തുരുത്തിയിൽ പൂക്കൃഷി വിളവെടുത്തു

വിതുര: തൊളിക്കോട് പഞ്ചായത്തിലെ തുരുത്തി വാർഡിൽ ജെ എൽ ജി ഗ്രൂപ്പ് തുടങ്ങിയ ഓണക്കനി നിറപ്പൊലിമ പുഷ്പകൃഷിയുടെ വിളവെടുപ്പിന്‍റെ ഉദ്ഘാടനം വാർഡ് മെമ്പർ എൻഎസ് ഹാഷിം നിർവഹിച്ചു. അഗ്രി സിആർപി ശ്രീജ, എഡിഎസ് അംഗം സിന്ധു കണ്ണങ്കര, ജെഎൽജി ഗ്രൂപ്പ് അംഗങ്ങളായ സതീഷ്, ശോഭ, രാധ, സുരേന്ദ്രൻ എന്നിവർ സന്നിഹിതരായിരുന്നു.

ADVERTISEMENT

സഹപാഠിക്ക് സുരക്ഷിത ഭവനമൊരുക്കാന്‍ എന്‍എസ്എസ് വോളണ്ടിയര്‍മാര്‍ രംഗത്ത്

നെയ്യാറ്റിന്‍കര: സഹപാഠിക്ക് സുരക്ഷിതമായ കിടപ്പാടം ഒരുക്കുക എന്ന ലക്ഷ്യത്തോടെ ഭവന നിര്‍മാണ ധനസമാഹരണ യജ്ഞവുമായി നാഷണല്‍ സര്‍വീസ് സ്കീം (എന്‍എസ്എസ്) യൂണിറ്റ് വോളണ്ടിയര്‍മാര്‍. നെയ്യാറ്റിന്‍കര ഗവ. ഹയര്‍സെക്കന്‍ഡറി സ്കൂളിലെ എന്‍എസ്എസ് വോളണ്ടിയര്‍മാരാണ് ഈ ദൗത്യം ഏറ്റെടുത്തിരിക്കുന്നത്. സ്വന്തമായി വസ്തുവോ കിടപ്പാടമോ ഇല്ലാത്ത ഒരു സഹപാഠിക്കുവേണ്ടി രൂപംനല്‍കിയ പദ്ധതിയുടെ വിജയകരമായ നടത്തിപ്പിനായി ധനസമാഹരണത്തിന്‍റെ ആദ്യഘട്ടമെന്ന നിലയില്‍ ലോഷന്‍ അടക്കമുള്ള ഉത്പന്നങ്ങളുടെ വില്‍പ്പനയ്ക്ക് തുടക്കം കുറിച്ചുകഴിഞ്ഞു. ആറാലുംമൂട് ഗ്രൗണ്ടില്‍ നടക്കുന്ന നെയ്യാര്‍ മേളയില്‍ സംഘാടക സമിതി ഈ ഉത്പന്നങ്ങളുടെ വിപണനത്തിനായി സ്റ്റാള്‍ അനുവദിച്ച് നല്‍കി. പ്രോഗ്രാം ഓഫീസര്‍ ശുഭശ്രീയുടെ നേതൃത്വത്തില്‍ യൂണിറ്റ് വോളണ്ടിയര്‍മാര്‍ സജീവമായി രംഗത്തുണ്ട്. ഈ ഉത്പന്നങ്ങള്‍ വില്‍ക്കുന്നതിലൂടെ ലഭ്യമാകുന്ന തുക ഭവന നിര്‍മാണത്തിനായി ഉപയോഗിക്കാനാണ് തീരുമാനിച്ചിട്ടുള്ളത്.

നിറംപകർന്നു നെയ്യാർഡാമിലെ സാംസ്‌കാരിക ഘോഷയാത്ര

നെയ്യാർഡാം : നിറം പകർന്ന് നെയ്യാർഡാമിലെ സാംസ്‌കാരിക ഘോഷയാത്ര. നിശ്ചലദൃശ്യങ്ങളും, കളരിപ്പയറ്റും, നൃത്തവുമായി നെയ്യാർഡാമിലെ ഓണം സാംസ്‌കാരിക ഘോഷയാത്ര കാണികൾക്ക് കാഴ്ചയുടെ വിസ്മയമൊരുക്കി. ഇന്നലെ വൈകുന്നേരം സി.കെ. ഹരീന്ദ്രൻ എംഎൽഎ ഘോ ഷയാത്ര ഫ്‌ളാഗ് ഓഫ് ചെയ്തു. കള്ളിക്കാട് പഞ്ചായത്ത് പ്രസിഡന്‍റ് പന്ത ശ്രീകുമാർ അധ്യക്ഷനായി. സ്‌കൂളുകൾ, തുറന്ന ജയിൽ, പ്രദേശത്തെ ആർട്‌സ് ആൻഡ് സ്‌പോർട്‌സ് ക്ലബുകൾ, പുരുഷ, വനിതാ സ്വയംസഹായ സംഘങ്ങൾ, കുടുംബശ്രീ, ശിവാനന്ദാശ്രമം, റസിഡന്‍റ്സ് അസോസിയേഷനുകൾ തുടങ്ങിയവർ വിവിധ നാടൻ കലാരൂപങ്ങളുമായി ഘോഷയാത്രയിൽ അണിചേർന്നു. കള്ളിക്കാട് മുതൽ നെയ്യാർഡാം വരെ റോഡിനിരുവശവും നൂറുകണക്കിനു പേരാണു ഘോ ഷയാത്ര കാണാനായി എത്തിയത്. നെയ്യാർഡാമിൽ ചേർന്ന സമാപന സമ്മേളനം സി.കെ.ഹരീന്ദ്രൻ എംഎൽഎ ഉദ്ഘാടനം ചെയ്തു. തുടർന്ന് കലാപരിപാടികളും ഉണ്ടായിരുന്നു. ഘോഷയാത്രയോടെ ഈ വർഷത്തെ ഓണം വാരാഘോഷം സമാപിച്ചു. വനം വകുപ്പ് ഫിഷറീസ് വകുപ്പ് ജലവിഭവ വകുപ്പ് ഡിടിപിസി എന്നിവ ചേർന്നാണ് ഇവിടെ ആഘോഷം സംഘടിപ്പിച്ചത്. കഴിഞ്ഞ അഞ്ചിനാണ് ഓണാലോഷം തുടങ്ങിയത്. വൻ ജന തിരക്കാണ് ഇവിടെ എത്തിയത്.

നബിദിന മതസൗഹാര്‍ദ കുടുംബ സംഗമം സംഘടിപ്പിച്ചു

തിരുവനന്തപുരം: ദേശീയ മലയാള വേദിയുടെ ആഭിമുഖ്യത്തില്‍ പൂജപ്പുര ഗവ. ചില്‍ഡ്രന്‍സ് ഹോമില്‍ സംഘടിപ്പിച്ച നബിദിന മതസൗഹാര്‍ദ കുടുംബ സംഗമം കെപിസിസി മുന്‍ പ്രസിഡന്‍റും മുന്‍ എംപിയുമായ കെ. മുരളീധരന്‍ ഉദ്ഘാടനം ചെയ്തു. പോലീസ് അസിസ്റ്റന്‍റ് കമ്മീഷണര്‍ എന്‍. ഷിബു മുഖ്യാതിഥിയായിരുന്നു. സിഡബ്ല്യൂസി ചെയര്‍പേഴ്‌സണ്‍ അഡ്വ. ഷാനിബാ ബീഗം മുഖ്യപ്രഭാഷണം നടത്തി. ദേശീയ മലയാള വേദി വര്‍ക്കിംഗ് പ്രസിഡന്‍റ് അഡ്വ. ഫസീഹ റഹീം അധ്യക്ഷത വഹിച്ചു. ലൂഥര്‍ സഭ മേജര്‍ ആര്‍ച്ച്ബിഷപ്പ് റോബിന്‍സണ്‍ ഡേവിഡ് മതസൗഹാര്‍ദസന്ദേശം നല്‍കി. സംസ്ഥാന പ്രസിഡന്‍റ് മുജീബ് റഹ്മാന്‍ സ്വാഗതവും, സംസ്ഥാന ചെയര്‍മാന്‍ പനച്ചമൂട് ഷാജഹാന്‍ നന്ദിയും പറഞ്ഞു. അപകടത്തെ തുടര്‍ന്നു ചികിത്സയിലിരുന്ന ശേഷം മടങ്ങിയെത്തിയ പ്രമുഖ വിദ്യാഭ്യാസജീവകാരുണ്യ പ്രവര്‍ത്തക യാസ്മിന്‍ സുലൈമാനെ ചടങ്ങില്‍ ആദരിച്ചു. നടന്‍ ശിവ മുരളി, എം.എച്ച്. സുലൈമാന്‍, ഡോ. അരുണ്‍ കുമാര്‍, ബി. പ്രഭാകരന്‍, എസ്. ഗിരിജാ ദേവി, അട്ടക്കുളങ്ങര സുലൈമാന്‍, ആറ്റിങ്ങല്‍ സുരേഷ് തുടങ്ങിയവര്‍ സംസാരിച്ചു. വിവിധ മേഖലയില്‍ മികവു പുലര്‍ത്തിയ വ്യക്തികളെ ആദരിച്ചു. ചില്‍ഡ്രന്‍സ് ഹോമിലെ കുട്ടികള്‍ക്കും അംഗങ്ങള്‍ക്കുമായി വിവിധ കലാകായിക മത്സരങ്ങള്‍ നടത്തി വിജയികള്‍ക്ക് സമ്മാനങ്ങളും നല്‍കി. ദേശീയ മലയാള വേദിയുടെ ഗായകര്‍ ഒരുക്കിയ ഗാനവിരുന്നും, നൃത്തവും ഉണ്ടായിരുന്നു. വൈകുന്നേരം പനച്ചമൂട് ഷാജഹാന്‍റെ അധ്യക്ഷതയില്‍ നടന്ന സമാപനസമ്മേളനം സൂപ്രണ്ട് ബിനു ജോണ്‍ ഉദ്ഘാടനം ചെയ്തു. അഡ്വ. ഫസീഹ റഹീം, മുജീബ് റഹ്മാന്‍, അഡ്വ. ജയകുമാരന്‍, വിഴിഞ്ഞം ലത്തീഫ് എന്നിവര്‍ പ്രസംഗിച്ചു. സമ്മാനവിതരണവും നടന്നു.

വെളിയംകോട് ഹോളിക്രോസ് ദേവാലയത്തിലെ ഗ്രോട്ടോയും കുരിശടിയും തകര്‍ത്ത് മോഷണം

മാറനല്ലൂരിൽ വീണ്ടും മോഷണം മാറനല്ലൂർ: മാറനല്ലൂരില്‍ വീണ്ടും മോഷണം. വെളിയംകോട് ഹോളി ക്രോസ് ദേവാലയത്തിലെ ഗ്രോട്ടോയും കുരിശടിയും തകര്‍ത്താണു മോഷണം നടത്തി യത്. പണം നഷ്ടപ്പെട്ടിട്ടുണ്ടോ എന്ന് കമ്മറ്റി അംഗങ്ങള്‍ പരിശോധിച്ചു വരികയാണ്. മാറനല്ലൂർ പോലിസിൽ പരാതി നൽകി. കഴിഞ്ഞ ദിവസം മേലാരിയോട് മദര്‍ തെരേസ നഗറിലെ രവീന്ദ്രന്‍റെ വീട്ടില്‍നിന്ന് 13 പവന്‍റെ ആഭരണങ്ങള്‍ മോഷ്ടാവ് കൊണ്ടു പോയിരുന്നു. ആഴ്ചകൾക്ക് മുൻപ് സപ്ലൈക്കോ ഉൾപ്പെടെ സ്ഥാപനങ്ങളിലും നിരവധി വീടുകളിലും മോഷണവും മോഷണ ശ്രമവും നടന്നിരുന്നു. ഒരു മാസമായി പ്രദേശത്ത് 15-ാമത്തെ മോഷണമാണിത്. കഴിഞ്ഞ ദിവസമാണ് ആളില്ലാത്ത വീടു കുത്തിത്തുറന്ന് 13 പവൻ കവർന്നത് . മാറനല്ലൂർ മേലാരിയോട് ഹരിലയത്തിൽ വിമുക്തഭടൻ ഹരീന്ദ്രന്‍റെ വീട്ടിലാണ് മോഷണം നടന്നത്. ഹരീന്ദ്രനും ഭാര്യയും മകനും മരുമകളുമാണ് വീട്ടിൽ താമസിക്കുന്നത്. ഹരീന്ദ്രനും ഭാര്യയും നെയ്യാർ മേള കാണുന്നതിനുവേണ്ടി നാലുമണിയോടുകൂടി വീട്ടിൽനിന്നിറങ്ങി. പിന്നാലെ മകനും മരുമകളും ഒരു വിവാഹചടങ്ങിൽ പങ്കെടുക്കാനും പോയി. എട്ടുമണിയോടെ വീട്ടിലെത്തിയപ്പോഴാണ് ഗേറ്റ് അകത്തുനിന്നു പൂട്ടിയ നിലയിൽ കണ്ടത്. അകത്തു കയറിയപ്പോൾ വീടിന്‍റെ മുൻവശത്തുള്ള വാതിലും തുറക്കാനായില്ല. ഇതേത്തുടർന്നു നടത്തിയ അന്വേഷണത്തിലാണു പിന്നിലെ വാതിൽ തുറന്നുകിടക്കുന്നതു കണ്ടത്. അകത്തുകയറി പരിശോധിച്ചപ്പോഴാണ് മുറിയിലുള്ള അലമാരകളെല്ലാം തുറന്നിട്ട നിലയിൽ കണ്ടത്. അലമാരയിൽ സൂക്ഷിച്ചിരുന്ന 13 പവനോളം സ്വർണം നഷ്ടപ്പെട്ടെന്നാണ് ഹരീന്ദ്രൻ മാറനല്ലൂർ പോലീസിൽ നൽകിയ പരാതിയിൽ പറയുന്നത്. ഒരു മാസത്തിനിടെ മാറനല്ലൂരിൽ സമാനരീതിയിൽ നിരവധി മോഷണങ്ങൾ നടന്നു. കൂവളശേരിയിലും ചെന്നിയോട്ടും വീടിന്‍റെ പിൻവശത്തെ വാതിൽ പൊളിച്ചാണ് മോഷ്ടാക്കൾ അകത്തുകയറിയത്. മുൻവശത്തെ വാതിൽ അകത്തുനിന്നു പൂട്ടിയ ശേഷമാണ് മോഷണം നടത്തുന്നത്. പെട്ടെന്നു വീട്ടുടമസ്ഥൻ എത്തിയാൽ പിൻവശത്തുകൂടി കടന്നുകളയുന്നതിനുവേണ്ടിയാണ് ഇത്തരത്തിൽ മോഷണം നടത്തുന്നതെന്നു സംശയിക്കുന്നു. ഇവിടെ അടുത്തിടെ നടന്ന മോഷണങ്ങളിൽ കണ്ടലയിലെ മൊബൈൽ കട കുത്തിത്തുറന്നു മോഷണം നടത്തിയ രണ്ടുപേരിൽ ഒരാളെ മാത്രമാണു പോലീസിനു പിടിക്കാൻകഴിഞ്ഞത്.

വേണ്ടത്ര ഡോക്ടർമാരും ജീവനക്കാരും ഇല്ലാതെ നേമം താലൂക്ക് ആശുപത്രി

പദവി പേരിലുമാത്രം ഒതുങ്ങി നേമം: താലൂക്ക് ആശുപത്രിയായി പദവി ലഭിച്ച് വര്‍ഷങ്ങളായിട്ടും ഇപ്പോഴും വേണ്ടത്ര ഡോക്ടര്‍മാരും ജീവനക്കാരുമില്ലാതെ നേമം താലൂക്ക് ആശുപത്രി. കോര്‍പ്പറേഷന്‍റെ ഭാഗമായ നേമം മേഖലയിലെ പൊന്നുമംഗലം, നേമം, മേലാംകോട്, പാപ്പനംകോട്, എസ്റ്റേറ്റ് വാര്‍ഡുകളിലേയും സമീപ പഞ്ചായത്തുകളായ കല്ലിയൂര്‍, പള്ളിച്ചല്‍ എന്നിവിടങ്ങളിൽ നിന്നുമുള്ള സാധാരണക്കാരായ നൂറുകണക്കിന് രോഗികള്‍ ചികിത്സയ്ക്കായി എത്തുന്നത് ഇവിടെയാണ്. ദിവസവും അഞ്ഞൂറിലധികം രോഗികള്‍ ഒപിയിലെത്തുന്നുണ്ട്. വേണ്ടുന്ന ജീവനക്കാരുടെയും ഡോക്ടര്‍മാരുടെയും എണ്ണത്തില്‍ പകുതിയില്‍ താഴെ മാത്രമാണ് ഇപ്പോൾ ആശുപത്രിയിലുള്ളത്. ഈ അവസ്ഥയില്‍ രോഗികള്‍ക്ക് നല്ല ചികിത്സ ലഭിക്കുന്നില്ലെന്ന പരാതിയുമുണ്ട്. ഉച്ച വരെയുള്ള ഒപി കഴിഞ്ഞാല്‍ വൈകുന്നേരം ഒരു ഡോക്ടറുടെ സേവനം മാത്രമാണ് അത്യാഹിത വിഭാഗത്തില്‍ ലഭിക്കുന്നത്. പനി ബാധിതരുടെ എണ്ണം കൂടിയപ്പോള്‍ വൈകുന്നേരവും രാത്രിയിലും രോഗികൾക്കു ഫലപ്രദമായ ചികിത്സ കിട്ടാതെ വന്നിരുന്നു. ദേശീയപാതയില്‍ നെയ്യാറ്റിന്‍കര കഴിഞ്ഞാല്‍ നഗരത്തില്‍ പ്രവേശിപ്പിക്കുന്നതിനു മുമ്പുള്ള ഏക സര്‍ക്കാര്‍ ആശുപത്രിയാണിത്. രാത്രിയില്‍ അപകടങ്ങളോ മറ്റോ സംഭവിച്ച് ആശുപത്രിയിലെത്തിയാല്‍ ഒരു ഡോക്ടറുടെ സേവനം മാത്രമാണ് ലഭിക്കുന്നത്. രാത്രി ഡ്യൂട്ടിക്ക് രണ്ട് ഡോക്ടര്‍മാരെയെങ്കിലും നിയമിക്കണമെന്ന ആവശ്യവും ശക്തമാണ്. ഗൈനക്കോളജി യില്‍ പുതിയ നിയമനമായിട്ടില്ല. ജനറല്‍ ഡ്യൂട്ടി ചെയ്യുന്ന ഡോക്ടര്‍മാര്‍ക്ക് തന്നെ അത്യാഹിത വിഭാഗത്തിലും ജോലി നോക്കേണ്ടി വരുന്നത് പലപ്പോഴും ബുദ്ധിബുട്ടുകളുണ്ടാക്കുന്നു. സ്‌പെഷലിസ്റ്റ് ഡോക്ടര്‍മാരുടെ കുറവും രോഗികളെ വലയ്ക്കുന്നുണ്ട്. ആശുപത്രി വികസനത്തിനായി 30 കോടി രൂപയുടെ അടിസ്ഥാന സൗകര്യ പദ്ധതി നടന്നുവരികയാണ്. രണ്ടു ബഹുനില കെട്ടിടങ്ങളും മറ്റ് ആധുനിക സൗകര്യങ്ങളും വികസന പദ്ധതിയിലുണ്ട്. നബാര്‍ഡ് ധനസഹായത്തോടെ 22.24 കോടി രൂപ ചെലവാക്കി ആറു നിലകളുള്ള കെട്ടിടവും എന്‍എച്ച്എമ്മിന്‍റെ ധനസഹായത്തോടെ എട്ടുകോടി രൂപ ചെലവാക്കി നിർമിക്കുന്ന മൂന്നുനില കെട്ടിടവും ഉള്‍പ്പെട്ടതാണ് ഈ പദ്ധതി. നിർമാണം പൂർത്തിയാക്കാൻ ഒരു വര്‍ഷമെങ്കിലും എടുത്തേക്കും.

ബുള്ളറ്റ് ഇടിച്ചുകയറി ആറുപേർക്ക് പരിക്കേറ്റു

പോത്തൻകോട്: ബുള്ളറ്റ് ഇടിച്ചുകയറി ആറുപേർക്കു പരിക്കേറ്റു. മങ്ങാട്ടുക്കോണം സ്വദേശികളായ സാജൻ (23), വിഷ്ണു (30), നിതിൻ (38), സുമേഷ് (39), സജു (37) നും ആറുമാസം പ്രായമുള്ള കുഞ്ഞിനുമാണു പരിക്കേറ്റത്. മങ്ങാട്ടുക്കോണം തമ്പുരാൻ ബ്രദേഴ്സിന്‍റെ ഓണാഘോഷ പരിപാടിയുടെ ഭാഗമായി നടന്ന വടംവലി മത്സരത്തിന് ഇടയിലേക്കാണ് നരിക്കൽ സ്വദേശി അമൽ എന്നയാൾ ഓടിച്ച ബുള്ളറ്റ് ഇടിച്ചു കയറിയത്. സജന്‍റെ തുടയെല്ലിനും കാൽമുട്ടുകൾക്കും പൊട്ടലുണ്ട്. വിഷ്ണുവിന്‍റെ തലയ്ക്കാണ് ഗുരുതര പരിക്കേറ്റത്. ഇരുവരേയും സ്വകാര്യ ആശുപത്രിയിൽ പ്രവേശിപ്പിച്ചു. നിതിൻ, സുമേഷ്, സച്ചു എന്നിവർ മെഡിക്കൽ കോളജ് ആശുപത്രിയിലാണു ചികിത്സയിലുള്ളത്. ആറുമാസം പ്രായമുള്ള കുഞ്ഞിനെ മെഡിക്കൽ കോളജ് എസ്എടി ആശുപത്രിയിൽ പ്രവേശിപ്പിച്ചു. അമലിനും തലയ്ക്കും കൈകാലുകൾക്കും പരിക്കേറ്റു. പോത്തൻകോട് പോലീസ് കേസെടുത്തു.

ജഗതിയില്‍ പെയിന്‍റ് റോഡില്‍ വീണു; ബൈക്ക് യാത്രികര്‍ തെന്നിവീണു

പേരൂര്‍ക്കട: ജഗതി-ഇടപ്പഴിഞ്ഞി റോഡില്‍ പെയിന്‍റ് റോഡില്‍ വീണത് വാഹനയാത്ര ദുഷ്‌കരമാക്കി. ഇന്നലെ പകല്‍സമയത്താണ് അജ്ഞാത വാഹനത്തില്‍ കൊണ്ടുപോകുകയായിരുന്ന 20 ലിറ്റര്‍ പെയിന്‍റ് റോഡില്‍ വീണത്. വാഹനയാത്ര തടസപ്പെട്ടതോടെ തിരുവനന്തപുരം ഫയര്‍‌സ്റ്റേഷനില്‍നിന്ന് സീനിയര്‍ ഫയര്‍ ആൻഡ് റസ്‌ക്യു ഓഫീസര്‍ ഷഹീര്‍, ഓഫീസര്‍മാരായ രാഹുല്‍, ഫിറോസ് ഖാന്‍, രശ്മി, അഖില, എഫ്ആര്‍ഒ ഡ്രൈവര്‍ സജി എന്നിവര്‍ ചേര്‍ന്ന് റോഡില്‍നിന്നു പെയിന്‍റ് നീക്കം ചെയ്തു. മ്യൂസിയത്ത് ജനമൈത്രി സ്റ്റേഷനു സമീപം വാഹനത്തില്‍നിന്ന് ഓയില്‍ ചോര്‍ന്നു. രണ്ടുബൈക്ക് യാത്രക്കാ ര്‍ റോഡില്‍ തെന്നിവീണു. തിരുവനന്തപുരത്തുനിന്ന് ഫയര്‍ഫോഴ്‌സ് സംഘമെത്തിയാണ് വെള്ളം ചീറ്റി ഓയില്‍ റോഡില്‍നിന്നു നീക്കിയത്.

കാടുപിടിച്ച പുരയിടത്തിൽ തീപിടിത്തം

വിഴിഞ്ഞം: കാടു പിടിച്ചു കിടന്ന പുരയിടത്തിൽ തീ പിടിത്തമുണ്ടായി. ആളിപ്പടർന്ന തീ സമീപത്തെ വീടുകളെ ബാധിക്കുന്ന അവസ്ഥയിലായി. വിഴിഞ്ഞത്തുനിന്നു ഫയർഫോഴ്സെത്തി തീയണച്ചതിനാൽ അപകടം ഒഴിവായി. പരിഭ്രാന്തിയിലായ ജനം പ്രതിഷേധവുമായിരംഗത്തെത്തി. വിഴിഞ്ഞം കല്ലുവെട്ടാൻ കുഴി ടർഫിനു പുറകുവശത്തുള്ള പ്രിൻസ് എന്നയാളുടെ ആളൊഴിഞ്ഞ പുരയിട ത്തിനാണ് ഇന്നലെ വൈകുന്നേരം മൂന്നോടെ തീപടർന്നത്. കാടു കത്തുന്ന ശബ്ദവും തീയും പുകയും കണ്ട് പേടിച്ച നാട്ടുകാർ ഫയർഫോഴ്സി നെവിവരമറിയിച്ചു. ഫയർഫോഴ്സ് എത്തിയെങ്കിലും വാഹനം കടന്നുപോകാൻ പാകത്തിൽ റോഡില്ലായിരുന്നതും പ്രശ്നമായി. തുടർന്ന് സ്ഥലത്തു നടന്നെ ത്തിയ അധികൃതർ എറെ പണിപ്പെട്ടു തീയണച്ചു. വസ്തുവിന്‍റെ ഉടമസ്ഥൻ തീയിട്ടതാണ് പ്രശ്നങ്ങൾക്ക് കാരണമെന്നു നാട്ടുകാർ ആരോപിച്ചു. മുകളിൽ കൂടി വിഴിഞ്ഞം അന്താരാഷ്ട്ര തുറമുഖ സബ് സ്റ്റേഷനിൽ വൈദ്യുതി എത്തിക്കാനുള്ള ലൈൻ കടന്നുപോയിരുന്നതും ആശങ്കക്കിടവരുത്തിയതായി.

പെൺകുട്ടികളും യുവാവും അബോധാവസ്ഥയിൽ; നാട്ടുകാർ ആശുപത്രിയിലെത്തിച്ചു

നെടുമങ്ങാട്: വെള്ളച്ചാട്ടത്തിനു സമീപം അബോധാവസ്ഥയിൽ കണ്ടെത്തിയ മൂന്നു പെൺകുട്ടികളെയും ഒരു ആൺകുട്ടിയെയും നാട്ടുകാരും പോലീസും ചേർന്ന് ആശുപത്രിയിൽ പ്രവേശിപ്പിച്ചു. ഇന്നലെ രാവിലെ 11.30-ഓടെ ഇരിഞ്ചയം കൈരളി നഗറിനു സമീപമാണ് ഇവരെ കണ്ടെത്തിയത്. രണ്ടു ടൂവീലറിലായി കൈരളി നഗറിലെ വെള്ളച്ചാട്ടം കാണാൻ എത്തിയതായിരുന്നു എല്ലാവരും. നാട്ടുകാർ അറിയിച്ചതനുസരിച്ച് നെടുമങ്ങാട് പോലീസ് ജില്ലാ ആശുപത്രിയിലെത്തിച്ചു. പ്രാഥമിക ശുശ്രൂഷകൾക്കു ശേഷം തിരുവനന്തപുരം മെഡിക്കൽ കോളജ് ആശുപത്രിയിലേയ്ക്ക് മാറ്റി.പൊഴിയൂർ, അമ്പലത്തറ സ്വദേശികളായ 18 വയസുകാരെയാണ് അവശനിലയിൽ കണ്ടെത്തിയത്.

സഹോദരങ്ങളെ ഇടിച്ചിട്ട കാര്‍ നിര്‍ത്താതെ പോയി; ഒരാള്‍ പരിക്കേറ്റു ചികിത്സയില്‍

മ്യൂസിയം പോലീസ് അന്വേഷണം തുടങ്ങി പേരൂര്‍ക്കട: സ്‌കൂട്ടറില്‍ സഞ്ചരിക്കുകയായിരുന്ന സഹോദരങ്ങളെ ഇടിച്ചിട്ട കാര്‍ നിര്‍ത്താതെ പോയി. പിറകേ വന്ന മറ്റൊരു കാറിലുണ്ടായിരുന്നവര്‍ ഇരുവരെയും പട്ടം കോസ്‌മോ ആശുപത്രിയില്‍ പ്രവേശിപ്പിച്ചു. കഴിഞ്ഞ ശനിയാഴ്ച ഉച്ചയ്ക്ക് ഒരുമണിയോടുകൂടി നന്തന്‍കോട്ടെ ഒരു ഹോട്ടലിനു സമീപമായിരുന്നു സംഭവം. പേരൂര്‍ക്കട ഹിന്ദുസ്ഥാന്‍ ലാറ്റക്‌സിനു സമീപം താമസിക്കുന്ന എസ്.എസ്. സുനിത, ഇവരുടെ സഹോദരന്‍ വട്ടിയൂര്‍ക്കാവ് പുതൂര്‍ക്കോണം സ്വദേശി എസ്.എസ് സുനില്‍ എന്നിവരെയാണ് കാര്‍ ഇടിച്ചിട്ടത്. കാര്‍ ഓടിച്ചിരുന്നയാള്‍ വാഹനം നിര്‍ത്തി അപകടം വീക്ഷിച്ചശേഷം യാതൊന്നും പ്രതികരിക്കാതെ വാഹനം ഓടിച്ചുപോകുകയായിരുന്നു. ഇതിനു പിറകേയെത്തിയ മറ്റൊരു കാറിലുണ്ടായിരുന്നവരാണ് ഇരുവരെയും ആശുപത്രിയില്‍ എത്തിച്ചത്. സുനിതയുടെ മകന്‍ അതിന്‍ എസ്. പ്രസാദ് വയറുവേദനയെ തുടര്‍ന്ന് കോസ്‌മോ ആശുപത്രിയില്‍ ചികിത്സയിലായിരുന്നു. മകന്‍റെ സാധനസാമഗ്രികള്‍ വീട്ടില്‍നിന്ന് എടുക്കുന്നതിനു പേരൂര്‍ക്കടയിലേക്ക് പോകുന്നതിനിടെയാണ് സുനിലും സുനിതയും സഞ്ചരിച്ചിരുന്ന സ്‌കൂട്ടറിനു പിറകില്‍ കാര്‍ വന്നിടിക്കുന്നത്. വീഴ്ചയില്‍ സാരമായി പരിക്കേറ്റത് സുനിലിനാണ്. സംഭവത്തെ തുടര്‍ന്ന് ഇരുവരും മ്യൂസിയം സ്റ്റേഷനിലെത്തി പരാതി നല്‍കുകയായിരുന്നു. അപകടത്തില്‍ ഏറെക്കുറെ തകര്‍ന്ന സ്‌കൂട്ടര്‍ മരുതംകുഴിയിലെ വര്‍ക്‌ഷോപ്പിലേക്കു മാറ്റി. മ്യൂസിയം പോലീസ് കേസെടുത്ത് അന്വേഷണം ആരംഭിച്ചു.

മേലാരിയോട് വിശുദ്ധ മദര്‍ തെരേസാ തീര്‍ഥാടന തിരുനാളിനു കൊടിയേറി

നെയ്യാറ്റിന്‍കര: മദര്‍ തെരേസയുടെ നാമഥേയത്തിലെ ലോകത്തിലെ ആദ്യ ദേവാലയമായ നെയ്യാറ്റിന്‍കര രൂപതയിലെ മേലാരിയോട് വിശുദ്ധ മദര്‍ തെരേസാ തീര്‍ഥാടന തിരുനാളിനു തുടക്കയി. ഇടവക വികാരി ഫാ. കെ. പി. ജോണ്‍ കൊടിയേറ്റുകര്‍മം നിര്‍വഹിച്ചു. ഇന്നലെ പരിശുദ്ധ മാതാവിന്‍റെ ജനന തിരുനാള്‍ ദിനത്തില്‍ രാവിലെ ഒന്പതു മുതല്‍ ലീജിയന്‍ ഓഫ് മേരി സംഘടിച്ച അഖണ്ഡ ജപമാല നടന്നു. വൈകുന്നേരം ദിവ്യബലിയെ തുടര്‍ന്നു മാതാവിന്‍റെ തിരുസ്വരൂപം വഹിച്ച് ആഘോഷമായ തിരുസ്വരൂപ പ്രദക്ഷിണം സംഘടിപ്പിച്ചു. 13ന് വൈകുന്നേരം ദിവ്യബലിയെ തുടര്‍ന്ന് ആഘോഷമായ ചപ്രദക്ഷിണം നടക്കും. 14നു നടക്കുന്ന സമാപന ദിവ്യബലിയെ തുടര്‍ന്ന് ആഘോഷമായ ദിവ്യകാരുണ്യ പ്രദക്ഷിണം. നെയ്യാറ്റിന്‍കര രൂപതയിലെ വിവിധ വൈദികര്‍ തിരുകര്‍മങ്ങളില്‍ മുഖ്യകാര്‍മികത്വം വഹിക്കും. തിരുനാള്‍ ദിനങ്ങളില്‍ വൈ കുന്നേരം അഞ്ചുമുതല്‍ ബൈബിള്‍ പാരായണം, ജപമാല, ലിറ്റിനി, നൊവേന, ദിവ്യബലി എന്നിവ ഉണ്ടാവും. വിശുദ്ധ മദര്‍ തെരേസയുടെ തിരുശേഷിപ്പു വണങ്ങി പ്രാര്‍ഥിക്കാനുള്ള പ്രത്യേക ക്രമീകരണം ഒരുക്കിയിട്ടുണ്ടെന്നു ഇടവക വികാരി ഫാ. കെ.പി. ജോണ്‍ അറിയിച്ചു.

ഓണം വാരാഘോഷം ഇന്നു സമാപിക്കും

ഘോഷയാത്ര വൈകുന്നേരം നാലിന് തിരുവനന്തരം: ഓണപ്പൊലിമയ് ക്കു നിറച്ചാർത്തേകി താളമേളങ്ങളും കലാരൂപങ്ങളും അണിനിരക്കുന്ന ഘോഷയാത്രയോടെ സംസ്ഥാന സർക്കാരിന്‍റെ ഓണം വാരാഘോഷത്തിന് ഇന്നു സമാപനം. വൈകുന്നേരം നാലിനു വെള്ളയന്പലത്തുനിന്ന് ആരംഭിക്കുന്ന സാംസ്കാരിക ഘോഷയാത്ര കിഴക്കേകോട്ടയിൽ അവസാനിക്കും. ഗവർണർ രാജേന്ദ്ര വിശ്വനാഥ അർലേക്കർ ഫ്ളാഗ് ഓഫ് നിർവഹിക്കും. ഘോഷയാത്രയുടെ വരവ് അറിയിച്ചുകൊണ്ട് 51 കലാകരന്മാർ ശംഖനാദം മുഴക്കുകയും തുടർന്നു വാദ്യോപകരണമായ കൊന്പ്, ടൂറിസം മന്ത്രി പി.എ. മുഹമ്മദ് റിയാസ് മുഖ്യ കലാകാരനു കൈമാറിക്കൊണ്ട് സാംസ്കാരിക ഘോഷയാത്രയുടെ താളമേളങ്ങൾക്ക് തുടക്കം കുറിക്കുകയും ചെയ്യും. വർണ വൈവിധ്യങ്ങൾക്കൊപ്പം ആട്ടവും പാട്ടുമായി 91 കലാരൂപങ്ങളാണ് ഇക്കുറി ഓണം ഘോഷയാത്രയിൽ അണിനിരക്കുക. കേരളീയതയുടെ സംസ് കൃതി പ്രകാശിപ്പിക്കുന്ന അനുഷ്ഠാന കലകൾ, ഗോത്രകലകൾ, നാടൻ കലകൾ, ക്ലാസിക്കൽ കലാരൂപങ്ങൾ, പുതുകാലത്തിന്‍റെ ജനകീയകലകൾ എന്നീ അവതരണങ്ങൾക്കൊപ്പം ഭാരത് ഭവന്‍റെ നേതൃത്വത്തിൽ ജാർഖണ്ഡ്, ഉത്തർപ്രദേശ്, മധ്യപ്രദേശ്, മഹാരാഷ്ട്ര, ആന്ധ്രാപ്രദേശ്, തെലുങ്കാന, കർണാടക, തമിഴ്നാട് എന്നീ സംസ്ഥാനങ്ങളിൽ നിന്നുള്ള ഇന്ത്യൻ ഗ്രാമീണ കലകളും നാനാത്വത്തിൽ ഏകത്വം എന്ന പ്രമേയത്തെ മുൻനിർത്തി ഘോഷയാത്രയിൽ ഒത്തുചേരും. ഇന്ത്യയിലെ എട്ട് ക്ലാസിക്കൽ നൃത്തരൂപങ്ങൾ കേരളത്തിന്‍റെ മുടിയേറ്റ്, തെയ്യം, പടയണി, ഗൊപ്പിയാളനൃത്തം, മംഗലംകളി, ഇരുളനൃത്തം, രുധിരക്കോലം, അലാമിക്കളി, വനിതാകോൽക്കളി, പാവപ്പൊലിമകൾ, ട്രാൻസ് ജെൻഡേഴ്സ് സംഘം അവതരിപ്പിക്കുന്ന അർദ്ധനാരീനൃത്തം, മുറം ഡാൻസ്, ഉലക്ക ഡാൻസ്, പള്ളിവാൾനൃത്തം, മാവേലിയും ഓണപ്പാട്ടുകളും, പുലികളി, കുമ്മാട്ടി, വേലകളി, ഓണപ്പൊട്ടൻ, കാളയും തേരും, കന്പേറ്, മയൂര നൃത്തം, 10 അടി ഉയരമുള്ള കാരിക്കേച്ചർ രൂപങ്ങൾ, ശലഭ, അരയന്ന, മുയൽ നൃത്തങ്ങൾ തുടങ്ങി ഒരു കാലഘട്ടത്തിന്‍റെ ഓർമ്മയായ സൈക്കിൾ യജ്ഞമടക്കം കാണികൾക്ക് ദൃശ്യവിരുന്നാകും. ഗ്രീൻ പ്രോട്ടോകോൾ പാലിച്ചുകൊണ്ടാണ് ഫ്ളോട്ടുകൾ വിഭാവനം ചെയ്തിരിക്കുന്നത്. പബ്ലിക് ലൈബ്രറിക്കു മുന്നിൽ ഘോഷയാത്ര വീക്ഷിക്കുന്നതിന് ഒരുക്കിയിട്ടുള്ള വിവിഐപി പവലിയനു മുന്നിലും യൂണിവേഴ്സിറ്റി കോളജിനു മുൻവശത്തെ വിഐപി പവലിയന് മുന്നിലും മ്യൂസിയം ഗേറ്റിന് സമീപത്തെ പ്രത്യേക സ്റ്റേജിലും കലാരൂപങ്ങൾ അവതരിപ്പിക്കും. ഘോഷയാത്രയിൽ പങ്കെടുക്കുന്നവരും കാണികളും ഹരിത ചട്ടം പാലിക്കണമെന്ന് ഓണം വാരാഘോഷവുമായി ബന്ധപ്പെട്ട ഗ്രീൻ പ്രോട്ടോക്കോൾ കമ്മിറ്റി അഭ്യർഥിച്ചു.

നെയ്യാറ്റിൻകരയിലെ ബൈപ്പാസ് റോഡിൽ സുരക്ഷാവേലി വേണമെന്ന ആവശ്യം ശക്തമാകുന്നു

പൂവാർ: നെയ്യാറിന്‍റെ കരയിൽ അവസാനിക്കുന്ന ബൈപ്പാസ് സർവീസ് റോഡിനു ശക്തമായ സുരക്ഷാവേലിയും മുന്നറിയിപ്പു സംവിധാനങ്ങളും വേണമെന്ന ആവശ്യം ശക്തമാകുന്നു. വഴിയറിയാതെ എത്തുന്ന നിരവധി വാഹനങ്ങൾ നെയ്യാറിലേക്ക് പതിക്കാതെ രക്ഷപ്പെട്ടതു തലനാരിഴക്കെന്നു നാട്ടുകാർ പറയുന്നു. ആറുവരിപ്പാതയായ കോവളം കാരോട് ബൈപ്പാസ് നെയ്യാറിന്‍റെ കരയിൽ നാലു വരിപ്പാതയായി ചുരുക്കിയതാണ് പൊതുജനത്തിനു തിരിച്ചടിയായത്. ഇരുവശത്തുമായി കടന്നുപോകാനുള്ള സർവീസ് റോഡുകളെ ആറിന്‍റെ കരയിൽ അവസാനിപ്പിച്ചു. എന്നാൽ പതിയിരിക്കുന്ന അപകടമറിയാതെ വരുന്ന വാഹനങ്ങൾക്ക് സുരക്ഷയൊരുക്കുന്ന കാര്യത്തിലും അധികൃതർ അലംഭാവം കാണിച്ചു. ആറിന്‍റെ കരയോടു ചേർന്നു രണ്ടടി മാത്രം പൊക്കമുള്ള ബാരിക്കേട് സ്ഥാപിച്ച അധികൃതർ തൊട്ടടുത്തായി റോഡ് അവസാനിക്കുന്നു എന്ന് എഴുതിയ ഒരു ചെറിയ ബോർഡും സ്ഥാപിച്ചു. ചെങ്കൽ, തിരുപുറം പഞ്ചായത്തുകളുടെ പ്രധാന അതിർത്തിയാണ് നെയ്യാർ. ഇരുകരകളെയും പാലം നിർമിച്ച് ബന്ധിപ്പിക്കുന്നതിനു പകരം സർലീസ് റോഡ് കട്ട് ചെയ്ത് ദേശീയപാതാ ഉദ്യോഗസ്ഥർ സമീപത്തെ ബണ്ട് റോഡുമായി ബന്ധിപ്പിച്ചു. കിഴക്കുഭാഗത്തുനിന്ന് സർവീസ് റോഡുവഴിവരുന്ന വാഹനങ്ങൾ ആറിന്‍റെ കരയിൽ എത്തുമ്പോഴാണ് മറുകരയെത്താനുള്ള റോഡില്ലെന്ന കാര്യമറിയുന്നത്. അവിടെനിന്ന് ബണ്ട് റോഡിൽ ചെറിയ വാഹനങ്ങൾക്ക് പ്രവേശിക്കാൻ മേൽ പാലത്തിനടിയിലൂടെ ഇടിഞ്ഞ് പൊളിഞ്ഞ ആറടിപ്പാത അനുവദിച്ചു നൽകി. കാറുകൾക്കു പോലും ഇതുവഴി കടന്നുപോകാൻ പറ്റില്ലെന്നു നാട്ടുകാർ പറയുന്നു. നിലവിൽ ഇവിടെ ഗതാഗതം ഒറ്റവരിയിലായി ചുരുങ്ങി. കഴിഞ്ഞ മഴയിൽ ആറ്റിലുണ്ടായ വെള്ളപ്പൊക്കത്തിൽ പാലത്തോടു ചേർന്ന ബണ്ട് റോഡിന്‍റെ ഒരു ഭാഗം ഇടിഞ്ഞു താണതുംഅപകടത്തിന്‍റെ തോത് വർധിപ്പിച്ചു. ലോകത്തെ ഏറ്റവും വലിയ ശിവലിംഗ നിർമിതിയുള്ള ചെങ്കൽ ശിവക്ഷേത്രവും നെയ്യാറ്റിൻകര രൂപതയിലെ പ്രമുഖ തീർഥാടന കേന്ദ്രമായ വ്ലാത്താങ്കര മാതാവിന്‍റെ പള്ളിയും സന്ദർശിക്കാൻ മറ്റു സംസ്ഥാനങ്ങളിൽനിന്നു നിരവധി വാഹനങ്ങളിൽ ആളുകൾ എത്തുന്നുണ്ട്. ഈ വാഹനങ്ങൾ ബൈപ്പാസിൽ പ്രവേശിക്കണമെങ്കിൽ ബണ്ട് റോഡിൽ നാലു ലോമീറ്ററോളം ചുറ്റണം. നിരപ്പായ റോഡു കണ്ടു വേഗത്തിൽ വരുന്ന വാഹനങ്ങൾ അപകടം മനസിലാക്കി വെട്ടിച്ചവിട്ടി രക്ഷപ്പെടുകയാണ് പതിവ്. കണ്ണൊന്നു തെറ്റിയാൽ ആഴമേറിയ നെയ്യാറിലേക്കു പതിച്ചു വൻ അപകടമുണ്ടാകുമെന്നും നാട്ടുകാർ പറയുന്നു. ഇതിനെതിരെ പരാതികൾ നിരവധി ഉണ്ടായെങ്കിലും അപകട സൂചന നൽകുന്ന ലൈറ്റുകൾ സ്ഥാപിക്കാനോ, ബാരികകേഡുകൾ ശക്തിപ്പെടുത്തുന്നതിനേ മുന്നറിയിപ്പു ബോർഡുകൾ സ്ഥാപിക്കാനോ അധികൃതർ തയാറായില്ലെന്നും ആക്ഷേപം ഉയരുന്നു. സർവീസ് റോഡ് മുറിച്ചതോടെ നെയ്യാറിന്‍റെ ഇരുകരയിലുമുള്ള നാട്ടുകാരുടെ പരസ്പര ബന്ധവും ഇല്ലാതാക്കി. കഷ്ടിച്ചു നൂറു മീറ്റർ മാത്രം വീതിയുള്ള നെയ്യാറിന്‍റെ ഇരുകരകളും താണ്ടാൻ പൊതുജനം നാലു കിലോമീറ്റർ വരെ ദൂരം ചുറ്റണമെന്ന അവസ്ഥയിലായി. തലമുകളായി ഇവിടെ ഉണ്ടായിരുന്ന കടത്തുവള്ളവും അധികൃതർ ഇല്ലാതാക്കി ജനത്തെ ഒറ്റപ്പെടുത്തി.

മദ്യപാനം ചോദ്യം ചെയ്ത യുവാവിനും കുടുംബത്തിനും കുത്തേറ്റു

ശ്രീകാര്യം: മദ്യപാനം ചോദ്യം ചെയ്ത ഗൃഹനാഥനുൾപ്പെടെ നാലുപേർക്ക് കുത്തേറ്റു. പൗഡിക്കോണത്താണ് സംഭവം. പുതുവൽ പുത്തൻവീട്ടിൽ രാജേഷ് (40), സഹോദരൻ രതീഷ് (35), രാജേഷിന്‍റെ മകൾ പ്രിൻസി (19), രഞ്ജിത്ത് (35) എന്നിവർക്കാണ് കുത്തേറ്റത്. ഇവരെ മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. വീടിന് മുന്നിൽ ഒരുസംഘം ആളുകൾ സ്ഥിരമായി മദ്യപിക്കുകയും പരസ്പരം ചീത്തവിളിച്ചു ബഹളംവയ്ക്കുകയും ചെയ്തിരുന്നത് രാജേഷ് ചോദ്യം ചെയ്തിരുന്നു. ഇതിന്‍റെ പ്രതികാരമായി ഞായറാഴ്ച മൂന്നുപേർ രാജേഷിനേയും കുടുംബത്തേയും ആക്രമിക്കുകയായിരുന്നു. സംഭവത്തിൽ പനങ്ങോട്ടുകോണം സ്വദേശികളായ സഞ്ചയ് (21), രജിത (40), കണ്ടാലറിയാവുന്ന മൂന്നു പേർ എന്നിവർക്കെതിരെ പോലിസ് കേസെടുത്തു.

യൂത്ത് കോണ്‍ഗ്രസ് സെക്രട്ടേറിയറ്റ് മാര്‍ച്ചില്‍ സംഘര്‍ഷം

തിരുവനന്തപുരം: സെക്രട്ടേറിയറ്റിനുമുന്നില്‍ യൂത്ത് കോണ്‍ഗ്രസ് പ്രവര്‍ത്തകര്‍ നടത്തിയ മാര്‍ച്ചില്‍ സംഘര്‍ഷം. സെക്രട്ടേറിയറ്റ് സമരഗേറ്റിനു മുന്നില്‍ തുടങ്ങിയ പ്രതിഷേധം പിന്നീട് ആസാദ് ഗേറ്റിനു മുന്നിലേക്കും വ്യാപിച്ചു. ഇതിനിടെ പ്രവര്‍ത്തകര്‍ സെക്രട്ടേറിയറ്റിന്‍റെ മതില്‍ചാടി അക ത്ത് കടക്കാൻ ശ്രമിച്ചത് സംഘര്‍ഷത്തിന് ഇയടാക്കി. പോലീസും യൂത്ത്‌കോണ്‍ഗ്രസ് പ്രവര്‍ത്തകരും തമ്മില്‍ ഉന്തുംതള്ളും വാക്കേറ്റവും അരങ്ങേറി. യൂത്ത് കോണ്‍ഗ്രസ് സംസ്ഥാന നേതാക്കള്‍ ഉള്‍പ്പെടെ പ്രവര്‍ത്തകരെ പോലീസ് കസ്റ്റഡിയിലെടുത്തു. കേരളത്തിലെ പോലീസ് മര്‍ദനങ്ങളില്‍ പ്രതിഷേധിച്ചും മണ്ഡലം പ്രസിഡന്‍റ് സുജിത്തിനെ ആക്രമിച്ച പോലീസുകാരെ സര്‍വീസില്‍നിന്ന് നീക്കണമെന്നാവശ്യപ്പെട്ടുമാണ് യൂത്ത് കോണ്‍ഗ്രസ് പ്രതിഷേധ മാര്‍ച്ച് സംഘടിപ്പിച്ചത്. പ്രതിഷേധത്തിനിടെ ആറു യൂത്ത് കോണ്‍ഗ്രസ് പ്രവര്‍ത്തകരെ പോലീസ് കസ്റ്റഡിയിലെടുത്തു. കസ്റ്റഡിയിലെടുത്ത ജില്ലാ സെക്രട്ടറി ഷബിന്‍ ഹാഷിമിനെ ക്ലിഫ് ഹൗസിലേക്കു മാര്‍ച്ച് നടത്തിയ കേസില്‍ റിമാന്‍ഡ് ചെയ്യുകയും ചെയ്തു. ഇന്നലെ ഉച്ചയ്ക്ക് ഒന്നോടെ പാളയത്തുനിന്നും പ്രതിഷേധവുമായെത്തിയ പ്രവര്‍ത്തകരെ സമരഗേറ്റിനു മുന്നില്‍ പോലീസ് ബാരിക്കേ‍ഡ് ഉപയോഗിച്ച് തടഞ്ഞു. പ്രവര്‍ത്തകര്‍ ബാരിക്കേഡ് മറിച്ചിടാന്‍ ശ്രമിച്ചതോടെ പോലീസമായി ഉന്തുംതള്ളും അരങ്ങേറി. തുടര്‍ന്നു പ്രവര്‍ത്തകരെ തുരത്താന്‍ പോലീസ് മൂന്നു റൗണ്ട് ജലപീരങ്കി പ്രയോഗിച്ചു. ചിതറിയോടിയ പ്രവര്‍ത്തകര്‍ വീണ്ടും സംഘടിച്ചു. തുടര്‍ന്നാണ് സെക്രട്ടേറിയറ്റിന്‍റെ സുരക്ഷാഭിത്തി മറികടന്നും നോര്‍ത്ത് ഗേറ്റുവഴിയും അകത്തു കടക്കാന്‍ ശ്രമിച്ചത്. തുടര്‍ന്ന് സൗത്ത് ഗേറ്റിനു മുന്നില്‍ പ്രതിഷേധം തുടര്‍ന്നതോടെ പോലീസ് അറസ്റ്റ് നടപടികളിലേക്കു കടന്നു. ബാരിക്കേഡിന് ഒരുവശത്തുകൂടെ പ്രതിഷേധക്കാര്‍ സെക്രട്ടേറിയറ്റിനകത്തേക്കു കയറാന്‍ ശ്രമിച്ചതും പോലീസ് ചെറുത്തു. ഇതും സംഘര്‍ഷാവസ്ഥ രൂക്ഷമാക്കി. യൂത്ത് കോണ്‍ഗ്രസ് ജില്ല പ്രസിഡന്‍റ് നേമം ഷജീര്‍ അധ്യക്ഷത വഹിച്ച മാര്‍ച്ച് സംസ്ഥാന വൈസ് പ്രസിഡന്‍റ് ഒ.ജെ. ജെനീഷ് ഉദ്ഘാടനം ചെയ്തു. സംസ്ഥാന സെക്രട്ടറി സജിത് മുട്ടപ്പാലം, അഫ്‌സല്‍ ബാലരാമപുരം, ആര്‍.എസ്. വിപിന്‍, ഫൈസല്‍ നന്നാട്ടുക്കാവ് തുടങ്ങിയവര്‍ നേതൃത്വം നല്‍കി.

യുവതി ഫ്‌ളാറ്റില്‍ മരിച്ച നിലയിൽ

തിരുവനന്തപുരം: യുവതിയെ ഫ്‌ളാറ്റിനുളളില്‍ മരിച്ചനിലയില്‍ കണ്ടെത്തി. പോണ്ടിച്ചേരി കാരിക്കല്‍ മുക്കുളം സ്ട്രീറ്റ് 13ല്‍ അളകര്‍സാമിയുടെ മകള്‍ എ. അക്ഷയ (25) ആണ് മരിച്ചത്. തിങ്കളാഴ്ച രാവിലെ ഇവര്‍ താമസിച്ചുവന്ന ജനറല്‍ ആശുപത്രിക്കു സമീപം തമ്പുരാന്‍ മുക്കിലെ ആര്‍ടെക് തമ്പുരാന്‍സ് ഫ്‌ളാറ്റിലെ അഞ്ചാം നിലയില്‍ 5ബി അപ്പാര്‍ട്ട്‌മെന്‍റിനുള്ളിലാണ് മൃതദേഹം കണ്ടെത്തിയത്. ഫ്‌ളാറ്റിലെ ബെഡ്‌റൂമിനുള്ളില്‍ തൂങ്ങിയ നിലയിലാണ് മൃതദേഹം കണ്ടെത്തിയത്. മുന്‍വശത്തെ വാതിലിന്‍റെ മൂന്നു കുറ്റികളും ഭദ്രമായി ലോക്ക് ചെയ്ത നിലയിലായിരുന്നു. തിരുവനന്തപുരം ഫയര്‍‌സ്റ്റേഷനില്‍ നിന്ന് ഫയര്‍ ആൻഡ് റസ്‌ക്യു ഓഫീസര്‍ ഷഹീര്‍, ഓഫീസര്‍മാരായ രാഹുല്‍, നൂറുദ്ദീന്‍, സനിത്ത്, എഫ്ആര്‍ഒ ഡ്രൈവര്‍ ശ്രീരാജ് ആര്‍. നായര്‍ എന്നിവര്‍ ഫ്‌ളാറ്റിലെ മുറിയുടെ പിന്‍വാതിലൂടെ കടന്ന് നടത്തിയ പരിശോധനയിലാണ് മൃതദേഹം കണ്ടെത്തുന്നത്. ജര്‍മന്‍ഭാഷ പഠിക്കുന്നതിനുവേണ്ടി ഒരുമാസത്തിനു മുമ്പാണ് അക്ഷയ തിരുവനന്തപുരത്തെ ഒരു ഇന്‍സ്റ്റിറ്റ്യൂട്ടില്‍ ചേര്‍ന്നത്. 15 ദിവസത്തിനു മുമ്പാണ് തമ്പുരാന്‍മുക്കിലെ ഫ്‌ളാറ്റില്‍ താമസമാക്കുന്നത്. ഒറ്റയ്ക്കാണ് അക്ഷയ കഴിഞ്ഞുവന്നിരുന്നതെന്നു പോലീസ് അറിയിച്ചു. ആത്മഹത്യാക്കുറിപ്പൊന്നും കണ്ടെത്താനായിട്ടില്ല. മരണകാരണം വ്യക്തമായിട്ടില്ലെന്നു കന്‍റോണ്‍മെന്‍റ് പോലീസ് അറിയിച്ചു. മൃതദേഹം ഇന്‍ക്വസ്റ്റ് നടപടികള്‍ പൂര്‍ത്തിയാക്കിയശേഷം തിരുവനന്തപുരം മെഡിക്കല്‍കോളജ് മോര്‍ച്ചറിയിലേക്കു മാറ്റി.

മധ്യവയസ്കൻ ലോഡ്ജിൽ മരിച്ച നിലയിൽ

വെഞ്ഞാറമൂട് : വേറ്റിനാട് സ്വദേശിയെ വെഞ്ഞാറമൂട്ടിലെ ലോഡ്ജിൽ മരിച്ച നിലയിൽ കണ്ടെത്തി. വെമ്പായം വേറ്റിനാട് ഈഴക്കോട്ടുകോണം പുത്തൻവീട്ടിൽ പരേതനായ കുട്ടന്‍റെ മകൻ സുരേന്ദ്രൻ ( 60 )നെയാണ് വെഞ്ഞാറമൂട് ജംഗ്ഷനിലെ ലോഡ്ജിൽ മരിച്ച നിലയിൽ കണ്ടത്. നാളുകളായി ഇയാൾ ഇവിടത്തെ ലോഡ്ജിലാണ് താമസിച്ച് വന്നിരുന്നത്. മരിച്ച് കിടന്ന മുറിയിൽ ഏറെ മദ്യക്കുപ്പികളും ഉണ്ടായിരുന്നു. വെഞ്ഞാറമൂട് പോലീസ് എത്തി മേൽ നടപടികൾ സ്വീകരിച്ചു.

തൃപ്പാദത്തിൽ ഓണക്കോടിയുമായി വിദ്യാർഥികൾ എത്തി

നെടുമങ്ങാട്: തൃപ്പാദം അഗതി മന്ദിരത്തിൽ അറുപതോളം വരുന്ന അന്തേവാസികൾക്ക് ഓണക്കോടിയുമായി നെടുമങ്ങാട് വെർട്ടെക്സ് സ്റ്റഡീസിലെ വിദ്യാർഥികൾ എത്തി. വെർട്ടെക്സിന്‍റെ ഓണാഘോഷപരിപാടിയുടെ ഭാഗമായാണ് 150 ഓളം വിദ്യാർഥികളും അധ്യാപകരും ഓണക്കോടിയുമായി തൃപ്പാദത്തിൽ എത്തിയത്. തുടർന്നു കലാകായിക പരിപാടികളും ഓണസദ്യയുമായി അന്തേവാസികൾക്കൊപ്പം ചെലവഴിച്ചിട്ടാണു വിദ്യാർഥികൾ യാത്രയായത്. ഓണാഘോഷ പരിപാടികളുടെ ഉദ്ഘാടനം നെടുമങ്ങാട് നഗരസഭ ചെയർപേഴ്സൺ സി.എസ്. ശ്രീജ നിർവഹിച്ചു. തൃപ്പാദത്തിനുവേണ്ടി ഫാ. വിജയാനന്ദ വർഗീസ്, വാർഡ് കൗൺസിലർ സജിതയിൽ നിന്നും ഓണക്കോടി ഏറ്റുവാങ്ങി.

സമത ഗ്രാമീണ ഗ്രന്ഥശാല വാർഷികവും ഓണാഘോഷവും

നെടുമങ്ങാട്: പുനലാൽ സമത ഗ്രാമീണ ഗ്രന്ഥശാലയുടെ മൂന്നാം വാർഷികവും ഓണാഘോഷവും ജി. സ്റ്റീഫൻ എംഎൽഎ ഉദ്ഘാടനം ചെയ്തു. ഡെയിൽ വ്യൂ സ്ഥാപകരായ ക്രിസ്തുദാസ്, ശാന്താദാസ് എന്നിവരുടെ സ്മരണാർഥം ഗ്രന്ഥശാല ഏർപെടുത്തിയ ക്രിശാന്താ പ്രതിഭാ പുരസ്കാരം അച്ചു ജി. ദാസിന് വിതരണം ചെയ്തു. വിവിധ മേഖലകളിൽ സേവനം ചെയ്തവരെ യോഗത്തിൽ ആദരിച്ചു. വിവിധ പരീക്ഷകളിൽ വിജയിച്ചവർക്ക് സമ്മാനം വിതരണം ചെയ്തു. യുവ എഴുത്തുകാരി ഊർമിള അഗസ്ത്യ മുഖ്യാതിഥിയായി പങ്കെടുത്തു. ഡെയിൽ വ്യൂ ഡയറക്ടർ ഡിപിൻദാസ് പുരസ്കാര വിതരണം നടത്തി. താലൂക്ക് ലൈബ്രറി കൗൺസിൽ ജോ. സെക്രട്ടറി മുരുകൻ കാച്ചാണി, വെള്ളനാട് പഞ്ചായത്ത് മുൻ പ്രസിഡന്‍റ് എം. രാജേന്ദ്രൻ, മുൻ സ്റ്റാൻഡിംഗ് കമ്മിറ്റി ചെയർമാൻ എൽ. സത്യദാസ് തുടങ്ങിയവർ സംസാരിച്ചു. ഗ്രന്ഥശാല പ്രസിഡന്‍റ് ഡി. സ്റ്റുവർട്ട് അധ്യക്ഷത വഹിച്ച യോഗത്തിൽ സെക്രട്ടറി ഡി. ജോൺദാസ് സ്വാഗതവും ജോ. സെക്രട്ടറി രജിത്ത് രാജു നന്ദിയും പറഞ്ഞു.

ജയന്‍റ് വീലിനു മുകളില്‍ മരം വീണു; ഇരിപ്പിടങ്ങള്‍ തകര്‍ന്നു

പേരൂര്‍ക്കട: കുട്ടികള്‍ക്കുള്ള ജയന്‍റ് വീലിനു മുകളില്‍ മരം വീണ് ഇരിപ്പിടങ്ങള്‍ തകര്‍ന്നു. കഴിഞ്ഞദിവസം വൈകുന്നേരം 4.30ന് കനകക്കുന്ന് വളപ്പില്‍ സ്ഥാപിച്ചിരുന്ന ചില്‍ഡ്രന്‍സ് ജയന്‍റ് വീലിനു മുകളിലാണ് കൂറ്റന്‍ തണല്‍മരത്തിന്‍റെ ശിഖരം ഒടിഞ്ഞുവീണത്. തിരുവനന്തപുരം ഫയര്‍‌സ്റ്റേഷനില്‍ നിന്ന് ഉദ്യോഗസ്ഥരെത്തിയാണു ശിഖരം മുറിച്ചുനീക്കിയത്. സംഭവസമയം ജയന്‍റ് വീല്‍ നിര്‍ത്തിവച്ചിരിക്കുകയായിരുന്നു. കുട്ടികളാരും ഇതിനു സമീപത്ത് ഇല്ലാത്തത് അപകടം ഒഴിവാക്കി. ജയന്‍റ് വീലില്‍ കുട്ടികള്‍ ഇരിക്കുന്ന ഭാഗം കുറച്ചു തകര്‍ന്നുപോയി. തിരുവനന്തപുരം ഫയര്‍‌സ്റ്റേഷനില്‍ നിന്ന് സീനിയര്‍ എഫ്ആര്‍ഒ അനില്‍കുമാറും സംഘവും നേതൃത്വം നല്‍കി.

സഹോദരിയുടെ മകളെ തലയ്ക്കടിച്ച് പരിക്കേല്‍പ്പിച്ചയാള്‍ അറസ്റ്റില്‍

പൂന്തുറ: മദ്യ ലഹരിയില്‍ സഹോദരിയുടെ മകളെ തലയ്ക്കടിച്ച് പരിക്കേല്‍പ്പിച്ചയാളെ പൂന്തുറ പോലീസ് അറസ്റ്റ് ചെയ്തു. മുട്ടത്തറ വടുവത്ത് ക്ഷേത്രത്തിനു സമീപം താമസിക്കുന്ന സതീഷ് (32) ആണ് പോലീസിന്‍റെ പിടിയിലായത്. ശനിയാഴ്ച രാത്രി എട്ടരയോടെയായിരുന്നു സംഭവം. മദ്യലഹരിയിലായിരുന്ന സതീഷ്, പെൺകുട്ടി രാത്രിയിൽ ചൂലുപയോഗിച്ചു വീടു വൃത്തിയാക്കുന്നത് ചോദ്യം ചെയ്യുകയും സമീപത്തിരുന്ന വടിയെടുത്ത് മർദിക്കുകയുമായിരുന്നു. മർദനത്തിൽ തലപൊട്ടി രക്തം ഒഴുകിയതുകണ്ട കുട്ടിയുടെ അമ്മ പൂന്തുറ പോലീസിൽ വിവരം അറിയിച്ചു. ഈ സമയം കൈയിലിരുന്ന വടികൊണ്ട് സതീഷ്, സ്വന്തം തലയിൽ അടിച്ചു മുറിവേൽപ്പിക്കുകയും ചെയ്തു. സഹോദരിയുടെ പരാതിയിൽ കേസെടുത്ത പോലീസ് സതീഷിനെ അറസ്റ്റുചെയ്തു. പൂന്തുറ എസ്എച്ച്ഒ സജീവിന്‍റെ നേതൃത്വത്തില്‍ എസ്ഐ സുനില്‍, ഗ്രേഡ് എസ്ഐ സുധീര്‍, ഗ്രേഡ് സിപിഒ സജി, സിപിഒ മാരായ പത്മകുമാര്‍, അനീഷ്‌കുമാര്‍ എന്നിവരുടെ നേതൃത്വത്തില്‍ അറസ്റ്റ് ചെയ്ത പ്രതിയെ കോടതിയില്‍ റിമാന്‍ഡ് ചെയ്തു.

ചാലയിലെ ക്ഷേത്രമോഷണം; ബംഗാള്‍ സ്വദേശി അറസ്റ്റില്‍

പേരൂര്‍ക്കട: ചാലയിലെയും ആര്യശാലയിലെയും ക്ഷേത്രത്തില്‍ മോഷണം നടത്തിയ സംഭവത്തില്‍ ബംഗാള്‍ സ്വദേശിയുടെ അറസ്റ്റ് ഫോര്‍ട്ട് പോലീസ് രേഖപ്പെടുത്തി. വെസ്റ്റ് ബംഗാള്‍ മാള്‍ഡ ബങ്കി ഡോല സ്വദേശി സഞ്ജീബ് മണ്ഡല്‍ (27) ആണ് അറസ്റ്റിലായത്. കഴിഞ്ഞമാസം 31ന് ചാലയിലെ മുത്തുമാരിയമ്മന്‍ ക്ഷേത്രത്തിലെ കാണിക്കവഞ്ചി കുത്തിത്തുറന്ന ഇയാള്‍ 3000-ഓളം രൂപയാണ് കവര്‍ന്നത്. ക്ഷേത്ര കോമ്പൗണ്ടിലുണ്ടായിരുന്ന കാണിക്കവഞ്ചിയാണ് ഇയാള്‍ കവര്‍ന്നത്. ഇതിന്‍റെ അന്വേഷണം നടന്നുവരുന്നതിനിടെയാണ് ശനിയാഴ്ച പുലര്‍ച്ചെ രണ്ടോടെ ആര്യശാലയിലെ ഉജ്ജയിനി മഹാകാളി ക്ഷേത്രത്തില്‍നിന്നു കിണ്ടികളും വിളക്കുകളും മോഷ്ടിച്ചത്. ഈ സംഭവത്തിനുശേഷം തൊണ്ടിമുതല്‍ ചാക്കിലാക്കി നടന്നുവരുന്നതിനിടെ കണ്‍ട്രോള്‍ റൂമിലെ പോലീസ് ഉദ്യോഗസ്ഥര്‍ സംശയംതോന്നി ചോദ്യം ചെയ്തതോടെയാണ് മോഷണവിവരം അറിയുന്നത്. ചാലയില്‍നിന്നു മോഷ്ടിച്ച പണം തന്നില്‍ നിന്നു മറ്റാരോ കവര്‍ന്നുവെന്നാണ് ഫോര്‍ട്ട് സിഐ വി.ആര്‍ ശിവകുമാറിന്‍റെ നേതൃത്വത്തിലുള്ള സംഘം ചോദ്യം ചെയ്തപ്പോള്‍ ഇയാള്‍ പറഞ്ഞത്. തമ്പാനൂര്‍ റെയില്‍വേ സ്റ്റേഷന്‍ പരിസരത്താണ് സഞ്ജീബ് മണ്ഡല്‍ തമ്പടിച്ചിരിക്കുന്നത്. എസ്ഐ ബിജു, സിപിഒമാരായ അജീഷ്, സജു, ഹോം ഗാര്‍ഡ് സന്തോഷ് എന്നിവരും അന്വേഷണസംഘത്തില്‍ ഉണ്ടായിരുന്നു. അറസ്റ്റിലായ പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു.

ഭക്ഷ്യമന്ത്രിയുടെ മണ്ഡലത്തിൽ തൂശനിലയിൽ കഞ്ഞിവിളമ്പി പ്രതിഷേധം

നെടുമങ്ങാട്: ഉപ്പുതൊട്ട് കർപ്പൂരം വരെയുള്ള വസ്തുക്കൾക്കു വില കയറ്റം നിലനിൽക്കെ സപ്ലൈ കോയിൽ എല്ലാ സാധനങ്ങൾക്കും വിലകുറവെന്ന സർക്കാർ പരസ്യം ജനങ്ങളെ കബളിപ്പിച്ച സൂത്രതന്ത്രമായി മാറിയെന്നു കെപിസിസി ജനറൽ സെക്രട്ടറി അഡ്വ. ജി സുബോധൻ. മൂന്നര കോടി ജനങ്ങളുള്ള കേരളത്തിൽ ആകെ 89 ലക്ഷം പേർക്കാണ് റേഷൻകാർഡ് ഉള്ളത്. ഇതിൽ സൗജന്യ കിറ്റിനർഹരായവർ വെറും 5,62,323 പേരാണെങ്കിലും അതുലഭിച്ചവർ ആകെ മൂന്നുലക്ഷത്തിനകത്തുള്ളവർ മാത്രമാണെന്നും ജി. സുബോധ ൻ കുറ്റപ്പെടുത്തി. വിലക്കയറ്റത്തിൽ പ്രതിഷേധിച്ച് കോൺഗ്രസ് നെടുമങ്ങാട് നിയോജക മണ്ഡലം കമ്മിറ്റി തൂശ നിലയിൽ കഞ്ഞി വിളമ്പി നടത്തിയ പ്രതിഷേധ സമരം ഉദ്ഘാടനം ചെയ്യുകയായിരുന്നു അഡ്വ. ജി. സുബോധൻ. കോൺഗ്രസ്‌ നെടുമങ്ങാട് ബ്ലോക് പ്രസിഡന്റ് എ. അർജുനൻ അധ്യക്ഷനായി. നേതാക്കളായ അഡ്വ. എം. അൽത്താഫ്, അഡ്വ. എം. മുനീർ, വട്ടപ്പാറ ചന്ദ്രൻ, നെ ട്ടറച്ചിറ ജയൻ, അഡ്വ. തേക്കട അനിൽ, അഡ്വ. വെമ്പായം അനിൽ, അഡ്വ. അരുൺകുമാർ, അഡ്വ. മനോജ്‌, അഡ്വ. ഫാത്തിമ, പുങ്കുമൂട് അജി, അഡ്വ. മഹേഷ്‌ ചന്ദ്രൻ തുടങ്ങിയവർ പ്രസംഗിച്ചു.

കെട്ടിട നിര്‍മാണ തൊഴിലാളികള്‍ക്ക് 18 മാസത്തെ വേതനം മുടക്കമുള്ളതായി പരാതി

വെള്ളറട: കെട്ടിട നിര്‍മാണ തൊഴിലാളികള്‍ക്കു സര്‍ക്കാര്‍ 18 മാസത്തെ പെന്‍ഷന്‍ മുടക്കം വരുത്തിയതായി വ്യാപക പരാതി. പ്രതിമാസം 1,600 രൂപയാണ് കെട്ടിട നിര്‍മാണ തൊഴിലാളികള്‍ക്ക് സര്‍ക്കാര്‍ നല്‍കുന്നത്. ശാരീരികമായി ബലഹീനതയുള്ളവരും വാര്‍ധക്യത്തിലായവരും ദാരിദ്ര്യത്തില്‍ കഴിയുന്നവരുമാണു കെട്ടിട നിര്‍മാണ തൊഴിലാളി പെന്‍ഷന്‍ വാങ്ങുന്നവര്‍. അവര്‍ക്കാണു സര്‍ക്കാര്‍ 18 മാസത്തെ പെന്‍ഷന്‍ നല്‍കാനുള്ളത്. ഓണത്തിന് ഒരു മാസത്തെ പെന്‍ഷന്‍ 1600 രൂപ മാത്രം നല്‍കുക മാത്രമാണ് ചെയ്തത്. കുടിശികയുള്ള 18 മാസത്തെ പെന്‍ഷന്‍ അടിയന്തിരമായി നല്‍കി മരണാവസ്ഥയിലും ദാരിദ്ര്യത്തിലും കഴിയുന്നവരെ രക്ഷിക്കണമെന്നാണ് കെട്ടിട നിര്‍മാണ തൊഴിലാളികള്‍ ഒന്നടങ്കം ആവശ്യപ്പെടുന്നത്.

നെയ്യാർ ഡാമിലെ ഓണാഘോഷം ഇന്നു സമാപിക്കും

നെയ്യാർഡാം: നെയ്യാർ ഡാമിലെ ഓണാഘോഷത്തിന് ഇന്ന് സമാപനം. നാലിന് ആരംഭിച്ച ആഘോഷങ്ങൾക്ക് ഇന്നത്തെ സാംസ്കാരിക ഘോഷയാത്രയോടെ സമാപനമാകും. ദീപാലങ്കാരം കാണാനും വിവിധ കലാപരിപാടികൾ ആസ്വദിക്കാനും അയൽ സംസ്ഥാനങ്ങളിൽ നിന്ന് പോലും സഞ്ചാരികളെത്തിയിരുന്നു. സമാപന ദിവസമായന്നു പകൽ രണ്ടിനു നാടൻപാട്ട്, വൈകുന്നേരം നാലിനു സാംസ്കാരിക ഘോഷയാത്ര കള്ളിക്കാട് ജംഗ്ഷനിൽനിന്ന്‌ സി.കെ. ഹരീന്ദ്രൻ എംഎൽഎ ഉദ്‌ഘാടനം ചെയ്യും. പഞ്ചായത്ത് പ്രസിഡന്‍റ് പന്ത ശ്രീകുമാർ അധ്യക്ഷനാകും. വിവിധ നൃത്തങ്ങൾ, കാവടി, പൂരക്കാവടി, തെയ്യം, ആയോധന കലാപ്രകടനം എന്നിവ ഘോഷയാത്രയ്ക്കു കൊഴുപ്പേകും. കുടുംബശ്രീ, വിവിധ വാർഡുകൾ, വ്യാപാരി സംഘടനകൾ, സർക്കാർ വകുപ്പുകൾ എന്നിവ ഫ്ലോട്ടുകളുമായി ഘോഷയാത്രയിൽ അണിനിരക്കും, വാദ്യമേളങ്ങളും അകമ്പടിയേകും. ഗ്രീൻ പ്രോട്ടോ കോൾ പാലിച്ചാവും പരിപാടികൾ. നെയ്യാർഡാമിൽ ഘോ ഷയാത്ര സമാപിക്കും. രാത്രി 7.30-ന് സമാപനസമ്മേളനം. തുടർന്ന് റഹ്‌മാൻ പത്തനാപുരം നയിക്കുന്ന ഗാനമേള. കോട്ടൂർ ഇക്കോ ടൂറിസം ഓണാഘോഷം എട്ടിന് സമാപിക്കും. ഉത്രാടത്തിനു തുടങ്ങിയ ആഘോഷങ്ങളുടെ ഭാഗമായുള്ള വൈദ്യുത ദീപാലങ്കാരം, ജൈവ-കാർഷിക-കരകൗശല-പ്രദർശന-വിപണന മേള എന്നിവിടങ്ങളിൽ വലിയ തിരക്കാണ്. കലാപരിപാടികൾ ആസ്വദിക്കാനും വിവിധ ഇടങ്ങളിൽനിന്നും നിരവധിപ്പേർ എത്തുന്നുണ്ട്. സമാപനദിവസമായ എട്ടിന് വൈകുന്നേരം നാലിനു വർണശബളമായ സാംസ്കാരിക ഘോഷയാത്ര കാപ്പുകാട് ആനപാർക്കിൽനിന്നു തുടങ്ങി കോട്ടൂർ ജംഗ്ഷനിൽ സമാപിക്കും.

പാതയോരങ്ങളില്‍ പ്ലാസ്റ്റിക് മാലിന്യങ്ങള്‍ കുന്നുകൂടുന്നു

മാലിന്യ നിര്‍മാര്‍ജനം പ്രഖ്യാപനങ്ങളില്‍ മാത്രം പാറശാല: മാലിന്യമുക്ത പ്രഖ്യാപനം നടത്തിയ മലയോര പഞ്ചായത്തുകളിലെ പാതയോരങ്ങളിൽ മാലിന്യം തള്ളുന്നത് കൂടുന്നതായി ആക്ഷേപം. മാലിന്യമുക്ത പദ്ധതികള്‍ പ്രഖ്യാപനങ്ങളില്‍ ഒതുങ്ങു ന്നതല്ലാതെ പ്രാവര്‍ത്തികമാകുന്നില്ല. മാസങ്ങള്‍ക്കു മുന്‍പാണ് മണ്ഡലത്തിലെ ഭൂരിഭാഗം പഞ്ചായത്തുകളും മാലിന്യമുക്ത പദ്ധതിക്കു തുടക്കം കുറിച്ചത്. ഗ്രാമപഞ്ചായത്തുകളിലെ ശുചീകരണ തൊഴിലാളികളും ഹരിതകര്‍മ സേനയും മാലിന്യനീക്കം നടത്തുമെന്നായിരുന്നു തീരുമാനം. വീടുകളില്‍ നിന്നുള്ള പ്ലാസ്റ്റിക് മാലിന്യം ശേഖരിക്കുന്നതിലൊഴികെ പ്രഖ്യാപനം നടപ്പിലായില്ല. പാതയോരങ്ങളിലെ മാലിന്യനീക്കം പലയിടത്തും നടപ്പിലായില്ല. മാലിന്യമുക്ത പ്രഖ്യാപനം നടത്തിയ പഞ്ചായത്തുകളിലും പാതയോരങ്ങളില്‍ ഭക്ഷണാവശിഷ്ടവും, ഇറച്ചിക്കടകളില്‍ നിന്നുള്ള മാലിന്യവും തള്ളിയ നിലയിലാണ്.പാറശാല മുതല്‍ വെള്ളറട വരെ നീളുന്ന അതിര്‍ത്തി മലയോര പാതയില്‍ പഞ്ചായത്ത് ലൈസന്‍സ് പോലുമില്ലാതെ അനധികൃതമായി പ്രവര്‍ത്തിക്കുന്ന നൂറു കണക്കിന് അറവുശാലകളില്‍ നിന്നുള്ള മാലിന്യം പാതയോരങ്ങളിലും പൊതു ഇടങ്ങളിലും തള്ളുന്നത് തുടരുകയാണ്. പാറശാല ചെറുവാരക്കോണം സിഎസ്ഐ ലോ കോളജിനു സമീപത്തും പരശുവയ്ക്കലിലും പാതയോരത്ത് നിക്ഷേപിച്ചിട്ടുള്ള അറവുമാലിന്യം അഴുകി ദുര്‍ഗന്ധം വമിക്കുന്ന നിലയിലാണ് കണ്ടെത്താറുള്ളത്. സ്ഥിരം മാലിന്യ നിക്ഷേപ കേന്ദ്രങ്ങളില്‍ സിസിടിവി കാമറ സ്ഥാപിച്ചാല്‍ പ്രശ്‌നത്തിനു പരിഹാരമാകുമെങ്കിലും പഞ്ചായത്ത് അധികൃതർ ഇക്കാര്യത്തില്‍ നടപടി യെടുത്തിട്ടില്ല. കുളത്തൂര്‍ പഞ്ചായത്തില്‍ പൊഴിക്കര ഭാഗത്തും മാലിന്യ നിക്ഷേപമുണ്ട്. പഞ്ചായത്തുകളിൽ മാലിന്യം സംസ്‌കരിക്കാന്‍ സംവിധാനമില്ലാത്തതാണ് പാതയോരങ്ങള്‍ മാലിന്യനിക്ഷേപ കേന്ദ്രങ്ങളാകുന്നതിന് പ്രധാന കാരണം. ഭക്ഷ്യ-മാംസ അവശിഷ്ടങ്ങള്‍ ചാക്കുകളില്‍ കെട്ടി രാത്രിയില്‍ പൊതു ഇടങ്ങളില്‍ വാഹനങ്ങളില്‍ കൊണ്ടുവന്നു തള്ളുന്നതിനുള്ള കാരണവും ഇതാണ്. വീടുകളില്‍നിന്നും ഹോട്ടലുകളില്‍ നിന്നും വിവാഹ പാര്‍ട്ടികള്‍ നടക്കുന്ന സ്ഥലങ്ങളിലെയും മാലിന്യങ്ങള്‍ തെരുവുനായ്ക്കളും പക്ഷികളും കൊത്തി വലിച്ചു റോഡിലും കിണറുകളിലും മറ്റും ഇടുന്നതു കാരണം പകര്‍ച്ച വ്യാധി ഭീഷണിയുമുണ്ട്. വെള്ളറട കുന്നത്തുകാല്‍ പഞ്ചായത്തുകളുടെ പല ഭാഗങ്ങളിലും മാലിന്യനിക്ഷേപം കാണാം. ഒരു ഘട്ടത്തി ല്‍ പ്രതികളെ കണ്ടെത്തുന്നതിനു കാമറ സ്ഥാപിച്ചെങ്കിലും കാര്യമായ പ്രയോജനമുണ്ടായില്ല. കാമറ ദൃശ്യങ്ങളില്‍പെടാതെ തൊട്ടടുത്തു തന്നെ മാലിന്യങ്ങള്‍ കൊണ്ടുവന്നു നിക്ഷേപിക്കുകയാണ് പുതിയരീതി. വെള്ളറടയിലെ ആറാട്ടുകുഴി കടുക്കറ റോഡില്‍മുതുവാന്‍കോണം മുതല്‍ കടുക്കറവരെ മാലിന്യങ്ങള്‍ നിക്ഷേപിക്കുന്നു. കുന്നത്തുകാല്‍ പഞ്ചായത്തിലെ വണ്ടിത്തടം റോഡിലും കട്ടച്ചല്‍വിള കോട്ടുക്കോണം റോഡിലെ സര്‍ക്കാര്‍ ആശുപത്രികള്‍ക്ക് സമീപവുമാണു സ്ഥിരമായി മാലിന്യങ്ങള്‍ നിക്ഷേപിക്കുന്നത്. കുടപ്പനമൂട്, നെടുമങ്ങാട് റോഡിലെ വാഴിച്ചലിനു സമീപവും മാലിന്യനിക്ഷേപം കാണാം. പഞ്ചായത്തുകളില്‍ മാലിന്യം ശേഖരിച്ച് സംസ്‌കരിക്കാനുള്ള സംവിധാനങ്ങള്‍ ഏര്‍പ്പെടുത്തുകയും പൊതു ഇടങ്ങളില്‍ മാലിന്യം നിക്ഷേപിക്കുന്നവരെ കണ്ടെത്തി നിയമ നടപടികള്‍ സ്വീകരിക്കുകയും ചെയ്താല്‍ ഒരു പരിധിവരെ മാലിന്യനിക്ഷേപം കുറയ്ക്കാനാകും. തെരുവ് നായ്ക്കളുടെ വര്‍ധനയ്ക്കും പകര്‍ച്ച വ്യാധി ഭീഷണിക്കും ഇടയാകകുന്ന മാലിന്യപ്രശ്‌നം പരിഹരിക്കാന്‍ പഞ്ചായത്തുകള്‍ സത്വര നടപടികള്‍ സ്വീകരിക്കണമെന്നാണ് ആവശ്യം.

കരുത്ത് തെളിയിച്ച് എംഎസ്‌സി വിർജീനിയ വിഴിഞ്ഞത്ത്

വിഴിഞ്ഞം: എത്ര വലിയ ചരക്ക് കപ്പലുകൾക്കും ആഴമേറിയ അന്താരാഷ്ട്ര തുറമുഖത്ത് അടുക്കാമെന്നു ലോകത്തിന് മുന്നിൽ തെളിയിച്ച് എംഎസ്‌സി വിർജീനിയ. കേരളത്തിന് ഓണസമ്മാനമായി എത്തി 16.95 മീറ്റർ ആഴമുള്ള കണ്ടെയ്നർ കപ്പൽ കൈകാര്യം ചെയ്തതിന്‍റെ റെക്കോർഡുമായാണ് 478-മനായി വിർജീനിയയുടെ വരവ്. ഓണദിനത്തിൽനങ്കുരമിട്ട കപ്പൽ ദൗത്യം പൂർത്തിയാക്കി ഇന്നലെ രാവിലെ സ്പെയിൻ ലക്ഷ്യമാക്കി തീരംവിട്ടു. ഇന്ത്യൻ തുറമുഖങ്ങളിൽ ഇതുവരെ കൈകാര്യം ചെയ്തതിൽ രണ്ടാമത്തെ ഏറ്റവും വലിയ ഡ്രാഫ്റ്റ് കൂടിയ കപ്പൽ എന്ന പേരുമായാണ് എംഎസ്സിയുടെ അഭിമാന മടക്കം. അദാനി മുന്ദ്ര തുറമുഖത്തുനിന്ന് വിഴിഞ്ഞത്ത് എത്തുമ്പോൾ 16 മീറ്റർ ആയിരുന്നു കപ്പലിന്‍റെ ഡ്രാഫ്റ്റ് (കപ്പലിന്‍റെ അടിത്തട്ടു മുതൽ കടൽ നിരപ്പ് വരെയുള്ള ഉയരം). ഏതാണ്ട് 5,000 കണ്ടെയ്നർ ചരക്ക് വിഴിഞ്ഞത്ത് കൈകാര്യം ചെയ്ത ശേഷമാണ് ഡ്രാഫ്റ്റ് 16.95 ആയി വർധിച്ചത്. ഇതിനു മുൻപു 16.8 മീറ്റർ ആയിരുന്നു വിഴിഞ്ഞത്ത് എത്തിയ ആഴം കൂടിയ കപ്പൽ. 16.5 മീറ്ററിൽ കൂടുതൽ ഡ്രാഫ്റ്റ് ഉള്ള 17 കപ്പലുകളാണ് ഇതുവരെ വിഴിഞ്ഞത്ത് എത്തി ലക്ഷ്യം പൂർത്തിയാക്കി മടങ്ങിയത്. 18 മീറ്റർ മുതൽ 20 മീറ്റർ വരെ സ്വഭാവിക ആഴമുള്ള വിഴിഞ്ഞം തുറമുഖത്തിന്‍റെ കരുത്ത് ആഗോള മാരിടൈം മേഖലയ്ക്കു മുന്നിൽ ഒന്നുകൂടി തെളിയിക്കാനും കഴിഞ്ഞു. ട്രയൽ റണ്ണും കഴിഞ്ഞ് കൊമേഴ്സ്യൽ തുറമുഖമായി മുന്നോട്ട് കുതിക്കുന്ന തുറമുഖത്ത് 10.55 ലക്ഷം കണ്ടെയ്നറുകൾ കൈകാര്യം ചെയ്യാൻ കഴിഞ്ഞതിന്‍റെ അഭിമാന നേട്ടത്തിലാണ് വിഴിഞ്ഞം.

ഓണപ്പൂക്കള വിവാദം : സാമൂഹിക മാധ്യമങ്ങൾ നിരീക്ഷിക്കാൻ പോലീസ്

ശാസ്താംകോട്ട പോലീസ് സ്റ്റേഷനിലേക്ക് ഇന്ന് ബിജെപി മാർച്ച് കൊല്ലം: ശാസ്താംകോട്ട മുതുപിലാക്കാട് പാർഥസാരഥി ക്ഷേത്രത്തിലെ ഓണപ്പൂക്കള വിവാദവുമായി ബന്ധപ്പെട്ട കേസിൽ സാമൂഹിക മാധ്യമങ്ങളിലെ പോസ്റ്റുകൾ നിരീക്ഷിക്കാൻ പോലീസ്. പോലീസിനെതിരേ സോഷ്യൽ മീഡിയയിൽ ഈ വിഷയത്തിൽ തെറ്റിദ്ധാരണാജനകമായ പോസ്റ്റുകൾ പ്രചരിക്കുന്ന സാഹചര്യത്തിലാണ് തീരുമാനം. പൂക്കളമിട്ട എല്ലാവർക്ക ുമെതിരെ കെസെടുത്തിട്ടില്ലെന്നും പോലീസിന്‍റെ നിർദേശത്തിനു വിരുദ്ധമായി ഓണപ്പൂക്കളം ഇട്ടവർക്ക് എതിരേ മാത്രമാണ് കേസെ ടുത്തിട്ടുള്ളതെന്നും പോലീസ് പറഞ്ഞു. പൂക്കളമിട്ട എല്ലാവർക്കുമെതിരേ കേസെടുത്തു എന്ന് പ്രചരിക്കുന്ന വാർത്ത തെറ്റാണെന്നും ഇത്തരം വ്യാജവാർത്തകൾ പ്രചരിപ്പിക്കുന്ന വാട്സ്ആപ്പ് ഗ്രൂപ്പുകളെയടക്കം സൈബർ സെല്ലിന്‍റെ സഹായത്തോടെ തിരിച്ചറിഞ്ഞു കർശന നടപടി സ്വീകരിക്കുമെന്ന് ശാസ്താംകോട്ട പോലീസ് വ്യക്തമാക്കി. തിരുവോണ ദിവസം ക്ഷേത്രപരിസരത്ത് പോലീസ് നിർദേശത്തിന് വിരുദ്ധമായി പൂക്കളം ഒരുക്കിയ 27 പേർക്ക് എതിരേയാണ് പോലീസ് കേസ് എടുത്തിട്ടുള്ളത്. ഇവർ എല്ലാവരും ഒരു സംഘടനയിലെ അംഗങ്ങളുമാണ്. ക്ഷേത്ര പരിസരത്ത് രാഷ്‌ട്രീയ പാർട്ടികളുടെ കൊടിതോരണങ്ങളും ഫ്ലക്സ് ബോർഡുകളും നിരോധിച്ചുള്ള കോടതി ഉത്തരവ് നിലവിലുണ്ട്. ഇത് ലംഘിച്ചാണ് പൂക്കളം ഒരുക്കിയത്. മാത്രമല്ല ഇവർ ക്ഷേത്ര പരിസരത്ത് ഫ്ലക്സ് ബോർഡും സ്ഥാപിച്ചു. വ്യാഴാഴ്ച രാത്രിയോടെയാണ് ഏറെ വിവാദമായി മാറിയ സംഭവങ്ങളുടെ തുടക്കം. ക്ഷേത്രസഭ പൂക്കളം ഇടാൻ തയാറാക്കിയ സ്ഥലത്ത് ഒരു സംഘം ആൾക്കാർ പൂക്കളം ഒരുക്കാൻ എത്തിയതോടെയാണ് പ്രശ്നങ്ങൾ ആരംഭിച്ചത്. തുടർന്ന് ക്ഷേത്ര സഭ (ഭരണ സമിതി) ശാസ്താംകോട്ട പോലീസിൽ പരാതി നൽകി. തുടർന്നു പോലീസ് ഇരുവിഭാഗത്തെയും സ്റ്റേഷനിൽ വിളിപ്പിച്ചു. രണ്ടു കൂട്ടർക്കും പൂക്കളം ഇടാനുള്ള സ്ഥലവും പോലീസ് തന്നെ കണ്ടെത്തി നൽകുകയും ചെയ്തു. മാത്രമല്ല പൂക്കളത്തിൽ രാഷ്ട്രീയ പാർട്ടികളുടെ പേരോ കൊടിയോ ഉണ്ടാവരുതെന്ന കർശന നിർദേശവും പോലീസ് നൽകുകയുണ്ടായി. എന്നാൽ ഇത് ലംഘിച്ച് പൂക്കളം നിർമിച്ചതുമായി ബന്ധപ്പെട്ടാണ് കലാപശ്രമത്തിന് പോലീസ് 27 പേർക്കെതിരെ കേസെടുത്തത്. പൂക്കളത്തിനു സമീപം ഇവർ ബോർഡും സ്ഥാപിക്കുകയുണ്ടായി. തുടർന്നാണ് ഓപ്പറേഷൻ സിന്ദൂർ എന്നെഴുതി പൂക്കളം ഇട്ടതിനെതിരേ പോലീസ് കേസെടുത്തു എന്ന പ്രചാരണം ഉയർന്നത്. സോഷ്യൽ മീഡിയയിൽ ഇത് വലിയ രീതിയിൽ വ്യാജമായി പ്രചരിപ്പിക്കപ്പെട്ടു എന്നു പോലീസിന് ബോധ്യപ്പെടുകയും ചെയ്തു. പോലീസ് എടുത്ത എഫ് ഐആറിലെ വിവരങ്ങളും പുറത്ത് വന്നിട്ടുണ്ട്. അതിൽ ഓപ്പറേഷൻ സിന്ദൂർ എന്ന വാക്ക് പരാമർശിക്കുന്നു പോലുമില്ല. ഈ സാഹചര്യത്തിലാണു കർശന നടപടികളുമായി മുന്നോട്ട് പോകാൻ പോലീസ് തീരുമാനിച്ചിട്ടുള്ളത്. അതേ സമയം പോലീസിന്‍റെ നടപടിയിൽ പ്രതിഷേധിച്ച് ഇന്ന് ശാസ്താംകോട്ട പോലീസ് സ്റ്റേഷനിലേയ്ക്ക് മാർച്ച് നടത്തുമെന്ന് ബിജെപി നേതൃത്വം അറിയിച്ചു. രാവിലെ 10ന് മാർച്ചിന്‍റെ ഉദ്ഘാടനം സംസ്ഥാന ജനറൽ സെക്രട്ടറി അനൂപ് ആന്‍റണി നിർവഹിക്കും. പോലീസ് നടപടിയെ ചോദ്യം ചെയ്ത് കോടതിയെ സമീപിക്കാൻ ബിജെപി സംസ്ഥാന നേതൃത്വവും തീരുമാനിച്ചിട്ടുണ്ട്. പോലീസ് എടുത്ത കേസ് പിൻവലിച്ചില്ലെങ്കിൽ ശക്തമായ പ്രക്ഷോഭം സംഘടിപ്പിക്കുമെന്ന് യുവമോർച്ച ജില്ലാ ഭാരവാഹികളും മുന്നറിയിപ്പ് നൽകി.

പൂവാർ മേഖലയിൽ മിന്നൽ പരിശോധന

പൂവാർ: അനധികൃത ഉല്ലാസ ബോട്ടുകൾ പിടികൂടാൻ പൂവാർ മേഖലയിൽ കേരള മാരിടൈം ബോർഡ്‌ അധികൃതരുടെ മിന്നൽ പരിശോധന. പത്തോളം ബോട്ടുകളിൽ ക്രമക്കേട് കണ്ടെത്തി. വിഴിഞ്ഞം തുറമുഖത്തെ ഇൻലാൻഡ് വെസൽസ്‌ ആക്ട് എൻഫോഴ്സ്മെന്‍റ് വിഭാഗമാണു കഴിഞ്ഞ ദിവസം ജില്ലയിൽ ഏറ്റവും കൂടുതൽ ഉല്ലാസബോട്ടുകൾ പ്രവർത്തിക്കുന്ന പൂവാർ മേഖലയിൽ മിന്നൽ പരിശോധന നടത്തിയത്. ക്രമക്കേട്‌ കണ്ടെത്തിയ പത്തോളം ബോട്ടുകൾക്ക്‌ അധികൃതർ അമ്പതിനായിരത്തോളം രൂപാ പിഴയും ചുമത്തി. നിയമാനുസൃത ലൈസൻസ്‌, രജിസ്ട്രേഷൻ, സർവ്വേ തുടങ്ങിയവ ഇല്ലാത്ത ബോട്ടുകൾക്കാണു പിഴ ചുമത്തിയത്‌. പൂവാർ പോലീസും പരിശോധനയുടെ ഭാഗമായിട്ട്‌ ഉണ്ടായിരുന്നു. ‌തുടർന്നും ഈ മേഖലയിൽ കർശന പരിശോധന ഉണ്ടാകുമെന്ന് അധികൃതർ അറിയിച്ചു.

കൊലപാതകം മദ്യലഹരിയിൽ : മകനെ കൊലപ്പെടുത്തിയ പിതാവ് അറസ്റ്റിൽ

പോത്തൻകോട് : മദ്യ ലഹരിയിൽ മകനെ കുത്തിക്കൊലപ്പെടുത്തിയ പിതാവ് പിടിയിൽ. കാര്യവട്ടം ഗ്രീൻഫീൽഡ് സ്റ്റേഡിയത്തിനു സമീപം നവോദയ നഗർ ഉള്ളൂർക്കാേണം വലിയവിള പുത്തൻവീട്ടിൽ ഉല്ലാസ് (35)നെയാണ് വീട്ടിലെ ഹാളിൽ വെട്ടേറ്റ് മരിച്ച നിലയിൽ കണ്ടത്. പിതാവ് ഉണ്ണികൃഷ്ണൻ നായരെ (59) പോലീസ് അറസ്റ്റ് ചെയ്തു. തിരുവോണ ദിവസം ഉച്ചക്കാണു കൊലപാതകം നടന്നതെന്നാണ് പോലീസ് നിഗമനം. ഞായറാഴ്ചയാണ് രാവിലെ എട്ടോ ടെ ഹാളിൽ ഉല്ലാസിനെ രക്തം വാർന്നു മരിച്ച നിലയിൽ അമ്മ ഉഷ കാണ്ടെത്തിയത്. തുടർന്ന് പോത്തൻകോട് പോലീസിൽ വിവരം അറിയിച്ചു. ഉണ്ണികൃഷ് ണനും മകൻ ഉല്ലാസും മദ്യ ലഹരിയിൽ അടിയും വഴക്കുമുണ്ടാകുന്നത് പതിവാണ്. ഉത്രാട ദിവസം രാത്രി ഉല്ലാസ് ഭാര്യ വിദ്യയുമായി വഴക്കുണ്ടാകുകയും അതിനെ തുടർന്നു രണ്ടു കുട്ടികളുമായി വിദ്യ തിരുവോണ ദിവസം രാവിലെ ചെങ്ങന്നൂരുള്ള വീട്ടിൽ പോവുകയും ചെയ്തിരുന്നു. ഉഷയും ബന്ധുവീട്ടിൽ പോയി. തൊട്ടടുത്ത വീട്ടിലായിരുന്ന ഉഷയോട് ഉല്ലാസ് രക്തത്തിൽ കുളിച്ചുകിടക്കുന്നതായി ഉണ്ണികൃഷ് ണൻ തന്നെയാണ് പറഞ്ഞത്. തുടർന്ന് ഉഷ വന്നു നോക്കിയപ്പോ ഴാണ് കത്തി കൊണ്ടു വെട്ടി പരിക്കേൽപ്പതിനെ തുടർന്നു രക്തം വാർന്നു മരിച്ചു കിടക്കുന്ന നില യിൽ കണ്ടെത്തിയത്. ടിപ്പർ ലോറി ഡ്രൈവറാണ് മരിച്ച ഉല്ലാസ്.

വാടകയ്ക്ക് കാർ ഓടിയതുമായുള്ള തർക്കം : പനച്ചമൂട് സ്വദേശിയായ കാര്‍ ഡ്രൈവർ ചെന്നൈയിൽ കൊല്ലപ്പെട്ട നിലയില്‍

വെള്ളറട: പനച്ചമൂട് സ്വദേശിയായ കാര്‍ ഡ്രൈവറെ ചെന്നൈ മണിപ്പക്കം പോലീസ് സ്റ്റേഷന്‍ പരിധിയില്‍ കൊല്ലപ്പെട്ട നിലയില്‍ കണ്ടെത്തി. മൂന്നു മാസമായി ചെന്നൈ മണിപ്പക്കത്ത് ഷണ്മുഖം എന്നയാളിന്‍റെ വാഹനം ഓടിച്ചു വരികയായിരുന്ന അസുറുദ്ദീന്‍ ഷാ(34)യെയാണ് കൊല്ലപ്പെട്ട നിലയിൽ കണ്ടെത്തിയത്. വാഹനം ഓടിയതുമായി ബന്ധപ്പെട്ട് ഉടമയുമായി ചെറിയ സാമ്പത്തിക തര്‍ക്കങ്ങള്‍ നിലനില്‍ക്കവെ വെള്ളറട പനച്ചമൂട് പാറവളവ് സ്വദേശിയായ ഹാജാ (30), പനച്ചമൂട് സ്വദേശി ഷമീര്‍ (27) എന്നിവർ ചെന്നൈയിലെത്തി അസുറുദ്ദീന്‍ ഷായെ ക്രൂരമായി മര്‍ദിച്ചു കൊലപ്പെടുത്തിയെന്നാണ് കേസ്. സംഭവവുമായി ബന്ധപ്പെട്ട് മണിപ്പക്കം പോലീസ് പനച്ചമൂട്ടില്‍നിന്നും ഹാജ (30)നെ അസ്റ്റുചെയ്തു. പനച്ചമൂട് സ്വദേശി ഷമീര്‍(27)ഒളിവിലാണ്. ഇയാളെ പിടികൂടാനുള്ള തത്രപ്പാടിലാണ് മണിപ്പക്കം പോലീസ്. ഓണ്‍ലൈന്‍ ഊബര്‍ വണ്ടി മൂന്നു മാസമായി ഓടിയതിനെച്ചൊല്ലിയുണ്ടായ സാമ്പത്തിക തര്‍ക്കമാണ് ഉടമയുമായി ഉണ്ടായിരുന്നത്. പനച്ചമൂട്ടില്‍നിന്നും ഹാജയും, ഷമീറും ചെന്നൈ മണിപ്പക്കത്തെത്തി റൂമില്‍ പൂട്ടിയിട്ട് മര്‍ദിച്ചവശനാക്കിയെന്നും പതിനായിരം രൂപ അടിയന്തരമായി എത്തിച്ചുകൊടുക്കണമെന്ന് ആവശ്യപ്പെട്ടിരുന്നുവെന്നും അസുറുദ്ദീന്‍ ഷാ ഭാര്യയേയും ബന്ധുക്കളേയും അറിയിച്ചിരുന്നു. ഇതേ തുടർന്നു ഷായുടെ ഭാര്യ നാതിയ 7,000 രൂപ തരപ്പെടുത്തി ഷണ്‍മുഹത്തിന്‍റെ അക്കൗണ്ടല്‍ ഇട്ടുകൊടുക്കുകയും ചെയ്തിരുന്നു. ഇതിനുശേഷമാണു ഷായെ ഷണ്‍മുഖവും ഷിയാനും ചേർന്ന് ആശുപത്രിയില്‍ പ്രവേശിപ്പിച്ചത്. ചെന്നൈ മെഡിക്കല്‍ കോളജ് ആശുപത്രി അതികൃതര്‍ക്കു മരണത്തില്‍ ദുരൂഹതയുണ്ടന്നു ബോധ്യപ്പെട്ടതിനാല്‍ മാണിപ്പാക്കം പോലീസ് സ്റ്റേഷനില്‍ അറിയിക്കുകയായിരുന്നു. ക്രൂരമര്‍ദനത്തിന് ഇരയായാണ് മരണം സംഭവിച്ചതെന്നാണ് പ്രാഥമിക വിവരം. മർദിച്ച സംഘത്തിൽ രണ്ടുപേര്‍ കൂടി ഉള്ളതായി പറയപ്പെടുന്നു. രണ്ടാം പ്രതിയായ ഷമീര്‍ (27) ഒളിവിലാണ്.

ഗുരുദേവജയന്തി ആഘോഷിച്ചു

നെടുമങ്ങാട്: എസ്എൻഡിപി യോഗം ഇരിഞ്ചയം ശാഖയിൽ ഗുരുദേവജയന്തി ആഘോഷിച്ചു. വിളംബരഘോഷയാത്ര ശാഖമന്ദിരത്തിൽ നിന്നാരംഭിച്ച് താന്നിമൂട്, ഇരിഞ്ചയം, കുശർകോട്, മീൻമൂട്, പറയങ്കാവ്, ചിറയിൻകോണം, തോപ്പുവിള, ഗ്രാങ്കോട്ടുകോണം, മുണ്ടൈക്കോണം വഴി ഗുരുമന്ദിരത്തിൽ സമാപിച്ചു. ഷിബു ഇരിഞ്ചയം ഫ്‌ളാഗ് ഓഫ് ചെയ്തു. ശാഖാ പ്രസിഡന്‍റ് വാഴക്കാട്‌ മോഹനൻ പതാക ഉയർത്തി. നെടുമങ്ങാട് യൂണിയൻ പ്രസിഡന്‍റ് എ.മോഹൻദാസ് ഉദ്‌ഘാടനം ചെയ്തു. യൂണിയൻ കൗൺസിലർ സുരാജ് ചെല്ലാങ്കോട് സ്വാഗതം പറഞ്ഞു. ശാഖാ സെക്രട്ടറി അനിൽ, വനിതാസംഘം യൂണിയൻ പ്രസിഡന്‍റ് ലതാകുമാരി,തുടങ്ങിയവർ പങ്കെടുത്തു.

ഓണം വാരാഘോഷം : സാംസ്‌കാരിക ഘോഷയാത്ര നാളെ

തിരുവനന്തരം : സംസ്ഥാന സർക്കാരിന്‍റെ ഓണം വാരാഘോഷത്തിനു സമാപനം കുറിച്ചുള്ള സാംസ്‌കാരിക ഘോഷയാത്ര നാളെ വെള്ളയമ്പലത്തുനിന്നും ആരംഭിച്ച് കിഴക്കേകോട്ടയിൽ അവസാനിക്കും. തലസ്ഥാനനഗരിയെ താളലയ- വിസ്മയങ്ങളിൽ ആറാടിച്ചുകൊണ്ട് ആയിരത്തിൽപ്പരം കലാകാരന്മാർ അവതരിപ്പിക്കുന്ന സാംസ്‌കാരിക കലാരൂപങ്ങളുടെ അകമ്പടിയോടെ അറുപതോളം ഫ്‌ളോട്ടുകളും ഘോഷയാത്രയിൽ അണിനിരക്കുന്നതാണ്. നാളെ വൈകുന്നേരം നാലിന് വെള്ളയമ്പലത്തെ മാനവീയം വീഥിയിൽ ഗവർണർ രാജേന്ദ്ര ആർലേക്കർ ഫ്‌ളാഗ് ഓഫ് ചെയ്യുന്നതോടെ ഘോഷയാത്ര ആരംഭിക്കും. ഘോഷയാത്രയുടെ വരവ് അറിയിച്ചുകൊണ്ട് 51 കലാകരന്മാർ ശംഖനാദം മുഴക്കുകയും തുടർന്ന് വാദ്യോപകരണമായ കൊമ്പ്, ടൂറിസം മന്ത്രി പി.എ. മുഹമ്മദ് റിയാസ് മുഖ്യ കലാകാരനു കൈമാറിക്കൊണ്ട് സാംസ്‌കാരിക ഘോഷയാത്രയുടെ താളമേളങ്ങൾക്ക് തുടക്കം കുറിക്കുകയും ചെയ്യും. സംസ്ഥാന സർക്കാരിന്‍റെ വികസന പ്രവർത്തനങ്ങളെ ചിത്രീകരിച്ചുകൊണ്ട് വിവിധ വകുപ്പുകൾ തയാറാക്കുന്ന അറുപതോളം ഫ്‌ളോട്ടുകൾ ഘോഷയാത്രയുടെ പ്രത്യേകതയാണ്. കൂടാതെ 91 ദൃശ്യ- ശ്രവ്യകലാരൂപങ്ങളും ഇന്ത്യൻ ആർമിയുടെ ബാന്‍റ് സംഘവും ഘോഷയാത്രയ്ക്കു നിറവേകും. നാനാത്വത്തിൽ ഏകത്വം എന്ന പ്രമേയം മുൻനിർത്തി ജാർഖണ്ഡ്, ഉത്തർപ്രദേശ്, മധ്യപ്രദേശ്, മഹാരാഷ്ട്ര, ആന്ധ്രാപ്രദേശ്, തെലങ്കാന, കർണാടക, തമിഴ്‌നാട് എന്നിവിടങ്ങളിൽ നിന്നുള്ള ഇന്ത്യൻ ഗ്രാമീണ കലാ രൂപങ്ങളും ഘോഷ യാത്രയിൽ ഒത്തുചേരും. കേരളീയ പൈതൃകവും, സിനിമയും, സാഹിത്യവും, സ്ത്രീശാക്തീകരണവും, സ്ത്രീ സുരക്ഷയും ആരോഗ്യശീലങ്ങളും ശാസ്ത്ര സാങ്കേതിക വിദ്യയും, വിവിധ തരത്തിലുള്ള ജീവ സുരക്ഷാ സന്ദേശങ്ങളും ഫ്‌ളോട്ടുകളുടെ വിഷയങ്ങളായി അവതരിപ്പിക്കപ്പെടും. വിജ്ഞാനവും വിസ്മയവും കൗതുകവുമുണർത്തുന്നതുമായ സാംസ്‌കാരിക ഘോഷയാത്ര ഒരു പോയിന്‍റ് കടക്കാൻ ഉദ്ദേശം ഒന്നര മണിക്കൂർ വേണ്ടിവരുമെന്നാണ് കണക്കാക്കുന്നത്. ആനുകാലിക പ്രാധാന്യമുള്ളതും കഴിയുന്നത്ര കൃത്രിമത്വം ഒഴിവാക്കിയുള്ളതുമായ ഫ്‌ളോട്ടുകളാണ് തെരഞ്ഞെടുക്കപ്പെട്ടിട്ടുള്ളത്. പബ്ലിക് ലൈബ്രറിക്ക് മുന്നിൽ ഘോഷയാത്ര വീക്ഷിക്കുന്നതിന് ഒരുക്കിയിട്ടുള്ള വിവിഐപി പവലിയന് മുന്നിലും യൂണിവേഴ്‌സിറ്റി കോളജിന് മുൻവശത്തെ വിഐപി പവലിയന് മുന്നിലും മ്യൂസിയം ഗേറ്റിന് സമീപത്തെ പ്രത്യേക സ്റ്റേജിലും കലാരൂപങ്ങൾ അവതരിപ്പിക്കും. ഓണം വാരാഘോഷം നിശാഗന്ധിയിൽ ജുഗൽബന്ദി വൈകുന്നേരം ആറിന് കനകക്കുന്ന് സൂര്യകാന്തിയിൽ ഗാനമേള രാത്രി ഏഴിന് തൈക്കാട് ഭാരത് ഭവനിൽ നൃത്തനൃത്യങ്ങൾ വൈകുന്നേരം 6.15 മുതൽ കിഴക്കേ കോട്ട ഗാന്ധിപാർക്കിൽ കഥാപ്രസംഗം വൈകുന്നേരം 4.15 മുതൽ പബ്ലിക് ലൈബ്രറി ഹാളിൽ കഥയരങ്ങ്, കവിയരങ്ങ് ഉച്ചകഴിഞ്ഞ് മൂന്നു മുതൽ വൈലോപ്പിള്ളി സംസ്കൃതിഭവനിൽ കലാമണ്ഡലം വൈഷ്ണവിയുടെ കുച്ചിപ്പുടി വൈകുന്നേരം 6.15.

ഓണാഘോഷം

വെള്ളറട: ആങ്കോട് ന്യൂ കലാലയ കലാ കായിക സമിതിയുടെ ഓണാഘോഷത്തിന് ഉത്രാടം നാളില്‍ മാരായമുട്ടം പോലീസ് സ്‌റ്റേഷന്‍ ഹൗസ് ഓഫീസര്‍ കെ. ധനപാലന്‍ പതാക ഉയര്‍ത്തി തുടക്കം കുറിച്ചു. ഓണാഘോഷ പരിപാടികള്‍ ഇന്ന് സമാപിക്കും. കുട്ടികളുടെ കലാകായിക മത്സരങ്ങള്‍, സൗഹൃദ വടംവലി, മെഗാ തിരുവാതിര എന്നിവ സംഘടിപ്പിച്ചു. ജാതി മത വ്യത്യാസമില്ലാതെ നാട്ടിലെ വിവിധ കുടുംബങ്ങളില്‍ നിന്ന് എത്തിച്ച അവിട്ട സദ്യ വികസന കാര്യസ്റ്റാന്റിംഗ് കമ്മിറ്റി ചെയര്‍മാന്‍ കാനക്കോട് ബാലരാജ് ഉത്ഘാടനം ചെയ്തു. ഇന്ന് വൈകുന്നേരം 5 ന് ചേരുന്ന സാംസ്‌കാരിക സമ്മേളനം ആര്‍. അഭിലാഷിന്‍റെ അധ്യക്ഷതയില്‍ പെരുങ്കടവിള ഗ്രാമപഞ്ചായത്ത് പ്രസിഡന്‍റ് എസ്. . സുരേന്ദ്രന്‍ ഉദ്ഘാടനം ചെയ്യും. സുരേഷ് വീട്ടിയറം വീശിഷ്ടാഥിതിയായി പങ്കെടുക്കും. വികസന കാര്യാ സ്റ്റാന്‍ഡിംഗ് കമ്മറ്റി ചെയര്‍മാന്‍ കാനക്കോട് ബാലരാജ്, പഞ്ചായത്തംഗം വിനീത വി. നായര്‍, ആങ്കോട് രാജേഷ്. പ്രഭ കുമാര്‍, ഡി. പ്രകാശ്, യു. കൃഷ്ണ പ്രസാദ്, ആര്‍.രഞ്ജിത്, എസ്.എ.അനൂപ്, എസ്.സലി. എന്നിവര്‍ സംസാരിക്കും.

അധ്യാപക ദമ്പതികളെ ആദരിച്ചു

നെടുമങ്ങാട്: അധ്യാപകദിനത്തിൽ അധ്യാപകദമ്പതികളായ ആനാട് പുല്ലേക്കോണം ഉഷസിൽ പേരൂർക്കട ബോയ്സ് ഹയർ സെക്കൻഡറി സ്കൂളിൽ നിന്നും വിരമിച്ച പ്രധാന അധ്യാപകൻ പ്രദീപ് കുമാറിനെയും നന്ദിയോട് നളന്ദ ടീച്ചേഴ്സ് ട്രെയിനിങ് സ്കൂളിലെ അധ്യാപിക ഉഷ യെയും മുൻ കെ പി സി സി നിർവഹക സമിതി അംഗം ആനാട് ജയന്‍റെ നേതൃത്വത്തിൽ ആദരിച്ചു. മുൻ ആനാട് ഗ്രാമപഞ്ചായത്ത് ആനാട് സുരേഷ് ബ്ലോക്ക് കോൺഗ്രസ് കമ്മിറ്റി ജനറൽ സെക്രട്ടറി ആനാട് ഗോപകുമാർ വ്യാപാരി വ്യവസായി ഏകോപന സമിതി പ്രസിഡൻറ് അജയകുമാർ പി.അശോകൻ എന്നിവരും പങ്കെടുത്തു.

ട്രെയിന്‍ തട്ടി മരിച്ചയാളെ തിരിച്ചറിഞ്ഞില്ല

മെഡിക്കല്‍കോളജ്: ട്രെയിന്‍തട്ടി മരിച്ചയാളെ ഇനിയും തിരിച്ചറിഞ്ഞില്ല. തിരുവനന്തപുരത്തുനിന്ന് എറണാകുളത്തേക്കു സര്‍വ്വീസ് നടത്തുന്ന വഞ്ചിനാട് എക്‌സ്പ്രസ് തട്ടിയാണ് ഇയാള്‍ മരണപ്പെട്ടത്. ഏകദേശം 55 വയസ്സ് പ്രായം വരുന്ന പുരുഷന്റെ മൃതദേഹമാണ് കൊച്ചുവേളി റെയില്‍വേ ഗേറ്റിനടുത്ത് ഓഗസ്റ്റ് നാലാം തീയതി വൈകുന്നേരം 6 മണിയോടുകൂടി കാണപ്പെട്ടത്. കാക്കി നിറമുള്ള പാന്റ്‌സും വെള്ള നിറമുള്ള ഷര്‍ട്ടുമായിരുന്നു വേഷം. പേട്ട പോലീസ് മേല്‍നടപടികള്‍ സ്വീകരിച്ചു. മൃതദേഹം തിരുവനന്തപുരം മെഡിക്കല്‍കോളജ് ആശുപത്രി മോര്‍ച്ചറിയില്‍ സൂക്ഷിച്ചിരിക്കുകയാണ്. ഇയാളെക്കുറിച്ച് എന്തെങ്കിലും വിവരം ലഭിക്കുന്നവര്‍ 0471 2743195, 94979 47107 എന്നീ നമ്പരുകളില്‍ അറിയിക്കണം.

മഹാരാഷ്ട്രയിൽ ഖനനമാഫിയക്കെതിരെ പോരാടുന്ന മലയാളി ഐപിഎസുകാരി

മലയിൻകീഴ് : മഹാരാഷ്ട്രയിൽ ഖനന മാഫിയയെ വിറപ്പിച്ച് വാർത്തകളിൽ ഇടംനേടിയ ഐപിഎസുകാരി മലയിൻകീഴ് സ്വദേശിനി. സോളാപുരിലെ അനധികൃതഖനനം തടയാനെത്തിയ മലയാളി ഐപിഎസ് ഉദ്യോഗസ്ഥയായ വി.എസ്. അഞ്ജന കൃഷ്ണയെ മഹാരാഷ്ട്ര ഉപമുഖ്യമന്ത്രി അജിത് പവാർ ഫോണിലൂടെ ഭീഷണിപ്പെടുത്തിയത് വിവാദമായിരുന്നു. അജിത് പവാർ ഐപിഎസ് ഉദ്യോഗസ്ഥയുമായി ഫോണിൽ സംസാരിക്കുന്ന വീഡിയോ പുറത്തുവന്നതോടെയാണ് സംഭവം വിവാദമായത്. ഇതോടെ അജിത് പവാറിന്‍റെ രാജി ആവശ്യപ്പെട്ട് പ്രതിപക്ഷപാർട്ടികളും രംഗത്തെത്തിയിരുന്നു. ഒരു എൻസിപി പ്രവർത്തകന്‍റെ ഫോണിൽ സംസാരിച്ച അജിത് പവാർ ഉപമുഖ്യമന്ത്രിയാണ് സംസാരിക്കുന്നതെന്നും നടപടികൾ നിർത്തിവെക്കണമെന്നും ആവശ്യപ്പെട്ടു. അജിത് പവാറിന്‍റെ ശബ്ദം തിരിച്ചറിയാൻ കഴിയാത്തതിനെത്തുടർന്ന് അഞ്ജന തന്‍റെ നമ്പരിലേക്ക് വിളിക്കാൻ ആവശ്യപ്പെടുകയായിരുന്നു. നിങ്ങൾക്കെതിരേ നടപടി സ്വീകരിക്കുമെന്നായിരുന്നു അജിത് പവാറിന്‍റെ മറുപടി. ഫോണിൽ സംസാരിക്കുന്ന വീഡിയോ വ്യാപകമായി പ്രചരിച്ചതോടെയാണ് അഞ്ജന കൃഷ്ണ എന്ന മലയാളി ഐപിഎസുകാരി വാർത്തകളിൽ ഇടംനേടിയത്. മലയിൻകീഴ് സ്വദേശിയായ അഞ്ജന കൃഷ്ണ മഹാരാഷ്ട്രയിലെ കർമല ഡിഎസ്പിയായാണ് പ്രവർത്തിക്കുന്നത്. 2022-ലാണ് അഞ്ജന കൃഷ്ണ സിവിൽ സർവീസ് നേടിയത്. 2022-23 വർഷത്തെ സിവിൽ സർവീസ് പരീക്ഷയിൽ 355-ാം റാങ്കുകാരിയായിരുന്നു അഞ്ജന. നാലാംശ്രമത്തിലായിരുന്നു അഞ്ജന സിവിൽ സർവീസ് റാങ്ക് ലിസ്റ്റിൽ ഇടംപിടിച്ചത്. പൂജപ്പുര സെന്‍റ് മേരീസ് സെൻട്രൽ സ്‌കൂളിലും തിരുവനന്തപുരം എൻഎസ്എസ് വനിതാ കോളജിലുമായിട്ടായിരുന്നു വിദ്യാഭ്യാസം. ഇതിനുശേഷമാണ് അഞ്ജന സിവിൽ സർവീസിലെത്തുന്നത്. മലയിൻകീഴ് ആൽത്തറ ജങ്ഷൻ 'ദേവൂസാണ്' അഞ്ജനയുടെ വീട്. ബിസിനസുകാരനായ വിജുവിന്‍റെയും വഞ്ചിയൂർ കോടതിയിൽ ടൈപ്പിസ്റ്റ് ക്ലാർക്കായ സീനയുടെയും മകൾ. സിവിൽ സർവ്വീസ് പരീക്ഷയിൽ മലയാളമായിരുന്നു വിഷയം. മലയിൻകീഴിന് അടുത്താണ് മൂക്കുന്നിമല. ഖനന മാഫിയയുടെ ഇരയായിരുന്നു ഒരു കാലത്ത് മൂക്കുന്നിമല. നിരവധി പാരിസ്ഥിതിക പ്രതിഷേധങ്ങൾ ഉയർന്ന നാടാണ് മൂക്കുന്നിമല. അതിന്‍റെ തൊട്ടടുത്തു നിന്നുള്ള ഐപിഎസുകാരിയ്ക്ക് ഖനനത്തിന്‍റെ ദോഷവശം നന്നായി അറിയാം.

മനം കവര്‍ന്ന് ഡ്രോണ്‍ ലൈറ്റ് ഷോ

തിരുവനന്തപുരം: ഓണം വാരാഘോഷത്തോടനുബന്ധിച്ച് ആകാശത്ത് ദൃശ്യവിസ്മയമൊരുക്കിയ ആയിരത്തോളം ഡ്രോണുകളുടെ ലൈറ്റ് ഷോ കാണികള്‍ക്ക് സമ്മാനിച്ചത് കാഴ്ചകളുടെ നവ്യാനുഭവം. യൂണിവേഴ്സിറ്റി സ്റ്റേഡിയത്തിന് 250 അടി മുകളില്‍, സ്റ്റേഡിയത്തിന് നാല് കിലോമീറ്റര്‍ ചുറ്റളവില്‍ ആകാശത്ത് വിരിഞ്ഞ നയനമനോഹര കാഴ്ചകള്‍ വിനോദസഞ്ചാരികള്‍ക്കും ഓണം ആഘോഷിക്കാന്‍ നഗരത്തിലെത്തിയ ആയിരക്കണക്കിന് പൊതുജനങ്ങള്‍ക്കും ഒരുപോലെ ആസ്വാദ്യകരമായി. എല്‍ഇഡി ലൈറ്റുകളാല്‍ പ്രത്യേകം രൂപകല്‍പ്പന ചെയ്ത ഡ്രോണുകളാണ് ലൈറ്റ് ഷോയുടെ ഭാഗമായത്. നവകേരളത്തിന്‍റെ വികസനസ്വപ്നങ്ങളും കേരളത്തിന്‍റെ സാംസ്കാരിക തനിമയും പൈതൃകവും പാരമ്പര്യവും വിളിച്ചോതുന്നതായിരുന്നു ഡ്രോണ്‍ ലൈറ്റ് ഷോ. പ്രത്യേക സാങ്കേതികവിദ്യയുടെ സഹായത്തോടെ ഒരുമിച്ചുയര്‍ന്ന ഡ്രോണുകളുടെ വെളിച്ചത്തില്‍ വാദ്യോപകരണങ്ങളായ ചെണ്ടയും കൊമ്പിന്‍റേയും അകമ്പടിയോടെ മഹാബലിയെ ആനയിക്കുന്ന ദൃശ്യത്തോടെയാണ് ലൈറ്റ് ഷോ ആരംഭിക്കുന്നത്. തുടര്‍ന്ന് ഐതിഹാസികമായ വള്ളംകളി, ആയോധനകലയായ കളരിപ്പയറ്റ്, കേരളത്തിന്‍റെ തനത് നൃത്തരൂപമായ മോഹിനിയാട്ടം, ഇലയിട്ട് സദ്യ തുടങ്ങിയവയും വര്‍ണവിസ്മയം തീര്‍ത്തു. വിഴിഞ്ഞം തുറമുഖത്തിലൂടെ കേരളത്തിന്‍റെ പുരോഗതിയും ലോകത്തിലെ ഏറ്റവും വലിയ പക്ഷി ശില്‍പമുള്ള ജടായു എര്‍ത്ത് സെന്‍ററിന്‍റെ പുരാണ മഹത്വവും സാംസ്കാരിക ചിഹ്നമായ കഥകളി എന്നിവയും വെളിച്ചമായി വിരിഞ്ഞു. മുഖ്യമന്ത്രി പിണറായി വിജയന്‍റെ പ്രകാശരൂപവും അദ്ദേഹത്തിന്‍റെ ഓണാശംസകളും കേരള ടൂറിസത്തിന്‍റെ ലോഗോയും ഡ്രോണ്‍ വെളിച്ചമായി തെളിയുന്നതോടെയാണ് ലൈറ്റ് ഷോ പൂര്‍ത്തിയാകുന്നത്. ടൂറിസം, പൊതുമരാമത്ത് മന്ത്രി പി. എ മുഹമ്മദ് റിയാസ്, പൊതുവിദ്യാഭ്യാസ, തൊഴില്‍ മന്ത്രി വി. ശിവന്‍കുട്ടി, കേരള ടൂറിസം ഡയറക്ടര്‍ ശിഖ സുരേന്ദ്രന്‍ എന്നിവര്‍ തിരുവോണ ദിനത്തില്‍ ഡ്രോണ്‍ ലൈറ്റ് ഷോ കാണാനെത്തിയിരുന്നു. തലസ്ഥാനത്ത് ആദ്യമായാണ് കേരള ടൂറിസത്തിന്‍റെ നേതൃത്വത്തില്‍ 1000 ഡ്രോണുകള്‍ ഉള്‍പ്പെടുന്ന ഇത്തരമൊരു ലൈറ്റ് ഷോ സംഘടിപ്പിക്കുന്നതെന്ന് മന്ത്രി പി.എ.മുഹമ്മദ് റിയാസ് പറഞ്ഞു. ഓണം വാരാഘോഷങ്ങള്‍ക്ക് പുത്തന്‍ മാനവും കാണികള്‍ക്ക് മികച്ച കാഴ്ചാനുഭവവും ആസ്വാദ്യതയും സമ്മാനിക്കാന്‍ ഇതിലൂടെ സാധിച്ചതായി അദ്ദേഹം കൂട്ടിച്ചേര്‍ത്തു. ആഗോള മുന്‍നിര ഡ്രോണ്‍ ടെക്നോളജി കമ്പനിയായ ബോട്ട്ലാബ് ഡൈനാമിക്സാണ് ലൈറ്റ് ഷോ ഒരുക്കിയത്. 2022 ജനുവരി 29 ന് രാഷ്ട്രപതി ഭവനില്‍ ബീറ്റിംഗ് റിട്രീറ്റ് ചടങ്ങിനായി 1,000 ഡ്രോണുകള്‍ ഉപയോഗിച്ച് ഇന്ത്യയിലെ ഏറ്റവും വലിയ ഡ്രോണ്‍ ലൈറ്റ് ഷോ സംഘടിപ്പിച്ചതിന്‍റെ റെക്കോര്‍ഡുള്ള കമ്പനിയാണ് ബോട്ട്ലാബ് ഡൈനാമിക്സ്.

നെടുമങ്ങാട് ഓണോത്സവം 2025 ന് മിഴിതുറന്നു

നെടുമങ്ങാട് : സംസ്ഥാന സര്‍ക്കാരും ടൂറിസം വകുപ്പും നെടുമങ്ങാട് നഗരസഭയും സംയുക്തമായി സംഘടിപ്പിക്കുന്ന ഓണോത്സവം 2025 ന് ഭക്ഷ്യ വകുപ്പ് മന്ത്രി ജി.ആര്‍.അനിലിന്‍റെ അധ്യക്ഷതയില്‍ ചേര്‍ന്ന യോഗത്തില്‍ ടൂറിസം മന്ത്രി പി.എ മുഹമ്മദ് റിയാസ് ഉദ്ഘാടനം ചെയ്തു. പൊതുവിദ്യാഭ്യാസ മന്ത്രി വി.ശിവന്‍കുട്ടി വിശിഷ്ടാതിഥിയായി പങ്കെടുത്ത ചടങ്ങില്‍ നടനും സംവിധായകനുമായ ബേസില്‍ ജോസഫ് മുഖ്യാതിഥിയായി. ഉദ്ഘാടന ചടങ്ങുകള്‍ക്ക് ശേഷം പ്രമുഖ ചലചിത്ര പിന്നണി ഗായകന്‍ വിധു പ്രതാപ് അവതരിപ്പിച്ച മ്യൂസിക് ബാന്‍ഡും നടന്നു. മുനിസിപ്പല്‍ ചെയര്‍ പേഴ്സണ്‍ സി.എസ്. ശ്രീജ, സ്റ്റാൻഡിംഗ് കമ്മിറ്റി ചെയര്‍പേഴ്സണ്‍മാര്‍ വിവിധ രാഷ്ട്രീയ പാര്‍ട്ടി പ്രതിനിധികള്‍ എന്നിവര്‍ പങ്കെടുത്തു. ഇന്ന് തെക്കേക്കര മ്യൂസിക്ക് ബാൻഡ് അവതരിപ്പിക്കുന്ന പരിപാടി ഉണ്ടായിരിക്കും. നാളെ വൈകുന്നേരം 4.30ന് ഓണോത്സവം സമാപന സമ്മേളനം കല്ലിംഗല്‍ ജംഗ്ഷനില്‍ നടക്കും. ചലചിത്ര താരം അര്‍ജുന്‍ അശോകന്‍ മുഖ്യതിഥിയായി പങ്കെടുക്കും. തുടര്‍ന്ന് വൈകുന്നേരം 6.30 ചലചിത്ര പിന്നണി ഗായിക അഞ്ചു ജോസഫ് നയിക്കുന്ന മ്യൂസിക് ബാൻഡ് ഉണ്ടാകും.

മുഹമ്മദ് നബി സാമൂഹ്യ നീതിയുടെ സംസ്ഥാപകന്‍: പ്രഫ. ഡോ.പി.നസീര്‍

പാറശാല: അപരിഷ്‌കൃതരും അന്യവത്കൃതരുമായിരുന്ന ഒരു ജനതയെ ഉദാത്തമായ ഒരു നാഗരികതയിലേക്ക് നയിച്ച പ്രവാചകനാണ് മുഹമ്മദ് നബിയെന്ന് സംസ്ഥാന ന്യൂനപക്ഷ ക്ഷേമ വകുപ്പ് മുന്‍ ഡയറക്ടറും മെക്ക സംസ്ഥാന പ്രസിഡന്‍റുമായ പ്രഫ. ഡോ.പി.നസീര്‍ അഭിപ്രായപ്പെട്ടു. അരാജകത്വവും അനീതിയും അലങ്കാരമായി സ്വീകരിച്ചിരുന്ന ജനവിഭാഗങ്ങള്‍ക്കിടയില്‍ സാമൂഹ്യനീതിയുടെ സംസ്ഥാപനം യാഥാര്‍ത്ഥ്യമാക്കിയ വിശ്വഗുരുവാണ് മുഹമ്മദ് നബിയെന്നും അദ്ദേഹം പറഞ്ഞു. നബിദിനത്തോടനുബന്ധിച്ച് പൊഴിയൂര്‍ മുസ്‌ലിം ജമാഅത്ത് കമ്മിറ്റി സംഘടിപ്പിച്ച പൊതുസമ്മേളനം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. ജമാഅത്ത് പ്രസിഡന്‍റ് സുലൈമാന്‍ അധ്യക്ഷത വഹിച്ച യോഗത്തില്‍ ഇമാം യാസീന്‍ ബാഖവി മുഖ്യപ്രഭാഷണം നടത്തി. സെക്രട്ടറി ജലാല്‍, ട്രഷറര്‍ ഷാനവാസ്, സദര്‍ ഹാഷിം മന്നാനി എന്നിവര്‍ സംസാരിച്ചു.

മനം കവർന്ന് നെയ്യാര്‍ മേള

നെയ്യാറ്റിന്‍കര : ആറാലുംമൂട് ഗ്രൗണ്ടില്‍ ഒരുക്കിയിരിക്കുന്ന നെയ്യാര്‍ മേളയില്‍ തിരുവോണ നാളില്‍ പതിനായിരത്തോളം സന്ദര്‍ശകര്‍ എത്തിയതായി സംഘാടകര്‍ അറിയിച്ചു. മുന്‍വര്‍ഷങ്ങളെ അപേക്ഷിച്ച് മേളയിലെത്തുന്ന സന്ദര്‍ശകരുടെ എണ്ണത്തിലും വര്‍ധനവുള്ളതായി സംഘാടക സമിതി ജനറല്‍ കണ്‍വീനര്‍ എം. ഷാനവാസ്, കണ്‍വീനര്‍ പി. ബാലചന്ദ്രന്‍നായര്‍ എന്നിവര്‍ ദീപികയോട് പറഞ്ഞു. സംസ്ഥാന വിനോദ സഞ്ചാര വകുപ്പിന്‍റെയും തദ്ദേശ സ്വയംഭരണസ്ഥാപനങ്ങളുടെയും സഹകരണത്തോടെ കേരള സംസ്ഥാന വ്യാപാരി വ്യവസായി സമിതി നെയ്യാറ്റിൻകര ഏര്യാ കമ്മിറ്റി സംഘടിപ്പിച്ചിട്ടുള്ള നെയ്യാര്‍ മേളയുടെ തുടക്കം മുതലേ സന്ദര്‍ശകതിരക്ക് അനുഭവപ്പെട്ടിരുന്നു. ഓണം നാളുകളില്‍ സന്ദര്‍ശകരുടെ സംഖ്യ വര്‍ധിച്ചതിനു കാരണം മേളയില്‍ ഉള്‍പ്പെടുത്തിയിട്ടുള്ള വൈവിധ്യങ്ങളായ വിഭവങ്ങളാണെന്നും സംഘാടകസമിതി ഭാരവാഹികള്‍ ചൂണ്ടിക്കാട്ടി. രാത്രി പത്തിനു ശേഷവും സ്റ്റാളുകള്‍ സന്ദര്‍ശിക്കാനും അമ്യൂസ്മെന്‍റ് പാര്‍ക്ക് അടക്കമുള്ളവയിലെ റൈഡുകള്‍ ആസ്വദിക്കാനും കുട്ടികളും മുതിര്‍ന്നവരും ഒരുപോലെ ക്യൂനിന്നു. തിരക്ക് നിയന്ത്രിക്കാന്‍ വോളണ്ടിയര്‍മാരുടെ സേവനം ക്രമീകരിച്ചിട്ടുണ്ട്. നെയ്യാറ്റിന്‍കര പോലീസിന്‍റെയും സജീവസാന്നിധ്യം മേള സമാധാനപരമായി പുരോഗമിക്കുന്നതില്‍ സഹായകമാണ്. പുരാവസ്തു പ്രദര്‍ശനവും ത്രിഡി ഷോയുമെല്ലാം വിവിധ തലമുറകളിലെ സന്ദര്‍ശകര്‍ നെഞ്ചേറ്റിക്കഴിഞ്ഞു. വ്യത്യസ്തമായ ആഹാരങ്ങള്‍ക്കൊപ്പം വയനാടിന്‍റെ ഭക്ഷണരുചിയും അറിയാനുള്ള അവസരം ഫുഡ് കോര്‍ട്ടില്‍ ലഭ്യമാണ്. പ്രധാന വേദിയില്‍ ഓണം വാരാഘോഷത്തിന്‍റെ ഭാഗമായ കലാപരിപാടികള്‍ നിറഞ്ഞ സദസ്സിലാണ് അരങ്ങേറുന്നത്. സര്‍ഗമാനസം എന്ന അനുബന്ധ വേദിയില്‍ ഏതു പ്രായത്തിലുള്ള കലാകാരന്മാര്‍ക്കും അവതരണങ്ങള്‍ക്ക് അവസരം നല്‍കുന്നു. പുരോഗമന കലാ സാഹിത്യ സംഘം നെയ്യാറ്റിന്‍കര മേഖല കമ്മിറ്റിയുടെ സഹകരണത്തോടെ ദിവസവും വൈകുന്നേരം ക്ലാസ്സിക്കുകള്‍, ദേശീയ- സംസ്ഥാന പുരസ്കാരം ലഭിച്ച ചലച്ചിത്രങ്ങള്‍ മുതലായവ പ്രദര്‍ശിപ്പിക്കുന്നുണ്ട്.

നെയ്യാറിൽ ഓണാഘോഷം കാണാൻ വൻ തിരക്ക്

നെയ്യാർഡാം : വൈദ്യുത വിളക്കുകൾ മിഴി തുറന്നതോടെ നെയ്യാർഡാമിലെ ഓണാഘോഷത്തിന് തിരക്കേറി. തിരുവോണത്തിനും ഇന്നലെയും വൻ ജനക്കൂട്ടമാണ് ഇവിടെ എത്തിയത്. പകൽ എത്തിയവർ വൈെകുന്നേരം വെളിച്ചത്തിൽ കുളിച്ച് നിൽക്കുന്ന ഡാം കണ്ടിട്ടേ മടങ്ങുന്നുള്ളൂ. നെയ്യാർഡാം മുഖ്യ കവാട പരിസരത്ത് ഓണപ്പതാക ഉയർത്തിയാണ് ആഘോഷത്തിന് തുടക്കമിട്ടത്. നീലജലാശയത്തിലെ സുന്ദരമായ യാത്രയും ഹരിതഭംഗിയാർന്ന വനതാഴ്‌വാരത്തെ സുഖകരമായ അന്തരീക്ഷവും നുകരാൻ ഇക്കുറി എത്തിയ സഞ്ചാരികളെയും കാത്ത് നിരവധി വിഭവങ്ങളാണ് ഇവിടെ ഒരുക്കിയിരുന്നത്. ഉദ്യാനത്തിലെ പ്രതിമകൾ മിനുക്കി പണികൾ നടത്തി നന്നാക്കി കഴിഞ്ഞു. അവയ്ക്ക് ഏതാണ്ട് ജീവൻ വച്ചപോലെ. രാത്രി മനോഹരമാക്കാൻ ഉദ്യാനത്തിലെ വിളക്കുകൾ ഭംഗിയാക്കിയിട്ടുണ്ട്. കേടുവന്നവ മാറ്റുകയും പുതുതായി പലേടത്തും സ്ഥാപിക്കുകയും ചെയ്തു. ടവർ, ഡാം ബ്രിഡ്ജ്, അക്വേറിയം, സൈക്കിൾ പാർക്ക് എന്നിവിടങ്ങളിൽ പ്രത്യേക ദീപസംവിധാനം ഒരുക്കിയിട്ടുണ്ട്. കുട്ടികളുടെ പാർക്കിൽ വൻ തിരക്കാണ്. മീൻമുട്ടി, മുല്ലയാർ, കൊമ്പൈക്കാണി, വരയാട്ടുമുടി എന്നിവിടങ്ങളിൽ സാഹസികസഞ്ചാരം വനം വകുപ്പ് ഒരുക്കിയിട്ടുണ്ട്. മാൻപാർക്ക്, ചീങ്കണ്ണി പാർക്ക്, എന്നിവിടങ്ങളിൽ നല്ല തിരക്കുള്ളതിനാൽ ഇവിടേയ്ക്ക് ബോട്ട് സർവീസും നടത്തി. മീൻമുട്ടി വെള്ളചാട്ടം കാണാൻ സൗകര്യം ഒരുക്കിയിട്ടുണ്ട്. കാപ്പുകാട് ആനപാർക്കിൽ ഓണക്കളികളും സദ്യയും ഒരുക്കിയിട്ടുണ്ട്. ആനസവാരിയ്ക്കും ആനയൂട്ടിനും ഇക്കുറി നല്ല തിരക്കാണ്. നക്ഷത്ര അക്വേറിയത്തിൽ പുതിയ ഇനം മൽസ്യങ്ങൾ ഉണ്ട്. അതിനിടെ കുറ്റിച്ചൽ കൂട്ടായ്മ, കാപ്പുകാട് ആന പുനരധിവാസകേന്ദ്രം തുടങ്ങി എല്ലായിടത്തും വിപുലമായ ഓണാഘോഷ പരിപാടികളാണ് സംഘടിപ്പിക്കുന്നത്. കള്ളിക്കാട് ഗ്രാമപ്പഞ്ചായത്തും വിവിധ സർക്കാർ വകുപ്പുകളും ജില്ലാ ടൂറിസം പ്രമോഷൻ കൗൺസിലും ചേർന്നാണ് 'ഓണം ടൂറിസം വാരാഘോഷം' സംഘടിപ്പിച്ചിട്ടുള്ളത്. വാരാഘോഷം നാളെ സാംസ്‌കാരിക ഘോഷയാത്രയോടെ സമാപിക്കും. എല്ലാ ദിവസവും വൈകുന്നേരം കലാപരിപാടികളുമുണ്ട്. കൗതുകമായി ഒഴുകുന്ന പൂക്കളം നെയ്യാർഡാം : നെയ്യാർ ജലസംഭരണിയിൽ ഒരുക്കി യ ഫ്ളോട്ടിംഗ് അത്തപൂക്കളം വിനോദ സഞ്ചാരികളേയും വിദേശ സഞ്ചാരികളേയും ആകർഷിച്ചു. നെയ്യാർഡാം മരകുന്നത്താണ് ഈ പൂക്കളം. മരകുന്നം ശിവാനന്ദ ആർട്്‌സ് ആൻഡ് സ്‌പോർട്‌സ് ക്ലബാണ് കൗതുകകരമായ അത്തപ്പൂക്കളം ഒരുക്കിയത്. നെയ്യാർഡാമിൽ വന്ന സഞ്ചാരികൾ ഇത് കൗതുകത്തോടെ കാമറയിൽ പകർത്തുകയും ചെയ്തു. പേഴുംമൂട് ഉദയം സമിതിയുടെ പൂക്കളം ദിനോസറിന്‍റേതാണ്. ഏതാണ്ട് ജീവൻ തുടിക്കുന്നപോലെയാണ് ഈ ദിനോസർ. ഒരു മാസത്തെ കഠിന ശ്രമത്തിന്‍റെ ഫലമാണ് ഈ പൂക്കളം. ഇത് കാണാനും നിരവധി പേരാണ് എത്തുന്നത്.

രേഖകളില്ലാതെ മീൻ പിടിത്തം: ട്രോളർ ബോട്ട് പിടികൂടി

വിഴിഞ്ഞം : മതിയായ രേഖകൾ ഇല്ലാതെ മീൻ പിടിത്തം നടത്തിയ ട്രോളർ ബോട്ട് അധികൃതർ പിടികൂടി. കൊല്ലം സ്വദേശി ജോയേൽ ജോയിയുടെ ബോട്ടാണ് പിടികൂടിയത്. ഫിഷറീസ് അസിസ്റ്റൻഡ് ഡയറക്ടർ രാജേഷിന്‍റെ നിർദേശപ്രകാരം ഫിഷറീസ് റെസ്ക്യൂ വള്ളത്തിൽ ലൈഫ് ഗാർഡുമാരായ ജോർജ്, ആന്‍റണി, സുരേഷ്, ഡേവിഡ്‌സൺ ആന്‍റണി, ഇമാമുദ്ദീൻ, അലിക്കണ്ണ് എന്നിവരും പോലീസ് പട്രോളിങ് ബോട്ടിൽ മറൈൻ എന്ഫോഴ്സ്മെന്‍റ് സിവിൽ പൊലീസ് ഓഫീസർ ശ്രീകാന്ത് , ഗാർഡ് ജമാലുദ്ദീൻ എന്നിവർ വിഴിഞ്ഞത്ത് നിന്നും നടത്തിയ പട്രോളിംഗിലാണ് ബോട്ട് കസ്റ്റഡിയിൽ എടുത്തത്.

നേമം സഹകരണബാങ്ക് തട്ടിപ്പ്: തിരുവോണത്തിന് സെക്രട്ടേറിയറ്റ് നടയിൽ നിക്ഷേപകരുടെ നിരാഹാര സമരം

നേമം :96 കോടി രൂപയുടെ ക്രമക്കേടുകൾ കണ്ടെത്തിയ നേമം സഹകരണ ബാങ്കിലെ നിക്ഷേപകർക്ക് സർക്കാർ ഗ്യാരണ്ടി ബോർഡിൽ ഉൾപ്പെടുത്തി താൽക്കാലിക ആശ്വാസമായി ഓരോ നിക്ഷേപകനും അഞ്ചു ലക്ഷം രൂപ വീതം നൽകണമെന്നും, "സർക്കാർ ഗ്യാരണ്ടി" എന്ന ഉറപ്പ്‌ പാലിക്കണമെന്നും ആവശ്യപ്പെട്ടുകൊണ്ട് നിക്ഷേപ കൂട്ടായ്മ ഭാരവാഹികളായ ശാന്തിവിള മുജീബ് റഹ്‌മാനും കൈമനം സുരേഷും തിരുവോണ നാളിൽ സെക്രട്ടേറിയറ്റിനു മുന്നിൽ നിരാഹാരം അനുഷ്ഠിച്ചു. ഐക്യദാർഢ്യം പ്രഖ്യാപിച്ച് നൂറുകണക്കിന് നിക്ഷേപകർ നിരാഹാര സമരത്തിൽ പങ്കെടുത്തു. എ. ശാന്തമ്മയുടെ അധ്യക്ഷതയിൽ ചേർന്ന സമരം ആർ. എസ്. ശശികുമാർ ഉദ്ഘാടനം ചെയ്തു. കെപിസിസി ജനറൽ സെക്രട്ടറി അഡ്വ. ജി. സുബോധൻ, ശാന്തിവിള സുബൈർ, മണ്ണാങ്കൽ രാമചന്ദ്രൻ, ശാന്തിവിള വിനോദ്, എസ്. എൻ. ജമീർ, മനോജ്‌ കെ.നായർ എന്നിവർ സംസാരിച്ചു. എം. എൻ. നാസർ സ്വാഗതം പറഞ്ഞു.

ആവേശം അലതല്ലി വെള്ളായണി ജലോത്സവം : മഹാത്മ അയ്യന്‍കാളി ട്രോഫി കാക്കമൂല ബ്രദേഴ്‌സ് ചുണ്ടന്

നേമം : ആവേശം അലതല്ലി വെള്ളായണി കായലില്‍ അവിട്ടം നാളില്‍ നടന്ന നാല്‍പ്പത്തിയെട്ടാമത് മഹാത്മ അയ്യന്‍കാളി ജലോത്സവത്തില്‍ ഒന്നാംതരം വള്ളങ്ങളുടെ വിഭാഗത്തില്‍ ടി.ബിജു ക്യാപ്റ്റനായ കാക്കമൂല ബ്രദേഴ്‌സ് ചുണ്ടൻ മഹാത്മ അയ്യന്‍കാളി ട്രോഫി നേടി. ഒന്നാം തരം വള്ളങ്ങളില്‍ ഗോപി ക്യാപ്റ്റനായ കാക്കമൂല നടുഭാഗം ചുണ്ടന്‍ രണ്ടാം സ്ഥാനവും ശ്യാം ക്യാപ്റ്റനായ ബിബിസി പുന്നവിള മൂന്നാം സ്ഥാനവും നേടി. രണ്ടാം തരം വള്ളങ്ങളില്‍ അജി ക്യാപ്റ്റനായ കാക്കമൂല ബ്ലു ബേര്‍ഡ്‌സ് ഒന്നാം സ്ഥാനത്തെത്തി. ശംഭു ക്യാപ്റ്റനായ കാക്കമൂല ബ്രദേഴ്‌സ് ചുണ്ടന്‍ രണ്ടാം സ്ഥാനവും ജിത്തു ക്യാപ്റ്റനായ വടക്കേക്കര ചുണ്ടന്‍ മൂന്നാം സ്ഥാനവും നേടി. മൂന്നാം തരം വള്ളങ്ങളില്‍ ഷൈജു ക്യാപ്റ്റനായ കാക്കമൂല പടക്കുതിര ഒന്നാമെത്തി. അഭിജിത്ത് ക്യാപ്റ്റനായ കാരിച്ചാല്‍ ചുണ്ടന്‍ രണ്ടാം സ്ഥാനവും ഇഗ്നഷ്യസ് ക്യാപ്റ്റനായ കാക്കമൂല ചുണ്ടന്‍ മൂന്നാം സ്ഥാനവും നേടി. വനിതകള്‍ തുഴഞ്ഞ മത്സരത്തില്‍ എൻ. രാധിക ക്യാപറ്റനായ ഊക്കോട് ചുണ്ടന്‍ ഒന്നാം സ്ഥാനവും ബീന ക്യാപ്റ്റനായ കാഞ്ഞിരംപാറ ചുണ്ടന്‍ രണ്ടാം സ്ഥാനവും നേടി. ബിന്ദു ക്യാപ്റ്റനായ വിന്നേഴ്‌സ് ചുണ്ടന്‍ മൂന്നാം സ്ഥാനവും നേടി. മികച്ച അമരക്കാരനായി ഒന്നാംതരം വള്ളങ്ങളുടെ മത്സരത്തില്‍ ഒന്നാം സ്ഥാനം നേടിയ കാക്കമൂല ബ്രദേഴ്‌സ് ചുണ്ടനിലെ ബിനുസുധനെ തിരഞ്ഞെടുത്തു. ശ്രീ അയ്യന്‍കാളി ജലോത്സവ ട്രസ്റ്റിന്‍റെയും സംസ്ഥാന ടൂറിസം വകുപ്പിന്‍റെയും സംയുക്താഭിമുഖ്യത്തില്‍ നടന്ന വള്ളം കളി മത്സരത്തിന്‍റെ പൊതുസമ്മേളനം മന്ത്രി വി.ശിവന്‍കുട്ടി ഉദ്ഘാടനം ചെയ്ത് ഫ്‌ളാഗ് ഓഫ് നിര്‍വഹിച്ചു. എം.വിന്‍സെന്‍റ് എംഎല്‍എ അധ്യക്ഷനായി. ജില്ലാ പഞ്ചായത്ത് പ്രസിഡന്‍റ് ഡി.സുരേഷ്‌കുമാര്‍, കല്ലിയൂര്‍ പഞ്ചായത്ത് പ്രസിഡന്‍റ് എം.സോമശേഖരന്‍, നേമം ബ്ലോക്ക് പ്രസിഡന്‍റ് എസ്.കെ. പ്രീജ, അംഗങ്ങളായ വി.ലതാകുമാരി, ആര്‍.ജയലക്ഷ്മി, എസ്. സുരേഷ്, അഡ്വ.പുഞ്ചക്കരി രവീന്ദ്രന്‍, എം. വിനുകുമാര്‍, ആര്‍. മോശ, വി.സുധര്‍മ്മ, രാജലക്ഷ്മി, സുജിത്ത്, പൂങ്കുളം ബിജു, സി.എസ്. രാധാകൃഷ്ണന്‍ തുടങ്ങിയവര്‍ പങ്കെടുത്തു.

ഭീമൻ അത്തപ്പൂക്കളമൊരുക്കി അരുവി ആര്‍ട്‌സ് ആന്‍ഡ് സ്‌പോര്‍ട്‌സ് ക്ലബ്

വെള്ളറട : അരുവി ആര്‍ട്‌സ് ആന്‍ഡ് സ്‌പോര്‍ട്‌സ് ക്ലബ്ബിന്‍റെ നേതൃത്വത്തില്‍ അരുവിക്കുഴിയില്‍ ഭീമന്‍ അത്തക്കളം ഒരുക്കി. ഓണാഘോഷത്തോടനുബന്ധിച്ച് വിവിധ കലാപരിപാടികളും സംഘടിപ്പിച്ചു. കായിക മത്സരങ്ങള്‍, സാംസ്‌കാരിക സമ്മേളനം, ഓണ കിറ്റ് വിതരണം, കലാവിരുന്ന് എന്നിവ സംഘടിപ്പിച്ചു. വിശിഷ്ടാതിഥിയായി സിനിമാ സീരിയല്‍ താരം രാഹുല്‍ വെള്ളായണി പങ്കെടുത്തു. തുടര്‍ച്ചയായി പതിനെട്ടാമത്തെ വര്‍ഷമാണ് ഭീമന്‍ അത്തപ്പൂക്കളം ഒരുക്കി കലാപരിപാടികള്‍ സംഘടിപ്പിച്ചത്.

വർണാഭമായി പാച്ചല്ലൂർ ജലഘോഷയാത്ര

തിരുവല്ലം: കരമനയാറും പാർവ്വതീ പുത്തനാറും കടലിൽ സംഗമിക്കുന്ന പാച്ചല്ലൂർ പൊഴിക്കരയിൽ നിരവധി നാടൻ വള്ളങ്ങളിൽ കലാരൂപങ്ങളും വാദ്യമേളങ്ങളുമായി വർണാഭമായ ഘോഷയാത്ര സംഘടിപ്പിച്ചു. ടൂറിസം വകുപ്പും ജില്ലാ ടൂറിസം പ്രമോഷൻ കൗൺസിലും വെള്ളാർ വാർഡ് ജനകീയ സമിതിയും ഓണം വാരാഘോഷത്തോടനുബന്ധിച്ചാണ് ജലഘോഷയാത്ര സംഘടിപ്പിച്ചത് . നാടൻ വള്ളങ്ങളിൽ തുഴയുന്ന മാവേലിയും തെയ്യക്കോലവും കഥകളിയുടെ നിശ്ചലദൃശ്യങ്ങളും തിരുവാതിരയും വാദ്യമേളങ്ങളും കരിക്കടവ് മുതൽ കൊപ്രാപ്പുര വരെ ഇരുകരകളിലും തടിച്ചുകൂടിയ നൂറുകണക്കിനാളുകൾക്ക് ഏറെ കൗതുകവും ആകർഷകമായി. മന്ത്രി വി. ശിവൻകുട്ടി ഫ്ലാഗ് ഓഫ് ചെയ്തു.

കണ്ണൂർ സ്വദേശിയുടെ മരണം: പരാതിയില്ലെന്ന് ബന്ധുക്കൾ; മൃതദേഹം സംസ്കരിച്ചു

മെഡിക്കല്‍കോളജ്: ശാരീരിക അവശതയെ തുടര്‍ന്ന് കുഴഞ്ഞുവീഴുകയും ആശുപത്രിയില്‍ മരിക്കുകയും ചെയ്ത കണ്ണൂര്‍ കൊച്ചുപുരയ്ക്കല്‍ കെ.പി ശ്രീഹരി (50) യുടെ മൃതദേഹം ബന്ധുക്കള്‍ ഏറ്റുവാങ്ങി സംസ്‌കരിച്ചു. കഴിഞ്ഞ മാസം 19നാണ് ശ്രീഹരി ഇദ്ദേഹം ജോലിചെയ്തുവരുന്ന മണക്കാടുള്ള വര്‍ക്‌ഷോപ്പിനുള്ളില്‍ കുഴഞ്ഞുവീഴുന്നത്. വര്‍ക്‌ഷോപ്പ് ഉടമയാണ് ഇദ്ദേഹത്തെ തിരുവനന്തപുരം മെഡിക്കല്‍കോളജ് ആശുപത്രിയില്‍ പ്രവേശിപ്പിക്കുന്നത്. ശ്രീഹരിക്ക് ബ്രെയിന്‍ സ്റ്റെം സ്‌ട്രോക്കാണെന്നു ഡോക്ടര്‍മാര്‍ കണ്ടെത്തുകയായിരുന്നു. ശ്വാസകോശവും ഹൃദയവും നിയന്ത്രിക്കുന്ന തലച്ചോറിലെ പോണ്‍സിലാണ് സ്‌ട്രോക്ക് ബാധിച്ചത്. ഇക്കാരണത്താലാണ് ചികിത്സയിലിരുന്ന ശ്രീഹരിയെ രക്ഷിക്കാനാകാത്തതിനു കാരണം. ശ്രീഹരിയുടെ മരണത്തില്‍ പരാതിയില്ലെന്ന് കുടുംബം അറിയിച്ചിരിക്കുകയാണ്. ശ്രീഹരിയെ അജ്ഞാതരോഗിയായി അഡ്മിറ്റ് ചെയ്തിരുന്നതിനാല്‍ ബന്ധുക്കള്‍ ആദ്യം രേഖകള്‍ സമര്‍പ്പിച്ചശേഷം പരാതി നല്‍കിയിരുന്നു. രക്ഷിക്കാനാകാത്ത വിധത്തില്‍ തലച്ചോറിലുണ്ടായ സ്‌ട്രോക്കാണ് മരണകാരണമെന്ന് ബന്ധുക്കള്‍ തിരിച്ചറിഞ്ഞതോടെയാണ് ഇനി പരാതിക്കില്ലെന്നു കുടുംബം വ്യക്തമാക്കിയിരിക്കുന്നത്. കണ്ണൂരില്‍ പൊതുദര്‍ശനത്തിനുശേഷമാണ് ശ്രീഹരിയുടെ മൃതദേഹം സംസ്‌കരിച്ചത്.

വിളക്കില്‍ നിന്നു തീ പടര്‍ന്ന് തടിയുരുപ്പടികള്‍ കത്തിനശിച്ചു

പേരൂര്‍ക്കട: വിളക്കില്‍ നിന്നു തീ പടര്‍ന്ന് തടിമില്ലിലെ തടിയുരുപ്പടികള്‍ കത്തിനശിച്ചു. വട്ടിയൂര്‍ക്കാവ് വേട്ടമുക്ക് പെട്രോള്‍ പമ്പിനു സമീപം പ്രവര്‍ത്തിക്കുന്ന ശിവന്‍റെ ഉടമസ്ഥതയിലുള്ള ശിവാസ് സോ മില്ലിനാണ് തീ പിടിച്ചത്. വെള്ളിയാഴ്ച വൈകുന്നേരം 4.30നാണ് സംഭവം. തിരുവനന്തപുരത്ത് ഒരു ഗൃഹപ്രവേശന കര്‍മത്തില്‍ പങ്കെടുത്തുകൊണ്ടിരുന്ന ഉടമയെ സമീപവാസികള്‍ വിവരമറിയിക്കുകയും ഉടമ തിരുവനന്തപുരം ഫയര്‍ഫോഴ്‌സിനെ വിളിക്കുകയുമായിരുന്നു. ശിവാസ് മില്ലിനു തൊട്ടടുത്ത മറ്റൊരു തടിമില്ലുകൂടി ഉണ്ടായിരുന്നു. അല്‍പ്പസമയംകൂടി വൈകിയിരുന്നുവെങ്കില്‍ അവിടേക്കുകൂടി തീ പടര്‍ന്ന് വന്‍ നഷ്ടം സംഭവിക്കുമായിരുന്നു. ശിവാസ് മില്ലിലുണ്ടായിരുന്ന മുറിച്ചുവച്ച പന്ത്രണ്ടോളം തടികളാണ് കത്തിനശിച്ചത്. ഏകദേശം 15,0000 രൂപയുടെ നഷ്ടം കണക്കാക്കുന്നതായി ഫയര്‍ഫോഴ്‌സ് അറിയിച്ചു. തിരുവനന്തപുരം നിലയത്തില്‍ നിന്ന് അസി. സ്റ്റേഷന്‍ ഓഫീസര്‍ ജോര്‍ജ് പോളിന്‍റെ നേതൃത്വത്തില്‍ ഫയര്‍ ആൻഡ് റസ്‌ക്യു ഓഫീസര്‍മാരായ രതീഷ്, റസീഫ്, ഷമീര്‍, ഫിറോസ് ഖാന്‍, എഫ്ആര്‍ഒ ഡ്രൈവര്‍മാരായ പ്രശാന്ത്, അരുണ്‍, ഹോം ഗാര്‍ഡ് ശ്യാമളകുമാര്‍ എന്നിവര്‍ പ്രവര്‍ത്തനങ്ങളില്‍ പങ്കെടുത്തു.

മേലാരിയോട് വിശുദ്ധ മദര്‍ തെരേസാ തീര്‍ഥാടന തിരുനാളിന് ഇന്ന് കൊടിയേറും

നെയ്യാറ്റിന്‍കര : മദര്‍ തെരേസയുടെ നാമധേയത്തിലെ ലോകത്തിലെ ആദ്യ ദേവാലയമായ നെയ്യാറ്റിന്‍കര രൂപതയിലെ മേലാരിയോട് വിശുദ്ധ മദര്‍ തെരേസാ തീര്‍ഥാടന തിരുനാളിന് ഇന്ന് തുടക്കമാവും. ഇന്ന് വൈകുന്നേരം 6.30 ന് ഇടവക വികാരി ഫാ.കെ.പി. ജോണ്‍ കൊടിയേറ്റ് കർമം നിര്‍വഹിക്കും . നാളെ മാതാവിന്‍റെ ജനന തിരുനാള്‍ ദിനത്തില്‍ രാവിലെ 9 മുതല്‍ ലീജിയന്‍ ഓഫ് മേരി സംഘടിപ്പിക്കുന്ന അഖണ്ഡ ജപമാല. വൈകുന്നേരം ദിവ്യബലിയെ തുടര്‍ന്ന് മാതാവിന്‍റെ തിരുസ്വരൂപം വഹിച്ച് ആഘോഷമായ തിരുസ്വരൂപ പ്രദക്ഷിണം . 13 ന് വൈകിട്ട് ദിവ്യബലിയെ തുടര്‍ന്ന് ആഘോഷമായ പ്രദക്ഷിണം. 14 ന് ദിവ്യബലിയെ തുടര്‍ന്ന് ആഘോഷമായ ദിവ്യകാരുണ്യ പ്രദക്ഷിണം , നെയ്യാറ്റിന്‍കര രൂപതയിലെ വിവിധ വൈദികര്‍ തിരുകര്‍മങ്ങളില്‍ മുഖ്യ കാര്‍മികത്വം വഹിക്കും. തിരുനാള്‍ ദിനങ്ങളില്‍ വൈകുന്നേരം 5 മുതല്‍ ബൈബിള്‍ പാരായണം , ജപമാല, ലിറ്റിനി , നൊവേന ദിവ്യബലി എന്നിവ ഉണ്ടാവും. വിശുദ്ധ മദര്‍ തെരേസയുടെ തിരുശേഷിപ്പ് വണങ്ങി പ്രാര്‍ഥിക്കാനുളള പ്രത്യേക ക്രമീകരണം പളളിയില്‍ ഒരുക്കിയിട്ടുണ്ടെന്ന് ഇടവക വികാരി ഫാ. കെ.പി.ജോണ്‍ അറിയിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]