ലഹരിവിരുദ്ധ ബോധവത്കരണം നടത്തി : Deepika.com Nattu Visesham

മാനന്തവാടി: ചോലയിറക്കുന്നതിനിടെ മരത്തിൽനിന്നു വീണ് അധ്യാപകൻ മരിച്ചു. കല്ലോടി സെന്‍റ് ജോസഫ്സ് സ്കൂൾ അധ്യാപകൻ ഇല്ലിക്കൽ ജയ്സനാണ്(47)മരിച്ചത്. ഇന്നലെ ഉച്ചയോടെയാണ് അപകടം. ഉടൻ ഗവ.മെഡിക്കൽ കോളജ് ആശുപത്രിയിൽ എത്തിച്ചെങ്കിലും രക്ഷിക്കാനായില്ല. പരേതനായ ഒൗസേപ്പ്-ഏലിയാമ്മ ദന്പതികളുടെ മകനാണ്. ഭാര്യ: ജിൻസി(അധ്യാപിക, വാളേരി ഗവ.ഹൈസ്കൂൾ). മക്കൾ: നിസ, സിയ.

കർഷകൻ കുഴഞ്ഞുവീണ് മരിച്ചു

മാനന്തവാടി: കർഷകൻ കുഴഞ്ഞുവീണ് മരിച്ചു. കമ്മന തൂപ്പുങ്കര ടി.ജെ. ജോണാണ്(60 മരിച്ചത്. ഇന്നലെ ഉച്ചയോടെ വീട്ടിലാണ് കുഴഞ്ഞുവീണത്. ആശുപത്രിയിലേക്ക് കൊണ്ടുവരുന്നതിനിടെയായിരുന്നു മരണം. ഭാര്യ: മേഴ്സി. മക്കൾ: ആൽബിൻ, അരുണ്‍. മരുമകൾ: ലിയ.

കൈക്കൂലി: പരാതികൾ നൽകാം

ഊട്ടി: കൈക്കൂലി ആവശ്യപ്പെടുന്നവർക്കെതിരേ പൊതുജനങ്ങൾക്ക് ധൈര്യസമേതം വിജിലൻസിന് പരാതി നൽകാമെന്ന് വിജിലൻസ് ഡിവൈഎസ്പി ജയകുമാർ അറിയിച്ചു. കൈക്കൂലി ആവശ്യപ്പെടുന്ന ഉദ്യോഗസ്ഥർക്കെതിരേ കർശന നടപടി സ്വീകരിക്കും. പരാതി നൽകുന്നതിനുള്ള എല്ലാ സൗകര്യങ്ങളും ഏർപ്പെടുത്തിയിട്ടുണ്ട്. ഡിവൈഎസ്പി ജയകുമാർ: 9498147234, സിഐ ഷണ്‍മുഖ വടിവ്: 9498124373 എന്നീ നന്പറിൽ വിളിച്ചു പരാതി നൽകാമെന്ന് വിജിലൻസ് വിഭാഗം അറിയിച്ചു.

പരിശീലനം തുടങ്ങി

മാനന്തവാടി: വന്യമൃഗശല്യം പ്രതിരോധിക്കാൻ മിഷൻ സോളാർ ഫെൻസിംഗ് പരിശീലനവുമായി വനം വകുപ്പ്. വന്യജീവി സംഘർഷ ലഘൂകരണത്തിന് സർക്കാർ പത്ത് മിഷനുകളിൽ ഒന്നാണ് മിഷൻ സോളാർ ഫെൻസിംഗ്. കോഴിക്കോട് വനം ഡിവിഷനിലെ തെരഞ്ഞെടുത്ത റേഞ്ച് കോ ഓർഡിനേറ്റർമാർ, മാസ്റ്റർ ട്രെയിനീസ് എന്നിവർക്കാണ് തുടക്കത്തിൽ പരിശീലനം. സോളാർ പവർ ഫെൻസിംഗ്, തൂക്ക് ഫെൻസിംഗ് നിർമാണവുമായി ബന്ധപ്പെട്ട സ്ഥല പരിശോധന, അടങ്കൽ തയാറാക്കൽ, നിർമാണ സാമഗ്രികളുടെ ഗുണമേൻമ ഉറപ്പുവരുത്തൽ, നിർമാണം, പരിചരണം എന്നീ വിഷയങ്ങളിൽ ക്ലാസും പ്രായോഗിക പരിശീലനവും ഇവർക്ക് നൽകും. നോർത്ത് വനം സർക്കിളിലെ ഏഴ് ഡിവിഷനുകളിലും ആദ്യഘട്ടം പരിശീലനം ഈ മാസം പൂർത്തിയാക്കും. സൗത്ത് വയനാട് ഡിവിഷണൽ ഫോറസ്റ്റ് ഓഫീസർ അജിത് കെ. രാമൻ സർക്കിൾതല പരിശീലനം ഉദ്ഘാടനം ചെയ്തു. മിഷൻ സോളാർ ഫെൻസിംഗ് സ്റ്റേറ്റ് കോർഡിനേറ്റർ എം.കെ. സമീർ, റേഞ്ച് ഫോറസ്റ്റ് ഓഫീസർമാരായ രഞ്ജിത് കുമാർ, ഹരിലാൽ, മിഷൻ സോളാർ ഫെൻസിംഗ് സർക്കിൾ കോ ഓർഡിനേറ്റർ കെ.വി. ആനന്ദൻ തുടങ്ങിയവരാണ് പരിശീലനത്തിന് നേതൃത്വം നൽകുന്നത്.

ആരോഗ്യദിനം ആഘോഷിച്ചു

പടിഞ്ഞാറത്തറ: പഞ്ചായത്ത്, കാപ്പുംകുന്ന് കുടുംബാരോഗ്യകേന്ദം എന്നിവയുടെ സംയുക്താഭിമുഖ്യത്തിൽ സംസ്കാരിക നിലയത്തിൽ ലോക ആരോഗ്യ ദിനം ആഘോഷിച്ചു. പഞ്ചായത്ത് വികസനകാര്യ സ്റ്റാൻഡിംഗ് കമ്മിറ്റി ചെയർമാൻ പി.എ. ജോസ് ഉദ്ഘാടനം ചെയ്തു. ഹെൽത്ത് ഇൻസ്പെക്ടർ ഷീജ അധ്യക്ഷത വഹിച്ചു. എച്ച്ഐ മിഥുൻ, പിഎച്ച്എൻ ഹസീന എന്നിവർ ക്ലാസെടുത്തു. സമയബന്ധിതമായി കുത്തിവയ്പ് നടത്തിയവർ, കൃത്യമായ ഇടവേളകളിൽ ജനകീയ ആരോഗ്യ കേന്ദ്രങ്ങളിൽ എത്തിയവർ എന്നിവർക്ക് സമ്മാനം നൽകി. ജഐച്ച്ഐ സന്തോഷ് സ്വാഗതവും ജെപിഎച്ച്എൻ സന്ധ്യ നന്ദിയും പറഞ്ഞു.

ലഹരിവിരുദ്ധ റാലി നടത്തി

മുട്ടിൽ: പഞ്ചായത്ത് കമ്മ്യൂണിറ്റി ഡവലപ്മെന്‍റ് സൊസൈറ്റിയുടെയും ജെൻഡർ റിസോഴ്സ് സെന്‍ററിന്‍റെയും ആഭിമുഖ്യത്തിൽ ലഹരി വിരുദ്ധ സ്കൂട്ടർ റാലി നടത്തി. കാക്കവയൽ ജവാൻ സ്മൃതി മണ്ഡപ പരിസരത്ത് ആരംഭിച്ച റാലി പഞ്ചായത്ത് ബസ്‌സ്റ്റാൻഡിൽ സമാപിച്ചു. പഞ്ചായത്ത് പ്രസിഡന്‍റ് ശ്രീദേവി ബാബു ഫ്ളാഗ് ഓഫ് ചെയ്തു. സമാപനയോഗത്തിൽ കടുംബശ്രീ മിഷൻ ജില്ലാ കോഓർഡിനേറ്റർ പി. ബാലസുബ്രഹ്മണ്യൻ അധ്യക്ഷത വഹിച്ചു. എക്സൈസ് ഉദ്യോഗസ്ഥൻ വി.കെ. ഉമ്മർ ലഹരിവിരുദ്ധ സന്ദേശം നൽകി. കുടുംബശ്രീ ജില്ലാ മിഷൻ അസി. കോഓർഡിനേറ്റർ അമീൻ ലഹരിവിരുദ്ധ പ്രതിജ്ഞ ചൊല്ലിക്കൊടുത്തു. പഞ്ചായത്ത് ക്ഷേമകാര്യ സ്റ്റാൻഡിംഗ് കമ്മിറ്റി ചെയർപേഴ്സണ്‍ നസീമ, പഞ്ചായത്ത് അംഗം ലീന സി. നായർ എന്നിവർ പ്രസംഗിച്ചു. ബീന മാത്യു, ആശ പോൾ, ടി.പി. കമല, വനജ സുരേഷ്, സജന എന്നിവർ നേതൃത്വം നൽകി.

വളർത്തു നായയെ പുലി കൊന്നു

ഉൗട്ടി: ഉൗട്ടിക്കടുത്ത മേൽ തലയാട്ടുമന്ദിൽ വളർത്തു നായയെ പുലി കൊന്നു. കഴിഞ്ഞ ദിവസം രാത്രിയിലാണ് സംഭവം. വീട്ടുമുറ്റത്തെ കൂട്ടിൽ നിന്നാണ് നായയെ പുലി ആക്രമിച്ചത്. സംഭവത്തിന്‍റെ വീഡിയോ ദൃശ്യം സമീപത്തെ സിസിടിവി കാമറയിൽ പതിഞ്ഞിട്ടുണ്ട്.

കാട്ടാനക്കൂട്ടം പരിഭ്രാന്തി പരത്തി

ഉൗട്ടി: ഉൗട്ടി-മേട്ടുപാളയം ദേശീയ പാതയിലെ ബർളിയാറിൽ റോഡിലേക്ക് ഇറങ്ങുന്ന കാട്ടാനക്കൂട്ടം പരിഭ്രാന്തി പരത്തുന്നതായി പരാതി. കുട്ടികളോടൊപ്പമാണ് ആനകൾ ഇറങ്ങുന്നത്. സമീപത്തെ വനത്തിൽ നിന്നാണ് ആനകൾ ഇറങ്ങുന്നത്. ഇതുകാരണം ഇരുചക്രവാഹന യാത്രക്കാർ ഉൾപ്പെടെയുള്ളവർ ഭീതിയിലാണ്. ബർളിയാറിൽ സ്വകാര്യ എസ്റ്റേറ്റ് ബംഗ്ലാവിന്‍റെ ഗേറ്റ് കാട്ടാനക്കൂട്ടം തകർത്തു. ജനങ്ങളുടെ പരാതിയുടെ അടിസ്ഥാനത്തിൽ ഈ മേഖലയിൽ വനംവകുപ്പ് നിരീക്ഷണം ശക്തമാക്കിയിരിക്കുകയാണ്. ആനകളെ വനത്തിലേക്ക് തുരത്തണമെന്ന് നാട്ടുകാർ ആവശ്യപ്പെട്ടു.

വിദ്യാർഥികൾക്ക് ലാപ്ടോപ്പ് നൽകി

മീനങ്ങാടി: ഉന്നത വിദ്യാഭ്യാസം നടത്തുന്ന പട്ടികജാതി-വർഗ വിദ്യാർഥികൾക്ക് പഞ്ചായത്ത് ഉണരാം, ഉയരാം എന്ന പദ്ധതിയിൽ ലാപ്ടോപ്പുകൾ വിതരണം ചെയ്തു. ഐ.സി. ബാലകൃഷ്ണൻ എംഎൽഎ ഉദ്ഘാടനം ചെയ്തു. പഞ്ചായത്ത് പ്രസിഡന്‍റ് കെ.ഇ. വിനയൻ അധ്യക്ഷത വഹിച്ചു. കെ.പി. നുസ്രത്ത്, ബേബി വർഗീസ്, പി. വാസുദേവൻ, ഉഷ രാജേന്ദ്രൻ, പി.വി. വേണുഗോപാൽ, പഞ്ചായത്ത് സെക്രട്ടറി കെ. അഫ്സത്ത്, അസിസ്റ്റന്‍റ് സെക്രട്ടറി എം. രാജേന്ദ്രൻപിള്ള, ജൂണിയർ സൂപ്രണ്ട് കെ.കെ. മോഹൻദാസ് എന്നിവർ പ്രസംഗിച്ചു.

വഖഫ് ഭേദഗതി ബില്ല്: ഗൂഡല്ലൂരിൽ പ്രതിഷേധ പ്രകടനം നടത്തി

ഗൂഡല്ലൂർ: കേന്ദ്ര സർക്കാരിന്‍റെ വഖഫ് ഭേദഗതി നിയമത്തിനെതിരേ ഗൂഡല്ലൂരിൽ പ്രതിഷേധ സമരം നടത്തി. വിവിധ രാഷ്ട്രീയ പാർട്ടികൾ, വ്യാപാരി സംഘടനകൾ, വിവിധ മുസ്ലിം സംഘടനകൾ എന്നിവയുടെ ആഭിമുഖ്യത്തിലാണ് പ്രതിഷേധ പരിപാടി സംഘടിപ്പിച്ചത്. ഗൂഡല്ലൂർ നഗരസഭാ ഓഫീസ് പരിസരത്ത് നിന്ന് ആരംഭിച്ച പ്രതിഷേധ റാലി ടൗണ്‍ ചുറ്റി പോലീസ് സ്റ്റേഷൻ റോഡ് വഴി ഗാന്ധി മൈതാനിയിൽ സമാപിച്ചു. നൂറുകണക്കിന് പേർ റാലിയിൽ അണിനിരന്നു. തുടർന്ന് നടന്ന പൊതുസമ്മേളനത്തിൽ മുസ്ലിം ലീഗ് ജില്ലാ പ്രസിഡന്‍റ് ബാപ്പു ഹാജി നെല്ലാക്കോട്ട അധ്യക്ഷത വഹിച്ചു. മുൻ എംഎൽഎയും ഡിഎംകെ നേതാവുമായ എം. ദ്രാവിഡമണി ഉദ്ഘാടനം ചെയ്തു. എം. പാണ്ഡ്യരാജ്, എ. ലിയാക്കത്തലി, ഇളഞ്ചഴിയൻ (ഡിഎംകെ), കെ.പി. മുഹമ്മദ് ഹാജി, കെ. ഹംസ, ശിവരാജ്, സുൽഫിക്കറലി (കോണ്‍ഗ്രസ്), എൻ. വാസു, എം.എ. കുഞ്ഞിമുഹമ്മദ്, എം.ആർ. സുരേഷ് (സിപിഎം), എ.എം. ഗുണശേഖരൻ, എ. മുഹമ്മദ് ഗനി (സിപിഐ), ആലി ഉപ്പട്ടി (മുസ്ലിം ലീഗ്), കെ. സഹദേവൻ, ഭുവനേശ്വരൻ (വിസികെ), സ്വാദിഖ് ബാബു, തമീമുൽ അൻസാരി, സമസ്ത നീലഗിരി ജില്ലാ പ്രസിഡന്‍റ് സീഫോർത്ത് അബ്ദുർറഹ്മാൻ ദാരിമി, സമസ്ത ഇകെ വിഭാഗം പ്രസിഡന്‍റ് മുഹമ്മദലി ബാഖവി, മുസ്ലിം ലീഗ് ജില്ലാ സെക്രട്ടറി വി.കെ. ഹനീഫ എന്നിവർ പ്രസംഗിച്ചു. എം. അബ്ദു റസാഖ്, ബാദുഷ, സി.കെ.എം. പാടന്തറ, രാജേന്ദ്രൻ തുടങ്ങിയവർ സംബന്ധിച്ചു.

വികസന പ്രവർത്തനങ്ങളുടെ അവതരണമായിരിക്കും എന്‍റെ കേരളം മേള: മന്ത്രി ഒ.ആർ. കേളു

കൽപ്പറ്റ: സംസ്ഥാന സർക്കാരിന്‍റെ വികസന പ്രവർത്തനങ്ങളുടെ അവതരണമായിരിക്കും എന്‍റെ കേരളം പ്രദർശന വിപണന മേളയുടെ ഭാഗമായി നടക്കുകയെന്ന് പട്ടികജാതി പട്ടിക വർഗ പിന്നാക്കക്ഷേമ മന്ത്രി ഒ.ആർ. കേളു. 22 മുതൽ 28 വരെ കൽപ്പറ്റ എസ്കഐംജെ സ്കൂൾ മൈതാനിയിൽ നടക്കുന്ന എന്‍റെ കേരളം മേളയുടെ അവലോകന യോഗത്തിൽ അധ്യക്ഷത വഹിച്ചു പ്രസംഗിക്കുകയായിരുന്നു മന്ത്രി. ജനപ്രതിനിധികൾ, രാഷ്ട്രീയ പാർട്ടി അംഗങ്ങൾ, രാഷ്ട്രീയ യുവജന സംഘടനകൾ, സർവീസ് സംഘടനകൾ, തദ്ദേശ സ്ഥാപന അധ്യക്ഷൻമാർ, ജില്ലാതല ഉദ്യോഗസ്ഥർ, ഡിടിപിസി എക്സിക്യുട്ടീവ് അംഗങ്ങൾ എന്നിവരുടെ സാന്നിധ്യത്തിലാണ് മേള തയ്യാറെടുപ്പിന്‍റെ ഇതുവരെയുള്ള പ്രവർത്തനങ്ങൾ അവലോകനം ചെയ്തത്. ബത്തേരി ബ്ലോക്ക് പഞ്ചായത്ത് പ്രസിഡന്‍റ് സി. അസൈനാർ, മാനന്തവാടി ബ്ലോക്ക് പഞ്ചായത്ത് പ്രസിഡന്‍റ് ജസ്റ്റിൻ ബേബി, വെങ്ങപ്പള്ളി ഗ്രാമപഞ്ചായത്ത് പ്രസിഡന്‍റ് ഇ.കെ. രേണുക, ജില്ലാ പഞ്ചായത്ത് അംഗങ്ങളായ കെ. വിജയൻ, ബിന്ദു പ്രകാശ്, എ.എൻ. സുശീല, വെങ്ങപ്പള്ളി ഗ്രാമപഞ്ചായത്ത് അംഗം ശ്രീജ ജയപ്രകാശ്, സഹകരണ ക്ഷേമനിധി ബോർഡ് വൈസ് ചെയർമാൻ സി.കെ. ശശീന്ദ്രൻ, കൽപ്പറ്റ നഗരസഭ കൗണ്‍സിലർ സി.കെ. ശിവരാമൻ തുടങ്ങിയവർ പങ്കെടുത്തു. രാഷ്ട്രീയ, യുവജന സംഘടനകളെ പ്രതിനിധീകരിച്ച് സിപിഎം ജില്ലാ സെക്രട്ടറി കെ. റഫീക്ക്, ഡിവൈഎഫ് ഐ ജില്ലാ സെക്രട്ടറി കെ.എം. ഫ്രാൻസിസ്, വിജയൻ ചെറുകര (സിപിഐ), ഡി. രാജൻ, കെ.ബി. രാജുകൃഷ്ണ (ആർജെഡി), സണ്ണി ജോസഫ് (കേരള കോണ്‍ഗ്രസ് ബി), എം.ടി. ഇബ്രാഹിം (ഐഎൻഎൽ), ഷാജി ചെറിയാൻ, പി.എ. സതീഷ് ബാബു, കെ. വിശ്വനാഥൻ (ജെഡിഎസ്), കെ.വി. മാത്യു (കെസിഎം), സി.എം. ശിവരാമൻ തുടങ്ങിയവർ സംബന്ധിച്ചു. ജില്ലാ കളക്ടർ ഡി.ആർ. മേഘശ്രീ, എഡിഎം കെ. ദേവകി, സബ് കളക്ടർ മിസാൽ സാഗർ ഭരത്, ജില്ല ഇൻഫർമേഷൻ ഓഫീസർ പി. റഷീദ് ബാബു, അസിസ്റ്റന്‍റ് എഡിറ്റർമാരായ കെ. സുമ, എം. അമിയ, വിവിധ വകുപ്പുകളുടെ ജില്ലാ ഉദ്യോഗസ്ഥർ എന്നിവരും പങ്കെടുത്തു.

കർഷകർക്ക് വിഷു കൈനീട്ടവുമായി യുഎഫ്പിഎ

സുൽത്താൻ ബത്തേരി: ഇതര സംസ്ഥാനങ്ങളിൽ കൃഷി ചെയ്ത് നഷ്ടത്തിലായി ദുരിതമനുഭവിക്കുന്ന കർഷകർക്ക് വിഷു കൈനീട്ട സമ്മാന പദ്ധതിയുമായി അഖിലേന്ത്യാ കർഷക സംഘടനയായ യുണൈറ്റഡ് ഫാർമേഴ്സ് പ്രൊഡ്യൂസേഴ്സ് അസോസിയേഷൻ. സംഘടനയുടെ കൈത്താങ്ങ് സഹായ പദ്ധതിയുടെ ഭാഗമായാണ് വിഷു കൈനീട്ടം നൽകുന്നത്. പദ്ധതിയുടെ നറുക്കെടുപ്പും സഹായതുക സമാഹരണവും യുഎഫ്പിഎ യുടെ കർണ്ണാടക ബേഗൂരിലെ കന്പനിയുടെ ഓഫീസിൽ സംഘടനാ ദേശീയ ചെയർമാൻ എമിൻസണ്‍ തോമസ് ഉദ്ഘാടനം ചെയ്തു. തെരഞ്ഞെടുക്കപ്പെട്ടവർക്ക് വിഷു ദിനത്തിൽ തുക വിതരണം ചെയ്യും. യുഎഫ്പിഎ വൈസ് ചെയർമാൻ കെ.എ. വിജയൻ, മെന്‍റർ കെ.എസ്. സാബു, കൈത്താങ്ങ് പദ്ധതി കമ്മിറ്റി ചെയർമാൻ നയിമുദ്ധീൻ മലപ്പുറം, കണ്‍വീനർ ഷാജി തൂപ്പുംകര എന്നിവർ സംബന്ധിച്ചു.

നീലഗിരി കോളജിൽ ബിരുദദാന സമ്മേളനം ഇന്ന്

കൽപ്പറ്റ: താളൂർ നീലഗിരി ആർട്സ് ആൻഡ് സയൻസ് കോളജിൽ ഒന്പതാമത് ബിരുദദാന സമ്മേളനവും വിദ്യാഭ്യാസ സെമിനാറും ഇന്നു നടത്തുമെന്ന് ഗവേണിംഗ് ബോഡി വൈസ് ചെയർമാൻ പ്രഫ.ടി. മോഹൻ ബാബു, പ്രിൻസിപ്പൽ ഡോ.ബാല ഷണ്‍മുഖദേവി, കാന്പസ് മാനേജർ പി.എം. ഉമ്മർ, പിടിഎ പ്രസിഡന്‍റ് പി.പി. സുദർശൻ എന്നിവർ വാർത്താസമ്മേളനത്തിൽ അറിയിച്ചു. കോഴ്സ് പൂർത്തിയാക്കിയ 680 യുജി, 75 പിജി വിദ്യാർഥികൾക്കാണ് ബിരുദം സമ്മാനിക്കുന്നത്. സമ്മേളനം രാവിലെ 10ന് ന്യൂഡൽഹി ജവഹർലാൽ നെഹ്റു സർവകലാശാല വൈസ് ചാൻസലർ ഡോ.ശാന്തി ശ്രി ദുലിപുടി പണ്ഡിറ്റ് ഉദ്ഘാടനം ചെയ്യും. ഭാരതിയാർ സർവകലാശാല സിൻഡിക്കറ്റ് അംഗവും കോളജ് മാനേജിംഗ് ഡയറക്ടറുമായ ഡോ.റാഷിദ് ഗസാലി അധ്യക്ഷത വഹിക്കും. കേരള ഡിജിറ്റൽ യൂണിവേഴ്സിറ്റി മുൻ വൈസ് ചാൻസലർ ഡോ.സജി ഗോപിനാഥ് മുഖ്യാതിഥിതയാകും. യൂണിവേഴ്സിറ്റി റാങ്ക് ജേതാക്കളെ ആദരിക്കും. ഉച്ചകഴിഞ്ഞു നടക്കുന്ന വിദ്യാഭ്യാസ സെമിനാറിൽ ഡോ.ശാന്തി ശ്രി ദുലിപുടി പണ്ഡിറ്റും ഡോ.സജി ഗോപിനാഥും വിദ്യാർഥികളുമായി സംവദിക്കും. പരസ്പര സഹകരണത്തിന് പഞ്ചാബ് ലൗലി പ്രഫഷണൽ യൂണിവേഴ്സിറ്റി, ഇൻഫോസിസ് എന്നിവയുമായി ധാരണാപത്രം നീലഗിരി കോളജ് ധാരണാപത്രം ഒപ്പിട്ടിട്ടുണ്ട്. അക്കാദമിക രംഗത്ത് ജെഎൻയുവുമായി സഹകരണത്തിനു നീക്കം നടത്തിവരികയാണ്. ഈ പശ്ചാത്തലത്തിലാണ് ജഐൻയു വൈസ് ചാൻസലർ നീലഗിരി കോളജിൽ എത്തുന്നത്. നാക്കിന്‍റെ എ പ്ലസ് പ്ലസ് ഗ്രേഡുള്ള സ്ഥാപനമാണ് നീലഗിരി കോളജ്. നിവിൽ 11 ബിരുദ കോഴ്സുകളും നാല് ബിരുദാനന്തര ബിരുദ കോഴ്സുകളും രണ്ട് ഗവേഷണ കോഴ്സുകളും കോളജിലുണ്ട്. വരുന്ന അധ്യയനവർഷം ബിഎസ്‌സി ഫുഡ് സയൻസ് ആൻഡ് ന്യൂട്രിഷൻ, ബിഎസ്‌സി കംപ്യൂട്ടർ സയൻസ് വിത്ത് സൈബർ സെക്യൂരിറ്റി കോഴ്സുകൾ കൂടി തുടങ്ങും.

പൈങ്കുനി ഉത്രം ആഘോഷിച്ചു

വൈത്തിരി: വൈദ്യഗിരി ശ്രീ സുബ്രഹ്മണ്യസ്വാമീ ക്ഷേത്രത്തിൽ സുബ്രമണ്യസ്വാമിയുടെ തിരുക്കല്യാണ ഉത്സവമായ പൈങ്കുനി ഉത്രം മഹോത്സവാഘോഷം നടത്തി. ക്ഷേത്രം മേൽശാന്തി സുരേഷ് സ്വാമിയുടെ നേതൃത്വത്തിൽ പ്രത്യേക പൂജകൾ ക്ഷേത്രത്തിൽ നടന്നു. രാവിലെ പഴയ വൈത്തിരി ധർമ്മശാസ്താ ക്ഷേത്രത്തിൽ നിന്നും ക്ഷേത്രം ഗുരുസ്വാമി സെൽവം കൽപ്പറ്റയുടെ നേതൃത്വത്തിൽ വൈദ്യഗിരി കാവടി സംഘം പാൽക്കുടം കാവടികളുമായി വാദ്യഘോഷങ്ങളോടെ വൈദൃഗിരിയിൽ എത്തി. പ്രധാന പൂജകൾക്കും അഷ്ടാഭിഷേകത്തിനും ശേഷം ഭക്തർക്ക് പ്രസാദ ഉൗട്ട് നടത്തി.

സ്കൂൾ കെട്ടിടത്തിനു ശിലയിട്ടു

മീനങ്ങാടി: കിഫ്ബി ഫണ്ടിൽനിന്നു ലഭിച്ച 1.30 കോടി രൂപ ചെലവഴിച്ച് ഗവ.എൽപി സ്കൂളിനു നിർമിക്കുന്ന കെട്ടിടത്തിന്‍റെ ശിലാസ്ഥാപനം ഐ.സി. ബാലകൃഷ്ണൻ എംഎൽഎ നിർവഹിച്ചു. പഞ്ചായത്ത് പ്രസിഡന്‍റ് കെ.ഇ. വിനയൻ അധ്യക്ഷത വഹിച്ചു. ബത്തേരി ബ്ലോക്ക് പഞ്ചായത്ത് പ്രസിഡന്‍റ് സി. അസൈനാർ മുഖ്യപ്രഭാഷണം നടത്തി. പിടിഎ പ്രസിഡന്‍റ് വിനോദ് അണിമംഗലത്ത് പ്രസംഗിച്ചു. പഞ്ചായത്ത് ഭരണസമിതി അംഗങ്ങൾ, സ്കൂൾ പിടിഎ, എംപിടിഎ, എസ്എംസി, എസ്എസ്ജി അംഗങ്ങൾ, വിദ്യാർഥികൾ തുടങ്ങിയവർ പങ്കെടുത്തു.

മണ്ണിടിച്ചിൽ, വെള്ളപ്പൊക്കം; മോക്ക് ഡ്രിൽ സംഘടിപ്പിച്ചു

കൽപ്പറ്റ: ദേശീയ, സംസ്ഥാന, ജില്ലാ ദുരന്തനിവാരണ അതോറിറ്റികളുടെ നേതൃത്വത്തിൽ ജില്ലയിൽ മോക്ക് ഡ്രിൽ സംഘടിപ്പിച്ചു. തൊണ്ടർനാട് ഗ്രാമപഞ്ചായത്തിലെ വാളാരംകുന്ന് മട്ടിലയം മേഖലയിൽ മണ്ണിടിച്ചിൽ സംബന്ധിച്ചും കോട്ടത്തറ ഗ്രാമപഞ്ചായത്തിലെ വെണ്ണിയോട് മേഖലയിൽ വെള്ളപ്പൊക്കം സംബന്ധിച്ചുമുള്ള മോക്ക് എക്സൈസാണ് ഇന്നലെ സംഘടിപ്പിച്ചത്. രാവിലെ എട്ട് മുതൽ ഇൻസിഡന്‍റ് കമാൻഡറുടെ നേതൃത്വത്തിൽ പ്രവർത്തനങ്ങൾ ആരംഭിച്ചു. ഇതിനോടനുബന്ധിച്ച് സുരക്ഷിതമല്ലാത്ത ഇടങ്ങളിൽ നിന്നും ആളുകളെ മാറ്റിപാർപ്പിക്കൽ, മറ്റു രക്ഷാ പ്രവർത്തനങ്ങൾ എന്നിവ നടത്തി. ദുരന്ത മുന്നറിയിപ്പ് ലഭിക്കുന്ന ഘട്ടത്തിൽ മുൻകൂട്ടി നിശ്ചയിക്കപ്പെട്ടിരിക്കുന്ന ഇൻസിഡന്‍റ് റെസ്പോണ്‍സ് സിസ്റ്റത്തിന്‍റെ പ്രവർത്തനം, കണ്‍ട്രോൾ റൂമുകളുടെ പ്രവർത്തനം, വിവിധ വകുപ്പുകൾ തമ്മിലുള്ള ഏകോപനം, ആശയവിനിമയോപാധികളുടെ കൃത്യമായ ഉപയോഗം, സൈറണുകളുടെ പ്രവർത്തനം, അപകട സ്ഥലത്ത് നടത്തുന്ന പ്രതികരണരക്ഷാപ്രവർത്തനങ്ങളുടെ ഏകോപനം തുടങ്ങിയ സുപ്രധാന കാര്യങ്ങളിൽ പരിശീലനം നൽകി.കളക്ടറേറ്റിൽ നിന്ന് എഡിഎം കെ. ദേവകിയുടെ നേതൃത്വത്തിലുള്ള സംഘം രക്ഷാപ്രവർത്തനങ്ങൾ ഏകോപിപ്പിച്ചു.

ശിശുമലയിലേക്ക് നടന്ന കുരിശിന്‍റെ വഴിയിൽ ആയിരങ്ങൾ മലകയറി

പുൽപ്പള്ളി: വലിയ നോന്പിന്‍റെ പ്രധാന ദിനങ്ങളിലൊന്നായ നാല്പതാം വെള്ളിയോട് അനുബന്ധിച്ച് മുള്ളൻകൊല്ലി ഫോറോനയുടെ നേതൃത്വത്തിൽ 12 ഇടവകളുടെ പങ്കാളിത്തത്തോടെ ശിശുമല തീർത്ഥാടന കേന്ദ്രത്തിലേക്ക് കുരിശിന്‍റെ വഴി നടത്തി. രാവിലെ മുള്ളൻകൊല്ലി സെന്‍റ് മേരീസ് ഫോറോന ദേവാലയത്തിൽ നിന്ന് ആരംഭിച്ച കുരിശിന്‍റെ വഴിയിൽ വൈദികരോടൊപ്പം ആയിരക്കണക്കിന് വിശ്വാസികൾ പങ്കുചേർന്നു. യേശുദേവന്‍റെ പീഡാനുഭവങ്ങളെ സ്മരിച്ച് മരക്കുരിശുകൾ കൈകളിലേന്തിയായിരുന്നു പാപപരിഹാരത്തിനായി കുരിശിന്‍റെ വഴിയിൽ വിശ്വാസികൾ പങ്കുചേർന്നത്. തുടർന്ന് മലമുകളിൽ നടന്ന വിശുദ്ധ കുർബാനയ്ക്ക് ഫാ. ജസ്റ്റിൻ മുന്നനാൽ മുഖ്യ കാർമികത്വം വഹിച്ചു. അന്പലവയൽ സെന്‍റ് മാർട്ടിൻസ് പള്ളി വികാരി ഫാ. ചാക്കോ മേപ്പുറത്ത് വചന സന്ദേശം നൽകി.ഫാ. ബിജു മാവറ, ഫാ. ജയിംസ് പുത്തൻപറന്പിൽ, ഫാ. മാത്യു പെരുമാട്ടിക്കുന്നേൽ, ഫാ. മാത്യു കറുത്തേടത്ത്, ഫാ. പ്രതീഷ് കിഴക്കൻപുതുപ്പള്ളി, ഫാ. സോമി വടയാപറന്പിൽ, ഫാ. ജോണി കല്ലുപുര, ഫാ. ജയിംസ് ചന്പക്കര, ഫാ. എബിൻ കെട്ടുപുരക്കൽ നേതൃത്വം നൽകി. തുടർന്ന് തിരുക്കച്ച വണക്കവും നേർച്ച ഭക്ഷണവും ഉണ്ടായിരുന്നു.

ലൈഫ് പദ്ധതി: നാലു വർഷത്തിനിടെ പട്ടികവർഗക്കാർക്ക് നിർമിച്ചത് 21,371 വീട്

കൽപ്പറ്റ: രണ്ടാം പിണറായി സർക്കാരിന്‍റെ കാലത്ത് സംസ്ഥാനത്ത് ലൈഫ് പദ്ധതിയിൽ പട്ടികവർഗക്കാർക്ക് നിർമിച്ചത് 21,371 വീടുകൾ. 2021 മെയ് മുതൽ 2025 മാർച്ച് ഒന്നു വരെയയുള്ള കണക്കാണിത്. ഇത്രയും വീടുകളുടെ നിർമാണത്തിന് തദ്ദേശ സ്വയംഭരണ സ്ഥാപന, സംസ്ഥാന, വായ്പ വിഹിതങ്ങളായി 1094.82 കോടി രൂപ ചെലവഴിച്ചതായി പട്ടികവർഗ വികസന വകുപ്പ് അധികൃതർ പറഞ്ഞു. ഈ കാലയളവിൽ 333 കോടി രൂപ പട്ടികവർഗ വികസന വകുപ്പ് ലൈഫ് മിഷന് കൈമാറി.

വിഷു: തിരക്കിലമർന്ന് വിപണി

സുൽത്താൻ ബത്തേരി: വിഷു എത്തിയതോടെ തിരക്കിലമർന്ന് വിപണി. വസ്ത്ര വിപണിയാണ് സജീവമായത്. ജില്ലയിലെ പ്രധാന പട്ടണങ്ങളിലെല്ലാം തിരക്കാണ്. പെരുന്നാളിന്‍റെ ഭാഗമായി കഴിഞ്ഞ ഏതാനും ദിവസങ്ങളായി രാത്രി വളരെ വൈകിയും കടകളും ഭക്ഷണ ശാലകളും തുറന്നു പ്രവർത്തിക്കുന്നുണ്ട്. ഉപഭോക്താക്കളുടെ മികച്ച പ്രതികരണത്തിൽ ആശ്വാസത്തിലാണ് വ്യാപാര സമൂഹം. വിഷുക്കണിക്കുള്ള കണിക്കലവും കൃഷ്ണ വിഗ്രഹവും ഇത്തവണ വിപണിയിൽ ഏറെയുണ്ട്. ദേശീയപാതയോരത്തും മറ്റു പലയിടത്തും കൃഷ്ണ വിഗ്രഹങ്ങളുമായി ഇതര സംസ്ഥാനക്കാർ ഉൾപ്പെടെ എത്തിയിട്ടിട്ടുണ്ട്.

എൽസ്റ്റണ്‍ എസ്റ്റേറ്റിലെ ടൗൺഷിപ്പ് നിർമാണം : തൊഴിലാളികൾക്ക് നൽകിയ വാഗ്ദാനം പാലിക്കണമെന്ന് ആവശ്യം

ക്വാറിയിലെ വെള്ളക്കെട്ടിൽ മധ്യവയസ്കൻ മുങ്ങിമരിച്ചു

അന്പലവയൽ: ടൗണ്‍ പരിസരത്തുള്ള ക്വാറിയിലെ വെള്ളക്കെട്ടിൽ മധ്യവയസ്കൻ മുങ്ങിമരിച്ചു. കൊട്ടിയൂർ സ്വദേശി ഷാജിയാണ്(48)മരിച്ചത്. ഇന്നലെ വൈകുന്നേരം അഞ്ചോടെയാണ് സംഭവം. കുളിക്കുന്നതിനിടെ നിലതെറ്റി താഴ്ന്നുപോകുകയായിരുന്നു. ബത്തേരി ഫയർ ആൻഡ് റസക്യൂ സ്റ്റേഷൻ അസി.ഓഫീസർ പി. ഹമീദിന്‍റെ നേതൃത്വത്തിലെത്തിയ സ്കൂബ ടീം അംഗങ്ങളായ എ.ഡി. നിജിൽദാസ്, അഖിൽ രാജ് എന്നിവരാണ് മൃതദേഹം പുറത്തെടുത്തത്. പോലീസും രക്ഷാപ്രവർത്തനത്തിൽ പങ്കെടുത്തു. ചെരിപ്പുകുത്തിയാണ് ഷാജി. കുറച്ചുകാലമായി അന്പലവയലിലാണ് തൊഴിൽ ചെയ്യുന്നത്.

ബീ കോർണർ പ്രവർത്തനം ആരംഭിച്ചു

മാനന്തവാടി: കീ സ്റ്റോണ്‍ ഫൗണ്ടേഷന്‍റെയും ആക്സിസ് ബാങ്ക് ഫൗണ്ടേഷന്‍റെയും സഹകരണത്തോടെതിരുനെല്ലിയിൽ ഗോത്രയുവാക്കൾ ’ബീ കോർണർ’ എന്ന പേരിൽ സംരംഭം ആരംഭിച്ചു. ഗോത്ര കുടുംബങ്ങളിൽനിന്നു ശേഖരിക്കുന്ന കാട്ടുതേനും മറ്റു ചെറുകിട വനവിഭവങ്ങളും ഉൾപ്പെടെ ഉത്പന്നങ്ങൾ വിപണിയിൽ എത്തിക്കുന്നതിനാണ് സംരംഭം തുടങ്ങിയത്. ബ്ലോക്ക് പഞ്ചായത്ത് പ്രസിഡന്‍റ് ജസ്റ്റിൻ ബേബി ഉദ്ഘാടനം ചെയ്തു. തിരുനെല്ലി പഞ്ചായത്ത് പ്രസിഡന്‍റ് പി.വി. ബാലകൃഷ്ണൻ അധ്യക്ഷത വഹിച്ചു. കീ സ്റ്റോണ്‍ ഫൗണ്ടേഷൻ ഡയറക്ടർ ജ്യോത്സന കൃഷ്ണകുമാർ, പ്രോഗ്രാം കോ ഓർഡിനേറ്റർ കെ.ജി. രാമചന്ദ്രൻ, ആദിമലൈ, ജസ്റ്റിൻ പോൾസ്, ബീ കോർണർ പ്രതിനിധികൾ എന്നിവർ പങ്കെടുത്തു.

ഗോത്ര സമൂഹ സമിതി ധർണ നടത്തി

മാനന്തവാടി: ഗോത്ര വിഭാഗങ്ങൾക്കെതിരായ പോലീസ് അതിക്രമങ്ങളിൽ പ്രതിഷേധിച്ച് ഗോത്ര സമൂഹസമിതിയുടെ നേതൃത്വത്തിൽ ഗാന്ധി പാർക്കിൽ ജനകീയ ധർണ നടത്തി. സമിതി സംസ്ഥാന ചെയർപേഴ്സൻ പ്രസീത അഴീക്കോട് ഉദ്ഘാടനം ചെയ്തു. അഞ്ചുകുന്ന് മാങ്കനി ഉന്നതിയിലെ രതിന്‍റെ മരണത്തിൽ ആരോപണ വിധേയരായ പോലീസുകാരെ സർവീസിൽനിന്നു മാറ്റിനിർത്തണമെന്ന് അവർ ആവശ്യപ്പെട്ടു.സി.പി. അഷറഫ് അധ്യക്ഷത വഹിച്ചു. സൈമണ്‍ പൗലോസ്, ഇ.സി. സനീഷ്, ബാബുരാജ്, ഹാരിസ് തോപ്പിൽ, സുരേഷ് കുമിയോട്ടിൽ എന്നിവർ പ്രസംഗിച്ചു.

ലഹരിവിരുദ്ധ ഫ്ളാഷ് മോബ് നടത്തി

കണിയാന്പറ്റ: കാലിക്കട്ട് സർവകലാശാല അധ്യാപക വിദ്യാഭ്യാസ കേന്ദ്രത്തിന്‍റെയും നെഹ്റു യുവകേന്ദ്രയുടെയും സംയുക്താഭിമുഖ്യത്തിൽ പ്രോസ്പെറ എന്ന പേരിൽ സംഘടിപ്പിച്ച സാമൂഹിക സഹവാസ ക്യാന്പിന്‍റെ ഭാഗമായി ടൗണിൽ ലഹരിവിരുദ്ധ ഫ്ളാഷ് മോബ് നടത്തി. ഇതോടനുബന്ധിച്ചു ചേർന്ന യോഗത്തിൽ സാമൂഹികപ്രവർത്തകൻ കെ.ആർ. സാരംഗ്, പ്രിൻസിപ്പൽ ഡോ.പി.എൻ. ഫൈസൽ, ക്യാന്പ് സ്റ്റാഫ് കോ ഓർഡിനേറ്റർ ബി. ശ്രീലത, നെഹ്റു യുവകേന്ദ്ര പ്രതിനിധി കെ.എ. അഭിജിത്ത്, സ്റ്റാഫ് സെക്രട്ടറി ജീനോ കുര്യാക്കോസ്, യു.എൻ. വൈക്കിംഗ്, എം.പി. വൈശാഖ്, ക്യാന്പ് വിദ്യാർഥി കോ ഓർഡിനേറ്റർ അസ്ലം ഷേർഖാൻ, പ്രിയ ജയിംസ്, പി.സി. ജിജി എന്നിവർ പ്രസംകിച്ചു. വിദ്യാർഥികൾ ലഹരിവിരുദ്ധ പ്രതിജ്ഞയെടുത്തു.

ശിശുമലയിലേക്ക് വിശ്വാസികളുടെ കുരിശിന്‍റെ വഴി ഇന്ന്

പുൽപ്പള്ളി: വലിയ നോന്പിലെ പ്രധാന ദിനമായ നാൽപതാം വെള്ളി ആചരണം ഇന്ന് നടക്കും. മുള്ളൻകൊല്ലി ഫൊറോനയുടെ നേതൃത്വത്തിൽ 12 ഇടവകകളിലെ വിശ്വാസികൾ മുള്ളൻകൊല്ലിയിൽ ഒത്തുകൂടി കുരിശിന്‍റെ വഴിയായി ശിശുമല കുരിശുമലയിലെത്തും. ഇന്ന് ഒന്പതിന് മുള്ളൻകൊല്ലിയിൽ ആരംഭിക്കുന്ന കുരിശിന്‍റെവഴി ആലത്തൂർ, ശിശുമല വഴി മലമുകളിലെത്തും. 11ന് വിശുദ്ധകുർബാനയ്ക്ക് ഫൊറോനാ വികാരി ഫാ. ജസ്റ്റിൻ മൂന്നാനാൽ കാർമികത്വം വഹിക്കും. അന്പലവയൽ സെന്‍റ് മാർട്ടിൻസ് പള്ളി വികാരി ഫാ. ചാക്കോ മേപ്പുറത്ത് സന്ദേശം നൽകും. തുടർന്ന് തിരുക്കച്ച വണക്കം. നേർച്ച ഭക്ഷണത്തോടെ സമാപിക്കും. തീർഥാടകർക്ക് ആവശ്യമായ എല്ലാ സൗകര്യങ്ങളും ഏർപ്പെടുത്തിയിട്ടുണ്ടെന്ന് വികാരി ഫാ. ബിജു മാവറ അറിയിച്ചു.

ദുരന്തബാധിതരുടെ വായ്പ: കേന്ദ്ര നിലപാടിനെ അപലപിച്ച് പ്രിയങ്കഗാന്ധി

കൽപ്പറ്റ: പുഞ്ചിരിമട്ടം ഉരുൾദുരന്തബാധിതരുടെ ബാങ്ക് വായ്പകൾ എഴുതിത്തള്ളില്ലെന്ന കേന്ദ്ര നിലപാടിനെ അപലപിച്ച് പ്രിയങ്ക ഗാന്ധി എംപി. കേന്ദ്ര നിലപാട് ദുരന്തബാധിതരോടുള്ള വഞ്ചനയാണെന്ന് അവർ പറഞ്ഞു. ദുരന്തബാധിതർ വീടും സ്ഥലവും ജീവിതമാർഗവും നഷ്ടപ്പെട്ടവരാണ്. എന്നിട്ടും വായ്പ പുനഃക്രമീകരിക്കാനേ കഴിയൂവെന്നാണ് കേന്ദ്ര സർക്കാർ പറയുന്നത്. ഈ സമീപനം അനീതിയാണ്. ദുരന്തബാധിതർക്ക് നീതി ലഭ്യമാക്കാൻ ശക്തമായി ഇടപെടുമെന്നും എംപി പറഞ്ഞു.

ക്ഷേമ പെൻഷൻ 2500 രൂപആയി വർധിപ്പിക്കണം: സീനിയർ സിറ്റിസണ്‍സ് കോണ്‍ഗ്രസ്

പുൽപ്പള്ളി: പെൻഷൻ കുടിശിക വരുത്താതെ അനുദിനമായി ഉയർന്നു വന്നുകൊണ്ടിരിക്കുന്ന ജീവിത ചെലവുകൾക്കനുസരിച്ച് ക്ഷേമപെൻഷൻ 2500 രൂപയായി വർധിപ്പിക്കണമെന്ന് പുൽപ്പള്ളിയിൽ ചേർന്ന സീനിയർ സിറ്റിസണ്‍സ് കോണ്‍ഗ്രസ് യോഗം ആവശ്യപ്പെട്ടു. സീനിയർ സിറ്റിസണ്‍സ് കോണ്‍ഗ്രസ് ജില്ലാ പ്രസിഡന്‍റ് പോക്കർ ഹാജി യോഗം ഉദ്ഘാടനം ചെയ്തു കോണ്‍ഗ്രസ് മണ്ഡലം പ്രസിഡന്‍റ് പി.ഡി. ജോണി അധ്യക്ഷത വഹിച്ചു. ജില്ലാ വൈസ് പ്രസിഡന്‍റ് സോമനാഥൻ, കെ.ടി. ജോസ്, വി.എം. പൗലോസ്, കുര്യാച്ചൻ വട്ടക്കുന്നേൽ, ടി.പി. ശശിധരൻ, ജോമറ്റ് കോതവഴിക്കൽ, രാജു തോണിക്കടവ്, സിജോ കുട്ടുകാപ്പിള്ളി, ജോസ് പെരുന്പിൽ, പി.വി. ഏലിയാസ്, ചാക്കോ മാളിയേക്കൽ, ബേബി സുകുമാരൻ, എം.ബി. രാമകൃഷ്ണൻ, രാജൻ പുതുക്കുളം, ജോസഫ് ഇന്ദുങ്കൽ എന്നിവർ പ്രസംഗിച്ചു, ഭാരവാഹികളായി പ്രസിഡന്‍റ് ജോർജ് കൊല്ലിയിൽ, ജനറൽ സെക്രട്ടറി ബേബി കൈനിക്കുടി, ട്രഷറർ ജോസഫ് കുന്നത്തുമറ്റം, വൈസ് പ്രസിഡന്‍റ് കൃഷ്ണൻകുട്ടി മഞ്ഞപ്പിള്ളി, മോഹനൻ പുത്തൻകണ്ടത്തിൽ, പൗലോസ് ഇടപ്പുളവിൽ, ജോയിന്‍റ് സെക്രട്ടറിമാരായി കെ.കെ. കൃഷ്ണൻകുട്ടി, സുബ്രഹ്മണ്യൻ ചേകാടി, വർഗീസ് തോണ്ടമ്മാക്കിൽ എന്നിവരെ തെരഞ്ഞെടുത്തു.

പാൽ അധിക വില: ബത്തേരി ക്ഷീരസംഘം 3.22 കോടി വിതരണം ചെയ്തു

സുൽത്താൻ ബത്തേരി: ക്ഷീര സംഘം 2024-25ൽ പാൽ അളന്ന 2,910 കർഷകർക്ക് അധികവിലയായി 3.22 കോടി രൂപ വിതരണം ചെയ്തു. 2024-25ൽ കർഷകർ സംഘത്തിൽ 1,07,63,071 ലിറ്റർ പാലാണ് അളന്നത്. ലിറ്ററിന് മൂന്നു രൂപയാണ് അധിക വില നൽകിയത്. കഴിഞ്ഞ ഓണക്കാലത്ത് അധിക വിലയായി 90 ലക്ഷം രൂപ വിതരണം ചെയ്തിരുന്നു. മരുന്നുകൾ, തൊഴുത്ത് കോണ്‍ക്രീറ്റ്, കോണ്‍ട്രിബ്യൂട്ടറി കാറ്റിൽ ഡെത്ത് ഫണ്ട്, കാലിത്തീറ്റ, പച്ചപ്പുല്ല് വിതരണ സബ്സിഡി ഇനത്തിൽ 76 ലക്ഷം രൂപയും സംഘം കർഷകർക്ക് ലഭ്യമാക്കി. അധിക വില വിതരണം ടൗണ്‍ ഹാളിൽ ക്ഷീര വികസന ഡയറക്ടർ ശാലിനി ഗോപിനാഥ് ഉദ്ഘാടനം ചെയ്തു. മുനിസിപ്പൽ ചെയർമാൻ ടി.കെ. രമേശ് അധ്യക്ഷത വഹിച്ചു. ക്ഷീര വികസന ഡെപ്യൂട്ടി ഡയറക്ടർ ഫെമി വി. മാത്യു, ബ്ലോക്ക് പഞ്ചായത്തംഗം പി.കെ. സത്താർ, നൂൽപ്പുഴ പഞ്ചായത്ത് വൈസ് പ്രസിഡന്‍റ് എൻ.എ. ഉസ്മാൻ, നെൻമേനി പഞ്ചായത്തംഗം കെ.വി. ശശി, കാർഷിക വികസന ബാങ്ക് ചെയർമാൻ വി.വി. ബേബി, ജില്ലാ ഗുണ നിയന്ത്രണ ഓഫീസർ പി.എച്ച്. സിനാജുദ്ദീൻ, പി.കെ. രാമചന്ദ്രൻ, പി.പി. പ്രജിഷ, ഡോ.കെ. അസൈനാർ, സംഘം പ്രസിഡന്‍റ് കെ.കെ. പൗലോസ്, വൈസ് പ്രസിഡന്‍റ് സിന്ധു ഹരിദാസ്, ബേബി വർഗീസ്, കെ. രജനി, സെക്രട്ടറി പി.പി. വിജയൻ എന്നിവർ പ്രസംഗിച്ചു.

ജൈവകൃഷിയിൽ വിജയം കൊയ്ത് അയ്യൂബ് തോട്ടോളി

കൽപ്പറ്റ: ജൈവകൃഷിയിൽ വിജയം കൊയ്ത് വെള്ളമുണ്ട അയ്യൂബ് തോട്ടോളി. മനസുവച്ചാൽ അന്തസോടെ ജീവിക്കാനുള്ള വരുമാനം കൃഷിയിൽനിന്നു ലഭിക്കുമെന്നു തെളിയിക്കുകയാണ് ഈ കർഷകൻ. വൈറ്റ് കോളർ ജോലി ഉപേക്ഷിച്ച് കൃഷിയിലേക്ക് വന്നതാണ് അയ്യൂബ്. സ്വന്തം ഭൂമിക്കുപുറമേ പാട്ടത്തിനെടുത്ത സ്ഥലത്തും ഇദ്ദേഹം കൃഷി നടത്തുന്നുണ്ട്. ആകെ 13 ഏക്കറിലാണ് അയൂബിന്‍റെ പരന്പരാഗത-നൂതന കൃഷികൾ. വിയറ്റ്നാം മാതൃകയിൽ കുരുമുളകുകൃഷിയും വാണിജ്യാടിസ്ഥാനത്തിൽ പപ്പായ കൃഷിയും ജില്ലയിൽ ആരംഭിച്ചത് അയ്യൂബാണ്. കുരുമുളക്, കാപ്പി, തെങ്ങ്, കമുക്, ഏലം, പാഷൻ ഫ്രൂട്ട്, പേര,വിയറ്റ്നാം ഏർളി പ്ലാവ്, ഹൈെ ഡെൻസിറ്റി മാവ്, റംബുട്ടാൻ, അവക്കാഡോ തുടങ്ങിയയവും വാണിജ്യാടിസ്ഥാനത്തിൽ ഇദ്ദേഹം കൃഷി ചെയ്യുന്നുണ്ട്. 14 തരം മുള, മറയൂർ ചന്ദനം എന്നിവയും കൃഷിയിടത്തിലുണ്ട്. കോഴി, താറാവ്, മത്സ്യം എന്നീ കൃഷികളും ചെയ്യുന്ന അയൂബ് ക്ഷീര കർഷകനുമാണ്. പ്രധാനമായും സമൂഹ മാധ്യമങ്ങൾ ഉപയോഗപ്പെടുത്തിയാണ് ഉത്പന്ന വിപണനം. കൃഷികളിൽനിന്നു മെച്ചപ്പെട്ട വരുമാനം ലഭിക്കുന്നുണ്ടെന്നു അയ്യൂബ് പറയുന്നു. ഡോ.എം.എസ്. സ്വാമിനാഥൻ ഫൗണ്ടേഷന്‍റെ കുടുംബകൃഷി അവാർഡ്, ഹരിത കീർത്തി അവാർഡ്, ആത്മ സമ്മിശ്ര കർഷക അവാർഡ് ഉൾപ്പെടെ നിരവധി പുരസ്കാരങ്ങൾ ലഭിച്ചിട്ടുണ്ട്.

ലഹരിക്കെതിരെയുള്ള പോരാട്ടം വെള്ളത്തിൽ വരച്ച വര പോലെ ആകരുത്: മന്ത്രി ഒ.ആർ. കേളു

സുൽത്താൻബത്തേരി: ലഹരിക്കെതിരെയുള്ള പോരാട്ടം വെള്ളത്തിൽ വരച്ച വരപോലെ ആകരുതെന്ന് പട്ടികജാതി പട്ടികവർഗ പിന്നോക്ക ക്ഷേമ മന്ത്രി ഒ.ആർ. കേളു. ലഹരിക്കെതിരെ കേന്ദ്ര സാമൂഹ്യനീതി ശാക്തീകരണ മന്ത്രാലയം നടപ്പാക്കുന്ന നശാമുക്ത് ഭാരത് അഭിയാൻ പദ്ധതിയുടെ ഭാഗമായി ജില്ലയിൽ സാമൂഹ്യനീതി വകുപ്പ് ശ്രേയസിന്‍റെ സഹകരണത്തോടെ നടപ്പാക്കുന്ന വിവിധ പരിപാടികളുടെ ഉദ്ഘാടനം സുൽത്താൻ ബത്തേരിയിൽ ഉദ്ഘാടനം ചെയ്യുകയായിരുന്നു മന്ത്രി ഒ.ആർ. കേളു. പലകാര്യങ്ങൾക്കും പദ്ധതികളും മറ്റും പ്രഖ്യാപിക്കുമെങ്കിലും നൂറ് ശതമാനം നടപ്പാകാറില്ല. എന്നാൽ ലഹരിക്കെതിരെയുള്ള പോരാട്ടം അങ്ങനെ ആവരുതെന്നും പൂർണമായും സമൂഹത്തിൽ നിന്ന് പറിച്ചെറിയാൻ എല്ലാവരും പോരാടണമെന്നും അദ്ദേഹം പറഞ്ഞു. ശ്രേയസിൽ നടന്ന ചടങ്ങിൽ സബ് കളക്ടർ മിസാൽസാഗർ ഭരത് അധ്യക്ഷത വഹിച്ചു. എൻഎംബിഎ സംസ്ഥാന കോഓർഡിനേറ്റർ ടി.എം. മാത്യു, അസിസ്റ്റന്‍റ് എക്സൈസ് കമ്മീഷണർ എ.ജെ. ഷാജി, ഡിഎസ്ജിഒ കെ.ജെ. ജോണ്‍ ജോഷി, ജില്ലാമെഡിക്കൽ ഓഫീസർ മനോജ്കുമാർ, ജില്ലാ വനിതാശിശു വികസന ഓഫീസർ പി. സുധീർകുമാർ, ആസാദ് സേന ജില്ലാ കോ ഓർഡിനേറ്റർ എം.എ. ഷെറീന, എൻഎംബിഎ അംഗം പ്രിൻസ് ഏബ്രഹാം, ശ്രേയസ് എക്സിക്യൂട്ടീവ് ഡയറക്ടർ ഫാ. ഡേവിഡ് ആലുങ്കൽ, ഫാ. ബിജോ തോമസ്, ഡോ. ഷാജി വട്ടോളിപ്പുരക്കൽ, മധുസൂദനൻ എന്നിവർ പ്രസംഗിച്ചു. വരുംദിവസങ്ങളിൽ വിവിധ വകുപ്പുകളുടെ സഹകരണത്തോടെ ബോധവത്കരണ ക്ലാസുകൾ, സെമിനാറുകൾ, കൗണ്‍സലിംഗ്, കൗമാരശക്തീകരണ പരിശീലനം, ഹൈസ്കൂൾ-കോളജ് തലങ്ങളിൽ ലഹരി വസ്തുക്കളുടെ ദുരുപയോഗത്തെയും അപകടത്തെയുംകുറിച്ച് പ്രചാരണങ്ങൾ തുടങ്ങിയ വിവിധങ്ങളയ പ്രവർത്തനങ്ങളും വിവിധ വകുപ്പുകളുടെ സഹകരണത്തോടെ നടത്തും.

ഗോകുലിന്‍റെ മരണം: മാർച്ചും ധർണയും നടത്തി

കൽപ്പറ്റ: ആദിവാസികൾക്കെതിരായ അതിക്രമ വിരുദ്ധ സമിതിയുടെ നേതൃത്വത്തിൽ കളക്ടറേറ്റ് മാർച്ചും ധർണയും നടത്തി. അന്പലവയൽ നെല്ലാറച്ചാൽ പുതിയാപാടി ഉന്നതിയിലെ 17കാരൻ ഗോകുലിനെ ഏപ്രിൽ ഒന്നിനു രാവിലെ കൽപ്പറ്റ പോലീസ് സ്റ്റേഷനിലെ ശുചിമുറിയിൽ തൂങ്ങിമരിച്ചനിലയിൽ കണ്ടെത്തിയ സംഭവം സിബിഐ അന്വേഷിക്കുക, കസ്റ്റഡി മരണത്തിന് ഉത്തരവാദികളെ നിയമത്തിനു മുന്പിൽ നിർത്തുക, ഗോകുലിന്‍റെ കുടുംബത്തിന് അടിയന്തര സഹായധനമായി 10 ലക്ഷം രൂപ നൽകുക, പോക്സോ നിയമത്തിന്‍റെ മറവിൽ ആദിവാസികളെ വേട്ടയാടുന്നത് അവസാനിപ്പിക്കുക തുടങ്ങിയ ആവശ്യങ്ങൾ ഉന്നയിച്ചായിരുന്നു സമരം. മനുഷ്യാവകാശ പ്രവർത്തകൻ കെ.കെ. സുരേന്ദ്രൻ ഉദ്ഘാടനം ചെയ്തു. സമിതി ചെയർപേഴ്സണ്‍ അമ്മിണി കെ. വയനാട് അധ്യക്ഷത വഹിച്ചു. കണ്‍വീനർ സി. മണിക്കുട്ടൻ, ഡോ.പി.ജി. ഹരി, സാം പി. മാത്യു, എ.എൻ. സലിംകുമാർ, ബിന്ദു മൈലാച്ചേരി, ഓമന ചുള്ളിയോട്, സി.എസ്. മുരളി, സി.എച്ച്. ലത്തീഫ്, മുജീബ് റഹ്മാൻ അഞ്ചുകുന്ന് എന്നിവർ പ്രസംഗിച്ചു.

ബത്തേരിയിൽ കുരിശിന്‍റെ വഴി ഇന്ന്

സുൽത്താൻ ബത്തേരി: കോഴിക്കോട്, മാനന്തവാടി, സുൽത്താൻ ബത്തേരി രൂപതകളുടെ നേതൃത്വത്തിൽ ഇന്ന് വൈകുന്നേരം നാലിന് കുരിശിന്‍റെ വഴി ബത്തേരി സെന്‍റ് തോമസ് ദേവാലയത്തിൽ ആരംഭിക്കുമെന്ന് സംയുക്ത കത്തോലിക്കസഭ ഭാരവാഹികൾ വാർത്താസമ്മേളനത്തിൽ അറിയിച്ചു. യേശുവിനെ കുരിശിൽ തറച്ച അതേ കുരിശിന്‍റെ അംശം തിരുശേഷിപ്പായി സൂക്ഷിച്ചിരിക്കുന്ന പൂമല ഹോളിക്രോസ് ലത്തീൻ ദേവാലയത്തിൽ സമാപിക്കും. യേശുക്രിസ്തു ജെറുസലെമിലെ കാൽവരിക്കുന്നിലേയ്ക്ക് കുരിശ് വഹിച്ച് നടത്തിയ പീഢാസഹന യാത്രയെ അനുസ്മരിപ്പിച്ച് നടത്തുന്ന കുരിശിന്‍റെ വഴി സുൽത്താൻ ബത്തേരി പട്ടണത്തിലൂടെയാണ് പൂമല ഹോളിക്രോസിൽ എത്തിച്ചേരുക. തുടർന്ന് കുരിശിന്‍റെ തിരുശേഷിപ്പ് വണക്കവും ഉണ്ടായിരിക്കും. ബത്തേരി ബിഷപ് ഡോ.ജോസഫ് മാർ തോമസ് മെത്രാപ്പോലീത്ത അനുഗ്രഹ പ്രഭാഷണം നടത്തും. സെന്‍റ് തോമസ് കത്തീഡ്രൽ വികാരി സെബാസ്റ്റ്യൻ കീപ്പള്ളിൽ സ്വാഗതവും അസംപ്ഷൻ ഫെറോന പള്ളി വികാരി ഫാ. തോമസ് മണക്കുന്നേൽ നന്ദിയും പറയും. പരിപാടിയിൽ പങ്കെടുക്കുന്ന എല്ലാവർക്കും നേർച്ച ഭക്ഷണവും വിതരണം ചെയ്യും. വാർത്താസമ്മേളനത്തിൽ ജനറൽ കണ്‍വീനർ സെബാസ്റ്റ്യൻ കീപ്പള്ളി, കണ്‍വീനർമാരായ ഫാ. തോമസ് മണക്കുന്നേൽ, ഫാ. പോൾ ആൻഡ്രൂസ്, പ്രോഗ്രാം കോഓർഡിനേറ്റർ ഫാ. ജേക്കബ് ഓവക്കൽ, പബ്ലിസിറ്റി കണ്‍വീനർ ഫാ. ജോർജ് കോടാനൂർ, കമ്മിറ്റി അംഗങ്ങളായ മെജോ കുരുത്തോലയിൽ, സിബിച്ചൻ കരിക്കേടം, റോയ് വർഗീസ്, വിൽസന്‍റ് വട്ടപ്പറന്പിൽ, വി.പി. തോമസ് എന്നിവർ പങ്കെടുത്തു.

ബൈബിൾ കണ്‍വെൻഷനും ജൂബിലി സംഗമവും

സുൽത്താൻ ബത്തേരി: എട്ട് എപ്പിസ്ക്കോപ്പൽ സഭകളുടെ കൂട്ടായ്മയായ വയനാട് എക്യുമെനിക്കൽ ഫോറത്തിന്‍റെ രജത ജൂബിലിയും അഖിലലോക എക്യുമെനിക്കൽ പ്രസ്ഥാനമായ ബത്തേരി വൈഎംസിഎ യുടെ സുവർണ ജൂബിലിയും ആഘോഷിക്കുന്നതിന്‍റെ ഭാഗമായി ബൈബിൾ കണ്‍വെൻഷനും ജൂബിലി സംഗമവും 12ന് വൈകുന്നേരം അഞ്ച് മുതൽ 8.30 വരെ ബത്തേരി സെന്‍റ് മേരീസ് സുനോറോ ദേവാലയത്തിൽ നടത്തും. വടുവഞ്ചാൽ വട്ടത്തുവയൽ അനുഗ്രഹ ധ്യാനകേന്ദ്രത്തിലെ വചന പ്രഘോഷകൻ ഫാ.മാത്യു വയലാമണ്ണിലാണ് വചന സന്ദേശം നൽകുന്നത്. ബത്തേരി ബിഷപ് ഡോ.ജോസഫ് മാർ തോമസ് അനുഗ്രഹ പ്രഭാഷണം നടത്തും. എക്യുമെനി ക്കൽ ഫോറം പ്രസിഡന്‍റ് ഫാ. സുനിൽ എടച്ചേരി അധ്യക്ഷത വഹിക്കും. വൈഎംസിഎ പ്രസിഡന്‍റ് രാജൻ തോമസ് സന്ദേശം നൽകും. പ്രോഗ്രാം ജനറൽ കണ്‍വീനർ ഫാ. ബേബി ഏലിയാസ് കാരക്കുന്നേൽ, എക്യുമെനിക്കൽ ഫോറം സെക്രട്ടറി പ്രഫ.എ.വി. തരിയത്ത് എന്നിവർ പ്രസംഗിക്കും. വാർത്താസമ്മേളനത്തിൽ ഫാ. സുനിൽ എടച്ചേരി, ഫാ. പോൾ ആൻഡ്രൂസ്, ഫാ. ബേബി ഏലിയാസ് കാരക്കുന്നേൽ, പ്രഫ.എ.വി. തരിയത്ത്, സിബിച്ചൻ എൻ.വി. കരിക്കേടം, വർഗീസ് കാട്ടന്പള്ളി, വിൻസെന്‍റ് വട്ടപറന്പിൽ, എൻ.എ. ബില്ലിഗ്രഹാം, വി.പി. തോമസ്, റോയ് വർഗീസ് എന്നിവർ സംബന്ധിച്ചു.

മഹിളാ കോണ്‍ഗ്രസ് ധർണ നടത്തി

കൽപ്പറ്റ: പാചകവാതക വില വർധിപ്പിച്ചതിൽ പ്രതിഷേധിച്ച് മഹിളാ കോണ്‍ഗ്രസ് ജില്ലാ കമ്മിറ്റിയുടെ നേതൃത്വത്തിൽ നഗരത്തിൽ പ്രകടനവും ഹെഡ് പോസ്റ്റ് ഓഫീസ് പടിക്കൽ ധർണയും നടത്തി. ഡിസിസി പ്രസിഡന്‍റ് എൻ.ഡി. അപ്പച്ചൻ ഉദ്ഘാടനം ചെയ്തു. പാചകവാതക വില വർധിച്ചിച്ചത് ജനങ്ങളോടുള്ള വെല്ലുവിളിയാണെന്ന് അദ്ദേഹം പറഞ്ഞു. മഹിളാ കോണ്‍ഗ്രസ് ജില്ലാ പ്രസിഡന്‍റ് ജിനി തോമസ് അധ്യക്ഷത വഹിച്ചു. വൈസ് പ്രസിഡന്‍റുമാരായ ഉഷ തന്പി, മീനാക്ഷി രാമൻ, ബിന്ദു സജീവ്, ജനറൽ സെക്രട്ടറി പ്രസന്ന രാമകൃഷ്ണൻ, സെക്രട്ടറിമാരായ ലൗലി ഷാജു, ഒ.ജെ, ബിന്ദു, ചന്ദ്രിക കൃഷ്ണൻ, മേഴ്സി ബെന്നി, രജനി ചന്ദ്രൻ, രാജാറാണി, എം.ഡി. മേരി, ഡായോണിയ സിബി, ബ്ലോക്ക് പ്രസിഡന്‍റുമാരായ ഗിരിജ മോഹൻദാസ്, ജാൻസി ജോസഫ്, ബീന സജി, കോണ്‍ഗ്രസ് മണ്ഡലം പ്രസിഡന്‍റ് ഗിരീഷ് കൽപ്പറ്റ എന്നിവർ പ്രസംഗിച്ചു.

ചൂരൽമല നിവാസികളെ ചേർത്തുപിടിച്ച് മാനന്തവാടി രൂപതയും വയനാട് സോഷ്യൽ സർവീസ് സൊസൈറ്റിയും

ജില്ലയ്ക്ക് മികച്ച നേട്ടം : 200 കോടി കടന്ന് തൊഴിലുറപ്പ് പദ്ധതി

കൽപ്പറ്റ: മഹാത്മാഗാന്ധി ദേശീയ ഗ്രാമീണ തൊഴിലുറപ്പ് പദ്ധതി 2024 - 2025 സാന്പത്തിക വർഷം 206.37 കോടി രൂപ ചെലവഴിച്ചതിലൂടെ സംസ്ഥാനത്ത് തന്നെ മികച്ച നേട്ടം കൈവരിക്കാൻ വയനാട് ജില്ലയ്ക്ക് സാധിച്ചു. കഴിഞ്ഞ സാന്പത്തിക വർഷം 186.81 കോടി രൂപയായിരുന്നു ചെലവഴിച്ചത്. 43.75 ലക്ഷം തൊഴിൽ ദിനങ്ങൾ സൃഷ്ടിച്ചതിലൂടെ 147.61 കോടി രൂപ കൂലിയിനത്തിലും 51.47 കോടി രൂപ മെറ്റീരിയൽ ഇനത്തിലും ഈ വർഷം ചെലവഴിക്കാൻ സാധിച്ചു. 61,051 കുടുംബങ്ങളാണ് ഈ സാന്പത്തിക വർഷം തൊഴിലിനിറങ്ങിയത്. ഇതിൽ 26,358 കുടുംബങ്ങൾ നൂറുദിനം പൂർത്തീകരിക്കുകയും ചെയ്തു. ഇതും റിക്കാർഡാണ്. 15.36 കോടി രൂപ മെറ്റീരിയൽ ഇനത്തിൽ ഈ വർഷം കൂടുതൽ ഉപയോഗിച്ചതിലൂടെ 606 റോഡുകൾ, 28 കൾവർട്ടുകൾ, 31 ഡ്രൈനേജുകൾ, എട്ട് സ്കൂളുകൾക്ക് ചുറ്റുമതിൽ, 19 സ്വയം സഹായ ഗ്രൂപ്പുകൾക്ക് വർക്ക്ഷെഡ്, 182 ജലസേചന കുളങ്ങൾ, മൂന്ന് അങ്കണവാടി കെട്ടിടം തുടങ്ങി ഗ്രാമീണ അടിസ്ഥാന സൗകര്യം ഉറപ്പ് വരുത്തുന്നതിനുള്ള പ്രവൃത്തികൾ പൂർത്തിയാക്കി. ശുചിത്വ മേഖലയുമായി ബന്ധപ്പെട്ട് 1,633 സോക്ക്പിറ്റുകളും 272 കംന്പോസ്റ്റ് പിറ്റുകളും 126 മിനി എംസിഎഫുകളും നിർമിച്ചു. 1,200 ഓളം കുടുംബങ്ങൾക്ക് തൊഴുത്ത്, ആട്ടിൻകൂട്, കോഴിക്കൂട്, തീറ്റപ്പുൽകൃഷി തുടങ്ങിയ വ്യക്തിഗത ആസ്തികൾ നൽകാനും സാധിച്ചു. ജില്ലയിൽ വരൾച്ച പ്രതിരോധത്തിനായി ജല സംരക്ഷണ പ്രവൃത്തികളും പരന്പരാഗത ജലസ്രോതസുകളുടെ പുനരുദ്ധാരണ പ്രവൃത്തികളും കൂടുതൽ കാര്യക്ഷമമായി ഏറ്റെടുക്കാൻ സാധിച്ചു. ഓരോ വാർഡിലും ഓരോ നഴ്സറി ആരംഭിച്ച് ഗ്രാമ സമൃദ്ധി എന്ന പേരിൽ നടപ്പാക്കുന്ന പ്രത്യേക പദ്ധതി ഈ വർഷം ആരംഭിക്കാൻ പോവുകയാണ്. തൊഴിൽ കാർഡുള്ള കർഷകർക്ക് അവരുടെ തോട്ടങ്ങളിൽ തെങ്ങ്, കമുക്, കാപ്പി, കശുമാവ്, റംബുട്ടാൻ, മാങ്കോസ്റ്റീൻ, സപ്പോട്ട, മാവ്, പുതിയ ഇനം പ്ലാവുകൾ, ഒൗഷധസസ്യങ്ങൾ, പൂമരങ്ങൾ എന്നിവ നട്ടു നൽകുന്നതാണ് പദ്ധതി. ഇതിലൂടെ അഞ്ച് ലക്ഷം തൈകൾ കർഷകർക്ക് നട്ടുനൽകാനാണ് ലക്ഷ്യമിടുന്നത്. ഇതോടൊപ്പം ഓരോ ഗ്രാമപഞ്ചായത്തിലും ഒന്ന് വീതം ജൈവവൈവിധ്യ പാർക്കും ഒൗഷധസസ്യ ഉദ്യാനവും നിർമിക്കുന്നതിന് പദ്ധതി തയാറാക്കിയിട്ടുണ്ട്.

ലഹരിവിരുദ്ധ ബോധവത്കണം നൽകി

പുൽപ്പള്ളി: ലഹരിവിരുദ്ധ കാന്പയിനിന്‍റെ ഭാഗമായി വീട്ടിമൂലയിൽ കൈരളി ക്ലബിന്‍റെ നേതൃത്വത്തിൽ ബോധവത്കരണം നടത്തി. ലഹരിവിരുദ്ധ ദീപം തെളിയിച്ചു. വാർഡ് അംഗം സുശീല സുബ്രഹ്മണ്യൻ ഉദ്ഘാടനം ചെയ്തു. ബേബി കൈനികുടി അധ്യക്ഷത വഹിച്ചു. ക്ലബ് പ്രസിഡന്‍റ് കെ.എസ്. മഹേശൻ, കെ.കെ. കൃഷ്ണൻകുട്ടി, പി.യു. വിനോദ്, കെ.പി. സുരേഷ്, ലിൻസി ബാബു എന്നിവർ പ്രസംഗിച്ചു.

ഖാദി മേള ആരംഭിച്ചു

കൽപ്പറ്റ: കേരള ഖാദി ഗ്രാമ വ്യവസായ ബോർഡ് നടത്തുന്ന ഖാദി മേളയുടെ ഉദ്ഘാടനവും ആദ്യ വിൽ പനയും പള്ളിത്താഴെ റോഡിലെ ഖാദി ഗ്രാമസൗഭാഗ്യയിൽ ജില്ലാ പഞ്ചായത്ത് ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ ജുനൈദ് കൈപ്പാണി നിർവഹിച്ചു. ഖാദി ബോർഡ് ജില്ലാ പ്രോജക്ട് ഓഫീസർ എം. ആയിഷ അധ്യക്ഷത വഹിച്ചു. എം. അനിത, ദിലീപ് കുമാർ, കെ. ജിബിൻ, വി. ഷാഫി എന്നിവർ പ്രസംഗിച്ചു. കോട്ടണ്‍ ഷർട്ടുകൾ, ദോതികൾ, റെഡിമെയ്ഡ് ഷർട്ടുകൾ, ഉന്നക്കിടക്കകൾ, തേൻ, മരച്ചക്കിലാട്ടിയ എള്ളെണ്ണ, സോപ്പ് എന്നിവ മേളയിൽ ലഭ്യമാണ്.

കഞ്ചാവുമായി യുവാക്കൾ പിടിയിൽ

കാട്ടിക്കുളം: കഞ്ചാവുമായി രണ്ട് യുവാക്കൾ പോലീസ് പിടിയിലായി. ആസാം സ്വദേശികളായ സഞ്ജു നായക് (37), മനേഷ് പുർത്തി(24) എന്നിവരെയാണ് തിരുനെല്ലി പോലീസ് അറസ്റ്റുചെയ്തത്. സഞ്ജുവിൽനിന്നു 51 ഉം മനേഷിൽനിന്നു 31 ഉം ഗ്രാം കഞ്ചാവ് പിടിച്ചെടുത്തു. കഴിഞ്ഞ് ദിവസം ബാവലിയിൽ ഇൻസ്പെക്ടർ ലാൽ സി. ബേബിയുടെ നേതൃത്വത്തിൽ പരിശോധനയിലാണ് ഇവരുടെ കൈവശം കഞ്ചാവ് കണ്ടെത്തിയത്.

ലഹരിവിരുദ്ധ സംഗമം നടത്തി

ചേനംകൊല്ലി: ലൈബ്രറി കൗണ്‍സിൽ അമൃതംഗമയ എന്ന പേരിൽ നടത്തുന്ന ലഹരിവിരുദ്ധ കാന്പയിനിന്‍റെ ഭാഗമായി കെബിസിടി വായനശാല ആൻഡ് ക്ലബ്, മാനസ മുട്ടിൽ, കുടുംബശ്രീ യൂണിറ്റ് എന്നിവയുടെ സഹകരണത്തോടെ ലഹരിവിരുദ്ധ സംഗമം നടത്തി. സിവിൽ എക്സൈസ് ഓഫീസർ വി.പി. വജീഷ് ഉദ്ഘാടനം ചെയ്തു. മാനസ കണ്‍വീനർ ബെന്നി മലനാട് അധ്യക്ഷത വഹിച്ചു. അബ്ദുൾ ജലീൽ മദനി, വി.പി. സുധീഷ്, കെ. ആമിന, എം.കെ. സൈനുദ്ദീൻ, കെ. രവീന്ദ്രൻ എന്നിവർ പ്രസംഗിച്ചു. വായനശാല പ്രസിഡന്‍റ് സി.എം. സുമേഷ് സ്വാഗതവും ലൈബ്രേറിയൻ റഷീന നൗഷാദ് നന്ദിയും പറഞ്ഞു.

കരാട്ടെ താരങ്ങൾക്ക് യാത്രയയപ്പ് നൽകി

കൽപ്പറ്റ: തിരുവനന്തപുരം ജിമ്മി ജോർജ് ഇൻഡോർ സ്റ്റേഡിയത്തിൽ 11, 12, 13 തീയതികളിൽ നടക്കുന്ന ഓപ്പണ്‍ കരാട്ടെ ചാന്പ്യൻഷിപ്പിൽ ജില്ലയിൽനിന്നു പങ്കെടുക്കുന്ന നൂറോളം താരങ്ങൾക്ക് ജില്ലാ കരാട്ടെ അസോസിയേഷന്‍റെ നേതൃത്വത്തിൽ യാത്രയയപ്പ് നൽകി. ഒളിന്പിക് അസോസിയേഷൻ ജില്ലാ സെക്രട്ടറി സലിം കടവൻ, കരാട്ടെ അസോസിയേഷൻ ജില്ലാ സെക്രട്ടറി സെൻസായി സുരേഷ്, ഡി പോൾ സ്കൂൾ പ്രിൻസിപ്പൽ ജോസഫ്, കരാട്ടെ അസോസിയേഷൻ ഭാരവാഹികളായ ഷിജു, മനോജ്, ഹമീദ് എന്നിവർ നേതൃത്വം നൽകി. സംസ്ഥാന ഒളിന്പിക്, കരാട്ടെ അസോസിയേഷനുകൾ സംയുക്തമായാണ് ചാന്പ്യൻഷിപ്പ് സംഘടിപ്പിക്കുന്നത്.

ക്ഷേമ പെൻഷൻ 2,500 രൂപയാക്കണം: സീനിയർ സിറ്റിസണ്‍സ് കോണ്‍ഗ്രസ്

പുൽപ്പള്ളി: ക്ഷേമ പെൻഷൻ 2,500 രൂപയായി വർധിപ്പിക്കണമെന്ന് സീനിയർ സിറ്റിസണ്‍സ് കോണ്‍ഗ്രസ് മണ്ഡലം കമ്മിറ്റി യോഗം സർക്കാരിനോട് ആവശ്യപ്പെട്ടു. ജില്ലാ പ്രസിഡന്‍റ് കെ.വി. പോക്കർ ഹാജി ഉദ്ഘാടനം ചെയ്തു. കോണ്‍ഗ്രസ് മണ്ഡലം പ്രസിഡന്‍റ് പി.ഡി. ജോണി അധ്യക്ഷത വഹിച്ചു. സീനിയർ സിറ്റിസണ്‍സ് കോണ്‍ഗ്രസ് ജില്ലാ വൈസ് പ്രസിഡന്‍റ് സോമനാഥൻ, കെ.ടി. ജോസ്, വി.എം. പൗലോസ്, കുര്യാച്ചൻ വട്ടക്കുന്നേൽ, ടി.പി. ശശിധരൻ, ജോമറ്റ് കോതവഴിക്കൽ, രാജു തോണിക്കടവ്, സിജോ കൊട്ടുകാപ്പിള്ളി, ജോസ് പെരുന്പിൽ, പി.വി. ഏലിയാസ്, ചാക്കോ മാളിയേക്കൽ, ബേബി സുകുമാരൻ, എം.ബി. രാമകൃഷ്ണൻ, രാജൻ പുതുക്കുളം, ജോസഫ് ഇന്ദുങ്കൽ എന്നിവർ പ്രസംഗിച്ചു. ഭാരവാഹികളായി ജോർജ് കൊല്ലിയിൽ(പ്രസിഡന്‍റ്), കൃഷ്ണൻകുട്ടി മഞ്ഞപ്പിള്ളി, മോഹനൻ പുത്തൻകണ്ടത്തിൽ, പൗലോസ് ഇടപ്പുളവിൽ(വൈസ് പ്രസിഡന്‍റുമാർ), ബേബി കൈനികുടി(ജനറൽ സെക്രട്ടറി), കെ.കെ. കൃഷ്ണൻകുട്ടി, സുബ്രഹ്മണ്യൻ ചേകാടി, വർഗീസ് തോണ്ടമ്മാക്കിൽ(ജോയിന്‍റ് സെക്രട്ടറിമാർ), ജോസഫ് കുന്നത്തുമറ്റം(ട്രഷറർ) എന്നിവരെ തെരഞ്ഞെടുത്തു.

അനധികൃതമായി സൂക്ഷിച്ച പടക്കങ്ങൾ പിടിച്ചെടുത്തു

കൽപ്പറ്റ: ജില്ലാ ഹോൾസെയിൽ കണ്‍സ്യൂമർ സ്റ്റോറിൽ അനധികൃതമായി സൂക്ഷിച്ച ഏകദേശം 950 കിലോഗ്രാം പടക്കം പോലീസ് പിടിച്ചെടുത്തു. ലൈസൻസി കേണിച്ചിറ താഴെമുണ്ട പുതുശേരി പി.ജെ. ജീമോനെതിരേ(48) കേസെടുത്തു. എസ്ഐ വിമൽചന്ദ്രന്‍റെ നേതൃത്വത്തിൽ നടത്തിയ പരിശോധനയിലാണ് അനധികൃത പടക്കശേഖരം കണ്ടെത്തിയത്. 450 കിലോഗ്രാം ചൈനീസ് പടക്കങ്ങളും 50 കിലോഗ്രാം നിർമിത പടക്കങ്ങളും സൂക്ഷിക്കാനുള്ള അനുമതിയാണ് സ്ഥാപനത്തിനുള്ളത്. നിയമവിരുദ്ധമായി എക്സ്പ്ലോസീവ് ഉത്പന്നങ്ങൾ സൂക്ഷിക്കുന്നത് കണ്ടെത്താൻ വ്യാപകമായ പരിശോധന നടത്തുമെന്ന് ജില്ലാ പോലീസ് മേധാവി അറിയിച്ചു.

ലഹരിക്കെതിരേ ദീപം തെളിയിച്ച് സീനിയർ ചേംബർ

വൈത്തിരി: സീനിയർ ചേംബർ ഇന്‍റർനാഷണൽ കൽപ്പറ്റ ലിജിയൻ കുന്നന്പറ്റ പെപ്പർവാലി റിസോർട്ടിൽ ചേർന്ന വാർഷിക സമ്മേളനത്തിൽ ലഹരിക്കെതിരേ ദീപം തെളിയിച്ചു. നാഷണൽ കോ ഓർഡിനേറ്റർ പി.ജെ. ജോസുകുട്ടി, സന്തോഷ് പട്ടയിൽ, ഡോ.നൗഷാദ് പള്ളിയാൽ, സോമൻ വൈത്തിരി, പ്രശാന്തൻ, കെ.പി. സെയ്തലവി, അഡ്വ. രഞ്ജിത്ത്, മാധവൻ, രശ്മി സുനിൽ, കെ.പി. ബാബു, ആയിഷ നൗഷാദ്, സുനിൽ, റോഷ്നി എന്നിവർ നേതൃത്വം നൽകി.

വാട്ടർ അഥോറിറ്റി സ്റ്റാഫ് അസോസിയേഷൻ ധർണ നടത്തി

സുൽത്താൻ ബത്തേരി: വാട്ടർ അഥോറിറ്റി സ്റ്റാഫ് അസോസിയേഷൻ സംസ്ഥാന വ്യാപകമായി നടത്തിയ സമരത്തിന്‍റെ ഭാഗമായി ഡിവിഷൻ ഓഫീസിനു മുന്പിൽ ധർണ നടത്തി. ജല അഥോറിറ്റിയെ തകർക്കുന്ന സർക്കാർ നയങ്ങളിൽ പ്രതിഷേധിച്ചും വിവിധ ആവശ്യങ്ങൾ ഉന്നയിച്ചുമായിരുന്നു പരിപാടി. ഐഎൻടിയുസി സംസ്ഥാന എക്സിക്യുട്ടീവ് കമ്മിറ്റിയംഗം ഉമ്മർ കുണ്ടാട്ടിൽ ഉദ്ഘാടനം ചെയ്തു. അസോസിയേഷൻ സംസ്ഥാന വൈസ് പ്രസിഡന്‍റ് പി. പ്രമോദ് മുഖ്യപ്രഭാഷണം നടത്തി. ജില്ലാ സെക്രട്ടറി സാബു എം. രാജു, ഷിനോജ് മാത്യു, എം.പി. ധർമപാലൻ, ജിജി അലക്സ് എന്നിവർ പ്രസംഗിച്ചു.

ക്വാറി പ്രവർത്തനത്തിനെതിരേ നിവേദനം നൽകി

പുൽപ്പള്ളി: മുള്ളൻകൊല്ലി ഗ്രാമപഞ്ചായത്തിൽ പ്രവർത്തിക്കുന്ന ക്വാറികൾ മൂലം ദുരിതമനുഭവിക്കുന്ന പ്രദേശവാസികൾ പഞ്ചായത്തിലും ജില്ലാ ഭരണകൂടത്തിലും സംസ്ഥാന സർക്കാർ ഓഫീസുകളിലും നിരവധി പരാതികൾ നൽകിയെങ്കിലും അനുകൂല നടപടികൾ സ്വീകരിക്കാത്ത സാഹചര്യത്തിൽ കേന്ദ്ര വനം, പരിസ്ഥിതി, കാലാവസ്ഥ വ്യതിയാന മന്ത്രി കീർത്തി വർദ്ധൻ സിംഗ്, കേന്ദ്ര മന്ത്രി ജോർജ് കുര്യൻ എന്നിവർക്ക് നിവേദനം നൽകി. മുള്ളൻകൊല്ലി നിവാസികൾക്കുവേണ്ടി ഫാ. ബിബിൻ കുന്നേൽ, ഷിജോ മലയിൽ, സനോജ് ഒള്ളേത്താഴത്ത് എന്നിവരാണ് കൽപ്പറ്റയിൽ വച്ച് നേരിൽ കണ്ട് മന്ത്രിമാർക്ക് നിവേദനം നൽകിയത്. കേന്ദ്ര വനം വകുപ്പ് 2019 ൽ ദേശീയ വനം ഉദ്യാനവുമായി ബന്ധപ്പെട്ട് പ്രഖ്യാപിച്ച നിയമലംഘനങ്ങൾ മുള്ളൻകൊല്ലിയിൽ പ്രവർത്തിക്കുന്ന ക്വാറികളിൽ ഉണ്ടെന്നും നിവേദനത്തിൽ ചൂണ്ടിക്കാണിച്ചിട്ടുണ്ട്. വിഷയം വേണ്ടത്ര ഗൗരവത്തോടെ പരിഗണിക്കുമെന്ന് കേന്ദ്ര മന്ത്രി കീർത്തി വർദ്ധൻ സിംഗ് പറഞ്ഞു.

കുടുംബശ്രീ സിഡിഎസ് വായ്പ വിതരണവും വായ്പ എഴുതിത്തള്ളിയവർക്ക് രേഖ കൈമാറലും ഇന്ന്

കൽപ്പറ്റ: സാമൂഹികമായും സാന്പത്തികമായും പിന്നാക്കാവസ്ഥ അനുഭവിക്കുന്ന കുടുംബശ്രീയിലെ അംഗങ്ങൾക്ക് വേണ്ടി സംസ്ഥാന പട്ടികജാതി പട്ടികവർഗ വികസന കോർപ്പറേഷൻ സിഡിഎസ് മുഖേന വായ്പ വിതരണം നടത്തുന്നു. ജില്ലാതല ഉദ്ഘാടനം ഇന്ന് ഉച്ചയ്ക്ക് 1.30ന് കൽപ്പറ്റ സിവിൽ സ്റ്റേഷനിലെ എ.പി.ജെ. അബ്ദുൾ കലാം ഹാളിൽ പട്ടികജാതി പട്ടികവർഗ പിന്നാക്ക ക്ഷേമ മന്ത്രി ഒ.ആർ. കേളു നിർവഹിക്കും. ടി. സിദ്ദിഖ് എംഎൽഎ അധ്യക്ഷത വഹിക്കും. പുഞ്ചിരിമട്ടം ദുരന്തത്തിൽ വായ്പ എഴുതിത്തള്ളിയവർക്കുള്ള രേഖ കൈമാറലും പരിപാടിയിൽ നടക്കും.

കോർട്ട് ഫീസ്: അഭിഭാഷകർ കോടതി സമുച്ചയത്തിൽ ധർണ നടത്തി

സുൽത്താൻ ബത്തേരി: അശാസ്ത്രീയ കോർട്ട് ഫീസ് വർധന പിൻവലിക്കണമെന്നാവശ്യപ്പെട്ട് അഭിഭാഷകർ കോടതി സമുച്ചയത്തിൽ ധർണ നടത്തി. ബാർ അസോസിയേഷൻ പ്രസിഡന്‍റ് പി.ഡി. സജി അധ്യക്ഷത വഹിച്ചു. ഷജിൽ ജോണ്‍, കെ.കെ. സോമനാഥൻ, പി.എം. മത്തായി, കെ. ഗീവർഗീസ്, സതീഷ് പൂതിക്കാട്, ടി.എം. റഷീദ്, മുനവറലി സാദത്ത്, ജോർജ് ജോസഫ്, കെ.പി. പ്രവീണ്‍, അജിത്ത് വില്ലി, ഐഡ സാജു എന്നിവർ പ്രസംഗിച്ചു.

പാചക വാതക വില വർധിപ്പിച്ചതിൽ പ്രതിഷേധിച്ചു

കൽപ്പറ്റ: പാചകവാതകത്തിന്‍റെയും പെട്രോളിയം ഉത്പന്നങ്ങളുടെയും വില വർധിപ്പിച്ചതിൽ കേരള സ്റ്റേറ്റ് കർഷകത്തൊഴിലാളി യൂണിയൻ വനിതാ വിഭാഗം ജില്ലാ കണ്‍വൻഷൻ പ്രതിഷേധിച്ചു. പാചകവാതകം സിലിണ്ടറിന് 50 രൂപയും പെട്രോളിനും ഡീസലിനും ലിറ്ററിന് രണ്ട് രൂപയുമാണ് കേന്ദ്ര സർക്കാർ വർധിപ്പിച്ചത്. പെട്രോളിയം കന്പനികളെ സഹായിക്കുന്നതിനാണ് സാധാരണക്കാരുടെ ജീവിതത്തെ ബാധിക്കുന്ന നടപടികൾ മോദി സർക്കാർ സ്വീകരിക്കുന്നത്. ക്രൂഡ് ഓയിൽ വില അന്താരാഷ്ട്ര വിപണിയിൽ കുറയുന്പോഴാണ് രാജ്യത്ത് ജനങ്ങളെ കൊള്ളയടിക്കാൻ പട്രോളിയം കന്പനികൾക്ക് അവസരം നൽകുന്നതെന്ന് കണ്‍വൻഷൻ കുറ്റപ്പെടുത്തി. ഇന്നും നാളെയുമായി വില്ലേജ്, മേഖലാ കേന്ദ്രങ്ങളിൽ അടുപ്പുകുട്ടി സമരം സംഘടിപ്പിക്കാൻ തീരുമാനിച്ചു. കോമള ലക്ഷ്മണൻ ഉദ്ഘാടനം ചെയ്തു. വി.ജി. ഗിരിജ അധ്യക്ഷത വഹിച്ചു. ഗിരിജ മധു റിപ്പോർട്ട് അവതരിപ്പിച്ചു. സി.കെ. ശശീന്ദ്രൻ, കെ. റഫീഖ്, സീത ബാലൻ, കെ. ഷമീർ, സുരേഷ് താളൂർ എന്നിവർ പ്രസംഗിച്ചു. ബീന രതീഷ്(കണ്‍വീനർ), അഖില എബി, വത്സ മാർട്ടിൻ, ഗിരിജ മധു(ജോയിന്‍റ് കണ്‍വീനർമാർ)എന്നിവർ ഭാരവാഹികളായി 29 അംഗ കമ്മിറ്റിയെ തെരഞ്ഞെടുത്തു. ജുമൈലത്ത് സ്വാഗതവും ബീന രതീഷ് നന്ദിയും പറഞ്ഞു.

ബൈക്ക് മോഷണം: രണ്ടാം പ്രതി പിടിയിൽ

കൽപ്പറ്റ: ബൈക്ക് മോഷണക്കേസിൽ രണ്ടാം പ്രതി പിടിയിലായി. മേപ്പാടി കാപ്പംകൊല്ലിയിലെ സ്ഥാപനത്തിൽനിന്നു രണ്ട് ലക്ഷം രൂപ വിലവരുന്ന ബൈക്ക് മാർച്ച് 15ന് പുലർച്ചെ മോഷ്ടിച്ച കേസിലെ രണ്ടാംപ്രതി വൈത്തിരി പന്ത്രണ്ടാംപാലം മുഹമ്മദ് ഷിഫാനെയാണ് മേപ്പാടി എസ്ഐ വി. ഷറഫുദ്ദീൻ, പ്രൊബേഷൻ എസ്ഐ വി. രേഖ, സിപിഒമാരായ പ്രശാന്ത്കുമാർ, ടോണി മാത്യു എന്നിവരടങ്ങുന്ന സംഘം അറസ്റ്റ് ചെയ്തത്. ഒന്നാംപ്രതി വൈത്തിരി പന്ത്രണ്ടാംപാലം മുതിരോത്ത് ഫസൽ മറ്റൊരു ബൈക്ക് മോഷണക്കേസിൽ താമരശേരി പോലീസിന്‍റെ പിടിയിലായിരുന്നു. കാപ്പംകൊല്ലിയിൽനിന്നു മോഷ്ടിച്ച ബൈക്ക് ഫസലിന്‍റെ വീട്ടുവളപ്പിൽനിന്നു പോലീസ് കണ്ടെടുത്തു. വൈത്തിരി, ചുണ്ട, മേപ്പാടി എന്നിവിടങ്ങളിലെ വിവിധ സ്ഥാപനങ്ങളിൽനിന്നു ശേഖരിച്ച സിസിടിവി ദൃശ്യങ്ങൾ പരിശോധിച്ചാണ് പ്രതികളെ തിരിച്ചറിഞ്ഞത്. ചുണ്ടേൽ ടൗണിലെ ചായക്കടയിലുള്ള സിസിടിവിയിൽനിന്നാണ് പ്രതികളുടെ യഥാർഥ ചിത്രങ്ങൾ ലഭിച്ചത്.

Deepika.com

The Largest Read Malayalam Internet Daily

Quick Links

Rashtra Deepika LTD

Deepika.com

The Largest Read Malayalam Internet Daily

Local News

Quick Links

Rashtra Deepika LTD