റെയ്സൺ സാറിന്റെ ശബ്ദമില്ലാതെ എന്ത് കായികമേള ...!
1463527
Thursday, October 24, 2024 3:46 AM IST
നെടുങ്കണ്ടം: കായികമേളകളിലെ സ്ഥിരം ശബ്ദമാണ് റെയ്സൻ പി. ജോസഫിന്റേത്. രണ്ടു പതിറ്റാണ്ടായി ജില്ലാ കായികമേളയുടെ അനൗൺസറാണ് അദ്ദേഹം. കായികതാരങ്ങളെയും പരിശീലകരെയും നിയന്ത്രിക്കുന്നതിൽ ഒരു പ്രത്യേക കഴിവാണ് അദ്ദേഹത്തിന്.
കായിക അധ്യാപനത്തിൽനിന്നു വിരമിച്ചിട്ടും ഈ വർഷവും റെസൺ പി. ജോസഫിന്റെ ശബ്ദത്തിലൂടെയാണ് കാണികൾക്ക് ജില്ലാകായികമേള ആവേശമായത്. മികച്ച അനൗൺസ്മെന്റിലൂടെ മേളകളുടെ ശ്രദ്ധകേന്ദ്രമാണ് റെയ്സൺ.
1991ൽ ആലപ്പുഴ ജില്ലയിലെ കല്യാണശേരി ഗവ. യുപി സ്കൂളിലാണ് സർവീസിന് തുടക്കം കുറിച്ചത്. 1996ൽ ഇടുക്കി ജില്ലയിലെ ചെമ്പകപ്പാറ ഗവ. ഹൈസ്കൂളിൽ സേവനം ആരംഭിച്ചതു മുതൽ ഇടുക്കി ജില്ലാ കായികമേളയിലെ ശബ്ദമാണ് അദ്ദേഹം.
2024 മേയ് 31ന് വിരമിച്ചു. ഇപ്പോൾ നെടുങ്കണ്ടം പഞ്ചായത്ത് സിന്തറ്റിക് സ്റ്റേഡിയത്തിന്റെ ചുമതല അദ്ദേഹത്തിനാണ്. കൂടാതെ ചെസ്, കാരംസ്, ജൂഡോ, യോഗ എന്നിവയിലും പരിശീലനം നൽകുന്നുണ്ട്.