ബൈക്ക് ലോറിയിലിടിച്ച് യുവാവ് മരിച്ചു
1464182
Sunday, October 27, 2024 1:29 AM IST
കൊട്ടാരക്കര: സുഹൃത്തുക്കൾ ഒാടിച്ച ബൈക്കുകളിലൊന്നു മുന്പേപോയ ലോറിയിലിടിച്ച് യുവാവ് മരിച്ചു. പിന്നാലെ വന്ന ബൈക്കുകളിലുണ്ടായിരുന്ന സുഹൃത്തുക്കളിൽ രണ്ടു പേർക്ക് പരിക്കേറ്റു.
കൊട്ടാരക്കര പടിഞ്ഞാറ്റിൻകര ലീലാ ഭവനിൽ ഹൃദേഷ് (23) ആണ് മരിച്ചത്. വല്ലത്ത് വാടകയ്ക്ക് താമസിക്കുന്ന നെടുമ്പന സ്വദേശി ഷിജിൻ (22), പടിഞ്ഞാറ്റിൻകര സ്വദേശി ജറിൻ (21) എന്നിവർക്കാണ് പരിക്കേറ്റത്. ഷിജിനെ തിരുവനന്തപുരം മെഡിക്കൽ കോളജ് ആശുപത്രിയിലും ജറിനെ കൊട്ടാരക്കര താലൂക്കാശുപത്രിയിലും പ്രവേശിപ്പിച്ചു. വെള്ളിയാഴ്ച രാത്രി 11.30 ഓടെ ദേശീയ പാതയിൽ റെയിൽവേ സ്റ്റേഷനു സമീപത്തെ മേൽപാലത്തിലായിരുന്നു അപകടം.
കൊല്ലം ഭാഗത്തേക്ക് പോവുകയായിരുന്നു ബൈക്കുകൾ. ഇവയിലൊന്നു മുന്നിൽ പോവുകയായിരുന്ന ലോറിക്കു പിന്നിലിടിക്കുകയായിരുന്നു. ബൈക്ക് ഓടിച്ചിരുന്ന ഹൃദേഷ് റോഡിൽ തലയിടിച്ച് വീണു തൽക്ഷണം മരിച്ചു. രണ്ടായി മുറിഞ്ഞ ബൈക്കിന്റെ ഭാഗങ്ങൾ പിന്നാലെ ബൈക്കുകളിലുണ്ടായിരുന്ന സുഹൃത്തുക്കളുടെ മേൽ പതിച്ചാണ് അവർക്ക് പരിക്കേറ്റത്. ഹൃദേഷിന്റെ മൃതദേഹം കൊട്ടാരക്കര താലൂക്കാശുപത്രി മോർച്ചറിയിൽ.