പോരാട്ടത്തിനിറങ്ങുന്നത് 2500 ത്തോളം താരങ്ങൾ : റവന്യൂ ജില്ലാ സ്കൂൾ കായികമേള ഇന്നു മുതൽ
1463863
Friday, October 25, 2024 6:33 AM IST
തിരുവനന്തപുരം: റവന്യൂ ജില്ല സ്കൂൾ കായികമേളയ്ക്ക് ഇന്നു തുടക്കമാകും. കാര്യവട്ടം എൽഎൻസിപി സ്റ്റേഡിയത്തിൽ ആരംഭിക്കുന്ന മീറ്റ് 27ന് സമാപിക്കും. റവന്യു ജില്ലയിലെ സായി, ജി.വി. രാജ, അയ്യങ്കാളി സ്പോർട്സ് സ്കൂളുകളും പൊതു വിദ്യാഭ്യാസവകുപ്പിന്റെ 12 ഉപജില്ലകളിൽ നിന്നുള്ള അണ്ടർ 14, അണ്ടർ 17, അണ്ടർ 19 വിഭാഗങ്ങളിൽ നിന്നുള്ള താരങ്ങളും മത്സരത്തിൽ അണിനിരക്കും.
98 മത്സര ഇനങ്ങളിൽ 2500 ത്തോളം താരങ്ങളാണ് മൂന്നു ദിവസം നീണ്ടുനില്ക്കുന്ന മത്സരത്തിൽ പോരാട്ടത്തിനിറങ്ങുന്നത്. ഇന്നു രാവിലെ സീനിയർ ആണ്കുട്ടികളുടെ 1500 മീറ്റർ മത്സരത്തോടെയാണ് ട്രാക്ക് ഉണരുന്നത്. 36 ഫൈനലുകൾക്ക് കാര്യവട്ടം സ്റ്റേഡിയം സാക്ഷ്യം വഹിക്കും. രാവിലെ മീറ്റിന്റെ ഉദ്ഘാടനം കടകംപള്ളി സുരേന്ദ്രൻ എംഎൽഎ നിർവഹിക്കും.
തിരുവനന്തപുരം കോർപ്പറേഷൻ കൗണ്സിലർ എം. ബിനു അധ്യക്ഷത വഹിക്കും. കോർപ്പറേഷൻ കൗണ്സിലർ ചെന്പഴന്തി ഉദയൻ, എൽഎൻസിപിഇ പ്രിൻസിപ്പൽ ഡോ. ജി. കിഷോർ, ഡിഡിഇ ആർ. ഷീജ, എസ്. ജയചന്ദ്രൻ, എസ്. പ്രദീപ് കുമാർ എന്നിവർ പ്രസംഗിക്കും.
27നു വൈകുന്നേരം നാലിനു ഡിഡിഇ ആർ. ഷീജയുടെ അധ്യക്ഷതയിൽ ചേരുന്ന കായിക മേളയുടെ സമാപന സമ്മേളനം ജില്ലാ പഞ്ചായത്ത് പ്രസിഡന്റ് അഡ്വ. ഡി. സുരേഷ് കുമാർ ഉദ്ഘാടനം ചെയ്യും. ജില്ലാ പഞ്ചായത്ത് വൈസ് പ്രസിഡന്റ് അഡ്വ.ഷൈലജ ബീഗം മുഖ്യപ്രഭാഷണം നടത്തും.
നഗരസഭാ പൊതുമരാമത്ത് സ്റ്റാൻഡിംഗ് കമ്മിറ്റി ചെയർമാൻ മേടയിൽ വിക്രമൻ, കൗണ്സിലർ എൽ.എസ്. കവിത, ഹയർ സെക്കൻഡറി ആർഡിഡി കെ. സുധ, വിഎച്ച്എസ്സി എഡിഒ എസ്. ചിത്ര, പ്രദീപ് കുമാർ, ആർ.എസ്. ലിജിൻ എന്നിവർ ആശംസകളർപ്പിക്കും.
ഇന്നു രാവിലെ ഒൻപതിന് മണിക്ക് രജിസ്ട്രഷൻ നടപടികൾ ആരംഭിക്കുമെന്നു പബ്ലിസിറ്റി കമ്മിറ്റി കണ്വീനർ ആർ.എസ്.സുനിൽകുമാർ അറിയിച്ചു.