ഒഴിപ്പിച്ചവരെ പുനരധിവസിപ്പിക്കണം: യുണൈറ്റഡ് മര്ച്ചന്റ്സ് ചേംബര്
1464089
Saturday, October 26, 2024 6:28 AM IST
കൊല്ലം: റോഡ് വികസനത്തിനായി ഒഴിപ്പിച്ച വ്യാപാരികള്ക്ക് പുനരധിവാസം അല്ലെങ്കില് 10 ലക്ഷം രൂപ വീതം നല്കണമെന്നാവശ്യപ്പെട്ട് യുണൈറ്റഡ് മര്ച്ചന്റ്സ് ചേംബര് സംസ്ഥാന കമ്മിറ്റിയുടെ നേതൃത്വത്തിൽ മുഖ്യമന്ത്രിക്ക് നിവേദനം നല്കി.
വകുപ്പ് മന്ത്രിമാര്, ജിഎസ്ടി കമ്മീഷണര്, എംപി മാര്, എംഎല്എമാര്, കരുനാഗപ്പള്ളി അസിസ്റ്റന്റ് കമ്മീഷണര് എന്നിവര്ക്കും നിവേദനം നല്കി. സര്വീസ് റോഡിന്റെ പണി പൂർത്തിയാക്കി സഞ്ചാരയോഗ്യമാക്കുക, കരുനാഗപ്പള്ളി കെഎസ്ആര്ടിസി ബസ് സ്റ്റേഷന് സമീപത്തെ ഓട്ടോ സ്റ്റാന്ഡ് ഹൈവേയുടെ പണി തീരുന്നത് വരെ കെഎസ്ആര്ടിസിക്ക് ഉള്വശത്താക്കുക, ഗതാഗത കുരുക്ക്, അപകട മരണങ്ങള് എന്നിവ ഒഴിവാക്കാനായി സത്വര നടപടികള് സ്വീകരിക്കുക തുടങ്ങിയ ആവശ്യങ്ങളും ഉന്നയിച്ചു.
സംസ്ഥാന പ്രസിഡന്റ് ജോബി. വി. ചുങ്കത്ത്, ജനറല് സെക്രട്ടറി ടി.എഫ്. സെബാസ്റ്റ്യന്, ട്രഷറര് നിജാംബഷി, വൈസ് പ്രസിഡന്റ് ടി.കെ. ഹെന്ട്രി, സെക്രട്ടറി ആസ്റ്റിന് ബെന്നന് എന്നിവര് പങ്കെടുത്തു. കരുനാഗപ്പള്ളി എസിപിക്ക് യുഎംസി സംസ്ഥാന ട്രഷറര് നിജാംബഷി, സംസ്ഥാന കൗണ്സില് അംഗങ്ങളായ റൂഷ. പി. കുമാര്, ഷമ്മാസ് ഹൈദ്രോസ്, വിഷ്ണു, നിഷാദ് എന്നിവര് ചേർന്നാണ് നിവേദനം നൽകിയത്.