Deepika
ADVERTISEMENT
Kerala
തിരുവനന്തപുരം: ചാലയിൽ സ്വർണക്കടയിൽ വൻ കവർച്ച. രണ്ടു കിലോ സ്വർണം കവർന്നതായാണ് പരാതി ഉയർന്നിരിക്കുന്നത്. വൈഷ്ണവി ജ്വല്ലറി ഉടമയിൽനിന്നാണ് സ്വർണം കവർന്നത്.
ജ്വല്ലറി അടച്ച് തിരികെ പോകുന്നതിനിടെയാണ് സംഭവം. ബുള്ളറ്റിലെത്തിയ രണ്ടംഗ സംഘമാണ് കവർച്ച നടത്തിയത്. സംഭവത്തിൽ ഫോർട്ട് പൊലിസ് അന്വേഷണം ആരംഭിച്ചു.
Kerala
തിരുവനന്തപുരം: ലോവർ പ്രൈമറി സ്കൂൾ ടീച്ചർ റാങ്ക് ഹോൾഡേഴ്സ് അസോസിയേഷൻ (എൽപിഎസ്ടി) സെക്രട്ടറിയേറ്റിന് മുന്നിൽ നടത്തുന്ന സമരത്തിനിടെ ഉദ്യോഗാര്‍‌ഥി വളർമതിയെ ആശുപത്രിയിലേക്ക് മാറ്റി. ശാരീരിക അസ്വസ്ഥതകളെ തുടർന്നാണ് വളർമതിയെ ആശുപത്രിയിൽ പ്രവേശിപ്പിച്ചത്. ആരോഗ്യസ്ഥിതി മോശമായതിനെ തുടർന്ന് തീവ്രപരിചരണ വിഭാഗത്തിലാണ് പ്രവേശിപ്പിച്ചിരിക്കുന്നത്. പൊലീസ് ഇടപെട്ടല്ല ഇവരെ ആശുപത്രിയിലേക്ക് മാറ്റിയത്.
അതിനിടെ എൽപിഎസ്ടി സമരവുമായി ബന്ധപ്പെട്ട് പോലീസ് ഒരു കേസ് കൂടി രജിസ്റ്റർ ചെയ്തു. പോലീസ് പൊളിച്ചുനീക്കിയ സമരപ്പന്തലുകൾ പുനഃസ്ഥാപിച്ചതിന് ഡിവൈഎഫ്ഐക്കും എൽപിഎസ്ടി സമരസമിതിക്കും എതിരെയാണ് കേസെടുത്തിരിക്കുന്നത്. കഴിഞ്ഞ ദിവസം രാത്രി പോലീസ് സമരപ്പന്തൽ അഴിച്ചുമാറ്റിയിരുന്നുവെങ്കിലും മണിക്കൂറുകൾക്കകം ഡിവൈഎഫ്ഐയുടെ നേതൃത്വത്തിൽ ഇത് വീണ്ടും കെട്ടുകയായിരുന്നു. പോലീസിനെ തടഞ്ഞതിന് യുവമോർച്ചക്കാർക്കെതിരെയും മറ്റൊരു കേസ് രജിസ്റ്റർ ചെയ്തിട്ടുണ്ട്.
Kerala
കൊച്ചി: എറണാകുളം മഹാരാജാസ് കോളജില്‍ നടന്ന ബിരുദദാന ചടങ്ങിനെത്തിയ ഉന്നതവിദ്യാഭ്യാസ മന്ത്രി റോജി എം. ജോണിനെ തടയുകയും ചടങ്ങ് അലങ്കോലമാക്കുകയും ചെയ്ത കേസില്‍ പ്രതികളായ പത്തു വിദ്യാര്‍ഥികള്‍ക്ക് മുന്‍കൂര്‍ ജാമ്യം. കോളജ് യൂണിയന്‍ ചെയര്‍പേഴ്‌സണ്‍ പ്രണീല്‍രാജ്, വൈസ് ചെയര്‍പേഴ്‌സണ്‍ നഫീസത്തുല്‍ മിസ്രിയ, എസ്എഫ്‌ഐ പ്രവര്‍ത്തകരായ പി.ബി. ബിജോയ്, മുഹമ്മദ് അഫ്രീദ്, പി. അധീന, ജോയല്‍ ബാബു, ആശിഷ് എസ്. ആനന്ദ്, എച്ച്. നന്ദകുമാര്‍, പി.എ. അബ്ദുള്‍ നാസിര്‍, കെ. നവീന്‍ എന്നിവര്‍ക്കാണ് എറണാകുളം പ്രിന്‍സിപ്പല്‍ സെഷന്‍സ് കോടതി ജാമ്യം അനുവദിച്ചത്.
കോളജിലെ ബിരുദദാന ചടങ്ങിനെത്തിയ മന്ത്രിയോടു സംസ്‌കൃത സര്‍വകലാശാലയിലെ വിദ്യാര്‍ഥികളുടെ സസ്‌പെന്‍ഷന്‍ സംബന്ധിച്ച ചോദ്യങ്ങള്‍ ചോദിക്കുക മാത്രമാണു ചെയ്തതെന്നും സമാധാനപരമായാണു പ്രതിഷേധം സംഘടിപ്പിച്ചതെന്നുമായിരുന്നു ഹര്‍ജിക്കാരുടെ വാദം. മന്ത്രി മടങ്ങിയശേഷം തടസമില്ലാതെ ചടങ്ങ് നടക്കുകയും ചെയ്തു. തുടക്കത്തില്‍ ജാമ്യം ലഭിക്കാവുന്ന വകുപ്പുകള്‍ മാത്രം ഉള്‍പ്പെടുത്തി രജിസ്റ്റര്‍ ചെയ്ത കേസില്‍, പിന്നീട് രാഷ്‌ട്രീയ സമ്മര്‍ദത്തെത്തുടര്‍ന്ന് ജാമ്യമില്ലാ വകുപ്പ് ബോധപൂര്‍വം കൂട്ടിച്ചേര്‍ത്തതായും ഹര്‍ജിക്കാര്‍ ചൂണ്ടിക്കാട്ടി.
Kerala
കോട്ടയം: പാറേല്‍ മര്‍ത്ത്മറിയം തീര്‍ഥാടനകേന്ദ്രം കൂദാശയും ബസിലിക്ക പ്രഖ്യാപനവും നവംബർ 21നു നടക്കുമെന്ന് അതിരൂപത വികാരി ജനറാളും റെക്ടറുമായ മോണ്‍. മാത്യു ചങ്ങങ്കരി, അതിരൂപത പിആര്‍ഒ അഡ്വ. ജോജി ചിറയില്‍, ചീഫ് കോ-ഓര്‍ഡിനേറ്റര്‍ ഫാ. ടെജി പുതുവീട്ടില്‍ക്കളം, പള്ളി വികാരി ഫാ. ജേക്കബ് വാരിക്കാട്ട്, ജനറല്‍ കണ്‍വീനര്‍ ഫാ. ഡോ. തോമസ് കറുകക്കളം, പബ്ലിസിറ്റി കണ്‍വീനര്‍ ഫാ. ഡോ. ജോജിന്‍ ഇലഞ്ഞിക്കല്‍ എന്നിവര്‍ പത്രസമ്മേളനത്തില്‍ അറിയിച്ചു.
21ന് ഉച്ചകഴിഞ്ഞ് രണ്ട്: പ്രധാന ദേവാലയമായ മര്‍ത്ത്മറിയം വലിയ പള്ളി കൂദാശ, പ്രഥമ വിശുദ്ധ കുര്‍ബാന. കാര്‍മികന്‍: ആര്‍ച്ച്ബിഷപ് എമരിറ്റസ് മാര്‍ ജോസഫ് പെരുന്തോട്ടം. ബസിലിക്ക പ്രഖ്യാപനം: ആര്‍ച്ച്ബിഷപ് മാര്‍ തോമസ് തറയില്‍. സഹകാര്‍മികരായ ബിഷപ്പുമാർ: മാര്‍ ജോസഫ് കല്ലറങ്ങാട്ട്, തോമസ് മാര്‍ കൂറിലോസ്, ഡോ. തോമസ് ജെ. നെറ്റോ, മാര്‍ തോമസ് ഇലവനാല്‍, ഡോ.സെല്‍വിസ്റ്റര്‍ പൊന്നുമുത്തന്‍, ഡോ. തോമസ് മാര്‍ ഐറേനിയസ്, ഡോ. ജയിംസ് ആനാപറമ്പില്‍, യൂഹാനോന്‍ മാര്‍ തിയോഡേഷ്യസ്, മാര്‍ തോമസ് പാടിയത്ത്, ഡോ. ജസ്റ്റിന്‍ മഠത്തിൽപറമ്പില്‍, മോണ്‍. ആന്‍റണി എത്തയ്ക്കാട്ട്.
22നു രാവിലെ ഏഴ്: പുതിയ കല്‍ക്കുരിശ് ആശീര്‍വാദം കര്‍ദിനാള്‍ മാര്‍ ജോര്‍ജ് ആലഞ്ചേരി. ഉച്ചകഴിഞ്ഞ് 2.30ന് ചന്തക്കടവ് കപ്പേളയില്‍നിന്നും പാറേല്‍ പള്ളിയിലേക്ക് യുവദീപ്തി-എസ് എംവൈഎം നേതൃത്വം നല്‍കുന്ന ജപമാലറാലി. പാറേല്‍ പള്ളിയില്‍ യുവജന സമ്മേളനം.
23ന് രാവിലെ 9.30: കൊടിമരം ആശീര്‍വാദം ബിഷപ് മാര്‍ തോമസ് പാടിയത്ത്. ഉച്ചകഴിഞ്ഞ് 2.30ന് അമലോത്ഭവമാതാപള്ളി കൂദാശ, ആദ്യവിശുദ്ധ കുര്‍ബാന അര്‍പ്പണം- ആര്‍ച്ച്ബിഷപ് മാര്‍ തോമസ് തറയില്‍.
24ന് വൈകുന്നേരം ആറ്: സാംസ്‌കാരിക സമ്മേളനം മുഖ്യാതിഥി: മുഖ്യമന്ത്രി വി.ഡി. സതീശന്‍
25ന് വൈകുന്നേരം ആറ്: നിത്യാരാധനാ ചാപ്പല്‍, കുമ്പസാരക്കൂടുകള്‍ ആശീര്‍വാദം- മുന്‍ അപ്പസ്തോലിക് ന്യൂണ്ഷ്യോ ആര്‍ച്ച്ബിഷപ് മാര്‍ ജോര്‍ജ് കൊച്ചേരി
27ന് വൈകുന്നേരം 4.30: പാറേല്‍ പള്ളിയുടെ സ്ഥാപനത്തിനായി അധ്വാനിച്ച മാര്‍ മാത്യു മാക്കില്‍, മറ്റു പിതാക്കന്മാര്‍, ഫാ. എസ്തഫാനോസ് തയ്യില്‍ സിഎംഐ, മോണ്‍. സിറിയക് കണ്ടങ്കരി, അമ്പിച്ചന്‍ ഇളപ്പുങ്കല്‍ എന്നിവർക്കായി അനുസ്മരണ പ്രാര്‍ഥന.
ഡിസംബര്‍ എട്ട്: ഇടവക മധ്യസ്ഥയായ പരിശുദ്ധകന്യകാ മറിയത്തിന്‍റെ അമലോത്ഭവ തിരുനാള്‍. വൈകുന്നേരം 4.30ന് വിശുദ്ധ കുര്‍ബാന മേജര്‍ ആര്‍ച്ച്ബിഷപ് മാര്‍ റാഫേല്‍ തട്ടില്‍.
ഡിസംബര്‍ 24: ഉച്ചകഴിഞ്ഞ് 2.30ന് എമ്മേ ദ് മിശിഹാ ക്രിപ്റ്റ് ദേവാലയം (ഭൂഗര്‍ഭ കപ്പേള) കൂദാശ, തിരുശേഷിപ്പ് സ്ഥാപിക്കല്‍, വിശുദ്ധ കര്‍ബാന- കര്‍ദിനാള്‍ മാര്‍ ജോര്‍ജ് കൂവക്കാട്.
Kerala
തിരുവനന്തപുരം: വെമ്പായത്തിന് സമീപം കാറും ബൈക്കും കൂട്ടിയിടിച്ച് രണ്ടു പേർ മരിച്ചു. ബൈക്ക് യാത്രികരായ യുവാവും ബന്ധുവുമാണ് മരിച്ചത്. പനവൂർ മൂഴി കുലപ്പള്ളി വിവി ഭവനിൽ രവീന്ദ്രൻ നായരുടെ ഭാര്യ ശോഭന (55), ഇവരുടെ ബന്ധുവായ ഹരികുമാർ (46) എന്നിവരാണ് മരിച്ചത്. വൈകുന്നേരം മൂന്നോടെ പോത്തൻകോട് - വെമ്പായം റോഡിൽ മേലെമുക്കിലായിരുന്നു അപകടം.
വെമ്പായം ഭാഗത്തേക്ക് പോവുകയായിരുന്ന സ്കൂട്ടറും പോത്തൻകോട് ജംഗ്ഷനിലേക്ക് വരികയായിരുന്ന കാറും തമ്മിൽ കൂട്ടിയിടിക്കുകയായിരുന്നു. മറ്റൊരു വാഹനത്തെ ഓവർടേക്ക് ചെയ്യുന്നതിനിടെ നിയന്ത്രണംവിട്ട സ്കൂട്ടർ കാറിലേക്ക് ഇടിച്ച് കയറുകയായിരുന്നു എന്നാണ് പ്രാഥമിക നിഗമനം.
അപകടത്തിൽ ഗുരുതരമായി പരിക്കേറ്റ ഹരികുമാറിനെയും ശോഭനയെയും ഉടൻതന്നെ തിരുവനന്തപുരം മെഡിക്കൽ കോളജ് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. ഹരിയുടെ ഭാര്യ ആശ. മക്കൾ ഹരി പ്രിയ, ആദിത്യൻ. ശോഭനയുടെ മക്കൾ വിഷ്ണുകുമാർ, ആർ.എസ്. വിപിൻ. മൃതദേഹങ്ങൾ മെഡിക്കൽ കോളജ് ആശുപത്രി മോർച്ചറിയിൽ സൂക്ഷിച്ചിരിക്കുകയാണ്.
Kerala
തിരുവനന്തപുരം: എൽപിഎസ്ടി റാങ്ക് ഹോൾഡേഴ്സിന്റെ സെക്രട്ടേറിയറ്റിനു മുന്നിലെ സമരപ്പന്തൽ പൊളിച്ചുമാറ്റിയത് സുപ്രീംകോടതിയുടെ നിർദേശമുള്ളതുകൊണ്ടാണെന്ന് ആഭ്യന്തരമന്ത്രി രമേശ് ചെന്നിത്തല.
പൊലിസിനെതിരേ നിരന്തരമായ കോടതിയലക്ഷ്യ കേസ് വന്നുകൊണ്ടിരിക്കുകയാണ്. അതുകൊണ്ടാണ് പൊലിസ് പന്തൽ പൊളിച്ചുനീക്കിയത്.
സെക്രട്ടേറിയറ്റ് പടിക്കൽ പന്തൽ കെട്ടി സമരം ചെയ്യുന്നതിന് എതിരല്ല. ലോകത്ത് എല്ലായിടത്തും ഇത്തരം സമരം നടക്കുന്നുണ്ട്. സമരത്തിനോട് ഗവണ്‍മെന്‍റിന് ഒരു അലർജിയുമില്ല. സമരങ്ങൾ ചെയ്യുന്നതിനോട് എതിർപ്പുമില്ല.
എല്ലാ ആവശ്യങ്ങളും ഒന്നിച്ചു നടപ്പാക്കാനാവില്ലെന്ന് സമരം ചെയ്യുന്നവർ മനസിലാക്കണമെന്നും ചെന്നിത്തല പറഞ്ഞു.
Kerala
മാര്‍ ജോസഫ് പെരുന്തോട്ടം ആര്‍ച്ച്ബിഷപ്പായിരുന്ന കാലത്താണ് പാറേല്‍ മരിയന്‍ തീര്‍ഥാടനകേന്ദ്രം പുനര്‍നിര്‍മാണം സംബന്ധിച്ച ആലോചനകള്‍ക്ക് തുടക്കംകുറിച്ചതും തീരുമാനമെടുത്തതും. തുടർന്ന് ശിലാസ്ഥാപനം നടത്തിയതും നിര്‍മാണത്തിന്‍റെ ഭൂരിഭാഗം പൂര്‍ത്തീകരിച്ചതും മാര്‍ പെരുന്തോട്ടത്തിന്‍റെ നേതൃത്വത്തിലായിരുന്നു. 21ന് കൂദാശ ചെയ്ത് ബസിലിക്കയായി ഉയര്‍ത്തപ്പെടുമ്പോള്‍ പള്ളി നിര്‍മാണത്തെക്കുറിച്ച് മാര്‍ ജോസഫ് പെരുന്തോട്ടം ദീപികയോടു സംസാരിക്കുന്നു.
? പാറേല്‍ പള്ളിയുടെ അടിസ്ഥാനശില ഫ്രാന്‍സിസ് മാര്‍പാപ്പ വെഞ്ചരിച്ചപ്പോഴുണ്ടായ അനുഭവം
ചങ്ങനാശേരി അതിരൂപതയുടെ പൊതു മരിയന്‍ തീര്‍ഥാടനകേന്ദ്രമായ പാറേല്‍ പള്ളി പുതുക്കിപ്പണിയുമ്പോള്‍ അതിന്‍റെ മൂലക്കല്ല് ഫ്രാന്‍സിസ് മാര്‍പാപ്പയെക്കൊണ്ട് ആശിര്‍വദിപ്പിക്കാന്‍ സാധിച്ചിരുന്നെങ്കില്‍ എന്നാഗ്രഹിച്ചു. ആഗ്രഹം മനസില്‍ സൂക്ഷിച്ച് അതിനുള്ള സാധ്യതകളെക്കുറിച്ച് ആലോചിച്ചു. 2014 നവംബര്‍ 23ന് വത്തിക്കാനിലെ സെന്‍റ് പീറ്റേഴ്‌സ് ബസിലിക്കയില്‍ ചാവറ കുര്യാക്കോസ് ഏലിയാസച്ചന്‍റെയും എവുപ്രാസിയാമ്മയുടെയും വിശുദ്ധപദ പ്രഖ്യാപനകര്‍മത്തില്‍ പങ്കെടുക്കാന്‍ റോമിലെത്തിയപ്പോള്‍ പാപ്പായെക്കൊണ്ട് വെഞ്ചരിപ്പിക്കുന്നതിന് ഒരു കല്ല് തയാറാക്കി കൈയില്‍ കരുതാന്‍ തീരുമാനിച്ചു. തിരുക്കര്‍മങ്ങള്‍ക്കായി വത്തിക്കാന്‍ ബസിലിക്കയിലെത്തിയപ്പോള്‍ തിരുവസ്ത്രങ്ങള്‍ക്കൊപ്പം ഒരു സഞ്ചിയില്‍ കല്ലും കരുതിയിരുന്നു.
പൗരസ്ത്യ സഭാ കാര്യാലയത്തിന്‍റെ തലവന്‍ കര്‍ദിനാള്‍ സാന്ദ്രിപ്പിതാവും മേജര്‍ ആര്‍ച്ച്ബിഷപ് കര്‍ദിനാള്‍ ആലഞ്ചേരിപ്പിതാവും മറ്റ് ഏതാനും മെത്രാന്മാരും അവിടെ സന്നിഹിതരായിരുന്നു. പാപ്പായെക്കൊണ്ട് കല്ല് വെഞ്ചരിപ്പിക്കാനുള്ള ആഗ്രഹം ആലഞ്ചേരിപ്പിതാവിനോടു ഞാന്‍ പറഞ്ഞു. ഞങ്ങള്‍ രണ്ടുപേരുംകൂടി ഇക്കാര്യം കര്‍ദിനാള്‍ സാന്ദ്രിപ്പിതാവുമായി സംസാരിച്ചു. കാര്യം സാധിക്കുന്നത് ബുദ്ധിമുട്ടായിരിക്കുമെന്ന് അദ്ദേഹം പറഞ്ഞു. ഏതായാലും ആഗ്രഹം കൈവെടിയാതെ കല്ല് തോളില്‍ തൂക്കിയിട്ടുകൊണ്ട് ഞാന്‍ തിരുക്കര്‍മങ്ങളില്‍ സംബന്ധിച്ചു. പുറമെ കാപ്പ ധരിച്ചിരുന്നതുകൊണ്ട് കല്ല് ആരും ശ്രദ്ധിച്ചു കാണുകയില്ല. ഞങ്ങള്‍ ഏതാനും മെത്രാന്മാരുടെ ഇരിപ്പിടങ്ങള്‍ തിരുക്കര്‍മങ്ങള്‍ നടക്കുന്ന അള്‍ത്താരയ്ക്കടുത്തായിരുന്നു. തിരുക്കര്‍മങ്ങള്‍ക്കുശേഷം ഏതാനും മെത്രാന്മാരുടെ അടുത്തേക്ക് ഫ്രാന്‍സിസ് പാപ്പാ വന്നു. എന്‍റെയടുത്ത് എത്തിയപ്പോള്‍ സഞ്ചിയില്‍ കരുതിയിരുന്ന കല്ല് ഞാന്‍ മാര്‍പാപ്പയെ കാണിച്ച് ആഗ്രഹം അറിയിച്ചു. പുഞ്ചിരിയോടെ മാര്‍പാപ്പ ശില ആശീര്‍വദിച്ചു. പത്രോസിന്റെ ബസിലിക്കയില്‍വച്ച് അനേകായിരങ്ങളെ സക്ഷിനിര്‍ത്തി മാര്‍പാപ്പ പാറേല്‍ പള്ളിയുടെ അടിസ്ഥാനശില വെഞ്ചരിച്ചപ്പോള്‍ അവാച്യമായ സന്തോഷവും കൃതജ്ഞതയുടെ വികാരങ്ങളുമാണ് അനുഭവപ്പെട്ടത്.
ഇറ്റലിയില്‍ ഉപരിപഠനം നടത്തിക്കൊണ്ടിരുന്ന ചങ്ങനാശേരി അതിരൂപതാംഗമായ ഫാ. സോണി കടന്തോട്, തന്‍റെ സുഹൃത്തായ എന്‍ജിനിയറുടെ സഹായത്തോടെയാണ് ശില സജ്ജമാക്കിയത്. റോമില്‍നിന്ന് ഏകദേശം 50 കിലോമീറ്റർ അകലെയുള്ള ഒരു മലയില്‍ ഇറ്റലിയിലെ ഏറ്റവും പുരാതന മരിയന്‍ തീര്‍ഥാടനകേന്ദ്രത്തോടു ചേര്‍ന്നുള്ള പാറക്കെട്ടില്‍നിന്നു വെട്ടിയെടുത്ത മുപ്പതു കിലോ തൂക്കംവരുന്ന ഒരു കരിങ്കല്ല് കൊത്തിമിനുക്കി 18 സെന്‍റിമീറ്റര്‍ നീളവും 11 സെന്‍റിമീറ്റര്‍ വീതിയുമുള്ള ഇഷ്ടികരൂപത്തിലാക്കിയാണ് വെഞ്ചരിക്കാന്‍ പാകത്തിലാക്കിയത്.
? ശിലാസ്ഥാപനം സംബന്ധിച്ച്
റോമിനടുത്തുള്ള ഒരു പ്രധാന മരിയന്‍ തീര്‍ഥാടനകേന്ദ്രം സ്ഥിതിചെയ്യുന്ന സ്ഥലത്തെ പാറയില്‍നിന്നു കൊത്തിയെടുത്ത്, ഏതു പാറമേലാണോ ഈശോ തന്‍റെ പള്ളി (സഭ) പണിയുമെന്ന് പറഞ്ഞത്, ആ പാറയാകുന്ന പത്രോസിന്റെ പിന്‍ഗാമിയായ ഫ്രാന്‍സിസ് മാര്‍പാപ്പയാല്‍ ആശീര്‍വദിക്കപ്പെട്ട കല്ല്, പാറമേല്‍ സ്ഥാപിക്കപ്പെട്ടിരിക്കുന്ന പ്രസിദ്ധമായ പാറേല്‍ മരിയന്‍ തീര്‍ഥാടനപ്പള്ളിയുടെ മൂലക്കല്ലായിരിക്കുന്നു എന്നത് അര്‍ഥസമ്പുഷ്ടമായ ഒരു ചരിത്രനിയോഗവും ഭാഗ്യപ്പെട്ട സ്മരണയുമായിരിക്കുന്നു. അതിരൂപതയുടെ മുഴുവന്‍ പ്രാതിനിധ്യം കണക്കിലെടുത്ത് അടിസ്ഥാനശിലകളായി 15 കല്ലുകളാണ് സ്ഥാപിച്ചിരിക്കുന്നത്.
? പ്ലാന്‍ തയാറാക്കലും ഫണ്ട് സമാഹരണവും
തീര്‍ഥാടകര്‍ക്കു വേണ്ട എല്ലാ സൗകര്യങ്ങളും പുതിയ പള്ളിയില്‍ ക്രമീകരിക്കുംവിധമാണ് പ്ലാനും എസ്റ്റിമേറ്റും സജ്ജമാക്കിയത്. ശാന്തമായി ധ്യാനിക്കാനും പ്രാര്‍ഥിക്കാനുമുള്ള എല്ലാ സൗകര്യങ്ങളും ഏര്‍പ്പെടുത്തിയിട്ടുണ്ട്. പള്ളിക്കുള്ളിലെ വിശുദ്ധ കലകളും ദിവ്യാലങ്കാരങ്ങളും ഭൂഗര്‍ഭ കപ്പേളയും സജ്ജീകരിച്ചിരിക്കുന്നത് ദൈവികരഹസ്യങ്ങളുടെ ആഘോഷവേദിയായ ഈ തീര്‍ഥാടനപ്പള്ളി സ്വര്‍ഗീയാനുഭവത്തിലേക്ക് ഭക്തജനങ്ങളെ ആനയിക്കാന്‍ സഹായിക്കണം എന്ന ലക്ഷ്യത്തോടെയാണ്. അതിരൂപതാംഗങ്ങള്‍ക്കെല്ലാം സ്വന്തം എന്നു തോന്നത്തക്കവിധമുള്ള ഒരു അടുപ്പവും ബന്ധവും ഈ തീര്‍ഥാടന കേന്ദ്രത്തോടുണ്ടാകണം എന്ന ലക്ഷ്യത്തോടെ മുഴുവന്‍ ഇടവകകളിലെയും വിശ്വാസീസമൂഹം മനസോടെ നല്‍കിയ സംഭാവനകളിലൂടെയാണ് പള്ളിനിര്‍മാണം പൂര്‍ത്തിയാക്കുന്നത്.
? പള്ളിപണിക്കിടെയുണ്ടായ തടസങ്ങള്‍
നിര്‍മാണം ഏഴു വര്‍ഷംകൊണ്ട് പൂര്‍ത്തിയാക്കാമെന്നാണ് കരുതിയിരുന്നത്. 2018ലെ മഹാമാരിയും 2021 കാലഘട്ടത്തിലെ കോവിഡും പള്ളിപണിയെ മന്ദഗതിയിലാക്കി. സംഭാവനകള്‍ തടസപ്പെട്ടു. സാധനസാമഗ്രികളുടെയും തൊഴിലാളികളുടെയും ലഭ്യതയ്ക്ക് തടസം നേരിട്ടു. ഈ തടസങ്ങള്‍ ഇല്ലായിരുന്നെങ്കില്‍ നിര്‍മാണം കുറച്ചുകൂടി നേരത്തേ തീരുമായിരുന്നു. എന്നാല്‍ ഇത്രയേറെ ബൃഹത്തായ നിര്‍മാണത്തിന് കൂടുതല്‍ സമയം എടുത്തെന്നും പറയാനാകില്ല. ഇപ്പോള്‍ നിര്‍മാണം പൂര്‍ത്തിയാക്കി കൂദാശ ചെയ്യപ്പെടുമ്പോള്‍ മനസില്‍ വലിയ സന്തോഷം. ബസിലിക്കയായി ഉയര്‍ത്തപ്പെടുന്നത് ധന്യനിമിഷമാണ്.
Kerala
ഹരിപ്പാട് /ആലപ്പുഴ: കരുവാറ്റ ശിവൻകുട്ടി ചെട്ടിയാർ വധക്കേസിൽ ഹരിപ്പാട് പൊലിസ് 740 പേജുള്ള അന്തിമ കുറ്റപത്രം സമർപ്പിച്ചു.
ആലപ്പുഴ ജില്ലാ ജുവനൈൽ ജസ്റ്റിസ് ബോർഡിനു മുന്നിൽ ഓൺലൈൻ വഴിയാണ് കുറ്റപത്രം ഫയൽ ചെയ്തത്.
കൊലപാതകം നേരിട്ടു നടപ്പാക്കിയ 16 വയസ് പൂർത്തിയായ ഒന്നു മുതൽ മൂന്ന് വരെയുള്ള ആൺകുട്ടികളെ മുതിർന്നവരായി പരിഗണിച്ച് വിചാരണ നടത്തണമെന്ന നിർണായക ശിപാർശയും അന്വേഷണസംഘം ബോർഡിനു മുന്നിൽ വെച്ചിട്ടുണ്ട്.
കൊല്ലപ്പെട്ട ശിവൻകുട്ടി ചെട്ടിയാരുടെ ബന്ധുവായ 13 വയസുകാരിയും, കൊല്ലം സ്വദേശികളായ മൂന്ന് ആൺകുട്ടികളും ഉൾപ്പെടെ നാല് കുട്ടികളാണ് കേസിലുള്ളത്.
Kerala
കൊച്ചി: കേരളത്തിന്‍റെ വികസനപ്രക്രിയയിൽ പ്രവാസി മലയാളികൾ വഹിക്കുന്ന പങ്ക് പ്രധാനമാണെന്നു മന്ത്രി അനൂപ് ജേക്കബ്.
ഇംഗ്ലണ്ടിലെ ബേസിംഗ് സ്റ്റോക്ക് ഡെപ്യൂട്ടി മേയറായി തെരഞ്ഞെടുക്കപ്പെട്ട മലയാളി സജീഷ് ടോമിന് കേരള കത്തോലിക്കാ സഭയുടെ ആസ്ഥാനമായ പാലാരിവട്ടം പിഒസിയില്‍ നൽകിയ സ്നേഹാദരം പരിപാടി ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം.
വരാപ്പുഴ സഹായമെത്രാന്‍ ഡോ. ആന്‍റണി വാലുങ്കല്‍ അധ്യക്ഷത വഹിച്ചു. ബിഷപ്പും ഫാ. ജോസ് ഇടശേരിയും ചേർന്ന് സജീഷ് ടോമിനു മംഗളപത്രം സമർപ്പിച്ചു.
എറണാകുളം-അങ്കമാലി അതിരൂപത പ്രൊക്യുറേറ്റർ ഫാ. തോമസ് വൈക്കത്തുപറന്പിൽ, കെസിബിസി ഡെപ്യൂട്ടി സെക്രട്ടറി ഫാ. തോമസ് തറയിൽ, സിഎൽ‌സി സംസ്ഥാന പ്രസിഡന്‍റ് സജു തോമസ്, സി.ഡി. രാജു, സംഘാടകസമിതി ഭാരവാഹികളായ ജോജോ മനക്കിൽ, സിജോ പൈനാടത്ത്, പി.എൽ. അനിൽ, സീന തായങ്കേരി, അനിൽ പാലത്തിങ്കൽ എന്നിവർ പ്രസംഗിച്ചു.
സംസ്ഥാന, രൂപത തലങ്ങളിൽ സിഎൽസിയിൽ പ്രവർത്തിച്ച വൈദിക, അല്മായ പ്രതിനിധികൾ പങ്കെടുത്തു. ഇംഗ്ലണ്ടിൽ ഒരേസമയം കൗണ്ടി, ബറോ കൗണ്‍സിലുകളിൽ അംഗമാകുന്ന ആദ്യ മലയാളിയാണു സജീഷ് ടോം.
Kerala
കൊച്ചി: കൊച്ചി കായലിലെ സൗന്ദര്യം ഇനി ഹൗസ്ബോട്ടിലൂടെയും ആസ്വദിക്കാം. രാത്രിയിൽ ഉറങ്ങാനുള്ള സൗകര്യം ഉൾപ്പടെയുള്ള ഹൗസ്ബോട്ട് ഇതാദ്യമായാണു സർവീസിനൊരുങ്ങുന്നത്.
എട്ട് ബെഡ്‌റൂമുകളും വിശാലമായ കോൺഫറൻസ് ഹാളുമുള്ള സൺറൈസ് ഹൗസ്ബോട്ട് ഇന്നു വൈകുന്നേരം അഞ്ചിന് മറൈൻ ഡ്രൈവിലെ കൊച്ചിൻ ബോട്ട് ക്ലബ് ജെട്ടിയിൽ മുഖ്യമന്ത്രി വി.ഡി. സതീശൻ ഉദ്ഘാടനം ചെയ്യും.
ഡേ പാക്കേജ്, ഡിന്നർ പാക്കേജ് എന്നിവ ലഭ്യമാണ്. ഗ്രീനിക്സ് എക്സ്പീരിയൻസ് പ്രൈവറ്റ് ലിമിറ്റഡാണു സൺറൈസ് എന്നപേരിൽ ലക്ഷ്വറി ഹൗസ്ബോട്ട് അവതരിപ്പിക്കുന്നത്.
Kerala
കണ്ണൂർ: ടി.പി. ചന്ദ്രശേഖരൻ വധക്കേസ് പ്രതി മുഹമ്മദ് ഷാഫി വീണ്ടും പരോളിലിറങ്ങി. ഹൈക്കോടതി കഴിഞ്ഞദിവസം 15 ദിവസത്തെ പരോൾ അനുവദിച്ചതിനെത്തുടർന്നാണ് ഷാഫി ഇന്നലെ കണ്ണൂർ സെൻട്രൽ ജയിലിൽനിന്നു പുറത്തിറങ്ങിയത്.
കുഞ്ഞിനെ കാണാൻ പരോൾ അനുവദിക്കണമെന്ന് ആവശ്യപ്പെട്ടുള്ള ഷാഫിയുടെ അപേക്ഷ നേരത്തെ സെൻട്രൽ ജയിൽ അധികൃതർ തള്ളിയിരുന്നു. ക്രമസമാധാന പ്രശ്നങ്ങൾ ചൂണ്ടിക്കാട്ടിയാണ് അപേക്ഷ തള്ളിയത്. ഇതേത്തുടർ‌ന്നാണു ഹൈക്കോടതിയെ സമീപിച്ചത്. കഴിഞ്ഞ ഡിസംബറിലും ഷാഫിക്കു പരോൾ അനുവദിച്ചിരുന്നു.
Kerala
പുത്തന്‍കുരിശ്: കാലം ചെയ്ത ശ്രേഷ്ഠ കാതോലിക്ക ബസേലിയോസ് തോമസ് പ്രഥമന്‍ ബാവായുടെ സ്മരണാര്‍ഥം ഏര്‍പ്പെടുത്തിയ ശ്രേഷ്ഠ ബാവാ പുരസ്‌കാരത്തിന് നടൻ മമ്മൂട്ടി അർഹനായി.
സമൂഹത്തിന്‍റെ നന്മയ്ക്കും പുരോഗതിക്കും നല്‍കുന്ന സംഭാവനകള്‍ കണക്കിലെടുത്താണ് ശ്രേഷ്ഠ ബാവാ പുരസ്കാരം നല്‍കുന്നത്.
സാമ്പത്തികമായി പിന്നാക്കം നില്‍ക്കുന്നവരുടെ ആരോഗ്യപരവും വിദ്യാഭ്യാസപരവുമായ ഉന്നമനത്തിനുവേണ്ടി കെയര്‍ ആൻഡ് ഷെയര്‍ ഇന്‍റര്‍നാഷണല്‍ ഫൗണ്ടേഷന്‍ നടത്തുന്ന പ്രവർത്തനങ്ങൾ, ഹൃദ്‌രോഗികളായ കുട്ടികള്‍ക്ക് ആവശ്യമായ സഹായം നല്‍കുന്ന ഹൃദയസ്പര്‍ശം പദ്ധതി, മാതാപിതാക്കള്‍ നഷ്‌ടപ്പെട്ടതും രോഗാവസ്ഥയിലുമുള്ള കുട്ടികളുടെ ഉന്നമനം, ഉന്നത വിദ്യാഭ്യാസത്തിനുള്ള സഹായം എന്നിവ മുൻനിർത്തിയാണ് പുരസ്കാരം നൽകുന്നത്.
Kerala
തിരുവനന്തപുരം: കേരളത്തിന് നാഷണൽ തെർമൽ പവർ കോർപറേഷനിൽ (എൻടിപിസി) നിന്ന് ഡിസംബർ മുതൽ വൈദ്യുതി ലഭിച്ചു തുടങ്ങും. യൂണിറ്റിന് 5.40 രൂപ നിരക്കിലാണ് എൻടിപിസി വൈദ്യുതി നൽകുന്നത്.
ഡിസംബർ- ജനുവരിയിൽ മാസങ്ങളിൽ എൻടിപിസിയിൽ നിന്ന് 270 മെഗാവാട്ട് വൈദ്യുതി കേരളത്തിന് ലഭിക്കും. ഫെബ്രുവരി മുതൽ 540 മെഗാവാട്ടും സംസ്ഥാനത്തിന് നൽകുന്നത്. ഇക്കാര്യം എൻടിപിസി സംസ്ഥാന സർക്കാരിനെ അറിയിച്ചു.
ഇതോടെ, സംസ്ഥാനത്തെ വൈദ്യുതി പ്രതിസന്ധി പരിഹരിക്കാൻ കുറഞ്ഞ നിരക്കിൽ സിന്നാർ വൈദ്യുതി ലഭിക്കുമെന്ന് ഉറപ്പായി. സംസ്ഥാനം ഉയർന്ന നിരക്കിൽ വൈദ്യുതി വാങ്ങാനുള്ള തീരുമാനവും വൈദ്യുതി വിതരണത്തിലെ സ്വകാര്യ ഓണ്‍ലൈൻ പ്ലാറ്റ് ഫോമായ ജിഎൻഎയിൽ നിന്ന് യൂണിറ്റിന് 8.63, 8.90 രൂപ നിരക്കിൽ വൈദ്യുതി വാങ്ങാനുള്ള തീരുമാനവും ഏറെ വിവാദങ്ങൾക്ക് ഇട നൽകിയിരുന്നു. ഹിമാചൽപ്രദേശിൽ നിന്ന് പവർ ട്രേഡിംഗ് കോർപറേഷൻ എന്ന ഇടനിലക്കാർ വഴി 14.50 രൂപ നിരക്കിൽ വൈദ്യുതി വാങ്ങാനുള്ള തീരുമാനം ഏറെ വിവാദങ്ങൾക്ക് ഇടയാക്കിയിരുന്നു.
സംസ്ഥാനം ഇരുട്ടിലേക്കു നീങ്ങുമെന്നും ഉടൻ വൈദ്യുതി വാങ്ങണമെന്നുമുള്ള കെഎസ്ഇബി അപേക്ഷ മുഖ്യമന്ത്രി തള്ളിയിരുന്നു. ബോർഡ് സമർപ്പിച്ച അപേക്ഷയിൽ ഹിമാചലിൽ നിന്ന് ഇടനിലക്കാർ വഴി 14.5 രൂപ നിരക്കിലും സ്വകാര്യ ഓണ്‍ലൈൻ വൈദ്യുതി വിതരണ പ്ലാറ്റ്ഫോമായ ജിഎൻഎയിൽ നിന്ന് 8.63, 8.9 രൂപ നിരക്കുകളിൽ വൈദ്യുതി വാങ്ങാമെന്നായിരുന്നു കെഎസ്ഇബി സർക്കാരിനെ അറിയിച്ചത്. ഇതെല്ലാം മുഖ്യമന്ത്രി തള്ളിയിരുന്നു. വൈദ്യുതി മന്ത്രി സണ്ണി ജോസഫും മുഖ്യമന്ത്രി വി.ഡി. സതീശനും തമ്മിലുള്ള തർക്കത്തിനും ഇത് ഇടയാക്കി.
കുറഞ്ഞ നിരക്കിൽ ഹ്രസ്വ- ദീർഘകാല അടിസ്ഥാനത്തിൽ വൈദ്യുതി എത്തിക്കാൻ ചർച്ചകൾ നടന്നു വരുന്നതായി മുഖ്യമന്ത്രി കഴിഞ്ഞ ദിവസം പറഞ്ഞിരുന്നു. മുഖ്യമന്ത്രിയും എൻടിപിസി ചെയർമാനുമായി ഡൽഹിയിൽ കഴിഞ്ഞ ഒക്ടോബർ ആറിന് വൈദ്യുതി വാങ്ങൽ സംബന്ധിച്ച് ചർച്ച നടത്തിയിരുന്നു. കേരളത്തിനു കൂടുതൽ വൈദ്യുതി വിഹിതം അനുവദിക്കണമെന്ന് മുഖ്യമന്ത്രി ആവശ്യപ്പെട്ടു. ഈ ചർച്ചയുടെ തുടർച്ചയായാണ് എൻടിപിസിയുടെ ഇപ്പോഴത്തെ തീരുമാനം.
Kerala
കാഞ്ഞങ്ങാട്: നിരവധി കേസുകളിലെ പിടികിട്ടാപ്പുള്ളിയെ കര്‍ണാടക മൈസൂരു ഹുന്‍സൂറില്‍നിന്നു പൊലിസ് പിടികൂടി. ചെറുവത്തൂര്‍ കാടങ്കോട് സ്വദേശി സി.എച്ച്. മുത്തലിബ് ആണ് പിടിയിലായത്. ഇയാള്‍ കേരളത്തിലെ വിവിധ പൊലിസ് സ്റ്റേഷനുകളിലായി ബലാത്സംഗം, പോക്‌സോ, വീസ തട്ടിപ്പ്, സ്ത്രീപീഡനം, അടിപിടി, വഞ്ചന തുടങ്ങിയ നിരവധി കേസുകളില്‍ പ്രതിയാണ്. പല കേസുകളിലും കോടതി പിടികിട്ടാപ്പുള്ളിയായി പ്രഖ്യാപിക്കുകയും ചെയ്തിരുന്നു.
ജില്ലാ പൊലിസ് മേധാവി പി. നിധിന്‍രാജിന്‍റെ നിര്‍ദേശപ്രകാരം കാഞ്ഞങ്ങാട് ഡിവൈഎസ്പി എം.വി. അനില്‍കുമാറിന്‍റെ നേതൃത്വത്തില്‍ പ്രത്യേകമായി രൂപവത്കരിച്ച ലോംഗ് പെന്‍ഡിംഗ് കേസ് സ്‌ക്വാഡാണ് പ്രതിയെ അതിവിദഗ്ധമായി പിടികൂടിയത്. പൊലിസിന്‍റെ നിരീക്ഷണത്തില്‍ പെടാതിരിക്കാന്‍ പ്രതി 26 മൊബൈല്‍ നമ്പറുകള്‍ ഉപയോഗിച്ചിരുന്നതായി അന്വേഷണസംഘം കണ്ടെത്തി.
Kerala
തിരുവനന്തപുരം: ഫുട്ബോള്‍ താരം മെസിയെയും അർജന്‍റൈൻ ടീമിനെയും കേരളത്തിലെത്തിക്കാമെന്ന പേരിൽ തട്ടിപ്പു നടത്തിയെന്ന കേസിൽ മുന്‍ കായികമന്ത്രി വി. അബ്ദുറഹ്‌മാനെതിരേ പ്രോസിക്യൂഷൻ അനുമതി. അബ്ദുറഹ്‌മാനെ അഴിമതിതടയൽ നിയമപ്രകാരം പ്രോസിക്യൂട്ട് ചെയ്യാൻ ഗവര്‍ണർ അനുമതി നൽകി. അബ്ദുറഹ്‌മാനും റിപ്പോർട്ടർ ചാനൽ ഉടമ ആന്‍റോ അഗസ്റ്റിനുമടക്കം നാലുപേരുമാണ് കേസിലെ പ്രതികള്‍.
റിപ്പോർട്ടർ ബ്രോഡ്കാസ്റ്റിംഗ് കമ്പനിക്ക് അന്യായമായ സാമ്പത്തിക ലാഭമുണ്ടാക്കാൻ അബ്ദുറഹ്‌മാൻ ഔദ്യോഗിക പദവി ദുരുപയോഗം ചെയ്തെന്നാണ് എസ്ഐടി കണ്ടെത്തൽ.
നേരത്തേ സർക്കാരും മുഖ്യമന്ത്രിയും അനുമതി തേടി രാജ്ഭവനു കൈമാറിയ ഫയലിലാണ് ഗവർണറുടെ സുപ്രധാന തീരുമാനം. മുൻ ഗവർണർ രാജേന്ദ്ര അർലേക്കറുടെ ഭരണകാലത്താണ് വി. അബ്ദുറഹ്‌മാനെ പ്രോസിക്യൂട്ട് ചെയ്യാനുള്ള അനുമതി തേടി സർക്കാർ രാജ്ഭവനെ സമീപിച്ചിരുന്നത്. എന്നാൽ, സ്ഥാനം ഒഴിയുന്നതുവരെ ഫയലിൽ അദ്ദേഹം തീരുമാനമെടുത്തിരുന്നില്ല. തുടർന്ന് പുതിയ ഗവർണറായി ചുമതലയേറ്റ ഓംപ്രകാശ് മാഥുർ വിഷയം പരിശോധിക്കുകയും നിയമോപദേശം തേടുകയുമായിരുന്നു.
ഗവർണറുടെ പ്രോസിക്യൂഷൻ അനുമതി ലഭിച്ചതോടെ വി. അബ്ദുറഹ്‌മാനെ കേസിൽ പ്രതിചേർക്കാനും ചോദ്യംചെയ്യൽ, അറസ്റ്റ് അടക്കമുള്ള നിയമനടപടികളുമായി മുന്നോട്ടു പോകാനും പ്രത്യേക അന്വേഷണ സംഘത്തിനു സാധിക്കും. വിശദമായ അന്വേഷണത്തിനു ശേഷം എസ്ഐടി സമർപ്പിച്ച റിപ്പോർട്ടിൽ വി. അബ്ദുറഹ്‌മാൻ, റിപ്പോർട്ടർ ബ്രോഡ്കാസ്റ്റിംഗ് കമ്പനി ഉടമ ആന്‍റോ അഗസ്റ്റിൻ, യു. ഷറഫലി, സി. സത്യപാലൻ എന്നിവരെ പ്രതിചേർക്കുന്നതിനാണ് അനുമതി തേടിയിരുന്നത്. കേസിൽ ആഭ്യന്തര വകുപ്പിന്‍റെ അനുമതി മാത്രം മതിയെന്ന് ഡയറക്ടർ ജനറൽ ഓഫ് പ്രോസിക്യൂഷൻ നിർദേശിച്ചിരുന്നെങ്കിലും, കൂടുതൽ നിയമോപദേശത്തിന്‍റെ അടിസ്ഥാനത്തിലാണ് രാജ്ഭവന്‍റെ അനുമതി തേടിയത്.
മാനദണ്ഡങ്ങളും കൃത്യമായ നടപടിക്രമങ്ങളും ലംഘിച്ച് അനധികൃതമായി ടെൻഡർ നൽകി റിപ്പോർട്ടർ ബ്രോഡ്കാസ്റ്റിംഗ് കമ്പനിക്ക് സ്പോൺസർഷിപ്പ് അനുവദിച്ചു, വകുപ്പുകളെ ഇരുട്ടിൽ നിർത്തി, ഔദ്യോഗിക പദവിയും സർക്കാർ രേഖകളും ദുരുപയോഗം ചെയ്തു തുടങ്ങി നിരവധി ഗുരുതരമായ വീഴ്ചകളാണ് എസ്ഐടി അന്വേഷണത്തിൽ കണ്ടെത്തിയത്. ഇതോടൊപ്പം ജിഎസ്ടി തട്ടിപ്പും കോടികളുടെ ക്രമക്കേടും നടന്നതായി എസ്ഐടി വിലയിരുത്തിയിട്ടുണ്ട്.
അതേസമയം, മന്ത്രി ആവശ്യപ്പെട്ട പ്രകാരമാണ് സ്പോൺസർഷിപ്പ് റിപ്പോർട്ടർ കമ്പനിക്കു നൽകിയതെന്ന് മുൻ പ്രൈവറ്റ് സെക്രട്ടറി സി. സത്യപാലൻ പ്രത്യേക അന്വേഷണസംഘത്തിനു മൊഴി നൽകിയിരുന്നു.
Kerala
തിരുവനന്തപുരം: വി.ഡി. സതീശൻ സർക്കാർ അധികാരത്തിലേറി ആറു മാസത്തോളമെത്തുന്പോൾ ബോർഡ്- കോർപറേഷൻ അധ്യക്ഷന്മാർ അടക്കമുള്ള സർക്കാർ പദവികൾ സം ബന്ധിച്ച് യുഡിഎഫിൽ ഏകദേശ ധാരണയായി.
ബോർഡ്- കോർപറേഷനുകളും അർധ ജുഡീഷ്യൽ അധികാരമുള്ള കമ്മിഷനുകളും മറ്റു പദവികളും അടക്കമുള്ള 200ഓളം പദവികളിൽ കോണ്ഗ്രസും മുസ്‌ലിം ലീഗും തമ്മിൽ ധാരണയിലെത്തി. ഇതിൽ ലീഗിന് 32 അധ്യക്ഷസ്ഥാനങ്ങളാണു ലഭിക്കുക.
ബോർഡ്, കോർപറേഷനുകൾ അടങ്ങിയ 102 സ്ഥാപനങ്ങളിൽ കോണ്ഗ്രസിന് 60 സ്ഥാപനങ്ങളിൽ അധ്യക്ഷപദവി ലഭിക്കും.
മുസ്‌ലിം ലീഗിന് 22 എണ്ണമാണ് ധാരണയിലുള്ളത്. കേരള കോണ്ഗ്രസ്, ആർഎസ്പി, സിഎംപി എന്നിവ അടക്കമുള്ള മറ്റു ഘടകകക്ഷികൾക്ക് നൽകുന്ന സ്ഥാനങ്ങളുടെ എണ്ണത്തിൽ അന്തിമ തീരുമാനമായിട്ടില്ല.
ആർഎസ്പിക്കു നാല് സ്ഥാപനങ്ങളിൽ അധ്യക്ഷപദമാണ് വാഗ്ദാനം ചെയ്തിട്ടുള്ളത്. കാപ്പക്സ്, കില, രണ്ട് ക്ഷേമനിധി ബോർഡുകൾ എന്നിവയാണവ. എന്നാൽ, ആർഎസ്പിക്ക് കൂടുതൽ പദവികൾ ആവശ്യപ്പെട്ട് മന്ത്രിയും പാർട്ടി സംസ്ഥാന സെക്രട്ടറിയുമായ ഷിബു ബേബി ജോണ് മുഖ്യമന്ത്രിക്കു കത്ത് നൽകി. അസോസിയേറ്റ് അംഗപദവിയിലുള്ള ആർഎംപി, മാണി സി. കാപ്പന്‍റെ കെഡിപി എന്നിവയ്ക്ക് പദവി നൽകുമോയെന്ന് വ്യക്തമല്ല.
ഏതു പാർട്ടിയാണോ വകുപ്പ് ഭരിക്കുന്നത്, അതിനു കീഴിലുള്ള സ്ഥാപനങ്ങൾ പ്രധാനമായും ആ പാർട്ടിക്ക് എന്നതാണ് പദവി സംബന്ധിച്ച പൊതു മാനദണ്ഡം. എന്നാൽ, കൃത്യമായി ഇതു പാലിക്കാനാകില്ല. മുൻകാലങ്ങളിൽ ഏതു പാർട്ടിയാണോ അവ കൈകാര്യം ചെയ്തത് എന്നതും പരിശോധിക്കുന്നുണ്ട്. അധ്യക്ഷസ്ഥാന വിഭജനത്തിന്‍റെ പിന്നാലെ സ്ഥാപനങ്ങളുടെ ഭരണസമിതി അംഗങ്ങളെയും ഓരോ കക്ഷിക്കുമായി വിഭജിച്ചു നൽകും.
ആയിരത്തോളം സ്ഥാനങ്ങൾ ഈ വിഭാഗത്തിൽ വരുമെന്നാണ് കണക്കാക്കുന്നത്. ബോർഡ്, കോർപറേഷന് പുറമെ അക്കാദമി, അർധജുഡീഷ്യൽ സ്ഥാപനങ്ങൾ, ഇൻസ്റ്റിറ്റ്യൂട്ടുകൾ, കമ്മിഷനുകൾ, മിഷനുകൾ തുടങ്ങി വിവിധ വിഭാഗങ്ങളിലായാണ് സ്ഥാപനങ്ങളുള്ളത്.
മുഖ്യമന്ത്രിയെ കണ്ട് മന്ത്രിമാർ, ബോർഡ് വിഭജനം ചർച്ചയായി
തിരുവനന്തപുരം: ജിഎന്‍എ വൈദ്യുതി വിവാദങ്ങള്‍ക്കിടെ മുഖ്യമന്ത്രി വി.ഡി . സതീശനുമായി കൂടിക്കാഴ്ച നടത്തി മന്ത്രിമാരായ രമേശ് ചെന്നിത്തലയും സണ്ണി ജോസഫും.
മുഖ്യമന്ത്രിയുടെ ഔദ്യോഗിക വസതിയായ ക്ലിഫ് ഹൗസിലായിരുന്നു കൂടിക്കാഴ്ച. ബോര്‍ഡ്, കോര്‍പറേഷന്‍ നിയമന ചര്‍ച്ചകളുടെ ഭാഗമായായിരുന്നു കൂടിക്കാഴ്ച. ജിഎന്‍എ വൈദ്യുതി കരാറുമായി ബന്ധപ്പെട്ടുണ്ടായ വിവാദങ്ങളും ചര്‍ച്ചയായി. കരാര്‍ ഉപേക്ഷിച്ചതോടെ പരസ്യചര്‍ച്ചകള്‍ ഒഴിവാക്കാനാണ് ധാരണ.
Kerala
പുത്തന്‍കുരിശ്: മലങ്കര സഭയുടെ ചരിത്രപ്രസിദ്ധമായ മുളന്തുരുത്തി സുന്നഹദോസിന്‍റെ 150-ാം വാര്‍ഷികാഘോഷങ്ങളുടെ ഭാഗമായി ഇന്ന് യാക്കോബായ സുറിയാനി സഭ ക്രമീകരിച്ചിട്ടുള്ള വിശുദ്ധ മൂറോന്‍ കൂദാശയും യാക്കോബായ സുറിയാനി ക്രിസ്ത്യാനി അസോസിയേഷനും ഇഗ്നാത്തിയോസ് അപ്രേം ദ്വിതീയന്‍ പാത്രിയര്‍ക്കീസ് ബാവയുടെ നേതൃത്വത്തില്‍ നടക്കും.
ഇന്നലെ വൈകുന്നേരം പാത്രിയര്‍ക്കീസ് ബാവയുടെയും ശ്രേഷ്ഠ കാതോലിക്ക ബസേലിയോസ് മാർ ജോസഫ് ബാവയുടെയും നേതൃത്വത്തിലും മെത്രാപ്പോലീത്താമാരുടെ സാന്നിധ്യത്തിലും പുത്തന്‍കുരിശ് മാര്‍ അത്തനേഷ്യസ് കത്തീഡ്രലില്‍ സന്ധ്യാപ്രാര്‍ഥനയും തുടര്‍ന്ന് വിശുദ്ധ മൂറോന്‍ കൂദാശയുടെ പ്രാരംഭ കര്‍മങ്ങളും നടന്നു.
ഇന്ന് രാവിലെ രാവിലെ ഏഴിന് പ്രഭാത പ്രാര്‍ഥന. തുടര്‍ന്ന് 7.45ന് പാത്രിയര്‍ക്കീസ് ബാവയും ശ്രേഷ്ഠ കാതോലിക്കയും മെത്രാപ്പോലീത്തമാരും പ്രദക്ഷിണമായി പാത്രിയര്‍ക്കാ സെന്‍ററില്‍നിന്ന് വിശുദ്ധ മദ്ബഹയിലേക്ക് പ്രവേശിക്കും. എട്ടിന് വിശുദ്ധ മൂറോന്‍ കൂദാശ ആരംഭിക്കും. ഇതിന്‍റെ സമാപനത്തിൽ വിശുദ്ധ കുര്‍ബാന.
ഉച്ചകഴിഞ്ഞ് രണ്ടിന് ശ്രേഷ്ഠ കാതോലിക്ക ബാവയുടെ അധ്യക്ഷതയില്‍ കൂടുന്ന യാക്കോബായ സുറിയാനി ക്രിസ്ത്യാനി അസോസിയേഷന്‍ യോഗം പാത്രിയര്‍ക്കീസ് ബാവ ഉദ്ഘാടനം ചെയ്യും.
തുടർന്ന് ഉച്ചകഴിഞ്ഞ് മൂന്നിന് മുളന്തുരുത്തി സുന്നദോസിന്‍റെ 150-ാം വാര്‍ഷികാഘോഷങ്ങളുടെ ഭാഗമായുള്ള പൊതുസമ്മേളനം മുഖ്യമന്ത്രി വി.ഡി. സതീശന്‍ ഉദ്ഘാടനം ചെയ്യും.
Kerala
തിരുവനന്തപുരം: 2027 ജനുവരി 1 യോഗ്യതാ തീയതിയായ സംക്ഷിപ്ത വോട്ടര്‍ പട്ടിക പുതുക്കലിന്‍റെ ഭാഗമായുള്ള കരട് വോട്ടര്‍ പട്ടിക കേരളത്തില്‍ പ്രസിദ്ധീകരിച്ചു.
ബന്ധപ്പെട്ട ഇആര്‍ഒ ഓഫിസുകളിലും കളക്ടറേറ്റുകളിലും ബിഎല്‍ഒമാരുടെ പക്കലും മുഖ്യതെരഞ്ഞെടുപ്പ് ഓഫിസറുടെ വെബ്സൈറ്റിലും പട്ടിക ലഭ്യമാണ്.
കരട് വോട്ടര്‍ പട്ടിക ദേശീയ പാര്‍ട്ടികള്‍ക്കും അംഗീകൃത സംസ്ഥാന പാര്‍ട്ടികള്‍ക്കും ബന്ധപ്പെട്ട ഇആര്‍ഒമാര്‍ കൈമാറിയിട്ടുണ്ടെന്ന് മുഖ്യതെരഞ്ഞെടുപ്പ് ഓഫിസറുടെ ഓഫിസ് അറിയിച്ചു.
Kerala
തിരുവനന്തപുരം: ടെക്നോപാർക്ക് ഫേസ് ഫോറിൽ നിർമിക്കുന്ന ഡിജിറ്റൽ സയൻസ് പാർക്ക് സംസ്ഥാനത്തിന്‍റെ ഭാവിയിലേക്കുള്ള സുപ്രധാന നിക്ഷേപമാകുമെന്ന് ഐടി മന്ത്രി പി.കെ. കുഞ്ഞാലിക്കുട്ടി.ഡിജിറ്റൽ സയൻസ് പാർക്ക് നിർമാണോദ്ഘാടനം ടെക്നോപാർക്ക് ഫേസ് വൺ സി-ഡാക് ഹാളിൽ നിർവഹിക്കുകയായിരുന്നു മന്ത്രി.
കേരളത്തിന്‍റെ സാങ്കേതിക രംഗത്തെ പ്രധാന നാഴികക്കല്ലാണ് ഡിജിറ്റൽ സയൻസ് പാർക്ക്. സർവകലാശാലകൾ, ഗവേഷണ സ്ഥാപനങ്ങൾ, സ്റ്റാർട്ടപ്പുകൾ, വ്യവസായങ്ങൾ എന്നിവയ്ക്ക് ഒരുമിച്ച് പ്രവർത്തിക്കാനാകുന്ന പൊതുവേദിയാണ് ഡിജിറ്റൽ സയൻസ് പാർക്കിലൂടെ ലക്ഷ്യമിടുന്നതെന്ന് മന്ത്രി വ്യക്തമാക്കി.
ടെക്നോപാർക്ക് ഫേസ് ഫോറിൽ 13.59 ഏക്കർ സ്ഥലത്താണ് ഡിജിറ്റൽ സയൻസ് പാർക്ക് യാഥാർഥ്യമാകുന്നത്. 1,515 കോടി രൂപ ചെലവ് പ്രതീക്ഷിക്കുന്നു. ഗവേഷണം, സാങ്കേതികവിദ്യ, വ്യവസായം, സംരംഭകത്വം എന്നിവയെ ഒരുമിപ്പിക്കുന്ന കേന്ദ്രമായാണ് പാർക്ക് വിഭാവനം ചെയ്തിരിക്കുന്നത്. അത്യാധുനിക ഡിജിറ്റൽ സാങ്കേതികവിദ്യകളിലൂടെ ഗവേഷണത്തിനും വികസനത്തിനുമായി ലോകോത്തര സൗകര്യങ്ങൾ ഒരുക്കുകയാണ് ലക്ഷ്യം.
പദ്ധതിയുടെ അക്കാദമിക സാങ്കേതിക മേൽനോട്ടം ഡിജിറ്റൽ യൂണിവേഴ്സിറ്റി കേരള വഹിക്കും. കിൻഫ്രയ്ക്കാണ് നിർവഹണ ചുമതല. ഡിജിറ്റൽ ഗവേഷണത്തിന്‍റെയും നവീകരണത്തിന്‍റെയും ആഗോള കേന്ദ്രമായി കേരളത്തെ വളർത്തുക എന്ന ലക്ഷ്യത്തിലേക്കുള്ള സുപ്രധാന ചുവടുവയ്പ്പാണ് ഡിജിറ്റൽ സയൻസ് പാർക്കിലൂടെ യാഥാർഥ്യമാകുന്നത്.
വി. മുരളീധരൻ എംഎൽഎ, ഐടി വകുപ്പ് സ്പെഷ്യൻ സെക്രട്ടറി എസ്. സുഹാസ്, ഡിജിറ്റൽ യൂണിവേഴ്സിറ്റി കേരള വൈസ് ചാൻസലർ സജി ഗോപിനാഥ്, നഗരസഭാഗം സുനിൽകുമാർ, കിൻഫ്ര മാനേജിംഗ് ഡയറക്ടർ സ്നേഹിൽ കുമാർ, ടെക്നോപാർക്ക് ചീഫ് എക്സിക്യൂട്ടീവ് ഓഫിസർ ഹരിശങ്കർ രാധാകൃഷ്ണൻ, ഐഐഐടിഎംകെ ഡയറക്ടർ അലക്സ് ജയിംസ്, ഡിജിറ്റൽ യൂണിവേഴ്സിറ്റി കേരള രജിസ്ട്രാർ മുജീബ് എന്നിവർ പങ്കെടുത്തു.
Kerala
തിരുവനന്തപുരം: സംസ്ഥാനത്തെ ക്ഷീരമേഖലയെ തകര്‍ച്ചയില്‍നിന്നും രക്ഷിക്കുന്നതിനായി ക്ഷീരകര്‍ഷകര്‍ക്ക് പാല്‍വില വീണ്ടും വര്‍ധിപ്പിക്കണമെന്ന് മില്‍മ തിരുവനന്തപുരം മേഖല സഹകരണ ക്ഷീരോത്പാദക യൂണിയന്‍.
പാല്‍വില ലിറ്ററിന് പത്ത് രൂപ വര്‍ധിപ്പിക്കുന്നതിന് അനുമതി തേടിക്കൊണ്ട് സംസ്ഥാന സര്‍ക്കാരിനും സംസ്ഥാന ക്ഷീരവിപണന ഫെഡറേഷനും കത്തയയ്ക്കുവാന്‍ മേഖലയൂണിയന്‍ ഭരണസമിതി തീരുമാനിച്ചു.
വിപണനം ചെയ്യുന്ന പാലിന് മില്‍മ ജൂണ്‍ മാസം ലിറ്ററിന് നാല് രൂപ വര്‍ധിപ്പിച്ചിരുന്നു. ഇത് മൂലം ക്ഷീരകര്‍ഷകര്‍ക്ക് ആവശ്യമായ ഗുണം ലഭിച്ചിട്ടില്ല എന്നതിന്‍റെ അടിസ്ഥാനത്തിലാണ് വീണ്ടും പാല്‍വിലവര്‍ധനവിനായി അനുമതി തേടിയിരിക്കുന്നത്.
Kerala
കൊച്ചി: നിയമപോരാട്ടങ്ങളുടെയും വാദപ്രതിവാദങ്ങളുടെയും ഗൗരവം നിറഞ്ഞ കോടതിമുറിയിൽ, ഒരു നിമിഷം എല്ലാവരുടെയും കണ്ണ് നിറഞ്ഞു. മഹാരാജാസ് കോളജ് വിദ്യാർഥിയായിരുന്ന അഭിമന്യുവിന്‍റെ കൊലക്കേസ് വിചാരണയ്ക്കിടെയാണ് കണ്ടുനിന്നവരുടെ ഉള്ളുലയ്ക്കുന്ന വൈകാരിക നിമിഷങ്ങൾ അരങ്ങേറിയത്.
വിശപ്പടക്കാൻ ഒരു നേരത്തെ ഭക്ഷണം നൽകിയ സഹപാഠിക്ക് കൊല്ലപ്പെട്ട അഭിമന്യു തന്‍റെ കൈപ്പടയിൽ എഴുതി നൽകിയ കൃതജ്ഞതാകുറിപ്പാണ് എറണാകുളം പ്രിൻസിപ്പൽ സെഷൻസ് കോടതിയിൽ ഹാജരാക്കപ്പെട്ടത്.
"പട്ടിണി മാത്രമായിരുന്നു ഇന്നത്തെ ദിവസം, വയറുനിറയെ ഭക്ഷണം നൽകിയതിന് നന്ദി...” ഒരു നോട്ടുബുക്കിൽനിന്നും കീറിയെടുത്ത കടലാസിൽ കുറിച്ചിട്ട ആ വരികൾ കോടതിയിൽ വായിക്കപ്പെട്ടപ്പോൾ അഭിമന്യു അനുഭവിച്ച കടുത്ത ദാരിദ്ര്യത്തിന്‍റെയും നിഷ്കളങ്കമായ സ്നേഹത്തിന്‍റെയും ആഴം എല്ലാവരെയും നൊമ്പരപ്പെടുത്തി. ഭക്ഷണം നൽകിയ സഹപാഠിയുടെ ഒഴിഞ്ഞ പാത്രത്തിനുള്ളിലാണ് അഭിമന്യു ഈ നന്ദിക്കുറിപ്പ് വച്ചിരുന്നത്.
രാഷ്‌ട്രീയത്തിനതീതമായ സൗഹൃദത്തിന്‍റെ നേർസാക്ഷ്യം കൂടിയായിരുന്നു ഈ വിചാരണ. എസ്എഫ്‌ഐ പ്രവർത്തകനായിരുന്ന അഭിമന്യുവിന്‍റെ ഈ ഓർമക്കുറിപ്പ് കോടതിക്കുമുന്നിലെത്തിച്ചത് അന്നു കോളജിൽ എതിർചേരിയായ കെഎസ്‌യുവിന്‍റെ ഭാരവാഹിയായിരുന്ന തംജിത്താണ്. സഹപാഠിയുടെ പാത്രത്തിൽ കണ്ട ആ കുറിപ്പ് താൻ മൊബൈൽ ഫോണിൽ പകർത്തി നിധിപോലെ സൂക്ഷിക്കുകയായിരുന്നുവെന്ന് തംജിത്ത് വികാരാധീനനായി കോടതിയിൽ പറഞ്ഞു.
ദാരിദ്ര്യത്തോടു പടപൊരുതിയാണ് അഭിമന്യു തന്‍റെ പഠനവും സംഘടനാപ്രവർത്തനവും മുന്നോട്ടു കൊണ്ടുപോയിരുന്നത്. രാഷ്‌ട്രീയ വൈരങ്ങൾക്കപ്പുറം എല്ലാവരോടും സൗഹാർദം പുലർത്തിയിരുന്ന അഭിമന്യു, കെഎസ്‌യു സംഘടിപ്പിച്ച പെനാൽറ്റി ഷൂട്ടൗട്ട് മത്സരത്തിൽ പങ്കെടുക്കാൻ പോലും ആദ്യമെത്തിയിരുന്നുവെന്ന് തംജിത്ത് ഓർത്തെടുത്തു.
സംഭവദിവസം രാത്രിയിൽ കോളജ് ഗേറ്റിന് സമീപത്തുനിന്ന് ബൈക്ക് മാറ്റണമെന്നാവശ്യപ്പെട്ട് ഒന്നാം പ്രതി മുഹമ്മദ് വിളിച്ചതും തൊട്ടുപിന്നാലെ പ്രിയപ്പെട്ട സഹപാഠിയുടെ അരുംകൊലയുടെ വാർത്തയറിഞ്ഞതും തംജിത്ത് മൊഴി നൽകി. അഭിമന്യുവിന്‍റെ അപ്രതീക്ഷിത വിയോഗം ഏൽപ്പിച്ച ആഘാതത്തിൽനിന്നു മുക്തനാകാൻ തനിക്ക് ഒരു വർഷത്തോളം വേണ്ടിവന്നുവെന്നും സാക്ഷി വിങ്ങലോടെ കോടതിയെ അറിയിച്ചു.
എറണാകുളം പ്രിന്‍സിപ്പല്‍ ജില്ലാ സെഷന്‍സ് ജഡ്ജി കെ.കെ. ബാലകൃഷ്ണന്‍ മുമ്പാകെ പൊലിസ് ഉദ്യോഗസ്ഥര്‍, ഡോക്‌ടര്‍മാര്‍, ഫോറന്‍സിക് വിദഗ്ധര്‍ തുടങ്ങിയവരുടെ വിസ്താരം തുടരും.
Kerala
മാള(തൃശൂർ): ഹോളി ഗ്രേസ് അക്കാദമിയിൽ നടന്നുവരുന്ന സംസ്ഥാന സിബിഎസ്ഇ കലോത്സവത്തിന്റെ ഒന്നാംദിനം 52 ഇനങ്ങളിൽ 32 എണ്ണം പൂർത്തിയാകുന്പോൾ 255 പോയിന്റുമായി മലബാർ സഹോദയ മുന്നിൽ. 243 പോയിന്റുമായി കണ്ണൂർ സഹോദയ രണ്ടാംസ്ഥാനത്തും 241 പോയിന്റുമായി തൃശൂർ സെൻട്രൽ സഹോദയ മൂന്നാം സ്ഥാനത്തുമുണ്ട്.
സ്കൂളുകളിൽ മലബാർ സഹോദയയിലെ ദേവഗിരി സിഎംഐ പബ്ലിക് സ്കൂൾ, കൊച്ചി സഹോദയയിലെ ഭവൻസ് ആദർശ് വിദ്യാലയ എന്നിവർ 32 പോയിന്റ് വീതം നേടി ഒന്നാം സ്ഥാനത്താണ്. 30 പോയിന്റ് നേടി മലബാർ സഹോദയയിലെ സിൽവർ ഹിൽസ് പബ്ലിക് സ്കൂൾ തൊട്ടുപിന്നിലുണ്ട്. തൃശൂർ സെൻട്രൽ സഹോദയയിലെ ചെന്ത്രാപ്പിന്നി എസ്എൻ വിദ്യാഭവൻ സീനിയർ സെക്കൻഡറി സ്കൂൾ 28 പോയിന്റുമായി മൂന്നാമതാണ്.
കേരളത്തിലെ 14 ജില്ലകളിൽ നിന്നായി 31 സഹോദയകളാണ് സംസ്ഥാന കലോത്സവവേദിയിൽ കലാകിരീടത്തിനായി മാറ്റുരയ്ക്കുന്നത്. ഇന്ന് ഹോളി ഗ്രേസ് കാന്പസിലെ 32 വേദികളിലായി 43 ഇനങ്ങളിൽ മത്സരം അരങ്ങേറും.
Kerala
കൊച്ചി: ഹൈക്കോടതി ഉത്തരവ് ലംഘിച്ചു റോഡ് ഗതാഗതം തടസപ്പെടുത്തി മുസ്‌ലിം യൂത്ത് ലീഗ് ജാഥയും സമ്മേളനവും നടത്തിയതിനെതിരേ കോടതിയലക്ഷ്യ നടപടി ആവശ്യപ്പെട്ട് പുതുവൈപ്പ് സ്വദേശി എം.എം. ജഹാംഗീര്‍ നല്‍കിയ ഹര്‍ജി ഹൈക്കോടതി ചൊവ്വാഴ്ച പരിഗണിക്കാന്‍ മാറ്റി.
മണിക്കൂറുകളോളം നഗരത്തില്‍ ട്രാഫിക് തടസമുണ്ടാക്കുകയും ഗോശ്രീ പാലം സ്തംഭിപ്പിക്കുകയും ചെയ്തുവെന്നടക്കം ചൂണ്ടിക്കാട്ടി പി.കെ. ഫിറോസ് എംഎല്‍എ, കളക്ടര്‍ ജി. പ്രിയങ്ക, സിറ്റി പൊലിസ് കമ്മിഷണര്‍ ആര്‍. നിശാന്തിനി, ട്രാഫിക് ഡെപ്യൂട്ടി കമ്മിഷണര്‍ മോഹിത് റാവത്ത്, ആര്‍ടിഒ കെ.ആര്‍. സുരേഷ് എന്നിവരെ എതിര്‍കക്ഷികളാക്കി നല്‍കിയ ഹര്‍ജിയാണു ജസ്റ്റീസുമാരായ അനില്‍ കെ. നരേന്ദ്രന്‍, എസ്. മുരളീകൃഷ്ണ എന്നിവരടങ്ങുന്ന ഡിവിഷന്‍ ബെഞ്ച് പരിഗണിച്ചത്.
2010 ജൂണ്‍ 23ന് ഹൈക്കോടതി പുറപ്പെടുവിച്ച ഉത്തരവിന്‍റെ ലംഘനമാണ് യൂത്ത് ലീഗ് ജാഥയില്‍ നടന്നതെന്നാണു ഹര്‍ജിയിലെ ആരോപണം.
Kerala
പുത്തന്‍കുരിശ്: മുളന്തുരുത്തി സൂനഹദോസിന്‍റെ ശതോത്തര സുവര്‍ണ ജൂബിലിയും വിശുദ്ധ മൂറോന്‍ കൂദാശയും നടക്കുന്ന ഇന്ന് യാക്കോബായ സുറിയാനി സഭയുടെ എല്ലാ വിദ്യാഭ്യാസ സ്ഥാപനങ്ങള്‍ക്കും അവധിയായിരിക്കും.
ഭദ്രാസനങ്ങളുടെ കീഴിലും പള്ളികളുടെ കീഴിലും പ്രവര്‍ത്തിക്കുന്ന വിദ്യാഭ്യാസസ്ഥാപനങ്ങള്‍ക്കും അവധി ബാധകമായിരിക്കും. അതേസമയം പരീക്ഷകള്‍ക്കു മാറ്റമുണ്ടായിരിക്കില്ല.
Kerala
കൊച്ചി: സംസ്ഥാനത്ത് അരിയുടെ ഉൾപ്പടെ അനിയന്ത്രിതമായ വിലക്കയറ്റം ഉണ്ടാകാൻ അനുവദിക്കില്ലെന്ന് മന്ത്രി അനൂപ് ജേക്കബ്.
വിപണിയിൽ കൃത്രിമമായ വിലക്കയറ്റം അനുവദിക്കില്ല. ഇതുസംബന്ധിച്ച് സിവിൽ സപ്ലൈസ് കമ്മീഷണർക്കു പ്രത്യേക നിർദേശം നൽകിയിട്ടുണ്ടെന്ന് അദ്ദേഹം പറഞ്ഞു.
ADVERTISEMENT
ADVERTISEMENT
SPACE FOR ADVERTISEMENT
Copyright © 2026, Rashtra Deepika Ltd. All Rights Reserved.
Design and Development 
Corehub Solutions
Contact Numbers :
+91 481 2566706, 2566707, 2566708
About Us Feedback Privacy Policy Terms and Conditions for Online Payment
E-paper LOGIN
LOGIN