കിയത്. പരാതി ലഭിച്ച ആദ്യഘട്ടത്തില്‍ തന്നെ സോണിയുടെ പെരുമാറ്റത്തില്‍ സംശയം തോന്നിയ പോലീസ് ഇയാളെ നിരീക്ഷിച്ചുവരികയായിരുന്നു. തന്നിലുള്ള സംശയം ഒഴിവാക്കാനായി ഇയാള്‍ അയര്‍ക്കുന്നത്തുള്ള മറ്റു ഇതര സംസ്ഥാനക്കാരായ തൊഴിലാളികള്‍ക്കൊപ്പം ഭാര്യയെ വിവിധ സ്ഥലങ്ങളില്‍ എത്തി അന്വേഷിക്കുകയും ചെയ്തിരുന്നു. അന്വേഷണം പുരോഗമിക്കുന്നതിനിടയില്‍ പോലീസ് സോണിയുടെ മൊബൈല്‍ ലൊക്കേഷന്‍ പരിശോധിച്ചപ്പോള്‍ എറണാകുളം ഭാഗത്തേക്ക് ഇയാള്‍ ട്രെയിനില്‍ യാത്ര ചെയ്യുന്നതായി കണ്ടെത്തി. തുടര്‍ന്ന് കസ്റ്റഡിയിലെടുത്തു നടത്തിയ ചോദ്യം ചെയ്യലിലാണ് ഭാര്യയോടുള്ള സംശയത്തെ തുടര്‍ന്നാണ് കൊല നടത്തിയതെന്നു പ്രതി സമ്മതിച്ചത്. എറണാകുളത്ത് പ്രതിയെ അറസ്റ്റു ചെയ്യാൻ പോയ സംഘത്തിൽ എസ്ഐ സജു ടി. ലൂക്കോസ്, എഎസ്ഐ എസ്. ജയരാജ്,എ എസ്ഐ സുഭാഷ്, എഎസ്ഐ ജിജോ തോമസ്, ഹോംഗാർഡ് ജയരാജ് എന്നിവർ ഉണ്ടായിരുന്നു.

രംഗോത്സവ് - 2025: സംഘാടന മികവിൽ കെഇ സ്കൂൾ

മാന്നാനം: കുര്യാക്കോസ് ഏലിയാസ് ഇംഗ്ലീഷ് മീഡിയം സ്കൂളിൽ എഎസ്ഐഎസ്‌സി കേരള റീജൺ കലോത്സവം - രംഗോത്സവ് 2025ന്‌ കൊടിയിറങ്ങുമ്പോൾ കെഇ സ്കൂളിന്‍റെ സംഘാടന മികവ് ഒരിക്കൽകൂടി ശ്രദ്ധിക്കപ്പെടുന്നു. 160 സ്കൂളുകളിൽനിന്ന് 2000 വിദ്യാർഥികൾ പങ്കെടുത്ത കലോത്സവം. 10 വേദികളിലായി 56 മത്സര ഇനങ്ങൾ. 10 വേദികളിലും മത്സരങ്ങൾ പരാതികളില്ലാതെ സുഗമമായി നടന്നു. ഓരോ ഇനത്തിന്‍റെയും ഫലം പ്രഖ്യാപിച്ചാലുടൻ സമ്മാനങ്ങൾ നൽകാൻ പ്രത്യേക വേദിയും ക്രമീകരണവും. തിക്കും തിരക്കുമില്ലാതെ യഥാസമയം ഭക്ഷണം. താമസ സൗകര്യം. വർണദീപങ്ങളാൽ അലംകൃതമായ കെഇ സ്കൂളും പരിസരവും കലോത്സവത്തിനെത്തിയ വിദ്യാർഥികളെ മറ്റൊരു ലോകത്തെത്തിച്ചു. അവർ സർവം മറന്ന് കലോത്സവ ദിനങ്ങൾ ആഘോഷമാക്കി. 2024ലും ഇതേ കലോത്സവത്തിന് ആതിഥേയത്വം വഹിച്ചത് കെഇ സ്കൂൾ ആയിരുന്നു. അന്നത്തെ സംഘാടന മികവാണ് തൊട്ടടുത്ത വർഷം വീണ്ടും കലോത്സവം മാന്നാനത്തു തന്നെ എത്താൻ കാരണമായത്. മികച്ച സംഘാടകനായ കെഇ സ്കൂൾ പ്രിൻസിപ്പൽ റവ.ഡോ. ജയിംസ് മുല്ലശേരി സിഎംഐയുടെ ശിരസിൽ മറ്റൊരു പൊൻതൂവൽ കൂടിയായി രംഗോത്സവ് - 2025.

സിന്ധുവിന്‍റെ തിരോധാനത്തിലും സെബാസ്റ്റ്യന്‍ സംശയനിഴലില്‍

കോട്ടയം: അതിരമ്പുഴ സ്വദേശി ജെയ്‌നമ്മ (54), ചേര്‍ത്തല കടക്കരപ്പള്ളി സ്വദേശി ബിന്ദു പത്മനാഭന്‍ (52) എന്നിവരെ കൊലപ്പെടുത്തിയ കേസുകളില്‍ പ്രതിയായ പള്ളിപ്പുറം ചൊങ്ങുംതറ സി.എം. സെബാസ്റ്റ്യന്‍ കൂടുതല്‍ കേസുകളില്‍ അറസ്റ്റിലായേക്കും. 2020 ഒക്ടോബര്‍ 19ന് ചേര്‍ത്തല തെക്ക് പഞ്ചായത്ത് 13-ാം വാര്‍ഡ് വള്ളാകുന്നംവെളി വീട്ടില്‍നിന്നും തിരുവിഴ ക്ഷേത്രത്തിലേക്കെന്നു പറഞ്ഞ് പുറപ്പെട്ട സിന്ധു (48)വിനെക്കുറിച്ച് പിന്നീടൊരു വിവരവുമില്ല. സിന്ധു മൊബൈല്‍ ഫോണ്‍ കൊണ്ടുപോയിരുന്നില്ല. എന്നാല്‍ ക്ഷേത്രത്തില്‍ വഴിപാട് നടത്തിയതായി കണ്ടെത്തിയിരുന്നു. ഇവിടെനിന്നും സിന്ധു എങ്ങോട്ടുപോയെന്ന് വ്യക്തമല്ല. സിന്ധുവിനെയും സമാനരീതിയില്‍ സെബാസ്റ്റ്യന്‍ കൊലപ്പെടുത്തിയതാണെന്ന സൂചനയില്‍ അഞ്ചു വര്‍ഷം മുന്‍പ് അര്‍ത്തുങ്കല്‍ പോലീസ് രജിസ്റ്റര്‍ ചെയ്ത കേസില്‍ പുനരന്വേഷണം ആരംഭിച്ചു. ഭര്‍ത്താവുമായി അകന്നുകഴിഞ്ഞിരുന്ന സിന്ധുവിനെ മകളുടെ വിവാഹനിശ്ചയത്തിന് രണ്ടു ദിവസം മുമ്പാണ് കാണാതായത്. മകളുടെ വിവാഹത്തിനുള്ള സ്വര്‍ണം സിന്ധു സൂക്ഷിച്ചിരുന്നു. സ്ത്രീകളെ പ്രണയം നടിച്ച് കൊലപ്പെടുത്തി സ്വത്തും സ്വര്‍ണവും കൈക്കലാക്കുന്ന കുറ്റവാളിയെന്ന് വ്യക്തമായതോടെയാണ് ഈ കേസിലും സെബാസ്റ്റ്യന്‍ സംശയനിഴലിലായത്, ബിന്ദു പത്മനാഭന്‍, ജെയ്‌നമ്മ വധക്കേസുകള്‍ക്കു പുറമെ സെബാസ്റ്റ്യന്‍ റിട്ട. പഞ്ചായത്ത് ജീവനക്കാരി ഐഷ(58) യെയും കൊലപ്പെടുത്തിയതായി സ്ഥിരീകരിച്ചിട്ടുണ്ട്. വിയ്യൂര്‍ ജയിലില്‍ കഴിയുന്ന സെബാസ്റ്റ്യനെ അടുത്തയാഴ്ച കസ്റ്റഡിയില്‍ വാങ്ങി ഐഷ കൊലക്കേസിലും അറസ്റ്റ് രേഖപ്പെടുത്തും. ഐഷയെ 2012 മേയ് 12നാണ് കാണാതായത്. വീടുവയ്ക്കാന്‍ സ്ഥലം തരപ്പെടുത്തിക്കൊടുക്കാമെന്ന ഉറപ്പില്‍ സ്ഥലം ബ്രോക്കറായിരുന്ന സെബാസ്റ്റ്യന്‍ പള്ളിപ്പുറത്തെ വീട്ടിലെത്തിച്ചു കൊലപ്പെടുത്തിയെന്നാണു നിഗമനം.

കൗമാരകുതിപ്പിനായി കോട്ടയം ടീം നാളെ അനന്തപുരിയിലേക്ക്

കോട്ടയം: അനന്തപുരിയില്‍ കൗമാരകുതിപ്പിനായി കോട്ടയം ടീം നാളെ പുറപ്പെടും. കഴിഞ്ഞ വര്‍ഷം എറണാകുളത്തു നടന്ന സംസ്ഥാന കായികമേളയില്‍ ജില്ലയ്ക്ക് എട്ടാം സ്ഥാനമായിരുന്നു. ഇത്തവണ നില മെച്ചപ്പെടുത്താനുള്ള ഒരുക്കത്തിലാണ് കോട്ടയം ടീം. ആദ്യകാലങ്ങളില്‍ വിദ്യാഭ്യാസ ജില്ലാ അടിസ്ഥാനത്തില്‍ മത്സരങ്ങള്‍ നടത്തിയപ്പോള്‍ കാഞ്ഞിരപ്പള്ളി വിദ്യാഭ്യാസ ജില്ല തുടര്‍ച്ചയായി 16 വര്‍ഷം ചാമ്പ്യന്‍പട്ടം നേടിയിരുന്നു തുടര്‍ന്ന് 12 വര്‍ഷം കോട്ടയം ജില്ലയും ചാമ്പ്യന്‍പട്ടം നേടി. തുടര്‍ന്നാണ് പാലക്കാടും എറണാകുളവുമൊക്കെ കിരീടം നേടിയത്. ഗെയിംസിലും അത്‌ലറ്റിക്‌സിലുമായി ഇത്തവണ ആയിരത്തോളം കുട്ടികളടങ്ങുന്ന ടീമാണ് കോട്ടയത്തിനുള്ളത്. ഗെയിംസില്‍ ബാസ്‌കറ്റ്‌ബോളില്‍ സ്വര്‍ണ പ്രതീക്ഷയാണുള്ളത്. അത്‌ലറ്റിക്‌സില്‍ സീനിയര്‍ ആണ്‍കുട്ടികളുടെ ഹൈജംപ്, 100 മീറ്റര്‍ ആണ്‍, പെണ്‍, പോള്‍വാള്‍ട്ട് തുടങ്ങിയവയില്‍ സ്വര്‍ണം പ്രതീക്ഷിക്കുന്ന ടീം റിലേയിലും ഹര്‍ഡില്‍സിലും ജാവലിനിലും മികച്ച പ്രകടനമാണ് പ്രതീക്ഷിക്കുന്നത്. സീനിയര്‍ ആണ്‍കുട്ടികളുടെ ഹൈജംപില്‍ ജില്ലാ മേളയില്‍ ദേശീയ റിക്കാര്‍ഡ് ഭേദിച്ച ജുവല്‍ തോമസ് ഇത്തവണയും സ്വര്‍ണം നേടുമെന്നാണ് പ്രതീക്ഷ. അതേപോലെ സീനിയര്‍ വിഭാഗം ആണ്‍കുട്ടികളുടെയും പെണ്‍കുട്ടികളുടെയും പോള്‍വാള്‍ട്ടിലും കോട്ടയം സ്വര്‍ണം ഉറപ്പിച്ചുകഴിഞ്ഞു. പാലാ സെന്‍റ് തോമസ് സ്‌കൂള്‍, പൂഞ്ഞാര്‍ എസ്എംവി, കാഞ്ഞിരപ്പള്ളി സെന്‍റ് മേരീസ് ഗേള്‍സ്, ഭരണങ്ങാനം എസ്എച്ച്ജിഎച്ച്‌എസ്, ഗവ. വിഎച്ച്എസ്ഇ മുരിക്കുംവയല്‍, സെന്‍റ് പീറ്റേഴ്‌സ് സ്‌കൂള്‍ കുറുമ്പനാട് എന്നീ സ്‌കൂളുകളിലെ കുട്ടികളാണ് കൂടുതലും വിജയികളായത്. നാളെ രാവിലെ 8.15നുള്ള ബംഗളൂരു- കന്യാകുമാരി ട്രെയിനില്‍ കോട്ടയം റവന്യു ജില്ലാ സ്‌പോര്‍ട്സ് സെക്രട്ടറി വി. പി. സജിമോന്‍റെ നേതൃത്വത്തില്‍ ടീം അനന്തപുരിക്ക് യാത്ര തിരിക്കും.

സ്‌കൂള്‍ കായികമേള: ചീഫ് മിനിസ്റ്റേഴ്‌സ് ട്രോഫിക്കു കോട്ടയത്ത് സ്വീകരണം നല്‍കി

കോട്ടയം: 21 ന് തിരുവനന്തപുരത്താരംഭിക്കുന്ന 67 -ാമത് സംസ്ഥാന സ്‌കൂള്‍ കായികമേളയിലെ ചാമ്പ്യന്മാര്‍ക്കുള്ള ചീഫ് മിനിസ്റ്റേഴ്‌സ് ട്രോഫിക്ക് ജില്ലയില്‍ സ്വീകരണം നല്‍കി. കുടമാളൂര്‍ ഗവ. എച്ച്എസ് എല്‍പി സ്‌കൂളില്‍ നടന്ന യോഗത്തില്‍ മന്ത്രി വി.എന്‍. വാസവന്‍ ട്രോഫിയില്‍ മാല ചാര്‍ത്തി സ്വീകരിച്ചു. ദേശീയ, അന്തര്‍ദേശീയ തലത്തില്‍ മികച്ച കായികതാരങ്ങളെ സംഭാവന ചെയ്തിട്ടുള്ള കേരളത്തിന്‍റെ കായികരംഗത്തെ കൂടുതല്‍ തിളക്കമുള്ളതാക്കി മാറ്റാന്‍ സ്‌കൂള്‍ കായിക മേളകള്‍ക്ക് കഴിയുമെന്ന് അദ്ദേഹം പറഞ്ഞു. സ്‌കൂളിലെ വര്‍ണക്കൂടാരം പരിപാടിയുടെ ഉദ്ഘാടനവും അദ്ദേഹം നിര്‍വഹിച്ചു. അയ്മനം പഞ്ചായത്ത് പ്രസിഡന്‍റ് വിജി രാജേഷ് അധ്യക്ഷത വഹിച്ചു. ജില്ലാപഞ്ചായത്ത് പ്രസിഡന്റ് ഹേമലത പ്രേംസാഗര്‍,ഏറ്റുമാനൂര്‍ ബ്ലോക്ക് പഞ്ചായത്ത് പ്രസിഡന്റ് ആര്യ രാജന്‍, പൊതുവിദ്യാഭ്യാസ ജോയിന്റ് ഡയറക്ടര്‍ ഗിരീഷ് ചോലയില്‍, ഡെപ്യൂട്ടി ഡയറക്ടര്‍ ഹണി ജി. അലക്‌സാണ്ടര്‍,ഡിഇഒ എ. ആര്‍. സുനിമോള്‍ എന്നിവര്‍ പങ്കെടുത്തു.

പ്രകടന പത്രിക ഇനി വേണ്ട, സര്‍ക്കാര്‍ ഉറക്കം വിട്ടുണരണം: കെസിബിസി മദ്യവിരുദ്ധ സമിതി

കോട്ടയം: ആസന്നമായ നിയമസഭാ തെരഞ്ഞെടുപ്പില്‍ മദ്യനയം സംബന്ധിച്ച പ്രകടന പത്രിക ഇടതുമുന്നണി ഇനി പ്രസിദ്ധീകരിക്കരുതെന്നും മുന്‍തെരഞ്ഞെടുപ്പുകളില്‍ നല്കിയതൊക്കെ വ്യാജമായിരുന്നെന്ന് കാലം തെളിയിച്ചെന്നും കെസിബിസി മദ്യവിരുദ്ധ സമിതി കോട്ടയം മേഖല സമ്മേളനം. പ്രകടന പത്രികയില്‍ പറഞ്ഞതൊക്കെ അധികാരത്തില്‍ വന്നപ്പോള്‍ സമൂലം തള്ളിയ സര്‍ക്കാരാണ് കഴിഞ്ഞ ഒന്‍പത് വര്‍ഷക്കാലമായി ഭരണം നടത്തുന്നത്. കേരളത്തിന്‍റെ ചരിത്രത്തില്‍ ഇത്രയധികം മദ്യശാലകളും മാരക ലഹരിവസ്തുക്കളും ഉണ്ടായ കാലഘട്ടമില്ല. സര്‍ക്കാര്‍ ഉറക്കം വിട്ടുണരണമെന്നും സമ്മേളനം ആവശ്യപ്പെട്ടു. കോട്ടയം, പാലാ, കാഞ്ഞിരപ്പള്ളി, വിജയപുരം രൂപതകളുടെ ആഭിമുഖ്യത്തില്‍ സംഘടിപ്പിച്ച കോട്ടയം മേഖലാ സമ്മേളനം സംസ്ഥാന സെക്രട്ടറി പ്രസാദ് കുരുവിള ഉദ്ഘാടനം ചെയ്തു. മേഖലാ പ്രസിഡന്‍റ് തോമസുകുട്ടി മണക്കുന്നേല്‍ അധ്യക്ഷത വഹിച്ചു. ഡയറക്ടര്‍ ഫാ. ജേക്കബ് വെള്ളമരുതുങ്കല്‍ മുഖ്യപ്രഭാഷണം നടത്തി. ആന്‍റണി മാത്യു, കെ.പി. മാത്യു, സാബു ഏബ്രഹാം, ജോസ് കവിയില്‍, ജോസ്മോന്‍ പുഴക്കരോട്ട്, ബേബിച്ചന്‍ പുത്തന്‍പറമ്പില്‍, ഔസേപ്പച്ചന്‍ ചെറുകാട്, ജിയോ കുന്നശേരി, ടോമി പൊട്ടംകുഴിയില്‍, ടി.തോമസുകുട്ടി എന്നിവര്‍ പ്രസംഗിച്ചു.

കോട്ടയത്ത് വന്‍ എംഡിഎംഎ വേട്ട

കോട്ടയം: കോട്ടയത്ത് വന്‍ എംഡിഎംഎ വേട്ട. ദമ്പതികള്‍ ഉള്‍പ്പെടെ മൂന്നു പേര്‍ അറസ്റ്റില്‍. പുതുപ്പള്ളി, വാകത്താനം ഇരവുചിറ വെള്ളത്തടത്തില്‍ എ.കെ. അമല്‍ ദേവ് (38), ഭാര്യ ശരണ്യ രാജന്‍ (36), ഇവരുടെ സുഹൃത്ത് ചേര്‍ത്തല മാരാരിക്കുളം പുകലപ്പുരയ്ക്കല്‍ രാഹുല്‍ രാജ് (33) എന്നിവരാണ് പിടിയിലായത്. മീനടം വെട്ടത്തുകവല-ഇലക്കൊടിഞ്ഞി റോഡില്‍ പുത്തന്‍പുരപ്പടിക്കു സമീപമുള്ള മഠത്തില്‍ വീട്ടില്‍ വാടകയ്ക്ക് താമസിക്കുകയായിരുന്നു പ്രതികള്‍. രണ്ടാഴ്ച മുന്പാണ് പ്രതികള്‍ ഇവിടെ വീട് വാടകയ്ക്ക് എടുത്തത്. റോഡ് സൈഡിലുള്ള വീട് ഒരാള്‍ ഉയരത്തില്‍ ഗാർഡന്‍ നെറ്റ് ഉപയോഗിച്ച് മറച്ചായിരുന്നു സംഘം കച്ചടവടം നടത്തിയത്. ‌ഇവിടെ നിന്നുമാണ് 68 ഗ്രാം എംഡിഎംഎയുമായി ഇവര്‍ പിടിയിലായത്. ഇവര്‍ കാറില്‍ ലഹരി മരുന്ന് ഒളിപ്പിച്ച് ആവശ്യക്കാര്‍ക്ക് എത്തിച്ചുനല്‍കുകയാണ് ചെയ്യുന്നത്. ഇന്നും പതിവുപോലെ കാറില്‍ ലഹരി വില്പന നടത്തി വീട്ടില്‍ തിരിച്ചെത്തിയപ്പോഴാണ് ഇവര്‍ പോലീസിന്‍റെ പിടിയിലാകുന്നത്. ജില്ലാ പോലീസ് ചീഫ് എ. ഷാഹുല്‍ ഹമീദിനു ലഭിച്ച രഹസ്യ വിവരത്തിന്‍റെ അടിസ്ഥാനത്തില്‍ ലഹരി വിരുദ്ധ സ്‌ക്വാഡ്, പാമ്പാടി പോലീസ്, ഇന്‍റലിജന്‍സ് വിഭാഗം എന്നിവര്‍ ചേര്‍ന്നാണ് പിടികൂടിയത്. ബംഗളൂരുവില്‍ നിന്നുമാണ് ഇവര്‍ എംഡിഎംഐ എത്തിച്ചിരുന്നത്. പാമ്പാടിയിലും സമീപപ്രദേശങ്ങളിലും ഇവര്‍ എംഡിഎംഐ വില്‍പ്പന നടത്തുന്നതായി പോലീസിനു രഹസ്യവിവരം ലഭിച്ചിരുന്നു. ഇതിനെത്തുടര്‍ന്ന് പോലീസ് രഹസ്യമായി ഇവരെ നിരീക്ഷിച്ചുവരികയായിരുന്നു. ഈ പ്രദേശത്ത് ഇവരുടെ ഇടനിലക്കാരുണ്ടെന്നും ലഹരി വില്‍പ്പന സജീവമാണെന്നും നാട്ടൂകാര്‍ ആരോപിക്കുന്നു. അമല്‍ദേവും രാഹുല്‍ രാജും വധശ്രമം, ലഹരി വില്പന തുടങ്ങി നിരവധി കേസുകളില്‍ പ്രതികളാണ്. രാഹുലിന് വാറണ്ടുള്ളതിനാല്‍ ദമ്പതികളോടൊപ്പം ഇവിടെ ഒളിച്ചുതാമസിക്കുകയായിരുന്നുവെന്ന് പോലീസ് പറഞ്ഞു.

വാഗമണ്ണിനെ ടൂറിസം ഹബ്ബാക്കും: മന്ത്രി മുഹമ്മദ് റിയാസ്

മുണ്ടക്കയം: കേരളത്തിൽ പശ്ചാത്തല വികസനരംഗത്ത് വലിയ മുന്നേറ്റം കൈവരിക്കാൻ കഴിഞ്ഞതായി മന്ത്രി മുഹമ്മദ് റിയാസ്. മുണ്ടക്കയം-കൂട്ടിക്കൽ -ഏന്തയാർ-വല്യേന്ത-വാഗമൺ റോഡിന്‍റെ രണ്ടാംഘട്ട നിർമാണോദ്ഘാടനം ഓൺലൈനായി നിർവഹിച്ച് പ്രസംഗിക്കുകയായിരുന്നു മന്ത്രി. സംസ്ഥാനത്തെ പകുതിയിലധികം പൊതുമരാമത്ത് റോഡുകൾ ബിഎം ആൻഡ് ബിസി നിലവാരത്തിലേക്ക് ഉയർത്താനും നൂറ്റന്പതിലധികം പാലങ്ങൾ പുതുതായി നിർമിക്കാനും ടൂറിസം രംഗത്തടക്കം വലിയ മുന്നേറ്റം കൈവരിക്കാനും കഴിഞ്ഞിട്ടുണ്ട്. ഇതിന്‍റെ ഭാഗമായി വാഗമണ്ണിനെ ടൂറിസം ഹബ്ബാക്കി മാറ്റുമെന്നു മന്ത്രി പറഞ്ഞു. ഇളങ്കാട് ടൗണിൽ ചേർന്ന ഉദ്ഘാടന സമ്മേളനം സെബാസ്റ്റ്യൻ കുളത്തുങ്കൽ എംഎൽഎ നിർവഹിച്ചു. കെ.ജെ. തോമസ് മുഖ്യപ്രഭാഷണം നടത്തി. ജില്ലാപഞ്ചായത്തംഗങ്ങളായ ശുഭേഷ് സുധാകരൻ, പി.ആർ. അനുപമ, ബ്ലോക്ക് പഞ്ചായത്ത് പ്രസിഡന്‍റ് അജിത രതീഷ്, കൂട്ടിക്കൽ പഞ്ചായത്ത് പ്രസിഡന്‍റ് ബിജോയ് ജോസ് മുണ്ടുപാലം, പഞ്ചായത്ത് വൈസ് പ്രസിഡന്‍റ് രജനി സുധീർ, പഞ്ചായത്തംഗങ്ങളായ പി.എസ്. സജിമോൻ, ജെസി ജോസ്, എം.വി. ഹരിഹരൻ, കെ.എസ്. മോഹനൻ, വിവിധ രാഷ്ട്രീയ, സാമൂഹ്യ, സാംസ്കാരിക സംഘടനാ നേതാക്കൾ, പൊതുമരാമത്ത് വകുപ്പ് ഉദ്യോഗസ്ഥർ തുടങ്ങിയവർ പ്രസംഗിച്ചു. നിലവിൽ വല്യേന്തവരെ എത്തിനിൽക്കുന്ന റോഡ് തുടർന്ന് ഏഴു കിലോമീറ്റർ പൂർത്തീകരിച്ചാണ് മുണ്ടക്കയം - വാഗമൺ റോഡ് നിർമിക്കുന്നത്. ഇതിനായി 2022-23 ലെ സംസ്ഥാന ബജറ്റിൽ 12 കോടി രൂപയും 2023-24 വർഷത്തെ സംസ്ഥാന ബജറ്റിൽ അഞ്ചുകോടി രൂപയും വകയിരുത്തിയിരുന്നു. ഇപ്രകാരം ലഭ്യമായ 17 കോടി രൂപ വിനിയോഗിച്ചാണ് റോഡിന്‍റെ നിർമാണ പ്രവൃത്തികൾ നടത്തുന്നത്. റോഡ് യാഥാർഥ്യമാകുന്നതോടെ മുണ്ടക്കയത്തുനിന്ന് 22 കിലോമീറ്റർ മാത്രം സഞ്ചരിച്ച് വിനോദ സഞ്ചാരികൾക്ക് വാഗമണ്ണിൽ എത്തിച്ചേരാൻ കഴിയും. ഈ പ്രദേശങ്ങളിൽ നൂറുകണക്കിന് ഏക്കർ റവന്യൂ ഭൂമിയുള്ളതിനാൽ ടൂറിസം അധിഷ്ഠിതവും മറ്റിതര സംരംഭങ്ങളും സർക്കാർ ഉടമസ്ഥതയിൽ ആരംഭിക്കുന്നതിനും കഴിയും. ഇതിനോടകംതന്നെ ഡിസ്ട്രിക്ട് ടൂറിസം പ്രമോഷൻ കൗൺസിലിന്‍റെ നേതൃത്വത്തിൽ ഇളങ്കാട് കേന്ദ്രീകരിച്ചും കോലാഹലമേട് കേന്ദ്രീകരിച്ചും ഓരോ ടൂറിസം പദ്ധതി ആവിഷ്കരിക്കുന്നതിന് ഡിപിആർ തയാറാക്കിവരികയാണ്. സ്വകാര്യ പങ്കാളിത്തത്തോടെ ഇത്തരം ടൂറിസം പദ്ധതികൾ നടപ്പാക്കാനാണ് ഉദ്ദേശിക്കുന്നത്. കൂടാതെ ഭാവിയിൽ എരുമേലി ശബരി ഗ്രീൻഫീൽഡ് ഇന്‍റർനാഷണൽ എയർപോർട്ട് യാഥാർഥ്യമാകുമ്പോൾ ദേശീയ - അന്താരാഷ്ട്ര തലങ്ങളിൽനിന്ന് എത്തിച്ചേരുന്ന വിനോദസഞ്ചാരികൾക്ക് 36 കിലോമീറ്റർ മാത്രം സഞ്ചരിച്ച് ഇതുവഴി വാഗമണ്ണിൽ എത്തിച്ചേരാൻ കഴിയുമെന്നുള്ളതും ഭാവിയിൽ വാഗമണ്ണിന്‍റെ ടൂറിസം സാധ്യതകൾ കൂടുതൽ വർധിപ്പിക്കുന്നതാണ്. മുണ്ടക്കയം, കൂട്ടിക്കൽ, കോരുത്തോട്, എരുമേലി, പാറത്തോട് പഞ്ചായത്തുകളുടെയും സമഗ്ര പുരോഗതിക്കും ഈ പാത ഉപകരിക്കും.

അഞ്ചിലിപ്പ പാലത്തിന്‍റെ തൂണില്‍ മാലിന്യങ്ങള്‍ അടിഞ്ഞുകൂടി

കാഞ്ഞിരപ്പള്ളി: കഴിഞ്ഞ ദിവസമുണ്ടായ ശക്തമായ മഴയിൽ ചിറ്റാര്‍ പുഴയില്‍ അഞ്ചിലിപ്പ പാലത്തിനടിയില്‍ മാലിന്യം അടിഞ്ഞുകൂടി. പ്ലാസ്റ്റിക് കുപ്പികളും കൂടുകളും അടങ്ങുന്ന പാഴ്‌വസ്തുക്കളും വലിയ മരത്തടികളുമാണ് മഴയില്‍ ഒഴുകിയെത്തി തങ്ങിക്കിടക്കുന്നത്. ശക്തമായ ഒഴുക്കുള്ള ഇവിടെ നിരൊഴുക്ക് തടഞ്ഞാണ് മാലിന്യങ്ങള്‍ കിടക്കുന്നത്. വന്‍മരങ്ങള്‍ ഒഴുകിയെത്തി പാലത്തിന്‍റെ തൂണുകളില്‍ തങ്ങി നില്‍ക്കുന്നത് പാലത്തിനും തൂണുകള്‍ക്കും ബലക്ഷയത്തിനു കാരണമാകും. ചിറ്റാര്‍ പുഴയില്‍നിന്ന് ഈ മാലിന്യങ്ങള്‍ നീക്കം ചെയ്യാതെ ഒഴുക്കി വിട്ടാല്‍ ചെന്നെത്തുന്നത് മണിമലയാറ്റിലേക്കുമാണ്. കഴിഞ്ഞദിവസം ചിറ്റാര്‍ പുഴയുടെ കൈത്തോടായ ആനക്കല്ല് - കപ്പാട് തോട്ടില്‍ രണ്ട് താത്കാലിക തടിപ്പാലങ്ങള്‍ ഒഴുകിപ്പോയിരുന്നു. മാലിന്യങ്ങള്‍ അടിഞ്ഞുകൂടി കിടക്കുന്നതിന് സമീപമാണ് കുളിക്കടവുമുള്ളത്. മാലിന്യം കിടക്കുന്നത് നീരൊഴുക്കിന് തടസമാകുന്നതിനാല്‍ വീണ്ടും മഴയെത്തിയാല്‍ വെള്ളം കരകവിഞ്ഞൊഴുകാനുള്ള സാധ്യതയുമേറെയാണ്. മഴയില്‍ ഒഴുകിയെത്തിയ മാലിന്യങ്ങള്‍ നീക്കം ചെയ്യണമെന്ന് നാട്ടുകാർ ആവശ്യപ്പെട്ടു.

കാടുകയറി പൊൻകുന്നം- കപ്പാട് റോഡ്

പൊൻകുന്നം: പൊൻകുന്നം - കപ്പാട് റോയൽ ബൈപാസ് റോഡിന്‍റെ ഇരുവശവും കാട് വളർന്ന് യാത്ര ദുഷ്ക്കരമായി. റോഡിന്‍റെ പകുതിയോളം കാട് വളർന്നതിനാൽ കാൽനടയാത്ര ഏറെ ബുദ്ധിമുട്ടായിരിക്കുകയാണ്. വാഹനങ്ങൾ വരുമ്പോൾ റോഡിന്‍റെ ഓരം ചേർന്ന് പോകാനാവാത്ത സ്ഥിതിയാണ്. കാടുമൂലം എതിരേ വരുന്ന വാഹനങ്ങൾ കാണാനും കഴിയാറില്ല. ഇവിടെ ഇഴജന്തുക്കളുടേയും കീരി, കുറുക്കൻ എന്നിവയുടേയും ശല്യമുണ്ട്. ഇതിനെല്ലാം ഉപരിയാണ് സാമൂഹിക വിരുദ്ധരുടെ അഴിഞ്ഞാട്ടവും. കഴിഞ്ഞ ദിവസം ബൈക്കിലെത്തിയ ആൾ പൂർണ നഗ്നനായി യുവതിയെ ആക്രമിക്കാൽ ശ്രമിച്ചത് റോഡിൽ കാട് വളർന്ന ഭാഗത്തുവച്ചാണ്. ആറ് കിലോമീറ്റർ ദൈർഘ്യമുള്ള റോഡിന്‍റെ ഒരു കിലോമീറ്റർമാത്രമാണ് സഞ്ചാരയോഗ്യമായുള്ളത്. ശേഷിക്കുന്ന അഞ്ചു കിലോമീറ്റർ ദൂരം തകർന്നുകിടക്കുകയാണ്. റോഡിലേക്ക് വളർന്നുനിൽക്കുന്ന കാട് വെട്ടിത്തെളിക്കണമെന്നാണ് നാട്ടുകാരുടെ ആവശ്യം.

അബിയ ആൻ ജിജിക്ക് ആദരം

പുലിക്കുന്ന്: ഒഡീഷ്യയിലെ ഭുവനേശ്വറിൽ നടന്ന 40ാമത് ജൂനിയർ അത്‌ലറ്റിക് ചാമ്പ്യൻഷിപ്പിൻ പെൺകുട്ടികളുടെ ഹൈജന്പിൽ സ്വർണ മെഡലും കഴിഞ്ഞദിവസം നെടുങ്കണ്ടത്ത് നടന്ന ഇടുക്കി ജില്ലാ സ്കൂൾ മീറ്റിൽ ഹൈജമ്പ്, ലോംഗ് ജമ്പ്, ത്രിബിൾ ജമ്പ് എന്നീ ഇനത്തിലും ഒന്നാം സ്ഥാനം കരസ്ഥമാക്കിയ പുലിക്കുന്ന് വെട്ടിക്കിഴക്കേതിൽ അബിയ ആൻ ജിജിയെ കണ്ണിമല ഫാർമേഴസ് ക്ലബിന്‍റെ ആദരവ്. കേരള പ്ലാന്‍റേഷൻ കോർപറേഷൻ ചെയർമാൻ ഒ.പി.എ. സലാം ആദരപത്രം വീട്ടിലെത്തി നൽകി ആദരിക്കുകയും പൊന്നാടയണിയിക്കുകയും ചെയ്തു. കാഞ്ഞിരപ്പള്ളി ബ്ലോക്ക് പഞ്ചായത്തംഗം പി.കെ. പ്രദീപ് കാഷ് അവാർഡ് സമ്മാനിച്ചു. ക്ലബ് പ്രസിഡന്‍റ് പി.ഡി. ജോൺ പവ്വത്ത് അധ്യക്ഷത വഹിച്ചു. മുണ്ടക്കയം പഞ്ചായത്ത് മുൻ പ്രസിഡന്‍റ് ബേബിച്ചൻ പ്ലാക്കാട്ട്, പഞ്ചായത്തംഗം ദിലീഷ് ദിവാകരൻ, ക്ലബ് സെക്രട്ടറി സാബു തോമസ് തകടിയേൽ, വൈസ് പ്രസിഡന്‍റ് കെ.എൻ. ഷിബു കപ്ലിയിൽ, എ.ജെ. അലക്സ് റോയ്, ടി.പി. ആന്‍റണി തകടിയേൽ, റെജി പനമൂട്ടിൽ തുടങ്ങിയവർ പ്രസംഗിച്ചു.

കെഎസ്ആർടിസി കെട്ടിടത്തിന്‍റെ കരിങ്കൽകെട്ട് ഇടിഞ്ഞുവീണു

എരുമേലി: കെഎസ്ആർടിസി ഓപ്പറേറ്റിംഗ് സെന്‍റർ കെട്ടിടത്തിന്‍റെ പിറകിലെ ഉയരമേറിയ കരിങ്കൽകെട്ടിന്‍റെ കുറച്ചുഭാഗം ഇടിഞ്ഞുവീണു. അവശേഷിക്കുന്ന ഭാഗവും ഇടിഞ്ഞ നിലയിലാണ്. മഴ തുടരുന്നതിനാൽ ഇതും ഉടൻ ഇടിഞ്ഞുവീഴുമെന്ന് ആശങ്ക. ഇന്നലെ പുലർച്ചെ മൂന്നോടെ മെക്കാനിക്ക് വിഭാഗം മുറിയുടെ പിന്നിലേക്ക് കരിങ്കൽകെട്ടും മണ്ണും നിലംപതിക്കുകയായിരുന്നു. മതിൽ പൂർണമായും പൊളിച്ചു മാറ്റണമെന്ന് ജീവനക്കാർ ആവശ്യപ്പെട്ടു. അതേസമയം എരുമേലിയിലെ കെഎസ്ആർടിസി ബസ് സ്റ്റാൻഡ് ഉൾപ്പെടെയുള്ള സ്ഥലവും കെട്ടിടവും സംബന്ധിച്ച് നിലവിൽ കോടതിയിൽ തർക്കം നിലവിലുള്ളതിനാൽ മതിൽ പൊളിച്ചുമാറ്റി പുനർ നിർമിക്കുന്നതിന് കോടതി അനുമതി വേണ്ടിവന്നേക്കും. ശബരിമല സീസണിന് ഒരു മാസം മാത്രം ശേഷിക്കേ ബസ് സ്റ്റാൻഡ് കെട്ടിടം സുരക്ഷിതമാക്കാൻ കഴിഞ്ഞിട്ടില്ല. സീസണിൽ അയ്യപ്പഭക്തർ ഏറെ എത്തുന്ന സ്റ്റാൻഡിൽ ആവശ്യമായ സൗകര്യം ഒരുക്കാനും കഴിയുന്നില്ല. ബസ് പാർക്കിംഗ് സ്ഥലത്തും അപകടത്തിലായ നിലയിൽ മറ്റൊരു കരിങ്കൽ കെട്ട് ഉണ്ട്. ഇതും തകർച്ചയിലാണ്. സ്റ്റാൻഡ് കുണ്ടും കുഴികളും നിറഞ്ഞ നിലയിലാണ്. തത്കാലത്തേക്ക് തൊട്ടടുത്ത് എതിർവശത്തുള്ള ദേവസ്വം ബോർഡ് ഷോപ്പിംഗ് കോംപ്ലക്സ് കെട്ടിടത്തിലെ രണ്ട് മുറികൾ കെഎസ്ആർടിസിയുടെ ഓഫീസ് പ്രവർത്തനത്തിന് ഉപയോഗിച്ച് പ്രതിസന്ധി പരിഹരിക്കാനാണ് നീക്കം. മുറികൾ വിട്ടു കിട്ടാൻ സെബാസ്റ്റ്യൻ കുളത്തുങ്കൽ എംഎൽഎ ദേവസ്വത്തിന് കത്ത് നൽകിയിട്ടുണ്ട്. 2018ലെ പ്രളയത്തിൽ വെള്ളം കയറിയാണ് കെഎസ്ആർടിസി ഓഫീസ് കെട്ടിടത്തിന് നാശനഷ്‌ടങ്ങളുണ്ടായി ദുർബലമായത്. സ്ഥലം സംബന്ധിച്ച് സ്വകാര്യ വ്യക്തിയും കുടുംബവും നൽകിയ ഉടമസ്ഥ അവകാശ കേസിൽ പാലാ സബ് കോടതിയിൽനിന്ന് കെഎസ്ആർടിസിയ്ക്കെതിരേയാണ് വിധി ഉണ്ടായത്. സ്വകാര്യ വ്യക്തിക്കും കുടുംബത്തിനും സ്ഥലം തിരികെ കൊടുക്കണമെന്നായിരുന്നു വിധി. ഇതിന് മൂന്ന് മാസം സാവകാശം നൽകിയിരുന്നു. ഈ കേസിൽ പാലായിലെതന്നെ ജില്ലാ കോടതി ബഞ്ചിൽ കെഎസ്ആർടിസി നൽകിയ അപ്പീൽ ഹർജി തീർപ്പായിട്ടില്ല.

ബിഎസ്എൻഎൽ ഓഫീസിന്‍റെ കരിങ്കൽകെട്ട് ഇടിഞ്ഞുവീണു

എരുമേലി: പഞ്ചായത്ത്‌ ഓഫീസ് റോഡിൽ ബിഎസ്എൻഎൽ ഓഫീസിന്‍റെ അപകടത്തിലായിരുന്ന ചുറ്റുമതിലിന്‍റെ കുറച്ചുഭാഗം കഴിഞ്ഞദിവസം പൊളിച്ചുമാറ്റിയിരുന്നു. പൊളിക്കാതെ അവശേഷിച്ചിരുന്ന കരിങ്കൽകെട്ട് ഇന്നലെ നിലംപതിച്ചു. കഴിഞ്ഞ ദിവസം മതിൽ പൊളിച്ചപ്പോൾ ഒരു ഭാഗത്ത്‌ മതിലിനോടു ചേർന്ന് മരം നിന്നിരുന്നതിനാൽ പൂർണമായി പൊളിച്ചുമാറ്റാനായില്ല. മരം വെട്ടിമാറ്റിയ ശേഷം ബാക്കി ഭാഗം പൊളിക്കാനാണ് തീരുമാനിച്ചിരുന്നത്. ഇന്നലെ അവധിദിനമായതിനാൽ പണികൾ അടുത്ത ദിവസത്തേക്ക് മാറ്റിയിരുന്നു. ഇതിനു പിന്നാലെയാണ് അവശേഷിച്ചിരുന്ന ഭാഗം ഇന്നലെ ഇടിഞ്ഞു റോഡിൽ പതിച്ചത്. ഇതോടെ മരം ചെരിഞ്ഞ നിലയിലാണ്. അപകടത്തിലായ മരം വെട്ടിമാറ്റി ഉടൻതന്നെ കരിങ്കൽകെട്ട് പൂർണമായും പൊളിച്ചുമാറ്റുമെന്ന് ബിഎസ്എൻഎൽ അധികൃതർ അറിയിച്ചു. മതിൽ അപകടത്തിലായതു സംബന്ധിച്ച് ദീപിക നേരത്തേ വാർത്ത പ്രസിദ്ധീകരിച്ചിരുന്നു. തുടർന്നാണ് പൊളിച്ചുനീക്കാൻ നടപടികളായത്.

റോഡിലെ മണ്‍കൂനയിൽ കയറി സ്കൂട്ടർ മറിഞ്ഞ് വ്യാപാരി മരിച്ചു

കുമളി: വെള്ളാരംകുന്നിൽ ശനിയാഴ്ച രാത്രിയുണ്ടായ കനത്ത മഴയിൽ റോഡിലേക്ക് ഇടിഞ്ഞുവീണ മണ്‍കൂനയിൽ കയറി സ്കൂട്ടർ മറിഞ്ഞ് വ്യാപാരി മരിച്ചു. വെള്ളാരംകുന്ന് പറപ്പള്ളിൽ പി.എം. തോമസ് (തങ്കച്ചൻ - 66) ആണ് മരിച്ചത്. ആനവിലാസം സെൻട്രൽ ഹോട്ടൽ ഉടമയാണ് തോമസ്. ഹോട്ടൽ അടച്ച് രാത്രി എട്ടോടെ വീട്ടിലേക്ക് പോകുന്പോഴാണ് അപകടമുണ്ടായത്. വഴിയാത്രക്കാരാണ് തോമസിന്‍റെ സഹോദരൻ സജുവിനെ അപകടവിവരം അറിയിച്ചത്. തോമസിനെ കട്ടപ്പനയിലെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. സംസ്കാരം വ്യാഴാഴ്ച രണ്ടിന് വെള്ളാരംകുന്ന് സെന്‍റ് മേരീസ് പള്ളിയിൽ. ഭാര്യ ലീലാമ്മ തോമസ്. മകൾ: ജോസ്ന തോമസ്. മരുമകൻ: ജോസഫ് ആന്‍റണി. കാഞ്ഞിരപ്പള്ളി പഴയിടം സെന്‍റ് മൈക്കിൾസ് പള്ളി വികാരി ഫാ. ജോസ് മാത്യു പറപ്പള്ളിൽ പരേതന്‍റെ സഹോദരനാണ്.

കട്ടച്ചിറ ചെക്ക് ഡാമിന്‍റെ ഇരുകരകളും ഇനി മനോഹരം

കിടങ്ങൂര്‍: പൊന്തക്കാടുകള്‍ നിറഞ്ഞും മാലിന്യങ്ങള്‍ നിക്ഷേപിച്ചും സാമൂഹ്യവിരുദ്ധ ശല്യവും മൂലം പൊതുജനങ്ങളുടെ സൈ്വരജീവിതത്തിനു തടസമായിരുന്ന കിടങ്ങൂര്‍ കട്ടച്ചിറ ചെക്ക് ഡാമിന്‍റെ ഇരുകരകളും മനോഹര മായിരിക്കുന്നു. കിടങ്ങൂര്‍ പഞ്ചായത്തിലെ 12, 13 വാര്‍ഡുകളില്‍പ്പെട്ട ഇരു കരകളിലും മിനി പാര്‍ക്ക് സ്ഥാപിക്കുന്നതിനായി ജില്ലാപഞ്ചായത്തംഗം ജോസ്‌മോന്‍ മുണ്ടയ്ക്കല്‍ അനുവദിച്ച 10 ലക്ഷം രൂപ വിനിയോഗിച്ച് നടത്തിയ പ്രവര്‍ത്തനങ്ങളിലൂടെയാണിത് സാധിച്ചത്. ചെക്ക്ഡാമിന്‍റെ ഇരുവശങ്ങളിലും സ്റ്റീല്‍ വേലികള്‍ തീര്‍ത്ത് പ്രതലം ഇന്‍റര്‍ലോക്ക് വിരിച്ച് സ്റ്റീല്‍ പൈപ്പുകൊണ്ടുള്ള ഇരിപ്പിടങ്ങള്‍ സജ്ജമാക്കി. രണ്ട് സ്ഥലങ്ങളിലും മിനി മാക്‌സ് ലൈറ്റുകള്‍ സ്ഥാപിച്ചു. പതിമൂന്നാം വാര്‍ഡിന്‍റെ ഭാഗത്തെ പ്രവര്‍ത്തനങ്ങള്‍ക്ക് പുഴയോരം റസിഡന്‍സ് അസോസിയേഷനും പന്ത്രണ്ടാം വാര്‍ഡിന്‍റെ ഭാഗത്തെ പ്രവര്‍ത്തനങ്ങള്‍ക്ക് കൈരളി റസിഡന്‍സ് അസോസിയേഷനും നേതൃത്വം നല്‍കി. യോഗത്തില്‍ പഞ്ചായത്ത് പ്രസിഡന്‍റ് ഇ.എന്‍. ബിനു അധ്യക്ഷത വഹിച്ചു. ബ്ലോക്ക് പഞ്ചായത്തംഗം ഡോ.മേഴ്‌സി ജോണ്‍, മുന്‍ പഞ്ചായത്ത് പ്രസിഡന്‍റ് തോമസ് മാളിയേക്കല്‍, പഞ്ചായത്തംഗം ദീപലത സുരേഷ്, എം. ദിലീപ് തെക്കുംചേരി, രാധാ പ്രദീപ് കൂടാരപ്പള്ളി, രാധാകൃഷ്ണക്കുറുപ്പ് തുടങ്ങിയവര്‍ പ്രസംഗിച്ചു.

കൂത്താട്ടുകുളം ടൗൺ ഫൊറോന പള്ളിയിൽ നൊവേന തിരുനാളിന് കൊടിയേറി

കൂത്താട്ടുകുളം: കൂത്താട്ടുകുളം ടൗൺ ഫൊറോന പള്ളിയിൽ നൊവേന തിരുനാളിന് കൊടിയേറി. പാലാ രൂപത വികാരി ജനറാൾ മോൺ. ജോസഫ് തടത്തിൽ കൊടിയേറ്റ് നിർവഹിച്ചു. വികാരി ഫാ. ജയിംസ് കുടിലിൽ, സഹവികാരി ഫാ. ജോസഫ് മരോട്ടിക്കൽ എന്നിവർ തിരുക്കർമങ്ങൾക്കു നേതൃത്വം നൽകി. ഈ മാസം 28 വരെ വിശുദ്ധ യൂദാശ്ലീഹായുടെ നൊവേന തിരുനാൾ ആഘോഷിക്കും. 28 വരെ ദിവസവും വൈകുന്നേരം 6.15ന് 1001 എണ്ണത്തിരി തെളിക്കൽ ശുശ്രൂഷ ഉണ്ടായിരിക്കും.

ഈരാറ്റുപേട്ട-വാഗമൺ റോഡിൽ പിക്കപ്പ് വാൻ മറിഞ്ഞു

തീക്കോയി: ഈരാറ്റുപേട്ട- വാഗമൺ റോഡിൽ പിക്കപ്പ് വാൻ കൊക്കയിലേക്കു മറിഞ്ഞു. ഇന്നലെ 3.30ന് കാരികാട് ടോപ്പിനു സമീപം എട്ടാം മൈലിലാണ് അപകടമുണ്ടായത്. 50 അടിയോളം താഴ്ചയിലേക്ക് മറിഞ്ഞ പിക്കപ്പ് ആൾതാമസം ഇല്ലാത്ത വീടിനു മുകളിലേക്കാണ് വീണത്. തമിഴ്‌നാട് സ്വദേശികളായ രണ്ടു പേരാണ് പിക്കപ്പിലുണ്ടായിരുന്നത്. ഇവർ നിസാര പരിക്കുകളോടെ രക്ഷപ്പെട്ടു.

ദേവമാതാ കോളജിൽ ശ്രീനാരായണഗുരു ഓപ്പൺ സർവകലാശാല പ്രാദേശിക കേന്ദ്രം പ്രവർത്തനമാരംഭിച്ചു

കുറവിലങ്ങാട്: ദേവമാതാ ഓട്ടോണമസ് കോളജിൽ ശ്രീനാരായണഗുരു ഓപ്പൺ യൂണിവേഴ്സിറ്റിയുടെ പ്രാദേശികകേന്ദ്രം പ്രവർത്തനമാരംഭിച്ചു. 15 ബിരുദ പ്രോഗ്രാമുകളും 12 ബിരുദാനന്തരബിരുദ പ്രോഗ്രാമുകളുമാണ് ദേവമാതാ പ്രാദേശിക കേന്ദ്രത്തിൽ ആരംഭിച്ചിരിക്കുന്നത്. കോളജ് മാനേജർ ആർച്ച്പ്രീസ്റ്റ് റവ. ഡോ. തോമസ് മേനാച്ചേരി അധ്യക്ഷത വഹിച്ചു. ഓപ്പൺ യൂണിവേഴ്സിറ്റി വൈസ് ചാൻസിലർ ഡോ. വി.പി.ജഗതിരാജ് പഠനകേന്ദ്രത്തിന്‍റെ ഉദ്ഘാടനം നിർവഹിച്ചു. പ്രിൻസിപ്പൽ ഡോ. സുനിൽ സി. മാത്യു, റീജണൽ ഡയറക്ടർ ഡോ. ടോജോമോൻ മാത്യു, ബർസാർ ഫാ. ജോസഫ് മണിയൻചിറ, സെന്‍റർ കോ-ഓർഡിനേറ്റർ റെനീഷ് തോമസ്, എന്നിവർ പ്രസംഗിച്ചു. ശ്രീനാരായണഗുരു യൂണിവേഴ്സിറ്റി അസിസ്റ്റന്‍റ് പ്രഫസർ യു. അഖിലേഷ് പുതുതായി ചേർന്ന വിദ്യാർഥികൾക്ക് ഓറിയന്‍റേഷൻ ക്ലാസ് നടത്തി.

ഈരാറ്റു പേട്ട ഉപജില്ലാ ശാസ്ത്രോത്സവം അരുവിത്തുറയിൽ

അരുവിത്തുറ: ഈരാറ്റുപേട്ട ഉപജില്ലാ ശാസ്‌ത്രോത്സവം 21, 22 തീയതികളിൽ അരുവിത്തുറ സെന്‍റ് ജോർജ് ഹയർ സെക്കൻഡറി സ്‌കൂൾ, സെന്‍റ് മേരീസ് എൽപി സ്‌കൂൾ എന്നിവിടങ്ങളിലായി നടക്കും. നാളെ രാവിലെ 9.30 ന് സെബാസ്റ്റ്യൻ കുളത്തുങ്കൽ എം.എൽ.എ ഉദ്ഘാടനം നിർവഹിക്കും. സ്‌കൂൾ മാനേജർ ഫാ. സെബാസ്റ്റ്യൻ വെട്ടുകല്ലേലിൽ‌ അധ്യക്ഷത വഹിക്കും. ഈരാറ്റുപേട്ട മുനിസിപ്പൽ ചെയർപേഴ്‌സൺ സുഹ്‌റ അബ്ദുൽ ഖാദർ മുഖ്യപ്രഭാഷണം നടത്തും. 22 ന് വൈകുന്നേരം 4.30 ന് നടക്കുന്ന സമാപന സമ്മേളനം മുനിസിപ്പൽ ചെയർപേഴ്‌സൺ സുഹ്‌റ അബ്ദുൾ ഖാദർ ഉദ്ഘാടനം ചെയ്യും. സ്‌കൂൾ മാനേജർ ഫാ. സെബാസ്റ്റ്യൻ വെട്ടുകല്ലേൽ അധ്യക്ഷത വഹിക്കും. രണ്ടു ദിവസങ്ങളിലായി നടക്കുന്ന ശാസ്ത്ര, സാമൂഹ്യശാസ്ത്ര, ഗണിതശാസ്ത്ര, ഐടി, പ്രവൃത്തിപരിചയമേളകളിലായി മൂവായിരത്തോളം കുട്ടികൾ പങ്കെടുക്കുമെന്ന് ഉപജില്ലാ വിദ്യാഭ്യാസ ഓഫീസർ ഷംല ബീവി, പ്രിൻസിപ്പൽ സജി തോമസ്, ഹെഡ്മാസ്റ്റർ ജോബിൻ തോമസ് എന്നിവർ അറിയിച്ചു.

മുത്തോലിയിൽ ആരു മുത്താകും?

മുത്തോലി ഗ്രാമപഞ്ചായത്ത് പാലാ നിയോജക മണ്ഡലത്തില്‍ ബിജെപി ഭരിക്കുന്ന ഏക പഞ്ചായത്ത്. ചെറുകിട കര്‍ഷകര്‍ തിങ്ങിപ്പാര്‍ക്കുന്ന സ്ഥലം. മെഡിക്കല്‍, എൻജിനിയറിംഗ് പ്രവേശന പരീക്ഷാ പരിശീലനകേന്ദ്രമായ ബ്രില്യന്‍റ് സ്റ്റഡി സെന്‍ററിന്‍റെ സാന്നിധ്യം നാടിന്‍റെ മുഖച്ഛായതന്നെ മാറ്റിയിരിക്കുന്നു. വ്യാപാരസ്ഥാപനങ്ങളും വീടുകളോടനുബന്ധിച്ച ഹോസ്റ്റലുകളും ഹോംസ്റ്റേകളും അനുബന്ധ സ്വയം തൊഴില്‍ സാധ്യതകളും കാര്യമായി വർധിച്ച മേഖല. നേട്ടങ്ങൾ രഞ്ജിത് ജി. മീനാഭവന്‍ (പഞ്ചായത്ത് പ്രസിഡന്‍റ്, ബിജെപി) ആരോഗ്യമേഖലയ്ക്ക് മരുന്നും ഉപകരണവും വാങ്ങല്‍, ആരോഗ്യ പരിരക്ഷ - പടിവാതില്‍ സേവനം പദ്ധതി, പാലിയേറ്റീവ് കെയര്‍ പരിചരണം, ചികിത്സാ സഹായം, പോഷകാഹാര കിറ്റ് വിതരണം, ആംബുലന്‍സ് പദ്ധതി എന്നിവ മികച്ച രീതിയില്‍. നെല്‍കൃഷി വികസനം, അടുക്കത്തോട്ടം ജൈവ പച്ചക്കറി കൃഷി, കാര്‍ഷിക വിപണികള്‍ക്ക് ധനസഹായം, ഇക്കോഷോപ്പിന് അടിസ്ഥാന സൗകര്യം. മൃഗസംരക്ഷണത്തിനും ക്ഷീരവികസനത്തിനും പ്രോത്സാഹനം. അങ്കണവാടി കുട്ടികള്‍ക്കു പോഷകാഹാരം, ഗവണ്‍മെന്‍റ് സ്‌കൂളുകളുടെ ശുചിത്വ പരിപാലനം, ലഹരിവിരുദ്ധ ബോധവത്കരണം, സ്‌കൂള്‍ ലൈബ്രറി മോടിപിടിപ്പൽ, നീന്തല്‍, ഫുട്ബോള്‍, ഷട്ടില്‍ പരിശീലനം. പഞ്ചായത്തിലെ എല്ലാ കുടുംബങ്ങളിലും ജൽജീവന്‍ മിഷന്‍ വഴിയും ജലനിധി പദ്ധതി വഴിയും കുടിവെള്ളം. ലൈഫ് ഭവന പദ്ധതി മികച്ച രീതിയില്‍. വയോധികരുടെയും ഭിന്നശേഷിക്കാരുടെയും അഗതികളുടെയും ഉന്നമന പദ്ധതികൾ, മാലിന്യ സംസ്‌കരണ പദ്ധതികള്‍, റോഡ് വികസനം, കേന്ദ്ര പദ്ധതി നടപ്പിലാക്കല്‍ എന്നിവയും നല്ല രീതിയിൽ. കോട്ടങ്ങൾ രാജന്‍ മുണ്ടമറ്റം (കേരള കോണ്‍ഗ്രസ്-എം പാര്‍ലമെന്‍ററി പാര്‍ട്ടി ലീഡർ) അഞ്ചു വര്‍ഷംകൊണ്ട് പദ്ധതി നടപ്പാക്കാത്തതു മൂലം 7.3 കോടി രൂപ പഞ്ചായത്തിനു നഷ്ടപ്പെട്ടു. 4ജൽജീവന്‍ മിഷന്‍ പദ്ധതിയില്‍ 10 കോടി രൂപ നഷ്ടമായി. ലൈഫ് ഭവന പദ്ധതി അട്ടിമറിക്കപ്പെട്ടു. കഴിഞ്ഞ അഞ്ചു വര്‍ഷംകൊണ്ട് ആകെ തീർന്നത് 52 വീടുകള്‍ മാത്രം. പിഎംഎവൈ പദ്ധതിയില്‍ ആകെ നാലു വീടും. ആശമാർക്ക് അധിക ഓണറേറിയമായി 7,000 രൂപ നല്‍കുമെന്നു വാക്കാൽ പ്രഖ്യാപിച്ചു. പക്ഷേ, ബജറ്റില്‍ ഉള്‍പ്പെടുത്തിയില്ല. ഒറ്റനോട്ടത്തിൽ പാലാ നിയോജക മണ്ഡലത്തിലാണ് മുത്തോലി സ്ഥിതി ചെയ്യുന്നത്. കടുത്തുരുത്തി നിയോജക മണ്ഡലവുമായി അതിര്‍ത്തി പങ്കിടുന്ന പഞ്ചായത്ത്. ആറു മെംബര്‍മാരുള്ള ബിജെപിയാണ് ഭരണം നടത്തുന്നത്. ബിജെപിക്കെതിരേ എല്‍ഡിഎഫും കോണ്‍ഗ്രസും ഒന്നിച്ചാല്‍ ഭരണം അട്ടിമറിക്കാമെങ്കിലും അത്തരം നീക്കങ്ങൾ ഉണ്ടായില്ല. 13 വാർഡുകൾ പുനഃസംഘടനയിൽ 14 ആയി ഉയർന്നു. കക്ഷിനില: ബിജെപി -ആറ്, എല്‍ഡിഎഫ് -5 (കേരള കോണ്‍.-എം- 4, സിപിഎം -1), യുഡിഎഫ്-2 (കോണ്‍ഗ്രസ് 2). ആകെ 13.

തീർത്ഥാടന പദയാത്ര തിങ്കളാഴ്ച

ഇടയ്ക്കാട്ട്: കോട്ടയം അതിരൂപതയിലെ ചെറുപുഷ്പ മിഷൻലീഗിന്‍റെ ആഭിമുഖ്യത്തിൽ ധന്യൻ മാർ മാത്യു മാക്കിലിന്‍റെ കബറിടം സ്ഥിതിചെയ്യുന്ന ഇടയ്കാട്ട് സെന്‍റ് ജോർജ് ദൈവാലയത്തിലേക്ക് പദയാത്ര നടത്തുന്നു. തിങ്കളാഴ്ച ഉച്ചകഴിഞ്ഞ് മൂന്നിന് മള്ളുശേരി സെന്‍റ് തോമസ് ക്നാനായ കത്തോലിക്ക ദൈവാലയത്തിൽ നിന്നും ആരംഭിക്കുന്ന പദയാത്ര വികാരി ജനറാൾ ഫാ. തോമസ് ആനിമൂട്ടിൽ ഉദ്ഘാടനം ചെയ്യും. കോട്ടയം അതിരൂപത സഹായമെത്രാൻ മാർ ജോസഫ് പണ്ടാരശേരിയിൽ ഇടയ്ക്കാട്ട് പള്ളിയിൽ ആശീർവാദ പ്രാർഥന നടത്തും. തുടർന്നുള്ള പിതൃസമ്മാനം പദ്ധതിയുടെ നറുക്കെടുപ്പ് ദീപിക മാനേജിംഗ് ഡയറക്ടർ ഫാ. മൈക്കിൾ വെട്ടിക്കാട്ട് ഉദ്ഘാടനം ചെയ്യും.

തീർത്ഥാടന പദയാത്ര തിങ്കളാഴ്ച

ഇടയ്ക്കാട്ട്: കോട്ടയം അതിരൂപതയിലെ ചെറുപുഷ്പ മിഷൻലീഗിന്‍റെ ആഭിമുഖ്യത്തിൽ ധന്യൻ മാർ മാത്യു മാക്കിലിന്‍റെ കബറിടം സ്ഥിതിചെയ്യുന്ന ഇടയ്കാട്ട് സെന്‍റ് ജോർജ് ദൈവാലയത്തിലേക്ക് പദയാത്ര നടത്തുന്നു. തിങ്കളാഴ്ച ഉച്ചകഴിഞ്ഞ് മൂന്നിന് മള്ളുശേരി സെന്‍റ് തോമസ് ക്നാനായ കത്തോലിക്ക ദൈവാലയത്തിൽ നിന്നും ആരംഭിക്കുന്ന പദയാത്ര വികാരി ജനറാൾ ഫാ. തോമസ് ആനിമൂട്ടിൽ ഉദ്ഘാടനം ചെയ്യും. കോട്ടയം അതിരൂപത സഹായമെത്രാൻ മാർ ജോസഫ് പണ്ടാരശേരിയിൽ ഇടയ്ക്കാട്ട് പള്ളിയിൽ ആശീർവാദ പ്രാർഥന നടത്തും. തുടർന്നുള്ള പിതൃസമ്മാനം പദ്ധതിയുടെ നറുക്കെടുപ്പ് ദീപിക മാനേജിംഗ് ഡയറക്ടർ ഫാ. മൈക്കിൾ വെട്ടിക്കാട്ട് ഉദ്ഘാടനം ചെയ്യും.

കെസിവൈഎൽ അതിരൂപത ലീഡർഷിപ്പ് ക്യാമ്പ് ആരംഭിച്ചു

കോട്ടയം: ക്‌നാനായ കാത്തലിക് യൂത്ത് ലീഗ് ലീഡർഷിപ്പ് ക്യാമ്പിന്‍റെ ഉദ്ഘാടനം കോട്ടയം അതിരൂപതാ സഹായ മെത്രാൻ മാർ ജോസഫ് പണ്ടാരശേരിൽ നിർവഹിച്ചു. ചൈതന്യ പാസ്റ്ററൽ സെന്‍ററിൽ നടക്കുന്ന പരിപാടിയിൽ അതിരൂപതാ പ്രസിഡന്‍റ് ജോണീസ് പി. സ്റ്റ‌ീഫൻ പാണ്ടിയാംകുന്നേൽ അധ്യക്ഷത വഹിച്ചു. കെസിവൈഎൽ അതിരൂപതാ ചാപ്ലെയിൻ ഫാ.മാത്തുക്കുട്ടി കുളക്കാട്ടുകുടിയിൽ, ചൈതന്യ പാസ്റ്ററൽ സെന്‍റർ ഡയറക്ടർ ഫാ.സുനിൽ പെരുമാനൂർ, കെസിഡബ്ലുഎ അതിരൂപതാ സെക്രട്ടറി സിൽജി സജി തുടങ്ങിയവർ പ്രസംഗിച്ചു. അതിരൂപതാ സമിതി അംഗങ്ങളായ സെക്രട്ടറി ചാക്കോ ഷിബു, ഡയറക്ടർ ഷെല്ലി ആലപ്പാട്ട്, ജോയിന്‍റ് ഡയറക്ടർ സ്റ്റെഫി പുതിയകുന്നേൽ, അഡ്വൈസർ സിസ്റ്റർ ലേഖ എസ്ജെസി, ഭാരവാഹികളായ നിതിൻ ജോസ്, അലൻ ബിജു, ആൽബിൻ ബിജു ബെറ്റി തോമസ്, ജാക്ക്സൺ സ്റ്റീഫൻ എന്നിവർ ക്യാമ്പിന് നേതൃത്വം നൽകി.

ഞാലിയാകുഴിയിൽ പ്രതിഷേധ സദസ്

ഞാലിയാകുഴി: ആശാസമരസഹായ സമിതിയുടെ ആഭിമുഖ്യത്തില്‍ ഞാലിയാകുഴി കവലയില്‍ സംഘടിപ്പിച്ച പ്രതിഷേധ സദസ് കെപിസിസി ജനറല്‍ സെക്രട്ടറി ജോഷി ഫിലിപ്പ് ഉദ്ഘാടനം ചെയ്തു. സമരസഹായ സമിതി ചെയര്‍മാന്‍ ബാബു കുട്ടന്‍ചിറ അധ്യക്ഷത വഹിച്ചു. എസ്. മിനി, വി.ജെ. ലാലി, സുധാ കുര്യന്‍, ഫാ. ബ്രിജേഷ് ഫിലിപ്പ്, മിനി കെ. ഫിലിപ്പ്, ബേബി ജോസഫ്, എജി പാറപ്പാട്, ഷൈനി അനില്‍, പി.കെ. മജു രമേശ്, നടരാജന്‍, ജോര്‍ജ് തോമസ്, സണ്ണി കെ. വര്‍ക്കി, പി.എച്ച്. അഷ്റഫ്, ഷിബു ഏഴേപുഞ്ചയില്‍, കെ.എസ്. ശശികല, മണിവാസന്‍, കെ.എന്‍. രാജന്‍, ടി.ജെ. ജോണിക്കുട്ടി എന്നിവര്‍ പ്രസംഗിച്ചു.

ജപമാലറാലി ഭക്തസാന്ദ്രമായി

ചങ്ങനാശേരി: ആലപ്പുഴ പുന്നപ്ര ഐഎംഎസ് ധ്യാനഭവനില്‍നിന്നു പാറേല്‍ മരിയന്‍ തീര്‍ഥാടന കേന്ദ്രത്തിലേക്കു നടന്ന ജപമാല റാലി ഭക്തസാന്ദ്രമായി. പുലര്‍ച്ചെ 4.30ന് ഐഎംഎസില്‍നിന്നുമാരംഭിച്ച റാലി ഉച്ചയ്ക്ക് ഒന്നിന് പാറേല്‍ പള്ളിയില്‍ എത്തിച്ചേര്‍ന്നു. പാറേല്‍ പള്ളി വികാരി ഫാ. ജേക്കബ് വാരിക്കാട്ട് വിശുദ്ധ കുര്‍ബാനയര്‍പ്പിച്ചു. ഫാ. തോമസ് പുത്തന്‍പുരയ്ക്കല്‍ സന്ദേശം നല്‍കി.

ചെത്തിപ്പുഴ ആശുപത്രിയില്‍ രാജ്യാന്തര സമ്മേളനം തുടങ്ങി

ചങ്ങനാശേരി: എംജി സര്‍വകലാശാലയിലെ ഡോ.എന്‍. രാധാകൃഷ്ണന്‍ ഇന്‍റര്‍നാഷനല്‍ സെന്‍റര്‍ ഫോര്‍ മെഡിക്കല്‍ ഇന്നൊവേഷന്‍റെ നേതൃത്വത്തില്‍ ചെത്തിപ്പുഴ സെന്‍റ് തോമസ് ആശുപത്രിയില്‍ ആരംഭിച്ച "റിഥം -2025’ രാജ്യാന്തര സമ്മേളനം എംജി സര്‍വകലാശാല വൈസ് ചാന്‍സലര്‍ ഡോ. സി.ടി. അരവിന്ദകുമാര്‍ ഉദ്ഘാടനം ചെയ്തു. ആശുപത്രി എക്‌സിക്യൂട്ടീവ് ഡയറക്ടര്‍ ഫാ. ജയിംസ് പി. കുന്നത്ത് അധ്യക്ഷത വഹിച്ചു. കോട്ടയം മെഡിക്കല്‍ കോളജ് ആശുപത്രി പ്രിന്‍സിപ്പല്‍ ഡോ. വര്‍ഗീസ് പി. പുന്നൂസ് മുഖ്യപ്രഭാഷണം നടത്തി. ജോബ് മൈക്കിള്‍ എംഎല്‍എ, സെന്‍റ് തോമസ് ആശുപത്രി മാനേജര്‍ മോണ്‍. ജോണ്‍ തെക്കേക്കര, അസോസിയേറ്റ് ഡയറക്ടര്‍ ഫാ. ജോഷി മുപ്പതില്‍ചിറ, എന്‍ആര്‍ഐസിഎംഐ ചെയര്‍മാനും സെന്‍റ് തോമസ് ഇന്‍സ്റ്റിറ്റ്യൂട്ട് ഓഫ് റിസര്‍ച്ച് ഓണ്‍ വീനസ് ഡിസീസ് മെഡിക്കല്‍ ഡയറക്ടറുമായ ഡോ. എന്‍. രാധാകൃഷ്ണന്‍, സെന്‍റ് തോമസ് ആശുപത്രി കാര്‍ഡിയോളജി വിഭാഗം ഡോ. അബ്ദുല്‍ ഖാദര്‍, മാര്‍ അത്തനാസിയോസ് കോളജ് ഫോര്‍ അഡ്വാന്‍സ് സ്റ്റഡീസ് പ്രിന്‍സിപ്പല്‍ ഫാ. ഏബ്രഹാം മുളമൂട്ടില്‍, പുഷ്പഗിരി മെഡിക്കല്‍ കോളജ് ജനറല്‍ സര്‍ജറി വിഭാഗം പ്രഫ. റോബിന്‍സണ്‍ പി. ജോര്‍ജ്, ഡോ. സി. ചന്ദന എന്നിവര്‍ പ്രസംഗിച്ചു.

ജെജെഎംസ് ബസ് ജീവനക്കാര്‍ക്ക് ബിഗ് സല്യൂട്ട്... ബസില്‍ കുഴഞ്ഞുവീണ യാത്രക്കാരിയെ ആശുപത്രിയിലെത്തിച്ച് ജീവന്‍ രക്ഷിച്ചു

ചങ്ങനാശേരി: സ്വകാര്യബസില്‍ കുഴഞ്ഞുവീണ യാത്രക്കാരിയെ ബസ് ജീവനക്കാര്‍ ആശുപത്രിയിലെത്തിച്ചു. ഇന്നലെ ഉച്ചയ്ക്ക് 1.40ന് ചങ്ങനാശേരി-തെങ്ങണ-തൃക്കൊടിത്താനം റൂട്ടില്‍ ഓടുന്ന ജെജെഎംഎസ് മുളകുപ്പാടം ബസിലാണ് സംഭവം. ചങ്ങനാശേരിയിലേക്കുള്ള യാത്രയ്ക്കിടെ യാത്രക്കാരി കുഴഞ്ഞു വീഴുകയായിരുന്നു. ഡ്രൈവര്‍ രതീഷ് ആർ.‍ നായര്‍, കണ്ടക്ടര്‍ കെ.എം. സുമേഷ് എന്നിവരുടെ നേതൃത്വത്തില്‍ ബസില്‍ ഇവരെ ഉടനെ ജനറല്‍ ആശുപത്രിയില്‍ എത്തിച്ചു. ബസിനുള്ളില്‍ മറ്റു യാത്രക്കാരുമുണ്ടായിരുന്നു. കണ്ടക്ടറും ബസിലുണ്ടായിരുന്ന യാത്രക്കാരൻ സോജന്‍ എസ്. ശ്രീധരനും ഗതാഗതക്കുരുക്ക് ഒഴിവാക്കാന്‍ സഹായിച്ചു.

അവകാശസംരക്ഷണ യാത്ര 22ന് ചങ്ങനാശേരി അതിരൂപതയില്‍

ചങ്ങനാശേരി: കത്തോലിക്ക കോണ്‍ഗ്രസ് ഗ്ലോബല്‍ സമിതിയുടെ നേതൃത്വത്തില്‍ സമുദായ ശക്തീകരണം രാ‌ഷ്‌ട്രപുരോഗതിക്ക്, നീതി ഔദാര്യമല്ല അവകാശമാണ് എന്നീ മുദ്രാവാക്യങ്ങള്‍ ഉയര്‍ത്തി 13ന് കാസര്‍ഗോഡുനിന്നും കത്തോലിക്കാ കോണ്‍ഗ്രസ് ഗ്ലോബല്‍ പ്രസിഡന്‍റ് പ്രഫ. രാജീവ് കൊച്ചുപറമ്പിലിന്‍റെ നേതൃത്വത്തില്‍ ആരംഭിച്ച അവകാശസംരക്ഷണ യാത്രയ്ക്ക് 22ന് ചങ്ങനാശേരി അതിരൂപതയിലെ വിവിധ കേന്ദ്രങ്ങളില്‍ സ്വീകരണം നല്‍കും. രാവിലെ 8.45ന് പാലായില്‍നിന്ന് ഏറ്റുമാനൂരില്‍ എത്തിച്ചേരുന്ന അവകാശ സംരക്ഷണ യാത്രയെ പാലാ റോഡില്‍നിന്ന് സ്വീകരിച്ച് ഏറ്റുമാനൂര്‍ ജംഗ്ഷനിലെ സമ്മേളന വേദിയിലേക്ക് ആനയിക്കും. അതിരൂപത കത്തോലിക്ക കോണ്‍ഗ്രസ് പ്രസിഡന്‍റ് ബിജു സെബാസ്റ്റ്യന്‍ ഏറ്റുമാനൂരില്‍ ആരംഭിച്ച് തുടര്‍ന്ന് അതിരൂപതയുടെ വിവിധ കേന്ദ്രങ്ങളില്‍ നടക്കുന്ന സ്വീകരണ സമ്മേളനങ്ങളില്‍ അധ്യക്ഷത വഹിക്കും. യോഗങ്ങളില്‍ അതിരൂപതാ ഡയറക്ടര്‍ ഫാ. സാവിയോ മാനാട്ട്, ജനറല്‍ സെക്രട്ടറി ബിനു ഡൊമിനിക്ക് എന്നിവര്‍ പ്രസംഗിക്കും. ഏറ്റുമാനൂരില്‍ നടക്കുന്ന അതിരൂപതയുടെ പ്രഥമ സ്വീകരണ സമ്മേളനം അതിരൂപത വികാരിജനറാള്‍ മോണ്‍. ആന്‍റണി എത്തയ്ക്കാട്ട് ഉദ്ഘാടനം ചെയ്യും. ഫൊറോനാ വികാരി ഫാ. മാത്യു പടിഞ്ഞാറേക്കുറ്റ് മുഖ്യസന്ദേശം നല്‍കും. 10.45ന് കോട്ടയത്ത് എത്തിച്ചേരുന്ന യാത്രയെ കോട്ടയം, ചങ്ങനാശേരി അതിരൂപതാ സമിതികളുടെ നേതൃത്വത്തില്‍ ഗാന്ധി പ്രതിമയ്ക്കു മുന്നില്‍നിന്ന് സ്വീകരിച്ച് തിരുനക്കര പ്രൈവറ്റ് ബസ്‌സ്റ്റാന്‍ഡ് മൈതാനത്തേക്ക് ആനയിക്കും. ക്‌നാനായ കത്തോലിക്ക കോണ്‍ഗ്രസ് കോട്ടയം അതിരൂപത പ്രസിഡന്‍റ് ബാബു പറമ്പത്തുമലയിലിന്‍റെ അധ്യക്ഷതയില്‍ ചേരുന്ന സമ്മേളനം കോട്ടയം അതിരൂപത സഹായമെത്രാന്‍ മാര്‍ ജോസഫ് പണ്ടാരശേരി ഉദ്ഘാടനം ചെയ്യും. കോട്ടയം അതിരൂപത ചാപ്ലിന്‍ ഫാ. തോമസ് ആനിമൂട്ടില്‍ മാര്‍ഗനിര്‍ദേശ പ്രസംഗം നടത്തും. 12.15ന് കുമരകം ചന്തക്കവലയില്‍ കുടമാളൂര്‍ ഫൊറോന പ്രസിഡന്‍റ് ഷെയിന്‍ ജോസഫ് ജാഥ ക്യാപ്റ്റനെ ഹാരമണിയിക്കും. ഉച്ചകഴിഞ്ഞ് 2.30ന് കൈതവന ജംഗ്ഷനില്‍ ജാഥ ക്യാപ്റ്റനെ സ്വീകരിക്കും. ഉച്ചകഴിഞ്ഞ് 3.45ന് രാമങ്കരി ജംഗ്ഷനില്‍ ജാഥയെ സ്വീകരിക്കും. വൈകുന്നേരം 4.45ന് ചങ്ങനാശേരിയില്‍ എത്തിച്ചേരുന്ന അവകാശ സംരക്ഷണ യാത്രയെ അതിരൂപതയിലെ ചങ്ങനാശേരി, തുരുത്തി, തൃക്കൊടിത്താനം, കുറുമ്പനാടം, നെടുംകുന്നം, മണിമല ഫൊറോനാ സമിതികളുടെ നേതൃത്വത്തില്‍ ധന്യ തിയറ്ററിനു മുമ്പില്‍നിന്ന് സ്വീകരിച്ച് സമ്മേളന വേദിയായ പെരുന്ന ബസ്‌സ്റ്റാന്‍ഡിനു മുമ്പില്‍ ക്രമീകരിച്ചിരിക്കുന്ന സ്വീകരണ സമ്മേളന നഗറിയിലേക്ക് ആനയിക്കും. സമാപന സമ്മേളനം ആര്‍ച്ച് ബിഷപ് മാര്‍ തോമസ് തറയില്‍ ഉദ്ഘാടനം ചെയ്യും. ജാഥാ ക്യാപ്റ്റനും കത്തോലിക്കാ കോണ്‍ഗ്രസ് ഗ്ലോബല്‍ പ്രസിഡന്‍റുമായ പ്രഫ.രാജീവ് കൊച്ചുപറമ്പില്‍ വിഷയാവതരണ പ്രസംഗം നടത്തും.

പായിപ്പാടിന്‍റെ ചാൽ ഇനി എങ്ങോട്ട് ‍?

ചങ്ങനാശേരി: തൃക്കൊടിത്താനം, കവിയൂര്‍, മുട്ടാര്‍ പഞ്ചായത്തുകളുടെയും ചങ്ങനാശേരി നഗരത്തിന്‍റെയും മധ്യത്തിൽ പത്തനംതിട്ട, ആലപ്പുഴ ജില്ലകളുടെ അതിരുകള്‍ പങ്കിട്ട് സ്ഥിതിചെയ്യുന്ന പഞ്ചായത്താണ് പായിപ്പാട്. ഈ പഞ്ചായത്തിന്‍റെ ഒന്ന്, 16 വാര്‍ഡുകള്‍ വെള്ളത്താല്‍ ചുറ്റപ്പെട്ട പ്രദേശങ്ങളാണ്. ളായിക്കാട് 15-ാംവാര്‍ഡ് (പുതിയ-16) വെള്ളക്കെട്ട് നേരിടുന്ന പ്രദേശമാണ്. കാര്യമായൊരു മഴ പെയ്താല്‍ 16-ാം വാര്‍ഡിലെ പൂവം, പെരുമ്പുഴക്കടവ്, നക്രാല്‍, അറുനൂറില്‍ പുതുവല്‍, അംബേദ്കര്‍ കോളനി, എട്ട്യാകരി തുടങ്ങി ഭാഗങ്ങൾ വെള്ളക്കെട്ടില്‍ ഒറ്റപ്പെട്ട് വാര്‍ത്തയാകുന്നതു പതിവാണ്. ഈ ഭാഗത്തേക്കുള്ള റോഡുകളും വെള്ളത്തിലാകും. മഴക്കാലത്ത് മാസങ്ങളോളമാണ് ഇവരുടെ ദുരിതം. പഴയ 16-ാം വാര്‍ഡ് ഇപ്പോള്‍ 17-ാം വാര്‍ഡായി മാറി. ഇരുപതോളം പാടശേഖരങ്ങളിലായി ആയിരത്തോളം ഹെക്‌ടര്‍ നെല്‍കൃഷിയാല്‍ സമ്പന്നവും മണിമലയാറും എസി റോഡരികിലുള്ള കനാലും മുട്ടിയുരുമ്മിക്കിടക്കുന്നുവെന്ന സവിശേഷതയും പായിപ്പാടിനുണ്ട്. പെരുന്തുരുത്തി-ഏറ്റുമാനൂര്‍ ബൈപാസും തിരുവല്ല-മല്ലപ്പള്ളി, ചങ്ങനാശേരി- കവിയൂര്‍ റോഡുകളും പായിപ്പാട് പഞ്ചായത്തിനെ കീറിമുറിച്ചാണ് കടന്നുപോകുന്നത്. ഇതരസംസ്ഥാന തൊഴിലാളികളുടെ കേന്ദ്രം കഴിഞ്ഞ പത്തുവര്‍ഷത്തോളമായി ഇതരസംസ്ഥാന തൊഴിലാളികള്‍ ഏറ്റവും അധികം കുടിയേറി താമസിക്കുന്ന പ്രദേശമെന്ന പ്രത്യേകത പായിപ്പാട് കവലയ്ക്കുണ്ട്. പഞ്ചായത്തിലെ വിവിധ വാര്‍ഡുകളിലായി എണ്ണായിരത്തോളം ഇതരസംസ്ഥാന തൊഴിലാളികള്‍ നൂറോളം ക്യാമ്പുകളിലായി വസിച്ച് വിവിധ സ്ഥലങ്ങളില്‍ ജോലിക്കു പോകുന്നുണ്ട്. ഒറ്റനോട്ടത്തിൽ വിസ്തീര്‍ണം: 22.88 ചതുരശ്ര മീറ്റര്‍ ജനസംഖ്യ: 26,500 വീടുകള്‍: 6,400 നിലവിൽ വാര്‍ഡുകള്‍:16 പുനര്‍വിഭജനത്തിൽ: 17 =6, 7, 8 വാര്‍ഡുകള്‍ വിഭജിച്ച് സിഎംഎസ് എല്‍പി സ്‌കൂള്‍ വാര്‍ഡ് രൂപംകൊണ്ടു. ഭരണം: എല്‍ഡിഎഫ് -7 (സിപിഎം-അഞ്ച്, കേരള കോണ്‍. എം-രണ്ട്). യുഡിഎഫ്-അഞ്ച് (കോണ്‍ഗ്രസ്-രണ്ട്, കേരള കോണ്‍.-രണ്ട്, ലീഗ്-ഒന്ന്). ബിജെപി: രണ്ട്. എസ്ഡിപിഐ: ഒന്ന്. സ്വതന്ത്രന്‍: ഒന്ന്. നേട്ടങ്ങള്‍ ലൈഫ് വീടുകള്‍-104. 152 കിടപ്പുരോഗികള്‍ക്ക് ഡോക്‌ടറും നഴ്‌സും ഉള്‍പ്പെടുന്ന പാലിയേറ്റീവ് കെയര്‍ സുസജ്ജമാക്കി. മുഖ്യമന്ത്രിയുടെ ഫണ്ടില്‍നിന്നനുവദിച്ച 65 ലക്ഷം വിനിയോഗിച്ച് മുക്കാഞ്ഞിരം, പഞ്ചായത്ത് ഓഫീസ്- വേഷ്ണാല്‍, കൊല്ലാപുരം-യുപി, പുത്ത്‍കാവ്-യുപി, റീത്തുപള്ളി-മച്ചിപ്പള്ളി റോഡുകള്‍ നന്നാക്കി. വനിതാ വികസന കോര്‍പറേഷനില്‍നിന്നും കുടുംബശ്രീകള്‍ക്ക് 3.65 കോടി വായ്പ വിതരണം ചെയ്തു. ചായ്ക്കാരന്‍, പള്ളിക്കച്ചിറ കുളങ്ങള്‍ 88 ലക്ഷം മുടക്കി നവീകരിച്ചു. ശുദ്ധജലക്ഷാമത്തിനു പരിഹാരം. 76ലക്ഷം വിനിയോഗിച്ച് പൊതുശ്മശാനം തുറന്നു. ജലക്ഷാമം രൂക്ഷമായ നക്രാല്‍, പുതുവല്‍ നിവാസികള്‍ക്കായി 23 ലക്ഷം മുടക്കി ശുദ്ധജല പദ്ധതി പൂര്‍ത്തിയാക്കി. ഏഴാംവാര്‍ഡില്‍ 22 ലക്ഷം മുടക്കി കലുങ്ക് നിര്‍മിച്ച് ഏഴു കുടുംബങ്ങളുടെ യാത്ര സുഗമമാക്കി. ആറാം വാര്‍ഡില്‍ സ്വകാര്യവ്യക്തി നല്‍കിയ മൂന്നു സെന്‍റ് സ്ഥലത്ത് അങ്കണവാടിക്കെട്ടിടം നിര്‍മിച്ചു. നാലാം വാര്‍ഡില്‍ പ്രാഥമികാരോഗ്യ കേന്ദ്രത്തോടു ചേര്‍ന്ന് വനിതാ ഫിറ്റ്‌നസ് സെന്‍റര്‍. കെ.ഡി. മോഹനന്‍ പ്രസിഡന്‍റ്, പായിപ്പാട് പഞ്ചായത്ത് കോട്ടങ്ങള്‍ ജല്‍ജീവന്‍ മിഷന്‍ പൈപ്പ് സ്ഥാപിക്കാന്‍ പഞ്ചായത്തിലെ മുഴുവന്‍ റോഡുകളും പൊളിച്ചെങ്കിലും ഭൂരിഭാഗം റോഡുകളും പൂര്‍വസ്ഥിതിയില്‍ എത്തിച്ചില്ല. വഴിവിളക്കുകള്‍ തെളിയുന്നില്ല. ഇരുവശങ്ങളിലും നെല്‍പ്പാടങ്ങളും തോടുകളും നിറഞ്ഞ പൂവം-പെരുമ്പുഴക്കടവ്, നക്രാല്‍ റോഡുകളുടെ വശങ്ങൾ ടൂറിസം പദ്ധതിക്ക് വിനിയോഗിക്കാനായില്ല. പൂവത്തെ തോടുകളിൽ പോള തിങ്ങിയതിനാല്‍ ഒഴുക്ക് തടസപ്പെട്ട് വെള്ളക്കെട്ടിനു കാരണമാകുന്നു. വേനല്‍ക്കാലത്ത് വിവിധ വാര്‍ഡുകളില്‍ ശുദ്ധജലക്ഷാമം രൂക്ഷം. ഹരിതകര്‍മസേനയുടെ പ്രവര്‍ത്തനം അടിമുടി താളംതെറ്റി. ഹരിതകര്‍മസേന ശേഖരിക്കുന്ന പ്ലാസ്റ്റിക് സംഭരിക്കുന്നതിനോ തരംതിരിക്കുന്നതിനോ സ്വന്തമായ സ്ഥലമോ പദ്ധതിയോ ഇല്ല. പ്രാഥമികാരോഗ്യ കേന്ദ്രത്തിനു സമീപത്താണ് മാലിന്യം നിക്ഷേപിക്കുന്നത്. യുഡിഎഫ് ഭരണസമിതി പ്രാഥമികാരോഗ്യ കേന്ദ്രത്തിനു സമീപം നിര്‍മിച്ച വയോജന കേന്ദ്രം ആക്രി സൂക്ഷിക്കുന്ന സ്ഥലമാക്കി. ജയിംസ് വേഷ്ണാല്‍ യുഡിഎഫ് പാര്‍ലമെന്‍ററി പാര്‍ട്ടി ലീഡര്‍, പായിപ്പാട്

തോട്ടകം വളവിൽ കുഴികൾ നികത്തി ടൈൽ പാകി

വൈക്കം: വൈക്കം -വെച്ചൂർ റോഡിൽ വൻ ഗർത്തങ്ങൾ രൂപപ്പെട്ട് വാഹനാപകടങ്ങൾ പതിവായ തോട്ടകം വളവിൽ ടൈൽപാകി കുഴികൾ അടയ്ക്കുന്ന പ്രവർത്തനങ്ങൾ പുരോഗമിക്കുന്നു. പല തവണ അറ്റകുറ്റപ്പണി നടത്തിയിട്ടും വീണ്ടും കുഴികൾ രൂപപ്പെട്ട് ഇവിടെ വെള്ളം കെട്ടിനിന്നതിനെത്തുടർന്നാണ് ടൈൽ പാകിയത്. വൈക്കം -വെച്ചൂർ റോഡിൽ കുഴികളടച്ച് ടാറിംഗ് നടത്താനായി റോഡിന്‍റെ വിവിധ ഭാഗങ്ങളിൽ നിർമാണസാമഗ്രികൾ എത്തിച്ചു കുഴിയടച്ചുതുടങ്ങി.

കെഎസ്എസ്പിയു കലാമേള ശ്രദ്ധേയമായി

തലയോലപ്പറമ്പ്: കേരള സ്റ്റേറ്റ് സർവീസ് പെൻഷനേഴ്സ് യൂണിയൻ കടുത്തുരുത്തി ബ്ലോക്ക് കലാമേള സർഗമാധുരി-2025 ശ്രദ്ധേയമായി.തലയോലപ്പറമ്പ് ഗവൺമെന്‍റ് യുപി സ്കൂൾ ഓഡിറ്റോറിയത്തിൽബ്ലോക്ക് വൈസ് പ്രസിഡന്‍റ് ഡി.എം.ദേവരാജന്‍റെ അധ്യക്ഷതയിൽ നടന്ന കലാമേള പ്രദീപ് മാളവിക ഉദ്ഘാടനം ചെയ്തു. വിവിധ വേദികളിലായി ബ്ലോക്കിലെ ഏഴ് യൂണിറ്റുകളിൽ നിന്നുള്ള കലാപ്രതിഭകൾ മാറ്റുരച്ചു. കെഎസ്എസ്പി യു ജില്ലാ വൈസ് പ്രസിഡന്‍റ് പ്രഫ.കെ.എസ്. ജയചന്ദ്രൻ നായർ മുഖ്യാതിഥിയായിരുന്നു. ടി.കെ ഗോപി, യു.ചന്ദ്രശേഖരൻ, എം.എസ്. സുകുമാരൻനായർ, സി.കെ. അന്നമ്മ, സാബു ഐസക്, എ. പത്രോസ്, കെ.സി. അജിതകുമാരി എന്നിവർ പ്രസംഗിച്ചു. വൈകുന്നേരം ചേർന്ന സമാപന സമ്മേളനം തലയോലപ്പറമ്പ് പഞ്ചായത്ത് പ്രസിഡന്‍റ് ഷിജി വിൻസന്‍റ് ഉദ്ഘാടനം ചെയ്തു.

ദൈവദാസൻ കാട്ടറാത്ത് വർക്കി അച്ചന്‍റെ 94-ാം ചരമവാർഷികാചരണം

വൈക്കം: വിൻസെൻഷ്യൻ സഭാ സ്ഥാപകനും തോട്ടകം സെന്‍റ് ഗ്രിഗോറിയോസ് പള്ളിയുടെ ആരംഭകനുമായ ദൈവദാസൻ കാട്ടറാത്ത് വർക്കി അച്ചന്‍റെ 94-ാം ചരമവാർഷികാചരണം തോട്ടകം സെൻ് ഗ്രിഗോറിയോസ് ദേവാലയത്തിൽ 22,23,24 തീയതികളിൽ നടക്കും. 22നു വൈകുന്നേരം അഞ്ചിന് ജപമാല,5.30ന് വിശുദ്ധ കുർബാന ഫാ.ഷാജി ചിലമ്പിക്കുന്നേൽ വിസി, 6.15ന് വചനശുശ്രൂഷ: ഫാ. ബിജു കൂനൻ. 23നു വൈകുന്നേരം 5.30ന് വിശുദ്ധകുർബാന: ഫാ.വർഗീസ് മേനാച്ചേരി,6.15ന് വചനശുശ്രൂഷ: ഫാ.മാത്യു ഒറ്റാലങ്കൽ വിസി. 24നു രാവിലെ ഒൻപതിന് ജപമാല, 9.45ന് വചനശുശ്രൂഷ: ഫാ. റോയി വാരകത്ത് വിസി, 10.30ന് സൗഖ്യാരാധന: ഫാ. ആന്‍റണി തച്ചേത്തുകുടി വിസി, 11.15ന് വിശുദ്ധ കുർബാന: ആർച്ച ബിഷപ് മാർ ജോസഫ് പാംപ്ലാനി. 12.45ന് കബറിടത്തിൽ പ്രാർഥന. തുടർന്ന് സ്കോളർഷിപ്പ് വിതരണം. ചരമ വാർഷികാചരണ ചടങ്ങുകൾക്ക് വിൻസെൻഷ്യൻ കോൺഗ്രിഗേഷൻ സുപ്പീരിയർ ജനറൽ ഫാ. പോൾ പുതുവ വിസി, തോട്ടകം ആശ്രമം സുപ്പീരിയർ ഫാ. ആന്‍റണി കോലഞ്ചേരി, തോട്ടകം സെന്‍റ് ഗ്രിഗോറിയോസ് പള്ളി വികാരി ഫാ.വർഗീസ് മേനാച്ചേരി വിസി എന്നിവർ നേതൃത്വം നൽകും.

റോഡുകളുടെ നിർമാണത്തിന് 80 ലക്ഷം അനുവദിച്ചു

വൈക്കം: നിയോജകമണ്ഡലത്തിലെ എട്ടു റോഡുകൾ പുനർനിർമിക്കുന്നതിനായി സംസ്ഥാന സർക്കാരിന്‍റെ ഫ്ലഡ് പദ്ധതിയിൽ ഉൾപ്പെടുത്തി 80 ലക്ഷം രൂപ അനുവദിച്ചതായി. സി.കെ.ആശ എം എൽ എ അറിയിച്ചു. തലയാഴം പഞ്ചായത്തിലെവാക്കേത്തറ - ചെട്ടിക്കരി റോഡ് 10 ലക്ഷം, തൃപ്പക്കുടം - മാടപ്പള്ളി റോഡ് 10 ലക്ഷം, ടി.വി. പുരം പഞ്ചായത്തിലെ കാവിൽമന - കുഴിപ്പറമ്പ് റോഡ് 10 ലക്ഷം, മറവൻതുരുത്തിലെ മംഗലത്ത് - ചാലുങ്കടവ് റോഡ് 10 ലക്ഷം, വൈക്കം നഗരസഭയിലെകോനാട്ട് റോഡ് 10 ലക്ഷം, ഉദയനാപുരത്തെ തുറുവേലിക്കുന്ന് - പുത്തൻപാലം റോഡ് 10 ലക്ഷം, മറവൻതുരുത്തിലെ തേവടി - കള്ള്കടവ് റോഡ് 10 ലക്ഷം, ചെമ്പ് കാട്ടിക്കുന്നു - ചാണിയിൽ റോഡ് - 10 ലക്ഷം എന്നിങ്ങനെയാണ് തുക അനുവദിച്ചത്.

വാക്കേത്തറ-കപിക്കാട് റോഡ് നിർമാണം ഉടൻ: എംഎൽഎ

കടുത്തുരുത്തി: കല്ലറ പഞ്ചായത്തിലെ വികസനസദസ് സി.കെ. ആശ എംഎല്‍എ ഉദ്ഘാടനം ചെയ്തു. കല്ലറ-തലയാഴം പഞ്ചായത്തുകളെ ബന്ധിപ്പിച്ച് കടന്നുപോകുന്ന വാക്കേത്തറ-കപിക്കാട് റോഡ് നിര്‍മാണം ഉടന്‍ ആരംഭിക്കുമെന്നും ഇതോടെ മുണ്ടാര്‍, കല്ലറ നിവാസികളുടെ യാത്രാദുരിതത്തിന് പരിഹാരമാവുമെന്നും എംഎല്‍എ പറഞ്ഞു. പഞ്ചായത്ത് പ്രസിഡന്‍റ് ജോണി തോട്ടുങ്കല്‍ അധ്യക്ഷത വഹിച്ചു. ബ്ലോക്ക് പഞ്ചായത്ത് പ്രസിഡന്‍റ് ജോണ്‍സണ്‍ കൊട്ടുകാപ്പളളി, ജില്ലാ പഞ്ചായത്തംഗം ഹൈമി ബോബി, പഞ്ചായത്ത് വൈസ് പ്രസിഡന്‍റ് അമ്പിളി മനോജ്, ബ്ലോക്ക് പഞ്ചായത്തംഗം പി.വി. സുനില്‍, പഞ്ചായത്തംഗങ്ങളായ വി.കെ. ശശികുമാര്‍, മിനി ജോസ്, ജോയി കോട്ടായില്‍, ഷൈനി ബൈജു തുടങ്ങിയവര്‍ പ്രസംഗിച്ചു.

മഴയ്ക്കൊപ്പമെത്തിയ ഇടിമിന്നലില്‍ വീട് തകർന്നു

കടുത്തുരുത്തി: മഴയ്ക്കൊപ്പമെത്തിയ ശക്തമായ ഇടിമിന്നലില്‍ വീടിന് കനത്ത നാശം. കടുത്തുരുത്തി പഞ്ചായത്തിലെ നാലാം വാര്‍ഡ് കെ.എസ്. പുരത്താണ് സംഭവം. മലയില്‍ രവീന്ദ്രന്‍റെ വീടിനാണ് ഇടിമിന്നല്‍ നാശം വിതച്ചത്. വെള്ളിയാഴ്ച രാത്രി എട്ടോടെയാണ് അപകടം. വീട്ടിലെ വയറിംഗ് പൂര്‍ണമായി കത്തി നശിച്ചു. ഇന്‍വേര്‍ട്ടര്‍, മീറ്റര്‍, മോട്ടോര്‍ എന്നിവയെല്ലാം ഇടിമിന്നലില്‍ നശിച്ചു. ജനല്‍പാളികളുടെ ചില്ലുകള്‍ പൊട്ടിത്തെറിച്ചു. വീടിന്‍റെ ഭിത്തിക്കും നാശമുണ്ടായി. ഭിത്തിയില്‍ തുള വീണ അവസ്ഥയിലാണ്. അപകടം നടക്കുമ്പോള്‍ കുടുംബാംഗങ്ങള്‍ വീട്ടിലുണ്ടായിരുന്നെങ്കിലും ആര്‍ക്കും പരിക്കേറ്റില്ല. സമീപവാസികളായ കോച്ചേരി തോമ്മാച്ചന്‍, കാപ്പില്‍ റോയിച്ചന്‍ എന്നിവരുടെ വീടിനും നാശമുണ്ടായി. വീടിനു സമീപ ത്തെ മരങ്ങള്‍ വാടിയിട്ടുണ്ട്.

ഹണി ട്രാപ്പ്: ഒരു പ്രതികൂടി അറസ്റ്റിൽ

ഗാന്ധിനഗർ: ഗാന്ധിനഗർ പോലീസ് സ്റ്റേഷൻ പരിധിയിൽ യുവാവിനെ ഹണി ട്രാപ്പിൽപ്പെടുത്തി 64 ലക്ഷം രൂപ തട്ടിയെടുത്ത കേസിലെ രണ്ടാം പ്രതിയായ അലൻ തോമസിനെ ( 27) ഗാന്ധിനഗർ പോലീസ് അറസ്റ്റ് ചെയ്തു. സ്റ്റേഷൻ എസ്എച്ച്ഒ ശ്രീജിത്ത് ടി.യുടെ നേതൃത്വത്തിലുള്ള പോലീസ് സംഘമാണ് പ്രതിയെ പിടികൂടിയത്. കോടതിയിൽ ഹാജരാക്കിയ പ്രതിയെ റിമാന്‍ഡ് ചെയ്തു. ഇതുമായി ബന്ധപ്പെട്ട് ഗാന്ധിനഗർ പോലീസ് സ്റ്റേഷനില്‍ 2025 ഏപ്രിൽ മൂന്നിനാണ് കേസ് രജിസ്റ്റര്‍ ചെയ്തത്.

വിദ്യാര്‍ഥിയെ യുവാവ് ക്രൂരമായി മര്‍ദിച്ചെന്നു പരാതി

കോട്ടയം: വിദ്യാര്‍ഥിയെ യുവാവ് ക്രൂരമായി മര്‍ദിച്ചതായി പരാതി. കൂട്ടുകാരുമൊത്ത് കളിക്കുകയായിരുന്ന പതിനാലുകാരനെയാണ് പ്രദേശവാസിയായ കൊട്ടാരത്തില്‍ ഫൈസല്‍ (38) മര്‍ദിച്ചത്. ഇന്നലെ വൈകുന്നേരം 5.30 ഓടെ കുമ്മനം അമ്പൂരത്തിനു സമീപമാണ് സംഭവം. ഫുട്ബോള്‍ കളിക്കുന്നതിനിടെ പന്ത് ഫൈസലിന്‍റെ വീടിന്‍റെ ഭാഗത്തേക്ക് വീണു. കുട്ടി പന്തെടുക്കാന്‍ പോയ വഴി ഫൈസലിന്‍റെ മകനുമായി കൂട്ടിയിടിച്ചു നിലത്തുവീണു. മകന്‍ വീഴുന്നത് കണ്ട ഫൈസൽ പന്തെടുക്കാനെത്തിയ കുട്ടിയുടെ കഴുത്തിനു കുത്തിപ്പിടിക്കുകയും തലയ്ക്കിടിക്കുകയും ചെയ്തെന്നും. കുട്ടി ഓടി രക്ഷപ്പെടാൻ ശ്രമിച്ചപ്പോൾ കരിങ്കല്ലുകൊണ്ട് എറിഞ്ഞെന്നും പരാതിയില്‍ പറയുന്നു. വിദ്യാര്‍ഥിയെ ജില്ലാ ജനറല്‍ ആശുപത്രിയില്‍ പ്രവേശിപ്പിച്ചു. കുമരകം പോലീസിലും ചൈല്‍ഡ് ലൈനിലും പരാതി നല്‍കിയിട്ടുണ്ട്.

നിർമാണം പൂർത്തിയായിട്ട് നാലു വർഷം : ആശുപത്രി കെട്ടിടം തുറക്കാതെ പഞ്ചായത്ത്

കാണക്കാരി: എംഎൽഎയുടെ ആസ്തി വികസന ഫണ്ടിൽനിന്ന് 65 ലക്ഷം രൂപ ചെലവഴിച്ച് നാലു വർഷം മുമ്പു നിർമിച്ച കെട്ടിടം കാടുപിടിച്ചു കിടക്കുന്നു. കാണക്കാരി പഞ്ചായത്ത് ഫാമിലി ഹെൽത്ത് സെന്‍ററിന്‍റെ ഒപി കെട്ടിടം തുറന്നു പ്രവർത്തിക്കാനാണ് അധികൃതർ തയ്യാറാകാത്തത്. മോൻസ് ജോസഫ് എംഎൽഎയുടെ ആസ്തി വികസന ഫണ്ടിൽ നിന്നാണ് കെട്ടിടം നിർമാണത്തിന് 65 ലക്ഷം രൂപ അനുവദിച്ചത്. മുഴുവൻ തുകയും യഥാസമയം അനുവദിച്ച് നാലുവർഷം മുമ്പ് നിർമാണം പൂർത്തിയാക്കിയെങ്കിലും കെട്ടിടത്തിൽ ഒപി വിഭാഗം പ്രവർത്തിപ്പിക്കാനുള്ള നടപടികൾക്ക് പഞ്ചായത്ത് കമ്മിറ്റി തയാറാകുന്നില്ലെന്ന് കേരള കോൺഗ്രസ് കാണക്കാരി മണ്ഡലം കമ്മിറ്റി ആരോപിച്ചു. നിർമാണം പൂർത്തീകരിച്ച ഒപി കെട്ടിടത്തിന്‍റെ പ്രവർത്തനം ഉടനാരംഭിക്കണമെന്ന് കേരള കോൺഗ്രസ് കാണക്കാരി മണ്ഡലം പ്രവർത്തകയോഗം ആവശ്യപ്പെട്ടു. നാലുവർഷം പിന്നിട്ടിട്ടും രോഗികൾക്കായി കെട്ടിടത്തിന്‍റെ സൗകര്യം പ്രയോജനപ്പെടുത്താത്ത കാണക്കാരി പഞ്ചായത്തിന്‍റെ കെടുകാര്യസ്ഥതയിൽ യോഗം പ്രതിഷേധിച്ചു. മണ്ഡലം പ്രസിഡന്‍റ് റോയി ചാണകപ്പാറ അധ്യക്ഷത വഹിച്ച യോഗം മോൻസ് ജോസഫ് എംഎൽഎ ഉദ്ഘാടനം ചെയ്തു. കേരള കോൺഗ്രസ് നേതാക്കളായ മാഞ്ഞൂർ മോഹൻകുമാർ, ഡോ. ടി.ടി. തോമസ്, അഡ്വ. ജോസഫ് മുടക്കനാട്ട്, ജോസഫ് ബോനിഫെസ്, രാജു എമ്മാനുവൽ, സണ്ണി പാലമറ്റം, ജോബിൻ വാഴപ്പള്ളി, സന്തോഷ് കുളത്തിനായിൽ, ബാബൂസ് രത്നഗിരി തുടങ്ങിയവർ പ്രസംഗിച്ചു.

മുതിർന്ന പൗരന്മാർ നേരിടുന്ന പ്രശ്നങ്ങൾ ഗുരുതരം: സത്യൻ മൊകേരി

കോട്ടയം: രാജ്യത്തും സംസ്ഥാനത്തും മുതിര്‍ന്ന പൗരന്മാര്‍ നേരിടുന്ന പ്രശ്‌നങ്ങള്‍ അതീവ ഗൗരവമേറിയതാണെന്ന് സിപിഐ സംസ്ഥാന അസിസ്റ്റന്‍റ് സെക്രട്ടറി സത്യന്‍ മൊകേരി. സീനിയര്‍ സിറ്റിസണ്‍സ് സര്‍വീസ് കൗണ്‍സില്‍ 13-ാം സംസ്ഥാന സമ്മേളനം കോട്ടയം സിഎസ്‌ഐ റിട്രീറ്റ് സെന്‍ററില്‍ ഉദ്ഘാടനം ചെയ്യുകയായിരുന്നു അദ്ദേഹം. പ്രസിഡന്‍റ് എന്‍. അനന്തകൃഷ്ണന്‍ അധ്യക്ഷത വഹിച്ചു. സി.കെ. ശശിധരന്‍, ഓള്‍ ഇന്ത്യാ സീനിയര്‍ സിറ്റിസണ്‍സ് കോണ്‍ഫെഡറേഷന്‍ മുന്‍ പ്രസിഡന്‍റ് ടി.പി.ആര്‍. ഉണ്ണി, വി.കെ. സന്തോഷ് കുമാര്‍, ഹനീഫാ റാവുത്തര്‍, സി. വാമദേവ് എന്നിവര്‍ പ്രസംഗിച്ചു. വയോജന കമ്മീഷന്‍ ചെയര്‍മാന്‍ കെ. സോമപ്രസാദ്, അംഗങ്ങളായ കെ.എന്‍.കെ. നമ്പൂതിരി, പ്രഫ. ലോപ്പസ് മാത്യു എന്നിവര്‍ക്ക് യോഗത്തില്‍ സ്വീകരണം നല്‍കി. സമ്മേളനത്തിന്‍റെ ഭാഗമായി സംഘടിപ്പിച്ച സുഹൃദ്‌സമ്മേളനം ഫ്രാന്‍സിസ് ജോര്‍ജ് എംപി ഉദ്ഘാടനം ചെയ്തു. സാംസ്‌കാരിക സമ്മേളനത്തില്‍ വി.ബി. ബിനു അധ്യക്ഷത വഹിച്ചു. ഇന്നു രാവിലെ 11ന് ""വയോജനങ്ങളുടെ അവകാശങ്ങള്‍ സമൂഹവും സര്‍ക്കാരും’’എന്ന വിഷയത്തില്‍ നടക്കുന്ന സെമിനാറില്‍ കെ.എല്‍. സുധാകരന്‍ അധ്യക്ഷത വഹിക്കും. മന്ത്രി വി.എന്‍. വാസവന്‍ ഉദ്ഘാടനം ചെയ്യും.

കെഎസ്ആര്‍ടിസി ബസില്‍ സ്വകാര്യബസിടിച്ചു

കോട്ടയം: കോട്ടയം നഗരത്തില്‍ ഭാരവാഹനങ്ങള്‍ക്ക് യാത്രാ നിരോധനമുള്ള വണ്‍വേ റോഡിലേക്കു തിരിഞ്ഞ കെഎസ്ആര്‍ടിസി ബസില്‍ സ്വകാര്യബസിടിച്ചു. ഇന്നലെ രാവിലെ 7.45നു കോട്ടയം കെഎസ്ആര്‍ടിസി ബസ് സ്റ്റാന്‍ഡിനു സമീപം ടിബി റോഡില്‍ കല്യാണ്‍ സില്‍ക്‌സിന് എതിര്‍വശത്തുനിന്നു സ്റ്റാര്‍ ജംഗ്ഷനിലേക്കുള്ള വണ്‍വേ റോഡിലാണ് അപകടമുണ്ടായത്. കോഴിക്കോട്ടേക്കു പോയ കെഎസ്ആര്‍ടിസി സൂപ്പര്‍ഫാസ്റ്റും ചങ്ങനാശേരിയിലേക്കു പോയ സ്വകാര്യബസുമാണ് അപകടത്തില്‍പ്പെട്ടത്. ബസുകള്‍ക്കും ഭാരവാഹനങ്ങള്‍ക്കും യാത്രാ നിരോധനമുള്ള റോഡിലേക്കു സ്റ്റാന്‍ഡില്‍നിന്ന് ഇറങ്ങിവന്ന കെഎസ്ആര്‍ടിസി ബസ് തിരിഞ്ഞപ്പോള്‍ പിന്നാലെ എത്തിയ സ്വകാര്യബസിടിക്കുകയായിരുന്നു. നിയന്ത്രണംവിട്ട ബസ് നടപ്പാതയിലേക്ക് ഇടിച്ചുകയറി. ഇരുബസുകളിലും യാത്രക്കാരുണ്ടായിരുന്നെങ്കിലും ആര്‍ക്കും പരിക്കില്ല.

അവകാശ സംരക്ഷണ യാത്രയ്ക്ക് കോട്ടയത്ത് സ്വീകരണം

കോട്ടയം: “നീതി ഔദാര്യമല്ല, അവകാശമാണ്’’ എന്ന മുദ്രാവാക്യവുമായി കത്തോലിക്ക കോണ്‍ഗ്രസ് കാസര്‍കോഡ് നിന്നും തിരുവനന്തപുരത്തേക്ക് നടത്തുന്ന അവകാശ സംരക്ഷണയാത്രയ്ക്കു 22നു രാവിലെ 10.30 ന് കോട്ടയത്ത് എത്തുമ്പോള്‍ ക്‌നാനായ കത്തോലിക്കാ കോണ്‍ഗ്രസ് കോട്ടയം അതിരൂപതാ സമിതിയുടെയും ചങ്ങനാശേരി അതിരൂപത കോട്ടയം, കുടമാളൂര്‍ ഫൊറോനാ സമിതികളുടെയും നേതൃത്വത്തില്‍ സ്വീകരണം നല്‍കും. ഏറ്റുമാനൂരിൽ‍നിന്നു ബേക്കര്‍ ജംഗ്ഷന്‍വഴി ഗാന്ധി പ്രതിമയ്ക്കു സമീപം എത്തുമ്പോള്‍ യാത്രയെ സ്വീകരിച്ചാനയിച്ച് സമ്മേളനവേദിയായ തിരുനക്കര പ്രൈവറ്റ് ബസ് സ്റ്റാൻഡ് മൈതാനത്ത് എത്തിക്കും. സ്വീകരണ സമ്മേളനം കോട്ടയം അതിരൂപത സഹായമെത്രാന്‍ മാര്‍ ജോസഫ് പണ്ടാരശേരി ഉദ്ഘാടനം ചെയ്യും. സ്വീകരണ സമ്മേളനത്തിന്‍റെ സ്വാഗതസംഘം രൂപീകരണ യോഗത്തില്‍ ചങ്ങനാശേരി അതിരൂപത പ്രസിഡന്‍റ് ബിജു സെബാസ്റ്റ്യന്‍ അധ്യക്ഷത വഹിച്ചു. കോട്ടയം അതിരൂപത പ്രസിഡന്‍റ് പി.എ. ബാബു ഉദ്ഘാടനം ചെയ്തു. ബേബി മുളവേലിപ്പുറം, ബിനു ചെങ്ങളം, കുഞ്ഞ് കളപ്പുര, സെബാസ്റ്റ്യന്‍ പുല്ലാട്ടുകാലാ, തോമസ് പീടിയേക്കല്‍, ബിനോയി ഇടയാടി, ഷെയിന്‍ ജോസഫ്, സാലിച്ചന്‍ തുമ്പേക്കളം, പി.ജെ. ജോസ്, തോമസ് മാത്യു തുടങ്ങിയവര്‍ പ്രസംഗിച്ചു. സ്വാഗതസംഘം ജനറല്‍ കോ-ഓര്‍ഡിനേറ്ററായി തോമസ് പീടിയേക്കല്‍, ജോയിന്‍റ് കണ്‍വീനര്‍മാരായി ഷെയിന്‍ ജോസഫ്, ബിനു ചെങ്ങളം, ബിനോയ് ഇടയാടി, കുഞ്ഞ് കളപ്പുര എന്നിവരെ തെരഞ്ഞെടുത്തു.

വിളക്കിത്തലനായർ സംസ്ഥാന സമ്മേളനം പാലായിൽ

പാലാ: വിളക്കിത്തലനായര്‍ സമാജം 21-ാം സംസ്ഥാന വാര്‍ഷിക സമ്മേളനം നാളെയും 21നും പാലാ മുനിസിപ്പല്‍ ടൗണ്‍ ഹാളില്‍ നടക്കും. നാളെ ഉച്ചകഴിഞ്ഞ് രണ്ടിന് കടപ്പാട്ടൂര്‍ ക്ഷേത്രപരിസരത്തുനിന്ന് ആരംഭിക്കുന്ന റാലി ടൗണ്‍ ചുറ്റി മുനിസിപ്പല്‍ ടൗണ്‍ ഹാളില്‍ സമാപിക്കും. തുടര്‍ന്നു നടക്കുന്ന പൊതുസമ്മേളനം കേന്ദ്ര സഹമന്ത്രി ജോര്‍ജ് കുര്യന്‍ ഉദ്ഘാടനം ചെയ്യും. സമാജം പ്രസിഡന്‍റ് കെ.ആര്‍. സുരേന്ദ്രന്‍ അധ്യക്ഷത വഹിക്കും. മന്ത്രി വി.എന്‍. വാസവന്‍, എംപിമാരായ ഫ്രാന്‍സിസ് ജോര്‍ജ്, ജോസ് കെ. മാണി, എംഎല്‍എമാരായ തിരുവഞ്ചൂര്‍ രാധാകൃഷ്ണന്‍, മാത്യു ടി. തോമസ്, മാണി സി. കാപ്പന്‍, മുനിസിപ്പല്‍ ചെയര്‍മാന്‍ തോമസ് പീറ്റര്‍, സമാജം രക്ഷാധികാരി കെ.എസ്. രമേഷ് ബാബു, വി.ജി. മണിലാല്‍, കെ.കെ. അനില്‍കുമാര്‍, പി.കെ. രാധാകൃഷണന്‍, എം.എന്‍. മോഹനന്‍ എന്നിവര്‍ പ്രസംഗിക്കും. 21നു രാവിലെ ഒമ്പതിന് പ്രതിനിധി സമ്മേളനത്തിനു തുടക്കംകുറിച്ചു സമാജം പ്രസിഡന്‍റ് കെ.ആര്‍. സുരേന്ദ്രന്‍ പതാക ഉയര്‍ത്തും. പത്തിന് മന്ത്രി റോഷി അഗസ്റ്റിന്‍ പ്രതിനിധി സമ്മേളനം ഉദ്ഘാടനം ചെയ്യും. സി.കെ. ആശ എംഎല്‍എ, സെക്രട്ടറി ബാബു കുഴിക്കാല, ജനറല്‍ സെക്രട്ടറി പി.കെ. രാധാകൃഷ്ണന്‍, കെ.കെ. അനില്‍കുമാര്‍, കെഎസ്. രമേഷ് ബാബു, പി.കെ. സുരേന്ദ്രന്‍ എന്നിവര്‍ പ്രസംഗിക്കും. സമാജം ഭാരവാഹികളായ കെ.എസ്, രമേഷ്ബാബു, കെ.ആര്‍. സുരേന്ദ്രന്‍, പി.കെ. രാധാകൃഷ്ണന്‍, കെ.കെ. അനില്‍കുമാര്‍, എം.എന്‍. മോഹനന്‍, ടി.എം.ബാബു. കെ.എ. ചന്ദ്രന്‍ എന്നിവര്‍ പത്രസമ്മേളനത്തില്‍ പങ്കെടുത്തു.

ശനിയാഴ്ച മാന്താടി ഉണർന്നത് ഞെട്ടലോടെ

കിടങ്ങൂര്‍: കിടങ്ങൂര്‍ മാന്താടി ഗ്രാമം ഇന്നലെ ഉണര്‍ന്നത് കൊലപാതക കഥ കേട്ടാണ്. കിടപ്പുരോഗിയായ കിടങ്ങൂര്‍ സൗത്ത് മാന്താടി ഏലക്കോട് രമണിയുടെ (70) കൊലപാതകമാണ് നാടിനെ ഞെട്ടിച്ചത്. ശനിയാഴ്ച പുലര്‍ച്ചെ ഒന്നരയോടെയാണ് സംഭവം. ഏറെക്കാലമായി കിടപ്പുരോഗിയായിരുന്ന ഭാര്യയുടെ രോഗാവസ്ഥയില്‍ മനംനൊന്താണ് കൊലപാതകം നടത്തിയതെന്ന് ഭര്‍ത്താവ് സോമന്‍ (74) പോലീസിനോടു പറഞ്ഞു. മാനസിക വെല്ലുവിളി നേരിട്ടിരുന്ന ഇളയമകന്‍ ശ്രീകുമാറിനെ കൊലപ്പെടുത്താനും സോമൻ ശ്രമം നടത്തി. ഇരുവരെയും കൊലപ്പെടുത്തി ജീവനൊടുക്കാനായിരുന്നു സോമന്‍റെ പദ്ധതി. ഭിന്നശേഷിക്കാരനായ മകനെ മറ്റാരും നോക്കില്ലെന്നു കരുതിയാണ് കൊലപ്പെടുത്താന്‍ ശ്രമിച്ചതെന്നു സോമന്‍ പറഞ്ഞു. എന്നാല്‍ ശ്രീകുമാര്‍ ബഹളം വച്ചതോടെ മൂത്തമകന്‍ സുനീത് ഉണർന്ന് പിതാവിന്‍റെ കൈ തട്ടിമാറ്റി അനുജനെ രക്ഷപ്പെടുത്തി. തുടര്‍ന്ന് കൊലപാതകവിവരം നാട്ടുകാരെയും ബന്ധപ്പെട്ടവരെയും അറിയിച്ചു. ഭാര്യയുടെ രോഗാവസ്ഥ സോമനിൽ കടുത്ത മാനസിക സമ്മര്‍ദം ഉണ്ടാക്കിയിരുന്നു. വെള്ളിയാഴ്ച നാട്ടുകാരോടു സംസാരിച്ചത് ഭാര്യയുടെ വിഷമതകളെക്കുറിച്ചാണ്. രമണിയുടെ വേദന കണ്ണുനിറയ്ക്കുന്നതായും അയല്‍ക്കാരനോട് പറഞ്ഞിരുന്നു. മേസ്തിരി പണിക്കാരനായ സോമന് ഏറെ നാളായി ജോലിക്കു പോകാനും കഴിഞ്ഞിരുന്നില്ല. ഇളയ മകനെയും ഭാര്യയെയും ശുശ്രൂഷിച്ചിരുന്നതും ഭക്ഷണം പാകം ചെയ്തിരുന്നതും സോമനായിരുന്നു. സംഭവമറിഞ്ഞ് തടിച്ചുകൂടിയ നാട്ടുകാര്‍ക്കും പോലീസിനും മുന്നില്‍ നിസംഗനായി ഇരിക്കുകയായിരുന്നു സോമന്‍.

ഹൈക്കോടതി നിർദേശം ലംഘിച്ചു : അതിരമ്പുഴ പഞ്ചാ. പ്രസിഡന്‍റിനും അംഗങ്ങൾക്കും പിഴ

അതിരമ്പുഴ: റോഡ് നിർമാണം സംബന്ധിച്ച ഹൈക്കോടതി നിർദേശം ലംഘിച്ച അതിരമ്പുഴ പഞ്ചായത്ത് പ്രസിഡന്‍റിനും അംഗങ്ങൾക്കും പിഴശിക്ഷ വിധിച്ച് ഹൈക്കോടതി. ഏഴാം വാർഡിൽ തർക്കത്തിലുള്ള റോഡിൽ ചെറിയ അറ്റകുറ്റപ്പണികൾ മാത്രം നടത്താനുള്ള അനുമതി ലംഘിച്ച് റോഡ് ടാർ ചെയ്തതിനാണ് ജസ്റ്റീസ് എസ്. ഈശ്വരൻ പിഴശിക്ഷ വിധിച്ചത്. പഞ്ചായത്ത് പ്രസിഡന്‍റ് ജോസ് അമ്പലക്കുളവും ഏഴാം വാർഡ് അംഗം ബേബിനാസ് അജാസും 25,000 രൂപ വീതവും മറ്റ് 20 അംഗങ്ങൾ 3,500 രൂപ വീതവുമാണ് പിഴ അടയ്ക്കേണ്ടത്. പിഴത്തുക ഒരാഴ്ചയ്ക്കുള്ളിൽ ലീഗൽ സർവീസസ് അഥോറിറ്റിയിൽ അടയ്ക്കണം. പഞ്ചായത്ത് സെക്രട്ടറി പുതിയ ആളായതിനാൽ ശിക്ഷയിൽനിന്ന് ഒഴിവാക്കി. ഏഴാം വാർഡിലുള്ള വഴിയുടെ ഉടമസ്ഥതയും ഉപയോഗാവകാശവും സംബന്ധിച്ച തർക്കത്തിൽ ജില്ലാക്കോടതി വിധിക്കുമേൽ അതിരമ്പുഴ പൈനേൽ ബിജോമോൻ തോമസ് അപ്പീലുമായി ഹൈക്കോടതിയെ സമീപിക്കുകയായിരുന്നു. തത്‌സ്ഥിതി തുടരാൻ ഹൈക്കോടതി നിർദേശിച്ചു. പിന്നീട് റോഡ് തകർന്നു കിടക്കുകയാണെന്നും തറയോടു പാകി നവീകരിക്കാൻ അനുവദിക്കണമെന്നും ആവശ്യപ്പെട്ട് പഞ്ചായത്ത് അപേക്ഷ സമർപ്പിച്ചു. തറയോടു പാകരുതെന്ന് നിർദേശിച്ച ഹൈക്കോടതി റോഡിന്‍റെ സ്വഭാവം മാറ്റാത്ത തരത്തിലുള്ള അറ്റകുറ്റപ്പണിക്ക് അനുമതി നൽകി. എന്നാൽ, പഞ്ചായത്ത് എട്ടു ലക്ഷത്തോളം രൂപ ചെലവഴിച്ച് റോഡ് പൂർണമായി ടാർ ചെയ്തു. ഇതിനെതിരേ ബിജോമോൻ ഹൈക്കോടതിയെ സമീപിച്ചു. നിയമലംഘനം നടന്നോയെന്ന് അറിയുന്നതിന് ഹൈക്കോടതി കമ്മീഷണറെ നിയോഗിച്ചു. റോഡ് പൂർണമായി ടാർ ചെയ്തെന്ന് കമ്മീഷണർ റിപ്പോർട്ട് നൽകിയതോടെയാണ് കോടതിയെ അനുസരിക്കാതിരുന്നതിന് പഞ്ചായത്ത് പ്രസിഡന്‍റിനും അംഗങ്ങൾക്കും പിഴ ചുമത്തിയത്. കേസിൽ അന്തിമവിധി പരാതിക്കാരന് അനുകൂലമാകുകയാണെങ്കിൽ റോഡ് ടാർ ചെയ്യുന്നതിന് പഞ്ചായത്ത് ഫണ്ടിൽനിന്ന് ചെലവഴിച്ച തുക പഞ്ചായത്ത് അംഗങ്ങളിൽനിന്ന് തുല്യമായി സർക്കാരിന് തിരിച്ചുപിടിക്കാമെന്നും ഹൈക്കോടതിയുടെ ഉത്തരവിൽ പറയുന്നുണ്ട്. കേസ് വീണ്ടും 24ന് പരിഗണിക്കും.

കിടപ്പുരോഗിയായ വീട്ടമ്മ കൊല്ലപ്പെട്ടു; ഭര്‍ത്താവ് പിടിയില്‍

പാലാ: കിടങ്ങൂരില്‍ കിടപ്പുരോഗിയായ വീട്ടമ്മയെ കൊലപ്പെടുത്തിയ നിലയില്‍ കണ്ടെത്തി. സംഭവവുമായി ബന്ധപ്പെട്ട് ഭര്‍ത്താവ് പോലീസ് പിടിയില്‍. കിടങ്ങൂര്‍ സൗത്ത് മാന്താടി കവലയ്ക്കു സമീപം ഏലക്കോടത്ത് വീട്ടില്‍ രമണി (70)യാണ് കൊല്ലപ്പെട്ടത്. സംഭവത്തില്‍ ഭര്‍ത്താവ് സോമനെ (74) കിടങ്ങൂര്‍ പോലീസ് അറസ്റ്റ് ചെയ്തു. ഭാര്യ രമണി ഏറെക്കാലമായി കിടപ്പിലായിരുന്നതും അടുത്തിടെ അവര്‍ക്കു ശാരീരിക അസ്വസ്ഥതകള്‍ വര്‍ധിച്ചതിലുമുള്ള മാനസിക വിഷമത്തിലാണ് കൊലപാതകം നടത്തിയതെന്നാണ് പോലീസിന്‍റെ പ്രാഥമിക നിഗമനം. മാനസിക-ശാരീരിക വെല്ലുവിളി നേരിടുന്ന ഇളയ മകന്‍ ശ്രീകുമാറിനെയും കൊലപ്പെടുത്തി ജീവനൊടുക്കാനായിരുന്നു പദ്ധതി യെന്ന് സോമന്‍ പോലീസിനോടു പറഞ്ഞു. ഇന്നലെ പുലര്‍ച്ചെ ഒന്നരയോടെയാണ് സംഭവങ്ങള്‍ക്കു തുടക്കം. പക്ഷാഘാതം വന്നു മൂന്നു വര്‍ഷത്തോളമായി രമണി കിടപ്പിലായിരുന്നു. എട്ടു മാസം മുമ്പ് ഇടുപ്പെല്ലിനും കാര്യമായ അസുഖങ്ങള്‍ ബാധിച്ചു. ഇതോടെ പിടിച്ചു നടക്കാന്‍ പോലും കഴിയാത്ത അവസ്ഥയായി. മേസ്തിരി പണിക്കാരനായ സോമനായിരുന്നു രമണിയെയും ഇളയ മകനെയും പരിചരിച്ചിരുന്നത്. നാള്‍ക്കുനാള്‍ രമണിയുടെ രോഗാവസ്ഥ മോശമായത് സോമനെ മാനസികമായി തളര്‍ത്തിയിരുന്നു. ഇതോടെയാണ് സോമന്‍ ഭാര്യയും മകനെയും കൊലപ്പെടുത്തി ജീവനൊടുക്കുവാന്‍ തീരുമാനിച്ചതെന്നു പോലീസ് പറയുന്നു.പുലര്‍ച്ചെ തോര്‍ത്ത് ഉപയോഗിച്ചു കഴുത്തു മുറുക്കി രമണിയെ കൊലപ്പെടുത്തി. വീടിന്‍റെ ഹാളില്‍ കിടന്നുറങ്ങിയായിരുന്ന ശ്രീകുമാറിനെ കൊലപ്പെടുത്താന്‍ ശ്രമിക്കുന്നതിനിടെ ഇയാള്‍ കൈ തട്ടിമാറ്റി ബഹളം കൂട്ടി. ഈ സമയം മറ്റൊരു മുറിയില്‍ കിടന്നുറങ്ങുകയായിരുന്ന മൂത്തമകന്‍ സുനീത് ബഹളം കേട്ട് എത്തുകയും പിതാവിന്‍റെ കൈ പിടിച്ചുമാറ്റി സഹോദരനെ രക്ഷിക്കുകയും ചെയ്തു. തുടര്‍ന്നു കൊലപാതക വിവരം പഞ്ചായത്ത് മെംബറെയും സമീപവാസികളെയും വിളിച്ചറിയിച്ചു. കിടങ്ങൂര്‍ പോലീസ് സ്ഥലത്തെത്തി നടപടി സ്വീകരിച്ചു. കൊലപാതകത്തിനു ശേഷം നിര്‍വികാരനായി വീട്ടില്‍ തന്നെയിരിക്കുകയായിരുന്നു സോമന്‍. രമണിയുടെ മൃതദേഹം കോട്ടയം മെഡിക്കല്‍ കോളജിലെ പോസ്റ്റുമോര്‍ട്ടത്തിനു ശേഷം ഇന്നലെ രാത്രി വീട്ടുവളപ്പില്‍ സംസ്‌കരിച്ചു. കോടതിയില്‍ ഹാജരാക്കിയ സോമനെ റിമാന്‍ഡ് ചെയ്തു. കിടങ്ങൂര്‍ എസ്എച്ച്ഒ കെ.എന്‍. മഹേഷിന്‍റെ നേതൃത്വത്തിലാണ് അന്വേഷണം. എസ്‌ഐ രാംദാസ്, എഎസ്‌ഐ മാരായ അരുണ്‍കുമാര്‍, സതീഷ് കുമാര്‍, സുരേഷ് ബാബു എന്നിവരും അന്വേഷണ സംഘത്തിലുണ്ട്.

മുക്കൂട്ടുതറ: കാർ നിയന്ത്രണംവിട്ട് കലുങ്ക് പാലത്തിന്‍റെ സമീപത്തുനിന്നു തോട്ടിൽ 20 അടിയോളം താഴ്ചയിൽ തലകീഴായി മറിഞ്ഞ് അപകടം

മുക്കൂട്ടുതറ: കാർ നിയന്ത്രണംവിട്ട് കലുങ്ക് പാലത്തിന്‍റെ സമീപത്തുനിന്നു തോട്ടിൽ 20 അടിയോളം താഴ്ചയിൽ തലകീഴായി മറിഞ്ഞ് അപകടം. കാറിലുണ്ടായിരുന്നയാളെ ചില്ല് പൊട്ടിച്ച് പുറത്തെടുത്തു. സാരമായി പരിക്കേറ്റ ഉമ്മിക്കുപ്പ കണ്ടത്തിൽ ജോമോൻ (48) ആശുപത്രിയിൽ ചികിത്സയിലാണ്. വെള്ളിയാഴ്ച രാത്രി ഒമ്പതോടെയാണ് അപകടം. ഇടകടത്തിയിൽനിന്ന് അറയാഞ്ഞിലിമണ്ണ് പാലത്തിലേക്കുള്ള റോഡിൽ എരുമേലി പഞ്ചായത്തിന്‍റെ അതിർത്തി അവസാനിക്കുന്ന ചെറിയ കലുങ്ക് പാലത്തിലാണ് അപകടം. പമ്പയാറിലേക്ക് ഒഴുകുന്ന കൈത്തോടിന് കുറുകെ വീതി കുറഞ്ഞ ഇടുങ്ങിയ പാലത്തിലേക്ക് കാർ എത്തിയപ്പോൾ നിയന്ത്രണംതെറ്റുകയായിരുന്നു. പാലത്തിലൂടെ എതിരേ വന്ന കാർ കടന്നുപോയ ശേഷം പാലത്തിലേക്ക് എത്തുമ്പോഴാണ് പാലത്തിലേക്ക് കയറാതെ വാഹനം തോട്ടിലേക്ക് പതിച്ചത്. സമീപത്തെ കടയിലുണ്ടായിരുന്നവരാണ് തോട്ടിൽ ഇറങ്ങി കാറിന്‍റെ ചില്ല് പൊട്ടിച്ച് ജോമോനെ പുറത്തെടുത്തത്. മുക്കൂട്ടുതറ അസീസി ആശുപത്രിയിൽ പ്രാഥമിക ചികിത്സയ്ക്ക് ശേഷം ജോമോനെ കാഞ്ഞിരപ്പള്ളി ജനറൽ ആശുപത്രിയിൽ പ്രവേശിപ്പിച്ചു. വീതി ഇല്ലാത്തത് അപകടകരം വീതി കുറഞ്ഞ കലുങ്ക് പാലം ഇനിയും അപകടങ്ങൾ സൃഷ്ടിക്കുമെന്ന് ആശങ്ക. കഷ്ടിച്ച് ഒരു വാഹനത്തിന് പോകാവുന്ന വീതിയാണ് പാലത്തിനുള്ളത്. വാഹനം കടന്നുപോകുമ്പോൾ കാൽനട യാത്രികർക്ക് പോലും സഞ്ചരിക്കാൻ സ്ഥലമില്ല. കനം കുറഞ്ഞ പൈപ്പുകളാണ് കൈവരിയായി ഉള്ളത്. പമ്പാനദി കരകവിയുമ്പോഴും അറയാഞ്ഞിലിമണ്ണ് കോസ്‌വേ പാലം മുങ്ങുമ്പോഴും കലുങ്ക് പാലവും അടിയിലുള്ള തോടും വെള്ളത്തിൽ മുങ്ങും.

ടാന്‍സാനിയന്‍ ബിഷപ്സ് കൗണ്‍സില്‍ പ്രതിനിധികള്‍ കോട്ടയത്ത്

കോട്ടയം: ടാന്‍സാനിയന്‍ ബിഷപ്സ് കൗണ്‍സില്‍ പ്രതിനിധികള്‍ കോട്ടയം അതിരൂപത ആസ്ഥാനവും കാരിത്താസ് ആശുപത്രിയും കഴിഞ്ഞ ദിവസം സന്ദര്‍ശിച്ചു. രണ്ട് രാജ്യങ്ങളിലെയും ജനങ്ങള്‍ക്ക് പ്രയോജനപ്പെടും വിധം ആരോഗ്യമേഖലയില്‍ വരുത്താന്‍ കഴിയുന്ന കാര്യങ്ങള്‍ ചര്‍ച്ച ചെയ്യപ്പെട്ടു. ടാന്‍സാനിയന്‍ ബിഷപ്സ് കൗണ്‍സില്‍നിന്നുള്ള എട്ട് പ്രതിനിധികളാണ് സന്ദര്‍ശനത്തിനെത്തിയത്. റവ. ഡോ. പോള്‍ സ്റ്റീവ് ചോബോ, സിസ്റ്റര്‍ അലീസിയ സൈമണ്‍ മസെംഗ, പ്രഫ. ഇറാസ്മസ് കസൗറ കമുഗിഷ, പ്രഫ. സ്റ്റീഫന്‍ എലിയതോഷ മഷാന, സിസ്റ്റര്‍ മേരി ജെസ്‌ക ക്രിസ്റ്റഫര്‍ എംബോയേര്‍വ, ഡോ. വിഹാര്‍ രാജേന്ദ്രകുമാര്‍ കൊടേച്ച, ഡോ. സാംവെല്‍ മുതലേംവ ബയബറ്റോ, ഡോ. ആന്‍ഡ്രൂ ഇമ്മാനുവല്‍ എന്‍കിലിജിവ എന്നിവരുടെ സംഘമാണ് ചര്‍ച്ചകള്‍ക്കായി എത്തിയത്. കോട്ടയം അതിരൂപതാ സഹായമെത്രാന്‍മാര്‍ മാര്‍ ജോസഫ് പണ്ടാരശേരില്‍, ഗീവര്‍ഗീസ് മാര്‍ അപ്രേം എന്നിവരുടെ നേതൃത്വത്തില്‍ പ്രതിനിധിസംഘത്തെ സ്വീകരിച്ചു. കാരിത്താസ് ഹോസ്പിറ്റല്‍ ഡയറക്ടര്‍ റവ. ഡോ. ബിനു കുന്നത്ത്, കോട്ടയം അതിരൂപത വികാരി ജനറല്‍ ഫാ തോമസ് ആനിമൂട്ടില്‍ കാരിത്താസ് ഹോസ്പിറ്റല്‍ ജോയിന്‍റ് ഡയറക്ടര്‍ ഫാ. ജിസ്‌മോന്‍ മഠത്തില്‍ എന്നിവര്‍ സന്നിഹിതരായിരുന്നു.

വെര്‍ച്വല്‍ അറസ്റ്റിലൂടെ 25 ലക്ഷം തട്ടാനുള്ള ശ്രമം പൊളിച്ച് പോലീസ്

കോട്ടയം: വെര്‍ച്വല്‍ അറസ്റ്റിലൂടെ 25 ലക്ഷം തട്ടാനുള്ള ശ്രമം പൊളിച്ച് ജില്ലാ സൈബര്‍ പോലീസ്. മാങ്ങാനം സ്വദേശിനിയുടെ 25 ലക്ഷം രൂപ തട്ടിയെടുക്കാനുള്ള സൈബര്‍ തട്ടിപ്പുകാരുടെ ശ്രമമാണ് ജില്ലാ പോലീസ് ചീഫിന്‍റെയും സൈബര്‍ പോലീസ് സ്റ്റേഷന്‍ ഹൗസ് ഓഫീസറുടെയും ബാങ്കിന്‍റെയും സമയോചിതമായ ഇടപെടലിലൂടെ തടയാന്‍ സാധിച്ചത്. 75 വയസുള്ള വയോധികയുടെ ഫോണിലേക്ക് ഇക്കഴിഞ്ഞ 15 മുതല്‍ 18 വരെയുള്ള ദിവസങ്ങളിലാണ് വെര്‍ച്വല്‍ അറസ്റ്റിലാണെന്ന് സന്ദേശമെത്തിയത്. ഇവരുടെ ബാങ്ക് അക്കൗണ്ട് വഴി ലഭിക്കുന്ന പണം രാജ്യവിരുദ്ധ ഇടപാടുകള്‍ക്ക് ഉപയോഗിക്കുകയാണെന്നും മുംബൈയിലെ കൊളാബ പോലീസ് സ്റ്റേഷനിലെ ഓഫീസര്‍മാരാണെന്ന പേരിലാണ് സന്ദേശമെത്തിയത്. വാട്സാപ്പിലൂടെയാണ് തട്ടിപ്പുസംഘം ഇവരെ വെര്‍ച്വല്‍ അറസ്റ്റ് ചെയ്‌തെന്ന് പറഞ്ഞ് കബളിപ്പിച്ചത്. തുടര്‍ന്ന് എത്രയും വേഗം കൊളാബ പോലീസ് സ്റ്റേഷനില്‍ എത്താത്തപക്ഷം അറസ്റ്റ് ചെയ്ത് കൊണ്ടുപോകുമെന്നും സംഘം പറഞ്ഞു. അറസ്റ്റ് ചെയ്യാതിരിക്കണമെങ്കില്‍ 25 ലക്ഷം രൂപ കെട്ടിവയ് ക്കണമെന്നും കേസ് കഴിയുമ്പോള്‍ ഈ തുക തിരികെ ലഭിക്കുമെന്നും സന്ദേശത്തില്‍ വ്യക്തമാക്കി. തുടര്‍ന്ന് വയോധിക 1.75 ലക്ഷം രൂപ ഓണ്‍ലൈനായി കൈമാറി. ബാക്കി തുക അയച്ചു നല്‍കുന്നതിന് കഞ്ഞിക്കുഴി സൗത്ത് ഇന്ത്യന്‍ ബാങ്കില്‍ എത്തിയപ്പോള്‍ ബാങ്ക് മാനേജര്‍ക്ക് തോന്നിയ സംശയമാണ് കേസില്‍ വഴിത്തിരിവായത്. ഉടന്‍തന്നെ മാനേജര്‍ കോട്ടയം സൈബര്‍ പോലീസില്‍ വിളിച്ചറിയിക്കുകയും ജില്ലാ പോലീസ് ചീഫ് ഷാഹുല്‍ ഹമീദിന്‍റെ നിര്‍ദേശപ്രകാരം സൈബര്‍ പോലീസ് സംഘം ബാങ്കിലെത്തി വയോധികയെസ്റ്റേഷനിലെത്തിച്ച് കാര്യങ്ങള്‍ പറഞ്ഞ് മനസിലാക്കി കൂടുതല്‍ തുക കൈമാറാനുള്ളശ്രമത്തില്‍നിന്നു രക്ഷപ്പെടുത്തുകയായിരുന്നു. നഷ്ടമായ 1.75 ലക്ഷം രൂപ തിരികെ ലഭിക്കുന്നതിനായി പരാതി നല്‍കിയിട്ടുണ്ട്. തട്ടിപ്പിന് ഇരയായാൽ വെര്‍ച്വല്‍ അറസ്റ്റ് പോലുള്ള സാമ്പത്തിക തട്ടിപ്പുകള്‍ക്ക് ഇരയായാല്‍ ഉടന്‍തന്നെ 1930 എന്ന ടോള്‍ ഫ്രീ നമ്പരിലോ നാഷണല്‍ സൈബര്‍ ക്രൈം റിപ്പോര്‍ട്ടിംഗ് പോര്‍ട്ടലില്‍ നേരിട്ടോ പരാതി രജിസ്റ്റര്‍ ചെയ്യണമെന്ന് ജില്ലാ പോലീസ് ചീഫ് അറിയിച്ചു. ഒരു ഇടവേളയ്ക്ക് ശേഷം ഇത്തരം തട്ടിപ്പുകള്‍ സജീവമാകുകയാണെന്നും പൊതുജനങ്ങള്‍ ജാഗ്രത പുലര്‍ത്തണമെന്നും ജില്ലാ പോലീസ് ചീഫ് ഷാഹുല്‍ ഹമീദ് വ്യക്തമാക്കി.

തദ്ദേശം: സംവരണ നറുക്കെടുപ്പ് 21നു പൂര്‍ത്തിയാകും

കോട്ടയം: ജില്ലയിലെ തദ്ദേശസ്ഥാപനങ്ങളില്‍ ഗ്രാമ, ബ്ലോക്ക് പഞ്ചായത്തുകളിലെയും നഗരസഭകളിലെയും സംവരണ സീറ്റുകള്‍ നിശ്ചയിക്കാനുള്ള നറുക്കെടുപ്പ് പൂര്‍ത്തിയായി. 21ന് ജില്ലാ പഞ്ചായത്തിലെ സംവരണസീറ്റുകള്‍ നറുക്കിടും. പുതുതായി തലനാട് വാര്‍ഡുകൂടി വന്നതോടെ ജില്ലാ പഞ്ചായത്തില്‍ 23 ഡിവിഷനുകളുണ്ട്. തദ്ദേശ തെരഞ്ഞെടുപ്പിനു മുന്നോടിയായി വോട്ടര്‍പട്ടികയില്‍ പേരു ചേര്‍ക്കാനുള്ള അപേക്ഷ സ്വീകരിക്കല്‍ പൂര്‍ത്തിയായി. കഴിഞ്ഞമാസം പുതുക്കിയ വോട്ടര്‍പട്ടിക പ്രസിദ്ധീകരിച്ചിരുന്നു. അതിനു ശേഷവും പേരു ചേര്‍ക്കാന്‍ കഴിയാതിരുന്നവര്‍ക്കുവേണ്ടിയാണ് വീണ്ടും അപേക്ഷ സ്വീകരിച്ചത്. പഞ്ചായത്തുകളില്‍ 1,200 വോട്ടര്‍മാര്‍ക്ക് ഒരു പോളിംഗ് ബൂത്ത്, മുനിസിപ്പാലിറ്റികളില്‍ 1,500 വോട്ടര്‍മാര്‍ക്ക് ഒരു പോളിംഗ് ബൂത്ത് എന്നിങ്ങനെയാണ് ക്രമീകരണം. നഗരസഭാ പരിധിയിലുള്ളവര്‍ക്ക് ഒരു വോട്ട് മാത്രമേയുള്ളൂ. എന്നാല്‍, ഗ്രാമ, ബ്ലോക്ക് പഞ്ചായത്ത് പരിധിയിലെ വോട്ടര്‍മാര്‍ മൂന്നു വോട്ടുകള്‍ ചെയ്യണം. ആ സാഹചര്യത്തില്‍ ജില്ലയിലുടനീളം പുതിയ ബൂത്തുകള്‍ കണ്ടെത്തേണ്ടിവരും. നവംബര്‍ ആദ്യം തെരഞ്ഞെടുപ്പ് വിജ്ഞാപനം വരും. ഡിസംബര്‍ ആദ്യവാരം മൂന്നു ഘട്ടങ്ങളായി തെരഞ്ഞെടുപ്പ് നടക്കും. ഡിസംബര്‍ 20ന് പുതിയ തദ്ദേശസമിതിയംഗങ്ങള്‍ ചുമതലയേല്‍ക്കും. സംവരണ നിര്‍ണയം പൂര്‍ത്തിയായാലുടന്‍ മൂന്നു മുന്നണികളും വാര്‍ഡ്തലം മുതല്‍ യോഗം ചേര്‍ന്ന് സ്ഥാനാര്‍ഥിയെ കണ്ടെത്തും. ബ്ലോക്ക് പഞ്ചായത്തുകളിലെ സംവരണ വാര്‍ഡുകളായി കോട്ടയം: തദ്ദേശ സ്വയംഭരണ സ്ഥാപനങ്ങളിലേക്കുള്ള തെരഞ്ഞെടുപ്പിനു മുന്നോടിയായി ജില്ലയിലെ ബ്ലോക്ക് പഞ്ചായത്തുകളിലെ സംവരണ വാര്‍ഡുകളുടെ നിര്‍ണയം പൂര്‍ത്തിയായി. ഇന്നലെ കളക്ടറേറ്റില്‍ ജില്ലാ കളക്ടര്‍ ചേതന്‍കുമാര്‍ മീണയുടെ നേതൃത്വത്തിലായിരുന്നു നറുക്കെടുപ്പ് നടത്തിയത്. ജില്ലാ പഞ്ചായത്തിലെ സംവരണ ഡിവിഷനുകള്‍ തീരുമാനിക്കുന്നതിനുള്ള നറുക്കെടുപ്പ് 21ന് കളക്ടറേറ്റില്‍ നടക്കും. കാഞ്ഞിരപ്പള്ളി പട്ടികജാതി സ്ത്രീ സംവരണം: 11-എരുമേലി. പട്ടികജാതി സംവരണം: നാല്- കൂട്ടിക്കല്‍. പട്ടികവര്‍ഗ സംവരണം: 12-പൊന്തന്‍പുഴ. സ്ത്രീ സംവരണം: മൂന്ന്- ചോറ്റി, അഞ്ച്- മുണ്ടക്കയം, ആറ്-പുലിക്കുന്ന്, ഏഴ്-പുഞ്ചവയല്‍, 13- മണിമല, 14-ചേനപ്പാടി, 16- മണ്ണാറക്കയം. ഏറ്റുമാനൂര്‍ പട്ടികജാതി സംവരണം: നാല്- അതിരമ്പുഴ സ്ത്രീ സംവരണം: മൂന്ന്- നീണ്ടൂര്‍, അഞ്ച്- യൂണിവേഴ്സിറ്റി, ആറ്- മാന്നാനം, ഏഴ്- കരിപ്പൂത്തട്ട്, എട്ട്- മെഡിക്കല്‍ കോളജ്, ഒമ്പത്-കുടമാളൂര്‍, 12-തിരുവാര്‍പ്പ്. കടുത്തുരുത്തി പട്ടികജാതി സ്ത്രീ സംവരണം: മൂന്ന്- മുളക്കുളം. പട്ടികജാതി സംവരണം: 14- പൊതി. സ്ത്രീ സംവരണം: നാല്- കീഴൂര്‍, അഞ്ച്- ഞീഴൂര്‍, ഏഴ്- മുട്ടുചിറ, എട്ട്-കടുത്തുരുത്തി, 10-മധുരവേലി, 13-ആപ്പാഞ്ചിറ. ളാലം പട്ടികജാതി സംവരണം: 14-വള്ളിച്ചിറ. സ്ത്രീ സംവരണം: രണ്ട്-കരൂര്‍, നാല്-നീലൂര്‍, ആറ്- പ്രവിത്താനം, ഏഴ്- ഭരണങ്ങാനം, എട്ട്- പൂവരണി, ഒമ്പത്- പൈക, 11- ചേര്‍പ്പുങ്കല്‍. മാടപ്പള്ളി പട്ടികജാതി സംവരണം: ആറ്- തോട്ടയ്ക്കാട് സ്ത്രീസംവരണം: രണ്ട് വെരൂര്‍ചിറ, മൂന്ന്- ഇന്‍ഡസ്ട്രിയല്‍ നഗര്‍, അഞ്ച്- മണികണ്ഠപുരം, ഏഴ്-മാമ്മൂട്, ഒമ്പത്- മാടപ്പള്ളി, 10-കോട്ടമുറി, 13-പായിപ്പാട്. വൈക്കം പട്ടികജാതി സ്ത്രീ സംവരണം: എട്ട്-ഇടയാഴം പട്ടികജാതി സംവരണം: ഒമ്പത്-ബണ്ട് റോഡ് സ്ത്രീ സംവരണം: രണ്ട്- ബ്രഹ്‌മമംഗലം, മൂന്ന്-ഏനാദി, ഏഴ്-ഉല്ലല, 10- ടിവിപുരം, 12- ഉദയനാപുരം, 14- ചെമ്മനാകരി. പള്ളം ഉഴവൂര്‍ പട്ടികജാതി സംവരണം: ഏഴ്-വെമ്പള്ളി. സ്ത്രീ സംവരണം: ഒന്ന്- വെളിയന്നൂര്‍, രണ്ട്- പഴമല, അഞ്ച്- മരങ്ങാട്ടുപിള്ളി, എട്ട്- കാണക്കാരി, 10-മാഞ്ഞൂര്‍, 12- കുറവിലങ്ങാട്, 14-മോനിപ്പള്ളി. ഈരാറ്റുപേട്ട പട്ടികജാതി സംവരണം: 4-തീക്കോയി. പട്ടികവര്‍ഗ സംവരണം: 13-പ്ലാശനാല്‍. സ്ത്രീ സംവരണം: 3- തലനാട്, 6-പാതാമ്പുഴ, 8-പൂഞ്ഞാര്‍, 9- കൊണ്ടൂര്‍, 10-പിണ്ണാക്കനാട്, 11-തിടനാട്, 14-കളത്തൂക്കടവ്. വാഴൂര്‍ പട്ടികജാതി സംവരണം: രണ്ട്-നെടുംകുന്നം. സ്ത്രീ സംവരണം: നാല്- പുളിക്കല്‍കവല, ആറ്- തേക്കേത്തുകവല, ഏഴ്-പൊന്‍കുന്നം, എട്ട്- ചിറക്കടവ്, ഒമ്പത്-ചെറുവള്ളി, 11-വെള്ളാവൂര്‍, 14- കൂത്രപ്പള്ളി. പാമ്പാടി പട്ടികജാതി സംവരണം: നാല്-മഞ്ചക്കുഴി. സ്ത്രീ സംവരണം: രണ്ട്- കിടങ്ങൂര്‍ സൗത്ത്, മൂന്ന്-കാഞ്ഞിരമറ്റം, അഞ്ച്-ഇളങ്ങുളം, ഏഴ്- അരുവിക്കുഴി, ഒമ്പത്- കൂരോപ്പട, 10- പാമ്പാടി, 11-ഇലക്കൊടിഞ്ഞി, 14- മാലം. പട്ടികജാതി സംവരണം: 10-പരുത്തുംപാറ. സ്ത്രീ സംവരണം: ഒന്ന്- അയര്‍ക്കുന്നം, അഞ്ച്- കൈതേപ്പാലം, ആറ്- ഇത്തിത്താനം, ഏഴ്- മലകുന്നം, ഒമ്പത്- കുഴിമറ്റം, 11- കൊല്ലാട്, 12-മാങ്ങാനം.

സ്‌പെഷല്‍ ഒളിമ്പിക്‌സ്- ഭാരത കേരളയും എസ്എച്ച് നഴ്സിംഗ് കോളജും കൈകോര്‍ക്കുന്നു

കോട്ടയം: തിരുഹൃദയ കോളജ് ഓഫ് നഴ്‌സിംഗും സ്‌പെഷല്‍ ഒളിമ്പിക്‌സ്- ഭാരത കേരളയും കൈ കോര്‍ക്കുന്നു. ജില്ലയിലെ ഭിന്നശേഷിയുള്ള വ്യക്തികളുടെ സമഗ്ര ആരോഗ്യ പരിചരണം ലക്ഷ്യംവച്ചു വിവിധ പദ്ധതികളാണ് സംയുക്തമായി ഒരുക്കുന്നത്. ഭിന്നശേഷി കുട്ടികളുടെ ദന്തപരിപാലനം, ഭിന്നശേഷിയുള്ള പെണ്‍കുട്ടികള്‍ക്കായി ആരോഗ്യശീലങ്ങള്‍, കായിക പരിശീലനം, വ്യക്തിശുചിത്വം തുടങ്ങിയ വിവിധ മേഖലകളിലാണ് തിരുഹൃദയ കോളജ് ഓഫ് നഴ്‌സിംഗ് ഭിന്നശേഷികാര്‍ക്ക് പരിചരണവും പരിശീലനവും നല്‍കുന്നത്. കോളജില്‍ നടന്ന ചടങ്ങില്‍ എസ്ഒബി ഏരിയ ഡയറക്ടര്‍ ഫാ. റോയി കണ്ണന്‍ചിറ സിഎംഐ തിരുഹൃദയ കോളജ് ഓഫ് നഴ്‌സിംഗ് പ്രിന്‍സിപ്പല്‍ സിസ്റ്റര്‍ ആലീസ് മണിയങ്ങാട്ട് എസ്എച്ചിന് ധാരണാപത്രം കൈമാറി.

ഇപിഎഫ് കുറഞ്ഞ പെന്‍ഷന്‍ 5,000 രൂപയാക്കണം; സ്റ്റാഫ് ഫെഡറേഷന്‍

കോട്ടയം: ഇപിഎഫ് അംഗങ്ങളുടെ കുറഞ്ഞ പെന്‍ഷന്‍ 5,000 രൂപയാക്കി ഉയര്‍ത്തണമെന്നും 2014 സെപ്റ്റംബര്‍ ഒന്നിനു ശേഷം പിഎഫ് അംഗത്വം നേടിയവര്‍ക്കും ഇപിഎഫ്ഒ പെന്‍ഷന്‍ പദ്ധതി അംഗത്വം നല്‍കി ഹയര്‍ പെന്‍ഷന്‍ ഓപ്ഷന് അവസരം നല്‍കണമെന്ന് ഇപിഎഫ്ഒ സ്റ്റാഫ് ഫെഡറേഷന്‍ സംസ്ഥാന സമ്മേളനം ആവശ്യപ്പെട്ടു. ശമ്പളപരിധിയില്ലാതെ തൊഴിലാളികള്‍ക്ക് ഇപിഎഫ് അംഗത്വം നല്‍കുക, ഇപിഎഫ് വേതന പരിധി 15,000 രൂപയില്‍ നിന്ന് 35,000 ആക്കുക, അസംഘടിത തൊഴിലാളികള്‍ക്കും ഇപിഎഫ് ആനുകൂല്യങ്ങള്‍ നല്‍കുക, എട്ടാം ശമ്പള കമ്മീഷന്‍ നിയമിക്കുക, ജീവനക്കാര്‍ക്ക് യുപിഎസ് പെന്‍ഷന്‍ ഓപ്ഷന്‍ അനുവദിക്കുക തുടങ്ങിയ ആവശ്യങ്ങളും ഉന്നയിച്ചു. സംസ്ഥാന പ്രസിഡന്‍റായി കെ. സദാനന്ദനെയും ജനറല്‍ സെക്രട്ടറിയായി കെ. സ്‌നേഹപ്രഭയെയും തെരഞ്ഞെടുത്തു. എസ്. ജയഗോപാല്‍ (വര്‍ക്കിംഗ് പ്രസിഡന്‍റ്), പി. മനോജ്, പി. സനോജ് (വൈസ് പ്രസിഡന്‍റ്), എന്‍. സമീന, എസ്.എസ്. രഞ്ജിത്ത് (ഓര്‍ഗനൈസിംഗ് സെക്രട്ടറി), എന്‍.വി. ബിജു (ട്രഷറര്‍) എന്നിവരാണ് മറ്റു ഭാരവാഹികള്‍.

കുടക്കച്ചിറയിൽ ഖനനഭീതി

പാലാ: ജില്ലയില്‍ പെരുമഴയുടെ അലര്‍ട്ടും നിരോധനവും വന്നാലും പൊതു അവധി ദിവസമായാലും സമയനിബന്ധന പോലും പാലിക്കാതെ വന്‍തോതില്‍ പാറഖനനം നടക്കുന്നതായി ആരോപണം. കരൂര്‍ പഞ്ചായത്ത് ഒന്നാം വാര്‍ഡായ കുടക്കച്ചിറ, കലാമുകളം പ്രദേശത്തെ പാറമടകള്‍ക്കെതിരേ പഞ്ചായത്ത് ഓഫീസ് പടിക്കല്‍ സമരസമിതിയുടെ നേതൃത്വത്തില്‍ നടത്തിയ സമരങ്ങളും നിവേദനങ്ങളും അധികൃതര്‍ കണ്ടില്ലെന്നു നടിക്കുകയാണെന്നു നാട്ടുകാര്‍ കുറ്റപ്പെടുത്തുന്നു. റോഡ് തകരുന്നു, ടിപ്പർ മറിഞ്ഞു റോഡ് തകര്‍ത്ത് ടിപ്പറുകളും ടോറസ് ലോറികളും പായുന്നു. പാര്‍ലമെന്‍റ് അംഗങ്ങളും സ്ഥലം എംഎല്‍എയും അടക്കം നിരന്തരം പ്രതിഷേധസമരം നടത്തിയതിന്‍റെ പേരില്‍ ഇടക്കാലത്തു മുടങ്ങിക്കിടന്നിരുന്ന പാറഖനനം പുനരാരംഭിച്ചിട്ട് ഒരു മാസമായി. ഇന്നലെ ഉച്ചകഴിഞ്ഞ് കുടക്കച്ചിറ പാറമട ജംഗ്ഷന്‍ റോഡിന്‍റെ തിട്ടയിടിച്ച് കരിങ്കല്‍ ലോഡ് സഹിതം ടോറസ് ലോറി ഭഗവതിപടവില്‍ അപ്പച്ചന്‍റെ റബര്‍ത്തോട്ടത്തിലേക്കു മറിഞ്ഞു. ആളപായം ഉണ്ടാകാതിരുന്നത് ഭാഗ്യംകൊണ്ടു മാത്രം. സ്‌കൂള്‍ കുട്ടികളടക്കമുള്ള കാല്‍നടയാത്രക്കാർ‍ ഭയത്തോടെയാണ് ഇതുവഴി സഞ്ചരിക്കുന്നത്. പരിസ്ഥിതിലോലം കരൂര്‍ പഞ്ചായത്തുതന്നെ നാലു വര്‍ഷം മുമ്പു നടത്തിയ പരിസ്ഥിതി പഠന റിപ്പോര്‍ട്ടില്‍ ഒന്ന്, രണ്ട് വാര്‍ഡുകളുടെ മലയോരം പരിസ്ഥിലോലമാണെന്നു കണ്ടെത്തിയിരുന്നു. റിപ്പോര്‍ട്ട് പ്രസിദ്ധീകരിച്ച ആളുകള്‍തന്നെ അതിനു വിരുദ്ധമായി ഖനനാനുമതി നല്‍കിയത് ജനങ്ങളോടുള്ള വെല്ലുവിളിയാണെന്ന് ആരോപിച്ചാണ് മുമ്പ് നാട്ടുകാര്‍ സമരം നടത്തിയത്. 22 ഡിഗ്രിയില്‍ കൂടുതല്‍ ചെരിവുള്ള സ്ഥലത്ത് ഖനനം നടത്തിയാല്‍ ഉരുള്‍പൊട്ടല്‍, മലയിടിച്ചില്‍, മണ്ണിടിച്ചില്‍ തുടങ്ങിയ പ്രകൃതിദുരന്തങ്ങള്‍ സംഭവിക്കാനുള്ള സാധ്യത കൂടുതലാണെന്ന് ശാസ്ത്രീയ മുന്നറിയിപ്പുണ്ടായിട്ടും അവഗണിച്ചെന്നു നാട്ടുകാർ പറയുന്നു. ഇവിടെ മലകളുടെ ചെരിവ് 40 ഡിഗ്രിയില്‍ കൂടുതലാണ്.

മൂന്നാനിയില്‍ വാഹനാപകടങ്ങള്‍ തുടര്‍ക്കഥ

പാലാ: പാലാ-ഈരാറ്റുപേട്ട റോഡില്‍ മൂന്നാനിയില്‍ കോടതിക്കു മുന്‍പില്‍ വീണ്ടും അപകടം. കഴിഞ്ഞ ദിവസം ഉച്ചയോടെ റോഡ് കുറുകെ കടന്ന സ്ത്രീക്ക് കാര്‍ ഇടിച്ചു പരിക്കേറ്റു. ഇവരെ സമീപത്തെ ആശുപത്രിയില്‍ പ്രവേശിപ്പിച്ചു. കഴിഞ്ഞ കുറെ നാളുകളായി ഇവിടെ അപകടം തുടര്‍ക്കഥയാവുകയാണ്. ഏതാനും ദിവസങ്ങള്‍ക്ക് മുന്‍പ് വാഹനങ്ങള്‍ കൂട്ടിയിടിച്ച് അപകടം സംഭവിച്ചിരുന്നു. ബസിറങ്ങി നിരവധി ആളുകള്‍ റോഡ് കുറുകെ കടന്ന് കോടതി സമുച്ചയത്തിലേക്കു പോകുന്പോൾ അപകടത്തില്‍പ്പെടുന്ന സംഭവങ്ങള്‍ സമീപകാലത്ത് വര്‍ധിച്ചിട്ടുണ്ട്. റോഡുകളുടെ നിലവാരം ഉയര്‍ന്നതോടെ അപകടങ്ങളും പെരുകുകയാണ്. വളവോ കയറ്റമോ ഇറക്കമോ ഇല്ലാത്ത നേരേയുള്ള പാതയാണ് കോടതിസമുച്ചയത്തിനു മുമ്പിലുള്ളത്. അമിതവേഗവും അശ്രദ്ധയിലുള്ള വാഹനമോടിക്കലുമാണ് ഭൂരിഭാഗം അപകടങ്ങള്‍ക്കും കാരണമാകുന്നതെന്ന് നാട്ടുകാര്‍ പറഞ്ഞു.

അര്‍ധരാത്രിയില്‍ നാടിനെ നടുക്കിയ കൊലപാതകം

കിടങ്ങൂര്‍: അര്‍ധരാത്രി കിടങ്ങൂര്‍ മാന്താടി ഗ്രാമം ഉണര്‍ന്നത് കൊലപാതകക്കഥ കേട്ടാണ്. കിടപ്പു രോഗിയായ കിടങ്ങൂര്‍ സൗത്ത് മാന്താടി ഏലക്കോട് രമണിയുടെ (70) കൊലപാതകമാണ് നാടിനെ ഞെട്ടിച്ചത്. ശനിയാഴ്ച പുലര്‍ച്ചെ ഒന്നരയോടെയാണ് സംഭവം. ഏറെക്കാലം കിടപ്പുരോഗി ആയിരുന്ന ഭാര്യയുടെ രോഗാവസ്ഥയില്‍ മനംനൊന്താണ് കൊലപാതകം നടത്തിയതെന്ന് ഭര്‍ത്താവ് സോമന്‍ (74) പോലീസിനോട് പറയുന്നു. മാനസിക വെല്ലുവിളി നേരിടുന്ന ഇളയ മകന്‍ ശ്രീകുമാറിനെയും കൊലപ്പെടുത്താന്‍ ശ്രമം നടത്തി. ഇരുവരെയും കൊലപ്പെടുത്തിയ ശേഷം ജീവനൊടുക്കാനായിരുന്നു സോമന്‍റെ തീരുമാനം. ഭിന്നശേഷിക്കാരനായ മകനെ മറ്റാരും നോക്കാനില്ലെന്ന് കരുതിയാണ് കൊലപ്പെടുത്താന്‍ ശ്രമിച്ചതെന്നും സോമന്‍ പറഞ്ഞു. എന്നാല്‍ ശ്രീകുമാര്‍ ബഹളം വച്ചതോടെ മൂത്തമകന്‍ സുനീത് ഉറക്കമുണരുകയും പിതാവിന്‍റെ കൈ വേര്‍പ്പെടുത്തി അനുജനെ രക്ഷപ്പെടുത്തുകയുമായിരുന്നു. തുടര്‍ന്ന് കൊലപാതകവിവരം നാട്ടുകാരെയും ബന്ധപ്പെട്ടവരെയും അറിയിച്ചു. ഭാര്യയുടെ രോഗാവസ്ഥയില്‍ സോമന് കടുത്ത മാനസിക സമ്മര്‍ദം ഉണ്ടായിരുന്നു. വെള്ളിയാഴ്ച നാട്ടുകാരോട് സംസാരിച്ചത് ഭാര്യയുടെ വിഷമതകളെക്കുറിച്ചാണ്. രമണി വേദനിക്കുന്നതുകണ്ട് കണ്ണ് നിറയുന്നതായും അയല്‍ക്കാരനോട് സംസാരിച്ചിരുന്നു. മേസ്തിരി പണിക്കാരനായ സോമന് കഴിഞ്ഞ ഏറെ നാളുകളായി പണിക്കു പോകാനും കഴിഞ്ഞിരുന്നില്ല. ഇളയ മകനെയും ഭാര്യയെയും ശുശ്രൂഷിച്ചിരുന്നതും ഭക്ഷണം പാകം ചെയ്തിരുന്നതും സോമനായിരുന്നു. കൊലപാതകവിവരം അറിഞ്ഞെത്തിയ നാട്ടുകാര്‍ക്കും പോലീസിനും മുന്നില്‍ നിസംഗനായി ഇരിക്കുകയായിരുന്നു സോമന്‍.

പഞ്ചായത്തുകളിൽ വികസനസദസ്

ഇടമറ്റം: മീനച്ചില്‍ പഞ്ചായത്ത് വികസനസദസ് ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗര്‍ ഉദ്ഘാടനം ചെയ്തു. പഞ്ചായത്ത് ഹാളില്‍ നടന്ന സദസില്‍ പ്രസിഡന്‍റ് സോജന്‍ തൊടുക അധ്യക്ഷത വഹിച്ചു. ജില്ലാ പഞ്ചായത്തംഗം രാജേഷ് വാളിപ്ലാക്കല്‍, മുന്‍ പ്രസിഡന്‍റ് ജോയി കുഴിപ്പാല, സെക്രട്ടറി പി.ആര്‍. സീന, വൈസ് പ്രസിഡന്‍റ് ലിന്‍സി മാര്‍ട്ടിന്‍, അംഗങ്ങളായ ടി.ബി. ബിജു, ഇന്ദു പ്രകാശ്, പി.വി. വിഷ്ണു, സിഡിഎസ് ചെയര്‍പേഴ്‌സണ്‍ ശ്രീലത ഹരിദാസ് എന്നിവര്‍ പ്രസംഗിച്ചു. മന്ത്രിമാരായ എം.ബി. രാജേഷ്, വി.എന്‍. വാസവന്‍ എന്നിവരുടെ സന്ദേശങ്ങള്‍ യോഗത്തില്‍ വായിച്ചു. കൊഴുവനാല്‍: കൊഴുവനാൽ പഞ്ചായത്ത് വികസനസദസ് ഉദ്ഘാടനവും ആയുര്‍വേദ സബ് സെന്‍റര്‍ സമര്‍പ്പണവും നടന്നു. സെന്‍റ് ജോണ്‍ നെപുംസ്യാന്‍സ് ഫൊറോന പള്ളി പാരിഷ് ഹാളില്‍ പഞ്ചായത്ത് പ്രസിഡന്‍റ് ലീലാമ്മ ബിജുവിന്‍റെ അധ്യക്ഷതയില്‍ ചേര്‍ന്ന യോഗം ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗര്‍ ഉദ്ഘാടനം ചെയ്തു. ലൈഫ് ഗുണഭോക്തൃ സംഗമവും താക്കോല്‍ദാനവും ളാലം ബ്ലോക്ക് പഞ്ചായത്ത് പ്രസിഡന്‍റ് ജെസി ജോര്‍ജ് നിര്‍വഹിച്ചു. പഞ്ചായത്തിന്‍റെ 2021-25 വര്‍ഷത്തെ പ്രോഗ്രസ് റിപ്പോര്‍ട്ട് ജില്ലാ പഞ്ചായത്ത് മെംബര്‍ ജോസ്‌മോന്‍ മുണ്ടയ്ക്കല്‍ പ്രകാശനം ചെയ്തു. 75 വയസിന് മുകളിലുള്ള തൊഴിലുറപ്പ് തൊഴിലാളികളെയും ഹരിതകര്‍മസേനാംഗങ്ങള്‍, ആശാ പ്രവര്‍ത്തര്‍ എന്നിവരെയും ആദരിച്ചു.

വിളക്കിത്തലനായർ സമാജം സംസ്ഥാന സമ്മേളനം പാലായിൽ

പാലാ: വിളക്കിത്തലനായര്‍ സമാജം 21-ാം സംസ്ഥാന വാര്‍ഷിക സമ്മേളനം 20, 21 തീയതികളില്‍ പാലാ മുനിസിപ്പല്‍ ടൗണ്‍ ഹാളില്‍ നടക്കും. 20ന് ഉച്ചകഴിഞ്ഞ് രണ്ടിന് കടപ്പാട്ടൂര്‍ ക്ഷേത്രപരിസരത്തുനിന്ന് ആരംഭിക്കുന്ന റാലി ടൗണ്‍ ചുറ്റി മുനിസിപ്പല്‍ ടൗണ്‍ഹാളില്‍ സമാപിക്കും. തുടര്‍ന്ന് നടക്കുന്ന പൊതുസമ്മേളനം കേന്ദ്ര സഹമന്ത്രി ജോര്‍ജ് കുര്യന്‍ ഉദ്ഘാടനം ചെയ്യും. സമാജം പ്രസിഡന്‍റ് കെ.ആര്‍. സുരേന്ദ്രന്‍ അധ്യക്ഷത വഹിക്കും. മന്ത്രി വി.എന്‍. വാസവന്‍, എംപിമാരായ ഫ്രാന്‍സിസ് ജോര്‍ജ്, ജോസ് കെ. മാണി, എംഎല്‍എമാരായ തിരുവഞ്ചൂര്‍ രാധാകൃഷ്ണന്‍, മാത്യു ടി. തോമസ്, മാണി സി. കാപ്പന്‍, മുനിസിപ്പല്‍ ചെയര്‍മാന്‍ തോമസ് പീറ്റര്‍, സമാജം രക്ഷാധികാരി കെ.എസ്. രമേഷ് ബാബു, വി.ജി. മണിലാല്‍, കെ.കെ. അനില്‍കുമാര്‍, പി.കെ. രാധാകൃഷ്ണന്‍, എം.എന്‍. മോഹനന്‍ എന്നിവര്‍ പ്രസംഗിക്കും. 21നു രാവിലെ ഒമ്പതിന് പ്രതിനിധി സമ്മേളനത്തിന് തുടക്കമായി സമാജം പ്രസിഡന്‍റ് കെ.ആര്‍. സുരേന്ദ്രന്‍ പതാക ഉയര്‍ത്തും. പത്തിന് മന്ത്രി റോഷി അഗസ്റ്റിന്‍ പ്രതിനിധി സമ്മേളനം ഉദ്ഘാടനം ചെയ്യും. സി.കെ. ആശ എംഎല്‍എ, സെക്രട്ടറി ബാബു കുഴിക്കാല, ജനറല്‍ സെക്രട്ടറി പി.കെ. രാധാകൃഷ്ണന്‍, കെ.കെ. അനില്‍കുമാര്‍, കെഎസ്. രമേഷ് ബാബു, പി.കെ. സുരേന്ദ്രന്‍ എന്നിവര്‍ പ്രസംഗിക്കും. സമാജം ഭാരവാഹികളായ കെ.എസ്. രമേഷ്ബാബു, കെ.ആര്‍. സുരേന്ദ്രന്‍, പി.കെ. രാധാകൃഷ്ണന്‍, കെ.കെ. അനില്‍കുമാര്‍, എം.എന്‍. മോഹനന്‍, ടി.എം. ബാബു, കെ.എ. ചന്ദ്രന്‍ എന്നിവര്‍ പത്രസമ്മേളനത്തില്‍ പങ്കെടുത്തു.

രാമപുരം കോളജില്‍ ലോജിസ്റ്റിക്‌സ് ആൻഡ് സപ്ലൈ ചെയിന്‍ മാനേജ്‌മെന്‍റില്‍ ആഡോണ്‍ കോഴ്‌സ്

രാമപുരം: മാര്‍ ആഗസ്തീനോസ് കോളജ് കൊമേഴ്സ് ഡിപ്പാര്‍ട്ട്മെന്‍റും തിരുവനന്തപുരം കെല്‍ട്രോണുമായി ചേര്‍ന്ന് ധാരണാപത്രം ഒപ്പുവച്ചു. 2026 അധ്യയന വര്‍ഷം മുതല്‍ പ്രവേശനം നേടുന്ന വിദ്യാര്‍ഥികള്‍ക്കായി തൊഴില്‍ ഉറപ്പ് നല്‍കുന്ന ലോജിസ്റ്റിക്‌സ് ആൻഡ് സപ്ലൈ ചെയിന്‍ മാനേജ്‌മെന്‍റില്‍ ആഡോണ്‍ കോഴ്‌സ് ആരംഭിക്കുന്നതിനാണ് ധാരണാപത്രം ഒപ്പുവച്ചത്. പ്രിന്‍സിപ്പല്‍ ഡോ. റെജി വര്‍ഗീസ് മേക്കാടന്‍ കെല്‍ട്രോണ്‍ പ്രോജക്‌ട് കോ-ഓര്‍ഡിനേറ്റര്‍ ആദിത്യ രാജില്‍നിന്നു ധാരണാപത്രം ഏറ്റുവാങ്ങി. വൈസ് പ്രിന്‍സിപ്പല്‍മാരായ ഫാ. ജോസഫ് ആലഞ്ചേരില്‍, സിജി ജേക്കബ്, അഡ്മിനിസ്ട്രേറ്റീവ് ഓഫീസര്‍മാരായ രാജീവ് ജോസഫ്, പ്രകാശ് ജോസഫ്, ഡിപ്പാര്‍ട്ട്മെന്‍റ് മേധാവി ജോസ് ജോസഫ് തുടങ്ങിയവര്‍ പങ്കെടുത്തു.

ഇടിമിന്നൽ: തിടനാട്ടിൽ ആറു വീടുകൾക്ക് കനത്ത നാശം

തിടനാട്: ഇന്നലെ വൈകുന്നേരമുണ്ടായ അതിശക്തിയായ ഇടിമിന്നലിൽ തിടനാട് - മാടമല ഭാഗത്തെ ആറു വീടുകളുടെ വയറിംഗ് ഉൾപ്പെടെ ഗൃഹോപകരണങ്ങൾ കത്തിനശിച്ചു. ചെന്നയ്ക്കാട്ടുകുന്നേൽ കുട്ടിച്ചൻ, വള്ളിയാംതടത്തിൽ കുട്ടിച്ചൻ, മണിയാക്കുപാറ സജി, മണിയാക്കുപാറ സിബി, പൊട്ടനാനി ജയിംസ്, കുഞ്ഞമ്മ പൊട്ടനാനി എന്നിവരുടെ വീടുകൾക്കാണ് നാശനഷ്ടമുണ്ടായത്. ലൈനിൽ പൊതുവായി കൊടുക്കേണ്ട എർത്ത് സംവിധാനത്തിന്‍റെ അപാകതയാണ് ഇടിമിന്നലിൽ നാശനഷ്ടം സംഭവിക്കാൻ കാരണമെന്ന് ആക്ഷേപമുയർന്നു.

ഉഴവൂർ ബ്ലോക്ക് കേരളോത്സവം

വെളിയന്നൂർ: ഉഴവൂർ ബ്ലോക്ക് പഞ്ചായത്ത് കേരളോത്സവം ബ്ലോക്ക് പ്രസിഡന്‍റ് രാജു ജോൺ ചിറ്റേത്ത് ഉദ്ഘാടനം ചെയ്തു. ബ്ലോക്ക് വൈസ് പ്രസിഡന്‍റ് ഡോ. സിന്ധുമോൾ ജേക്കബ് അധ്യക്ഷത വഹിച്ചു. പഞ്ചായത്ത് പ്രസിഡന്‍റ് സജേഷ് ശശി, ജില്ലാ പഞ്ചായത്തംഗം പി.എം. മാത്യു, ബ്ലോക്ക് പഞ്ചായത്തംഗം പി.എൻ. രാമചന്ദ്രൻ, ബ്ലോക്ക് പഞ്ചായത്ത് സെക്രട്ടറി ശ്രീകുമാർ എസ്. കൈമൾ, വന്ദേമാതരം വിഎച്ച്എസ്‌സി പ്രിൻസിപ്പൽ ആർ. ജയേഷ്, പഞ്ചായത്ത് സെക്രട്ടറി എസ്. സുനിൽ, എസ്.വി. മുകുൾ എന്നിവർ പ്രസംഗിച്ചു. ബാസ്കറ്റ്ബോൾ മത്സരം ഇന്ന് 8.30ന് കുര്യനാട് സെന്‍റ് ആൻസ് ഹയർ സെക്കൻഡറി സ്കൂളിലും എട്ടിന് ക്രിക്കറ്റ് മത്സരം കാണക്കാരി ഗവ. ഹയർ സെക്കൻഡറി സ്കൂളിലും ഒൻപതിന് അത്‌ലറ്റിക്സ് വെളിയന്നൂർ വന്ദേമാതരം വൊക്കേഷണൽ ഹയർ സെക്കൻഡറി സ്കൂളിലും നടക്കും. ഷട്ടിൽ ബാഡ്മിന്‍റൺ ഉച്ചകഴിഞ്ഞ് മൂന്നിന് ഉഴവൂർ ക്ലബ് ഇൻഡോർ സ്റ്റേഡിയത്തിൽ നടക്കും. നാളെ പത്തിന് നീന്തൽ മത്സരങ്ങൾ തോപ്പൻസ് അക്കാദമിയിൽ നടക്കും. 21ന് 1.30 ന് ചെണ്ടമേളം മത്സരം ഉഴവൂർ ബ്ലോക്ക് പഞ്ചായത്ത് ആസ്ഥാനത്തും നടക്കും.

റോഡ് പുനരുദ്ധാരണത്തിന് 50 ലക്ഷം അനുവദിച്ചു

പാലാ: കഴിഞ്ഞ വര്‍ഷത്തെ കാലവര്‍ഷക്കെടുതി മൂലം തകര്‍ന്ന് ഗതാഗതയോഗ്യമല്ലാതായ റോഡുകള്‍ പുനരുദ്ധരിക്കുന്നതിനായി പാലാ നിയോജക മണ്ഡലത്തിലെ വിവിധ പഞ്ചായത്തുകളിലായി 50 ലക്ഷം രൂപ അനുവദിച്ചെന്ന് മാണി സി. കാപ്പന്‍ എംഎല്‍എ അറിയിച്ചു. 2025-26 വര്‍ഷത്തെ വെള്ളപ്പൊക്ക നിവാരണ ദുരിതാശ്വാസ ഫണ്ടില്‍നിന്നാണ് തുക അനുവദിച്ചിരിക്കുന്നത്. കൊഴുവനാല്‍ പഞ്ചായത്തിലെ വെട്ടിക്കൊമ്പില്‍-പരുന്തനാനി റോഡ്, തലപ്പലം പഞ്ചായത്തിലെ ചുങ്കപ്പുര-അമ്പാറ ചപ്പാത്ത് റോഡ്, മൂന്നിലവ് പഞ്ചായത്തിലെ വാകക്കാട്-തഴക്കവയല്‍ റോഡ്, രാമപുരം പഞ്ചായത്തിലെ വെള്ളിലാപ്പിള്ളി-ഏഴാച്ചേരി പള്ളി റോഡ്, കീത്താപ്പിള്ളി-കുരുമറ്റം റോഡ് എന്നിവയ്ക്ക് പത്തു ലക്ഷം രൂപ വീതമാണ് അനുവദിച്ചിരിക്കുന്നത്.

പൗരോഹിത്യ സുവർണ ജൂബിലി

പൂവത്തോട്: ഫാ. ജോസ് പ്രകാശ് മണ്ണൂരെട്ടൊന്നലിന്‍റെ പൗരോഹിത്യ സുവർണ ജൂബിലി ഇന്ന് മൂന്നാംതോട് സിഎസ്ടി ആശ്രമ ദേവാലയത്തിൽ നടക്കും. രാവിലെ 10.30ന് കൃതജ്ഞതാബലി. തുടർന്നു നടക്കുന്ന അനുമോദന സമ്മേളനം സെബാസ്റ്റ്യൻ കുളത്തുങ്കൽ എംഎൽഎ ഉദ്ഘാടനം ചെയ്യും. അസിസ്റ്റന്‍റ് സുപ്പീരിയർ ജനറൽ ഫാ. ജോർജ് ആറാംചേരി അധ്യക്ഷത വഹിക്കും. ബിഷപ് മാർ ജേക്കബ് മുരിക്കൻ ജൂബിലിസന്ദേശം നൽകും. ഫാ. ജോസ് തടത്തിൽ സിഎസ്ടി, പൂവത്തോട് പള്ളി വികാരി ഫാ. ജേക്കബ് പുതിയാപറമ്പിൽ, പഞ്ചായത്ത് പ്രസിഡന്‍റ് സ്കറിയാച്ചൻ പൊട്ടനാനി, എം.എം. മാനുവൽ, സംസ്ഥാന യുവജന കമ്മീഷൻ അംഗം അബേഷ് അലോഷ്യസ്, എം.എം. മാത്യു, ഫാ. ജോർജ് ചേപ്പില, ഫാ. സാവിയോ ഇല്ലിമൂട്ടിൽ, ഫാ. ജോജു അടമ്പകല്ലേൽ തുടങ്ങിയവർ പ്രസംഗിക്കും.

റാങ്ക് നേട്ടവുമായി സെന്‍റ് ആന്‍റണീസ് കോളജ്

കാഞ്ഞിരപ്പള്ളി: തുടര്‍ച്ചയായ റാങ്ക് നേട്ടങ്ങളുമായി കാഞ്ഞിരപ്പള്ളി സെന്‍റ് ആന്‍റണീസ് കോളജ്. 2015 മുതല്‍ തുടര്‍ച്ചയായി യൂണിവേഴ്‌സിറ്റി പരീക്ഷകളില്‍ റാങ്കുകള്‍ വാരിക്കൂട്ടുകയാണ് കോളജിലെ വിദ്യാർഥികള്‍. ആധുനിക വിദ്യാഭ്യാസരംഗത്ത് ഏവിയേഷന്‍, ലാബ് ടെക്‌നീഷ്യന്‍ കോഴ്‌സ്, ഹോട്ടല്‍ മാനേജ്‌മെന്‍റ് തുടങ്ങിയ പ്രഫഷണല്‍ കോഴ്‌സുകള്‍ ആരംഭിച്ച കാഞ്ഞിരപ്പള്ളി സെന്‍റ് ആന്‍റണീസ് കോളജില്‍ കഴിഞ്ഞ എംജി യൂണിവേഴ്‌സിറ്റി എംകോം പ്രൈവറ്റ് രജിസ്‌ട്രേഷന്‍ വിഭാഗം പരീക്ഷയില്‍ ജി. സായ് കൃഷ്ണ അഞ്ചാം റാങ്കും അല്‍ഫോന്‍സ ജോയ് ഒന്പതാം റാങ്കും നേടി. ‌റാങ്ക് ജേതാക്കളെയും പരിശീലനം നല്‍കിയ അധ്യാപകരെയും കോളജ് ഡയറക്‌ടര്‍ ലാലിച്ചന്‍ കല്ലംപള്ളിയുടെ അധ്യക്ഷതയില്‍ ചേര്‍ന്ന യോഗം അഭിനന്ദിച്ചു. പി.എം. ജേക്കബ് പൂതക്കുഴി, സെക്രട്ടറി ജോസ് ആന്‍റണി, പ്രിന്‍സിപ്പല്‍ എ.ആര്‍. മധുസുദനന്‍, വൈസ് പ്രിന്‍സിപ്പല്‍ ടിജോമോന്‍ ജേക്കബ്, സ്റ്റാഫ് സെക്രട്ടറിമാരായ ബേബി മാത്യു, ലൂസിയാമ്മ ജോര്‍ജ് എന്നിവര്‍ പ്രസംഗിച്ചു.

പെരുമഴ, മലവെള്ളപ്പാച്ചിൽ; പാലങ്ങൾ ഒലിച്ചുപോയി

കാഞ്ഞിരപ്പള്ളി: വെള്ളിയാഴ്ച പെയ്ത കനത്ത മഴയിൽ കപ്പാട് പ്രദേശങ്ങളിൽ നിരവധി വീടുകളിൽ വെള്ളം കയറുകയും കൃഷി നശിക്കുകയും ചെയ്തു. പ്രദേശത്തെ താത്കാലിക പാലമടക്കം മൂന്നു പാലങ്ങൾ ഒലിച്ചുപോയി. കാഞ്ഞിരപ്പള്ളി പഞ്ചായത്തിലെ രണ്ട്, മൂന്ന്, നാല് വാർഡുകളിലാണ് കനത്ത മഴയിലുണ്ടായ മഴവെള്ളപ്പാച്ചിലിൽ നാശനഷ്ടമുണ്ടായത്. ഈരാറ്റുപേട്ട റോഡിൽ ആനക്കല്ല്, മഞ്ഞപ്പള്ളി, കപ്പാട് എന്നിവിടങ്ങളിൽ റോഡ് ഗതാഗതം മണിക്കൂറോളം തടസപ്പെട്ടു. മൂന്നു വാർഡുകളിലുമായി 25ഓളം വീടുകളിൽ വെള്ളം കയറി. മൂന്നാം വാർഡിലാണ് ഏറ്റവും കൂടുതൽ വീടുകളിൽ വെള്ളം കയറി നാശനഷ്ടമുണ്ടായത്. വലിയകുളത്തിൽ മേരിക്കുട്ടി മാത്യു, പുല്ലാട്ടുപറന്പിൽ രവി, പേഴത്തുംവയലിൽ സണ്ണി, തകിടിയേൽ ബെന്നി, കുളത്തുങ്കൽ പ്രീതി രാജേഷ്, കൊച്ചുപറന്പിൽ മുഹമ്മദ് കുട്ടി എന്നിവരുടെ വീടുകളിലാണ് വെള്ളം കയറിയത്. തോട്ടിലെ കിണർ തടസം വണ്ടനാമല കൊടിത്തോട്ടിൽ വെള്ളം ഉയർന്നതോടെ മാടത്താനി പ്രദേശത്തെ 10 വീടുകളിൽ വെള്ളം കയറി. ആറ് വീടുകൾക്കു നാശനഷ്ടമുണ്ടാകുകയും വീട്ടുപകരണങ്ങളെല്ലാം നശിക്കുകയും ചെയ്തു. കിണറുകളും ഉപയോഗശൂന്യമായി. തുമ്പമട ഭാഗത്ത് തോട്ടിൽ നിർമിച്ച കിണറും സംരക്ഷണഭിത്തിയുമാണ് മാടത്താനി ഭാഗത്ത് വീടുകളിൽ വെള്ളം കയറാൻ കാരണമായതെന്നു വാർഡംഗം അമ്പിളി ഉണ്ണിക്കൃഷ്ണൻ ആരോപിച്ചു. വെള്ളത്തിന്‍റെ സുഗമമായ ഒഴുക്കിന് തടസം സൃഷ്ടിക്കുന്ന ഇവ പൊളിച്ച് നീക്കണമെന്നും ഇവർ ആവശ്യപ്പെട്ടു. വ്യാപക കൃഷിനാശം നാലാം വാർഡിലും നാലോളം വീടുകളിൽ വെള്ളം കയറിയതിനെത്തുടർന്ന് നാശനഷ്ടമുണ്ടായിട്ടുണ്ട്. കപ്പാട് ഗവൺമെന്‍റ് സ്കൂളിന് മുൻവശത്തുള്ള വീടുകളിലും വെള്ളം കയറി നാശനഷ്ടം സംഭവിച്ചു. ആനക്കല്ല്, മഞ്ഞപ്പള്ളി പ്രദേശങ്ങളിൽ കടകളിലും വെള്ളം കയറിയിരുന്നു. എറികാട് പാലം തകർന്നതിനൊപ്പം ആനക്കല്ല് മൂഴികാട് തോടിന് കുറുകെയുള്ള രണ്ട് താത്കാലിക പാലങ്ങളും ഒലിച്ചുപോയി. ഇതോടെ തോടിന് മറുകരയുള്ളവർ കിലോമീറ്ററോളം ചുറ്റിക്കറങ്ങേണ്ട സ്ഥിതിയാണ്. മലവെള്ളം കുത്തിയൊലിച്ചൊഴുകിയതോടെ വ്യാപകമായ കൃഷിനാശവും സംഭവിച്ചിട്ടുണ്ട്. ശക്തമായ കാറ്റിൽ കപ്പാട്-കുരുവിക്കൂട് റോഡിൽ മരം ഒടിഞ്ഞുവീണ് ഗതാഗതം തടസപ്പെട്ടു. കപ്പാട് ഗവൺമെന്‍റ് പന്നിഫാമിന്‍റെ വളപ്പിൽനിന്ന മരമാണ് റോഡിലേക്ക് ഒടിഞ്ഞുവീണത്. വാഹനങ്ങളൊന്നും ഈ സമയം ഇതുവഴി കടന്നു പോകാതിരുന്നതിനാൽ വലിയ അപകടമാണ് ഒഴിവായത്. ഇവിടെ വൈദ്യുതി പോസ്റ്റുകളും തകർന്നിട്ടുണ്ട്.

ചിറക്കടവ് പഞ്ചായത്തിലെ സംവരണവാർഡ് നിർണയത്തിൽ വീഴ്ചയെന്ന് സിപിഎം

പൊൻകുന്നം: ചിറക്കടവ് പഞ്ചായത്തിലെ സംവരണവാർഡ് നിർണയത്തിൽ വീഴ്ചയുണ്ടായെന്ന് സിപിഎം. ഇതുസംബന്ധിച്ച് സിപിഎം ചിറക്കടവ് പഞ്ചായത്ത് കമ്മിറ്റി സെക്രട്ടറി എൻ.കെ. സുധാകരൻനായർ സംസ്ഥാന തെരഞ്ഞെടുപ്പ് കമ്മീഷന് പരാതി നൽകി. ചിറക്കടവിൽ അടുത്തടുത്ത ആറുമുതൽ ഒന്പതുവരെ വാർഡുകളും 19 മുതൽ 22 വരെ വാർഡുകളും സംവരണസീറ്റുകളായി. 10 മുതൽ 13 വരെ അടുത്തടുത്ത വാർഡുകൾ ജനറലുമായി. നറുക്കെടുപ്പ് നടപടിക്രമത്തിലെ പിഴവാണിതിന് കാരണമെന്നാണ് പരാതി. ഡീലിമിറ്റേഷന് ശേഷം രണ്ടു വാർഡ് കൂടിയ ചിറക്കടവിൽ അനുബന്ധം ആർ-നാല് പ്രകാരമാണ് സംവരണവാർഡുകൾ നിർണയിക്കേണ്ടത്. കോളം അഞ്ചിൽനിന്ന് കോളം നാല് ഒഴിവാക്കി ബാക്കി വരുന്ന വാർഡുകളിൽനിന്നുവേണം സ്ത്രീസംവരണം നിശ്ചയിക്കാൻ. എന്നാൽ, കോളം നാല് പ്രകാരം നറുക്കെടുപ്പിൽനിന്ന് ഒഴിവാക്കേണ്ട എട്ടുവാർഡുകളുടെ കൂടെ ബാക്കി 14 വാർഡുകളിൽനിന്ന് മൂന്നു വാർഡുകൾ മാത്രമാണ് നറുക്കെടുത്തത്. ഇതുമൂലമാണ് അടുത്തടുത്ത വാർഡുകൾ സംവരണത്തിൽപ്പെട്ടതെന്നാണ് പരാതി.

ഇന്‍റർ സ്കൂൾ എക്കോ പെയിന്‍റിംഗ് മത്സരം

വാഴൂർ: ഏദൻ പബ്ലിക് സ്കൂൾ എക്കോ ക്ലബ്ബിന്‍റെ ആഭിമുഖ്യത്തിൽ 16-ാമത് ഇന്‍റർ സ്കൂൾ എക്കോ പെയിന്‍റിംഗ് മത്സരം നടത്തി. കേരള വ്യാപാരി വ്യവസായി ഏകോപന സമിതി പ്രസിഡന്‍റ് ടോമി ഡൊമിനിക് മത്സരം ഉദ്ഘാടനം ചെയ്തു. സ്കൂൾ മാനേജർ ടോം തോമസ്, പിടിഎ പ്രസിഡന്‍റ് കെ.ആർ. ഷാജി, പ്രിൻസിപ്പൽ മഞ്ജുള മാത്യു, അഡ്മിനിസ്ട്രേറ്റീവ് പ്രിൻസിപ്പൽ കിരൺ ജോസ്, എക്കോ ക്ലബ് കോ-ഓർഡിനേറ്റർ ലീന രാജീവൻ എന്നിവർ പ്രസംഗിച്ചു. ഇരുപത് സ്കൂളുകളിൽനിന്ന് ഇരുനൂറോളം കുട്ടികൾ പെയിന്‍റിംഗ് മത്സരത്തിൽ പങ്കെടുത്തു. ആശാനിലയം സ്പെഷൽ സ്കൂളിലെ കുട്ടികളുടെ ലഘുഭക്ഷണശാലയും നടത്തി.

കുന്നുംഭാഗം-പാലക്കയം റോഡ് ഉദ്ഘാടനം

പൊൻകുന്നം: പ്രധാനമന്ത്രി ഗ്രാമീണ സടക് യോജനയിൽപ്പെടുത്തി ചിറക്കടവ് പഞ്ചായത്തിലെ കുന്നുംഭാഗം-പാലക്കയം റോഡ് നവീകരിച്ചു. 4.68 കിലോമീറ്റർ ദൂരമുള്ള റോഡ് 3.53 കോടി രൂപ വിനിയോഗിച്ചാണ് നവീകരിച്ചത്. ആന്‍റോ ആന്‍റണി എംപി ഉദ്ഘാടനം ചെയ്തു. ചീഫ് വിപ്പ് ഡോ. എൻ. ജയരാജ് അധ്യക്ഷത വഹിച്ചു. പഞ്ചായത്ത് പ്രസിഡന്‍റ് സി.ആർ. ശ്രീകുമാർ മുഖ്യപ്രഭാഷണം നടത്തി. ബി. രവീന്ദ്രൻനായർ, ഫാ. മാത്യു വയലുങ്കൽ, എം.ടി. പ്രീത, എം.ജി. വിനോദ്, ആന്‍റണി മാർട്ടിൻ, കെ.ജി. രാജേഷ്, അഭിലാഷ് ചന്ദ്രൻ, സേവ്യർ മൂലകുന്ന്, ശ്യാം ബാബു തുടങ്ങിയവർ പ്രസംഗിച്ചു.

കൂട്ടിക്കലിൽ വനിതാ കലോത്സവം

കൂട്ടിക്കൽ: പഞ്ചായത്തിന്‍റെ വാർഷിക പദ്ധതിയിൽ ഉൾപ്പെടുത്തി വനിതാ കലോത്സവം നടത്തി. പഞ്ചായത്തിന്‍റെ വിവിധ വാർഡുകളിൽ നിന്നായി നൂറുകണക്കിന് വനിതകളാണ് തങ്ങളുടെ കഴിവുകൾ മാറ്റുരയ്ക്കാൻ അരങ്ങിലെത്തിയത്. കൂട്ടിക്കൽ സെന്‍റ് മേരീസ് ഓഡിറ്റോറിയത്തിൽ നടന്ന കലോത്സവം ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗർ ഉദ്ഘാടനം ചെയ്തു. പഞ്ചായത്ത് പ്രസിഡന്‍റ് ബിജോയ് ജോസ് മുണ്ടുപാലം അധ്യക്ഷത വഹിച്ചു. പഞ്ചായത്ത് വൈസ് പ്രസിഡന്‍റ് രജനി സുധീർ, ബ്ലോക്ക് പഞ്ചായത്ത് മെംബർ അനു ഷിജു, പഞ്ചായത്തംഗങ്ങൾ ഐസിഡിഎസ് സൂപ്പർവൈസർ എസ്. സിന്ധു തുടങ്ങിയവർ പ്രസംഗിച്ചു. സമാപന സമ്മേളനവും വിശിഷ്ടവ്യക്തികളെ ആദരിക്കലും സെബാസ്റ്റ്യൻ കുളത്തുങ്കൽ എംഎൽഎ ഉദ്ഘാടനം ചെയതു. കലോത്സവത്തിൽ വിജയികളായവർക്കുള്ള സമ്മാനദാനവും എംഎൽഎ നിർവഹിച്ചു.

അവകാശസംരക്ഷണ യാത്രയ്ക്ക് 21ന് കാഞ്ഞിരപ്പള്ളിയിൽ സ്വീകര

കാഞ്ഞിരപ്പള്ളി: സമുദായ ശക്തീകരണം രാഷ്‌ട്രപുരോഗതിക്ക് എന്ന ലക്ഷ്യവുമായി നീതി ഔദാര്യമല്ല അവകാശമാണ് എന്ന പ്രഖ്യാപനവുമായി കത്തോലിക്ക കോൺഗ്രസ് ഗ്ലോബൽ സമിതിയുടെ ആഭിമുഖ്യത്തിൽ പ്രസിഡന്‍റ് പ്രഫ. രാജീവ് കൊച്ചുപറമ്പിൽ നയിക്കുന്ന അവകാശ സംരക്ഷണയാത്രയ്ക്ക് 21ന് കാഞ്ഞിരപ്പള്ളിയിൽ സ്വീകരണം നൽകുമെന്ന് ഭാരവാഹികൾ പത്രസമ്മേളനത്തിൽ അറിയിച്ചു. 21നു രാവിലെ ഒന്പതിന് കോട്ടയം ജില്ലയുടെ പ്രവേശന കവാടമായ മുണ്ടക്കയത്ത് എത്തുന്ന യാത്രയ്ക്ക് മുണ്ടക്കയം വ്യാകുലമാതാ ഫൊറോന വികാരി റവ.ഡോ. ജയിംസ് മുത്തനാട്ടിന്‍റെ നേതൃത്വത്തിൽ സ്വീകരണം നൽകും. രാവിലെ 11ന് മരിയൻ തീർഥാടന കേന്ദ്രമായ കാഞ്ഞിരപ്പള്ളി പഴയ പള്ളി മൈതാനിയിൽ റാലി എത്തും. കത്തോലിക്ക കോൺഗ്രസ് നേതാക്കളും വിവിധ സംഘടനാ ഭാരവാഹികളും ജാഥാ ക്യാപ്റ്റനെ ഹാരമണിയിച്ച് സ്വീകരിക്കും. തുടർന്നു നടക്കുന്ന സ്വീകരണ സമ്മേളനം രൂപതാധ്യക്ഷൻ മാർ ജോസ് പുളിക്കൽ ഉദ്ഘാടനം ചെയ്യും. രൂപത പ്രസിഡന്‍റ് ബേബി കണ്ടത്തിൽ അധ്യക്ഷത വഹിക്കും. രൂപത വികാരി ജനറാൾ റവ.ഡോ. സെബാസ്റ്റ്യൻ കൊല്ലംകുന്നേൽ ആമുഖപ്രഭാഷണം നടത്തും. ഗ്ലോബൽ ജനറൽ സെക്രട്ടറി ഡോ. ജോസുകുട്ടി ഒഴുകയിൽ വിഷയാവതരണവും ഗ്ലോബൽ ഡയറക്ടർ റവ.ഡോ. ഫിലിപ്പ് കവിയിൽ മുഖ്യപ്രഭാഷണവും നടത്തും. ‌ഗ്ലോബൽ ഭാരവാഹികളായ ടോണി പുഞ്ചക്കുന്നേൽ, ബെന്നി ആന്‍റണി, രാജേഷ് ജോൺ, ട്രീസ ലിസ് സെബാസ്റ്റ്യൻ, ജോമി കൊച്ചുപറമ്പിൽ, ബിജു സെബാസ്റ്റ്യൻ, ജോർജ് കോയിക്കൽ, രൂപത ഡയറക്ടർ ഫാ. ജസ്റ്റിൻ മതിയത്ത്, ഭാരവാഹികളായ ജോസഫ് പണ്ടാരക്കളം, ഫിലിപ്പ് പള്ളിവാതുക്കൽ, ജോജോ തെക്കുംചേരിക്കുന്നേൽ, ടെസി ബിജു പാഴിയാങ്കൽ, ബിജു ശൗര്യാംകുഴി തുടങ്ങിയവർ പ്രസംഗിക്കും. മതേതരത്വ - ഭരണഘടനാ സംരക്ഷണം ഉറപ്പാക്കുക, ജെ.ബി. കോശി കമ്മീഷൻ റിപ്പോർട്ട് നടപ്പാക്കുക, വന്യമൃഗ ആക്രമണങ്ങൾക്ക് ശാശ്വത പരിഹാരം കണ്ടെത്തുക, കാർഷികോത്പന്നങ്ങൾക്ക് ന്യായവില ഉറപ്പാക്കുക, വിദ്യാഭ്യാസ-ന്യൂനപക്ഷ അവഗണന അവസാനിപ്പിക്കുക തുടങ്ങിയ ആവശ്യങ്ങൾ ഉന്നയിച്ചുകൊണ്ട് ഒക്ടോബർ 13ന് കാസർഗോട്ടുനിന്ന് ആരംഭിച്ച അവകാശ സംരക്ഷണയാത്ര 24ന് തിരുവനന്തപുരത്ത് സെക്രട്ടേറിയറ്റ് മാർച്ചോടെ സമാപിക്കും. പത്രസമ്മേളനത്തിൽ ഭാരവാഹികളായ ജോമി കൊച്ചുപറമ്പിൽ, ജോസഫ് പണ്ടാരക്കളം, ഫിലിപ്പ് നിക്കോളാസ് പള്ളിവാതുക്കൽ, ബിജു ശൗര്യാംകുഴി എന്നിവർ പങ്കെടുത്തു.

കാഞ്ഞിരപ്പള്ളി രൂപത കലോത്സവം കുട്ടിക്കാനത്ത്‌

കാഞ്ഞിരപ്പള്ളി: കുട്ടികളിലെ സർഗവാസനകളെ പരിപോഷിപ്പിക്കുന്നതിനായി കാഞ്ഞിരപ്പള്ളി രൂപത വിശ്വാസ പരിശീലന കേന്ദ്രത്തിന്‍റെ നേതൃത്വത്തിൽ നടത്തുന്ന രൂപത കലോത്സവം കുട്ടിക്കാനം മരിയൻ ഇന്‍റർനാഷണൽ ഇൻസ്റ്റിറ്റ്യൂട്ട് ഓഫ് മാനേജ്മെന്‍റിൽ നാളെ നടക്കും. രാവിലെ ഒന്പതിന് രജിസ്ട്രേഷനോടുകൂടി ആരംഭിക്കുന്ന പ്രോഗ്രാം 9.30ന്‍റെ പ്രാർഥനാശുശ്രൂഷയ്ക്ക് ശേഷം മരിയൻ ഇന്‍റർനാഷണൽ ഇൻസ്റ്റിറ്റ്യൂട്ട് ഓഫ് മാനേജ്മെന്‍റ് അഡ്മിനിസ്ട്രേറ്റർ റവ.ഡോ. ജോസ് ചിറ്റടി ഉദ്ഘാടനം ചെയ്യും. തുടർന്ന് ആറു വേദികളിലായി കലാമത്സരങ്ങൾ നടക്കും. രൂപതയിലെ 13 ഫൊറോനകളിൽനിന്ന് ഒന്നാം സ്ഥാനം കരസ്ഥമാക്കിയ 520 കുട്ടികൾ വിവിധ മത്സരങ്ങളിൽ പങ്കെടുക്കും. ഉച്ചകഴിഞ്ഞ് നടക്കുന്ന സമാപന സമ്മേളനത്തിൽ വികാരി ജനറാൾ ഫാ. ബോബി അലക്സ് മണ്ണംപ്ലാക്കൽ വിജയികൾക്ക് സമ്മാനങ്ങൾ വിതരണം ചെയ്യും.

അതിരൂപതാ സണ്‍ഡേസ്‌കൂള്‍ ബൈബിള്‍ കലോത്സവം ഇന്നാരംഭിക്കും

ചങ്ങനാശേരി: അതിരൂപതാ മതബോധനകേന്ദ്രമായ സന്ദേശനിലയത്തിന്‍റെ ആഭിമുഖ്യത്തിലുള്ള ബൈബിള്‍ കലോത്സവം എസ്ബി കോളജില്‍ (കാവുകാട്ട് നഗറില്‍) ഇന്ന് ആരംഭിക്കും. 18 ഫൊറോനകളില്‍നിന്നുള്ള രണ്ടായിരത്തിലധികം കലാപ്രതിഭകള്‍ കലോത്സവത്തില്‍ പങ്കെടുക്കും. രാവിലെ ഒമ്പതിന് ജോമ്മ കാട്ടടി പതാക ഉയര്‍ത്തുന്നതോടെ സമ്മേളനത്തിനു തുടക്കമാകും. ഫാ. ഷെറിന്‍ കുറശേരി ബൈബിള്‍ പ്രതിഷ്ഠ നടത്തും. തുടര്‍ന്നു നടക്കുന്ന സമ്മേളനം വികാരി ജനറാള്‍ മോണ്‍. മാത്യു ചങ്ങങ്കരി ഉദ്ഘാടനം ചെയ്യും. ഡയറക്ടര്‍ ഫാ. ബാബു പുത്തന്‍പുരയ്ക്കല്‍ അധ്യക്ഷത വഹിക്കും. എസിസി സെക്രട്ടറി പ്രിന്‍സ് ചിറ്റേട്ടുകളം പ്രസംഗിക്കും. തുടർന്ന് കലാമത്സരങ്ങള്‍ ആരംഭിക്കും. 20ന് വൈകുന്നേരം 4.30ന് നടക്കുന്ന സമാപന സമ്മേളനം ആര്‍ച്ച്ബിഷപ് മാര്‍ തോമസ് തറയില്‍ ഉദ്ഘാടനം ചെയ്യും. ഡയറക്ടര്‍ ഫാ. ബാബു പുത്തന്‍പുരയ്ക്കല്‍ അധ്യക്ഷത വഹിക്കും. എസിസി കണ്‍വീനര്‍ ബോബി തോമസ്, സിജോ ആന്‍റണി എന്നിവര്‍ പ്രസംഗിക്കും. പ്രോലൈഫ് ട്രെയിനിംഗ് 20ന് ചങ്ങനാശേരി: അതിരൂപതയില്‍ പ്രോലൈഫ് പ്രവര്‍ത്തനങ്ങള്‍ ആരംഭിച്ചിട്ട് 25 വര്‍ഷം തികയുന്ന വേളയില്‍ അതിരൂപതാ ജീവന്‍ ജ്യോതിസ് പ്രോലൈഫ്‌ സെല്‍ ശുശ്രൂഷകര്‍, മാതൃ-പിതൃ വേദി നേതൃനിര, ജീവസംരക്ഷണ പ്രേഷിതര്‍ എന്നിവര്‍ക്കായുള്ള ഏകദിന പ്രോലൈഫ് ട്രെയിനിംഗ് 20നു രാവിലെ 10 മുതല്‍ മൂന്നുവരെ ചങ്ങനാശേരി പാസ്റ്ററല്‍ സെന്‍ററില്‍ നടക്കും. ആര്‍ച്ച്ബിഷപ് മാര്‍ തോമസ് തറയില്‍ ഉദ്ഘാടനം ചെയ്യും. ഫാമിലി അപ്പൊസ്തലേറ്റ് ഡയറക്ടര്‍ ഫാ. സെബാസ്റ്റ്യന്‍ ചാമക്കാല, കോ-ഓര്‍ഡിനേറ്റര്‍ ഏബ്രഹാം പുത്തന്‍കളം എന്നിവര്‍ ജീവന്‍റെ ഉത്ഭവവും വളര്‍ച്ചയും മനുഷ്യജീവന്‍ നേരിടുന്ന വെല്ലുവിളികള്‍, ഗര്‍ഭഛിദ്രം, വലിയ കുടുംബങ്ങളുടെ പ്രസക്തി, ജീവന്‍റെ മൂല്യവും മനഃസാക്ഷി രൂപീകരണവും, പ്രോലൈഫ് ശുശ്രൂഷയുടെ പ്രസക്തി, സമൂഹത്തില്‍ പ്രചരിക്കുന്ന ജീവവിരുദ്ധത എന്നീ വിഷയങ്ങളില്‍ ക്ലാസുകള്‍ നയിക്കും.

കങ്ങഴയില്‍ വികസനസദസ്

കോട്ടയം: കങ്ങഴ പഞ്ചായത്തിലെ വികസന സദസ് ചീഫ് വിപ്പ് ഡോ.എന്‍. ജയരാജ് ഉദ്ഘാടനം ചെയ്തു. പഞ്ചായത്ത് കമ്യൂണിറ്റി ഹാളില്‍ നടന്ന ചടങ്ങില്‍ പ്രസിഡന്‍റ് കെ.എസ്. റാംലാ ബീഗം അധ്യക്ഷത വഹിച്ചു. സംസ്ഥാന സര്‍ക്കാരിന്‍റെ വികസന നേട്ടങ്ങള്‍ റിസോഴ്‌സ് പേഴ്‌സണ്‍ എസ്.കെ. ശ്രീനാഥും പഞ്ചായത്തിന്‍റെ വികസന നേട്ടങ്ങള്‍ സെക്രട്ടറി കെ.എം. ഷീബാമോളും അവതരിപ്പിച്ചു. വാഴൂര്‍ ബ്ലോക്ക് പഞ്ചായത്ത് പ്രസിഡന്‍റ് മുകേഷ് കെ. മണി, പഞ്ചായത്ത് വൈസ് പ്രസിഡന്‍റ് ഷിബു ഫിലിപ്പ്, പഞ്ചായത്തംഗങ്ങളായ ജയാ സാജു, എം.എ. ആന്ത്രയോസ്, വത്സലകുമാരി എ.എം. മാത്യു എന്നിവര്‍ പങ്കെടുത്തു.

ആലംപറമ്പ് - കോയിപ്പുറം റോഡ് നിര്‍മാണം പൂര്‍ത്തിയാക്കി

തൃക്കൊടിത്താനം: പഞ്ചായത്ത് പതിനൊന്നാം വാര്‍ഡിലെ ആലംപറമ്പ് - കോയിപ്പുറം റോഡ് നിര്‍മാണം പൂര്‍ത്തിയാക്കി. ജോബ് മൈക്കിള്‍ എംഎല്‍എ ഉദ്ഘാടനം നിര്‍വഹിച്ചു. എംഎല്‍എയുടെ ആസ്തി വികസന ഫണ്ടില്‍നിന്നും 27 ലക്ഷം രൂപ മുതല്‍മുടക്കിയാണ് റോഡ് നിര്‍മാണം പൂര്‍ത്തിയാക്കിയത്. വര്‍ഷങ്ങളായി തകര്‍ന്നു കിടന്ന് യാത്രയോഗ്യമല്ലായിരുന്ന റോഡാണിത്. യോഗത്തില്‍ വാര്‍ഡ് മെംബര്‍ പി.ടി. ബിനു, ഷാജി കോലേട്ട്, സജി ചാക്കോ തുടങ്ങിയവര്‍ പ്രസംഗിച്ചു.

60-ാം വിവാഹവാര്‍ഷികം ഭിന്നശേഷിക്കാർക്കൊപ്പം ആഘോഷിക്കാൻ ദന്പതികൾ

ചങ്ങനാശേരി: എന്‍എസിസി ഉദ്യോഗസ്ഥരായിരുന്ന ഫാത്തിമാപുരം മുരിക്കനാട്ട് ജോര്‍ജ് തോമസ്-സെലിന്‍ ദമ്പതികളുടെ അറുപതാം വിവാഹവാര്‍ഷികാഘോഷം ഭിന്നശേഷിക്കാരോടൊപ്പമാണ്. കുന്നന്താനം ദൈവപരിപാലന ഭവനില്‍ ഇന്നാണ് ആഘോഷപരിപാടികള്‍. ജോര്‍ജ് തോമസ് എന്‍സിസി വിഭാഗത്തിലെ സൂപ്രണ്ടും സെലിന്‍ അതേവിഭാഗത്തിലെ തന്നെ ഉദ്യോഗസ്ഥയുമായിരുന്നു. സമുദായ, സാമൂഹിക, സാംസ്‌കാരിക, രംഗത്തെ സജീവ പ്രവര്‍ത്തകരാണ് ഈ ദമ്പതികള്‍. ഉദ്യോഗകാണ്ഡം, മൈത്രി, മനാസേ(നോവല്‍), എമ്പയര്‍ സ്റ്റേറ്റ് തുടങ്ങിയ പുസ്തകങ്ങളുടെ രചയിതാവും എസ്‌വിഡി സെമിനാരി സ്ഥാപകന്‍ ആര്‍നോള്‍ഡ് ജാന്‍സന്‍റെ ജീവചരിത്രത്തിന്‍റെ മലയാള വിവര്‍ത്തകനുമാണ്. മക്കള്‍: ഡോ. ഷൈന്‍ ജോര്‍ജ്, നിഷ സന്തോഷ്, ഡോ. നിമിഷ ആനി ഫിലിപ്പ്.

റോഡുകളുടെ റീടാറിംഗിന് ഒരു കോടി 60 ലക്ഷം അനുവദിച്ചു: ഡോ.എന്‍. ജയരാജ്

കറുകച്ചാല്‍: കാഞ്ഞിരപ്പള്ളി നിയോജക മണ്ഡലത്തിലെ പ്രകൃതിക്ഷോഭത്തില്‍ തകര്‍ന്ന റോഡുകളുടെ പുനരുദ്ധാരണ പദ്ധതിയില്‍പ്പെടുത്തി അറ്റകുറ്റപ്പണികള്‍ നടത്തുന്നതിന് ഒരു കോടി 60 ലക്ഷം രൂപ അനുവദിച്ചതായി ചീഫ് വിപ്പ് ഡോ.എന്‍. ജയരാജ് അറിയിച്ചു. പ്രസ്തുത പദ്ധതിയില്‍ ഉള്‍പ്പെടുത്തുന്നതിന് റോഡുകളുടെ പട്ടിക റവന്യൂമന്ത്രിക്ക് നല്‍കിയിരുന്നതിന്‍റെ അടിസ്ഥാനത്തിലാണ് അനുമതി ലഭിച്ചത്. ടെന്‍ഡര്‍ നടപടികള്‍ പൂര്‍ത്തിയാക്കി നിര്‍മാണ പ്രവൃത്തികള്‍ എത്രയും വേഗം ആരംഭിക്കാനാകുമെന്ന് പ്രതീക്ഷിക്കുന്നതായി ചീഫ് വിപ്പ് അറിയിച്ചു.

പുനര്‍ജനിക്കുമോ, ചങ്ങനാശേരിയിലെ പടിഞ്ഞാറന്‍ ബൈപാസ്...?

ചങ്ങനാശേരി: ചങ്ങനാശേരിയിലെ പടിഞ്ഞാറന്‍ ബൈപാസ് എന്ന ജനകീയ ആഗ്രഹം ഇനിയും അകലെ. ചങ്ങനാശേരി നഗരത്തിലെ ഗതാഗതക്കുരുക്കഴിക്കാന്‍ വര്‍ഷങ്ങള്‍ക്കുമുമ്പ് പദ്ധതിയിട്ടതായിരുന്നു പടിഞ്ഞാറന്‍ ബൈപാസ്. എംസി റോഡില്‍ (ഇപ്പോഴത്തെ എന്‍എച്ച്-183) ചങ്ങനാശേരി നഗരപരിധിയിലെ പാലാത്രച്ചിറയില്‍ ആരംഭിച്ച് വാഴപ്പള്ളി, പായിപ്പാട്, പെരിങ്ങര പഞ്ചായത്തുകളെ ബന്ധിപ്പിച്ച് ഇടിഞ്ഞില്ലത്തിനു സമീപം എംസി റോഡില്‍(എന്‍എച്ച്-183) എത്തിച്ചേരുന്ന വിധത്തിലായിരുന്ന ഈ ബൈപാസ് വിഭാവനം ചെയ്തിരുന്നത്. ളായിക്കാട്-പാലാത്രച്ചിറ ചങ്ങനാശേരി കിഴക്കന്‍ ബൈപാസ് പൂര്‍ത്തിയായതിനു പിന്നാലെ 2012 കാലഘട്ടത്തില്‍ അന്നത്തെ എംഎല്‍എയായിരുന്ന സി.എഫ്. തോമസാണ് പടിഞ്ഞാറന്‍ ബൈപാസിനുള്ള പദ്ധതി വിഭാവനം ചെയ്തത്. ബൈപാസ് നിര്‍മാണത്തിനായി 57 കോടി രൂപയും സര്‍ക്കാര്‍ അനുവദിച്ചിരുന്നു. വീടുകള്‍ പൊളിക്കേണ്ട സാഹചര്യം പരമാവധി ഒഴിവാക്കി ചതുപ്പുനിലം നികത്തി ബൈപാസ് നിര്‍മിക്കാനായിരുന്നു പൊതുമരാമത്തുവകുപ്പ് അന്ന് അലൈന്‍മെന്‍റ് തയാറാക്കിയത്. നിയമക്കുരുക്കുകളും കേസുകളും ഒഴിവാക്കാനാണ് പാടശേഖരങ്ങളിലൂടെ പദ്ധതി ആവിഷ്‌കരിച്ചത്. റോഡു കടന്നുപോകുന്ന ഭാഗത്ത് പൊതുമരാമത്തു വകുപ്പ് കല്ലുകള്‍ വരെ സ്ഥാപിച്ച് സര്‍വേ നടപടികളും പൂര്‍ത്തിയാക്കി ഫാസ്റ്റ് ട്രാക്കില്‍പ്പെടുത്തി സ്ഥലം ഏറ്റെടുക്കുന്ന നടപടിയുടെ അന്ത്യഘട്ടംവരെ എത്തിയിരുന്നു. ബൈപാസിന്‍റെ രൂപരേഖ ഇപ്രകാരമായിരുന്നു എംസി റോഡില്‍ പാലാത്രച്ചിറയില്‍ ആരംഭിച്ച് കോണത്തോട്, കുറ്റിശേരിക്കടവ്, പറാല്‍, വെട്ടിത്തുരുത്ത് ഭാഗങ്ങളിലൂടെ കടന്ന് ചങ്ങനാശേരി-ആലപ്പുഴ റോഡിലെത്തി എസി കനാലിനു കുറുകെ പാലം നിര്‍മിച്ച് പെരുമ്പുഴക്കടവു വഴി ളായിക്കാടിനു സമീപം എത്തിച്ചേരുന്ന വിധമായിരുന്ന ബൈപാസിന്‍റെ രൂപരേഖ. മുപ്പതുമീറ്റര്‍ വീതിയില്‍ എട്ടു കിലോമീറ്റര്‍ ദൂരം വരുന്നതായിരുന്നു പദ്ധതി. ളായിക്കാട്-പാലാത്രച്ചിറ കിഴക്കന്‍ ബൈപാസും നിര്‍ദിഷ്‌ട പടിഞ്ഞാറന്‍ ബൈപാസും ബന്ധിപ്പിച്ച് ചങ്ങനാശേരി നഗരത്തിലെ റിംഗ് റോഡ് എന്ന നിലയില്‍ നിര്‍മിക്കാനായിരുന്ന ആസൂത്രണം. ബൈപാസിന് പ്രതിസന്ധിയായി നീര്‍ത്തട-നെല്‍വയല്‍ സംരക്ഷണ നിയമം ബൈപാസ് രൂപകല്പന ചെയ്തിരുന്നത് ഭൂരിഭാഗവും ചതുപ്പും നെല്‍വയലും നിറഞ്ഞ പ്രദേശത്തുകൂടിയായിരുന്നു. നീര്‍ത്തട നെല്‍വയല്‍ സംരക്ഷണ സമിതിയുടെ അനുമതി പദ്ധതിക്ക് അനിവാര്യമായിരുന്നു. നീര്‍ത്തട നെല്‍വയല്‍ സംരക്ഷണ നിയമാണ് ബൈപാസ് നിര്‍മാണത്തിനു പ്രതിസന്ധിയായത്. പടിഞ്ഞാറന്‍ മേഖലയുടെ വികസനത്തിന് ഏറെ ഉപകരിക്കുന്നതായിരുന്നു ഈ ബൈപാസ് പദ്ധതി. ആളുകള്‍ക്ക് വലിയതോതില്‍ പ്രതിസന്ധി സൃഷ്ടിക്കാത്ത ഈ പദ്ധതി പുനരാവിഷ്‌കരിച്ചാല്‍ ചങ്ങനാശേരിക്ക് ഏറെ ഉപകാരപ്പെടുമെന്ന നിര്‍ദേശമാണ് നിലനില്‍ക്കുന്നത്.

അഞ്ചുവിളക്കിന്‍റെ നാട് എങ്ങോട്ട് ?

തെക്കുംകൂര്‍ രാജഭരണത്തിലായിരുന്ന ചങ്ങനാശേരി സാസ്‌കാരിക, വിദ്യാഭ്യാസ പാരമ്പര്യങ്ങൾക്കും മതമൈത്രിക്കും ഖ്യാതി കേട്ട നഗരമാണ്. പുരാതനപ്രശസ്തമായ ചങ്ങനാശേരി അതിരൂപതയുടെയും നായര്‍ സര്‍വീസ് സൊസൈറ്റിയുടെയും ആസ്ഥാനങ്ങള്‍ ചങ്ങനാശേരി ഇവിടെയാണെന്നതും അഞ്ചുവി ളക്കിന്‍റെ നാടിനെ അതുല്യമാക്കുന്നു. പുണ്യപിതാക്കന്മാരുടെ കബറിടംകൊണ്ട് പവിത്രമായ കത്തീഡ്രല്‍ പള്ളിയും, തങ്ങള്‍മാരുടെ ഓര്‍മകള്‍ നിലനില്‍ക്കുന്ന മുസ്‌ലിം പഴയ പള്ളിയും മഹാത്മജിയുടെയും ശ്രീനാരായണഗുരുവിന്‍റെയും പാദസ്പര്‍ശത്താല്‍ ധന്യമായ ആനന്ദാശ്രമവും അതിപ്രശസ്തമായ വിദ്യാഭ്യാസ സ്ഥാപനങ്ങളും ചങ്ങനാശേരിയുടെ അഭിമാനസ്തംഭങ്ങളാണ്. 1805ല്‍ വേലുത്തമ്പി ദളവ ചങ്ങനാശേരി ചന്ത ഉദ്ഘാടനം ചെയ്തതിന്‍റെ ഓര്‍മയ്ക്കായി സ്ഥാപിച്ച അഞ്ചുവിളക്ക് ചരിത്ര പ്രസിദ്ധമാണ്. നൂറ്റാണ്ടു പിന്നിട്ട മുനിസിപ്പല്‍ നഗരമെന്ന പ്രശസ്തിയും പ്രഗത്ഭരായ ഭരണാധികാരികള്‍ നയിച്ചുവെന്ന ബഹുമതിയും ചങ്ങനാശേരി നഗരസഭയ്ക്കുണ്ട്. മധ്യതിരുവിതാംകൂറില്‍ കോട്ടയം ജില്ലയുടെ തെക്കേയറ്റത്തുള്ള ചങ്ങനാശേരിയുടെ മൂന്നുവശവും പുഞ്ചപ്പാടങ്ങൾ അതിരിട്ട ദ്വീപു പോലെ യാണ്്. കുട്ടനാടിന്‍റെയും മലനാടിന്‍റെയും സംഗമഭൂമി കൂടിയാണ് മതമൈത്രിക്കും പേരുകേട്ട ചങ്ങനാശേരി. കഴിഞ്ഞ കാല്‍ നൂറ്റാണ്ടിനിടെ കാലുമാറ്റത്തിലും കൂറുമാറ്റത്തിലും ഇടതു-വലതു ഭരണങ്ങള്‍ അട്ടിമറിക്കപ്പെട്ട് സ്ഥിരതയില്ലാത്ത സമിതികള്‍ മാറിമാറി ഭരണത്തിലെത്തിയ രാഷ്‌ട്രീയചരിത്രവും ചങ്ങനാശേരി നഗരസഭയ്ക്കുണ്ട്. ഒറ്റനോട്ടത്തില്‍ വിസ്തീര്‍ണം: 13.5 ച.മീ. ആകെ ജനസംഖ്യ: 47,694. വാര്‍ഡുകൾ: 37. പുനര്‍വിഭജനത്തില്‍ വാര്‍ഡുകളിലെ വീടുകള്‍ തമ്മില്‍ മാറ്റങ്ങള്‍ ഉണ്ടായെങ്കിലും വാര്‍ഡുകളുടെ എണ്ണത്തില്‍ മാറ്റമില്ല. 2020 ഡിസംബറിലെ തെരഞ്ഞെടുപ്പിനുശേഷം യുഡിഎഫിന്‍റെ പിന്തുണയോടെ സ്വതന്ത്രാംഗങ്ങളായ സന്ധ്യ മനോജ് -ചെയര്‍പേഴ്‌സണ്‍, ബെന്നി ജോസഫ് -വൈസ് ചെയര്‍മാന്‍ എന്നിവരുടെ നേതൃത്വത്തില്‍ ഭരണസമിതി നിലവില്‍ വന്നു. 31 മാസം തികഞ്ഞപ്പോള്‍ യുഡിഎഫ് പക്ഷത്തായിരുന്ന ക്ഷേമകാര്യ സ്റ്റാന്‍ഡിംഗ് കമ്മിറ്റി ചെയര്‍പേഴ്‌സണും സ്വതന്ത്രാംഗവുമായ ബീന ജോബിയും രണ്ട് കോണ്‍ഗ്രസ് അംഗങ്ങളും എല്‍ഡിഎഫ് കൊണ്ടുവന്ന അവിശ്വാസത്തെ പിന്തുണച്ചതോടെ യുഡിഎഫിന് ഭരണം നഷ്ടപ്പെട്ടു. ബീനാ ജോബി ചെയര്‍പേഴ്‌സണും മാത്യൂസ് ജോര്‍ജ് വൈസ് ചെയര്‍മാനുമായ ഇടതു ഭരണസമിതി നിലവില്‍ വന്നു. ഒരു വര്‍ഷത്തിനുശേഷം ബീന ജോബി രാജിവച്ചു. സിപിഎം അംഗമായ കൃഷ്ണകുമാരി രാജശേഖരന്‍ ചെയര്‍പേഴ്‌സണാകുകയും ചെയ്തു. ആദ്യ കക്ഷിനില അംഗങ്ങള്‍: 37 കോണ്‍ഗ്രസ്-ഒമ്പത്. കേരള കോണ്‍ഗ്രസ്-നാല്, ലീഗ്-ഒന്ന്, സ്വതന്ത്രര്‍-നാല്, സിപിഎം-13, കേരള കോണ്‍-എം-ഒന്ന്, ജനാധിപത്യ കേരള കോണ്‍ഗ്രസ്-ഒന്ന്, സിപിഐ-ഒന്ന്, ബിജെപി-മൂന്ന്. ഇപ്പോഴത്തെ കക്ഷിനില അംഗങ്ങള്‍: 35 കോണ്‍ഗ്രസ്-ഏഴ്, കേരള കോണ്‍ഗ്രസ്-നാല്, ലീഗ്-ഒന്ന്, സ്വതന്ത്രര്‍-നാല്, സിപിഎം-13, കേരള കോണ്‍ഗ്രസ് എം-ഒന്ന്, ജനാധിപത്യ കേരള കോണ്‍ഗ്രസ്-ഒന്ന്, സിപിഐ-ഒന്ന്, ബിജെപി-മൂന്ന്. കൂറുമാറി എല്‍ഡിഎഫിനെ പിന്തുണച്ച രണ്ട് കോണ്‍ഗ്രസ് അംഗങ്ങളെ തെരഞ്ഞെടുപ്പ് കമ്മീഷന്‍ പുറത്താക്കി. നേട്ടങ്ങള്‍ കേരളത്തില്‍ ആദ്യമായി ചങ്ങനാശേരി നഗരസഭയില്‍ സിഎന്‍ജി പ്ലാന്‍റിന് 23.50 കോടിയുടെ ലോകബാങ്കിന്‍റെ ധനസഹായ അംഗീകാരം. കുടിവെള്ളത്തിന് 15 കോടിയുടെ പദ്ധതി. ഏഴുകിലോമീറ്റര്‍ പുതിയ പൈപ്പും ആറു കിലോമീറ്റര്‍ പൈപ്പുകളുടെ അറ്റകുറ്റപ്പണികളും. 255 കുടുംബങ്ങള്‍ക്ക് സൗജന്യ കുടിവെള്ള കണക‌്ഷന്‍. 448 കുടുംബങ്ങള്‍ക്ക് ലൈഫ് വീടുകള്‍. 37 വാര്‍ഡുകളിള്‍ 23 കോടിയുടെ റോഡ് നവീകരണം. 15 ഹൈമാസ്റ്റ് വിളക്കുകള്‍, 57 മിനിമാസ്റ്റ്‌ വിളക്കുകള്‍. വിവിധ വാര്‍ഡുകളില്‍ വഴിവിളക്കുകള്‍ തെളിക്കാന്‍ സയമബന്ധിത നടപടി. ശുചിമുറി മാലിന്യസംസ്‌കരണം ആധുനികവത്കരിക്കാന്‍ മൊബൈല്‍ സെപ്‌റ്റേജ് ട്രീറ്റ്‌മെന്‍റ് യൂണിറ്റ്. ഹരിതകര്‍മസേനയുടെ കാര്യക്ഷമമായ പ്രവര്‍ത്തനം. പ്ലാസ്റ്റിക് മാലിന്യനിര്‍മാജനത്തില്‍ മുന്നേറ്റം. തുമ്പൂര്‍മൂഴി മാതൃക മാലിന്യ സംസ്‌കരണം വിജയകരം. മാലിന്യ സംസ്‌കരണ വികേന്ദ്രീകരണത്തിന്‍റെ ഭാഗമായി 5000 കുടുംബങ്ങളില്‍ ജി-ബിന്നുകള്‍. നഗരത്തിലെ ആറു കുളങ്ങളുടെ നവീകരണം. നഗരത്തില്‍ വാഴപ്പള്ളി, കുന്നക്കാട്, ആനന്ദാശ്രമം എന്നിവിടങ്ങളില്‍ ആരോഗ്യ കേന്ദ്രങ്ങള്‍. കൃഷ്ണകുമാരി രാജശേഖരന്‍ ചെയര്‍പേഴ്‌സണ്‍, ചങ്ങനാശേരി നഗരസഭ കോട്ടങ്ങള്‍ യുഡിഎഫ് തുടങ്ങിവച്ച പദ്ധതികള്‍ പൂര്‍ത്തീകരിച്ചില്ല. അവസാന രണ്ടുവര്‍ഷങ്ങളില്‍ വാര്‍ഡ് വികസന ഫണ്ടുകള്‍ 80 ശതമാനവും വിനിയോഗിച്ചിട്ടില്ല. കഴിഞ്ഞ മാര്‍ച്ചില്‍ ബജറ്റില്‍ പ്രഖ്യാപിച്ച പത്തുലക്ഷം രൂപ വീതം വാര്‍ഡ് വര്‍ക്കുകളുടെ പ്രാരംഭഘട്ടം പോലുമായില്ല. ബജറ്റുകളില്‍ പ്രഖ്യാപിച്ച വേഴക്കാട്ടുചിറയിലെ ഗസ്റ്റ് ഹൗസ് സമുച്ചയം തുടങ്ങിയില്ല. മാലിന്യമുക്ത പദ്ധതി പ്രഖ്യാപനത്തില്‍ മാത്രം. ബയോറമഡിയേഷന്‍, തുമ്പൂര്‍മൂഴി മാലിന്യസംസ്‌കരണം പദ്ധതികള്‍ കാര്യക്ഷമമല്ല. നഗരത്തിലെ മിനിമാസ്റ്റുകളടക്കം വഴിവിളക്കുകള്‍ അണഞ്ഞിട്ട് പത്തുമാസം. റോഡുകളുടെ അറ്റകുറ്റപ്പണികള്‍ നടത്തിയിട്ടില്ല. വാഹനപാര്‍ക്കിംഗിന് ക്രമീകരണങ്ങൾ ഏര്‍പ്പെടുത്താനായില്ല. ഓടകളും തോടുകളും മാലിന്യപൂരിതം. മാര്‍ക്കറ്റിലേതടക്കം നഗരസഭയുടെ കടമുറികളുടെ അറ്റകുറ്റപ്പണികള്‍ ശ്രദ്ധിച്ചിട്ടില്ല. നഗരത്തിലെ ഒന്നാംനമ്പര്‍ ബസ്‌സ്റ്റാന്‍ഡ് വികസനവും പെരുന്ന ബസ് സ്റ്റാന്‍ഡ് പരിപാലനവും നടന്നില്ല. ജോമി ജോസഫ് യുഡിഎഫ് പാര്‍ലമെന്‍ററി പാര്‍ട്ടി ലീഡര്‍, ചങ്ങനാശേരി നഗരസഭ.

പണം വാങ്ങിയിട്ടും റോഡുപണി ആരംഭിക്കാത്തതിൽ പ്രതിഷേധം

വൈക്കം: അംഗപരിമിത ദമ്പതികൾക്ക് യാത്രാസൗകര്യം ഒരുക്കുന്നതിന് തൊഴിലുറപ്പ് പദ്ധതിയിൽപ്പെടുത്തി റോഡ് നിർമിച്ചു നൽകാമെന്ന് വാഗ്ദാനം നൽകി റോഡുനിർമിക്കുന്നതിനുഅംഗപരിമിത ദമ്പതികളിൽ നിന്നടക്കം പണം വാങ്ങിയിട്ടും പണി ആരംഭിക്കാത്തതിൽ പ്രതിഷേധം. അംഗപരിമിതനായ തലയാഴം അമ്പാനപ്പള്ളി കാട്ടുതറ രമേശൻ,സമീപസ്ഥലം ഉടമകളായ രണ്ടു പേർ എന്നിവരിൽ നിന്നടക്കം 15-ാം വാർഡ് മെംബർ ഇടപ്പെട്ട് 20,000 രൂപ നിർമാണം നടത്താമെന്നേറ്റയാൾക്ക് നൽകി ഒരുമാസം കഴിഞ്ഞിട്ടും പണി ആരംഭിച്ചില്ലെന്നാണ് ആരോപണം. 130 മീറ്റർ ദൈർഘ്യമുള്ള റോഡ് മണ്ണിട്ടുയർത്തി സഞ്ചാരയോഗ്യമാക്കാൻ 4,44,000 രൂപയുടെ പദ്ധതിയാണ് പഞ്ചായത്ത് വിഭാവനം ചെയ്തത്. രമേശനും പൊതുപ്രവർത്തകനായ ജിതിനും പണി ആരംഭിക്കാത്തകാര്യം പഞ്ചായത്തിലെത്തി സംസാരിച്ചപ്പോൾ പ്രസിഡന്‍റടക്കം ഇവരോട് കയർത്ത് സംസാരിച്ചെന്നും രമേശൻ ആരോപിച്ചു. കാഴ്ചത്തകരാർ വന്നതോടെ രമേശന്‍റെ ഭാര്യ കുത്തുമണി വീട്ടിലിരിപ്പായി. മുച്ചക്ര വാഹനത്തിൽ പുറത്തു പോയിവരുന്ന രമേശൻ വീട്ടിലേക്കുള്ള വഴി ചെളിക്കുളമായതോടെ വീട്ടിൽനിന്നു കുറച്ച് അകലെയുള്ള വീട്ടുവളപ്പിൽ വാഹനം വച്ചശേഷം വടിയിലൂന്നി ചെറുവള്ളത്തിൽ കയറിയാണ് കരിയാറിന്‍റെ തീരത്തുള്ള വീട്ടിൽ എത്തുന്നത്. വീട് താഴ്ന്ന പ്രദേശത്തായതിനാൽ കരിയാറിൽ ജലനിരപ്പുയർന്നാൽ രമേശന്‍റെ വീടും പരിസരവും വെള്ളക്കെട്ടിലാകും. കൂലിപ്പണിക്കാരനായ മകന്‍റെ വരുമാനത്തിലാണ് കുടുംബം കഴിയുന്നത്. നൂറുവർഷത്തിലധികമായി രമേശന്‍റെ കുടുംബം ഇവിടെയാണ് താമസിക്കുന്നത്. നവകേരള സദസിൽ വഴിക്കായി രമേശൻ പരാതി നൽകിയപ്പോൾ ഉടൻ വഴി നിർമിക്കാമെന്ന് സർക്കാരിന് പഞ്ചായത്ത് ഉറപ്പു നൽകി രണ്ടു വർഷം കഴിഞ്ഞിട്ടും പാലിച്ചില്ലെന്ന് രമേശൻ പറഞ്ഞു. എൽഡിഎഫ് സമരം നടത്തി അംഗപരിമിത ദമ്പതികൾക്ക് യാത്രാ സൗകര്യം ഒരുക്കുന്നതിൽ വീഴ്ച വരുത്തിയ വാർഡ് മെമ്പറും പഞ്ചായത്ത് പ്രസിഡന്‍റും രാജിവയ്ക്കണമെന്നാവശ്യപ്പെട്ടു എൽഡിഎഫ് തലയാഴം പഞ്ചായത്ത് കമ്മിറ്റിയുടെ നേതൃത്വത്തിൽ പഞ്ചായത്ത് ഓഫീസിലേക്ക് പ്രതിഷേധ മാർച്ചും ധർണയും നടത്തി. മാർച്ചും ധർണയും സി പി ഐ മണ്ഡലം സെക്രട്ടറി എം.ഡി.ബാബുരാജ് ഉദ്ഘാടനം ചെയ്തു. സിപിഎം ഏരിയാ കമ്മിറ്റി അംഗം എസ്.ദേവരാജൻ അധ്യക്ഷത വഹിച്ചു.

ലോഗോസ് ക്വിസ് : അമ്മയും മക്കളും രൂപതാതല വിജയികൾ

കുറവിലങ്ങാട്: മാതാപിതാക്കളും മക്കളും ഒരുമിച്ചിരുന്ന് വചനം പഠിച്ചു. ഫലം വന്നപ്പോൾ അമ്മയ്ക്കും മക്കൾക്കും പാലാ രൂപതാതലത്തിൽ മിന്നുന്ന വിജയം. ലോഗോസ് ക്വിസിലാണ് രൂപതാതലത്തിലെ രണ്ട് ഒന്നാംസ്ഥാനങ്ങളും ഒരു മൂന്നാംസ്ഥാനവും ഒരു വീട്ടിലേക്ക് എത്തിയത്. മേജർ ആർക്കിഎപ്പിസ്‌കോപ്പൽ മർത്ത്മറിയം അർക്കദിയാക്കോൻ തീർഥാടന ഇടവകയിലെ വടക്കേവെള്ളാക്കൽ വീട്ടിലാണ് വചനമനനത്തിന്‍റെ ഒന്നാംസ്ഥാനങ്ങൾ ഒരുമിച്ചെത്തിയത്. പുത്തൻകുരിശ് മുത്തൂറ്റ് എൻജിനിയറിംഗ് കോളജ് അധ്യാപകനായ വടക്കേവെള്ളാക്കൽ ഡോ. റിജോ സെബാസ്റ്റ്യന്‍റെ ഭാര്യ ഡിന്‍റ ഫ്രാൻസിസ്, മക്കളായ ആൽബർട്ട് റിജോ, ആഗ്‌നസ് റിജോ എന്നിവരാണ് മിന്നും വിജയം നേടിയത്. ഡി വിഭാഗത്തിൽ ഒന്നാംസ്ഥാനം നേടിയ ഡിന്‍റ ഫ്രാൻസിസ് മോനിപ്പള്ളി പോസ്റ്റ്ഓഫീസിൽ പോസ്റ്റ് മിസ്ട്രസാണ്. ആൽബർട്ടും ആഗ്‌നസും നസ്രത്ത്ഹിൽ ഡി പോൾ സ്‌കൂൾ വിദ്യാർഥികളാണ്. എ കാറ്റഗറിയിലാണ് ആൽബർട്ടിന്‍റെ ഒന്നാംസ്ഥാനം. ആഗ്‌നസ് ബി കാറ്റഗറിയിൽ രൂപതാതലത്തിൽ മൂന്നാം സ്ഥാനത്താണ്. 2023ൽ സംസ്ഥാനതലത്തിൽ നാലാം സ്ഥാനം ആഗ്‌നസ് നേടിയിരുന്നു. വിജയികളെ ആർച്ച്പ്രീസ്റ്റ് റവ.ഡോ. തോമസ് മേനാച്ചേരി, അസി. വികാരി ഫാ. ജോസഫ് ചൂരയ്ക്കൽ, സോൺ ലീഡർ ജിയോ കരികുളം, സോൺ സെക്രട്ടറി ഷൈനി സാബു മഞ്ഞപ്പള്ളിൽ, പള്ളിയോഗ പ്രതിനിധി ട്രീസ മാൻകൂട്ടത്തിൽ, കുടുംബകൂട്ടായ്മ യൂണിറ്റ് ഭാരവാഹികൾ, വിശ്വാസപരിശീലകർ എന്നിവർ അഭിനന്ദിച്ചു.

വിശുദ്ധ യൂദാതദേവൂസിന്‍റെ നൊവേനയും തിരുനാളും

കടുത്തുരുത്തി: വലിയപള്ളിയുടെ ഐടിഐ ജംഗ്ഷനിലുള്ള കപ്പേളയില്‍ വിശുദ്ധ യൂദാ തദേവൂസിന്‍റെ നൊവേനയും തിരുനാളും നാളെ മുതല്‍ 28 വരെ ‍ നടക്കും. എല്ലാ ദിവസവും വൈകുന്നേരം ആറിന് ജപമാല, നൊവേന, ലദീഞ്ഞ്, വചനപ്രഘോഷണം എന്നിവ നടക്കും. പ്രധാന തിരുനാള്‍ദിനമായ 28നു വൈകുന്നേരം 5.30ന് ജപമാല, ആറിന് തിരുനാള്‍ കുര്‍ബാന-ഫാ.തോമസ് കരിമ്പുംകാലായില്‍, തിരുനാള്‍ സന്ദേശം-ഫാ.ലൂക്ക് പൂതൃക്കയില്‍, ലദീഞ്ഞ്, പ്രദക്ഷിണം, പാച്ചോര്‍നേര്‍ച്ച.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]