അരുവിക്കര മണ്ഡലത്തിലെ നവീകരിച്ച റോഡുകള് തുറന്നു
1464107
Saturday, October 26, 2024 6:47 AM IST
നെടുമങ്ങാട്: അരുവിക്കരമണ്ഡലത്തില് നവീകരിച്ച റോഡുകള് ഗതാഗതത്തിനായി തുറന്നു. ബിഎം ആന്ഡ് ബിസി നിലവാരത്തില് നവീകരിച്ച മൂന്ന് റോഡുകള് മന്ത്രി പി.എ മുഹമ്മദ് റിയാസ് ഉദ്ഘാടനം ചെയ്തു. മൈലോട്ടുമൂഴി-ചായ്ക്കുളം റോഡ്, നെട്ടിറച്ചിറ-വെള്ളനാട്-പൂവച്ചല് റോഡ്, വെള്ളനാട്-കണ്ണമ്പള്ളി-ചേപ്പോട്-മുളയറ റോഡ് എന്നിവയാണ് നവീകരിച്ചത്. 20 കോടിയിലധികം രൂപയാണ് മൂന്ന് റോഡുകളുടെ നവീകരണത്തിനായി ചെലവായത്.
മികച്ച ഗുണനിലവാരമുള്ള റോഡുകൾ യാഥാർഥ്യമാക്കുകയെന്ന ജനങ്ങൾക്കുള്ള ഉറപ്പാണ് സർക്കാർ പാലിക്കുന്നതെന്നു മന്ത്രി പറഞ്ഞു. 1.50 കോടി രൂപയാണ് മൈലോട്ടുമൂഴി-ചായ്ക്കുളം റോഡിന്റെ നവീകരണത്തിനായി ചെലവായത്. കാട്ടാക്കട - നെയ്യാര്ഡാം റോഡിനേയും മുതിയാവിള - ഒറ്റശേഖരമംഗലം റോഡിനേയും ബന്ധിപ്പിക്കുന്ന പ്രധാന റോഡാണ് മൈലോട്ടുമൂഴി-ചായ്ക്കുളം-ആമച്ചല് റോഡ്.
ഈ റോഡിന്റെ 950 മീറ്ററാണ് ബിഎം ആന്ഡ് ബിസി നിലവാരത്തില് നവീകരിച്ചത്. ചായ്ക്കുളം ജംഗ്ഷനിലും വെള്ളനാട് ശ്രീഭദ്ര ഓഡിറ്ററിയത്തിലും നടന്ന ഉദ്ഘാടന ചടങ്ങുകളില് ജി.സ്റ്റീഫന് എംഎല്എ അധ്യക്ഷനായിരുന്നു.
വെള്ളനാട് ബ്ലോക്ക് പഞ്ചായത്ത് പ്രസിഡന്റ് എസ്.ഇന്ദുലേഖ, പൂവച്ചല് പഞ്ചായത്ത് പ്രസിഡന്റ് ടി.സനല്കുമാര്, വെള്ളനാട് പഞ്ചായത്ത് പ്രസിഡന്റ് കെ.എസ്.രാജലക്ഷ്മി, ജില്ലാ പഞ്ചായത്തംഗം വെള്ളനാട് ശശി, രാധിക ടീച്ചര്, ബ്ലോക്ക്-പഞ്ചായത്ത് അംഗങ്ങള് എന്നിവരും പങ്കെടുത്തു.
ഗതാഗത നിയന്ത്രണം ഏർപ്പെടുത്തി
നേമം: അരിക്കടമുക്ക് - മുക്കുന്നിമല റോഡിൽ ഇടയ്ക്കോട് ജംഗ്ഷൻ കഴിഞ്ഞിട്ടുള്ള തോടിന് കുറുകെ കൾവർട്ടിന്റെ പണി നടക്കുന്ന സ്ഥലത്ത് ശക്തമായ മഴയെ തുടർന്ന് മണ്ണിടിഞ്ഞ് ഗതാഗതം തടസപ്പെട്ടതിനാൽ അരിക്കടമുക്ക് ഭാഗത്ത് നിന്ന് മുക്കുന്നിമലയിലേക്ക് പോകുന്ന വാഹനങ്ങൾ കളപ്രകോണം ക്ഷേത്രം റോഡിലൂടെയും,
മുക്കുന്നിമലയിൽ നിന്ന് അരിക്കടമുക്കിലേക്ക് പോകുന്ന വാഹനങ്ങൾ മഞ്ചാടത്ത് മണലുവിള റോഡിലൂടെയും പോകണമെന്ന് പൊതുമരാമത്ത് നെയ്യാറ്റിൻകര റോഡുകൾ വിഭാഗം അസിസ്റ്റന്റ് എൻജിനീയർ അറിയിച്ചു.