സന്തോഷ് സെല്‍ത്തിന്‍റെ ജാമ്യം റദ്ദാക്കാന്‍ പോലീസ് കോടതിയിലേക്ക്
1481085
Friday, November 22, 2024 5:56 AM IST
കോട്ടയം: പാലായില്‍ ഭവനഭേദനത്തിനുശേഷം ജാമ്യത്തില്‍ പോയ കുറുവാ സന്തോഷ് സെല്‍വന്‍ ഒട്ടും വൈകാതെ ആലപ്പുഴയിലെത്തി വിവിധയിടങ്ങളില്‍ വന്‍ മോഷണം നടത്തിയ സാഹചര്യത്തില്‍ പാലായില്‍ നല്‍കിയ ജാമ്യം റദ്ദാക്കി വീണ്ടും ജയിലില്‍ അടയ്ക്കാന്‍ പോലീസ് കോടതിയെ സമീപിച്ചേക്കും.
രാമപുരം, പൈക, പൊന്‍കുന്നം, ചിങ്ങവനം, ചങ്ങനാശേരി, പുതുവേലി എന്നിവിടങ്ങളിലായി എട്ടു മോഷണക്കേസുകളില്‍ പ്രതിയാണ് സന്തോഷ് സെല്‍വന്‍. പാലായില്‍ മോഷണം നടത്തി മുങ്ങിയ സന്തോഷിനെ മറ്റൊരു കേസില്‍ ചോദ്യം ചെയ്തപ്പോഴാണ് ജില്ലയിലുട നീളം ഇയാള്‍ മോഷണം നടത്തിയതായി തെളിയുന്നത്.
പാലാ, പൊന്‍കുന്നം ജയിലുകളില്‍ മൂന്നു മാസം തടവില്‍ കഴിഞ്ഞ ശേഷം രണ്ടു മാസത്തോളം പാലാ പോലീസ് സ്റ്റേഷനിലെത്തി ഒപ്പു വച്ചിരുന്നു. ഇനി മോഷണം നടത്തില്ലെന്ന ഉറപ്പില്‍ നാടുവിട്ട സന്തോഷ് ഒരു മാസം പോലും വൈകാതെ ആലപ്പുഴയുടെ വിവിധ പ്രദേശങ്ങളില്‍ ഭീതി വിതച്ച് മോഷണം തുടരുമ്പോഴാണ് കഴിഞ്ഞയാഴ്ച അറസ്റ്റിലായത്.
ആലപ്പുഴ കഴിഞ്ഞാല്‍ ഇയാള്‍ക്ക് ഏറെ പരിചയുമുള്ളത് കോട്ടയം ജില്ലയുടെ വിവിധ പ്രദേശങ്ങളാണ്. ഈ സാഹചര്യത്തില്‍ പൊതുസുരക്ഷ കണക്കാക്കിയാണ് സന്തോഷ് സെല്‍വത്തിന്‍റെ ജാമ്യം റദ്ദാക്കി ജയിലില്‍ അടയ്ക്കാന്‍ ആവശ്യവുമായി കോടതിയെ സമീപിക്കുന്നത്.