വൈദ്യുതി ബോര്‍ഡിന്‍റെ പെന്‍ഷന്‍ ; ബാധ്യത സര്‍ക്കാര്‍ ഏറ്റെടുക്കില്ല
Wednesday, September 11, 2024 1:46 AM IST
തിരുവനന്തപുരം: വൈദ്യുതി ബോര്‍ഡിന്‍റെ പെന്‍ഷന്‍ ബാധ്യത ഏറ്റെടുക്കാനാവില്ലെന്നും പെന്‍ഷന്‍ മാസ്റ്റര്‍ ട്രസ്റ്റിലേക്ക് തുക വകയിരുത്തേണ്ട ഉത്തരവാദിത്വം വൈദ്യുതി ബോര്‍ഡിനാണെന്നും വ്യക്തമാക്കി സര്‍ക്കാര്‍ ഉത്തരവ്.
ഉപയോക്താക്കളില്‍ നിന്നു പിരിക്കുന്ന വൈദ്യുതി ഡ്യൂട്ടി ബോര്‍ഡിനു വിട്ടുനല്‍കാനാവില്ലെന്ന് ചൂണ്ടിക്കാട്ടിയ ഉത്തരവില്‍ കെഎസ്ഇബി ലിമിറ്റഡ് വാര്‍ഷിക വിഹിതം മാസ്റ്റര്‍ ട്രസ്റ്റിനു നല്‍കിയാണ് പെന്‍ഷന്‍ ഫണ്ട് നിലനിര്‍ത്തേണ്ടതെന്നും ഉത്തരവില്‍ വിശദീകരിക്കുന്നു. ഹൈക്കോടതി നിര്‍ദേശ പ്രകാരം ബോര്‍ഡിലെ പെന്‍ഷന്‍കാരുടെ കൂട്ടായ്മയെ കേട്ടശേഷമാണ് സര്‍ക്കാര്‍ ഉത്തരവ്.
പത്ത് വര്‍ഷത്തേക്കു കൂടി വൈദ്യുതി ഡ്യൂട്ടി ബോര്‍ഡിനു നല്‍കണമെന്നും മാസ്റ്റര്‍ ട്രസ്റ്റ് പ്രവര്‍ത്തനസജ്ജമാക്കാന്‍ സര്‍ക്കാര്‍ ഇടപെടണമെന്നും ആവശ്യപ്പെട്ട് പെന്‍ഷന്‍ കൂട്ടായ്മ ഹൈക്കോടതിയെ സമീപിക്കുകയായിരുന്നു.
ഇതേ തുടര്‍ന്ന് പെന്‍ഷന്‍ കൂട്ടായ്മ പ്രതിനിധികളെ നേരിട്ടു കേട്ട ശേഷം തുടര്‍ നടപടികള്‍ കൈക്കൊള്ളാന്‍ കോടതി സര്‍ക്കാരിന് നിര്‍ദേശം നല്‍കുകയായിരുന്നു.
വൈദ്യുതി നിരക്ക് വര്‍ധന: റെഗുലേറ്ററി കമ്മീഷന്‍റെ അവസാന പൊതുതെളിവെടുപ്പ് ഇന്ന്
വൈദ്യുതി നിരക്ക് വര്‍ധനയ്ക്ക് കെഎസ്ഇബി നല്‍കിയ അപേക്ഷയില്‍ സംസ്ഥാന വൈദ്യുതി റെഗുലേറ്ററി കമ്മീഷന് നടത്തുന്ന പൊതുതെളിവെടുപ്പ് ഇന്ന് അവസാനിക്കും. തിരുവനന്തപുരം പഞ്ചായത്ത് അസോസിയേഷന്‍ ഹാളില്‍ ഇന്നു രാവിലെ 10.30 മുതലാണ് അവസാനദിന തെളിവെടുപ്പ് നടക്കുക. കോഴിക്കോട്, എറണാകുളം, പാലക്കാട് എന്നിവിടങ്ങളിലാണ് ഇതിനു മുന്‍പ് തെളിവെടുപ്പ് നടന്നത്.
വേനല്‍ക്കാലത്തെ വര്‍ധിച്ച വൈദ്യുതി ഉപയോഗത്തിന് സമ്മര്‍ ചാര്‍ജ് ഉള്‍പ്പെടെ നിര്‍ദേശിച്ചാണ് കെഎസ്ഇബി വൈദ്യുതി നിരക്ക് വര്‍ധനയ്ക്കായി കമ്മീഷന് അപേക്ഷ നല്‍കിയിട്ടുള്ളത്.
അടുത്ത മൂന്നു വര്‍ഷത്തെ നിരക്ക് വര്‍ധനയ്ക്കായ് സമര്‍പ്പിച്ച അപേക്ഷയില്‍ ഗാര്‍ഹിക ഉപയോക്താക്കള്‍ക്ക് യൂണിറ്റിന് 30 പൈസയുടെ വരെ വര്‍ധനയും ജനുവരി മുതല്‍ മേയ് വരെയുള്ള വേനല്‍ക്കാലത്ത് 10 പൈസ അധിക നിരക്കും ആവശ്യപ്പെടുന്നു.
വൈദ്യുതി ഉപയോഗം കൂടതലുള്ള പീക്ക് സമയത്ത് 250 യൂണിറ്റിന് മുകളില്‍ വൈദ്യുതി ഉപയോഗിക്കുന്നവര്‍ക്ക് നിരക്ക് കൂട്ടണമെന്നും കെഎസ്ഇബി ആവശ്യപ്പെട്ടിട്ടുണ്ട്.