നേമം സഹകരണ ബാങ്ക് : സമരസമിതി രക്ഷാധികാരിക്ക് വധഭീഷണിയെന്ന് പരാതി
1464111
Saturday, October 26, 2024 6:55 AM IST
നേമം : നേമം സഹകരണ ബാങ്കിലെ സമര സമിതി രക്ഷാധികാരി എസ്. മുജീബ് റഹ്മാന് വധഭീഷണി. ബാങ്കിലെ മുന് സെക്രട്ടറി എ.ആര്.രാജേന്ദ്രന്റെ മരുമകനാണ് ഫോണില് വിളിച്ച് ഭീഷണിപ്പെടുത്തിയതായി പരാതി നല്കിയത്.
നിക്ഷേപകരുടെ സമര കൂട്ടായ്മയുടെ നേതൃത്വത്തില് സമര പരിപാടികള് നടന്നുവരുന്നതിനിടെയാണ് വ്യാഴാഴ്ച ലണ്ടനില് നിന്നും രാജേന്ദ്രന്റെ മരുമകന്റെ ഫോണ് വിളി വന്നതെന്നും അസഭ്യം പറയുകയും വധിക്കുമെന്ന് ഭീഷണിപ്പെടുത്തുകയും ചെയ്തതായി മുജീബ് റഹ്മാന് നേമം പോലീസില് നല്കിയ പരാതിയില് പറയുന്നു.
രാജേന്ദ്രനും കുടുംബവും ബാങ്കില് നിന്നും ലക്ഷകണക്കിന് രൂപ വായ്പ എടുത്തതായുള്ള രേഖ സമരസമിതി പുറത്തുവിടുകയും മുന് സെക്രട്ടറി രാജേന്ദ്രന് വിദേശത്ത് കടക്കാന് ശ്രമിക്കുന്നതായും, ഇത് തടയണമെന്നുമുള്ള പരാതിയും മുജീബ് റഹ്മാന് നല്കിയിരുന്നു.
ഇതിന്റെ വൈരാഗ്യമാണ് ഭീഷണിക്ക് പിന്നിലെന്ന് കരുതുന്നതായി മുജീബ് പറഞ്ഞു. ബാങ്കിലെ തിരിമറികള്ക്കെതിരെ കോണ്ഗ്രസ് നേമം ബ്ലോക്ക് കമ്മിറ്റിയുടെ പ്രതിഷേധ ധര്ണ രാവിലെ കെ.മുരളീധരന് ഉദ്ഘാടനം ചെയ്യും.