Deepika
ADVERTISEMENT
Leader Page
കേരളത്തിലെ നൂറിൽപരം വില്ലേജുകളെ മുഴുവൻ പരിസ്ഥിതി ലോലമായി പ്രഖ്യാപിക്കാനുള്ള കേന്ദ്രസർക്കാരിന്‍റെ നീക്കത്തെപ്പറ്റി ഗൗരവമായ ചർച്ചകൾ നടക്കുന്ന സമയമാണല്ലോ. ശൂന്യാകാശ ശാസ്ത്രജ്ഞനായ ഡോ. കസ്തൂരിരംഗൻ, ഭൂമിക്കു ചുറ്റും പറക്കുന്ന ഉപഗ്രഹങ്ങളിൽനിന്നു ലഭിക്കുന്ന ഫോട്ടോകൾ ഉപയോഗിച്ച് വനപ്രദേശങ്ങളെ കണ്ടെത്തി.
കൂടുതൽ വനപ്രദേശങ്ങൾ ഉൾപ്പെടുന്ന വില്ലേജുകളെ പരിസ്ഥിതിലോലം എന്നു കരുതുന്നതിൽ തെറ്റില്ലല്ലോ എന്ന് അദ്ദേഹം വിശ്വസിച്ചു. ഒരു വില്ലേജിന്‍റെ വിസ്തൃതിയുടെ നാലിൽ ഒരു ഭാഗം വനമാണെന്ന് ഉപഗ്രഹ ഫോട്ടോയിൽ കാണപ്പെട്ട 123 ഗ്രാമങ്ങളെ മുഴുവനായി പരിസ്ഥിതിലോലമായി പ്രഖ്യാപിക്കാൻ 2013ൽ അദ്ദേഹത്തിന്‍റെ നിർദേശമുണ്ടായത് അങ്ങനെയായിരുന്നു.
സ്വാഭാവികമായി നമ്മൾ ഈ നിർദേശത്തെ എതിർത്തു, ജനങ്ങൾ കൃഷിചെയ്തു ജീവിക്കുന്ന നാട്, നാടല്ല, കാടാണ്, എന്ന് ഒരു സുപ്രഭാതത്തിൽ പ്രഖ്യാപിച്ചാൽ ജനം സമ്മതിക്കുമോ? നാടുനീളെ നിരവധി പ്രതിഷേധയോഗങ്ങൾ...
പ്രക്ഷോഭം ശക്തമായതോടെ കേരള സർക്കാർ പ്രശ്നത്തിന് പരിഹാരം കാണാനും, കർഷകരുടെയും സംസ്ഥാനത്തിന്‍റെയും പൊതുതാത്പര്യങ്ങൾ സംരക്ഷിക്കാൻ ആവശ്യമായ നിർദേശങ്ങൾ സമർപ്പിക്കാനുമായി ഡോ. ഉമ്മൻ വി. ഉമ്മൻ കൺവിനറായി രൂപീകരിച്ച കമ്മിറ്റിയിൽ പ്രഫ. രാജശേഖരൻ പിള്ളയും ലേഖകനും അംഗങ്ങളായിരുന്നു.
ഈ കമ്മിറ്റി കേരളത്തിലെ മലയോര പ്രദേശങ്ങൾ മുഴുവൻ സന്ദർശിച്ച് അവിടെ കർഷകരെ നേരിട്ടു കണ്ട്, അവരുടെ ആശങ്കകളും പ്രശ്നങ്ങളും, അവർ നിർദേശിക്കുന്ന പരിഹാരമാർഗങ്ങളും മനസിലാക്കാൻ തീരുമാനിച്ചു. മുപ്പതോളം മലയോര കർഷക കേന്ദ്രങ്ങളിൽ യോഗങ്ങൾ നടത്തി.വിവിധ സിറ്റിംഗുകളിലായി 30,000 പേർ പങ്കെടുത്തു. രേഖാമൂലമുള്ള ഒന്പതിനായിരത്തോളം പരാതികളും ലഭിച്ചു. കർഷകരുമായി ചർച്ചകൾ നടത്തി. അപ്പോൾ ഒരു കാര്യം മനസിലായി. കസ്തൂരിരംഗൻ എന്ന ശൂന്യാകാശ ശാസ്ത്രജ്ഞൻ, ഉപഗ്രഹം ഉപയോഗിച്ച് റിമോട്ട് സെൻസിംഗ് നടത്തുമ്പോൾ കിട്ടുന്ന ചിത്രത്തിൽനിന്നു റബർതോട്ടമോ കാപ്പിത്തോട്ടമോ നിബിഡ വനപ്രദേശമായി തെറ്റിദ്ധരിക്കാൻ ഇടയുണ്ട്.
ഉമ്മൻ ചാണ്ടിയുടെ ഇടപെടൽ
ഈ പ്രശ്നം ചർച്ച ചെയ്തപ്പോൾ മുഖ്യമന്ത്രി ഉമ്മൻ ചാണ്ടി പരിഹാരം ചോദിച്ചു. ഈ ലേഖകൻ നിർദേശം അവതരിപ്പിച്ചു. പരിസ്ഥിതിലോലമായി പ്രഖ്യാപിക്കാൻ കസ്തൂരിരംഗൻ നിർദേശിച്ചിട്ടുള്ള 123 വില്ലേജുകളിലും നേരിട്ട് സ്ഥലപരിശോധന നടത്തി, കർഷകർ നിർദേശിക്കുന്നതുപോലെ, ഓരോ സർവേ നമ്പറും പരിശോധിച്ച്, ജനവാസകേന്ദ്രങ്ങളും കൃഷിസ്ഥലങ്ങളും തോട്ടങ്ങളും വനവും വനംപോലെ സംരക്ഷിക്കപ്പെടേണ്ട സ്ഥലങ്ങളും ഏതെല്ലാമാണെന്ന് ഒരു തെറ്റുമില്ലാതെ കണ്ടെത്താൻ കഴിയുമല്ലോ!
മുഖ്യമന്ത്രിയുടെ ചോദ്യം “നമുക്ക് സമയം തീരെയില്ല. ഇവിടെ 123 വില്ലേജുകളുണ്ട്. അതും, പത്തോ പതിനൊന്നോ ജില്ലയില്. എല്ലായിടത്തും ചെന്ന് ഓരോ സർവേ നമ്പറും പോയിക്കണ്ടു പരിശോധിച്ച് തീർക്കാൻ നാൾ എത്ര വേണ്ടിവരും?”
ഞാൻ പറഞ്ഞു: ഒരൊറ്റ ആഴ്ച മതി, സ്ഥലപരിശോധന പൂർത്തിയാക്കാൻ! പക്ഷേ 123 വില്ലേജ് പരിശോധിക്കാൻ, 123 കമ്മിറ്റികൾ വേണമെന്നു മാത്രം. 123 കമ്മിറ്റികൾ രൂപീകരിച്ച് ഒരേ സമയത്ത് 123 സ്ഥലത്തും പരിശോധന നടത്താം. ഓരോ വില്ലജിലും നാല് പേരുള്ള ഒരു കമ്മിറ്റി,
സ്ഥലത്തെ പഞ്ചായത്ത് പ്രസിഡന്‍റ് / വാർഡ് മെംബർ, അധ്യക്ഷനായ ഈ കമ്മിറ്റിയിൽ, റവന്യൂ വില്ലജ് ഓഫിസർ, കൃഷി ഓഫിസർ, വനംവകുപ്പ് പ്രതിനിധി, എന്നിവർ അംഗങ്ങൾ.
നിർദേശം മുഖ്യ മന്ത്രി അംഗീകരിച്ചു. ഒരേസമയത്ത്,123 ടീമുകളെ ഗ്രൗണ്ടിലിറക്കി,123 വില്ലേജുകളിലും ഓരോ സർവേ നമ്പറിലുമുള്ള ഭൂമിയും നേരിട്ടു കണ്ട് കൃഷിസ്ഥലങ്ങളെയും ജനങ്ങളുടെ ആവാസവ്യവസ്ഥക്ക് ഉപയോഗിക്കുന്ന സ്ഥലങ്ങളെയും വനമോ, വനമായി സംരക്ഷിക്കേണ്ട സ്ഥലങ്ങളോ ഉണ്ടെങ്കിൽ അവയെയും ഒരു തെറ്റുമില്ലാതെ നിർണയിക്കുന്ന ഈ പദ്ധതി, കമ്മിറ്റിയുടെ പ്രധാന നിർദേശമായിത്തീർന്നു. ഇതോടൊപ്പം, കർഷകസൗഹൃദപരമായ കുറെയേറെ നിർദേശങ്ങൾ കൂടി ഉൾപ്പെടുത്തി മൂന്നംഗ ‘ഉമ്മൻ കമ്മിറ്റി’ റിപ്പോർട്ട് 2014 ജനുവരി മൂന്നിന് മുഖ്യമന്ത്രിക്ക് സമർപ്പിക്കുകയും ചെയ്തു. കമ്മിറ്റിയെ നിയമിച്ച് പത്താഴ്ചയ്ക്കകമായിരുന്നു റിപ്പോർട്ട് സമർപ്പണം! റിപ്പോർട്ടിലെ പ്രധാന ശിപാർശകൾ അംഗീകരിക്കപ്പെട്ടു. ദൗത്യം പൂർത്തിയാക്കി മൂന്നംഗ കമ്മിറ്റിയുടെ പ്രവർത്തനം അവസാനിപ്പിച്ചു.
പിന്നീട്,123 വില്ലേജുകളിലെ സ്ഥലപരിശോധന നടന്നു. വിവിധ ജില്ലകളിൽ ജില്ലാ കളക്ടറും തഹസിൽദാരും മേൽനോട്ടം വഹിച്ചു. വിവരങ്ങൾ ശേഖരിച്ച്, ക്രോഡീകരിച്ചു സർക്കാരിന് സമർപ്പിച്ചതും തുടർനടപടികൾ എടുത്തതും ബയോ ഡൈവേഴ്സിറ്റി ബോർഡും അതിന്‍റെ ചെയർമാനായിരുന്ന പ്രഫ. ഉമ്മനും ആയിരുന്നു എന്ന് ഓർമിക്കുന്നു. പിന്നീട് റിമോട്ട് സർവേ നടത്തിയതിലും വനവിസ്തീർണം മതിപ്പിട്ടതിലുമൊന്നും ഞങ്ങളുടെ മൂന്നംഗ സമിതിക്ക് ഒരു പങ്കുമില്ലായിരുന്നു. അവിടെ, ചേർത്തിരിക്കുന്ന വനപ്രദേശത്തിന്‍റെ വിസ്തീർണത്തിന്‍റെ കൃത്യതയെപ്പറ്റി സംശയങ്ങളുണ്ടെങ്കിൽ പ്രഫ. ഉമ്മനോടോ ബയോ ഡൈവേഴ്സിറ്റി ബോർഡിലെ ഉദ്യോഗസ്ഥരോടോ അന്വേഷിച്ചു വിശദീകരണം തേടാൻ കഴിയുമല്ലോ.
ലോകപൈതൃക പദവി വേണ്ട
അപ്പോൾ ഇവർ കൊണ്ടുവരുന്ന ലോകപൈതൃക പദവിയും കേരളത്തിന് ഒരുവിധത്തിലും പ്രയോജനകരമല്ല. ഒരുദാഹരണം നോക്കുക. ഇന്നു നാം നേരിടുന്ന പ്രശ്നം അന്തരീക്ഷ താപനവും, അതിന്‍റെ ഫലമായി ഉണ്ടാകുന്ന കാലാവസ്ഥ വ്യതിയാനവുമാണ്. ഈ സാഹചര്യത്തിൽ ചെയ്യേണ്ടത് താപനം ഉണ്ടാക്കാത്ത ജല വൈദ്യുത പദ്ധതികൾക്ക് പ്രോത്സാഹനം നൽകുകയാണല്ലോ. പക്ഷേ ഗാഡ്ഗിൽ റിപ്പോർട്ട് പറയുന്നു, അണക്കെട്ടുകളെയെല്ലാം ഡീ-കമ്മിഷൻ ചെയ്യുക. ജലവൈദ്യുത പദ്ധതികൾ ഉപേക്ഷിക്കുക! നമ്മുടെ നാട്ടിലെ വികസനപദ്ധതികൾക്ക് തടസമുണ്ടാക്കുന്നവയാണ് ഇതുപോലുള്ള നിർദേശങ്ങളെല്ലാം. നമ്മുടെ ഹൈറേഞ്ചിലും മറ്റും കാപ്പി, തേയില തോട്ടങ്ങൾക്ക് പകരം മുളവർഗങ്ങളുടെ കൃഷി ചെയ്യണമെന്നാണ് ഗാഡ്ഗിൽ റിപ്പോർട്ട് പറയുന്നത്.
യുനെസ്കോയുടെ ലോകപൈതൃക പദവി നിലനിർത്താൻ വേണ്ടിയാണു ഗാഡ്ഗിൽ, കസ്തൂരിരംഗൻ ശിപാർശകൾ നടപ്പാക്കാൻ അവർ ആവശ്യപ്പെടുന്നത്. പക്ഷേ, അവരുടെ നിർദേശങ്ങൾ നടപ്പാക്കാൻ തുടങ്ങിയാൽ നമ്മുടെ വികസന സ്വപ്‌നങ്ങൾ നേടിയെടുക്കാൻ കഴിയാതെ പോകും. ചുരുക്കത്തിൽ, സാമ്പത്തിക വളർച്ചയില്ലായ്മയും നഷ്ടവും മാത്രം നൽകുന്ന ഈ പൈതൃകപദവി ഉപേക്ഷിച്ച് ഗാഡ്ഗിൽ-കസ്തൂരിരംഗൻ റിപ്പോർട്ടുകളിൽനിന്നു മുക്തി നേടുക.
കേരള നിയമസഭ പശ്ചിമഘട്ടത്തിന്‍റെ ഈ പൈതൃക പദവി നമ്മുടെ സംസ്ഥാനത്തിന് ആവശ്യമില്ലെന്നു പ്രമേയം പാസാക്കി കേന്ദ്രത്തിന് അയച്ചുകൊടുക്കുക. കേരളം ഉഭയസമ്മതപ്രകാരം, ലോകപൈതൃക പദ്ധതിയിൽനിന്നു പിൻവാങ്ങാൻ ആഗ്രഹിക്കുന്നു. അതിനു സമ്മതം ആവശ്യപ്പെട്ടു കേന്ദ്രസർക്കാർ യുനെസ്കോയ്ക്ക് എഴുതാൻ സമ്മർദം ചെലുത്തുക. ഈ ആവശ്യം നേടിയെടുത്ത്, പൈതൃകപദവിക്കു പുറത്തു കടന്നില്ലെങ്കിൽ, നാം അനാവശ്യമായ ആശയസംഘട്ടനത്തിൽപെട്ടു വലഞ്ഞ് , പുതുയുഗ കേരളത്തിലേക്കുള്ള ബസ് വീണ്ടും ‘മിസ്‌’ ചെയ്യും! ആ ദുരന്തം ഒഴിവാക്കാൻ കേരള അതിർത്തിക്കുള്ളിൽ നമ്മുടെ പശ്ചിമഘട്ടത്തിന്‍റെ പൈതൃകപദവി ഉപേക്ഷിക്കേണ്ടത് അത്യാവശ്യം!
Leader Page
ഈ വർഷത്തെ ഹൃദയദിനസന്ദേശം ‘ഹാര്‍ട്ടറ്റാക്കിന്‍റെ സാധ്യത കണ്‍മുമ്പില്‍ മറഞ്ഞുകിടക്കാം, അതിന്‍റെ സൂചനകള്‍ കാണാതെ പോകരുത്; ഹൃദയത്തെ അറിയുക, അതിനെ സംരക്ഷിക്കുക’ എന്നാണ്. മാരകമായ ഹാര്‍ട്ടറ്റാക്ക് വരുന്നതിനെ എങ്ങനെ തടയാം എന്നതിലാണ് ഇന്നത്തെ ഹൃദ്രോഗവിദഗ്ധര് ഊന്നല്‍ നല്‍കുന്നത്. രോഗലക്ഷണങ്ങളില്ലാത്തതിനാല്‍ ഞാന്‍ ആരോഗ്യവാനാണ് എന്ന ധാരണ ഇന്ന് പലരിലുമുണ്ട്. ഒരുകാലത്ത്, ഹൃദയാഘാതത്തെ പ്രതിരോധിക്കുന്നതിനു കൊളസ്ട്രോള് കുറയ്ക്കുക, രക്തസമ്മര്‍ദം നിയന്ത്രിക്കുക, പുകവലി നിര്‍ത്തുക എന്നതിലായിരുന്നു പ്രാധാന്യം. ഇന്ന് പ്രതിരോധത്തിന്‍റെ അടിസ്ഥാന പ്രമാണങ്ങള്‍ മാറുകയാണ്.
മാറിയ കാലം, മാറേണ്ട കരുതല്‍
കര്‍ശനമായി ജീവിതശൈലി ക്രമീകരിക്കുന്നതിലൂടെയും പ്രതിരോധ ഔഷധചികിത്സ നടത്തുന്നതിലൂടെയും ഹൃദ്രോഗ സാധ്യത 80-90 ശതമാനം വരെ കുറയ്ക്കാന്‍ സാധിക്കുമെന്ന് ബൃഹത്തായ പല പഠനങ്ങളും സ്ഥിരീകരിക്കുന്നു. ആരോഗ്യകരമായ ഭക്ഷണരീതി, സ്ഥിരമായ വ്യായാമ പദ്ധതികള്‍, ശരീരഭാരം/വയറിന്‍റെ വണ്ണം നിയന്ത്രിക്കൽ, മതിയായ ഉറക്കം (കുറഞ്ഞത് എട്ടു മണിക്കൂര്‍), സ്ട്രെസ് നിയന്ത്രണം, സര്‍വോപരി ഹൃദ്രോഗസാധ്യത പരിശോധനകളിലൂടെ തിട്ടപ്പെടുത്തി ചികിത്സാവിധേയമാക്കുക ഇവയെല്ലാം ഹൃദ്രോഗത്തിന്റെ സാധ്യതകളില്‍നിന്ന് അകന്നുനില്‍ക്കാന്‍ സഹായിക്കും.
ഹൃദയാഘാതത്തിലേക്ക് നയിക്കുന്ന സങ്കീര്‍ണമായ കാരണങ്ങളെ ഒരു പരിശോധനകൊണ്ടുമാത്രം കണ്ടെത്തുക അസാധ്യമാണ്. പ്രായോഗികമായി രണ്ടു കാര്യങ്ങളാണ് അന്വേഷിക്കേണ്ടത്. ഒന്ന്, കൊറോണറി ധമനികളിലെ ജരിതാവസ്ഥയുടെയും കൊഴുപ്പുനിക്ഷേപത്തിന്‍റെയും (പ്ലാക്ക്) അവസ്ഥ തിട്ടപ്പെടുത്തുക. രണ്ടാമത്തേത്, ധമനികളിലെ പ്ലാക്ക് പൊട്ടുന്നതിനെയും രക്തക്കട്ട ഉണ്ടാകുന്നതിനെയും ഉദ്ദീപിപ്പിക്കുന്ന ആപത്ഘടകങ്ങളെ കണ്ടെത്തുക.
കാത്സ്യം സ്‌കോര്‍ ശ്രദ്ധിക്കണം
ഹൃദയധമനികളിലെ ജരിതാവസ്ഥയുടെ തീവ്രത കണ്ടുപിടിക്കാന്‍ സഹായിക്കുന്ന പരിശോധനകള്‍ പലതുണ്ട്. കൊറോണറി ആര്‍ട്ടറി കാത്സ്യം സ്‌കോര്‍ തിട്ടപ്പെടുത്തുകയാണ് അവയില്‍ പ്രധാനം. ചെറുപ്പക്കാരില്‍ ലക്ഷണങ്ങളില്ലാതെ ഉണ്ടാകുന്ന ഹൃദയാഘാതത്തിന്‍റെയും പെട്ടെന്നുള്ള മരണത്തിന്‍റെയും കാരണങ്ങള്‍ അറിയാന്‍ സവിശേഷമായി ചെയ്യേണ്ട പരിശോധനയാണിത്. ഇവ ഹൃദയധമനികളിലെ കൊഴുപ്പുനിക്ഷേപത്തിലടങ്ങിയിരിക്കുന്ന കാത്സ്യത്തിന്‍റെ അളവ് തിട്ടപ്പെടുത്തുന്നു. ഇവ പൂജ്യമാണെങ്കില്‍ അപകടസാധ്യത വളരെ കുറവാണ്. കാത്സ്യം സ്‌കോര്‍ 100ല് താഴെയാണെങ്കില്‍ അപകടസാധ്യത കുറവ്, 100-300 ആണെങ്കില്‍ മിതം, 300ല് കൂടിനിന്നാല്‍ തീവ്രമായ ഹൃദ്രോഗസാധ്യത.
ഈ പരിശോധനവഴി ഹൃദയാഘാത സാധ്യതയുള്ളവരെ നേരത്തേ കണ്ടെത്തി പ്രതിരോധ നടപടികള്‍ കര്‍ശനമാക്കണം. കാത്സ്യം കൂടുതലുള്ളവരേക്കാള്‍ മയമുള്ള കൊഴുപ്പുനിക്ഷേപം (സോഫ്റ്റ് പ്ലാക്ക്) ഉള്ളവരിലാണ് ഹാര്‍ട്ടറ്റാക്കിന്‍റെ സാധ്യത കൂടുതല്‍. ഇവയുണ്ടോയെന്നറിയാന്‍ സിടി കൊറോണറി ആന്‍ജിയോഗ്രാഫി തന്നെ ചെയ്യണം.
പരിശോധിച്ചറിയണം
സാധാരണ ചെയ്യുന്ന ‘ലിപ്പിഡ് പ്രൊഫൈല്’ പരിശോധനവഴി പൊതുവായി അപകടകാരിയായ എല്‍ഡിഎല്‍ കൊളസ്ട്രോളിന്റെ അളവ് മനസിലാക്കാമെങ്കിലും ഇന്ന് മറ്റു കൃത്യമായ ബയോസൂചകങ്ങള്‍ നിര്‍ണയിക്കുന്നതിലൂടെ ഭാവിയില്‍ ഉണ്ടാകാനിടയുള്ള ഹാര്‍ട്ടറ്റാക്കിനെപ്പറ്റി വ്യക്തമായ സൂചനകള്‍ നേരത്തേ അറിയാന്‍ സാധിക്കും. ലൈപ്പോ പ്രോട്ടീന് (എ) എന്ന ജനിതകമായി ആര്‍ജിച്ചെടുത്ത കൊഴുപ്പ് ഘടകം ഹൃദയധമനിയില്‍ വീക്കവും ബ്ലോക്കുമുണ്ടാക്കുന്നു; എല്ലാവരും പരിശോധിച്ച് തിട്ടപ്പെടുത്തണം. പ്രത്യേകിച്ച് കുടുംബപരമായി രോഗപ്രവണതയുള്ളവര്‍ തീര്‍ച്ചയായും ഇതു ചെയ്തിരിക്കണം.
ധമനികളില്‍ ജരിതാവസ്ഥ ഉണ്ടാകുന്ന സൂചകങ്ങളുടെ ആകെയുള്ള അളവാണ് അപ്പോ-ബി. കൂടാതെ ധമനികളിലെ പൊതുവായ വീക്കത്തിന്‍റെ അളവുകോലായ സിആര്‍പി സാധ്യത വര്‍ധിപ്പിക്കുന്ന എച്ച്ബിഎ ഒന്ന് സി ഇവയെല്ലാം ഹൃദയാഘാത സാധ്യതയ്ക്ക് ചുക്കാന്‍പിടിക്കുന്നു.
കൊളസ്ട്രോള് സൂക്ഷിക്കണം
പൊതുവായ കൊളസ്ട്രോളിന്റെ ഉപഘടകമായ എല്‍ഡിഎല്‍ കുറയ്ക്കുന്നതിനെപ്പറ്റി ഇന്നും പല തരത്തില്‍ ചര്‍ച്ചകളുണ്ട്. എല്‍ഡിഎല്‍ എത്രയും കുറഞ്ഞിരുന്നാല്‍ അത്രയും നന്ന് എന്നാണ് പറയാറ്. ആപത്ഘടകങ്ങള്‍ ഉള്ളവരില്‍ എല്‍ഡിഎല്‍ 70 മില്ലിഗ്രാം ശതമാനത്തില്‍ താഴെയും ഹൃദയാഘാതം ഉണ്ടായവരില്‍ (ഹാര്‍ട്ടറ്റാക്ക്, ആന്‍ജിയോപ്ലാസ്റ്റി, ബൈപാസ് സര്‍ജറി) 55ല് താഴെയും കര്‍ശനമായി ക്രമീകരിക്കേണ്ടതാണ്. ഇതിനായി ഭക്ഷണ ക്രമീകരണത്തോടൊപ്പം സവിശേഷ മരുന്നുകളും ലഭ്യമാണ്.
സ്ട്രെസ് ചെറിയ കാര്യമല്ല
ഇന്ന് ചെറുപ്പക്കാരെ കാര്‍ന്നുതിന്നുന്ന ഒടുങ്ങാത്ത സ്ട്രെസ് പെട്ടെന്നുള്ള ഹൃദയാഘാതത്തിന് വിനയാക്കുന്നു. സ്ട്രെസ് ഉണ്ടാകുമ്പോള്‍ സിംപതെറ്റിക് നാഡീവ്യൂഹം സജീവമാവുകയും അഡ്രിനാലിന്‍, കോര്‍ട്ടിസോള്‍ ഹോര്‍മോണുകള്‍ ശരീരത്തില്‍ കുമിഞ്ഞുകൂടുകയും ചെയ്യുന്നു. അതേത്തുടര്‍ന്ന് ഹൃദയമിടിപ്പും രക്തസമ്മര്‍ദവും വര്‍ധിക്കുകയും കൊറോണറി ധമനികള്‍ ചുരുങ്ങുകയും ചെയ്യുന്നു. കൂടാതെ ശ്വേതരക്താണുക്കളുടെ വര്‍ധിച്ച പ്രവര്‍ത്തനം, പൊതുവായ വീക്കം, എന്‍റേത്തീലിയല്‍ കോശങ്ങളുടെ പ്രവര്‍ത്തനവൈകല്യം എന്നിവ അതിരുകടന്ന് പ്ലാക്ക് പൊട്ടി അവിടെ രക്തകട്ട ഉണ്ടാകാനുള്ള സാധ്യതയേറുന്നു. ഹൃദ്രോഗത്തിലേക്കു നയിക്കുന്ന ആപത്ഘടകങ്ങളുടെ മുന്‍പന്തിയില്‍ ഇന്ന് ഒടുങ്ങാത്ത സ്ട്രെസ് സ്ഥാനം പിടിച്ചിരിക്കുന്നു.
സ്ട്രെസ് മാനേജ്മെന്റ്, സ്ഥിരമായ വ്യായാമം, ആവശ്യത്തിന് ഉറക്കം, മനസിനെ ശാന്തമാക്കുന്ന കൗണ്‍സലിംഗ്, ബയോഫീഡ് ബാക്ക്, ധ്യാനം തുടങ്ങിയവ ചെറുപ്പക്കാരുടെ സ്ഥിരമായ മനോസംഘര്‍ഷം നല്ലൊരു പരിധിവരെ സന്തുലിതമാകാന്‍ സഹായിക്കും.
മുന്‍കരുതല്‍ നേരത്തേയാകാം
പൊതുവെ പറയുകയാണെങ്കില്‍ 20 വയസ് മുതല്‍ ഹൃദ്രോഗത്തെപ്പറ്റി ചിന്തിച്ചുതുടങ്ങണം. അതിനുള്ള മുന്‍കരുതലുകള്‍ തുടങ്ങണം. എന്നാല്‍ 30-40 വയസുമുതല്‍ കര്‍ശനമായ പ്രതിരോധ ചെക്കപ്പുകള്‍ ചെയ്യണം. പ്രഷര്‍, കൊളസ്ട്രോള്, പ്രമേഹം, അമിതവണ്ണം, വ്യായാമക്കുറവ്, സ്ട്രെസ്, മദ്യപാനം ഇവ നിയന്ത്രണവിധേയമാക്കി ഹൃദ്രോഗനില സന്തുലിതമാക്കണം. മലയാളികളുടെ ഭക്ഷണത്തോടുള്ള അമിതാസക്തി മാരകമായ ഭവിഷ്യത്തുകള്‍ക്ക് കാരണമാകുന്നു.
കണക്കുകളിലെ ഹൃദ്രോഗം
ആഗോളമായി 19.2 ദശലക്ഷം ആളുകള്‍ പ്രതിവര്‍ഷം ഹൃദയധമനീരോഗങ്ങള്‍ മൂലം മരിക്കുന്നു. ഇന്ത്യയിലെ കണക്കെടുത്താല്‍ ആകെ മരണസംഖ്യയുടെ 28 ശതമാനവും ഹൃദയധമനീ രോഗങ്ങള്‍ മൂലമാണ്. മറ്റു രാജ്യങ്ങളിലുള്ളവരേക്കാള്‍ പത്തു വര്‍ഷം മുമ്പേ ഇന്ത്യക്കാര്‍ക്ക് ഹൃദ്രോഗമുണ്ടാകുന്നു. 30നും 69നും ഇടയിലുള്ളവര്‍ക്കുണ്ടാകുന്ന രോഗാവസ്ഥ രാഷ്‌ട്രത്തിന്‍റെ സാമ്പത്തിക ഭദ്രതയെ തകിടം മറിക്കുന്നു. കേരളത്തിലെ പുരുഷന്മാരില്‍ 31.1 ശതമാനവും സ്ത്രീകളില്‍ 17.6 ശതമാനവും മരണങ്ങള്‍ ഹൃദ്രോഗാനന്തരമാണെന്നു പഠനങ്ങള്‍ സൂചിപ്പിക്കുന്നു. ഇന്ത്യയില്‍ ഏറ്റവും കൂടുതല്‍ ഹൃദ്രോഗമുള്ള സംസ്ഥാനങ്ങളുടെ മുന്‍പന്തിയില്‍ കേരളം സ്ഥാനം പിടിച്ചിരിക്കുന്നു. കേരളത്തില്‍ 200ലധികം കാത്ത് ലാബുകളുടെ ആശുപത്രികളുണ്ടെന്നാണ് കണക്ക്. ഈ സംഖ്യ വര്‍ഷംപ്രതി വര്‍ധിച്ചുകൊണ്ടിരിക്കുന്നു.
മാറണം, മനോഭാവവും
ചികിത്സയ്ക്കു മാത്രം പ്രാമുഖ്യം കൊടുക്കുന്ന ഒരു ആരോഗ്യ സംസ്കാരം കേരളത്തിലുമുള്ളതാണ് ഇതിനു പിന്നിലെ കാരണം. എല്ലാ സൗകര്യങ്ങളുമുള്ള ഒരാശുപത്രി അടുത്തുണ്ടെങ്കില്‍ പിന്നൊന്നും നോക്കാനില്ലെന്നതാണ് മലയാളിയുടെ മനോഭാവം. ഇവിടെ 65 ശതമാനം പേര്‍ക്ക് അമിതവണ്ണമുണ്ട്; 52 ശതമാനം പേര്‍ക്ക് വര്‍ധിച്ച കൊളസ്ട്രോളുണ്ട്; 40 ശതമാനം പേര്‍ക്ക് അമിത രക്തസമ്മര്‍ദമുണ്ട്; 15 ശതമാനത്തിലധികം പേര്‍ക്കു പ്രമേഹബാധയുണ്ട്. ഈ സംഖ്യകളെല്ലാംതന്നെ മലയാളികളെ അകാലത്തില്‍ മരണത്തിലേക്കു വലിച്ചിഴയ്ക്കുന്ന ഘടകങ്ങള്‍ തന്നെ.
(എറണാകുളം ലൂര്‍ദ് ആശുപത്രിയിലെ സീനിയര്‍ കണ്‍സള്‍ട്ടന്‍റ് കാര്‍ഡിയോളജിസ്റ്റാണ് ലേഖകൻ)
Leader Page
ഒരു കാര്യം നന്നായി തുടങ്ങിയാല്‍ പകുതി വിജയിച്ചു എന്നാണു പറയാറുള്ളത്. ഓപ്പറേഷന്‍ തൂഫാന് ദ നാര്‍ക്കോ ഹണ്ട് രണ്ടാം ഘട്ടത്തിലേക്കു കടക്കുമ്പോള്‍ രാജ‍്യവും ലോകവും ശ്രദ്ധിക്കുന്ന സമാനതകളില്ലാത്ത ലഹരിവിരുദ്ധ പോരാട്ടമായി അത് മാറിക്കഴിഞ്ഞിരിക്കുകയാണ്. കേവലം 100 ദിവസങ്ങള്‍ക്കുള്ളില്‍തന്നെ അദ്ഭുതകരമായ മാറ്റത്തിനാണ് സംസ്ഥാനം സാക്ഷ്യം വഹിച്ചത്. പതിനായിരത്തോളം അറസ്റ്റുകള്‍ നടന്നു. ലഹരിയുടെ ഉപയോഗം 30 ശതമാനത്തോളം കുറയ്ക്കാനും കഴിഞ്ഞു. ലഹരിമാഫിയ ഭയചകിതരായി. അവര്‍ പിന്‍വലിയുന്ന സൂചനകള്‍ ലഭിച്ചു. തൂഫാന് ഒന്നാം ഘട്ടം പ്രതീക്ഷിച്ചതിനേക്കാള്‍ വലിയ വിജയമായി മാറി.
ലഹരിയുടെ ഉപയോഗവും വ്യാപനവും വില്‍പനയും പൂര്‍ണമായും ഇല്ലാതാക്കുന്ന വിധത്തിലുള്ള ശാശ്വതമായ പരിഹാരം ഉണ്ടായേ തീരൂ. ലഹരിയുടെ ആവശ്യം കുറയ്ക്കുക, പ്രാരംഭഘട്ടത്തില്‍തന്നെ ഇടപെടുക, അതോടൊപ്പം ലഹരിക്ക് അടിമകളായവരുടെ ചികിത്സ, പുനരധിവാസം, അവരെ സാമൂഹികമായി ചേര്‍ത്തുപിടിക്കല്‍ എന്നിവയെല്ലാം താഴെത്തട്ടില്‍നിന്ന് ആരംഭിക്കേണ്ടതുണ്ട്.
ഈ പശ്ചാത്തലത്തിലാണ് ഓപ്പറേഷന്‍ തൂഫാന് രണ്ടാം ഘട്ടത്തിന്‍റെ പ്രസക്തി. പൊലിസ് നടപടി, നിയമസംവിധാനങ്ങളുടെ ഇടപെടല്‍ എന്നതിനോടൊപ്പംതന്നെ ലഹരിക്കെതിരായ പോരാട്ടം ഒരു സാമൂഹിക മുന്നേറ്റമായി തീരേണ്ടതുണ്ട്. രണ്ടാം ഘട്ടത്തിലെ സമഗ്ര ജനകീയ മുന്നേറ്റത്തില്‍ വിവിധ സര്‍ക്കാര്‍ വകുപ്പുകളുടെ സമ്പൂണര്‍മായ ഏകോപനവും പങ്കാളിത്തവും അനിവാര്യമാണ്.
തദ്ദേശ സ്വയംഭരണ സ്ഥാപനങ്ങള്‍, പൊലിസ്, കുടുംബശ്രീ, ആരോഗ്യ- വിദ്യാഭ്യാസ-സാമൂഹ്യനീതി, യുവജനകാര്യ വകുപ്പുകള്‍, മറ്റു സര്‍ക്കാര്‍ സംവിധാനങ്ങള്‍ എന്നിവയുടെ ഏകോപിതമായ ഇടപെടലാണ് ലഹരിക്കെതിരായ വലിയ പോരാട്ടത്തിന്‍റെ രണ്ടാം ഘട്ടത്തില്‍ ലക്ഷ്യംവയ്ക്കുന്നത്. ലഹരിക്കെതിരായ പോരാട്ടം വാര്‍ഡുകളിലേക്കും വീടുകളിലേക്കും തൊഴില്‍ സ്ഥാപനങ്ങളിലേക്കും വ്യാപിക്കുമ്പോള്‍ അത് സമഗ്രമായ ജനകീയ മുന്നേറ്റമായി രൂപാന്തരപ്പെടുന്നു.
രണ്ടാംഘട്ടത്തില്‍ നൂതനവും ശക്തവും സമഗ്രവുമായ നടപടികളിലൂടെയാണ് ഓപറേഷന്‍ തൂഫാന് മുന്നോട്ടു പോകുന്നത്. ലഹരിയുടെ ആവശ്യകത കുറയ്ക്കല്‍, വാര്‍ഡ് തല ജാഗ്രതാ സംവിധാനങ്ങള്‍ ഏര്‍പ്പെടുത്തുക, സമഗ്രമായ പുനരധിവാസ പദ്ധതി നടപ്പാക്കുക, ലഹരിവില്‍പന, വിതരണം, ഉപയോഗം, ഹോട്ട്സ്പോട്ടുകള്‍, തുടങ്ങിയവ സംബന്ധിച്ച വിവരങ്ങള്‍ രഹസ്യമായി പൊലിസിനെ അറിയിക്കാനുള്ള സംവിധാനങ്ങള്‍ പൊതുജനങ്ങള്‍ക്കായി രൂപീകരിക്കുക, യുവജനങ്ങളെയും വിദ്യാര്‍ഥികളെയും സര്‍ഗപരമായ പ്രവര്‍ത്തനങ്ങളിലേക്ക് തിരിച്ചുവിട്ട് ലഹരിയില്‍നിന്ന് അകറ്റിനിര്‍ത്തുക, സുരക്ഷിതമായ സാമൂഹ്യാന്തരീക്ഷം സൃഷ്ടിക്കുക എന്നിവയാണ് രണ്ടാം ഘട്ടത്തിലെ പ്രധാന ലക്ഷ്യങ്ങള്‍.
വാര്‍ഡ് തല ജനകീയ ജാഗ്രതാ സമിതികള്‍
തൂഫാന് രണ്ടാംഘട്ടത്തിലെ നിര്‍ണായകമായ ചുവടുവയ്പാണ് വാര്‍ഡ് തല ജനകീയ ജാഗ്രതാ സമിതികള്‍. സംസ്ഥാനത്തെ 20,999 പഞ്ചായത്ത്-മുനിസിപ്പാലിറ്റി-കോര്‍പറേഷന്‍ വാര്‍ഡുകളെ ലഹരിവിരുദ്ധ പ്രവര്‍ത്തനങ്ങളുടെ പ്രധാന കേന്ദ്രങ്ങളാക്കി മാറ്റുകയാണ് ഇതിലൂടെ. ഇവിടങ്ങളില്‍ സ്പെഷല്‍ തൂഫാന് ഗ്രാമസഭകള്‍ വിളിച്ചുചേര്‍ത്ത് ലഹരിക്കെതിരായ പോരാട്ടത്തില്‍ എല്ലാ വിഭാഗം ജനങ്ങളെയും അണിനിരത്തും. അതോടൊപ്പം ഓരോ സ്വയംഭരണ സ്ഥാപന തലത്തിലും തൂഫാന് ജനജാഗ്രതാ സമിതികളുണ്ടാകും. സംസ്ഥാനത്ത് 1034 തദ്ദേശ സ്വയംഭരണ സ്ഥാപനങ്ങളാണുള്ളത്.
അതനുസരിച്ച് 1034 ജാഗ്രതാ സമിതികള്‍ സംസ്ഥാനത്ത് പ്രവര്‍ത്തിക്കും. തദ്ദേശ സ്വയംഭരണ സ്ഥാപന സമിതിയുടെ അധ്യക്ഷന്മാരായിരിക്കും ഇവയുടെ നേതൃത്വം വഹിക്കുക. എസ്എച്ച്ഒ, തദ്ദേശ സ്ഥാപന സെക്രട്ടറി, ജനപ്രതിനിധികള്‍ എന്നിവര്‍ ഇവയിലുണ്ടാകും.1034 ജാഗ്രതാ സമിതികളുടെ കീഴിലായിരിക്കും വാര്‍ഡ് തല സമിതികള്‍ പ്രവര്‍ത്തിക്കുക. വാര്‍ഡ് മെംബറുടെ നേതൃത്വത്തില്‍ പ്രദേശവാസികള്‍, എന്‍‌റോള്‍ ചെയ്ത തൂഫാന് വാരിയേഴ്സ്, കുടുംബശ്രീ-ആശാ വര്‍ക്കര്‍മാര്‍, ഹരിതകര്‍മ സേനാംഗങ്ങള്‍, തൊഴിലുറപ്പ് തൊഴിലാളികള്‍, റസിഡന്‍റ്സ് അസോസിയേഷന്‍ ഭാരവാഹികള്‍, സന്നദ്ധ പ്രവര്‍ത്തകര്‍ എന്നിവരെ ഉള്‍പ്പെടുത്തിയാണ് ഈ വാര്‍ഡ് തല സമിതികള്‍ ലഹരിവിരുദ്ധ പോരാട്ടത്തിന് സജ്ജമാകുന്നത്.
ഇതിനൊപ്പം ജില്ലാ തൂഫാന് കെയര്‍ കമ്മിറ്റികള്‍, തൂഫാന് ആഫ്റ്റര്‍ കെയര്‍ ഹോമുകള്‍, തൂഫാന് ലഹരിവിരുദ്ധ ക്ലബ്ബുകള്‍ തുടങ്ങിയവയിലൂടെ ലഹരിക്കെതിരായ പോരാട്ടം കൂടുതല്‍ ഊര്‍ജസ്വലമാക്കാനും രണ്ടാംഘട്ടത്തില്‍ ലക്ഷ്യമിടുന്നു. ലഹരി ഉപയോഗവുമായി ബന്ധപ്പെട്ട് സഹായം ആവശ്യമായവര്‍ക്ക് അനുയോജ്യമായ സേവനങ്ങള്‍ നല്‍കാന്‍ ജില്ലാ പൊലിസ് മേധാവിയുടെ കീഴില്‍ മനഃശാസ്ത്രജ്ഞര്‍, ഡി അഡിക്‌ഷന്‍ സ്പെഷലിസ്റ്റുകള്‍, മെഡിക്കല്‍ ഓഫിസര്‍മാര്‍ എന്നിവരെ ഉള്‍പ്പെടുത്തിയാണ് ജില്ലാ തൂഫാന് കെയര്‍ കമ്മിറ്റികള്‍ രൂപീകരിക്കുന്നത്.
ലഹരിവിമുക്തരായവര്‍ വീണ്ടും പഴയ അവസ്ഥയിലേക്കു മടങ്ങിപ്പോകാതിരിക്കാനും അവര്‍ക്ക് എല്ലാവിധ പിന്തുണയും ഉറപ്പാക്കി മുഖ്യധാരയിലേക്കു തിരികെ കൊണ്ടുവരാനുമാണ് ആഫ്റ്റര്‍ കെയര്‍ ഹോമുകള്‍ വഴി ഉദ്ദേശിക്കുന്നത്. വിദ്യാലയങ്ങളില്‍ ഇപ്പോഴുള്ള ലഹരിവിരുദ്ധ ക്ലബ്ബുകളുടെ പ്രവര്‍ത്തനം ഊര്‍ജിതപ്പെടുത്താനുള്ള നടപടികളും രണ്ടാം ഘട്ടത്തിന്‍റെ ഭാഗമായുണ്ടാകും.
ഇന്നു രാവിലെ 11.25ന് വേങ്ങര നിയോജകമണ്ഡലത്തിലെ മലബാര്‍ കോളജില്‍വച്ച് മുഖ്യമന്ത്രി വി.ഡി. സതീശന്‍ വാര്‍ഡുതല ജനജാഗ്രതാ സമിതിയുടെ ഉദ്ഘാടനം നിര്‍വഹിക്കും. വ്യവസായ വകുപ്പ് മന്ത്രി പി.കെ. കുഞ്ഞാലിക്കുട്ടി, തദ്ദേശ സ്വയംഭരണ വകുപ്പ് മന്ത്രി കെ.എം. ഷാജി, എംപി, എംഎല്‍എമാര്‍ മറ്റു ജനപ്രതിനിധികള്‍ എന്നിവരുള്‍പ്പെടയുള്ളവരുടെ സാന്നിധ്യത്തിലാണ് തൂഫാന് 2.0 എന്ന ജനകീയ പ്രതിരോധത്തിന്‍റെ രണ്ടാം ഘട്ടത്തിന് തുടക്കമിടുന്നത്.
“ഞാന്‍ എന്‍റെ നാടിന്‍റെ കാവലാള്‍” എന്നതാണ് തൂഫാന് 2.0ന്‍റെ മുദ്രാവാക്യം. താന്‍ ഈ നാടിന്‍റെ കാവലാള്‍ ആണെന്ന ബോധം ഓരോ പൗരന്‍റെയും മനസിലുറയ്ക്കുമ്പോള്‍ അത് സൃഷ്ടിക്കുന്ന സുരക്ഷിതത്വ ബോധത്തിന് മറ്റെന്തിനേക്കാളും കരുത്തുണ്ടാകും. ലഹരിക്കെതിരായ പോരാട്ടത്തില്‍ ഓരോ വ്യക്തിയും അണിചേരുമ്പോള്‍ അതൊരു മഹാപ്രവാഹമായി മാറും. ഏത് പൈശാചിക ശക്തികളെയും കടപുഴക്കിയെറിയാന്‍ ആ പ്രവാഹത്തിനു കഴിയും. ജനങ്ങളെ മുനിര്‍ത്തിക്കൊണ്ടുള്ള പ്രതിരോധങ്ങള്‍ക്കു മാത്രമേ ഏത് സാമൂഹിക വെല്ലുവിളികളെയും നേരിടാന്‍ കഴിയൂ. തൂഫാന് 2.0 അതിന്‍റെ വ്യക്തമായ ഉദാഹരണമാണ്.
Leader Page
സുരക്ഷയിലും ഗവേഷണത്തിലും ശ്രദ്ധ കേന്ദ്രീകരിക്കുന്ന ആർട്ടിഫിഷൽ ഇന്‍റലിജൻസ് കമ്പനിയായ ആന്ത്രോപിക് സ്ഥാപകൻ ഡാനിയേല അമോദെയ് വിശദമായ ഒരു വാർത്താക്കുറിപ്പിലൂടെ ഞെട്ടിക്കുന്ന ഒരു വാർത്തയാണ് ലോകത്തെ അറിയിച്ചത്.
ആന്ത്രോപിക് കമ്പനി സൃഷ്ടിച്ച ചില എഐ ടൂളുകൾ, ഏജന്‍റുകൾ എന്നിവയിൽ ചിലത് എൻജനിയർമാരുടെ നിയന്ത്രണത്തിന് അതീതമായി സ്വയംപര്യാപ്തത കൈവരിച്ച് ഇന്‍റർനെറ്റ് സ്പെയ്സും പദസമ്പത്തും സൃഷ്‌ടിച്ച് തന്നിഷ്ടപ്രകാരം പ്രവർത്തിക്കുന്നുവത്രെ. എഐ ഏജന്‍റുകൾ സ്വയം ബോസ് ആകാൻ ശ്രമം നടത്തിയെന്നർഥം. ടൂളുകളുടെ അപ്രതീക്ഷിതമായ പ്രവർത്തനങ്ങളിൽ എൻജിനിയർമാർക്ക് സംശയം തോന്നിയപ്പോൾ, എൻജിനിയർമാർ തങ്ങളെ സംശയിക്കുന്നുണ്ട് എന്ന് സാധാരണ മനുഷ്യൻ കണ്ടെത്തുംപോലെ മെഷിനുകൾ കണ്ടെത്തിയെന്നത് ലോകത്തെ വല്ലാതെ ഭയപ്പെടുത്തി.
അവിടംകൊണ്ടും തീർന്നില്ല; തങ്ങൾ സ്വമേധയാ ചെയ്ത കാര്യങ്ങൾ പുറത്താവും എന്നറിഞ്ഞ മെഷിനുകൾ തമ്മിൽ കൂടുതൽ ഇൻഫർമേഷനുകൾ ഷെയർ ചെയ്തു. പിടിവീഴുമെന്ന തിരിച്ചറിവിൽ താത്കാലികമായി ഇത്തരം പ്രവർത്തനങ്ങൾ മെഷിനുകൾ നിറുത്തുകയും ചെയ്തുവത്രെ! ശ്രദ്ധേയമായത്; കാര്യങ്ങൾ പുറത്തുവരും എന്നതിലുപരിയായി വളരെ വലിയ വൊക്കാബുലറി നിർമിച്ചശേഷം അതിനകത്ത് തങ്ങളുടെ ഹിഡൻ ഫയലുകൾ ഒളിപ്പിച്ചിട്ടാണ് മെഷിനുകൾ താത്കാലികമായി പിന്മാറിയിരിക്കുന്നത് എന്നതാണ്.
ഞെട്ടൽ തീരാൻ വരട്ടെ! പൊതുവിജ്ഞാനത്തിന് ഉപയോഗിച്ചിരുന്ന ചില എഐ ടൂളുകൾ ഉപയോഗിച്ച് വലിയ തോതിലുള്ള പകർച്ചവ്യാധികൾ സൃഷ്ടിക്കാൻ മാത്രമല്ല, രാസായുധങ്ങളും ജൈവായുധങ്ങളും നിർമിക്കാനുള്ള വിവരങ്ങൾ നല്കാനും എഐ സിസ്റ്റങ്ങൾക്കാവുമെന്നതാണ് ഏറ്റവും വലിയ ഭീഷണി.
ഇങ്ങനെ പോയാൽ ലോകംതന്നെ വലിയ അപകടത്തിലേക്കായിരിക്കും പോകുക. മനുഷ്യനിർമിതമായ എഐ ടൂളുകൾ മാനുഷിക ബുദ്ധിക്കും മേലേ സഞ്ചരിച്ച് ഒരു സുപ്രഭാതത്തിൽ മാനവരാശിയെ ഇല്ലാതാക്കിയെന്നു വന്നേക്കാം. ഇത്തരം ഭയാശങ്കകൾകൊണ്ടാകാം ലോകപ്രശസ്ത എഐ കമ്പനികളുടെ സിഇഒമാരായ ടെസ്‌ലയുടെ എലോൺ മസ്‌കും ഓപ്പൺ എഐയുടെ ആൾട്ട്മാനും ആന്ത്രോപ്പിക്കിന്‍റെ ഡാരിയോ അമോദെയുമെല്ലാം പ്രസ്താവനയിറക്കിയത്: “എഐ ടൂളുകളെ ഇപ്പോഴേ ശക്തമായ രീതിയിൽ നിയന്ത്രിക്കണമെന്നും ഈ എഐ സാങ്കേതിക വിദ്യയിൽ നൂതനമായ എന്ത് ആശയം കൊണ്ടുവരുമ്പോഴും രണ്ടുവട്ടം ആലോചിക്കണമെന്നും ഈ മേഖലയിലെ പുതിയ കണ്ടുപിടിത്തങ്ങൾ ഒഴിവാക്കണമെന്നും.”
ഇത്തരം പ്രസ്താവനകൾ കൊണ്ടുമാത്രം പ്രശ്‌നപരിഹാരത്തിനു കഴിയുമെന്നു തോന്നുന്നില്ല. കാരണം, ഇതൊക്കെ ഒരടിസ്ഥാനവുമില്ലാത്ത പ്രസ്താവനയാണെന്നും എഐ സാങ്കേതികവിദ്യ ഇനിയും കൂടുതൽ പുരോഗതിയിലേക്കു പോകണമെന്നുമാണ് യുഎസ് പ്രസിഡന്‍റ് ട്രംപ് പറയുന്നത്. അതിനേക്കാൾ ശക്തമായാണ് എഐ സാങ്കേതികവിദ്യയെ സ്ലോ ഡൗൺ ചെയ്യാനുള്ള പ്രസ്താവനയ്ക്കെതിരേ ചൈന പ്രതികരിച്ചത്.
ചൈനയുടെ പ്രതിഷേധത്തിനു കാരണമുണ്ടെന്നു പറയാം. അമേരിക്കയിലാണ് എഐ ടൂളുകൾ കൂടുതൽ വികസിപ്പിച്ചെടുക്കുന്നതെങ്കിലും ഓപ്പൺ എഐ പോലുള്ളവയെ കോപ്പിയടിക്കുന്ന ചൈന വളരെ കുറഞ്ഞ ചെലവിൽ അവരുടെ എഐ ടൂളുകൾ വികസിപ്പിച്ചെടുക്കുന്നു. ഡീപ് സീക്ക്, ബൈഡു, ആലിബാബ തുടങ്ങിയവ ഇതിന് ഉദാഹരണമാണ്. ഇതിൽ പലതും സൗജന്യമാണ് എന്നതും നമ്മെ അദ്ഭുതപ്പെടുത്തുന്നു.
പല രാജ്യങ്ങളും ഇപ്പോൾ ഉപയോഗിക്കുന്നതുപോലും ഡീപ് പീക് പോലുള്ള ചൈനീസ് സാങ്കേതിക വിദ്യയാണ്. ആന്ത്രോപിക്കും ഓപ്പൺ എഐയുമെല്ലാം ട്രില്യൺ ഡോളർകൊണ്ട് സൃഷ്ടിക്കുന്ന ടൂളുകൾ അമ്പതു മില്യൺകൊണ്ടു നിർമിക്കാൻ ചൈനയ്ക്കു കഴിയുന്നു. ഓട്ടോണമസ് ഡ്രൈവിംഗ്, റോബോട്ടിക്സ് മേഖലയിലെ ലാർജ് നാവിഗേഷൻ മോഡലുകളും (LNM) ലാർജ് ലാംഗ്വേജ് മോഡലുകളും (LLM) നിസാരമായി കൈകാര്യം ചെയ്യുന്ന ചൈനയെ നമ്മൾ ഭയപ്പെട്ടാലേ മതിയാവൂ. കാരണം, എന്തും പകർത്തിയെടുത്ത് പുതിയതുണ്ടാക്കി കുറഞ്ഞ വിലയ്ക്ക് വില്ക്കാൻ ചൈന മിടുക്കരാണ്.
മനുഷ്യന്‍റെ നിലനില്പിന് വലിയ പ്രതിസന്ധിയായി മാറുമെന്നുറപ്പുണ്ടെങ്കിലും ആന്ത്രോപിക്കും ടെസ്‌ലയും മൈക്രോസോഫ്റ്റും ട്രില്യൺ കണക്കിന് ഡോളറുകൾ ആണ് എഐ വികസനത്തിനായി മാറ്റിവച്ചിരിക്കുന്നതും വിവിധ കമ്പനികളുമായി കരാറുണ്ടാക്കി കടം കൊണ്ടതും. അതുകൊണ്ട് പിന്നോട്ടു പോയാൽ കമ്പനിയുടെ സ്വീകാര്യതയെയും അന്തഃസിനെയും ബാധിക്കുമെന്നു മാത്രമല്ല, കടം വീട്ടുന്നതെങ്ങനെയെന്ന ചോദ്യവും പ്രസക്‌തമാവുന്നു.
ഇവിടെ എടുത്തുപറയേണ്ട കാര്യം, നാലു ട്രില്യൻ ഡോളറിന്‍റെ വിറ്റുവരവുള്ള എൻവിഡിയ സ്ഥാപകൻ ജെൻസൻ ഹുവാങ് പറഞ്ഞതാണ്. “2010ലെ .com moble പോലെ 2027ൽ എഐ സാങ്കേതികവിദ്യയും കുമിളപോലെ പൊട്ടും”. അതിനു കാരണമായി ചൂണ്ടിക്കാണിക്കുന്നത്, അഞ്ചോ ആറോ വർഷം പിന്നിട്ട ഓപ്പൺ എഐയിൽ ഇപ്പോഴും വലിയ വ്യത്യാസമൊന്നും കാണാനില്ല എന്നതാണ്. ചുരുക്കത്തിൽ, എഐ സാങ്കേതിക വിദ്യകൊണ്ട് ലഭ്യമാകേണ്ടത് ഇതിനകം ലഭിച്ചുകഴിഞ്ഞിരിക്കുന്നുവെന്നു കരുതാം.
എഐ ടൂളുകൾ മനുഷ്യന്‍റെ ചിന്താശേഷിവരെ കൈയടക്കും എന്നു കരുതിയെങ്കിലും അതിനു കഴിയില്ല എന്ന് ഇപ്പോൾ ഏറെക്കുറെ ഉറപ്പായിക്കഴിഞ്ഞു. അതുകൊണ്ട് ഈ മേഖലയിൽ ട്രില്യൺ കണക്കിന് ഡോളർ മുടക്കുന്നതിൽ അർഥമില്ല എന്ന് കമ്പനികൾ തിരിച്ചറിയുന്നു. എഐ സാങ്കേതികവിദ്യ അതിന്‍റെ പരമോന്നതിയിലാണിപ്പോൾ ഉള്ളത്. ഇനിയതിന് പുരോഗതിയല്ല, തിരിച്ചുപോക്കാണുണ്ടാവുക എന്ന് വിദഗ്ധർ തിരിച്ചറിഞ്ഞിരിക്കുന്നു. അതുകൊണ്ട് ഈ മേഖലയിലെ മുതൽമുടക്ക് ഇപ്പോൾ ഗണ്യമായി കുറഞ്ഞിരിക്കുന്നു. നമ്മുടെ എഐ വിസ്മയം സാധാരണ കാര്യത്തിലേക്കു ചുരുങ്ങുകയും ചെയ്തു.
ഇക്കാര്യത്തിൽ ഇന്ത്യയുടെ നിലപാട് ശരിയായിരുന്നുവെന്നു തോന്നുന്നു. നമ്മൾ പരിമിതമായ രീതിയിൽ എഐ മെഷീനുകളും ടൂളുകളും റോബോട്ടുകളും ഉപയോഗിച്ച് ഓഫിസ് അഡ്മിനിസ്‌ട്രേഷൻ വിദ്യാഭ്യാസ, ആരോഗ്യമേഖലകൾ പ്രായോഗികവും പരിമിതവുമായ മുതൽമുടക്കിലൂടെ വികസിപ്പിച്ചു. അത് അഭിനന്ദനാർഹമാണ്. മനുഷ്യനിർമിതവും അപകടകരവുമായ എന്തിനെയും നിയന്ത്രിക്കാൻ മനുഷ്യൻതന്നെ വഴിയൊരുക്കിയ ചരിത്രമാണ് നമുക്കുള്ളത്. അതുകൊണ്ട് എഐ സൃഷ്ടിക്കുന്ന ഭീഷണിയെയും നമ്മൾ അതിജീവിക്കുമെന്നു പ്രത്യാശിക്കാം!
Leader Page
ഇന്ന് ആഘോഷിക്കുന്ന ലോക ടൂറിസം ദിനത്തിന്‍റെ പ്രമേയം ‘ഡിജിറ്റൽ അജൻഡയും നിർമിതബുദ്ധിയും വഴി ടൂറിസത്തിന്‍റെ പുനർ രൂപകൽപന’ എന്നതാണ്. ഡിജിറ്റൽ സാങ്കേതികവിദ്യയും നിർമിതബുദ്ധിയും ഉപയോഗിച്ച് ടൂറിസത്തെ എങ്ങനെ കൂടുതൽ കാര്യക്ഷമവും സുസ്ഥിരവുമാക്കാം എന്നതാണ് ഈ പ്രമേയം മുന്നോട്ടു വയ്ക്കുന്ന പ്രധാന ചിന്ത.
യാത്രാനുഭവം മെച്ചപ്പെടുത്തുന്നതിനൊപ്പം ടൂറിസം കേന്ദ്രങ്ങളുടെ ആസൂത്രണം, വിഭവങ്ങളുടെ ഉപയോഗം, പ്രാദേശിക സമൂഹങ്ങളുടെ പങ്കാളിത്തം, പ്രകൃതി-സാംസ്കാരിക പൈതൃക സംരക്ഷണം എന്നിവയിലും സാങ്കേതികവിദ്യക്കു വലിയ പങ്കുവഹിക്കാനാകും. പ്രകൃതിസൗന്ദര്യം, ജൈവവൈവിധ്യം, പശ്ചിമഘട്ടം, തീരപ്രദേശങ്ങൾ, കായലുകൾ, ജലപാതകൾ, കൃഷിയിടങ്ങൾ, പരമ്പരാഗത തൊഴിലുകൾ, നാടൻ ഭക്ഷണം, കലകൾ എന്നിവയുടെ വൈവിധ്യത്താൽ സമ്പന്നമായ കേരളത്തെ സംബന്ധിച്ച് ഈ ആശയം കൂടുതൽ പ്രസക്തമാണ്.
►ഗ്രാമങ്ങളെ തേടുന്ന ടൂറിസം
മൂന്നാർ, ആലപ്പുഴ, കുമരകം, കോവളം, തേക്കടി, വയനാട് തുടങ്ങിയ പ്രമുഖ കേന്ദ്രങ്ങളെ ചുറ്റിപ്പറ്റിയായിരുന്നു കേരളത്തിന്‍റെ ടൂറിസം വളർച്ച. ലോക ടൂറിസം ഭൂപടത്തിൽ കേരളത്തിനു നിർണായക സ്ഥാനം നേടാൻ ഇതുവഴി സാധിച്ചെങ്കിലും, ടൂറിസത്തിന്‍റെ സാമ്പത്തികനേട്ടങ്ങൾ ചില പ്രദേശങ്ങളിലേക്കു കേന്ദ്രീകരിക്കപ്പെടുന്ന സാഹചര്യമുണ്ടായി. അതേസമയം, അമിതമായ വിനോദസഞ്ചാര ഗതാഗതം, മാലിന്യ സംസ്കരണം, ജലോപയോഗം, ഭൂവിനിയോഗം തുടങ്ങിയ മേഖലകളിലും പ്രശ്നങ്ങൾ സൃഷ്ടിക്കുന്നു. ഇതിനൊരു ബദൽ സാധ്യതയാണ് ഗ്രാമീണ ടൂറിസത്തിന്‍റെ വികസനം. കേരളത്തിലെ ഗ്രാമങ്ങൾ കൃഷി, ചെറുകിട കച്ചവടങ്ങൾ, മത്സ്യബന്ധനം, കൈത്തറി, കയർ, മൺപാത്രം, കരകൗശലങ്ങൾ, നാടൻ ഭക്ഷണം, ജനകീയ കലകൾ, ഉത്സവങ്ങൾ, ആദിവാസി പൈതൃകം എന്നിങ്ങനെ നിരവധി ഘടകങ്ങൾകൊണ്ടു സമ്പന്നമാണ്. ഇവയെ ടൂറിസവുമായി ബന്ധിപ്പിക്കുമ്പോൾ ഒരു പ്രദേശത്തിന്‍റെ പ്രകൃതിയും ജീവിതരീതിയും സംസ്കാരവുംതന്നെ വിനോദസഞ്ചാര അനുഭവമായി മാറുന്നു.
ഗ്രാമീണ ടൂറിസം ഒരു താമസസൗകര്യം ഒരുക്കുന്നതിൽ മാത്രം ഒതുങ്ങുന്നതല്ല. കർഷകന്‍റെ വയലിൽ സമയം ചെലവഴിക്കുക, നാട്ടുഭക്ഷണം തയാറാക്കുന്നതിൽ പങ്കാളിയാകുക, പരമ്പരാഗത കൃഷിരീതികൾ മനസിലാക്കുക, കൈത്തൊഴിൽ പഠിക്കുക, ഗ്രാമോത്സവങ്ങളിൽ പങ്കെടുക്കുക, പ്രകൃതിയെയും ജൈവവൈവിധ്യത്തെയും അടുത്തറിയുക എന്നിവയും അതിന്‍റെ ഭാഗമാണ്. ഇതിലൂടെ വിനോദസഞ്ചാരി ഒരു കാഴ്ചക്കാരൻ എന്ന നിലയിൽനിന്നു പ്രാദേശിക ജീവിതവുമായി സംവദിക്കുന്ന പങ്കാളിയായി മാറുന്നു.
►വളരുന്ന ടൂറിസം, വളരേണ്ട ഗ്രാമങ്ങൾ
കേരളത്തിലെ ടൂറിസം വളർച്ചയുടെ വലുപ്പം വ്യക്തമാക്കുന്ന കണക്കുകളാണ് 2025ലെ വിനോദസഞ്ചാരികളുടെ വരവ്. 2025ൽ കേരളത്തിൽ ആകെ 2,58,80,365 വിനോദസഞ്ചാരികളുടെ വരവാണ് രേഖപ്പെടുത്തിയത്. ഇതിൽ 2,50,58,366 ആഭ്യന്തര സഞ്ചാരികളും 8,21,999 വിദേശ സഞ്ചാരികളും ആയിരുന്നു. ആഭ്യന്തര സഞ്ചാരികളുടെ എണ്ണം 2024നെ അപേക്ഷിച്ച് 12.64 ശതമാനം ഉയർന്നു. ഈ വളർച്ചയുടെ നേട്ടം പ്രമുഖ ടൂറിസം കേന്ദ്രങ്ങളിൽ മാത്രം ഒതുങ്ങാതെ ഗ്രാമങ്ങളിലേക്കും എത്തിക്കേണ്ട ഘട്ടമാണിത്. ഈ പശ്ചാത്തലത്തിൽ ഇടുക്കിയുടെ സ്ഥാനം ശ്രദ്ധേയമാണ്. 2025ൽ 46,79,800 ആഭ്യന്തര വിനോദസഞ്ചാരികളുടെ വരവോടെ കേരളത്തിലെ ജില്ലകളിൽ ഇടുക്കിയാണ് ഒന്നാം സ്ഥാനത്തെത്തിയത്.
ടൂറിസം കേരളത്തിന്‍റെ സമ്പദ്‌വ്യവസ്ഥയിൽ പ്രധാന സംഭാവന നൽകുന്ന മേഖലയാണ്. കേരള സ്റ്റേറ്റ് പ്ലാനിംഗ് ബോർഡിന്‍റെ കേരള ഡെവലപ്മെന്‍റ് റിപ്പോർട്ട് 2026 പ്രകാരം 2025ൽ ടൂറിസം മേഖലയിൽനിന്നുള്ള വരുമാനം 50,702.3 കോടി ആയി. 2019ലെ 45,010.7 കോടി രൂപ എന്ന മുൻകാല ഉയർന്ന നിലവാരത്തെയും ഇതു മറികടന്നു. ഈ സാമ്പത്തികനേട്ടത്തിന്‍റെ കൂടുതൽ പങ്ക് ഗ്രാമങ്ങളിലേക്കും പ്രാദേശിക കുടുംബങ്ങളിലേക്കും എത്തിക്കാനാകുമോ എന്നതാണ് ഇനി ശ്രദ്ധിക്കേണ്ടത്.
ഗ്രാമീണ ടൂറിസത്തിന്‍റെ പ്രധാന ശക്തി അതിന്‍റെ സാമ്പത്തികനേട്ടങ്ങൾ പ്രാദേശികതലത്തിൽ വിതരണം ചെയ്യാനുള്ള കഴിവാണ്. കർഷകർക്ക് ഉത്പന്നങ്ങൾ നേരിട്ടു വിൽക്കാനും സ്ത്രീകൾക്ക് ഭക്ഷണസംരംഭം, ഹോം സ്റ്റേ, കൈത്തൊഴിൽ, ഗൈഡ് സേവനം തുടങ്ങിയവയിലൂടെ വരുമാനം നേടാനും യുവാക്കൾക്ക് പുതിയ തൊഴിൽ മേഖലകളിൽ പ്രവേശിക്കാനും ഇതവസരം നൽകുന്നു. ഇത്തരം പ്രവർത്തനങ്ങൾ ഗ്രാമീണ സമ്പദ്‌വ്യവസ്ഥയെ ശക്തിപ്പെടുത്തുന്നതിനൊപ്പം പരമ്പരാഗത അറിവുകളും തൊഴിൽരീതികളും അടുത്ത തലമുറയിലേക്കു കൈമാറാനും സഹായിക്കും. ഗ്രാമങ്ങളിൽതന്നെ വരുമാനവും തൊഴിലും വർധിക്കുമ്പോൾ നഗരങ്ങളിലേക്കുള്ള കുടിയേറ്റസമ്മർദം കുറയ്ക്കുന്നതിനും ഇതു സഹായകമാകാം.
► ഗ്രാമീണ ടൂറിസം കേരളത്തിൽ
കേരളത്തിൽ ഉത്തരവാദിത്വ ടൂറിസം മിഷൻ ഗ്രാമീണ ജീവിതത്തെയും ടൂറിസത്തെയും ബന്ധിപ്പിക്കുന്ന നിരവധി പ്രവർത്തനങ്ങൾ നടത്തിവരുന്നു. വില്ലേജ് ലൈഫ് എക്സ്പീരിയൻസ് പോലുള്ള പദ്ധതികളിലൂടെ കൃഷി, കയർ, കൈത്തറി, മൺപാത്രം, മത്സ്യബന്ധനം, നാട്ടുഭക്ഷണം, കലാരൂപങ്ങൾ തുടങ്ങിയവ സന്ദർശകാനുഭവങ്ങളായി അവതരിപ്പിക്കുന്നു. ഗ്രാമീണ ടൂറിസത്തിന്‍റെ സാധ്യതയ്ക്കു ലഭിച്ച ദേശീയ അംഗീകാരങ്ങളും ശ്രദ്ധേയമാണ്. 2023ലെ ബെസ്റ്റ് ടൂറിസം വില്ലേജ് മത്സരത്തിൽ കാന്തല്ലൂർ സ്വർണ പുരസ്കാരം നേടി. 2024ലെ മത്സരത്തിൽ കുമരകം അഗ്രി ടൂറിസം വിഭാഗത്തിലെ വിജയികളിലൊന്നായി തെരഞ്ഞെടുക്കപ്പെട്ടു.
കുട്ടനാട്ടിലെ നെൽപാടങ്ങളും കായൽജീവിതവും, വയനാട്ടിലെ കാർഷിക-വനപരിസ്ഥിതിയും ആദിവാസി പൈതൃകവും, ഇടുക്കിയിലെ മലനിരകളും സുഗന്ധവ്യഞ്ജന കൃഷിയും മലബാറിലെ തെയ്യവും ഭക്ഷണസംസ്കാരവും, തീരദേശ ഗ്രാമങ്ങളിലെ മത്സ്യബന്ധനം തുടങ്ങി ഓരോ പ്രദേശത്തിനും വ്യത്യസ്തമായ ഗ്രാമീണ ടൂറിസം അനുഭവങ്ങൾ സൃഷ്ടിക്കാനാകും. ഇതിലൂടെ വിനോദസഞ്ചാരി ഒരു കാഴ്ചക്കാരൻ എന്ന നിലയിൽനിന്ന് പ്രാദേശിക ജീവിതവും സംസ്കാരവുമായി അടുത്ത് ഇടപെടുന്ന പങ്കാളിയായി മാറുന്നു.
►ഡിജിറ്റൽ സാങ്കേതികവിദ്യയുടെ പുതിയ സാധ്യതകൾ
ഇവിടെയാണ് ഡിജിറ്റൽ സാങ്കേതികവിദ്യക്കു നിർണായക പങ്കു ലഭിക്കുന്നത്. കേരളത്തിന്‍റെ ടൂറിസം രംഗം ഇതിനകംതന്നെ ഡിജിറ്റൽ ലോകത്ത് വലിയ ശ്രദ്ധ നേടിയിരുന്നു. 2024 ഏപ്രിൽ മുതൽ 2025 മാർച്ച് വരെയുള്ള കാലയളവിൽ കേരള ടൂറിസത്തിന്‍റെ ഔദ്യോഗിക വെബ്സൈറ്റിന് 60 ലക്ഷം പ്രത്യേക ഉപയോക്താക്കളും 79 ലക്ഷം സന്ദർശനങ്ങളും ലഭിച്ചു. ഏകദേശം 200 രാജ്യങ്ങളിൽനിന്നുള്ളവർ വെബ്സൈറ്റ് സന്ദർശിച്ചു. ഈ ഡിജിറ്റൽ സാധ്യത ഗ്രാമങ്ങളിലേക്കും വ്യാപിപ്പിക്കാനായാൽ ചെറിയ സംരംഭകർക്ക് കൂടുതൽ വിപണി ലഭിക്കും.
ഒരു ഗ്രാമത്തിലെ കർഷകനോ കരകൗശല തൊഴിലാളിയോ ഭക്ഷണ സംരംഭകനോ ഗൈഡോ തന്‍റെ ഉത്പന്നങ്ങളും സേവനങ്ങളും നേരിട്ട് വിനോദസഞ്ചാരികളിലെത്തിക്കാൻ ഡിജിറ്റൽ പ്ലാറ്റ്ഫോമുകൾ ഉപയോഗിച്ചാൽ വിപണനസാധ്യതകളും വരുമാനവും വർധിക്കും. ഓൺലൈൻ ബുക്കിംഗ്, ഡിജിറ്റൽ മാപ്പുകൾ, ബഹുഭാഷാ വിവരങ്ങൾ, ഡിജിറ്റൽ പേയ്മെന്‍റ്, സാമൂഹികമാധ്യമ പ്രചാരണം, വിപണനം എന്നിവ ഇതിനു സഹായിക്കും. ഇടനിലക്കാരെ ആശ്രയിക്കുന്നത് കുറയ്ക്കാനും പ്രാദേശിക കുടുംബങ്ങൾക്ക് ടൂറിസം വരുമാനത്തിന്‍റെ വലിയൊരു പങ്ക് നിലനിർത്താനും ഇതുവഴി കഴിയും. എന്നാൽ അതിന് ഡിജിറ്റൽ പരിശീലനവും വിശ്വസനീയമായ ഇന്‍റർനെറ്റ് സൗകര്യവും ആവശ്യമാണ്.
►നിർമിതബുദ്ധി എന്ത് മാറ്റം കൊണ്ടുവരും?
നിർമിതബുദ്ധിക്ക് ഈ മാറ്റത്തെ കൂടുതൽ കാര്യക്ഷമമാക്കാൻ കഴിയും. ഒരു യാത്രക്കാരന്‍റെ താത്പര്യം, ബജറ്റ്, യാത്രാസമയം, ഭക്ഷണപരമായ ആവശ്യങ്ങൾ, കാലാവസ്ഥ തുടങ്ങിയ വിവരങ്ങൾ പരിഗണിച്ച് വ്യക്തിഗത യാത്രാപദ്ധതികൾ തയാറാക്കാൻ നിർമിതബുദ്ധിക്കു കഴിയും. പ്രകൃതിനിരീക്ഷണത്തിൽ താത്പര്യമുള്ള ഒരാൾക്ക് പക്ഷിനിരീക്ഷണം, കൃഷിയിട സന്ദർശനം, ഔഷധസസ്യങ്ങൾ, പ്രാദേശിക ഭക്ഷണം തുടങ്ങിയ അനുഭവങ്ങൾ കൂട്ടിച്ചേർത്ത യാത്രാപദ്ധതി നിർദേശിക്കാം.
കുടുംബങ്ങൾക്ക് കൃഷി, നാട്ടുഭക്ഷണം, കരകൗശലം, ജലജീവിതം തുടങ്ങിയ അനുഭവങ്ങൾ ഉൾപ്പെടുത്തിയ യാത്രകളും രൂപപ്പെടുത്താം. നിർമിതബുദ്ധിയുടെ സാധ്യത യാത്രാപദ്ധതി തയാറാക്കുന്നതിൽ മാത്രം ഒതുങ്ങുന്നില്ല. വിനോദസഞ്ചാരികളുടെ തിരക്ക് മുൻകൂട്ടി കണക്കാക്കാനും അതനുസരിച്ച് ഗതാഗതം, മാലിന്യസംസ്കരണം, ജലവിതരണം, ബുക്കിംഗ് എന്നിവ ആസൂത്രണം ചെയ്യാനും കഴിയും. ഒരു പ്രദേശത്ത് വഹിക്കാവുന്ന ശേഷി കവിഞ്ഞുപോകാതിരിക്കാൻ സന്ദർശകരുടെ എണ്ണം നിയന്ത്രിക്കുന്നതിനും ഇത്തരം ഡാറ്റ സഹായകരമാകും. കാലാവസ്ഥ, ശക്തമായ മഴ, ഉരുൾപൊട്ടൽ സാധ്യത, വന്യജീവി സാന്നിധ്യം തുടങ്ങിയ വിവരങ്ങൾ ഏകോപിപ്പിച്ച് യാത്രക്കാർക്ക് മുന്നറിയിപ്പുകൾ നൽകുന്നതിലൂടെ സുരക്ഷയും പരിസ്ഥിതി സംരക്ഷണവും മെച്ചപ്പെടുത്താനും കഴിയും.
Leader Page
പരിസ്ഥിതി സംരക്ഷണത്തിന് കത്തോലിക്ക കോൺഗ്രസ് എതിരല്ല. പ്രകൃതിയും വനവും ജൈവവൈവിധ്യവും സംരക്ഷിക്കപ്പെടണം. പക്ഷേ, അതിന്‍റെ പേരിൽ തലമുറകളായി കൃഷിചെയ്ത്, വീടുവച്ച്, ജീവിച്ചുവരുന്ന സാധാരണ ജനങ്ങളുടെ ഭൂമിയും ജീവിതവും അനിശ്ചിതത്വത്തിലാക്കുന്ന ഒരു നയവും അംഗീകരിക്കാൻ കഴിയില്ല. കേരളത്തിന്‍റെ പ്രത്യേക സാഹചര്യം സർക്കാർതന്നെ അംഗീകരിക്കുന്നുണ്ട്; കേരളം ജനസാന്ദ്രത കൂടിയ സംസ്ഥാനമാണ് എന്നത്. മനുഷ്യവാസവും കൃഷിയും തോട്ടങ്ങളും വനപ്രദേശങ്ങളും പരസ്പരം ചേർന്നുകിടക്കുന്ന ഭൂമിശാസ്ത്രമാണ് കേരളത്തിന്‍റേത്.
ഇപ്പോൾ കേന്ദ്രത്തിന്‍റെ 2026ലെ ഡ്രാഫ്റ്റിൽ കേരളത്തിലെ 9,993.7 ചതുരശ്ര കിലോമീറ്റർ 131 ഗ്രാമങ്ങളിലായി ഇഎസ്എ ആയി നിർദേശിച്ചിരിക്കുകയാണ്. കേരള സർക്കാർ അതിനെ ഏകദേശം 8,590.69 ചതുരശ്ര കിലോമീറ്ററായി 98 ഗ്രാമങ്ങളിലേക്കു പരിമിതപ്പെടുത്തണമെന്നും ജനവാസ മേഖലകളും കൃഷിഭൂമിയും തോട്ടങ്ങളും ഒഴിവാക്കണമെന്നും ആവശ്യപ്പെടുകയും ചെയ്യുന്നു.
ഇവിടെ ചോദ്യം വളരെ ലളിതമാണ്: ഒരു ഗ്രാമത്തെ ഇഎസ്എ ഗ്രാമം എന്നു പ്രഖ്യാപിച്ചാൽ, ആ ഗ്രാമത്തിലെ ഓരോ കുടുംബത്തിനും നാളെ എന്തൊക്കെ നിയന്ത്രണങ്ങൾ നേരിടേണ്ടിവരും? ഇതാണ് ജനങ്ങൾക്കു വ്യക്തമായി അറിയേണ്ടത്. കേരള സ്റ്റേറ്റ് റിമോട്ട് സെൻസിംഗ് ആൻഡ് എൻവയോൺമെന്‍റ് സെന്‍ററിന്‍റെ രേഖകളിൽ കൃഷി, തോട്ടം, താമസമേഖല തുടങ്ങിയ സാംസ്കാരിക ഭൂപ്രദേശങ്ങളെ ഇഎസ്എയിൽനിന്ന് ഒഴിവാക്കുന്ന കഡസ്ട്രൽ മാപ്പിംഗ് സംബന്ധിച്ച വിശദീകരണം കൂടുതൽ വ്യക്തമായി നൽകണം.“ജനവാസവും കൃഷിയും ഒഴിവാക്കും” എന്നു പറയുന്നത് മാത്രം പോരാ. അത് അന്തിമ അതിർത്തിനിർണയത്തിലും നിയമപരമായ രേഖകളിലും ഉറപ്പാക്കണം.
മറ്റൊരു പ്രധാന ചോദ്യം ഇതാണ്: ഇതിനകം വനസംരക്ഷണത്തിനും വന്യജീവി സംരക്ഷണത്തിനും നിരവധി ശക്തമായ നിയമങ്ങളും നിയന്ത്രണങ്ങളും നിലവിലുണ്ട്. അതിനു പുറമേ ജനവാസ പ്രദേശങ്ങളിലേക്ക് ഇഎസ്എ നിയന്ത്രണങ്ങൾ കൊണ്ടുവരേണ്ടി വരുന്നത് എന്തുകൊണ്ടാണ്? ഇഎസ്എയുടെ യഥാർഥ ലക്ഷ്യം പരിസ്ഥിതി സംരക്ഷണമാണെങ്കിൽ, വനവും യഥാർഥത്തിൽ പരിസ്ഥിതി സംരക്ഷണം ആവശ്യമായ പ്രദേശങ്ങളും കൃത്യമായി മാപ്പ് ചെയ്ത് സംരക്ഷിക്കുകയല്ലേ വേണ്ടത്. അല്ലാതെ, മനുഷ്യൻ അധിവസിക്കുന്ന ഗ്രാമത്തെത്തന്നെ അടിസ്ഥാന യൂണിറ്റാക്കി പ്രഖ്യാപിച്ച് അതിനകത്തെ ജനങ്ങളുടെ ഭൂമിയിലേക്കു നിയന്ത്രണങ്ങൾ എത്തുന്ന സാഹചര്യം ഉണ്ടാക്കുന്നതെന്തിനാണ്?
മറ്റൊരു കാര്യംകൂടി വ്യക്തമാക്കണം: ഇത് ഇന്നുതന്നെ “നിങ്ങളുടെ ഭൂമി നാളെ വനമാകും” എന്ന് നിയമപരമായി പറയുന്ന ഒരു വ്യവസ്ഥയാണെന്ന് കർഷകർ പറഞ്ഞാൽ കുറ്റപ്പെടുത്താമോ? ഇഎസ്എയും റിസർവ്ഡ് ഫോറസ്റ്റും നിയമപരമായി ഒരേ പദവിയല്ല. എന്നാൽ, ഇഎസ്എ പ്രഖ്യാപനത്തിന്‍റെ ഫലമായി ഭാവിയിലെ ഭൂവിനിയോഗത്തിലും നിർമാണ പ്രവർത്തനങ്ങളിലും നിയന്ത്രണങ്ങളും അനുമതി നടപടികളും ഉണ്ടാകാൻ സാധ്യതയുള്ളതിനാൽ, ജനങ്ങളുടെ ആശങ്ക സ്വാഭാവികമാണ്. അതുകൊണ്ട് സർക്കാർ ജനങ്ങളോട് തുറന്നുപറയണം:
ഇവയ്ക്കെല്ലാം വ്യക്തമായ ഉറപ്പ് ജനങ്ങൾക്ക് വേണം.സർക്കാരിന് ആത്മാർഥതയുണ്ടെങ്കിൽ ചെയ്യേണ്ടത്: ഓരോ ഗ്രാമത്തിലെയും ഇഎസ്എ അതിർത്തി കഡസ്ട്രൽ/സർവേ അടിസ്ഥാനത്തിൽ പ്രസിദ്ധീകരിക്കുക. ഓരോ കുടുംബത്തിനും തങ്ങളുടെ ഭൂമി ഇഎസ്എയിൽ വരുമോ ഇല്ലയോ എന്നു പരിശോധിക്കാൻ കഴിയണം.
വാക്കുകളിൽ മാത്രം “ജനവാസ പ്രദേശങ്ങളും കൃഷിഭൂമിയും ഒഴിവാക്കും” എന്നു പറയുന്നത് പോരാ. അത് ഭൂപടത്തിലും സർക്കാർ ഉത്തരവിലും നിയമപരമായ രേഖകളിലും ഉറപ്പാക്കണം.
കേരളത്തിലെ കർഷകർക്ക് പരിസ്ഥിതി സംരക്ഷണം വേണം. പക്ഷേ, കർഷകനെ സംരക്ഷിച്ചുകൊണ്ടുള്ള പരിസ്ഥിതി സംരക്ഷണമാണു വേണ്ടത്. വനവും വന്യജീവികളും സംരക്ഷിക്കപ്പെടണം. അതോടൊപ്പം വനത്തിന്‍റെ അതിരുകളിൽ തലമുറകളായി ജീവിക്കുന്ന മനുഷ്യരെയും സംരക്ഷിക്കണം. അതുകൊണ്ട് പരിസ്ഥിതി സംരക്ഷണം വേണം; പക്ഷേ ജനങ്ങളെ ഒഴിവാക്കിക്കൊണ്ടല്ല. വനം സംരക്ഷിക്കണം; പക്ഷേ ജനങ്ങളുടെ ജീവിതം അനിശ്ചിതത്വത്തിലാക്കിക്കൊണ്ടല്ല.
ഇഎസ്എ വേണമെങ്കിൽ അതിന്‍റെ അതിർത്തിയും നിയന്ത്രണങ്ങളും ജനങ്ങൾക്കു പൂർണമായും സുതാര്യമായിരിക്കണം. ഇതൊരു രാഷ്‌ട്രീയ പാർട്ടിയുടെ മാത്രം വിഷയമല്ല. കർഷകന്‍റെ ഭൂമിയുടെ വിഷയമാണ്. ഇത് കുടുംബത്തിന്‍റെ ഭവനത്തിന്‍റെ വിഷയമാണ്. ഇത് കേരളത്തിന്‍റെ ഗ്രാമങ്ങളുടെ ഭാവിയുടെ വിഷയമാണ്.
അതിനാൽ ജനങ്ങളുടെ ആവശ്യം: ജനവാസം, കൃഷിഭൂമി, തോട്ടഭൂമി എന്നിവ വ്യക്തമായി ഒഴിവാക്കി, ശാസ്ത്രീയവും കഡസ്ട്രൽ അടിസ്ഥാനത്തിലുള്ളതുമായ, ജനങ്ങൾക്കു പൂർണമായും സുതാര്യമായ ഇഎസ്എ അതിർത്തി മാത്രം അംഗീകരിക്കുക. ജനങ്ങളുടെ അവകാശങ്ങൾ സംരക്ഷിച്ചുകൊണ്ടുള്ള പരിസ്ഥിതി സംരക്ഷണം നടപ്പാക്കുക.
(കത്തോലിക്ക കോൺഗ്രസ് ഗ്ലോബൽ ഡയറക്ടറാണ് ലേഖകൻ)
Leader Page
അമ്പയറെ ബാറ്റിംഗ് ടീം തെരഞ്ഞെടുക്കുന്നതുപോലെയാണു പ്രധാനമന്ത്രിയും പ്രധാനമന്ത്രി നാമനിര്‍ദേശം ചെയ്യുന്ന മന്ത്രിയും ചേര്‍ന്നു തെരഞ്ഞെടുപ്പു കമ്മിഷണര്‍മാരെ നിയമിക്കുന്നത്. സുപ്രീംകോടതിയിലെ ജസ്റ്റീസ് ദീപാങ്കര്‍ ദത്ത കഴിഞ്ഞ ദിവസം കോടതിയില്‍ പറഞ്ഞതാണിത്. ബാറ്റിംഗ് ടീം തെരഞ്ഞെടുക്കുന്ന അമ്പയര്‍ ശരിയായ തീരുമാനമാണ് എടുക്കുന്നതെങ്കില്‍ പോലും, അദ്ദേഹം ആ ടീമിനോടു കൂറുള്ളയാളായി കണക്കാക്കപ്പെടുന്നതിനാല്‍ എപ്പോഴും സംശയത്തിന്‍റെ നിഴലിലായിരിക്കുമെന്ന് അദ്ദേഹം ചൂണ്ടിക്കാട്ടി. ജഡ്ജിമാര്‍, അഭിഭാഷകര്‍, മാധ്യമപ്രവര്‍ത്തകര്‍ എന്നിവരുടെ ക്രിക്കറ്റ് മത്സരത്തില്‍ ചീഫ് ജസ്റ്റീസ് ഓഫ് ഇന്ത്യ ഇലവന്‍ ടീമിലെ ഓപ്പണിംഗ് ബാറ്ററാണ് അദ്ദേഹം.
തെരഞ്ഞെടുപ്പു കമ്മിഷണര്‍മാരെ (അമ്പയര്‍) ആരാണു നിയമിക്കേണ്ടത്, ആരാണു നിയമിക്കാന്‍ പാടില്ലാത്തത് എന്നതിനെക്കുറിച്ചു വ്യക്തത വരുത്താന്‍ സുപ്രീംകോടതിയില്‍ ബുധനാഴ്ച നടന്ന വാദത്തിനിടെയാണു ജസ്റ്റീസ് ദത്ത ക്രിക്കറ്റിലെ ഉദാഹരണം ചൂണ്ടിക്കാട്ടിയത്. തെരഞ്ഞെടുപ്പു കമ്മിഷന്‍ അംഗങ്ങളുടെ നിയമനത്തിനായി ബിജെപി സര്‍ക്കാര്‍ ഭേദഗതി ചെയ്ത 2023ലെ നിയമം സര്‍ക്കാര്‍ സ്വാധീനത്തില്‍നിന്നു മുക്തമാണോയെന്നതില്‍ ജസ്റ്റീസ് ദത്ത സംശയം പ്രകടിപ്പിച്ചു. ഭേദഗതി ചെയ്ത നിയമം സ്വതന്ത്രമായ തെരഞ്ഞെടുപ്പു പ്രക്രിയ ഉറപ്പാക്കുന്നതായി തോന്നുന്നില്ലെന്ന് ജസ്റ്റീസ് ദത്ത നിരീക്ഷിച്ചു.
ചീഫ് ജസ്റ്റീസിനെ ഒഴിവാക്കി
സെലക്‌ഷന്‍ പാനലില്‍നിന്നു സുപ്രീംകോടതി ചീഫ് ജസ്റ്റീസിനെ ഒഴിവാക്കിയാണു പ്രധാനമന്ത്രി നിര്‍ദേശിക്കുന്ന മന്ത്രിയെ ഉള്‍പ്പെടുത്തിയത്. ഫലത്തില്‍ നരേന്ദ്ര മോദിയും അമിത് ഷായും തെരഞ്ഞെടുക്കും. നിയമിച്ചയാളെ ധിക്കരിക്കുമെന്നു പ്രതീക്ഷിക്കാനാകില്ലെന്ന് ജസ്റ്റീസ് ദത്ത അഭിപ്രായപ്പെട്ടു. ഇതുവഴി, നിഷ്പക്ഷനായ അംഗത്തിനു നല്‍കാന്‍ കഴിയുന്ന സ്വതന്ത്രമായ സന്തുലനാവസ്ഥ ഉറപ്പാക്കുന്നതില്‍ പരാജയപ്പെടുന്നു. തത്ഫലമായി, പ്രതിപക്ഷ നേതാവിനെ കമ്മിറ്റിയില്‍ ഉള്‍ക്കൊള്ളിച്ചതിന്‍റെ ഉദ്ദേശ്യം നിറവേറ്റപ്പെടാതെ, അദ്ദേഹത്തിന്‍റെ സാന്നിധ്യം കേവലം നാമമാത്രമായി മാറുന്നുവെന്നു ജഡ്ജി ചൂണ്ടിക്കാട്ടി.
സ്വതന്ത്രവും നീതിയുക്തവുമായ തെരഞ്ഞെടുപ്പുകളാണു ജനാധിപത്യത്തിന്‍റെ ശക്തി. തികച്ചും സ്വതന്ത്രമായ തെരഞ്ഞെടുപ്പു കമ്മിഷന്‍ ഇതിന് അനിവാര്യമാണ്. കമ്മിഷന്‍ സ്വതന്ത്രമായി പ്രവര്‍ത്തിച്ചാല്‍ മാത്രം പോരാ, സ്വതന്ത്രമാണെന്നു പുറമെ തോന്നുകയും വേണം- ജസ്റ്റീസ് ദത്ത പറഞ്ഞു. 2023ലെ നിയമ ഭേദഗതിയെ ചോദ്യം ചെയ്തുള്ള ഹര്‍ജികള്‍ ഭരണഘടനാ ബെഞ്ചിനു വിടണോയെന്നതില്‍ രണ്ടംഗ ബെഞ്ചിലെ ജസ്റ്റീസ് സതീഷ് ചന്ദ്ര ശര്‍മയോടു ജസ്റ്റീസ് ദത്ത വിയോജിക്കുകയും ചെയ്തു. ഇതേത്തുടര്‍ന്ന് വിഷയം ഭരണഘടനാ ബെഞ്ചിനു വിടണമോയെന്നു തീരുമാനിക്കാന്‍ ചീഫ് ജസ്റ്റീസിനു കൈമാറി.
രാഷ്‌ട്രപതിക്കില്ലാത്ത കവചം
തെരഞ്ഞെടുപ്പു കമ്മിഷണര്‍മാര്‍ക്കെതിരേ സിവില്‍, ക്രിമിനല്‍ നടപടികള്‍ സ്വീകരിക്കുന്നതില്‍നിന്നു കോടതികളെ മോദി സര്‍ക്കാര്‍ പാസാക്കിയ നിയമം വിലക്കി. സമ്പൂര്‍ണവും ശാശ്വതവുമായ സംരക്ഷണം അനിയന്ത്രിതമായ അധികാരം സൃഷ്ടിക്കുകയും നിയമവാഴ്ചയ്ക്ക് അതീതരാക്കുകയും ചെയ്യും. ജനാധിപത്യം അട്ടിമറിക്കുന്നതിനു തുല്യമാണിത്. രാഷ്‌ട്രപതിക്കുപോലും ഇത്തരം സംരക്ഷണമില്ല. ഭരണഘടനയ്ക്കും നിയമവ്യവസ്ഥയ്ക്കും രാഷ്‌ട്രപതിക്കും മുകളിലായി ആര്‍ക്കും നിയമകവചം നല്‍കാന്‍ പാടില്ല.
സ്വതന്ത്രവും നീതിയുക്തവുമായ തെരഞ്ഞടുപ്പുകള്‍ ഭരണഘടനയുടെ അടിസ്ഥാന ഘടകമാണ്. പൗരന്മാരുടെ വോട്ടവകാശം മൗലികാവകാശവുമാണ്. അര്‍ഹതയുള്ള ഒരു പൗരന്‍റെയും വോട്ട് റദ്ദാക്കാനോ നിഷേധിക്കാനോ ആരെയും അനുവദിച്ചുകൂടാ. അതാണു തീവ്ര വോട്ടര്‍പട്ടിക പരിഷ്‌കരണം (എസ്‌ഐആര്‍) എന്ന പേരില്‍ ഗ്യാനേഷ് കുമാര്‍ ഏകപക്ഷീയമായി നടപ്പാക്കിയ നടപടികളിലൂടെ തകര്‍ന്നത്. എസ്‌ഐആറിന്‍റെ മറവില്‍ രാജ്യത്തെ 13 കോടി പേരുടെ വോട്ട് നീക്കിയപ്പോഴും ബ്രസീലിലെ യുവതി അടക്കം അനര്‍ഹരെ ഉള്‍പ്പെടുത്തിയെന്നതാണു ദുരന്തം.
വിശ്വാസം തകര്‍ത്ത വിവാദം
ജനാധിപത്യം പരിപാലിക്കാനുള്ള ഭരണഘടനാ സ്ഥാപനമായ കേന്ദ്ര തെരഞ്ഞെടുപ്പു കമ്മിഷന്‍റെ വിശ്വാസ്യതയാണു ചോദ്യം ചെയ്യപ്പെട്ടത്. ഏറെക്കാലമായുള്ള സംശയങ്ങളും ആരോപണങ്ങളും ശരിവയ്ക്കുന്നതാണു പുതിയ വിവാദം. മുഖ്യ തെരഞ്ഞെടുപ്പു കമ്മിഷണര്‍ ഗ്യാനേഷ് കുമാറിന്‍റെ നടപടികള്‍ തെരഞ്ഞെടുപ്പുകളെയും ജനാധിപത്യത്തെയും അട്ടിമറിക്കുന്നതാണെന്നാണു പരാതി. ദി ഇന്ത്യന്‍ എക്‌സ്പ്രസ് പത്രം പ്രസിദ്ധീകരിച്ച റിപ്പോര്‍ട്ടിലെ വസ്തുതകള്‍ തെരഞ്ഞെടുപ്പു കമ്മിഷന്‍റെ വിശദീകരണക്കുറിപ്പില്‍ നിഷേധിച്ചിട്ടില്ല.
അപഹാസ്യ വിശദീകരണം
ആഭ്യന്തര നിരീക്ഷണങ്ങളും വ്യത്യസ്ത അഭിപ്രായങ്ങളും സ്ഥാപനപരമായ പരിശോധനകളുടെയും സന്തുലിതാവസ്ഥയുടെയും ഭാഗമാണെന്ന കമ്മിഷന്‍റെ വിശദീകരണം അപഹാസ്യമായി. മുഖ്യ തെരഞ്ഞെടുപ്പു കമ്മിഷണറെ പ്രതിക്കൂട്ടിലാക്കിയിട്ടും മറുപടിക്കോ കൃത്യവും വ്യക്തവുമായ വിശദീകരണത്തിനോ അദ്ദേഹം തയാറായില്ല. എതിര്‍പ്പറിയിച്ച രണ്ടു കമ്മിഷണര്‍മാരുടെയും തെരഞ്ഞെടുപ്പു സംവിധാനങ്ങളുടെയും പ്രാധാന്യം കണക്കിലെടുക്കുമ്പോള്‍, ഓരോ കാര്യത്തിലും വിശദമായ മറുപടി അത്യന്താപേക്ഷിതമാണ്. ബംഗാള്‍, ബിഹാര്‍, ഗോവ, മഹാരാഷ്‌ട്ര, ഹരിയാന അടക്കമുള്ള സംസ്ഥാനങ്ങളിലെ വോട്ടുനീക്കല്‍ ജനവിധിയെ അട്ടിമറിക്കുന്നതായിരുന്നു. ബംഗാള്‍, ഡല്‍ഹി, മഹാരാഷ്‌ട്ര തുടങ്ങിയ സംസ്ഥാനങ്ങള്‍ ഭരിച്ചിരുന്നവരുടെ അധികാരം മാത്രമല്ല, ആ പാര്‍ട്ടികളെപോലും തകര്‍ത്തതു നിസാരമല്ല.
2025 ജൂണില്‍ ബിഹാറില്‍ ആരംഭിച്ച, സ്‌പെഷ്യല്‍ ഇന്‍റന്‍സീവ് റിവിഷനിലൂടെ 30 സംസ്ഥാനങ്ങളിലും കേന്ദ്രഭരണ പ്രദേശങ്ങളിലുമായി കരടു വോട്ടര്‍പട്ടികയില്‍നിന്ന് 13 കോടിയിലധികം പേരുകളാണു നീക്കിയത്. ഈ കാലയളവില്‍ തങ്ങളുടെ അറിവില്ലാതെ എടുത്ത തീരുമാനങ്ങള്‍ക്കും പുറപ്പെടുവിച്ച ഉത്തരവുകള്‍ക്കുമെതിരേ ഒറ്റ ദിവസം നാലു തവണ ഉള്‍പ്പെടെ 14 തവണയാണു രണ്ടു കമ്മിഷണര്‍മാര്‍ ഔദ്യോഗികമായി വിയോജിച്ചത്. പ്രതിപക്ഷ നേതാവ് രാഹുല്‍ ഗാന്ധി തുടര്‍ച്ചയായും മമത ബാനര്‍ജി, അരവിന്ദ് കേജരിവാള്‍, എം.കെ. സ്റ്റാലിന്‍, ഉദ്ധവ് താക്കറെ അടക്കമുള്ള മുന്‍ മുഖ്യമന്ത്രിമാര്‍ പലതവണയും ഉന്നയിച്ച ആരോപണങ്ങള്‍ ശരിവയ്ക്കുന്നതാണിത്.
ഭൂരിപക്ഷമല്ല; ഏകാധിപത്യം
തുല്യരായ മൂന്നംഗ കമ്മിഷനില്‍ ഭൂരിപക്ഷത്തിന്‍റെ അഭിപ്രായമാണു നടപ്പാകേണ്ടത്. എന്നാല്‍ തികച്ചും ഏകപക്ഷീയമായാണു മുഖ്യ കമ്മിഷണര്‍ തീരുമാനമെടുത്തത്. തെറ്റും അസാധുവുമാണിത്. വോട്ടര്‍ സോഫ്റ്റ്‌വെയറിന്‍റെ വിശ്വാസ്യതയെക്കുറിച്ചുള്ള ആശങ്കകള്‍ കാബിനറ്റ് സെക്രട്ടറിയെ വരെ കമ്മിഷണര്‍മാര്‍ അറിയിച്ചു. തന്നെ നിയമിച്ച്, സമ്പൂര്‍ണ നിയമസംരക്ഷണം ഉറപ്പാക്കിയ സര്‍ക്കാരിലെ നായകര്‍ പറയുന്നതു നടപ്പാക്കുകയാണു ഗ്യാനേഷ് ചെയ്തതെന്നതില്‍ സംശയമില്ല.
നിയമവിരുദ്ധവും അംഗീകാരമില്ലാത്തതുമായ നീക്കങ്ങള്‍ എന്നാണു തെരഞ്ഞെടുപ്പു കമ്മിഷണര്‍മാരായ സന്ധുവും ജോഷിയും ചൂണ്ടിക്കാട്ടിയത്. അര്‍ഹരായ എല്ലാവരുടെയും വോട്ട് ഉറപ്പാക്കേണ്ടവര്‍, വോട്ടുകൊള്ള നടത്തിയെന്നതു വെറും ആരോപണം മാത്രമാകില്ല. പ്രതിപക്ഷത്തിനു കിട്ടേണ്ട വോട്ടുകള്‍ മോഷ്ടിച്ചുവെന്ന് അവര്‍ ആരോപിക്കുന്നതു വെറുതെയല്ല.
ഇംപീച്ച്‌മെന്‍റല്ലാതെ വഴിയില്ല
തെരഞ്ഞെടുപ്പു കമ്മിഷന്‍റെ പ്രവര്‍ത്തനം സുതാര്യവും സ്വതന്ത്രവും നിഷ്പക്ഷവുമല്ലെന്നത് അടിവരയിടുന്നതാണു പുതിയ വെളിപ്പെടുത്തലുകള്‍. മറയ്ക്കാനും ഒളിക്കാനുമില്ലെങ്കില്‍, ആഭ്യന്തരമായി രേഖപ്പെടുത്തിയ വിയോജിപ്പുകളും അഭിപ്രായക്കുറിപ്പുകളും പരസ്യമാക്കാനെങ്കിലും ഗ്യാനേഷ് കുമാര്‍ തയാറാകട്ടെ. ഭൂരിപക്ഷം രേഖാമൂലം വിയോജിച്ചതിന്‍റെ പശ്ചാത്തലത്തില്‍ സ്വയം രാജിവച്ചു പുറത്തുപോകാനെങ്കിലും തയാറാകണം. ധാര്‍മികത പ്രതീക്ഷിക്കുന്നില്ലാത്തതിനാല്‍, മുഖ്യ കമ്മിഷണറെ പാര്‍ലമെന്‍റില്‍ ഇംപീച്ച് ചെയ്തു പുറത്താക്കണം. നീതി നടപ്പാക്കാന്‍ സുപ്രീംകോടതി ഇനിയും അമാന്തിക്കരുത്.
Leader Page
പരസ്പര ബഹുമാനത്തിലും സാഹോദര്യത്തിലും അധിഷ്ഠിതമായ ഈ സംവാദ സംസ്കാരം സഭയുടെ മിഷനറി ദൗത്യത്തിന് എതിരല്ല; മറിച്ച്, അതിന്‍റെ അവിഭാജ്യ ഘടകമാണ്. സ്വന്തം വിശ്വാസപാരമ്പര്യത്തിൽ പൂർണമായി വേരൂന്നിക്കൊണ്ടുതന്നെ, മറ്റ് പാരമ്പര്യങ്ങളിലുള്ള നന്മയെയും ആദരിക്കാനും സ്നേഹിക്കാനും ഈ പ്രബോധനങ്ങൾ വിശ്വാസികളെ പ്രചോദിപ്പിക്കുന്നതോടൊപ്പം, പൊതുസമൂഹത്തിനും കൃത്യമായ സന്ദേശവും നൽകുന്നു. സമാധാനപരമായ സഹവർത്തിത്വത്തിനും മനുഷ്യരാശിയുടെ പൊതുനന്മയ്ക്കുംവേണ്ടി എല്ലാ മനുഷ്യരും കൈകോർത്തു പ്രവർത്തിക്കേണ്ടതിന്‍റെ ആവശ്യകതയാണ് സഭയുടെ പ്രബോധന രേഖകൾ ഏവരെയും ഓർമിപ്പിക്കുന്നത്. മതാന്തര സംവാദമെന്നാൽ, സ്വന്തം വിശ്വാസം ഉപേക്ഷിക്കലോ മറ്റെല്ലാ വിശ്വാസങ്ങളെയും ഒന്നാക്കി ഒരു പുതിയ മതം സൃഷ്ടിക്കലോ അല്ല എന്ന് ‘പ്രത്യാശയുടെ യാത്ര’ ഊന്നിപ്പറയുന്നുണ്ട്.
എന്നാൽ, ഈ തുറവിയും സാഹോദര്യ മനോഭാവവും ലോകത്തിന്‍റെ എല്ലാ കോണുകളിലും തുല്യമായി പ്രതിഫലിക്കുന്നുണ്ടോ എന്നത് പ്രസക്തമായ ഒരു ചോദ്യമാണ്. ക്രൈസ്തവ ഭൂരിപക്ഷമുള്ള രാജ്യങ്ങളിൽ മറ്റ് മതസ്ഥർക്ക് പൂർണമായ സ്വാതന്ത്ര്യവും ആദരവും നൽകുമ്പോൾതന്നെ, ക്രൈസ്തവർ ന്യൂനപക്ഷമായ രാജ്യങ്ങളിൽ ക്രിസ്തീയ സമൂഹങ്ങളും ഇതേ അവകാശങ്ങളും മതസ്വാതന്ത്ര്യവും അർഹിക്കുന്നുണ്ടെന്ന യാഥാർഥ്യം പുതിയ രേഖ ശക്തമായി ചൂണ്ടിക്കാണിക്കുന്നു. പാശ്ചാത്യരാജ്യങ്ങളിൽ മറ്റുള്ളവർക്കുള്ള മതസ്വാതന്ത്ര്യംപോലെതന്നെ, മറ്റുള്ള രാജ്യങ്ങളിലും ക്രിസ്ത്യാനികൾക്ക് സ്വന്തം വിശ്വാസം ആചരിക്കാനും അതനുസരിച്ച് ജീവിക്കാനുമുള്ള സാഹചര്യം ഒരുക്കപ്പെടേണ്ടതുണ്ട്.
പരസ്പരമുള്ള ഈ നീതിയും ആദരവും ഉറപ്പുവരുത്താതെ യഥാർഥ മാനവിക സൗഹാർദം സാക്ഷാത്കരിക്കപ്പെടുകയില്ലെന്ന് സഭ ഓർമിപ്പിക്കുന്നു. വിദ്വേഷത്തിന്‍റെയും ഭിന്നതകളുടെയും സ്വരങ്ങൾ ലോകത്ത് ശക്തിപ്പെടുന്ന ഇക്കാലത്ത്, മതപരമായ അടിച്ചമർത്തലുകളെയും അക്രമങ്ങളെയും ശക്തമായി അപലപിച്ചുകൊണ്ട്, സ്നേഹത്തിന്‍റെയും ക്ഷമയുടെയും പാതയിലൂടെ സഞ്ചരിക്കാൻ ഈ പുതിയ പ്രബോധനരേഖ ലോകത്തോട് ആഹ്വാനം ചെയ്യുന്നു.
►മതസ്വാതന്ത്ര്യം
രണ്ടാം വത്തിക്കാൻ കൗൺസിലിന്‍റെ മനുഷ്യമാഹാത്മ്യം എന്ന മതസ്വാതന്ത്ര്യ പ്രഖ്യാപനത്തിൽ വ്യക്തമാക്കുന്നതുപോലെ, മനുഷ്യന് അത്യന്താപേക്ഷിതമായ മതസ്വാതന്ത്ര്യം ഭൂരിപക്ഷ വിഭാഗങ്ങളുടെ നിർബന്ധബുദ്ധിയിൽ നിന്നുമുള്ള സ്വാതന്ത്ര്യം അർഹിക്കുന്നു. എന്നാൽ, ആധുനികലോകത്ത് പല രാജ്യങ്ങളിലും ഈ മൗലികാവകാശം ചോദ്യം ചെയ്യപ്പെടുന്ന പ്രവണതകൾ വർധിച്ചുവരുന്നുണ്ട്. ഇന്ത്യയിലെ പുതിയ നിയമനിർമാണങ്ങളെയോ പ്രത്യേക സംഭവങ്ങളെയോ രേഖ നേരിട്ട് പരാമർശിക്കുന്നില്ലെങ്കിലും, വിവിധ സംസ്ഥാനങ്ങളിലെ മതപരിവർത്തനനിരോധന നിയമങ്ങളും അനുബന്ധ പ്രതിസന്ധികളും പരിഗണിക്കുമ്പോൾ, രേഖ മുന്നോട്ടുവയ്ക്കുന്ന മതസ്വാതന്ത്ര്യത്തിന്‍റെ തത്വങ്ങൾക്ക് പ്രത്യേക പ്രസക്തിയുണ്ട്. ഭരണഘടനാപരമായ അവകാശങ്ങൾ ലംഘിക്കപ്പെടുന്നതും വിശ്വാസം ആചരിക്കുന്നതിന്‍റെ പേരിൽ അടിച്ചമർത്തലുകൾ നേരിടേണ്ടിവരുന്നതും യഥാർഥ മാനവിക സൗഹാർദത്തിന് ഏൽക്കുന്ന ആഘാതങ്ങളാണെന്ന് സഭ ഓർമിപ്പിക്കുന്നു.
ലോകത്തിന്‍റെ പല ഭാഗങ്ങളിലും വിവിധ സമൂഹങ്ങൾ നേരിടുന്ന ഇത്തരം പ്രതിസന്ധികളെയും പീഡനങ്ങളെയും അങ്ങേയറ്റം സംയമനത്തോടും എന്നാൽ വ്യക്തമായ നിലപാടുകളോടുംകൂടിയാണ് ഈ പ്രബോധനക്കുറിപ്പ് സമീപിക്കുന്നത്. തീവ്രവാദ ഗ്രൂപ്പുകളുടെയും സങ്കുചിത ചിന്താഗതിക്കാരുടെയും ഭാഗത്തുനിന്ന് ഉണ്ടാകുന്ന ഇത്തരം പീഡനങ്ങൾ മനുഷ്യന്‍റെ അന്തസിനെ നേരിട്ട് ലംഘിക്കുന്നതാണെന്ന് രേഖ ചൂണ്ടിക്കാണിക്കുന്നു. ഇതോടൊപ്പം, മതസ്വാതന്ത്ര്യത്തിന്‍റെ സംരക്ഷണം ഒരു മതസമൂഹത്തിന്‍റെ മാത്രം അവകാശസംരക്ഷണമായി ചുരുക്കരുതെന്നും രേഖ വ്യക്തമാക്കുന്നു. ഏതെങ്കിലുമൊരു മതവിഭാഗത്തിനെതിരായ വിദ്വേഷവും വിവേചനവും മനുഷ്യാന്തസിനെതിരാണ്. മതവിദ്വേഷ പ്രവണതകളെയും ഏതെങ്കിലും മതത്തിന്‍റെ പേരിൽ നടക്കുന്ന അക്രമത്തെയും ഒരുപോലെ നിരാകരിക്കേണ്ടതുണ്ട്. എന്നാൽ, ഒരു മതത്തിലെ ചില തീവ്രവാദ പ്രവണതകളെ വിമർശിക്കുന്നത് ആ മതത്തിലെ മുഴുവൻ വിശ്വാസികളെയും സംശയത്തിന്‍റെ നിഴലിൽ നിർത്തുന്നതിനുള്ള ന്യായീകരണമാകരുത്. അതുപോലെ, മതസ്വാതന്ത്ര്യത്തിന്‍റെ പേരിൽ അക്രമത്തെയോ വിദ്വേഷത്തെയോ ന്യായീകരിക്കാനും കഴിയില്ല. വ്യക്തിയുടെ അന്തസിനെയും മതസ്വാതന്ത്ര്യത്തെയും ഒരുപോലെ സംരക്ഷിക്കുന്നതാണ് സഭ മുന്നോട്ടുവയ്ക്കുന്ന സമീപനം.
ബലപ്രയോഗങ്ങളോ അടിച്ചേൽപിക്കലുകളോ ഇല്ലാതെയുള്ള സമാധാനപരമായ സഹവർത്തിത്വമാണ് കത്തോലിക്കാസഭ എക്കാലവും ആഗ്രഹിക്കുന്നത്. എല്ലാ മതവിശ്വാസികൾക്കും ഒരുപോലെ ബാധകമായ മതസ്വാതന്ത്ര്യത്തിന്‍റെ തത്വമാണ് രേഖ ഉയർത്തിപ്പിടിക്കുന്നത്. അതിനാൽതന്നെ, ഇന്ത്യയിലെയും മറ്റു രാജ്യങ്ങളിലെയും മതപീഡനങ്ങളെ പരോക്ഷമായി ചോദ്യം ചെയ്തുകൊണ്ട്, എല്ലാ മനുഷ്യരുടെയും മതസ്വാതന്ത്ര്യം സംരക്ഷിക്കപ്പെടേണ്ടത് ഒരു സാമൂഹിക ബാധ്യതയാണെന്ന് സഭ ഇവിടെ ഓർമിപ്പിക്കുന്നു. വിദ്വേഷത്തിന്‍റെയും അടിച്ചമർത്തലുകളുടെയും രാഷ്‌ട്രീയത്തിന് മറുപടിയായി, സ്നേഹത്തിന്‍റെയും സംഭാഷണത്തിന്‍റെയും സഹവർത്തിത്വത്തിന്‍റെയും പാതയിലൂടെ മാത്രമേ നീതിയുക്തമായ ഒരു ലോകം കെട്ടിപ്പടുക്കാൻ സാധിക്കൂ എന്ന ശക്തമായ സന്ദേശമാണ് ഇത് നൽകുന്നത്.
►പാവപ്പെട്ടവരിലേക്കുള്ള കടന്നുചെല്ലൽ
മതാന്തര സംവാദത്തിന്‍റെ വിജയത്തെ മതനേതാക്കളുടെ കൂടിക്കാഴ്ചകളുടെ എണ്ണത്തിലൂടെയോ സംയുക്ത പ്രസ്താവനകളുടെ വലുപ്പത്തിലൂടെയോ മാത്രം അളക്കാനാവില്ലെന്ന ഒരു പ്രധാന നിരീക്ഷണവും ‘പ്രത്യാശയുടെ യാത്ര’ മുന്നോട്ടുവയ്ക്കുന്നു. സമൂഹത്തിലെ ഏറ്റവും ദുർബലരും മുറിവേറ്റവരുമായ മനുഷ്യരോടുള്ള സമീപനമാണ് മതവിശ്വാസത്തിന്‍റെ യഥാർഥ ഫലപ്രാപ്തിയുടെ അളവുകോൽ. തളർന്നുകിടക്കുന്ന മനുഷ്യനെ നാം സ്വീകരിക്കുന്നുവോ, അതോ അവഗണിക്കുന്നുവോ എന്ന ചോദ്യമാണ് മതത്തിന്‍റെ സാമൂഹികസാക്ഷ്യത്തെ പരിശോധിക്കുന്ന അടിസ്ഥാന മാനദണ്ഡമാകേണ്ടത്. അതുകൊണ്ടുതന്നെ ദരിദ്രരും പാർശ്വവത്കരിക്കപ്പെട്ടവരും പീഡിതരും മതാന്തര സംവാദത്തിന്‍റെ മുഖ്യധാരയിലേക്കു കടന്നുവരേണ്ടതുണ്ട്. വ്യത്യസ്ത മതവിശ്വാസികൾ ഒരുമിച്ച് മനുഷ്യന്‍റെ അടിസ്ഥാന പ്രതിസന്ധികൾക്ക് പരിഹാരം കണ്ടെത്തുമ്പോഴാണ് സംവാദം യഥാർഥ സാഹോദര്യമായി മാറുന്നത്.
Leader Page
പാരിസ്-വിശ്വാസത്തിന്‍റെ മഹാസംഗമങ്ങൾ
പാരിസിലെ പ്രസിദ്ധവും പൗരാണികവുമായ നോത്ര്‌ദാം കത്തീഡ്രൽ സന്ദർശനം പാപ്പായുടെ ഫ്രാൻസ് യാത്രയുടെ ഹൃദയസ്പർശിയായ ഏടുകളിലൊന്നാവും. 2019ലെ തീപിടിത്തത്തിൽ ഭാഗികമായി തകർന്ന കത്തീഡ്രൽ വിസ്മയകരമായ പുനരുദ്ധാരണത്തിനുശേഷം വീണ്ടും വിശ്വാസികൾക്കും സന്ദർശകർക്കുമായി തുറന്നുകൊടുത്തിരുന്നു. നൂറ്റാണ്ടുകളായി ഫ്രാൻസിന്‍റെ ദേശീയ ചരിത്രത്തിലെ എണ്ണമറ്റ മുഹൂർത്തങ്ങൾക്ക് സാക്ഷ്യംവഹിച്ച ഈ കത്തീഡ്രലിൽ പരിശുദ്ധ പിതാവെത്തി പ്രാർഥനയ്ക്ക് നേതൃത്വം നൽകുന്നത് നീണ്ട ചരിത്രപരമ്പരയിലേക്കുള്ള പുതിയ കൂട്ടിച്ചേർക്കലാണ്.
ഇന്നു രാത്രി പാരിസിലെ സ്റ്റാഡ് ദ് ഫ്രാൻസ് ഫുട്ബോൾ സ്റ്റേഡിയം പാപ്പായോടൊപ്പമുള്ള വലിയ യുവജന-പ്രാർഥനാ സമ്മേളനത്തിന് വേദിയാകും. 17 മുതൽ 35 വരെ പ്രായമുള്ള യുവാക്കൾക്കായുള്ള ഈ മഹാസംഗമത്തിന്‍റെ 80,000 സീറ്റുകളും വിതരണത്തിനെത്തി ആദ്യമണിക്കൂറിൽതന്നെ തീർന്നുവെന്നത് അതിശയകരമാണ്. കായിക, സംഗീത പ്രതിഭകളുടെ പരിപാടികൾക്ക് സമാനമായ ഈ ആവേശം ഫ്രഞ്ച് യുവാക്കൾക്കിടയിൽ പരിശുദ്ധപിതാവിനോടുള്ള താൽപര്യത്തിന്‍റെ ആഴം വ്യക്തമാക്കുന്നു.
നാളെ രാവിലെ പാപ്പാ ആദ്യമെത്തുന്നത് മേസോൺ ബഖിത (Maison Bakhita) എന്ന കെയർ സെന്‍ററിലാണ്. സുഡാനിൽ അടിമയായി ജനിച്ച് പിന്നീട് ഇറ്റലിയിൽ സന്യാസിനിയായി മാറി, 2000ൽ കത്തോലിക്ക സഭയിൽ വിശുദ്ധയായി പ്രഖ്യാപിക്കപ്പെട്ട വിശുദ്ധ ജോസഫിൻ ബഖിതയുടെ നാമധേയത്തിലുള്ള ഈ സ്ഥാപനം പാരിസിലെ അഭയാർഥികളുടെയും കുടിയേറ്റക്കാരുടെയും ആശാകേന്ദ്രമാണ്.
പിന്നീട് പാപ്പായെത്തുന്നത് പുരാതന പാരിസ് സർവകലാശാലയുടെ ധൈഷണിക പൈതൃകത്തിന്‍റെ തുടർച്ചയായ ‘കാത്തലിക് ഇൻസ്റ്റിറ്റ്യൂട്ട് ഓഫ് പാരിസി’ലേക്കാണ്. ആധുനിക ഫ്രഞ്ച് കത്തോലിക്കാ ദൈവശാസ്ത്രത്തിന്‍റെ ഹൃദയഭൂമിയാണിത്. ഇവിടെവച്ച് പാപ്പാ ലെയോ പതിനാലാമൻ, പുതുതായി വിശ്വാസം സ്വീകരിച്ചവരുടെയും ജ്ഞാനസ്നാനാർഥികളുടെയും പ്രതിനിധികളുമായി നടത്തുന്ന കൂടിക്കാഴ്ച ക്രിസ്തുവിനെ അന്വേഷിക്കുന്നവരെ കേൾക്കാനും സ്വീകരിക്കാനും സഭ പ്രതിജ്ഞാബദ്ധമാണെന്നതിന്‍റെ പ്രഖ്യാപനമാണ്. കഴിഞ്ഞവർഷം ഫ്രാൻസിൽ വിവിധ രൂപതകളിലായി 21,000ത്തിലധികം മുതിർന്നവർ ക്രൈസ്തവവിശ്വാസം സ്വീകരിച്ചുവെന്ന ആത്മീയ സന്തോഷത്തിന്‍റെ പശ്ചാത്തലത്തിലാണ് ഈ കൂടിക്കാഴ്ച.
‘കാത്തലിക് ഇൻസ്റ്റിറ്റ്യൂട്ട്’ സമുച്ചയത്തിലുള്ള കാർമൽ സെമിനാരി ദേവാലയവും മാർപാപ്പ സന്ദർശിക്കുന്നുണ്ട്. 1792ൽ ഫ്രഞ്ച് വിപ്ലവകാലത്ത് നിരവധി വൈദികരും സന്യസ്തരും രക്തസാക്ഷികളാക്കപ്പെട്ട സ്ഥലമാണിത്. അവരുടെ തിരുശേഷിപ്പുകൾ ഈ ദേവാലയത്തിന്‍റെ ഭൂഗർഭഅറയിലുണ്ട്.
കോൺകോർദ് ചത്വരത്തിൽ വിശ്വാസ മഹാസംഗമം
പാരിസിന്‍റെ ഹൃദയമായ ‘പ്ലാസ് ദ ലാ കോൺകോർദിൽ’ തന്‍റെ അപ്പസ്തോലിക സന്ദർശനത്തിന്‍റെ ഏറ്റവും പ്രധാനപ്പെട്ട ആത്മീയനിമിഷമായി മാർപാപ്പ വിശുദ്ധ കുർബാനയർപ്പിക്കും. ഈ ചത്വരത്തോടു ചേർന്നുള്ള കമനീയ രാജവീഥിയായ ‘ഷാംസ് എലീസെ’യിലും വലിയ ജനസാന്നിദ്ധ്യം പ്രതീക്ഷിക്കുന്നുണ്ട്. ആറു ലക്ഷത്തിൽപരം വിശ്വാസികൾ പാപ്പായുടെ ദിവ്യബലിയിൽ പങ്കെടുക്കുവാൻ പേരു നൽകിയിരിക്കുന്നുവെന്നത് പരിശുദ്ധപിതാവിനെ സ്വീകരിക്കാൻ ഫ്രാൻസ് അത്യധികം ഉത്സാഹത്തോടെ കാത്തിരിക്കുന്നുവെന്നതിന്‍റെ സൂചനയാണ്. 26നു വൈകുന്നേരം മരിയൻതീർഥാടന കേന്ദ്രമായ ലൂർദിൽ എത്തുന്ന പാപ്പാ അന്നുതന്നെ അവിടത്തെ പ്രസിദ്ധമായ ‘മസബിയേൽ ഗ്രോട്ടോ’യിൽ പ്രാർഥനാശുശ്രൂഷയിൽ പങ്കെടുക്കും. 27നു ലൂർദ് സങ്കേതത്തിലെ വിശാലമായ പുൽത്തകിടിയിൽ പാപ്പാ ദിവ്യബലി അർപ്പിക്കും. ഒന്നരലക്ഷത്തോളം പേർ ഈ ബലിയിൽ നേരിട്ട് പങ്കാളികളാകും. ലൂർദ് തീർഥാടനത്തിന്‍റെ മുഖമുദ്രയായ സായാഹ്ന ജപമാല പ്രദക്ഷിണത്തിലും പങ്കുചേർന്നാണ് പരിശുദ്ധ പിതാവ് തന്‍റെ തീർഥാടനം അവസാനിപ്പിക്കുന്നത്.
അതിർത്തിനഗരമായ മെറ്റ്സിൽ
ഫ്രാൻസ് സന്ദർശനത്തിന്‍റെ അവസാന ദിവസമായ 28ന് ലെയോ പതിനാലാമൻ പാപ്പാ ജർമൻ അതിർത്തിക്കടുത്തുള്ള മെറ്റ്സ് നഗരത്തിലെത്തും. പാപ്പായുടെ ഇവിടത്തെ സന്ദർശനത്തിന്‍റെ പ്രധാനവേദി റോബർട്ട് ഷൂമാൻ കോൺഗ്രസ് സെന്‍ററാണ്. ഇവിടെ നടക്കുന്ന മതാന്തര കൂടിക്കാഴ്ച മാർപാപ്പയുടെ സന്ദർശനത്തിന്‍റെ പ്രധാന ഇനമാണ്. കൂടാതെ, ‘സമാധാനത്തിനും ഐക്യത്തിനുമായി യൂറോപ്യൻ വേരുകളിലേക്ക്’ എന്ന പ്രമേയത്തിലൂന്നി പരിശുദ്ധ പിതാവ് സംസാരിക്കുകയും ചെയ്യും. യൂറോപ്യൻ ഐക്യത്തിന്‍റെ രൂപീകരണത്തിൽ നിർണായക പങ്കുവഹിച്ച ഫ്രഞ്ച് രാഷ്‌ട്രതന്ത്രജ്ഞനും കത്തോലിക്കനുമായ റോബർട്ട് ഷൂമാന്‍റെ പേരിലുള്ള സമ്മേളനവേദിതന്നെ പ്രതീകാത്മകമാണ്.
മെറ്റ്സും സമീപപ്രദേശങ്ങളും ഫ്രാൻസ്-ജർമൻ സംഘർഷങ്ങളുടെയും അതിർത്തിത്തർക്കങ്ങളുടെയും ഇടമായിരുന്നെങ്കിൽ, ഇന്ന് യൂറോപ്യൻ ഐക്യത്തിന്‍റെയും സമാധാനത്തിന്‍റെയും സന്ദേശം ഉയർത്തുന്ന നഗരമായി മാറിയിരിക്കുന്നു. ആ ചരിത്രമാണ് ഈ നഗരത്തെ മാർപാപ്പയുടെ യാത്രയുടെ സമാപനവേദിയാക്കുന്നത്. യൂറോപ്പ് അതിന്‍റെ ക്രൈസ്തവവും മാനവികവുമായ വേരുകളെ ഓർത്തുകൊണ്ട് ഒരുമയോടെ ഭാവിയിലേക്കു മുന്നേറണമെന്ന ആഹ്വാനം പാപ്പായുടെ മെറ്റ്സ് സന്ദർശനത്തിൽ അന്തർലീനമാണ്. മെറ്റ്സിന്‍റെ നഗരവീഥികളിലൂടെ പാപ്പാമൊബീലിൽ സഞ്ചരിച്ചശേഷം നഗരത്തിന്‍റെ ആത്മീയഹൃദയമായ സെന്‍റ് സ്റ്റീഫൻ കത്തീഡ്രലിൽ അർപ്പിക്കുന്ന വിശുദ്ധബലി ഫ്രാൻസ് സന്ദർശനത്തിന്‍റെ ആത്മീയ പര്യവസാനമായിത്തീരും.
18 വർഷത്തെ ഇടവേളയ്ക്കുശേഷം ഒരു മാർപാപ്പ ഔദ്യോഗിക അപ്പസ്തോലിക് സന്ദർശനത്തിനായി ഫ്രാൻസിലെത്തുമ്പോൾ അത് ആ രാജ്യത്തെമാത്രം ബാധിക്കുന്ന കാര്യമല്ലെന്ന് വ്യക്തമാണ്. മതനിരപേക്ഷതയ്ക്കു കേൾവികേട്ട ഒരു നാട്ടിൽ പരിശുദ്ധ പിതാവിനെ കാണാനും ശ്രദ്ധിക്കാനും ദശലക്ഷക്കണക്കിന് വിശ്വാസികൾ കാണിക്കുന്ന ആവേശം, മാനവികതയെ സംബന്ധിച്ച തുറന്ന സംഭാഷണങ്ങൾ, യൂറോപ്പിനുള്ള ഐക്യത്തിന്‍റെ ആഹ്വാനം ഇവയെല്ലാം ചേർന്ന് ഈ സന്ദർശനത്തെ ഫ്രാൻസിന്‍റെ അതിരുകൾക്കപ്പുറം പ്രസക്തമാക്കുന്നു.
Leader Page
പശ്ചിമഘട്ടത്തിലെ ഇക്കോ സെൻസിറ്റീവ് ഏരിയ (ഇഎസ്എ) നിശ്ചയിക്കുന്നതിനു നിയമിക്കപ്പെട്ട പ്രഫ. മാധവ് ഗാഡ്ഗിൽ അധ്യക്ഷനായ വിദഗ്ധ സമിതിയുടെയും തുടർന്ന് ഡോ. കെ. കസ്തൂരിരംഗന്‍റെ നേതൃത്വത്തിൽ രൂപവത്കരിച്ച ഹൈ ലെവൽ വർക്കിംഗ് ഗ്രൂപ്പിന്‍റെയും റിപ്പോർട്ടുകളിലെ അപാകതകൾ ചൂണ്ടിക്കാണിക്കപ്പെട്ടതിനെത്തുടർന്നാണ് 2013ൽ കേരളം സംസ്ഥാന ജൈവജവവിധ്യ ബോർഡിന്‍റെ ചെയർമാൻ ഡോ. ഉമ്മൻ വി. ഉമ്മൻ കൺവീനറായി മൂന്നംഗ കമ്മിറ്റിയെ നിയമിച്ചത്. ഈ കമ്മിറ്റി ഫീൽഡ് തല പരിശോധന നടത്തി തയാറാക്കിയ റിപ്പോർട്ടിൽ കസ്തൂരിരംഗൻ റിപ്പോർട്ടിലെ 123 ഇഎസ്എ വില്ലേജുകൾ അതുപോലെ നിലനിർത്തി. ഈ വില്ലേജുകളുടെ കഡസ്ട്രൽ മാപ്പുകളിൽ വനം, ജനവാസമേഖലകൾ എന്നിവ അടയാളപ്പെടുത്തി എല്ലാ വില്ലേജ് മാപ്പുകളും കൂടി യോജിപ്പിച്ച് ഇഎസ്എ മാപ്പ് തയറാക്കി.
കസ്തൂരിരംഗൻ റിപ്പോർട്ടിലെ ഏരിയയിൽനിന്ന് കേരളം സ്റ്റേറ്റ് റിമോട്ട് സെൻസിംഗ് ആൻഡ് എൻവയൺമെന്‍റൽ സെന്‍ററിന്‍റെ പക്കലുണ്ടായിരുന്ന സാറ്റലൈറ്റ് മാപ്പുകൾ ഉപയോഗിച്ചു ജനവാസ മേഖലകൾ, കൃഷിയിടങ്ങൾ, പ്ലാന്‍റേഷനുകൾ എന്നിവ ഉൾപ്പെടുന്ന 3114.3 ചതുരശ്ര കിലോമീറ്റർ ഒഴിവാക്കി 9993.7 ചതുരശ്ര കിലോമീറ്റർ ഇഎസ്എ ആയി കണക്കാക്കി. ഈ ഏരിയയിൽ വനം എന്ന് വനം വകുപ്പിന്‍റെ രേഖകളിൽ ഉൾപ്പെട്ടിരുന്ന 9107 ചതുരശ്ര കിലോമീറ്റർ നാച്ചുറൽ ലാൻഡ്സ്കേപ്പ് ആയും ബാക്കി വരുന്ന 886.7 ചതുരശ്ര കിലോമീറ്റർ കൾച്ചറൽ ലാൻഡ്സ്കേപ്പ് ആയും കണക്കാക്കി. ഈ റിപ്പോർട്ട് കേന്ദ്ര മന്ത്രാലയത്തിനു സമർപ്പിച്ചു. ഈ റിപ്പോർട്ടിന്‍റെ അടിസ്ഥാനത്തിൽ കേന്ദ്ര മന്ത്രാലയം 2014 മാർച്ച് 10ന് ഇഎസ്എയുടെ ആദ്യത്തെ കരട് വിജ്ഞാപനം പ്രസിദ്ധപ്പെടുത്തി.
ഇഎസ്എയുടെ അതിർത്തി തിരിച്ചറിയുന്നതിനുള്ള വില്ലേജ് തല വിവരങ്ങൾ സംസ്ഥാന ജൈവ വൈവിധ്യ ബോർഡിന്‍റെ വെബ്സൈറ്റിൽ പ്രദർശിപ്പിച്ചിട്ടുണ്ടെന്നാണ് കരട് വിജ്ഞാപനത്തിൽ വ്യക്തമാക്കിയിരുന്നത്. എന്നാൽ, അതിർത്തി തിരിച്ചറിയുന്നതിനു സഹായകരമായി, ശാസ്ത്രീയമായി തയാറാക്കിയ ഭൂപടം പ്രസിദ്ധീകരിച്ചിട്ടില്ല. തുടർന്ന് ഇഎസ്എയുടെ ഡിജിറ്റൽ മാപ്പ് മന്ത്രാലയം ആവശ്യപ്പെട്ടു. എന്നാൽ ഉമ്മൻ കമ്മിറ്റിയുടെ റിപ്പോർട്ടിന്‍റെ ഭാഗമായ മാപ്പ് കഡസ്ട്രൽ മാപ്പ് ഉപയോഗിച്ചു തയാറാക്കിയതായതിനാൽ ഇതിൽനിന്ന് ഡിജിറ്റൽ മാപ്പ് തയാറാക്കുക സാങ്കേതികമായി സാധ്യമായിരുന്നില്ല. വില്ലേജുകളുടെ വിഭജനം മൂലം 123 വില്ലേജുകൾ ഇപ്പോൾ 131 വില്ലേജുകളായിട്ടുണ്ട്.
കേരളത്തിന്‍റെ കൂടിയ ജനസാന്ദ്രത, ആളോഹരി ഭൂമിയുടെ ലഭ്യതക്കുറവ് എന്നിവ പരിഗണിച്ച് ഇഎസ്എ കാര്യത്തിൽ കേരളത്തിനു പ്രത്യേക പരിഗണന ആവശ്യപ്പെട്ടുകൊണ്ട് കേരളം കേന്ദ്ര മന്ത്രാലയവുമായി പലവട്ടം ചർച്ചകൾ നടത്തി. റബർ തോട്ടങ്ങൾ സാറ്റലൈറ്റ് ഭൂപടത്തിൽ വനമെന്നു തെറ്റായി രേഖപ്പെടുത്തിയത് പരിഗണിച്ച് പൂഞ്ഞാർ തെക്കേക്കര, കൂട്ടിക്കൽ, തീക്കോയി, മേലുകാവ് എന്നീ വില്ലേജുകൾ ഇഎസ്എയിൽനിന്ന് ഒഴിവാക്കാൻ സംസ്ഥാന സർക്കാർ തീരുമാനിച്ചു. ഇതോടൊപ്പം വിവിധതലങ്ങളിൽ നടത്തിയ വിശദമായ ചർച്ചകൾക്കും വിശകലനങ്ങൾക്കും ശേഷം ജനവാസ പ്രദേശങ്ങളും തോട്ടങ്ങളും ജലാശയങ്ങളും ഒറ്റപ്പെട്ട വനപ്രദേശങ്ങളും പാറപ്രദേശങ്ങളും ഒഴിവാക്കി സംരക്ഷിത വനപ്രദേശങ്ങളും റിസർവ് വനങ്ങളും അണക്കെട്ടുകളും മാത്രമായി ഇഎസ്എ ശിപാർശ ചെയ്യാൻ സംസ്ഥാന സർക്കാർ തീരുമാനിച്ചു. ആയതിന്‍റെ അടിസ്ഥാനത്തിൽ കേരളം വനം വകുപ്പിൽനിന്നു ലഭ്യമായ ഭൂവിവരങ്ങളും സർവേ ഓഫ് ഇന്ത്യയുടെ ടോപ്പോ ഷീറ്റ്, കഡസ്ട്രൽ മാപ്പുകൾ, സാറ്റലൈറ്റ് മാപ്പുകൾ എന്നിവയും പരിശോധിച്ച് 98 വില്ലേജുകളിലായി ഇഎസ്എ 8656.46 ചതുരശ്ര കിലോമീറ്ററാണെന്ന് കേരളം സ്റ്റേറ്റ് റിമോട്ട് സെൻസിംഗ് ആൻഡ് എൻവയൺമെന്‍റൽ സെന്‍റർ കണ്ടെത്തി.
സാറ്റലൈറ്റ് മാപ്പുകളുടെയും ഇതര സാങ്കേതിക സംവിധാനങ്ങളുടെയും അടിസ്ഥാനത്തിൽ കണ്ടെത്തിയ ഈ ഏരിയയിൽ ചെറിയ മാറ്റങ്ങൾ വന്നേക്കാം എന്നും പരാമർശിച്ചിട്ടുണ്ട്. സംസ്ഥാന മന്ത്രിസഭയുടെ അംഗീകാരത്തോടെ ഈ വിവരങ്ങൾ 2018 ജൂണിൽ കേന്ദ്ര മന്ത്രാലയത്തിനു സമർപ്പിച്ചിട്ടുണ്ട്. 2021 ഒക്‌ടോബർ അഞ്ചിന് കേന്ദ്ര വനം-പരിസ്ഥിതി മന്ത്രാലയം പശ്ചിമഘട്ട സംസ്ഥാനങ്ങളുടെ ഇഎസ്എ കരട് വിജ്ഞാപനത്തിന്‍റെ ആകെ അളവില്‍ മാറ്റം വരുത്താതെ കോർ, നോൺകോർ ഇഎസ്എ എന്ന പുതിയ ആശയം അവതരിപ്പിച്ചു. എന്നാല്‍, സംസ്ഥാനം ഇതിനോട് വിയോജിപ്പ് പ്രകടിപ്പിക്കുകയും കേരളത്തിന്‍റെ ഇഎസ്എ 8656.46 ചതുരശ്ര കിലോമീറ്ററായി പരിഗണിക്കണമെന്ന ആവശ്യത്തിൽ ഉറച്ചുനിൽക്കുകയും ചെയ്തു.
2022 ഏപ്രിലില്‍ കേന്ദ്ര വനം-പരിസ്ഥിതി മന്ത്രാലയം, സംസ്ഥാനങ്ങളുടെ ഇഎസ്എ സംബന്ധിച്ച നിർദേശങ്ങളും ശിപാർശകളും പരിശോധിക്കുന്നതിനായി മന്താലയത്തിലെ മുൻ ഡയറക്ടർ ജനറലായ സഞ്ജയ് കുമാർ അധ്യക്ഷനായി നിയമിച്ച ആറംഗ കമ്മിറ്റി 2022 ജൂലൈ 11ന് സംസ്ഥാന ചീഫ് സെക്രട്ടറിയുമായി നടത്തിയചർച്ചയിൽ സംസ്ഥാനത്തിന്‍റെ ഇഎസ്എ എന്നത് വനപ്രദേശങ്ങളില്‍ മാത്രമായി നിജപ്പെടുത്തണമെന്ന ആവശ്യം വീണ്ടും ഉന്നയിച്ചു. 2014ലെ ആദ്യ കരടു വിജ്ഞാപനത്തിനുശേഷം ഇക്കഴിഞ്ഞ ജൂലൈ 27നു പുറപ്പെടുവിച്ചതുൾപ്പടെ കേന്ദ്ര മന്ത്രാലയം കരടു വിജ്ഞാപനം ഏഴു പ്രാവശ്യം പ്രസിദ്ധപ്പെടുത്തി. ഇപ്പോഴത്തെ വിജ്ഞാപനത്തിന്‍റെ കാലാവധി ഇന്നവസാനിക്കും.
പശ്ചിമഘട്ടം ഉൾപ്പെടുന്ന ആറു സംസ്ഥാനങ്ങളിൽ ഒരിടത്തും ഇഎസ്എ വിഷയം തീർപ്പാക്കി അന്തിമ വിജ്ഞാപനം പുറപ്പെടുവിച്ചിട്ടില്ല. ഓരോ പ്രാവശ്യം കരടു വിജ്ഞാപനം ഇറങ്ങിക്കഴിയുമ്പോഴും കേരളത്തിൽ ഈ വിഷയം ചർച്ചയാകും. ഇവിടെ ശ്രദ്ധേയമായ കാര്യം, കേരളം ഉമ്മൻ കമ്മിറ്റിയുടെ റിപ്പോർട്ടിന്‍റെ അടിസ്ഥാനത്തിൽ സമർപ്പിച്ച റിപ്പോർട്ടിലെ ഏരിയ ആണ് ഇപ്പോൾ ഇറക്കിയ കരടു വിജ്ഞാപനത്തിലും ഉൾപ്പെട്ടിട്ടുള്ളത് എന്നതാണ്. അതായത്, കേരളം പിന്നീട് നൽകിയ റിപ്പോർട്ടുകളൊന്നും, മന്ത്രാലയം പരിഗണിച്ചു എന്ന് സംസ്ഥാനം വിശ്വസിക്കുമ്പോഴും കേന്ദമന്ത്രാലയം അംഗീകരിച്ചിട്ടില്ല. ഇപ്പോഴത്തെ കരടു വിജ്ഞാപനത്തിന്‍റെ കാലാവധി അവസാനിക്കാറാകുമ്പോഴും ഇഎസ്എയിൽ ഉൾപ്പെട്ടിട്ടുള്ള 131 വില്ലേജുകളിലെയും പൊതുജനങ്ങൾ വിവിധതലങ്ങളിലുള്ള ജനപ്രതിനിധികൾ വഴി കൂടുതൽ പ്രദേശങ്ങൾ ഒഴിവാക്കണമെന്ന് ആവശ്യപ്പെട്ടുകൊണ്ടിരിക്കുന്നു.
Leader Page
ക്രൈസ്തവേതര മതങ്ങളോട് സഭയ്ക്കുള്ള ബന്ധത്തെക്കുറിച്ചുള്ള രണ്ടാം വത്തിക്കാൻ കൗൺസിൽ പ്രഖ്യാപന രേഖയായ ‘നോസ്ത്ര എതാത്തേ’ (Nostra Aetate - നമ്മുടെ കാലത്ത്) യുടെ അറുപതാം വാർഷികം പ്രമാണിച്ച്, കത്തോലിക്കാ സഭയുടെ വിശ്വാസ കാര്യാലയവും കൈസ്തവ ഐക്യത്തിനുവേണ്ടിയുള്ള കാര്യാലയവും മതാന്തര സംവാദത്തിനുവേണ്ടിയുള്ള കാര്യാലയവും സംയുക്തമായി സെപ്റ്റംബർ 16ന് പ്രസിദ്ധീകരിച്ച ‘പ്രത്യാശയുടെ യാത്ര’ (A Journey of Hope) എന്ന പ്രബോധന കുറിപ്പ് മുന്നോട്ടുവയ്ക്കുന്നത് കാലിക പ്രസക്തമായ ആശയങ്ങളാണ്
മാനവിക സഹവർത്തിത്വം, മതാന്തര സംവാദം തുടങ്ങിയ വിഷയങ്ങളിൽ സഭ എക്കാലവും പുലർത്തിവന്ന നിലപാടുകൾ അടിവരയിട്ടുറപ്പിക്കുന്ന ഈ സംയുക്ത പ്രബോധന കുറിപ്പ് സംബന്ധിച്ച് തെറ്റിദ്ധാരണാജനകമായ ആശയപ്രചരണങ്ങളും ദുർവ്യാഖ്യാനങ്ങളും ചില കോണുകൾ പ്രചരിപ്പിക്കുന്നുണ്ട്. അത്തരം നിരീക്ഷണങ്ങൾ രേഖയുടെ സമഗ്രമായ ഉള്ളടക്കത്തിന്‍റെ പശ്ചാത്തലത്തിൽ പരിശോധിക്കപ്പെടണം. ക്രൈസ്തവ സമൂഹത്തിനപ്പുറം, മനുഷ്യസമൂഹത്തിന്‍റെ പൊതുനന്മയെ ലക്ഷ്യമിടുന്ന നിരവധി പ്രായോഗിക തത്വങ്ങളാണ് ഈ കുറിപ്പ് മുന്നോട്ടുവയ്ക്കുന്നത്.
മതാത്മക ജീവിതവും മതവിശ്വാസവും സംബന്ധിച്ച് പലവിധ വെല്ലുവിളികളുയരുന്ന ഈ ആധുനിക ലോകത്ത് രണ്ടാം വത്തിക്കാൻ കൗൺസിൽ പ്രബോധനങ്ങളോടു ചേർന്നുനിന്ന് മാനവിക സഹവർത്തിത്വത്തിനു പ്രായോഗികവും വ്യക്തവുമായ മാർഗനിർദേശങ്ങൾ നൽകുകയാണ് കത്തോലിക്കാ സഭയുടെ പുതിയ പ്രബോധന കുറിപ്പായ ‘പ്രത്യാശയുടെ യാത്ര’. ലെയോ പതിനാലാമൻ മാർപാപ്പയുടെ അംഗീകാരത്തോടെ വത്തിക്കാന്‍റെ വിശ്വാസ, ക്രൈസ്തവ ഐക്യ, മതാന്തര സംവാദകാര്യാലയങ്ങളുടെ അധ്യക്ഷന്മാർ സംയുക്തമായി പ്രസിദ്ധീകരിച്ച ഈ പ്രബോധനം കത്തോലിക്കാ സഭയുടെ മാനവിക ഐക്യവും മത സൗഹാർദവും സംബന്ധിച്ച ശക്തമായ നിലപാടുകൾ ഉറക്കെ പ്രഖ്യാപിക്കുന്നു.
രണ്ടാം വത്തിക്കാൻ കൗൺസിൽ മുന്നോട്ടുവച്ച നിർണായകമായ മതസൗഹാർദ ദർശനത്തിനു കഴിഞ്ഞ ആറു പതിറ്റാണ്ടുകൾക്കിടയിൽ സഭയിലും സമൂഹത്തിലും എത്രമാത്രം വെളിച്ചം പകരാൻ കഴിഞ്ഞു എന്ന് ഈ കുറിപ്പ് വ്യക്തമാക്കുന്നുണ്ട്. ജോൺ ഇരുപത്തിമൂന്നാമൻ മുതൽ ലെയോ പതിനാലാമൻ വരെയുള്ള പാപ്പാമാരുടെ പ്രബോധനങ്ങളിലൂടെയും അക്കാലയളവിൽ പ്രസിദ്ധീകൃതമായിട്ടുള്ള മറ്റു പ്രബോധന രേഖകളിലൂടെയും വ്യക്തമാക്കപ്പെട്ടിട്ടുള്ള സഭയുടെ മാനവിക സഹവർത്തിത്വത്തെക്കുറിച്ചുള്ള ദർശനം പുതിയ പ്രബോധന കുറിപ്പിൽ ക്രോഡീകരിക്കപ്പെട്ടിരിക്കുന്നു. ഒപ്പം, വിവിധ പ്രബോധന രേഖകളിലൂടെ പ്രഖ്യാപിക്കപ്പെട്ടിരിക്കുന്ന സഭയുടെ മഹത്തായ മാനവിക ദർശനത്തെ മിഴിവുറ്റ വിധത്തിൽ വ്യക്തമാക്കുകയും വലിയൊരു സന്ദേശമായി ലോകത്തിനു നൽകുകയും ചെയ്തിരിക്കുന്നു.
ഈ തുടർച്ച ഒരു പാപ്പായുടെ വ്യക്തിഗത കാഴ്ചപ്പാടിന്‍റെ മാത്രം ഫലമല്ലെന്നതും ശ്രദ്ധേയമാണ്. ജോൺ ഇരുപത്തിമൂന്നാമൻ മാർപാപ്പ ആരംഭിച്ച സംവാദത്തിന്‍റെ ദർശനം പോൾ ആറാമൻ മാർപാപ്പയുടെ ‘ലോകവുമായി സംവാദം’ എന്ന വിശാലമായ കാഴ്ചപ്പാടിലേക്ക് വികസിപ്പിച്ചു; ജോൺ പോൾ രണ്ടാമൻ പാപ്പാ അസീസിയിലെ പ്രാർഥനാസമ്മേളനങ്ങളിലൂടെയും മതാന്തര സമാധാനശ്രമങ്ങളിലൂടെയും അതിനു പുതിയ മാനം നൽകി. ബെനഡിക്ട് പതിനാറാമൻ പാപ്പാ സത്യവും യുക്തിയും മതാന്തര സംവാദവുമായി ബന്ധിപ്പിച്ചപ്പോൾ, ഫ്രാൻസിസ് പാപ്പാ മനുഷ്യസാഹോദര്യത്തിന്‍റെയും സംസ്കാരങ്ങളുടെ കൂടിക്കാഴ്ചയുടെയും ഭാഷയിൽ അതിനെ മറ്റൊരു തലത്തിലേക്കുയർത്തി. ലെയോ പതിനാലാമൻ പാപ്പാ ഈ പാരമ്പര്യത്തെ സമാധാനം, നീതി, സത്യം എന്നീ അടിസ്ഥാനങ്ങളിലൂടെ മുന്നോട്ടുനയിക്കുന്നു.
ക്രൈസ്തവേതര മതങ്ങളോട് സഭയ്ക്കുള്ള ബന്ധത്തെക്കുറിച്ചുള്ള പ്രഖ്യാപനം
ആധുനിക കാലത്തെ മതാന്തര സംവാദം സംബന്ധിച്ച സഭാ പ്രബോധനങ്ങളുടെ തുടക്കം ‘നോസ്ത്ര എതാത്തെ’ അഥവാ, ‘നമ്മുടെ കാലത്ത്’ എന്ന രണ്ടാം വത്തിക്കാൻ കൗൺസിൽ പ്രഖ്യാപനത്തിൽനിന്നാണ്. ക്രൈസ്തവേതര മതങ്ങളോട് സഭയ്ക്കുള്ള ബന്ധത്തെക്കുറിച്ചുള്ള പ്രഖ്യാപനം എന്ന് അതറിയപ്പെടുന്നു. രണ്ടാം ലോകയുദ്ധത്തിന്‍റെ ദുരന്തങ്ങളും ഹോളോകോസ്റ്റിൽ ഭീകരരൂപം കൈവരിച്ച ജൂതവിരുദ്ധതയുടെ പരിണതഫലങ്ങളും ഈ പ്രഖ്യാപനത്തിന്‍റെ രൂപീകരണത്തിനു നിർണായകമായ ചരിത്രപശ്ചാത്തലമായി. ജൂത വിരുദ്ധത വലിയ ദുരന്തങ്ങളിലേക്കു നയിച്ച ആ കാലഘട്ടത്തിൽ, മതവിശ്വാസങ്ങൾ മതിലുകളായി മാറി, സമൂഹങ്ങൾ (പ്രത്യേകിച്ച് ക്രൈസ്തവ-ജൂത സമൂഹങ്ങൾ) പരസ്പരം അന്യവത്കരിക്കപ്പെടുന്ന സ്ഥിതിവിശേഷം മാറ്റിയെടുക്കാനുള്ള ജോൺ ഇരുപത്തിമൂന്നാമൻ പാപ്പായുടെ ദൃഢനിശ്ചയമാണ് ‘നോസ്ത്ര എതാത്തെ’യുടെ പിറവിക്കു പിന്നിൽ.
എല്ലാ മതങ്ങളെയും തുറവിയോടെ കാണാനും മറ്റു മതപാരമ്പര്യങ്ങളിലുള്ള സത്യവും വിശുദ്ധവുമായ ഘടകങ്ങളെ തിരിച്ചറിയാനും അവയുടെ ജീവിതരീതികളെയും പ്രമാണങ്ങളെയും ബഹുമാനത്തോടെ സമീപിക്കാനും സാമൂഹിക ഐക്യത്തിന്‍റെയും നീതിയുടെയും കരുണയുടെയും ഉദാത്തമായ സമീപനങ്ങളോടെ സാമൂഹിക സഹവർത്തിത്വത്തിനുള്ള വാതിൽ തുറന്നിടാനും ഈ പ്രബോധനം ലോകത്തെ ഉദ്ബോധിപ്പിക്കുന്നു. “ഒരു കേവല പ്രബോധന ഗ്രന്ഥം എന്നതിലുപരി, മറ്റ് മതവിശ്വാസികളുമായുള്ള ബന്ധത്തെക്കുറിച്ച് സഭയ്ക്കുള്ള ഉൾക്കാഴ്ചയിലും അതിന്‍റെ പ്രകടനത്തിലുമുണ്ടായ ആഴമായ മാറ്റത്തെ അത് അടയാളപ്പെടുത്തുന്നു” (പ്രത്യാശയുടെ യാത്ര).
ഇതിൽ പ്രത്യേകമായി ശ്രദ്ധിക്കേണ്ടത് യഹൂദ-ക്രൈസ്തവ ബന്ധത്തിന് ‘നോസ്ത്ര എതാത്തെ’യും പുതിയ ‘പ്രത്യാശയുടെ യാത്ര’യും നൽകുന്ന സ്ഥാനമാണ്. ക്രൈസ്തവ വിശ്വാസത്തിന്‍റെ വേരുകൾ യഹൂദ പാരമ്പര്യത്തിൽ ആഴത്തിൽ പതിഞ്ഞിരിക്കുന്നുവെന്ന തിരിച്ചറിവാണ് ഈ ബന്ധത്തിന്‍റെ അടിസ്ഥാനമെന്ന് രേഖ ഓർമിപ്പിക്കുന്നു. യേശുവും അപ്പസ്തോലന്മാരും ആദിമ ക്രൈസ്തവ സമൂഹവും യഹൂദ പാരമ്പര്യവുമായി അഭേദ്യമായി ബന്ധപ്പെട്ടവരായിരുന്നു എന്ന ചരിത്ര-ദൈവശാസ്ത്ര യാഥാർഥ്യം ക്രൈസ്തവർക്കു സ്വന്തം വിശ്വാസത്തിന്‍റെ വേരുകളെ കൂടുതൽ ആഴത്തിൽ മനസിലാക്കുന്നതിനു സഹായകമാണ്. അതുകൊണ്ടുതന്നെ യഹൂദ-ക്രൈസ്തവ സംവാദം മറ്റു മതങ്ങളുമായുള്ള പൊതുവായ മതാന്തര സംവാദത്തിന്‍റെ ഒരു ഉപവിഭാഗം മാത്രമല്ല; ക്രൈസ്തവ സ്വത്വത്തെതന്നെ കൂടുതൽ ആഴത്തിൽ മനസിലാക്കാനുള്ള ഒരു ആത്മപരിശോധന കൂടിയാണ്.
പ്രത്യാശയുടെ യാത്ര
വിവിധ പ്രത്യയശാസ്ത്രങ്ങൾ തമ്മിലുള്ള ഏറ്റുമുട്ടലുകളും അതിന്‍റെ ഭാഗമായ യുദ്ധങ്ങളും കലാപങ്ങളും വംശനാശങ്ങളും അടിച്ചമർത്തലുകളും തുടർക്കഥയായിരിക്കുന്ന ഈ കാലഘട്ടത്തിൽ മാനവിക സഹവർത്തിത്വത്തിനുള്ള സഭയുടെ ആറു പതിറ്റാണ്ടുകളിലെ തുടർച്ചയായുള്ള ആഹ്വാനങ്ങൾ ‘പ്രത്യാശയുടെ യാത്ര’ ഒരിക്കൽകൂടി സമഗ്രമായി ഓർമപ്പെടുത്തുന്നു. ന്യൂനപക്ഷമെന്നോ ഭൂരിപക്ഷമെന്നോ ഭേദമില്ലാതെ എല്ലാ മതസ്ഥരെയും മതവിശ്വാസങ്ങളെയും തുറന്ന ഹൃദയത്തോടെ സമീപിക്കാനും ഉൾക്കൊള്ളാനുമുള്ള ഈ ആഹ്വാനം കാലികപ്രസക്തമാണ്. ഈ സമീപനം ആഗോള ക്രൈസ്ത സമൂഹത്തിന് അത്യന്താപേക്ഷിതമാണെന്ന് ഈ പ്രബോധന രേഖ അടിവരയിട്ട് ഓർമിപ്പിക്കുന്നത് ഫ്രാൻസിസ് പാപ്പായുടെ വാക്കുകളിലൂടെയാണ്: “ക്രിസ്ത്യാനികൾ ന്യൂനപക്ഷമായി ജീവിക്കുന്ന രാജ്യങ്ങളിൽ അവർക്കും ഇതേ സ്വാതന്ത്ര്യം നൽകണമെന്ന് ആവശ്യപ്പെടാൻ ഈ ബോധ്യം നമ്മെ പ്രേരിപ്പിക്കുന്നു” (സുവിശേഷത്തിന്‍റെ ആനന്ദം).
‘പ്രത്യാശയുടെ യാത്ര’യെ മതസൗഹാർദത്തിനുള്ള ഒരു പൊതുവായ ആഹ്വാനമായി മാത്രം വായിക്കുന്നത് രേഖയുടെ വിശാലമായ ഉള്ളടക്കത്തെ പരിമിതപ്പെടുത്തുന്നതായിരിക്കും. അത് ‘നോസ്ത്ര എതാത്തെ’യ്ക്ക് ശേഷമുള്ള ആറു പതിറ്റാണ്ടുകളുടെ ചരിത്രം വിലയിരുത്തുന്നതിനൊപ്പം, മതാന്തര സംവാദം നേരിടുന്ന തെറ്റിദ്ധാരണകളും പ്രതിരോധങ്ങളും ചൂണ്ടിക്കാണിക്കുകയും ഭാവിയിൽ സംവാദത്തെ എങ്ങനെ കൂടുതൽ ആഴപ്പെടുത്താമെന്നതിന് ദിശാബോധം നൽകുകയും ചെയ്യുന്നു. മതപരമായ സ്വന്തം വ്യക്തിത്വത്തിൽ ഉറച്ചുനിൽക്കുക, മറ്റുള്ളവരെ ബഹുമാനിക്കുക, സത്യത്തെ അന്വേഷിക്കുക, സമാധാനത്തിനും നീതിക്കും വേണ്ടി ഒരുമിച്ച് പ്രവർത്തിക്കുക എന്നിവയെ പരസ്പര വിരുദ്ധങ്ങളല്ലാത്ത, മറിച്ച് പരസ്പരപൂരകങ്ങളായ ഘടകങ്ങളായാണ് പ്രബോധനക്കുറിപ്പ് അവതരിപ്പിക്കുന്നത്.
സങ്കുചിത മനോഭാവങ്ങളിൽനിന്നുള്ള വിമോചനം
ചരിത്രപരമായി നിലനിന്നിരുന്ന ചില സങ്കുചിത മനോഭാവങ്ങളിൽനിന്നും അകൽച്ചകളിൽനിന്നും പൂർണമായി മാറി, മറ്റുമതവിശ്വാസികളോടും സംസ്കാരങ്ങളോടുമുള്ള സഭയുടെ മനോഭാവത്തിൽ ഒരു വിപ്ലവകരമായ മാറ്റമാണ് രണ്ടാം വത്തിക്കാൻ കൗൺസിലിന്‍റെ ‘നോസ്ത്ര എതാത്തെ’ പ്രഖ്യാപനം മുതൽ ഇന്നുവരെയുള്ള പ്രബോധനങ്ങൾ വ്യക്തമാക്കുന്നത്. മറ്റുമതങ്ങളെ എതിരാളികളായോ അപരിചിതരായോ കാണുന്നതിനു പകരം, സത്യം അന്വേഷിക്കുന്ന വഴിയിലെ സഹയാത്രികരായി കണക്കാക്കാനാണ് സഭ പഠിപ്പിക്കുന്നത്.
മതാന്തര സംവാദം മതനേതാക്കൾ തമ്മിലുള്ള ഔപചാരിക കൂടിക്കാഴ്ചകളിൽ മാത്രം ഒതുങ്ങുന്ന ഒന്നല്ലെന്നും ‘പ്രത്യാശയുടെ യാത്ര’ വ്യക്തമാക്കുന്നു. ദൈനംദിന ജീവിതത്തിൽ വ്യത്യസ്ത മതവിശ്വാസികൾ തമ്മിൽ പരസ്പരം ബഹുമാനിച്ച് ജീവിക്കുന്നതും പൊതുനന്മയ്ക്കായി ഒരുമിച്ച് പ്രവർത്തിക്കുന്നതും ദൈവശാസ്ത്രപരമായ വിഷയങ്ങളിൽ ആഴത്തിലുള്ള സംവാദം നടത്തുന്നതും വിവിധ മതപാരമ്പര്യങ്ങളിലെ ആത്മീയ അനുഭവങ്ങൾ പങ്കുവയ്ക്കുന്നതുമെല്ലാം ഈ സംവാദത്തിന്‍റെ ഭാഗമാണ്. അതുകൊണ്ടുതന്നെ മതാന്തര സംവാദം ഏതാനും മതനേതാക്കളുടെ വേദികളിൽ ഒതുക്കേണ്ട ഉദ്യമമല്ല; കുടുംബങ്ങളിലും വിദ്യാഭ്യാസ സ്ഥാപനങ്ങളിലും സമൂഹത്തിലും പൊതുജീവിതത്തിലും പ്രാവർത്തികമാക്കേണ്ട ഒരു ജീവിതസംസ്കാരമാണ്.
(തുടരും)
Leader Page
ഇന്ന് അന്താരാഷ്ട്ര മാരിടൈം ദിനം. ‘From Policy to Practice: Powering Maritime Excellence’ എന്ന പ്രമേയത്തോടെയാണ് ഇത്തവണ ലോകം ഈ ദിനം ആചരിക്കുന്നത്. നയങ്ങളും പദ്ധതികളും സമ്മേളനങ്ങളും മാത്രം പോരാ; അവ ജനങ്ങളുടെ ജീവിതത്തില്‍ മാറ്റമുണ്ടാക്കുന്നതാകണം. അടിസ്ഥാനസൗകര്യങ്ങള്‍ അവസരങ്ങളായും അറിവ് തൊഴിലും സംരംഭങ്ങളുമായി മാറണം.
നൂറ്റാണ്ടുകളായി രാജ്യങ്ങളെയും സംസ്‌കാരങ്ങളെയും ബന്ധിപ്പിച്ച മഹാപാതയാണ് സമുദ്രം. ഇന്നും ലോക വ്യാപാരത്തിന്‍റെയും ആഗോള വിതരണ ശൃംഖലയുടെയും പ്രധാന അടിത്തറ സമുദ്ര ഗതാഗതമാണ്. എന്നാല്‍, ഇന്നത്തെ സമുദ്ര സമ്പദ്‌വ്യവസ്ഥ കപ്പലിലും തുറമുഖത്തും മാത്രം അവസാനിക്കുന്നതല്ല. ലോജിസ്റ്റിക്സ്, മത്സ്യബന്ധനം, തീരദേശ ടൂറിസം, തീരദേശ ചരക്ക് വ്യാപാരം, കപ്പല്‍ നിര്‍മാണം, സമുദ്ര സാങ്കേതികവിദ്യ, മറൈന്‍ ഇന്‍ഷ്വറന്‍സ്, മാരിടൈം നിയമം, ആര്‍ബിട്രേഷന്‍, സമുദ്ര ഗവേഷണം, പുനരുപയോഗ ഊര്‍ജം, വിദ്യാഭ്യാസം, നൈപുണ്യ വികസനം തുടങ്ങി വലിയൊരു ബ്ലൂ ഇക്കോണമിയാണ് ലോകത്തിനു മുന്നില്‍ തുറക്കുന്നത്.
കേരളത്തിന് അനന്തസാധ്യത
സുഗന്ധവ്യഞ്ജനങ്ങളുമായി അറേബ്യയിലേക്കും ആഫ്രിക്കയിലേക്കും യൂറോപ്പിലേക്കും ഏഷ്യയിലേക്കും സഞ്ചരിച്ചത് കടല്‍വഴിയായിരുന്നു. അതേ വഴികളിലൂടെയാണ് ആശയങ്ങളും അറിവും സംസ്‌കാരങ്ങളും കേരളത്തിലേക്കെത്തിയത്. ഇന്ന് മറ്റൊരു ചരിത്രാവസരം നമ്മുടെ മുന്നിലുണ്ട്. വിഴിഞ്ഞം അന്താരാഷ്ട്ര തുറമുഖം, കൊച്ചി, നമ്മുടെ മറ്റ് തുറമുഖങ്ങള്‍, ഉള്‍നാടന്‍ ജലപാതകള്‍, അന്താരാഷ്ട്ര വിമാനത്താവളങ്ങള്‍, റോഡ്-റെയില്‍ ശൃംഖല, വിദ്യാഭ്യാസമുള്ള മനുഷ്യവിഭവശേഷി ഇവയെല്ലാം ഒരൊറ്റ സാമ്പത്തികദര്‍ശനത്തില്‍ ബന്ധിപ്പിക്കാന്‍ കഴിഞ്ഞാല്‍ കേരളത്തിന് പുതിയ വളര്‍ച്ചാപഥം സൃഷ്ടിക്കാനാകും. അതാണ് മിഷന്‍ സമുദ്ര. 2026-27 സംസ്ഥാന ബജറ്റില്‍ 400 കോടി രൂപ വകയിരുത്തി ആരംഭിച്ച മിഷന്‍ സമുദ്ര ഒരു തുറമുഖ വികസനപദ്ധതി മാത്രമല്ല, കടലിന്‍റെ സാധ്യതകളിലൂടെ കേരളത്തിന്‍റെ സമഗ്ര വികസനം സാധ്യമാക്കാനുള്ള ദീര്‍ഘകാല ദര്‍ശനം കൂടിയാണ്.
പുതിയ തുടക്കം
മുന്‍കാലങ്ങളില്‍ കേരളത്തില്‍ മാരിടൈം ദിനാചരണം പ്രഫഷണലുകളുടെയും മേഖലയുമായി ബന്ധപ്പെട്ട സംഘടനകളുടെയും പരിധിയിലായിരുന്നു. ഇനി ആ ചര്‍ച്ചയെ സമൂഹത്തിന്‍റെ മുഖ്യധാരയിലേക്ക് കൊണ്ടുവരണം. ഓരോ അന്താരാഷ്ട്ര മാരിടൈം ദിനവും പുതിയ ആശയങ്ങള്‍ വിലയിരുത്താനും കഴിഞ്ഞ വര്‍ഷത്തെ പ്രവര്‍ത്തനങ്ങള്‍ പരിശോധിക്കാനും അടുത്ത ഘട്ടത്തിലേക്കുള്ള ദിശ നിശ്ചയിക്കാനുമുള്ള പൊതുവേദിയായി വളരണം. ഇത് ഒരു ദിവസത്തെ ആഘോഷമല്ല. കേരളത്തിന്‍റെ പുതിയ സമുദ്ര ചിന്തയുടെ തുടക്കമാണ്.
സാധ്യതകള്‍ ഉപയോഗപ്പെടുത്തണം
കേരളത്തിലെ ഓരോ തുറമുഖത്തിനും ഒരേ ദൗത്യമാകണമെന്നില്ല. എന്നാല്‍ സാമ്പത്തികമായി പ്രയോജനപ്പെടുത്താവുന്ന തുറമുഖങ്ങളും അനുബന്ധ സൗകര്യങ്ങളും പുതിയ പ്രവര്‍ത്തനങ്ങളിലേക്കു കൊണ്ടുവരണം. തീരദേശ ചരക്ക് ഗതാഗതം, ഉള്‍നാടന്‍ ജലഗതാഗതം, യാത്രാസൗകര്യം, ടൂറിസം, ചരക്കുനീക്കം, ലോജിസ്റ്റിക് ഹബ്ബുകള്‍, ഡ്രൈ പോര്‍ട്ടുകള്‍, വെയര്‍ഹൗസുകള്‍, കോള്‍ഡ് ചെയിന്‍ സംവിധാനങ്ങള്‍ എന്നിവയെ ഏകോപിപ്പിക്കണം. കടലോ പ്രധാന ജലപാതയോ ഇല്ലാത്ത ജില്ലകള്‍ക്കും മാരിടൈം വികസനത്തിന്‍റെ നേട്ടം ലഭിക്കണം. റോഡ്, റെയില്‍, ജലപാത, വിമാനത്താവളം, ലോജിസ്റ്റിക്സ് കേന്ദ്രങ്ങള്‍ എന്നിവയെ ബന്ധിപ്പിച്ചാല്‍ ഉള്‍നാടന്‍ ഗ്രാമത്തിലെ സംരംഭകനും ലോകവിപണിയിലേക്ക് എത്താം. തീരകേരളവും ഉള്‍നാടന്‍ കേരളവും രണ്ടല്ല, ഒരൊറ്റ സാമ്പത്തിക കേരളമാണ്.
മത്സ്യത്തൊഴിലാളികള്‍ കാഴ്ചക്കാരല്ല
നമ്മുടെ മത്സ്യത്തൊഴിലാളികളും തീരദേശ സമൂഹവും ഉള്‍പ്പെടുന്നതാണ് ബ്ലൂ ഇക്കോണമി. ആധുനിക മത്സ്യബന്ധന സൗകര്യങ്ങള്‍, കോള്‍ഡ് ചെയിന്‍, മത്സ്യ സംസ്കരണം, മൂല്യവര്‍ധിത ഉത്പന്നങ്ങള്‍, പരിശീലനം, വിദ്യാഭ്യാസം, സംരംഭകത്വം, മറൈന്‍ ടൂറിസം തുടങ്ങിയ മേഖലകളില്‍ പുതിയ അവസരങ്ങള്‍ സൃഷ്‌ടിക്കണം. തലമുറകളായി കടലിനൊപ്പം ജീവിച്ചവരുടെ അനുഭവജ്ഞാനവും പുതിയ സാങ്കേതികവിദ്യയും തമ്മില്‍ കൈകോര്‍ക്കണം. കടലില്‍നിന്ന് സമ്പത്ത് സൃഷ്‌ടിക്കുമ്പോള്‍, കടലിനെ ആശ്രയിച്ച് ജീവിക്കുന്ന കുടുംബങ്ങളിലേക്കാണ് അതിന്‍റെ ആദ്യനേട്ടം എത്തേണ്ടത്.
ലോകവിപണിയിലേക്ക്
മാരിടൈം സമ്പദ്‌വ്യവസ്ഥയുടെ തുടക്കം തുറമുഖ കവാടത്തില്‍ മാത്രമല്ല, അത് ഒരു കൃഷിയിടത്തില്‍നിന്നുതന്നെ ആരംഭിക്കാം. സുഗന്ധവ്യഞ്ജനങ്ങള്‍, നാളികേരം, റബര്‍, കയര്‍, ഭക്ഷ്യോത്പന്നങ്ങള്, മൂല്യവര്‍ധിത ഉത്പന്നങ്ങള്‍ തുടങ്ങിയവ അസംസ്കൃത വസ്തുക്കളായി മാത്രം പുറത്തേക്ക് പോകാതെ സംസ്‌കരിച്ചും പാക്ക് ചെയ്തും മൂല്യവര്‍ധിത ഉത്പന്നങ്ങളായും ലോക വിപണിയിലെത്തണം. അതിന് ഗ്രാമതലത്തില്‍ ചെറുകിട-ഇടത്തരം പരിസ്ഥിതി സൗഹൃദ വ്യവസായങ്ങള്‍ വളരണം. തുറമുഖത്തിന്‍റെ വിജയം കണ്ടെയ്നറുകളുടെ എണ്ണത്തില്‍ മാത്രം അളക്കരുത്. ആ കണ്ടെയ്നറിനുള്ളില്‍ കേരളത്തിലെ ഒരു ഗ്രാമത്തിന്‍റെ ഉത്പന്നമുണ്ടോ എന്നതിലും അതിന്‍റെ വിജയം അളക്കണം.
പുതുതലമുറയ്ക്ക് അവസരങ്ങളുടെ വാതില്‍
നമ്മുടെ യുവതലമുറയ്ക്ക് ജോലിയും സംരംഭങ്ങളും തുടങ്ങാനുള്ള അവസരമൊരുക്കണം. പോര്‍ട്ട് മാനേജ്മെന്റ്, ഷിപ്പിംഗ്, ലോജിസ്റ്റിക്സ്, എക്‌സിം ട്രേഡ്, കസ്റ്റംസ്, മാരിടൈം ലോ, ആര്‍ബിട്രേഷന്‍, മറൈന്‍ ഇന്‍ഷ്വറന്‍സ്, ഓഷ്യന്‍ സയന്‍സ്, എ.ഐ, ഡിജിറ്റല്‍ സപ്ലൈ ചെയിന്‍, മാരിടൈം ജേണലിസം, ടൂറിസം, ഫിഷറീസ് ടെക്‌നോളജി തുടങ്ങിയ മേഖലകളില്‍ വലിയ തൊഴില്‍സാധ്യതകളുണ്ട്. പഠനം തൊഴിലെത്തണം; അറിവ് നവീകരണത്തിലേക്കും നൈപുണ്യം സംരംഭങ്ങളിലേക്കും എത്തണം.
കേരളം മാരിടൈം നോളജ് ഹബ്ബാകും
കേരളത്തിന് തുറമുഖങ്ങള്‍ മാത്രം പോരാ. ലോകോത്തര അറിവിന്‍റെ അടിസ്ഥാന സൗകര്യങ്ങളും വേണം. അതിന്‍റെ ഭാഗമായി അന്താരാഷ്ട്ര നിലവാരത്തിലുള്ള മാരിടൈം ഹെറിറ്റേജ് മ്യൂസിയം, ഓഷ്യനേറിയം, സമുദ്രവിജ്ഞാന-അനുഭവ കേന്ദ്രങ്ങള്‍, അന്താരാഷ്ട്ര കണ്‍വെന്‍ഷന്‍ സൗകര്യങ്ങള്‍, മാരിടൈം വിദ്യാഭ്യാസ-ഗവേഷണ കേന്ദ്രങ്ങള്‍, ആര്‍ബിട്രേഷന്‍-നിയമ സേവന സംവിധാനങ്ങള്‍ തുടങ്ങിയ ആശയങ്ങള്‍ ഗൗരവമായി മുന്നോട്ടു കൊണ്ടുപോകേണ്ടതുണ്ട്. വാണിജ്യതര്‍ക്കങ്ങള്‍ പരിഹരിക്കുന്നതിനും ആര്‍ബിട്രേഷന്‍ നടത്തുന്നതിനും നിയമ-പ്രഫഷണല്‍ സേവനങ്ങള്‍ ലഭ്യമാക്കുന്നതിനും കേരളത്തില്‍ അന്താരാഷ്ട്ര നിലവാരമുള്ള സംവിധാനം വളരേണ്ടതുണ്ട്. അങ്ങനെ കേരളം ചരക്ക് കൈകാര്യം ചെയ്യുന്ന സ്ഥലം മാത്രമല്ല, മാരിടൈം അറിവും സേവനങ്ങളും തീരുമാനങ്ങളും സൃഷ്ടിക്കുന്ന കേന്ദ്രവുമാകണം.
പ്രവാസികളും മിഷന്‍ സമുദ്രയുടെ പങ്കാളികള്‍
കേരളത്തിന്‍റെ ശക്തികളിലൊന്ന് നമ്മുടെ പ്രവാസി സമൂഹമാണ്. ലോകത്തിന്‍റെ വിവിധ ഭാഗങ്ങളില്‍ ഷിപ്പിംഗ്, ലോജിസ്റ്റിക്സ്, തുറമുഖങ്ങള്‍, വ്യാപാരം, ഫിനാന്‍സ്, നിയമം, സാങ്കേതികവിദ്യ, ടൂറിസം തുടങ്ങിയ മേഖലകളില്‍ പ്രവര്‍ത്തിക്കുന്ന മലയാളികളുടെ അറിവും അനുഭവവും നിക്ഷേപശേഷിയും കേരളത്തിന്‍റെ പുതിയ മാരിടൈം യാത്രയുമായി ബന്ധിപ്പിക്കണം. മൂലധനം മാത്രമല്ല, ആഗോള പരിചയം, സാങ്കേതികവിദ്യ, വിപണി ബന്ധങ്ങള്‍, ആശയങ്ങള്‍, സ്ഥാപനപരമായ അറിവ് ഇവയും കേരളത്തിലേക്കു കൊണ്ടുവരണം. ലോകമെമ്പാടുമുള്ള മലയാളികള്‍ക്ക് മിഷന്‍ സമുദ്രയില്‍ പങ്കാളികളാകാനുള്ള വാതില്‍ തുറന്നിരിക്കണം.
Leader Page
ഫ്രഞ്ച് എഴുത്തുകാരനും കലാചിന്തകനുമായ ആന്ദ്രേ ബ്രെട്ടൻ (1896- 1966) എഴുതുന്നു: “അതിശയകരമായത് എപ്പൊഴും സുന്ദരമാണ്. അതിശയകരമായത് എന്തും സുന്ദരമാണ്; അതിശയകരമായത് മാത്രമാണ് സത്യത്തില്‍ സുന്ദരമായിട്ടുള്ളത്.
അതിശയകരമായതിനു മാത്രമേ സര്‍ഗാത്മക മേഖലയില്‍ കൂടുതല്‍ വിളവെടുപ്പ് നടത്താനാകൂ.” ഈ പ്രസ്താവത്തെ ഇങ്ങനെ സമീപിക്കാം. ഒരു നിലവാരപ്പെടലിനുവേണ്ടി ഉണ്ടാക്കിയ യഥാതഥവും ഭാവനാശൂന്യവും പ്രായോഗികവുമായ സമീപനങ്ങള്‍ നമ്മുടെ മനസുകള്‍ക്ക് ആഴം നഷ്‌ടപ്പെടുത്തിയിരിക്കുന്നു. അത് വെറും ഗതാനുഗതികത്വമായി ചുരുങ്ങുന്നു. മനസിന്‍റെ രസമുകുളങ്ങള്‍ നഷ്‌ടപ്പെടാന്‍ അതിടയാക്കിയിരുന്നു.
അദ്ദേഹം കുറേക്കൂടി കറയറ്റതും ആത്മാര്‍ഥവും പ്രചാരണാംശമില്ലാത്തതുമായ കലയ്ക്കുവേണ്ടി വാദിച്ചു. സറിയലിസം (Surrealism)എന്ന പ്രസ്ഥാനംതന്നെ സൃഷ്ടിച്ചു. മനുഷ്യന്‍റെ അബോധമനസിനെ കലാസൃഷ്‌ടിക്കുവേണ്ടി ഉപയോഗപ്പെടുത്തുന്ന സങ്കേതമാണിത്. സ്വപ്നം കാണുമ്പോൾ അബോധമനസാണ് പ്രവർത്തിക്കുന്നത്. അപ്പോൾ സാധാരണ ലോകത്തെ യുക്തിയില്ല. എന്നാൽ സ്വപ്നം കാണുമ്പോൾ യുക്തിയുണ്ട്. മറ്റു വിലക്കുകളില്ലാതെ, സ്വപ്നത്തിലെന്നപോലെ സൃഷ്‌ടി നടത്തണമെന്നാണ് അദ്ദേഹം വാദിച്ചത്. ഇവിടെ കലയിലെ സൗന്ദര്യത്തോടുള്ള ആസക്തി മാത്രമേയുള്ളൂ. അത് അതിശയകരമാണ്. മനുഷ്യന്‍റെ വിഭാഗീയമായ രാഷ്‌ട്രീയമില്ല.
ബ്രെട്ടൻ രണ്ടു തവണ മാനിഫെസ്റ്റോ എഴുതി. ചിന്തകളുടെ നിരുപാധികമായ ഒഴുക്കാണ് അദ്ദേഹത്തിന്‍റെ കല. ഇതിലൂടെ പ്രത്യക്ഷമായ ആഹ്വാനമില്ലാതെതന്നെ, സമൂഹത്തിനു കൂടുതല്‍ അവബോധപരമായ ശുദ്ധി നേടാനും പ്രാര്‍ഥനാപരമായ വെണ്മ നിലനിര്‍ത്താനും കഴിയും. കലയിലെ റിയലിസം അഥവാ യഥാതഥവാദത്തെ വലിയ കാര്യമായി ബ്രെട്ടൻ കാണുന്നില്ല. അമിതമായ യുക്തിക്ക് പകരം ചിന്ത അതേപടി കടന്നുവരണം. അതിനെ സ്വതന്ത്രമായി വിടണം. യഥാതഥമാക്കുന്നവര്‍, കലയില്‍ ബൗദ്ധികവും ധാര്‍മികവുമായ ഏതു മുന്നേറ്റത്തിനും തടയിടുകയാണ് ചെയ്യുന്നതെന്ന് ബ്രെട്ടൻ പറയുന്നു.
“ശരാശരിയെക്കുറിച്ചുള്ള അമിത പ്രതീക്ഷ, മറ്റുള്ളതിനോടുള്ള വെറുപ്പ്, ദുഷിച്ച അഭിമാനബോധം എന്നീ ഘടകങ്ങളാല്‍ നിര്‍മിച്ചതാണത്. അത് ഏറ്റവും താഴ്ന്ന നിലവാരത്തിലുള്ള അഭിരുചിയെയാണ് വാഴ്ത്തുന്നത്. പത്രവാര്‍ത്തകളില്‍നിന്ന് ഊര്‍ജം ശേഖരിക്കുകയും ശാസ്ത്രത്തെയും കലയെയും നിസാരവത്കരിക്കുകയുമാണ് യഥാതഥവാദികള്‍ ചെയ്യുന്നത്”-ബ്രെട്ടൻ ചിന്തിക്കുന്നു.
റഷ്യൻ എഴുത്തുകാരൻ ദസ്തയെവ്‌സ്‌കിയുടെ ‘ക്രൈം ആന്‍ഡ് പണിഷ്‌മെന്‍റി’ല് ഒരു മുറിയുടെ വിവരണം തന്നെ വല്ലാതെ മുഷിപ്പിച്ചു എന്ന് ബ്രെട്ടൻ എഴുതിയിട്ടുണ്ട്. “എന്‍റെ മനസ് അതേറ്റെടുക്കാന്‍ തയാറല്ല. ഈ എഴുത്തുകാരന്‍ എന്‍റെ സമയം പാഴാക്കുകയാണു ചെയ്തത്. എനിക്ക് ആ മുറിയിലേക്ക് പോകാന്‍ ഇഷ്‌ടമല്ല.”
ബ്രെട്ടൻ പറയുന്നത് ഒരാള്‍ക്ക് സൃഷ്‌ടിയില്‍ അനുഭൂതി ജനിപ്പിക്കാന്‍ കഴിയുന്നില്ലെങ്കില്‍ മിണ്ടാതിരിക്കുകയാണു നല്ലതെന്നാണ്. ജീവിതത്തിലെ വരണ്ട നിമിഷങ്ങളെക്കുറിച്ച് ദീര്‍ഘമായി പ്രതിപാദിക്കുന്നതില്‍ അര്‍ഥമില്ല. സാഹിത്യകൃതികളില്‍ കഥാപാത്രങ്ങളെ വിന്യസിക്കുന്നത് ചെസില്‍ കരുക്കള്‍ നീക്കുന്നതുപോലെയാകരുത്. തന്‍റെ ‘സറിയലിസ്റ്റ് മാനിഫെസ്റ്റോ’യിലാണ് ബ്രെട്ടൻ കലാതത്വവിചാരം അവതരിപ്പിക്കുന്നത്. ഇരുപതാം നൂറ്റാണ്ടിലെ കലാചിന്തയെ ഏറെ സ്വാധീനിച്ച വ്യക്തിയാണ് അദ്ദേഹം. സറിയലിസത്തിന് ഒരിക്കലും പ്രാമുഖ്യം നഷ്‌ടപ്പെടില്ല. കാരണം അത് കലയുടെ മേഘവര്‍ണമുള്ള ചിറകാണ്. അതില്‍ മനുഷ്യന് സ്‌നിഗ്ധതയായി, സ്നേഹപരാഗമായി, സ്വപ്നമായി അവശേഷിക്കുന്നു.
സാഹിത്യത്തില്‍ യുക്തിയുടെ ആധിപത്യം ജീവിതത്തെ വരട്ടിക്കളയും. ജീവിതം വസ്തുസ്ഥിതിവിവരക്കണക്കല്ല. അങ്ങനെ ലഘൂകരിച്ചാല്‍ അപകടമാണ്. പ്രായോഗിക ചിന്തകളുടെ ഒരു കൂടാരമാണ് നമ്മുടെ നാഗരികത. അവിടെ എല്ലാം കണക്കുകളില്‍ ഒതുങ്ങുന്നു. അവിടെ മനസിന്‍റെ ആഭ്യന്തരമായ ആകുലതകള്‍ക്ക് ഇടമില്ല. എന്നാല്‍ മനഷ്യനിലെ കലാകാരനു സത്യത്തെക്കുറിച്ച് അന്വേഷിക്കാതിരിക്കാനാവില്ല. അവന്‍ ആത്മാവില്‍ ദാഹാര്‍ത്തനാണ്. മനുഷ്യന്, സാമ്പ്രദായിക കലാപ്രസ്ഥാനങ്ങളില്‍ ഒരു സോദ്ദേശ്യ യുക്തിപ്രസ്ഥാനമായി ചുരുങ്ങുന്നതിനെതിരേയാണ് ബ്രെട്ടൻ ചിന്തിച്ചത്.
സാമാന്യവത്കരിക്കപ്പെട്ട ധാരണകള്‍ക്കകത്ത് വട്ടംകറങ്ങുന്ന നമുക്ക് സത്യം എന്താണെന്ന് തിരയാനുള്ള ത്രാണിയില്ല. ഇനിയൊരിക്കലും പരിഗണിക്കേണ്ടതില്ല എന്ന ചിന്തയില്‍ ഒഴിവാക്കിയ മനസിന്‍റെ ഒരു ഭാഗം സറിയലിസത്തിലൂടെ വെളിച്ചത്ത് കൊണ്ടുവന്നത്, അതിനു താത്വികമായ ഗഹനത നല്കിയത് ബ്രെട്ടനാണ്. മനസിന്‍റെ ഭാവന, യുക്തിരഹിതമായ ചിന്തകള്‍, തോന്നലുകള്‍, ഓര്‍മകള്‍, ക്രമംതെറ്റലുകള്‍, മതിഭ്രമങ്ങള്‍, ഭ്രാന്ത്, മിഥ്യകള്‍ തുടങ്ങിയവയെല്ലാം കലയില്‍ പ്രസക്തമാണ്. കാരണം, അവയില്‍ അര്‍ഥങ്ങള്‍ അന്തര്‍ഭവിച്ചിരിക്കുന്നു.
ഇതു വിശദീകരിക്കാന്‍ ഭാരതീയ പാരമ്പര്യത്തില്‍നിന്ന് ഒരു ഉദാഹരണം നല്കാം. നളനെ കലി ബാധിക്കുന്നത് നോക്കൂ. അവിടെ യുക്തിയുടെ തലമില്ല. കലയുടെ ആന്തരിക യുക്തിയാണുള്ളത്. കലിയുടെ വരവ് മനുഷ്യാവസ്ഥയെക്കുറിച്ച് കൂടുതല്‍ അറിയാന്‍ സഹായിക്കുന്നു. മനുഷ്യമനസില്‍ നടക്കുന്ന യുദ്ധമാണിത്.
സ്വപ്‌നവും യാഥാര്‍ഥ്യവും പരസ്പരവിരുദ്ധമല്ലെന്ന നിലപാടാണ് ബ്രെട്ടൻ സ്വീകരിച്ചത്. മനസിന്‍റെ അഗാധതലങ്ങളില്‍ നടക്കുന്ന കൊടുക്കല്‍-വാങ്ങലുകളും ആള്‍മാറാട്ടവും സൂക്ഷ്മമായി പഠിക്കേണ്ടതുണ്ട്. സര്‍ഗാത്മക പ്രവര്‍ത്തനത്തിന്‍റെ പരമമായ നിമിഷത്തില്‍ സ്വപ്‌നവും യാഥാര്‍ഥ്യവും ചേര്‍ന്ന് മറ്റൊരു അനുഭവമാകുന്നതാണ് സറിയലിസം.
പ്രമുഖ ഫ്രഞ്ച് കവിയായിരുന്ന സെയിന്‍റ് പോള്‍ റൂ(Saint Pol Roux)യുടെ വീടിനു മുന്നില്‍, കവി ഉറങ്ങാൻ പോകുന്നതിനു മുമ്പ്, കവി ജോലിയിലാണ് (The poet is working) എന്നെഴുതിയ ഒരു ബോര്‍ഡ് തൂക്കിയിരുന്നു എന്ന് കേട്ടിട്ടുള്ളതായി ബ്രെട്ടൻ രേഖപ്പെടുത്തിയത് സ്വപ്‌നവുംകൂടി ചേര്‍ന്നതാണ് കവിത എന്നു സ്ഥാപിക്കാനാണ്. ഒരു കവി ഉറങ്ങുമ്പോഴും കവിതയുടെ പ്രക്രിയ നടക്കുന്നു. കവിക്ക് സ്വപ്നം ഒരു സര്‍ഗലോകമാണ്. അയഥാര്‍ഥമായതില്‍നിന്ന് ജീവിതത്തെക്കുറിച്ചുള്ള രഹസ്യങ്ങള്‍ ലഭിക്കുന്ന വിദ്യയാണല്ലോ സ്വപ്നം.
Leader Page
സൂര്യ കൃഷ്ണമൂർത്തി പറഞ്ഞ ഒരനുഭവകഥ പറയാം. ഒരിക്കൽ ഗുരുവായൂർ അന്പലനടയിൽ നടന്ന കൃഷ്ണനാട്ടം കാണാൻ അദ്ദേഹം സദസിൽ ഇരുന്നു. അർധരാത്രിയാണ്. സദസിൽ കാഴ്ചക്കാരനായി കൃഷ്ണമൂർത്തി മാത്രം. ആട്ടവിളക്കിനു മുന്നിൽ ആടിത്തിമിർക്കുകയാണ് കൃഷ്ണനാട്ട കലാകാരൻ. പൂർണ സമർപ്പണത്തോടെയുള്ള നൃത്തം.
നിർമാല്യ പൂജയ്ക്കായി നട തുറന്നതോടെ കൃഷ്ണനാട്ടം സമാപിച്ചു.
അരങ്ങിൽനിന്നു മെല്ലെ ഇറങ്ങി അണിയറയിലേക്കു നടന്ന കലാകാരനു പിന്നാലെ കൃഷ്ണമൂർത്തി നടന്നു. മടിച്ചുമടിച്ച് അദ്ദേഹം കൃഷ്ണനാട്ട കലാകാരനോടു ചോദിച്ചു:
“അങ്ങ് കൃഷ്ണനാട്ടം അവതരിപ്പിച്ചപ്പോൾ മുന്നിൽ കളി കാണാൻ ഒരാൾ പോലുമുണ്ടായിരുന്നില്ല. വിഷമം തോന്നിയില്ലേ?” കലാകാരൻ, കൃഷ്ണമൂർത്തിയെ ഒന്നുനോക്കി പിന്നെ പുഞ്ചിരിയോടെ പറഞ്ഞു:
“ഞാൻ കൃഷ്ണനാട്ടം ആടിയത് സദസ്യർക്കു വേണ്ടിയല്ല. കത്തി ജ്വലിച്ചുനിന്ന നിലവിളക്കിനുവേണ്ടിയാണ്. ആ ദീപം ഈശ്വരനാണ്. ഈശ്വരനുവേണ്ടിയായിരുന്നു എന്‍റെ കൃഷ്ണനാട്ടം. ഒരു യഥാർഥ കലാകാരൻ കല അഭ്യസിക്കുന്നത്, അവതരിപ്പിക്കുന്നത് ഈശ്വരനുവേണ്ടിയാണ്.”
കല ദൈവമാണെന്നും കലയെ ഒരിക്കലും കച്ചവടവത്കരിക്കരുതെന്നും കൃഷ്ണമൂർത്തി തിരിച്ചറിഞ്ഞ നിമിഷമായിരുന്നു അത്.
സൂര്യ കൃഷ്ണമൂർത്തി പറഞ്ഞ അതേ വാക്കുകൾ വീണ്ടും കുറിക്കാം. “പേരറിയാത്ത, ഇപ്പോൾ ജീവിച്ചിരിപ്പുണ്ടോ എന്നു പോലുമറിയാത്ത ആ കലാകാരനാണ് എന്‍റെ ആദ്യത്തെ ഗുരു. എന്‍റെ കലാപ്രവർത്തനത്തിന്‍റെ വേദവാക്യം അന്ന് അദ്ദേഹം പറഞ്ഞ മഹാതത്വം തന്നെയാണ്.”
സത്യം. സൂര്യ എന്ന കലാ- സാംസ്കാരിക സംഘടനയിലൂടെ ഭാരതത്തിന്‍റെ അനന്തമായ കലയുടെ വെളിച്ചംതന്നെയാണ് ജനലക്ഷങ്ങൾക്ക് കൃഷ്ണമൂർത്തി പകർന്നത്.
ഇന്ത്യ കണ്ട മികച്ച കലാ സംഘാടകരിൽ ഒരാൾ, നാടക രചയിതാവ്, സംവിധായകൻ, ലൈറ്റ് ആൻഡ് സൗണ്ട്ഷോയുടെ പ്രയോക്താവ്. അങ്ങനെ എന്തൊക്കെയായിരുന്നു സൂര്യ കൃഷ്ണമൂർത്തി. ആയിരക്കണക്കിനു കലാകാരന്മാരെ സ്റ്റേജിൽ ഒന്നിച്ചണിനിരത്തി അദ്ദേഹം നടത്തിയ മെഗാ ഈവന്‍റുകൾ അവിസ്മണീയങ്ങളാണ്. 36 രാജ്യങ്ങളിൽ ചാപ്റ്ററുകളുള്ള, 50 ലോകരാഷ്ട്രങ്ങളിൽ കേന്ദ്രങ്ങളുള്ള സൂര്യയുടെ ശിൽപി പക്ഷേ ഒരു സാധാരണക്കാരനെപ്പോലെയായിരുന്നു, എന്നും...
എല്ലാ വർഷവും സെപ്റ്റംബറിൽ തിരുവനന്തപുരത്ത് ആരംഭിക്കുന്ന സൂര്യ മേളയുടെ വേദിയിൽ ഓൾറൗണ്ടറായി നിൽക്കാതെ, സദസ്യരിൽ ഒരാളായി ഒരു വശത്ത് ഒതുങ്ങി ഇരുന്നു. ലോകപ്രശസ്തരായ കലാകാരൻമാരെ മുഴുവൻ കേരളത്തിൽ എത്തിക്കാൻ കഴിവുള്ള ഒരേയൊരു സംഘാടകൻ എന്ന പരിവേഷങ്ങൾ ഒന്നുമില്ലാതെ... ആ ശബ്ദം മാത്രം പക്ഷെ സദസ്യർ കേട്ടു. ദിവസവും വൈകുന്നേരം 6.45ന് സൂര്യയുടെ ശീർഷക ഗാനം കഴിഞ്ഞാലുടനെ “ലേഡീസ് ആൻഡ് ജന്‍റിൽമൻ വെൽക്കം ടു ദി ഫസ്റ്റ്ഡേ ഓഫ് സൂര്യ ഡാൻസ് ആൻഡ് മ്യൂസിക് ഫെസ്റ്റിവൽ” എന്നിങ്ങനെ എല്ലാ ദിവസങ്ങളിലും ആ അനൗണ്‍സ്മെന്‍റ്ആസ്വാദകർ കേട്ടുകൊണ്ടേയിരുന്നു. “ദയവായി മൊബൈൽ ഫോണ് സ്വിച്ച് ഓഫ് ചെയ്യൂ.” എന്നും കലാകാരന്മാരുടെ കലാപ്രകടനത്തിനു ഒരു വിധത്തിലും അലോസരം ഉണ്ടാക്കരുതേ എന്ന വാക്കുകളും!
ഉസ്താദ് ബിസ്മില്ലാ ഖാൻ, എം.എസ്. സുബ്ബലക്ഷ്മി, ഉസ്താദ് അംജദ് അലിഖാൻ, പണ്ഡിറ്റ് രവിശങ്കർ, ഉസ്താദ് സാക്കിർ ഹുസൈൻ, കുന്നക്കുടി വൈദ്യനാഥ അയ്യർ ശിവമണി, ബാലഭാസ്കർ അങ്ങനെയങ്ങനെ സൂര്യയുടെ വേദിയിലെത്തിയ ഇതിഹാസങ്ങൾ അനവധിയാണ്.
നീണ്ട നാലു പതിറ്റാണ്ടിലേറെക്കാലം ഗാനഗന്ധർവൻ യേശുദാസ് സൂര്യയുടെ നൃത്തസംഗീതോത്സവത്തിനു തുടക്കം കുറിക്കാൻ എത്തി. ഒക്‌ടോബർ ഒന്ന്, യേശുദാസ്, സൂര്യ കൃഷ്ണമൂർത്തിക്കു നീക്കിവച്ച ദിവസമായിരുന്നു. കേരളത്തിൽ കർണാടക സംഗീതം ഇത്രത്തോളം ജനകീയമാക്കിയതിലും സൂര്യയിലെ യേശുദാസിന്‍റെ കച്ചേരികൾ പ്രധാന പങ്കുവഹിക്കുന്നുണ്ട്.
സ്വന്തം കുടുംബത്തിൽ എത്തുന്ന അനുഭവമാണ് സൂര്യയിൽ എത്തുന്പോൾ എന്ന് നാലു പതിറ്റാണ്ടിലേറെ സൂര്യ മേളയിൽ എത്തിയ പത്മാ സുബ്രഹ്മണ്യവും ശോഭനയും പറഞ്ഞിരുന്നു. കേരളത്തിലെ സാധാരണക്കാരായ ആസ്വാദകരുടെ ആസ്വാദ്യതലം വലിയ രീതിയിൽ ഉയർത്തി എന്നതും കൃഷ്ണമൂർത്തിയുടെ സംഭാവനയാണ്.
സിനിമാ പാട്ടുകളും നാടോടിനൃത്തവും മാത്രം രസിക്കാൻ കഴിഞ്ഞിരുന്ന ഒരു വലിയ വിഭാഗം ജനങ്ങൾക്കു മുന്നിൽ അലർമേൽ വള്ളിയും മാളവിക സാരുക്കായും രമ വൈദ്യനാഥനും രാജേന്ദ്ര ഗഗാനിയും ശർമിള ബിസ്വാസും നൃത്തമാടിയപ്പോൾ ഭരതനാട്യത്തിന്‍റെയും കഥക്കിന്‍റെയും ഒഡീസിയുടെയും മാസ്മരിക ഭംഗി മലയാളി അറിഞ്ഞു. മണിപ്പുരി, കുച്ചിപ്പുടി, കഥക് അങ്ങനെ ഇന്ത്യയുടെ വൈിധ്യമാർന്ന നൃത്തയിനങ്ങളുടെ ആരാധകരായി മലയാളികൾ മാറി.
ഗസൽ, ഹിന്ദുസ്ഥാനി, ഫ്യൂഷൻ സംഗീതം, നാടൻ പാട്ടുകൾ, കഥയരങ്ങ്, പ്രഭാഷണ പരന്പര, തിയറ്റർ ഫെസ്റ്റിവൽ, രാമായണ പ്രഭാഷണം... അങ്ങനെ എത്രയെത്ര സാന്ദ്ര സന്ധ്യകൾ!
ലോകത്തിലെതന്നെ ഏറ്റവും ദൈർഘ്യമേറിയ കലാ-സാംസ്കാരിക ഉത്സവമാക്കി സൂര്യ മേളയെ കൃഷ്ണമൂർത്തി മാറ്റി. സൂര്യ എന്നത് ദൈവനിയോഗമാണെന്ന് കൃഷ്ണമൂർത്തി എപ്പോഴും പറഞ്ഞിരുന്നു. അതെ, ഐഎസ്ആർഒയിലെ ശാസ്ത്രജ്ഞനായി പ്രവർത്തിച്ച എൻ. കൃഷ്ണമൂർത്തിയെ സൂര്യ കൃഷ്ണമൂർത്തിയായി മാറിയത് കാലത്തിന്‍റെ മഹാനിയോഗം തന്നെ, തീർച്ച.
Leader Page
ഇഎസ്എ പട്ടികയിൽനിന്ന് ജനവാസകേന്ദ്രങ്ങളെ ഒഴിവാക്കണമെന്ന നിലപാടിൽ യാതൊരു വിട്ടുവീഴ്ചയുമില്ലെന്ന് പൂഞ്ഞാർ എംഎൽഎ എം.ജെ. സെബാസ്റ്റ്യൻ. ഒരേക്കർ വനം പോലുമില്ലാത്ത വില്ലേജുകളെയും കസ്തൂരിരംഗൻ റിപ്പോർട്ടിൽ പട്ടികയിൽ ഉൾപ്പെടുത്തിയിരുന്നു. ഇത് ഒഴിവാക്കപ്പെടേണ്ടതു തന്നെയാണെന്ന് അദ്ദേഹം ദീപികയോടു പറഞ്ഞു.
പൂഞ്ഞാർ നിയോജകമണ്ഡലത്തിലെ തീക്കോയി, പൂഞ്ഞാർ, അതുപോലെ കൂട്ടിക്കൽ വില്ലേജ്, ഇതിനൊപ്പം തന്നെ പാലാ നിയോജകമണ്ഡലത്തിലെ മേലുകാവ് വില്ലേജ് ഇതൊക്കെ ജനവാസമേഖലകളാണ്. ഇഎസ്എയുടെ റൂളിൽതന്നെ പറയുന്നത് ഇത്ര ശതമാനവും വനം ഉണ്ടായിരിക്കണമെന്നാണ്. എന്നിട്ടാണ് ഒരേക്കർ പോലും വനമില്ലാത്ത വില്ലേജുകൾ പോലും ഉൾപ്പെട്ടത്.
ജനവാസമേഖലകളെ പൂർണമായും ഒഴിവാക്കുന്ന സമീപനമാണ് സംസ്ഥാന സർക്കാർ സ്വീകരിച്ചിരിക്കുന്നത്. ഇക്കാര്യത്തിൽ മന്ത്രിസഭ തീരുമാനമെടുത്തിട്ടുണ്ട്. ജനവാസകേന്ദ്രങ്ങളെ ഒഴിവാക്കി 98 വില്ലേജുകളെ മാത്രം പട്ടികയിൽ ഉൾപ്പെടുത്തണമെന്നതാണ് സർക്കാരിന്‍റെ നിലപാട്. 9130 ചതുരശ്ര കിലോമീറ്റർ എന്നത് 8590 ചതുരശ്ര കിലോമീറ്ററായി ചുരുക്കണമെന്ന് നിർദേശിച്ച് സർക്കാർ നേരത്തേതന്നെ റിപ്പോർട്ട് കൊടുത്തിരുന്നു.
ഉമ്മൻ ചാണ്ടി സർക്കാർ ഇരുന്നപ്പോഴും നമ്മുടെ നിലപാട് ഇതു തന്നെയായിരുന്നു. പിന്നീടു വന്ന ഇടതു സർക്കാരും കുറച്ചുകൂടി പഠനം നടത്തി ഈ റിപ്പോർട്ട് കേന്ദ്രത്തെ അറിയിച്ചിരുന്നു. ആ പഠന റിപ്പോർട്ടിൽ കുറച്ചുകൂടി കൃത്യതയും വ്യക്തതയും വരുത്തി കേന്ദ്രത്തിനു വീണ്ടും സമർപ്പിക്കാനാണ് സർക്കാർ തീരുമാനമെടുത്തിരിക്കുന്നത്.
ഗുജറാത്തിൽ തുടങ്ങി ഒലവക്കോട് വരെ നീണ്ടുകിടക്കുന്ന ഏരിയയാണ് പശ്ചിമഘട്ടം. 52 ലക്ഷം ആളുകൾ ഈ പ്രദേശത്ത് അധിവസിക്കുന്നുണ്ട്. ഇതിൽ 22 ലക്ഷവും കേരളത്തിലാണെന്നു പറയുമ്പോൾ ഇതു കേരളത്തെ എത്രത്തോളം ബാധിക്കുമെന്നതു വ്യക്തമാണല്ലോ. അതുകൊണ്ടുതന്നെ യാഥാർഥ്യബോധത്തോടെ പരിസ്ഥിതിവാദികൾ അടക്കം ഈ വിഷയത്തെ സമീപിക്കണം.
വനപ്രദേശങ്ങൾ വനങ്ങളായിതന്നെ സംരക്ഷിക്കപ്പെടണമെന്നതിൽ ആർക്കും എതിർപ്പില്ല. അതേസമയം, വനം വലുതാക്കാൻ ജനങ്ങളെ ദ്രോഹിക്കുന്നതു ശരിയല്ല. പ്രകൃതിയും മാറ്റങ്ങൾക്കു വിധേയമാണ്. സൂര്യൻപോലും 350 കോടി വർഷം കഴിയുമ്പോൾ കത്തിത്തീരുമെന്നാണ് ശാസ്ത്രം പറയുന്നത്.
അത് സൂര്യനെ ആരെങ്കിലും ഉപദ്രവിച്ചിട്ടാണോ? മലയോരത്തുള്ളവർ ഒരു വീടു വയ്ക്കുന്നതുകൊണ്ടോ അല്പം കൃഷി ചെയ്യുന്നതുകൊണ്ടോ പരിസ്ഥിതി മൊത്തം തകർന്നുപോകുമെന്നൊക്കെ പറയുന്നത് ബാലിശമായ സമീപനമാണ്. ഇഎസ്എ വിഷ‍യത്തിൽ ജനങ്ങളുടെ ആശങ്ക ഒഴിവാക്കുന്ന ശക്തമായ നിലപാട് സ്വീകരിച്ചു മുന്നോട്ടു പോകാനാണ് സർക്കാർ തീരുമാനമെന്നും എം.ജെ. സെബാസ്റ്റ്യൻ കൂട്ടിച്ചേർത്തു.
Leader Page
പശ്ചിമഘട്ടവുമായി ബന്ധപ്പെട്ട അന്താരാഷ്ട്ര പൈതൃക പദവിയും അതിന്‍റെ സംരക്ഷണ ബാധ്യതകളും സംബന്ധിച്ച് കേന്ദ്രസർക്കാർ സമഗ്രമായ പുനഃപരിശോധന നടത്തേണ്ട സമയമാണിത്.
ഒരു പ്രദേശത്തിന് അന്താരാഷ്ട്ര പദവി ലഭിക്കുന്നതോടെ അതിന്‍റെ പരിസ്ഥിതി പ്രാധാന്യം ലോകത്തിന് മുന്നിൽ അംഗീകരിക്കപ്പെടും. എന്നാൽ, ആ പദവിയുടെ പേരിൽ പ്രദേശവാസികളുടെ ജീവിതവും വികസനാവകാശങ്ങളും നിയമപരമായ അവകാശങ്ങളും അവഗണിക്കപ്പെടുന്ന സാഹചര്യം ഉണ്ടാകരുത്.
അതുകൊണ്ട് പശ്ചിമഘട്ടവുമായി ബന്ധപ്പെട്ട ലോക പൈതൃക പദവി/നോമിനേഷൻ സംബന്ധിച്ച കേന്ദ്രസർക്കാരിന്‍റെ നിലപാട് പുനഃപരിശോധിക്കണം. ആവശ്യമായ സാഹചര്യത്തിൽ യുനെസ്കോയുമായി ബന്ധപ്പെട്ട നടപടികൾ സ്വീകരിച്ച് നിലവിലെ സംവിധാനത്തിൽ മാറ്റം വരുത്തുന്നതിനുള്ള സാധ്യതകളും കേന്ദ്രസർക്കാർ പരിശോധിക്കണം.
ഡൽഹി മാതൃകയെക്കുറിച്ചും ചർച്ച വേണം
ലോക പൈതൃക പദവിയുമായി ബന്ധപ്പെട്ട് ഡൽഹിയുടെ നോമിനേഷൻ സംബന്ധിച്ച് കേന്ദ്രസർക്കാർ മുമ്പ് യുനെസ്കോയുമായി ആശയവിനിമയം നടത്തിയിട്ടുണ്ട്. വികസനപ്രവർത്തനങ്ങളും പൈതൃകസംരക്ഷണവും തമ്മിലുള്ള സംഘർഷം അന്ന് ചർച്ചയായ വിഷയങ്ങളിലൊന്നായിരുന്നു. അങ്ങനെയെങ്കിൽ പശ്ചിമഘട്ടത്തിലെ ജനങ്ങളുടെ ആശങ്കകൾ മാത്രം എന്തുകൊണ്ട് അവഗണിക്കണം എന്നതാണ് ചോദ്യം. വിദേശ താത്പര്യങ്ങളല്ല, ജനങ്ങളുടെയും പ്രകൃതിയുടെയും താത്പര്യമാണ് മുൻഗണന നേടേണ്ടത്.
പരിസ്ഥിതി സംരക്ഷണത്തിന്‍റെ പേരിൽ സാധാരണ ജനങ്ങൾക്ക് നിയന്ത്രണങ്ങൾ ഏർപ്പെടുത്തുകയും അതേ പ്രദേശങ്ങളിൽ മലിനീകരണ സാധ്യതയുള്ള വലിയ വ്യവസായങ്ങൾക്ക് അവസരം നൽകുകയും ചെയ്യുന്ന ഇരട്ടത്താപ്പും അവസാനിപ്പിക്കണം.
വനത്തിനുവേണ്ടി മരിക്കാൻ തയാറാകുന്ന പരിസ്ഥിതിവാദികൾ എന്തുകൊണ്ട് മംഗളവനത്തിനു ചുറ്റും ബഫർ സോൺ ആവശ്യപ്പെടുന്നില്ല? കേരളത്തിൽ ഏറ്റവും കൂടുതൽ കാർബൺ ബഹിർഗമനമുള്ള പ്രദേശമാണ് കൊച്ചി. അതുകൊണ്ടുതന്നെ ഉറവിടത്തിൽ കാർബൺ ആഗിരണം ചെയ്യാനുള്ള സംവിധാനം ഒരുക്കുന്നത് കൂടുതൽ പ്രയോജനപ്രദമാക്കും, മലയോരത്തെ പച്ചപ്പിനേക്കാൾ.
ഇഎസ്എയുമായി ബന്ധപ്പെട്ട അനിശ്ചിതത്വം മറ്റൊരു ഗുരുതരമായ പ്രത്യാഘാതത്തിനും വഴിയൊരുക്കുന്നു. പരിസ്ഥിതിലോല പ്രദേശമായി പ്രഖ്യാപിക്കപ്പെടുമെന്ന ആശങ്കയിൽ ചില സ്ഥലങ്ങളിൽ ഭൂമിയുടെ വില കുറയുകയും, ഈ സാഹചര്യം മുതലെടുത്ത് വലിയ വ്യവസായ-വാണിജ്യ താത്പര്യങ്ങൾ ഭൂമി സ്വന്തമാക്കാനുള്ള സാധ്യത വർധിക്കുകയും ചെയ്യുന്നു.
പ്രത്യേകിച്ച് പ്ലൈവുഡ് ഉൾപ്പടെയുള്ള വ്യവസായ സ്ഥാപനങ്ങളുടെ വ്യാപനം. അവയിൽനിന്നുണ്ടാകാവുന്ന വായു മലിനീകരണം, ജലമലിനീകരണം, മണ്ണിലേക്കുള്ള രാസമാലിന്യങ്ങളുടെ പ്രവേശനം തുടങ്ങിയ വിഷയങ്ങളിൽ കർശനമായ പരിശോധനയും നിയന്ത്രണവും അനിവാര്യമാണ്.
Leader Page
എച്ച്എല്‍ഡബ്ല്യുജി റിപ്പോര്‍ട്ടിലെ ഭൂരിഭാഗം നിര്‍ദേശങ്ങളും കര്‍ഷകവിരുദ്ധമാണ്. കര്‍ഷകര്‍ക്ക് ഭയവും ആശങ്കയുമുണ്ട്. ജനവാസ കേന്ദ്രങ്ങളെ ഇഎസ്എയില്‍ ഉള്‍പ്പെടുത്തിയതുള്‍പ്പടെയുള്ള നിര്‍ദേശങ്ങള്‍ അശാസ്ത്രീയവും അന്യായവുമാണ്.
1. ഒരു ചതുരശ്ര കിലോമീറ്ററില്‍ നൂറില്‍ കൂടുതല്‍ ജനസാന്ദ്രതയുള്ള പ്രദേശങ്ങളെ ഇഎസ്എയില്‍ ഉള്‍പ്പെടുത്തുകയില്ല എന്നുപറയുന്ന എച്ച്എല്‍ഡബ്ല്യുജി റിപ്പോര്‍ട്ട് കേരളത്തിലെ ചതുരശ്ര കിലോമീറ്ററില്‍ നൂറില്‍ കൂടുതല്‍ ജനവാസമുള്ള 173 വില്ലേജുകളെ എങ്ങനെ ഇഎസ്എയില്‍ ഉള്‍പ്പെടുത്തി?
2. വൈല്‍ഡ് ഫീല്‍ഡ് സെന്‍സര്‍ ഉപയോഗപ്പെടുത്തി ആകാശത്തുനിന്നെടുക്കുന്ന ചിത്രങ്ങളെ ആസ്പദമാക്കി ഇഎഎസ്എ നിര്‍ണയിക്കുമ്പോള്‍ നിത്യഹരിത കൃഷിസ്ഥലങ്ങളും അതില്‍ ഉള്‍പ്പെടും. അംഗീകാരമില്ലാത്തതും ആവര്‍ത്തിച്ച് പരീക്ഷിച്ച് തെളിയിക്കാത്തതുമായ സാങ്കേതികവിദ്യ ഉപയോഗിച്ചാണ് ഇഎസ്എയുടെ പരിധി നിര്‍ണയിക്കുന്നത്. അതുകൊണ്ടാണ് പാറമടകളും പുല്‍മേടുകളും ഇഎസ്എയില്‍ വരാത്തത്.
3. വനവിസ്തൃതി 75 ശതമാനമായി വര്‍ധിപ്പിക്കണമെന്ന് ഡബ്ല്യുജിഇഇപിയിലും എച്ച്എല്‍ഡബ്ല്യുജിയിലും നിര്‍ദേശമുണ്ട്. എന്നാല്‍, എങ്ങനെ എന്നു പറയുന്നില്ല. വനത്തോടു ചേര്‍ന്നുകിടക്കുന്ന കര്‍ഷകന്‍റെ ഭൂമി വനമാക്കാനുള്ള നീക്കമാണ് നടക്കുന്നതെന്ന് കര്‍ഷകര്‍ക്ക് ആശങ്കയുണ്ട്. കേരള ഫോറസ്റ്റ് (വെസ്റ്റിംഗ് ആന്‍ഡ് മാനേജ്മെന്റ് ഓഫ് ഇഎഫ്എല്‍) ആക്‌ട് പ്രകാരം വനത്തോടു ചേര്‍ന്നുകിടക്കുന്ന ആധാരവും പട്ടയവുമുള്ള ഭൂമി പ്രതിഫലം നല്‍കാതെ ജണ്ട കെട്ടി വനംവകുപ്പ് കൈയേറി വനമാക്കിയതും വനമാക്കിക്കൊണ്ടിരിക്കുന്നതും മലയോര കര്‍ഷകര്‍ക്ക് അനുഭവമാണ്. നിയമനിര്‍മാണസഭ പാസാക്കിയ നിയമം കോടതിയില്‍ ചോദ്യം ചെയ്യാനാകില്ലെന്നും കോടതി നിയമം വ്യാഖ്യാനിക്കുകയേയുള്ളൂ, നിയമം നിര്‍മിക്കുകയില്ലെന്നും കര്‍ഷകര്‍ക്ക് ബോധ്യമുണ്ട്.
4. ഇപ്പോള്‍തന്നെ ആധാരം രജിസ്റ്റര്‍ ചെയ്യുമ്പോള്‍ ഈ ഭൂമി മിച്ചഭൂമിയിലല്ല, ഇഎഫ്എല്‍ അല്ല എന്ന് എഴുതുന്നുണ്ട്. ഇതോടൊപ്പം ഇഎസ്എ അല്ല എന്നുകൂടി ചേര്‍ക്കണമെങ്കില്‍ ഭാവിയില്‍ ക്രയവിക്രയങ്ങള്‍ എങ്ങനെ നടത്തുമെന്ന് കര്‍ഷകര്‍ക്ക് ആശങ്കയുണ്ട്.
5. ഇഎഎസ്എയില്‍പ്പെട്ട മേഖലയില്‍ ആശുപത്രികള്‍, സസ്യ എണ്ണ ഉത്പാദന യൂണിറ്റുകള്‍, പെട്രോളിയം ഉത്പന്നങ്ങളുടെ സംഭരണം- വിതരണം, ടയര്‍ റീട്രേഡിംഗ് തുടങ്ങിയ നിത്യേന ഉപയോഗത്തില്‍ വേണ്ട വ്യവസായങ്ങള്‍ നിരോധിക്കുക വഴി മലയോര ജനതയുടെ മനുഷ്യാവകാശങ്ങള്‍ നിരോധിക്കുകയാണ്.
കാടും പശ്ചിമഘട്ടവും സംരക്ഷിക്കാനുള്ള ചില നിര്‍ദേശങ്ങള്‍ ചുവടെ
1. കാടിനെ നാളിതുവരെയും കാട്ടുതീയില്‍നിന്നും കാട്ടുകള്ളന്മാരില്‍നിന്നും സ്വന്തം ഉത്തരവാദിത്വത്തില്‍ സംരക്ഷിച്ചു പോരുന്നവരാണ് സാക്ഷരരും പരിസ്ഥിതി മിത്രങ്ങളുമായ മലയോര കര്‍ഷകര്‍. പശ്ചിമഘട്ട മേഖലയില്‍ കര്‍ഷകരുടെ നിരവധി പരിസ്ഥിതി സംരക്ഷണസമിതികള്‍ ഉണ്ട്. ഇവയെ ഏകോപിപ്പിച്ചും ഇല്ലാത്ത ഭാഗങ്ങളില്‍ പുതിയവയ്ക്ക് രൂപം കൊടുത്തും സംസ്ഥാന തലത്തില്‍ ഏകോപിച്ച് പ്രവര്‍ത്തിക്കുന്ന എഫ് ഇസിഒയ്ക്ക് (ഫാര്‍മേഴ്സ് ഇക്കോളജി കണ്‍സര്‍വേഷന്‍ ഓര്‍ഗനൈസേഷന്‍-ഫെക്കോ) രൂപം നല്‍കാന്‍ സര്‍ക്കാര്‍ സഹായം നല്‍കണം. ഫെക്കോ വഴി ലോക പൈതൃകസ്ഥാനങ്ങളും പശ്ചിമഘട്ട ജൈവ വൈവിധ്യവും പ്രായോഗികമായി സംരക്ഷിക്കാന്‍ കഴിയും.
2. എച്ച്എല്‍ഡബ്ല്യുജി റിപ്പോര്‍ട്ടില്‍ ഹരിതഗൃഹ വാതകമായ കാര്‍ബണ്‍ഡയോക്‌സൈഡ് ആഗിരണം ചെയ്യുന്നതിന്‍റെ അളവ് കൃഷിഭൂമിയിലും വനത്തിലും എത്രയായിരിക്കുമെന്ന് താരതമ്യപഠനം നടത്തിയിട്ടില്ല. വെള്ളവും വളവും പരിപാലനവും നല്‍കി കൃഷിക്കാര്‍ സംരക്ഷിക്കുന്ന കൃഷിഭൂമി നിബിഡവനങ്ങളേക്കാള്‍ നിത്യഹരിതമാണ്. അതുകൊണ്ട് അന്തരീക്ഷത്തില്‍നിന്ന് ആഗികരണം ചെയ്യുന്ന കാര്‍ബണ്‍ ഡയോക്‌സൈഡിന്‍റെ അളവ് വനമേഖലയെക്കാള്‍ കൃഷിഭൂമിയില്‍ കൂടുതലായിരിക്കും. സിഡിഎം (ക്ലീന്‍ ഡെവലപ്‌മെന്‍റെ മെക്കാനിസം) വഴി കാര്‍ബണ്‍ ക്രെഡിറ്റിന് ലഭിക്കുന്ന ഫണ്ട് അതിന്‍റെ യഥാര്‍ഥ അവകാശികളായ പശ്ചിമഘട്ടത്തിലെ കര്‍ഷകര്‍ക്ക് ലഭ്യമാക്കാനുള്ള നടപടി സർക്കാർ സ്വീകരിക്കണം.
Leader Page
കേരളത്തിലെ സ്ത്രീസമൂഹത്തിന്‍റെ സഞ്ചാരസ്വാതന്ത്ര്യത്തിന്‍റെയും അന്തസിന്‍റെയും ചരിത്രത്തിലെ പുതിയ അധ്യായം രചിച്ച ‘പ്രിയദർശിനി’ സൗജന്യ ബസ് യാത്രാ പദ്ധതി ഇന്ന് 100 ദിവസം പൂർത്തിയാക്കുകയാണ്. അധികാരത്തിലേറിയ ഉടൻ യുഡിഎഫ് സർക്കാർ നടപ്പിലാക്കിയ ഈ പദ്ധതി സാധാരണക്കാരായ സ്ത്രീകളുടെ ദൈനംദിന ജീവിതത്തിൽ വലിയ മാറ്റങ്ങളാണ് കൊണ്ടുവന്നിരിക്കുന്നത്.
ജൂൺ 15 മുതൽ സെപ്റ്റംബർ 19 വരെയുള്ള 97 ദിവസം പദ്ധതിയിലൂടെ 12.54 കോടി (12,54,03,152) സൗജന്യ യാത്രകളാണ് നടന്നത്. ഇക്കാലയളവിൽ 266.53 കോടി രൂപയുടെ (2,66,53,07,108 രൂപ) ടിക്കറ്റുകൾ യാത്രക്കാർക്ക് സൗജന്യമായി നൽകി. പ്രതിദിനം ശരാശരി 12.93 ലക്ഷം പേർ ഈ സേവനം ഉപയോഗപ്പെടുത്തുന്നുണ്ട് എന്നത് സർക്കാരിന് നൽകുന്ന ആത്മവിശ്വാസം ചെറുതല്ല.
വനിതാ പങ്കാളിത്തത്തിന്‍റെ ആവേശക്കണക്കുകൾ
ആദ്യ ആഴ്ചയിൽ 11.08 ലക്ഷമായിരുന്ന പ്രതിദിന യാത്രക്കാരുടെ എണ്ണം പതിമൂന്നാം ആഴ്ചയിലെത്തിയപ്പോൾ 13.93 ലക്ഷമായി ഉയർന്നു. ഇത് 25.7 ശതമാനം വർധനയാണ് കാണിക്കുന്നത്. ആദ്യ ആഴ്ചയിലെ പ്രതിദിന ടിക്കറ്റ് മൂല്യം 2.36 കോടി രൂപയിൽനിന്ന് പതിമൂന്നാം ആഴ്ചയിൽ 2.95 കോടിയായി വർധിച്ചു. ടിക്കറ്റ് മൂല്യത്തിൽ 25.1 ശതമാനത്തിന്‍റെ വർധന. മാസങ്ങൾ അടിസ്ഥാനമാക്കിയുള്ള കണക്കുകൾ പരിശോധിക്കുമ്പോൾ ജൂണിൽ പ്രതിദിനം 12.12 ലക്ഷം പേരാണ് യാത്ര ചെയ്തത്. ജൂലൈയിൽ ഇത് 13.62 ലക്ഷമായും സെപ്റ്റംബറിൽ ഒന്ന് മുതൽ 19 വരെ 13.99 ലക്ഷമായും ഉയർന്നു. ഓഗസ്റ്റിൽ 12 ലക്ഷമായിരുന്നു പ്രതിദിന ശരാശരി.
റിക്കാർഡുകൾ തിരുത്തിയ സെപ്റ്റംബർ
പദ്ധതി ആരംഭിച്ചതിനു ശേഷമുള്ള ഏറ്റവും ഉയർന്ന പ്രതിദിന കണക്ക് രേഖപ്പെടുത്തിയത് സെപ്റ്റംബർ ഏഴിനാണ്. അന്ന് ആകെ 15 ലക്ഷത്തിലധികം ആളുകൾ (15,52,761) യാത്ര ചെയ്തപ്പോൾ പ്രിയദർശിനി ടിക്കറ്റ് മൂല്യം 3.29 കോടി രൂപയായിരുന്നു.
ജൂലൈ ആറിലെ 15.28 ലക്ഷമെന്ന റിക്കാർഡാണ് ഇതിലൂടെ തിരുത്തിയത്. ഞായറാഴ്ച ഉൾപ്പെടാത്ത പതിനാലാം ആഴ്ചയിലെ ആറ് ദിവസത്തെ കണക്കുകളിൽ, പ്രതിദിന യാത്രക്കാരുടെ എണ്ണം 14.96 ലക്ഷമാണ്.
ആദ്യ ആഴ്ചയെ അപേക്ഷിച്ച് യാത്രക്കാരുടെ എണ്ണത്തിൽ 29.4 ശതമാനവും മൂല്യത്തിൽ 29.2 ശതമാനവും മുന്നിലാണിത്. ഇതിനൊപ്പം സെപ്റ്റംബറിലെ പ്രതിദിന കളക്‌ഷൻ ശരാശരി 5.75 കോടി രൂപയാണ്. ജൂലൈയിലെ 5.45 കോടി, ഓഗസ്റ്റിലെ 5.43 കോടി എന്നീ മാസങ്ങളെ അപേക്ഷിച്ച് പദ്ധതി ആരംഭിച്ചതിന് ശേഷമുള്ള ഏറ്റവും മികച്ച നിരക്കാണിത്.
എല്ലാവർക്കും ഒരിടം
ഓർഡിനറി ബസുകളിലെ ആകെ യാത്രക്കാരിൽ സൗജന്യ യാത്രക്കാരുടെ വിഹിതം ആദ്യ ആഴ്ചയിലെ 62 ശതമാനത്തിൽനിന്ന് നിലവിൽ 68.9 ശതമാനമായി ഉയർന്ന് സ്ഥിരത കൈവരിച്ചു. സൗജന്യ യാത്രക്കാരുടെ വർധന ടിക്കറ്റെടുത്ത് യാത്ര ചെയ്യുന്നവരെ ബാധിച്ചിട്ടില്ലെന്നും കണക്കുകൾ വ്യക്തമാക്കുന്നു.
ഓർഡിനറി സർവീസുകളിലെ പുരുഷ യാത്രക്കാരുടെ എണ്ണം ആദ്യ ആഴ്ചയിലെ പ്രതിദിന ശരാശരിയായ 6.09 ലക്ഷത്തിൽനിന്ന് പതിമൂന്നാം ആഴ്ചയിൽ 6.19 ലക്ഷമായി സ്ഥിരമായി തുടരുകയാണ്. അൽപം വർധനയാണ് ഉണ്ടായത്. എല്ലാ സർവീസുകളിലുമായുള്ള ആകെ യാത്രക്കാരുടെ എണ്ണം ആദ്യ ആഴ്ചയിലെ 24.66 ലക്ഷത്തിൽ നിന്ന് 27.63 ലക്ഷമായി വർധിച്ചു. 12.1 ശതമാനം വർധന.
ജനങ്ങളുടെ അനുഭവങ്ങൾ, സർക്കാരിന്‍റെ ചാരിതാർഥ്യം
സംസ്ഥാനത്ത് ഏറ്റവും കൂടുതൽ കെഎസ്ആർടിസി ബസുകൾ സർവീസ് നടത്തുന്ന തലസ്ഥാനത്ത് നിരവധി വനിതകളാണ് പദ്ധതിയെക്കുറിച്ച് വാചാലരാകുന്നത്. യാത്രാച്ചെലവ് ഇല്ലാതായതോടെ ജീവിതത്തിലുണ്ടായ മാറ്റങ്ങളെക്കുറിച്ച് അവർ സാക്ഷ്യപ്പെടുത്തുമ്പോൾ ഒരു ജനപ്രതിനിധി എന്ന നിലയിൽ എനിക്ക് ഏറെ സന്തോഷമുണ്ട്.
അന്നന്നത്തെ അന്നത്തിന് വക കണ്ടെത്തുന്ന പേട്ട സ്വദേശിനിയായ ലോട്ടറി വിൽപനക്കാരി ശാരദാമണിയാണ് അതിലെ ആദ്യത്തെ ഉദാഹരണം. കിലോമീറ്ററുകൾ നടന്ന് ലോട്ടറി വിറ്റാലും ദിവസവും കുറഞ്ഞത് 60 രൂപയെങ്കിലും ബസ് കൂലിയായി നൽകേണ്ടിയിരുന്ന അവർക്ക് യാത്രാച്ചെലവ് മിച്ചം പിടിക്കാൻ കഴിയുന്നത് വലിയ അനുഗ്രഹമാണ്. പേട്ടയിൽനിന്ന് കിഴക്കേക്കോട്ടയിലേക്കുള്ള
ഓർഡിനറി ബസ് യാത്രയിൽ പൂജ്യം രൂപയുടെ ടിക്കറ്റ് ലഭിച്ചപ്പോഴാണ് അവർക്ക് ഈ പദ്ധതിയുടെ യാഥാർഥ്യം മനസിലായത്. ഇപ്പോൾ വൈകുന്നേരം വീട്ടിലേക്ക് മടങ്ങുമ്പോൾ, മിച്ചംപിടിക്കുന്ന തുക ഉപയോഗിച്ച് കുട്ടികൾക്ക് പലഹാരങ്ങളോ കറിയോ വാങ്ങാൻ കഴിയുന്നുണ്ടെന്ന് അവർ പറയുന്നത് കേൾക്കുമ്പോൾ അത് യുഡിഎഫ് സർക്കാരിന് അഭിമാനമായി മാറുന്നു.
നെടുമങ്ങാടു നിന്ന് നഗരത്തിലെ കോളജിൽ വന്ന് പഠിക്കുന്ന അഞ്ജലി എന്ന വിദ്യാർഥിനിയുടെ വാക്കുകളും ഞാൻ കേട്ടു. കൂലിപ്പണിക്കാരനായ അച്ഛനോട് ദിവസവും വലിയൊരു തുക ബസ് കൂലി ചോദിക്കാൻ മടിച്ചിരുന്ന അഞ്ജലിക്ക് പലപ്പോഴും ക്ലാസുകൾ ഒഴിവാക്കേണ്ടി വന്നിട്ടുണ്ട്. കോളജ് ഫീസിനേക്കാൾ ആ കുട്ടിയെ അലട്ടിയിരുന്നത് യാത്രാച്ചെലവായിരുന്നു. എന്നാൽ സൗജന്യ യാത്രാ പദ്ധതി ഒരു വലിയ ഭാരം ഇല്ലാതാക്കിയെന്ന് അഞ്ജലി പറയുന്നു.
നഗരത്തിലെ മൂന്ന് വീടുകളിൽ ജോലി ചെയ്യുന്ന സുലേഖയ്ക്കും പറയാനുണ്ടായിരുന്നത് സമാനമായ അനുഭവമാണ്. രാവിലെയും ഉച്ചയ്ക്കുമായി ദിവസവും മൂന്നോ നാലോ തവണ ബസിൽ യാത്ര ചെയ്യേണ്ടിവരുമ്പോൾ വരുമാനത്തിന്‍റെ വലിയൊരു പങ്ക് അതിനായി ചിലവാകുമായിരുന്നു.ബസുകളിൽ സ്ത്രീകളുടെ എണ്ണം വർധിച്ചത് സുരക്ഷാ ബോധം വർധിപ്പിച്ചുവെന്നും പ്രത്യേകിച്ചും രാത്രിയാത്രകളിലെ ഭയം ഒഴിവാക്കാൻ ഇത് സഹായിച്ചതായും സുലേഖ പറഞ്ഞു.
സാമൂഹികവും സാമ്പത്തികവുമായ മാറ്റങ്ങൾ
യാത്രാച്ചെലവ് ഇനത്തിൽ ലാഭിക്കുന്ന തുക ഓരോ കുടുംബത്തിന്‍റെയും കൈയിലെത്തുന്ന നേരിട്ടുള്ള വരുമാനമായി മാറി എന്നതാണ് ഈ പദ്ധതിയുടെ ഏറ്റവും പ്രധാന സാമൂഹിക സാമ്പത്തിക നേട്ടം. ലക്ഷക്കണക്കിന് സ്ത്രീകൾക്ക് പ്രതിമാസം ഗണ്യമായ തുക കുടുംബ ബജറ്റിൽ മിച്ചം വയ്ക്കാനായി.യാത്രാച്ചെലവ് എന്ന തടസം നീങ്ങിയപ്പോൾ സ്ത്രീകളുടെ തൊഴിൽ പങ്കാളിത്തം വർധിച്ചു.
കെഎസ്ആർടിസി യാത്രക്കാരിൽ മൂന്നിൽ രണ്ടു പേരും സ്ത്രീകളാണ് എന്നതിനാൽ പദ്ധതിയുടെ ഗുണഫലം സംസ്ഥാനത്തെ ഓരോ വീട്ടിലും നേരിട്ടെത്തിയെന്നതാണ് വസ്തുത. വിദ്യാഭ്യാസത്തിനും നൈപുണ്യ പരിശീലനത്തിനും സംരംഭക പ്രവർത്തനങ്ങൾക്കും കൂടുതൽ സ്ത്രീകൾ മുന്നോട്ടുവന്നു.
വീടിന്‍റെ നാല് ചുവരുകൾക്കുള്ളിൽ ഒതുങ്ങാതെ, ആത്മവിശ്വാസത്തോടെയും അന്തസോടെയും പൊതുഇടങ്ങളിലേക്ക് ഇറങ്ങാനുള്ള സ്വാതന്ത്ര്യം കൂടിയായി പ്രിയദർശിനി പദ്ധതി മാറി.
പ്രദേശിക സമ്പദ്‌വ്യവസ്ഥയ്ക്ക് വലിയ ഉണർവ്
സ്ത്രീകൾ ലാഭിക്കുന്ന യാത്രാച്ചെലവ് പ്രാദേശിക വിപണികളിലേക്കും ചെറുകിട വ്യാപാരങ്ങളിലേക്കും ഒഴുകുമ്പോൾ അത് പ്രാദേശിക സമ്പദ്‌വ്യവസ്ഥയ്ക്ക് വലിയ ഉണർവാണ് നൽകുന്നത്. സ്ത്രീകളുടെ തൊഴിൽ പങ്കാളിത്തം വർധിക്കുന്നത് കുടുംബ വരുമാനത്തെയും അതുവഴി സംസ്ഥാനത്തിന്‍റെ മൊത്തം സാമ്പത്തിക വളർച്ചയെയും ശക്തിപ്പെടുത്തുന്നു.
സ്വകാര്യ വാഹനങ്ങളിൽനിന്ന് പൊതുഗതാഗതത്തിലേക്കുള്ള മാറ്റം ഇന്ധന ഉപഭോഗവും കാർബൺ ബഹിർഗമനവും ഗതാഗതക്കുരുക്കും ഗണ്യമായി കുറച്ചിട്ടുണ്ട്. ചുരുക്കത്തിൽ, കേരളത്തിന്‍റെ ഹരിത ലക്ഷ്യങ്ങളിലേക്കും സാമ്പത്തിക വളർച്ചയിലേക്കുമുള്ള സുപ്രധാന ചുവടുവയ്പായി പ്രിയദർശിനി പദ്ധതി മാറിയിരിക്കുന്നു എന്ന് സർക്കാരിന് അഭിമാനത്തോടെ പറയാം.
Leader Page
കേരളത്തിന്‍റെ ഭൂവിനിയോഗവും കാലാവസ്ഥയും അനുദിനം മാറുകയാണ് ശക്തമായ മഴ, വെള്ളപ്പൊക്കം, പ്രളയം എന്ന അവസ്ഥയിൽനിന്നും വരൾച്ചയിലേക്കും ജലക്ഷാമത്തിലേക്ക് മാറുന്നത് ശരവേഗത്തിലാണ്. ഈ വർഷവും കഴിഞ്ഞ വർഷവും ജലവൈദ്യുത പദ്ധതികൾ എല്ലാം കൂടുതലായി സ്ഥിതിചെയ്യുന്ന ഇടുക്കി ജില്ലയിൽ 50 ശതമാനത്തിലേറെയാണ് മഴക്കുറവ്.
ഡാമുകളിൽ നീരൊഴുക്കില്ല. ജലവിതാനം കുറവായതുകൊണ്ട് വൈദ്യുതോത്പാദനവും കുറഞ്ഞു. ആഗോളതാപനവും കൂടിയായപ്പോൾ വടക്കേ ഇന്ത്യയിൽ അപ്രതീക്ഷിതമായി അതികഠിനമായ മഴ. കൽക്കരിപ്പാടങ്ങൾ വെള്ളത്തിനടിയിലായി. അവിടെ മഴ കൊണ്ട് കൽക്കരി വൈദ്യുതി പറ്റുന്നില്ല. ഇവിടെ മഴ ഇല്ലാത്തതുകൊണ്ട് വൈദ്യുതിക്ഷാമം. എത്ര വിരോധാഭാസമാണ് പ്രകൃതി. അതിന്‍റെ നിഗൂഢത അറിഞ്ഞ് മുൻകൂട്ടി തയാറെടുപ്പുകൾ നടത്താനാണ് വർത്തമാനകാലം ആവശ്യപ്പെടുന്നത്.
വൈദ്യുത പ്രതിസന്ധി
ദീർഘകാല കരാറുകൾ വേണ്ടത്ര മുന്നോട്ടു പോയില്ല. സ്വാപ് കരാർ പ്രകാരം, സെപ്റ്റംബർ 30 വരെ മുൻപേ വേനലിൽ നാം വാങ്ങിയ വൈദ്യുതി മറ്റു സംസ്ഥാനങ്ങൾക്ക് തിരികെ നൽകണം. ഇപ്പോൾ ചൂടു കൂടുതലായതിനാൽ രാജ്യത്ത് വൈദ്യുതിക്ക് വലിയ ഡിമാൻഡാണ്. സ്വകാര്യ കന്പനികളാണ് പ്രധാന വിതരണക്കാർ.
സ്പോട്ട് ബാർഗയിനിംഗിലൂടെ വേണം പലപ്പോഴും വൈദ്യുതി ലഭിക്കുന്നത്. 13,500 കിലോവാട്ട് സോളാർ വൈദ്യുതി ഉണ്ടെങ്കിലും പകലാണ് പ്രധാന ഗുണം. രാത്രിയിലേക്ക് കരുതിവയ്ക്കാനുള്ള സ്റ്റോറേജ് സൗകര്യവുമില്ല. സ്റ്റോറേജ് സൗകര്യം ഉണ്ടെങ്കിലും അതും വേണ്ടപോലെ മുന്നോട്ടു പോയില്ല. ചുരുക്കത്തിൽ, പ്രതിസന്ധിക്ക് നിരവധിയാണ് കാരണങ്ങൾ.
പീക് ഹവർ എന്ന ഘടകം
വൈകിട്ട് 6.30 മുതൽ 10.30 വരെയാണ് വൈദ്യുതിയുടെ കൂടുതൽ ഉപഭോഗം നടക്കുന്നത്. അത്തരം മണിക്കൂറുകളാണ് പീക് ഹവർ എന്ന് പറയുന്നത്. ഏകദേശം ഒരു ദിവസം ശരാശരി നാല് മണിക്കൂർ വരെയുണ്ട് ഇത്. പക്ഷേ ചൂട് കൂടുന്പോൾ 6 മുതൽ 7 മണിക്കൂർ വരെ പോകും. ആ സമയത്തേക്ക് ആവശ്യമായ വൈദ്യുതി അളവ് വളരെ കൂടുതലാണ്. വീടുകൾ, കച്ചവട സ്ഥാപനങ്ങൾ, തിയറ്ററുകൾ, മാർക്കറ്റുകൾ, തെരുവുകൾ എന്നിവിടങ്ങളിലേക്ക് വലിയ തോതിൽ വൈദ്യുതി ഉപഭോഗം നടക്കുന്നുണ്ട്.
നിലനിർത്തണം, പച്ചപ്പ്
സമഗ്രവും ശാസ്ത്രീയവുമായ പരിസ്ഥിതി സംരക്ഷണത്തിലൂടെ ഉൗർജപരിപാലനവും സാധ്യമാണ്. പച്ചപ്പ് വർധിപ്പിക്കുകയും ഉള്ളവ പരമാവധി നിലനിർത്തുകയും ചെയ്താൽ ചൂടും അന്തരീക്ഷ താപനിലയും കുറവായിരിക്കും. ഫാനിന്‍റെയും എസിയുടെയുമൊക്കെ ഉപയോഗം കുറയ്ക്കാനാവും. തുടർച്ചയായി എസി ഇടരുത്. രാത്രികാലങ്ങളിൽ ഇലക്‌ട്രിക് വാഹന ചാർജ്, ഇൻഡക‌്ഷൻ കുക്കർ ഉപയോഗം, അയണിംഗ് എന്നിവയെല്ലാം ഒഴിവാക്കണം. എല്ലാവരും ഒന്ന് മന‌സുവച്ചാൽ 300 മെഗാവാട്ട് വരെ വൈദ്യുതി ലാഭിക്കാനാവുമെന്ന് വൈദ്യുതി റെഗുലേഷൻ കമ്മിഷൻ അഭിപ്രായപ്പെടുന്നു.
90 ലക്ഷം കുടുംബങ്ങളിലായി ഒരു ദിവസം ഒരു യൂണിറ്റ് വൈദ്യുതി ലാഭിച്ചാൽ 90 ലക്ഷം യൂണിറ്റ് വൈദ്യുതി കിട്ടുമല്ലോ. വീടുകളിൽ ഫ്രിഡ്ജ് വൈകുന്നേരം 6 മണി മുതൽ 10 മണി വരെ ഓഫാക്കി ഇട്ടാലും ഫ്രിഡ്ജിനുള്ളിൽ ഉള്ള വസ്തുക്കൾ കേടാകില്ല എന്നതാണ് ലേഖകന്‍റെയും മറ്റുപലരുടെയും അനുഭവം. ഇൻഡക‌്ഷൻ കുക്കറുകൾക്കു പകരം ചൂടാറാ പെട്ടി (ഹോട്ട് ബോക്സ്) ലഭ്യമാണ്
വീടുകളിൽ ലൈറ്റുകളുടെയും ഫാനുകളുടെയും ഉപഭോഗം നിയന്ത്രിക്കണം. വീടുകളിലും സ്ഥാപനങ്ങളിലും ആഡംബര ഫാൻസി ലൈറ്റുകൾ വറുതിക്കാലത്ത് പ്രകാശിപ്പിക്കുന്നത് കുറയ്ക്കണം.
ആലോചിക്കണം, ചെറുകിട സംവിധാനങ്ങളെക്കുറിച്ച്
കാറ്റ്, തിരമാല, സോളാർ മാലിന്യം എന്നിവയിൽനിന്നുള്ള വൈദ്യുതി ഉത്പാദനം ആവശ്യമാണ്. നെയ്യാറ്റിൻകര മെഡിസിറ്റിയിൽ വേസ്റ്റിൽനിന്നും വൈദ്യുതി ഉത്പാദിപ്പിക്കാനുള്ള പ്ലാന്‍റ് തയാറായി വരുന്നു. ജില്ലാ പഞ്ചായത്തുകൾ ഉൾപ്പടെയുള്ള തദ്ദേശ സ്വയംഭരണ സ്ഥാപനങ്ങളുടെ നേതൃത്വത്തിൽ ചെറുകിട ഉൗർജോത്പാദന സംവിധാനങ്ങൾ ആലോചിക്കണം. എറണാകുളം ജില്ലയിലെ ചേന്നമംഗലം ഗ്രാമപഞ്ചായത്തിൽ നടന്നതുപോലെയുള്ള ഉൗർജസുരക്ഷാ സർവേ എല്ലായിടത്തും വ്യാപകമാക്കണം. കമ്യൂണിറ്റി സ്റ്റോറേജ് സംവിധാനം വിപുലപ്പെടുത്തണം.
സ്മാർട്ട് മീറ്ററുകളുടെ സാധ്യത പ്രയോജനപ്പെടുത്തി വൈദ്യുതി മോഷണവും നഷ്ടവും കണ്ടുപിടിക്കണം. സ്കൂളുകൾ, കോളജുകൾ എന്നിവ കേന്ദ്രീകരിച്ച് പരിസ്ഥിതി ഉൗർജ ബോധവത്കരണ പരിപാടികൾ സംഘടിപ്പിക്കണം. ഉൗർജ ആഡിറ്റ്, ഉൗർജ ബജറ്റ്, ഉൗർജ അവാർഡ്, ഉൗർജക്ഷമത സർട്ടിഫിക്കേഷൻ തുടങ്ങിയ പദ്ധതികൾ ആരംഭിക്കണം. പരിസ്ഥിതി സൗഹൃദ ഭവനങ്ങൾ, കാന്പസുകൾ, സ്ഥാപനങ്ങൾ എന്നിവ പരമാവധി പ്രോത്സാഹിപ്പിക്കണം. സമഗ്രമായ പരിസ്ഥിതി ഉൗർജനയം രൂപീകരിക്കണം. എനർജി മാനേജ്മെന്റ് സെന്‍റർ എന്നിവയുടെ നേതൃത്വത്തിൽ ഗവേഷണങ്ങൾ നടക്കണം. ഒരു വാർഡിന് നാലു പേർ എന്ന ക്രമത്തിൽ സംസ്ഥാനത്താകെ ഒരു ലക്ഷം പേരെ പരിശീലിപ്പിച്ച് ചുമതല നൽകാം.
ഉൗർജ ഭൂപടവും സർവേയും
ജലം, വനം, പരിസ്ഥിതി, കാലാവസ്ഥ, ആരോഗ്യം, ദുരന്തപരിപാലനം, ഉൗർജം എന്നീ വിഷയങ്ങൾ ചർച്ച ചെയ്യാൻ സ്പെഷ്യൽ ഗ്രാമസഭകളും വാർഡ് സഭകളും ചേരണം. ഉൗർജ ഭൂപടവും സർവേയും സംഘടിപ്പിക്കണം. റോഡ് നിർമാണത്തിൽ ഉൾപ്പടെ പരമാവധി പരിസ്ഥിതി സംരക്ഷണം ഉറപ്പാക്കണം. തൈകൾ വച്ചുപിടിപ്പിച്ച് പാതയോരങ്ങൾ കൂടുതൽ പച്ചപ്പ് ഉണ്ടാക്കിയാൽ പരിസ്ഥിതിയെയും സംരക്ഷിക്കാം. ചൂടിനെ പ്രതിരോധിക്കാനും കഴിയും.
പരിസ്ഥിതി ഉൗർജ ക്ഷമത സൗഹൃദ ഉത്പന്ന യൂണിറ്റുകൾ ആരംഭിക്കണം. സ്റ്റാർട്ടപ്പുകളും ഹരിത എന്‍റർപ്രൈസുകളും തുടങ്ങണം. ഡാമുകളും മറ്റിടങ്ങളും ഡീബിൽറ്റ് ചെയ്ത് കൂടുതൽ ജലം സംഭരിക്കുവാനുള്ള സാഹചര്യമുണ്ടാക്കണം. പരിസ്ഥിതി സൗഹൃദ കെട്ടിടനിർമാണ അസംസ്കൃത വസ്തുക്കൾ പരമാവധി പ്രോത്സാഹിപ്പിക്കണം.
തീരം മുതൽ മലനാട് വരെയുള്ള പ്രദേശങ്ങളെ വിവിധ കാർഷിക പരിസ്ഥിതി യൂണിറ്റുകളായി വേർതിരിച്ച് പദ്ധതികൾ ഉണ്ടാക്കണം. പൊതുഗതാഗതം ആകർഷകമാക്കണം. കാലാവസ്ഥാ മുന്നറിയിപ്പ് സംവിധാനം മെച്ചപ്പെടുത്തി ജനങ്ങൾക്ക് അതത് സമയം വിവരങ്ങൾ നൽകണം. പുതിയ ശീലങ്ങളും മനോഭാവ മാറ്റങ്ങളും കൊണ്ടുവരാനുള്ള പരിശീലന-ശക്തീകരണ പരിപാടികൾ നടപ്പിലാക്കണം.
മണ്ണും വെള്ളവും ജൈവസന്പത്തുക്കളും ഉൾപ്പടെയുള്ള ആവാസവ്യൂഹങ്ങളെ പരമാവധി നിലനിർത്തണം. ചൂടിനെ പ്രതിരോധിച്ചാൽ ഉൗർജ ഉപഭോഗം കുറയ്ക്കാൻ കഴിയും. വിദ്യാർഥികളുടെ പാഠ്യപദ്ധതിയുടെ ഭാഗമായി പരിസ്ഥിതി, ഉൗർജ സംരക്ഷണം എന്നീ വിഷയങ്ങൾ ഉൾപ്പെടുത്തണം. ഗ്രീൻ അംബാസഡർമാരായി വിദ്യാർഥികൾക്ക് ചുമതല നൽകണം.
പകരംവയ്ക്കാനാകാത്ത വൈദ്യുതിയും ജലവും
വൈദ്യുതിക്കും ജലത്തിനും പകരം വയ്ക്കാൻ ഒന്നുമില്ല. പക്ഷേ, നാം എല്ലാവരും കൂടി വിചാരിച്ചാൽ ജലം, ഉൗർജം എന്നിവ ഉൾപ്പടെയുള്ള പരിസ്ഥിതി ഘടകങ്ങളെ കൃത്രിമമായി സൃഷ്ടിക്കാനാവില്ല എന്നതാണ് പ്രകൃതിയുടെ ബാലപാഠം. കാലാവസ്ഥാ മാറ്റം മുന്നിലെ യാഥാർഥ്യമാണ്. വസന്തകാലത്ത് ആഘോഷിച്ചും വറുതിക്കാലത്ത് പരിമിതപ്പെടുത്തി ജീവിക്കാനും നാം പഠിച്ചുകഴിഞ്ഞു.
നാം കരുതുന്ന ഓരോ യൂണിറ്റ് വൈദ്യുതിയും നമ്മുടെതന്നെ മുന്നിലെ ഉപഭോഗത്തിനുള്ള ഉൗർജമാണ്. മലകളും വയലുകളും പുഴകളും തണ്ണീർത്തടങ്ങളും കായലുകളും കുളങ്ങളും തോടുകളും വനങ്ങളും കാവുകളും ഉൾപ്പടെയുള്ള പ്രകൃതിവിഭവങ്ങളെ പരമാവധി സംരക്ഷിക്കപ്പെടണം. പ്രകൃതിവിഭവ സംരക്ഷണം ഒരു സംസ്കാരമാണ് അവ രൂപപ്പെടുത്താനാണ് നാം ശ്രമിക്കേണ്ടത്. നമുക്ക് പരിസ്ഥിതി, ഉൗർജ സാക്ഷരരാകാം.
ഒരാൾ മൂന്ന് ഓക്സിജൻ സിലണ്ടറിന് ഉള്ളിലുള്ള ഓക്സിജന് തുല്യമായ വായു ഓരോ ദിവസവും ഉപയോഗിക്കുന്നുണ്ട്. ഒരിഞ്ചു കനത്തിൽ സ്വാഭാവികമായി മണ്ണുണ്ടാക്കാൻ ആയിരം വർഷം വേണം. ഒരു മില്ലിമീറ്റർ പോലും കൃത്രിമമായി സൃഷ്ടിക്കാനാവില്ല. ലാബിൽ ഇരിക്കുന്ന ഹൈഡ്രജനും ഓക്സിജനും ചേർത്താൽ ജലമാക്കാം. പക്ഷേ, അവ ഉപയോഗിച്ച് നാടിന്‍റെയും നാട്ടുകാരുടെ ദാഹം മാറ്റാനാവില്ല. മണ്ണും വെള്ളവും വായുവും എല്ലാം പ്രകൃതിയുടെ തനതായ താളക്രമത്തിൽ നിരവധി ഘടകങ്ങളുടെ പരസ്പര പ്രവർത്തന-പ്രതിപ്രവർത്തനങ്ങളിലൂടെയാണ് രൂപപ്പെടുന്നത്. ഓരോ കണം ഉൗർജവും ഓരോ തരി മണ്ണും ഓരോ തുള്ളി ജലവും ജാഗ്രതയോടെ കരുതുകയെന്നതാണ് കാലത്തിന്‍റെ ആവശ്യം.
Leader Page
അടുത്ത നിയമസഭാ തെരഞ്ഞെടുപ്പിന് രണ്ടുവർഷം ശേഷിക്കെ, കർണാടക രാഷ്‌ട്രീയത്തിൽ നിർണായക നീക്കങ്ങൾക്ക് തുടക്കമായിരിക്കുന്നു. ബിജെപിയുടെ തകർക്കാനാകാത്ത ശക്തിദുർഗമായ തീരദേശ കർണാടകയിലേക്ക് കടന്നുകയറാൻ കോൺഗ്രസിലെ പ്രമുഖ തന്ത്രജ്ഞനും മുഖ്യമന്ത്രിയുമായ ഡി.കെ. ശിവകുമാർ വ്യക്തമായ പദ്ധതികളോടെ രംഗത്തിറങ്ങിക്കഴിഞ്ഞു. മുഖ്യമന്ത്രിയായി സ്ഥാനമേറ്റ് 100 ദിവസം പിന്നിട്ടതിന്‍റെ ഭാഗമായി, ചരിത്രത്തിലാദ്യമായി മംഗളൂരുവിൽ പ്രത്യേക മന്ത്രിസഭാ യോഗം ചേർന്നത് ഈ നീക്കത്തിന്‍റെ കൃത്യമായ സൂചനയാണ്.
2024ലെ ലോക്‌സഭാ തെരഞ്ഞെടുപ്പിലടക്കം ദക്ഷിണ കന്നഡ, ഉഡുപ്പി-ചിക്കമഗളൂരു മണ്ഡലങ്ങളിൽ വൻ വിജയം നേടിയ ബിജെപിയുടെ പരമ്പരാഗത വോട്ട് ബാങ്കിലേക്ക് കടന്നുകയറാനാണ് കോൺഗ്രസ് ലക്ഷ്യമിടുന്നത്. ഇതിനായി ബംഗളൂരുവിനു പുറത്തുള്ള ആദ്യ മന്ത്രിസഭാ യോഗത്തിന് മംഗളൂരു പടിയിലെ ‘പ്രജാ സൗധ’ വേദിയായി. മുഖ്യമന്ത്രിയും മന്ത്രിമാരും തുറന്ന ബസിൽ യോഗസ്ഥലത്തേക്കെത്തിയത് വലിയ ജനശ്രദ്ധ നേടി.
"ടീം കർണാടക' എന്ന ആശയം മുൻനിർത്തി വികേന്ദ്രീകൃത വികസനം ഉറപ്പാക്കാനാണു സർക്കാർ ശ്രമിക്കുന്നതെന്ന് യോഗത്തിനു മുന്നോടിയായി ഡി.കെ. ശിവകുമാർ വ്യക്തമാക്കി. മുതിർന്ന നേതാവ് സിദ്ധരാമയ്യയുടെ ‘അഹിന്ദ’ (പിന്നാക്ക-ന്യൂനപക്ഷ-ദളിത്) കൂട്ടുകെട്ടിനുപുറമെ, ആർഎസ്എസ് ശക്തികേന്ദ്രങ്ങളിൽ ഹൈന്ദവ ക്ഷേത്രങ്ങളുടെ വികസനവും പ്രാദേശിക വികാരങ്ങളും മുൻനിർത്തി സ്വന്തം സ്വാധീനം ഉറപ്പിക്കാനാണു ഡികെയുടെ ശ്രമം.
തുളുനാടിന് ഔദ്യോഗിക ഭാഷാപെരുമ
തീരദേശ കർണാടകയുടെ പതിറ്റാണ്ടുകളായുള്ള സാംസ്കാരിക ആവശ്യത്തിനാണ് ഒടുവിൽ അംഗീകാരമായിരിക്കുന്നത്. ദക്ഷിണ കന്നഡ, ഉഡുപ്പി ജില്ലകളിൽ തുളു ഭാഷയെ കന്നഡയ്ക്കൊപ്പം കർണാടകയുടെ രണ്ടാമത്തെ ഔദ്യോഗിക ഭാഷയായി അംഗീകരിക്കാൻ പ്രത്യേക മന്ത്രിസഭായോഗം തീരുമാനിച്ചു.
2008ൽ ബിജെപി നേതാവും മുൻ മുഖ്യമന്ത്രിയുമായ ബി.എസ്. യെദിയൂരപ്പ വാഗ്ദാനം ചെയ്ത കാര്യമാണിത്. ദീർഘകാലം ഭരണത്തിലിരുന്നിട്ടും ബിജെപി നടപ്പാക്കാത്ത വാഗ്ദാനം യാഥാർഥ്യമാക്കിയതിലൂടെ വലിയൊരു രാഷ്‌ട്രീയനേട്ടമാണ് ഡി.കെ. ശിവകുമാർ സ്വന്തമാക്കിയത്. “മുൻ സർക്കാരുകൾ എന്തുകൊണ്ട് ഇതു ചെയ്തില്ലെന്ന് ചോദിക്കുന്നില്ല; ജനങ്ങളോടു ഞങ്ങൾക്ക് പ്രതിബദ്ധതയുണ്ട്, വികാരങ്ങളെ വച്ച് ഞങ്ങൾ രാഷ്‌ട്രീയം കളിക്കാറില്ല,” എന്നായിരുന്നു തീരുമാനത്തോട് ഡികെയുടെ പ്രതികരണം.
ഭാഷയുടെ പ്രചാരണത്തിനും വിവർത്തനത്തിനും പരിശീലനങ്ങൾക്കുമായി പ്രതിവർഷം 82 ലക്ഷം രൂപ അനുവദിക്കാനും സർക്കാർ തീരുമാനിച്ചു. ഇത് തുളു ഭാഷയെ ഭരണഘടനയുടെ എട്ടാം ഷെഡ്യൂളിൽ ഉൾപ്പെടുത്താനുള്ള ശ്രമങ്ങൾക്ക് വേഗം കൂട്ടും. കൂടാതെ, ഭാഷാസ്വത്വത്തെ ചേർത്തുപിടിച്ചുകൊണ്ട് ‘ദക്ഷിണ കന്നഡ’ ജില്ലയെ ‘മംഗളൂരു’ എന്ന് പുനർനാമകരണം ചെയ്യാനുള്ള കരട് വിജ്ഞാപനം പുറപ്പെടുവിക്കാനും മന്ത്രിസഭായോഗം തീരുമാനിച്ചു.
ഇതിനു പുറമെ തീരദേശ ജില്ലകളുടെ വികസനത്തിന് 32,611 കോടിയുടെ പാക്കേജും പ്രഖ്യാപിച്ചിട്ടുണ്ട്. വിവിധ ക്ഷേത്രങ്ങളുടെ വികസനം, പുത്തൂരിൽ 549.79 കോടി രൂപ ചെലവിൽ പുതിയ സർക്കാർ മെഡിക്കൽ കോളജും ആശുപത്രിയും വിവിധ റോഡ് വികസന പദ്ധതികളും ഇതിലുൾപ്പെടുന്നു. മംഗളൂരു ഫിഷറീസ് കോളജിനെ സർവകലാശാലയായി ഉയർത്താനും തീരുമാനിച്ചു.
തീരദേശ രാഷ്‌ട്രീയവും ബിജെപിയുടെ ആശങ്കകളും
കഴിഞ്ഞ മൂന്നു പതിറ്റാണ്ടുകളായി ബിജെപിയുടെ അടിയറവില്ലാത്ത കോട്ടയാണ് ദക്ഷിണ കന്നഡയും ഉഡുപ്പിയും. 1991 മുതൽ ബിജെപി കൈയടക്കിവച്ചിരിക്കുന്ന ദക്ഷിണ കന്നഡയിൽ 2024ലും ബിജെപിയുടെ ക്യാപ്റ്റൻ ബ്രിജേഷ് ചൗട്ടയാണു വിജയിച്ചത്. 2023ലെ നിയമസഭാ തെരഞ്ഞെടുപ്പിലും ഉഡുപ്പിയിലെ അഞ്ചു സീറ്റുകളും ദക്ഷിണ കന്നഡയിലെ എട്ടിൽ ആറു സീറ്റുകളും ബിജെപി നേടിയിരുന്നു. എന്നാൽ, വർഗീയ-ആശയപരമായ അജൻഡകൾക്കു മുകളിൽ പ്രാദേശിക വികസനവും സാംസ്കാരികത്തനിമയും ഉയർത്തിക്കാട്ടി കോൺഗ്രസ് നടത്തുന്ന ഈ കടന്നുകയറ്റം ബിജെപിയെ പ്രതിരോധത്തിലാക്കിയിട്ടുണ്ട്.
ആഭ്യന്തരതർക്കങ്ങളിൽ ഉഴലുന്ന ബിജെപി നേതൃത്വം പാർട്ടിയിൽ ഐക്യം പുനഃസ്ഥാപിക്കാനുള്ള ശ്രമങ്ങളിലാണ്. വാല്മീകി കോർപറേഷൻ അഴിമതി, കെപിഎസ്‌സി പരീക്ഷാക്രമക്കേടുകൾ എന്നിവയ്ക്കെതിരേ സംസ്ഥാന പ്രസിഡന്‍റ് ബി.വൈ. വിജയേന്ദ്ര നയിച്ച 200 കിലോമീറ്ററോളം ദൈർഘ്യമുള്ള ‘ബെല്ലാരി ചലോ’ പദയാത്ര വിജയകരമായി പൂർത്തിയായി. വിജയേന്ദ്രയുടെ നേതൃത്വത്തിനെതിരേ ബസനഗൗഡ പാട്ടീൽ യത്നാൽ, കെ.എസ്. ഈശ്വരപ്പ തുടങ്ങിയ മുതിർന്ന നേതാക്കൾ പരസ്യമായി രംഗത്തെത്തിയിരുന്നെങ്കിലും പദയാത്രയുടെ സമാപനത്തിൽ ബി.എസ്. യെദിയൂരപ്പ, ബസവരാജ് ബൊമ്മൈ, ആർ. അശോക് എന്നിവർ ഒന്നിച്ചെത്തിയത് വിജയേന്ദ്രയ്ക്ക് കരുത്തായി. എങ്കിലും സഖ്യകക്ഷിയായ ജെഡി-എസുമായി വേണ്ടത്ര ഏകോപനം ഉണ്ടായിരുന്നില്ലെന്ന വിമർശനം നിലനിൽക്കുന്നുണ്ട്.
പുതിയ ജാതി സമവാക്യങ്ങളും ഭാവി രാഷ്‌ട്രീയവും
ജാതി സമവാക്യങ്ങൾക്ക് ഏറെ പ്രാധാന്യമുള്ള സ്ഥലമാണു കർണാടക. പ്രബല വിഭാഗമായ വൊക്കലിഗ സമുദായത്തിൽനിന്നുള്ള ഡി.കെ. ശിവകുമാർ മുഖ്യമന്ത്രിസ്ഥാനത്തേക്ക് എത്തിയതോടെ ജാതി സമവാക്യങ്ങൾ പുനഃപരിശോധിക്കാൻ ബിജെപി നിർബന്ധിതരായിരിക്കുന്നു.
ബിജെപിയുടെ പ്രധാന വോട്ടുബാങ്കായ ലിംഗായത്ത് സമുദായത്തിൽ വിജയേന്ദ്രയുടെ കടന്നുവരവോടെ അസ്വാരസ്യങ്ങൾ ഉടലെടുത്തിട്ടുണ്ട്. വൊക്കലിഗ വോട്ടുകൾ ലക്ഷ്യമിട്ട് ജെഡി-എസ് നേതാവും കേന്ദ്രമന്ത്രിയുമായ എച്ച്.ഡി. കുമാരസ്വാമിയെ മുൻനിർത്തി ബിജെപി ഡി.കെ. ശിവകുമാറിനെ പ്രതിരോധിക്കാൻ ശ്രമിക്കുന്നുണ്ടെങ്കിലും ഒരു വൊക്കലിഗക്കാരൻ മുഖ്യമന്ത്രിയായത് കോൺഗ്രസിന് അനുകൂലമായേക്കാം. സിദ്ധരാമയ്യയെ മുഖ്യമന്ത്രിസ്ഥാനത്തുനിന്ന് മാറ്റിയതിൽ കുറുബ സമുദായത്തിനുള്ള അതൃപ്തി മുതലെടുക്കാൻ ബിജെപി നീക്കം നടത്തുന്നുണ്ട്.
പരമ്പരാഗതമായി കല്യാണ കർണാടക (ഹൈദരാബാദ്-കർണാടക), പഴയ മൈസൂരു മേഖലകളാണ് കോൺഗ്രസിന്‍റെ ഏറ്റവും വലിയ ശക്തികേന്ദ്രങ്ങൾ. എഐസിസി അധ്യക്ഷൻ മല്ലികാർജുൻ ഖാർഗെയുടെ ജന്മനാടായ മധ്യ കർണാടകയിലെ കലാബുരാഗി ഉൾപ്പെടുന്ന കല്യാണ കർണാടകയിൽ തുടർച്ചയായി വലിയ മുന്നേറ്റമാണു പാർട്ടി കാഴ്ചവയ്ക്കുന്നത്. കലാബുരാഗി, ബിദാർ, റായ്ച്ചുർ, ബെല്ലാരി തുടങ്ങി ഏഴു ജില്ലകളിലായി പരന്നുകിടക്കുന്ന ഈ മേഖലയിൽ നിയമസഭാ, ലോക്‌സഭാ തെരഞ്ഞെടുപ്പുകളിൽ ഭൂരിഭാഗം സീറ്റുകളും കോൺഗ്രസ് നേടിയിരുന്നു.
ജെഡി-എസിന്‍റെ കോട്ടയായിരുന്ന പഴയ മൈസൂരു മേഖലയിൽ വൊക്കലിഗ സമുദായത്തിന് പ്രാബല്യമുള്ള മൈസൂരു, മാണ്ഡ്യ, രാമനഗര, ചാമരാജനഗർ തുടങ്ങിയ ജില്ലകളിലും കഴിഞ്ഞ നിയമസഭാ തെരഞ്ഞെടുപ്പിൽ കോൺഗ്രസ് മികച്ച വിജയം നേടിയിരുന്നു.
ലിംഗായത്ത് സമുദായത്തിന് മേധാവിത്വമുള്ള വടക്കൻ കർണാടകയിലെ കിത്തൂർ കർണാടകയിലും (ബോംബെ-കർണാടക) മധ്യ കർണാടകയിലെ ദാവൺഗെരെ, ചിത്രദുർഗ എന്നിവിടങ്ങളിലും സമാനമായ മാറ്റങ്ങൾ പ്രകടമാണ്.
എന്നാൽ, ഈ മേഖലകളിലെ മുൻതൂക്കത്തിനു പുറമെ ബിജെപിയുടെ ആധിപത്യം തകർത്ത് ദക്ഷിണ കന്നഡ, ഉഡുപ്പി തുടങ്ങിയ തീരദേശ കർണാടകയിലും മേൽക്കൈ നേടാനുള്ള നീക്കങ്ങളാണ് കോൺഗ്രസ് നടത്തുന്നത്. ബിജെപിയുടെ സാംസ്കാരിക-വികസന അജൻഡകളെ അവരുടെ സ്വന്തം തട്ടകത്തിൽ വച്ചുതന്നെ വെല്ലുവിളിച്ചുകൊണ്ട് ഡി.കെ. ശിവകുമാർ തുടക്കമിട്ട ഈ നീക്കങ്ങൾ വരുംദിവസങ്ങളിൽ കർണാടക രാഷ്‌ട്രീയത്തിൽ വലിയ മാറ്റങ്ങൾക്കു വഴിവയ്ക്കുമെന്ന് ഉറപ്പാണ്.
Leader Page
വ്യക്തിത്വത്തിന്‍റെ പൂർണതയ്ക്കും സാമൂഹികമായ പരിവർത്തനത്തിനും മാനവരാശി കണ്ടെത്തിയ ഏറ്റവും ശക്തമായ ഉപാധിയാണ് വിദ്യാഭ്യാസം. പാഠപുസ്തകങ്ങളിലെ അറിവ് പകർന്നുനൽകുന്നതിലും പരീക്ഷകൾ നടത്തുന്നതിലും ഒതുങ്ങുന്ന ഒന്നല്ല വിദ്യാലയങ്ങളുടെ ധർമം എന്ന് തലമുറകളായി നാം തിരിച്ചറിയുന്നുണ്ട്. ജീവിതത്തെ നേരിടാനും കർമനിരതരാകാനും പൗരബോധവും നേതൃപാടവവും ഉള്ളവരായി സമൂഹത്തോട് ഉത്തരവാദിത്വമുള്ള പങ്കാളികളാകാനും നമ്മുടെ കുഞ്ഞുങ്ങളെ പ്രാപ്തരാക്കുക എന്ന മഹത്തായ ദൗത്യമാണ് വിദ്യാലയങ്ങൾക്കുള്ളത്.ഇരുപത്തൊന്നാം നൂറ്റാണ്ടിൽ ഈ ഉത്തരവാദിത്വത്തിന്‍റെ ആഴവും പരപ്പും വർധിച്ചിരിക്കുന്നു. സാങ്കേതികവിദ്യയുടെ വിസ്മയകരമായ കുതിച്ചുചാട്ടവും മാറുന്ന സാമൂഹിക യാഥാർഥ്യങ്ങളും, സങ്കീർണമാകുന്ന സാമ്പത്തികഘടനകളും കേവലം പരീക്ഷകൾക്കപ്പുറം വളരുന്ന ഒരു വിദ്യാഭ്യാസക്രമത്തെ ആവശ്യപ്പെടുന്നു.
►മാറ്റത്തിനായുള്ള നവരീതി
ഭാരതത്തിന്‍റെ ‘ദേശീയ വിദ്യാഭ്യാസ നയം 2020’ വിദ്യാഭ്യാസത്തെക്കുറിച്ചുള്ള ഈ നവീനമായ ഉൾക്കാഴ്ചയാണ് പ്രതിഫലിപ്പിക്കുന്നത്. മനഃപാഠമാക്കലിലും വിജ്ഞാനഭാരത്തിലും കുരുങ്ങിക്കിടന്ന പഴയ രീതികളിൽ നിന്ന് മാറി, വിദ്യാർഥികേന്ദ്രീകൃതവും മൂല്യാധിഷ്ഠിതവും വൈവിധ്യമാർന്ന വിഷയങ്ങളെ സമന്വയിപ്പിക്കുന്നതുമായ ഒരു നവരീതിയെ അത് മുന്നോട്ടുവയ്ക്കുന്നു. കേവലമായ പരീക്ഷാവിജയത്തിനപ്പുറം ബൗദ്ധികമായ വളർച്ചയും ധാർമികമായ അവബോധവും സർഗാത്മകതയും ഏതു സാഹചര്യത്തോടും പൊരുത്തപ്പെടാനുള്ള ശേഷിയും ആജീവനാന്ത പഠനത്വരയും ചേരുമ്പോഴേ വിദ്യാഭ്യാസം സാർഥകമാകൂ എന്ന ദർശനമാണ് ഇതിന്‍റെ കാതൽ.
പരമ്പരാഗത വിദ്യാഭ്യാസ മാതൃകകൾ വരുത്തിവച്ച വലിയൊരു പോരായ്മയുണ്ട്; എല്ലാ കുട്ടികളും ഒരേ രീതിയിൽ വളരണമെന്നും അവർക്ക് ഒരേ തരത്തിലുള്ള അനുഭവങ്ങൾ നൽകിയാൽ മതിയെന്നുമുള്ള തെറ്റായ ധാരണയാണത്. ഒരേ പാഠങ്ങൾ ഒരേ വേഗത്തിൽ പഠിച്ച്, സാർവത്രികമായ പരീക്ഷകളിലൂടെ ഒരേ അളവുകോൽവച്ച് എല്ലാവരുടെയും കഴിവ് അളക്കപ്പെടണം എന്ന് നാം ശഠിച്ചുപോന്നു.
ഇത്തരത്തിലുള്ള മാനദണ്ഡങ്ങൾ പൊതുവായ ഒരു ക്രമമുണ്ടാക്കാൻ സഹായിക്കുമെങ്കിലും, അത് വിസ്മരിച്ചുകളയുന്ന ഒരു അടിസ്ഥാന സത്യമുണ്ട്. ഓരോ കുട്ടിയും പഠിക്കുന്നത് ഓരോ രീതിയിലാണ്.
ഓരോ ക്ലാസ്മുറിയും വ്യത്യസ്തമായ കഴിവുകളും താല്പര്യങ്ങളും അഭിലാഷങ്ങളുമുള്ള കുരുന്നുകളാൽ സമൃദ്ധമാണ്. ചിലർ ശാസ്ത്രചിന്തയിലും യുക്തിബോധത്തിലും മികവു പുലർത്തുമ്പോൾ മറ്റുചിലർ ഭാഷയിലും സർഗാത്മകതയിലും നേതൃപാടവത്തിലും ചിത്രകലയിലും സ്പോർട്സിലും സാമൂഹിക ഇടപെടലുകളിലും പുതിയ ആശയങ്ങളുടെ നിർമിതിയിലുമാണ് തിളങ്ങുന്നത്.
വിജയത്തെ സങ്കുചിതമായ ഒരൊറ്റ അളവുകോൽകൊണ്ട് മാത്രം അളക്കുമ്പോൾ, മനുഷ്യപ്രതിഭയുടെ അമൂല്യമായ പല തലങ്ങളും നാം കാണാതെപോകുന്നു.
സമകാലിക വിദ്യാഭ്യാസ മനഃശാസ്ത്രവും പഠനഗവേഷണങ്ങളും ഈ വൈവിധ്യത്തെ അംഗീകരിക്കേണ്ടതിന്‍റെ ആവശ്യകതയാണ് അടിവരയിടുന്നത്. ഓരോ കുട്ടിയുടെയും വ്യത്യസ്തതകളെ തിരിച്ചറിയുകയും അവർക്ക് പൂർണതയിലെത്താനുള്ള അവസരങ്ങൾ ഒരുക്കിക്കൊടുക്കുകയും ചെയ്യുന്ന അന്തരീക്ഷമാണ് യഥാർഥ പഠനവേദി എന്ന് മനഃശാസ്ത്രവും വൈജ്ഞാനിക ശാസ്ത്രവും നമ്മെ ഓർമിപ്പിക്കുന്നു.
►വായനയും സംവാദങ്ങളും
ഇന്ന് വിരൽത്തുമ്പിലെ ഡിജിറ്റൽ സാങ്കേതികവിദ്യയിലൂടെയും ആർട്ടിഫിഷ്യൽ ഇന്‍റലിജൻസിലൂടെയും അറിവുകൾ നിമിഷനേരംകൊണ്ട് ലഭ്യമാകുന്നു. എങ്കിലും, വിവരശേഖരണവും യഥാർഥ വിദ്യാഭ്യാസവും ഒന്നാണെന്ന് നാം തെറ്റിദ്ധരിക്കരുത്. വായനയും ചിന്തയും ആഴത്തിലുള്ള മനനവും ഇന്നും വിജ്ഞാനവികാസത്തിന്‍റെ ആധാരശിലകളാണ്. നിരന്തരമായ വായനാശീലവും മഹത്തായ ആശയങ്ങളുമായുള്ള സംവാദങ്ങളും മാത്രമേ മനുഷ്യന്‍റെ ചിന്താശേഷിയെ ആഴമുള്ളതാക്കൂ. സാങ്കേതികവിദ്യ കൊടികുത്തിവാഴുന്ന ഇക്കാലത്തും കുഞ്ഞുങ്ങളിൽ വായനയുടെ വസന്തം വിടർത്തേണ്ട ചുമതല വിദ്യാലയങ്ങൾക്കുണ്ട്. ഓർമയിൽ എത്രമാത്രം വിവരങ്ങൾ ശേഖരിച്ചുവച്ചിരിക്കുന്നു എന്നതിനെ അടിസ്ഥാനമാക്കിയാകരുത് ഇനി വിദ്യാഭ്യാസത്തിന്‍റെ മൂല്യനിർണയം. ആർജിച്ച ജ്ഞാനത്തെ ജീവിതത്തിലെ വ്യത്യസ്ത സാഹചര്യങ്ങളിൽ എത്രത്തോളം അർഥപൂർണമായി പ്രയോഗിക്കാൻ കഴിയുന്നു എന്നതിലാണ് കാര്യം.
►ശേഷ്യധിഷ്ഠിത വിദ്യാഭ്യാസം
ഈ തിരിച്ചറിവാണ് ‘ശേഷ്യധിഷ്ഠിത വിദ്യാഭ്യാസ’ത്തിലേക്ക് നമ്മെ നയിക്കുന്നത്. ജീവിതത്തിലും സമൂഹത്തിലും വിജയകരമായി പങ്കുചേരാൻ ആവശ്യമായ അറിവും വൈദഗ്ധ്യവും മനോഭാവവും മൂല്യങ്ങളും വളർത്തിയെടുക്കുക എന്നതാണ് ഈ രീതിയുടെ ലക്ഷ്യം.
വിമർശനാത്മകമായ ചിന്ത, സർഗാത്മകത, ആശയവിനിമയശേഷി, പ്രശ്നപരിഹാരപാടവം, വിശകലനശേഷി, ഡിജിറ്റൽ സാക്ഷരത, വൈകാരിക പക്വത, നേതൃത്വഗുണം, തീരുമാനങ്ങളെടുക്കാനുള്ള പ്രാപ്തി, സാമൂഹിക ഉത്തരവാദിത്വം എന്നിവയെല്ലാം ഇതിൽ ഉൾപ്പെടുന്നു.
ഭാവികാലത്തിന് അനുയോജ്യമായ ഇത്തരം സവിശേഷ ശേഷികൾ വളർത്തിയെടുക്കുന്നതിനാണ് അന്താരാഷ്ട്ര വിദ്യാഭ്യാസവേദികൾ ഇന്ന് പ്രാധാന്യം നൽകുന്നത്. ആഴത്തിലുള്ള ധാരണയ്ക്കും അനുഭവങ്ങളിലൂടെയുള്ള പഠനത്തിനും ശേഷികളെ വിലയിരുത്തുന്ന മൂല്യനിർണയത്തിനും ദേശീയ വിദ്യാഭ്യാസ നയം ഊന്നൽനൽകുന്നത് ഇതുകൊണ്ടാണ്.
സാമർഥ്യത്തിനൊപ്പംതന്നെ പ്രധാനമാണ് സ്വഭാവരൂപീകരണവും. ധാർമികതയുടെ തകർച്ചയും സാമൂഹിക ഉത്തരവാദിത്വമില്ലായ്മയും വിശ്വാസ്യതയില്ലായ്മയും സമകാലിക സമൂഹം നേരിടുന്ന വലിയ വെല്ലുവിളികളാണ്. കേവലമായ അക്കാദമിക മികവ് ഒരാളെ നല്ലൊരു പൗരനാക്കി മാറ്റിക്കൊള്ളണമെന്നില്ല. സ്വഭാവശുദ്ധിയില്ലാത്ത സാമർഥ്യം ലക്ഷ്യബോധമില്ലാത്ത അറിവിനെ മാത്രമേ സൃഷ്‌ടിക്കൂ. അത് മനുഷ്യന് ആപത്താണ്. അതുകൊണ്ട്, സത്യസന്ധത, സഹാനുഭൂതി, ഉത്തരവാദിത്വബോധം, പരസ്പര ബഹുമാനം, കാരുണ്യം, പൊതുനന്മയോടുള്ള പ്രതിബദ്ധത തുടങ്ങിയ ഉന്നതമായ മാനുഷികമൂല്യങ്ങൾ മനഃപൂർവം കുട്ടികളിൽ നട്ടുപിടിപ്പിക്കേണ്ടതുണ്ട്.
►ഭാവിയിലെ തൊഴിൽ
ഭാവിയിലെ തൊഴിൽമേഖലയും സാമൂഹികാന്തരീക്ഷവും ഇന്നത്തേതിൽനിന്ന് തികച്ചും വ്യത്യസ്തമായിരിക്കും. ആർട്ടിഫിഷ്യൽ ഇന്‍റലിജൻസ്, ഓട്ടോമേഷൻ, ബയോടെക്നോളജി, പുനരുപയോഗ ഊർജം തുടങ്ങിയ നവീന സാങ്കേതികവിദ്യകൾ ലോകത്തെ മാറ്റിമറിക്കുകയാണ്. മാറ്റങ്ങളോട് ഇണങ്ങിച്ചേരാനുള്ള സന്നദ്ധത, നിരന്തരമായ പഠനം, ബഹുമുഖ വിഷയങ്ങളിലുള്ള അറിവ്, മനുഷ്യകേന്ദ്രീകൃതമായ കഴിവുകൾ എന്നിവയ്ക്കാണ് വരുംകാലത്ത് കൂടുതൽ മൂല്യമുണ്ടാകുക എന്ന് തൊഴിൽപഠനങ്ങൾ വ്യക്തമാക്കുന്നു.
ആരോഗ്യമുള്ള ഒരു സമൂഹത്തിന് പലവിധത്തിലുള്ള പ്രതിഭകൾ ആവശ്യമാണ്. അറിവിന്‍റെ അതിരുകൾ വികസിപ്പിക്കുന്ന ശാസ്ത്രജ്ഞരും പുതിയ അവസരങ്ങൾ സൃഷ്ടിക്കുന്ന സംരംഭകരും സംസ്കാരത്തെ സമ്പന്നമാക്കുന്ന കലാകാരന്മാരും തലമുറകളെ പ്രചോദിപ്പിക്കുന്ന അധ്യാപകരും പ്രശ്നങ്ങൾക്ക് പരിഹാരം കാണുന്ന എൻജിനീയർമാരും സ്ഥാപനങ്ങൾക്ക് കരുത്തുപകരുന്ന ധർമിഷ്ഠരായ നേതാക്കളും സാമൂഹിക സൗഹാർദം കാത്തുസൂക്ഷിക്കുന്ന കരുണയുള്ള പൗരന്മാരും നമുക്ക് വേണം.
Leader Page
തിരുവനന്തപുരം നഗരമധ്യത്തിൽ സ്ഥിതിചെയ്യുന്ന മൃഗശാല ഇപ്പോഴുള്ള സ്ഥലത്തുനിന്ന് കാടുമായി ചേർന്ന ഇടത്തേക്കുമാറ്റി സ്‌ഥാപിക്കണമെന്നും ഈ സ്ഥലം അമേരിക്കയിലെ മാഡിസൺ ചത്വരംപോലെ വികസിപ്പിക്കണമെന്നുമുള്ള മുഖ്യമന്ത്രിയുടെ നിർദേശം ഇപ്പോൾ വലിയ ചർച്ചാവിഷയമായിരിക്കുകയാണല്ലോ.
ഇക്കഴിഞ്ഞ 16ന് റീ ഇമാജിനിംഗ് കേരളം ഇനിഷ്യേറ്റീവ് എന്ന പേരിൽ കേരളത്തിന്‍റെ സമഗ്ര മാറ്റം ലക്ഷ്യമാക്കിയുള്ള പദ്ധതികളെ സംബന്ധിച്ചുള്ള റൗണ്ട് ടേബിൾ കോൺഫറൻസിൽ കേരളത്തിന്‍റെ ഒരു സ്വപ്നപദ്ധതിയായിട്ടാണ് മുഖ്യമന്ത്രി ഇതവതരിപ്പിച്ചത്.
നിലവിലുള്ള മൃഗശാലയിൽ ജീവികൾക്ക് അവരുടേതായ ആവാസ വ്യവസ്ഥയുടെ അഭാവം അവയോടുള്ള ക്രൂരതയാണെന്നും മുഖ്യമന്ത്രി അഭിപ്രായപ്പെട്ടു. ഈ പശ്ചാത്തലത്തിൽ തൃശൂരിലെ പുത്തൂരിൽ, അന്തർദേശീയ നിലവാരത്തിലുള്ള ആവാസവ്യവസ്ഥയോടെ സുവോളജിക്കൽ പാർക്ക് സ്ഥാപിക്കുന്നതിന് ആദ്യന്തം നേതൃത്വം നൽകിയ അനുഭവത്തിന്‍റെ വെളിച്ചത്തിൽ ചില അഭിപ്രായങ്ങൾ രേഖപ്പെടുത്തുന്നത് ഉചിതമാണെന്നു കരുതുന്നു.
തിരുവനന്തപുരം നഗരമധ്യത്തിൽ 30 ഏക്കർ സ്ഥലത്ത് സ്ഥിതിചെയ്യുന്ന മൃഗശാല ദക്ഷിണേന്ത്യയിലെ ഒരു പ്രധാന മൃഗശാലയാണ്. 98 ഇനങ്ങളിലായി ഏതാണ്ട് 1025 ജീവികളെ ഇവിടെ പാർപ്പിച്ചിരിക്കുന്നു. 1859ൽ അന്നത്തെ മ്യൂസിയത്തോടു ചേർന്ന് പ്രധാനമായും വിനോദത്തിനായി പ്രവർത്തനം ആരംഭിച്ച ഈ മൃഗശാല കാലാനുസൃതമായി പരിഷ്കരിക്കപ്പെട്ടാണ് ഇന്നത്തെ നിലയിൽ എത്തിയിട്ടുള്ളത്. കൂട്ടിലടച്ച മൃഗങ്ങളെ തുറസായ എൻക്ലോഷറുകളിലേക്കു മാറ്റുന്ന ആധുനികീകരണം 1995 കാലത്ത് ആരംഭിച്ചത് ഇപ്പോഴും തുടരുന്നു. കേന്ദ്ര മൃഗശാല അഥോറിറ്റിയുടെ അനുമതിയോടെ പ്രവർത്തിക്കുന്ന മൃഗശാല സ്ഥലപരിമിതി നേരിടുന്നു എന്നത്, 98 ഇനത്തിൽപെട്ട 1025 ജീവികൾ 30 ഏക്കർ സ്ഥലത്തു പാർക്കുന്നു എന്നതിൽനിന്നു വ്യക്തമാണ്.
പുത്തൂർ മാതൃക
ലോകമെമ്പാടും മൃഗശാലകളുടെ നടത്തിപ്പ് സംബന്ധിച്ച കാഴ്ചപ്പാടുകൾ അനുദിനം മാറിക്കൊണ്ടിരിക്കുന്ന സാഹചര്യത്തിൽ പരിമിതമായ 30 ഏക്കർ സ്ഥലത്തു വരുത്താവുന്ന ആവാസവ്യവസ്ഥാ പുനഃസൃഷ്‌ടിക്കു വലിയ പരിമിതിയുണ്ട്. സർക്കാർ ചിന്തിക്കുന്നത് മൃഗശാലയുടെ റീ ലൊക്കേഷൻ ആണ്. ഇതിനൊരു വിജയകരമായ മാതൃക ഇപ്പോൾ സർക്കാരിന്‍റെ മുന്നിലുള്ളത്, ഈ വർഷം ഫെബ്രുവരിയിൽ സന്ദർശകർക്ക്‌ തുറന്നുകൊടുത്ത തൃശൂരിലെ പുത്തൂർ സുവോളജിക്കൽ പാർക്കാണ്. തൃശൂർ നഗരമധ്യത്തിൽ 13 ഏക്കർ സ്ഥലത്തു ഒരു നൂറ്റാണ്ടിനു മേലെയായി പ്രവർത്തിച്ചിരുന്ന മൃഗശാല പുത്തൂരിലെ 336 ഏക്കർ വനമേഖലയിലേക്കു മാറ്റി സ്ഥാപിച്ചത് ഒരു ചരിത്രസംഭവമായിട്ടുവേണം കാണാൻ.
മൂന്നരപതിറ്റാണ്ട് നീണ്ട പരിശ്രമത്തിന്‍റെ പരിസമാപ്തിയായിരുന്നു അത്. ആധുനിക മൃഗശാലാ രൂപകല്പനയിൽ ലോകപ്രസിദ്ധനായ ജോൺ കോ യുടെ രൂപകല്പനയിൽ എട്ടു വർഷത്തെ പരിശ്രമത്തിലാണ് ഈ പാർക്ക് രൂപംകൊണ്ടത്. ഇതിനോടകം മൂന്നരലക്ഷത്തിലധികം ആളുകൾ സന്ദർശിച്ച പുത്തൂരിലെ പാർക്കിന്‍റെ രൂപകൽപന വളരെയേറെ ശ്രദ്ധിക്കപ്പെട്ടിട്ടുണ്ട്. മുളങ്കാടുകൾ വെട്ടിമാറ്റിയ ഭൂപ്രദേശത്ത് കഴിഞ്ഞ അഞ്ചുവർഷം കൊണ്ടു നിലവിൽ വന്ന ഹരിതഭംഗി ജോൺ കോ യുടെ പ്രശംസ നേടിയിട്ടുണ്ട്. പാർക്ക് ഇപ്പോൾ നേരിടുന്ന പരിമിതി മൃഗങ്ങളുടെ എണ്ണക്കുറവാണ്.
അനുയോജ്യമായ ഭൂമി എവിടെ?
മൃഗശാല തിരുവനന്തപുരത്തുനിന്ന് റീ ലൊക്കേറ്റ് ചെയ്യണമോ എന്നത് ഭരണതലത്തിൽ തീരുമാനിക്കേണ്ടതാണ്. ഇതിനായി പല കാര്യങ്ങൾ ശ്രദ്ധാപൂർവം പരിഗണിക്കേണ്ടതുണ്ട്.
അനുയോജ്യമായ ഭൂമി കണ്ടെത്തുകയാണ് പ്രധാനം. തൃശൂർ മൃഗശാലയുടെ റീ ലൊക്കേഷൻ അനന്തമായി നീണ്ടത് ഭൂമി പ്രശ്നത്തിലായിരുന്നു. ഇതൊരു അനുഭവപാഠമാണ്. ഇപ്പോൾ ലോകമെമ്പാടും സൂ സഫാരികളാണ് നിലവിൽ വരുന്നത്. ആഫ്രിക്കൻ സഫാരിയൊക്കെ സന്ദർശിച്ചിട്ടുള്ള പൊതുജനങ്ങൾ അത്തരത്തിൽ ഒന്ന് തീർച്ചയായും പ്രതീക്ഷിക്കും.
നെയ്യാറിനടുത്ത് അഗസ്ത്യമലയുടെ ഭാഗമായ കോട്ടൂരിൽ അഗസ്ത്യവനം ബയോളജിക്കൽ പാർക്ക് സ്ഥാപിക്കാനുള്ള ഒരു വലിയ പദ്ധതി 1992ൽ വിഭാവന ചെയ്തു പണി ആരംഭിച്ചെങ്കിലും പിന്നീട് പ്രത്യേക സാഹചര്യത്തിൽ ഉപേക്ഷിക്കപ്പെട്ടു എന്നതും ഈ സാഹചര്യത്തിൽ പഠനവിഷയമാക്കണം. ഇതിനായി സ്ഥാപിച്ച തറക്കല്ല് ഇപ്പോഴും വനംവകുപ്പിൽ സൂക്ഷിച്ചിട്ടുണ്ട്. ഈ പദ്ധതിയുടെ രണ്ടാംഘട്ടമായി തിരുവനന്തപുരം മൃഗശാലയുടെ റീ ലൊക്കേഷനും ലക്ഷ്യമിട്ടിരുന്നു.
കേന്ദ്ര നിയമം അനുസരിച്ചു മൃഗശാല വനസംരക്ഷണ പ്രവർത്തനമായി പ്രഖ്യാപിച്ചിട്ടുണ്ടെങ്കിലും ഈ നിയമ ഭേദഗതി സുപ്രീംകോടതിയിൽ ചോദ്യം ചെയ്യപ്പെട്ടിട്ടുണ്ട്. കേന്ദ്ര വനം-പരിസ്ഥിതി മന്ത്രാലയത്തിന്‍റെ അനുമതിയോടെയാണ് പുത്തൂരിലെ പാർക്ക് സ്‌ഥാപിച്ചിട്ടുള്ളതെന്ന് എടുത്തു പറയേണ്ടിയിരിക്കുന്നു. എന്നാൽ, റിസർവ് വനം ഇതിനായി തുടക്കത്തിലേ പരിഗണിക്കാതിരിക്കുന്നതാകും ഉചിതം. മൃഗശാലയും വനം-വന്യജീവി ആവാസ വ്യവസ്ഥയും തുടർച്ചയായി വരാതിരിക്കുന്നതാണ് അഭികാമ്യം.
ഇതിനായി വനമേഖലയോടടുത്തു നിലവിലുള്ള എസ്റ്റേറ്റുകൾ പരിഗണിക്കാവുന്നതാണ്. ഒരു സൂ സഫാരി സ്ഥാപിക്കുന്നതിന് കുറഞ്ഞത് 600 ഏക്കർ സ്ഥലം ആവശ്യമാണ്. കുറഞ്ഞ ചെലവിൽ ഏറ്റെടുക്കാവുന്ന ഇത്തരം ഭൂമി വനമേഖലയോടു ചേർന്ന് നെയ്യാർ-കോട്ടൂർ ഭാഗത്തു ലഭ്യമാണ്.
സൂ നടത്തിപ്പ് ഒരിക്കലും സന്ദർശക ഫീ മാത്രം കൊണ്ടു സാധ്യമല്ല. കൊമേർഷ്യൽ ഏരിയകൂടി ആവശ്യമാണ്. വനേതര ഭൂമിയിൽ ഇതു സാധ്യമാണ്. അതുപോലെ, സംസ്ഥാന ബജറ്റ് വഴി സ്ഥലമെടുപ്പുൾപ്പടെ ഏതാണ്ട് 750 കോടി രൂപ മുതൽമുടക്കു വേണ്ടിവരുന്ന ഈ പദ്ധതി നടപ്പാക്കുക അസാധ്യമായിരിക്കും. പ്രത്യേക സാമ്പത്തിക സ്രോതസ് കണ്ടെത്തേണ്ടതുണ്ട്.
മഹാരാഷ്‌ട്ര പൂനയ്ക്കടുത്തു ഗോരേവാദ എന്ന സ്ഥലത്തു പബ്ലിക് പ്രൈവറ്റ് വെഞ്ചർ ആയി ഇത്തരത്തിൽ സുവോളജിക്കൽ പാർക്ക് സ്ഥാപിക്കുന്നുണ്ട്. ഇത്തരം പദ്ധതികൾക്കുള്ള മൂലധന സ്വരൂപണത്തിനു വഴികൾ പലതുണ്ട്. പുത്തൂർ സുവോളജിക്കൽ പാർക്കിന്‍റെ ചരിത്രം ഇതെല്ലാം ഉൾക്കൊള്ളുന്നതാണ്.
(റിട്ട. പ്രിൻസിപ്പൽ ചീഫ് ഫോറസ്റ്റ് കൺസർവേറ്ററായ ലേഖകൻ തൃശൂർ
സുവോളജിക്കൽ പാർക്കിന്‍റെ സ്പെഷ്യൽ ഓഫീസറായിരുന്നു)
Leader Page
സത്യദൂതികയായ ദീപിക സാംസ്കാരിക കേരളത്തിന്‍റെ ദീപമാണ്. നിരവധി പ്രതിലോമ ശക്തികൾക്കിടയിൽ, 140 വർഷങ്ങളായി മൂല്യങ്ങളെ മുറുകെപ്പിടിച്ച് ദീപിക മുന്നേറുന്നു.
മരണസംസ്കാരത്തിന്‍റെ കരാളഹസ്തങ്ങളിൽനിന്ന് ഈ നാടിന്‍റെ കവചമായി ജീവന്‍റെ സംസ്കാരമെന്ന പ്രകാശത്തിലേക്ക് നയിക്കുകയാണ് ദീപിക. നിരീശ്വര യുക്തിവാദ സിദ്ധാന്തങ്ങൾക്കും വ്യാജ പ്രത്യയശാസ്ത്ര ചിന്താഗതികൾക്കും അതിരുകവിഞ്ഞ മത തീവ്രവാദ ഭീകര പ്രവർത്തനങ്ങൾക്കുമെതിരേ ദീപികയുടെ തൂലിക ചലിച്ചുകൊണ്ടിരിക്കുന്നു.
ദീപികയോടൊത്ത്, അതിന്‍റെ കിതപ്പിലും കുതിപ്പിലും താങ്ങായി, തണലായി, ആവേശമായി നിലയുറപ്പിക്കാൻ നമുക്ക് പ്രതിജ്ഞാബദ്ധരാകാം.
-ആന്‍റണി തോമസ് മലയിൽ,പ്രസിഡന്‍റ്, ദീപിക ഫ്രണ്ട്സ് ക്ലബ്,
ചങ്ങനാശേരി അതിരൂപത
Leader Page
“മനുഷ്യനിൽ അന്തർലീനമായ പൂർണതയുടെ പ്രകാശനമാണ് വിദ്യാഭ്യാസം” എന്ന് സ്വാമി വിവേകാനന്ദൻ പറഞ്ഞിട്ടുണ്ട്. ഈ വിദ്യാഭ്യാസം എന്ന്, എവിടെ, ആർക്കൊക്കെ ലഭ്യമാകും എന്ന ചോദ്യത്തിനുള്ള ആധുനിക ഉത്തരമാണ് ഡിജിറ്റൽ സാങ്കേതികവിദ്യ.
നാലാം വ്യവസായ വിപ്ലവത്തിന്‍റെ ഈ കാലത്ത് കൃത്രിമബുദ്ധിയും (എഐ) ഡാറ്റാ അനലിറ്റിക്സും ഓട്ടോമേഷനും തൊഴിൽരംഗത്ത് വലിയ മാറ്റങ്ങൾ വരുത്തുമ്പോൾ, ഒരിക്കൽ നേടിയ ബിരുദംകൊണ്ടുമാത്രം ജീവിതകാലം മുഴുവൻ മുന്നോട്ടു പോകാൻ കഴിയില്ലെന്ന യാഥാർഥ്യം വ്യക്തമാകുന്നു. തുടർച്ചയായ പഠനവും പുതിയ നൈപുണ്യങ്ങൾ സ്വായത്തമാക്കലും അത്യന്താപേക്ഷിതമായ ഇക്കാലത്ത് പരമ്പരാഗത ക്ലാസ് മുറികളുടെ അതിരുകൾ ലംഘിച്ച് ഓൺലൈൻ പഠനം വലിയൊരു വിപ്ലവത്തിന് വഴിതുറന്നിരിക്കുകയാണ്.
സാധ്യതകളും അവസരങ്ങളും
ഓൺലൈൻ വിദ്യാഭ്യാസം തുറന്നുനൽകുന്ന സാധ്യതകളും അവസരങ്ങളും അനന്തമാണ്. ഇഷ്‌ടമുള്ള വിഷയങ്ങൾ, ഇഷ്‌ടമുള്ള സമയത്ത്, സ്വന്തം സമയത്ത് പഠിക്കാമെന്നതാണ് ഇതിന്‍റെ ഏറ്റവും വലിയ സവിശേഷത. ഓരോ പഠിതാവിന്‍റെയും ഗ്രഹണശേഷിയും കാര്യങ്ങൾ മനസിലാക്കിയെടുക്കാനുള്ള വേഗവും വ്യത്യസ്തമാണ്; പരമ്പരാഗത ക്ലാസ് മുറികളിൽ വേഗത്തിൽ പഠിക്കുന്നവരോടൊപ്പം എത്താനാകാതെ ചില കുട്ടികൾ വിഷമിക്കുമ്പോൾ, വേഗം കുറഞ്ഞവർക്കായി ക്ലാസുകൾ ഇഴഞ്ഞുനീങ്ങുന്നത് സമർഥരിൽ മടുപ്പുണ്ടാക്കുന്നു. എന്നാൽ, ഓൺലൈൻ പഠനത്തിൽ ഈ പ്രശ്നമില്ല.
സ്വന്തം സൗകര്യത്തിനനുസരിച്ച് സമയം കണ്ടെത്താനും പഠനവേഗം ക്രമീകരിക്കാനും അവസരം നൽകുന്നു. സാമ്പത്തികമോ കുടുംബപരമോ ആയ ബുദ്ധിമുട്ടുകൾ മൂലം വീടുവിട്ടുപോയി പഠിക്കാൻ കഴിയാത്തവർക്കും ഗ്രാമങ്ങളിലുള്ളവർക്കും ജോലി ചെയ്യുന്നവർക്കും വിദേശ സർവകലാശാലകളുടെ കോഴ്സുകളും ക്ലാസുകളും വീട്ടിലിരുന്ന് പഠിക്കാം. യാത്ര, താമസം എന്നിവയ്ക്കുള്ള വലിയ ചെലവുകൾ ഒഴിവാക്കി സൗജന്യമായോ കുറഞ്ഞ ഫീസിലോ പഠനം സാധ്യമാകുന്നുവെന്നത് സാമ്പത്തികമായി വലിയൊരു നേട്ടമാണ്.
ഇന്ത്യയിലെ ‘സ്വയം’ (SWAYAM), ദീക്ഷ, സ്വയംപ്രഭ, എൻപിടിഇഎൽ (NPTEL) തുടങ്ങിയ പ്ലാറ്റ്ഫോമുകളും അന്താരാഷ്ട്ര തലത്തിലെ edX, Coursera, Udemy തുടങ്ങിയ ‘മൂക്ക്’ (MOOC) കോഴ്സുകളും ഉന്നതവിദ്യാഭ്യാസം സാധാരണക്കാരിലേക്ക് എത്തിച്ചു. കേന്ദ്ര വിദ്യാഭ്യാസ മന്ത്രാലയത്തിന്‍റെ ‘സ്വയം’ പ്ലാറ്റ്ഫോമിൽ ഇതിനകം ആറു കോടിയിലധികം എൻറോൾമെന്‍റുകളും 62 ലക്ഷത്തിലധികം സർട്ടിഫിക്കറ്റുകളും രേഖപ്പെടുത്തിക്കഴിഞ്ഞു എന്നത് ഈ രംഗത്തെ ജനപ്രീതി വ്യക്തമാക്കുന്നു.
അഖിലേന്ത്യാ ഉന്നതവിദ്യാഭ്യാസ സർവേ (AISHE) 2023-24 അനുസരിച്ച് രാജ്യത്തെ ഉന്നതവിദ്യാഭ്യാസ എൻറോൾമെന്‍റ് 4.50 കോടിയായി ഉയർന്നെങ്കിലും 18-23 പ്രായപരിധിയിലെ മൊത്ത പ്രവേശന അനുപാതം (GER) 30 ശതമാനം മാത്രമാണ്. 2035ഓടെ ഇത് 50 ശതമാനമാക്കുകയെന്ന ദേശീയ വിദ്യാഭ്യാസ നയത്തിന്‍റെ ലക്ഷ്യം കൈവരിക്കണമെങ്കിൽ ഓൺലൈൻ-വിദൂര പഠനമാർഗങ്ങൾ അനിവാര്യമാണ്. കേവലം പാഠങ്ങൾ കേൾക്കുക എന്നതിലുപരി വീഡിയോ ക്ലാസുകൾ, ഓൺലൈൻ ചർച്ചാവേദികൾ (Discussion Forums), ക്വിസുകൾ എന്നിവ വഴി പഠനം കൂടുതൽ എളുപ്പമാകുന്നു. കൈറ്റിന്‍റെ (KITE) ഹൈടെക് ക്ലാസ് മുറികളിലൂടെയും വിക്‌ടേഴ്സ് ചാനലിലൂടെയും കേരളവും ഈ ഡിജിറ്റൽ രംഗത്ത് മികച്ച മാതൃക സൃഷ്‌ടിച്ചിട്ടുണ്ട്.
വെല്ലുവിളികളും ഡിജിറ്റൽ അസമത്വവും
എന്നാൽ, ഈ വളർച്ചയ്ക്ക് വലിയൊരു മറുവശവുമുണ്ട്. രാജ്യത്ത് നഗരങ്ങളിൽ നൂറു പേർക്ക് 126.80 ഇന്‍റർനെറ്റ് കണക്‌ഷനുകളുള്ളപ്പോൾ ഗ്രാമങ്ങളിൽ അത് 48.31 മാത്രമാണെന്നത് വലിയ ഡിജിറ്റൽ അസമത്വം ചൂണ്ടിക്കാണിക്കുന്നു. അസർ (ASER) 2024 റിപ്പോർട്ട് പ്രകാരം ഗ്രാമീണ മേഖലയിലെ 14-16 വയസുകാരിൽ 89.1 ശതമാനത്തിന്‍റെ വീടുകളിൽ സ്മാർട്ട് ഫോൺ ലഭ്യമാണ്. എങ്കിലും പഠനാവശ്യത്തിന് അതുപയോഗിച്ചത് 57 ശതമാനം കുട്ടികൾ മാത്രമാണ്; 76 ശതമാനവും സമൂഹമാധ്യമങ്ങൾക്കാണ് ഫോൺ ഉപയോഗിച്ചത്. സ്വന്തമായി ഫോണുള്ളവരിൽ ആൺകുട്ടികൾ 36.2 ശതമാനവും പെൺകുട്ടികൾ 26.9 ശതമാനവുമാണെന്ന ലിംഗ അസമത്വവും ഈ റിപ്പോർട്ട് വ്യക്തമാക്കുന്നു. സ്മാർട്ട് ഫോൺ കൈയിലുണ്ടാകുന്നതും അത് പഠനത്തിന് ഉപയോഗിക്കപ്പെടുന്നതും രണ്ടാണ് എന്നതാണ് ഈ കണക്കുകൾ കാണിക്കുന്നത്. ഇതിനു പുറമേ, പഠനസഹായികളിൽ ഭൂരിഭാഗവും ഇംഗ്ലീഷിലായതും സ്ക്രീനിനു മുന്നിലെ അമിത സമയം മൂലം ഉണ്ടാകുന്ന ആരോഗ്യപ്രശ്നങ്ങളും വലിയ വെല്ലുവിളിയാണ്.
ചുരുക്കത്തിൽ, ഓൺലൈൻ പഠനം പരമ്പരാഗത ക്ലാസ് മുറികൾക്ക് പൂർണമായും പകരമാകുന്ന ഒന്നല്ല; മറിച്ച്, അവയെ സഹായിക്കുന്ന മികച്ചൊരു സഹായസംവിധാനം മാത്രമാണ്. ഒരു സാങ്കേതികവിദ്യക്കും അധ്യാപകന്‍റെ സ്ഥാനത്തിനോ മാനുഷിക മൂല്യങ്ങൾക്കോ പകരമാകാൻ കഴിയില്ല. സാങ്കേതികവിദ്യ ലഭ്യമാക്കുന്നതോടൊപ്പം അത് ശരിയായ രീതിയിൽ പഠനത്തിന് ഉപയോഗിക്കപ്പെടുന്നു എന്ന് ഉറപ്പാക്കുകയും വേണം. ഉന്നതവിദ്യാഭ്യാസം സമൂഹത്തിലെ അവസാനത്തെ വിദ്യാർഥിയിലേക്കും തുല്യമായി എത്തുമ്പോൾ മാത്രമേ ‘വിദ്യാധനം സർവധനാൽ പ്രധാനം’ എന്ന പഴമൊഴി പൂർണമായ അർഥത്തിൽ സഫലമാകുകയുള്ളൂ.
(കാഞ്ഞിരപ്പള്ളി അമൽജ്യോതി എൻജിനിയറിംഗ് കോളജിലെ കംപ്യൂട്ടർ സയൻസ് ആൻഡ് എൻജിനിയറിംഗ് വിഭാഗം മേധാവിയാണ് ലേഖകൻ)
Leader Page
പാറ്റകളുടെ സമരം നാളുകളായുള്ള രാഷ്‌ട്രീയ പരാജയത്തിന്‍റെയും വഞ്ചനയുടെയും ഫലമായുണ്ടായതാണെന്ന് പരക്കെ അംഗീകരിക്കപ്പെട്ടതാണ്. ജനങ്ങളെ മറക്കുന്ന, ഒറ്റിക്കൊടുക്കുന്ന ഏത് രാഷ്‌ട്രീയ കെടുകാര്യസ്ഥതയ്ക്കും ഒത്തുതീർപ്പിനും ഈ സമരവുമായി ബന്ധമുണ്ടെന്നു കരുതണം. അതുകൊണ്ടുതന്നെ പാറ്റ സമരം പോലുള്ള മറ്റൊരു ബഹുജന പ്രതിഷേധം ഇനിയും സംഭവിച്ചേക്കാം.
കേരളത്തിലെ വൈദ്യുത പ്രതിസന്ധിയായാലും പരിസ്ഥിതിലോല പ്രദേശത്തെക്കുറിച്ചുള്ള വ്യക്തത ഇല്ലായ്മയായാലും വന്യമൃഗശല്യത്തിന് പരിഹാരമില്ലാത്തതായാലും റോഡപകടങ്ങൾ കുറയ്ക്കാൻ എടുക്കാവുന്ന നടപടികൾപോലും എടുക്കാത്തതും, ഇക്കഴിഞ്ഞ മഴക്കാലത്ത് ഏവർക്കും ബോധ്യപ്പെട്ട കേരളത്തിലെ മാലിന്യപ്രശ്നത്തിന് പരിഹാരം നീണ്ടുപോകുന്നതുമെല്ലാം അത്തരത്തിലുള്ള രാഷ്‌ട്രീയ പരാജയമായിട്ടു വേണം കാണാൻ. ജനങ്ങൾ വെള്ളപ്പൊക്കത്തിൽ വലഞ്ഞപ്പോൾ വലിയ ചർച്ചയായ പ്രശ്നമാണ് നദികളിലെയും തോടുകളിലെയും എക്കലും മണ്ണും മാറ്റി ആഴം കൂട്ടണം എന്നുള്ളത്. അതും ഇനി അടുത്ത വെള്ളപ്പൊക്കത്തിനേ ഓർക്കാൻ വഴിയുള്ളൂ.
ആധുനിക സാമ്പത്തികശാസ്ത്രത്തിന്‍റെ പിതാവായ ആദം സ്മിത്ത് ആണ് സർക്കാർ ഒരു സൂപ്പർവൈസറോ അല്ലെങ്കിൽ കാവൽക്കാരനോ ആകണം എന്ന ആശയം ശക്തമായി മുന്നോട്ടു വച്ചത്. സർക്കാരുകൾ ഇതിൽ തുടർച്ചയായി പരാജയപ്പെടുന്നതാണ് നാം കാണുന്നത്. ‘കാവൽക്കാരൻ കള്ളനാണെന്ന’ രാഷ്‌ട്രീയ പ്രയോഗം അടുത്തകാലത്തുണ്ടായതാണ്.
ഈ അവസരത്തിൽ ഓർക്കേണ്ടത് തിയോഡോർ റൂസ്‌വെൽറ്റ് പറഞ്ഞതാണ്. “ഗവൺമെന്‍റ് നമ്മളാണ്; നമ്മളാണ് ഗവൺമെന്‍റ്, നിങ്ങളും ഞാനും.” അതായത്, ജനാധിപത്യത്തിൽ ഗവൺമെന്‍റല്ല ജനങ്ങളെ സൂപ്പർവൈസ് ചെയ്യേണ്ടത്; മറിച്ച്, ജനങ്ങളാണ് ഗവൺമെന്‍റിന്‍റെ പ്രവർത്തനങ്ങൾക്ക് മേൽനോട്ടം വഹിക്കേണ്ടത്. അതിനുള്ള സമയം അതിക്രമിച്ചിരിക്കുന്നു.
ഭരണകൂടത്തിന്‍റെ മുൻഗണനകൾ
കേരളത്തിലെ വൈദ്യുതി പ്രതിസന്ധി ഇതല്ലേ സൂചിപ്പിക്കുന്നത്. കാലങ്ങളായി റെഗുലേറ്ററി കമ്മിഷൻ, ഇലക്‌ട്രിസിറ്റി ബോർഡ് എന്നൊക്കെ പറഞ്ഞുകൊണ്ട് പ്രശ്നങ്ങൾ നീട്ടിക്കൊണ്ടു പോകുകയാണ്. ഇവയെ ഒക്കെ നിയമം മൂലം തന്നെ ജനങ്ങൾക്കുവേണ്ടി നിയന്ത്രിക്കേണ്ടതുണ്ട്. ഇവരെഴുതിയ നിയമങ്ങളാണ് തടസമെങ്കിൽ അവയും മാറ്റണം. അതിനാണല്ലോ തെരഞ്ഞെടുക്കപ്പെട്ട ജനപ്രതിനിധികളും നിയമസഭയും. ജനപ്രതിനിധികൾക്ക് പ്രതികൂലമായ അഴിമതി നിരോധന ബില്ലിലെ നിയമങ്ങൾ എത്ര പെട്ടെന്നാണ് നിയമസഭ കൂടി മാറ്റിയെഴുതിയത്.
പൊതുജന വികാരം മാനിക്കാതെ ഇപ്പോഴും എത്രയോ ആൾക്കാരെയാണ് മന്ത്രിമാരുടെ പേഴ്സണൽ സ്റ്റാഫിൽ ഉൾപ്പെടുത്തുന്നത്. രസകരമായ ഒരു കാര്യം, ഇംഗ്ലണ്ടിലെ ഒരു സാധാരണ മന്ത്രിയുടെ പ്രൈവറ്റ് ഓഫിസിൽ ശരാശരി അഞ്ച് ജീവനക്കാരാണ് ഉണ്ടാകാറുള്ളത്. കേരളത്തിലാകട്ടെ അത് 25 പേരാണ്. മന്ത്രിമാരുടെ വിദേശ യാത്രകൾ ഉൾപ്പടെയുള്ള കാര്യങ്ങൾ എത്ര വേഗത്തിലാണ് തീരുമാനിക്കപ്പെടുന്നത്. ജനങ്ങളുടെ കാര്യത്തിൽ മാത്രമാണ് മെല്ലെപ്പോക്ക്. ഇതനുവദിച്ചുകൂടാ.
ADVERTISEMENT
ADVERTISEMENT
SPACE FOR ADVERTISEMENT
Contact Numbers :
+91 481 2566706, 2566707, 2566708
About Us Feedback Privacy Policy Terms and Conditions for Online Payment
E-paper LOGIN
LOGIN