ADVERTISEMENT

ADVERTISEMENT

മൂല്യനിർണയ ക്യാന്പിൽ പ്രതിഷേധ സംഗമം

നെടുങ്കണ്ടം: ഹയർ സെക്കൻഡറി വിദ്യാഭ്യാസ മേഖലയെ ഇല്ലാതാക്കാനുള്ള സർക്കാർ നീക്കത്തിനെതിരേ ഫെഡറേഷൻ ഓഫ് ഹയർ സെക്കൻഡറി ടീച്ചേഴ്സ് അസോസിയേഷന്‍റെ ആഭിമുഖ്യത്തിൽ ഇരട്ടയാർ സെന്‍റ് തോമസ് ഹയർ സെക്കൻഡറി സ്കൂളിലെ മൂല്യനിർണയ ക്യാന്പിൽ പ്രതിഷേധ സംഗമം നടത്തി.

ഖാദർ കമ്മിറ്റി റിപ്പോർട്ട് തള്ളിക്കളയുക, സ്കൂൾ എകീകരണ നടപടികൾ അവസാനിപ്പിക്കുക, തസ്തികകൾ ഇല്ലാതാക്കി അധ്യാപകരെ സ്ഥലംമാറ്റുന്ന നടപടി അവസാനിപ്പിക്കുക, പ്ലസ്‌വണ്‍ പ്രവേശനത്തിലെ അനാവശ്യമായ സീറ്റ് വർധന ഒഴിവാക്കുക, ഒരു ബാച്ചിൽ പരമാവധി 50 കുട്ടികളെന്ന നിലവിലുള്ള നിയമം പാലിച്ച് പ്രവേശനം നടത്തുക, ഡിഎ, പേ റിവിഷൻ കുടിശികകൾ അനുവദിക്കുക, ശന്പള കമ്മീഷനെ നിയമിക്കുക, കോണ്‍ട്രിബ്യൂട്ടറി പെൻഷൻ സന്പ്രദായം പിൻവലിക്കുക, എയ്ഡഡ് സ്കൂൾ അധ്യാപക നിയമനങ്ങൾ അംഗീകരിക്കുക, മൂല്യനിർണയവേതനം വർധിപ്പിക്കുക തുടങ്ങിയ ആവശ്യങ്ങൾ ഉന്നയിച്ചാണ് പ്രതിഷേധ സംഗമം നടത്തിയത്.

എച്ച്എസ്എസ്ടിഎ സംസ്ഥാന വൈസ് പ്രസിഡന്‍റ് ഡോ. എസ്. ശേഖർ സംഗമം ഉദ്ഘാടനം ചെയ്തു.

നോബിൾ മാത്യു, രാജൻ തോമസ്, മാർട്ടിൻ ജോസഫ്, അജോ പി. ജോസ്, സെസിൽ ജോസ്, എം. രാജൻ, കെ.ടി. അജേഷ് എന്നിവർ പ്രസംഗിച്ചു.

ADVERTISEMENT

നാരങ്ങാനത്ത് സ്ഥാപിച്ച കുരിശ് വനംവകുപ്പ് പൊളിച്ചുനീക്കി

കരിമണ്ണൂർ: തൊമ്മൻകുത്ത് സെന്‍റ് തോമസ് പള്ളിയുടെ നേതൃത്വത്തിൽ തോക്കുന്പൻസാഡിൽ റോഡിനോടു ചേർന്ന് നാരങ്ങാനം ഭാഗത്ത് സ്ഥാപിച്ച കുരിശ് പൊളിച്ചുനീക്കിയതിൽ വ്യാപക പ്രതിഷേധം. പള്ളിയുടെ കൈവശഭൂമിയിൽ വെള്ളിയാഴ്ചയാണ് കോണ്‍ക്രീറ്റ് കുരിശ് സ്ഥാപിച്ചത്. വലിയ നോന്പിലെ നാൽപ്പതാം വെള്ളിയാഴ്ച ഇടവകയുടെ നേതൃത്വത്തിൽ ഇവിടേക്ക് കുരിശിന്‍റെ വഴിയും നടത്തിയിരുന്നു. ഇതിനിടെയാണ് യാതൊരു മുന്നറിയിപ്പും നൽകാതെ വനംവകുപ്പ് ഉദ്യോഗസ്ഥർ പോലീസിന്‍റെ സഹായത്തോടെ സ്ഥലത്തെത്തി ഇന്നലെ രാവിലെ 11ഓടെ ജെസിബി ഉപയോഗിച്ച് കുരിശ് പൊളിച്ചുനീക്കിയത്. പിഴുതെടുത്ത കുരിശ് നശിപ്പിക്കാനായിരുന്നു ശ്രമം. ഈ സമയം സ്ഥലത്തുണ്ടായിരുന്ന വിശ്വാസികൾ ഇത് എതിർത്തതോടെ കുരിശ് ലോറിയിൽ കയറ്റി കൊണ്ടുപോകുകയായിരുന്നു. കുരിശ് പൊളിക്കുന്നത് എതിർത്ത നാട്ടുകാരനെ പോലീസ് പിടിച്ചുതള്ളുകയും ചെയ്തു. കുരിശ് പൊളിച്ചുനീക്കിയ സംഭവത്തിൽ ശക്തമായ പ്രതിഷേധമാണ് വിവിധ കോണുകളിൽനിന്ന് ഉയരുന്നത്. ഇന്നലെ വൈകുന്നേരം കത്തോലിക്ക കോണ്‍ഗ്രസിന്‍റെ നേതൃത്വത്തിൽ തൊമ്മൻകുത്ത് ടൗണിൽ പന്തംകൊളുത്തി പ്രകടനം നടത്തി. പ്രകടനത്തിൽ നൂറുകണക്കിനാളുകൾ പങ്കുചേർന്നു. വിഷയം ചർച്ച ചെയ്യാൻ ഇന്നു രാവിലെ പള്ളിയിൽ പൊതുയോഗം വിളിച്ചിട്ടുണ്ട്. കുരിശ് സ്ഥാപിച്ച സ്ഥലത്തുനിന്ന് ഒരുകിലോമീറ്ററോളം അകലെയാണ് വനംവകുപ്പിന്‍റെ ജണ്ടയുള്ളതെന്നും വർഷങ്ങളായി കൈവശത്തിലുള്ള ഭൂമിയിലാണ് കുരിശ് സ്ഥാപിച്ചിരുന്നതെന്നും വികാരി ഫാ. ജയിംസ് ഐക്കരമറ്റം പറഞ്ഞു. ഇവിടെ നിരവധി കുടുംബങ്ങൾ അധിവസിക്കുന്നുണ്ട്. ഇവർക്കെല്ലാം തങ്ങളുടെ സ്ഥലത്തിന് കൈവശരേഖയുമുണ്ട്. പള്ളിയുടെ കൈവശത്തിലുള്ള സ്ഥലത്ത് സ്ഥാപിച്ച കുരിശ് പൊളിച്ചുനീക്കുന്നതു സംബന്ധിച്ച് യാതൊരു അറിയിപ്പും നൽകിയിരുന്നില്ലെന്നും അദ്ദേഹം വ്യക്തമാക്കി. നേരത്തേ നെയ്യശേരി-തോക്കുന്പൻസാഡിൽ റോഡ് നിർമാണവുമായി ബന്ധപ്പെട്ട് നിരവധി തവണ തടസവാദവുമായി വനംവകുപ്പ് രംഗത്തുവന്നിരുന്നു. റോഡ് നിർമാണ കരാറുകാർക്കെതിരേ കേസെടുത്തതോടെ നിർമാണ പ്രവർത്തനം ദിവസങ്ങളോളം മുടങ്ങുകയും ചെയ്തു. ഇതിനു പുറമേ ആയിരക്കണക്കിനു സഞ്ചാരികൾ എത്തുന്ന ആനയാടിക്കുത്തിലേക്കുള്ള പ്രവേശനം തടയുന്നതിനും വനംവകുപ്പ് നേരത്തേ ശ്രമം നടത്തിയിരുന്നു. ആനയാടിക്കുത്തും വനംവകുപ്പിന്‍റെ അധീനതയിലാക്കാനുള്ള ശ്രമമാണ് ഇതിനു പിന്നിലെന്ന് നാട്ടുകാർ ആരോപിച്ചു. കർഷകൻ നട്ടുപിടിപ്പിച്ച സ്വന്തം കൃഷിയിടത്തിലെ മരങ്ങൾ വെട്ടിയെടുക്കുന്നതിനും വനംവകുപ്പ് തടസം നിൽക്കുകയാണ്. ഇതുമൂലം മരങ്ങൾ വാങ്ങാൻ ആരും തയാറാകുന്നില്ല. ആരെങ്കിലും വാങ്ങിയാൽ നാമമാത്ര വില മാത്രമാണ് കർഷകനു ലഭിക്കുന്നത്. സമീപനാളിൽ വനംവകുപ്പിന്‍റെ അനാവശ്യഇടപെടൽ പ്രദേശത്ത് വർധിച്ചുവരികയാണ്. ഇതു വലിയ പ്രതിഷേധത്തിനു കാരണമായിട്ടുണ്ട്. വനംവകുപ്പ് ഉദ്യോഗസ്ഥരെ നിലയ്ക്കുനിർത്താൻ സർക്കാർ തയാറാകണമെന്ന് നാട്ടുകാർ ആവശ്യപ്പെട്ടു. കത്തോലിക്ക കോൺഗ്രസ് പന്തംകൊളുത്തി പ്രകടനം നടത്തി തൊമ്മൻകുത്ത്: സെന്‍റ് തോമസ് പള്ളിയുടെ കീഴിൽ ആനയാടിക്കുത്തിനു സമീപം നാരങ്ങാനം ഭാഗത്ത് സ്ഥാപിച്ച കുരിശ് വനംവകുപ്പ് നശിപ്പിച്ചതിൽ പ്രതിഷേധിച്ച് കത്തോലിക്ക കോണ്‍ഗ്രസ് തൊമ്മൻകുത്ത് യൂണിറ്റിന്‍റെ നേതൃത്വത്തിൽ ടൗണിൽ പന്തംകൊളുത്തി പ്രകടനം നടത്തി. ഇന്നലെ വൈകുന്നേരം 6.30-ഓടെപള്ളി പരിസരത്തുനിന്ന് ആരംഭിച്ച പ്രകടനം മണിയൻസിറ്റി ചുറ്റി തിരികെ പള്ളിയിൽ സമാപിച്ചു.

പ്രകടനത്തിലും പ്രതിഷേധ യോഗത്തിലും നിരവധിപ്പേർ പങ്കെടുത്തു. വികാരി ഫാ. ജയിംസ് ഐക്കരമറ്റം, കത്തോലിക്ക കോണ്‍ഗ്രസ് യൂണിറ്റ് പ്രസിഡന്‍റ് സോജൻ കുന്നുംപുറത്ത് തുടങ്ങിയവർ പ്രസംഗിച്ചു. കേരള കോണ്‍ഗ്രസ് സംസ്ഥാന കോ-ഓർഡിനേറ്റർ അപു ജോണ്‍ ജോസഫ് സ്ഥലത്തെത്തിയിരുന്നു. അതേസമയം കുരിശ് സ്ഥാപിച്ച സ്ഥലം റിസർവ് വനമാണെന്നും ഇവിടെ കുരിശ് സ്ഥാപിച്ചസംഭവത്തിൽ കേസെടുത്തിട്ടുണ്ടെന്നും കാളിയാർ റേഞ്ച് ഓഫീസർ ടി.കെ. മനോജ് പറഞ്ഞു.

ബഫർസോണ്‍: ആശങ്ക പടർത്തിയത് മന്ത്രി-എംപി

തൊടുപുഴ: ഡാമുകൾക്ക് ചുറ്റും ബഫർ സോണ്‍ ഉത്തരവിറക്കി ജനങ്ങൾക്ക് ആശങ്കയുണ്ടാക്കിയത് മന്ത്രി റോഷി അഗസ്റ്റിനാണെന്ന് ഡീൻ കുര്യാക്കോസ് എംപി. ഈ ഉത്തരവ് കൂടാതെയാണ് ഡാമുകൾക്കും ജലവിഭവ വകുപ്പിന്‍റെ ചെറിയ കുളങ്ങൾക്കും ടാങ്കുകൾക്കും ചുറ്റും ഒരു കിലോമീറ്റർ മുതൽ 30 മീറ്റർ വരെ ബഫർ സോണ്‍ പ്രഖ്യാപിച്ച് ക്വാറിയിംഗും മൈനിംഗും നിരോധിച്ച് ഉത്തരവിറക്കിയത്. ഈ ഉത്തരവ് ഇതുവരെ പിൻവലിച്ചിട്ടില്ല. ജലവിഭവ വകുപ്പിന്‍റെ നിരവധി കുളങ്ങളും, ടാങ്കുകളും, ചെക്ക് ഡാമുകളും കൃഷി ഭൂമിയിലുണ്ട്. കൃഷി ഭൂമികൂടി ബഫർ സോണിന്‍റെ പരിധിയിലാക്കുന്ന ഈ ഉത്തരവ് അടിയന്തരമായി പിൻവലിക്കണം. ഡാമുകൾക്ക് സമീപം നിർമാണ പ്രവർത്തനങ്ങൾക്ക് നൽകുന്നതിനെക്കുറിച്ച് നിർദേശങ്ങൾ സമർപ്പിക്കാൻ 2023 ൽ സർക്കാർ വിദഗ്ധ സമിതിയെ നിയോഗിച്ചിരുന്നു. ഈ സമിതിയുടെ റിപ്പോർട്ടിന്‍റെ അടിസ്ഥാനത്തിലാണ് 2024 ഡിസംബർ 26 ന് ഡാമിന് ചുറ്റും രണ്ട് കാറ്റഗറികളായി തിരിച്ച് നിർമാണ പ്രവർത്തനങ്ങൾക്ക് നിയന്ത്രണമേർപ്പെടുത്തി ജലവിഭവ വകുപ്പ് ഉത്തരവ് ഇറക്കിയത്. ഈ ഉത്തരവാണ് വൈദ്യുതി ബോർഡിന്‍റെ ഡാമുകളിലേക്ക് വ്യാപിപ്പിക്കുന്ന കാര്യം പരിഗണനയിലാണെന്ന് വൈദ്യുതി മന്ത്രി അൻവർ സാദത്തിന്‍റെ നിയമസഭയിലെ ചോദ്യത്തിന് രേഖാമൂലം മറുപടി നൽകിയതും വിവാദമായപ്പോൾ നടപ്പാക്കില്ലന്ന് പത്രകുറിപ്പ് ഇറക്കിയതും. ജലവിഭവ വകുപ്പിന്‍റെ ബഫർ സോണ്‍ ഉത്തരവ് പിൻവലിച്ചതുകൊണ്ടോ വൈദ്യുതി ബോർഡ് പത്രക്കുറിപ്പ് ഇറക്കിയത് കൊണ്ടോ പ്രശ്നം പരിഹരിക്കപ്പെടില്ലെന്ന് എംപി പറഞ്ഞു. കോടതിയിൽ നിന്ന് അനുകൂല വിധിയുണ്ടായാൽ മാത്രമേ ബഫർ സോണിൽ നിന്ന് രക്ഷപെടാൻ കഴിയു. ഈ പ്രശ്നം പൂർണമായും പരിഹരിക്കാൻ വിദഗ്ധ സമിതിയുടെ റിപ്പോർട്ട് തള്ളിക്കളഞ്ഞ് ജണ്ടയ്ക്ക് പുറത്തുള്ള ഭൂമിയിൽ നിർമാണത്തിന് നിയന്ത്രണമില്ലെന്ന് സർക്കാർ കോടതിയെ ധരിപ്പിക്കണം. ഡിസംബർ 26 ലെ ബഫർ സോണ്‍ ഉത്തരവ് പിൻവലിച്ചതിലെ അവ്യക്തതയും പരിഹരിക്കണമെന്നും അല്ലെങ്കിൽ ഹൈക്കോടതിയിൽ തിരിച്ചടി നേരിടുമെന്നും അദ്ദേഹം പറഞ്ഞു.

സാൻജോ മൗണ്ടിൽ നാൽപതാം വെള്ളി ആചരിച്ചു

വടക്കുംമുറി: കുരിശുമല തീർഥാടന കേന്ദ്രമായ വടക്കുംമുറി സാൻജോ മൗണ്ടിൽ നാൽപതാം വെള്ളി ആചരണം നടത്തി. കോട്ടയം അതിരൂപത വികാരി ജനറാൾ ഫാ. തോമസ് ആനിമൂട്ടിൽ വിശുദ്ധ കുർബാന അർപ്പിച്ചു. ചുങ്കം ഫൊറോനയിലെ എല്ലാ ഇടവകകളുടെയും നേതൃത്വത്തിൽ കുരിശുമലകയറ്റവും നടന്നു. ഫൊറോന വികാരി ഫാ.ജോണ്‍ ചേന്നാക്കുഴി, വടക്കുംമുറി വികാരി ഫാ. ദിപു ഇറപുറത്ത്, ജയിംസ് പൂതക്കാട്ട്, ബിജു പള്ളിപ്പുറത്ത് എന്നിവർ നേതൃത്വം നൽകി.

മുതലക്കോടം ഫൊറോന പള്ളിയിൽ തിരുനാൾ 21 മുതൽ

തൊടുപുഴ: തീർഥാടന കേന്ദ്രമായ മുതലക്കോടം സെന്‍റ് ജോർജ് ഫൊറോന പള്ളിയിൽ ഇടവക മധ്യസ്ഥന്‍റെ തിരുനാൾ 21 മുതൽ 24 വരെ ആഘോഷിക്കുമെന്ന് വികാരി റവ. ഡോ. ജോർജ് താനത്തുപറന്പിൽ പത്രസമ്മേളനത്തിൽ അറിയിച്ചു. തിരുനാളിന് ഒരുക്കമായുള്ള വിശുദ്ധ കുർബാനയും നൊവേനയും ആരംഭിച്ചു. എല്ലാ ദിവസവും രാവിലെ 10ന് വിശുദ്ധ കുർബാനയും നൊവേനയും നടക്കും. 21ന് രാവിലെ ഏഴിന് മാർ ജോർജ് പുന്നക്കോട്ടിൽ കൊടിയേറ്റും. തുടർന്ന് 10നും ഉച്ചകഴിഞ്ഞ് 2.30 നും വൈകുന്നേരം ഏഴിനും വിശുദ്ധ കുർബാന, നൊവേന. 22ന് രാവിലെ 10ന് വിശുദ്ധ കുർബാന (സുറിയാനി ക്രമം), സന്ദേശം, നൊവേന - ഫാ. സെബാസ്റ്റ്യൻ നെടുന്പുറത്ത്, 2.30ന് വിശുദ്ധ കുർബാന, നൊവേന-ഫാ. ജിൻസ് പുളിക്കൽ. വൈകുന്നേരം 4.30ന്് പഴുക്കാകുളം കുരിശുപള്ളിയിൽ വിശുദ്ധ കുർബാന-ഫാ. ജോസഫ് കൂനാനിക്കൽ, സന്ദേശം-ഫാ. ജോർജ് മാറാപ്പിള്ളിൽ. തുടർന്ന് മുതലക്കോടം പള്ളിയിലേക്ക് പ്രദക്ഷിണം. 23ന് രാവിലെ ഒൻപതിന് വിശുദ്ധ കുർബാന, സന്ദേശം, നൊവേന-ഫാ. ജോസ് വടക്കേടത്ത്, 10.30ന് വിശുദ്ധ കുർബാന, സന്ദേശം, നൊവേന-മോണ്‍. വിൻസെന്‍റ് നെടുങ്ങാട്ട്, 2.30ന് വിശുദ്ധ കുർബാന, സന്ദേശം, നൊവേന-ഫാ. ബിബിൻ പുത്തൂർ, വൈകുന്നേരം അഞ്ചിന് കോതമംഗലം ബിഷപ് മാർ ജോർജ് മഠത്തിക്കണ്ടത്തിൽ പൊന്തിഫിക്കൽ കുർബാനയർപ്പിച്ച് സന്ദേശം നൽകും. തുടർന്ന് തിരുനാൾ പ്രദക്ഷിണം. പ്രധാന തിരുനാൾ ദിനമായ 24ന് രാവിലെ 7.30ന് വിശുദ്ധ കുർബാന, സന്ദേശം, നൊവേന-ഫാ. ജയിംസ് മുണ്ടോളിക്കൽ, ഒൻപതിന് വിശുദ്ധ കുർബാന, സന്ദേശം, നൊവേന - ഫാ. ജോസ് കുളത്തൂർ, 10.30ന് വിശുദ്ധ കുർബാന- ഫാ. ആന്‍റണി വെണ്ണായപ്പിള്ളിൽ, സന്ദേശം-ഫാ. ഡയസ് ആന്‍റണി വലിയമരുതുങ്കൽ. തുടർന്ന് 12.30ന് വചനമണ്ഡപം ചുറ്റി പള്ളിയിലേക്ക് പ്രദക്ഷിണം. ഉച്ചകഴിഞ്ഞ് 2.30ന് വിശുദ്ധ കുർബാന, സന്ദേശം, നൊവേന-ഫാ. ജോർജ് പീച്ചാനിക്കുന്നേൽ, വൈകുന്നേരം 4.30ന് വിശുദ്ധ കുർബാന, സന്ദേശം, നൊവേന -ഫാ. അഗസ്റ്റിൻ നിരപ്പേൽ. 25 മുതൽ 30 വരെ വൈകുന്നേരം 4.30ന് വിശുദ്ധ കുർബാനയും സന്ദേശവും നൊവേനയും നടക്കും. മേയ് ഒന്നിന് എട്ടാമിടത്തോടനുബന്ധിച്ച് രാവിലെ ആറിനും 7.30നും വിശുദ്ധ കുർബാന. ഒൻപതിന് വിശുദ്ധ കുർബാന, സന്ദേശം, നൊവേന-ഫാ. കുര്യൻ കുരീക്കാട്ടിൽ, 10.30ന് തിരുനാൾ കുർബാന-ഫാ. സിൽജോ ആവണിക്കുന്നേൽ, സന്ദേശം-ഫാ. ജോസഫ് ആലഞ്ചേരി, തുടർന്ന് പ്രദക്ഷിണം. പത്രസമ്മേളനത്തിൽ അസി. വികാരിമാരായ ഫാ. സിറിയക് മഞ്ഞക്കടന്പിൽ, ഫാ. വർഗീസ് കണ്ണാടൻ, ഫാ. ആൽബിൻ കരിമാക്കിൽ, കൈക്കാരന്മാരായ സാന്‍റോ പോൾ ചെന്പരത്തി, പോൾ വർഗീസ് മച്ചുകുഴി, ജോജോ ജോസഫ് പാറത്തലയ്ക്കൽ, കെ.പി. മാത്യു കൊച്ചുപറന്പിൽ, ജനറൽ കണ്‍വീനർ കെ.കെ. ജോസഫ് കല്ലിങ്കക്കുടിയിൽ, കണ്‍വീനർമാരായ സെബാസ്റ്റ്യൻ കട്ടപ്പുറം, തോമസ്കുട്ടി വർഗീസ് വടക്കേപറന്പിൽ, ബോണി മാത്യു ഞാളൂർ എന്നിവർ പങ്കെടുത്തു.

കുടുംബത്തിന്‍റെ ആത്മഹത്യ: അന്വേഷണം തുടങ്ങി

ഉപ്പുതറ: ഒൻപതേക്കറിൽ നാലംഗ കുടുംബം ആത്മഹത്യ ചെയ്ത സംഭവത്തിൽ പോലീസ് അന്വേഷണം ആരംഭിച്ചു. ഒൻപതേക്കർ എംസി കവലയ്ക്കു സമീപം പട്ടത്തന്പലം സജീവ് (36), ഭാര്യ രേഷ്മ (25), മക്കളായ ദേവൻ (5), ദിയ (4) എന്നിവർ മരിച്ച കേസിലാണ് അന്വേഷണം. കട്ടപ്പനയിലെ സ്വകാര്യ ധനകാര്യ സ്ഥാപനത്തിൽ സജീവ് ഓട്ടോറിക്ഷ പണയപ്പെടുത്തി എടുത്തിരുന്ന വായ്പയുടെ തിരിച്ചടവ് മുടങ്ങിയതോടെ ജീവനക്കാർ വിളിച്ച് ഭീഷണിപ്പെടുത്തിയതിനെ തുടർന്നാണ് മരിച്ചതെന്നു വ്യക്തമാക്കുന്ന ആത്മഹത്യാക്കുറിപ്പ് പോലീസ് കണ്ടെത്തിയിരുന്നു. നിലവിൽ അസ്വാഭാവിക മരണത്തിനാണ് കേസെടുത്തിരിക്കുന്നത്. കുടുംബത്തെ ഭീഷണിപ്പെടുത്തിയവർക്കെതിരെ കൊലക്കുറ്റത്തിന് കേസെടുക്കണമെന്നാവശ്യപ്പെട്ട് ഡി വൈ എഫ് ഐയും ഓട്ടോറിക്ഷാ തൊഴിലാളികളും ഉപ്പുതറ ടൗണിൽ പ്രതിഷേധ പ്രകടനവും യോഗവും നടത്തി. യോഗം സി പിഎം ഉപ്പുതറ ലോക്കൽ സെക്രട്ടറി കെ. കലേഷ് കുമാർ ഉദ്ഘാടനം ചെയ്തു.

പതിവ് തെറ്റിച്ചില്ല; എട്ടാം വർഷത്തിലും മോഹനൻ കുരുത്തോലയുമായെത്തി

രാജാക്കാട്: ഓശാനത്തിരുനാളിൽ മതസൗഹാർദത്തിന്‍റെ സന്ദേശം കുരുത്തോലയിലൂടെ പങ്കുവച്ച് ഹൈന്ദവ സഹോദരൻ. രാജാക്കാട് ഓണംപാറയിൽ മോഹനനാണ് മതസൗഹാർദത്തിന്‍റെ പ്രതീകമായി രാജാക്കാട് ക്രിസ്തുരാജ ഫൊറോന പള്ളിക്ക് സ്വന്തം പുരയിടത്തിലെ കുരുത്തോല മുറിച്ചുനൽകി മാതൃകയായത്. തന്‍റെ പുരയിടത്തിലുളള 18 തെങ്ങുകളുടെ കുരുത്തോലകളാണ് പള്ളിക്ക് നൽകിയത്. ടൗണിൽ മുനീന്ദ്ര ബാർബർ ഷോപ്പ് എന്ന സ്ഥാപനം നടത്തുന്ന മോഹനൻ കഴിഞ്ഞ ഏഴുവർഷമായി ഇതിനു മുടക്കംവരുത്തിയിട്ടില്ല. രാജാക്കാടിനു പുറമേ ജോസ്ഗിരി പള്ളിയിലും കുരുത്തോലകൾ എത്തിച്ചു നൽകാറുണ്ട്. ഹൈറേഞ്ച് മേഖലയിൽ മണ്ടവീഴ്ചമൂലം തെങ്ങുകൾ വ്യാപകമായി നശിച്ചതിനെത്തുടർന്ന് ഓശാന ഞായറാഴ്ച പള്ളികളിൽ വിതരണം ചെയ്യാൻ ആവശ്യമായ കുരുത്തോല ലഭ്യമാക്കാൻ അധികൃതർ ബുദ്ധിമുട്ടുന്ന സാഹചര്യമാണ് നിലവിലുള്ളത്. ഇതു തിരിച്ചറിഞ്ഞാണ് മോഹനൻ രാജാക്കാട് പള്ളിയിൽ കഴിഞ്ഞ ഏഴുവർഷമായി മുടങ്ങാതെ കുരുത്തോല എത്തിച്ചു നൽകുന്നത്. 1,089 കുടുംബങ്ങളുള്ള ഇടവകയിൽ ഓശാനഞായറാഴ്ച നൽകാൻ 5,000 ത്തിലധികം കുരുത്തോലകൾ ആവശ്യമാണ്. ടൗണ്‍ പള്ളിയായതിനാൽ സമീപ ഇടവകകളിൽനിന്ന് ഓശാന ഞായറാഴ്ച കൂടുതൽ വിശ്വാസികൾ എത്താറുണ്ട്. ഇവർക്കെല്ലാം ആവശ്യമായ കുരുത്തോലകൾ നൽകുന്നതിന് ഒരിക്കലും തടസമുണ്ടായിട്ടില്ല. പ്രദേശത്ത് ഏലം കൃഷിയാണ് കൂടുതലുള്ളത്. തെങ്ങ് കൃഷി കുറഞ്ഞുവരുന്നതു കുരുത്തോലകൾക്ക് ക്ഷാമത്തിനു കാരണമാകുന്നുണ്ട്. എന്നാൽ മോഹനനെപ്പോലുള്ളവർ ഉണ്ടെങ്കിൽ ഒരിക്കലും കുരുത്തോലകൾക്ക് ക്ഷാമം ഉണ്ടാകില്ലെന്നു വികാരി ഫാ. മാത്യു കരോട്ട് കൊച്ചറയ്ക്കൽ പറഞ്ഞു. സഹ വികാരി ഫാ. സെബാസ്റ്റ്യൻ മച്ചുകാട്ട്, കൈക്കാരൻ ബിനോയി കൂനംമാക്കൽ, പാരീഷ് കൗണ്‍സിൽ സെക്രട്ടറി സജി പൂവത്തിങ്കൽ, ഷൈൻ കോവൂർ, മനോജ് തട്ടാറുകുന്നേൽ എന്നിവർ ചേർന്നാണ് കുരുത്തോല ഏറ്റുവാങ്ങിയത്.

ജില്ലാ ആശുപത്രിയിലെ ചികിത്സാപ്പിഴവ് ; ഡിഎംഒ റിപ്പോർട്ട് തേടി

തൊടുപുഴ: ജില്ലാ ആശുപത്രിയിൽ ഗുരുതര ചികിൽസാപ്പിഴവുണ്ടായ സംഭവത്തിൽ ജില്ലാ മെഡിക്കൽ ഓഫീസർ റിപ്പോർട്ട് തേടി. ഡോക്ടർമാരുടെയും സർജന്‍റെയും ചികിത്സാപ്പിഴവ് മൂലം കാലിലുണ്ടായ മുറിവിനുള്ളിൽ ലോഹക്കഷണവുമായി യുവാവിന് രണ്ടാഴ്ചയോളം ദുരിതം അനുഭവിക്കേണ്ടി വന്ന സംഭവത്തിലാണ് ജില്ലാ മെഡിക്കൽ ഓഫീസർ ഡോ. സുരേഷ് വർഗീസ് ആശുപത്രി സൂപ്രണ്ടിനോട് റിപ്പോർട്ട് ആവശ്യപ്പെട്ടത്. ഇതു ലഭിച്ചതിനു ശേഷം തുടർനടപടികൾ സ്വീകരിക്കുമെന്ന് അദ്ദേഹം പറഞ്ഞു. ഇടവെട്ടി സ്വദേശി വടക്കേചെറുകോട്ടിൽ മുഹമ്മദ് ഹാജയാണ് ജില്ലാ ആശുപത്രിയിൽ മുറിവിനു ചികിത്സ തേടിയെത്തി ദുരിതത്തിലായത്. മാർച്ച് 29ന് ജോലി സ്ഥലത്തു വച്ചാണ് മുഹമ്മദ് ഹാജയുടെ കാലിൽ ഗ്രൈൻഡർ കൊണ്ട് മുറിവുണ്ടായത്. ഉടൻ ജില്ലാ ആശുപത്രിയിലെത്തി ചികിത്സ തേടി. ആഴത്തിലുള്ള മുറിവായതിനാൽ ഞരന്പ് മുറിഞ്ഞിട്ടുണ്ടോയെന്ന് അറിയാനായി ഡോക്ടറുടെ നിർദ്ദേശ പ്രകാരം എക്സ് റേ എടുത്ത് പരിശോധിക്കുകയും ചെയ്തു. തുടർന്ന് മുറിവിൽ തുന്നലിട്ട് ഒന്നിടവിട്ട ദിവസങ്ങളിൽ ആശുപത്രിയിൽ വന്ന് മരുന്ന് വച്ച് ഡ്രസ് ചെയ്യണമെന്നും നിർദ്ദേശിച്ചു. ഇതനുസരിച്ച് ഏപ്രിൽ ഒന്നിന് ആശുപത്രിയിലെത്തി. എന്നാൽ പഴുപ്പ് കുറയാത്തതിനാൽ രണ്ടിന് വീണ്ടുമെത്തി ഡോക്ടറെ കണ്ട് വിവരം പറഞ്ഞു. ഡോക്ടർ സർജന്‍റെ അടുത്തേയ്ക്ക് പറഞ്ഞയച്ചു. പരിശോധന നടത്തി സർജൻ തുടർന്നുള്ള എല്ലാ ദിവസവും മുറിവിൽ മരുന്ന് വച്ച് ഡ്രസ് ചെയ്യാൻ നിർദേശിച്ച് മടക്കി. സർജന്‍റെ നിർദേശപ്രകാരം പിന്നീടുള്ള ദിവസങ്ങളിൽ ജില്ലാ ആശുപത്രിയിലെത്തി മരുന്ന് വച്ചെങ്കിലും പഴുപ്പ് കുറഞ്ഞില്ല. ഇക്കാര്യം ശ്രദ്ധയിൽപ്പെടുത്തിയപ്പോൾ തുന്നൽ നീക്കാൻ നിർദ്ദേശിച്ചു. ഇതിന് ശേഷവും പഴുപ്പും വേദനയും കുറയുകയോ കാൽ നിലത്ത് കുത്താനോ പറ്റാത്ത സ്ഥിതി തുടർന്നു. ഇതോടെ കഴിഞ്ഞ ദിവസം ഇടവെട്ടിയിലെ പ്രാഥമികാരോഗ്യ കേന്ദ്രത്തിലെത്തി ഡോക്ടറെ കണ്ടു. ഇവിടുത്തെ ഡോക്ടർ നടത്തിയ പരിശോധനയിൽ കാലിലെ മുറിവിനുള്ളിൽ അപകടത്തിനിടയാക്കിയ ഗ്രൈൻഡറിന്‍റെ ഒരു ലോഹക്കഷണം തറഞ്ഞിരിക്കുന്നതായി കണ്ടെത്തി. അതു നീക്കം ചെയ്ത് മരുന്ന് വച്ചപ്പോഴാണ് വേദനയ്ക്ക് ആശ്വാസമായതെന്ന് മുഹമ്മദ് ഹാജ പറഞ്ഞു. സംഭവത്തിൽ ആദ്യം ചികിത്സിച്ച ജില്ലാ ആശുപത്രിയിലെ ഡോക്ടർക്കും സർജനും ഡ്രസിംഗ് നടത്തിയ നഴ്സുമാർക്കുമെതിരേ ആശുപത്രി സൂപ്രണ്ടിന് മുഹമ്മദ് ഹാജ പരാതി നൽകി. സംഭവത്തിൽ കുറ്റക്കാർക്കെതിരേ നടപടി സ്വീകരിക്കണമെന്നാണ് ഇവരുടെ ആവശ്യം.

അമൂല്യമാണ് ജീവൻ, ആത്മഹത്യ ഒന്നിനും പരിഹാരമല്ല; അഞ്ചു വർഷത്തിനിടെ ജീവിതം അവസാനിപ്പിച്ചത് 2204 പേർ

തൊടുപുഴ: പ്രതിസന്ധികൾ നേരിടുന്നതോടെ നിരാശയിലാണ്ട് ജീവിതം അവസാനിപ്പിക്കുന്നവരുടെ എണ്ണം ജില്ലയിൽ കൂടുന്നതായി കണക്കുകൾ. ജില്ലയിൽ ക്രൈം റെക്കോഡ്സ് ബ്യൂറോയുടെ കണക്കുകൾ പ്രകാരം അഞ്ചു വർഷത്തിനിടെ 2204 പേരാണ് ജില്ലയിൽ വിവിധ കാരണങ്ങളാൽ ജീവനൊടുക്കിയത്. 2020 ജനുവരി മുതൽ 2025 മാർച്ച് വരെയുള്ള കണക്കാണിത്. കടബാധ്യതയെത്തുടർന്ന് ഉപ്പുതറയിൽ പിഞ്ചുകുട്ടികൾ ഉൾപ്പെടെ നാലംഗ കുടുബം ജീവനൊടുക്കിയത് കഴിഞ്ഞ ദിവസമാണ്. ജീവിതം അവസാനിപ്പിക്കുന്നവരുടെ എണ്ണം വർധിച്ചതോടെ സംഭവത്തിന്‍റെ ഗൗരവം കണക്കിലെടുത്ത് ബോധവത്കരണവും മറ്റും വേണമെന്ന ആവശ്യവും ശക്തിപ്പെട്ടിട്ടുണ്ട്. 2017-ൽ 319 ആത്മഹത്യകളാണ് ജില്ലയിൽ നടന്നത്. 2018-ൽ ഇത് 379 ആയി ഉയർന്നു. 2020 ഓടെ എണ്ണം പിന്നെയും കൂടി വന്നു. കുടുംബപ്രശ്നങ്ങൾ, കട ബാധ്യത, മാറാരോഗങ്ങൾ, ലഹരി, സൈബർ രംഗത്തെ ചൂഷണങ്ങൾ, മാനസിക പ്രശ്നങ്ങൾ തുടങ്ങിയവയാണ് ആത്മഹത്യക്ക് പ്രധാന കാരണങ്ങളായി ചൂണ്ടിക്കാട്ടുന്നത്. വർഷങ്ങൾക്ക് മുൻപ് ജില്ലയിൽ കർഷക ആത്മഹത്യകൾ മാത്രമാണ് കൂടുതലായി കേട്ടിരുന്നത്. എന്നാൽ അതു മാറി ഇപ്പോൾ സാന്പത്തിക പ്രയാസങ്ങളും കുടുംബപ്രശ്നങ്ങളും മൂലമുള്ള ആത്മഹത്യകൾ കൂടിയതായി കണക്കുകൾ വ്യക്തമാക്കുന്നു. കുടുംബങ്ങളിൽനിന്നും സമൂഹത്തിൽനിന്നുമുള്ള ഒറ്റപ്പെടുത്തലും ഇതേത്തുടർന്നുണ്ടാകുന്ന മാനസിക പ്രശ്നങ്ങളും പ്രധാനമായി ആത്മഹത്യക്ക് കാരണമാകുന്നതായും വിദഗ്ധർ പറയുന്നു. ജീവനൊടുക്കുന്നവരിൽ മുന്നിൽ പുരുഷൻമാരാണ്. അടുത്തിടെ യുവാക്കളിലും വിദ്യാർഥികൾക്കിടയിലും ആത്മഹത്യാപ്രവണത ഏറി വരുന്നതായി ആരോഗ്യവകുപ്പ് അധികൃതരും ചൂണ്ടിക്കാട്ടുന്നു. കഴിഞ്ഞ വ്യാഴാഴ്ചയാണ് ഉപ്പുതറ ഒൻപതേക്കർ പട്ടത്തന്പലം മോഹനന്‍റെ മകൻ സജീവ്, (34 , ഭാര്യ രേഷ്മ (30) മകൻ ദേവൻ (5), ദിവ്യ (3) എന്നിവരെയാണ് തൂങ്ങിമരിച്ച നിലയിൽ വീടിനുള്ളിൽ കണ്ടെത്തിയത്. കടബാധ്യതയാണ് കൂട്ടത്തോടെ ജീവനൊടുക്കാനുള്ള കാരണം. പ്രതിസന്ധികളെ തരണം ചെയ്യാനും ദുരിതങ്ങൾ അനുഭവിക്കുന്നവർക്ക് കൈത്താങ്ങാകാനും സമൂഹം കൂടുതൽ ജാഗ്രത പാലിക്കണമെന്ന സന്ദേശമാണ് ഈ മരണങ്ങൾ നൽകുന്നത്. അഞ്ചു വർഷത്തിനിടെ ജില്ലയിൽ ഏറ്റവും കൂടുതൽ ആളുകൾ ജീവനൊടുക്കിയത് അടിമാലിയിലാണ്. 151 പേരാണ് ഇവിടെ ജീവിതം അവസാനിപ്പിച്ചത്. നെടുങ്കണ്ടം - 146, തൊടുപുഴ -140, കുമളി -131, മുട്ടം -28, പീരുമേട് -76, പെരുവന്താനം - 35, രാജാക്കാട് -96, ശാന്തൻപാറ - 108, തങ്കമണി - 54, ഉടുന്പൻചോല -77, ഉപ്പുതറ- 99, വാഗമണ്‍ - 42, വണ്ടൻമേട്- 89, വണ്ടിപെരിയാർ - 71, വെള്ളത്തൂവൽ-103, കന്പംമെട്ട് - 49, ദേവികുളം -32, ഇടുക്കി - 53, കാളിയാർ - 49,കഞ്ഞിക്കുഴി -75, കരിമണൽ - 4, കരിമണ്ണൂർ -64, കരിങ്കുന്നം -33, കട്ടപ്പന - 128, കുളമാവ് -14, മറയൂർ -41, മൂന്നാർ - 90, മുരിക്കാശേരി -42 എന്നിങ്ങനെയാണ് വിവിധ പ്രദേശങ്ങളിൽ ജീവനൊടുക്കിയവരുടെ എണ്ണം.

നഗരത്തിൽ സ്വകാര്യബസുകളുടെ മരണപ്പാച്ചിൽ

തൊടുപുഴ: നഗരത്തിൽ സ്വകാര്യബസുകളുടെ അമിതവേഗം നിയന്ത്രിക്കണമെന്ന ആവശ്യം ശക്തമാകുന്നു. തിരക്കേറിയ നഗരവീഥികളിലൂടെ മറ്റു വാഹന യാത്രക്കാരെ ഭയപ്പെടുത്തുന്ന രീതിയിലാണ് ഇവരുടെ പരക്കംപാച്ചിൽ. അമിത ശബ്ദത്തിൽ ഹോണ്‍ മുഴക്കുക, ഹെഡ് ലൈറ്റുകൾ തെളിക്കുക തുടങ്ങിയവ ചില സ്വകാര്യ ബസ് ഡ്രൈവർമാരുടെ പതിവുപരിപാടികളാണ്. പിന്നിൽനിന്ന് ഇവരുടെ അമിതവേഗവും വലിയ ശബ്ദവും മൂലം ചെറുവാഹന ഡ്രൈവർമാർ ആശങ്കയിലാവുകയും അപകടം ഉണ്ടാവുകയും ചെയ്യുന്നതും പതിവാണ്. മുന്നിലുള്ള വാഹനങ്ങളെ മറികടക്കാൻ സ്ഥലം ഇല്ലെങ്കിലും ചില സ്വകാര്യ ബസ് ഡ്രൈവർമാർ നിയമം കാറ്റിൽപ്പറത്തി മറികടക്കാൻ ശ്രമിക്കുകയും അപകടം ഉണ്ടാവുകയും ചെയ്യുന്നു. ശനിയാഴ്ച ഉച്ചയോടെ തൊടുപുഴ കാഞ്ഞിരമറ്റം ബൈപാസ് ജംഗ്ഷനിൽ ട്രാഫിക് റൗണ്ടിൽ കാറിന് പിന്നിൽ സ്വകാര്യ ബസ് ഇടിച്ച് അപകടമുണ്ടായി. റൗണ്ടിന് സമീപമുള്ള ഡിവൈഡർ ശ്രദ്ധിക്കാതെ ബസ് മുന്നോട്ട് എടുത്തതാണ് അപകട കാരണം. എന്നാൽ കുറ്റം കാർ ഡ്രൈവറുടെ മേൽ ആരോപിച്ച് സംഘടിതരായ സ്വകാര്യ ബസ് ജീവനക്കാർ ഇയാളെ ഭീഷണിപ്പെടുത്തുകയായിരുന്നു. അപകടം സംഭവിച്ചിട്ടും പോലീസ് യാതൊരു നടപടിയും സ്വീകരിക്കുന്നില്ല. കാഞ്ഞിരമറ്റത്തെ ട്രാഫിക് റൗണ്ടിൽ പലപ്പോഴും സ്വകാര്യ ബസുകൾ അമിതവേഗത്തിലാണ് പായുന്നത്. നാലു റോഡുകൾ സംഗമിക്കുന്ന ഇവിടെ ഏറെ ശ്രദ്ധയോടെ വാഹനം ഓടിച്ചില്ലെങ്കിൽ അപകടം ഉണ്ടാകുമെന്നുറപ്പാണ്. പലപ്പോഴും ഇവിടെ വാഹനങ്ങൾ ഇടിച്ച് അപകടം ഉണ്ടാകാറുമുണ്ട്. എന്നാൽ അപകടം ഒഴിവാക്കാൻ മുന്നറിയിപ്പു സംവിധാനങ്ങളോ ട്രാഫിക് പോലീസിന്‍റെ സേവനമോ ഇവിടെ ഏർപ്പെടുത്തിയിട്ടില്ല.

സാബുവിന്‍റെ മരണം: പോലീസ് മേധാവിക്ക് പരാതി നൽകാൻ മനുഷ്യാവകാശ കമ്മീഷൻ നിർദേശം

തൊടുപുഴ: കട്ടപ്പനയിലെ സഹകരണസംഘത്തിനു മുന്നിൽ നിക്ഷേപകനായ കട്ടപ്പന മുളങ്ങാശേരിൽ സാബു തോമസ് ജീവനൊടുക്കിയ സംഭവത്തിൽ പുനരന്വേഷണം ആവശ്യപ്പെട്ട് ഭാര്യ മേരിക്കുട്ടി. കട്ടപ്പന റൂറൽ ഡവലപ്മെന്‍റ് കോ-ഓപ്പറേറ്റീവ് സൊസൈറ്റിക്ക് മുന്നിൽ സാബു ജീവനൊടുക്കിയ സംഭവത്തിൽ ഭാര്യ മേരിക്കുട്ടി മനുഷ്യാവകാശ കമ്മീഷന് പരാതി നൽകിയിരുന്നു. വെള്ളിയാഴ്ച തൊടുപുഴയിൽ നടന്ന സിറ്റിംഗിൽ പരാതി പരിഗണിക്കവേയാണ് പുനരന്വേഷമെന്ന ആവശ്യം മേരിക്കുട്ടി ഉന്നയിച്ചത്. പോലീസ് നടത്തിയ അന്വേഷണം തൃപ്തികരമല്ലെന്നും യഥാർഥ പ്രതികളെ പോലീസ് സംരക്ഷിക്കുകയാണെന്നും സിറ്റിംഗിൽ കമ്മീഷനു മുന്പാകെ മേരിക്കുട്ടി പറഞ്ഞു. ഇതോടെ ജില്ലാ പോലീസ് മേധാവിക്ക് പുനരന്വേഷണം ആവശ്യപ്പെട്ട് പരാതി നൽകാൻ മേരിക്കുട്ടിയോട് മനുഷ്യാവകാശ കമ്മീഷൻ ചെയർപേഴ്സണ്‍ ജസ്റ്റിസ് അലക്സാണ്ടർ തോമസ് നിർദേശിച്ചു. പുനരന്വേഷണം കുറ്റമറ്റരീതിയിൽ നടത്താൻ ജില്ലാ പോലീസ് മേധാവിക്ക് നിർദേശം നൽകുമെന്നും കമ്മീഷൻ അറിയിച്ചു. കേസിൽ കഴിഞ്ഞ ദിവസം പോലീസ് കട്ടപ്പന കോടതിയിൽ കുറ്റപത്രം നൽകിയിരുന്നു. സംഘം സെക്രട്ടറി റെജി ഏബ്രഹാം, സീനിയർ ക്ലർക്ക് സുജാമോൾ ജോസ്, ജൂണിയർ ക്ലർക്ക് ബിനോയി തോമസ് എന്നിവരെയാണ് പോലീസ് പ്രതിയാക്കിയിരിക്കുന്നത്. എന്നാൽ ആത്മഹത്യാപ്രേരണയ്ക്ക് സംഘം മുൻ പ്രസിഡന്‍റും സിപിഎം ജില്ലാകമ്മിറ്റിയംഗവുമായ വി.ആർ. സജിക്കെതിരേയും കേസെടുക്കണമെന്നും മേരിക്കുട്ടി കമ്മീഷന് നൽകിയ പരാതിയിൽ ആവശ്യപ്പെട്ടു. സംഘത്തിലെ സാബുവിന്‍റെ ഇടപാടുകൾ സംബന്ധിച്ച സ്റ്റേറ്റ്മെന്‍റുകൾ ആവശ്യപ്പെട്ടിട്ടും തരാൻ അധികൃതർ തയാറായിട്ടില്ലെന്നും ഇവർ കമ്മീഷനെ അറിയിച്ചു. കഴിഞ്ഞ ഡിസംബർ 20നാണ് സാബു സൊസൈറ്റിക്ക് മുന്നിൽ ആത്മഹത്യ ചെയ്തത്. പ്രതിഷേധം ശക്തമായതോടെ ജില്ലാ പോലീസ് മേധാവി ഇടപെട്ട് ഡിവൈഎസ്പിയും രണ്ട് സിഐമാരും രണ്ട് എസ്ഐമാരും അടങ്ങുന്ന പ്രത്യേക അന്വേഷണ സംഘത്തെ നിയോഗിച്ചിരുന്നു. സംഘം ജീവനക്കാരായ പ്രതികൾ മുൻകൂർ ജാമ്യം നേടിയതിനാൽ ഇവരെ അറസ്റ്റ് ചെയ്തില്ല. സംഘത്തിൽനിന്ന് ഇവരെ സസ്പെൻഡ് ചെയ്തെങ്കിലും കഴിഞ്ഞ ദിവസം വീണ്ടും ജോലിയിൽ പ്രവേശിപ്പിച്ചിരുന്നു.

മരിയാപുരം സ്കൂൾ സുവർണജൂബിലി ആഘോഷം ഉദ്ഘാടനം ചെയ്തു

ചെറുതോണി: മരിയാപുരം സെന്‍റ് മേരീസ് ഹയർ സെക്കൻഡറി സ്കൂൾ സുവർണ ജൂബിലി ആഘോഷങ്ങളുടെയും ഫിക്സേഷൻ ലഭിച്ച സയൻസ് ബാച്ചിന്‍റെയും നവീകരിച്ച സ്കൂൾ ഓഡിറ്റോറിയത്തിന്‍റെയും എൻസിസി യൂണിറ്റിന്‍റെയും ഉദ്ഘാടനം നടന്നു. സ്കൂൾ ഓഡിറ്റോറിയത്തിൽ നടന്ന ജൂബിലി സമ്മേളനം മന്ത്രി റോഷി അഗസ്റ്റിൻ ഉദ്ഘാടനം ചെയ്തു. ഇടുക്കി ബിഷപ് മാർ ജോണ്‍ നെല്ലിക്കുന്നേൽ അധ്യക്ഷത വഹിച്ചു. എൻസിസി യൂണിറ്റിന്‍റെ ഉദ്ഘാടനം അഡ്വ. ഡീൻ കുര്യാക്കോസ് എംപി നിർവഹിച്ചു. ഇടുക്കി രൂപത മുഖ്യ വികാരി ജനറാൾ മോണ്‍. ജോസ് കരിവേലിക്കൽ മുഖ്യപ്രഭാഷണവും വികാരി ജനറാൾ മോണ്‍. ഏബ്രഹാം പുറയാറ്റ് അനുഗ്രഹപ്രഭാഷണവും നടത്തി. ഫിക്സേഷൻ ലഭിച്ച സയൻസ് ബാച്ചിന്‍റെ ഉദ്ഘാടനം ഇടുക്കി രൂപത വിദ്യാഭ്യാസ സെക്രട്ടറി റവ. ഡോ. ജോർജ് തകിടിയേൽ നിർവഹിച്ചു. നെടുങ്കണ്ടം എൻസിസി 33കെ. ബറ്റാലിയൻ കമാൻഡിംഗ് ഓഫീസർ കേണൽ വിക്രംജിത്സിംഗ് മുഖ്യാതിഥിയായിരുന്നു. നവീകരിച്ച സ്കൂൾ ഓഡിറ്റോറിയത്തിന്‍റെ വെഞ്ചരിപ്പ് സ്കൂൾ മാനേജർ ഫാ. തോമസ് ആനിക്കുഴിക്കാട്ടിൽ നിർവഹിച്ചു. ഇടുക്കി ബ്ലോക്ക് പഞ്ചായത്ത് പ്രസിഡന്‍റ് ആൻസി തോമസ്, മരിയാപുരം പഞ്ചായത്ത് പ്രസിഡന്‍റ് ജിൻസി ജോയി, ജില്ലാ പഞ്ചായത്തംഗം കെ.ജി. സത്യൻ, ബ്ലോക്ക് പഞ്ചായത്തംഗങ്ങളായ ഡിറ്റാജ് ജോസഫ്, ആലീസ് വർഗീസ്, സ്കൂൾ പ്രിൻസിപ്പൽ സിബിച്ചൻ തോമസ്, പഞ്ചായത്തംഗങ്ങളായ അനുമോൾ കൃഷ്ണൻ, കെ.എസ്. സിന്ധു, പിടിഎ പ്രസിഡന്‍റ് സണ്ണി കല്ലക്കാവുങ്കൽ, ഹെഡ്മാസ്റ്റർ സിജുമോൻ ദേവസ്യ, സ്കൂൾ ചെയർമാൻ വിഷ്ണു നിഷാദ് തുടങ്ങിയവർ പ്രസംഗിച്ചു.

വാഹനാപകടത്തിൽ പരിക്കേറ്റ് കിടപ്പിലായിരുന്ന ഗൃഹനാഥൻ മരിച്ചു

കട്ടപ്പന: വാഹനാപകടത്തിൽ പരിക്കേറ്റ് നാലുവർഷമായി അബോധാവസ്ഥയിൽ കിടപ്പിലായിരുന്ന ഗൃഹനാഥൻ മരിച്ചു. കടശിക്കടവ് പൊളിച്ചുമൂട്ടിൽ പി.ജെ. രാജനാണ് (60) മരിച്ചത്. 2021 ജനുവരി 27നാണ് വാഹനാപകടത്തിൽ ഗുരുതരമായി പരിക്കേറ്റ് രാജൻ അബോധാവസ്ഥയിലായത്. പുറ്റടി ഭാഗത്തുനിന്നും അണക്കര ഭാഗത്തേക്ക് സ്കൂട്ടറിൽ വരികയായിരുന്ന രാജനെ അജ്ഞാത വാഹനമിടിക്കുകയായിരുന്നു. എന്നാൽ വണ്ടേന്മേട് പോലീസ് സ്കൂട്ടർ യാത്രക്കാരനായ രാജൻ തനിയെ വീണതാണെന്നാണ് കണ്ടെത്തിയത്. എന്നാൽ പോലീസിന്‍റെ അന്വേഷണം തൃപ്തികരമല്ലെന്ന്കാണിച്ച് രാജന്‍റെ ഭാര്യ ഇടുക്കി ജില്ലാ പോലീസ് മേധാവിക്കും കട്ടപ്പന ഡിവൈഎസ്പിക്കും പരാതി നൽകി. തുടർന്ന് കട്ടപ്പന ഡിവൈഎസ്പിവി.എ. നിഷാദ്മോന്‍റെ സ്പെഷൽ ടീം കേസ് അന്വേഷിക്കുകയും പ്രതിയെ കണ്ടെത്തുകയുമായിരുന്നു. കന്പം പുതുപ്പെട്ടി സ്വദേശി ധനശേഖരനെയും പ്രതി ഓടിച്ച വാഹനവും കസ്റ്റഡിയിലെടുക്കുകായിരുന്നു. രാജന്‍റെ സംസ്കാരം നാളെ രാവിലെ 10ന് കൊച്ചറ സെന്‍റ് മേരീസ് ഓർത്തഡോക്സ് പള്ളിയിൽ നടക്കും. ഭാര്യ നൈസി തെന്നച്ചേരിയിൽ കുടുംബാംഗം. മക്കൾ: നൈജു, സൂസൻ.

ഓപ്പറേഷൻ ഡി ഹണ്ട്: പിടിയിലായത് 265 പേർ

ഇടുക്കി: ലഹരിക്കെതിരേയുള്ള ഓപ്പറേഷനോടനുബന്ധിച്ച് ജില്ലയിൽ ജില്ലാ പോലീസ് മേധാവി ടി.കെ. വിഷ്ണു പ്രദീപിന്‍റെ നിർദേശപ്രകാരം വ്യാഴാഴ്ച ജില്ലയിൽ വ്യാപക പരിശോധന നടത്തി. ഡോഗ് സ്ക്വാഡിന്‍റെ സഹായത്തോടെ ഇടുക്കിയിലും മൂന്നാറിലും പോലീസ് സംഘം പരിശോധന നടത്തി. തൊഴിലാളികളെ എത്തിക്കുന്ന വാഹനങ്ങളും ലോഡ്ജുകളും ഇതര സംസ്ഥാനക്കാർ കൂടുതലായി താമസിക്കുന്ന സ്ഥലങ്ങളും സംശയമുള്ള കടകളും പരിശോധിച്ചു. ഫെബ്രുവരി 22 മുതൽ കഴിഞ്ഞ 11 വരെ ജില്ലയിൽ 255 കേസുകൾ രജിസ്റ്റർ ചെയ്തു. 265 പേരെ അറസ്റ്റ് ചെയ്തു. ജില്ലയിലുടനീളം 10175 പേരെയാണ് പരിശോധിച്ചത്.

സാന്പത്തിക തട്ടിപ്പ്: പ്രതി പിടിയിൽ

കട്ടപ്പന: വിധവയായ സ്ത്രീക്ക് വീട് നിർമിച്ചുനൽകാമെന്ന് വിശ്വസിപ്പിച്ച് സാന്പത്തിക തട്ടിപ്പ് നടത്തിയ കേസിൽ ആലപ്പുഴ ചെങ്ങന്നൂർ കൊടുകുളഞ്ഞി പെനിയേൽ തോമസ് മാത്യു (50) പിടിയിൽ. കട്ടപ്പന സ്വദേശിനിയുടെ പരാതിയിലാണ് അറസ്റ്റ്. 2025 ഫെബ്രുവരിയിൽ പല തവണകളിലായി അറുപതിനായിത്തോളം രൂപ തട്ടിയെടുത്തെന്നാണ് പരാതി. പ്രതിയെ കട്ടപ്പന കോടതിയിൽ ഹാജരാക്കി റിമാന്‍ഡ് ചെയ്തു.മാത്യു.

തൊടുപുഴ കൊലപാതകം: മുഖ്യപ്രതിയുടെ ഭാര്യ അറസ്റ്റിൽ

തൊടുപുഴ: സാന്പത്തിക തർക്കത്തെത്തുടർന്ന് മുൻ ബിസിനസ് പങ്കാളിയെ ക്വട്ടേഷൻ നൽകി കൊലപ്പെടുത്തി മാൻഹോളിൽ തള്ളിയ സംഭവത്തിൽ ഒന്നാം പ്രതിയുടെ ഭാര്യയും അറസ്റ്റിൽ. മുഖ്യപ്രതിയായ കലയന്താനി തേക്കുംകാട്ടിൽ ജോമോന്‍റെ ഭാര്യ സീനയാണ് (45) അറസ്റ്റിലായത്. കൊലപാതകത്തിൽ പങ്കുണ്ടെന്ന സംശയത്തിൽ ചോദ്യം ചെയ്യാൻ പോലീസ് നോട്ടീസ് നൽകിയതിനെത്തുടർന്ന് സീന മുട്ടം നീലൂരുള്ള അകന്ന ബന്ധുവിന്‍റെ വീട്ടിൽ ഒളിവിൽ കഴിയുകയായിരുന്നു. പോലീസ് അറസ്റ്റു ചെയ്യാനുള്ള നീക്കത്തിലേക്കു കടന്നതോടെ ഇന്നലെ ഉച്ചയോടെ തൊടുപുഴ പോലീസ് സ്റ്റേഷനിൽ കീഴടങ്ങുകയായിരുന്നു. ഇതോടെ കേസിൽ അറസ്റ്റിലായ പ്രതികളുടെ എണ്ണം ആറായി.

ജപ്തി നടപടിക്കെതിരേ പ്രതിഷേധമുയരുന്നു

അടിമാലി: വ്യാപാരിയെ വെട്ടിലാക്കി കേരളബാങ്കിന്‍റെ ജപ്തി നടപടി. അടിമാലി ടൗണിൽ സർക്കാർ ഹൈസ്കൂൾ പരിസരത്ത് അക്ബർ ബനാന മർച്ചന്‍റ് എന്ന മൊത്തവ്യാപാര സ്ഥാപനത്തിലാണ് കേരള ബാങ്ക് ജപ്തി നടപടികളുമായി എത്തിയത്. സംഭവം പ്രതിഷേധത്തിനും നാടകീയ രംഗങ്ങൾക്കും വഴിതെളിച്ചു. മാർക്കറ്റിംഗ് സൊസൈറ്റിയിൽനിന്ന് സ്ഥലം വാടകയ്ക്കെടുത്ത് കെട്ടിടം നിർമിച്ചായിരുന്നു അക്ബർ വ്യാപാരം നടത്തിവന്നിരുന്നത്. അക്ബറിന് ബാങ്കുമായി ഇടപാടില്ലെങ്കിലും മാർക്കറ്റിംഗ് സൊസൈറ്റിക്കുള്ള കുടിശിക ഈടാക്കുന്നതിനാണ് ബാങ്ക് ജപ്തി നടപടികളുമായി എത്തിയതെന്നാണ് വിവരം. ജപ്തിയുമായി ബന്ധപ്പെട്ട് അറിയിപ്പൊന്നും ലഭിച്ചിരുന്നില്ലെന്നും കടയ്ക്കുള്ളിലെ സ്റ്റോക്ക് പോലും നീക്കാൻ അവസരം നൽകാതെയാണ് ബാങ്കധികൃതർ സ്ഥാപനം പൂട്ടിയതെന്നും കടയുടമ ആരോപിച്ചു. ജപ്തിക്കായി ബാങ്കധികൃതർ എത്തിയതോടെ പ്രതിഷേധവുമായി വ്യാപാരി സംഘടനാഭാരവാഹികളും സ്ഥാപനത്തിലെത്തി. ഇതിനിടെ സ്ഥാപന ഉടമ അക്ബർ കുഴഞ്ഞു വീണു. പോലീസ് ഇദ്ദേഹത്തെ ആശുപത്രിയിലേക്കുമാറ്റി. ജപ്തി ചെയ്ത കടയ്ക്കുള്ളിൽ വിഷു വിപണി ലക്ഷ്യമിട്ട് സൂക്ഷിച്ചിട്ടുള്ള വാഴക്കുലകൾ അഴുകി നശിച്ചാൽ തനിക്ക് വൻ നഷ്ടം ഉണ്ടാകുമെന്ന് അക്ബർ പറഞ്ഞു. ഇദ്ദേഹം ഹൈക്കോടതിയെ സമീപിച്ചിട്ടുണ്ട്. പഴക്കുലകൾ പോലും നീക്കാൻ സാവകാശം നൽകാതെയുള്ള ബാങ്കിന്‍റെ നടപടി അംഗീകരിക്കാനാകില്ലെന്നാണ് വ്യാപാരി സംഘടനയുടെ നിലപാട്.

കാഡ്സിന്‍റെ നേതൃത്വത്തിൽ വിഷുചന്ത തുടങ്ങി

തൊടുപുഴ: കാഡ്സിന്‍റെ നേതൃത്വത്തിൽ ആരംഭിച്ച വിഷുച്ചന്തയുടെ ഉദ്ഘാടനം മുനിസിപ്പൽ ചെയർമാൻ കെ. ദീപക് നിർവഹിച്ചു. കരിമണ്ണൂർ, ഉടുന്പന്നൂർ, ആലക്കോട്, വെള്ളിയറ്റം, കുമാരമംഗലം എന്നീ പഞ്ചായത്തുകളിൽ പ്രവർത്തിക്കുന്ന കാഡ്സ് നാട്ടുചന്തകളുടെ നേതൃത്വത്തിലാണ് വിഷുച്ചന്തയ്ക്ക് വേണ്ട വിഭവങ്ങൾ സമാഹരിച്ചത്. കാഡ്സ് പ്രസിഡന്‍റ് ആന്‍റണി കണ്ടിരിക്കൽ അധ്യക്ഷത വഹിച്ചു. കെ.എം. മത്തച്ചൻ, വി.പി. ജോർജ്, സജി മാത്യു, കെ.എം. ജോസ്, വി.പി. സുകുമാരൻ, ആൻസി ജേക്കബ് എന്നിവർ പ്രസംഗിച്ചു.

പന്തംകൊളുത്തി പ്രകടനം നടത്തി

കട്ടപ്പന: ഡാമുകളിൽ ബഫർ സോണ്‍ തീരുമാനം സർക്കാർ പിൻവലിക്കണമെന്നാവശ്യപ്പെട്ട് കോണ്‍ഗ്രസ് ഇരട്ടയാർ മണ്ഡലം കമ്മിറ്റിയുടെ നേതൃത്വത്തിൽ പന്തംകുളത്തി പ്രകടനം നടത്തി. ഡിസിസി സെക്രട്ടറി ബിജോ മാണി ഉദ്ഘാടനം ചെയ്തു. ഇരട്ടയാറിൽ കെഎസ്ഇബിക്ക് ആവശ്യമുള്ള സ്ഥലം ജണ്ട കെട്ടി തിരിച്ചിട്ടുണ്ട്. ജണ്ടയ്ക്ക് പുറത്തുള്ള സ്ഥലം ആവശ്യമില്ലെന്നും ഇവിടെ പട്ടയം നൽകുന്നതിൽ തടസമില്ലെന്നും 2004-ൽ യുഡിഎഫ് സർക്കാരിന്‍റെ കാലത്ത് വൈദ്യുതി ബോർഡ് ചീഫ് എൻജിനിയർ ഉത്തരവിറക്കിയിരുന്നു. തുടർന്നാണ് പത്ത് ചെയിൻ മേഖലയിൽ പട്ടയം നൽകിയത്.ബഫർ സോണ്‍ ഉത്തരവിൽ വൈദ്യുതി ബോർഡിന്‍റെ ഡാമുകളും ഉൾപ്പെട്ടാൽ പ്രാദേശങ്ങളിലെ നിരവധി കുടുംബങ്ങളെ പ്രതികൂലമായി ബാധിക്കും. ഉത്തരവ് നടപ്പായാൽ ഇരട്ടയാർ ടൗണ്‍ പൂർണമായും ബഫർ സോണിന്‍റെ പരിധിയിലാകും. ഡാമിന്‍റെ പരമാവധി ജലനിരപ്പിനുള്ളിൽ പഞ്ചായത്തിലെ ഏഴു വാർഡുകൾ ഉൾപ്പെടും. ഭാവിയിൽ ഇവിടെ നിർമാണം നടത്താൻ കഴിയാത്ത സ്ഥിതിയുണ്ടാകും. ബസ് സ്റ്റാന്‍റിൽ നിന്നാരംഭിച്ച പന്തംകൊളുത്തി പ്രകടനം ടൗണ്‍ചുറ്റി സെൻട്രൽ ജംഗ്ഷനിൽ സമാപിച്ചു. മണ്ഡലം പ്രസിഡന്‍റ് ഷാജി മടത്തുംമുറി, പഞ്ചായത്തംഗം ജോസുകുട്ടി അരീപ്പറന്പിൽ, യൂത്ത് കോണ്‍ഗ്രസ് നിയോജക മണ്ഡലം പ്രസിഡന്‍റ് ആനന്ദ് തോമസ്, വിനോദ് നെല്ലിക്കൽ, അജയ് കളത്തൂക്കുന്നേൽ, ജോയി ഒഴുകയിൽ എന്നിവർ പങ്കെടുത്തു.

കട്ടപ്പനയിലെ ധനകാര്യ സ്ഥാപനത്തിനെതിരേ പ്രതിഷേധം

കട്ടപ്പന: ഉപ്പുതറയിൽ ജീവനൊടുക്കിയ നാലംഗ കുടുംബത്തിലെ യുവാവിനെയും ഇദ്ദേഹത്തിന്‍റെ പിതാവിനെയും ഭീഷണിപ്പെടുത്തിയതായി ആരോപണമുയർന്ന കട്ടപ്പനയിലെ സ്വകാര്യ ധനകാര്യ സ്ഥാപനം ജില്ലാ ഓട്ടോ ടാക്സി വർക്കേഴ്സ് യൂണിയൻ (സിഐടിയു) ഉപരോധിച്ചു. സ്ഥാപനത്തിൽനിന്ന് ഫോണിൽ വിളിച്ച് ഭീഷണി മുഴക്കിയതിനെത്തുടർന്നാണ് ജീവനൊടുക്കുന്നതെന്ന് ആത്മഹത്യാക്കുറിപ്പിലുള്ളതായി ജില്ലാ പൊലീസ് മേധാവി വ്യക്തമാക്കിയിരുന്നു. പലതവണ തന്നെയും ഫോണിൽ വിളിച്ച് ഭീഷണിപ്പെടുത്തിയതായി സജീവിന്‍റെ പിതാവ് മോഹനനും ആരോപിച്ചിരുന്നു. ജില്ലാ സെക്രട്ടറി എം.സി. ബിജു സമരം ഉദ്ഘാടനം ചെയ്തു. ഏരിയാ സെക്രട്ടറി ടി. എം. സുരേഷ്, പ്രസിഡന്‍റ് ഫൈസൽ ജാഫർ, ഏരിയാ കമ്മിറ്റിയംഗങ്ങളായ മുരളി, പി. എം. മാത്യു, ഇ. സി. അജോ എന്നിവർ നേതൃത്വം നൽകി.

നാലംഗ കുടുംബത്തിന് നാട് വിടചൊല്ലി

ഉപ്പുതറ: ഒന്പതേക്കർ എംസി കവലയ്ക്കുസമീപം വീടിനുള്ളിൽ മരിച്ചനിലയിൽ കാണപ്പെട്ട പട്ടത്തന്പലം സജീവ് (36), ഭാര്യ രേഷ്മ(25), മക്കളായ ദേവൻ(5),ദിയ(4) എന്നിവർക്ക് നാടിന്‍റെ കണ്ണീരിൽ കുതിർന്ന യാത്രാമൊഴി. വ്യാഴാഴ്ച വൈകുന്നേരം നാലോടെയാണ് നാടിനെ നടുക്കിയ സംഭവം. നാലുപേരെയും വീടിനുള്ളിൽ തൂങ്ങിമരിച്ച നിലയിൽ കണ്ടെത്തുകയായിരുന്നു. സാന്പത്തിക ബാധ്യതയെ തുടർന്നു മക്കളെ കൊലപ്പെടുത്തിയ ശേഷം ദന്പതികൾ ജീവനൊടുക്കുകയായിരുന്നുവെന്നാണ് നിഗമനം. ഇതുസംബന്ധിച്ചുള്ള ആത്മഹത്യാക്കുറിപ്പ് പോലീസിനു ലഭിച്ചിരുന്നു. ഇടുക്കി മെഡിക്കൽ കോളജ് ആശുപത്രിയിൽ പോസ്റ്റ്മോർട്ടത്തിനു ശേഷം വൈകുന്നേരം അഞ്ചോടെയാണ് മൃതദേഹങ്ങൾ വീട്ടിലെത്തിച്ചത്. ആദ്യം ദിയയുടെയും പിന്നീട് ദേവന്‍റെയും മൃതദേഹമാണ് കൊണ്ടുവന്നത്. പിന്നീടാണ് സജീവിന്‍റെയും രേഷ്മയുടെയും മൃതദേഹങ്ങൾ എത്തിച്ചത്. ഇതോടെ വീട്ടിൽ വികാരനിർഭരമായ രംഗങ്ങളാണ് അരങ്ങേറിയത്. വീടിനോടു ചേർന്ന് അടുത്തടുത്തായി നാലുപേർക്കും ചിതയൊരുക്കുകയായിരുന്നു. വൈകുന്നേരം ആറോടെ സംസ്കാരം നടത്തി. അന്തിമോപചാരമർപ്പിക്കാൻ നാട്ടുകാർക്കും ബന്ധുക്കൾക്കും പുറമെ പൊതുപ്രവർത്തകരും എത്തിയിരുന്നു. വാഴൂർ സോമൻ എംഎൽഎ, ഉപ്പുതറ പഞ്ചായത്ത് പ്രസിഡന്‍റ്, കെ.ജെ. ജയിംസ്, ജില്ലാപഞ്ചായത്തംഗം ആശആന്‍റണി, സിപിഎം ജില്ലാ സെക്രട്ടറി സി.വി. വർഗീസ്, കോണ്‍ഗ്രസ് നേതാക്കളായ വി.ടി. ഷാൽ, വി. കെ. കുഞ്ഞുമോൻ ബിജെപി നേതാക്കളായ സന്തോഷ് കൃഷ്ണൻ, ജയിംസ് ജോസഫ് തുടങ്ങിയവരും വീട്ടിലെത്തി അന്തിമോപചാരമർപ്പിച്ചു.

ലഹരിവിരുദ്ധ കാന്പയിൻ: സംഘാടകസമിതി ചേർന്നു

തൊടുപുഴ: ജില്ലാ സ്പോർട്സ് കൗണ്‍സിലിന്‍റെ നേതൃത്വത്തിൽ ലഹരിവിരുദ്ധ കാന്പയിന്‍റെ ജില്ലാതല സംഘാടക സമതി യോഗം ചെറുതോണി ടൗണ്‍ ഹാളിൽ ചേർന്നു. മന്ത്രി റോഷി അഗസ്റ്റിൻ ഉദ്ഘാടനം ചെയ്തു. ജില്ലാ പഞ്ചായത്ത് പ്രസിഡന്‍റ് രാരിച്ചൻ നീറണാകുന്നേൽ ലഹരിവിരുദ്ധ പ്രതിജ്ഞ ചൊല്ലിക്കൊടുത്തു. യോഗത്തിൽ 101 അംഗ സംഘാടകസമതിയെ തെരഞ്ഞെടുത്തു. ജില്ലാകളക്ടർ വി. വിഗ്നേശ്വരി അധ്യക്ഷത വഹിച്ചു. സംസ്ഥാന സ്പോർട്സ് കൗണ്‍സിലംഗം പി.ഐ. ബാബു, ത്രിതല പഞ്ചായത്തംഗങ്ങളായ എം. ലതീഷ് , കെ.ജി. സത്യൻ, ആൻസി തോമസ്, ബീന ടോമി, കെ. ദീപക്, സംസ്ഥാന സ്പോർട്സ് കൗണ്‍സിൽ അംഗം കെ.എൽ. ജോസഫ്, പി.എ. ഷാജിമോൻ എന്നിവർ പ്രസംഗിച്ചു.

മാലിന്യമുക്തം നവകേരളം: കട്ടപ്പന നഗരസഭയ്ക്ക് നേട്ടം

കട്ടപ്പന: മാലിന്യമുക്തം നവകേരളം കാന്പയിനിൽ കട്ടപ്പന നഗരസഭയ്ക്ക് മികച്ച നേട്ടം. മികച്ച നഗരസഭ, എൻഫോഴ്സ്മെന്‍റ് പ്രവർത്തനത്തിൽ മികച്ച തദ്ദേശ സ്വയംഭരണ സ്ഥാപനം, ഹരിത അയൽക്കൂട്ടം, ഉറവിട മാലിന്യ സംസ്കരണ ഉപാധികൾ സ്ഥാപിച്ചതിലെ മികവ് എന്നീ നിലകളിലാണ് അവാർഡുകൾ നേടിയത്. 2015 ജനുവരി 14നാണ് കട്ടപ്പനയെ നഗരസഭയാക്കി ഉയർത്തിയത്. തുടർന്ന് അതേവർഷം നവംബറിൽ ആദ്യ തെരഞ്ഞെടുപ്പ് നടന്നു. ജില്ലയിലെ രണ്ടാമത്തെ നഗരസഭയും സംസ്ഥാനത്തെ ആദ്യത്തെ ഹൈറേഞ്ച് നഗരസഭയുമാണ് കട്ടപ്പന. നിലവിൽ ലഭിച്ച നേട്ടങ്ങളും ഉപഹാരങ്ങളും വരും വർഷങ്ങളിലെ പ്രവർത്തനങ്ങൾ കൂടുതൽ മെച്ചപ്പെടുത്താൻ സാധിക്കുമെന്നാണ് ആരോഗ്യ വിഭാഗത്തിന്‍റെ പ്രതീക്ഷ. മാലിന്യ നിക്ഷേപത്തിനെതിരേ കൂടുതൽ നടപടികളും, ആരോഗ്യ വിഭാഗത്തിന്‍റെ നേതൃത്വത്തിൽ കൂടുതൽ പ്രവർത്തനങ്ങളും നടത്തും. വരുംവർഷങ്ങളിൽ കൂടുതൽ നേട്ടങ്ങൾ ലക്ഷ്യമിട്ടുള്ള പ്രവർത്തനങ്ങളാണ് നഗരസഭ നടത്താൻ ഉദ്ദേശിക്കുന്നത്.

ക്വട്ടേഷൻ കൊലപാതകം ; ഒരാൾകൂടി പിടിയിൽ

തൊടുപുഴ: സാന്പത്തിക തർക്കത്തെത്തുടർന്ന് നടന്ന ക്വട്ടേഷൻ കൊലപാതകക്കേസിൽ ഒരാളെ കൂടി പോലീസ് അറസ്റ്റു ചെയ്തു. ഭരണങ്ങാനം എട്ടിലൊന്ന് പാറപ്പുറത്ത് എബിൻ തോമസ് (35) ആണ് പിടിയിലായത്. ഇതോടെ തൊടുപുഴ ചുങ്കം മുളയിങ്കൽ ബിജുവിനെ കൊലപ്പെടുത്തിയ കേസിൽ ഇതുവരെ പിടിയിലായവരുടെ എണ്ണം അഞ്ചായി. കേസിലെ ഒന്നാം പ്രതിയും ബിജുവിന്‍റെ ബിസിനസ് പങ്കാളിയുമായിരുന്ന ജോമോന്‍റെ ബന്ധുവാണ് പിടിയിലായ എബിൻ. കൊലപാതക വിവരങ്ങൾ എബിന് പൂർണമായി അറിയാമായിരുന്നെന്ന് പോലീസ് പറഞ്ഞു. ജോമോന് സാന്പത്തിക സഹായം ഉൾപ്പെടെ എബിൻ നൽകിയിരുന്നു. ബിജു ജോസഫിനെ തട്ടിക്കൊണ്ടുപോകുന്നത് മുതൽ പിന്നീട് ബിജു മരിച്ചതും മൃതദേഹം കുഴിച്ചിട്ടതും ഉൾപ്പെടെയുള്ള വിവരങ്ങൾ എബിന് അറിയാമായിരുന്നു. എന്നാൽ മൃതദേഹം കുഴിച്ചിട്ട സ്ഥലം അറിയില്ലായിരുന്നെന്നും പോലീസ് പറഞ്ഞു. കൊലപാതകത്തിന് ശേഷം ജോമോൻ എബിനെ ഫോണിൽ വിളിച്ച് കാര്യങ്ങൾ പറഞ്ഞിരുന്നു. പിന്നീട് പുതിയ ഫോണ്‍ വാങ്ങാൻ 25,000 രൂപ അക്കൗണ്ടിൽ ഇട്ടുകൊടുത്തതും ഇയാളാണ്. ജോമോനുമായി എബിന് ബിസിനസ് പങ്കാളിത്തം ഒന്നുമില്ലെങ്കിലും കേറ്ററിംഗ് സർവീസിൽ സഹായിച്ചിരുന്നതായി വിവരമുണ്ട്. അതേസമയം ജോമോന്‍റെ ഭാര്യ ഒളിവിൽ തുടരുകയാണ്. ചോദ്യംചെയ്യലിന് ഹാജരാകാൻ ഇവർക്ക് നോട്ടീസ് നൽകിയെങ്കിലും എത്താതിരുന്നതിനെ തുടർന്ന് ഇവരെ അന്വേഷിച്ച് കഴിഞ്ഞദിവസം പോലീസ് വീട്ടിലെത്തിയെങ്കിലും സ്ഥലത്തുണ്ടായിരുന്നില്ല.ചോദ്യംചെയ്ത് സംഭവത്തിൽ ഇവർക്ക് പങ്കുണ്ടോയെന്ന കാര്യത്തിൽ വ്യക്തത വരുത്തേണ്ടതുണ്ടെന്ന് പോലീസ് പറഞ്ഞു. വരും ദിവസങ്ങളിൽ ഇവർ കീഴടങ്ങാനും സാധ്യതയുണ്ട്. ബിജുവിന്‍റെ മൃതദേഹം ഭാര്യ കണ്ടതാണെന്നും കിടപ്പുമുറിയിലെ രക്തക്കറ കഴുകിക്കളഞ്ഞത് ഇവരാണെന്നുമാണ് വിവരം. നിലവിൽ പോലീസ് കസ്റ്റഡിയിലുള്ള ജോമോൻ, മുഹമ്മദ് അസ്‌ലം, ജോമിൻ കുര്യൻ എന്നിവരുടെ കസ്റ്റഡി കാലാവധി ഇന്ന് അവസാനിക്കും.

ആത്മവിശുദ്ധിയുടെ നിറവിൽ നാളെ ഓശാന

തൊടുപുഴ: ഭക്തി സാന്ദ്രമായ ചടങ്ങുകളോടെ ക്രൈസ്തവ ദേവാലയങ്ങളിൽ നാളെ ഓശാന ഞായർ ആഘോഷിക്കും. മാനവരക്ഷയ്ക്കായി മന്നിൽ അവതരിച്ച യേശുക്രിസ്തു കഴുതക്കുട്ടിയുടെ പുറത്തുകയറി ജറൂസെലേം ദേവാലയത്തിലേക്ക് രാജകീയ പ്രവേശനം നടത്തിയപ്പോൾ ഒലിവിലകൾ വീശി ദാവീദിന്‍റെ പുത്രന് ഓശാന പാടി എതിരേറ്റ ചരിത്രസംഭവത്തിന്‍റെ അനുസ്മരണമാണ് ദേവാലയങ്ങളിൽ നടക്കുന്നത്. ആശീർവദിച്ച കുരുത്തോലകൾ കരങ്ങളിലേന്തി ദേവാലയത്തിനു പ്രദക്ഷിണം വച്ച് സ്തുതിഗീതങ്ങളുമായി വിശ്വാസികൾ പങ്കെടുക്കും. നോന്പിന്‍റെയും ഉപവാസത്തിന്‍റെയും ചൈതന്യത്തിൽ ആത്മവിശുദ്ധീകരണത്തിലേക്ക് പ്രവേശിക്കുന്ന ക്രൈസ്തവരുടെ വിശ്വാസ സാക്ഷ്യത്തിന്‍റെ വിളംബരവുമാണിത്. തൊടുപുഴ ടൗണ്‍ ഫോറോനപള്ളി, മുതലക്കോടം സെന്‍റ് ജോർജ്, കരിമണ്ണൂർ സെന്‍റ് മേരീസ്, കാളിയാർ സെന്‍റ് റീത്താസ്, മാറിക സെന്‍റ് ജോസഫ്, മൈലക്കൊന്പ് സെന്‍റ് തോമസ്, തുടങ്ങനാട് സെന്‍റ് തോമസ്, മൂലമറ്റം സെന്‍റ് ജോർജ്, വാഴത്തോപ്പ് സെന്‍റ് ജോർജ് കത്തീഡ്രൽ, അടിമാലി സെന്‍റ് ജൂഡ്, പാറത്തോട് സെന്‍റ് ജോർജ്, മുരിക്കാശേരി സെന്‍റ് മേരീസ്, ചുരുളി സെന്‍റ് തോമസ്, തങ്കമണി സെന്‍റ് തോമസ്, വെള്ളയാംകുടി സെന്‍റ് ജോർജ്, കട്ടപ്പന സെന്‍റ് ജോർജ്, രാജകുമാരി ദൈവമാതാ തുടങ്ങി വിവിധ ദേവാലയങ്ങളിൽ ആഘോഷപൂർവം ഓശാന ഞായർ തിരുക്കർമങ്ങൾ നടക്കും.

കണിക്കൊന്ന പ്രഭയിൽ വിഷുവിപണി

തൊടുപുഴ: കണികണ്ടുണരാൻ ഒരു വിഷുക്കാലംകൂടി വന്നെത്തിയതോടെ ആഘോഷത്തിനു പൊലിമ പകരാൻ വിപണി സജീവമായിത്തുടങ്ങി. കണിയൊരുക്കാനുള്ള കൃഷ്ണവിഗ്രഹങ്ങൾ ഇതിനോകംതന്നെ വലിയതോതിൽ വിൽപ്പന നടന്നു കഴിഞ്ഞു. വിഷുപ്പുലരിക്ക് രണ്ടു ദിവസം മാത്രം നിലനിൽക്കേ വസ്ത്രവിപണിയിലും ഗൃഹോപകരണ വിൽപ്പന കേന്ദ്രങ്ങളിലും മറ്റും തിരക്ക് വർധിച്ചിട്ടുണ്ട്. ഇന്നു മുതൽ പഴം, പച്ചക്കറി കടകളിലും ബേക്കറികളിലും തിരക്ക് അനുഭവപ്പെട്ടു തുടങ്ങും. വഴിയോരങ്ങളിൽ പടക്കക്കടകളും നിരന്നു. വിഷുവിന് വലിയ തോതിൽ വിൽപ്പന നടക്കുന്ന കണിവെള്ളരി മാർക്കറ്റുകളിൽ വലിയ തോതിൽ ഇടം പിടിച്ചിട്ടുണ്ട്. വിഷു കണക്കിലെടുത്ത് പച്ചക്കറി ഉത്പന്നങ്ങളുടെ വിലയിൽ വലിയ തോതിൽ വർധനയുണ്ടായിട്ടില്ല. ബീൻസ് ഉൾപ്പെടെ ചില ഉത്പന്നങ്ങൾക്ക് വില വർധിച്ചതൊഴിച്ചാൽ മറ്റുള്ളവയുടെ വിലയിൽ വലിയ വ്യത്യാസം വന്നിട്ടില്ല. തമിഴ്നാട്ടിൽനിന്നു തന്നെയാണ് ഇത്തവണയും കണിവെള്ളരി ഉൾപ്പെടെ ഭൂരിഭാഗം പച്ചക്കറികളും വിപണിയിലെത്തുന്നത്. വിഷുവിനോടനുബന്ധിച്ച് കൃഷിവകുപ്പും വെജിറ്റബിൾ ആന്‍ഡ് ഫ്രൂട്ട്സ് പ്രമോഷൻ കൗണ്‍സിലും വിപണികൾ തുറക്കാറുണ്ടായിരുന്നെങ്കിലും ഇത്തവണ വിഷുച്ചന്തകൾ തുറക്കാത്തത് സാധാരണക്കാർക്ക് തിരിച്ചടിയായി. മഞ്ഞ പുതപ്പിച്ച് കണിക്കൊന്ന വിഷു ആഘോഷത്തിന് കൊന്നപ്പൂക്കൾ ഒഴിവാക്കാൻ കഴിയാത്തതിനാൽ നാളെ പ്രധാന ടൗണുകളിലെല്ലാം തന്നെ കണിക്കൊന്നപ്പൂക്കൾ വിൽപ്പനയ്ക്കെത്തും. പല വീടുകളുടെയും തൊടിയിലും പാതയോരങ്ങളിലും മഞ്ഞ പുതച്ചുനിൽക്കുന്ന കണിക്കൊന്നപ്പൂക്കൾ കാണാം. ഇവയെല്ലാംതന്നെ അടർത്തിയെടുത്ത് ഓട്ടോയിലും മറ്റുമായി വിൽപ്പനയ്ക്കെത്തിക്കും. വിഷുവിന് കൊന്നപ്പൂക്കൾക്ക് ആവശ്യക്കാരേറുന്നതിനാൽ വലിയ വിലയാണ് ഇതിന് ഈടാക്കുന്നത്. കഴിഞ്ഞ വർഷം ഒരു ചെറുപിടി കൊന്നപ്പൂവിന് 40 മുതൽ 50 രൂപ വരെയാണ് വഴിയോരക്കച്ചവടക്കാർ വാങ്ങിയത്. ചൈനീസ് പൂക്കളും റെഡി ഇതിനു പുറമേ കൊന്നപ്പൂവിന്‍റെ ക്ഷാമം കണക്കിലെടുത്ത് ചൈനീസ് കൊന്നപ്പൂക്കളും ഇപ്പോൾ വ്യാപകമായി പ്രചാരത്തിലുണ്ട്. നാടൻ കണിക്കൊന്നയോടെ സാമ്യമുള്ള ചൈനീസ് കൊന്നപ്പൂക്കൾ ഫാൻസി, സ്റ്റേഷനറി കടകളെ അലങ്കരിച്ചുകഴിഞ്ഞു. ഒരു പൂവിന് 30 രൂപ മുതലാണ് വില. ഒരു തവണ ഉപയോഗിച്ച ശേഷം സൂക്ഷിച്ചു വച്ചാൽ അടുത്ത വർഷവും ഉപയോഗിക്കാമെന്നതാണ് ഇതിന്‍റെ പ്രത്യേകത. കണിവെള്ളരി വിഷുക്കണി കാണാൻ സ്വർണവർണമാർന്ന വെള്ളരിയാണ് വേണ്ടത്. നല്ല കണിവെള്ളരിയ്ക്ക് 45-55 രൂപ വരെയാണ് വില. അരക്കിലോ മുതൽ രണ്ടു കിലോ വരെ വലിപ്പമുള്ള കണിവെള്ളരികളുണ്ട്. മൂന്ന് മാസമാണ് കണിവെള്ളരി പാകമാകാൻ എടുക്കുന്ന സമയം. വേനൽമഴ മറ്റ് വിളകൾക്ക് ഗുണം ചെയ്യുമെങ്കിലും വെള്ളരിക്ക് തിരിച്ചടിയാകും. മഴകൊണ്ടാൽ മൂത്ത വെള്ളരിയടക്കം പൊട്ടി നശിച്ചു പോകുമെന്ന് കർഷകർ പറഞ്ഞു. പടക്ക വിപണി വിഷുവിന് കുട്ടികളുടെ പ്രധാന ആഘോഷത്തിൽനിന്ന് പടക്കത്തെ മാറ്റിനിർത്താനാവില്ല. പൂത്തിരിയും കന്പിത്തിരിയും ചക്രങ്ങളും വിവിധ തരത്തിലുള്ള പടക്കങ്ങളുമാണ് വിപണിയിൽ എത്തിയിരിക്കുന്നത്. അപകടരഹിതമായ ചൈനീസ് ഇനങ്ങൾക്കായിരിക്കും ഡിമാൻഡ് കൂടുതൽ. ക്രിസ്മസിനും ന്യൂഇയറിനും ശേഷം പടക്ക വിപണി സജീവമാകുന്നത് വിഷുവിനും ദീപാവലിക്കുമാണ്. തമിഴ്നാട്ടിലെ ശിവകാശിയിൽനിന്നാണ് കേരളത്തിലെ പടക്ക മൊത്ത വ്യാപാരികൾ ലോഡ് എത്തിക്കുന്നത്. വിഷു എത്തുന്നതോടെ പല ഇനങ്ങൾക്കും മൊത്തക്കച്ചവടക്കാർ വില ഉയർത്താറുണ്ട്.

മൊബൈൽ ടവറാണത്രേ..! ഉപയോഗം വട്ടപൂജ്യം

ഉടുന്പന്നൂർ: മൊബൈൽ ടവറുണ്ടെങ്കിലും വിളിച്ചാൽ കിട്ടുന്നില്ലെന്ന് നാട്ടുകാർ. രാജ്യത്തെ ഒറ്റപ്പെട്ട പ്രദേശങ്ങളിൽ മൊബൈൽ ടവറുകൾ സ്ഥാപിക്കാനുള്ള കേന്ദ്രപദ്ധതിയനുസരിച്ചാണ് ഇടുക്കി ജില്ലയിലെ കൈതപ്പാറയിൽ ബിഎസ്എൻഎൽ മൊബൈൽ ടവർ സ്ഥാപിച്ചത്. അഞ്ചു മാസം ടവർ പ്രവർത്തനക്ഷമമാക്കുകയും ചെയ്തു. 4-ജി സംവിധാനമാണ് ടവറിനുള്ളത്. ബാൻഡ്-28 സപ്പോർട്ട് ചെയ്യുന്ന ഫോണുകളിൽ മാത്രമേ റേഞ്ച് ലഭിക്കുകയുള്ളൂ. രണ്ടുവർഷം മുന്പുള്ള പല ഫോണുകളിലും ഈ സംവിധാനം നിലവിലില്ല. കൈതപ്പാറ, മനയത്തടം പ്രദേശങ്ങളിലുള്ളവർക്കായാണ് ഇവിടെ ടവർ സ്ഥാപിച്ചത്. എന്നാൽ നിലവിലെ സ്ഥിതിയിൽ പലർക്കും ടവറിന്‍റെ പ്രയോജനം ലഭിക്കാത്ത സാഹചര്യമാണ്. വൈദ്യുതി പോകുന്ന സമയത്ത് പ്രവർത്തിക്കുന്നതിനായി സോളാർ, ബാറ്ററി സംവിധാനവും ടവറിനുണ്ട്. സംസ്ഥാനത്ത് പലയിടങ്ങളിലും സ്ഥാപിച്ച ടവറുകളുടെതും സ്ഥിതി സമാനമാണ്.

നഗരസഭാ ചെയർമാന് സ്വീകരണം

തൊടുപുഴ: മർച്ചന്‍റ്സ് അസോസിയേഷന്‍റെ നേതൃത്വത്തിൽ നഗരസഭാ ചെയർമാൻ കെ. ദീപക്കിന് സ്വീകരണം നൽകി. നഗരസഭയിലെ പ്രധാന വരുമാന സ്രോതസ് വ്യാപാരികളാണെങ്കിലും മതിയായ പരിഗണന മുനിസിപ്പാലിറ്റി നൽകുന്നില്ലെന്നും അനധികൃത വഴിയോരക്കച്ചവടക്കാരെ ഒഴിവാക്കാനുള്ള നടപടി സ്വീകരിക്കണമെന്നും പ്രസിഡന്‍റ് രാജു തരണിയിൽ ആവശ്യപ്പെട്ടു. നഗരത്തിലെ ഗതാഗതക്കുരുക്ക്, ബസ് സ്റ്റോപ്പിന്‍റെ അശാസ്ത്രീയത, മുനിസിപ്പൽ ബസ് സ്റ്റാൻഡിന്‍റെ ശോചനീയാവസ്ഥ, മങ്ങാട്ടുകവല സ്റ്റാൻഡിന്‍റെ പോരായ്മ തുടങ്ങിയവ പരിഹരിക്കുക, ശുചിമുറികൾ തുറന്നു കൊടുക്കുക തുടങ്ങിയ ആവശ്യ ങ്ങളും അസോസിയേഷൻ ചെയർമാന് മുന്നിൽ അവതരിപ്പിച്ചു. വ്യാപാരികളുടെ ആവശ്യങ്ങൾ സമയപരിധിക്കുള്ളിൽ പരിഹരിക്കുമെന്നും പ്ലാസ്റ്റിക് മാലിന്യം ഒഴിവാക്കിയും ടൗണ്‍ ശുചിയായിരിക്കുന്നതിന് വ്യാപാരികളു ടെ സഹകരണം വേണമെന്നും ചെയർമാൻ പറഞ്ഞു. സെക്രട്ടറി നവാസ്, അനിൽ പീടികപ്പറന്പിൽ, നാസർ സൈര, ഷെരീഫ് സർഗം, ജോസ് കളരിക്കൽ, ശിവദാസ്, സാലി മുഹമ്മദ്, ഷിയാസ് എംപീസ്, ലിജോണ്‍സ് ഹിന്ദുസ്ഥാൻ എന്നിവർ പ്രസംഗിച്ചു.

ദുരന്തനിവാരണം: മോക്ഡ്രിൽ നടത്തി

മൂലമറ്റം: കാലവർഷം അടുത്തുവരുന്ന സാഹചര്യത്തിൽ പ്രകൃതിക്ഷോഭം മൂലം വീടുകൾക്കോ പൊതുജനങ്ങൾക്കോ അപകടം ഉണ്ടായാൽ ചെയ്യേണ്ട കാര്യങ്ങൾ ജനങ്ങളെ ബോധ്യപ്പെടുത്താൻ മൂലമറ്റത്ത് രണ്ട് മോക്ക് ഡ്രില്ലുകൾ നടത്തി. മൂലമറ്റം പവർ ഹൗസിലും, താഴ്‌വാരം കോളനിയിലുമാണ് മോക്ഡ്രിൽ നടത്തിയത്. കെഎസ്ഇബി, റവന്യു, ഫയർഫോഴ്സ്, പഞ്ചായത്ത്, പോലീസ്, എൻഡിആർഎഫ് എന്നിവരുടെ നേതൃത്വത്തിൽ പവർഹൗസിൽ കുടുങ്ങിക്കിടന്ന 18 പേരെ രക്ഷിച്ച് ആശുപത്രിയിലാക്കി. ഹോണ്‍ മുഴക്കിയും അലാറം വച്ച് ജനങ്ങളെ അറിയിച്ചും വിപുലമായ രീതിയിലാണ് മോക് ഡ്രിൽ നടത്തിയത്. വെള്ളപ്പൊക്കം ഉണ്ടായാൽ രക്ഷിക്കാനും മരംവീണ് ഗതാഗതം തടസപ്പെട്ടാൽ മുറിച്ചുമാറ്റാനും വെള്ളത്തിൽ കുടുങ്ങിയവരെ രക്ഷിക്കാനുമുള്ള പരിശീലനം ആണ് താഴ്‌വാരം കോളനിയിൽ നടന്നത്. ജില്ലാ ഭരണകൂടം മുന്നറിയിപ്പ് നൽകിയിരുന്നതിനാൽ ജനങ്ങൾ പരിഭ്രാന്തരായില്ല.

മൂലമറ്റം സ്വിച്ച് യാർഡിൽ പൊട്ടിത്തെറി; ജനറേറ്റർ നിലച്ചു

മൂലമറ്റം: മൂലമറ്റം സ്വിച്ച് യാർഡിൽ വ്യാഴാഴ്ച രാത്രി ട്രാൻസ്ഫോമർ പൊട്ടിത്തെറിച്ചു. ആളപായമില്ല. രാത്രി ഒന്നോടെയാണ് വലിയ ശബ്ദത്തിൽ ട്രാൻസ്ഫോമർ പൊട്ടിത്തെറിച്ചത്. മൂലമറ്റം-കളമശേരി 220 കെവി ലൈനിന്‍റെ പൊട്ടൻഷ്യൽ ട്രാൻസ്ഫോർമറാണ് പൊട്ടിത്തെറിച്ചത്. ഇതോടെ മൂലമറ്റത്തും സമീപ പ്രദേശങ്ങളിലും വൈദ്യുതി തടസം നേരിട്ടു. ട്രാൻസ്ഫോമർ മാറ്റി സ്ഥാപിക്കാൻ എട്ട് ദിവസമെങ്കിലും വേണമെന്നാണ് ബോർഡ് അധികൃതർ പറയുന്നത്. ഇതിനു പുറമേ പവർഹൗസിലെ ഒന്നാംഘട്ടത്തിലെ മൂന്നാം നന്പർ ജനറേറ്ററിലേക്ക് കുളമാവ് ഡാമിൽനിന്നു നാടുകാണി വഴി ഭൂഗർഭ പെൻസ്റ്റോക്ക് പൈപ്പിലൂടെ വെള്ളമെത്തിക്കുന്ന സ്ഫെറിക്കൽ വാൽവിന്‍റെ സീലും തകരാറിലായി. ഇതുമൂലം മൂന്നാം നന്പർ ജനറേറ്ററിന്‍റെ പ്രവർത്തനവും നിലച്ചു. സ്ഫെറിക്കൽ വാൽവിൽനിന്ന് ആറു ജലധാരകളായി തിരിഞ്ഞാണ് ടർബൈനിലേക്ക് വെള്ളം പതിക്കുന്നത്. ഓരോ ടർബൈനുകളും കറങ്ങുന്പോഴാണ് ജനറേറ്റർ പ്രവർത്തിച്ച് വൈദ്യുതി ഉത്പാദനം നടക്കുന്നത്. ഒരു ജനറേറ്ററിൽനിന്നു 130 മെഗാവാട്ട് വീതം 780 മെഗാവാട്ട് വൈദ്യുതിയാണ് ഇവിടത്തെ ഉത്പാദന ശേഷി. ദുരന്തനിവാരണ പ്രതിരോധ പ്രവർത്തനങ്ങളുടെ ഭാഗമായി ഇന്നലെ പവർഹൗസിൽ സൈറണ്‍ മുഴക്കുമെന്നും മോക് ഡ്രിൽ നടത്തുമെന്നും അധികൃതർ അറിയിച്ചിരുന്നു. ഇതിന്‍റെ ഭാഗമായുള്ള മുഴക്കമാണെന്നാണ് ആദ്യം ജനങ്ങൾ ധരിച്ചത്.

വിശ്വാസചൈതന്യം വിളിച്ചോതി കുരിശുമല തീർഥാടനം

വിശുദ്ധിയുടെ പടവുകൾ ചവിട്ടി നാൽപ്പതാംവെള്ളിയാചരണം തൊടുപുഴ: വലിയ നോന്പിന്‍റെ ചൈതന്യം ഉൾക്കൊണ്ട് ഉപവാസവും പ്രാർഥനയുമായി ആത്മവിശുദ്ധീകരണത്തിന്‍റെ വഴിയിൽ വിശ്വാസീസമൂഹം നാൽപ്പതാം വെള്ളിയാചരണം നടത്തി. ഇതിന്‍റെ ഭാഗമായി ജില്ലയിലെ പ്രധാനപ്പെട്ട കുരിശുമലകളിലേക്ക് വിശ്വാസികൾ കുരിശിന്‍റെ വഴി നടത്തി. വിശുദ്ധ കുർബാന, ഉൗട്ടുനേർച്ച എന്നിവയിലും നൂറുകണക്കിന് വിശ്വാസികൾ പങ്കെടുത്തു. ആയിരങ്ങൾ പങ്കാളികളായി ഇടുക്കി: വിശ്വാസചൈതന്യം വിളിച്ചോതി നാൽപ്പതാം വെള്ളിയാചരണത്തോടനുബന്ധിച്ച് ഇടുക്കി രൂപതയുടെ നേതൃത്വത്തിൽ എഴുകുംവയൽ കുരിശുമലയിലേക്ക് നടത്തിയ കാൽനട തീർഥാടനത്തിൽ ആയിരങ്ങൾ പങ്കാളികളായി. വിശ്വാസത്തിന്‍റെ ഉജ്ജ്വല സാക്ഷ്യമായി മാറിയ മൂന്നാമതു തീർഥാടനത്തിന് ഇടുക്കി ബിഷപ് മാർ ജോണ്‍ നെല്ലിക്കുന്നേൽ നേതൃത്വം നൽകി. 30 കിലോമീറ്റർ ദൂരം ബിഷപ് കാൽനടയായി തീർഥാടനത്തിന്‍റെ മുൻനിരയിൽ നീങ്ങി. വ്യാഴാഴ്ച രാവിലെ ആറിന് വാഴത്തോപ്പ് കത്തീഡ്രൽ പള്ളിയിൽനിന്ന് ആരംഭിച്ച തീർഥാടനം രാത്രി 11നു പാണ്ടിപ്പാറയിൽ എത്തിച്ചേർന്നു. തുടർന്ന് ഇന്നലെ പുലർച്ചെ 3.30നു ഇവിടെനിന്ന് ആരംഭിച്ച തീർഥാടനം 8.30ന് വെട്ടിക്കാമറ്റത്തെത്തി. വെള്ളയാംകുടി, തോപ്രാംകുടി, നെടുങ്കണ്ടം, രാജകുമാരി, അടിമാലി എന്നീ സ്ഥലങ്ങളിൽനിന്ന് ആരംഭിച്ച തീർഥാടനവും ഇവിടെ സംഗമിച്ചു. തുടർന്നു മലമുകളിലേക്ക് കുരിശിന്‍റെ വഴിയുമായി നടന്നുനീങ്ങി. രൂപതയിലെ വിവിധ ഇടവകകളിൽനിന്ന് എത്തിച്ചേർന്ന ആയിരക്കണക്കിനു വിശ്വാസികൾ തീർഥാടനത്തെ വരവേറ്റു. രാവിലെ 9.30ന് കപ്പളയിൽ പ്രാരംഭ പ്രാർഥനകൾ നടത്തി. തുടർന്നു 11.30നു തീർഥാടകർ മലമുകളിലെത്തി. കൊടുംചൂടിനെ അവഗണിച്ചും വിശ്വാസികൾ തീർഥാടനത്തിൽ പങ്കുചേർന്നത് വിശ്വാസത്തിന്‍റെ നേർസാക്ഷ്യമായി. മലമുകളിൽ മാർ ജോണ്‍ നെല്ലിക്കുന്നേലിന്‍റെ മുഖ്യകാർമികത്വത്തിൽ വിശുദ്ധ കുർബാന അർപ്പിച്ചു. ഏറെ ത്യാഗം സഹിച്ചുള്ള ഈ തീർഥാടനം ജീവിതത്തിലുണ്ടാകുന്ന സഹനങ്ങളെ സന്തോഷത്തോടെ സ്വീകരിക്കാനും വിശ്വാസജീവിതത്തിൽ മുന്നേറാനുമുള്ള ശക്തിയാണ് പ്രദാനം ചെയ്യുന്നതെന്ന് ബിഷപ് പറഞ്ഞു. ഈശോ സഹിച്ച പീഡകളെ നമ്മുടെ ജീവിതത്തിൽ ഏറ്റുവാങ്ങുന്നതിന്‍റെ ഭാഗമാണ് ത്യാഗപൂർണമായ ഈ യാത്ര. അനുദിന ജീവിതത്തിലെ ക്ലേശങ്ങളെ ഈശോയുടെ കുരിശോടു ചേർത്തുവയ്ക്കുന്പോഴാണ് നമ്മുടെ ജീവിതം അർഥപൂർണമാകുന്നതെന്നും ബിഷപ് പറഞ്ഞു. തോപ്രാംകുടി പള്ളി വികാരി ഫാ. ജോസി പുതുപ്പറന്പിൽ നാൽപ്പതാം വെള്ളി സന്ദേശം നൽകി. രൂപത വികാരി ജനറാൾമാരായ മോണ്‍. ജോസ് കരിവേലിക്കൽ, മോണ്‍. ഏബ്രഹാം പുറയാറ്റ്, വികാരിമാരായ ഫാ. ജോസഫ് തച്ചുകുന്നേൽ, ഫാ. അമൽ മണിമലക്കുന്നേൽ എന്നിവർ വിശുദ്ധ കുർബാനയിൽ സഹകാർമികരായിരുന്നു. തീർഥാടകർക്ക് നേർച്ചക്കഞ്ഞി വിതരണം ചെയ്തു. ഇന്നലെ ഉച്ചകഴിഞ്ഞും രാത്രിയിലും നിരവധി വിശ്വാസികളാണ് കുരിശുമലയിലെത്തിയത്. തീർഥാടകർക്കായി വിപുലമായ ക്രമീകരണങ്ങളാണ് ഇവിടെ ഒരുക്കിയിട്ടുള്ളത്. വലിയ നോന്പിൽ എഴുകുംവയൽ കുരിശുമല സന്ദർശിച്ച് വിശുദ്ധ കുർബാനയിൽ പങ്കെടുത്ത് മാർപാപ്പയുടെ നിയോഗങ്ങൾക്കായി പ്രാർഥിക്കുന്നവർക്ക് ജൂബിലി വർഷസമ്മാനമായി പൂർണ ദണ്ഡവിമോചനം ലഭിക്കുമെന്നു രൂപത കേന്ദ്രം അറിയിച്ചു. നോന്പുകാലം തീരുന്നതുവരെ തീർഥാടകർക്ക് കുരിശുമല കയറുന്നതിനുള്ള സൗകര്യവും ഒരുക്കിയിട്ടുണ്ട്. തുന്പച്ചി കുരിശുമല അറക്കുളം: ബൈബിളിലെ വിവിധ ദൃശ്യങ്ങൾ ശിൽപഭംഗിയോടെ ഒരുക്കിയിരിക്കുന്ന പ്രകൃതിരമണീയമായ അറക്കുളം തുന്പച്ചി കുരിശുമലയിൽ നാൽപതാം വെള്ളയാചരണത്തോടനുബന്ധിച്ച് വിശ്വാസികൾ കുരിശിന്‍റെ വഴിയുമായി മലകയറി. ഗത്സമനിൽ പ്രാർഥിക്കുന്ന ഈശോയുടെ രൂപത്തിനു മുന്നിൽ നിന്നു രാവിലെ ഒന്പതിനു മലമുകളിലേക്ക് നടത്തിയ കുരിശിന്‍റെ വഴിക്ക് അറക്കുളം സെന്‍റ് മേരീസ് പള്ളി സഹവികാരി ഫാ. ജോർജ് ഞാറ്റുതൊട്ടിയിൽ നേതൃത്വം നൽകി. ഭാരത അപ്പസ്തോലനായ മാർതോമാശ്ലീഹയുടെ തിരുസ്വരൂപം വണങ്ങി, യാക്കോബിന്‍റെ കിണർ ദർശിച്ച് പിയാത്തായുടെ അരികിലൂടെ യോനായെ മത്സ്യം വിഴുങ്ങുന്ന ദൃശ്യം കണ്ട് ഇരുകൈകളും ഉയർത്തി ലോകത്തെ ആശീർവദിക്കുന്ന ഉത്ഥിതന്‍റെ തിരുസ്വരൂപത്തിലേക്ക് കണ്ണുകൾ ഉയർത്തി പ്രാർഥിച്ച് പിറവിയുടെ ഗുഹയിൽ എത്തുന്പോൾ മനസിൽ നിറയുന്നത് ശാന്തത. പിന്നീട് പഠിപ്പിക്കുന്ന ഗുരുവായ ഈശോയുടെ രൂപം ദർശിച്ച് കാൽവരി സമുച്ചയത്തിൽ എത്തി നേർച്ചകാഴ്ചകൾ അർപ്പിച്ച് കൽക്കുരിശിൽ എണ്ണയൊഴിച്ച് പ്രാർഥിച്ച് പുതിയ ദേവാലയം സന്ദർശിച്ച് മലയിറങ്ങുന്പോൾ മനസിലെ ഭാരമെല്ലാം അലിഞ്ഞില്ലാതാകുന്ന അനുഭവമാണ് ഓരോ വിശ്വാസിയുടെയും ഉള്ളിൽ നിറയുന്നത്. നാൽപ്പതാംവെള്ളിയാചരണത്തിന്‍റെ ഭാഗമായി നടന്ന വിശുദ്ധ കുർബാനയ്ക്ക് ഫാ. ജേക്കബ് കടുതോടിൽ കാർമികത്വം വഹിച്ചു. പാലാ രൂപത ചാൻസലർ ഫാ. ജോസഫ് കുറ്റിയാങ്കൽ വചനസന്ദേശം നൽകി വികാരി ഫാ. മൈക്കിൾ കിഴക്കേപ്പറന്പിൽ ഉൗട്ടുനേർച്ച ആശീർവദിച്ചു. തുടർന്നു നടന്ന വിശുദ്ധ കുർബാനയ്ക്ക് ഫാ. ജോർജ് തൊട്ടിയിൽ കാർമികനായി. രാവിലെ മുതൽ നാടിന്‍റെ വിവിധ ഭാഗങ്ങളിൽനിന്നുള്ള വിശ്വാസികൾ കുരിശിന്‍റെ വഴിയുമായി തുന്പച്ചി കുരിശുമലയിൽ എത്തിയിരുന്നു. ഫാ. ജോർജ് ഞാറ്റുതൊട്ടിയിൽ, കൈക്കാരന്മാരായ ബേബി ഐക്കരമറ്റം, ജോയി കുളത്തിനാൽ, ജോമോൻ മൈലാടൂർ, ഷിന്ധു കുളത്തിനാൽ എന്നിവർ നേതൃത്വം നൽകി. ദുഃഖവെള്ളിയാഴ്ച രാവിലെ എട്ടിന് അറക്കുളം അശോകക്കവലയിൽനിന്ന് ഇടുക്കി റോഡിലൂടെ കിലോമീറ്ററുകൾ സഞ്ചരിച്ച് തുന്പച്ചിയിലേക്ക് പരിഹാര പ്രദക്ഷിണം നടത്തും. ഹിഡുംബൻ മല നാകപ്പുഴ: മരിയൻ തീർഥാടന കേന്ദ്രമായ നാകപ്പുഴ സെന്‍റ് മേരീസ് പള്ളിയിൽനിന്നു ഹിഡുംബൻ മലയിലേക്ക് കുരിശിന്‍റെ വഴി നടത്തി. രാവിലെ ആറിന് നടന്ന വിശുദ്ധ കുർബാനയ്ക്കു ശേഷം ഫാ. പോൾ നെടുന്പുറത്തിന്‍റെ പ്രാരംഭ പ്രാർഥനയോടെയായിരുന്നു കുരിശിന്‍റെ വഴിക്ക് തുടക്കം കുറിച്ചത്. സഹവികാരി ഫാ.പോൾ വാലംപാറയ്ക്കൽ നേതൃത്വം നൽകി. കുരിശിന്‍റെ വഴിയിലെ 14 സ്ഥലങ്ങളിലൂടെ പ്രാർഥനാമന്ത്രങ്ങൾ ഉരുവിട്ടാണ് മലമുകളിൽ എത്തിയത്. തുടർന്നു സമാപന ആശീർവാദവും നേർച്ചക്കഞ്ഞി വിതരണവും ഉണ്ടായിരുന്നു.

ഡിസിഎൽ ഇടുക്കി പ്രവിശ്യാക്യാന്പ് മേരികുളം മരിയൻ പബ്ലിക് സ്കൂളിൽ

കട്ടപ്പന: ദീപിക ബാലസഖ്യം ഇടുക്കി പ്രവിശ്യ സംഘടിപ്പിക്കുന്ന വ്യക്തിത്വ വികസന ദ്വിദിന ക്യാന്പ് 28, 29 തീയതികളിൽ മേരികുളം മരിയൻ പബ്ലിക് സ്കൂളിൽ നടക്കും. 28നു രാവിലെ 9.30നു സ്കൂൾ മാനേജർ ഫാ. വർഗീസ് കുളംപള്ളിയുടെ അധ്യക്ഷതയിൽ ചേരുന്ന യോഗത്തിൽ ജില്ലാ പഞ്ചായത്ത് പ്രസിഡന്‍റ് രാരിച്ചൻ നീറണാകുന്നേൽ ഉദ്ഘാടനം ചെയ്യും. കൊച്ചേട്ടൻ ഫാ.റോയി കണ്ണൻചിറ സിഎംഐ മുഖ്യപ്രഭാഷണം നടത്തും. അയ്യപ്പൻകോവിൽ പഞ്ചായത്ത് വാർഡ് മെംബർ സോണിയ വെട്ടിക്കാല, ഫാ. ജോസഫ് കളപ്പുരയ്ക്കൽ എന്നിവർ പ്രസംഗിക്കും. പ്രവിശ്യാ കോ-ഓർഡിനേറ്റർ എം.വി. ജോർജുകുട്ടി, മരിയൻ സ്കൂൾ പ്രിൻസിപ്പൽ ടോം കണയങ്കവയൽ, മേഖലാ ഓർഗനൈസർമാരായ കൊച്ചുറാണി ജോസഫ്, റെന്നി തോമസ്, ഷാജി കിഴക്കേമുറി, ജെയ്സൺ സ്കറിയ, സിസ്റ്റർ ആനി ജോസഫ്, സിസ്റ്റർ തെരേസ് തുടങ്ങിയവർ നേതൃത്വം നൽകും. ക്യാന്പിൽ പങ്കെടുക്കാനാഗ്രഹിക്കുന്നവർ 9400671874, 9447205828 എന്നീ നന്പറുകളിൽ ബന്ധപ്പെടണം.

എഴുകുംവയൽ കുരിശുമല തീർഥാടനം തുടങ്ങി

ചെറുതോണി: കാൽവരിമലയിലേക്കുള്ള യേശുവിന്‍റെ പീഡാനുഭവ യാത്രയെ അനുസ്മരിപ്പിച്ച് ഇടുക്കി രൂപത കുടുംബം നടത്തുന്ന കുരിശുമല തീർഥാടനത്തിന് തുടക്കമായി. വാഴത്തോപ്പ് സെന്‍റ് ജോർജ് കത്തീഡ്രലിൽനിന്നു ബിഷപ് മാർ ജോണ്‍ നെല്ലിക്കുന്നേലിന്‍റെ നേതൃത്വത്തിൽ ആരംഭിച്ച കാൽനട തീർഥയാത്രയിൽ വൈദികരും സന്യസ്തരുമുൾപ്പെടെ നൂറുകണക്കിനുവിശ്വാസികൾ പങ്കുചേർന്നു. ഭാരമേറിയ മരക്കുരിശുമായാണ് യുവവൈദികർ തീർഥയാത്രയെ അനുഗമിക്കുന്നത്. രൂപത മുഖ്യ വികാരി ജനറാൾ മോണ്‍. ജോസ് കരിവേലിക്കൽ, കത്തീഡ്രൽ വികാരി ഫാ. ഫ്രാൻസിസ് ഇടവക്കണ്ടം, രൂപത വിദ്യാഭ്യാസ സെക്രട്ടറി റവ.ഡോ. ജോർജ് തകിടിയേൽ, രൂപത മീഡിയ കമ്മീഷൻ ഡയറക്ടർ ഫാ. ജിൻസ് കാരയ്ക്കാട്ട് തുടങ്ങിയവർ നേതൃത്വം നൽകി. തീർഥാടനം ഇന്നലെ പാണ്ടിപ്പാറ സെന്‍റ് ജോസഫ് പള്ളിയിൽ സമാപിച്ചു. ഇന്നു പുലർച്ചെ 3.45ന് പുനരാരംഭിക്കും. വിവിധ ഇടവകകളിൽനിന്നു രാവിലെ 8.30നു മലയടിവാരത്ത് സംഗമിച്ച ശേഷമാണ് മലകയറുന്നത്. വലിയനോന്പിലെ നാൽപതാം വെള്ളിയാഴ്ചയായ ഇന്നു ഇടുക്കി രൂപതയുടെ തീർഥാടനദിനമാണ്. തീർത്ഥാടകർക്ക് ആവശ്യമായ എല്ലാ ക്രമീകരണങ്ങളും ഒരുക്കിയിട്ടുണ്ടെന്ന് അധികൃതർ അറിയിച്ചു.

മാര്‍ ജോസഫ് പള്ളിക്കാപറമ്പിലിന്‍റെ 98-ാം ജന്മദിനം ആഘോഷിച്ചു

പാലാ: 99-ാം വയസിലേക്കു പ്രവേശിക്കുന്ന മാര്‍ ജോസഫ് പള്ളിക്കാപറമ്പിലിന്‍റെ ജന്മദിനം ലളിതമായി ആഘോഷിച്ചു. രാവിലെ ബിഷപ് ഹൗസ് ചാപ്പലില്‍ അദ്ദേഹത്തിന്‍റെ മുഖ്യകാര്‍മികത്വത്തില്‍ വിശുദ്ധ കുര്‍ബാന അര്‍പ്പിക്കപ്പെട്ടു. ഉച്ചകഴിഞ്ഞ് ബിഷപ് ഹൗസ് ഹാളില്‍ 99 കുട്ടികളുടെ സാന്നിധ്യത്തില്‍ അദ്ദേഹം കേക്കു മുറിച്ചു. ബിഷപ് മാര്‍ ജോസഫ് കല്ലറങ്ങാട്ട്, മുഖ്യവികാരി ജനറാള്‍ മോണ്‍. ജോസഫ് തടത്തില്‍, മോണ്‍. ജോസഫ് മലേപ്പറമ്പില്‍, മോണ്‍. ജോസഫ് കണിയോടിക്കല്‍, മോണ്‍. സെബാസ്റ്റ്യന്‍ വേത്താനത്ത് തുടങ്ങിയവര്‍ പങ്കെടുത്തു. നിരവധി സാമൂഹ്യ-സാസ്‌കാരിക-രാഷ്‌ട്രീയ പ്രവത്തകര്‍ മാര്‍ പള്ളിക്കാപറമ്പിലിന് ആശംസകളുമായി എത്തിയിരുന്നു. മാര്‍ ജോസഫ് പള്ളിക്കാപറമ്പിലിന്‍റെ 98-ാം ജന്മദിനം കത്തീഡ്രല്‍ ഇടവകയില്‍ മിഷന്‍ലീഗിന്‍റെയും സണ്‍ഡേ സ്‌കൂളിന്‍റെയും സംയുക്ത ആഭിമുഖ്യത്തില്‍ ആഘോഷിച്ചു. 99 കുട്ടികള്‍ 99 എന്ന സംഖ്യാ രൂപത്തില്‍ അണിനിരക്കുകയും മാര്‍ പള്ളിക്കാപറമ്പിലിന് ജന്മദിനാശംസകള്‍ നേര്‍ന്ന് ആശംസകള്‍ എഴുതിയ ബലൂണുകള്‍ ആകാശത്തേക്ക് ഉയര്‍ത്തുകയും ചെയ്തു. ഇടവക വികാരി ഫാ. ജോസ് കാക്കല്ലില്‍, സണ്‍ഡേ സ്‌കൂള്‍ ഡയറക്ടര്‍ ഫാ. ഐസക് പെരിങ്ങാമലയില്‍, ഹെഡ്മാസ്റ്റര്‍ ഷാജി ആവിമൂട്ടില്‍, മിഷന്‍ ലീഗ് പ്രസിഡന്‍റ് അനൂപ് വെട്ടിക്കല്‍, സിബി പുളിക്കല്‍, സിസ്റ്റര്‍ റിന്‍സി വരവുകാലായില്‍, അമല്‍ വരകുകാലായില്‍, ജോമിന്‍ വില്ലന്‍കല്ലേല്‍, മാത്യു പരിപ്പിക്കുന്നേല്‍, ലീഡര്‍മാരായ എഡ്വിന്‍ കിഴക്കേപറമ്പില്‍, സ്‌നേഹ പുത്തന്‍പുരക്കല്‍, ടോം വളയത്തില്‍ എന്നിവര്‍ ആശംസാ പ്രസംഗം നടത്തി.

വന്യജീവി ആക്രമണം: കർമപദ്ധതിയുമായി വനംവകുപ്പ്

അടിമാലി: വന്യജീവി ആക്രമണം ലഘൂകരിക്കുന്നതിനു ജില്ലയുടെ വിവിധ പ്രദേശങ്ങളിലെ അതിർത്തി മേഖലകളിൽ വിവിധ കർമപദ്ധതികൾ നടപ്പാക്കാനൊരുങ്ങി വനംവകുപ്പ്. ഓരോ പ്രദേശത്തിന്‍റെ പ്രത്യേകത, ഏതുതരം വന്യമൃഗങ്ങളാണ് ജനവാസമേഖലയിൽ എത്തുന്നത്, ഇവയുടെ സ്വഭാവം, എണ്ണം തുടങ്ങിയവ മുൻനിർത്തിയാണ് പദ്ധതികൾ തയാറാക്കിയിട്ടുള്ളത്. മാങ്കുളത്ത് മിഷൻ റിയൽ ടൈംസ് മോണിറ്ററിംഗ് പദ്ധതിയാണ് നടപ്പാക്കുന്നത്. വന്യജീവി ആക്രമണം കൂടുതലുള്ള പ്രദേശമാണിവിടം. ഈ മേഖലയിലെ സംഘർഷം ലഘൂകരിക്കുകയെന്ന ലക്ഷ്യത്തോടെയാണ് വനംവകുപ്പ് മിഷൻ റിയൽ ടൈംസ് മോണിറ്ററിംഗ് പദ്ധതി നടപ്പാക്കാൻ ഒരുങ്ങുന്നത്. വനംവകുപ്പിന്‍റെ മാങ്കുളം ഫോറസ്റ്റ് ഡിവിഷന്‍റെ നേതൃത്വത്തിൽ വനാതിർത്തികളിൽ 360 ഡിഗ്രി നിരീക്ഷണ കാമറകൾ സ്ഥാപിച്ച് വന്യമൃഗങ്ങളുടെ തത്സമയ സഞ്ചാരവും സ്വഭാവവും ഉൾപ്പെടെ വിലയിരുത്തും. ഇതോടൊപ്പം ഇവ ജനവാസ മേഖലയിലേക്ക് എത്താനുള്ള സാധ്യത മുൻകൂട്ടികണ്ട് ആവശ്യമായ നടപടി സ്വീകരിക്കാനും പദ്ധതി ഉപകരിക്കും. പ്രദേശത്ത് വന്യജീവികളുടെ സാന്നിധ്യം ഉണ്ടായാൽ ജനങ്ങൾക്ക് ജാഗ്രതാനിർദേശം നൽകാനും പദ്ധതി ഉപകരിക്കും. ഇതുമായി ബന്ധപ്പെട്ട് കാമറകൾ സ്ഥാപിക്കുന്നതിനുള്ള പ്രവർത്തനങ്ങൾ പുരോഗമിക്കുകയാണെന്ന് ഹെറേഞ്ച് സർക്കിൾ ചീഫ് കണ്‍സർവേറ്റർ ആർ.എസ്.അരുണ്‍ പറഞ്ഞു. കിംസ് ഹെൽത്ത് കെയറിന്‍റെ സിഎസ്ആർ ധനസഹായത്തോടെയും ഇടുക്കി എൻജിനിയറിംഗ് കോളജിന്‍റെ സാങ്കേതിക സഹായത്തോടെയും ആർട്ടിഫിഷൽ ഇന്‍റലിജൻസ് സാങ്കേതിക സഹായത്തോടെയുള്ള കാമറകൾ സ്ഥാപിക്കുന്നതിനുള്ള നടപടികളാണ് പുരോഗമിക്കുന്നത്. പദ്ധതിയുടെ ട്രയൽ റണ്‍ വിജയിച്ചതായും വനംവകുപ്പ് അറിയിച്ചു. കാമറകൾ സ്ഥാപിക്കുന്നതിലൂടെ ജനവാസമേഖലയിൽ കാട്ടാനയടക്കമുള്ള വന്യജീവികളുടെ സാന്നിധ്യം മുൻകൂട്ടി തിരിച്ചറിയാൻ സാധിച്ചാൽ ജനവാസമേഖലയിലേക്ക് ഇവ എത്തുന്നതിനു മുന്പ് അവയെ വനത്തിലേക്ക് തുരത്താൻ പദ്ധതി സഹായിക്കുമെന്നാണ് വനംവകുപ്പിന്‍റെ പ്രതീക്ഷ. തേക്കടി ഉൾപ്പെടെയുള്ള സ്ഥലങ്ങളിൽ കാമറകൾസ്ഥാപിച്ച് വന്യജീവികളെ നിരീക്ഷിച്ചുവരുന്നുണ്ട്. മറയൂരിൽ പിആർടി വന്യജീവി ആക്രമണം രൂക്ഷമാകുന്ന സാഹചര്യത്തിൽ ജനങ്ങളുടെ ജീവനും സ്വത്തിനും സംരക്ഷണം നൽകുന്നതിനായി വനംവകുപ്പിന്‍റെ നേതൃത്വത്തിൽ പിആർടി സംഘത്തെ സജ്ജമാക്കും. ഇതിനായി വനം വകുപ്പ്, പോലീസ്, ആരോഗ്യം, റവന്യൂ തുടങ്ങിയ ഡിപ്പാർട്ട്മെന്‍റുകൾക്കു പുറമേ ഗ്രാമങ്ങളിലെ വോളണ്ടിയർമാരെയും ഉൾപ്പെടുത്തിയാണ് ആർആർടി ടീമിനെ സജ്ജമാക്കിയിരിക്കുന്നത്. പഞ്ചായത്തിലെ വിവിധ വാർഡുകളിൽനിന്നുള്ള 25-ഓളം അംഗങ്ങളെയാണ് ഇതിനായി തെരഞ്ഞെടുത്തിരിക്കുന്നത്. വന്യമൃഗങ്ങളുടെ സാന്നിധ്യം അറിഞ്ഞാൽ ഉടൻതന്നെ റെസ്പോണ്‍സ് ടീമിനെവിവരം അറിയിക്കുകയും ഉൾവനത്തിലേക്ക് മൃഗങ്ങളെ തുരത്താനുള്ള നടപടികൾ സ്വീകരിക്കുകയും ചെയ്യും. ടീമിലെ 25 പേർക്കും വനംവകുപ്പ് പ്രത്യേക യൂണിഫോം തയാറാക്കി നൽകിയിട്ടുണ്ട്. പ്രദേശവാസികളുടെ സഹകരണം കൂടി ലഭ്യമായാൽ പ്രശ്നപരിഹാരം സാധ്യമാണെന്ന് കാന്തല്ലൂർ റേഞ്ച് ഫോറസ്റ്റ് ഓഫീസർ ടി. രഘുലാൽ പറഞ്ഞു.

ബഫർ സോണ്‍ ; അനാവശ്യ ഭീതി പടർത്തരുത്: മന്ത്രി റോഷി

ഇടുക്കി: ബഫർ സോണ്‍ വിഷയത്തിൽ ജില്ലയിലെ ജനങ്ങളെ തെറ്റിദ്ധരിപ്പിച്ച് ആശങ്കയിലാഴ്ത്താനാണ് ചിലർ ശ്രമിക്കുന്നതെന്ന് മന്ത്രി റോഷി അഗസ്റ്റിൻ. ജനങ്ങളുടെ ആശങ്ക മനസിലാക്കി ജലവിഭവ വകുപ്പ് ഡാമുകളുടെ ചുറ്റും ബഫർ സോണ്‍ പ്രഖ്യാപിച്ചുകൊണ്ടുള്ള ഉത്തരവ് റദ്ദാക്കി പുതിയ ഉത്തരവ് പുറപ്പെടുവിച്ചിരുന്നു. ഇതോടെ പഴയ ഉത്തരവ് പൂർണമായും ഇല്ലാതായി. ഇപ്പോൾ ഡാമിന്‍റെ ചുറ്റുമുള്ള സ്വകാര്യ ഭൂമിയിൽ ഒരു തരത്തിലുമുള്ള നിർമാണ നിയന്ത്രണങ്ങൾ ഇല്ലെന്നു മന്ത്രി പറഞ്ഞു. എന്നാൽ ഇതു മറച്ചുവച്ച് പഴയ ഉത്തരവ് റദ്ദാക്കിയില്ലെന്നും ബഫർ സോണ്‍ ഇപ്പോഴും നിലവിൽ ഉണ്ടെന്നും കെഎസ്ഇബിയുടെ ഡാമുകളിലേക്കുകൂടി ഇതു വ്യാപിപ്പിക്കാൻ സർക്കാർ തയാറെടുക്കുകയാണ്. വ്യാജ പ്രചാരണം അഴിച്ചുവിടുന്നത് ജനങ്ങളെ ആശങ്കപ്പെടുത്താനാണ്. ഇത്തരമൊരു പ്രചാരണം ജനങ്ങൾ തിരിച്ചറിയണമെന്നും മന്ത്രി പറഞ്ഞു. കെഎസ്ഇബിയുടെ ഡാമുകളുടെ ചുറ്റും ബഫർ സോണ്‍ പ്രഖ്യാപിക്കാൻ നീക്കമില്ലെന്ന് വൈദ്യുതി മന്ത്രിയുടെ ഓഫീസ് തന്നെ വ്യക്തമാക്കിയിട്ടുണ്ട്. ഇക്കാര്യം വൈദ്യുതി മന്ത്രിയുമായി നേരിൽ സംസാരിക്കുകയും അത്തരമൊരു നീക്കവുമില്ലെന്ന് അദ്ദേഹം വ്യക്തമാക്കുകയും ചെയ്തിട്ടുണ്ട്. ഈ സാഹചര്യത്തിൽ വ്യക്തിപരമായ താത്പര്യങ്ങൾ മാത്രം മുന്നിൽക്കണ്ടാണ് ചിലർ ജനങ്ങളെ ഭീതിയിലാഴ്ത്തുന്നതെന്നും മന്ത്രി പറഞ്ഞു. മറുപടി പറയേണ്ടത് വൈദ്യുതി മന്ത്രി: ബിജോ മാണി ഇടുക്കി: കെഎസ്ഇബിയുടെ ഡാമുകളിൽ രണ്ട് കാറ്റഗറികളായി തിരിച്ച് നിർമാണപ്രവർത്തനങ്ങൾക്ക് നിയന്ത്രണമേർപ്പെടുത്തുമെന്ന് നിയമസഭയിൽ രേഖാമൂലം മറുപടി നൽകിയത് വൈദ്യുതി മന്ത്രിയാണെന്ന് ഡിസിസി ജനറൽ സെക്രട്ടറി ബിജോ മാണി പറഞ്ഞു. ഇനി ബഫർ സോണ്‍ നടപ്പാക്കുന്ന കാര്യം പരിഗണനയിൽ ഇല്ലെങ്കിൽ അത് വ്യക്തമാക്കേണ്ടത് വൈദ്യുതി മന്ത്രിയാണ്. അല്ലാതെ മന്ത്രിയുടെ ഓഫീസോ ജലവിഭവവകുപ്പ് മന്ത്രിയോ അല്ല.

ചുഴലിക്കാറ്റ് പ്രതിരോധം: മോക്ക് ഡ്രിൽ ഇന്ന്

ഇടുക്കി: ദേശീയ, സംസ്ഥാന ദുരന്തനിവാരണ അഥോറിറ്റികളുടെ ആഭിമുഖ്യത്തിൽ ഇന്ന് സംസ്ഥാനത്ത് ചുഴലിക്കാറ്റും അനുബന്ധ ദുരന്തങ്ങളും പ്രതിരോധിക്കുന്നതിനുള്ള തയാറെടുപ്പുകൾ വിലയിരുത്തുന്നതിനായി മൂലമറ്റം, പള്ളിവാസൽ പവർ ഹൗസുകളിൽ രാവിലെ എട്ടിനും ഉച്ചയ്ക്ക് ഒന്നിനും ഇടയിൽ മോക്ഡ്രിൽ നടത്തും. ഈ സമയം പവർ ഹൗസുകളിൽനിന്നു ം ഫയർ ഫോഴ്സ്, ദേശീയ ദുരന്ത പ്രതികരണ സേന, പോലീസ്, ആരോഗ്യ വകുപ്പ് എന്നിവരുടെ വാഹനങ്ങളിൽനിന്നും അപായ സൈറണ്‍ മുഴങ്ങുന്ന അവസരത്തിൽ ജനങ്ങൾ പരിഭ്രാന്തരാകേണ്ടെന്ന് അധികൃതർ അറിയിച്ചു. ദുരന്ത മുന്നറിയിപ്പ് ലഭിക്കുന്ന ഘട്ടത്തിൽ മുൻകൂട്ടി നിശ്ചയിക്കപ്പെട്ടിരിക്കുന്ന ഇൻസിഡന്‍റ് റെസ്പോണ്‍സ് സിസ്റ്റത്തിന്‍റെ പ്രവർത്തനം, കണ്‍ട്രോൾ റൂമുകളുടെ പ്രവർത്തനം, വിവിധ വകുപ്പുകൾ തമ്മിലുള്ള ഏകോപനം, ആശയവിനിമയോപാധികളുടെ കൃത്യമായ ഉപയോഗം, സൈറണുകളുടെ പ്രവർത്തനം, അപകട സ്ഥലത്ത് നടത്തുന്ന പ്രതിരോധ, രക്ഷാപ്രവർത്തനങ്ങളുടെ ഏകോപനം മുതലായവയും നിലവിൽ ഓരോ സംവിധാനവും എത്രത്തോളം സജ്ജമാണെന്നു പരിശോധിക്കാനും ശ്രദ്ധയിൽപ്പെടുന്ന പോരായ്മകൾ പരിഹരിക്കാനുമാണ് മോക്ക് ഡ്രിൽ സംഘടിപ്പിക്കുന്നത്.

തട്ടിപ്പിനെതിരേ നടപടി വേണം: മർച്ചന്‍റ്സ് അസോസിയേഷൻ

തൊടുപുഴ: നഗരത്തിലും പരിസരപ്രദേശങ്ങളും ഹണി ട്രാപ് മോഡൽ തട്ടിപ്പ് നടത്താൻ ശ്രമിക്കുന്നവർക്കെതിരേ ശക്തമായ നടപടി സ്വീകരിക്കണമെന്ന് തൊടുപുഴ മർച്ചന്‍റ്സ് അസോസിയേഷൻ ആവശ്യപ്പെട്ടു. കടയിലെത്തി സാധനങ്ങൾ വാങ്ങിയ ശേഷം തുക ചോദിക്കുന്പോൾ സ്ത്രീകളെ ഉപയോഗിച്ച് ഭീഷണിപ്പെടുത്തുകയും മറ്റുമാണ് ഇവർ ചെയ്യുന്നത്. ഇതിന് ചില രാഷ‌്ട്രീയക്കാരുടെ പിൻബലമുണ്ട്. ഇത്തരം തട്ടിപ്പുകളിൽ വ്യാപാരികൾ ശ്രദ്ധിക്കണമെന്ന് അസോസിയേഷൻ മുന്നറിയിപ്പു നൽകി. കഴിഞ്ഞ ദിവസം തൊടുപുഴയിലെ സ്വർണക്കടയിൽ സമാനരീതിയിലുള്ള സംഭവം ഉണ്ടായി. ഇത്തരം സംഭവങ്ങൾ ആവർത്തിക്കാതിരിക്കാനുള്ള നടപടി സ്വീകരിക്കണമെന്ന് ആവശ്യപ്പെട്ട് മുഖ്യമന്ത്രിക്കും എസ്പിക്കും പരാതി നൽകാൻ യോഗം തീരുമാനിച്ചു. പ്രസിഡന്‍റ് രാജു തരണിയിൽ അധ്യക്ഷത വഹിച്ചു. സി.കെ. നവാസ്, അനിൽ പീടികപ്പറന്പിൽ, നാസർ സൈര, ഷെരീഫ് സർഗം, ജോസ് കളരിക്കൽ, കെ.പി. ശിവദാസ്, ഷിയാസ് എംപീസ്, ലിജോണ്‍സ് ഹിന്ദുസ്ഥാൻ എന്നിവർ പ്രസംഗിച്ചു.

കാറും ബൈക്കും കത്തിനശിച്ചു

തൊടുപുഴ: തീ പിടിത്തത്തിൽ വീടിനോടു ചേർന്ന് പാർക്കു ചെയ്തിരുന്ന വാഹനങ്ങളും വിറകുപുരയും കത്തി നശിച്ചു. തൊടുപുഴ കുണിഞ്ഞിയിൽ ഇന്നലെ പുലർച്ചെ 2.45 നായിരുന്നു സംഭവം. കുണിഞ്ഞി പഴയന്പാറ ടോമി മാത്യുവിന്‍റെ വീടിനോട് ചേർന്ന് സ്ഥിതിചെയ്യുന്ന വിറകുപുരയ്ക്ക് സമീപം ഷെഡിൽ പാർക്ക് ചെയ്തിരുന്ന കാറും ബൈക്കുമാണ് കത്തി നശിച്ചത്. കാറിനാണ് ആദ്യം തീ പിടിച്ചത്. ഇത് പിന്നീട് വിറകുപുരയിലേക്കും അവിടെ സൂക്ഷിച്ചിരുന്ന ഒട്ടുപാലിലേക്കും പടരുകയായിരുന്നു. പിന്നീട് സമീപത്തുണ്ടായിരുന്ന ബൈക്കിനും തീ പിടിച്ചു. പുലർച്ചെ ആയതിനാൽ സംഭവം ആദ്യം വീട്ടുകാരുടെ ശ്രദ്ധയിൽപ്പെട്ടില്ല. വിവരം അറിഞ്ഞപ്പോഴേക്കും തീ വലിയ തോതിൽ പടർന്നിരുന്നു. വീട്ടുകാർ സംഭവം ഫയർഫോഴ്സിൽ അറിയിച്ചതിനെത്തുടർന്ന് തൊടുപുഴയിൽനിന്ന് അസിസ്റ്റന്‍റ് സ്റ്റേഷൻ ഓഫീസർ ബിജു പി.തോമസിന്‍റെ നേതൃത്വത്തിൽ രണ്ട് യൂണിറ്റ് സേനാംഗങ്ങൾ സ്ഥലത്തെത്തി. തീപിടിത്തം ഉണ്ടായ സ്ഥലത്തേക്ക് ഫയർഫോഴസ് വാഹനം എത്തിച്ചേരാവുന്ന വിധത്തിൽ റോഡ് ഉണ്ടായിരുന്നില്ല. എങ്കിലും സേനാംഗങ്ങളുടെ ശ്രമഫലമായി കത്തിക്കൊണ്ടിരുന്ന കാറിലെയും ബൈക്കിലേയും തീയണച്ചു. വിറകുകളിലേക്കും ഒട്ടുപാലിലേക്കും പടർന്ന തീയും നിശേഷം അണച്ചു. വിറകുപുരയുടെ മേൽക്കൂര ഉൾപ്പെടെ കത്തിനശിച്ചു. വാഹനത്തിലെ ഷോർട്ട് സർക്യൂട്ട് മൂലമാണ് തീപിടിത്തം ഉണ്ടായതെന്നാണ് പ്രാഥമിക നിഗമനം. കാറ്, ബൈക്ക്, വിറകുപുര, ഒട്ടുപാൽ എന്നിവ കത്തിനശിച്ചത് മൂലം 3.70 ലക്ഷം രൂപയുടെ നഷ്ടം കണക്കാക്കുന്നു. സീനിയർ ഫയർ ഓഫീസർ കെ.എ. ഉബാസ്, ഫയർ ഓഫീസർമാരായ ഷിബിൻ ഗോപി, ജയിംസ് നോബിൾ, വി.ബി. സന്ദീപ് , എഫ്.എസ്. ഫ്രിജിൻ, ലിബിൻ ജയിംസ്, ഹോം ഗാർഡുമാരായ മാത്യു ജോസഫ്, എം.പി. ബെന്നി, കെ.എസ്. അബ്ദുൾ നാസർ എന്നിവരാണ് രക്ഷാപ്രവർത്തനത്തിൽ പങ്കെടുത്തത്.

മരം വീണ് ഗതാഗതം തടസപ്പെട്ടു

തൊടുപുഴ: നടുക്കണ്ടത്ത് മരം വീണ് ഗതാഗതം തടസപ്പെട്ടു. ബുധനാഴ്ച രാത്രി 7.45 നായിരുന്നു സംഭവം. ഇല്ലിക്കൽ പുന്നൂസിന്‍റെ പുരയിടത്തിലെ വലിയ ആഞ്ഞിലിമരമാണ് തൊടുപുഴ-പാലാ റോഡിൽ വീണ് ഗതാഗതം തടസപ്പെട്ടത്. മരംവീണതിനെത്തുടർന്ന് മൂന്ന് ഇലക‌്ട്രിക് പോസ്റ്റുകൾ, ലൈനുകൾ, കേബിളുകൾ എന്നിവയ്ക്ക് നാശനഷ്ടം സംഭവിച്ചു. വീട്ടുകാർ വിവരം അറിയിച്ചതനുസരിച്ച് തൊടുപുഴയിൽനിന്ന് അസിസ്റ്റന്‍റ് സ്റ്റേഷൻ ഓഫീസർ ബിജു പി. തോമസിന്‍റെ നേതൃത്വത്തിൽ ഒരു യൂണിറ്റ് അഗ്നി രക്ഷാ സേന സ്ഥലത്തെത്തി. തുടർന്ന് ഒരു മണിക്കൂറോളം പരിശ്രമിച്ച് മരം മുറിച്ചുമാറ്റി ഗതാഗതം പുനഃസ്ഥാപിക്കുകയായിരുന്നു. ഫയർ ഓഫീസർമാരായ ഷിബിൻ ഗോപി, ജയിംസ് നോബിൾ, വി.ബി. സന്ദീപ്, എഫ്.എസ്. ഫ്രിജിൻ, ലിബിൻ ജയിംസ്, ഹോം ഗാർഡ് മാത്യു ജോസഫ് എന്നിവരായിരുന്നു സംഘത്തിൽ ഉണ്ടായിരുന്നത്.

ജല അഥോറിറ്റി ഗസ്റ്റ് ഹൗസ് നിർമാണം പുരോഗമിക്കുന്നു

ഇടുക്കി: പൈനാവിൽ വാട്ടർ അഥോറിറ്റി നിർമിക്കുന്ന ഗസ്റ്റ് ഹൗസിന്‍റെ നിർമാണം പുരോഗമിക്കുന്നു. മന്ത്രി റോഷി അഗസ്റ്റിനും ജലഅഥോറിറ്റി ഉദ്യോഗസ്ഥരും നിർമാണ പുരോഗതി വിലയിരുത്തി. ഗസ്റ്റ് ഹൗസിനോട് അനുബന്ധിച്ച് സെക്‌ഷൻ ഓഫീസും സബ് ഡിവിഷൻ ഓഫീസും നിർമിക്കും. സാധാരണക്കാർക്ക് വാട്ടർ അഥോറിറ്റി ഓഫീസുമായി ബന്ധപ്പെട്ട സേവനം കൂടുതൽ സൗകര്യപ്രദമാക്കുകയെന്ന ലക്ഷ്യത്തോടെയാണ് പൈനാവ് ടൗണിൽ ജല സംഭരണിക്ക് താഴെയായി ഓഫീസ് കെട്ടിടം നിർമിക്കുന്നത്. മൂന്ന് സ്യൂട്ട് റൂമുകളും രണ്ട് ഓർഡിനറി റൂമുകളും ഉൾപ്പെടുന്ന ഗസ്റ്റ് ഹൗസാണ് നിർമിക്കുന്നത്. വിനോദസഞ്ചാരികൾക്ക് മിതമായ നിരക്കിൽ താമസം ലഭ്യമാക്കുന്നതോടൊപ്പം വാട്ടർ അഥോറിറ്റിയുടെ വരുമാനം വർധിപ്പിക്കുകയുമാണ് ലക്ഷ്യം. ജൽജീവൻ മിഷന്‍റെ ഭാഗമായി രണ്ടര ലക്ഷം ലിറ്റർ സംഭരണ ശേഷിയുള്ള വാട്ടർ ടാങ്ക് നിർമിക്കുന്പോൾ ഇതിന്‍റെ താഴെയുള്ള ഭാഗങ്ങൾ അതിഥി മന്ദിരത്തിനും ഓഫീസ് കെട്ടിടത്തിനുമായി വിനിയോഗിക്കുകയായിരുന്നു. മൂന്നാമത്തെ നില ഉപയോഗപ്പെടുത്തിയാണ് സെക്‌ഷൻ, സബ് ഡിവിഷൻ ഓഫീസുകൾ സജ്ജീകരിക്കുന്നത്. 30 ലക്ഷം രൂപയാണ് അതിഥി മന്ദിരത്തിനും ഓഫീസ് കെട്ടിടത്തിനുമായി അനുവദിച്ചിരിക്കുന്നത്. നിർമാണപുരോഗതി വിലയിരുത്തിയ മന്ത്രി പ്രവർത്തനങ്ങൾ അതിവേഗം പൂർത്തിയാക്കാൻ നിർദേശം നൽകി. മേയ് അവസാനത്തോടെ കെട്ടിടത്തിന്‍റെ നിർമാണം പൂർത്തിയാക്കാനാണ് ലക്ഷ്യമിടുന്നത്.

മരിയാപുരം സെന്‍റ് മേരീസ് സ്കൂൾ സുവർണജൂബിലി ഉദ്ഘാടനം നാളെ

ചെറുതോണി: മരിയാപുരം സെന്‍റ് മേരീസ് ഹയർ സെക്കൻഡറി സ്കൂൾ സുവർണ ജൂബിലി ആഘോഷങ്ങളുടെയും ഫിക്സേഷൻ ലഭിച്ച സയൻസ് ബാച്ചിന്‍റെയും നവീകരിച്ച സ്കൂൾ ഓഡിറ്റോറിയത്തിന്‍റെയും എൻസിസി യൂണിറ്റിന്‍റെയും ഉദ്ഘാടനം നാളെ നടക്കും. രാവിലെ 9.30ന് സ്കൂൾ ഓഡിറ്റോറിയത്തിൽ ചേരുന്ന ജൂബിലി സമ്മേളനം മന്ത്രി റോഷി അഗസ്റ്റിൻ ഉദ്ഘാടനം ചെയ്യും. ഇടുക്കി ബിഷപ് മാർ ജോണ്‍ നെല്ലിക്കുന്നേൽ അധ്യക്ഷത വഹിക്കും. എൻസിസി യൂണിറ്റിന്‍റെ ഉദ്ഘാടനം ഡീൻ കുര്യാക്കോസ് എംപി നിർവഹിക്കും. ഇടുക്കി രൂപത മുഖ്യവികാരി ജനറാൾ മോണ്‍. ജോസ് കരിവേലിക്കൽ മുഖ്യപ്രഭാഷണവും വികാരി ജനറാൾ മോണ്‍. ഏബ്രഹാം പുറയാറ്റ് അനുഗ്രഹ പ്രഭാഷണവും നടത്തും. സയൻസ് ബാച്ചിന്‍റെ ഉദ്ഘാടനം രൂപത വിദ്യാഭ്യാസ സെക്രട്ടറി റവ. ഡോ. ജോർജ് തകിടിയേൽ നിർവഹിക്കും. നെടുങ്കണ്ടം എൻസിസി 33കെ ബറ്റാലിയൻ കമാന്‍ഡിംഗ് ഓഫീസർ കേണൽ വിക്രം ജിത് സിംഗ് വിശിഷ്ടാതിഥിയായിരിക്കും.നവീകരിച്ച സ്കൂൾ ഓഡിറ്റോറിയത്തിന്‍റെ വെഞ്ചരിപ്പ് സ്കൂൾ മാനേജർ ഫാ. തോമസ് ആനിക്കുഴിക്കാട്ടിൽ നിർവഹിക്കും. ഇടുക്കി ബ്ലോക്ക് പഞ്ചായത്ത് പ്രസിഡന്‍റ് ആൻസി തോമസ്, മരിയാപുരം പഞ്ചായത്ത് പ്രസിഡന്‍റ് ജിൻസി ജോയി, ജില്ലാ പഞ്ചായത്തംഗം കെ.ജി. സത്യൻ, ബ്ലോക്ക് പഞ്ചായത്തംഗം ഡിറ്റാജ് ജോസഫ്, ആലീസ് വർഗീസ്, പ്രിൻസിപ്പൽ സിബിച്ചൻ തോമസ്, പഞ്ചായത്തംഗങ്ങളായ അനുമോൾ കൃഷ്ണൻ, കെ.എസ്. സിന്ധു, പിടിഎ പ്രസിഡന്‍റ് സണ്ണി കല്ലക്കാവുങ്കൽ, ഹെഡ്മാസ്റ്റർ സിജുമോൻ ദേവസ്യ, സ്കൂൾ ചെയർമാൻ വിഷ്ണു നിഷാദ് തുടങ്ങിയവർ പ്രസംഗിക്കും.

പാതിവില തട്ടിപ്പിൽ മൊഴിയെടുപ്പ്: നോട്ടീസ് കിട്ടിയിട്ടില്ലെന്ന് ഡീൻ

തൊടുപുഴ: പാതിവില തട്ടിപ്പിൽ മൊഴിയെടുക്കാനായി തങ്ങൾക്ക് നോട്ടീസ് ലഭിച്ചിട്ടില്ലെന്ന് ഡീൻ കുര്യാക്കോസ് എംപിയും സിപിഎം ജില്ലാ സെക്രട്ടറി സി.വി. വർഗീസും പറഞ്ഞു. കേസിലെ ഒന്നാം പ്രതി അനന്ദു കൃഷ്ണനിൽനിന്നു പണം സ്വീകരിച്ചുവെന്ന ആരോപണത്തിന്‍റെ അടിസ്ഥാനത്തിൽ കേസ് അന്വേഷിക്കുന്ന ക്രൈംബ്രാഞ്ച് ഇരുവരെയും ചോദ്യം ചെയ്യുമെന്ന വാർത്തയോട് പ്രതികരിക്കുകയായിരുന്നു ഇവർ. നിർധന കുടുംബത്തിനായി അനന്ദു സഹായം നൽകിയിരുന്നുവെന്നും ഇതിന്‍റെ രേഖകൾ ഉണ്ടെന്നും ആർക്കുവേണമെങ്കിലും പരിശോധിക്കാവുന്നതാണെന്നും നേരത്തേ പലവട്ടം വ്യക്തമാക്കിയിരുന്നു. ഏത് അന്വേഷണത്തെയും നേരിടാൻ തയാറാണെന്നും ഡീൻ കുര്യാക്കോസ് പറഞ്ഞു. ക്രൈംബ്രാഞ്ച് മൊഴിയെടുക്കുമെന്നത് മാധ്യമങ്ങളിലൂടെ കേട്ടറിവ് മാത്രമേയുള്ളുവെന്നും നോട്ടീസ് ലഭിച്ചിട്ടില്ലെന്നും സി.വി വർഗീസും വ്യക്തമാക്കി.

ക്വട്ടേഷൻ കൊലപാതകം: ശബ്ദപരിശോധന നടത്തി

തൊടുപുഴ: സാന്പത്തിക തർക്കത്തെത്തുടർന്ന് മുൻ ബിസിനസ് പങ്കാളിയെ കൊലപ്പടുത്തിയ കേസിൽ ഒന്നാം പ്രതിയുടെ ശബ്ദ പരിശോധന നടത്തി. തൊടുപുഴ ചുങ്കം മുളയിങ്കൽ ബിജു ജോസഫിനെ കൊലപ്പെടുത്തി മാൻഹോളിൽ തള്ളിയ കേസിലെ മുഖ്യ പ്രതി കലയന്താനി സ്വദേശി ജോമോന്‍റെ ശബ്ദത്തിന്‍റെ ശാസ്ത്രീയ പരിശോധനയാണ് ഇന്നലെ സ്റ്റുഡിയോയിൽ നടത്തിയത്. കൊലപാതകത്തിനു ശേഷം ജോമോൻ നടത്തിയ ഫോണ്‍ സംഭാഷണത്തിന്‍റെ ശബ്ദ സന്ദേശം പോലീസിനു ലഭിച്ചിരുന്നു. ഇതിന്‍റെ ആധികാരികത കണ്ടെത്തുന്നതിനാണ് ഇയാളുടെ ശബ്ദ പരിശോധന നടത്തിയത്. ഇതിനിടെ ജോമോന്‍റെ ഭാര്യയെ ചോദ്യം ചെയ്യലിനായി ഹാജരാകാൻ ആവശ്യപ്പെട്ടെങ്കിലും ഇവർ എത്തിയില്ല. അന്വേഷണ ഉദ്യോഗസ്ഥർ ഇന്നലെ വീട്ടിൽ എത്തിയെങ്കിലും ഇവർ സ്ഥലത്ത് ഉണ്ടായിരുന്നില്ലെന്നും ഒളിവിലാണെന്നും പോലീസ് പറഞ്ഞു. ഒന്നാം പ്രതി ജോമോൻ, മൂന്നാം പ്രതി മുഹമ്മദ് അസ്ലം എന്നിവരെ ചൊവ്വാഴ്ചയാണ് മജിസ്ട്രേറ്റ് കോടതി അഞ്ചുദിവസത്തെ പോലീസ് കസ്റ്റഡിയിൽ വിട്ടത്. ഇവരുമായുള്ള തെളിവെടുപ്പ് ഇന്നും തുടരും.

മാര്‍ ജോസഫ് പള്ളിക്കാപറമ്പിലിന്‍റെ 98ാം ജന്മദിനം ഇന്ന്

പാലാ: പാലാ രൂപത ദ്വിതീയ മെത്രാന്‍ എമിരിറ്റസ് ബിഷപ് മാര്‍ ജോസഫ് പള്ളിക്കാപറമ്പിലിന്‍റെ 98 ാം ജന്മദിനം ഇന്ന്. രാവിലെ 6.30ന് ബിഷപ് ഹൗസ് ചാപ്പലില്‍ വിശുദ്ധ കുര്‍ബാന. ഉച്ചകഴിഞ്ഞ് മൂന്നിന് സമീപ ഇടവകകളില്‍ നിന്നുള്ള 99 കുട്ടികളോടൊപ്പം കേക്ക് മുറിച്ച് മധുരം പങ്കുവയ്ക്കും. 1927 ഏപ്രില്‍ 10നാണ് മാര്‍ ജോസഫ് പള്ളിക്കാപറമ്പില്‍ ജനിച്ചത്. ചങ്ങനാശേരി ബെര്‍ക്കുമാന്‍സ് കോളജ്, തൃശിനാപ്പള്ളി സെന്‍റ് ജോസഫ്‌സ് കോളജ്, മദ്രാസ് ലയോള കോളജ് എന്നിവിടങ്ങളിലെ പഠനത്തിനു ശേഷം അദ്ദേഹം ചങ്ങനാശേരി സെന്‍റ് തോമസ് പെറ്റി സെമിനാരിയില്‍ ചേര്‍ന്നു. തുടര്‍ന്ന് മംഗലാപുരം സെന്‍റ് ജോസഫ്‌സ് മേജര്‍ സെമിനാരി, റോം എന്നിവിടങ്ങളില്‍ പഠിച്ചു. 1958 നവംബര്‍ 23 ന് റോമില്‍ വച്ച് വൈദികപട്ടം സ്വീകരിച്ചു. തുടര്‍ന്ന് ഫിലോസഫിയില്‍ ഡോക്ടറേറ്റ് നേടി. 1962 ല്‍ തിരിച്ചെത്തി വടവാതൂര്‍ സെമിനാരിയില്‍ പ്രഫസറായി സേവനം ചെയ്തു. 1973 ല്‍ പാലാ രൂപത സഹായ മെത്രാനായി നിയമിതനായി. 1973 ഓഗസ്റ്റ് 15ന് കര്‍ദിനാള്‍ മാര്‍ ജോസഫ് പാറേക്കാട്ടിലില്‍നിന്നും മേല്‍പ്പട്ടം സ്വീകരിച്ചു. മാര്‍ സെബാസ്റ്റ്യന്‍ വയലില്‍ വിരമിച്ചപ്പോള്‍ പാലാ രൂപത ബിഷപ്പായി 1981 ഫെബ്രുവരി ആറിന് നിയമിതനായി. അനുഗ്രഹദായകമായ 23 വര്‍ഷത്തെ സേവനത്തിനു ശേഷം 2004 മേയ് രണ്ടിന് രൂപതയുടെ നേതൃത്വം മാര്‍ ജോസഫ് കല്ലറങ്ങാട്ടിന് കൈമാറി. 99 ാം വയസിലേക്കു കടക്കുന്ന മാര്‍ ജോസഫ് പള്ളിക്കാപറമ്പിലിന് പിറന്നാള്‍ ആശംസകളുമായി ഇന്നലെമുതല്‍ നിരവധി പേരാണ് ബിഷപ് ഹൗസില്‍ എത്തുന്നത്.

ശാന്തിയുടെ നീർച്ചാൽ തേടി ഹൈറേഞ്ചിന്‍റെ കുരിശുമലയിലേക്ക് തീർഥാടകർ

ഇടുക്കി: പശ്ചിമഘട്ടത്തിലെ സഹ്യസാനുക്കളെ തൊട്ടുരുമ്മി നിൽക്കുന്ന പ്രകൃതിരമണീയമായ കൂന്പൻമലയാണ് പ്രസിദ്ധമായ എഴുകുംവയൽ കുരിശുമല. സമുദ്രനിരപ്പിൽനിന്നു 3000ത്തിലധികം അടി ഉയരത്തിലാണ് ഈ കുരിശുമല സ്ഥിതിചെയ്യുന്നത്. 1959 മുതൽ വിശ്വാസികൾ ഇവിടേക്ക് പരിഹാര പ്രദക്ഷിണം നടത്തിവന്നിരുന്നതായാണ് പഴമക്കാർ പറയുന്നത്. 2006 സെപ്റ്റംബർ 14നു വിശുദ്ധ കുരിശിന്‍റെ പുകഴ്ചയുടെ തിരുനാളിനോടനുബന്ധിച്ചാണ് കുരിശുമല തീർഥാടന ദേവാലയത്തിന് തറക്കല്ലിട്ടത്. കുരിശുമല ദൈവാലയത്തിനു മുകളിലെ 55 അടി ഉയരമുള്ള ക്രൂശിത രൂപം മല കയറിയെത്തുന്ന വിശ്വാസികൾക്ക് പ്രത്യാശയുടെ ആത്മീയപ്രഭ വിതറുന്നു. മലമുകളിലെ അത്ഭുത ക്രൂശിതരൂപമാണ് ഏവരേയും ആകർഷിക്കുന്നത്. ഈ കുരിശിലേക്ക് തങ്ങളുടെ ജീവിതത്തിലെ നൊന്പരങ്ങളും ഭാരങ്ങളും സമർപ്പിച്ച് മലയിറങ്ങുന്പോൾ വിശ്വാസികളുടെ ഹൃദയത്തിൽ നിറയുന്നത് പ്രശാന്തതയുടെ അനുഭവമാണ്. നിർമാണവേളയിൽ കുരിശിനടിയിൽ വിവിധ ഭൂഖണ്ഡങ്ങളിലെ നാണയങ്ങളും കല്ലുകളും നിക്ഷേപിച്ചിട്ടുണ്ട്. യേശുനാഥൻ ഈ ലോകത്തിൽ ജീവിച്ചിരുന്ന 33 വർഷങ്ങൾ സൂചിപ്പിക്കുന്ന 33 പടികൾ കയറിയാണ് ക്രൂശിതരൂപത്തിനു ചുവട്ടിൽ എത്തുന്നത്. സംശയാലുവായ തോമസ് എന്ന വിശ്വപ്രസിദ്ധ ചിത്രത്തിന്‍റെ ജീവസുറ്റ ആവിഷ്കരണം മലമുകളിലെ ദേവാലയത്തിലെ അൾത്താരയിൽ ദർശിക്കാനാകും. കുരിശുമലയുടെ പതിമൂന്നാം സ്ഥലത്ത് നിർമിച്ചിട്ടുള്ള പരിശുദ്ധ ദൈവമാതാവിന്‍റെ വ്യാകുലത്തെ സൂചിപ്പിക്കുന്ന മിസേറിയ തിരുസ്വരൂപം ഏറെ ശ്രദ്ധേയമാണ്. ഈശോയുടെ തിരുക്കല്ലറയെ അനുസ്മരിപ്പിക്കുംവിധം പണിതീർത്ത ഹോളി സെപ്പുൾക്കർ തീർഥാടകർക്ക് പ്രതീക്ഷയുടെ അനുഭവം പകർന്നു നൽകുന്നു. കിഴക്കന്‍റെ കാൽവരി എന്ന് വിശേഷിപ്പിക്കപ്പെടുന്ന എഴുകുംവയൽ കുരിശുമലയിൽ ഈശോയുടെ പീഡാനുഭവ രഹസ്യങ്ങളെ ധ്യാനിച്ച് ത്യാഗപൂർവം മല ചവിട്ടിയെത്തുന്ന വിശ്വാസികൾക്ക് ക്രൂശിതന്‍റെ അനുഗ്രഹവും തിരുരക്തത്തിന്‍റെ സംരക്ഷണവും മാർത്തോമാശ്ലീഹായുടെ മാധ്യസ്ഥ്യവും ലഭിക്കുമെന്ന ഉറപ്പാണ് ഇവിടെയെത്തുന്നവർക്കുള്ളത്. 30 കിലോമീറ്റർ നടക്കാൻ ബിഷപ്പും ഇത്തവണത്തെ എഴുകുംവയൽ കുരിശുമല തീർഥാടനത്തിൽ ഇടുക്കി രൂപതാധ്യക്ഷൻ മാർ ജോണ്‍ നെല്ലിക്കുന്നേൽ 30 കിലോമീറ്റർ കാൽനടയായി സഞ്ചരിച്ചാണ് മലമുകളിലെത്തുക. മുൻവർഷങ്ങളിൽ പാണ്ടിപ്പാറയിൽനിന്നുമായിരുന്നു തീർഥാടനം ആരംഭിച്ചിരുന്നത്. ഇത്തവണ വാഴത്തോപ്പ് കത്തീഡ്രൽ പള്ളിയിൽനിന്നുമാണ് തീർഥാടനത്തിന് തുടക്കം കുറിക്കുന്നത്. ഇന്ന് വൈകുന്നേരം ആരംഭിക്കുന്ന തീർഥാടനം രാത്രി 11.30നു പാണ്ടിപ്പാറയിൽ അവസാനിക്കും. നാളെ പുലർച്ചെ 3.30 ന് തീർഥാടനം പുനരാരംഭിക്കും. ബിഷപ്പിനൊപ്പം നൂറുകണക്കിനു വിശ്വാസികൾ തീർഥാടനത്തിൽ പങ്കാളികളാകും. അര ലക്ഷം പേർ മലകയറും ഹൈറേഞ്ചിന്‍റെ വിവിധ കേന്ദ്രങ്ങളിൽനിന്നുമായി എത്തിച്ചേരുന്ന തീർഥാടകർ നാളെ രാവിലെ 8.30നു മലയടിവാരത്ത് സംഗമിച്ച ശേഷമാണ് മലകയറുന്നത്. വെള്ളിയാഴ്ച രൂപതയുടെ തീർഥാടന ദിനമായതിനാൽ പകലും രാത്രി മുഴുവനും വിശ്വാസികൾക്ക് മലകയറാനുള്ള വിപുലമായ ക്രമീകരണങ്ങളാണ് ഒരുക്കിയിട്ടുള്ളത്. അരലക്ഷത്തോളം തീർഥാടകർ എത്തുമെന്നാണ് പ്രതീക്ഷിക്കുന്നത്. തുന്പച്ചി കുരിശുമലയിൽ നാല്പതാം വെള്ളിയാചരണം അറക്കുളം: തീർഥാടനകേന്ദ്രമായ തുന്പച്ചി കുരിശുമലയിൽ നാല്പതാംവെള്ളിയാചരണം നാളെ നടക്കും. രാവിലെ ഒന്പതിന് ഗത്സമനിയിൽനിന്നു മലമുകളിലേക്ക് കുരിശിന്‍റെ വഴി. 10നു വിശുദ്ധകുർബാന-ഫാ. ജേക്കബ് കടുതോടിൽ, സന്ദേശം-ഫാ. ജോസഫ് കുറ്റിയാങ്കൽ, തുടർന്ന് ഉൗട്ടുനേർച്ച, 12നു വിശുദ്ധകുർബാന. ഓശാനഞായറാഴ്ച രാവിലെ ഏഴിന് ഇടവകദേവാലയത്തിൽ കുരുത്തോല വെഞ്ചരിപ്പ്. 11നു കുരിശുമലയിൽ വിശുദ്ധ കുർബാന, ദു:ഖവെള്ളിയാഴ്ച രാവിലെ ആറിന് അറക്കുളം സെന്‍റ് മേരീസ് പള്ളിയിൽ തിരുക്കർമങ്ങൾ, തുടർന്ന് എട്ടിന് അശോകകവലയിൽനിന്നു തുന്പച്ചിയിലേക്ക് കുരിശിന്‍റെ വഴി, 11നു സമാപന പ്രാർഥന, റവ. ഡോ.വിത്സണ്‍ ജോസഫ് കദളിക്കാട്ടിൽ പുത്തൻപുര പീഡാനുഭവ സന്ദേശം നൽകും. തുടർന്നു നേർച്ചക്കഞ്ഞി വിതരണം. 27നു പുതുഞായറാഴ്ച രാവിലെ പത്തിന് മലമുകളിലേക്ക് കുരിശിന്‍റെ വഴി. 10.30നു വിശുദ്ധകുർബാന, പാച്ചോർനേർച്ച എന്നിവയാണ് പരിപാടികളെന്ന് അറക്കുളം സെന്‍റ് മേരീസ് പുത്തൻപള്ളി വികാരി ഫാ. മൈക്കിൾ കിഴക്കേപ്പറന്പിൽ, അസി. വികാരി ഫാ. ജോർജ് ഞാറ്റുതൊട്ടിയിൽ എന്നിവർ അറിയിച്ചു.

ബാർ അസോ. കോടതി നടപടി ബഹിഷ്കരിച്ചു

നെടുങ്കണ്ടം: കോടതി ഫീസുകളിലുണ്ടായ ഭീമമായ വർധന പിൻവലിക്കണമെന്നാവശ്യപ്പെട്ട് ബാർ അസോസിയേഷന്‍റെ നേതൃത്വത്തിൽ നെടുങ്കണ്ടം ഫസ്റ്റ് ക്ലാസ് മജിസ്ട്രേറ്റ് കോടതിക്കു മുന്പിൽ അഭിഭാഷകർ കോടതി നടപടികൾ ബഹിഷ്കരിച്ച് പ്രതിഷേധിച്ചു. ഇതിന്‍റെ ഭാഗമായി, ഫീസ് വർധനവിനായി പുറത്തിറക്കിയ വിജ്ഞാപനം അഭിഭാഷകർ കത്തിച്ചു. കോടതി നടപടികൾക്കായി സമർപ്പിക്കുന്ന അപേക്ഷകൾ ഉൾപ്പടെയുള്ളവയ്ക്ക് 10 ശതമാനം മുതൽ 200 ശതമാനം വരെയാണ് വർധന വരുത്തിയിരിക്കുന്നത്. ഇത്തരം ഭീമമായ വർധനവ് എല്ലാവർക്കും സുഗമമായി നീതി തേടാനുള്ള അവസരം ഇല്ലാതെയാക്കുമെന്നും അതിനാൽ കോർട്ട് ഫീസ് വർധിപ്പിച്ച നടപടി പിൻവലിച്ച് നിലവിലുണ്ടായിരുന്ന ഫീസ് പുനഃസ്ഥാപിക്കണമെന്നും ബാർ അസോസിയേഷൻ ഭാരവാഹികൾ ആവശ്യപ്പെട്ടു. നെടുങ്കണ്ടം ബാർ അസോസിയേഷൻ പ്രസിഡന്‍റ് അഡ്വ. എസ്.ജെ. ജെയ്മോൻ അധ്യക്ഷത വഹിച്ചു. അഡ്വ. സേനാപതി വേണു, അഡ്വ. പി.ടി. ചെറിയാൻ, അഡ്വ. കെ.എൻ. ശശീന്ദ്രൻ, അഡ്വ. കെ. കനിയപ്പൻ, അഡ്വ. വി.എം. ജോയി തുടങ്ങിയവർ പ്രസംഗിച്ചു. 25 ഓളം അഭിഭാഷകർ പങ്കെടുത്തു.

ദീപിക ഫ്രണ്ട്‌സ് ക്ലബ് പാലാ രൂപത ഭാരവാഹികൾ

പാലാ: ദീപിക ഫ്രണ്ട്‌സ് ക്ലബ് പാലാ രൂപത ഭാരവാഹികളെ തെരഞ്ഞെടുത്തു. രൂപത പ്രസിഡന്‍റ് ജയ്‌സണ്‍ കുഴികോടിയില്‍ അധ്യക്ഷത വഹിച്ചു. രൂപത ഡയറക്ടര്‍ ഫാ. ജോര്‍ജ് നെല്ലിക്കുന്നുചെരിവുപുരയിടം ആമുഖ സന്ദേശം നല്‍കി. സംസ്ഥാന പ്രസിഡന്‍റ് ജോര്‍ജ് വടക്കേല്‍ തെരഞ്ഞെടുപ്പിനു നേതൃത്വം നല്‍കി. ദീപികയുടെ പ്രചാരത്തിനായി രൂപതയെ അഞ്ചു സോണുകളായി തിരിച്ച് പ്രവര്‍ത്തനങ്ങള്‍ ഏകോപിപ്പിക്കുന്നതിനു തീരുമാനിച്ചു. അരുവിത്തുറ, പാലാ, രാമപുരം, കുറവിലങ്ങാട്, മൂലമറ്റം എന്നിവയാണ് സോണുകള്‍. എ വിഭാഗം ഭാരവാഹികളായി ജയ്‌സണ്‍ ജോസഫ് കുഴികോടിയില്‍ (ചേര്‍പ്പുങ്കല്‍)-പ്രസിഡന്‍റ്, സാബു സിറിയക് കദളിയില്‍ (പ്രവിത്താനം)-വൈസ് പ്രസിഡന്‍റ്, വി.ടി. ജോസഫ് വെട്ടിക്കല്‍ (പാലാ കത്തീഡ്രല്‍)-സെക്രട്ടറി, സി.എ സെബാസ്റ്റ്യന്‍ ചവണിയാങ്കല്‍ (പിഴക്)-ജോയിന്‍റ് സെക്രട്ടറി), ഷാജി എമ്പ്രയില്‍ (കാക്കൊമ്പ്)-ട്രഷറര്‍, ജോര്‍ജ് തോമസ് വടക്കേല്‍ (അരുവിത്തുറ), രാജു കൊക്കപ്പുഴ (ഇടമറ്റം), സെബാസ്റ്റ്യന്‍ കുറ്റിയാനി (പൂഞ്ഞാര്‍), പി.കെ. കോശി പാറക്കല്‍ (കൂട്ടിക്കല്‍), പ്രതീഷ് പുതിയമംഗലത്ത് വാളച്ചിറ (മുട്ടുചിറ)-എക്‌സിക്യൂട്ടീവ് കമ്മിറ്റി അംഗങ്ങള്‍ എന്നിവരെ തെരഞ്ഞെടുത്തു. ബി വിഭാഗം ഭാരവാഹികളായി ജാന്‍സി ജോസഫ് തോട്ടക്കര (കടനാട്)-പ്രസിഡന്‍റ്, ഫ്‌ളവറി സെബാസ്റ്റ്യന്‍ വാളനാട്ട് (ചേര്‍പ്പുങ്കല്‍)-വൈസ് പ്രസിഡന്‍റ്, ആലീസ് തോമസ് ആറടിയില്‍ (ചെമ്മലമറ്റം)-സെക്രട്ടറി, ടെസി അലക്‌സ് വാഴക്കാലയില്‍ (ഉള്ളനാട്)-ജോയിന്‍റ് സെക്രട്ടറി), ഡെയ്‌സി ജിബു കണ്ടെത്തിങ്കര (കടനാട്)-ട്രഷറര്‍, മോളി ജോണ്‍ കുന്നുംപുറം (കിഴപറയാര്‍), ഷൈനി തോമസ് പെറ്റാടത്തില്‍ (വിളക്കുമാടം), തെയ്യാമ്മ തോമസ് പാറക്കല്‍ (മറ്റക്കര), മേഴ്‌സി ജോസഫ് മൂന്നാനപ്പള്ളില്‍ (ചെമ്മലമറ്റം), ജിജി സണ്ണി പൂത്തോട്ടാല്‍ (ചേര്‍പ്പുങ്കല്‍)-എക്‌സിക്യൂട്ടീവ് കമ്മിറ്റി അംഗങ്ങൾ എന്നിവരെ തെരഞ്ഞെടുത്തു.

കറുത്ത പൊന്നിന് വില ഉയരുന്നു ; പ്രതീക്ഷയോടെ കർഷകർ

തൊടുപുഴ: വിലയിടിവു മൂലം വലഞ്ഞ കർഷകർക്ക് പ്രതീക്ഷ പകർന്ന് കുരുമുളക് വില ഉയരുന്നു. കഴിഞ്ഞ വർഷം ഇതേ സീസണിൽ കുരുമുളക് വിലയിലുണ്ടായ തകർച്ച കർഷകരെ ഏറെ പ്രതികൂലമായി ബാധിച്ചിരുന്നു. എന്നാൽ ഒരു പതിറ്റാണ്ടിനു ശേഷം വില 710 കടന്നതാണ് കർഷകർക്ക് വീണ്ടും പ്രതീക്ഷയാകുന്നത്. ഗാർബിൾഡ് കുരുമുളകിനു 750 രൂപയും അണ്‍ഗാർബിൾഡിന് 715 രൂപയുമാണ് ഹൈറേഞ്ചിലെ പ്രധാന മാർക്കറ്റുകളിലെ വില. ഏതാനും ദിവസങ്ങൾക്ക് മുന്പ് അണ്‍ഗാർബിൾഡിന് 730 വരെ എത്തിയിരുന്നെങ്കിലും 15 രൂപ കുറഞ്ഞു. എങ്കിലും കിലോക്ക് രണ്ടാഴ്ചയ്ക്കിടെ വിലയിൽ 60 രൂപയുടെ വർധനയുണ്ടായി. 2014-15 ൽ ആണ് കുരുമുളകിന് ഇത്രയും മെച്ചപ്പെട്ട വില കർഷകർക്ക് ലഭിച്ചത.് കിലോയ്ക്ക് 750 രൂപ വരെയായി അന്ന് വില ഉയർന്നതോടെ 1000 കടക്കുമെന്ന പ്രതീക്ഷയുമുണ്ടായി. ഇതോടെ പലരും കുരുമുളക് വില്പന നടത്താതെ സംഭരിക്കുകയും ചെയ്തു. എന്നാൽ വില പിന്നീട് പടിപടിയായി താഴ്ന്നതല്ലാതെ വിപണിയിൽ കറുത്ത പൊന്നിന് മുന്നേറ്റമുണ്ടാക്കാനായില്ല. 2017-ൽ വില കിലോക്ക് 430 രൂപ വരെയായി താഴ്ന്നു. പിന്നീട് കിലോക്ക് 360 രൂപ വരെയായി കുരുമുളക് വില ഇടിഞ്ഞു. ഇത്തരത്തിൽ വില താഴ്ന്ന് ഉത്പാദനച്ചെലവു പോലും ലഭിക്കില്ലെന്ന അവസ്ഥ വന്നതോടെ കർഷകർ കൃഷി തന്നെ ഉപേക്ഷിക്കുന്ന സ്ഥിതി ആയിരുന്നു. ആഭ്യന്തരവിപണിയിൽ ആവശ്യക്കാർ വർധിച്ചതാണ് ഇപ്പോഴത്തെ വിലക്കയറ്റത്തിനു കാരണമെന്നാണ് സൂചന. വിവിധ ഭക്ഷ്യോത്പാദന, മസാല കന്പനികൾ വൻതോതിൽ കുരുമുളക് ശേഖരിക്കാൻ തുടങ്ങിയതും വില വർധനയ്ക്കിടയാക്കി. വിപണിയിലേക്ക് കുരുമുളകിന്‍റെ വരവ് കുറഞ്ഞാൽ അടുത്ത മാസത്തോടെ വില ചരിത്രത്തിലെ ഏറ്റവും ഉയർന്ന നിലയിലെത്തുമെന്നാണ് കരുതുന്നത്. കാലാവസ്ഥാ വ്യതിയാനത്തെത്തുടർന്ന് ഈ വർഷവും ഉത്പാദനത്തിൽ ഗണ്യമായ കുറവാണ് ഉണ്ടായിരിക്കുന്നത്. വില ഉയർന്നുനിൽക്കുന്നതിനാൽ കർഷകർ ഉത്്പന്നം സംഭരിക്കാതെ വിറ്റഴിക്കുകയാണ്. കുരുമുളകിനെ സംബന്ധിച്ച് വിലയിൽ ഏതു സമയവും ചാഞ്ചാട്ടമുണ്ടാകുമെന്നതിനാലാണ് കർഷകർ ഉത്പന്നം സംഭരിക്കാൻ ധൈര്യപ്പെടാത്തത്. സാന്പത്തിക വർഷം അവസാനിക്കാറായതോടെ പലർക്കും ബാങ്ക് വായ്പയടക്കം തിരിച്ചടയ്ക്കാനുള്ള സമയമായതിനാൽ വിളവെടുക്കുന്ന ഉത്പന്നം പെട്ടെന്നു തന്നെ വിപണിയിലെത്തുന്നുമുണ്ട്. ഡിമാൻഡ് വർധിച്ചതും ആഭ്യന്തര വിപണികളിലെ ലഭ്യതക്കുറവും മൂലം കിലോക്ക് 10 രൂപ വരെ കൂടുതൽ നൽകി കുരുമുളക് വാങ്ങാനും മൊത്ത വ്യാപാരികൾ തയാറാണ്. വിപണിയിൽ വിലയിലുണ്ടാകുന്ന ചാഞ്ചാട്ടം വൻകിട വ്യാപാരികൾക്ക് മുൻകൂട്ടി അറിയാമെന്നതിനാൽ ഇവർ ഇതു കണക്കാക്കിയാണ് പലപ്പോഴും കുരുമുളക് ചെറുകിട കച്ചവടക്കാരിൽനിന്നു സംഭരിക്കുന്നത്.

നിയമ ബോധവത്കരണ സെമിനാർ നടത്തി

മൂലമറ്റം: ലോകാരോഗ്യ ദിനത്തോടനുബന്ധിച്ച് ബിഷപ് വയലിൽ മെഡിക്കൽ സെന്‍ററും മുട്ടം ലീഗൽ സർവീസസ് അഥോറിറ്റിയും ചേർന്ന് നഴ്സിംഗ് സ്കൂൾ വിദ്യാർഥികൾക്കായി സൗജന്യ നിയമ ബോധവത്കരണ സെമിനാർ നടത്തി. കേരള പബ്ലിക് ആക്ട്, പോക്സോ ആക്ട്, എൻഡിപിഎസ് ആക്ട്, വിദ്യാർഥികളുടെ ഉത്തരവാദിത്വങ്ങളും ചുമതലകളും ആന്‍റി റാഗിംഗ്, ജെജെ ആക്ട് എന്നിവ സംബന്ധിച്ച് ലീഗൽ സർവീസ് അഥോറിറ്റി പാനൽ അഭിഭാഷകൻ പ്രേംജി സുകുമാർ ക്ലാസെടുത്തു. ആശുപത്രി അഡ്മിനിസ്ട്രേറ്റർ സിസ്റ്റർ ആനീസ് കൂട്ടിയാനിയിൽ അധ്യക്ഷത വഹിച്ചു. ലീഗൽ സർവീസ് അഥോറിറ്റി ജില്ലാ കോ-ഓർഡിനേറ്റർ ശാലിനി, സിസ്റ്റർ ഡോ. അമല എസ്എച്ച്, ഡോ. ജോജി പാപ്പച്ചൻ എന്നിവർ പ്രസംഗിച്ചു.

ബഫർ സോണ്‍: കെഎസ്ഇബി പിന്മാറണമെന്ന് ബിജോ മാണി

തൊടുപുഴ: ജലവിഭവ വകുപ്പിന്‍റെ നിയന്ത്രണത്തിലുള്ള ഡാമുകൾക്ക് ചുറ്റും ബഫർസോണ്‍ പ്രഖ്യാപിക്കാനുള്ള ഉത്തരവിനു പിന്നാലെ ഇപ്പോൾ വൈദ്യുതി ബോർഡിന്‍റെ ഡാമുകളിലേക്കും നിയന്ത്രണം വ്യാപിപ്പിക്കാനുള്ള നീക്കം നടത്തുകയാണെന്നും ആയിരക്കണക്കിന് ജനങ്ങളെ ബാധിക്കുന്ന തീരുമാനത്തിൽനിന്നു പിന്തിരിയണമെന്നും ഡിസിസി ജനറൽ സെക്രട്ടറി ബിജോ മാണി പത്ര സമ്മേളനത്തിൽ ആവശ്യപ്പെട്ടു. ഇടുക്കി ജല വൈദ്യുത പദ്ധതി ഉൾപ്പെടെ വൈദ്യുതി ബോർഡിന് ഏറ്റവുമധികം ഡാമുകളുള്ളത് ഇടുക്കിയിലായതിനാൽ ജില്ലയിലെ സാധാരണ കർഷകരെ ഇത് ഗുരുതരമായി ബാധിക്കും. കാഞ്ചിയാർ, അയ്യപ്പൻകോവിൽ, ഉപ്പുതറ തുടങ്ങി മൂന്നു ചെയിൻ മേഖലയിലും കല്ലാർകുട്ടി ഡാമിന്‍റെ 10 ചെയിൻ മേഖലയിലും ഇതോടെ പട്ടയം നൽകാനും കഴിയില്ല. മന്ത്രി റോഷി അഗസ്റ്റിൻ മാത്രമാണ് ഈ ജനദ്രോഹ ഉത്തരവിന് പൂർണ ഉത്തരവാദിയെന്നും ബിജോ മാണി ആരോപിച്ചു. ജലവിഭവ വകുപ്പിന്‍റെ ജനദ്രോഹ ഉത്തരവ് ചൂണ്ടിക്കാണിച്ച അവസരത്തിൽ തന്നെ വൈദ്യുതി വകുപ്പും ഇത്തരത്തിൽ നീങ്ങുമെന്ന അപകടം വ്യക്തമാക്കിയിരുന്നു. ഇപ്പോൾ ബഫർ സോണിന്‍റെ പരിധിയിലാക്കുന്ന കെഎസ്ഇബിയുടെ ജണ്ടയ്ക്ക് പുറത്തുള്ള സ്ഥലം വൈദ്യുതി ബോർഡിന് ആവശ്യമില്ലെന്ന് 1974ൽ അന്നത്തെ വൈദ്യുതി ബോർഡ് ചീഫ് എൻജിനീയർ ഇട്ടി ഡാർവിൻ തീരുമാനിച്ചിരുന്നു. 2017ൽ ഇടുക്കി പത്ത് ചെയിൻ മേഖലയിൽ പട്ടയം നൽകുന്നതുമായി ബന്ധപ്പെട്ട് ജില്ലാ കളക്ടർ ചീഫ് സെക്രട്ടറിക്ക് നൽകിയ റിപ്പോർട്ടിൽ ഇക്കാര്യം വ്യക്തമാക്കിയിട്ടുണ്ട്. കേരളത്തിൽ വൈദ്യുതി ബോർഡിന്‍റെ നിയന്ത്രണത്തിലുള്ള 61 ഡാമുകളിൽ 24 എണ്ണവും ജില്ലയിലാണ്. ഇരട്ടയാർ, പാന്പാടുംപാറ, നെടുങ്കണ്ടം, രാജാക്കാട്, ശാന്തന്പാറ, ചിന്നക്കനാൽ, കൊന്നത്തടി, അടിമാലി, വെള്ളത്തൂവൽ, പള്ളിവാസൽ, ബൈസണ്‍വാലി, മൂന്നാർ, മാട്ടുപ്പെട്ടി, കാഞ്ചിയാർ, അയ്യപ്പൻകോവിൽ, ഉപ്പുതറ, മരിയാപുരം, വാഴത്തോപ്പ്, കാമാക്ഷി, കഞ്ഞിക്കുഴി, വാത്തിക്കുടി, അറക്കുളം, മാങ്കുളം, പീരുമേട് എന്നീ 24 പഞ്ചായത്തുകളെയും കട്ടപ്പന നഗരസഭയെയും ഈ ഉത്തരവ് പ്രതികൂലമായി ബാധിക്കും. അതിനാൽ ബഫർ സോണ്‍ ഉത്തരവ് നടപ്പാക്കാനുള്ള വൈദ്യുതി വകുപ്പിന്‍റെ നീക്കത്തിൽനിന്നു പിൻമാറണമെന്നും അല്ലെങ്കിൽ ശക്തമായ സമരം സംഘടിപ്പിക്കുമെന്നും ബിജോ മാണി പറഞ്ഞു. പത്ര സമ്മേളനത്തിൽ ഡിസിസി വൈസ് പ്രസിഡന്‍റ് മുകേഷ് മോഹൻ, കോണ്‍ഗ്രസ് ബ്ലോക്ക് പ്രസിഡന്‍റ് ഷിബിലി സാഹിബ്, മണ്ഡലം പ്രസിഡന്‍റ് രാജേഷ് ബാബു എന്നിവർ പങ്കെടുത്തു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]