വി-ഓട്ടോ: ഒൻമ്പതാം ഘട്ട വിതരണം നടത്തി
1464085
Saturday, October 26, 2024 6:17 AM IST
കൊല്ലം: ഫിഷർമെൻ കമ്യൂണിറ്റി ഡെവലപ്മെന്റ് പ്രോഗ്രാമിന്റെ നേതൃത്വത്തിൽ സ്ത്രീ ശാക്തീകരണ ഭാഗമായുള്ള വി-ഓട്ടോ പദ്ധതിയുടെ ഒമ്പതാം ഘട്ട ഓട്ടോ വിതരണം എഫ്സിഡിപി ഓഫീസ് അങ്കണത്തിൽ നടന്നു.
തീരദേശത്തെ സ്ത്രീകളെ സമൂഹ മുഖ്യധാരയിലേക്ക് കൊണ്ട് വരിക, സ്റ്റിരിയോടൈപ്പിക്ക് തൊഴിൽ ദിശയിൽ നിന്ന് മാറി മുന്നേറുക, സ്ത്രീകളെ സാമ്പത്തികമായി സ്വതന്ത്രരാക്കുക എന്നീ ലക്ഷ്യത്തോടെയാണ് ഈ പദ്ധതി നടപ്പാക്കുന്നത്.
എഫ്സിഡിപി ചെയർപേഴ്സൺ ആഗ്നസ് ജോൺ അധ്യക്ഷത വഹിച്ചു. വികാരി ജനറാൾ മോൺ. ഡോ. ബൈജു ജൂലിയൻ ഉദ്ഘാടനം ചെയ്തു.
ഒമ്പതാം ഘട്ട ഓട്ടോ വിതരണ ചടങ്ങിനോടനുബന്ധിച്ച് ജാസ്മിൻ, ഗീത ജോർജ് എന്നീ വനിതകൾക്കാണ് പുതുതായി വി- ഓട്ടോ പദ്ധതിയുടെ കീഴിൽ ഓട്ടോ നൽകിയത്. ഫാ. ബൈജു ജൂലിയൻ ഗുണഭോക്താക്കൾക്ക് താക്കോൽ കൈമാറുകയും ഫ്ലാഗ് ഓഫ് കർമം നിർവഹിക്കുകയും ചെയ്തു.
ഫാ. ജിതിൻ സെബാസ്റ്റ്യൻ, ലറ്റീഷ്യ മാർട്ടിൻ, ഡോ. തോമസ് വില്യം, സിസ്റ്റർ മേരി, ബെർലിൻ എന്നിവർ പ്രസംഗിച്ചു.