Deepika
ADVERTISEMENT
Sports
മസ്കറ്റ്: അഫ്ഗാനിസ്ഥാനെ എട്ടു വിക്കറ്റിന് തകർത്ത് ഇന്ത്യ അണ്ടർ-19 ഏഷ്യാകപ്പ് ഫൈനലിൽ പ്രവേശിച്ചു. നാളെ നടക്കുന്ന കലാശപ്പോരിൽ ഇന്ത്യ x പാക്കിസ്ഥാൻ ഗ്ലാമർ പോരാട്ടം. ലീഗ് റൗണ്ടിൽ തോൽപ്പിച്ച പാക്കിസ്ഥാനെ വീഴ്ത്തി കിരീടം നേടുകയാണ് നീലപ്പടയുടെ ലക്ഷ്യം. സെമി ഫൈനലിൽ ഇന്ത്യ അഫ്ഗാനിസ്ഥാനെയും പാക്കിസ്ഥാൻ ബംഗ്ലാദേശിനെയും തോൽപ്പിച്ചു.
സെമിയിൽ അഫ്ഗാൻ ഉയർത്തിയ 228 റണ്‍സ് വിജയലക്ഷ്യം 36.5 ഓവറിൽ രണ്ടു വിക്കറ്റ് നഷ്ടത്തിൽ ഇന്ത്യ മറികടന്നു. ലക്ഷ്യ രാജേഷ് റായ്ചന്ദാനി, ആര്യവീർ സെവാഗ്, വി.കെ. വിനീത് എന്നിവരുടെ അർധ സെഞ്ചുറികളാണ് ഇന്ത്യൻ ജയം അനായാസമാക്കിയത്. സ്കോർ: അഫ്ഗാനിസ്ഥാൻ- 227/8. ഇന്ത്യ- 36.5 ഓവറിൽ 230/2.
തകർത്തടിച്ചു
90 പന്തിൽ ഒരു സിക്സും 13 ഫോറുമടക്കം 93 റണ്‍സെടുത്ത രാജേഷ് റായ്ചന്ദാനി ഇന്ത്യയുടെ ടോപ് സ്കോററായി. സമീപകാലത്ത് മികച്ച ഫോം തുടരുന്ന ആര്യവീർ സെവാഗ് 57 പന്തിൽ 51 റണ്‍സെടുത്തു. നാലു വീതം സിക്സും ഫോറുമടങ്ങുന്നതായിരുന്നു താരത്തിന്‍റെ ഇന്നിംഗ്സ്. ഓപ്പണിംഗ് വിക്കറ്റിൽ രാജേഷ് റായ്ചന്ദാനി- ആര്യവീർ സഖ്യം 102 പന്തിൽ 117 റണ്‍സ് സ്കോർ ചെയ്തു.
ആര്യവീർ പുറത്തായ ശേഷം വിനീതിനെ കൂട്ടുപിടിച്ച് രാജേഷ് റായ്ചന്ദാനി 77 റണ്‍സിന്‍റെ കൂട്ടുകെട്ടുണ്ടാക്കിയതോടെ അഫ്ഗാൻ മത്സരം കൈവിട്ടു. 62 പന്തുകൾ നേരിട്ട വിനീത് 57 റണ്‍സുമായി പുറത്താകാതെ നിന്നു. യശ്‌വര്‍ധന്‍ ചൗഹാൻ 16 റണ്‍സെടുത്ത് പുറത്താകാതെ നിന്നു.
ഇടവേളകളിൽ പിഴുതു
നേരത്തേ ടോസ് നേടി ആദ്യം ബാറ്റ് ചെയ്ത അഫ്ഗാൻ നിശ്ചിത 50 ഓവറിൽ എട്ടു വിക്കറ്റ് നഷ്ടത്തിൽ 227 റണ്‍സെടുത്തു. നൊമാൻ സലർസായ് (78 പന്തിൽ 51 റണ്‍സ്), ഷാ ഫൈസൽ റാഹിമി (72 പന്തിൽ 51 റണ്‍സ്) എന്നിവരുടെ അർധ സെഞ്ചുറികളാണ് അഫ്ഗാനെ ഭേദപ്പെട്ട സ്കോറിലെത്തിച്ചത്.
ഇന്ത്യൻ ബൗളർമാർ ഇടവേളകളിൽ വിക്കറ്റ് പിഴുത് അഫ്ഗാൻ ബാറ്റർമാരെ സമ്മർദത്തിലാക്കി. നാലാം വിക്കറ്റിൽ ഷാ ഫൈസൽ റാഹിമി - നൊമാൻ സലർസായ് കൂട്ടുകെട്ടിൽ പിറന്ന 57 റണ്‍സും ഏഴാം വിക്കറ്റിൽ ഫൈസൽ റാഹിമി- സൊഹൈൽ ഖാൻ കൂട്ടുകെട്ടിൽ പിറന്ന 60 റണ്‍സുമാണ് അഫ്ഗാനെ പൊരുതാവുന്ന സ്കോറിലെത്തിച്ചത്. സുബാൻ സഖായിൽ (31), സൊഹൈൽ ഖാൻ (36*) എന്നിവരാണ് അഫ്ഗാന്‍റെ മറ്റ് പ്രധാന സ്കോറർമാർ.
ആബിദുള്ള നദാർജാൻ (14), ഫരീദുള്ള ഇഹ്സാസ് (13), ആമിർ ഹംസ (0) എന്നിവരെല്ലാം നിരാശപ്പെടുത്തി. ഇന്ത്യക്കായി ഇഷാൻ സൂദ് മൂന്നും ആര്യൻ സവ്സാനി രണ്ടും വിക്കറ്റുകൾ വീഴ്ത്തി.
Sports
മൗണ്ട് മൗംഗനൂയി: ന്യൂസിലൻഡിനെതിരായ ഏകദിന പരന്പരയിലെ നാലാം മത്സരം ഇന്ന്. ബേ ഓവലിൽ രാവിലെ 7:30ന് നടക്കുന്ന മത്സരത്തിൽ വന്പൻ അഴിച്ചുപണിയുമായാണ് ഇന്ത്യ ഇറങ്ങുന്നത്.
19ന് ആരംഭിക്കുന്ന രണ്ട് മത്സരങ്ങളുടെ ടെസ്റ്റ് പരന്പരയ്ക്കുള്ള തയാറെടുപ്പുകൾക്കായി ക്യാപ്റ്റൻ ശുഭ്മാൻ ഗിൽ, കെ.എൽ. രാഹുൽ, അൻഷുൽ കംബോജ് എന്നിവർ വെല്ലിംഗ്ടണിലേക്ക് തിരിച്ചതോടെ ഇന്ത്യയെ നയിക്കാൻ ശ്രേയസ് അയ്യർക്ക് നറുക്ക് വീണു. ഇന്ത്യയുടെ ട്വന്‍റി20 ടീം ക്യാപ്റ്റനായ ശ്രേയസ് ആദ്യമായാണ് ഏകദിനത്തിൽ ഇന്ത്യയുടെ നായകസ്ഥാനം ഏറ്റെടുക്കുന്നത്.
ആദ്യ മൂന്ന് ഏകദിനങ്ങളിലും കളിച്ച ഗിൽ, രാഹുൽ, കംബോജ് എന്നിവർക്ക് പകരം തിലക് വർമ, കുമാർ കുശാഗ്ര, യഷ് താക്കൂർ എന്നിവരെ അവസാന രണ്ട് ഏകദിനങ്ങൾക്കുള്ള ടീമിൽ ഉൾപ്പെടുത്തിയിട്ടുണ്ട്.
ഇഷാൻ കിഷൻ ഓപ്പണർ
ആദ്യ മൂന്ന് മത്സരങ്ങളിലും അവസരമില്ലാതിരുന്ന ഇഷാൻ കിഷൻ നാലാം ഏകദിനത്തിൽ കളിക്കും. ഗില്ലിന്‍റെ അഭാവത്തിൽ ഇഷാൻ രോഹിത് ശർമയ്ക്കൊപ്പം ഇന്നിംഗ്സ് ഓപ്പണ്‍ ചെയ്യും. കെ.എൽ. രാഹുലിന്‍റെ വിക്കറ്റ് കീപ്പർ ചുമതലയും ഇഷാൻ നിർവഹിക്കും.
മധ്യനിരയിൽ അഞ്ചാം നന്പർ സ്ഥാനത്തിനായി തിലക് വർമയും ഋതുരാജ് ഗെയ്ക്‌വാദും അവസരം കാത്തിരിക്കുന്നു. നിലവിലെ പര്യടനത്തിലെ അഞ്ച് ട്വന്‍റി20 മത്സരങ്ങളിലും കളിച്ച തിലക് ന്യൂസിലൻഡ് എയ്ക്കെതിരായ മൂന്നാം ടെസ്റ്റിൽ അർധസെഞ്ചുറി നേടി തിളങ്ങിയിരുന്നു. ഇടം കൈയൻ ബാറ്ററെന്ന നിലയിൽ തിലകിന് സാധ്യത തെളിയും.
സിറാജ്/ കുൽദീപ്?
ആദ്യ മൂന്ന് മത്സരങ്ങളിലും സീനിയർ താരങ്ങളായ മുഹമ്മദ് സിറാജിനും കുൽദീപ് യാദവിനും പ്ലേയിംഗ് ഇലവനിൽ അവസരം ലഭിച്ചിരുന്നില്ല. അൻഷുൽ കംബോജ് മടങ്ങിയതോടെ ഇവരിലൊരാൾ ടീമിലെത്തും.
അക്വിബ് നബി, ഗുർനൂർ ബ്രാർ, അർഷ്ദീപ് സിംഗ് എന്നിവരിലൊരാൾക്ക് വിശ്രമം നൽകിയാൽ സിറാജും കുൽദീപും ഒരുമിച്ച് കളിക്കാനും സാധ്യതയുണ്ട്. അതേസമയം, കരിയറിലാദ്യമായി ഇന്ത്യൻ ഏകദിന ടീമിലേക്ക് വിളിച്ച കുമാർ കുശാഗ്രയ്ക്കും യഷ് ഠാക്കൂറിനും ഇന്നത്തെ മത്സരത്തിൽ അരങ്ങേറ്റത്തിനുള്ള സാധ്യത കുറാവാണ്.
ടോം ലാതം, ഡാരൽ മിച്ചൽ, ഗ്ലെൻ ഫിലിപ്സ്, നഥാൻ സ്മിത്ത്, ഹെൻറി നിക്കോൾസ് തുടങ്ങിയ താരങ്ങൾ ടെസ്റ്റ് ക്രിക്കറ്റിനായി വിശ്രമമെടുത്തതോടെ ന്യൂസിലൻഡ് നിരയിൽ ഇവർ കാണില്ല.
ജയിച്ചേ തീരൂ...
ഏഴ് വർഷം മുന്പാണ് ഇന്ത്യക്കെതിരേ ന്യൂസിലൻഡ് അവസാനമായി സ്വന്തം നാട്ടിൽ ഏകദിന പരന്പര തോറ്റത്. 2-0ന് പിന്നിലുള്ള കിവികൾക്ക് പരന്പര നഷ്ടമാകാതിരിക്കാൻ ഇന്നത്തെ മത്സരം ജയിച്ചേ തീരൂ. നായകനായി അരങ്ങേറ്റ മത്സരത്തിൽ ജയം സ്വന്തമാക്കി ട്വന്‍റി20 നായക മികവ് ഏകദിന ഫോർമാറ്റിലും തെളിയിക്കുകയെന്ന വെല്ലുവിളിയുമായാണ് ശ്രേയസ് അയ്യർ മത്സരത്തിനിറങ്ങുന്നത്.
Sports
റോം: ലോക ഫുട്ബോളിനെ തന്‍റെ മാന്ത്രിക നീക്കങ്ങൾകൊണ്ടു വിസ്മയിപ്പിച്ച ബ്രസീലിയൻ ഇതിഹാസം റൊണാൾഡീഞ്ഞോ വീണ്ടും മത്സര ഫുട്ബോളിലേക്ക് തിരിച്ചെത്തുന്നു. 11 വർഷത്തിലേറെ നീണ്ട ഇടവേളയ്ക്കുശേഷമാണ് 46കാരനായ താരം വീണ്ടും ബൂട്ടണിയുന്നത്. ഇറ്റാലിയൻ ക്ലബ്ബായ ‘റാവെന്ന’യ്ക്കുവേണ്ടിയാണ് റൊണാൾഡീഞ്ഞോ കളത്തിലിറങ്ങുക.
റാവെന്നയുമായുള്ള റൊണാൾഡീഞ്ഞോയുടെ ഈ തിരിച്ചുവരവിന് സവിശേഷതകൾ ഏറെയാണ്. ക്ലബ്ബിൽ രണ്ടു റോളുകളിലായിരിക്കും താരം ഉണ്ടാകുക-കളിക്കാരനായും ക്ലബ്ബിന്‍റെ ഓഹരി ഉടമയായും. കഴിഞ്ഞ ജൂണിൽ ക്ലബ്ബുമായി കരാറിലേർപ്പെട്ട റൊണാൾഡീഞ്ഞോ തുടർന്ന് സുഹൃത്ത് ഇഗ്നാസിയോ സിപ്രിയാനിയുടെ ഉടമസ്ഥതയിലുള്ള ഈ ടീമിൽ ഓഹരി പങ്കാളിത്തവും സ്വന്തമാക്കുകയായിരുന്നു.
2015 സെപ്റ്റംബറിൽ ബ്രസീലിയൻ ക്ലബ്ബായ ഫ്ലുമിനെൻസിനുവേണ്ടി കളിച്ചതിനുശേഷം ആദ്യമായാണ് റൊണാൾഡീഞ്ഞോ ഒരു മത്സരത്തിനായി മൈതാനത്തിറങ്ങുന്നത്. 2018ൽ ഔദ്യോഗികമായി വിരമിക്കൽ പ്രഖ്യാപിച്ചിരുന്നെങ്കിലും ഫുട്ബോൾ ലോകത്തെ ഏറ്റവും ആകർഷകമായ ശൈലിക്ക് ഉടമയായ താരം വീണ്ടും കളത്തിലേക്ക് വരുന്നുവെന്ന വാർത്ത ആരാധകർക്കിടയിൽ വലിയ ആവേശമാണു സൃഷ്‌ടിച്ചിരിക്കുന്നത്.
300-ാം ഗോൾ, ചരിത്രനേട്ടം ലക്ഷ്യം
തന്‍റെ പ്രഫഷണൽ കരിയറിലെ അപൂർവമായ ഒരു നാഴികക്കല്ല് സ്വന്തമാക്കാനുള്ള അവസരം കൂടിയാണ് റൊണാൾഡീഞ്ഞോയ്ക്ക് ഈ തിരിച്ചുവരവ്. കരിയറിൽ 299 ഗോളുകൾ നേടിയ ശേഷമാണു താരം കളിക്കളത്തോട് വിടപറഞ്ഞത്. അതിനാൽ, വരാനിരിക്കുന്ന മത്സരത്തിലൂടെ തന്‍റെ കരിയറിലെ 300-ാം ഗോൾ എന്ന സ്വപ്നനേട്ടം തികയ്ക്കാനാകും ബ്രസീലിയൻ ഇതിഹാസം ലക്ഷ്യമിടുന്നത്.
15ന് സ്റ്റേഡിയോ ബ്രൂണോ ബെനെല്ലിയിൽ ഫോർലി എഫ്സിക്കെതിരേ നടക്കുന്ന റാവെന്നയുടെ ഡെർബി പോരാട്ടമായിരിക്കും റൊണാൾഡീഞ്ഞോയുടെ തിരിച്ചുവരവിന് വേദിയാകുക. ലോകശ്രദ്ധ മുഴുവൻ തങ്ങളുടെ സ്റ്റേഡിയത്തിലേക്കു തിരിയുന്ന നിമിഷമായിരിക്കും ഇതെന്ന് ക്ലബ് അധികൃതർ വ്യക്തമാക്കി.
കളിക്കളത്തിലേക്കു മടങ്ങിവരുന്നതിന്‍റെ ആവേശം റൊണാൾഡീഞ്ഞോയും പങ്കുവച്ചു. പന്തുമായി വീണ്ടും മൈതാനത്തിറങ്ങാനും ക്ലബ്ബിനൊപ്പം പുതിയൊരു ചരിത്രം എഴുതാനും താൻ കാത്തിരിക്കുകയാണെന്ന് കരാർ ഒപ്പിട്ടശേഷം അദ്ദേഹം പറഞ്ഞു. ഫുട്ബോൾ തനിക്ക് എപ്പോഴും സന്തോഷത്തിന്‍റെ ഉറവിടമാണെന്നും ആ ആവേശം റാവെന്നയിലേക്കും കൊണ്ടുവരാൻ ആഗ്രഹിക്കുന്നുവെന്നും അദ്ദേഹം കൂട്ടിച്ചേർത്തു.
ഫുട്ബോൾ ലോകത്തെ മാന്ത്രികൻ
2002ൽ ഫിഫ ലോകകപ്പ് നേടിയ ബ്രസീൽ ടീമിലെ നിർണായക അംഗമായിരുന്നു റൊണാൾഡീഞ്ഞോ. ബാഴ്‌സലോണയിലെ മിന്നും പ്രകടനത്തിനു പിന്നാലെ 2005ൽ ബാലൺ ഡി ഓർ പുരസ്കാരവും അദ്ദേഹം സ്വന്തമാക്കി. 2000കളുടെ മധ്യത്തിൽ ബാഴ്‌സലോണയുടെ സുവർണകാലഘട്ടത്തിന് അടിത്തറയിട്ട താരം, ക്ലബ്ബിനൊപ്പം രണ്ട് ലാ ലിഗ കിരീടങ്ങളും 2006ൽ യുവേഫ ചാമ്പ്യൻസ് ലീഗ് കിരീടവും നേടിയിട്ടുണ്ട്. പാരീസ് സെന്‍റ് ജെർമെയ്ൻ, എസി മിലാൻ എന്നീ പ്രമുഖ ക്ലബ്ബുകൾക്കുവേണ്ടിയും അദ്ദേഹം ബൂട്ടണിഞ്ഞു.
തന്‍റെ തനതായ പുഞ്ചിരിയും അവിശ്വസനീയമായ ഡ്രിബ്ലിംഗ് പാടവവും സർഗാത്മകമായ നീക്കങ്ങളും കൊണ്ടു ഫുട്ബോളിനെ അനായാസമായ ഒരു കലയാക്കി മാറ്റിയ താരമാണു റൊണാൾഡീഞ്ഞോ. ആ പഴയ മാന്ത്രിക നിമിഷങ്ങൾ ഒരിക്കൽകൂടി കാണാനാകുമെന്ന പ്രതീക്ഷയിലാണ് ലോകമെമ്പാടുമുള്ള ഫുട്ബോൾ പ്രേമികള്‍.
Sports
മാഞ്ചസ്റ്റർ: 2026-27 പ്രീമിയർ ലീഗ് സീസണിലെ നിരാശാജനകമായ തുടക്കത്തെ തുടർന്ന് മാഞ്ചെസ്റ്റർ യുണൈറ്റഡ് ഹെഡ് കോച്ച് മൈക്കൽ കാരിക്കിനെ പുറത്താക്കി.
നിലവിലെ അമേരിക്കൻ ദേശീയ ടീം പരിശീലകനായ മൗറീഷ്യോ പൊച്ചെറ്റിനോയെ പകരക്കാരനായി നിയമിക്കാനാണ് ക്ലബിന്‍റെ നീക്കം. പൊച്ചെറ്റിനോയുമായി ക്ലബ് പ്രാഥമിക ധാരണയിലെത്തിയതായാണ് റിപ്പോർട്ടുകൾ.
ഈ സീസണിൽ കളിച്ച 10 പ്രീമിയർ ലീഗ് മത്സരങ്ങളിൽ നിന്ന് ഒരു ജയം മാത്രം നേടിയ യുണൈറ്റഡ് 18-ാം സ്ഥാനത്തേക്ക് പിന്തള്ളപ്പെടുകയും തരംതാഴ്ത്തൽ ഭീഷണി നേരിടുകയും ചെയ്ത പശ്ചാത്തലത്തിലാണ് ക്ലബ് മാനേജ്മെന്‍റ് നിർണായക തീരുമാനമെടുത്തത്.
2026 ജനുവരിയിലാണ് കാരിക്ക് യുണൈറ്റഡിന്‍റെ പരിശീലകസ്ഥാനത്തേക്ക് തിരിച്ചെത്തിയത്. തുടർന്ന് കളിച്ച 17 മത്സരങ്ങളിൽ 12 വിജയങ്ങൾ നേടി ടീമിനെ 2025-26 പ്രീമിയർ ലീഗ് സീസണിൽ മൂന്നാം സ്ഥാനത്ത് എത്തിക്കാനും യുവേഫ ചാന്പ്യൻസ് ലീഗ് യോഗ്യത നേടിക്കൊടുക്കാനും അദ്ദേഹത്തിന് സാധിച്ചിരുന്നു.
ഈ മികച്ച പ്രകടനത്തിന്‍റെ അടിസ്ഥാനത്തിലാണ് 2026-27 സീസണിന് മുന്നോടിയായി അദ്ദേഹത്തെ സ്ഥിരം കോച്ചായി നിയമിച്ചത്. എന്നാൽ പുതിയ സീസണിൽ ആ പ്രകടനം തുടരാൻ കാരിക്കിനും സംഘത്തിനും സാധിച്ചില്ല.
Sports
ന്യൂഡൽഹി: ഇന്ത്യൻ ഒളിന്പിക് അസോസിയേഷനിൽ പോര് മുറുകുന്നു. ഒളിന്പിക് അസോസിയേഷൻ (ഐഒഎ) പ്രസിഡന്‍റ് പി.ടി. ഉഷ ഐഒഎ ജനറൽ കൗണ്‍സിലിലേക്ക്.
തെരഞ്ഞെടുപ്പിനായുള്ള ഇലക്ടറൽ കോളജിലേക്ക് പി.ടി. ഉഷയെ നാമനിർദ്ദേശം ചെയ്തതായി റിട്ടേണിംഗ് ഓഫീസർ പുറപ്പെടുവിച്ച സർക്കുലറിൽ പറയുന്നു.
ഐസ് ഹോക്കി ഫെഡറേഷൻ ഓഫ് ഇന്ത്യയിൽ നിന്നുള്ള രണ്ട് അംഗങ്ങളിൽ ഹർജിന്ദർ സിംഗിനൊപ്പമാണ് ഉഷയെ നാമനിർദ്ദേശം ചെയ്തത്.
ഈ ആഴ്ച ആദ്യം നടന്ന ഇന്ത്യൻ ഒളിന്പിക് അസോസിയേഷന്‍റെ ’സ്പോർട്സ്പേഴ്സണ് ഓഫ് മെറിറ്റ്’ (എസ്ഒഎം) തെരഞ്ഞെടുപ്പിൽ ഉഷ പരാജയപ്പെട്ടതിനു പിന്നാലെയാണ് പുതിയ നീക്കം.
Sports
ടോക്കിയോ: ജപ്പാൻ മാസ്റ്റേഴ്സ് ബാഡ്മിന്‍റണ്‍ പുരുഷ സിംഗിൾസിൽ ഇന്ത്യയുടെ കിഡംബി ശ്രീകാന്ത് ക്വാർട്ടർ ഫൈനലിൽ പ്രവേശിച്ചു. ജപ്പാന്‍റെ കൊഡായി നറോക്കയെ പരാജയപ്പെടുത്തിയാണ് ക്വാർട്ടർ ഫൈനൽ പ്രവേശനം.
ഇരുതാരങ്ങളും തമ്മിലുള്ള അഞ്ച് മത്സരങ്ങളിൽ ശ്രീകാന്തിന്‍റെ ആദ്യ വിജയമാണിത്. ഒരു മണിക്കൂർ നീണ്ട പോരാട്ടത്തിൽ അഞ്ചാം സീഡ് താരം നറോക്കയെ 21-15, 11-21, 21-18 സ്കോറിനാണ് ശ്രീകാന്ത് പരാജയപ്പെടുത്തിയത്.
ലക്ഷ്യം മുന്നേറ്റം
സീസണിൽ മികച്ച ഫോം തുടരുന്ന ലക്ഷ്യ സെൻ ചൈനയുടെ ഡോങ് ടിയാൻ യാവോയെ പരാജയപ്പെടുത്തി ക്വാർട്ടർ ഫൈനലിൽ ഇടംപിടിച്ചു. 21-8, 21-14 സ്കോറിനായിരുന്നു ലക്ഷ്യസെന്നിന്‍റെ ജയം.
ട്രീസ- ഗായത്രി പുറത്ത്
ജപ്പാൻ മാസ്റ്റേഴ്സ് സൂപ്പർ 500 ടൂർണമെന്‍റിലെ വനിതാ ഡബിൾസ് പ്രീ-ക്വാർട്ടർ ഫൈനലിൽ ഇന്ത്യൻ വനിതാ സഖ്യം പുറത്തായി. ഇന്ത്യയുടെ ട്രീസ ജോളി- ഗായത്രി ഗോപിചന്ദ് സഖ്യമാണ് തോൽവി വഴങ്ങിയത്.
റിൻ ഇവാങ്ക- കീ നകാനിഷി സഖ്യത്തോട് 21-14, 21-14 സ്കോറിനാണ് ഇന്ത്യൻ സഖ്യം പരാജയപ്പെട്ടത്.
Sports
ദോഹ: ഖത്തറിലെ ദോഹയിൽ നടന്ന ഷൂട്ടിംഗ് ലോക ചാന്പ്യൻഷിപ്പിൽ പുരുഷന്മാരുടെ ട്രാപ്പ് ഇനത്തിൽ ഇന്ത്യയുടെ വിവാൻ കപൂർ വെള്ളി മെഡൽ നേടി.
24കാരനായ താരം ഫൈനലിൽ 30ൽ 29 പോയിന്റുകൾ നേടിയെങ്കിലും ഷൂട്ട്-ഓഫിൽ കുവൈറ്റിന്‍റെ അബ്ദുൾറഹ്മാൻ അൽ ഫൈഹാനോട് പരാജയപ്പെട്ടു.
2028ലെ ലോസ് ആഞ്ചലസ് ഒളിന്പിക്സിൽ സ്ഥാനം ഉറപ്പിക്കാനും അദ്ദേഹത്തിന് സാധിച്ചു.
Sports
മസ്കറ്റ്: അണ്ടർ 19 ഏഷ്യാ കപ്പ് സെമിയിൽ അഫ്ഗാനിസ്ഥാനെതിരെ ഇന്ത്യക്ക് 228 റൺസ് വിജയലക്ഷ്യം. ടോസ് നേടി ആദ്യം ബാറ്റിംഗ് തെരഞ്ഞെടുത്ത അഫ്ഗാനിസ്ഥാൻ നിശ്ചിത ഓവറുകളിൽ എട്ട് വിക്കറ്റ് നഷ്ടത്തിൽ 227 റൺസെടുത്തു. 51 റൺസ് വീതം നേടിയ ഷാ ഫൈസൽ റഹീമിയും നൊമാൻ സലർസായിയുമാണ് അഫ്ഗാനിസ്ഥാന്‍റെ ടോപ് സ്കോറർമാർ.
അഫ്ഗാന്‍റെ തുടക്കം മികച്ചതായിരുന്നില്ല. 29 റൺസിലെത്തിയപ്പോൾ അബ്ദുള്ള നദർജാന്‍റെ (14) വിക്കറ്റ് നഷ്ടമായി. പിന്നാലെ ഫരീദുള്ള ഇഹ്സാസ് (13), ശുഭൻ സഖെയിൽ (31) എന്നിവരും പുറത്തായി. ഇതോടെ 86 റൺസിന് മൂന്ന് വിക്കറ്റ് എന്ന നിലയിലായി അഫ്ഗാനിസ്ഥാൻ. തുടർന്ന് ക്രീസിലൊന്നിച്ച നൊമാൻ സലർസായിയും ഷാ ഫൈസൽ റഹീമിയും ചേർന്ന് 57 റൺസ് കൂട്ടിച്ചേർത്ത് ടീമിനെ തകർച്ചയിൽ നിന്ന് കരകയറ്റി.
എന്നാൽ നിർണായക ഘട്ടത്തിൽ അഫ്ഗാനിസ്ഥാന് വീണ്ടും തിരിച്ചടിയേറ്റു. സലർസായി പുറത്തായതിന് പിന്നാലെ ഏഴ് പന്തുകൾക്കിടെ അമിർ ഹംസ (0), താഹിർ സർവാരി (ഒന്ന്) എന്നിവരുടെ വിക്കറ്റുകളും നഷ്ടമായി. പിന്നീട് റഹീമിയും പുറത്താകാതെ 36 റൺസ് നേടിയ സൊഹൈൽ ഖാനും ചേർന്നാണ് ടീമിനെ ഭേദപ്പെട്ട സ്കോറിലെത്തിച്ചത്.
ഇരുവരും ചേർന്ന് 60 റൺസ് കൂട്ടിച്ചേർത്തു. ഇന്ത്യക്കായി ഇഷാൻ സൂദ് മൂന്ന് വിക്കറ്റും ആര്യൻ സാവ്‌സനി രണ്ട് വിക്കറ്റും വീഴ്ത്തി. ഇന്നത്തെ മത്സരത്തിൽ വിജയിക്കുന്ന ടീം ബംഗ്ലാദേശ്-പാക്കിസ്ഥാൻ സെമി ഫൈനലിലെ വിജയികളുമായി ഫൈനലിൽ ഏറ്റുമുട്ടും.
Sports
ഓക്‌ലൻഡ്: ന്യൂസിലൻഡിനെതിരായ സൗഹൃദ ഫുട്ബോളിൽ മത്സരത്തിൽ ഇന്ത്യയ്ക്ക് കനത്ത തോൽവി. മറുപടിയില്ലാത്ത അഞ്ച് ഗോളുകൾക്കാണ് ഇന്ത്യ പരാജയപ്പെട്ടത്. ന്യൂസിലൻഡിനായി ജെസെ റാൻഡൽ ഇരട്ടഗോൾ നേടി. ബിജോയ് വർഗീസിന്‍റെ സെൽഫ് ഗോളും ഇന്ത്യയ്ക്ക് തിരിച്ചടിയായി. മത്സരം ആരംഭിച്ച് അഞ്ചാം മിനിറ്റിൽ തന്നെ ന്യൂസിലൻഡ് ലീഡ് നേടി.
പ്രതിരോധ താരം ബിജോയ് വർഗീസിന്‍റെ സെൽഫ് ഗോളിലൂടെയായിരുന്നു ന്യൂസിലൻഡിന്‍റെ ആദ്യ മുന്നേറ്റം. എതിർ ടീമിന്‍റെ ആക്രമണം തടയുന്നതിനിടെ പന്ത് ക്ലിയർ ചെയ്യാനുള്ള ശ്രമം പാളുകയായിരുന്നു. തുടർന്ന് ഇരുടീമുകളും ആക്രമണങ്ങൾ നടത്തിയെങ്കിലും ന്യൂസിലൻഡിന്‍റെ മുന്നേറ്റത്തിന് മുന്നിൽ ഇന്ത്യൻ പ്രതിരോധം പതറി. ആദ്യ പകുതി അവസാനിക്കുന്നതിന് മുൻപ് 34, 43 മിനിറ്റുകളിൽ ജെസെ റാൻഡൽ വലകുലുക്കി.
ഇതോടെ ന്യൂസിലൻഡ് മൂന്ന് ഗോളിന്‍റെ ലീഡ് സ്വന്തമാക്കി. രണ്ടാം പകുതിയിൽ തിരിച്ചുവരവിന് ശ്രമിച്ച ഇന്ത്യയ്ക്ക് പക്ഷേ കാര്യമായ മുന്നേറ്റങ്ങളൊന്നും നടത്താനായില്ല. വിങ്ങുകളിലൂടെ നിരന്തരം ആക്രമണം നടത്തിയ ന്യൂസിലൻഡ് 57-ാം മിനിറ്റിൽ ക്രിസ് വുഡിലൂടെ നാലാം ഗോൾ നേടി. 74-ാം മിനിറ്റിൽ ലക്ലാൻ ബെയ്സ് അഞ്ചാം ഗോളും കണ്ടെത്തി.
Sports
ന്യൂഡൽഹി: ഇന്ത്യയും ബംഗ്ലാദേശും തമ്മിലുള്ള ക്രിക്കറ്റ് ബന്ധത്തിൽ മഞ്ഞുരുകുന്നു. ഇരുരാജ്യങ്ങളും തമ്മിലുള്ള വൈറ്റ്ബോൾ പരമ്പരയ്ക്കായുള്ള ചർച്ചകൾ പുരോഗമിക്കുന്നതിനിടെ വരാനിരിക്കുന്ന ഐപിഎൽ താരലേലത്തിൽ ബംഗ്ലാദേശ് താരങ്ങൾക്കും അവസരം ലഭിക്കും. ബംഗ്ലാദേശ് താരങ്ങൾക്ക് ലേലത്തിൽ പങ്കെടുക്കാൻ ബിസിസിഐ അനുമതി നൽകിയതായി സൂചനയുണ്ട്.
കഴിഞ്ഞ ഐപിഎൽ ലേലത്തിൽ കോൽക്കത്ത നൈറ്റ് റൈഡേഴ്സ് ടീമിലെത്തിച്ച ശേഷം ഒഴിവാക്കിയ ബംഗ്ലാദേശ് പേസർ മുസ്തഫിസുർ റഹ്മാനും ഇത്തവണ രജിസ്റ്റർ ചെയ്തിട്ടുണ്ട്. മുസ്തഫിസുർ ഉൾപ്പെടെ ഏഴ് ബംഗ്ലാദേശ് താരങ്ങളാണ് ലേലത്തിൽ പങ്കെടുക്കാൻ ഒരുങ്ങുന്നത്. നഹീദ് റാണ, റിഷാദ് ഹൊസൈൻ, ഹസൻ മഹ്മൂദ്, തൗഹീദ് ഹൃദോയ്, ടസ്കിൻ അഹമ്മദ്, ഷൊറിഫുൾ ഇസ്ലാം എന്നിവരാണ് പട്ടികയിലെ മറ്റ് താരങ്ങൾ.
ഇന്ത്യയിൽ നടന്ന ടി20 ലോകകപ്പ് ബംഗ്ലാദേശ് ബഹിഷ്കരിച്ചതോടെയാണ് ബിസിസിഐയും ബംഗ്ലാദേശ് ക്രിക്കറ്റ് ബോർഡും തമ്മിലുള്ള ബന്ധത്തിൽ വിള്ളലുണ്ടായത്. എന്നാൽ പുതിയ നീക്കങ്ങൾ ഇരുരാജ്യങ്ങളുടെയും ക്രിക്കറ്റ് ബന്ധത്തിൽ അനുകൂലമായ മാറ്റത്തിന്‍റെ സൂചനയായാണ് വിലയിരുത്തപ്പെടുന്നത്. ഐപിഎല്ലിന്‍റെ പുതിയ സീസണിന് മുന്നോടിയായി താരലേലത്തിനുള്ള ഒരുക്കങ്ങൾ സജീവമാക്കിയിരിക്കുകയാണ് ഫ്രാഞ്ചൈസികൾ.
ടീമിൽ നിലനിർത്തേണ്ടവരുടെയും ഒഴിവാക്കേണ്ടവരുടെയും പട്ടിക തയാറാക്കുന്ന തിരക്കിലാണ് ടീമുകൾ. നിലനിർത്തുന്ന താരങ്ങളുടെ പട്ടിക സമർപ്പിക്കാനുള്ള അവസാന തീയതി നവംബർ 15 ആണ്. ഡിസംബർ 16നാണ് താരലേലം നടക്കുന്നത്. കഴിഞ്ഞ ഐപിഎൽ സീസണിന് മുന്നോടിയായി ബിസിസിഐയുടെ നിർദേശത്തെത്തുടർന്ന് കോൽക്കത്ത നൈറ്റ് റൈഡേഴ്സ് മുസ്തഫിസുർ റഹ്മാനെ ടീമിൽനിന്ന് ഒഴിവാക്കിയത് വലിയ വിവാദങ്ങൾക്ക് വഴിവെച്ചിരുന്നു.
Sports
ന്യൂഡൽഹി: സെവാഗ് എന്ന പേര് കേട്ടാൽ ക്രിക്കറ്റ് ആരാധകരുടെ മനസിൽ ആദ്യം തെളിയുന്നത് ബൗണ്ടറികൾ കടന്നുപായുന്ന പന്തുകളാണ്. ആ ഓർമകൾക്ക് വീണ്ടും ജീവൻ നൽകുകയാണ് മകൻ ആര്യവീർ. അണ്ടർ19 ഏഷ്യാ കപ്പിൽ ഈ കൗമാര താരത്തിന്‍റെ പ്രകടനം ഇതിനു തെളിവായി മാറിയിരിക്കുകയാണ്. യുഎഇക്കെതിരെ കഴിഞ്ഞ ദിവസം 160 റൺസ് അടിച്ചുകൂട്ടിയതോടെ അച്ഛന്‍റെ പാതയിൽ മകന്‍റെയും വെടിക്കെട്ട് യാത്ര തുടങ്ങിയിരിക്കുന്നു. യുഎഇക്കെതിരെ 17 ഫോറും ഏഴ് സിക്സറും പറത്തിയ ആര്യവീറിന്‍റെ ഇന്നിംഗ്സ് വെറുമൊരു സെഞ്ചുറി പ്രകടനമല്ല ക്രിക്കറ്റ് ലോകത്തിന് മുന്നിലുള്ള തന്‍റെ വരവറിയിക്കൽ കൂടിയാണ്.
അച്ഛന് നൽകിയ വാക്ക് പാലിച്ച ഇന്നിംഗ്സ്
വീരേന്ദർ സെവാഗിന്‍റെ ക്രിക്കറ്റ് കാഴ്ചപ്പാടും ബാറ്റിംഗ് തത്വങ്ങളും ആര്യവീറിന്‍റെ വളർച്ചയിലും സ്വാധീനം ചെലുത്തുന്നുണ്ട്. അതിന്‍റെ മനോഹരമായ ഉദാഹരണമായിരുന്നു യുഎഇക്കെതിരായ തകർപ്പൻ ഇന്നിംഗ്സ്. സെഞ്ചുറി നേടുക എന്നതിൽ മാത്രം ഒതുങ്ങരുതെന്നും ഒരിക്കൽ മൂന്നക്കം കടന്നാൽ സ്കോർ 150 റൺസിന് മുകളിലെത്തിക്കാൻ ശ്രമിക്കണമെന്നുമായിരുന്നു മകനോട് സെവാഗ് നൽകിയ ഉപദേശം. വലിയ സ്കോറുകൾ കണ്ടെത്താനുള്ള മനോഭാവവും ക്രീസിൽ ലഭിക്കുന്ന അവസരം പരമാവധി പ്രയോജനപ്പെടുത്താനുള്ള ശീലവുമാണ് ഈ ഉപദേശത്തിന് പിന്നിൽ.
അച്ഛന്‍റെ വാക്കുകൾ മനസിൽ സൂക്ഷിച്ചാണ് ആര്യവീർ യുഎഇക്കെതിരെ ബാറ്റ് വീശിയത്. തുടക്കത്തിൽ വിക്കറ്റുകൾ കാത്തുസൂക്ഷിച്ച് ക്ഷമയോടെ കളിച്ച താരം 131 പന്തുകൾ നേരിട്ടാണ് സെഞ്ചുറി പൂർത്തിയാക്കിയത്. എന്നാൽ മൂന്നക്കം കടന്നതോടെ ബാറ്റിംഗ് ടോപ് ഗിയറിലേക്ക് മാറ്റി. പിന്നീട് ക്രീസിൽ കണ്ടത് ആര്യവീറിന്‍റെ ആക്രമണോത്സുക മുഖമായിരുന്നു. തുടർന്നുള്ള വെറും 37 പന്തുകളിൽ നിന്ന് 60 റൺസ് കൂടി അടിച്ചെടുത്തതോടെ സ്കോർ 160-ലെത്തി.
ഈ ഘട്ടത്തിൽ പന്ത് അതിർത്തികൾ കടന്നുപായുന്ന ഷോട്ടുകളിലൂടെ ബൗളർമാരുടെ മേൽ ആധിപത്യം സ്ഥാപിക്കാനും താരത്തിനായി. 17 ഫോറുകളും ഏഴ് സിക്സറുകളും ഉൾപ്പെട്ട ഇന്നിംഗ്സ് അച്ഛന് നൽകിയ വാക്ക് പാലിക്കുക മാത്രമല്ല, വലിയ ഇന്നിംഗ്സുകൾ കളിക്കാനുള്ള തന്‍റെ കഴിവും ആത്മവിശ്വാസവും തെളിയിക്കുന്നതായി. സെവാഗിന്‍റെ ഉപദേശം വെറുമൊരു വാക്കായി ഒതുങ്ങിയില്ല മകന്‍റെ ബാറ്റിൽ അത് റൺമഴയായി പെയ്തിറങ്ങുകയായിരുന്നു.
തുടക്കത്തിൽ കരുതൽ, പിന്നെ വെടിക്കെട്ട്
ബാറ്റിങ്ങിൽ അച്ഛൻ വീരേന്ദർ സെവാഗിന്‍റെ അതേ ആക്രമണോത്സുക ശൈലിയല്ല ആര്യവീറിന്‍റേത്. ആദ്യ പന്തുമുതൽ ബൗളർമാരെ കടന്നാക്രമിക്കുന്ന സെവാഗിൽനിന്ന് വ്യത്യസ്തമായി ക്രീസിൽ നിലയുറപ്പിക്കാനും ബൗളർമാരുടെ താളവും പന്തിന്‍റെ സ്വഭാവവും മനസിലാക്കാനും സമയം കണ്ടെത്തുന്ന രീതിയാണ് ആര്യവീർ പിന്തുടരുന്നത്. തുടക്കത്തിൽ റൺസ് കണ്ടെത്തുന്നതിനേക്കാൾ വിക്കറ്റ് നഷ്ടപ്പെടുത്താതെ ബാറ്റിംഗ് മുന്നോട്ടുകൊണ്ടുപോകുന്നതിനാണ് താരം പ്രാധാന്യം നൽകുന്നത്. എന്നാൽ ഒരിക്കൽ ക്രീസിൽ ആത്മവിശ്വാസം കൈവന്നാൽ പിന്നെ ബൗളർമാർക്ക് കാര്യങ്ങൾ അത്ര എളുപ്പമല്ല.
യുഎഇക്കെതിരായ മത്സരത്തിൽ ആദ്യ റൺ കണ്ടെത്താൻ തന്നെ 14 പന്തുകൾ ആര്യവീറിന് വേണ്ടിവന്നു. തുടക്കത്തിലെ ഈ കരുതൽ കണ്ടപ്പോൾ വലിയൊരു ഇന്നിംഗ്സിലേക്കുള്ള സൂചനയാണെന്ന് ആരും കരുതിയിരിക്കണമെന്നില്ല. എന്നാൽ ക്രീസിൽ നിലയുറപ്പിച്ചശേഷം താരം പതിയെ ബാറ്റിംഗിന്‍റെ വേഗം കൂട്ടി. ഗ്യാപ്പുകൾ കണ്ടെത്തി സിംഗിളുകളും ഡബിളുകളും നേടിയെടുക്കുന്നതിനൊപ്പം മോശം പന്തുകളെ അതിർത്തി കടത്താനും തുടങ്ങി. പിന്നീട് ബൗളർമാർക്ക് മേൽ സമ്മർദം ചെലുത്തുന്ന രീതിയിലേക്ക് ഇന്നിംഗ്സ് മാറി. തുടക്കത്തിൽ ക്ഷമയോടെ പന്തുകളെ നേരിട്ട അതേ താരം പിന്നീട് അനായാസം സിക്സറുകളും ഫോറുകളും പായിക്കുന്ന കാഴ്ചയായിരുന്നു മൈതാനത്ത്.
ആദ്യ 131 പന്തുകളിൽ സെഞ്ചുറി നേടിയ ആര്യവീർ പിന്നീട് വെറും 37 പന്തുകളിൽ 60 റൺസ് കൂടി അടിച്ചെടുത്തത് ഈ മാറ്റത്തിന്‍റെ ഏറ്റവും മികച്ച ഉദാഹരണമാണ്. തുടക്കത്തിലെ കരുതലും അവസാനഘട്ടത്തിലെ ആക്രമണവും ചേർന്നപ്പോൾ 160 റൺസിന്‍റെ തകർപ്പൻ ഇന്നിംഗ്സ് പിറന്നു. അച്ഛന്‍റെ വെടിക്കെട്ട് ബാറ്റിങ്ങിൽനിന്ന് വ്യത്യസ്തമായ ശൈലിയാണെങ്കിലും വലിയ സ്കോറുകൾ കണ്ടെത്താനുള്ള മനോഭാവത്തിൽ ഇരുവരും തമ്മിൽ സാമ്യമുണ്ട്. ക്ഷമയോടെ തുടങ്ങി അവസരം ലഭിക്കുമ്പോൾ എതിരാളികളെ കടന്നാക്രമിക്കുന്ന ആര്യവീറിന്‍റെ ഈ ബാറ്റിങ് രീതി തന്നെയാണ് താരത്തെ ശ്രദ്ധേയനാക്കുന്നത്.
ജൂനിയർ ക്രിക്കറ്റിൽ നേരത്തെ അടയാളപ്പെടുത്തിയ പ്രതിഭ
ജൂനിയർ ക്രിക്കറ്റിൽ ഡൽഹിക്കുവേണ്ടി നടത്തിയ മികച്ച പ്രകടനങ്ങളിലൂടെയാണ് ആര്യവീർ ശ്രദ്ധ നേടിത്തുടങ്ങിയത്. 2024 നവംബറിൽ കൂച്ച് ബെഹാർ ട്രോഫിയിൽ മേഘാലയക്കെതിരെ നേടിയ 297 റൺസായിരുന്നു ആദ്യത്തെ വലിയ നേട്ടങ്ങളിലൊന്ന്. 309 പന്തിൽ 51 ഫോറുകളും മൂന്ന് സിക്സറുകളും ഉൾപ്പെടെയായിരുന്നു ആ ഇന്നിംഗ്സ്. വെറും മൂന്ന് റൺസ് അകലെ ട്രിപ്പിൾ സെഞ്ചുറി നഷ്ടമായെങ്കിലും ആ പ്രകടനം താരത്തിന്‍റെ മാറ്റ് തെളിയിച്ചു. 2026 ഒക്ടോബറിൽ വിനൂ മങ്കാദ് ട്രോഫിയിൽ ഡൽഹി അണ്ടർ 19 ടീമിനെ നയിച്ച ആര്യവീർ ചണ്ഡീഗഢിനെതിരെ 143 പന്തിൽ 173 റൺസും നേടി. 19 ഫോറുകളും എട്ട് സിക്സറുകളും ഉൾപ്പെട്ട ഇന്നിംഗ്സിൽ 124 റൺസും ബൗണ്ടറികളിലൂടെയാണ് നേടിയത്. സ്ഥിരതയാർന്ന ഈ പ്രകടനങ്ങൾ താരത്തിന്‍റെ വളർച്ചയ്ക്ക് കരുത്തായി.
ലീഗിലെ സാന്നിധ്യവും ജൂനിയർ ടീമിലെ അരങ്ങേറ്റവും
ജൂനിയർ ക്രിക്കറ്റിലെ മികച്ച പ്രകടനങ്ങൾക്കൊപ്പം പ്രൊഫഷണൽ ക്രിക്കറ്റിന്‍റെ കൂടുതൽ കടുപ്പമേറിയ വേദികളിലും തന്‍റെ കഴിവ് തെളിയിച്ചുകൊണ്ടിരിക്കുകയാണ്ആര്യവീർ. ഡൽഹി പ്രീമിയർ ലീഗിലൂടെയാണ് ടി20 ക്രിക്കറ്റിൽ താരം സാന്നിധ്യമറിയിച്ചത്. 2025 സീസണിൽ സെൻട്രൽ ഡൽഹി കിംഗ്സിനായി കളിച്ച ആര്യവീർ, 2026 സീസണിൽ വെസ്റ്റ് ഡൽഹി ലയൺസിന്‍റെ ഭാഗമായി. ടി20 ക്രിക്കറ്റിന്‍റെ വേഗതയേറിയ സാഹചര്യങ്ങളുമായി പൊരുത്തപ്പെടാനും വ്യത്യസ്തമായ ബൗളിംഗ് ശൈലികളെ നേരിടാനുമുള്ള അവസരമായിരുന്നു ഈ ലീഗ് മത്സരങ്ങൾ.
ആഭ്യന്തര ക്രിക്കറ്റിലെ സ്ഥിരതയാർന്ന പ്രകടനങ്ങൾക്കുള്ള അംഗീകാരമായിരുന്നു ഇന്ത്യൻ അണ്ടർ 19 ടീമിലേക്കുള്ള വിളി. ഓസ്ട്രേലിയൻ അണ്ടർ 19 ടീമിനെതിരായ ഏകദിന പരമ്പരയിലൂടെയാണ് ആര്യവീർ ഇന്ത്യൻ ജൂനിയർ ജഴ്സിയിൽ അരങ്ങേറ്റം കുറിച്ചത്. രാജ്യത്തിനായി ആദ്യമായി കളിക്കാനിറങ്ങിയ പരമ്പരയിൽ തന്നെ ശ്രദ്ധേയമായ തുടക്കമാണ് താരം സ്വന്തമാക്കിയത്. മൂന്ന് മത്സരങ്ങളിൽ നിന്ന് 28, 47, 34 എന്നിങ്ങനെയായിരുന്നു സ്കോറുകൾ.
വലിയ ഇന്നിംഗ്സുകളിലേക്ക് ഉയരാനായില്ലെങ്കിലും മൂന്ന് മത്സരങ്ങളിലും ഭേദപ്പെട്ട സംഭാവന നൽകാൻ സാധിച്ചത് താരത്തിന്‍റെ സ്ഥിരതയുടെ സൂചനയായി. ഇന്ത്യൻ ജൂനിയർ ടീമിലെ അരങ്ങേറ്റത്തിന് പിന്നാലെ അണ്ടർ 19 ഏഷ്യാ കപ്പിലും മികച്ച പ്രകടനം ആവർത്തിക്കുകയാണ് ആര്യവീർ. അച്ഛന്‍റെ പേരിന്‍റെ തണലിൽ മാത്രം ഒതുങ്ങാതെ സ്വന്തം പ്രകടനങ്ങളിലൂടെ ഇന്ത്യൻ ക്രിക്കറ്റിൽ ഇടം ഉറപ്പിക്കാനുള്ള ശ്രമത്തിലാണ് ഈ യുവതാരം.
Sports
ധാക്ക: സാഫ് കപ്പ് ഫുട്‌ബോളില്‍ മാലദ്വീപിനെ പരാജയപ്പെടുത്തി ഇന്ത്യൻ പുരുഷന്മാർ സെമിയില്‍. നിലവിലെ ചാമ്പ്യന്മാരായ ഇന്ത്യക്ക് സമനില നേടിയാലും സെമി പ്രവേശനം ഉറപ്പിക്കാമായിരുന്ന മത്സരത്തില്‍ 1-0നായിരുന്നു ജയം.
ധാക്കയിലെ നാഷണല്‍ സ്റ്റേഡിയത്തില്‍ നടന്ന മത്സരത്തില്‍ സുഹൈല്‍ അഹമ്മദ് ഭട്ട് ആദ്യ പകുതിയില്‍ ലഭിച്ച പെനാല്‍റ്റി ലക്ഷ്യത്തിലെത്തിച്ച് ഇന്ത്യക്കു മൂന്നു പോയിന്‍റ് സമ്മാനിച്ചു. ഇതോടെ ഗ്രൂപ്പ് ടോപ്പറായി ഇന്ത്യ സെമിയിൽ. ഗ്രൂപ്പ് ബിയില്‍ നടന്ന ആദ്യ മത്സരത്തില്‍ പാക്കിസ്ഥാനെ 3-2ന് ഇന്ത്യ തകര്‍ത്തിരുന്നു.
മത്സരത്തിന്‍റെ തുടക്കം മുതല്‍ ഇന്ത്യ ആധിപത്യം പുലര്‍ത്തി. പന്തിന്‍റെ നിയന്ത്രണം നീലപ്പട ഏറ്റെടുത്ത് മൂന്നാം മിനിറ്റില്‍ സുഹൈല്‍ മാല്‍ഡിവ്‌സ് ഗോള്‍ കീപ്പര്‍ ഹുസൈന്‍ ഷെരീഫിന് വെല്ലുവിളിയുയര്‍ത്തുന്ന ഷോട്ട് പായിച്ചു. എന്നാല്‍, ഗോളെന്ന ലക്ഷ്യത്തിനായി 38-ാം മിനിറ്റ് വരെ കാത്തിരിക്കേണ്ടി വന്നു.
നോര്‍ത്ത് ഈസ്റ്റ് യുണൈറ്റഡിന്‍റെ മുന്നേറ്റനിര താരം അബ്ദുള്‍ റബീഹിനെ പെനാല്‍റ്റി ബോക്‌സിനുള്ളില്‍ ഹുസൈന്‍ സിഫാവു യൂസഫ് ഫൗള്‍ ചെയ്തത് ഇന്ത്യൻ വിജയ നിമിഷമാക്കി മാറ്റി. ലഭിച്ച പെനാല്‍റ്റി സുഹൈല്‍ ഭട്ട് മാലദ്വീപ് ഗോള്‍വലയുടെ ഇടത് മൂലയിൽ നിക്ഷേപിച്ചു. സീസണിൽ സുഹൈലിന്‍റെ മൂന്നാം ഗോൾ.
മത്സരത്തിന്‍റെ അവസാന നിമിഷം മാലദ്വീപിന്‍റെ ഏഥന്‍ ഇബ്രാഹിം സാക്കിയുടെ സമനില ഗോളിനായുള്ള ശ്രമം ഇന്ത്യന്‍ ഗോള്‍കീപ്പര്‍ പ്രിയാന്‍ഷ് ദുബെ രക്ഷപ്പെടുത്തി. ബോക്‌സിനുള്ളില്‍ ലഭിച്ച ഓപ്പണ്‍ ചാന്‍സ് ഏഥന്‍ ഇബാഹിം ലക്ഷ്യത്തിലേക്ക് തൊടുത്തെങ്കിലും പ്രിയാന്‍ഷിന്‍റെ ഉജ്വല സേവ്. എന്നാല്‍, പന്ത് മുഖത്ത് തട്ടി പരിക്കേറ്റ പ്രിയാന്‍ഷിന് ഫിസിയോയുടെ സഹായം തേടേണ്ടിവന്നു.
Sports
മിലാന്‍: മഞ്ഞുവീഴ്ചയാല്‍ വിറങ്ങലിക്കുന്ന യൂറോപ്പില്‍ തീപ്പൊരി പോരാട്ടത്തിലൂടെ ചൂടുപകരാന്‍ യുവേഫ ചാമ്പ്യന്‍സ് ലീഗ് ഫുട്‌ബോളിന്‍റെ അഞ്ചാം റൗണ്ടിന് ഈ രാത്രി തുടക്കം.
2026 ഫിഫ ലോകകപ്പ് ജേതാക്കളായ സ്‌പെയിന്‍, മൂന്നാം സ്ഥാനക്കാരായ ഇംഗ്ലണ്ട്, മുന്‍ ചാമ്പ്യന്മാരായ ഫ്രാന്‍സ്, പ്രതാപം വീണ്ടെടുക്കാന്‍ ശ്രമിക്കുന്ന ഇറ്റലി, ക്രൊയേഷ്യ തുടങ്ങിയ വമ്പന്മാരെല്ലാം ഈ രാത്രി കളത്തില്‍ ഇറങ്ങും. സോണി ടെന്‍, ലിവ് എന്നിവയിലൂടെ മത്സരങ്ങള്‍ തത്സമയം കാണാം.
മിലാനിലെ സാന്‍ സിറൊ സ്റ്റേഡിയത്തില്‍ നടക്കുന്ന ഇറ്റലി x ഫ്രാന്‍സ് പോരാട്ടമാണ് അഞ്ചാം റൗണ്ടിലെ ശ്രദ്ധേയ പോരാട്ടങ്ങളിലൊന്ന്. ഇന്ത്യന്‍ സമയം നാളെ പുലര്‍ച്ചെ 1.15നാണ് കിക്കോഫ്. പരിക്കേറ്റു വിശ്രമത്തിലുള്ള സൂപ്പര്‍ താരം കിലിയന്‍ എംബപ്പെ ഫ്രാന്‍സിനൊപ്പം കളിച്ചേക്കില്ല. ഗ്രൂപ്പ് എയില്‍ നാലു മത്സരങ്ങളില്‍നിന്നു 10 പോയിന്‍റുമായി ഫ്രാന്‍സ് ആണ് ഒന്നാമത്. ഏഴു പോയിന്‍റുമായി ഇറ്റലി രണ്ടാം സ്ഥാനത്തുണ്ട്. ഗ്രൂപ്പ് എയിലെ മറ്റൊരു മത്സരത്തില്‍ ബെല്‍ജിയം തുര്‍ക്കിയുമായി ഏറ്റുമുട്ടും.
ഗ്രൂപ്പ് സിയില്‍ ഇംഗ്ലണ്ടും ക്രൊയേഷ്യയും കൊമ്പുകോര്‍ക്കും. ലണ്ടനിലെ വെംബ്ലി സ്റ്റേഡിയത്തിലാണ് മത്സരം. ക്രൊയേഷ്യയില്വച്ചു നടന്ന ആദ്യ മുഖാമുഖത്തില്‍ ഇംഗ്ലണ്ട് 7-0ന്‍റെ ജയം സ്വന്തമാക്കിയിരുന്നു. സിയിലെ മറ്റൊരു മത്സരത്തില്‍ സ്‌പെയിന്‍ ചെക്കുമായി ഏറ്റുമുട്ടും. കളിച്ച നാലു മത്സരങ്ങളും ജയിച്ച് 12 പോയിന്‍റുമായി സ്‌പെയിലാണ് ഗ്രൂപ്പിന്‍റെ തലപ്പത്ത്. ഒമ്പതു പോയിന്‍റുമായി ഇംഗ്ലണ്ട് രണ്ടാമതുണ്ട്. മൂന്നു പോയിന്‍റുമായി ക്രൊയേഷ്യ മൂന്നാമതാണ്.
Sports
കോട്ടയം: ന്യൂസിലന്‍ഡിനെതിരായ 3x3 ബാസ്‌കറ്റ്‌ബോള്‍ ടീമില്‍ മലയാളി താരങ്ങളായ അനീഷ ക്ലീറ്റസും ആര്‍. ശ്രീകലയും ഇടംപിടിച്ചു. ഇന്ത്യന്‍ റെയില്‍വേ താരങ്ങളായ പുഷ്പ സെന്തില്‍ കുമാര്‍, ദര്‍ശിനി തിരുനാവുക്കരശു എന്നിവരാണ് ടീമിലെ മറ്റ് അംഗങ്ങള്‍.
ഇന്ത്യയും ന്യൂസിലന്‍ഡും തമ്മിലുള്ള കായിക ബന്ധത്തിന്‍റെ നൂറാം വാര്‍ഷികാഘോഷങ്ങളുടെ ഭാഗമായി സംഘടിപ്പിക്കുന്ന ‘100 ഇയേഴ്സ് യൂണിറ്റി ത്രൂ സ്പോര്‍ട്' സാംസ്‌കാരിക-കായിക വിനിമയ പരിപാടിയിലാണ് ടീം മാറ്റുരയ്ക്കുക. 13, 14 തീയതികളിലാണ് മത്സരങ്ങള്‍.
Sports
മുംബൈ: ആഴ്ചകള്‍ നീണ്ട അഭ്യൂഹങ്ങള്‍ക്കു വിരാമം. ഐപിഎല്‍ ട്വന്‍റി-20 ക്രിക്കറ്റിലെ ഗ്ലാമര്‍ ടീമായ മുംബൈ ഇന്ത്യന്‍സിന്‍റെ പേസ് ഓള്‍ റൗണ്ടര്‍ ഹാര്‍ദിക് പാണ്ഡ്യ പഞ്ചാബ് കിംഗ്സിലേക്കും പഞ്ചാബ് കിംഗ്‌സിന്‍റെ ഇടംകൈ പേസറായ അര്‍ഷദീപ് സിംഗ് മുംബൈ ഇന്ത്യന്‍സിലേക്കും ചേക്കേറി.
ഹാര്‍ദിക്കിന്‍റെ ട്രേഡ് മുംബൈ ഇന്ത്യന്‍സ് അധികൃതര്‍ ഇന്നലെ രാവിലെ സ്ഥിരീകരിച്ചു. അര്‍ഷദീപിന്‍റെ കൂടുമാറ്റം അദ്ദേഹത്തിന്‍റെ അച്ഛനും അടിവരയിട്ടു. ഇതിനു പിന്നാലെ ഇവരുടെ കൈമാറ്റക്കരാര്‍ സംബന്ധിച്ച വിശദാംശങ്ങള്‍ പങ്കുവച്ച് ഐപിഎല്‍ പത്രക്കുറിപ്പു പ്രസിദ്ധപ്പെടുത്തി. അതോടെ ഐപിഎല്‍ ചരിത്രത്തിലെ ഏറ്റവും വിലയേറിയ കൈമാറ്റക്കരാര്‍ ഔദ്യോഗികമാക്കപ്പെട്ടു. 2027 ഐപിഎല്‍ സീസണിനു മുന്നോടിയായാണ് ഈ കൈമാറ്റം.
36 കോടിയുടെ കൈമാറ്റം
36 കോടി രൂപയുടെ ട്രാന്‍സ്ഫര്‍ ഡീലിലൂടെയാണ് ഹാര്‍ദിക്കിനെയും അര്‍ഷദീപിനെയും മുംബൈ ഇന്ത്യന്‍സും പഞ്ചാബ് കിംഗ്‌സും പരസ്പരം കൈമാറിയത്. അതായത്, ഹാര്‍ദിക്കിനും അര്‍ഷദീപിനും 18 കോടി രൂപ വീതം. ഫലത്തില്‍ ഹാര്‍ദിക് പാണ്ഡ്യക്കാണ് ഈ കൈമാറ്റത്തില്‍ സാമ്പത്തിക നേട്ടം. മുംബൈ ഇന്ത്യന്‍സില്‍ 16.35 കോടി രൂപയായിരുന്നു ഹാര്‍ദിക് പാണ്ഡ്യക്കു ലഭിച്ചിരുന്നത്. അതായത് 1.65 കോടി രൂപയുടെ വര്‍ധന.
മറുവശത്ത്, അര്‍ഷദീപ് സിംഗിനു പഞ്ചാബ് കിംഗ്‌സ് നല്‍കിയിരുന്നത് 18 കോടി രൂപയാണ്. അതേ തുകതന്നെ മുംബൈ ഇന്ത്യന്‍സും താരത്തിനു നല്‍കും. ഐപിഎല്‍ പത്രക്കുറിപ്പിലൂടെയാണ് ഇക്കാര്യം സ്ഥിരീകരിക്കപ്പെട്ടത്.
റിക്കാർഡ് ട്രാൻസ്ഫർ
ഐപിഎല്‍ ചരിത്രത്തിലെ ഏറ്റവും വിലയേറിയ കൈമാറ്റമാണു മുംബൈ ഇന്ത്യന്‍സും പഞ്ചാബ് കിംഗ്‌സും നടത്തിയത്. 2026 സീസണിനു മുമ്പായി ചെന്നൈ സൂപ്പര്‍ കിംഗ്‌സ് രവീന്ദ്ര ജഡേജയെയും സാം കറനെയും വിട്ടുനല്‍കി രാജസ്ഥാന്‍ റോയല്‍സിന്‍റെ മലയാളി വിക്കറ്റ് കീപ്പര്‍ ബാറ്ററായ സഞ്ജു സാംസണിനെ സ്വന്തമാക്കിയതായിരുന്നു ഇതുവരെയുള്ള റിക്കാര്‍ഡ് മാറ്റക്കരാര്‍. അന്ന് സഞ്ജു സാംസണിനു 18 കോടി രൂപയും രവീന്ദ്ര ജഡേജയ്ക്ക് 14 കോടി രൂപയും സാം കറനു 2.4 കോടി രൂപയുമായിരുന്നു ട്രാന്‍സ്ഫര്‍ തുക. അതായത്, ആകെ 34.4 കോടി രൂപ. ഈ റിക്കാര്‍ഡാണ് 18 കോടി രൂപ വീതം ട്രാന്‍സ്ഫര്‍ തുകയോടെ ഹാര്‍ദിക് പാണ്ഡ്യയും അര്‍ഷദീപ് സിംഗും ചേര്‍ന്നു തകര്‍ത്തത്.
ക്യാപ്റ്റന്‍സി, വിഷ്ണു
പഞ്ചാബ് കിംഗ്‌സില്‍ ശ്രേയസ് അയ്യറിന്‍റെ ക്യാപ്റ്റന്‍സിയില്‍ കളിക്കാനുള്ള സന്നദ്ധത ഹാര്‍ദിക് പാണ്ഡ്യ അറിയിച്ചതോടെയാണ് കൈമാറ്റം സാധ്യമായതെന്നതാണ് വാസ്തവം. “എന്‍റെ ക്യാപ്റ്റന്‍ ശ്രേയസ്. എന്‍റെ കോച്ച് റിക്കി പോണ്ടിംഗ്. എന്‍റെ ടീം മുഴുവന്‍ പഞ്ചാബ് ’’- എന്ന് ഹാര്‍ദിക് സോഷ്യല്‍ മീഡിയയില്‍ ഇന്നലെ കുറിച്ചു.
ഹാര്‍ദിക് കൂടുമാറിയതോടെ, മുംബൈ ഇന്ത്യന്‍സിന് ഇനിയൊരു ക്യാപ്റ്റനെ വേണം. മുതിര്‍ന്ന താരമായ രോഹിത് ശര്‍മ ക്യാപ്റ്റനായേക്കുമെന്ന് അഭ്യൂഹമുണ്ട്. രോഹിത് ശര്‍മ ക്യാപ്റ്റന്‍സിയിലേക്ക് തിലക് വര്‍മയുടെ പേരു നിര്‍ദേശിച്ചതായും റിപ്പോര്‍ട്ടുകള്‍ പുറത്തുവന്നു.
ഹാര്‍ദിക്-അര്‍ഷദീപ് ട്രേഡില് പഞ്ചാബ് കിംഗ്‌സിന്‍റെ മലയാളി വിക്കറ്റ് കീപ്പര്‍ ബാറ്ററായ വിഷ്ണു വിനോദിന്‍റെ പേരും ഉയര്‍ന്നുവന്നിരുന്നു. ഹാര്‍ദിക്കിനും അര്‍ഷദീപിനും തുല്യ ട്രാന്‍സ്ഫര്‍ തുക ആയതോടെ വിഷ്ണു പഞ്ചാബില്‍ തുടരും.
Sports
ഐപിഎല്‍ ട്വന്‍റി-20 ക്രിക്കറ്റിന്‍റെ 2014 സീസണ്‍ ലേലത്തില്‍ ഒരു ഫ്രാഞ്ചൈസിയും സ്വന്തമാക്കാതിരുന്ന കളിക്കാരനായിരുന്നു പേസ് ഓള്‍ റൗണ്ടറായ ഹാര്‍ദിക് പാണ്ഡ്യ.
എന്നാല്‍, 2015 സീസണിനു മുമ്പായി മുംബൈ ഇന്ത്യന്‍സിന്‍റെ സ്‌കൗട്ടായ ജോണ്‍ റൈറ്റ് ഹാര്‍ദിക്കിന്‍റെ മത്സരം കാണാന്‍ ഇടയായി. മുംബൈയിലെ പ്രാദേശിക ടൂര്‍ണമെന്‍റില്‍ ഹാര്‍ദിക് 57 പന്തില്‍ 82 റണ്‍സ് നേടിയ പ്രകടനം ജോണ്‍ റൈറ്റിന്‍റെ കണ്ണിലുടക്കി.മുംബൈ ഇന്ത്യന്‍സിന്‍റെ ട്രയല്‍സിലേക്ക് ചേട്ടന്‍ ക്രുണാലിനൊപ്പം ഹാര്‍ദിക്കുമെത്തി. 10 ലക്ഷം രൂപയുടെ കരാറില്‍ ഹാര്‍ദിക് മുംബൈ ഇന്ത്യന്‍സിന്‍റെ ഭാഗവുമായി.
ക്യാപ്റ്റന്‍ ഹാര്‍ദിക്
2022ലെ മെഗാ ലേലത്തിനു മുമ്പ് മുംബൈ ഇന്ത്യന്‍സ് ഹാര്‍ദിക്കിനെ റിലീസ് ചെയ്തു. അതോടെ ഐപിഎല്ലിലെ പുതിയ ഫ്രാഞ്ചൈസിയായ ഗുജറാത്ത് ടൈറ്റന്‍സ് 15 കോടി രൂപയ്ക്കു ഹാര്‍ദിക്കിനെ സ്വന്തമാക്കി. ഗുജറാത്തിന്‍റെ ക്യാപ്റ്റനുമാക്കി. 487 റണ്‍സും എട്ടു വിക്കറ്റും വീഴ്ത്തി ഹാര്‍ദിക്, ഗുജറാത്ത് ടൈറ്റന്‍സിനെ കിരീടത്തിലെത്തിച്ചു. 2023ല് വീണ്ടും ഐപിഎല്‍ ഫൈനല്‍. ഗുജറാത്തിന്‍റെ ക്യാപ്റ്റനായി 31 മത്സരങ്ങൾ. 22 ജയം.
മങ്ങിയ മടങ്ങിവരവ്
2024 ഐപിഎല്‍ സീസണിനു മുമ്പായി ഹാര്‍ദിക്കിനെ മുംബൈ ഇന്ത്യന്‍സ് തിരികെ കൊണ്ടുവന്നു. രോഹിത് ശര്‍മയെ മാറ്റി ഹാര്‍ദിക്കിനെ ക്യാപ്റ്റനുമാക്കി. 15 കോടി രൂപയായിരുന്നു ഫീസ്.
ക്യാപ്റ്റനായി എത്തിയെങ്കിലും മുംബൈ ഇന്ത്യന്‍സിനെ ഒരു തവണപോലും പ്ലേ ഓഫില്‍ എത്തിക്കാന്‍ ഹാര്‍ദിക് പാണ്ഡ്യക്കു സാധിച്ചില്ല. മൂന്നു സീസണിലായി 39 മത്സരങ്ങളില്‍ ഹാര്‍ദിക് മുംബൈ ക്യാപ്റ്റനായി. 15 ജയം മാത്രമാണു നേടാനായത്.
Sports
ഐപിഎല്‍ 2019 സീസണില്‍ പഞ്ചാബ് കിംഗ്‌സിലൂടെയാണ് (അന്ന് കിംഗ്‌സ് ഇലവന്‍ പഞ്ചാബ്) പേസര്‍ അര്‍ഷദീപ് സിംഗിന്‍റെ അരങ്ങേറ്റം. അടിസ്ഥാന വിലയായ 20 ലക്ഷം രൂപയ്ക്കായിരുന്നു പഞ്ചാബിലെത്തിയത്.
2022 സീസണിനു മുന്നോടിയായി അണ്‍ക്യാപ്ഡ് താരമെന്നനിലയില്‍ നാലു കോടിക്ക് പഞ്ചാബ് താരത്തെ നിലനിര്‍ത്തി. തുടര്‍ന്നുള്ള സീസണുകളില്‍ ഓപ്പണിംഗ് ബൗളറായും ഡെത്ത് ഓവര്‍ സ്‌പെഷ്യലിസ്റ്റായും രൂപാന്തരപ്പെട്ടു. 2025 സീസണിനു മുന്നോടിയായി പഞ്ചാബ് അര്‍ഷദീപിനെ റിലീസ് ചെയ്തു.
തുടര്‍ന്ന് റൈറ്റ് ടു മാച്ച് (ആര്‍ടിഎം) കാര്‍ഡിലൂടെ 18 കോടിക്കു തിരികെ സ്വന്തമാക്കി. അവിടെനിന്നാണ് ഇപ്പോള്‍, 18 കോടിക്ക് മുംബൈ ഇന്ത്യന്‍സിലേക്കു ചേക്കേറിയത്. മുംബൈയില്‍ ജസ്പ്രീത് ബുംറയ്‌ക്കൊപ്പമുള്ള പേസ് ആക്രമണത്തില്‍ പങ്കാളിയാകുകയാണ് അര്‍ഷദീപ് സിംഗ്.
Sports
ഓക്‌ലന്‍ഡ്: ഇന്ത്യന്‍ ക്രിക്കറ്റ് ടീമിനു പിന്നാലെ ഫുട്‌ബോള്‍ ടീമും ന്യൂസിലന്‍ഡിന്‍റെ മണ്ണില്‍ പോരാട്ടത്തിനിറങ്ങുന്നു. രാജ്യാന്തര സൗഹൃദ ഫുട്‌ബോളില്‍ ഇന്ത്യ ഇന്ന് ന്യൂസിലന്‍ഡിനെ നേരിടും.
ഓക്‌ലന്‍ഡിലെ ഗോ മീഡിയ സ്റ്റേഡിയത്തില്‍ ഇന്ത്യന്‍ സമയം രാവിലെ 11.40നാണ് കിക്കോഫ്. ഇരുരാജ്യങ്ങളും തമ്മിലുള്ള സൗഹൃദത്തിന്‍റെ നൂറാം വാര്‍ഷികം പ്രമാണിച്ചാണു മത്സരമെന്നതും ശ്രദ്ധേയം.
നവംബറിലെ രാജ്യാന്തര വിന്‍ഡോയില്‍ ഇന്ത്യന്‍ ടീമിന്‍റെ ആദ്യ മത്സരമാണ്. കഴിഞ്ഞ വിന്‍ഡോയില്‍ പാനമ, ബ്രസീല്‍, ഉറുഗ്വെ ടീമുകള്‍ക്കെതിരേ ഇന്ത്യ ഹോം മത്സരങ്ങള്‍ കളിച്ചിരുന്നു.
അന്നിറങ്ങിയ ടീമില്‍നിന്നു തികച്ചും വ്യത്യസ്തമായ സംഘവുമായാണ് മുഖ്യപരിശീലകന്‍ ഖാലിദ് ജമീല്‍ ന്യൂസിലന്‍ഡില്‍ എത്തിയിരിക്കുന്നത്.
ഫിഫ റാങ്കിംഗില്‍ ഇന്ത്യ 138-ാമതാണ്. ന്യൂസിലന്‍ഡ് 88-ാം സ്ഥാനത്തും.
Sports
ടോക്കിയൊ: ജപ്പാന്‍ മാസ്റ്റേഴ്സ് ബാഡ്മിന്‍റണിന്‍റെ പുരുഷ സിംഗിള്‍സില്‍ ഇന്ത്യയുടെ ലക്ഷ്യ സെന്‍ പ്രീക്വാര്‍ട്ടറില്‍.
എട്ടാം സീഡായ ലക്ഷ്യ സെന്‍, ചൈനീസ് തായ്‌പെയിയുടെ ചി യു ജെന്നിനെ നേരിട്ടുള്ള ഗെയിമിനു തോല്‍പിച്ചു. സ്‌കോര്‍: 21-19, 21-18.
കിഡംബി ശ്രീകാന്തും പ്രീക്വാര്‍ട്ടറില്‍ ഇടംനേടി. മൂന്നു ഗെയിം നീണ്ട പോരാട്ടത്തില്‍ ഡെന്മാര്‍ക്കിന്‍റെ റാസ്മസ് ജെംകിനെയാണ് കിഡംബി ശ്രീകാന്ത് കീഴടക്കിയത്. 18-21, 21-16, 24-22നായിരുന്നു ഇന്ത്യന്‍ താരത്തിന്‍റെ ജയം.
അതേസമയം, മിക്‌സഡ് ഡബിള്‍സില്‍ ഇന്ത്യയുടെ ഹരിഹരന്‍ - താനിഷ ക്രാസ്റ്റൊ കൂട്ടുകെട്ട് ആദ്യ റൗണ്ടില്‍ പുറത്തായി.
Sports
മുംബൈ: അഞ്ച് തവണ ഐപിഎൽ കിരീടം നേടിക്കൊടുത്ത മുൻ ഇന്ത്യൻ ക്യാപ്റ്റൻ കൂടിയായ രോഹിത് ശർമയെ മാറ്റിയാണ് മുംബൈ ഇന്ത്യൻസ് ഹാർദിക് പാണ്ഡ്യയെ ക്യാപ്റ്റനാക്കിയത്. ആരാധകരെ ചൊടിപ്പിച്ച ഈ തീരുമാനത്തിന് പ്രകടനം കൊണ്ട് താരം മറുപടി പറയുമെന്നായിരുന്നു മാനേജ്മെന്‍റിന്‍റെ പ്രതികരണം. എന്നാൽ, മൂന്ന് സീസണുകളിൽ ടീമിനെ നയിച്ച താരത്തിന് ടീമിനെ കലാശപൊരിനെത്തിക്കാൻ കൂടി സാധിച്ചില്ല.
കഴിഞ്ഞ വർഷത്തെ സീസണിൽ മൂന്നാമതെത്തിച്ചത് ആണ് മികച്ച പ്രകടനം. 2024ലും ഈ വർഷവും പത്താം സ്ഥാനത്തും ഒമ്പതാം സ്ഥാനത്തുമാണ് ഫിനിഷ് ചെയ്തത്. ഹാർദിക്കിനെതിരെ ആരാധകർ തിരിഞ്ഞതോടെ ക്യാപ്റ്റൻ സ്ഥാനം തെറിക്കുമെന്ന് ഏതാണ്ട് ഉറപ്പായിരുന്നു. അടുത്ത വർഷത്തെ സീസണിൽ ഹാർദിക്ക് നായകനായി തുടരുമോയെന്ന കാര്യത്തിൽ സസ്പെൻസ് തുടരുന്നതിനിടെയാണ് ഹാർദിക് ടീം വിട്ട് പഞ്ചാബിലേയ്ക്ക് ചേക്കേറുന്നു എന്ന വാർത്തകൾ പുറത്തുവന്നത്. ഇന്നതിൽ സ്ഥിരീകരണവും വന്നു. ഹാർദിക്ക് പഞ്ചാബിലേയ്ക്കും അർഷ്ദീപ് സിംഗ് മുംബൈയിലും എത്തി.
2015 മുതൽ മുംബൈയ്ക്ക് വേണ്ടി കളത്തിലിറങ്ങിയ ഹാർദിക്ക് 2021 വരെ ടീമിൽ തുടർന്നു. 2022ൽ ഗുജറാത്ത് ടൈറ്റൻസ് ക്യാപ്റ്റനായി ചുതമതലയേറ്റു. അക്ഷരാർത്ഥത്തിൽ വലിയ കൂടുമാറ്റം. പുതുതായി ഐപിഎല്ലിനെത്തിയ ഗുജറാത്ത് ടൈറ്റൻസിനെ ആദ്യ സീസണിൽ ചാമ്പ്യൻമാരാക്കാനും ഹാർദിക്കിനായി. അടുത്ത സീസണിൽ റണ്ണറപ്പാകാനും ടൈറ്റൻസിനായി. ഇതോടെ ക്യാപ്റ്റനെന്ന നിലയിൽ പേരെടുക്കാനും ഹാർദിക്കിനായി. ഈ മികവ് കണ്ടാണ് തൊട്ടടുത്ത സീസണിൽ മുംബൈ ഹാർദിക്കിനെ തിരികെ ടീമിലെത്തിക്കുന്നത്. അതും ക്യാപ്റ്റനായി.
എന്നാൽ, പിന്നീടങ്ങോട്ട് കാര്യങ്ങൾ അത്ര ശുഭകരമായിരുന്നില്ല. മുംബൈ ക്യാപ്റ്റനായ ആദ്യ സീസണിൽ പത്താം സ്ഥാനത്താണ് ടീം ഫിനീഷ് ചെയ്തത്. ഇത് തന്നെ വൻ വിമർശനങ്ങൾക്കിടയാക്കിയിരുന്നു. പക്ഷെ, രണ്ടാം സീസണിൽ ടീമിനെ പ്ലെഓഫിലെത്തിച്ച് ഹാർദിക്ക് മികവ് കാട്ടി. ഈ വർഷത്തെ സീസണിൽ കാര്യങ്ങൾ വീണ്ടും കൈവിട്ടു. ഒന്പതാം സ്ഥാനത്ത് മാത്രമാണ് ടീമിന് എത്താൻ സാധിച്ചത്. ഇതോടെ മുംബൈ ആരാധകർ ഹാർദിക്കിനെതിരെ പ്രതിഷേധത്തിലായി.
ഇതോക്കെ കഴിഞ്ഞ കാര്യങ്ങൾ, ഇനി പഞ്ചാബിലാണ് ഹാർദിക്. ശ്രേയസാണ് നായകൻ. നിലവിൽ മികച്ച രീതിയിൽ ടീമിനെ മുന്നോട്ട് പോകുന്നുണ്ട് ശ്രേയസ്. എന്നാൽ 2025 ൽ ഫൈനൽ വരെ എത്തിച്ചെങ്കിലും കഴിഞ്ഞ സീസണിൽ തുടക്കത്തിലെ മികച്ച പ്രകടനങ്ങൾക്ക് ശേഷം ടീം തകർന്നടിഞ്ഞത് ശ്രേയസിന് തിരിച്ചടിയായിരുന്നു. പഞ്ചാബിനാണെങ്കിൽ ഇതുവരെ കിരീടവും ലഭിച്ചിട്ടില്ല. അതുകൊണ്ട് തന്നെ ഹാർദികിനെ മാനേജ്മെന്‍റ് കൊണ്ടുവരുന്നത്, കിരീടം ലക്ഷ്യമിട്ടാണ് എന്ന കാര്യം ഉറപ്പാണ്.
മുംബൈയിൽ തിരിച്ചെത്തി രോഹിതിന്‍റെ ക്യാപ്റ്റൻസി തട്ടിയെടുത്ത ഹാർദിക് ശ്രേയസിന്‍റെ നായകസ്ഥാനം കൈയടക്കുമോ എന്ന ആശങ്കയിലാണ് പഞ്ചാബ് ആരാധകർ. രോഹിതിനെ സൈഡാക്കിയ ഹാർദിക്കിന് അത് എളുപമാണ് എന്നാണ് ക്രിക്കറ്റ് പ്രേമികൾ പറയുന്നത്. ശ്രേയസ് എന്തായാലും കരുതിയിരിക്കണം എന്നും അവർ നിർദേശിക്കുന്നുണ്ട്.
Sports
മുംബൈ: മുംബൈ ഇന്ത്യൻസ് നായകൻ ഹാർദിക് പാണ്ഡ്യ പഞ്ചാബ് കിംഗ്സിലേയ്ക്കും , പഞ്ചാബ് പേസർ അർഷ്ദീപ് സിംഗ് മുംബൈ ഇന്ത്യൻസിലേക്കും കൂടുമാറി. ഹാര്‍ദിക്കിനും അര്‍ഷ്ദീപിനും 18 കോടി രൂപയാണ് പ്രതിഫലമെന്നതിനാല്‍ മറ്റ് അധിക പണമടവുകൾ ഒന്നുമില്ലാതെ നേരിട്ടുള്ള ട്രേഡിലൂടെയാണ് കളിക്കാരെ കൈമാറിയത്.
അര്‍ഷ്ദീപിനൊപ്പം മലയാളി താരം വിഷ്ണു വിനോദിനെയും മുംബൈക്ക് കൈമാറുമെന്ന് റിപ്പോര്‍ട്ടുണ്ടായിരുന്നു. എന്നാല്‍ ട്രേഡില് അര്‍ഷ്ദീപിനെ മാത്രമാണ് വിട്ടുകൊടുത്തത് എന്നതിനാല്‍ വിഷ്ണു വിനോദ് പഞ്ചാബിനൊപ്പം തുടരും. കഴിഞ്ഞ സീസണിൽ പഞ്ചാബ് അർഷ്ദീപിനെ 18 കോടി രൂപയ്ക്കാണ് നിലനിർത്തിയത്. മുംബൈ ഇന്ത്യൻസിൽ ഹാർദിക്കിന്‍റെ പ്രതിഫലം16.35 കോടി രൂപയായിരുന്നു .
മുംബൈ ഇന്ത്യൻസിലുള്ള ഹാർദിക്കിന്‍റെ രണ്ടാമൂഴത്തിനും ഇതോടെ അവസാനമായി. ഗുജറാത്ത് ടൈറ്റൻസിൽ നിന്ന് മുംബൈയിലേക്ക് തിരികെ എത്തിയ ഹാർദിക്കിന് ആരാധകരുടെ പിന്തുണ നേടാൻ സാധിച്ചിരുന്നില്ല.
രോഹിത് ശർമയിൽ നിന്ന് നായകസ്ഥാനം ഏറ്റെടുത്തത് ആരാധകർക്കിടയിൽ വലിയ പ്രതിഷേധത്തിന് ഇടയാക്കുകയും ടീമിന്‍റെ പ്രകടനത്തെ ബാധിക്കുകയും ചെയ്തിരുന്നു. ഹാർദിക്കിന്‍റെ നേതൃത്വത്തിൽ മത്സരിച്ച മൂന്ന് സീസണുകളിൽ രണ്ടിലും മുംബൈ പട്ടികയിലെ അവസാന സ്ഥാനങ്ങളിലാണ് ഫിനിഷ് ചെയ്തത്.
Sports
ന്യൂഡൽഹി: ഇന്ത്യൻ ഒളിംപിക് അസോസിയേഷനിലേക്കുള്ള എസ്ഒഎം തെരഞ്ഞെടുപ്പിൽ അട്ടിമറിയും ക്രമക്കേടും നടന്നെന്ന നിലവിലെ പ്രസിഡന്‍റ് പി.ടി. ഉഷയുടെ ആരോപണങ്ങൾക്ക് മറുപടിയുമായി അഞ്ജു ബോബി ജോർജ്. തെരഞ്ഞെടുപ്പിൽ ജയവും തോൽവിയും സ്വാഭാവികമാണെന്നും അത് ഒരുപോലെ അംഗീകരിക്കാൻ എല്ലാവർക്കും സാധിക്കണമെന്നും അഞ്ജു
പറഞ്ഞു.
ആരോപണങ്ങൾ ഉന്നയിക്കുന്നവർ അതിനുള്ള കൃത്യമായ തെളിവ് ഹാജരാക്കണമെന്നും, എന്തെങ്കിലും പരാതികളുണ്ടെങ്കിൽ ബന്ധപ്പെട്ട ഔദ്യോഗിക സംവിധാനങ്ങളെയാണ് സമീപിക്കേണ്ടതെന്നും അവർ പറഞ്ഞു. ഐഒഎയുടെ 'സ്പോർട്സ് പേഴ്സൺസ് ഓഫ് ഔട്ട്സ്റ്റാൻഡിങ് മെറിറ്റ് (എസ്ഒഎം) തെരഞ്ഞെടുപ്പിൽ ഏറ്റവും കൂടുതൽ വോട്ടുകൾ (53 വോട്ട്) നേടിയാണ് അഞ്ജു ബോബി ജോർജ് വിജയിച്ചത്.
ലഭിച്ച വോട്ടുകൾ കായികരംഗത്തെ തന്‍റെ പ്രവർത്തനങ്ങൾക്കുള്ള വലിയ അംഗീകാരമാണെന്ന് അഞ്ജു പ്രതികരിച്ചു. വോട്ടെടുപ്പിൽ ആരൊക്കെയാണ് തനിക്ക് വോട്ട് ചെയ്തതെന്ന് മുൻകൂട്ടി പറയാൻ കഴിയില്ലെന്നും അവർ കൂട്ടിച്ചേർത്തു.
അതേസമയം, വരാനിരിക്കുന്ന ഐ.ഒ.എ പ്രസിഡന്‍റ് സ്ഥാനത്തേക്ക് മത്സരിക്കാനുള്ള സാധ്യതകൾ അഞ്ജു ബോബി ജോർജ് പൂർണ്ണമായി തള്ളിക്കളഞ്ഞില്ല. വോട്ടെടുപ്പിൽ 40 വോട്ടുകൾ മാത്രം നേടി അഞ്ചാം സ്ഥാനത്തേക്ക് പിന്തള്ളപ്പെട്ട പി.ടി. ഉഷയ്ക്ക് ഭരണസമിതിയിലെ അംഗത്വം നഷ്ടമായതോടെ തിരിച്ചടി നേരിട്ടിരിക്കുകയാണ്.
Sports
വലൻസിയ: സ്പാനിഷ് കോപ ഡെൽ റെ മത്സരത്തിൽ വലൻസിയയ്ക്ക് ഗംഭീര ജയം. ചൊവ്വാഴ്ച നടന്ന ആദ്യ റൗണ്ട് മത്സരത്തിൽ ടവെർനസിനെ എതിരില്ലാത്ത ആറ് ഗോളുകൾക്ക് തകർത്തു.
വലൻസിയയ്ക്ക് വേണ്ടി എയ്മർ ബ്ലാസ്കസ് രണ്ട് ഗോളുകൾ നേടി. ഡാനി റാബ, ഹ്യൂഗോ ഡൂറോ, ലൂയിസ് റിയോജ, എച്ച്. എല്ലിയട്ട് എന്നിവർ ഓരോ ഗോൾ വീതം സ്കോർ ചെയ്തു.
Sports
തിരുവനന്തപുരം: സയ്യിദ് മുഷ്താഖ് അലി ട്വന്‍റി 20 ക്രിക്കറ്റ് ടൂർണമെന്‍റിനു പ്രഖ്യാപിച്ച കേരള ടീമിനെ ഇന്ത്യൻ താരം സഞ്ജു വി. സാംസൺ നയിക്കും. 18 അംഗ ടീമിനെയാണ് കേരള ക്രിക്കറ്റ് അസോസിയേഷൻ പ്രഖ്യാപിച്ചിരിക്കുന്നത്. സച്ചിൻ ബേബി ടീമിലില്ല. നവംബർ 14 മുതൽ 26 വരെ പഞ്ചാബിലെ ന്യൂ ചണ്ഡിഗഡിലാണ് മത്സരങ്ങൾ നടക്കുന്നത്.
മധ്യപ്രദേശ്, മഹാരാഷ്ട്ര, ആന്ധ്ര, ത്രിപുര, പോണ്ടിച്ചേരി, അസം, ഹിമാചൽപ്രദേശ് എന്നീ ടീമുകളടങ്ങിയ ഗ്രൂപ്പ്-സിയിലാണ് കേരളമുള്ളത്. തിങ്കളാഴ്ച മധ്യപ്രദേശിനെതിരെയാണ് കേരളത്തിന്‍റെ ആദ്യ മത്സരം.
കേരള ടീം: സഞ്ജു വി. സാംസൺ (ക്യാപ്റ്റൻ & വിക്കറ്റ് കീപ്പർ), രോഹൻ എസ്. കുന്നുമ്മൽ, മുഹമ്മദ് അസറുദ്ദീൻ (വിക്കറ്റ് കീപ്പർ), അഹമ്മദ് ഇമ്രാൻ, ഗോവിന്ദ് ദേവ് ഡി. പൈ, ആർ.ജെ. കൃഷ്ണ ദേവൻ, വിഷ്ണു വിനോദ് (വിക്കറ്റ് കീപ്പർ), സൽമാൻ നിസാർ, അഖിൽ സ്കറിയ, എം. നിഖിൽ, വിഘ്നേഷ് പുത്തൂർ, എൻ. ബിജു നാരായണൻ, കാർത്തിക് ബി. നായർ, വൈശാഖ് ചന്ദ്രൻ, കെ.എം. ആസിഫ്, എം.ഡി. നിധീഷ്, എൻ.എം. ഷറഫുദ്ദീൻ, ജലജ് സക്സേന.
Sports
ന്യൂഡല്‍ഹി: ഇന്ത്യന്‍ ഒളിമ്പിക് അസോസിയേഷന്‍റെ (ഐഒഎ) ഭരണസമിതി തെരഞ്ഞെടുപ്പിനുള്ള നാമനിര്‍ദേശപ്രക്രിയ നാളെ വൈകിട്ട് മൂന്നിന് പൂർത്തിയാകും.
2026-30 കാലയളവിലേക്കുള്ള ഭരണസമിതിയിലേക്ക് ഡിസംബര്‍ അഞ്ചിനാണ് തെരഞ്ഞെടുപ്പ്. ഇതിനു വേണ്ടിയുള്ള ജനറല്‍ അസംബ്ലിയിലേക്ക് 30 അംഗീകൃത ദേശീയ കായിക ഫെഡറേഷനുകള്‍ രണ്ടുപേരെ വീതമാണ് നിര്‍ദേശിക്കുക. ഒരാള്‍ പുരുഷനും മറ്റൊരാള്‍ സ്ത്രീയുമായിരിക്കണം.
ജനറല്‍ അസംബ്ലിയില്‍ എട്ട് എസ്ഒഎം (സ്പോര്ട്സ് പേഴ്‌സണ്‍സ് ഓഫ് മെറിറ്റ്) പ്രതിനിധികള്‍, അത്‌ലറ്റ്‌സ് കമ്മിഷനില്‍ നിന്നുള്ള രണ്ടുപേര്‍, അന്താരാഷ്‌ട്ര ഒളിമ്പിക് കമ്മിറ്റിയിലെ ഇന്ത്യന്‍ പ്രതിനിധി എന്നിവരുമുള്‍പ്പെടുന്നു. ഇവരുള്‍പ്പടെ വോട്ടര്‍പട്ടികയില്‍ ആകെയുള്ള 71 അംഗങ്ങളാണ് പുതിയ എക്‌സിക്യൂട്ടീവ് കൗണ്‍സിലിനെ തെരഞ്ഞെടുക്കുന്നത്.
ഉഷ ഇടം നേടുമോ?
എസ്ഒഎം തെരഞ്ഞെടുപ്പില്‍ പരാജയപ്പെട്ട നിലവിലെ ഐഒഎ പ്രസിഡന്‍റ് പി.ടി. ഉഷയ്ക്ക് ദേശീയ കായിക ഫെഡറേഷന്‍റെ പ്രതിനിധിയായി ജനറല്‍ അസംബ്ലിയില്‍ ഇടം നേടാനാകുമോ എന്നതും ഐഒഎ തെരഞ്ഞെടുപ്പിനെ ശ്രദ്ധേയമാക്കുന്നു. നവംബര്‍ 15ന് അന്തിമ വോട്ടര്‍പട്ടിക പ്രസിദ്ധീകരിക്കും.
ജനറല്‍ അസംബ്ലിയിലേക്ക് നാഷണല്‍ സ്പോര്ട്സ് ഫെഡറേഷന്‍ (എന്‍എസ്എഫ്) നാമനിര്‍ദേശം ചെയ്താല്‍ മാത്രമേ ഐഒഎ എക്‌സിക്യൂട്ടീവ് കൗണ്‍സില്‍ തെരഞ്ഞെടുപ്പില്‍ ഉഷയ്ക്ക് ഇനി മത്സരിക്കാന്‍ കഴിയൂ. നിലവിലെ സാഹചര്യത്തില്‍ അതിന് സാധ്യത കുറവാണ്.
എക്‌സിക്യൂട്ടീവ് കൗണ്‍സിലില്‍ പി.ടി. ഉഷ വേണ്ടായെന്ന നിലപാടിലാണ് വിവിധ കായിക സംഘടനകള്‍ എന്നാണ് അറിയുന്നത്. അത്‌ലറ്റിക്‌സ് ഫെഡറേഷന്‍ ഓഫ് ഇന്ത്യയുടെ പ്രതിനിധിയായി ഉഷ വരുന്നതില്‍ താല്‍പര്യമില്ലെന്നാണ് സംഘടന വൃത്തങ്ങള്‍ നല്‍കുന്ന സൂചന.
ADVERTISEMENT
ADVERTISEMENT
SPACE FOR ADVERTISEMENT
Copyright © 2026, Rashtra Deepika Ltd. All Rights Reserved.
Design and Development 
Corehub Solutions
Contact Numbers :
+91 481 2566706, 2566707, 2566708
About Us Feedback Privacy Policy Terms and Conditions for Online Payment
E-paper LOGIN
LOGIN