സമന്വയം: വാമനപുരം നിയോജക മണ്ഡലതല ഉദ്ഘാടനം നാളെ
1463869
Friday, October 25, 2024 6:33 AM IST
തിരുവനന്തപുരം: സംസ്ഥാന ന്യൂനപക്ഷ കമ്മീഷന്റെ ആഭിമുഖ്യത്തിൽ കേരള നോളജ് ഇക്കോണമി മിഷനുമായി ചേർന്നു നടപ്പാക്കുന്ന "സമന്വയം' (ന്യൂനപക്ഷ യുവജനങ്ങൾക്ക് ഒരു ലക്ഷം തൊഴിലവസരങ്ങൾ) പദ്ധതിയുടെ വാമനപുരം മണ്ഡലതല ഉദ്ഘാടനം പെരിങ്ങമല ഷാ ഓഡിറ്റോറിയത്തിൽ നാളെ രാവിലെ 10ന് ഡി.കെ മുരളി എംഎൽഎ നിർവഹിക്കും. കമ്മീഷൻ ചെയർമാൻ അഡ്വ. എ.എ. റഷീദ് അധ്യക്ഷത വഹിക്കും.
കേരള നോളജ് ഇക്കോണമി മിഷൻ ഡയറക്ടർ ഡോ. പി.എസ്. ശ്രീകല മുഖ്യപ്രഭാഷണം നടത്തും. കമ്മീഷൻ അംഗങ്ങളായ പി. റോസ, എ. സൈഫുദ്ദീൻ ഹാജി, ജനപ്രതിനിധികൾ, വിവിധ ന്യൂനപക്ഷ സംഘടനാ നേതാക്കൾ, സംഘാടക സമിതി ഭാരവാഹികൾ തുടങ്ങിയവർ ഉദ് ഘാടന ചടങ്ങിൽ പങ്കെടുക്കും.
രാവിലെ ഒൻപത് മുതൽ രജിസ്ട്രേഷൻ ആരംഭിക്കും. ന്യൂനപക്ഷങ്ങളായ ക്രിസ്ത്യൻ, മുസ്ലിം വിഭാഗങ്ങളിലെയും സൂക്ഷ്മ ന്യൂനപക്ഷങ്ങളായ ബുദ്ധ, ജൈന, സിഖ്, പാഴ്സി വിഭാഗങ്ങളിലെയും അഭ്യസ്തവിദ്യരായ തൊഴിൽരഹിതർക്ക് വൈജ്ഞാനിക തൊഴിൽ പരിചയവും നൈപുണ്യ പരിശീലനവും നൽകുകയാണ് പദ്ധതിയിലൂടെ ലക്ഷ്യമിടുന്നത്.