Deepika
ADVERTISEMENT
National
ന്യൂഡല്‍ഹി: ഇന്ത്യ-യുഎസ് വ്യാപര കരാറിനെതിരേ സമരം ശക്തമാക്കാന്‍ കര്‍ഷക സംഘടനകള്‍. യുഎസ് വ്യാപാര കരാറുമായി മുന്നോട്ടുപോയാല്‍ അതിശക്തമായ സമരം നടത്തുമെന്ന് അഖിലേന്ത്യ കിസാന്‍ സഭ (എഐകെഎസ്) വ്യക്തമാക്കി.
വ്യാപാര കരാര്‍ വഴി യുഎസിന് നല്‍കുന്ന ഇളവുകള്‍ രാജ്യത്തെ കാര്‍ഷിക മേഖലയെ തകര്‍ക്കുമെന്നും വന്‍കിട കോര്‍പറേറ്റുകള്‍ക്ക് കാര്‍ഷികമേഖലയില്‍ സ്വാധീനം ചെലുത്താന്‍ വഴിവയ്ക്കുമെന്നും ചൂണ്ടിക്കാട്ടിയാണ് എഐകെഎസ് രംഗത്ത് വന്നത്.
അമേരിക്കയില്‍ വന്‍തോതില്‍ സബ്സിഡി ലഭിക്കുന്ന കാര്‍ഷിക ഉത്പാദകരുമായി മത്സരിക്കാന്‍ ഇന്ത്യയിലെ സാധാരണ കര്‍ഷകര്‍ക്ക് സാധിക്കില്ലെന്ന് ഇവര്‍ ചൂണ്ടിക്കാട്ടുന്നു.
കരാറുമായി ബന്ധപ്പെട്ട വിവരങ്ങള്‍ പാര്‍ലമെന്‍റില്‍നിന്ന് സര്‍ക്കാര്‍ മറച്ചുവയ്ക്കുകയാണെന്ന് കിസാന്‍ സഭ കുറ്റപ്പെടുത്തി. അമേരിക്കയുടെ പാല്‍ ഉത്പന്നങ്ങള്‍ ഇന്ത്യയില്‍ വില്‍ക്കാനുള്ള ആവശ്യമാണ് കരാറിലെ അവസാന തടസമെന്നും കരാര്‍ വളരെ അടുത്തെത്തിക്കഴിഞ്ഞെന്നും അമേരിക്കൻ സ്റ്റേറ്റ് സെക്രട്ടറി മാര്‍ക്കോ റൂബിയോ പ്രസ്താവിച്ച പശ്ചാത്തലത്തിലാണ് എഐകെഎസ് കേന്ദ്രത്തിന് മുന്നറിയിപ്പുമായി രംഗത്തുവന്നത്.
സംയുക്ത കിസാന്‍ മോര്‍ച്ച ഉള്‍പ്പടെയുള്ള കര്‍ഷക സംഘടനകളും പ്രതിഷേധവുമായി രംഗത്തെത്തുമെന്നാണ് അറിയുന്നത്.
National
ജറൂസലെം: പ്രധാനമന്ത്രി നരേന്ദ്ര മോദിയുമായി ടെലിഫോണിൽ സംസാരിച്ച് ഇസ്രേലി പ്രധാനമന്ത്രി ബെഞ്ചമിൻ നെതന്യാഹു.
ഇസ്രയേൽ സ്വാതന്ത്ര്യദിനാഘോഷത്തിൽ ഇന്ത്യൻ പൈലറ്റ്‌ സ്മിത് മച്ചാറിനൊപ്പം പങ്കെടുക്കാൻ മോദിയെ നെതന്യാഹു ക്ഷണിച്ചു.
ക്ഷണത്തിന് മോദി നന്ദി അറിയിച്ചെന്നും ഭീകരതയ്ക്കെതിരേ ഇന്ത്യയും ഇസ്രയേലും സംയുക്തമായി പോരാടുമെന്ന് അറിയിച്ചെന്നും നെതന്യാഹു എക്സിൽ കുറിച്ചു.
Kerala
തിരുവനന്തപുരം: നിലവിലെ കെപിസിസി പ്രസിഡന്‍റ് സണ്ണി ജോസഫ് വൈദ്യുതി മന്ത്രിയായി ചുമതലയേറ്റതിനു പിന്നാലെ കെപിസിസി അധ്യക്ഷസ്ഥാനം ഒഴിയാന്‍ സന്നദ്ധത ഹൈക്കമാന്‍ഡിനെ അറിയിച്ച് മാസങ്ങള്‍ പിന്നിട്ടിട്ടും പുതിയ അധ്യക്ഷനെ പ്രഖ്യാപിക്കാന്‍ കഴിയാതെ കോണ്‍ഗ്രസ് ഹൈക്കമാന്‍ഡ്.
അധ്യക്ഷ പദവി ആഗ്രഹിച്ച് നിരവധി മുതിര്‍ന്ന നേതാക്കള്‍ രംഗത്തുണ്ടെങ്കിലും ഗ്രൂപ്പ് താത്പര്യങ്ങള്‍ക്ക് അതീതമായി ഒരാളെ അധ്യക്ഷ പദവിയിലേക്ക് നിയോഗിക്കണമെന്നതാണ് പൊതുവായ ആവശ്യം. നിലവില്‍ കെപിസിസി പ്രവര്‍ത്തനങ്ങള്‍ ആസൂത്രണം ചെയ്യുന്നതിന് ഒരു പൂര്‍ണസമയ പ്രസിഡന്‍റ് ഇല്ലെന്ന വാദം പാര്‍ട്ടിക്കുള്ളില്‍തന്നെ ചര്‍ച്ചയാണ്.
മുഖ്യമന്ത്രി വി.ഡി. സതീശന്‍ ഡല്‍ഹി സന്ദര്‍ശനത്തിനിടെ കേന്ദ്ര നേതാക്കളോട് പുതിയ പ്രസിഡന്‍റ് നിയമനം സംബന്ധിച്ച് ചര്‍ച്ചകള്‍ നടത്തിയതായാണ് സൂചന. നിലവിലെ കെപിസിസി പ്രസിഡന്‍റ് മന്ത്രിസഭയിലെത്തിയിട്ട് നാലു മാസം പിന്നിട്ടു. ഇത്രയധികം ദിവസങ്ങള്‍ ആയിട്ടും പുതിയ പ്രസിഡന്‍റിനെ പ്രഖ്യാപിക്കാന്‍ കഴിയാത്തതില്‍ സംസ്ഥാനത്തെ മുതിര്‍ന്ന നേതാക്കള്‍ക്കിടയിലും വിമര്‍ശനം ഉയരുന്നുണ്ട്.
പുതിയ പ്രസിഡന്‍റിനെ നിയമിക്കുന്ന കാര്യത്തില്‍ ഹൈക്കമാന്‍ഡിനു വേഗം പോരെന്ന ആക്ഷേപമുണ്ട്. എന്നാല്‍, ഡല്‍ഹിയില്‍ നിലവില്‍ നടക്കുന്ന സമരങ്ങളുടെ പശ്ചാത്തലത്തില്‍ സംഘടനാ കാര്യങ്ങളില്‍ ഉള്‍പ്പടെ കൂടുതല്‍ ചര്‍ച്ചകള്‍ നടത്താന്‍ കഴിയാത്ത സാഹചര്യമാണെന്നാണ് ഹൈക്കമാന്‍ഡ് പക്ഷം. നിലവില്‍ കെപിസിസി അധ്യക്ഷസ്ഥാനത്തും യൂത്ത് കോണ്‍ഗ്രസ് അധ്യക്ഷ സ്ഥാനത്തുമുള്ള രണ്ടു പേരും മന്ത്രിസഭാംഗങ്ങളാണ്.
പാര്‍ട്ടിയുടെയും പോഷകസംഘടനയുടെയും പരിപാടികള്‍ കൃത്യമായി സംഘടിപ്പിക്കാന്‍ ഇതുമൂലം ഇവര്‍ക്ക് പലപ്പോഴും കഴിയുന്നുമില്ല.
സര്‍ക്കാര്‍ അധികാരത്തിലെത്തി നാലുമാസമായിട്ടും ബോര്‍ഡ്, കോര്‍പറേഷന്‍ അധ്യക്ഷന്മാരുടെ നിയമനവും നീളുകയാണ്.
പുതിയ കെപിസിസി അധ്യക്ഷന്‍ ചുമതല ഏറ്റെടുത്ത ശേഷം മതി ബോര്‍ഡ് കോര്‍പറേഷന്‍ അധ്യക്ഷന്മാരുടെ നിയമനമെന്നായിരുന്നു ആദ്യധാരണ. എന്നാല്‍, കെപിസിസി അധ്യക്ഷനെ നിയമിക്കുന്നത് നീണ്ടുപോകുന്നതോടെ അതിനു കാത്തുനില്‍ക്കാതെതന്നെ ബോര്‍ഡ് കോര്‍പറേഷന്‍ അധ്യക്ഷന്മാരെ നിയമിക്കാനും നീക്കം നടക്കുന്നുണ്ട്.
യുഡിഎഫില്‍ ഓരോ കക്ഷിക്കുമുള്ള ബോര്‍ഡ് കോര്‍പറേഷന്‍ സ്ഥാനങ്ങള്‍ വീതംവച്ചു നല്‍കിയശേഷം കോണ്‍ഗ്രസിനു ലഭിക്കുന്ന സീറ്റുകളില്‍ നിയമനം വേഗത്തിലാക്കണമെന്ന ആവശ്യവും ശക്തമാണ്.
കെപിസിസി പ്രസിഡന്‍റ് സ്ഥാനത്തേക്ക് കൊടിക്കുന്നില്‍ സുരേഷ്, ജോസഫ് വാഴയ്ക്കന്‍, ഷാഫി പറമ്പില്‍, മാത്യു കുഴല്‍നാടന്‍, ടി.എന്‍. പ്രതാപന്‍, അടൂര്‍ പ്രകാശ് തുടങ്ങിയ പല പേരുകളും ചര്‍ച്ചകളില്‍ വരുന്നുണ്ട്. ഇതിനിടെതന്നെ കെപിസിസി അധ്യക്ഷ സ്ഥാനത്തുനിന്നു മാറ്റിയതില്‍ അതീവ ദുഃഖമുണ്ടെന്നു പരാതിപ്പെട്ട്‌ മുന്‍ അധ്യക്ഷന്‍ കൂടിയായ കെ. സുധാകരന്‍ എംപി കഴിഞ്ഞ ദിവസം രംഗത്തെത്തിയിരുന്നു.
International
കലിഫോർണിയ: ലോകമെമ്പാടുമുള്ള 70 ശതമാനത്തോളം വെബ്‌സൈറ്റുകൾ പ്രവർത്തിക്കുന്ന പിഎച്ച്പി പ്രോഗ്രാമിംഗ് ഭാഷയിൽ ദശാബ്‌ദത്തിലേറെയായി ഒളിഞ്ഞിരുന്ന ഗുരുതരമായ സുരക്ഷാവീഴ്ച കണ്ടെത്തി. നിർമിതബുദ്ധി (എഐ) സാങ്കേതികവിദ്യ ഉപയോഗിച്ചു നടത്തിയ പരിശോധനയിലാണ് വൻ സുരക്ഷാഭീഷണി തിരിച്ചറിഞ്ഞത്.
ഇതേത്തുടർന്ന് വികസിതരാജ്യങ്ങളുടെ സർക്കാരുകളുടെയും പ്രമുഖ ആഗോള കമ്പനികളുടെയും വെബ്‌സൈറ്റുകൾ മുൻകരുതലിന്‍റെ ഭാഗമായി താത്കാലികമായി അടച്ചുപൂട്ടി.
എഐ കൈവരിച്ച വലിയ വഴിത്തിരിവ്
മനുഷ്യരായ വിദഗ്ധർക്കു മാസങ്ങളെടുത്ത് മാത്രം കണ്ടെത്താൻ കഴിയുന്ന സങ്കീർണമായ കോഡിംഗ് പിഴവുകൾ വെറും ഒരാഴ്ചയ്ക്കുള്ളിൽ എഐ മോഡലുകൾ ഉപയോഗിച്ച് തിരിച്ചറിയാൻ കഴിഞ്ഞു. ഗൂഗിളിന്‍റെ ജെമിനി, ഓപ്പൺഎഐയുടെ ജിപിടി, വിസ്, കാലിഫ് എന്നീ സ്ഥാപനങ്ങളിലെ ഗവേഷകരാണ് ‘php2shell’ എന്നു പേരിട്ടിരിക്കുന്ന ഈ തകരാറുകൾ കണ്ടെത്തിയത്. ദശാബ്‌ദത്തിലേറെയായി കോഡുകളിൽ ആരും കാണാതെ കിടന്ന ഈ പിഴവിലൂടെ ഹാക്കർമാർക്ക് വെബ്‌സൈറ്റുകളുടെ പാസ്‌വേഡ് അടക്കമുള്ള രഹസ്യവിവരങ്ങൾ ചോർത്താനും സിസ്റ്റങ്ങളുടെ പൂർണനിയന്ത്രണം ഏറ്റെടുക്കാനും സാധിക്കുമായിരുന്നു.
പരക്കേ ഹാക്കിംഗ് ശ്രമങ്ങൾ
വെബ്‌സൈറ്റുകളുടെ നിയന്ത്രണം വിദൂരത്തിരുന്ന് ഏറ്റെടുക്കാനും സേവനങ്ങൾ തടസപ്പെടുത്താനും ഈ സുരക്ഷാവീഴ്ചയിലൂടെ സാധിക്കുമെന്ന് പ്രമുഖ വെബ് ഇൻഫ്രാസ്ട്രക്ചർ ദാതാക്കളായ ക്ലൗഡ് ഫ്ലെയർ മുന്നറിയിപ്പ് നൽകി. തകരാറുകൾ പരിഹരിക്കാൻ പിഎച്ച്പി ഫൗണ്ടേഷൻ അടിയന്തര സുരക്ഷാ പാച്ച് പുറത്തിറക്കിയെങ്കിലും ഇത് അപ്‌ഡേറ്റ് ചെയ്യുന്നതിനു മുമ്പുതന്നെ വിവരങ്ങൾ ചോർന്നതു പ്രതിസന്ധി ഇരട്ടിയാക്കി.
ത
കരാർ പുറത്തുവന്ന് ആദ്യമണിക്കൂറുകളിൽ ലക്ഷക്കണക്കിന് ഹാക്കിംഗ് ശ്രമങ്ങളാണു രേഖപ്പെടുത്തിയതെങ്കിൽ നിലവിൽ അതു കോടികളിലേക്ക് ഉയർന്നതായി ക്ലൗഡ് ഫ്ലെയർ സിഇഒ മാത്യു പ്രിൻസ് വ്യക്തമാക്കി. 2014ൽ ഇന്‍റർനെറ്റിനെ വിറപ്പിച്ച ‘ഹാർട്ട് ബ്ലീഡ്’ സുരക്ഷാ ഭീഷണിയോടു സമാനമായ സാഹചര്യമാണിതെന്ന് വിദഗ്ധർ മുന്നറിയിപ്പ് നൽകുന്നു.
നിശ്ചലമായി ആഗോള ഡിജിറ്റൽ സേവനങ്ങൾ
സുരക്ഷാ മുന്നറിയിപ്പിനെത്തുടർന്ന് ലോകത്തിന്‍റെ വിവിധ ഭാഗങ്ങളിൽ ഡിജിറ്റൽ സേവനങ്ങൾ താത്കാലികമായി നിർത്തിവച്ചു. യുകെ സർക്കാരിന്‍റെ 30ഓളം ഡിജിറ്റൽ സേവനങ്ങൾ ഭാഗികമായോ പൂർണമായോ നിർത്തിവച്ചു.
അയർലൻഡിലെ ദ് ജേണൽ വാർത്താ പോർട്ടൽ, ഫ്രാൻസിലെ ടെലികോം ഭീമനായ ഓറഞ്ച്, ഡെന്മാർക്ക്, ഫിൻലാൻഡ്, നെതർലാൻഡ്സ് എന്നിവിടങ്ങളിലെ സർക്കാർ പോർട്ടലുകൾ എന്നിവ ഓഫ്‌ലൈനാക്കി. വിക്കിപീഡിയയുടെ പ്രവർത്തനക്കാരായ വിക്കിമീഡിയ ഫൗണ്ടേഷനും തങ്ങളുടെ സിസ്റ്റങ്ങളിൽ സുരക്ഷാ അപ്‌ഡേറ്റുകൾ വരുത്തുന്നതായി അറിയിച്ചു.
ജപ്പാൻ പ്രധാനമന്ത്രി സനേ ടകൈച്ചി ജാഗ്രതാനിർദേശം നൽകിയതിനെത്തുടർന്ന് എഎൻഎ എയർലൈൻസ്, ജെആർ വെസ്റ്റ് റെയിൽവേ, എംയുഎഫ്ജി ബാങ്ക്, നോമുറ ബ്രോക്കറേജ് എന്നിവയുടെ ഓൺലൈൻ സേവനങ്ങൾ തടസപ്പെട്ടു.
ചൈനയും ദക്ഷിണ കൊറിയയും എല്ലാ സിസ്റ്റങ്ങളും അടിയന്തരമായി അപ്‌ഡേറ്റ് ചെയ്യാൻ നിർദേശം നൽകി. ദക്ഷിണകൊറിയ രാജ്യത്ത് അടിയന്തര ജാഗ്രതാനിർദേശം പുറപ്പെടുവിച്ചിട്ടുണ്ട്.
സാമ്പത്തിക നഷ്‌ടത്തിനും വിവരച്ചോർച്ചയ്ക്കും സാധ്യത
ലോകമെമ്പാടുമുള്ള 70 ശതമാനം വെബ്‌സൈറ്റുകളും വേർഡ്പ്രസ്, ഡ്രൂപ്പൽ തുടങ്ങിയ ജനപ്രിയ കണ്ടന്‍റ് മാനേജ്‌മെന്‍റ് സിസ്റ്റങ്ങളും ഉപയോഗിക്കുന്നത് പിഎച്ച്പിയിലാണ്. വ്യാപാര ആവശ്യങ്ങൾക്കും ബാങ്കിംഗിനുമായി കോടിക്കണക്കിന് ആളുകൾ ഉപയോഗിക്കുന്ന സംവിധാനമായതിനാൽ വലിയ സാമ്പത്തിക നഷ്‌ടത്തിനും വിവരച്ചോർച്ചയ്ക്കും സാധ്യതയുണ്ടെന്ന് സാമ്പത്തിക ഉപദേശക സ്ഥാപനമായ ഡിവിർ ഗ്രൂപ്പ് ചൂണ്ടിക്കാട്ടുന്നു.
യുഎസ് നാഷണൽ സെക്യൂരിറ്റി ഏജൻസിയും യൂറോപ്യൻ സൈബർ സെക്യൂരിറ്റി ഏജൻസിയും അടിയന്തരമായി സെക്യൂരിറ്റി പാച്ചുകൾ ഇൻസ്റ്റാൾ ചെയ്യാൻ സ്ഥാപനങ്ങളോട് ആവശ്യപ്പെട്ടിട്ടുണ്ട്.
National
ന്യൂഡൽഹി: പ്രതിരോധ കയറ്റുമതിയിൽ ഇന്ത്യക്ക് വളർച്ച. കയറ്റുമതി നിലവില്‍ 38,400 കോടി രൂപയിലെത്തിയെന്ന് ബ്രഹ്മോസ് എയ്റോസ്പേസ് സിഇഒയും മാനേജിംഗ് ഡയറക്‌ടറുമായ ഡോ. ജയതീര്‍ഥ ജോഷി.
വാര്‍ഷിക വളര്‍ച്ചാ നിരക്കിൽ 62.7 ശതമാനം വർധനയാണ് കയറ്റുമതിയില്‍ നേടിയതെന്നും ജയതീര്‍ഥ ജോഷി വ്യക്തമാക്കി.
2025ല് യുദ്ധമുഖത്ത് പരീക്ഷിക്കപ്പെടുന്നതിന് മുമ്പുതന്നെ കയറ്റുമതി രംഗത്ത് ബ്രഹ്മോസ് വിജയം നേടിയിരുന്നു.
Sports
തിരുവനന്തപുരം: നല്ല ആരോഗ്യമുള്ള മനസും ശരീരവും ഉണ്ടെങ്കിലേ നന്നായി പഠിക്കാനും നേട്ടങ്ങള്‍ കൈവരിക്കാനും കഴിയുകയുള്ളൂവെന്ന് പൊതുവിദ്യാഭ്യാസ മന്ത്രി എന്‍. ഷംസുദ്ദീന്‍. സംസ്ഥാന സ്‌കൂള്‍ കായികമേളയുടെ സ്വര്‍ണക്കപ്പ് പര്യടന യാത്ര തിരുവനന്തപുരം പട്ടം ഗവണ്‍മെന്‍റ് ഗേള്‍സ് ഹയര്‍ സെക്കന്‍ഡറി സ്‌കൂളില്‍ ഫ്ളാഗ് ഓഫ് ചെയ്യുകയായിരുന്നു മന്ത്രി.
കുട്ടികളുടെ പഠനത്തിലും ജീവിതത്തിലും കായികക്ഷമത അത്യാവശ്യമാണ്. സ്‌കൂളുകളില്‍ കായിക പരിശീലനം ശക്തമാക്കുന്നതിന്‍റെ ഭാഗമായി കായിക അധ്യാപക തസ്തിക ഇനി മുതല്‍ 300 കുട്ടികളുള്ള സ്‌കൂളുകളിലും ലഭ്യമാക്കാന്‍ തീരുമാനിച്ചിട്ടുണ്ട്.
എല്ലാ സ്‌കൂളുകളിലും കായിക അധ്യാപകരുടെ സേവനം ഉറപ്പാക്കുന്നതിനായി പ്രത്യേക പഠന കമ്മിറ്റിയെ നിയോഗിച്ചിട്ടുണ്ട്. കായികമേളകളില്‍ ഉത്തേജക മരുന്നുകളുടെ ഉപയോഗം, പ്രായത്തില്‍ തിരിമറി നടത്തല്‍ തുടങ്ങിയവ കണ്ടെത്തിയാല്‍ കര്‍ശന നടപടി സ്വീകരിക്കുമെന്നും മന്ത്രി വ്യക്തമാക്കി.
National
ബാങ്കുറ (പശ്ചിമബംഗാൾ): പശ്ചിമബംഗാളിലെ ബാങ്കുറ ജില്ലയിൽ ദുർഗാപൂജാ ആഘോഷങ്ങൾക്കിടയിൽ രാജ്യത്തെ നടുക്കി നരബലി. താന്ത്രിക പൂജയുടെയും ആചാരങ്ങളുടെയും പേരിൽ ഭാര്യയെയും പിതാവിനെയും യുവാവ് ക്രൂരമായി വെട്ടിക്കൊന്നു.
ബാങ്കുറ ജില്ലയിലെ സോനാമുഖി പൊലിസ് സ്റ്റേഷൻ പരിധിയിലുള്ള ലാൽബാബ ചാർ ഗ്രാമത്തിൽ നടന്ന സംഭവത്തിൽ മംഗൾ ചൗധരി (45) എന്നയാളെ പൊലിസ് അറസ്റ്റ് ചെയ്തു. ചൊവ്വാഴ്ച രാത്രിയിലായിരുന്നു സംഭവം.
പ്രതിയുടെ ഭാര്യ രംപ ചൗധരി (40), അച്ഛൻ രാജേന്ദ്ര ചൗധരി (64) എന്നിവരാണു കൊല്ലപ്പെട്ടത്. ഭാര്യയുടെ തല വെട്ടിമാറ്റി വീടിനു മുന്നിൽ നിർമിച്ച കാളി ക്ഷേത്രത്തിനു മുന്നിൽ സമർപ്പിച്ചശേഷം, അടുത്തുള്ള വീട്ടിൽ താമസിച്ചിരുന്ന അച്ഛനെ വിളിച്ചുവരുത്തി വെട്ടിക്കൊല്ലുകയായിരുന്നുവെന്ന് ഗ്രാമവാസികൾ പറയുന്നു.
തുടർന്ന് സ്വന്തം സഹോദരനായ രാം ലക്ഷ്മൺ ചൗധരിയെയും ഇയാൾ ആക്രമിക്കാൻ ശ്രമിച്ചെങ്കിലും അദ്ദേഹം ഓടി രക്ഷപ്പെടുകയായിരുന്നു.
പൂജകൾക്കു രക്തം വേണമെന്ന് അലറിവിളിച്ചുകൊണ്ട് ചോരപുരണ്ട ആയുധവുമായി മംഗൾ ഗ്രാമത്തിൽ ഭീതി പരത്തിയതായി നാട്ടുകാർ വ്യക്തമാക്കി.
സംഭവം നടന്നയുടൻ പൊലിസ് സ്ഥലത്തെത്തി മംഗൾ ചൗധരിയെ കസ്റ്റഡിയിലെടുത്തു. മൃതദേഹങ്ങൾ പോസ്റ്റ്‌മോർട്ടത്തിനായി ബിഷ്ണുപുരിലേക്കു മാറ്റി.
National
ന്യൂഡൽഹി: എത്ര ഗൗരവമേറിയ കുറ്റകൃത്യമാണെങ്കിലും വിചാരണയ്ക്കു മുമ്പുള്ള ദീർഘകാല തടവ് ശിക്ഷയായി മാറരുതെന്നും ഇത് ഭരണഘടന നൽകുന്ന മൗലികാവകാശങ്ങളുടെ ലംഘനമാണെന്നും സുപ്രീംകോടതി.
രാജസ്ഥാനിലെ ജല്‍ജീവൻ മിഷൻ പദ്ധതിയിലെ ടെൻഡർ ക്രമക്കേടുകളുമായി ബന്ധപ്പെട്ട അഴിമതിക്കേസിൽ മുൻ കോൺഗ്രസ് മന്ത്രി മഹേഷ് ചന്ദ്ര ജോഷി, മുകേഷ് പഥക് എന്നിവർക്ക് ജാമ്യം അനുവദിച്ചുകൊണ്ടാണ് ജസ്റ്റീസുമാരായ ദീപങ്കർ ദത്ത, ശീൽ നഗു എന്നിവരടങ്ങിയ ബെഞ്ചിനെ നിരീക്ഷണം.
ഇരുവർക്കുമെതിരെയുള്ള കുറ്റപത്രം സമർപ്പിച്ചിട്ടുണ്ടെന്നും രേഖകളെല്ലാം അന്വേഷണ ഏജൻസിയുടെ കസ്റ്റഡിയിലായതിനാൽ തുടർച്ചയായ കസ്റ്റഡി ആവശ്യമില്ലെന്നും കോടതി നിരീക്ഷിച്ചു.
22 പ്രതികളും 124 സാക്ഷികളും ഇരുപതിനായിരത്തോളം പേജുകളുടെ രേഖകളുമുള്ള കേസിൽ വിചാരണ വൈകാൻ സാധ്യതയുണ്ടെന്നതും ഇതിനകം പ്രതികൾ അനുഭവിച്ച തടവ് കാലാവധിയും സമാനകേസുകളിൽ മറ്റു പ്രതികൾക്ക് ജാമ്യം ലഭിച്ചിട്ടുണ്ടെന്ന കാര്യവും കോടതി കണക്കിലെടുത്തു.
72കാരനായ മഹേഷ് ചന്ദ്ര ജോഷി അഞ്ചു മാസത്തിലേറെയും മുകേഷ് പഥക് എട്ടു മാസത്തോളവുമായി കസ്റ്റഡിയിലാണ്.
Kerala
തിരുവനന്തപുരം: എക്സാലോജിക് മാസപ്പടിക്കേസിൽ മുൻ മുഖ്യമന്ത്രി പിണറായി വിജയനും കുടുംബത്തിനും എതിരേയുള്ള കേസിന്‍റെ അപ്പീൽ ഹൈക്കോടതി ഡിവിഷൻ പരിഗണിക്കുന്പോൾ സർക്കാർ വാദം കടുപ്പിക്കാൻ നിർദേശം.
വിജിലൻസ് എഫ്ഐആർ റദ്ദാക്കാതിരിക്കാൻ സർക്കാർ ഭാഗം ശക്തമാക്കാൻ എജി അടക്കമുള്ള അഭിഭാഷകർക്ക് ആഭ്യന്തര വകുപ്പ് നിർദേശം നൽകിയതായാണ് വിവരം.
വിജിലൻസ് എഫ്ഐആർ കോടതി റദ്ദാക്കുന്ന സാഹചര്യമുണ്ടായാൽ യുഡിഎഫ് സർക്കാരിനു രാഷ്്ട്രീയമായി കനത്ത തിരിച്ചടി നേരിടേണ്ടിവരുമെന്ന സാഹചര്യത്തിലാണ് സർക്കാർ വാദം കടുപ്പിക്കാൻ നിർദേശിച്ചത്.
പിണറായി വിജയനെതിരേയുള്ള സർക്കാരിന്‍റെ അയഞ്ഞ സമീപനത്തിൽ കോണ്ഗ്രസിലെ ഒരുവിഭാഗം കടുത്ത അതൃപ്തിയിലാണ്. ചില കോണ്‍ഗ്രസ് എംഎൽഎമാർ അടക്കമുള്ളവർ പരസ്യവിമർശനവും ഉന്നയിച്ചിരുന്നു.
കഴിഞ്ഞ ദിവസത്തെ സുപ്രീംകോടതി ഉത്തരവ് മുതിർന്ന കോണ്‍ഗ്രസ് നേതാക്കൾക്കും യുഡിഎഫിലെ ചില ഘടകകക്ഷി നേതാക്കൾക്കും ഏറെ ആശ്വാസം നൽകിയിരുന്നു. പിണറായിക്കെതിരേയുള്ള കേസ് ലക്ഷ്യമിട്ടു മുഖ്യമന്ത്രിക്കും ആഭ്യന്തരമന്ത്രിക്കും എതിരേയുള്ള കോണ്ഗ്രസിലെ ചേരിപ്പോര് രൂക്ഷമാണ്.
ഇതുകൂടി മുന്നിൽ കണ്ടാണു തീരുമാനം. എന്നാൽ, ഹൈക്കോടതി ഡിവിഷൻ ബെഞ്ച് കേസ് പരിഗണിക്കുന്പോൾ എഫ്ഐആർ റദ്ദാക്കാൻ ആവശ്യമായ വാദമുഖങ്ങളാകും പിണറായി വിജയനും കൂട്ടരും ഉന്നയിക്കാൻ സാധ്യത. മുതിർന്ന അഭിഭാഷകരെ രംഗത്തിറക്കിയുള്ള നിയമയുദ്ധത്തിനാണ് ശ്രമിക്കുന്നത്. ഇതു മുൻകൂട്ടി കണ്ട് ആവശ്യമായ നിയമനടപടി സ്വീകരിക്കാനാണ് നിർദേശം.
അയഞ്ഞ വാദമുഖങ്ങൾ ഉയർത്തിയാൽ സർക്കാരിനെതിരേ രാഷ്്ട്രീയമായി ഒത്തുകളി ആരോപണം നേരിടേണ്ടിവരും. അതിനാൽ വിജിലൻസ് അന്വേഷണം അനിവാര്യമാണെന്ന നിലപാട് കോടതിയിൽ സ്വീകരിക്കാനാണ് ആഭ്യന്തര വകുപ്പിന്‍റെ ശിപാർശ.
അപ്പീലിനായി വിജിലൻസ് അന്വേഷണം പത്തു ദിവസത്തേക്ക് സുപ്രീംകോടതി സ്റ്റേ ചെയ്തിരുന്നു. പ്രാഥമികാന്വേഷണം വേണമെന്ന നിലപാട് കോടതി തള്ളിയിട്ടും എന്തുകൊണ്ട് സംസ്ഥാന സർക്കാർ അപ്പീൽ നൽകിയില്ലെന്ന ചോദ്യവും സുപ്രീംകോടതി ഉന്നയിച്ചിരുന്നു.
National
ന്യൂഡൽഹി: പാർലമെന്‍റിന്‍റെ പ്രത്യേക സമ്മേളനം വിളിച്ചുചേർക്കുന്നതു സംബന്ധിച്ച് സർക്കാരാണ് അന്തിമതീരുമാനമെടുക്കേണ്ടതെന്നും ഇതുവരെ ഔദ്യോഗിക അറിയിപ്പുകളൊന്നും ലഭിച്ചിട്ടില്ലെന്നും ലോക്സഭാ സ്പീക്കർ ഓം ബിർള വ്യക്തമാക്കി.
മണ്ഡല പുനർനിർണയവുമായി ബന്ധപ്പെട്ട് പ്രത്യേക സമ്മേളനം ഉണ്ടായേക്കുമെന്ന അഭ്യൂഹങ്ങൾ ശക്തമായി നിലനിൽക്കുന്നതിനിടെയാണ് പാർലമെന്‍റ് അനെക്സിൽ നടത്തിയ വാർത്താസമ്മേളനത്തിൽ സ്പീക്കർ ഇക്കാര്യം വ്യക്തമാക്കിയത്.
വർഷകാല സമ്മേളനം അവസാനിച്ചതു സംബന്ധിച്ച ഔദ്യോഗിക വിജ്ഞാപനം പുറത്തിറക്കേണ്ടതു രാഷ്‌ട്രപതിയാണ്. നടപടിക്രമങ്ങൾ പൂർത്തിയാക്കി അതുസംബന്ധിച്ച തീരുമാനമുണ്ടാകുമെന്ന് സ്പീക്കർ പറഞ്ഞു. രാഷ്‌ട്രപതിയുടെ വിജ്ഞാപനം മുമ്പും ഇതിലും വൈകി പുറപ്പെടുവിച്ചിട്ടുള്ളതായി അദ്ദേഹം ചൂണ്ടിക്കാട്ടി. ഓഗസ്റ്റ് 13ന് മൺസൂൺ സമ്മേളനം പിരിഞ്ഞിട്ടും ഇതുവരെ വിജ്ഞാപനം ഇറക്കാത്തതിനെതിരേ പ്രതിപക്ഷം രംഗത്തുവന്ന പശ്ചാത്തലത്തിലാണു സ്പീക്കറുടെ വിശദീകരണം.
മമത ബാനർജിയുടെ തൃണമൂൽ കോൺഗ്രസ് വിട്ടു എൻസിപിഐയിൽ ചേർന്ന 20 വിമത ലോക്സഭാംഗങ്ങളെ അയോഗ്യരാക്കണമെന്നാവശ്യപ്പെട്ട് ടിഎംസി ലോക്സഭാ നേതാവ് അഭിഷേക് ബാനർജി നൽകിയ ഹർജിയിൽ നടപടികൾ പുരോഗമിക്കുകയാണെന്ന് സ്പീക്കർ വ്യക്തമാക്കി.
പത്താം പട്ടികയിലെ വ്യവസ്ഥകൾ പ്രകാരം വിമത എംപിമാർക്കെതിരേ അയോഗ്യതാ നടപടി സ്വീകരിക്കണമെന്നാണ് പാർട്ടിയുടെ ആവശ്യം. എതിർപക്ഷത്തിന്‍റെ മറുപടി ലഭിച്ചാലുടൻ ചട്ടപ്രകാരം വേഗത്തിൽ തീരുമാനമെടുക്കുമെന്നും അദ്ദേഹം അറിയിച്ചു.
National
ന്യൂഡൽഹി: ദേശീയ പതാക ഉയർത്താൻ പൗരന്മാർക്ക് അനുമതി ആവശ്യമില്ലെന്ന് ഡൽഹി ഹൈക്കോടതിയിൽ ഐസ പ്രസിഡന്‍റ് നേഹ ബോറ. മുഖ്യ തെരഞ്ഞെടുപ്പ് കമ്മിഷണർ ഗ്യാനേഷ് കുമാറിനെതിരേ നടക്കുന്ന പ്രതിഷേധങ്ങളെ തുടർന്ന് സമാധാന ബോണ്ട് ആവശ്യപ്പെട്ട് ഡൽഹി പൊലിസ് നൽകിയ നോട്ടീസിനെതിരേ നേഹ സമർപ്പിച്ച ഹർജിയിലെ വാദത്തിനിടയിലാണ് ഇക്കാര്യം പരാമർശിച്ചത്.
കേസിൽ രണ്ടര മണിക്കൂറിലധികം വാദം കേട്ട ജസ്റ്റീസ് സുബ്രഹ്മണ്യം പ്രസാദ് ഇന്ന് വിധി പറയാൻ മാറ്റി. 16ന് സിജെപിയുടെ തിരംഗ മാർച്ചിൽ പങ്കെടുക്കുന്നതിനിടെ കസ്റ്റഡിയിലായ നേഹ ബോറയെ പിറ്റേന്നാണ് വിട്ടയച്ചത്. തുടർന്ന് സമാധാനം പാലിക്കുന്നതിനായി 10,000 രൂപയുടെ ബോണ്ട് നൽകാൻ ആവശ്യപ്പെട്ട് സ്പെഷ്യൽ എക്സിക്യൂട്ടീവ് മജിസ്ട്രേറ്റ് നോട്ടീസ് അയച്ചിരുന്നു. എന്നാൽ നോട്ടീസ് നിലനിൽക്കില്ലെന്നും ദേശീയ പതാക ഉയർത്താൻ ആരുടെയും അനുമതി ആവശ്യമില്ലെന്നും ചൂണ്ടിക്കാട്ടിയാണ് നേഹ ഹൈക്കോടതിയെ സമീപിച്ചത്.
സമാനമായി ജന്തർ മന്തറിൽ കയറി പതാക വീശിയതുമായി ബന്ധപ്പെട്ട് സിജെപി നേതാക്കളായ സൗരവ് ദാസ്, അശുതോഷ് രങ്ക, അജിങ്ക്യ ഷിൻഡെ എന്നിവരോട് ഇന്നലെ ക്രൈം ബ്രാഞ്ച് ഓഫിസിൽ എത്താൻ ആവശ്യപ്പെട്ടെങ്കിലും മൂവരും ഹാജരായില്ല. അശുതോഷിനെയും സൗരവിനെയും പൊലിസ് കസ്റ്റഡിയിൽ നിന്നു മോചിപ്പിച്ചതിനു പിന്നാലെയാണ് ക്രൈം ബ്രാഞ്ച് ഓഫിസിൽ ഹാജരാകാൻ ആവശ്യപ്പെട്ട് നോട്ടീസ് അയച്ചത്.
നിരോധനാജ്ഞ ലംഘിച്ച് ജന്തർ മന്തറിലേക്ക് പ്രതിഷേധിക്കാൻ എത്തിയതും സ്വകാര്യ വ്യക്തിയുടെ വസ്തുവിൽ അതിക്രമിച്ച് കയറി ഉദ്യോഗസ്ഥരുടെ ഔദ്യോഗിക കൃത്യനിർവഹണം തടസപ്പെടുത്തിയതുമാണ് ഇവർക്കെതിരെയുള്ള കേസ്.
ഏഴ് ദിവസത്തെ കസ്റ്റഡിക്കുശേഷം ജന്തർ മന്തറിൽ ഇനി പ്രതിഷേധിക്കില്ല എന്ന് ഉറപ്പ് നൽകി വ്യക്തിഗത ബോണ്ടും ആൾജാമ്യവും സമർപ്പിച്ചാണ് നേതാക്കളെ ബുധനാഴ്ച വിട്ടയച്ചത്. ഇന്നലെ ഹാജരാകാതിരുന്നതോടെ ക്രൈംബ്രാഞ്ച് പുതിയ സമൻസ് അയച്ചേക്കും.
Kerala
ആലപ്പുഴ: ലോകത്തിന്‍റെ വിവിധഭാഗങ്ങളിൽനിന്നെത്തുന്ന ലക്ഷക്കണക്കിന് ആളുകൾ പങ്കുചേരുന്ന ആലപ്പുഴ കൃപാസനം അഖണ്ഡ ജപമാല മഹാറാലി നാളെ നടക്കും. എല്ലാ വർഷവും ഒക്‌ടോബറിലെ നാലാമത്തെ ശനിയാഴ്ചയാണ് ജപമാല റാലി നടക്കുന്നത്.
ഓരോ വർഷവും പങ്കെടുക്കുന്നവരുടെ എണ്ണം കൂടിവരികയാണ്. ഇതു കണക്കിലെടുത്ത് തീർഥാടകരെ സ്വീകരിക്കാനും ക്രമീകരണങ്ങൾക്കുമായി ജില്ലാ ഭരണകൂടവും എല്ലാവിധ സഹകരണവുമായി രംഗത്തുണ്ട്. ജപമാല റാലിയുടെ ലക്ഷ്യത്തെക്കുറിച്ചും ക്രമീകരണങ്ങളെക്കുറിച്ചും കൃപാസനം ഡയറക്ടർ ഫാ. ഡോ. വി.പി. ജോസഫ് വലിയവീട്ടിൽ ദീപികയോടു സംസാരിക്കുന്നു.
►ജപമാല റാലിയിൽ ഒാരോ വർഷവും തീർഥാടകരുടെ എണ്ണം കൂടിവരികയാണല്ലോ. എന്താണ് ജപമാല റാലിയുടെ ലക്ഷ്യം?
നമ്മുടെ രാജ്യത്തിന്‍റെ നന്മയാണ് ഈ ജപമാലറാലിയുടെ ഒരു പ്രധാന നിയോഗം. രാജ്യമില്ലെങ്കിൽ പിന്നെ ഒന്നുമില്ലല്ലോ. നമ്മുടെ രാജ്യം സമാധാനത്തിലും കെട്ടുറപ്പിലും നിൽക്കണം. യുദ്ധങ്ങൾ ഒഴിവായി ലോകത്തു സമാധാനം പുലരണം. അതോടൊപ്പം ജാതിമതഭേദമെന്യേ സർവജനങ്ങളെയും സമർപ്പിച്ചു പ്രാർഥിക്കും. കൃപാസനം തീർഥാടനകേന്ദ്രം മുതൽ അർത്തുങ്കൽ പള്ളിവരെ ഏകദേശം 14 കിലോമീറ്ററുണ്ട്. ഈ ദൂരത്തിനിടയിൽ 10 ജപമാലയെങ്കിലും പങ്കെടുക്കുന്നവർ ചൊല്ലും. ലക്ഷക്കണക്കിനാളുകൾ ചൊല്ലുന്പോൾ ഇതൊരു വലിയ പ്രാർഥനാ സമർപ്പണമാണ്.
►റാലിയിൽ പങ്കെടുക്കാൻ മാത്രം വിദേശത്തുനിന്നുപോലും തീർഥാടകർ
എത്തുന്നുണ്ടല്ലോ?
അങ്ങനെ ധാരാളം പേർ വരുന്നുണ്ട്. ആലപ്പുഴയിലെ ബന്ധുവീടുകളിലും ഹോട്ടലുകളിലുമെല്ലാം നേരത്തേ വന്നു തങ്ങി തീർഥാടനത്തിൽ പങ്കുചേരുന്ന അനേകർ ഉണ്ട്. അതുകൊണ്ടു തന്നെയാണ് ജപമാല റാലിയുടെ തീയതിയും ക്രമീകരണങ്ങളും നേരത്തേതന്നെ പ്രഖ്യാപിക്കുന്നത്. ആളുകൾ സ്വയം അച്ചടക്കത്തോടെ, ത്യാഗസന്നദ്ധതയോടെയാണ് പങ്കുചേരാൻ എത്തുന്നത്. പരസ്പരം സഹായിക്കാൻ ആളുകൾ തയാറാകുന്നതിനാൽ എല്ലാം സുഗമമായി നടക്കുന്നതാണ് ഇതുവരെയുള്ള അനുഭവം.
►ഇത്തവണത്തെ റാലിയുടെ പ്രത്യേക ക്രമീകരണങ്ങൾ എന്തെങ്കിലുമുണ്ടോ?
തീർഥാടകരുടെ തിരക്ക് പരിഗണിച്ച് ശനിയാഴ്ച പുലർച്ചെ ഒന്നു മുതൽ തീർഥാടകരെ കടത്തിവിടാൻ തീരുമാനിച്ചിട്ടുണ്ട്. അതിനായി തീർഥാടനം കടന്നുപോകുന്ന പാതകളിലെല്ലാം വെളിച്ചവും സംവിധാനങ്ങളും ക്രമീകരിച്ചിട്ടുണ്ട്. ജില്ലാ ഭരണകൂടവും പൊലിസും ഫയർഫോഴ്സും ആരോഗ്യവകുപ്പും അടക്കമുള്ള വിവിധ വകുപ്പുകളും എല്ലാവിധ സൗകര്യങ്ങളും ഒരുക്കിയിട്ടുണ്ട്. നൂറുകണക്കിനു സന്നദ്ധപ്രവർത്തകരും തയാറാണ്. കെഎസ്ആർടിസി എല്ലാ ഡിപ്പോകളിൽനിന്നും ഇവിടേക്കു തീർഥാടകർക്കായി സ്പെഷൽ സർവീസ് നടത്തുന്നുണ്ട്.
►ജപമാല റാലി നാടിന്‍റെ ഒരു വലിയ പങ്കാളിത്ത സംഭവമായി മാറിയിട്ടുണ്ടല്ലോ. ജാതിമത ഭേദമെന്യേ എല്ലാ വീടുകളിലും തീർഥാടകരെ സ്വീകരിക്കാൻ ഒരുക്കങ്ങളുണ്ടല്ലോ?
തീർച്ചയായും. അഖണ്ഡജപമാല റാലിയെ ആ നാട്ടിലെ ജനത അവരുടെ സ്വന്തമായിട്ടാണ് ഏറ്റെടുത്തിരിക്കുന്നത്. എല്ലാ വീടുകളുംതന്നെ തീർഥാടകർക്കു സൗകര്യങ്ങളൊരുക്കാനും ഭക്ഷണം നൽകാനും വിശ്രമിക്കാൻ ഇടം നൽകാനുമൊക്കെ ആരും പറയാതെതന്നെ സന്നദ്ധരാകുന്നു. ജാതിമത വ്യത്യാസങ്ങൾക്കതീതമായി നാടിന്‍റെ ഒത്തുചേരലിന്‍റെയും ഐക്യത്തിന്‍റെയും പ്രതീകമാണ് അഖണ്ഡ ജപമാല റാലി.
Kerala
തിരുവനന്തപുരം: ആരോഗ്യമേഖല കുത്തഴിഞ്ഞുവെന്ന ആരോപണവുമായി മുൻ ഇടത് മന്ത്രിസഭകളിലെ ആരോഗ്യമന്ത്രിമാർ. കെ. മുരളീധരനെതിരെ രൂക്ഷമായ വിമർശനമാണ് പി.കെ. ശ്രീമതിയും കെ.കെ. ഷൈലജയും വീണ ജോർജും ഉന്നയിച്ചത്.
ആരോഗ്യവകുപ്പിനെ നിസാരമായാണ് മന്ത്രി കണ്ടതെന്ന് പി.കെ. ശ്രീമതി ആരോപിച്ചു. എസ്എംഎ മരുന്നിനെച്ചൊല്ലി ഉയർന്ന വിവാദങ്ങളുടെ പശ്ചാലത്തലത്തിലായിരുന്നു വാർത്താസമ്മേളനം.
എല്ലാവർക്കും അഭിമാനിക്കാവുന്ന നേട്ടങ്ങൾ കഴിഞ്ഞ പത്ത് കൊല്ലം ആരോഗ്യരംഗത്ത് ഉണ്ടായിരുന്നു. മന്ത്രിമാർ മരുന്ന് കമ്പനികളുടെ ഏജന്‍റുമാരെ കാണാൻ പാടില്ല. കമ്പനി പ്രതിനിധികളെ കൂട്ടികൊണ്ട് വന്നത് എസ്എറ്റി സൂപ്രണ്ടാണ്.
ആരോഗ്യമന്ത്രിയുടെ ഭാഗത്ത് നിന്ന് ഒരിക്കലും സംഭവിക്കാൻ പാടില്ലാത്ത കാര്യമാണ്. എൽഡിഎഫ് കാലത്ത് ഒരു ഏജന്‍റും മന്ത്രിമാരെ കണ്ടിട്ടില്ല. പിന്നെ എന്തിനാണ് കെഎംഎസ്‍സിഎൽ എന്നും ശ്രീമതി ചോദിച്ചു. ലാഘവത്തോടെ കൈകാര്യം ചെയ്യാൻ പറ്റുന്ന ഒന്നല്ല ആരോഗ്യ വകുപ്പ് എന്ന് മുരളീധരൻ മനസിലാക്കണമെന്നും പി.കെ. ശ്രീമതി കൂട്ടിച്ചേർത്തു.
Kerala
ചേര്‍ത്തല: കലവൂര്‍ കൃപാസനത്തില്‍നിന്ന് അര്‍ത്തുങ്കല്‍ ബസിലിക്കയിലേക്ക് അഖണ്ഡ ജപമാല മഹാറാലി നാളെ നടക്കും.
മൂന്നര ലക്ഷം വിശ്വാസികൾ പങ്കെടുക്കുന്ന മഹാറാലി 24ന് പുലര്‍ച്ചെ ഒന്നിനാണ് ആരംഭിക്കുന്നത്. കൃപാസനം സ്ഥാപക ഡയറക്ടര്‍ ഫാ. ഡോ. വി.പി. ജോസഫ് വലിയവീട്ടില്‍ റാലിക്ക് ആത്മീയ നേതൃത്വം നല്‍കും. ബ്രദര്‍ ആർ. വിജയകുമാർ കോയമ്പത്തൂർ ഫ്ളാഗ് ഓഫ് ചെയ്യും.
തീരദേശപാതയ്ക്കു സമാന്തരമായി സഞ്ചരിക്കുന്ന റാലി വൈകുന്നേരം ആറിന് അര്‍ത്തുങ്കല്‍ ബസിലിക്കയില്‍ എത്തും. റെക്‌ടർ ഫാ. യേശുദാസ് കാട്ടുങ്കൽതയ്യിൽ റാലിയെ വരവേൽക്കും. തുടർന്ന് ആലപ്പുഴ ബിഷപ് ഡോ. ജയിംസ് റാഫേല്‍ ആനാപറമ്പിൽ സന്ദേശം നല്‍കി സമൂഹബലിയര്‍പ്പിക്കും. നൂറോളം വൈദികർ ചടങ്ങില്‍ പങ്കെടുക്കും.
റാലിയുടെ വിവിധകേന്ദ്രങ്ങളിൽ ശുദ്ധജലവിതരണവും പ്രാഥമികാവശ്യങ്ങൾക്കുള്ള സൗകര്യവും, ആംബുലന്‍സ് സൗകര്യവും ഒരുക്കിയിട്ടുണ്ട്. കളക്‌ടറുടെ നേതൃത്വത്തിൽ വിവിധ വകുപ്പുകളുടെ നേതൃത്വത്തില്‍ റാലിക്കു വേണ്ടിയുള്ള ഒരുക്കങ്ങൾ ഏകോപിപ്പിച്ചിട്ടുണ്ട്.
സംസ്ഥാനത്തിന്‍റെ വിവിധ ഭാഗങ്ങളിൽനിന്ന് കൃപാസനത്തിലേക്ക് കെഎസ്ആർടിസി പ്രത്യേക ബസ് സർവീസ് നടത്തും.
Kerala
പാറശാല: കനത്ത മഴയെ തുടർന്ന് റെയിൽവേ ട്രാക്കിലേക്കു മണ്ണിടിഞ്ഞുവീണ് ട്രെയിനിന്‍റെ എൻജിൻ പാളം തെറ്റി.
വ്യാഴാഴ്ച പുലർച്ചെ രണ്ടരയോടെയാണ് സംഭവം. ബിലാസ്പുർ-തിരുനെൽവേലി എക്സ്പ്രസ് ട്രെയിനാണ് അപകടത്തിൽപ്പെട്ടത്. ട്രാക്കിൽ വീണുകിടന്ന മണ്ണിലേക്ക് ഇടിച്ചുകയറി എൻജിന്‍റെ നാല് ചക്രങ്ങൾ പാളത്തിൽനിന്ന് തെന്നിമാറുകയായിരുന്നു.
എൻജിന് തൊട്ടുപിന്നിലുണ്ടായിരുന്ന കോച്ചുകൾ പാളം തെറ്റാതിരുന്നതും ലോക്കോ പൈലറ്റിന്‍റെ സമയോചിതമായ ഇടപെടലും കാരണം വലിയൊരു ദുരന്തമാണ് ഒഴിവായത്.
യാത്രക്കാർക്ക് ആർക്കും പരിക്കില്ല. ട്രാക്ക് നന്നാക്കുന്നതിന്‍റെ ഭാഗമായി ഈ റൂട്ടിലോടുന്ന ആറ് പാസഞ്ചർ ട്രെയിൻ സർവീസുകൾ റെയിൽവേ പൂർണമായും റദ്ദാക്കി.
ADVERTISEMENT
ADVERTISEMENT
SPACE FOR ADVERTISEMENT
Copyright © 2026, Rashtra Deepika Ltd. All Rights Reserved.
Design and Development 
Corehub Solutions
Contact Numbers :
+91 481 2566706, 2566707, 2566708
About Us Feedback Privacy Policy Terms and Conditions for Online Payment
E-paper LOGIN
LOGIN