Deepika
ADVERTISEMENT
Leader Page
ദാരിദ്ര്യവും ദാമ്പത്യതകർച്ചയും കാരണം കടുത്ത വിഷാദരോഗത്തിന് അടിമപ്പെടുകയും ആത്മഹത്യയെക്കുറിച്ചുവരെ ചിന്തിക്കുകയും ചെയ്ത ഒരു കാലമുണ്ടായിരുന്നു ജെ.കെ. റൗളിംഗിന്. എന്നാൽ, തന്‍റെ മാനസിക തകർച്ചകളെ അക്ഷരങ്ങളിലേക്ക് ആവാഹിച്ചാണ് അവർ ‘ഹാരി പോട്ടർ’ എന്ന അദ്ഭുതലോകം സൃഷ്ടിച്ച് ലോകത്തെ ഏറ്റവും സ്വാധീനമുള്ള എഴുത്തുകാരിയായത്.
ഇത്തരം യഥാർഥ അതിജീവന അനുഭവങ്ങൾ ഒരുപാടു പേരെ ജീവിതത്തിലേക്ക് തിരികെയെത്തിച്ചിട്ടുണ്ട്. ലോക മാനസികാരോഗ്യ ഫെഡറേഷന്‍റെ ഈ വർഷത്തെ പ്രമേയംതന്നെ ‘ജീവിതാനുഭവങ്ങളുടെ ശബ്ദം: യഥാർഥ ശബ്ദങ്ങൾ, യഥാർഥ മാറ്റങ്ങൾ’ എന്നതാണ്. മനുഷ്യർ നേരിടുന്ന യഥാർഥ പ്രയാസങ്ങൾക്ക് കാതോർക്കാനുള്ള ആഹ്വാനമാണിത്.
ഓഫിസിലെ കസേരയിലിരുന്ന് കൈകൾ വിറയ്ക്കുന്നത് മറയ്ക്കാൻ ശ്രമിക്കുന്ന മുപ്പതുകാരൻ, അകാരണമായ ഭയത്താൽ ഉറക്കം നഷ്ടപ്പെടുന്ന വിദ്യാർഥികൾ, വിഷാദത്തിന്‍റെ കറുത്ത തടവറയിൽ അകപ്പെട്ടുപോകുന്ന വീട്ടമ്മമാർ, ജീവിതത്തിന്‍റെ വെല്ലുവിളികളെ നേരിടാൻ കഴിയാതെ നിരാശയുടെ പിടിയിൽ കഴിയുന്ന മധ്യവയസ്കർ - ഇത്തരത്തിലുള്ള വേദനയുടെ വ്യത്യസ്ത മുഖങ്ങളാണ് അനുദിനവും നാം കണ്ടുവരുന്നത്.
എന്നാൽ, അവരെയെല്ലാം ഒരുപോലെ അലട്ടുന്നത് ‘എന്തുകൊണ്ട് എനിക്കു മാത്രം ഇങ്ങനെ സംഭവിക്കുന്നു?’ എന്ന ഒറ്റപ്പെടലിന്‍റെ ചിന്തയാണ്. അതുകൊണ്ടുതന്നെ, മാനസികാരോഗ്യത്തിന്‍റെ പ്രാധാന്യത്തെക്കുറിച്ച് കൃത്യമായ ബോധവത്കരണം നൽകാനും അതിജീവനത്തിനുള്ള വഴികൾ കാട്ടിക്കൊടുക്കാനും നാം മുന്നോട്ടു വരേണ്ടത് അത്യന്താപേക്ഷിതമാണ്.
Leader Page
ചാരപ്പണിക്കു പെൺകെണി. എക്കാലത്തെയും വിജയകരമായ തന്ത്രം. നിർമിതബുദ്ധി (എഐ) മേഖലയെ അടക്കിവാഴുന്ന എൻവിഡിയയുടെ മേധാവി ഈ അതിപുരാതന കെണിയിൽ കുരുങ്ങി. ആഴ്ചകൾക്കു മുൻപു ലോകത്തിലെ ഏറ്റവും വിലപ്പെട്ടതായിരുന്ന കമ്പനിയുടെ ഭാവിക്കുമേൽ ചോദ്യചിഹ്നം ഉയർത്തിയ വലിയ വീഴ്ച.
എൻവിഡിയ സഹസ്ഥാപകനും ചീഫ് എക്സിക്യൂട്ടീവ് ഓഫീസറുമായ(സിഇഒ) ജെൻസൻ ഹുവാംഗ്, ആലീസ് ഹുവാംഗ് എന്ന ബിസിനസുകാരിയുമായി അവിഹിതബന്ധം പുലർത്തി എന്നതു വിഷയത്തിന്‍റെ ഒരു വശം മാത്രം. ആലീസ് ചൈനയുടെ ചാരവനിത ആണെന്നതാണു പ്രധാന കാര്യം. അതിനൂതന എഐ സാങ്കേതികവിദ്യയുടെ ഉടമകളാണ് എൻവിഡിയ. അതു ചൈനയ്ക്കു കിട്ടാതിരിക്കാൻ എൻവിഡിയയുടെ പുത്തൻ ഗ്രാഫിക് പ്രോസസർ യൂണിറ്റു (ജിപിയു)കളുടെ കയറ്റുമതിക്ക് അമേരിക്ക കർക്കശ നിയന്ത്രണങ്ങൾ വച്ചിട്ടുണ്ട്. എൻവിഡിയയുടെ രഹസ്യങ്ങൾ ചോർത്താൻ ചൈന ശ്രമിക്കുന്നതു സ്വാഭാവികം. എഐയിൽ മുന്നിലെത്താൻ അതാവശ്യമാണല്ലോ.
അസാധാരണമായ ഒരു സാഹചര്യമാണ് എൻവിഡിയ നേരിടുന്നത്. പെൺകെണിയിൽ കുടുങ്ങിയാൽ പ്രഫഷണൽ സിഇഒമാരെ പുറത്താക്കുന്നതാണു പതിവ്. ഇന്‍റൽ കോർപറേഷൻ ബ്രയൻ ക്രിസാനിച്ചിനെ 2018ലും മക്ഡോണൾഡ്സ് സിഇഒ സ്‌റ്റീവ് ഈസ്റ്റർബ്രൂക്കിനെ 2019ലും പുറത്താക്കിയത് ജീവനക്കാരുമായി അവിഹിതം നടത്തിയതിനാണ്. കമ്പനി നിയമം അനുവദിക്കാത്തതാണു കീഴ്ജീവനക്കാരുമായുള്ള ബന്ധം. ഉടമകളെ അങ്ങനെ കൈകാര്യം ചെയ്യാറില്ല. ആമസോൺ ഉടമ ജെഫ് ബെസോസിന് ഒരു ടെലിവിഷൻ അവതാരകയുമായി ബന്ധം ഉണ്ടായപ്പോൾ വിവാഹമോചനം വേണ്ടിവന്നെങ്കിലും കമ്പനിയിൽ ഒരു നടപടിയും ഇല്ലായിരുന്നു.
നിരപരാധിയെന്നു ട്രംപ്
ജെൻസന്‍റെ അവിഹിതമല്ല, ചൈനീസ് ചാരവനിതയുമായുള്ള ബന്ധമാണ് അമേരിക്കയ്ക്കു വിഷയം. ആലീസ് ചാരവനിതയാണെന്ന് ജെൻസൻ അറിഞ്ഞിരുന്നില്ല എന്നും അദ്ദേഹത്തിന്‍റെ നിരപരാധിത്വം തെളിയുമെന്നു കരുതുന്നു എന്നുമാണു യുഎസ് പ്രസിഡന്‍റ് ഡോണൾഡ് ട്രംപ് പറഞ്ഞത്. ഫെഡറൽ ബ്യൂറോ ഓഫ് ഇൻവെസ്റ്റിഗേഷൻ (എഫ്ബിഐ) ആണ് അന്വേഷണം നടത്തുന്നത്. എൻവിഡിയ കമ്പനിയുടെ ഡയറക്‌ടർ ബോർഡും അന്വേഷണം പ്രഖ്യാപിച്ചിട്ടുണ്ട്. ചാരവൃത്തി ആരോപണം ചൈന നിഷേധിച്ചു.
ആലീസ് ചൈനയ്ക്കുവേണ്ടിയാണു പ്രവർത്തിക്കുന്നതെന്നു കരുതാൻ തക്ക വിവരം ജെൻസനു ലഭിച്ചിട്ടുണ്ടോ എന്നാണ് അന്വേഷണത്തിൽ അറിയേണ്ടത്. അങ്ങനെ തെളിഞ്ഞാൽ കമ്പനിയിൽനിന്നു മാറേണ്ടിവരും. രാജ്യദ്രോഹ കേസ് വരെ ഉണ്ടാകാം. മറിച്ചു തെളിഞ്ഞാൽ അവിഹിതത്തിന്‍റെ പേരുദോഷം മാത്രം ശേഷിക്കും.
വിലക്കുള്ളതു വാങ്ങി
2023 മുതൽ 2025 വരെയാണു ജെൻസൻ -ആലീസ് ബന്ധത്തിന്‍റെ നാളുകൾ. സിംഗപ്പുർ ആസ്ഥാനമായുള്ള കമ്പനിയുടെ സിഇഒ പല രാജ്യങ്ങളിലും ജെൻസന്‍റെ കൂടെ കറങ്ങി. എൻവിഡിയയിൽ നിന്ന് 480 കോടി ഡോളറിന്‍റെ ജിപിയുകൾ വാങ്ങി. ചൈനയിലേക്കു കയറ്റുമതി ചെയ്യാൻ വിലക്കുള്ളവയും അക്കൂട്ടത്തിൽപെട്ടു. ദക്ഷിണേഷ്യയിലെ പല ഡാറ്റാ സെന്‍ററുകളിലും എത്തിയ ആ ജിപിയുകൾ ആലിബാബ അടക്കമുള്ള ചൈനീസ് കമ്പനികൾ വിദൂരബന്ധം (Remote access) വഴി ഉപയോഗിച്ചു എന്നു കണ്ടെത്തിയിട്ടുണ്ട്. ഇതു വിവാദമായപ്പോൾ കയറ്റുമതി വിലക്കിൽ വിദൂരബന്ധം പെടുന്നില്ല എന്നാണ് എൻവിഡിയ നൽകിയ വിശദീകരണം.
ട്രംപ് നേരത്തേ അറിഞ്ഞു
യുഎസ് ഏജൻസികൾ 2023 മുതൽ ആലീസ് ഹുവാംഗിന്‍റെ നടപടികൾ ശ്രദ്ധിച്ചിരുന്നു. 2025ൽ അവർ നൽകിയ വിവരം വച്ച് സിംഗപ്പുർ അധികൃതർ അവരെ ചോദ്യം ചെയ്തു. എൻവിഡിയ അധികൃതർ യുഎസ് വാണിജ്യ അണ്ടർ സെക്രട്ടറി ജെഫ്രി കെസ്‌ലർ വഴി അന്ന് ആലിസിനു വേണ്ടി ഇടപെട്ടു. ഇതേ കാലത്തുതന്നെ ലൈംഗികാപവാദങ്ങൾ കൈകാര്യം ചെയ്യുന്നതിൽ ഉപദേശിക്കുന്ന ഹെല്ലർ എന്ന പബ്ലിക് റിലേഷൻസ് സ്ഥാപനവുമായി ജെൻസൻ ഒരു കോൺട്രാക്റ്റ് ഉണ്ടാക്കി എന്ന് ഈയിടെ വെളിച്ചത്തുവന്നു.
അക്കാലത്തുതന്നെ ട്രംപിന് ഇതേപ്പറ്റി വിവരം കിട്ടി. പക്ഷേ ഒന്നും ചെയ്തില്ല. എങ്കിലും ആലിസ് ഹുവാംഗ് പിന്നീടു പരസ്യവേദികളിൽ പ്രത്യക്ഷപ്പെട്ടില്ല. കഴിഞ്ഞ മേയിൽ ട്രംപ് ചൈനയ്ക്കു പോയപ്പോൾ കൂടെപ്പോകേണ്ട ബിസിനസുകാരിൽ ജെൻസനെ ആദ്യം പെടുത്തിയില്ല. അവസാനനിമിഷം തിരുകിക്കയറ്റുകയായിരുന്നു. അതിനു മുൻപുതന്നെ ഈ ബന്ധത്തിന്‍റെ ചില കഥകൾ വാഷിംഗ്ടണിൽ പരന്നു. സ്റ്റേറ്റ് സെക്രട്ടറി മാർക്കോ റൂബിയോ ആണു വിവരങ്ങൾ പുറത്താക്കിയത് എന്നാണു സംസാരം.
ചോർത്തിയത് എന്ത്?
ജെൻസൻ ഹുവാംഗിൽനിന്ന് എന്തു രഹസ്യങ്ങളാണ് ആലിസ് ചോർത്തിയത് എന്ന് ഇനിയും കണ്ടെത്തണം. സാങ്കേതികവിദ്യയേക്കാൾ രാഷ്‌ട്രീയവും നയപരവുമായ രഹസ്യവിവരങ്ങൾ ആകാം ചൈന ലക്ഷ്യമിട്ടത് എന്നാണു പലരും കരുതുന്നത്. വിശ്വസ്ത മിത്രമായ ജെൻസന് ചൈന -യുഎസ് ബന്ധം, കയറ്റുമതി നയം തുടങ്ങിയ കാര്യങ്ങളിലെ ട്രംപിന്‍റെ ചിന്താഗതി അറിയാം. കിടപ്പറബന്ധത്തിൽ അവ ചികഞ്ഞെടുക്കാൻ ചാരവനിതയ്ക്കു പ്രയാസമില്ലല്ലോ.
Leader Page
കേരളത്തിലെ സ്വാശ്രയം, ഒട്ടോണമസ് കോളജുകൾക്ക് പുതിയ കോഴ്സുകൾ തുടങ്ങാൻ സർക്കാരിന്‍റെ നോ ഒബ്ജക്‌ഷൻ സർട്ടിഫിക്കറ്റ് (എൻഒസി) ആവശ്യമില്ല എന്നുള്ള ഉത്തരവ് ഏറെ ശ്ലാഘനീയമാണ്. കേരളത്തിലെ ഉന്നതവിദ്യാഭ്യാസ മേഖലയിൽ കാതലായ മാറ്റങ്ങളുണ്ടാവട്ടെ എന്നുള്ള ഒരു ദീർഘവീക്ഷണത്തോടെ മന്ത്രി റോജി എം. ജോൺ നടത്തിയ നീക്കം പ്രശംസാർഹമാണ്. എന്നാൽ, പതിവുപോലെ അതേച്ചൊല്ലി വിവാദങ്ങളും ആരംഭിച്ചിരിക്കുന്നു. ഈ വിവാദങ്ങളുടെ ഉദ്ദേശ‍്യശുദ്ധി മനസിലാക്കാൻ ഏറെ പ്രയാസമാണ്.
ഒരു കോളജിൽ പുതിയ കോഴ്സ് തുടങ്ങണമെന്നുണ്ടെങ്കിൽ ആദ്യമായി റെഗുലേറ്ററി അഥോറിറ്റി, അതായത്, എഐസിടിഇ, മെഡിക്കൽ കൗൺസിൽ അല്ലെങ്കിൽ ഫാർമസി കൗൺസിൽ എന്നിവയുടെ അംഗീകാരം ലഭിക്കണം. അതിനുശേഷം ഈ കോളജുകൾ അഫിലിയേറ്റ് ചെയ്തിരിക്കുന്ന യൂണിവേഴ്സിറ്റിയുടെ നിബന്ധനകൾ പാലിച്ച് പുതിയ കോഴ്സിന് അഫിലിയേഷൻ ഉറപ്പിക്കണം. ഇത്തരത്തിൽ അഫിലിയേഷൻ നൽകുന്നതിനു മുമ്പ് സർക്കാരിന്‍റെ എൻഒസി വാങ്ങി ലഭ്യമാക്കുന്ന പ്രക്രിയയാണ് ഇതുവരെ നടന്നുവന്നിരുന്നത്. ഇതിൽനിന്നുള്ള ഒരു മാറ്റമാണ് ഇപ്പോൾ വരുത്തിയിരിക്കുന്നത്. അതായത്, സർക്കാരിന്‍റെ എൻഒസിയുടെ ആവശ്യമില്ല. അതുപോലെതന്നെ മൂന്നു വർഷത്തിലൊരിക്കൽ, കോളജുകൾ തുടർന്നു നടത്താനുള്ള അനുമതിയേ സർക്കാരിൽനിന്നു വാങ്ങേണ്ടതുള്ളൂ.
എൻഒസി കാലതാമസം
കഴിഞ്ഞ പത്തുവർഷമായുള്ള എൽഡിഎഫ് ഭരണത്തിലും അതിനു മുമ്പും സർക്കാരിൽനിന്ന് എൻഒസി വാങ്ങണം എന്ന നിബന്ധനയുണ്ടായിരുന്നു. എന്നാൽ ലഭ്യമായ അറിവനുസരിച്ച് 10 വർഷമായി ഒരു കോളജിനും എൻഒസി നിഷേധിച്ചിട്ടില്ല. അതിനാൽ, സർക്കാരിൽനിന്നുള്ള എൻഒസി എന്നത് ഒരു നടപടിക്രമം മാത്രമാണന്നല്ലേ മനസിലാക്കേണ്ടത്. എന്നാൽ, അത് ലഭിക്കുന്നതിനുള്ള കാലതാമസം വളരെയധികമാണ്. പുതിയ ഒരു വ്യവസായം തുടങ്ങാനുള്ള നടപടിക്രമങ്ങളെല്ലാം ലഘൂകരിച്ചുകൊണ്ടിരിക്കുന്ന കാലഘട്ടത്തിൽ ഈ എൻഒസി എന്നുള്ള കടമ്പ യാതൊരു കാരണവശാലും ആവശ്യമുള്ളതല്ല; ന‍്യായീകരിക്കാവുന്നതുമല്ല.
ഓൾ ഇന്ത്യ കൗൺസിൽ ഫോർ ടെക്നിക്കൽ എഡ‍്യുക്കേഷൻ അപ്രൂവൽ പ്രോസസ് ഹാൻഡ് ബുക്ക് ഇപ്പോൾ മൂന്നു വർഷത്തേക്കാണ്. 2024 മുതൽ 2027 വരെയുള്ള കാലഘട്ടത്തിലേക്കുള്ള അപ്രൂവൽ പ്രോസസ് ഹാൻഡ് ബുക്കാണ് ഇപ്പോൾ നിലവിലുള്ളത്. ഇതുപ്രകാരം ഒരു ഇൻസ്റ്റിറ്റ്യൂഷൻ മൂന്നുവർഷത്തേക്ക് എക്സ്റ്റൻഷൻ ഓഫ് അപ്രൂവലിനുവേണ്ടി അപേക്ഷ സമർപ്പിക്കുകയും അതു അനുവദിക്കുകയും ചെയ്യുന്ന പതിവാണുള്ളത്. കൂടാതെ, അപ്രൂവൽ പ്രോസസ് ഹാൻഡ് ബുക്കിലെ താഴെ പറയുന്ന വാചകങ്ങൾ ശ്രദ്ധേയമാണ്.
ദേശീയ വിദ്യാഭ്യാസ നയം (എൻഇപി) 2020ൽ പറഞ്ഞിരിക്കുന്ന വ്യവസ്ഥകളിലും മൊത്ത എൻറോൾമെന്‍റ് അനുപാതം (ജിഇആർ) വർധിപ്പിക്കുന്നതിനുള്ള രാജ്യത്തിന്‍റെ സജീവമായ സംരംഭങ്ങളിലും വിഭാവനം ചെയ്തിരിക്കുന്നതുപോലെ, നിലവിലുള്ള സ്ഥാപനങ്ങൾ നേരത്തെ വാഗ്ദാനം ചെയ്തിരുന്ന കോഴ്സുകൾ / പ്രോഗ്രാമുകൾക്കായി അനുവദിച്ച പ്രവേശനത്തിന്‍റെ ഉയർന്ന പരിധി നീക്കം ചെയ്യാൻ കൗൺസിൽ നിർദേശിക്കുന്നു. അടിസ്ഥാന സൗകര്യ ലഭ്യത, അതിന്‍റെ സന്നദ്ധത, നികത്തപ്പെട്ട ഫാക്കൽറ്റി സ്ഥാനം എന്നിവയ്ക്ക് വിധേയമാണിത്.
കേരളം നേരിടുന്ന വലിയ പ്രശ്നം, ഏതൊരു സ്ഥാപനം തുടങ്ങുന്നതിനുമുള്ള പ്രയാസങ്ങളാണ്. പ്രത്യേകിച്ച്, ഒരു വിദ്യാഭ്യാസ സ്ഥാപനം തുടങ്ങണമെങ്കിൽ അതിന്‍റേതായ ഇൻഫ്രാസ്ട്രക്ചറെല്ലാം വളരെ നല്ല രീതിയിൽതന്നെ ഉണ്ടെങ്കിൽ മാത്രമേ വിദ്യാർഥികൾ ആ സ്ഥാപനത്തിൽ ചേർന്നു പഠിക്കുകയുള്ളൂ.
വിദ്യാർഥികളുടെ എണ്ണവും ഇളവും
കേരളത്തിൽ നല്ല സ്ഥാപനങ്ങൾ ഇല്ലാഞ്ഞിട്ടായിരിക്കണം വിദ്യാർഥികൾ മറ്റ് സംസ്ഥാനങ്ങളിലും വിദേശ രാജ‍്യങ്ങളിലുമൊക്കെ അഡ്മിഷൻ തേടുന്നത്. കേരളത്തിലെ സ്വാശ്രയ കോളജുകൾ പ്രത്യേകിച്ച്, എൻജിനിയറിംഗ് കോളജുകൾ ഇന്ന് മറ്റു സംസ്ഥാനങ്ങളുമായി താരതമ്യപ്പെടുത്തുമ്പോൾ ഇപ്പോഴും വളരെ ചെറുതുതന്നെയാണ്. വിദ്യാർഥികളുടെ എണ്ണം മൂവായിരത്തിനടുത്തേ ഉള്ളൂ എന്നതിനാലാണിത്. കേരളത്തിന് പുറത്തുള്ള മിക്ക സ്ഥാപനങ്ങളിലും ഇപ്പോൾ പതിനായിരവും ഇരുപതിനായിരവുമൊക്കെ വിദ്യാർഥികളാണ് പഠിക്കുന്നത്. അതെല്ലാം ഡീംഡ് യൂണിവേഴ്സിറ്റികളും പ്രൈവറ്റ് യൂണിവേഴ്സിറ്റികളുമായി മാറിക്കഴിഞ്ഞു. കേരളത്തിലെ വിദ്യാഭ്യാസ സ്ഥാപനങ്ങൾക്ക് ഗുണനിലവാരം വർധിപ്പിക്കുന്നതിനും നൂതന കോഴ്സുകൾ ആരംഭിക്കുന്നതിനുമുള്ള ഒരു കാൽവയ്പായി ഈ ഇളവിനെ കാണാം. യൂണിവേഴ്സിറ്റികൾ അതിന് പ്രതിബന്ധമായി നിൽക്കുകയില്ലെന്നും ആശിക്കാം.
കച്ചവടച്ചരക്കെന്ന ചിത്രീകരണം
പുതിയ ഒരു ഉത്തരവ് വന്നപ്പോൾ വിദ്യാഭ്യാസത്തെ കച്ചവടച്ചരക്കായി മാറ്റുന്നു എന്ന ആരോപണമാണ് ഉയർത്തുന്നത്. എന്നാൽ, ഇതിന്‍റെ വാസ്തവം എന്താണ്? കേരളത്തിലെ സ്വാശ്രയ കോളജുകൾ താരതമ്യേന വളരെ കുറഞ്ഞ ഫീസാണ് ഈടാക്കുന്നത്. ഇങ്ങനെ കുറഞ്ഞ ഫീസ് വാങ്ങുമ്പോൾ അധ്യാപകർക്ക് നൽകുന്ന ശമ്പളവും കുറവാണ്. ഇതിനെ എങ്ങനെയാണ് കച്ചവടമായി ചിത്രീകരിക്കുക എന്നു മനസിലാകുന്നില്ല. പല കോളജുകളും അഡ്മിഷൻ മുഴുവൻ ലഭിക്കാത്തതു കാരണം പിന്നെയും ഫീസ് കുറയ്ക്കുന്നു. അങ്ങനെ ഫീസ് കുറയ്ക്കുമ്പോൾ അധ്യാപകരുടെ ശമ്പളം വീണ്ടും കുറയുന്നു. അവിടെയുള്ള സൗകര്യങ്ങൾ കുറയുന്നു. അങ്ങനെ ഒരു വിദ്യാഭ്യാസ സ്ഥാപനം നടത്തുകയാണെങ്കിൽ അത് ഗുണനിലവാരത്തെ കാര്യമായി ബാധിക്കും. ഇതിനെല്ലാമുള്ള പ്രതിവിധിയെന്നത് ഫീ റെഗുലേറ്ററി കമ്മിഷൻ നിർത്തലാക്കുക എന്നതാണ്. സ്ഥാപനം നടത്തുന്ന ആളുകളും അധ്യാപകരും യൂണിവേഴ്സിറ്റിയും ചേർന്ന് കോളജുകളുടെ ഗുണനിലവാരം ഉയർത്തുകയും അതോടൊപ്പം കൂടുതൽ വിദ്യാർഥികളെ അവിടേക്ക് ആകർഷിക്കുന്നതിനായി നല്ല രീതിയിലുള്ള ടീച്ചിംഗ് ലേണിംഗ് പ്രോസസും റിസർച്ചും നടത്തുകയും ചെയ്യട്ടെ.
അക്കാദമിക് വഴക്കവും കോഴ്സ് നവീകരണവും വർധിപ്പിക്കുന്നതിനായി തമിഴ്നാട് നിലവിൽ ധാരാളം സർക്കാർ കോളജുകളിൽ സ്വയംഭരണ പദവി നൽകുകയാണ്. ആന്ധ്രപ്രദേശ്, കർണാടക, മഹാരാഷ്‌ട്ര, തമിഴ്നാട് എന്നിവിടങ്ങളിൽ യുജിസി നിയന്ത്രണങ്ങൾ പ്രകാരം കാര്യമായ അക്കാദമിക് സ്വാതന്ത്ര്യത്തോടെ പ്രവർത്തിക്കുന്ന ധാരാളം സ്വയംഭരണ കോളജുകൾ വളരെക്കാലമായി ഉണ്ട്. ദേശീയ വിദ്യാഭ്യാസ നയം 2020 ആവർത്തിച്ച് വാദിക്കുന്നത് “ലളിതവും എന്നാൽ കർശനവുമായ’’ നിയന്ത്രണം, സ്വയംഭരണം, മൾട്ടി ഡിസിപ്ലിനറി കോഴ്സുകൾ, കുറഞ്ഞ ബ്യൂറോക്രാറ്റിക് നിയന്ത്രണം, നൂതനാശയ അധിഷ്ഠിത ഭരണം എന്നിവയ്ക്കായാണ്. സർക്കാർ, സർവകലാശാലകൾ, റെഗുലേറ്റർമാർ മാനദണ്ഡങ്ങൾ നിശ്ചയിക്കുകയും ഫലങ്ങൾ നിരീക്ഷിക്കുകയും വേണം, പക്ഷേ അക്കാദമിക് തീരുമാനങ്ങളിൽ കൈകടത്തരുത്.
വിദേശ യൂണിവേഴ്സിറ്റികളിലെ ഗുണനിലവാരം
യുകെയിൽ, സർവകലാശാലകൾ സാധാരണയായി സർക്കാർ അനുമതിയില്ലാതെ പുതിയ പ്രോഗ്രാമുകൾ അവതരിപ്പിക്കുന്നുണ്ട്. ഗുണനിലവാര ഉറപ്പ് ഏജൻസികൾ മുൻകൂർ അനുമതിയേക്കാൾ മാനദണ്ഡങ്ങൾക്ക് മേൽനോട്ടം വഹിക്കുന്നു. യുഎസ്എയിലെ സർവകലാശാലകൾ പ്രധാനമായും അവരുടെ സ്വന്തം പ്രോഗ്രാമുകൾ തീരുമാനിക്കുന്നു; അക്രഡിറ്റേഷൻ ബോഡികൾ ഗുണനിലവാരവും ഫലങ്ങളും നിരീക്ഷിക്കുന്നു. ഓസ്ട്രേലിയൻ സർവകലാശാലകൾ ദേശീയ ഗുണനിലവാര ഉറപ്പ് ചട്ടക്കൂടിനുള്ളിൽ അക്കാദമിക് സ്വയംഭരണാവകാശം ആസ്വദിക്കുന്നു. സിംഗപ്പൂരിലെ സ്വയംഭരണ സർവകലാശാലകൾക്ക് പുതിയ പ്രോഗ്രാമുകൾ ആരംഭിക്കാൻ ഗണ്യമായ സ്വാതന്ത്ര്യമുണ്ട്, പക്ഷേ കർശനമായ നിരീക്ഷണത്തിന് വിധേയമാണ്.
ഉന്നതവിദ്യാഭ്യാസ ഭരണത്തിന്‍റെ അനുമതി അടിസ്ഥാനമാക്കിയുള്ള മാതൃകയിൽനിന്ന് വിശ്വാസാധിഷ്ഠിതവും ഉത്തരവാദിത്വാധിഷ്ഠിതവുമായ മാതൃകയിലേക്കുള്ള മാറ്റത്തെ കേരളത്തിന്‍റെ തീരുമാനം പ്രതിനിധീകരിക്കുന്നു. യുജിസി ചട്ടങ്ങൾ, എൻഇപി 2020, ഉന്നതവിദ്യാഭ്യാസത്തിലെ അന്താരാഷ്‌ട്ര മികവ് എന്നിവയ്ക്ക് അനുസൃതമാണ് ഈ പരിഷ്കാരം. എന്നിരുന്നാലും, ഉത്തരവാദിത്വമില്ലാത്ത സ്വയംഭരണാവകാശം ഗുണനിലവാരം കുറയ്ക്കുന്നതിലേക്കു നയിച്ചേക്കാം. അതിനാൽ നയത്തിന്‍റെ വിജയം എൻഒസി ആവശ്യകത നീക്കം ചെയ്യുന്നതിനെയല്ല; അക്രഡിറ്റേഷൻ, സുതാര്യത, അക്കാദമിക് ഓഡിറ്റുകൾ, അതിനോടൊപ്പമുള്ള പൊതു ഉത്തരവാദിത്വ സംവിധാനങ്ങൾ എന്നിവയുടെ ശക്തിയെ ആശ്രയിച്ചിരിക്കും.
(കേരള ടെക്നിക്കൽ യൂണിവേഴ്സിറ്റി പ്രഥമ വൈസ് ചാൻസലറാണ് ലേഖകൻ)
Leader Page
ഒരു നാടിന്‍റെ ഉന്നതവിദ്യാഭ്യാസത്തിന്‍റെ യഥാർഥ മികവ് അളക്കേണ്ടത് സ്ഥാപനങ്ങളുടെ എണ്ണത്തിലോ പ്രഖ്യാപനങ്ങളുടെ പെരുമയിലോ മാത്രമല്ല; അവിടത്തെ യുവജനങ്ങൾക്ക് സ്വന്തം ഭാവി രൂപപ്പെടുത്താൻ ലഭിക്കുന്ന അവസരങ്ങളിലാണ്. ഇഷ്ടപ്പെട്ട വിഷയത്തിൽ പഠിക്കാനും കഴിവുകൾ വികസിപ്പിക്കാനും മാന്യമായ തൊഴിൽ നേടാനും നമ്മുടെ വിദ്യാഭ്യാസ സംവിധാനം എത്രത്തോളം സഹായിക്കുന്നു എന്നതാണ് അടിസ്ഥാനചോദ്യം. കേരളത്തിലെ ഉന്നതവിദ്യാഭ്യാസ പരിഷ്‌കാരങ്ങളെക്കുറിച്ചുള്ള ചർച്ചകളും ഈ ചോദ്യത്തിൽനിന്നുതന്നെ ആരംഭിക്കണം.സ്വയംഭരണ കോളജുകളിൽ പുതിയ സ്വാശ്രയ കോഴ്സുകൾ ആരംഭിക്കുന്നതിനുള്ള അനുമതി വ്യവസ്ഥകൾ ലഘൂകരിക്കുന്നതിനെ വിദ്യാഭ്യാസക്കച്ചവടത്തിനുള്ള വഴിയൊരുക്കലായി മാത്രം ചിത്രീകരിക്കുന്നത് ഏകപക്ഷീയവാദമാണ്. വിദ്യാർഥികളുടെ അവകാശങ്ങൾ സംരക്ഷിക്കുന്നതോടൊപ്പം, കാലത്തിന്‍റെ ആവശ്യങ്ങൾക്കനുസരിച്ച് വളരാൻ വിദ്യാഭ്യാസ സ്ഥാപനങ്ങൾക്ക് അവസരമൊരുക്കുന്നതും സർക്കാരിന്‍റെ ഉത്തരവാദിത്വമാണ്. നിയന്ത്രണവും പ്രോത്സാഹനവും വിവേകപൂർവം സമന്വയിക്കുമ്പോഴാണ് വിദ്യാഭ്യാസനയം ഫലപ്രദമാകുന്നത്.
വിദ്യാഭ്യാസനേട്ടവും മുന്നേറ്റവും
കേരളത്തിന്‍റെ വിദ്യാഭ്യാസനേട്ടങ്ങൾ ഏതെങ്കിലും ഒരു സർക്കാരിന്‍റെറെ മാത്രം സംഭാവനയല്ല. പൊതുവിദ്യാഭ്യാസ സ്ഥാപനങ്ങൾക്കൊപ്പം സാമൂഹികപ്രസ്ഥാനങ്ങളും മതസമൂഹങ്ങളും എയ്ഡഡ് സ്ഥാപനങ്ങളും സ്വകാര്യ വിദ്യാഭ്യാസ സംരംഭങ്ങളും ഈ മുന്നേറ്റത്തിൽ നിർണായക പങ്കുവഹിച്ചിട്ടുണ്ട്. അനേകം തലമുറകളുടെ അധ്വാനവും സമർപ്പണവും ചേർന്നുണ്ടാക്കിയ പൈതൃകമാണത്. ഈ സംഭാവനകളെ അംഗീകരിക്കാതെ സ്വകാര്യ പങ്കാളിത്തത്തെ ഒന്നടങ്കം സംശയത്തോടെ സമീപിക്കുന്നത് കേരളത്തിന്‍റെ വിദ്യാഭ്യാസഭാവിയെ ശക്തിപ്പെടുത്തുകയില്ല.
പുതിയ പരിഷ്‌കാരങ്ങളെ വിമർശിക്കുന്നവർ, കഴിഞ്ഞ പത്തുവർഷത്തെ ഭരണകാലത്തെയും തുറന്ന വിലയിരുത്തലിന് വിധേയമാക്കണം. വിദ്യാർഥികൾ സ്വമേധയാ തെരഞ്ഞെടുക്കുന്ന ഉന്നതവിദ്യാഭ്യാസകേന്ദ്രമായി കേരളത്തെ വളർത്താൻ എന്തൊക്കെ ചെയ്തു? പുതിയ തലമുറ ആഗ്രഹിക്കുന്ന കോഴ്സുകൾ ആരംഭിക്കാൻ സ്ഥാപനങ്ങൾക്ക് എത്രത്തോളം അവസരം നൽകി? അനുമതികളിലെ കാലതാമസം കുറയ്ക്കാനും പഠനത്തെ ഗവേഷണം, നൈപുണ്യവികസനം, തൊഴിൽസാധ്യത എന്നിവയുമായി ബന്ധിപ്പിക്കാനും സ്വീകരിച്ച നടപടികൾ എന്തെല്ലാമായിരുന്നു? അവയുടെ ഫലം വിദ്യാർഥികളുടെ ജീവിതത്തിൽ എത്രത്തോളം പ്രതിഫലിച്ചു?
ഇവ രാഷ്‌ട്രീയ എതിരാളികളെ പ്രതിരോധത്തിലാക്കാനുള്ള ചോദ്യങ്ങളല്ല. കേരളത്തിലെ യുവജനങ്ങളുടെ ഭാവിയെ മുൻനിർത്തി പൊതുസമൂഹം ഉയർത്തേണ്ട ചോദ്യങ്ങളാണ്. ഇവയ്ക്ക് വ്യക്തമായ മറുപടി നൽകാതെ പരിഷ്‌കാരങ്ങളെ മാനേജ്‌മെന്‍റുകൾക്കുള്ള കീഴടങ്ങലായി വിശേഷിപ്പിക്കുന്നത് ഗൗരവമുള്ള വിദ്യാഭ്യാസനയ വിമർശനമാകില്ല.
കോളജുകളിൽ സീറ്റുകൾ ഒഴിഞ്ഞുകിടക്കുന്ന സാഹചര്യം ചർച്ചയാകുമ്പോൾ, അതിനുള്ള മറുപടി പുതിയ കോഴ്‌സുകൾക്കുള്ള വാതിലുകൾ അടയ്ക്കലാകരുത്.
സ്ഥാപനങ്ങളുടെ നിലനിൽപ്
വിദ്യാർഥികളുടെ താത്പര്യം കുറഞ്ഞ കോഴ്സുകൾ മാറ്റമില്ലാതെ തുടരുകയും അവർ പഠിക്കാൻ ആഗ്രഹിക്കുന്ന മേഖലകളിൽ പുതിയ അവസരങ്ങൾ അനുവദിക്കാതിരിക്കുകയും ചെയ്താൽ സ്ഥാപനങ്ങൾ എങ്ങനെ നിലനിൽക്കും? മാറുന്ന ലോകത്തിനൊപ്പം മുന്നേറാനുള്ള സ്വാതന്ത്ര്യം നൽകാതെ വിദ്യാഭ്യാസസ്ഥാപനങ്ങളിൽനിന്ന് മികവ് പ്രതീക്ഷിക്കാനാവില്ല. ഒഴിഞ്ഞ ക്ലാസ്‌മുറികൾ ഒരു സ്ഥാപനത്തിന്‍റെ മാത്രം പ്രശ്‌നമായി കാണാതെ, വിദ്യാഭ്യാസത്തിന്‍റെ ദിശയെക്കുറിച്ചുള്ള പുനർവിചിന്തനത്തിനുള്ള സൂചനയായിക്കൂടി കാണണം.
ഉന്നതവിദ്യാഭ്യാസത്തിലെ എല്ലാ പ്രശ്‌നങ്ങൾക്കും ഏതെങ്കിലുമൊരു സർക്കാരിനെ മാത്രം ഉത്തരവാദിയാക്കുന്നതു നീതിയല്ല. എന്നാൽ, ദീർഘകാലം അധികാരത്തിലിരുന്ന നേതൃത്വത്തിന് നയപരമായ ഉത്തരവാദിത്വത്തിൽനിന്ന് ഒഴിഞ്ഞുമാറാനും കഴിയില്ല. നേട്ടങ്ങളുടെ അവകാശവാദത്തോടൊപ്പം പോരായ്മകൾ അംഗീകരിക്കാനുള്ള സന്നദ്ധതയും ജനാധിപത്യ നേതൃത്വത്തിന് ഉണ്ടായിരിക്കണം.
വിദ്യാഭ്യാസരംഗത്തെ ചൂഷണം തടയണമെന്നതിൽ തർക്കമില്ല. അമിതഫീസ്, പ്രവേശനത്തിലെ ക്രമക്കേടുകൾ, അടിസ്ഥാനസൗകര്യങ്ങളുടെ അഭാവം, അധ്യാപകരോടുള്ള അനീതി എന്നിവയ്‌ക്കെതിരേ കർശന നടപടി വേണം. എന്നാൽ ഓരോ പുതിയ കോഴ്‌സിനെയും സംശയത്തോടെ കാണുന്നതും അനാവശ്യ നടപടിക്രമങ്ങളിലൂടെ സ്ഥാപനങ്ങളുടെ മുന്നേറ്റം തടയുന്നതും ഗുണനിലവാരനിയന്ത്രണമായി അവതരിപ്പിക്കരുത്.
സുതാര്യമായ പ്രവേശനം, ന്യായമായ ഫീസ്, യോഗ്യതയുള്ള അധ്യാപകർ, നിലവാരമുള്ള പഠനസൗകര്യങ്ങൾ, ഫലപ്രദമായ പരാതിപരിഹാരം എന്നിവ ഉറപ്പാക്കുന്ന സംവിധാനമാണ് നമുക്കു വേണ്ടത്. അക്കാദമിക സ്വാതന്ത്ര്യവും പൊതുസമൂഹത്തോടുള്ള ഉത്തരവാദിത്വവും ഒരുമിച്ചു പോകണം.
ഈ പശ്ചാത്തലത്തിൽ, സ്വയംഭരണ സ്ഥാപനങ്ങൾക്ക് പ്രസക്തമായ കോഴ്സുകൾ ആരംഭിക്കുന്നതിനുള്ള അനാവശ്യ തടസങ്ങൾ കുറയ്ക്കുന്ന ഉന്നതവിദ്യാഭ്യാസ വകുപ്പിന്‍റെ സമീപനത്തെ സ്വാഗതം ചെയ്യുന്നു. മന്ത്രി റോജി എം. ജോണിന്‍റെ നേതൃത്വത്തിലുള്ള ഈ നടപടിയുടെ ഉദ്ദേശ്യത്തിന് പിന്തുണ അറിയിക്കുന്നു. അതിന്‍റെ നടപ്പാക്കൽ വിദ്യാർഥികളുടെ അവകാശങ്ങളും സാമൂഹികനീതിയും ബാധകമായ നിയമവ്യവസ്ഥകളും ഉറപ്പാക്കുന്നതായിരിക്കണം.
വിദ്യാഭ്യാസം വിദ്യാർഥികളുടെ നന്മയ്ക്ക്
കേരളത്തിന് ശക്തമായ പൊതുവിദ്യാഭ്യാസവും ഉത്തരവാദിത്വമുള്ള സ്വകാര്യ പങ്കാളിത്തവും ഒരുപോലെ ആവശ്യമാണ്. ഇവയെ പരസ്പരം എതിർചേരികളിൽ നിർത്തുന്നതിനുപകരം, വിദ്യാർഥികളുടെ നന്മയ്ക്കായി അവയുടെ സാധ്യതകൾ പ്രയോജനപ്പെടുത്തണം. സ്ഥാപനങ്ങൾ അടച്ചുപൂട്ടേണ്ട സാഹചര്യം ഒഴിവാക്കാനും കേരളത്തിൽതന്നെ മികച്ച പഠനാവസരങ്ങൾ സൃഷ്ടിക്കാനും സർക്കാരിന്‍റെ ക്രിയാത്മകമായ സഹകരണം അനിവാര്യമാണ്.
പരിഷ്‌കാരങ്ങളെ വിമർശിക്കാം; ആ വിമർശനം ജനാധിപത്യചർച്ചയുടെ ഭാഗവുമാണ്. എന്നാൽ അതിനൊപ്പം കഴിഞ്ഞ കാലത്തിന്‍റെ തീരുമാനങ്ങളുടെയും അവയുടെ ഫലങ്ങളുടെയും ആത്മപരിശോധനയും വേണം. പുതിയ നടപടികളെ രാഷ്‌ട്രീയ ആരോപണങ്ങളിലൂടെ തള്ളിക്കളയുമ്പോൾ, കൂടുതൽ വിദ്യാർഥികൾക്ക് മികച്ച വിദ്യാഭ്യാസം ലഭ്യമാക്കാനുള്ള വ്യക്തമായ ബദൽകൂടി അവതരിപ്പിക്കാൻ കഴിയണം.
കേരളത്തിന്‍റെ യുവതലമുറയ്ക്കു വേണ്ടത് അവരുടെ സ്വപ്നങ്ങൾക്ക് ഇടമുള്ള വിദ്യാഭ്യാസസംവിധാനമാണ്-ഇഷ്ടപ്പെട്ട വിഷയങ്ങൾ പഠിക്കാനും കഴിവുകൾ വളർത്താനും ആത്മവിശ്വാസത്തോടെ തൊഴിൽലോകത്തേക്ക് കടക്കാനും കഴിയുന്ന സംവിധാനം. കഴിഞ്ഞ പത്തുവർഷം അവർക്കായി എന്തു ചെയ്തു എന്ന ചോദ്യത്തിനും, ഇനി എന്തു ചെയ്യാനാണ് ഉദ്ദേശിക്കുന്നത് എന്ന ചോദ്യത്തിനും വ്യക്തമായ മറുപടി നൽകാനുള്ള ഉത്തരവാദിത്വം രാഷ്‌ട്രീയ നേതൃത്വത്തിനുണ്ട്.
Leader Page
ഒരു സൈനികന്‍റെ കണിശതയും യുദ്ധതന്ത്രങ്ങളുമായി രാഷ്‌ട്രീയഗോദയിലിറങ്ങിയ ഗാദി ഐസൻകോട്ട് എന്ന അറുപത്തിയൊന്നുകാരൻ ഇസ്രയേൽ രാഷ്‌ട്രീയത്തിൽ വലിയ ചലനങ്ങളാണു ചുരുങ്ങിയ നാളുകൾകൊണ്ട് സൃഷ്ടിച്ചത്. ഇസ്രയേൽ രാഷ്‌ട്രീയത്തിലെ അതികായനായ ബെഞ്ചമിൻ നെതന്യാഹുവിന്‍റെ വിശ്വസ്തനായി പ്രവർത്തനം തുടങ്ങിയ ഐസൻകോട്ട്, പിന്നീടങ്ങോട്ട് നെതന്യാഹുവിന്‍റെ അധീശത്വത്തിനു വെല്ലുവിളിയുയർത്തിയാണു ലോകശ്രദ്ധ നേടുന്നത്.
1960 മേയ് 19-ന് ഇസ്രയേലിലെ ടൈബീരിയസിൽ മൊറോക്കൻ കുടിയേറ്റക്കാരായ മാതാപിതാക്കളുടെ മകനായിട്ടാണ് ഗാദി ഐസൻകോട്ടിന്‍റെ ജനനം. മൊറോക്കോയിലെ കാസാ ബ്ലാങ്കയിൽനിന്നു കുടിയേറിയ യഹൂദ കുടുംബമായിരുന്നു അദ്ദേഹത്തിന്‍റേത്. ഇലത് നഗരത്തിലാണ് ബാല്യകാലം ചെലവഴിച്ചത്.
സാധാരണ കുടുംബപശ്ചാത്തലത്തിൽനിന്ന് ഉയർന്നുവന്ന ഐസൻകോട്ട് ടെൽ അവീവ് സർവകലാശാലയിൽനിന്നു ചരിത്രത്തിലും ഹൈഫ സർവകലാശലായിൽനിന്നു പൊളിറ്റിക്കൽ സയൻസിലും ബിരുദാനന്തരബിരുദം കരസ്ഥമാക്കി. യുഎസ് ആർമി വാർ കോളജിൽ ഉപരിപഠനം നടത്തി.
യുദ്ധക്കളത്തിലെ തന്ത്രപരമായ നയങ്ങൾ
1978-ൽ ഐഡിഎഫിൽ ചേർന്ന ഐസൻകോട്ട് പ്രശസ്തമായ ഗൊലാനി ബ്രിഗേഡിലൂടെയാണ് തന്‍റെ സൈനികജീവിതം കെട്ടിപ്പടുത്തത്. പിന്നീട് പ്രധാനമന്ത്രി എഹൂദ് ബരാക്കിന്‍റെ മിലിട്ടറി സെക്രട്ടറിയായും നോർത്തേൺ കമാൻഡ് മേധാവിയായും സേവനമനുഷ്ഠിച്ചു.
2015 മുതൽ 2019 വരെ ഇസ്രയേൽ സേനയുടെ തലവനായി (ചീഫ് ഓഫ് സ്റ്റാഫ്) അദ്ദേഹം സേവനമനുഷ്ഠിച്ചു. ഈ പദവിയിലെത്തുന്ന ആദ്യ മിസ്രാഹി യഹൂദ വിഭാഗക്കാരനാണ് ഐസൻകോട്ട്.
യുദ്ധക്കളത്തിലെ തന്ത്രപരമായ നയങ്ങൾകൊണ്ട് എന്നും ശ്രദ്ധേയനായിരുന്നു ഐസൻകോട്ട്. ഹിസ്ബുള്ളയെയും ഹമാസിനെയും നേരിടുന്നതിനു തനതായ സൈനികതന്ത്രങ്ങൾ രൂപവത്കരിച്ചയാളാണ് ഇദ്ദേഹം. ശത്രുക്കളുടെമേൽ ശക്തവും വേഗത്തിലുള്ളതുമായ തിരിച്ചടി ലക്ഷ്യമിടുന്ന ഡാഹിയ ഡോക്‌ട്രിന്‍റെ മുഖ്യശില്പികളിലൊരാളായി ഐസൻകോട്ട് കണക്കാക്കപ്പെടുന്നു.
രാഷ്‌ട്രീയ പ്രവേശനവും നെതന്യാഹുമായുള്ള കലഹവും
സൈനികസേവനത്തിൽനിന്നു വിരമിച്ച ശേഷം 2022ഓടെയാണ് ഐസൻകോട്ട് സജീവ രാഷ്‌ട്രീയത്തിൽ പ്രവേശിക്കുന്നത്. ഗാസ യുദ്ധക്കാലത്ത് നെതന്യാഹുവിന്‍റെ യുദ്ധ മന്ത്രിസഭയിൽ നിരീക്ഷകനായും പിന്നീട് മന്ത്രിയായും അദ്ദേഹം പങ്കാളിയായിരുന്നെങ്കിലും ബന്ദികളെ മോചിപ്പിക്കുന്നതിലെ കാലതാമസത്തിൽ പ്രതിഷേധിച്ച് 2024 ജൂണിൽ അദ്ദേഹം മന്ത്രിസഭയിൽനിന്നു രാജിവച്ചു.ഇതിനു പിന്നാലെ നെതന്യാഹു സർക്കാരിന്‍റെ തെറ്റായ നയങ്ങൾക്കെതിരേ ശക്തമായ നിലപാടെടുത്ത് പ്രതിപക്ഷനിരയിലേക്കു മാറി.
2025ൽ യാഷാർ എന്ന പാർട്ടി രൂപവത്കരിച്ച ഐസൻകോട്ട്, അധികം വൈകാതെ നെതന്യാഹുവിന്‍റെ നയങ്ങൾക്കു പകരമുള്ള വിശ്വസനീയ ബദലായി ഇസ്രേലി ജനങ്ങൾക്കു മുമ്പിൽ അടയാളപ്പെടുത്തി.
സവിശേഷതകളേറെ
ഐസൻകോട്ടിന്‍റെ മുന്നേറ്റം ശ്രദ്ധേയമാകുന്നതിനു പിന്നിൽ അദ്ദേഹത്തിന്‍റെ വംശീയ പാരമ്പര്യവും ഉൾപ്പെടുന്നു. യൂറോപ്യൻ വംശജരായ അൻകെനാസി ജൂതരിൽനിന്നു വ്യത്യസ്തമായി മൊറോക്കൻ ജൂത പാരമ്പര്യമുള്ളയാളാണ് അദ്ദേഹം. ഇസ്രയേലിന്‍റെ ചരിത്രത്തിൽ ഇതുവരെ മിസ്‌റാഹി വംശത്തിൽനിന്നൊരാൾ പ്രധാനമന്ത്രിപദത്തിലെത്തിയിട്ടില്ല. പശ്ചിമേഷ്യ, വടക്കേ ആഫ്രിക്കൻ മേഖലകളിൽനിന്നു കുടിയേറിയ ജൂതവിഭാഗത്തെയാണു മിസ്‌റാഹി ജൂതർ എന്നു വിളിക്കുന്നത്.
യുദ്ധത്തിന്‍റെ മുറിവ് കുടുംബജീവിതത്തിലും
രാജ്യസേവനത്തെയും സൈനിക പാരമ്പര്യത്തെയും ഏറെ ബഹുമാനിക്കുന്ന കുടുംബപശ്ചാത്തലമാണ് ഐസൻകോട്ടിന്‍റേത്. യുദ്ധക്കളത്തിലെ ധീരതയെന്നപോലെ കയ്‌പേറിയ അനുഭവങ്ങളും അദ്ദേഹത്തിന്‍റെ ജീവിതത്തിലുണ്ടായിട്ടുണ്ട്.
ഐസൻകോട്ടിനും ഭാര്യ ഹന്നയ്ക്കും അഞ്ചു മക്കളാണുള്ളത്. എന്നാൽ, 2023 ഡിസംബറിൽ ഗാസയിൽവച്ചുണ്ടായ സൈനികനടപടിക്കിടെ ഐസൻകോട്ടിന്‍റെ മകൻ ഗാൽ മെയ്ർ കൊല്ലപ്പെട്ടു.
ഇതിനു പിന്നാലെ അദ്ദേഹത്തിന്‍റെ അർധസഹോദരി ഷാരണിന്‍റെ മകൻ മാവോർ ഐസൻകോട്ടും ഗാസയിൽ സൈനിക സേവനത്തിനിടെ കൊല്ലപ്പെട്ടു. വ്യക്തിജീവിതത്തിലെ ഈ മുറിവുകൾക്കിടയിലും രാജ്യസേവനത്തിനു പ്രഥമ പരിഗണന നൽകിയ ആളായിരുന്നു ഐസൻകോട്ട്.
Leader Page
തിരുവനന്തപുരം: കേരളത്തില്‍ ജീവന്‍ അപഹരിക്കുന്ന പ്രകൃതി ദുരന്തങ്ങളില്‍ മുന്‍നിരയിലാണ് ഇടിമിന്നല്‍. ഇടിമിന്നലേറ്റ് സംസ്ഥാനത്ത് എഴുപതോളം പേര് പ്രതിവര്‍ഷം മരിക്കുന്നുവെന്നാണ് കണക്ക്. നൂറിലധികം പേര്‍ക്കു പരിക്കേല്‍ക്കുന്നു. രാജ്യത്ത് ഇടിമിന്നലേറ്റ് 2800-3000 പേര് പ്രതിവര്‍ഷം മരിക്കുന്നുണ്ടെന്നാണ് കണക്ക്.
ശാസ്ത്ര പരിസ്ഥിതി കേന്ദ്രത്തിന്‍റെ കണക്കുകള്‍ പ്രകാരം കഴിഞ്ഞ വര്‍ഷം ജനുവരിക്കും സെപ്റ്റംബറിനും ഇടയില്‍ ഇന്ത്യയില്‍ 1456 പേര് മരിച്ചിട്ടുണ്ട്. ഉത്തര്‍പ്രദേശിലും മധ്യപ്രദേശിലുമാണ് ഏറ്റവും അധികം ആളുകള്‍ ഇടിമിന്നലേറ്റ് മരിക്കുന്നത്. കേരളത്തില്‍ മറ്റു പ്രകൃതിദുരന്തങ്ങളേക്കാള്‍ ആഘാതമുണ്ടാക്കാവുന്നതാണ് ഇടിമിന്നലെന്നാണ് പഠനങ്ങള്‍ വ്യക്തമാകുന്നത്. തുലാവര്‍ഷത്തിന്‍റെ ആരംഭത്തോടെയാണ് കേരളത്തില്‍ ഇടിമിന്നലും ആരംഭിക്കുന്നത്. ഒക്‌ടോബര്‍, നവംബറിലും ഏപ്രില്‍, മേയിലുമാണ് കേരളത്തില്‍ ഇടിമിന്നലിന്‍റെ എണ്ണവും അതുമൂലമുള്ള അപകടങ്ങളും ഏറ്റവുമധികമുണ്ടാകുന്നത്.
ഇടിമിന്നലിന്‍റെ ശാസ്ത്രം
മഴമേഘങ്ങളില്‍നിന്നും ഭൂമിയിലേക്കു പതിക്കുന്ന പ്രകാശമയവും ശബ്ദത്തോടുകൂടിയതുമായ വൈദ്യുത ഊര്‍ജതരംഗമാണ് ഇടിമിന്നല്‍. മൂന്നു തരത്തിലുള്ള മിന്നല്‍ പ്രവാഹങ്ങളാണ് ഉണ്ടാകുന്നത്. ഇതില്‍ മഴമേഘങ്ങളില്‍നിന്നു ഭൂമിയിലേക്കു പതിക്കുന്ന മിന്നലാണ് നാശനഷ്ടങ്ങളുണ്ടാക്കുന്നത്. അതേസമയം മഴമേഘങ്ങള്‍ക്കുള്ളിലോ ഇടയിലോ ഉണ്ടാകുന്ന ഇടിമിന്നലുകള്‍ വിമാനങ്ങള്‍ക്കു കേടുപാടുകളുണ്ടാക്കിയേക്കാം.
അതിവേഗം സഞ്ചരിക്കുന്ന വൈദ്യുതിയുടെ പ്രവാഹമാണ് ഇടിമിന്നല്‍. ഒരുമിന്നല്‍ ഉണ്ടാകുന്നതിന് ഒരു മിനിറ്റിന്‍റെ ആയിരത്തിലൊന്ന് സമയമേ ആവശ്യമായി വരുന്നുള്ളൂ. ഇടിമിന്നല്‍ എപ്പോള്‍ വേണമെങ്കിലും ഉണ്ടാകാമെങ്കിലും സാധാരണയായി ഉച്ചയ്ക്കുശേഷമാണ് ഉണ്ടാകുന്നത്. ഒരു കിലോമീറ്റര്‍ ദൂരം സഞ്ചരിക്കാന്‍ ഇടിമുഴക്ക ശബ്ദതരംഗത്തിനു മൂന്നു സെക്കന്‍ഡ് സമയമാണ് ആവശ്യം.
കരുതിയിരിക്കാം
ശരിയായ മുന്‍കരുതലുകളെടുത്താല്‍ ഇടിമിന്നല്‍മൂലം മനുഷ്യര്‍ക്കും മറ്റു ജീവജാലങ്ങള്‍ക്കുമുണ്ടാകുന്ന ദുരന്തങ്ങള്‍ വലിയൊരളവില്‍ തടയാന്‍ സാധിക്കുമെന്നു വിദഗ്ധര്‍ പറയുന്നു. മിന്നലുണ്ടാകുന്ന സമയത്ത് തുറസായ സ്ഥലങ്ങളില്‍ നില്‍ക്കുന്നത് അപകടമുണ്ടാക്കും. ഇടിയുടെ ശബ്ദം കേട്ടാലുടന്‍ സുരക്ഷിതമായ സ്ഥലത്തേക്ക് മാറണം. കമ്പി ഉപയോഗിച്ചു വാര്‍ത്ത കെട്ടിടങ്ങള്‍ ഏറെ സുരക്ഷിതമാണ്. ലോഹമേല്‍ക്കൂരയും വശങ്ങളുമുള്ള വാഹനങ്ങളും സുരക്ഷയേകുന്നു. വലിയ കോണ്‍ക്രീറ്റ് കെട്ടിടങ്ങള്‍ ഇടിമിന്നലില്‍ നിന്നും ഒരു പരിധിവരെ രക്ഷനല്‍കുമ്പോള്‍ ഓട്, ഓലമേഞ്ഞ കെട്ടിടങ്ങള്‍ എന്നിവ മിന്നല്‍ രക്ഷാസംവിധാനമില്ലെങ്കില്‍ സുരക്ഷിതമല്ല.
വീടിനു പുറത്തിറങ്ങരുത്
ഇടിമിന്നല്‍ ഉണ്ടാകുമ്പോള്‍ അത്യാവശ്യങ്ങള്‍ക്കുപോലും പുറത്തിറങ്ങരുത്. വീടിനുള്ളിലാണെങ്കിലും നിലത്ത് കിടക്കരുത്. വലിയ മരങ്ങളുടെ കീഴില്‍ അഭയം തേടുന്നത് വലിയ അപകടം ക്ഷണിച്ചുവരുത്തും. മരത്തില്‍ കെട്ടിയിരിക്കുന്ന പശുവിനെ അഴിക്കാനും ഉണങ്ങാനിട്ടിരിക്കുന്ന തുണിയെടുക്കാനും പോകുമ്പോൾ സംഭവിക്കുന്ന മിന്നലപകടങ്ങളും മരണവും കേരളത്തില്‍ വ്യാപകമാണ്.
കെട്ടിടത്തിനു മിന്നലേല്‍ക്കുകയോ സമീപത്തു പതിച്ച മിന്നലിന്‍റെ വൈദ്യുതി കെട്ടിടത്തിലേക്ക് പ്രവേശിക്കുകയോ ചെയ്താല്‍ ഭിത്തിയിലും വൈദ്യുതിയുണ്ടാകാം. അതുകൊണ്ട് ഭിത്തിയില്‍ തൊടുകയോ ഭിത്തിയോടു ചേര്‍ത്തിട്ടിരിക്കുന്ന ഫര്‍ണിച്ചറുകളില്‍ ഇരിക്കുകയോ കിടക്കുകയോ ചെയ്യരുത്. മിന്നല്‍ വൈദ്യുതി കമ്പികളില്‍ക്കൂടി അകത്തുവരാമെന്നതിനാല്‍ വൈദ്യുതോപകരണങ്ങള്‍, ടെലഫോണ്‍ എന്നിവ ഉപയോഗിക്കുന്നതും അപകടം ക്ഷണിച്ചുവരുത്തും. ഇടിമിന്നലുണ്ടാകുന്ന സമയത്ത് മണ്‍വെട്ടി, കൂന്താലി, പിക്കാസ്, ലോഹത്തൂണുകള്‍ തുടങ്ങിയവ കൈകാര്യം ചെയ്യുന്നതും ഒഴിവാക്കണം.
വൈദ്യുത ബന്ധം വിച്ഛേദിക്കണം
ഇടിമുഴക്കം കേള്‍ക്കുമ്പോള്‍തന്നെ ടെലിവിഷന്‍, ഫ്രിഡ്ജ് മുതലായവ വൈദ്യുതിയില്‍ നിന്നും മറ്റു കേബിളുകളില്‍ നിന്നും ഊരിയിടണം. സ്വിച്ച് ഓഫ് ചെയ്തതുകൊണ്ടു മാത്രം സുരക്ഷ ഉറപ്പാക്കാനാകില്ല. ഇടിമിന്നലുണ്ടാകുന്ന സമയത്ത് വീടുകളില്‍ പ്ലംബിംഗ് ചെയ്തിരിക്കുന്ന പൈപ്പില്‍ക്കൂടി വൈദ്യുതി കടന്നു വരാന്‍ സാധ്യതയുള്ളതിനാല്‍ പൈപ്പ് ഉപയോഗിക്കാന്‍ ശ്രമിക്കരുത്. മിന്നലുണ്ടാകുന്ന സമയത്ത് വൈദ്യുതി പ്രവഹിക്കാന്‍ സാധ്യതയുള്ള വസ്തുക്കളില്‍നിന്നു ദൂരെമാറി നില്‍ക്കുകയാണ് സുരക്ഷയ്ക്കുള്ള ഏറ്റവും നല്ല മാര്‍ഗം. പുറത്തുനിന്നു വയറോ കേബിളോ വഴി ബന്ധപ്പെടുത്തിയിട്ടുള്ള ലാന്‍ഡ് ഫോണ്‍, കേബിള്‍ ടെലിവിഷന്‍, വയര്‍ ഘടിപ്പിച്ചിട്ടുള്ള ഇന്‍റര്‍നെറ്റ് മോഡം, വൈദ്യുതിയുമായി ബന്ധിപ്പിച്ചിട്ടുള്ള മറ്റുപകരണങ്ങള്‍ എന്നിവയില്‍ നിന്നെല്ലാം അകലം പാലിക്കണം.
ഇടിമിന്നലില്‍ ഒറ്റപ്പെട്ടാല്‍
ഇടിമിന്നല്‍ ഉണ്ടാകുന്ന സമയത്ത് തുറസായ സ്ഥലങ്ങളില്‍ ഒറ്റപ്പെട്ടു പോയാല്‍ കാലുകള്‍ അടുപ്പിച്ചുവച്ച് കുത്തിയിരുന്ന് തല കുനിച്ചുപിടിക്കുക. ചെവി പൊത്തിപ്പിടിക്കണം. കാലിന്‍റെ അഗ്രഭാഗം മാത്രമേ നിലത്ത് തൊടാന്‍ പാടുള്ളൂ. എത്രത്തോളം കുറച്ച് തൊടുന്നുവോ അത്രത്തോളം മിന്നലേല്‍ക്കാനുള്ള സാധ്യത കുറയും. കാലുകളുടെ ഉപ്പൂറ്റികള്‍ പരസ്പരം തൊടുന്ന രീതിയിലായിരിക്കണം ഇരിക്കേണ്ടത്.
ശരീരത്തിലേക്കു വൈദ്യുത പ്രവാഹമുണ്ടാകാനുള്ള സാധ്യത ഇതു ലഘൂകരിക്കുന്നു. ഇടിമിന്നലവസാനിച്ച് അരമണിക്കൂറെങ്കിലും സുരക്ഷാ നടപടികള്‍ പാലിക്കണം. ഉയര്‍ന്ന മലനിരകളിലെ തുറസായ സ്ഥലങ്ങളില്‍ ഇടിമിന്നലിനുള്ള സാധ്യത കൂടുതലാണ്. തുറസായ സ്ഥലത്ത് കുടപിടിക്കുന്നതും ഒഴിവാക്കണം. മിന്നലുണ്ടാകുന്ന സമയത്ത് വീടിന്‍റെ മേല്‍ക്കൂരയുടെയോ ടെറസിന്‍റെയോ മുകളിലും ബാല്‍ക്കണിയിലും നില്‍ക്കുന്നത് അപകടമുണ്ടാക്കും.
ബൈക്ക്, സൈക്കിള്‍ യാത്രകള്‍ ഒഴിവാക്കണം
ഇടിമിന്നലുണ്ടാകുന്ന സമയത്ത് ഇരുചക്രവാഹനങ്ങളില്‍ യാത്രചെയ്യുന്നതും ലോഹനിര്‍മിതമായ വലിയ വാഹനങ്ങളുടെ സമീപത്തോ അവയില്‍ തൊട്ടുകൊണ്ടോ നില്‍ക്കുന്നതും അപകടമാണ്. കൂട്ടമായി നില്‍ക്കുന്നവര്‍ അകന്നുമാറണം. ജലാശയങ്ങളില്‍ നീന്തുക, മീന്‍പിടിക്കുക തുടങ്ങിയ പ്രവര്‍ത്തനങ്ങളില്‍ ഏര്‍പ്പെടുന്നതും വലിയ അപകടമായിരിക്കും വിളിച്ചുവരുത്തുക.
രക്ഷാസംവിധാനങ്ങള്‍
കെട്ടിടങ്ങളെ ഇടിമിന്നലിൽനിന്ന് പരമാവധി രക്ഷിക്കുന്നതിനായി സാധ്യമായ ഇടിമിന്നല്‍ രക്ഷാ സംവിധാനങ്ങള്‍ സ്ഥാപിക്കാവുന്നതാണ്. മിന്നല്‍ ചാലകം, കെട്ടിടത്തിനു ചുറ്റുമായി സ്ഥാപിക്കാവുന്ന റിംഗ് കണ്ടക്ടര്‍ എന്നിവ ഇതില്‍പ്പെടും. വീടുകളിലും ഓഫിസുകളിലും ഉപകരണങ്ങളുടെ സുരക്ഷക്കായി സര്‍ജ് പ്രൊട്ടക്ഷന് ഡിവൈസുകളും സ്ഥാപിക്കാം. എന്നാല്‍ വീടിനു മുകളില്‍ സ്ഥാപിക്കുന്ന മിന്നല്‍രക്ഷാ ചാലകം കേരളത്തില്‍ അത്ര ഫലപ്രദമാകണമെന്നില്ല. വീടിനു മുകളിലായി മിന്നല്‍ രക്ഷാകവചം സ്ഥാപിച്ചാലും അതിനു മുകളില്‍ ഉയര്‍ന്നു നില്‍ക്കുന്ന മരങ്ങളാണ് തടസമാകുന്നത്. രക്ഷാകവചത്തേക്കാള്‍ ഉയര്‍ന്നു നില്‍ക്കുന്ന മരത്തില്‍ ഇടിമിന്നലേല്‍ക്കുകയും മരത്തില്‍ നിന്നും ഭൂമിയിലെത്തുന്ന ഇടിമിന്നലിന്‍റെ പ്രവാഹം വീടിനുള്ളിലേക്ക് ഉണ്ടാകുകയും ചെയ്യും. ഈ സാഹചര്യത്തില്‍ കെട്ടിടത്തിനു ചുറ്റും സ്ഥാപിക്കാവുന്ന റിംഗ് കണ്ടക്ടറുകള്‍ സുരക്ഷ നല്‍കുന്നതാണ്.
വിവരങ്ങള്‍ക്കു കടപ്പാട്: സെന്‍റര്‍ ഫോര്‍
ഇന്നവേഷന്‍ ഇന്‍ സയന്‍സ് ആൻഡ്സോഷ്യല്‍ ആക‌്ഷന്‍ (സിസ),
തിരുവനന്തപുരം.
Leader Page
ഒരു ഉത്പന്നത്തിന് വലിയ വിലക്കുറവ് ലഭിക്കുമ്പോൾ നാം അത് വാങ്ങാൻ തിടുക്കം കാണിക്കുന്നത് എന്തുകൊണ്ടാണ്? മറ്റുള്ളവർ ഒരു കാര്യം തെരഞ്ഞെടുക്കുമ്പോൾ അതുതന്നെ തെരഞ്ഞെടുക്കാൻ നമുക്കും തോന്നുന്നത് എന്തുകൊണ്ടാണ്? നമ്മുടെ സാമ്പത്തിക തീരുമാനങ്ങളെ നയിക്കുന്നത് യുക്തിയും കൃത്യമായ കണക്കുകൂട്ടലുകളും മാത്രമാണോ, അതോ അതിനപ്പുറം ചില മാനസിക ഘടകങ്ങൾ കൂടി പ്രവർത്തിക്കുന്നുണ്ടോ? പെരുമാറ്റ സാമ്പത്തികശാസ്ത്രം (Behavioural Economics) എന്ന കൗതുകകരമായ പഠനമേഖലയിലേക്കുള്ള ഒരു യാത്രയാണ് ഈ ലേഖനം.
വിസ്മയിപ്പിക്കുന്ന ഓഫറുകൾ
രാത്രിയിൽ മൊബൈൽ ഫോണിൽ ഒരു ഷോപ്പിംഗ് ആപ്പ് തുറക്കുന്നു. ഒരു ഹെഡ്‌ഫോണിന്‍റെ പഴയ വില ₹3,999. ഇപ്പോൾ "70% OFF'- വെറും ₹1,199. "ഇത്രയും വിലക്കുറവുണ്ടെങ്കിൽ വാങ്ങാതിരിക്കാൻ എന്താണ് കാരണം?' എന്ന് മനസ് പറയുന്നു. പക്ഷേ ഒരു നിമിഷം ചിന്തിച്ചുനോക്കൂ. നമുക്ക് യഥാർഥത്തിൽ ആ ഹെഡ്‌ഫോൺ ആവശ്യമുണ്ടായിരുന്നോ? ഇവിടെയാണ് ഒരു രസകരമായ ചോദ്യം ഉയരുന്നത്. നമ്മൾ എടുക്കുന്ന സാമ്പത്തിക തീരുമാനങ്ങൾ ശരിക്കും യുക്തിപരമാണോ?
സാമ്പത്തിക ശാസ്ത്രത്തിലെ പരമ്പരാഗത കാഴ്ചപ്പാടിൽ മനുഷ്യർ, ലഭ്യമായ വിവരങ്ങൾ പരിശോധിക്കുകയും ചെലവും നേട്ടവും താരതമ്യം ചെയ്യുകയും ഏറ്റവും മികച്ച തീരുമാനത്തിലെത്തുകയും ചെയ്യുന്ന വ്യക്തികളാണ്. എന്നാൽ യഥാർഥ ജീവിതത്തിലെ മനുഷ്യർ അങ്ങനെയല്ല. വികാരങ്ങൾ, സമയക്കുറവ്, പരിമിതമായ വിവരങ്ങൾ, സാമൂഹിക സ്വാധീനം, മുൻ അനുഭവങ്ങൾ, പരസ്യങ്ങൾ, ഭയം, പ്രതീക്ഷ എല്ലാം നമ്മുടെ തെരഞ്ഞെടുപ്പുകളെ സ്വാധീനിക്കുന്നു. ഈ യഥാർഥ മനുഷ്യനെ സാമ്പത്തികശാസ്ത്രത്തിന്‍റെ കേന്ദ്രത്തിലേക്ക് കൊണ്ടുവരുന്ന ശാഖയാണ് പെരുമാറ്റ സാമ്പത്തികശാസ്ത്രം.
യുക്തിക്ക് ചില പരിധികളുണ്ട്
1978ൽ സാമ്പത്തിക ശാസ്ത്രത്തിനുള്ള നൊബേൽ പുരസ്കാരം നേടിയ ഹെർബർട്ട് എ. സൈമൺ തന്‍റെ ‘പരിമിത യുക്തിബോധം’ (Bounded Rationality) എന്ന സിദ്ധാന്തത്തിലൂടെ മനുഷ്യൻ എപ്പോഴും പൂർണമായ വിവരങ്ങളുടെ അടിസ്ഥാനത്തിലല്ല തീരുമാനങ്ങളെടുക്കുന്നതെന്ന് ചൂണ്ടിക്കാട്ടിയിട്ടുണ്ട്. വിവരങ്ങൾ പരിമിതമാണ്; സമയം പരിമിതമാണ്; നമ്മുടെ ചിന്താശേഷിക്കും പരിധികളുണ്ട്. അതുകൊണ്ട് ഓരോ കാര്യത്തിലും എല്ലാ സാധ്യതകളും കണക്കുകൂട്ടി "ഏറ്റവും മികച്ചത്' തെരഞ്ഞെടുക്കുക പ്രായോഗികമല്ല. പകരം, പലപ്പോഴും നമുക്ക് തൃപ്തികരമെന്ന് തോന്നുന്ന ഒരു തെരഞ്ഞെടുപ്പിൽ ഒതുങ്ങേണ്ടിവരുന്നു.
ഒരു റസ്റ്ററന്‍റിൽ മെനു നോക്കുമ്പോൾ ഓരോ വിഭവത്തിന്‍റെയും വില, അളവ്, പോഷകമൂല്യം, മറ്റ് റസ്റ്ററന്‍റുകളിലെ വില എന്നിവ താരതമ്യം ചെയ്ത ശേഷമാണോ നമ്മൾ ഭക്ഷണം തെരഞ്ഞെടുക്കുന്നത്?
അല്ല. “ഇത് നല്ലതായിരിക്കും”, “ഇത് എല്ലാവരും ഓർഡർ ചെയ്യുന്നുണ്ട്”, “കഴിഞ്ഞ തവണ ഇത് കഴിച്ചത് നന്നായിരുന്നു” എന്നിങ്ങനെയുള്ള ചെറിയ സൂചനകളാണ് പലപ്പോഴും തീരുമാനത്തെ സ്വാധീനിക്കുന്നത്.
കാനെമാനും ട്വേഴ്സ്കിയും: പെരുമാറ്റ സാമ്പത്തികശാസ്ത്രത്തിലെ വഴിത്തിരിവ്
മനുഷ്യന്‍റെ തീരുമാനങ്ങൾ എങ്ങനെയാണ് രൂപപ്പെടുന്നത് എന്നതിനെക്കുറിച്ചുള്ള പഠനങ്ങളിൽ നിർണായക സംഭാവന നൽകിയവരാണ് 2002ൽ സാമ്പത്തിക ശാസ്ത്രത്തിനുള്ള നൊബേൽ പുരസ്കാരം നേടിയ ഇസ്രേലി-അമേരിക്കൻ മനഃശാസ്ത്രജ്ഞനായ ഡാനിയൽ കാനെമാനും ഇസ്രേലി മനഃശാസ്ത്രജ്ഞനും ഗവേഷകനുമായ എമൊസ് ട്വേഴ്സ്കിയും.
1970കളിൽ ആരംഭിച്ച അവരുടെ ഗവേഷണങ്ങൾ മനുഷ്യർ തീരുമാനങ്ങളെടുക്കുമ്പോൾ യുക്തിക്കൊപ്പം മാനസിക പക്ഷപാതങ്ങളും മുൻകാല അനുഭവങ്ങളും ചിന്തയിലെ ലളിതവഴികളും സ്വാധീനം ചെലുത്തുന്നുവെന്ന് വ്യക്തമാക്കി. 1974ൽ പ്രസിദ്ധീകരിച്ച "Judgment under Uncertainty: Heuristics and Biases' എന്ന വിഖ്യാത പഠനത്തിലൂടെ അനിശ്ചിത സാഹചര്യങ്ങളിൽ മനുഷ്യർ എങ്ങനെയാണ് വിധിനിർണയം നടത്തുന്നതെന്ന് അവർ വിശദീകരിച്ചു. 1979ൽ അവതരിപ്പിച്ച പ്രോസ്പെക്‌ട് സിദ്ധാന്തം (Prospect Theory) സാമ്പത്തിക തീരുമാനങ്ങളെക്കുറിച്ചുള്ള പരമ്പരാഗത കാഴ്ചപ്പാടുകളെ മാറ്റിമറിക്കുകയും പെരുമാറ്റ സാമ്പത്തികശാസ്ത്രത്തിന്‍റെ വളർച്ചയ്ക്ക് വഴിയൊരുക്കുകയും ചെയ്തു.
കാനെമാന്‍റെ അഭിപ്രായത്തിൽ, മനുഷ്യന്‍റെ ചിന്താപ്രക്രിയയെ രണ്ട് രീതികളിലൂടെ മനസിലാക്കാം.ഒന്നാമത്തേത്, വേഗത്തിലുള്ള ചിന്ത (System1). അധികം ആലോചിക്കാതെ, സ്വാഭാവികമായും യാന്ത്രികമായും തീരുമാനങ്ങളിലെത്തുന്ന രീതി. രണ്ടാമത്തേത്, മന്ദഗതിയിലുള്ള ചിന്ത (System 2). കൂടുതൽ ശ്രദ്ധയും ഏകാഗ്രതയും യുക്തിപരമായ വിശകലനവും ആവശ്യമായ ചിന്താരീതി.
മനസിന്‍റെ ചെറിയ കുറുക്കുവഴികൾ
വളരെക്കുറച്ച് വിവരം മാത്രം കൈയിലുള്ളപ്പോൾ, കൂടുതൽ ആലോചനയില്ലാതെ വേഗത്തിൽ തീരുമാനങ്ങളിലെത്താൻ മനുഷ്യർ ആശ്രയിക്കുന്ന മാനസിക രീതികളാണ് ഹ്യൂറിസ്റ്റിക്സ് (Heuristics) അഥവാ മാനസിക കുറുക്കുവഴികൾ. ഉദാഹരണത്തിന്, ഒരു പ്രശസ്ത വ്യക്തി ഒരു ഉത്പന്നത്തെക്കുറിച്ച് നല്ല അഭിപ്രായം പറയുമ്പോൾ, അതിന്‍റെ ഗുണനിലവാരം സ്വയം പരിശോധിക്കാതെതന്നെ നാം അത് വാങ്ങാൻ തീരുമാനിച്ചേക്കാം.
ഇത്തരം മാനസിക കുറുക്കുവഴികൾ തീരുമാനമെടുക്കുന്ന പ്രക്രിയ എളുപ്പമാക്കുകയും സമയവും മാനസികശ്രമവും ലാഭിക്കുകയും ചെയ്യുന്നു. എന്നാൽ ലഭ്യമായ വിവരങ്ങൾ അപൂർണമാകുമ്പോഴോ വ്യക്തിപരമായ വിശ്വാസങ്ങൾ യാഥാർഥ്യത്തെ മറികടക്കുമ്പോഴോ, ഈ കുറുക്കുവഴികൾ തെറ്റായ വിലയിരുത്തലുകളിലേക്കും നമ്മെ നയിച്ചേക്കാം.
ഒരു ഉത്പന്നത്തിന്‍റെ വില എത്രത്തോളം ആകർഷകമാണെന്ന് നാം തീരുമാനിക്കുന്നത് പലപ്പോഴും അതിന്‍റെ യഥാർഥ മൂല്യത്തെ അടിസ്ഥാനമാക്കിയല്ല, മറിച്ച് ആദ്യം കണ്ട വിലയുമായുള്ള താരതമ്യത്തിലൂടെയാണ്. ഉദാഹരണത്തിന്, ₹3,999 എന്ന് രേഖപ്പെടുത്തിയ ഒരു ഉത്പന്നം ₹1,199ന് ലഭിക്കുമ്പോൾ, വലിയൊരു ലാഭം നേടുന്നതായി നമുക്ക് തോന്നാം.
വിലയും ആദ്യത്തെ വിവരങ്ങളും നമ്മുടെ തീരുമാനങ്ങളെ സ്വാധീനിക്കുന്നതുപോലെ, മറ്റുള്ളവരുടെ തെരഞ്ഞെടുപ്പുകളും, അവസരം നഷ്‌ടപ്പെടുമെന്ന ഭയവും നമ്മുടെ തീരുമാനങ്ങളെ മാറ്റിമറിച്ചേക്കാം. ഓൺലൈൻ ഷോപ്പിംഗിൽ “സ്റ്റോക്കിൽ ഇനി ഒരു എണ്ണം മാത്രം”, “Sale ends in 12 minutes” തുടങ്ങിയ സന്ദേശങ്ങൾ നമ്മെ വേഗത്തിൽ വാങ്ങാൻ പ്രേരിപ്പിക്കുന്നു.
മറ്റുള്ളവർ വാങ്ങുന്നു എന്ന തോന്നലും അവസരം നഷ്‌ടപ്പെടുമെന്ന ഭയവും ചേർന്നുണ്ടാകുന്ന ഈ പ്രവണതയാണ് FOMO (Fear of Missing Out). ഇവിടെ നാം ചിന്തിക്കേണ്ടത് “എനിക്ക് ഇത് ആവശ്യമാണോ, അതോ നഷ്‌ടപ്പെടുമെന്ന ഭയം കൊണ്ടാണോ ഞാൻ വാങ്ങുന്നത്?”എന്നാണ്.
വിവരങ്ങൾ അവതരിപ്പിക്കുന്ന രീതി
ഒരു ചികിത്സയ്ക്ക് 90 ശതമാനം വിജയസാധ്യതയുണ്ടെന്ന് പറയുമ്പോൾ നമുക്ക് ആത്മവിശ്വാസം തോന്നാം. എന്നാൽ അതേ ചികിത്സയ്ക്ക് 10 ശതമാനം പരാജയസാധ്യതയുണ്ടെന്ന് പറയുമ്പോൾ ആശങ്ക തോന്നിയേക്കാം. വിവരത്തിന്‍റെ അർഥം ഒന്നുതന്നെയാണെങ്കിലും, അത് അവതരിപ്പിക്കുന്ന രീതി നമ്മുടെ ചിന്തയെയും തെരഞ്ഞെടുപ്പിനെയും സ്വാധീനിക്കുന്നു. ഈ പ്രതിഭാസത്തെയാണ് ഫ്രെയ്മിംഗ് ഇഫക്റ്റ് (Framing Effect) എന്നു വിളിക്കുന്നത്. സാമ്പത്തിക തീരുമാനങ്ങളിൽ മാത്രമല്ല, ആരോഗ്യരംഗത്തും രാഷ്‌ട്രീയ ആശയവിനിമയത്തിലും പരസ്യങ്ങളിലും പൊതുനയങ്ങളിലും വരെ framing വലിയ സ്വാധീനം ചെലുത്തുന്നു.
യുക്തിയുടെ പരിമിതികൾ
നമ്മൾ ഓരോ ദിവസവും എടുക്കുന്ന തീരുമാനങ്ങളിൽ സാമ്പത്തികശാസ്ത്രം വലിയ പങ്കുവഹിക്കുന്നു. എന്ത് ഭക്ഷണം കഴിക്കണം, ഏത് ഫോൺ വാങ്ങണം, വരുമാനത്തിൽ എത്രമാത്രം സമ്പാദിക്കണം, ഇൻഷ്വറൻസിലും ഓഹരികളിലും നിക്ഷേപിക്കണോ, വിലക്കുറവു കാണുമ്പോൾ സാധനങ്ങൾ വാങ്ങണോ, ആരോഗ്യത്തിനായി വ്യായാമം ചെയ്യണോ - ഇങ്ങനെ നിരവധി തീരുമാനങ്ങൾ നമ്മുടെ ദൈനംദിന ജീവിതത്തിന്‍റെ ഭാഗമാണ്. എന്നാൽ ഈ തീരുമാനങ്ങളെല്ലാം യുക്തിപൂർവമായ ചിന്തയുടെയും കൃത്യമായ കണക്കുകൂട്ടലുകളുടെയും മാത്രം ഫലമല്ല.
നമ്മുടെ ചിന്തകളും വികാരങ്ങളും ശീലങ്ങളും സാഹചര്യങ്ങളും ഇവയെ സ്വാധീനിക്കുന്നു. ഇക്കാര്യങ്ങളാണ് പെരുമാറ്റ സാമ്പത്തികശാസ്ത്രം പരിശോധിക്കുന്നത്. അങ്ങനെ, സാമ്പത്തികശാസ്ത്രത്തെ ക്ലാസ് മുറികളിലെ സിദ്ധാന്തങ്ങളിൽ ഒതുക്കിനിർത്താതെ നമ്മുടെ അടുക്കളയിലേക്കും ഷോപ്പിംഗ് കാർട്ടിലേക്കും മൊബൈൽ സ്ക്രീനിലേക്കും ബാങ്ക് അക്കൗണ്ടിലേക്കും കൊണ്ടുവരുന്ന ശാഖയായി പെരുമാറ്റ സാമ്പത്തികശാസ്ത്രം മാറുന്നു.
അപ്പോൾ നമ്മൾ യുക്തിരഹിതരാണോ? അല്ല. മനുഷ്യന്‍റെ യുക്തിക്ക് ചില പരിമിതികളുണ്ടെന്ന യാഥാർഥ്യമാണ് പെരുമാറ്റ സാമ്പത്തികശാസ്ത്രം നമ്മെ ഓർമിപ്പിക്കുന്നത്. അതിനാൽ, അടുത്ത തവണ ഒരു വലിയ ഓഫർ കാണുമ്പോഴോ, “Limited Stock” എന്ന സന്ദേശം ശ്രദ്ധയിൽപ്പെടുമ്പോഴോ, മറ്റുള്ളവരെല്ലാം എന്തോ വാങ്ങുന്നതായി കാണുമ്പോഴോ, ഒരു നിമിഷം നമുക്ക് സ്വയം ചോദിക്കാം, “ഞാൻ ഇത് തെരഞ്ഞെടുക്കുന്നത് എന്തുകൊണ്ടാണ്?” ഈ ഒരു ചോദ്യം ചിലപ്പോൾ നമ്മുടെ തീരുമാനങ്ങളെക്കുറിച്ച് വീണ്ടും ചിന്തിക്കാനും കൂടുതൽ ബോധപൂർവമായ തെരഞ്ഞെടുപ്പുകൾ നടത്താനും നമ്മെ സഹായിച്ചേക്കാം.
നമ്മൾ എടുക്കുന്ന ഓരോ സാമ്പത്തിക തീരുമാനത്തിനും പിന്നിൽ ഒരു കണക്കുണ്ടാകണമെന്നില്ല, പക്ഷേ, അതിനു പിന്നിൽ ഒരു ചിന്തയോ വികാരമോ അനുഭവമോ തീർച്ചയായും ഉണ്ടായിരിക്കും. ആ മനസിനെ മനസിലാക്കാനുള്ള ശ്രമമാണ് പെരുമാറ്റ സാമ്പത്തികശാസ്ത്രം. മനുഷ്യർ എന്തുകൊണ്ട് ഒരു പ്രത്യേക രീതിയിൽ ചിന്തിക്കുന്നു, എന്തുകൊണ്ട് ചില സാഹചര്യങ്ങളിൽ യുക്തിക്ക് വിരുദ്ധമായി പെരുമാറുന്നു എന്നതിനെക്കുറിച്ച് പെരുമാറ്റ സാമ്പത്തികശാസ്ത്രം പുതിയ ഉൾക്കാഴ്ചകൾ നൽകുന്നു.
(കോഴഞ്ചേരി സെന്‍റ് തോമസ് കോളജിലെ സാമ്പത്തിക ശാസ്ത്ര വിഭാഗം മേധാവിയാണ് ലേഖിക)
Leader Page
മക്കളോടുള്ള സ്നേഹത്തിന് അതിരുകളും അവരനുഭവിക്കുന്ന സ്വാതന്ത്ര്യത്തിന് ഉത്തരവാദിത്വവും വേണം. ഒരു കുടുംബത്തിലെ പക്വതക്കുറവ് മറ്റൊരു കുടുംബത്തിന്‍റെ ദുരന്തമാകുമ്പോൾ സമൂഹം പോലും ചോദ്യം ചെയ്യപ്പെടുന്നു. ഒരു കുട്ടി വളരുന്നത് ഒരു വീടിനുള്ളിൽ മാത്രമല്ല; അവന്‍റെ ചിന്തകളും സ്വഭാവവും ശീലങ്ങളും തീരുമാനങ്ങളും നാളെ ജീവിക്കേണ്ടിവരുന്ന സമൂഹത്തിന്‍റെകൂടി ഭാഗമാണ്. അതുകൊണ്ടുതന്നെ മക്കളെ വളർത്തുക എന്നത് ഒരു കുടുംബത്തിന്‍റെ സ്വകാര്യ ഉത്തരവാദിത്വം മാത്രമല്ല; സമൂഹത്തോടുള്ള വലിയൊരു കടമകൂടിയാണ്. മക്കൾക്ക് മികച്ച വിദ്യാഭ്യാസവും ജീവിതസൗകര്യങ്ങളും ഒരുക്കുന്നതിൽ മാത്രം മാതാപിതാക്കളുടെ ഉത്തരവാദിത്വം അവസാനിക്കുന്നില്ല. മറ്റുള്ളവരുടെ ജീവനെയും അവകാശങ്ങളെയും മാനിക്കുന്ന ഉത്തരവാദിത്വമുള്ള മനുഷ്യരായി അവരെ വളർത്തുക എന്നതിലാണ് യഥാർഥ രക്ഷാകർതൃത്വത്തിന്‍റെ വിജയം.
ഈ സത്യം നമ്മുടെ മുന്നിൽ വീണ്ടും വീണ്ടും തെളിയിക്കുന്ന ചില സംഭവങ്ങളാണ് അടുത്തിടെയുണ്ടായത്. തിരുവനന്തപുരം മണ്ണന്തലയിൽ നാലു മക്കളുടെ മുന്നിൽവച്ച് അമ്മ കൊല്ലപ്പെട്ട ദാരുണസംഭവം കേരളത്തിന്‍റെ മനഃസാക്ഷിയെ ഞെട്ടിച്ചു. കുടുംബപ്രശ്നങ്ങളെ തുടർന്നുണ്ടായ അക്രമത്തിൽ അമ്മയ്ക്ക് ജീവൻ നഷ്ടപ്പെടുകയും പിന്നീട് പിതാവിനെ മരിച്ച നിലയിൽ കണ്ടെത്തുകയും ചെയ്തതോടെ നാലു കുട്ടികൾക്ക് മാതാപിതാക്കളെ നഷ്ടമായി. എറണാകുളം ചേരാനെല്ലൂരിൽ പതിനേഴുകാരൻ ഓടിച്ച ആഡംബരകാർ ഇടിച്ച് ഒരു വഴിയോര ഭക്ഷണശാല ഉടമയ്ക്ക് ജീവൻ നഷ്ടപ്പെട്ട സംഭവം ഞെട്ടലുണ്ടാക്കി. പ്രായപൂർത്തിയാകാത്ത ഒരാൾക്ക് എങ്ങനെയാണ് പൊതുനിരത്തിൽ വാഹനം ഓടിക്കാനുള്ള സാഹചര്യമുണ്ടായത്? നെടുമ്പാശേരിയിൽ ഒക്ടോബർ 11ന് മദ്യലഹരിയിലായിരുന്ന പത്തൊന്പതുകാരൻ ഓടിച്ച കാർ സ്കൂട്ടറിലിടിച്ച് മൂന്ന് യുവജനങ്ങളുടെ ജീവനുകൾ പൊലിഞ്ഞ സംഭവവും കേരളത്തെ നടുക്കി.
ഈ സംഭവങ്ങൾ ഓരോന്നും വ്യത്യസ്ത സാഹചര്യങ്ങളിലാണ് ഉണ്ടായത്. അവയുടെ കാരണങ്ങളും നിയമപരമായ ഉത്തരവാദിത്വങ്ങളും ഒരുപോലെയല്ല. എന്നാൽ, അവയെല്ലാം സമൂഹത്തിന് മുന്നിൽ ഉയർത്തിവയ്ക്കുന്ന ചില ചോദ്യങ്ങളുണ്ട്. രക്ഷാകർതൃത്വത്തിന്‍റെ അർഥം നാം മറന്നുപോകുകയാണോ? മക്കളുടെ ആഗ്രഹങ്ങൾക്കു മുന്നിൽ അതിരുകൾ നിശ്ചയിക്കാൻ മാതാപിതാക്കൾക്ക് കഴിയാതെപോകുകയാണോ? കുടുംബത്തിനുള്ളിലെ അക്രമവും നിയന്ത്രണമില്ലാത്ത സ്വാതന്ത്ര്യവും മറ്റുള്ളവരുടെ ജീവിതത്തെ ബാധിക്കുമെന്ന് നാം തിരിച്ചറിയുന്നുണ്ടോ? അതിലുപരി, അപകടത്തിന്‍റെ മുന്നറിയിപ്പുകൾ കാണുമ്പോഴും നമ്മുടെ ചുറ്റുപാടുകൾ എന്തുകൊണ്ടാണ് പലപ്പോഴും നിശബ്ദമാകുന്നത്? ഇത് ഏതാനും കുടുംബങ്ങളുടെ മാത്രം കഥയല്ല. സ്നേഹവും സ്വാതന്ത്ര്യവും ഉത്തരവാദിത്വവും തമ്മിലുള്ള അതിർവരമ്പുകൾ മങ്ങിപ്പോകുന്ന ഒരു കാലത്തിന്‍റെ സാമൂഹിക യാഥാർഥ്യമാണ്.
സ്നേഹവും ഉത്തരവാദിത്വവും
മക്കളെ സ്നേഹിക്കുക എന്നത് അവരുടെ എല്ലാ ആഗ്രഹങ്ങൾക്കും സമ്മതം മൂളുക എന്നല്ല. അവർ ആവശ്യപ്പെടുന്നതെല്ലാം വാങ്ങിക്കൊടുക്കുന്നതും അവർക്ക് ഇഷ്ടമുള്ളതെല്ലാം ചെയ്യാൻ അനുവദിക്കുന്നതുമല്ല നല്ല രക്ഷാകർതൃത്വമെന്ന് ഇനിയെന്നാണ് വിവേകികളായ മലയാളികൾ മനസിലാക്കുക? ചില സന്ദർഭങ്ങളിൽ സ്നേഹത്തിന്‍റെ ഏറ്റവും വലിയ പ്രകടനം “ഇല്ല” എന്ന് പറയാനുള്ള ധൈര്യമാണ്. കുട്ടികൾക്ക് എന്താണ് ആഗ്രഹമെന്നറിയുന്നതിനൊപ്പം അവർക്കെന്താണ് സുരക്ഷിതമെന്നും ഉചിതമെന്നും തിരിച്ചറിയാൻ സഹായിക്കുകയാണ് മാതാപിതാക്കളുടെ കടമ.
ഇന്ന് പല കുടുംബങ്ങളിലെയും സാമ്പത്തിക ഉന്നതി കുട്ടികളുടെയും ജീവിതസൗകര്യങ്ങൾ ഉയർത്താൻ ഉപകരിച്ചിട്ടുണ്ട് എന്നത് യാഥാർഥ്യമാണ്. വിലകൂടിയ മൊബൈൽ ഫോണുകൾ, ആഡംബര വാഹനങ്ങൾ, വിദേശയാത്രകൾ, ഇഷ്ടാനുസൃത ജീവിതരീതികൾ എന്നിവ കുട്ടികൾക്ക് അനുസ്യൂതമായി ലഭ്യമാവുന്ന ഒരു സാഹചര്യം കൈവന്നിരിക്കുന്നു. ഇതിലൊന്നും സ്വതവേ തെറ്റൊന്നുമില്ല. എന്നാൽ, സൗകര്യങ്ങൾക്കൊപ്പം തങ്ങളുടെ സാമൂഹിക ഉത്തരവാദിത്വവും വളരുന്നുണ്ടോ എന്നതാണ് പ്രസക്തമായ ചോദ്യം. ഒരു കുട്ടിക്ക് വിലകൂടിയ കാർ വാങ്ങിക്കൊടുക്കാൻ കഴിയുന്ന രക്ഷിതാവ്, ആ കാർ ഉപയോഗിക്കാനുള്ള നിയമപരമായ പ്രായവും പരിശീലനവും പക്വതയും അവർക്കുണ്ടോ എന്നുകൂടി ഉറപ്പുവരുത്തേണ്ടതുണ്ട്. സ്വന്തം മക്കളുടെ ഇഷ്ടങ്ങൾ നിറവേറ്റുന്നതിൽ കാണിക്കുന്ന ശ്രദ്ധയും ജാഗ്രതയും, അവരുടെ സുരക്ഷ ഉറപ്പാക്കുന്നതിലും കാണിക്കേണ്ടതുണ്ട്.
കുട്ടികളുമായി സൗഹൃദപരമായി പെരുമാറണം എന്നതിൽ തർക്കമില്ല. അവരുടെ പ്രശ്നങ്ങൾ കേൾക്കാനും അവരുടെ ലോകം മനസിലാക്കാനും മാതാപിതാക്കൾ തയാറാകണം. എന്നാൽ, രക്ഷിതാവിന്‍റെ ഉത്തരവാദിത്വം സൗഹൃദത്തിൽ മാത്രം ഒതുങ്ങുന്നതല്ല. തെറ്റായ തീരുമാനങ്ങളിൽനിന്ന് അവരെ പിന്തിരിപ്പിക്കാനും അപകടകരമായ ശീലങ്ങൾ തിരുത്താനും ആവശ്യമായപ്പോൾ കർശനമായ നിലപാട് സ്വീകരിക്കാനും കെൽപുണ്ടാവണം. കുട്ടികൾക്ക് ഇഷ്ടപ്പെടുന്ന രക്ഷിതാവാകുന്നതിലുപരി, ജീവിതത്തിലെ നിർണായക ഘട്ടങ്ങളിൽ ശരിയായ വഴി കാണിക്കുന്ന രക്ഷിതാവാകാനാണ് പരിശ്രമിക്കേണ്ടത്.
സ്നേഹം കുട്ടിക്ക് ചിറകുകൾ നൽകണം; എന്നാൽ ആ ചിറകുകൾ ഉപയോഗിക്കുമ്പോൾ സ്വന്തം പരിധികളും മറ്റുള്ളവരുടെ അവകാശങ്ങളും തിരിച്ചറിയാനുള്ള വിവേകവും നൽകണം. നിയന്ത്രണമില്ലാത്ത സ്വാതന്ത്ര്യം വളർച്ചയല്ല. ഉത്തരവാദിത്വം തിരിച്ചറിയാത്ത സ്വാതന്ത്ര്യം ചിലപ്പോൾ അപകടത്തിലേക്കുള്ള വഴികൂടിയാണ് എന്നത് തിരിച്ചറിയണം.
രക്ഷിതാക്കളുടെ ഉത്തരവാദിത്വം, സമൂഹത്തിന്‍റെ ഇടപെടൽ
കുട്ടികളുടെ വളർച്ചയിൽ ഏറ്റവും വലിയ പങ്ക് കുടുംബത്തിനാണ്. എന്നാൽ കുട്ടികളെ വളർത്തുന്നതും അപകടങ്ങൾ തടയുന്നതും കുടുംബത്തിന്‍റെ മാത്രം ചുമതലയായി കരുതാനുമാവില്ല.
ഒരു കുട്ടിയുടെ തെറ്റിന് തെളിവില്ലാതെ രക്ഷിതാക്കളെ കുറ്റപ്പെടുത്തുന്നതും എല്ലാ സാമൂഹിക പരാജയങ്ങളുടെയും ഉത്തരവാദിത്വം ഒരു കുടുംബത്തിനുമേൽ ചുമത്തുന്നതും നീതിയല്ല. അതുപോലെ, കുടുംബത്തിനുള്ളിൽ നടക്കുന്ന അക്രമമോ അപകടകരമായ പെരുമാറ്റമോ ‘അവരുടെ സ്വകാര്യ കാര്യം’ എന്ന പേരിൽ അവഗണിക്കുന്നതും ശരിയല്ല.
‘അത് അവരുടെ കുടുംബകാര്യം’ എന്ന മൗനം
കുടുംബത്തിനുള്ളിലെ അക്രമം പലപ്പോഴും വീടിന്‍റെ നാലു ചുവരുകൾക്കുള്ളിൽ ഒതുങ്ങേണ്ട കാര്യമാണെന്ന തെറ്റായ ധാരണ നമ്മുടെ സമൂഹത്തിലുണ്ട്. ഭാര്യാഭർത്താക്കന്മാർ തമ്മിലുള്ള വഴക്കിൽ ഇടപെടേണ്ടതില്ലെന്നും അത് അവരുടെ സ്വകാര്യ പ്രശ്നമാണെന്നും കരുതുന്നവരുണ്ട്. എന്നാൽ, ഒരു വീട്ടിൽ നിരന്തരമായ ശാരീരികമോ മാനസികമോ ആയ അക്രമം നടക്കുമ്പോൾ അതിനെ സ്വകാര്യവിഷയമായി മാത്രം കാണാനാവില്ല. അവിടെ കുട്ടികളുടെ സുരക്ഷയും സ്ത്രീകളുടെ ജീവിതവും മനുഷ്യാവകാശങ്ങളും ഉൾപ്പെട്ടിരിക്കുന്നു.
അക്രമത്തിന്‍റെ മുന്നറിയിപ്പുകൾ ലഭിക്കുമ്പോൾ അവയെ വെറും കുടുംബവഴക്കായി കാണാതെ, അപകടസാധ്യത വിലയിരുത്തി ഇരയുടെ സുരക്ഷ ഉറപ്പാക്കാൻ തക്ക സംവിധാനങ്ങൾ നമ്മുടെ സാമൂഹിക ചുറ്റുപാടുകളിൽ സ്നേഹ മതിലുകളായി രൂപപ്പെട്ടുവരേണ്ടതായുണ്ട്.
അയൽവാസികൾക്കും ബന്ധുക്കൾക്കും സുഹൃത്തുക്കൾക്കും ചിലപ്പോൾ കുടുംബത്തിനുള്ളിലെ പ്രശ്നങ്ങളുടെ സൂചനകൾ ലഭിക്കാറുണ്ട്. ഒരു സമയോചിതമായ ഇടപെടൽ ഒരാളുടെ ജീവൻ രക്ഷിച്ചേക്കാം; ഒരു കുട്ടിയുടെ ജീവിതം കൂടുതൽ സുരക്ഷിതമാക്കിയേക്കാം. സമൂഹത്തിന്‍റെ ഉത്തരവാദിത്വം കുറ്റം സംഭവിച്ചശേഷം പ്രതിഷേധിക്കുന്നതിൽ മാത്രം ഒതുങ്ങാനുള്ളതല്ല. ദുരന്തത്തിനു മുമ്പുള്ള സൂചനകൾ തിരിച്ചറിയാനും ആവശ്യമായ സഹായം യഥാസമയത്ത് എത്തിക്കാനും കഴിയുന്ന ഒരു സാമൂഹിക അന്തരീക്ഷമാണ് നമുക്കു വേണ്ടത്.
സമ്പത്തും പദവിയും ഉത്തരവാദിത്വത്തിനു പകരമല്ല
സമ്പത്ത് ഒരിക്കലും ഉത്തരവാദിത്വത്തിന്‍റെ അളവുകോലല്ല. ഒരു കുട്ടിക്ക് ആഡംബരജീവിതം നൽകാൻ കഴിയുന്നതുകൊണ്ടു മാത്രം അവൻ പക്വതയുള്ളവനാകുന്നുമില്ല. പദവിയും അധികാരവും ഉള്ളതുകൊണ്ട് നിയമപരമായ ബാധ്യതകളിൽനിന്ന് ഒരാൾക്ക് ഒഴിവാകാനുമാവില്ല. മക്കൾക്ക് നൽകേണ്ട ഏറ്റവും വിലയേറിയ പാഠം പണത്തിന്‍റെ ശക്തിയെക്കുറിച്ചല്ല, ഉത്തരവാദിത്വത്തിന്‍റെ മൂല്യത്തെക്കുറിച്ചാണ്. സ്വന്തം പ്രവൃത്തികൾ മറ്റൊരാളുടെ ജീവിതത്തെ എങ്ങനെ ബാധിക്കുമെന്ന് തിരിച്ചറിയുമ്പോഴാണ് ഒരാൾ യഥാർഥത്തിൽ പക്വതയുള്ളവനാകുന്നത്. ആ പക്വത പാഠപുസ്തകത്തിൽ നിന്നല്ല, സ്വജീവിതത്തിൽനിന്നാണ് കൈവരിക്കേണ്ടത്.
Leader Page
ആഭ്യന്തര റബർ വിപണിയെ സ്വാധീനിക്കുന്ന ഇറക്കുമതി നയങ്ങളും ഉത്പന്നങ്ങളുടെ വർഗീകരണത്തിലെ അവ്യക്തതകളും കർഷകന്‍റെ വരുമാനത്തെ നിർണയിക്കുന്ന പ്രധാന ഘടകങ്ങളായി മാറിയിരിക്കുന്നു. പ്രത്യേകിച്ച്, കോമ്പൗണ്ട് റബർ എന്ന പേരിൽ ഇറക്കുമതി ചെയ്യുന്ന ഉത്പന്നങ്ങളുടെ യഥാർഥ ഘടനയും സ്വഭാവവും സംബന്ധിച്ച ആശങ്കകൾ ഗൗരവമായി പരിശോധിക്കപ്പെടേണ്ടതാണ്.
സ്വാഭാവിക റബറിന്‍റെ വലിയൊരളവ് അടങ്ങിയ ഉത്പന്നങ്ങളെ കോമ്പൗണ്ട് റബർ എന്ന പേരിൽ വർഗീകരിച്ച് ഇറക്കുമതി ചെയ്യാൻ അനുവദിക്കുന്ന സാഹചര്യമുണ്ടെങ്കിൽ അത് ആഭ്യന്തര റബർ കർഷകരുടെ താത്പര്യങ്ങൾക്ക് ഗുരുതരമായ ആഘാതമുണ്ടാക്കും. ചില വൻകിട ടയർ കമ്പനികൾക്ക് ഇത്തരം വർഗീകരണങ്ങളിലൂടെ നേട്ടമുണ്ടാകുന്നുവെന്ന കർഷകമേഖലയുടെ ആശങ്കയും വസ്തുതകളുടെ അടിസ്ഥാനത്തിൽ പരിശോധിക്കപ്പെടണം. ഇറക്കുമതിയുടെ യഥാർഥ സ്വഭാവം മറച്ചുവച്ച് കുറഞ്ഞ തീരുവയോ മറ്റ് ആനുകൂല്യങ്ങളോ നേടാനുള്ള നീക്കങ്ങൾ അനുവദിക്കരുത്.
ഇവിടെ ഉയരുന്ന അടിസ്ഥാനചോദ്യം ഇതാണ്: സ്വാഭാവിക റബറും ഏതാനും രാസഘടകങ്ങളും ചേർത്തതുകൊണ്ടുമാത്രം ഒരു ഉത്പന്നത്തെ കോമ്പൗണ്ട് റബറായി കണക്കാക്കാനാകുമോ? അതിന്‍റെ ഘടനയും സ്വാഭാവിക റബറിന്‍റെ അളവും സംസ്കരണരീതിയും പരിശോധിക്കാതെ ഇത്തരം വർഗീകരണം അംഗീകരിക്കുന്നത് ശരിയാണോ?
ബിഐഎസ് മാനദണ്ഡങ്ങളിലെ അവ്യക്തത
ഇറക്കുമതി ചെയ്യുന്ന കോമ്പൗണ്ട് റബറിന്‍റെ ഘടനയും ഗുണനിലവാരവും സംബന്ധിച്ച് വ്യക്തമായ മാനദണ്ഡങ്ങൾ ആവശ്യമാണ്. എന്നാൽ വ്യത്യസ്ത ഘടനയും സ്വഭാവവുമുള്ള ഇത്തരം ഉത്പന്നങ്ങൾക്ക് ഏകീകൃതമായ ഒരു ബിഐഎസ് മാനദണ്ഡം രൂപപ്പെടുത്തുക പ്രായോഗികമല്ലെന്ന നിലപാടാണ് വിഷയം പരിശോധിച്ച ബിഐഎസ് അറിയിച്ചിട്ടുള്ളത്.
എന്നാൽ ഏകീകൃത മാനദണ്ഡം രൂപപ്പെടുത്തുന്നതിലെ പ്രായോഗിക ബുദ്ധിമുട്ട് ഈ മേഖലയിലെ പരിശോധനയുടെയും നിയന്ത്രണത്തിന്‍റെയും അഭാവത്തിന് ന്യായീകരണമാകരുത്. ഇറക്കുമതി ചെയ്യുന്ന വസ്തുക്കളുടെ ഘടന, സ്വാഭാവിക റബറിന്‍റെ അളവ്, ചേർത്തിട്ടുള്ള മറ്റു ഘടകങ്ങൾ, സംസ്കരണരീതി എന്നിവ തിരിച്ചറിയുന്നതിനുള്ള വ്യക്തമായ സാങ്കേതിക പരിശോധനാ സംവിധാനവും വർഗീകരണ മാനദണ്ഡങ്ങളും അനിവാര്യമാണ്. നിർബന്ധിത ഗുണനിലവാര നിയന്ത്രണ ഉത്തരവ് ബാധകമായ സാഹചര്യങ്ങളും മറ്റ് ഇറക്കുമതികളും തമ്മിലുള്ള നിയമപരമായ വ്യത്യാസവും കൃത്യമായി പാലിക്കണം.
റബർ ബോർഡിന്‍റെ സാങ്കേതിക അധികാരം
റബർ ആക്ടിന്‍റെ അടിസ്ഥാനത്തിൽ റബർ ബോർഡിന് റബറിന്‍റെ ഗുണനിലവാരം, പരിശോധന, സാങ്കേതിക വിലയിരുത്തൽ തുടങ്ങിയ മേഖലകളിൽ നിർണായകമായ ചുമതലകളുണ്ട്. തുറമുഖങ്ങളിൽ എത്തുന്ന വസ്തുക്കളുടെ യഥാർഥ സ്വഭാവം പരിശോധിക്കുന്നതിനും അവ സ്വാഭാവിക റബറാണോ, മറ്റു ഘടകങ്ങൾ ചേർത്ത സ്വാഭാവിക റബറാണോ, കോമ്പൗണ്ട് റബറാണോ എന്ന് തിരിച്ചറിയുന്നതിനും ബോർഡിന്‍റെ സാങ്കേതിക വൈദഗ്ധ്യം പൂർണമായി പ്രയോജനപ്പെടുത്തണം.
സ്വാഭാവിക റബറും കോമ്പൗണ്ട് റബറും
കോമ്പൗണ്ട് റബറും സ്വാഭാവിക റബർ കൂടുതലായി അടങ്ങിയ മിശ്രിതങ്ങളും തമ്മിൽ വ്യക്തമായ അതിർവരമ്പ് നിർണയിക്കേണ്ടതുണ്ട്. സ്വാഭാവിക റബറിന്‍റെ അളവ് 50 ശതമാനത്തിൽ കൂടുതലുള്ള വസ്തുക്കളെ കോമ്പൗണ്ട് റബറായി പരിഗണിക്കരുതെന്ന നിർദേശം റബർ ബോർഡ് മുന്നോട്ടു വച്ചിട്ടുണ്ട്. ഈ നിർദേശം കേവലം ഒരു സാങ്കേതിക ശിപാർശയായി കാണാനാവില്ല. കോമ്പൗണ്ട് റബറിന്‍റെ യഥാർഥ സ്വഭാവവും വർഗീകരണത്തിന്‍റെ അടിസ്ഥാനതത്വവും സംരക്ഷിക്കുന്നതിനുള്ള അനിവാര്യമായ നിലപാടാണിത്. റബർ ബോർഡിന്‍റെ ശിപാർശയുടെ അടിസ്ഥാനത്തിൽ ഡിജിഎഫ്ടി വ്യക്തവും നിർബന്ധിതവുമായ വർഗീകരണ മാനദണ്ഡം കൊണ്ടുവരണം.
നിലവിലുള്ള അന്താരാഷ്‌ട്ര ഹാർമണൈസ്ഡ് സിസ്റ്റത്തിലെ 4005 വിഭാഗം വൾക്കനൈസ് ചെയ്യാത്ത കോമ്പൗണ്ടഡ് റബറിനെയും ഉൾക്കൊള്ളുന്നതിനാൽ, ഈ വിഷയത്തിൽ സാങ്കേതിക നിർവചനങ്ങളും കസ്റ്റംസ് നിയമങ്ങളും തമ്മിലുള്ള പൊരുത്തം ഉറപ്പാക്കിക്കൊണ്ടായിരിക്കണം നയപരമായ മാറ്റങ്ങൾ വരുത്തേണ്ടത്.
കസ്റ്റംസ് വരുമാനത്തിലും സുതാര്യത വേണം
ഇറക്കുമതി ചെയ്യുന്ന വസ്തുക്കളുടെ എച്ച്എസ്എൻ കോഡ് തെറ്റായി രേഖപ്പെടുത്തുകയോ ഉത്പന്നത്തിന്‍റെ യഥാർഥ ഘടന മറച്ചുവയ്ക്കുകയോ ചെയ്യുന്ന സാഹചര്യമുണ്ടെങ്കിൽ അത് ആഭ്യന്തര കർഷകരുടെ വിപണിയെ മാത്രമല്ല, സർക്കാരിന്‍റെ കസ്റ്റംസ് വരുമാനത്തെയും ബാധിക്കും. കോമ്പൗണ്ട് റബറിനും സ്വാഭാവിക റബറിനും ബാധകമായ തീരുവകളിൽ വ്യത്യാസങ്ങളുള്ളതിനാൽ, ഇറക്കുമതിയുടെ യഥാർഥ സ്വഭാവം പരിശോധിക്കാതെ വർഗീകരണം അംഗീകരിക്കുന്നത് പൊതുവരുമാനത്തിന് നഷ്ടമുണ്ടാക്കാൻ ഇടയാക്കും.
ഇറക്കുമതി ചെയ്യുന്ന രാജ്യത്തിന്‍റെ ഉത്ഭവം, ബാധകമായ വ്യാപാരക്കരാറുകൾ, തീരുവ ഇളവുകൾ, പ്രഖ്യാപിച്ച എച്ച്എസ്എൻ കോഡ്, യഥാർഥത്തിൽ ഈടാക്കിയ കസ്റ്റംസ് തീരുവ എന്നിവയെല്ലാം സുതാര്യമായി പരിശോധിക്കപ്പെടണം. എത്ര അളവിൽ കോമ്പൗണ്ട് റബർ ഇറക്കുമതി ചെയ്തു, അതിൽ സ്വാഭാവിക റബറിന്‍റെ അളവ് എത്രയാണ്, ഏത് രാജ്യങ്ങളിൽനിന്നാണ് ഇറക്കുമതി ചെയ്തത്, എത്ര നികുതി ലഭിച്ചു തുടങ്ങിയ വിവരങ്ങൾ പൊതുജനങ്ങൾക്ക് ലഭ്യമാക്കേണ്ടതുണ്ട്.
അഡ്വാൻസ് ഓതറൈസേഷൻ
വ്യവസ്ഥകൾ പുനഃപരിശോധിക്കണം
ടയർ നിർമാണമേഖലയിലെ അഡ്വാൻസ് ഓതറൈസേഷൻ സംവിധാനവും അതുമായി ബന്ധപ്പെട്ട എസ്ഐഒഎൻ (Standard Input Output Norms) മാനദണ്ഡങ്ങളും കാലാനുസൃതമായി പുനഃപരിശോധിക്കേണ്ടതുണ്ട്. കയറ്റുമതി ബാധ്യതയോടുകൂടി അസംസ്കൃത വസ്തുക്കൾ തീരുവയിളവോടെ ഇറക്കുമതി ചെയ്യാൻ അനുവദിക്കുന്ന ഈ സംവിധാനം കയറ്റുമതി വ്യവസായത്തിന് പ്രയോജനകരമാണ്. എന്നാൽ, മാറിയ സാങ്കേതികവിദ്യയും ഉത്പാദനരീതികളും കണക്കിലെടുത്ത് നിലവിലുള്ള മാനദണ്ഡങ്ങൾ യഥാർഥ ആവശ്യങ്ങളുമായി പൊരുത്തപ്പെടുന്നുണ്ടോ എന്നു പരിശോധിക്കണം.
ഇറക്കുമതി ചെയ്യുന്ന വസ്തുക്കൾ അനുവദിക്കപ്പെട്ട ആവശ്യങ്ങൾക്കുതന്നെ ഉപയോഗിക്കുന്നുണ്ടെന്നും കയറ്റുമതി ബാധ്യതകൾ കൃത്യമായി പാലിക്കുന്നുണ്ടെന്നും ഉറപ്പാക്കണം. കയറ്റുമതി പ്രോത്സാഹനത്തിന്‍റെ പേരിൽ ആഭ്യന്തര റബർ വിപണിയെയും കർഷകരെയും പ്രതികൂലമായി ബാധിക്കുന്ന സാഹചര്യം ഉണ്ടാകരുത്.
(കർഷക കോൺഗ്രസ് സംസ്ഥാന പ്രസിഡന്‍റാണ് ലേഖകൻ)
Leader Page
ലാൽ കൃഷ്ണ അഡ്വാനി ഇന്ന് തന്‍റെ ജീവിതത്തിന്‍റെ നൂറാം വർഷത്തിലേക്ക് പ്രവേശിക്കുകയാണ്. ആധുനിക ഇന്ത്യയുടെ പല സുപ്രധാന അധ്യായങ്ങളിലൂടെയും കടന്നുപോയ ചുരുക്കം ചില വ്യക്തികളിൽ ഒരാളാണ് അദ്ദേഹം. 1927 നവംബർ എട്ടിനാണ് അദ്ദേഹം ജനിച്ചത്.
1947ൽ യുവാവായിരിക്കുമ്പോൾതന്നെ സിന്ധിലെ പരിചിതമായ ലോകം ഉപേക്ഷിച്ചുപോരേണ്ടിവന്നതിന്‍റെ വേദന അദ്ദേഹം അനുഭവിച്ചു. എന്നാൽ, യാതൊരു നീരസവുമില്ലാതെ അദ്ദേഹം തന്‍റെ ജീവിതം പൂജ്യത്തിൽനിന്ന് വീണ്ടും കെട്ടിപ്പടുത്തു. എല്ലാ പ്രതിസന്ധികൾക്കുമെതിരേ പോരാടി, ഒന്നുമില്ലായ്മയിൽനിന്ന് കെട്ടിപ്പടുക്കാനുള്ള ഈ കഴിവ് അദ്ദേഹത്തോടൊപ്പം എപ്പോഴും ഉണ്ടായിരുന്നു.
രണ്ട് സവിശേഷതകൾ ഒരു നേതാവ് എന്ന നിലയിൽ അഡ്വാനിയെ എല്ലായ്പോഴും വേറിട്ടു നിർത്തി. അദ്ദേഹത്തിന്‍റെ പ്രത്യയശാസ്ത്ര വ്യക്തതയും ബൗദ്ധിക മൂർച്ചയുമാണ് ഒന്നാമത്തേത്. അദ്ദേഹത്തിന്‍റെ പ്രസംഗങ്ങളിലും എഴുത്തുകളിലും ഇത് പ്രതിഫലിച്ചിരുന്നു. ഇന്ത്യൻ രാഷ്‌ട്രീയത്തിലെ വലിയൊരു വിഭാഗം വർഷങ്ങളായി മുന്നോട്ടുവച്ച വ്യാജ മതേതരത്വത്തെ അദ്ദേഹം തുറന്നുകാട്ടിയ രീതിയാണ് രണ്ടാമത്തേത്.
തനിക്കു ലഭിച്ച ഓരോ ഉത്തരവാദിത്വവും അഡ്വാനിജി വളരെ ശ്രദ്ധയോടെ നിർവഹിച്ചു. 1970ൽ അഡ്വാനിയുടെ പാർലമെന്‍ററി ജീവിതം ആരംഭിച്ചു. പാർലമെന്‍റിലെ അദ്ദേഹത്തിന്‍റെ ഇടപെടലുകൾ രാഷ്‌ട്രീയ ഭേദമന്യേ ഏവരുടെയും പ്രശംസ പിടിച്ചുപറ്റി. ഒരു എംപി എന്ന നിലയിലും പിന്നീട് ഇരുസഭകളിലെയും പ്രതിപക്ഷ നേതാവായും ഭരണപക്ഷത്തിരുന്നും അദ്ദേഹം തന്‍റെ വ്യക്തിമുദ്ര പതിപ്പിച്ചു. പാർലമെന്‍ററി ഉത്തരവാദിത്വങ്ങൾക്കിടയിലും ജനങ്ങളെ നേരിട്ട് കാണുന്നതിനായി അദ്ദേഹം ഇന്ത്യയിലുടനീളം നിരന്തരം സഞ്ചരിച്ചു.
1991ലെ ലോക്സഭാ തെരഞ്ഞെടുപ്പ് എനിക്ക് ഇപ്പോഴും വ്യക്തമായി ഓർമയുണ്ട്. ലോക്സഭാ തെരഞ്ഞെടുപ്പിൽ അദ്ദേഹം മത്സരിക്കാൻ തീരുമാനിച്ച രണ്ട് സീറ്റുകളിൽ ഒന്നായിരുന്നു ഗാന്ധിനഗർ. ഗാന്ധിനഗറിലെ ജനങ്ങൾ അദ്ദേഹത്തെ പലതവണ പാർലമെന്‍റിലേക്ക് തെരഞ്ഞെടുത്തു. തന്‍റെ മണ്ഡലത്തോട് അദ്ദേഹം കാണിച്ച കരുതലും ശ്രദ്ധയും ഏവരും കണ്ടുപഠിക്കേണ്ട ഒന്നാണ്.
അടിയന്തരാവസ്ഥ അഡ്വാനിജിയുടെ ജീവിതത്തിലെ ഒരു നിർണായക വഴിത്തിരിവായിരുന്നു. ജനാധിപത്യത്തെ സംരക്ഷിക്കുന്നതിനും ഭരണഘടന കാത്തുസൂക്ഷിക്കുന്നതിനുമുള്ള പോരാട്ടത്തിൽ അദ്ദേഹം മുൻനിരയിലുണ്ടായിരുന്നു. ആ അനുഭവങ്ങൾ അദ്ദേഹത്തിന്‍റെ ‘എ പ്രിസണേഴ്സ് സ്ക്രാപ്പ്ബുക്ക്’ എന്ന പുസ്തകത്തിൽ ഇടംപിടിച്ചു.
ഉജ്വലനായ ഒരു പ്രതിപക്ഷ നേതാവ് മാത്രമല്ല, മികച്ചൊരു ഭരണകർത്താവ് കൂടിയായിരുന്നു അഡ്വാനി. 1977ൽ ജനതാ സർക്കാർ അധികാരത്തിൽ വന്നപ്പോൾ വാർത്താവിതരണ പ്രക്ഷേപണ മന്ത്രിയായി ചുമതലയേറ്റു. ഉപപ്രധാനമന്ത്രി എന്ന നിലയിലും ഇന്ത്യയിൽ ഏറ്റവും കൂടുതൽ കാലം സേവനമനുഷ്ഠിച്ച ആഭ്യന്തരമന്ത്രിമാരിൽ ഒരാളെന്ന നിലയിലും ഇന്ത്യയുടെ സുരക്ഷാ സംവിധാനം ശക്തിപ്പെടുത്തുന്നതിൽ അദ്ദേഹം നിർണായക പങ്കുവഹിച്ചു. നമ്മുടെ സുരക്ഷാ സേനാംഗങ്ങളുടെ ജീവിതനിലവാരം മെച്ചപ്പെടുത്തുന്നതിൽ അദ്ദേഹം ചെയ്ത കാര്യങ്ങൾ വലിയ ആദരവോടെ സ്മരിക്കപ്പെടുന്നു. ഭീകരവാദത്തിനെതിരേയുള്ള അദ്ദേഹത്തിന്‍റെ അസന്ദിഗ്ധ നിലപാട് ഇന്ത്യക്ക് ശക്തമായ ഒരു ഭീകരവിരുദ്ധ നിയമം ലഭിക്കുന്നതിന് വഴിയൊരുക്കി.
അദ്ദേഹത്തിന്‍റെ ജീവിതത്തിലെ ഏറ്റവും ശ്രദ്ധേയമായ മുഹൂർത്തങ്ങളിലൊന്നായിരുന്നു സോമനാഥിൽനിന്ന് അയോധ്യയിലേക്കുള്ള രഥയാത്ര. ബിഹാറിൽവച്ച് അദ്ദേഹം അറസ്റ്റിലായ സങ്കടകരമായ നിമിഷങ്ങളുടെ ഓർമകളും എന്‍റെ മനസിലുണ്ട്.
അഡ്വാനിജിയുടെ വ്യക്തിത്വത്തെ വേറിട്ടു നിർത്തുന്ന ഒട്ടേറെ കാര്യങ്ങളുണ്ട്. ഉദാഹരണത്തിന്, അദ്ദേഹത്തിന്‍റെ ലാളിത്യം. നവനിർമാൺ പ്രസ്ഥാനത്തിനുശേഷം അദ്ദേഹം ജുനഗഢിലെത്തി ഒരു സാധാരണ പ്രവർത്തകനെപ്പോലെ ഒരു മാസത്തോളം താമസിച്ചു. കോൺഗ്രസിനെ ജനങ്ങൾ തള്ളിക്കളഞ്ഞ ആ നിയമസഭാ തെരഞ്ഞെടുപ്പിനായി പാർട്ടിയെ സജ്ജമാക്കിയത് അദ്ദേഹമായിരുന്നു. പൊതുജീവിതത്തിൽ എത്രത്തോളം സത്യസന്ധതയും ധാർമികതയും പുലർത്താമെന്ന് അദ്ദേഹം എപ്പോഴും കാണിച്ചുതന്നു. വായനയിൽ അതീവ താത്പര്യമുള്ള വ്യക്തിയാണ് അദ്ദേഹം. അദ്ദേഹത്തോടൊപ്പം സമയം ചെലവഴിച്ചിട്ടുള്ളവർക്കറിയാം, എത്രത്തോളം ശ്രദ്ധയോടെയാണ് അദ്ദേഹം പത്രങ്ങൾ വായിക്കുന്നതെന്ന്. സിനിമയുടെയും നാടകത്തിന്‍റെയും വലിയൊരു ആരാധകനായ അദ്ദേഹം, നല്ലൊരു സിനിമാ നിരൂപകൻകൂടിയായിരുന്നു. ചരിത്രത്തെക്കുറിച്ചുള്ള അദ്ദേഹത്തിന്‍റെ അറിവും അത് സംരക്ഷിക്കേണ്ടതിന്‍റെ ആവശ്യകതയും ‘മൈ കൺട്രി മൈ ലൈഫ്’ എന്ന അദ്ദേഹത്തിന്‍റെ പുസ്തകത്തിൽ വ്യക്തമാണ്.
അദ്ദേഹത്തിന്‍റെ ശ്രദ്ധേയമായ ജീവിതയാത്രയെക്കുറിച്ചു പറയുമ്പോൾ, കമലാ അഡ്വാനിയെക്കുറിച്ച് പരാമർശിക്കാതെ അത് പൂർണമാകില്ല. അദ്ദേഹത്തിന്‍റെ പൊതുജീവിതത്തിലുടനീളം കരുത്തും പിന്തുണയും നൽകിയ വ്യക്തിയായിരുന്നു അവർ. അദ്ദേഹത്തോടുള്ള നന്ദിസൂചകമായി 2024ൽ ഭാരതരത്ന നൽകി അദ്ദേഹത്തെ ആദരിച്ചു. അഡ്വാനിജി തന്‍റെ ജീവിതത്തിന്‍റെ നൂറാം വർഷത്തിലേക്ക് പ്രവേശിക്കുമ്പോൾ അദ്ദേഹത്തിന് ആയുരാരോഗ്യമുണ്ടാവട്ടെയെന്നും നമ്മെ ഏവരെയും എന്നത്തെയുംപോലെ ഇനിയും പ്രചോദിപ്പിക്കുന്നത് തുടരാൻ കഴിയട്ടെയെന്നും ഞാൻ പ്രാർഥിക്കുന്നു.
Leader Page
അസംതൃപ്തി നിറഞ്ഞ വേനൽക്കാലത്തിനു ശേഷം ഇന്ത്യ ഇപ്പോൾ രാഷ്‌ട്രീയ പ്രതിസന്ധിയുടെ ശരത്കാലത്തിലേക്ക് പ്രവേശിച്ചിരിക്കുകയാണ്. കഠിനമായ ചൂടിൽ തിളച്ച ജൂൺ, ജൂലൈ മാസങ്ങളിൽ രാഹുൽ ഗാന്ധിയുടെ നേതൃത്വത്തിലുള്ള പ്രതിപക്ഷ കോൺഗ്രസ് പാർട്ടിയുടെ പിന്തുണയോടെ യുവാക്കൾ നയിച്ച പ്രസ്ഥാനം വിദ്യാഭ്യാസ പരിഷ്കരണം ആവശ്യപ്പെട്ട് തെരുവിലിറങ്ങി.
പ്രക്ഷോഭം വളരെ ശക്തമായിരുന്നതിനാൽ, കേന്ദ്ര വിദ്യാഭ്യാസമന്ത്രി ധർമേന്ദ്ര പ്രധാന്‍റെ രാജി ഉൾപ്പടെയുള്ള സുപ്രധാനമായ വിട്ടുവീഴ്ചകൾക്ക് ബിജെപി നയിക്കുന്ന കേന്ദ്രസർക്കാർ നിർബന്ധിതരായി. എന്നാൽ, ഇന്ത്യക്കാരുടെ പ്രതിഷേധം ഇവിടെ അവസാനിക്കുന്നില്ല: അവരുടെ ശ്രദ്ധയിപ്പോൾ തെരഞ്ഞെടുപ്പ് സംവിധാനത്തിലാണ്.
ഈ ജനകീയ മുന്നേറ്റത്തിന്‍റെ കേന്ദ്രബിന്ദു ഇലക്ഷൻ കമ്മിഷനാണ്. പതിറ്റാണ്ടുകളായി, സ്വതന്ത്ര സ്ഥാപനമായ കമ്മിഷൻ ഇന്ത്യയുടെ ഏറ്റവും കരുത്തുറ്റ ജനാധിപത്യ സ്ഥാപനങ്ങളിലൊന്നായാണ് വീക്ഷിക്കപ്പെട്ടിരുന്നത്. ലോകത്തിലെ ഏറ്റവും വലിയ തെരഞ്ഞെടുപ്പു പ്രക്രിയ സുഗമമായി നടത്തുന്നതുവഴി രാജ്യത്തിനകത്തും അന്തർദേശീയ തലത്തിലും അത് വലിയ ബഹുമാനം നേടി. വളർന്നുവരുന്ന പല ജനാധിപത്യ രാജ്യങ്ങളും ഉപദേശങ്ങൾക്കായി ഇലക്ഷൻ കമ്മിഷനെ സമീപിച്ചിരുന്നു. എന്നാൽ കമ്മിഷൻ ഇന്ന് വ്യവസ്ഥാപിതമായ പക്ഷപാതിത്വം, നടപടിക്രമങ്ങളിലെ സുതാര്യതയില്ലായ്മ, വൻതോതിലുള്ള വോട്ടവകാശ നിഷേധം തുടങ്ങിയ ആരോപണങ്ങൾ നേരിടുകയാണ്.
തീവ്ര വോട്ടർപട്ടിക പരിഷ്കരണം
ഏപ്രിലിൽ വോട്ടെടുപ്പ് നടന്ന അഞ്ച് സംസ്ഥാനങ്ങളിലെ വോട്ടർപട്ടികയിൽ ഇലക്ഷൻ കമ്മിഷൻ ‘തീവ്ര വോട്ടർ പട്ടിക പരിഷ്കരണം’ (എസ്ഐആർ) നടത്തിയതോടെയാണ് വിവാദങ്ങൾക്ക് തുടക്കമായത്. മരിച്ചുപോയവരുടെയും താമസം മാറിയവരുടെയും കുടിയേറിപ്പോയവരുടെയും പേരുകൾ നീക്കം ചെയ്ത് വോട്ടർ രജിസ്ട്രി ഇടയ്ക്കിടെ പുതുക്കുന്നത് സാധാരണ നടപടി തന്നെയാണ്. എന്നാൽ ഈ ‘തീവ്രമായ’ നടപടി പതിവിലും വളരെ വിപുലമായിരുന്നു: ബംഗാളിൽ മാത്രം 91 ലക്ഷം പേരുകളാണ് നീക്കം ചെയ്യപ്പെട്ടത്.
തുടർന്ന് ശക്തമായ തിരിച്ചടിയുണ്ടായി. ഇലക്ഷൻ കമ്മിഷന്‍റെ കഴിവുകേട്, കൃത്രിമം അല്ലെങ്കിൽ അതിലും മോശമായ എന്തോ ഒന്ന് ഇതിനു പിന്നിലുണ്ടെന്ന് പ്രതിപക്ഷം ആരോപിച്ചു. കമ്മീഷനെതിരേയുള്ള ഈ രോഷം ന്യായമായിരുന്നു. വോട്ടർമാരുടെ പേരുകളുടെ സ്പെല്ലിംഗ് പിഴവുകൾ പോലെയുള്ള നിസാരമായ പ്രശ്നങ്ങൾ കാരണം ലക്ഷക്കണക്കിന് വോട്ടർമാർ ഓട്ടോമേറ്റഡ് സിസ്റ്റങ്ങൾ വഴി വോട്ടർപട്ടികയ്ക്കു പുറത്തായി. വോട്ടർമാരെ ഒഴിവാക്കിയത് കൃത്യമായി പരിശോധിക്കപ്പെട്ടിരുന്നില്ല. അത് പാർശ്വവത്കരിക്കപ്പെട്ട സമൂഹങ്ങളെയും ദരിദ്ര സംസ്ഥാനങ്ങളിൽനിന്നുള്ള ഗ്രാമീണ കുടിയേറ്റ തൊഴിലാളികളെയും നഗരങ്ങളിലെ തൊഴിലാളികളെയുമാണ് ഏറ്റവും കൂടുതൽ പ്രതികൂലമായി ബാധിച്ചത്.
വോട്ടർപട്ടികയിൽനിന്ന് പുറത്താക്കപ്പെട്ടവരുടെ പരാതികൾ പരിഹരിക്കാൻ നടപടിയൊന്നുമുണ്ടായില്ലെന്നത് കാര്യങ്ങൾ കൂടുതൽ വഷളാക്കി. ബംഗാളിൽ പുറത്താക്കപ്പെട്ട 34 ലക്ഷം വോട്ടർമാർ ഈ തീരുമാനത്തിനെതിരെ അപ്പീൽ നൽകി. എന്നാൽ, അടുത്ത തിെരഞ്ഞെടുപ്പിനു മുൻപ് ഏകദേശം 82,000 ഹരജികളിൽ മാത്രമേ വാദം കേൾക്കാൻ കമ്മിഷന് കഴിഞ്ഞുള്ളൂ. ഇതിൽ 91% ഹർജികളും ശരിയാണെന്ന് കണ്ടെത്തുകയും ചെയ്തു. അതായത്, ഇലക്ഷൻ കമ്മിഷൻ നടത്തിയ കൂട്ട ഒഴിവാക്കലിലെ ഭൂരിഭാഗവും തെറ്റായിരുന്നു. പക്ഷേ, വോട്ടെടുപ്പിനു മുൻപ് അവ തിരുത്താനും കഴിഞ്ഞില്ല.
ഇത് തെരഞ്ഞെടുപ്പുഫലത്തെ സംശയിക്കാനിടയാക്കി. വിശേഷിച്ചും, മുൻകാല ഫലങ്ങളിൽനിന്ന് വളരെ വ്യത്യസ്തമായ ഫലമുണ്ടായപ്പോൾ. 294ൽ 207 സീറ്റുകൾ നേടി ചരിത്രത്തിലാദ്യമായി ബിജെപി പശ്ചിമബംഗാളിൽ വൻ വിജയം കൊയ്തു. ഈ ഒഴിവാക്കലുകൾ മാത്രമാണ് ഫലത്തെ നിർണയിച്ചതെന്ന് കുറച്ചുപേർ അവകാശപ്പെട്ടു. എന്തായാലും ഈ സംഭവം പ്രതിപക്ഷത്തെ തീർത്തും പ്രകോപിപ്പിച്ചു.
കോടതി ഇടപെടൽ തേടി പ്രതിപക്ഷം
വേനൽക്കാലത്ത് വെളിപ്പെട്ട ക്രമക്കേടുകളിൽ കോടതി വേണ്ടത്ര ശ്രദ്ധ ചെലുത്തിയില്ലെന്ന് ആരോപണമുണ്ടെങ്കിലും രാഹുൽ ഗാന്ധി ഉൾപ്പടെയുള്ള പ്രതിപക്ഷ നേതാക്കൾ സുപ്രീംകോടതിയിൽ ഹരജി നൽകിയിട്ടുണ്ട്. വോട്ടർപട്ടിക പരിഷ്കരണം നിർത്തിവയ്ക്കാനും ഒഴിവാക്കപ്പെട്ട വോട്ടർമാരെ വീണ്ടും ഉൾപ്പെടുത്താൻ ഉത്തരവിടാനും സ്വതന്ത്ര അന്വേഷണം തീരുന്നതുവരെ ഔദ്യോഗിക ചുമതലകൾ നിർവഹിക്കുന്നതിൽനിന്ന് ഗ്യാനേഷ് കുമാറിനെ തടയാനും അവർ കോടതിയുടെ ഇടപെടൽ തേടുന്നു.
അതേസമയം, തെരഞ്ഞെടുപ്പ് കമ്മിഷൻ തങ്ങളുടെ ഭാഗം ന്യായീകരിക്കാൻ ശ്രമിക്കുകയാണ്. അപ്പീലുകൾ നിലനിൽക്കുന്ന സാഹചര്യത്തിൽ പട്ടികയിൽ ഉൾപ്പെടുത്തുന്നത് ചോദ്യം ചെയ്യപ്പെട്ട വോട്ടർമാരെ തുടരാൻ അനുവദിച്ചുകൊണ്ട് മറ്റു സംസ്ഥാനങ്ങളിലെ അനിയന്ത്രിതമായ ഒഴിവാക്കലുകൾ കമ്മീഷൻ നിർത്തിവച്ചിട്ടുണ്ട്. എന്നാൽ, തങ്ങൾ ചെയ്തത് പതിവ് നടപടികളാണെന്ന് വാദിച്ച് ഉത്തരവാദിത്വം ഏൽക്കാൻ അവർ ഇപ്പോഴും വിസമ്മതിക്കുന്നു. അതുപോലെ, വോട്ടർപട്ടികയിൽ കൃത്രിമം കാണിച്ചുവെന്ന ആരോപണങ്ങൾ ബിജെപി സർക്കാരും തള്ളിക്കളഞ്ഞു. ഈ പ്രക്ഷോഭം ദേശീയ സ്ഥാപനങ്ങളെ തകർക്കാൻ ലക്ഷ്യമിട്ട രാഷ്‌ട്രീയപ്രേരിത ശ്രമങ്ങളാണെന്ന് അവർ വിശേഷിപ്പിച്ചു. ഇലക്ഷൻ കമ്മിഷനെ പ്രതിരോധിക്കാൻ അവർ പ്രചാരണങ്ങൾ പോലും നടത്തുന്നുണ്ട്.
പക്ഷേ, വിദ്യാഭ്യാസ പ്രക്ഷോഭങ്ങളുടെ കാര്യത്തിലെന്നപോലെ, സർക്കാരിന് വിട്ടുവീഴ്ചകൾ ചെയ്യേണ്ടിവരും. പ്രക്ഷോഭങ്ങൾ ദേശീയ രാഷ്‌ട്രീയത്തെ കൂടുതൽ ചൂടുപിടിപ്പിച്ചിട്ടുണ്ട്. കൂടാതെ, യുവജനങ്ങളുടെ നേതൃത്വത്തിലുള്ള പ്രതിഷേധങ്ങൾ രാഷ്‌ട്രീയ പ്രതിപക്ഷവുമായി ഒന്നിച്ച് ഭരണകൂടത്തിന്‍റെ അധികാരത്തിലുള്ള വിശ്വാസത്തെ ചോദ്യം ചെയ്തിരിക്കുകയാണ്. ഗ്യാനേഷ് കുമാറിന്‍റെ രാജിയില്ലാതെ ഈ പ്രതിസന്ധി പരിഹരിക്കപ്പെടാൻ പ്രയാസമാണ്. നവംബർ ആരംഭിക്കുമ്പോൾ ആയിരക്കണക്കിന് പ്രതിഷേധക്കാർ ന്യൂഡൽഹിയിൽ തടിച്ചുകൂടുന്നതോടെ, അദ്ദേഹത്തിന്‍റെ നിലനിൽപ്പ് അപകടത്തിലാണെന്നു തോന്നുന്നു.
Leader Page
ഭാരതത്തിലെ ഇതര സംസ്ഥാനങ്ങൾക്കു മുമ്പിൽ അഭിമാനപൂര്‍വം വിളിച്ചുപറയാവുന്ന ക്ഷേമസങ്കല്പത്തിന്‍റെ പ്രഖ്യാപനമായ ഒരു നിയമനിര്‍മാണത്തിന് കേരള നിയമസഭ സാക്ഷ്യം വഹിച്ചു. മുഖ്യമന്ത്രി വി.ഡി. സതീശന്‍ അവതരിപ്പിച്ച ‘2026ലെ കേരളം മുതിര്‍ന്ന പൗരന്മാരുടെ പരിചരണവും അവകാശ സംരക്ഷണവും’ ബിൽ നിയമസഭ ഐകകണ്ഠ്യേനയാണ് പാസാക്കിയത്.
ഈ ബില്ലിന്‍റെ ഉദ്ദേശ്യങ്ങള്‍ വിവരിക്കുമ്പോള്‍ ആരോഗ്യകരമായ വാര്‍ധക്യത്തിനായുള്ള നയങ്ങളും പദ്ധതികളും മുന്‍ഗണനാ ഇടപെടലുകളും നടത്താന്‍ ലോകാരോഗ്യ സംഘടന ആഹ്വാനം ചെയ്യുന്നത് ഓര്‍മിപ്പിക്കുന്നു. വൈദ്യശാസ്ത്രത്തിന്‍റെ പുരോഗതിയും മുതിര്‍ന്ന പൗരന്മാര്‍ക്കിടയിലെ ആരോഗ്യ അവബോധവും മൂലം കേരളത്തിലെ മുതിര്‍ന്നവരുടെ ആയുര്‍ദൈര്‍ഘ്യം വര്‍ധിച്ചിട്ടുണ്ടെന്നും നിരീക്ഷിക്കുന്നു.
വാര്‍ധക്യത്തിലെത്തുന്ന ജനസംഖ്യയുടെ ആവശ്യങ്ങള്‍ ഉള്‍ക്കൊള്ളുന്നതിനായി വിവിധ സംവിധാനങ്ങള്‍ ദീര്‍ഘകാല ശ്രദ്ധയോടും ദീര്‍ഘവീക്ഷണത്തോടെയുള്ള ആസൂത്രണത്തോടും കൂടെ പുനര്‍നിര്‍മിക്കുകയും പുനഃസംഘടിപ്പിക്കുകയും ചെയ്യുക എന്ന ലക്ഷ്യത്തോടെയാണ് ഇത്തരമൊരു നിയമനിര്‍മാണത്തിനായി സര്‍ക്കാര്‍ തയാറായത്. 11 അധ്യായങ്ങളിലായി 36 വകുപ്പുകളാണ് ബില്ലില്‍ നിര്‍ദേശിച്ചിരുന്നത്.
സ്വഗൃഹം പ്രധാനം
ഈ നിയമത്തിന്‍റെ കാഴ്ചപ്പാടില്‍, ഏവര്‍ക്കും മാനസിക പിന്തുണയും ആശ്വാസവും നല്‍കുന്ന സൗകര്യപ്രദമായ ഇടം വീടുതന്നെയാണ്. വയോജന പരിചരണ പരിപാടികളില്‍ മുതിര്‍ന്ന പൗരന്മാരെ വീട്ടില്‍ ജീവിക്കാന്‍ സഹായിക്കുന്ന പരിചരണ പരിപാടികള്‍ക്കാണ് പ്രഥമ പരിഗണന. പൊതുസമൂഹത്തിലെ ഏറ്റവും ദുര്‍ബല വിഭാഗമായി മാറിക്കഴിഞ്ഞിരിക്കുന്ന മുതിര്‍ന്ന പൗരന്മാരെ അവരുടെ അവകാശസംരക്ഷണ സൗകര്യാര്‍ഥം യുവവൃദ്ധര്‍ (60-69 വയസ്), വൃദ്ധര്‍ (70-79 വയസ്), അതിവൃദ്ധര്‍ (80-89 വയസ്) അത്യന്തം വൃദ്ധര്‍ (90 വയസിനു മുകളില്‍) എന്നിങ്ങനെ തരംതിരിച്ചിരിക്കുന്നു.
ബില്ലിലെ ഒന്നാമധ്യായത്തില്‍തന്നെ മുതിര്‍ന്ന പൗരനെ നിര്‍വചിച്ചിരിക്കുന്നത് ‘ഇന്ത്യന്‍ പൗരനും അറുപതോ അതിലധികമോ വയസ് പൂര്‍ത്തിയായതുമായ ഏതൊരു വ്യക്തിയും’ എന്നാണ്. മുതിര്‍ന്ന പൗരന്മാരുടെ അവകാശങ്ങളുടെ പശ്ചാത്തലമായി വരുന്ന പൊതുതത്വങ്ങള്‍ വിവരിക്കുന്ന രണ്ടാമധ്യായത്തിലെ ഒന്നാമത്തെ ഉപവകുപ്പുതന്നെ അന്തസിനും ആദരവിനുമുള്ള അവകാശത്തെപ്പറ്റി പ്രതിപാദിക്കുന്നു.
ഓരോ മുതിര്‍ന്ന പൗരനും ചൂഷണങ്ങളില്‍നിന്നും മാനസികവും ശാരീരികവുമായ പീഡനങ്ങളില്‍നിന്നും മുക്തമായി സുരക്ഷിതത്വത്തോടെ അന്തസുള്ള ജീവിതം നയിക്കുന്നതിന് അര്‍ഹതയുണ്ടായിരിക്കുന്നതാണ് എന്ന് അസന്ദിഗ്ധമായി പറയുന്നു.
അതുപോലെതന്നെ തുല്യപ്രാധാന്യത്തോടെ അവതരിപ്പിക്കുന്ന മറ്റൊരവകാശമാണ് മൂന്നാം വകുപ്പില്‍ പറയുന്ന സ്വഗൃഹത്തില്‍ താമസിക്കുന്നതിനുള്ള അവകാശം. മുതിര്‍ന്ന പൗരന്‍ കഴിയുന്നിടത്തോളം സ്വന്തം വീട്ടില്‍ താമസിക്കേണ്ടതും വീട്ടില്‍ത്തന്നെ ആരോഗ്യകരവും ഊര്‍ജസ്വലവുമായ വാര്‍ധക്യം സാധ്യമാകുന്നതിന് തക്കതായ പരിചരണം നല്‍കേണ്ടതുമാണ് എന്ന് ഓര്‍മിപ്പിക്കുന്നു.
ഈ അവകാശങ്ങള്‍ മറ്റുള്ള പൗരന്മാരുടെ കടമകളിലേക്കുകൂടി വിരല്‍ ചൂണ്ടുന്നു. ഇതിന്‍റെ പശ്ചാത്തലത്തിലാണ് തുടര്‍ന്നു വരുന്ന അധ്യായങ്ങളില്‍ മുതിര്‍ന്ന പൗരസംരക്ഷണത്തിനായുള്ള സംസ്ഥാന-ജില്ലാതല സ്ഥാപന സംവിധാനങ്ങളെപ്പറ്റിയും മുതിര്‍ന്ന പൗരപരിചരണ കേന്ദ്രങ്ങളുടെ സ്ഥാപനത്തെയും പ്രവര്‍ത്തനത്തെയും പറ്റിയും പ്രതിപാദിക്കുന്നത്. അതേത്തുടര്‍ന്ന് പരിചരണദാതാക്കളുടെ പരിശീലനം, സര്‍ട്ടിഫിക്കേഷന്‍, പരിചരണ വിലയിരുത്തല്‍ എന്നിവയെപ്പറ്റി ആറാമധ്യായം ചര്‍ച്ച ചെയ്യുന്നു.
സ്ഥാപനങ്ങളുടെ ഉത്തരവാദിത്വം
മുതിര്‍ന്ന പൗരന്മാരുടെ അവകാശങ്ങള്‍ അക്കമിട്ടു നിരത്തുന്ന നാലാം വകുപ്പിന്‍റെ പശ്ചാത്തലത്തില്‍ സര്‍ക്കാര്‍, സര്‍ക്കാര്‍-ഇതര സ്ഥാപനങ്ങള്‍, വ്യക്തികള്‍, കൂട്ടായ്മകള്‍ മുതലായവര്‍ അടിയന്തര പ്രാധാന്യത്തോടെ ചെയ്യേണ്ട ഉത്തരവാദിത്വങ്ങള്‍ ചുവടെ:
1. വിധവകള്‍, ഉപേക്ഷിക്കപ്പെട്ടവര്‍, ഭിന്നശേഷിക്കാര്‍, അതിക്രമത്തെ അതിജീവിച്ചവര്‍, ഭവനരഹിതര്‍, നിരാലംബര്‍ മുതലായ വിഭാഗങ്ങളില്‍പെട്ട മുതിര്‍ന്ന പൗരരായ വനിതകള്‍ക്കായി മുന്‍ഗണനാടിസ്ഥാനത്തിലുള്ള സംരക്ഷണ സംവിധാനങ്ങള്‍ തയാറാക്കുക.
2. ഓരോ മുതിര്‍ന്ന പൗരനും പ്രാപ്യമാകുംവിധം ഗൃഹപരിചരണ സേവനങ്ങള്‍, പകല്‍ പരിചരണ കേന്ദ്രങ്ങള്‍, സഹായിത ജീവിതസൗകര്യങ്ങള്‍, വിശ്രമപരിചരണം, സാന്ത്വന പരിചരണം, അടിയന്തര വൈദ്യസഹായം എന്നിവ ലഭ്യമാകുന്ന കേന്ദ്രങ്ങള്‍ ഒരുക്കുക.
3. എല്ലാ പൊതുകെട്ടിടങ്ങളും സേവനസ്ഥലങ്ങളും പൊതു ഇടങ്ങളും മുതിര്‍ന്ന പൗരസൗഹൃദ പ്രവേശനക്ഷമത ഉറപ്പാക്കുന്നതിന് റാംപുകള്‍, മുന്‍ഗണനാ ഇരിപ്പിടങ്ങള്‍, ക്യൂ സംവിധാനം, പ്രാപ്യമായ ശുചിമുറികള്‍ എന്നിവ ഉള്‍പ്പെടുത്തി പുനര്‍വിന്യസിക്കുക.
4. ലളിതമായ ഇന്‍റര്‍ഫേസുകള്‍, വലിയ അക്ഷരങ്ങള്‍, ശബ്ദസഹായ സംവിധാനം, ഹൈകോണ്‍ട്രാസ്റ്റ് ഡിസ്പ്ലേ മോഡുകള്‍ എന്നിവ മുതിര്‍ന്ന പൗരന്മാരുടെ ഉപയോഗത്തിനായി രൂപകല്പന ചെയ്തു സ്ഥാപിക്കുകയും അവയുടെ ഉപയോഗത്തിനായി അവര്‍ക്ക് ആവശ്യകമായ ഡിജിറ്റല്‍ സാക്ഷരതാ പരിപാടികള്‍ സംഘടിപ്പിക്കുകയും ചെയ്യുക.
5. ഈ ആക്ട് പ്രകാരം ലഭിക്കുന്ന അവകാശങ്ങള്‍ സംരക്ഷിക്കുന്നതിനായി ലീഗല്‍ സര്‍വീസസ് അഥോറിറ്റികളും നിയമസഹായത്തിനും നിയമസാക്ഷരതയ്ക്കും ആവശ്യമായ സംവിധാനങ്ങളും സജ്ജീകരിക്കുക.
6. മനുഷ്യാന്തസ് സംരക്ഷിക്കുന്ന ഉത്പന്നങ്ങളായ ചലനസഹായ ഉപകരണങ്ങള്‍, ശ്രവണസഹായികള്‍, കണ്ണടകള്‍, മല-മൂത്ര നിയന്ത്രണോത്പന്നങ്ങള്‍ തുടങ്ങിയവ മുതിര്‍ന്ന പൗരന്മാര്‍ക്ക് ന്യായമായ വിലയില്‍ ലഭ്യമാക്കുക.
അവകാശലംഘനത്തിന് ശിക്ഷ
ഈ ആക്ടിലെയും ഇതിനു കീഴില്‍ പുറപ്പെടുവിക്കുന്ന ചട്ടങ്ങളിലെയും മുതിര്‍ന്ന പൗരന്മാരുടെ അവകാശങ്ങള്‍ സംരക്ഷിക്കാനുതകുന്ന മാര്‍ഗനിര്‍ദേശങ്ങളും വ്യവസ്ഥകളും അവകാശലംഘനത്തിനുള്ള ശിക്ഷകളുമാണ് പത്താമധ്യായത്തില്‍ പ്രതിപാദിച്ചിരിക്കുന്നത്. ഈ നിയമങ്ങള്‍ പൂര്‍ണമായ രീതിയില്‍ നടപ്പാക്കപ്പെടുമ്പോള്‍ മനുഷ്യവ്യക്തിക്ക്, പ്രത്യേകിച്ച് സമൂഹത്തിലെ മുതിര്‍ന്ന പൗരന്മാര്‍ക്ക് കൂടുതല്‍ ആത്മാഭിമാനത്തോടെയും അന്തസോടെയും സമൂഹത്തിന്‍റെ ഭാഗമായി ജീവിക്കാനുള്ള അവസരമാണ് സംജാതമാകുന്നത്. അത് സാധ്യമാക്കാന്‍ നാമേവരും ഒത്തൊരുമിച്ച് പ്രവര്‍ത്തിക്കേണ്ടിയിരിക്കുന്നു.
Leader Page
അമേരിക്കൻ പ്രസിഡന്‍റ് ഡോണൾഡ് ട്രംപിന്‍റെ നാലു വർഷത്തെ ഭരണത്തിന്‍റെ പകുതിയെത്തിയപ്പോൾ ജനപ്രതിനിധി സഭയിലേക്കും സെനറ്റിലേക്കും നടന്ന തെരഞ്ഞെടുപ്പിൽ ട്രംപിന്‍റെ പാർട്ടിയായ റിപ്പബ്ലിക്കൻ പാർട്ടിക്ക് കനത്ത തിരിച്ചടിയുണ്ടായിരിക്കുകയാണ്. എതിർ കക്ഷിയായ ഡെമോക്രാറ്റിക് പാർട്ടിക്ക് രണ്ടു സഭകളിലും വ്യക്തമായ മുൻ‌തൂക്കം കിട്ടിയിരിക്കുന്നു.
ആർട്ടിക്കിൾ 1 സെക്‌ഷൻ 7 അനുസരിച്ച് രണ്ടു സഭകളും പാസാക്കിയ ഒരു ബില്ല് പ്രസിഡന്‍റിന് അംഗീകരിക്കുകയോ തന്‍റെ എതിർപ്പ് രേഖപ്പെടുത്തി തിരിച്ചയയ്ക്കുകയോ ചെയ്യാം. തിരിച്ചയയ്ക്കുന്ന അവസരങ്ങളിൽ ആ എതിർപ്പ് ഉൾപ്പടെ രണ്ടു സഭകളിലും വീണ്ടും ചർച്ച ചെയ്യുകയും മൂന്നിൽ രണ്ടു ഭൂരിപക്ഷത്തോടെ പാസാക്കുകയും ചെയ്താൽ മാത്രമേ നിയമമാകൂ. ഇപ്രകാരം മൂന്നിൽ രണ്ടു ഭൂരിപക്ഷം, രണ്ടു സഭയിലും ഡെമോക്രാറ്റിക് പാർട്ടിക്ക് ഇപ്പോഴും കിട്ടാത്തതുകൊണ്ടായിരിക്കാം, പ്രസിഡന്‍റ് ട്രംപ് തന്‍റെ വീറ്റോ അധികാരം സൂചിപ്പിച്ചുകൊണ്ട് സോഷ്യൽ മീഡിയയിൽ പോസ്റ്റിട്ടത്.
യുദ്ധാധികാരവും കോൺഗ്രസും
ആർട്ടിക്കിൾ 2, സെക്‌ഷൻ 2 അനുസരിച്ച്, യുഎസ് പ്രസിഡന്‍റ് കമാൻഡർ-ഇൻ-ചീഫ് ആണ്. സെനറ്റിന്‍റെ അംഗീകാരത്തോടെ വിവിധ പ്രധാന സ്ഥാനങ്ങളിലേക്ക് നിയമനം നടത്തുന്നതും പ്രസിഡന്‍റാണ്. ആർട്ടിക്കിൾ 1, സെക്‌ഷൻ 8 അനുസരിച്ച് യുദ്ധം പ്രഖ്യാപിക്കാനുള്ള അധികാരം സുവ്യക്തമായി യുഎസ് കോൺഗ്രസിൽ നിക്ഷിപ്തമാണ്. എന്നിട്ടും, ട്രംപ് ഇറാൻ യുദ്ധത്തിൽ ഇതുവരെ ഒരിക്കൽപോലും, കോൺഗ്രസിന്‍റെ അംഗീകാരം തേടിയിട്ടില്ല. അതെങ്ങനെ സംഭവിച്ചു? 1973ലെ വാർ പവർ റസലൂഷൻ ആണ് ട്രംപ് ഉപയോഗിച്ചത്.
വാർ പവർ റസലൂഷൻ 1973ലെ സെക്‌ഷൻ 3 അനുസരിച്ച്, യുഎസ് സൈന്യത്തെ ശത്രുതയുള്ള സാഹചര്യത്തിലേക്ക് , അമേരിക്കൻ പ്രസിഡന്‍റ് അയയ്ക്കുമ്പോൾ, അതു തീരുന്നതുവരെ കോൺഗ്രസിനെ, സാഹചര്യം അറിയിച്ചുകൊണ്ടിരിക്കാൻ പ്രസിഡന്‍റിന് ബാധ്യതയുണ്ട്. യുദ്ധപ്രഖ്യാപനമില്ലാതെ സൈന്യത്തെ ശത്രുതയുണ്ടാവാനിടയുള്ള സാഹചര്യത്തിലേക്ക് വിടുമ്പോൾ 48 മണിക്കൂറിനുള്ളിൽ ഇരുസഭകളെയും അറിയിക്കാനും സെക്‌ഷൻ 4 അനുസരിച്ച് പ്രസിഡന്‍റിന് ബാധ്യതയുണ്ട്. ഇപ്രകാരം റിപ്പോർട്ട് കൊടുത്തതിനു ശേഷം, 60 ദിവസത്തിനകം, കോൺഗ്രസ് യുദ്ധപ്രഖ്യാപനം നടത്തുന്നില്ലെങ്കിൽ, അല്ലെങ്കിൽ പ്രസിഡന്‍റിനെ ഏതെങ്കിലും പ്രത്യേകമായി അധികാരപ്പെടുത്തിയില്ലെങ്കിൽ, സെക്‌ഷൻ 5 അനുസരിച്ച് സൈന്യത്തെ പിൻവലിക്കാൻ പ്രസിഡന്‍റിന് ബാധ്യതയുണ്ട്.
ട്രംപ്, 2025 ജൂണിൽ ഇറാന്‍റെ ആണവകേന്ദ്രം ആക്രമിച്ചപ്പോഴും, 2026 ഫെബ്രുവരി-മാർച്ചിൽ ഇസ്രയേലിനോടൊപ്പം ചേർന്ന് ഇറാനിൽ മേജർ കോംബാറ്റ് ഓപ്പറേഷൻസ് നടപ്പാക്കിയപ്പോഴും കോൺഗ്രസിനെ വെറുതെ അറിയിക്കുക മാത്രമാണു ചെയ്തത്. ഒരു പെർമിഷന്‍റെ ആവശ്യമില്ല എന്നായിരുന്നു ട്രംപിന്‍റെ വാദം. ഏപ്രിൽ അവസാനത്തോടെ വെടിനിർത്തൽ പ്രഖ്യാപിച്ചിട്ടു, ട്രംപ് പറഞ്ഞത്, ശത്രുതയുള്ള സാഹചര്യം അവസാനിച്ച സ്ഥിതിക്ക് വാർ പവർ റസലൂഷൻ അനുസരിച്ച് 60 ദിവസത്തിനകം, കോൺഗ്രസിന്‍റെ അംഗീകാരം നേടേണ്ട ആവശ്യം ഇനിയില്ല എന്നായിരുന്നു.
Leader Page
ഫ്രാൻസ് മാത്രമല്ല ഇറ്റലി, സ്പെയിൻ, പോർച്ചുഗൽ, ഗ്രീസ് തുടങ്ങി മറ്റു പല യൂറോപ്യൻ രാജ്യങ്ങളിലും വലിയ സമരങ്ങളും ലഹളയും കർഫ്യൂവും വെടിവയ്പുമൊക്കെ നടക്കുകയാണ്.
ലോകമാധ്യമങ്ങളിലൂടെ നമുക്കു മനസിലാക്കാൻ പറ്റുന്ന ഒരു കാര്യം സമരമുഖത്ത് ഏറ്റവുമധികമുള്ളതും സമരത്തെ നയിക്കുന്നതും വിദ്യാർഥികളാണ് എന്നതാണ്. അവർ പഠിക്കുന്ന സ്കൂളിന്‍റെയും കലാലയങ്ങളുടെയും അവസ്ഥ ദയനീയമാണെന്നും കെട്ടിടങ്ങൾ മോശമാണെന്നും റിപ്പയറിംഗ് നടക്കുന്നില്ലെന്നും അവർ പറയുന്നു. മാത്രമല്ല, വിദ്യാഭ്യാസത്തിനുവേണ്ടിയുള്ള സ്കൂൾ ബജറ്റ് വർധിപ്പിക്കുന്നില്ല. താമസച്ചെലവ് - അത് വലിയ കെട്ടിടമായാലും ചെറിയ മുറിയായാലും-വളരെ കൂടുതലാണ്. പഠനച്ചെലവും അവശ്യസാധനങ്ങളുടെ വിലയും വല്ലാതെ വർധിച്ചിരിക്കുന്നു തുടങ്ങി മറ്റു പല കാരണങ്ങളും അവർ നിരത്തുന്നുണ്ട്.
യൂറോപ്യൻ രാജ്യങ്ങൾ പൊതുവേ ക്ഷേമരാഷ്‌ട്രങ്ങളായതിനാൽ പൗരന്മാരുടെ സാമൂഹികവും സാമ്പത്തികവുമായ ക്ഷേമം ഉറപ്പാക്കുന്നതിൽ മുൻകൈയെടുക്കും. വയോജനങ്ങൾക്ക് താമസ സൗകര്യമൊരുക്കുന്നതിലും പെൻഷൻ നല്കുന്നതിനുമെല്ലാം അവർ കൂടുതൽ പണം ചെലവഴിക്കും. അവിടെ പെൻഷന്‍റെ ചെലവ് സ്കൂൾ വിദ്യാഭ്യാസത്തിന്‍റെ ചെലവിനേക്കാൾ എത്രയോ ഇരട്ടിയാണ്. ആയുർദൈർഘ്യം കൂടിയതു കാരണം യുവാക്കളേക്കാൾ വയോജനങ്ങളുടെ എണ്ണത്തിൽ വൻ വർധനയാണുള്ളത്. മിക്കവാറും എല്ലാ രാജ്യങ്ങളിലും അൻപതു ശതമാനം പേരും അറുപതു വയസിനു മുകളിലുള്ളവരാണ്.
പക്ഷേ, നമ്മൾ ചർച്ച ചെയ്യേണ്ടത് ഇത്തരം സമരങ്ങൾ എന്തുകൊണ്ട് ഉണ്ടാവുന്നു എന്നതല്ല; മറിച്ച്, ഇതിന്‍റെ തീവ്രത എന്തുകൊണ്ട് ഇത്രയും ഭയാനകമായി എന്നതാണ്. ആളുകൾ എന്തുകൊണ്ടാണ് സ്വന്തം വീടുകളും അടിസ്ഥാന സൗകര്യങ്ങളും നശിപ്പിക്കുന്നത്, നൂറ്റിയമ്പതിലധികം വർഷം പഴക്കമുള്ള കെട്ടിടങ്ങൾ തീവയ്ക്കുന്നത്, പോലീസ് ഉപരോധത്തെ ജനങ്ങൾ ആക്രമിക്കുന്നത്? ഈ ഭയാനകത എന്തുകൊണ്ട് സംഭവിക്കുന്നു?
ഞാൻ മനസിലാക്കുന്നത് ഒരു സ്കൂളിന്‍റെ അവസ്ഥ പെട്ടെന്ന് മാറ്റാൻവേണ്ടിയോ വിദ്യാഭ്യാസ ആവശ്യത്തിനുള്ള ബജറ്റ് വർധിപ്പിക്കാൻവേണ്ടിയോ ഫ്രഞ്ചുകാർ തന്നെ സ്വന്തം രാജ്യത്തിന്‍റെ അടിസ്ഥാന സൗകര്യങ്ങൾ നശിപ്പിക്കാൻ സാധ്യതയില്ല എന്നാണ്. ജനാധിപത്യപരമായി ശാന്തമായ രീതിയിൽ സമരം ചെയ്തോ ജാഥ നടത്തിയോ ഗവൺമെന്‍റിനെ പ്രതിഷേധം അറിയിക്കാം. സ്കൂളുകളും കോളജുകളും ബഹിഷ്‌കരിക്കാം. എന്നാൽ, ഇവിടെ കലാപമാണ് ഉണ്ടാകുന്നത്; അതെന്തുകൊണ്ട്?
കുടിയേറ്റത്തിനെതിരേയുള്ള കലാപമാണ് സംഭവിക്കുന്നത് എന്നാണ് ഞാൻ മനസിലാക്കുന്നത്. പത്തുപതിനഞ്ചു വർഷമായിട്ട് യൂറാപ്യൻ രാജ്യങ്ങളിൽ കുടിയേറ്റം വല്ലാതെ കൂടിയിട്ടുണ്ട്. സിറിയ, ഇറാക്ക്, ആഫിക്ക, അൽബേനിയ തുടങ്ങിയ രാജ്യക്കാരാണ് കുടിയേറ്റക്കാരിലധികവും. അവരായിരിക്കാം ഒരു പക്ഷേ ഈ സമരക്കാരുടെയിടയിൽ നുഴഞ്ഞുകയറി സ്വന്തം ഐഡന്‍റിറ്റി വെളിപ്പെടുത്താതെ ഇത്തരം നശീകരണ പ്രവർത്തനങ്ങൾ ചെയ്യുന്നതിന് നേതൃത്വം കൊടുക്കുന്നതെന്നും ഫ്രാൻസിന്‍റെ പൈതൃകത്തെ നശിപ്പിക്കാൻ ശ്രമിക്കുന്നതെന്നും അനുമാനിക്കാവുന്നതാണ്. ഞങ്ങളെ ആരും തടയാൻ നോക്കേണ്ടെന്നും കടൽ മാർഗവും കരമാർഗവും മാത്രമല്ല മറ്റേതു മാർഗത്തിലൂടെയും ഞങ്ങൾ വന്നുകൊണ്ടിരിക്കുമെന്നും അതിന് ചെറിയൊരു തടസംപോലും വരുകയാണെങ്കിൽ പ്രതികരണം ഈ രീതിയിലായിരിക്കും എന്ന സന്ദേശമാണ് കുടിയേറ്റക്കാർ ഈ കലാപങ്ങളിലൂടെ മുന്നറിയിപ്പായി നല്കുന്നത്.
ഇതിനെ ഒരു വലിയ ചതിയായിട്ടുതന്നെ രാജ്യങ്ങൾ കാണണം. കാരണം, 1981ലെ ഫ്രഞ്ച് പ്രസിഡന്‍റായിരുന്ന ഫ്രാൻസ്വാ മിത്തറാങ് മുതൽ നിലവിലെ പ്രസിഡന്‍റ് ഇമ്മാനുവൽ മാക്രോൺ വരെ കുടിയേറ്റക്കാരോട് ഉദാര സമീപനമാണ് കാണിച്ചിട്ടുള്ളത്. 1994ലെ പ്രസിഡന്‍റ് റോമൻ ഹെർസോഗ് മുതൽ 2017ലെ ജോക്കിങ് ഹൗക്ക് വരെയുള്ള ജർമൻ പ്രസിഡന്‍റുമാരുടെ സമീപനവും അതുതന്നെയായിരുന്നു. മിക്കവാറും എല്ലാ യൂറോപ്യൻ രാജ്യങ്ങളും ഒരോ കാലത്തും ഒരു പ്രത്യേക അനുപാതത്തിൽ കുടിയേറ്റക്കാരെ സ്വീകരിച്ചിരുന്നു എന്നു കാണാം. ജർമനി ഇംഗ്ലണ്ട്, ഫ്രാൻസ് സ്പെയിൻ, നോർവ തുടങ്ങി കാനഡവരെ ഓരോ വർഷവും ഇത്രയിത്ര കുടിയേറ്റക്കാരെ സ്വീകരിക്കാമെന്ന് വ്യവസ്ഥയുണ്ടാക്കുകയും കുടിയേറ്റക്കാർക്ക് എല്ലാ സഹായവും ചെയ്തു കൊടുക്കുകയുമുണ്ടായിട്ടുണ്ട്. അതിനു നേതൃത്വം നല്കിയതാവട്ടെ ഫ്രാൻസും ജർമനിയുമാണ്.
എന്നാൽ, ഇന്നു നമ്മൾ കാണുന്നത് അഭയം നല്കിയ രാജ്യത്തിനെതിരേ കുടിയേറ്റക്കാർ വളരെ മോശമായ രീതിയിൽ പ്രതികരിക്കുന്നതാണ്. കുടിയേറ്റക്കാരുടെ ഈ നടപടി അവർക്ക് എതിരായി മാത്രമേ വരുകയുള്ളൂവെന്ന് അവർ മനസിലാക്കുന്നില്ല. ഭരണാധികാരികൾ മാത്രമല്ല, നാട്ടുകാർ ഒന്നടങ്കം അവർക്കെതിരാവും എന്ന കാര്യത്തിൽ സംശയം വേണ്ട.
നിലവിലത്തെ സ്ഥിതി പരിശോധിക്കുകയാണെങ്കിൽ മിക്കവാറും എല്ലാ യൂറോപ്യൻ രാജ്യങ്ങളും നിയമാനുസൃതമായും അല്ലാതെയുമുള്ള കുടിയേറ്റത്തെ ഒഴിവാക്കാൻ ഔദ്യോഗികമായിത്തന്നെ തീരുമാനമെടുത്തുകഴിഞ്ഞു. ജർമനിയിൽ ഈ അടുത്തക്കാലത്തുണ്ടായ തെരഞ്ഞെടുപ്പിൽ ഹിറ്റ്‌ലറുടെ പിൻഗാമി എന്നറിയപ്പെടുന്ന എഎഫ്ഡി പാർട്ടി അവിടത്തെ വളരെ പ്രധാനപ്പെട്ട രണ്ട് സംസ്ഥാനങ്ങളിൽ ജയിച്ചുകഴിഞ്ഞു. ഭരിക്കുന്ന പാർട്ടിയുടെ സ്ഥാനാർഥികളെ വളരെ ദയനീയമായിട്ടാണ് അവർ പരാജയപ്പെടുത്തിയത്.
ഫ്രാൻസിലെ പ്രമുഖ തീവ്ര വലതുപക്ഷ ദേശീയ റാലി പാർട്ടിയുടെ നേതാവായ മറൈൻ ലെ പെൻ പറയുന്നത്, “ഒരു കുടിയേറ്റക്കാരനും ഫ്രാൻസിൽ വേണ്ട” എന്നാണ്. ഫ്രാൻസിൽ നടക്കുന്ന അടുത്ത പ്രസിഡന്‍റ് തെരഞ്ഞെടുപ്പിനെ സ്വാധീനിക്കുന്നത് ഈ വാക്കുകൾ തന്നെയാവും.
ഹോളണ്ടിലെ തീവ്ര ദേശീയ വലതുപക്ഷ പാർട്ടി നേതാവ് ഗീർട്ട് വിൽഡേഴ്സ് കുടിയേറ്റക്കാർക്കെതിരായി കടുത്ത തീരുമാനം എടുത്തു. ഇറ്റലിയുടെ ചരിത്രത്തിലെ ആദ്യ വനിതാ പ്രധാനമന്ത്രിയായ, ബ്രദേഴ്സ് ഓഫ് ഇറ്റലി പാർട്ടിയിലെ ജോർജിയ മെലോണി കുടിയേറ്റക്കാരുടെ കാര്യത്തിൽ വളരെ കർശനനടപടിയെടുത്തു.
ആഫ്രിക്കയുടെ വടക്കേ അറ്റത്ത്, മൊറോക്കോയുമായി അതിർത്തി പങ്കിടുന്ന സ്പെയ്നിന്‍റെ രണ്ട് സ്വയംഭരണ നഗരങ്ങളാണ് സ്യൂട്ടയും മെലീലയും. ആഫ്രിക്കയിൽനിന്ന് ആയിരക്കണക്കിന് കുടിയേറ്റക്കാരാണ് ഇവിടെ എത്തിച്ചേർന്നിട്ടുള്ളത്. ഇക്കാര്യത്തെച്ചൊല്ലി പതിനാലു കിലോമീറ്റർ മാത്രം അടുത്തടുത്ത് സ്ഥിതി ചെയ്യുന്ന സ്പെയിനും ആഫ്രിക്കയും തമ്മിൽ ഈയടുത്തകാലത്തുണ്ടായ വലിയ പ്രശ്നം നമ്മൾ കണ്ടതാണ്. മാത്രമല്ല, കുടിയേറ്റ പ്രശ്നത്തെത്തുടർന്ന് സ്പെയിൻ സർക്കാർ നിലംപതിക്കുകയും ചെയ്തു.
കുടിയേറ്റക്കാരുടെ കാരണത്താൽ പല യൂറോപ്യൻ പ്രദേശങ്ങളിലും ഭരണം മാറിക്കൊണ്ടിരിക്കുന്നു. കുടിയേറ്റം ഒഴിപ്പിക്കണമെന്ന നിലപാട് സ്വീകരിക്കുന്ന പാർട്ടികൾക്കാണ് അവിടങ്ങളിൽ വിജയം. കുടിയേറ്റങ്ങളെക്കുറിച്ച് ഭരണകൂടം മാത്രമല്ല കുടിയേറ്റക്കാരും ഗൗരവമായി ചിന്തിക്കണം.
തദ്ദേശീയരായ വിദ്യാർഥികളും പൊതുജനങ്ങളും സമാധാനപരമായി നടത്തുന്ന സമര പരിപാടികളിൽപോലും അവർ പങ്കെടുക്കാൻ പാടില്ല എന്നതാണ് നിയമം എന്നിരിക്കെ ഒരു രാജ്യത്തിന്‍റെ പൈതൃകസമ്പത്തും അടിസ്ഥാന സൗകര്യങ്ങളും നശിപ്പിച്ചാൽ സ്ഥിതിയെന്താവും? കുടിയേറ്റക്കാരെ നിർബന്ധമായും ഒഴിപ്പിക്കും എന്ന് അമേരിക്കൻ പ്രസിഡന്‍റ് ഡോണൾഡ് ട്രംപ് സ്വീകരിച്ച അതേ നിലപാടുതന്നെയാവും യൂറോപ്യൻ രാജ്യങ്ങളിൽ വരാൻ പോകുന്ന ഭരണകൂടങ്ങളും സ്വീകരിക്കുക എന്നതിൽ ഒരു സംശയവും വേണ്ട.
ട്രംപ് പറയുന്ന എല്ലാ കാര്യങ്ങൾക്കും ലോകത്തിന്‍റെ പിന്തുണയില്ലെങ്കിലും ഇക്കാര്യത്തിൽ മറ്റുള്ളവർ ട്രംപിനെ പിന്തുണയ്ക്കുമെന്നത് ഏതാണ്ട് ഉറപ്പായിക്കഴിഞ്ഞു. വിരുന്നുകാർ വീട് കൈയേറി, സാധന സാമഗ്രികൾ നശിപ്പിച്ച് വീട്ടുകാരെ പുറത്താക്കിയാൽ വീട്ടുകാർ മാത്രമല്ല, അയൽക്കാർ പോലും വിരുന്നുകാർക്കെതിരാവും എന്നത് സാമാന്യ യുക്തിയാണ്.
Leader Page
മദ്യപാനം നിർത്തിയ കരടിയെപ്പറ്റി അമേരിക്കൻ ഹാസസാഹിത്യകാരൻ ജയിംസ് തർബർ (1894-1961) ഒരു കഥ എഴുതി. 1939ൽ. പേര് "ദ ബെയർ ഹു ലെറ്റ് ഇറ്റ് എലോൺ’. കരടി മദ്യപനായിരുന്നപ്പോൾ കുടിച്ചു മത്തനായി വീട്ടിൽ വന്നു ഭാര്യയെയും മക്കളെയും പേടിപ്പിക്കും, മർദിക്കും, വീട്ടുസാധനങ്ങൾ നശിപ്പിക്കും. മദ്യപാനം നിർത്തിയശേഷം, മദ്യം തൊടാത്തപ്പോഴും താൻ കരുത്തനാണെന്നു കാണിക്കാൻ വീട്ടിൽ അഭ്യാസങ്ങൾ തുടങ്ങി. അത് അവസാനിക്കുന്നത് കുറേ ഉപകരണങ്ങൾ നശിപ്പിച്ചും ഭാര്യയെയും മക്കളെയും മർദിച്ചുംതന്നെ. അമേരിക്കൻ ഇടക്കാല തെരഞ്ഞെടുപ്പിനു ശേഷം ഡോണൾഡ് ട്രംപിന്‍റെ അമേരിക്കയും ഇതേ അവസ്ഥയിലാകും.
ട്രംപിന്‍റെ രാഷ്‌ട്രീയബലം കുറഞ്ഞു. പക്ഷേ 2029 ജനുവരി 19 വരെ ട്രംപ്തന്നെ പ്രസിഡന്‍റ്. കോൺഗ്രസിൽ എതിർപ്പ് കൂടും എന്നു മാത്രം. 1930നു ശേഷം എട്ടു തവണ ഇടക്കാല തെരഞ്ഞെടുപ്പിൽ പ്രസിഡന്‍റിന്‍റെ കക്ഷി തോറ്റിട്ടുള്ള രാജ്യമാണ് അമേരിക്ക. അവിടെ ഇതു ശീലമായിക്കഴിഞ്ഞു. ട്രംപിന്‍റെ തോന്ന്യാസങ്ങൾ ഇന്നുകൊണ്ട് അവസാനിക്കില്ല.
പോരാടും, ഒത്തുതീർക്കും
ട്രംപിനു ക്ഷീണം വന്നതുകൊണ്ട് ഇന്ത്യ അടക്കം വിദേശരാജ്യങ്ങൾക്കു നേട്ടം ഉണ്ടാകാൻ പോകുന്നില്ല. തോൽവിയുടെ പേരിൽ സ്വഭാവം മാറ്റുന്ന ആളല്ല ട്രംപ്. നയവും മാറ്റില്ല. ഈജിപ്ഷ്യൻ വംശജനായ ഒരു മുസ്‌ലിം (മിഷിഗനിൽനിന്നുള്ള ഡോ. അബ്ദുൾ എൽ സെയ്ദ്) പുതിയ സെനറ്റിൽ ഉണ്ടെങ്കിലും ഇറാനെതിരായ യുദ്ധം നിർത്തിക്കാൻ സെനറ്റിനു കഴിയില്ല.
യുദ്ധവും വിദേശനയവും അടക്കമുള്ള കാര്യങ്ങളിൽ കോൺഗ്രസിന്‍റെ നിയന്ത്രണത്തിലല്ല പ്രസിഡന്‍റ്. പണം നൽകില്ല എന്നു കോൺഗ്രസിനു പറയാം. പക്ഷേ കോൺഗ്രസിനു താത്പര്യമുള്ള കാര്യങ്ങൾ മുടക്കി തിരിച്ചടിക്കാൻ ട്രംപ് മടിക്കില്ല. ഒടുവിൽ കോൺഗ്രസ് വഴങ്ങും. പ്രസിഡന്‍റും കോൺഗ്രസും മുഖം രക്ഷിക്കുന്ന ഒത്തുതീർപ്പുകൾ ഉണ്ടാക്കും. അതു പലവട്ടം കണ്ടതാണ്.
കമ്മി വർധിക്കുന്നതു തടയാൻ യുദ്ധത്തിനടക്കമുള്ള ചെലവ് കുറയ്ക്കാൻ ശ്രമമുണ്ടാകും. പക്ഷേ ഡെമോക്രാറ്റുകൾ തുക കൂട്ടാൻ ആവശ്യപ്പെടുന്ന ആരോഗ്യരക്ഷാ സ്കീമുകൾക്കും മറ്റുമുള്ള ചെലവ് വെട്ടിക്കുറയ്ക്കാൻ ട്രംപ് തുനിയും. ഒത്തുതീർപ്പിന്‍റെ ഭാഗമായി രണ്ടു കൂട്ടരും "വെടിനിർത്തും’. ഒടുവിൽ കമ്മി പഴയതുപോലെയോ അതിലേറെയോ ആകും. അതിനിടെ സർക്കാർ പ്രവർത്തനങ്ങൾക്കു തടസം നേരിടാം. ഒരു വർഷം മുൻപ് ഇതേ വിഷയത്തിൽ 43 ദിവസം യുഎസ് സർക്കാർ "അടഞ്ഞുകിടന്നതാണ്'. അത് ആവർത്തിക്കാം.
ഡെമോക്രാറ്റുകൾ മൈത്രി കാണിക്കുമോ?
ഇന്ത്യക്കു മേലുള്ള ട്രംപിന്‍റെ തീരുവ കുറയ്ക്കാൻ ഡെമോക്രാറ്റുകൾ ആവശ്യപ്പെടില്ല. തീരുവയിൽ യുഎസ് കമ്പനികളുടെയും കർഷകരുടെയും താത്പര്യത്തെ ഡെമോക്രാറ്റുകളും എതിർക്കുന്നില്ല. തങ്ങളുമായി നല്ല ബന്ധം പുലർത്തുന്ന കാനഡയുടെയും മെക്സിക്കോയുടെയും കാര്യത്തിൽ
അവർ ചിലപ്പോൾ സമ്മർദം ചെലുത്തിയേക്കാം.
ഇന്ത്യയോട് അത്രയും താത്പര്യം കാണിക്കുകയില്ല. അടുത്ത കാലം വരെ ട്രംപുമായി വലിയ അടുപ്പം പുലർത്തിയ ഇന്ത്യ ഡെമോക്രാറ്റുകൾക്കിടയിൽ നല്ല മിത്രങ്ങളെ കാര്യമായി വളർത്തിയിട്ടുമില്ല.
സോറോസും റോ ഖന്നയും
പ്രതിരോധ സഹകരണം, സാങ്കേതികവിദ്യയുടെ കൈമാറ്റം, പുതിയ തലമുറ യുദ്ധവിമാനങ്ങൾ തുടങ്ങിയ കാര്യങ്ങളിൽ ഇന്ത്യക്കുവേണ്ടി വാദിക്കാൻ വേണ്ടത്ര ഡെമോക്രാറ്റുകൾ ഉണ്ടാകില്ല. ലിബറൽ കാഴ്ചപ്പാടുള്ള പല ഡെമോക്രാറ്റ് നേതാക്കളും നരേന്ദ്ര മോദി സർക്കാരിനെ വിമർശിക്കാറുണ്ട്. ഇന്ത്യയിൽ മതസ്വാതന്ത്ര്യവും അഭിപ്രായസ്വാതന്ത്ര്യവും നിഷേധിക്കപ്പെടുന്നു എന്നു പല ഡെമോക്രാറ്റുകളും കരുതുന്നു.
ഇന്ത്യാവിരുദ്ധത ആരോപിച്ച് ബിജെപി നേതാക്കൾ നിരന്തരം വിമർശിക്കുന്ന ജോർജ് സോറോസ് ഡെമോക്രാറ്റിക് പാർട്ടിയുടെ വലിയ പണദാതാവാണ്. യുഎസ് കോൺഗ്രസിലെ ഇന്ത്യാ കോക്കസ് കോ ചെയറും ഡെമോക്രാറ്റ് നേതാവുമായ റോ ഖന്നയുമായി ബിജെപി പല പ്രാവശ്യം ഉടക്കിയിട്ടുണ്ട്.
വളർച്ചയിൽ ഭയമില്ല
ഡെമോക്രാറ്റുകൾ വിജയിച്ചതുകൊണ്ട് യുഎസ് സമ്പദ്ഘടനയിൽ കുഴപ്പമൊന്നും പ്രതീക്ഷിക്കുന്നില്ല. ഫലം വന്നുതുടങ്ങിയപ്പോൾ രണ്ടു ശതമാനത്തോളം താഴ്ന്ന ഓഹരിവിപണി സൂചികകൾ നേരം വെളുക്കും മുൻപേ തിരികെ നേട്ടത്തിലായി. നിലവിലെ മികച്ച വളർച്ച തുടരുമെന്നു വിപണി വിശ്വസിക്കുന്നു എന്നു ചുരുക്കം.
സെപ്റ്റംബറിൽ അവസാനിച്ച ത്രൈമാസത്തിൽ 3.4 ശതമാനം ജിഡിപി വളർച്ച ഉണ്ടായിരുന്നു അമേരിക്കയിൽ. സമ്പന്നരാജ്യ കൂട്ടായ്മയായ ജി 7ലെ ഏറ്റവും കൂടിയ നിരക്ക്. സെപ്റ്റംബറിൽ യുഎസ് തൊഴിലവസരങ്ങളിൽ 75.2 ലക്ഷത്തിന്‍റെ വർധനയുണ്ടായി. നാലു മാസത്തെ ഏറ്റവും ഉയർന്ന നിരക്കാണിത്. ഒക്‌ടോബറിലെ ഫാക്ടറി ഉത്പാദന സൂചിക നാലു വർഷത്തിനിടയിലെ രണ്ടാമത്തെ ഏറ്റവും ഉയർന്ന നിരക്കായ 55.5 ലെത്തി. എസ് ആൻഡ് പി 500 ഓഹരിസൂചിക ട്രംപിന്‍റെ രണ്ടാം വാഴ്ചയിൽ ഇതു വരെ 27 ശതമാനം മുന്നേറി.
നിർമിതബുദ്ധിക്കു നിയന്ത്രണം
നിർമിതബുദ്ധി (എഐ) മേഖലയിലെ ഡെമോക്രാറ്റിക് സമീപനങ്ങൾ ചില്ലറയല്ലാത്ത ആശങ്ക ജനിപ്പിക്കും. എഐയെ നിയന്ത്രിക്കണം എന്ന് അവർ വാദിക്കുന്നു. എഐ കമ്പനികളുടെ ഭീമൻ ഡാറ്റാ സെന്‍ററുകളെയും അവർ എതിർക്കുന്നു. അമിതമായി വൈദ്യുതിയും വെള്ളവും ഉപയോഗിക്കുന്ന ഡാറ്റാ സെന്‍ററുകൾ മൂലം വൈദ്യുതിക്കും വെള്ളത്തിനും കൂടുതൽ വില നൽകേണ്ടിവരുന്നു. പരിസ്ഥിതി പ്രശ്നങ്ങളും ഉണ്ടാക്കുന്നു. ഡാറ്റാ സെന്‍ററുകളുടെ അനുമതി ചട്ടപ്രകാരമാണോ എന്നു പരിശോധിക്കുന്നതു മുതൽ എഐക്കു റെഗുലേറ്ററി സംവിധാനം ഉണ്ടാക്കുന്നതു വരെ പലതും ഡെമോക്രാറ്റ് ഭൂരിപക്ഷ കോൺഗ്രസിനു ചെയ്യാനാകും.
ബാങ്കിംഗിൽ അടക്കം ട്രംപ് മാറ്റിക്കളഞ്ഞ നിയന്ത്രണങ്ങൾ പുനഃസ്ഥാപിക്കാൻ പുതിയ കോൺഗ്രസിനും സെനറ്റിനും കഴിയും. അവയെല്ലാം വീറ്റോ ചെയ്തു തടയാൻ പ്രസിഡന്‍റിന് അധികാരമില്ല. വ്യവസായങ്ങളെ ബാധിക്കുന്ന പരിസ്ഥിതി ചട്ടങ്ങൾ കർശനമാക്കാനും ഡെമോക്രാറ്റുകൾക്കു സാധിക്കും. ഇതെല്ലാം കമ്പനികളുടെ ലാഭക്ഷമതയെ ബാധിക്കും. വ്യവസായമേഖല ആശ്വസിക്കുന്നത് ഇവയൊക്കെ മാസങ്ങളും വർഷങ്ങളുംകൊണ്ടേ നടക്കൂ എന്നതിലാണ്.
അഴിമതി പിടിക്കുമോ?
കമ്മിയേക്കാൾ ഡെമോക്രാറ്റുകൾ ശ്രദ്ധയൂന്നുക ട്രംപ് ഭരണകൂടത്തിന്‍റെ അഴിമതികളിലാകും. ട്രംപും കുടുംബാംഗങ്ങളും തങ്ങളുടെ കമ്പനികൾക്കു നേട്ടമുണ്ടാക്കാൻവേണ്ടി നിയമങ്ങൾ മറികടന്നു പലതും ചെയ്തതു പുറത്തു കൊണ്ടുവരാൻ കോൺഗ്രസിലെ ഭൂരിപക്ഷം സഹായിക്കും. ട്രംപ് കുടുംബത്തിനെതിരായ ആരോപണങ്ങൾ കുറച്ചൊന്നുമല്ല. ക്രിപ്റ്റോകറൻസി കമ്പനികളിൽ ട്രംപ് കുടുംബത്തിനു വലിയ നിക്ഷേപമുണ്ട്. പാക്കിസ്ഥാൻ അടക്കം പല രാജ്യങ്ങളിലുംനിന്ന് അപൂർവധാതുക്കൾ സംഭരിക്കാൻ ഉണ്ടാക്കിയ കരാറുകൾ ട്രംപിന്‍റെ മക്കളും മരുമക്കളും മിത്രങ്ങളും ഉൾപ്പെട്ട കമ്പനികൾക്കു നേട്ടം ഉണ്ടാക്കാനുള്ളവയാണ്.
പല പശ്ചിമേഷ്യൻ രാജ്യങ്ങൾക്കും പ്രതിരോധ സംവിധാനങ്ങൾ കിട്ടണമെങ്കിൽ മരുമകൻ ജാറെഡ് കുഷ്നർക്കു കപ്പം നൽകണം. ഇങ്ങനെ നീളുന്നു ആരോപണ പരമ്പര. മാത്യു കോൾ എന്ന മാധ്യമപ്രവർത്തകൻ എഴുതിയ പ്രിൻസസ് ആൻഡ് തീവ്സ് എന്ന പുസ്തകം കുഷ്‌നറുടെ പശ്ചിമേഷ്യയിലെ കൊള്ളകൾ മാത്രം വിവരിക്കുന്നതാണ്. ഇവയൊക്കെ അന്വേഷിക്കാൻ ഡെമോക്രാറ്റുകൾ തുനിയുമോ, തുനിഞ്ഞാൽ അതു വിജയിക്കുമോ എന്നതാണ് ഈ തെരഞ്ഞെടുപ്പിനെത്തുടർന്നുള്ള ഏറ്റവും പ്രധാന ചോദ്യം.
Leader Page
നമ്മെ ഓരോരുത്തരെയും വ്യക്തിപരമായി അറിയുന്ന നമ്മുടെ സ്ന്ഹപിതാവാണ് ദൈവം എന്ന് കണ്ണുംപൂട്ടി വിശ്വസിക്കുകയും ആ വിശ്വാസം വീരോചിതമായി ജിവിച്ചു കാണിച്ചുതന്നുകൊണ്ട് ദൈവപരിപാലനയുടെ അത്ഭുതസാക്ഷ്യമായി മാറുകയും ചെയ്ത ജിവതമാണ് മദർ മേരി ലിറ്റിയുടേത്. എല്ലാംദൈവം തരും മഠം, ചങ്ങനാശേരി എന്ന് കത്തയച്ചാൽ അതു മദർ ലിറ്റിക്കു കിട്ടിയിരുന്ന നാളുകൾ കേരളത്തിന്‍റെ ചരിത്രത്തിൽ ഉണ്ടായിരുന്നു. അത്ര പ്രസിദ്ധമായിരന്നു അമ്മയുടെ ദൈവാശ്രയ സാക്ഷ്യം.
തിരുവനന്തപുരം ജില്ലയിലെ കിള്ളിയിൽ, ഭിന്നശേഷിക്കാരായ കുട്ടികൾക്ക് അഭയം കൊടുക്കാൻ ഒരു കന്യാസ്ത്രി വാടക വീടെടുത്ത് പ്രവർത്തിക്കുന്നു എന്നു കേട്ടാണ് വർഷങ്ങൾക്കു മുമ്പ് ഞാൻ അവിടെ ചെന്നത്. അന്ന് ഞാൻ ദീപികയുടെ തിരുവനന്തപുരം ബ്യൂറോചീഫ് ആയിരുന്നു. അവിടെ കണ്ടത് ഒന്നിനും കൊള്ളാ ത്തവരെന്ന് ലോകം കരുതുന്ന ഏതാനും കുട്ടികൾ, സംസാരിക്കാനെന്നല്ല തല പൊക്കാൻപോലും ആകാത്തവർ. ഭവനത്തിലാകെ നല്ല വൃത്തിയും വെടിപ്പും. മദർ അവിടെ ഉണ്ടായിരുന്നില്ല. മൂന്നു സിസ്റ്റേഴ്സ് ഉണ്ടായിരുന്നു. അവരുടെ മുഖത്തെല്ലാം നല്ല പ്രസരിപ്പും സന്തോഷവും. അവിടിരുന്ന് സംസാരിക്കുന്പോഴാണ് മദർ ലിറ്റി എന്ന അവരുടെ സ്ഥാപകയെക്കുറിച്ച് ആദ്യം കേൾക്കുന്നത്. എല്ലാം പ്രത്യാശയുടെ വാക്കുകൾ. അത്താഴത്തിന് വകയില്ലെങ്കിലും അതിഥികളെ സത്കരിക്കണം എന്നാണ് മദറിന്‍റെ നിർദേശമെന്നുകൂടി അവർ പറഞ്ഞു.
ഇവിടെ എങ്ങനെ കഴിയുന്നു. ഞാൻ അവരോടു തെരക്കി. ഒന്നിനും മുട്ടില്ല. എല്ലാം ഈശോ ക്രമീകരിക്കുന്നു. പലപ്പോഴും ഭക്ഷണം മിച്ചമാണ്. നല്ലമനസുകൾ കൊണ്ടുവന്നു തരുന്നത് സൂക്ഷിച്ചുവയ്ക്കാൻ ഫ്രിഡ്ജില്ലാത്തതുകൊണ്ട് പാഴായിപ്പോകും. അതു ഞങ്ങൾക്കു വലിയ സങ്കടമാണ്. ഒരു മണി ചോറുപോലും പാഴക്കരുതെന്ന് അമ്മ പറയാറുണ്ട്. ഫ്രിഡ്ജ് വാങ്ങാൻ വല്ല പാരിപാടിയുമുണ്ടോയെന്നു ഞാൻ ചോദിച്ചു. അറിയില്ല. അവർ പറഞ്ഞു. അന്നു വൈകുന്നേരം ലൂർദ് പള്ളിയിൽ ഉദ്യോഗസ്ഥക്കൂട്ടായ്മയുടെ കോർ ഗ്രൂപ്പുണ്ടായിരുന്നു. ആറു പേരുള്ള ചെറിയ സംഘം. കഥകളൊക്കെ ഞാൻ വിവരിച്ചു. ഒടുവിൽ ഞങ്ങള്‍ കുറച്ചുപേർ ചേർന്ന് 7000 രൂപ സ്വരൂപിച്ച് അവർക്ക് ഫ്രിഡ്ജ് വാങ്ങി നൽകി.
പിന്നീട് കിള്ളിയിലെ ദൈവ പരിപാലനയുടെ കഥകൾ കേൾക്കുന്പോൾ മദർ ലിറ്റിയോടുള്ള ആദരം പെരുകുകയായിരുന്നു. പണത്തിനു വേണ്ടി മനുഷ്യൻ എന്തും ചെയ്യുന്ന കാലത്ത് പണമല്ല പ്രധാന വിഷയം എന്ന് ജീവിതത്തിലൂടെ കാണിച്ചു കൊടുക്കുന്ന ഈ അമ്മ ഞങ്ങൾക്കെല്ലാം മുന്പിൽ അത്ഭുതമായി. പരിചയപ്പെട്ടപ്പോൾ ആദ്യം ചോദിച്ച ചോദ്യവും ഇതാണ്. മദർ ലിറ്റിക്ക് എങ്ങനെ ഇത്രയും ധൈര്യം കിട്ടി? അമ്മ പറഞ്ഞു തന്നു അത് ഒരു അനുഭവത്തിൽ നിന്നാണ്. 1957ലാണ് സംഭവം. അമ്മ ഡോക്ടറാകാൻ ഇറ്റലിയിൽ പഠിക്കുന്നു. ഒരു ദിവസം അവിടെ ടൂറിനിൽ വിശുദ്ധ ജോസഫ് കൊത്തലംഗോ സ്ഥാപിച്ച ദൈവപരിപാലനയുടെ ചെറുഭവനം സന്ദർശിക്കാൻ പോയി. അവിടത്തെ പ്രവർത്തനങ്ങൾ അമ്മയെ വല്ലാതെ അത്ഭുതപ്പെടുത്തി.ആയിരങ്ങൾക്കാണ് അവിടെ ദിവസവും സൗജന്യഭക്ഷണം കൊടുക്കുന്നത്. ആ ഭവനത്തിൽ ഒരു ദിവസം കിട്ടുന്നതെല്ലാം അന്നുതന്നെ വിതരണം ചെയ്തു തീരും. അല്ലെങ്കിൽ തീർക്കും. പിറ്റേന്നത്തേക്ക് ഒന്നും ബാക്കി വയ്ക്കില്ല. പിറ്റേന്നത്തേക്ക് ഈശോ തരണമെങ്കിൽ അങ്ങനെ വേണം.
അവിടത്തെ അത്ഭുതകരമായ ദൈവപരിപാലന മദറിന്‍റെ അന്തരംഗത്തിൽ മുഴങ്ങി ‘എന്തുകൊണ്ട് നിനക്കും പാവങ്ങൾക്കു വേണ്ടി ജീവിതം സമർപ്പിച്ചു കൂടാ?’ മദറിനെ സമർപ്പണ ജീവിതത്തിലേക്ക് തെരഞ്ഞെടുക്കുകയും ഇറ്റലിയിൽ ഡോക്ടർ പഠനത്തിനു വിടുകയും ചെയ്ച ധർമഗിരി സന്യാസ സഭയിൽനിന്നു പുറത്തിറങ്ങി വ്യത്യസ്തമായി ജീവിതം നയിക്കണം എന്ന ഈശോയുടെ വിളിയോടു പ്രത്യുത്തരം കൊടുക്കാൻ തടസങ്ങൾ ഏറെയായിരുന്നു. ഒടുവിൽ 1973ൽ മദർ ലിറ്റിക്ക് സഭയുടെ അനുവാദം കിട്ടി. പരമദരിദ്രർക്കു വേണ്ടിയുള്ള പടയോട്ടത്തിന് തുടക്കം കുറിക്കാൻ മദർ ലിറ്റി മുക്കുരിലെത്തി.
അവിടെ ഡോട്ടേഴ്സ് ഓഫ് സെന്‍റ് ജോസഫ്സ് എന്ന മഠത്തിൽ താമസിച്ച് ഒരുക്കങ്ങളാരംഭിച്ചു. പിന്നീട് ചങ്ങനാശേരി ആർച്ച്ബിഷപ്പായിരുന്ന മാർ ആന്‍റണി പടിയറയുടെ അനുമതിയോടെ 1978 ജനുവരി 17ന് ഒരു രോഗിയുമായി മദർ ലിറ്റി കുന്നന്താനത്തെ ഐക്കുഴിയിൽ വാടക വീട്ടിൽ ‘ലിറ്റിൽ സേർവന്‍റ്സ് ഓഫ് ഡിവൈൻ പ്രൊവിഡൻസ്’ എന്ന ഇന്നത്തെ സന്യാസിനീ സമുഹത്തിന് തുടക്കം കുറിച്ചു. അമ്മയുടെ പദ്ധതികൾ കേൾക്കുന്ന പടിയറപ്പിതാവ് എന്നും ചോദിച്ചതു ഇതിനുള്ള വരുമാനം എങ്ങനെ കണ്ടെത്തും? ദൈവം തരും അതായിരുന്നു മദർ ലിറ്റിയിടെ സ്ഥിരം മറുപടി. പിന്നീട് മദറിന്‍റെ ജീവിതത്തിലും ലിറ്റിൽ സേർവന്‍റ്സ് ഓഫ് ഡിവൈൻ പ്രൊവിഡൻസ് സന്യാസിനീ സമുഹത്തിലും ദൈവം എല്ലാം നൽകിയെന്നതാണ് ചരിത്രം.
1935 ഓഗസ്റ്റ് രണ്ടിന് കോതമംഗലം രൂപതയിലെ സന്പന്ന കടുംബമായ ഓലിയപ്പുറത്ത് ജോസഫിന്റെയും ബ്രിജിത്തയുടെയും ഏഴു മക്കളിൽ ഏറ്റവും ഇളയമകളായി പിറന്നു. കൊച്ചുത്രേസ്യ എന്നായിരുന്നു പേര്. കോതമംഗലം സെന്‍റ് അഗസ്റ്റിൻസ്‌ സ്കുളിലും ചങ്ങനാശേരി അസംപ്ഷൻ കോളജിലും പഠിച്ച ശേഷം 1955ൽ ധർമഗിരി സന്യാസിനി സമുഹത്തിൽ ചേർന്നു. പ്രഥമ വ്രതവാഗ്ദാനത്തിനുശേഷം റോമിൽ എംഡിക്കു പഠിക്കാൻ പോയി. ഐർലണ്ടിലും ഇംഗ്ലണ്ടിലും ഏതാനും വർഷം സേവനം നടത്തി. നാട്ടിൽ തിരിച്ചെത്തി സന്യാസസമുഹത്തിന്‍റെ വിവിധ ആശുപത്രികളിൽ ജോലി ചെയ്തു. അപ്പോഴാണ് വിളിക്കുള്ളിലെ വിളി സ്വീകരിച്ച് ദൈവപരിപാലയനയിൽ മാത്രം ആശ്രയിച്ച് ആർക്കും വേണ്ടാത്തവർക്കായി ശുശ്രൂഷ ആരംഭിച്ചത്. 2016 നവംബർ അഞ്ചിന് അമ്മ ഈ ലോകവാസം വിടുന്പോൾ ലിറ്റിൽ സേർവന്‍റ്സ് ഓഫ് ഡിവൈൻ പ്രൊവിഡൻസിന് 16 ഭവനങ്ങളും 162 സഹോദരികളും 2000 അന്തേവാസികളും ഉണ്ടായിരുന്നു.
Leader Page
നിയന്ത്രണവും നീതിപൂർവമായ സംരക്ഷണവും തമ്മിലുള്ള സന്തുലിതാവസ്ഥ ഇന്ത്യയിലെ നിരവധി ജീവകാരുണ്യ സ്ഥാപനങ്ങൾ, വിദ്യാഭ്യാസ സ്ഥാപനങ്ങൾ, ആശുപത്രികൾ, അനാഥാലയങ്ങൾ, സാമൂഹിക സേവന സംഘടനകൾ എന്നിവയുടെ പ്രവർത്തനങ്ങളിൽ വിദേശ സംഭാവനകൾ നിർണായകമായ പങ്കുവഹിച്ചിട്ടുണ്ട്.
ഇവയിൽ പലതും വിദേശ സംഭാവനകളോടൊപ്പം സ്ഥാപനത്തിന്‍റെ സ്വന്തം വരുമാനം, ആഭ്യന്തര സംഭാവനകൾ, മറ്റ് നിയമാനുസൃത സാമ്പത്തിക സ്രോതസുകൾ എന്നിവയും സംയോജിപ്പിച്ചാണ് പ്രവർത്തിച്ചുവരുന്നത്. അതിനാൽ, വിദേശ സംഭാവനകളെ നിയന്ത്രിക്കുന്ന നിയമത്തിലെ മാറ്റങ്ങൾ വൈദേശിക സാമ്പത്തിക ഇടപാടുകളെ മാത്രമല്ല ഈ സ്ഥാപനങ്ങളുടെ സ്വത്തുക്കൾ, ഭരണസംവിധാനം, സേവനങ്ങളുടെ തുടർച്ച എന്നിവയെയും ബാധിച്ചേക്കാം.
വിദേശ സംഭാവനകൾ സ്വീകരിക്കുന്ന സ്ഥാപനങ്ങൾ നിയമത്തിലെ രജിസ്ട്രേഷൻ, പുതുക്കൽ, കണക്കുകൾ സമർപ്പിക്കൽ, വിനിയോഗം തുടങ്ങിയ വ്യവസ്ഥകൾ പാലിക്കേണ്ടതുണ്ട്. ദേശീയ താത്പര്യം സംരക്ഷിക്കുന്നതിനും നിയമലംഘനങ്ങൾ തടയുന്നതിനും ഭരണകൂടത്തിന് ഫലപ്രദമായ നിയന്ത്രണാധികാരം ഉണ്ടായിരിക്കേണ്ടതിൽ തർക്കമില്ല. 2026ലെ ഭേദഗതി ബിൽ ഈ നിയന്ത്രണ സംവിധാനത്തിൽ കൂടുതൽ വിപുലമായ മാറ്റങ്ങളാണ് നിർദേശിക്കുന്നത്. ഈ ബിൽ ഇപ്പോൾ സംയുക്ത പാർലമെന്‍ററി സമിതിയുടെ പരിശോധനയിലാണ്.
ഈ പരിശോധനയിൽ പരിഗണിക്കേണ്ട പ്രധാന ചോദ്യം വിദേശ സംഭാവനകളെ നിയന്ത്രിക്കാനുള്ള ഭരണകൂടത്തിന്‍റെ അധികാരം വേണമോ എന്നതല്ല. മറിച്ച്, ആ അധികാരം പ്രയോഗിക്കുമ്പോൾ നിയമാനുസൃതമായ നിയന്ത്രണലക്ഷ്യങ്ങൾക്കും സ്വത്തവകാശ സംരക്ഷണത്തിനും സ്ഥാപനങ്ങളുടെ ഭരണസ്വാതന്ത്ര്യത്തിനും പൊതുസേവനങ്ങളുടെ തുടർച്ചയ്ക്കും ഇടയിൽ എങ്ങനെ ന്യായമായ സന്തുലിതാവസ്ഥ ഉറപ്പാക്കാം എന്നതാണ്.
പ്രത്യേകിച്ച്, വിദേശ സംഭാവനകളോടൊപ്പം ആഭ്യന്തര സംഭാവനകളും ഉപയോഗിച്ച് സമ്പാദിച്ച സ്വത്തുക്കൾ മുഴുവനായി അധികാരിയിൽ നിക്ഷിപ്തമാക്കാനുള്ള സാധ്യത, രജിസ്ട്രേഷൻ പുതുക്കാത്തതിന്‍റെ പ്രത്യാഘാതങ്ങൾ, സ്ഥിരമായ നിക്ഷിപ്തമാക്കലും സ്വത്തുക്കളുടെ കൈമാറ്റവും, സ്ഥാപനത്തിന്‍റെ നടത്തിപ്പിൽ ഇടപെടാനുള്ള അധികാരം, മുൻകാല കേസുകളിലേക്കുള്ള പുതിയ വ്യവസ്ഥകളുടെ പ്രയോഗം, ട്രസ്റ്റിമാരുടെയും ഭരണസമിതി അംഗങ്ങളുടെയും വ്യക്തിഗത ഉത്തരവാദിത്വം എന്നിവ സൂക്ഷ്മമായ പരിശോധന അർഹിക്കുന്നു.
Leader Page
ജന്തർ മന്തറിൽ സമീപകാലത്ത് ഏറ്റുമുട്ടുന്നത് പ്രതിഷേധക്കാരും പൊലിസും മാത്രമല്ല; പൗരസ്വാതന്ത്ര്യവും ഭരണകൂടത്തിന്‍റെ നിയന്ത്രണാധികാരവുമാണ്. പ്രതിഷേധിക്കാനെത്തുന്ന യുവതീ-യുവാക്കളെ വഴിയിൽത്തന്നെ തടയുന്നു; ചിലരെ വിമാനത്താവളത്തിൽനിന്നുതന്നെ കസ്റ്റഡിയിലെടുക്കുന്നു; പ്രതിഷേധസ്ഥലങ്ങളിലേക്കുള്ള വഴികൾ ബാരിക്കേഡുകൾകൊണ്ട് അടയ്ക്കുന്നു.
പ്രതിപക്ഷകക്ഷി നേതാക്കളെയുൾപ്പടെ പ്രതിഷേധക്കാരെ പിടിച്ചുവലിച്ചും ബലംപ്രയോഗിച്ചും പൊലിസ് വാഹനങ്ങളിലേക്കു കയറ്റുന്നു. അവ രേഖപ്പെടുത്താനെത്തുന്ന മാധ്യമപ്രവർത്തകരും പൊലിസ് നടപടിക്കു വിധേയരാകുന്നു. പ്രതിഷേധദൃശ്യങ്ങൾ പ്രചരിപ്പിക്കുന്ന സമൂഹമാധ്യമ അക്കൗണ്ടുകളിലേക്കുപോലും അന്വേഷണം നീളുന്നു. പ്രതിഷേധത്തെ നേരിടുക മാത്രമല്ല, അതിനെ തടയുകയും നിരീക്ഷിക്കുകയും അതിന്‍റെ ദൃശ്യതപോലും നിയന്ത്രിക്കുകയും ചെയ്യുന്ന ഒരു ഭരണകൂടത്തിന്‍റെ യുക്തി ഒരു ജനാധിപത്യസമൂഹത്തെ അത്യന്തം അസ്വസ്ഥപ്പെടുത്തുന്നതാണ്.
തെരഞ്ഞെടുപ്പു കമ്മിഷന്‍റെ പ്രത്യേക വോട്ടർപട്ടിക പരിഷ്കരണമായ എസ്ഐആറിനെതിരേയാണ് ഈ പ്രതിഷേധങ്ങൾ. മുഖ്യ തെരഞ്ഞെടുപ്പ് കമ്മിഷണർ ഗ്യാനേഷ് കുമാർ രാജിവയ്ക്കണമെന്നും എസ്ഐആർ പിൻവലിക്കണമെന്നും അവർ ആവശ്യപ്പെടുന്നു.
ഭരണകൂടത്തെ ചോദ്യം ചെയ്താൽ?
ഒരു ജനാധിപത്യരാജ്യത്ത് ഭരണകൂടത്തെ ചോദ്യംചെയ്യുക എന്നതു പൗരസമൂഹത്തിന്‍റെ മൗലികാവകാശമാണ്; ജനാധിപത്യത്തിന്‍റെ കരുത്തളക്കേണ്ടത് ഭരണകൂടത്തെ അനുകൂലിക്കുന്ന അഭിപ്രായങ്ങൾ എത്ര സ്വതന്ത്രമായി പ്രകടിപ്പിക്കപ്പെടുന്നു എന്നതിലല്ല; മറിച്ച് അതിനെ അസ്വസ്ഥമാക്കുന്ന വിയോജിപ്പുകളോട് അധികാരം എത്രത്തോളം സഹിഷ്ണുത കാണിക്കുന്നു എന്നതിലാണ്.
ഇവിടെ പ്രധാന പ്രശ്നം, പ്രതിഷേധങ്ങളെ മുൻകൂട്ടി നിയന്ത്രിക്കുകയും മെരുക്കുകയും ചെയ്യുന്ന ഭരണകൂടത്തിന്‍റെ ജനാധിപത്യവിരുദ്ധമായ ഭരണയുക്തിയാണ്. പ്രതിഷേധം ഭരണകൂടം വരച്ചിടുന്ന വൃത്തത്തിനുള്ളിൽ മാത്രമേ പാടുള്ളൂവെന്ന് നിഷ്കർഷിക്കുന്ന ഈ അച്ചടക്കാധികാരം ജനാധിപത്യപരമായ ഏതൊരു സമൂഹത്തിനും അപമാനവും വിരോധാഭാസവുമാണ്.
ആധുനിക അധികാരം എല്ലായ്പോഴും ലാത്തിയുടെയോ ജയിലിന്‍റെയോ രൂപത്തിൽ മാത്രം പ്രവർത്തിക്കുന്നില്ലെന്ന് ഫ്രഞ്ച് സമൂഹശാസ്ത്രജ്ഞനായ മിഷേൽ ഫൂക്കോ ചൂണ്ടിക്കാട്ടി. മനുഷ്യർ എവിടെ നിൽക്കണം, എപ്പോൾ, എങ്ങനെ സഞ്ചരിക്കണം, എപ്പോൾ സംഘം ചേരണം, എന്തെല്ലാം ചെയ്യാം എന്നതിന്‍റെ അതിരുകൾ ക്രമീകരിച്ചുകൊണ്ടും അധികാരം പ്രവർത്തിക്കുന്നു.
അതുകൊണ്ടുതന്നെ വഴികളടച്ച് റോഡുകളിൽ നിരത്തിയിരിക്കുന്ന ബാരിക്കേഡുകൾക്ക് മറ്റൊരു രാഷ്‌ട്രീയ അർഥമുണ്ട്. അവ വെറുമൊരു ഇരുമ്പുവേലിയല്ല. “ഇതിനപ്പുറം നിങ്ങളുടെ ശരീരത്തിന് പ്രവേശനമില്ല” എന്നു പറയുന്ന അധികാരത്തിന്‍റെ ഭാഷയാണ്. പ്രതിഷേധസ്ഥലത്തെത്തുന്നതിന് മുമ്പുള്ള കസ്റ്റഡി, അനുമതിനിഷേധം, നിരോധനാജ്ഞ, കേസെടുക്കുമെന്ന മുന്നറിയിപ്പ് ഇവയൊക്കെ ലാത്തി ഉയരുന്നതിനു മുമ്പുതന്നെ പ്രതിഷേധത്തെ നിയന്ത്രിക്കുന്ന മാർഗങ്ങളാണ്.
പ്രതിഷേധത്തെ നേരിട്ടുള്ള ബലപ്രയോഗത്തിലൂടെ അടിച്ചമർത്തുന്നതിനേക്കാൾ, നിരീക്ഷണത്തിലൂടെയും നിയന്ത്രണത്തിലൂടെയും മനുഷ്യരെ സ്വയം അച്ചടക്കത്തിനു വിധേയരാക്കുന്ന അധികാരത്തിന്‍റെ ഈ സൂക്ഷ്മരൂപമാണ് ഫൂക്കോ തന്‍റെ രചനകളിൽ അന്വേഷിച്ചത്. ഫൂക്കോയുടെ ജന്മശതാബ്‌ദി ആചരിക്കുന്ന ഈ വർഷം, അധികാരം എങ്ങനെ നിരീക്ഷിക്കുന്നു, നിയന്ത്രിക്കുന്നു, എപ്രകാരം സ്വയം അനുസരിപ്പിക്കുന്നു എന്ന അദ്ദേഹത്തിന്‍റെ ചോദ്യം ഇന്ത്യൻ തെരുവുകളിൽ അരങ്ങേറുന്ന സംഭവങ്ങളുടെ പശ്ചാത്തലത്തിൽ കൂടുതൽ പ്രസക്തമാകുകയാണ്. നിരീക്ഷണം എങ്ങനെയാണ് മനുഷ്യരെ അനുസരിപ്പിക്കുന്ന അച്ചടക്ക അധികാരമായി മാറുന്നത്? ഈ ചോദ്യത്തിന് ഫൂക്കോ നൽകുന്ന ഏറ്റവും ശക്തമായ വിശദീകരണമാണ് പനോപ്റ്റിക്കോൺ എന്ന സങ്കൽപം.
പനോപ്റ്റിക് അധികാരത്തിന്‍റെ ശക്തിയും സൗന്ദര്യവും
ബ്രിട്ടീഷ് തത്വചിന്തകനായ ജെറമി ബെന്തം പതിനെട്ടാം നൂറ്റാണ്ടിൽ രൂപകല്പന ചെയ്ത സവിശേഷമായ ജയിൽ മാതൃകയായിരുന്നു പനോപ്റ്റിക്കോൺ. ചുറ്റുമുള്ള തടവുമുറികളിലുള്ളവരെ നടുവിലെ നിരീക്ഷണഗോപുരത്തിൽനിന്ന് കാണാൻ കഴിയും; എന്നാൽ ഓരോ നിമിഷവും തന്നെ ആരെങ്കിലും നിരീക്ഷിക്കുന്നുണ്ടോയെന്ന് തടവുകാർക്ക് അറിയാനാകില്ല. താൻ നിരീക്ഷിക്കപ്പെടുന്നുണ്ടാകാമെന്ന ബോധംതന്നെ തടവുകാരനെ സ്വയം നിയന്ത്രിക്കാൻ പ്രേരിപ്പിക്കുന്നു. അധികാരത്തിന്‍റെ നോട്ടം മനസിൽ പതിയുന്നതോടെ ബാഹ്യമായ ഭീഷണിപ്പെടുത്തലുകളില്ലാതെതന്നെ വ്യക്തി സ്വയംനിയന്ത്രണത്തിലേക്ക് വഴിമാറുന്നു.
പനോപ്റ്റിക്കോണിനെ കേവലമൊരു ജയിൽമാതൃകയായിട്ടല്ല ഫൂക്കോ കണ്ടത്; ആധുനികസമൂഹത്തിലെ അച്ചടക്കാധികാരം പ്രവർത്തിക്കുന്നതിന്‍റെ ശക്തമായൊരു രൂപകമായിട്ടാണ് അതിനെ വികസിപ്പിച്ചത്. മനുഷ്യരുടെ ശരീരത്തെയും ചലനത്തെയും പെരുമാറ്റത്തെയും നിരീക്ഷിക്കുകയും ക്രമപ്പെടുത്തുകയും അതുവഴി അവരെ അനുസരണവിധേയരാക്കുകയും ചെയ്യുന്ന സൂക്ഷ്മമായ പ്രവർത്തനങ്ങളിലൂടെയും അധികാരം പ്രയോഗിക്കപ്പെടുന്നു. പ്രത്യക്ഷമായ മർദനമില്ലാതെതന്നെ നിരീക്ഷണത്തിന്‍റെ സാധ്യതയിലൂടെ മനുഷ്യരെ സ്വയം അച്ചടക്കത്തിനു വിധേയരാക്കുന്നതിലാണ് പനോപ്റ്റിക് അധികാരത്തിന്‍റെ ശക്തി.
ഇന്നത്തെ ഡിജിറ്റൽ സമൂഹത്തിൽ പനോപ്റ്റിക്കോണിന്‍റെ ഗോപുരം അപ്രത്യക്ഷമായെങ്കിലും അതിന്‍റെ കണ്ണുകൾ എല്ലായിടത്തുമുണ്ട്; അതിന്‍റെ നോട്ടം കൂടുതൽ വ്യാപകമായിരിക്കുന്നു. നിരീക്ഷണകാമറകൾ, മുഖം തിരിച്ചറിയൽ സംവിധാനങ്ങൾ, മൊബൈൽ വിവരങ്ങൾ, സമൂഹമാധ്യമങ്ങൾ, കേന്ദ്രീകൃത വിവര എജൻസികൾ എന്നിവയുള്ളതിനാൽ നിരീക്ഷണം ഇന്ന് ഒരു കെട്ടിടത്തിനുള്ളിലല്ല, സമൂഹത്തിലാകെ വ്യാപിച്ച ഒരു ശൃംഖലയാണ്. പ്രതിഷേധത്തിനെത്തുന്ന ഓരോരുത്തരെയും പൊലിസ് നേരിട്ടു തടയേണ്ടതില്ല; പൊലിസിന്‍റെ സാധ്യതയുള്ള നോട്ടം അവരുടെ ഉള്ളിൽ പതിച്ചാൽ മതി. മറുവശത്ത്, ഡിജിറ്റൽ കാലം ഈ നിരീക്ഷണത്തിന് ശക്തമായൊരു പ്രതിനോട്ടവും സാധിക്കുന്നു എന്നത് സമകാലിക ജനാധിപത്യ പ്രതിഷേധങ്ങൾക്ക് പുതിയ കരുത്ത് പകരുന്നു.
സിനോപ്റ്റിക്കോൺ ആശയം
ഫൂക്കോയുടെ പനോപ്റ്റിക്കോണിനെ വികസിപ്പിച്ചുകൊണ്ട് സമൂഹശാസ്ത്രജ്ഞനായ തോമസ് മത്തീസൻ സിനോപ്റ്റിക്കോൺ എന്ന ആശയം മുന്നോട്ടുവച്ചു. പനോപ്റ്റിക്കോണിൽ കുറച്ചുപേർ അനേകരെ നിരീക്ഷിക്കുന്നുവെങ്കിൽ, സിനോപ്റ്റിക്കോണിൽ അനേകർ കുറച്ചുപേരെ നിരീക്ഷിക്കുന്നു. ഇന്നത്തെ ജനാധിപത്യ പ്രതിഷേധത്തിൽ തിരിച്ചുള്ള ഈ നിരീക്ഷണത്തിന് പുതിയൊരു രാഷ്‌ട്രീയശക്തിയുണ്ട്.
പൊലിസ് പ്രതിഷേധക്കാരെ കാമറയിൽ പകർത്തുമ്പോൾ പ്രതിഷേധക്കാരുടെയും പൊതുസമൂഹത്തിന്‍റെയും മാധ്യമങ്ങളുടെയും മൊബൈൽ കാമറകൾ പൊലിസിന്‍റെ നടപടികളെയും പകർത്തുന്നു. ഒരു യുവാവിനെ പിടിച്ചുവലിക്കുന്നതോ ഒരു യുവതിയോട് ബലംപ്രയോഗിക്കുന്നതോ രാഷ്‌ട്രീയനേതാക്കളെയോ മാധ്യമപ്രവർത്തകരെയോ തടയുന്നതോ സന്നിഹിതരായ ഏതാനും പേരുടെ അനുഭവമായി അവസാനിക്കുന്നില്ല. നിമിഷങ്ങൾക്കുള്ളിൽ ആ ദൃശ്യങ്ങൾ ലക്ഷക്കണക്കിന് മനുഷ്യരുടെ സ്ക്രീനുകളിലെത്താം. അധികാരം പൗരസമൂഹത്തെ നിരീക്ഷണത്തിനു വിധേയമാക്കുമ്പോൾ, പൗരസമൂഹവും അധികാരപ്രയോഗത്തെ പൊതുസമൂഹത്തിനു മുന്നിൽ ദൃശ്യമാക്കുന്നു.
ഇവിടെയാണ് സിനോപ്റ്റിക് നോട്ടം ജനങ്ങളുടെ "പ്രതിരോധ നോട്ടമായി' മാറുന്നത്. തെരുവിലെ പ്രതിഷേധത്തോടൊപ്പം അധികാരത്തെ രേഖപ്പെടുത്തുകയും ദൃശ്യങ്ങൾ പങ്കുവയ്ക്കുകയും പൊതുസമൂഹത്തിന്‍റെ പരിശോധനയ്ക്കു വിധേയമാക്കുകയും ചെയ്യുന്നത് സമകാലിക ജനാധിപത്യ പ്രതിരോധത്തിന്‍റെ ശക്തമായ രൂപങ്ങളിലൊന്നാണ്. അതുകൊണ്ടുതന്നെ പ്രതിഷേധക്കാരുടെയും പൊതുജനങ്ങളുടെയും മാധ്യമപ്രവർത്തകരുടെയും കാമറകളും മൊബൈൽ ഫോണുകളും സംരക്ഷിക്കപ്പെടേണ്ട ജനാധിപത്യ ഉപകരണങ്ങളാണ്.
പ്രതിഷേധിക്കുന്നർ ശത്രുക്കളോ?
എസ്ഐആറിനെക്കുറിച്ചുള്ള ആരോപണങ്ങൾ പരിശോധിക്കപ്പെടട്ടെ; തെരഞ്ഞെടുപ്പ് കമ്മിഷൻ അതിന്‍റെ നടപടികൾക്ക് മറുപടി പറയട്ടെ; കോടതികൾ നിയമസാധുത പരിശോധിക്കട്ടെ. എന്നാൽ അതിനിടയിൽ പ്രതിഷേധിക്കുന്നവരെ ശത്രുക്കളായി കാണുന്ന ഒരു ഭരണസംസ്കാരം വളരാൻ അനുവദിക്കരുത്. ചോദ്യംചെയ്യുന്ന യുവത്വം ജനാധിപത്യത്തിന്‍റെ ഭീഷണിയല്ല; അതിന്‍റെ ജീവശക്തിയാണ്. വിയോജിപ്പിനെ പൊലിസിനെക്കൊണ്ട് മെരുക്കുന്നതിനു പകരം രാഷ്‌ട്രീയമായി നേരിടുകയും പൊതുസമൂഹത്തിനു മുന്നിൽ മറുപടി പറയുകയും ചെയ്യുന്നതാണ് ജനാധിപത്യ ഭരണകൂടത്തിന്‍റെ ഉത്തരവാദിത്വം.
ഫൂക്കോ നമ്മെ ഓർമിപ്പിച്ചതുപോലെ അധികാരത്തിന്‍റെ ഏറ്റവും അപകടകരമായ രൂപം എല്ലായ്പ്പോഴും അതിന്‍റെ അക്രമാസക്തമായ രൂപമല്ല. അനുസരണത്തെ സ്വാഭാവികമാക്കുകയും ഭയത്തെ പൗരരുടെ ഉള്ളിൽ സ്ഥാപിക്കുകയും ചെയ്യുന്ന അധികാരമാണ് കൂടുതൽ ആഴത്തിൽ പ്രവർത്തിക്കുന്നത്. അതുകൊണ്ട് നാം മുഖ്യമായും ചോദിക്കേണ്ടത്, എത്രപേർ അറസ്റ്റിലായി എന്നതു മാത്രമല്ല. ബാരിക്കേഡിനു മുന്നിൽ തടയപ്പെട്ട ഒരു യുവതിയോ യുവാവോ അടുത്ത തവണ തെരുവിലിറങ്ങാൻ ഭയപ്പെടുമോ എന്നതുകൂടിയാണ്. പ്രതിഷേധിക്കാനുള്ള ധൈര്യത്തെ ഭയം കീഴടക്കുകയും ആ ഭയം പൗരബോധത്തിൽ വേരുറപ്പിക്കുകയും ചെയ്യുമ്പോഴാണ് ജനാധിപത്യത്തിന്‍റെ ഇടങ്ങൾ യഥാർഥത്തിൽ ചുരുങ്ങിത്തുടങ്ങുന്നത്. എന്നാൽ അതേ പൗരസമൂഹം അധികാരത്തെ തിരിച്ചുനോക്കുകയും അതിന്‍റെ പ്രവൃത്തികളെ പൊതുസമൂഹത്തിനു മുന്നിൽ ദൃശ്യമാക്കുകയും ചെയ്യുമ്പോൾ ജനാധിപത്യം അതിന്‍റെ പ്രതിരോധശേഷി വീണ്ടെടുക്കുന്നു.
(ലേഖകൻ കേരള സർവകലാശാലയിൽ സോഷ്യോളജി പ്രഫസറും വകുപ്പ് മേധാവിയുമായിരുന്നു)
Leader Page
ട്രംപ് ഭരണകൂടത്തിന്‍റെ വിലയിരുത്തലായി അമേരിക്കയിൽ ഇന്ന് ഇടക്കാല തെരഞ്ഞെടുപ്പ്. ഭരണത്തിലിരിക്കുന്ന പ്രസിഡന്‍റിനുള്ള ജനവിധിയാണ് അമേരിക്കയിൽ സാധാരണയായി ഇടക്കാല തെരഞ്ഞെടുപ്പുകൾ.
എന്നാൽ ഇന്നു നടക്കുന്ന തെരഞ്ഞെടുപ്പ് ഒരു പുതിയ രാഷ്‌ട്രീയ യുഗത്തിന് തുടക്കംകുറിക്കുന്ന നിർണായക വഴിത്തിരിവായി മാറിയേക്കാം. ഇത് ട്രംപ് തരംഗത്തിന്‍റെ ഗതി നിർണയിക്കുകയോ അല്ലെങ്കിൽ അതിന്‍റെ തകർച്ചയ്ക്ക് തുടക്കമിടുകയോ ചെയ്യാം. കഴിഞ്ഞ പ്രസിഡന്‍റ് തെരഞ്ഞെടുപ്പിലെ പരാജയത്തിനുശേഷം ഡെമോക്രാറ്റിക് പാർട്ടിക്ക് തിരിച്ചുവരവിനുള്ള അവസരംകൂടിയാണിത്.
കഴിഞ്ഞ രണ്ടു വർഷത്തിനിടെ ട്രംപ് നടപ്പിലാക്കിയ ഭരണപരിഷ്കാരങ്ങൾ, ഫെഡറൽ ഏജൻസികളുടെ ഘടന മാറ്റൽ, രാഷ്‌ട്രീയ എതിരാളികളെ ലക്ഷ്യമിട്ടുള്ള നടപടികൾ എന്നിവയ്ക്കുള്ള ജനവിധിയാകുമിത്. വിദേശനയത്തിൽ ‘അമേരിക്ക ഫസ്റ്റ്’ ദേശീയത ഉയർത്തിപ്പിടിച്ച ട്രംപ്, പുതിയ മധ്യപൂർവദേശ യുദ്ധത്തിന് വഴിവച്ചതും റഷ്യൻ-ചൈനീസ് ഭരണാധികാരികളുമായുള്ള അടുപ്പവും വോട്ടർമാർ വിലയിരുത്തും.
അതേസമയം, ജോ ബൈഡൻ ഭരണകൂടത്തിന്‍റെ കാലത്തെ ഉയർന്ന പണപ്പെരുപ്പവും അതിർത്തി സുരക്ഷയിലെ വീഴ്ചകളും കാരണം പ്രതിച്ഛായ മങ്ങിയ ഡെമോക്രാറ്റുകൾക്കും ഈ തെരഞ്ഞെടുപ്പ് പരീക്ഷണമാണ്.
2028 തെരഞ്ഞെടുപ്പിലേക്കുള്ള ദിശാസൂചിക
ഇടക്കാല തെരഞ്ഞെടുപ്പ് ഫലം യുഎസ് സാമ്പത്തിക വിപണിയെയും 2028ൽ നടക്കാനിരിക്കുന്ന അടുത്ത യുഎസ് പ്രസിഡന്‍റ് തെരഞ്ഞെടുപ്പിനുള്ള രാഷ്‌ട്രീയതന്ത്രങ്ങളെയും ഒരുപോലെ സ്വാധീനിക്കും. അടുത്ത പ്രസിഡന്‍റ് തെരഞ്ഞെടുപ്പിലേക്കുള്ള ദിശാസൂചികയായും ഇതു മാറും.
ഒരു അമേരിക്കൻ പ്രസിഡന്‍റിന്‍റെ നാലു വർഷത്തെ ഭരണകാലയളവിന്‍റെ കൃത്യം പകുതിയിലാണ് (രണ്ടാം വർഷത്തിൽ) ഇടക്കാല തെരഞ്ഞെടുപ്പു നടക്കുന്നത്. ഇതിൽ ജനപ്രതിനിധി സഭയിലെ മുഴുവൻ 435 സീറ്റുകളിലേക്കും സെനറ്റിലെ ഏകദേശം മൂന്നിലൊന്ന് ( 34) സീറ്റുകളിലേക്കും മത്സരം നടക്കുന്നു.
സഭകൾക്കു പുറമെ 36 സംസ്ഥാനങ്ങളിലെ 39 ഗവർണർ പദവികളിലേക്കും സംസ്ഥാന നിയമസഭകളിലേക്കും ഇതോടൊപ്പം വോട്ടെടുപ്പ് നടക്കുന്നുണ്ട്.
തെരഞ്ഞെടുപ്പുഫലം ജനപ്രതിനിധി സഭയുടെയും സെനറ്റിന്‍റെയും ഭൂരിപക്ഷം നിർണയിക്കുന്നതിനൊപ്പം, വിവിധ സംസ്ഥാന ഗവർണർ പദവികളിലും പ്രാദേശിക ഭരണകേന്ദ്രങ്ങളിലും ആര് അധികാരത്തിലേറണമെന്നതും നിശ്ചയിക്കും. ഇന്ത്യയിലെ പാർലമെന്‍ററി സമ്പ്രദായത്തിൽനിന്ന് വേറിട്ടുനിൽക്കുന്ന അമേരിക്കൻ പ്രസിഡൻഷ്യൽ ഭരണക്രമത്തിൽ, ഭരണത്തലവന്‍റെ കാലാവധിയുടെ പകുതിയിൽ നടക്കുന്ന ഈ തെരഞ്ഞെടുപ്പ് സർക്കാരിന്‍റെ ആഭ്യന്തര-വിദേശ നയങ്ങളിൽ വലിയ മാറ്റങ്ങൾ സൃഷ്‌ടിക്കാൻ പോന്നതാണ്.
വോട്ടെടുപ്പു കഴിയുന്നതോടെ വോട്ടെണ്ണൽ ആരംഭിക്കും. അതിനാൽത്തന്നെ ഇന്നു രാത്രിയോടെ ഫലസൂചനകൾ വ്യക്തമാകും. നാളെ രാത്രിയോടെ അന്തിമഫലം ലഭ്യമാകും.
ട്രംപിന്‍റെ ജനപ്രീതിയും വോട്ടർമാരുടെ ഉത്കണ്ഠയും
ട്രംപ് ഭരണകൂടത്തിന്‍റെ സാമ്പത്തിക നയങ്ങൾക്കും ഭാവി രാഷ്‌ട്രീയനീക്കങ്ങൾക്കും വഴിത്തിരിവാകുന്നതാണ് ഈ തെരഞ്ഞെടുപ്പ്. ജനപ്രതിനിധിസഭയിലും സെനറ്റിലും നിലവിലുള്ള നേരിയ ഭൂരിപക്ഷം നിലനിർത്താൻ റിപ്പബ്ലിക്കൻ പാർട്ടി കടുത്ത പോരാട്ടം നേരിടുമ്പോൾ, ഇരുസഭകളുടെയും ഭരണം പിടിച്ചെടുക്കാനുള്ള തീവ്രശ്രമത്തിലാണ് എതിരാളികളായ ഡെമോക്രാറ്റുകൾ.
നിലവിൽ 435 അംഗ ജനപ്രതിനിധി സഭയിൽ 218-214 എന്ന നേരിയ ഭൂരിപക്ഷവും 100 അംഗ സെനറ്റിൽ 53-47 എന്ന ഭൂരിപക്ഷവുമാണ് റിപ്പബ്ലിക്കൻ പാർട്ടിക്കുള്ളത്. ഇരുസഭകളുടെയും ഭരണം പിടിച്ചെടുക്കാൻ ഡെമോക്രാറ്റിക് പാർട്ടിക്ക് ഇനി നാല് സീറ്റുകൾ വീതം അധികമായി വിജയിക്കേണ്ടതുണ്ട്.
സെപ്റ്റംബറിലെ സർവേകൾ പ്രകാരം പ്രസിഡന്‍റ് ഡോണൾഡ് ട്രംപിന്‍റെ ജനപ്രീതി 32 ശതമാനത്തിലേക്കു താഴ്ന്നത് റിപ്പബ്ലിക്കൻ പാർട്ടിക്കു തിരിച്ചടിയാണ്.
പ്രതീക്ഷയോടെ ഡെമോക്രാറ്റുകൾ
ജനപ്രീതി കുറഞ്ഞ റിപ്പബ്ലിക്കൻ പ്രസിഡന്‍റ്, വർധിച്ചുവരുന്ന ജീവിതച്ചെലവിൽ അസംതൃപ്തരായ ജനത, മാസങ്ങളായി തങ്ങൾക്ക് അനുകൂലമായി നിലകൊള്ളുന്ന അഭിപ്രായസർവേകൾ എന്നിവയെല്ലാം വോട്ടെടുപ്പിൽ തങ്ങൾക്കു നേട്ടമുണ്ടാകുമെന്ന പ്രതീക്ഷയിലാണ് ഡെമോക്രാറ്റിക് പാർട്ടി.
ജനപ്രതിനിധി സഭയിൽ ഡെമോക്രാറ്റിക് പാർട്ടിക്കു ഭൂരിപക്ഷം ലഭിക്കുമെന്നാണ് ഭൂരിഭാഗം സർവേകളും സൂചിപ്പിക്കുന്നത്. കൂടാതെ, നിർണായകമായ സെനറ്റ് തെരഞ്ഞെടുപ്പിൽ ഒപ്പത്തിനൊപ്പമോ നേരിയ വ്യത്യാസത്തിൽ മുന്നിലോ ആണ്.
ജനപ്രതിനിധി സഭയിൽ ഡെമോക്രാറ്റുകൾ ഭൂരിപക്ഷം നേടിയാൽ ഡെമോക്രാറ്റിക് നേതാവ് ഹകീം ജെഫ്രീസ് ജനപ്രതിനിധി സഭാ സ്പീക്കറാകും. ഈ പദവിയിലെത്തുന്ന ആദ്യ കറുത്ത വർഗക്കാരനായി അദ്ദേഹം മാറും. മാത്രമല്ല, ട്രംപ് ഭരണകൂടത്തിനെതിരേയുള്ള അന്വേഷണങ്ങൾ ശക്തമാക്കാനും നികുതി, ആഭ്യന്തര നയങ്ങളിൽ തടസങ്ങൾ സൃഷ്ടിക്കാനും ഡെമോക്രാറ്റുകൾക്കു സാധിക്കും.
സെനറ്റിൽ കടുത്ത മത്സരമാണു നടക്കുന്നത്. മെയ്ൻ, ഒഹായോ, നോർത്ത് കരോലിന, ഐവ, ജോർജിയ, ടെക്സസ്, മിഷിഗൺ എന്നീ സംസ്ഥാനങ്ങളിലെ മത്സരഫലങ്ങൾ നിർണായകമാകും.
57 ഇന്ത്യൻ വംശജരും മത്സരരംഗത്ത്
യുഎസ് ഇടക്കാല തെരഞ്ഞെടുപ്പിൽ മത്സരിക്കുന്നവരിൽ 57 ഇന്ത്യൻ വംശജരായ സ്ഥാനാർഥികളുമുണ്ട്. യുഎസ് കോൺഗ്രസ്, സംസ്ഥാന ഗവർണർ, അറ്റോർണി ജനറൽ പദവികൾ മുതൽ തദ്ദേശ സ്വയംഭരണ സ്ഥാപനങ്ങൾ വരെ നീളുന്നതാണ് ഇവരുടെ പോരാട്ടം. യുഎസ് പ്രതിനിധിസഭയിലേക്ക് 11 പേരും വിവിധ സംസ്ഥാന നിയമസഭകളിലേക്ക് 36 പേരും ജനവിധി തേടുന്നു. അമേരിക്കൻ രാഷ്‌ട്രീയത്തിലും നയരൂപീകരണത്തിലും ഇന്ത്യൻ സമൂഹത്തിന്‍റെ വർധിച്ചുവരുന്ന സ്വാധീനമാണ്ഇതു വ്യക്തമാക്കുന്നത്.
ഒഹായോ ഗവർണർ പദവിയിലേക്ക് മത്സരിക്കുന്ന റിപ്പബ്ലിക്കൻ നേതാവ് വിവേക് രാമസ്വാമി, ലോസ് ആഞ്ചലസ് മേയർ സ്ഥാനത്തേക്കു പോരാടുന്ന നിത്യ രാമൻ എന്നിവരുടെ മത്സരങ്ങൾ ആഗോളതലത്തിൽ ശ്രദ്ധ നേടുന്നുണ്ട്.
റോ ഖന്ന, പ്രമിള ജയപാൽ, ഡോ. അമി ബെറ, സുഹാസ് സുബ്രഹ്മണ്യം എന്നീ നിലവിലെ ഡെമോക്രാറ്റിക് കോൺഗ്രസ് അംഗങ്ങളും വീണ്ടും സഭയിലേക്ക് മത്സരിക്കുന്നുണ്ട്. രണ്ടു പ്രധാന മണ്ഡലങ്ങളിൽ ഇന്ത്യൻ വംശജർ തമ്മിലാണ് നേരിട്ടുള്ള പോരാട്ടം.
വാഷിംഗ്ടൺ സംസ്ഥാനത്തെ ഏഴാം കോൺഗ്രഷണൽ മണ്ഡലത്തിൽ സിറ്റിംഗ് ഡെമോക്രാറ്റിക് കോൺഗ്രസ് അംഗം പ്രമീള ജയപാലിനെ നേരിടുന്നത് റിപ്പബ്ലിക്കൻ സ്ഥാനാർഥി നീരവ് സേത്താണ്. ജനപ്രതിനിധി സഭയിലേക്ക് രണ്ട് ഇന്ത്യൻ വംശജർ പരസ്പരം ഏറ്റുമുട്ടുന്ന അപൂർവ മത്സരങ്ങളിലൊന്നാണിത്.
ഡെമോക്രാറ്റിക് പാർട്ടിക്ക് പ്രബലമായ സ്വാധീനമുള്ള മണ്ഡലത്തിൽ ആറാം തവണയും വിജയം തേടിയാണ് 60കാരിയായ പ്രമീള ജയപാൽ മത്സരരംഗത്തുള്ളത്.
വാഷിംഗ്ടണിനു പുറമെ കലിഫോർണിയയിലെ 17-ാം കോൺഗ്രഷണൽ മണ്ഡലത്തിൽ (സിലിക്കൺ വാലി ഉൾപ്പെടുന്ന പ്രദേശം) സിറ്റിംഗ് ഡെമോക്രാറ്റിക് അംഗം റോ ഖന്ന ആറാം തവണയും ജനവിധി തേടുന്നു. റിപ്പബ്ലിക്കൻ സ്ഥാനാർഥിയായ ഇന്ത്യൻ വംശജൻ റിതേഷ് ടണ്ടനാണ് ഇവിടെ റോ ഖന്നയുടെ പ്രധാന എതിരാളി.
Leader Page
മലയാള സാഹിത്യത്തിലെ ആധുനികാനന്തര ഘട്ടത്തിലെ വേറിട്ടതും സങ്കീർണവുമായ ശബ്ദങ്ങളിലൊന്നാണ് മേതിൽ രാധാകൃഷ്ണന്‍റേത്. മലയാള സാഹിത്യത്തിന്‍റെ പരമോന്നത ബഹുമതിയായ എഴുത്തച്ഛൻ പുരസ്കാരം ഈ വർഷം പ്രഖ്യാപിച്ചതും ഈ ‘ഒറ്റയാൻ’ ശബ്ദത്തിനാണ്. ജനപ്രിയ ആഖ്യാനരീതികളോട് സന്ധിചെയ്യാതെ, ചിന്തയുടെയും ഭാഷയുടെയും പരീക്ഷണങ്ങളിലൂടെ മുന്നോട്ടുപോയ മേതിൽ മലയാള സാഹിത്യത്തിലെ വിസ്മയപ്രതിഭയാണ്.
പരമ്പരാഗത കഥാകഥന രീതികളെയും ആഖ്യാന മാതൃകകളെയും പൂർണമായും ഉടച്ചുവാർത്ത്, പുതിയൊരു ദർശനവും ഭാഷയും മലയാളത്തിന് സമ്മാനിച്ച എഴുത്തുകാരനാണ് അദ്ദേഹം. കേവലമായൊരു കഥ പറയുന്നതിനപ്പുറം മനുഷ്യാനുഭവങ്ങളെയും യുക്തികളെയും വേറിട്ടൊരു തലത്തിലേക്ക് ഉയർത്താൻ മേതിലിന്‍റെ രചനകൾക്കായിട്ടുണ്ട്. ശാസ്ത്രം, തത്ത്വചിന്ത, മനഃശാസ്ത്രം എന്നിവ സർഗാത്മകമായി സമന്വയിപ്പിച്ച് സ്വന്തം ശൈലി വെട്ടിത്തുറന്ന എഴുത്തുകാരനെന്ന നിലയിലാണ് മേതിലിനെ എഴുത്തച്ഛൻ പുരസ്കാരത്തിനു പരിഗണിച്ചതെന്നാണു ജൂറിയുടെ വിലയിരുത്തൽ.
ശാസ്ത്രവും തത്ത്വചിന്തയും ഇഴചേർന്ന ആഖ്യാനത്തിലൂടെ പരമ്പരാഗത ശൈലികളെ നിരാകരിച്ചുകൊണ്ടാണു മേതിൽ സാഹിത്യരംഗത്തേക്ക് പ്രവേശിക്കുന്നത്. കാലഗണനയെയും കാര്യകാരണ ബന്ധങ്ങളെയും കാറ്റിൽപ്പറത്തുന്ന ഒരു സവിശേഷ ആഖ്യാനശൈലിയാണു മലയാളത്തിന് അദ്ദേഹം പരിചയപ്പെടുത്തിയത്. ഭൗതികശാസ്ത്രം, ഗണിതം, ജ്യോതിശാസ്ത്രം, തത്ത്വചിന്ത എന്നിവയുടെ സ്വാധീനം അദ്ദേഹത്തിന്‍റെ കൃതികളെ വേറിട്ടതാക്കി. മേതിലിന്‍റെ ഭാഷ അദ്ദേഹത്തിനു മാത്രം എഴുതാൻ കഴിയുന്നതായിരുന്നു.
അതു മറ്റാർക്കും പകർത്താൻ പോലുമാവില്ല. അതിനു ശ്രമിച്ചു പരാജയപ്പെട്ടുപോയ എഴുത്തുകാർ നിരവധി. ലളിതമായ ആഖ്യാനത്തിനു പകരം വായനക്കാരെ ചിന്തിപ്പിക്കുകയും ബൗദ്ധികമായി വെല്ലുവിളിക്കുകയും ചെയ്യുന്ന ഗൗരവമേറിയ ഭാഷയാണ് മേതിലിന്‍റേത്. കുറച്ചുകൂടി ലളിതമായിപ്പറഞ്ഞാൽ മലയാള സാഹിത്യത്തെ ഭൗതിക ശാസ്ത്രത്തിന്‍റെയും മാത്തമാറ്റിക്സിന്‍റെയും ലബോറട്ടറിയാക്കി അദ്ദേഹം മാറ്റി എന്നു പറയാം.
അദ്ദേഹം തന്‍റെ രചനകളിലൂടെ മനുഷ്യരെയും അവരുടെ സങ്കീർണമായ പ്രശ്നങ്ങളെയും അടയാളപ്പെടുത്താൻ ശ്രമിച്ചു. അത് എല്ലാ എഴുത്തുകാരും ചെയ്യുന്നതുപോലെതന്നെ. പക്ഷേ, ഇവിടെ അദ്ദേഹം അതിനായി പിന്തുടർന്നത് സാഹിത്യയുക്തിയായിരുന്നില്ല, ശാസ്ത്രയുക്തിയായിരുന്നു എന്നുമാത്രം.
1944 ജൂലൈ 24-ന് പാലക്കാട്ട് ജനിച്ച മേതിലിന്‍റെ പഠനകാലം ചിറ്റൂർ ഗവൺമെന്‍റ് കോളജിലും തൃശൂർ കേരളവർമ കോളജിലുമായിരുന്നു. പിന്നീട് നോർവീജിയൻ ഷിപ്പിംഗ് കമ്പനിയുടെ കംപ്യൂട്ടർ വിഭാഗത്തിലും ചെന്നൈയിൽ സാങ്കേതിക ലേഖകനായും ജോലി ചെയ്തു. ജന്തുസ്വഭാവ ശാസ്ത്രനിരീക്ഷണങ്ങൾ ബ്രിട്ടനിലെ എന്‍റമോളജിക്കൽ സൊസൈറ്റി ജേണലുകളിൽ പ്രസിദ്ധീകരിച്ചിട്ടുണ്ട്.
കോയമ്പത്തൂരില്‍ കംപ്യൂട്ടര്‍ സഹായത്തോടെയുള്ള ഡിസൈന്‍ ആന്‍ഡ് ഡ്രാഫ്റ്റിംഗ് കേന്ദ്രവും അദ്ദേഹം നടത്തി. ജീവശാസ്ത്രവും കംപ്യൂട്ടറും സാഹിത്യവും ഒരേ വ്യക്തിയില്‍ സംഗമിച്ചതിന്‍റെ ഫലം അദ്ദേഹത്തിന്‍റെ രചനകളിലുടനീളം കാണാം. കംപ്യൂട്ടര്‍ മുതല്‍ പ്രാണികള്‍ വരെയുള്ള, പരസ്പരബന്ധമില്ലാത്തതെന്നു തോന്നുന്ന അനുഭവങ്ങളുടെ പ്രപഞ്ചം മേതിലിന്‍റെ രചനകളിൽ നിറഞ്ഞതിന്‍റെ കാരണവും മറ്റൊന്നല്ല.
മലയാള സാഹിത്യത്തിൽ അതുവരെയുണ്ടായിരുന്ന സൗന്ദര്യബോധങ്ങളെ മേതിൽ പൊളിച്ചെഴുതി. ശരിക്കും പറഞ്ഞാൽ അട്ടിമറിച്ചു എന്നുപറയാം. ഭ്രാന്തമായ ചിന്തകളിലൂടെയും ഭാവനകളിലൂടെയുമാണ് അദ്ദേഹം അതു ചെയ്തത്. നിലവിലുണ്ടായിരുന്ന സൗന്ദര്യശാസ്ത്രം തകർക്കുക മാത്രമല്ല അദ്ദഹം ചെയ്തത്. മറ്റൊന്നിനെ നിർമിക്കുകയും ചെയ്തു. അദ്ദേഹത്തിനുമാത്രം സാധിക്കുന്ന ഒന്നാണത്. അതിനായി അദ്ദേഹം തന്‍റേതു മാത്രമായ ഒരു രീതിശാസ്ത്രം പ്രയോഗിച്ചു.
താന്‍ പഠിച്ചതും അറിഞ്ഞതുമായ കാര്യങ്ങള്‍ എഴുത്തിലേക്കു കൊണ്ടുവരിക എന്നതായിരുന്നു അത്.മേതിലിന്‍റെ എഴുത്തിലേക്കുള്ള വരവ് ഒരു വിമർശനലേഖനത്തിലൂടെയായിരുന്നു. പത്താംക്ലാസ് പരീക്ഷയെഴുതി റിസൾട്ട് കാത്തിരിക്കുന്ന സമയത്താണ് വിഖ്യാത കഥാകാരൻ പൊൻകുന്നം വർക്കിയുടെ ‘എന്‍റെ വഴിത്തിരിവ്’ എന്ന ആത്മകഥ മേതിൽ വായിക്കുന്നത്. തുടർന്ന് അതിനെ വിമർശിച്ചുകൊണ്ട് ലേഖനമെഴുതി. ആദ്യം അതു പ്രസിദ്ധീകരിക്കാൻ താത്പര്യപ്പെട്ടില്ലെങ്കിലും പിന്നീട് മനസുമാറി അദ്ദേഹം അതു നവയുഗം വാരികയ്ക്ക് അയച്ചുകൊടുക്കുകയും അതു പ്രസിദ്ധീകരിച്ചുവരികയും ചെയ്തു.
അതും വലിയ പ്രാധാന്യത്തോടെ. പൊൻകുന്നം വർക്കിയെന്നഅതികായനെ വിമർശിക്കാൻ ധൈര്യം കാട്ടിയതിലൂടെ മേതിൽ ശ്രദ്ധിക്കപ്പെട്ടു. പിന്നീട്, മേതിൽ രാധാകൃഷ്ണൻ എന്നപേര് മലയാള സാഹിത്യത്തിന്‍റെ നെടുംതൂണായി മാറിയെന്നത് ചരിത്രം. പതിനെട്ടാം വയസിൽ എഴുതിയ ‘ഒക്ടോപ്പസിന്‍റെ ശവം’എന്ന കഥ പ്രസിദ്ധീകരിച്ചതോടെ മേതിൽ അറിയപ്പെട്ടുതുടങ്ങിയെന്നു പറയാം. പരമ്പരാഗതമായ കഥാകഥന രീതികളിൽനിന്നു പൂർണമായും മാറി ചിന്തിക്കാനും പുതിയൊരു ആഖ്യാനവഴി വെട്ടിത്തുറക്കാനും അദ്ദേഹത്തിന് ആ പ്രായത്തിൽത്തന്നെ കഴിഞ്ഞു എന്നതിന്‍റെ തെളിവാണ് ഈ രചന.
കഥപറച്ചിലിന്‍റെ പരമ്പരാഗതമായ ചട്ടക്കൂടുകളെയും ഘടനകളെയും കാറ്റിൽപ്പറത്തിക്കൊണ്ടാണ് മേതിലിന്‍റെ ആദ്യ നോവലായ ‘സൂര്യവംശം’ പുറത്തുവരുന്നത്. അതുവരെ മലയാളിക്ക് പരിചിതമല്ലാത്ത നോൺ-ലീനിയർ ആഖ്യാന രീതിയാണ് മേതിൽ പരീക്ഷിച്ചത്. അതായത് കൃത്യമായ തുടക്കവും മധ്യവും ഒടുക്കവുമുള്ള പരമ്പരാഗത കഥാരീതിക്ക് പകരം ചിതറിനിൽക്കുന്ന ദൃശ്യങ്ങളിലൂടെയും ആശയങ്ങളിലൂടെയുമാണ് ‘സൂര്യംവശം’ വായനക്കാരനോടു സംവദിക്കുന്നത്.
രണ്ടാമത്തെ നോവലായ ‘ബ്രാ’യിലേക്കെത്തുന്പോൾ പരമ്പരാഗത കഥാഘടനകളെയും വായനാശീലങ്ങളെയും ബോധപൂർവം തച്ചുടയ്ക്കാൻ ഇറങ്ങിത്തിരിച്ചിരിക്കുന്ന മേതിലിനെയാണു കാണാനാവുക. ആധുനികാനന്തര മലയാള സാഹിത്യത്തിലെ ഏറ്റവും വേറിട്ട ആഖ്യാന പരീക്ഷണങ്ങളിലൊന്നാണ് ‘ബ്രാ’ യെന്ന ചെറുനോവലെന്ന് നിസംശയം പറയാം.
മേതിൽ രാധാകൃഷ്ണൻ കഥകളിലൂടെയും നോവലുകളിലൂടെയും മാത്രമല്ല, കവിതകളിലൂടെയും സാഹിത്യലോകത്ത് സവിശേഷമായ അടയാളപ്പെടുത്തലുകൾ നടത്തിയിട്ടുണ്ട്. പരമ്പരാഗത കവിതാ സങ്കല്പങ്ങളെയും വരികളുടെ താളക്രമങ്ങളെയും പൂർണമായി ഉടച്ചുകളയുന്നതാണ് മേതിലിന്‍റെ കാവ്യലോകം. നോവലുകളിലും കഥകളിലും കാണുന്ന മേതിൽ സ്റ്റൈൽ കവിതകളിലും കാണാനാവും. സാധാരണ കവിതകളിൽനിന്നു തികച്ചും വ്യത്യസ്തമായ ദാർശനിക തലങ്ങളാണ് മേതിൽ കവിതകളുടെ കാതൽ. ശാസ്ത്രം, ഭൗതികശാസ്ത്രം, ജ്യോതിശാസ്ത്രം, തത്ത്വചിന്ത, പ്രപഞ്ചരഹസ്യങ്ങൾ എന്നിവയൊക്കെ അദ്ദേഹത്തിന്‍റെ കവിതകളിൽ പ്രധാന പ്രമേയങ്ങളായി കടന്നുവരുന്നു.
മേതിൽ ഒരിക്കലും എഴുത്തിനെ ഒരു ലളിതവിനോദമായി കണ്ടിട്ടില്ല. അതുകൊണ്ടുതന്നെ ആദ്യകൃതിയിലൂടെ കൊണ്ടുവരാൻ ശ്രമിച്ച രചനാശൈലിയിൽനിന്ന് അണുവിടെ മാറാൻ അദ്ദേഹം തയാറായില്ല. തുടക്കക്കാർക്ക് അല്പം പ്രയാസകരമെന്ന് തോന്നാമെങ്കിലും ആഴത്തിലുള്ള വായന ആഗ്രഹിക്കുന്നവർക്ക് എക്കാലത്തും അവിസ്മരണീയമായ അനുഭവമാണ് മേതിലിന്‍റെ രചനകൾ നൽകുന്നത്.
ശാസ്ത്രവും കലയും സാഹിത്യവും ഒരുപോലെ സംഗമിക്കുന്ന അദ്ദേഹത്തിന്‍റെ കൃതികൾ മലയാള ആധുനിക സാഹിത്യ ചരിത്രത്തിൽ സവിശേഷമായ ഒരു ഏടായി നിലകൊള്ളുന്നു.
Leader Page
പ്രിയ വായനക്കാരേ, രണ്ടു ഭിന്നയാഥാർഥ്യങ്ങൾക്കു മധ്യേയാണ് ഈ സൂര്യോദയം. ഒന്നു രാജ്യതലസ്ഥാനത്താണ്. രാംലീല മൈതാനത്ത്, ജനാധിപത്യ ഇന്ത്യയുടെ വീണ്ടെടുപ്പിനെന്നു പറഞ്ഞ് പ്രതിപക്ഷവും വിദ്യാർഥിമുന്നേറ്റങ്ങളും കൈ കോർക്കുന്പോൾ കേരളം 70-ാം പിറന്നാളിന്‍റെ മധുരം പങ്കുവയ്ക്കുകയാണ്.
മാതൃഭൂമിയുടെയും ജനിച്ച മണ്ണിന്‍റെയും ഗന്ധമുള്ള മലയാളി രണ്ടു യാഥാർഥ്യങ്ങളും തിരിച്ചറിയുന്നു. കെടാത്ത സ്വാതന്ത്ര്യപോരാട്ടവീര്യത്തിൽ മുഷ്‌ടി ഉയർത്തിക്കൊണ്ടുതന്നെയാണ് മറുകൈയാൽ നാം മധുരം നുണയുന്നത്. കേരളത്തിനു പുറത്തും രാജ്യത്തിനു പുറത്തുമായി 50 ലക്ഷത്തോളം മലയാളികളും ഈ നൊന്പരവും മധുരവും പങ്കുവയ്ക്കുകയാവാം. ഇരുട്ടും വെളിച്ചവും ഇടകലർന്ന വഴികളിൽ കൈകോർത്തു മുന്നേറാം. എല്ലാവർക്കും ദീപികയുടെ കേരളപ്പിറവി ആശംസകൾ!
"മലഞ്ചൂരല്‍മടയില്‍നിന്നും വിളഞ്ഞ ചൂരപ്പനമ്പുപോലെ കുറത്തിയെത്തുന്നു' എന്ന മുന്നറിയിപ്പോടെയാണ് കടമ്മനിട്ട "കുറത്തി' എന്ന കവിത ഒരു തീക്കനൽപോലെ നമ്മുടെ നെഞ്ചിലേക്കെറിഞ്ഞത്. 50 കൊല്ലമെങ്കിലും കഴിഞ്ഞിട്ടുണ്ടാകും. ഏതു കാലപ്രവാഹത്തിലും മിഥ്യകളിൽ ഒഴുകിപ്പോകാതിരിക്കാൻ കുന്പസാരിക്കാനും പരിഹാരം ചെയ്യാനുമുള്ള താക്കീതും കുറത്തിയിലുണ്ട്.
തെറ്റുകളുടെ കുറ്റപത്രം നിവർന്നുനിന്നു വായിച്ചശേഷം കുറത്തി പറയുന്നു; "നിങ്ങളോര്‍ക്കുക നിങ്ങളെങ്ങനെ നിങ്ങളായെന്ന്!' ചൂഷിതരായ അടിസ്ഥാന വർഗങ്ങൾക്കുവേണ്ടിയായിരുന്നു കടമ്മനിട്ട എഴുതിയത്. പക്ഷേ, ഇന്ന് കേരളപ്പിറവിയുടെ ആഘോഷറാലികൾക്കും പ്രസംഗങ്ങൾക്കുമിടെ നാം മറക്കരുതാത്ത കാര്യം അതു മാത്രമാണ്.
പലവിധ നേട്ടങ്ങളിലും ചെറിയൊരു തുണ്ടു ഭൂമിയായ കേരളം എന്ന സംസ്ഥാനം എങ്ങനെയാണ് ഈ രാജ്യത്തിന്‍റെ മുന്നിലായതെന്നു നാം മറക്കരുതെന്ന്. നേട്ടങ്ങൾ മലവെള്ളത്തിൽ ഒഴുകിവന്നതല്ലെന്നും അതിനു പിന്നിൽ പൂർവികരുടെ കഠിനാധ്വാനങ്ങളുണ്ടെന്നും മറക്കരുതെന്ന്. അതു കൈമോശം വന്നെങ്കിൽ വീണ്ടെടുപ്പിനു സമയമായെന്ന്. നവോത്ഥാനം ചരിത്രപുസ്തകങ്ങളിലെ നിശ്ചിത കാലയളവിന്‍റെ പോരാട്ടകഥ മാത്രമല്ല, നിരന്തരം തുടരേണ്ട സംവാദവും സമരവുമാണെന്ന്.
കേരളത്തെ നവോത്ഥാനത്തിലേക്കും പുതുയുഗപ്പിറവിയിലേക്കും നടത്താനുള്ള പ്രതിജ്ഞ ഇന്നെടുക്കാം. ഡൽഹി ജനാധിപത്യത്തിനുവേണ്ടി വെയിലും തണുപ്പും കൊള്ളുന്നെങ്കിൽ ഇവിടെയും നാം കണ്ണു തുറക്കണം. മന്ത്രിമാരുടെയും എംഎൽഎമാരുടെയും ശന്പളമേ വർധിപ്പിച്ചിട്ടുള്ളൂ. ഇക്കഴിഞ്ഞ നാളുകളിൽ നിർമിതബുദ്ധിയുടെ ചവിട്ടേറ്റ് നിരവധിപേർക്കു ജോലി നഷ്ടമായി. നമ്മുടെ കർഷകർ, തൊഴിലാളികൾ, ദളിതർ, ആദിവാസികൾ, ന്യൂനപക്ഷങ്ങൾ, വിദ്യാർഥികൾ... ക്ലേശമേറുകയാണ്.
കൊട്ടാരങ്ങളിൽനിന്നും വോട്ടുവെട്ടി, വിദ്വേഷം വിളന്പി, മാസപ്പടി കൈപ്പറ്റി, ഭായ്-ഭായ് കളിച്ച് കറുത്ത യാഥാർഥ്യങ്ങളെത്തുന്നു. കേരളപ്പിറവി, മധുരം നുണഞ്ഞ് വീണ്ടുമുറങ്ങാനുള്ള സമയമല്ല, ജാതി-മത-രാഷ്‌ട്രീയ ഭേദമില്ലാതൊരു മുന്നേറ്റത്തിനൊരുങ്ങുക. പിറക്കട്ടെ പുതുകേരളം.
Leader Page
കേരളത്തെ ഇന്നത്തെ നിലയിലേക്കു വളര്‍ത്തിയെടുക്കാന്‍ ഏഴു പതിറ്റാണ്ടുകാലം പ്രയത്‌നിച്ച എല്ലാവരെയും ആദരവോടെ ഓര്‍ക്കുന്നു. സ്വാതന്ത്ര്യസമര പോരാട്ടങ്ങളും ജീവത്യാഗങ്ങളും ജാതിവ്യവസ്ഥയ്‌ക്കെതിരായ പ്രക്ഷോഭങ്ങളും സാമൂഹിക-സാംസ്‌കാരിക മുന്നേറ്റങ്ങളും വിദ്യാഭ്യാസ-ആരോഗ്യ മേഖലകളിലെ നേട്ടങ്ങളുമെല്ലാം ചേര്‍ന്നതാണു കേരളത്തിന്‍റെ 70 വര്‍ഷത്തെ ചരിത്രം.
വിവിധ മേഖലകളില്‍ നാം നേടിയെടുത്ത നേട്ടങ്ങളുടെയും അനുഭവങ്ങളുടെയും കരുത്തുമായാണ് കേരളം പുതിയ കാലത്തിലേക്കു കടക്കുന്നത്. വിദ്യാഭ്യാസം, ആരോഗ്യം, സാമൂഹികനീതി തുടങ്ങി നിരവധി മേഖലകളില്‍ രാജ്യത്തിനു മാതൃകയാകുന്ന മുന്നേറ്റങ്ങള്‍ നടത്താന്‍ നമുക്കു കഴിഞ്ഞിട്ടുണ്ട്. ഇതില്‍ തൃപ്തിപ്പെട്ട് മുന്നോട്ടു പോകാനാകില്ല. ഇന്ത്യയിലെ ഏറ്റവും മികച്ച സംസ്ഥാനമാക്കി കേരളത്തെ മാറ്റണം. അതിനുള്ള കൂട്ടായ പരിശ്രമത്തിനാണ് ഈ സര്‍ക്കാര്‍ തുടക്കം കുറിച്ചിരിക്കുന്നത്.
പരമ്പരാഗത വികസന സങ്കല്‍പ്പങ്ങളില്‍നിന്നു മാറി, പുതിയ കാലത്തിന്‍റെ സാധ്യതകളും വെല്ലുവിളികളും തിരിച്ചറിഞ്ഞ് പുതുയുഗ കേരളം കെട്ടിപ്പടുക്കുകയെന്ന ചരിത്രപരമായ ദൗത്യമാണു സര്‍ക്കാര്‍ ഏറ്റെടുത്തിരിക്കുന്നത്. എല്ലാവരെയും ചേര്‍ത്തുനിര്‍ത്തുന്ന, വികസനത്തിന്‍റെ ഗുണഫലങ്ങള്‍ എല്ലാവരിലേക്കും എത്തുന്ന കേരളമാണു നമ്മുടെ ലക്ഷ്യം. ഭൂമിശാസ്ത്രപരമായ പരിമിതികള്‍ക്കുള്ളില്‍ നിന്നുകൊണ്ട് ലഭ്യമായ സാധ്യതകളെ പരമാവധി പ്രയോജനപ്പെടുത്തണം. പ്രകൃതിയെയും കാലാവസ്ഥയെയും മനുഷ്യരുടെ ജീവിതത്തെയും പരിഗണിച്ചുള്ള വികസനമായിരിക്കണം നമ്മുടേത്. ലോകം ശ്രദ്ധിക്കുന്ന വികസന മാതൃകകള്‍ കേരളത്തില്‍ സൃഷ്‌ടിക്കാനാകണം.
ഫെസ്റ്റിവൽ കേരള
കേരളത്തിന്‍റെ 70-ാം വാര്‍ഷികം ആഘോഷങ്ങളുടെ ഭാഗമായി മാത്രം ഒതുങ്ങരുത്. നമ്മുടെ നാടിന്‍റെ നേട്ടങ്ങളും സാധ്യതകളും ലോകത്തിനു മുന്നില്‍ അവതരിപ്പിക്കാനുള്ള അവസരമാക്കി മാറ്റണം. അതിന്‍റെ ഭാഗമായി രാജ്യത്തിനകത്തും പുറത്തും ‘ഫെസ്റ്റിവല്‍ കേരളം’ സംഘടിപ്പിക്കും. ഇന്ത്യയിലെ പ്രധാന നഗരങ്ങളില്‍ നടക്കുന്ന ആഘോഷങ്ങളിലൂടെ കേരളത്തിന്‍റെ തനതായ കലയും സംസ്‌കാരവും പാരമ്പര്യവും ലോകത്തിനു മുന്നിലെത്തിക്കും. അതിനൊപ്പം നിക്ഷേപ സംഗമങ്ങളിലൂടെ കൂടുതല്‍ നിക്ഷേപകരെ കേരളത്തിലെത്തിക്കും.
നമ്മുടെ കുട്ടികള്‍ക്ക് മികച്ച വിദ്യാഭ്യാസവും തൊഴിലവസരങ്ങളും നാട്ടില്‍ത്തന്നെ സജ്ജമാക്കണം. അതിനായി ഉന്നതവിദ്യാഭ്യാസ മേഖലയില്‍ കാലാനുസൃതമായ മാറ്റങ്ങള്‍ കൊണ്ടുവരണം. അന്താരാഷ്‌ട്ര നിലവാരത്തിലുള്ള വിദ്യാഭ്യാസ സ്ഥാപനങ്ങള്‍, സര്‍വകലാശാലകളിലും കോളജുകളിലും പുതിയ കാലത്തിന് അനുയോജ്യമായ പഠനപദ്ധതികള്‍, മാറുന്ന തൊഴില്‍ സാഹചര്യങ്ങള്‍ക്കനുസരിച്ചുള്ള വിദഗ്ധ പരിശീലനം എന്നിവ ഉറപ്പാക്കണം. അതിന് കൂടുതല്‍ നിക്ഷേപങ്ങളും പുതിയ തൊഴില്‍മേഖലകളും ഉണ്ടാകണം. നമ്മുടെ കുട്ടികള്‍ക്ക് മികച്ച വിദ്യാഭ്യാസവും തൊഴിലും ഉറപ്പാക്കുന്നതിനൊപ്പം മറ്റു സംസ്ഥാനങ്ങളിലും രാജ്യങ്ങളില്‍നിന്നുമുള്ള വിദ്യാര്‍ഥികളും പഠനത്തിനു കേരളത്തിലെത്തണം. മികച്ച ചികിത്സ തേടി കൂടുതല്‍ ആളുകള്‍ കേരളത്തിലേക്കു വരണം. വിദ്യാഭ്യാസത്തിന്‍റെയും ആരോഗ്യപരിചരണത്തിന്‍റെയും പ്രധാന കേന്ദ്രമായി കേരളത്തെ മാറ്റണം.
ഭാവിയുടെ സാങ്കേതികവിദ്യകളിലും കേരളം മുന്നിലെത്തണം. ആര്‍ട്ടിഫിഷ്യല്‍ ഇന്‍റലിജന്‍സ്, ക്വാണ്ടം കംപ്യൂട്ടിംഗ്, മെഷീന്‍ ലേണിംഗ്, റോബോട്ടിക്‌സ് തുടങ്ങിയ മേഖലകളില്‍ പുതിയ അവസരങ്ങള്‍ സൃഷ്‌ടിക്കണം. ഡാറ്റാ സെന്‍ററുകള്‍, സെമികണ്ടക്‌ടര്‍ കേന്ദ്രങ്ങള്‍, ഗ്ലോബല്‍ കേപ്പബിലിറ്റി സെന്‍ററുകള്‍ എന്നിവ കേരളത്തില്‍ സ്ഥാപിക്കണം. രാജ്യത്തെ ഐടി മേഖലയുടെ വളര്‍ച്ചയ്ക്ക് തുടക്കമിട്ട സംസ്ഥാനങ്ങളിലൊന്നാണു കേരളം. ആ പാരമ്പര്യം പുതിയ സാങ്കേതികവിദ്യകളുടെ കാലത്തും നമുക്ക് തുടരാനാകണം. പുതിയ കാലത്തിന്‍റെ തൊഴില്‍ മേഖലകളില്‍ നമ്മുടെ യുവജനങ്ങള്‍ക്ക് കൂടുതല്‍ അവസരങ്ങള്‍ ഉറപ്പാക്കണം.
മുതിർന്ന പൗരന്മാരെ ചേർത്തുപിടിക്കും
നമ്മുടെ സമൂഹത്തില്‍ മുതിര്‍ന്ന പൗരന്മാരുടെ എണ്ണം വര്‍ധിച്ചുവരികയാണ്. അവരുടെ ജീവിതം സുരക്ഷിതവും സന്തോഷകരവുമാക്കേണ്ടത് നമ്മുടെ ഉത്തരവാദിത്വമാണ്. മുതിര്‍ന്ന പൗരന്മാര്‍ക്കായി പ്രത്യേക വകുപ്പ് രൂപീകരിച്ച രാജ്യത്തെ ആദ്യ സംസ്ഥാനമാണു കേരളം.
നിയമ പരിരക്ഷ ഉറപ്പാക്കുന്നതിന് നിയമവും പാസാക്കി. വയോജനങ്ങള്‍ക്ക് സംരക്ഷണം ഒരുക്കുന്നതിനൊപ്പം വിവിധ മേഖലകളിലുള്ള അവരുടെ അനുഭവസമ്പത്തും വൈദഗ്ധ്യവും പ്രയോജനപ്പെടുത്തുന്ന സില്‍വര്‍ ഇക്കോണമിയാണു സര്‍ക്കാരിന്‍റെ ലക്ഷ്യം. ജനസംഖ്യാപരമായ മാറ്റങ്ങള്‍ ലോകത്തെ പല രാജ്യങ്ങള്‍ക്കും വെല്ലുവിളിയാകുന്ന കാലത്ത് അതിനെ പുതിയ സാധ്യതകളാക്കി മാറ്റുകയാണ് കേരളം.
നിക്ഷേപസൗഹൃദമാകാൻ ‘സരൾ കേരളം’
സംസ്ഥാനത്തിന്‍റെ വരുമാനം വര്‍ധിക്കണമെങ്കില്‍ കൂടുതല്‍ നിക്ഷേപങ്ങളും വ്യവസായങ്ങളും കേരളത്തിലേക്കു വരണം. ഇതിന്‍റെ ഭാഗമായി അനാവശ്യ കാലതാമസവും നടപടിക്രമങ്ങളും ഒഴിവാക്കി സംരംഭങ്ങള്‍ക്കുള്ള അനുമതികള്‍ ലളിതവും വേഗത്തിലുമാക്കാന്‍ ‘സരള്‍ കേരളം’ എന്ന സുപ്രധാന നിയമം കേരള നിയമസഭ പാസാക്കിയിട്ടുണ്ട്. കേരളത്തെ നിക്ഷേപ സൗഹൃദ സംസ്ഥാനമാക്കി മാറ്റുന്നതിനുള്ള സുപ്രധാന ചുവടുവയ്പാണു സരള്‍ കേരളം.
വികസനം എന്നതു വന്‍കിട പദ്ധതികളുടെയും സാമ്പത്തികവളര്‍ച്ചയുടെയും മാത്രം പേരല്ല. ഓരോ മനുഷ്യന്‍റെയും ജീവിതത്തില്‍ ഉണ്ടാകുന്ന മാറ്റങ്ങളിലാണു വികസനത്തിന്‍റെ യഥാര്‍ഥ അര്‍ഥം. ഒരാളുടെയും പ്രയാസങ്ങള്‍ കാണാതെ പോകരുത്. അര്‍ഹമായ പരിഗണനയും സഹായവും എല്ലാവര്‍ക്കും ലഭിക്കണം. ഇതെല്ലാം ചേര്‍ത്തുവച്ച് ‘ഗുഡ് ഗവേണന്‍സ് വിത്ത് എംപതി, സഹാനുഭൂതിയോടെയുള്ള സദ്ഭരണം’ എന്ന കാഴ്ചപ്പാടുമായാണ് സര്‍ക്കാര്‍ മുന്നോട്ടു പോകുന്നത്.
നമ്മുടെ വികസന മുന്നേറ്റത്തിനൊപ്പം കേരളത്തിന്‍റെ മതേതര-ജനാധിപത്യ മൂല്യങ്ങളും സംരക്ഷിക്കപ്പെടണം. മതത്തിന്‍റെയോ ജാതിയുടെയോ പേരില്‍ ആരും മാറ്റിനിര്‍ത്തപ്പെടരുത്. മതേതര-ജനാധിപത്യ നിലപാടുകളില്‍ വിട്ടുവീഴ്ചയുമുണ്ടാകില്ല. 70 വര്‍ഷത്തെ നേട്ടങ്ങളും അനുഭവങ്ങളും നമുക്ക് വലിയ കരുത്താണ് നല്കുന്നത്. ആ കരുത്തില്‍ വിശ്വസിച്ച്, പുതിയ കാലത്തിന്‍റെ സാധ്യതകള്‍ പ്രയോജനപ്പെടുത്തി പുതുയുഗ കേരളത്തിലേക്ക് നമുക്ക് ഒന്നിച്ച് മുന്നേറാം.
Leader Page
സ്വർണവില വീണ്ടും താഴുന്നു. വെള്ളിവില ഇടിയുന്നു. സ്വർണത്തെയും വെള്ളിയെയും പറ്റിയുള്ള സങ്കല്പങ്ങൾ തിരുത്തുന്ന മാറ്റങ്ങളാണ് അവയുടെ വിലയിൽ വരുന്നത്.
കഴിഞ്ഞ ജനുവരി 29ന് 1,31,160 രൂപയിൽ എത്തിയതാണ് 22 കാരറ്റ് സ്വർണം ഒരു പവൻ. അത് ഒക്ടോബർ 31ന് 1,01,840 രൂപയായി താഴ്ന്നു. 22.35 ശതമാനം ഇടിവ്. അന്താരാഷ്‌ട്രവില ഇതേ കാലയളവിൽ ഇതിലേറെ താഴ്ച കാണിച്ചു. ജനുവരി 28ലെ 5,598.75 ഡോളറിൽനിന്ന് ഒക്ടോബർ 30ലെ 3,876.40 ഡോളറിലേക്ക് ഒരൗൺസ് സ്വർണത്തിന്‍റെ വില എത്തി. 30.76 ശതമാനം ഇടിവ്. (രാജ്യാന്തര വിലയിലെ താഴ്ച അതേപോലെ ഇവിടെ വരാത്തതിന്‍റെ പ്രധാന കാരണം ഇന്ത്യ മേയ് മാസത്തിൽ ഇറക്കുമതിച്ചുങ്കം ഗണ്യമായി വർധിപ്പിച്ചതാണ്).
വെള്ളിവില ഇതിനേക്കാൾ നാടകീയമായി ഇടിഞ്ഞു. രാജ്യാന്തര വില ജനുവരി 29ന് 121.67 ഡോളറിൽ എത്തി. ഒക്ടോബർ 30 ആയപ്പോൾ ഒരൗൺസ് വെള്ളി 48.90 ഡോളർ ആയി. ഇടിവ് 60 ശതമാനം.
പല മടങ്ങ് കയറി, പിന്നെ...
പത്തു വർഷം കൊണ്ട് സ്വർണം 1,120 ഡോളറിൽനിന്ന് ഈ ജനുവരിയിൽ 5,600 ഡോളറിനടുത്തുവരെ കയറി. വെള്ളി ഇതേ കാലയളവിൽ 12 ഡോളറിൽനിന്ന് 122 ഡോളറിനടുത്ത് എത്തി. സ്വർണം അഞ്ചു മടങ്ങായപ്പോൾ വെള്ളി പത്തു മടങ്ങായി. ഇപ്പോൾ ജനുവരിയിലെ റിക്കാർഡിൽനിന്ന് സ്വർണം 30 ശതമാനം താഴ്ന്നപ്പോൾ വെള്ളി 60 ശതമാനം ഇടിഞ്ഞു.
വിശിഷ്‌ട ലോഹങ്ങൾ എന്നു കണക്കാക്കുന്ന സ്വർണവും വെള്ളിയും ഇങ്ങനെ കയറുകയും ഇടിയുകയും ചെയ്യുന്നത് അസാധാരണമാണ്. യുദ്ധങ്ങളോ സാമ്പത്തികമാന്ദ്യങ്ങളോ വരുമ്പോൾ വില ഗണ്യമായി കൂടുകയും കുറയുകയും ചെയ്യാറുണ്ട്. അല്ലാത്തപ്പോൾ ഈ കുതിപ്പും കിതപ്പും സാധാരണമല്ല. ഒരു സുരക്ഷിത നിക്ഷേപം എന്ന നിലയിൽ ലോകം കണക്കാക്കിപ്പോരുന്ന ലോഹങ്ങളാണ് ഇവ.
സ്വർണവിപണിയുടെ രൂപമാറ്റം
2023 മുതൽ ഇവയുടെ വിലയിലുള്ള കയറ്റവും ഇറക്കവും യുദ്ധങ്ങളുമായി ബന്ധപ്പെട്ടവയല്ല. യുക്രെയ്ൻ യുദ്ധം നാലര വർഷമായി തുടരുന്നു. ഇറാന്‍റെമേലുള്ള അമേരിക്കൻ-ഇസ്രേലി ആക്രമണം തുടങ്ങുന്നതിന് ഒരു മാസം മുന്നേ സ്വർണവും വെള്ളിയും വിലയുടെ ഉച്ചിയിൽ എത്തിയിരുന്നു. യുദ്ധത്തിനുശേഷം ഇടിവാണു കണ്ടത്.
സമ്പത്തികമാന്ദ്യങ്ങൾ പരിസരത്തില്ല. അസാധാരണ സാമ്പത്തികവളർച്ചയും ഇല്ല. എന്നിട്ടും നാടകീയമായ കയറ്റിറക്കങ്ങൾ സംഭവിക്കുന്നു. എന്തുകൊണ്ട്?
കാൽ നൂറ്റാണ്ടുകൊണ്ട് സ്വർണവിപണിയുടെ ഘടനയും സ്വഭാവവും മാറി. വിലയെ സ്വാധീനിക്കുന്ന ഘടകങ്ങൾ മാറി.
മുമ്പ് സ്വർണത്തിന്‍റെ മുഖ്യ ഉപയോഗം ആഭരണവിപണിയിലായിരുന്നു. മറ്റ് ഉപയോഗങ്ങൾ പരിമിതം. സ്വർണത്തെ നിക്ഷേപമായി കണ്ടു സ്വർണക്കട്ടികളും നാണയങ്ങളും വാങ്ങിക്കൂട്ടുന്നവർ കുറവായിരുന്നു. ഇന്ത്യയായിരുന്നു ഈ നൂറ്റാണ്ടിന്‍റെ തുടക്കംവരെ ഏറ്റവും വലിയ സ്വർണ ഉപയോഗ രാജ്യം. ഇന്ത്യയിലെ ആവശ്യം ഏതാണ്ട് മുഴുവനായും ആഭരണങ്ങൾക്കായിരുന്നു.
കാൽ നൂറ്റാണ്ടിലെ തിരുത്ത്
2001ൽ ലോകത്ത് ഉപയോഗിച്ച സ്വർണത്തിന്‍റെ 87.8 ശതമാനവും (3,235 ടണ്ണിൽ 2,840 ടൺ) ആഭരണങ്ങൾക്കായിരുന്നു. മറ്റ് ഉപയോഗങ്ങൾ കുറവായിരുന്നു.
2025ൽ ലോകം മൊത്തം ഉപയോഗിച്ച 5,002 ടണ്ണിൽ 1,542.3 ടൺ (30.83 ശതമാനം) മാത്രമേ ആഭരണങ്ങൾക്കു വേണ്ടിവന്നുള്ളൂ. ഇപ്പോൾ സ്വർണത്തിന്‍റെ ഏറ്റവും വലിയ ഉപയോഗം നിക്ഷേപമേഖലയിലാണ്. 2025ൽ ആഗോള ഉപയോഗത്തിന്‍റെ 43.5 ശതമാനം (2,175 ടൺ) നിക്ഷേപത്തിലായിരുന്നു. സ്വർണക്കട്ടിയും നാണയവുമായി 1,374 ടൺ. ഇടിഎഫ് നിക്ഷേപമായി 801 ടൺ. കേന്ദ്രബാങ്കുകൾ കഴിഞ്ഞ വർഷം 863 ടൺ സ്വർണം വാങ്ങി. അതും നിക്ഷേപമായി കണക്കുകൂട്ടിയാൽ മൊത്തം നിക്ഷേപ ഉപയോഗം 60 ശതമാനം വരും. 2025ൽ 323 ടൺ സ്വർണം വ്യവസായ-ടെക്നോളജി മേഖലയും ഉപയോഗിച്ചു.
വെള്ളി ഉപയോഗത്തിലും നിക്ഷേപ പങ്ക് വർധിച്ചു. 36,000 ടൺ ആണു വെള്ളിയുടെ ആഗോള ഉപയോഗം. അതിൽ 60 ശതമാനത്തിലധികം വ്യവസായ-ടെക്നോളജി മേഖലയിലാണ്. 18 ശതമാനം ആഭരണങ്ങൾക്കും നാലു ശതമാനം വെള്ളിപ്പാത്രങ്ങൾക്കും ഉപയോഗിക്കുന്നു. ബാക്കി 18 ശതമാനം നിക്ഷേപ മേഖലയിലാണ്.
ദീർഘകാലം പോയി, ഹ്രസ്വകാല താത്പര്യം മാത്രം
സ്വർണം, വെള്ളി വിപണികളുടെ നിയന്ത്രണം ഇതോടെ വ്യാപാരികളിൽനിന്നു നിക്ഷേപകരിലേക്ക് മാറി. നിക്ഷേപകരും കേന്ദ്രബാങ്കുകളുംകൂടി വിപണിയിലെ സ്വർണത്തിന്‍റെ 60 ശതമാനത്തോളം കൈയടക്കി. വിപണിയിൽ ഹ്രസ്വകാല നിക്ഷേപതാത്പര്യങ്ങൾക്കായി ആധിപത്യം.
ഇതിന്‍റെ ഫലമായി ഓഹരിവിപണിയിലേതുപോലെ വലിയ കയറ്റിറക്കങ്ങൾ സ്വർണവിലയിൽ വരുന്നു. ഈ വർഷം ജനുവരി 28ന് ഔൺസിന് (31.1ഗ്രാം) 5,598.75 ഡോളർ വരെയെത്തിയ സ്വർണം ഒക്ടോബർ 30ന് 3,876.40 ഡോളറിലേക്കു താഴ്ന്നത് അങ്ങനെയാണ്. അമേരിക്കയടക്കം വിവിധ രാജ്യങ്ങളിൽ പലിശ കൂട്ടുന്നതിന്‍റെ പേരിലാണ് യുദ്ധകാലമായിട്ടും വില 30.76 ശതമാനം ഇടിഞ്ഞത്. പലിശ കൂടുമ്പോൾ സ്വർണനിക്ഷേപത്തേക്കാൾ ആദായം കടപ്പത്രനിക്ഷേപമാകും. അപ്പോൾ സ്വർണം വിറ്റ് കടപ്പത്രം വാങ്ങും. വിലക്കയറ്റം ഉയർന്നുനിൽക്കുന്നതിനാൽ പലിശ ഇനിയും കൂട്ടും എന്നതുകൊണ്ട് സ്വർണം ഇടിഞ്ഞു. ഓഹരികളും ഇടിഞ്ഞു. അത് ഇനി കൂടുതൽ വലിയ വിപണി തകർച്ചയിലേക്കു നയിക്കുമോ എന്ന ഭീതിയിലാണു ലോകം.
മിച്ചസമ്പാദ്യം ഉപയോഗിച്ചു സ്വർണം വാങ്ങിയിരുന്നതാണ് മുൻ തലമുറ. അന്നത്തെ വിപണിനിയമങ്ങൾ മാറി. ഇപ്പോൾ ദീർഘകാല നിക്ഷേപകർ ഇല്ല. കടമെടുത്തു നിക്ഷേപിച്ച് വേഗം ലാഭം തേടുന്നവരാണ് വിപണിയെ നിയന്ത്രിക്കുന്നത്. അപ്പോൾ വലിയ ചാഞ്ചാട്ടങ്ങൾ വിപണിയിൽ ഉണ്ടാകും. അതാണു നാം കാണുന്നത്. സ്വർണം ആഭരണമല്ല, ഹ്രസ്വകാല നിക്ഷേപമാണ് എന്നുവന്നതോടെ സുരക്ഷിത ആസ്തി എന്ന വിശേഷണം അസ്ഥാനത്തായി മാറുന്നുവെന്നും പറയാം.
നിക്ഷേപകർ വിപണി കൈയടക്കിയതിനാൽ ഒരു കാര്യം ഉറപ്പിക്കാം. താഴ്ന്ന വിലകൾ ഉയരും. ഇതിന്‍റെ മറുവശം (ഉയർന്ന വിലകൾ താഴുന്നത്) ആണ് ഇപ്പോൾ കാണുന്നത്.
Leader Page
പാർലമെന്‍റ് തെരഞ്ഞെടുപ്പിൽ ഒരു മുന്നണിക്കും വ്യക്തമായ ഭൂരിപക്ഷം ലഭിക്കാതെ വന്നതോടെ ഇസ്രയേലിൽ കടുത്ത ഭരണ പ്രതിസന്ധിയാണ് ഉടലെടുത്തിരിക്കുന്നത്. സർക്കാർ രൂപീകരണത്തിൽ അറബ് പാർട്ടികൾ നിർണായക ശക്തിയായി മാറിയപ്പോൾ, ബെഞ്ചമിൻ നെതന്യാഹുവിനെ അധികാരത്തിൽനിന്ന് അകറ്റുമെന്നു വ്യക്തമാക്കി പ്രതിപക്ഷം ശക്തമായി രംഗത്തുണ്ട്.
വ്യാഴാഴ്ച വോട്ടെണ്ണൽ പൂർത്തിയായപ്പോൾ രാജ്യത്തു ഭരണത്തുടർച്ചയ്ക്കോ പുതിയ ഭരണമാറ്റത്തിനോ ഉള്ള വ്യക്തമായ ഭൂരിപക്ഷം ഒരു മുന്നണിക്കും ലഭിച്ചിട്ടില്ല. 120 അംഗങ്ങളുള്ള പാർലമെന്‍റായ നെസെറ്റിൽ ഭരണം പിടിക്കാൻ 61 സീറ്റുകളുടെ ഭൂരിപക്ഷമാണു വേണ്ടത്. എന്നാൽ പ്രധാനമന്ത്രി ബെഞ്ചമിൻ നെതന്യാഹുവിന്‍റെ വലതുപക്ഷ ലിക്കുഡ് പാർട്ടിയുടെ നേതൃത്വത്തിലുള്ള സഖ്യത്തിനോ പ്രധാന എതിരാളിയും മുൻ സൈനിക മേധാവിയുമായ ഗാദി ഐസൻകോട്ടിന്‍റെ നേതൃത്വത്തിലുള്ള മധ്യപക്ഷ യഷാർ പാർട്ടിയുടെ സഖ്യത്തിനോ ഈ സംഖ്യ തികയ്ക്കാനായില്ല. ആഴത്തിലുള്ള രാഷ്‌ട്രീയ-ആശയധാര ഭിന്നതകൾ നിലനിൽക്കുന്നതിനാൽ പുതിയൊരു ഭരണസഖ്യം രൂപീകരിക്കുക എന്നത് ഒട്ടും എളുപ്പമല്ല.
എങ്കിലും, പരമാവധി ഒരു വർഷത്തോളം മാത്രം ആയുസുള്ള താത്കാലിക സഖ്യങ്ങളിലൂടെ ഭരണത്തിലെത്താൻ നേതാക്കൾ ശ്രമിച്ചേക്കാം. നൽകപ്പെട്ടിരിക്കുന്ന 12 ആഴ്ചയ്ക്കുള്ളിൽ ഇതിനൊരു തീരുമാനമായില്ലെങ്കിൽ ഇസ്രേലി ജനതയ്ക്കു വീണ്ടുമൊരു തെരഞ്ഞെടുപ്പിനെ അഭിമുഖീകരിക്കേണ്ടിവരും.
കിംഗ് മേക്കറായി അറബ് പാർട്ടികൾ
ആർക്കും ഭൂരിപക്ഷം ലഭിക്കാത്ത സാഹചര്യത്തിൽ 120 അംഗ പാർലമെന്‍റിൽ 19 സീറ്റ് നേടിയ അറബ് പാർട്ടികൾ കിംഗ് മേക്കറായിരിക്കുകയാണ്. അറബ് വോട്ടർമാർക്കിടയിലുണ്ടായ വൻ തരംഗം മൂലം ജോയിന്‍റ് ലിസ്റ്റ്, റാം എന്നീ രണ്ടു പ്രധാന അറബ് സഖ്യങ്ങളും മികച്ച നേട്ടമുണ്ടാക്കി. ഇതോടെ, ഭരണഘടനാനുസൃതമായി പുതിയ സർക്കാർ രൂപീകരിക്കുന്നതിൽ നിർണായക സ്വാധീനമുള്ള പദവിയിലേക്ക് അവർ ഉയർന്നു.
തെരഞ്ഞെടുപ്പുദിവസങ്ങളിൽ അറബ് വോട്ടർമാരുടെ പങ്കാളിത്തത്തെ തടയാൻ സമൂഹമാധ്യമങ്ങളിലൂടെ നെതന്യാഹു വൻ പ്രചാരണം നടത്തിയിരുന്നു. വോട്ടർമാർക്കിടയിൽ ഭയം സൃഷ്‌ടിക്കാനായി എഐ നിർമിത ചിത്രങ്ങൾ പോസ്റ്റ് ചെയ്തതും വലിയ വിമർശനങ്ങൾക്കു വഴിവച്ചു. രണ്ടാംതര പൗരന്മാരായി തങ്ങളെ കാണുന്നുവെന്ന് ആരോപിച്ചു വർഷങ്ങളായി തെരഞ്ഞെടുപ്പ് ബഹിഷ്കരിച്ചിരുന്ന രാജ്യത്തെ അറബ് വംശജർ, ഇത്തവണ നെതന്യാഹുവിന്‍റെ വലതുപക്ഷ സർക്കാരിനെ അധികാരത്തിൽനിന്നു പുറത്താക്കുക എന്ന ലക്ഷ്യത്തോടെയാണ് പോളിംഗ് ബൂത്തുകളിലേക്ക് ഒഴുകിയെത്തിയത്.
ഇസ്രയേലിന്‍റെ ചരിത്രത്തിൽ ഇതുവരെ ഒരൊറ്റ തവണ മാത്രമാണ് ഒരു അറബ് പാർട്ടി ഭരണസഖ്യത്തിന്‍റെ ഭാഗമായിട്ടുള്ളത്. 2021ൽ നെതന്യാഹുവിനെ പുറത്താക്കാൻ രൂപീകരിച്ച എട്ടു പാർട്ടികളുടെ സഖ്യത്തിൽ ‘റാം’ പങ്കാളിയായെങ്കിലും ആ സർക്കാർ ഒരു വർഷത്തിനുള്ളിൽ നിലംപതിച്ചു.
പ്രതിപക്ഷത്തിനു മുന്നിലെ തടസം
ബെഞ്ചമിൻ നെതന്യാഹുവിനെ അധികാരത്തിൽനിന്നു പുറത്താക്കുകയെന്ന മുഖ്യലക്ഷ്യം കൈവരിക്കണമെങ്കിൽ വോട്ടർമാർക്കു നൽകിയ വാഗ്ദാനങ്ങൾ ലംഘിക്കാൻ പ്രതിപക്ഷം നിർബന്ധിതമാകും. അറബ് പാർട്ടികളുമായി യാതൊരു സഖ്യവുമുണ്ടാക്കില്ലെന്ന മുൻ നിലപാടാണ് പ്രതിപക്ഷത്തിനിപ്പോൾ തിരുത്തേണ്ടിവരുന്നത്.
അറബ് പാർട്ടികളുമായി ചേർന്നു സർക്കാർ രൂപീകരിക്കില്ലെന്ന് തെരഞ്ഞെടുപ്പു പ്രചാരണവേളയിൽ പ്രതിപക്ഷനിരയിലെ പ്രമുഖ യഹൂദ പാർട്ടികളായ ഗാദി ഐസൻകോട്ടിന്‍റെ യാഷർ, നഫ്താലി ബെന്നറ്റിന്‍റെ ബിയാഹദ്, അവിഗ്ദോർ ലീബർമാന്‍റെ യിസ്രായേൽ ബെയ്തേനു എന്നിവ ആവർത്തിച്ചു വ്യക്തമാക്കിയിരുന്നു. അറബ് പാർട്ടികൾ ഉന്നയിക്കുന്ന വ്യവസ്ഥകൾ അംഗീകരിക്കാനാകില്ലെന്നായിരുന്നു ഐസൻകോട്ടിന്‍റെ നിലപാട്.
അറബ് പാർട്ടികളെ സർക്കാരിന്‍റെ ഭാഗമാക്കുന്നതിന് പ്രതിപക്ഷത്തിന് പ്രധാന തടസമാകുന്നത് ഇസ്രേലി യഹൂദരാഷ്‌ട്രീയത്തിൽ വേരൂന്നിയ അറബ് വിരുദ്ധ വംശീയ നിലപാടുകളാണ്. രാജ്യത്തെ ജനസംഖ്യയുടെ 20 ശതമാനത്തോളം വരുന്ന മുസ്‌ലിം-ക്രിസ്ത്യൻ അറബ് വംശജരെ പൂർണ അവകാശങ്ങളുള്ള പൗരന്മാരായി അംഗീകരിക്കാൻ യഹൂദവിഭാഗങ്ങൾക്ക് ഇന്നും വിമുഖതയുണ്ട്.
പ്രതിപക്ഷനിരയിൽ ഇടത് പാർട്ടിയായ ‘ഡെമോക്രാറ്റ്സി’ന്‍റെ നേതാവ് യായർ ഗോലാൻ മാത്രമാണ് അറബ് പാർട്ടികളെക്കൂടി ഉൾപ്പെടുത്തി സർക്കാർ രൂപീകരിക്കണമെന്ന് പരസ്യമായി ആവശ്യപ്പെടുന്നത്.
ഐക്യസർക്കാർ സാധ്യത
പ്രതിസന്ധി തുടരുന്നതിനിടെ മൂന്നു സാധ്യതകളാണ് കൽപ്പിക്കപ്പെടുന്നത്. നെതന്യാഹുവും ഐസൻകോട്ടും കൈകോർക്കുന്ന ദേശീയ ഐക്യ സർക്കാർ, ഐസൻകോട്ടിനൊപ്പമുള്ള വിമതരെ ഒപ്പം കൂട്ടി നെതന്യാഹു രൂപീകരിക്കുന്ന സർക്കാർ, അറബ് പാർട്ടികളുടെ പിന്തുണയോടെ ഐസൻകോട്ടിന്‍റെ നേതൃത്വത്തിൽ വരുന്ന സർക്കാർ എന്നിവയാണിത്.
ഐക്യസർക്കാർ രൂപീകരണമെന്ന ആശയം സജീവമായിട്ടുണ്ടെങ്കിലും ഇതിനോടു വിവിധ കക്ഷികളിൽ അഭിപ്രായഭിന്നത ഉടലെടുത്തിട്ടുണ്ട്. ഇറാന്‍റെ ഭീഷണികളെ ഒറ്റക്കെട്ടായി ചെറുക്കാൻ ഐക്യസർക്കാർ രൂപീകരണം അനിവാര്യമാണെന്നാണ് നെതന്യാഹുവിന്‍റെ അഭിപ്രായം. എന്നാൽ, നെതന്യാഹുവിനൊപ്പം ചേർന്ന് സർക്കാർ രൂപീകരിക്കാനില്ലെന്നും ജനവിധി തങ്ങൾക്കൊപ്പമാണെന്നുമാണ് പ്രതിപക്ഷനേതാക്കൾ പറയുന്നത്.
നെതന്യാഹുവിന്‍റെ ഭരണം അവസാനിച്ചു കാണാൻ ആഗ്രഹിക്കുന്ന ലക്ഷക്കണക്കിന് ഇസ്രേലികൾ ഐസൻകോട്ട് നിലപാട് മാറ്റിയാൽ അതിനെ ഒരു വഞ്ചനയായിട്ടാകും കാണുക. അറബ് പാർട്ടികളുമായി സഹകരിക്കില്ലെന്നു മുന്പ് പ്രതിപക്ഷ നേതാക്കൾ പറഞ്ഞിരുന്നെങ്കിലും നെതന്യാഹുവിനെ അധികാരത്തിൽനിന്ന് അകറ്റിനിർത്താൻ ഐസൻകോട്ട് പുറത്തുനിന്നുള്ള പിന്തുണയോടെ ഒരു ന്യൂനപക്ഷ സർക്കാർ രൂപീകരിക്കണമെന്ന് പ്രതിപക്ഷ വോട്ടർമാർക്കിടയിൽ നടത്തിയ സർവേകൾ വ്യക്തമാക്കുന്നു.
പ്രസിഡന്‍റിന്‍റെ തീരുമാനം കാത്ത്
അനിശ്ചിതാവസ്ഥ തുടരുന്നതിനിടെ പ്രസിഡന്‍റ് ഐസക് ഹെർസോഗിലേക്കാണ് ഇനി എല്ലാ കണ്ണുകളും. സർക്കാരുണ്ടാക്കാൻ ആരെ ക്ഷണിക്കണമെന്നു തീരുമാനിക്കുന്നതിനുമുന്പ് പാർലമെന്‍ററി ഗ്രൂപ്പുകളുമായി ചർച്ച നടത്തുമെന്ന് പ്രസിഡന്‍റ് അറിയിച്ചിട്ടുണ്ട്. വീണ്ടുമൊരു തെരഞ്ഞെടുപ്പ് ഒഴിവാക്കാൻ രാഷ്‌ട്രീയനേതാക്കൾ പരസ്പര ധാരണയിലെത്തണമെന്നും അദ്ദേഹം അഭ്യർഥിച്ചു. എല്ലാ പാർട്ടി നേതാക്കളുമായും അടുത്തദിവസംതന്നെ പ്രസിഡന്‍റ് ഔദ്യോഗിക ചർച്ചകൾ ആരംഭിക്കും. പാർട്ടികളുടെ അഭിപ്രായം ആരാഞ്ഞശേഷം, സർക്കാർ രൂപീകരിക്കാൻ ഏറ്റവും സാധ്യതയുള്ള ഒരു നേതാവിനെ പ്രസിഡന്‍റ് ക്ഷണിക്കും.
അറബ് പാർട്ടികൾ ഐസൻകോട്ടിനെ പിന്തുണയ്ക്കുമെന്ന് പ്രതീക്ഷിക്കുന്നതിനാൽ യഷാർ പാർട്ടി നേതാവായ അദ്ദേഹത്തിനാകും ആദ്യ അവസരം ലഭിക്കുക. ക്ഷണം ലഭിക്കുന്ന നേതാവിന് സഖ്യമുണ്ടാക്കാൻ 28 ദിവസത്തെ സമയം ലഭിക്കും. ആവശ്യമെങ്കിൽ 14 ദിവസം കൂടി നീട്ടിനൽകാം. ആദ്യനേതാവിനു ഭൂരിപക്ഷം തെളിയിക്കാൻ കഴിഞ്ഞില്ലെങ്കിൽ പ്രസിഡന്‍റ് രണ്ടാമതൊരു നേതാവിനെ ക്ഷണിക്കും. ഇവർക്ക് 28 ദിവസം മാത്രമായിരിക്കും ലഭിക്കുക. ഇതിലും തീരുമാനമായില്ലെങ്കിൽ പാർലമെന്‍റിലെ ഭൂരിപക്ഷം അംഗങ്ങൾക്ക് മൂന്നാമതൊരു സ്ഥാനാർഥിയെ നിർദേശിക്കാം. ഇവർക്കു സഖ്യമുണ്ടാക്കാൻ 14 ദിവസം ലഭിക്കും. ഈ പ്രക്രിയകളെല്ലാം പരാജയപ്പെട്ടാൽ രാജ്യം വീണ്ടുമൊരു പൊതുതെരഞ്ഞെടുപ്പിലേക്കു നീങ്ങും.
ഈ രാഷ്‌ട്രീയനാടകങ്ങളിൽ ഏറ്റവും അനുകൂല സാഹചര്യമുള്ളത് നിലവിലെ താത്കാലിക പ്രധാനമന്ത്രിയായ നെതന്യാഹുവിനാണ്. പ്രതിപക്ഷത്തിന് ഭൂരിപക്ഷം തെളിയിക്കാൻ കഴിഞ്ഞില്ലെങ്കിൽ അധികാരം നെതന്യാഹുവിന്‍റെ കൈകളിൽതന്നെ നിലനിൽക്കും. പുതിയൊരു സർക്കാർ വരുന്നതുവരെ മാസങ്ങളോളം നെതന്യാഹുതന്നെ പ്രധാനമന്ത്രിയായി തുടരും. തെരഞ്ഞെടുപ്പ് വീണ്ടും വരികയാണെങ്കിൽ, കഴിഞ്ഞ എട്ടു വർഷത്തിനിടെ ഇസ്രയേൽ നേരിടുന്ന ഏഴാമത്തെ പൊതുതെരഞ്ഞെടുപ്പായിരിക്കും അത്.
വിദേശ ഇടപെടൽ ആരോപണം
തെരഞ്ഞെടുപ്പിൽ തിരിച്ചടി നേരിട്ടതിനു പിന്നാലെ പ്രതിപക്ഷത്തിനെതിരേ വിദേശ ഇടപെടൽ ആരോപണവുമായി പ്രധാനമന്ത്രി ബെഞ്ചമിൻ നെതന്യാഹു രംഗത്തെത്തിയത് രാജ്യത്തു വലിയ രാഷ്‌ട്രീയ കൊടുങ്കാറ്റിനു തിരികൊളുത്തിയിരിക്കുകയാണ്. അറബ് പാർട്ടികൾ വിദേശ സഹായത്തോടെ തെരഞ്ഞെടുപ്പ് അട്ടിമറിച്ചെന്നും ഖത്തറിൽനിന്നും തുർക്കിയിൽനിന്നും നിയമവിരുദ്ധമായി ഫണ്ട് കൈപ്പറ്റിയെന്നും ലിക്കുഡ് പാർട്ടി ആരോപിക്കുന്നു. ഇതേക്കുറിച്ച് ആഭ്യന്തര സുരക്ഷാ ഏജൻസിയായ ഷിൻ ബെറ്റ് അന്വേഷണം ആരംഭിച്ചിട്ടുമുണ്ട്.
എന്നാൽ, ആരോപണങ്ങൾ ഖത്തർ പൂർണമായും തള്ളി. രാജ്യത്തിനെതിരേ ദുഷ്പ്രചാരണം നടത്താനാണ് ഇസ്രേലി രാഷ്‌ട്രീയക്കാർ ശ്രമിക്കുന്നതെന്നും ഖത്തർ കുറ്റപ്പെടുത്തി.
അതേസമയം, തെരഞ്ഞെടുപ്പ് പ്രക്രിയയെ വൻതോതിൽ ബാധിക്കുന്ന രീതിയിലുള്ള നിയമലംഘനങ്ങൾ നടന്നിട്ടുണ്ടെന്ന വാദത്തിനു തക്കതായ തെളിവുകളൊന്നുമില്ലെന്ന് ഷിൻ ബെറ്റ് വ്യക്തമാക്കി. നിയമപരമായി വോട്ട് ചെയ്ത ഒരു മുഴുവൻ സമൂഹത്തെയും സംശയനിഴലിൽ നിർത്താൻ ഉദ്ദേശിക്കുന്നില്ലെന്നും സുരക്ഷാ ഏജൻസികൾ അറിയിച്ചിട്ടുണ്ട്.
Leader Page
റോഡപകടങ്ങളെ കേവലമൊരു ഗതാഗത പ്രശ്നമായോ ക്രമസമാധാന ലംഘനമായോ മാത്രം കാണാതെ പൊതുജനാരോഗ്യ കാഴ്ചപ്പാടിൽ നോക്കിക്കാണേണ്ടത് അത്യന്താപേക്ഷിതമാണ്. പകർച്ചവ്യാധികളെ നിർണയിക്കുന്ന ‘എപ്പിഡെമിയോളജിക്കൽ ട്രയാഡ്’ എന്ന ശാസ്ത്രീയ മാതൃകയെ കേരളത്തിലെ റോഡ് സുരക്ഷാ വിശകലനങ്ങളിലേക്കു പ്രയോഗിക്കുന്നത് തികച്ചും നൂതനമായൊരു തലം തുറന്നിടുന്നു.
ഈ പുതിയ സിദ്ധാന്ത മാതൃകയനുസരിച്ച് ആതിഥേയൻ, രോഗകാരി, പരിസ്ഥിതി എന്നീ ഘടകങ്ങൾ തമ്മിലുള്ള അസന്തുലിതാവസ്ഥയാണ് അടിസ്ഥാനപരമായി അപകടങ്ങൾക്കു കാരണമാകുന്നത്. ഇവിടെ ‘ആതിഥേയൻ’ എന്നത് റോഡ് ഉപയോഗിക്കുന്ന മനുഷ്യരാണ്. അതായത്, ഡ്രൈവർമാരും കാൽനടയാത്രക്കാരും. ഇവരുടെ പ്രായം, കാഴ്ചശക്തി, പ്രതികരണ വേഗം, ലഹരി ഉപയോഗം, മാനസിക സമ്മർദം, നിയമങ്ങളോടുള്ള മനോഭാവം എന്നിവയാണ് ഈ ഘടകത്തെ സ്വാധീനിക്കുന്നത്; പ്രത്യേകിച്ച്, പ്രായപൂർത്തിയാകാത്ത കുട്ടികൾ വാഹനം ഓടിക്കുമ്പോഴുണ്ടാകുന്ന വൈകാരികമായ അസ്ഥിരതയും സാഹസികതയും ഹോസ്റ്റ് ഫാക്ടറിലെ വലിയൊരു പാളിച്ചയാണ്.
"രോഗകാരി’ അഥവാ ഏജന്‍റ് വാഹനംതന്നെയാണ്; ഒരു വൈറസ് മനുഷ്യശരീരത്തെ ആക്രമിക്കുന്നതുപോലെ, ഇവിടെ മനുഷ്യന്‍റെ ജീവനെടുക്കുന്നത് വാഹനങ്ങളുടെ അമിതമായ കുതിപ്പും അതിലൂടെ ഇരയുടെ ശരീരത്തിലേക്ക് അനിയന്ത്രിതമായി കൈമാറ്റം ചെയ്യപ്പെടുന്ന മാരകമായ ഗതികോർജവുമാണ്. ഉയർന്ന കുതിരശക്തിയുള്ള ആഡംബര കാറുകൾ, ഭാരമേറിയ വാഹനങ്ങൾ, അശാസ്ത്രീയമായി രൂപമാറ്റം വരുത്തിയ സൂപ്പർ ബൈക്കുകൾ എന്നിവയൊക്കെ റോഡിൽ അതിമാരകമായ രോഗകാരികളായി മാറുന്നു.
"പരിസ്ഥിതി’ എന്നത് ഭൗതികവും സാമൂഹികവുമായ ചുറ്റുപാടുകളാണ്; അശാസ്ത്രീയമായ റോഡ് ഡിസൈൻ, അപകടമുനമ്പുകൾ, വെളിച്ചമില്ലായ്മ, സീബ്ര ക്രോസിംഗുകളുടെയും സുരക്ഷിതമായ നടപ്പാതകളുടെയും അഭാവം എന്നിവ ഭൗതിക പരിസ്ഥിതിയാകുമ്പോൾ, അയഞ്ഞ ഡ്രൈവിംഗ് ടെസ്റ്റുകളും എത്ര വലിയ നിയമലംഘനം നടത്തിയാലും ചെറിയ സാമ്പത്തിക പിഴയടച്ച് രക്ഷപ്പെടാമെന്ന സാമൂഹികനിയമ വ്യവസ്ഥിതിയും ഈ പരിസ്ഥിതി ഘടകത്തെ കൂടുതൽ ദുഷിപ്പിക്കുന്നു.
ഈ മൂന്നു ഘടകങ്ങളെയും ഒരേസമയം ചികിത്സിക്കേണ്ടതുണ്ട് എന്ന ശാസ്ത്രീയ ബോധ്യത്തിലേക്കു നാം മാറേണ്ടതുണ്ട്; അല്ലാതെ കേവലം ഡ്രൈവറെ മാത്രം കുറ്റപ്പെടുത്തി വാഹനങ്ങളുടെ അമിതശേഷിയോ റോഡിലെ എൻജിനിയറിംഗ് തകരാറുകളോ കണ്ടില്ലെന്നു നടിക്കുന്നത്, രോഗലക്ഷണങ്ങളെ മാത്രം ചികിത്സിച്ച് യഥാർത്ഥ രോഗകാരണത്തെ പൂർണമായും അവഗണിക്കുന്നതിനു തുല്യമാണ്.
റോഡപകടങ്ങളിൽ മരിക്കുകയോ വൈകല്യം സംഭവിക്കുകയോ ചെയ്യുന്നവരിൽ ഭൂരിഭാഗവും 15നും 45നും ഇടയിൽ പ്രായമുള്ള, സമൂഹത്തിന്‍റെ ഉത്പാദനക്ഷമതയുള്ള യുവതലമുറയാണ്. കുടുംബത്തിലെ പ്രധാന വരുമാനദായകന്‍റെ അകാല വേർപാട് ആ കുടുംബത്തെ പെട്ടെന്ന് സാമ്പത്തിക തകർച്ചയിലേക്കും ശാശ്വതമായ ദാരിദ്ര്യത്തിലേക്കും തള്ളിവിടുന്നു. കൂടാതെ, വൈകല്യങ്ങളും ഗുരുതര പരിക്കുകളും ഉണ്ടാക്കുന്ന ശാരീരികമാനസിക ആഘാതങ്ങൾ തലമുറകളെപ്പോലും ബാധിക്കുന്നു. ആരോഗ്യ മേഖലയുടെ വിഭവവിനിയോഗത്തിൽ വലിയൊരു ഭാഗം തടയാൻ കഴിയുമായിരുന്ന ഇത്തരം ട്രോമാ കേസുകൾ പരിചരിക്കാൻ മാറ്റിവയ്ക്കേണ്ടി വരുന്നത് ജനറൽ ഹെൽത്ത് കെയർ സംവിധാനത്തെ കടുത്ത സമ്മർദത്തിലാക്കുന്നു. ആയതിനാൽ, സാംക്രമിക രോഗങ്ങളെ പ്രതിരോധിക്കുന്ന അതേ ഗൗരവത്തോടെയും ശാസ്ത്രീയ ആസൂത്രണത്തോടെയും വേണം ഭരണകൂടങ്ങൾ റോഡ് സുരക്ഷാ നയങ്ങൾ രൂപീകരിക്കാൻ.
"വിഷൻ സീറോ’യും സുരക്ഷിത റോഡ് നിർമിതിയും
സ്വീഡൻ ആവിഷ്കരിക്കുകയും യൂറോപ്പ് മുഴുവൻ മാതൃകയാക്കുകയും ചെയ്ത ആശയമാണ് "വിഷൻ സീറോ’. മനുഷ്യർക്കു തെറ്റുപറ്റാമെന്നും എന്നാൽ ആ തെറ്റ് ഒരു വ്യക്തിയുടെ ജീവനെടുക്കുന്ന ദുരന്തമായി മാറാതിരിക്കാൻ റോഡിന്‍റെ ഡിസൈനും സാങ്കേതികവിദ്യയും തടസമാകണമെന്നുമാണ് വിഷൻ സീറോയുടെ അടിസ്ഥാന തത്വം. യൂറോപ്യൻ നഗരങ്ങളിലെ ജനവാസ മേഖലകളിലും സ്കൂൾ പരിസരങ്ങളിലും വാഹനങ്ങളുടെ വേഗം മണിക്കൂറിൽ 30 കിലോമീറ്ററായി നിജപ്പെടുത്തുന്ന "ടെമ്പോ 30’ സമ്പ്രദായം ഇതിനൊരു നല്ല ഉദാഹരണമാണ്.
റോഡുകളിൽ വേഗതടസങ്ങൾ ശാസ്ത്രീയമായി നിർമിച്ച്, എലവേറ്റഡ് സീബ്ര ക്രോസിംഗുകൾ ക്രമീകരിച്ച് കാൽനടയാത്രക്കാർക്ക് സുരക്ഷിതമായി റോഡ് മുറിച്ചുകടക്കാൻ ഫൂട്ട്പാത്തുകളും കാൽനടപ്പാലങ്ങളും നിർബന്ധമാക്കുമ്പോൾ, മാനന്തവാടിയിൽ കൊച്ചുകുട്ടിക്കു സംഭവിച്ചതുപോലുള്ള ദാരുണമായ ദുരന്തങ്ങൾ ഒഴിവാക്കാൻ സാധിക്കും. ഇതോടൊപ്പം മാനുവൽ പൊലിസ് പരിശോധനകൾക്കു പകരം സീബ്ര ക്രോസിംഗുകളിലെ നിയമലംഘനങ്ങൾ കണ്ടുപിടിക്കുന്ന നൂതന കാമറകൾ വഴി കൃത്യമായി ഡിജിറ്റൽ പിഴ ചുമത്തുന്ന രീതിയുമുണ്ട്.
ശാശ്വത പരിഹാരത്തിനായുള്ള നിർദേശങ്ങൾ
കേരളത്തിലെ റോഡപകടങ്ങൾ കുറയ്ക്കുന്നതിനും കാൽനടയാത്രക്കാരുടെ സുരക്ഷ ഉറപ്പാക്കുന്നതിനുമായി അടിയന്തരമായി നടപ്പാക്കേണ്ട നയപരിഹാരങ്ങൾ ഏതാനും സുപ്രധാന മേഖലകളിലേക്കു കേന്ദ്രീകരിക്കേണ്ടതുണ്ട്.
● നിലവിലുള്ള കേവല എച്ച്, എട്ട് അടയാള പരീക്ഷകൾ നിർത്തിവച്ച് യഥാർഥ ട്രാഫിക്കിലും മോശം കാലാവസ്ഥയിലും നിർബന്ധിത ഡ്രൈവിംഗ് മണിക്കൂറുകൾ അടങ്ങിയ വിപുലമായ പരിശീലനവും സിലബസും ഉൾപ്പെടുത്തി ലൈസൻസിംഗ് രീതി പരിഷ്കരിക്കണം. സിമുലേറ്റർ പരിശീലനവും എമർജൻസി ബ്രേക്കിംഗ് വിദ്യകളും പരീക്ഷയുടെ നിർബന്ധിത ഭാഗമാക്കണം.
● സീബ്ര ക്രോസിംഗുകളിൽ കാൽനടയാത്രക്കാർക്ക് മുൻഗണന നൽകാത്ത ഡ്രൈവർമാർക്കെതിരേ കനത്ത പിഴ ചുമത്തുകയും ട്രാഫിക് കുറ്റകൃത്യങ്ങളിൽ ആവർത്തിച്ച് ഉൾപ്പെടുന്നവർക്കും ലഹരിയുപയോഗിച്ച് വാഹനമോടിക്കുന്നവർക്കും അമിതവേഗക്കാർക്കും ജർമൻ മാതൃകയിൽ നിർബന്ധിത സൈക്കോളജിക്കൽ കൗൺസലിംഗും മെഡിക്കൽ മാനസികാരോഗ്യ മൂല്യനിർണയവും ഏർപ്പെടുത്തി പരാജയപ്പെടുന്നവരുടെ ലൈസൻസ് സ്ഥിരമായി റദ്ദാക്കുകയും വേണം.
● പ്രായപൂർത്തിയാകാത്ത കുട്ടികൾക്ക് വാഹനം നൽകുന്ന രക്ഷിതാക്കൾക്കും വാഹന ഉടമകൾക്കുമെതിരേ വിചാരണ കൂടാതെ ജാമ്യം ലഭിക്കാത്ത തരത്തിൽ കർശനമായ കേസ് എടുക്കുകയും അവരുടെ വാഹനം കണ്ടുകെട്ടുകയും ചെയ്യുന്ന നിയമ നിർമാണം കൊണ്ടുവരണം.
● സ്കൂളുകൾ, ആശുപത്രികൾ, ഗ്രാമീണ കവലകൾ എന്നിവയ്ക്കു ചുറ്റും വേഗം മണിക്കൂറിൽ 30 കിലോമീറ്ററായി പരിമിതപ്പെടുത്തുകയും എല്ലാ പ്രധാന റോഡുകളിലും തടസമില്ലാത്ത ഫൂട്ട്പാത്തുകളും പ്രകാശമാനമായ എലവേറ്റഡ് സീബ്ര ക്രോസിംഗുകളും നിർബന്ധമാക്കുകയും വേണം.
● അപകടത്തിൽപെടുന്നവർക്ക് ആദ്യത്തെ"ഗോൾഡൻ അവറിൽ’ ശാസ്ത്രീയ അടിയന്തര വൈദ്യസഹായം ഉറപ്പാക്കുന്ന ട്രോമ കെയർ നെറ്റ്‌വർക്ക് സംസ്ഥാനത്തുടനീളം ശക്തമാക്കുകയും പാഠ്യപദ്ധതിയിൽ റോഡ് സുരക്ഷയും കാൽനടയാത്രക്കാരുടെ അവകാശങ്ങളും പൗരബോധവും പഠനവിഷയമാക്കുകയും വേണം.
വൈകിക്കൂടാ
റോഡിൽ പൊലിയുന്ന ഓരോ ജീവനും ഒരു കുടുംബത്തിന്‍റെ പ്രതീക്ഷയും നാടിന്‍റെ സമ്പത്തുമാണ്. റോഡ് സുരക്ഷ എന്നത് പൊലിസിന്‍റെ കേവല പിഴ ഈടാക്കലോ പരിശോധനയോ മാത്രമല്ല, മറിച്ച് ഒരു ജനതയുടെ പൊതുജനാരോഗ്യത്തിന്‍റെയും ജീവിക്കാനുള്ള അവകാശത്തിന്‍റെയും അടിസ്ഥാനഘടകമാണ്. വേഗത്തിന്‍റെയും അഹന്തയുടെയും ഇരകളായി ഇനിയും നമ്മുടെ കുഞ്ഞുങ്ങളുടെ ചോരക്കട്ടകൾ റോഡിൽനിന്നു തുടച്ചുമാറ്റേണ്ടി വരാതിരിക്കാൻ ഭരണകൂടവും പൊതുസമൂഹവും ഒരുപോലെ ഉണർന്നു പ്രവർത്തിച്ചേ മതിയാകൂ.
ADVERTISEMENT
ADVERTISEMENT
SPACE FOR ADVERTISEMENT
Copyright © 2026, Rashtra Deepika Ltd. All Rights Reserved.
Design and Development 
Corehub Solutions
Contact Numbers :
+91 481 2566706, 2566707, 2566708
About Us Feedback Privacy Policy Terms and Conditions for Online Payment
E-paper LOGIN
LOGIN