ലോകസമാധാനത്തിനായി ജപമാല റാലി ഇന്നു വേളിയിൽ
1464312
Sunday, October 27, 2024 6:40 AM IST
തിരുവനന്തപുരം: തിരുവനന്തപുരം ലത്തീൻ അതിരൂപതയിലെ എല്ലാ ഇടവകകളിലും കുടുംബയൂണിറ്റുകളിലുമായി ഈ മാസം നടത്തി വന്നിരുന്ന ജപമാല സമർപ്പണ പ്രാർഥനയുടെ സമാപനം ലീജിയൻ ഓഫ് മേരിയുടെ ആഭിമുഖ്യത്തിൽ വേളി സെന്റ് തോമസ് ദേവാലയത്തിൽ നടത്തും. അതിരൂപതയിലെ എല്ലാ ഇടവകകളിൽനിന്നും ആയിരക്കണക്കിനു മരിയ സൈനികർ ജപമാല സമർപ്പണ റാലിയോടെ ഇന്നു വൈകുന്നേരം 6.30നു സെന്റ് തോമസ് ദേവാലയ അങ്കണത്തിൽ എത്തിച്ചേരും.
ലോകത്തിന്റെയും ഇന്ത്യയുടെയും സമാധാനത്തിനായി പ്രത്യേക ജപമാല പ്രാർഥനയോടെ നടത്തപ്പെടുന്ന റാലിക്ക് അതിരൂപത അൽമായ ശുശ്രൂഷാ ഡയറക്ടർ ഫാ. മൈക്കിൾ തോമസ്, വികാരി ജനറാൾ മോണ്. യൂജിൻ എച്ച്. പെരേര, അതിരൂപത കൊമ്മീസിയം പ്രസിഡന്റ് എ. ജയിംസ്, കൊമ്മീസിയം സെക്രട്ടറി പി.എം. സെബാസ്റ്റ്യൻ എന്നിവർ നേതൃത്വം നൽകും. സമാപനറാലിയെ തുടർന്ന് ആർച്ച്ബിഷപ് ഡോ. തോമസ് ജെ. നെറ്റോയുടെ കാർമികത്വത്തിൽ ആഘോഷപൂർവമായ പൊന്തിഫിക്കൽ ദിവ്യബലി നടത്തും.