ADVERTISEMENT

ADVERTISEMENT

തീവ്രവാദി ആക്രമണം: ജ്വാല തെളിയിച്ചു

മെഡിക്കല്‍കോളജ്: പഹല്‍ഗാമില്‍ കൊല്ലപ്പെട്ടവര്‍ക്ക് ആദരാഞ്ജലി അര്‍പ്പിച്ച് ഡിവൈഎഫ്ഐ കേശവദാസപുരം മേഖല കമ്മിറ്റിയുടെ നേതൃത്വത്തില്‍ ഭീകരവിരുദ്ധ ജ്വാല തെളിയിച്ചു.

പട്ടം എല്‍ഐസി ഓഫീസിനു മുന്നില്‍ ചേര്‍ന്ന സമാധാന സദസ് ജില്ല കമ്മിറ്റിയംഗം അംശു വാമദേവന്‍ ഉദ്ഘാടനം ചെയ്തു. മേഖല സെക്രട്ടറി ആര്‍. അജിത്ത്, എല്‍. ജോസഫ് വിജയന്‍, രഞ്ജിത് എന്നിവർ പ്രസംഗിച്ചു.

ADVERTISEMENT

പാപ്പനംകോട്ട് ഉത്സവത്തിനു കൊടിയേറി

നേമം: പാപ്പനംകോട് പട്ടാരത്ത് ശ്രീചാമുണ്ഡേശ്വരി ക്ഷേത്രത്തിലെ പൊങ്കാല മഹോത്സവത്തിനു തന്ത്രി വടക്കൻ പറവൂർ രാകേഷ് കൊടിയേറ്റി. മേൽശാന്തി ഷാൻപോറ്റി, ട്രസ്റ്റ് ഭാരവാഹികൾ എന്നിവർ പങ്കെടുത്തു. ഉത്സവനാളുകളിൽ ക്ഷേത്ര ചടങ്ങുകൾക്ക് പുറമെ വിവിധ കലാപരിപാടികളും നടക്കും. മേയ് ഒന്നിന് കാവടി ഘോഷയാത്രയും അഗ്നിക്കാവടിയും നടക്കും. ശനിയാഴ്ച വൈകുന്നേരം 6.30ന് ആനപ്പുറത്ത് എഴുന്നള്ളത്ത്. ആറാം തിയതി ചൊവ്വാഴ്ച രാവിലെ 10.30 നാണ് പൊങ്കാല.

സ്മരണാഞ്ജലിയർപ്പിച്ചു

വിതുര: പഹൽഗാം ഭീകരാക്രമണത്തിൽ കൊല്ലപ്പെട്ടവർക്ക് വിതുര കോൺഗ്രസ് മണ്ഡലം കമ്മിറ്റി സ്മരണാഞ്ജലി അർപ്പിച്ചു.മണ്ഡലം പ്രസിഡന്‍റ് ഇ.എം. നസീർ, വിഷ്ണു ആനപ്പാറ, ബി.എൽ.മോഹനൻ, റമീസ് ഹുസൈൻ, ശുഭമണി, സലിം മേമല, സുധിൻ, രഘു, സിദ്ദിഖ്, അനിൽ മങ്കാല, വിനോദ്കുമാർ, ഷാജി കടമ്പറ, വിപിൻലാൽ, അനിൽ, പ്രകാശ്,നിധിൻ, തള്ളച്ചിറ വിനോദ് തുടങ്ങിയവർ പങ്കെടുത്തു. നെടുമങ്ങാട്: പഹൽഗാമിലെ ഭീകരാക്രമണത്തിൽ കൊല്ലപ്പെട്ടവർക്ക് ഇന്ത്യൻ നാഷണൽ കോൺഗ്രസ് ഉഴമലയ്ക്കൽ മണ്ഡലം കമ്മിറ്റിയുടെ നേതൃത്വത്തിൽ ആദരാഞ്ജലികൾ അർപ്പിക്കുകയും ഭീകര വിരുദ്ധ പ്രതിജ്ഞ എടുക്കുകയും ചെയ്തു. മണ്ഡലം പ്രസിഡന്‍റ് അഡ്വ. രാജീവ് സത്യൻ, എൻ. ബാബു, പി. സക്കീർ ഹുസൈൻ, അരുവിയോട് സുരേന്ദ്രൻ, ഒസന്‍ കുഞ്ഞ്, എ. മോഹനൻ ഷൈജു പരുത്തിക്കുഴി ശ്യാംകുമാർ, ഉഷ, അബൂബക്കർ കുളപ്പട തുടങ്ങിയവർ സംസാരിച്ചു.

അമരവിള- കാരക്കോണം റോഡ് നിർമാണം: ഉപരോധ സമരം നടത്തി

വെള്ളറട: അമരവിള കാരക്കോണം റോഡ് നിര്‍മാണത്തിനായി മതിയായ വീതിയില്‍ കുന്നത്തുകാല്‍ ജംഗ്ഷനില്‍ പുറമ്പോക്ക് ഭൂമി ഏറ്റെടുക്കാത്തതിലും അപകടകരമായ രീതിയില്‍ കെട്ടിടങ്ങൾ പൊളിച്ചു നിര്‍ത്തിയിരിക്കുന്നതിലും പ്രതിഷേധിച്ച് ബി ജെപി കുന്നത്തുകാല്‍ ഏരിയാ കമ്മിറ്റിയുടെ നേതൃത്വത്തില്‍ കുന്നത്തുകാലില്‍ റോഡ് ഉപരോധം നടത്തി. ഏരിയാ പ്രസിഡന്‍റ് വണ്ടിത്തടം ദിലീപിന്‍റെ അധ്യക്ഷതയില്‍ പാറശാല മണ്ഡലം പ്രസിഡന്‍റ് മണവാരി രതീഷ് ഉപരോധം ഉദ്ഘാടനം ചെയ്തു.

ലോട്ടറി വിൽപ്പനയുടെ മറവില്‍ മദ്യവില്‍പ്പന; ഒരാള്‍ പിടിയില്‍

പേരൂര്‍ക്കട: ലോട്ടറിടിക്കറ്റ് വില്‍പ്പനയുടെ മറവില്‍ മദ്യവില്‍പ്പന നടത്തിയ ആളെ തമ്പാനൂര്‍ പോലീസ് പിടികൂടി. വലിയശാല സ്വദേശി മോഹന്‍കുമാര്‍ (60) ആണ് പിടിയിലായത്. മൂന്നുലിറ്റര്‍ വരുന്ന ഇന്ത്യന്‍ നിര്‍മിത വിദേശമദ്യമാണ് ഇയാളുടെ സ്‌കൂട്ടറില്‍നിന്നു പിടികൂടിയത്. തമ്പാനൂര്‍ ലാല്‍ ടൂറിസ്റ്റ് ഹോമിന് എതിര്‍വശത്ത് ലോട്ടറികച്ചവടം നടത്തിവരുന്ന മോഹന്‍കുമാര്‍ ഇതിന്‍റെ മറവില്‍ അനധികൃത മദ്യവില്‍പ്പന നടത്തിവരികയായിരുന്നു. തമ്പാനൂര്‍ സിഐ വി.എം. ശ്രീകുമാറും സംഘവുമാണ് മദ്യം പിടികൂടിയത്. അറസ്റ്റിലായ പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു.

മഴയിൽ ഉണ്ടപ്പാറയിൽ മണ്ണിടിച്ചിൽ : കുളപ്പട പനയ്ക്കോട് റോഡിൽ മങ്ങാട്ടുപാറയ്ക്കു സമീപം ടാറിംഗ് കേടായി

നെടുമങ്ങാട്: കുളപ്പട - പനയ് ക്കോട് - മന്നൂർകോണം റോഡിൽ മങ്ങാട്ടുപാറയ്ക്ക് സമീപം ടാറിംഗ് കേടായി. ടാറിംഗിന്‍റെ അടിഭാഗം താഴ്ന്നതാണ് ഇതിനു കാരണം. കുറച്ചു നാളായി ഇവിടെ ടാറിംഗ് തകർന്ന നിലയിലാണ്. ബസുകൾ ഉൾപ്പെടെ ഒട്ടേറെ വലിയ വാഹനങ്ങൾ സഞ്ചരിക്കുന്ന റോഡാണിത്. ഏഴു കിലോമീറ്ററിലധികം വരുന്ന റോഡിൽ ടാറിംഗ് നടത്തിയിട്ട് രണ്ടു വർഷത്തിലധികമായി. ഉഴമലയ്ക്കൽ–തൊളിക്കോട് പഞ്ചായത്തുകളെ ബന്ധിപ്പിക്കുന്ന പ്രധാന റോഡാണിത്. ഈ പഞ്ചായത്തുകളുടെ അതിർത്തി പ്രദേശമായ ഉണ്ടപ്പാറയിൽ റോഡിന്‍റെ വശങ്ങളിൽ മഴയിൽ മണ്ണിടിച്ചിലുമുണ്ട്. വശത്ത് ഉയർന്ന് നിൽക്കുന്ന മൺത്തിട്ടയാണ് ഇടിഞ്ഞ് റോഡിലേക്ക് വീഴുന്നത്. ഇവിടെ ഒട്ടേറെ സ്ഥലങ്ങളിൽ മൺതിട്ട ഇടിച്ചു റോഡിന്‍റെ വശത്ത് ടാറിംഗിനോടു ചേർന്നു വീണുകിടക്കുന്നതും കാണാം. മങ്ങാട്ടുപാറയ്ക്കു സമീപം ടാറിംഗ് കേടായ ഭാഗം ഉടനടി നവീകരിച്ചില്ലെങ്കിൽ വലിയ കുഴികൾ രൂപപ്പെടാൻ സാധ്യതയുണ്ട്. കൂടാതെ ഉണ്ടപ്പാറയിലെ മണ്ണിടിച്ചിലിനും ഉടൻ പരിഹാരം കണ്ടില്ലെങ്കിൽ വാഹനങ്ങൾ അപകടത്തിൽപെടാനും സാധ്യതയുണ്ട്. റോഡിലെ പ്രശ്നങ്ങൾ പരിഹരിക്കുന്നതിനുള്ള നടപടികൾ അധികൃതരുടെ ഭാഗത്ത് നിന്ന് ഉണ്ടാകണമെന്ന് യാത്രക്കാർ ആവശ്യപ്പെട്ടു.

പെൺകുട്ടിയെ തട്ടിക്കൊണ്ടുപോയ യുവാവ് ലുധിയാനയില്‍ പിടിയില്‍

പേരൂര്‍ക്കട: പ്രായപൂർത്തിയാകാത്ത പെൺകുട്ടിയെ തട്ടിക്കൊണ്ടുപോയ യുവാവിനെ പഞ്ചാബിലെ ലുധിയാനയില്‍നിന്ന് ഫോര്‍ട്ട് പോ ലീസ് പിടികൂടി. ജാര്‍ഖണ്ഡ് സ്വദേശി മുഹമ്മദ്‌ ദാവൂദ് (24) ആണ് പിടിയിലായത്. ബിഹാര്‍ സ്വദേശിനിയാണ് പെണ്‍കുട്ടി. മുഹമ്മദ്‌ ദാവൂദ് ചാലയ്ക്കകത്ത് മത്സ്യക്കച്ചവടം നടത്തിവരുന്നയാളാണ്. ഒരുമാസത്തിനു മുമ്പ് ഇന്‍സ്റ്റാഗ്രാം വഴിയാണ് ദാവൂദ് പെണ്‍കുട്ടിയുമായി പരിചയപ്പെടുന്നത്. 23ന് രാവിലെയാണ് പെണ്‍കുട്ടിയുടെ വീട്ടില്‍നിന്ന് ഇയാള്‍ കടത്തിക്കൊണ്ടു പോയത്. രക്ഷിതാക്കള്‍ നല്‍കിയ പരാതിയെത്തുടര്‍ന്ന് ഫോര്‍ട്ട് സിഐ ശിവകുമാറിന്‍റെ നിര്‍ദേശപ്രകാരമായിരുന്നു അന്വേഷണം. പെണ്‍കുട്ടിയെ ജാര്‍ഖണ്ഡ്, ഡല്‍ഹിവഴി പഞ്ചാബിലെ ലുധിയാനയിലെത്തിച്ചശേഷം അവിടെ ഒരു ഗ്രാമത്തില്‍ ഒളിവില്‍ക്കഴിഞ്ഞു വരികയായിരുന്നു. ഫോര്‍ട്ട് എസ്ഐ സുരേഷ്, എസ്‌സിപിഒമാരായ ലിപിന്‍ രാജ്, ശ്രീജിത്ത്, സിപിഒ പ്രവീണ്‍ എന്നിവരാണ് ലുധിയാനയില്‍ നിന്ന് ഇരുവരെയും കസ്റ്റഡിയിലെടുത്തത്. ‌ ഇയാള്‍ക്കെതിരേ പോക്‌സോ കേസാണ് രജിസ്റ്റര്‍ ചെയ്തത്. പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു.

ബസ് കാത്തിരിപ്പു കേന്ദ്രം ഉദ്ഘാടനം ചെയ്തു

വെള്ളറട: കുന്നത്തുകാല്‍ പഞ്ചായത്ത് കുറുവാട് ജംഗ്ഷനില്‍ നിര്‍മിച്ച ബസ് കാത്തിരിപ്പു കേന്ദ്രത്തിന്‍റെയും, കുന്നത്തുകാല്‍ പഞ്ചായത്തിലെ വിവിധ കേന്ദ്രങ്ങളില്‍ എംഎല്‍എയുടെ പ്രാദേശിക വികസന ഫണ്ടില്‍ നിന്നും സ്ഥാപിച്ച മിനി മാസ്റ്റ് ലൈറ്റുകളുടേയും ഉദ്ഘാടനം സി.കെ. ഹരീന്ദ്രന്‍ എംഎല്‍എ നിര്‍വഹിച്ചു. കുന്നത്തുകാല്‍ പഞ്ചായത്തിലെ കൈതക്കുഴി, ചെറുപാലക്കോട്, കുളക്കോട്, വിട്ടിയറം ക്ഷേത്രം, തേരണി, പടപ്പില്‍തോട്ടം, കല്ലറത്തല്‍ ഇലങ്കം, പള്ളിവിള, തുരുത്തിമൂല, വ്‌ലാങ്കുളം, മിഷന്‍വീട് ജംഗ്ഷന്‍, കോട്ടുക്കോണം സിഎസ്‌ഐ ചര്‍ച്ച് ആശുപത്രി, തച്ചന്‍കോട്, കുളപ്പുറത്തുകോണം എന്നീ സ്ഥലങ്ങളിലാണ് ലൈറ്റുകള്‍ സ്ഥാപിച്ചത്. പഞ്ചായത്ത് പ്രസിഡന്‍റ് ആര്‍.അമ്പിളി, വൈസ് പ്രസിഡന്‍റ് ജി. കുമാര്‍, സ്റ്റാൻഡിംഗ് കമ്മറ്റി ചെയര്‍മാന്‍മാരായ അഡ്വ. എസ്.എസ് റോജി, മേരി മിനി ഫ്‌ലോറ, ബ്ലോക്ക് പഞ്ചായത്ത് അംഗം ഒ. വസന്തകുമാരി പഞ്ചായത്ത് അംഗങ്ങളായ ഡി. ലൈല, സിന്ധു, അനീഷ്, രതീഷ്, ജയപ്രസാദ്, പഞ്ചായത്ത് മുന്‍ പ്രസിഡന്‍റ് അരുണ്‍, ആര്‍. പരമേശ്വരപിള്ള എന്നിവർ പ്രസംഗിച്ചു.

വിതുര ജെഴ്സിഫാമിൽ തൊഴിലാളികളുടെ പ്രതിഷേധം

വിതുര : വിതുര ജെഴ്സിഫാമിന്‍റെ ഭൂമി കേരള ലൈവ് സ്റ്റോക്ക് ഡെവലപ്മെന്‍റ് ബോർഡിനു കൈമാറാൻ നീക്കം നടക്കുന്നതായി ആരോപിച്ച് തൊഴിലാളി സംഘടനകളുടെ പ്രതിഷേധം. കഴിഞ്ഞ ദിവസങ്ങളിൽ സ്ഥലം പരിശോധിക്കാൻ കെഎൽഡി അധികൃതർ എത്തിയതായി തൊഴിലാളികൾ പറയുന്നു. ഇതിനെ തുടർന്നാണ് അവരുടെ പ്രതിഷേധം. എന്നാൽ കാലി വളർത്തലും പാൽ ഉദ്പാദനവും വർധിപ്പിക്കുകയാണ് ലക്ഷ്യമിടുന്നതെന്ന് അധികൃതർ പറയുന്നു. സൗകര്യമുള്ള ഭൂമിക്കായി വിവിധ ഫാമുകൾ സന്ദർശിക്കുന്നതിന്‍റെ ഭാഗമായാണ് ഇവിടെ എത്തിയതെന്നാണ് അവരുടെ വിശദീകരണം. 400-ഹെക്ടറിലധികം വിസ്തീർണമുണ്ടായിരുന്ന ഭൂമിയിൽ നിന്നാണ് ഐസറിന് സ്ഥലം നൽകിയത്. നിലവിൽ 99-ഹെക്ടർ മാത്രമാണ് അവശേഷിക്കുന്നത്. ജില്ലയിൽ തന്നെ പാലുദ്പാദനത്തിൽ മുൻ പന്തിയിലാണ് ഫാം. എന്നാൽ തീറ്റപ്പുല്ല് നട്ടുപിടിപ്പിക്കാനുള്ള സ്ഥലം അപര്യാപ്തമാണെന്നാണ് ജീവനക്കാർ പറയുന്നത്. ഈ സാഹചര്യത്തിൽ കെഎൽഡിക്ക് സ്ഥലം വിട്ടുനൽകുന്നത് ഫാമിന്‍റെ പ്രവർത്തനം നിലയ്ക്കാൻ കാരണമാകുമെന്നും അവർ പറയുന്നു. നിലവിൽ 400- പശുക്കളാണ് ഫാമിലുള്ളത്. 1400 ലിറ്റർ പാൽ പ്രതിദിനം ഉദ്പാദിപ്പിക്കുന്നു. കൂടാതെ 150-ലധികം ആടുകളും ഇവിടെയുണ്ട്. 116- സ്ഥിരം തൊഴിലാളികൾ ജോലി ചെയ്യുന്നു. കൂടാതെ കാഷ്വൽ, ദിവസ വേതന വിഭാഗത്തിൽ 37 പേരുമുണ്ട്.

ഫണ്ട് അനുവദിച്ചിട്ടും രക്ഷയില്ല; എന്‍സിസി കുളം അവഗണനയില്‍

പേരൂര്‍ക്കട: തിരുവനന്തപുരം നഗരസഭ അഞ്ചുകോടി രൂപ ഫണ്ട് അനുവദിച്ചിട്ടും കരാറുകാരന്‍ കനിയാത്തതിനാല്‍ പാറോട്ടുകോണത്തെ എന്‍സിസി കുളം അവഗണനയില്‍. ചതുരാകൃതിയിലുള്ള കുളത്തിലെ വെള്ളം ശുചീകരിച്ച് പായല്‍ നീക്കല്‍, ഇടിഞ്ഞുവീണ സംരക്ഷണഭിത്തി കെട്ടല്‍, കുളത്തില്‍ മഴക്കാലത്ത് കൂടുതലായി വരുന്ന വെള്ളം കനാല്‍വഴി തിരിച്ചുവിടല്‍ എന്നിവയാണ് പദ്ധതിയില്‍ ഉണ്ടായിരുന്നത്. കുളത്തിന്‍റെ ഒരുഭാഗം ഇടിച്ചുപൊളിച്ചതോടെ സ്വകാര്യവ്യക്തികള്‍ക്ക് വീടുകളിലേക്ക് പോകാനുണ്ടായിരുന്ന വഴി നഷ്ടമായി. കരിങ്കല്ലുകളിലും സ്ലാബുകളിലും കാല്‍വച്ചാണ് ഇവര്‍ ഇപ്പോള്‍ സഞ്ചരിച്ചുകൊണ്ടിരിക്കുന്നത്. പണിക്കാവശ്യമായ പലകള്‍ കുളത്തിനു സമീപം കൊണ്ടിറക്കിയത് ചിതലുകള്‍ കയറാവുന്ന അവസ്ഥയിലാണ്. കുളത്തിനു നഗരസഭ ഫണ്ട് അനുവദിച്ചിട്ട് ആറുമാസം കഴിഞ്ഞുവെന്നാണ് സൂചന. ഫണ്ട് വേണ്ടുന്നവിധം ഉപയോഗിക്കാതെ കരാറുകാരന്‍ ഉരുണ്ടുകളിക്കുകയാണെന്നാണ് നാട്ടുകാര്‍ പറയുന്നത്. അതേസമയം കുളത്തിന്‍റെ കരാര്‍ ഏറ്റെടുത്തയാള്‍ക്കു പണി ചെയ്യുന്നതുമൂലം നഷ്ടം സംഭവിക്കുമെന്നും അതുകൊണ്ട് അയാള്‍ പണി പാതിവഴിയില്‍ ഉപേക്ഷിച്ചതാണെന്നും ആരോപണമുണ്ട്. നിരവധി ജനങ്ങള്‍ കാര്‍ഷിക ആവശ്യങ്ങള്‍ക്കു കുളത്തിലെ വെള്ളം ഉപയോഗിച്ചിരുന്നതാണ്. കുളം നാശോന്മുഖമാവുകയും പരിസരം കാടുപിടിക്കുകയും ചെയ്തതോടെ കഞ്ചാവു മാഫിയ ഈ ഭാഗത്ത് തമ്പടിക്കുന്നുണ്ട്. പട്രോളിംഗിനിടെ ഇത്തരം സാമൂഹികവിരുദ്ധരെ മണ്ണന്തല പോലീസ് പിടികൂടാന്‍ ശ്രമിക്കാറുണ്ടെങ്കിലും അവര്‍ ഓടി രക്ഷപ്പെടുകയാണ് പതിവ്.

ജ്യൂസ് കടയില്‍നിന്നു പുക ഉയര്‍ന്നതു പരിഭ്രാന്തി പരത്തി

പേരൂര്‍ക്കട: ജ്യൂസ് കടയില്‍ നിന്നു പുക ഉയര്‍ന്നതു പരിഭ്രാന്തി പരത്തി. അട്ടക്കുളങ്ങരയില്‍ പ്രവര്‍ത്തിക്കുന്ന തിരുവല്ലം സ്വദേശി ബിജുവിന്‍റെ ഉടമസ്ഥതയിലുള്ള കിട്ടൂസ് സ്റ്റോഴ്‌സില്‍ നിന്നാണ് പുക ഉയര്‍ന്നത്. കടയ്ക്കുള്ളിലുണ്ടായിരുന്ന ഫ്രീസറിന്‍റെ ഇലക്ട്രിക്കല്‍ ഭാഗം ഷോര്‍ട്ടായതായിരുന്നു പ്രശ് നം. തിരുവനന്തപുരം ഫയര്‍ സ്റ്റേഷനില്‍നിന്ന് സീനിയര്‍ ഫയര്‍ ആൻഡ് റസ്‌ക്യു ഓഫീസര്‍ സുധീഷ് ചന്ദ്രന്‍റെ നേതൃത്വത്തില്‍ ഒരു യൂണിറ്റെത്തിയെങ്കിലും അപ്പോഴേക്കും പ്രശ്‌നം പരിഹരിച്ചിരുന്നു.

അമ്മയും മക്കളും ലിഫ്റ്റില്‍ കുടുങ്ങി; ഫയർഫോഴ്സ് രക്ഷിച്ചു

നെയ്യാറ്റിന്‍കര : നെയ്യാറ്റിന്‍കരയിലെ ഒരു പ്രമുഖ ടെക്സ്റ്റൈല്‍സിന്‍റെ ഒന്നാം നിലയിലെ ലിഫ്റ്റില്‍ കുടങ്ങിയ അമ്മയേയും രണ്ടുമക്കളേയും ഫയര്‍ ആന്‍ഡ് റസ്ക്യൂ ഫോഴ്സ് വിഭാഗം രക്ഷപ്പെടുത്തി. ഇന്നലെ ഉച്ചയ്ക്ക് രണ്ടോടെയായിരുന്നു സംഭവം. ഭര്‍ത്താവിനും മക്കളോടുമൊപ്പമാണ് നെയ്യാറ്റിന്‍കരയിലെ സ്വകാര്യവസ്ത്ര വ്യാപാര കേന്ദ്രത്തില്‍ യുവതിയും മക്കളായ കാളീചരണ്‍, ശ്രേയ എന്നിവരുമെത്തിയത്. ഇവരൊരുമിച്ച് ലിഫ്റ്റിൽ ഫസ്റ്റ് ഫ്ലോറില്‍ നിന്നും അടുത്ത നിലയിലേയ്ക്ക് പോകുന്നതിനിടയിലാണ് കുടങ്ങിയത്. ലിഫ്റ്റിന്‍റെ വാതില്‍ തുറക്കാന്‍ വസ്ത്രവ്യാപാര കേന്ദ്രത്തിലെ ആളുകൾ ശ്രമിച്ചെങ്കിലും നടന്നില്ല. നിര്‍വാഹമില്ലാതെ നെയ്യാറ്റിന്‍കര ഫയര്‍ ആന്‍ഡ് റസ്ക്യൂ വിഭാഗത്തെ വിളിച്ചറിയിക്കുകയായിരുന്നു. ഇവിടെനിന്നു സീനിയര്‍ ഓഫീസര്‍ രമേഷിന്‍റെ നേതൃത്വത്തില്‍ എത്തിയ സംഘം ഹൈഡ്രോളിക് ഉപകരണത്തിന്‍റെ സഹായത്താല്‍ ലിഫ്റ്റിൽനിന്നും അമ്മയേയും രണ്ടു കുഞ്ഞുങ്ങളേയും രക്ഷിച്ചു.

ശ്രീ ചിത്തിര തിരുനാള്‍ നാഷണല്‍ അവാര്‍ഡുകൾ സമ്മാനിച്ചു

വെള്ളറട: കുന്നത്തുകാല്‍ ശ്രീ ചിത്തിര തിരുനാള്‍ ട്രസ്റ്റ് ഏര്‍പ്പെടുത്തിയിട്ടുള്ള 2024-25 വര്‍ഷങ്ങ ളിലെ നാഷണല്‍ അവാര്‍ഡ് വിതരണം ഗവര്‍ണര്‍ രാജേന്ദ്ര വിശ്വനാഥ് അര്‍ലേക്കര്‍ നിര്‍വഹിച്ചു. 2024 ലെ അവാര്‍ഡിന് സിനിമാ താരം ജയറാമും 2025ലെ അവാർ ഡിനു ഒളിംപ്യന്‍ പി.ആര്‍. ശ്രീജേഷും അര്‍ഹരായി. രണ്ടുലക്ഷം രൂപയും പ്രശസ്തി പത്രവും ഫലകവുമടങ്ങുന്നതാണ് പുരസ്‌കാരം. ശാസ്ത്രം, സാങ്കേതികവിദ്യ, ഭരണം, കൃഷി, കല, സിനിമ, സംഗീതം, സാഹിത്യം, വൈദ്യം, കായികം, രാഷ്ട്രത്തിന് നല്‍കിയിട്ടുള്ള സംഭാവനകള്‍ മുതലായ മേഖലകളിലെ മികച്ച സംഭാവനയക്കാണ് പുരസ്‌കാരം. ഈ വര്‍ഷത്തെ അവാര്‍ഡ് പ്രഖ്യാപനം മുന്‍ അംബാസഡര്‍ ടി.പി ശ്രീനിവാസനാണു നിര്‍വഹിച്ചത്. ശ്രീചിത്തിരതിരുനാള്‍ സ്‌കൂളില്‍ നടന്ന ചടങ്ങില്‍ ഗവര്‍ണര്‍ രാജേന്ദ്ര വിശ്വനാഥ് അര്‍ലേക്കര്‍ മുഖ്യാതിഥിയായി പങ്കെടുത്തു. മുന്‍ അംബാസഡര്‍ ടി.പി. ശ്രീനിവാസൻ, സ്‌കൂള്‍ പ്രിന്‍സിപ്പല്‍ പുഷ്പവല്ലി, മാനേജിംഗ് ട്രസ്റ്റി ടി. സതീഷ് കുമാര്‍ എന്നിവർ പങ്കെ ടുത്തു. ചോറ്റാനിക്കര സത്യന്‍ നാരായണന്‍ മാരാര്‍, നര്‍ത്തകി ഇന്ദുലേഖ എന്നിവരുടെ കലാപരിപാടികളും നടന്നു.

മാനവരാശിക്ക് വേണ്ടിയുള്ള ജീവിതമായിരുന്നു മാർപാപ്പയുടേത്: സ്വാമി അഭയാനന്ദ

കഴക്കൂട്ടം: മതത്തിനപ്പുറം മാനവരാശിക്ക് വേണ്ടിയുള്ള ജീവിതമായിരുന്നു ഫ്രാൻസിസ് മാർപാപ്പയുടെതെന്നു ചെമ്പഴന്തി ശ്രീനാരായണഗുരുകുലം മഠാധിപതി സ്വാമി അഭയാനന്ദ. ഇന്‍റർ റിലിജിയസ് ഫെലോഷിപ്പ് കഴക്കൂട്ടത്ത് സംഘടിപ്പിച്ച ഫ്രാൻസിസ് മാർപാപ്പ അനുസ്മരണ ചടങ്ങിൽ പ്രസംഗിക്കുകയായിരുന്നു അദ്ദേഹം. മനുഷ്യകുലത്തിന്‍റെ നന്മയ്ക്കും സമാധാനത്തിനും പ്രകൃതിയുടെ പരിപാലനത്തിനുവേണ്ടി നിലകൊണ്ട മഹാ ആചാര്യനെയാണ് ലോകത്തിനു നഷ്ടമായതെന്നും അദ്ദേഹം അനുസ്മരിച്ചു. യുദ്ധത്തിന്‍റെ ഭീകരതയിൽ കഷ്ടപ്പെടുന്ന ജനങ്ങൾക്ക് വേണ്ടി തന്‍റെ അവസാന ഹൃദയത്തുടിപ്പിലും ശബ്ദിച്ച സമാധാനത്തിന്‍റെ വെള്ളരിപ്രാവിനെയാണ് ഫ്രാൻസിസ് മാർപാപ്പയുടെ വിയോഗത്തിലൂടെ മാനവകുലത്തിന് നഷ്ടമായതെന്ന് ഇമാം അൽ ഹാബിസ് അർഷാദ് കാശ്മീ പറഞ്ഞു. കാലത്തിനനുസരിച്ച് സഭയുടെ മുൻഗണനകൾ ധീരതയോടെ നവീകരിച്ച ശ്രേഷ്ഠ ഇടയനായിരുന്നു ഫ്രാൻസിസ് മാർപാപ്പ എന്ന് അധ്യക്ഷത വഹിച്ച കഴക്കൂട്ടം സെന്‍റ് ജോസഫ് ഇടവക വികാരി ഫാ. ദീപക് ആന്‍റോ അഭിപ്രായപ്പെട്ടു. ഡോ. ഉമ്മൻ വി. ഉമ്മൻ, ആർ. ശ്രീകുമാർ, അണിയൂർ പ്രസന്നകുമാർ, കഴക്കൂട്ടം അനിൽ, ജ്യോതിസ് ചന്ദ്രൻ, ജി. ജയചന്ദ്രൻ, ഡോ. യൂജിൻ ഗോമസ്, ജോൺ വിനേഷ്യസ്, എച്ച്.എസ്. ആദർശ്, ആന്‍റണി ആൽബർട്ട്, ബാലചന്ദ്രൻ നായർ, ഗ്രേഷ്യസ് പെരേര, ഭൂവനചന്ദ്രൻ നായർ, ജോർജ്ജ് കുലാസ്, ടൈറ്റസ് ആന്‍റണി തുടങ്ങിയവർ പ്രസംഗിച്ചു.

തിരുവനന്തപുരം വിമാനത്താവളത്തിൽ വ്യാജ ബോംബ് ഭീഷണി

വലിയതുറ: തിരുവനന്തപുരം ജില്ലാ കോടതിക്കും കലക്ടറേറ്റിനും ഹോട്ടലുകള്‍ക്കും ബോംബു ഭീഷണി ഉണ്ടായതിനു പിന്നാലെ തിരുവനന്തപുരം അന്താരാഷ്ട്ര വിമാനത്താവളത്തിനും ബോംബ് ഭീഷണിയുണ്ടായി. ഇന്നലെ രാവിലെ 9.30 ഓടുകൂടി എയര്‍പോര്‍ട്ട് മാനേജരുടെ ഇ-മെയിലിലേയ്ക്കാണു ഭീഷണി സന്ദേശം എത്തിയത്. ഭീഷണി സന്ദേശത്തിന്‍റെ പശ്ചാത്തലത്തില്‍ വിമാനത്താവളത്തില്‍ പരിശോധന ശക്തമാക്കിയതായി ബന്ധപ്പെട്ട അധികൃതര്‍ വ്യക്തമാക്കി. ബോംബ് ഭീഷണി എത്തിയതോടെ വിമാനത്താവള അധികൃതര്‍ വിവരം വലിയതുറ പോലീസിനേയും ബോംബ് സ്‌ക്വാഡ്, ഫയര്‍ഫോഴ്‌സ് എന്നിവരെ അറിയിക്കുകയായിരുന്നു. അവര്‍ എത്തി പരിശോധന നടത്തിയെങ്കിലും യാതൊന്നും കണ്ടെത്താന്‍ കഴിഞ്ഞില്ല. ഇതോടെ ഭീഷണി വ്യാജമാണെന്ന അനുമാനത്തിലെത്തുകയായിരുന്നു അധികൃതര്‍. ബോംബ് സ്‌ക്വാഡും പോലീസും സി.ഐഎസ്എഫും സംയുക്തമായിട്ടാണു പരിശോധന നടത്തിയത്. ഇ-മെയില്‍ വിലാസമുണ്ടാക്കിയതു ഡാര്‍ക്ക് വെബില്‍നിന്നാണെന്നാണ് സൂചന. ആയതിനാല്‍ തന്നെ ഭീഷണിയുടെ ഉറവിടം കണ്ടുപിടിക്കാന്‍ പോലീസ് ഇരുട്ടില്‍ തപ്പേണ്ടിവരും എന്നാണു വിദഗ്ധാഭിപ്രായം. ബോംബു ഭീഷണി സന്ദേശം എത്തിയ ഉടന്‍ തന്നെ തിരുവനന്തപുരം എയര്‍പോര്‍ട്ട് ബോംബ് ത്രറ്റ് അസസ്‌മെന്‍റ് കമ്മിറ്റിയുടെ നേതൃത്വത്തില്‍ എയര്‍പോര്‍ട്ടിനുള്ളില്‍ വേണ്ടവിധത്തിലുളള സുരക്ഷാ ക്രമീകരണങ്ങള്‍ ഒരുക്കുകയായിരുന്നു. കമ്മിറ്റിയുടെ നേതൃത്വത്തില്‍ തന്നെ സുരക്ഷയ്ക്കായുളള വിവിധ സെക്യൂരിറ്റി ഏജന്‍സികളെ ഏകോപിക്കുകയായിരുന്നു. അതിനാല്‍ വിമാനത്താവളത്തിനുള്ളില്‍ യാത്രക്കാര്‍ക്കോ വിമാനത്താവളത്തിനുള്ളിലെ പ്രവര്‍ത്തനങ്ങള്‍ക്കോ യാതൊരുവിധത്തിലുമുള്ളതടസമോ പ്രയാസമോ നേരിടേണ്ടി വന്നില്ല.

നാടുകാണി ശ്രീധർമശാസ്താ ക്ഷേത്രത്തിലെ പഞ്ചലോഹ വിഗ്രഹവും രത്നവും കവർന്നു

പ്രതികളിൽ ഒരാൾ പിടിയിൽ; ഒരാൾ രക്ഷപ്പെട്ടു കാട്ടാക്കട: കാട്ടാക്കട പോലീസ് സ്റ്റേഷൻ അതിർത്തിയിലെ പൂവച്ചൽ നാടുകാണി ശ്രീധർമശാസ്താ ക്ഷേത്രത്തിലെ പഞ്ചലോഹ വിഗ്രഹവും വൈഡൂര്യക്കല്ലുകളും കവർന്നു. പ്രതി മറ്റൊരു മോ ഷണ ശ്രമത്തിനിടെ പിടിയിൽ. മറ്റൊരു മോഷണ ശ്രമത്തിനിടെ മോഷ്ടാക്കളിൽ ഒരാളായ സോജൻ ആര്യൻകോട് പോലീസിന്‍റെ പിടിയിലായിരുന്നു. പ്രധാന മോഷ്ടാവ് പ്രിൻസിന്‍റെ സഹായിയാണു സോജൻ. ഇയാളെ ചോദ്യം ചെയ്തപ്പോഴാണ് പഞ്ചലോഹ വിഗ്രഹം മോഷ്ടിച്ചതായും ഇതു മാരായമുട്ടത്തെ ഒരു വീട്ടിൽ ഒളിപ്പിച്ചതായും പോലീസിനു വിവരം ലഭിച്ചത്. ശാസ്താവിന്‍റെ 110 കിലോ ഭാരമുള്ള പഞ്ചലോഹ വിഗ്രഹമാണ് കവർന്നത്. ഇന്നലെ രാവിലെ ക്ഷേത്രം തുറക്കാനെത്തിയ പൂജാരിയാണ് പ്രധാന ശ്രീകോവിലിന്‍റെ വാതിൽ പൊളിച്ച നിലയിൽ കണ്ടെത്തിയത്. ഉപദേവന്മാരായ മുരുകൻ, ഗണപതി എന്നിവരുടെ ശ്രീകോവിലിന്‍റെ വാതിലും പൊളിച്ചിട്ടുണ്ട്. മുരുകസ്വാമിയുടെ വിഗ്രഹം മറിച്ചിട്ട നിലയിലായിരുന്നു. ഇവിടെ വൈഡൂര്യം ഉണ്ടോ എന്നു പരിശോധിക്കുന്നതിനാണു വിഗ്രഹം മറിച്ചിട്ടതെന്നാണ് നിഗമനം. മോഷ്ടിച്ച പഞ്ചലോഹ വിഗ്രഹം പാറ ഇടുക്കിലൂടെ അര കിലോമീറ്ററിലധികം വലിച്ചിഴച്ചാണു കടത്തിയത്. ഇവിടുത്തെ മോഷണത്തിനുശേഷം പ്രദേശത്തെ മറ്റൊരു ക്ഷേത്രത്തിൽ കാണിക്കവഞ്ചി മോഷ്ടിച്ചശേഷം മടങ്ങുന്നതിനിടെയാണ് സോജൻ പോലീസിന്‍റെ പിടിയിലായത്. ഇയാളെ ചോദ്യം ചെയ്യുന്നതിനിടെ പ്രധാനപ്രതിയായ പ്രിൻസ് സ്ഥലത്ത് നിന്നും രക്ഷപ്പെടുകയായിരുന്നു. പ്രിൻസിനായി പോലീസ് വ്യാപക തെരച്ചിൽ ആരംഭിച്ചിട്ടുണ്ട്. മാറനല്ലൂർ പോലീസ് സ്റ്റേഷനിൽ ഇയാൾക്കെതിരേ നിരവധി കേസുകൾ നിലവിലുണ്ട്. മോഷണ ഉരുപ്പടികൾ ഉരുക്കാനായി പ്രിൻസിന്‍റെ വീട്ടിൽ സജീകരിച്ചിട്ടുള്ള ആല പോലീസ് കണ്ടെത്തി. ഇവിടെ ഉണ്ടായിരുന്ന വസ്തുക്കൾ പോലീസ് കണ്ടെടുത്തു. സ്ഥലത്ത് ഫോറൻസിക് സംഘം പരിശോധന നടത്തി. പ്രതിയെ ചോദ്യം ചെയ്തുവരികയാണ്. ‌‌

‘പുലിയാണ് ’വിഴിഞ്ഞം തുറമുഖത്തിലെ പുലിമുട്ട്

എസ്. രാജേന്ദ്രകുമാർ വിഴിഞ്ഞം : വിഴിഞ്ഞം അന്താരാഷ്ട്ര തുറമുഖത്തിന്‍റെ യഥാർഥ പുലിയാണ് സുരക്ഷ വേലിയായ പുലിമുട്ട്. പ്രകൃതി പ്രതിഭാസമായ അറബിക്കടലിന്‍റെ തിരമാലകളെ മൂന്നു കിലോമീറ്ററോളം തോൽപ്പിച്ച് കേരളത്തിന്‍റെ വികസന സ്വപ്നത്തിനു സുരക്ഷയൊരുക്കലാണ് ജോലി. ഇന്ത്യയിലെ മറ്റൊരു തുറമുഖത്തിനും അവകാശപ്പെടാൻ പറ്റാത്ത തരത്തിലുള്ള വിശാലമായ ബ്രേക്ക് വാട്ടർ ഒരുക്കി ചരക്കുമായെത്തുന്ന കൂറ്റൻ കണ്ടെയ്നർ കപ്പലുകൾക്ക് വാർഫിൽ അടുക്കാൻ അവസരമൊരുക്കാനുള്ള ചുമതലും പുലിമുട്ടിനുണ്ട്. തീരത്തുനിന്നു കടലിന്‍റെ ഉള്ളിലേക്ക് മൂന്നു കിലോമീറ്ററോളം നീളത്തിൽ നിർമിച്ച പുലിമുട്ടിൻന്‍റെ മുകൾപ്പരപ്പിനു പത്ത് മീറ്റർ വീതിയുണ്ട്. ഇരുപത് മുതൽ ഇരുപത്തിരണ്ടു മീറ്റർ വരെ ആഴമുള്ള ഉൾക്കടലിലെ തിരച്ചുഴിയെ തള്ളി നീക്കി ഒരു സ്തൂപത്തിന്‍റെ മാതൃകയിലാണ് കല്ലിട്ടു കെട്ടിപ്പൊക്കിയത്. മുകൾപ്പരപ്പ് കോൺക്രീറ്റു പാകി കണ്ടെയ്നറുകൾക്ക് കടന്നു പോകാൻ പാകത്തിൽ വിശാലമായ റോഡും യാഥാർഥ്യമാക്കി. കേരളത്തിലെയും തമിഴ്നാട്ടിലെയും വിവിധ ക്വാറികളിൽനിന്നു കരയിലൂടെയും കടൽ വഴിയും കൊണ്ടു വന്ന 62 ലക്ഷം ടൺ പാറ വേണ്ടി വന്നു പുലിമുട്ടിന്‍റെ ഒന്നാം ഘട്ട നിർമാണം പൂർത്തിയാക്കാൻ. തമിഴ്നാട്ടിലെ കന്യാകുമാരി, തിരുനെൽവേലി ജില്ലകളിലും കേരളത്തിൽ തിരുവന്തപുരം, കൊല്ലം ജില്ലകളിൽ നിന്നുള്ളതുമായ വിവിധ ക്വാറികൾ വിഴിഞ്ഞം തുറമുഖത്തിനായി പൊട്ടിക്കേണ്ടിവന്നു. തിരുനെൽവേലിയിലും കന്യാകുമാരിയിൽ നിന്നുമായി ടിപ്പർ ലോറികളിൽ കര മാർഗ്ഗം കൂറ്റൻ പാറക്കല്ലുകൾ എത്തിയപ്പോൾ കൊല്ലത്തുനിന്നു മുതലപ്പൊഴിയിൽ എത്തിച്ച പാറകൾ ബാർജുകളിൽ കടൽ മാർഗം വിഴിഞ്ഞത്തു കൊണ്ടുവന്നു നിക്ഷേപിച്ചു. പൂർണമായി കേരള സർക്കാരിന്‍റെ ഖജനാവിൽ നിന്നുള്ള 1500 കോടി ചിലവിൽ ആറുവർഷം കൊണ്ടാണ് ഈ തുറമുഖസുരക്ഷാ കവചം സഫലമാക്കിയത്. കരിങ്കല്ലുകൊണ്ടുള്ള നീളമേറിയ റോസിനെ സംരക്ഷിക്കാൻ മൂന്നു കാലിൽ സിമെന്‍റ് കോൺക്രീറ്റിൽ നിർമിച്ച കൂറ്റൻ ടഡ്രോ പാടുകൾ കൂടി നിരത്തി തിരമാലകളെ പൂർണമായി പരാജയപ്പെടുത്തി, ഏതു കാലാവസ്ഥയിലും അലറിയടിച്ച് വരുന്ന തിരമാലകളെ വിഴിഞ്ഞം തുറമുഖത്തേക്കു കടക്കാതെ സംരക്ഷിക്കുന്നതും ഈപുലിമുട്ട് തന്നെയാണ്. പുലിമുട്ടിന്‍റെ സംരക്ഷണത്തിൽ കിലോമീറ്ററുകളോളം പരന്നുകിടക്കുന്ന ബ്രേക്ക് വാട്ടറിനുള്ളിൽ ഏത് സമയത്തും ഏതു തരം കപ്പലുകൾക്കും പ്രവേശിക്കാമെന്നതും ഏറെ പ്രത്യേകതാണ്. ആധുനിക സാങ്കേതികവിദ്യയിൽ നിർമിച്ചകൂറ്റൻ പുലിമുട്ടിന്‍റെ കരുത്തിൽ ലോകത്തിന്‍റെ വിവിധ കോണുകളിൽനിന്നു പത്തു മാസത്തിനുള്ളിൽ 277 ചരക്ക് കപ്പലുകൾ വിഴിഞ്ഞം തുറമുഖത്തടുന്നു. അ ഞ്ചു ലക്ഷത്തി എൺപത്തിയെ ണ്ണായിരം കണ്ടെയ്നറുകളും കൈകാര്യം ചെയ്ത തുറമുഖം ലോക രാജ്യങ്ങൾക്കു മുന്നിൽ കരുത്തു തെളിയിച്ചു.

ഒൻപത് ദിവസത്തെ വിജയോത്സവം 30ന് തുടങ്ങും

തിരുവനന്തപുരം: റഷ്യൻ ഹൗസ്, "റൂസ്കിയ് മിർ' ഫൗണ്ടേഷനും ന്യൂഡൽഹിയിലെ റഷ്യൻ എംബസിയുമായി സഹകരിച്ച്, രണ്ടാം ലോകമഹായുദ്ധത്തിലെ സോവിയറ്റ് വിജയത്തിന്‍റെ 80-ാം വാർഷികം ആഘോഷിക്കുന്നതിന്‍റെ ഭാഗമായി, ഒമ്പതു ദിവസം നീളുന്ന വിവധ പരിപാടികൾ സംഘടിപ്പിക്കുന്നു. ആഘോഷപരിപാടിയുടെ ഭാഗമായി സെമിനാറുകൾ, പ്രദർശനങ്ങൾ, മത്സരങ്ങൾ, ചലച്ചിത്രമേള, സംഗീത വിരുന്ന് എന്നിവ നടത്തും. ആഘോഷങ്ങൾക്ക് 30 തുടക്കമാകും. മന്ത്രിമാർ, ഡിപ്ലോമാറ്റുകൾ, മുൻ സൈനിക ഉദ്യോഗസ്ഥർ, അന്താരാഷ്ട്രകാര്യ വിദഗ്ധർ, ചരിത്രകാരൻമാർ, വിദ്യാർഥികൾ തുടങ്ങിയവർ പങ്കെടുക്കും. 30 നു വൈകുന്നേരം മോസ്കോ സ്റ്റേറ്റ് കോൺസർവേറ്ററിയിലെ സോളോയിസ്റ്റുകളുടെ ഓപ്പറ സംഗീത നിശ ഉണ്ടാകും. മേയ് എട്ടിന്, 80 പേർ ചേർന്ന് 80 മീറ്റർ നീളമുള്ള സെന്‍റ് ജോർജ് റിബൺ പ്രദർശിപ്പിക്കും. പാസുകൾക്ക്, +91 73562 24024 (വാട്സ്ആപ്പ്) എന്ന നമ്പറിൽ ബന്ധപ്പെടുക.

പുതിയതുറ സെന്‍റ് നിക്കോളാസ് പള്ളിയിൽ തിരുനാളിനു കൊടിയേറി

വിഴിഞ്ഞം: കൊച്ചെടത്വ എന്നും പൊറ്റയിൽ പള്ളി എന്നും അറിയപ്പെടുന്ന പ്രമുഖ തീർഥാടന കേന്ദ്രമായ വിശുദ്ധ നിക്കോളാസ് പള്ളിയിൽ വിശുദ്ധ ഗീവർഗീസ് സഹദായുടെ തിരുനാളിന് കൊടിയേറി. പുതിയതുറ കുരിശടിയിലെ ജപമാലയെ തുടർന്ന് അശ്വാരൂഡ സേന, കുരിശ് വാഹകർ, അൾത്താര ബാലകർ, മുത്തുകുട ചൂടിയ സ്ത്രീകൾ, വാദ്യമേളങ്ങൾ, ഭക്തസഭകൾ എന്നിവരുടെ അകമ്പടിയോടെ കൊടിമരത്തിലേക്കു പതാക പ്രദക്ഷിണം നടന്നു. കൊടിമരത്തിനു മുന്നിൽ പൂജ നൃത്തം, ഇടവക ചരിത്രം, പ്രാർഥന നൃത്തം എന്നിവുമുണ്ടായിരുന്നു. പരിശുദ്ധത്മാവിന്‍റെ ഗാനാലാപനവും ബൈബിൾ വായനയ്ക്കുംശേഷം വജ്ര ജൂബിലി ഗാനമായ "ദിവ്യാത്മ ഗീവർഗീസ്' പ്രകാശനം ചെയ്തു. തുടർന്നു പതാക വെഞ്ചരിച്ച് ഇടവക വികാരി ഫാ. ഗ്ലാഡിൻ അലക്സ് കൊടിയേറ്റം നിർവഹിച്ചു. ഫാ. ജറാൾഡ് മുഖ്യകാർമികനായ ദിവ്യബലിയിൽ ഫാ. മൈക്കിൾ തോമസ് വചനപ്രഘോഷണം നടത്തി. ഇന്നു രാവിലെ ആറിനും 10.30 നും ദിവ്യബലി ഉണ്ടായിരിക്കും. വൈകുന്നേരം ആറിനു പുതിയതുറ ബീച്ച് മൈതാനത്തിൽ ദിവ്യബലി ഉണ്ടായിരിക്കും. പതിനായിരകണക്കിനു തീർഥാടകർ എത്തുന്ന തിരുനാൾ ദിനങ്ങളിൽ പോലീസ്, ഫയർ ഫോഴ്സ്, എക്സൈസ്, ആരോഗ്യം വകുപ്പ്, വാട്ടർ അഥോറിറ്റി, പിഡബ്ല്യൂഡി, കെഎസ്ഇബി എന്നീ വകുപ്പുകളുടെ സേവനം ഉണ്ടാകും. കെഎസ്ആർടിസി പ്രത്യേക ബസ് സർവീസ് ആരംഭിച്ചു. തീർഥാടകരുടെ സഹയത്തിനായി സേവാസംഘം ഓഫീസും ഇടവക ജനങ്ങളുടെ നേതൃത്വത്തിൽ വോളന്‍റിയർമാരും സജ്ജരാണ്. ജനപ്രധിനിധികളും ഉത്സവക്കമ്മിറ്റിയും ഇടവക കമ്മിറ്റിയും അടങ്ങുന്ന സംഘം ഓരോ ദിവസവും നടക്കുന്ന കാര്യങ്ങൾ മുഴുവൻ വിലയിരുത്തും. തിരുനാളാഘോഷം മേയ് നാലിനു സമാപിക്കും.

വെഞ്ഞാറമൂട് കൂട്ടക്കൊല: അന്വേഷണം പൂർത്തിയായി: കുടുംബത്തിനു കടബാധ്യത 48 ലക്ഷം: അഫാൻ ഏകപ്രതി, കുറ്റപത്രം അടുത്തമാസം

വെഞ്ഞാറമൂട് : വെഞ്ഞാറമ്മൂട് കൂട്ടക്കൊലയ്കക്കു കാരണം കടബാധ്യതയെന്ന് ഉറപ്പിച്ച് പൊലീസ്. കേസിൽ പോലീസിന്‍റെ അന്വേഷണം പൂർത്തിയായി. കേസിലെ ഏകപ്രതിയായ അഫാന്‍റെ കുടുംബത്തിന് 48 ലക്ഷം രൂപയുടെ കടബാധ്യതയുണ്ടെന്നും പോലീസ് വ്യക്തമാക്കി. അന്വേഷണം പൂർത്തിയായതിനു പിന്നാലെ കുറ്റപത്രം തയാറാക്കൽ നടപടികളിലേക്ക് പോലീസ് കടന്നു. അടുത്തമാസത്തോടെ കുറ്റപത്രം സമർപ്പിക്കും. കുതിച്ചുയർന്ന കടവും കടക്കാർ പണം തിരികെ ചോദിച്ചതിലെ ദേഷ്യവുമാണ് കൊലയുടെ കാരണമായി അന്വേഷണസംഘം കണ്ടെത്തിയത്. ബന്ധുക്കളിൽ നിന്നായി 16 ലക്ഷം രൂപയും 17 ലക്ഷം രൂപയുടെ ഹൗസിംഗ് ലോണും മൂന്നുലക്ഷം രൂപയുടെ പഴ് സണൽ ലോണും ഒന്നര ലക്ഷത്തിന്‍റെ ബൈക്ക് ലോണും 10 ലക്ഷത്തിന്‍റെ പണയവുമായിരു ന്നു കടം. അമ്മയും വല്ല്യമ്മയും സഹോദരനും ബന്ധുക്കളും കാമുകിയുമടക്കം ആറു പേരെയാണ് അഫാൻ ചുറ്റികയ്ക്ക് അടിച്ചുവീഴ്ത്തിയത്. കടം വീട്ടാൻ സഹായിക്കാതിരുന്നതോടെയാണ് വല്ല്യമ്മ, പിതൃസഹോദരൻ, ഇദ്ദേഹത്തിന്‍റെ ഭാര്യ എന്നിവരെ കൊന്നതെന്നും പണയംവച്ച സ്വർണം തിരികെ ചോദിച്ചതിന്‍റെ വൈരാഗ്യത്തിലാണു കാമുകിയെ കൊന്നതെന്നും പോലീസ് പറയുന്നു. പതിനഞ്ചുപേരിൽ നിന്നായാണ് കുടുംബം പണം കടം വാങ്ങിയിരുന്നത്. അഫാൻ ഏക പ്രതിയായ കേസിൽ അമ്മ ഷെമീനയെ മുഖ്യസാക്ഷിയാക്കും. കൊലയുടെ കാരണം കൂടാതെ സമയക്രമവും പോലീസ് ഉറപ്പിച്ചു. ഫെബ്രുവരി 24നു രാവിലെ 10.30ന് അമ്മയെ ആക്രമിച്ചു, 11.30ന് വല്യമ്മയേയും ഒന്നരയ്ക്കും രണ്ടിനുമിടയിൽ പിതൃസഹോദരനേയും ഭാര്യയേയും കൊന്നു. പിന്നീട് ബാറിൽ പോയി മദ്യപിച്ച ശേഷം വൈകുന്നേരം 4.15 ഓടെ ഫർസാനയേയും നാലേ മുക്കാലോടെ അനിയനേയും ആക്രമിച്ചെന്നാണു കണ്ടെത്തൽ.

ബഹറിനിൽ മലയാളി കുഴഞ്ഞു വീണ് മരിച്ചു

പേയാട് : ബഹറിനിൽ മലയാളി കുഴഞ്ഞു വീണ് മരിച്ചു. തിരുമല സ്വദേശി ഡി. എ. ഗിരീഷ് (50) ആണ് മരിച്ചത്. ജുഫൈർ ക്ലബിൽ രാത്രി ഷട്ടിൽ കളിക്കുന്നതിനിടെയാണ് കുഴഞ്ഞു വീണ് മരിച്ചത്. ബഹ്റൈനിലെ ബാങ്കിലെ ജീവനക്കാരനായിരുന്നു. മൃതദേഹം ഇപ്പോൾ സൽമാനിയ ആശുപത്രിയിലാണ്. നാട്ടിലേക്ക് കൊണ്ടു പോകാനുള്ള നടപടിക്രമങ്ങൾ പുരോഗമിക്കുകയാണ്. സംസ്കാര ചടങ്ങുകൾ നാട്ടിലെത്തിച്ച ശേഷം. ഭാര്യ: ഷീജ. മക്കൾ: ഗ്രീഷ്മ (മെഡിക്കൽ വിദ്യാർഥി), ഗൗരി (വിദ്യാർഥിനി).

മാവിന്‍റെ ശിഖരം ഒടിഞ്ഞു വീണ് യുവാവ് മരിച്ചു

പൂവാർ: മാങ്ങ പറിക്കുന്നതിനിടെ ശിഖരം ഒടിഞ്ഞ് വീണ് യുവാവ് മരിച്ചു. പൂവാർ അരുമാനൂർ പള്ളിവിള ആറാട്ടുകടവിൽ പരേതനായ സുകുമാരന്‍റെയും ശ്യാമളയുടെയും മകൻ കെ. എസ്. രാജീവൻ (ഉണ്ണി-46) ആണ് മരിച്ചത്. കൂലിപ്പണിക്കാരനായിരുന്നു. ഇന്നലെ ഉച്ചയ്ക്ക് രണ്ടരയോടെ അരുമാനൂർ ജംഗ്ഷന് സമീപത്തായിരുന്നു അപകടം. മാവിൻ മാങ്ങ പറിക്കാന്നതിനിടെ ശിഖരം ഒടിഞ്ഞു താഴെ വീഴുകയായിരുന്നു. തലയ്ക്ക് ഗുരുതരമായി പരിക്കേറ്റ രാജീവനെ ഉടൻ തന്നെ നെയ്യാറ്റിൻകര ജനറൽ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. മൃതദേഹം തിരുവനന്തപുരം മെഡിക്കൽ കോളജ് ആശുപ്രതി മോർച്ചറിയിൽ. പോസ്റ്റ്മോർട്ടത്തിനു ശേഷം സംസ്കാരം ഇന്ന് വൈകുന്നേരം നടക്കും. പീതാംബരൻ, സാക്ഷ എന്നിവർ സഹോദരങ്ങളാണ്. പൂവാർ പോലീസ് കേസെടുത്തു.

നേതൃത്വ പരിശീലന ക്യാന്പ് "ഓറ-2025' തുടങ്ങി

അമ്പൂരി: കേരള ലൈവ്സ്റ്റോക്ക് ഇൻസ്‌പെക്ടേഴ്സ് അസോസിയേഷൻ സംസ്ഥാന കമ്മിറ്റിയുടെ ആഭിമുഖ്യത്തിൽ ദ്വിദിന ശില്പശാലയ്ക്ക് "ഓറ-2025' - അമ്പൂരിയിൽ തുടക്കമായി. അഡ്വ. മോൻസ് ജോസഫ് എംഎൽഎ ഉദ്ഘാടനം ചെയ്തു. സംസ്ഥാന പ്രസിഡന്‍റ് ദുനിംസ് റിയാസുദീൻ അധ്യക്ഷത വഹിച്ചു. ജനറൽ സെക്രട്ടറി വി. മനോജ്‌ സ്വാഗതം പറഞ്ഞു. വി. കൃഷ്ണദാസ്, പി.ജി. ഷാജി, എസ്.വി. പ്രശാന്ത്, എം. അബ്ദുൽ സലാം, ഇ. നജീബ്, ബി. മുകേഷ് എന്നിവർ പ്രസംഗിച്ചു. പി. സമീർസിദ്ധീഖി, രതീശൻ അരിമ്മൽ, നവീൻ മഞ്ഞിപ്പുഴ, ജി. സജികുമാർ എന്നിവർ ക്ലാസുകളെടുത്തു. നാളെ നടക്കുന്ന സമാപന സമ്മേളനം സി.കെ. ഹരീന്ദ്രൻ എംഎൽഎ ഉദ്ഘാടനം ചെയ്യും.

നേമത്ത് ലഹരി വിരുദ്ധറാലി

നേമം: നേമം ജനമൈത്രി പോ ലീസിന്‍റെ നേതൃത്വത്തിൽ നേമത്ത് ലഹരി വിരുദ്ധ ബഹുജന റാലി സംഘടിപ്പിച്ചു. വൈകുന്നേരം നാലിനു പഴയ കാരയ്ക്കാമണ്ഡപത്തു നിന്നാരംഭിച്ച റാലി സിറ്റി പോലീസ് കമ്മീഷണർ തോംസൺ ജോസ് ഫ്ലാഗ് ഓഫ് ചെയ്തു. റാലി പ്രാവച്ചമ്പലത്ത് സമാപിച്ചു. നേമം ജനമൈത്രി പോലീസ് കോ-ഓർഡിനേറ്റർ ജയൻ, ജനമൈത്രി സിആർഒ സബ് ഇൻസ്പെക്ടർ പ്രവീൺ ചന്ദ്ര പ്രതാപ്, കൗൺസിലർമാരായ യു. ദീപിക, എൽ. സൗമ്യ, എസ്.കെ. ശ്രീദേവി, പള്ളിച്ചൽ പഞ്ചായത്ത് പ്രസിഡന്‍റ് രാഗേഷ്, കല്ലിയൂർ പഞ്ചായത്ത് അംഗം ചന്ദുകൃഷ്ണ, ഫ്രാൻസ് റസിഡൻസ് അസോസിയേഷൻ പ്രസിഡന്‍റ്് മണ്ണാങ്കൽ രാമചന്ദ്രൻ, ജനറൽ സെക്രട്ടറി വിജയൻ നായർ, പട്ടം സ്മാരക വോളിബോൾ ട്രെയിനിംഗ് വിദ്യാർഥികൾ, വിവിധമത, രാഷ്ട്രീയ,യുവജന സംഘടനകൾ, കോർപ്പറേഷൻ, കല്ലിയൂർ, പള്ളിച്ചൽ പഞ്ചായത്തുകൾ, വ്യാപാരി വ്യവസായി സംഘടനകൾ, നിർഭയ വോളൻന്‍റിയർമാർ, വിദ്യാർഥികൾ, അധ്യാപകർ, എസ്പിസി, നാഷണൽ സർവീസ് സ്കീം, സർവീസ് സംഘടനകൾ എന്നിവർ പങ്കെടുത്തു.

ശ്രീവരാഹത്ത് ഹരിതകര്‍മസേനയുടെ ഗോഡൗണില്‍ തീപിടിത്തം

പേരൂര്‍ക്കട: ശ്രീവരാഹം പറമ്പില്‍ ജംഗ്ഷനില്‍ മില്‍മ ഹബ്ബിന് എതിര്‍വശം ഹരിതകര്‍മസേനയുടെ ഗോഡൗണില്‍ തീപിടിത്തം. ശനിയാഴ്ച വൈകുന്നേരം നാലുമണിയോടുകൂടിയിരുന്നു. സംഭവം. ഇവിടെ ഒരു വീട്ടില്‍ ഏകദേശം നാലുലോഡ് പ്ലാസ്റ്റിക് സാധനങ്ങള്‍ ഉള്‍പ്പെടെ ശേഖരിച്ചിരിക്കുകയായിരുന്നു. കെട്ടിടത്തില്‍ സ്ഥാപിച്ചിരുന്ന വൈദ്യുത വയറുമായി ബന്ധപ്പെട്ട ഷോര്‍ട്ട് സര്‍ക്യൂട്ടാകാം തീപിടിത്തതിനു കാരണമെന്നു ഫയര്‍ഫോഴ്‌സ് പറഞ്ഞു. ഏകദേശം രണ്ടുലോഡ് സാധനങ്ങള്‍ കത്തിനശിച്ചിട്ടുണ്ട്. തിരുവനന്തപുരം നിലയത്തില്‍നിന്ന് സീനിയര്‍ ഫയര്‍ ആൻഡ് റസ്‌ക്യു ഓഫീസര്‍ സജിയുടെ നേതൃത്വത്തിലുള്ള സംഘം രണ്ടുമണിക്കൂര്‍ പരിശ്രമിച്ചാണ് തീ കെടുത്തിയത്. കൂടുതല്‍ സ്ഥലങ്ങളിലേക്ക് തീ പടരാത്തത് വന്‍ അത്യാഹിതം ഒഴിവാക്കി.

പൊഴിയൂര്‍ ക്ഷേത്രത്തില്‍ ഉത്സവ എഴുന്നള്ളിപ്പിനിടെ ആന ഇടഞ്ഞു

പാറശാല: പൊഴിയൂര്‍ മഹാദേവ ക്ഷേത്രത്തില്‍ ഉത്സവ എഴുന്നള്ളിപ്പിനിടയില്‍ ആന ഇടഞ്ഞു. തിരുവിതാംകൂർ ദേവസ്വം ബോര്‍ഡിന്‍റെ ഉടമസ്ഥതയിലുളള പാറശാല ശിവശങ്കരനെന്ന ആനയാണ് ഇടഞ്ഞത്. വെള്ളിയാഴ്ച രാത്രി ശ്രീഭൂതബലി എഴുന്നള്ളിപ്പ് നടക്കുന്നതിനിടിയിലാണ് ആന ഇടഞ്ഞത്. തുടര്‍ന്ന് ആന, ക്ഷേത്രത്തിന്‍റെ മേല്‍ക്കൂരയിലെ ഓടുകള്‍ നശിപ്പിക്കുകയും ചുറ്റമ്പലം തകര്‍ക്കുകയും ചെയ്തു. പാപ്പാന്‍മാരുടെ നേതൃത്വത്തില്‍ ആനയെ നിയന്ത്രിക്കുവാന്‍ ശ്രമിച്ചെങ്കിലും സാധിച്ചില്ല. ഇട ചങ്ങല ഉപയോഗിച്ചിരുന്നതിനാല്‍ ആനക്ക് കൂടുതല്‍ ആക്രമണം നടത്തുവാന്‍ സാധിച്ചില്ല. ആനയെ നിയന്ത്രിക്കുവാന്‍ ശ്രമിച്ച പാപ്പാന്‍മാരെ ആന ആക്രമിക്കാനും ശ്രമിച്ചു.

പണം തിരിച്ചുനല്‍കുന്നില്ലെന്ന്; വയോധികന്‍ ജ്വല്ലറി ഉടമയുടെ വീടിനു മുന്നില്‍ സമരമിരുന്നു

പേരൂര്‍ക്കട: ജ്വല്ലറിയില്‍ നിക്ഷേപിച്ച പണം തിരികെനല്‍കുന്നില്ലെന്നാരോപിച്ച് വയോധികന്‍ ഉടമയുടെ വീടിനുമുന്നില്‍ സമരമിരുന്നു. കഴിഞ്ഞദിവസം രാവിലെ 11 മുതല്‍ രാത്രി എട്ടുവരെയാണു വയോധികൻ ഒറ്റയാള്‍ സമരം നടത്തിയത്. കൊല്ലം പുനലൂര്‍ സ്വദേശി അബൂബക്കര്‍ (70) ആണ് പ്രമുഖ ജ്വല്ലറി ഉടമയുടെ പൂജപ്പുരയിലെ വസതിക്കുമുന്നില്‍ സമരം നടത്തിയത്. പഴയ സ്വര്‍ണാഭരണങ്ങള്‍വിറ്റു 11 ലക്ഷത്തോളം രൂപ താന്‍ ജ്വല്ലറിയില്‍ 11 മാസത്തെ കാലാവധിയില്‍ നല്‍കിയെന്നും എന്നാല്‍ ജ്വല്ലറി സാമ്പത്തിക പ്രതിസന്ധിയിലാണെന്നു പലരില്‍നിന്നും അറിഞ്ഞതോടെ ഇതു തിരികെ ആവശ്യപ്പെട്ടുവെന്നും ഇദ്ദേഹം പറയുന്നു. താന്‍ നിക്ഷേപിച്ച പണത്തിനു കൂടുതല്‍ ആനുകൂല്യങ്ങളൊന്നും വേണ്ടെന്നും പണം തന്നാല്‍ മതിയെന്നുമായിരുന്നു അബൂബക്കറിന്‍റെ ആവശ്യം. ഇതുമായി ബന്ധപ്പെട്ടു കഴിഞ്ഞ നാലഞ്ചുമാസമായി താന്‍ കല്ലമ്പലത്തെ ജ്വല്ലറിശാഖയില്‍ കയറിയിറങ്ങിയെന്നും എന്നാല്‍ ഇതുവരെയും പണം ലഭിച്ചില്ലെന്നുമാണ് ഇദ്ദേഹം പറയുന്നത്. മാനേജര്‍ ഒഴികഴിവുകള്‍ പറഞ്ഞ് ഒഴിഞ്ഞതോടെയാണ് അബൂക്കര്‍ ഉടമയുടെ പൂജപ്പുരയിലെ വീടിനുമുന്നില്‍ മണിക്കൂറുകള്‍ സമരം നടത്തിയത്. സംഭവത്തില്‍ കേസെടുത്തില്ല.

മണ്ണാമ്മൂലയിലെ സ്റ്റേഷനറിക്കട കുത്തിത്തുറന്ന് പണം കവര്‍ന്നു

പേരൂര്‍ക്കട: മണ്ണാമ്മൂലയിലെ സ്റ്റേഷനറി കട കുത്തിത്തുറന്നു പണവും സാധനസാമഗ്രികളും കവര്‍ന്നു. ദേവി നഗര്‍ ഹൗസ് നമ്പര്‍ 93 അശ്വതി ഭവനില്‍ ലളിത, വീടിനോടു ചേര്‍ന്നു നടത്തിവരുന്ന സ്റ്റേഷനറി കടയിലായിരുന്നു മോഷണം. വെള്ളിയാഴ്ച രാത്രി 11നും ശനിയാഴ്ച പുലര്‍ച്ചെ അഞ്ചിനും ഇടയിലാണ് മോഷണമെന്നാണ് അനുമാനം. കടയില്‍ സൂക്ഷിച്ചിരുന്ന 5,000 രൂപയും പാല്‍, എണ്ണ തുടങ്ങിയ സാധനങ്ങളുമാണ് കവര്‍ച്ച ചെയ്യപ്പെട്ടത്. കടയുടെ മുന്‍ഭാഗം കുത്തിത്തുറന്നാണ് മോഷ്ടാവ് അകത്തു കടന്നത്. സംഭവത്തെ തുടര്‍ന്ന് ഗോഡ്‌സ്‌ക്വാഡും പോലീസും സ്ഥലത്തെത്തി പരിശോധന നടത്തി. മോഷ്ടാവ് നടന്നുവരുന്നതും കട കുത്തിപ്പൊളിക്കുന്നതുമായ സിസിടിവി ദൃശ്യങ്ങള്‍ പോലീസ് ശേഖരിച്ചിട്ടുണ്ട്. മോഷ്ടാവിന്‍റേതെന്നു സംശയിക്കുന്ന വിരലടയാളങ്ങള്‍ ലഭിച്ചതായാണു സൂചന. പേരൂര്‍ക്കട പോലീസ് കേസെടുത്ത് അന്വേഷണം ആരംഭിച്ചു.

അപകടത്തിൽപ്പെട്ടത് നിരവധി വാഹനങ്ങൾ : പൈപ്പിടാനെടുത്ത കുഴികൾ അപകടക്കെണികളാകുന്നു

മാറനല്ലൂർ: പൈപ്പ് സ്ഥാപിക്കാനെടുത്ത കുഴികൾ അപകടകെണികളാകുന്നു. ഇതുവരെ അപകടത്തിൽപ്പെട്ടതാകട്ടെ നിരവധി വാഹനങ്ങൾ. അവസനമായി ഇന്നലെ അപകടത്തിൽപ്പെട്ടത് സിമന്‍റ് ലോറിയും. കാട്ടാക്കട ബാലരാമപുരം റോഡിൽ കണ്ടല മുതൽ മാറനല്ലൂർ വരെയുള്ള ഭാഗത്താണ് പൈപ്പ് സ്ഥാപിക്കാനെടുത്ത കുഴി അപകടക്കെണിയാകുന്നത്. ഒരുമാസം മുൻപാണ് പാതയോരത്ത് കുഴിയെടുത്ത് പൈപ്പ് സ്ഥാപിച്ചശേഷം മൂടിയത്. മണ്ണുമൂടിയ സ്ഥലങ്ങൾ വേനൽമഴയെത്തുടർന്നു ഇപ്പോൾ കുഴിയായി. ഇതോടെയാണു പാതയോരത്തോടു ചേർത്തുനിർത്തുന്ന വാഹനങ്ങൾ കുഴിയിൽവീണ് അപകടത്തിൽപ്പെടുന്നത് പതിവായത്. ഇന്നലെ പുലർച്ചെ സിമന്‍റ് കയറ്റിവന്ന ലോറി കുഴിയിൽച്ചാടി. ലോറിയിൽ ഭാരം കൂടുതലായതിനാൽ ക്രെയിൻ ഉപയോഗിച്ച് മാറ്റാൻ ശ്രമിച്ചെങ്കിലും നടന്നില്ല. തുടർന്ന് സിമന്‍റ് ചാക്കുകൾ മറ്റൊരു വാഹനത്തിലേക്കു മാറ്റിയശേഷമാണ് ലോറി മാറ്റാൻ കഴിഞ്ഞത്. പൈപ്പിടാനെടുത്ത കുഴികൾ കോൺക്രീറ്റ് ചെയ്ത് ബലപ്പെടുത്തണമെന്നു നിർദേശമുണ്ടെങ്കിലും പലപ്പോഴും മാസങ്ങൾകഴിഞ്ഞാണ് ഈ പണികൾ നടത്തുന്നത്. മൂന്നു ദിവസം മുൻപ് ഒരു കാർ ഈ കുഴിയിൽപ്പെട്ടു താണു. ഒടുവിൽ മണിക്കൂറുകൾ നീണ്ട ശ്രമത്തിനു ശേഷമാണ് കാർ പൊക്കിയതും. ബൈക്കപകടങ്ങൾ നിരവധി നടന്നിട്ടുണ്ട്. പരിസരവാസികൾ ഇക്കാര്യങ്ങൾ ബന്ധപ്പെട്ടവരുടെ ശ്രദ്ധയിൽപെടുത്തിയെങ്കിലും ഫലമുണ്ടായില്ല.

തൊണ്ടിവാഹനങ്ങള്‍ ഇഴജന്തുക്കളുടെ താവളം : ഗവ. പ്രസ് റോഡിലൂടെ സഞ്ചരിക്കുന്നവര്‍ ഭീതിയില്‍

പേരൂര്‍ക്കട: തൊണ്ടിവാഹനങ്ങള്‍ കുന്നുകൂടിയതോടെ മണ്ണന്തല ഗവ. പ്രസിനു സമീപത്തെ റോഡിലൂടെ സഞ്ചരിക്കുന്നവര്‍ ഭീതിയില്‍. ഇഴജന്തുഭയമാണ് ഇവരെ നിരന്തരം അലട്ടുന്നത്. ഇടുങ്ങിയ റോഡിലൂടെ രാത്രിയാത്ര ഏറെ ക്ലേശകരമാണ്. തീര്‍ത്തും ധൈര്യമുള്ളവര്‍ക്കുമാത്രമേ കൂറ്റന്‍ മരങ്ങള്‍ സ്ഥിതിചെയ്യുന്ന ഈ ഭാഗത്തുകൂടി നടന്നുപോകാന്‍ സാധിക്കൂ. മണ്ണന്തല സ്റ്റേഷന്‍ പരിധിയില്‍ പിടിക്കപ്പെടുന്ന തൊണ്ടിവാഹനങ്ങള്‍ കൂട്ടിയിട്ടിരിക്കുന്നത് ഇടറോഡിലാണ്. 10 വര്‍ഷത്തിനു പുറത്തു പ്രായമുള്ള തൊണ്ടിവാഹനങ്ങള്‍വരെ ഇക്കൂട്ടത്തിലുണ്ട്. കാറുകളും ഓട്ടോറിക്ഷകളും ബൈക്കുകളും എന്നുവേണ്ട കേസുകളില്‍ പിടിക്കപ്പെടുന്ന മണ്ണടിക്കുന്ന ടിപ്പര്‍ലോറികള്‍വരെ കൊണ്ടിടുന്നത് വിസ്താരംകുറഞ്ഞ റോഡിലാണ്. വാഹനയാത്രയ്ക്ക് തടസമുണ്ടാകുന്നില്ലെങ്കിലും രാത്രികാലങ്ങളില്‍ തെരുവുവിളക്കുകള്‍ ചില സമയങ്ങളില്‍ മാത്രം പ്രകാശിക്കുന്ന റോഡിലൂടെ പാമ്പുകളെയും പെരുച്ചാഴികളെയും എലികളെയും മറ്റും ഭയന്നുവേണം പോകാന്‍. വാഹനങ്ങളുടെ മറപറ്റി നില്‍ക്കുന്ന മദ്യപരുടെ ശല്യം വേറെയും. രാത്രി 11 മണിക്കുശേഷമാണ് ഇവര്‍ ഇവിടെ താവളമടിക്കുന്നത്. പോലീസിന്‍റെ രാത്രികാല പട്രോളിംഗിന്‍റെ ആദ്യഘട്ടം അവസാനിച്ചശേഷമാണ് ഇവര്‍ ഇവിടം വിഹാരരംഗമാക്കുന്നത്. മണ്ണന്തല ഗവ. പ്രസിനു സമീപത്തെ റോഡിലൂടെ എളുപ്പത്തില്‍ എം.സി. റോഡിലേക്കു ചെല്ലാനാകും. കഷ്ടിച്ച് അരകിലോമീറ്ററാണു ദൂരം. അതുകൊണ്ടുതന്നെ ഇതുവഴി തെരഞ്ഞെടുക്കുന്ന കാല്‍നടയാത്രികര്‍ക്ക് സുരക്ഷിതമായ പാത ഒരുക്കണമെങ്കില്‍ തൊണ്ടിവാഹനങ്ങള്‍ ഇവിടെനിന്നു നീക്കംചെയ്യേണ്ടതുണ്ട്. കാലാകാലങ്ങളില്‍ ലേല നടപടികള്‍ ഉണ്ടാകാത്തതാണു തൊണ്ടിവാഹനങ്ങള്‍ കുന്നുകൂടാന്‍ കാരണം.

കച്ചവടത്തിനായി സൂക്ഷിച്ചിരുന്ന കഞ്ചാവും ഹാഷിഷ് ഓയിലുമായി യുവാവ് പിടിയില്‍

പൂന്തുറ: വീട്ടില്‍ കച്ചവടത്തിനായി സൂക്ഷിച്ചിരുന്ന കാഞ്ചാവും ഹാഷിഷ് ഓയിലുമായി യുവാവിനെ എക്‌സൈസ് സംഘം പിടികൂടി. പരുത്തിക്കുഴി അല്‍ബസ്‌നയില്‍ മുഹമ്മദ് അനസ് (28) ആണ് പിടിയിലായത്. ഇയാളില്‍ നിന്നും 1.2 കിലോ ഗ്രാം കഞ്ചാവും 650 ഗ്രാം ഹാഷിഷ് ഓയിലും പിടിച്ചെടുത്തു. ശനിയാഴ്ച ഉച്ചതിരിഞ്ഞ് മൂന്നോടെ എക്‌സൈസ് സംഘം നടത്തിയ പരിശോധനയിലാണു കഞ്ചാവും ഹാഷിഷ് ഓയിലും പിടിച്ചെടുത്തത്. തിരുവനന്തപുരം എക്‌സൈസ് റേഞ്ച് സിഐ റജിലാലിന് ലഭിച്ച രഹസ്യത്തിന്‍റെ അടിസ്ഥാനത്തിലാണ് പരിശോധന നടത്തിയത്.

കാട്ടാക്കടയിൽ മാനവശൃംഖല മേയ് പത്തിന്

തിരുവനന്തപുരം: മയക്കു മരുന്നു സൃഷ്ടിക്കുന്ന വിപത്തുകളിൽ നിന്നുള്ള മോചനത്തിനും ലഹരിക്കും മയക്കുമരുന്നിനും അടിമപ്പെട്ടവരെ മോചിപ്പിക്കുന്നതിനുമായി കാട്ടാക്കട നിയോജക മണ്ഡലത്തിലെ ജനങ്ങളെയാകെ പങ്കെടുപ്പിച്ചു മേയ് 10ന് മാനവ ശൃംഖല ഒരുക്കും. 10നു വൈകുന്നേരം നാലിനു തുടങ്ങുന്ന "മാനവ ശൃംഖല' കുണ്ടമണ്‍കടവിൽ നിന്ന് ആരംഭിച്ചു മണ്ഡപത്തിൻകടവ് വരെ നീളും. ഇതിനു മുന്നോടിയായി മേയ് രണ്ടിനു രാവിലെ എട്ടിനു മയക്കുമരുന്നിനെതിരേ കാട്ടാക്കട കാന്പയിന്‍റെ ഒൗദ്യോഗിക ഉദ് ഘാടനം നടക്കും. ഐ.ബി. സതീഷ് എംഎൽഎ അധ്യക്ഷത വഹിക്കുന്ന ചടങ്ങിൽ വിഴിഞ്ഞം സിഇഒ ദിവ്യ എസ്. അയ്യർ മുഖ്യാതിഥിയാകും. യുവാക്കളെ ആകർഷിക്കുന്ന തിരുവനന്തപുരത്തെ പ്രമുഖ വ്ളോഗർമാർ വിദ്യാർഥികളുമായി സംവദിക്കും. ഇതോടനുബന്ധിച്ച് കുട്ടികളുടെ കളരിപ്പയറ്റ്, സൂംബ ഡാൻസ്, കലാപരിപാടികൾ, ലഹരിവിരുദ്ധ പ്രതിജ്ഞ തുടങ്ങിയവ നടക്കും. ലഹരിക്കെതിരെ വിദ്യാർഥികളെയും യുവതീ-യുവാക്കളെയും അണിനിരത്തുന്ന കൂട്ട് പദ്ധതി മാസ് കാന്പയിനായി മാറിയെന്ന് ഐ.ബി. സതീഷ് എംഎൽഎ പറഞ്ഞു.

കുളത്തൂരിൽ ഓടികൊണ്ടിരുന്ന കാർ കത്തിനശിച്ചു

പോത്തൻകോട്: കുളത്തൂർ ടിഎസ് സി ആശുപത്രിക്ക് സമീപം ദേശീയപാത 66ൽ ഓടികൊണ്ടിരുന്ന കാർ കത്തിനശിച്ചു. അപകടത്തിൽ ആളപായമില്ല. ശനിയാഴ്ച രാത്രി 7.45 നായിരുന്നു സംഭവം. അമ്പലത്തറ ഭാഗത്ത് നിന്ന് കഴക്കൂട്ടം ഭാഗത്തേക്ക് വന്ന സാൻഡ്രോ കാറാണ് പൂർണമായി കത്തിനശിച്ചത്. വിഎസ്എസ്‌സിയിൽ അഡ്മിനിസ്ട്രേഷൻ വിഭാഗത്തിൽ ജോലി നോക്കുന്ന അമ്പലത്തറ സ്വദേശി ഹരികുമാറിന്‍റെ കാറാണ് കത്തിയത്. സ്ഥലത്തെത്തിയ കഴക്കൂട്ടം ഫയർ ഫോഴ്സ് തീ കെടുത്തിയെങ്കിലും കാർ പൂർണമായും കത്തിനശിച്ചിരുന്നു. സംഭവത്തെ തുടർന്നു ദേശീയ പാതയിൽ ഒരു മണിക്കൂറോളം വാഹനഗതാഗതം നിലച്ചു.

തുന്പ, വെട്ടുകാട് കടൽത്തീരങ്ങളിൽ ലൈഫ് ഗാർഡുകളെ നിയമിക്കണം

തിരുവനന്തപുരം: ജില്ലയുടെ കടലോരത്തു വിനോദ സഞ്ചാരികൾ ധാരാളമെത്തുന്ന മേഖലകളിൽ അപകട സാധ്യത ഏറിയിട്ടും ലൈഫ് ഗാർഡുകളെ നിയമിക്കുന്നില്ലെന്നു പരാതി. വിനോദസഞ്ചാരികൾ ധാരാളമായി എത്തിച്ചേരുന്ന കടൽ തീരങ്ങളായ വെട്ടുകാട്, തുന്പ എന്നിവിടങ്ങളിൽ ഇപ്പോഴും ലൈഫ് ഗാർഡുകളെ നിയമിച്ചിട്ടില്ല. ടൂറിസം മേഖലകളായി വളരുന്ന തുന്പയിലും വെട്ടുകാടും എത്തുന്ന സഞ്ചാരികൾക്ക് സുരക്ഷ ഒരുക്കാൻ ലൈഫ് ഗാർഡുകളെ ആവശ്യത്തിനു നിയമിക്കാൻ സർക്കാർ ഇടപെടണമെന്നു സ്വതന്ത്ര മത്സ്യത്തൊഴിലാളി ഫെഡറേഷൻ സംസ്ഥാന പ്രസിഡന്‍റ് പി സ്റ്റെല്ലസ് ആവശ്യപ്പെട്ടു. ടൂറിസ്റ്റുകൾ വരുന്ന മേഖലകളിൽ അപകടം ഒഴിവാക്കാൻ ലൈഫ് ഗാർഡുകൾ അനിവാര്യമാണ്. അപകടത്തിൽപ്പെടുപ്പോൾ യഥാസമയം രക്ഷാപ്രവർത്തനവും ആവശ്യമായ ചികിത്സാ സഹായം നൽകാനും കഴിയാത്ത സാഹചര്യമാണ് വെട്ടുകാട്, തുന്പ തീര മേഖലയിൽ നിലവിലുള്ളത്. ലൈഫ് ഗാർഡുകളുടെ അഭാവം തുടർന്നാൽ അപകടങ്ങൾക്കും ജീവനെടുക്കുന്നതിനും കാരണമാകുമെന്നും സ്റ്റെല്ലസ് പറഞ്ഞു.

രണ്ടര ടൺ നിരോധിത പുകയില ഉത്പന്നങ്ങളുമായി യുവാക്കൾ പിടിയിൽ

പോത്തൻകോട്: രഹസ്യ വിവരത്തിന്‍റെ അടിസ്ഥാനത്തിൽ ശ്രീകാര്യം ഭാഗത്തു നടത്തിയ റെയ്‌ഡിൽ രണ്ടര ടൺ നിരോധിത പുകയില ഉത്പന്നങ്ങളുമായി രണ്ടുപേർ പിടിയിൽ. ആസാം സ്വദേശിയായ മുഹമ്മദ്‌ മജാറുൾ (29), ഇയാളുടെ സഹായിയായ ഹാറൂൻ റഷീദ് എന്നിവരെയാണ് പിടികൂടിയത്. ബംഗളൂരുവിൽനിന്നും വൻ തോതിൽ കടത്തിക്കൊണ്ടുവരുന്ന ലഹരിവസ്തുക്കൾ സ്കൂൾ കുട്ടികൾക്കും മറ്റും വിൽക്കുന്ന മൊത്ത കച്ചവടക്കാരാണ് അറസ്റ്റിലായ ഇരുവരും. ശ്രീകാര്യം മടവിള ലൈനിൽ രാജേഷ് ഭവനിൽ രണ്ടുനില വീട് വാടകക്ക് എടുത്തു രഹസ്യമായി ടൺ കണക്കിനു നിരോധിത പുകയില ഉത്പന്നങ്ങൾ വീടിനുള്ളിലായി ഒളിച്ചുസൂക്ഷിച്ചിരിക്കുകയായിരുന്നു ഇവർ. നഗരത്തിലെ വിവിധ സ്ഥലങ്ങളിൽ ചെറിയ പാൻ ഷോപ്പുകൾ നടത്തിയായിരുന്നു ആസാം സ്വദേശിയുടെ വൻ തോതിലുള്ള നിരോധിത പുകയില വിൽപന. റെയ്‌ഡിൽ അസിസ്റ്റന്‍റ് എക്സൈസ് ഇൻസ്‌പെക്ടർ ലോറൻസ് (ഗ്രേഡ്), സിവിൽ എക്സൈസ് ഓഫീസർമാരായ നന്ദകുമാർ, ആരോമൽ രാജൻ എക്സൈസ് ഡ്രൈവർ ആന്‍റോ എന്നിവർ പങ്കെടുത്തു.

കോവളത്ത് ഹോട്ടലിൽ വ്യാജ ബോബു ഭീഷണി

വിഴിഞ്ഞം: കോവളത്തെ പഞ്ചനക്ഷത്ര ഹോട്ടലിൽ വ്യാജ ബോംബ് ഭീഷണി. പോലീസും, ബോംബ് സ്ക്വാഡും, ഡോഗ് സ്ക്വാഡും പരിശോധന നടത്തിയെങ്കിലും സംശയകരമായി ഒന്നും കണ്ടെത്താനായില്ല. ഇന്നലെ രാവിലെ പത്തരയോടെയാണ് അധികൃതർക്ക് ഇ- മെയിൽ സന്ദേശം എത്തുന്നത്. ഉച്ചക്കു രണ്ടു മണിക്കുള്ളിൽ സഞ്ചാരികളെ ഒഴിപ്പിക്കണമെന്നും അതിനുള്ളിൽ ബോംബ് പൊട്ടുമെന്നുമായിരുന്നു സന്ദേശം. വിവരമറിഞ്ഞ് പോലീസ് വ്യാപക തിരച്ചിൽ നടത്തിസന്ദേശം വ്യാജമെന്ന് ഉറപ്പുവരുത്തി മടങ്ങിയിരുന്നു. ഇതിന മുൻപും കോവളത്തെ ചില ഹോട്ടലുകളിൽ ഇത്തരം സന്ദേശങ്ങൾ എത്തിയിരുന്നു. അന്നും പോലീസ് പരിശോധന നടത്തി സുരക്ഷ ഉറപ്പുവരുത്തിയിരുന്നു.

കഴക്കൂട്ടം ഫാത്തിമ മാതാ പള്ളിയിലെ മാതാവിന്‍റെ പ്രതിമ തകർത്ത പ്രതി പിടിയിൽ

പോത്തൻകോട്: കഴക്കൂട്ടം ഫാത്തിമ മാതാ പള്ളിയിലെ മാതാവിന്‍റെ പ്രതിമ തകർത്ത പ്രതി പിടിയിൽ. വെള്ളിയാഴ്ച രാത്രി 11.40ന് ഫാത്തിമ മാതാ ചര്‍ച്ചിലെത്തി പ്രാര്‍ഥിച്ചശേഷമാണു പ്രതി ആക്രമം നടത്തിയത്. തുമ്പ കിൻഫ്ര പ്രിൻസി വില്ലയിൽ മാർട്ടിൻ തങ്കച്ചനെ (61) യാണ് തുമ്പ പോലീസ് പിടികൂടിയത്. മാനസിക പ്രശ്നങ്ങൾ നേരിടുന്നയാളാണു തങ്കച്ചനെ ന്നു പോലീസ് അറിയിച്ചു. പള്ളി മുറ്റത്ത് കുരിശടിയോടു ചേര്‍ന്നു സ്ഥാപിച്ചിരുന്ന മാതാവിന്‍റെ പ്രതിമയാണു തകര്‍ത്തത്. രാവിലെ നടക്കാനിറങ്ങിയ പള്ളിവികാരി ഫാ. ലാസർ ബെനഡിക്റ്റാണു പ്രതിമ തകര്‍ത്ത നിലയില്‍ കണ്ടത്. തുടർന്നു കഴക്കൂട്ടം പോലീസിനെ വിവരമറിയിക്കുകയായിരുന്നു. കഴക്കൂട്ടം എസ്എച്ച്ഒയുടെ നേതൃത്വത്തിൽ സമീപത്തെ സിസിടിവിയും മറ്റും കേന്ദ്രീകരിച്ച് നടത്തിയ അന്വേഷണത്തിലാണ് മാർട്ടിൻ തങ്കച്ചനാണു പ്രതിമ തകർത്തതെന്നു തിരിച്ചറിഞ്ഞത്. വിരളടയാള വിദഗ്ധരും പരിശോധന നടത്തി. രാത്രിയോടെ ഓട്ടോറിക്ഷ ഡ്രൈവറായ മാർട്ടിൻ തങ്കച്ചൻ ബീച്ചിന്‍റെ ഭാഗത്തും പള്ളിയിലും ബഹളം ഉണ്ടാക്കിയതിനെ തുടർന്നു നാട്ടുകാർ പോലീസിനെ വിവരം അറിയിച്ചു. തുമ്പ പോലീസെത്തി മാർട്ടിനെ കസ്റ്റഡിയിലെടുത്ത് സ്റ്റേഷനിലേക്ക് കൊണ്ടുപോയിരുന്നു. ശനിയാഴ്ച ഉച്ചയോടെ കഴക്കൂട്ടം എസ് എച്ച്ഒ ജെ.എസ്. പ്രവീണിന്‍റെ നേതൃത്വത്തിലുള്ള സംഘം തുമ്പ സ്റ്റേഷനിലെത്തി മാർട്ടിൻ തങ്കച്ചനെ ചോദ്യം ചെയ്യുകയും ചെയ്തു. മാനസിക പ്രശ്നമുള്ള ആളാണെന്നു മാർട്ടിനെന്നു ബന്ധുക്കൾ പോലീസിനോട് പറഞ്ഞു. മുൻപും പല ദേവാലയങ്ങളിലും സമാനമായ സംഭവങ്ങൾ നടത്തിയിട്ടുള്ളതായും പ്രതിമ തകർത്ത സംഭവത്തിലും തങ്കച്ചനെ പിടികൂടിയിട്ടുണ്ടെന്നു കഴക്കൂട്ടം പോലീസ് പറയുന്നു.

റിപ്പോര്‍ട്ട് ഹാജരാക്കാന്‍ കോടതി ഉത്തരവ്

തിരുവല്ലം: കോവളത്തെ റിസോര്‍ട്ടില്‍ 15 കാരിയെ പീഡിപ്പിച്ച സംഭവത്തിൽ തിരുവല്ലം പോലീസ് രജിസ്റ്റര്‍ ചെയ്ത പോക്‌സോ കേസില്‍ വ്‌ളോഗര്‍ മുകേഷ് എം. നായരുടെ മുന്‍കൂര്‍ ജാമ്യഹര്‍ജിയില്‍ 29നു തിരുവല്ലം പോലീസ് അന്വേഷണ റിപ്പോര്‍ട്ട് ഹാജരാക്കാന്‍ കോടതി ഉത്തരവ്. തിരുവനന്തപുരം പ്രിന്‍സിപ്പല്‍ ജില്ലാ സെക്ഷന്‍സ് ജഡ്ജ് എസ്. നസീറയുടെതാണ് ഉത്തരവ്. ഫെബ്രുവരി 14 വാലന്‍റയിന്‍സ് ദിനത്തിന്‍റെ ഭാഗമായി കോവളത്തെ റിസോര്‍ട്ടില്‍ നടന്ന റീല്‍സ് ഫോട്ടോഷൂട്ട് ചിത്രീകരണത്തിനിടെയായിരുന്നു സംഭവമെന്നാണു കേസ്. കടയ്ക്കല്‍ സ്വദേശിയായ പെണ്‍കുട്ടിയുടെ രക്ഷിതാക്കളുടെ പരാതിയിലാണ് പോലീസ് കേസെടുത്തിരിക്കുന്നത്. മുകേഷിനെ കുടാതെ കുട്ടിയെ എത്തിച്ച കോ-ഓഡിനേറ്റർക്കെതിരെയും പോലീസ് പോക്‌സോ കേസെടുത്തിട്ടുണ്ട്. നിലവില്‍ പെണ്‍കുട്ടിയുടെയും അമ്മയുടെയും മൊഴി രേഖപ്പെടുത്തി പോലീസ് കേസില്‍ അന്വേഷണം നടത്തുകയാണ്.

ആക്ട്സിന്‍റെ പ്രാർഥനാ ദിനം ഇന്ന്

തിരുവനന്തപുരം: രാജ്യത്തിന്‍റെ സമാധാനത്തിനും, ഭീകരാക്രമണത്തിൽ മൃതിയടഞ്ഞവരുടെ കുടുംബങ്ങളുടെ സമാശ്വാസത്തിനുമായി ക്രൈസ്തവ സഭകളുടെ കൂട്ടായ്മയായ ആക്ട്സ് വിവിധ കേന്ദ്രങ്ങളിൽ ഇന്നു സമൂഹപ്രാർഥന നടത്തും. തിരുവനന്തപുരം വെള്ളയന്പലത്തെ ബിലീവേഴ്സ് ഈസ്റ്റേണ്‍ ചർച്ച് ബിഷപ് ഹൗസിൽ ഉച്ചകഴിഞ്ഞു മൂന്നിനു നടക്കുന്ന ചടങ്ങിൽ ശാന്തിഗിരി ആശ്രമം ജനറൽ സെക്രട്ടറി സ്വാമി ഗുരുരത്നം ജ്ഞാന തപസ്വി, പാളയം ഇമാം ഡോ. വി.പി. സുഹൈബ് മൗലവി, സാൽവേഷൻ ആർമി ടെറിട്ടോറിയൽ കമാൻഡർ കേണൽ ജോണ്‍ വില്യം പോളിമെറ്റല, ബിഷപ്പുമാരായ ഡോ. ഉമ്മൻ ജോർജ്, മാത്യൂസ് മോർ സിൽവാനിയോസ് തുടങ്ങിയവർ പങ്കെടുക്കും. ആക്ട്സ് ജനറൽ സെക്രട്ടറി ജോർജ് സെബാസ്റ്റ്യൻ അധ്യക്ഷത വഹിക്കും.

അഞ്ചാമത് കൊച്ചെടത്വാ തിരുനാളിന് ഇന്നു കൊടിയേറും

വിഴിഞ്ഞം: പുതിയതുറ (കൊച്ചെടത്വ) വിശുദ്ധ സെന്‍റ് നിക്കോളാസ് ദൈവാലയത്തിൽ വിശുദ്ധ ഗീവർഗീസ് സഹദായുടെ വജ്രജൂബിലി തിരുനാളിന് ഇന്നു കൊടിയേറും. വിവിധ പരിപാടികളോടെ മേയ് നാലിനു സമാപിക്കും. ഇന്നു വൈകുന്നേരം 5.30ന് പുതിയതുറ കുരിശടിയിൽ ജപമാല. തുടർന്ന് അശ്വാരൂഢരുടെ അകമ്പടിയോടുകൂടി പതാകാപ്രദക്ഷിണം പള്ളിയിൽ എത്തിചേരും. ഇതിനുശേഷം ഇടവക വികാരി ഫ. ഗ്ലാഡിൻ അലക്സിന്‍റെ മുഖ്യകാർമികത്വത്തിൽ കൊടിയേറും. തിരുനാൾ ദിനങ്ങളിൽ സുരക്ഷ ഒരുക്കി പോലീസ്, ഫയർ ഫോഴ്സ്, എക്സൈസ് വകുപ്പുകളുടെ യൂണിറ്റുകൾ മുഴുവൻ സമയവും പ്രവർത്തിക്കും. ആരോഗ്യ വകുപ്പിനു കീഴിൽ ആംബുലൻസ് സൗകര്യവും പ്രാഥമിക ചികിത്സാസൗകര്യവും ഒരുക്കിയിട്ടുണ്ട്. വാട്ടർ അഥോറിറ്റി താൽക്കാലികമായി കുടിവെള്ള പൈപ്പുകളും ഇവിടെ സജ്ജീകരിച്ചിട്ടുണ്ട്. തിരുനാൾ ദിനങ്ങളിൽ കെഎസ്ആർടിസി പ്രത്യേക ബസ് സർവീസുകൾ നടത്തും. തീർഥാടകരുടെ സഹയത്തിനായി സേവാസംഘം ഓഫീസിന്‍റെ പ്രവർത്തനം ആരംഭിച്ചു. തിരുനാൾ ദിനങ്ങളിൽ രാത്രി തിരുക്കർമങ്ങൾക്കുശേഷം വിവിധ തരം കലാ സംഗീത പരിപാടികൾ ഉണ്ടാകുമെന്നും ഉത്സവ കമ്മിറ്റി കൺവീനർ പുഷ്പം വിൻസന്‍റ്, മീഡിയ കൺവീനർ നിജു മൈക്കിൾ എന്നിവർ അറിയിച്ചു. യുഎഇയിലുള്ള പുതിയതുറ നിവാസികളുടെ സംഘടനയുടെ നേതൃത്വത്തിൽ ഷാർജ സെന്‍റ് മൈക്കിൾസ് ദൈവാലയത്തിൽ ഇന്നേ ദിവസവും യുകെയിലെ പുതിയതുറ നിവാസികൾ ലണ്ടൻ ഈസ്റ്റ് ഹാമിലെ സെന്‍റ് മൈക്കിൾസ് ആർസി ദൈവാലയത്തിൽ മേയ് മൂന്നിനും മധ്യസ്ഥ ന്‍റെ തിരുനാളാഘോഷിക്കും.

ജെ.സി. ഡാനിയലിന്‍റെ വിയോഗത്തിന് 50 വയസ് : ജന്മനാട്ടില്‍ സിനിമാ തീയേറ്റര്‍ വാഗ്ദാനത്തിലൊതുങ്ങി

നെയ്യാറ്റിന്‍കര: മലയാള സിനിമയുടെ പിതാവ് ജെ.സി. ഡാനിയലിന്‍റെ വിയോഗത്തിന് അരനൂറ്റാണ്ട് പിന്നിടുന്പോഴും തീയേറ്റര്‍ എന്നത് ഇപ്പോഴും കേവലം സ്വപ്നം. നെയ്യാറ്റിന്‍കര നിവാസികള്‍ക്കു സിനിമ കാണാന്‍ ഇപ്പോഴും ആശ്രയം കിലോമീറ്ററുകള്‍ക്കപ്പുറത്തുള്ള തീയേറ്ററുകള്‍ മാത്രം. 1975 ഏപ്രില്‍ 25 നാണ് ജെ.സി. ഡാനിയല്‍ ഈ ഭൗതികലോകത്തുനിന്നും എന്നെന്നേക്കുമായി വിട ചൊല്ലിയത്. അതിനു മുന്പു തന്നെ അദ്ദേഹം താനേറെ ഇഷ്ടപ്പെട്ടിരുന്ന ചലച്ചിത്ര രംഗത്തുനിന്നും വേര്‍പിരിഞ്ഞിരുന്നു. 1928 നവംബര്‍ ഏഴിനാണ് വിഗതകുമാരന്‍ എന്ന മലയാളത്തിലെ തന്നെ ആദ്യ ചലച്ചിത്രം തിരുവനന്തപുരത്ത് പ്രദര്‍ശിപ്പിച്ചത്. ദി ട്രാവന്‍കൂര്‍ നാഷണല്‍ പിക്ച്ചേഴ്സ് എന്ന സ്റ്റുഡിയോ സ്ഥാപിച്ചതും ഡാനിയലാണ്. സ്വന്തം പുരയിടം വിറ്റാണ് സിനിമാ നിര്‍മാണം സംബന്ധിയായ പ്രവര്‍ത്തനങ്ങള്‍ക്ക് അദ്ദേഹം തുക സ്വരൂപിച്ചത്. നിശബ്ദചിത്രമായ വിഗതകുമാരന്‍റെ സംവിധാനത്തിനു പുറമേ തിരക്കഥയും അദ്ദേഹത്തിന്‍റേതായിരുന്നു. ഏറെ പ്രതിസന്ധികള്‍ അതിജീവിച്ച് സിനിമയുടെ പ്രദര്‍ശനം നടന്നെങ്കിലും സവര്‍ണ സമൂഹത്തിന്‍റെ സദാചാരയിടപെടലുകളാല്‍ വിഗതകുമാരന്‍ വേദനിക്കുന്ന ഓര്‍മയായി. തീയേറ്ററിനു നേരെ ആക്രമണമുണ്ടായി. നായിക പി.കെ. റോസി തലനാരിഴയ്ക്ക് രക്ഷപ്പെട്ടു. സാന്പത്തികമായി തകര്‍ന്ന ഡാനിയല്‍ കുറച്ചുവര്‍ഷം നെയ്യാറ്റിന്‍കരയില്‍ ദന്തഡോക്റായും സേവനം അനുഷ്ഠിച്ചു. പുതിയ തലമുറയ്ക്ക് തന്നെ അറിയില്ലായെന്ന ആത്മവ്യഥയോടെ നെയ്യാറ്റിന്‍കരയുടെ സ്വന്തം സിനിമാക്കാരന്‍ ഒടുവില്‍ സ്മരണകളിലൊതുങ്ങി. നെയ്യാറ്റിന്‍കര നഗരസഭ നെയ്യാറ്റിന്‍കര മുനിസിപ്പല്‍ സ്റ്റേഡിയം കോന്പൗണ്ടില്‍ ജെ.സി. ഡാനിയല്‍ ഓപ്പണ്‍ എയര്‍ ഓഡിറ്റോറിയം യാഥാര്‍ഥ്യമാക്കാനുള്ള ശ്രമത്തിലാണ്. നിര്‍മാണ പ്രവര്‍ത്തനങ്ങള്‍ പുരോഗമിക്കുന്നു. തൊട്ടടുത്തു തന്നെ അദ്ദേഹത്തിന്‍റെ പൂര്‍ണകായ പ്രതിമ സ്ഥാപിച്ചിട്ടുണ്ട്. ജെ.സി. ഡാനിയല്‍ ഫൗണ്ടേഷന്‍ നിര്‍മിച്ച പ്രതിമയ്ക്ക് നഗരസഭ സ്റ്റേഡിയത്തില്‍ ഇരിപ്പിടം നല്‍കുകയായിരുന്നു. നിരവധി തീയേറ്ററുകളുണ്ടായിരുന്ന നെയ്യാറ്റിന്‍കര താലൂക്കില്‍ നിലവില്‍ അവയെല്ലാം മുതിര്‍ന്ന തലമുറയുടെ സ്മൃതികളില്‍ മായാതെ അവശേഷിക്കുന്നു. വര്‍ഷം തോറും ജെ.സി. ഡാനിയലിന്‍റെ ജനന- മരണ വാര്‍ഷിക ദിനങ്ങളില്‍ അനുസ്മരണ പരിപാടികള്‍ സംഘടിപ്പിക്കുന്നത് മാത്രം പതിവായി.

വിഴിഞ്ഞം തുറമുഖം സന്ദർശിച്ച് മുഖ്യമന്ത്രി

എസ്. രാജേന്ദ്രകുമാർ വിഴിഞ്ഞം: കേരളത്തിന്‍റെ സ്വപ്ന പദ്ധതിയായ വിഴിഞ്ഞം അന്താരാഷ്ട്ര തുറമുഖം പ്രധാനമന്ത്രി രാഷ്ട്രത്തിന് സമർപ്പിക്കാനിരിക്കെ ഒരുക്കങ്ങൾ വിലയിരുത്താൻ മുഖ്യമന്ത്രി പിണറായി വിജയൻ കുടുംബസമേതം വിഴിഞ്ഞത്തെത്തി. ഇന്നലെ വൈകുന്നേരം അഞ്ചരയോടെ തുറമുഖത്തെത്തിയ മുഖ്യമന്ത്രി, മന്ത്രിമാരായ വി.എൻ. വാസവൻ, വി.ശിവൻകുട്ടി, മേയർ ആര്യാ രാജേന്ദ്രൻ, വിസിൽ എംഡി ഡോ. ദിവ്യ എസ്. അയ്യർ, തുറമുഖ സിഇഒ പ്രദീപ് ജയരാമൻ, കോർപറേറ്റ് അഫേഴ്സ് മേധാവി അനിൽ ബാലകൃഷ്ണൻ, മറ്റ് തുറമുഖ ഉന്നത ഉദ്യോഗസ്ഥർ എന്നിവരുമായി അവലോകനയോഗം നടത്തി. അവിടെനിന്നു കപ്പലുകൾ നങ്കൂരമിടുന്ന വാർഫിലൂടെ വാഹനത്തിൽ സഞ്ചരിച്ച മുഖ്യമന്ത്രി പ്രവർത്തനങ്ങൾ വിലയിരുത്തി. തുടർന്ന് തുറമുഖത്തിന്‍റെ സുരക്ഷാവേലിയായി കടലിനുള്ളിലൂടെ മൂന്നു കിലോമീറ്റർ ദൂരത്തിൽ നിർമിച്ച പുലിമുട്ടിന്‍റെ മുനമ്പ് വരെ എത്തിയ മുഖ്യമന്ത്രിക്ക് അധികൃതർ തുറമുഖത്തിന്‍റെ നിലവിലെ സാഹചര്യങ്ങൾ വിവരിച്ച് നൽകി. ഭാര്യ കമല, മകൾ വീണാ വിജയൻ എന്നിവരും മുഖ്യമന്ത്രിക്കൊപ്പം ഉണ്ടായിരുന്നു. സംഘാടക സമിതിയുടെ മുഖ്യ രക്ഷാധികാരി കൂടിയാണു മുഖ്യമന്ത്രി പിണറായി വിജയൻ. കേരളത്തെ വികസനക്കുതിപ്പിലേക്കു നയിക്കുന്ന തുറമുഖംമേയ് രണ്ടിന് പ്രധാനമന്ത്രി നരേന്ദ്ര മോദി രാജ്യത്തിനു സമർപ്പിക്കും. ഇതോടൊപ്പം രണ്ടാം ഘട്ട നിർമാണോദ്ഘാടനവും ഉണ്ടാകും. ഇതിനായി തുറമുഖ കവാടത്തിനോ‌ു ചേർന്ന് ആയിരങ്ങൾക്ക് ഇരിക്കാൻ പാകത്തിലുള്ള വേദി ഒരുക്കുന്നതിനുള്ള നടപടികൾ ആരംഭിച്ചു. റോഡുമാർഗമുള്ള യാത്ര ഒഴിവാക്കി തിരുവനന്തപുരം എയർപോർട്ടിൽനിന്ന് ആകാശമാർഗം പ്രധാനമന്ത്രി വിഴിഞ്ഞത്തെത്താനുള്ള സാധ്യതകൾ കണക്കിലെടുത്ത് മൂന്നു ഹെലിപാഡുകളും ഒരുങ്ങുന്നു. ഇതോടൊപ്പം ഹെലികോപ്റ്ററുകളുടെ അടിയന്തിര ലാൻഡിംഗിനായി കവാടത്തിനു സമീപവും സൗകര്യമൊരുക്കുമെന്നുഅധികൃതർ അറിയിച്ചു. ഇതിനുള്ള ഔദ്യോഗിക തീരുമാനം എസ് പിജിയിൽനിന്നു കിട്ടേണ്ടതുണ്ടെന്നും അധികൃതർ പറയുന്നു.

ഓടയില്‍ വീണ സ്മാര്‍ട്ട്‌ഫോണ്‍ വീണ്ടെടുത്ത് നൽകി ഫയര്‍ഫോഴ്‌സ്

പേരൂര്‍ക്കട: വെള്ളമുണ്ടായിരുന്ന ഓടയില്‍ വീണ അരലക്ഷം രൂപയുടെ സ്മാര്‍ട്ട്‌ഫോണ്‍ വീണ്ടെടുത്ത് തിരുവനന്തപുരം ഫയര്‍ഫോഴ്‌സ് ടീം. ബാലരാമപുരം സ്വദേശിനിയും തിരുവനന്തപുരം മെഡിക്കല്‍കോളജിലെ കോണ്‍ഫിഡന്‍ഷ്യല്‍ അസിസ്റ്റന്‍റുമായ ബി. നിത്യയുടെ സ്മാര്‍ട്ട് ഫോണാണ് ഇവര്‍ തമ്പാനൂര്‍ റെയില്‍വേ സ്റ്റേഷനു സമീപത്തുകൂടി നടന്നുവരുന്നതിനിടെ അബദ്ധത്തില്‍ ഓടയിലേക്കു വീണത്. വിവരമറിഞ്ഞ് ഫയര്‍ ആൻഡ് റസ്‌ക്യു ഓഫീസര്‍ സുധീഷ് ചന്ദ്രന്‍റെ നേതൃത്വത്തില്‍ സേനാംഗങ്ങളായ വി. വിജിന്‍, നൂറുദീന്‍, ദീപക്ക്, പ്രസാദ് എന്നിവര്‍ ചേര്‍ന്ന് ഒരുമണിക്കൂര്‍ പരിശ്രമിച്ച് എക്യുപ്‌മെന്‍റ് കാച്ചറിന്‍റെ സഹായത്തോടെയാണ് ഫോണ്‍ വീണ്ടെടുത്തത്. വെള്ളം നനഞ്ഞുവെങ്കിലും ഫോണ്‍ പ്രവര്‍ത്തനക്ഷമമായിരുന്നു. സ്മാര്‍ട്ട്‌ഫോണ്‍ വീണ്ടെടുത്ത് നല്‍കിയതിന് ഫയര്‍ഫോഴ്‌സിന് നന്ദിപറഞ്ഞശേഷമാണ് നിത്യ ജോലിസ്ഥലത്തേക്ക് പോയത്.

തകർന്നടിഞ്ഞ് പഴയ കട - കിഴവൻ മൂലകടവ് റോഡ്

വിഴിഞ്ഞം: പഴയ കട -കിഴവൻ മൂലകടവ് റോഡ് തകർന്ന് തരി പ്പണമായി വാഹനയാത്രക്കാരും കാൽനട യാത്രക്കാരും ദുരിതത്തിലായി. ദിനംപ്രതി നൂറ് കണക്കിന് വാഹനങ്ങൾ കടന്നുപോകുന്ന റോഡാണ് യാത്രക്കാർക്ക് ദുരിതമായി മാറിയത്. ബൈപ്പാസ് നിർമാതാക്കളായ ദേശീയപാത അധികൃതരുടെ ചതിയാണ് പ്രധാനമായി ജനത്തിന് വിനയായത്. നെയ്യാറിന്‍റെ കരയിൽ സർവീസ് റോഡ് ഇല്ലാതാക്കിയ അധികൃതർ വാഹന ഗതാഗതം ആറിന് ഇരുവശത്തുമുള്ള പഴയ ബണ്ട് റോഡിലേക്ക് തിരിച്ചു വിട്ടു. എന്നാൽ ബൈപ്പാസിന്‍റെ സർവീസ് റോഡിലൂടെ വരുന്ന അന്യ സംസ്ഥാന വാഹനങ്ങൾക്ക് വരെ പ്രധാന പാതയായ നെയ്യാറ്റിൻകര - പൂവാർ റോഡിൽ പ്രവേശിക്കണമെങ്കിൽ കുണ്ടും കുഴിയി അപകടം നിറഞ്ഞ ഇവിടം താണ്ടണം. ചെങ്കൽമഹേശ്വാരം ക്ഷേത്രം,നെയ്യാറ്റിൻകര രൂപതയുടെ തീർഥാടന കേന്ദ്രമായ വ്ലാത്താങ്കരസ ്വർഗാരോപിതമാതാ ദേവാലയം , തൊട്ടടുത്ത ശ്രീകൃഷ്ണസ്വാമി ക്ഷേത്രം നിരവധി സ്കൂളുകൾ എന്നിവിടങ്ങളിലേക്ക് വരുന്ന വാഹനങ്ങൾ ഇവിടെ കുടുങ്ങിക്കിടക്കുന്നതും പതിവാണ്. ബൈപാസിനും ഒന്നര കിലോമീറ്റർ മാറി നെയ്യാറിന് കുറുകെ നിർമിച്ച കിഴവൻ മൂലകടവ് പാലത്തിന്‍റെ അപ്രോച്ച് റോഡു കൂടയാണിത്. പാലം വരെ വീതി കൂടിയ റോഡുള്ളതിനാൽ തടസമില്ലെന്ന് കരുതിയെത്തുന്ന ടൂറിസ്റ്റ് വാഹനങ്ങളാണ് ദുരിതമനുഭവിക്കുന്നതിൽ ഏറെയും. ആരാധനാലയങ്ങൾക്കായി ബൈപ്പാസിൽ നെയ്യാറിന്‍റെ ഇരുവശങ്ങളിലും എൻട്രൻസ് അനുവദിക്കുമെന്ന് നിർമാണ വേളയിൽ ദേശീയപാത അധികൃതർ ജനത്തെ പറഞ്ഞ് ബോധ്യപ്പെടുത്തിയിരുന്നു. എന്നാൽ ബൈപാസ് നിർമാണം പൂർത്തിയായതോടെ എല്ലായിടവും അടച്ച് കെട്ടിയ അധികൃതർ തങ്ങളെ കബളിപ്പിച്ചതായി നാട്ടുകാർ പറയുന്നു. നിലവിൽ നൂറ് മീറ്റർ മാത്രം വീതിയുള്ള നെയ്യാറിന്‍റെ മറുകര താണ്ടാൻ ജനത്തിനും വാഹന യാത്രക്കാർക്കും നാല് കിലോമീറ്ററോളം യാത്ര ചെയ്യണം. റോഡിന്‍റെ ശോച്യാവസ്ഥ മാറ്റിയില്ലെങ്കിൽ പ്രതിഷേധവുമായി രംഗത്തിറങ്ങുമെന്ന് നാട്ടുികാർ പറഞ്ഞു

ഫയർഫോഴ്സ് രക്ഷകരായി ; പാർവണയ്ക്ക് ‘കാത്തു’വിനെ തിരിച്ച് കിട്ടി

വിഴിഞ്ഞം: ഫയർഫോഴ്സുകാർ രക്ഷകരായി, പാർവണയ്ക്ക് റെ കാത്തു പൂച്ചയെ തിരിച്ച് കിട്ടി . അറുപതടിയോളം താഴ്ചയുള്ള പൊട്ടക്കിണറിൽ വീണ പൂച്ചയെ രക്ഷിക്കാൻ അപകട മറിയാതെ സ്വയം ഇറങ്ങൾ ശ്രമിച്ച പന്ത്രണ്ട് കാരിയെ തടഞ്ഞ അയൽവാസികൾ ഫയർഫോഴ്സിന്‍റെ സഹായം തേടുകയായിരുന്നു. കല്ലിയൂർനെടിഞ്ഞിൽ, മാവുവിള, ഷിജ യുടെ വീട്ടിലെ വളർത്തു പൂച്ചയാണ് ഇന്നലെ രാവിലെ വീടിന് സമീപമുള്ള ഒഴിഞ്ഞ പറമ്പിലെ 60 അടിയോളം താഴ്ചയുള്ള കിണറിൽ അകപ്പെട്ടത്.കിണറ്റിൽ നിന്ന് പൂച്ചയുടെ ശബ്‌ദം കേട്ടാണ് വീട്ടുകാർ അപകട വിവരം അറിയുന്നത്.ഷീജയുടെ മകളായ പാർവണ യുടെ പൂച്ചയെ പുറത്തെടുക്കുന്നതിന് പല വഴികളിലൂടെ ശ്രമം നടത്തി. ബക്കറ്റിൽ മീൻ നിക്ഷേപിച്ച് കയർ മുഖേന കിണറ്റിനുള്ളിൽ ഇറക്കിയുള്ള ശ്രമവും പരാജയമടഞ്ഞതോടെ പാർവണയുടെ കരച്ചിലിന്‍റെ ശക്തിയും കൂടി. ഒടുവിൽ തന്‍റെ ഓമനപ്പൂച്ചയെ രക്ഷിക്കാൻ കിണറ്റിലിറങ്ങാനുള്ള ശ്രമവും നടത്തിയെങ്കിലും അയൽവാസികൾ തടഞ്ഞു. കുട്ടിയുടെ വിഷമം കണ്ട അയൽവാസികൾ ഉച്ചയോടെ വിഴിഞ്ഞം ഫയർ ആൻഡ് റെസ്ക്യൂ സേനയുടെ സഹായം തേടി. സേന സ്ഥലത്ത് എത്തി കുട്ടിയെ സമാധാനിപ്പിച്ച ശേഷം ആഴകൂടുതലും വായു സഞ്ചാരവുമില്ലാത്ത കിണറ്റിൽ കരയിൽ നിന്നു കൊണ്ട് തന്നെ പ്രതേകം തയാറാക്കിയ റോപ്പും സ്റ്റീൽറാഡും ഉപയോഗിച്ച് പൂച്ചയെ കരയിലെത്തിച്ചു. പൂച്ച ജീവനോടെ കരയ്ക്ക് എത്തിയപ്പോഴാണ് പാർവണയ്ക്ക് സമാധാനമായത്. ഗ്രേഡ് എഎസ്ടിഒ അലി അക്ബറിന്‍റെ നേതൃത്വത്തിൽ ഫയർ ആൻഡ് റെസ്ക്യൂ ഓഫീസർമാരായ സന്തോഷ് കുമാർ, അനുരാജ്, സാജൻ,ഹോം ഗാർഡ് വിനോദ്എന്നിവരാണ് രക്ഷാപ്രവർത്തനം നടത്തിയത്.

നെയ്യാർ വലതുകര കനാലിലെ ബണ്ട് തകർന്നു

മാറനല്ലൂർ : നെയ്യാറിലെ വലതുകര കനാൽ കടന്നുപോകുന്ന കൂവളശേരിക്കു സമീപം ബണ്ട് തകർന്നു. രണ്ടുദിവസങ്ങൾക്കു മുമ്പാണ് മണ്ണിടിച്ചിലുണ്ടായത്. കനാലിന്‍റെ വശങ്ങളിൽ കോൺക്രീറ്റ് ചെയ്ത് നവീകരിക്കാത്തതിനെത്തുടർന്ന് വെള്ളം തുറന്നുവിട്ടതിനുശേഷം ബണ്ടിൽ ചോർച്ചയുണ്ടായിരുന്നതായി നാട്ടുകാർ പറയുന്നു. കനാലിനു വശത്തെ വീടുകൾ വെള്ളപ്പൊക്ക ഭീഷണിയിലാണ്.അടുത്തിടെ കനാൽ ബണ്ടിന്‍റെ വശങ്ങൾ അങ്ങിങ്ങ് മാത്രമാണ് നവീകരിച്ചത്. അപകടസാധ്യത കൂടുതലുള്ള മേഖലകളിൽ പലയിടത്തും കോൺക്രീറ്റ് ചെയ്തിട്ടില്ലെന്നും നാട്ടുകാർ പറഞ്ഞു. നാട്ടുകാർ വിവരം നൽകിയതിനെ ത്തുടർന്ന് ജലസേചനവകുപ്പ് അധികൃതർ വന്ന് പരിശോധന നടത്തി. വേനൽ മഴ കനത്താൽ ശക്തമായ മണ്ണിടിച്ചിലുണ്ടാകാൻ സാധ്യതയുണ്ടെന്നാണ് നാട്ടുകാർ പറയുന്നത്. അതിനിടെ കഴിഞ്ഞ നാല് വർഷമായി തകർന്നു കിടക്കുന്ന മണ്ണടിക്കോണം കനാൽ നവീകരിക്കാനുള്ള നീക്കം നടക്കുന്നുമില്ല. ഇപ്പോൾ തന്നെ കാനൽ പൂർണമായും ഇടിഞ്ഞ് താണ അവസ്ഥയിലാണ്.

തൃക്കണ്ണാപുരത്ത് ചതുപ്പുനിലത്ത് തീപിടിത്തം

പേരൂര്‍ക്കട: തൃക്കണ്ണാപുരത്ത് ചതുപ്പുനിലത്ത് കൂടിക്കിടന്ന മൂന്നുലോഡ് ചവറുകള്‍ക്ക് തീപിടിച്ചു. ആറാംമട പൗള്‍ട്രിഫാമിനടുത്തുള്ള ചതുപ്പുനിലത്തുകിടന്ന ചവറിനാണ് തീ പിടിച്ചത്. ഇന്നലെ വൈകുന്നേരം നാലിനാണ് സംഭവം. ടൈല്‍സ്, ക്ലോസറ്റ്, മള്‍ട്ടി വുഡ്, മരപ്പൊടി, പ്ലാസ്റ്റിക്കുകള്‍, പേപ്പര്‍ വേസ്റ്റുകള്‍ എന്നിവയ്ക്കാണ് തീപിടിച്ചത്. തിരുവനന്തപുരം നിലയത്തില്‍ നിന്ന് സീനിയര്‍ ഫയര്‍ ആൻഡ് റസ്‌ക്യു ഓഫീസര്‍ സജിയുടെ നേതൃത്വത്തില്‍ ഫയര്‍ആൻഡ് റസ്‌ക്യു ഓഫീസര്‍മാരായ നാസിം, രാഹുല്‍, ഷാജന്‍, സൈമണ്‍, ഷമീര്‍, ഹോം ഗാര്‍ഡ് വിപിന്‍, ഡ്രൈവര്‍മാരായ ബിജു, വിജിന്‍ എന്നിവരുടെ നേതൃത്വത്തില്‍ രണ്ടു യൂണിറ്റും കാട്ടാക്കടയില്‍ നിന്ന് ഒരു യൂണിറ്റും എത്തി രണ്ടുമണിക്കൂര്‍ പരിശ്രമിച്ചാണ് തീ കെടുത്തിയത്. കഴിഞ്ഞദിവസം ഒരു കല്യാണവീട്ടില്‍ നിന്നുള്ള മാലിന്യം ഇവിടെ കൊണ്ടുവന്ന് കത്തിച്ചിരുന്നു. അതില്‍നിന്നാണ് തീപടര്‍ന്നതെന്നാണ് സംശയം.

പീഡനക്കേസ്:‍ യുവാവ് പിടിയിൽ

മെഡിക്കല്‍കോളജ്: പീഡനക്കേസില്‍ യുവാവിനെ മെഡിക്കല്‍കോളജ് പോലീസ് അറസ്റ്റുചെയ്തു. എറണാകുളം ആലങ്കാട് വാരാപ്പുഴ പാട്ടശ്ശേരിമുക്ക് ജംഗ്ഷനു സമീപം താമസിക്കുന്ന ജിനു (40) ആണ് അറസ്റ്റിലായത്. 2023 ജൂണ്‍ മാസത്തിലായിരുന്നു കേസിനാസ്പദമായ സംഭവം. കഴക്കൂട്ടം സ്വദേശിനിയായ 31-കാരിയാണ് പീഡനത്തിന് ഇരയായത്. യുവതിയുടെ പരാതിയെത്തുടര്‍ന്ന് നടത്തിയ അന്വേഷണത്തിനൊടുവില്‍ കഴക്കൂട്ടം എസി ജെ.കെ ദിനിലിന്‍റെ നിര്‍ദേശപ്രകാരം മെഡിക്കല്‍കോളജ് സിഐ ബി.എം.ഷാഫി, എസ്ഐ വിഷ്ണു, സിപിഒമാരായ വിനോദ്, ബല്‍റാം, ഡ്രൈവര്‍ ഷിജു എന്നിവര്‍ ചേര്‍ന്നാണ് പ്രതിയെ എറണാകുളത്തുനിന്ന് പിടികൂടിയത്. ഇയാളെ ഇന്ന് കോടതിയില്‍ ഹാജരാക്കും.

ഭീകരതയ്ക്കെതിരേ പ്രതിജ്ഞ ചൊല്ലി

നെടുമങ്ങാട് : ജമ്മു കാഷ്മീരിലെ പഹല്‍ഗാമില്‍ ഉണ്ടായ ഭീകരാക്രമണത്തില്‍ മരണമടഞ്ഞവരോടുള്ള ആദരസൂചകമായി നെടുമങ്ങാട് ബ്ലോക്ക് കോണ്‍ഗ്രസ് കമ്മറ്റിയുടെ നേതൃത്വത്തില്‍ മെഴുകുതിരി തെളിയിച്ചു. തുടർന്ന് പുഷ്പാർച്ചനയും ഭീകരതയ്ക്കെതിരേയുള്ള പ്രതിജ്ഞയും ചൊല്ലി. ബ്ലോക്ക്‌ പ്രസിഡന്‍റ് ടി.അർജുനന്‍റെ അധ്യക്ഷതയിൽ അനുശോചനം രേഖപ്പെടുത്തിക്കൊണ്ട് ഡിസിസി ജനറൽ സെക്രട്ടറി അഡ്വ.എൻ. ബാജി, യുഡിഎഫ് ചെയർമാൻ വട്ടപ്പാറ ചന്ദ്രൻ,ഡിസിസി ജനറൽ സെക്രട്ടറി തേക്കട അനിൽകുമാർ, വി.എസ്.ശശി,എ.റഹീം, രാജ്മോഹനൻ, വണ്ട സതി, ചന്ദ്രകുമാർ, കറ്റുവെട്ടി ചന്ദ്രൻ , നെട്ടയിൽ ഷിനു, രഘു തുടങ്ങിയവർ പങ്കെടുത്തു. നെടുമങ്ങാട് : ജമ്മു കാഷ്മീരിലെ പഹല്‍ഗാമില്‍ നടന്ന തീവ്രവാദി ആക്രമണത്തിൽ മരണപ്പെട്ടവർക്ക് ആദരാഞ്ജലികൾ അർപ്പിച്ചുകൊണ്ട് മൂഴി മണ്ഡലം കോൺഗ്രസ് കമ്മിറ്റിയുടെ നേതൃത്വത്തിൽ മൂഴി ജംഗ്ഷനിൽ ദുഃഖസൂചകമായി ദീപം തെളിയിക്കുകയും അനുശോചന യോഗം നടത്തുകയും തീവ്രവാദത്തിനെതിരേ പ്രതിജ്ഞ എടുക്കുകയും ചെയ്തു. മൂഴിമണ്ഡലം കോൺഗ്രസ് കമ്മിറ്റി പ്രസിഡന്‍റ് വേട്ടം പള്ളി സനൽ, കെ. ശേഖരൻ, ഇര്യനാട് രാമചന്ദ്രൻ, വേങ്കവിള സുരേഷ്,കല്ലിയോട് ഭുവനേന്ദ്രൻ,ഷമി മൂഴി തുടങ്ങിയവർ പ്രസംഗിച്ചു.

പട്ടാരത്ത് പൊങ്കാല ഉത്സവം

നേമം : പാപ്പനംകോട് പട്ടാരത്ത് ശ്രീ ചാമുണ്ഡേശ്വരി ക്ഷേത്രത്തിലെ പുന:പ്രതിഷ്ഠാ വാർഷികവും പൊങ്കാല മഹോത്സവും നാളെ മുതൽ വിവിധ പരിപാടികളോടുകൂടി ആഘോഷിക്കും. നാളെ രാവിലെ 11ന് മേൽ തൃക്കൊടിയേറ്റ്. ഉച്ചയ്ക്ക് 12.30ന് അന്നദാനം. രാത്രി 7.30 ന് സംഗീത കച്ചേരി . 28ന് രാവിലെ 10.30ന് ഉച്ചപുജ, വൈകുന്നേരം 6.30 ന് കാവടി കാപ്പ കെട്ട്, രാത്രി എട്ടിന് ഡാൻസ് 9.30ന് നൃത്തനൃത്യങ്ങൾ, 29ന് രാത്രി എട്ടിന് വിശേഷാൽ പുജ, 9.30ന് ഭക്തിഗാനസുധ, നൃത്തനൃത്യങ്ങൾ. 30ന് വൈകുന്നേരം 6.30ന് ഭജൻസ്, രാത്രി ഒന്പതിന് ആട്ടം-2025 അവതരണം, ചാലക്കുടി പ്രസീത. മേയ് ഒന്നിന് ഉച്ചയ്ക്ക് രണ്ടിന് കാവടി ഘോഷയാത്ര, രാത്രി എട്ടിന് അഗ്നി കാവടി. രണ്ടിന് ഉച്ചയ്ക്ക്. 12.30 ന് അന്നദാനം. വൈകുന്നേരം 6.30ന് ഭക്തിഗാനസുധ, രാത്രി ഒന്പതിന് ഗാനമേള. മൂന്നിന് വൈകുന്നേരം 6.30ന് ആനപ്പുറത്ത് എഴുന്നള്ളത്ത്. നാലിന് രാത്രി എട്ടിന് തിരുവാതിര, ഒന്പതിന് ഡാൻസ്. അഞ്ചിന് രാവിലെ 9.30ന് ആയില്യപൂജ നാഗരൂട്ട്, ഉച്ചയ്ക്ക് 12.30ന് അന്നദാനം, രാത്രി ഒന്പതിന് പള്ളിവേട്ട. ആറിന് രാവിലെ 10.30ന് പൊങ്കാല, ഉച്ചയ്ക്ക് 1.30ന് വട്ടി താലപ്പൊലി, രണ്ടിന് പൊങ്കാല നിവേദ്യം, രാത്രി ഏഴിന് ആറാട്ട് പുറപ്പാട്, 10ന് ആറാട്ട് തിരിച്ച് വരവ്. തുടർന്ന് കൊടിയിറക്കം പുലർച്ചെ ഒന്നിന് ഗുരുസി.

സെക്യൂരിറ്റി ജീവനക്കാരനെ മര്‍ദിച്ച കേസ്:‍ രണ്ടുപേര്‍കൂടി അറസ്റ്റില്‍

തിരുവല്ലം: പാച്ചല്ലൂര്‍ വാഴമുട്ടത്തിനു സമീപത്തുളള ബാറില്‍ അതിക്രമിച്ചുകയറി സെക്യൂരിറ്റി ജീവനക്കാരനെ മര്‍ദിച്ച കേസിലെ രണ്ടുപേര്‍കൂടി തിരുവല്ലം പോലീസിന്‍റെ പിടിയിലായി. വള്ളക്കടവ് സ്വദേശിയും നിലവില്‍ പുഞ്ചക്കരിയില്‍ താമസക്കാരനുമായ ഷാരൂഖ് ഖാന്‍ (27) , കല്ലിയൂര്‍ കാക്കാമൂല സ്വദേശി അഖില്‍ ചന്ദ്രന്‍ (28) എന്നിവരാണ് പിടിയിലായത്. മാര്‍ച്ച് 22ന് പുലർച്ചേ 2.30 ഓടുകൂടി ബാറിലെത്തിയ പ്രതികള്‍ തങ്ങള്‍ക്ക് മദ്യം വേണമെന്ന് ആവശ്യപ്പെട്ട് ബാറിനുളളില്‍ അതിക്രമിച്ച് കയറുകയും തടയാന്‍ ശ്രമിച്ച സെക്യൂരിറ്റി ജീവനക്കാരനായ മൊയ്ദീന്‍ അടിമയെ ക്രൂരമായി മര്‍ദിക്കുകയായിരുന്നു. സമീപത്ത് ചാരിവെച്ചിരുന്ന ഫ്ലക്‌സ് ബോര്‍ഡില്‍ നിന്നും പട്ടിക വലിച്ചെടുത്ത് ആറോളം പ്രതികള്‍ ചേര്‍ന്ന് മര്‍ദിക്കുകയായിരുന്നതായി പോലീസ് പറഞ്ഞു. മര്‍ദനത്തില്‍ സെക്യൂരിറ്റി ജീവനക്കാരന് സാരമായി പരിക്കേറ്റ ു. ബാറിലെത്തുമ്പോള്‍ പ്രതികളില്‍ ഒരാള്‍ മദ്യപിച്ചിരുന്നതായി പോലീസ് പറഞ്ഞു. കേസിലെ മൂന്ന് പേരെ പോലീസ് നേരത്തെ പിടികൂടിയിരുന്നു. ഒരാളെ ഇനിയും പിടികൂടാനുണ്ട്. തിരുവല്ലം എസ്എച്ച്ഒ പ്രദീപിന്‍റെ നേതൃത്വത്തില്‍ എസ്ഐ മാരായ പ്രസന്നകുമാര്‍, നൗഷാദ്, സിപിഒ മാരായ വിജേഷ് , കെ.കെ.ഷിജു എന്നവരുള്‍പ്പെട്ട പോലീസ് സംഘമാണ് പ്രതികളെ അറസ്റ്റ് ചെയ്തത്. കോടതിയില്‍ ഹാജരാക്കിയ പ്രതികളെ റിമാന്‍ഡ് ചെയ്തു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]