ADVERTISEMENT

ADVERTISEMENT

ലഹരിക്കെതിരേ ചെസ് ടൂർണമെന്‍റ്

അഗളി: വർധിച്ചുവരുന്ന ലഹരി ഉപയോഗത്തിനെതിരേ ജനകീയ ചെസ് ടൂർണമെന്‍റ് സംഘടിപ്പിച്ചു. എംസെഡ് അക്കാദമിയുടെ നേതൃത്വത്തിൽ ഷോളയൂർ ഗ്രാമപഞ്ചായത്തിന്‍റേയും കോട്ടത്തറ ജനമൈത്രി എക്സൈസ് സ്ക്വാഡിന്‍റേയും ശാന്തി മെഡിക്കൽ ഇൻഫർമേഷൻ സെന്‍ററിന്‍റേയും സഹകരണത്തോടെയാണ് ചെസ് ടൂർണമെന്‍റ് സംഘടിപ്പിച്ചത്. പരിപാടിയുടെ ഉദ്ഘാടനം എക്സൈസ് ഇൻസ്പെക്ടർ സന്തോഷ് നിർവഹിച്ചു.

എട്ടുവയസു മുതൽ പതിനാറുവയസുവരെയുള്ള പതിനാറു മത്സരാർഥികൾ പങ്കെടുത്ത ടൂർണമെന്‍റിൽ പി.എം. വിനു, സായ് സർവേഷ് തുടങ്ങിയവർ ജേതാക്കളായി. മുഴുവൻ പങ്കാളികൾക്കും സർട്ടിഫിക്കറ്റുകൾ വിതരണം ചെയ്തു. നിഖിൽ എംസെഡ്, ഡോ. സബലക്ഷ്മി, യദുകൃഷ്ണൻ തുടങ്ങിയവർ പ്രസംഗിച്ചു.

ADVERTISEMENT

കത്തോലിക്ക കോൺഗ്രസ് വിളംബരജാഥ സമാപിച്ചു

മണ്ണാർക്കാട്: കത്തോലിക്ക കോൺഗ്രസിന്‍റെ 107 ാം ജന്മദിന വാർഷികാഘോഷത്തിന്‍റെ ഭാഗമായി നടക്കുന്ന മഹാറാലിയുടെയും സമുദായ സംഗമത്തിന്‍റേയും പ്രചരണപരിപാടിയുടെ ഭാഗമായി ഫൊറോന കത്തോലിക്ക കോൺഗ്രസ് നടത്തിയ വിളംബരജാഥ സമാപിച്ചു. ഫൊറോനയിലെ ഇടവകകളായ എടത്തനാട്ടുകര, അലനല്ലൂർ, തിരുവിഴാംകുന്ന്, കണ്ടമംഗലം, കാരാപ്പാടം, കുമരംപുത്തൂർ, ശ്രീകൃഷ്ണപുരം, കോട്ടപ്പുറം, പുല്ലിശേരി, മെഴുകുംപാറ, കൈതച്ചിറ, പെരിമ്പടാരി ഫൊറാന പള്ളി തുടങ്ങി എല്ലായിടവകയിലും വിളംബരജാഥ എത്തി. ഫൊറാന പ്രസിഡന്‍റ് ബിജു മലയിലിന്‍റെ നേതൃത്വത്തിൽ നടന്ന വിളംബരജാഥയുടെ സമാപനം പെരിമ്പടാരി പള്ളിയിൽ ഫൊറോന ഡയറക്ടർ ഫാ. രാജു പുളിക്കത്താഴെ ഉദ്ഘാടനം ചെയ്തു. കത്തോലിക്ക കോൺഗ്രസ് ഫൊറോന ഡയറക്ടർ ഫാ. ലിവിൻ ചുങ്കത്ത് വിളംബരസന്ദേശം നല്കി. നാടിനെ നയിക്കേണ്ട യുവതലമുറയെ കാർന്നുതിന്നുന്ന ലഹരിമാഫിയയെ നിലയ്ക്കു നിർത്താൻ പള്ളികൾ തോറും എല്ലാ സംഘടനകളിൽ നിന്നും ആളുകളെ ഉൾപ്പെടുത്തി സൗഹൃദ ജാഗ്രതാകർമ സമിതികൾ രൂപികരിക്കുമെന്ന് ജാഥാക്യാപ്റ്റൻ ബിജു മലയിൽ പ്രഖ്യാപിച്ചു. ഷിബു കാട്രുകുടിയിൽ, എലിസബത്ത് മുസോളിനി, ജോഷി മേലേടത്ത്, ബേബി മാവറയിൽ, ജോസ് കിഴക്കേൽ തുടങ്ങിയവർ വിളംബരജാഥയ്ക്ക് നേതൃത്വം നല്കി.

പള്ളം പ്രദേശത്തുകാർക്ക് വിഷുക്കണിയായി റെയിൽവേയുടെ വെള്ളിടി

ഒറ്റപ്പാലം: പള്ളം പ്രദേശത്തുകാർക്ക് റെയിൽവേയുടെ വിഷുകൈനീട്ടം- വഴി അടച്ചുകെട്ടി. റെയിൽവേ സുരക്ഷാക്രമീകരണങ്ങളുടെ ഭാഗമായിട്ടാണ് പ്രദേശത്തേക്കുള്ള വഴി അടച്ചുകെട്ടുന്നതെന്നും അതല്ല പ്ലാറ്റ്ഫോം വിപുലീകരണത്തിന്‍റെ ഭാഗമായിട്ടാണ് കരിങ്കല്ലിട്ട് അടച്ചു കെട്ടുന്നതെന്നുമാണ് സ്ഥിരീകരിക്കാത്ത വിവരം. നിരവധി വീടുകളിലേക്കുള്ള വഴിയാണ് അടച്ചുകെട്ടി റെയിൽവേ നിർമാണ പ്രവൃത്തികൾ നടത്തുന്നത്. ഒറ്റപ്പാലം റെയിൽവേസ്റ്റേഷനപ്പുറത്ത് പാളംമുറിച്ചുകടക്കുന്ന നടവഴിയിലാണ് റെയിൽവേ മതിൽ കെട്ടുന്നത്. നേരത്തെയും ഇത്തരത്തിലുള്ള നീക്കം നടന്നിരുന്നു. എന്നാൽ അന്ന് ഡോ. രാധാ മോഹൻദാസ് അഗർവാൾ എംപി ഇടപെട്ടാണ് നിർത്തിവെപ്പിച്ചത്. വീട്ടിലേക്കുള്ള വഴി നിഷേധിക്കപ്പെടുമോ എന്ന ആധി ഒറ്റപ്പാലം റെയിൽവേസ്റ്റേഷനപ്പുറത്ത് താമസിക്കുന്ന പള്ളം നിവാസികൾക്ക് യാഥാർഥ്യമാവുകയാണ്. ഇവിടെ 30 ഓളം കുടുംബങ്ങൾ താമസിക്കുന്നുണ്ട്. ഈ വഴിയടച്ചാൽ ഇവർക്ക് സ്വന്തം വീട്ടിലേക്ക് പോകാനോ വരാനോ കഴിയില്ല. ഒറ്റപ്പാലം റെയിൽവേസ്റ്റേഷനും ഭാരതപ്പുഴയ്ക്കുമിടയിലായാണ് 30 ഓളം കുടുംബങ്ങൾ താമസിക്കുന്നത്. സ്റ്റേഷന് ഒരറ്റത്ത് രണ്ടാംപ്ലാറ്റ്‌ഫോമിന് 50 അടി മുൻവശത്തായാണ് ഇവിടേക്കുള്ള നടവഴി. പ്രദേശത്തുള്ളവർക്ക് വാഹനം വീടുകളിലേക്കെത്തിക്കാനാകാത്ത പ്രശ്നവുമുണ്ട്. ഇവിടങ്ങളിൽനിന്ന് അസുഖമുള്ളവരെയും മറ്റും ആശുപത്രിയിലേക്കെത്തിക്കണമെങ്കിൽ ഇവരെ താങ്ങിയെടുത്ത് പാളം മുറിച്ചുകടക്കേണ്ട സ്ഥിതിയാണുള്ളത്. ഇരുചക്രവാഹനങ്ങളെല്ലാം പാളത്തിനിപ്പുറം നിർത്തിയാണ് ഇവിടുത്തുകാർ വീടുകളിലേക്ക് പോകാറുള്ളത്. ഇതുമൂലം വാഹനത്തിന്‍റെ പലഭാഗങ്ങളും മോഷ്ടിക്കപ്പെടുകയും ചെയ്യുന്ന പ്രശ്നങ്ങളുമുണ്ട്. ഇത്തരം പ്രശ്നങ്ങൾ നിലനിൽക്കെയാണ് നടവഴികൂടി ഇല്ലാതാവുന്നത്.

ഓശാനഞായർ ആചരിച്ചു; വിശുദ്ധവാരത്തിന് തുടക്കം

പാലക്കാട്: യേശുവിന്‍റെ ജറുസലേം പ്രവേശനത്തിന്‍റെ സ്മരണ പുതുക്കി ഓശാനതിരുനാൾ ആചരിച്ചു. രണ്ടായിരത്തിൽപരം വർഷങ്ങൾക്കു മുന്പ് കഴുതപ്പുറത്തേറി ജെറുസലേമിലേക്ക് ക്രിസ്തു നടത്തിയ രാജകീയപ്രവേശനത്തിന്‍റെ ഓർമപുതുക്കലാണ് ഓശാനഞായർ തിരുക്കർമ്മങ്ങൾ. പാലക്കാട് സെന്‍റ് റാഫേൽസ് കത്തീഡ്രൽ പള്ളിയിൽ നടന്ന ഓശാന തിരുക്കർമ്മങ്ങൾക്ക് ബിഷപ് മാർ പീറ്റർ കൊച്ചുപുരയ്ക്കൽ നേതൃത്വം നൽകി. രാമനാഥപുരം ഹോളി ട്രിനിറ്റി കത്തീഡ്രലിൽ നടന്ന കർമ്മങ്ങൾക്ക് ബിഷപ് മാർ പോൾ ആലപ്പാട്ട് കാർമികത്വം വഹിച്ചു. സുൽത്താൻപേട്ട സെന്‍റ് സെബാസ്റ്റ്യൻസ് കത്തീഡ്രലിൽ ബിഷപ് ഡോ. അന്തോണിസാമി പീറ്റർ അബീർ മുഖ്യകാർമികനായി. രൂപതകളിലെ എല്ലാ പള്ളികളിലും വിശുദ്ധകുർബാനയും കുരുത്തോല പ്രദക്ഷിണവും നടന്നു. ഇതോടെ വിശുദ്ധവാരത്തിനും തുടക്കമായി. അന്ത്യഅത്താഴത്തിന്‍റേയും പീഢാനുഭവ, കുരിശുമരണത്തിന്‍റേയും ഉയിർപ്പിന്‍റേയും ഓർമകളാണ് വിശുദ്ധവാരത്തിൽ ആചരിക്കപ്പെടുന്നത്.

ഒറ്റപ്പാലത്തിന് കണികാണാൻ അമ്പലപ്പാറയുടെ കണിവെള്ളരി

ഒറ്റപ്പാലം: ഒറ്റപ്പാലം കണികാണും സ്വന്തം നാടിന്‍റെ കണിവെള്ളരി. ഇത്തവണ വിഷുക്കണി ഒരുക്കാൻ 25 ടൺ കണിവെള്ളരിയാണ് ഒറ്റപ്പാലത്തിന് അമ്പലപ്പാറ സമ്മാനിച്ചിട്ടുള്ളത്. വേനൽമഴയെ അതിജീവിച്ചാണ് അമ്പലപ്പാറയിലെ കർഷകർ ഇത്രയും കണി വെള്ളരി വിഷുവിപണിയിലെത്തിച്ചത് . അറവക്കാട്, വേങ്ങശേരി, അകവണ്ട, ചെറുമുണ്ടശേരി, കടമ്പൂർ, കൂനൻമല പ്രദേശങ്ങളിലെ 15 ഏക്കർ കൃഷിയിടത്തിൽനിന്നാണ് വെള്ളരി വിപണിയിലെത്തിച്ചയത്. 25 കർഷകരുടെ അധ്വാനഫലമായി കഴിഞ്ഞവർഷത്തേക്കാൾ പത്തുടൺ അധികം വിളവെടുക്കാനായി. നേരത്തേതന്നെ വിപണിയിൽ ഇടംപിടിക്കാൻ കഴിഞ്ഞതിനാൽ വെള്ളരിക്ക് കഴിഞ്ഞവർഷത്തെ അപേക്ഷിച്ച് കൂടുതൽവില ലഭിച്ചതായി കർഷകർ പറഞ്ഞു. കിലോയ്‌ക്ക് 23 രൂപ വരെയാണ് ലഭിച്ചത്. കഴിഞ്ഞവർഷം 20രൂപവരെയായിരുന്നു വില. അമ്പലപ്പാറയിൽ അറവക്കാട് ആശ്രയക്ലസ്റ്ററിന് കീഴിലുള്ള കർഷകരാണ് ഏറ്റവും കൂടുതൽ വെള്ളരി വിപണിയിലെത്തിച്ചിട്ടുള്ളത്. ഏകദേശം 20 ടൺ വെള്ളരിയാണ് വിളവെടുക്കാൻ കഴിഞ്ഞതെന്ന് ക്ലസ്റ്റർ സെക്രട്ടറി കെ. ഗോപാലകൃഷ്ണൻ പറഞ്ഞു. പന്ത്രണ്ടര ഏക്കർ സ്ഥലത്തായിരുന്നു കൃഷി. മറ്റുസ്ഥലങ്ങളിലെ കർഷകർ ചേർന്ന് അഞ്ച് ടണ്ണോളം കണിവെള്ളരിയും വിപണിയിലെത്തിച്ചു. ഒറ്റപ്പാലം, കടമ്പഴിപ്പുറം, അമ്പലപ്പാറ തുടങ്ങിയ സ്ഥലങ്ങളിലെ മൊത്തവ്യാപാര സ്ഥാപനങ്ങൾ കേന്ദ്രീകരിച്ചായിരുന്നു വില്പന. അപ്രതീക്ഷിത മഴയിൽ അഞ്ച് ടൺ വെള്ളരി കർഷകർക്ക് നഷ്ടമായി. മഴപെയ്ത് കൃഷിയിടത്തിൽ വെള്ളമെത്തിയതാണ് പ്രശ്നമായത്. ചില കർഷകരുടെ വെള്ളരിക്ക് നിറംവെക്കാൻ വൈകുന്ന പ്രശ്നവുമുണ്ടായി.

വിഷുവിനൊരുങ്ങി നാടും നഗരവും

ജോജി തോമസ് നെന്മാറ: വിഷുവിനൊരുങ്ങി നാടും നഗരവും. പച്ചക്കറി, പഴ, പടക്കവിപണിയിൽ മുന്പെങ്ങുമില്ലാത്ത തിരക്കായിരുന്നു ഇത്തവണ. വിഷുക്കണി ഒരുക്കുന്നതിന്‍റെ മുന്നോടിയായി അങ്ങാടികളിൽ വൻ തിരക്കായിരുന്നു. പുതിയ മോഡൽ പടക്കങ്ങളും കമ്പിത്തിരിയും, വിഷു ചക്രങ്ങളുമായാണ് വിഷുവിപണി ആകർഷണീയമായത്. പൊട്ടിവിടരുന്ന ഇന്ത്യൻ ഡ്രാഗൺ, മാനത്തു തീതുപ്പി കത്തിജ്വലിക്കുന്ന ചൈനീസ് ഡ്രാഗൺ, ബഹുവർണം വിതറുന്ന ഫ്ളവർ എവറസ്റ്റ് എന്ന ഭീമൻ പൂക്കുറ്റി തുടങ്ങി പടക്ക വിപണിയിൽ കൗതുകമേറെയാണ്. ചൈനീസ് മോഡലിന്‍റെ പാത പിന്തുടർന്ന് പതിവിൽനിന്നു വ്യത്യസ്ത‌മായി പലയിനം പടക്കങ്ങളും ഇക്കുറി പടക്കവിപണിയിൽ എത്തിയിരുന്നു. കുടെ പതിവു പരമ്പരാഗത കമ്പിത്തിരി, മത്താപ്പ്, ഓലപ്പടക്കങ്ങളുടെ വില്പനയും തകൃതിയായിരുന്നു. വിഷുവിനു തലേദിവസമായ ഇന്നലെ ഞായറാഴ്ച സാധാരണ അങ്ങാടി ഒഴിവു ദിവസമാണെങ്കിലും വിഷു പ്രമാണിച്ച് കടകൾ തുറന്നിരുന്നു. പടക്കം, പച്ചക്കറി, പഴങ്ങൾ, വെറ്റില തുടങ്ങി കണിയൊരുക്കാനുള്ള വസ്തുക്കളുടെ കച്ചവടമാണ് തകൃതിയായത്. മുൻവർഷങ്ങളുമായി താരതമ്യം ചെയ്യുമ്പോൾ വലിയ വിലക്കൂടുതലുമില്ല. ടൗണുകളിൽ ലൈസൻസ് ഉള്ളവർ മാത്രം പടക്കം വ്യാപാരം നടത്തുമ്പോൾ നാട്ടിൻപുറങ്ങളിൽ താത്കാലിക കച്ചവടക്കാർ വഴിയോരങ്ങളിലും വ്യാപാരസ്ഥാപനങ്ങളോടും ചേർന്നും പടക്കവില്പന സജീവമാക്കി. ടൗണുകളിലെ കടകളിലും ചില സംഘടനകളും തമിഴ്നാട്ടിൽ നിന്നും മറ്റും കൊണ്ടുവന്ന് ഗിഫ്റ്റ് പാക്കറ്റ് എന്ന നിലയിൽ നിശ്ചിത രൂപയ്ക്ക് കിറ്റുകളായും നൽകുന്നുണ്ട്. സൂപ്പർ മാർക്കറ്റുകൾ മുതൽ വഴിയോരങ്ങളിൽ വരെ കണിക്കൊന്ന വില്പനയും സജീവമായിരുന്നു. പ്രകൃതിദത്ത കണിക്കൊന്നയെ വെല്ലുന്ന നിറവും ഭംഗിയുമുള്ള കൃത്രിമകണിക്കൊന്നയും വാഹനവും വീടും അലങ്കരിക്കാൻ ആവശ്യക്കാരുണ്ട്. തുണിക്കടകളിൽ കസവുകരയുള്ള സെറ്റുമുണ്ടും ശ്രീകൃഷ്ണ ചിത്രങ്ങളുള്ള വസ്ത്രങ്ങൾക്കും ആവശ്യക്കാരുണ്ട് . പാത്രകടകളിൽ കണിയൊരുക്കാനുള്ള ഓട്ടുരുളികളും സ്വർണനിറം പൂശിയ പാത്രങ്ങളും പ്രദർശിപ്പിച്ച് വില്പന നടത്തുന്നുണ്ട്. പഴം, പച്ചക്കറിവിപണിയും സജീവമായിരുന്നു. മുന്തിരി, ഓറഞ്ച്, ചക്ക, കണിവെള്ളരി, മത്തൻ തുടങ്ങിയ വിവിധ കണിവസ്തുക്കൾക്കും ആവശ്യക്കാരേറെയുണ്ടായിരുന്നു. പഴങ്ങൾക്കും നേരിയതോതിൽ വിലവർധന വന്നിട്ടുണ്ട്.

പന്നിയങ്കര ടോൾപ്ലാസയിൽ നാലുചക്ര ഓട്ടോതൊഴിലാളികൾ സമരം നടത്തി

വടക്കഞ്ചേരി: സർവകക്ഷി യോഗ തീരുമാനം അട്ടിമറിച്ച ടോൾ കമ്പനിക്കെതിരെ വടക്കഞ്ചേരി ജനകീയവേദിയുടെ നേതൃത്വത്തിൽ നാലു ചക്ര ഓട്ടോ-ടാക്സി ഡ്രൈവർമാരും തൊഴിലാളികളും പ്രതിഷേധ സമരം നടത്തി. പ്രതിഷേധയോഗം ജനകീയവേദി ചെയർമാൻ ബോബൻ ജോർജ് ഉദ്ഘാടനം ചെയ്തു. ഓട്ടോ-ടാക്സി ഡ്രൈവേഴ്സ് യൂണിയൻ പ്രതിനിധി താജുദ്ദീൻ ഇബ്രാഹിം അധ്യക്ഷത വഹിച്ചു. ജനകീയവേദി ജനറൽ കൺവീനർ ജിജോ അറയ്ക്കൽ, വ്യാപാരി സംരക്ഷണ സമിതി പ്രസിഡന്‍റ് സി.കെ. അച്യുതൻ, കൺവീനർ കെ. ശിവദാസ്, ഓട്ടോറിക്ഷ തൊഴിലാളി പ്രതിനിധി സുലൈമാൻ കാസിം, ജനകീയ വേദി ട്രഷറർ മോഹനൻ പള്ളിക്കാട് എന്നിവർ പ്രസംഗിച്ചു. കെ. രാധാകൃഷ്ണ‌ൻ എംപിയുടെ അധ്യക്ഷതയിൽ പി.പി. സുമോദ് എംഎൽഎ, കെ.ഡി. പ്രസേനൻ എംഎൽഎ എന്നിവരുടെ നേതൃത്വത്തിൽ ചേർന്ന യോഗത്തിൽ നാലുചക്ര ഓട്ടോറിക്ഷകൾക്ക് സൗജന്യയാത്ര അനുവദിക്കുമെന്ന് ഉറപ്പു പറഞ്ഞിരുന്നു. എന്നാൽ സർവകക്ഷിയോഗ തീരുമാനം അട്ടിമറിച്ച് ടോൾ കമ്പനി മുന്നോട്ടുപോകുന്ന സ്ഥിതിയാണിപ്പോൾ. യോഗതീരുമാനത്തിന് വിരുദ്ധമായി ടോൾ കമ്പനി പ്രവർത്തിച്ചാൽ സമരം ശക്തമാക്കുമെന്ന് സംയുക്ത സമരസമിതി ഭാരവാഹികൾ പറഞ്ഞു. ടോൾ അധികൃതരുമായി നടത്തിയ ചർച്ചയിൽ നാലുചക്ര ഓട്ടോറിക്ഷകളെ അടുത്ത ഉന്നതതല ചർച്ച നടക്കുന്നതുവരെ സൗജന്യട്രാക്കിലൂടെ കടത്തിവിടാൻ ധാരണയായിട്ടുണ്ട്.

കൊല്ലുന്ന ലഹരിക്കെതിരെ മണ്ണാർക്കാട്ട് പ്രതിഷേധ കുടുംബമതിൽ തീർത്തു

മണ്ണാർക്കാട്: നിരോധിത ലഹരിയുടെ വിൽപ്പനയും ഉപയോഗവും തടയുക എന്ന ലക്ഷ്യത്തോടെ രൂപീകൃതമായ മൂവ് ജനകീയ കൂട്ടായ്മയുടെ നേതൃത്വത്തിൽ മണ്ണാർക്കാട് നഗരസഭയും ട്രേഡ് യൂണിയനുകളും വിവിധ സംഘടനകളും സംയുക്തമായി സംഘടിപ്പിച്ച ലഹരി വിരുദ്ധ കുടുംബ മതിൽ മണ്ണാർക്കാട് നെല്ലിപ്പുഴ മുതൽ കുന്തിപ്പുഴ വരെ അണിനിരന്നു. വിവിധ രാഷ്ട്രീയ, സമുദായ സംഘടനാനേതാക്കൾ, സാമൂഹ്യ സംഘടനാനേതാക്കൾ, മത നേതാക്കൾ, ബിൽഡിംഗ് ഓണേഴ്സ് സംഘടനാ പ്രതിനിധികൾ, ബസ് ഓപ്പറേറ്റേഴ്സ് സംഘടനാനേതാക്കൾ, യൂസ്ഡ് വെഹിക്കിൾ സംഘടനാനേതാക്കൾ, ആർട്ടിസ്റ്റ് അസോസിയേഷൻ നേതാക്കൾ, റസിഡൻഷ്യൽ അസോസിയേഷൻ ഭാരവാഹികൾ തുടങ്ങിയവർ നേതൃത്വം നൽകിയ പ്രതിരോധ മതിലിൽ സ്ത്രീകളും കുട്ടികളുമടക്കം ആറായിരത്തിൽപ്പരം ആളുകളാണ് അണിനിരന്നത്. നെല്ലിപ്പുഴ പരിസരത്ത് നടന്ന ഉദ്ഘാടന പരിപാടിയിൽ മൂവ് ചെയർമാൻ ഡോ.കെ.എ. കമ്മാപ്പ അധ്യക്ഷത വഹിച്ചു. എൻ. ഷംസുദീൻ എംഎൽഎ ഉദ്ഘാടനം ചെയ്തു. നഗരസഭാ ചെയർമാൻ സി. മുഹമ്മദ് ബഷീർ പ്രതിജ്ഞ ചൊല്ലിക്കൊടുത്തു. മൂവ് ഭാരവാഹികളായ എം. പുരുഷോത്തമൻ, പഴേരി ഷരീഫ്ഹാജി തുടങ്ങിയവർ പ്രവർത്തകരായ ഫിറോസ് ബാബു, കൃഷ്ണദാസ് കൃപ ,കെ.വി. അബ്ദുറഹ്മാൻ, നഷീദ് പിലാക്കൽ, കെ. ഇസ്മായിൽ, ഷബീർ അലി, സി. ഷൗക്കത്ത് അലി, പ്രശോഭ് കുന്നിയാരത്ത്, അബ്ദുൽ ഹാദി അറക്കൽ, ബഷീർ കുറുവണ്ണ, ഉമ്മർ റീഗൽ, തുടങ്ങിയവർ പ്രസംഗിച്ചു.

മ ുടങ്ങിയ ഡിഎ ഉടൻ വിതരണം ചെയ്യണം: കെസിഇസി

ശ്രീകൃഷ്ണപുരം: കേരള കോ. ഓപ്പററ്റീവ് എംപ്ലോയിസ് കൗൺസിൽ എഐടിയുസി ജില്ലാ സമ്മേളനം സംസ്ഥാന ജനറൽ സെക്രട്ടറി വിൽസൻ ആന്‍റണി ഉദ്ഘാടനം ചെയ്തു. ജില്ലാ പ്രസിഡന്‍റ് എ. ശങ്കരനാരായണൻ അധ്യക്ഷത വഹിച്ചു. ജില്ലാ സെക്രട്ടറി സിദ്ധിക്ക് റിപ്പോർട്ട് അവതരിപ്പിച്ചു. സഹകരണവേദി ജില്ലാ സെക്രട്ടറി കെ. വേണുഗോപാൽ, എഐടിയുസി ശ്രീകൃഷ്ണപുരം മണ്ഡലം സെക്രട്ടറി ആലുംകുണ്ടിൽ രാധാകൃഷ്ണൻ, എ. വിഷ്ണു, എ.പി. സന്ദീപ് എന്നിവർ പ്രസംഗിച്ചു. മൾട്ടി സ്റ്റേറ്റ് സഹകരണ സംഘങ്ങളുടെ പ്രവർത്തനത്തിൽ സർക്കാർ ഇടപെട്ട് ആവശ്യമായ മാറ്റങ്ങൾ കൊണ്ടുവരണമെന്നും എല്ലാ സഹകരണ മേഖലയിലേയും ശമ്പള പരിഷ്ക്കരണനടപടി ഊർജിതമാക്കണമെന്നും, മുടങ്ങിക്കിടക്കുന്ന മൂന്ന് വർഷത്തെ ഡിഎ ഉടൻ വിതരണം ചെയ്യണമെന്നും സമ്മേളനം ആവശ്യപ്പെട്ടു. ഭാരവാഹികൾ: പി. സുകുമാരൻ- പ്രസിഡന്‍റ്, കെ.സിദ്ധിക്ക്- സെക്രട്ടറി, എ.പി. സന്ദീപ്- ട്രഷറർ, വി. രാമചന്ദ്രൻ- ജോയിന്‍റ് സെക്രട്ടറി, സുരേഷ് ബാബു-വൈസ് പ്രസിഡന്‍റ്.

പോഷകാഹാരം പദ്ധതി ആരംഭിച്ചു

ശ്രീകൃഷ്ണപുരം: വിളർച്ചയുമായി ബന്ധപ്പെട്ട് വനിതകൾക്കിടയിൽ കണ്ടെത്തിയ ആരോഗ്യപ്രശ്നങ്ങൾ പരിഹരിക്കുന്നതിന് ശ്രീകൃഷ്ണപുരം ഗ്രാമപഞ്ചായത്തിൽ ആരോഗ്യ 2025 പോഷകാഹാര പദ്ധതി ആരംഭിച്ചു. വിളർച്ചയിൽ നിന്നും വളർച്ചയിലേക്ക് എന്ന പദ്ധതിയുടെ ഭാഗമായി 15 നും 50 നും ഇടയിൽ പ്രായമുള്ള വനിതകൾക്കിടയിൽ രക്തപരിശോനസർവേ നടത്തിയിരുന്നു. സർവേയിലൂടെ ഹീമോഗ്ലോബിൻ ലെവൽ 9.4 ന് താഴെയായി കണ്ടെത്തിയവർക്കായാണ് പോഷകാഹാര കിറ്റ് നൽകിയത്. റാഗി, ശർക്കര, ചെറുപയർ, മുതിര, കപ്പലണ്ടി, ഉണക്കമുന്തിരി എന്നിവയടങ്ങിയ കിറ്റാണ് പോഷകാകാരമായി നൽകുന്നത്. ജനകീയാസൂത്രണം 2024-25 വനിതാ ഘടകപദ്ധതിയിൽ 198000 രൂപ വിനിയോഗിച്ച് 200 വനിതകൾക്ക് പദ്ധതിയുടെ ഗുണഫലം ലഭിക്കും. ജില്ലാ പഞ്ചായത്ത് പ്രസിഡന്‍റ് കെ. ബിനുമോൾ ഉദ്ഘാടനം ചെയ്തു. പഞ്ചായത്ത് പ്രസിഡന്‍റ് സി. രാജിക അധ്യക്ഷയായി.

ഒറ്റപ്പാലത്ത് അഗ്നിരക്ഷാസേന യൂണിറ്റെന്ന പാഴ്പ്രഖ്യാപനത്തിന് ഒരു പതിറ്റാണ്ട്

ഒറ്റപ്പാലം: ഒറ്റപ്പാലത്ത് അഗ്നിരക്ഷാ സേന യൂണിറ്റ് സ്ഥാപിക്കണമെന്ന ആവശ്യം നടപ്പായില്ല. അഗ്നിരക്ഷാസേന യൂണിറ്റ് സ്ഥാപിക്കാൻ താമരക്കുളത്തിനോട് ചേർന്ന സ്ഥലം അനുയോജ്യമാണെന്ന് നേരത്തെ കണ്ടത്തിയിരുന്നു. അഗ്നിരക്ഷസേനാ ജില്ലാ ഓഫീസറാണ് പത്തൊമ്പതാം മൈലിലെ താമരക്കുളത്തിന് മുൻവശത്തുള്ള ഉയർന്നപ്രദേശം അനുയോജ്യമെന്ന് വിലയിരുത്തിയത്. യൂണിറ്റ് സ്ഥാപിക്കാനുള്ള അംഗീകാരത്തിനായി പദ്ധതി തയ്യാറാക്കി സർക്കാരിന് സമർപ്പിച്ചതായി കെ. പ്രേംകുമാർ എംഎൽഎയും പറഞ്ഞിരുന്നു. എന്നാൽ ഇപ്പോൾ പദ്ധതിയെക്കുറിച്ച് ആർക്കും മിണ്ടാട്ടമില്ല. പദ്ധതി കാര്യം നിയമസഭയിൽ ഉപക്ഷേപമായും ഉന്നയിച്ചിരുന്നതാണ്. കണ്ടെത്തിയ സ്ഥലത്ത് വലിയ വാഹനങ്ങൾക്ക്‌ കടന്നുപോകാവുന്ന രീതിയിൽ മാറ്റങ്ങൾ വരുത്തേണ്ടിവരും. പാലക്കാട്-കുളപ്പുള്ളി പാതയുടെ വളരെ അടുത്താണെന്നുള്ളതും അഗ്നിരക്ഷാസേനയുടെ വേഗത്തിലുള്ള സഞ്ചാരത്തിന് സഹായകമാവുന്നതാണ്. ഒപ്പം ആവശ്യത്തിന് വെള്ളം കുളത്തിലുണ്ടെന്നതും പ്രവർത്തനത്തിന് സഹായകരമാകുമെന്നായിരുന്നു വിലയിരുത്തൽ. നവീകരണം പൂർത്തിയായ താമരക്കുളത്തിൽ കുട്ടികളെ നീന്തൽപരിശീലിപ്പിക്കാൻ സഹായിക്കാമെന്ന് അഗ്നിരക്ഷാസേന അറിയിച്ചതായും എംഎൽഎ നേരത്തെ പറഞ്ഞിരുന്നതാണ്. ഒറ്റപ്പാലത്ത് ഒരു അഗ്നിരക്ഷായൂണിറ്റ് തുടങ്ങുന്നുവെന്ന പ്രഖ്യാപനം വന്നിട്ട് ഒരു പതിറ്റാണ്ടുകാലമായി. സ്ഥലം ലഭിക്കാത്തതാണ് യൂണിറ്റ് തുടങ്ങുന്നതിന് തടസമായിരുന്നത്. ആദ്യം ലക്കിടി കിൻഫ്രപാർക്കിൽ സ്ഥലത്തിന് ശ്രമിച്ചിരുന്നെങ്കിലും ജലലഭ്യതപ്രശ്‌നംമൂലം ഒഴിവാക്കി. പിന്നീടാണ് താമരക്കുളത്തിന് സമീപത്തെ സ്ഥലത്തിലേക്കെത്തിയത്. ഒറ്റപ്പാലത്തും പട്ടാമ്പിയിലും ഒരേസമയത്താണ് അഗ്നിരക്ഷാസേനയുടെ യൂണിറ്റ് തുടങ്ങാൻ പദ്ധതിയിട്ടിരുന്നത്. പട്ടാമ്പിയിൽ കഴിഞ്ഞ നിയമസഭാതെരഞ്ഞെടുപ്പ് കാലത്തുതന്നെ വാടകക്കെട്ടിടത്തിൽ പ്രവർത്തനംതുടങ്ങി. എന്നാൽ ഒറ്റപ്പാലം ഇപ്പോഴും സ്ഥലം കണ്ടെത്തലിലെത്തിയിട്ടേയുള്ളൂ. ഇപ്പോഴുള്ള ഷൊർണൂർ അഗ്നിരക്ഷാസേനയ്ക്ക് ഒറ്റപ്പാലം, ഷൊർണൂർ, ചെർപ്പുളശേരി എന്നീ മൂന്ന് നഗരസഭകളുൾപ്പെടെയുള്ള വലിയ പരിധിയാണുള്ളത്.

ഷൊർണൂർ റെയിൽവേ സ്റ്റേഷനിലെ പാർക്കിംഗ് കേന്ദ്രത്തിന്‍റെ കരാറുകാരനെ ഒഴിവാക്കി

ഷൊർണൂർ: റെയിൽവേ സ്റ്റേഷനിലെ പുതിയ പാർക്കിംഗ് കേന്ദ്രത്തിന്‍റെ കരാറുകാരനെ റെയിൽവേ ഒഴിവാക്കി. റെയിൽവേക്കു നൽകേണ്ട വാടക നൽകാതെ മാസങ്ങളോളം കുടിശിക വരുത്തിയതിനാണു കരാറുകാരനെ ഒഴിവാക്കിയതെന്നു റെയിൽവേ അറിയിച്ചു. കോയമ്പത്തൂർ കേന്ദ്രീകരിച്ചുള്ള ഏജൻസിയാണു കരാർ ഏറ്റെടുത്തിരുന്നത്. കാറുകൾക്കു പ്രതിമാസ വാടക 300 രൂപയും ബൈക്കുകൾക്കു പ്രതിദിനം 20 രൂപയും ഹെൽമറ്റിനു 10 രൂപയുമാണു കരാറുകാരൻ ഈടാക്കിയിരുന്നത്. വ്യാഴാഴ്ച രാത്രിയോടെ നിലവിലെ കരാറുകാരൻ പാർക്കിംഗ്ഫീസ് വാങ്ങൽ അവസാനിപ്പിച്ചു. വെള്ളിയാഴ്ച സമീപത്തു സ്ഥാപിച്ച പാർക്കിംഗ് ബോർഡുകളും എടുത്തുമാറ്റി. സ്ഥലത്തു വാഹനങ്ങൾ പാർക്ക് ചെയ്യേണ്ടതു സ്വന്തം ഉത്തരവാദിത്തത്തിൽ ആയിരിക്കണമെന്നു നോട്ടീസും റെയിൽവേ പതിച്ചിട്ടുണ്ട്. ഒരു മാസം മുൻപാണു പുതിയ പാർക്കിംഗ് കേന്ദ്രം റെയിൽവേ തുറന്നു നൽകിയത്. 5000 ചതുരശ്രമീറ്റർ വിസ്തൃതിയിൽ ഒരുക്കിയിട്ടുള്ള പാർക്കിംഗ് കേന്ദ്രത്തിൽ നൂറുകണക്കിനു വാഹനങ്ങൾ നിർത്താൻ കഴിയും. റെയിൽവേ സ്റ്റേഷനു വലതുവശത്തുള്ള സ്ഥലത്താണു പാർക്കിംഗ് സൗകര്യം ഉള്ളത്. അമൃത് ഭാരത് പദ്ധതിയുടെ ഭാഗമായി റെയിൽവേ സ്റ്റേഷൻ നവീകരണത്തിന് ഒപ്പമാണു പാർക്കിംഗ് കേന്ദ്രവും നിർമിച്ചത്. റെയിൽവേ സുരക്ഷാസേനയുടെ വാഹനങ്ങൾക്കും ഇവിടെയാണു പാർക്കിങ്. അടുത്ത ദിവസം തന്നെ പുതിയ കരാറുകാരനെ കണ്ടെത്താനുള്ള ടെൻഡർ വിളിക്കുമെന്നു റെയിൽവേ അറിയിച്ചു.

സ്റ്റേറ്റ് ട്രാൻസ്പോർട്ട് കോർപറേഷനിൽ പുതിയ വനിതാകണ്ടക്ടർമാരെ നിയമിച്ചു

കോയമ്പത്തൂർ: സ്റ്റേറ്റ് ട്രാൻസ്പോർട്ട് കോർപറേഷനിൽ പുതിയ വനിതാ കണ്ടക്ടർമാരെ നിയമിച്ചു. 13 പുതിയ സർക്കാർ ബസുകളുടെ ഉദ്ഘാടന ചടങ്ങും ജോലിക്കിടെ മരിച്ച സംസ്ഥാന ഗതാഗത കോർപറേഷൻ ജീവനക്കാരുടെ അവകാശികൾക്ക് കാരുണ്യ നിയമന ഉത്തരവുകൾ നൽകുന്നതും കോയമ്പത്തൂർ കസ്റ്റംസിലെ ബ്രാഞ്ച്-1 ലെ സ്റ്റേറ്റ് ഗതാഗത കോർപറേഷൻ വർക്ക്‌ഷോപ്പിൽ നടന്നു. ഗതാഗത മന്ത്രി ശിവശങ്കർ പുതിയ ബസുകളുടെ പ്രവർത്തനം ഉദ്ഘാടനം ചെയ്തു. കോയമ്പത്തൂർ ഡിവിഷണൽ ട്രാൻസ്‌പോർട്ട് കോർപറേഷനിലെ ജോലിക്കിടെ മരിച്ച 44 ജീവനക്കാരുടെ അവകാശികൾക്ക് അദ്ദേഹം കാരുണ്യ നിയമന ഉത്തരവുകൾ നൽകി. ഇന്ന് നിയമനഉത്തരവ് ലഭിച്ച 44 പേരിൽ 22 പേർ സ്ത്രീകളാണ്. കഴിഞ്ഞ 2 വർഷങ്ങളിലായി 317 ബസുകൾ കോയമ്പത്തൂർ സ്റ്റേറ്റ് ട്രാൻസ്പോർട്ട് കോർപറേഷനിൽ എത്തിയിട്ടുണ്ട്. 321 പുതിയ ബസുകൾ കൂടി അനുവദിച്ചിട്ടുണ്ട്.

റെയിൽവേ പാളങ്ങൾക്കു സമീപം വളർത്തുമൃഗങ്ങളെ മേയാൻ വിടുന്നത് തടയണം

പുതുനഗരം: പാലക്കാട് -പൊള്ളാച്ചി റെയിൽപ്പാതയിൽ വളർത്തുമൃഗങ്ങളെ മേച്ചിലിനു വിടുന്നവർക്കെതിരെ കർശന നടപടി വേണമെന്ന ആവശ്യം ശക്തം. മീനാക്ഷിപുരം മുതൽ യാക്കരപ്പാലം വരേയുള്ള ലൈനിലാണ് പശു, ആട് ഉൾപ്പെടെ മൃഗങ്ങളെ മേയാൻവിടുന്നത്. ചരക്ക്, പാസഞ്ചർ ട്രെയിനുകൾക്കു പുറമേ സർവീസ് എൻജിനുകളും ഇടയ്ക്കിടെ ഓടുന്ന റെയിൽവേ ട്രാക്കുകളിൽ ആളുകൾ നടക്കുന്നതും മൃഗങ്ങളെ മേച്ചിലിനു വിടുന്നതിനും നിരോധനം നിലവിലുണ്ട്. ഇവവരുന്നത് സംബന്ധിച്ച് റെയിൽവേ സ്റ്റേഷനുകളിൽ മാത്രമാണ് മുൻകരുതൽ നടപടികൾ സ്വീകരിക്കാറുള്ളത്. ചിലർ റെയിൽപാളങ്ങൾക്ക്സമീപത്തെ വൃക്ഷങ്ങളിൽ കയറിൽ തളച്ച് മേച്ചിലിനു വിടാറുണ്ട്. ട്രെയിൻ വരുന്ന ശബ്ദം കേട്ടാൽ ഇത്തരം മൃഗങ്ങൾ പരക്കംപായുന്നതും കയറുപൊട്ടിച്ചു രക്ഷപ്പെടാൻ ശ്രമിക്കുന്നതും പതിവാണ്. ഈ സംഭവം ട്രെയിൻ സഞ്ചാരത്തിനും ഭീഷണിയാവുന്നുണ്ട്. ഇക്കഴിഞ്ഞ ദിവസം മുതലമട നാവിളുംതോട്ടിൽ റെയിൽവേ പാളങ്ങൾക്കിടയിൽ നടക്കുകയായിരുന്ന 13 പശുക്കൾ ട്രെയിനിടിച്ച് ചത്തിരുന്നു. തമിഴ്നാട് ഭാഗത്തുനിന്നുമാണ് പശുക്കൾ ട്രാക്കിലെത്തിയതെന്നാണ് പ്രാഥമിക നിഗമനം. മുതലമട പഞ്ചായത്ത് പ്രസിഡന്‍റും ജീവനക്കാരും അപകടം നടന്ന സ്ഥലത്തെത്തിയിരുന്നു. പിന്നീട് മൃഗങ്ങളുടെ ജഡം പഞ്ചായത്ത് ചെലവിൽ സംസ്കാരം നടത്തി.

വൈദ്യുതിവേലി ശാസ്ത്രീയമായി നിർമിച്ച് പരിപാലിക്കണം: കർഷകർ

കല്ലടിക്കോട്: കഴിഞ്ഞ ആഴ്ച കയറംകോട് അത്താണിപ്പറമ്പിൽ കുളത്തിങ്കൽ ജോസഫിന്‍റെ മകൻ അലന്‍റെ (24) ജീവൻ എടുത്തത് വനം വകുപ്പ് അധികാരികളുടെ അനാസ്ഥയെന്ന് പരാതി. വാളയാർ മുതൽ പാലക്കയം തരുപ്പപ്പതി വരെ നീണ്ടുകിടക്കുന്ന കല്ലടിക്കോടൻ മലനിരയുടെ ചുവട്ടിൽ സ്ഥിതിചെയ്യുന്ന ഈ പ്രദേശത്ത് കാട്ടാനകൾ തമ്പടിക്കുന്നത് പതിവാണ്. ഈ പ്രദേശത്തെ നാട്ടുകാർ ഈ വിവരം വനംവകുപ്പിനേയും ദ്രുത കർമസേനയേയും ജനപ്രതിനിധികളേയും അപ്പപ്പോൾതന്നെ അറിയിക്കുന്നുമുണ്ടായിരുന്നു. നാട്ടുകാരുടെ ഏറെനാളത്തെ പരാതികൾക്കൊടുവിൽ ഈ വനമേഖലയിൽ വൈദ്യുതിവേലി നിർമിക്കാൻ തീരുമാനിക്കുകയും നിർമാണ പ്രവൃത്തികൾ ആരംഭിക്കുകയും ചെയ്തിരുന്നു. കാട്ടാനയുടെ കുത്തും ചവിട്ടും ഏറ്റ് മരിച്ച അലന്‍റെ വീടിനു സമീപം വനത്തിനോട് ചേർന്നൂള്ള സ്ഥലത്ത് വൈദ്യുതി വേലി വലിച്ച് കെട്ടിയെങ്കിലും വെള്ളം ഒഴുകി ചാലായ ഭാഗത്ത് 15 അടിയോളം ഉയരത്തിലാണ് വൈദ്യുതിവേലിയുടെ കമ്പി പോയിരിക്കുന്നത്. ആനകൾക്ക് ഈ ചാലിലൂടെ കമ്പിയിൽ തട്ടാതെ കൃഷിയിടത്തിലേയ്ക്കും സമീപത്തെ വീടുകളിലേയ്ക്കും എത്താൻ കഴിയുമായിരുന്നു.വൈദ്യുതി വേലി നിർമിച്ചപ്പോൾ ഈ ഭാഗത്ത് ഒരു ലൈൻ കൂടി വലിക്കാൻ വനം വകുപ്പ് ഉദ്യോഗസ്ഥർ തായ്യാറായിരുന്നെങ്കിൽ അലൻ മരിക്കുകയും അമ്മയ്ക്ക് ഗുരുതരപരിക്കേൽക്കുകയും ഇല്ലായിരുന്നു എന്ന് നാട്ടുകാർ പറഞ്ഞു. വനം വകുപ്പ് നിർമിച്ച വൈദ്യുതി വേലികൾ പലഭാഗത്തും പൊട്ടിക്കിടക്കുകയാണ്. മരങ്ങൾ വീണ് വൈദ്യുതി വിഛേദിക്കപ്പെടുകയും ചെയ്തിട്ടുണ്ട്. വേലി നിർമിച്ച് പോകുന്നതല്ലാതെ അറ്റകുറ്റപ്പണികൾ നടത്താൻ അധികാരികൾ തയ്യാറാകുന്നില്ലെന്ന പരാതിയും ഉണ്ട്. ഫെൻസിംഗിന് ഇരുവശവും മിനിമം 15 മീറ്ററെങ്കിലും മരങ്ങൾ ഇല്ലാതെ ക്ലിയർ ചെയ്യണം. കേരളത്തിൽ 4000 കിലോ മീറ്ററിന് മുകളിലുള്ള വനത്തിന്‍റെ അതിരുകൾ ക്ലിയറിംഗ് അസാധ്യമാണ്. ആന കടന്നുവരും. 8 മില്ലീമീറ്റർ വാർക്കകമ്പി വലിഞ്ഞ് പൊട്ടാൻ 1100 കിലോ ഭാരം ചെലുത്തണം. വെറും 2 മില്ലീമീറ്റർ കമ്പി പൊട്ടാൻ 50 കിലോയുടെ മരക്കൊമ്പ് 10 മീറ്റർ ഉയരത്തിൽ നിന്നും വീണാൽ മതി. വൈദ്യുതി കമ്പി കെട്ടിയ തൂണുകൾ ചവിട്ടിമറിക്കാൻ ആനകൾ പരിശീലിച്ചിരിക്കുന്നു. വള്ളിപടർപ്പ് കേറാതെ സൂക്ഷിക്കണം. വെട്ടി കളഞ്ഞാലും കാനലില്ലാത്തതിനാൽ വള്ളി 15 ദിവസത്തിനുള്ളിൽ വളരും. 3 ദിവസം മഴ പെയ്തില്ലെങ്കിൽ ഓരോ 25 മീറ്ററിലുമുള്ള എർത്തിംഗിൽ വെള്ളം ഒഴിച്ച് നനയ്ക്കണം, ഇല്ലെങ്കിൽ പവർ കുറയും. ഇതിനൊക്കെ ആവശ്യത്തിന് ജോലിക്കാരില്ലാത്തതിനാൽ വനം വകുപ്പിന് അസാധ്യമാണ്. കേരളത്തിൽ വനഭൂമിയുമായി ബന്ധപ്പെട്ട സ്ഥലങ്ങളിൽ മിക്കവാറും മഴയുള്ളതിനാലും അതിശക്തമായ ഇടിമിന്നൽ ഉള്ളതിനാലും കൂടുതൽ ശ്രദ്ധ ഉണ്ടാകണം. 10 അടി താഴ്ചയിൽ വനാതിർത്തിയിൽ ട്രഞ്ചെടുക്കുകയും ഉൾവശം കോൺക്രീറ്റ് ചെയ്ത് മിനുസപ്പെടുത്തുകയും മുകൾഭാഗത്ത് റെയിൽപാളം സ്ഥാപിക്കുകയും അതിനുമുകളിലായി ഹാംഗിംഗ് വൈദ്യുതിവേലി നിർമിക്കുകയും ചെയ്താൽമാത്രമേ കാട്ടാനകളും വന്യമൃഗങ്ങളും കൃഷിയിടത്തിലേക്ക് കടക്കാതിരിക്കൂ. അതിനുള്ള നടപടികളാണ് വനം വകുപ്പും സർക്കാരും സ്വീകരിക്കേണ്ടത്.

ആധ്യാത്മിക നവീകരണദിനം ആചരിച്ചു

പാലക്കാട്: സൊസൈറ്റി ഓഫ് സെന്‍റ് വിൻസന്‍റ് ഡി പോൾ പാലക്കാട് സെൻട്രൽ കൗണ്‍സിൽ ആധ്യാത്മിക നവീകരണദിനം ആചരിച്ചു. ബിഷപ് മാർ പീറ്റർ കൊച്ചുപുരയ്ക്കൽ ആശംസകൾ നേർന്ന് പ്രസംഗിച്ചു. രൂപത സ്പിരിച്വൽ ഡയറക്ടർ ഫാ. രാജു പുളിക്കത്താഴെ സന്ദേശം നൽകി. തൃശൂർ അതിരൂപത സിസി സെക്രട്ടറി പ്രശാന്ത് ചിറ്റിലപ്പിള്ളി, അരപ്പാറ പള്ളി വികാരി ഫാ. ജിബിൻ കണ്ടത്തിൽ എന്നിവർ ക്ലാസുകൾ നയിച്ചു. രാവിലെ സിസി പ്രസിഡന്‍റ് ജെയിംസ് പടമാടന്‍റെ അധ്യക്ഷതയിൽ കൂടിയ യോഗത്തിൽ സിസി സെക്രട്ടറി ജോസഫ് കൊള്ളന്നൂർ, ട്രഷറർ ടോമി പള്ളിവാതുക്കൽ എന്നിവർ വിവിധ വിഷയങ്ങൾ അവതരിപ്പിച്ചു. എട്ട് ഏരിയ കൗണ്‍സിൽ പ്രസിഡന്‍റുമാരും 77 കോണ്‍ഫറൻസ് പ്രസിഡന്‍റുമാരും ഉൾപ്പെടെ നാനൂറോളം അംഗങ്ങൾ സ്പിരിച്വൽ ഡേ പ്രോഗ്രാമിൽ പങ്കെടുത്തു.

ചിറ്റൂരിൽ യൂത്ത് കോൺഗ്രസ് മാർച്ചിനു നേരേ ജലപീരങ്കി പ്രയോഗം

ചിറ്റൂർ: അനർട്ട് സോളാർ പദ്ധതിയിൽ കോടികളുടെ ക്രമക്കേട് ആരോപിച്ച് ചിറ്റൂർ എംഎൽഎ കെ. കൃഷ്ണൻകുട്ടിയുടെ ഓഫീസിലേക്ക് യൂത്ത് കോൺഗ്രസ് നടത്തിയ മാർച്ചിനെതിരെ പോലീസ് ജലപീരങ്കി പ്രയോഗിച്ചു. രണ്ടു മണിക്കൂറോളം പ്രദേശം സംഘർഷ ഭരിതമായി. ചിറ്റൂർ കച്ചേരിമേട്ടിലെ ഓഫീസിലേക്ക് നടത്തിയ മാർച്ച് പോലീസ് സ്റ്റേഷനു മുന്നിൽ ബാരിക്കേഡ് ഉപയോഗിച്ച് തടഞ്ഞു. ഇത് മറികടക്കാൻ ശ്രമിച്ച പ്രവർത്തകർക്ക് നേരെയാണ് പോലീസ് ലാത്തിവീശിയത്. യൂത്ത് കോൺഗ്രസ് ജില്ലാ പ്രസിഡന്‍റ് കെ.എസ്. ജയഘോഷ് ഉൾപ്പെടെ നാലുപേർക്ക് പരിക്കേറ്റു. ഉച്ചയ്ക്ക് 12 മണിയോടെ ആരംഭിച്ച മാർച്ച് ഒരു മണിക്കൂറിലേറെ സമയം കഴിഞ്ഞിട്ടും സംഘർഷം അവസാനിക്കാതിരുന്നതോടെ പോലീസ് ജലപീരങ്കി പ്രയോഗിക്കുകയായിരുന്നു. ബാരിക്കേഡ് മറികടന്ന യൂത്ത് കോൺഗ്രസ് ഭാരവാഹികളായ രാഹുൽ കൃഷ്ണ, ജിസാൻ മുഹമ്മദ്, പ്രമോദ് എന്നിവർക്ക് ലാത്തിചാർജിൽ പരിക്കേറ്റു. ജില്ലാ പ്രസിഡന്‍റ് കെ.എസ് . ജയഘോഷ് അധ്യക്ഷത വഹിച്ച മാർച്ചിന് സംസ്ഥാന ഭാരവാഹികളായ ഷെഫീഖ് അത്തിക്കോട്, പ്രതീഷ് മാധവൻ, സി. വിഷ്ണു, ജിതേഷ് നാരായണൻ എന്നിവർ നേതൃത്വം നൽകി. ജില്ലാ ഭാരവാഹികളായ രതീഷ് പുതുശേരി, ശ്യാം ദേവദാസ്, വത്സൻ പെരുവെമ്പ്, ഷെഫീഖ് തത്തമംഗലം, മുഹമ്മദ് ഗിസാൻ, നിയോജകമണ്ഡലം പ്രസിഡന്‍റ് സാജൻ കോട്ടപ്പാടം, മുഹമ്മദ് നവാസ് ചിറ്റൂർ തുടങ്ങിയവർ പ്രസംഗിച്ചു . ചിറ്റൂർ - വണ്ണാമട പാതയിൽ രണ്ടു മണിക്കൂറോളം ഗതാഗത സ്തംഭനവും ഉണ്ടായി.

വേനൽമഴയിൽ ചീഞ്ഞുതുടങ്ങിയ വൈക്കോൽ ഉഴുതുമറിച്ച് കർഷകർ

നെന്മാറ: തുടർച്ചയായ വേനൽമഴയിൽ വൈക്കോൽ അഴുകി നശിച്ച കർഷകർക്ക് ഇൻഷ്വറൻസ് ആനുകൂല്യം നൽകണമെന്ന് പടശേഖരസമിതികൾ ആവശ്യപ്പെട്ടു. രണ്ടാംവിള കൊയ്‌ത്തുകഴിഞ്ഞ നെൽപ്പാടങ്ങളിലെ വൈക്കോൽ വേനൽമഴയിൽ സംഭരിക്കാൻ കഴിയാതെ വെള്ളത്തിൽ കിടന്ന് അഴുകി ഉപയോഗശൂന്യമായതിനെ തുടർന്നുള്ള നഷ്ടം നികത്താൻ കാലാവസ്ഥ ഇൻഷ്വറൻസ്, സംസ്ഥാന ഇൻഷ്വറൻസ് എന്നിവയിൽ നിന്ന് കർഷകർക്ക് നഷ്ടപരിഹാരം ലഭ്യമാക്കണമെന്ന് നെന്മാറ, അയിലൂർ മേഖലയിലെ വിവിധ കർഷകസമിതികൾ ആവശ്യപ്പെട്ടു. ഒരുദിവസത്തെ ഇടവേളയ്ക്കു ശേഷം വീണ്ടും വേനൽ മഴ ശക്തമായതോടെ നെൽപ്പാടങ്ങളിൽ പരന്നു കിടക്കുന്നവയും ചുരുട്ടി റോളുകൾ ആക്കിയവയും വീണ്ടും ചീഞ്ഞു തുടങ്ങി. ഇനി ചുരുട്ടി കെട്ടിയെടുക്കാൻ കഴിയാത്ത നെൽപ്പാടങ്ങളിലെ വൈക്കോലുകൾ ട്രാക്ടർ ഉപയോഗിച്ച് ചേറിൽ ഉഴുതുമറിച്ചു തുടങ്ങി. സാധാരണ വേനൽമഴയിൽ കലപ്പ ഉപയോഗിച്ച് ഉഴുതുമറിക്കുന്ന സ്ഥാനത്താണ് ഇപ്പോൾ ചെളിയിൽ പൂട്ടിമറിക്കുന്നത്. അളിഞ്ഞു തുടങ്ങിയ വൈക്കോൽ ചെളിയിൽ ഉഴുതുമറിക്കുന്നതോടെ പെട്ടെന്ന് മണ്ണിൽ ചേരാനും അതുവഴി ചെറിയതോതിൽ ജൈവവളാംശം ലഭിക്കുമെന്നും പെരുമാങ്കോട് പാടശേഖരത്തിലെ എം. ശിവദാസൻ പറഞ്ഞു. വൈക്കോൽ നഷ്ടംവന്ന ക്ഷീരകർഷകർക്ക് ക്ഷീരസംഘങ്ങൾ മുഖേന കുറഞ്ഞവിലയ്ക്ക് വൈക്കോലും കാലിത്തീറ്റയും ലഭ്യമാക്കാനുള്ള നടപടികൾ ഉണ്ടാവണമെന്ന് ക്ഷീരകർഷകനായ എം. യൂസഫ് ആവശ്യപ്പെട്ടു. സ്വന്തം കൃഷിയിടത്തിലെ വൈക്കോൽ നശിച്ചതോടെ ഉയർന്ന വിലക്ക് വൈക്കോൽ വാങ്ങ‌ാൻ കഴിയാത്തതിനാൽ പശുവളർത്തൽ അവസാനിപ്പിക്കുകയാണെന്നും കറവയുള്ള ഒരു ഉരുവിനെ ഒഴികെ മറ്റുള്ളവരെ വില്പന നടത്താനും ആലോചിക്കുന്നതായി കരിമ്പാറയിലെ ക്ഷീരകർഷകനായ എം. ദേവൻ പറഞ്ഞു.

ജെല്ലിപ്പാറയിൽ അഭിഷേകാഗ്നി കൺവൻഷൻ ഇന്നുമുതൽ

അഗളി: ജെല്ലിപ്പാറ സെന്‍റ് പീറ്റേഴ്സ് പള്ളിയിൽ ഫാ. സേവ്യർഖാൻ വട്ടായിലും സംഘവും നയിക്കുന്ന അഭിഷേകാഗ്നി കൺവൻഷന് ഇന്ന് തുടക്കമാകും. വൈകുന്നേരം നാലു മുതൽ രാത്രി 9 വരെയാണ് കൺവൻഷൻ. നാല് ദിവസം നീളുന്ന കൺവൻഷൻ ബുധനാഴ്ച സമാപിക്കും. ദിവ്യകാരുണ്യ ആരാധന, കുമ്പസാരം, രോഗശാന്തി ശുശ്രൂഷ, വിടുതൽ ശുശ്രൂഷയും കൗൺസിലിംഗും,ഗാനശുശ്രൂഷ,കുട്ടികൾക്കും യുവജനങ്ങൾക്കുമായി പ്രത്യേക പ്രാർഥന തുടങ്ങിയവ അഭിഷേകാഗ്നി കൺവൻഷനിൽ ഉണ്ടാവും. രൂപത വികാരി ജനറാൾ മോൺ. ജീജോ ചാലക്കൽ കൺവൻഷൻ ഉദ്ഘാടനം ചെയ്ത് ബൈബിൾ പ്രതിഷ്ഠ നിർവഹിക്കും. അട്ടപ്പാടി സെഹിയോൻ ധ്യാനകേന്ദ്രം ഡയറക്ടർ ഫാ. സോജി ഓലിക്കൽ നാളെ വിശുദ്ധ കുർബാന അർപ്പിച്ച് സന്ദേശം നൽകും. കോയമ്പത്തൂർ സിഎംഐ പ്രേക്ഷിത പ്രോവിൻസ് പ്രൊവിൻഷ്യൽ ഫാ. സാജു ചക്കാലക്കൽ ചൊവ്വാഴ്ച തിരുക്കർമ്മങ്ങൾക്ക് മുഖ്യകാർമികത്വം വഹിക്കും. ബിഷപ് മാർ പീറ്റർ കൊച്ചുപുരയ്ക്കൽ സമാപന ദിവസം മുഖ്യകാർമികത്വം വഹിച്ച് സന്ദേശം നൽകും. കൺവൻഷന്‍റെ മുന്നോടിയായി ഇന്നലെ നടന്ന വാഹന വിളംബര ജാഥ വികാരി ഫാ. ജോൺ മരിയവിയാനി ഒലക്കേങ്കിൽ ഫ്ലാഗ് ഓഫ് ചെയ്തു. ചടങ്ങിൽ ഫാ.ബിജോയ് ചോതിരക്കോട്ടിൽ, കൈക്കാരന്മാർ, കൺവൻഷൻ കൺവീനർമാർ പങ്കെടുത്തു.

നിയന്ത്രണംവിട്ട പിക്കപ്പ് വാൻ ഹോട്ടലിൽ ഇടിച്ചുകയറി ഉടമക്ക് പരിക്ക്

ചിറ്റൂർ: അമിതവേഗതയിൽ എത്തിയ പിക്കപ്പ് വാഹനം ഇടിച്ചുകയറി ഹോട്ടൽ ഉടമക്ക് ഗുരുതര പരിക്ക്. പൊൽപ്പുള്ളി വേട്ടാംകുളം സ്വദേശി സുരേഷി (50)നാണ് പരിക്കേറ്റത്. ഇന്നലെരാവിലെ ഏഴോടെയാണ് സംഭവം. പൊൽപ്പുള്ളിയിൽ സുരേഷ് നടത്തുന്ന ഹോട്ടലിലേക്ക് പിക്കപ്പ് വാൻ ഇടിച്ചു കയറുകയായിരുന്നു. ഹോട്ടലിനു മുന്നിൽ നിർത്തിയിട്ടിരുന്ന ഇരുചക്രവാഹനവും തകർത്തു ഹോട്ടലിനുള്ളിലേക്ക് കയറിയ വാഹനം മുൻവശത്ത് നിൽക്കുകയായിരുന്ന സുരേഷിനെയും ഇടിച്ചിട്ടു. ചിറ്റൂർ അഗ്നിരക്ഷാ നിലയത്തിലെ എസ്എഫ്ആർഒ ബൈജുവിന്‍റെ നേതൃത്വത്തിൽ സേനാംഗങ്ങളായ മനോജ്, പ്രദീപ്കുമാർ, സന്തോഷ്കുമാർ, സുജീഷ്, ഇസ്മയിൽ, ശിവകുമാർ, മുഹമ്മദ് ഷഫീർ, മനു, ഹോം ഗാർഡുമാരായ ബിജു, പ്രതീഷ് എന്നിവർ പരിക്കേറ്റ സുരേഷിനെ ആദ്യം ജില്ലാ ആശുപത്രിയിലും പിന്നീട് കോയമ്പത്തൂരിലെ സ്വകാര്യ ആശുപത്രിയിലും പ്രവേശിപ്പിച്ചു.

പ്ലാസ്റ്റിക്മാലിന്യം മണ്ണിട്ടു മൂടി; വിജിലൻസിന് പരാതി

ഒറ്റപ്പാലം: നഗരസഭയുടെ ഖരമാലിന്യ പ്ലാന്‍റിലെ പ്ലാസ്റ്റിക് മാലിന്യം മാറ്റാതെ മണ്ണിട്ടു മൂടിയെന്ന ആരോപണത്തിൽ അന്വേഷണമാവശ്യപ്പെട്ട് മുസ്‌ലിംലീഗ് വിജിലൻസിനു പരാതിനൽകി. പദ്ധതിനിർവഹണത്തിൽ വൻക്രമക്കേടുണ്ടെന്നു ഭാരവാഹികൾ ആരോപിച്ചു. മണ്ണിട്ടുമൂടിയ മാലിന്യത്തിനു മുകളിൽ ഫലവൃക്ഷത്തൈകൾ നടാനും പൂന്തോട്ടമൊരുക്കാനുളള പദ്ധതി അന്വേഷണം തീരുന്നതുവരെ നിർത്തണമെന്ന് പി.എം.എ. ജലീൽ, പി.പി. മുഹമ്മദ് കാസിം, എം. ഉമ്മർഫാറൂഖ് ആവശ്യപ്പെട്ടു.

ലഹരിക്കടത്തിന് വിസമ്മതിച്ച ഓട്ടോഡ്രൈവറെ മർദിച്ച പ്രതി അറസ്റ്റിൽ

പാലക്കാട്: ലഹരിക്കടത്തിന് വിസമ്മതിച്ച ഓട്ടോ ഡ്രൈവറെ മർദിച്ച് കവർച്ച നടത്തിയ കേസിൽ അവസാന പ്രതിയും പിടിയിൽ. കല്ലേക്കാട് പുതിയ സ്റ്റോപ്പ് സ്വദേശി സതീഷ് എന്ന പുരുഷു (37) വിനെയാണ് പാലക്കാട് കസബ പോലീസ് പിടികൂടിയത്. മാർച്ച് ഒന്നിനാണ് കേസിനാസ്പദമായ സംഭവം നടന്നത്. പാലക്കാട് ടൗണിൽ നിന്നും രോഗിയെ കയറ്റാനെന്ന വ്യാജേനെയാണ് പ്രതികൾ ഓട്ടോറിക്ഷ വിളിച്ച് ചന്ദ്രനഗർ കൂട്ടുപാതയിൽ എത്തിയത്. എന്നാൽ കഞ്ചാവെടുക്കാനാണെന്ന് മനസിലാക്കിയ ഓട്ടോ ഡ്രൈവർ വിസമ്മതിച്ചു. ഇതോടെ പ്രതികൾ ചേർന്ന് അബ്ബാസിനെ ക്രൂരമായി മർദിക്കുകയും കയ്യിലുണ്ടായിരുന്ന 2500 രൂപ കവരുകയും ചെയ്തു. രണ്ട് മണിക്കൂറിന് ശേഷമാണ് ഡ്രൈവറെ വിട്ടയച്ചത്. ശരീരം മുഴുവൻ മുറിവുകളുമായി ജില്ലാ ആശുപത്രിയിലെത്തിയ അബ്ബാസിനെ വിദഗ്ദ ചികിത്സക്കായി തൃശൂർ മെഡിക്കൽ കോളജിലേക്ക് മാറ്റുകയായിരുന്നു. പ്രതികളായ കാരേക്കാട് സ്വദേശികളായ ജിതിൻ, അനീഷ്, കൂട്ടുപാത സ്വദേശികളായ സ്മിഗേഷ്, മണികണ്ഠൻ എന്നിവരെ നേരത്തെ പിടികൂടിയിരുന്നു. കസബ ഇൻസ്പെക്ടർ എം. സുജിത്ത്, എസ്ഐമാരായ എച്ച്. ഹർഷാദ്, ജതി, സീനിയർ സിപിഒമാരായ ഷാനവാസ്, ആർ. രാജീദ്,സി. സുനിൽ എന്നിവരാണ് പ്രതികളെ പിടികൂടിയത്.

ഒറ്റപ്പാലം നഗരത്തിൽ ഗതാഗതക്കുരുക്ക്

ഒറ്റപ്പാലം: വിഷു അടുത്തതോടെ ഒറ്റപ്പാലം പട്ടണത്തെ വലച്ച് ഗതാഗതക്കുരുക്ക്. രാവിലെ മുതൽ മണിക്കൂറുകളോളം തുടർന്ന ഗതാഗതക്കുരുക്കിൽ നിരവധി വാഹനങ്ങളാണ് വലഞ്ഞത്. ഈസ്റ്റ് ഒറ്റപ്പാലം മുതൽ കണ്ണിയംപുറം വരെ ഇരുവശങ്ങളിലും വാഹനങ്ങളുടെ നീണ്ട നിരയായിരുന്നു. കഴിഞ്ഞ കുറച്ചു ദിവസങ്ങളായി ഒറ്റപ്പാലത്ത് ഗതാഗതക്കുരുക്ക് പതിവാണ്. നഗരത്തിൽ പാലക്കാട്-കുളപ്പുള്ളി പാതയിൽ രൂപപ്പെടുന്ന ഗതാഗതക്കുരുക്ക് ക്രമേണ ടിബി റോഡിലേക്കും വ്യാപിക്കുന്നതോടെ പട്ടണം സ്തംഭിക്കുകയാണ്. കാൽനടയാത്രക്കാർക്ക് റോഡ് മുറിച്ചു കടക്കാനാകാത്ത വിധത്തിലാണ് തിരക്ക്. വശങ്ങൾ നോക്കാതെ വാഹനങ്ങൾ ഇഷ്ടത്തിനനുസരിച്ച് സഞ്ചരിക്കുന്നതാണ് പ്രശ്നത്തിന് കാരണമെന്ന് പോലീസ് പറഞ്ഞു. ട്രാഫിക് പോലീസിന്‍റെ നിരന്തരമായ പരിശ്രമങ്ങൾക്കും പരിഹാരം കാണാനായില്ല. ഗതാഗതനിയന്ത്രണത്തിന് കൂടുതൽ പോലീസുകാരെത്തുമെന്നറിയിച്ചിരുന്നുവെങ്കിലും അതുണ്ടായില്ല. വിഷുത്തിരക്ക് പരിഗണിച്ച് കൂടുതൽ പോലീസുകാരെ ഗതാഗത നിയന്ത്രണത്തിനായി ചുമതലപ്പെടുത്തുന്നുണ്ടെന്ന് ട്രാഫിക് പോലീസ് അറിയിച്ചു.

എംഎൽഎക്കെതിരേ ഭീഷണി: യൂത്ത് കോണ്‍ഗ്രസ് പരാതി നൽകി

പാലക്കാട്: രാഹുൽ മാങ്കൂട്ടത്തിൽ എംഎൽഎയ്ക്കും അദ്ദേഹത്തിന്‍റെ പിതാവിനും എതിരെ അപകീർത്തി പരാമർശവും ഭീഷണിപ്പെടുത്തലും നടത്തിയ ബിജെപി ജില്ലാ പ്രസിഡന്‍റ് ഉൾപ്പെടെയുള്ളവർക്കെതിരെ കേസെടുക്കണമെന്ന് ആവശ്യപ്പെട്ട് എസ്പിക്ക് യൂത്ത്കോണ്‍ഗ്രസ് പരാതി നൽകി. രാഷ്ട്രീയം പറയുവാനോ പ്രവർത്തിക്കുവാനോ കഴിയാത്തവരുടെ കാട്ടിക്കൂട്ടലുകളാണ് ബിജെപി നേതാക്കളിൽ നിന്നും ഉണ്ടാകുന്നതെന്ന് യൂത്ത്കോണ്‍ഗ്രസ് ജില്ലാ പ്രസിഡന്‍റ് കെ.എസ.് ജയഘോഷ് പറഞ്ഞു. ഇന്ത്യയ്ക്ക് മഹത്തായ ഒരു ചരിത്രവും പാരന്പര്യവും ഉണ്ട്. സ്വാതന്ത്ര്യസമരത്തിന് വേണ്ടി ജീവൻ ബലിയർപ്പിച്ച ധീരദേശാഭിമാനികളുടെ നാടാണ് ഇന്ത്യ. ആ ചരിത്രത്തെയും പൈതൃകത്തെയും വളച്ചൊടിക്കുവാനും ആ കാലഘട്ടങ്ങളിൽ അതിനെതിരെ പ്രവർത്തിച്ചവരെ മഹാന്മാരാക്കുവാനുമുള്ള നീക്കത്തെ എന്തുവിലകൊടുത്തും ചെറുക്കുമെന്നും ജയഘോഷ് പറഞ്ഞു. ദേശദ്രോഹികളുടെ പേര് ബിജെപിയുടെ ഓഫീസുകൾക്ക് മാത്രം നൽകിയാൽ മതിയെന്നും പൊതുജനങ്ങൾക്ക് വേണ്ടിയുള്ള നിർമിതികൾക്കും പദ്ധതികൾക്കും അത്തരത്തിലുള്ള പേരുകൾ നൽകുവാനോ അവരുടെ രാഷ്ട്രീയം അടിച്ചേൽപ്പിക്കുവാനോ ശ്രമിച്ചാൽ യൂത്ത്കോണ്‍ഗ്രസ് അതിനെ തടയും. രാഹുൽ മാങ്കൂട്ടത്തിൽ പാലക്കാട് ജനതയുടെ ഹൃദയത്തിലുള്ള നേതാവാണ്. കഴിഞ്ഞ തെരഞ്ഞെടുപ്പിൽ അധികാരത്തിന്‍റെ എല്ലാ സ്രോതസുകളെയും ഉപയോഗപ്പെടുത്തി പരമാവധി പണം ചെലവഴിച്ച് തെരഞ്ഞെടുപ്പിനെ നേരിട്ടിട്ടും ബിജെപി പരാജയപ്പെട്ടത് കണ്ടതാണ്. അതേ അനുഭവം തന്നെയാകും വരുന്ന നഗരസഭാ തെരഞ്ഞെടുപ്പിൽ ഉണ്ടാകുവാൻ പോകുന്നത്. അത് തിരിച്ചറിഞ്ഞുള്ള അസ്വസ്ഥതകളാണ് ഇപ്പോൾ ബിജെപി നേതാക്കളിൽ പ്രകടമാകുന്നതെന്നും പോലീസ് ബിജെപിയുടെ സംരക്ഷണം ഏറ്റെടുത്താൽ അതിനെയും നേരിടുമെന്നും ജയഘോഷ് പറഞ്ഞു.

ആലാംകടവ് മേൽപ്പാലം നിർമാണം പുരോഗമിക്കുന്നു

ചിറ്റൂർ: ആലാംകടവ്പുഴയിൽ മേൽപ്പാലം നിർമാണം രണ്ടാം സ്ലാബ് വാർപ്പ് പൂർത്തിയായി . ഇനി നാലു സ്ലാബുകൾ വാർപ്പിനുള്ള ജോലികൾ യുദ്ധകാലാടിസ്ഥാനത്തിൽ പുരോഗമിച്ചു വരികയാണ്. കഴിഞ്ഞവർഷം മാർച്ചിൽ ഒന്നരവർഷത്തെ സമയപരിധിയിൽ പാലം പൂർത്തിയാക്കാനായിരുന്നു തീരുമാനം. ഇക്കാരണത്താൽതന്നെ പരമാവധി നിശ്ചിതസമയത്ത് തന്നെ കമ്മീഷൻ നടത്താനാണ് സമയ ബന്ധിതമായി നിർമാണ പ്രവർത്തനം മുന്നേറിവരുന്നത്. സ്ഥലം എംഎൽഎയും മന്ത്രിയുമായ കെ. കൃഷ്ണൻകുട്ടിയുടെ ശ്രമഫലമായാണ് പെരുമാട്ടി നിവാസികളുടെ വർഷങ്ങളായുള്ള മുറവിളിക്ക് പരിഹാരം കണ്ടെത്തിയത്. കാലവർഷം തുടങ്ങിയാൽ പുഴയിൽ ദിവസങ്ങോളം വെള്ളം ഒഴുകുന്നതിനാൽ നിലമ്പതി കവിയുന്നതുമൂലം ഗതാഗതപ്രശ്നം യാത്രക്കാർക്ക് ഏറെവിഷമം സൃഷ്ടിച്ചിരുന്നു. പാലം നിർമാണം പൂർത്തിയാവുന്നതോടെ ഗതാഗതതടസത്തിന് ശാശ്വതപരിഹാരം ഉണ്ടാകും.

കരിമഞ്ഞളിലെ അപൂർവഇനമായ വാടാർമഞ്ഞൾ കൃഷിചെയ്ത് എൽദോ

വടക്കഞ്ചേരി: കരിമഞ്ഞളിലെ ഏറ്റവും മുന്തിയ ഇനമായ വാടാർ മഞ്ഞൾ കൃഷിചെയ്ത് വടക്കഞ്ചേരി ബസ് സ്റ്റാൻഡിലെ മലഞ്ചരക്ക് വ്യാപാരിയായ കൊല്ലംകുടിയിൽ എൽദോ. ഹോട്ടൽ ഡയാനക്കടുത്തുള്ള ഗാന്ധിഗ്രാമത്തിലെ എൽദോയുടെ വീടിനുമുന്നിലെ ചെടിചട്ടികളിലാണ് ഈ അപൂർവമഞ്ഞൾ ഇനം വളരുന്നത്. വിത്തുനട്ട് നാലോ അഞ്ചോ വർഷം കഴിഞ്ഞ് പറിച്ചെടുക്കുന്ന വാടാർമഞ്ഞളിനാണ് വിലയും ഗുണവും കൂടുതലെന്ന് എൽദോ പറഞ്ഞു. പച്ചക്ക് തന്നെ ഇതിന് കിലോക്ക് 1000 രൂപ വിലയുണ്ട്. പൂജാകർമങ്ങൾക്കും ഔഷധമരുന്നുകൂട്ടുകൾക്കുമായാണ് ഇത് കൂടുതലും ഉപയോഗിക്കുന്നത്. വാടാർമഞ്ഞളിന്‍റെ 100 ഗ്രാം വിത്തിനുതന്നെ പതിനായിരത്തോളം രൂപ വിലയുണ്ടെന്ന് പറയുന്നു. അതിനാൽ വ്യാവസായികാടിസ്ഥാനത്തിൽ കരിമഞ്ഞൾ കൃഷി വ്യാപകമല്ല. ഓൺലൈൻ വിപണിയാണ് ഇതിനുള്ളത്. ഇലകളുടെ നടുക്ക് കറുത്ത വരകളാണ് കരിമഞ്ഞളിന്‍റെ പ്രധാന ലക്ഷണം. മഞ്ഞൾ മുറിച്ചാൽ മഞ്ഞക്കളറിനു പകരം കറുപ്പ് കലർന്ന നീല നിറമാണെന്നതും ഇതിന്‍റെ സവിശേഷതയാണ്. മലഞ്ചരക്ക് ഇനങ്ങളിൽ ഇക്കുറി സാധാരണ ഉണക്കമഞ്ഞൾ വില നന്നേ കുറവായിരുന്നുവെന്ന് എൽദോ പറഞ്ഞു. കിലോക്ക് 180 രൂപയാണ് വില. കഴിഞ്ഞവർഷം ഇത് 230 രൂപ വരെ ഉണ്ടായിരുന്നു. ചുക്ക് വിലയും കർഷകർക്ക് താങ്ങായില്ല. കിലോക്ക് 250 രൂപയായി. കർണാടകയിൽ ഇഞ്ചികൃഷി വ്യാപകമായതാണ് ചുക്കുവില ഇടിയാൻ കാരണമായത്. തമിഴ്നാട്ടിൽ നിന്നുള്ള കപ്പ വരവ് വർധിച്ചതോടെ വാട്ടുകപ്പവിലയും കുറഞ്ഞു. കിലോയ്ക്ക് 60 രൂപയായി. കശുവണ്ടിവിലയും കർഷകർക്ക് അനുകൂലമല്ല. 150 രൂപയാണ് കശുവണ്ടി വില. നാടൻ മഞ്ഞളിന് വിലകുറവാണെങ്കിലും ഇക്കുറി മഞ്ഞൾക്ഷാമം ഉണ്ടാകുമെന്നാണ് കച്ചവടക്കാർ പറയുന്നത്. ആവശ്യക്കാർ കൂടുതലായതിനാൽ ഉണക്കമഞ്ഞളിന് വിലകൂടാനും സാധ്യതയുണ്ടെന്ന് പറയുന്നു. കുരുമുളക് വിലയാണ് വലിയ ഇടിവില്ലാതെ തുടരുന്നത്. കുരുമുളകിനിപ്പോൾ ഭേദപ്പെട്ട വിലയുണ്ട്.

പാലപ്പള്ളം പാതയിൽ വാഹനാപകടം ഒഴിവാക്കാൻ നടപടിവേണം

ചിറ്റൂർ: വാഹന അപകടങ്ങളും മരണവും പതിവാകുന്ന പാലപ്പള്ളം പാതയിൽ പൊതുമരാമത്ത് നടപടി അനിവാര്യമായി. വാഹനങ്ങൾ ഇടയ്ക്കിടെ നേർക്ക് കുട്ടിയിടിക്കുന്നത് പതിവായിരിക്കുകയാണ്. രണ്ടാഴ്ച മുന്പ് ബസുമായി കൂട്ടിയിടിച്ച് ഇരുചക്രവാഹനം ഓടിച്ചയാൾ സംഭവസ്ഥലത്ത് തന്നെ മരണപ്പെട്ടിരുന്നു. സ്വകാര്യബസുകൾ നേർക്കുനേർ കൂട്ടിയിടിച്ച അപകടങ്ങളും മുന്പ് നടന്നിട്ടുണ്ട്. ഈ സ്ഥലത്ത് ആവശ്യത്തിന് റോഡിന് വീതിയുണ്ടെങ്കിലും എതിരെവരുന്ന വാഹനങ്ങൾ ദൂരെ നിന്നും കാണാൻ സാധിക്കാത്തതാണ് അപകടങ്ങൾക്ക് കാരണമാവുന്നത്. തൃശൂർ - കോയമ്പത്തൂർ അന്തർസംസ്ഥാന പാതയെന്നതിനാൽ രാപ്പകൽ വാഹനസഞ്ചാരമുള്ള പാതയാണിത്. റോഡിനിരുവശത്തെ വീടുകളുടെ മറവും യാത്രക്കാർക്ക് വിഷമകരമായിരിക്കുകയാണ്. ഇത് പരിഹരിക്കാനുള്ള നടപടികൾ താമസംവിനാ നടപ്പാക്കണം. കമ്പിളിച്ചുങ്കം പരിസര പ്രദേശങ്ങളിൽ നിന്നും അടിയന്തരചികിത്സക്ക് താലുക്ക് ആശുപത്രിയിലേക്ക് ആംബുലൻസ് എത്താൻ പാലപ്പള്ളം അപകടമേഖല അതിജീവിക്കേണ്ടതായിട്ടുണ്ട്. ചിറ്റൂർ ആശുപത്രി ജംഗ്ഷൻ മുതൽ നാട്ടുകൽവരെയുള്ള പ്രദേശങ്ങളിൽ നിരവധി വാഹന അപകടങ്ങളും മരണങ്ങളും നടന്നിട്ടുണ്ട്. അപകടം നടന്നാൽ സംഭവസ്ഥലത്തെത്തുന്ന പോലീസ് അധികൃതർ വിവരങ്ങൾ ശേഖരിച്ച് മടങ്ങുമ്പോൾ സ്ഥലത്തെ അപകടാവസ്ഥ പൊതുമരാമത്തേ് വകുപ്പിന് ശുപാർശ നൽകാറില്ല . ഇതുമൂലം ആവർത്തന അപകടങ്ങളും വർധിച്ച് വരുന്നത് യാത്രക്കാരെ ആശങ്കപ്പെടുത്തുകയാണ്.

മൂന്നു വർഷത്തിനുശേഷം കോയമ്പത്തൂരിൽ ജെല്ലിക്കെട്ട് 25 ന്

കോയന്പത്തൂർ: മൂന്ന് വർഷത്തിനുശേഷം നടക്കുന്ന കോയമ്പത്തൂർ ജെല്ലിക്കെട്ട് 25 ന് എൽ ആൻഡ് ടി ബൈപ്പാസ് ചെട്ടിപാളയത്തിന് സമീപം നടക്കും. മത്സരം തമിഴ്‌നാട് ഉപമുഖ്യമന്ത്രി ഉദയനിധി ഉദ്ഘാടനം ചെയ്യും. തമിഴരുടെ പരമ്പരാഗത വീരോചിത കായിക വിനോദമായ ജെല്ലിക്കെട്ട് പൊങ്കലിനോടനുബന്ധിച്ച് വിവിധ ജില്ലകളിൽ നടന്നു. അതേസമയം മൂന്ന് വർഷത്തിന് ശേഷമാണ് കോയമ്പത്തൂരിൽ മത്സരം നടക്കുന്നത്. തമിഴ് കൾച്ചറൽ ജെല്ലിക്കെട്ട് അസോസിയേഷന്‍റെ ജില്ലാ പ്രസിഡന്‍റും ഡിഎംകെ സൗത്ത് ജില്ലാ സെക്രട്ടറിയുമായ ദളപതി മുരുകേശൻ, വൈസ് പ്രസിഡന്‍റ് വിശ്വനാഥൻ, കൗൺസിൽ സെക്രട്ടറി കൃഷ്ണമൂർത്തി, അഡ്മിനിസ്ട്രേറ്റർമാർ എന്നിവർ നേരിട്ട് എത്തി മത്സരത്തിനുള്ള ആദ്യ ക്ഷണം കോയമ്പത്തൂർ ജില്ലാ ചുമതലയുള്ള മന്ത്രി സെന്തിൽ ബാലാജിക്ക് നൽകി. മധുര, തേനി, വിരുദുനഗർ, ദിണ്ടിഗൽ, സേലം, ധർമ്മപുരി, കോയമ്പത്തൂർ തുടങ്ങി തമിഴ്‌നാട്ടിലെ വിവിധ ജില്ലകളിൽ നിന്നുള്ള 800 ലധികം കാളകളും 500 ലധികം കാളപ്പോരാളികളും മത്സരത്തിൽ പങ്കെടുക്കും. വിജയികൾക്ക് സ്വർണനാണയങ്ങളും വെള്ളിനാണയങ്ങളും ഉൾപ്പെടെ സമ്മാനങ്ങൾ നൽകും. കാണികൾക്ക് ഇരുന്ന് മത്സരം കാണാൻ കഴിയുന്ന തരത്തിൽ ഗാലറികളും സജ്ജീകരിക്കും.

അപകടത്തിൽപ്പെട്ട് കാൽ ഒടിഞ്ഞ മോഷ്ടാക്കളെ പിടികൂടി

കോയന്പത്തൂർ: മദ്യലഹരിയിൽ ബൈക്ക് ഓടിച്ച് അപകടത്തിൽപ്പെട്ട് കാൽ ഒടിഞ്ഞ നിലയിൽ രണ്ട് മോഷ്ടാക്കളെ പോലീസ് അറസ്റ്റ് ചെയ്തു. ഇട്ടേരി റോഡ് നിവാസിയായ അംബ്രോസ് (28), രത്നപുരി സുബ്ബത്തൽ ലേഔട്ട് നിവാസിയായ ലോറൻസ് (27) എന്നിവരാണ് അറസ്റ്റിലായത്. നഗരത്തിലെ വിവിധ പോലീസ് സ്റ്റേഷനുകളിൽ ഇരുവർക്കുമെതിരെ നിരവധി കേസുകൾ നിലവിലുണ്ട്. നഗരത്തിലെ സ്വകാര്യ കമ്പനിയിൽ ജോലി ചെയ്യുന്ന ഗൗതം എന്നയാൾ ജോലി കഴിഞ്ഞ് വീട്ടിലേക്ക് പോകുന്പോൾ ഇവർ കത്തി കാട്ടി ഭീഷണിപ്പെടുത്തി മൊബൈൽ ഫോൺ തട്ടിയെടുത്ത് കടന്നുകളഞ്ഞിരുന്നു. ഈ പരാതിയിൽ പോലീസ് അന്വേഷണം നടത്തിവരികയായിരുന്നു. കഴിഞ്ഞദിവസം രാത്രി മദ്യലഹരിയിലായിരുന്ന രണ്ടു മോഷ്ടാക്കളും ബൈക്കിൽ വരവേ കണ്ണപ്പൻ നഗർ മേൽപ്പാലത്തിൽ മതിലിൽ ഇടിച്ച് ഗുരുതരമായി പരിക്കേറ്റു. വഴിയാത്രക്കാരാണ് ഇവരെ രക്ഷിച്ച് സ്വകാര്യ ആശുപത്രിയിൽ പ്രവേശിപ്പിച്ചത്. ഇരുവരുടെയും വലതുകാല് ഒടിഞ്ഞതായി ഇവരെ പരിശോധിച്ച ഡോക്ടർമാർ പറഞ്ഞു.

കഞ്ചാവും പുകയില ഉത്പന്നങ്ങളും പിടികൂടി

പാലക്കാട്: വാടക വീട്ടിൽ സൂക്ഷിച്ചിരുന്ന 1.5 കിലോ കഞ്ചാവും, 10 കിലോ നിരോധിത പുകയില ഉത്പന്നങ്ങളുമായി ഉത്തർപ്രദേശ് സ്വദേശി പിടിയിൽ. പട്ടാന്പി ഓങ്ങല്ലൂർ പോക്കുപ്പടി വരമംഗലത്ത് വീട്ടിൽ നിന്നാണ് അനധികൃതമായി സൂക്ഷിച്ച കഞ്ചാവും പുകയില ഉത്പന്നങ്ങളും പട്ടാന്പി എക്സൈസ് റേഞ്ച് ഇൻസ്പെക്ടർ എച്ച്.വിനുവിന്‍റെ നേതൃത്വത്തിൽ പിടികൂടിയത്. ഉത്തർപ്രദേശ് സ്വദേശി രഘുനന്ദൻ പട്ടേൽ (24)എന്നയാളെ അറസ്റ്റ് ചെയ്തു.

ഒറ്റപ്പാലം അർബൻ ബാങ്ക് നാണയമേള

ഒറ്റപ്പാലം: കോ-ഓപ്പറേറ്റീവ് അർബൻ ബാങ്ക് വിഷുവിനോടനുബന്ധിച്ച് ഇടപാടുകാർക്ക് പുതിയ കറൻസികളും നാണയങ്ങളും ലഭ്യമാക്കുന്നതിന് നാണയമേള സംഘടിപ്പിച്ചു. ഒറ്റപ്പാലം മെയിൻബ്രാഞ്ചിൽ നടന്ന നാണയ മേളയുടെ ഉദ്‌ഘാടനം ബാങ്ക് ചെയർമാൻ യു.രാജഗോപാൽ സംവിധായകൻ അനിൽ രാധാകൃഷ്ണമേനോന് പുതിയ നാണയം നൽകി നിർവഹിച്ചു. ബാങ്ക് മാനേജിംഗ് ഡയറക്ടർ ഡോ.എം. രാമനുണ്ണി ചടങ്ങിൽ അധ്യക്ഷത വഹിച്ചു. മെയിൻ ബ്രാഞ്ച് മാനേജർ പി.കെ. ശാന്തി, എസ്. സഞ്ജീവ് പ്രസംഗിച്ചു. ബാങ്കിന്‍റെ 9 ബ്രാഞ്ചുകളിലും നാണയമേളയുടെ ഉദ്ഘാടനങ്ങൾ നടന്നു.

ആലത്തൂരിൽ നിറയുടെ വിഷുവിപണി

ആലത്തൂർ: നിറ ഇക്കോഷോപ്പിന്‍റെ നേതൃത്വത്തിൽ സംഘടിപ്പിക്കുന്ന വിഷുവിപണി ഇന്ന് സമാപിക്കും. കൃഷിഭവന്‍റേയും ആലത്തൂർ ഗ്രാമപഞ്ചായത്തിന്‍റേയും കർഷകരുടേയും പങ്കാളിത്തതോടെയാണ് വിപണി നടപ്പാക്കുന്നത്. ഗ്രാമപഞ്ചായത്ത് പ്രസിഡന്‍റ് എ. ഷൈനി ഉദ്ഘാടനം ചെയ്തു. വൈസ്പ്രസിഡന്‍റ് ചന്ദ്രൻ പരുവക്കൽ, കൃഷി ഓഫീസർ കെ. ശ്രുതി, നിറ ഇക്കോഷോപ്പ് പ്രസിഡന്‍റ് കെ.ഡി. ഗൗതമൻ, എം. ഗംഗാധരൻ എന്നിവർ പ്രസംഗിച്ചു. കർഷകർ ഉത്പാദിക്കുന്ന നാടൻപഴങ്ങൾ, പച്ചക്കറികൾ എന്നിവ സംഭരിക്കുകയും പൊതുജനങ്ങൾക്ക്‌ വിഷരഹിത പഴം, പച്ചക്കറി എന്നിവ എത്തിച്ച് നല്ല ഭക്ഷണം നല്ല ആരോഗ്യം നടപ്പിലാക്കുക എന്നതാണ് ലക്ഷ്യം. ആലത്തൂർ ബസ് സ്റ്റാൻഡിന് സമീപത്തുള്ള നിറ ഇക്കോഷോപ്പിലാണ് വിഷു വിപണി ഒരുക്കിയിരിക്കുന്നത്.

വരോട് മേഖലയിൽ വിഷുക്കാലത്തും കുടിവെള്ളമില്ല

ഒറ്റപ്പാലം: വരോടുകാർക്ക് വിഷുക്കണിയല്ല, വെള്ളമാണ് വേണ്ടത്. നഗരസഭയായിരുന്നിട്ടും മേഖലയിൽ പത്തുദിവസമായി കുടിവെള്ളമില്ല. അനങ്ങൻമല, വരോട്, ചേരിക്കുന്ന്, പനമണ്ണ വായനശാല, വീട്ടാമ്പാറ, കോലോത്തുപറമ്പ് വാർഡുകളിലെ ആയിരത്തോളം കുടുംബങ്ങളാണു കുടിവെള്ളമില്ലാതെ ബുദ്ധിമുട്ടിലായത്. തുടർന്ന് നഗരസഭാ കൗൺസിലർമാർ ജലഅഥോറിറ്റി ഓഫീസിൽ പ്രതിഷേധിച്ചു. തോട്ടക്കര അരിയൂർ തെക്കുമുറിയിലും ആറുദിവസമായി കുടിവെള്ളമെത്തുന്നില്ല. തുടർച്ചയായി പെയ്ത മഴയിൽ മീറ്റ്ന തടയണ ജലസമൃദ്ധമാണെങ്കിലും വിതരണത്തിലെ പ്രശ്നമാണു കുടിവെള്ളമെത്താത്തതിനു കാരണമെന്നാണ് ആരോപണം. പൊതുമരാമത്ത് റസ്റ്റ് ഹൗസ് കോമ്പൗണ്ടിലെ ജലസംഭരണിയിൽനിന്നാണ് ഈ വാർഡുകളിലേക്കെല്ലാം വെള്ളം വിതരണംചെയ്യുന്നത്. വിവിധ വാർഡുകളിൽ പഴയ പൈപ്പ് ലൈൻ മാറ്റി പുതിയവ സ്ഥാപിക്കുന്നുണ്ട്. പൈപ്പിട്ടയിടങ്ങളിൽ വെള്ളമെത്തുന്നുമില്ല. വിതരണം നടക്കുന്നയിടങ്ങളിൽ ഉയർന്ന പ്രദേശങ്ങളിലേക്കും വെള്ളമെത്തുന്നില്ല. പൈപ്പ് ലൈൻ സ്ഥാപിക്കുന്ന പണി പൂർത്തിയാക്കി വ്യാഴാഴ്ച വെള്ളം വിതരണം നടത്താമെന്നായിരുന്നു അധികൃതർ അറിയിച്ചിരുന്നതെന്നു കൗൺസിലർമാർ പറഞ്ഞു. ഇതു നടപ്പാകാതെ വന്നതോടെയാണ് ജല അഥോറിറ്റി ഓഫീസിൽ കൗൺസിലർമാർ പ്രതിഷേധവുമായെത്തിയത്. ഉടൻ പ്രശ്നം പരിഹരിക്കാമെന്ന ഉറപ്പിൻമേൽ പ്രതിഷേധം അവസാനിപ്പിച്ചു. സ്ഥിരം സമിതി അധ്യക്ഷരായ കെ. അബ്ദുൾ നാസർ, ടി. ലത, കൗൺസിലർമാരായ പി. ശ്രീകുമാർ, അക്ബറലി, സബിത മണികണ്ഠൻ എന്നിവർ നേതൃത്വം നൽകി.

മദ്യനിർമാണശാലയുടെ അനുമതി റദ്ദാക്കി വേണം ലഹരിവിരുദ്ധ പോരാട്ടം: ആക്ട്സ്

പാലക്കാട്: ലഹരിവിരുദ്ധ പ്രവർത്തനങ്ങൾക്കായി മതമേലധ്യക്ഷരുടെ യോഗം വിളിച്ചിരിക്കുന്ന മുഖ്യമന്ത്രിയുടെ നീക്കം ആത്മാർഥതയോടെയാണെങ്കിൽ എലപ്പുള്ളിയിലെ നിർദിഷ്ട മദ്യനിർമാണ ശാലയ്ക്കു നൽകിയ അനുമതി റദ്ദു ചെയ്യണമെന്ന് ക്രൈസ്തവസഭാ സംഘടനകളുടെ കൂട്ടായ്മയായ ആക്ട്സ് ആവശ്യപ്പെട്ടു. മദ്യവ്യാപനം കൂട്ടുവാൻ ശ്രമിക്കുന്നവർക്ക് എങ്ങനെ ലഹരിവിരുദ്ധ പ്രവർത്തനം നടത്തുവാൻ കഴിയും. മദ്യത്തിൽ നിന്നും മയക്കുമരുന്നിലേക്ക് വഴുതിവീഴുന്ന തലമുറയാണ് നമ്മുടേത്. മയക്കുമരുന്നു മാത്രമാണ് ലഹരിയെന്നുള്ള സർക്കാർ നിലപാട് പരിഹാസ്യമാണ്. മദ്യത്തിന്‍റെ കാര്യത്തിൽ ശക്തമായ നിലപാട് സ്വീകരിക്കുന്നില്ലെങ്കിൽ വെള്ളത്തിൽ വരച്ച വരപോലെയാകും സർക്കാരിന്‍റെ ലഹരിവിരുദ്ധ പോരാട്ടമെന്ന് ആക്ട്സ് ചൂണ്ടിക്കാട്ടി. എലപ്പുള്ളി മദ്യനിർമാണശാലക്കെതിരെ രൂപീകരിച്ചിരിക്കുന്ന എലപ്പുള്ളി പോരാട്ട ജനകീയസമിതിയുടെ ഓഫീസ് ഉദ്ഘാടനം 15ന് ശാന്തിഗിരി ആശ്രമം ജനറൽ സെക്രട്ടറി സ്വാമി ഗുരുരത്നം ജ്ഞാനതപസ്വി നിർവഹിക്കുമെന്ന് ആക്ട്സ് ജനറൽ സെക്രട്ടറി ജോർജ് സെബാസ്റ്റ്യൻ അറിയിച്ചു.

വനംവകുപ്പ് ജോലികൾക്ക് വർധിപ്പിച്ച കൂലി നൽകണം: മനുഷ്യാവകാശ കമ്മീഷൻ

പാലക്കാട്: പറന്പിക്കുളം വനമേഖലയിൽ വനംവകുപ്പിന്‍റെകീഴിൽ നടക്കുന്ന റോഡിന്‍റെ ഇരുവശവും വെട്ടൽ, വയൽ വെട്ടൽ, ട്രക്ക് പാത, ഫയർ ലൈൻ തുടങ്ങിയ ജോലികളിൽ ഏർപ്പെടുന്നവരുടെ ദിവസക്കൂലി 375 രൂപയിൽ നിന്നും 857 രൂപയായി ഉയർത്തിയിട്ടുണ്ടെന്ന് പറന്പിക്കുളം കടുവാസങ്കേതം ഡപ്യൂട്ടി ഡയറക്ടർ മനുഷ്യാവകാശ കമ്മീഷനെ അറിയിച്ചു. കരാറുകാർ തുച്ഛമായ കൂലി നൽകുന്നതിനെതിരെ സമർപ്പിച്ച പരാതിയിൽ കമ്മീഷൻ ജുഡീഷ്യൽ അംഗം കെ. ബൈജുനാഥ് ആവശ്യപ്പെട്ട റിപ്പോർട്ടിലാണ് ഇക്കാര്യമുള്ളത്. പുതുക്കിയ തുക ജോലിക്കാർക്ക് നൽകാൻ കരാറുകാർക്ക് നിർദേശം നൽകിയിട്ടുണ്ടെന്നും വനംവകുപ്പിലെ ജോലികൾ ടെണ്ടർ സംവിധാനത്തിലൂടെയാണ് കരാറുകാർക്ക് നൽകുന്നതെന്നും റിപ്പോർട്ടിൽ പറയുന്നു. കേന്ദ്ര-സംസ്ഥാന സർക്കാരുകൾ നിശ്ചയിച്ചിട്ടുള്ള നിരക്കുകളാണ് അനുവദിക്കുന്നത്. റിപ്പോർട്ട് പരാതിക്കാരനായ സതീഷ് കുമാറിന് അയച്ചുകൊടുത്ത് കമ്മീഷൻ കേസ് തീർപ്പാക്കി.

ഷൊർണൂരിലെ അമ്മമാർക്ക് ആശ്വാസമായി അങ്കണവാടി കം ക്രഷർ തുറന്നു

ഷൊർണൂർ: വനിത ശിശുവികസന വകുപ്പ് ഐസിഡിഎസ് ഒറ്റപ്പാലം അഡീഷണൽ വകുപ്പ് നടപ്പിലാക്കുന്ന അങ്കണവാടി കം ക്രഷിന്‍റെ ഉദ്ഘാടനം പി. മമ്മിക്കുട്ടി എംഎൽഎ നിർവഹിച്ചു ഷൊർണൂർ നഗരസഭയിൽ ആദ്യമായി ആരംഭിച്ച ക്രഷ് ലക്ഷംവീട് കോളനി അങ്കണവാടിയിലാണ് തുടക്കംകുറിച്ചത്. ജോലിക്കുപോകുന്ന വീട്ടമ്മമാരുടെ ആറുമാസംമുതൽ മൂന്നുവയസുവരെ പ്രായമുള്ള കുഞ്ഞുങ്ങളെ രാവിലെ ഏഴരമുതൽ രാത്രി ഏഴുവരെ പരിപാലിക്കുകയാണ് ലക്ഷ്യം. ഷിഫ്റ്റ് സമ്പ്രദായത്തിൽ അങ്കണവാടി വർക്കറും ഹെൽപ്പറുമുണ്ടാകുമെന്ന പ്രത്യേകതകൂടിയുണ്ട്. നഗരസഭ ചെയർമാൻ എം.കെ. ജയപ്രകാശ് അധ്യക്ഷനായി. നഗരസഭ വൈസ് ചെയർപേഴ്സൺ പി. സിന്ധു, കൗൺസിലർമാരായ കെ. കൃഷ്ണകുമാർ, പി. ജിഷ, ടി. ലത എന്നിവർ പ്രസംഗിച്ചു.

അട്ടപ്പാടി ചുരത്തിൽ ചുമർചിത്രമൊരുക്കി വിദ്യാർഥികൾ

മണ്ണാർക്കാട്: ചുമർചിത്രം വരച്ച് കാടുകാക്കാൻ ഒരുങ്ങുകയാണ് തവനൂർ കാർഷിക എൻജിനീയറിംഗ് കോളജിലെ എൻഎസ്എസ് വിദ്യാർഥികളും വനംവകുപ്പും. സൈലന്‍റ് വാലിയിലേക്കും അട്ടപ്പാടി മലനിരകളിലേക്കും ചുരംകയറി പോകുമ്പോൾ റോഡിന്‍റെ വശത്തെ മതിലിൽ ഒരുക്കിയിട്ടുള്ള മനോഹരമായ ചുവർചിത്രം ഇനി കാടുകാക്കലിന്‍റെ സന്ദേശമോതും. ജന്തുജാലങ്ങളുമായി അനുഗൃഹീതമായ അട്ടപ്പാടി ചുരംറോഡ് മാലിന്യത്തിൽ മുങ്ങിയിരുന്നു. വനത്തിലൂടെ കടന്നുപോകുന്ന പാതയുടെ ഇരുവശത്തും ആളുകൾ മാലിന്യമെറിഞ്ഞതോടെ ചുരം ചീഞ്ഞുനാറാൻ തുടങ്ങി. ബോധവത്കരണ പോസ്റ്ററുകളും അറിയിപ്പുകളുമെല്ലാം സ്ഥാപിച്ചെങ്കിലും ഫലപ്രദമായില്ല. തുടർന്നാണ് പാറക്കെട്ടുകളിലും മതിലുകളിലുമെല്ലാം മനോഹരമായ ചിത്രങ്ങൾ വരയ്ക്കാമെന്ന ആശയം എൻഎസ്എസ് വോളന്‍റിയർമാർക്കു തോന്നിയത്. മണ്ണാർക്കാട് ഫോറസ്റ്റ് ഡിവിഷൻ പ്രോത്സാഹനവുമായെത്തിയതോടെ ചുമർചിത്രവും യാഥാർഥ്യമായി. എൻഎസ്എസ് സപ്തദിന ക്യാന്പിന്‍റെ ഭാഗമായാണ് ഈ സൗന്ദര്യവത്കരണം. പത്താംവളവ് എത്തുന്നതിനു മുമ്പ് ഏകദേശം 500 മീറ്റർ മാറിയാണ് 750 ചതുരശ്രഅടി വിസ്തീർണത്തിൽ ചുവർചിത്രം ഒരുക്കിയത്. കോളജ് എൻഎസ്എസ് പ്രോഗ്രാം ഓഫീസർ അസിസ്റ്റന്‍റ് പ്രഫസർ വൈശാഖ് വേണുവും മണ്ണാർക്കാട് റേഞ്ച് ഫോറസ്റ്റ് ഓഫീസർ സുബൈറും ഡെപ്യൂട്ടി ഓഫീസർ അഷ്റഫും കൈകോർത്തതോടെയാണ് വിദ്യാർഥികളുടെ സൗന്ദര്യവത്കരണം യാഥാർഥ്യമായത്.

സൗജന്യ സമ്മർ ഫുട്ബോൾ കോച്ചിംഗ്ക്യാമ്പ് തുടങ്ങി

മണ്ണാർക്കാട്: മണ്ണാർക്കാട് ഫുട്ബോൾ അസോസിയേഷനും ലിൻഷ മെഡിക്കൽസ് ഫുട്ബോൾ ക്ലബ്ബും സംയുക്തമായി സംഘടിപ്പിക്കുന്ന സൗജന്യ സമ്മർ ഫുട്ബോൾ കോച്ചിംഗ് ക്യാമ്പിലേക്ക് സെലക‌്ഷൻ ലഭിച്ച 50 കുട്ടികൾക്ക് കേരള പോലീസ് മുൻ ഹെഡ് കോച്ച് വിവേകിന്‍റെ നേതൃത്വത്തിൽ പരിശീലനം ആരംഭിച്ചു. മുബാസ് ഗ്രൗണ്ടിൽ നടന്ന ചടങ്ങിൽ എംഎഫ്എ പ്രസിഡന്‍റ് മുഹമ്മദ് ചെറൂട്ടി അധ്യക്ഷത വഹിച്ചു. കുട്ടികൾക്കുള്ള ജഴ്സി വിതരണം മദർ കെയർ ആശുപത്രി എംഡി ഷാജി മുല്ലപ്പള്ളി നിർവഹിച്ചു. ക്യാമ്പിന്‍റെ ഉദ്ഘാടനം ഉഗാണ്ട ദേശീയ ഫുട്ബോൾ താരവും ലിൻഷ മെഡിക്കൽസ് ഫുട്ബോൾ ടീം അംഗവുമായ യാസർ മുഗർവ നിർവഹിച്ചു. എംഎഫ്എ ജനറൽ സെക്രട്ടറി ഫിറോസ് ബാബു, ട്രഷറർ സലിം മറ്റത്തൂർ, ലിൻഷ മെഡിക്കൽസ് ഫുട്ബോൾ ക്ലബ് മാനേജർ ഷമീർ ബാബു മങ്ങാടൻ, എംഎഫ്എ ഭാരവാഹികളായ ഇബ്രാഹിം ഡിലൈറ്റ്, ഫിഫ മുഹമ്മദ് അലി, റഹീം എം. ഷൗക്കത്ത്, സി. അലി, ഷിഹാബ് കുന്നത്ത്, ഷിബു കാഞ്ഞിരം തുടങ്ങിയവർ പങ്കെടുത്തു.

കൺവൻഷൻ നാനാജാതി മതസ്ഥർക്കുവേണ്ടിയുള്ള ആത്മീയ ഉണർവ്: ഫാ. സേവ്യർഖാൻ വട്ടായിൽ

അഗളി: ജെല്ലിപ്പാറ സെന്‍റ് പീറ്റേഴ്സ് ഇടവകയിൽ നാളെമുതൽ ആരംഭിക്കുന്ന അഭിഷേകാഗ്നി കൺവെൻഷൻ നാനാജാതി മതസ്ഥർക്കുവേണ്ടിയുള്ള ആത്മീയ ഉണർവാണെന്ന് ഫാ. സേവ്യർഖാൻ വട്ടായിൽ. കൺവൻഷനോടനുബന്ധിച്ച് താവളം റൂഹ മൗണ്ട് മോണാസ്ട്രിയിൽ നടത്തിയ പത്രസമ്മേളനത്തിൽ സംസാരിക്കുകയായിരുന്നു അദ്ദേഹം. അട്ടപ്പാടിയിലെ കർഷകരും മറ്റു വിഭാഗക്കാരും ഏറെ കഷ്ടതയിലൂടെയാണ് കടന്നുപോകുന്നത്. പകലന്തിവരെയും തുടർന്നും പണിയെടുക്കുന്ന കർഷകർക്ക് സ്വസ്ഥമായി ഉറങ്ങാനാകുന്നില്ല. സമസ്തമേഖലകളിലും കർഷകർ വെല്ലുവിളി നേരിടുകയാണ്. രാപ്പകൽഭേദമില്ലാതെ പക്ഷിമൃഗാദികൾ കാർഷികവിളകൾ തിന്നൊടുക്കുമ്പോൾ കാട്ടാനപോലുള്ള വലിയ മൃഗങ്ങൾ കൃഷിനാശത്തിനൊപ്പം കൃഷിയിടവും ചവിട്ടിനിരപ്പാക്കുന്നു. ഇതിനുപുറമേ കീടബാധയും പ്രകൃതിക്ഷോഭങ്ങളും കർഷകരെ നിലയില്ലാക്കയത്തിലേക്ക് നയിക്കുന്നു. അട്ടപ്പാടി വൃദ്ധരുടെ നാടായി മാറുന്നു. അട്ടപ്പാടിയിൽ വിവാഹങ്ങൾ നടക്കാത്ത സ്ഥിതിവിശേഷമായിക്കഴിഞ്ഞു. അട്ടപ്പാടിയിലേക്ക് പെൺകുട്ടികളെ അയയ്ക്കാൻ ആരും തയാറാകുന്നില്ല. ജീവിക്കാൻ ഉതകുന്ന വേതനം ലഭിക്കുന്ന തൊഴിൽതേടിയും വിവാഹസാഹചര്യം ഒരുക്കുന്നതിനുമായി യുവതലമുറ അട്ടപ്പാടി വിടുകയാണിപ്പോൾ. മദ്യ, മയക്കുമരുന്നുകളുടെ പ്രസരണം വർധിച്ചിരിക്കുന്നു. സ്വസ്ഥത നഷ്ടപ്പെട്ട ജനവിഭാഗങ്ങളെ സമസ്തമേഖലകളിലും കാണുന്നു. ഈ അവസരത്തിൽ അഭിഷേകാഗ്നി പോലുള്ള ആത്മജ്ഞാനങ്ങൾക്കു പ്രസക്തിയുണ്ടെന്നു ഫാ. വട്ടായിൽ ചൂണ്ടിക്കാട്ടി. സെഹിയോൻ മിനിസ്ട്രീസ് ഡയറക്ടറും പിഡിഎഫ് മോണാസ്ട്രി സ്ഥാപകഡയറക്ടറുമായ ഫാ. സേവ്യർഖാൻ വട്ടായിലും സംഘവുമാണ് കൺവൻഷൻ നയിക്കുന്നത്. നാലുദിവസങ്ങളിലായി നടക്കുന്ന കൺവൻഷനുകളിൽ രോഗികൾക്കുവേണ്ടിയുള്ള പ്രത്യേക പ്രാർഥന, വെഞ്ചരിച്ച മെഡൽ കൊടുത്ത് കുട്ടികൾക്കുവേണ്ടിയുള്ള പ്രാർഥന, എല്ലാ ദിവസവും രാവിലെ 9 മുതൽ 4 വരെ തൈലംപൂശി പ്രാർഥന, കുട്ടികളുടെ പഠനോപകരണങ്ങൾ വെഞ്ചരിച്ചുനൽകൽ, കടബാധ്യത, രോഗപീഡകൾ, കുടുംബ തകർച്ച, ആത്മഹത്യ, ദുരന്തമരണങ്ങൾ എന്നിങ്ങനെയുള്ള തിന്മകളിൽനിന്നു മുക്തിനേടാൻ പ്രത്യേക പ്രാർഥനയും ഉണ്ടാകും. 13 മുതൽ 16 വരെ വൈകുന്നേരം നാലുമുതൽ രാത്രി 9 വരെയാണ് കൺവൻഷൻ. ദൂരെനിന്ന് എത്തുന്നവർക്ക് സൗജന്യ താമസസൗകര്യവും ഭക്ഷണവും ഒരുക്കിയിട്ടുണ്ട്. ബിഷപ് മാർ പീറ്റർ കൊച്ചുപുരയ്ക്കൽ, വികാരി ജനറാൾ മോൺ. ജീജോ ചാലയ്ക്കൽ തുടങ്ങിയവർ തിരുക്കർമങ്ങളിൽ സന്ദേശം നൽകും. സെന്‍റ് പീറ്റേഴ്സ് ഇടവകവികാരി ഫാ. ജോൺ മരിയ വിയാനി ഒലക്കേങ്കിൽ, പിഡിഎം അഡ്മിനിസ്ട്രേറ്റർ റെജി അറയ്ക്കൽ, കൈക്കാരന്മാർ, കൺവീനർമാർ എന്നിവർ പത്രസമ്മേളനത്തിൽ പങ്കെടുത്തു.

ടോൾവിഷയം: കമ്പനിയുടെ നിലപാടിൽ പ്രതിഷേധിച്ച് കോൺഗ്രസ് മാർച്ച്

വടക്കഞ്ചേരി: പന്നിയങ്കര ടോൾ പ്ലാസയിൽ പ്രദേശവാസികളുടെ ടോൾ സംബന്ധിച്ച സർവകക്ഷി യോഗതീരുമാനത്തിന് വിരുദ്ധമായി പ്രവർത്തിക്കുന്ന ടോൾ കമ്പനി നിലപാടിനെതിരെ കോൺഗ്രസ് ബ്ലോക്ക് കമ്മിറ്റി ടോൾ പ്ലാസയിലേക്ക് മാർച്ച്നടത്തി. ടോൾബൂത്തുകൾക്കു മുന്നിൽ എസ്ഐ ബാബുവിന്‍റെ നേതൃത്വത്തിൽ പ്രവർത്തകരെ പോലീസ് തടഞ്ഞു.തുടർന്ന് ടോൾ കൊള്ളക്കും കമ്പനിയുടെ ധിക്കാര നടപടികൾക്കുമെതിരെ പ്രവർത്തകർ മുദ്രാവാക്യങ്ങളുയർത്തി. കോൺഗ്രസ് ബ്ലോക്ക് പ്രസിഡന്‍റ് അഡ്വ.എം. ദിലീപ് ഉദ്ഘാടനം ചെയ്തു. സുരേഷ് വേലായുധൻ അധ്യക്ഷത വഹിച്ചു.വി.എം. സെയ്തലവി, ചാർളി മാത്യു, റെജി കെ. മാത്യു, ആന്‍റോ, കെ.എം.ശശീന്ദ്രൻ, എം.കെ. ശ്രീനിവാസൻ, കെ.സുദേവൻ കണ്ണമ്പ്ര, ബാബു മാധവൻ എന്നിവർ പ്രസംഗിച്ചു. ടോൾപ്ലാസയിൽ നിന്നും ഏഴര കിലോമീറ്റർ ദൂരപരിധിയിലുള്ളവർക്കു മാത്രമെ സൗജന്യപ്രവേശനം അനുവദിക്കൂ എന്ന നിലപാടിലാണ് ടോൾകമ്പനി. അതിനപ്പുറം എഡിഎം പരിശോധിച്ച് കണ്ടെത്തിയിട്ടുള്ള പ്രദേശങ്ങളിലുള്ളവർക്കുകൂടി സൗജന്യപ്രവേശനം നൽകണമെന്നതായിരുന്നു സർവകക്ഷി യോഗത്തിലെ തീരുമാനം. ഇത് കാറ്റിൽ പറത്തിയാണ് ടോൾകമ്പനി പ്രവർത്തിക്കുന്നത്. കമ്പനി പറയുന്ന ദൂരപരിധിയിൽ രേഖകൾ സമർപ്പിച്ചവർക്ക് ഏത് ട്രാക്കിലൂടെ വേണമെങ്കിലും കടന്നുപോകാം. രേഖകൾ സമർപ്പിച്ച വാഹനങ്ങൾ കടന്നുപോകുമ്പോൾ ഫാസ് ടാഗ് വഴി പണം നഷ്ടപ്പെടുന്നുണ്ടെന്ന പരാതികളുമുണ്ട്.

സിഐടിയു സമരം; ചർച്ച വീണ്ടും പരാജയം

ഷൊർണൂർ: സിഐടിയു കുടിൽകെട്ടി സമരം ചെയ്യുന്ന കുളപ്പുള്ളിയിലെ സ്ഥാപന ഉടമയുമായി ലേബർ ഓഫീസർ നടത്തിയ ചർച്ച പരാജയപ്പെട്ടു. യോഗത്തിനെത്തിയ ഉടമ ചർച്ചയ്ക്കു നിൽക്കാതെ ഹൈക്കോടതി തനിക്ക് അനുകൂലമായി നൽകിയ വിധി നടപ്പാക്കാൻ തയാറാകണമെന്ന് ആവശ്യപ്പെട്ടു. എന്നാൽ ലേബർ കാർഡില്ലാത്ത തൊഴിലാളികളെ സ്ഥാപനഉടമ നീക്കം ചെയ്യണമെന്നു സിഐടിയുവും ആവശ്യപ്പെട്ടതോടെയാണ് ചർച്ച പൊളിഞ്ഞത്. ജില്ലാ ലേബർ ഓഫീസറുടെ സാന്നിധ്യത്തിൽ വീണ്ടും ചർച്ച നടക്കും. അതേസമയം, താൻ ആത്മഹത്യയുടെ വക്കിലാണെന്നാണ് സ്ഥാപന ഉടമ പറയുന്നത്. സ്ഥാപനം ഇപ്പോൾ അടച്ചിട്ടിരിക്കുകയാണ്. കുളപ്പുള്ളിയിൽ കെട്ടിടനിർമാണ സാമഗ്രികൾ വിൽക്കുന്ന പ്രകാശ് സ്റ്റീൽ കടയ്ക്കുമുൻമ്പിലാണ് സിഐടിയു ചുമട്ടുതൊഴിലാളികൾ സമരം നടത്തിവരുന്നത്. നേരത്തെയും ലേബർ ഓഫീസറുടെ സാന്നിധ്യത്തിൽ ചർച്ച നടന്നതു പരാജയപ്പെട്ടിരുന്നു. തുടർന്ന് സ്ഥാപനഉടമ പ്രകാശിനു തൊഴിലാളികളിൽനിന്ന് മർദനമേറ്റതായും പരാതി ഉയർന്നു. സ്ഥാപനത്തിൽ കയറ്റിറക്കിനായി സ്ഥാപിച്ച യന്ത്രം പ്രവർത്തിപ്പിക്കാൻ തങ്ങളെ അനുവദിക്കണമെന്നായിരുന്നു ചുമട്ടുതൊഴിലാളികളുടെ ആവശ്യം. കയറ്റാനും ഇറക്കാനും രണ്ടുപേർവീതവും ഒരാൾ യന്ത്രത്തിന്‍റെ ബെൽറ്റിലും എന്ന രീതിയിൽ ജോലി നൽകണമെന്ന്‌ തൊഴിലാളിനേതാക്കൾ ആവശ്യപ്പെട്ടു. എന്നാൽ യന്ത്രം പ്രവർത്തിപ്പിക്കുന്നതിനും സ്വന്തംതൊഴിലാളികളെ ഉപയോഗിച്ച് കയറ്റിറക്കു ചെയ്യുന്നതിനും കോടതിയുത്തരവുണ്ടെന്നായിരുന്നു സ്ഥാപനയുടമയുടെ നിലപാട്. ജില്ലാ ലേബർ ഓഫീസറുടെ സാനിധ്യത്തിൽ ഒറ്റപ്പാലം ലേബർ ഓഫീസിൽ നടന്ന ചർച്ചയിലും ഇതായിരുന്നു വാദം. സമരം അവസാനിപ്പിക്കാൻ ചർച്ചയ്ക്ക്‌ തയാറാണെന്ന്‌ വ്യാപാരി വ്യവസായി ഏകോപനസമിതി ജില്ലാനേതാക്കളും അറിയിച്ചിരുന്നു.

കാൽവരിമല പ്രതീക്ഷയുടെ കൂടാരമാകും: ഡോ.യൂഹാനോൻ മാർ തിയഡോഷ്യസ്

കല്ലടിക്കോട്: വാക്കോടൻ മലയിൽ നിർമിതമായ കാൽവരിമല ഏവർക്കും പ്രതീക്ഷയുടെ കൂടാരമായി മാറുമെന്ന് മൂവാറ്റുപുഴ രൂപതാധ്യക്ഷൻ ഡോ.യൂഹാനോൻ മാർ തിയഡോഷ്യസ് മെത്രാപ്പൊലീത്ത പറഞ്ഞു. ഇരുമ്പാമുട്ടി സെന്‍റ് ജോസഫ് മലങ്കര കത്തോലിക്ക പള്ളിയിൽനിന്നും നാല്പതാം വെള്ളിയാഴ്ച ആണ്ടുതോറും നടത്തിവരുന്ന വാക്കോടൻ കാൽവരി കുരിശുമലകയറ്റത്തിൽ പങ്കെടുത്ത് സന്ദേശം നൽകുകയായിരുന്നു അദ്ദേഹം. കുരിശുമലയെ തീർഥാടനകേന്ദ്രമായി പ്രഖ്യാപിച്ചു. കുരിശുമലയിൽ പുതുതായി പണികഴിപ്പിച്ച ചാപ്പലിന്‍റേയും കൽകുരിശിന്‍റേയും കൽവിളക്കിന്‍റേയും കൂദാശാകർമവും നിർവഹിച്ചു. ഫാ. മാത്യു തടത്തിൽ, ഫാ. ജോവാക്കിം പണ്ടാരങ്കുടിയിൽ, ഫാ. ഐസക് കോച്ചേരിയിൽ മറ്റ് വൈദീകർ, രാഷ്ട്രീയ നേതാക്കൾ തുടങ്ങിയവർ നേതൃത്വം നൽകി.

വിശ്വാസികൾ ക്രിസ്തീയദർശനത്തിൽ ജീവിക്കണം: മാർ പീറ്റർ കൊച്ചുപുരയ്ക്കൽ

അഗളി: അനുസരണം, വിധേയത്വം എന്നീ ക്രിസ്തീയദർശനത്തിൽ ഊന്നി ദൈവഹിതത്തിനു സ്വയം സമർപ്പിച്ചുവേണം വിശ്വാസികൾ ജീവിക്കാനെന്നു ബിഷപ് മാർ പീറ്റർ കൊച്ചുപുരയ്ക്കൽ. നാല്പതാം വെള്ളി ആചരണത്തിന്‍റെ ഭാഗമായി ചിന്നമലയാറ്റൂർ എന്നറിയപ്പെടുന്ന അട്ടപ്പാടി ജെല്ലിപ്പാറ കാൽവരി മൗണ്ട് തീർഥാടന കേന്ദ്രത്തിലേക്ക് നടന്ന കുരിശുമലതീർഥാടനത്തിൽ സന്ദേശം നൽകുകയായിരുന്നു ബിഷപ്. സ്വയം ജീവിതം അവസാനിപ്പിക്കുന്ന പ്രവണത വർധിച്ചുവരുന്ന സാഹചര്യത്തിൽ ഏവരും ദൈവഹിതം മനസിലാക്കി സമചിത്തതയോടെ സാഹചര്യങ്ങളെ വിലയിരുത്തി ജീവിക്കണമെന്നും ബിഷപ് പറഞ്ഞു. ഇന്നലെ വൈകുന്നേരം 3.30ന് സെന്‍റ് പീറ്റേഴ്സ് പള്ളിയിൽ നടന്ന തിരുകർമ്മങ്ങൾക്ക് താവളം ഫെറോന വികാരി ഫാ. ബിജു പ്ലാത്തോട്ടത്തിൽ മുഖ്യകാർമികത്വം വഹിച്ചു. തുടർന്ന് ബിഷപ്പിന്‍റെ നേതൃത്വത്തിൽ നടന്ന കുരിശിന്‍റെ വഴിയിൽ ആയിരങ്ങൾ മല ചവിട്ടി പുണ്യം നേടി. സംസ്ഥാനത്തിന് അകത്തുനിന്നും പുറത്തുനിന്നുമായി വിശ്വാസികളും വൈദികരും സന്യസ്ഥരും ഒഴുകിയെത്തി. ഇടവക വികാരി ഫാ. ജോൺ മരിയ വിയാനി ഒലക്കേങ്കിൽ, ഫാ. ബിജോയി ചോതിരക്കോട്ടിൽ, ഫാ. സൈമൺ കൊള്ളന്നൂർ, കൈക്കാരന്മാരായ മത്തായി ഊടുപുഴയിൽ, ഷിബിൻ കുരുവിലംകാട്ടിൽ, കൺവീനർമാരായ ജയ്സൺ പനന്താനത്ത്, സാബു ചാലാനിയിൽ എന്നിവർ നേതൃത്വം നൽകി.

മദ്യം ലഹരിയല്ലെന്നു സർക്കാർ പ്രചരിപ്പിക്കുന്നു: വി.എം. സുധീരൻ

പാലക്കാട്: പ്രകടനപത്രികയിൽ പറഞ്ഞ കാര്യങ്ങൾ വിസ്മരിച്ച് കേരളത്തെ മദ്യത്തിൽ മുക്കിക്കൊല്ലുകയാണ് ഇടതുപക്ഷ സർക്കാർ ചെയ്യുന്നതെന്ന് കോണ്‍ഗ്രസ് നേതാവ് വി.എം. സുധീരൻ. മദ്യം ലഹരിയല്ല, മയക്കുമരുന്നാണ് ലഹരി എന്ന മട്ടിലാണ് സർക്കാരിന്‍റെ പ്രചാരണം. ഇതു കേരളത്തെ ദുരന്തത്തിലേക്ക് തള്ളിവിടുമെന്നും അദ്ദേഹം എലപ്പുള്ളിയിൽ മാധ്യമങ്ങളോടു പറഞ്ഞു. തെരഞ്ഞെടുപ്പ് പ്രകടനപത്രികയിലെ വാഗ്ദാനങ്ങൾ എല്ലാം ഇടതുപക്ഷ സർക്കാർ ലംഘിച്ചിരിക്കുകയാണ്. മദ്യവർജനമാണ് ലക്ഷ്യംവയ്ക്കുന്നതെന്നായിരുന്നു പ്രകടനപത്രികയിലെ വാഗ്ദാനം. എന്നാൽ മദ്യഷാപ്പുകളുടെ എണ്ണം വർധിപ്പിക്കുകയാണ് സർക്കാർ ചെയ്തത്. യുഡിഎഫ് അധികാരത്തിൽ നിന്ന് ഒഴിയുന്പോൾ 29 ബാറുകൾ ഉണ്ടായിരുന്ന സ്ഥാനത്ത് ഇന്നത് ആയിരത്തിലേറെയായി ഉയർന്നു. കേരളത്തെ മദ്യവത്കരിക്കാനാണ് സർക്കാർ ശ്രമിക്കുന്നത്. ഒരു വശത്ത് മദ്യവർജനം എന്നു പ്രഖ്യാപിക്കുന്പോഴും യഥേഷ്ടം ബ്രൂവറികൾ സ്ഥാപിക്കാനാണ് സർക്കാർ നീക്കം നടത്തുന്നത്. ഐടി മേഖലയിലും മറ്റും മദ്യം വിളന്പാൻ സൗകര്യം ഒരുക്കുന്നു. വിനോദസഞ്ചാരത്തിന്‍റെ പേരിൽ ഡ്രൈ ഡേകളിൽ പോലും സർക്കാർ ഇളവുവരുത്തി. മദ്യലഹരിയിൽ അക്രമവും മറ്റും നാൾക്കുനാൾ പെരുകുന്പോൾ മദ്യവർജനം നടപ്പാക്കുമെന്ന് പറയുന്നത് വിരോധാഭാസമാണ്. സർക്കാർ തെറ്റായ നടപടികളിൽ നിന്നും പിന്തിരിയണം. മദ്യം വർജിക്കുക എന്ന പ്രചരണം അഴിച്ചുവിട്ട് ജനങ്ങളോട് ഏറ്റവും വലിയ വഞ്ചനയാണ് സർക്കാർ കാണിക്കുന്നതെന്നും വി.എം. സുധീരൻ കുറ്റപ്പെടുത്തി. സർക്കാരിന്‍റെ എലപ്പുള്ളിയിലെ ബ്രൂവറിയോടുള്ള സമീപനം സുതാര്യമല്ല. ബ്രൂവറി നിർമിക്കാൻ വേണ്ടി സർക്കാർ നിരത്തുന്ന അവകാശവാദങ്ങളെല്ലാം പൊള്ളയാണ്. രൂക്ഷമായ ജലക്ഷാമം നേരിടുന്ന പ്രദേശമാണ് എലപ്പുള്ളി. ഭൂഗർഭജലത്തിന്‍റെ തോത് പോലും കുറയുന്നുവെന്നാണ് പഠനങ്ങൾ തെളിയിക്കുന്നത്. ഇവിടെ മദ്യനിർമാണ ശാല സ്ഥാപിക്കാനുള്ള നീക്കത്തിൽ നിന്നും സർക്കാർ പിന്തിരിയണമെന്നും വി.എം. സുധീരൻ ആവശ്യപ്പെട്ടു. കെപിസിസി വൈസ് പ്രസിഡന്‍റ് വി.ടി. ബൽറാം, എലപ്പുള്ളി പഞ്ചായത്ത് പ്രസിഡന്‍റ് കെ. രേവതി ബാബു, ഡിസിസി ജനറൽ സെക്രട്ടറി പത്മഗിരീശൻ, പാലക്കാട് ശാസ്ത്രവേദി ജില്ലാ പ്രസിഡന്‍റ് ഡോ. ലക്ഷ്മി ആർ. ചന്ദ്രൻ, സെക്രട്ടറി കെ.വി. പുണ്യകുമാരി, എലപ്പുള്ളി മണ്ഡലം പ്രസിഡന്‍റ് ഡി. രമേശൻ എന്നിവരും വി.എം. സുധീരനൊപ്പം ഉണ്ടായിരുന്നു. ശാസ്ത്രവേദി ജില്ലാ കമ്മിറ്റി എലപ്പുള്ളി മദ്യനിർമാണശാല സാമൂഹ്യ പാരിസ്ഥിതിക പ്രത്യാഘാത സാധ്യതാപഠനത്തെക്കുറിച്ച് സംഘടിപ്പിച്ച പരിപാടിയിൽ പങ്കെടുക്കാനെത്തിയതായിരുന്നു സുധീരൻ. അതേസമയം കെപിസിസി രാഷ്ട്രീയകാര്യസമിതി അംഗം ഡോ. ശൂരനാട് രാജശേഖരന്‍റെ നിര്യാണത്തെതുടർന്ന് പരിപാടി മാറ്റിവച്ചു.

ചുഴലിക്കാറ്റും അനുബന്ധ ദുരന്തങ്ങളും; മോക് എക്സർസൈസ് നടത്തി

പാലക്കാട്: ചുഴലിക്കാറ്റ്, മറ്റ് അനുബന്ധ പ്രകൃതി ദുരന്തങ്ങളെ നേരിടാനും നിലവിലുള്ള സൗകര്യങ്ങൾ വിലയിരുത്തുന്നതിനുമായി ജില്ലയിൽ മോക്ഡ്രിൽ നടന്നു. ദേശീയ ദുരന്ത നിവാരണ അഥോറിറ്റിയും സംസ്ഥാന ദുരന്ത നിവാരണ അഥോറിറ്റിയും ചേർന്നാണ് മോക്ഡ്രിൽ നടത്തിയത്. രാവിലെ എട്ടുമണിയോടെ സംസ്ഥാനത്ത് റെഡ് അലർട്ട് പ്രഖ്യാപിക്കുകയും ചുഴലിക്കാറ്റിനും ശക്തമായ മഴയ്ക്കും സാധ്യത ഉണ്ടെന്നുള്ള അറിയിപ്പ് ലഭിച്ചു. ചുഴലിക്കാറ്റ് രാവിലെ പത്തിനും 11 നും ഇടയിൽ നിലം തൊടുമെന്ന അറിയിപ്പിനെ തുടർന്ന് ജില്ലാ ദുരന്ത നിവാരണ അഥോറിറ്റി ചീഫ് എക്സിക്യൂട്ടീവ് ഓഫീസറായ എ ഡിഎം കെ. മണികണ്ഠന്‍റെ നേതൃത്വത്തിൽ രാവിലെ ഒന്പത് മുതൽ കളക്ടറേറ്റിൽ കണ്‍ട്രോൾ റൂം തുറന്നു. ജില്ലാ ദുരന്ത നിവാരണ അഥോറിറ്റി ചെയർപേഴ്സണായ ജില്ലാ കളക്ടർ ജി. പ്രിയങ്ക പ്രവർത്തനങ്ങൾ വിലയിരുത്തുകയും ആവശ്യമായ നിർദേശങ്ങൾ ടീമിന് നൽകുകയും ചെയ്തു. മോക്ഡ്രില്ല് വിജയകരമായി പൂർത്തിയാക്കാനായെന്നും ഇത്തവണ ഉണ്ടായ പോരായ്മകൾ ഉൾക്കൊണ്ട് പ്രവർത്തിക്കാൻ എല്ലാവരും ശ്രദ്ധിക്കണമെന്നും ജില്ലാ കളക്ടർ പറഞ്ഞു. ഗ്യാസ് പടർന്നതിനെ തുടർന്ന് പരിസരവാസികളെ പ്രദേശത്ത് നിന്ന് ഒഴിപ്പിക്കുകയും വാതകം ശ്വസിച്ചതിനെ തുടർന്ന് കുഴഞ്ഞുവീണവരെ ആശുപത്രികളിൽ എത്തിച്ച് ആവശ്യമായ വൈദ്യസഹായം നൽകുകയും ഒടിഞ്ഞുവീണ മരവും ടാങ്കർ ലോറിയും നീക്കം ചെയ്യുന്നതും മോക് ഡ്രില്ലിൽ ഉൾപ്പെടുത്തിയിരുന്നു. ഡെപ്യൂട്ടി ഇൻസിഡെന്‍റ് കമാൻഡറായ ജില്ലാ പ്ലാനിംഗ് ഓഫീസർ പി. ആർ. രത്നേഷ്, പോലീസ്, ഫയർ ഫോഴ്സ്, ഡി ഇ ഒസി, എൻഡിആർഎഫ്, ഹെൽത്ത്, ട്രാൻസ്പോർട്ട് എന്നീ വിവിധ വിഭാഗങ്ങളിലെ ഉദ്യോഗസ്ഥരും വോളന്‍റിയർമാരും മോക്ഡ്രില്ലിൽ പങ്കാളികളായി.

മസ്റ്ററിംഗ് പൂർത്തിയാക്കണമെന്നു എൽപിജി ഓപ്പണ്‍ ഫോറം

പാലക്കാട്: ജില്ലാതല എൽപിജി ഓപ്പണ്‍ഫോറം യോഗം കളക്ടറേറ്റ് കോണ്‍ഫറൻസ് ഹാളിൽ നടത്തി. അഡീഷണൽ ജില്ലാ മജിസ്ട്രേറ്റ് കെ. മണികണ്ഠൻ അധ്യക്ഷനായി. മസ്റ്ററിംഗിനായി അവശേഷിക്കുന്ന ഉപഭോക്താക്കൾ പെട്ടെന്ന് പൂർത്തിയാക്കണമെന്നു ഓയിൽ കന്പനി പ്രതിനിധികൾ ആവശ്യപ്പെട്ടു. ഉപഭോക്താക്കൾക്ക് എൽപിജി ലഭ്യതയുമായി ബന്ധപ്പെട്ട പരാതികൾ പരിഹരിക്കാനായി 8137067808 എന്ന നന്പറിൽ ബന്ധപ്പെടണമെന്നു എൽപിജി ഡിസ്ട്രിബ്യൂട്ടേഴ്സ് ഫെഡറേഷൻ അറിയിച്ചു. ജില്ലാ സപ്ലൈ ഓഫീസർ, താലൂക്ക് സപ്ലൈ ഓഫീസർമാർ, ഓയിൽ കന്പനി പ്രതിനിധികൾ, ഉപഭോക്തൃ സംഘടന പ്രതിനിധികൾ, എൽപിജി ഡീലർമാർ, പ്രൈവറ്റ് ബോട്ട്ലിംഗ് പ്ലാന്‍റ് ഉടമകൾ തുടങ്ങിയവർ യോഗത്തിൽ പങ്കെടുത്തു.

യുവക്ഷേത്ര കോളജിൽ കരിയർ ഗൈഡൻസ് സെമിനാർ

മുണ്ടൂർ: യുവക്ഷേത്ര കോളജും ഫ്രെയിം ഫൗണ്ടേഷനും ജനപ്രകാശവും ചേർന്നു സംഘടിപ്പിച്ച കരിയർ ഗൈഡൻസ് പ്രോഗ്രാം ഡയറക്ടർ റവ.ഡോ. മാത്യു ജോർജ് വാഴയിൽ ഉദ്ഘാടനം ചെയ്തു. ജനപ്രകാശം ടൈംസ് മാർക്കറ്റിംഗ് എക്സിക്യൂട്ടീവ് ഫാ. ജയ്സൺ കൊള്ളന്നൂർ അധ്യക്ഷനായിരുന്നു. വൈസ് പ്രിൻസിപ്പൽ റവ.ഡോ. ജോസഫ് ഓലിക്കൽകൂനൽ ആശംസകളർപ്പിച്ചു. കരിയർ എക്സ്പർട്ടും തൃശൂർ സെന്‍റ് തോമസ് കോളേജ് ഫിസിക്സ് വിഭാഗം അസിസ്റ്റന്‍റ് പ്രഫസർ ഡോ. ഡെയ്സണ്‌ പാണേങ്ങാടൻ കരിയർ ഗൈഡൻസ് സെമിനാറിൽ ക്ലാസെടുത്തു. ജില്ലയിലെ വിവിധ സ്കൂളുകളിൽനിന്നായി ഇരുനൂറിലധികം വിദ്യാർഥികൾ പങ്കെടുത്ത പരിപാടിയിൽ രൂപതയുടെ വിവിധ വിദ്യാഭ്യാസസ്ഥാപന പ്രതിനിധികൾ അവരുടെ സ്ഥാപനത്തെയും കോഴ്സുകളും പരിചയപ്പെടുത്തി. കോ-ഓർഡിനേറ്റർ റവ.ഡോ. എബിൻ കൊളമ്പിൽ സ്വാഗതവും വിദ്യാർഥിനി ഐറിൻ ജിബോയ് നന്ദിയും പറഞ്ഞു.

കുടിശിക ഉടൻ നൽകണമെന്നു കെഎസ്ഇബി പെൻഷനേഴ്സ് അസോസിയേഷൻ

പാലക്കാട്: കെഎസ്ഇബി പെൻഷനേഴ്സ് അസോസിയേഷൻ ജില്ലാതല പ്രവർത്തക കൺവൻഷൻ വിക്‍ടോറിയ കോളജിനു സമീപം ജില്ലാ പെൻഷൻ ഭവനിൽ ചേർന്നു. അസോസിയേഷൻ സംസ്ഥാന വൈസ് പ്രസിഡന്‍റ് എം.ടി. വർഗീസ് ഉദ്ഘാടനം ചെയ്തു. സംസ്ഥാന വൈസ് പ്രസിഡന്‍റ് പി.എസ്. ഉദയകുമാർ കേന്ദ്രകമ്മിറ്റി റിപ്പോർട്ട് അവതരിപ്പിച്ചു ജില്ലാ പ്രസിഡന്‍റ് പ്രസാദ് മാത്യുയോഗത്തിൽ അധ്യക്ഷത വഹിച്ചു. ജില്ലാ സെക്രട്ടറി കെ. ഹരി, സംസ്ഥാന സെക്രട്ടറി ടി.ആർ. പ്രേംകുമാർ, ജില്ലാ വനിതാ കൺവീനർ കെ.എസ്. ചിത്ര, പാലക്കാട് ഡിവിഷൻ സെക്രട്ടറി കെ. ശ്രീകുമാർ എന്നിവർ പ്രസംഗിച്ചു. മുടങ്ങിയ പെൻഷൻ ഡിഎ കുടിശിക വിതരണം ചെയ്യണമെന്നും പെൻഷൻഫണ്ടിൽ കെഎസ്ഇബിയുടെ തുക ഉടൻ നിക്ഷേപിക്കണമെന്നും യോഗം ആവശ്യപ്പെട്ടു. പവർ സെക്രട്ടറിയും കെഎസ്ഇബി മാനേജ്മെന്‍റും പുലർത്തിവരുന്ന നിസംഗതയ്ക്കു പരിഹാരം കാണണമെന്നും ആവശ്യപ്പെട്ടു. പാലക്കാട്, ചിറ്റൂർ, മണ്ണാർക്കാട്, പട്ടാന്പി, ആലത്തൂർ, ഷൊർണൂർ ഡിവിഷനിലെ പ്രവർത്തകർ പങ്കെടുത്തു.

പ്രകൃതികൃഷിയിലൂടെ കാലാവസ്ഥാവ്യതിയാനത്തെ നിയന്ത്രിക്കാൻ കഴിയണം: ഷബിൽ കൃഷ്ണ

എലപ്പുള്ളി: ഗാന്ധിയൻ രീതിയിലുള്ള പ്രകൃതികൃഷിയിലൂടെ കാലാവസ്ഥാവ്യതിയാനത്തെ നിയന്ത്രിക്കാൻ കഴിയണമെന്നും പ്രാദേശികവും അഹിംസാത്മകവുമായ ഇടപെടലുകൾക്കു കർഷകരെയും കർഷകത്തൊഴിലാളികളെയും സജ്ജരാക്കുന്നതിനുള്ള പദ്ധതികൾക്കു രൂപംനൽകാൻ പഞ്ചായത്തുകൾ മുന്നോട്ടുവരണമെന്നും പരിസ്ഥിതിഗവേഷകനും എഴുത്തുകാരനുമായ ഷബിൽ കൃഷ്ണ. രാമശേരി ഗാന്ധി ആശ്രമത്തിൽ സംഘടിപ്പിച്ച പഠനക്ലാസിൽ "പരിസ്ഥിതിയും ആരോഗ്യവും ഗാന്ധിയുടെ രീതിശാസ്ത്രം " എന്ന വിഷയം അവതരിപ്പിക്കുകയായിരുന്നു അദ്ദേഹം. ഗാന്ധിആശ്രമം ട്രസ്റ്റി പുതുശേരി ശ്രീനിവാസൻ മോഡറേറ്ററായ പഠനക്ലാസിൽ കർഷകഅവാർഡ് ജേതാവ് പി. ഭുവനേശ്വരി, വാവോലിതോട് ഫാർമേഴ്സ് ക്ലബ് പ്രസിഡന്‍റ് വി. പ്രദീപ്, പരിസ്ഥിതി പ്രവർത്തകൻ ഉണ്ണികൃഷ്ണൻ മായന്നൂർ, മഹേഷ് അകത്തേതറ, എൻ. ദേവിലക്ഷ്മി, സർവോദയകേന്ദ്രം നിർവാഹക സമിതി അംഗം അനിത നാവുക്കോട്, എം.എം. കൃഷ്ണൻകുട്ടി, രാധാകൃഷ്ണൻ രാമച്ചൻകാട്, രാജകുമാരൻ എരട്ടക്കുളം തുടങ്ങിയവർ ചർച്ചയിൽ പങ്കെടുത്തു.

കിഴക്കേത്തല റോഡിലൂടെ പോകാൻ മൂക്കുപൊത്താതെ വയ്യെന്നു നാട്ടുകാർ

കൊടുവായൂർ: കിഴക്കേത്തല റോഡരികിൽ വീടുകൾക്കുസമീപം മാലിന്യംതള്ളിയത് നീക്കംചെയ്യണമെന്നു നാട്ടുകാർ‌. കൊടുവായൂർ പ്രധാന പാതയ്ക്കരുകിലാണ് മാലിന്യം കുമിഞ്ഞുകിടക്കുന്നത്. ജില്ലയിൽ പഞ്ചായത്തുകൾതോറും മാലിന്യമുക്തമെന്ന് മത്സരിച്ചു പ്രഖ്യാപനം നടത്തുമ്പോഴും കൊടുവായൂരിൽ ഇതൊന്നും അറിഞ്ഞമട്ടില്ല. മഴ ചാറിയിൽ മാലിന്യത്തിനു സമീപം കൊതുകുശല്യം കൂടുന്നതു പകർച്ചവ്യാധികൾക്കു ഇടയാക്കുമെന്നു പരിസരവാസികൾ ആരോപിച്ചു. താലൂക്കിലെ പ്രധാന വാണിജ്യകേന്ദ്രമായ കൊടുവായൂരിലെ മിക്കയിടത്തും ഇതാണ് അവസ്ഥ.

മലന്പുഴ ഉദ്യാനത്തിൽ "ശങ്ക' തീർക്കാൻ പെടാപ്പാട്

മലന്പുഴ: ഉദ്യാനത്തിലെത്തുന്ന വിനോദസഞ്ചാരികൾക്കു ആ ശങ്ക തീർക്കാൻ പെടാപ്പാട്. ലക്ഷങ്ങൾ മുടക്കി ഉദ്യാനത്തിൽ പണിതീർത്ത ഇ ടോയ്‌ലറ്റുകൾ തുരുന്പുപിടിച്ചു നശിക്കുന്നു. വർഷങ്ങളായി പ്രവർത്തനരഹിതമായി കിടക്കുന്ന ടോയ്‌ലറ്റുകൾ ഉദ്ഘാടനശേഷം മൂന്നുമാസംപോലും തികച്ചു പ്രവർത്തിച്ചില്ല. ഉദ്യാനത്തിലെ നൂൽപ്പാലം കടന്നാൽ ഒരു കംഫർട്ട് സ്റ്റേഷനുണ്ടെങ്കിലും തിരക്കുകുറഞ്ഞ ദിവസങ്ങളിലും സ്റ്റാഫ് ഇല്ലാത്ത ദിവസങ്ങളിലും പ്രവർത്തിക്കാറില്ല. വിനോദസഞ്ചാരികൾക്ക് അതിനാൽ പ്രവേശനകവാടം വരെ ശങ്കനിവൃത്തിക്കായി എത്തേണ്ട ഗതികേടാണ്. ഇ ടോയ്‌ലറ്റ് പ്രദേശത്തു മറ്റൊരു കംഫർട്ട് സ്റ്റേഷൻ തുടങ്ങണമെന്നാണ് വിനോദസഞ്ചാരികളുടെ ആവശ്യം.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]