രാജ്യസുരക്ഷ: പ്രതികളുടെ അസാന്നിധ്യത്തിൽ വിചാരണയാകാമെന്ന് അമിത് ഷാ
Sunday, January 19, 2025 2:55 AM IST
ന്യൂഡൽഹി: രാജ്യസുരക്ഷയുമായി ബന്ധപ്പെട്ട കേസുകളിൽ രാജ്യം വിട്ട പ്രതികളുടെ അസാന്നിധ്യത്തിലും വിചാരണ ആരംഭിക്കാമെന്ന് കേന്ദ്ര ആഭ്യന്തരമന്ത്രി അമിത് ഷാ.
ഇത്തരം കേസുകളിൽ പ്രതിയുടെ അസാന്നിധ്യത്തിലും വിചാരണയ്ക്കുള്ള വ്യവസ്ഥകൾ രാജ്യത്തിന്‍റെ നിയമസംവിധാനത്തിലുണ്ടെന്നും അദ്ദേഹം വ്യക്തമാക്കി.
പുതിയ ക്രിമിനൽ നിയമങ്ങൾ നടപ്പിലാക്കുന്നതുമായി ബന്ധപ്പെട്ട് മധ്യപ്രദേശ് സർക്കാരിന്‍റെ പ്രതിനിധിസംഘത്തോടൊപ്പം ചർച്ച നടത്തുന്നതിനിടയിലാണ് ഷായുടെ പ്രസ്താവന.
ദരിദ്രർക്ക് ശരിയായ നിയമ പ്രാതിനിധ്യം ഉറപ്പാക്കേണ്ടത് സർക്കാരിന്‍റെ ഉത്തരവാദിത്വമാണെന്ന് അദ്ദേഹം ചൂണ്ടിക്കാട്ടി.
ഭീകരത, സംഘടിത കുറ്റകൃത്യങ്ങൾ എന്നിവയുമായി ബന്ധപ്പെട്ട വകുപ്പുകൾപ്രകാരം കേസുകൾ രജിസ്റ്റർ ചെയ്യുന്നതിനുമുന്പ് മുതിർന്ന പോലീസ് ഉദ്യോഗസ്ഥർ ആ വകുപ്പുകൾ ചുമത്താൻ കേസ് യോഗ്യമാണോയെന്ന് വിലയിരുത്തണം. കേന്ദ്രസർക്കാർ നടപ്പാക്കിയ പുതിയ ക്രിമിനൽ നിയമത്തിൽ മൂന്നു വർഷത്തിനുള്ളിൽ തീർപ്പ് കല്പിക്കും.
എഫ്ഐആർ രജിസ്റ്റർ ചെയ്യുന്നതുമുതൽ സുപ്രീംകോടതിയിൽനിന്ന് വിധി വരുന്നതുവരെ ഈ കാലയളവിനുള്ളിൽ അവസാനിക്കും. കൃത്യസമയത്ത് നീതി ലഭ്യമാക്കുക എന്നതായിരിക്കണം പോലീസിന്റെ പ്രഥമ പരിഗണനയെന്നും അദ്ദേഹം ചൂണ്ടിക്കാട്ടി.