ADVERTISEMENT

ADVERTISEMENT

ഒറ്റഞാർ നെൽകൃഷി പരിശീലനം

പാറശാല: രൂപതയുടെ സോഷ്യൽ സർവീസ് പ്രസ്ഥാനമായ ക്ഷേമയുടെ നേതൃത്വത്തിൽ, ഇൻഫാമിന്‍റെ സഹകരണത്തോടെ, ചെങ്കൽ ഗപഞ്ചായത്തിലെ നെറ്റിയൂർ വാർഡിലെ, കാരിയോട് കരിക്കകരി ഏലായിൽ ഒറ്റഞാർ നെൽകൃഷി പരിശീലനം സംഘടിപ്പിച്ചു. നൂതന രീതിയിലുള്ള നെൽകൃഷി രീതികളെ പറ്റി ക്ഷേമ ഡയറക്ടർ ഫാ. ജോർജ് വെട്ടിക്കാട്ടിൽ ക്ലാസ് എടുത്തു.

ക്ഷേമ അസിസ്റ്റന്‍റ് ഡയറക്ടർ ഫാ. ജോൺ പുന്നാറ, ഇൻഫാം കാർഷിക ജില്ലാ പ്രസിഡന്‍റ് ധർമരാജ്, സംസ്ഥാന സമിതി അംഗം സനൽ, ക്ഷേമ കോ-ഓർഡിനേറ്റർമാ രായ ജോയ് ഫ്രാൻസ് മുല്ലശേരി, സാലി, ക്ഷേമ യൂണിറ്റ് സെക്രട്ടറിമാർ, നെൽകർഷകർ, കർഷകസമിതി സെക്രട്ടറി മണിയൻ എന്നിവർ നേതൃത്വം നൽകി.

ADVERTISEMENT

വിഷുക്കണി വിളവെടുപ്പ്

മെഡിക്കല്‍കോളജ്: ഉള്ളൂര്‍ കൃഷിഭവന്റെ മേല്‍നോട്ടത്തില്‍ ആക്കുളം കായല്‍തീരത്ത് ആരംഭിച്ച പച്ചക്കറികൃഷിയുടെ വിളവെടുപ്പ്- വിഷുക്കണി വിളവെടുപ്പ്- ചലച്ചിത്ര നടന്‍ പ്രേംകുമാര്‍ നിര്‍വ്വഹിച്ചു. ആക്കുളം വാര്‍ഡ് കൗണ്‍സിലര്‍ സുരേഷ്‌കുമാര്‍ അദ്ധ്യക്ഷത വഹിച്ചു. മൂന്ന് ഏക്കര്‍ സ്ഥലത്തായി വെണ്ട, പയര്‍, മുളക്, ചീര, തക്കാളി തുടങ്ങിയവയാണ് ഹരിത കൃഷിക്കൂട്ടത്തിന്റെ ശ്രമഫലമായി കൃഷിചെയ്തിരുന്നത്. 30 വര്‍ഷമായി തരിശുകിടന്ന സ്ഥലമാണ് കൃഷിയോഗ്യമാക്കി മാറ്റിയതെന്നും ഇത് കൃഷിഭവന്റെ വലിയൊരു നേട്ടമാണെന്നും കൃഷിഓഫീസര്‍ സി. സൊപ്‌ന പറഞ്ഞു. ചടങ്ങില്‍ കൃഷി അസി. ഡയറക്ടര്‍ ആര്‍. റിയാസ്, സുരേഷ് മുതുകുളം, രവികുമാര്‍ തുടങ്ങിയവര്‍ പങ്കെടുത്തു.

പൂവച്ചലിൽ ഭരണ-പ്രതിപക്ഷ പോര്

കാട്ടാക്കട: പൂവച്ചലിൽ ഭരണപക്ഷ -പ്രതിപക്ഷ പോര് കൊഴുക്കുന്നു. പഞ്ചായത്ത് ഭരിക്കുന്ന സിപിഎം മാലിന്യ വലിച്ചെറിയൽ പ്രശ്‌നത്തിൽ കോൺഗ്രസ് നേതാക്കൾക്കതിരേ കടുത്ത നടപടികളിലേയ്ക്ക് നീങ്ങുമ്പോൾ, കോൺഗ്രസും പോലീസും കേസുമായി മുന്നോട്ടുപോവുകയാണ്. സംഭവങ്ങളുടെ തുടക്കം ഇങ്ങിനെ: യുഡിഎഫ് പൂവച്ചലിൽ സംഘടിപ്പിച്ച രാപകൽ സമരത്തിനുശേഷം പ്ലാസ്റ്റിക് ഉൾപ്പെടുന്ന ഭക്ഷ്യാവശിഷ്ടങ്ങൾ പഞ്ചായത്ത് ഓഫീസിന് എതിർവശത്തെ പഞ്ചായത്ത് ഭൂമിയിൽ ഉപേക്ഷിച്ചിരുന്നു. സംഭവത്തിൽ മാലിന്യങ്ങൾ വലിച്ചെറിയുന്നത് കോൺഗ്രസ് നേതാവാണെന്നും സിസിടിവി ദ്യശ്യങ്ങൾ ഉൾപ്പെടെ ചൂണ്ടിക്കാട്ടി പിഴയൊടുക്കാൻ നോട്ടീസ് നൽകിയിരുന്നു. കോൺഗ്രസ് മണ്ഡലം മുൻ പ്രസിഡന്‍റും യുഡിഎഫ് കൺവീനറുമായ പൊന്നെടുത്തകുഴി സത്യദാസിനാണ് 5,000 രൂപ പിഴയൊടുക്കാൻ നോട്ടീസ് ലഭിച്ചത്. ഇതോടെയാണ് പ്രതിപക്ഷം രംഗത്തുവന്നത്. പഞ്ചായത്ത് ഓഫീസിനു മുന്നിൽ രാപകൽ സമരം നടത്തിയതിന്‍റെ പകയാണ് നോട്ടീ സിനു പിന്നിലെന്ന് കോൺഗ്രസ് ആരോപിക്കുന്നു. ഇതിൽ പ്രതിഷേധിച്ച് കോൺഗ്രസ് പഞ്ചായത്തംഗങ്ങൾ കഴിഞ്ഞ ദിവസം പഞ്ചായത്ത് സെക്രട്ടറിയെ ഉപരോധിച്ചിരുന്നു. ഭക്ഷ്യാവിഷ്ടങ്ങൾ ശേഖരിച്ച് ഒരു ചാക്കിൽകെട്ടി വച്ചിരിക്കുകയായിരുന്നുവെന്നും എന്നാൽ ചില സിപിഎം പ്രവർത്തകർ ചാക്കിൽനിന്നും ഭക്ഷ്യാവിഷ്ടങ്ങൾ പുറത്തെറിഞ്ഞെന്നുമാണ് കോൺഗ്രസിന്‍റെ ആരോപണം. ഇത് സംബന്ധിച്ച് അന്വേഷണം വേണമെന്നാവശ്യപ്പെട്ട് കോൺഗ്രസ് മണ്ഡലം പ്രസിഡന്‍റും പഞ്ചായത്ത് അംഗവുമായ കട്ടയ്‌ക്കോട് തങ്കച്ചൻ കാട്ടാക്കട പോലീസിൽ പരാതി നൽകിയിട്ടുണ്ട്. സംഭവത്തിൽ വൻ സമരപരിപാടികൾക്ക് രൂപം നൽകിയതായും കോൺഗ്രസ് വൃത്തങ്ങൾ അറിയിച്ചു. കഴിഞ്ഞ വെള്ളിയാഴ്ചയാണ് പഞ്ചായത്തോഫീസിനു മുന്നിൽ രാപകൽ സമരം നടന്നത്.

പത്തേമാരി പ്രവാസി മലയാളി അസോസിയേഷന്‍ ജില്ലാ സമ്മേളനം

തിരുവനന്തപുരം: പത്തേമാരി പ്രവാസി മലയാളി അസോസിയേഷന്‍ തിരുവനന്തപുരം ജില്ലാ സമ്മേളനം സത്യന്‍ സ്മാരക ഹാളില്‍ മാതാ കോളജ് മെഡിക്കല്‍ ടെക്‌നോളജി ചെയര്‍പേഴ്‌സണ്‍ ജിജി ജോസഫ് ഉദ്ഘാടനം ചെയ്തു. ജില്ലാ പ്രസിഡന്‍റ് മദനന്‍ ടി. നാടർ അധ്യക്ഷത വഹിച്ചു. ചെയര്‍മാന്‍ സക്കീര്‍ പായിപ്ര മുഖ്യപ്രഭാഷണം നടത്തി. മ്യൂസിയം ഷെഫിന്‍ മയക്കുമരുന്നിനെതിരേ ബോധവത്കരണ ക്ലാസ് എടുത്തു. കുഞ്ഞുമുഹമ്മദ്, ടെസിബെന്നി, സലിം അബ്ദുള്‍റെഹുമാന്‍, ബഹറിന്‍ ചാപ്റ്റര്‍ മുഹമ്മദ് ഇറയ്ക്കല്‍, സംസ്ഥാന പ്രസിഡന്‍റ് കുമില്‍ നസീര്‍, സനോജ് ഭാസ്‌കര്‍, ഷീബ കാട്ടാക്കട, അബ്ദുള്ള ബീമാപള്ളി, ഉഷാപ്രദീപ്, സുശീല, തുടങ്ങിയവർ പ്രസംഗിച്ചു. കലാസാംസ്‌കാരിക രംഗത്തെ പ്രമുഖനായ മാഹിന്‍ പാറവിളയെ ആദരിച്ചു.

കോണ്‍ഗ്രസ് ലഹരി വിരുദ്ധ സദസും കവിയരങ്ങും സംഘടിപ്പിച്ചു

പാറശാല: ബ്ലോക്ക് കോണ്‍ഗ്രസ് കമ്മിറ്റിയുടെ നേതൃത്വത്തില്‍ പാറശാല ജംഗ്ഷനില്‍ ലഹരി വിരുദ്ധസദസും കവിയരങ്ങും സംഘടിപ്പിച്ചു. കെപിസിസി സെക്രട്ടറി ഡോ. ആര്‍.വല്‍സലന്‍ ഉദ്ഘാടനം ചെയ്തു. ബ്ലോക്ക് പ്രസിഡന്‍റ് അഡ്വ. എസ്. ജോണിന്‍റെ അധ്യക്ഷതയില്‍ ബാബുക്കുട്ടന്‍ നായര്‍, കൊറ്റാമം വിനോദ്, അഡ്വ. മഞ്ചവിളാകം ജയന്‍, പാറശാല സുധാകരന്‍, കൊല്ലിയോടു സത്യനേശന്‍, അഡ്വ. പാലിയോട് അനൂപ്, വേലപ്പന്‍ നായര്‍, ജസ്റ്റിന്‍ എന്നിവര്‍ പ്രസംഗിച്ചു.

ബഡ്സ് സ്കൂളിലെ കുട്ടികള്‍ വിഴിഞ്ഞം തുറമുഖം കാണാന്‍ ഒത്തുകൂടി

വെള്ളറട: വിഴിഞ്ഞം തുറമുഖം കാണാന്‍ ഭിന്നശേഷി കുട്ടികള്‍ ഒത്ത് ചേര്‍ന്നു. പെരുങ്കടവിള പഞ്ചായത്ത് ബഡ്‌സ് സ്‌കൂളിന്‍റെ നേതൃത്വത്തില്‍ തിരുവനന്തപുരം കേന്ദ്രമാക്കി സംഘടിപ്പിച്ച പഠന വിനോദയാത്ര കുട്ടികള്‍ക്കു കൗതുകമായി. പഞ്ചായത്ത് പ്രദേശത്തെ 58 ഭിന്ന ശേഷിക്കുട്ടികള്‍ പഠിക്കുന്ന ബഡ്സ് സ്കൂളിലെ 25 കുട്ടികളും, രക്ഷകര്‍ത്താക്കളും യാത്രയില്‍ ഉണ്ടായിരുന്നു. വിഴിഞ്ഞം അന്താരാഷ്ട്ര തുറമുഖകവാടവും ചരക്ക് കപ്പലുകളും ആര്‍ത്തലക്കുന്ന തിരമാലകളും നീണ്ടു പരന്നുകിടക്കുന്ന മണല്‍പരപ്പുകളും, തണുത്ത ഇളംകാറ്റും അവരുടെ മനസിലുണ്ടാക്കിയ സന്തോഷം ആംഗ്യത്തിലൂടെയും, മുഖഭാവത്തിലൂടെയും ആസ്വദിച്ച നിമിഷങ്ങള്‍. ശംഖുമുഖം ബീച്ചും, ട്രയിന്‍ യാത്രയും ബോട്ടിംഗും കിഴക്കേകോട്ടയിലെ മെഴുകു പ്രതിമ മ്യൂസിയവും അവിടെനിന്നു ടബിള്‍ഡക്കര്‍ ബസിലെ നഗരക്കാഴ്ചയും പള്ളിച്ചല്‍ഫാം ഹൗസും കണ്ടു. ബഡ്‌സ് സ്‌കൂള്‍ അധ്യാപിക എസ്. സിമിയുടെ നേതൃത്വത്തിലുള്ള സംഘത്തെ പഞ്ചായത്ത് വൈസ് പ്രസിഡന്‍റ് എസ്. ബിന്ദു, വികസന സ്റ്റാൻഡിംഗ് കമ്മിറ്റി ചെയര്‍മാന്‍ കാനക്കോട് ബാലരാജ്, പഞ്ചായത്ത് അംഗങ്ങളായ സ്‌നേഹലത, ധന്യ പി. നായര്‍, വിമല, മിനി പ്രസാദ്, വി.എ. സചിത്ര, ജഗഥമ്മ എന്നിവര്‍ നേതൃത്വം നല്‍കി.

തീരദേശത്ത് പ്ലാസ്റ്റിക് നിര്‍മാര്‍ജനത്തിനു തുടക്കം

വലിയതുറ: "ശുചിത്വ സാഗരം സുന്ദര തീരം' ഏകദിന പ്ലാസ്റ്റിക് നിര്‍മാര്‍ജന യജ്ഞത്തിനു തുടക്കം കുറിച്ചു. മത്സ്യ സമ്പത്തിന്‍റെ സംരക്ഷണവും തീരദേശ വികസനവും ലക്ഷ്യമിട്ടുള്ള പദ്ധതിയാണ് സുചിത്വ സാഗരം സുന്ദര തീരം ഏകദിന പ്ലാസ്റ്റിക് നിര്‍മാര്‍ജന യജ്ഞം. പദ്ധതിയുടെ സംസ്ഥാനതല ഉദ്ഘാനം ശംഖുമുഖം ബീച്ചില്‍ മന്ത്രി എം.ബി. രാജേഷ് നിര്‍വഹിച്ചു. മന്ത്രി സജി ചെറിയാന്‍ അധ്യക്ഷത വഹിച്ചു. എല്ലാവരും ഒന്നിച്ചാല്‍ ശുചിത്വ സാഗരം പദ്ധതി വിജയകരമാകുമെന്നു മന്ത്രി സജി ചെറിയാന്‍ പ്ലാസ്റ്റിക് നിര്‍മാര്‍ജന യജ്ഞത്തിന് തുടക്കംകുറിച്ചുകൊണ്ട് പറഞ്ഞു. 12000 വോളന്‍റിയര്‍മാരെ വിന്യസിച്ചാണ് പ്ലാസ്റ്റിക് നിര്‍മാര്‍ജന യജ്ഞം നടത്തുന്നത്. എല്ലാ മാസവും രണ്ടാം ശനിയാഴ്ച ശുചീകരണം നടത്തുമെന്നും 200 മീറ്റര്‍ ദൂരത്തിനിടയില്‍ ഓരോ പ്ലാസ്റ്റിക് ബോട്ടില്‍ ബൂത്ത് സ്ഥാപിക്കുമെന്നും സജി ചെറിയാന്‍ പറഞ്ഞു. പ്ലാസ്റ്റിക് നിര്‍മാര്‍ജനത്തിനു വലിയ ബോധവത്കരണം ആവശ്യമാണെന്നും കടലിലെ പ്ലാസ്റ്റിക് സാന്നിധ്യം വളരെ കൂടുതലാണെന്നും ഇതിനെ പൂര്‍ണമായും നിര്‍മാര്‍ജനം ചെയ്യാന്‍ കഴിയണമെന്നും ഇല്ലെങ്കില്‍ കേരളം ഭാവിയില്‍ വലിയ പ്രത്യാഘാതം നേരിടേണ്ടിവരുമെന്നും മന്ത്രി കൂട്ടിച്ചേര്‍ത്തു.

റോഡിലെ അപകടക്കെണി : വാർത്തയ്ക്കു പിന്നാലെ സുരക്ഷാ അറിയിപ്പ് ബോർഡ് സ്ഥാപിച്ചു

കാട്ടാക്കട: റോഡിൽ അപകടക്കെണിയെന്ന വാർത്തയ്ക്കു പിന്നാലെ അധികൃതർ ഉണർന്നു. ഈ ഭാഗത്തു സുരക്ഷാ മുന്നറിയിപ്പു ബോർഡുകൾ സ്ഥാപിച്ചു. ഇതു സംബന്ധിച്ച് ദീപിക വാർത്ത നൽകിയിരുന്നു. വാർത്ത ശ്രദ്ധയിൽപ്പെട്ടതിനെ തുടർന്നാണ് ബോർഡ് സ്ഥാപിച്ചത്. താമസിയാതെ ഇവിടം വൃത്തിയാക്കി അപകടഭാഗത്തു സുരക്ഷാവേലി നിർമിക്കാൻ പൊതുമരാമത്ത് വകുപ്പ് തീരുമാനമെടുത്തു. അതിന്‍റെ നടപടിയും ഉടൻ ഉണ്ടാകും. കാട്ടാക്കട -നെടുമങ്ങാട് റോഡിലെ പൂവച്ചൽ പുന്നാംകരിക്കകം തയ്ക്കാവ് പള്ളിക്കടുത്താണ് യാത്രക്കാർ അപകടത്തിൽപ്പെടുന്നത്. ഈ ഭാഗത്ത് റോഡിനു വളവും വീതി കുറവുമാണ്. റോഡിനു താഴെ വലിയ തോടാണുള്ളത്. അപകടത്തിൽപ്പെടുന്ന വാഹനങ്ങൾ മിക്കപ്പോഴും ഈ തോട്ടിലേക്കാണു മറിയുന്നത്. തിരക്കേറിയ റോഡാണിത്. ഈ റോഡ് അടുത്തിടെയാണ് ആധുനികവത്കരിച്ചത്. റോഡ് നവീകരിച്ചപ്പോൾ ശാസ്ത്രീയമായി ചെയ്തില്ലെന്ന ആരോപണം നാട്ടുകാർ ഉന്നിയിച്ചിരുന്നു. തയ്ക്കാ പള്ളി ഭാഗത്തും വലിയ വളവുണ്ട്. അപകടങ്ങൾ നിത്യ സംഭവമായി മാറിയിട്ടും ബന്ധപ്പെട്ടവർ തിരിഞ്ഞു നോക്കുന്നിലെന്നു നാട്ടുകാർ പറയുന്നു. കഴിഞ്ഞ നാലുമാസത്തിനിടെ 23ളം അപകടങ്ങളാണ് നടന്നിരിക്കുന്നത്. ഈ സാഹചര്യത്തിലാണ് ഇവിടെ റോഡിൽ സുരക്ഷാവേലി വയ്ക്കണമെന്ന ആവശ്യം ഉയർന്നത്. ഇതാണ് രണ്ടു ദിവസം മുൻപ് വാർത്തയായി നൽകിയത്.

വായ്പാ വിതരണവും പലിശ സബ്സിഡി വിതരണവും

നെടുമങ്ങാട്: ആര്യനാട് പഞ്ചായത്ത് കുടുംബശ്രീ സിഡിഎസിന്‍റെ നേതൃത്വത്തിൽ എസ്സിഎസ്‌‌ടി കോർപ്പറേഷൻ വായ്പാ വിതരണവും പലിശ സബ്സിഡി വിതരണവും അഡ്വ. ജി സ്റ്റീഫൻ എംഎൽഎ ഉദ് ഘാടനം ചെയ്തു. പഞ്ചായത്ത് പ്രസിഡന്‍റ് വി. വിജുമോഹൻ അധ്യക്ഷനായ യോഗത്തിൽ സിഡിഎസ് ചെയർപേഴ്സൺ ജെ.ആർ. സുനിത കുമാരി സ്വാഗതം പറഞ്ഞു. 48 ഗുണഫോക്താക്കൾക്ക് 48ലക്ഷം രൂപ വിതരണം ചെയ്തു. ജില്ലാ പഞ്ചായത്ത് അംഗം മിനി, ക്ഷേമകാര്യ സ്റ്റാൻ ഡിംഗ് കമ്മിറ്റി ചെയർപേഴ്സൺ കെ.എസ്. മോളി, ജനപ്രതിനിധികളയാ ഷീജ, ലേഖ, ഈഞ്ചപ്പുരി രാജേന്ദ്രൻ, സനൂജ, ആതിര സരസ്വതി, കുടുംബശ്രി മെമ്പർ സെക്രട്ടറി ജോൺ കെ. സ്റ്റീഫൻ എന്നിവർ പങ്കെടുത്തു. സിഡിഎസ് വൈസ് ചെയർപേഴ്സൺ ശോഭനമ്മ നന്ദി അറിയിച്ചു.

പാറശാല ആര്‍ടി ഓഫീസില്‍ വിജിലന്‍സ് പരിശോധന

50,900 രൂപയുമായി ഡ്രൈവിംഗ് സ്‌കൂള്‍ ജീവനക്കാരൻ പിടിയിൽ പാറശാല: ആര്‍ടി ഓഫീസില്‍ വിജിലന്‍സ് നടത്തിയ മിന്നല്‍ പരിശോധനയില്‍ 50,900 രൂപയുമായി ഡ്രൈവിംഗ് സ്‌കൂള്‍ ജീവനക്കാരനെ പിടികൂടി. വിവിധഡ്രൈവിംഗ് സ്‌കൂളുകളില്‍നിന്ന് സമാഹരിച്ച് ഉദ്യോഗസ്ഥര്‍ക്ക് കൈമാറുന്നതിനായി കൊണ്ടുവന്ന പണമാണ് പിടികൂടിയതെന്ന് സംശയിക്കുന്നതായി വിജിലന്‍സ് സംഘം അറിയിച്ചു. വ്യാഴാഴ്ച വൈകുന്നേരം നാലരയോടെയാണ് വിജിലന്‍സ് സംഘം എത്തിയത്. ഓഫീസിലെ നടപടികളെക്കുറിച്ച് മൂന്നുമാസം മുന്‍പെ ലഭിച്ച പരാതികളില്‍ വിശദമായ പരിശോധന നടത്തിയശേഷമാണ് സംഘം പരിശോധനയ്ക്കായി എത്തിയത്. വാഹന കാര്യക്ഷമതാ പരിശോധന മുതല്‍ ഡ്രൈവിംഗ് പരീക്ഷകള്‍ക്കു വരെ ഒരുവിഭാഗം ഉദ്യോഗസ്ഥര്‍ വന്‍തോതില്‍ കൈക്കൂലി വാങ്ങുന്നതായും കൈക്കൂലി സമാഹരിച്ച് കൈമാറുന്നതിനായി ഡ്രൈവിംഗ് സ്‌കൂള്‍ ജീവനക്കാരനെ ചുമതലപ്പെടുത്തിയിട്ടുള്ളതായും വിജിലന്‍സിന് പരാതി ലഭിച്ചിരുന്നു. ഡ്രൈവിംഗ് സ്‌കൂള്‍ ജീവനക്കാരനായ സുരേന്ദ്രനെയാണ് 50,900 രൂപയുമായി പിടികൂടിയത്. വിജിലന്‍സ് യൂണിറ്റിലെ സിഐ അഭിലാഷ്, കിരണ്‍ എന്നിവരുടെ നേതൃത്വത്തിലായിരുന്നു പരിശോധന.

തിരുമല-തൃക്കണ്ണാപുരം റോഡ് വീതികൂട്ടല്‍‌; വെള്ളപ്പൊക്ക ഭീതിയില്‍ കുടുംബങ്ങള്‍

ഓടയിലെ വെള്ളം ഒഴുകിപ്പോകാന്‍ പദ്ധതിയില്‍ പ്ലാനില്ലെന്ന് ആക്ഷേപം പേരൂര്‍ക്കട: തിരുമല-തൃക്കണ്ണാപുരം റോഡ് വീതികൂട്ടല്‍ ദീര്‍ഘവീക്ഷണത്തോടുകൂടിയുള്ളതല്ലെന്നും ഓട പുതുക്കിപ്പണിയുമ്പോള്‍ വെള്ളപ്പൊക്ക സാധ്യതയുണ്ടെന്നും നാട്ടുകാരുടെ ആരോപണം. പിഡബ്ല്യുഡി 45 കോടിയോളം രൂപ വിനിയോഗിച്ചാണ് റോഡു വീതി കൂട്ടുന്നത്. ഇരുവശത്തുമായി 15 മീറ്റര്‍ വീതിയാണ് വര്‍ധിപ്പിക്കുന്നത്. മൂന്നരകിലോമീറ്റര്‍ വരുന്നതാണ് റോഡ്. പണി മാസങ്ങള്‍ക്കു മുമ്പ് ആരംഭിച്ചുകഴിഞ്ഞു. ജെസിബി ഉപയോഗിച്ചുള്ള പണി തകൃതിയായി നടത്തുന്നുണ്ട്. കുന്നപ്പുഴ ജംഗ്ഷനു സമീപം ട്രാന്‍സ്‌ഫോമറിനു എതിര്‍വശത്ത് റോഡിന്‍റെ വീതി വര്‍ധി പ്പിക്കലുമായി ബന്ധപ്പെട്ടാണ് പരാതികളും ആശങ്കകളും കൂടുതലായി നിലനില്‍ക്കുന്നത്. ഇവിടെ ആറുമാസത്തിനു മുമ്പ് വീതിയില്‍ ഓട നിര്‍മിച്ചിരുന്നു. റോഡ് വീതി കൂട്ടുന്നതോടെ ഓട പുനര്‍നിര്‍മിക്കേണ്ടതായി വരും. നിലവില്‍ ഓടയില്‍നിന്നുള്ള വെള്ളം ഇവിടെ നിന്നും പ്രത്യേക പൈപ്പ് വഴി കരമനയാറ്റിലേക്കാണു വിട്ടിരുന്നത്. എന്നാൽ പുതിയ പദ്ധതിയില്‍ ഓടനിര്‍മാണം വിശദീകരിക്കുന്നുണ്ടെങ്കിലും കൂടുതലായി മഴയില്‍ വന്നുചേരുന്ന വെള്ളം എവിടേക്ക് വിടണമെന്നു പറയുന്നില്ല. കരമനയാറ്റിലേക്ക് വെള്ളം വിടുന്നതിനുള്ള സംവിധാനം ഒരുക്കാതെ റോഡ് വീതികൂട്ടല്‍ നടത്തുകയാണെങ്കില്‍ പ്രധാന റോഡില്‍പ്പോലും വെള്ളപ്പൊക്കമുണ്ടാകുകയും നിരവധി കുടുംബങ്ങളെ അതു അപകടത്തില്‍പ്പെടുത്തുകയും ചെയ്യും.

തൂക്കം വ്രതം അനുഷ്ടിച്ച 13വയസുകാരനെ പോലീസ് മർദിച്ചെന്നു പരാതി

പോത്തൻകോട്: തൂക്കം വ്രതം അനുഷ്ടിച്ച 13വയസുകാരനെ പോലീസ് മർദിച്ചെന്നു പരാതി. മേനംകുളം എംകെആർഎ 43 ൽ എസ്എസ് സുമേഷിന്‍റെയും ആർ.എസ്. അശ്വതിയുടെയും മകൻ വിനായകിന് (13) ആണ് പരിക്കേറ്റത്. വിനായക് മെഡിക്കൽ കോളജ് ആശുപത്രിയിൽ ഓർത്തോ വിഭാഗത്തിൽ ചികിത്സയിൽ ആണ്. പോലീസ് ഉദ്യോഗസ്ഥനും മേനംകുളം സ്വദേശിയുമായ വി.എസ്. ശ്രീബുവിനെതിരെയാണ് പരാതി നൽകിയിട്ടുള്ളത്. പാൽക്കര ഭഗവതി ക്ഷേത്രത്തിൽ തൂക്കത്തിനു വ്രതംനിന്ന വിനായക് ച‌ടങ്ങുകൾക്കുശേഷം ക്ഷേത്രത്തിനു സമീപം നിൽക്കുമ്പോൾ അകാരണമായി പോലീസുകാരനായ ശ്രീബു മർദിക്കുകയായിരുന്നുവെന്നു പറയുന്നു.

മലയാറ്റൂർ ഫൗണ്ടേഷൻ സാഹിത്യ മത്സര വിജയികളെ പ്രഖ്യാപിച്ചു

തിരുവനന്തപുരം: സാഹിത്യകാരൻ മലയാറ്റൂർ രാമകൃഷ്ണന്റെ 'പൊന്നി' എന്ന നോവലിനെ ആധാരമാക്കി 'പൊന്നി: നോവലും സിനിമയും' എന്ന വിഷയത്തിൽ മലയാറ്റൂർ ഫൗണ്ടേഷൻ നടത്തിയ സാഹിത്യമത്സരത്തിലെ വിജയികളെ പ്രഖ്യാപിച്ചു. നേമം സ്വദേശി ഡോ. കെ.എസ്. അനിൽകുമാർ, എറണാകുളം ചങ്ങമ്പുഴ നഗർ സ്വദേശി അജയ് നാരായണൻ, തൃശൂർ സ്വദേശി ടി.ജി. ബിന്ദു എന്നിവരാണ് ആദ്യമൂന്നു സ്ഥാനങ്ങളിലെ വിജയികൾ. മലയാറ്റൂരിന്റെ 98-ാമത് ജന്മവാർഷികദിനമായ മേയ് 30ന് ഭാരത് ഭവനിൽ സംഘടിപ്പിക്കുന്ന സാംസ്‌കാരിക സായാഹ്നത്തിൽ പുരസ്‌കാരങ്ങൾ സമ്മാനിക്കും. സി. റഹിം ജൂറി ചെയർമാനും ജോൺ തോമസ്, ശോഭാ രാജ്‌മോഹൻ, പി.ആർ. ശ്രീകുമാർ എന്നിവർ അംഗങ്ങളുമായ സമിതിയാണ് ജേതാക്കളെ തെരഞ്ഞെടുത്തത്.

ചട്ടവിരുദ്ധ ഇ ഫയൽ: സ്പീക്കറുടെ തീരുമാനത്തിനെതിരെ സമരം ചെയ്ത ജീവനക്കാർക്ക് ഭീഷണിക്കത്ത്

തിരുവന്തപുരം: സ്പീക്കറുടെ ചട്ടവിരുദ്ധ നടപടിയിൽ പ്രതിഷേധിച്ചു സെക്രട്ടേറിയറ്റിനു മുന്നിൽ സമരം ചെയ്ത നിയമസഭയിലെ പ്രതിപക്ഷ സർവീസ് സംഘടനയായ കേരള ലെജിസ്ലേച്ചർ സെക്രട്ടേറിയറ്റ് അസോസിയേഷന്‍റെ പ്രതിഷേധത്തിൽ പങ്കെടുത്ത വനിത ജീവനക്കാർക്ക് ഭീഷണിക്കത്ത്. സ്പീക്കർക്കെതിരേ സമരം ചെയ്താൽ പണി തെറിപ്പിക്കുമെന്നും അനുഭവിക്കേണ്ടിവരുമെന്നും ഭീഷണിപ്പെടുത്തുന്ന കത്തുകളാണ് ഇടതു അനുഭാവി എന്ന പേരിൽ വനിതാ ജീവനക്കാർക്കു ലഭിച്ചത്. ജനാധിപത്യപരമായ പ്രതിഷേധത്തിൽ പങ്കെടുത്ത ജീവനക്കാരെ സ്പീക്കറുടെ പേരുൾപ്പെടുത്തി ഭീഷണിപ്പെടുത്തിയ സംഭവത്തിൽ അന്വേഷണവും കുറ്റക്കാർക്കെതിരേ നടപടിയും ആവശ്യപ്പെട്ടു കേരള ലെജിസ്ലേച്ചർ സെക്രട്ടേറിയറ്റ് അസോസിയേഷൻ സ്പീക്കർ എ.എൻ. ഷംസീറിന് കത്ത് നൽകി. ജനാധിപത്യം അനുവദിച്ച പ്രതിഷേധത്തിൽ പങ്കെടുത്ത വനിതാ ജീവനക്കാരെ ഭീഷണിപ്പെടുത്തിയ നടപടി അപലപനീയമാണെന്നു ഭാരവാഹികൾ പറഞ്ഞു.

പരിശോധനയിൽ മദ്യപിച്ചെന്നു കണ്ടെത്തൽ : കെഎസ്ആർടിസി ഡിപ്പോയിൽ ഡ്രൈവറുടെ പ്രതിഷേധ സമരം

പാലോട്: ബ്രീത്ത് അനലൈസർ പരിശോധനയിൽ സിഗ്നൽ 16 കടന്നു എന്നു കണ്ടെത്തിയതിനെ തുടർന്ന് ഡ്രൈവറെ ഡ്യൂട്ടിയിൽ നിന്ന് ഒഴിവാക്കി. തുടർന്നു പാലോട് ഡിപ്പോയിൽ അരങ്ങേറിത് നാടകീയ രംഗങ്ങൾ. ഇന്നലെ രാവിലെ പാലോട് ഡിപ്പോയിൽ ജോലിക്ക് എത്തിയ ഡ്രൈവർ പച്ചമല തേക്കുമൂട് സ്വദേശി ജയപ്രകാശിനെയാണ് ഡ്യൂട്ടി യിൽ നിന്ന് ഒഴിവാക്കിയത്. എന്നാൽ താൻ മദ്യപിക്കുന്ന ആളല്ലെന്നും ഇത്രയും വർഷം പാലോട് ഡിപ്പോയിൽ ജോലി നോക്കിയിട്ട് ഇങ്ങനെ ഒരു പരാതി ഉണ്ടായിട്ടില്ലെന്നും ചൂണ്ടിക്കാട്ടി എസ്. ജയപ്രകാശ് പരാതിയുമായി മുന്നോട്ടു വന്നു. ഡ്യൂട്ടിയിൽനിന്ന് ഒഴിവാക്കിയതിൽ പ്രതിഷേധിച്ച് ജയപ്രകാശ് ഓഫീസ് പടിക്കൽ പ്രതിഷേധ സമരം നടത്തി. വീട്ടിൽനിന്നു ഭാര്യയെയും മക്കളെയും സ്ഥലത്തെത്തിച്ചാണു ജയപ്രകാശ് സമരം നടത്തിയത്. സമരം മണിക്കൂറുകളോളം ഡിപ്പോയിൽ നാടകീയ രംഗങ്ങൾക്ക് ഇടയാക്കി. പരിശോധന ഉപകരണം തകരാറിലാണെന്ന് ആഴ്ചകളായി ജീവനക്കാർ പരാതി നൽകിയിരുന്നു. കഴിഞ്ഞ 31നും സമാനമായ സംഭവങ്ങൾ ഉണ്ടായതായും ജീവനക്കാർ ആ രോപിക്കുന്നു. അന്ന് അഞ്ചുപേർക്കാണ് പലവട്ടം പരിശോധനയിൽ പല സിഗ്നകളിൽ കാണിച്ചത്. വെള്ളിയാഴ്ച രാവിലെ സ്റ്റേഷൻ മാസ്റ്റർ ബൈജുവാണു ജീവനക്കാരെ പരിശോധിച്ചത്. ജയപ്രകാശിനോടൊപ്പം ഉണ്ടായിരുന്ന കണ്ടക്ടർ ഷിബുവിനെ പരിശോധിച്ചപ്പോൾ സിഗ്നൽ പൂജ്യം ആയിരുന്നു. എന്നാൽ ജയപ്രകാശിനെ പരിശോധിച്ചപ്പോൾ അത് 16 എന്നാണ് കാണിച്ചത്. ഇയാൾ മദ്യപിക്കുന്ന ആളല്ലെന്നു സഹപ്രവർത്തകരും ഉദ്യോഗസ്ഥരും പറയുന്നു. ‌സംഭവം വലിയ വാർത്തയായതോടെ വിഷയത്തിൽ മന്ത്രിയുടെ ഓഫീസ് ഇടപെടുകയും പാലോട് ഡിപ്പോയിലെ സ്റ്റേഷൻ മാസ്റ്റർ ഡ്യൂട്ടിയിൽ ഉണ്ടായിരുന്ന രണ്ടു പേരും നെടുമങ്ങാട് എടിഒ എയും ജയപ്രകാശും ഉൾപ്പെടെ എംഡിയുടെ ഓഫീസിൽ റിപ്പോർട്ട് ചെയ്യണമെന്ന് ആ വശ്യപ്പെട്ടിട്ടുണ്ട്.

വിഴിഞ്ഞത്തെ ഇളക്കിമറിച്ച് ‘രക്ഷാപ്രവർത്തനം’

എസ്. രാജേന്ദ്രകുമാർ വിഴിഞ്ഞം: നേരം പുലർന്നപ്പോൾ മുതൽ ദുരന്തനിവാരണ സേനയുടെയും ഫയർ ഫോഴ്സിന്‍റെയും ജില്ലാ കളക്ടർ ഉൾപ്പെടെ റവന്യൂവിലെ ഉന്നത ഉദ്യോഗസ്ഥരുടെയും വാഹനങ്ങളുടെ ആരവം. പതിനൊന്ന് മണിയോടെ സൈറൺ മുഴക്കിയുള്ള വാഹനങ്ങളുടെയും രക്ഷാപ്രവർത്തകരുടെയും പരക്കംപാച്ചിൽ. വിഴിഞ്ഞം - കളിയിക്കാവിള റോഡിലൂടെ കൂട്ടമായി പാഞ്ഞവാഹനനിര അന്താരാഷ്ട്ര തുറമുഖ കവാടവും കടന്ന് ഉള്ളിലേക്ക് പോയി. ആൾക്കാരുമായി ആംബുലൻസുകൾ ആശുപത്രകളിലേക്ക് പായുന്ന രംഗങ്ങൾ. ഹാം റേഡിയയിലൂടെയും വയർലെസ് സംവിധാനം വഴിയുള്ള മുന്നറിയിപ്പുകൾ. ഏതോ വൻ ദുരന്തം നടന്നതിന്‍റെ പ്രതീതിയിൽ വിഴിഞ്ഞം. കാര്യമറിയാതെ പേടിച്ചരണ്ട് ആകാംഷയുടെ മുൾമുനയിൽ മണിക്കൂറുകളോളം ജനം. ചുഴലിക്കാറ്റ് ദുരന്തങ്ങൾ ഉണ്ടായാൽ ജനങ്ങളുടെ ജീവനും സ്വത്തിനും സംരക്ഷണ നൽകുന്നതിന് സേനകൾ സജ്ജമെന്ന് തെളിയിക്കുന്ന ദുരന്തനിവാരണ സേന അധികൃതർ നടത്തിയ മോക് ട്രില്ലാണ് നാട്ടുകാരെ മണിക്കൂറുകളോളം ആകാംഷയിൽ നിർത്തിയത്. മുൻകൂട്ടിയുള്ള പ്രചരണമില്ലാത്തതിനാൽ നടക്കാൻപോകുന്ന കാര്യങ്ങളെക്കുറിച്ചുള്ള അറിവ് ജനത്തിനില്ലായിരുന്നു. ഫയർഫോഴ്സ് അധികൃതരും, എൻഡിആർഎഫ്, മിലിട്ടറി ഉദ്യോഗസ്ഥരും കളക്ടർ ഉൾപ്പെടെയുള്ള റവന്യൂ ഉദ്യോഗസ്ഥരും, ആരോഗ്യവിഭാഗം ജീവനക്കാരും രാവിലെ എട്ടു മണിയോടെ വിഴിഞ്ഞം പള്ളിക്കു സമീപം തമ്പടിച്ചു. പത്തു മണിയോടെ സൈക്ലോൺ കൂടുതൽ ബാധിക്കുമെന്നുറപ്പുള്ള ഭാഗങ്ങളിൽ ഫയർഫോഴ്സ് ഉദ്യോഗസ്ഥർ നിരീക്ഷണം നടത്തിആൾക്കാതെ ഒഴിപ്പിച്ചു താല് കാലിക ക്യാമ്പിലേക്ക്മാറ്റി. പതിനൊന്ന് മണിയോടെ ശക്തമായ ചുഴലിക്കാറ്റ് (സാങ്കല്പികം) തീരം തൊട്ടതായുള്ള വിവരം കാലാവസ്ഥ നിരീക്ഷണ കേന്ദ്രത്തിൽ നിന്നെത്തി. പിന്നെ നടന്നത് രക്ഷാപ്രവർത്തകരുടെ ജീവൻ മരണ പോരാട്ടം. വിഴിഞ്ഞം പള്ളിക്കു സമീപം തമ്പടിച്ചിരുന്ന സംഘം മുൻകൂട്ടി നിശ്ചയിച്ചിരുന്ന വിഴിഞ്ഞം അന്താരാഷ്ട്ര തുറമുഖം ലക്ഷ്യമാക്കി പാഞ്ഞു. പ്രതീകാത്മകരക്ഷാപ്രവർത്തനങ്ങളും മുന്നറിയിപ്പുകളും അപകടത്തിൽപ്പെട്ടവരെ ദുരന്ത സ്ഥലത്തുനിന്നു മാറ്റുന്നതുൾപ്പെടെയുള്ള പ്രവർത്തങ്ങളും ഊർജിതമായി നടന്നു. വിഴിഞ്ഞത്ത് പ്രത്യേക കൺട്രോൾ റൂമും തുറന്ന് പ്രവർത്തനം ഏകോപിപ്പിച്ചു. ഉച്ചക്ക്ഒരു മണിയോടെ മോക് ട്രില്ലിന് സമാപനമായി. തുടർന്ന് മിലിറ്ററി ഉദ്യോഗസ്ഥരും എൻഡിആർഎഫ് സംഘവും നടത്തിയ ബോധവത്്കരണ പരിപാടിക്കുശേഷം മൂന്നോടെ ദൗത്യം അവസാനിച്ചു.

മിനിമം കൂലി ഉറപ്പാക്കാൻ കേന്ദ്ര- സംസ്ഥാന സർക്കാർ ഇടപെടണം

തിരുവനന്തപുരം: ബാങ്കുകളിലെ ഹൗസ് കീപ്പിംഗ് വിഭാഗത്തിൽ കരാർ അടിസ്ഥാനത്തിൽ ജോലി ചെയ്യുന്നവർക്ക് അടിസ്ഥാന മിനിമം കൂലി ഉറപ്പാക്കാൻ കേന്ദ്ര- സംസ്ഥാന സർക്കാരുകൾ ഇടപെടണമെന്നു സ്റ്റേറ്റ് ബാങ്ക് ഓഫ് ഇന്ത്യ ഹൗസ് കീപ്പിംഗ് ആൻഡ് മെയിന്‍റനൻസ് എംപ്ലോയീസ് യൂണിയൻ പത്രസമ്മേളനത്തിൽ ആവശ്യപ്പെട്ടു. ബാങ്കുകളിൽ ഹൗസ് കീപ്പിംഗ് വിഭാഗത്തിൽ ജോലി ചെയ്യുന്ന വിവിധ ജില്ലകളിലും കോർപറേഷനിലും നഗരസഭയിലും പഞ്ചായത്തുകളിലും വ്യത്യസ്ത തരത്തിലാണ് കൂലി നൽകുന്നത്. ചിലയിടങ്ങളിൽ 12,000 രൂപ മാത്രം നൽകുന്പോൾ മറ്റു ചിലയിടങ്ങളിൽ 15, 000 രൂപ വരെ നൽകുന്നു. ലേബർ കോണ്‍ട്രാക്ട് എടുത്തിട്ടുള്ള ഏജൻസികൾ തുക തട്ടിയെടുക്കുകയാണ്. 21,000 രൂപ മുതൽ 26,000 രൂപ വരെ കരാർ ജീവനക്കാർക്കാർക്കായി ബാങ്ക് ഏജൻസികൾ എഴുതിയെടുക്കുന്പോൾ ഇവർക്ക് തുച്ഛമായ തുക മാത്രമാണ് നൽകുന്നത്. ജീവനക്കാർക്ക് തൊഴിൽ സുരക്ഷിതത്വവും ഉറപ്പാക്കാനും കേന്ദ്ര- സംസ്ഥാന സർക്കാരുകൾക്കു കഴിയുന്നില്ലെന്നു പ്രസിഡന്‍റ് അനിയൻ മാത്യു, ജനറൽ സെക്രട്ടറി എം.എം. ഹസീന, തിരുവനന്തപുരം ജില്ലാ സെക്രട്ടറി റോയ് സാംരാജ് എന്നിവർ പറഞ്ഞു.

നേമം സഹകരണ ബാങ്ക് നിക്ഷേപ തട്ടിപ്പ് : ഡയറക്ടർ ബോർഡ് അംഗങ്ങളുടെ സ്വത്ത്‌ കണ്ടുകെട്ടണമെന്ന് ആവശ്യം

നേമം: നേമം സർവീസ് സഹകരണ ബാങ്കിലെ നിക്ഷേപങ്ങൾ നഷ്ടപ്പെട്ടവർക്ക് താൽക്കാലിക ആശ്വാസം നൽകുന്നതിനു കോടികൾ മുടക്കി നിർമിച്ച ബാങ്ക് മന്ദിരം ലേലം ചെയ്യാൻ അടിയന്തിര നടപടികൾ സ്വീകരിക്കണമെന്നും, നിലവിലെ ഭരണസമിതി പിരിച്ചുവിട്ട് , അംഗങ്ങളായ നിക്ഷേപകരുടെ പ്രതിനിധികളെ ഉൾപ്പെടുത്തി അഡ്മിനിസ്ട്രേറ്റീവ് കമ്മിറ്റി രൂപീകരിക്കണമെന്നും ആവശ്യപ്പെട്ടു നേമം പ്രദേശത്തെ റസിഡൻസ് അസോസിയേഷനുകളുടെ കൂട്ടായ്മ "ഫ്രാൻസ്' മുഖ്യമന്ത്രിക്കും സഹകരണ മന്ത്രിക്കും, സഹകരണ രജിസ്ട്രാർക്കും നിവേദനം നൽകി. ചികിത്സ ചെലവു കൾക്കായി ബാങ്കിൽ നിക്ഷേപിച്ചിരുന്ന 10 ലക്ഷം രൂപ മടക്കി ലഭിക്കാത്തതിനെതുടർന്നു ചികിത്സ ലഭിക്കാതെ കഴിഞ്ഞദിവസം ഒരു നിക്ഷേപകൻ മരണപ്പെട്ടിരുന്നുവെന്നും പരാതിയിൽ പറയു ന്നു. നിക്ഷേപകരായ നിരവധി പേരുടെ ചികിത്സകളും മക്കളുടെ വിവാഹ ആവശ്യങ്ങളും മുടങ്ങിയിരിക്കുകയാണ്. സഹകരണ ഓഡിറ്റ് വിഭാഗം, കൃത്യമായ രേഖകൾ ബാങ്കിൽ സൂക്ഷിച്ചിട്ടില്ലന്നതിന്‍റെ പേരിൽ ഓഡിറ്റ് പൂർത്തിയാക്കാതെ നീട്ടിക്കൊണ്ടു പോവുകയാണ്. ബാങ്കിന്‍റെ മുൻ ഡയറക്ടർ ബോർഡ് അംഗങ്ങളെ അറസ്റ്റ് ചെയ്ത് അവരുടെ സ്വത്തു വകകൾ കണ്ടുകെട്ടാൻ വൈകരുതെന്നും നിവേദനത്തിൽ ആവശ്യപ്പെട്ടിട്ടുണ്ട്.

ഭക്തിസാന്ദ്രമായി പൈങ്കുനി ഉത്സവം ആറാട്ട്

തിരുവനന്തപുരം: നഗരത്തെ ഭക്തിയിൽ ആറാടിച്ച് ശ്രീപദ്മനാഭ സ്വാമിക്ഷേത്രത്തിലെ പൈങ്കുനി ഉത്സവത്തോടനുബന്ധിച്ചുള്ള ആറാട്ട് നടന്നു. വൈകുന്നേരം അഞ്ചിനു ക്ഷേത്രത്തിന്‍റെ പടിഞ്ഞാറെ നടവഴി പുറത്തേക്കെഴുന്നള്ളിച്ച ശ്രീപദ്മനാഭ സ്വാമിയുടെയും നരസിംഹമൂർത്തിയുടെയും തിരുവന്പാടി ശ്രീകൃഷ്ണസ്വാമിയുടെയും വിഗ്രഹങ്ങൾക്കു ക്ഷേത്രം സ്ഥാനിയൻ മൂലം തിരുനാൾ രാമവർമ അകന്പടി സേവിച്ചു. ഹരിതപട തൊപ്പിയും മരതക മാലയുമണിഞ്ഞ് ഉടവാളേന്തി നീങ്ങിയ മൂലം തിരുനാളിനൊപ്പം രാജകുടുംബാംഗങ്ങളും അണിനിരന്നു. നെറ്റിപ്പട്ടം കെട്ടിയ ഗജവീരന്മാർ, അശ്വാരൂഢ സേന, കാര്യക്കാർ, മേളക്കാർ എന്നിവർ ആറാട്ട് ഘോയാത്രയ്ക്കു മിഴിവേകി. ബാൻഡുമേളവും ചെണ്ടമേളവും അന്തരീക്ഷത്തിൽ ഉയർന്നു. ആറാട്ടു ഘോഷയാത്ര കോട്ടവാതിൽ കടന്നപ്പോൾ 21 ആചാരവെടി മുഴങ്ങി. ശംഖുമുഖം കടൽത്തീരം വരെ നീളുന്ന റോഡിനിരുവശവും ഭക്തർ ഭക്തിനിർഭരമായ മനസോടെ ആറാട്ട് ഘോഷയാത്രയെ സ്വീകരിച്ചു. ശംഖുമുഖം കടലിലെ ആറാട്ടിനു ശേഷം ദേവവിഗ്രഹങ്ങൾ തിരിച്ചെഴുന്നള്ളിച്ചതോടെ ഈ വർഷത്തെ പൈങ്കുനി ഉത്സവത്തിനു സമാപനമായി.

വിഷു വിപണമേള

നെടുമങ്ങാട്: ആര്യനാട് കുടുംബശ്രീ സിഡിഎസ് ആര്യനാട് പോസ്റ്റ് ഓഫീസ് ജംഗ്ഷനിൽ വിഷു വിപണനമേള നടത്തുന്നു. പഞ്ചായത്ത് പ്രസിഡന്‍റ് വി. വിജുമോഹൻ മേള ഉദ്ഘാടനം ചെയ്തു. സിഡിഎസ് ചെയർപേഴ്സൺ ജെ.ആർ. സുനിതകുമാരിയുടെ അധ്യക്ഷതയിൽ ക്ഷേമകാര്യ സ്റ്റാൻഡിംഗ് ചെയർപേഴ്സൺ മോളി, ആരോഗ്യ സ്റ്റാൻഡിംഗ് കമ്മിറ്റി ചെയർമാൻ ഐത്തി അശോകൻ, ജനപ്രതിനിധികളായ ഈ ഞ്ചപ്പുരി രാജേന്ദ്രൻ, സനൂജ, ഷീജ, സരസ്വതി എന്നിവർ പങ്കെടുത്തു.

റിമാന്‍ഡ് പ്രതിക്കെതിരേ വീണ്ടും പോക്‌സോ കേസ്

പേരൂര്‍ക്കട: 15 വയസുള്ള ആണ്‍കുട്ടിയെ പ്രകൃതിവിരുദ്ധ പീഡനത്തിന് ഇരയാക്കിയതിനു റിമാന്‍ഡിലായ ആള്‍ക്കെതിരേ പേരൂര്‍ക്കട സ്റ്റേഷനില്‍ മറ്റൊരു പരാതികൂടി. 14 വയസുള്ള ഒരാണ്‍കുട്ടിയുടെ രക്ഷിതാക്കളാണ് സ്റ്റേഷനില്‍ പരാതി നല്‍കിയിരിക്കുന്നത്. പേരൂര്‍ക്കട സ്വദേശി അഭിജിത്ത് (22) ആണ് പീഡനവുമായി ബന്ധപ്പെട്ട് റിമാന്‍ഡില്‍ കഴിയുന്നത്. തന്നോടു മോശമായി പെരുമാറിയെന്നു 14-കാരന്‍ വീട്ടുകാരെ അറിയിച്ചതിന്‍റെ അടിസ്ഥാനത്തിലാണ് ഇവര്‍ പരാതിയുമായി എത്തിയത്. രണ്ടാമത്തെ പരാതി എത്തിയിരിക്കുന്നത് പോക്‌സോ കേസില്‍ റിമാന്‍ഡില്‍ കഴിയുന്ന അഭിജിത്തിനെതിരേയാണെന്നും ഇയാള്‍ക്കെതിരേ ഒരുകേസുകൂടി രജിസ്റ്റര്‍ ചെയ്തിട്ടുണ്ടെന്നും പേരൂര്‍ക്കട പോലീസ് അറിയിച്ചു.

നിക്ഷേപ തുക തിരിച്ചുകിട്ടാതെ ചികിത്സ മുടങ്ങി മരിച്ച സുരേഷിന്‍റെ മൃതദേഹം സംസ്കരിച്ചു

നേമം: നേമം ബാങ്കിൽ നിക്ഷേപിച്ചിരുന്ന പണം കിട്ടാത്തതിനെ തുടർന്നു ചികിത്സ മുടങ്ങി മരിച്ച നേമം ശാന്തിവിള കുരുമി സ്വദേശി സുരേഷി (60) ന്‍റെമൃതദേഹം ഇന്നലെ ഉച്ചയ്ക്ക് ശാന്തി കവാടത്തിൽ സംസ്കരിച്ചു. കരളിൽ കുരുക്കൾ വന്നതിനെതുടർന്നു കഴിഞ്ഞ രണ്ടു വർഷമായി സുരേഷ് ചികിത്സയിലായിരുന്നു. ചികിത്സാ ചെലവിനായി മക്കൾ ലോണെടുത് നൽകിയ 10 ലക്ഷം രൂപ സുരേഷ് മറ്റൊരു ബാങ്കിൽ നിക്ഷേപിച്ചിരുന്നു. നേമം ബാങ്ക് മുൻ സെക്രട്ടറി രാജേന്ദ്രൻ ഇടപെ ട്ട് അവിടെനിന്നും നിക്ഷേപം നേമം ബാങ്കിലേയ്ക്ക് മാറ്റുകയായിരുന്നു. പിന്നീട് രോഗം മൂർഛിച്ച സുരേഷിനേയും കൊണ്ട് ആംബുലൻസിൽ ബാങ്ക് പ്രസിഡന്‍റിന്‍റെ വീട്ടിൽ കൊണ്ടുപോയതിനെ തുടർന്നു രണ്ടു തവണയായി അഞ്ചുലക്ഷം രൂപ അനുവദിച്ചിരുന്നു. ബാക്കി അഞ്ചു ലക്ഷം രൂപ കിട്ടിയിരുന്നില്ല. ഇതോടെ ശസ്ത്രക്രിയ മുടങ്ങിയ സുരേഷ് രണ്ടു ദിവസമായി സ്വകാര്യ ആശുപത്രിയിൽ ചികിത്സയിലിരിക്കെ കഴിഞ്ഞദിവസം രാവിലെയാണ് മരിച്ചത്. സുരേഷിന്‍റെ മരണത്തിൽ ബാങ്ക് അധികാരികൾക്കെതിരെ നടപടി സ്വീകരിക്കണമെന്നു നിക്ഷേപ കൂട്ടായ്മ രക്ഷാധികാരി ശാന്തിവിള മുജീബ് റഹ്‌മാനും കൺവീനർ കൈമനം സുരേഷും ആവശ്യപ്പെട്ടു.

നഴ്സിന്‍റെ മാല മോഷ്ടിച്ചെന്നു പരാതി

കാട്ടാക്കട: സ്കൂട്ടറിൽ സഞ്ചരിക്കുകയായിരുന്ന നഴ്സിന്‍റെ സ്വർണമാല പിന്നാലെ ബൈക്കിൽ എത്തിയ ആൾ പൊട്ടിച്ചു കടന്നു. കാട്ടാക്കട ചാരുപാറയ്ക്ക് സമീപം വെള്ളിയാഴ്ചയാണ് സംഭവം. പൂഴനാടുനിന്നും കാട്ടാക്കടയിലേക്ക് വരികയായിരുന്നു കുന്നനാട് കരിമണ്ണറ കോണം വീട്ടിൽ ദീപയുടെ രണ്ടര പവന്‍റെ മാലയാണ് കവർന്നത്. കാട്ടാക്കട പോ ലീസ് കേസ് രജിസ്റ്റർ ചെയ്ത് അന്വേഷണം ആരംഭിച്ചു.

ബോണക്കാട് കുരിശുമലയിൽ കുരിശിന്‍റെ വഴി നടത്തി

വിതുര: കിഴക്കിന്‍റെ കാൽവരി ബോണക്കാട് കുരിശുമലയുടെ രണ്ടാംദിന തീർഥാടനം നടന്നു. കുരിശിന്‍റെ വഴിക്ക് വെള്ളനാട് നവജീവൻ ബ്രദേഴ്സ് നേതൃത്വം നല്കി. തുടർന്നു നടന്ന ദിവ്യബലിക്ക് ആര്യനാട് ഫൊറോന വികാരി ഷൈജുദാസ് മുഖ്യകർമികനായി. ഫാ. എ.എസ്. പോൾ വചനസന്ദേശം നൽകി. കുരിശുമല റെക്ടർ റവ. ഡോ. ടി. ബിനു, ഫാ. ജോസഫ് ഷാജി, ഫാ. യോഹന്നാൻ ഒഎഫ്എം, ഫാ. റിനോയി കാട്ടിപറമ്പിൽ, ഫാ. ലിജോ മോൻ ലീൻ തുടങ്ങിയവർ സഹകാർമികരായി. ആര്യനാട് ഫെറോനായാണ് നേതൃത്വം നൽകിയത്. മൂന്നാം ദിനമായ ഇന്നു ചുള്ളിമാനൂർ ഫൊറോനയിലെ വൈദികരും വിശ്വാസികളുമാണ് നേതൃത്വം നൽകുന്നത്. ഇന്നു നടക്കുന്ന പൊന്തിഫിക്കൽ ദിവ്യബലിക്ക് നെയ്യാറ്റിൻകര രൂപത സഹമെത്രാൻ ഡോ. ഡി. സെൽവരാജൻ മുഖ്യകർമികനാകും.

വിശുദ്ധ വാരത്തിനു നാളെ തുടക്കം; ഓശാന ഞായറിനൊരുങ്ങി ദേവാലയങ്ങള്‍

തിരുവനന്തപുരം: ഓശാന ഞായറിന്‍റെ തിരുക്കര്‍മങ്ങള്‍ക്കായി ദേവാലയങ്ങള്‍ ഒരുങ്ങി. ഓശാന ഞായറിനോടനുബന്ധിച്ച് നാളെ നഗരത്തിലെ വിവിധ ദേവാലയങ്ങളില്‍ പ്രത്യേക പ്രാര്‍ഥനാശുശ്രൂഷകളും കുരുത്തോല വെഞ്ചരിപ്പും നടക്കും. ഓശാന ആചരണത്തോടെ ക്രൈസ്തവ ദേവാലയങ്ങളില്‍ വിശുദ്ധവാര തിരുക്കര്‍മങ്ങള്‍ക്കു തുടക്കമാകും. വിവിധ ദേവാലയങ്ങളില്‍ നടക്കുന്ന ഓശാനഞായര്‍ ശുശ്രൂഷകളില്‍ വിവിധ മതമേലധ്യക്ഷന്മാര്‍ കാര്‍മികത്വം വഹിക്കും. പട്ടം സെന്‍റ്് മേരീസ് മേജര്‍ ആര്‍ക്കി എപ്പാര്‍ക്കിയല്‍ കത്തീഡ്രലില്‍ ഓശാനയുടെ തിരുക്കര്‍മങ്ങള്‍ നാളെ രാവിലെ 6.30ന് ആരംഭിക്കും. മലങ്കര കത്തോലിക്കാസഭ മേജര്‍ ആര്‍ച്ച് ബിഷപ് കര്‍ദിനാള്‍ മാര്‍ ബസേലിയോസ് ക്ലീമിസ് കാതോ ലിക്കാബാവ മുഖ്യകാര്‍മികനായിരിക്കും. കുരുത്തോലവാഴ്‌വിന്‍റെ ശുശ്രുഷ, പ്രദക്ഷിണം, വിശുദ്ധ കുര്‍ബാന എന്നീ തിരുക്കര്‍മങ്ങളുണ്ടാകും. വൈകുന്നേരം അഞ്ചിനും വിശുദ്ധ കുര്‍ബാനയുണ്ടാകും. പാളയം സെന്‍റ് ജോസഫ്‌സ് മെട്രോപ്പൊളിറ്റന്‍ കത്തീഡ്രലില്‍ നാളെ രാവിലെ ഏഴിന് ആരംഭിക്കുന്ന പൊന്തിഫിക്കല്‍ ദിവ്യബലിക്കും കുരുത്തോല വെഞ്ചിരിപ്പിനും മറ്റു ഓശാന ശുശ്രൂഷകള്‍ക്കും തിരുവനന്തപുരം ലത്തീന്‍ അതിരൂപത ആര്‍ച്ച്ബിഷപ് ഡോ.തോമസ് ജെ. നെറ്റോ മുഖ്യ കാര്‍മികനായിരിക്കും. രാവിലെ 5.45നും വൈകുന്നേരം അഞ്ചിനും വിശുദ്ധ കുര്‍ബാന ഉണ്ടാകും. പിഎംജി ലൂര്‍ദ് ഫൊറോന പള്ളിയില്‍ നാളെ രാവിലെ 5.30ന് വിശുദ്ധ കുര്‍ബാന. രാവിലെ ഏഴിന് ആരംഭിക്കുന്ന ഓശാന ഞായറിന്‍റെ തിരുക്കര്‍മങ്ങള്‍ക്ക് ചങ്ങനാശേരി അതിരൂപത പ്രോട്ടോ സിഞ്ചെല്ലൂസ് ഫാ.ആന്‍റണി ഏത്തക്കാട്ട് മുഖ്യകാര്‍മികനായിരിക്കും. തിരുക്കര്‍മങ്ങളോടനുബന്ധിച്ച് കുരുത്തോല വെഞ്ചിരിപ്പും പള്ളി യിലേക്ക് പ്രദക്ഷിണവും വിശുദ്ധ കുര്‍ബാനയും ഉണ്ടാ യിരിക്കും. ഓശാന ഞായറിനോടനുബന്ധിച്ച് നാളെ രാവിലെ 11നും വൈകുന്നേരം അഞ്ചിനും 6.30നും വിശുദ്ധ കുര്‍ബാനയുണ്ടാകും. വെട്ടുകാട് മാദ്രെ ദെ ദേവൂസ് ദേവാലയത്തില്‍ ഓശാന ഞായറിന്‍റെ തിരുക്കര്‍മങ്ങള്‍ നാളെ രാവിലെ 8.30ന് റൊസാരിയന്‍ കോണ്‍വന്‍റ് ഗ്രോട്ടോയില്‍ ആരംഭിക്കും. കുരുത്തോല വെഞ്ചിരിപ്പും പ്രദക്ഷിണവും ദിവ്യബലിയും ഉണ്ടാകും. പാളയം സമാധാന രാജ്ഞി ബസിലിക്കയില്‍ നാളെ രാവിലെ 6.15ന് പ്രഭാതനമസ്‌കാരത്തോടെ ഓശാനയുടെ ശുശ്രൂഷകള്‍ ആരംഭിക്കും. പ്രഭാത നമസ്‌കാരം, കുരുത്തോല വാഴ്‌വിന്‍റെ ശുശ്രൂഷ, വിശുദ്ധ കുര്‍ബാന എന്നീ ശുശ്രൂഷകള്‍ക്ക് ബസിലിക്ക റെക്ടര്‍ ഫാ.നെല്‍സണ്‍ വലിയവീട്ടില്‍ മുഖ്യകാര്‍മികത്വം വഹിക്കും. വൈകുന്നേരം ആറിന് സന്ധ്യാ നമസ്‌കാരം. വഴുതക്കാട് കാര്‍മല്‍ ഹില്‍ ആശ്രമ ദേവാലയത്തില്‍ ഓശാന ഞായറിന്‍റെ തിരുക്കര്‍മങ്ങള്‍ നാളെ രാവിലെ 6.30ന് ആരംഭിക്കും. കുരുത്തോല വെഞ്ചിരിപ്പ്, പ്രദക്ഷിണം, ആഘോഷമായ ദിവ്യബലി എന്നിവയുണ്ടാകും. രാവിലെ ഒന്‍പതിനും 11ന് ഇംഗ്ലീഷിലും ഉച്ചകഴിഞ്ഞ് നാലിനും 5.30നും ഏഴിനും വിശുദ്ധ കുര്‍ബാനയുണ്ടാകും. മണ്ണന്തല സെന്‍റ് ജോണ്‍ പോള്‍ രണ്ടാമന്‍ മലങ്കര കാത്തലിക്കാ പള്ളിയില്‍ നാളെ രാവിലെ 6.30ന് പ്രഭാത നമസ്‌കാരം, കുരുത്തോല വാഴ്‌വ് ശുശ്രൂഷ, വിശുദ്ധ കുര്‍ബാന. മുഖ്യ കാര്‍മികന്‍ ഫാ. ജോണ്‍ കുറ്റിയില്‍. ബാര്‍ട്ടന്‍ഹില്‍ വിശുദ്ധ പത്താം പിയൂസ് ക്‌നാനായ കത്തോലിക്ക പള്ളിയില്‍ നാളെ രാവിലെ 7.30ന് വിശുദ്ധ കുര്‍ബാന, കുരുത്തോല വെഞ്ചരിപ്പ്. വികാരി ഫാ. മിഥുൻ വലിയ പുളിഞ്ചാ ക്കിൽ മുഖ്യകാർമികനാകും. പാളയം സെന്‍റ് ജോര്‍ജ് ഓര്‍ത്തഡോക്‌സ് സിറിയന്‍ കത്തീഡ്രലില്‍ ഓശാനയുടെ തിരുക്കര്‍മങ്ങള്‍ നാളെ രാവിലെ ആറിന് ആരംഭിക്കും. ഏഴിന് വിശുദ്ധ കുര്‍ബാന. വൈകുന്നേരം ആറിന് സന്ധ്യാ നമസ്‌കാരം. നെടുമങ്ങാട് വിശുദ്ധ ജെറോം മലങ്കര കത്തോലിക്കാ പള്ളിയി ൽ നാളെ രാവിലെ എട്ടിന് പ്രഭാത പ്രാര്‍ഥനയോടെ ഓശാനയുടെ ശുശ്രൂഷകള്‍ ആരംഭിക്കും. കുരുത്തോല വാഴ്‌വ്, പ്രദക്ഷിണം, വിശുദ്ധ കുര്‍ബാന എന്നീ തിരുക്കര്‍മങ്ങളുണ്ടായിരിക്കും. വലിയതുറ വിശുദ്ധ ഫ്രാന്‍സിസ് സേവ്യര്‍ പള്ളിയിൽ നാളെ രാവിലെ 6.30ന് കുരുത്തോല വെഞ്ചിരിപ്പ്, പ്രദക്ഷിണം തുടര്‍ന്ന് ദിവ്യബലി. നെയ്യാറ്റിന്‍കര അമലോത്ഭവ മാതാ കത്തീഡ്രലില്‍ ബിഷപ് ഡോ. വിന്‍സന്‍റ് സാമുവല്‍ നാളെ രാവിലെ ഏഴിന് ഓശാന തിരുകര്‍മങ്ങള്‍ക്കു മുഖ്യകാര്‍മികത്വം വഹിക്കും. കുരിശടി ജംഗ്ഷനില്‍ കുരുത്തോല ആശീര്‍വദിക്കും. തുടരന്നു നടത്തുന്ന പ്രദക്ഷിണം ബസ് സ്റ്റാന്‍ഡ് ജംഗ്ഷനിലൂടെ ആലുംമൂട്ടിലെത്തി തിരികെ കോണ്‍വന്‍റ് റോഡിലൂടെ ദേവാലയത്തില്‍ സമാപിക്കും. തുടര്‍ന്ന് ദിവ്യബലി. പാറശാല മലങ്കര കത്തോലിക്കാ രൂപതയിലെ കുടയാല്‍ ജപമാല പള്ളിയിൽ‍ രാവിലെ 8.30ന് ബിഷപ് തോമസ് മാര്‍ യൗസേബിയൂസിന്‍റെ മുഖ്യ കാര്‍മികത്വത്തില്‍ ഓശാന തിരുക്കര്‍മങ്ങള്‍ നടത്തും. പനയംമൂല ലൂര്‍ദുമാതാ ദേവാലയത്തില്‍ നടത്തുന്ന ചടങ്ങുകള്‍ക്ക് രൂപതയുടെ വികാരി ജനറാൾ മോണ്‍. ജോസ് കോന്നാ ത്തുവിള നേതൃത്വം നല്‍കും.അമ്പൂരി സെന്‍റ് ജോര്‍ജ് ഫൊറോന ദേവാലയത്തില്‍ രാവിലെ 6.30ന് ഇടവക വികാരി ഫാ.സോണി കരുവേലിന്‍റെ നേതൃത്വത്തിലാണ് ചടങ്ങുകള്‍. നെയ്യാറ്റിന്‍കര രൂപതയുടെ തീര്‍ഥാടന കേന്ദ്രങ്ങളായ ബാലരാമപുരം വിശുദ്ധ സെബസ്ത്യാനോസ് ദേവാലയത്തില്‍ ഇടവക വികാരി ഫാ.വിക്ടര്‍ എവരിസ്റ്റസും കമുകിന്‍കോട് വിശുദ്ധ അന്തോണീസ് ദേവാലയത്തില്‍ ഇടവക വികാരി ഫാ.സജി തോമസും കുരുത്തോല പ്രദക്ഷിണത്തിന് നേതൃത്വം നല്‍കും. വ്ളാത്താങ്കര സ്വര്‍ഗാരോപിത മാതാ ദേവാലയത്തില്‍ ഫാ. ജോയി സിയും തൂങ്ങാംപാറ വിശുദ്ധ കൊച്ചുത്രേസ്യ ദേവാലയത്തില്‍ വികാരി ഫാ.ജോയി മത്യാസും മേലാരിയോട് വിശുദ്ധ മദര്‍ തെരേസാ ദേവാലയത്തില്‍ ഫാ.ജോണ്‍ കെ പൊന്നൂസും നേതൃത്വം നല്‍കും. നെയ്യാറ്റിന്‍കര രൂപതയിലെ തൈലപരികര്‍മ്മ ബലി തിങ്കളാഴ്ച വൈകുന്നേരം ഏഴിനു കത്തീഡ്രല്‍ ദേവാലയത്തില്‍ നടക്കും. മാരായമുട്ടം സോവർഹിൽ ലൂഥറൻ ചർച്ചിൽ ഓശാനയുടെ തിരുകർമ്മങ്ങൾ നാളെ രാവിലെ 7. 30ന് ആരംഭിക്കും. ഘോഷയാത്രയും തുടർന്ന് ആരാധനയും ഉണ്ടായിരിക്കും.

സ്കൂട്ടർ യാത്രക്കാരൻ കെഎസ്ആർടിസി ബസിടിച്ച് മരിച്ചു

നേമം: സ്കൂട്ടർ യാത്രക്കാരൻ കെഎസ്ആർടിസി ബസിടിച്ച് മരിച്ചു. ഇന്നലെ നേമം സ്കൂളിന് മുന്നിൽ ഉച്ചയ്ക്കുശേഷം 2.15-ഓടെയായിരുന്നു അപകടമുണ്ടായത്. വെള്ളായണി കീർത്തിനഗർ തിരുവോണം വീട്ടിൽ വാടകയ്ക്ക് താമസിക്കുന്ന പരേതനായ ഹരികുമാർ-ശൈലജ ദമ്പതികളുടെ മകൻ മണികണ്ഠൻ(34) ആണ് മരിച്ചത്. അവിവാഹിതനാണ്. പ്രാവച്ചമ്പലത്തിനും നേമം സ്കൂളിനുമിടയിൽ റോഡിലെ തണ്ണിമത്തൻ തട്ട് കടയിൽ ജോലിക്കാരനായിരുന്നു. ഊണ് കഴിക്കാനായി വീട്ടിലേക്ക് പോകുമ്പോഴാണ് പിന്നിലൂടെയെത്തിയ ബസ് ഇടിച്ചത്. മൃതദേഹം മെഡിക്കൽ കോളജ് മോർച്ചറിയിൽ. കാലടിയിൽ താമസിച്ചിരുന്ന മണികണ്ഠൻ ഈയടുത്താണ് വെള്ളായണിയിലേക്ക് താമസം മാറ്റിയത്. ഏക സഹോദരി ലക്ഷ്മി.

സൗജന്യ ലാപ്പ്‌ടോപ്പ് വിതരണം

വെള്ളറട: പെരുങ്കടവിള പഞ്ചായത്ത് ജനകീയ ആസൂത്രണ പദ്ധതിപ്രകാരം നടപ്പിലാക്കിയ വാര്‍ഡുകളില്‍ നിന്നു തെരെഞെടുക്കപ്പെട്ട എസ്‌‌സി വിഭാഗം വിദ്യാര്‍ഥികള്‍ക്കുള്ള സൗജന്യ ലാപ്‌ടോപ്പ് വിതരണം സി.കെ. ഹരീന്ദ്രന്‍ എംഎല്‍എ നിര്‍വഹിച്ചു. പ്രസിഡന്‍റ് എസ്. സുരേന്ദ്രന്‍ അധ്യക്ഷത വഹിച്ചു. വൈസ് പ്രസിഡന്‍റ് എസ്. ബിന്ദു, ബ്ലോക്ക് പഞ്ചായത്ത് അംഗം ഷീലകുമാരി വികസന സ്റ്റാൻഡിംഗ് കമ്മിറ്റി ചെയര്‍മാന്‍ കാനക്കോട് ബാലരാജ്, ക്ഷേമകാര്യ സ്റ്റാൻഡിംഗ് കമ്മിറ്റി ചെയര്‍ പേഴ്‌സണ്‍ മഞ്ചു ഷാജയന്‍, ആരോഗ്യ വിദ്യാഭ്യാസ സ്റ്റാൻഡിംഗ് കമ്മിറ്റി ചെയര്‍മാന്‍ റെജികുമാര്‍, പഞ്ചായത്ത് അംഗങ്ങളായ ധന്യ പി. നായര്‍, കെ.എസ്. ജയചന്ദ്രന്‍, മിനി പ്രസാദ്, സചിത്ര സ്‌നേഹലത, വിമല, സിഡിഎസ് ചെയര്‍പേഴ്‌സന്‍ സചിത്ര, ഐസിഡിഎസ് സൂപ്പര്‍വൈസര്‍ ജിനി തുടങ്ങിയവര്‍ പ്രസംഗിച്ചു.

സദാനന്ദകുമാര്‍ അനുസ്മരണം

നെയ്യാറ്റിന്‍കര: പ്രവാസി കോണ്‍ഗ്രസ് നെയ്യാറ്റിന്‍കര ബ്ലോക്ക് കമ്മിറ്റിയുടെ ആഭിമുഖ്യത്തില്‍ നഗരസഭ മുന്‍ സ്റ്റാന്‍ഡിംഗ് കമ്മിറ്റി ചെയര്‍മാന്‍ കെ. സദാനന്ദകുമാറിന്‍റെ പത്താം ചരമവാര്‍ഷിക ദിനം ഇന്ന് ആചരിക്കും. വൈകുന്നേരം അഞ്ചിന് അമരവിള ബാങ്ക് ജംഗ്ഷനില്‍ ചേരുന്ന ചടങ്ങ് ഐഎന്‍ടിയുസി ജില്ലാ പ്രസിഡന്‍റ് വി.ആര്‍. പ്രതാപന്‍ ഉദ്ഘാടനം ചെയ്യും. പ്രവാസി കോണ്‍ഗ്രസ് ബ്ലോക്ക് പ്രസിഡന്‍റ് അമരവിള വിന്‍സന്‍റ് അധ്യക്ഷനാകുന്ന യോഗത്തില്‍ നഗരസഭ പ്രതിപക്ഷ നേതാവ് ജെ. ജോസ് ഫ്രാങ്ക്ളിന്‍ മുഖ്യപ്രഭാഷണവും ഡിസിസി ജനറല്‍ സെക്രട്ടറിമാരായ മാരായമുട്ടം സുരേഷ്, സുമകുമാരി എന്നിവര്‍ അനുസ്മരണ പ്രഭാഷണവും നടത്തും.

അടുപ്പുകൂട്ടി സമരം നടത്തി

കാട്ടാക്കട: പാചകവാതകവിലവർധനവിൽ പ്രതിഷേധിച്ച് കെഎസ്കെടിയു കുറ്റിച്ചൽ മഹിളാ ലോക്കൽ കമ്മിറ്റി സംഘടിപ്പിച്ച അടുപ്പുകൂട്ടി സമരം പഞ്ചായത്ത് മുൻ പ്രസിഡന്‍റ് എസ്. ഗീത കുമാരി ഉദ്ഘാടനം ചെയ്തു. കോട്ടൂർ സലിം, അജിത് പി. അരുകിൽ, സി. വിജയൻ, അമ്പിളി ഷാമില, പ്രീത, സൂസി, എന്നിവർ പങ്കെടുത്തു.

പൂമണി മാസ്റ്റര്‍ അനുസ്മരണം

വെള്ളറട: ജനാധിപത്യ കേരള കോണ്‍ഗ്രസിന്‍റെ നേതൃത്വത്തിൽ എള്ളുവിള പൂമണി മാസ്റ്ററുടെ ഏഴാമത് ചരമ വാര്‍ഷികം ആചരിച്ചു. പാറശാല നിയോജകമണ്ഡലം പ്രസിഡന്‍റ് ആന്‍റണി വെള്ളറട അനുസ്മരണ യോഗം ഉദ്ഘാടനം ചെയ്തു. മണ്ഡലം പ്രവര്‍ത്തക യോഗം സംസ്ഥാന കമ്മിറ്റി അംഗം റോബിന്‍ പ്ലാവിള ഉദ്ഘാടനം ചെയ്തു. കുന്നത്തുകാല്‍ മണ്ഡലം പ്രസിഡന്‍റ് സുരേഷ് കുമാര്‍ നാറാണി അധ്യക്ഷത വഹിച്ചു. സ്മൃതി ദിനാചരണ പരിപാടികളുടെ ഭാഗമായി പ്രവര്‍ത്തകര്‍ രാവിലെ കുന്നത്തുകാലില്‍ ഛായാചിത്രത്തില്‍ ഹാരാര്‍പ്പണവും പുഷ്പാര്‍ച്ചനയും നടത്തി. യോഗത്തില്‍ ജില്ലാ എക്‌സിക്യൂട്ടീവ് അംഗം സ്വാമിദാസ് മാസ്റ്റര്‍ അനുസ്മരണ പ്രഭാഷണം നടത്തി.

പോക്‌സോ കേസ് പ്രതി പിടിയില്‍

പേരൂര്‍ക്കട: മിഠായിയില്‍ എംഡിഎംഎ കലര്‍ത്തി നല്‍കി മയക്കി 13-കാരിയെ പീഡിപ്പിച്ച സംഭവത്തില്‍ കാപ്പകേസ് പ്രതിയെ പൂജപ്പുര സിഐ പി. ഷാജിമോന്‍റെ നേതൃത്വത്തിലുള്ള സംഘം പിടികൂടി. പുന്നയ്ക്കാമുകള്‍ സ്വദേശി മുഹമ്മദ് റൈസ് (19) ആണ് പിടിയിലായത്. ലഹരിയടങ്ങിയ മിഠായി സ്ഥിരമായി പ്രതി കുട്ടിക്കു നല്‍കിയിരുന്നു. ഇതു ലഭിക്കാതെ വന്നപ്പോള്‍ കുട്ടി മാനസികാസ്വാസ്ഥ്യം പ്രകടിപ്പിച്ചതിനെത്തുടര്‍ന്നു കുട്ടിയെ വൈദ്യപരിശോധനയ്ക്കു വിധേയയാക്കുകയായിരുന്നു. പെണ്‍കുട്ടി നിരവധി തവണ പീഡനത്തിനിരയായതായി വ്യക്തമായിട്ടുണ്ട്. പിടിയിലായ മുഹമ്മദ് റൈസ് 10 ക്രിമിനല്‍ക്കേസുകളില്‍ പ്രതിയാണ്. പോലീസിനെക്കണ്ടു തിരുമല ഭാഗത്തുള്ള ഒരു കെട്ടിടത്തിനു മുകളില്‍നിന്നു ചാടി രക്ഷപ്പെടാന്‍ ശ്രമിച്ച ഇയാളെ സാഹസികമായാണ് പിടികൂടിയത്. പ്രതിയെ ഇന്നു കോടതിയില്‍ ഹാജരാക്കും.

പോക്സോ കേസ് പ്രതിയെ 43 വർഷം തടവിനു ശിക്ഷിച്ചു

കാട്ടാക്കട: പ്രായപൂർത്തിയാക്കാത്ത പെൺകുട്ടിയെ വീട്ടിൽനിന്നും കൂട്ടിക്കൊണ്ടു പോയി പലതവണ ലൈംഗികമായി പീഡിപ്പിച്ച പ്രതിക്ക് 43 വർഷം കഠിനതടവും 80,000 രൂപ പിഴയും ശിക്ഷ വിധിച്ച് കാട്ടാക്കട പോക്സോ കോടതി. തിരുവനന്തപുരം മുട്ടത്തറ പുത്തൻ പാണ്ടി പൂന്തുറ പള്ളിത്തെരുവിൽ ടി സി 46/ 407 (2) ജസീന മൻസിലിൽ കുയിൽ എന്ന മുഹമ്മദ് സുഹൈൽഖാൻ (24) നെയാണ് കാട്ടാക്കട അതിവേഗ പോക്സോ കോടതി ജഡ്ജി എസ്. രമേശ് കുമാർ ശിക്ഷിച്ചത്. പിഴ തുക അതിജീവിതയ്ക്ക് നൽകണമെന്നും പിഴ ഒടുക്കിയില്ലെങ്കിൽ 20 മാസം അധിക കഠിനത കൂടി അനുഭവിക്കണമെന്നും വിധി ന്യായത്തിൽ പറയുന്നു. 2020 ജൂലൈ 17നാണ് കേസിനാസ്പദമായ സംഭവം ഉണ്ടായത്. പ്രോസിക്യൂഷനു വേണ്ടി സ്പെഷൽ പബ്ലിക് പ്രോസിക്യൂട്ടർ അഡ്വ. ഡി.ആർ. പ്രമോദ് കോടതിയിൽ ഹാജരായി. പ്രോസിക്യൂഷൻ ഭാഗത്തുനിന്നും 33 സാക്ഷികളെ വിസ്തരിക്കുകയും 39 രേഖകളും അഞ്ചു തൊണ്ടിമുതലുകളും ഹാജരാക്കുകയും ചെയ്തു. അന്നത്തെ നേമം എസ്എച്ച് ആയിരുന്ന രജീഷ് കുമാർ ആണ് അന്വേഷണം പൂർത്തിയാക്കി കോടതിയിൽ കുറ്റപത്രം സമർപ്പിച്ചത്.

അരുവിക്കര ഡാം സൈറ്റിലെ ജലസംഭരണിയിൽ ഡ്രെഡ്ജിംഗ്

നെടുമങ്ങാട്: അരുവിക്കര ഡാം സൈറ്റിലെ ജലസംഭരണിയിൽ ഡ്രെഡ്ജിംഗ് തുടങ്ങി. ഡാംമും ആവാസവ്യവസ്ഥയും സം രക്ഷിച്ചുകൊണ്ട് ഒരു മില്യൺ ക്യൂബിക് മീറ്റർ ജലം ശേഖരിക്കാനുള്ള സൗകര്യമാണ് ഒരുങ്ങുന്നത്. ‌ തിരുവനന്തപുത്തിന്‍റെ പ്രാധാന ജലസ്രോതസായ അരുവിക്കര ഡാമിലെ റിസർവോയറിൽ അടിഞ്ഞുകൂടിയ എക്കൽ മണ്ണും ചെളിയും മറ്റു പാഴ് ച്ചെടികളും നീക്കി സംഭരണശേഷി കൂട്ടാനുള്ള നടപടികൾക്കാണു തുടക്കം കുറിച്ചത്. ഡാം നിർമിതമായശേഷം ആദ്യമായാണ് ഇത്തരം നടപടികൾ സ്വീകരിക്കുന്നത്. ഏകദേശം 50 ശതമാനത്തോളം ഭാഗങ്ങളിൽ ജലം സംഭരിക്കാനുള്ള സാഹചര്യം തടസപ്പെട്ടു. ഇതുകാരണം കഴിഞ്ഞ കുറച്ച് വർഷങ്ങളായി നഗര പ്രദേശത്ത് വെള്ളമെത്തിക്കുവാൽ മറ്റു ഡാമുകളെ ആശ്രയിക്കേണ്ട അവസ്ഥയാണുള്ളത്. തുടർന്നാണ് സർക്കാർ ഡിസ്റ്റിലേഷൻ പദ്ധതി പ്രകാരം കഴിഞ്ഞ ഡിസംബർ 11ന് ഡ്രെഡ് ജിംഗ് മന്ത്രി റോഷി അഗസ്റ്റിൻ ഔദ്യോഗികമായി ഉദ്ഘാടനം ചെയ്തു. കേരള ഇറിഗേഷൻ ഇൻഫ്രാസ്ട്രക്ചർ ഡെവലപ്പ്മെന്‍റ് കോർപ്പറേഷനാണു നടത്തിപ്പു ചുമതല. കരാർ ഏറ്റെടുത്ത ഗുജറാത്ത്, അഹമ്മദാബാദ് ഡിവൈൻ ഷിപ്പിംഗ് സർവീസസ് എന്ന കമ്പനിയാണ് റിസർവോയർ നവീകരിക്കുന്നത്. അടിഞ്ഞു കൂടിയ ചെളിയും മണ്ണും നീക്കി ആഴംകൂട്ടി കൂടുതൽ ജലം സംഭരിക്കുമെന്നു ജി. സ്റ്റീഫൻ എംഎൽഎ പറഞ്ഞു. രണ്ടു ദശലക്ഷം മീറ്റർ ക്യൂബാണ് സംഭരണശേഷി. എന്നാൽ ഇതിന്‍റെ പകുതിയോളം ഉപയോഗശൂന്യമെന്നാണ് കണ്ടെത്തൽ. ആദ്യഘട്ടത്തിൽ ഡാമിന്‍റെ 18 കിലോമീറ്ററോളം ദൂരത്തിലുള്ള റിസർവോയർ ശുചിയാക്കും. കൂവക്കുടി പാലത്തിന്‍റെ ഭാഗം, കാളിയാർമൂഴി തുടങ്ങിയ പ്രദേശങ്ങൾ കേന്ദ്രീകരിച്ച് 50 ഓളം തൊഴിലാളികളാണ് ആധുനിക യന്ത്രങ്ങളുടെ സഹായങ്ങോടെ ശുചീകരണത്തിനിറങ്ങിയത്. ഒരു ദിവസം 240 മുതൽ 800 ക്യൂബിക് മീറ്റർ വരെ മണ്ണ് റിസർവോയറിൽ നിന്നു പമ്പുചെയ്തു മാറ്റും. ഏറ്റവും വലിയ പ്രത്യേകത, മണ്ണെടുക്കുമ്പോൾ വെള്ളം കലങ്ങി മലിനമാകില്ല എന്നതാണ്. ചെളിവെള്ളം പ്രത്യേക ബണ്ട് കെട്ടി തയാറാക്കിയ നാലു ചെറു കുളങ്ങളിൽ നിറച്ചു ചെളി മാറ്റിയശേഷം ജലസംഭരണിയിലേക്ക് കടത്തി വിടും. കുഴിച്ചെടുക്കുന്ന മണൽ പാസ് മുഖേന ആവശ്യകാർക്ക് നൽകും. ഓട്, ചെടിച്ചട്ടി നിർമാതാക്കൾക്കു ചെളി മണ്ണ് നൽകും. പായൽ, മറ്റു പാഴ്ച്ചെടികൾ എ ന്നിവ കേരള കാർഷിക സർവകലാശാലയുമായി സഹകരിച്ച് സാങ്കേതിക സഹായത്തോടെ വളമാക്കി കർഷകർക്ക് നൽകും, ഒരു വർഷത്തിനുള്ളിൽ ജോലികൾ പൂർത്തിയാക്കും. ഇതോ ടെ സർക്കാരിന് 713. 88 കോടി രൂപയുടെ വരുമാനം ലഭിക്കുമെന്നു കെഐഐഡിഡി അധികൃതർ അറിയിച്ചു. 1934-ൽ കരമനയാറിനു കുറുകേ നിർമിച്ച അരുവിക്കര ഡാമിൽനിന്നും 350 ദശലക്ഷം ലിറ്റർ വെള്ളം നഗരത്തിലെ കുടിവെള്ള ആവശ്യങ്ങൾക്കായി പമ്പ് ചെയ്യുന്നുണ്ട്.

ഇടിഞ്ഞാറില്‍ "ലഹരിക്കെതിരേ കായികലഹരി' പരിശീലനക്യാന്പ്

പാലോട് : ലഹരിക്കെതിരെ കായികലഹരി എന്ന സന്ദേശമുയര്‍ത്തി ഇടിഞ്ഞാര്‍ ട്രൈബല്‍ ഹൈസ്‌കൂളില്‍ ഫുട്‌ബോള്‍ പരിശീലനക്യാമ്പ് ആരംഭിച്ചു. ഗോകുലം കേരള വിമുക്തി മിഷന്‍റെയും എക്‌സൈസ് വകുപ്പിന്‍റെയും നേതൃത്വത്തിലാണ് പരിശീലന ക്യാമ്പ് സംഘടിപ്പിക്കുന്നത്. ഗോകുലം കേരള കുട്ടികള്‍ക്ക് ജെഴ്‌സികള്‍ വിതരണവും ചെയ്തു. ഡെപ്യൂട്ടി കമ്മീഷണര്‍ ഓഫ് എക്‌സൈസ് ജയരാജ് പരിപാടി ഉദ്ഘാടനം ചെയ്തു. ഗോകുലം കേരള എഫ്സി ഹെഡ് മൈക്കിള്‍ ആന്‍ഡ്രൂസ് ജഴ്‌സികള്‍ വിതരണം ചെയ്തു. പിടിഎ പ്രസിഡന്‍റ് സുബീഷ് കുമാര്‍ അധ്യക്ഷനായി. പ്രഥമാധ്യാപിക ജസ്‌ലറ്റ് സേവിയര്‍, അഭിഷേക്, ഗീതാകുമാരി, കൃപ എന്നിവര്‍ സംസാരിച്ചു. പരിശീലനകാലത്തു മികവു കാട്ടുന്ന കളിക്കാരെ ഗോകുലം കേരള ടീമിലേക്ക് സെലക്ട് ചെയ്യും.

മുട്ടത്തറയില്‍ യൂസ്ഡ് കാര്‍ വില്‍പന കേന്ദ്രത്തില്‍ തീപിടിത്തം

പൂന്തുറ: മുട്ടത്തറ കല്ലുംമൂട് ഭാഗത്ത് പ്രവര്‍ത്തിക്കുന്ന യൂസ്ഡ് കാര്‍ വില്‍പ്പന കേന്ദ്രത്തില്‍ തീപിടിത്തം. ബുധനാഴ്ച രാത്രി 10.15 ഓടെയായിരുന്നു തീപിടിത്തം. മുട്ടത്തറ സ്വദേശി ഗണേഷ്‌കുമാറിന്‍റെ ഉടമസ്ഥതയിലുളള പോപ്പുലര്‍ വെഹിക്കിള്‍സ് ആന്‍ഡ് സര്‍വീസസ് എന്ന സ്ഥാപനത്തിലെ സെക്യൂരിറ്റി ജീവനക്കാരന്‍റെ റൂമിലാണ് തീപിടിത്തമുണ്ടായത്. ഷോര്‍ട്ട് സര്‍ക്യൂട്ടായിരുന്നു തീപിടിത്തത്തിനു കാരണമെന്ന് ബന്ധപ്പെട്ട അധികൃതര്‍ പറഞ്ഞു. റൂമില്‍നിന്നും തീയും പുകയും ജീവനക്കാരന്‍ വിവരം ചാക്ക ഫയര്‍ സ്റ്റേഷനില്‍ അറിയിക്കുകയായിരുന്നു. തുടര്‍ന്നു എസ്എഫ്ആര്‍ഒ റിയാസ് ഖാന്‍റെ നേതൃത്വത്തിലുള്ള സേനാംഗങ്ങളെത്തി ഏകദേശം 30 മിനിറ്റ് സമയം ചെലവഴിച്ചാണു തീ പൂര്‍ണമായും നിയന്ത്രണ വിധേയ മാക്കിയത്. തീപിടിത്തത്തില്‍ റൂമിലുണ്ടായിരുന്ന മേശ, കസാരകള്‍, പേപ്പറുകള്‍ തുടങ്ങിയവ കത്തിനശിച്ചു. ഫയര്‍ഫോഴ്‌സ് അധികൃതരുടെ സമയോചിതമായ ഇടപെടലിനെ തുടർന്നു വന്‍ അപകടം ഒഴിവായി.

ഫോറസ്റ്റ് ഓഫീസിലേക്ക് മാർച്ചും ധർണയും നടത്തി

നെടുമങ്ങാട്: മലയോര കർഷകർക്ക് ദുരിത ജീവിതത്തിൽനിന്നും മോചനം ലഭിക്കുന്നതിനും വന്യജീവി ആക്രമണത്തിൽനിന്നും അവരെ രക്ഷിക്കുന്നതിനും കാലഹരണപ്പെട്ട നിയമങ്ങൾ കാലാനുസൃതമായി പരിഷ്‌ക്കരിക്കണമെന്നു സിഎംപി സംസ്ഥാന ജനറൽ സെക്രട്ടറി സി.പി.ജോൺ ആവശ്യപ്പെട്ടു. യുഡിഎഫ് നെടുമങ്ങാട് താലൂക്ക് കമ്മിറ്റിയുടെ നേതൃത്വത്തിൽ ചുള്ളിമാനൂർ ഫോറസ്റ്റ് ഓഫീസിലേയ്ക്ക് നടത്തിയ മാർച്ചും ധർണയും ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. യുഡിഎഫ് വാമനപുരം നിയോജക മണ്ഡലം ചെയർമാൻ കല്ലറ അനിൽകുമാർ അധ്യക്ഷത വഹിച്ചു. അടൂർ പ്രകാശ് എംപി കരകുളം കൃഷണപിള്ള, ശരത്ചന്ദ്രപ്രസാദ്, പി.കെ. വേണുഗോപാൽ, കെ.എസ്. ശബരിനാഥൻ, ആനാട് ജയൻ, ബി.ആർ.എം. ഷെഫീർ, ആനക്കുഴി ഷാനവാസ്, എം. മുനീർ, സുധീർ ഷാ പാലോട്, ബിനു എസ്. നായർ, ബി സുശീലൻ, ടി. അർജുനൻ, ജ്യോതിഷ്കുമാർ, ഉവൈസ് യാൻ, നിസാർ മുഹമ്മദ് സുൽഫി, മലയിൻകീഴ് നന്ദകുമാർ, ഇടവം ഖാലിദ്, എം.ആർ. മനോജ് തുടങ്ങിയവർ സംസാരിച്ചു.

പൈപ്പ് ലൈൻ നോക്കുകുത്തി; കോട്ടൂരിൽ ജാലക്ഷാമം രൂക്ഷം

കാട്ടാക്കട: ജല അഥോറിറ്റിയുടെ പൈപ്പ് ലൈൻ എത്തിയിട്ടും കോട്ടൂർ പ്രദേശത്തെ ഉയർന്ന പ്രദേശങ്ങളിലെ ജനങ്ങളുടെ കുടിവെള്ളക്ഷാമത്തിന് അറുതിയില്ല. വേനൽ കടുത്തതോടെ ജനങ്ങൾ വെള്ളത്തിനായി നെട്ടോട്ടമോടുകയാണ്. കോട്ടൂർ കടമാൻകുന്ന്, മൈലമൂട് പ്രദേശങ്ങളിൽ കടുത്ത ജലക്ഷാമമാണ് അനുഭവപ്പെടുന്നത്. കള്ളിയൽ, പങ്കാവ്, കിഴക്കേക്കര, മലവിള, തീപ്പച്ചാൻതേരി, എരുമക്കുഴി എന്നിവിടങ്ങളിൽ പൈപ്പുകളിൽ വെള്ളമില്ലാത്ത സ്ഥിതിയുണ്ട്. കുറ്റിച്ചൽ പഞ്ചായത്തിലെ ഏറ്റവും ഉയർന്ന പ്രദേശമാണ് കോട്ടൂർ കടമാൻകുന്ന്. കിണറുകളല്ലാതെ മറ്റു ജലസ്രോതസുകളൊന്നും ഇല്ലാത്ത ഇവിടെ എഴുപത്തിയഞ്ചിലേറെ കുടുംബങ്ങൾ താമസിക്കുന്നുണ്ട്. വേനൽ തുടങ്ങുമ്പോൾത്തന്നെ എല്ലാ കിണറുകളും വറ്റും. ഇതോടെ ശുദ്ധജലത്തിനു ക്ഷാമവും തുടങ്ങും. ഓരോപ്രാവശ്യവും കുടിവെള്ളക്ഷാമം ഉണ്ടാകുമ്പോൾ കുറ്റിച്ചൽ പഞ്ചായത്ത് അരുവിക്കര ജലസംഭരണിയിൽനിന്നു ടാങ്കർ ലോറിയിലാണ് വെള്ളമെത്തിച്ചിരുന്നത്. ടാങ്കറിൽ എത്തുന്ന കുടിവെള്ളവും കാത്ത് കടമാൻകുന്നുകാരുടെ കാത്തിരിപ്പ് ഇതേ വരെ തീർന്നിട്ടില്ല. തുടർന്ന് ഇവിടേക്ക് ജലഅതോറിറ്റിയുടെ പൈപ്പിലൂടെ കുടിവെള്ളമെത്തിക്കാൻ തീരുമാനമായി. തുടർന്ന് ഇവിടേക്ക് പൈപ്പുകൾ നീട്ടി. പിന്നാലെ കോട്ടൂർമുതൽ കടമാൻകുന്ന്വരെയുള്ള 500 മീറ്ററോളം ഭാഗത്ത് റോഡരികിലെ എഴുപത്തിയഞ്ചോളം വീടുകളിൽ ജലജീവൻ പദ്ധതിയിൽ കുടിവെള്ള കണക്ഷനും നൽകി. എന്നാൽ, ജലവിതരണം മാത്രം നടന്നില്ല. വെള്ളമില്ല; എങ്കിലും ബില്ലെത്തി പൈപ്പ് കണക്ഷൻ കിട്ടിയവർക്കു വെള്ളം നൽകാതെ ജല ഉപയോഗത്തിന് ബില്ലുകൾ നൽകിയതോടെ ജല അഥോറിറ്റിക്കെതിരേ പരാതിയുമായി ജനങ്ങൾ രംഗത്തെത്തി. ഭൂരിപക്ഷം പേരും പണം അടയ്ക്കാതെ കണക്ഷൻ വിച്ഛേദിക്കാൻ ആവശ്യപ്പെട്ട് അഥോറിറ്റിക്ക് കത്തും നൽകി. ഇതേ അവസ്ഥതന്നെയാണ് കോട്ടൂരിലെ ബാക്കി പ്രദേശത്തും. നിലവിൽ കോട്ടൂർ കള്ളിയൽ റോഡിൽ ഗ്രന്ഥശാലവരെ മാത്രമേ വല്ലപ്പോഴും വെള്ളമെത്തുകയുള്ളൂ. കാളിപ്പാറ ശുദ്ധജലപദ്ധതിയിൽനിന്നു കള്ളിക്കാട് പഞ്ചായത്തിലെ വ്‌ളാവെട്ടി വഴിയാണ് കോട്ടൂർ പ്രദേശത്ത് കുടിവെള്ളമെത്തിക്കുന്നത്. അതും അർധരാത്രിയിൽ മാത്രമെന്നു പ്രദേശത്തുകാർ പറയുന്നു. വെള്ളത്തിനായി രാത്രി മുഴുവൻ കാത്തിരിക്കണം. എന്നാൽ, ജല അഥോറിറ്റിയുടെ കമ്പൈൻഡ് വാട്ടർ സപ്ലൈ സ്‌കീമിൽ മണ്ണൂർക്കര-വീരണകാവ്-പെരുംകുളം സമഗ്ര കുടിവെള്ളപദ്ധതിയിൽനിന്നു പൂർണതോതിൽ ജലവിതരണം നടന്നാൽ കോട്ടൂരിലെ ജലക്ഷാമത്തിനു പരിഹാരമായേനെ. കുറ്റിച്ചൽ പഞ്ചായത്തിൽ 2122 പേർക്കാണ് ഈ പദ്ധതിയിൽനിന്നു കണക്ഷൻ നൽകിയിട്ടുള്ളത്. കോട്ടൂർ പ്രദേശവും ഇതിൽ ഉൾപ്പെടുന്നു. 2013-ൽ ആരംഭിച്ച 91 കോടി രൂപയുടെ പദ്ധതിയാണ് ഇഴയുന്നത്.

ടിടിഇയെ മര്‍ദിച്ചെന്നു പരാതി

തിരുവനന്തപുരം: ഐലന്‍ഡ് എക്‌സ്പ്രസില്‍ ടിടിഇയെ മര്‍ദിച്ചതായി പരാതി. ടിടിഇ ജയേഷിനാണ് മര്‍ദനമേറ്റത്. കൊല്ലംകോട് സ്വദേശിയായ രതീഷ് എന്ന സൈനികനാണു മര്‍ദിച്ചത്. തിരുവനന്തപുരം പേട്ട ആശുപത്രിയില്‍ ടിടി ഐ ചികിത്സയിലാണ്. രതീഷിനെ പോലീസ് കസ്റ്റഡിയിലെടുത്തു. ജനറൽ ടിക്കറ്റിൽ സ്ലീപ്പർ കോച്ചിൽ കയറിയതു ചോദ്യം ചെയ്തതാണ് മർദനത്തിനു കാരണമായത്. മര്‍ദ്ദിച്ചയാള്‍ക്കൊപ്പം ഉണ്ടായിരുന്ന നാല് പേര്‍ ഓടി രക്ഷപ്പെട്ടു.

പാറശാല സബ് ആർടിഒ ഓഫീസിൽ വിജിലൻസിന്‍റെ മിന്നൽ പരിശോധന

പാറശാല: പാറശാല സബ് റീജണൽ ട്രാൻസ്പോർട്ട് ഓഫീസിൽ വിജിലൻസിന്‍റെ മിന്നൽ പരിശോധന. ഇന്നലെ വൈകുന്നേരം നാലിനു ആരംഭിച്ച പരിശോധന എട്ടു മണിവരെ തുടർന്നു. ഇവിടെയുണ്ടായിരുന്ന എജന്‍റിന്‍റെ പക്കൽനിന്നും കണക്കിൽപ്പെടാത്ത 50,800/- രൂപയും, കൈവശമുണ്ടായിരുന്ന ബാഗിനുള്ളിൽ നിന്നും ഡ്രൈവിംഗ് സ്കൂളുകളുടെ പേരുകളും, ഡ്രൈവിംഗ് ടെസ്റ്റിൽ പങ്കെടുത്തവരുടെ എണ്ണവും, കൈക്കൂലി കൊടുക്കാനുള്ള തുകകളും രേഖപ്പെടുത്തിയ തുണ്ട് പേപ്പറുകളും വിജിലൻസ് പിടിച്ചെടുത്തു.

ഞാൻ അവഗണിക്കപ്പെടുന്ന എഴുത്തുകാരൻ: പ്രഫ. ജി.എൻ. പണിക്കർ

തിരുവനന്തപുരം : പ്രമുഖരായ ചില എഴുത്തുകാരുടെ പ്രശസ്തങ്ങളായ കൃതികളെ ഞാൻ വിമർശിച്ചിട്ടുണ്ട്. ആരെയും ശത്രുവായി കണ്ടിട്ടല്ല എന്‍റെ വിമർശനം. അവരുടെ കൃതികളെ കുറിച്ചുള്ള എന്‍റെ അഭിപ്രായം ഞാൻ തുറന്നു പറഞ്ഞു. അത്രമാത്രം. മലയാളത്തിലും ഇംഗ്ലീഷിലുമായി അറുപത്തി അഞ്ചിലേറെ കൃതികൾ രചിച്ചിട്ടുണ്ട്. പല അവാർഡുകമ്മിറ്റികളും പക്ഷേ എന്നെ പരിഗണിക്കാറില്ല. അവഗണിക്കപ്പെടുന്ന ഒരു എഴുത്തുകാരനാണ് ഞാൻ. അതിലെനിക്കു പരിഭവമോ പരാതിയോ ഇല്ല. പ്രഫ. ജി. എൻ. പണിക്കരുടേതാണ് ഈ വാക്കുകൾ. ഡോ. പി.സി. നായർ ഫൗണ്ടേഷന്‍റെ വരദേവി പുരസ്കാരം മുൻ ചീഫ് സെക്രട്ടറി കെ. ജയകുമാറിൽനിന്നും ഏറ്റുവാങ്ങി പ്രസംഗിക്കുകയായിരുന്നു അദ്ദേഹം. പ്രസ് ക്ലബ് ഹാളിലെ ടിഎൻജി ഹാളിലായിരുന്നു ചടങ്ങ്. വള്ളുവനാടൻ എഴുത്തുകാരെ പോലെ തിരുവനന്തപുരത്തെ സാഹിത്യകാരന്മാർക്കു അർഹമായ അംഗീകാരം ലഭിയ്ക്കാറില്ലെന്ന് അവാർഡ് ദാനം നിർവഹഹിച്ച കെ. ജയകുമാർ അഭിപ്രായപ്പെട്ടു. വിട്ടുവീഴ്ചകൾക്കു തയ്യാറാവാതെ സ്വന്തം നിലപാടുകളിൽ ഉറച്ചു നിന്നതു കൊണ്ടാണ് പ്രഫ. ജി.എൻ. പണിക്കർ പലപ്പോഴും ഒഴിവാക്കപ്പെട്ടത്. ജി.എൻ. പണിക്കരുടെ ആശയ ധീരത അദ്ദേഹത്തിന്‍റെ വ്യക്തിത്വത്തിന്‍റെ ഭാഗമാണെന്നും കെ. ജയകുമാർ ചൂണ്ടിക്കാട്ടി. ചടങ്ങിൽ കൊട്ടിയം എൻഎസ്എസ് കോളജ് പ്രിൻസിപ്പൽ പ്രഫ. നന്ത്യത്ത് ഗോപാലകൃഷ്ണൻ അധ്യക്ഷത വഹിച്ചു. പി.സി. നായർ ഫൗണ്ടേഷൻ ചെയർമാൻ അഡ്വ. പി. ബാലചന്ദ്രൻ നായർ സ്വാഗതം ആശംസിച്ചു. കാര്യദർശി കെ. രാജഗോപാൽ നന്ദിയും പറഞ്ഞു.

മാറനല്ലൂർ ക്രൈസ്റ്റ് നഗര്‍ കോളജ് മികച്ച ഹരിത കലാലയം

തിരുവനന്തപുരം: മാറനല്ലൂര്‍ പഞ്ചായത്തിലെ ഏറ്റവും മികച്ച ഹരിത കലാലയത്തിനുള്ള പുരസ്‌കാരം എ പ്ലസ് ഗ്രേഡോടുകൂടി ക്രൈസ്റ്റ് നഗര്‍ കോളജ് നേടി. നിരവധി പരിശോധനകളും സര്‍വേയും നടത്തിയാണ് മികച്ച ഹരിത കലാലയത്തെ തെരഞ്ഞെടുത്തത്. കലാലയ പരിസരം, ഓഫീസ്, ക്ലാസ് മുറികള്‍, കാന്‍റീന്‍, ശുചിമുറികള്‍, മാലിന്യസംസ്‌കരണം തുടങ്ങിയവ പരിശോധനാ വിധേയമാക്കി. മാറനല്ലൂര്‍ പഞ്ചായത്ത് ഹാളില്‍ നടന്ന ചടങ്ങില്‍ പ്രസിഡന്‍റ് സുരേഷ്‌കുമാറില്‍നിന്നും കോളജ് പ്രിന്‍സിപ്പല്‍ ഡോ. ജോളി ജേക്കബ് പുരസ്‌കാരം ഏറ്റുവാങ്ങി. ഗ്രീന്‍ പ്രോട്ടോകോള്‍ ഏറ്റവും മാതൃകാപരമായ രീതിയില്‍ പരിപാലിക്കുന്ന കലാലയമാണ് ക്രൈസ്റ്റ് നഗര്‍ കോളജെന്നു ജില്ലാ പഞ്ചായത്ത് പ്രസിഡന്‍റ് സുരേഷ്‌കുമാര്‍ പറഞ്ഞു.

യുവാവിനെ വെട്ടിപ്പരിക്കേല്‍പ്പിച്ച പ്രതി അറസ്റ്റില്‍

പൂന്തുറ: യുവാവിനെ വെട്ടിപ്പരിക്കേല്‍പ്പിച്ച കേസിലെ പ്രതിയെ പൂന്തുറ പോലീസ് അറസ്റ്റ് ചെയ്തു. കമലേശ്വരം ഗംഗാനഗര്‍ ടിസി - 63 /757 ഹൗസ് നമ്പര്‍ -91 മുഹമ്മദ് മന്‍സിലില്‍ മുഹമ്മദ് ഖനീഫയുടെ മകന്‍ ഷബീറിനെ (39) ആണ് പോലീസ് അറസ്റ്റ് ചെയ്തത്. കഴിഞ്ഞദിവസം രാത്രി 11.00 ഓടെ കമലേശ്വരം ഗംഗാനഗര്‍ സ്വദേശി വിനീഷിനെ (29) ഇയാള്‍ വീടിനു സമീപത്തുവച്ചു വെട്ടിപ്പരിക്കേല്‍പ്പിക്കുകയായിരുന്നു. ശരീരത്തില്‍ സാരമായി പരിക്കേറ്റ വിനീഷ് ആശുപത്രിയില്‍ ചികിത്സ തേടി. വിനീഷ് നല്‍കിയ പരാതിയില്‍ കേസെടുത്ത പോലീസ് നടത്തിയ അന്വേഷണത്തിലാണ് ഷബീര്‍ പിടിയിലായത്. മുന്‍ വിരോധമായിരുന്നു ആക്രമണത്തില്‍ കലാശിച്ചത്. പൂന്തുറ എസ്എച്ച്ഒ നിയാസിന്‍റെ നേതൃത്വത്തില്‍ എസ്ഐ മാരായ സുനില്‍, ജയപ്രകാശ് എന്നിവരുള്‍പ്പെട്ട പോലീസ് സംഘമാണ് പ്രതിയെ അറസ്റ്റ് ചെയ്തത്. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.

സുനിതാ ബിനു വെങ്ങാനൂർ പഞ്ചായത്ത് വൈസ് പ്രസിഡന്‍റ്

വിഴിഞ്ഞം : വെങ്ങാനൂർ പഞ്ചായത്ത് വൈസ് പ്രസിഡന്‍റായി കോൺഗ്രസിലെ മാവുവിള വാർഡു മെമ്പർ സുനിതാ ബിനുവിനെ തെരഞ്ഞെടുത്തു. ഇന്നലെ രാവിലെ പതിനൊന്നോടെ കഴക്കുട്ടം ജോയിന്‍റ് ആർടിഒ പ്രകാശ് വരണാധികാരിയായി നടന്ന തെരഞ്ഞെടുപ്പിൽ സുനിതക്ക് എട്ടും എൽഡിഎഫിലെ പ്രമീളക്ക് ഏഴും ബിജെപിയിലെ മിനി വേണുഗോപാലിന് അഞ്ചും വോട്ടുകൾ ലഭിച്ചു. സിപിഎം ഭരണത്തിലായിരുന്ന പഞ്ചായത്തിൽ പതിവിലത്തട്ടിപ്പിൽ ആരോപണ വിധേയനായ മുൻ പ്രസിഡന്‍റ് ശ്രീകുമാർ രാജിവച്ചതിനുശേഷം നടന്ന പ്രസിഡന്‍റ് തെരഞ്ഞെടു പ്പിൽ കോൺഗ്രസ് അട്ടിമറിയിലൂടെ ഭരണം പിടിച്ചെടുത്തിരുന്നു. നേരത്തെ വൈസ് പ്രസിഡന്‍റായിരുന്ന സിപിഎമ്മിലെ ചിത്രലേഖ രാജിവച്ച ഒഴിവിലായിരുന്നു ഇന്നലെ തിരഞ്ഞെടുപ്പ് നടന്നത്.

ബോണക്കാട് കുരിശുമല തീർഥാടനത്തിനു തുടക്കം

വിതുര: ബോണക്കാട് കുരിശുമലയിലെ 68-ാമത് കുരിശുമല തീർഥാടന ദിനങ്ങൾക്കു തുടക്കമായി. നെടുമങ്ങാട് റീജണൽ കോ-ഓർഡിനേറ്റർ മോൺ. റൂഫസ് പയസ്‌ലീൻ തീർഥടന പതാക ഉയർത്തി. തുടർന്നു നടന്ന പ്രരംഭ ദിവ്യബലിക്കും അദ്ദേഹം മുഖ്യകാർമികനായി. നെടുമങ്ങാട് ഫൊറോന വികാരി ഷാജി ഡി. സാവിയോ വചന സന്ദേശം നൽകി. കുരിശുമല റെക്ടർ ഡോ. ടി. ബിനു, ഫാ. റിനോയ് കാട്ടിപറമ്പിൽ ഒഎസ് ജെ, ഫാ. റ്റൈറ്റസ്, ഫാ. വിജിൻ, ഫാ. ലിജുമോൻ തുടങ്ങിയവർ സഹകാർമികരായി. ഇന്നു രാവിലെ ഒന്പതിനു പ്രാരാംഭ പ്രാർഥന, രാവിലെ 9.30ന് ബ്രദർ സുജീഷും സംഘവും (നവജീവൻ വെള്ളനാട്) നയിക്കുന്ന കുരിശിന്‍റെ വഴി. തുടർന്നു വിശുദ്ധ കുരിശിന്‍റെ ആശീർവാദം,11.30ന് തച്ചൻകോട് ഇടവക വികാരി റവ. ഫാ. യോഹന്നാൻ വിൽഫ്രഡ്‌ ഒഎഫ്എമ്മിന്‍റെ മുഖ്യ കർമികത്വത്തിൽ ആഘോഷമായ ദിവ്യബലി നടക്കും. ആര്യനാട് ഫൊറോനയിലെ എല്ലാ വൈദികരും സഹകാർമികരാകും. തുടർന്നു പറണ്ടോട് ഇടവക വികാരി റവ. എ.എസ്. ഫാ. പോൾ വചന സന്ദേശം നൽകും. ചടങ്ങുകൾക്കു ആര്യനാട് ഫൊറോന നേതൃത്വം നൽകും.

കെഎസ്‌യു-എസ്എഫ്‌ഐ സ്ഥാനാര്‍ഥികള്‍ക്ക് വിജയം

കെഎസ്‌യു പ്രതിനിധി തെരഞ്ഞെടുക്കപ്പെടുന്നത് 13 വര്‍ഷത്തിനു ശേഷം തിരുവനന്തപുരം: കേരള യൂണിവേഴ്‌സിറ്റി യൂണിയന്‍ തെരഞ്ഞെടുപ്പില്‍ ഏഴ് ജനറല്‍ സീറ്റില്‍ ആറു സീറ്റില്‍ എസ്എഫ്‌ഐ സ്ഥാനാര്‍ഥികളും ഒരു സീറ്റില്‍ കെഎസ്‌യു സ്ഥാനാര്‍ഥിയും വിജയിച്ചു. ചെയര്‍പേഴ്‌സണ്‍ സ്ഥാനത്തേക്ക് എസ്എഫ്‌ഐ സ്ഥാനാര്‍ഥി വിജയിച്ചപ്പോള്‍ ഒരു വൈസ് ചെയര്‍പേഴ്‌സണ്‍ സ്ഥാനത്തേക്ക് കെഎസ്‌യു സ്ഥാനാര്‍ഥി വിജയിച്ചു.13 വര്‍ഷത്തിനു ശേഷമാണ് ഈ സ്ഥാനത്തേക്ക് കെഎസ് യു പ്രതിനിധി തെരഞ്ഞെടുക്കപ്പെടുന്നത്. ജനറല്‍ സെക്രട്ടറി, മൂന്നില്‍ രണ്ട് വൈസ് ചെയര്‍പേഴ്‌സണ്‍മാര്‍, രണ്ട് ജോയിന്‍റ് സെക്രട്ടറിമാര്‍ എന്നീ സ്ഥാനങ്ങളിലേക്കും എസ്എഫ്‌ഐ വിജയം നേടി. സ്റ്റുഡന്‍റ്സ് കൗണ്‍സിലിലേക്ക് ഏഴ് എസ്എഫ്‌ഐ സ്ഥാനാര്‍ഥികളും മൂന്നു കെഎസ്‌യു സ്ഥാനാര്‍ഥികളും വിജയം നേടി. അക്കൗണ്ട്‌സ് കമ്മിറ്റിയിലേക്കു നാല് എസ്എഫ്‌ഐ സ്ഥാനാര്‍ഥികളും ഒരു കെഎസ്‌യു സ്ഥാനാര്‍ഥിയും വിജയം കൈവരിച്ചു. എക്‌സിക്യൂട്ടീവ് കമ്മിറ്റിയിലേക്ക് 11 എസ്എഫ്‌ഐ സ്ഥാനാര്‍ഥികളും നാല് കെഎസ്‌യു സ്ഥാനാര്‍ഥികളും വിജയിച്ചു. ചെയര്‍മാനായി അശ്വിന്‍ എസ്. നായര്‍ (തിരുവനന്തപുരം യൂണിവേഴ്‌സിറ്റി കോളജ്), ജനറല്‍ സെക്രട്ടറിയായി എ.വി. ഗോവിന്ദ് (ശൂരനാട് മില്ലത്ത് കോളജ് ഓഫ് ടീച്ചര്‍ എഡ്യൂക്കേഷന്‍), വൈസ് ചെയര്‍പേഴ്‌സണ്‍മാരായി എ.അരുണ്‍ (കൊല്ലം ടികെഎം കോളജ്), അഭിജിത്ത് രാജ് (ചാത്തന്നൂര്‍ എസ്എന്‍ കോള ജ്), ജോയിന്‍റ് സെക്രട്ടറിമാരായി ഗാഥ.ബി. രാജേഷ് (ചവറ ബിജെഎം കോളജ്), മുഹമ്മദ് കരീം (ധനുവച്ചപുരം കോളജ് ഓഫ് അപ്ലൈഡ് സയന്‍സ്) എന്നിവര്‍ വിജയിച്ചു.

തേക്കുപാറ സെന്‍റ് മേരീസ് പള്ളിയുടെ വെഞ്ചരിപ്പും മദ്ബഹാ കൂദാശയും നാളെ

അന്പൂരി: സഹൃപർവത മലമടക്കുകളിൽ കുടിയേറ്റത്തിന്‍റെ ഏഴ് പതിറ്റാണ്ടുകൾ പിന്നിടുന്ന തേക്കുപാറ സെന്‍റ് മേരീസ് പള്ളി പുതുമോടിയിൽ. നവീകരിച്ച ദേവാലയത്തിന്‍റെ കൂദാശ കർമം 12ന് ചങ്ങനാശേരി ആർച്ച് ബിഷപ് മാർ തോമസ് തറയിൽ നിർവഹിക്കും. 1930 കളിൽ മലയോര മേഖലയിൽ വന്യമൃഗത്തോടും പ്രകൃതിയോടും രോഗത്തോടും പോരാടി കേരളതമിഴ്നാട് അതിർത്തി പ്രദേശങ്ങളിൽ ഒരു പുതിയ കുടിയേറ്റം രൂപമെടുത്തിരുന്നു. ഇതിന്‍റെ കേന്ദ്രം അമ്പൂരി എന്ന പ്രദേശമായിരുന്നു. അമ്പൂരി കേന്ദ്രീകരിച്ച് നടന്ന കാർഷിക കുടിയേറ്റം പിന്നീട് സമീപ പ്രദേശങ്ങളായ മായം, തേക്കുപാറ എന്നിവിടങ്ങളിലേക്കും വ്യാപിച്ചു. 1955 ഏപ്രിൽ 29ന് വിശുദ്ധ പത്താം പീയൂസ് പാപ്പ ’മുൾത്തോരും ഫിദേലിയം’ എന്ന തിരുവെഴുത്ത് വഴി ചങ്ങനാശേരി അതിരൂപതയുടെ പ്രവർത്തനമേഖല തമിഴ്നാട്ടിലെ കന്യാകുമാരി വരെ വ്യാപിപ്പിക്കുക വഴി ഈ പ്രദേശങ്ങളിലെ ക്രൈസ്തവ വിശ്വാസ ദീപ്തി കൂടുതൽ പ്രശോഭിതമായി. തേക്കുപാറ പ്രദേശത്തേക്ക് കുടിയേറിയവർ തങ്ങളുടെ വിശ്വാസ ആവശ്യത്തിന് ആശ്രയിച്ചിരുന്നത് അമ്പൂരി പള്ളിയെ ആയിരുന്നു. 1955 മുതൽ ഇവിടെ ഞായറാഴ്ച ദിവസങ്ങളിൽ വിശുദ്ധ കുർബാന അർപ്പണം നടന്നിരുന്നു. 1961ൽ പരിശുദ്ധ കന്യമറിയത്തിന്‍റെ നാമത്തിൽ ഫാ.ജോസഫ് മാലിപറമ്പിൽ പള്ളി പണിയിക്കാൻ ആരംഭിച്ചു. 1965 ൽ തേക്കുപാറ ഒരു കുരിശുപള്ളിയായി ഉയർത്തപ്പെട്ടു. പള്ളിയോട് ചേർന്ന് 1966ൽ തിരുഹൃദയ സന്യാസിനി സമൂഹത്തിന്‍റെ മഠവും സർക്കാർ അനുമതിയോടെ ഒരു പള്ളിക്കൂടവും ആരംഭിച്ചു. മുന്നേറ്റത്തിന്‍റെയും വികസനത്തിന്‍റെയും പാതയിലേക്ക് എത്തിയ തേക്കുപാറ ഇടവക 1971ൽ ഒരു സ്വതന്ത്ര ഇടവകയായി ഉയർത്തപ്പെട്ടു. 2008ൽ പള്ളി സ്ഥാപിതമായത്തിന്‍റെ സുവർണജൂബിലി സമാപനത്തിൽ ആർച്ച് ബിഷപ് മാർ ജോസഫ് പെരുന്തോട്ടം സന്നിഹിതനായിരുന്നു. ദൈവാലയം പുനർനിർമിക്കുക എന്നത് ഈ ഇടവക സമൂഹത്തിന്‍റെ വലിയ ആഗ്രഹവും പ്രാർഥനയുമായിരുന്നു. ആറ് പതിറ്റാണ്ടുകൾക്കപ്പുറത്ത് ഒരു കുരിശ് പള്ളിമാത്രമായിരുന്ന തേക്കുപാറ എന്ന ഈ മലയോര ഗ്രാമ പള്ളി ഇന്ന് പാരമ്പര്യവും പ്രൗഡിയും തിളങ്ങുന്ന ഒരു വിശുദ്ധ ദേവാലയവും സാക്ഷ്യം നല്കുന്ന വിശ്വാസി സമൂഹവുമായി മാറിയിരിക്കുന്നു. ഇതിനു പിന്നിൽ അക്ഷീണം പ്രവർത്തിച്ച നിരവധി ആളുകളും വൈദികരും ഉണ്ട്. മുതിയാവിള വല്യച്ചൻ എന്ന് വിളിക്കപ്പെടുന്ന ബൽജിയംകാരനായ ഫാ.അദേയദാത്തൂസ് ഒസിഡി, ഫാ. ജോസഫ് മാലിപ്പറമ്പിൽ, ഫാ. ലുഷ്യസ് സിഎംഐ, ദൈവലയം പുനർനിർമിച്ച ഫാ.ടോണി നമ്പിശേരികളം എന്നീ വൈദികരുടെ അക്ഷീണ പരിശ്രമത്തിന്‍റെയും പ്രവർത്തനത്തിന്‍റെയും ഒരു നേർസാക്ഷ്യം കൂടിയാണ് പുനർനിർമിച്ച തേക്കുപാറ പള്ളി. 12ന് ഉച്ചകഴിഞ്ഞ് 2.30ന് ചങ്ങനാശേരി ആർച്ച് ബിഷപ് മാർ തോമസ് തറയിലിന് ഇടവകയിൽ കാനോനിക സ്വീകരണം നല്കും. തുടർന്ന് പള്ളി വെഞ്ചരിപ്പും മദ്ബഹാ കൂദാശാ തിരുക്കർമങ്ങളും നടക്കും. നാലിന് സ്നേഹവിരുന്നോടെ ചടങ്ങുകൾ സമാപിക്കും. ഇടവക വികാരി ഫാ.ടോണി നമ്പിശേരിക്കളം, കൈക്കാരൻമാരായ വിജയൻ ഊറ്റുകുഴി, സണ്ണി പാറയ്ക്കൽ എന്നിവരുടെ നേതൃത്വത്തിൽ ഇടവക ജനം ഒന്നാകെ പള്ളി കൂദാശക്കായി വിപുലമായ ഒരുക്കങ്ങൾ നടത്തി വരുന്നു.

കേരള സർവകലാശാല യൂണിയന്‍ തെരഞ്ഞെടുപ്പ് : യുദ്ധക്കളമായി സർവകലാശാല ആസ്ഥാനം

തിരുവനന്തപുരം: കേരള യൂണിവേഴ്‌സിറ്റി യൂണിയന്‍ തെരഞ്ഞെടുപ്പിനെത്തുടര്‍ന്ന് യുദ്ധക്കളമായി കേരള യൂണിവേഴ്‌സിറ്റി ആസ്ഥാനം. ഇന്നലെ രാവിലെ യൂണിയന്‍ തെരഞ്ഞെടുപ്പ് ആരംഭിച്ചതു മുതല്‍ യൂണിവേഴ്‌സിറ്റി ആസ്ഥാനത്ത് സംഘര്‍ഷാവസ്ഥ നിലനിന്നിരുന്നു. വൈകുന്നേരം ആറോടെ കെഎസ്‌യു-എസ്എഫ്‌ഐ പ്രവര്‍ത്തകര്‍ ചേരിതിരിഞ്ഞ് ഏറ്റുമുട്ടല്‍ ആരംഭിച്ചതോടെയാണ് സ്ഥിതിഗതികള്‍ രൂക്ഷമായത്. യൂണിവേഴ്‌സിറ്റിക്കുപുറത്തും ആശാന്‍ സ്‌ക്വയറിലുമായി കെഎസ്‌യു-എസ്എഫ്‌ഐ പ്രവര്‍ത്തകര്‍ ഏറ്റുമുട്ടി. ഇതിനിടെ പോലീസും പ്രവര്‍ത്തകരും തമ്മില്‍ ഉന്തും തള്ളും ഉണ്ടായി. പ്രവര്‍ത്തകരെ പിരിച്ചു വിടുന്നതിനായി പോലീസ് പലതവണ ലാത്തിചാര്‍ജ് നടത്തി. ലാത്തിച്ചാര്‍ജിലും കല്ലേറിലും കെഎസ്‌യു ജില്ലാ പ്രസിഡന്‍റ് ഗോപു നെയ്യാറിനും എസ്എഫ്‌ഐ പ്രവര്‍ത്തകന്‍ ധനേഷിനും ഉള്‍പ്പെടെ നിരവധി പേര്‍ക്കും പോലീസ് ഉദ്യോഗസ്ഥര്‍ക്കും പരിക്കേറ്റു. യൂണിവേഴ്‌സിറ്റി യൂണിയന്‍ തെരഞ്ഞെടുപ്പില്‍ വൈസ് ചെയര്‍മാന്‍ സ്ഥാനത്തേക്ക് ഒരാളും എക്‌സിക്യൂട്ടീവിലേക്ക് നാലുപേരും അക്കൗണ്ട്‌സ് കമ്മിറ്റിയിലേക്ക് ഒരാളും കെഎസ്‌യു പ്രതിനിധികളായി തെരഞ്ഞെടുക്കപ്പെട്ടിരുന്നു. വിജയപ്രഖ്യാപനത്തിനു ശേഷം കെഎസ്‌യു പ്രവര്‍ത്തകര്‍ ഒരുഭാഗത്തും എസ്എഫ്‌ഐ പ്രവര്‍ത്തകര്‍ മറ്റൊരു ഭാഗത്തുമായി വിജയാഹ്ലാദവും പ്രകടനവും നടത്തിയിരുന്നു. പിന്നീട് യൂണിവേഴ്‌സിറ്റി വളപ്പില്‍നിന്നു മുദ്രാവാക്യം വിളിച്ച കെഎസ്‌യു പ്രവര്‍ത്തകര്‍ക്കു നേരെ പുറത്തുനിന്നും എത്തിയ പത്തോളം വരുന്ന സംഘം ഹെല്‍മറ്റ് ഉപയോഗിച്ച് ആക്രമണം നടത്തുകയായിരുന്നുവെന്നു കെഎസ്‌യു പ്രവര്‍ത്തകര്‍ പറഞ്ഞു. പുറത്തിറങ്ങിയ കെഎസ്‌യു പ്രവര്‍ത്തകര്‍ക്കുനേരെ എസ്എഫ്‌ഐ പ്രവര്‍ത്തകര്‍ സര്‍വകലാശാല ആസ്ഥാനത്തിനുള്ളില്‍ നിന്നും കല്ലേറു നടത്തി. യൂണിവേഴ്‌സിറ്റിക്കുള്ളില്‍ നിന്നും റോഡിലേക്കു കല്ലേറു വന്നപ്പോള്‍ റോഡിലൂടെ വാഹനങ്ങള്‍ കടന്നു പോകുന്ന സമയമായിരുന്നു. റോഡിലേക്കു വന്ന കല്ലുകള്‍ കെഎസ്‌യു പ്രവര്‍ത്തകര്‍ തിരിച്ച് യൂണിവേഴ്‌സിറ്റി വളപ്പിലേക്കു എസ്എഫ്‌ഐ പ്രവര്‍ത്തകരെ ലക്ഷ്യമാക്കിയും എറിയുന്നുണ്ടായിരുന്നു. വിദ്യാര്‍ഥികളെ പിരിച്ചു വിടുന്നതിനായി പോലീസ് ലാത്തിച്ചാര്‍ജ് നടത്തുകയും നിരവധി പേര്‍ക്ക് പരിക്കേല്‍ക്കുകയും ചെയ്തു. ഒരു മണിക്കൂളോളം ഗതാഗതം സ്തംഭിച്ചു. റോഡിലേക്ക് വലിയ കല്ലുകള്‍!! പരിഭ്രാന്തരായി സാധാരണക്കാർ തിരുവനന്തപുരം: കേരള യൂണിവേഴ്‌സിറ്റി യൂണിയന്‍ തെരഞ്ഞെടുപ്പിനെത്തുടര്‍ന്ന് എസ് എഫ്‌ഐ- കെഎസ്‌യു പ്രവര്‍ത്തകര്‍ ഏറ്റുമുട്ടിയപ്പോള്‍ പരിഭ്രാന്തരായത് റോഡിലൂടെ യാത്ര ചെയ്ത സാധാരണ ആളുകള്‍. യൂണിവേഴ്‌സിറ്റിക്കു പുറത്ത് ആശാന്‍ സ്‌ക്വയറിനു സമീപം നിന്ന കെഎസ്‌യു പ്രവര്‍ത്തകരെ നേരിടുന്നതിനായി എസ്എഫ്‌ഐ പ്രവര്‍ത്തകര്‍ എറിഞ്ഞ കല്ലുകളാണ് റോഡിലേക്കു പതിച്ചത്. ഇതോടെ കാര്യങ്ങള്‍ ഒന്നും അറിയാതെ റോഡിലൂടെ യാത്ര ചെയ്തവര്‍ പരിഭ്രാന്തരായി. റോഡിലൂടെ വാഹനം ഓടിച്ചുപോയവര്‍ കണ്ടത് വലിയ കല്ലുകള്‍ റോഡിലേക്കു വന്നു വീഴുന്നതായിരുന്നു. പിന്നീട് പോലീസ് ഇതു വഴിയുള്ള ഗതാഗതം നിര്‍ത്തിവച്ചു. സ്ഥലത്ത് വന്‍ പോലീസ് സന്നാഹം തിരുവനന്തപുരം: യൂണിവേഴ്‌സിറ്റി യൂണിയന്‍ തെരഞ്ഞെടുപ്പിനെത്തുടര്‍ന്ന് ഇന്നലെ രാവിലെ മുതല്‍ വന്‍ പോലീസ് സന്നാഹത്തെയാണ് യൂണിവേഴ്‌സിറ്റി പരിസരത്ത് വിന്യസിച്ചിരുന്നത്. തിരുവനന്തപുരം ഡിസിപി വിജയ് ഭാരത് റെഡ്ഡിയുടെ നേതൃത്വത്തില്‍ നൂറുകണക്കിനു പോലീസുകാരാണു സ്ഥലത്ത് ക്യാമ്പ് ചെയ്തത്. ആക്രമം ആരംഭിച്ച വൈകുന്നേരം ആറോടെ വീണ്ടും പോലീസ് ഉദ്യോഗസ്ഥരെ ഇവിടേയ്ക്ക് വിന്യസിച്ചു. രാത്രി വൈകിയും കേരള യൂണിവേഴ്‌സിറ്റിക്കുള്ളിലും പരിസര പ്രദേശങ്ങളിലും പോലീസ് ക്യാമ്പ് ചെയ്യുകയാണ്.

ബീ കീപ്പിങ് ട്രെയിനിംഗ് ഇന്‍സ്റ്റിറ്റ്യൂട്ട് ഉദ്ഘാടനം

നേമം: സംസ്ഥാനത്ത് മൂന്ന് വര്‍ഷത്തിനുള്ളില്‍ മൂന്നര ലക്ഷം സംരംഭങ്ങള്‍ സര്‍ക്കാരിന് സൃഷ്ടിക്കാന്‍ കഴിഞ്ഞതായി മന്ത്രി പി. രാജീവ് പറഞ്ഞു. ഇതില്‍ 31 ശതമാനവും സ്ത്രീ സംരംഭകരാണ്. കേരള ഖാദി ഗ്രാമ വ്യവസായ ബോര്‍ഡ് ബീ കീപ്പിങ് ട്രെയിനിംഗ് ഇന്‍സ്റ്റിറ്റ്യൂട്ടിന്‍റെ ഉദ്ഘാടനം പാപ്പനംകോട് പൂഴിക്കുന്നില്‍ നിര്‍വഹിച്ചു സംസാരിക്കുകയായിരുന്നു അദ്ദേഹം. മന്ത്രി വി. ശിവന്‍കുട്ടി അധ്യക്ഷത വഹിച്ചു. ഖാദിബോര്‍ഡ് വൈസ് ചെയര്‍മാന്‍ പി. ജയരാജന്‍, പ്രിസണ്‍സ് ഡയറക്ടര്‍ ജനറല്‍ ബല്‍റാംകുമാര്‍ ഉപാദ്ധ്യായ, ഖാദി ബോര്‍ഡ് സെക്രട്ടറി കെ.എ. രതീഷ്, ബോര്‍ഡ് അംഗങ്ങളായ എസ്. ശിവരാമന്‍, കമലാ സദാനന്ദന്‍, കെ.പി. രണദിവെ, കെ.എസ്. രമേഷ് ബാബു, കെ. ചന്ദ്രശേഖരന്‍, സാജന്‍ തൊടുക, വാര്‍ഡ് കൗണ്‍സലര്‍ യു. ദീപിക, മേരി വിര്‍ജിന്‍ തുടങ്ങിയവര്‍ പങ്കെടുത്തു.

പള്ളിച്ചൽ പഞ്ചായത്തിൽ "പ്രത്യാശ' പരിശീലന പരിപാടി

തിരുവല്ലം: വെള്ളായണി കാർഷിക കോളജ് വിദ്യാർഥികളുടെ പ്രവൃത്തിപരിചയ പരിപാടിയുടെ ഭാഗമായി പള്ളിച്ചൽ, പഞ്ചായത്തിൽ "പ്രത്യാശ" എന്ന പേരിൽ സെമിനാറും പരിശീലന പരിപാടികളും സംഘടിപ്പിച്ചു. സ്ത്രീശാക്തീകരണം നൂതന മേഖലയിൽ എന്ന ആശയത്തിൽ പള്ളിച്ചൽ പഞ്ചായത്തിലെ മുക്കുന്നിമല, ഭഗവതിനട, തൊഴിലുറപ്പ് പദ്ധതി ഹാൾ, എന്നിവിടങ്ങളിലാണു പരിപാടികൾ നടത്തിയത്. മൂക്കുന്നിമലയിൽ നടത്തിയ പരിപാടിയിൽ വാർഡ് മെമ്പർ കെ. രാജേഷും, നരുവാമൂട് തൊഴിലുറപ്പ് പദ്ധതി ഹാളിൽ നടന്ന പരിപാടിയിൽ പള്ളിച്ചൽ പഞ്ചായത്ത് പ്രസിഡന്‍റ് കെ. രാകേഷ്, കൃഷി ഓഫീസർ എസ്. മധുസൂദനൻ നായർ, എന്നിവരും ഭഗവതിനടയിൽ നടത്തിയ പരിപാടിയിൽ വാർഡ് മെമ്പർ ശിവകുമാറും എന്നിവരും മുഖ്യതിഥികളായി. പരിപാടിയുടെ ഭാഗമായി കാർഷിക പ്രായോഗിക പരിശീലനങ്ങൾ, വനിതാ സംരംഭക പ്രദർശനങ്ങൾ, സാംസ്‌കാരിക പരിപാടികൾ എന്നിവ വിവിധ വേദികളിൽ കൃഷിഭവന്‍റെയും കാർഷിക വിദ്യാർഥികളുടെയും അധ്യാപകരുടെയും നേതൃത്വത്തിൽ നടത്തി. കാർഷിക വായ്പകൾ വിശദീകരിക്കുന്ന ബ്രോഷറുകളും കാർഷിക സഹായത്തിനായുള്ള സമർപ്പിത ആൻഡ്രോയിഡ് പ്ലാറ്റ്‌ഫോമായ കേര മൊബൈൽ ആപ്ലിക്കേഷനും കർഷകർക്ക് വിതരണം ചെയ്തു.

പോക്‌സോ കേസ്: വയോധികനെ അറസ്റ്റ് ചെയ്തു

പേരൂര്‍ക്കട: പോക്‌സോ കേസുമായി ബന്ധപ്പെട്ട് വയോധികനെ വഞ്ചിയൂര്‍ പോലീസ് അറസ്റ്റുചെയ്തു. മുട്ടത്തറ സ്വദേശി ജയകുമാര്‍ (65) ആണ് അറസ്റ്റിലായത്. ഏപ്രില്‍ എട്ടിന് രാത്രിയാണ് കേസിനാസ്പദമായ സംഭവം. വഞ്ചിയൂര്‍ ഋഷിമംഗലം റോഡിലൂടെ നടന്നുപോകുകയായിരുന്ന 15-കാരിയാണ് പീഡനശ്രമത്തിന് ഇരയായത്. ജയകുമാര്‍ അലഞ്ഞുതിരിഞ്ഞു നടക്കുന്നയാളാണെന്നു പോലീസ് പറഞ്ഞു. പരാതിയുടെ അടിസ്ഥാനത്തില്‍ വഞ്ചിയൂര്‍ സിഐ എച്ച്എസ് ഷാനിഫ്, എസ്ഐമാരായ അലക്‌സ്, ജോസ് എന്നിവരാണ് അന്വേഷണത്തിനും അറസ്റ്റിനും നേതൃത്വം നല്‍കിയത്. പ്രതിയെ കോടതിയില്‍ ഹാജരാക്കി.

പ്രകൃതിവിരുദ്ധ പീഡനം; യുവാവ് പിടിയില്‍

പേരൂര്‍ക്കട: 15 വയസുകാരനെ പ്രകൃതിവിരുദ്ധ പീഡനത്തിന് ഇരയാക്കിയ യുവാവ് പിടിയില്‍. പേരൂര്‍ക്കട സ്വദേശി അഭിജിത്ത് (22) ആണ് പിടിയിലായത്. ആഴ്ചകള്‍ക്കു മുമ്പായിരുന്നു സംഭവം. സ്റ്റേഷന്‍ പരിധിയിലെ ഒരു വീട്ടില്‍ വച്ചാണ് ഇയാള്‍ കുട്ടിയെ ലൈംഗിക വൈകൃതത്തിനിരയാക്കിയത്. പേരൂര്‍ക്കട സിഐ ശിവകുമാര്‍, എസ്ഐ മനോജ്, എഎസ്.ഐമാരായ ഷംല, സന്ധ്യ, സി പിഒമാരായ സിബി, നൗഫല്‍ എന്നിവരാണ് അന്വേഷണസംഘത്തില്‍ ഉണ്ടായിരുന്നത്. പ്രതിയെ റിമാന്‍ഡ് ചെയ്തു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]