ജില്ലയിൽ കന്നുകാലി സെന്‍സസ് ആരംഭിച്ചു
1464286
Sunday, October 27, 2024 6:09 AM IST
കൊല്ലം: കന്നുകാലി സെൻസസ് ജില്ലയില്‍ ആരംഭിച്ചു. കൊല്ലം ബിഷപ് ഹൗസില്‍ ഉദ്യോഗസ്ഥര് നേരിട്ടെത്തി വളര്‍ത്തുമൃഗങ്ങളുടെ കണക്കെടുപ്പ് നടത്തിയാണ് സെന്‍സസ് തുടങ്ങിയത്.
പശു ഉണ്ടോ എന്ന് അന്വേഷിച്ച് കുടുംബശ്രീയുടെ 'പശുസഖി 'മാര്‍ വീടുകളില്‍ എത്തും. മൊബൈല്‍ ആപ്ലിക്കേഷന്‍ വഴിയാണ് വിവരങ്ങള്‍ ശേഖരിക്കുന്നത്. നാലു മാസം നീളുന്നതാണ് കന്നുകാലി സെന്‍സസ്.
കുടുംബശ്രീയുടെ മൃഗസംരക്ഷണ പദ്ധതികള്‍ ഊര്‍ജിതമാക്കാന്‍ പ്രവര്‍ത്തിക്കുന്ന 299 ഓളം പശുസഖിമാരാണ് എന്യൂമറേറ്റര്‍മാര്‍. കന്നുകാലികള്‍, വളര്‍ത്തു പക്ഷികള്‍, അരുമമൃഗങ്ങള്‍, അരുമപ്പക്ഷികള്‍, മറ്റ് വളര്‍ത്തു മൃഗങ്ങള്‍ എന്നിവയുടെ എണ്ണം, ഇനം, പ്രായം, ലിംഗം എന്നിങ്ങനെയുള്ള വിവരങ്ങള്‍ സെന്‍സസിലൂടെ ശേഖരിക്കും.
മൃഗസംരക്ഷണ രംഗത്ത് പ്രവര്‍ത്തിക്കുന്ന കര്‍ഷകരുടേയും വനിതാ സംരംഭകരുടേയും എണ്ണം, ഗാര്‍ഹിക ഗാര്‍ഹികേതര സംരംഭങ്ങളുടേയും സ്ഥാപനങ്ങളുടേയും കണക്കുകള്‍ എന്നിവയും ശേഖരിക്കുന്നുണ്ട്. അറവുശാലകള്‍, മാംസ സംസ്‌കരണ പ്ലാന്‍റുകള്‍ എന്നിവയുടേയും കണക്കെടുക്കും.
ബിഷപ്സ് ഹൗസില്‍ നടന്ന ചടങ്ങില്‍ കൊല്ലം ബിഷപ് പോള്‍ ആന്‍റണി മുല്ലശേരി, ഫാ. ജോളി, ജില്ലാ മൃഗസംരക്ഷണ ഓഫീസര്‍ ഡോ. ഡി. ഷൈന്‍കുമാര്‍, ഡെപ്യൂട്ടി ഡയറക്ടര്‍ ഡോ. എ.എല്‍. അജിത്ത്, ഡോ. വിഷ്ണുദത്ത്, നാദിര്‍ഷ, ബീന, അമ്പിളി, എസ്. റിജു എന്നിവര്‍ പങ്കെടുത്തു.