ADVERTISEMENT

ADVERTISEMENT

നേതൃത്വ പരിശീലന ക്യാന്പ് "ഓറ-2025' തുടങ്ങി

അമ്പൂരി: കേരള ലൈവ്സ്റ്റോക്ക് ഇൻസ്‌പെക്ടേഴ്സ് അസോസിയേഷൻ സംസ്ഥാന കമ്മിറ്റിയുടെ ആഭിമുഖ്യത്തിൽ ദ്വിദിന ശില്പശാലയ്ക്ക് "ഓറ-2025' - അമ്പൂരിയിൽ തുടക്കമായി. അഡ്വ. മോൻസ് ജോസഫ് എംഎൽഎ ഉദ്ഘാടനം ചെയ്തു. സംസ്ഥാന പ്രസിഡന്‍റ് ദുനിംസ് റിയാസുദീൻ അധ്യക്ഷത വഹിച്ചു.

ജനറൽ സെക്രട്ടറി വി. മനോജ്‌ സ്വാഗതം പറഞ്ഞു. വി. കൃഷ്ണദാസ്, പി.ജി. ഷാജി, എസ്.വി. പ്രശാന്ത്, എം. അബ്ദുൽ സലാം, ഇ. നജീബ്, ബി. മുകേഷ് എന്നിവർ പ്രസംഗിച്ചു. പി. സമീർസിദ്ധീഖി, രതീശൻ അരിമ്മൽ, നവീൻ മഞ്ഞിപ്പുഴ, ജി. സജികുമാർ എന്നിവർ ക്ലാസുകളെടുത്തു. നാളെ നടക്കുന്ന സമാപന സമ്മേളനം സി.കെ. ഹരീന്ദ്രൻ എംഎൽഎ ഉദ്ഘാടനം ചെയ്യും.

ADVERTISEMENT

നേമത്ത് ലഹരി വിരുദ്ധറാലി

നേമം: നേമം ജനമൈത്രി പോ ലീസിന്‍റെ നേതൃത്വത്തിൽ നേമത്ത് ലഹരി വിരുദ്ധ ബഹുജന റാലി സംഘടിപ്പിച്ചു. വൈകുന്നേരം നാലിനു പഴയ കാരയ്ക്കാമണ്ഡപത്തു നിന്നാരംഭിച്ച റാലി സിറ്റി പോലീസ് കമ്മീഷണർ തോംസൺ ജോസ് ഫ്ലാഗ് ഓഫ് ചെയ്തു. റാലി പ്രാവച്ചമ്പലത്ത് സമാപിച്ചു. നേമം ജനമൈത്രി പോലീസ് കോ-ഓർഡിനേറ്റർ ജയൻ, ജനമൈത്രി സിആർഒ സബ് ഇൻസ്പെക്ടർ പ്രവീൺ ചന്ദ്ര പ്രതാപ്, കൗൺസിലർമാരായ യു. ദീപിക, എൽ. സൗമ്യ, എസ്.കെ. ശ്രീദേവി, പള്ളിച്ചൽ പഞ്ചായത്ത് പ്രസിഡന്‍റ് രാഗേഷ്, കല്ലിയൂർ പഞ്ചായത്ത് അംഗം ചന്ദുകൃഷ്ണ, ഫ്രാൻസ് റസിഡൻസ് അസോസിയേഷൻ പ്രസിഡന്‍റ്് മണ്ണാങ്കൽ രാമചന്ദ്രൻ, ജനറൽ സെക്രട്ടറി വിജയൻ നായർ, പട്ടം സ്മാരക വോളിബോൾ ട്രെയിനിംഗ് വിദ്യാർഥികൾ, വിവിധമത, രാഷ്ട്രീയ,യുവജന സംഘടനകൾ, കോർപ്പറേഷൻ, കല്ലിയൂർ, പള്ളിച്ചൽ പഞ്ചായത്തുകൾ, വ്യാപാരി വ്യവസായി സംഘടനകൾ, നിർഭയ വോളൻന്‍റിയർമാർ, വിദ്യാർഥികൾ, അധ്യാപകർ, എസ്പിസി, നാഷണൽ സർവീസ് സ്കീം, സർവീസ് സംഘടനകൾ എന്നിവർ പങ്കെടുത്തു.

ശ്രീവരാഹത്ത് ഹരിതകര്‍മസേനയുടെ ഗോഡൗണില്‍ തീപിടിത്തം

പേരൂര്‍ക്കട: ശ്രീവരാഹം പറമ്പില്‍ ജംഗ്ഷനില്‍ മില്‍മ ഹബ്ബിന് എതിര്‍വശം ഹരിതകര്‍മസേനയുടെ ഗോഡൗണില്‍ തീപിടിത്തം. ശനിയാഴ്ച വൈകുന്നേരം നാലുമണിയോടുകൂടിയിരുന്നു. സംഭവം. ഇവിടെ ഒരു വീട്ടില്‍ ഏകദേശം നാലുലോഡ് പ്ലാസ്റ്റിക് സാധനങ്ങള്‍ ഉള്‍പ്പെടെ ശേഖരിച്ചിരിക്കുകയായിരുന്നു. കെട്ടിടത്തില്‍ സ്ഥാപിച്ചിരുന്ന വൈദ്യുത വയറുമായി ബന്ധപ്പെട്ട ഷോര്‍ട്ട് സര്‍ക്യൂട്ടാകാം തീപിടിത്തതിനു കാരണമെന്നു ഫയര്‍ഫോഴ്‌സ് പറഞ്ഞു. ഏകദേശം രണ്ടുലോഡ് സാധനങ്ങള്‍ കത്തിനശിച്ചിട്ടുണ്ട്. തിരുവനന്തപുരം നിലയത്തില്‍നിന്ന് സീനിയര്‍ ഫയര്‍ ആൻഡ് റസ്‌ക്യു ഓഫീസര്‍ സജിയുടെ നേതൃത്വത്തിലുള്ള സംഘം രണ്ടുമണിക്കൂര്‍ പരിശ്രമിച്ചാണ് തീ കെടുത്തിയത്. കൂടുതല്‍ സ്ഥലങ്ങളിലേക്ക് തീ പടരാത്തത് വന്‍ അത്യാഹിതം ഒഴിവാക്കി.

പൊഴിയൂര്‍ ക്ഷേത്രത്തില്‍ ഉത്സവ എഴുന്നള്ളിപ്പിനിടെ ആന ഇടഞ്ഞു

പാറശാല: പൊഴിയൂര്‍ മഹാദേവ ക്ഷേത്രത്തില്‍ ഉത്സവ എഴുന്നള്ളിപ്പിനിടയില്‍ ആന ഇടഞ്ഞു. തിരുവിതാംകൂർ ദേവസ്വം ബോര്‍ഡിന്‍റെ ഉടമസ്ഥതയിലുളള പാറശാല ശിവശങ്കരനെന്ന ആനയാണ് ഇടഞ്ഞത്. വെള്ളിയാഴ്ച രാത്രി ശ്രീഭൂതബലി എഴുന്നള്ളിപ്പ് നടക്കുന്നതിനിടിയിലാണ് ആന ഇടഞ്ഞത്. തുടര്‍ന്ന് ആന, ക്ഷേത്രത്തിന്‍റെ മേല്‍ക്കൂരയിലെ ഓടുകള്‍ നശിപ്പിക്കുകയും ചുറ്റമ്പലം തകര്‍ക്കുകയും ചെയ്തു. പാപ്പാന്‍മാരുടെ നേതൃത്വത്തില്‍ ആനയെ നിയന്ത്രിക്കുവാന്‍ ശ്രമിച്ചെങ്കിലും സാധിച്ചില്ല. ഇട ചങ്ങല ഉപയോഗിച്ചിരുന്നതിനാല്‍ ആനക്ക് കൂടുതല്‍ ആക്രമണം നടത്തുവാന്‍ സാധിച്ചില്ല. ആനയെ നിയന്ത്രിക്കുവാന്‍ ശ്രമിച്ച പാപ്പാന്‍മാരെ ആന ആക്രമിക്കാനും ശ്രമിച്ചു.

പണം തിരിച്ചുനല്‍കുന്നില്ലെന്ന്; വയോധികന്‍ ജ്വല്ലറി ഉടമയുടെ വീടിനു മുന്നില്‍ സമരമിരുന്നു

പേരൂര്‍ക്കട: ജ്വല്ലറിയില്‍ നിക്ഷേപിച്ച പണം തിരികെനല്‍കുന്നില്ലെന്നാരോപിച്ച് വയോധികന്‍ ഉടമയുടെ വീടിനുമുന്നില്‍ സമരമിരുന്നു. കഴിഞ്ഞദിവസം രാവിലെ 11 മുതല്‍ രാത്രി എട്ടുവരെയാണു വയോധികൻ ഒറ്റയാള്‍ സമരം നടത്തിയത്. കൊല്ലം പുനലൂര്‍ സ്വദേശി അബൂബക്കര്‍ (70) ആണ് പ്രമുഖ ജ്വല്ലറി ഉടമയുടെ പൂജപ്പുരയിലെ വസതിക്കുമുന്നില്‍ സമരം നടത്തിയത്. പഴയ സ്വര്‍ണാഭരണങ്ങള്‍വിറ്റു 11 ലക്ഷത്തോളം രൂപ താന്‍ ജ്വല്ലറിയില്‍ 11 മാസത്തെ കാലാവധിയില്‍ നല്‍കിയെന്നും എന്നാല്‍ ജ്വല്ലറി സാമ്പത്തിക പ്രതിസന്ധിയിലാണെന്നു പലരില്‍നിന്നും അറിഞ്ഞതോടെ ഇതു തിരികെ ആവശ്യപ്പെട്ടുവെന്നും ഇദ്ദേഹം പറയുന്നു. താന്‍ നിക്ഷേപിച്ച പണത്തിനു കൂടുതല്‍ ആനുകൂല്യങ്ങളൊന്നും വേണ്ടെന്നും പണം തന്നാല്‍ മതിയെന്നുമായിരുന്നു അബൂബക്കറിന്‍റെ ആവശ്യം. ഇതുമായി ബന്ധപ്പെട്ടു കഴിഞ്ഞ നാലഞ്ചുമാസമായി താന്‍ കല്ലമ്പലത്തെ ജ്വല്ലറിശാഖയില്‍ കയറിയിറങ്ങിയെന്നും എന്നാല്‍ ഇതുവരെയും പണം ലഭിച്ചില്ലെന്നുമാണ് ഇദ്ദേഹം പറയുന്നത്. മാനേജര്‍ ഒഴികഴിവുകള്‍ പറഞ്ഞ് ഒഴിഞ്ഞതോടെയാണ് അബൂക്കര്‍ ഉടമയുടെ പൂജപ്പുരയിലെ വീടിനുമുന്നില്‍ മണിക്കൂറുകള്‍ സമരം നടത്തിയത്. സംഭവത്തില്‍ കേസെടുത്തില്ല.

മണ്ണാമ്മൂലയിലെ സ്റ്റേഷനറിക്കട കുത്തിത്തുറന്ന് പണം കവര്‍ന്നു

പേരൂര്‍ക്കട: മണ്ണാമ്മൂലയിലെ സ്റ്റേഷനറി കട കുത്തിത്തുറന്നു പണവും സാധനസാമഗ്രികളും കവര്‍ന്നു. ദേവി നഗര്‍ ഹൗസ് നമ്പര്‍ 93 അശ്വതി ഭവനില്‍ ലളിത, വീടിനോടു ചേര്‍ന്നു നടത്തിവരുന്ന സ്റ്റേഷനറി കടയിലായിരുന്നു മോഷണം. വെള്ളിയാഴ്ച രാത്രി 11നും ശനിയാഴ്ച പുലര്‍ച്ചെ അഞ്ചിനും ഇടയിലാണ് മോഷണമെന്നാണ് അനുമാനം. കടയില്‍ സൂക്ഷിച്ചിരുന്ന 5,000 രൂപയും പാല്‍, എണ്ണ തുടങ്ങിയ സാധനങ്ങളുമാണ് കവര്‍ച്ച ചെയ്യപ്പെട്ടത്. കടയുടെ മുന്‍ഭാഗം കുത്തിത്തുറന്നാണ് മോഷ്ടാവ് അകത്തു കടന്നത്. സംഭവത്തെ തുടര്‍ന്ന് ഗോഡ്‌സ്‌ക്വാഡും പോലീസും സ്ഥലത്തെത്തി പരിശോധന നടത്തി. മോഷ്ടാവ് നടന്നുവരുന്നതും കട കുത്തിപ്പൊളിക്കുന്നതുമായ സിസിടിവി ദൃശ്യങ്ങള്‍ പോലീസ് ശേഖരിച്ചിട്ടുണ്ട്. മോഷ്ടാവിന്‍റേതെന്നു സംശയിക്കുന്ന വിരലടയാളങ്ങള്‍ ലഭിച്ചതായാണു സൂചന. പേരൂര്‍ക്കട പോലീസ് കേസെടുത്ത് അന്വേഷണം ആരംഭിച്ചു.

അപകടത്തിൽപ്പെട്ടത് നിരവധി വാഹനങ്ങൾ : പൈപ്പിടാനെടുത്ത കുഴികൾ അപകടക്കെണികളാകുന്നു

മാറനല്ലൂർ: പൈപ്പ് സ്ഥാപിക്കാനെടുത്ത കുഴികൾ അപകടകെണികളാകുന്നു. ഇതുവരെ അപകടത്തിൽപ്പെട്ടതാകട്ടെ നിരവധി വാഹനങ്ങൾ. അവസനമായി ഇന്നലെ അപകടത്തിൽപ്പെട്ടത് സിമന്‍റ് ലോറിയും. കാട്ടാക്കട ബാലരാമപുരം റോഡിൽ കണ്ടല മുതൽ മാറനല്ലൂർ വരെയുള്ള ഭാഗത്താണ് പൈപ്പ് സ്ഥാപിക്കാനെടുത്ത കുഴി അപകടക്കെണിയാകുന്നത്. ഒരുമാസം മുൻപാണ് പാതയോരത്ത് കുഴിയെടുത്ത് പൈപ്പ് സ്ഥാപിച്ചശേഷം മൂടിയത്. മണ്ണുമൂടിയ സ്ഥലങ്ങൾ വേനൽമഴയെത്തുടർന്നു ഇപ്പോൾ കുഴിയായി. ഇതോടെയാണു പാതയോരത്തോടു ചേർത്തുനിർത്തുന്ന വാഹനങ്ങൾ കുഴിയിൽവീണ് അപകടത്തിൽപ്പെടുന്നത് പതിവായത്. ഇന്നലെ പുലർച്ചെ സിമന്‍റ് കയറ്റിവന്ന ലോറി കുഴിയിൽച്ചാടി. ലോറിയിൽ ഭാരം കൂടുതലായതിനാൽ ക്രെയിൻ ഉപയോഗിച്ച് മാറ്റാൻ ശ്രമിച്ചെങ്കിലും നടന്നില്ല. തുടർന്ന് സിമന്‍റ് ചാക്കുകൾ മറ്റൊരു വാഹനത്തിലേക്കു മാറ്റിയശേഷമാണ് ലോറി മാറ്റാൻ കഴിഞ്ഞത്. പൈപ്പിടാനെടുത്ത കുഴികൾ കോൺക്രീറ്റ് ചെയ്ത് ബലപ്പെടുത്തണമെന്നു നിർദേശമുണ്ടെങ്കിലും പലപ്പോഴും മാസങ്ങൾകഴിഞ്ഞാണ് ഈ പണികൾ നടത്തുന്നത്. മൂന്നു ദിവസം മുൻപ് ഒരു കാർ ഈ കുഴിയിൽപ്പെട്ടു താണു. ഒടുവിൽ മണിക്കൂറുകൾ നീണ്ട ശ്രമത്തിനു ശേഷമാണ് കാർ പൊക്കിയതും. ബൈക്കപകടങ്ങൾ നിരവധി നടന്നിട്ടുണ്ട്. പരിസരവാസികൾ ഇക്കാര്യങ്ങൾ ബന്ധപ്പെട്ടവരുടെ ശ്രദ്ധയിൽപെടുത്തിയെങ്കിലും ഫലമുണ്ടായില്ല.

തൊണ്ടിവാഹനങ്ങള്‍ ഇഴജന്തുക്കളുടെ താവളം : ഗവ. പ്രസ് റോഡിലൂടെ സഞ്ചരിക്കുന്നവര്‍ ഭീതിയില്‍

പേരൂര്‍ക്കട: തൊണ്ടിവാഹനങ്ങള്‍ കുന്നുകൂടിയതോടെ മണ്ണന്തല ഗവ. പ്രസിനു സമീപത്തെ റോഡിലൂടെ സഞ്ചരിക്കുന്നവര്‍ ഭീതിയില്‍. ഇഴജന്തുഭയമാണ് ഇവരെ നിരന്തരം അലട്ടുന്നത്. ഇടുങ്ങിയ റോഡിലൂടെ രാത്രിയാത്ര ഏറെ ക്ലേശകരമാണ്. തീര്‍ത്തും ധൈര്യമുള്ളവര്‍ക്കുമാത്രമേ കൂറ്റന്‍ മരങ്ങള്‍ സ്ഥിതിചെയ്യുന്ന ഈ ഭാഗത്തുകൂടി നടന്നുപോകാന്‍ സാധിക്കൂ. മണ്ണന്തല സ്റ്റേഷന്‍ പരിധിയില്‍ പിടിക്കപ്പെടുന്ന തൊണ്ടിവാഹനങ്ങള്‍ കൂട്ടിയിട്ടിരിക്കുന്നത് ഇടറോഡിലാണ്. 10 വര്‍ഷത്തിനു പുറത്തു പ്രായമുള്ള തൊണ്ടിവാഹനങ്ങള്‍വരെ ഇക്കൂട്ടത്തിലുണ്ട്. കാറുകളും ഓട്ടോറിക്ഷകളും ബൈക്കുകളും എന്നുവേണ്ട കേസുകളില്‍ പിടിക്കപ്പെടുന്ന മണ്ണടിക്കുന്ന ടിപ്പര്‍ലോറികള്‍വരെ കൊണ്ടിടുന്നത് വിസ്താരംകുറഞ്ഞ റോഡിലാണ്. വാഹനയാത്രയ്ക്ക് തടസമുണ്ടാകുന്നില്ലെങ്കിലും രാത്രികാലങ്ങളില്‍ തെരുവുവിളക്കുകള്‍ ചില സമയങ്ങളില്‍ മാത്രം പ്രകാശിക്കുന്ന റോഡിലൂടെ പാമ്പുകളെയും പെരുച്ചാഴികളെയും എലികളെയും മറ്റും ഭയന്നുവേണം പോകാന്‍. വാഹനങ്ങളുടെ മറപറ്റി നില്‍ക്കുന്ന മദ്യപരുടെ ശല്യം വേറെയും. രാത്രി 11 മണിക്കുശേഷമാണ് ഇവര്‍ ഇവിടെ താവളമടിക്കുന്നത്. പോലീസിന്‍റെ രാത്രികാല പട്രോളിംഗിന്‍റെ ആദ്യഘട്ടം അവസാനിച്ചശേഷമാണ് ഇവര്‍ ഇവിടം വിഹാരരംഗമാക്കുന്നത്. മണ്ണന്തല ഗവ. പ്രസിനു സമീപത്തെ റോഡിലൂടെ എളുപ്പത്തില്‍ എം.സി. റോഡിലേക്കു ചെല്ലാനാകും. കഷ്ടിച്ച് അരകിലോമീറ്ററാണു ദൂരം. അതുകൊണ്ടുതന്നെ ഇതുവഴി തെരഞ്ഞെടുക്കുന്ന കാല്‍നടയാത്രികര്‍ക്ക് സുരക്ഷിതമായ പാത ഒരുക്കണമെങ്കില്‍ തൊണ്ടിവാഹനങ്ങള്‍ ഇവിടെനിന്നു നീക്കംചെയ്യേണ്ടതുണ്ട്. കാലാകാലങ്ങളില്‍ ലേല നടപടികള്‍ ഉണ്ടാകാത്തതാണു തൊണ്ടിവാഹനങ്ങള്‍ കുന്നുകൂടാന്‍ കാരണം.

കച്ചവടത്തിനായി സൂക്ഷിച്ചിരുന്ന കഞ്ചാവും ഹാഷിഷ് ഓയിലുമായി യുവാവ് പിടിയില്‍

പൂന്തുറ: വീട്ടില്‍ കച്ചവടത്തിനായി സൂക്ഷിച്ചിരുന്ന കാഞ്ചാവും ഹാഷിഷ് ഓയിലുമായി യുവാവിനെ എക്‌സൈസ് സംഘം പിടികൂടി. പരുത്തിക്കുഴി അല്‍ബസ്‌നയില്‍ മുഹമ്മദ് അനസ് (28) ആണ് പിടിയിലായത്. ഇയാളില്‍ നിന്നും 1.2 കിലോ ഗ്രാം കഞ്ചാവും 650 ഗ്രാം ഹാഷിഷ് ഓയിലും പിടിച്ചെടുത്തു. ശനിയാഴ്ച ഉച്ചതിരിഞ്ഞ് മൂന്നോടെ എക്‌സൈസ് സംഘം നടത്തിയ പരിശോധനയിലാണു കഞ്ചാവും ഹാഷിഷ് ഓയിലും പിടിച്ചെടുത്തത്. തിരുവനന്തപുരം എക്‌സൈസ് റേഞ്ച് സിഐ റജിലാലിന് ലഭിച്ച രഹസ്യത്തിന്‍റെ അടിസ്ഥാനത്തിലാണ് പരിശോധന നടത്തിയത്.

കാട്ടാക്കടയിൽ മാനവശൃംഖല മേയ് പത്തിന്

തിരുവനന്തപുരം: മയക്കു മരുന്നു സൃഷ്ടിക്കുന്ന വിപത്തുകളിൽ നിന്നുള്ള മോചനത്തിനും ലഹരിക്കും മയക്കുമരുന്നിനും അടിമപ്പെട്ടവരെ മോചിപ്പിക്കുന്നതിനുമായി കാട്ടാക്കട നിയോജക മണ്ഡലത്തിലെ ജനങ്ങളെയാകെ പങ്കെടുപ്പിച്ചു മേയ് 10ന് മാനവ ശൃംഖല ഒരുക്കും. 10നു വൈകുന്നേരം നാലിനു തുടങ്ങുന്ന "മാനവ ശൃംഖല' കുണ്ടമണ്‍കടവിൽ നിന്ന് ആരംഭിച്ചു മണ്ഡപത്തിൻകടവ് വരെ നീളും. ഇതിനു മുന്നോടിയായി മേയ് രണ്ടിനു രാവിലെ എട്ടിനു മയക്കുമരുന്നിനെതിരേ കാട്ടാക്കട കാന്പയിന്‍റെ ഒൗദ്യോഗിക ഉദ് ഘാടനം നടക്കും. ഐ.ബി. സതീഷ് എംഎൽഎ അധ്യക്ഷത വഹിക്കുന്ന ചടങ്ങിൽ വിഴിഞ്ഞം സിഇഒ ദിവ്യ എസ്. അയ്യർ മുഖ്യാതിഥിയാകും. യുവാക്കളെ ആകർഷിക്കുന്ന തിരുവനന്തപുരത്തെ പ്രമുഖ വ്ളോഗർമാർ വിദ്യാർഥികളുമായി സംവദിക്കും. ഇതോടനുബന്ധിച്ച് കുട്ടികളുടെ കളരിപ്പയറ്റ്, സൂംബ ഡാൻസ്, കലാപരിപാടികൾ, ലഹരിവിരുദ്ധ പ്രതിജ്ഞ തുടങ്ങിയവ നടക്കും. ലഹരിക്കെതിരെ വിദ്യാർഥികളെയും യുവതീ-യുവാക്കളെയും അണിനിരത്തുന്ന കൂട്ട് പദ്ധതി മാസ് കാന്പയിനായി മാറിയെന്ന് ഐ.ബി. സതീഷ് എംഎൽഎ പറഞ്ഞു.

കുളത്തൂരിൽ ഓടികൊണ്ടിരുന്ന കാർ കത്തിനശിച്ചു

പോത്തൻകോട്: കുളത്തൂർ ടിഎസ് സി ആശുപത്രിക്ക് സമീപം ദേശീയപാത 66ൽ ഓടികൊണ്ടിരുന്ന കാർ കത്തിനശിച്ചു. അപകടത്തിൽ ആളപായമില്ല. ശനിയാഴ്ച രാത്രി 7.45 നായിരുന്നു സംഭവം. അമ്പലത്തറ ഭാഗത്ത് നിന്ന് കഴക്കൂട്ടം ഭാഗത്തേക്ക് വന്ന സാൻഡ്രോ കാറാണ് പൂർണമായി കത്തിനശിച്ചത്. വിഎസ്എസ്‌സിയിൽ അഡ്മിനിസ്ട്രേഷൻ വിഭാഗത്തിൽ ജോലി നോക്കുന്ന അമ്പലത്തറ സ്വദേശി ഹരികുമാറിന്‍റെ കാറാണ് കത്തിയത്. സ്ഥലത്തെത്തിയ കഴക്കൂട്ടം ഫയർ ഫോഴ്സ് തീ കെടുത്തിയെങ്കിലും കാർ പൂർണമായും കത്തിനശിച്ചിരുന്നു. സംഭവത്തെ തുടർന്നു ദേശീയ പാതയിൽ ഒരു മണിക്കൂറോളം വാഹനഗതാഗതം നിലച്ചു.

തുന്പ, വെട്ടുകാട് കടൽത്തീരങ്ങളിൽ ലൈഫ് ഗാർഡുകളെ നിയമിക്കണം

തിരുവനന്തപുരം: ജില്ലയുടെ കടലോരത്തു വിനോദ സഞ്ചാരികൾ ധാരാളമെത്തുന്ന മേഖലകളിൽ അപകട സാധ്യത ഏറിയിട്ടും ലൈഫ് ഗാർഡുകളെ നിയമിക്കുന്നില്ലെന്നു പരാതി. വിനോദസഞ്ചാരികൾ ധാരാളമായി എത്തിച്ചേരുന്ന കടൽ തീരങ്ങളായ വെട്ടുകാട്, തുന്പ എന്നിവിടങ്ങളിൽ ഇപ്പോഴും ലൈഫ് ഗാർഡുകളെ നിയമിച്ചിട്ടില്ല. ടൂറിസം മേഖലകളായി വളരുന്ന തുന്പയിലും വെട്ടുകാടും എത്തുന്ന സഞ്ചാരികൾക്ക് സുരക്ഷ ഒരുക്കാൻ ലൈഫ് ഗാർഡുകളെ ആവശ്യത്തിനു നിയമിക്കാൻ സർക്കാർ ഇടപെടണമെന്നു സ്വതന്ത്ര മത്സ്യത്തൊഴിലാളി ഫെഡറേഷൻ സംസ്ഥാന പ്രസിഡന്‍റ് പി സ്റ്റെല്ലസ് ആവശ്യപ്പെട്ടു. ടൂറിസ്റ്റുകൾ വരുന്ന മേഖലകളിൽ അപകടം ഒഴിവാക്കാൻ ലൈഫ് ഗാർഡുകൾ അനിവാര്യമാണ്. അപകടത്തിൽപ്പെടുപ്പോൾ യഥാസമയം രക്ഷാപ്രവർത്തനവും ആവശ്യമായ ചികിത്സാ സഹായം നൽകാനും കഴിയാത്ത സാഹചര്യമാണ് വെട്ടുകാട്, തുന്പ തീര മേഖലയിൽ നിലവിലുള്ളത്. ലൈഫ് ഗാർഡുകളുടെ അഭാവം തുടർന്നാൽ അപകടങ്ങൾക്കും ജീവനെടുക്കുന്നതിനും കാരണമാകുമെന്നും സ്റ്റെല്ലസ് പറഞ്ഞു.

രണ്ടര ടൺ നിരോധിത പുകയില ഉത്പന്നങ്ങളുമായി യുവാക്കൾ പിടിയിൽ

പോത്തൻകോട്: രഹസ്യ വിവരത്തിന്‍റെ അടിസ്ഥാനത്തിൽ ശ്രീകാര്യം ഭാഗത്തു നടത്തിയ റെയ്‌ഡിൽ രണ്ടര ടൺ നിരോധിത പുകയില ഉത്പന്നങ്ങളുമായി രണ്ടുപേർ പിടിയിൽ. ആസാം സ്വദേശിയായ മുഹമ്മദ്‌ മജാറുൾ (29), ഇയാളുടെ സഹായിയായ ഹാറൂൻ റഷീദ് എന്നിവരെയാണ് പിടികൂടിയത്. ബംഗളൂരുവിൽനിന്നും വൻ തോതിൽ കടത്തിക്കൊണ്ടുവരുന്ന ലഹരിവസ്തുക്കൾ സ്കൂൾ കുട്ടികൾക്കും മറ്റും വിൽക്കുന്ന മൊത്ത കച്ചവടക്കാരാണ് അറസ്റ്റിലായ ഇരുവരും. ശ്രീകാര്യം മടവിള ലൈനിൽ രാജേഷ് ഭവനിൽ രണ്ടുനില വീട് വാടകക്ക് എടുത്തു രഹസ്യമായി ടൺ കണക്കിനു നിരോധിത പുകയില ഉത്പന്നങ്ങൾ വീടിനുള്ളിലായി ഒളിച്ചുസൂക്ഷിച്ചിരിക്കുകയായിരുന്നു ഇവർ. നഗരത്തിലെ വിവിധ സ്ഥലങ്ങളിൽ ചെറിയ പാൻ ഷോപ്പുകൾ നടത്തിയായിരുന്നു ആസാം സ്വദേശിയുടെ വൻ തോതിലുള്ള നിരോധിത പുകയില വിൽപന. റെയ്‌ഡിൽ അസിസ്റ്റന്‍റ് എക്സൈസ് ഇൻസ്‌പെക്ടർ ലോറൻസ് (ഗ്രേഡ്), സിവിൽ എക്സൈസ് ഓഫീസർമാരായ നന്ദകുമാർ, ആരോമൽ രാജൻ എക്സൈസ് ഡ്രൈവർ ആന്‍റോ എന്നിവർ പങ്കെടുത്തു.

കോവളത്ത് ഹോട്ടലിൽ വ്യാജ ബോബു ഭീഷണി

വിഴിഞ്ഞം: കോവളത്തെ പഞ്ചനക്ഷത്ര ഹോട്ടലിൽ വ്യാജ ബോംബ് ഭീഷണി. പോലീസും, ബോംബ് സ്ക്വാഡും, ഡോഗ് സ്ക്വാഡും പരിശോധന നടത്തിയെങ്കിലും സംശയകരമായി ഒന്നും കണ്ടെത്താനായില്ല. ഇന്നലെ രാവിലെ പത്തരയോടെയാണ് അധികൃതർക്ക് ഇ- മെയിൽ സന്ദേശം എത്തുന്നത്. ഉച്ചക്കു രണ്ടു മണിക്കുള്ളിൽ സഞ്ചാരികളെ ഒഴിപ്പിക്കണമെന്നും അതിനുള്ളിൽ ബോംബ് പൊട്ടുമെന്നുമായിരുന്നു സന്ദേശം. വിവരമറിഞ്ഞ് പോലീസ് വ്യാപക തിരച്ചിൽ നടത്തിസന്ദേശം വ്യാജമെന്ന് ഉറപ്പുവരുത്തി മടങ്ങിയിരുന്നു. ഇതിന മുൻപും കോവളത്തെ ചില ഹോട്ടലുകളിൽ ഇത്തരം സന്ദേശങ്ങൾ എത്തിയിരുന്നു. അന്നും പോലീസ് പരിശോധന നടത്തി സുരക്ഷ ഉറപ്പുവരുത്തിയിരുന്നു.

കഴക്കൂട്ടം ഫാത്തിമ മാതാ പള്ളിയിലെ മാതാവിന്‍റെ പ്രതിമ തകർത്ത പ്രതി പിടിയിൽ

പോത്തൻകോട്: കഴക്കൂട്ടം ഫാത്തിമ മാതാ പള്ളിയിലെ മാതാവിന്‍റെ പ്രതിമ തകർത്ത പ്രതി പിടിയിൽ. വെള്ളിയാഴ്ച രാത്രി 11.40ന് ഫാത്തിമ മാതാ ചര്‍ച്ചിലെത്തി പ്രാര്‍ഥിച്ചശേഷമാണു പ്രതി ആക്രമം നടത്തിയത്. തുമ്പ കിൻഫ്ര പ്രിൻസി വില്ലയിൽ മാർട്ടിൻ തങ്കച്ചനെ (61) യാണ് തുമ്പ പോലീസ് പിടികൂടിയത്. മാനസിക പ്രശ്നങ്ങൾ നേരിടുന്നയാളാണു തങ്കച്ചനെ ന്നു പോലീസ് അറിയിച്ചു. പള്ളി മുറ്റത്ത് കുരിശടിയോടു ചേര്‍ന്നു സ്ഥാപിച്ചിരുന്ന മാതാവിന്‍റെ പ്രതിമയാണു തകര്‍ത്തത്. രാവിലെ നടക്കാനിറങ്ങിയ പള്ളിവികാരി ഫാ. ലാസർ ബെനഡിക്റ്റാണു പ്രതിമ തകര്‍ത്ത നിലയില്‍ കണ്ടത്. തുടർന്നു കഴക്കൂട്ടം പോലീസിനെ വിവരമറിയിക്കുകയായിരുന്നു. കഴക്കൂട്ടം എസ്എച്ച്ഒയുടെ നേതൃത്വത്തിൽ സമീപത്തെ സിസിടിവിയും മറ്റും കേന്ദ്രീകരിച്ച് നടത്തിയ അന്വേഷണത്തിലാണ് മാർട്ടിൻ തങ്കച്ചനാണു പ്രതിമ തകർത്തതെന്നു തിരിച്ചറിഞ്ഞത്. വിരളടയാള വിദഗ്ധരും പരിശോധന നടത്തി. രാത്രിയോടെ ഓട്ടോറിക്ഷ ഡ്രൈവറായ മാർട്ടിൻ തങ്കച്ചൻ ബീച്ചിന്‍റെ ഭാഗത്തും പള്ളിയിലും ബഹളം ഉണ്ടാക്കിയതിനെ തുടർന്നു നാട്ടുകാർ പോലീസിനെ വിവരം അറിയിച്ചു. തുമ്പ പോലീസെത്തി മാർട്ടിനെ കസ്റ്റഡിയിലെടുത്ത് സ്റ്റേഷനിലേക്ക് കൊണ്ടുപോയിരുന്നു. ശനിയാഴ്ച ഉച്ചയോടെ കഴക്കൂട്ടം എസ് എച്ച്ഒ ജെ.എസ്. പ്രവീണിന്‍റെ നേതൃത്വത്തിലുള്ള സംഘം തുമ്പ സ്റ്റേഷനിലെത്തി മാർട്ടിൻ തങ്കച്ചനെ ചോദ്യം ചെയ്യുകയും ചെയ്തു. മാനസിക പ്രശ്നമുള്ള ആളാണെന്നു മാർട്ടിനെന്നു ബന്ധുക്കൾ പോലീസിനോട് പറഞ്ഞു. മുൻപും പല ദേവാലയങ്ങളിലും സമാനമായ സംഭവങ്ങൾ നടത്തിയിട്ടുള്ളതായും പ്രതിമ തകർത്ത സംഭവത്തിലും തങ്കച്ചനെ പിടികൂടിയിട്ടുണ്ടെന്നു കഴക്കൂട്ടം പോലീസ് പറയുന്നു.

റിപ്പോര്‍ട്ട് ഹാജരാക്കാന്‍ കോടതി ഉത്തരവ്

തിരുവല്ലം: കോവളത്തെ റിസോര്‍ട്ടില്‍ 15 കാരിയെ പീഡിപ്പിച്ച സംഭവത്തിൽ തിരുവല്ലം പോലീസ് രജിസ്റ്റര്‍ ചെയ്ത പോക്‌സോ കേസില്‍ വ്‌ളോഗര്‍ മുകേഷ് എം. നായരുടെ മുന്‍കൂര്‍ ജാമ്യഹര്‍ജിയില്‍ 29നു തിരുവല്ലം പോലീസ് അന്വേഷണ റിപ്പോര്‍ട്ട് ഹാജരാക്കാന്‍ കോടതി ഉത്തരവ്. തിരുവനന്തപുരം പ്രിന്‍സിപ്പല്‍ ജില്ലാ സെക്ഷന്‍സ് ജഡ്ജ് എസ്. നസീറയുടെതാണ് ഉത്തരവ്. ഫെബ്രുവരി 14 വാലന്‍റയിന്‍സ് ദിനത്തിന്‍റെ ഭാഗമായി കോവളത്തെ റിസോര്‍ട്ടില്‍ നടന്ന റീല്‍സ് ഫോട്ടോഷൂട്ട് ചിത്രീകരണത്തിനിടെയായിരുന്നു സംഭവമെന്നാണു കേസ്. കടയ്ക്കല്‍ സ്വദേശിയായ പെണ്‍കുട്ടിയുടെ രക്ഷിതാക്കളുടെ പരാതിയിലാണ് പോലീസ് കേസെടുത്തിരിക്കുന്നത്. മുകേഷിനെ കുടാതെ കുട്ടിയെ എത്തിച്ച കോ-ഓഡിനേറ്റർക്കെതിരെയും പോലീസ് പോക്‌സോ കേസെടുത്തിട്ടുണ്ട്. നിലവില്‍ പെണ്‍കുട്ടിയുടെയും അമ്മയുടെയും മൊഴി രേഖപ്പെടുത്തി പോലീസ് കേസില്‍ അന്വേഷണം നടത്തുകയാണ്.

ആക്ട്സിന്‍റെ പ്രാർഥനാ ദിനം ഇന്ന്

തിരുവനന്തപുരം: രാജ്യത്തിന്‍റെ സമാധാനത്തിനും, ഭീകരാക്രമണത്തിൽ മൃതിയടഞ്ഞവരുടെ കുടുംബങ്ങളുടെ സമാശ്വാസത്തിനുമായി ക്രൈസ്തവ സഭകളുടെ കൂട്ടായ്മയായ ആക്ട്സ് വിവിധ കേന്ദ്രങ്ങളിൽ ഇന്നു സമൂഹപ്രാർഥന നടത്തും. തിരുവനന്തപുരം വെള്ളയന്പലത്തെ ബിലീവേഴ്സ് ഈസ്റ്റേണ്‍ ചർച്ച് ബിഷപ് ഹൗസിൽ ഉച്ചകഴിഞ്ഞു മൂന്നിനു നടക്കുന്ന ചടങ്ങിൽ ശാന്തിഗിരി ആശ്രമം ജനറൽ സെക്രട്ടറി സ്വാമി ഗുരുരത്നം ജ്ഞാന തപസ്വി, പാളയം ഇമാം ഡോ. വി.പി. സുഹൈബ് മൗലവി, സാൽവേഷൻ ആർമി ടെറിട്ടോറിയൽ കമാൻഡർ കേണൽ ജോണ്‍ വില്യം പോളിമെറ്റല, ബിഷപ്പുമാരായ ഡോ. ഉമ്മൻ ജോർജ്, മാത്യൂസ് മോർ സിൽവാനിയോസ് തുടങ്ങിയവർ പങ്കെടുക്കും. ആക്ട്സ് ജനറൽ സെക്രട്ടറി ജോർജ് സെബാസ്റ്റ്യൻ അധ്യക്ഷത വഹിക്കും.

അഞ്ചാമത് കൊച്ചെടത്വാ തിരുനാളിന് ഇന്നു കൊടിയേറും

വിഴിഞ്ഞം: പുതിയതുറ (കൊച്ചെടത്വ) വിശുദ്ധ സെന്‍റ് നിക്കോളാസ് ദൈവാലയത്തിൽ വിശുദ്ധ ഗീവർഗീസ് സഹദായുടെ വജ്രജൂബിലി തിരുനാളിന് ഇന്നു കൊടിയേറും. വിവിധ പരിപാടികളോടെ മേയ് നാലിനു സമാപിക്കും. ഇന്നു വൈകുന്നേരം 5.30ന് പുതിയതുറ കുരിശടിയിൽ ജപമാല. തുടർന്ന് അശ്വാരൂഢരുടെ അകമ്പടിയോടുകൂടി പതാകാപ്രദക്ഷിണം പള്ളിയിൽ എത്തിചേരും. ഇതിനുശേഷം ഇടവക വികാരി ഫ. ഗ്ലാഡിൻ അലക്സിന്‍റെ മുഖ്യകാർമികത്വത്തിൽ കൊടിയേറും. തിരുനാൾ ദിനങ്ങളിൽ സുരക്ഷ ഒരുക്കി പോലീസ്, ഫയർ ഫോഴ്സ്, എക്സൈസ് വകുപ്പുകളുടെ യൂണിറ്റുകൾ മുഴുവൻ സമയവും പ്രവർത്തിക്കും. ആരോഗ്യ വകുപ്പിനു കീഴിൽ ആംബുലൻസ് സൗകര്യവും പ്രാഥമിക ചികിത്സാസൗകര്യവും ഒരുക്കിയിട്ടുണ്ട്. വാട്ടർ അഥോറിറ്റി താൽക്കാലികമായി കുടിവെള്ള പൈപ്പുകളും ഇവിടെ സജ്ജീകരിച്ചിട്ടുണ്ട്. തിരുനാൾ ദിനങ്ങളിൽ കെഎസ്ആർടിസി പ്രത്യേക ബസ് സർവീസുകൾ നടത്തും. തീർഥാടകരുടെ സഹയത്തിനായി സേവാസംഘം ഓഫീസിന്‍റെ പ്രവർത്തനം ആരംഭിച്ചു. തിരുനാൾ ദിനങ്ങളിൽ രാത്രി തിരുക്കർമങ്ങൾക്കുശേഷം വിവിധ തരം കലാ സംഗീത പരിപാടികൾ ഉണ്ടാകുമെന്നും ഉത്സവ കമ്മിറ്റി കൺവീനർ പുഷ്പം വിൻസന്‍റ്, മീഡിയ കൺവീനർ നിജു മൈക്കിൾ എന്നിവർ അറിയിച്ചു. യുഎഇയിലുള്ള പുതിയതുറ നിവാസികളുടെ സംഘടനയുടെ നേതൃത്വത്തിൽ ഷാർജ സെന്‍റ് മൈക്കിൾസ് ദൈവാലയത്തിൽ ഇന്നേ ദിവസവും യുകെയിലെ പുതിയതുറ നിവാസികൾ ലണ്ടൻ ഈസ്റ്റ് ഹാമിലെ സെന്‍റ് മൈക്കിൾസ് ആർസി ദൈവാലയത്തിൽ മേയ് മൂന്നിനും മധ്യസ്ഥ ന്‍റെ തിരുനാളാഘോഷിക്കും.

ജെ.സി. ഡാനിയലിന്‍റെ വിയോഗത്തിന് 50 വയസ് : ജന്മനാട്ടില്‍ സിനിമാ തീയേറ്റര്‍ വാഗ്ദാനത്തിലൊതുങ്ങി

നെയ്യാറ്റിന്‍കര: മലയാള സിനിമയുടെ പിതാവ് ജെ.സി. ഡാനിയലിന്‍റെ വിയോഗത്തിന് അരനൂറ്റാണ്ട് പിന്നിടുന്പോഴും തീയേറ്റര്‍ എന്നത് ഇപ്പോഴും കേവലം സ്വപ്നം. നെയ്യാറ്റിന്‍കര നിവാസികള്‍ക്കു സിനിമ കാണാന്‍ ഇപ്പോഴും ആശ്രയം കിലോമീറ്ററുകള്‍ക്കപ്പുറത്തുള്ള തീയേറ്ററുകള്‍ മാത്രം. 1975 ഏപ്രില്‍ 25 നാണ് ജെ.സി. ഡാനിയല്‍ ഈ ഭൗതികലോകത്തുനിന്നും എന്നെന്നേക്കുമായി വിട ചൊല്ലിയത്. അതിനു മുന്പു തന്നെ അദ്ദേഹം താനേറെ ഇഷ്ടപ്പെട്ടിരുന്ന ചലച്ചിത്ര രംഗത്തുനിന്നും വേര്‍പിരിഞ്ഞിരുന്നു. 1928 നവംബര്‍ ഏഴിനാണ് വിഗതകുമാരന്‍ എന്ന മലയാളത്തിലെ തന്നെ ആദ്യ ചലച്ചിത്രം തിരുവനന്തപുരത്ത് പ്രദര്‍ശിപ്പിച്ചത്. ദി ട്രാവന്‍കൂര്‍ നാഷണല്‍ പിക്ച്ചേഴ്സ് എന്ന സ്റ്റുഡിയോ സ്ഥാപിച്ചതും ഡാനിയലാണ്. സ്വന്തം പുരയിടം വിറ്റാണ് സിനിമാ നിര്‍മാണം സംബന്ധിയായ പ്രവര്‍ത്തനങ്ങള്‍ക്ക് അദ്ദേഹം തുക സ്വരൂപിച്ചത്. നിശബ്ദചിത്രമായ വിഗതകുമാരന്‍റെ സംവിധാനത്തിനു പുറമേ തിരക്കഥയും അദ്ദേഹത്തിന്‍റേതായിരുന്നു. ഏറെ പ്രതിസന്ധികള്‍ അതിജീവിച്ച് സിനിമയുടെ പ്രദര്‍ശനം നടന്നെങ്കിലും സവര്‍ണ സമൂഹത്തിന്‍റെ സദാചാരയിടപെടലുകളാല്‍ വിഗതകുമാരന്‍ വേദനിക്കുന്ന ഓര്‍മയായി. തീയേറ്ററിനു നേരെ ആക്രമണമുണ്ടായി. നായിക പി.കെ. റോസി തലനാരിഴയ്ക്ക് രക്ഷപ്പെട്ടു. സാന്പത്തികമായി തകര്‍ന്ന ഡാനിയല്‍ കുറച്ചുവര്‍ഷം നെയ്യാറ്റിന്‍കരയില്‍ ദന്തഡോക്റായും സേവനം അനുഷ്ഠിച്ചു. പുതിയ തലമുറയ്ക്ക് തന്നെ അറിയില്ലായെന്ന ആത്മവ്യഥയോടെ നെയ്യാറ്റിന്‍കരയുടെ സ്വന്തം സിനിമാക്കാരന്‍ ഒടുവില്‍ സ്മരണകളിലൊതുങ്ങി. നെയ്യാറ്റിന്‍കര നഗരസഭ നെയ്യാറ്റിന്‍കര മുനിസിപ്പല്‍ സ്റ്റേഡിയം കോന്പൗണ്ടില്‍ ജെ.സി. ഡാനിയല്‍ ഓപ്പണ്‍ എയര്‍ ഓഡിറ്റോറിയം യാഥാര്‍ഥ്യമാക്കാനുള്ള ശ്രമത്തിലാണ്. നിര്‍മാണ പ്രവര്‍ത്തനങ്ങള്‍ പുരോഗമിക്കുന്നു. തൊട്ടടുത്തു തന്നെ അദ്ദേഹത്തിന്‍റെ പൂര്‍ണകായ പ്രതിമ സ്ഥാപിച്ചിട്ടുണ്ട്. ജെ.സി. ഡാനിയല്‍ ഫൗണ്ടേഷന്‍ നിര്‍മിച്ച പ്രതിമയ്ക്ക് നഗരസഭ സ്റ്റേഡിയത്തില്‍ ഇരിപ്പിടം നല്‍കുകയായിരുന്നു. നിരവധി തീയേറ്ററുകളുണ്ടായിരുന്ന നെയ്യാറ്റിന്‍കര താലൂക്കില്‍ നിലവില്‍ അവയെല്ലാം മുതിര്‍ന്ന തലമുറയുടെ സ്മൃതികളില്‍ മായാതെ അവശേഷിക്കുന്നു. വര്‍ഷം തോറും ജെ.സി. ഡാനിയലിന്‍റെ ജനന- മരണ വാര്‍ഷിക ദിനങ്ങളില്‍ അനുസ്മരണ പരിപാടികള്‍ സംഘടിപ്പിക്കുന്നത് മാത്രം പതിവായി.

വിഴിഞ്ഞം തുറമുഖം സന്ദർശിച്ച് മുഖ്യമന്ത്രി

എസ്. രാജേന്ദ്രകുമാർ വിഴിഞ്ഞം: കേരളത്തിന്‍റെ സ്വപ്ന പദ്ധതിയായ വിഴിഞ്ഞം അന്താരാഷ്ട്ര തുറമുഖം പ്രധാനമന്ത്രി രാഷ്ട്രത്തിന് സമർപ്പിക്കാനിരിക്കെ ഒരുക്കങ്ങൾ വിലയിരുത്താൻ മുഖ്യമന്ത്രി പിണറായി വിജയൻ കുടുംബസമേതം വിഴിഞ്ഞത്തെത്തി. ഇന്നലെ വൈകുന്നേരം അഞ്ചരയോടെ തുറമുഖത്തെത്തിയ മുഖ്യമന്ത്രി, മന്ത്രിമാരായ വി.എൻ. വാസവൻ, വി.ശിവൻകുട്ടി, മേയർ ആര്യാ രാജേന്ദ്രൻ, വിസിൽ എംഡി ഡോ. ദിവ്യ എസ്. അയ്യർ, തുറമുഖ സിഇഒ പ്രദീപ് ജയരാമൻ, കോർപറേറ്റ് അഫേഴ്സ് മേധാവി അനിൽ ബാലകൃഷ്ണൻ, മറ്റ് തുറമുഖ ഉന്നത ഉദ്യോഗസ്ഥർ എന്നിവരുമായി അവലോകനയോഗം നടത്തി. അവിടെനിന്നു കപ്പലുകൾ നങ്കൂരമിടുന്ന വാർഫിലൂടെ വാഹനത്തിൽ സഞ്ചരിച്ച മുഖ്യമന്ത്രി പ്രവർത്തനങ്ങൾ വിലയിരുത്തി. തുടർന്ന് തുറമുഖത്തിന്‍റെ സുരക്ഷാവേലിയായി കടലിനുള്ളിലൂടെ മൂന്നു കിലോമീറ്റർ ദൂരത്തിൽ നിർമിച്ച പുലിമുട്ടിന്‍റെ മുനമ്പ് വരെ എത്തിയ മുഖ്യമന്ത്രിക്ക് അധികൃതർ തുറമുഖത്തിന്‍റെ നിലവിലെ സാഹചര്യങ്ങൾ വിവരിച്ച് നൽകി. ഭാര്യ കമല, മകൾ വീണാ വിജയൻ എന്നിവരും മുഖ്യമന്ത്രിക്കൊപ്പം ഉണ്ടായിരുന്നു. സംഘാടക സമിതിയുടെ മുഖ്യ രക്ഷാധികാരി കൂടിയാണു മുഖ്യമന്ത്രി പിണറായി വിജയൻ. കേരളത്തെ വികസനക്കുതിപ്പിലേക്കു നയിക്കുന്ന തുറമുഖംമേയ് രണ്ടിന് പ്രധാനമന്ത്രി നരേന്ദ്ര മോദി രാജ്യത്തിനു സമർപ്പിക്കും. ഇതോടൊപ്പം രണ്ടാം ഘട്ട നിർമാണോദ്ഘാടനവും ഉണ്ടാകും. ഇതിനായി തുറമുഖ കവാടത്തിനോ‌ു ചേർന്ന് ആയിരങ്ങൾക്ക് ഇരിക്കാൻ പാകത്തിലുള്ള വേദി ഒരുക്കുന്നതിനുള്ള നടപടികൾ ആരംഭിച്ചു. റോഡുമാർഗമുള്ള യാത്ര ഒഴിവാക്കി തിരുവനന്തപുരം എയർപോർട്ടിൽനിന്ന് ആകാശമാർഗം പ്രധാനമന്ത്രി വിഴിഞ്ഞത്തെത്താനുള്ള സാധ്യതകൾ കണക്കിലെടുത്ത് മൂന്നു ഹെലിപാഡുകളും ഒരുങ്ങുന്നു. ഇതോടൊപ്പം ഹെലികോപ്റ്ററുകളുടെ അടിയന്തിര ലാൻഡിംഗിനായി കവാടത്തിനു സമീപവും സൗകര്യമൊരുക്കുമെന്നുഅധികൃതർ അറിയിച്ചു. ഇതിനുള്ള ഔദ്യോഗിക തീരുമാനം എസ് പിജിയിൽനിന്നു കിട്ടേണ്ടതുണ്ടെന്നും അധികൃതർ പറയുന്നു.

ഓടയില്‍ വീണ സ്മാര്‍ട്ട്‌ഫോണ്‍ വീണ്ടെടുത്ത് നൽകി ഫയര്‍ഫോഴ്‌സ്

പേരൂര്‍ക്കട: വെള്ളമുണ്ടായിരുന്ന ഓടയില്‍ വീണ അരലക്ഷം രൂപയുടെ സ്മാര്‍ട്ട്‌ഫോണ്‍ വീണ്ടെടുത്ത് തിരുവനന്തപുരം ഫയര്‍ഫോഴ്‌സ് ടീം. ബാലരാമപുരം സ്വദേശിനിയും തിരുവനന്തപുരം മെഡിക്കല്‍കോളജിലെ കോണ്‍ഫിഡന്‍ഷ്യല്‍ അസിസ്റ്റന്‍റുമായ ബി. നിത്യയുടെ സ്മാര്‍ട്ട് ഫോണാണ് ഇവര്‍ തമ്പാനൂര്‍ റെയില്‍വേ സ്റ്റേഷനു സമീപത്തുകൂടി നടന്നുവരുന്നതിനിടെ അബദ്ധത്തില്‍ ഓടയിലേക്കു വീണത്. വിവരമറിഞ്ഞ് ഫയര്‍ ആൻഡ് റസ്‌ക്യു ഓഫീസര്‍ സുധീഷ് ചന്ദ്രന്‍റെ നേതൃത്വത്തില്‍ സേനാംഗങ്ങളായ വി. വിജിന്‍, നൂറുദീന്‍, ദീപക്ക്, പ്രസാദ് എന്നിവര്‍ ചേര്‍ന്ന് ഒരുമണിക്കൂര്‍ പരിശ്രമിച്ച് എക്യുപ്‌മെന്‍റ് കാച്ചറിന്‍റെ സഹായത്തോടെയാണ് ഫോണ്‍ വീണ്ടെടുത്തത്. വെള്ളം നനഞ്ഞുവെങ്കിലും ഫോണ്‍ പ്രവര്‍ത്തനക്ഷമമായിരുന്നു. സ്മാര്‍ട്ട്‌ഫോണ്‍ വീണ്ടെടുത്ത് നല്‍കിയതിന് ഫയര്‍ഫോഴ്‌സിന് നന്ദിപറഞ്ഞശേഷമാണ് നിത്യ ജോലിസ്ഥലത്തേക്ക് പോയത്.

തകർന്നടിഞ്ഞ് പഴയ കട - കിഴവൻ മൂലകടവ് റോഡ്

വിഴിഞ്ഞം: പഴയ കട -കിഴവൻ മൂലകടവ് റോഡ് തകർന്ന് തരി പ്പണമായി വാഹനയാത്രക്കാരും കാൽനട യാത്രക്കാരും ദുരിതത്തിലായി. ദിനംപ്രതി നൂറ് കണക്കിന് വാഹനങ്ങൾ കടന്നുപോകുന്ന റോഡാണ് യാത്രക്കാർക്ക് ദുരിതമായി മാറിയത്. ബൈപ്പാസ് നിർമാതാക്കളായ ദേശീയപാത അധികൃതരുടെ ചതിയാണ് പ്രധാനമായി ജനത്തിന് വിനയായത്. നെയ്യാറിന്‍റെ കരയിൽ സർവീസ് റോഡ് ഇല്ലാതാക്കിയ അധികൃതർ വാഹന ഗതാഗതം ആറിന് ഇരുവശത്തുമുള്ള പഴയ ബണ്ട് റോഡിലേക്ക് തിരിച്ചു വിട്ടു. എന്നാൽ ബൈപ്പാസിന്‍റെ സർവീസ് റോഡിലൂടെ വരുന്ന അന്യ സംസ്ഥാന വാഹനങ്ങൾക്ക് വരെ പ്രധാന പാതയായ നെയ്യാറ്റിൻകര - പൂവാർ റോഡിൽ പ്രവേശിക്കണമെങ്കിൽ കുണ്ടും കുഴിയി അപകടം നിറഞ്ഞ ഇവിടം താണ്ടണം. ചെങ്കൽമഹേശ്വാരം ക്ഷേത്രം,നെയ്യാറ്റിൻകര രൂപതയുടെ തീർഥാടന കേന്ദ്രമായ വ്ലാത്താങ്കരസ ്വർഗാരോപിതമാതാ ദേവാലയം , തൊട്ടടുത്ത ശ്രീകൃഷ്ണസ്വാമി ക്ഷേത്രം നിരവധി സ്കൂളുകൾ എന്നിവിടങ്ങളിലേക്ക് വരുന്ന വാഹനങ്ങൾ ഇവിടെ കുടുങ്ങിക്കിടക്കുന്നതും പതിവാണ്. ബൈപാസിനും ഒന്നര കിലോമീറ്റർ മാറി നെയ്യാറിന് കുറുകെ നിർമിച്ച കിഴവൻ മൂലകടവ് പാലത്തിന്‍റെ അപ്രോച്ച് റോഡു കൂടയാണിത്. പാലം വരെ വീതി കൂടിയ റോഡുള്ളതിനാൽ തടസമില്ലെന്ന് കരുതിയെത്തുന്ന ടൂറിസ്റ്റ് വാഹനങ്ങളാണ് ദുരിതമനുഭവിക്കുന്നതിൽ ഏറെയും. ആരാധനാലയങ്ങൾക്കായി ബൈപ്പാസിൽ നെയ്യാറിന്‍റെ ഇരുവശങ്ങളിലും എൻട്രൻസ് അനുവദിക്കുമെന്ന് നിർമാണ വേളയിൽ ദേശീയപാത അധികൃതർ ജനത്തെ പറഞ്ഞ് ബോധ്യപ്പെടുത്തിയിരുന്നു. എന്നാൽ ബൈപാസ് നിർമാണം പൂർത്തിയായതോടെ എല്ലായിടവും അടച്ച് കെട്ടിയ അധികൃതർ തങ്ങളെ കബളിപ്പിച്ചതായി നാട്ടുകാർ പറയുന്നു. നിലവിൽ നൂറ് മീറ്റർ മാത്രം വീതിയുള്ള നെയ്യാറിന്‍റെ മറുകര താണ്ടാൻ ജനത്തിനും വാഹന യാത്രക്കാർക്കും നാല് കിലോമീറ്ററോളം യാത്ര ചെയ്യണം. റോഡിന്‍റെ ശോച്യാവസ്ഥ മാറ്റിയില്ലെങ്കിൽ പ്രതിഷേധവുമായി രംഗത്തിറങ്ങുമെന്ന് നാട്ടുികാർ പറഞ്ഞു

ഫയർഫോഴ്സ് രക്ഷകരായി ; പാർവണയ്ക്ക് ‘കാത്തു’വിനെ തിരിച്ച് കിട്ടി

വിഴിഞ്ഞം: ഫയർഫോഴ്സുകാർ രക്ഷകരായി, പാർവണയ്ക്ക് റെ കാത്തു പൂച്ചയെ തിരിച്ച് കിട്ടി . അറുപതടിയോളം താഴ്ചയുള്ള പൊട്ടക്കിണറിൽ വീണ പൂച്ചയെ രക്ഷിക്കാൻ അപകട മറിയാതെ സ്വയം ഇറങ്ങൾ ശ്രമിച്ച പന്ത്രണ്ട് കാരിയെ തടഞ്ഞ അയൽവാസികൾ ഫയർഫോഴ്സിന്‍റെ സഹായം തേടുകയായിരുന്നു. കല്ലിയൂർനെടിഞ്ഞിൽ, മാവുവിള, ഷിജ യുടെ വീട്ടിലെ വളർത്തു പൂച്ചയാണ് ഇന്നലെ രാവിലെ വീടിന് സമീപമുള്ള ഒഴിഞ്ഞ പറമ്പിലെ 60 അടിയോളം താഴ്ചയുള്ള കിണറിൽ അകപ്പെട്ടത്.കിണറ്റിൽ നിന്ന് പൂച്ചയുടെ ശബ്‌ദം കേട്ടാണ് വീട്ടുകാർ അപകട വിവരം അറിയുന്നത്.ഷീജയുടെ മകളായ പാർവണ യുടെ പൂച്ചയെ പുറത്തെടുക്കുന്നതിന് പല വഴികളിലൂടെ ശ്രമം നടത്തി. ബക്കറ്റിൽ മീൻ നിക്ഷേപിച്ച് കയർ മുഖേന കിണറ്റിനുള്ളിൽ ഇറക്കിയുള്ള ശ്രമവും പരാജയമടഞ്ഞതോടെ പാർവണയുടെ കരച്ചിലിന്‍റെ ശക്തിയും കൂടി. ഒടുവിൽ തന്‍റെ ഓമനപ്പൂച്ചയെ രക്ഷിക്കാൻ കിണറ്റിലിറങ്ങാനുള്ള ശ്രമവും നടത്തിയെങ്കിലും അയൽവാസികൾ തടഞ്ഞു. കുട്ടിയുടെ വിഷമം കണ്ട അയൽവാസികൾ ഉച്ചയോടെ വിഴിഞ്ഞം ഫയർ ആൻഡ് റെസ്ക്യൂ സേനയുടെ സഹായം തേടി. സേന സ്ഥലത്ത് എത്തി കുട്ടിയെ സമാധാനിപ്പിച്ച ശേഷം ആഴകൂടുതലും വായു സഞ്ചാരവുമില്ലാത്ത കിണറ്റിൽ കരയിൽ നിന്നു കൊണ്ട് തന്നെ പ്രതേകം തയാറാക്കിയ റോപ്പും സ്റ്റീൽറാഡും ഉപയോഗിച്ച് പൂച്ചയെ കരയിലെത്തിച്ചു. പൂച്ച ജീവനോടെ കരയ്ക്ക് എത്തിയപ്പോഴാണ് പാർവണയ്ക്ക് സമാധാനമായത്. ഗ്രേഡ് എഎസ്ടിഒ അലി അക്ബറിന്‍റെ നേതൃത്വത്തിൽ ഫയർ ആൻഡ് റെസ്ക്യൂ ഓഫീസർമാരായ സന്തോഷ് കുമാർ, അനുരാജ്, സാജൻ,ഹോം ഗാർഡ് വിനോദ്എന്നിവരാണ് രക്ഷാപ്രവർത്തനം നടത്തിയത്.

നെയ്യാർ വലതുകര കനാലിലെ ബണ്ട് തകർന്നു

മാറനല്ലൂർ : നെയ്യാറിലെ വലതുകര കനാൽ കടന്നുപോകുന്ന കൂവളശേരിക്കു സമീപം ബണ്ട് തകർന്നു. രണ്ടുദിവസങ്ങൾക്കു മുമ്പാണ് മണ്ണിടിച്ചിലുണ്ടായത്. കനാലിന്‍റെ വശങ്ങളിൽ കോൺക്രീറ്റ് ചെയ്ത് നവീകരിക്കാത്തതിനെത്തുടർന്ന് വെള്ളം തുറന്നുവിട്ടതിനുശേഷം ബണ്ടിൽ ചോർച്ചയുണ്ടായിരുന്നതായി നാട്ടുകാർ പറയുന്നു. കനാലിനു വശത്തെ വീടുകൾ വെള്ളപ്പൊക്ക ഭീഷണിയിലാണ്.അടുത്തിടെ കനാൽ ബണ്ടിന്‍റെ വശങ്ങൾ അങ്ങിങ്ങ് മാത്രമാണ് നവീകരിച്ചത്. അപകടസാധ്യത കൂടുതലുള്ള മേഖലകളിൽ പലയിടത്തും കോൺക്രീറ്റ് ചെയ്തിട്ടില്ലെന്നും നാട്ടുകാർ പറഞ്ഞു. നാട്ടുകാർ വിവരം നൽകിയതിനെ ത്തുടർന്ന് ജലസേചനവകുപ്പ് അധികൃതർ വന്ന് പരിശോധന നടത്തി. വേനൽ മഴ കനത്താൽ ശക്തമായ മണ്ണിടിച്ചിലുണ്ടാകാൻ സാധ്യതയുണ്ടെന്നാണ് നാട്ടുകാർ പറയുന്നത്. അതിനിടെ കഴിഞ്ഞ നാല് വർഷമായി തകർന്നു കിടക്കുന്ന മണ്ണടിക്കോണം കനാൽ നവീകരിക്കാനുള്ള നീക്കം നടക്കുന്നുമില്ല. ഇപ്പോൾ തന്നെ കാനൽ പൂർണമായും ഇടിഞ്ഞ് താണ അവസ്ഥയിലാണ്.

തൃക്കണ്ണാപുരത്ത് ചതുപ്പുനിലത്ത് തീപിടിത്തം

പേരൂര്‍ക്കട: തൃക്കണ്ണാപുരത്ത് ചതുപ്പുനിലത്ത് കൂടിക്കിടന്ന മൂന്നുലോഡ് ചവറുകള്‍ക്ക് തീപിടിച്ചു. ആറാംമട പൗള്‍ട്രിഫാമിനടുത്തുള്ള ചതുപ്പുനിലത്തുകിടന്ന ചവറിനാണ് തീ പിടിച്ചത്. ഇന്നലെ വൈകുന്നേരം നാലിനാണ് സംഭവം. ടൈല്‍സ്, ക്ലോസറ്റ്, മള്‍ട്ടി വുഡ്, മരപ്പൊടി, പ്ലാസ്റ്റിക്കുകള്‍, പേപ്പര്‍ വേസ്റ്റുകള്‍ എന്നിവയ്ക്കാണ് തീപിടിച്ചത്. തിരുവനന്തപുരം നിലയത്തില്‍ നിന്ന് സീനിയര്‍ ഫയര്‍ ആൻഡ് റസ്‌ക്യു ഓഫീസര്‍ സജിയുടെ നേതൃത്വത്തില്‍ ഫയര്‍ആൻഡ് റസ്‌ക്യു ഓഫീസര്‍മാരായ നാസിം, രാഹുല്‍, ഷാജന്‍, സൈമണ്‍, ഷമീര്‍, ഹോം ഗാര്‍ഡ് വിപിന്‍, ഡ്രൈവര്‍മാരായ ബിജു, വിജിന്‍ എന്നിവരുടെ നേതൃത്വത്തില്‍ രണ്ടു യൂണിറ്റും കാട്ടാക്കടയില്‍ നിന്ന് ഒരു യൂണിറ്റും എത്തി രണ്ടുമണിക്കൂര്‍ പരിശ്രമിച്ചാണ് തീ കെടുത്തിയത്. കഴിഞ്ഞദിവസം ഒരു കല്യാണവീട്ടില്‍ നിന്നുള്ള മാലിന്യം ഇവിടെ കൊണ്ടുവന്ന് കത്തിച്ചിരുന്നു. അതില്‍നിന്നാണ് തീപടര്‍ന്നതെന്നാണ് സംശയം.

പീഡനക്കേസ്:‍ യുവാവ് പിടിയിൽ

മെഡിക്കല്‍കോളജ്: പീഡനക്കേസില്‍ യുവാവിനെ മെഡിക്കല്‍കോളജ് പോലീസ് അറസ്റ്റുചെയ്തു. എറണാകുളം ആലങ്കാട് വാരാപ്പുഴ പാട്ടശ്ശേരിമുക്ക് ജംഗ്ഷനു സമീപം താമസിക്കുന്ന ജിനു (40) ആണ് അറസ്റ്റിലായത്. 2023 ജൂണ്‍ മാസത്തിലായിരുന്നു കേസിനാസ്പദമായ സംഭവം. കഴക്കൂട്ടം സ്വദേശിനിയായ 31-കാരിയാണ് പീഡനത്തിന് ഇരയായത്. യുവതിയുടെ പരാതിയെത്തുടര്‍ന്ന് നടത്തിയ അന്വേഷണത്തിനൊടുവില്‍ കഴക്കൂട്ടം എസി ജെ.കെ ദിനിലിന്‍റെ നിര്‍ദേശപ്രകാരം മെഡിക്കല്‍കോളജ് സിഐ ബി.എം.ഷാഫി, എസ്ഐ വിഷ്ണു, സിപിഒമാരായ വിനോദ്, ബല്‍റാം, ഡ്രൈവര്‍ ഷിജു എന്നിവര്‍ ചേര്‍ന്നാണ് പ്രതിയെ എറണാകുളത്തുനിന്ന് പിടികൂടിയത്. ഇയാളെ ഇന്ന് കോടതിയില്‍ ഹാജരാക്കും.

ഭീകരതയ്ക്കെതിരേ പ്രതിജ്ഞ ചൊല്ലി

നെടുമങ്ങാട് : ജമ്മു കാഷ്മീരിലെ പഹല്‍ഗാമില്‍ ഉണ്ടായ ഭീകരാക്രമണത്തില്‍ മരണമടഞ്ഞവരോടുള്ള ആദരസൂചകമായി നെടുമങ്ങാട് ബ്ലോക്ക് കോണ്‍ഗ്രസ് കമ്മറ്റിയുടെ നേതൃത്വത്തില്‍ മെഴുകുതിരി തെളിയിച്ചു. തുടർന്ന് പുഷ്പാർച്ചനയും ഭീകരതയ്ക്കെതിരേയുള്ള പ്രതിജ്ഞയും ചൊല്ലി. ബ്ലോക്ക്‌ പ്രസിഡന്‍റ് ടി.അർജുനന്‍റെ അധ്യക്ഷതയിൽ അനുശോചനം രേഖപ്പെടുത്തിക്കൊണ്ട് ഡിസിസി ജനറൽ സെക്രട്ടറി അഡ്വ.എൻ. ബാജി, യുഡിഎഫ് ചെയർമാൻ വട്ടപ്പാറ ചന്ദ്രൻ,ഡിസിസി ജനറൽ സെക്രട്ടറി തേക്കട അനിൽകുമാർ, വി.എസ്.ശശി,എ.റഹീം, രാജ്മോഹനൻ, വണ്ട സതി, ചന്ദ്രകുമാർ, കറ്റുവെട്ടി ചന്ദ്രൻ , നെട്ടയിൽ ഷിനു, രഘു തുടങ്ങിയവർ പങ്കെടുത്തു. നെടുമങ്ങാട് : ജമ്മു കാഷ്മീരിലെ പഹല്‍ഗാമില്‍ നടന്ന തീവ്രവാദി ആക്രമണത്തിൽ മരണപ്പെട്ടവർക്ക് ആദരാഞ്ജലികൾ അർപ്പിച്ചുകൊണ്ട് മൂഴി മണ്ഡലം കോൺഗ്രസ് കമ്മിറ്റിയുടെ നേതൃത്വത്തിൽ മൂഴി ജംഗ്ഷനിൽ ദുഃഖസൂചകമായി ദീപം തെളിയിക്കുകയും അനുശോചന യോഗം നടത്തുകയും തീവ്രവാദത്തിനെതിരേ പ്രതിജ്ഞ എടുക്കുകയും ചെയ്തു. മൂഴിമണ്ഡലം കോൺഗ്രസ് കമ്മിറ്റി പ്രസിഡന്‍റ് വേട്ടം പള്ളി സനൽ, കെ. ശേഖരൻ, ഇര്യനാട് രാമചന്ദ്രൻ, വേങ്കവിള സുരേഷ്,കല്ലിയോട് ഭുവനേന്ദ്രൻ,ഷമി മൂഴി തുടങ്ങിയവർ പ്രസംഗിച്ചു.

പട്ടാരത്ത് പൊങ്കാല ഉത്സവം

നേമം : പാപ്പനംകോട് പട്ടാരത്ത് ശ്രീ ചാമുണ്ഡേശ്വരി ക്ഷേത്രത്തിലെ പുന:പ്രതിഷ്ഠാ വാർഷികവും പൊങ്കാല മഹോത്സവും നാളെ മുതൽ വിവിധ പരിപാടികളോടുകൂടി ആഘോഷിക്കും. നാളെ രാവിലെ 11ന് മേൽ തൃക്കൊടിയേറ്റ്. ഉച്ചയ്ക്ക് 12.30ന് അന്നദാനം. രാത്രി 7.30 ന് സംഗീത കച്ചേരി . 28ന് രാവിലെ 10.30ന് ഉച്ചപുജ, വൈകുന്നേരം 6.30 ന് കാവടി കാപ്പ കെട്ട്, രാത്രി എട്ടിന് ഡാൻസ് 9.30ന് നൃത്തനൃത്യങ്ങൾ, 29ന് രാത്രി എട്ടിന് വിശേഷാൽ പുജ, 9.30ന് ഭക്തിഗാനസുധ, നൃത്തനൃത്യങ്ങൾ. 30ന് വൈകുന്നേരം 6.30ന് ഭജൻസ്, രാത്രി ഒന്പതിന് ആട്ടം-2025 അവതരണം, ചാലക്കുടി പ്രസീത. മേയ് ഒന്നിന് ഉച്ചയ്ക്ക് രണ്ടിന് കാവടി ഘോഷയാത്ര, രാത്രി എട്ടിന് അഗ്നി കാവടി. രണ്ടിന് ഉച്ചയ്ക്ക്. 12.30 ന് അന്നദാനം. വൈകുന്നേരം 6.30ന് ഭക്തിഗാനസുധ, രാത്രി ഒന്പതിന് ഗാനമേള. മൂന്നിന് വൈകുന്നേരം 6.30ന് ആനപ്പുറത്ത് എഴുന്നള്ളത്ത്. നാലിന് രാത്രി എട്ടിന് തിരുവാതിര, ഒന്പതിന് ഡാൻസ്. അഞ്ചിന് രാവിലെ 9.30ന് ആയില്യപൂജ നാഗരൂട്ട്, ഉച്ചയ്ക്ക് 12.30ന് അന്നദാനം, രാത്രി ഒന്പതിന് പള്ളിവേട്ട. ആറിന് രാവിലെ 10.30ന് പൊങ്കാല, ഉച്ചയ്ക്ക് 1.30ന് വട്ടി താലപ്പൊലി, രണ്ടിന് പൊങ്കാല നിവേദ്യം, രാത്രി ഏഴിന് ആറാട്ട് പുറപ്പാട്, 10ന് ആറാട്ട് തിരിച്ച് വരവ്. തുടർന്ന് കൊടിയിറക്കം പുലർച്ചെ ഒന്നിന് ഗുരുസി.

സെക്യൂരിറ്റി ജീവനക്കാരനെ മര്‍ദിച്ച കേസ്:‍ രണ്ടുപേര്‍കൂടി അറസ്റ്റില്‍

തിരുവല്ലം: പാച്ചല്ലൂര്‍ വാഴമുട്ടത്തിനു സമീപത്തുളള ബാറില്‍ അതിക്രമിച്ചുകയറി സെക്യൂരിറ്റി ജീവനക്കാരനെ മര്‍ദിച്ച കേസിലെ രണ്ടുപേര്‍കൂടി തിരുവല്ലം പോലീസിന്‍റെ പിടിയിലായി. വള്ളക്കടവ് സ്വദേശിയും നിലവില്‍ പുഞ്ചക്കരിയില്‍ താമസക്കാരനുമായ ഷാരൂഖ് ഖാന്‍ (27) , കല്ലിയൂര്‍ കാക്കാമൂല സ്വദേശി അഖില്‍ ചന്ദ്രന്‍ (28) എന്നിവരാണ് പിടിയിലായത്. മാര്‍ച്ച് 22ന് പുലർച്ചേ 2.30 ഓടുകൂടി ബാറിലെത്തിയ പ്രതികള്‍ തങ്ങള്‍ക്ക് മദ്യം വേണമെന്ന് ആവശ്യപ്പെട്ട് ബാറിനുളളില്‍ അതിക്രമിച്ച് കയറുകയും തടയാന്‍ ശ്രമിച്ച സെക്യൂരിറ്റി ജീവനക്കാരനായ മൊയ്ദീന്‍ അടിമയെ ക്രൂരമായി മര്‍ദിക്കുകയായിരുന്നു. സമീപത്ത് ചാരിവെച്ചിരുന്ന ഫ്ലക്‌സ് ബോര്‍ഡില്‍ നിന്നും പട്ടിക വലിച്ചെടുത്ത് ആറോളം പ്രതികള്‍ ചേര്‍ന്ന് മര്‍ദിക്കുകയായിരുന്നതായി പോലീസ് പറഞ്ഞു. മര്‍ദനത്തില്‍ സെക്യൂരിറ്റി ജീവനക്കാരന് സാരമായി പരിക്കേറ്റ ു. ബാറിലെത്തുമ്പോള്‍ പ്രതികളില്‍ ഒരാള്‍ മദ്യപിച്ചിരുന്നതായി പോലീസ് പറഞ്ഞു. കേസിലെ മൂന്ന് പേരെ പോലീസ് നേരത്തെ പിടികൂടിയിരുന്നു. ഒരാളെ ഇനിയും പിടികൂടാനുണ്ട്. തിരുവല്ലം എസ്എച്ച്ഒ പ്രദീപിന്‍റെ നേതൃത്വത്തില്‍ എസ്ഐ മാരായ പ്രസന്നകുമാര്‍, നൗഷാദ്, സിപിഒ മാരായ വിജേഷ് , കെ.കെ.ഷിജു എന്നവരുള്‍പ്പെട്ട പോലീസ് സംഘമാണ് പ്രതികളെ അറസ്റ്റ് ചെയ്തത്. കോടതിയില്‍ ഹാജരാക്കിയ പ്രതികളെ റിമാന്‍ഡ് ചെയ്തു.

സ്റ്റാറായി ഗുദാദത്ത് മാങ്ങ...

നെടുമങ്ങാട് : മൂന്ന് കിലോയിലധികം തൂക്കം ഉള്ള ഗുദാദത്ത് മാങ്ങ വേറിട്ട കാഴ്ചയാകുന്നു. വട്ടപ്പാറ മരുതൂര്‍ ആദിത്യയില്‍ അജിത്തിന്‍റെ വീട്ടുമുറ്റത്തെ ഗുദാദത്ത് എന്നയിനം മാവിനു പേര് പോലെ വൈവിധ്യമായ ചരിത്രവുമുണ്ട്. വർഷങ്ങൾക്കു മുൻപ് കോഴിക്കോട് ബീച്ച് ഫയര്‍ സ്റ്റേഷന്‍ ഇരിക്കുന്ന പ്രദേശം ഫ്രഞ്ചുകാരുടെ അധീനതയിലുള്ള പ്രദേശമായിരുന്നു. ആക്കാലത്തു ഫ്രഞ്ചുകാർ കോഴിക്കോട് ബീച്ച് ഫയര്‍ സ്റ്റേഷന്‍ പരിസരത്ത് കൊണ്ടു നട്ട ഗുദാദത്ത് മാവ് എല്ലാവരും അത്ഭുതത്തോടെയാണ് കണ്ടിരുന്നത്. ആ മാവില്‍ ആദ്യകാലത്തൊക്കെ കായ്ച്ചിരുന്ന മാങ്ങക്ക് അഞ്ച് കിലോവരെ ഭാരമുണ്ടായിരുന്നു. എന്നാൽ പിന്നീട് പുതിയ തൈകള്‍ ഉണ്ടാക്കാനുള്ള എല്ലാ ശ്രമങ്ങളും പരാജയപ്പെടുകയായിരിന്നു.കോഴിക്കോട് ഫയർ ഫോഴ്‌സ് സ്റ്റേഷനിൽ ജീവനക്കാരനായിരുന്ന അജിത്ത് ഗുദാദത്ത് മാങ്ങ നട്ടുപിടിപ്പിക്കാനായി കാര്‍ഷിക ഗവേഷണ സ്ഥാപനങ്ങളുമയി നിരന്തരം ബന്ധപ്പെട്ടു. ഒടുവില്‍ മലപ്പുറത്തെ ആനക്കയം കാര്‍ഷിക ഓഫീസില്‍ നിന്നും ഉദ്യോഗസ്ഥര്‍ കോഴിക്കോട് വന്നു. അവര്‍ മാവിന്‍റെ ചില്ലകള്‍ വെട്ടി കൊണ്ടുപോയി. മാസങ്ങള്‍ കഴിഞ്ഞ് അവര്‍ 40 ഓളം തൈകള്‍ സ്റ്റേഷനില്‍ എത്തിച്ചു. സഹപ്രവർ ത്ത ക രെല്ലാം വീടുകളില്‍ കൊണ്ടുപോയി നട്ടുവളര്‍ത്തിയെങ്കിലും ഒന്നുപോലും വളര്‍ന്ന് കായ്ച്ചില്ല. അജിത് വീട്ടിൽ കൊണ്ട് വന്നു നട്ട മാവ് വർഷങ്ങൾക്കു ശേഷം കായ്ച്ചു. 100ഓളം ചെറിയ മാങ്ങ ഉണ്ടായിരുന്നെങ്കിലും 11 മാങ്ങ മാത്രമാണ് ഇപ്പോള്‍ പൂര്‍ണ വളര്‍ച്ചയിലെത്തിയത്. ബാക്കിയെല്ലാം പൊഴിഞ്ഞു പോയി. ഗുദാദത്ത് മാങ്ങ കാണാൻ അജിത്തിന്‍റെ വീട്ടിൽ സന്ദർശകർ ഏറുകയാണ്.

മുതലപ്പൊഴിയിലെ പൊഴി മുറിച്ചു

തിരുവനന്തപുരം : നാലു ദിവസത്തെ കഠിന പ്രയത്നത്തെ തുടർന്ന് മുതലപ്പൊഴിയിലെ പൊഴി ഇന്നലെ വൈകുന്നേരത്തോടെ മുറിച്ചു. പൊഴിമുഖത്ത് അടിഞ്ഞു കൂടിയ മണൽ നീക്കം ചെയ്യാൻ കണ്ണൂർ അഴീക്കൽ തുറമുഖത്തു നിന്നും എത്തിച്ച കൂറ്റൻ ഡ്രഡ്ജർ ഇന്നലെ രാവിലെ മുതലപ്പൊഴിയിൽ എത്തി. ഡ്രഡ്ജെറിന് പൊഴിമുഖത്തേക്ക് കടന്നു വരാനുള്ള വഴി ഒരുക്കുകയാണ് തൊഴിലാളികൾ. 13 മീറ്റർ വീതിയിലും രണ്ടര മീറ്റർ ആഴത്തിലും മണൽ നീക്കം നടത്തിയാൽ മാത്രമേ ചന്ദ്രഗിരി ഡ്രഡ്ജ്റിന് പൊഴി മുഖത്തേക്ക് പ്രവേശിക്കാൻ സാധിക്കുകയുള്ളു. നാളെ പുലർച്ചെയോടെ ഇത് പൊഴി മുഖത്തേക്ക് പ്രവേശിക്കും. അഞ്ചു ലക്ഷം കുബിക് മീറ്റർ മണലാണ് പൊഴി മുഖത്ത് നിന്നും നീക്കം ചെയ്യാനുള്ളത്. ചന്ദ്ര ഗിരി ഡ്രഡ്ജറിന് മണിക്കൂറിൽ 400 കുബിക് മീറ്റർ മണ്ണ് നീക്കം ചെയ്യാൻ ശേഷിയുണ്ട്. മണൽ അടിഞ്ഞു കൂടിയത് കാരണം മൂന്നുറിൽ അധികം ബോട്ടുകളും വള്ളങ്ങളും മത്സ്യ ബന്ധനത്തിന് പോകാൻ സാധിക്കാത്ത അവസ്ഥ വന്നതോടെയാണ് മത്സ്യ ത്തൊഴിലാളികൾ പ്രതിഷേധവുമായി രംഗത്തെത്തിയത്. സമവായ ചർച്ചകൾ നടത്തിയതിന്‍റെ ഫലമായാണ് മണ്ണ് നീക്കം നടത്താനും പൊഴി മുറിക്കാനും ധാരണയായത്. നീക്കം ചെയ്യുന്ന മണ്ണ് വീണ്ടും അടിഞ്ഞു കൂടാതെ നോക്കണമെന്നും അശാശ്രീയമായി മണൽ നീക്കം നടത്തരുതെന്നും തങ്ങൾ മുന്നോട്ട് വച്ചു അംഗീകരിച്ച വിധത്തിൽ പ്രവർത്തന ങ്ങൾ നടത്തണമെന്നും സമരസമിതി ഇന്നലെയും തുറമുഖ വകുപ്പ് അധികൃതരോട് പറഞ്ഞു. മേയ് 15 നുള്ളിൽ മുതല പൊഴിയിലെ മണ്ണ് പൂർണമായി മാറ്റി പഴയ സ്ഥിതിയിൽ ആക്കുമെന്നാണ് തുറമുഖ വകുപ്പ് അധികൃതർ പറയുന്നത്. അതേ സമയം ചന്ദ്രഗിരി ഡ്രഡ്ജർ ഉപയോഗിച്ചുള്ള മണൽ നീക്കം അടുത്ത ദിവസം തുടങ്ങിയേക്കും.

ലഹരിവിരുദ്ധ കൂട്ടയോട്ടം ഇന്ന്

തിരുവനന്തപുരം: ലഹരിക്കും ഹിംസയ്ക്കും എതിരേയുള്ള ബോധവത്കരണ നടപടികളുടെ ഭാഗമായി ലഹരി വിരുദ്ധ കൂട്ടയോട്ടം ഇന്നു വൈകുന്നേരം നടക്കും. പാളയം രക്തസാക്ഷി മണ്ഡപത്തിൽ നിന്ന് ഇന്നു വൈകുന്നേരം 5.30ന് ആരംഭിക്കുന്ന കൂട്ടയോട്ടം മാനവീയം വീഥിയിൽ ലഹരി വിരുദ്ധ പ്രതിജ്ഞയോടെ സമാപിക്കും. അഭിജിത് ഫൗണ്ടേ ഷന്‍റെ നേതൃത്വത്തിൽ നടക്കുന്ന പരിപാടിയിൽ എഡിജിപി എസ്. ശ്രീജിത്ത്, ഫൗണ്ടേ ഷൻ ചെയർമാൻ ഡോ. ജോർജ് ഓണക്കൂർ, ജസ്റ്റിസ് എം.ആർ.ഹരിഹരൻനായർ, പാളയം ഇമാം ഡോ. വി.പി. സുഹൈബ് മൗലവി തുടങ്ങിയവർ പങ്കെടുക്കും. സമാപന സമ്മേളനം ശശി തരൂർ എംപി ഉദ്ഘാടനം ചെയ്യും.

കാര്‍ഷിക വികസനസമിതി യോഗം നടത്തി

മെഡിക്കല്‍കോളജ്: ഉള്ളൂര്‍ കൃഷിഭവന്‍ സെമിനാര്‍ ഹാളില്‍ കാര്‍ഷിക വികസനസമിതി യോഗം നടത്തി. കൃഷി ഡപ്യൂട്ടി ഡയറക്‌ടര്‍ ദീപ ഉദ്ഘാടനം ചെയ്തു. കാര്‍ഷിക മേഖലയിലെ കൃഷിക്കൂട്ടങ്ങള്‍ ഉള്‍പ്പെടെയുള്ള കര്‍ഷക കൂട്ടായ്മകളെ പ്രോത്സാഹിപ്പിച്ച് പച്ചക്കറി ഉത്പാദന മേഖലയില്‍ നേട്ടം കൈവരിക്കുന്നതിനുവേണ്ടിയാണ് യോഗം സംഘടിപ്പിച്ചത്. കൃഷി ഓഫീസര്‍ സി. സ്വപ്‌ന, ഐസിഡിഎസ്, കുടുംബശ്രീ, വിദ്യാഭ്യാസ സ്ഥാപനങ്ങള്‍, സ്വകാര്യ സ്ഥാപനങ്ങള്‍, റസി. അസോസിയേഷനുകള്‍, സാംസ്‌കാരിക സംഘടനകള്‍ എന്നിവരുടെ പ്രതിനിധികള്‍ യോഗത്തില്‍ പങ്കെടുത്തു.

വഞ്ചിയൂര്‍ കോടതിക്ക് വീണ്ടും വ്യാജ ബോംബ് ഭീഷണി

പേരൂര്‍ക്കട: വഞ്ചിയൂര്‍ കോടതിയില്‍ ബോംബ് വച്ചിട്ടുണ്ടെന്ന് വീണ്ടും വ്യാജ ഭീഷണി. ഇന്നലെ ഉച്ചതിരിഞ്ഞ് 1.30നാണ് കോടതിയുടെ ഔദ്യോഗിക മെയിലില്‍ വ്യാജ ബോംബ് ഭീഷണി എത്തിയത്. വിവരത്തെ തുടര്‍ന്ന് ബോംബ് സ്‌ക്വാഡും ഡോഗ് സ്‌ക്വാഡും വഞ്ചിയൂര്‍ സിഐ എച്ച്.എസ് ഷാനിഫിന്‍റെ നേതൃത്വത്തിലുള്ള പോലീസും പരിശോധന നടത്തി. ഏകദേശം മൂന്നുമണിക്കൂര്‍ നീണ്ട പരിശോധന വൈകുന്നേരം 4.30നാണ് അവസാനിച്ചത്. പരിശോധനയില്‍ അസ്വാഭാവികമായി ഒന്നും കണ്ടെത്താനായില്ല. ഏപ്രില്‍ 15ന് വൈകുന്നേരം മൂന്നിനും സമാനമായ രീതിയില്‍ കോടതിയുടെ ഔദ്യോഗിക മെയിലില്‍ വ്യാജ ബോംബ് ഭീഷണി എത്തിയിരുന്നു. അതിന്‍റെ അന്വേഷണം സൈബര്‍ സെല്‍ ടീം നടത്തി വരുന്നതിനിടെയാണ് വീണ്ടും വ്യാജ സന്ദേശം എത്തിയത്. രണ്ടുതവണയും വ്യത്യസ്ത മെയില്‍ ഐഡികളില്‍ നിന്നാണ് സന്ദേശം എത്തിയിരിക്കുന്നത്.

എമ്മാവൂസ് പള്ളിയിൽ തിരുനാളിനു കൊടിയേറി

തിരുവനന്തപുരം: ശ്രീകാര്യം എമ്മാവൂസ് സെന്‍റ് ജോസഫ്സ് പള്ളിയിൽ വിശുദ്ധ യൗസേപ്പ് പിതാവിന്‍റെ തിരുനാളിനു കൊടിയേറി. തിരുവനന്തപുരം ലൂർദ് ഫൊറോന വികാരി ഫാ. സോണി തെക്കേക്കരയാണു കൊടി ഉയർത്തിയത്. തുടർന്ന് വിശുദ്ധ കുർബാനയും നൊവേനയും ലദീഞ്ഞും നടന്നു. മേയ് നാലിനാണ് പ്രധാന തിരുനാൾ. ഇന്നു രാവിലെ എട്ടിനു വിശുദ്ധ കുർബാനയ്ക്കൊപ്പം കുട്ടികളുടെ ആഘോഷമായ ദിവ്യകാരുണ്യ സ്വീകരണവും നടക്കും. വൈകുന്നേരം 6.30 ന് വിശുദ്ധ കുർബാന, നൊവേന, ലദീഞ്ഞ്. നാളെ രാവിലെ 6.30 നും വൈകുന്നേരം 5.30 നും വിശുദ്ധ കുർബാന. വൈകുന്നേരം നൊവേനയും ലദീഞ്ഞും ഉണ്ടാകും. 28 മുതൽ മേയ് മൂന്നു വരെ വൈകുന്നേരം ആറിനു ജപമാല, 6.30 ന് വിശുദ്ധ കുർബാന, നൊവേന, ലദീഞ്ഞ്. പ്രധാന തിരുനാൾ ദിനമായ മേയ് നാലിന് രാവിലെ എട്ടിനു വിശുദ്ധ കുർബാന. വൈകുന്നേരം അഞ്ചിന് ഫാ. അനീഷ് പുളിക്കലിന്‍റെ മുഖ്യകാർമികത്വത്തിൽ ആഘോഷമായ തിരുനാൾ കുർബാന. 7.30 ന് പ്രദക്ഷിണം. തുടർന്ന് സ്നേഹവിരുന്ന്. മരിച്ചവരുടെ ഓർമദിനമായ മേയ് അഞ്ചിന് രാവിലെ 6.30 ന് വിശുദ്ധ കുർബാനയും തുടർന്ന് സെമിത്തേരി സന്ദർശനവും ഉണ്ട ാകുമെന്നു വികാരി ഫാ. സെബാസ്റ്റ്യൻ മുട്ടംതൊട്ടിൽ എംസിബിഎസ് അറിയിച്ചു. ഫ്രാൻസീസ് മാർപാപ്പയുടെ വിയോഗത്തിന്‍റെ പശ്ചാത്തലത്തിൽ ആഘോഷങ്ങൾ പൂർണമായി ഒഴിവാക്കിയാണ് തിരുനാൾ നടത്തുന്നത്.

പൊങ്കാലയ്ക്കെത്തിയ വയോധികയുടെ സ്വർണമാല കവർന്നതായി പരാതി

കാട്ടാക്കട: പൊങ്കാല അർപ്പിക്കാൻ എത്തിയ വയോധികയുടെ സ്വർണ മാല കവർന്നതായി പരാതി. കാട്ടാക്കട മുടിപ്പുര ഭദ്രകാളി ദേവി ക്ഷേത്രത്തിൽ പൊങ്കാല അർപ്പിക്കാൻ എത്തിയ വയോധികയുടെ സ്വർണമാലയാണ് കവർന്നത്.കാട്ടാക്കട അഞ്ചുതെങ്ങിൻ മൂട് മണ്ണാംകോണം സേജൽ ഭവനിൽ ലീലാകുമാരി (65)ന്‍റെ നാലേകാൽ പവൻ സ്വർണമാലയാണ് കഴിഞ്ഞദിവസം രാവിലെ പൊട്ടിച്ചെടുത്തത്. പണ്ടാര അടുപ്പിൽ തീ പകരുന്നതിന് തൊട്ട് മുമ്പാണ് സംഭവം. ലീലകുമാരിയും മക്കളായ ബിന്ദു ,സൗമ്യ എന്നിവരുമായാണ് പൊങ്കാല അർപ്പിക്കാൻ എത്തിയത്.ശേഷം ലീലകുമാരി തൊഴാൻ പോയ സമയം തിരക്ക് കൂടുതൽ ആയതിനാൽ തിരികെ വരുന്നതിനിടെയാണ് മാല പൊട്ടിച്ചത്. മക്കളുടെ അടുത്ത് എത്തിയപ്പോഴാണ് മാല നഷ്‌ടപ്പെട്ടെന്ന് മനസിലായത്. തിരിക്കിനിടയിലാവാം മാല നഷ്‌‌ടപ്പെട്ടതെന്ന് ലീല കുമാരി പറഞ്ഞു. സംഭവം നടന്ന ഉടനെ ക്ഷേത്ര ഭാരവാഹികളെ അറിയിച്ചു. തുടർന്ന് പോലീസിലും അറിയിച്ചു. പോലീസ് സിസിടിവി ദൃശ്യങ്ങൾ ഉൾപ്പെടെ പരിശോധിച്ചു വരികയാണ്. ലീലാ കുമരിയുടെ മൊഴി രേഖപ്പെടുത്തി കാട്ടാക്കട പോലീസ് കേസെടുത്തു.

കൂലി വർധന തടഞ്ഞു ; എൻഎഫ്എസ്എ തൊഴിലാളികൾ സമരത്തിലേക്ക്

തിരുവനന്തപുരം : റേഷൻ വിതരണവുമായി ബന്ധപ്പെട്ട് സിവിൽ സപ്ലൈസ്, എൻഎഫ്എസ്എ ഗോഡൗണുകളിൽ കയറ്റിറക്കു ജോലി ചെയ്യുന്ന തൊഴിലാളികളുടെ കൂലി വർധന നടപ്പാക്കേണ്ടതില്ലെന്ന് സർക്കാർ തീരുമാനിച്ചതിൽ പ്രതിഷേധിച്ച് സംസ്ഥാന വ്യാപകമായി കയറ്റിറക്കു തൊഴിലാളികൾ സമരമാരംഭിക്കാൻ തിരുവനന്തപുരത്തു ചേർന്ന കേരളാ സ്റ്റേറ്റ് ഹെഡ് ലോഡ് വർക്കേഴ്സ് ഫെഡറേഷൻ (ഐഎൻടിയുസി ) സംസ്ഥാന കമ്മിറ്റി യോഗം തീരുമാനിച്ചതായി ഫെഡറേഷൻ സംസ്ഥാന പ്രസിഡന്‍റ് എ.കെ.ഹഫീസും ജനറൽ സെക്രട്ടറി വി.ആർ.പ്രതാപനും അറിയിച്ചു. ഏകപക്ഷീയമായ സർക്കാർ നടപടികളിൽ പ്രതിഷേധിച്ച് സംസ്ഥാന വ്യാപകമായി ഗോഡൗണുകൾ അടച്ച് പണി മുടക്കി സമരം ചെയ്യാനും ഐഎൻ ടിയുസി തീരുമാനിച്ചതായി ഫെഡറേഷൻ ഭാരവാഹികൾ പറഞ്ഞു. തിരുവനന്തപുരത്ത് ചേർന്ന യോഗത്തിൽ ഫെഡറേഷൻ സംസ്ഥാന പ്രസിഡന്‍റ് എ.കെ. ഹഫീസ് അധ്യക്ഷത വഹിച്ചു. വി.ജെ. ജോസഫ്,വി.ആർ. പ്രതാപൻ, കെ.കെ. ഇബ്രാഹീം കുട്ടി,പി.പി. അലി തുടങ്ങിയവർ പ്രസംഗിച്ചു.

ആര്‍സിസിയിലെ കാത്ത് ലാബ് ഉദ്ഘാടനം; മന്ത്രി റിപ്പോര്‍ട്ട് ആവശ്യപ്പെട്ടു

മെഡിക്കല്‍കോളജ്: തിരുവനന്തപുരം ആര്‍സിസിയിലെ കാത്ത് ലാബ് ഉദ്ഘാടനവുമായി ബന്ധപ്പെട്ട വിവാദത്തില്‍ മന്ത്രി വീണ ജോര്‍ജ് റിപ്പോര്‍ട്ട് ആവശ്യപ്പെട്ടു. ഡിഎംഇ (ഡയറക‌്ടര്‍ ഓഫ് മെഡിക്കല്‍ എജ്യുക്കേഷന്‍) യോടാണ് വിശദമായ റിപ്പോര്‍ട്ട് ആവശ്യപ്പെട്ടിരിക്കുന്നത്. ആര്‍സിസിയിലെ കാത്ത് ലാബിന്‍റെ ഉദ്ഘാടനം കഴിഞ്ഞദിവസം ഡയക്‌ടര്‍ ഡോ. രേഖ എ. നായര്‍ നിര്‍വഹിക്കുകയുണ്ടായി. എന്നാല്‍ ഈ വിവരം മന്ത്രിയെ അറിയിക്കുകയോ എംഎല്‍എ, എംപി, വാര്‍ഡ് കൗണ്‍സിലര്‍ തുടങ്ങിയവരെ പങ്കെടുപ്പിക്കുകയോ ചെയ്തിരുന്നില്ല. ഇതുസംബന്ധിച്ച് ഒരു നോട്ടീസ് പോലും ഇറക്കുകയുണ്ടായില്ല. സംസ്ഥാന സര്‍ക്കാരിന്‍റെ 12 കോടി രൂപ മുതല്‍ മുടക്കിയാണ് പുതിയ കാത്ത് ലാബ് സജ്ജീകരിച്ചത്. മാത്രമല്ല, മന്ത്രിയുടെ ഓഫീസ് ഉദ്ഘാടന പരിപാടി അറിഞ്ഞതോടെ 11ന് നിശ്ചയിച്ചിരുന്ന ഉദ്ഘാടനം നേരത്തെയാക്കി 9.30ന് നടത്തുകയായിരുന്നു. അതിനിടെ ഉദ്ഘാടനം നടത്തിയതായി കാണിച്ച ഫലകം ചിലര്‍ചേര്‍ന്ന് ഇളക്കിമാറ്റിയതും വിവാദമായിരുന്നു. ആര്‍സിസി ഡയറക്‌ടര്‍ സ്വന്തമായി കാത്ത് ലാബ് ഉദ്ഘാടനം നടത്തിയതു സംബന്ധിച്ച് ആര്‍സിസി ഡയറക്‌ടറോടും മന്ത്രി വിശദീകരണം ചോദിച്ചിട്ടുണ്ട്.

ഭാര്യയെ തടിക്കഷണംകൊണ്ട് അടിച്ചയാള്‍ റിമാൻഡിൽ

പേരൂര്‍ക്കട: ഭാര്യയെ തടിക്കഷണംകൊണ്ട് അടിച്ചുപരിക്കേല്‍പ്പിച്ചതിന് ഭര്‍ത്താവിനെ ഫോര്‍ട്ട് പോലീസ് അറസ്റ്റുചെയ്തു. ഈഞ്ചയ്ക്കല്‍ പെരുന്താന്നി പടിഞ്ഞാറ്റേ മുടുമ്പില്‍ പുത്തന്‍വീട്ടില്‍ രഘു (60) ആണ് അറസ്റ്റിലായത്. ബുധനാഴ്ച വൈകുന്നേരം ആറിനാണ് കേസിന്നാസ്പദമായ സംഭവം. മദ്യപിച്ചെത്തിയാണ് രഘു ഭാര്യ വിജയലക്ഷ്മിയെ ആക്രമിച്ചത്. ശാരീരികമായ ഉപദ്രവത്തിനിടെ രഘുവിന്‍റെ അടിയേറ്റ് ഭാര്യയുടെ വാരിയെല്ലുകള്‍ തകര്‍ന്നു. ആശുപത്രിയിലെ ചികിത്സയെത്തുടര്‍ന്ന് ഇവര്‍ ഫോര്‍ട്ട് സ്റ്റേഷനില്‍ പരാതി നല്‍കുകയായിരുന്നു. ഫോര്‍ട്ട് സി.ഐ ശിവകുമാറിന്‍റെ നേതൃത്വത്തില്‍ നടത്തിയ അന്വേഷണത്തിനൊടുവിലാണ് രഘുവിനെ കസ്റ്റഡിയിലെടുത്തത്. ഇയാളെ കോടതിയില്‍ ഹാജരാക്കി റിമാന്‍ഡ് ചെയ്തു.

നോര്‍ക്കയെ കബളിപ്പിച്ച സിനിമാ സംവിധായകന്‍ അറസ്റ്റില്‍

പേരൂര്‍ക്കട: വ്യാജ അറ്റസ്‌റ്റേഷന്‍ സര്‍ട്ടിഫിക്കറ്റ് ഹാജരാക്കി നോര്‍ക്ക റൂട്ട്‌സിനെ കബളിപ്പിച്ച സിനിമാ സംവിധായകനെ കന്‍റോണ്‍മെന്‍റ് സിഐ പ്രജീഷ് ശശി, എസ്ഐമാരായ ജിജുകുമാര്‍, ഗ്രീഷ്മ ചന്ദ്രന്‍ എന്നിവര്‍ ഉള്‍പ്പെട്ട സംഘം അറസ്റ്റുചെയ്തു. പള്ളിക്കല്‍ കാട്ടുപുതുശേരി മൂന്നാംകല്ല് ജംഗ്ഷന്‍ സൈന മന്‍സിലില്‍ അനസ് സൈനുദീന്‍ (37) ആണ് അറസ്റ്റിലായത്. എറണാകുളം നോര്‍ക്ക റൂട്ട്‌സിന്‍റെ സര്‍ട്ടിഫിക്കറ്റ് അറ്റ‌സ്‌റ്റേഷന്‍ സെന്‍ററിലെ ഓതന്‍റിക്കേഷന്‍ ഓഫീസറുടെ സീലും ഒപ്പും വ്യാജമായി നിര്‍മിച്ചാണ് പ്രതി വ്യാജസര്‍ട്ടിഫിക്കറ്റ് ഉണ്ടാക്കിയത്. 2024 ജൂലൈ നാലിനായിരുന്നു കേസിനാസ്പദമായ സംഭവം. കൊല്ലം ആയൂര്‍ സ്വദേശിനിയായ ബി.ടെക്കുകാരിക്കാണ് ഇപ്രകാരം വ്യാജ സര്‍ട്ടിഫിക്കറ്റ് തരപ്പെടുത്തിക്കൊടുക്കുകയും അതു തിരുവനന്തപുരം നോര്‍ക്ക റൂട്ട്‌സില്‍ സമര്‍പ്പിക്കുകയും ചെയ്തത്. യുഎഇ എംബസി അറ്റസ്റ്റേഷനുവേണ്ടി ഇപ്രകാരം വ്യാജ സര്‍ട്ടിഫിക്കറ്റ് സീല്‍ വച്ചു തയാറാക്കി നല്‍കിയതിനായി പ്രതി യുവതിയില്‍ നിന്ന് ഒന്നരലക്ഷം രൂപയാണ് കൈപ്പറ്റിയത്. സംഭവത്തില്‍ ഒന്നാംപ്രതി അടൂര്‍ സ്വദേശി ജി.ആര്‍.പ്രവീണിനെ (35) നേരത്തെ പോലീസ് അറസ്റ്റുചെയ്തിരുന്നു. സിനിമയുടെ തിരക്കഥ, സംവിധാനം എന്നിവ ചെയ്തിട്ടുള്ള അനസ് ഒരു പുതുമുഖ ചിത്രത്തില്‍ നായകനായും അഭിനയിച്ചിട്ടുണ്ട്. പൂജപ്പുരയില്‍ നിന്നാണ് പ്രതിയെ പോലീസ് കസ്റ്റഡിയിലെടുത്തത്. അന്വേഷണസംഘത്തില്‍ സിപിഒമാരായ ഹൈദറുദീന്‍, ബി.രഞ്ജിത്ത്, സുജേഷ്‌കുമാര്‍, എം.ഡി.അനില്‍കുമാര്‍ എന്നിവരും ഉണ്ടായിരുന്നു. പ്രതിയെ കോടതി റിമാന്‍ഡ് ചെയ്തു.

സ്വത്ത് സ്വന്തമാക്കാന്‍ ഭാര്യയെ ഷോക്കടിപ്പിച്ച് കൊന്ന യുവാവിന് ജീവപര്യന്തം

നെയ്യാറ്റിന്‍കര : സ്വത്ത് സ്വന്തമാക്കാന്‍ 52 കാരിയായ ഭാര്യയെ ഷോക്കടിപ്പിച്ച് കൊലപ്പെടുത്തിയ യുവാവായ ഭർത്താവിന് ജീവപര്യന്തം കഠിന തടവ്. നെയ്യാറ്റിൻകര അതിയന്നൂർ അരുൺ നിവാസിൽ അരുണി (32) നെയാണ് ഭാര്യയെ കൊന്ന കുറ്റത്തിന് ജീവപര്യന്തം കഠിന തടവിനും രണ്ട് ലക്ഷം രൂപ പിഴ അടയ്ക്കുന്നതിനുമായി അഡീഷണൽ ജില്ലാ കോടതി ജഡ്ജി എ.എം.ബഷീർ ഉത്തരവായത്. ത്രേസ്യാപുരം പ്ലാങ്കാല പുത്തൻ വീട്ടിൽ ഫിലോമിന മകൾ ശാഖാകുമാരി (52) യാണ് കൊല്ലപ്പെട്ടത്. 2020 ഡിസംബർ 26ന് പുലർച്ചെ 1.30 യ്ക്കാണ് കേസിനാസ്പദമായ കൊലപാതകം നടന്നത്. കൊല്ലപ്പെട്ട ശാഖാകുമാരിയുടെ ഭർത്താവാണ് പ്രതി അരുൺ. വിവാഹം വേണ്ടെന്ന തീരുമാനത്തില്‍ കഴിഞ്ഞ ശാഖാകുമാരി അരുണുമായി പ്രണയത്തിലായി. തിരുവനന്തപുരം നഗരത്തിലെ ചില ആശുപത്രികളിൽ ഇലക്‌ട്രീഷ്യൻ ആയിരുന്നു അരുൺ. വലിയ സ്വത്തിനു ഉടമയായിരുന്നു ശാഖകുമാരി. തന്‍റെ സ്വത്തുകൾക്ക് അവകാശിയായി ഒരു കുഞ്ഞു ജനിക്കണമെന്ന ആഗ്രഹമാണ് പ്രണയത്തിലും പിന്നീട് വിവാഹത്തിലും കലാശിച്ചത്. 50 ലക്ഷം രൂപയും 100 പവൻ സ്വർണവും അരുൺ വിവാഹ പരിതോഷികം ആയി ആവശ്യപ്പെട്ടു. 2020 ഒക്‌ടോബര്‍ 29ന് വിവാഹം നടന്നു. വരന്‍റെ ഭാഗത്തു നിന്നും ഒരു സുഹൃത്ത്‌ മാത്രമേ വിവാഹത്തില്‍ പങ്കെടുത്തുള്ളൂ. വിവാഹം രഹസ്യമായിരിക്കണമെന്നും വിവാഹ ഫോട്ടോ, വീഡിയോ ഒന്നും പുറത്ത് പ്രചരിപ്പിക്കാൻ പാടില്ലായെന്നും പ്രതി നിർബന്ധിച്ചിരുന്നു. എന്നാൽ ശാഖാകുമാരിയുടെ ബന്ധുക്കളിൽ ചിലർ വിവാഹ ഫോട്ടോകള്‍ പുറത്ത് പ്രചരിപ്പിച്ചത് അരുണിനെ വല്ലാതെ ചൊടിപ്പിച്ചു. വിവാഹ ശേഷം അരുൺ ഭാര്യാവീട്ടിൽ തന്നെ താമസിച്ചു. വിവാഹത്തിന് മുന്പേ തന്നെ അരുണ്‍ ധാരാളം പണം കൈക്കലാക്കിയിരുന്നു. ശാഖാകുമാരിയുടെ പണം ഉപയോഗിച്ച് കാറും ബൈക്കും വാങ്ങുകയും ചെയ്തു. ആഡംബര ജീവിതം നയിച്ചുപോന്ന അരുണ്‍ കുട്ടികള്‍ വേണമെന്ന ശാഖാകുമാരിയുടെ ആവശ്യത്തോട് വൈമുഖ്യം കാണിച്ചു. ഇതിനിടയില്‍ അരുണ്‍ സ്വത്ത് മുഴുവനും കൈക്കലാക്കുക എന്ന ലക്ഷ്യത്തോടെ ശാഖാകുമാരിയെ അപായപ്പെടുത്താന്‍ ശ്രമിച്ചു. വീട്ടിൽ ഓവൻ റിപ്പയർ ചെയ്യുന്നതായി ഭാവിച്ച് ശാഖാകുമാരിയുടെ കൈയിൽ ഷോക്ക് അടിപ്പിക്കാൻ ശ്രമം നടത്തി. അന്ന് ശാഖാകുമാരി തലനാരിഴയ്ക്ക് രക്ഷപ്പെട്ടു. ശാഖാകുമാരിയെ തെളിവില്ലാതെ കൊലപെടുത്തുകയും നിയമപരമായ ഭർത്താവ് എന്ന നിലയിൽ സ്വത്തുക്കളുടെ അവകാശിയായി മാറുകയും ചെയ്യുക എന്നതായിരുന്നു അരുണിന്‍റെ ലക്ഷ്യം. ഡിസംബർ 25ന് രാത്രിയിൽ ബന്ധുക്കൾ പിരിഞ്ഞ ശേഷം അരുൺ ഭാര്യയെ കൊല്ലാൻ മുൻകൂട്ടി പദ്ധതിയിട്ടു. പുലർച്ചെ ഒന്നരയോടെ കിടപ്പുമുറിയില്‍ ശാഖാകുമാരിയുടെ വായും മുഖവും ബലം പ്രയോഗിച്ച് അമർത്തി ശ്വാസം മുട്ടിച്ച് ബോധം കെടുത്തി. തുടര്‍ന്ന് ശരീരം വലിച്ചിഴച്ച് വീടിന്‍റെ ഹാളില്‍ കൊണ്ടുചെന്ന് കിടത്തി. മുൻകൂട്ടി കരുതിയിരുന്ന പ്ലഗും വയറും ഉപയോഗിച്ച് സമീപത്തെ ഷോകെയ്‌സിലെ ഇലക്‌ട്രിക് സോക്കറ്റിൽ വയറ് ഘടിപ്പിച്ച് ശാഖാകുമാരിയുടെ വലതു കൈത്തണ്ടയിലും മൂക്കിലും കൊടുത്തു വൈദ്യുതി കടത്തി വിട്ട് കൊലപ്പെടുത്തി. പിന്നീട് കേടായ സീരിയൽ ബൾബ് സെറ്റ് ശാഖാകുമാരിയുടെ മൃതദേഹത്തിൽ വിതറിയിട്ടു. പുലർച്ചെ ആറോടെ അരുൺ തന്നെ വീടിനു സമീപത്തെ വീടുകളിലുള്ളവരെ പോയി വിളിച്ചു കൊണ്ടുവന്നു. ശാഖാകുമാരിയുടെ മൃതദേഹം കാണിച്ചു. അവരുടെ നിർദേശം അനുസരിച്ച് സ്വിച്ച് ഓഫ് ചെയ്ത് മൃതദേഹത്തിൽ നിന്നും അരുൺ വയറുകൾ മാറ്റി. അത് നാട്ടുകാരിൽ സംശയം ഉണർത്തിയിരുന്നു. ശാഖാകുമാരിക്ക് ജീവനുണ്ടെന്ന് നാട്ടുകാരെ വിശ്വസിപ്പിച്ച് അവരുമൊത്ത് കാറിൽ കാരക്കോണം മെഡിക്കൽ കോളജ് ആശുപത്രിയിൽ ശാഖാകുമാരിയുടെ ശരീരം എത്തിച്ചു. അവിടെ പരിശോധിച്ച ഡോക്‌ടർ മണിക്കൂറുകൾക്ക് മുൻപ്തന്നെ മരണം സംഭവിച്ചതായി സ്ഥിരീകരിച്ചു. തുടര്‍ന്ന് വെള്ളറട പോലീസ് സ്റ്റേഷനിൽ ഇന്‍റിമേഷൻ അയച്ചു കൊടുത്തതാണ് കേസില്‍ വഴിത്തിരിവ് ഉണ്ടാകാൻ കാരണമായത്. വിധി പറയും മുൻപായി പ്രതി കോടതിയോട് ദയ യാചിച്ചു. അച്ഛൻ ഹൃദ്രോഗി ആണെന്നും സഹോദരൻ ഗൾഫിൽ ആണെന്നും വീട്ടുകാരെ സംരക്ഷിക്കാൻ താൻ മാത്രമാണുള്ളതെന്നും അരുണ്‍ കോടതിയില്‍ പറഞ്ഞു. അതിനാൽ ശിക്ഷയിൽ ഇളവ് ഉണ്ടാകണമെന്നും അഭ്യർഥിച്ചു. എന്നാൽ ഇത് അപൂർവങ്ങളിൽ അപൂർവമായ കുറ്റകൃത്യമാണെന്ന് പ്രോസിക്യൂഷൻ വാദിച്ചു. ദൃക്സാക്ഷികൾ ഇല്ലാത്ത ഈ കേസിൽ സാഹചര്യത്തെളിവുകളും ശാസ്ത്രീയ തെളിവുകളുമാണ് പ്രോസീക്യൂഷൻ ആശ്രയിച്ചത്.സ്റ്റേറ്റ് ഇലക്‌ട്രിസിറ്റി ബോർഡ്‌ ചീഫ് ഇലക്‌ട്രിക്കൽ ഇൻസ്‌പെക്‌ടർ പി.കെ. ഉഷാകുമാരി,കുന്നത്തുകാൽ ഇലക്‌ട്രിക്കൽ സെക്ഷൻ അസി. എൻജിനിയർ സുമ എന്നിവർ പ്രധാന സാക്ഷികളായി. ഈ കേസിൽ പോസ്റ്റുമോർട്ടം നടത്തിയ തിരുവനന്തപുരം ഗവ. മെഡിക്കൽ കോളജ് ആശുപത്രിയിലെ സീനിയർ പോലീസ് സർജൻ ഡോ. എസ്. ഷാരിജ കോടതിയിൽ നൽകിയ മൊഴി നിർണായകമായി. കൊല്ലപ്പെട്ട ശാഖാകുമാരിയുടെ വലതു കൈത്തണ്ടയുടെ അകവശം സൂപ്പർഫിഷ്യൽ ആർട്ടറിയിൽ ഏല്പിച്ച ഇലക്‌ട്രിക് ഷോക്ക് നേരിട്ട് ഹൃദയ ധമിനികളുടെ പ്രവർത്തനം ഉടനടി നിർത്തുന്നതിനു പര്യാപ്തമാണെന്ന ഡോക്‌ടറുടെ ശാസ്ത്രീയ മൊഴി കോടതി പരിഗണിച്ചിരുന്നു. പ്രതി തിരുവനന്തപുരം നഗരത്തിലെ പ്രസിദ്ധമായ ചില ആശുപത്രികളിലെ ഇലക്‌ട്രീഷ്യൻ ആയിരുന്നു എന്നും മറ്റു സാക്ഷിമൊഴികൾ കൊണ്ട് തെളിവിൽ വന്നു. ഒരു ആശുപത്രിയിലെ അത്യാഹിത ഭാഗം ഇലക്‌ട്രിക് വിദഗ്ധനു മാത്രമേ ഇപ്രകാരം പ്രവർത്തിക്കാൻ കഴിയുകയുള്ളൂവെന്ന് പ്രോസിക്യൂഷന് തെളിയിക്കാൻ സാധിച്ചു. വെള്ളറട പോലീസ് സബ് ഇൻസ്‌പെക്‌ടർമാരായ ഡി.സദാനന്ദൻ, വി.രാജതിലകൻ എന്നിവർ പ്രാഥമിക അന്വേഷണം നടത്തിയ കേസിൽ ഇൻസ്‌പെക്‌ടർ എം. ശ്രീകുമാറാണ് അന്വേഷണം പൂർത്തിയാക്കി കുറ്റപത്രം കോടതിയിൽ ഫയൽ ചെയ്തത്. കേസിൽ പ്രോസിക്യൂഷൻ ഭാഗം 44 സാക്ഷികളെ വിസ്തരിക്കുകയും 83 രേഖകളും കേസിൽ പെട്ട 43 വസ്തുക്കളും കോടതിയിൽ ഹാജരാക്കുകയും ചെയ്തു. പ്രോസിക്യൂഷനു വേണ്ടി പബ്ലിക് പ്രോസിക്യൂട്ടർ പാറശാല എ. അജികുമാർ, അഡ്വ. മഞ്ജിത എന്നിവർ ഹാജരായി. എഎസ്‌ഐ ശ്രീകല പോലീസ് ലൈസണ്‍ ഓഫീസറായി പ്രവർത്തിച്ചു.

ഓട്ടോയും കാറും കൂട്ടിയിടിച്ച്; ചികിത്സയിലായിരുന്ന ഓട്ടോ ഡ്രൈവർ മരിച്ചു

കോവളം : വാഴമുട്ടം ജംഗ്ഷനിൽ ഓട്ടോയും കാറും തമ്മിൽ കൂട്ടിയിടിച്ചുണ്ടായ അപകടത്തിൽ ഗുരുതര പരിക്കേറ്റ് ചികിത്സയിലായിരുന്ന ഓട്ടോ ഡ്രൈവർ മരിച്ചു. കോവളം കെഎസ് റോഡ് ഷൈല മൻസിൽ ചെറികോണത്തു മേലെവീട്ടിൽ സെയ്യദ് (55) ആണ് ഇന്നലെ രാവിലെ 11 ഓടെ മരിച്ചത്. കഴിഞ്ഞദിവസം രാത്രി ഒന്പതോടെയായിരുന്നു അപകടം. നാഗർകോവിലിൽ നിന്നും തിരുവനന്തപുരം എയർപോർട്ടിലേക്ക് പോകുകയായിരുന്ന കാറും പനത്തുറ ഭാഗത്തെ സർവീസ് റോഡിലൂടെ ബൈപ്പാസിലേക്ക് കയറുകയായിരുന്ന ഓട്ടോറിക്ഷയും തമ്മിൽ കൂട്ടിയിടിച്ചായിരുന്നു അപകടം. ഓട്ടോയിൽ ഒപ്പം ഉണ്ടായിരുന്ന ബന്ധു തിരുവനന്തപുരം മെഡിക്കൽ കോളജ് ആശുപത്രിയിൽ ചികിത്സയിലാണ്. സെയ്യദിന്‍റെ മൃതദേഹം ഇന്ന് പോസ്റ്റ്മോർട്ടത്തിന് ശേഷം ബന്ധുക്കൾക്ക് വിട്ടുകൊടുക്കുമെന്ന് തിരുവല്ലം പോലീസ് അറിയിച്ചു. ഭാര്യ : ലൈല, മക്കൾ: സിയാദ്, ഷംനാദ്, സജാദ്.

ആൾ താമസമില്ലാത്ത വീട്ടിൽ യുവാവ് മരിച്ച നിലയിൽ

വെഞ്ഞാറമൂട്: യുവാവിനെ ആൾ താമസമില്ലാത്ത വീട്ടിൽ മരിച്ച നിലയിൽ കണ്ടെത്തി. മുരൂർക്കോണം കാവുവിള വീട്ടിൽ ചെല്ലപ്പൻ-സരള ദമ്പതികളുടെ മകൻ ജയൻ (46) നെ നെല്ലനാട് വില്ലേജ് ഓഫീസിന് സമീപത്തെ ആൾതാമസമില്ലാത്ത വീട്ടിൽ മരിച്ച നിലയിൽ കാണപ്പെട്ടത്. മൃതദേഹത്തിന് അഞ്ചു ദിവസത്തെ പഴക്കമുണ്ട്. നാട്ടുകാർ വിവരം അറിയിച്ചതിനെ തുടർന്ന് വെഞ്ഞാറമൂട് പോലീസ് സ്ഥലത്തെത്തി ഇൻക്വസ്റ്റ് നടപടികൾ പൂർത്തിയാക്കി മൃതദ്ദേഹം തിരുവനന്തപുരം മെഡിക്കൽ കോളജ് മോർച്ചറിയിലേയ്ക്ക് മാറ്റി. കഴിഞ്ഞ കുറച്ച് ദിവസമായി ജയനെ കാണാനില്ലായിരുന്നെന്നാണ് ബന്ധുക്കൾ പറയുന്നത്. വെഞ്ഞാറമൂട്ടിലെ ഓഡിറ്റോറിയത്തിൽ ജോലിക്ക് പോയിട്ട് അവിടെ തന്നെ തങ്ങുമായിരുന്നു ജയൻ. ഈ കാരണത്താലാകും അന്വോഷണം നടത്താതിരുന്നത്. ഇന്ന് 12 മണിയോടെ പഞ്ചായത്തുമെമ്പർ സുജയുടെ നേതൃത്വത്തിൽ സംസ്കാര ചടങ്ങുകൾ നടത്തി. ഇയാൾ അവിവാഹിതനാണ്. ജയശ്രീ, കുമാർ എന്നിവർ സഹോദരങ്ങളാണ്.

രോഗി ആശുപത്രിയിൽ തൂങ്ങിമരിച്ച നിലയിൽ

മെഡിക്കല്‍കോളജ്: സ്വകാര്യാശുപത്രിയില്‍ ചികിത്സയിലായിരുന്ന രോഗിയെ തൂങ്ങിമരിച്ച നിലയില്‍ കണ്ടെത്തി. മലയിന്‍കീഴ് ഗോവിന്ദമംഗലം സ്വദേശി രാജേന്ദ്രകുമാര്‍ (60) ആണ് മരിച്ചത്. കഴിഞ്ഞദിവസം പുലര്‍ച്ചെയാണ് സംഭവം. ആശുപത്രിയില്‍ ഇയാള്‍ കഴിഞ്ഞുവന്ന വാര്‍ഡിലെ ജനാലക്കമ്പിയില്‍ ഉടുത്തിരുന്ന ലുങ്കി കെട്ടിയശേഷം തൂങ്ങിയ നിലയില്‍ കണ്ടെത്തുകയായിരുന്നു. ആശുപത്രി അധികൃതര്‍ ഇയാൾക്ക് ഉടന്‍തന്നെ വിദഗ്ധ ചികിത്സ നല്‍കിയെങ്കിലും ജീവൻരക്ഷിക്കാനായില്ല. ഇടതുകാലിനുണ്ടായ ഗുരുതരമായ പരിക്കിന് ഓപ്പറേഷന്‍ നടത്തുന്നതിനുവേണ്ടിയാണ് രാജേന്ദ്രകുമാറിനെ കുറച്ചുദിവസം മുമ്പ് ആശുപത്രിയില്‍ പ്രവേശിപ്പിച്ചത്. സഹിക്കാനാകാത്ത വേദനമൂലമാണ് രാജേന്ദ്രകുമാര്‍ ആത്മഹ്യചെയ്തതെന്നാണു പ്രാഥമിക നിഗമനം. മൃതദേഹം തിരുവനന്തപുരം മെഡിക്കല്‍കോളജ് ആശുപത്രിയില്‍ പോസ്റ്റുമോര്‍ട്ടം നടത്തി.

യുവാവ് വീടിനുള്ളിൽ തൂങ്ങിമരിച്ചനിലയിൽ

പൂവാർ : യുവാവിനെ വീടിനുള്ളിൽ തൂങ്ങിമരിച്ചനിലയിൽ കണ്ടെത്തി. തിരുപുറം കാലുംമുഖം വലിയതോപ്പ് മേക്കരുകത്ത് പുത്തൻവീട്ടിൽ ബർണാസിന്‍റെ മകൻ അഖിൽ (30) ആണ് മരിച്ചത്. സ്വകാര്യ ക്ലിനിക്കിലെ ഡയാലിസിസ് ടെക്നീഷ്യനാണ്. എട്ടുമാസം മുൻപായിരുന്നു അഖിലിന്‍റെ വിവാഹം നടന്നത്. ഭാര്യയുമായുള്ള പിണക്കമാണ് ആത്മഹത്യക്ക് കാരണമെന്ന് വീട്ടുകാർ മൊഴി നൽകിയതായി പൂവാർ പോലീസ് അറിയിച്ചു. അരുൺ സഹോദരനാണ്.

സിപിഎമ്മിനെയും കോണ്‍ഗ്രസിനെയും വിമര്‍ശിച്ച് ബിജെപി സംസ്ഥാന അധ്യക്ഷന്‍

തിരുവനന്തപുരം: സിപിഎമ്മിനെയും കോണ്‍ഗ്രസിനെയും വിമര്‍ശിച്ച് ബിജെപി സംസ്ഥാന അധ്യക്ഷന്‍ രാജീവ് ചന്ദ്രശേഖര്‍. നിരപരാധികളായ വിനോദ സഞ്ചാരികളെ ക്രൂരമായി കൊലപ്പെടുത്തിയ പാക് ഭീകരരെപ്പറ്റി പറയുമ്പോള്‍ എന്തിനാണ് എം.എ. ബേബിയും വി.ഡി. സതീശനും അസ്വസ്ഥരാവുന്നതെന്ന് രാജീവ് ചന്ദ്രശേഖര്‍ ചോദിച്ചു. പെഹല്‍ഗാമിലെ ഭീകരാക്രമണത്തില്‍ സുരക്ഷാ വീഴ്ച ഉണ്ടായെന്ന് എല്ലാവരും കാണുന്നതല്ലേയെന്ന് രാജീവ് ചന്ദ്രശേഖര്‍ മാധ്യമപ്രവര്‍ത്തകരുടെ ചോദ്യത്തിനു മറുപടിയായി പറഞ്ഞു. പാക്കിസ്ഥാനു വേണ്ടി എന്തിന് സിപിഎം, കോണ്‍ഗ്രസ് നേതാക്കള്‍ നിലപാടെടുക്കുന്നു? തീവ്രവാദി ആക്രമണത്തെ ഒറ്റക്കെട്ടായി അപലപിക്കുകയാണ് വേണ്ടത്. വി.ഡി. സതീശനും ബേബിയും ഒന്നും സുരക്ഷാ വിദഗ്ധരാകേണ്ടെന്നും രാജീവ് ചന്ദ്രശേഖര്‍ വിമര്‍ശിച്ചു.

പൊന്നമ്മ ഡിസി അന്തരിച്ചു

കോട്ടയം: എഴുത്തുകാരനും പ്രസാധകനുമായിരുന്ന ഡിസി കിഴക്കേമുറിയുടെ ഭാര്യ പൊന്നമ്മ ഡിസി (90) അന്തരിച്ചു. സംസ്‌കാരം 27ന് ഉച്ചകഴിഞ്ഞ് രണ്ടിനു വസതിയിലെ ശുശ്രൂഷയ്ക്കുശേഷം മൂന്നിനു കോട്ടയം ലൂര്‍ദ് ഫൊറോന പള്ളിയില്‍. മൃതദേഹം 26നു രാവിലെ 10 മുതല്‍ ദേവലോകത്തുള്ള വസതിയില്‍ പൊതുദര്‍ശനത്തിനു വയ്ക്കും. പൊന്നമ്മ രണ്ടു പതിറ്റാണ്ട് ഡിസി ബുക്‌സ് പ്രവര്‍ത്തനങ്ങള്‍ക്ക് സാരഥ്യം വഹിച്ചിരുന്നു. തിരുവല്ല ബാലികാമഠം സ്‌കൂളിലെ അധ്യാപികയായിരുന്നു. 1974ല്‍ ഡിസി ബുക്‌സ് ആരംഭിച്ചപ്പോള്‍ നേതൃത്വപരമായ പങ്കാളിത്തം വഹിച്ചത് പൊന്നമ്മ ഡിസിയായിരുന്നു. ഡിസി ബുക്‌സിന്‍റെ മാനേജിംഗ് പാര്‍ട്ണറാണ്. തകഴി, ബഷീര്‍, സി.ജെ. തോമസ് തുടങ്ങിയവരുമായി അടുത്ത സൗഹൃദം സൂക്ഷിച്ചിരുന്ന പൊന്നമ്മ ഡിസി സാമൂഹിക സാംസ്‌കാരിക രംഗത്ത് സജീവമായിരുന്നു. ഡിസി കിഴക്കേമുറിക്ക് ലഭിച്ച മരണാനന്തര പത്മഭൂഷന്‍ രാഷ്ട്രപതി കെ.ആര്‍. നാരായണനില്‍നിന്ന് ഏറ്റുവാങ്ങിയത് പൊന്നമ്മയായിരുന്നു. ചെങ്ങന്നൂര്‍ കടക്കേത്തുപറമ്പില്‍ പി.വി. ഐസക്കിന്‍റെയും റേച്ചലിന്‍റെയും ഇളയപുത്രിയായി 1934 ഡിസംബര്‍ മൂന്നിനായിരുന്നു ജനനം. മക്കള്‍: താര, മീര, രവി ഡിസി (ഡിസി ബുക്‌സ്). മരുമക്കള്‍: ജോസഫ് സത്യദാസ് (സിംഗപ്പുര്‍ സ്‌ട്രെയ്റ്റ് ടൈംസ് സീനിയര്‍ എഡിറ്റര്‍), അനില്‍ വര്‍ഗീസ് (ബിസിനസ്), രതീമ (എക്‌സിക്യുട്ടീവ് ഡയറക്ടര്‍, ഡിസി ബുക്‌സ്).

കൊച്ചുതുറയിൽ റോഡ് ഉപരോധിച്ചു : പുറന്പോക്ക് ഭൂമി നികത്താനൊരുങ്ങി പഞ്ചായത്ത് അധികൃതർ; തടഞ്ഞ് നാട്ടുകാർ

വിഴിഞ്ഞം: പഞ്ചായത്ത് പുറംമ്പോക്ക് ഭൂമിയിൽ മണ്ണിട്ട് നികത്തി വെള്ളക്കെട്ട് ഒഴിവാക്കാൻ അധികൃതർ. സ്വകാര്യ ഭൂമിയാണെന്ന് അവകാശപ്പെട്ട് എത്തിയ നാട്ടുകാർ പണി തടസപ്പെടുത്താൻ ശ്രമിച്ചു. മണ്ണിടൽ തുടർന്നതിൽ പ്രതിഷേധിച്ച് ഒരു വിഭാഗം നാട്ടുകാർ റോഡ് ഉപരോധവുമായി രംഗത്ത് എത്തി. കരിംകുളം കൊച്ചുപള്ളിക്ക് സമീപത്തെ ഒന്നര ഏക്കറോളം വരുന്ന സർക്കാർ ഭൂമിയിലെ മണ്ണിടലാണ് തർക്കത്തിനു വഴിതെളിയിച്ചത്. കാടും പടലുംപിടിച്ച ഭൂമിയിലെ വെള്ളക്കെട്ടിനെതിരെ നേരത്തെ വ്യാപക പരാതി ഉയർന്നിരുന്നതായി പഞ്ചായത്ത് അധികൃതർ പറയുന്നു. പരിഹാരമായി ഭൂമിയുടെ നവീകരണത്തിനും വെള്ളക്കെട്ട് ഒഴിവാക്കുന്നതിനും ലക്ഷ്യംവച്ചു രണ്ടു പ്രാവശ്യമായി 20 ലക്ഷം രൂപയുടെ ഫണ്ടും വകയിരുത്തി. എന്നാൽ ജില്ലാ കളക്ടറുടെ അനുമതിയോടെ പഞ്ചായത്തധികൃതർ പണി നടത്താനുള്ള ശ്രമം ആരംഭിച്ചതോടെ തടസവാദങ്ങളുമായി നാട്ടുകാരിൽ ഒരുവിഭാഗം രംഗത്തെത്തുകയായിരുന്നു. ഹൈക്കോടതിയിൽനിന്നു പോലീസ് സംരക്ഷണ അനുമതി വാങ്ങിയ അധികൃതർ ഇന്നലെ കാടു വെട്ടിത്തെളിച്ചു വെള്ളകെട്ട് ഒഴിവാക്കാനുള്ള നടപടി ആരംഭിച്ചു. ഇതിനിടയിൽ മണ്ണുമായെത്തിയ ലോറികളെ പ്രതിഷേധക്കാർ തടയുക യായിരുന്നു. എന്നാൽ പോലീസിന്‍റെ സംരക്ഷണയിൽ മണ്ണിടൽ തുടർന്നതിൽ പ്രതിഷേധിച്ച് നാട്ടുകാർ വിഴിഞ്ഞം-കളിയിക്കാവിള തീരദേശറോഡ് ഉപരോധിച്ചു. ബഞ്ചുകളും മറ്റും നിരത്തി സ്ത്രീകൾ ഉൾപ്പെടെയുള്ളവർ റോഡ് ഉപരോധിച്ചതോടെ ഇതുവഴിയുള്ള ഗതാഗതം മണിക്കൂറുകളോളം സ്തംഭിച്ചു. രാവിലെ തുടങ്ങിയ ഉപരോധം ഉച്ചകഴിഞ്ഞും തുടർന്നു. ഒടുവിൽ ജനപ്രതിനിധികളും ഇടവകാധികാരും തമ്മിൽ നടന്ന ചർച്ചക്കൊടുവിൽ ഉപരോധം അവസാനിച്ചു. കാഞ്ഞിരംകുളം പോലീസ് കണ്ടാലറിയാവുന്ന നിരവധി പേർക്കെതിരെ റോഡ് ഉപരോധത്തിന് കേസെടുത്തു. നാട്ടുകാരുടെ ആരോഗ്യപ്രശ്നത്തിനു വരെ വഴിതെളിച്ച വെള്ളക്കെട്ട് ഒഴിവാക്കുന്നതിനുള്ള നടപടിയുമായി മുന്നോട്ട് പോകുമെന്നു പഞ്ചായത്ത് പ്രസിഡന്‍റ് ഫ്രീഡ സൈമൺ അറിയിച്ചു.

കവര്‍ച്ച; വീട്ടുജോലിക്കാരി പിടിയില്‍

മെഡിക്കല്‍കോളജ്: സ്വര്‍ണാഭരണവും മൊബൈല്‍ഫോണും കവര്‍ച്ച നടത്തിയ സംഭവത്തില്‍ വീട്ടുജോലിക്കാരിയെ മെഡിക്കല്‍കോളജ് പോലീസ് പിടികൂടി. മണ്ണൂര്‍ക്കര കുറ്റിച്ചല്‍ പേങ്ങാട് അയണിമൂട് വീട്ടില്‍ ജലജ (54) ആണ് പിടിയിലായത്. ബുധനാഴ്ച പുലര്‍ച്ചെയായിരുന്നു സംഭവം. സ്റ്റേഷന്‍ പരിധിയില്‍ ദേവസ്വം ലെയിനിലെ ഒരു വീട്ടില്‍ താമസിച്ചുവരുന്ന 95 വയസുള്ള വയോധികയുടെ ഒരുപവന്‍ മാലയും വീട്ടില്‍ സൂക്ഷിച്ചിരുന്ന മൊബൈല്‍ ഫോണുമാണ് നഷ്ടമായത്. സ്വര്‍ണമാല കാണാതായതോടെ വയോധികയാണ് മെഡിക്കല്‍കോളജ് സ്റ്റേഷനില്‍ പരാതി നല്‍കിയത്. ജലജയാണ് കവര്‍ച്ച നടത്തിയതെന്നു വ്യക്തമായതോടെ ഇവരെ വീട്ടില്‍നിന്നുതന്നെ പോലീസ് കസ്റ്റഡിയിലെടുക്കുകയായിരുന്നു. തൊണ്ടിമുതല്‍ കണ്ടെടുക്കാനുള്ള ശ്രമം പോലീസ് ആരംഭിച്ചിട്ടുണ്ട്. അറസ്റ്റിലായ പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു.

ആശാ സമരം 74 ദിനം പിന്നിട്ടു

തിരുവനന്തപുരം: സെക്രട്ടേറിയറ്റ് പടിക്കൽ നടക്കുന്ന ആശാ സമരം 74 ദിനം പിന്നിട്ടു. ഇന്നലെയും സമൂഹത്തിന്‍റെ നാനാ തുറകളിൽ നിന്നുള്ള നിരവധിപ്പേർ സമരത്തിന് പിന്തുണ പ്രഖ്യാപിച്ച് സമരപ്പന്തലിലെത്തി. ഇന്നലെ സമരത്തിന് അഭിവാദ്യം അർപ്പിച്ചുകൊണ്ട് യൂത്ത് ലീഗ് സംസ്ഥാന ജനറൽ സെക്രട്ടറി പി. കെ ഫിറോസ്, കേരള വനവാസി വികാസ കേന്ദ്രം നേതാവ് ഷിബു പാണത്തൂർ, കോണ്‍ഗ്രസ് നേതാവ് എം. ആർ. ജയപ്രസാദ് തുടങ്ങി വിവിധ സംഘടനാ നേതാക്കളും വ്യക്തികളും സമരവേദിയിൽ എത്തി. സമരപ്പന്തലിലെ നിരാഹാര സമരം 36 ദിവസം പിന്നിട്ടു.

തൊഴിലുറപ്പ് തൊഴിലാളികള്‍ പെരുങ്കടവിള പഞ്ചായത്ത് ഓഫീസ് വളഞ്ഞു

വെള്ളറട: പെരുങ്കടവിള പഞ്ചായത്ത് തൊഴിലുറപ്പ് പദ്ധതി നടത്തിപ്പിലെ അശാസ്ത്രീയമായ നടപടികള്‍ പിന്‍വലിക്കണമെന്നാവശ്യപ്പെട്ടു തൊഴിലുറപ്പ് തൊഴിലാളികള്‍ പഞ്ചായത്ത് ഓഫീസ് വളഞ്ഞു. വര്‍ക്ക്കോഡ് എന്ന പേരില്‍ ജിയോ ടാഗ് ഫോട്ടോ എടുക്കല്‍ അവസാനിപ്പിക്കുക, തൊഴില്‍ ദിനം 200 ആക്കി വര്‍ധിപ്പിക്കുക, വേതനം 500 ആക്കി വര്‍ധിപ്പിക്കുക, തൊഴിലുറപ്പ് തൊഴിലാളികള്‍ക്ക് പെന്‍ഷന്‍ അനുവദിക്കുക, സൗജ്യന്യ ചികിത്സയും- ആരോഗ്യ സുരക്ഷയും അനുവദിക്കുക തുടങ്ങിയ നിരവധി ആവശ്യങ്ങള്‍ ഉന്നയിച്ചു നടത്തിയ സമരം പെരുങ്കടവിള പഞ്ചായത്ത് ഓഫീസ് വളയല്‍ സമരം കര്‍ഷക കോണ്‍ഗ്രസ് സംസ്ഥാന വൈസ് പ്രസിഡന്‍റ് എം.എസ്. അനില്‍ ഉദ്ഘാടനം ചെയ്തു. വടകര വാര്‍ഡ് മെമ്പര്‍ മഞ്ജുഷാ ജയന്‍ അധ്യക്ഷത വഹിച്ചു. തത്തിയൂര്‍ വാര്‍ഡ് മെമ്പര്‍ കാക്കണം മധു, സ്വാഗത സംഘം ചെയര്‍മാന്‍ വടകര ജയന്‍, ആരാമം മധുസുദനന്‍ നായര്‍, അരുവിപുറം സദനന്ദന്‍, എന്നിവര്‍ നേതൃത്വം നല്‍കി. പെരുങ്കടവിള വില്ലേജ് ഓഫീസില്‍നിന്നും ആരംഭിച്ച പ്രകടനം പഞ്ചായത്ത് ഓഫീസില്‍ എത്തിച്ചേര്‍ന്നു. 500ല്‍ അതികം തൊഴിലുറപ്പ് തൊഴിലാളികള്‍ പങ്കെടുത്തു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]