ഇടുക്കി റവന്യുജില്ലാ സ്കൂള് കായികമേള: കട്ടപ്പനയ്ക്ക് കിരീടം; കാൽവരിമൗണ്ട് ചാന്പ്യൻസ്കൂൾ
1463522
Thursday, October 24, 2024 3:46 AM IST
നെടുങ്കണ്ടം: ഇടുക്കിയുടെ കായിക കരുത്തിനു വേദിയൊരുക്കിയ റവന്യൂ ജില്ലാ സ്കൂള് കായികമേള സമാപിച്ചു. കട്ടപ്പന സബ്ജില്ല ചാമ്പ്യന്മാരായി. 42 സ്വര്ണവും 47 വെള്ളിയും 26 വെങ്കലവും ഉള്പ്പടെ 420 പോയിന്റോടെയാണ് കട്ടപ്പന ചാമ്പ്യന്ഷിപ്പ് കരസ്ഥമാക്കിയത്. 28 സ്വര്ണവും 25 വെള്ളിയും 25 വെങ്കലവും ഉള്പ്പടെ 267 പോയിന്റ് നേടിയ അടിമാലി സബ്ജില്ലയാണ് റണ്ണേഴ്സ് അപ്.
92 പോയിന്റോടെ മൂന്നാം സ്ഥാനം നേടിയ നെടുങ്കണ്ടം സബ് ജില്ലയ്ക്ക് ആറു സ്വര്ണവും 14 വീതം വെള്ളിയും വെങ്കലവും ലഭിച്ചു. പീരുമേട് 84, തൊടുപുഴ 68, മൂന്നാര് 11, അറക്കുളം 10 പോയിന്റകളും നേടി. കാല്വരിമൗണ്ട് കാല്വരി സ്കൂള്, ഇരട്ടയാര് സെന്റ് തോമസ് സ്കൂള് എന്നിവയുടെ മെഡല്വേട്ടയാണ് കട്ടപ്പന സബ്ജില്ലയെ ചാമ്പ്യന്മാരാക്കിയത്.
സ്കൂള് അടിസ്ഥാനത്തില് 127 പോയിന്റോടെ കാല്വരിമൗണ്ട് കാല്വരി ഹൈസ്കൂള് ചാമ്പ്യന്മാരായി. സ്കൂളിന് 15 വീതം സ്വര്ണവും വെള്ളിയും ഏഴു വെങ്കലവും ലഭിച്ചു. രണ്ടാം സ്ഥാനത്തുള്ള ഇരട്ടയാര് സെന്റ് തോമസ് സ്കൂളിന് ഒൻപത് സ്വര്ണവും 18 വെള്ളിയും എട്ട് വെങ്കലവും ഉള്പ്പടെ 106 പോയിന്റ് ലഭിച്ചു. അടിമാലി സബ്ജില്ലയിലെ എന്ആര് സിറ്റി എസ്എന്വിഎച്ച്എസ്എസിനാണ് 94 പോയിന്റോടെ മൂന്നാം സ്ഥാനം. ഇവര്ക്കു 10 സ്വര്ണവും 11 വീതം വെള്ളി, വെങ്കല മെഡലുകളും ലഭിച്ചു.
ആവേശകരമായ മത്സരങ്ങളാണ് മൂന്ന് ദിവസങ്ങളിലായി സിന്തറ്റിക് ട്രാക് സ്റ്റേഡിയത്തില് നടന്നത്. മികച്ച സംഘാടക മികവാണ് ഇക്കുറി മേളയ്ക്കുണ്ടായത്. നെടുങ്കണ്ടം ഗ്രാമപഞ്ചായത്ത് പ്രസിഡന്റ് പ്രിമി ലാലിച്ചന്റെ അധ്യക്ഷതയില് നടന്ന സമാപന സമ്മേളനത്തില് ബ്ലോക്ക് പഞ്ചായത്ത് പ്രസിഡന്റ് കെ.ടി. കുഞ്ഞ് വിജയികള്ക്കുള്ള ട്രോഫികള് സമ്മാനിച്ചു.