ADVERTISEMENT

ADVERTISEMENT

വിഷു വിപണമേള

നെടുമങ്ങാട്: ആര്യനാട് കുടുംബശ്രീ സിഡിഎസ് ആര്യനാട് പോസ്റ്റ് ഓഫീസ് ജംഗ്ഷനിൽ വിഷു വിപണനമേള നടത്തുന്നു. പഞ്ചായത്ത് പ്രസിഡന്‍റ് വി. വിജുമോഹൻ മേള ഉദ്ഘാടനം ചെയ്തു.

സിഡിഎസ് ചെയർപേഴ്സൺ ജെ.ആർ. സുനിതകുമാരിയുടെ അധ്യക്ഷതയിൽ ക്ഷേമകാര്യ സ്റ്റാൻഡിംഗ് ചെയർപേഴ്സൺ മോളി, ആരോഗ്യ സ്റ്റാൻഡിംഗ് കമ്മിറ്റി ചെയർമാൻ ഐത്തി അശോകൻ, ജനപ്രതിനിധികളായ ഈ ഞ്ചപ്പുരി രാജേന്ദ്രൻ, സനൂജ, ഷീജ, സരസ്വതി എന്നിവർ പങ്കെടുത്തു.

ADVERTISEMENT

ഓശാന ഞായര്‍ തിരുക്കര്‍മങ്ങള്‍

മുട്ടട ഹോളിക്രോസ് ദേവാലയം: ഓശാന ഞായര്‍ തിരുക്കര്‍മങ്ങള്‍ ഇന്നു രാവിലെ 6.45ന് ആരംഭിക്കും. കുരിശടിയില്‍ കുരുത്തോല വെഞ്ചിരിപ്പും കുരുത്തോല പ്രദക്ഷിണവും ഉണ്ടാകും. തുടര്‍ന്ന് ദിവ്യബലി. രാവിലെ 5.45നും ഒന്‍പതിനും വൈകുന്നേരം അഞ്ചിനും ദിവ്യബലിയുണ്ടാകും. ശ്രീകാര്യം എമ്മാവൂസ് ദേവാലയം: ഓശാന ഞായര്‍ തിരുക്കര്‍മങ്ങള്‍ ഇന്നു രാവിലെ 6.30ന് ആരംഭിക്കും. കുരുത്തോല വെഞ്ചിരിപ്പും കുരുത്തോല പ്രദക്ഷിണവും ഉണ്ടാകും.രാവിലെ 9.30നും വൈകുന്നേരം 5.30നും വിശുദ്ധ കുര്‍ബാനയുണ്ടാകും. പാപ്പാട് കൊടുങ്ങാനൂര്‍ സാല്‍വേഷന്‍ ആര്‍മി ചര്‍ച്ച്: ഇന്നു രാവിലെ 9.30ന് ഓശാന തിരുക്കര്‍മ്മങ്ങള്‍ ആരംഭിക്കും. പുന്നന്‍ റോഡിലുള്ള സെന്‍റ് പീറ്റേഴ്‌സ് യാക്കോബായ സുറിയാനി ഓര്‍ത്തഡോക്‌സ് സിംഹാസന കത്തീഡ്രല്‍: ഇന്നു രാവിലെ 6.30ന് പ്രഭാത നമസ്‌കാരം. 7.30ന് ഓശാന ശുശ്രൂഷ, വിശുദ്ധ കുര്‍ബാന. വൈകുന്നേരം ആറിന് സന്ധ്യാ നമസ്‌കാരം. 6.45ന് വാദെ ദല്‍മീനോ ശുശ്രൂഷ.

തുമ്പോട് മിനി മാസ്റ്റ് ലൈറ്റ് ഉദ്ഘാടനം

കല്ലറ: കല്ലറ ഗ്രാമ പഞ്ചായത്തിലെ തുമ്പോട് മുടിപ്പുര ക്ഷേത്രത്തിൽ പുതിയതായി സ്ഥാപിച്ച മിനി മാസ്റ്റ് ലൈറ്റിന്‍റെ ഉദ്ഘാടനം ഡി.കെ മുരളി എംഎൽഎ നിർവഹിച്ചു. കല്ലറ ഗ്രാമ പഞ്ചായത്ത് പ്രസിഡന്‍റ് ജി.ജെ.ലിസി അധ്യക്ഷത വഹിച്ചു. എംഎൽഎയുടെ പ്രത്യേക വികസന ഫണ്ടിൽ നിന്നാണ് ലൈറ്റ് അനുവദിച്ചത്. ബ്ലോക്ക് വൈസ് പ്രസിഡന്‍റ് എസ്.എം.റാസി, പഞ്ചായത്ത് വൈസ് പ്രസിഡന്‍റ് എസ്.നജിൻഷ, മെമ്പർ രാധാമണി, ജി.ബേബി, ഡി.വിജയകുമാർ, ജി. വിജയൻ, ക്ഷേത്ര ഭാരവാഹികൾ തുടങ്ങിയവർ പങ്കെടുത്തു.

സാല്‍വേഷന്‍ ആര്‍മി തിരുവനന്തപുരം ഡിവിഷന്‍ വിബിഎസ് സംഗമം നടത്തി

തിരുവനന്തപുരം: പാട്ടും ഡാന്‍സും ഗെയിമുകളുമായി സാല്‍വേഷന്‍ ആര്‍മി വേളി ടൂറിസ്റ്റ് വില്ലേജില്‍ തിരുവനന്തപുരം ഡിവിഷന്‍റെ വിബിഎസ് സംഗമം സംഘടിപ്പിച്ചു. "മാനത്തൊരു സ്വര്‍ണ്ണ കൊട്ടാരം'എന്ന വിഷയത്തെ ആസ്പദമാക്കി ചര്‍ച്ചുകളില്‍ കഴിഞ്ഞ 10 ദിവസമായി നടന്ന വിബിഎസിന്‍റെ സംഗമം ഡിവിഷണല്‍ കമാന്‍ഡര്‍ ലെഫ്.കേണല്‍ ജേക്കബ് ജെ. ജോസഫ് ഉദ്ഘാടനം ചെയ്തു. ഡിവിഷണല്‍ യൂത്ത് സെക്രട്ടറി മേജര്‍ യേശുദാസ് ശാമുവേല്‍ അധ്യക്ഷനായിരുന്നു. സംസ്ഥാന യൂത്ത് സെക്രട്ടറി ക്യാപ്റ്റന്‍ അജേഷ് കുമാര്‍ ജോസഫ്, ഡിവിഷണല്‍ സെക്രട്ടറി മേജര്‍ മോത്തോ തോംപ്‌സണ്‍ തുടങ്ങിയവര്‍ പ്രസംഗിച്ചു. ഡിവിഷനിലെ 22 പള്ളികളില്‍ നിന്നുള്ള വിബിഎസ് കൂട്ടുകാരും അധ്യാപകരും സംഗമത്തില്‍ പങ്കെടുത്തു.

കേരള കോണ്‍ഗ്രസ് -എം നിയോജകമണ്ഡലം കമ്മിറ്റി ഓഫീസ് ഉദ്ഘാടനം

വെള്ളറട: കേരള കോണ്‍ഗ്രസ് -എമ്മിന്‍റെ നിയോജകമണ്ഡലം ഓഫീസ് വെള്ളറടയില്‍ പ്രവര്‍ത്തനമാരംഭിച്ചു. ജില്ലാ പ്രസിഡന്‍റ് സഹായദാസ് ഉദ്ഘാടനം നിര്‍വഹിച്ചു. കൂതാളി ഷാജി, സുനു ,ആനപ്പാറ രവി, പാറശാല രാജന്‍, ജസ്റ്റിന്‍ രാജ്, കക്കോട്ടുകുഴി വിജയന്‍, ദിവാകരന്‍ നായര്‍, ഷിജിന്‍കുമാര്‍, തൃപ്പലവൂര്‍ ജയകുമാര്‍, സുവിധാ, സുരേഷ് കുമാര്‍, ജോര്‍ജ് തേക്ക്പാറ, ജോയ് വെള്ളാര്‍, റെക്‌സോണ്‍, സലീം രാജ് തുടങ്ങിയവര്‍ പ്രസംഗിച്ചു.

പോലീസുകാർ വീടുവച്ച് നൽകി

നെടുമങ്ങാട്: വീട് വച്ച് നൽകി പോലീസ് മാതൃകയായി. ആര്യനാട് പഞ്ചായത്തിലെ തേവിയാരുകുന്ന് വാർഡിലെ റോഡരികത്ത് വീട്ടിൽ കെ.ഭവാനിയമ്മ(80)മകൻ രജീഷ് കുമാർ(40)എന്നിവർക്കാണ് പോലീസ് വീട് വച്ച് നൽകിയത്. ഇക്കഴിഞ്ഞ ഫെബ്രുവരി ആറിന് പുതുതായി ചുമതലയേറ്റ റൂറൽ എസ്പി കെ.എസ്.സുദർശനൻ ആര്യനാട് തേവിയാരുകുന്ന് ട്രൈബൽ സെറ്റിൽമെന്‍റിൽ നടത്തിയ അദാലത്തിലാണ് പണിപൂർത്തിയാകാത്ത വീട്ടിൽ ദുരിതാവസ്ഥയിൽ കഴിയുന്ന വൃദ്ധയായ ഭവാനിയുടെ വീട് ശ്രദ്ധയിൽപ്പെട്ടത്. സന്ദർശന വേളയിൽത്തന്നെ റൂറൽ എസ്.പി ഭവാനിയുടെ വീട് പുതുക്കി പണിയാൻ നിർദ്ദേശിക്കുകയായിരുന്നു. എസ്പിയുടെ നിർദ്ദേശപ്രകാരം കാട്ടാക്കട ഡി.വൈ.എസ്.പി എൻ.ഷിബു,ആര്യനാട് എസ്.എച്ച്.ഒ വി.എസ്.അജീഷ് എന്നിവരുടെ നേതൃത്വത്തിൽ വീട് നിർമാണത്തിനുള്ള ശ്രമം തുടങ്ങി. ഏകോപന ചുമതല ആര്യനാട് സ്റ്റേഷനിലെ സിവിൽ പൊലീസ് ഓഫീസർ എം.എസ്.ഷിബുവിനും നൽകി. രണ്ട് മുറികളും അടുക്കളയും ശുചിമുറിയും ഉൾപ്പടെ മനോഹരമായ ചെറിയ വീട് യാഥാർത്ഥ്യമാക്കാൻ സാമൂഹ്യ പ്രവർത്തകനും കരാറുകാരനുമായ പുനലാൽ സ്വദേശി രാജനും കൂടി കൈകോർത്തതോടെ യാണ് വീടെന്ന സ്വപ്നം യാഥാർത്ഥ്യമായത്. തുടർന്ന് താക്കോൽ റേഞ്ച് ഡിഐജി എസ്.അജിതാബീഗം ഭവാനിയ്ക്ക് കൈമാറി. റൂറൽ എസ്.പി കെ.എസ്.സുദർശനൻ അദ്ധ്യക്ഷത വഹിച്ചു. കാട്ടാക്കട ഡിവൈഎസ്പി എൻ.ഷിബു,ആര്യനാട് ഗ്രാമ പഞ്ചായത്ത് പ്രസിഡന്‍റ് വി.വിജുമോഹൻ തുടങ്ങിയവർ സംബന്ധിച്ചു.

വരും എംഎല്‍എ ഫണ്ട് വീണ്ടും; പാപ്പാട് കുളം നവീകരിക്കും

പേരൂര്‍ക്കട: പാപ്പാട് കുളം നവീകരിക്കുമെന്ന് വാര്‍ഡ് കൗണ്‍സിലറുടെ ഉറപ്പ്. വാഴോട്ടുകോണം വാര്‍ഡില്‍ ഉള്‍പ്പെടുന്ന പാപ്പാട് കുളമാണ് രണ്ടുതവണ നവീകരണം നടത്തിയിട്ടും ചുറ്റുവേലി ഇടിഞ്ഞ് കാടുകയറി കിടക്കുന്നത്. 2020-ലും 2022-ലുമാണ് എംഎല്‍എ ഫണ്ടായ 17 ലക്ഷവും 42 ലക്ഷവും വിനിയോഗിച്ച് നവീകരിച്ചത്. കുളത്തിലെ പായലുകള്‍ നീക്കുക, കാടുകയറിക്കിടക്കുന്ന പരിസരം വൃത്തിയാക്കി ഇന്‍റര്‍ലോക്ക് സ്ഥാപിക്കുക, തെരുവുവിളക്കുകള്‍ സ്ഥാപിക്കുക, ചുറ്റുവേലി കെട്ടുക എന്നിവയ്ക്കാണ് ഫണ്ട് അനുവദിച്ചിരുന്നത്. ഏറ്റവുമൊടുവില്‍ നവീകരണം നടത്തിയശേഷം ഒന്നരവര്‍ഷമായി കുളം നാശോന്മുഖമായി കിടക്കുകയാണ്. കുളത്തിനു സമീപം ഒരു അങ്കണവാടി പ്രവര്‍ത്തിക്കുന്നുണ്ട്. കുട്ടികള്‍ ഇഴജന്തുക്കളെ ഭയന്നുവേണം ഇവിടെ കഴിയാന്‍ എന്നതാണ് അവസ്ഥ. കുളത്തിന്‍റെ കരകളില്‍ നിന്ന് മണ്ണിടിഞ്ഞ് കുളത്തിലേക്ക് വീണുകിടക്കുകയാണ്. കരാറുകാര്‍ പണി ശാസ്ത്രീയമായി നടത്താത്തതാണ് വശങ്ങള്‍ കാരണമെന്നാണ് വാര്‍ഡ് കൗണ്‍സിലര്‍ റാണി വിക്രമന്‍ പറയുന്നത്. നഗരസഭയുടെ ഭരണം അവസാനിക്കുന്നതിനു മുമ്പുതന്നെ ആവശ്യമായ ഫണ്ട് വകയിരുത്തി കുളം വൃത്തിയും വെടിപ്പുമുള്ളതാക്കി മാറ്റുമെന്ന് അവര്‍ ഉറപ്പു പറഞ്ഞു. ആവശ്യമായ ഫണ്ട് വകയിരുത്തുമെന്ന് എംഎല്‍എയുടെ ഓഫീസും അറിയിച്ചു.

ദു:ഖവെള്ളിയാഴ്ച്ച പാളയത്ത് സംയുക്ത കുരിശിന്‍റെ വഴി

തിരുവനന്തപുരം : 18ന് ദുഃഖവെള്ളിയാഴ്ച രാവിലെ 6.45 ന് പാളയത്ത് വിശുദ്ധ കുരിശിന്‍റെ വഴി സംഘടിപ്പിക്കും. ലത്തീൻ, സീറോ മലബാർ, മലങ്കര കത്തോലിക്ക, ക്നനായ സഭകളുടെ സംയുക്ത ആഭിമുഖ്യത്തിൽ പാളയം സെന്‍റ് ജോസഫ് കത്തീഡ്രലിൽ നിന്നാരംഭിച്ച്, വിജെടി ഹാൾ, യൂണിവേഴ്സിറ്റി ചുറ്റി പാളയത്ത് സമാപിക്കുന്നു. കർദിനാൾ മാർ ബസേലിയോസ് ക്ലീമിസ് കതോലിക്കാബാവ പ്രാരംഭ സന്ദേശവും ആർച്ച് ബിഷപ് തോമസ് ജെ. നെറ്റോ സമാപന സന്ദേശവും നല്കും. തിരുവനന്തപുരം ലത്തീൻ, തിരുവനന്തപുരം മലങ്കര, ചങ്ങനാശേരി, കോട്ടയം എന്നീ അതിരൂപതകളിലെ നൂറുകണക്കിനു വിശ്വാസികളും സന്യസ്തരും വൈദികരും പങ്കുചേരും. പാളയം കത്തീഡ്രൽ വികാരി മോണ്‍. വിൽഫ്രഡ് എമിലിയാസ്, ചങ്ങനാശേരി അതിരൂപതാ വികാരി ജനറലും ലൂർദ് വികാരിയുമായ മോണ്‍ ജോണ്‍ തെക്കേക്കര, പാളയം സമാധാനരാജ്ഞി ബസിലിക്ക റെക്ടർ ഫാ. നെൽസണ്‍ വലിയവീട്ടിൽ, പത്താംപീയുസ് ക്നാനായ കത്തോലിക്ക പള്ളി വികാരി ഫാ. മിഥുൻ വലിയ പുളിഞ്ചാക്കിൽ, ഷാജൻ മാർട്ടിൻ, ജെറോണ്‍ ഏലിയാസ്, ജെയിംസ് ഒഴുങ്ങാലിൽ, ആന്‍റണി കെ.ജെ.കൈതപ്പറന്പിൽ, സേവ്യർ സെബാസ്റ്റ്യൻ അനുഗ്രഹ്, ജിജി എം.ജോണ്‍, ജേക്കബ് മാത്യു എന്നിവർ ക്രമീകരണങ്ങൾക്ക് നേതൃത്വം നല്കും.

പാലത്തില്‍ കാല്‍നടയാത്രികര്‍ക്ക് ഭീഷണിയായി മെറ്റല്‍ പ്ലേറ്റ് !

പേരൂര്‍ക്കട: വട്ടിയൂര്‍ക്കാവ് മരുതംകുഴി പുതിയ പാലത്തില്‍ ഫുട്പാത്ത് ആരംഭിക്കുന്ന ഭാഗത്ത് യാത്രികര്‍ക്കു ഭീഷണിയായി മെറ്റല്‍ പ്ലേറ്റ്. തറനിരപ്പില്‍ നിന്ന് ഉയര്‍ന്ന് വളഞ്ഞുനില്‍ക്കുന്ന പ്ലേറ്റില്‍ തട്ടിയാല്‍ അപകടം ഉറപ്പാണ്ട്. ഫുട്പാത്തിലേക്ക് കയറുന്നവര്‍ ഇതില്‍തട്ടി റോഡിലേക്ക് വീഴാനുള്ള സാദ്ധ്യത കൂടുതലാണ്. വര്‍ഷങ്ങള്‍ക്കുമുമ്പ് റോഡുവശത്ത് അലങ്കാരലൈറ്റ് ഉറപ്പിക്കുന്നതിന്‍റെ ഭാഗമായി നിര്‍മിച്ചതാണ് മെറ്റല്‍ പ്ലേറ്റ്. ലൈറ്റും ബാക്കി ഭാഗങ്ങളും നശിച്ചുപോയെങ്കിലും ലോഹഭാഗം ഇപ്പോഴും അവശേഷിക്കുന്നു. പാലത്തില്‍ തെരുവുവിളക്കുകള്‍ പ്രകാശിക്കാതെ വരുന്ന വേളകളിലാണ് അപകടസാദ്ധ്യത കൂടുതല്‍.

കെഎസ്ആര്‍ടിസി സർവീസുകള്‍ വെട്ടിക്കുറച്ചു, യുഡിഎഫ് പ്രതിഷേധ ധര്‍ണ നടത്തി

പാലോട് : പെരിങ്ങമ്മല തെന്നൂര്‍ റൂട്ടിലെ കെഎസ്ആര്‍ടിസി ബസ് സര്‍വീസുകള്‍ വെട്ടിക്കുറച്ചതില്‍ പ്രതിഷേധിച്ച് യുഡിഎഫ് പെരിങ്ങമ്മല മണ്ഡലം കമ്മിറ്റി ഡിപ്പോയിലേക്ക് മാര്‍ച്ച് നടത്തി. ഇടിഞ്ഞാര്‍ അഗ്രിഫാം, തെന്നൂര്‍, ഞാറനീലി എന്നിവടങ്ങളിലേക്ക് സർവീസ് നടത്തിയിരുന്ന 20ലധികം സര്‍വീസുകളാണ് നിര്‍ത്തലാക്കിയത്. സ്വകാര്യബസുകളെ സഹായിക്കാനാണ് ഈ നീക്കമെന്ന് സമരക്കാര്‍ പറയുന്നു. പൊതുജനം കഷ്ടപ്പെടുകയാണ്. സര്‍ക്കാര്‍ ഓഫീസുകളിലെത്തേണ്ടവര്‍ക്ക് സമയത്ത് എത്താന്‍ കഴിയുന്നില്ല. ഡിപ്പോ അടച്ചുപൂട്ടുന്നതിനുള്ള ചില സംഘടനകളുടെ ഗൂഡശ്രമമാണ് ഇതിന് പിന്നിലെന്ന് ആരോപണമുണ്ട്. മാര്‍ച്ചും ധര്‍ണയും ഡിസിസി വൈസ് പ്രസിഡന്‍റ് സുധീര്‍ഷ ഉദ്ഘാടനം ചെയ്തു. യു.ഡി.എഫ് പെരിങ്ങമ്മല പഞ്ചായത്ത് കമ്മിറ്റി ചെയര്‍മാൻ സലിം പള്ളിവിള അധ്യക്ഷത വഹിച്ചു. കണ്‍വീനര്‍ കൊച്ചുവിള അന്‍സാരി, ലീഗ് ജില്ല ജനറല്‍ സെക്രട്ടറി നിസാര്‍ മുഹമ്മദ് സുല്‍ഫി, ബ്ലോക്ക് കോണ്‍ഗ്രസ് പ്രസിഡന്‍റ് നന്ദിയോട് ബി.സുശീലന്‍, ഇടവം ഖാലിദ്, ബി. പവിത്രകുമാര്‍, പി.എന്‍‌.അരുണ്‍കുമാര്‍, താന്നിമൂട് ഷംസുദീന്‍, ഇല്യാസ്, ഗീതാപ്രിജി, കൊച്ചുകരിക്കകം നൗഷാദ് എന്നിവര്‍ പ്രസംഗിച്ചു.

കോട്ടുകോണം സിഎസ്ഐ ഡിസ്ട്രിക്ട് ചർച്ച് 129-ാം വാർഷികാഘോഷം

നിലമാമൂട്: കോട്ടുക്കോണം സിഎസ്ഐ ഡിസ്ട്രിക്ട് ചര്‍ച്ചിന്‍റെ 129-ാമത് വാര്‍ഷികവും സഭാദിനാഘോഷങ്ങളുടെ ഉദ്ഘാടനവും ഇന്നു രാവിലെ എട്ടിന് ഡിസ്ട്രിക്ട് ചെയര്‍മാന്‍ റവ. സി. ജപരാജിന്‍റെ അധ്യക്ഷതയില്‍ മോട്ടിവേഷന്‍ സ്പീക്കര്‍ നോബിള്‍ മില്ലര്‍ ഉദ്ഘാടനം ചെയ്യും. 20ന് സഭാദിനാഘോഷയാത്രയോടു കൂടി സമാപിക്കും. ഇന്നു രാവിലെ 7.45ന് ഓശാന പെരുന്നാള്‍ ആരാധനയും സഭാദിന ഘോഷയാത്രയുടെയും തണല്‍ പാലിയേറ്റീവ് കെയര്‍ യൂണിറ്റിന്‍റെയും ഉദ്ഘാടനവും നടക്കും. 10ന് മെഡിക്കല്‍ ക്യാമ്പ്. വൈകുന്നേരം മൂന്നു മുതല്‍ വിബിഎസ് സമാപന സമ്മേളനവും ഘോഷയാത്രയും. തുടര്‍ന്ന് വിവിധ കലാപരിപാടികളും. നാളെ മുതല്‍ 16 വരെ തണല്‍ പാലിയേറ്റീവ് കെയര്‍ യൂണിറ്റിന്‍റെ ആഭിമുഖ്യത്തില്‍ ഭവന സന്ദര്‍ശനവും സഹായവിതരണവും. 17ന് വൈകുന്നേരം ഏഴിനു റവ. ഡോ.സി.ഐ. ഡേവിസ് ജോയി നയിക്കുന്ന കണ്‍വന്‍ഷന്‍. 18ന് രാവിലെ ഏഴിന് ദുഃഖവെള്ളി ആരാധന കണ്‍വന്‍ഷന്‍‌. വൈകുന്നേരം ഏഴിനു ഇവാ: ലീനുവിന്‍റെ അധ്യക്ഷതയില്‍ ക്യാപ്റ്റന്‍ സാജന്‍ ജോണിന്‍റെ നേതൃത്വത്തില്‍ കണ്‍വന്‍ഷന്‍ യോഗം. 19ന് വൈകുന്നേരം ഏഴിന് റവ. ജെ.എല്‍. ബിജോയിയുടെ അധ്യക്ഷതയില്‍ കണ്‍വന്‍ഷന്‍‌. 20ന് രാവിലെ എട്ടിന് 129ാമത് സഭാദിനാഘോഷ സമാപനത്തില്‍ ഡിസ്ട്രിക്ട് റവ. സി. രാജീവ് മുഖ്യസന്ദേശം നല്‍കും. വൈകുന്നേരം 6.30ന് സഭാദിന ഘോഷയാത്ര.

അംബേദ്കറുടെ 134-ാം ജന്മവാര്‍ഷികം; ഇന്ന് പദയാത്ര

തിരുവനന്തപുരം: ഇന്ത്യന്‍ ഭരണഘടനയുടെ എഴുപത്തിഅഞ്ചാം വാര്‍ഷികാഘോഷത്തിന്‍റെ ഭാഗമായും ഭരണഘടനാ ശില്‍പി ഡോ.ബി.ആര്‍. അംബേദ്ക്കറുടെ 134-ാം ജന്മവാര്‍ഷികത്തോടനുബന്ധിച്ചും നെഹ്രു യുവകേന്ദ്രയുടെ നേതൃത്വത്തില്‍ പദയാത്ര സംഘടിപ്പിക്കും. ഇന്നു രാവിലെ എട്ടിന് കവടിയാര്‍ വിവേകാനന്ദ പ്രതിമക്ക് മുന്നില്‍ നിന്നും ആരംഭിക്കുന്ന പദയാത്ര വെള്ളയമ്പലം അയ്യന്‍കാളി പ്രതിമക്ക് മുന്നില്‍ സമാപിക്കും. ഗവര്‍ണര്‍ രാജേന്ദ്ര വിശ്വനാഥ് അര്‍ലേര്‍ക്കര്‍ ഉദ്ഘാടനം ചെയ്യും. മന്ത്രി ജി.ആര്‍. അനില്‍ അധ്യക്ഷത വഹിക്കുന്ന ചടങ്ങില്‍ അഡ്വ. വി.കെ. പ്രശാന്ത് എംഎല്‍എ, മുന്‍ കേന്ദ്ര സഹമന്ത്രി വി. മുരളീധരന്‍, നെഹ്രു യുവകേന്ദ്ര സ്റ്റേറ്റ് ഡയറക്ടര്‍ എം.അനില്‍കുമാര്‍ തുടങ്ങിയവര്‍ പങ്കെടുക്കും.

ഡ്രോണിന്‍റെ സാന്നിധ്യം; പോലീസ് കേസെടുത്തു

പേരൂര്‍ക്കട: ഫോര്‍ട്ട് സ്റ്റേഷന്‍ പരിധിയില്‍ ഡ്രോണിന്‍റഎ സാന്നിധ്യം കണ്ടെത്തിയതുമായി ബന്ധപ്പെട്ട് പോലീസ് കേസെടുത്തു. കഴിഞ്ഞ ദിവസം രാത്രിയാണ് പത്മനാഭസ്വാമിക്ഷേത്രത്തിന്‍റെ കിഴക്കേനട ഭാഗത്ത് ഡ്രോണ്‍ കണ്ടെത്തിയത്. വേഗത്തില്‍ ഡ്രോണ്‍ കുളത്തിനു സമീപത്തുകൂടി കടന്നുപോകുകയായിരുന്നു. 60 അടി ഉയരത്തിലായിരുന്നു ഡ്രോണ്‍ പറന്നതെന്നു ഫോര്‍ട്ട് സിഐ ശിവകുമാര്‍ പറഞ്ഞു. പത്മനാഭസ്വാമിക്ഷേത്ര പരിസരം ഇത്തരം ഉപകരണങ്ങള്‍ ഉപയോഗിക്കുന്നതിന് നിയന്ത്രണമുള്ള സ്ഥലമാണ്. വിവാഹാവശ്യവുമായി ബന്ധപ്പെട്ടോ മറ്റോ ആണ് ഡ്രോണ്‍ ഉപയോഗിച്ചിട്ടുള്ളതെന്നാണ് കരുതുന്നത്. ഡ്രോണിന്‍റെ ഉറവിടം കണ്ടെത്താനുള്ള ശ്രമം പോലീസ് ഊര്‍ജ്ജിതമാക്കിയിട്ടുണ്ട്.

മഹേശ്വരം ശിവപാര്‍വതി ക്ഷേത്രത്തില്‍ വിഷു കണിയും കൈനീട്ടവും

പാറശാല: മഹേശ്വരം ശിവ പാര്‍വതി ക്ഷേത്രത്തില്‍ നാളെ വിഷുക്കണി ആചരിക്കും. ഇന്ന് രാത്രി അത്താഴപൂജയ്ക്കു ശേഷം ക്ഷേത്ര മേല്‍ശാന്തി കുമാര്‍ മഹേശ്വരവും മറ്റു കീഴ്ശാന്തി മാരും ചേര്‍ന്നു ശ്രീകോവിലിനു മുന്നിലുള്ള നമസ്‌കാര മണ്ഡപത്തില്‍ ഓട്ടു ഉരുളിയില്‍ കണിക്കോപ്പ് ഒരുക്കും. നാളെ പുലര്‍ച്ചെ ക്ഷേത്ര മഠാധിപതി സ്വാമി മഹേശ്വരാനന്ദ സരസ്വതിയുടെ സാനിധ്യത്തില്‍ ക്ഷേത്ര നടതുറന്ന് ശ്രീകോവിലില്‍ എത്തി മേല്‍ശാന്തി നാളികേരമുറിയില്‍ നെയ്ത്തിരി തെളിയിച്ചു ഒരുക്കിവച്ചു കണിക്കോപ്പുകള്‍ ഉയര്‍ത്തിപ്പിടിച്ചു ക്ഷേത്ര മഠാധിപതി ശിവപാര്‍വതിമാരെ കണികാണിക്കും. അതോടുകൂടി വിഷു കണി ദര്‍ശനത്തിനു തുടക്കമാകും. തുടര്‍ന്ന് ദര്‍ശനത്തിനെത്തുന്ന ഭക്ത ജനങ്ങള്‍ക്ക് ദീപാരാധനയ്ക്കു ശേഷം പൂജിച്ച നാണയ തുട്ടുകള്‍ വിഷു കൈനീട്ടമായി നല്‍കുമെന്നും ക്ഷേത്ര ട്രസ്റ്റ് കമ്മിറ്റി അറിയിച്ചു.

കരാട്ടേചാമ്പ്യൻഷിപ്പ്: ആറ്റിങ്ങൽ ജേതാക്കൾ

തിരുവനന്തപുരം: ജിമ്മി ജോർജ് ഇൻഡോർ സ്റ്റേഡിയത്തിൽ സംഘടിപ്പിച്ച പ്രഥമ കേരള സംസ്ഥാന തല ഓപ്പൺ കരാട്ടെ ചാമ്പ്യൻഷിപ്പിൽ ആറ്റിങ്ങൽ കരാട്ടെ ടീം ജേതാക്കൾ. എസ്കെഎ തിരുവന്തപുരം രണ്ടാം സ്ഥാനവും ഐഎസ് കെടി കോട്ടയം മൂന്നാം സ്ഥാനവും നേടി. കേരള ഒളിമ്പിക് അസോസിയേഷൻ പ്രസിഡന്‍റ് വി.സുനിൽ കുമാർ, കേരള കരാട്ടെ അസോസിയേഷൻ പ്രസിഡന്‍റ് എസ്. രഘു കുമാർ എന്നിവരുടെ സാന്നിധ്യത്തിൽ നടന്ന സമാപന സമ്മേളനത്തിൽ വിജയികൾക്കുള്ള പുരസ്‌കാരങ്ങൾ . പി. വിഷ്ണു രാജ് ഐഎസ് വിതരണം ചെയ്തു.

സൂപ്പർമാർക്കറ്റിലെ ഷെഡിൽ നിന്ന് 700 കിലോ ലഹരി വസ്തുക്കൾ പിടികൂടി

കൊല്ലം: കടയ്ക്കൽ - കുമ്മിൾ റോഡിലെ പനമ്പള്ളി സൂപ്പർ മാർക്കറ്റിലെ ഷെഡിൽ നിന്ന് 700 കിലോഗ്രാം നിരോധിത ലഹരി വസ്തുക്കൾ പിടികൂടി. ചടയമംഗലം എക്സൈസ് റേഞ്ച് ഇൻസ്പെക്‌ടർ രാജേഷിന്‍റെ നേതൃത്വത്തിലുള്ള സംഘം 11ന് രാത്രി 12ന് നടത്തിയ റെയ്ഡിലാണ് ഇവ പിടികൂടിയത്. ലഹരി വസ്തുക്കൾക്ക് വിപണിയിൽ 10 ലക്ഷം രൂപ വില വരും. കടയ്ക്കൽ മുക്കുന്നം സ്വദേശി സിയാദിന്‍റെ ഉടമസ്ഥതയിലുള്ളതാണ് സൂപ്പർമാർക്കറ്റ്. സിയാദിനെതിരേ മുൻപും സമാന കേസുകൾ ചടയമംഗലം എക്സൈസ് ഓഫീസിൽ രജിസ്റ്റർ ചെയ്തിട്ടുണ്ട്.സിയാദിനെ പിടികൂടാൻ സാധിച്ചില്ല. ഇയാൾ ഒളിവിലാണെന്ന് എക്സൈസ് ഉദ്യോഗസ്ഥർ പറഞ്ഞു. കടയ്ക്കൽ, കുമ്മിൾ മേഖലകളിൽ ചില്ലറ വില്പനക്കായി എത്തിച്ചതാണ് പിടികൂടിയ ലഹരി വസ്തുക്കൾ.കഴിഞ്ഞ ഒരു മാസത്തിനിടയിൽ ആയൂർ, കടയ്ക്കൽ, ഇട്ടിവ മേഖലകളിൽ നിന്നായി ഒരു ടണ്ണിലധികം നിരോധിത ലഹരി വസ്തുക്കളാണ് ചടയമംഗലം എക്സൈസ് സംഘം പിടികൂടിയത്. റെയ്ഡിൽ സിവിൽ എക്സൈസ് ഓഫീസർമാരായ സബീർ, കെ.ജി. ജയേഷ്, ശ്രേയസ് ഉമേഷ് എന്നിവരും പങ്കെടുത്തു.

എസ്‌കവേറ്റര്‍ കുളത്തില്‍ താഴ്ന്നു; ഡ്രൈവര്‍ തലനാരിഴയ്ക്ക് രക്ഷപ്പെട്ടു

പേരൂര്‍ക്കട: പാറക്കുളം വൃത്തിയാക്കാനായി തിരുവല്ലത്തു നിന്നു കൊണ്ടുവന്ന എസ്‌കവേറ്റര്‍ കുളത്തില്‍ താഴ്ന്നു, ഡ്രൈവര്‍ തലനാരിഴയ്ക്കു രക്ഷപ്പെട്ടു. തിരുവനന്തപുരം മെഡിക്കല്‍കോളജ് ആശുപത്രിയില്‍ ചികിത്സ തേടി. എസ്‌കവേറ്റര്‍ ഫയര്‍ഫോഴ്‌സിന്റെ സ്‌കൂബ ടീം എത്തി ക്രെയിനിന്‍റെ സഹായത്തോടെ ഉയര്‍ത്തിമാറ്റി. പേരൂര്‍ക്കട അടുപ്പുകൂട്ടാന്‍ പാറയ്ക്കു സമീപം ജലനിരപ്പില്‍ നിന്ന് 50 അടി താഴ്ചയുള്ള കുളത്തിലേക്കാണ് എസ്‌കവേറ്റര്‍ താഴ്ന്നുപോയത്. കുളത്തിലേക്കു വീണ ഡ്രൈവര്‍ വെള്ളം കുടിച്ചെങ്കിലും നീന്തി രക്ഷപ്പെടുകയായിരുന്നു. പാറക്കുളത്തിന്‍റെ ഒരു വശം വൃത്തിയാക്കുന്നതിനിടെ വെള്ളിയാഴ്ച വൈകുന്നേരമാണ് എസ്‌കവേറ്റര്‍ കുളത്തിലേക്കു വീണുപോയത്. വിവരം അറിയിച്ചതിനെത്തുടര്‍ന്ന് സ്‌കൂബ ടീം അംഗങ്ങളായ വിദ്യരാജ്, എസ്.പി. സജി, ദിനുമോന്‍, വിജിന്‍ എന്നിവരുടെ നേതൃത്വത്തിലുള്ള സംഘം ശനിയാഴ്ച രാവിലെ 11 മുതല്‍ 4 മണിക്കൂര്‍ പരിശ്രമിച്ചാണ് എസ്‌കവേറ്റര്‍ കുളത്തില്‍ നിന്നു പുറത്തെടുത്തത്.

ശബരി എക്സ്പ്രസിനു പകരം തിരുവനന്തപുരം സെൻട്രലിൽനിന്ന് പുതിയ ട്രെയിൻ വേണമെന്ന്

തിരുവനന്തപുരം: രാവിലെ 6.40 ന് തിരുവനന്തപുരം സെൻട്രൽ സ്റ്റേഷനിൽ നിന്ന് തിരിക്കുന്ന തിരുവനന്തപുരം - സെക്കന്ദരാബാദ് ശബരി എക്സ്പ്രസിന്‍റെ സമയമാറ്റവും സ്റ്റേഷൻ മാറ്റവും പരിഗണിച്ച് രാവിലെ അതേ സമയത്ത് തന്നെ പുതിയ ട്രെയിൻ സർവീസ് ആരംഭിക്കണമെന്ന് റെയിൽവേ പാസഞ്ചേഴ്സ് അസോസിയേഷൻ സംസ്ഥാന പ്രസിഡന്‍റ് പരവൂർ സജീബ് ആവശ്യപ്പെട്ടു. കൊല്ലം ,കായംകുളം തുടങ്ങിയ സ്റ്റേഷനുകളിൽ ഇറങ്ങുന്ന ധാരാളം യാത്രക്കാർ ശബരി എക്പ്രസിലാണ് യാത്ര ചെയ്യുന്നുണ്ട് . കോട്ടയം വരെയുള്ള സ്ഥിരം യാത്രക്കാർക്ക് വലിയ ബുദ്ധിമുട്ടാണ് വരാൻ പോകുന്നത് . തിരുവനന്തപുരം സെൻട്രലിനു പകരം കൊച്ചുവേളിയിൽ (തിരുവനന്തപുരം നോർത്ത് ) നിന്ന് വൈകുന്നേരം 5.30ന് പുറപ്പെടാനും സൂപ്പർ ഫാസ്റ്റ് ട്രെയിനാക്കാനും സെക്കന്ദ്രാബാദിന് പകരം ചേർലപള്ളി വരെയാക്കാനും റെൽയിൽവേ നടപടികൾ ആരംഭിച്ചു കഴിഞ്ഞു. രാവിലെ ശബരി എക്സ്പ്രസിന്‍റെ സമയത്ത് പുതിയ ട്രെയിൻ സർവ്വീസ് ആരംഭിച് സ്ഥിര യാത്രക്കാരുടെ യാത്രാക്ലേശം പരിഹരിക്കണമെന്ന് റെയിൽവേ പാസഞ്ചേഴ്സ് അസോസിയേഷൻ ആവശ്യപ്പെട്ടു.

തൊഴിലാളിവിരുദ്ധ സർക്കാരുകൾ നയം മാറ്റണം: കെ.മുരളീധരൻ

നേമം : കേന്ദ്രം - സംസ്ഥാന സർക്കാരുകൾ തൊഴിലാളി വിരുദ്ധ നടപടികൾ അവസാനിപ്പിക്കണമെന്ന് കെ.മുരളീധരന്‍‌. കേരള ആര്‍ട്ടിസാന്‍സ് ആന്‍ഡ് സ്‌കില്‍ഡ് വര്‍ക്കേഴ്‌സ് ഫെഡറേഷന്‍ ഐഎന്‌ടിയുസി സംസ്ഥാന സമ്മേളനം നേമത്ത് ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. സമര രംഗത്തുള്ള ആശാവർക്കർമാരെ മാനസികമായി സർക്കാർ പിഡീപ്പിക്കുകയാണെന്ന് കെ.മുരളീധരന്‍ പറഞ്ഞു. ഫെഡറേഷന്‍ സംസ്ഥാന പ്രസിഡന്‍റ് പീതാംബരകുറുപ്പ് അധ്യക്ഷത വഹിച്ചു. സംസ്ഥാന ജനറല്‍ സെക്രട്ടറി പൂവട വിജയന്‍, പനവിള രാജശേഖരന്‍, ജില്ല പ്രസിഡന്‍റ് കല്ലിയൂര്‍ മുരളി, രാധാകൃഷ്ണന്‍ ചാത്തന്നൂര്‍, എന്‍‌.കെ. നകുലന്‍, നേമം രാജന്‍ തുടങ്ങിയവര്‍ പങ്കെടുത്തു.

ചുമട്ടു തൊഴിലാളി യൂണിയൻ ജില്ലാ സമ്മേളനം നാളെ മുതൽ 16 വരെ

തിരുവനന്തപുരം: ഹെഡ്‌ലോഡ് ആൻഡ് ജനറൽ വർക്കേഴ്സ് യൂണിയൻ (സിഐടിയു) ജില്ലാ സമ്മേളനം നാളെ മുതൽ 16 വരെ നെയ്യാറ്റിൻകരയിൽ നടക്കും. നാളെ രാവിലെ എട്ടിന് മെഡിക്കൽ കോളജ് ആശുപത്രിയിൽ രക്തദാന ക്യാന്പോടെ സമ്മേളനത്തിനു തുടക്കമാകുമെന്നു പ്രസിഡന്‍റ് സി. ജയൻബാബുവും ജനറൽ സെക്രട്ടറി എൻ. സുന്ദരംപിള്ളയും പത്രസമ്മേളനത്തിൽ അറിയിച്ചു. രക്തദാന ക്യാന്പ് സിഐടിയു സംസ്ഥാന സെക്രട്ടറി കെ.എസ്. സുനിൽകുമാർ ഉദ്ഘാടനം ചെയ്യും. യന്ത്രവത്കരണം, വൻകിട മാളുകൾ, ഓണ്‍ലൈൻ കച്ചവടം, പ്രത്യേക സാന്പത്തിക മേഖല തുടങ്ങിയവ മൂലം തൊഴിലാളികൾക്കു ജോലി നഷ്ടമാകുകയാണെന്ന് അവർ പറഞ്ഞു. 15നു മാരായമുട്ടം രക്തസാക്ഷി ചെല്ലപ്പൻപിള്ളയുടെ ബലി കുടീരത്തിൽ നിന്ന് കൊടിമരജാഥയും എൻ.പി. ശെൽവന്‍റെ സ്മൃതി മണ്ഡപത്തിൽ നിന്ന് പതാക ജാഥയും സമ്മേളന നഗരിയിൽ എത്തും. 16നു രാവിലെ 10ന് നെയ്യാറ്റിൻകര മൂന്നുകല്ലിൻമൂട് ഡോ.ജി.ആർ. കൾച്ചറൽ സെന്‍ററിൽ നടക്കുന്ന പ്രതിനിധി സമ്മേളനം മന്ത്രി വി. ശിവൻകുട്ടി ഉദ്ഘാടനം ചെയ്യും. പ്രസിഡന്‍റ് സി. ജയൻബാബു അധ്യക്ഷത വഹിക്കും.

പെരുന്പഴുതൂര്‍ ജംഗ്ഷന്‍ വികസനം; രണ്ടു പദ്ധതികളുടെ നിര്‍മാണോദ്ഘാടനം നാളെ

നെയ്യാറ്റിന്‍കര : പെരുന്പഴുതൂര്‍ ജംഗ്ഷന്‍ വികസനവുമായി ബന്ധപ്പെട്ട് രണ്ടു പ്രധാന പദ്ധതികളുടെ നിര്‍മാണോദ്ഘാടനം നാളെ നടക്കും. വൈകുന്നേരം 3.30 ന് അയണിയറത്തലയിലെ നഗരസഭ ഭൂമിയില്‍ ബഡ്സ് സ്കൂളിന്‍റെയും നാലിന് പെരുന്പഴുതൂര്‍ ജംഗ്ഷനില്‍ ഓപ്പണ്‍ എയര്‍ ഓഡിറ്റോറിയത്തിന്‍റെയും നിര്‍മാണോദ്ഘാടനം ചെയര്‍മാന്‍ പി.കെ. രാജമോഹനന്‍ നിര്‍വഹിക്കും. ഗ്രാമപഞ്ചായത്തായിരുന്ന പെരുന്പഴുതൂര്‍ നെയ്യാറ്റിന്‍കര നഗരസഭയോട് കൂട്ടിച്ചേര്‍ക്കപ്പെട്ടതു മുതല്‍ ഉയരുന്ന പ്രധാന ആവശ്യമാണ് പെരുന്പഴുതൂര്‍ ജംഗ്ഷന്‍ വികസനം. ജംഗ്ഷന്‍ വികസനത്തിന്‍റെ ആദ്യപടി എന്ന നിലയിൽ ഓപ്പണ്‍ എയര്‍ ഓഡിറ്റോറിയം, ബഡ്സ് സ്കൂള്‍ എന്നിവയുടെ നിര്‍മാണോദ്ഘാടനം നടത്തുന്നത്. ഭിന്നശേഷിക്കാരായി മാറിയ വ്യക്തികളെ സമൂഹത്തിന്‍റെ മുഖ്യധാരയിൽ കൊണ്ടു വരുന്നതിന് 58 ലക്ഷം രൂപ ചെലവഴിച്ച് പെരുമ്പഴുതൂരിലെ നഗരസഭയുടെ ഭൂമിയിൽ ബഡ്‌സ് സ്‌കൂൾ പണി കഴിപ്പിക്കുന്നതിനുള്ള ടെണ്ടർ നടപടികൾ പൂർത്തീകരിച്ച വിവരം 2025- 2026 നഗരസഭ ബജറ്റില്‍ തന്നെ പരാമര്‍ശിച്ചിരുന്നു. ഓപ്പണ്‍ എയര്‍ ഓഡിറ്റോറിയം നിര്‍മാണത്തിനായി 29 ലക്ഷം രൂപയാണ് ബജറ്റില്‍ ഉള്‍പ്പെടുത്തിയിട്ടുള്ളത്. പെരുമ്പഴുതൂർ മാർക്കറ്റ് വികസനത്തിന്‍റെ ഭാഗമായി മാർക്കറ്റിന്‍റെ മുനനിൽ പൊതുജനങ്ങൾക്കു വേണ്ടി നിർമിക്കുന്ന പാർക്ക് വയോജന സമൂഹത്തിനു കൂടെ ഉപയോഗിക്കുവാൻ കഴിയുന്ന തരത്തിൽ രൂപകല്‌പന ചെയ്‌ത് ദൃശ്യശ്രവണ സംവിധാനത്തോടു കൂടി യാഥാര്‍ഥ്യമാക്കുന്നതിന് 15 ലക്ഷം രൂപയും ബജറ്റിൽ നീക്കി വച്ചിട്ടുണ്ട്.

ഗൃഹനാഥനെ കല്ലുകൊണ്ടിടിച്ച മൂന്നംഗസംഘം പിടിയില്‍

പേരൂര്‍ക്കട: ഗൃഹനാഥനെ കല്ലുകൊണ്ടിടിച്ച് പരിക്കേല്‍പ്പിച്ച മൂന്നംഗസംഘത്തെ പോലീസ് പിടികൂടി. പേരൂര്‍ക്കട ഹാര്‍വ്വിപുരം സ്വദേശികളായ ഉണ്ണിക്കുട്ടന്‍ എന്നുവിളിക്കുന്ന ആദിത്യന്‍ (19), അഖില്‍ (21), ജോബി (19) എന്നിവരാണ് പിടിയിലായത്. വെള്ളിയാഴ്ച വൈകുന്നേരം ആറോടുകൂടി ഹാര്‍വ്വിപുരത്തായിരുന്നു കേസിന്നാസ്പദമായ സംഭവം. പ്രദേശവാസിയായ ജോയി (58) യെയാണ് സംഘം മര്‍ധിച്ചത്.. കാലിനു പൊട്ടലേറ്റ ജോയി പേരൂര്‍ക്കട ഗവ. ആശുപത്രിയില്‍ ചികിത്സയിലാണ്. ആദിത്യന്‍ ക്രിമിനല്‍ക്കേസില്‍ പ്രതിയാണ്. പ്രതികളെ കോടതി റിമാന്‍ഡ് ചെയ്തു.

കുത്തുകേസ്; ഒന്നാംപ്രതി പിടിയില്‍

ഉള്ളൂർ: ഡിവൈഎഫ്ഐ പ്രവര്‍ത്തകനെ കുത്തിപ്പരിക്കേല്‍പ്പിച്ച സംഭവത്തില്‍ ഒളിവിലായിരുന്ന ഒന്നാം പ്രതി പിടിയില്‍‌. കുമാരപുരം ചെന്നിലോട് സ്വദേശി ചന്തു എന്നുവിളിക്കുന്ന അനൂപ് (30) ആണ് പിടിയിലായത്. കോയമ്പത്തൂരിലെ ഗണപതിയില്‍ നിന്നാണ് മെഡിക്കല്‍കോളജ് സിഐ ബി.എം. ഷാഫിയുടെ നേതൃത്വത്തിലുള്ള സംഘം പ്രതിയെപിടികൂടിയത്. പാത്രക്കടയില്‍ തൊഴിലാളിയായി ഒളിവില്‍ താമസിക്കുകയായിരുന്നു പ്രതി. മാര്‍ച്ച് 27ന് രാത്രി 10 ഓടുകൂടി കുമാരപുരം സ്വദേശിയും ഡിവൈഎഫ്ഐ യൂണിറ്റ് സെക്രട്ടറിയുമായ പ്രവീണിനെ (40) യാണ് അനൂപും ബൈജുവും ജിതിനും ഉള്‍പ്പെട്ട സംഘം ചെന്നിലോട് ഭാഗത്തുവച്ച് കുത്തിപ്പരിക്കേല്‍പ്പിച്ചത്. മദ്യപാനം ചോദ്യം ചെയ്തതിലുള്ള വിരോധമാണ് ആക്രമണത്തിന് കാരണമായത്. കൂട്ടുപ്രതികളായ ബൈജു, ജിതിന്‍ എന്നിവര്‍ റിമാന്‍ഡില്‍ക്കഴിഞ്ഞുവരികയാണ്.

മാലിന്യ സംസ്‌കരണം : കേരളം രാജ്യത്തിന് മാതൃകയെന്ന് ഗവര്‍ണര്‍

തിരുവനന്തപുരം: മാലിന്യ സംസ്‌കരണത്തില്‍ കേരളം രാജ്യത്തിനുതന്നെ മാതൃകയാണെന്നും കേരളീയനെന്ന് അറിയപ്പെടുന്നതില്‍ അഭിമാനിക്കുന്നുവെന്നും ഗവര്‍ണര്‍ രാജേന്ദ്ര വിശ്വനാഥ് അര്‍ലേക്കര്‍. വൃത്തി-2025 കോണ്‍ക്ലേവിന്‍റെ സമാപന സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. കേരളത്തിലെ മാലിന്യ സംസ്‌കരണ പ്രവര്‍ത്തനങ്ങളുടെ വിജയത്തിന്‍റെ പ്രധാന കാരണം ജനങ്ങളുടെ പങ്കാളിത്തമാണ്. സര്‍ക്കാരും ജനങ്ങളും ഉദ്യോഗസ്ഥരും ഒരുമിച്ചു നേടിയ വിജയം മുഴുവന്‍ കേരളീയരുടേയും വിജയമാണ്. ഇപ്പോഴത്തെ പ്രവര്‍ത്തനങ്ങളിലൂടെ നേടിയെടുത്ത വൃത്തി സ്ഥിരമായ ഒന്നല്ലെന്നും വൃത്തി ഒരു ശീലമായി മാറണമെന്നും അദ്ദേഹം പറഞ്ഞു. എന്‍റെ മാലിന്യം എന്‍റെ ഉത്തരവാദിത്തമാണെന്ന ബോധമുണ്ടാകണം. ഉറവിട കേന്ദ്രീകൃതമായ വികേന്ദ്രീകൃത മാലിന്യ സംസ്‌കരണ സംവിധാനങ്ങള്‍ വ്യാപകമാക്കണം. അതിലൂടെ വൃത്തിശീലം ജനജീവിതത്തിന്‍റെ ഭാഗമാക്കാനും അടുത്ത തലമുറയ്ക്ക് പകര്‍ന്നു നല്‍കാനും സാധിക്കുമെന്നും അദ്ദേഹം പറഞ്ഞു. മാലിന്യ സംസ്‌കരണ പ്ലാന്‍റുകളുമായി ബന്ധപ്പെട്ട എതിര്‍പ്പുകളില്‍ സമവായമുണ്ടാക്കാനായി എന്നതാണ് വൃത്തി-2025 കോണ്‍ക്ലേവിന്‍റെ ഏറ്റവും വലിയ നേട്ടമെന്നും ഗവര്‍ണര്‍ പറഞ്ഞു. സ്വച്ഛതയും വൃത്തിയുമെന്നത് ഇന്ന് ഇന്ത്യയിലൊട്ടാകെ ഒരു മുഖ്യ അജണ്ടയാണെന്നും ഗവര്‍ണര്‍ ചൂണ്ടിക്കാട്ടി. കേരളം വികേന്ദ്രീകൃതവും ജനകീയവുമായ മാലിന്യസംസ്കരണ മോഡൽ സൃഷ്ടിക്കുകയാണെന്ന് തദ്ദേശ സ്വയംഭരണ മന്ത്രി എം. ബി. രാജേഷ് അഭിപ്രായപ്പെട്ടു . മാലിന്യസംസ്കരണത്തിന്‍റെ ഈ കേരള മോഡൽ ഇതിനകം മറ്റ് സംസ്ഥാനങ്ങളെ സ്വാധീനിക്കുന്നുണ്ട്. തമിഴ്നാട് സംസ്ഥാനം കേരള മാതൃകയിൽ ക്ലീൻ തമിഴ്‌നാട് മിഷൻ ആരംഭിച്ചതായും അദ്ദേഹം പറഞ്ഞു. അടിത്തട്ട് മുതൽ തുടങ്ങി മുകൾതട്ട് വരെ എത്തിയ ഒരു ജനകീയ യത്നത്തിന്‍റെ ഒടുവിലാണ് വൃത്തി 2025 കോൺക്ലേവ് നടന്നത്. കേരളത്തിലെ മാലിന്യ സംസ്‌കരണ പ്രവര്‍ത്തനങ്ങള്‍ സംബന്ധിച്ച വിഷന്‍ ഡോക്യുമെന്‍റ് ഗവര്‍ണര്‍ പ്രകാശനം ചെയ്തു. മാലിന്യ സംസ്‌കരണ പ്രവര്‍ത്തനങ്ങളില്‍ മികച്ച പ്രകടനം കാഴ്ചവച്ച തദ്ദേശ സ്വയംഭരണ സ്ഥാപനങ്ങള്‍ക്കുള്ള അവാര്‍ഡുകള്‍ ഗവര്‍ണര്‍ സമ്മാനിച്ചു. സമാപന സമ്മേളനത്തില്‍ ്പു മന്ത്രി എം.ബി. രാജേഷ് അധ്യക്ഷത വഹിച്ചു. വി.കെ. പ്രശാന്ത് എംഎല്‍എ, ചീഫ് സെക്രട്ടറി ശാരദ മുരളീധരന്‍, തദ്ദേശ സ്വയംഭരണ വകുപ്പ് സ്‌പെഷ്യല്‍ സെക്രട്ടറി അനുപമ ടി.വി. തുടങ്ങിയവര്‍ പങ്കെടുത്തു.

സർവീസ് സ്റ്റേഷൻ തൊഴിലാളി മരിച്ച നിലയിൽ

നെടുമങ്ങാട് : മധ്യവയസ്കനെ പുരയിടത്തിൽ മരിച്ച നിലയിൽ കണ്ടെത്തി. വാളിക്കോട് കൊപ്പം കുന്നത്തു വീട്ടിൽ അശോകൻ(56)നെയാണ് വാളിക്കോട് കിള്ളിയാറിന് കരയിലുള്ള ഒരു പുരയിടത്തിൽ മരിച്ചനിലയിൽ കണ്ടെത്തിയത്. സമീപത്തെ ഒരു സർവീസ് സ്റ്റേഷനിലെ തൊഴിലാളികളാണ് മൃതദേഹം കണ്ടത്. മൃതദേഹത്തിന് രണ്ട് ദിവസത്തിലേറെ പഴക്കമുണ്ട്. സമീപത്തുള്ള പ്ലാവിന്‍റെ ചുവട്ടിലാണ് മൃതദേഹം കിടന്നിരുന്നത്. അവിവാഹിതനാണ് അശോകൻ. നെടുമങ്ങാട് പോലീസ് മേൽ നടപടികൾ സ്വീകരിച്ചു.

ശംഖുമുഖത്ത് യുവാവ് വാഹനാപകടത്തില്‍ മരിച്ചു

വലിയതുറ: ശംഖുമുഖം വിമാനത്താവളത്തിലേക്കുളള റോഡില്‍ യുവാവ് സഞ്ചരിച്ചിരുന്ന ബൈക്ക് മുന്നില്‍ പോകുകയായിരുന്ന കാറിന്‍റെ പുറകില്‍ ഇടിച്ച് ബൈക്ക് യാത്രികനായ യുവാവ് മരിച്ചു. പൂന്തുറ മാണിക്കവിളാകം ബദരിയാ നഗര്‍ സ്വദേശി സയിദ് അലി (45) ആണ് മരിച്ചത്. കഴിഞ്ഞ ദിവസം വൈകുന്നേരം ആറ് മണിയോടുകൂടിയായിരുന്നു അപകടം. അപകടത്തില്‍ ബൈക്കില്‍ നിന്നും റോഡിലേയ്ക്ക് തെറിച്ചു വീണ സയിദ് അലിയുടെ തലയ്ക്ക് ഗുരുതരമായി പരിക്കേറ്റിരുന്നു. നാട്ടുകാരുടെയും വലിയതുറ പോലീസിന്‍റെയും നേതൃത്വത്തില്‍ മെഡിക്കല്‍ കോളജ് ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാന്‍ കഴിഞ്ഞില്ല. മൃതദേഹം മെഡിക്കല്‍ കോളജ് ആശുപത്രി മോര്‍ച്ചറിയില്‍. വലിയതുറ പോലീസ് കേസെടുത്തു.

ഒറ്റഞാർ നെൽകൃഷി പരിശീലനം

പാറശാല: രൂപതയുടെ സോഷ്യൽ സർവീസ് പ്രസ്ഥാനമായ ക്ഷേമയുടെ നേതൃത്വത്തിൽ, ഇൻഫാമിന്‍റെ സഹകരണത്തോടെ, ചെങ്കൽ ഗപഞ്ചായത്തിലെ നെറ്റിയൂർ വാർഡിലെ, കാരിയോട് കരിക്കകരി ഏലായിൽ ഒറ്റഞാർ നെൽകൃഷി പരിശീലനം സംഘടിപ്പിച്ചു. നൂതന രീതിയിലുള്ള നെൽകൃഷി രീതികളെ പറ്റി ക്ഷേമ ഡയറക്ടർ ഫാ. ജോർജ് വെട്ടിക്കാട്ടിൽ ക്ലാസ് എടുത്തു. ക്ഷേമ അസിസ്റ്റന്‍റ് ഡയറക്ടർ ഫാ. ജോൺ പുന്നാറ, ഇൻഫാം കാർഷിക ജില്ലാ പ്രസിഡന്‍റ് ധർമരാജ്, സംസ്ഥാന സമിതി അംഗം സനൽ, ക്ഷേമ കോ-ഓർഡിനേറ്റർമാ രായ ജോയ് ഫ്രാൻസ് മുല്ലശേരി, സാലി, ക്ഷേമ യൂണിറ്റ് സെക്രട്ടറിമാർ, നെൽകർഷകർ, കർഷകസമിതി സെക്രട്ടറി മണിയൻ എന്നിവർ നേതൃത്വം നൽകി.

വിഷുക്കണി വിളവെടുപ്പ്

മെഡിക്കല്‍കോളജ്: ഉള്ളൂര്‍ കൃഷിഭവന്റെ മേല്‍നോട്ടത്തില്‍ ആക്കുളം കായല്‍തീരത്ത് ആരംഭിച്ച പച്ചക്കറികൃഷിയുടെ വിളവെടുപ്പ്- വിഷുക്കണി വിളവെടുപ്പ്- ചലച്ചിത്ര നടന്‍ പ്രേംകുമാര്‍ നിര്‍വ്വഹിച്ചു. ആക്കുളം വാര്‍ഡ് കൗണ്‍സിലര്‍ സുരേഷ്‌കുമാര്‍ അദ്ധ്യക്ഷത വഹിച്ചു. മൂന്ന് ഏക്കര്‍ സ്ഥലത്തായി വെണ്ട, പയര്‍, മുളക്, ചീര, തക്കാളി തുടങ്ങിയവയാണ് ഹരിത കൃഷിക്കൂട്ടത്തിന്റെ ശ്രമഫലമായി കൃഷിചെയ്തിരുന്നത്. 30 വര്‍ഷമായി തരിശുകിടന്ന സ്ഥലമാണ് കൃഷിയോഗ്യമാക്കി മാറ്റിയതെന്നും ഇത് കൃഷിഭവന്റെ വലിയൊരു നേട്ടമാണെന്നും കൃഷിഓഫീസര്‍ സി. സൊപ്‌ന പറഞ്ഞു. ചടങ്ങില്‍ കൃഷി അസി. ഡയറക്ടര്‍ ആര്‍. റിയാസ്, സുരേഷ് മുതുകുളം, രവികുമാര്‍ തുടങ്ങിയവര്‍ പങ്കെടുത്തു.

പൂവച്ചലിൽ ഭരണ-പ്രതിപക്ഷ പോര്

കാട്ടാക്കട: പൂവച്ചലിൽ ഭരണപക്ഷ -പ്രതിപക്ഷ പോര് കൊഴുക്കുന്നു. പഞ്ചായത്ത് ഭരിക്കുന്ന സിപിഎം മാലിന്യ വലിച്ചെറിയൽ പ്രശ്‌നത്തിൽ കോൺഗ്രസ് നേതാക്കൾക്കതിരേ കടുത്ത നടപടികളിലേയ്ക്ക് നീങ്ങുമ്പോൾ, കോൺഗ്രസും പോലീസും കേസുമായി മുന്നോട്ടുപോവുകയാണ്. സംഭവങ്ങളുടെ തുടക്കം ഇങ്ങിനെ: യുഡിഎഫ് പൂവച്ചലിൽ സംഘടിപ്പിച്ച രാപകൽ സമരത്തിനുശേഷം പ്ലാസ്റ്റിക് ഉൾപ്പെടുന്ന ഭക്ഷ്യാവശിഷ്ടങ്ങൾ പഞ്ചായത്ത് ഓഫീസിന് എതിർവശത്തെ പഞ്ചായത്ത് ഭൂമിയിൽ ഉപേക്ഷിച്ചിരുന്നു. സംഭവത്തിൽ മാലിന്യങ്ങൾ വലിച്ചെറിയുന്നത് കോൺഗ്രസ് നേതാവാണെന്നും സിസിടിവി ദ്യശ്യങ്ങൾ ഉൾപ്പെടെ ചൂണ്ടിക്കാട്ടി പിഴയൊടുക്കാൻ നോട്ടീസ് നൽകിയിരുന്നു. കോൺഗ്രസ് മണ്ഡലം മുൻ പ്രസിഡന്‍റും യുഡിഎഫ് കൺവീനറുമായ പൊന്നെടുത്തകുഴി സത്യദാസിനാണ് 5,000 രൂപ പിഴയൊടുക്കാൻ നോട്ടീസ് ലഭിച്ചത്. ഇതോടെയാണ് പ്രതിപക്ഷം രംഗത്തുവന്നത്. പഞ്ചായത്ത് ഓഫീസിനു മുന്നിൽ രാപകൽ സമരം നടത്തിയതിന്‍റെ പകയാണ് നോട്ടീ സിനു പിന്നിലെന്ന് കോൺഗ്രസ് ആരോപിക്കുന്നു. ഇതിൽ പ്രതിഷേധിച്ച് കോൺഗ്രസ് പഞ്ചായത്തംഗങ്ങൾ കഴിഞ്ഞ ദിവസം പഞ്ചായത്ത് സെക്രട്ടറിയെ ഉപരോധിച്ചിരുന്നു. ഭക്ഷ്യാവിഷ്ടങ്ങൾ ശേഖരിച്ച് ഒരു ചാക്കിൽകെട്ടി വച്ചിരിക്കുകയായിരുന്നുവെന്നും എന്നാൽ ചില സിപിഎം പ്രവർത്തകർ ചാക്കിൽനിന്നും ഭക്ഷ്യാവിഷ്ടങ്ങൾ പുറത്തെറിഞ്ഞെന്നുമാണ് കോൺഗ്രസിന്‍റെ ആരോപണം. ഇത് സംബന്ധിച്ച് അന്വേഷണം വേണമെന്നാവശ്യപ്പെട്ട് കോൺഗ്രസ് മണ്ഡലം പ്രസിഡന്‍റും പഞ്ചായത്ത് അംഗവുമായ കട്ടയ്‌ക്കോട് തങ്കച്ചൻ കാട്ടാക്കട പോലീസിൽ പരാതി നൽകിയിട്ടുണ്ട്. സംഭവത്തിൽ വൻ സമരപരിപാടികൾക്ക് രൂപം നൽകിയതായും കോൺഗ്രസ് വൃത്തങ്ങൾ അറിയിച്ചു. കഴിഞ്ഞ വെള്ളിയാഴ്ചയാണ് പഞ്ചായത്തോഫീസിനു മുന്നിൽ രാപകൽ സമരം നടന്നത്.

പത്തേമാരി പ്രവാസി മലയാളി അസോസിയേഷന്‍ ജില്ലാ സമ്മേളനം

തിരുവനന്തപുരം: പത്തേമാരി പ്രവാസി മലയാളി അസോസിയേഷന്‍ തിരുവനന്തപുരം ജില്ലാ സമ്മേളനം സത്യന്‍ സ്മാരക ഹാളില്‍ മാതാ കോളജ് മെഡിക്കല്‍ ടെക്‌നോളജി ചെയര്‍പേഴ്‌സണ്‍ ജിജി ജോസഫ് ഉദ്ഘാടനം ചെയ്തു. ജില്ലാ പ്രസിഡന്‍റ് മദനന്‍ ടി. നാടർ അധ്യക്ഷത വഹിച്ചു. ചെയര്‍മാന്‍ സക്കീര്‍ പായിപ്ര മുഖ്യപ്രഭാഷണം നടത്തി. മ്യൂസിയം ഷെഫിന്‍ മയക്കുമരുന്നിനെതിരേ ബോധവത്കരണ ക്ലാസ് എടുത്തു. കുഞ്ഞുമുഹമ്മദ്, ടെസിബെന്നി, സലിം അബ്ദുള്‍റെഹുമാന്‍, ബഹറിന്‍ ചാപ്റ്റര്‍ മുഹമ്മദ് ഇറയ്ക്കല്‍, സംസ്ഥാന പ്രസിഡന്‍റ് കുമില്‍ നസീര്‍, സനോജ് ഭാസ്‌കര്‍, ഷീബ കാട്ടാക്കട, അബ്ദുള്ള ബീമാപള്ളി, ഉഷാപ്രദീപ്, സുശീല, തുടങ്ങിയവർ പ്രസംഗിച്ചു. കലാസാംസ്‌കാരിക രംഗത്തെ പ്രമുഖനായ മാഹിന്‍ പാറവിളയെ ആദരിച്ചു.

കോണ്‍ഗ്രസ് ലഹരി വിരുദ്ധ സദസും കവിയരങ്ങും സംഘടിപ്പിച്ചു

പാറശാല: ബ്ലോക്ക് കോണ്‍ഗ്രസ് കമ്മിറ്റിയുടെ നേതൃത്വത്തില്‍ പാറശാല ജംഗ്ഷനില്‍ ലഹരി വിരുദ്ധസദസും കവിയരങ്ങും സംഘടിപ്പിച്ചു. കെപിസിസി സെക്രട്ടറി ഡോ. ആര്‍.വല്‍സലന്‍ ഉദ്ഘാടനം ചെയ്തു. ബ്ലോക്ക് പ്രസിഡന്‍റ് അഡ്വ. എസ്. ജോണിന്‍റെ അധ്യക്ഷതയില്‍ ബാബുക്കുട്ടന്‍ നായര്‍, കൊറ്റാമം വിനോദ്, അഡ്വ. മഞ്ചവിളാകം ജയന്‍, പാറശാല സുധാകരന്‍, കൊല്ലിയോടു സത്യനേശന്‍, അഡ്വ. പാലിയോട് അനൂപ്, വേലപ്പന്‍ നായര്‍, ജസ്റ്റിന്‍ എന്നിവര്‍ പ്രസംഗിച്ചു.

ബഡ്സ് സ്കൂളിലെ കുട്ടികള്‍ വിഴിഞ്ഞം തുറമുഖം കാണാന്‍ ഒത്തുകൂടി

വെള്ളറട: വിഴിഞ്ഞം തുറമുഖം കാണാന്‍ ഭിന്നശേഷി കുട്ടികള്‍ ഒത്ത് ചേര്‍ന്നു. പെരുങ്കടവിള പഞ്ചായത്ത് ബഡ്‌സ് സ്‌കൂളിന്‍റെ നേതൃത്വത്തില്‍ തിരുവനന്തപുരം കേന്ദ്രമാക്കി സംഘടിപ്പിച്ച പഠന വിനോദയാത്ര കുട്ടികള്‍ക്കു കൗതുകമായി. പഞ്ചായത്ത് പ്രദേശത്തെ 58 ഭിന്ന ശേഷിക്കുട്ടികള്‍ പഠിക്കുന്ന ബഡ്സ് സ്കൂളിലെ 25 കുട്ടികളും, രക്ഷകര്‍ത്താക്കളും യാത്രയില്‍ ഉണ്ടായിരുന്നു. വിഴിഞ്ഞം അന്താരാഷ്ട്ര തുറമുഖകവാടവും ചരക്ക് കപ്പലുകളും ആര്‍ത്തലക്കുന്ന തിരമാലകളും നീണ്ടു പരന്നുകിടക്കുന്ന മണല്‍പരപ്പുകളും, തണുത്ത ഇളംകാറ്റും അവരുടെ മനസിലുണ്ടാക്കിയ സന്തോഷം ആംഗ്യത്തിലൂടെയും, മുഖഭാവത്തിലൂടെയും ആസ്വദിച്ച നിമിഷങ്ങള്‍. ശംഖുമുഖം ബീച്ചും, ട്രയിന്‍ യാത്രയും ബോട്ടിംഗും കിഴക്കേകോട്ടയിലെ മെഴുകു പ്രതിമ മ്യൂസിയവും അവിടെനിന്നു ടബിള്‍ഡക്കര്‍ ബസിലെ നഗരക്കാഴ്ചയും പള്ളിച്ചല്‍ഫാം ഹൗസും കണ്ടു. ബഡ്‌സ് സ്‌കൂള്‍ അധ്യാപിക എസ്. സിമിയുടെ നേതൃത്വത്തിലുള്ള സംഘത്തെ പഞ്ചായത്ത് വൈസ് പ്രസിഡന്‍റ് എസ്. ബിന്ദു, വികസന സ്റ്റാൻഡിംഗ് കമ്മിറ്റി ചെയര്‍മാന്‍ കാനക്കോട് ബാലരാജ്, പഞ്ചായത്ത് അംഗങ്ങളായ സ്‌നേഹലത, ധന്യ പി. നായര്‍, വിമല, മിനി പ്രസാദ്, വി.എ. സചിത്ര, ജഗഥമ്മ എന്നിവര്‍ നേതൃത്വം നല്‍കി.

തീരദേശത്ത് പ്ലാസ്റ്റിക് നിര്‍മാര്‍ജനത്തിനു തുടക്കം

വലിയതുറ: "ശുചിത്വ സാഗരം സുന്ദര തീരം' ഏകദിന പ്ലാസ്റ്റിക് നിര്‍മാര്‍ജന യജ്ഞത്തിനു തുടക്കം കുറിച്ചു. മത്സ്യ സമ്പത്തിന്‍റെ സംരക്ഷണവും തീരദേശ വികസനവും ലക്ഷ്യമിട്ടുള്ള പദ്ധതിയാണ് സുചിത്വ സാഗരം സുന്ദര തീരം ഏകദിന പ്ലാസ്റ്റിക് നിര്‍മാര്‍ജന യജ്ഞം. പദ്ധതിയുടെ സംസ്ഥാനതല ഉദ്ഘാനം ശംഖുമുഖം ബീച്ചില്‍ മന്ത്രി എം.ബി. രാജേഷ് നിര്‍വഹിച്ചു. മന്ത്രി സജി ചെറിയാന്‍ അധ്യക്ഷത വഹിച്ചു. എല്ലാവരും ഒന്നിച്ചാല്‍ ശുചിത്വ സാഗരം പദ്ധതി വിജയകരമാകുമെന്നു മന്ത്രി സജി ചെറിയാന്‍ പ്ലാസ്റ്റിക് നിര്‍മാര്‍ജന യജ്ഞത്തിന് തുടക്കംകുറിച്ചുകൊണ്ട് പറഞ്ഞു. 12000 വോളന്‍റിയര്‍മാരെ വിന്യസിച്ചാണ് പ്ലാസ്റ്റിക് നിര്‍മാര്‍ജന യജ്ഞം നടത്തുന്നത്. എല്ലാ മാസവും രണ്ടാം ശനിയാഴ്ച ശുചീകരണം നടത്തുമെന്നും 200 മീറ്റര്‍ ദൂരത്തിനിടയില്‍ ഓരോ പ്ലാസ്റ്റിക് ബോട്ടില്‍ ബൂത്ത് സ്ഥാപിക്കുമെന്നും സജി ചെറിയാന്‍ പറഞ്ഞു. പ്ലാസ്റ്റിക് നിര്‍മാര്‍ജനത്തിനു വലിയ ബോധവത്കരണം ആവശ്യമാണെന്നും കടലിലെ പ്ലാസ്റ്റിക് സാന്നിധ്യം വളരെ കൂടുതലാണെന്നും ഇതിനെ പൂര്‍ണമായും നിര്‍മാര്‍ജനം ചെയ്യാന്‍ കഴിയണമെന്നും ഇല്ലെങ്കില്‍ കേരളം ഭാവിയില്‍ വലിയ പ്രത്യാഘാതം നേരിടേണ്ടിവരുമെന്നും മന്ത്രി കൂട്ടിച്ചേര്‍ത്തു.

റോഡിലെ അപകടക്കെണി : വാർത്തയ്ക്കു പിന്നാലെ സുരക്ഷാ അറിയിപ്പ് ബോർഡ് സ്ഥാപിച്ചു

കാട്ടാക്കട: റോഡിൽ അപകടക്കെണിയെന്ന വാർത്തയ്ക്കു പിന്നാലെ അധികൃതർ ഉണർന്നു. ഈ ഭാഗത്തു സുരക്ഷാ മുന്നറിയിപ്പു ബോർഡുകൾ സ്ഥാപിച്ചു. ഇതു സംബന്ധിച്ച് ദീപിക വാർത്ത നൽകിയിരുന്നു. വാർത്ത ശ്രദ്ധയിൽപ്പെട്ടതിനെ തുടർന്നാണ് ബോർഡ് സ്ഥാപിച്ചത്. താമസിയാതെ ഇവിടം വൃത്തിയാക്കി അപകടഭാഗത്തു സുരക്ഷാവേലി നിർമിക്കാൻ പൊതുമരാമത്ത് വകുപ്പ് തീരുമാനമെടുത്തു. അതിന്‍റെ നടപടിയും ഉടൻ ഉണ്ടാകും. കാട്ടാക്കട -നെടുമങ്ങാട് റോഡിലെ പൂവച്ചൽ പുന്നാംകരിക്കകം തയ്ക്കാവ് പള്ളിക്കടുത്താണ് യാത്രക്കാർ അപകടത്തിൽപ്പെടുന്നത്. ഈ ഭാഗത്ത് റോഡിനു വളവും വീതി കുറവുമാണ്. റോഡിനു താഴെ വലിയ തോടാണുള്ളത്. അപകടത്തിൽപ്പെടുന്ന വാഹനങ്ങൾ മിക്കപ്പോഴും ഈ തോട്ടിലേക്കാണു മറിയുന്നത്. തിരക്കേറിയ റോഡാണിത്. ഈ റോഡ് അടുത്തിടെയാണ് ആധുനികവത്കരിച്ചത്. റോഡ് നവീകരിച്ചപ്പോൾ ശാസ്ത്രീയമായി ചെയ്തില്ലെന്ന ആരോപണം നാട്ടുകാർ ഉന്നിയിച്ചിരുന്നു. തയ്ക്കാ പള്ളി ഭാഗത്തും വലിയ വളവുണ്ട്. അപകടങ്ങൾ നിത്യ സംഭവമായി മാറിയിട്ടും ബന്ധപ്പെട്ടവർ തിരിഞ്ഞു നോക്കുന്നിലെന്നു നാട്ടുകാർ പറയുന്നു. കഴിഞ്ഞ നാലുമാസത്തിനിടെ 23ളം അപകടങ്ങളാണ് നടന്നിരിക്കുന്നത്. ഈ സാഹചര്യത്തിലാണ് ഇവിടെ റോഡിൽ സുരക്ഷാവേലി വയ്ക്കണമെന്ന ആവശ്യം ഉയർന്നത്. ഇതാണ് രണ്ടു ദിവസം മുൻപ് വാർത്തയായി നൽകിയത്.

വായ്പാ വിതരണവും പലിശ സബ്സിഡി വിതരണവും

നെടുമങ്ങാട്: ആര്യനാട് പഞ്ചായത്ത് കുടുംബശ്രീ സിഡിഎസിന്‍റെ നേതൃത്വത്തിൽ എസ്സിഎസ്‌‌ടി കോർപ്പറേഷൻ വായ്പാ വിതരണവും പലിശ സബ്സിഡി വിതരണവും അഡ്വ. ജി സ്റ്റീഫൻ എംഎൽഎ ഉദ് ഘാടനം ചെയ്തു. പഞ്ചായത്ത് പ്രസിഡന്‍റ് വി. വിജുമോഹൻ അധ്യക്ഷനായ യോഗത്തിൽ സിഡിഎസ് ചെയർപേഴ്സൺ ജെ.ആർ. സുനിത കുമാരി സ്വാഗതം പറഞ്ഞു. 48 ഗുണഫോക്താക്കൾക്ക് 48ലക്ഷം രൂപ വിതരണം ചെയ്തു. ജില്ലാ പഞ്ചായത്ത് അംഗം മിനി, ക്ഷേമകാര്യ സ്റ്റാൻ ഡിംഗ് കമ്മിറ്റി ചെയർപേഴ്സൺ കെ.എസ്. മോളി, ജനപ്രതിനിധികളയാ ഷീജ, ലേഖ, ഈഞ്ചപ്പുരി രാജേന്ദ്രൻ, സനൂജ, ആതിര സരസ്വതി, കുടുംബശ്രി മെമ്പർ സെക്രട്ടറി ജോൺ കെ. സ്റ്റീഫൻ എന്നിവർ പങ്കെടുത്തു. സിഡിഎസ് വൈസ് ചെയർപേഴ്സൺ ശോഭനമ്മ നന്ദി അറിയിച്ചു.

പാറശാല ആര്‍ടി ഓഫീസില്‍ വിജിലന്‍സ് പരിശോധന

50,900 രൂപയുമായി ഡ്രൈവിംഗ് സ്‌കൂള്‍ ജീവനക്കാരൻ പിടിയിൽ പാറശാല: ആര്‍ടി ഓഫീസില്‍ വിജിലന്‍സ് നടത്തിയ മിന്നല്‍ പരിശോധനയില്‍ 50,900 രൂപയുമായി ഡ്രൈവിംഗ് സ്‌കൂള്‍ ജീവനക്കാരനെ പിടികൂടി. വിവിധഡ്രൈവിംഗ് സ്‌കൂളുകളില്‍നിന്ന് സമാഹരിച്ച് ഉദ്യോഗസ്ഥര്‍ക്ക് കൈമാറുന്നതിനായി കൊണ്ടുവന്ന പണമാണ് പിടികൂടിയതെന്ന് സംശയിക്കുന്നതായി വിജിലന്‍സ് സംഘം അറിയിച്ചു. വ്യാഴാഴ്ച വൈകുന്നേരം നാലരയോടെയാണ് വിജിലന്‍സ് സംഘം എത്തിയത്. ഓഫീസിലെ നടപടികളെക്കുറിച്ച് മൂന്നുമാസം മുന്‍പെ ലഭിച്ച പരാതികളില്‍ വിശദമായ പരിശോധന നടത്തിയശേഷമാണ് സംഘം പരിശോധനയ്ക്കായി എത്തിയത്. വാഹന കാര്യക്ഷമതാ പരിശോധന മുതല്‍ ഡ്രൈവിംഗ് പരീക്ഷകള്‍ക്കു വരെ ഒരുവിഭാഗം ഉദ്യോഗസ്ഥര്‍ വന്‍തോതില്‍ കൈക്കൂലി വാങ്ങുന്നതായും കൈക്കൂലി സമാഹരിച്ച് കൈമാറുന്നതിനായി ഡ്രൈവിംഗ് സ്‌കൂള്‍ ജീവനക്കാരനെ ചുമതലപ്പെടുത്തിയിട്ടുള്ളതായും വിജിലന്‍സിന് പരാതി ലഭിച്ചിരുന്നു. ഡ്രൈവിംഗ് സ്‌കൂള്‍ ജീവനക്കാരനായ സുരേന്ദ്രനെയാണ് 50,900 രൂപയുമായി പിടികൂടിയത്. വിജിലന്‍സ് യൂണിറ്റിലെ സിഐ അഭിലാഷ്, കിരണ്‍ എന്നിവരുടെ നേതൃത്വത്തിലായിരുന്നു പരിശോധന.

തിരുമല-തൃക്കണ്ണാപുരം റോഡ് വീതികൂട്ടല്‍‌; വെള്ളപ്പൊക്ക ഭീതിയില്‍ കുടുംബങ്ങള്‍

ഓടയിലെ വെള്ളം ഒഴുകിപ്പോകാന്‍ പദ്ധതിയില്‍ പ്ലാനില്ലെന്ന് ആക്ഷേപം പേരൂര്‍ക്കട: തിരുമല-തൃക്കണ്ണാപുരം റോഡ് വീതികൂട്ടല്‍ ദീര്‍ഘവീക്ഷണത്തോടുകൂടിയുള്ളതല്ലെന്നും ഓട പുതുക്കിപ്പണിയുമ്പോള്‍ വെള്ളപ്പൊക്ക സാധ്യതയുണ്ടെന്നും നാട്ടുകാരുടെ ആരോപണം. പിഡബ്ല്യുഡി 45 കോടിയോളം രൂപ വിനിയോഗിച്ചാണ് റോഡു വീതി കൂട്ടുന്നത്. ഇരുവശത്തുമായി 15 മീറ്റര്‍ വീതിയാണ് വര്‍ധിപ്പിക്കുന്നത്. മൂന്നരകിലോമീറ്റര്‍ വരുന്നതാണ് റോഡ്. പണി മാസങ്ങള്‍ക്കു മുമ്പ് ആരംഭിച്ചുകഴിഞ്ഞു. ജെസിബി ഉപയോഗിച്ചുള്ള പണി തകൃതിയായി നടത്തുന്നുണ്ട്. കുന്നപ്പുഴ ജംഗ്ഷനു സമീപം ട്രാന്‍സ്‌ഫോമറിനു എതിര്‍വശത്ത് റോഡിന്‍റെ വീതി വര്‍ധി പ്പിക്കലുമായി ബന്ധപ്പെട്ടാണ് പരാതികളും ആശങ്കകളും കൂടുതലായി നിലനില്‍ക്കുന്നത്. ഇവിടെ ആറുമാസത്തിനു മുമ്പ് വീതിയില്‍ ഓട നിര്‍മിച്ചിരുന്നു. റോഡ് വീതി കൂട്ടുന്നതോടെ ഓട പുനര്‍നിര്‍മിക്കേണ്ടതായി വരും. നിലവില്‍ ഓടയില്‍നിന്നുള്ള വെള്ളം ഇവിടെ നിന്നും പ്രത്യേക പൈപ്പ് വഴി കരമനയാറ്റിലേക്കാണു വിട്ടിരുന്നത്. എന്നാൽ പുതിയ പദ്ധതിയില്‍ ഓടനിര്‍മാണം വിശദീകരിക്കുന്നുണ്ടെങ്കിലും കൂടുതലായി മഴയില്‍ വന്നുചേരുന്ന വെള്ളം എവിടേക്ക് വിടണമെന്നു പറയുന്നില്ല. കരമനയാറ്റിലേക്ക് വെള്ളം വിടുന്നതിനുള്ള സംവിധാനം ഒരുക്കാതെ റോഡ് വീതികൂട്ടല്‍ നടത്തുകയാണെങ്കില്‍ പ്രധാന റോഡില്‍പ്പോലും വെള്ളപ്പൊക്കമുണ്ടാകുകയും നിരവധി കുടുംബങ്ങളെ അതു അപകടത്തില്‍പ്പെടുത്തുകയും ചെയ്യും.

തൂക്കം വ്രതം അനുഷ്ടിച്ച 13വയസുകാരനെ പോലീസ് മർദിച്ചെന്നു പരാതി

പോത്തൻകോട്: തൂക്കം വ്രതം അനുഷ്ടിച്ച 13വയസുകാരനെ പോലീസ് മർദിച്ചെന്നു പരാതി. മേനംകുളം എംകെആർഎ 43 ൽ എസ്എസ് സുമേഷിന്‍റെയും ആർ.എസ്. അശ്വതിയുടെയും മകൻ വിനായകിന് (13) ആണ് പരിക്കേറ്റത്. വിനായക് മെഡിക്കൽ കോളജ് ആശുപത്രിയിൽ ഓർത്തോ വിഭാഗത്തിൽ ചികിത്സയിൽ ആണ്. പോലീസ് ഉദ്യോഗസ്ഥനും മേനംകുളം സ്വദേശിയുമായ വി.എസ്. ശ്രീബുവിനെതിരെയാണ് പരാതി നൽകിയിട്ടുള്ളത്. പാൽക്കര ഭഗവതി ക്ഷേത്രത്തിൽ തൂക്കത്തിനു വ്രതംനിന്ന വിനായക് ച‌ടങ്ങുകൾക്കുശേഷം ക്ഷേത്രത്തിനു സമീപം നിൽക്കുമ്പോൾ അകാരണമായി പോലീസുകാരനായ ശ്രീബു മർദിക്കുകയായിരുന്നുവെന്നു പറയുന്നു.

മലയാറ്റൂർ ഫൗണ്ടേഷൻ സാഹിത്യ മത്സര വിജയികളെ പ്രഖ്യാപിച്ചു

തിരുവനന്തപുരം: സാഹിത്യകാരൻ മലയാറ്റൂർ രാമകൃഷ്ണന്റെ 'പൊന്നി' എന്ന നോവലിനെ ആധാരമാക്കി 'പൊന്നി: നോവലും സിനിമയും' എന്ന വിഷയത്തിൽ മലയാറ്റൂർ ഫൗണ്ടേഷൻ നടത്തിയ സാഹിത്യമത്സരത്തിലെ വിജയികളെ പ്രഖ്യാപിച്ചു. നേമം സ്വദേശി ഡോ. കെ.എസ്. അനിൽകുമാർ, എറണാകുളം ചങ്ങമ്പുഴ നഗർ സ്വദേശി അജയ് നാരായണൻ, തൃശൂർ സ്വദേശി ടി.ജി. ബിന്ദു എന്നിവരാണ് ആദ്യമൂന്നു സ്ഥാനങ്ങളിലെ വിജയികൾ. മലയാറ്റൂരിന്റെ 98-ാമത് ജന്മവാർഷികദിനമായ മേയ് 30ന് ഭാരത് ഭവനിൽ സംഘടിപ്പിക്കുന്ന സാംസ്‌കാരിക സായാഹ്നത്തിൽ പുരസ്‌കാരങ്ങൾ സമ്മാനിക്കും. സി. റഹിം ജൂറി ചെയർമാനും ജോൺ തോമസ്, ശോഭാ രാജ്‌മോഹൻ, പി.ആർ. ശ്രീകുമാർ എന്നിവർ അംഗങ്ങളുമായ സമിതിയാണ് ജേതാക്കളെ തെരഞ്ഞെടുത്തത്.

ചട്ടവിരുദ്ധ ഇ ഫയൽ: സ്പീക്കറുടെ തീരുമാനത്തിനെതിരെ സമരം ചെയ്ത ജീവനക്കാർക്ക് ഭീഷണിക്കത്ത്

തിരുവന്തപുരം: സ്പീക്കറുടെ ചട്ടവിരുദ്ധ നടപടിയിൽ പ്രതിഷേധിച്ചു സെക്രട്ടേറിയറ്റിനു മുന്നിൽ സമരം ചെയ്ത നിയമസഭയിലെ പ്രതിപക്ഷ സർവീസ് സംഘടനയായ കേരള ലെജിസ്ലേച്ചർ സെക്രട്ടേറിയറ്റ് അസോസിയേഷന്‍റെ പ്രതിഷേധത്തിൽ പങ്കെടുത്ത വനിത ജീവനക്കാർക്ക് ഭീഷണിക്കത്ത്. സ്പീക്കർക്കെതിരേ സമരം ചെയ്താൽ പണി തെറിപ്പിക്കുമെന്നും അനുഭവിക്കേണ്ടിവരുമെന്നും ഭീഷണിപ്പെടുത്തുന്ന കത്തുകളാണ് ഇടതു അനുഭാവി എന്ന പേരിൽ വനിതാ ജീവനക്കാർക്കു ലഭിച്ചത്. ജനാധിപത്യപരമായ പ്രതിഷേധത്തിൽ പങ്കെടുത്ത ജീവനക്കാരെ സ്പീക്കറുടെ പേരുൾപ്പെടുത്തി ഭീഷണിപ്പെടുത്തിയ സംഭവത്തിൽ അന്വേഷണവും കുറ്റക്കാർക്കെതിരേ നടപടിയും ആവശ്യപ്പെട്ടു കേരള ലെജിസ്ലേച്ചർ സെക്രട്ടേറിയറ്റ് അസോസിയേഷൻ സ്പീക്കർ എ.എൻ. ഷംസീറിന് കത്ത് നൽകി. ജനാധിപത്യം അനുവദിച്ച പ്രതിഷേധത്തിൽ പങ്കെടുത്ത വനിതാ ജീവനക്കാരെ ഭീഷണിപ്പെടുത്തിയ നടപടി അപലപനീയമാണെന്നു ഭാരവാഹികൾ പറഞ്ഞു.

പരിശോധനയിൽ മദ്യപിച്ചെന്നു കണ്ടെത്തൽ : കെഎസ്ആർടിസി ഡിപ്പോയിൽ ഡ്രൈവറുടെ പ്രതിഷേധ സമരം

പാലോട്: ബ്രീത്ത് അനലൈസർ പരിശോധനയിൽ സിഗ്നൽ 16 കടന്നു എന്നു കണ്ടെത്തിയതിനെ തുടർന്ന് ഡ്രൈവറെ ഡ്യൂട്ടിയിൽ നിന്ന് ഒഴിവാക്കി. തുടർന്നു പാലോട് ഡിപ്പോയിൽ അരങ്ങേറിത് നാടകീയ രംഗങ്ങൾ. ഇന്നലെ രാവിലെ പാലോട് ഡിപ്പോയിൽ ജോലിക്ക് എത്തിയ ഡ്രൈവർ പച്ചമല തേക്കുമൂട് സ്വദേശി ജയപ്രകാശിനെയാണ് ഡ്യൂട്ടി യിൽ നിന്ന് ഒഴിവാക്കിയത്. എന്നാൽ താൻ മദ്യപിക്കുന്ന ആളല്ലെന്നും ഇത്രയും വർഷം പാലോട് ഡിപ്പോയിൽ ജോലി നോക്കിയിട്ട് ഇങ്ങനെ ഒരു പരാതി ഉണ്ടായിട്ടില്ലെന്നും ചൂണ്ടിക്കാട്ടി എസ്. ജയപ്രകാശ് പരാതിയുമായി മുന്നോട്ടു വന്നു. ഡ്യൂട്ടിയിൽനിന്ന് ഒഴിവാക്കിയതിൽ പ്രതിഷേധിച്ച് ജയപ്രകാശ് ഓഫീസ് പടിക്കൽ പ്രതിഷേധ സമരം നടത്തി. വീട്ടിൽനിന്നു ഭാര്യയെയും മക്കളെയും സ്ഥലത്തെത്തിച്ചാണു ജയപ്രകാശ് സമരം നടത്തിയത്. സമരം മണിക്കൂറുകളോളം ഡിപ്പോയിൽ നാടകീയ രംഗങ്ങൾക്ക് ഇടയാക്കി. പരിശോധന ഉപകരണം തകരാറിലാണെന്ന് ആഴ്ചകളായി ജീവനക്കാർ പരാതി നൽകിയിരുന്നു. കഴിഞ്ഞ 31നും സമാനമായ സംഭവങ്ങൾ ഉണ്ടായതായും ജീവനക്കാർ ആ രോപിക്കുന്നു. അന്ന് അഞ്ചുപേർക്കാണ് പലവട്ടം പരിശോധനയിൽ പല സിഗ്നകളിൽ കാണിച്ചത്. വെള്ളിയാഴ്ച രാവിലെ സ്റ്റേഷൻ മാസ്റ്റർ ബൈജുവാണു ജീവനക്കാരെ പരിശോധിച്ചത്. ജയപ്രകാശിനോടൊപ്പം ഉണ്ടായിരുന്ന കണ്ടക്ടർ ഷിബുവിനെ പരിശോധിച്ചപ്പോൾ സിഗ്നൽ പൂജ്യം ആയിരുന്നു. എന്നാൽ ജയപ്രകാശിനെ പരിശോധിച്ചപ്പോൾ അത് 16 എന്നാണ് കാണിച്ചത്. ഇയാൾ മദ്യപിക്കുന്ന ആളല്ലെന്നു സഹപ്രവർത്തകരും ഉദ്യോഗസ്ഥരും പറയുന്നു. ‌സംഭവം വലിയ വാർത്തയായതോടെ വിഷയത്തിൽ മന്ത്രിയുടെ ഓഫീസ് ഇടപെടുകയും പാലോട് ഡിപ്പോയിലെ സ്റ്റേഷൻ മാസ്റ്റർ ഡ്യൂട്ടിയിൽ ഉണ്ടായിരുന്ന രണ്ടു പേരും നെടുമങ്ങാട് എടിഒ എയും ജയപ്രകാശും ഉൾപ്പെടെ എംഡിയുടെ ഓഫീസിൽ റിപ്പോർട്ട് ചെയ്യണമെന്ന് ആ വശ്യപ്പെട്ടിട്ടുണ്ട്.

വിഴിഞ്ഞത്തെ ഇളക്കിമറിച്ച് ‘രക്ഷാപ്രവർത്തനം’

എസ്. രാജേന്ദ്രകുമാർ വിഴിഞ്ഞം: നേരം പുലർന്നപ്പോൾ മുതൽ ദുരന്തനിവാരണ സേനയുടെയും ഫയർ ഫോഴ്സിന്‍റെയും ജില്ലാ കളക്ടർ ഉൾപ്പെടെ റവന്യൂവിലെ ഉന്നത ഉദ്യോഗസ്ഥരുടെയും വാഹനങ്ങളുടെ ആരവം. പതിനൊന്ന് മണിയോടെ സൈറൺ മുഴക്കിയുള്ള വാഹനങ്ങളുടെയും രക്ഷാപ്രവർത്തകരുടെയും പരക്കംപാച്ചിൽ. വിഴിഞ്ഞം - കളിയിക്കാവിള റോഡിലൂടെ കൂട്ടമായി പാഞ്ഞവാഹനനിര അന്താരാഷ്ട്ര തുറമുഖ കവാടവും കടന്ന് ഉള്ളിലേക്ക് പോയി. ആൾക്കാരുമായി ആംബുലൻസുകൾ ആശുപത്രകളിലേക്ക് പായുന്ന രംഗങ്ങൾ. ഹാം റേഡിയയിലൂടെയും വയർലെസ് സംവിധാനം വഴിയുള്ള മുന്നറിയിപ്പുകൾ. ഏതോ വൻ ദുരന്തം നടന്നതിന്‍റെ പ്രതീതിയിൽ വിഴിഞ്ഞം. കാര്യമറിയാതെ പേടിച്ചരണ്ട് ആകാംഷയുടെ മുൾമുനയിൽ മണിക്കൂറുകളോളം ജനം. ചുഴലിക്കാറ്റ് ദുരന്തങ്ങൾ ഉണ്ടായാൽ ജനങ്ങളുടെ ജീവനും സ്വത്തിനും സംരക്ഷണ നൽകുന്നതിന് സേനകൾ സജ്ജമെന്ന് തെളിയിക്കുന്ന ദുരന്തനിവാരണ സേന അധികൃതർ നടത്തിയ മോക് ട്രില്ലാണ് നാട്ടുകാരെ മണിക്കൂറുകളോളം ആകാംഷയിൽ നിർത്തിയത്. മുൻകൂട്ടിയുള്ള പ്രചരണമില്ലാത്തതിനാൽ നടക്കാൻപോകുന്ന കാര്യങ്ങളെക്കുറിച്ചുള്ള അറിവ് ജനത്തിനില്ലായിരുന്നു. ഫയർഫോഴ്സ് അധികൃതരും, എൻഡിആർഎഫ്, മിലിട്ടറി ഉദ്യോഗസ്ഥരും കളക്ടർ ഉൾപ്പെടെയുള്ള റവന്യൂ ഉദ്യോഗസ്ഥരും, ആരോഗ്യവിഭാഗം ജീവനക്കാരും രാവിലെ എട്ടു മണിയോടെ വിഴിഞ്ഞം പള്ളിക്കു സമീപം തമ്പടിച്ചു. പത്തു മണിയോടെ സൈക്ലോൺ കൂടുതൽ ബാധിക്കുമെന്നുറപ്പുള്ള ഭാഗങ്ങളിൽ ഫയർഫോഴ്സ് ഉദ്യോഗസ്ഥർ നിരീക്ഷണം നടത്തിആൾക്കാതെ ഒഴിപ്പിച്ചു താല് കാലിക ക്യാമ്പിലേക്ക്മാറ്റി. പതിനൊന്ന് മണിയോടെ ശക്തമായ ചുഴലിക്കാറ്റ് (സാങ്കല്പികം) തീരം തൊട്ടതായുള്ള വിവരം കാലാവസ്ഥ നിരീക്ഷണ കേന്ദ്രത്തിൽ നിന്നെത്തി. പിന്നെ നടന്നത് രക്ഷാപ്രവർത്തകരുടെ ജീവൻ മരണ പോരാട്ടം. വിഴിഞ്ഞം പള്ളിക്കു സമീപം തമ്പടിച്ചിരുന്ന സംഘം മുൻകൂട്ടി നിശ്ചയിച്ചിരുന്ന വിഴിഞ്ഞം അന്താരാഷ്ട്ര തുറമുഖം ലക്ഷ്യമാക്കി പാഞ്ഞു. പ്രതീകാത്മകരക്ഷാപ്രവർത്തനങ്ങളും മുന്നറിയിപ്പുകളും അപകടത്തിൽപ്പെട്ടവരെ ദുരന്ത സ്ഥലത്തുനിന്നു മാറ്റുന്നതുൾപ്പെടെയുള്ള പ്രവർത്തങ്ങളും ഊർജിതമായി നടന്നു. വിഴിഞ്ഞത്ത് പ്രത്യേക കൺട്രോൾ റൂമും തുറന്ന് പ്രവർത്തനം ഏകോപിപ്പിച്ചു. ഉച്ചക്ക്ഒരു മണിയോടെ മോക് ട്രില്ലിന് സമാപനമായി. തുടർന്ന് മിലിറ്ററി ഉദ്യോഗസ്ഥരും എൻഡിആർഎഫ് സംഘവും നടത്തിയ ബോധവത്്കരണ പരിപാടിക്കുശേഷം മൂന്നോടെ ദൗത്യം അവസാനിച്ചു.

മിനിമം കൂലി ഉറപ്പാക്കാൻ കേന്ദ്ര- സംസ്ഥാന സർക്കാർ ഇടപെടണം

തിരുവനന്തപുരം: ബാങ്കുകളിലെ ഹൗസ് കീപ്പിംഗ് വിഭാഗത്തിൽ കരാർ അടിസ്ഥാനത്തിൽ ജോലി ചെയ്യുന്നവർക്ക് അടിസ്ഥാന മിനിമം കൂലി ഉറപ്പാക്കാൻ കേന്ദ്ര- സംസ്ഥാന സർക്കാരുകൾ ഇടപെടണമെന്നു സ്റ്റേറ്റ് ബാങ്ക് ഓഫ് ഇന്ത്യ ഹൗസ് കീപ്പിംഗ് ആൻഡ് മെയിന്‍റനൻസ് എംപ്ലോയീസ് യൂണിയൻ പത്രസമ്മേളനത്തിൽ ആവശ്യപ്പെട്ടു. ബാങ്കുകളിൽ ഹൗസ് കീപ്പിംഗ് വിഭാഗത്തിൽ ജോലി ചെയ്യുന്ന വിവിധ ജില്ലകളിലും കോർപറേഷനിലും നഗരസഭയിലും പഞ്ചായത്തുകളിലും വ്യത്യസ്ത തരത്തിലാണ് കൂലി നൽകുന്നത്. ചിലയിടങ്ങളിൽ 12,000 രൂപ മാത്രം നൽകുന്പോൾ മറ്റു ചിലയിടങ്ങളിൽ 15, 000 രൂപ വരെ നൽകുന്നു. ലേബർ കോണ്‍ട്രാക്ട് എടുത്തിട്ടുള്ള ഏജൻസികൾ തുക തട്ടിയെടുക്കുകയാണ്. 21,000 രൂപ മുതൽ 26,000 രൂപ വരെ കരാർ ജീവനക്കാർക്കാർക്കായി ബാങ്ക് ഏജൻസികൾ എഴുതിയെടുക്കുന്പോൾ ഇവർക്ക് തുച്ഛമായ തുക മാത്രമാണ് നൽകുന്നത്. ജീവനക്കാർക്ക് തൊഴിൽ സുരക്ഷിതത്വവും ഉറപ്പാക്കാനും കേന്ദ്ര- സംസ്ഥാന സർക്കാരുകൾക്കു കഴിയുന്നില്ലെന്നു പ്രസിഡന്‍റ് അനിയൻ മാത്യു, ജനറൽ സെക്രട്ടറി എം.എം. ഹസീന, തിരുവനന്തപുരം ജില്ലാ സെക്രട്ടറി റോയ് സാംരാജ് എന്നിവർ പറഞ്ഞു.

നേമം സഹകരണ ബാങ്ക് നിക്ഷേപ തട്ടിപ്പ് : ഡയറക്ടർ ബോർഡ് അംഗങ്ങളുടെ സ്വത്ത്‌ കണ്ടുകെട്ടണമെന്ന് ആവശ്യം

നേമം: നേമം സർവീസ് സഹകരണ ബാങ്കിലെ നിക്ഷേപങ്ങൾ നഷ്ടപ്പെട്ടവർക്ക് താൽക്കാലിക ആശ്വാസം നൽകുന്നതിനു കോടികൾ മുടക്കി നിർമിച്ച ബാങ്ക് മന്ദിരം ലേലം ചെയ്യാൻ അടിയന്തിര നടപടികൾ സ്വീകരിക്കണമെന്നും, നിലവിലെ ഭരണസമിതി പിരിച്ചുവിട്ട് , അംഗങ്ങളായ നിക്ഷേപകരുടെ പ്രതിനിധികളെ ഉൾപ്പെടുത്തി അഡ്മിനിസ്ട്രേറ്റീവ് കമ്മിറ്റി രൂപീകരിക്കണമെന്നും ആവശ്യപ്പെട്ടു നേമം പ്രദേശത്തെ റസിഡൻസ് അസോസിയേഷനുകളുടെ കൂട്ടായ്മ "ഫ്രാൻസ്' മുഖ്യമന്ത്രിക്കും സഹകരണ മന്ത്രിക്കും, സഹകരണ രജിസ്ട്രാർക്കും നിവേദനം നൽകി. ചികിത്സ ചെലവു കൾക്കായി ബാങ്കിൽ നിക്ഷേപിച്ചിരുന്ന 10 ലക്ഷം രൂപ മടക്കി ലഭിക്കാത്തതിനെതുടർന്നു ചികിത്സ ലഭിക്കാതെ കഴിഞ്ഞദിവസം ഒരു നിക്ഷേപകൻ മരണപ്പെട്ടിരുന്നുവെന്നും പരാതിയിൽ പറയു ന്നു. നിക്ഷേപകരായ നിരവധി പേരുടെ ചികിത്സകളും മക്കളുടെ വിവാഹ ആവശ്യങ്ങളും മുടങ്ങിയിരിക്കുകയാണ്. സഹകരണ ഓഡിറ്റ് വിഭാഗം, കൃത്യമായ രേഖകൾ ബാങ്കിൽ സൂക്ഷിച്ചിട്ടില്ലന്നതിന്‍റെ പേരിൽ ഓഡിറ്റ് പൂർത്തിയാക്കാതെ നീട്ടിക്കൊണ്ടു പോവുകയാണ്. ബാങ്കിന്‍റെ മുൻ ഡയറക്ടർ ബോർഡ് അംഗങ്ങളെ അറസ്റ്റ് ചെയ്ത് അവരുടെ സ്വത്തു വകകൾ കണ്ടുകെട്ടാൻ വൈകരുതെന്നും നിവേദനത്തിൽ ആവശ്യപ്പെട്ടിട്ടുണ്ട്.

ഭക്തിസാന്ദ്രമായി പൈങ്കുനി ഉത്സവം ആറാട്ട്

തിരുവനന്തപുരം: നഗരത്തെ ഭക്തിയിൽ ആറാടിച്ച് ശ്രീപദ്മനാഭ സ്വാമിക്ഷേത്രത്തിലെ പൈങ്കുനി ഉത്സവത്തോടനുബന്ധിച്ചുള്ള ആറാട്ട് നടന്നു. വൈകുന്നേരം അഞ്ചിനു ക്ഷേത്രത്തിന്‍റെ പടിഞ്ഞാറെ നടവഴി പുറത്തേക്കെഴുന്നള്ളിച്ച ശ്രീപദ്മനാഭ സ്വാമിയുടെയും നരസിംഹമൂർത്തിയുടെയും തിരുവന്പാടി ശ്രീകൃഷ്ണസ്വാമിയുടെയും വിഗ്രഹങ്ങൾക്കു ക്ഷേത്രം സ്ഥാനിയൻ മൂലം തിരുനാൾ രാമവർമ അകന്പടി സേവിച്ചു. ഹരിതപട തൊപ്പിയും മരതക മാലയുമണിഞ്ഞ് ഉടവാളേന്തി നീങ്ങിയ മൂലം തിരുനാളിനൊപ്പം രാജകുടുംബാംഗങ്ങളും അണിനിരന്നു. നെറ്റിപ്പട്ടം കെട്ടിയ ഗജവീരന്മാർ, അശ്വാരൂഢ സേന, കാര്യക്കാർ, മേളക്കാർ എന്നിവർ ആറാട്ട് ഘോയാത്രയ്ക്കു മിഴിവേകി. ബാൻഡുമേളവും ചെണ്ടമേളവും അന്തരീക്ഷത്തിൽ ഉയർന്നു. ആറാട്ടു ഘോഷയാത്ര കോട്ടവാതിൽ കടന്നപ്പോൾ 21 ആചാരവെടി മുഴങ്ങി. ശംഖുമുഖം കടൽത്തീരം വരെ നീളുന്ന റോഡിനിരുവശവും ഭക്തർ ഭക്തിനിർഭരമായ മനസോടെ ആറാട്ട് ഘോഷയാത്രയെ സ്വീകരിച്ചു. ശംഖുമുഖം കടലിലെ ആറാട്ടിനു ശേഷം ദേവവിഗ്രഹങ്ങൾ തിരിച്ചെഴുന്നള്ളിച്ചതോടെ ഈ വർഷത്തെ പൈങ്കുനി ഉത്സവത്തിനു സമാപനമായി.

റിമാന്‍ഡ് പ്രതിക്കെതിരേ വീണ്ടും പോക്‌സോ കേസ്

പേരൂര്‍ക്കട: 15 വയസുള്ള ആണ്‍കുട്ടിയെ പ്രകൃതിവിരുദ്ധ പീഡനത്തിന് ഇരയാക്കിയതിനു റിമാന്‍ഡിലായ ആള്‍ക്കെതിരേ പേരൂര്‍ക്കട സ്റ്റേഷനില്‍ മറ്റൊരു പരാതികൂടി. 14 വയസുള്ള ഒരാണ്‍കുട്ടിയുടെ രക്ഷിതാക്കളാണ് സ്റ്റേഷനില്‍ പരാതി നല്‍കിയിരിക്കുന്നത്. പേരൂര്‍ക്കട സ്വദേശി അഭിജിത്ത് (22) ആണ് പീഡനവുമായി ബന്ധപ്പെട്ട് റിമാന്‍ഡില്‍ കഴിയുന്നത്. തന്നോടു മോശമായി പെരുമാറിയെന്നു 14-കാരന്‍ വീട്ടുകാരെ അറിയിച്ചതിന്‍റെ അടിസ്ഥാനത്തിലാണ് ഇവര്‍ പരാതിയുമായി എത്തിയത്. രണ്ടാമത്തെ പരാതി എത്തിയിരിക്കുന്നത് പോക്‌സോ കേസില്‍ റിമാന്‍ഡില്‍ കഴിയുന്ന അഭിജിത്തിനെതിരേയാണെന്നും ഇയാള്‍ക്കെതിരേ ഒരുകേസുകൂടി രജിസ്റ്റര്‍ ചെയ്തിട്ടുണ്ടെന്നും പേരൂര്‍ക്കട പോലീസ് അറിയിച്ചു.

നിക്ഷേപ തുക തിരിച്ചുകിട്ടാതെ ചികിത്സ മുടങ്ങി മരിച്ച സുരേഷിന്‍റെ മൃതദേഹം സംസ്കരിച്ചു

നേമം: നേമം ബാങ്കിൽ നിക്ഷേപിച്ചിരുന്ന പണം കിട്ടാത്തതിനെ തുടർന്നു ചികിത്സ മുടങ്ങി മരിച്ച നേമം ശാന്തിവിള കുരുമി സ്വദേശി സുരേഷി (60) ന്‍റെമൃതദേഹം ഇന്നലെ ഉച്ചയ്ക്ക് ശാന്തി കവാടത്തിൽ സംസ്കരിച്ചു. കരളിൽ കുരുക്കൾ വന്നതിനെതുടർന്നു കഴിഞ്ഞ രണ്ടു വർഷമായി സുരേഷ് ചികിത്സയിലായിരുന്നു. ചികിത്സാ ചെലവിനായി മക്കൾ ലോണെടുത് നൽകിയ 10 ലക്ഷം രൂപ സുരേഷ് മറ്റൊരു ബാങ്കിൽ നിക്ഷേപിച്ചിരുന്നു. നേമം ബാങ്ക് മുൻ സെക്രട്ടറി രാജേന്ദ്രൻ ഇടപെ ട്ട് അവിടെനിന്നും നിക്ഷേപം നേമം ബാങ്കിലേയ്ക്ക് മാറ്റുകയായിരുന്നു. പിന്നീട് രോഗം മൂർഛിച്ച സുരേഷിനേയും കൊണ്ട് ആംബുലൻസിൽ ബാങ്ക് പ്രസിഡന്‍റിന്‍റെ വീട്ടിൽ കൊണ്ടുപോയതിനെ തുടർന്നു രണ്ടു തവണയായി അഞ്ചുലക്ഷം രൂപ അനുവദിച്ചിരുന്നു. ബാക്കി അഞ്ചു ലക്ഷം രൂപ കിട്ടിയിരുന്നില്ല. ഇതോടെ ശസ്ത്രക്രിയ മുടങ്ങിയ സുരേഷ് രണ്ടു ദിവസമായി സ്വകാര്യ ആശുപത്രിയിൽ ചികിത്സയിലിരിക്കെ കഴിഞ്ഞദിവസം രാവിലെയാണ് മരിച്ചത്. സുരേഷിന്‍റെ മരണത്തിൽ ബാങ്ക് അധികാരികൾക്കെതിരെ നടപടി സ്വീകരിക്കണമെന്നു നിക്ഷേപ കൂട്ടായ്മ രക്ഷാധികാരി ശാന്തിവിള മുജീബ് റഹ്‌മാനും കൺവീനർ കൈമനം സുരേഷും ആവശ്യപ്പെട്ടു.

നഴ്സിന്‍റെ മാല മോഷ്ടിച്ചെന്നു പരാതി

കാട്ടാക്കട: സ്കൂട്ടറിൽ സഞ്ചരിക്കുകയായിരുന്ന നഴ്സിന്‍റെ സ്വർണമാല പിന്നാലെ ബൈക്കിൽ എത്തിയ ആൾ പൊട്ടിച്ചു കടന്നു. കാട്ടാക്കട ചാരുപാറയ്ക്ക് സമീപം വെള്ളിയാഴ്ചയാണ് സംഭവം. പൂഴനാടുനിന്നും കാട്ടാക്കടയിലേക്ക് വരികയായിരുന്നു കുന്നനാട് കരിമണ്ണറ കോണം വീട്ടിൽ ദീപയുടെ രണ്ടര പവന്‍റെ മാലയാണ് കവർന്നത്. കാട്ടാക്കട പോ ലീസ് കേസ് രജിസ്റ്റർ ചെയ്ത് അന്വേഷണം ആരംഭിച്ചു.

ബോണക്കാട് കുരിശുമലയിൽ കുരിശിന്‍റെ വഴി നടത്തി

വിതുര: കിഴക്കിന്‍റെ കാൽവരി ബോണക്കാട് കുരിശുമലയുടെ രണ്ടാംദിന തീർഥാടനം നടന്നു. കുരിശിന്‍റെ വഴിക്ക് വെള്ളനാട് നവജീവൻ ബ്രദേഴ്സ് നേതൃത്വം നല്കി. തുടർന്നു നടന്ന ദിവ്യബലിക്ക് ആര്യനാട് ഫൊറോന വികാരി ഷൈജുദാസ് മുഖ്യകർമികനായി. ഫാ. എ.എസ്. പോൾ വചനസന്ദേശം നൽകി. കുരിശുമല റെക്ടർ റവ. ഡോ. ടി. ബിനു, ഫാ. ജോസഫ് ഷാജി, ഫാ. യോഹന്നാൻ ഒഎഫ്എം, ഫാ. റിനോയി കാട്ടിപറമ്പിൽ, ഫാ. ലിജോ മോൻ ലീൻ തുടങ്ങിയവർ സഹകാർമികരായി. ആര്യനാട് ഫെറോനായാണ് നേതൃത്വം നൽകിയത്. മൂന്നാം ദിനമായ ഇന്നു ചുള്ളിമാനൂർ ഫൊറോനയിലെ വൈദികരും വിശ്വാസികളുമാണ് നേതൃത്വം നൽകുന്നത്. ഇന്നു നടക്കുന്ന പൊന്തിഫിക്കൽ ദിവ്യബലിക്ക് നെയ്യാറ്റിൻകര രൂപത സഹമെത്രാൻ ഡോ. ഡി. സെൽവരാജൻ മുഖ്യകർമികനാകും.

വിശുദ്ധ വാരത്തിനു നാളെ തുടക്കം; ഓശാന ഞായറിനൊരുങ്ങി ദേവാലയങ്ങള്‍

തിരുവനന്തപുരം: ഓശാന ഞായറിന്‍റെ തിരുക്കര്‍മങ്ങള്‍ക്കായി ദേവാലയങ്ങള്‍ ഒരുങ്ങി. ഓശാന ഞായറിനോടനുബന്ധിച്ച് നാളെ നഗരത്തിലെ വിവിധ ദേവാലയങ്ങളില്‍ പ്രത്യേക പ്രാര്‍ഥനാശുശ്രൂഷകളും കുരുത്തോല വെഞ്ചരിപ്പും നടക്കും. ഓശാന ആചരണത്തോടെ ക്രൈസ്തവ ദേവാലയങ്ങളില്‍ വിശുദ്ധവാര തിരുക്കര്‍മങ്ങള്‍ക്കു തുടക്കമാകും. വിവിധ ദേവാലയങ്ങളില്‍ നടക്കുന്ന ഓശാനഞായര്‍ ശുശ്രൂഷകളില്‍ വിവിധ മതമേലധ്യക്ഷന്മാര്‍ കാര്‍മികത്വം വഹിക്കും. പട്ടം സെന്‍റ്് മേരീസ് മേജര്‍ ആര്‍ക്കി എപ്പാര്‍ക്കിയല്‍ കത്തീഡ്രലില്‍ ഓശാനയുടെ തിരുക്കര്‍മങ്ങള്‍ നാളെ രാവിലെ 6.30ന് ആരംഭിക്കും. മലങ്കര കത്തോലിക്കാസഭ മേജര്‍ ആര്‍ച്ച് ബിഷപ് കര്‍ദിനാള്‍ മാര്‍ ബസേലിയോസ് ക്ലീമിസ് കാതോ ലിക്കാബാവ മുഖ്യകാര്‍മികനായിരിക്കും. കുരുത്തോലവാഴ്‌വിന്‍റെ ശുശ്രുഷ, പ്രദക്ഷിണം, വിശുദ്ധ കുര്‍ബാന എന്നീ തിരുക്കര്‍മങ്ങളുണ്ടാകും. വൈകുന്നേരം അഞ്ചിനും വിശുദ്ധ കുര്‍ബാനയുണ്ടാകും. പാളയം സെന്‍റ് ജോസഫ്‌സ് മെട്രോപ്പൊളിറ്റന്‍ കത്തീഡ്രലില്‍ നാളെ രാവിലെ ഏഴിന് ആരംഭിക്കുന്ന പൊന്തിഫിക്കല്‍ ദിവ്യബലിക്കും കുരുത്തോല വെഞ്ചിരിപ്പിനും മറ്റു ഓശാന ശുശ്രൂഷകള്‍ക്കും തിരുവനന്തപുരം ലത്തീന്‍ അതിരൂപത ആര്‍ച്ച്ബിഷപ് ഡോ.തോമസ് ജെ. നെറ്റോ മുഖ്യ കാര്‍മികനായിരിക്കും. രാവിലെ 5.45നും വൈകുന്നേരം അഞ്ചിനും വിശുദ്ധ കുര്‍ബാന ഉണ്ടാകും. പിഎംജി ലൂര്‍ദ് ഫൊറോന പള്ളിയില്‍ നാളെ രാവിലെ 5.30ന് വിശുദ്ധ കുര്‍ബാന. രാവിലെ ഏഴിന് ആരംഭിക്കുന്ന ഓശാന ഞായറിന്‍റെ തിരുക്കര്‍മങ്ങള്‍ക്ക് ചങ്ങനാശേരി അതിരൂപത പ്രോട്ടോ സിഞ്ചെല്ലൂസ് ഫാ.ആന്‍റണി ഏത്തക്കാട്ട് മുഖ്യകാര്‍മികനായിരിക്കും. തിരുക്കര്‍മങ്ങളോടനുബന്ധിച്ച് കുരുത്തോല വെഞ്ചിരിപ്പും പള്ളി യിലേക്ക് പ്രദക്ഷിണവും വിശുദ്ധ കുര്‍ബാനയും ഉണ്ടാ യിരിക്കും. ഓശാന ഞായറിനോടനുബന്ധിച്ച് നാളെ രാവിലെ 11നും വൈകുന്നേരം അഞ്ചിനും 6.30നും വിശുദ്ധ കുര്‍ബാനയുണ്ടാകും. വെട്ടുകാട് മാദ്രെ ദെ ദേവൂസ് ദേവാലയത്തില്‍ ഓശാന ഞായറിന്‍റെ തിരുക്കര്‍മങ്ങള്‍ നാളെ രാവിലെ 8.30ന് റൊസാരിയന്‍ കോണ്‍വന്‍റ് ഗ്രോട്ടോയില്‍ ആരംഭിക്കും. കുരുത്തോല വെഞ്ചിരിപ്പും പ്രദക്ഷിണവും ദിവ്യബലിയും ഉണ്ടാകും. പാളയം സമാധാന രാജ്ഞി ബസിലിക്കയില്‍ നാളെ രാവിലെ 6.15ന് പ്രഭാതനമസ്‌കാരത്തോടെ ഓശാനയുടെ ശുശ്രൂഷകള്‍ ആരംഭിക്കും. പ്രഭാത നമസ്‌കാരം, കുരുത്തോല വാഴ്‌വിന്‍റെ ശുശ്രൂഷ, വിശുദ്ധ കുര്‍ബാന എന്നീ ശുശ്രൂഷകള്‍ക്ക് ബസിലിക്ക റെക്ടര്‍ ഫാ.നെല്‍സണ്‍ വലിയവീട്ടില്‍ മുഖ്യകാര്‍മികത്വം വഹിക്കും. വൈകുന്നേരം ആറിന് സന്ധ്യാ നമസ്‌കാരം. വഴുതക്കാട് കാര്‍മല്‍ ഹില്‍ ആശ്രമ ദേവാലയത്തില്‍ ഓശാന ഞായറിന്‍റെ തിരുക്കര്‍മങ്ങള്‍ നാളെ രാവിലെ 6.30ന് ആരംഭിക്കും. കുരുത്തോല വെഞ്ചിരിപ്പ്, പ്രദക്ഷിണം, ആഘോഷമായ ദിവ്യബലി എന്നിവയുണ്ടാകും. രാവിലെ ഒന്‍പതിനും 11ന് ഇംഗ്ലീഷിലും ഉച്ചകഴിഞ്ഞ് നാലിനും 5.30നും ഏഴിനും വിശുദ്ധ കുര്‍ബാനയുണ്ടാകും. മണ്ണന്തല സെന്‍റ് ജോണ്‍ പോള്‍ രണ്ടാമന്‍ മലങ്കര കാത്തലിക്കാ പള്ളിയില്‍ നാളെ രാവിലെ 6.30ന് പ്രഭാത നമസ്‌കാരം, കുരുത്തോല വാഴ്‌വ് ശുശ്രൂഷ, വിശുദ്ധ കുര്‍ബാന. മുഖ്യ കാര്‍മികന്‍ ഫാ. ജോണ്‍ കുറ്റിയില്‍. ബാര്‍ട്ടന്‍ഹില്‍ വിശുദ്ധ പത്താം പിയൂസ് ക്‌നാനായ കത്തോലിക്ക പള്ളിയില്‍ നാളെ രാവിലെ 7.30ന് വിശുദ്ധ കുര്‍ബാന, കുരുത്തോല വെഞ്ചരിപ്പ്. വികാരി ഫാ. മിഥുൻ വലിയ പുളിഞ്ചാ ക്കിൽ മുഖ്യകാർമികനാകും. പാളയം സെന്‍റ് ജോര്‍ജ് ഓര്‍ത്തഡോക്‌സ് സിറിയന്‍ കത്തീഡ്രലില്‍ ഓശാനയുടെ തിരുക്കര്‍മങ്ങള്‍ നാളെ രാവിലെ ആറിന് ആരംഭിക്കും. ഏഴിന് വിശുദ്ധ കുര്‍ബാന. വൈകുന്നേരം ആറിന് സന്ധ്യാ നമസ്‌കാരം. നെടുമങ്ങാട് വിശുദ്ധ ജെറോം മലങ്കര കത്തോലിക്കാ പള്ളിയി ൽ നാളെ രാവിലെ എട്ടിന് പ്രഭാത പ്രാര്‍ഥനയോടെ ഓശാനയുടെ ശുശ്രൂഷകള്‍ ആരംഭിക്കും. കുരുത്തോല വാഴ്‌വ്, പ്രദക്ഷിണം, വിശുദ്ധ കുര്‍ബാന എന്നീ തിരുക്കര്‍മങ്ങളുണ്ടായിരിക്കും. വലിയതുറ വിശുദ്ധ ഫ്രാന്‍സിസ് സേവ്യര്‍ പള്ളിയിൽ നാളെ രാവിലെ 6.30ന് കുരുത്തോല വെഞ്ചിരിപ്പ്, പ്രദക്ഷിണം തുടര്‍ന്ന് ദിവ്യബലി. നെയ്യാറ്റിന്‍കര അമലോത്ഭവ മാതാ കത്തീഡ്രലില്‍ ബിഷപ് ഡോ. വിന്‍സന്‍റ് സാമുവല്‍ നാളെ രാവിലെ ഏഴിന് ഓശാന തിരുകര്‍മങ്ങള്‍ക്കു മുഖ്യകാര്‍മികത്വം വഹിക്കും. കുരിശടി ജംഗ്ഷനില്‍ കുരുത്തോല ആശീര്‍വദിക്കും. തുടരന്നു നടത്തുന്ന പ്രദക്ഷിണം ബസ് സ്റ്റാന്‍ഡ് ജംഗ്ഷനിലൂടെ ആലുംമൂട്ടിലെത്തി തിരികെ കോണ്‍വന്‍റ് റോഡിലൂടെ ദേവാലയത്തില്‍ സമാപിക്കും. തുടര്‍ന്ന് ദിവ്യബലി. പാറശാല മലങ്കര കത്തോലിക്കാ രൂപതയിലെ കുടയാല്‍ ജപമാല പള്ളിയിൽ‍ രാവിലെ 8.30ന് ബിഷപ് തോമസ് മാര്‍ യൗസേബിയൂസിന്‍റെ മുഖ്യ കാര്‍മികത്വത്തില്‍ ഓശാന തിരുക്കര്‍മങ്ങള്‍ നടത്തും. പനയംമൂല ലൂര്‍ദുമാതാ ദേവാലയത്തില്‍ നടത്തുന്ന ചടങ്ങുകള്‍ക്ക് രൂപതയുടെ വികാരി ജനറാൾ മോണ്‍. ജോസ് കോന്നാ ത്തുവിള നേതൃത്വം നല്‍കും.അമ്പൂരി സെന്‍റ് ജോര്‍ജ് ഫൊറോന ദേവാലയത്തില്‍ രാവിലെ 6.30ന് ഇടവക വികാരി ഫാ.സോണി കരുവേലിന്‍റെ നേതൃത്വത്തിലാണ് ചടങ്ങുകള്‍. നെയ്യാറ്റിന്‍കര രൂപതയുടെ തീര്‍ഥാടന കേന്ദ്രങ്ങളായ ബാലരാമപുരം വിശുദ്ധ സെബസ്ത്യാനോസ് ദേവാലയത്തില്‍ ഇടവക വികാരി ഫാ.വിക്ടര്‍ എവരിസ്റ്റസും കമുകിന്‍കോട് വിശുദ്ധ അന്തോണീസ് ദേവാലയത്തില്‍ ഇടവക വികാരി ഫാ.സജി തോമസും കുരുത്തോല പ്രദക്ഷിണത്തിന് നേതൃത്വം നല്‍കും. വ്ളാത്താങ്കര സ്വര്‍ഗാരോപിത മാതാ ദേവാലയത്തില്‍ ഫാ. ജോയി സിയും തൂങ്ങാംപാറ വിശുദ്ധ കൊച്ചുത്രേസ്യ ദേവാലയത്തില്‍ വികാരി ഫാ.ജോയി മത്യാസും മേലാരിയോട് വിശുദ്ധ മദര്‍ തെരേസാ ദേവാലയത്തില്‍ ഫാ.ജോണ്‍ കെ പൊന്നൂസും നേതൃത്വം നല്‍കും. നെയ്യാറ്റിന്‍കര രൂപതയിലെ തൈലപരികര്‍മ്മ ബലി തിങ്കളാഴ്ച വൈകുന്നേരം ഏഴിനു കത്തീഡ്രല്‍ ദേവാലയത്തില്‍ നടക്കും. മാരായമുട്ടം സോവർഹിൽ ലൂഥറൻ ചർച്ചിൽ ഓശാനയുടെ തിരുകർമ്മങ്ങൾ നാളെ രാവിലെ 7. 30ന് ആരംഭിക്കും. ഘോഷയാത്രയും തുടർന്ന് ആരാധനയും ഉണ്ടായിരിക്കും.

സ്കൂട്ടർ യാത്രക്കാരൻ കെഎസ്ആർടിസി ബസിടിച്ച് മരിച്ചു

നേമം: സ്കൂട്ടർ യാത്രക്കാരൻ കെഎസ്ആർടിസി ബസിടിച്ച് മരിച്ചു. ഇന്നലെ നേമം സ്കൂളിന് മുന്നിൽ ഉച്ചയ്ക്കുശേഷം 2.15-ഓടെയായിരുന്നു അപകടമുണ്ടായത്. വെള്ളായണി കീർത്തിനഗർ തിരുവോണം വീട്ടിൽ വാടകയ്ക്ക് താമസിക്കുന്ന പരേതനായ ഹരികുമാർ-ശൈലജ ദമ്പതികളുടെ മകൻ മണികണ്ഠൻ(34) ആണ് മരിച്ചത്. അവിവാഹിതനാണ്. പ്രാവച്ചമ്പലത്തിനും നേമം സ്കൂളിനുമിടയിൽ റോഡിലെ തണ്ണിമത്തൻ തട്ട് കടയിൽ ജോലിക്കാരനായിരുന്നു. ഊണ് കഴിക്കാനായി വീട്ടിലേക്ക് പോകുമ്പോഴാണ് പിന്നിലൂടെയെത്തിയ ബസ് ഇടിച്ചത്. മൃതദേഹം മെഡിക്കൽ കോളജ് മോർച്ചറിയിൽ. കാലടിയിൽ താമസിച്ചിരുന്ന മണികണ്ഠൻ ഈയടുത്താണ് വെള്ളായണിയിലേക്ക് താമസം മാറ്റിയത്. ഏക സഹോദരി ലക്ഷ്മി.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]