ADVERTISEMENT

ADVERTISEMENT

വിദ്യാർഥി ബസിൽ കുഴഞ്ഞുവീണ് മരിച്ചു

മണ്ണാർക്കാട്: കോഴിക്കോടുനിന്നു മണ്ണാര്‍ക്കാട്ടെ വീട്ടിലേക്കു വരുന്നതിനിടെ വിദ്യാർഥി കെഎസ്‌ആര്‍ടിസി ബസില്‍ കുഴ‍ഞ്ഞുവീണ് മരിച്ചു. കണ്ടമംഗലം അമ്പാഴക്കോട് ഹംസയുടെ മകൻ സിയാദ്(18) ആണ് മരിച്ചത്.

ബുധനാഴ്ച രാത്രി പത്തുമണിയോടെയാണ് സംഭവം. ഉടൻ ബസ് ജീവനക്കാരും യാത്രക്കാരും ചേർന്ന് ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. കോഴിക്കോട് സ്വകാര്യ സ്ഥാപനത്തിൽ എൻജിനീയറിംഗ് വിദ്യാർഥിയായിരുന്നു. മാതാവ്: ഫൗസിയ. സഹോദരങ്ങൾ: മുഹമ്മദ് ഷാമിൽ, ഹസ്ന ഫാത്വിമ.

ADVERTISEMENT

വിഷുവേലയ്ക്കിടെ പോലീസിനെ മർദിച്ച അഞ്ചുപേർക്കെതിരേ കേസ്

കുഴല്‍മന്ദം: വിഷുവേലയ്ക്കിടെയുണ്ടായ സംഘര്‍ഷം പിരിച്ചുവിടാനെത്തിയ ഗ്രേഡ് സബ് ഇന്‍സ്‌പെക്ടറെ മര്‍ദിച്ച സംഭവത്തില്‍ അഞ്ചുപേര്‍ക്കെതിരെ പോലീസ് കേസെടുത്തു. മാത്തൂര്‍ വീശ്വലം കാളികാവ് ഭഗവതി ക്ഷേത്രത്തിലെ വിഷുവേലയ്ക്കിടെയാണ് സംഘര്‍ഷമുണ്ടായത്. ഗ്രേഡ് എസ്ഐ സുരേഷ് കുമാറിനു നേരെയാണ് ആക്രമണമുണ്ടായത്. ബുധനാഴ്ച വൈകുന്നേരം ആറിന് വീശ്വലത്തുവച്ചായിരുന്നു ആക്രമണം. ആക്രമണത്തെ തുടര്‍ന്ന് നിലത്തുവീണ സുരേഷ് കുമാറിന്‍റെ ഇടതു തോളിനു ഉള്‍പ്പെടെ സാരമായി പരിക്കേറ്റിരുന്നു. തുടര്‍ന്ന് ഇദ്ദേഹത്തെ കുഴല്‍മന്ദം കമ്യൂണിറ്റി ഹെല്‍ത്ത് സെന്‍ററിലും തുടര്‍ന്ന് ജില്ലാ ആശുപത്രിയിലേക്കു മാറ്റുകയുമായിരുന്നു.സംഭവത്തോടനു ബന്ധിച്ച് വീശ്വലം സ്വദേശികളായ സുഭാഷ് (28), സി. മിഥുന്‍ (23), കിഷോര്‍ (30), കെ. ഷാജു ( 32), കെ. അനീഷ് ( 30) എന്നിവര്‍ക്കെതിരെയാണ് കുഴല്‍മന്ദം പോലീസ് കേസെടുത്തത്. പ്രതികളെ പാലക്കാട് ഒന്നാം ക്ലാസ് ജുഡീഷ്യല്‍ മജിസ്‌ട്രേറ്റ് കോടതിയില്‍ ഹാജരാക്കി. പ്രതികളെ 15 ദിവസത്തേക്കു കോടതി റിമാന്‍ഡുചെയ്തു.

പാലക്കാട്ടെ ഭിന്നശേഷി നൈപുണ്യകേന്ദ്രം ; ആരും വിട്ടുകൊടുക്കില്ല, വിവാദം തുടരും

പാലക്കാട്: നഗരസഭയുടെ ഭിന്നശേഷി നൈപുണ്യകേന്ദ്രത്തിന് ആർഎസ്എസ് നേതാവിന്‍റെ പേരുനൽകാനുള്ള നീക്കത്തിൽ വിവാദം ഇനിയും പുകയും. ഇന്നലെ നടന്ന സർവകക്ഷിയോഗത്തിൽ തീരുമാനങ്ങൾ പലതുണ്ടെങ്കിലും അങ്ങനെയൊന്നും വിട്ടുകൊടുക്കേണ്ടെന്ന നിലപാടിൽതന്നെയാണ് ബിജെപി, കോൺഗ്രസ്, സിപിഎം നേതൃത്വങ്ങൾ. ആസന്നമായ തെരഞ്ഞെടുപ്പുകൾക്കുള്ള മുന്നൊരുക്കമെന്ന നിലയിലാണ് നേതാക്കൾ പലരും വിഷയത്തെ കാണുന്നത്. പാലക്കാടിന്‍റെ സമാധാന അന്തരീക്ഷം നിലനിർത്തണമെന്ന ജനങ്ങളുടെ ആവശ്യത്തിന് ഇവർ മനസുകൊണ്ടു സമ്മതംമൂളുന്നുമില്ല. പാലക്കാട് നഗരത്തിനുള്ളിലെ ശക്തിയാർക്ക് എന്നു തെളിയിക്കാനാണ് പാർട്ടികളുടെ ശ്രമം. പരസ്യമായ പോര് ഇനിയും പ്രതീക്ഷിക്കുന്ന നഗരവാസികൾക്കു ആശ്വാസം ചെറുപാർട്ടികളാണ്. പലരും യോഗംചേർന്നു സമാധാനാന്തരീക്ഷത്തിനു മുറവിളി കൂട്ടിത്തുടങ്ങിയതുമാത്രമാണ് ജനങ്ങളുടെ ഏക ആശ്വാസം. ബിജെപി ഭരിക്കുന്ന പാലക്കാട് നഗരസഭയുടെ കീഴിലുള്ള ഭിന്നശേഷി നൈപുണ്യ കേന്ദ്രത്തിനു ആർഎസ്എസ് നേതാവ് ഹെഡ്ഗേവാറിന്‍റെ പേരുനൽകിയതാണ് പ്രതിഷേധത്തിന് ഇടയാക്കിയത്. നഗരസഭ മുന്നോട്ടുപോകും പാലക്കാട്: ഭിന്നശേഷി നൈപുണ്യകേന്ദ്രത്തിനു ഹെഡ്ഗേവാറിന്‍റെ പേരുമായിത്തന്നെ മുന്നോട്ടുപോകുമെന്ന് നഗരസഭാ വൈസ് ചെയർപേഴ്സൺ ഇ. കൃഷ്ണദാസ് മാധ്യമങ്ങളോടു വ്യക്തമാക്കി. തർക്കം പേരിനെച്ചൊല്ലി മാത്രമല്ലെന്നും അങ്ങനെയായിരുന്നെങ്കിൽ എന്തിനാണ് ഉദ്ഘാടനച്ചടങ്ങ് അലങ്കോലപ്പെടുത്തിയതെന്നും കൃഷ്ണദാസ് ചോദിച്ചു. കോണ്‍ഗ്രസ് ഇത്രകാലം ഭരിച്ചിട്ട് ഭിന്നശേഷിക്കാര്‍ക്കുവേണ്ടി എന്തുചെയ്തുവെന്നു പറയാന്‍ രാഹുല്‍ മാങ്കൂട്ടത്തിലിനെ അദ്ദേഹം വെല്ലുവിളിക്കുകയും ചെയ്തു. വികസനത്തിനെതിരായി ആരെങ്കിലും മുടന്തന്‍ന്യായങ്ങളുമായി വന്നാല്‍ അതു കാര്യമാക്കുന്നില്ലെന്നും തങ്ങളുടെ പ്രവര്‍ത്തനവുമായി മുന്നോട്ടുപോകുമെന്നും കൃഷ്ണദാസ് കൂട്ടിച്ചേര്‍ത്തു. പോലീസ് നിഷ്ക്രിയം; ചർച്ച ബഹിഷ്കരിച്ച് കോൺഗ്രസ് പാലക്കാട്: നഗരത്തിലെ സംഘർഷാവസ്ഥ കണക്കിലെടുത്ത് പോലീസ് ഇന്നലെ വിളിച്ചുചേർത്ത സർവകക്ഷിയോഗം കോൺഗ്രസ് ബഹിഷ്കരിച്ചു. പോലീസിന്‍റെ പക്ഷപാതപരമായ പ്രവർത്തനത്തിൽ പ്രതിഷേധിച്ചായിരുന്നു കോൺഗ്രസിന്‍റെ ഈ നീക്കം. പാലക്കാട്ടെ രാഷ്ട്രീയ സാഹചര്യം വഷളാക്കിയതിനുത്തരവാദി പോലീസാണ്. പോലീസ് കാര്യക്ഷമമായി പ്രവർത്തിച്ചിരുന്നെങ്കിൽ അനിഷ്ട സംഭവങ്ങൾ ഒഴിവാക്കാമായിരുന്നുവെന്നും ഡിസിസി പ്രസിഡന്‍റ് എ. തങ്കപ്പൻ പറഞ്ഞു. ഭിന്നശേഷി നൈപുണ്യകേന്ദ്രത്തിന് പേരിടുന്നതുമായി ബന്ധപ്പെട്ട് ബ്ലോക്ക് കോൺഗ്രസ് കമ്മിറ്റി മാർച്ച് നടത്തിയതു നഗരസഭയിലേക്കാണ്. ഇതിനു ബദലായി ബിജെപി മാർച്ച് നടത്തിയതു ജില്ലാ കോൺഗ്രസ് കമ്മിറ്റി ഓഫീസിലേക്കും. പോലീസിനെ നോക്കുകുത്തിയാക്കി ജില്ലാ കോൺഗ്രസ് കമ്മിറ്റി ഓഫീസിലേക്ക് മാർച്ചുനടത്തി ജില്ലയിലെ സമാധാന അന്തരീക്ഷം തകർക്കാനുള്ള നീക്കം നടത്തിയത് ബിജെപിയാണ്. മാർച്ചിലുടനീളം ബിജെപിക്ക് കുടപിടിക്കുന്ന സമീപനം സ്വീകരിച്ച പോലീസ് സമാധാനപരമായി പ്രതിഷേധിച്ച യൂത്ത് കോൺഗ്രസ് പ്രവർത്തകരെ തല്ലിച്ചതയ്ക്കുകയായിരുന്നുവെന്നും അദ്ദേഹം പറഞ്ഞു. സർവകക്ഷിയോഗം കോൺഗ്രസ് ബഹിഷ്കരിച്ചെന്നതു തെറ്റാണ്. ഞങ്ങൾക്കു ലഭിച്ച അറിയിപ്പ് നോട്ടീസിൽ സർവകക്ഷിയോഗമെന്നോ സമാധാനയോഗമെന്നോ ഒരു വരിപോലും ഇല്ല. ചർച്ചയെന്നാണ് രേഖപ്പെടുത്തിയിരിക്കുന്നത്. അക്രമത്തിനു നേതൃത്വം നല്കുന്ന ബിജെപിയുമായുള്ള ഒരു ചർച്ചയ്ക്കും കോൺഗ്രസ് തയാറല്ലെന്നും അദ്ദേഹം പറഞ്ഞു.

പെസഹാവ്യാഴം ആചരിച്ചു

പാലക്കാട്: യേശുക്രിസ്തു പരിശുദ്ധ കുർബാന സ്ഥാപിച്ചതിന്‍റെയും ശിഷ്യരുടെ പാദങ്ങൾ കഴുകി വിനയത്തിന്‍റെ മാതൃക നൽകിയതിന്‍റെയും പൗരോഹിത്യം എന്ന കൂദാശ സ്ഥാപിക്കപ്പെട്ടതിന്‍റെയും ഓർമ പുതുക്കി ലോകമെമ്പാടും പെസഹാവ്യാഴം ആചരിച്ചു. വിവിധ ദേവാലയങ്ങളിൽ രാവിലെ നടന്ന പ്രത്യേക തിരുക്കർമങ്ങളിൽ വിശ്വാസികൾ പങ്കുചേർന്നു. സെന്‍റ് റാഫേൽസ് കത്തീഡ്രൽ പാലക്കാട് സെന്‍റ് റാഫേൽസ് കത്തീഡ്രലിൽ തിരുക്കർമങ്ങൾക്കു പാലക്കാട് രൂപതാധ്യക്ഷൻ മാർ പീറ്റർ കൊച്ചുപുരയ്ക്കൽ നേതൃത്വം നൽകി. രാവിലെ 6. 30നു ശുശ്രൂഷകൾ ആരംഭിച്ചു. നൂറുകണക്കിനു വിശ്വാസികളാണ് പെസഹാതിരുനാളിൽ കത്തീഡ്രലിൽ എത്തിച്ചേർന്നത്. ദേവാലയത്തിലെ ശുശ്രൂഷകൾക്കുശേഷം കാൽകഴുകൽശുശ്രൂഷയും നടത്തി. പെസഹാതിരുനാളിൽ രാവിലെ മുതൽ വൈകീട്ടുവരെ തുടർച്ചയായി ആരാധനാശുശ്രൂഷകൾ നടന്നു. വൈകീട്ട് ആറുമുതൽ ഏഴുവരെ പൊതു ആരാധനയിൽ നിരവധിപേർ സംബന്ധിച്ചു. ഇന്നു ദുഃഖവെള്ളിദിനത്തിൽ രാവിലെ ആറരയ്ക്ക് ശുശ്രൂഷകൾ ആരംഭിക്കും. പീഡാനുഭവചരിത്ര വായനയും വിശുദ്ധ കുരിശിന്‍റെ ചുംബനവും തുടർന്ന് സന്ദേശവുമുണ്ടാകും. വൈകുന്നേരം നാലരയ്ക്ക് പാലക്കാട് സെന്‍റ് റാഫേൽസ് കത്തീഡ്രലിൽനിന്ന് പാലക്കാട് കോട്ടമൈതാനിയിലെ രാപ്പാടിയിലേക്കു പരിഹാരപ്രദക്ഷിണം നടക്കും. രാപ്പാടിയിൽ നടക്കുന്ന ആത്മീയശുശ്രൂഷകൾക്കുശേഷം മാർ പീറ്റർ കൊച്ചുപുരയ്ക്കൽ കുരിശിന്‍റെ ആശീർവാദംനൽകും. ഇന്നത്തെ ശുശ്രൂഷകളുമായി ബന്ധപ്പെട്ട വിപുലമായ പരിപാടികളാണ് ഏർപ്പെടുത്തിയിരിക്കുന്നതെന്നു വികാരി ഫാ. ജോഷി പുലിക്കോട്ടിലും കൈക്കാരന്മാരായ സുരേഷ് വടക്കൻ, പി.എൽ. ജോസഫ് എന്നിവരും അറിയിച്ചു. രാമനാഥപുരം കത്തീഡ്രൽ കോയമ്പത്തൂർ: രാമനാഥപുരം ഹോളി ട്രിനിറ്റി കത്തീഡ്രലിൽ പെസഹാ തിരുനാൾ ആചരിച്ചു. രൂപത മെത്രാൻ മാർ പോൾ ആലപ്പാട്ട് തിരുക്കർമങ്ങൾക്കു മുഖ്യകാർമികത്വം വഹിച്ചു. രൂപത വൈസ് ചാൻസലർ ഫാ. ആന്‍റണി കൂട്ടുങ്കൽ, കോയമ്പത്തൂർ സിഎംഐ പ്രേഷിത പ്രോവിൻസ് വികാർ പ്രൊവിൻഷ്യൽ ഫാ. വിൻസൺ ചക്യത്ത് സിഎംഐ, കത്തീഡ്രൽ വികാരി ഫാ. മാർട്ടിൻ പട്ടരുമടത്തിൽ, സഹവികാരി ഫാ. നെൽസൺ കളപ്പുരയ്ക്കൽ, സ്പിരിച്വൽ പ്രീസ്റ്റ് ഫാ. വിൽസൺ പ്ലാക്കൽ എന്നിവർ സഹകാർമികരായി. ഇടവകയിലെ 12 പേരുടെ കാലുകൾ കഴുകിക്കൊണ്ട് ബിഷപ് ഈശോ കാണിച്ചുതന്ന വിനയത്തിന്‍റെ മാതൃക ആവർത്തിച്ചു. ഇടവകയിലെ കുടുംബകൂട്ടായ്മ, വിവിധ സംഘടനകളുടെ നേതൃത്വത്തിൽ ദിവ്യകാരുണ്യ ആരാധനയും വൈകുന്നേരം പൊതു ആരാധനയും നടന്നു. കൈക്കാരന്മാരായ പി.വി. ജെയ്സൺ, ജെർസൺ ജോർജ്, ബിജു ഇത്താക്ക്, ഇടവകയിലെ വിവിധ സംഘടനകളുടെ ഭാരവാഹികൾ എന്നിവർ പരിപാടികൾക്കു നേതൃത്വം നൽകി. സുൽത്താൻപേട്ട സെന്‍റ് സെബാസ്റ്റ്യൻസ് കത്തീഡ്രലിൽ നടന്ന തിരുക്കർമങ്ങൾക്കു ബിഷപ് ഡോ. പീറ്റർ അബീർ അന്തോണിസാമി മുഖ്യകാർമികത്വം വഹിച്ചു. അട്ടപ്പാടി ജെല്ലിപ്പാറ സെന്‍റ് പീറ്റേഴ്സ് ദേവാലയത്തിൽ നടന്ന തിരുക്കർമങ്ങൾക്കു ബിഷപ് എമരിറ്റസ് മാർ ജേക്കബ് മനത്തോടത്ത് മുഖ്യകാർമികത്വം വഹിച്ചു.

പാലക്കാട്- പൊള്ളാച്ചി റൂട്ടിൽ അപകടങ്ങൾക്കു കുറവില്ല

എലപ്പുള്ളി: അപകട മുന്നറിയിപ്പ് ബോർഡുകൾ സ്ഥാപിച്ചിട്ടും മോട്ടർവാഹനവകുപ്പും പോലീസും പരിശോധനകൾ കർശനമാക്കിയിട്ടും പാലക്കാട്- പൊള്ളാച്ചി പാതയിലെ അപകടങ്ങൾക്കു കുറവില്ല. രണ്ടു മാസത്തിനിടെ ചെറുതും വലുതുമായ ഇരുപതിലേറെ അപകടങ്ങളിലായി 25 പേർക്കു പരിക്കേറ്റു. അഞ്ചുപേർ മരിച്ചു. ഇരട്ടയാൽ ജംഗ്ഷൻ, വള്ളേക്കുളം, പള്ളത്തേരി, പാറ ജംഗ്ഷൻ, നോമ്പിക്കോട്, നെയ്തലപാലം, ഇരട്ടക്കുളം എന്നിങ്ങനെ ഒട്ടേറെ സ്ഥിരം ഹോട്സ്പോട്ടുകളാണ് പാലക്കാട്- പൊള്ളാച്ചി അന്തർസംസ്ഥാന പാതയിലുള്ളത്. വാഹനങ്ങളുടെ അമിതവേഗത്തിനും അശ്രദ്ധയ്ക്കും പുറമേ പലയിടത്തും റോഡിനു മതിയായ വീതിയില്ലാത്തതും വളവുമാണ് അപകടങ്ങൾക്കു വഴിയൊരുക്കുന്നത്. അപകടം കുറയ്ക്കാനും ഗതാഗതക്കുരുക്ക് അഴിക്കാനും പോലീസിന്‍റെയും മോട്ടർവാഹന വകുപ്പിന്‍റെയും നിർദേശത്തോടെ പാറ ജംഗ്ഷനിൽ ഗതാഗത പരിഷ്കാരം നടപ്പാക്കിയിട്ടുണ്ട്. പലയിടത്തും ഇതുമൂലം തിരക്കും അപകടവും കുറയ്ക്കാനായി. ഒരു വർഷം മുൻപാണു റോഡ് പുതുക്കി പണിതത്. കിഫ്ബി ഫണ്ട് ഉപയോഗിച്ചു നാലുവരിപ്പാതയായി മാറ്റാനുള്ള പദ്ധതി തയാറാക്കിയിട്ടുണ്ട്.

നെല്ലുസംഭരണത്തിലെ മെല്ലെപ്പോക്ക്‌ അവസാനിപ്പിക്കണം: കർഷകസംഘം

പാലക്കാട്‌: സാങ്കേതിക പ്രശ്‌നങ്ങളുടെപേരിൽ നെല്ലുസംഭരണം വൈകുന്നതു കർഷകരെ ദുരിതത്തിലാക്കുന്നുവെന്ന്‌ കർഷകസംഘം ജില്ലാ കമ്മിറ്റി. മെല്ലെപ്പോക്ക്‌ അവസാനിപ്പിച്ച്‌ സംഭരണം കാര്യക്ഷമമാക്കാൻ സപ്ലൈകോ തയാറാകണം. തുടർച്ചയായ അവധി, സാമ്പത്തിക വർഷാവസാനത്തെ കണക്കെടുപ്പ്‌ എന്നിവ മൂലം സംഭരണം രണ്ടുംമുന്നും ആഴ്‌ച വൈകി. ഇതിനുപുറമെ ബാങ്കുകളുമായുള്ള കരാർ ഒപ്പിടുന്നതിൽ കാലതാമസം വന്നതിനാൽ നെല്ലുനൽകിയ കർഷകർക്കു പണം ലഭിക്കാനും തടസം നേരിടുന്നു. ഇപ്പോൾ സാങ്കേതിക പ്രശ്‌നങ്ങളുടെ പേരുപറഞ്ഞ്‌ സംഭരണം നീണ്ടുപോകുകയാണ്‌. കിഴക്കൻ മേഖലയിൽ കൊയ്‌തെടുത്ത നെല്ല്‌ ചാക്കിലാക്കി പാടത്തും മറ്റും കിടക്കുന്നു. ഇടയ്‌ക്കിടക്ക്‌ പെയ്യുന്ന മഴയിൽ നെല്ല്‌ നശിക്കുമെന്ന ആശങ്കയിലാണ്‌ കർഷകർ. നെല്ലുനനഞ്ഞാൽ ഈർപ്പത്തിന്‍റെ പേരിൽ തൂക്കം കുറയ്‌ക്കുകയും അതു കർഷകന്‌ വലിയ സാമ്പത്തിക നഷ്ടം വരുത്തുകയും ചെയ്യും. നെൽകൃഷിയ മാത്രം ആശ്രയിച്ച്‌ ജീവിക്കുന്ന ആയിരക്കണക്കിന്‌ കർഷകരുടെ ജീവിതത്തിൽ പ്രതിസന്ധിയുണ്ടാക്കുന്ന ഇത്തരം നിലപാടിൽ നിന്നും സപ്ലൈകോ പിൻമാറണം. സാങ്കേതിക പ്രശ്‌നങ്ങൾ ഉടൻ പരിഹരിക്കണം. സംഭരണം കാര്യക്ഷമാക്കുകയും നെല്ല്‌ അളന്ന ഉടൻ പണം നൽകാൻ നടപടി സ്വീകരിക്കുകയും വേണം. അല്ലെങ്കിൽ സമര പരിപാടികളുമായി മുന്നോട്ടുപോകുമെന്നും ജില്ലാകമ്മിറ്റി മുന്നറിയിപ്പുനൽകി. യോഗത്തിൽ ജില്ലാ പ്രസിഡന്‍റ് കെ.ഡി. പ്രസേനൻ എംഎൽഎ അധ്യക്ഷനായി. സംസ്ഥാന വൈസ്‌ പ്രസിഡന്‍റ് സി.കെ. രാജേന്ദ്രൻ, ജില്ലാ സെക്രട്ടറി എം.ആർ. മുരളി എന്നിവർ പ്രസംഗിച്ചു.

ഊട്ടി, കൊടൈക്കനാലിൽ പ്ലാസ്റ്റിക് നിരോധനം: നടപടികൾ കർശനമാക്കി അധികൃതർ

കോയന്പത്തൂർ: ഊട്ടി, കൊടൈക്കനാൽ എന്നിവയുൾപ്പെടെ പശ്ചിമഘട്ടമേഖലയിൽ 28 തരം പ്ലാസ്റ്റിക് ഉത്പന്നങ്ങൾ നിരോധിച്ചു മദ്രാസ് ഹൈക്കോടതി ഉത്തരവിട്ടതിന്‍റെ പശ്ചാത്തലത്തിൽ പോലീസ് പരിശോധന ഊർജിതം. നിരോധനം ലംഘിച്ച് പ്ലാസ്റ്റിക് കൊണ്ടുപോകുന്ന വാഹനങ്ങൾ പിടിച്ചെടുക്കാനും ഹൈക്കോടതി ഉത്തരവിട്ടിട്ടുണ്ട്. നീലഗിരിയിലേക്ക് പ്ലാസ്റ്റിക് ഉത്പന്നങ്ങൾ പ്രവേശിക്കുന്നത് നിരോധിക്കണമെന്ന് ആവശ്യപ്പെട്ട് സുബ്രഹ്മണ്യ കൗശിക് സമർപ്പിച്ച ഹർജിയിൽ വാദം കേൾക്കുന്നതിനിടെയാണ് കോടതിയുടെ ഉത്തരവ്. പശ്ചിമഘട്ടത്തിലെ വിനോദസഞ്ചാരികൾക്ക് കുടിവെള്ള കുപ്പികളും ബാഗുകളും വാടകയ്ക്ക് നൽകുന്ന പദ്ധതി നടപ്പിലാക്കണമെന്നും കോടതി ശുപാർശ ചെയ്തിട്ടുണ്ട്. ഇതിനിടെ പോലീസ് അടക്കമുള്ള അധികൃതർ ഊട്ടി, കൊടൈക്കനാൽ മേഖലയിൽ വാഹന പരിശോധനയും പ്ലാസ്റ്റിക് കണ്ടെത്തലും കർശനമാക്കിയിട്ടുണ്ട്.

എയർഹോൺ ദുരുപയോഗം; പിഴയിട്ട് ഗതാഗതവകുപ്പ്

കോയമ്പത്തൂർ: എയർഹോണുകൾ മുഴക്കി ചീറിപ്പായുന്ന ബസുകൾക്കു പിഴചുമത്തി ആർടിഒ അധികൃതർ. നഗരത്തിലും പ്രാന്തപ്രദേശങ്ങളിലും സർവീസ് നടത്തുന്ന സർക്കാർ, സ്വകാര്യബസുകളിൽ ഉച്ചത്തിലുള്ള എയർ ഹോണുകൾ ഘടിപ്പിക്കുന്നത് വളരെക്കാലമായി നിലനിൽക്കുന്ന ഒരു പതിവാണ്. ഏയർഹോണുകൾ വ്യാപകമായി അപകടങ്ങൾ സൃഷ്ടിക്കുന്നുവെന്ന കണ്ടെത്തിലിലാണ് ആർടിഒ നടപടി. പ്രാദേശിക ഗതാഗത ഉദ്യോഗസ്ഥരും മലിനീകരണ നിയന്ത്രണ ബോർഡ് ഉദ്യോഗസ്ഥരും ഇന്നലെ ഗാന്ധിപുരം ബസ് സ്റ്റാൻഡിൽ മിന്നൽ പരിശോധന നടത്തി. ശബ്ദ ലെവൽ മീറ്ററിൽ 90 ഡെസിബെൽ കവിഞ്ഞ ബസുകൾക്ക് പിഴ ചുമത്തിയത്. വാഹനങ്ങളിൽ സ്ഥാപിച്ചിരുന്ന എയർ ഹോണും അവർ നീക്കം ചെയ്തു. സ്വകാര്യ ബസുകൾക്കൊപ്പം സർക്കാർ ബസുകളും പരിശോധനയ്ക്കു വിധേയമായി. മൂവായിരം രൂപമുതൽ പതിനായിരംരൂപ വരെ പല വാഹനങ്ങൾക്കും പിഴ ചുമത്തിയതായി അധികൃതർ അറിയിച്ചു.

മാട്ടുമന്തയിലെ നിർധനകുടുംബത്തിനു വീടൊരുക്കി ഒലീവിയ ഫൗണ്ടേഷൻ

പാലക്കാട്: ഒലീവിയ ഫൗണ്ടേഷന്‍റെ നേതൃത്വത്തിൽ പാലക്കാട്‌ മാട്ടുമന്ത സ്വദേശിക്കു വീട് നിർമിച്ചുനൽകി. മാതാപിതാക്കളും രണ്ടു കുഞ്ഞുങ്ങളുമടങ്ങുന്ന കുടുംബത്തിന് താമസിക്കാനുതകുന്ന രീതിയിൽ വളരെ ചുരുങ്ങിയ കാലയളവിനുള്ളിലാണ് വീട് നിർമാണം പൂർത്തീകരിച്ചത്. ഒലീവിയ ഫൌണ്ടേഷൻ മാനേജിംഗ് ഡയറക്ടർ കെ.ടി. കൃഷ്ണകുമാർ താക്കോൽദാനം നിർവഹിച്ചു. ഫൗണ്ടേഷൻ സിഇഒ അജിത്കുമാർ വർമ മുഖ്യപ്രഭാഷണം നടത്തി. മഴക്കാലത്ത് ചോർന്നൊലിക്കുന്ന വീട്ടിൽ ഗൃഹനാഥനു നട്ടെല്ലിന് അസുഖം ബാധിക്കുകയും ചെയ്ത സാഹചര്യത്തിൽ രണ്ടു പെൺകുട്ടികളുള്ള കുടുംബത്തിനു സുരക്ഷയൊരുക്കുന്നതിന്‍റെ ഭാഗമായാണ് വീട് നിർമിച്ചു നൽകിയതെന്നു അധികൃതർ പറഞ്ഞു. വാർഡ് കൗൺസിലർ സിന്ധു, ഫൗണ്ടേഷൻ ഫിനാൻഷ്യൽ അഡ്വൈസർ രാമകൃഷ്ണൻ. ചീഫ് പ്രോജക്ട് മാനേജർ ഗൗതം രാമകൃഷ്ണൻ എന്നിവർ പ്രസംഗിച്ചു.

കാഞ്ഞിരപ്പുഴ പ്രാഥമികാരോഗ്യ കേന്ദ്രത്തിലേക്കു കുന്തിപ്പുഴ ലയൺസ് ക്ലബ് ഫാനുകൾ നൽകി

കാഞ്ഞിരപ്പുഴ: സർക്കാർ പ്രാഥമികാരോഗ്യ കേന്ദ്രത്തിലേക്കു കുന്തിപ്പുഴ ലയൺസ് ക്ലബ് ഫാനുകൾ വിതരണം ചെയ്തു. ആശുപത്രിയിൽ നടന്ന ചടങ്ങിൽ മെഡിക്കൽ ഓഫീസർ ഡോ. നെൽസൺ തോമസ് ഫാനുകൾ ഏറ്റുവാങ്ങി. ചടങ്ങിൽ കുന്തിപ്പുഴ ലയൺസ് ക്ലബ് പ്രസിഡന്‍റ് മോൻസി തോമസ്, സെക്രട്ടറി കെ.സി. ജയറാം, വൈസ് പ്രസിഡന്‍റുമാരായ റോയ് ജോർജ്, സുധീ ഷ്, ചാക്കോ, പൊറ്റശ്ശേരി സർവീസ് സഹകരണ ബാങ്ക് പ്രസിഡന്‍റ് ജോയ് ജോസഫ്, ഹെൽത്ത് ഇൻസ്പെക്ടർ രാമപ്രസാദ് എന്നിവർ പ്രസംഗിച്ചു.

ജില്ലയിൽ ആദ്യത്തെ മെഗാ മൾട്ടിസ്പെഷാലിറ്റി മെഡിക്കൽ ക്യാമ്പ് തൃത്താലയിലൊരുങ്ങുന്നു

പാലക്കാട്: തൃത്താല നിയോജകമണ്ഡലത്തിൽ മന്ത്രി എം.ബി. രാജേഷിന്‍റെ നേതൃത്വത്തിൽ നടപ്പാക്കുന്ന സമഗ്ര ആരോഗ്യപദ്ധതിയായ അൻപോടെ തൃത്താലയുടെ ഭാഗമായി മെഗാ മൾട്ടി സ്പെഷാലിറ്റി മെഡിക്കൽ ക്യാമ്പ് മേയ് 11 ന് സംഘടിപ്പിക്കുന്നു. വട്ടേനാട് ഗവ. വിഎച്ച്എസ് സ്കൂളിൽ രാവിലെ എട്ടുമുതൽ ഉച്ചയ്ക്ക് ഒന്നുവരെയാണ് ക്യാമ്പ്. സർക്കാർ ആശുപത്രികളും എറണാകുളം അമൃത, ലിസി, തൃശൂർ ജൂബിലി, അമല, കോട്ടയ്ക്കൽ മിംസ്, പെരിന്തൽമണ്ണ ഇഎംഎസ് ആശുപത്രി ഉൾപ്പെടെ കേരളത്തിലെ മികച്ച സ്വകാര്യ ആശുപത്രികളും ഹോമിയോ, അലോപ്പതി, ആയുർവേദ വിഭാഗങ്ങളും ക്യാമ്പിന്‍റെ ഭാഗമാകും. ജനറൽ മെഡിസിൻ, ജനറൽ സർജറി, ശിശുരോഗ വിഭാഗം, അസ്ഥിരോഗ വിഭാഗം, ഇഎൻടി, ത്വക്ക് രോഗ വിഭാഗം, പൾമനോളജി - ശ്വാസകോശവിഭാഗം, ഗൈനക്കോളജി, നേത്രരോഗ വിഭാഗം, ഹൃദ്രോഗവിഭാഗം -കാർഡിയോളജി, വൃക്കരോഗവിഭാഗം - നെഫ്രോളജി, ഉദരരോഗ വിഭാഗം - ഗ്യാസ്ട്രോ എന്‍ററോളജി, ന്യൂറോളജി, കാൻസർ വിഭാഗം - ഓങ്കോളജി, പീഡിയാട്രിക് സർജറി, കാർഡിയോ തൊറാസിക് സർജറി, യൂറോളജി, ന്യൂറോ സർജറി, സർജിക്കൽ, ഓങ്കോളജി, ഇന്‍റർവെൻഷണൽ റേഡിയോളജി, പാലിയേറ്റീവ് കെയർ, ദന്തരോഗ വിഭാഗം, ആയുർവേദം, ഹോമിയോ ഉൾപ്പെടെ 28 വിഭാഗങ്ങളുടെ സേവനം ലഭ്യമാക്കുന്ന ജില്ലയിലെ ആദ്യ മെഗാ മൾട്ടി സ്പെഷ്യാലിറ്റി മെഡിക്കൽ ക്യാമ്പ് കൂടിയാണിത്. ക്യാമ്പിൽ പങ്കെടുക്കുന്നവർക്കാവശ്യമായ തുടർ ചികിത്സാ സംവിധാനവും ഉറപ്പാക്കും. മൊബൈൽ ദന്തൽ ക്ലിനിക്ക് ഉൾപ്പെടെ വിപുലമായ ചികിത്സാ സൗകര്യങ്ങൾ ഒരുക്കിയാണ് മെഡിക്കൽ ക്യാമ്പ് സംഘടിപ്പിക്കുന്നത്. മെഡിക്കൽ ക്യാമ്പിൽ പങ്കെടുന്നവർ മുൻകൂട്ടി രജിസ്റ്റർ ചെയ്യണം. അപേക്ഷ ഫോം തൃത്താല എംഎൽഎ ഓഫീസിലും ഗ്രന്ഥശാലകളിലും ഈമാസം 30 വരെ ലഭ്യമാകും. മെഗാ മൾട്ടി സ്പെഷാലിറ്റി മെഡിക്കൽ ക്യാമ്പിന്‍റെ വിജയത്തിനായി സംഘാടകസമിതി രൂപീകരിച്ചു. യോഗം മന്ത്രി എം.ബി. രാജേഷ് ഉദ്ഘാടനം ചെയ്തു.വട്ടേനാട് എൽപി സ്കൂളിൽ ചേർന്ന യോഗത്തിൽ യു.ആർ. പ്രദീപ് എംഎൽഎ മുഖ്യാതിഥിയായി. ബ്ലോക്ക് പഞ്ചായത്ത് വൈസ് പ്രസിഡന്‍റ് പി.ആർ. കുഞ്ഞുണ്ണി അധ്യക്ഷനായി. ഡോ. ജോ ജോസഫ് പദ്ധതി വിശദീകരിച്ചു. ഗ്രാമപഞ്ചായത്ത് പ്രസിഡന്‍റുമാരായ വി.വി. ബാലചന്ദ്രൻ, പി.കെ. ജയ, ജില്ലാ പഞ്ചായത്ത് അംഗം വി.പി. ഷാനിബ ടീച്ചർ, തഹസിൽദാർ ടി.പി. കിഷോർ, അൻപോട് തൃത്താല സെക്രട്ടറി എ.പി. സുനിൽ ഖാദർ, സാമൂഹ്യ സാംസ്കാരിക രാഷ്ട്രീയ പ്രവർത്തകർ, അൻപോടെ തൃത്താല പ്രതിനിധികൾ തുടങ്ങിയവർ പങ്കെടുത്തു. പ്രസിഡന്‍റ് ഡോ.ഇ. സുഷമ സ്വാഗതവും ട്രഷറർ പി.വി. രാംദാസ് നന്ദിയും പറഞ്ഞു.

പാലക്കാടിന്‍റെ സമാധാന അന്തരീക്ഷം തകർക്കരുത്: എൻസിപി- എസ് ജില്ലാ കമ്മിറ്റി

പാലക്കാട്: നഗരസഭ സ്ഥാപിക്കുന്ന ഭിന്നശേഷി നൈപുണ്യ കേന്ദ്രത്തിനു ആർഎസ്എസ് സ്ഥാപകന്‍റെ പേരിടുന്നതിനെ ചൊല്ലിയുള്ള വിവാദങ്ങളും പ്രതിഷേധങ്ങളും പാലക്കാടിന്‍റെ സമാധാനന്തരീക്ഷം തകർക്കാൻ ഇടവരരുതെന്നു എൻസിപി- എസ് ജില്ലാ നേതൃയോഗം അഭിപ്രായപ്പെട്ടു. സംഘപരിവാർ നിയന്ത്രണത്തിലുള്ള പാലക്കാട് നഗരസഭ ഭരണനേതൃത്വവും എസ്ഡിപിഐ പിന്തുണയോടെ നിയമസഭാ അംഗമായ പാലക്കാട് എംഎൽഎയും ആസന്നമായ തദ്ദേശതെരഞ്ഞെടുപ്പും നിയമസഭാ തെരഞ്ഞെടുപ്പും മുന്നിൽകണ്ട് രാഷ്ട്രീയലക്ഷ്യത്തോടെ നടത്തുന്ന ഇത്തരം നീക്കങ്ങൾക്കെതിരേ മതേതര വിശ്വാസികളും സമാധാനകാംക്ഷികളും ജാഗ്രത പുലർത്തണമെന്നു യോഗം അഭ്യർഥിച്ചു. ജില്ലാ പ്രസിഡന്‍റ് എ. രാമസ്വാമി യോഗത്തിൽ അധ്യക്ഷത വഹിച്ചു. സംസ്ഥാന ജനറൽ സെക്രട്ടറി ടി.എൻ. ശിവശങ്കരൻ യോഗം ഉദ്ഘാടനം ചെയ്തു. സംസ്ഥാന ജനറൽ സെക്രട്ടറി പി.എ. റസാഖ് മൗലവി, സംസ്ഥാന നിർവാഹക സമിതി അംഗങ്ങളായ കാപ്പിൽ സൈതലവി, പി. അബ്ദുൽ റഹ്്മാൻ, മോഹൻ ഐസക്, ഷെനിൻ മന്ദിരാട്, ദേശീയസമിതിഅംഗം അഡ്വ.എ.കെ. മുഹമ്മദ് റാഫി, ജില്ലാ ഭാരവാഹികൾ പങ്കെടുത്തു.

എലപ്പുള്ളിയിലെ നിർദിഷ്ട ബ്രൂവറിക്കെതിരേ സമര ഐക്യദാർഢ്യസമ്മേളനം

എലപ്പുള്ളി: പഞ്ചായത്തിലെ മണ്ണുക്കാട് പ്രദേശത്തുവരുന്ന കാർഷിക മേഖലയെ തകർക്കുന്ന ജലക്ഷാമം രൂക്ഷമാക്കുന്ന മദ്യനിർമാണ കമ്പനി ജനജീവിതത്തെ ദുരിതപൂർണമാക്കുമെന്നു പിയുസിഎൽ സംസ്ഥാന വൈസ് പ്രസിഡന്‍റ് അഡ്വ.പി.എ. പൗരൻ. എലപ്പുള്ളി പഞ്ചായത്ത് കമ്യൂണിറ്റി ഹാളിൽ സംഘടിപ്പിച്ച എലപ്പുള്ളി ബ്രൂവറിവിരുദ്ധ സമരഐക്യദാർഢ്യസമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. നീലം കർഷകരെ വെള്ളക്കാരുടെ ചൂഷണത്തിൽനിന്നു രക്ഷിക്കുന്നതിന് ഗാന്ധിജി നടത്തിയ ചമ്പാരൻ സത്യഗ്രഹത്തിന്‍റെ സ്മരണകൾ ഉയർത്തിക്കൊണ്ടാണ് കോർപറേറ്റ് കുത്തകയായ മദ്യനിർമാണ കമ്പനിക്കെതിരേയുള്ള സമരം നടക്കുന്നതെന്നു തുടർന്നു യോഗത്തിൽ പ്രസംഗിച്ച നേതാക്കൾ പറഞ്ഞു. രാമശേരി ഗാന്ധി ആശ്രമം ട്രസ്റ്റി പുതുശേരി ശ്രീനിവാസൻ അധ്യക്ഷനായി. എൻഎപിഎം കൺവീനർ സി.ആർ. നീലകണ്ഠൻ, പഞ്ചായത്തീരാജ് മൂവ്മെന്‍റ് സംസ്ഥാന കോ- ഓർഡിനേറ്റർ അഡ്വ. ജോൺ ജോസഫ്, കേരള സർവോദയ മണ്ഡലം സംസ്ഥാന പ്രസിഡന്‍റ് ടി. ബാലകൃഷ്ണൻ, ഭാരതപ്പുഴ സംരക്ഷണ സമിതി ചെയർമാൻ അഡ്വ. കൊച്ചുകൃഷ്ണൻ, പ്ലാച്ചിമട സമര ഐക്യദാർഢ്യ സമിതി സംസ്ഥാന ചെയർമാൻ അമ്പലക്കാട് വിജയൻ, എലപ്പുള്ളി പഞ്ചായത്ത് ഉപാധ്യക്ഷൻ എസ്. സുനിൽകുമാർ, വിളയോടി വേണുഗോപാലൻ, ടി.എം. വർഗീസ്, ഡോ. ലക്ഷ്മി. ആർ. ചന്ദ്രൻ, എ.കെ. ഓമനക്കുട്ടൻ, ശിവരാജൻ, അശോക് പുലാപ്പറ്റ, കെ. അബ്ദുൾ അസീസ്, രാജീവ് കേരളശേരി, സജീഷ് കുത്തന്നൂർ, ബി.രാജേന്ദ്രൻ, ഇ.എ. ജോസഫ്, എം. സുലൈമാൻ, പുണ്യകുമാരി, വി. ചെന്താമരാക്ഷൻ, ശിവരാജേഷ്, അട്ടപ്പള്ളം ഗോപാലകൃഷ്ണൻ, ചിദംബരൻകുട്ടി, നാരായണൻ, ആറുമുഖൻ പത്തിച്ചിറ തുടങ്ങിയവർ പ്രസംഗിച്ചു. മണ്ണുക്കാട് ബ്രൂവറിവിരുദ്ധ സമരസമിതി ചെയർമാൻ എം. ജയകുമാർ സ്വാഗതവും ജനറൽ കൺവീനർ സുഭാഷ് മണ്ണുക്കാട് നന്ദിയും പറഞ്ഞു. വിവിധ ജില്ലകളിൽനിന്നടക്കം പരിസ്ഥിതി, രാഷ്ട്രീയ, മനുഷ്യാവകാശ, ഗാന്ധിമാർഗ പ്രവർത്തകർ പങ്കെടുത്തു.

വിനോദയാത്രക്കു പോയ ബാലിക മരിച്ചു

വടക്കഞ്ചേരി: വിനോദയാത്രയ്ക്കുപോയ പത്തു വയസുകാരി മരിച്ചു. അഞ്ചുമൂർത്തിമംഗലം ചേറുംകോട് മനോജ് -മായ ദമ്പതികളുടെ മകൾ ദേവികയാണ് മരിച്ചത്. കുടുംബത്തോടൊപ്പം വിനോദയാത്രയ്ക്കുപോയപ്പോൾ ദേഹാസ്വാസ്ഥ്യം അനുഭവപ്പെട്ടതിനെതുടർന്ന്‌ തഞ്ചാവൂരിലെ ആശുപത്രിയിൽ ചികിത്സയിലിരിക്കെയാണ് മരിച്ചത്. സഹോദരി: ദേവനന്ദ.

പ്രായപൂർത്തിയാകാത്ത പെൺകുട്ടികൾക്കുനേരെ പീഡനശ്രമം; രണ്ടുപേർ റിമാൻഡിൽ

ഷൊർണൂർ: പ്രായപൂർത്തിയാകാത്ത പെൺകുട്ടികളെ പീഡിപ്പിക്കാൻ ശ്രമിച്ച കേസിൽ രണ്ടുപേർ റിമാൻഡിൽ. സാമൂഹികമാധ്യമങ്ങൾവഴി സുഹൃത്തുക്കളായി മാറിയവരുടെ കൂടിച്ചേരലിനിടെയാണ് പ്രായപൂർത്തിയാവാത്ത പെൺകുട്ടികളെ പീഡിപ്പിക്കാൻ ശ്രമം നടന്നത്. സംഭവത്തിൽ മലപ്പുറം ചോക്കാട് പാറൽ മമ്പാട്ടുമൂല കോട്ടയിൽ സുനിൽകുമാർ (45), കല്ലിപ്പാടം അണ്ടിക്കുന്നുപറമ്പിൽ ജയകൃഷ്ണൻ (55) എന്നിവരാണ് റിമാൻഡിലായത്. കുളപ്പുള്ളിയിൽ സാമൂഹികമാധ്യമംവഴി കൂട്ടായവരുടെ കൂടിച്ചേരലിൽ പങ്കെടുക്കാനെത്തിയതായിരുന്നു ഇവർ. രാത്രിയിൽ കുട്ടികളുടെ വീട്ടിൽവെച്ച്‌ പീഡിപ്പിക്കാൻ ശ്രമിക്കയായിരുന്നെന്നാണ് പരാതി. രാത്രി കലാപരിപാടികൾക്കുശേഷം കുട്ടികളുടെ ബന്ധുവിനൊപ്പം വീട്ടിൽക്കയറിയ ഇരുവരും രണ്ട് കുട്ടികളോടും മോശമായി പെരുമാറിയെന്നും രക്ഷിതാക്കൾ അടുത്തില്ലാത്ത സമയത്തായിരുന്നു സംഭവമെന്നും പോലീസ് പറഞ്ഞു. പിന്നീട് പെൺകുട്ടികൾ സംഭവം രക്ഷിതാക്കളെ അറിയിച്ച് പോലീസിൽ പരാതി നൽകുകയായിരുന്നു. പത്ത്, ഒൻപത് വയസുള്ള കുട്ടികളെയാണ്‌ പീഡിപ്പിക്കാൻ ശ്രമിച്ചത്. കുട്ടികളുടെ ബന്ധു ഉൾപ്പെടെയുള്ളവരുള്ള സാമൂഹികമാധ്യമക്കൂട്ടായ്മയുടെ പരിപാടിയാണ് സംഘടിപ്പിച്ചത്. പരാതിയെത്തുടർന്ന് കഴിഞ്ഞ ദിവസം ഇവരെ പോലീസ് അറസ്റ്റുചെയ്തിരുന്നു. പ്രതികളെ കോടതി റിമാൻഡുചെയ്തു. എസ്ഐ കെ.എ. ഡേവിയുടെ നേതൃത്വത്തിലുള്ള സംഘമാണ് ഇവരെ പിടികൂടിയത്.

വനംവകുപ്പ് ആർആർടിക്കെതിരേ നടപടിയെടുക്കണമെന്നു കിഫ

പാലക്കാട്: മുണ്ടൂരിൽ കാട്ടാനയാക്രമണത്തിൽ കൊല്ലപ്പെട്ട അലന്‍റെ മരണത്തിനു കാരണക്കാരായ വനംവകുപ്പിന്‍റെ ആർആർടിക്കെതിരേ വകുപ്പുതല നടപടിയെടുക്കണമെന്നു കിഫ. ജില്ലയിൽ കാട്ടാനയുടെ രൂക്ഷമായ ശല്യം അനുഭവിക്കുന്ന പ്രദേശങ്ങളാണ് മലമ്പുഴ നിയോജക മണ്ഡലത്തിലെ മുണ്ടൂർ, പുതുപ്പരിയാരം, മലമ്പുഴ പഞ്ചായത്തുകൾ. മുൻകാലങ്ങളിൽ മുണ്ടൂർ, പുതുപ്പരിയാരം പഞ്ചായത്തുകളിൽമാത്രം അഞ്ചുപേർ കൊല്ലപ്പെടുകയും പലർക്കും പരിക്കേൽക്കുകയും വ്യാപകമായ കൃഷി നാശം സംഭവിക്കുകയും ചെയ്തിട്ടുണ്ട്. മുണ്ടൂർ, പുതുപ്പരിയാരം പഞ്ചായത്തുകളിൽ കാട്ടാന ഇറങ്ങുന്നതുമായി ബന്ധപ്പെട്ട വിവരങ്ങൾ പ്രദേശവാസികളെ അറിയിക്കുവാൻ വേണ്ടി 2021 ഡിസംബർ 24ന് വാട്സ്ആപ്‌ ഗ്രൂപ്പ് രൂപീകരിച്ചിരുന്നു. വന്യമൃഗങ്ങൾ ഇറങ്ങുന്നത് സംബന്ധിച്ച് യാതൊരു വിധ വിവരങ്ങളോ മുന്നറിയിപ്പുകളോ പാലക്കാട് ഡിവിഷന്‍റെ കീഴിലുള്ള ആർആർടി ഈ ഗ്രൂപ്പിൽ അറിയിച്ചിരുന്നില്ല. അലൻ കൊല്ലപ്പെടുന്നതിന്‍റെ തലേദിവസവും കാട്ടാനക്കൂട്ടം ജനവാസ മേഖലയിൽ ഇറങ്ങിയിരുന്നു. എന്നാൽ ആർആർടി ഈ പ്രദേശങ്ങളിൽ എത്തുകയോ ആനയെ തുരത്തുകയോ ജനങ്ങൾക്ക് ആനയുടെ സാന്നിധ്യം സംബന്ധിച്ച എന്തെങ്കിലും വിവരങ്ങൾ ഈ ഗ്രൂപ്പിൽ കൂടി അറിയിക്കുകയോ ചെയ്തിട്ടില്ല. മുണ്ടൂർ പഞ്ചായത്തിലെ കട്ടിക്കൽ മുതൽ പുതുപ്പരിയാരം പഞ്ചായത്തിലെ ധോണി വരെയുള്ള മലയോരപ്രദേശങ്ങൾ ജനങ്ങൾ തീവ്രമായ കാട്ടാന ഭീതിയിൽ കഴിയുമ്പോഴും ആർആർടിയുടെ നിഷ്ക്രിയത്വമാണ് യുവാവിന്‍റെ ജീവൻ ബലികൊടുത്തത്. കർത്തവ്യ നിർവഹണത്തിൽ അന്പേ പരാജയമാണ് പാലക്കാട് ഡിവിഷനു കീഴിലെ ആർആർടി വിഭാഗമെന്നും യോഗം കുറ്റപ്പെടുത്തി. ഇനിയും മനുഷ്യജീവനുകൾ പൊലിയാതിരിക്കാൻ മന്ത്രിയുടെ കൂടുതൽ ഇടപെടലുകളുണ്ടാവണമെന്നും കിഫ ജില്ലാ കമ്മിറ്റി ആവശ്യപ്പെട്ടു.

പെട്രോൾ ബോംബെറിഞ്ഞു കൊലപ്പെടുത്തിയ കേസിൽ പോലീസ് കുറ്റപത്രം തയാർ

ഒറ്റപ്പാലം: ചുനങ്ങാട് നിർമാണത്തിലിരുന്ന വീട്ടിലേക്ക് പെട്രോൾ ബോംബെറിഞ്ഞു തൊഴിലാളി മരിച്ച സംഭവത്തിൽ കുറ്റപത്രം തയാറായി. കുറ്റപത്രം സമർപ്പിക്കാൻ പ്രോസിക്യൂഷൻ അനുമതിക്കായി പോലീസ് ജില്ലാ കളക്ടറെ സമീപിച്ചിരിക്കുകയാണ്. എക്സ്പ്ലോസീവ് വകുപ്പുകൾ ഉൾപ്പെട്ട കേസായതിനാൽ കുറ്റപത്രം സമർപ്പിക്കാൻ കളക്ടറുടെ അനുമതി വേണമെന്നതിനാലാണിത്. അനുമതിക്കുശേഷം ഒറ്റപ്പാലം പോലീസ് കുറ്റപത്രം സമർപ്പിക്കും. കോഴിക്കോട് കൊയിലാണ്ടി കന്നൂർ മാണിക്കോത്ത് മീത്തൽ വിഷ്ണു (27) മരിച്ച സംഭവത്തിലാണ് കുറ്റപത്രം സമർപ്പിക്കാനുള്ള നടപടികൾ പോലീസ് തുടങ്ങിയത്. കേസിൽ ചുനങ്ങാട് മനയങ്കത്ത് നീരജ് (32) നിലവിൽ റിമാൻഡിലാണ്. കഴിഞ്ഞ ജനുവരി 13ന് പുലർച്ചെ 2.17നാണ് നിർമാണത്തിലിരിക്കുന്ന ചുനങ്ങാട്ടെ വീട്ടിൽ സ്‌ഫോടനം നടന്നത്. വീടിനു മുമ്പിലെ കുളത്തിന്‍റെ നിർമാണത്തിന് കോഴിക്കോടുനിന്ന് ആറു തൊഴിലാളികളെത്തിയിരുന്നു. ഇവർ രാത്രി വീടിനു മുൻവശത്ത് കിടന്നുറങ്ങുകയായിരുന്നു. ഇതിനിടെയാണ് ഈ വീടിന്‍റെ സമീപത്തെ വീട്ടിൽ താമസിച്ചിരുന്ന നീരജ് പെട്രോൾ ബോംബ് എറിഞ്ഞത്. തൊഴിലാളികൾ കളിയാക്കുന്നുവെന്ന തോന്നലിലാണ് നീരജ് പെട്രോൾ ബോംബ് എറിഞ്ഞതെന്ന്‌ പോലീസ് കണ്ടെത്തിയിരുന്നു. അന്ന് വിഷ്ണുവുൾപ്പെടെ രണ്ടുപേർക്കാണ് ഗുരുതരമായി പരിക്കേറ്റത്. ചികിത്സയിലിരിക്കേ ഫെബ്രുവരി ഒന്നിനു വിഷ്ണു മരിച്ചു. പരിക്കേറ്റ ബാലുശ്ശേരി സ്വദേശി പ്രിയേഷിന് ഒരുമാസത്തോളം നീണ്ട ചികിത്സ വേണ്ടിവന്നു. ജില്ലാ കളക്ടറുടെ അനുമതി ലഭിച്ചാൽ ഉടൻ പോലീസ് കുറ്റപത്രം കോടതിയിൽ സമർപ്പിക്കും.

ക്രൈസ്തവജീവിതത്തിൽ ഏറ്റവും ആകർഷണീയമാകേണ്ടതു കുരിശും കുരിശിലെ ജീവിതവും: മാർ പീറ്റർ കൊച്ചുപുരയ്ക്കൽ

അഗളി: ക്രൈസ്തവജീവിതത്തിൽ ഏറ്റവും ആകർഷണീയമാകേണ്ടതു കുരിശും കുരിശിലെ ജീവിതവുമാണെന്നു പാലക്കാട് രൂപത ബിഷപ് മാർ പീറ്റർ കൊച്ചുപുരയ്ക്കൽ. ജെല്ലിപ്പാറ സെന്‍റ് പീറ്റേഴ്സ് ദേവാലയത്തിൽ നാലുദിവസമായി നടന്ന അഭിഷേകാഗ്നി കൺവൻഷൻ സമാപനത്തോടനുബന്ധിച്ചു തിരുക്കർമങ്ങളിൽ സന്ദേശം നൽകുകയായിരുന്നു ബിഷപ്. ജീവിതത്തിൽ കുരിശിന്‍റെ പ്രാധാന്യം മനസിലാക്കി ജീവിക്കാൻ വിശുദ്ധവാരത്തിൽ നടന്ന കൺവൻഷനിലൂടെ ഏവർക്കും സാധ്യമാകട്ടെയെന്നു ബിഷപ് ആശംസിച്ചു. താവളം ഫെറോന വികാരി ഫാ. ബിജു പ്ലാത്തോട്ടത്തിൽ, ഫാ. മാർട്ടിൻ ഏറ്റുമാനൂക്കാരൻ എന്നിവർ സഹകാർമികത്വം വഹിച്ചു. താവളം സെഹിയോൻ ധ്യാനകേന്ദ്രം ഡയറക്ടർ ഫാ. സേവ്യർഖാൻ വട്ടായിലും സംഘവുമാണ് അഭിഷേകാഗ്നി കൺവൻഷൻ നയിച്ചത്. നാലുദിവസം നീണ്ടുനിന്ന കൺവൻഷനിൽ സംസ്ഥാനത്തിന്‍റെ വിവിധമേഖലകളിൽ നിന്നായി നൂറുകണക്കിനു വിശ്വാസികൾ പങ്കെടുത്തു.

അമ്പലപ്പാറയിലും ഒരുങ്ങുന്നു കളിമൈതാനം

ഒറ്റപ്പാലം: അമ്പലപ്പാറയിലും കായിക സ്വപ്നങ്ങൾക്കഉ ചിറകുമുളയ്ക്കുന്നു. പഞ്ചായത്തിലെ ചുനങ്ങാട്ട് നാട്ടുകാർ ചേർന്ന് മൈതാനം സ്വന്തമാക്കിയതിനു പിന്നാലെയാണ് അമ്പലപ്പാറയിലും മൈതാനമൊരുങ്ങുന്നത്. ആശുപത്രിപ്പടിയിലുള്ള പഞ്ചായത്ത് മൈതാനമാണു നവീകരിക്കുന്നത്. 2023- 24 വർഷത്തെ സംസ്ഥാന ബജറ്റിലെ ഒരു കോടി രൂപ വിനിയോഗിച്ച് മൈതാനത്തിന്‍റെ നവീകരണം തുടങ്ങി. ചുറ്റുമതിൽ കെട്ടൽ തുടങ്ങി. ഫുട്ബോൾ, വോളിബോൾ, കബഡി കോർട്ടുകൾ, ഫ്ലഡ്‌ലിറ്റ് സംവിധാനം, കായികോപകരണങ്ങൾ സ്ഥാപിക്കൽ തുടങ്ങിയവയും നടപ്പാക്കും. കേരള സ്പോർട്സ് ഫൗണ്ടേഷനാണ് നിർവഹണച്ചുമതല. എട്ടുമാസമാണ് കരാർ കാലാവധി. ചുനങ്ങാട് മുട്ടിപ്പാലത്തുകാർചേർന്ന് പണം സമാഹരിച്ച് 38 സെന്‍റ് സ്ഥലം 40 ലക്ഷം രൂപയ്ക്ക് സ്വന്തമാക്കി നാടിന്‍റെ പൊതുസ്വത്തായി പ്രഖ്യാപിച്ചിരുന്നു. അമ്പലപ്പാറ ആശുപത്രിപ്പടിയിൽ ഒരേക്കറിലധികംവരുന്ന മൈതാനം നാലുപതിറ്റാണ്ടായി നവീകരണംകാത്ത് കിടക്കുകയായിരുന്നു. മിച്ചഭൂമിയായിരുന്ന സ്ഥലം പഞ്ചായത്ത് മൈതാനമാക്കി ഉയർത്തുന്നത് 1985-ലാണ്. ഉദ്ഘാടനസമയത്ത് നിർമിച്ച ഒരു സ്റ്റേജും രണ്ടു മുറികളുമുണ്ടെങ്കിലും ഇതുപയോഗിക്കാതെ കിടക്കുകയാണ്. കെട്ടിടത്തിൽ ഇതുവരെ വൈദ്യുതിപോലും ഏർപ്പെടുത്തിയിട്ടില്ല.

ഇന്നു പെസഹ, നാളെ ദുഃഖവെള്ളി

പാലക്കാട്: ലോകമെന്പാടുമുള്ള ക്രൈസ്തവർ ഇന്നു പെസഹാ തിരുനാൾ ആചരിക്കും. ക്രിസ്തുനാഥൻ വിശുദ്ധകുർബാന സ്ഥാപിച്ച ദിനമാണ് പെസഹ. പെസഹ എന്ന വാക്കിന്‍റെ അർഥം കടന്നുപോകൽ എന്നാണ്. ഈജിപ്തിലെ ഫറവോയുടെ അടിമത്തത്തിൽനിന്നും ഇസ്രായേൽ ജനത്തെ ദൈവം രക്ഷിച്ച കഥ അനുസ്മരിക്കുന്നതായിരുന്നു അന്നുവരെ പെസഹ. പഴയ നിയമത്തിന്‍റെ തുടർച്ചയെന്നോണം ശിഷ്യരുമൊത്ത് പെസഹാ അപ്പം മുറിക്കാനായി ഇരുന്ന ക്രിസ്തു പതിവിൽനിന്നു വിഭിന്നമായി അപ്പവും വീഞ്ഞും നിറച്ച കാസയും എടുത്ത് "ഇതെന്‍റെ ശരീരവും രക്തവുമാകുന്നു; നിങ്ങൾ ഇതുവാങ്ങി ഭക്ഷിക്കുകയും പാനംചെയ്യുകയും ചെയ്യുവിൻ' എന്നരുൾ ചെയ്തു. ഈ വിശുദ്ധകുർബാന സ്ഥാപനത്തിന്‍റെ തിരുനാളാണ് ഇന്ന്. യേശു തന്‍റെ ശിഷ്യരുടെ പാദങ്ങൾ കഴുകി വിനയത്തിന്‍റെ അത്യുദാത്ത മാതൃക തീർത്തതും പെസഹാദിനത്തിലാണ്. ഈ രണ്ട് ഓർമകളും ലോകമെന്പാടുമുള്ള ക്രൈസ്തവർ ഇന്നു അനുസ്മരിക്കുകയും ആചരിക്കുകയും ചെയ്യും. ദേവാലയങ്ങളിൽ പ്രത്യേക തിരുകർമങ്ങൾ നടക്കും. യേശുക്രിസ്തു ഗാഗുൽത്തായിലെ കുരിശിൽ ജീവൻവെടിഞ്ഞ് ലോകത്തെ മുഴുവൻ പാപത്തിൽനിന്നും രക്ഷിച്ചുവെന്നാണ് ക്രൈസ്തവ വിശ്വാസം. ഇതിന്‍റെ ഓർമയാണ് ദുഃഖവെള്ളി ആചരണം. പാലക്കാട് സെന്‍റ് റാഫേൽസ് കത്തീഡ്രലിൽ ഇന്നു പെസഹാവ്യാഴം തിരുകർമങ്ങൾക്കു രൂപത ബിഷപ് മാർ പീറ്റർ കൊച്ചുപുരയ്ക്കൽ നേതൃത്വം നൽകും. രാവിലെ 6.30ന് കാൽകഴുകൽ ശുശ്രൂഷയും വിശുദ്ധ കുർബാനയും, തുടർന്ന് ആരാധനയുടെ പ്രദക്ഷിണവും, ശേഷം ഇടവകയിലെ വിവിധ യൂണിറ്റുകളുടെ നേതൃത്വത്തിൽ ദിവസംമുഴുവൻ വിശുദ്ധകുർബാനയുടെ ആരാധനയുമുണ്ടാകും. വൈകുന്നേരം ആറുമുതൽ ഏഴുവരെ പൊതു ആരാധനയും ആരാധനയുടെ സമാപനവും. നാളെ ദുഃഖവെള്ളി തിരുകർമങ്ങൾക്കു രൂപത ബിഷപ് മാർ പീറ്റർ കൊച്ചുപുരയ്ക്കൽ നേതൃത്വം നൽകും. പീഡാനുഭവ ചരിത്രവായനയും വിശുദ്ധകുരിശിന്‍റെ ചുംബനവും, പീഡാനുഭവ ദിനത്തിന്‍റെ സന്ദേശവും, രാവിലത്തെ ശുശ്രൂഷകളിലുണ്ടായിരിക്കും. വൈകുന്നേരം നാലിനു പീഡാനുഭവദിന പരിഹാരപ്രദക്ഷിണം പാലക്കാട് കത്തീഡ്രലിൽനിന്ന് കോട്ടമൈതാനിയിലെ രാപ്പാടി സ്റ്റേഡിയത്തിലേക്കു നടത്തും. പാലക്കാട് ഫൊറോനയിലെ വിവിധ ദേവാലയങ്ങളിൽ നിന്നുള്ള പരിഹാര പ്രദക്ഷിണങ്ങൾ രാപ്പാടിയിൽ എത്തിച്ചേർന്നശേഷം പാലക്കാട് മൈനർ സെമിനാരി വൈസ് റെക്ടർ ഫാ. ജോബിൻ കാഞ്ഞിരത്തിങ്കൽ പീഡാനുഭവദിന സന്ദേശം നൽകും. തുടർന്ന് ബിഷപ് മാർ പീറ്റർ കൊച്ചുപുരയ്ക്കലിന്‍റെ സന്ദേശവും ആശീർവാദവും. ശനിയാഴ്ച രാവിലെ ആറരയ്ക്കു ശുശ്രൂഷയ്ക്കു ശേഷം കത്തീഡ്രലിൽ പുതുവെള്ളം വെഞ്ചരിപ്പും തിരിവെഞ്ചരിപ്പും മാമോദീസ, വ്രതവാഗ്ദാന നവീകരണ ശുശ്രൂഷകളുമുണ്ടാകും. രാത്രി പതിനൊന്നരയ്ക്ക് ഈസ്റ്റർദിന തിരുകർമങ്ങൾ ആരംഭിക്കും. മാർ പീറ്റർ കൊച്ചുപുരയ്ക്കൽ ശുശ്രൂഷകൾക്കു നേതൃത്വം നൽകും.

നെല്ലിയാന്പതി പുല്ലുകാട് ഉന്നതിയിൽ അംബേദ്കർ ജയന്തിദിനാചരണം

നെന്മാറ:നെന്മാറ സെൻറർ ഫോർ ലൈഫ് സ്കിൽസ് ലേണിങ്ങിന്‍റെയും പാലക്കാട് നെഹ്റു യുവകേന്ദ്രയുടെയും നേതൃത്വത്തിൽ അംബേദ്കർ ജയന്തിദിനം ആചരിച്ചു. നെല്ലിയാമ്പതി പുല്ലുകാട് ഉന്നതിയിൽ നടന്ന പരിപാടി നെല്ലിയാമ്പതി ഡെപ്യൂട്ടി റെഞ്ച് ഫോറസ്റ്റ് ഓഫീസർ ജയേന്ദ്രൻ ഉദ്ഘാടനം ചെയ്തു. നെഹ്റു യുവകേന്ദ്ര ജില്ലായൂത്ത് കോ-ഓർഡിനേറ്റർ സി. ബിൻസി അധ്യക്ഷയായി. നെല്ലിയാമ്പതി വനംവന്യജീവി വകുപ്പിന്‍റെ സഹകരണത്തോടെ നടന്ന പരിപാടിയിൽ ബിഎഫ്ഒ പ്രമോദ്, മുൻ നെല്ലിയാമ്പതി സബ് ഇൻസ്പെക്ടർ ഹംസ മുഖ്യാതിഥിയായി. സെന്‍റർ ഫോർ ലൈഫ് സ്കിൽസ് ലേർണിംഗ് ഡയറക്ടർ അശോക് നെന്മാറ, എം. വിവേഷ്, പി.ആർ. അനിൽകുമാർ, ഹരി കിള്ളിക്കാവിൽ, വൈശാഖ്, ആർ. സജിത്ത്, ചിജീഷ് പല്ലാവൂർ എന്നിവർ പ്രസംഗിച്ചു. തുടർന്ന് യുവാക്കൾക്കായി സ്പോർട്സ് കിറ്റ് വിതരണവും നടത്തി.

കല്പാത്തി കെഎസ്ഇബി സെക്്ഷൻ ഓഫീസ് കയറിയിറങ്ങാൻ പെടാപ്പാട്

പാലക്കാട്: കല്പാത്തി ഇലക്ട്രിക്കൽ സെക്്ഷൻ ഓഫീസ് കെട്ടിടനിർമാണം ഉടൻ ആരംഭിക്കണമെന്നും നിർമാണം പൂർത്തീകരിക്കുന്നതുവരെ ഉപഭോക്താക്കളുടെ സൗകര്യം കണക്കിലെടുത്തു ഓഫീസ് താഴത്തെ നിലയിൽ സൗകര്യമുള്ള വാടക കെട്ടിടത്തിലേക്കു മാറ്റണമെന്നും ആവശ്യം. പ്രായമായവർക്കും ഭിന്നശേഷിക്കാർക്കും ഏറെ ബുദ്ധിമുട്ട് സൃഷ്ടിക്കുന്നതായി ആക്ഷേപം ശക്തമാണ്. സെക്്ഷൻ ഓഫീസിനു വേണ്ടി ചാത്തപ്പുരത്തുള്ള 33 കെ വി സബ്സ്റ്റേഷന് സമീപത്ത് 2014 ൽ 10 സെന്‍റ് സ്ഥലം വാങ്ങിക്കുകയും 2019 ൽ നിർമാണോദ്ഘാടനം കഴിഞ്ഞതുമാണ്. പിന്നീട് ആറുവർഷം കഴിഞ്ഞിട്ടും ഓഫീസിന്‍റെ നിർമാണം തുടങ്ങിയുമില്ല. 2003 മുതൽ സെക്്ഷൻ ഓഫീസ് കല്പാത്തിയിലുള്ള വാടക കെട്ടിടത്തിന്‍റെ ഒന്നാം നിലയിൽ പ്രവർത്തിച്ചു വരുകയാണ്. ഏറെ ബുദ്ധിമുട്ടി ഗോവണി കയറിയാണ് പലരും ഓഫീസിലെത്തുന്നത്. ഭിന്നശേഷി വിഭാഗത്തിൽപെട്ടവർക്ക് ഈ ഓഫീസിൽ കയറാൻ പോലും കഴിയില്ല. താഴത്തെ നിലയിൽ സൗകര്യമുള്ള കെട്ടിടം വാടകക്കെടുത്ത് ഓഫീസ് പ്രവർത്തിപ്പിക്കണമെന്ന ആവശ്യമുന്നയിച്ച് ആം ആദ്മി പാർട്ടി പ്രവർത്തകർ അസിസ്റ്റൻറ് എക്സിക്യൂട്ടീവ് എൻജിനീയർ വി.കെ. രാംപ്രകാശിനു നിവേദനം നൽകി. അവശ്യമായ നടപടികൾ സ്വീകരിക്കാമെന്ന് അദ്ദേഹം ഉറപ്പും നൽകി. ആം ആദ്മി പാർട്ടി ജില്ലാ പ്രസിഡന്‍റ് ടി. വേണുഗോപാൽ, വൈസ് പ്രസിഡന്‍റ് പുഷ്പ, പാലക്കാട്‌ നിയോജകമണ്ഡലം സമിതി അംഗം കെ.സി. ഉണ്ണികൃഷ്ണൻ എന്നിവരാണ് നിവേദനം നൽകിയത്.

വേങ്ങ- കണ്ടമംഗലം റോഡിന്‍റെ നവീകരണം അന്തിമഘട്ടത്തിൽ

കോട്ടോപ്പാടം: കോട്ടോപ്പാടം ഗ്രാമപഞ്ചായത്തിലെ പുരാതന റോഡുകളിലൊന്നായ വേങ്ങ- കണ്ടമംഗലം റോഡിന്‍റെ നവീകരണം അവസാനഘട്ടത്തിൽ. റോഡുതകർച്ചയിൽ ഏറെ പ്രയാസത്തിലായിരുന്നു ഈ പ്രദേശം. ഈ വഴിയുള്ള ഗതാഗതസഞ്ചാരം ദുഷ്കരമായിരുന്നു. ജലജീവൻ മിഷന്‍റെ കുടിവെള്ള പൈപ്പ് സ്ഥാപിക്കാൻ കുഴിയെടുക്കൽ കൂടിയായപ്പോൾ യാത്ര വലിയ ദുസഹവുമായി. ഈ റോഡ് ഗതാഗതയോഗ്യമാക്കുന്നതിനു മണ്ണാർക്കാട് എംഎൽഎ എൻ. ഷംസുദീന്‍റെ ഫണ്ടിൽനിന്നും ഒരുകോടിരൂപ അനുവദിച്ചിരുന്നു. ഇതിനെ തുടർന്നാണ് പ്രവൃത്തികൾക്കു തുടക്കമായത്.

ട്രിനിറ്റി കണ്ണാശുപത്രിയിൽ അത്യാധുനിക ലാസിക് ചികിത്സയ്ക്കു തുടക്കം

കോയന്പത്തൂർ: കോയമ്പത്തൂരിലെ ട്രിനിറ്റി ഐ ഹോസ്പിറ്റലിൽ അത്യാധുനിക കൊണ്ടൗറ ലാസിക് ശസ്ത്രക്രിയ ആരംഭിച്ചു. നടി മീന ഉദ്ഘാടനം ചെയ്തു. ഉദ്ഘാടന ചടങ്ങിൽ തിമിര ശസ്ത്രക്രിയ വിഭാഗം മെഡിക്കൽ എക്സിക്യൂട്ടീവ് ഡയറക്ടറും സീനിയർ കൺസൾട്ടന്‍റുമായ ഡോ. മധുസൂദനൻ, ട്രിനിറ്റി ഐ ഗ്രൂപ്പ് സിഇഒ ജാസ്മിൻ, തിമിര ചികിത്സയിലെ സീനിയർ കൺസൾട്ടന്‍റ് ഡോ. മുംതാസ് പങ്കെടുത്തു.

മുണ്ടൂർ യുവക്ഷേത്ര കോളജിൽ അംബേദ്കർ അനുസ്മരണം

മുണ്ടൂർ: യുവക്ഷേത്ര കോളജിൽ അംബേദ്ക്കർ ജയന്തിയോടനുബന്ധിച്ച് ഭരണഘടനാ നിർമാണത്തിലൂടെ രാജ്യത്തിന് അദ്ദേഹം നല്കിയ സംഭാവനകളെ അനുസ്മരിച്ചു. ജാതിചിന്തകൾക്കതീതമായി ദേശീയതയും രാഷ്ട്രബോധവും നിലനിർത്തി മാത്യരാജ്യത്തിന്‍റെ ഐക്യത്തിനും അഖണ്ഡതക്കുംവേണ്ടി എല്ലാ ഭാരതീയനും നിലകൊള്ളണമെന്നു അനുസ്മരണ പ്രഭാഷണത്തിൽ വൈസ് പ്രിൻസിപ്പൽ റവ.ഡോ. ജോസഫ്ഓലിക്കൽകൂനൽ ഓർമിപ്പിച്ചു. മാഗസിൻ സ്റ്റുഡന്‍റ് എഡിറ്റർ ആർ. മേഘ ക്ലാസെടുത്തു. ഐക്യൂഎസി കോ-ഓർഡിനേറ്റർ ഷൈലജ മേനോൻ സ്വാഗതവും രണ്ടാം വർഷ എം എസ് സി ജ്യോഗ്രഫി വിദ്യാർഥിനി പി.എസ്. ആതിര നന്ദിയും പറഞ്ഞു. തുടർന്ന് ഭരണഘടന സംഭാവനകളെകുറിച്ച് സംവാദം ഉണ്ടായിരുന്നു. പുഷ്പാർച്ചനയോടുകൂടി അനുസ്മരണ സമ്മേളനം സമാപിച്ചു.

രാപ്പകൽ‌സമരവുമായി കെപിഎസ്ടിഎ

പാലക്കാട്: സംതൃപ്തമായ വിദ്യാലയങ്ങൾ സൃഷ്ടിക്കുവാൻ മുഴുവൻ അധ്യാപകർക്കും നിയമന അംഗീകാരം നൽകണമെന്ന് വി.കെ. ശ്രീകണ്ഠൻ എംപി. പാലക്കാട് കെപിഎസ്ടിഎ റവന്യു ജില്ലാ കമ്മിറ്റിയുടെ നേതൃത്വത്തിൽ പാലക്കാട് അഞ്ചുവിളക്കിനു മുന്നിൽ നടക്കുന്ന രാപ്പകൽ സമരം ഉദ്ഘാടനം ചെയ്യുകയായിരുന്നു എംപി. പൊതു വിദ്യാലയങ്ങൾ തകർക്കുവാനുള്ള പരിപാടികളിൽ നിന്നും ഇടതുസർക്കാർ പിന്മാറണമെന്നും അദ്ദേഹം ആവശ്യപ്പെട്ടു. ജില്ലാ പ്രസിഡന്‍റ് ഷാജി എസ്. തേക്കെതിൽ അധ്യക്ഷത വഹിച്ച യോഗത്തിൽ സംസ്ഥാന പ്രസിഡന്‍റ് കെ. അബ്ദുൾമജീദ് മുഖ്യപ്രഭാഷണം നടത്തി. സംസ്ഥാന ജനറൽ സെക്രട്ടറി പി.കെ. അരവിന്ദൻ , സീനിയർ വൈസ് പ്രസിഡന്‍റ് ബി. സുനിൽകുമാർ, സംസ്ഥാന സെക്രട്ടറി ടി. ആബിത, പി.കെ. ഹരിനാരായണൻ, ജി.രാജലക്ഷ്മി പ്രസംഗിച്ചു. ജില്ലാ സെക്രട്ടറി എം. ശ്രീജിത്ത് സ്വാഗതവും ട്രഷറർ കെ. സുമേഷ് കുമാർ നന്ദിയും പറഞ്ഞു.

കുളപ്പുള്ളിയിലെ വ്യാപാരസ്ഥാപനം തുറന്നുപ്രവർത്തിക്കാൻ നടപടിയുണ്ടാകണമെന്നു കെവിവിഇഎസ് നേതൃയോഗം

ഷൊർണൂർ: സിഐടിയു സമരത്തെത്തുടർന്ന് അടച്ചിട്ട കുളപ്പുള്ളിയിലെ വ്യാപാരസ്ഥാപനം തുറന്നുപ്രവർത്തിക്കാൻ നടപടിയുണ്ടാകണമെന്നു വ്യാപാരി വ്യവസായി ഏകോപന സമിതി സംസ്ഥാന പ്രസിഡന്‍റ് രാജു അപ്‌സര. വ്യാപാരിവ്യവസായി ഏകോപനസമിതി ജില്ലാ, സംസ്ഥാന നേതൃയോഗം ഉദ്ഘാടനം ചെയ്യുകയായിരുന്നു അദ്ദേഹം. ഹൈക്കോടതിയുടെ അനുമതിയുണ്ടായിട്ടും വ്യാപാരസ്ഥാപനത്തിനു പ്രവർത്തിക്കാൻ കഴിയുന്നില്ല. യന്ത്രമുപയോഗിച്ച് കയറ്റിറക്ക് നടത്താനുള്ള ഹൈക്കോടതി വിധിയിൽ യന്ത്രത്തെ സംബന്ധിച്ച് തർക്കമുണ്ടെങ്കിൽ അതുചർച്ച ചെയ്യുകയും കോടതിവിധി സമ്പാദിക്കുകയും ചെയ്യുന്നതിനുപകരം വ്യാപാരസ്ഥാപനത്തിനെതിരെ ഉപരോധം ഏർപ്പെടുത്തുന്നതു പ്രതിഷേധാർഹമാണ്. മുഖ്യമന്ത്രിക്കും തൊഴിൽവകുപ്പ്, വ്യവസായ മന്ത്രിമാർക്കും പരാതി നൽകാൻ തീരുമാനിച്ചതായും അറിയിച്ചു. തൊഴിലാളി യൂണിയൻ നടത്തുന്ന കോടതിയലക്ഷ്യനടപടികൾക്കെതിരെ ജില്ലയിൽ വ്യാപാരി പണിമുടക്ക് നടക്കുന്ന 22ന് സംസ്ഥാനത്തെ ഏകോപനസമിതിയുടെ എല്ലാ യൂണിറ്റ് കേന്ദ്രങ്ങളിലും പ്രതിഷേധപ്രകടനം നടത്താനും തീരുമാനിച്ചു. ജില്ലാപ്രസിഡന്‍റ് ബാബു കോട്ടയിൽ അധ്യക്ഷത വഹിച്ചു. സംസ്ഥാന ജനറൽ സെക്രട്ടറി ദേവസ്യ മേച്ചേരി, സംസ്ഥാന വർക്കിംഗ് പ്രസിഡന്റ് കെ.വി. അബ്ദുൾ ഹമീദ്, കെ.എം. ഹമീദ്, കെ.കെ. ഹരിദാസ്, എ.എം. അൻസാരി പ്രസംഗിച്ചു.

വ്യാപാരികളുടെ വടക്കഞ്ചേരി ഫെസ്റ്റിവലിനു കാൽനാട്ടി

വടക്കഞ്ചേരി: കേരള വ്യാപാരി വ്യവസായി ഏകോപന സമിതി വടക്കഞ്ചേരി യൂണിറ്റിന്‍റെ ആഭിമുഖ്യത്തിൽ യുണൈറ്റഡ് ഇവന്‍റ്സ് സംഘടിപ്പിക്കുന്ന വടക്കഞ്ചേരി ഫെസ്റ്റിവലിന്‍റെ കാൽനാട്ടൽകർമം നടത്തി. പഞ്ചായത്ത് പ്രസിഡന്‍റ് ലിസി സുരേഷ് കാൽനാട്ടൽകർമം നിർവഹിച്ചു. യൂണിറ്റ് പ്രസിഡന്‍റ് കെ.എം. ജലീൽ അധ്യക്ഷത വഹിച്ചു. ജനറൽസെക്രട്ടറി എം.ഡി. സിജു, ട്രഷറർ സി.എസ്. സിദ്ദിക്, മുൻമന്ത്രിമാരായ കെ.ഇ. ഇസ്മയിൽ, വി.സി. കബീർമാസ്റ്റർ, ദേവദാസ്, ഇല്യാസ് പടിഞ്ഞാറെകളം, സെയ്താലി, സുരേഷ്, ബാബു പീറ്റർ എന്നിവർ പ്രസംഗിച്ചു.

വൈദ്യുതിക്കമ്പി പൊട്ടിവീണ് തീപിടിത്തം: മനിശീരിയിൽ ഒഴിവായതു വൻദുരന്തം

ഷൊർണൂർ: വൈദ്യുതിക്കമ്പി പൊട്ടിവീണ് വീടിനുസമീപം സൂക്ഷിച്ച വൈക്കോലിനു തീ പിടിച്ചു. തലനാരിഴക്ക് വൻദുരന്തം ഒഴിവായി. പശുക്കുട്ടിക്ക് ഗുരുതരമായി പൊള്ളലേറ്റു. വീടിന്‍റെ അടുക്കള പൂർണമായും കത്തിനശിച്ചു. വാണിയംകുളം മനിശ്ശീരി തെക്കുമുറി തെക്കേച്ചോലയിൽ പ്രകാശന്‍റെ വീട്ടിലാണ് സംഭവം. കഴിഞ്ഞ ദിവസം പുലർച്ചെ മൂന്നുമണിയോടെയാണ് തീപിടുത്തമുണ്ടായത്. ഈ സമയം എല്ലാവരും നല്ല ഉറക്കത്തിലായിരുന്നു. വീടിനു പിന്നിലായി തൊഴുത്തിനു സമീപത്ത് സൂക്ഷിച്ച വൈക്കോലിനാണ് ആദ്യം തീ പിടിച്ചത്. പശുക്കളുടെയും ആടിന്‍റെയും കരച്ചിൽ കേട്ടു വീട്ടുകാർ ഉണർന്നപ്പോഴാണ് തീപടരുന്നതു കണ്ടത്. ഉടനെ തൊഴുത്തിൽ കെട്ടിയിട്ട പശുക്കളുടെ കയർ കത്തികൊണ്ട് മുറിച്ചുവിടുകയും ചെയ്തു. എന്നാൽ, തീ കൂടുതൽ ഭാഗത്തേക്ക് പടർന്നുപിടിച്ചു. ഇതിനിടയിലാണ് തൊഴുത്തിൽ വീണ നിലയിൽ 10 മാസം പ്രായമുള്ള മൂരിക്കുട്ടിയെ കണ്ടത്. അപ്പോഴേക്കും ശരീരത്തിൽ ഗുരുതരമായി പൊള്ളലേറ്റിരുന്നു. ഷൊർണൂരിൽനിന്നുള്ള അഗ്നിരക്ഷാസേന എത്തിയാണ് തീ പൂർണമായും അണച്ചത്. തൊഴുത്തിലുണ്ടായിരുന്ന മറ്റുപശുക്കൾക്കും പൊള്ളലേറ്റിട്ടുണ്ട്. ആറുപശുക്കളാണ് തൊഴുത്തിലുണ്ടായിരുന്നത് ഇതിൽ രണ്ടുപശുക്കൾ ഒൻപതുമാസം ഗർഭിണികളാണെന്ന് വീട്ടമ്മ ശാന്തി പറഞ്ഞു. സമീപത്തുതന്നെയാണ് ആട്ടിൻകൂടുമുള്ളത്. ഇവയെ കൂട് തുറന്നുവിട്ടതിനാൽ അപകടത്തിൽനിന്ന് രക്ഷപ്പെടുകയായിരുന്നു. വാണിയംകുളത്തുനിന്ന് വെറ്ററിനറി ഡോക്ടറെത്തി പശുക്കളെ പരിശോധിച്ചു. അടുക്കളവാതിലുകളും ജനലും പാത്രങ്ങളും ഷീറ്റും കത്തിനശിച്ചു. കഴിഞ്ഞ ദിവസമാണ് ദേശമംഗലത്തുനിന്ന് വൈക്കോൽ എത്തിച്ചതെന്ന് ശാന്തി പറഞ്ഞു. വീടിനു സമീപത്തെ തെങ്ങിൽനിന്ന് തൊഴുത്തിലേക്ക് പോകുന്ന വൈദ്യുതിലൈനിലേക്ക് തെങ്ങിൻ പട്ട വീഴുകയും വയർ മുറിഞ്ഞ് വൈക്കോലിന് തീ പിടിക്കുകയായിരുന്നുവെന്ന് വീട്ടുടമ പറഞ്ഞു.

ബൈക്ക് ഓട്ടോയിലിടിച്ച് യുവാവ് മരിച്ചു

വണ്ടിത്താവളം: പ്ലാച്ചിമടയിൽ നിയന്ത്രണംവിട്ട ബൈക്ക് ഓട്ടോയുമായി കൂട്ടിയിടിച്ച് ഗുരുതരമായി പരിക്കേറ്റ ബൈക്ക് യാത്രികൻ മരിച്ചു. മുതലമട ചുളിയാർഡാം മിനുക്കംപാറ കോളനി സലീമിന്‍റെ മകൻ സാലി(21)യാണ്‌ മരിച്ചത്. ബൈക്കിലുണ്ടായിരുന്ന സഹയാത്രികൻ ഗോവിന്ദാപുരം ആട്ടയാമ്പതി യാക്കൂബിന്‍റെ മകൻ റംഷീദിനെ ഗുരുതര പരിക്കുകളോടെ കോയമ്പത്തൂരിലെ സ്വകാര്യആശുപത്രിയിൽ പ്രവേശിപ്പിച്ചു. പ്ലാച്ചിമട വളവുപാതയിലാണ് അപകടം. മീനാക്ഷിപുരത്തുനിന്ന് മുതലമടയിലെ വീട്ടിലേക്ക് പോകുകയായിരുന്നു സാലി. വണ്ടിത്താവളം ഭാഗത്ത് നിന്ന് എതിർദിശയിൽ വരികയായിരുന്ന ഓട്ടോയുമായി കൂട്ടിയിടിച്ചാണ് അപകടം. മീനാക്ഷിപുരം പോലീസ് മേൽനടപടികൾ സ്വീകരിച്ചു. അമ്മ: ഖദീജ. സഹോദരങ്ങൾ: ഫാത്തിമ, ഷെയ്ക്ക് ബീവി, ഫൗസിയ.

അപകടത്തിൽ ചികിത്സയിലായിരുന്ന ആൾ മരിച്ചു

കല്ലടിക്കോട്: സൈക്കിളിൽ പോകുന്നതിനിടെ കാർ ഇടിച്ച് പരിക്കേറ്റു ചികിത്സയിലായിരുന്ന ആൾ മരിച്ചു. കരിമ്പ കൂടല്ലൂർ വീട്ടിൽ കെ.രാജേന്ദ്രൻ(61) ആണ് മരിച്ചത്. സംസ്‌കാരം ഇന്ന് ഉച്ചയ്ക്ക് മൂന്നിന് ഐവർമഠം ശ്മാശാനത്തിൽ. കഴിഞ്ഞ തിങ്കളാഴ്ച്ച ഉച്ചയ്ക്ക് രണ്ടോടെയാണ് അപകടം. ചികിത്സ നടക്കുന്നതിനിടെ ബുധനാഴ്ച്ച ഉച്ചയോടെയായിരുന്നു അന്ത്യം. ഭാര്യ: രമണി, മക്കൾ: അരുൺരാജ്, ഐശ്വര്യ. മരുമകൾ: വിനീത.

കച്ചവടസ്ഥാപനം ഒരുക്കിനൽകി എൻഎസ്എസ് വിദ്യാർഥിനികൾ

ചിറ്റൂർ: കച്ചവടസ്ഥാപനം നൽകി എൻഎസ്എസ് വിദ്യാർഥിനികളുടെ സേവനം മാതൃകയായി. ഗവ.വിക്ടോറിയ ഗേൾസ് എൻഎസ്എസ് യൂണിറ്റാണ് ഉപജീവനം എന്ന പദ്ധതിയുടെ ഭാഗമായി കടവച്ചു കൊടുത്തത്. നാഷണൽ സർവീസ് സ്കീമിന്‍റെ സംസ്ഥാനതല പദ്ധതിയാണ് ഉപജീവനം. അർഹതപ്പെട്ട ഒരു വ്യക്തിക്ക് ജീവിതമാർഗം ഉണ്ടാക്കി കൊടുക്കലാണ് ഇതിന്‍റെ ലക്ഷ്യം. ഈ പദ്ധതി പ്രകാരം സ്കൂളിലെ തന്നെ ഒരു പ്ലസ് വൺ വിദ്യാർഥിയുടെ രക്ഷിതാവിനാണ് വിദ്യാർഥികൾ കടവെച്ച് കൊടുത്തത്. കുട്ടികൾ നാഷണൽ സർവീസ് സ്കീമിന്‍റെ ഭാഗമായി നടത്തിയ വിവിധ പ്രവർത്തനങ്ങളിലൂടെ ലഭിച്ച ഫണ്ടിനോടൊപ്പം സുമനസുകളുടെ സഹായം കൂടി സ്വീകരിച്ചാണ് ഈ പദ്ധതി നടപ്പിലാക്കിയിട്ടുള്ളത്. കൊടുവായൂർ പിട്ടുപീടികയിൽ കടയുടെ ഉദ്ഘാടനം ജില്ലാ പഞ്ചായത്ത് മെംബർ എം. രാജൻ ഉദ്ഘാടനം നിർവഹിച്ചു . സ്കൂൾ പ്രിൻസിപ്പൽ ടി. ഗിരി സ്വാഗതം പറഞ്ഞ പരിപാടിയിൽ കൊടുവായൂർ ഗ്രാമപഞ്ചായത്ത് വൈസ് പ്രസിഡന്‍റ് എം. മനോജ്, വാർഡ് മെംബർമാരായ എ. മുരളി ,ശാന്തകുമാരി. പി. കുമാരി, ആർ. അബ്ബാസ്, എൻഎസ്എസ് പ്രോഗാം ഓഫീസർ ആർ. സുജിത, അധ്യാപകരായ കെ. കുമാർ, സിന്ധു, റഷീദ, ബിന്ദുമോൾ, എൻഎസ്എസ് വോളന്‍റിയർ ആർ. രേഷ്മ തുടങ്ങിയവർ പ്രസംഗിച്ചു.

പല്ലിയറ ഉദയ ടീം ജേതാക്കൾ

അഗളി: ലഹരിയാകാം കളിയിടങ്ങളോട് എന്ന മുദ്രാവാക്യവുമായി ഡിവൈഎഫ്ഐ അട്ടപ്പാടി ബ്ലോക്ക്കമ്മിറ്റി സംഘടിപ്പിച്ച ഇ.കെ. നായനാർ മെമ്മോറിയൽ സെവൻസ് ഫുട്ബോൾ ടൂർണമെന്‍റിൽ ഉദയ പല്ലിയറ ജേതാക്കളായി. ഫൈനലിൽ ഹാദിയ കക്കുപ്പടിയെയാണ് പരാജയപ്പെടുത്തിയത്. വിജയികൾക്ക് ചുങ്കത്ത് വനിതാ സൂപ്പർ ഗോൾഡ് ആൻഡ് ഡയമണ്ട്സ് സ്ഥാപന മേധാവി ഷാജു സമ്മാനങ്ങൾ വിതരണം ചെയ്തു. മണ്ണാർക്കാട് മദർ കെയർ ഹോസ്പിറ്റൽ പ്രതിനിധി അജയൻ, ഡിവൈഎഫ്ഐ അട്ടപ്പാടി ബ്ലോക്ക്‌ സെക്രട്ടറി മനു പുന്നക്കോട്ടിൽ, ബ്ലോക്ക് പ്രസിഡന്‍റ് ബിജു ജോസഫ്, ട്രഷറർ ലിജോമോൻ ജോസഫ്, ബ്ലോക്ക് കമ്മിറ്റി അംഗങ്ങളായ വരുൺ തുമ്പയിൽ, സി.ജെ. അമൽദേവ് , അനിൽകുമാർ, ജോജി, എസ്എഫ്ഐ സംസ്ഥാന കമ്മിറ്റി അംഗം ആർ. കാർത്തിക് തുടങ്ങിയവർ നേതൃത്വം നൽകി.

ഗ്രാമപ്രദേശങ്ങളിലെ കളിക്കളങ്ങളുടെ അഭാവം പരിഹരിക്കും: മന്ത്രി വി. അബ്ദുറഹിമാൻ

പാലക്കാട്: ഗ്രാമപ്രദേശങ്ങളിലെ കളിക്കളങ്ങളുടെ അഭാവം പരിഹരിക്കാൻ ‘ഒരു പഞ്ചായത്തിൽ ഒരു കളിക്കളം’ പദ്ധതികൊണ്ട് സാധിച്ചെന്ന് കായികവകുപ്പ് മന്ത്രി വി. അബ്ദുറഹിമാൻ. തച്ചനാട്ടുകര ഗ്രാമപഞ്ചായത്തിൽ നിർമിക്കുന്ന കളിസ്ഥലത്തിന്‍റെ പ്രവർത്തനോദ്ഘാടനം നിർവഹിച്ച് പ്രസംഗിക്കുകയായിരുന്നു മന്ത്രി. എല്ലാ പഞ്ചായത്തുകളിലും കളിക്കളങ്ങൾ നിർമിച്ചുനൽകാനാണ് സർക്കാർ ലക്ഷ്യം വെക്കുന്നത്. ഭൂരിപക്ഷം പഞ്ചായത്തുകളിലും ആസ്തിവികസന ഫണ്ടുകൾ ഉപയോഗിച്ച് കളിക്കളങ്ങൾ നിർമിക്കാൻ സാധിച്ചെന്നും മന്ത്രി കൂട്ടിച്ചേർത്തു. കൗമാരക്കാരിലേയും വിദ്യാർഥികളിലേയും കായികവാസന വളർത്തുന്നതിന് ഗോൾ, ഹെൽത്ത് കിഡ്സ് തുടങ്ങിയ പദ്ധതികൾ നടപ്പിൽ വരുത്തിയിട്ടുണ്ട്. രാജ്യത്ത് ആദ്യമായി കായികനയം രൂപീകരിച്ച സംസ്ഥാനം കൂടിയാണ് നമ്മുടേതെന്ന് മന്ത്രി പറഞ്ഞു. തച്ചനാട്ടുകര ഗ്രാമപഞ്ചായത്തിന്‍റെ അധീനതയിലുള്ള കളിസ്ഥലത്ത് സംസ്ഥാന സർക്കാരിന്‍റെ 2023-24 വാർഷിക ബജറ്റിൽ ഉൾപ്പെടുത്തി അനുവദിച്ച ഒരു കോടി രൂപ വിനിയോഗിച്ചുകൊണ്ടുള്ള നിർമാണ പ്രവർത്തനമാണ് ആരംഭിച്ചിരിക്കുന്നത്. അണ്ണാൻതൊടി സി എച്ച് സ്മാരക ഹാളിൽ നടന്ന പരിപാടിയിൽ കെ.പ്രേംകുമാർ എംഎൽഎ അധ്യക്ഷത വഹിച്ചു. കേരള സ്പോർട്സ് ഫൗണ്ടേഷൻ എക്സിക്യൂട്ടീവ് എൻജിനീയർ മുഹമ്മദ് അഷറഫ് പദ്ധതി വിശദീകരണം നടത്തി. കെ.പി.എം സലിം, പാർവതി ഹരിദാസ്, എം.സി. രമേഷ്, ഗഫൂർ കോൽക്കളത്തിൽ, മെഹർബാൻ ടീച്ചർ, കെ.പി ബുഷറ, തങ്കം മഞ്ചാടിക്കൽ, പി.മൻസൂറലി, ആറ്റബീവി, സി.പി സുബൈർ തുടങ്ങിയവർ ചടങ്ങിൽ പങ്കെടുത്തു.

വിശുദ്ധവാരം ക്രിസ്തീയജീവിതത്തിന്‍റെ മൂർച്ചകൂട്ടാനുള്ള സമയം: മാർ പോൾ ആലപ്പാട്ട്

കോയന്പത്തൂർ: ക്രിസ്തീയജീവിതത്തിന്‍റെ മൂർച്ചകൂട്ടാനുള്ള സമയമാണ് വിശുദ്ധവാരമെന്ന് മാർ പോൾ ആലപ്പാട്ട് പറഞ്ഞു. പൗരോഹിത്യ വിശുദ്ധീകരണദിനത്തിൽ വിശുദ്ധകുർബാനമധ്യേ സന്ദേശംനൽകുക‍യായിരുന്നു ബിഷപ്. പൗരോഹിത്യം സഭയുടെ പൊതുസ്വത്താണെന്നും ഇതു സ്വീകരിച്ചവർ കൂട്ടംതെറ്റാതെ മുമ്പോട്ടുപോകാനുള്ള പരിശ്രമമാണ് വിശുദ്ധീകരണദിനത്തിലൂടെ നടത്തേണ്ടതെന്നും അദ്ദേഹം ഓർമിപ്പിച്ചു. നിലനിൽക്കുന്ന കുറവുകൾ ഒറ്റക്കെട്ടായി പരിഹരിച്ചാൽ സഭയാകുന്ന നൗക നിത്യതയിലേക്ക് അനായാസം യാത്ര തുടരും. പൗരോഹിത്യ വിശുദ്ധീകരണദിനത്തിലൂടെ അർഥമാക്കുന്നത് എന്നേക്കും നിലനിൽക്കുന്ന ക്രിസ്തുവിന്‍റെ വിശ്വസ്തതയോടു പൗരോഹിത്യ വിശ്വസ്തത ചേർന്നുപോകേണ്ട ആവശ്യകതയാണ്. അതു യാഥാർഥ്യമാകുന്നത് ഒരുവനിൽ നിക്ഷിപ്തമാകുന്ന ദൗത്യം സംതൃപ്തിയോടെ നിർഹിക്കുന്നതിലൂടെയാണ്. അതിനു വൈദികർ മറ്റുള്ളവരെ വിശുദ്ധീകരിക്കുന്നതിനുമുമ്പ് സ്വയം വിശുദ്ധീകരിക്കണം. ഇപ്രകാരം സ്വയം വിശുദ്ധീകരിക്കുന്ന വൈദികർ വെഞ്ചരിച്ച തൈലത്താൽ പരിശുദ്ധാത്മാവിന്‍റെ സഹായത്തോടെ വിശ്വാസികളെ വിശുദ്ധീകരിക്കുകയും ചെയ്യുമ്പോൾ പൗരോഹിത്യ ശുശ്രൂഷയുടെ അഭിഷേകം പൂർണവും കൂടുതൽ ഫലദായകവും ആകുമെന്നും ബിഷപ് പറഞ്ഞു.

ആദിവാസിഫണ്ട് തട്ടാൻ വനം-വൈദ്യുതി വകുപ്പ് ഉന്നതതല സിൻഡിക്കേറ്റ്: സുമേഷ് അച്യുതൻ

പാലക്കാട്: ആദിവാസി ഉന്നതികളിലെ വികസനത്തിനെന്ന പേരിൽ ഫണ്ട്തട്ടാൻ വനം വൈദ്യുതിവകുപ്പ് ഉന്നതരുടെ സിൻഡിക്കേറ്റ് പ്രവർത്തിക്കുന്നതായി ഡിസിസി വൈസ് പ്രസിഡന്‍റ് സുമേഷ് അച്യുതൻ. അട്ടപ്പാടിയിലെ നാല് ഉൗരുകളിൽ അനർട്ട് നടപ്പാക്കിയ സൗരോർജ, കാറ്റാടി, വൈദ്യുതി പദ്ധതികളിലെ അഴിമതി അന്വേഷിക്കാൻ ചുമതലപ്പെടുത്തിയത് അഡീഷണൽ ചീഫ് സെക്രട്ടറി ജ്യോതി ലാലിനെയാണ്. ഒരേസമയം വനംവകുപ്പിന്‍റെയും വൈദ്യുതിവകുപ്പിന്‍റേയും സെക്രട്ടറി ചുമതല വഹിക്കുന്ന ജ്യോതിലാലിനെ അന്വേഷണം ഏൽപ്പിച്ചത് ഈ സിൻഡിക്കേറ്റിന്‍റെ തീരുമാനപ്രകാരമാണ്. അനർട്ട് അഴിമതികളിലെ കൂട്ടുപ്രതിയായ ജ്യോതിലാലിന്‍റെ റിപ്പോർട്ട് വൈദ്യുതി മന്ത്രിയേയും അനർട്ട് സിഇഒ നരേന്ദ്രനാഥ് വേലൂരിയേയും വെള്ളപൂശാൻ ഇറക്കുന്ന തിരക്കഥയ്ക്ക് അനുസരിച്ചായിരിക്കും. കുറ്റാരോപിതനായ അനർട്ട് സിഇഒ നരേന്ദ്രനാഥ് വേലൂരിയും അഡീഷണൽ ചീഫ്സെക്രട്ടറി ജ്യോതിലാലും തങ്ങളുടെ സ്ഥാനത്തെ മുതലെടുത്ത് നിരവധി തവണ സർക്കാർ ചിലവിൽ ഒരുമിച്ച് വിദേശയാത്രകൾ നടത്തിയിട്ടുണ്ടെന്ന് ആരോപിച്ച സുമേഷ് ഇതു സംബന്ധിച്ച ഗവണ്‍മെന്‍റ് ഓർഡർ പുറത്തുവിട്ടു. ഇത്തരം അന്വേഷണപ്രഹസനത്തിനു പകരം വിജിലൻസ് അന്വേഷണത്തിനു ശുപാർശ ചെയ്യാൻ മന്ത്രി കെ. കൃഷ്ണൻകുട്ടിയ്ക്ക് ധൈര്യമുണ്ടോയെന്ന് സുമേഷ് അച്യുതൻ വെല്ലുവിളിച്ചു. അട്ടപ്പാടിയിൽ 60 സോളാർ പാനൽ സ്ഥാപിച്ചതിൽ നാലെണ്ണം മാത്രമാണ് പ്രവർത്തനരഹിതമെന്നും മറ്റുള്ള ഗുണമേന്മയോടെ പ്രവർത്തിക്കുന്നതായും മന്ത്രി അവകാശപ്പെട്ടിരുന്നു. അട്ടപ്പാടിയിലെ വനം ഉദ്യോഗസ്ഥരെ കോണ്‍ഗ്രസ് നേതാക്കൾ ഉൗരുകളിൽ എത്തിയതിന്‍റെ പേരിലും ഭീഷണിപ്പെടുത്തുന്നുണ്ട്. തിരുവനന്തപുരത്തും വയനാട്ടിലും കണ്ണൂരിലും ഇടുക്കിയിലും വനം-വൈദ്യുതി വകുപ്പ് അഴിമതി സിൻഡിക്കേറ്റ് പ്രവർത്തിക്കുന്നുണ്ട്. ഈ സംഘടിതകൊള്ളയ്ക്കെതിരെ രാഷ്ട്രീയ,നിയമപോരാട്ടം തുടരുമെന്നും സുമേഷ് അച്യുതൻ പത്രസമ്മേളനത്തിൽ വ്യക്തമാക്കി. യൂത്ത് കോണ്‍ഗ്രസ് സംസ്ഥാന ജനറൽസെക്രട്ടറി പ്രതീഷ് മാധവൻ, കോണ്‍ഗ്രസ് ചിറ്റൂർ ബ്ലോക്ക് പ്രസിഡന്‍റ് സച്ചിദാനന്ദ ഗോപാലകൃഷ്ണൻ എന്നിവർ പങ്കെടുത്തു.

റോഡിലേക്കു ചെരിഞ്ഞ മരം മുറിച്ചുനീക്കണം

ചിറ്റൂർ: നാട്ടുകൽ -വാളറ പാതയിൽ റോഡിലേക്ക് ചെരിഞ്ഞ വൃക്ഷം വാഹനസഞ്ചാരത്തിന് അപകടഭീഷണിയായി. കാലവർഷം ആരംഭിച്ചാൽ മരം റോഡിലേക്ക് നിലംപതിക്കാവുന്ന സാഹചര്യമാണുള്ളത്. കൊടുവായൂർ - കോയമ്പത്തൂർ അന്തർ സംസ്ഥാനപാതയെന്നതിനാൽ രാപ്പകൽ ഇടതടവില്ലാതെ വാഹനസഞ്ചാരമുള്ള പ്രധാനപാതയാണിത്. തീർഥാടന, വിനോദസഞ്ചാര വാഹനങ്ങൾക്ക് പുറമെ നിരവധി സ്്കൂൾ -കോളജ് ബസുകൾ സഞ്ചരിക്കുന്ന പാതയാണിത്. കാറ്റു വീശുമ്പോൾ മരച്ചില്ലകൾ റോഡിലേക്ക് വീഴുന്നതും കാൽനട സഞ്ചാരികൾക്കും വിനയാവുകയാണ്. അപകടം സംഭവിച്ചശേഷം ബന്ധപ്പെട്ട അധികൃതർ സംഭസ്ഥലത്തെത്തുകയാണ് പതിവുനടപടി. എന്നാൽ അപകടാവസ്ഥ മനസിലാക്കി മരം മുറിച്ചുമാറ്റുന്ന മുൻകരുതൽ നടപടിയാണ് യാത്രക്കാർ ആവശ്യപ്പെടുന്നത്.

റെയിൽവേഭൂമി അടച്ചുകെട്ടും; പള്ളത്തുകാർക്ക് യാത്ര വഴിമുട്ടും

ഒറ്റപ്പാലം: ഒരുവശത്ത് റെയിൽവേസ്റ്റേഷൻ, മറുവശത്ത് ഭാരതപ്പുഴ. ഒറ്റപ്പാലം റെയിൽവേ സ്റ്റേഷനപ്പുറം പള്ളംപ്രദേശത്ത്‌ താമസിക്കുന്നവരുടെ യാത്രാദുരിതം വർധിപ്പിച്ചുകൊണ്ടാണ് റെയിൽവേ പ്ലാറ്റ്ഫോം നീളംകൂട്ടൽ നടത്തുന്നത്. പ്ലാറ്റ്ഫോമിന്‍റെ നിർമാണം പൂർത്തിയായാൽ രണ്ടാൾ ഉയരത്തിൽ മതിൽ ഉയർന്നു പൊങ്ങും. ഇതോടെ പള്ളത്തുകാർക്ക് സഞ്ചാരസ്വാതന്ത്ര്യവും നഷ്ടമാവും. പുഴയ്ക്കും റെയിൽവേസ്റ്റേഷനുമിടയിലായതിനാൽ ഇവിടേക്ക് വഴിയില്ലെന്നതാണ് പ്രദേശവാസികളെ കുഴക്കുന്ന മുഖ്യപ്രശ്നം. റെയിൽവേയുടെ നിർമാണപ്രവൃത്തികൾ പ്രദേശത്ത് പുരോഗമിക്കുകയാണ്. പാളം മുറിച്ചുകടന്നാണ് ഇവിടത്തുകാർ പള്ളംഭാഗത്തേക്ക്‌ പോകുന്നത്. നിലവിലുള്ള പ്രശ്നങ്ങൾക്കെല്ലാം ഏകപരിഹാരം റെയിൽവേസ്റ്റേഷൻ പ്ലാറ്റ്ഫോമിനറ്റത്ത്‌ ഒരു കാൽനട മേൽപ്പാലം സ്ഥാപിക്കുക എന്നതു മാത്രമാണ്. ഇതോടെ യാത്രക്കാർക്ക്‌ പാളംമുറിച്ചുകടക്കാതെ മേൽപ്പാലത്തിലൂടെ അപ്പുറംകടക്കാൻ സാധിക്കും. പള്ളത്ത് ഏകദേശം 100 കുടുംബങ്ങളാണ് താമസിക്കുന്നത്. വഴിയില്ലാത്തതിനാൽ ഇവിടത്തെ കിടപ്പുരോഗികളെ ആശുപത്രിയിലെത്തിക്കാൻ പ്രദേശവാസികൾ ബുദ്ധിമുട്ട് നേരിടുന്നുണ്ട്. രണ്ട്‌ പ്രളയമുണ്ടായപ്പോൾ ഭാരതപ്പുഴയിൽനിന്ന് വെള്ളംകയറുന്ന പ്രശ്നമുണ്ടായി. വഴിയില്ലാത്ത പ്രശ്നത്തിനൊപ്പം വെള്ളംകയറുന്ന പ്രശ്നംകൂടിവന്നതോടെ പലരും വീടൊഴിഞ്ഞുപോയി. ഇതിനിടെ പള്ളത്തുകാർ പാളംമുറിച്ചുകടക്കുന്ന സ്ഥലത്ത് സുരക്ഷാമാനദണ്ഡങ്ങൾ പാലിക്കാൻ റെയിൽവേ മതിൽകെട്ടാൻ പദ്ധതിയുമിട്ടു. അന്ന് രാഷ്ട്രീയപ്രതിരോധത്തെ തുടർന്നാണ് റെയിൽവേ ആ പദ്ധതിയിൽനിന്ന് പിൻമാറിയത്. ഇവിടെ കാൽനട മേൽപ്പാലം നിർമിക്കണമെന്ന ആവശ്യം നാട്ടുകാർ റെയിൽവേയ്ക്കുമുന്നിൽ അവതരിപ്പിച്ചിരുന്നു. ഒറ്റപ്പാലം സ്റ്റേഷനിൽ പ്രവേശനകവാടത്തിന് സമീപത്താണ് മേൽപ്പാലമുള്ളത്. ലിഫ്റ്റ് സൗകര്യവുമുണ്ട്. മറ്റിടങ്ങളിൽനിന്നെല്ലാം പ്ലാറ്റ്‌ഫോം മറികടക്കണമെങ്കിൽ പാളംമുറിച്ചുകടക്കണമെന്നതാണ് സ്ഥിതി. ഒരു മേൽപ്പാലംകൂടി നിർമിച്ചാൽ യാത്രക്കാർക്ക് പ്ലാറ്റ്ഫോം മുറിച്ചുകടക്കാനും ഗുണകരമാകും. മേൽക്കൂരകളുടെ നിർമാണത്തിനൊപ്പം മേൽപ്പാലംകൂടി നിർമിക്കണമെന്നാണ് യാത്രക്കാരുടെ ആവശ്യം. അതേസമയം നിലവിൽ റെയിൽവേ നിർമാണ പ്രവൃത്തികൾ നടത്തുന്ന സ്ഥലത്ത് ഒറ്റപ്പാലം നഗരസഭ ചെയർപേഴ്സൺ കെ. ജാനകിദേവി സന്ദർശനം നടത്തി. റെയിൽവേ സ്റ്റേഷന്‍റെ പടിഞ്ഞാറുഭാഗത്താണ് പഴയ ഓട്ടുകമ്പനിയോട് ചേർന്ന് റെയിൽവേ ഭൂമിയിൽ ഇപ്പോൾ പ്ലാറ്റ്ഫോം നിർമാണ പ്രവൃത്തികൾ പുരോഗമിക്കുന്നത്.

കേടായ കൂളർ മാറ്റിനൽകാത്തതിനു നഷ്ടപരിഹാരം നൽകണം: ഉപഭോക്തൃ തർക്കപരിഹാര കമ്മീഷൻ

ആലത്തൂർ: പുതുതായി വാങ്ങിയ എയർ കൂളറുകളിലൊന്ന് കേടായത് മാറ്റി നൽകാത്തതിന് കൂളറിന്‍റെ വില, പലിശ, ചെലവ്, മനോവിഷമമുണ്ടാക്കിയതിന് നഷ്ടം എന്നിവ വില്പനക്കാരനും നിർമാതാവും ഉപഭോക്താവിന് നൽകാൻ ജില്ലാ ഉപഭോക്തൃ തർക്കപരിഹാര കമ്മീഷൻ ഉത്തരവ്. മണപ്പുള്ളിക്കാവ് ഗോകുലത്തിൽ ടി.വി. ചന്ദ്രശേഖരന്‍റെ പരാതിയിലാണ് കമ്മീഷന്‍റെ ഉത്തരവ്. 2024 മാർച്ചിൽ പാലക്കാട് നടത്തിയ പ്രദർശനവ്യാപാരമേളയിലെ എറണാകുളം വൈറ്റിലയിലെ ഡിക്യൂഎഫ് ഏജൻസിയിൽ നിന്ന് രണ്ട് വർഷം വാറന്‍റിയുള്ള രണ്ട് എയർ കൂളറുകൾ വാങ്ങി. ഉപയോഗത്തിലിരിക്കെ ഒരു മാസത്തിനകം അതിലൊന്ന് കേടായി. വിവരം വില്പനക്കാരനെ അറിയിച്ചപ്പോൾ കുറച്ച് ദിവസം കഴിഞ്ഞ് കേടായ കൂളർ എടുത്ത് മറ്റൊന്ന് പകരം നൽകി. പകരംനൽകിയ കൂളറും അടുത്തദിവസം പ്രവർത്തിക്കാതായി. ഈ വിവരം അറിയിച്ചെങ്കിലും ഉത്തരവാദിത്വത്തിൽ നിന്ന് ഒഴിഞ്ഞുമാറുകയാണ് ചെയ്തത്. തുടർന്ന് ചന്ദ്രശേഖരൻ ആലത്തൂരിലെ ഫോറം ഫോർ കൺസ്യൂമർ ജസ്റ്റിസിന്‍റെ സഹായം തേടി. കേടായ കൂളർ നന്നാക്കിയോ അല്ലെങ്കിൽ മാറ്റിയോ നൽകണമെന്ന് കാണിച്ച് വില്പനക്കാരന് കത്തയച്ചുവെങ്കിലും തർക്കം പരിഹരിച്ചില്ല. കൂളറിന്‍റെ വില 3990, വാങ്ങിയ ദിവസം മുതൽ പൈസ തിരിച്ച് നൽകുന്നത് വരെ പത്ത് ശതമാനം പലിശ, മനോവിഷമമുണ്ടാക്കിയതിന് 5000 , ചെലവ് 2000 എന്നിങ്ങനെ സംഖ്യകൾ 45 ദിവസത്തിനകം നൽകണമെന്നും വൈകിയാൽ ഓരോ മാസത്തിനും വീണ്ടും 500 രൂപ വീതം നൽകണമെന്നും വി. വിനയ് മേനോൻ പ്രസിഡന്‍റും എ. വിദ്യ, എൻ.കെ . കൃഷ്ണൻകുട്ടി അംഗങ്ങളുമായുള്ള കമ്മീഷന്‍റെ ഉത്തരവിൽ പറഞ്ഞു.

ജെല്ലിപ്പാറയിൽ അഭിഷേകാഗ്നി കൺവൻഷൻ സമാപനം ഇന്ന്

അഗളി: ജെല്ലിപ്പാറ സെന്‍റ് പീറ്റേഴ്സ് ദേവാലയ അങ്കണത്തിൽ മൂന്ന് ദിവസമായി നടന്നുവരുന്ന അഭിഷേകാഗ്നി കൺവൻഷന് ഇന്ന് സമാപനമാകും. ഫാ.സേവ്യർ ഖാൻ വട്ടായിൽ ആണ് കൺവൻഷൻ നയിക്കുന്നത്. ഇന്ന് ഉച്ചകഴിഞ്ഞ് 3.30ന് ബിഷപ് മാർ പീറ്റർ കൊച്ചുപുരയ്ക്കലിന്‍റെ മുഖ്യകാർമികത്വത്തിൽ നടക്കുന്ന വിശുദ്ധ കുർബാനയോടെ അഭിഷേകാഗ്നി കൺവൻഷനാരംഭിക്കും. രാത്രി 9 നാണ് കൺവൻഷൻ സമാപനം. ഇന്ന് രാവിലെ 9 മുതൽ ഉച്ചകഴിഞ്ഞ് 3.30 വരെ കുമ്പസാരം, കൗൺസിലിംഗ് എന്നിവ ഉണ്ടായിരിക്കുമെന്ന് ഫാ. സേവ്യർഖാൻ വട്ടായിൽ അറിയിച്ചു.

കെ.എം. മാണിയെ അനുസ്മരിച്ചു

പാലക്കാട്: കാരുണ്യപദ്ധതിയിലൂടെ പതിനായിരങ്ങൾക്ക് ജീവിതംനൽകിയ മനുഷ്യസ്നേഹിയാണ് കെ.എം. മാണി എന്ന് കെ. രാധാകൃഷ്ണൻ എംപി പറഞ്ഞു. നിരാലംബരും നിരാശ്രയരുമായിരുന്ന ഒരുജനവിഭാഗത്തിന് പണമില്ലാത്തതിന്‍റെ പേരിൽ ചികിത്സ നിക്ഷേധിക്കപ്പെടുന്ന സാഹചര്യത്തിലാണ് കെ.എം. മാണി കാരുണ്യ ബെനവലന്‍റ് ഫണ്ട്എന്ന ആശയം ബജറ്റിലൂടെ അവതരിപ്പിക്കുകയും ചെലവേറിയ ആധുനികചികിത്സകൾ സാധാരണക്കാരന് പ്രാപ്യമാക്കുവാൻ അവസരം ഉണ്ടാക്കിയതും. കാലം എത്ര കഴിഞ്ഞാലും മലയാളിയുടെ മനസിൽ മായാത്ത ഓർമയായിരിക്കും കെ.എം. മാണി എന്നും അദ്ദേഹം കൂട്ടിച്ചേർത്തു. കണ്ണാടിയിൽ പ്രവർത്തിക്കുന്ന മഹാത്മാ വൃദ്ധസദനത്തിൽ കെ.എം. മാണിയുടെ 6 ാം ചരമദിനാചരണത്തിന്‍റെ ഭാഗമായി നടത്തിയ അനുസ്മരണയോഗം ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. കേരള കോണ്‍ഗ്രസ്-എം ജില്ലാ പ്രസിഡന്‍റ് അഡ്വ. കെ കുശലകുമാർ അധ്യക്ഷത വഹിച്ചു. പാർട്ടി സംസ്ഥാന സ്റ്റീയറിംഗ് കമ്മിറ്റിയംഗം കെ.എം. വർഗീസ്, ഓഫീസ്ചാർജ് ജനറൽ സെക്രട്ടറി തോമസ് ജോണ്‍ കാരുവള്ളി, ജില്ലാ വൈസ് പ്രസിഡന്‍റ് അഡ്വ. ടൈറ്റസ് ജോസഫ്, ജില്ലാ സെക്രട്ടറിമാരായ ജോസ് വി. ജോർജ്, ആർ. പന്പാവാസൻ, കർഷകയൂണിയൻ ജില്ലാ പ്രസിഡന്‍റ് വിൽസണ്‍ കണ്ണാടൻ, യൂത്ത് ഫ്രണ്ട് ജില്ലാ പ്രസിഡന്‍റ് ജോഷ്വാ രാജു, കെടിയുസി സംസ്ഥാന ജനറൽ സെക്രട്ടറി ആർ. സുരേഷ്, പാർട്ടി പാലക്കാട് നിയോജക മണ്ഡലം പ്രസിഡന്‍റ് എൽ. കൃഷ്ണ മോഹൻ, സംസ്ഥാന കമ്മിറ്റി അംഗം വി. വേണു തുടങ്ങിയവർ പ്രസംഗിച്ചു. സമൂഹത്തിൽ സുസ്ത്യർഹമായ പ്രവർത്തനങ്ങൾ നടത്തുന്ന വിവിധ മേഖലയിലെ ആളുകളെ യോഗത്തിൽ പൊന്നാട അണിയിച്ച് ആദരിച്ചു.

നെന്മാറയിൽ വേറിട്ട വിഷുക്കൈനീട്ടവുമായി പാടശേഖരസമിതി

നെന്മാറ: വിഷുക്കൈനീട്ടമായി പാടശേഖരസമിതിയിലെ എല്ലാ കർഷകർക്കും മുറവും കളമുറവും വിതരണം ചെയ്തു. വല്ലങ്ങി തവളാക്കുളം പാടശേഖരസമിതിയുടെ നേതൃത്വത്തിലാണ് കണിവിഭവങ്ങളുമായി അപൂർവമായ വിഷുക്കൈനീട്ടം നടത്തിയത്. പാടശേഖര സമിതി പ്രസിഡന്‍റ് ജി. ജയപ്രകാശൻ അധ്യക്ഷത വഹിച്ച ചടങ്ങിൽ നെന്മാറ ക്യഷി ഓഫീസർ വി. അരുണിമ മുറങ്ങൾ കൈനീട്ടമായി എല്ലാ കർഷകർക്കും നൽകി ഉദ്ഘാടനം നിർവഹിച്ചു. നെല്ല് കാറ്റത്തിടാനും നെല്ലിലെ മാലിന്യങ്ങൾ വ്യത്തിയാക്കാനും പഴമക്കാർ വ്യാപകമായി ഉപയോഗിച്ചിരുന്നതും ആധുനികകാലത്ത് കളപ്പുരകളിൽ നിന്ന് അന്യംനിന്ന് പോയതുമായ ഈറ്റ കൊണ്ടുള്ള മുറവും കളമുറവും കർഷകർക്ക് നൽകി വേറിട്ട മാതൃക സൃഷ്ടിച്ചിരിക്കുകയാണ് വല്ലങ്ങി തവളാക്കുളം പാടശേഖര സമിതി. സമിതിയിലെ 55 കർഷകർക്കാണ് ഇതിന്‍റെ പ്രയോജനം ലഭിച്ചത്. പാടശേഖരസമിതി സെക്രട്ടറി കെ. സുരേഷ് കുമാർ, അസിസ്റ്റന്‍റ് കൃഷി ഓഫീസർ സി. സന്തോഷ്, കൃഷി അസിസ്റ്റന്‍റുമാരായ കെ. പ്രകാശ്, വി. ലിഖിത, പാടശേഖര സമിതി ഭാരവാഹികളായ വി. സത്യൻ, കെ. രാമചന്ദ്രൻ, കെ. രവീന്ദ്രൻ എന്നിവർ പങ്കെടുത്തു.

കാറ്റിലും മഴയിലും നെല്ലിയാമ്പതി ചുരംറോഡിൽ മരംവീണ് ഗതാഗതം തടസപ്പെട്ടു

നെന്മാറ: കനത്ത മഴയിലും കാറ്റിലും നെല്ലിയാമ്പതി ചുരം റോഡിൽ മരംവീണ് ഗതാഗതം തടസപ്പെട്ടു. കുണ്ട്റചോല പാലത്തിനു സമീപം ചുരം റോഡിന് കുറുകെ മരങ്ങൾവീണ് റോഡ് ഗതാഗതം ഒന്നരമണിക്കൂർ തടസപ്പെട്ടു. കഴിഞ്ഞദിവസം ചെറുനെല്ലി ബംഗ്ലാവ് വളവിലും സമീപവും മരക്കൊമ്പുകൾ പൊട്ടിവീണ് ഗതാഗതം തടസപ്പെട്ടിരുന്നു. സർവീസ് ബസ് ഉൾപ്പെടെ നൂറിലേറെ ചെറുതും വലുതുമായ വാഹനങ്ങൾ റോഡിൽ കുടുങ്ങിയിരുന്നു. വൈകുന്നേരം ഏഴു മണിയോടെയാണ് ഗതാഗതം പുനസ്ഥാപിച്ചത്. കോൺഗ്രസ് പ്രവർത്തകരായ പി.ഒ. ജോസഫും ഷിബു, ഷെരീഫ്, മുകേഷ്, സൂരജ് തുടങ്ങിയവരും നാട്ടുകാരും വിനോദസഞ്ചാരികളും ചേർന്നാണ് മരങ്ങൾ മുറിച്ചുമാറ്റിയത്. വിവരമറിയിച്ചതിനെ തുടർന്ന് വനംവകുപ്പ് അധികൃതരും അഗ്നിരക്ഷാസേനയും സ്ഥലത്തെത്തി തുടർന്ന് അപകടഭീഷണി ഉയർത്തി റോഡിൽ കിടന്ന വലിയ മരക്കഷണങ്ങൾ മുറിച്ചുമാറ്റി ഗതാഗതം പുനസ്ഥാപിച്ചു. വേനൽ, വിഷു, അവധിയുമായി ബന്ധപ്പെട്ട് വിനോദസഞ്ചാരികളുടെ തിരക്കും നെല്ലിയാമ്പതി മേഖലയിൽ അനുഭവപ്പെട്ടു.

ചെമ്മണ്ണാംകുന്നിൽ പെട്രോൾപമ്പിനായി സ്ഥലം വിട്ടുകൊടുക്കാനുള്ള നീക്കം നാട്ടുകാർ തടഞ്ഞു

വടക്കഞ്ചേരി: ദേശീയപാത വികസനത്തിനായി ഏറ്റെടുത്ത സ്ഥലം പെട്രോൾപമ്പിനായി വിട്ടുകൊടുക്കാനുള്ള ഹൈവേ അധികൃതരുടെ നീക്കം നാട്ടുകാർ തടഞ്ഞു. ദേശീയപാത മേരിഗിരിക്കടുത്ത് പാലക്കാട് ലൈനിൽ ചെമ്മണ്ണാംകുന്നിലാണ് സംഭവം. സ്ഥലം കുറവെന്ന് പറഞ്ഞ് ഈ ഭാഗത്ത് ആറുവരി ദേശീയപാതയുടെ ഇരുഭാഗത്തും സർവീസ് റോഡില്ല. ഇതിനിടെയാണ് പെട്രോൾ പമ്പിനായി സ്ഥലം വിട്ടുകൊടുത്ത് അപകടങ്ങൾ ക്ഷണിച്ചുവരുത്തുംവിധം ടാർ റോഡിനോട് ചേർന്ന് വരമ്പ് നിർമിച്ച് ഹൈവേ അധികാരികൾ അനധികൃത നടപടികൾക്ക് കൂട്ടുനിൽക്കുന്നതെന്ന് ജനകീയ സമരസമിതി ഭാരവാഹിയായ ജോർസി പറഞ്ഞു. സർവീസ് റോഡില്ലാത്തതിനാൽ ചുക്കുണ്ട്, പൊത്തപ്പാറ ഭാഗങ്ങളിലേക്ക് പോകുന്നവർ അപകടം മുഖാമുഖം കണ്ടാണ് ഇപ്പോൾ യാത്ര ചെയ്യുന്നത്. പമ്പിനായി സ്ഥലം വിട്ടുകൊടുത്ത് അപകടം ഉണ്ടാക്കുന്ന സ്ഥിതിയുണ്ടാക്കിയാൽ നിർമാണം തടയുമെന്ന് നാട്ടുകാർ പറഞ്ഞു.

ചുള്ളിയാംകുളത്ത് കാട്ടാനയുടെ വിളയാട്ടം; ഓട്ടോറിക്ഷ തകർത്തു

കല്ലടിക്കോട്: ചുള്ളിയാംകുളം കുറുമുഖത്തിനു സമീപം മാവിൻ ചുവട്ടിൽ കാട്ടാന ഓട്ടോറിക്ഷ തകർത്തു. ചൂരക്കോട് സ്വദേശി സുരേഷിന്‍റെ ഓട്ടോറിക്ഷയാണ് കുത്തിമറിച്ച് നശിപ്പിച്ചത്. ചൊവ്വാഴ്ച വെളുപ്പിനെയാണ് സംഭവം. മാവിൻചുവട്ടിൽ ഓട്ടോറിക്ഷ നിർത്തിയിട്ട് സമീപത്തുള്ള സുരേഷിന്‍റെ വീട്ടിലേയ്ക്ക് പോയ സമയത്താണ് കാട്ടാന ഓട്ടോറിക്ഷ കുത്തിമറിച്ച് തകർത്തത്. കഴിഞ്ഞ കുറേദിവസങ്ങളായി ഈ മേഖലയിൽ കാട്ടാന കൃഷിയിടങ്ങളിൽ ഇറങ്ങിയിരുന്നു. ഇന്നലെ പകൽ മീൻവല്ലത്തിനു സമീപത്തെ കൃഷിയിടത്തിൽ കാട്ടാന എത്തി പ്രദേശത്ത് ഭീതി പരത്തി. വീടുകൾക്ക് സമീപം കാട്ടാന എത്തിയതോടെ മീൻവല്ലത്തേയ്ക്കുള്ള സന്ദർശനം നിർത്തിവെച്ചു. വിഷു ആയതിനാൽ പതിവിൽ കൂടുതൽ സന്ദർശകർ മീൻവല്ലം സന്ദർശിക്കാൻ എത്തിയിരുന്നു. ആർആർടി സംഘവും നാട്ടുകാരും ചേർന്ന് കാട്ടാനകളെ വനത്തിലേക്ക് തുരത്തിയെങ്കിലും പിന്നെയും കൃഷിയിടത്തിലേക്ക് ഇറങ്ങുകയായിരുന്നു. തുടിക്കോട്, ആനക്കല്ല്, കരിമല, മീൻവല്ലം തുടങ്ങി എല്ലാ ഭാഗങ്ങളിലൂടെയും ആനകൾ ഇറങ്ങിയിരിക്കുന്ന സാഹചര്യത്തിൽ ഏത് ആനയാണ് അക്രമണകാരിയെന്നു മനസിലാക്കാൻ കഴിയാത്തതിനാൽ പ്രദേശത്തെ ജനങ്ങൾ ഭീതിയിലാണ്. ഞാറക്കോട് അത്താണിപ്പറമ്പിൽ യുവാവിനെ കുത്തിക്കൊന്ന ആനയാണ് മീൻവല്ലത്ത് എത്തിയതെന്നാണ് നാട്ടുകാർ പറയുന്നത്. ആർആർടി സംഘത്തോടൊപ്പം ആനയെ ഓടിച്ച് കാടുകയറ്റാൻ ശ്രമിക്കുന്ന നാട്ടുകാരെ ആന തെരഞ്ഞ് അക്രമിക്കുന്നതും പതിവാണ്.

കത്തോലിക്ക കോൺഗ്രസ് വിളംബരജാഥ സമാപിച്ചു

മണ്ണാർക്കാട്: കത്തോലിക്ക കോൺഗ്രസിന്‍റെ 107 ാം ജന്മദിന വാർഷികാഘോഷത്തിന്‍റെ ഭാഗമായി നടക്കുന്ന മഹാറാലിയുടെയും സമുദായ സംഗമത്തിന്‍റേയും പ്രചരണപരിപാടിയുടെ ഭാഗമായി ഫൊറോന കത്തോലിക്ക കോൺഗ്രസ് നടത്തിയ വിളംബരജാഥ സമാപിച്ചു. ഫൊറോനയിലെ ഇടവകകളായ എടത്തനാട്ടുകര, അലനല്ലൂർ, തിരുവിഴാംകുന്ന്, കണ്ടമംഗലം, കാരാപ്പാടം, കുമരംപുത്തൂർ, ശ്രീകൃഷ്ണപുരം, കോട്ടപ്പുറം, പുല്ലിശേരി, മെഴുകുംപാറ, കൈതച്ചിറ, പെരിമ്പടാരി ഫൊറാന പള്ളി തുടങ്ങി എല്ലായിടവകയിലും വിളംബരജാഥ എത്തി. ഫൊറാന പ്രസിഡന്‍റ് ബിജു മലയിലിന്‍റെ നേതൃത്വത്തിൽ നടന്ന വിളംബരജാഥയുടെ സമാപനം പെരിമ്പടാരി പള്ളിയിൽ ഫൊറോന ഡയറക്ടർ ഫാ. രാജു പുളിക്കത്താഴെ ഉദ്ഘാടനം ചെയ്തു. കത്തോലിക്ക കോൺഗ്രസ് ഫൊറോന ഡയറക്ടർ ഫാ. ലിവിൻ ചുങ്കത്ത് വിളംബരസന്ദേശം നല്കി. നാടിനെ നയിക്കേണ്ട യുവതലമുറയെ കാർന്നുതിന്നുന്ന ലഹരിമാഫിയയെ നിലയ്ക്കു നിർത്താൻ പള്ളികൾ തോറും എല്ലാ സംഘടനകളിൽ നിന്നും ആളുകളെ ഉൾപ്പെടുത്തി സൗഹൃദ ജാഗ്രതാകർമ സമിതികൾ രൂപികരിക്കുമെന്ന് ജാഥാക്യാപ്റ്റൻ ബിജു മലയിൽ പ്രഖ്യാപിച്ചു. ഷിബു കാട്രുകുടിയിൽ, എലിസബത്ത് മുസോളിനി, ജോഷി മേലേടത്ത്, ബേബി മാവറയിൽ, ജോസ് കിഴക്കേൽ തുടങ്ങിയവർ വിളംബരജാഥയ്ക്ക് നേതൃത്വം നല്കി.

ലഹരിക്കെതിരേ ചെസ് ടൂർണമെന്‍റ്

അഗളി: വർധിച്ചുവരുന്ന ലഹരി ഉപയോഗത്തിനെതിരേ ജനകീയ ചെസ് ടൂർണമെന്‍റ് സംഘടിപ്പിച്ചു. എംസെഡ് അക്കാദമിയുടെ നേതൃത്വത്തിൽ ഷോളയൂർ ഗ്രാമപഞ്ചായത്തിന്‍റേയും കോട്ടത്തറ ജനമൈത്രി എക്സൈസ് സ്ക്വാഡിന്‍റേയും ശാന്തി മെഡിക്കൽ ഇൻഫർമേഷൻ സെന്‍ററിന്‍റേയും സഹകരണത്തോടെയാണ് ചെസ് ടൂർണമെന്‍റ് സംഘടിപ്പിച്ചത്. പരിപാടിയുടെ ഉദ്ഘാടനം എക്സൈസ് ഇൻസ്പെക്ടർ സന്തോഷ് നിർവഹിച്ചു. എട്ടുവയസു മുതൽ പതിനാറുവയസുവരെയുള്ള പതിനാറു മത്സരാർഥികൾ പങ്കെടുത്ത ടൂർണമെന്‍റിൽ പി.എം. വിനു, സായ് സർവേഷ് തുടങ്ങിയവർ ജേതാക്കളായി. മുഴുവൻ പങ്കാളികൾക്കും സർട്ടിഫിക്കറ്റുകൾ വിതരണം ചെയ്തു. നിഖിൽ എംസെഡ്, ഡോ. സബലക്ഷ്മി, യദുകൃഷ്ണൻ തുടങ്ങിയവർ പ്രസംഗിച്ചു.

പള്ളം പ്രദേശത്തുകാർക്ക് വിഷുക്കണിയായി റെയിൽവേയുടെ വെള്ളിടി

ഒറ്റപ്പാലം: പള്ളം പ്രദേശത്തുകാർക്ക് റെയിൽവേയുടെ വിഷുകൈനീട്ടം- വഴി അടച്ചുകെട്ടി. റെയിൽവേ സുരക്ഷാക്രമീകരണങ്ങളുടെ ഭാഗമായിട്ടാണ് പ്രദേശത്തേക്കുള്ള വഴി അടച്ചുകെട്ടുന്നതെന്നും അതല്ല പ്ലാറ്റ്ഫോം വിപുലീകരണത്തിന്‍റെ ഭാഗമായിട്ടാണ് കരിങ്കല്ലിട്ട് അടച്ചു കെട്ടുന്നതെന്നുമാണ് സ്ഥിരീകരിക്കാത്ത വിവരം. നിരവധി വീടുകളിലേക്കുള്ള വഴിയാണ് അടച്ചുകെട്ടി റെയിൽവേ നിർമാണ പ്രവൃത്തികൾ നടത്തുന്നത്. ഒറ്റപ്പാലം റെയിൽവേസ്റ്റേഷനപ്പുറത്ത് പാളംമുറിച്ചുകടക്കുന്ന നടവഴിയിലാണ് റെയിൽവേ മതിൽ കെട്ടുന്നത്. നേരത്തെയും ഇത്തരത്തിലുള്ള നീക്കം നടന്നിരുന്നു. എന്നാൽ അന്ന് ഡോ. രാധാ മോഹൻദാസ് അഗർവാൾ എംപി ഇടപെട്ടാണ് നിർത്തിവെപ്പിച്ചത്. വീട്ടിലേക്കുള്ള വഴി നിഷേധിക്കപ്പെടുമോ എന്ന ആധി ഒറ്റപ്പാലം റെയിൽവേസ്റ്റേഷനപ്പുറത്ത് താമസിക്കുന്ന പള്ളം നിവാസികൾക്ക് യാഥാർഥ്യമാവുകയാണ്. ഇവിടെ 30 ഓളം കുടുംബങ്ങൾ താമസിക്കുന്നുണ്ട്. ഈ വഴിയടച്ചാൽ ഇവർക്ക് സ്വന്തം വീട്ടിലേക്ക് പോകാനോ വരാനോ കഴിയില്ല. ഒറ്റപ്പാലം റെയിൽവേസ്റ്റേഷനും ഭാരതപ്പുഴയ്ക്കുമിടയിലായാണ് 30 ഓളം കുടുംബങ്ങൾ താമസിക്കുന്നത്. സ്റ്റേഷന് ഒരറ്റത്ത് രണ്ടാംപ്ലാറ്റ്‌ഫോമിന് 50 അടി മുൻവശത്തായാണ് ഇവിടേക്കുള്ള നടവഴി. പ്രദേശത്തുള്ളവർക്ക് വാഹനം വീടുകളിലേക്കെത്തിക്കാനാകാത്ത പ്രശ്നവുമുണ്ട്. ഇവിടങ്ങളിൽനിന്ന് അസുഖമുള്ളവരെയും മറ്റും ആശുപത്രിയിലേക്കെത്തിക്കണമെങ്കിൽ ഇവരെ താങ്ങിയെടുത്ത് പാളം മുറിച്ചുകടക്കേണ്ട സ്ഥിതിയാണുള്ളത്. ഇരുചക്രവാഹനങ്ങളെല്ലാം പാളത്തിനിപ്പുറം നിർത്തിയാണ് ഇവിടുത്തുകാർ വീടുകളിലേക്ക് പോകാറുള്ളത്. ഇതുമൂലം വാഹനത്തിന്‍റെ പലഭാഗങ്ങളും മോഷ്ടിക്കപ്പെടുകയും ചെയ്യുന്ന പ്രശ്നങ്ങളുമുണ്ട്. ഇത്തരം പ്രശ്നങ്ങൾ നിലനിൽക്കെയാണ് നടവഴികൂടി ഇല്ലാതാവുന്നത്.

ഓശാനഞായർ ആചരിച്ചു; വിശുദ്ധവാരത്തിന് തുടക്കം

പാലക്കാട്: യേശുവിന്‍റെ ജറുസലേം പ്രവേശനത്തിന്‍റെ സ്മരണ പുതുക്കി ഓശാനതിരുനാൾ ആചരിച്ചു. രണ്ടായിരത്തിൽപരം വർഷങ്ങൾക്കു മുന്പ് കഴുതപ്പുറത്തേറി ജെറുസലേമിലേക്ക് ക്രിസ്തു നടത്തിയ രാജകീയപ്രവേശനത്തിന്‍റെ ഓർമപുതുക്കലാണ് ഓശാനഞായർ തിരുക്കർമ്മങ്ങൾ. പാലക്കാട് സെന്‍റ് റാഫേൽസ് കത്തീഡ്രൽ പള്ളിയിൽ നടന്ന ഓശാന തിരുക്കർമ്മങ്ങൾക്ക് ബിഷപ് മാർ പീറ്റർ കൊച്ചുപുരയ്ക്കൽ നേതൃത്വം നൽകി. രാമനാഥപുരം ഹോളി ട്രിനിറ്റി കത്തീഡ്രലിൽ നടന്ന കർമ്മങ്ങൾക്ക് ബിഷപ് മാർ പോൾ ആലപ്പാട്ട് കാർമികത്വം വഹിച്ചു. സുൽത്താൻപേട്ട സെന്‍റ് സെബാസ്റ്റ്യൻസ് കത്തീഡ്രലിൽ ബിഷപ് ഡോ. അന്തോണിസാമി പീറ്റർ അബീർ മുഖ്യകാർമികനായി. രൂപതകളിലെ എല്ലാ പള്ളികളിലും വിശുദ്ധകുർബാനയും കുരുത്തോല പ്രദക്ഷിണവും നടന്നു. ഇതോടെ വിശുദ്ധവാരത്തിനും തുടക്കമായി. അന്ത്യഅത്താഴത്തിന്‍റേയും പീഢാനുഭവ, കുരിശുമരണത്തിന്‍റേയും ഉയിർപ്പിന്‍റേയും ഓർമകളാണ് വിശുദ്ധവാരത്തിൽ ആചരിക്കപ്പെടുന്നത്.

ഒറ്റപ്പാലത്തിന് കണികാണാൻ അമ്പലപ്പാറയുടെ കണിവെള്ളരി

ഒറ്റപ്പാലം: ഒറ്റപ്പാലം കണികാണും സ്വന്തം നാടിന്‍റെ കണിവെള്ളരി. ഇത്തവണ വിഷുക്കണി ഒരുക്കാൻ 25 ടൺ കണിവെള്ളരിയാണ് ഒറ്റപ്പാലത്തിന് അമ്പലപ്പാറ സമ്മാനിച്ചിട്ടുള്ളത്. വേനൽമഴയെ അതിജീവിച്ചാണ് അമ്പലപ്പാറയിലെ കർഷകർ ഇത്രയും കണി വെള്ളരി വിഷുവിപണിയിലെത്തിച്ചത് . അറവക്കാട്, വേങ്ങശേരി, അകവണ്ട, ചെറുമുണ്ടശേരി, കടമ്പൂർ, കൂനൻമല പ്രദേശങ്ങളിലെ 15 ഏക്കർ കൃഷിയിടത്തിൽനിന്നാണ് വെള്ളരി വിപണിയിലെത്തിച്ചയത്. 25 കർഷകരുടെ അധ്വാനഫലമായി കഴിഞ്ഞവർഷത്തേക്കാൾ പത്തുടൺ അധികം വിളവെടുക്കാനായി. നേരത്തേതന്നെ വിപണിയിൽ ഇടംപിടിക്കാൻ കഴിഞ്ഞതിനാൽ വെള്ളരിക്ക് കഴിഞ്ഞവർഷത്തെ അപേക്ഷിച്ച് കൂടുതൽവില ലഭിച്ചതായി കർഷകർ പറഞ്ഞു. കിലോയ്‌ക്ക് 23 രൂപ വരെയാണ് ലഭിച്ചത്. കഴിഞ്ഞവർഷം 20രൂപവരെയായിരുന്നു വില. അമ്പലപ്പാറയിൽ അറവക്കാട് ആശ്രയക്ലസ്റ്ററിന് കീഴിലുള്ള കർഷകരാണ് ഏറ്റവും കൂടുതൽ വെള്ളരി വിപണിയിലെത്തിച്ചിട്ടുള്ളത്. ഏകദേശം 20 ടൺ വെള്ളരിയാണ് വിളവെടുക്കാൻ കഴിഞ്ഞതെന്ന് ക്ലസ്റ്റർ സെക്രട്ടറി കെ. ഗോപാലകൃഷ്ണൻ പറഞ്ഞു. പന്ത്രണ്ടര ഏക്കർ സ്ഥലത്തായിരുന്നു കൃഷി. മറ്റുസ്ഥലങ്ങളിലെ കർഷകർ ചേർന്ന് അഞ്ച് ടണ്ണോളം കണിവെള്ളരിയും വിപണിയിലെത്തിച്ചു. ഒറ്റപ്പാലം, കടമ്പഴിപ്പുറം, അമ്പലപ്പാറ തുടങ്ങിയ സ്ഥലങ്ങളിലെ മൊത്തവ്യാപാര സ്ഥാപനങ്ങൾ കേന്ദ്രീകരിച്ചായിരുന്നു വില്പന. അപ്രതീക്ഷിത മഴയിൽ അഞ്ച് ടൺ വെള്ളരി കർഷകർക്ക് നഷ്ടമായി. മഴപെയ്ത് കൃഷിയിടത്തിൽ വെള്ളമെത്തിയതാണ് പ്രശ്നമായത്. ചില കർഷകരുടെ വെള്ളരിക്ക് നിറംവെക്കാൻ വൈകുന്ന പ്രശ്നവുമുണ്ടായി.

വിഷുവിനൊരുങ്ങി നാടും നഗരവും

ജോജി തോമസ് നെന്മാറ: വിഷുവിനൊരുങ്ങി നാടും നഗരവും. പച്ചക്കറി, പഴ, പടക്കവിപണിയിൽ മുന്പെങ്ങുമില്ലാത്ത തിരക്കായിരുന്നു ഇത്തവണ. വിഷുക്കണി ഒരുക്കുന്നതിന്‍റെ മുന്നോടിയായി അങ്ങാടികളിൽ വൻ തിരക്കായിരുന്നു. പുതിയ മോഡൽ പടക്കങ്ങളും കമ്പിത്തിരിയും, വിഷു ചക്രങ്ങളുമായാണ് വിഷുവിപണി ആകർഷണീയമായത്. പൊട്ടിവിടരുന്ന ഇന്ത്യൻ ഡ്രാഗൺ, മാനത്തു തീതുപ്പി കത്തിജ്വലിക്കുന്ന ചൈനീസ് ഡ്രാഗൺ, ബഹുവർണം വിതറുന്ന ഫ്ളവർ എവറസ്റ്റ് എന്ന ഭീമൻ പൂക്കുറ്റി തുടങ്ങി പടക്ക വിപണിയിൽ കൗതുകമേറെയാണ്. ചൈനീസ് മോഡലിന്‍റെ പാത പിന്തുടർന്ന് പതിവിൽനിന്നു വ്യത്യസ്ത‌മായി പലയിനം പടക്കങ്ങളും ഇക്കുറി പടക്കവിപണിയിൽ എത്തിയിരുന്നു. കുടെ പതിവു പരമ്പരാഗത കമ്പിത്തിരി, മത്താപ്പ്, ഓലപ്പടക്കങ്ങളുടെ വില്പനയും തകൃതിയായിരുന്നു. വിഷുവിനു തലേദിവസമായ ഇന്നലെ ഞായറാഴ്ച സാധാരണ അങ്ങാടി ഒഴിവു ദിവസമാണെങ്കിലും വിഷു പ്രമാണിച്ച് കടകൾ തുറന്നിരുന്നു. പടക്കം, പച്ചക്കറി, പഴങ്ങൾ, വെറ്റില തുടങ്ങി കണിയൊരുക്കാനുള്ള വസ്തുക്കളുടെ കച്ചവടമാണ് തകൃതിയായത്. മുൻവർഷങ്ങളുമായി താരതമ്യം ചെയ്യുമ്പോൾ വലിയ വിലക്കൂടുതലുമില്ല. ടൗണുകളിൽ ലൈസൻസ് ഉള്ളവർ മാത്രം പടക്കം വ്യാപാരം നടത്തുമ്പോൾ നാട്ടിൻപുറങ്ങളിൽ താത്കാലിക കച്ചവടക്കാർ വഴിയോരങ്ങളിലും വ്യാപാരസ്ഥാപനങ്ങളോടും ചേർന്നും പടക്കവില്പന സജീവമാക്കി. ടൗണുകളിലെ കടകളിലും ചില സംഘടനകളും തമിഴ്നാട്ടിൽ നിന്നും മറ്റും കൊണ്ടുവന്ന് ഗിഫ്റ്റ് പാക്കറ്റ് എന്ന നിലയിൽ നിശ്ചിത രൂപയ്ക്ക് കിറ്റുകളായും നൽകുന്നുണ്ട്. സൂപ്പർ മാർക്കറ്റുകൾ മുതൽ വഴിയോരങ്ങളിൽ വരെ കണിക്കൊന്ന വില്പനയും സജീവമായിരുന്നു. പ്രകൃതിദത്ത കണിക്കൊന്നയെ വെല്ലുന്ന നിറവും ഭംഗിയുമുള്ള കൃത്രിമകണിക്കൊന്നയും വാഹനവും വീടും അലങ്കരിക്കാൻ ആവശ്യക്കാരുണ്ട്. തുണിക്കടകളിൽ കസവുകരയുള്ള സെറ്റുമുണ്ടും ശ്രീകൃഷ്ണ ചിത്രങ്ങളുള്ള വസ്ത്രങ്ങൾക്കും ആവശ്യക്കാരുണ്ട് . പാത്രകടകളിൽ കണിയൊരുക്കാനുള്ള ഓട്ടുരുളികളും സ്വർണനിറം പൂശിയ പാത്രങ്ങളും പ്രദർശിപ്പിച്ച് വില്പന നടത്തുന്നുണ്ട്. പഴം, പച്ചക്കറിവിപണിയും സജീവമായിരുന്നു. മുന്തിരി, ഓറഞ്ച്, ചക്ക, കണിവെള്ളരി, മത്തൻ തുടങ്ങിയ വിവിധ കണിവസ്തുക്കൾക്കും ആവശ്യക്കാരേറെയുണ്ടായിരുന്നു. പഴങ്ങൾക്കും നേരിയതോതിൽ വിലവർധന വന്നിട്ടുണ്ട്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]