Leader Page

യൂറോപ്പിനെ അസ്വസ്ഥമാക്കുന്ന ജനരോഷം

വ്യത്യസ്ത കാരണങ്ങളാൽ ആരംഭിച്ചതാണെങ്കിലും യൂറോപ്പിലുടനീളം പടരുന്ന പ്രതിഷേധങ്ങൾക്കു പിന്നിൽ സാമ്പത്തിക അസ്ഥിരതയും സർക്കാരുകളോടുള്ള പൊതുജനങ്ങളുടെ അതൃപ്തിയുമാണ് വ്യക്തമാകുന്നത്. അടിച്ചമർത്തലുകൾകൊണ്ടു താത്കാലികമായി അക്രമങ്ങൾ തടയാൻ സാധിച്ചേക്കാമെങ്കിലും ജനങ്ങളുടെ അടിസ്ഥാന പ്രശ്നങ്ങൾക്കു പരിഹാരം കാണാതെ ഈ പ്രതിഷേധങ്ങൾക്ക് ശമനമുണ്ടാകില്ലെന്നാണ് വിലയിരുത്തപ്പെടുന്നത്.

നിത്യോപയോഗ സാധനങ്ങളുടെ വിലക്കയറ്റം, ഭവന പ്രതിസന്ധി, വിദ്യാഭ്യാസ മേഖലയിലെ ചെലവുകൾ, തകരുന്ന പൊതുസേവനങ്ങൾ എന്നിവയ്‌ക്കെതിരേയാണു പ്രക്ഷോഭം. ഫ്രാൻസിൽ ഉടലെടുത്ത ശക്തമായ പ്രക്ഷോഭങ്ങൾ സ്പെയിൻ, ഇറ്റലി, ബെൽജിയം, പോർച്ചുഗൽ തുടങ്ങിയ മറ്റ് യൂറോപ്യൻ രാജ്യങ്ങളിലേക്കും പടർന്നുപിടിച്ചിരിക്കുകയാണ്. ഇതിനിടെ, ഭരണകൂടത്തിന്‍റെ അഴിമതിക്കെതിരേയും പ്രധാനമന്ത്രിയുടെ രാജിയാവശ്യപ്പെട്ടും അൽബേനിയയിൽ വിദ്യാർഥികളുടെ നേതൃത്വത്തിൽ ശക്തമായ പ്രക്ഷോഭവും നടക്കുന്നുണ്ട്.

ആദ്യം സമാധാനപരമായി ആരംഭിച്ച പ്രതിഷേധങ്ങൾ പലയിടത്തും പൊലിസുമായുള്ള ഏറ്റുമുട്ടലിലേക്കും അക്രമസംഭവങ്ങളിലേക്കും വഴിതിരിഞ്ഞിരിക്കുന്നു.

ഫ്രാൻസിൽ അക്രമസ്വഭാവം പ്രാപിച്ച് പ്രക്ഷോഭം

വിദ്യാഭ്യാസ ബജറ്റിലെ വെട്ടിക്കുറയ്ക്കലുകൾക്കെതിരേ വിദ്യാർഥികൾ ആരംഭിച്ച പ്രതിഷേധമാണ് ഫ്രാൻസിൽ വൻ ജനകീയ പ്രക്ഷോഭമായി മാറിയത്. വിലക്കയറ്റവും ജീവതച്ചെലവുകളും കാരണം വലയുന്ന സാധാരണക്കാരും തൊഴിലാളി യൂണിയനുകളും പ്രക്ഷോഭത്തിൽ പങ്കുചേർന്നതോടെ ശനിയാഴ്ചയും ഞായറാഴ്ചയും രാജ്യവ്യാപകമായി അഞ്ചര ലക്ഷത്തോളം ആളുകൾ തെരുവിലിറങ്ങി. തലസ്ഥാനമായ പാരീസിൽ മാത്രം ഒരു ലക്ഷത്തിലധികം പേർ പ്രതിഷേധത്തിൽ പങ്കെടുത്തു.

സമാധാനപരമായ പ്രകടനങ്ങൾക്കിടയിൽ കടകൾ കൊള്ളയടിക്കപ്പെടുകയും പൊതുമുതലുകൾക്ക് തീയിടുകയും ചെയ്തു. ലിമോഗെസിലെ ടൗൺ ഹാളിന്‍റെ ക്ലോക്ക് ടവർ തീപിടിത്തത്തിൽ പൂർണമായി നശിച്ചു. ഫ്രഞ്ച് ആഭ്യന്തര മന്ത്രാലയത്തിന്‍റെ കണക്കനുസരിച്ച് ഇതുവരെ 2,400ഓളം പേരെ പൊലിസ് അറസ്റ്റ് ചെയ്യുകയും ആയിരത്തോളം പൊലിസുകാർക്ക് പരിക്കേൽക്കുകയും ചെയ്തിട്ടുണ്ട്. സമാധാനപരമായി നടന്ന പ്രക്ഷോഭം തീവ്രവാദസംഘടനകളും വിധ്വംസക ശക്തികളും മുതലെടുക്കുന്നതായി തെളിവുകൾ നിരത്തി സർക്കാർ ചൂണ്ടിക്കാട്ടുന്നു.

രാജ്യത്തിന്‍റെ പൊതു കടം ജിഡിപിയുടെ 119 ശതമാനത്തിലേക്ക് ഉയർന്ന പശ്ചാത്തലത്തിൽ, ബജറ്റിൽ വരുത്താൻ പോകുന്ന വെട്ടിക്കുറയ്ക്കലുകൾ സാധാരണക്കാരെ കൂടുതൽ ദുരിതത്തിലാക്കുമെന്നാണ് പ്രക്ഷോഭകരുടെ ഭയം.

2018ൽ ഇന്ധന നികുതിക്കെതിരേ രംഗത്തുവന്ന ‘യല്ലോ വെസ്റ്റ്’ പ്രസ്ഥാനത്തിന്‍റെ സാന്നിധ്യവും നിലവിലെ പ്രതിഷേധങ്ങളിൽ പ്രകടമാണ്.
ഇറ്റലിയിലും ബെൽജിയത്തിലും പൊലിസുമായി ഏറ്റുമുട്ടൽ
ഇറ്റലിയിലെ മിലാൻ, ബൊളോഞ്ഞ, ബ്രെസിയ, ബെർഗാമോ, ടൂറിൻ എന്നീ നഗരങ്ങളിൽ ശനി, ഞായർ ദിവസങ്ങളിൽ പ്രക്ഷോഭകർ തെരുവിലിറങ്ങി. മിലാനിൽ മാസ്ക് ധരിച്ചെത്തിയ പ്രക്ഷോഭകർ കടകളുടെ ചില്ലുകൾ തകർക്കുകയും മാലിന്യക്കൂമ്പാരങ്ങൾക്ക് തീയിടുകയും ചെയ്തു. പ്രതിഷേധക്കാരെ പിരിച്ചുവിടാൻ പൊലിസ് കണ്ണീർവാതകവും ജലപീരങ്കിയും ഉപയോഗിച്ചു. സംഭവത്തിൽ നിരവധി പേർ അറസ്റ്റിലായിട്ടുണ്ട്. സാഹചര്യം വിലയിരുത്താൻ പ്രധാനമന്ത്രി ജോർജിയ മെലോണി അടിയന്തര യോഗം വിളിച്ചുചേർത്തു.

ബെൽജിയത്തിൽ ഉന്നതവിദ്യാഭ്യാസ മേഖലയിലെ ചെലവുകൾ വർധിക്കുന്നതിനെതിരേ വിദ്യാർഥികളാണ് പ്രധാനമായും പ്രതിഷേധിക്കുന്നത്. തലസ്ഥാനമായ ബ്രസൽസിലും ലീജ് നഗരത്തിലും നടന്ന പ്രകടനങ്ങൾക്കുനേരേ പൊലിസ് ജലപീരങ്കിയും കണ്ണീർവാതകവും പ്രയോഗിച്ചു.

ഭവന പ്രതിസന്ധിയിൽ കത്തിയമർന്ന് പോർച്ചുഗലും സ്പെയിനും

പോർച്ചുഗൽ തലസ്ഥാനമായ ലിസ്ബണിൽ പതിനായിരക്കണക്കിന് ആളുകളാണ് ജീവിതച്ചെലവിനും ഭവന പ്രതിസന്ധിക്കുമെതിരേ തെരുവിലിറങ്ങിയത്. 2017ന് ശേഷം രാജ്യത്ത് വീടുകളുടെ വില ഇരട്ടിയിലധികമായി ഉയർന്നു. വാടക നിരക്കിലും വൻ വർധനവാണുണ്ടായിട്ടുള്ളത്. വരുമാനത്തിന്‍റെ ഭൂരിഭാഗവും വാടകയ്ക്കും ഭക്ഷണത്തിനും ഇന്ധനത്തിനുമായി ചെലവഴിക്കേണ്ടിവരുന്നത് ജീവിതം ദുഃസഹമാക്കുന്നുവെന്ന് പ്രക്ഷോഭകർ ചൂണ്ടിക്കാണിക്കുന്നു. സെപ്റ്റംബറിൽ രാജ്യത്തെ പണപ്പെരുപ്പം 3.6 ശതമാനമായി ഉയർന്നിരുന്നു.

വാടക കൂട്ടുന്നതിനും ഒഴിപ്പിക്കലുകൾക്കുമെതിരേ ശക്തമായ നിയമനിർമാണം നടത്താൻ സർക്കാരിനു സാധിക്കാത്തതിനെത്തുടർന്നാണു സ്പെയിനിൽ പ്രതിഷേധം പൊട്ടിപ്പുറപ്പെട്ടത്. മാഡ്രിഡ്, വലൻസിയ, ബാഴ്‌സലോണ ഉൾപ്പടെയുള്ള പ്രധാന നഗരങ്ങളിൽ അരലക്ഷത്തോളം ആളുകൾ പങ്കെടുത്ത 50ഓളം മാർച്ചുകളാണ് നടന്നത്.

വാടക വർധന താങ്ങാനാകാത്തതിനെത്തുടർന്ന് കഴിഞ്ഞ മാസം 87 വയസുള്ള മാരികാർമെൻ അബാസ്കൽ എന്ന വൃദ്ധയെ വസതിയിൽനിന്ന് ഒഴിപ്പിച്ചതാണ് രാജ്യത്തുടനീളം ജനരോഷം ആളിക്കത്തിച്ചത്. പ്രതിഷേധങ്ങൾ തണുപ്പിക്കുന്നതിനായി പ്രധാനമന്ത്രി പെദ്രോ സാഞ്ചസിന്‍റെ ന്യൂനപക്ഷ സഖ്യ സർക്കാർ പാർലമെന്‍റിൽ അവതരിപ്പിച്ച അടിയന്തര നിയമനിർമാണ നിർദേശങ്ങൾ പരാജയപ്പെട്ടു. പ്രതിപക്ഷ കക്ഷികളായ പീപ്പിൾസ് പാർട്ടിയും വോക്സും കൂടാതെ കാറ്റലൻ പ്രാദേശികകക്ഷിയായ ‘ടുഗെദർ ഫോർ കാറ്റലോണിയ’യും ബില്ലിനെതിരേ വോട്ട് ചെയ്തതോടെയാണു പ്രധാനമന്ത്രിക്ക് തിരിച്ചടിയുണ്ടായത്.

പാർലമെന്‍റിലെ പരാജയത്തോടെ അടുത്ത വേനൽക്കാലത്ത് നടക്കേണ്ട പൊതുതെരഞ്ഞെടുപ്പ് നേരത്തേയാക്കി അടുത്തമാസം 29ന് പ്രഖ്യാപിച്ചിരിക്കുകയാണ്.

സ്പെയിനിൽ നിലവിൽ ഏഴു ലക്ഷം വീടുകളുടെ കുറവുണ്ടെന്നാണ് ബാങ്ക് ഓഫ് സ്പെയിനിന്‍റെ കണക്ക്. കഴിഞ്ഞ ഒരു വർഷത്തിനിടെ വീടുകളുടെ വില 12.2 ശതമാനവും വാടകനിരക്ക് ശരാശരി 8.5 ശതമാനവും വർധിച്ചു.

ബാഴ്‌സലോണയിലും മാഡ്രിഡിലുമാണ് ഏറ്റവും ഉയർന്ന വാടകനിരക്കുള്ളത്. മാഡ്രിഡിൽ ഒറ്റ മുറി അപ്പാർട്ട്മെന്‍റിന് 72,000 മുതൽ ഒരു ലക്ഷം രൂപ വരെയാണു പ്രതിമാസ വാടക.

ഭരണമാറ്റം ആവശ്യപ്പെട്ട് അൽബേനിയ

മറ്റു യൂറോപ്യൻ രാജ്യങ്ങളിൽനിന്നു വ്യത്യസ്തമായി അൽബേനിയയിൽ രാഷ്‌‌ട്രീയപരമായ ആവശ്യങ്ങൾ ഉന്നയിച്ചാണ് പ്രതിഷേധം ശക്തമാകുന്നത്. പ്രധാനമന്ത്രി എഡി രാമ രാജിവയ്ക്കണമെന്നാണ് പ്രക്ഷോഭകരുടെ പ്രധാന ആവശ്യം.

ഭരണകൂടത്തിലെ അഴിമതി, തൊഴിലില്ലായ്മ, തകരുന്ന വിദ്യാഭ്യാസ നിലവാരം എന്നിവയ്ക്കെതിരേ അൽബേനിയൻ തലസ്ഥാനമായ ടിറാനയിൽ വിദ്യാർഥികളുടെ നേതൃത്വത്തിൽ തുടർച്ചയായ ആറാം ദിവസവും വൻ പ്രതിഷേധം നടന്നു. എന്നാൽ രാജി ആവശ്യങ്ങൾ പ്രധാനമന്ത്രി എഡി രാമ തള്ളി.

റബർ ഉത്പാദകനെ കേന്ദ്രസ്ഥാനത്ത് എത്തിക്കുക

ആൽഗയും മനുഷ്യ മസ്തിഷ്കവും

ബിജെപിക്കും ഇന്ത്യ മുന്നണിക്കും ഒരുപോലെ നിർണായകം; യുപിയിൽ ഇക്കുറി തീപാറും

ജനാധിപത്യ സംരക്ഷണ സമരങ്ങളും ഭാവി പ്രതീക്ഷയും

Leader Page

വിവരാവകാശം ജനാധിപത്യ പോരാട്ടങ്ങളുടെ കരുത്ത്

വിവരത്തിനുള്ള അവകാശം (Right to Information) ഒരു അടിസ്ഥാന മനുഷ്യാവകാശമാണ്. ഭരണഘടനയുടെ ആർട്ടിക്കിൾ 19(1)(a) അഭിപ്രായപ്രകടനത്തിനും സംസാരത്തിനുമുള്ള സ്വാതന്ത്ര്യം ഉറപ്പുനൽകുന്നു. ഇത് 1948ലെ മനുഷ്യാവകാശങ്ങളുടെ സാർവദേശീയ പ്രഖ്യാപനത്തിലെ ആർട്ടിക്കിൾ 19ന്‍റെ ആശയവുമായി ആഴത്തിൽ ബന്ധപ്പെട്ടിരിക്കുന്നു.

പാർലമെന്‍റ് 2005ൽ വിവരാവകാശ നിയമം പാസാക്കി. ഇന്ത്യയിലെ പൗരന്മാർക്ക് വിവരത്തിനുള്ള അവകാശം ഉറപ്പാക്കുകയും പൊതു അധികാരികളുടെ നിയന്ത്രണത്തിലുള്ള വിവരങ്ങളിലേക്ക് ഓരോ പൗരനും പ്രവേശനം സാധ്യമാക്കുകയുമാണ് ലക്ഷ്യം. ഓരോ പൊതു അധികാര സ്ഥാപനത്തിന്‍റെയും പ്രവർത്തനത്തിൽ സുതാര്യതയും ഉത്തരവാദിത്വവും വളർത്തുക എന്നതും ഈ നിയമത്തിന്‍റെ ലക്ഷ്യമാണ്. ഭരണഘടനയുടെ കീഴിൽ ഒരു മൗലികാവകാശമായിരുന്ന ‘അറിയാനുള്ള അവകാശം’ വിവരാവകാശ നിയമത്തിലൂടെ നിയമപരമായ അവകാശമായി മാറി. എന്നാൽ, ഒരു മൗലികാവകാശമെന്ന നിലയിൽ വിവരാവകാശത്തിന്‍റെ വ്യാപ്തി നിയമപരമായ അവകാശത്തേക്കാൾ വളരെ വിശാലമാണ്.

2005ലെ വിവരാവകാശ നിയമം (2005ലെ നിയമം നമ്പർ 22; 2011 ഫെബ്രുവരി 1 വരെ ഭേദഗതികളോടെ) നിർവചിക്കുന്നതുപോലെ, ‘വിവരം’ എന്നതിൽ രേഖകൾ, പ്രമാണങ്ങൾ, മെമ്മോകൾ, ഇ-മെയിലുകൾ, അഭിപ്രായങ്ങൾ, ഉപദേശങ്ങൾ, പത്രക്കുറിപ്പുകൾ, സർക്കുലറുകൾ, ഉത്തരവുകൾ, ലോഗ്ബുക്കുകൾ, കരാറുകൾ, റിപ്പോർട്ടുകൾ, പേപ്പറുകൾ, സാമ്പിളുകൾ, മാതൃകകൾ, ഇലക്‌ട്രോണിക് രൂപത്തിലുള്ള ഡാറ്റാ സാമഗ്രികൾ എന്നിവ ഉൾപ്പടെ ഏതു രൂപത്തിലുള്ളതുമായ, ഏതു സാമഗ്രിയും ഉൾപ്പെടുന്നു. നിലവിൽ പ്രാബല്യത്തിലുള്ള മറ്റേതെങ്കിലും നിയമപ്രകാരം ഒരു പൊതു അധികാര സ്ഥാപനത്തിന് ലഭ്യമാക്കാൻ കഴിയുന്ന സ്വകാര്യ സ്ഥാപനവുമായി ബന്ധപ്പെട്ട വിവരങ്ങളും ഇതിൽ ഉൾപ്പെടുന്നു.

അതുപോലെതന്നെ, പൊതുഅധികാര സ്ഥാപനങ്ങളുടെ ബാധ്യതയും നിയമം വ്യക്തമാക്കുന്നു: “ഓരോ പൊതു അധികാര സ്ഥാപനവും അതിന്‍റെ എല്ലാ രേഖകളും ശരിയായ രീതിയിൽ പട്ടികപ്പെടുത്തുകയും സൂചികപ്പെടുത്തുകയും വേണം. ഈ നിയമപ്രകാരം വിവരാവകാശം വിനിയോഗിക്കാൻ സൗകര്യമാകുന്ന തരത്തിലും രൂപത്തിലുമാകണം അത്. കംപ്യൂട്ടർവത്കരിക്കാൻ അനുയോജ്യമായ എല്ലാ രേഖകളും, വിഭവങ്ങളുടെ ലഭ്യതയ്ക്ക് വിധേയമായി, യുക്തിസഹമായ കാലയളവിനുള്ളിൽ കംപ്യൂട്ടർവത്കരിക്കുകയും രാജ്യത്തുടനീളം വിവിധ സംവിധാനങ്ങളിലൂടെ ഒരു ശൃംഖലയിൽ ബന്ധിപ്പിക്കുകയും വേണം; അങ്ങനെ അത്തരം രേഖകളിലേക്കുള്ള പ്രവേശനം സുഗമമാക്കുകയും വേണം…”

ഇതേ ആശയത്തിന്‍റെ അടിസ്ഥാനത്തിൽ, വിവരങ്ങൾ ലഭിക്കുന്നതിനുള്ള അപേക്ഷയെക്കുറിച്ചും നിയമം വ്യക്തമാക്കുന്നു:

“ഈ നിയമപ്രകാരം ഏതെങ്കിലും വിവരം ലഭിക്കാൻ ആഗ്രഹിക്കുന്ന ഒരാൾ, നിർദേശിക്കപ്പെട്ട ഫീസ് സഹിതം, ഇംഗ്ലീഷിലോ ഹിന്ദിയിലോ, അപേക്ഷ സമർപ്പിക്കുന്ന പ്രദേശത്തെ ഔദ്യോഗിക ഭാഷയിലോ, എഴുത്തിലൂടെയോ ഇലക്‌ട്രോണിക് മാർഗത്തിലൂടെയോ അപേക്ഷ നൽകേണ്ടതാണ്. അപേക്ഷ ബന്ധപ്പെട്ട പൊതു അധികാര സ്ഥാപനത്തിലെ കേന്ദ്ര പബ്ലിക് ഇൻഫർമേഷൻ ഓഫീസർക്കോ, സംസ്ഥാന പബ്ലിക് ഇൻഫർമേഷൻ ഓഫീസർക്കോ, അല്ലെങ്കിൽ കേന്ദ്ര അസിസ്റ്റന്‍റ് പബ്ലിക് ഇൻഫർമേഷൻ ഓഫീസർക്കോ, സംസ്ഥാന അസിസ്റ്റന്‍റ് പബ്ലിക് ഇൻഫർമേഷൻ ഓഫീസർക്കോ സമർപ്പിക്കാം. ആവശ്യപ്പെടുന്ന വിവരത്തിന്‍റെ വിശദാംശങ്ങൾ അപേക്ഷയിൽ വ്യക്തമാക്കണം. എന്നാൽ, അത്തരം അപേക്ഷ എഴുത്തിൽ നൽകാൻ കഴിയാത്ത സാഹചര്യത്തിൽ, അപേക്ഷകൻ വാക്കാൽ ആവശ്യപ്പെടുന്ന വിവരങ്ങൾ എഴുത്തിലേക്ക് മാറ്റുന്നതിനാവശ്യമായ എല്ലാ യുക്തിസഹമായ സഹായവും ബന്ധപ്പെട്ട ഉദ്യോഗസ്ഥൻ നൽകണം. അപേക്ഷകൻ, വിവരം ആവശ്യപ്പെടുന്നതിന്‍റെ കാരണം നൽകേണ്ടതില്ല. അപേക്ഷകനുമായി ബന്ധപ്പെടുന്നതിന് ആവശ്യമായ വ്യക്തിഗത വിവരങ്ങൾ ഒഴികെ മറ്റേതെങ്കിലും വ്യക്തിഗത വിവരങ്ങളും നൽകേണ്ടതില്ല.”

ഉയർച്ചയും പരിമിതിയും

ചില വിവരങ്ങൾ വെളിപ്പെടുത്തുന്നത് ഒഴിവാക്കുന്നതുപോലുള്ള പരിമിതികളുടെ പേരിൽ 2005ലെ വിവരാവകാശ നിയമം വിമർശിക്കപ്പെട്ടിട്ടുണ്ട്. ഔദ്യോഗിക രഹസ്യനിയമം, ഇന്ത്യൻ തെളിവ് നിയമം തുടങ്ങിയ മറ്റ് നിയമങ്ങളിലും ചില വിവരങ്ങൾ വെളിപ്പെടുത്താനാകില്ല. ഇതും വിവരാവകാശ നിയമത്തെ പരിമിതപ്പെടുത്തുന്നു. വിവരാവകാശ നിയമം പ്രധാനമായും പൊതുമേഖലയിലായതും ‘അറിയാനുള്ള അവകാശത്തിന്‍റെ’ മഹത്വം ഒരു പരിധിവരെ കുറഞ്ഞിട്ടുണ്ട്.

പരിമിതികൾക്കപ്പുറം 2005ലെ വിവരാവകാശ നിയമത്തിന്‍റെ കരുത്തിൽ നമുക്കു ശ്രദ്ധയൂന്നാം. കൂടുതൽ ജനാധിപത്യത്തിനും സ്വയംഭരണത്തിനുമുള്ള നമ്മുടെ ജനാധിപത്യപരമായ പരിശ്രമങ്ങളെയും പോരാട്ടങ്ങളെയും തുടർന്നും ഉണർത്താൻ ഈ നിയമത്തിനു കഴിയട്ടെ.

Leader Page

തേനിസൈ തെൻട്രലായി ദേവ

ഇളയരാജ എന്ന സാഗരത്തിനും എ.ആർ. റഹ്‌മാൻ എന്ന താരകത്തിനുമിടയിൽ തമിഴ് സിനിമയിൽ തേൻകണങ്ങൾ പൊഴിച്ചെത്തിയ ഇളംകാറ്റായിരുന്നു ദേവനേശൻ ചൊക്കലിംഗം എന്ന ദേവ. കർണാടകസംഗീതജ്ഞരായ എം.എസ്. വിശ്വനാഥൻ, കെ.വി. മഹാദേവൻ, ഇളയരാജ, പിന്നീടു വന്ന റഹ്‌മാൻ എന്നിവർക്കിടയിൽ ദേവ എന്നൊരു പേര് ഉയർന്നുവന്നതിനു പിന്നിലെ കഷ്‌ടപ്പാടുകൾ ചില്ലറയായിരുന്നില്ല. ആരാധകരെ ദുഃഖത്തിലാഴ്ത്തി ദേവ വിടപറയുമ്പോൾ അവർക്ക് തേനിസൈ തെൻട്രലായി അദ്ദേഹം ഈണം പകർന്ന നാനൂറിലേറെ ഗാനങ്ങൾ.

ചെന്നൈ നഗരത്തിനടുത്തായിരുന്നു ജനനം. ദാരിദ്ര്യം നിറഞ്ഞ ജീവിതത്തിൽ ദേവയ്‌ക്കും താഴെയുള്ള നാലു സഹോദരങ്ങൾക്കും ആകെയുണ്ടായിരുന്ന കൈമുതൽ സംഗീതമായിരുന്നു. കല്യാണവേദികളിലും ക്ഷേത്രങ്ങളിലും നാടകവേദികളിലും സംഗീതമവതരിപ്പിച്ചാണ് ദേവയും സഹോദരങ്ങളും ജീവിച്ചിരുന്നത്. ധൻരാജ് മാസ്റ്ററുടെ കീഴിൽ പിയാനോയിലടക്കം പരിശീലനം നേടിയതും പാശ്ചാത്യ സംഗീതപഠനവും ദേവയ്‌ക്കു പിൽക്കാലത്തു സദ്‌ഫലം നൽകി. ‘മെല്ലിസൈ മന്നൻ’ എം.എസ്. വിശ്വനാഥൻ പിൽക്കാലത്ത് ദേവയ്ക്കു ദൈവമായി. പ്രശസ്തിയിലെത്തിയിട്ടും തന്‍റെ ഹാർമോണിയത്തിൽ പതിപ്പിച്ചിരുന്ന വിശ്വനാഥന്‍റെ ചിത്രം മായ്ച്ചില്ല. എല്ലാ പ്രഭാതത്തിലും എം.എസ്‌.വിയുടെ ഗാനങ്ങൾ കേൾക്കുന്ന പതിവ് വിവാഹപ്പിറ്റേന്നുപോലും മുടങ്ങിയില്ല. തമിഴകം വിളിച്ച ‘തേനിസൈ തെൻട്രൽ’എന്ന വിശേഷണം ദേവയ്‌ക്കു ചാർത്തിയതും വിശ്വനാഥനായിരുന്നു.

♫ പേരിന്‍റെ വൈപരീത്യങ്ങൾ

ഭക്തിഗാനങ്ങൾക്കു സംഗീതം ചെയ്യലായിരുന്നു ദേവയുടെയും സഹോദരങ്ങളുടെയും വരുമാനമാർഗം. സ്വപ്നം സിനിമയും. സംവിധായകരുടെയും നിർമാതാക്കളുടെയും വീടുകൾ പലവുരു കയറിയിറങ്ങി. ഒടുവിൽ 1986ൽ ‘മാട്ടുകാര മന്നർ’ എന്ന ചിത്രത്തിൽ അവസരം കിട്ടി. ആ ചിത്രം പുറത്തിറങ്ങിയില്ല. ഒന്നും രണ്ടുമല്ല, അങ്ങനെ 13 ചിത്രങ്ങൾ. ജ്യോതിഷിയുടെ നിർദേശപ്രകാരം ‘നാടോടി സിദ്ധൻ’ എന്ന പേര് സ്വീകരിച്ചു. ആ പേരുമായി നടത്തിയ ആദ്യ ഗാനമേളയിൽ ആകെ കുഴപ്പമായി. സ്റ്റേജിലേക്ക് തുരുതുരാ കല്ലുകൾ. ദേവയ്ക്കും ട്രൂപ്പിനും ഇറങ്ങി ഓടേണ്ടിവന്നു. അതോടെ നാടോടി സിദ്ധന്‍റെ കഥ കഴിഞ്ഞു. ‘ദേവാധി ദേവൻ’ എന്നതായിരുന്നു അടുത്ത പേര്. ആ പേരിൽ സംഗീതം ചെയ്യാനേറ്റ രണ്ടു ചിത്രങ്ങൾ പൂജയോടെ അവസാനിച്ചു. 1989ൽ ’മനസുക്കേത്ത മഹാരാസ’ എന്ന ചിത്രത്തിന് ‘ദേവ സി.’ എന്ന പേര് സ്വീകരിച്ചു. ചിത്രത്തിലെ നായകനായ രാമരാജനാണ് ദേവ എന്ന പേര് നിർദേശിച്ചത്. ആ ചിത്രവും ഗാനങ്ങളും ഹിറ്റായതോടെ ദേവ ഉറച്ചു. അടുത്തവർഷം പ്രശാന്തിന്‍റെ ‘വൈകാശി പൊറന്താച്ച്’ എന്ന ചിത്രം ഹിറ്റാവുക മാത്രമല്ല, ദേവയ്ക്ക് മികച്ച സംഗീത സംവിധായകനുള്ള സംസ്ഥാന അവാർഡ് നേടിക്കൊടുക്കുകയും ചെയ്തു.

♫ ഡപ്പാംകുത്തിന്‍റെ ഉപജ്ഞാതാവ്

ഇളയരാജയും റഹ്‌മാനും ബിംബങ്ങളായി തുടരുമ്പോൾ നിലനിൽപ്പിന് ചെന്നൈ സംഗീതമാണ് ദേവയെ തുണച്ചത്. ചെന്നൈ നഗരത്തിലെ സമ്പന്നരും ദരിദ്രരും ഉപയോഗിക്കുന്ന ചില ഗാനശൈലികളുണ്ട്. അത് സിനിമയിലുപയോഗിക്കാൻ ദേവ തീരുമാനിക്കുന്നു. അങ്ങനെയാണ് പ്രശസ്തമായ ‘ഗാന പാട്ട്’ ശൈലിയുടെ തുടക്കം. ലളിതമായഗാന ശൈലി. ലളിതമായ ഈണങ്ങളും ആകർഷകമായ താളക്രമങ്ങളും. പിന്നീട് ഡപ്പാംകുത്ത്, കുത്ത്പാട്ട്, അടിപൊളി തുടങ്ങിയ പേരിലെല്ലാം അറിയപ്പെട്ട വേഗമേറിയ, ഊർജസ്വലമായ നൃത്തഗാനങ്ങളുടെ ഉപജ്ഞാതാവ് ദേവയായിരുന്നു.

♫ വാഴ്ത്തും ഇകഴ്ത്തും

അണ്ണാമലൈക്കുശേഷം രജനി-സുരേഷ് കൃഷ്ണ ടീമിന്‍റെ എക്കാലത്തെയും ഇതിഹാസ ചിത്രം ബാഷ. അതിലെ ‘നാൻ ഓട്ടോക്കാരൻ ഓട്ടോക്കാരൻ’ എന്ന പാട്ട് മുതലാണ് തെന്നിന്ത്യൻ ഭാഷകളിൽ അടിപൊളി ഗാനങ്ങളിലൂടെ നായകനെ അവതരിപ്പിക്കുന്ന ശൈലിയുടെ പിറവി. ബാഷയിലെ ഗാനങ്ങൾ അന്നും ഇന്നും ഹിറ്റാണ്. ഇതേക്കുറിച്ചു രജനിതന്നെ പറഞ്ഞിട്ടുണ്ട്. പശ്ചാത്തലസംഗീതംചെയ്യുംമുൻപ് ഞാൻ ബാഷ കണ്ടപ്പോൾ വെറും ഒരു സാധാരണ പടം. ദേവയുടെ സംഗീതമാണ് ചിത്രത്തെ ഉയർത്തിയത്. തുടർന്ന് രജനീകാന്തിന്‍റെ അരുണാചലം, കമൽഹാസന്‍റെ അവ്വൈ ഷൺമുഖി, പമ്മൽ കെ സമ്മന്തം, പഞ്ചതന്ത്രം, ശരത്കുമാറിന്‍റെ സൂര്യൻ, വിജയകാന്തിന്‍റെ എങ്കൽ അണ്ണ, അജിത്തിന്‍റ മുഖവരി, സിറ്റിസൺ, വിജയുടെ ഖുഷി, ശിവകാശി... ദേവയുടെ ഹിറ്റുകൾ തുടർന്നു. ഒപ്പം, വിമർശനങ്ങളുമുയർന്നു. പുതുമയുടെ അഭാവം, ഉപയോഗിച്ച ഈണങ്ങളുടെ ആവർത്തനം. ഇളയരാജയെ പകർത്തുന്നു എന്ന ആരോപണം തുടക്കംമുതൽ ചിലരെങ്കിലും ആരോപിച്ചിട്ടുണ്ട്.

♫ പുതുതലമുറയും മറന്നില്ല

രണ്ടായിരത്തിൽ രണ്ടാം പകുതിയോടെ ദേവയ്ക്ക് അവസരങ്ങൾ കുറഞ്ഞു. സൗമ്യമായ പെരുമാറ്റവും ലളിതമായ ജീവിതവും ദേവയെ തമിഴ് സിനിമാലോകത്തിൽ നിലനിറുത്തി. മറ്റുള്ളവരെ സഹായിക്കാനും പ്രോത്സാഹിപ്പിക്കാനും ദേവ സന്നദ്ധനായിരുന്നു.

2019ൽ ‘പേട്ട’ എന്ന രജനീകാന്ത് ചിത്രം എത്തിയതോടെ ദേവ വീണ്ടും ചർച്ചാവിഷയമായി. പേട്ടയ്ക്ക് സംഗീതമൊരുക്കിയ, അനിരുദ്ധ് രവിചന്ദർ, ദേവയോടുള്ള തന്‍റെ ആരാധന വെളിപ്പെടുത്തി. ടൈറ്റിൽ കാർഡ് മുതൽ മരണമാസ് ഗാനത്തിലടക്കം ദേവയുടെ മേൽനോട്ടം അനിരുദ്ധ് ആഗ്രഹിച്ചു. ദേവ മടികൂടാതെ അതു നിർവഹിക്കുകയും ചെയ്തു. തമിഴിൽ മാത്രമല്ല തെലുങ്ക്, കന്നഡ, മലയാളം ചിത്രങ്ങൾക്കും ദേവ സംഗീതം നിർവഹിച്ചു. മലയാളത്തിൽ മോഹൻലാലിന്‍റെ ദി പ്രിൻസ്, മമ്മൂട്ടി ചിത്രമായ ഫാന്‍റം പൈലി തുടങ്ങിയ ചിത്രങ്ങൾ. ഫാന്‍റം പൈലിയിലെ ജയചന്ദ്രൻ പാടിയ ‘വിരൽതൊട്ടാൽ വിരിയുന്ന പെൺപൂവേ’ എന്ന മനോഹരഗാനം ഹിറ്റായി.

Leader Page

മലയോരത്തിന് ചിന്നക്കനാൽ ചൂണ്ടുപലക

ഇടുക്കി ജില്ലാ കളക്‌ടർ സെപ്റ്റംബർ 23ന് വന്യജീവി സംരക്ഷണത്തിന്‍റെ പേരിൽ ജനവാസ മേഖലയും റവന്യു ഭൂമിയുമായ ചിന്നക്കനാലിൽ ആനകൾക്കും മറ്റു വന്യജീവികൾക്കും സ്വൈരവിഹാരം നടത്താൻ തടസങ്ങളെല്ലാം നീക്കണമെന്ന് ഉത്തരവിടുകയുണ്ടായി. ദുരന്തനിവാരണ നിയമം ദുരുപയോഗം ചെയ്താണ് ഉത്തരവിട്ടിട്ടുള്ളത്. മണിക്കൂറുകൾക്കുള്ളിൽ ഫോറസ്റ്റ് ഉദ്യോഗസ്ഥർ സ്ഥലത്തെത്തി വേലികളും നിർമാണങ്ങളും മറ്റു തടസങ്ങളും നീക്കി. ഡാമിൽ ആനകൾക്ക് വെള്ളം കുടിക്കാനുള്ള തടസങ്ങൾ നീക്കണമും അതൊരു ആനത്താരയാണെന്നുമാണ് അവകാശപ്പെടുന്നത്. ഇടുക്കിയിൽ ഒരു ആനത്താര ഉള്ളത് തേക്കടി ടൈഗർ റിസർവിനുള്ളിൽ മാത്രമാണ്. ഇതറിയാത്ത ആളല്ല ജില്ലാ കളക്‌ടർ എന്നുള്ളതാണ് ആക്ഷേപകരമായ കാര്യം.

അപ്രഖ്യാപിത കർഫ്യൂവും ന്യായീകരണങ്ങളും

തുടർന്നു വന്ന പ്രതിഷേധത്തിന് പ്രതികാരമെന്നോണം 28ന് പ്ലാന്‍റേഷൻ ഇൻസ്പെക്‌ടർമാർക്കു ജില്ലാ കളക്‌ടർ മറ്റൊരു നിർദേശം നൽകി. ദുരന്തനിവാരണ നിയമപ്രകാരം പുറപ്പെടുവിച്ച ഉത്തരവ് ഫലപ്രദമായി നടപ്പാക്കുന്നതിന് വൈകിട്ട് ആറു മുതൽ പുലർച്ചെ ആറ് വരെ വനാതിർത്തിയിലുള്ള റോഡുകളിൽ ജനസഞ്ചാരം പാടില്ല. ജനങ്ങൾ വീട്ടിനുള്ളിൽ കഴിയണം. തുടരുന്ന പ്രതിഷേധത്തിൽനിന്ന് രക്ഷപ്പെടുന്നതിന് ഇതിനെ ന്യായീകരിക്കാൻ അദ്ദേഹം സെപ്റ്റംബർ 30ന് വാർത്താമാധ്യമങ്ങളെ കാണുകയുണ്ടായി. കൈയേറ്റക്കാർക്കാണ് പരാതിയുള്ളതെന്നാണ് അദ്ദേഹത്തിന്‍റെ ഭാഷ്യം. വന്യജീവി ആക്രമണമുള്ള പ്രദേശത്തു മാത്രമേ ഇത് ബാധകമാകൂ എന്നും പറഞ്ഞു. എന്നാൽ ഉത്തരവ് ജില്ല മുഴുവൻ ബാധകമാകുന്ന രൂപത്തിലാണ്.

ഭരണകൂട ഒത്താശയും ഗൂഢാലോചനയും

ഉത്തരവിന്‍റെ പിറകിൽ ആസൂത്രിതമായ ഒരു ഗൂഢാലോചനയുണ്ട്. ദുരന്തനിവാരണ സമിതിയുടെ അധ്യക്ഷനായ അധികാരി നിയമം അനുസരിച്ച് നടത്തേണ്ട കൂടിയാലോചന എങ്ങും നടത്തിയില്ലെന്ന് അദ്ദേഹം പത്രക്കാരോട് തുറന്നുസമ്മതിച്ചു.

വനംവകുപ്പ് ഉദ്യോഗസ്ഥരുമായി ഓൺലൈൻ മീറ്റിംഗ് കൂടിയാണ് ഈ ഉത്തരവ് പുറപ്പെടുവിച്ചതെന്നും വ്യക്തമാക്കി. ഈ നടപടിക്രമം പൂർണമായും തെറ്റാണ്. സെപ്റ്റംബർ 30ന് വനംവകുപ്പിന്‍റെ ഫോറസ്റ്റ് റിസർച്ച് ഇൻസ്റ്റിറ്റ്യൂട്ടിന്‍റെ പരിപാടിയിൽ പങ്കെടുത്തുകൊണ്ട് മുഖ്യമന്ത്രി തിരുവനന്തപുരത്ത് പറഞ്ഞത്, വന്യജീവികളുടെ ജീവിതത്തിന് ജനങ്ങൾ തടസമുണ്ടാക്കുന്നു. അത് ഒഴിവാക്കണം. അതിനുള്ള നടപടികളാണ് തന്‍റെ സർക്കാർ ചെയ്യുന്നതെന്നാണ്. ഇപ്പോൾ കാര്യം വ്യക്തമായി.മുഖ്യമന്ത്രിയുടെയും ഭരണക്കാരുടെയും അനുമതിയോടുകൂടിയാണ് ജില്ലാ കളക്‌ടർ എല്ലാം ചെയ്തുകൊണ്ടിരിക്കുന്നത്. ഊർജകേന്ദ്രം മുഖ്യമന്ത്രിയാണ്.

ഹരിത എംഎൽഎയായിരുന്ന അദ്ദേഹത്തിന്‍റെ പ്രസ്താവന മറക്കാറായിട്ടില്ല. കസ്തൂരിരംഗൻ റിപ്പോർട്ട് കാലത്ത് വന്യജീവി സങ്കേതങ്ങൾക്കു ചുറ്റും പത്തു ചതുരശ്ര കിലോമീറ്റർ ബഫർ സോൺ വേണമെന്നായിരുന്നു അത്. ഇത് നടപ്പാക്കിയാൽ ഇടുക്കി വന്യജീവി സംരക്ഷണ കേന്ദ്രത്തിൽനിന്ന് പടിഞ്ഞാറോട്ട് പിടിക്കുമ്പോൾ തൊടുപുഴയും ബഫർ സോണിലെത്തും. അതോടെ ജില്ല പൂർണമായും വനവും വന്യജീവി കേന്ദ്രവുമാകും. വനഭൂമിയില്ലാത്ത സ്ഥലത്ത് വൈദ്യുതി ബോർഡിന്‍റെ ഡാമിന്‍റെ സംരക്ഷണം ആ വകുപ്പ് ചെയ്യേണ്ടതാണ്. ജില്ലാ കളക്ടർ ഉത്തരവിട്ടാൽ അതു നടപ്പാക്കേണ്ടത് തഹസിൽദാരും അദ്ദേഹത്തെ സഹായിക്കാൻ തീരുമാനിക്കുന്ന പൊലിസടക്കമുള്ള ഉദ്യോഗസ്ഥരുമാണ്. വനംവകുപ്പുകാർക്ക് ഇവിടെ എന്തു കാര്യം‍? അവരെ ചുമതലപ്പെടുത്തിയതിന്‍റെ രഹസ്യം എന്താണെന്ന് കളക്ടർ വിശദീകരിക്കുമോ?

വ്യാജ ആനത്താരവാദവും കപട പരിസ്ഥിതിവാദവും

ഓഗസ്റ്റിൽ ചേർന്ന ജില്ലാ വികസനസമിതി യോഗത്തിൽ എംഎൽഎമാർ വന്യജീവി ശല്യത്തെപ്പറ്റി പരാതി പറഞ്ഞപ്പോഴാണ് വിഷയം പഠിക്കാൻ വനംവകുപ്പ് ഉദ്യോഗസ്ഥരെ ചുമതലപ്പെടുത്തിയത്. രണ്ടായിരമാണ്ടിൽ പ്രണബ് സെൻ കമ്മിറ്റി റിപ്പോർട്ട് പുറത്തുവന്നപ്പോൾ മുതൽ തേക്കടിയിൽനിന്ന് ദീർഘദൂരമായ ജനവാസ മേഖലയിലൂടെ ആനമലവരെ എത്തുന്ന ആനത്താരയുണ്ടെന്നുള്ള പ്രചാരണം വനംവകുപ്പുകാരും കപട പരിസ്ഥിതിവാദികളും നടത്തിക്കൊണ്ടിരിക്കുകയാണ്. ചിന്നക്കനാലിൽ ഒരു ‘ആനപാർക്ക്’ ഉണ്ടെന്നും അവകാശപ്പെടുന്നു. ജില്ലാ കളക്‌ടറുടെ ഈ നടപടി വരുംനാളുകളിൽ ഉപയോഗിക്കാൻ പോകുന്നത് വന-പരിസ്ഥിതിവാദികൾ ആയിരിക്കും.

മലയോരത്തിന്‍റെ വികസനത്തിനും മനുഷ്യർക്ക് പട്ടയം കിട്ടുന്നതിനും തടസമായി പരിസ്ഥിതി സംരക്ഷണത്തിന്‍റെ പേരിൽ ബോധപൂർവമായ കുപ്രചാരണങ്ങൾ നടത്തുകയും സുപ്രീംകോടതിയിൽ കേസുകൾ നടത്തുകയും തങ്ങളുടെ വിജയത്തിന് വ്യാജരേഖകൾ ചമയ്ക്കുകയും ചെയ്യുന്നവരാണവർ. കോടതികളെ സമീപിച്ച് പല ഉത്തരവുകൾ വാങ്ങുകയും ചെയ്തിട്ടുള്ളവരാണ് . ഇപ്പോഴും കോടതികളിൽ അവർ കൊടുത്ത കേസുകൾ തീർപ്പാകാതെയുണ്ട്. പട്ടയം നൽകുന്നതിനെതിരായ കേസും (സിഎച്ച്ആർ) കാർഡമം ഹിൽ റിസർവ് വനമാക്കി മാറ്റാനുള്ള കേസും ഇതിൽ പ്രധാനമാണ്. ഈ കാര്യങ്ങളെല്ലാം ഒരു ജില്ലാ ഭരണാധികാരി അറിയാത്തത് കഷ്‌ടമല്ലേ? അദ്ദേഹത്തിന്‍റെ നിലപാടുകൾ വിചിത്രവും ദൗർഭാഗ്യകരവുമാണ്.

വനനശീകരണത്തിന്‍റെ ഉത്തരവാദികൾ ആര്?

കേരളത്തിലെ വന്യജീവി സംരക്ഷണം വിചിത്രമായ രൂപത്തിലാണ്. വന്യജീവി സങ്കേതങ്ങൾക്കു പുറമേ വനങ്ങൾ പൂർണമായും വന്യജീവികൾക്ക് വിട്ടുകൊടുത്തിരിക്കുകയാണ്. വനത്തിനുള്ളിൽ അവയ്ക്ക് ഭക്ഷണവും വെള്ളവും ലഭിക്കുന്നില്ല. വന്യജീവികളുടെ എണ്ണം വല്ലാതെ പെരുകിയിട്ടുമുണ്ട്. മനുഷ്യന്‍റെ ജനന നിയന്ത്രണം നടത്തുന്ന സർക്കാർ വന്യജീവി പെരുപ്പം തടയുന്നില്ല. അവയ്ക്ക്‌ തീറ്റയും വെള്ളവും നൽകാത്തവർക്കെതിരേ നടപടികളില്ല. വനത്തിനുള്ളിലെ തീറ്റയെല്ലാം നശിപ്പിച്ചത് ഫോറസ്റ്റുകാരാണ്. പ്രവാസി സസ്യങ്ങളും യൂക്കാലി പോലുള്ള മരങ്ങളും വച്ചുപിടിപ്പിച്ച് പുല്ലും തീറ്റയും നഷ്‌ടപ്പെടുത്തുകയും ജലദൗർലഭ്യമുണ്ടാക്കുകയും ചെയ്തത് ഫോറസ്റ്റുകാരാണ്. ഈ വസ്തുതകളെല്ലാം മറന്നുകൊണ്ടുള്ള സമീപനങ്ങളാണ് ഭരണ നേതൃത്വത്തിൽനിന്നുണ്ടാകുന്നത്.

മനുഷ്യജീവന് തെല്ലും വിലകൽപ്പിക്കാതെ വനാതിർത്തികളിൽ വസിക്കുന്നവനെ പീഡിപ്പിക്കുകയാണ്. ചിന്നക്കനാലിൽ ജനങ്ങൾക്കു നേരേ കരിനിയമം കൂടുതലായി പ്രയോഗിച്ചു. ഇത് നിസാരമല്ല. വനവത്കരണം മാത്രമാണ് ലക്ഷ്യം. 1972ൽ സ്റ്റോക്ക്ഹോമിൽനിന്ന് ആരംഭിച്ച ഒരു ദീർഘകാല പദ്ധതിയുടെ ഭാഗമായി വിപുലമായ അർഥത്തിലാണിത് വിലയിരുത്തേണ്ടത്. ഉദ്ദേശ്യം പശ്ചിമഘട്ടത്തെ ലോകത്തിന്‍റേതാക്കി മാറ്റുക എന്നതാണ്. ആ ശ്രമത്തിന്‍റെ ഭാഗമായി നിയമനിർമാണങ്ങൾ നടത്തി. അവ ശക്തമായി നടപ്പാക്കിക്കൊണ്ടിരിക്കുകയാണ്. അതിന്‍റെ ഭാഗമാണ് ഇഎസ്എ.

ജനവിരുദ്ധ ഉത്തരവ് പിൻവലിക്കണം

വനവും പരിസ്ഥിതിയുമായി ബന്ധപ്പെട്ട കേസുകളിൽ ഇതുവരെ സുപ്രീംകോടതിയും ഹൈക്കോടതികളും നടത്തിയിട്ടുള്ള ഭൂരിപക്ഷം വിധികളും ജനതാത്പര്യവും സാമൂഹിക യാഥാർഥ്യവും പരിഗണിക്കാതെയുള്ളവയാണെന്ന് ഖേദപൂർവം പറയട്ടെ! ജില്ലാ കളക്ടറുടെ ഉത്തരവുമായി ആരെങ്കിലും സുപ്രീംകോടതിയെ സമീപിച്ചാൽ തേക്കടി മുതൽ ആനമലവരെ ആനത്താര അനുവദിച്ചു കൊണ്ട് ഉത്തരവാകാനുള്ള സാധ്യത വളരെ കൂടുതലാണ്. ഇത് സങ്കൽപ്പിക്കാവുന്നതിലും എത്രയോ ഭീകരമാണ്. അതാണ് ജില്ലാ കളക്ടറുടെ ഉത്തരവിന്‍റെ പ്രാധാന്യം. ജനപ്രതിനിധികൾ ഇതു മനസിലാക്കുന്നില്ല. കഴിഞ്ഞ കാലങ്ങളിൽ ചിന്നക്കനാലിലും മറ്റും റവന്യു ഭൂമി വനഭൂമിയാക്കി പ്രഖ്യാപിച്ചിട്ടുള്ള ഉത്തരവുകൾ മരവിപ്പിച്ചിട്ടുള്ളതല്ലാതെ, റദ്ദാക്കിയിട്ടില്ല. അതിനർഥം ഉത്തരവ് നിലനിൽക്കുന്നു എന്നാണ്. അതിനാൽ ജില്ലാ കളക്‌ടറുടെ ഉത്തരവ് റദ്ദാക്കണം. അല്ലാത്തപക്ഷം ഇതിനെ പിന്തുടർന്ന് മലയോരമേഖലയാകെ വരുംകാലങ്ങളിലിത് നടപ്പാക്കാനുള്ള ദീർഘകാല പദ്ധതിക്കുള്ള സാധ്യതയുണ്ട്. ഫയലുകൾ രഹസ്യമാക്കി വച്ച് വർഷങ്ങൾ കഴിയുമ്പോൾ അല്പാല്പമായി നടപ്പാക്കുന്ന തന്ത്രമാണ് വനം-പരിസ്ഥിതി സംഘങ്ങൾ സ്വീകരിക്കുന്നത്. ജനപ്രതിനിധികൾ അറിഞ്ഞുകൊണ്ട് ചെയ്യുന്ന തെറ്റുകൾ ദൈവം പൊറുക്കുമോ?

(കിസാൻ സഭ ദേശീയ സമിതി അംഗമാണ് ലേഖകൻ)

Leader Page

ഇന്ത്യൻ യുവത്വം പ്രതിസന്ധികളിലൂടെ

സ്വാമി വിവേകാനന്ദൻ ഒരിക്കൽ യുവാക്കളെ ഉദ്ബോധിപ്പിച്ചുകൊണ്ട് പറയുകയുണ്ടായി. “യുവാവേ ഉണരുക, നിന്‍റെ ലക്ഷ്യം കൈവരിക്കുന്നതുവരെ പരിശ്രമം നിർത്തരുത്.” എന്നാൽ, തങ്ങളുടെ ചുറ്റുമുള്ളവർക്ക് വെളിച്ചമായി, പ്രചോദനമായി മാറേണ്ട യുവജനങ്ങൾ ഇന്ന് അസ്വസ്ഥരും ആശങ്കാകുലരുമാണ്. സമീപകാലത്തുണ്ടായ അക്കാദമിക രംഗത്തെ മാറ്റങ്ങൾ, പരീക്ഷാ മൂല്യനിർണയ മാറ്റങ്ങൾ, തൊഴിൽരംഗത്തെ അസ്ഥിരത തുടങ്ങിയവ ഈ ആശങ്കയ്ക്ക് ആക്കം കൂട്ടുന്നു.

പരീക്ഷകളും വിദ്യാർഥികളുടെ ഭാവിയും

ഈ വർഷം നടത്തിയ സിബിഎസ്ഇ പരീക്ഷയുടെ മൂല്യനിർണയം ധാരാളം വിദ്യാർഥികളുടെ ഭാവി കഷ്‌ടത്തിലാക്കി. ഈയടുത്ത കാലത്ത് നാഷണൽ ടെസ്റ്റിംഗ് ഏജൻസി (എൻടിഎ) നടത്തിയ പരീക്ഷകളിലെ ക്രമക്കേടുകളും ചോദ്യപേപ്പർ ചോർച്ചയും മെഡിക്കൽ പ്രവേശന പരീക്ഷയായ നീറ്റ്, ഉന്നതവിദ്യാഭ്യാസത്തിനായുള്ള നെറ്റ് തുടങ്ങിയ പ്രമുഖ പരീക്ഷകളിൽ തുടർച്ചയായി ഉണ്ടായ പ്രശ്നങ്ങളും യുവതലമുറയെ കടുത്ത മാനസിക വിഷമത്തിലേക്ക് നയിച്ചിട്ടുണ്ട്.

2026ലെ നീറ്റ് യുജി റദ്ദ് ചെയ്തപ്പോൾ രാജ്യത്തിന്‍റെ വിവിധ ഭാഗങ്ങളിലായി ഇരുപതിലധികം യുവാക്കളാണ് ആത്മഹത്യ ചെയ്തത്. 2024 ജൂണിൽ നടത്തിയ യുജിസി നെറ്റ് പരീക്ഷ അടുത്ത ദിവസംതന്നെ റദ്ദ് ചെയ്യേണ്ടി വന്നു. ഇത് ചോദ്യപേപ്പർ ചോർന്നതിനാലായിരുന്നു.

പബ്ലിക് സർവീസ് കമ്മീഷൻ നടത്തിയ പരീക്ഷകളിൽ ഒന്നാം റാങ്ക് നേടിയ ഉദ്യോഗാർഥിക്കുപോലും നിയമനം ലഭിക്കാതെ നിരാശപ്പെടേണ്ടിവരുന്ന സാഹചര്യമാണ് ഇന്നു നിലനിൽക്കുന്നത്. വേക്കൻസികൾ റിപ്പോർട്ട് ചെയ്യാതെതന്നെ പരീക്ഷകൾ നടത്തുകയും റാങ്ക് ലിസ്റ്റ് പ്രസിദ്ധീകരിക്കുകയും ചെയ്യുന്നത് എങ്ങനെയാണ് സാധൂകരിക്കപ്പെടുന്നത്. റാങ്ക് ലിസ്റ്റിന്‍റെ കാലാവധി തീരുന്ന സമയം മുഴുവനും കാത്തിരുന്നിട്ടാണ് ഒന്നാം റാങ്കുകാർക്കുപോലും ജോലി ലഭിക്കാതിരിക്കുന്നത്.

പരീക്ഷകളും ജോലിസംബന്ധമായ കാര്യങ്ങളും കൈകാര്യം ചെയ്യുന്നവർ ഉത്തരവാദിത്വബോധത്തോടും നീതിബോധത്തോടും വിവേചനരഹിതമായി കാര്യങ്ങൾ ചെയ്യാൻ തക്കവിധം ഇച്ഛാശക്തിയുള്ളവരാകണം. മഹാകവി രബീന്ദ്രനാഥ ടാഗോർ തന്‍റെ ‘എന്‍റെ രാജ്യത്തെ ഉണർത്തുക’ എന്ന കവിതയിലൂടെ നമ്മെയെല്ലാം ആഹ്വാനം ചെയ്യുന്നത് ഇതുതന്നെയാണ്.

മനം ഭയമില്ലാതെ നിൽക്കുന്നിടം
തല ഉയർന്നു നിവർന്നിരിക്കുന്നിടം
സങ്കുചിതമായ ഗൃഹമതിലുകളാൽ
ഖണ്ഡഖണ്ഡമായി ലോകം മുറിയിടാത്തൊരിടം
അറിവു സ്വതന്ത്രമായിരിക്കുന്നിടം
അധ്വാനത്തിന്‍റെ സ്വർഗത്തിലേക്ക്
എന്‍റെ പിതാവേ,
എന്‍റെ രാജ്യത്തെ അങ്ങ് ഉണർത്തണമേ.

യുവജന പ്രതിസന്ധി - വിദ്യാഭ്യാസം, തൊഴിൽ, പരിശീലന രംഗത്ത്

ഇന്ത്യയുടെ ഏറ്റവും വലിയ അനുഗ്രഹമായ യുവജനസന്പത്ത് ഇന്ന് ഇന്ത്യക്ക് ഭാരമാകുന്നുവോ? നിതി ആയോഗ് 2026 ഓഗസ്റ്റിൽ പുറത്തുവിട്ട ‘വികസിത് ഭാരത് 2047ലേക്കായി നൈപുണ്യവികസനത്തെ പുനരാവിഷ്കരിക്കുക’ എന്ന റിപ്പോർട്ട് പ്രകാരം ഇന്ത്യയിലെ യുവാക്കൾ നേരിടുന്ന പ്രധാന പ്രതിസന്ധികൾ താഴെ പറയുന്നവയാണ്:

1) NEET: യുവാക്കളുടെ വലിയ എണ്ണം

ഇന്ത്യയിൽ 15നും 29നും ഇടയിൽ പ്രായമുള്ള 8.7 കോടി യുവാക്കൾ വിദ്യാഭ്യാസമോ തൊഴിലോ നൈപുണ്യ പരിശീലനമോ ഇല്ലാത്ത അവസ്ഥയിലാണ്. അന്താരാഷ്‌ട്ര തലത്തിൽ ഇങ്ങനെയുള്ളവരെ NEET (Not in Eduction, Employment or Training) എന്നാണ് വിശേഷിപ്പിക്കുന്നത്. ഇത് തൊഴിലില്ലായ്മനിരക്ക് മാത്രമല്ല; മറിച്ച്, ഒരു മേഖലയിലും സജീവമല്ലാത്ത യുവജനങ്ങളുടെ എണ്ണമാണ്. 91% ബിരുദധാരികളായ യുവാക്കളും തൊഴിലില്ലാത്തവരാണ്.

2) വിദ്യാഭ്യാസവും തൊഴിലും തമ്മിലുള്ള പൊരുത്തക്കേട്

രാജ്യത്തെ ഉന്നതവിദ്യാഭ്യാസം നേടിയ യുവാക്കളിൽ 8.25% പേർക്ക് മാത്രമാണ് തങ്ങളുടെ യോഗ്യതയ്ക്ക് അനുസരിച്ചുള്ള ജോലി ലഭിക്കുന്നത്. പരന്പരാഗതബിരുദങ്ങൾ (BA, BSc, BCom) നേടുന്നവർക്ക് ഇന്നത്തെ ആധുനിക മാർക്കറ്റിൽ ആവശ്യമായ പ്രായോഗിക നൈപുണ്യമോ സാങ്കേതിക അറിവോ (ഉദാഹരണത്തിന് എഐ, മെഷീൻ ലേണിംഗ്, കമ്യൂണിക്കേഷൻ സ്കിൽസ്) ലഭിക്കുന്നില്ല.

3) സ്ത്രീകളുടെ പങ്കാളിത്തക്കുറവും പ്രതിസന്ധികളും

ഈ 8.7 കോടി ജനസംഖ്യയിൽ 88 ശതമാനത്തോളം പേരും വീട്ടുജോലികളിൽ മാത്രം ഒതുങ്ങിപ്പോയവരാണ്. സ്ത്രീകളുടെ കാര്യത്തിലാണ് ഈ പ്രതിസന്ധി ഏറ്റവും രൂക്ഷം. പരിശീലനകേന്ദ്രങ്ങളുടെ കുറവ്, യാത്രാസൗകര്യമില്ലായ്മ, കുടുംബപരമായ ഉത്തരവാദിത്വങ്ങൾ, സുരക്ഷാ പ്രശ്നങ്ങൾ എന്നിവ കാരണം ഭൂരിഭാഗം യുവതികൾക്കും മികച്ച നൈപുണ്യ വികസന പരിപാടികളിൽ പങ്കെടുക്കാൻ സാധിക്കുന്നില്ല.

4) സാമ്പത്തിക ബാധ്യതകൾ

സാധാരണ കുടുംബങ്ങളിലെ വിദ്യാർഥികൾ, റെഗുലർ കോളജ് ഫീസിനായും പ്രൈവറ്റ് ട്യൂഷനായും വലിയ തുക ചിലവഴിക്കുന്നുണ്ട്. എന്നാൽ, പഠനം കഴിഞ്ഞിറങ്ങുന്പോൾ വീണ്ടും വലിയ തുക നൽകി കോഡിംഗോ മറ്റ് സാങ്കേതിക കോഴ്സുകളോ പഠിക്കാൻ ഇവർക്ക് സാധിക്കുന്നില്ല. വരുമാനമില്ലാത്തതും മുന്പ് പഠനത്തിനായി ചിലവഴിച്ച തുകയുടെ ബാധ്യതയും യുവാക്കളെ കൂടുതൽ പ്രതിസന്ധിയിലാക്കുന്നു.

പ്രധാന പ്രശ്നങ്ങൾ

ഇന്നത്തെ നിലവിലുള്ള ബിരുദവും മറ്റ് വിദ്യാഭ്യാസ രീതികളും ആവശ്യത്തിന് ജോലി ലഭിക്കാൻ പര്യാപ്തമല്ല.
നൈപുണ്യ പരിശീലനം വളരെ വിദൂരത്തിലാണ്. ആവശ്യത്തിന് നൈപുണ്യമുള്ളവരെ ഇന്നത്തെ വിദ്യാഭ്യാസരീതി രൂപപ്പെടുത്തുന്നില്ല.
വിദ്യാഭ്യാസവും അതിനോടൊത്തുള്ള ചെറിയ പരിശീലനവും കഴിഞ്ഞാൽ വീണ്ടും പരിശീലനത്തിനാവശ്യമായ വരുമാനം/ഫണ്ട് ലഭ്യമല്ല.
എഐയുടെ ആവിർഭാവം മൂലവും ഓട്ടോമേഷൻ മൂലവും ഐടി മേഖലയിൽ റിക്രൂട്ട്മെന്‍റ് കുറവുണ്ട്. അതുപോലെതന്നെ ഇന്ത്യയുടെതന്നെ ശോചനീയമായ വിദ്യാഭ്യാസ നടത്തിപ്പ് ഈ റിപ്പോർട്ട് ചൂണ്ടിക്കാട്ടുന്നുണ്ട്.
വൈദ്യുതി ഇല്ലാതെ 1,19,000 സ്കൂളുകൾ പ്രവർത്തിക്കുന്നുണ്ട്.
98,592 സ്കൂളുകളിൽ പെണ്‍കുട്ടികൾക്ക് ശൗചാലയമില്ല.
1,00,843 സ്കൂളുകളിൽ ഒരൊറ്റ ടീച്ചർ മാത്രമാണ് എല്ലാം പഠിപ്പിക്കാനും കാര്യങ്ങൾ നടത്താനുമുള്ളത്.
ഇതെല്ലാം പരിഹരിച്ചു വേണം 2047ലെ വികസിത് ഭാരത് എന്ന സ്വപ്നം സാക്ഷാത്കരിക്കാൻ.
നിതി ആയോഗ് നിർദേശിക്കുന്ന പരിഹാരമാർഗങ്ങൾ
സബ്സിഡിയോടുകൂടിയ നൈപുണ്യ പരിശീലന പരിപാടികൾ വിപുലമാക്കുക.
പ്രാദേശിക തൊഴിൽ വിപണിക്ക് അനുസരിച്ചുള്ള കോഴ്സുകൾ ആരംഭിക്കുക.
നമ്മുടെ രാഷ്‌ട്രപിതാവായ മഹാത്മാഗാന്ധി പറഞ്ഞത്, വിദ്യാഭ്യാസത്തിന്‍റെ ലക്ഷ്യം ഒരുവനെ സ്വന്തം കാലിൽ നിർത്താൻ പര്യാപ്തമാക്കുകയെന്നതാണ്. അതായത്, വിദ്യാഭ്യാസം വഴി ഒരുവന് തന്‍റെ ജീവിതമാർഗം കണ്ടെത്താൻ സാധിക്കണം. എല്ലാവരുടെയും സ്വപ്നം സർക്കാർ ജോലികളാണ്. പക്ഷേ, ഇത്രയധികം പേർക്ക് ഒരു സർക്കാരിനും ജോലി നല്കാൻ സാധിക്കുകയില്ല. അതുപോലെ വലിയ കോർപറേറ്റ് സ്ഥാപനങ്ങൾ ജോലിക്കാരുടെ എണ്ണം ഇപ്പോൾ കുറയ്ക്കുകയാണ്. ഇവിടെ ചെറുകിട വ്യവസായങ്ങൾക്ക് സുപ്രധാന പങ്ക് വഹിക്കാൻ സാധിക്കും.

കുറെയധികം യുവജനങ്ങൾക്ക് ജോലി നൽകാൻ ചെറുകിട വ്യവസായങ്ങൾക്ക് കഴിയും. നൂതനമായ ആശയങ്ങൾ ഉൾക്കൊണ്ട് സ്റ്റാർട്ടപ്പുകൾ ആരംഭിക്കുന്നുണ്ട്. സംരംഭകത്വം നന്നായി പോത്സാഹിപ്പിച്ചാൽ ധാരാളം പേർക്ക് തൊഴിൽ ലഭ്യമാകും. ഒന്നോ രണ്ടോ പേർക്കുമുതൽ നൂറുകണക്കിന് യുവജനങ്ങൾക്ക് അഭയമായി ഇന്ന് സ്റ്റാർട്ടപ്പുകൾ ഇന്ത്യയുടെ പല ഭാഗങ്ങളിലും പ്രവർത്തിക്കുന്നുണ്ട്. ഇപ്പോൾ നൽകുന്ന പ്രോത്സാഹനം ശ്ലാഘനീയമാണെങ്കിലും ഇന്ത്യയൊട്ടാകെ എല്ലാ വിദ്യാഭ്യാസ സ്ഥാപനങ്ങളിലേക്കും ഇത് വ്യാപിപ്പിക്കേണ്ടതുണ്ട്.

എല്ലാ തൊഴിൽരഹിതരുടെയും ആഗ്രഹം നല്ല ജോലി ലഭിക്കണമെന്നതാണ്. എന്താണീ നല്ല ജോലി? നമ്മുടെയിടയിൽ പണ്ടുണ്ടായിരുന്ന ചാതുർവർണ്യ വിവേചനം, ഇന്ന് തൊഴിലിന്‍റെ പേരിൽ സമൂഹത്തിൽ ശക്തമായിട്ടുണ്ട്. ഡോക്‌ടർ, എൻജിനിയർ, ജഡ്ജി, സർക്കാർ ഉദ്യോഗസ്ഥൻ തുടങ്ങിയവരെ ഒരുതട്ടിലും കൂലിപ്പണിക്കാരെയും സാധാരണ ജോലി ചെയ്യുന്നവരെയും മറ്റൊരു തട്ടിലും കാണുന്ന സമീപനം നാം മാറ്റണം. ഓരോരുത്തരും ചെയ്യുന്ന ജോലിയെ അംഗീകരിക്കാനും അഭിനന്ദിക്കാനുമുള്ള തുറവി നമുക്കുണ്ടാകണം. എല്ലാറ്റിനുമുപരി ‘മനുഷ്യൻ, മനുഷ്യത്വം’ എന്ന കാഴ്ചപ്പാടിലേക്ക് നാം വളരണം. ജോലിയെക്കുറിച്ചുള്ള ‘സമഭാവം’ കുടുംബങ്ങളിൽനിന്ന് തുടങ്ങി സമൂഹത്തിലേക്ക് വ്യാപിപ്പിക്കണം. അതുവഴി ഏതു ജോലിയും സന്തോഷത്തോടെ ആസ്വദിച്ചു ചെയ്യാൻ നമ്മുടെ യുവജനങ്ങൾ തയാറാകും.

(കാഞ്ഞിരപ്പള്ളി അമൽ ജ്യോതി കോളജ് ഓഫ് എൻജിനിയറിംഗ്-ഓട്ടോണമസ്-അധ്യാപകനാണ് ലേഖകൻ)

Leader Page

ഇന്ന് ലോക ഭക്ഷ്യദിനം: ആഗോള ഭക്ഷ്യ പ്രതിസന്ധി പടിവാതിൽക്കൽ

ലോകം കടുത്ത ഭക്ഷ്യ പ്രതിസന്ധിയിലേക്ക് നീങ്ങുകയാണോ? നഗരങ്ങളിലും ഗ്രാമങ്ങളിലും ഒരു പോലെ പിടിവിട്ടുയരുന്ന ഭക്ഷ്യവിലക്കയറ്റവും മധ്യ ഇന്ത്യയിലെ വരണ്ടുണങ്ങിയ കൃഷിയിടങ്ങളുമെല്ലാം നമ്മുടെ ഭക്ഷ്യവ്യവസ്ഥ തകർച്ചയിലേക്ക് നീങ്ങുകയാണെന്നതിന്‍റെ സൂചനയാണ്.

നമ്മൾ വിചാരിക്കുന്നതിനുമപ്പുറം ദുർബലവും അസ്ഥിരവുമാണ് ഇന്ന് ആഗോള ഭക്ഷ്യവ്യവസ്ഥ. പശ്ചിമേഷ്യൻ യുദ്ധം, യുക്രെയ്ൻ സംഘർഷം, എൽ നിനോ ഉൾപ്പടെയുള്ള കാലാവസ്ഥാ ഭീഷണികൾ, രാസവളം പ്രതിസന്ധി തുടങ്ങിയ കാരണങ്ങളാൽ 2027ൽ ലോക ഭക്ഷ്യവ്യവസ്ഥ അപ്രതീക്ഷിത ആഘാതങ്ങൾ നേരിട്ടേക്കാമെന്ന് ഓഗസ്റ്റിൽ പുറത്തിറക്കിയ ജെ.പി. മോർഗൻ റിപ്പോർട്ടിൽ പറയുന്നു.

ഇന്ത്യ, ബ്രസീൽ, ഇന്തോനേഷ്യ എന്നീ രാജ്യങ്ങൾക്കായിരിക്കും ഏറ്റവും കൂടുതൽ ആഘാതം. ഇന്ന് കൃഷിചെയ്യുന്ന വിളകൾ വിളവെടുപ്പ്, സംസ്കരണം, ഗതാഗതം, വിതരണം എന്നീ ഘട്ടങ്ങൾ കടന്ന് ഉപഭോക്താക്കളിൽ എത്താൻ മാസങ്ങളെടുക്കും. നമ്മൾ ഇപ്പോൾ കഴിക്കുന്ന ഭക്ഷണം മാസങ്ങൾക്കുമുമ്പ് വിളവെടുത്തതായിരിക്കും. ഇതിനർഥം ഏതാനും മാസങ്ങൾക്കകമോ അടുത്ത വർഷമോ പൊട്ടിപ്പുറപ്പെടാനിടയുള്ള ഒരു ഭക്ഷ്യപ്രതിസന്ധിയിലേക്ക് ലോകം നീങ്ങിക്കൊണ്ടിരിക്കുന്നു എന്നതാണ്.

പട്ടിണിക്കാരുടെ എണ്ണം കൂടും

2030ഓടെ വിശപ്പില്ലാത്ത ഒരു ലോകം കെട്ടിപ്പടുക്കുക (സീറോ ഹംഗർ) എന്നതാണ് ഐക്യരാഷ്‌ട്ര സഭയുടെ സുസ്ഥിര വികസന ലക്ഷ്യങ്ങളിൽ രണ്ടാമത്തേത്. എന്നാൽ ഭൗമ-രാഷ്‌ട്രീയ സംഘർഷങ്ങൾ, കോവിഡ് മഹാമാരി, സാമ്പത്തിക പ്രതിസന്ധി, ദുർബലമായ നയങ്ങൾ, കാലാവസ്ഥാ വ്യതിയാനം തുടങ്ങിയ കാരണങ്ങളാൽ ഈ ലക്ഷ്യത്തിന് അടുത്തെങ്ങും എത്താനായിട്ടില്ല. എൽ നിനോ കാരണം 2027ഓടെ കുറഞ്ഞത് 49 ദശലക്ഷം ആളുകൾകൂടി കടുത്ത ഭക്ഷ്യ അരക്ഷിതാവസ്ഥയിലേക്ക് തള്ളപ്പെട്ടേക്കാമെന്ന് ലോക ഭക്ഷ്യപരിപാടിയുടെ (ഡബ്ല്യുഎഫ്പി) പ്രാഥമിക വിശകലനം സൂചിപ്പിക്കുന്നു. ലോകജനസംഖ്യയുടെ 40 ശതമാനത്തോളം വരുന്ന 300 കോടിയിലധികം ആളുകൾക്ക് പോഷകസമ്പന്നവും ആരോഗ്യകരമായ ഭക്ഷണം വാങ്ങാനുള്ള സാമ്പത്തിക ശേഷിയില്ല.

പിടിയിൽ നിൽക്കാതെ ഭക്ഷ്യ വിലക്കയറ്റം

തടസപ്പെട്ട വ്യാപാരപാതകളും തീവ്ര കാലാവസ്ഥാ സംഭവങ്ങളും അടുത്ത മാസങ്ങളിൽ ആഗോളതലത്തിൽ ഭക്ഷ്യവസ്തുക്കളുടെ വില വർധിപ്പിച്ചേക്കാമെന്ന് ജെ.പി. മോർഗൻ റിപ്പോർട്ട് സൂചിപ്പിക്കുന്നു. പ്രത്യാഘാതങ്ങൾ പ്രകടമാകാൻ മാസങ്ങളെടുത്തേക്കാം. 2027ന്‍റെ ആദ്യപകുതിയിൽ ആഗോളതലത്തിൽ ഭക്ഷ്യവിലക്കയറ്റം ഏകദേശം അഞ്ച് ശതമാനത്തിലേക്ക് ഉയർന്നേക്കാമെന്ന് റിപ്പോർട്ട് മുന്നറിയിപ്പ് നൽകുന്നു. 2026ന്‍റെ ആദ്യപകുതിയിൽ 2.8 ശതമാനം മാത്രമായിരുന്നു ഇത്. നാഷണൽ സ്റ്റാറ്റിസ്റ്റിക്സ് ഓഫിസ് (എൻഎസ്ഒ) ഈ മാസം 12ന് പുറത്തുവിട്ട പ്രാഥമിക കണക്കുകൾ പ്രകാരം, ഇന്ത്യയിൽ ഈ സെപ്റ്റംബറിൽ ഭക്ഷ്യവസ്തുക്കളുടെ വില കുത്തനെ കൂടി. ഭക്ഷ്യവസ്തുക്കളുടെ വിലക്കയറ്റം ഓഗസ്റ്റിലെ 5.97 ശതമാനത്തിൽനിന്ന് സെപ്റ്റംബറിൽ 7.74 ശതമാനമായി ഉയർന്നു. നഗരപ്രദേശങ്ങളിൽ ഭക്ഷ്യവില 7.18 ശതമാനം ഉയർന്നപ്പോൾ ഗ്രാമീണ മേഖലകളിൽ വർധന 8.06 ശതമാനമായിരുന്നു. ഭക്ഷ്യധാന്യങ്ങളുടെ വില കഴിഞ്ഞ ഒരു വർഷത്തിനിടെ 17 ശതമാനത്തിലേറെ കൂടി. കൃഷിച്ചെലവ് കൂടുകയും ഉത്പാദനം കുറയുകയും ചെയ്യുമെന്നതിനാൽ വരുംമാസങ്ങളിൽ വിലക്കയറ്റം കൂടുതൽ രൂക്ഷമായിരിക്കും.

കാർഷികോത്പാദനം ഇടിയും

സൂപ്പർ എൽ നിനോയുടെ പശ്ചാത്തലത്തിൽ 2026-27 വിളവെടുപ്പ് വർഷം ഇന്ത്യയുടെ ഭക്ഷ്യധാന്യോത്പാദനത്തിൽ കാര്യമായ കുറവുണ്ടാകും. എൽ നിനോയുടെ പ്രഭാവം കണക്കിലെടുത്ത് രാജ്യത്തെ 2026-27 വിളവെടുപ്പ് വർഷത്തേക്കുള്ള ഭക്ഷ്യധാന്യ ഉത്പാദനലക്ഷ്യം 373.93 ദശലക്ഷം ടണ്ണായി പുതുക്കി നിശ്ചയിച്ചിട്ടുണ്ട്. 2025-26-ലേതിനേക്കാൾ 2.63 ദശലക്ഷം ടൺ കുറവാണിത്. ഇന്ത്യയിൽ എൽ നിനോ കാരണം അരി, മക്കച്ചോളം, പയർ വർഗങ്ങൾ തുടങ്ങിയവയുടെ ഉത്പാദനത്തിൽ കാര്യമായ കുറവുണ്ടാകുമെന്ന് ലോക ഭക്ഷ്യ കാർഷിക സംഘടന മുന്നറിയിപ്പ് നൽകുന്നു.

2026-27ൽ ഇന്ത്യയുടെ അരി ഉത്പാദനത്തിൽ 4.5 മുതൽ 5.5 ശതമാനം വരെ ഇടിവുണ്ടായേക്കാം. പൊതുവിപണിയിൽ അരിയുടെ വൻ വിലക്കയറ്റത്തിനാണ് വരും മാസങ്ങൾ സാക്ഷ്യം വഹിക്കാൻ പോകുന്നത്. ഗോതമ്പ് ഉത്പാദനത്തിൽ ഇന്ത്യയിൽ വലിയ പ്രതിസന്ധി പ്രതീക്ഷിക്കുന്നില്ല. എന്നാൽ കൊടുംചൂടിൽ യൂറോപ്പിലെ കൃഷി നശിച്ചതും യുക്രെയ്ൻ യുദ്ധവും കാരണം ആഗോളവിപണിയിൽ ഗോതമ്പിന്‍റെ വില ഉയർന്നുകൊണ്ടിരിക്കുകയാണ്. ഇത് വരുംമാസങ്ങളിൽ ഇന്ത്യയിലും പ്രതിഫലിക്കും

മാറ്റമില്ലാതെ രാസവളം പ്രതിസന്ധി

പശ്ചിമേഷ്യാ സംഘർഷത്തെത്തുടർന്ന് തുടങ്ങിയ രാസവളം പ്രതിസന്ധി മാറ്റമില്ലാതെ തുടരുകയാണ്. ആഭ്യന്തര വിപണിയിൽ യൂറിയ, ഡൈ അമോണിയം ഫോസ്ഫേറ്റ് എന്നീ വളങ്ങളുടെ വില മാറ്റമില്ലാതെ തുടരുന്നു. എന്നാൽ മറ്റു രാസവളങ്ങളുടെ വില ഒരു വർഷത്തിനിടയിൽ രണ്ടിരട്ടിയിലേറെ കൂടിയത് കർഷകരെ പ്രതിസന്ധിയിലാക്കിയിട്ടുണ്ട്. കർഷകർ വളത്തിന്‍റെ ഉപയോഗം കുറയ്ക്കുകയോ കൃഷി ചെയ്യുന്ന വിളകൾ മാറ്റുകയോ കൃഷിസ്ഥലം തരിശിടുകയോ ചെയ്യും. കർഷകരുടെ ഈ തീരുമാനങ്ങൾ ഭാവിയിലെ ഭക്ഷ്യോത്പാദനത്തെ കാര്യമായി ബാധിക്കും.

ഇന്ത്യയിലെ യൂറിയ നിർമാണ പ്ലാന്‍റുകളിൽ ഉപയോഗിക്കുന്ന പ്രകൃതിവാതകത്തിന്‍റെ 80 ശതമാനവും പശ്ചിമേഷ്യൻ രാജ്യങ്ങളിൽനിന്നാണ് എത്തുന്നത്. ഫോസ്ഫേറ്റ് വളങ്ങളുടെ 80 ശതമാനവും പൊട്ടാസ്യം വളങ്ങൾ 100 ശതമാനവും രാജ്യം ഇറക്കുമതി ചെയ്യുന്നു. ഫോസ്ഫേറ്റ് വളം ഇറക്കുമതിയുടെ 40 ശതമാനവും സൗദി അറേബ്യയിൽനിന്നാണ്. പശ്ചിമേഷ്യൻ സംഘർഷം അവസാനിച്ചാലും രാസവളം വിതരണ ശൃംഖലകൾ നേരേയാക്കാൻ മാസങ്ങൾ വേണ്ടിവരും. രാസവളം സബ്സിഡിക്കുവേണ്ടി 2026-27 ലെ ബജറ്റിൽ നീക്കിവച്ചിരുന്ന 1.71 ലക്ഷം കോടി രൂപ മൂന്ന് ലക്ഷം കോടി രൂപയെങ്കിലുമായി ഉയരും.

Leader Page

ബ്രെക്സിറ്റ് അബദ്ധം; തിരിച്ചുപോക്കിലാണ് ബ്രിട്ടന്‍റെ ഭാവി

ബ്രെക്സിറ്റ് സമ്പൂര്‍ണ പരാജയമായിരുന്നുവെന്നതിൽ ഇന്ന് രണ്ടഭിപ്രായമില്ല. എന്നാൽ, അതിനപ്പുറം വംശീയതയുടെ തിരിച്ചുവരവിന് ചുവന്നപരവതാനി വിരിക്കുകകൂടിയായിരുന്നു ബ്രെക്സിറ്റ് എന്നതാണ് വലിയ ദുരന്തം. കുടിയേറ്റക്കാരെ ‘ആഭ്യന്തര ശത്രുക്കളെ’ന്ന് മുദ്രകുത്തി, യുദ്ധാനന്തര യൂറോപ്പ് ഉയര്‍ത്തിപ്പിടിച്ച മാനുഷിക മൂല്യങ്ങളെ തകര്‍ത്തെറിയുന്ന വംശീയ വിദ്വേഷത്തിന്‍റെ പ്രതിധ്വനിയാണ് അതു കേള്‍പ്പിച്ചത്.

യൂറോപ്യൻ യൂണിയനിൽനിന്നു പുറത്തുവരാനുള്ള ബ്രിട്ടന്‍റെ തീരുമാനത്തിന് ഇക്കഴിഞ്ഞ ജൂണിൽ ഒരു പതിറ്റാണ്ട് തികഞ്ഞു. വളരെ നേരിയ ഭൂരിപക്ഷത്തിനാണ് അതു സംഭവിച്ചതെന്നത് മറ്റൊരു വസ്തുത. അര ദശാബ്ദത്തിലേറെ നീണ്ട രാഷ്‌ട്രീയ അനിശ്ചിതത്വങ്ങള്‍ക്കും സാമ്പത്തിക തകര്‍ച്ചയ്ക്കും ബ്രിട്ടീഷ് സമൂഹത്തെത്തന്നെ ഭിന്നിപ്പിക്കുന്ന സാമൂഹ്യ, രാഷ്‌ട്രീയ അടിയൊഴുക്കുകള്‍ക്കുമാണ് ബ്രെക്സിറ്റ് വഴിവച്ചത്.

‘ബ്രിട്ടീഷ് ജോലികൾ ബ്രിട്ടീഷുകാര്‍ക്ക്’ എന്ന വലതുപക്ഷ പ്രചാരണം നാസി ജര്‍മനിയിലെ വംശീയ മേധാവിത്വത്തെയും ഒഴിവാക്കൽ അഥവാ ഉന്മൂലന നയങ്ങളെയും ഓര്‍മിപ്പിക്കുന്നതാണ്. യൂറോപ്പ് എന്ന ആശയത്തെ പരുവപ്പെടുത്തിയെടുത്ത ചില മൂല്യങ്ങളുണ്ടായിരുന്നു. സമാധാനത്തിനുള്ള പ്രാധാന്യം, മാനുഷിക അവകാശങ്ങൾ സംരക്ഷിക്കൽ, സാമ്പത്തിക സഹകരണം, സ്വതന്ത്രമായി സഞ്ചരിക്കാനും സമൃദ്ധി പങ്കിടാനുമുള്ള ചിന്ത... ഇതെല്ലാമാണ് യൂറോപ്യൻ യൂണിയനിൽനിന്നുള്ള ബ്രിട്ടന്‍റെ പുറത്തുവരവോടെ തകര്‍ന്നടിഞ്ഞത്.

സമാധാനത്തിലേക്ക് യൂറോപ്പിനെ നയിക്കാനാണ് യൂറോപ്യൻ യൂണിയൻ (ഇയു) പിറവിയെടുത്തത്. സുരക്ഷ, വിദേശകാര്യം, സാമ്പത്തിക സഹകരണം, സ്വതന്ത്ര സഞ്ചാരം, നീതി എന്നിവയെല്ലാമായിരുന്നു അതിന്‍റെ കാതൽ. ഏതെങ്കിലും വംശത്തിന്‍റെയോ വര്‍ണത്തിന്‍റെയോ മേധാവിത്വത്തിലോ ശ്രേഷ്ഠതയിലോ അധിഷ്ഠിതമായല്ലാതെ, മനുഷ്യജീവന് സംരക്ഷണം നല്‍കുകയും ഏറ്റവും ഉയര്‍ന്ന മാനുഷിക മൂല്യങ്ങൾ ഉയര്‍ത്തിപ്പിടിക്കുകയുമായിരുന്നു യൂറോപ്യൻ യൂണിയന്‍റെ അടിസ്ഥാന മൂല്യങ്ങൾ.

യൂറോപ്യൻ രാജ്യങ്ങള്‍ക്കിടയിലുള്ള അസ്വാരസ്യങ്ങളും സംഘര്‍ഷങ്ങളും ഒഴിവാക്കുക എന്ന ലക്ഷ്യത്തോടെയാണ് ഈ ആശയം ഉയര്‍ന്നുവന്നത്. എന്നാൽ, ചരിത്രപരമായി നോക്കുമ്പോൾ എല്ലാ യൂറോപ്യൻ രാജ്യങ്ങളും തങ്ങളുടെ ഭരണത്തിൽ ഈ ‘അടിസ്ഥാന മൂല്യങ്ങൾ’ പാലിച്ചിരുന്നില്ല എന്നു കാണാം; പ്രത്യേകിച്ചും ബ്രിട്ടൻ, ഫ്രാന്‍സ്, നെതർലൻഡ്സ് തുടങ്ങിയ രാജ്യങ്ങൾ നടത്തിയ കൊളോണിയൽ അധിനിവേശങ്ങളുടെ കാര്യത്തിൽ ഇത് കൂടുതൽ വ്യക്തമാണ്. ഈ അധിനിവേശ പാരമ്പര്യം അവരുടെ ചില ‘ആധുനികകാല’ നേതാക്കള്‍ക്കും ബാധകമായിരുന്നു.

1973 ജനുവരി ഒന്നിനാണ് ബ്രിട്ടൻ യൂറോപ്യൻ യൂണിയനിൽ ഔദ്യോഗികമായി അംഗത്വമെടുത്തത്. എന്താണ് യൂറോപ്യൻ യൂണിയൻ ബ്രിട്ടന് നല്‍കിയത് എന്ന ചോദ‍്യം ഇവിടെ പ്രസക്തമാണ്? അതിനുത്തരം ഇതൊക്കെയാണ്: തൊഴിലാളികള്‍ക്ക് എവിടെയും തൊഴിലെടുക്കാനുള്ള സ്വാതന്ത്ര്യം, സ്വതന്ത്ര വിപണി, സുസ്ഥിരമായ സമാധാനം, പങ്കാളിത്തത്തോടെയുള്ള സാമ്പത്തിക അഭിവൃദ്ധി, മനുഷ്യാവകാശങ്ങളും ജനാധിപത്യവും ഉള്‍പ്പടെയുള്ള സാര്‍വലൗകിക മൂല്യങ്ങൾ ഉയര്‍ത്തിപ്പിടിക്കൽ, സഞ്ചാരസ്വാതന്ത്ര്യം, തുല്യ അവകാശങ്ങൾ, പിന്നെ സുരക്ഷയും. കൂടാതെ, വംശീയ പീഡനങ്ങളും വംശീയ മേധാവിത്തവും കര്‍ശനമായി നിരോധിക്കപ്പെട്ടു, അതൊരു ക്രിമിനൽ കുറ്റമാക്കുകയും ചെയ്തു. സമൂഹം കൂടുതൽ കെട്ടുറപ്പുള്ളതായി മാറി എന്നതാണ് ഏറ്റവും ശ്രദ്ധേയമായ കാര്യം.

കുടിയേറ്റ സമൂഹം ഈ രാജ്യത്തെ കരുത്തുറ്റ ഒരു തൊഴിൽ ശക്തിയാണെന്ന് തെളിയിക്കപ്പെടുകയും അവര്‍ക്ക് താരതമ്യേന തുല്യമായ പരിഗണന ലഭിക്കുകയും ചെയ്തു. സമ്പദ്‌വ്യവസ്ഥ പുരോഗമിക്കുകയും ജനങ്ങളുടെ ജീവിതനിലവാരം മെച്ചപ്പെടുകയും ചെയ്തു എന്നത് പറയാതെ വയ്യ. മാതൃകാപരമായ സാമൂഹിക സുരക്ഷയും വിദ്യാഭ്യാസവുമെല്ലാം അതിന്‍റെ ഗുണഫലങ്ങളായിരുന്നു. ക്ഷേമരാഷ്‌ട്രങ്ങള്‍ക്കുതന്നെ മാതൃകയായ നാഷണൽ ഹെല്‍ത്ത് സര്‍വീസ് (എന്‍എച്ച്എസ്) എന്നത് ഈ വിശാല കാഴ്ചപ്പാടിന്‍റെ ഏറ്റവും വലിയ നേട്ടമായിരുന്നു.

അതേസമയം, സമൂഹത്തിൽ കൂടുതൽ ഐക്യം പ്രകടമായിത്തുടങ്ങി, വര്‍ഗീയ വികാരങ്ങൾ താരതമ്യേന കുറഞ്ഞുവരികയും ചെയ്തു. അതോടൊപ്പം ബഹുസ്വരതയും വൈവിധ്യവും ബ്രിട്ടീഷ് സമൂഹത്തിൽ കൂടുതൽ ആഴത്തിൽ വേരൂന്നാനും തുടങ്ങി. എന്നാൽ, തീവ്ര വലതുപക്ഷ നേതാക്കൾ ഇതിൽ അസ്വസ്ഥരായിരുന്നു. സമൂഹത്തിൽ ഭിന്നിപ്പുണ്ടാക്കാനുള്ള വഴികളാണ് അവർ തേടിയത്. പലവിധത്തിലുള്ള അസംതൃപ്തികളെ ചൂഷണം ചെയ്യാനുള്ള പദ്ധതിയുടെ ഫലമായി ‘നമ്മളും അവരും’ എന്നൊരു വലിയ വിഭജനത്തിന് വഴിയൊരുക്കുകയാണ് അവർ ചെയ്തത്. ‘ബ്രിട്ടീഷ് തൊഴിലുകൾ ബ്രിട്ടീഷുകാര്‍ക്ക്’ -വംശവെറിയുടെ ആ മുദ്രാവാക്യം ഇവിടെയും മുഴങ്ങി. ബ്രിട്ടീഷ് വലതുപക്ഷത്തിന് നാസി ജര്‍മനിയുമായുള്ള ഒരേയൊരു വ്യത്യാസം, വംശീയതയ്ക്ക് പകരം ഇവിടെ അവർ ഉപയോഗിച്ചത് ‘കുടിയേറ്റക്കാർ’ എന്ന പദമായിരുന്നു എന്നതാണ്. കുടിയേറ്റക്കാർ എന്ന പദം ഇപ്പോൾ ജര്‍മൻ രാഷ്‌ട്രീയത്തിലും പ്രവേശിച്ചുവെന്നത് മറ്റൊരു ആകസ്മികത. പ്രത്യേകിച്ചും ജര്‍മനിയിലെ സാക്സണി അന്‍ഹാള്‍ട്ടിൽ എഎഫ്ഡി നേടിയ ചരിത്രവിജയം ഇതിനോടു ചേര്‍ത്തു വായിക്കണം.
സകലതിനും പഴി കേള്‍ക്കേണ്ടിവരുന്ന

കുടിയേറ്റക്കാർ

കുടിയേറ്റക്കാർ ഏതെങ്കിലും ഒരു യൂറോപ്യൻ രാജ്യത്തുനിന്നോ അല്ലെങ്കിൽ ഒരു കോമണ്‍വെല്‍ത്ത് രാജ്യത്തുനിന്നോ ആണ് ഇത്രയും ദൂരം താണ്ടി ബ്രിട്ടനിലെത്തിയത്. 1215ലെ മാഗ്നാകാര്‍ട്ടയുടെയും 1689ലെ ബിൽ ഓഫ് റൈറ്റ്സിന്‍റെയും പാരമ്പര്യമുള്ള, പൗരാവകാശങ്ങളുടെ കാവലാളാണെന്ന് സ്വയം അവകാശപ്പെടുന്ന ബ്രിട്ടൻ, മാനുഷിക മൂല്യങ്ങള്‍ക്ക് പരമാവധി സംരക്ഷണം ഉറപ്പാക്കാനും അവ ഉയര്‍ത്തിപ്പിടിക്കാനുമുള്ള പൂര്‍ണ ഉത്തരവാദിത്വവും ധാര്‍മിക ബാധ്യതയും ഏറ്റെടുക്കേണ്ടതുണ്ട്. കുടിയേറ്റക്കാരുടെ എണ്ണം വളരെ കൂടുതലായിരിക്കാം, അവർ പല ആനുകൂല്യങ്ങളും കൈപ്പറ്റിയിട്ടുമുണ്ടാകാം, എങ്കിലും അവർ തീര്‍ച്ചയായും സമൂഹത്തിന് തങ്ങളുടേതായ സംഭാവനകൾ നല്‍കിയിട്ടുണ്ട്, നല്‍കുന്നുമുണ്ട്. രണ്ടാം തലമുറയില്‍പ്പെട്ട കുടിയേറ്റക്കാർ കൃത്യമായി നികുതി അടയ്ക്കുന്നവരാണെന്നും അവരിൽ ചിലർ ഹൗസ് ഓഫ് കോമണ്‍സിൽ വരെ പ്രതിനിധികളായി എത്തിനില്‍ക്കുന്നുണ്ടെന്നും മനസിലാക്കേണ്ടതുണ്ട്.

മറ്റൊരു മുദ്രാവാക്യം ഇതായിരുന്നു: ‘കുടിയേറ്റക്കാർ കുറ്റവാളികളാണ്.’ ഒരാൾ ഒരു കുറ്റം ചെയ്താൽ, ആ ചെയ്ത കുറ്റത്തിന് അയാള്‍ക്ക് മാത്രമാണ് വ്യക്തിപരമായ ഉത്തരവാദിത്വമുള്ളത്. അയാളെയാണ് വിചാരണ ചെയ്ത് ശിക്ഷിക്കേണ്ടത്, അല്ലാതെ കുറ്റം ചെയ്തയാളുടെ മുഴുവൻ സമുദായത്തെയോ കുടുംബാംഗങ്ങളെയോ അല്ല. കൊടുംകുറ്റകൃത്യങ്ങൾ ചെയ്യുകയും ശിക്ഷാ കാലാവധി പൂര്‍ത്തിയാക്കി പുറത്തിറങ്ങുകയും ചെയ്യുന്ന വെള്ളക്കാരുടെ കാര്യമോ? അത് സമൂഹത്തിന്‍റെ സുരക്ഷയെ ബാധിക്കുന്നില്ലേ?

യാതൊരു തരത്തിലുള്ള വിവേചനവുമില്ലാതെ നടപ്പാക്കപ്പെടുന്ന കൃത്യമായ നിയമനടപടികൾ മാത്രമാണ് സമൂഹത്തിലെ കുറ്റകൃത്യങ്ങള്‍ക്കുള്ള ഏക പരിഹാരം, അല്ലാതെ വംശീയമായി വേര്‍തിരിച്ച് ഒരു സമൂഹത്തെ മുഴുവൻ കുറ്റപ്പെടുത്തുകയല്ല വേണ്ടത്. അങ്ങനെ ചെയ്യുന്നത് വ്യവസ്ഥിതിയുടെ പരാജയത്തെയാണ് ചൂണ്ടിക്കാണിക്കുന്നത്. അധികാരത്തിൽ മാത്രം കണ്ണുംനട്ടിരിക്കുന്ന വലതുപക്ഷക്കാർ ഈ അടിസ്ഥാനസത്യം ഇനിയും ഉള്‍ക്കൊള്ളേണ്ടിയിരിക്കുന്നു.

വൈകിവന്ന വിവേകം

ജര്‍മനിയിൽ സംഭവിച്ചതുപോലെ, കുടിയേറ്റക്കാര്‍ക്കെതിരായ വലതുപക്ഷക്കാരുടെ കേവലമൊരു പ്രചാരണം മാത്രമായിരുന്നു ബ്രെക്സിറ്റും. നമ്മുടെ അയല്‍ക്കാരെ എതിര്‍ക്കുകയും അവരെ ശത്രുക്കളായി കാണുകയും ചെയ്യുക എന്നതാണ് ബ്രെക്സിറ്റിന് പിന്നിലുണ്ടായിരുന്ന ഏക അജൻഡ. അതിലവർ വിജയിച്ചെങ്കിലും, അതിലൂടെ ലഭിക്കുമെന്ന് വാഗ്ദാനം ചെയ്യപ്പെട്ട നേട്ടങ്ങളൊന്നും കൈവരിക്കുന്നതിന് അവര്‍ക്ക് സാധിച്ചില്ല. ഈ സത്യം ഇപ്പോൾ ബ്രിട്ടനിലെ മിക്ക രാഷ്‌ട്രീയ നേതൃത്വങ്ങളും തിരിച്ചറിഞ്ഞിട്ടുണ്ട്.

Leader Page

ഓർമകളിൽ മായാതെ... ചെറുവയൽ രാമേട്ടൻ

മണ്ണിനെയും കൃഷിയെയും സ്വന്തം പ്രാണനോളം സ്നേഹിക്കുകയും പാരമ്പര്യ നെൽവിത്തുകളെ ജീവനെപ്പോലെ കാത്തുസൂക്ഷിക്കുകയുംചെയ്ത പദ്മശ്രീ ചെറുവയൽ രാമേട്ടന്‍റെ വിയോഗവാർത്ത അറിഞ്ഞ നിമിഷം മുതൽ മനസിലൊരു മരവിപ്പാണ്. മണ്ണിന്‍റെ മണമുള്ള ആ മനുഷ്യൻ ഇനി നമുക്കിടയിലില്ലെന്ന സത്യം എളുപ്പത്തിൽ ഉൾക്കൊള്ളാനാകുന്നില്ല.

ആരോഗ്യപ്രശ്നങ്ങളെത്തുടർന്ന് കൽപ്പറ്റയിലെ ആശുപത്രിയിൽ പ്രവേശിപ്പിച്ച അദ്ദേഹത്തെ അടിയന്തരമായി കോഴിക്കോട് മെഡിക്കൽ കോളജിലേക്ക് മാറ്റണമെന്നറിഞ്ഞപ്പോൾ, അവിടത്തെ ഡോക്‌ടർമാരുമായി ആലോചിച്ച് ആവശ്യമായ ക്രമീകരണങ്ങൾ ഏർപ്പെടുത്തിയിരുന്നു. ചികിത്സയ്ക്കുശേഷം പൂർണ ആരോഗ്യവാനായി രാമേട്ടൻ തിരിച്ചെത്തുമെന്നായിരുന്നു പ്രതീക്ഷ. എന്നാൽ ശസ്ത്രക്രിയയ്ക്കുശേഷം അദ്ദേഹത്തിന്‍റെ ആരോഗ്യനില കൂടുതൽ വഷളാവുകയും ഒടുവിൽ വിയോഗവാർത്ത ഞെട്ടലോടെ കേൾക്കേണ്ടിവരികയും ചെയ്തു.

പച്ചപ്പിനെ സ്നേഹിച്ച, വിത്തുകളിൽ നാളെയുടെ പ്രതീക്ഷകൾ സൂക്ഷിച്ച, പ്രകൃതിയെ സ്വന്തം ജീവിതംകൊണ്ട് ചേർത്തുപിടിച്ച ഒരു മനുഷ്യൻകൂടി ഓർമകളിലേക്ക് മടങ്ങുകയാണ്. കർഷകരുടെയും കർഷകപ്രസ്ഥാനങ്ങളുടെയും അഭിമാനമായിരുന്ന ചെറുവയൽ രാമേട്ടന്‍റെ വിയോഗം ഒരു വ്യക്തിയുടെ വേർപാടു മാത്രമല്ല. മണ്ണിനെ സ്നേഹിക്കുന്ന ഓരോ മനുഷ്യന്‍റെയും ഹൃദയത്തിൽ ആഴത്തിൽ പതിയുന്ന നഷ്‌ടമാണത്.

വിത്തുസൂക്ഷിപ്പുകാരൻ

1952 ജൂൺ ആറിന് ജനിച്ച തലക്കര ചെറിയ രാമൻ എന്ന ചെറുവയൽ രാമൻ, കമ്മന നവോദയ എൽപി സ്കൂളിലെ പ്രാഥമിക വിദ്യാഭ്യാസത്തിനുശേഷം പത്താമത്തെ വയസിലാണ് കാർഷികമേഖലയിലേക്ക് പൂർണമായി കടന്നുവരുന്നത്. അന്നുമുതൽ ജീവിതാവസാനം വരെ കൃഷിയെ ഹൃദയത്തോടുചേർത്തുപിടിച്ച് മണ്ണിലിറങ്ങി അധ്വാനിച്ചു. 45ലേറെ തദ്ദേശീയ നെൽവിത്തിനങ്ങളെ വംശനാശത്തിൽനിന്ന് സംരക്ഷിച്ചു നിർത്തിയതിലൂടെയാണ് അദ്ദേഹം രാജ്യത്തിന്‍റെ ശ്രദ്ധ പിടിച്ചുപറ്റിയത്. പതിറ്റാണ്ടുകളായി പൂർണമായും ജൈവരീതിയിലായിരുന്നു അദ്ദേഹത്തിന്‍റെ കൃഷി. നെൽവിത്തുകൾക്കു പുറമേ പാരമ്പര്യ പച്ചക്കറികൾ, ഔഷധസസ്യങ്ങൾ, വിവിധയിനം വൃക്ഷങ്ങൾ എന്നിവയും അദ്ദേഹം തന്‍റെ തോട്ടത്തിൽ സംരക്ഷിച്ചുപോന്നു.

രാമേട്ടന് കൃഷി കേവലമൊരു ഉപജീവനമാർഗമായിരുന്നില്ല. പ്രകൃതിയോടും മണ്ണിനോടും വരുംതലമുറയോടുമുള്ള കടപ്പാടിന്‍റെ മഹത്തായ ആവിഷ്കാരമായിരുന്നു അത്. മറ്റുള്ളവർക്ക് കൃഷി ഒരു തൊഴിലായിരുന്നെങ്കിൽ രാമേട്ടന് അതൊരു ജീവിതദർശനമായിരുന്നു. മറ്റുള്ളവർ വിത്തിൽ ഒരു വിളവിന്‍റെ സാധ്യത കണ്ടപ്പോൾ അദ്ദേഹം അതിൽ തലമുറകളുടെ പൈതൃകവും മനുഷ്യരാശിയുടെ ഭാവിയും കണ്ടു.

ലാളിത്യത്തിന്‍റെ മുഖം

രാമേട്ടനുമായി ദീർഘകാലത്തെ വ്യക്തിബന്ധമാണുള്ളത്. അദ്ദേഹത്തെക്കുറിച്ച് ഓർക്കുമ്പോൾ മനസിലേക്ക് ആദ്യം കടന്നുവരുന്നത് വലിയ വേദികളിൽ ആദരവുകൾ ഏറ്റുവാങ്ങി നിൽക്കുന്ന രൂപമല്ല. മറിച്ച്, ലാളിത്യവും സ്നേഹവും നിറഞ്ഞ നന്മയുടെ മുഖമാണ്. കാണുമ്പോഴെല്ലാം വീട്ടിൽനിന്ന് കൊണ്ടുവരുന്ന ഉച്ചഭക്ഷണപ്പൊതിയുമായി എത്തുന്ന രാമേട്ടൻ ഇന്നും മനസിലുണ്ട്. ആ ഭക്ഷണപ്പൊതിയിൽപ്പോലും അദ്ദേഹത്തിന്‍റെ ജീവിതത്തിലെ ലാളിത്യവും മണ്ണിനോടുള്ള അടുപ്പവും സ്നേഹത്തിന്‍റെ ഊഷ്മളതയും നിറഞ്ഞുനിന്നിരുന്നു.

ആരോടും അനായാസം സൗഹൃദം സ്ഥാപിക്കാനും കണ്ടുമുട്ടുന്നവരുടെ ഹൃദയത്തിൽ ഇടംനേടാനും അദ്ദേഹത്തിന് പ്രത്യേക കഴിവുണ്ടായിരുന്നു. വലിയ അംഗീകാരങ്ങൾ തേടിപ്പോകാത്ത, എന്നാൽ തന്‍റെ ജീവിതംകൊണ്ട് വലിയ അംഗീകാരങ്ങൾക്ക് അർഹനായ മനുഷ്യൻ. അദ്ദേഹത്തെക്കുറിച്ച് ഓർത്തെടുക്കാൻ എത്രയോ അനുഭവങ്ങളുണ്ട്. പറഞ്ഞുതീർക്കാനാകാത്തത്ര ഓർമകൾ.

സ്വാതന്ത്ര്യദിനത്തിലും റിപ്പബ്ലിക് ദിനത്തിലും വയനാട്ടിലെ എസ്കെഎംജെ. ഹൈസ്കൂൾ ഗ്രൗണ്ടിൽ ദേശീയപതാകയെ സാക്ഷിനിർത്തി നടക്കുന്ന ഔദ്യോഗിക ചടങ്ങുകളിൽ അതിഥിയായി എത്തുന്ന രാമേട്ടന്‍റെ ചിത്രം ഇന്നും ഓർമകളിൽനിന്ന് മായുന്നില്ല.

നാടിന്‍റെ പാട്ടും പൈതൃകവും

നാടൻപാട്ടുകളും ആദിവാസി ഊരുകളുടെ തനിമയാർന്ന പാട്ടുകളും ഹൃദയത്തിൽ സൂക്ഷിച്ച മനുഷ്യനായിരുന്നു രാമേട്ടൻ. പാട്ടിന്‍റെ താളത്തിനൊപ്പം ആടിയും പാടിയും ആസ്വാദകരുടെ മനസ് കീഴടക്കുന്ന അദ്ദേഹത്തിന്‍റെ രൂപം ആരെയും ആകർഷിക്കുന്നതായിരുന്നു. പ്രകൃതിയോടുള്ള സ്നേഹവും നാടിന്‍റെ പാരമ്പര്യത്തോടുള്ള ആദരവും ജീവിതത്തിന്‍റെ ലാളിത്യവും ആ പാട്ടുകളിലും ചിരിയിലും നിറഞ്ഞുനിന്നു.

അദ്ദേഹത്തിന്‍റെ ജീവിതം നമ്മെ പഠിപ്പിക്കുന്നത് വലിയ കാര്യങ്ങൾ ചെയ്യാൻ വലിയ സൗകര്യങ്ങളോ വലിയ പദവികളോ ആവശ്യമില്ലെന്ന സത്യമാണ്. സ്വന്തം മണ്ണിൽ ഉറച്ചുനിന്ന്, പൈതൃകത്തെ നെഞ്ചോടുചേർത്ത്, വരുംതലമുറയ്ക്കുവേണ്ടി ജീവിതം സമർപ്പിച്ചാൽ ഒരാൾക്ക് കാലത്തെ അതിജീവിക്കാനാകുമെന്ന് രാമേട്ടൻ തെളിയിച്ചു.

തുടരേണ്ട ദൗത്യം

രാമേട്ടന്‍റെ വിയോഗത്തോടെ അദ്ദേഹത്തിന്‍റെ ജീവിതപ്രവർത്തനങ്ങൾ അവസാനിക്കുന്നില്ല. അദ്ദേഹം കാത്തുസൂക്ഷിച്ച വിത്തുകളും സ്വരൂപിച്ച അറിവുകളും പുതിയ തലമുറയിലേക്ക് പകർന്നുനൽകേണ്ടത് നമ്മുടെ ഉത്തരവാദിത്വമാണ്. അദ്ദേഹത്തിന്‍റെ അമൂല്യമായ വിത്തുശേഖരവും കാർഷികവിജ്ഞാനവും സംരക്ഷിക്കാനും അവ ഭാവിതലമുറയ്ക്ക് പ്രയോജനപ്പെടുന്ന രീതിയിൽ കൈമാറാനും കൃഷിവകുപ്പിന്‍റെയും സർക്കാരിന്‍റെയും ഭാഗത്തുനിന്ന് ആവശ്യമായ എല്ലാ നടപടികളും സ്വീകരിക്കും. രാമേട്ടന്‍റെ ഓർമകൾക്ക് നൽകാവുന്ന ഏറ്റവും വലിയ ആദരവ് അദ്ദേഹം തുടങ്ങിവച്ച ദൗത്യം മുന്നോട്ടു കൊണ്ടുപോകുക എന്നതാണ്.

കാലത്തെ അതിജീവിച്ച് രാമേട്ടൻ കാത്തുസൂക്ഷിച്ച ഓരോ വിത്തിലും അദ്ദേഹത്തിന്‍റെ അധ്വാനത്തിന്‍റെ കഥയുണ്ട്. വയനാടിന്‍റെ മണ്ണിൽ പടരുന്ന ഓരോ പച്ചപ്പിലും അദ്ദേഹത്തിന്‍റെ പ്രകൃതിസ്നേഹത്തിന്‍റെ അടയാളമുണ്ട്. നാടൻപാട്ടുകളുടെ ഈണങ്ങളിലും ഗ്രാമവഴികളിലെ നിഷ്കളങ്കമായ ചിരികളിലും അദ്ദേഹത്തിന്‍റെ സാന്നിധ്യം ഇനിയും അനുഭവിക്കാനാകും.

രാമേട്ടൻ ബാക്കിവച്ച നാടൻ അറിവുകളുടെയും ശാസ്ത്രലോകത്തിന് കൗതുകവും പഠനസാധ്യതകളും പകരുന്ന വിജ്ഞാനത്തിന്‍റെയും മുദ്രകൾ നിലനിർത്തുക എന്ന വലിയ ഉത്തരവാദിത്വം ഈ സന്ദർഭത്തിൽ നാം ഏറ്റെടുക്കണം. രാമേട്ടന്‍റെ വിത്തുശേഖരവും അമൂല്യമായ അറിവുകളും പുതുതലമുറയിലേക്ക് പകർന്നുനൽകാൻ കൃഷിവകുപ്പിന്‍റെയും സർക്കാരിന്‍റെയും ഭാഗത്തുനിന്ന് ആവശ്യമായ എല്ലാ നടപടികളും ഉണ്ടാകും.

പ്രിയപ്പെട്ട രാമേട്ടന് ആദരാഞ്ജലികൾ...

Leader Page

അതിവേഗം മൂലമുള്ള അപകടമരണം കൊലപാതകംതന്നെ

ഞാൻ കോഴിക്കോട് പൊലിസ് കമ്മിഷണറായി ജോലി ചെയ്യുമ്പോൾ കുന്നമംഗലം ഐഐഎമ്മിനടുത്ത് ഉണ്ടായ സംഭവം ഓർക്കുകയാണ്. കുറേ വിദ്യാർഥികൾ സ്കൂൾ വിട്ട് കൈകൾ കോർത്തു പിടിച്ച് റോഡ് മുറിച്ചുകടക്കുന്ന സമയത്ത് ഒരു ബസ് അമിതവേഗത്തിൽ പാഞ്ഞുവന്നു.

ഡ്രൈവർക്ക് കുട്ടികളെ ദൂരെനിന്നുതന്നെ കാണാമായിരുന്നു. എന്നിട്ടും അയാൾ വേഗം കുറച്ചില്ല. ആ സമയത്ത് റോഡിൽ വീണ പുസ്തകമെടുക്കാൻ കൂട്ടത്തിൽ ഒരു കുട്ടി ശ്രമിക്കുമ്പോൾ ഡ്രൈവർക്ക് അമിതവേഗംനിയന്ത്രിക്കാൻ കഴിഞ്ഞില്ല. കുട്ടിയെ ഇടിച്ചു തെറിപ്പിക്കുകയും ഇടിയേറ്റ കുട്ടി 20 മീറ്റർ അകലെ തെറിച്ചുവീഴുകയും ചെയ്തു.

ഞാൻ സംഭവ സ്ഥലം സന്ദർശിച്ചു. വാഹനത്തിൽ യാത്ര ചെയ്യുന്ന പലരോടും സംസാരിച്ചപ്പോൾ അവർ പറഞ്ഞത്; “അപകടം നടന്ന ആ സ്ഥലത്ത് എത്തുന്നതിന് ഒരു കിലോമീറ്റർ മുമ്പുതന്നെ തങ്ങൾ ഡ്രൈവറോടു പലവട്ടം പറഞ്ഞതാണ് കുട്ടികൾ പോകുന്ന വഴിയാണ്, സൂക്ഷിക്കണമെന്ന്. പക്ഷേ അയാൾ കേട്ടില്ല എന്നു മാത്രമല്ല, കുട്ടികളുടെ കാര്യം മാത്രം നോക്കിയാൽ ബസ് ഓടിക്കാനാകുമോ” എന്നയാൾ ചോദിക്കുകയും ചെയ്തത്രെ!

അന്വേഷണ ഉദ്യോഗസ്ഥനായിരുന്ന ട്രാഫിക് സിഐ രാജ്മോഹനുമായി ഞാൻ സംസാരിച്ച് ഐപിസി 302 പ്രകാരം കേസെടുക്കാൻ ആവശ്യപ്പെട്ടു. ഒരു വ്യക്തി മറ്റൊരാളെ കൊല്ലണമെന്ന വ്യക്തമായ ഉദ്ദേശ്യത്തോടെയോ അല്ലെങ്കിൽ ചെയ്താൽ മരണം ഉറപ്പാണെന്ന് അറിഞ്ഞുകൊണ്ടോ ചെയ്യുന്ന ക്രൂരമായ കുറ്റകൃത്യങ്ങൾക്കാണ് ഈ വകുപ്പു പ്രകാരം കേസെടുക്കുന്നത്.

അതായത്, ഒരാൾ വളരെ അപകടകരമായ രീതിയിൽ വാഹനമോടിച്ചതു കാരണം മറ്റൊരാൾ മരണപ്പെട്ടാൽ അയാൾക്കെതിരേ കൊലപാതകക്കുറ്റത്തിന് കേസ് എടുക്കാമെന്നർഥം. പ്രസ്തുത വകുപ്പു ചുമത്തി കേസെടുക്കുകയും നല്ല രീതിയിൽ അന്വേഷണം നടത്തി പെട്ടെന്നുതന്നെ കോടതിയിൽ ചാർജ് ഷീറ്റ് സമർപ്പിക്കുകയും ചെയ്തതിനാൽ ജാമ്യം കിട്ടാതെ ഡ്രൈവർക്ക് ഒരു വർഷത്തോളം ജയിലിൽ കിടക്കേണ്ടിവന്നിട്ടുണ്ട്. ഒരു റോഡ് ട്രാഫിക് അപകട കേസ് ഐപിസി സെക്‌ഷൻ 302 പ്രകാരം ചാർജ് ചെയ്ത രാജ്യത്തെ ആദ്യ കേസായിരുന്നു അത്.

അപകടസാധ്യത കാണുമ്പോൾ വാഹനത്തിന്‍റെ വേഗം എത്രയായിരുന്നു, ഇടിക്കുമ്പോൾ എത്രയായിരുന്നു, ഇടിയേറ്റയാൾ എത്ര ദൂരം തെറിച്ചുവീണു എന്നിങ്ങനെ മൂന്നു കാര്യങ്ങളാണ് പ്രധാനമായി വരുന്നത്. ടയർ മാർക്കും സഹയാത്രക്കാരുടെയും സാക്ഷികളുടെയും മൊഴിയും പ്രധാനംതന്നെ. ഇങ്ങനെ വാഹനമോടിച്ചാൽ അപകടമുണ്ടാകുമെന്ന് ഡ്രൈവർക്ക് അറിയാമെന്നിരിക്കെ കരുതിക്കൂട്ടി അപകടമുണ്ടാക്കിയതാണ് എന്ന അർഥത്തിൽ വാദം നടത്തുകയും പ്രതിക്ക് ഏഴു വർഷം ശിക്ഷ വാങ്ങിക്കൊടുക്കുകയും ചെയ്തു.

ശിക്ഷയ്ക്കെതിരേ പ്രതി ഹൈക്കോടതിയെ സമീപിച്ചെങ്കിലും സെക്‌ഷൻ 302ൽനിന്ന് 304 മനഃപൂർവമല്ലാത്ത നരഹത്യയിലേക്ക് മാറ്റുകയാണുണ്ടായത്. ഹൈക്കോടതി ശിക്ഷ അഞ്ചു വർഷമാക്കി കുറച്ചുവെന്നു മാത്രം. പ്രതി സുപ്രീംകോടതിയെ സമീപിച്ചെങ്കിലും, വളരെ ക്രൂരമായ കൃത്യമാണ് നടന്നതെന്നും ഇത്തരം കുറ്റകൃത്യങ്ങൾക്ക് 304 ചുമത്തുന്നതിനുവേണ്ട നടപടികൾ കേന്ദ്രസർക്കാർ സ്വീകരിക്കണമെന്ന് സുപ്രീംകോടതി ഓർമപ്പെടുത്തുകയും ചെയ്തു.

സമാന കേസുകൾ അന്വേഷിക്കുമ്പോൾ പ്രസ്തുത കേസുമായി ബന്ധപ്പെട്ട എല്ലാ വിധികളും ഉദ്യോഗസ്ഥർ പരിശോധിക്കേണ്ടതുണ്ട്. പ്രായപൂർത്തിയായ ഒരാൾ കേരളത്തിലെ ചെറിയ റോഡുകളിൽ 200 കിലോമീറ്റർ വേഗത്തിൽ വാഹനമോടിക്കുന്നത് അപകടമുണ്ടാകുമെന്ന് അറിയാത്തതുകൊണ്ടല്ല; മറിച്ച്, എന്തായാലും തനിക്കൊന്നുമില്ല എന്ന വിവേകമില്ലായ്മ കൊണ്ടാണ്. നമ്മുടെ നാട്ടിൽ ഈയിടെ നടന്ന അപകടവും ഇത്തരത്തിൽ നിരീക്ഷിക്കുകയും അന്വേഷണം നടത്തുകയും വേണമെന്നു മാത്രമല്ല, 302 പോലെയുള്ള വകുപ്പുകൾ ചുമത്തുകയും വേണം. എങ്കിലേ ഇത്തരം തെറ്റുകൾ ആവർത്തിക്കാതിരിക്കുകയുള്ളൂ.

Leader Page

ഹിറ്റ്‌ലറെ ഭയപ്പെടുത്തിയ സിംഹഗർജനം

അധികാരത്തോടു ചേർന്നുനിൽക്കാനും അധികാരികളെ ഭയപ്പെടാനുമാണ് സാധാരണഗതിയിൽ ആളുകൾ തയാറാവുക. പ്രത്യേകിച്ചും അധികാരികൾക്ക് ഓരോരോ ബുദ്ധിമുട്ടുകൾ സൃഷ്‌ടിക്കാൻ കഴിയുന്ന സാഹചര്യത്തിൽ അനീതികൾപോലും ചെറുക്കാൻ അവർ അശക്തരാകും.

തികഞ്ഞ ആത്മബോധവും അഭിമാനവും സ്വാതന്ത്ര്യവാഞ്‌ഛയുമുള്ളവർ അത്തരം സാഹചര്യങ്ങളിലും പതറാതെ നിൽക്കും. പീഡനങ്ങളെ തൃണവൽഗണിച്ചുകൊണ്ട് അവർ അനീതികളെ ചൂണ്ടിക്കാണിക്കുകതന്നെ ചെയ്യും. ഭയം അവരെ തീണ്ടുകയില്ല. മനുഷ്യരാശിയെ രണ്ടാം ലോകയുദ്ധത്തിലേക്കു തള്ളിവിട്ട ഹിറ്റ്‌ലറുടെ ചെയ്തികളിൽ ഭയചകിതരായ പൗരസഞ്ചയം പ്രതികരിക്കാൻ മടിച്ചുനിന്ന കാലം.

അപ്പോൾ ജർമനിയിൽ വെസ്റ്റ്ഫാലിയ പ്രദേശത്ത് മ്യുൺസ്റ്റർ നഗരത്തിലെ ബിഷപ്പിന്‍റെ സ്വരമുയർന്നു: ബിഷപ് ക്ലെമൻസ് അഗസ്റ്റ് ഗ്രാഫ് ഫോൺ ഗാലൻ. നാസി പ്രത്യയശാസ്ത്രത്തിന്‍റെ തുടക്കം മുതൽ അതിന്‍റെ വിമർശകനായിരുന്നു ബിഷപ് ക്ലെമൻസ്. അതു പ്രയോഗത്തിലാക്കാൻ ഇറങ്ങിപ്പുറപ്പെട്ട ഹിറ്റ്‌ലറുടെ അനുയായികളെയും അദ്ദേഹം കുറ്റപ്പെടുത്തി. ഭരണകൂടത്തേക്കാൾ ദൈവത്തെയാണ് അനുസരിക്കേണ്ടത്. സമൂഹത്തിന്‍റെ ധാർമിക മനഃസാക്ഷിയെ ധിക്കരിക്കുമ്പോൾ സമൂഹം സ്വന്തം മഹത്വവും ശാസനാധികാരവും നഷ്‌ടപ്പെടുത്തുന്നു. അത് അധികാരത്തിന്‍റെ ദുരുപയോഗമാണ്. ദൈവദത്തമായ മനുഷ്യമഹത്വത്തിന്മേലുള്ള കടന്നുകയറ്റമാണ്.

ജർമൻ ചാൻസലറായി ഹിറ്റ്‌ലർ അവരോധിക്കപ്പെട്ടിട്ട് (1933 ജനുവരി 30) ഏഴു മാസം കഴിഞ്ഞപ്പോഴാണ് മ്യുൺസ്റ്റർ രൂപതാ മെത്രാനായി ക്ലെമൻസ് സ്ഥാനമേൽക്കുന്നത്. ഹിറ്റ്‌ലറിന്‍റെ ആത്മഹത്യക്കുശേഷം (1945 ഏപ്രിൽ 30) കഷ്‌ടിച്ച് ഒരു വർഷം കൂടിയേ അദ്ദേഹം ജീവിച്ചിരുന്നുള്ളൂ (1946 മാർച്ച് 22). അദ്ദേഹം ദിവംഗതനായിട്ട് ഇക്കൊല്ലം 80 സംവത്സരങ്ങൾ തികഞ്ഞു. "മ്യുൺസ്റ്ററിലെ സിംഹം' എന്നായിരുന്നു അദ്ദേഹത്തെ ജനങ്ങൾ ആദരപൂർവം വിളിച്ചിരുന്നത്. ഫോൺ ഗാലൻ എന്ന പ്രഭുകുടുംബത്തിൽ ഡി‌ങ്ക്‌ലാഗെയിലെ കൊട്ടാരസദൃശമായ വീട്ടിൽ 1878 മാർച്ച് 16നാണ് ക്ലെമൻസിന്‍റെ ജനനം.

ഫോൺ സ്പീ പ്രഭുകുടുംബത്തിൽനിന്നുള്ള എലിസബത്ത് പ്രഭ്വിയായിരുന്നു അമ്മ. അവരുടെ 13 മക്കളിൽ പതിനൊന്നാമൻ. 1904ൽ അദ്ദേഹം വൈദികനായി. രണ്ടുവർഷം മ്യുൺസ്റ്റർ കത്തീഡ്രലിലും തുടർന്ന് 23 വർഷം ബെർലിനിലും വികാരിയായിരുന്നു. 1929ൽ മ്യുൺസ്റ്ററിൽ വികാരിയായി തിരിച്ചെത്തിയ അദ്ദേഹത്തെ പീയൂസ് പതിനൊന്നാമൻ മാർപാപ്പയാണ് മ്യുൺസ്റ്ററിലെ മെത്രാനായി നിയമിക്കുന്നത്.

വംശീയതയ്ക്കെതിരേ

നാസികളുടെ ആര്യവംശ ശ്രേഷ്ഠതയുടെ അവകാശവാദങ്ങൾ 1934 മുതൽ ബിഷപ് ക്ലെമൻസ് ചോദ്യം ചെയ്തിരുന്നു. രാഷ്‌ട്രത്തോടുള്ള ചോദ്യം ചെയ്യാത്ത വിശ്വസ്തതയെ അടിമത്തം എന്നാണ് അദ്ദേഹം വിശേഷിപ്പിച്ചത്. ജർമൻ വംശത്തിന്‍റെ പരിശുദ്ധി എന്ന ഹിറ്റ്‌ലറുടെ വാദവും ക്ലെമൻസ് തള്ളിക്കളഞ്ഞു. വംശീയമേന്മയുടെ പേരിൽ ഹിറ്റ്‌ലർ ആരംഭിച്ച കൂട്ടക്കൊലയുടെ ഇരകൾ യഹൂദർ മാത്രമല്ല ഭിന്നശേഷിക്കാരും അംഗഭംഗം വന്നവരും മാനസികരോഗികളും വൃദ്ധരുമൊക്കെയായിരുന്നു. ഒപ്പം "ഹീനജാതി'യിൽ പെട്ടവരും. എതിർത്തവരെ തുറുങ്കിലടച്ച് കഠോര പീഡനങ്ങൾക്ക് വിധേയരാക്കി.

പ്രസംഗങ്ങളും സമ്മേളനങ്ങളും കൂട്ടായ്മകളുമൊക്കെ നിരീക്ഷിക്കാനും റിപ്പോർട്ട് ചെയ്യാനും ഗ്രാമങ്ങളിൽ പോലും നാസി ചാരന്മാർ ഉണ്ടായിരുന്നു. മ്യൂണിക്കിന് അടുത്തുള്ള ദാഹാവ് ക്യാമ്പിൽ ഒരേസമയം രണ്ടായിരത്തിലധികം കത്തോലിക്കാ വൈദികർ തടവുകാരായിരുന്നു. ആശ്രമങ്ങളും കന്യകാമഠങ്ങളും ഉപേക്ഷിച്ചുപോകാൻ വൈദികരും സന്യസ്തരും നിർബന്ധിതരായി.

വംശവെറിയുടെ വിഷപ്പുകകൊണ്ട് യൂറോപ്പിന്‍റെ ആകാശത്തിൽ കാളമേഘങ്ങൾ ഉരുണ്ടുകൂടി സംഹാര രുദ്രമായി പെയ്തുതുടങ്ങി. നാസി ഭരണകൂടത്തിനെതിരേയുള്ള പള്ളി പ്രസംഗങ്ങൾ തടയാൻ അവ നേരത്തേതന്നെ സെൻസർക്കു കൊടുക്കേണ്ടിയിരുന്നു. ഈ സാഹചര്യത്തിലാണ് ബിഷപ് ക്ലെമൻസ് നാസി ഭരണകൂടത്തിന്‍റെ മനുഷ്യത്വവിരുദ്ധതയ്ക്കും ജനാധിപത്യവിരുദ്ധതയ്ക്കുമെതിരേ ശബ്ദമുയർത്തിയത്. "പുകഴ്ത്തലോ ഭയമോ കൂടാതെ' ( nec laudibus, nec timore) എന്നതായിരുന്നു അദ്ദേഹത്തിന്‍റെ ഔദ്യോഗിക മുദ്രയിലെ ആപ്തവാക്യം. നാസി പാർട്ടിയുടെ സൂക്ഷ്മനിരീക്ഷണത്തിലായിരുന്നു ബിഷപ് ക്ലെമൻസ്. അദ്ദേഹത്തെ മൂൺസ്റ്ററിൽനിന്നും മെത്രാൻ പദവിയിൽനിന്നും മാറ്റാൻ പാർട്ടി ആഗ്രഹിച്ചിരുന്നു. ജനരോഷം ഭയന്ന് അവർ നടപടികൾ മാറ്റിവച്ചു എന്നേയുള്ളൂ.

ഹിറ്റ്‌ലറെ അനുകൂലിച്ച ജർമനിയെപ്പോലെതന്നെ ഹിറ്റ്‌ലറെ എതിർത്ത മറ്റൊരു ജർമനിയും ഉണ്ടായിരുന്നു. അതിന്‍റെ പ്രതീകമായിരുന്നു ബിഷപ് ക്ലെമൻസ്. രക്തച്ചൊരിച്ചിലും വംശവെറിയും മഹത്വവത്കരിച്ച പ്രത്യയശാസ്ത്രത്തിനെതിരേ പോരാടാൻ അദ്ദേഹത്തിന് പിന്തുണയും പ്രോത്സാഹനവും നൽകിയത് പീയൂസ് പന്ത്രണ്ടാമൻ മാർപാപ്പയായിരുന്നു. ഇരുവരും തമ്മിൽ നടത്തിയ കത്തിടപാടുകൾ അവരുടെ കാഴ്ചപ്പാടുകൾ വ്യക്തമാക്കുന്നുണ്ട്. 1941 ജൂലൈ 13നു നാസിപ്പട മൂൺസ്റ്റർ നഗരത്തിലെ ഈശോസഭാ മന്ദിരവും കന്യകാമഠവും കൈയടക്കി ആശ്രമവാസികളെ തെരുവിൽ ഇറക്കിവിട്ടു. പിറ്റേന്ന് അദ്ദേഹം പ്രസംഗിച്ചു: “ഏറ്റവും വിശ്വസ്തനും ഉത്തരവാദിത്വമുള്ളവനുമായ പൗരൻ എന്ന് സ്വയം വിശ്വസിക്കുന്നവൻപോലും സുരക്ഷിതനല്ല”. ഒരാഴ്ചയ്ക്കകംസഭ വക കൂടുതൽ വസ്തുവകകൾ ഭരണകൂടം പിടിച്ചെടുത്തു. ഭരണകൂടം ചുറ്റികയാണെങ്കിൽ കത്തോലിക്കാ സഭ അടിക്കുറ്റിയാണെന്ന് (anvil) അദ്ദേഹം പ്രസ്താവിച്ചു.

ജീവന്‍റെ മൂല്യം

"ജീവിതയോഗ്യമല്ലാത്ത ജീവിത'ങ്ങളെ നശിപ്പിക്കാനുള്ള "ടി 4' പദ്ധതിക്കെതിരേ ബിഷപ് ഉയർത്തിയ ശബ്ദം ഭരണകൂടത്തിന് കേൾക്കാതിരിക്കാനായില്ല. രോഗികളെ കൊല്ലുന്നത് സർക്കാർ നിർത്തിവച്ചു. അതിനുവേണ്ടി നിർമിച്ച ആറ് ഉന്മൂലനകേന്ദ്രങ്ങൾ അടയ്ക്കുകയും ചെയ്തു. അതിനകം 80,000 പേരെ ഭരണകൂടം കൊന്നിരുന്നു. രഹസ്യമായി രണ്ടു ലക്ഷം പേരെ പിന്നീടും കൊന്നിട്ടുണ്ട് എന്നാണു കണക്ക്. ആശ്രമങ്ങൾ കണ്ടുകെട്ടുന്നതും നിർത്തിവച്ചു. എന്നാൽ എപ്പോഴും അത് സംഭവിക്കാമെന്ന് എല്ലാവരും കരുതി. യുദ്ധത്തിലെ അന്തിമവിജയത്തിനുശേഷം സഭയോട് പകരം വീട്ടാമെന്നായിരുന്നു അവരുടെ കണക്കു കൂട്ടൽ.

സർക്കാർ നയങ്ങളെ വിമർശിച്ചിരുന്നതുകൊണ്ട് ബിഷപ്പിനെ രാജ്യദ്രോഹിയും രാജ്യത്തിന്‍റെ ശത്രുവുമായാണ് ഭരണകൂടം കണ്ടത്. എന്നാൽ താൻ നിർവഹിക്കുന്നത് പൗരധർമം ആണെന്നായിരുന്നു അദ്ദേഹത്തിന്‍റെ ബോധ്യം. “യാതൊന്നിനും പിന്തിരിപ്പിക്കാനാകാത്ത മനഃസാക്ഷിയുടെ ചില പരിശുദ്ധമായ ചുമതലകൾ നമുക്കുണ്ട്. സ്വജീവിതം വിലയായി കൊടുത്തുപോലും ആ ചുമതല നാം നിറവേറ്റണം” - അദ്ദേഹം പറഞ്ഞു. മ്യുൺസ്റ്റർ രൂപതയിലെ 29 വൈദികരെ പൊലിസ് തുറുങ്കിലടച്ചിരുന്നെങ്കിലും ബിഷപ്പിനെ അറസ്റ്റ് ചെയ്യാതിരുന്നത് ജനരോഷം ഭയന്നാണ്. യഹൂദവിരോധം ശരിയല്ലെന്ന് ഉദ്ബോധിപ്പിച്ചുകൊണ്ട് തന്‍റെ രൂപതാ വൈദികർക്ക് അദ്ദേഹം കത്തെഴുതുകയുണ്ടായി.

1941ൽ നടത്തിയ മൂന്നു പള്ളിപ്രസംഗങ്ങളിൽ അദ്ദേഹം നാസി രഹസ്യ പൊലിസിന്‍റെ ഭീകരത, ദയാവധം, നിർബന്ധിത വന്ധ്യംകരണം, കോൺസൻട്രേഷൻ ക്യാമ്പ് എന്നിവയെ അതിനിശിതമായി കുറ്റപ്പെടുത്തി. പ്രസംഗങ്ങൾ ജർമനി മുഴുവനും ലഘുലേഖകളായി പ്രചരിച്ചു. സമാധാനം നീതിയുടെ ഫലമാണ്. നീതിയാണ് അധികാരത്തിന്‍റെ മൂലക്കല്ലായിരിക്കേണ്ടത്. ഭയത്തിന്‍റെയും ഭീരുത്വത്തിന്‍റെയും അടിമകളാക്കി ഹിറ്റ്‌ലർ ജർമൻ ജനതയെ അധഃപതിപ്പിച്ചിരിക്കുന്നതായി അദ്ദേഹം ചൂണ്ടിക്കാട്ടി.

കത്തോലിക്കർക്കുവേണ്ടി മാത്രമുള്ള ഉത്കണ്ഠയായിരുന്നില്ല ബിഷപ് ക്ലെമൻസിന്‍റേത്. വിചാരണ കൂടാതെ തടങ്കൽ പാളയങ്ങളിലും പൊലിസ് കസ്റ്റഡിയിലും കഴിയുന്ന അസംഖ്യം ആളുകളെകുറിച്ചും അദ്ദേഹം അസ്വസ്ഥനായി. പ്രൊട്ടസ്റ്റന്‍റ് പാസ്റ്റർ ആയിരുന്ന മാർട്ടിൻ നീമൊള്ളർക്ക് അദ്ദേഹം പരസ്യമായി പിന്തുണ നൽകി. അനീതിയും അടിച്ചമർത്തലും കണ്ടാൽ അതിന്‍റെ ഇരകൾക്കുവേണ്ടി അപ്പോൾതന്നെ പ്രതികരിക്കണം എന്നാണ് ബിഷപ്പിന്‍റെ ബോധ്യം. പ്രതികരിക്കാൻ താമസിച്ചാൽ അനേകർ അനീതിയുടെ ഇരകളാകും. പൊതുസമൂഹം അത് നിശബ്‌ദമായി അംഗീകരിക്കും.

ഭരണകൂടത്തിന്‍റെ ആക്രമണോത്സുകതയ്ക്കെതിരേ ബിഷപ് ക്ലെമൻസ് പ്രസംഗിച്ചത് അക്രമരാഹിത്യമാണ്. അദ്ദേഹം പറഞ്ഞു: “നമ്മുടെ ഏക ആയുധം ഇതാണ് - ശക്തമായും ധീരമായും എഴുന്നേൽക്കുക, സഹിക്കുക, സത്യത്തോടുള്ള അചഞ്ചലമായ പ്രതിബദ്ധതയോടെ കർമം ചെയ്യുക, രാജ്യത്തെ സ്നേഹിക്കുക”. ഒപ്പം വിശ്വാസത്തോടെ പ്രാർഥിക്കാനും ദൈവസഹായം തേടാനും അദ്ദേഹം ആഹ്വാനം ചെയ്തു. അറസ്റ്റ് ചെയ്യുകയാണെങ്കിൽ രൂപതാ പ്രവർത്തനങ്ങൾ എങ്ങനെ മുന്നോട്ടു കൊണ്ടുപോകണമെന്ന് 1936ൽതന്നെ അദ്ദേഹം എഴുതിവച്ചിരുന്നു. “നമ്മുടെ ഈ സമരത്തിൽ നാം വിശ്വസ്തതയോടെ ഉറച്ചുനിന്നാൽ ഉരുക്കിനെപ്പോലുള്ള നമ്മുടെ ഈ ചൈതന്യം ഉണർന്ന് പ്രശോഭിക്കുന്ന ഒരു ദിവസം വരും. അടിച്ചമർത്തപ്പെട്ടതും നിശബ്‌ദമാക്കപ്പെട്ടതുമായ നമ്മുടെ ചൈതന്യവും സത്യവും നീതിയും അന്നു ബഹുമാനിതമാകും”.

അന്തിമവിജയം

ഹിറ്റ്‌ലറുടെ ആത്മഹത്യയോടെ യുദ്ധം തീർന്നു. നാസി പാർട്ടി നേതാക്കളും പ്രവർത്തകരും ഒളിവിൽ പോവുകയോ ആത്മഹത്യ ചെയ്യുകയോ ചെയ്തു. അന്തിമവിജയം അവർക്കായിരുന്നില്ല. യുദ്ധാനന്തരം റഷ്യൻ, ബ്രിട്ടീഷ്, ഫ്രഞ്ച്, അമേരിക്കൻ സൈനികർ ജർമൻ ജനതയെ കൊള്ളയടിച്ചതും അപമാനിച്ചതും അദ്ദേഹം നിശിതമായി കുറ്റപ്പെടുത്തി. “നാസികളുടെ അനീതികൾ മാത്രമല്ല, അനീതി ആരു ചെയ്താലും അതിനെതിരേ ഞാൻ പോരാടും”.

1945 ജൂലൈ ഒന്നിന് അദ്ദേഹം ചെയ്ത പള്ളിപ്രസംഗം പിൻവലിക്കണമെന്ന് ബ്രിട്ടീഷ് അധികാരികൾ ആവശ്യപ്പെട്ടെങ്കിലും ബിഷപ് വഴങ്ങിയില്ല. ആ പ്രസംഗത്തിന്‍റെ കോപ്പികൾ മുൻ പ്രസംഗങ്ങളെപ്പോലെതന്നെ ജർമനിയിൽ ആകമാനം വിതരണം ചെയ്യപ്പെട്ടു. 1946 ഫെബ്രുവരി 21ന് മാർപാപ്പ അദ്ദേഹത്തെ കർദിനാൾ പദവിയുടെ സ്ഥാനചിഹ്നങ്ങൾ ധരിപ്പിച്ചപ്പോൾ സെന്‍റ് പീറ്റേഴ്സ് ബസിലിക്കയിൽ ഉയർന്ന കരഘോഷം അനേകം മിനിറ്റുകൾ നീണ്ടുനിന്നു. തിരിച്ചു മ്യുൺസ്റ്ററിൽ എത്തിയ കർദിനാൾ ക്ലെമൻസിന് രാജോചിതമായ സ്വീകരണമാണ് ജർമൻ ജനത നൽകിയത്.

ബോംബാക്രമണത്തിൽ തകർന്നുകിടന്ന മ്യുൺസ്റ്റർ കത്തീഡ്രലിൽ "വെസ്റ്റ്ഫാലിയിലെ കുലീനമായ ഓക്കുമരത്തെ പോലെ' വിജിഗീഷുവായി കർദിനാൾ ക്ലെമൻസ് കടന്നുവന്നു. അന്തിമവിജയത്തിനുശേഷം അദ്ദേഹത്തെ തുറുങ്കിലടക്കാൻ കാത്തിരുന്ന "ദേശസ്നേഹികൾ' ഏകഛത്രാധിപതികളുടെ അനിവാര്യ ഭാഗധേയമായ ആത്മഹത്യയിലോ ഒളിസങ്കേതങ്ങളിലോ തടവറകളിലോ എത്തിപ്പെട്ടിരുന്നു.

സംശുദ്ധമായ വ്യക്തിജീവിതത്തിന്‍റെ ഉടമയായിരുന്ന കർദിനാൾ ക്ലെമൻസിന്‍റെ വിശുദ്ധപദ പ്രഖ്യാപനത്തിനുള്ള നടപടികൾ 1956ൽ ആരംഭിച്ചു. 2004ൽ അവസാനിച്ചു. പിറ്റേവർഷം ഒക്‌ടോബർ ഒമ്പതിനു ബനഡിക്‌ട് പതിനാറാമൻ മാർപാപ്പ അദ്ദേഹത്തെ വാഴ്ത്തപ്പെട്ടവനായി പ്രഖ്യാപിച്ചു.

Leader Page

വൃദ്ധനും കടലും

എന്താണ് താങ്കൾ കലയിലൂടെ കണ്ടെത്തുന്നതെന്ന ചോദ്യത്തിന് വിഖ്യാത സാഹിത്യകാരനായ ഏണസ്റ്റ് ഹെമിംഗ്‌വേ (Ernst Hemingway) പറഞ്ഞ ഉത്തരം ഇതാണ്: അത്ര ആശയക്കുഴപ്പത്തിലാകാൻ എന്തുണ്ട്? സംഭവിച്ച കാര്യങ്ങളിൽനിന്നും നിലവിലുള്ള കാര്യങ്ങളിൽനിന്നും നിങ്ങൾക്കറിയാവുന്ന എല്ലാ കാര്യങ്ങളിൽ നിന്നും നിങ്ങൾക്ക് അറിയാൻ കഴിയാത്തവയിൽനിന്നും, നിങ്ങളുടെ ഭാവനയിലൂടെ നിങ്ങൾ ഒരു പുതിയ കാര്യം ഉണ്ടാക്കുന്നു - അത് വെറുമൊരു പകർത്തലല്ല, മറിച്ച് യഥാർഥവും ജീവനുള്ളതുമായ ഏതിനേക്കാളും സത്യമുള്ള ഒരു പുതിയ സംഗതിയാണ്.

നിങ്ങൾ അതിന് ജീവൻ നൽകുന്നു, അത്യാവശ്യം നന്നായി ചെയ്താൽ നിങ്ങൾ അതിന് അനശ്വരതയും നൽകുന്നു. അതുകൊണ്ടാണ് നിങ്ങൾ എഴുതുന്നത്, നിങ്ങൾക്ക് അറിയാവുന്ന വേറെ ഒരു കാരണത്താലുമല്ല. എന്നാൽ ആർക്കും അറിയാത്ത എല്ലാ കാരണങ്ങളെപ്പറ്റിയോ?

തലമുറകളെ വായിപ്പിച്ച ഹെമിംഗ്‌വേയുടെ ഇതുവരെ പ്രസിദ്ധീകരിക്കാത്ത ഒരു കഥ ഏതാനും വർഷങ്ങൾക്കു മുമ്പ് "ദ് ന്യൂയോര്‍ക്കറി'ല്‍ വന്നു. "പഴ്‌സ്യൂട്ട് ആസ് ഹാപ്പിനസ്' (Pursuit as Happiness)എന്നാണ് കഥയുടെ പേര്: സന്തോഷമായി പിന്തുടരുക.1956 ല്‍ ഹെമിംഗ്‌വേ എഴുതിയ "വൃദ്ധനും കടലും' (The old man and the sea) പ്രസിദ്ധമാണല്ലോ. ഒരു കൂറ്റന്‍ മത്സ്യത്തെ വേട്ടയാടിപ്പിടിക്കുന്നതും ഒടുവില്‍ അത് ഉപയോഗശൂന്യമാകുന്നതുമാണ് പ്രമേയം.

പുറത്തുവന്നിരിക്കുന്ന ചെറുകഥയിലും ഒരു മത്സ്യത്തെ വേട്ടയാടുന്ന ഹെമിംഗ്‌വേയെയും സുഹൃത്തുക്കളെയും കാണാം. ഇത് ആത്മകഥാപരമായ ഒരു വിവരണമാണ്. ആത്മകഥയും "കഥ' തന്നെയാണല്ലോ. ഹെമിംഗ്‌വേയുടെ ചെറുമകന്‍ സീന്‍ ഹെമിംഗ്‌വേ ബോസ്റ്റണിലെ ജോണ്‍ എഫ്. കെന്നഡി ലൈബ്രറി ആന്‍ഡ് മ്യൂസിയത്തിലെ ഹെമിംഗ്‌വേ ഗ്രന്ഥശേഖരത്തില്‍നിന്നാണ് ടൈപ്പ് ചെയ്ത് ഉപേക്ഷിച്ചതായി കാണപ്പെട്ട ഈ കഥ കണ്ടെടുത്തത്. അദ്ദേഹം പറയുന്നു: എന്തുകൊണ്ടാണ് ഈ കഥ ശ്രദ്ധിക്കപ്പെടാതെ പോയതെന്ന് മനസിലാകുന്നില്ല. ഇത് അസാധാരണമായ ഒരു മുത്താണ്, വൃദ്ധനും കടലും പോലെ.

ഈ കഥയെ "വൃദ്ധനും കടലും' എഴുതുന്നതിനുമുമ്പുള്ള ഒരു പരിശീലനമായി കാണാമെന്നാണ് സീനിന്‍റെ അഭിപ്രായം. രണ്ടു രചനകള്‍ക്കും തമ്മില്‍ നല്ല സാമ്യമുണ്ട്. രണ്ടിലും ഒരു മത്സ്യത്തെ വേട്ടയാടുന്നു. കഥാന്ത്യത്തില്‍, രണ്ടിലും നിരാശയുണ്ട്. ഈ കഥയുടെ കൈയെഴുത്തുപ്രതിയുടെ കോപ്പി പ്രിന്‍സ്റ്റണ്‍ യൂണിവേഴ്‌സിറ്റിയിലെ സ്‌ക്രിബ്‌നര്‍ ആര്‍ക്കീവിലും കണ്ടെത്തിക്കഴിഞ്ഞു. ഏണസ്റ്റ് എന്ന വ്യക്തിയാണ് കഥ പറയുന്നത്. ഏണസ്റ്റും സുഹൃത്ത് മിസ് ജോസിയുമാണ് പ്രധാന കഥാപാത്രങ്ങള്‍. 1933ലാണ് കഥ നടക്കുന്നത്.

അതിജീവന കഥ

"വൃദ്ധനും കടലും' എന്ന ചെറുനോവല്‍ ഒരു ക്ലാസിക്കായി മാറിയത് ചരിത്രമാണ്. സാന്‍റിയാഗോ എന്ന അധ്വാനിയായ വൃദ്ധന്‍റെ അതിജീവനമാണത്. വൃദ്ധൻ എണ്‍പത്തിനാല് ദിവസമായി മീന്‍ പിടിക്കാന്‍ കഴിയാതെ നിരാശയില്‍ കഴിയുകയായിരുന്നു. ഒരു വയസനു ചൂണ്ടയിടാന്‍ കഴിഞ്ഞേക്കും; അതിൽ അദ്ഭുതമില്ല. ഒരു വലിയ മത്സ്യത്തെ കരയിലെത്തിക്കുന്നത് അയാളുടെ സ്വപ്‌നമായിരുന്നു. അതിലൂടെ തന്‍റെ സമീപത്തുള്ളവര്‍ക്കിടയില്‍ താന്‍ പരാജയപ്പെട്ടവനല്ലെന്നു തെളിയിക്കാനാകും. ഒരു ഘട്ടം കഴിയുമ്പോള്‍ ജീവിതം എന്നാല്‍ നിശ്ചലതയോ നിര്‍വികാരതയോ പിന്തിരിഞ്ഞുനോട്ടമോ ആകാം.

വയസാകല്‍ മാനസികവ്യഥകളിലേക്കുള്ള പരിണാമ പ്രക്രിയയായി മാറാവുന്നതാണ്. എണ്‍പത്തിയഞ്ചാം ദിവസം വൃദ്ധന്‍ തന്‍റെ വള്ളവുമായി ക്യൂബന്‍ തീരത്തുനിന്ന് കടലിലേക്ക് കുതിച്ചു. കുറെ ദൂരം പിന്നിട്ടപ്പോഴാണ് ആ വലിയ മത്സ്യത്തെ കണ്ടത്. അയാള്‍ അതിനെ തന്‍റെ കുന്തമെറിഞ്ഞ് പിടിക്കാന്‍ ശ്രമിച്ചു. എന്നാല്‍ അയാളെയും വലിച്ചുകൊണ്ട് ആ മത്സ്യം വീണ്ടും കടലിലേക്ക് കുതിച്ചു. രണ്ടു ദിവസമാണ് വൃദ്ധൻ മത്സ്യത്തിന്‍റെ പിന്നാലെ ചുറ്റിത്തിരിഞ്ഞത്. മൂന്നാംദിവസം മത്സ്യത്തെ അടുപ്പിച്ചു.

അയാള്‍ മത്സ്യത്തെ കരയ്‌ക്കെത്തിക്കാനായി കഠിനമായി പരിശ്രമിച്ചുകൊണ്ടു തുഴഞ്ഞു. എന്നാല്‍ മാര്‍ഗമധ്യേ, വലിയ മത്സ്യത്തെ സ്രാവുകള്‍ ആക്രമിക്കുന്നതാണ് കണ്ടത്. സ്രാവുകള്‍ വലിയ മീനിന്‍റെ മാംസം കൊത്തിത്തിന്നാന്‍ തുടങ്ങിയിരുന്നു. ഏതാനും സ്രാവുകളെ വൃദ്ധന്‍ വകവരുത്തിയെങ്കിലും അവയുടെ ആക്രമണത്തില്‍നിന്ന് വലിയ മത്സ്യത്തെ രക്ഷപ്പെടുത്താനായില്ല.

പുലര്‍ച്ചെ തീരത്ത് എത്തുമ്പോള്‍ അയാൾ പിടിച്ച പതിനെട്ടടി നീളമുള്ള വലിയ മത്സ്യത്തിന്‍റെ മാംസമെല്ലാം നഷ്‌ടപ്പെട്ടിരുന്നു. തലയും നട്ടെല്ലും വാലും മാത്രമുള്ള അസ്ഥികൂടമാണ് അവശേഷിച്ചത്. വൃദ്ധൻ അതിനെ തീരത്ത് ഉപേക്ഷിച്ച് ഉറങ്ങാന്‍ പോകുകയാണ്. പ്രത്യേകമായ ഒരു വിഷാദം അയാളെ ബാധിക്കുന്നില്ല.

സ്വപ്നങ്ങളുടെ പരിണാമം

ഹെമിംഗ്‌വേ നല്കുന്ന സൂചന വളരെ ആഴത്തില്‍ ചെന്നുകൊള്ളുന്നു. ജീവിതത്തിന്‍റെ സാരമാണത്. നമ്മുടെ സ്വപ്‌നങ്ങളുടെ പരിണാമം. അതില്‍ വാര്‍ധക്യത്തിന്‍റെയും മരണത്തിന്‍റെയും അര്‍ഥങ്ങളുണ്ട്. കാലത്തിന്‍റെ സ്വഭാവം ആ അസ്ഥികൂടമായ മത്സ്യത്തില്‍ സ്പന്ദിക്കുകയാണ്. ആഗ്രഹങ്ങളുടെ നൈമിഷികമായ സാക്ഷാത്കാരത്തിനുശേഷം എല്ലാം ജഡതുല്യമായിത്തീരുന്നു. മനുഷ്യന്‍ വിജയിക്കുന്നതിന്‍റെ ചിത്രമല്ല ഇവിടെയുള്ളത്. വിജയമാണെന്ന് തെറ്റിദ്ധരിച്ച് മൂല്യത്തിന്‍റെ ജഡത്തെ കെട്ടിവലിച്ചുകൊണ്ടു നടക്കരുതെന്നാണ് ഈ നോവൽ നൽകുന്ന സൂചന. വൃദ്ധൻ ക്രൂരത പ്രവർത്തിച്ചു. ആ തെറ്റ് മനസിലാക്കാൻ അയാളുടെ ഈഗോ അനുവദിക്കുന്നില്ല.

കടലിൽ നീന്തിത്തുടിച്ച ഒരു മത്സ്യത്തെ തന്‍റെ വിജയത്തിനും അഹന്തയ്ക്കും മത്സരത്തിനുമായി പിന്തുടർന്നു കൊല്ലുന്നത് ക്രൂരതയാണ്. എന്നാൽ മനുഷ്യൻ എല്ലായ്‌പോഴും, കുതിച്ചുപായാനാണ് കൊതിക്കുന്നത്. കൈവിട്ടുപോകുമെന്ന് അറിയാമെങ്കിലും സാഹസികമായി അത് നേടാന്‍ നോക്കും.സാന്‍റിയാഗോ എന്ന മനുഷ്യന്‍ അതിന്‍റെ ഉദാഹരണമാണ്. മിഥ്യയെ എതിര്‍വശത്തു നിര്‍ത്തിക്കൊണ്ടാണ് ആ മനുഷ്യൻ ജീവിതാവേശത്തിന്‍റെ സാന്‍റിയാഗോ ആകുന്നത്. ആ ചത്ത മീനിന്‍റെ എല്ലിന്‍കൂട് മനുഷ്യജീവിതത്തെ നോക്കുകയാണ്. വിഷണ്ണത ഒരു സ്വഭാവമല്ല, ഒരു താത്കാലിക പ്രതികരണമാണ്.

ഒരിക്കല്‍ ഹെമിംഗ്‌വേയോട് ഒരാള്‍ ചോദിച്ചു, എന്താണ് നല്ല എഴുത്തെന്ന്? അദ്ദേഹം പറഞ്ഞു: “സത്യസന്ധമായ എഴുത്താണ് നല്ല എഴുത്ത്. ഒരാൾ ഒരു കഥ ഭാവന ചെയ്യുകയാണെങ്കിൽ, തന്‍റെ ജീവിതാനുഭവങ്ങളെക്കുറിച്ചുള്ള അറിവിനും എത്രത്തോളം ആത്മാർഥതയോടെ അയാൾ അത് ചെയ്യുന്നുണ്ട് എന്നതിനും ആനുപാതികമായിരിക്കും ആ കഥയിലെ സത്യസന്ധത; അതുകൊണ്ട് അയാൾ എന്തെങ്കിലും കെട്ടിച്ചമയ്ക്കുമ്പോൾ, അത് യഥാർഥത്തിൽ എങ്ങനെയോ അതുപോലെ തന്നെയായിരിക്കും.” ജിവിതാനുഭവത്തെക്കുറിച്ച് ഒരാൾക്ക് എന്തുമാത്രം അറിവുണ്ടോ അത്രയും മാത്രമേ അയാളുടെ സത്യസന്ധതയ്ക്ക് കടന്നുചെല്ലാനാകൂ.

Leader Page

അരാജകത്വമോ ജനാധിപത്യമോ?

നിങ്ങളുടെ വോട്ട് നിങ്ങളുടെ ഒപ്പാണ്. അത് നിങ്ങളുടെ സമ്മതമില്ലാതെ ആർക്കും വിട്ടുകൊടുക്കരുത് എന്ന വാചകം ഒരു നിശ്ചിത വ്യക്തിയുടെ ഉദ്ധരണിയല്ല. മറിച്ച്, ഇത് വോട്ടവകാശത്തെയും അതിന്‍റെ വ്യക്തിപരമായ പ്രാധാന്യത്തെയും ജനങ്ങളെ ബോധ്യപ്പെടുത്താൻവേണ്ടി രൂപപ്പെടുത്തിയ ഒരു പൊതുവായ ജനാധിപത്യ ബോധവത്കരണ സന്ദേശമാണ്. ആ സ്വന്തം ഒപ്പിന്‍റെ അവകാശത്തിനുവേണ്ടിയാണ് ഇന്ന് ഇന്ത്യയിലെ ചെറുപ്പക്കാർ റോഡിലിറങ്ങേണ്ടിവരുന്നതും അതിനെ ഗവണ്മെന്‍റിന് അന്യായ മാർഗത്തിൽകൂടി നേരിടേണ്ടിവരുന്നതും. ഇതു മൂലമുണ്ടാകുന്ന ചില ജനജീവിത അസൗകര്യങ്ങളും നിയമപ്രശ്നങ്ങളും"അരാജകത്വ’മാണെന്ന രീതിയിൽ കുറേപേരെങ്കിലും വ്യാഖ്യാനിക്കാൻ ഇടയുണ്ട്.

വാസ്തവത്തിൽ ഭരണഘടന ആർട്ടിക്കിൾ 19(1) a, b പ്രകാരം ഉറപ്പുതരുന്ന മൗലികാവകാശമാണ് അഭിപ്രായപ്രകടനത്തിനും ഒന്നിച്ചു കൂടാനുമുള്ള സ്വാതന്ത്ര്യം. അതിപ്പോൾ ഉപയോഗിക്കുന്നതാകട്ടെ ജനാധിപത്യത്തിലെ അടിസ്ഥാന സ്വാതന്ത്ര്യമായ വോട്ടവകാശം സംരക്ഷിക്കാനും ഇതുമായി ബന്ധപ്പെട്ട ദുരൂഹതകൾ നീക്കാനും ആവശ്യപ്പെട്ടുകൊണ്ടാണ്.

എന്തിനേറെ, പ്രധാനമന്ത്രി മത്സരിച്ച വാരാണസിയിൽപോലും വോട്ടർപട്ടികയിൽ വ്യാജ പേരുകൾ ചേർത്തതായും വോട്ട് രേഖപ്പെടുത്താൻ പുറത്തുനിന്നുള്ള ആളുകളെ വാരാണസിയിൽ എത്തിച്ചതായും ഗൗരവമായ ആരോപണം ഉയർന്നു. അതുകൊണ്ടുതന്നെ ഇലക്‌ഷൻ കമ്മിഷനുമായി ബന്ധപ്പെട്ട ദുരൂഹതകൾ പരിഹരിക്കേണ്ടതുണ്ട്. അതിപ്പോൾ തീവ്ര വോട്ട് പരിഷ്കരണ അഴിമതിയിൽ എത്തിനിൽക്കുന്നു. ഇതാകട്ടെ ഇന്ത്യൻ ജനാധിപത്യ സംവിധാനത്തിന്‍റെയും പ്രവർത്തനങ്ങളുടെയും ആധികാരികതയും നിയമസാധുതയുംപോലും സംശയത്തിലാക്കുന്നു.

ഇത്രയും ഗൗരവമുള്ള വിഷയത്തിന്‍റെ പേരിൽ പ്രതിഷേധിക്കുന്ന യുവജനതയെയും നേതാക്കളെയും കേവലം കക്ഷിരാഷ്‌ടീയത്തിന്‍റെ പേരിലും കക്ഷിനേതാക്കളുടെ പേരിലും സാധാരണയായി നടത്തപ്പെടുന്ന നിയമലംഘനവുമായോ മറ്റ് സമരങ്ങളുമായോ താരതമ്യംപോലും ഇല്ലാത്തതാണ്. അമേരിക്കയിൽ ജോർജ് ഫ്ലോയിഡിന്‍റെ മരണവുമായി ബന്ധപ്പെട്ടുണ്ടായ "എനിക്ക് ശ്വസിക്കണം’എന്ന മുദ്രവാക്യത്തെ ഓർമപ്പെടുത്തുന്നു "എനിക്ക് വോട്ട് ചെയ്യണം’എന്നുള്ള ഇന്ത്യയിലെ യുവജനങ്ങളുടെ ആവശ്യം. ഇതിനെ അരാജകത്വം എന്ന, ആളുകൾ നിയമങ്ങളൊന്നും പാലിക്കാതെ സ്വന്തം ഇഷ്ടപ്രകാരം മാത്രം പ്രവർത്തിക്കുന്ന അവസ്ഥ അല്ലെന്നുള്ളത് മനസിലാക്കേണ്ടത്, ഈ സമരത്തിന്‍റെ പ്രാധാന്യത്തോളംതന്നെ പ്രധാനമാണ്.

പ്രമുഖ ചിന്തകനും ഭാഷാശാസ്ത്രജ്ഞനുമായ നോം ചോംസ്കി, അനാർക്കിസമെന്ന അരാജകവാദത്തെക്കുറിച്ച് പറഞ്ഞത് ഇപ്പോൾ പ്രസക്തമാണ്: ""എന്‍റെ കാഴ്ചപ്പാടിൽ അനാർക്കിസം എന്നത്, പ്രയോഗിക്കപ്പെടുന്ന ഏതൊരു അധികാരവും ആധിപത്യവും ശ്രേണീവ്യവസ്ഥയും അതിന്‍റെ ന്യായസാധുത തെളിയിക്കേണ്ടത് അത് പ്രയോഗിക്കുന്നവരുടെ ബാധ്യതയാണ് എന്ന ആശയത്തിന്‍റെ ആവിഷ്കാരമാണ്. അതു ന്യായമാണെന്ന് അവർക്കു തെളിയിക്കാൻ കഴിയണം. സാധിച്ചില്ലെങ്കിൽ, ആ അധികാരത്തെ ഉടനടി ഇല്ലാതാക്കേണ്ടതുണ്ട്. ''

സമൂഹത്തിലെ എല്ലാത്തരം അധികാര രൂപങ്ങളെയും (അത് ഭരണകൂടമായാലും മുതലാളിത്തമായാലും) നിരന്തരം ചോദ്യം ചെയ്യണമെന്നാണ് ചോംസ്കി പറയുന്നത്. ഒരു അധികാര വ്യവസ്ഥയ്ക്കും സ്വയം നിലനിൽക്കാൻ അവകാശമില്ല. അത് ജനങ്ങൾക്ക് ഗുണകരമാണെന്ന് തെളിയിക്കാൻ കഴിഞ്ഞില്ലെങ്കിൽ അതിനെ ഇല്ലാതാക്കണം.

അനാർക്കി എന്നാൽ ക്രമസമാധാനമില്ലായ്മയോ കുഴപ്പങ്ങളോ അല്ല. മറിച്ച്, ജനങ്ങൾ പരസ്പര സഹകരണത്തോടെയും സ്വയംഭരണത്തിലൂടെയും നയിക്കുന്ന ഒരു സ്വതന്ത്ര സമൂഹമാണ് എന്നാണ് അദ്ദേഹം അർഥമാക്കുന്നത്. അങ്ങനെ അരാജകത്വം എന്ന് ഉപയോഗിച്ചാൽതന്നെ, അത് ഒരു സമൂഹത്തിന്‍റെ ജനാധിപത്യ സംരക്ഷണ യജ്ഞമായിവേണം മനസിലാക്കാൻ.

ജനങ്ങൾ താഴേത്തട്ടിൽനിന്ന് ജനാധിപത്യപരമായി സംഘടിപ്പിക്കുന്ന ഒരു വ്യവസ്ഥയെയാണ് ചോംസ്കി അരാജകത്വം എന്ന് മനസിലാക്കുന്നത്. ഇത്‌ വെറും ഒരു രാഷ്‌ട്രീയ സിദ്ധാന്തമല്ല; മറിച്ച് മനുഷ്യന്‍റെ സ്വാതന്ത്ര്യത്തെയും സർഗാത്മകതയെയും മുൻനിർത്തിയുള്ള ആഴത്തിലുള്ള ഒരു തത്വശാസ്ത്രമാണ്.

യഥാർഥത്തിൽ നിയമങ്ങളില്ലാത്ത, അടിപിടിയും കുഴപ്പങ്ങളും നിറഞ്ഞ അരാജകത്വം എന്ന നിഷേധാത്മക സാഹചര്യം സൃഷ്ടിക്കുന്നത് ജനങ്ങളുടെമേൽ അടിച്ചേൽപ്പിക്കപ്പെടുന്ന സ്റ്റേറ്റിന്‍റെയോ ഭരണകൂടത്തിന്‍റെയോ നേതൃത്വത്തിലാണ്. അതിനെതിരേയുള്ള ബഹുജന കൂട്ടായ്മകൾ ജനാധിപത്യപരമായുള്ള, സർഗാത്മക "അരാജകത്വം’ ആണ്. ഇവയെ തമ്മിൽ കൂട്ടിക്കുഴയ്ക്കുന്നതും ജനാധിപത്യപരവും ന്യായവുമായ സമരങ്ങളെ വെറും ഒരു സാധാരണക്കാരന്‍റെ സംഭാഷണത്തിലെ "നിയമവാഴ്ചയില്ലാത്ത കടുത്ത കുഴപ്പങ്ങൾ നിറഞ്ഞ അവസ്ഥ’ എന്നു തെറ്റിദ്ധരിപ്പിക്കുന്നതും അടിച്ചമർത്തുന്നതും, ചോംസ്കി പറയുന്നതുപോലെതന്നെ ജനങ്ങളെ അടിമകളാക്കി നിർത്തുന്നതിന് തുല്യവുമാണ്. ഇത്ു സാധിക്കുന്നത് അക്രമത്തിലൂടെയല്ല; മറിച്ച് മാധ്യമങ്ങളിലൂടെയും പരസ്യങ്ങളിലൂടെയും വിദ്യാഭ്യാസത്തിലൂടെയും ജനങ്ങളുടെ പൊതുബോധത്തെ നിയന്ത്രിച്ചുകൊണ്ടാണ്. ഇതിനെയാണ് അദ്ദേഹം "മാനുഫാക്ചറിംഗ് കൺസെന്‍റ്’(സമ്മതി നിർമിതി) എന്നു വിളിക്കുന്നത്.

ജനങ്ങളെ വെറും ഉപഭോക്താക്കൾ മാത്രമാക്കി മാറ്റി അവരുടെ ചിന്താശേഷിയെയും പ്രതികരണ ശേഷിയെയും ഇല്ലാതാക്കുന്ന ഈ വ്യവസ്ഥയെ ചോംസ്കി ശക്തമായി വിമർശിക്കുന്നുണ്ട്. ജനാധിപത്യത്തിന്‍റെതന്നെ വലിയ വെല്ലുവിളിയാണ് ഇന്നിത്. ഇന്ത്യയിലെയും സ്ഥിതി വ്യത്യസ്തമല്ല. ഇന്ത്യയിൽ ഈ "സമ്മതി നിർമിതി’ക്കെതിരേ പൊതുബോധം രൂപപ്പെടേണ്ടതുണ്ട്. അതിനുള്ള ശ്രമമായി വേണം ഇപ്പോഴത്തെ യുവാക്കളുടെ സമരത്തെ കാണാനും പിന്തുണക്കാനും.

അതിനെ വെറും അരാജകത്വമായി മുദ്രകുത്തി, യുവാക്കളെ അക്രമത്തിലൂടെ അടിച്ചമർത്തി നശിപ്പിക്കാൻ ശ്രമിച്ചാൽ, ചിലിയൻ കവിയായ നേരുദാ എഴുതിയതുപോലെ സംഭവിക്കും. ""നിങ്ങൾക്ക് എല്ലാ പൂക്കളും കൊയ്തെടുക്കാം, എന്നാൽ വസന്തം വരുന്നത് തടയാൻ നിങ്ങൾക്ക് കഴിയില്ല.''

Leader Page

ഇരുളിലേക്ക്..?

ജനാധിപത്യ മുന്നേറ്റങ്ങളുടെ പ്രകടനകേന്ദ്രമായ ജന്തർ മന്തർ അധികാരനഷ്‌ടഭീതിയിലാണ്ടവർ പൂട്ടിയിരിക്കുന്നു. പ്രതിഷേധവും പ്രതികരണവും ഈ ജനാധിപത്യ രാജ്യത്ത് വലിയ കുറ്റമായിരിക്കുന്നു. മൗലികാവകാശങ്ങൾപോലും റദ്ദു ചെയ്യപ്പെടുന്ന ഇരുളിലേക്കാണോ രാജ്യത്തിന്‍റെ യാത്ര? അതീവ ജാഗ്രത പുലർത്തിയില്ലെങ്കിൽ നമുക്ക് നഷ്‌ടപ്പെടുക നമ്മുടെ അവകാശങ്ങളും ജനാധിപത്യവുമാകും.

മാധ്യമപ്രവർത്തനം പോലും വിലക്കുന്ന ഇരുണ്ട ജനാധിപത്യം! പ്രതിഷേധിക്കുന്ന പ്രതിപക്ഷത്തെ, വിദ്യാർഥികളെ, മാധ്യമപ്രവർത്തകരെ കാലിൽവാരി ഇടിവണ്ടിയിലെറിയുന്നു.

റെയിൽവേസ്റ്റേഷനുകൾ, ബസ് സ്റ്റാൻഡുകൾ, ഇന്‍റർനെറ്റ്, ഭക്ഷണ-കുടിവെള്ള വിതരണസംവിധാനങ്ങൾ... എല്ലാത്തിനെയും പേടി. സമരക്കാർക്ക് ഒരാവശ്യമേയുള്ളൂ; വോട്ടു വെട്ടി ജനാധിപത്യത്തെ പിന്നിൽനിന്നു കുത്തിയ മുഖ്യതെരഞ്ഞെടുപ്പ് കമ്മിഷണറെ പുറത്താക്കണം.

സർക്കാരിനു ധൈര്യമില്ല. അദ്ദേഹം പുറത്തുപോയാൽ, നിഷ്പക്ഷസമിതി പുനഃസ്ഥാപിച്ചു പുതിയൊരുദ്യോഗസ്ഥനെ തെരഞ്ഞെടുത്താൽ, വോട്ടുകൾ തിരിച്ചുവച്ചാൽ കസേരകളി തോൽക്കും. പക്ഷേ, ജനം പിന്നാലെയുണ്ട്. സ്വാതന്ത്ര്യസമര തഴന്പുള്ളവരുടെ പിന്മുറക്കാർ രാജ്യത്തെ ഇരുട്ടുവിഴുങ്ങുവോളം കാത്തിരിക്കില്ല. ഡൽഹി രാജ്യത്തെ വിളിച്ചുണർത്തുകയാണ്. സർക്കാരിന്‍റെ നിഴലിൽ ഒളിച്ചിരിക്കുന്ന ഉദ്യോഗസ്ഥനെയല്ല, രാജ്യത്തിനാവശ്യം ജനാധിപത്യത്തെയാണ്. തിരിച്ചുവയ്ക്കുക.

Leader Page

ജനാധിപത്യം തടവറയിലാകുന്ന തെരഞ്ഞെടുപ്പുകൾ

പൗരന്മാരുടെ സ്വാതന്ത്ര്യത്തിനു മുൻഗണന നൽകിയ മഹത്തായ ജനാധിപത്യ പാരമ്പര്യമാണ് ഇന്ത്യയുടേത്. ഭരണഘടനാ ശില്പിയായ ഡോ. ബി.ആർ. അംബേദ്കറും പണ്ഡിറ്റ് ജവഹർലാൽ നെഹ്റുവും മഹാത്മാഗാന്ധിയും ചേർന്ന് രാജ്യത്തെ മുന്നോട്ട് നയിച്ചപ്പോൾ "ഒരാൾക്ക് ഒരു വോട്ട്, ആ വോട്ടിന് ഒരേ മൂല്യം' എന്ന ഭരണഘടനാ തത്വം യാഥാർഥ്യമായി.

എന്നാൽ, ഇന്ന് ഭരണഘടനാ സ്ഥാപനങ്ങളെ സ്വന്തം കാര്യസാധ്യത്തിനായി വശംവദരാക്കുകയും, ജനവിധിയെ അട്ടിമറിക്കാൻ ഭരണകൂടത്തിന്‍റെ കുഴലൂത്തുകാരായി അവരെ മാറ്റുകയും ചെയ്യുന്ന ഭയാനകമായ ദുരവസ്ഥയ്ക്കാണ് ഭാരതം സാക്ഷ്യംവഹിക്കുന്നത്.

നിയമനത്തിലെ അട്ടിമറി-2023ലെ നിയമം

ഒരു സ്വതന്ത്ര തെരഞ്ഞെടുപ്പ് കമ്മിഷന്‍റെ സുതാര്യത ആരംഭിക്കുന്നത് അതിന്‍റെ തലപ്പത്തുള്ള കമ്മിഷണർമാരുടെ നിയമനത്തിലൂടെയാണ്. ഭരണഘടനയുടെ 324-ാം അനുച്ഛേദം അനുസരിച്ച് തെരഞ്ഞെടുപ്പ് കമ്മിഷനെ നിയമിക്കുന്നതിന് പാർലമെന്‍റ് നിയമം കൊണ്ടുവരണമെന്ന് വ്യവസ്ഥയുണ്ട്.

2023 മാർച്ച് 2-ന് സുപ്രീം കോടതിയുടെ അഞ്ചംഗ ഭരണഘടനാ ബെഞ്ച് ഒരു ചരിത്ര വിധി പുറപ്പെടുവിച്ചു. പാർലമെന്‍റ് നിയമം കൊണ്ടുവരുന്നതുവരെ, തെരഞ്ഞെടുപ്പ് കമ്മിഷണർമാരെ നിയമിക്കുന്നത് പ്രധാനമന്ത്രി, ലോക്‌സഭയിലെ പ്രതിപക്ഷ നേതാവ്, സുപ്രീംകോടതി ചീഫ് ജസ്റ്റീസ് എന്നിവരടങ്ങിയ സമിതിയായിരിക്കണം എന്നായിരുന്നു വിധി.

എന്നാൽ ആ വിധിയുടെ നിഷ്പക്ഷതയെ മറികടക്കാൻ 2023 ഡിസംബർ 12ന് കേന്ദ്ര സർക്കാർ നിയമം പാസാക്കി. അതിൽ സുപ്രീംകോടതി ചീഫ് ജസ്റ്റീസിനെ സമിതിയിൽ നിന്ന് പുറത്താക്കി, പകരം പ്രധാനമന്ത്രി നോമിനേറ്റ് ചെയ്യുന്ന ഒരു കേന്ദ്ര കാബിനറ്റ് മന്ത്രിയെ ഉൾപ്പെടുത്തി. മൂന്നംഗ സമിതിയിൽ ഭൂരിപക്ഷം ഭരണപക്ഷത്താകുന്നതോടെ, തങ്ങൾക്ക് ഇഷ്‌ടമുള്ളവരെമാത്രം തിരഞ്ഞെടുപ്പ് കമ്മിഷന്‍റെ തലപ്പത്ത് നിയമിക്കാൻ വഴിതുറന്നു.

ഫോം ആറി ലെ മാറ്റവും സുപ്രീംകോടതിയുടെ പരാമർശവും

പ്രത്യേക തീവ്ര വോട്ടർപട്ടിക പുതുക്കൽ നടപടിയുടെ മറവിൽ ലക്ഷക്കണക്കിന് വോട്ടർമാരുടെ പേരുകൾ വെട്ടിമാറ്റപ്പെട്ടു. പുതിയ വോട്ട് ചേർക്കാനുള്ള ഫോം ആറിനോടൊപ്പം ഒരു അധിക ഡിക്ലറേഷൻ കൂട്ടിച്ചേർത്തതാണ് വിവാദമായത്. അതിന് സുപ്രീംകോടതി അനുമതിയില്ലെന്നതും പിന്നീട് തെളിഞ്ഞു. ഇതിനിടെ കമ്മിഷനിലെ അഭിപ്രായവ്യത്യാസങ്ങളും പുറത്തുവന്നു.

സെ‌ക‌്ഷൻ 16- വിവാദമായ നിയമപരിരക്ഷ

ഈ വിവാദങ്ങൾക്കൊപ്പം ചേർത്ത് വായിക്കേണ്ടതാണ് 2023ലെ പുതിയ നിയമത്തിലെ സെക്ഷൻ 16. ഇതനുസരിച്ച് പദവിയിൽ ഇരിക്കുമ്പോൾ മാത്രമല്ല, സ്ഥാനമൊഴിഞ്ഞ ശേഷവും കേസ് എടുക്കാൻ കഴിയില്ല. ഔദ്യോഗിക കൃത്യമാണെന്ന് തോന്നിപ്പിക്കുന്ന പ്രവൃത്തിക്കും സംരക്ഷണം ലഭിക്കും. സാധാരണയായി പൊതുസേവകർക്കുള്ള സംരക്ഷണ നിയമങ്ങളിൽ "നല്ല വിശ്വാസത്തിൽ ചെയ്ത പ്രവൃത്തി' എന്ന് നിബന്ധനയുണ്ട്. അതും ഒഴിവാക്കിയിരിക്കുന്നു എന്നാണ് നിയമവിദഗ്ധർ ചൂണ്ടിക്കാട്ടുന്നത്.

ആറ് സംസ്ഥാനങ്ങളിലെ ആരോപണങ്ങൾ-ഒരു പഠനം

പശ്ചിമ ബംഗാൾ, മഹാരാഷ‌്ട്ര, ഡൽഹി, മധ്യപ്രദേശ്, പഞ്ചാബ്, ഒഡീഷ എന്നീ സംസ്ഥാനങ്ങളിൽ എസ്ഐആർ നടപടികളുടെ മറവിൽ ക്രമക്കേട് നടന്നതായി പ്രതിപക്ഷകക്ഷികൾ ആരോപിക്കുന്നു. ഇവയെല്ലാം ആരോപണങ്ങളാണ്, എന്നു പറഞ്ഞ് തടിതപ്പാൻ ശ്രമിച്ചേക്കാം. പക്ഷെ ഇതിനെല്ലാം മറുപടി പറയേണ്ടത് തെരഞ്ഞെടുപ്പ് കമ്മിഷനാണ്. പ്രാദേശിക തലത്തിൽ ബിഎൽഒമാർ വീടുകളിൽ നേരിട്ടെത്തി നടത്തിയിരുന്ന സർവേകൾക്ക് പകരം ഡൽഹിയിലിരുന്ന് അൽഗോരിതം ഉപയോഗിച്ച് വോട്ടുകൾ നീക്കം ചെയ്യുന്നു എന്നതാണ് പ്രധാനമായി ഉന്നയിക്കുന്നത്.

വോട്ടർപട്ടികയിലെ ഈ ക്രമക്കേടിനെ കുറിച്ച് രാഹുൽ ഗാന്ധി 2025 മുതൽ തന്നെ മുന്നറിയിപ്പ് നൽകിയിരുന്നു. രാഹുൽ ഗാന്ധി ഉന്നയിച്ചത് വെറും രാഷ്ട്രീയ ആരോപണമല്ല, മറിച്ച് സ്ഥാപനത്തിനുള്ളിലെ യാഥാർഥ്യമായിരുന്നു എന്ന് ഇതോടെ തെളിഞ്ഞു. നിയമന പ്രക്രിയയിൽ സുപ്രീംകോടതി ചീഫ് ജസ്റ്റീസ് അടങ്ങുന്ന നിഷ്പക്ഷ സമിതിയെ തിരിച്ചുകൊണ്ടുവരികയും, വോട്ടർ പട്ടികയിലെ ആശങ്കകൾ പരിഹരിക്കുകയും ചെയ്തെങ്കിൽ മാത്രമേ ജനവിശ്വാസം വീണ്ടെടുക്കാനാകൂ.

നമ്മുടെ ചോദ്യം

ഒരു ഗ്രാമത്തിലെ സാധാരണ വോട്ടറെ സംബന്ധിച്ച് കാര്യം വളരെ ലളിതമാണ്: തന്‍റെ പേര് വോട്ടർ പട്ടികയിൽ ഉണ്ടാകണം. അത് അന്യായമായി വെട്ടിമാറ്റപ്പെട്ടാൽ ചോദ്യംചെയ്യാൻ തനിക്ക് അവകാശമുണ്ടാകണം. വോട്ടവകാശം അപഹരിക്കുന്നവർക്ക് ആജീവനാന്ത കവചം ഉണ്ടാകരുത്.

ജനാധിപത്യത്തിൽ അവസാന വാക്ക് വോട്ടറുടേത് തന്നെയായിരിക്കണം. ഭരണഘടന ഉയർത്തിപ്പിടിക്കുന്ന മൂല്യങ്ങളും പൗരന്‍റെ അവകാശങ്ങളും സംരക്ഷിക്കാൻ ഇന്ത്യൻ നാഷണൽ കോൺഗ്രസ് നടത്തുന്ന പോരാട്ടങ്ങൾ ചരിത്രത്തിൽ പൊൻഅക്ഷരങ്ങളാൽ അടയാളപ്പെടുത്തപ്പെടും. ആ പോരാട്ടവീഥികളിൽ മുൻനിരയിൽ നിലയുറപ്പിക്കാൻ കഴിഞ്ഞു എന്നത് ഒരു പൊതുപ്രവർത്തകൻ എന്ന നിലയിൽ എന്നെ സംബന്ധിച്ച് ഏറെ അഭിമാനകരമാണ്.

ഭരണഘടനയും പൗരന്‍റെ വോട്ടവകാശവും സംരക്ഷിക്കപ്പെടുന്നതുവരെ ഈ പോരാട്ടവും സമരങ്ങളും തുടർന്നു കൊണ്ടേയിരിക്കും.

Leader Page

മദ്രാസ് ഹൈക്കോടതിയുടെ എഫ്സിആർഎ വിധി ഉയർത്തുന്ന ഭരണഘടനാപരമായ ചോദ്യങ്ങൾ

കേസിന്‍റെ വസ്തുതകൾ കൃത്യമായി പരിശോധിച്ച് ഒരു സ്ഥാപനത്തിന്‍റെ അപേക്ഷ നിരസിക്കുന്നതും, ഒരു മതവിഭാഗത്തെക്കുറിച്ചോ പൊതുവായ വിശ്വാസങ്ങളെക്കുറിച്ചോ വിശാലമായ നിഗമനങ്ങൾ അവതരിപ്പിക്കുന്നതും തികച്ചും വ്യത്യസ്തമായ രണ്ട് കാര്യങ്ങളാണ്.

ഇന്ത്യൻ ഭരണഘടന വിഭാവന ചെയ്യുന്ന മതനിരപേക്ഷതയും സമത്വതത്ത്വവും ഈ വേർതിരിവ് കർശനമായി ആവശ്യപ്പെടുന്നുണ്ട്.ഇക്കഴിഞ്ഞ ആറാംതീയതി മദ്രാസ് ഹൈക്കോടതിയുടെ മധുര ബെഞ്ചിലെ ജസ്റ്റീസ് ജി.ആർ. സ്വാമിനാഥൻ, ജസ്റ്റീസ് എം.ഡി. സുമതി എന്നിവരടങ്ങിയ ഡിവിഷൻ ബെഞ്ച് കൻസിയോൺ പബ്ലിക് ചാരിറ്റബിൾ ട്രസ്റ്റുമായി ബന്ധപ്പെട്ട കേസിൽ പുറപ്പെടുവിച്ച വിധി രാജ്യത്ത് ഗൗരവമേറിയ നിയമപരവും സാമൂഹികവുമായ ചർച്ചകൾക്ക് വഴിതുറന്നിരിക്കുകയാണ്. വിദേശ സംഭാവന (നിയന്ത്രണ) നിയമം, 2010 (എഫ്സിആർഎ) പ്രകാരമുള്ള രജിസ്ട്രേഷൻ നിഷേധിച്ചതിനെതിരേ കൻസിയോൺ പബ്ലിക് ചാരിറ്റബിൾ ട്രസ്റ്റ് സമർപ്പിച്ച അപ്പീൽ കോടതി തള്ളിക്കളയുകയാണുണ്ടായത്.

കേസിലെ വസ്തുതകളും നിയമപരമായ വശങ്ങളും

2021ൽ സ്ഥാപിതമായ ഈ ട്രസ്റ്റ് തമിഴ്നാട്ടിലെ കൊടൈക്കനാലിൽ ഒരു സെൻ മെഡിറ്റേഷൻ സെന്‍ററും മോണ്ടിസോറി സ്കൂളും നടത്തിവരുന്നുണ്ട്. ആദായനികുതി നിയമത്തിലെ 12എബി, 80ജി വകുപ്പുകൾ പ്രകാരമുള്ള രജിസ്ട്രേഷൻ നേടിയിരുന്ന സ്ഥാപനം, വിദേശ സംഭാവനകൾ സ്വീകരിക്കുന്നതിനുള്ള എഫ്സിആർഎ രജിസ്ട്രേഷനും അപേക്ഷിച്ചിരുന്നു. എന്നാൽ, അപേക്ഷയിൽ സ്ഥാപനത്തിന്‍റെ മതപരമായ യഥാർഥ സ്വഭാവം വെളിപ്പെടുത്തിയില്ലെന്ന കാരണത്താൽ കേന്ദ്ര ആഭ്യന്തരമന്ത്രാലയം അപേക്ഷ നിരസിക്കുകയാണുണ്ടായത്. സെൻ ധ്യാനകേന്ദ്രത്തിന്‍റെ പ്രവർത്തനങ്ങളെ മതപരമായി വർഗീകരിക്കാനാവില്ലെന്നായിരുന്നു ട്രസ്റ്റിന്‍റെ വാദം.

സ്ഥാപനത്തിന്‍റെ പ്രവർത്തനങ്ങളും അപേക്ഷയിൽ നൽകിയ വിവരങ്ങളും പരിശോധിച്ച കോടതി, സെൻ ബുദ്ധമത പാരമ്പര്യവുമായി ബന്ധപ്പെട്ട പ്രവർത്തനങ്ങൾ നടത്തുന്ന സ്ഥാപനം അതിന്‍റെ മതപരമായ സ്വഭാവം കൃത്യമായി വെളിപ്പെടുത്തേണ്ടതായിരുന്നുവെന്നു വിലയിരുത്തി. എഫ്സിആർഎ പ്രകാരം വിദേശ സംഭാവന സ്വീകരിക്കുന്നത് മൗലികാവകാശമല്ലെന്നും, രജിസ്ട്രേഷൻ അനുവദിക്കുന്നതിൽ അധികാരികൾക്ക് വിശാലമായ വിവേചനാധികാരമുണ്ടെന്നും കോടതി നിരീക്ഷിക്കുകയുണ്ടായി.
ഇവിടെവരെ ഈ വിധി ഒരു സ്ഥാപനത്തിന്‍റെ പ്രവർത്തനങ്ങളുടെ വർഗീകരണത്തെയും വിദേശ സംഭാവനകൾ സ്വീകരിക്കുന്നതിനുള്ള നിയമപരമായ വ്യവസ്ഥകളെയും സംബന്ധിച്ചുള്ളതാണ്.

തെറ്റായ വിവരങ്ങൾ നൽകിയാലോ പ്രവർത്തനങ്ങൾ വെളിപ്പെടുത്തിയതിൽനിന്ന് വ്യത്യസ്തമായാലോ നടപടിയെടുക്കാൻ സർക്കാരിന് അധികാരമുണ്ട്. എന്നാൽ, ഈ പ്രത്യേക കേസിന്‍റെ നിയമപരമായ പരിധികൾക്കപ്പുറം, ക്രൈസ്തവ മതത്തെയും മറ്റ് അബ്രഹാമിക മതങ്ങളെയും കുറിച്ച് കോടതി നടത്തിയ ചില പൊതുവായ പരാമർശങ്ങളാണ് വലിയതോതിൽ ഭരണഘടനാപരമായ ചോദ്യങ്ങൾ ഉയർത്തുന്നത്.

മതങ്ങളുടെ സ്വഭാവത്തെക്കുറിച്ചുള്ള നിരീക്ഷണങ്ങളും ചരിത്രപരമായ വസ്തുതകളും

വിധിയിലെ ഏറ്റവും ശ്രദ്ധേയവും വിവാദപരമായ മറ്റൊരു പരാമർശം താഴെ പറയുന്നതാണ്: “Unlike Hinduism which is inclusive, the Abrahamic religions are inherently exclusive.” അതായത്, ഹിന്ദുമതം ഉൾക്കൊള്ളൽ സ്വഭാവമുള്ളതാണെന്നും അബ്രഹാമിക മതങ്ങൾ സ്വഭാവത്താൽതന്നെ മറ്റുള്ളവരെ ഒഴിവാക്കുന്നവയാണെന്നും കോടതി നിരീക്ഷിക്കുന്നു. ജൂത, ക്രൈസ്തവ, ഇസ്ലാം മതങ്ങൾ തങ്ങളുടേതാണ് ഏകസത്യമെന്ന് വിശ്വസിക്കുന്നുവെന്ന വാദവും ഇതിൽ ഉൾപ്പെടുന്നു. എന്നാൽ, ലോകത്തിലെ പ്രധാന മതപാരമ്പര്യങ്ങൾക്കുള്ളിൽതന്നെ വൈവിധ്യമാർന്ന ദാർശനിക പ്രവാഹങ്ങളും ചിന്താധാരകളും നിലനിൽക്കുന്നുണ്ട്. ഈ സങ്കീർണതകളെ അവഗണിച്ച് ഒരു മതവിഭാഗത്തെ പൊതുവായി ഉൾക്കൊള്ളുന്നതായും മറ്റൊന്നിനെ സ്വഭാവത്താൽ ഒഴിവാക്കുന്നതായും ചിത്രീകരിക്കുന്നത് വലിയ വിമർശനങ്ങൾക്ക് വഴിവയ്ക്കുന്നു. ഒരു പാരമ്പര്യത്തിന്‍റെ മേന്മ ഉയർത്തിക്കാട്ടാൻ മറ്റൊരു മതവിഭാഗത്തെ താഴ്ത്തിക്കാട്ടേണ്ടതില്ല.

ക്രൈസ്തവ സഭയുടെ ഔദ്യോഗിക നിലപാടുകൾ പരിശോധിച്ചാൽ, ക്രിസ്തുവിന്‍റെ അനന്യതയെ പഠിപ്പിക്കുമ്പോഴും സകല മതങ്ങളിലും അടങ്ങിയിരിക്കുന്ന സത്യത്തിന്‍റെ പ്രകാശത്തെ (Ray of Truth) കത്തോലിക്കാ സഭ ആദരിക്കുന്നുണ്ടെന്ന് രണ്ടാം വത്തിക്കാൻ കൗൺസിലിന്‍റെ നൊസ്ത്രാ എത്താത്തെ (Nostra aetate) എന്ന പ്രഖ്യാപനം, ഖണ്ഡിക രണ്ട് വ്യക്തമാക്കുന്നുണ്ട്. ക്രിസ്തീയ വെളിപാടിന്‍റെ പ്രത്യേകതകൾ അവതരിപ്പിക്കുമ്പോൾതന്നെ, മറ്റു മതങ്ങളോട് അസഹിഷ്ണുതയോടെ പെരുമാറാനോ സ്വന്തം മതം പ്രചരിപ്പിക്കുന്നതിൽ തീവ്രവാദപരമായ സമീപനം സ്വീകരിക്കാനോ ക്രിസ്തുമതം എവിടെയും പഠിപ്പിക്കുന്നില്ല. യേശുക്രിസ്തു തന്‍റെ ജീവിതത്തിലും പ്രബോധനങ്ങളിലും ഒരിക്കലും അത്തരം തീവ്രവാദമോ സങ്കുചിതത്വമോ പഠിപ്പിച്ചിട്ടില്ല. ഇന്ത്യയുടെ ബഹുസ്വരമായ സാമൂഹിക-സാംസ്കാരിക പശ്ചാത്തലത്തിൽ, ഇതര മതങ്ങളോടുള്ള വിദ്വേഷമോ അവയെ പൂർണമായി തള്ളിക്കളയുന്ന മനോഭാവമോ പുലർത്തുന്ന മതമായി ക്രൈസ്തവ വിശ്വാസം ഒരിക്കലും നിലകൊണ്ടിട്ടില്ല.

മുൻവിധികളുടെയും തെറ്റായ സാമാന്യവത്കരണങ്ങളുടെയും അടിസ്ഥാനത്തിലല്ല; മറിച്ച്, വസ്തുതകളുടെയും ഭരണഘടനാ മൂല്യങ്ങളുടെയും അടിസ്ഥാനത്തിലാണ് ഇത്തരം നിർണായക വിധികൾ ഉണ്ടാകേണ്ടത്.

ഭരണഘടന നൽകുന്ന മതസ്വാതന്ത്ര്യവും സമത്വവും നിയമവാഴ്ചയും

ക്രൈസ്തവ വിശ്വാസപ്രകാരം, വിശേഷിച്ചും കത്തോലിക്കാ സഭയുടെ കാഴ്ചപ്പാടിൽ സുവിശേഷവത്കരണത്തിന്‍റെ ലക്ഷ്യം സുവിശേഷം അറിയാനും അത് മനസിലാക്കാനും മറ്റുള്ളവർക്ക് അവസരമൊരുക്കുക മാത്രമാണ്. ആകർഷകമായി തോന്നുകയാണെങ്കിൽ ആർക്കും ക്രിസ്തുമതം സ്വീകരിക്കാം; അത് ഒരിക്കലും ഭരണഘടനാവിരുദ്ധവുമാകുന്നില്ല.

താൻ ആഗ്രഹിക്കുന്ന മതത്തിൽ വിശ്വസിക്കാനും അത് പിന്തുടരാനുമുള്ള അവകാശം ഇന്ത്യൻ ഭരണഘടന ഓരോ പൗരനും ഉറപ്പുനൽകുന്ന മൗലികാവകാശമാണ്. ഇന്ത്യൻ ഭരണഘടനയുടെ അനുച്ഛേദം 25(1) അനുസരിച്ച്, പൊതുക്രമത്തിനും സദാചാരത്തിനും ആരോഗ്യത്തിനും വിധേയമായി, എല്ലാ വ്യക്തികൾക്കും മനഃസാക്ഷിയുടെ സ്വാതന്ത്ര്യത്തിനും തങ്ങളുടെ മതം സ്വതന്ത്രമായി ഏറ്റുപറയാനും ആചരിക്കാനും പ്രചരിപ്പിക്കാനുമുള്ള അവകാശമുണ്ട്.

ഭരണഘടന ഉറപ്പുനൽകുന്ന ഈ മൗലികാവകാശത്തിന്മേൽ ഒരു സാധാരണ നിയമത്തിന് എങ്ങനെ നിയന്ത്രണങ്ങൾ ഏർപ്പെടുത്താനാകുമെന്നും, അതിന്‍റെ പശ്ചാത്തലത്തിൽ മതപ്രചാരണത്തെ ഒരു കുറ്റകൃത്യംപോലെ ചിത്രീകരിക്കുന്ന തരത്തിലുള്ള പരാമർശങ്ങൾ ഒരു ന്യായാധിപന്‍റെ വിധിന്യായത്തിൽ എങ്ങനെ ഇടംപിടിക്കുമെന്നും മനസിലാക്കാൻ പ്രയാസമാണ്. കത്തോലിക്കാ സഭ ഒരിക്കലും ആരെയും നിർബന്ധിക്കുകയോ പ്രലോഭനങ്ങളോ സമ്മാനങ്ങളോ നൽകി സഭയിലേക്ക് ആകർഷിക്കുകയോ ചെയ്യാറില്ല. അത്തരം നിർബന്ധിത മതപരിവർത്തനം സഭയുടെ നയത്തിന് തികച്ചും എതിരുമാണ്.

ഇന്ത്യൻ ഭരണഘടനയുടെ അനുച്ഛേദം 14 നിയമത്തിനു മുന്നിലുള്ള സമത്വവും തുല്യസംരക്ഷണവും ഉറപ്പുനൽകുന്നു. അനുച്ഛേദം 25, 26, 30 എന്നിവ മതസ്വാതന്ത്ര്യവും ന്യൂനപക്ഷ അവകാശങ്ങളും സംരക്ഷിക്കുന്നുണ്ട്. ഈ അവകാശങ്ങൾ പൊതുക്രമത്തിനും ധാർമികതയ്ക്കും വിധേയമാണെങ്കിലും, മതപരമായ പരിഗണനകളുടെ പേരിൽ മാത്രം പൗരന്മാർക്കോ സ്ഥാപനങ്ങൾക്കോ തുല്യപരിഗണന നിഷേധിക്കപ്പെടാൻ പാടില്ല.

വിദേശ സംഭാവനകൾ സ്വീകരിക്കുന്നതിന് നിക്ഷിപ്തമായ അവകാശമോ (vested right), കേവലവും നിരുപാധികവുമായ അവകാശമോ (absolute right) ഇല്ലെന്ന് ബഹുമാനപ്പെട്ട സുപ്രീംകോടതി Noel Harper v. Union of India (2023) 3 SCC 544 എന്ന കേസിൽ വ്യക്തമാക്കിയിട്ടുണ്ട്. അത്തരം സംഭാവനകൾ സ്വീകരിക്കുന്നതിന് നിയമപരമായ നിയന്ത്രണങ്ങൾ ഏർപ്പെടുത്താൻ പാർലമെന്‍റിന് അധികാരവുമുണ്ട്. എന്നാൽ നിയന്ത്രണങ്ങൾ ഭരണഘടന നൽകുന്ന അവകാശങ്ങളെ നിഷേധിക്കുന്നത് ആകരുത്. അതുപോലെതന്നെ നിയന്ത്രണങ്ങൾ ഏർപ്പെടുത്തുന്നതോടൊപ്പം ഒരു പ്രത്യേക മതവിഭാഗത്തെ മുഴുവൻ പൊതുവായി സംശയത്തിന്‍റെ നിഴലിൽ നിർത്താനും ഭരണഘടന അനുമതി നൽകുന്നില്ല.

നിയമലംഘനങ്ങൾ ഉണ്ടാകുമ്പോൾ അവ കൃത്യമായ തെളിവുകളുടെ അടിസ്ഥാനത്തിൽ പരിശോധിക്കപ്പെടണം. എഫ്സിആർഎ എന്നത് സാമ്പത്തിക സുതാര്യത ഉറപ്പാക്കാനുള്ള ഒരു നിയന്ത്രണ നിയമമാണ്, അല്ലാതെ മതപരമായ വിവേചനത്തിനുള്ള ഉപകരണമല്ല. മതനിരപേക്ഷ ഇന്ത്യയിൽ നിയമം എല്ലാവർക്കും ഒരുപോലെ ബാധകമായിരിക്കണം. മുൻവിധികളല്ല, മറിച്ച്, തെളിവുകളും ഭരണഘടനാപരമായ തുല്യതയുമാണ് നീതിന്യായ വ്യവസ്ഥയ്ക്ക് അടിസ്ഥാനമാകേണ്ടത്.

Leader Page

ഗാന്ധിയൻ വഴിയിലെ സമാധാന നൊബേല്‍

സമാധാനദൂതനായി മഹാത്മാഗാന്ധിയെ രൂപപ്പെടുത്തുന്നത് ദക്ഷിണാഫ്രിക്കന്‍ നഗരമായ ഡര്‍ബനാണ്. മറ്റൊരു കാലത്താണെങ്കിലും അതേ നഗരത്തില്‍ ജനിച്ചുവളര്‍ന്ന നവനീതം (നവി) പിള്ളയെന്ന ദക്ഷിണാഫ്രിക്കന്‍ നിയമജ്ഞ ഇത്തവണത്തെ സമാധാനത്തിനുള്ള നൊബേല്‍ പുരസ്‌കാരം സ്വന്തമാക്കിയിരിക്കുന്നു. ഇന്ത്യയില്‍നിന്ന് കുടിയേറിയ ഒരു കുടുംബത്തിലെ ഇളമുറക്കാരിയെന്ന നിലയില്‍ ഗാന്ധിയന്‍ സ്വാധീനം അവരില്‍ പ്രതിഫലിച്ചിട്ടുണ്ടാകാം.

1893ല്‍ യുവ അഭിഭാഷകനായി മോഹന്‍ദാസ് കരംചന്ദ് ഗാന്ധി ഡര്‍ബനില്‍ എത്തുമ്പോള്‍ വര്‍ണവിവേചനം അതിന്‍റെ എല്ലാ ക്രൗര്യത്തോടെയും ദക്ഷിണാഫ്രിക്കയെ ചൂഴ്ന്നുനില്‍ക്കുകയായിരുന്നു. പീറ്റര്‍മാരിസ്ബര്‍ഗ് റെയില്‍വേ സ്റ്റേഷനില്‍ ഗാന്ധിയും അതിനിരയായി. വെള്ളക്കാരനല്ലെന്നതു മാത്രമായിരുന്നു ഒന്നാംക്ലാസ് കംപാര്‍ട്ട്‌മെന്‍റിൽനിന്ന് അദ്ദേഹത്തെ പുറത്താക്കാനുണ്ടായ കാരണം. അന്നത്തെ തണുപ്പന്‍ രാത്രിയില്‍ സ്റ്റേഷനിലെ കാത്തിരിപ്പുമുറിയില്‍ തുടങ്ങിയ സമാധാനപരമായൊരു സത്യഗ്രഹമാണ് ഇന്ന് ലോകം അംഗീകരിക്കുന്ന ഗാന്ധിയന്‍ സമരമുറ.

ഡര്‍ബനിലെ കണ്ണില്ലാത്ത വര്‍ണവിവേചനത്തിന്‍റെ ഇരയാണു നവി പിള്ളയും. ശിഷ്‌ടജീവിതവും ഇതിനെതിരേയുള്ള വലിയൊരു സത്യഗ്രഹമായി മാറ്റുന്പോൾ ഗാന്ധിയൻ ആദർശം അവരെ പിന്തുടർന്നിരുന്നു. വര്‍ണവിവേചനം, വംശഹത്യ, ലൈംഗികചൂഷണം തുടങ്ങിയ കൊടിയ കുറ്റങ്ങള്‍ക്കെതിരേ നിയമംകൊണ്ടാണ് നവി പിള്ള പോരാടിയത്.

വര്‍ണവിവേചനത്തിന്‍റെ ചെളിക്കുണ്ടില്‍നിന്നുള്ള ദക്ഷിണാഫ്രിക്കയുടെ പരിവര്‍ത്തനം അതിൽ നിർണായകമായി എന്നു മാത്രം. രാജ്യത്തിന്‍റെ പുതിയ പ്രസിഡന്‍റായി അധികാരമേറ്റ നെല്‍സണ്‍ മണ്ടേലയാണ് നവി പിള്ളയെ ഹൈക്കോടതി ജഡ്ജിയായി നിയമിച്ചത്. ഇതിനുശേഷം തന്നോട് വിവേചനം കാണിക്കുന്ന ഒരു നിയമവ്യവസ്ഥയെ നിയമത്തിന്‍റെ ചട്ടക്കൂട്ടില്‍ നിന്നുകൊണ്ട് അവര്‍ നേരിട്ടു.

തൊട്ടുപിന്നാലെ രാജ്യാന്തര നീതിന്യായ കോടതികളിലേക്കു നവി പിള്ളയുടെ സേവനം എത്തി. 1999 മുതല്‍ 2003 വരെ റുവാണ്ടയ്ക്കു വേണ്ടിയുള്ള യുഎന്‍ രാജ്യാന്തര ട്രൈബ്യൂണലിന്‍റെ പ്രസിഡന്‍റായി നവി പിള്ള സേവനമനുഷ്ഠിച്ചു. 2003 മുതല്‍ 2008 വരെ രാജ്യാന്തര ക്രിമിനല്‍ കോടതിയിലെ അപ്പീല്‍ ചേംബര്‍ ജഡ്ജിയായി. 2008 മുതല്‍ 2014 വരെ യുഎന്‍ മനുഷ്യാവകാശ ഹൈക്കമ്മിഷണറും.

രാജ്യാന്തര നിയമങ്ങളുടെ അടിസ്ഥാനത്തില്‍ സംഘര്‍ഷരഹിതമായൊരു ലോകം രൂപപ്പെടുത്തുക എന്ന ലക്ഷ്യത്തോടെയായിരുന്നു അവരുടെ ഓരോ തീരുമാനവും, നിയമത്തിന്‍റെ കാർക്കശ്യത്തിൽനിന്ന് വ്യതിചലിക്കരുതെന്ന നിലപാടും. നൊബേല്‍ പുരസ്‌കാരം ലഭിച്ചശേഷമുള്ള പ്രതികരണത്തില്‍ വരെ അതു വായിച്ചെടുക്കാം. പുരസ്‌കാരം തനിക്കാണെന്നുള്ള വാര്‍ത്ത കേട്ടപ്പോള്‍ അതൊരു തമാശയാണെന്നു കരുതിയെന്നാണ് നവി പിള്ള പ്രതികരിച്ചത്. ഒരു അഭിഭാഷകയും ജഡ്ജിയുമായതിനാല്‍ വാസ്തവമാണെന്ന് ഉറപ്പുവരുത്താന്‍ ആഗ്രഹമുണ്ടെന്നും അവര്‍ പറയുകയായിരുന്നു.

Leader Page

ഇന്ന് ലോക മാനസികാരോഗ്യദിനം: അവഗണിക്കേണ്ടതല്ല, അറിഞ്ഞിരിക്കേണ്ടതാണ്

ലോക ഫെഡറേഷൻ ഓഫ് മെന്‍റൽ ഹെൽത്ത് 2026ലെ, ലോക മാനസികാരോഗ്യദിനത്തിന്‍റെ കേന്ദ്രവിഷയം ‘അനുഭവങ്ങളുടെ ശബ്ദം കേൾക്കാം: യഥാർഥ ശബ്ദങ്ങൾ, യഥാർഥ മാറ്റങ്ങൾ’ (‘Lived Experiences Heard: Real Voices, Real Change’) എന്നതാണ്. ഈ ആശയം മാനസികാരോഗ്യത്തെക്കുറിച്ചുള്ള നമ്മുടെ സമീപനത്തിൽ വളരെ പ്രധാനപ്പെട്ട ഒരു മാറ്റത്തെ ഓർമിപ്പിക്കുന്നു. മാനസികാരോഗ്യ പ്രശ്നങ്ങളെക്കുറിച്ച് സംസാരിക്കുന്പോൾ, അവ അനുഭവിച്ച മനുഷ്യരുടെ ശബ്‌ദത്തിനും അനുഭവജ്ഞാനത്തിനും കേന്ദ്രസ്ഥാനം നൽകണമെന്നാണത്.

വിഷാദരോഗം, ബൈപോളാർ ഡിസോർഡർ, സ്കിസോഫ്രീനിയ, ഒബ്സസീവ് കംപൽസീവ് ഡിസോർഡർ തുടങ്ങിയ മാനസികാരോഗ്യ പ്രശ്നങ്ങളിലൂടെ കടന്നുപോയ വ്യക്തികൾക്ക് തന്‍റെ അനുഭവത്തെക്കുറിച്ച് ഒരു പ്രത്യേക അറിവുണ്ട്. എനിക്ക് എന്താണ് സംഭവിക്കുന്നത്, എന്നെ മറ്റുളളവർ മനസിലാക്കുമോ, ഞാൻ പഴയ ജീവിതത്തിലേക്കു തിരിച്ചുവരുമോ, എന്‍റെ രോഗത്തെ കുറിച്ച് ആളുകൾ എന്ത് ചിന്തിക്കും എന്നിങ്ങനെ നിരവധി ചോദ്യങ്ങൾ മാനസികാരോഗ്യപ്രശ്നങ്ങളിലൂടെ കടന്നുപോകുന്ന വ്യക്തിയുടെ മനസിലുണ്ടാകാം. അതിനാൽ അവരുടെ അനുഭവങ്ങൾ കേൾക്കുക എന്നത് ഒരു കരുണാപൂർവമായ സമീപനം ആണ്.
വിഷാദരോഗം

വെല്ലുവിളിയാകുമ്പോൾ

ആഗോളതലത്തിൽ 280 ദശലക്ഷത്തിലധികം ആളുകളെ ബാധിക്കുന്ന വിഷാദരോഗം, കേവലം ഒരു താത്കാലിക വിഷമമല്ല; മറിച്ച് വ്യക്തിയുടെ ദൈനംദിന ജീവിതത്തെ ബാധിക്കുന്ന മസ്തിഷ്ക സംബന്ധമായ വൈകല്യമാണ്. നാഡീവ്യൂഹത്തിലെ സെറോടോണിൻ, ഡോപമിൻ, നോറെപിനെഫ്രിൻ എന്നീ ന്യൂറോട്രാൻസ്മിറ്ററുകളുടെ സന്തുലിതാവസ്ഥയിലുണ്ടാകുന്ന വ്യതിയാനങ്ങളാണ് വിഷാദരോഗത്തിന് കാരണം.

ഉത്കണ്ഠാരോഗങ്ങൾ

സാധാരണ ഭയത്തിൽനിന്നു വ്യത്യസ്തമായി, അനാവശ്യവും അമിതവുമായ ഭീതി വ്യക്തിയിൽ നിലനിൽക്കുന്ന അവസ്ഥയാണ് ഉത്കണ്ഠാരോഗങ്ങൾ. മസ്തിഷ്കത്തിലെ ഭയത്തിന്‍റെ കേന്ദ്രമായ അമിഗ്ഡല ആലോചനകളെ നിയന്ത്രിക്കുന്ന പ്രീഫ്രണ്ടൽ കോർട്ടക്സ് എന്നിവ തമ്മിലുള്ള ബന്ധത്തിലുണ്ടാകുന്ന തകരാറുകളാണ് ഉത്കണ്ഠയ്ക്ക് കാരണമെന്ന് ആധുനിക ന്യൂറോ ഇമേജിംഗ് പഠനങ്ങൾ തെളിയിക്കുന്നു

സൈക്കോസിസും ലഹരി ഉപയോഗവും

വാസ്തവികതയുമായുള്ള ബന്ധം നഷ്‌ടപ്പെടുന്ന ഗുരുതരമായ മാനസികാവസ്ഥയാണ് സൈക്കോസിസ്. പ്രകടനപരമായ വിഭ്രാന്തികൾ, ഇല്ലാത്ത ശബ്‌ദങ്ങൾ കേൾക്കുക, ഇല്ലാത്ത കാഴ്ചകൾ കാണുക, മിഥ്യാധാരണകൾ, അനാവശ്യമായ സംശയങ്ങൾ, ചിന്തകളിലെ ക്രമരഹിതത്വം എന്നിവ പ്രകടമാകുന്നു.

ലഹരിവസ്തുക്കൾ മസ്തിഷകത്തിലെ സന്തോഷവും സംതൃപ്തിയും നൽകുന്ന റിവാർഡ് സിസ്റ്റത്തിൽ വൻതോതിൽ ഡോപമിൻ എത്താൻ കാരണമാകുന്നു. തുടർച്ചയായ ഉപയോഗംമൂലം തലച്ചോറിലെ സ്വാഭാവിക ഡോപമിൻ ഉത്പാദനം കുറയുകയും വ്യക്തി ലഹരിവസ്തുവിനെ പൂർണമായി ആശ്രയിക്കുന്ന അവസ്ഥയിലാവുകയും ചെയ്യുന്നു. കാലക്രമേണ, ആദ്യം അനുഭവപ്പെട്ട സന്തോഷം ലഭിക്കാൻ കൂടുതൽ അളവിൽ ലഹരിവസ്തു ഉപയോഗിക്കേണ്ടിവരുന്നു.

ബിഹേവിയറൽ അഡിക്‌ഷനുകൾ

യാതൊരുവിധ ലഹരിവസ്തുക്കളും ശരീരത്തിനുള്ളിൽ ചെന്നില്ലെങ്കിലും, ചില പ്രത്യേക പ്രവൃത്തികളിൽ ഏർപ്പെടുന്പോൾ തലച്ചോറിലുണ്ടാകുന്ന മാറ്റങ്ങളാണ് ബിഹേവിയറൽ അഡിക്‌ഷനുകൾക്ക് കാരണം. ഗാംബ്ലിംഗ് ഡിസോർഡറിൽ, പണം നഷ്‌ടപ്പെടുന്പോഴും അനിയന്ത്രിതമായി ചൂതാട്ടത്തിലും ബെറ്റിംഗ് ആപ്പുകളിലും ഏർപ്പെടുക. ഓണ്‍ലൈൻ,വീഡിയോ ഗെയിമുകളിൽ മണിക്കൂറുകളോളം മുഴുകിയിരിക്കുകയും, സാമൂഹിക ജീവിതത്തിൽ നിന്ന് പൂർണമായി ഉൾവലിയുകയും ചെയ്യുക. ലഹരി അഡിക്‌ഷന് സമാനമായ സ്വയം നിയന്ത്രണമില്ലായ്മയും വിഷാദവും ഇത്തരക്കാരിലും കാണപ്പെടുന്നു.

ഡിജിറ്റൽ ഡിപെൻഡൻസ്

സോഷ്യൽ മീഡിയയിലെ ‘ലൈക്, ഷെയർ’ അനുഭവം തലച്ചോറിൽ ഡോപമിൻ ഉത്പാദിപ്പിക്കുകയും ഘടനാപരമായ അഡിക്‌ഷനിലേക്ക് വ്യക്തിയെ എത്തിക്കുകയും ചെയ്യുന്നു. ഇത് ശ്രദ്ധ കേന്ദ്രീകരിക്കാനുള്ള കഴിവിനെ ബാധിക്കുന്നു.

ചികിത്സാരീതികൾ

ഇന്ന് മാനസികാരോഗ്യ ചികിത്സ കേവലം ലക്‌ഷണങ്ങൾ കുറയ്ക്കുന്നതിൽ മാത്രമല്ല, വ്യക്തിയുടെ പൂർണ പുനരധിവാസത്തിലാണ് ശ്രദ്ധ കേന്ദ്രീകരിക്കുന്നത്. വിഷാദത്തിനും ഉത്കണ്ഠയ്ക്കും നൽകുന്ന ഏറ്റവും സുരക്ഷിതമായ ഔഷധങ്ങൾ ഇന്ന് നിലവിലുണ്ട്. സൈക്കോസിസ് ചികിത്സയ്ക്കായി കുറഞ്ഞ പാർശ്വഫലങ്ങളോടെ ഉപയോഗിക്കുന്ന പുതിയ തലമുറ മരുന്നുകൾ ലഭ്യമാണ്.

വ്യക്തിയുടെ നിഷേധാത്മകമായ ചിന്താരീതികളെ തിരിച്ചറിഞ്ഞു തിരുത്തുന്ന രീതിയാണ് കൊഗ്നിറ്റീവ് ബിഹേവിയർ തെറാപ്പി. വികാരങ്ങളെ അതേപടി സ്വീകരിച്ച് പോസിറ്റീവായ മാറ്റങ്ങൾക്ക് പ്രേരിപ്പിക്കുന്ന രീതിയാണ് ആക്സപ്റ്റൻസ് ആൻഡ് കമ്മിറ്റ്മെന്‍റ് തെറാപ്പി. ധ്യാനവും ബോധപൂർവമായ ശ്രദ്ധയും വഴി ഉത്കണ്ഠ കുറയ്ക്കുന്ന സാങ്കേതികവിദ്യയാണ് മൈൻഡ്ഫുൾനസ് ബേസ്ഡ് സ്ട്രെസ്‌സ് റിഡക്ഷൻ മെത്തേഡിലൂടെ ഉപയോഗിക്കുന്നത്. ഇതുകൂടാതെ നിരവധി ആധുനിക ചികിത്സാസമ്പ്രദായങ്ങളും മാനസികാരോഗ്യ ചികിത്സയിൽ ഉപയോഗിക്കുന്നുണ്ട്.

( ലേഖകൻ കണ്‍സൾട്ടന്‍റ് സൈക്കോളജിസ്റ്റ്, പ്രഫ. മേരി മാതാ
മേജർ സെമിനാരി, തൃശൂർ)

Leader Page

കാവുകാട്ടുപിതാവ് മനുഷ്യത്വത്തിന്‍റെയും മതമൈത്രിയുടെയും ‎മാടപ്രാവ്

ദൈവദാസൻ മാർ മാത്യു കാവുകാട്ട് പിതാവിന്‍റെ 57-ാം ‎ചരമവാർഷികാചരണം അദ്ദേഹത്തിന്‍റെ അതുല്യവ്യക്തിത്വത്തെയും ‎പുണ്യജീവിതത്തെയും അടുത്തറിയാനും ധ്യാനിക്കാനുമുള്ള ‎അനുഗൃഹീതമായ ഒരു അവസരമാണ്. കത്തോലിക്കാ സഭയിൽ ‎വിശുദ്ധിയുടെ മാനദണ്ഡം ഒരാൾ തന്‍റെ ജീവിതകാലത്ത് ‎അസാധാരണ കാര്യങ്ങൾ ചെയ്തു എന്നതിലല്ല, അതിലുപരി ‎വളരെ സാധാരണമായ കാര്യങ്ങൾ എന്നാൽ അസാധാരണമാംവിധം ‎സ്നേഹത്തോടെയും വിശുദ്ധിയോടെയും ചെയ്തു എന്നതിലാണ്. ‎കാവുകാട്ടു പിതാവിന്‍റെ ജീവിതം ഈ തത്വത്തിന് ഏറ്റവും ‎മികച്ചൊരു ജീവിക്കുന്ന ഉദാഹരണമാണ്. രൂപതാധ്യക്ഷൻ, ‎വിദ്യാഭ്യാസ വിചക്ഷണൻ, സമുദായ നേതാവ് എന്നീ ‎നിലകളിലെല്ലാം ശോഭിക്കുമ്പോഴും തന്‍റെ ലാളിത്യം, വിനയം, ‎മനുഷ്യത്വം, കരുണ, സഹജീവികളോടുള്ള കരുതൽ ‎എന്നിങ്ങനെയുള്ള പുണ്യങ്ങൾ അസാധാരണമാംവിധം ‎പൂർണതയിൽ ജീവിച്ച വ്യക്തിയാണ് അദ്ദേഹം. ‎

►മനുഷ്യത്വം കവിഞ്ഞൊഴുകുന്ന വ്യക്തിത്വം◄

കാവുകാട്ടു പിതാവിനെ ഒരിക്കലെങ്കിലും കണ്ടുമുട്ടുകയോ ‎സംസാരിക്കുകയോ ചെയ്തിട്ടുള്ള ഏവരും ഒരു ദൈവമനുഷ്യനെ ‎കണ്ടുമുട്ടിയതിന്‍റെ നിർവൃതിയോടെയാണ് തിരികെ പോയിട്ടുള്ളത്. ‎കണ്ടുമടങ്ങുമ്പോൾ തങ്ങളുടെ ഉള്ളിലെ ആകുലതകളുടെ ഭാരം ‎കുറഞ്ഞതായും മനസിൽ അപൂർവമായൊരു ശാന്തത ‎നിറഞ്ഞതായും എല്ലാവരും ഒരുപോലെ സാക്ഷ്യപ്പെടുത്തുന്നു. ‎അത്രത്തോളം ആർദ്രമായ മനുഷ്യത്വത്തിന്‍റെ ഉടമയായിരുന്നു ‎അദ്ദേഹം. അതുകൊണ്ടുതന്നെയാണ് പ്രഫ. തോമസ് ‎കണയംപ്ലാവൻ കാവുകാട്ടു പിതാവിനെക്കുറിച്ച് ഇങ്ങനെ ‎കുറിച്ചത്: ‘ഉച്ചി മുതൽ ഉള്ളങ്കാൽ വരെ ഹൃദയമുള്ള ഒരു ‎മനുഷ്യൻ’. അത്രമേൽ വിശാലഹൃദയനും മഹാമനസ്കനുമായിരുന്നു ‎കാവുകാട്ടു പിതാവ്.‎

സഭയ്ക്ക് ഭരണസംവിധാനങ്ങളും സ്ഥാപനങ്ങളും ‎ആവശ്യമാണെങ്കിലും, സഭയുടെ യഥാർഥ അജപാലന ശൈലി ‎വ്യക്തികേന്ദ്രീകൃതമായിരിക്കണം എന്ന് കാവുകാട്ടു പിതാവ് ആഴമായി ‎തിരിച്ചറിഞ്ഞിരുന്നു. പാവപ്പെട്ടവരെ നേരിട്ടു കാണുന്നതും അവർക്കുള്ള ‎സാമ്പത്തിക സഹായം സ്വന്തം കൈകൊണ്ടുതന്നെ നൽകുന്നതും ‎അദ്ദേഹത്തിന് നിർബന്ധമായിരുന്നു. അതിനായി ആഴ്ചയിൽ ഒരു ‎ദിവസം തന്‍റെ സമയം മുഴുവനും മാറ്റിവച്ചിരുന്നു. ‎നിർമിത ബുദ്ധിയുടെയും സാങ്കേതികവിദ്യകളുടെയും ‎സഹായത്തോടെയുള്ള അജപാലന പ്രവർത്തനങ്ങൾ മുൻതൂക്കം നേടുന്ന ‎ഈ കാലഘട്ടത്തിൽ കാവുകാട്ടു പിതാവിന്‍റെ മനുഷ്യത്വത്തിലൂന്നിയുള്ള ‎സുവിശേഷശൈലി എടുത്തുകാണിക്കേണ്ടത് മുൻപത്തേക്കാൾ ഇന്ന് ‎ഏറെ ആവശ്യമായി തീർന്നിരിക്കുന്നു.

മാനവികതയുടെ അതിരുകൾ ‎വ്യാപിപ്പിക്കാൻ നിർമിതബുദ്ധി സഹായിക്കുന്നുണ്ടെങ്കിലും ‎മറുഭാഗത്ത് അത് മനുഷ്യബന്ധങ്ങളുടെ ആഴം കുറയ്ക്കുകയും ‎യന്ത്രവത്കൃതമായ ഒരു ലോകത്തിലേക്ക് നമ്മെ തള്ളിവിട്ട് ‎മനുഷ്യത്വമില്ലായ്മ സൃഷ്ടിക്കുകയും ചെയ്യുന്നുണ്ട്. അജപാലന ശൈലി ‎കേവലം സാങ്കേതികത്വത്തിലേക്ക് ചുരുങ്ങാതെ, വ്യക്തിപരമായ ‎ആർദ്രതയും സ്നേഹവും നിറഞ്ഞതായിരിക്കണമെന്ന് ‎കാവുകാട്ടു പിതാവിന്‍റെ ജീവിതം നമ്മെ ഓർമിപ്പിക്കുന്നു.‎

►ദൈവകേന്ദ്രീകൃതമായ ലോകപുരോഗതി◄

ദൈവത്തെ മാറ്റിനിർത്തിക്കൊണ്ട് സ്വന്തം ശക്തിയിലും ശാസ്ത്ര ‎വളർച്ചയിലും മാത്രം അധിഷ്ഠിതമായി ലോകപുരോഗതി ‎കൈവരിക്കാമെന്ന ഉത്തരാധുനിക മനുഷ്യന്‍റെ കാഴ്ചപ്പാട് ‎വർധിച്ചുവരികയാണ്. ലെയോ പതിനാലാമൻ മാർപാപ്പ തന്‍റെ ‎ചാക്രികലേഖനമായ ‘മനുഷ്യത്വത്തിന്‍റെ പൂർണത’ (Magnifica Humanitas ) ‎എന്ന പ്രബോധനത്തിൽ ഇതിന്‍റെ അപകടം ചൂണ്ടിക്കാണിക്കുന്നുണ്ട്. ‎ദൈവമില്ലാതെയുള്ള കേവല ലോകപുരോഗതിയെ ഒരു പുതിയ ‎‎’ബാബേൽ ഗോപുര’ നിർമാണമായിട്ടാണ് മാർപാപ്പ ഉപമിക്കുന്നത്. ‎

എന്നാൽ, ദൈവകേന്ദ്രീകൃതവും മനുഷ്യത്വത്തിലൂന്നിയതുമായ വികസന ‎ശൈലിയാണ് കാവുകാട്ടു പിതാവ് തന്‍റെ ജീവിതത്തിലുടനീളം ‎ഉയർത്തിപ്പിടിച്ചത്. അദ്ദേഹത്തിന്‍റെ കാഴ്ചപ്പാടിൽ, മനുഷ്യന്‍റെ ‎വികസനം സമഗ്രമായിരിക്കണം; അത് ശരീരത്തെയും മനസിനെയും ‎ആത്മാവിനെയും ഒരുപോലെ ഉൾക്കൊള്ളുന്ന ഒന്നായിരിക്കണം. ദൈവ‎വിശ്വാസത്തിലും മനഃപരിവർത്തനത്തിലും വേരൂന്നാത്ത സാമൂഹിക ‎പ്രവർത്തനങ്ങളും ദൈവത്തെ മാറ്റിനിർത്തിയുള്ള വികസനവും ‎മനുഷ്യനെ യഥാർഥ മനുഷ്യത്വത്തിൽനിന്ന് അകറ്റുകയേ ഉള്ളൂ എന്ന് ‎കാവുകാട്ടു പിതാവ് നിരന്തരം ഓർമിപ്പിച്ചിരുന്നു. ‎

►മതമൈത്രിയുടെ പ്രവാചകൻ◄

1957ൽ തുടങ്ങിയ വിദ്യാഭ്യാസപ്രക്ഷോഭവും തുടർന്നുണ്ടായ ‎വിമോചന സമരവുമാണ് കേരള ചരിത്രത്തിൽ ‎കാവുകാട്ടു പിതാവിനെ ചിരസ്മരണീയനാക്കിയത്. ‎കൂനൻകുരിശുസത്യത്തിനുശേഷം മൂന്നു നൂറ്റാണ്ടോളം പിരിഞ്ഞു ‎നിന്നിരുന്ന കേരളത്തിലെ ക്രൈസ്തവ സഭകളെ ഒരു കുടക്കീഴിൽ ‎അണിനിരത്താൻ സാധിച്ചതും 27 മേലധ്യക്ഷന്മാരുടെ ആ കൂട്ടായ്മയെ ‎ഒരു എക്യൂമെനിക്കൽ മുന്നേറ്റമായി വളർത്താനായതും ‎കാവുകാട്ടു പിതാവിന്‍റെ നേതൃപാടവത്തിന്‍റെ മായാത്ത മുദ്രയാണ്.

ഈ പ്രതിസന്ധിഘട്ടത്തിൽ ക്രൈസ്തവരെ മാത്രമല്ല മറ്റു സമുദായ ‎നേതാക്കളെയും, പൊതുനന്മ എന്ന ഒരേ ചരടിൽ കോർത്തിണക്കാൻ ‎കഴിഞ്ഞുവെന്നതിലാണ് പിതാവിന്‍റെ മതമൈത്രി വ്യക്തമാകുന്നത്. ‎

1962ൽ കൊട്ടിയൂർ കുടിയിറക്കു പ്രശ്നത്തിൽ വ്യത്യസ്ത ‎ആശയങ്ങളിലായിരുന്നെങ്കിലും കാവുകാട്ടു പിതാവുമായുള്ള ‎അനുരഞ്ജനയോഗത്തിനുശേഷം മന്നത്ത് പത്മനാഭന്‍റെ പ്രതികരണം ‎അസാധാരണമായിരുന്നു: “ഒരു ശാന്തിദൂതനാണ് ‎കാവുകാട്ടു മെത്രാപ്പോലിത്തായെന്ന കേൾവി തികച്ചും സത്യമാണെന്ന് ‎എനിക്കിപ്പോൾ ബോധ്യമായി”.‎

മധ്യതിരുവതാംകൂറിലെ മുസ്‌ലിം സമുദായനേതാക്കളുമായും മികച്ച ‎സൗഹൃദവും സഹകരണവുമാണ് കാവുകാട്ടു പിതാവ് ‎പുലർത്തിയിരുന്നത്. കാവുകാട്ടു പിതാവിന്‍റെ ശിഷ്യനും ‎ആർച്ച്ബിഷപ് മാർ ജോസഫ് പവ്വത്തിലിന്‍റെ സുഹൃത്തും ‎കേരള ജമാഅത്ത് കോഓർഡിനേഷൻ കമ്മിറ്റിയുടെ സംസ്ഥാന ‎പ്രസിഡന്‍റുമായിരുന്ന ഹാജി ഏലംകുളം എസ്. ഷംസുദ്ദീൻ തന്‍റെ ഗുരുവിനെ അനുസ്മരിച്ചത് ഇങ്ങനെയാണ്: “ചങ്ങനാശേരി ‎എസ്ബി കോളജിൽ അഡ്മിഷന്‍റെ കാര്യത്തിൽ ജാതി-മത ‎വ്യത്യാസമില്ലാതെ പ്രവേശനം നൽകാൻ അദ്ദേഹം പ്രത്യേകം ‎നിർദേശം നൽകിയിരുന്നു. ന്യൂനപക്ഷ പിന്നാക്ക വിഭാഗങ്ങൾക്ക് ‎പ്രത്യേക പരിഗണനയും നൽകിയിരുന്നു. അരമനയിൽ കിട്ടാറുള്ള ‎ധാന്യങ്ങൾ പാവപ്പെട്ടവർക്ക് കൊടുക്കുന്നതിലും ജാതി-മത ‎വ്യത്യാസം ഒരിക്കലും നോക്കിയിട്ടില്ല.” ‎

കാവുകാട്ടു പിതാവ് സ്വന്തം ജീവിതത്തിലൂടെ കാണിച്ചുതന്ന ആ ‎‎‘മനുഷ്യസാഹോദര്യ’ത്തിന്‍റെ പ്രസക്തി ഇന്ന് ‎ഏറിക്കൊണ്ടിരിക്കുകയാണ്. സഭയ്ക്കുള്ളിലും ‎സമുദായങ്ങൾക്കിടയിലും ഭിന്നതയുണ്ടാക്കാൻ ശ്രമിക്കുന്നവരെ ‎ചെറുത്തുനിൽക്കാൻ ശാന്തിദൂതനായ കാവുകാട്ടുപിതാവിന്‍റെ ‎മാതൃകയും പ്രാർഥനയും നമുക്ക് തുണയാകട്ടെ.

Leader Page

മറക്കാനാകില്ല, ഈ പരുക്കനെ

ഒരേ അച്ചിൽ വാർത്ത വില്ലന്മാരെയും നെഗറ്റീവ് കഥാപാത്രങ്ങളെയും കണ്ടുശീലിച്ച ബോളിവുഡിന് നാനാ പടേക്കർ ഒരു വിസ്മയമായിരുന്നു. അഞ്ചു പതിറ്റാണ്ടിലേറെ നീണ്ട ആ വിസ്മയത്തിന് ഒരിക്കലും മങ്ങലേറ്റുമില്ല. ഒരു നോട്ടം, ശബ്ദ വ്യതിയാനം എന്നിവകൊണ്ട് കഥാപാത്രത്തിന്‍റെ ആത്മാവ് കണ്ടെത്തിയ അദ്ദേഹത്തിന്‍റെ അഭിനയശൈലി ഇന്ത്യൻ സിനിമയിൽ വേറിട്ടതായി. 75-ാം വയസിൽ നാനാപടേക്കർ വിട പറയുന്പോൾ കാലത്തിനും ഭാഷ‍യ്ക്കും അതീതമായ ആ മുഖവും ശബ്‌ദവും സിനിമാപ്രേക്ഷകർക്കു വിസ്മരിക്കാനാവില്ല.

മറാഠി നാടക ലോകത്തു നിന്നാണ് നാനാപടേക്കർ സിനിമയിലെത്തിയത്. 1978ൽ ഗമൻ എന്ന ചിത്രത്തിലെ ചെറിയ വേഷത്തിലൂടെ. എന്നാൽ വേഷം ചെറുതെങ്കിലും സ്ക്രീനിൽ പടേക്കർ പ്രത്യക്ഷപ്പെടുന്പോൾ മറ്റെല്ലാ കഥാപാത്രങ്ങളും അപ്രസക്തരാകുന്ന ഒരു മാസ്മരികത അദ്ദേഹത്തിനുണ്ടായി. സംഭാഷണങ്ങളിലെ വ്യക്തത, അമിതാഭിനയിത്തിലേക്കു വഴുതിവീഴാത്ത ഭാവങ്ങൾ, വൈകാരിക രംഗങ്ങളിലെ മികവ് എന്നിവകൊണ്ട് ഓരോ സിനിമകളിലൂടെയും അദ്ദേഹം തന്‍റേതായ മേൽവിലാസം നേടുകയായിരുന്നു.

അർധ് സത്യ വഴിത്തിരിവായി

1983ൽ എത്തിയ അർധ് സത്യ അദ്ദേഹത്തിന്‍റെ കരിയറിലെ വഴിത്തിരിവായി. എന്നാൽ 1989ൽ വിധു വിനോദ് ചോപ്രയുടെ പരിന്ദ എന്ന ചിത്രം നാനാപടേക്കറിന്‍റെ താരമൂല്യം ഉയർത്തി. ചിത്രത്തിൽ നാനാ പടേക്കർ അവതരിപ്പിച്ച അണ്ണാ എന്ന അധോലോക നായകൻ ഇന്ത്യൻ സിനിമയിലെ ഏറ്റവും ശക്തനായ വില്ലൻ കഥാപാത്രങ്ങളിൽ ഒന്നായി. നോട്ടം ,ശബ്‌ദം ,നിശബ്‌ദത എന്നിവയെല്ലാ സംയോജിപ്പിച്ച അണ്ണ എന്ന കഥാപാത്രം ഇന്ത്യൻ സിനിമയ്ക്ക് പുതുമയായിരുന്നു. അണ്ണായിലെ പ്രകടനത്തിന് മികച്ച സഹനടനുള്ള ദേശീയ പുരസ്കാരവും ലഭിച്ചു.

പരുക്കൻ കഥാപാത്രം മുഖമുദ്ര

പരുക്കൻ കഥാപാത്രങ്ങളാണ് അദ്ദേഹത്തിന്‍റെ മുഖമുദ്രയെങ്കിലും 1991ൽ എത്തിയ ‘പ്രഹാർ: ദ ഫൈനൽ അറ്റാക്ക്’ ആ ഇമേജ് മാറ്റിമറിച്ചു. സൈനിക പശ്ചാത്തലമുള്ള ഈ ചിത്രത്തിൽ നായകനായി അഭിനയിച്ചതിനൊപ്പം സംവിധാനം, തിരക്കഥ, സംഭാഷണം എന്നിവയിലും അദ്ദേഹം പങ്കാളിയായി.

മൂന്നു വർഷത്തിനു ശേഷം വന്ന ക്രാന്തിവീർ ശരിക്കും വിസ്മയിപ്പിച്ചു. രാഷ്‌ട്രീയ സംവിധാനങ്ങളോടും അഴിമതിക്കും എതിരായ സാധാരണക്കാരന്‍റെ പ്രതീകമായിരുന്നു ചിത്രത്തിലെ കഥാപാത്രം. ക്രാന്തിവീറിലെ പ്രകടനത്തിന് മികച്ച നടനുള്ള ദേശീയ പുരസ്കാരം ലഭിച്ചു. 1990കൾ നാനാ പടേക്കറുടെ ഒട്ടേറെ വ്യത്യസ്തങ്ങളായ വേഷങ്ങളാൽ സന്പന്നമായി. ‘അംഗാർ’, ‘തിരംഗ’, ‘അഗ്നി സാക്ഷി’, ‘ഖാമോഷി: ദ മ്യൂസിക്കൽ’, ‘യശ്വന്ത്’ തുടങ്ങിയ ചിത്രങ്ങൾ. അഗ്നിസാക്ഷിയിലെ പ്രകടനത്തിന് വീണ്ടും ദേശീയ അംഗീകാരം ലഭിച്ചു. അധികാരകേന്ദ്രങ്ങളോടും വ്യവസ്ഥിതിയോടും പോരാടുന്ന കഥാപാത്രങ്ങളായിരുന്നു നാനാ പടേക്കർ അവതരിപ്പിച്ചതിൽ മിക്കവയും.

പൊട്ടിച്ചിരിപ്പിച്ച നായകൻ

2007ൽ എത്തിയ ‘വെൽക്കം’ എന്ന ചിത്രത്തിലെ ഉദയ് എന്ന അധോലോക നായകൻ പ്രേക്ഷകരെ പൊട്ടിച്ചിരിപ്പിച്ചു. കരിയറിന്‍റെ അവസാനകാലത്തും അദ്ദേഹത്തിന് മികച്ച അവസരങ്ങൾ ലഭിച്ചു. 2022ലെ ‘തഡ്ക’, 2023ലെ ‘ദ വാക്സിൻ വാർ’, ‘ഗദർ 2’ എന്നിവയ്ക്ക് പിന്നാലെ 2024ൽ ‘വൻവാസ്’ എത്തി.

2025ൽ ‘ഹൗസ്ഫുൾ. ഈ വർഷവും ശക്തമായകഥാപാത്രങ്ങളെ അവതരിപ്പിക്കാൻ താരത്തിന്കഴിഞ്ഞു.വിശാൽ ഭരദ്വാജിന്‍റെ ‘ഒ റോമിയോ’യിൽ ഡിസിപി ഇസ്മായിൽ ഖാനായി എത്തി. അനിൽ കപൂറിന്‍റെ ‘സുബേദാർ’ലും ശ്രദ്ധേയ വേഷത്തിലെത്തി.

Leader Page

ഇന്ത്യയും യുഎസും അകലുന്നു

പാക്കിസ്ഥാനിലെ പട്ടാള ഭരണാധികാരികളെ പിന്താങ്ങുന്ന അമേരിക്ക ഒറ്റയാൻ ശക്തിയാണ്. കാലങ്ങളായി ജനാധിപത്യ ഇന്ത്യയുടെ വിശ്വസ്ത മിത്രമാണ് റഷ്യ.

-വിദേശകാര്യ മന്ത്രി എസ്. ജയശങ്കർ
(സെപ്റ്റംബർ 28ന് ന്യൂയോർക്കിലെ ഏഷ്യാ സൊസൈറ്റിയിലെ പ്രസംഗത്തിൽ)

പ്രസിഡന്‍റ് ട്രംപുമായി വളരെ രചനാത്മകമായ ഫോൺ സംഭാഷണം നടത്തി.

-പ്രധാനമന്ത്രി നരേന്ദ്ര മോദി
(സെപ്റ്റംബർ 30ന് എക്സിൽ)

ഇന്ത്യയുമായുള്ള വ്യാപാരക്കരാർ ആസന്നമല്ല.

-സെപ്റ്റംബർ 30ന് യുഎസ് വാണിജ്യ പ്രതിനിധി ജാമീസൺ ഗ്രീയർ വാഷിംഗ്ടണിൽ ഇന്ത്യയുടെ വാണിജ്യ മന്ത്രി പിയൂഷ് ഗോയലുമായി
നടത്തിയ ചർച്ചയ്ക്കു ശേഷം.

ഇന്ത്യ-അമേരിക്ക വ്യാപാര ഉടമ്പടിക്കായുള്ള ചർച്ചകൾ പീഠഭൂമിയിൽ വഴിമുട്ടി നിൽക്കുന്നു. കൂടുതൽ വിട്ടുവീഴ്ചകൾ സാധ്യമല്ല.

-ധനമന്ത്രി നിർമല സീതാരാമൻ
(ഒക്‌ടോബർ അഞ്ചിനു ന്യൂഡൽഹിയിൽ മ്യൂണിക് ലീഡേഴ്സ് മീറ്റിൽ.)

ഇന്ത്യ-അമേരിക്ക വ്യാപാര ഉടമ്പടി ഉണ്ടാകില്ല എന്നു മാത്രമല്ല ഈ പ്രസ്താവനകൾ പറയുന്നത്. ഇന്ത്യ-അമേരിക്ക ബന്ധത്തിൽ കാര്യമായ ഉലച്ചിൽ സംഭവിച്ചു എന്ന് ഇവ കാണിക്കുന്നു. ഉലച്ചിൽ മാറാൻ യുഎസ് പ്രസിഡന്‍റ് ഡോണൾഡ് ട്രംപ് എൺപതാം വയസിൽ തന്‍റെ ശൈലിയും നയങ്ങളും മാറ്റണം. 2016-21 കാലത്തും 2024 നവംബർ മുതലും ട്രംപിനെ സുഖിപ്പിക്കുന്നതിൽ ശ്രദ്ധിച്ച ഇന്ത്യൻ നയതന്ത്രം ഒരു പരാജയമായി എന്നും ഇതിൽനിന്നു മനസിലാക്കാം. കഴിഞ്ഞ വർഷം ഫെബ്രുവരിയിൽ തുടങ്ങിയതാണു വ്യാപാര ഉടമ്പടിക്കായുള്ള ചർച്ച. 21 മാസത്തിനു ശേഷം, ചർച്ച വഴി മുട്ടിയെന്നും തുടരാൻ സാധ്യത കുറവാണെന്നും ധനമന്ത്രി പറഞ്ഞതോടെ ഇന്ത്യ-അമേരിക്ക ബന്ധത്തിലെ ഒരു അധ്യായം അവസാനിക്കുന്നു.
വലിയ പ്രതീക്ഷയോടെയാണു ചർച്ച തുടങ്ങിയത്. ട്രംപ് രണ്ടാം തവണ അധികാരമേറ്റ് ആഴ്ചകൾക്കകം മോദി വാഷിംഗ്ടണിലെത്തി സന്ദർശിച്ചു. ഫെബ്രുവരി 13നു വൈറ്റ് ഹൗസിൽ മോദിക്കായി വർക്കിംഗ് ലഞ്ച് ഒരുക്കി. വളരെ വലിയ പ്രഖ്യാപനങ്ങളാണ് ആ ഉച്ചഭക്ഷണത്തിനുശേഷം ഉണ്ടായത്.

►വലിയ പങ്കാളിത്തം

ബന്ധം ആഴപ്പെടുത്താൻ യുഎസ്-ഇന്ത്യ കോംപാക്റ്റ് (COMPACT- Catalyzing Opportunities for Military Partnership, Accelerated Commerce and Technology) പ്രഖ്യാപിച്ചു. 21-ാം നൂറ്റാണ്ടിലേക്ക് രണ്ടു രാജ്യങ്ങളും സൈനിക പങ്കാളിത്തവും ത്വരിത വാണിജ്യ-സാങ്കേതിക സഹകരണവും വർധിപ്പിക്കുക എന്നാണ് ഇതിൽ ലക്ഷ്യമിട്ടത്. പരസ്പര വ്യാപാരം 2030നകം 50,000 കോടി ഡോളർ ആക്കുക, വ്യാപാരക്കരാർ ഉണ്ടാക്കുക, ആയുധങ്ങളും പ്രതിരോധ സംവിധാനങ്ങളും കൂട്ടായി നിർമിക്കുക, ഊർജമേഖലയിൽ സഹകരണം കൂട്ടുക. മോദിയും ‘ഡിയർ ഫ്രണ്ട്’ ട്രംപും ആശ്ലേഷിച്ച് രൂപംകൊടുത്ത കോംപാക്റ്റിൽ ഇതെല്ലാം പറഞ്ഞിരുന്നു. അതാണ് ഇപ്പോൾ ഒന്നുമല്ലാതെ തീരുന്നത്. പ്രതിരോധ സഖ്യവും ഇല്ല, വ്യാപാരക്കരാറുമില്ല. 50,000 കോടി ഡോളർ വ്യാപാരസ്വപ്നവും വെറുതേ. കോംപാക്റ്റ് വിഭാവന ചെയ്ത ഒരു മേഖലയിലും മുന്നേറിയില്ല. പ്രതിരോധ സഹകരണത്തിൽ ഇന്ത്യക്കു പരാതിയേ ഉള്ളൂ. പുതിയ ആയുധങ്ങളോ പോർവിമാനങ്ങളോ പ്രതിരോധ സംവിധാനങ്ങളോ ലഭിച്ചില്ല.

►ഡ്രോണിലെ കുതന്ത്രം

അമേരിക്കയിലെ പവറസ് കമ്പനിയിൽനിന്ന് ഡ്രോണുകൾ വാങ്ങാനും ഇവിടെ നിർമിക്കാനും ഇന്ത്യ കരാറുണ്ടാക്കി. മൂന്നുമാസം കഴിഞ്ഞപ്പോൾ പവറസ് പാക്കിസ്ഥാനുമായും ഇതേ ഡ്രോണുകൾ നൽകാൻ കരാറുണ്ടാക്കി. ട്രംപിന്‍റെ രണ്ടു പുത്രന്മാർക്കു നിക്ഷേപമുള്ള കമ്പനിയുടെ ഈ നടപടി വീണ്ടും ഇന്ത്യയെ പ്രകോപിപ്പിച്ചു. പാക്കിസ്ഥാനെ കൂടെച്ചേർത്തു നിർത്തുന്ന യുഎസ് നയം ട്രംപ് തുടരുന്നതാണ് പ്രതിരോധ സഹകരണം അധികം മുന്നേറാത്തതിന്‍റെ കാരണം. സേനാധിപൻ അസിം മുനീറും പ്രധാനമന്ത്രി ഷഹബാസ് ഷരീഫും പാക്കിസ്ഥാനിലെ അപൂർവധാതുസമ്പന്നമായ ചില പ്രദേശങ്ങളിൽ അമേരിക്കൻ കമ്പനികൾക്കു ഖനനാവകാശം നൽകാൻ നീക്കമുണ്ട്. തന്‍റെ മകനു പങ്കുള്ള കമ്പനികൾക്ക് അതു തരപ്പെടുത്താനാണു ട്രംപ് ശ്രമിക്കുന്നത്. ബുഷ് ഭരണകൂടംപോലെ ചൈനയ്ക്കെതിരേ ഇന്ത്യയെ ഉയർത്തണം എന്ന ആശയമൊന്നും ട്രംപിനില്ല.

►നിയമവും കരാറും മാനിക്കാതെ

രണ്ടാം വരവിൽ ട്രംപ് വാണിജ്യ നിയമങ്ങളും കരാറുകളും കാറ്റിൽ പറത്തിയാണു നീങ്ങിയത്. അമേരിക്കയ്ക്കു വ്യാപാരക്കമ്മിയുള്ള എല്ലാ രാജ്യങ്ങൾക്കും ‘പകരം തീരുവ’ ചുമത്തി. 50 ശതമാനമാണ് ഇന്ത്യക്കു ചുമത്തിയത്. ചർച്ചയിലൂടെ അതു 18 ശതമാനമാക്കി. യുഎസ് സുപ്രീം കോടതി ‘പകരം തീരുവ’ അസാധുവാക്കിയപ്പോൾ ട്രംപ് മറ്റൊരു നിയമം ഉപയോഗിച്ചു 10 ശതമാനം താത്കാലിക തീരുവ ചുമത്തി. അതു തീരും മുൻപ് ഇന്ത്യക്കും മറ്റു കുറേ രാജ്യങ്ങൾക്കുമെതിരേ നിർബന്ധിത ജോലിയുടെയും അമിത ഉത്പാദനശേഷിയുടെയും പേരിൽ അന്വേഷണങ്ങൾ പ്രഖ്യാപിച്ചു. നിർബന്ധിത ജോലിയിൽ ഇന്ത്യ പ്രശ്നക്കാരല്ലെന്നു തീർപ്പായപ്പോൾ ഇന്ത്യക്കു 10 ശതമാനം തീരുവ തുടർന്നു. ഉത്പാദനശേഷിയുടെ അന്വേഷണം തുടങ്ങുകയാണ്. അതിനിടെ റഷ്യൻ എണ്ണ വാങ്ങുന്നതിന്‍റെ പേരിൽ 100 ശതമാനം തീരുവ ചുമത്താൻ അധികാരം നൽകുന്ന നിയമവും അമേരിക്കയിൽ ഉണ്ടായി. നിലവിലെ എല്ലാ തീരുവ നിയമങ്ങളും മാറിയാലും ഇതു മാത്രം മതി ഇന്ത്യയെ ശ്വാസം മുട്ടിക്കാൻ.

ഇന്ത്യക്കു മറ്റു രാജ്യങ്ങളോടു മത്സരിച്ചു വേണം കയറ്റുമതിയിൽ മുന്നേറാൻ. അതിനു മറ്റു രാജ്യങ്ങളെ അപേക്ഷിച്ചു നമ്മുടെ തീരുവ കുറവാകണം. അങ്ങനെ കുറഞ്ഞ നിരക്കു തരാമെന്ന് അമേരിക്ക ഉറപ്പു നൽകില്ല. അമേരിക്കയോടു നമ്മൾ കരാറുണ്ടാക്കിയ ശേഷം വേറെ രാജ്യക്കാർ കുറഞ്ഞ നിരക്കിൽ കരാറുണ്ടാക്കിയാൽ നമ്മൾ പെട്ടതുതന്നെ.

ചുരുക്കം ഇതാണ്. പാടുപെട്ട് കരാർ ഉണ്ടാക്കിയാൽ അമേരിക്ക അതു സൗകര്യം പോലെ മാറ്റും. അപ്പോൾ എന്തിനു കരാർ? കാനഡയും മെക്സിക്കോയും യൂറോപ്യൻ യൂണിയനും അതു നേരത്തേ പഠിച്ചു. ഇന്ത്യ അതു പഠിച്ചു തുടങ്ങുന്നു എന്നാണു നിർമല സീതാരാമന്‍റെ പ്രസ്താവന കാണിക്കുന്നത്.

►നയപരമായ പരാജയം

പന്ത്രണ്ട് വർഷമായി അമേരിക്കയുടെ സഖ്യകക്ഷി എന്ന നിലയിലേക്ക് ഇന്ത്യയെ ഉയർത്താൻവേണ്ടി ശ്രമിക്കുകയായിരുന്നു മോദി ഭരണകൂടം. അതു പരാജയമായെന്ന് ഇപ്പോൾ തെളിയുന്നു. റഷ്യയുമായുള്ള സുദൃഢ ബന്ധം നിലനിർത്തിക്കൊണ്ട്, അമേരിക്കയുമായി നല്ല സൗഹൃദം പുലർത്തി, ചൈനയെ കരുതലോടെ കൈകാര്യം ചെയ്തും പ്രതിരോധശേഷി വളർത്തിയും മുന്നോട്ടു പോകുന്ന നയത്തിലേക്കു രാജ്യം മടങ്ങേണ്ടി വരുന്നു. ചൈനയ്ക്കെതിരേ ഇന്ത്യക്കൊരു പരിചയായി അമേരിക്ക ഉണ്ടാകും എന്ന തെറ്റിദ്ധാരണ ഇപ്പോൾ മാറുന്നുണ്ട്. തായ്‌വാനോടും യൂറോപ്പിനോടും ട്രംപ് കാണിക്കുന്നതിൽനിന്ന് ഇന്ത്യ പഠിച്ചു തുടങ്ങുന്നു.

ട്രംപ് മാറിയാലും ട്രംപിസം യുഎസ് ഭരണകൂടത്തിൽനിന്നു മാറും എന്നു കരുതാനാവില്ല. അതാണു ദീർഘകാല ഭീഷണി. ഇന്ത്യൻ യുവാക്കൾക്കു വലിയ അവസരങ്ങൾ വാഗ്ദാനം ചെയ്ത ഇന്ത്യ-യുഎസ് സൗഹൃദം ഇങ്ങനെ ഉലയുന്നതു ചെറുപ്പക്കാരെയും നിരാശപ്പെടുത്തും.

Leader Page

അതിരുകൾ വകവയ്ക്കാത്ത ധീരത

കവിത, ഉപന്യാസം, ഗ്രീക്ക് നാടക തർജമകൾ, ദൃശ്യകല എന്നിവയെയെല്ലാം ഒരൊറ്റ കൃതിയിൽ കൂട്ടിച്ചേർക്കുന്ന കാനഡയിലെ എഴുത്തുകാരിയും അധ്യാപികയുമാണ് ഇത്തവണ സാഹിത്യത്തിനുള്ള നൊബേൽ സമ്മാനം നേടിയ ആൻ കാർസൻ.

ഇരുപതിലേറെ വർഷം കാനഡയിലെയും അമേരിക്കയിലെയും മുൻനിര സർവകലാശാലയിൽ പ്രാചീന ഗ്രീക്ക് സാഹിത്യം പഠിപ്പിച്ച കാർസൻ ഗ്രീക്ക് പുരാണങ്ങളെ ആധുനിക സാഹചര്യങ്ങളിലേക്ക് മനോഹരമായി കൂട്ടിയിണക്കുന്നു.ക്ലാസിക്കൽ പഠനം വിരസമാണെന്ന പൊതുധാരണയെ തിരുത്തുകയാണവർ. അവരുടെ ഏതാണ്ട് എല്ലാ സാഹിത്യ സൃഷ്ടികളും വാക്കുകളോടുള്ള ഭാഷാശാസ്ത്രജ്ഞയുടെ കൗതുകവും പുതിയ അർഥം തേടുന്ന കവിയുടെ ഉൾക്കാഴ്ചയുടെയും സങ്കലനമാണ്. വാക്കിന്‍റെ ഉത്പത്തി തപ്പിപ്പോകുന്നിടത്താണ് തന്‍റെ എല്ലാ കൃതികളുടെയും തുടക്കം എന്ന് കാർസൻ തിരിച്ചറിയുന്നു.

വൈവിധ്യമാണ് കാർസന്‍റെ എഴുത്തിന്‍റെ മുഖമുദ്ര. ഉപന്യാസങ്ങൾ, കവിതകൾ, ചരമക്കുറിപ്പുകൾ, കലാകാരന്മാരെയും ചരിത്രപുരുഷന്മാരെയും കുറിച്ചുള്ള ഗദ്യലേഖനങ്ങൾ എന്നിവ സമന്വയിപ്പിച്ച ‘മെൻ ഇൻ ദി ഓഫ് അവേഴ്സ്’ 2001ൽ പ്രഥമ ഗ്രഫിൻ പോയട്രി സമ്മാനം നേടി. മറ്റൊരു വൈവിധ്യമാർന്ന കൃതിയായ ‘ഡിക്രിയേഷൻ’ എന്ന കൃതി കവിതയും ഉപന്യാസങ്ങളും ഓപ്പറയും ഒന്നിച്ചു ചേർത്തതാണ്.

1986ലാണ് ആദ്യകൃതി പുറത്തുവരുന്നത് -‘ഇറോസ് ദി ബിറ്റർസ്വീറ്റ്’. ഇതിൽ സാഹിത്യവിമർശനത്തെ കാമനകളും പുരാതന ഗ്രീക്ക് പാരമ്പര്യവുമായും സമന്വയിപ്പിച്ചിരിക്കുന്നു. പുരാതന ഗ്രീക്ക് കവി സ്റ്റെസിക്കോറസിന്‍റെ കവിതകളിൽനിന്ന് പ്രചോദനം ഉൾക്കൊണ്ട് 1998ൽ പുറത്തിറക്കിയ ‘ഓട്ടോബയോഗ്രഫി ഓഫ് റെഡ്’ എന്ന പദ്യനോവലാണ് അവരുടെ ഏറ്റവും പ്രശസ്തമായ കൃതി. ഹെരാക്കിൾസ് കൊലപ്പെടുത്തിയ ചുവന്ന ചിറകുകളുള്ള ഗെറിയോൺ എന്ന രാക്ഷസന്‍റെ പുരാണത്തെ, ഹൃദയവേദനകളിലൂടെയും കാമനകളിലൂടെയും കടന്നുപോകുന്ന ഒരു ആധുനിക കൗമാരക്കാരന്‍റെ കഥയായി ഇത് പുനരാവിഷ്കരിക്കുന്നു. 2001ൽ ‘ദി ബ്യൂട്ടി ഓഫ് ദി ഹസ്ബൻഡ്’ എന്ന സമാഹാരത്തിലൂടെ ടി.എസ്. എലിയട്ട് പുരസ്കാരം നേടുന്ന ആദ്യ വനിതയായി.

എന്തുകൊണ്ടാണ് നിങ്ങൾ നിരന്തരം എഴുത്തുരൂപങ്ങൾ മാറുന്നത് എന്ന് ഒരു അഭിമുഖത്തിൽ ചോദിച്ചപ്പോൾ ഇതായിരുന്നു മറുപടി: “വിരസത തന്നെ. ഒരേ രീതിയിൽ എഴുതുമ്പോൾ അസ്വസ്ഥതയുണ്ട്. ശ്രമിച്ചുനോക്കാൻ ധാരാളം സാഹിത്യരൂപങ്ങളുണ്ടല്ലോ.” അതിന്‍റെ അപകടവും അവർ തിരിച്ചറിഞ്ഞിട്ടുണ്ട്. “എന്‍റെ കൃതികൾ പലപ്പോഴും ശിഥിലമാകാറുണ്ട്. അതോടെ അത് വിചിത്രമായി മാറും. പിന്നെ ആർക്കും വായിക്കാൻ താത്പര്യമുണ്ടാകില്ല. അതുമല്ലെങ്കിൽ അത് വെറും ഒരു അനുകരണമാവുകയും ചെയ്യും” 2018ലെ ഒരു അഭിമുഖത്തിൽ കാർസൻ സ്വയം വിലയിരുത്തുന്നു.

ഹൈസ്കൂളിലെ പതിമൂന്നാം ഗ്രേഡിൽ പഠിക്കുമ്പോഴാണ് കാർസൻ ഗ്രീക്ക് ഭാഷ പഠിക്കാൻ തുടങ്ങിയത്. ഇംഗ്ലീഷിനേക്കാൾ വാക്കുകളുടെ ആഴത്തിലുള്ള അർഥങ്ങളിലേക്ക് ഇറങ്ങിച്ചെല്ലാൻ ഗ്രീക്ക് ഭാഷ സഹായിക്കുന്നു എന്ന് അവർ കരുതുന്നു. ഇംഗ്ലീഷിൽ നമ്മൾ മരത്തിന്‍റെ കൊമ്പുകളിലും ചില്ലകളിലും മാത്രമാണ് സഞ്ചരിക്കുന്നതെങ്കിൽ ഗ്രീക്കിൽ വേരുകളിലാണ് ജീവിക്കുന്നതെന്നാണ് കാർസന്‍റെ പക്ഷം.

വാക്കുകളിലൂടെ മാത്രമല്ല, ദൃശ്യകലയിലൂടെയും സാഹിത്യത്തെ സമീപിക്കുന്ന ഒരു കലാകാരിയാണ് ആൻ കാർസൻ. അവരുടെ സൃഷ്‌ടികളിൽ എഴുത്തും വരയും സമന്വയിക്കുന്നത് അതിശയകരമായ കാഴ്ചയാണ്. തന്‍റെ സഹോദരന്‍റെ മരണത്തെത്തുടർന്ന് 2010ൽ അവർ നിർമിച്ച അക്കോർഡിയൻ രീതിയിലുള്ള ഏറെ പ്രശസ്തമായ പുസ്തകമാണ് ‘നോക്സ്.’ കവിതയോടൊപ്പം പെയിന്‍റിംഗുകൾ, പഴയ ഫോട്ടോഗ്രാഫുകൾ, കൊളാഷുകൾ, വരകൾ എന്നിവയൊക്കെ ഉൾപ്പെടുത്തി ഒരു കലാശില്പം പോലെയാണ് ഇത് രൂപകൽപ്പന ചെയ്തിരിക്കുന്നത്. സോഫോക്ലിസിന്‍റെ ‘ആന്‍റിഗണി’ എന്ന ഗ്രീക്ക് നാടകത്തിന്‍റെ പുനരാവിഷ്കാരമായ ‘ആന്‍റിഗോണിക്’ എന്ന പുസ്തകത്തിൽ കവിതയും വാക്യങ്ങളും ഹാൻഡ്-ലെയർ ചെയ്ത പെയിന്‍റിംഗുകൾക്കും വരികൾക്കുമൊപ്പമാണ് നൽകിയിരിക്കുന്നത്. കാർസൻ തന്‍റെ പല പുസ്തകങ്ങളുടെയും കവറുകളും അകത്തെ ചിത്രങ്ങളും സ്വയം വരയ്ക്കുകയും ഡിസൈൻ ചെയ്യുകയും ചെയ്തിട്ടുണ്ട്.

എഴുത്തിൽ മറച്ചുപിടിക്കാനും വ്യാജം ചമയ്ക്കാനും കഴിയും. എന്നാൽ, ചിത്രരചന ഭീതിദമാംവിധം നഗ്നമാണെന്നാണ് കാർസൻ പറയുന്നത്. സത്യത്തിൽ അവർ ചിത്രകലയെയാണ് എഴുത്തിനു മുകളിൽ വയ്ക്കുന്നത്. എഴുത്തിൽ അപൂർവമായേ പൂർണ സംതൃപ്തി അനുഭവപ്പെടാറുള്ളൂ എന്നവർ പറയുന്നു. എന്നാൽ വരയ്ക്കുമ്പോൾ വിഷയം എത്ര സങ്കടകരമാണെങ്കിലും അത് ആത്മാവിനെ പൂർണമായി ഉൾക്കൊള്ളുന്ന ഒന്നായി മാറുന്നു. എഴുത്തിനെ അവർ വിനോദത്തിന്‍റെ ലാഘവത്തോടെയേ കണ്ടിട്ടുള്ളൂ.

ഒരു സംഭവത്തിന്‍റെ ഫോട്ടോ കോപ്പിയല്ല കവിത എന്നാണ് കാർസന്‍റെ നിലപാട്. കവിതയെന്നത് എഴുത്തുകാരന്‍റെ മനസ് ഒരു ചിന്തയിലൂടെ നടത്തുന്ന പ്രയാണമാണ്. വായനക്കാരൻ കവിത വായിക്കുമ്പോൾ എഴുത്തുകാരൻ കടന്നുപോയ അതേ ചിന്താപ്രക്രിയയിലൂടെ നടക്കുന്നു. കവിതയുടെ അവസാനത്തിൽ എത്തുമ്പോൾ വായനക്കാരൻ തുടക്കത്തിൽ ഉണ്ടായിരുന്ന ആളിൽനിന്ന് വ്യത്യസ്തനായിക്കഴിഞ്ഞിട്ടുണ്ടാകും.

താൻ ഒരു പൂർണ സ്ത്രീയാണെന്നോ പുരുഷനാണെന്നോ ഉള്ള വ്യക്തമായ അതിർവരമ്പുകളിൽ സ്വയം തളച്ചിടാൻ അവർ ആഗ്രഹിച്ചില്ല. സ്വത്വത്തെക്കുറിച്ചും ലിംഗഭേദത്തെക്കുറിച്ചും കൃത്യമായ ധാരണയില്ലാത്ത ഒരു ‘സഞ്ചരിക്കുന്ന ലിംഗപദവി’ (floating gender) എന്ന നിലയിലായിരുന്നു ജീവിതം.
പല കൃതികളിലും അവർ പുരുഷ കഥാപാത്രങ്ങളെയോ സ്വവർഗാനുരാഗികളായ കഥാപാത്രങ്ങളെയോ ആഖ്യാതാക്കളാക്കുന്നുണ്ട്. എഴുത്തിൽ സ്വന്തം സ്വത്വം ഒരുതരം വേലിക്കെട്ടായി തോന്നുമ്പോൾ വ്യത്യസ്ത രൂപങ്ങളിലൂടെയും കഥാപാത്രങ്ങളിലൂടെയും അതിൽനിന്ന് പുറത്തു കടക്കാനാണ് അവർ ശ്രമിക്കുന്നത്.

Leader Page

സമരാഗ്നിയില്‍ ഉരുകി രാജ്യം

സ്വതന്ത്ര ഇന്ത്യയില്‍ പുതുചരിത്രം കുറിച്ച പ്രക്ഷോഭങ്ങള്‍ക്കാണു പ്രതിപക്ഷ നേതാവ് രാഹുല്‍ ഗാന്ധി നേതൃത്വം നല്‍കുന്നത്. വിവാദ തീവ്ര വോട്ടര്‍പട്ടിക പരിഷ്‌കരണത്തിനും മുഖ്യ തെരഞ്ഞെടുപ്പു കമ്മിഷണര്‍ ഗ്യാനേഷ് കുമാറിനുമെതിരേയുമുള്ള സമരം ദിവസവും കൂടുതല്‍ കത്തിപ്പടരുകയാണ്.

വിദ്യാര്‍ഥികളും യുവജനങ്ങളും ഇതേ ആവശ്യവുമായി പ്രതിഷേധം തുടരുമ്പോള്‍ കേന്ദ്രസര്‍ക്കാരും ഗ്യാനേഷും പതിവില്ലാത്ത പ്രതിരോധത്തിലാണ്. സമരവീര്യത്തില്‍ രാഹുലും സഹോദരി പ്രിയങ്ക ഗാന്ധി വദ്രയും ആര്‍ക്കും പിന്നിലല്ലെന്നുകൂടി രണ്ടുദിവസത്തെ ഡല്‍ഹി പ്രക്ഷോഭം തെളിയിച്ചു. ഇതോടെ സമരാഗ്നി രാജ്യമാകെ കത്തിപ്പടരുകയാണ്.

ഇന്ത്യന്‍ രാഷ്‌ട്രീയത്തില്‍ പ്രതിപക്ഷ നേതാവ് രാഹുലിന്‍റെ ഗ്രാഫ് ഉയരുകയും പ്രധാനമന്ത്രി നരേന്ദ്ര മോദിയുടെ ഗ്രാഫ് ഇടിയുകയും ചെയ്യുന്നുവെന്നതാണു സമരപരമ്പരകളുടെ പ്രത്യേകത.

ദേശീയ തലസ്ഥാനം ഇന്നലെയും ചൊവ്വാഴ്ചയും കണ്ടതെല്ലാം മുഖ്യതെരഞ്ഞെടുപ്പു കമ്മിഷണറായി ഗ്യാനേഷ് കുമാര്‍ തുടരാനുള്ള സാധ്യത വിരളമാക്കുകയാണ്. രണ്ടു വര്‍ഷത്തോളമായി തെളിവുകളോടെ രാഹുല്‍ ഉയര്‍ത്തിയ വോട്ടുകൊള്ള ആരോപണം ശരിവയ്ക്കുന്നതായിരുന്നു രണ്ടു തെരഞ്ഞെടുപ്പു കമ്മിഷണര്‍മാരുടെ 14 വിയോജനക്കുറിപ്പുകള്‍.

മിന്നല്‍പിണറായി മിന്നല്‍സമരം

രാഹുലിന്‍റെ മിന്നല്‍ സമരങ്ങള്‍ മിന്നല്‍പിണറുകള്‍പോലെ വന്‍ പ്രകമ്പനം കൊള്ളിക്കുകയാണ്. ജനാധിപത്യവും ഭരണഘടനയും സംരക്ഷിക്കാനുള്ള പോരാട്ടം എന്നാണ് രാഹുല്‍ പ്രതിഷേധങ്ങളെ വിശേഷിപ്പിച്ചത്. മോദിയും ഷായുമല്ല, ആരു വിചാരിച്ചാലും ജനാധിപത്യം സംരക്ഷിക്കാനുള്ള പോരാട്ടത്തില്‍നിന്നു തങ്ങളെ തടയാനാകില്ലെന്നു രാഹുല്‍ ഇന്നലെയും ആവര്‍ത്തിച്ചു. എത്ര തടഞ്ഞാലും എത്ര ഉപദ്രിവിച്ചാലും എത്ര ത്യാഗം വേണ്ടി വന്നാലും പോരാട്ടം തുടരുമെന്ന് അദ്ദേഹം തറപ്പിച്ചുപറയുന്നു.

ഇന്ത്യ സഖ്യത്തില്‍ ആശയക്കുഴപ്പവും വിള്ളലുമുണ്ടെന്നു വരുത്താന്‍ ശ്രമിച്ച ബിജെപിയുടെയും ബിജെപി അനുകൂല മാധ്യമങ്ങളുടെയും കുപ്രചാരണം പൊളിക്കാനും രണ്ടു ദിവസമായി ഡല്‍ഹിയില്‍ നടന്ന പ്രതിപക്ഷ സമരത്തിനു കഴിഞ്ഞു. ലക്ഷ്യത്തിലേക്ക് ഒറ്റക്കെട്ടാണെന്നു പ്രതിപക്ഷം തെളിയിച്ചു. ഗ്യാനേഷ് കുമാറിന്‍റെ രാജിയില്‍ കുറഞ്ഞതൊന്നും വിലപ്പോകില്ല.
പൊലിസും അര്‍ധസൈനിക വിഭാഗങ്ങളും കിണഞ്ഞുശ്രമിച്ചിട്ടും രാഹുലിനെയും പ്രിയങ്കയെയും അറസ്റ്റ് ചെയ്തു നീക്കാന്‍പോലും മണിക്കൂറുകളെടുത്തു. പ്രതിപക്ഷ എംപിമാരെയെല്ലാം അണിനിരത്തി നടത്തിയ സമരമാര്‍ച്ചിനെ തടയാന്‍ പൊലിസിന്‍റെയും ബാരിക്കേഡുകളുടെയും ബലം പോരായിരുന്നു.

കേരളത്തില്‍നിന്നുള്ള യുഡിഎഫ്, എല്‍ഡിഎഫ് എംപിമാരെല്ലാം മാര്‍ച്ചില്‍ സജീവമായിരുന്നു. ചൊവ്വാഴ്ച ആകാശവാണി നിലയത്തിന്‍റെ വളപ്പിലെ ബോധിവൃക്ഷച്ചുവട്ടിലിരുന്നായിരുന്നു ഇരുവരുടെയും മണിക്കൂറുകള്‍ നീണ്ട ചെറുത്തുനില്‍പ്. കിണഞ്ഞുശ്രമിച്ചിട്ടും രാത്രി വരെ രാഹുലും പ്രിയങ്കയും വേണുഗോപാലും ആല്‍മര ചുവട്ടില്‍ തുടര്‍ന്ന് രാജ്യത്താകെ ജനവികാരം ഉണര്‍ത്തി. മന്ത്രിമാരുടേതിനു തുല്യമായ കാബിനറ്റ് പദവിയുള്ള പ്രതിപക്ഷ നേതാവിനും പ്രിയങ്കയ്ക്കുമെതിരേ ബലപ്രയോഗവും മര്‍ദനവുമുണ്ടായതു ജനാധിപത്യത്തിനു ഭൂഷണമല്ല. മുതിര്‍ന്നവരും വനിതകളുമായ എംപിമാര്‍ക്കുമെതിരേ കൈയറ്റം നടന്നതായാണു പരാതി. പ്രതിഷേധം ആളിക്കത്തിക്കാനും ഗ്യാനേഷിന്‍റെ രാജി ഉറപ്പിക്കാനും മാത്രമേ സര്‍ക്കാരിന്‍റെ സമരവിരുദ്ധ നടപടികള്‍ വഴിതെളിക്കൂ.

ജനാധിപത്യ വ്യവസ്ഥിതിയില്‍ തെരഞ്ഞെടുക്കപ്പെട്ട ജനപ്രതിനിധികള്‍ക്കും പ്രതിപക്ഷ നേതാവിനും പ്രതിഷേധിക്കാനും സമരം നയിക്കാനുമുള്ള അവകാശം അമര്‍ച്ച ചെയ്യാമെന്ന കേന്ദ്രസര്‍ക്കാരിന്‍റെ മോഹംപോലും അപകടമാകും. സര്‍ക്കാരിന്‍റെ നിയമലംഘനത്തിനെതിരേ നിയമലംഘനങ്ങളും വേണ്ടി വരുമെന്ന പ്രതിപക്ഷ നേതാക്കളുടെ നിലപാടു തെറ്റാകില്ല.
കേരള മുഖ്യമന്ത്രി വി.ഡി. സതീശനും തെലുങ്കാന മുഖ്യമന്ത്രി രേവന്ത് റെഡ്ഡിയും ഇന്നലെ ഡല്‍ഹിയിലെ പ്രതിഷേധത്തില്‍ പങ്കെടുത്തതും ശ്രദ്ധേയമായി.

രാഹുലിനെ കസ്റ്റഡിയിലെടുത്ത കൊണ്ടുപോയ ബാരക്കംബ റോഡ് പൊലിസ് സ്‌റ്റേഷനിലേക്കു ഇന്നലെ രാത്രി നടന്നു പോയ മുഖ്യമന്ത്രി സതീശനയെും എംപിമാരെയും പോലീസ് തടഞ്ഞതിനും ന്യായീകരണമില്ല. ഒടുവില്‍ പ്രതിഷേധം കനത്തതോടെയാണു സതീശനെയും പിന്നാലെയെത്തിയ രേവന്ത് റെഡ്ഡിയെയും പൊലിസ് സ്‌റ്റേഷനിലുള്ള രാഹുലിനെ കാണാന്‍ അനുവദിച്ചത്. കോണ്‍ഗ്രസ് നേതാവിനെ കാണാന്‍ അദ്ദേഹത്തിന്‍റെ പാര്‍ട്ടിയിലെ മുഖ്യമന്ത്രിമാരെയും എംപിമാരെയും അനുവദിക്കില്ലെന്ന നിലപാടിനു ന്യായീകരണം പോലുമില്ല. തീക്കൊള്ളികൊണ്ടു തല ചൊറിയുകയാണു കേന്ദ്രസര്‍ക്കാരെന്ന് എംപിമാര്‍ മുന്നറിയിപ്പു നല്‍കിയിട്ടുണ്ട്. എന്തായാലും പ്രതിഷേധിക്കാനുള്ള അവകാശം കവരാന്‍ ആരെയും അനുവദിച്ചുകൂടാ.

മുന്നില്‍ കാണാതെ വെട്ടിലായി കേന്ദ്രം

മിന്നല്‍സമരങ്ങളുടെ പുതുരൂപങ്ങളിലൂടെയാണു രാഹുല്‍ ഗാന്ധി കേന്ദ്രസര്‍ക്കാരിനെ തുടര്‍ച്ചയായി വെട്ടിലാക്കുന്നത്. നേരത്തെ നീറ്റ് ചോദ്യപേപ്പര്‍ ചോര്‍ച്ചയ്‌ക്കെതിരേ അതീവസുരക്ഷയുള്ള പ്രധാനമന്ത്രിയുടെ ഔദ്യോഗിക വസതിക്കു പുറത്തു മണിക്കൂറുകള്‍ ധര്‍ണ നടത്താന്‍ രാഹുലിനും കൂട്ടര്‍ക്കും കഴിഞ്ഞു. സ്വതന്ത്ര ഭാരതത്തിന്‍റെ ചരിത്രത്തില്‍ ആദ്യമായാണ് അത്തരത്തിലൊരു പ്രതിഷേധം നടന്നത്. ചൊവ്വാഴ്ച തെരഞ്ഞെടുപ്പു കമ്മിഷന്‍ ആസ്ഥാനത്തേക്കു നടത്തിയ എംപിമാരുടെ മാര്‍ച്ച് അവസാനിച്ചുവെന്ന തോന്നിച്ചപ്പോഴായിരുന്നു രാഹുലിന്‍റെ അപ്രതീക്ഷിത നീക്കം. തെരഞ്ഞെടുപ്പു കമ്മിഷനോടു ചേര്‍ന്നുള്ള ആകാശവാണി മന്ദിര വളപ്പിലേക്കുള്ള രാഹുലിന്‍റെ കുതിപ്പ് പൊലിസിനെ സ്തംബ്ധരാക്കി. എട്ടു മണിക്കൂറോളം കഴിഞ്ഞാണ് രാഹുലിനെയും പ്രിയങ്കയെയും ബലമായി നീക്കാന്‍ കഴിഞ്ഞത്.

ഇന്നലെയാകട്ടെ ഇന്ത്യ സഖ്യം എംപിമാരെ ഉച്ചഭക്ഷണത്തിനു ക്ഷണിച്ചപ്പോഴും ഡല്‍ഹി പൊലിസിനും കേന്ദ്രസര്‍ക്കാരും അപകടം മണക്കാനായില്ല. കൊണാട്ട് പ്ലേസിനടുത്ത് ഭക്ഷണം കഴിഞ്ഞ് മൂന്നു മണിയോടെ കോണ്‍ഗ്രസ് അധ്യക്ഷന്‍ മല്ലികാര്‍ജുന്‍ ഖാര്‍ഗെ അടക്കമുള്ള എംപിമാര്‍ മൂന്നു ബസുകളിലായ തിരിച്ചപ്പോള്‍ മാത്രമാണു പൊലിസ് സംശയിച്ചത്. വിന്‍ഡ്‌സര്‍ പ്ലേസ് സര്‍ക്കിളില്‍ ബസുകള്‍ തടഞ്ഞെങ്കിലും രാഹുലും പ്രിയങ്കയും നേരിട്ടിറങ്ങിയതോടെ പൊലിസ് വെട്ടിലായി. രാഹുലിനെ കസ്റ്റഡിയിലെടുത്ത ശേഷം പഞ്ചറായ വാഹനം മണിക്കൂറോളം പ്രധാന റോഡില്‍ കിടന്നുവെന്നതും പൊലിസിനു നാണക്കേടായി. ഇന്നലെ രാത്രി ഏഴു വരെയെങ്കിലും രാഹുലിനെ കൊണ്ടുപോകുന്നതു തടയാന്‍ യൂത്ത് കോണ്‍ഗ്രസ്, എന്‍എസ്‌യു, മഹിളാ കോണ്‍ഗ്രസ് പ്രവര്‍ത്തക്കു കഴിഞ്ഞു.

ആയിരക്കണക്കിനു പൊലിസുകാരെയും കേന്ദ്രസേനാംഗങ്ങളെയും രംഗത്തിറക്കിയിട്ടും രാഹുലും പ്രതിപക്ഷ എംപിമാരും സമരലക്ഷ്യം കണ്ടു. ബിജെപിയിലെയും പൊലിസിലെയും തന്ത്രജ്ഞരുടെ പദ്ധതികളെല്ലാം പൊളിഞ്ഞു.

ഭിന്നിച്ച പ്രതിപക്ഷത്തെ ഒന്നിപ്പിച്ചു

കേരളം ഉള്‍പ്പടെയുള്ള നിയമസഭാ തെരഞ്ഞെടുപ്പുകളില്‍ ഭിന്നിച്ചു നിന്നിരുന്ന പ്രതിപക്ഷത്തെ ഒന്നിപ്പിക്കാന്‍ പുതിയ സമരപരമ്പരകള്‍ക്കു കഴിഞ്ഞു. കേന്ദ്രസര്‍ക്കാരും തെരഞ്ഞെടുപ്പു കമ്മിഷനും ചേര്‍ന്നു വോട്ടര്‍പട്ടികയിലും തെരഞ്ഞെടുപ്പു നടപടികളിലും കൃത്രിമം കാട്ടി ജനവിധികള്‍ അട്ടിമറിക്കുന്നതിനെതിരേ രാജ്യത്താകെ ജനവികാരം ഉണര്‍ത്താനും രാഹുലിന്‍റെ നേതൃത്വത്തില്‍ നിശ്ചയദാര്‍ഢ്യത്തോടെ നടത്തിയ പ്രതിഷേധങ്ങള്‍ക്കു കഴിഞ്ഞു.

Leader Page

എന്തുകൊണ്ട് മിന്നലാക്രമണം?

മിന്നലാക്രമണശൈലിയിലുള്ള സമരം. സ്വാതന്ത്ര‍്യനന്തര ഇന്ത‍്യ കണ്ടുശീലിച്ച സമരരീതികൾ മാറുന്ന അസാധാരണ കാഴ്ചകൾ. 2012ൽ നിർഭയ സംഭവത്തെത്തുടർന്ന് ഡൽഹി കണ്ട വ‍്യത‍്യസ്തമായ സമരത്തിനുശേഷം രാജ‍്യം കാണുന്ന പതിവു വിട്ട സമരം.

പതിറ്റാണ്ടിനുശേഷം ഒറ്റ ലക്ഷ‍്യത്തിൽ പ്രധാന പ്രതിപക്ഷ മുന്നണി നടത്തുന്ന സമര പരമ്പര. എന്തുകൊണ്ട് ഇത്തരം മിന്നലാക്രമണശൈലി? ആദ‍്യ ഉത്തരം പ്രതിപക്ഷസ്വരത്തിന് ചെവികൊടുക്കാത്ത ഭരണകൂടം എന്നതുതന്നെ. മാന‍്യവും ജനാധിപത‍്യപരവും മുൻകൂട്ടി അറിയിക്കുന്നതുമായ സമരങ്ങൾക്കും പ്രതിഷേധങ്ങൾക്കും ഭരണകൂടം പുല്ലുവിലയാണു നൽകുന്നത് എന്നതിൽ ഭരണകക്ഷിക്കുപോലും സംശയമുണ്ടാകില്ല. പ്രതിപക്ഷത്തിന്‍റെ ചോദ‍്യങ്ങൾക്ക് ഉത്തരം നൽകേണ്ടതില്ലെന്നാണല്ലോ ഭരണകക്ഷി നേതാക്കൾ പരസ‍്യമായിത്തന്നെ പറയുന്നത്.

സമരാവേശം ഏറ്റെടുത്ത പൊതുസമൂഹം

എന്തു വിമർശനം ഉന്നയിച്ചാലും സമരത്തിന്‍റെ മുദ്രാവാക‍്യം അതീവഗൗരവമുള്ളതാണെന്ന് പൊതുസമൂഹവും വിലയിരുത്തുന്നുണ്ട്. വോട്ട്കൊള്ളയാണെന്നും നിരവധി വോട്ടർമാരുടെ വോട്ടുകൾ തള്ളുകയും വിദേശികളെപോലും പട്ടികയിൽ ഉൾപ്പെടുത്തുകയും ചെയ്തുവെന്നും തെളിവുകൾ സഹിതം ലോക്സഭയിലെ പ്രതിപക്ഷ നേതാവ് രാഹുൽ ഗാന്ധി വാർത്താസമ്മേളനത്തിൽ ഉന്നയിച്ച ആരോപണങ്ങൾ തെറ്റായിരുന്നെങ്കിൽ എന്തുകൊണ്ട് തെരഞ്ഞെടുപ്പു കമ്മിഷൻ രാഹുലിനെതിരേ നിയമനടപടി സ്വീകരിച്ചില്ല. പിന്നീടും കൂടുതൽ തെളിവുകൾ വന്നപ്പോഴും ഒഴുക്കൻമട്ടിൽ പ്രസ്താവന നൽകി കമ്മിഷൻ തടിതപ്പിക്കൊണ്ടിരുന്നതും ജനങ്ങളുടെ മുന്നിലുണ്ട്.

ഒരു ജനാധിപത‍്യരാജ‍്യത്ത് ഇതാണോ സമരരീതിയെന്ന് ചോദ‍്യമുയരുന്നുണ്ട്. മാത്രമല്ല ജെൻ സി സമരംപോലെ വ‍്യവസ്ഥാപിതമല്ലാത്ത സമരമാർഗത്തിലേക്ക് എന്തുകൊണ്ടാണ് പ്രതിപക്ഷനേതാവടക്കം തിരിയുന്നത് എന്നതും ഏറെ ഗൗരവമുള്ളതാണ്.

പ്രതിപക്ഷത്തെ ഇത്തരം സമരരീതിയിലേക്ക് എത്തിച്ചതിന്‍റെ മുഖ‍്യകാരണക്കാർ ഭരണകക്ഷിയാണ് എന്നുതന്നെ വിലയിരുത്തേണ്ടിവരും. ജന്തർ മന്തർ ഇക്കാലമത്രയും രാജ‍്യതലസ്ഥാനത്തെ പ്രതിഷേധവേദിയാണ്. അവിടം കെട്ടിയടച്ച പൊലിസ് വേറെ എവിടെയാണ് സമരംചെയ്യേണ്ടതെന്ന് പറയുന്നുമില്ല.

അക്രമാസക്തമാകാതെ പ്രതിപക്ഷ സമരം

പ്രതിപക്ഷ സമരം ഒരുതരത്തിലും അക്രമാസക്തമായിരുന്നില്ല എന്നത് കാണാതിരുന്നുകൂടാ. എംപിമാരാണ് സമരത്തിനെത്തുന്നത്. അവരുടെ കൈവശം യാതൊരുവിധ ആയുധങ്ങളുമില്ല. പിന്നെ എന്തിനാണ് ജനാധിപത‍്യരീതിയിലുള്ള പ്രതിഷേധത്തെ ഭരണകൂടം ഇത്രമാത്രം ഭയപ്പെടുന്നത് എന്ന ചോദ‍്യത്തിന് ഇതുവരെ വ‍്യക്തമായ ഉത്തരം നൽകാൻ കേന്ദ്ര ആഭ‍്യന്തര മന്ത്രാലയത്തിന് കഴിഞ്ഞിട്ടില്ല. എംപിമാർ ജന്തർ മന്തറിൽ സമാധാനപരമായി സമരം ചെയ്താൽ എന്താണു കുഴപ്പമെന്ന് സർക്കാരാണ് വ‍്യക്തമാക്കേണ്ടത്. ഈ സമരം വലിയ നിയമലംഘനമാണെങ്കിൽ പ്രതിപക്ഷ നേതാവിനെയും പ്രതിഷേധിക്കുന്ന എംപിമാരെയും എന്തുകൊണ്ട് അറസ്റ്റ് ചെയ്ത് കോടതിയിൽ ഹാജരാക്കി നിയമപരമായ ശിക്ഷ നൽകുന്നില്ല എന്നതിനും പൊലിസ് ഉത്തരം പറയേണ്ടതുണ്ട്.

ചരിത്രയാഥാർഥ്യം മറക്കുന്ന ഭരണകൂടം

ജനാധിപത‍്യത്തിനുമേൽ കൈവയ്ക്കുന്നവർക്ക് ഇന്ത‍്യൻ ജനത മാപ്പു നൽകിയ ചരിത്രമില്ല. ഈ ചരിത്ര യാഥാർഥ‍്യത്തെ ബിജെപിയും പ്രധാനമന്ത്രി നരേന്ദ്ര മോദിയും മറക്കുകയാണെങ്കിൽ കനത്ത വില നൽകേണ്ടിവരും. നീറ്റ് പരീക്ഷാ ക്രമക്കേടിൽ രാജ‍്യത്ത് ഉയർന്നുവന്ന ജെൻ സി പ്രക്ഷോഭം വ‍്യക്തമായ സൂചന നൽകിയതാണ്. എസ്ഐആർ വിഷയത്തിലും യുവപ്രക്ഷോഭകർ മുന്നറിയിപ്പു നൽകിയിട്ടുണ്ട്.

കോക്രോച്ച് ജനതാ പാർട്ടിയുടെ സമരം മുന്നിൽക്കണ്ടായിരിക്കാം രാഹുൽ ഗാന്ധി പ്രകോപനപരമായ മിന്നലാക്രമണ സമരശൈലി സ്വീകരിച്ചിരിക്കുന്നത്. പൊലിസ് പറയുന്നതുപോലെ പ്രതിഷേധസമരം നടത്തുന്ന കാലം അവസാനിച്ചിരിക്കുന്നുവെന്ന് ഭരണകൂടം ഇനിയും തിരിച്ചറിയാത്തതാണ് അദ്ഭുതം.

ഇത്രമാത്രം ആരോപണം നേരിട്ട ഗ‍്യാനേഷ് കുമാറിനെ സംരക്ഷിക്കാൻ ശ്രമിക്കുംതോറും സർക്കാരിന്‍റെ പ്രതിഛായ മോശമായിക്കൊണ്ടേയിരിക്കുമെന്നതാണ് വസ്തുത. പ്രതിപക്ഷത്തിന് കരുത്തു കൂടുകയും ചെയ്യും.
പാർലമെന്‍റിൽ മാത്രമല്ല തെരുവിലും പോരാടാൻ ശക്തിയുണ്ടെന്ന് പ്രതിപക്ഷം തെളിയിച്ചുകഴിഞ്ഞു. ലോകം ഇതെല്ലാം കാണുന്നുണ്ട്.

ജനാധിപത‍്യത്തെ സംരക്ഷിക്കാനുള്ള പ്രക്ഷോഭമെന്നുതന്നെയാണ് ആഗോള മാധ‍്യമങ്ങൾ ഇതിനെ വിലയിരുത്തുന്നതും. അതിനാൽ എത്രയും പെട്ടന്ന് എസ്ഐആർ നടപടികളിൽ വന്ന വീഴ്ച തിരുത്തുന്നതായിരിക്കും പ്രധാനമന്ത്രി നരേന്ദ്ര മോദിക്കും അദ്ദേഹത്തിന്‍റെ സർക്കാരിനും ഗുണകരം. അതിൽ പ്രധാനം ഗ‍്യാനേഷ് കുമാറിനെ മാറ്റുക എന്നതും.

Leader Page

അക്ഷരലോകത്തെ വിസ്മയം

ലോകമെമ്പാടുമുള്ള ദശലക്ഷക്കണക്കിന് വായനക്കാരുടെ മനസ് കീഴടക്കിയ എഴുത്തുകാരനായിരുന്നു കഴിഞ്ഞ ദിവസം അന്തരിച്ച ജഫ്രി ആർച്ചർ (86). ത്രില്ലർ നോവലുകളിലൂടെയും ഉദ്വേഗം നിറഞ്ഞ കഥാപാത്രസൃഷ്‌ടിയിലൂടെയും ലോക സാഹിത്യത്തിൽ അദ്ദേഹം സ്വന്തം ഇടം കണ്ടെത്തുകയായിരുന്നു.

1969ൽ ബ്രിട്ടീഷ് പാർലമെന്‍റിലെ ഏറ്റവും പ്രായം കുറഞ്ഞ എംപിമാരിൽ ഒരാളായി തെരഞ്ഞെടുക്കപ്പെട്ട അദ്ദേഹം കൺസർവേറ്റീവ് പാർട്ടി അംഗമായിരുന്നു. എന്നാൽ, ബിസിനസ് പരാജയത്തെത്തുടർന്ന് സാമ്പത്തിക ബാധ്യതയിൽ അകപ്പെട്ടു. തുടർന്ന് ജീവിതം തിരിച്ചുപിടിക്കാനായി അദ്ദേഹം എഴുത്തിന്‍റെ ലോകത്തേക്കു തിരിഞ്ഞു.

കടബാധ്യതകളിൽനിന്ന് കരകയറാൻ എഴുതിയ ആദ്യ നോവലായ ‘നോട്ട് എ പെന്നി മോർ, നോട്ട് എ പെന്നി ലെസ്’ (1976) വലിയ വിജയമായി. തുടർന്ന് 1979ൽ പുറത്തിറങ്ങിയ ‘കെയിൻ ആൻഡ് ഏബൽ’ എന്ന നോവൽ അദ്ദേഹത്തെ ലോകത്തിലെ ജനപ്രിയ എഴുത്തുകാരുടെ നിരയിലെത്തിച്ചു. ലോകമെമ്പാടും കോടിക്കണക്കിന് കോപ്പികൾ വിറ്റഴിഞ്ഞ കെയിൻ ആൻഡ് ഏബൽ എന്ന മാസ്റ്റർപീസ് നോവലിനു പിന്നാലെ ക്ലിഫ്റ്റൻ ക്രോണിക്കിൾസ് എന്ന ഏഴ് ഭാഗങ്ങളുള്ള പരമ്പര വായനക്കാർക്കിടയിൽ വൻ തരംഗമായി.

ഫസ്റ്റ് അമംഗ് ഈക്വൽസ്, ആസ് ദി ക്രോ ഫ്ലൈസ് തുടങ്ങിയ നോവലുകളും അനേകം ചെറുകഥാ സമാഹാരങ്ങളും അദ്ദേഹത്തിന്‍റേതായിട്ടുണ്ട്.
ജയിൽവാസക്കാലത്തെ അനുഭവങ്ങൾ കോർത്തിണക്കി അദ്ദേഹം എഴുതിയ ‘എ പ്രിസൺ ഡയറി’ ശ്രദ്ധേയമായിരുന്നു.

അദ്ദേഹത്തിന്‍റെ നോവൽ പോലെ നാടകീയതകൾ നിറഞ്ഞതായിരുന്നു ആ ജീവിതവും. രാഷ്‌ട്രീയത്തിൽ തിളങ്ങിനിൽക്കുമ്പോഴും കോടതിയലക്ഷ്യക്കേസിൽ ജയിൽശിക്ഷ അനുഭവിക്കേണ്ടിവന്നു. വീഴ്ചകളിൽനിന്നെല്ലാം അതിശക്തമായി തിരിച്ചുവരാനുള്ള കഴിവ് ഒരു എഴുത്തുകാരൻ എന്ന നിലയിൽ അദ്ദേഹത്തെ കൂടുതൽ പ്രശസ്തനാക്കി.

30 കോടിയിലധികം പുസ്തകങ്ങൾ വിറ്റഴിച്ച, നൂറിലധികം രാജ്യങ്ങളിൽ വായനക്കാരുള്ള ജഫ്രി ആർച്ചർ, ഉദ്വേഗജനകമായ കഥപറച്ചിൽ ശൈലികൊണ്ടാണ് ഓർമിക്കപ്പെടുന്നത്. മരണത്തിന് തലേന്നുവരെ എഴുത്തിൽ സജീവമായിരുന്ന അദ്ദേഹത്തിന്‍റെ അവസാന നോവലായ ‘ആദം ആൻഡ് ഈവ്’ പ്രകാശിപ്പിക്കുന്നതിനു തൊട്ടുമുമ്പാണ് വിടവാങ്ങൽ.

Leader Page

മുന്നാണ്ടുകൾക്കിപ്പുറവും ഉണങ്ങാത്ത മുറിവുകൾ

പശ്ചിമേഷ്യയുടെ ഭൗമരാഷ്‌ട്രീയ ചരിത്രത്തെ പാടെ തിരുത്തിയെഴുതുകയും മാനവരാശിയുടെ മനഃസാക്ഷിയെ നടുക്കുകയും ചെയ്ത ആ കറുത്ത ദിനത്തിന് ഇന്ന് മൂന്നു വർഷം തികയുകയാണ്. സമയം മുന്നോട്ടു പോയെങ്കിലും 2023 ഒക്‌ടോബർ ഏഴിന്‍റെ പ്രഭാതത്തിൽ വിതയ്ക്കപ്പെട്ട ഭീതിയും വിനാശവും അത്രമേൽ തീവ്രമായി ഇന്നും ലോകത്തെ വേട്ടയാടുന്നു.

മനുഷ്യത്വം മരവിച്ചുപോയ ആ ദിനം അവശേഷിപ്പിച്ചത് മായാത്ത വേദനകളും ഉണങ്ങാത്ത മുറിവുകളും മാത്രമാണ്. ആ പുലരിയിൽ ഗാസയിൽനിന്ന് ആയിരക്കണക്കിന് റോക്കറ്റുകളാണ് ഇസ്രയേൽ അതിർത്തി കടന്നെത്തിയത്. ‘സുപ്പർനോവ’ മ്യൂസിക് ഫെസ്റ്റിവലിൽ സംഗീതത്തിൽ ലയിച്ചിരുന്ന ചെറുപ്പക്കാരുടെ ഇടയിലേക്കും തെക്കൻ ഇസ്രയേലിലെ ശാന്തമായ ഗ്രാമങ്ങളിലേക്കും ഇരച്ചുകയറിയ ഹമാസ് ഭീകരർ കാട്ടിക്കൂട്ടിയത് വിവരണാതീതമായ ക്രൂരതകളാണ്.

പിഞ്ചുകുഞ്ഞുങ്ങളും സ്ത്രീകളും വയോധികരുമടക്കം 1200ഓളം നിരപരാധികളുടെ ജീവനാണ് മണിക്കൂറുകൾക്കുള്ളിൽ കവർന്നെടുക്കപ്പെട്ടത്. 250ലേറെ മനുഷ്യരെ ബന്ദികളാക്കി ഗാസയിലെ ഇരുണ്ട തുരങ്കങ്ങളിലേക്ക് വലിച്ചിഴച്ചുകൊണ്ടുപോയി. രണ്ടാം ലോകയുദ്ധത്തിനും ഹോളോകോസ്റ്റിനും ശേഷം യഹൂദ ജനത നേരിട്ട ഏറ്റവും ക്രൂരവും ദാരുണവുമായ വംശഹത്യയായി അതു മാറി.

തരിപ്പണമായ ഗാസയും ചോരപ്പുഴയായ പശ്ചിമേഷ്യയും

ഒക്‌ടോബർ ഏഴിന്‍റെ മുറിവുകൾക്ക് മറുപടിയായി ഇസ്രയേൽ പ്രഖ്യാപിച്ച പൂർണമായ സൈനിക തിരിച്ചടി പശ്ചിമേഷ്യയെ കൊടുങ്കാറ്റിലേക്കാണു തള്ളിവിട്ടത്. ഹമാസിനെ നിർവീര്യമാക്കുക, ബന്ദികളെ മോചിപ്പിക്കുക എന്നീ ലക്ഷ്യങ്ങളോടെ ആരംഭിച്ച ഇസ്രയേൽ സൈനികനീക്കം ഗാസയെ തരിപ്പണമാക്കി. ഇസ്രയേലിന്‍റെ തീവ്രമായ സൈനിക നടപടികളിൽ ഇതുവരെ ഹമാസ് ഭീകരരുൾപ്പടെ 74,000ത്തിലധികം പലസ്തീനികളാണു കൊല്ലപ്പെട്ടത്. കോൺക്രീറ്റ് അവശിഷ്‌ടങ്ങൾക്കടിയിൽ അമർന്നത് ലക്ഷക്കണക്കിനു മനുഷ്യരുടെ ജീവനും പ്രതീക്ഷകളുമാണ്.

അതിർത്തി കടന്നെത്തിയ 6,000 ഹമാസ് ഭീകരരിൽ 4,000 പേരെയും വധിച്ചതായും ലബനനിലെ ഹിസ്ബുള്ളയുടെ റോക്കറ്റ് ശേഷിയുടെ 80 ശതമാനവും തകർത്തതായും ഇസ്രേലി പ്രതിരോധ സേന അവകാശപ്പെടുമ്പോഴും വെടിയൊച്ചകൾക്ക് അന്ത്യമായിട്ടില്ല. അവശേഷിക്കുന്ന ഹമാസ് ഭീകരർ പ്രകോപനം സൃഷ്‌ടിച്ചുകൊണ്ടിരിക്കുകയാണ്. അന്തഃഛിദ്രം മാത്രം ലക്ഷ്യമിടുന്ന ചില നിഴൽസംഘടനകൾ ഈ അവസരം നന്നായി ഉപയോഗപ്പെടുത്തുന്നു. സംഘർഷത്തിന് ഏറെക്കുറെ ശമനമായെങ്കിലും ഏറ്റവുമൊടുവിലുണ്ടായ ഫ്ലൈ ദുബായ് വിമാന ആക്രമണം പോലുള്ള സംഭവങ്ങൾ സമാധാനത്തിന് വീണ്ടും വെല്ലുവിളിയാണ്.

Leader Page

ജീവിതത്തിന് അർഥം കണ്ടെത്താൻ

ഓസ്ട്രിയൻ ന്യൂറോളജിസ്റ്റും സൈക്യാട്രിസ്റ്റുമായിരുന്ന വിക്‌ടർ ഫ്രാങ്ക് (1905-1997), ലോകപ്രശസ്തനായ മനഃശാസ്ത്രജ്ഞനായ സിഗ്‌മണ്ട് ഫ്രോയിഡുമായി ആശയവിനിമയം നടത്തിയിട്ടുണ്ട്. മനുഷ്യൻ സന്തോഷത്തെയാണ് പ്രധാനമായി കാണുന്നതെന്നും അതിനുവേണ്ടി ജീവിക്കുന്നതാണ് അവന്‍റെ ജന്മവാസനയെന്നും ഫ്രോയിഡ് വാദിച്ചു. എന്നാൽ, മനുഷ്യന്‍റെ വിജയം ജീവിതത്തിനു അർഥം കണ്ടെത്തുന്നതിലാണെന്നു ഫ്രാങ്ക് അഭിപ്രായപ്പെട്ടു. യെസ് ടു ലൈഫ്, മാൻസ് സെർച്ച് ഫോർ മീനിംഗ് എന്നീ പുസ്തകങ്ങളിൽ ഫ്രാങ്കിന്‍റെ മനഃശാസ്ത്രപരവും താത്വികവുമായ ആശയങ്ങൾ അടങ്ങിയിരിക്കുന്നു.

1942-1945 കാലത്ത് ഫ്രാങ്കും കുടുംബവും ഹിറ്റ്‌ലറുടെ തടങ്കൽപാളയത്തിലായിരുന്നു. ജീവൻ നിലനിർത്താനാകുമെന്ന് ഒരു പ്രതീക്ഷയുമില്ലായിരുന്നു. തടവറയിൽനിന്ന് രക്ഷപ്പെടുക പ്രയാസമാണല്ലോ. അക്കാലത്ത് അദ്ദേഹത്തിന് മാതാപിതാക്കളെയും ഭാര്യയെയും നഷ്‌ടപ്പെട്ടു. ആ പ്രയാസമേറിയ ഇരുണ്ട കാലത്ത് മനസിൽ എങ്ങനെയാണ് ജീവിതത്തിന്‍റെ പ്രതീക്ഷയുടെ തിരിനാളം അങ്കുരിച്ചതെന്ന് അദ്ദേഹം വിവരിക്കുന്നുണ്ട്. എത്ര വലിയ യാതനയിലും നാം ജീവിതത്തിന് ഒരു അർഥമുണ്ടെന്ന കാര്യം കൈവിടരുത്. ഒരു ഉദ്ദേശ്യമുണ്ടായാൽ പുറത്തുവീഴുന്ന ചാട്ടവാറടികളെ അതിജീവിക്കാനാവും.

1946ൽ പുറത്തുവന്ന ‘മാൻസ് സെർച്ച് ഫോർ മീനിംഗ്’ എന്ന കൃതി കോൺസെൻട്രേഷൻ ക്യാമ്പിലെ പീഡാനുഭവങ്ങൾ രേഖപ്പെടുത്തുന്നു. സന്തോഷം തേടുന്നതല്ല, അർഥം അന്വേഷിക്കുന്നതാണ് ജീവിതത്തിന്‍റെ നിലനിൽപ്പിന് പ്രധാനമെന്ന് അദ്ദേഹം പറയുന്നു. യാതനയുടെ കാലത്ത് ഈ ജീവിതലക്ഷ്യം നഷ്‌ടപ്പെടുത്തരുത്. ചുറ്റുപാടുകളിൽനിന്ന് നാം ഒരു ലക്ഷ്യം കണ്ടെത്തണം. അസഹനീയമായ കഷ്‌ടപ്പാടുകളില്‍ ജീവിക്കുമ്പോൾ മനസ് മടുക്കുന്നതിനുപകരം വ്യക്തിപരമായ അനുഭവത്തിന്‍റെ മൂല്യവും അതിജീവിക്കാനുള്ള ശക്തിയുമാണ് തിരയേണ്ടത്. അവശർ അവശതയിൽ ഫോക്കസ് ചെയ്യരുത്.

തന്‍റെ മനഃശാസ്ത്രപരമായ സമീപനത്തെ അദ്ദേഹം ലോഗോതെറാപ്പി എന്നാണു വിളിച്ചത്. ജീവിതത്തിന്‍റെ അർഥം കണ്ടെത്തുകയാണ് ഇതുകൊണ്ട് ഉദ്ദേശിക്കുന്നത്. ജീവിതത്തിൽ എന്തു തെരഞ്ഞെടുക്കണമെന്ന് നാം തീരുമാനിക്കണം. ജീവിതത്തിന്‍റെ അർഥത്തെ സ്വയം അനുഭവിച്ചറിയണം. അദ്ദേഹം എഴുതുന്നു: വിജയിക്കുക എന്നതല്ല ലക്ഷ്യമായി കാണേണ്ടത്. ഒരു ലക്ഷ്യത്തെ മാത്രം കേന്ദ്രീകരിച്ചാൽ അതു നഷ്‌ടപ്പെടും. സന്തോഷം പോലെയാണ് വിജയവും. അതിനെ പിന്തുടരരുത്, നഷ്‌ടപ്പെടും. അത് സ്വാഭാവികമായി സംഭവിക്കേണ്ടതാണ്. അത് ഒരു പാർശ്വഫലമായി വരേണ്ടതാണ്. വിജയത്തിനുവേണ്ടി പോരാടാതെ അത് സംഭവിക്കണം. നിങ്ങളോട് മനഃസാക്ഷി എന്താണു പറയുന്നതെന്ന് ശ്രദ്ധിക്കണം. അതു നിർവഹിക്കാൻ പരമാവധി ശക്തി ഉപയോഗിക്കുക. അതു നിങ്ങൾക്ക് ദീർഘകാലാടിസ്ഥാനത്തിൽ ഫലം തരുന്നു. വിജയം നിങ്ങളുടെയടുത്തേക്കു വരും. കാരണം, നിങ്ങൾ അതിനെക്കുറിച്ച് ചിന്തിച്ചിരുന്നില്ലല്ലോ.

നമ്മൾ ജീവിതത്തിന് അർഥം നൽകുന്നത് പ്രവൃത്തികളിലൂടെ മാത്രമല്ല, സ്നേഹത്തിലൂടെയും പിന്നീട് പ്രയാസങ്ങളിലൂടെയുമാണ്. മനുഷ്യർ തന്‍റെ സാധ്യതകളെ മുൻനിർത്തി ഒരു പ്രശ്നത്തെ എങ്ങനെ അഭിമുഖീകരിക്കുന്നു എന്ന വിഷയമുണ്ട്. അവന്‍റെ/അവളുടെ പ്രവർത്തനങ്ങളെ, സ്നേഹിക്കാനുള്ള കഴിവിനെ അത് എങ്ങനെ ബാധിക്കുന്നു എന്നത് ഗൗരവമേറിയതാണ്. ഈ നിയന്ത്രണങ്ങൾക്കകത്ത് അവനും അവളും എങ്ങനെ പെരുമാറുന്നു, ഈ ചുറ്റുപാടിൽ അവർ സ്വന്തം വിഷമങ്ങളെ എങ്ങനെ ഉൾക്കൊള്ളുന്നു എന്നു നോക്കുക. ഇതിലെല്ലാം അവരുടെ മൂല്യം കാണാം.

ജീവിതത്തില്‍ സന്തോഷത്തിനാണ് ഒന്നാം സ്ഥാനമെന്ന് കരുതുന്നവരുണ്ട്. രാജ്യങ്ങള്‍പോലും ഇന്ന് ആളുകളുടെ ആളോഹരി ആനന്ദമാണ് പരിശോധിക്കുന്നത്. ലൗകികമായ അര്‍ഥത്തിലല്ലെങ്കില്‍പോലും പ്രപഞ്ചസാരം തേടിയ ഋഷികളും ആനന്ദത്തെക്കുറിച്ച് പറയുന്നുണ്ട്. സകല ജീവികളും ആനന്ദത്തിനായി ഉത്സുകരാകുന്നു. നേരിട്ട് ആനന്ദം സാക്ഷാത്കരിക്കാന്‍ പ്രകൃതിയില്‍തന്നെ പരിമിതികള്‍ ഉള്ളതുകൊണ്ട് മനുഷ്യര്‍ അവലംബിത മാര്‍ഗങ്ങള്‍ തേടുന്നു. കലാരൂപങ്ങളില്‍നിന്നു കിട്ടുന്നത് ഈ അനുഭവമാണ്.

പരോക്ഷമായി ആനന്ദത്തിന്‍റെ സാധ്യമായ ഒരിടമാണത്. അതിന്‍റെയര്‍ഥം ജൈവലോകത്തിന് ആനന്ദം നിഷിദ്ധമല്ലെന്നാണ്. ഒരു ശലഭം വെറുതെ പറക്കുന്നു; എത്രയോ ആനന്ദകരമായ കാഴ്ചയാണത്. പ്രപഞ്ചലീലയുടെ സരളമായ ആനന്ദാനുഭവമാണത്. ശലഭവും ഇതുതന്നെ നേടുന്നു. യാതൊന്നിന്‍റെയും ബൗദ്ധികമോ സദാചാരപരമോ സാമൂഹികമോ ആയിട്ടുള്ള പദാവലിയുടെ ഭാരമില്ലാതെതന്നെ അവയ്ക്ക് പറക്കാനാകുന്നു. ഭൂമിയിലെ ജീവികളുടെ സഹജമായ ആത്മീയതയാണിത്.

അതേസമയം, ഈ ആനന്ദം പലപ്പോഴും കൈയെത്തും ദൂരത്തിനും അപ്പുറമാണ്. ആനന്ദം എങ്ങനെയാണ് നഷ്‌ടമാകുന്നത്? നമ്മുടെ കൈയില്‍ സുലഭമായ ആനന്ദമുണ്ട്. എന്നാല്‍, അത് നമുക്കു നഷ്‌ടപ്പെടുന്നു. ഇതല്ലേ സത്യം? നഷ്‌ടപ്പെടാതിരിക്കാന്‍ എന്താണു ചെയ്യേണ്ടത് എന്ന ചോദ്യം എപ്പോഴും ഉയരുന്നു. പല ചിന്തകരും മനഃശാസ്ത്രജ്ഞരും എപ്പോഴും ഇതേക്കുറിച്ചുള്ള പ്രമാണങ്ങളും കണ്ടെത്തലുകളും ആവിഷ്‌കരിക്കുകയാണ്.

ജീവിതത്തെ ജീവിക്കാന്‍ കൊള്ളാതാക്കുന്നതിനെതിരായി ചിലത് ചെയ്യേണ്ടതുണ്ട്. തടങ്കല്‍പ്പാളയങ്ങളില്‍ കഴിയുന്നവര്‍ പൊതുവേ നിരാശയില്‍ മുങ്ങിത്താഴുകയാണു പതിവ്. അവിടെനിന്ന് ക്ഷതമേല്‍ക്കാതെ, ജീവിതത്തിന്‍റെ വിഹായസിലേക്ക് തിരിച്ചെത്താന്‍ കഷ്‌ടപ്പെടണം. ഫ്രാങ്ക് അതിന്‍റെ നല്ല ഉദാഹരണമാണ്. അദ്ദേഹം പറയുന്ന പ്രധാനപ്പെട്ട ഒരു കാര്യം, നമ്മുടെ ഭാവിയെ സര്‍ഗാത്മകമായി നവീകരിക്കുന്നതിന് തടസമാകുന്ന തരത്തില്‍ ഒരു ചിന്തയ്ക്ക് അടിമപ്പെടരുതെന്നാണ്. സ്വാമി വിവേകാനന്ദന്‍ പറഞ്ഞതുപോലെ എഴുന്നേല്‍ക്കൂ, ജാഗ്രതയോടെ ഇരിക്കൂ എന്ന ആശയം നമുക്ക് ഓര്‍മിക്കാവുന്നതാണ്. ഉണര്‍ന്നില്ലെങ്കില്‍ നാം സ്വന്തം നരകത്തിലേക്കു ചെന്നുവീഴും.

ജീവിതത്തില്‍ കുറെയൊക്കെ പുരോഗതി നേടിയെന്നു വിചാരിക്കുക. എന്നാല്‍, അതുകൊണ്ട് വിജയം നിലനില്‍ക്കില്ല. അതിനെ പുനര്‍ഭാവനകളിലൂടെ മുന്നോട്ട് നയിക്കണം. അദ്ദേഹം എഴുതുന്നു: “നമ്മള്‍ നേരിട്ട യാതനകളെ ഉള്‍ക്കൊള്ളാന്‍ നമുക്കു കഴിയേണ്ടതുണ്ട്. മഹാനായ ദസ്തയേവ്‌സ്‌കി ഇതു പറഞ്ഞിട്ടുണ്ട്. നമ്മുടെ യാതനകളെ ഉള്ളില്‍ താങ്ങാന്‍ കഴിയുകയാണെങ്കില്‍ അത് വലിയൊരു പുരോഗതിയാണ്. ഇത് ആത്മീയമായ സ്വാതന്ത്ര്യമാണ്. ഇത് എങ്ങോട്ടും എടുത്തുമാറ്റാനാവാത്തതാണ്. ഇത് ജീവിതത്തിന് അര്‍ഥമുണ്ടാക്കുന്നു.’’

SPACE FOR ADVERTISEMENT

21

E Paper

DeepikaE-Paper

NEWS

SECTIONS

FEATURED

PUBLICATIONS

Important Links

Follow

NEWS

SECTIONS

FEATURED

PUBLICATIONS

Important Links

Follow

Leader Page

യൂ​റോ​പ്പി​നെ അ​സ്വ​സ്ഥ​മാ​ക്കു​ന്ന ജ​ന​രോ​ഷം

റ​​​​ബ​​​​ർ ഉ​​​​ത്​​​​പാ​​​​ദ​​​​ക​​​​നെ കേ​​​​ന്ദ്ര​​​​സ്ഥാ​​​​ന​​​​ത്ത് എത്തി​​​​ക്കു​​​​ക

ആൽഗയും മനുഷ്യ മസ്തിഷ്കവും

ബിജെപിക്കും ഇന്ത്യ മുന്നണിക്കും ഒരുപോലെ നിർണായകം; യുപിയിൽ ഇക്കുറി തീപാറും

ജനാധിപത്യ സംരക്ഷണ സമരങ്ങളും ഭാവി പ്രതീക്ഷയും

വിവരാവകാശം ജനാധിപത്യ പോരാട്ടങ്ങളുടെ കരുത്ത്

തേ​നി​സൈ തെ​ൻ​ട്ര​ലായി ദേവ

മലയോരത്തിന് ചിന്നക്കനാൽ ചൂണ്ടുപലക

ഇന്ത്യൻ യുവത്വം പ്രതിസന്ധികളിലൂടെ

ഇന്ന് ലോക ഭക്ഷ്യദിനം: ആ​ഗോ​ള ഭ​ക്ഷ്യ പ്ര​തി​സ​ന്ധി പ​ടി​വാ​തി​ൽ​ക്ക​ൽ

ബ്രെ​ക്സി​റ്റ് അ​ബ​ദ്ധം; തി​രി​ച്ചു​പോ​ക്കിലാ​ണ് ബ്രി​ട്ട​ന്‍റെ ഭാ​വി

ഓ​​​​​ർ​​​​​മ​​​ക​​​​​ളി​​​​​ൽ മാ​​​​​യാ​​​​​തെ... ചെറുവയൽ രാമേട്ടൻ

അതിവേഗം മൂലമുള്ള അപകടമരണം കൊലപാതകംതന്നെ

ഹിറ്റ്‌ലറെ ഭയപ്പെടുത്തിയ സിംഹഗർജനം

വൃ​​​​​ദ്ധ​​​​​നും ക​​​​​ട​​​​​ലും

അരാജകത്വമോ ജനാധിപത്യമോ?

ഇരുളിലേക്ക്..?

ജ​നാ​ധി​പ​ത്യം ത​ട​വ​റ​യി​ലാ​കു​ന്ന തെ​ര​ഞ്ഞെ​ടു​പ്പു​ക​ൾ

മ​ദ്രാ​സ് ഹൈ​ക്കോ​ട​തി​യു​ടെ എഫ്സിആർഎ വി​ധി ഉയർത്തുന്ന ഭ​ര​ണ​ഘ​ട​നാ​പ​ര​മാ​യ ചോദ്യങ്ങൾ

ഗാന്ധിയൻ വഴിയിലെ സമാധാന നൊബേല്‍

കാവുകാട്ടുപിതാവ് മനുഷ്യത്വത്തിന്‍റെയും മതമൈത്രിയുടെയും ‎മാടപ്രാവ്

മറക്കാനാകില്ല, ഈ പരുക്കനെ

ഇന്ത്യയും യുഎസും അകലുന്നു

അതിരുകൾ വകവയ്ക്കാത്ത ധീരത

സമരാഗ്നിയില്‍ ഉരുകി രാജ്യം

എന്തുകൊണ്ട് മി​ന്ന​ലാ​ക്ര​മ​ണം?

അ​ക്ഷ​ര​ലോ​ക​ത്തെ വി​സ്മ​യം

മുന്നാണ്ടുകൾക്കിപ്പുറവും ഉണങ്ങാത്ത മുറിവുകൾ

ജീ​വി​ത​ത്തി​ന് അ​ർ​ഥം ക​ണ്ടെ​ത്താ​ൻ

LOAD MORE

Latest News

ഡൽഹിയിൽ യുഎസ് എംബസിക്ക് മുന്നിൽ യൂത്ത് കോൺ​ഗ്രസിന്റെ മിന്നൽ സമരം

അട്ടപ്പാടിയിൽ വീണ്ടും നവജാത ശിശു മരിച്ചു

വന്ദേഭാരത് ട്രെയിൻ തട്ടി വിദ്യാർഥിനി മരിച്ചു

പി​ണ​റാ​യി​യെ കേ​സി​ൽനി​ന്നു ര​ക്ഷി​ക്കാ​ൻ മു​ഖ്യ​മ​ന്ത്രി ശ്ര​മി​ക്കു​ന്നു: രാ​ജീ​വ് ച​ന്ദ്ര​ശേ​ഖ​ർ

ഓണ്‍ലൈന്‍ ജോലി വാഗ്ദാനം ചെയ്ത് പണം തട്ടിയ കേസിൽ ഒരാൾ കൂടി അറസ്റ്റിൽ

ജർമനിയിലെ തീപിടിത്തത്തിൽ മരിച്ച മലയാളികളുടെ മൃതദേഹം വെള്ളിയാഴ്ച നാട്ടിലേക്ക് എത്തിക്കും

ഒടുവിൽ ജാമ്യം: സി​ജെ​പി നേ​താ​ക്ക​ളാ​യ സൗ​ര​വ് ദാ​സും അ​ശു​തോ​ഷ് റാങ്ക​യും ജയിൽ മോ​ചി​ത​രാ​കും

എച്ച്ഡിഎഫ്സി ബാങ്കിൽ നിന്ന് നിർണായക വിവരങ്ങൾ ചോർത്തി; മുതിർന്ന ഉദ്യോഗസ്ഥർക്കെതിരേ അന്വേഷണം

കെ​പി​സി​സി അ​ധ്യ​ക്ഷ സ്ഥാ​ന​ത്തു​നി​ന്ന് മാ​റ്റി​യ​തി​ലെ അ​മ​ർ​ഷം പരസ്യമാക്കി കെ. ​സു​ധാ​ക​ര​ൻ

സി​ജെ​പി നേ​താ​ക്ക​ളു​ടെ ജു​ഡീ​ഷ്യ​ൽ ക​സ്റ്റ​ഡി: ഹ​ർ​ജി വി​ധി പ​റ​യാ​ൻ മാ​റ്റി ഡ​ൽ​ഹി കോ​ട​തി

ആഗ്രഹങ്ങൾക്കു ദൂരപരിധിയില്ല; 2,390 കി.മീറ്റർ നടന്നെത്തിയ ആരാധകനെ നെഞ്ചോടു ചേർത്ത് ഹാർദിക് പാണ്ഡ്യ

തൃശൂർ പൂരം അട്ടിമറി കേസ്: ക്രൈംബ്രാഞ്ച് അന്വേഷണ റിപ്പോർട്ട് ഡിജിപിക്ക് കൈമാറി

വീണയും സിപിഎമ്മും മാപ്പ് പറയണം: കെഎസ്‌യു പ്രവർത്തകരെ ജയിലിലിട്ടത് രാഷ്ട്രീയ പ്രതികാരമെന്ന് അബിൻ വർക്കി

രാ​ഹു​ൽ ഗാ​ന്ധി​യു​ടെ നേ​തൃ​ത്വ​ത്തി​ൽ പി​ണ​റാ​യി​യെ സ​ഹാ​യി​ച്ചു; ആ​രോ​പ​ണ​വു​മാ​യി ഷോ​ൺ ജോ​ർ​ജ്

രാ​മാ​യ​ണ​യ്ക്ക് പ​ശ്ചി​മ ബം​ഗാ​ളി​ൽ നി​കു​തി ഒ​ഴി​വാ​ക്കു​മെ​ന്ന് സു​വേ​ന്ദു അ​ധി​കാ​രി

ശനിയാഴ്ചത്തെ ഹര്‍ത്താലിൽ മാറ്റമില്ലെന്ന് സിപിഎം

ചൂടിനു മുന്നിൽ മുട്ടുകുത്തി വൃക്ഷരാജാക്കന്മാർ; ആയിരമാണ്ടു പിന്നിട്ട റെഡ്‌വുഡുകളുടെ ഭാവി എന്ത്?

പാ​ക്കി​സ്ഥാ​നു​മാ​യു​ള്ള ബ​ന്ധം ഇ​ന്ത്യ​യു​മാ​യു​ള്ള സൗ​ഹൃ​ദ​ത്തെ ബാ​ധി​ക്കി​ല്ല: മാ​ർ​ക്കോ റൂ​ബി​യോ

ആനവണ്ടിയിൽ ഉല്ലാസ‍യാത്ര പോകാം; വിദ്യാർഥികൾക്ക് കെഎസ്ആർടിസിയുടെ വിനോദയാത്രാ പാക്കേജ്

നി​ർ​മാ​ണ​ത്തി​ലി​രു​ന്ന കെ​ട്ടി​ട​ത്തി​ൽ സ്ഫോ​ട​നം; ര​ണ്ട് തൊ​ഴി​ലാ​ളി​ക​ൾ​ക്ക് പ​രി​ക്ക്

ഗൂ​ഗി​ൾ ക്ലൗ​ഡ് ത​ക​രാ​ർ; യു​കെ​യി​ൽ ബാ​ങ്ക് ഇ​ട​പാ​ടു​ക​ളും ഓ​ൺ​ലൈ​ൻ സേ​വ​ന​ങ്ങ​ളും സ്തം​ഭി​ച്ചു

വീ​ടി​നു​ള്ളി​ൽ ദ​മ്പ​തി​ക​ൾ മ​രി​ച്ച നി​ല​യി​ൽ

അ​ന്തി​ക്കാ​ട് ക​ഞ്ചാ​വും എം​ഡി​എം​എ​യു​മാ​യി സ​ഹോ​ദ​ര​ങ്ങ​ൾ പി​ടി​യി​ൽ

ജിയോ ഐപിഒ: ആവേശത്തോടെ ആദ്യമണിക്കൂറുകൾ

ന്യൂനമർദം വരുന്നു; അതിശക്തമായ മഴയ്ക്ക് സാധ്യത, 10 ജില്ലകളിൽ മുന്നറിയിപ്പ്

CATEGORIES

FEATURING

IMPORTANT LINKS

FOLLOW US

📰 Subscribe to E-Paper

CATEGORIES

FEATURING

RASHTRA DEEPIKA LTD

Deepika
E-Paper

യൂറോപ്പിനെ അസ്വസ്ഥമാക്കുന്ന ജനരോഷം

റബർ ഉത്പാദകനെ കേന്ദ്രസ്ഥാനത്ത് എത്തിക്കുക

തേനിസൈ തെൻട്രലായി ദേവ

ഇന്ന് ലോക ഭക്ഷ്യദിനം: ആഗോള ഭക്ഷ്യ പ്രതിസന്ധി പടിവാതിൽക്കൽ

ബ്രെക്സിറ്റ് അബദ്ധം; തിരിച്ചുപോക്കിലാണ് ബ്രിട്ടന്‍റെ ഭാവി

ഓർമകളിൽ മായാതെ... ചെറുവയൽ രാമേട്ടൻ

വൃദ്ധനും കടലും

ജനാധിപത്യം തടവറയിലാകുന്ന തെരഞ്ഞെടുപ്പുകൾ

മദ്രാസ് ഹൈക്കോടതിയുടെ എഫ്സിആർഎ വിധി ഉയർത്തുന്ന ഭരണഘടനാപരമായ ചോദ്യങ്ങൾ

എന്തുകൊണ്ട് മിന്നലാക്രമണം?

അക്ഷരലോകത്തെ വിസ്മയം

ജീവിതത്തിന് അർഥം കണ്ടെത്താൻ

ഡൽഹിയിൽ യുഎസ് എംബസിക്ക് മുന്നിൽ യൂത്ത് കോൺഗ്രസിന്റെ മിന്നൽ സമരം

പിണറായിയെ കേസിൽനിന്നു രക്ഷിക്കാൻ മുഖ്യമന്ത്രി ശ്രമിക്കുന്നു: രാജീവ് ചന്ദ്രശേഖർ

ഒടുവിൽ ജാമ്യം: സിജെപി നേതാക്കളായ സൗരവ് ദാസും അശുതോഷ് റാങ്കയും ജയിൽ മോചിതരാകും

കെപിസിസി അധ്യക്ഷ സ്ഥാനത്തുനിന്ന് മാറ്റിയതിലെ അമർഷം പരസ്യമാക്കി കെ. സുധാകരൻ

സിജെപി നേതാക്കളുടെ ജുഡീഷ്യൽ കസ്റ്റഡി: ഹർജി വിധി പറയാൻ മാറ്റി ഡൽഹി കോടതി

രാഹുൽ ഗാന്ധിയുടെ നേതൃത്വത്തിൽ പിണറായിയെ സഹായിച്ചു; ആരോപണവുമായി ഷോൺ ജോർജ്

രാമായണയ്ക്ക് പശ്ചിമ ബംഗാളിൽ നികുതി ഒഴിവാക്കുമെന്ന് സുവേന്ദു അധികാരി

പാക്കിസ്ഥാനുമായുള്ള ബന്ധം ഇന്ത്യയുമായുള്ള സൗഹൃദത്തെ ബാധിക്കില്ല: മാർക്കോ റൂബിയോ

നിർമാണത്തിലിരുന്ന കെട്ടിടത്തിൽ സ്ഫോടനം; രണ്ട് തൊഴിലാളികൾക്ക് പരിക്ക്

ഗൂഗിൾ ക്ലൗഡ് തകരാർ; യുകെയിൽ ബാങ്ക് ഇടപാടുകളും ഓൺലൈൻ സേവനങ്ങളും സ്തംഭിച്ചു

വീടിനുള്ളിൽ ദമ്പതികൾ മരിച്ച നിലയിൽ

അന്തിക്കാട് കഞ്ചാവും എംഡിഎംഎയുമായി സഹോദരങ്ങൾ പിടിയിൽ