നിരോധിത പുകയില ഉത്പന്നങ്ങള് പിടികൂടി
1464294
Sunday, October 27, 2024 6:09 AM IST
നെയ്യാറ്റിന്കര : പിക് അപ്പ് വാനില് കടത്താന് ശ്രമിച്ച 1300 കിലോ നിരോധിത പുകയില ഉത്പന്നങ്ങള് എക്സൈസ് സംഘം പിടികൂടി. രണ്ടു പേര് അറസ്റ്റില്. ഇവരുടെ പക്കല് നിന്നും അഞ്ചര ലക്ഷം രൂപയും പിടിച്ചെടുത്തു.
മലപ്പുറം സ്വദേശികളായ റാഫി, ഷാഹിദ് എന്നിവരെയാണ് നെയ്യാറ്റിന്കര എക്സൈസ് സര്ക്കിള് ഇന്സ്പെക്ടറും സംഘവും അറസ്റ്റ് ചെയ്തത്.
ബാലരാമപുരത്തിനു സമീപം പട്രോളിംഗിനിടയില് കൈ കാണിച്ചിട്ടും പരിശോധനയ്ക്ക് നിര്ത്താതെ വേഗത്തില് പോയ വാഹനത്തെ എക്സൈസ് സംഘം പിന്തുടര്ന്ന് പിടികൂടുകയായിരുന്നു.
വളം നിറച്ച ചാക്കുകള്ക്കിടയില് ഒളിപ്പിച്ച നിലയിലായിരുന്നു പുകയില ഉത്പന്നങ്ങള്. 17 ഗ്രാമിന് 40 രൂപ നിരക്കിലാണ് ഇവര് വില്ക്കുന്നതെന്നും പിടിച്ചെടുത്ത ഉത്പന്നങ്ങള്ക്ക് ആകെ 35 ലക്ഷത്തോളം രൂപ വില വരുമെന്നും എക്സൈസ് സര്ക്കിള് ഓഫീസ് അധികൃതര് അറിയിച്ചു. പെരുന്പാവൂരില് നിന്നുമാണ് പുകയില ഉത്പന്നങ്ങള് കൊണ്ടുവന്നതെന്ന് പിടിയിലായവര് മൊഴി നല്കിയതായും എക്സൈസ് അധികൃതര് പറഞ്ഞു.
തിരുവനന്തപുരത്തിന്റെ തെക്കന് പ്രദേശങ്ങളില് വില്പ്പനയ്ക്കായാണ് ഇവ എത്തിച്ചത്. റാഫിയുടെയും ഷാഹിദിന്റെയും പക്കല് നിന്നും കണ്ടെടുത്ത അഞ്ചര ലക്ഷം രൂപ പെരുന്പാവൂരില് നിന്നും ബാലരാമപുരത്തേയ്ക്കുള്ള യാത്രാമധ്യേ പലയിടത്തും വില്പ്പന നടത്തിയതിലൂടെ ലഭിച്ചതാണ്.
ഇരുവരെയും നെയ്യാറ്റിന്കര പോലീസിന് കൈമാറിയതായി എക്സൈസ് അധികൃതര് അറിയിച്ചു. എക്സൈസ് ഇന്സ്പെക്ടര് അജയകുമാറിന്റെ നേതൃത്വത്തില് വിപിന്, ഷിന്റോ ഏബ്രഹാം, വിപിന്ദാസ്, ഷിബു എന്നിവരുള്പ്പെട്ട ടീമാണ് പുകയില ഉത്പന്ന കടത്ത് സംഘത്തെ പിടികൂടിയത്.