Deepika
ADVERTISEMENT
20-10-2026
അപ്രഖ്യാപിത മതരാഷ്‌ട്രത്തിന്‍റെ എഴുതപ്പെടാത്ത ഭരണഘടനയാൽ നാം അഥവാ നമ്മുടെ രാഷ്‌ട്രം ആക്രമിക്കപ്പെടുന്നു. മോദിഭരണം വിചാരധാരപാഠങ്ങളാൽ രണ്ടാംതരം പൗരന്മാക്കിയ ന്യൂനപക്ഷങ്ങൾക്കുമേൽ സംഘപരിവാർ കയറിനിരങ്ങുന്ന വാർത്തകൾ പഴയതാണ്. ആ ‘പണി’ഏറ്റെടുത്ത വർഗീയവത്കരിക്കപ്പെട്ട ‘ഗോദി ബ്യൂറോക്രാറ്റുകൾ’ പുതിയ ഘട്ടത്തിലേക്കു കടന്നിരിക്കുന്നു. ബിജെപി ഭരിക്കുന്ന ഛത്തീസ്ഗഡിൽനിന്നാണ് പുതിയ വാർത്ത. ഗോത്രവിഭാഗക്കാരനായ ഡീക്കന്‍റെ പൗരോഹിത്യ സ്വീകരണച്ചടങ്ങ് പ്രാദേശിക ഭരണകൂടം തടഞ്ഞു.
30 വർഷം മുന്പത്തെ മാമ്മോദീസ സർട്ടിഫിക്കറ്റ് ഹാജരാക്കിയെങ്കിലും അന്നത്തെ അനുമതിപത്രം വേണമത്രേ. അന്ന് അത്തരമൊരു അനുമതിപത്രം ആവശ്യമില്ലായിരുന്നെന്ന വസ്തുത, വർഗീയതയുടെ കാട്ടുനീതിയിൽ അപ്രസക്തമായി. പൗരോഹിത്യസ്വീകരണം മാറ്റിവച്ചു. നമ്മുടെ ഭരണഘടന നിലവിലുണ്ടെന്ന് ഈ രാജ്യത്തെ ന്യൂനപക്ഷങ്ങൾ ഇനിയും വിശ്വസിക്കണോ? ചോദ്യം ഭരണകൂടത്തോടും നീതിന്യായ സംവിധാനങ്ങളോടും മാത്രമല്ല, രാജ്യത്തെ ഭിന്നിപ്പിക്കുന്നവരെ വെളുപ്പിക്കുന്ന, ഹിന്ദുത്വ ഫാക്‌ട‌‌‌‌‌റിനിർമിത ക്രൈസ്തവ അലക്കുയന്ത്രങ്ങളോടുമാണ്. പ്രതിസന്ധി നിസാരമല്ല; ക്രൈസ്തവനേതൃത്വം ഭരണഘടനാസുരക്ഷിതത്വത്തിന്‍റെ മിഥ്യാധാരണകളിൽനിന്നും ചട്ടപ്പടി പ്രതികരണങ്ങളിൽനിന്നും പുറത്തുവരണം.
ബൽറാംപുർ ജില്ലയിലെ ധൻവാർ ഇടവകയിൽ 14നായിരുന്നു ഈശോസഭാംഗമായ ഡീക്കൻ ബേസിൽ ഹദ്ദെയുടെ പൗരോഹിത്യ സ്വീകരണ ചടങ്ങ് തടഞ്ഞത്. രണ്ടു വ്യക്തികൾ നൽകിയ പരാതിയുടെ അടിസ്ഥാനത്തിലാണത്രേ പൊലിസും സബ് ഡിവിഷണൽ മജിസ്‌ട്രേറ്റും ഉൾപ്പെടുന്ന ഉദ്യോഗസ്ഥസംഘമെത്തിയത്. ഡീക്കന്‍റെ ക്രിസ്തീയ ഐഡന്‍റിറ്റി തെളിയിക്കുന്ന മാമ്മോദീസ സർട്ടിഫിക്കറ്റ് ഹാജരാക്കിയെങ്കിലും, അധികാരികളുടെ അനുമതിയോടെയാണോ മതപരിവർത്തനം നടത്തിയതെന്നു തെളിയിക്കുന്ന രേഖകൾ വേണമെന്നായി ഉദ്യോഗസ്ഥർ.
1995ൽ അത്തരം അനുമതി ആവശ്യമില്ലായിരുന്നെന്ന് ഹദ്ദെ ചൂണ്ടിക്കാട്ടിയെങ്കിലും ഉദ്യോഗസ്ഥർ സമ്മതിച്ചില്ല. കിട്ടാനിടയില്ലാത്ത സർട്ടിഫിക്കറ്റുകൾ ചോദിച്ച് വോട്ട് നിഷേധിക്കുന്നതിന്‍റെ മറ്റൊരു പതിപ്പ്! ചടങ്ങ് മാറ്റിവച്ചില്ലെങ്കിൽ ഉണ്ടാകുന്ന അനിഷ്‌ടസംഭവങ്ങൾക്കു തങ്ങൾ ഉത്തരവാദികളായിരിക്കില്ലെന്നു മുന്നറിയിപ്പും നൽകി. ഔദ്യോഗിക ഭീഷണി! ഡീക്കൻ ബേസിൽ ഹദ്ദെയെ സുരക്ഷിതകേന്ദ്രത്തിലേക്കു മാറ്റി. കോടതിയെ സമീപിക്കാനാണ് സഭയുടെ തീരുമാനം.
നീതി കിട്ടുമോ? ഛത്തീസ്ഗഡിലെ ചില ആദിവാസി ഗ്രാമങ്ങളിൽ ക്രൈസ്തവ പുരോഹിതർക്കും പരിവർത്തിത ക്രൈസ്തവർക്കും പ്രവേശനം വിലക്കിക്കൊണ്ട് സ്ഥാപിച്ച ബോർഡുകൾ ഭരണഘടനാ വിരുദ്ധമല്ലെന്ന് വിധിച്ചത് 2025ലും 26ലും കോടതികളാണ്. പക്ഷേ, ഘർവാപ്പസിയെന്ന മതപരിവർത്തനത്തിനു വിലക്കില്ല. ഛത്തീസ്ഗഡിൽതന്നെ ക്രൈസ്തവരുടെ മൃതദേഹം അവരുടെ പറന്പിൽപോലും സംസ്കരിക്കാൻ പറ്റില്ലെന്ന് ഇക്കഴിഞ്ഞ ഫെബ്രുവരിയിൽ വർഗീയവാദികൾ തീട്ടുരമിറക്കിയപ്പോഴും തടയാൻ ആരുമില്ലായിരുന്നു. ഏതു മതത്തിലും വിശ്വസിക്കാനും ആചരിക്കാനും പ്രചരിപ്പിക്കാനും പൗരനു സ്വാതന്ത്ര്യം ഉറപ്പാക്കുന്ന ഭരണഘടനയുടെ 25-ാം അനുഛേദം ഇപ്പോഴുമുണ്ട്!
ഹിന്ദുക്കൾ ഉൾപ്പടെയുള്ള ബംഗ്ലാദേശിലെ ന്യൂനപക്ഷങ്ങളെ ചവിട്ടിയരച്ച മുസ്‌ലിം തീവ്രവാദ കഥ പറഞ്ഞ ത‌സ്‌ലിമ നസ്രീന്‍റെ നോവലാണ് ലജ്ജ. തസ്‌ലിമയെ ഓർത്തോർത്തു കരഞ്ഞവരാണ് ഭരിക്കുന്നത്. സ്ഥല-വ്യക്തി നാമങ്ങളൊന്നു മാറ്റിയാൽ, അതു തസ്‌ലിമയ്ക്ക് അഭയം കൊടുത്ത ഇന്ത്യയുടെ സമകാലിക ദുരന്തനോവലാകും. ലജ്ജിക്കുക! ബിജെപി ഭരിക്കുന്ന മിക്ക സംസ്ഥാനങ്ങളിലും ന്യൂനപക്ഷങ്ങൾക്കു സുരക്ഷിതത്വമില്ല. ബിജെപി ഭരിക്കാനെത്തിയതോടെ പശ്ചിമബംഗാളും വർഗീയവത്കരിക്കപ്പെടുകയാണ്.
ക്രൈസ്തവരും ആരാധനാലയങ്ങളും ആക്രമിക്കപ്പെടുന്ന നിരവധി വാർത്തകൾ പുറത്തുവന്നുകഴിഞ്ഞു. രാജ്യത്തുടനീളം ക്രൈസ്തവർക്കും മുസ്‌ലിംകൾക്കുമെതിരേ നടക്കുന്ന അക്രമങ്ങൾ ലക്ഷണങ്ങൾ മാത്രമാണ്. രോഗം, വർഗീയന്യൂനമർദങ്ങൾ വംശഹത്യക്കൊരുക്കുന്ന വിദ്വേഷ കാർമേഘങ്ങളാണ്. ഇന്ത്യയിൽ മുസ്‌ലിംകളെയും ക്രിസ്ത്യാനികളെയും ലക്ഷ്യമിട്ടുള്ള വിദ്വേഷ പ്രസംഗങ്ങളിൽ വലിയ വർധനയുണ്ടായെന്നും അതിൽ 88 ശതമാനവും ബിജെപി ഭരിക്കുന്ന സംസ്ഥാനങ്ങളിലാണെന്നുമുള്ള അമേരിക്ക ആസ്ഥാനമായുള്ള ഇന്ത്യ ഹെയ്റ്റ് ലാബിന്‍റെ റിപ്പോർട്ടും കൂട്ടക്കൊലകൾക്കു സാധ്യതയുള്ള 168 രാജ്യങ്ങളുടെ സാധ്യതാപട്ടികയിൽ ഇന്ത്യ നാലാം സ്ഥാനത്താണെന്ന യുഎസ് ഹോളോകോസ്റ്റ് മ്യൂസിയത്തിന്‍റെ റിപ്പോർട്ടും പുറത്തുവന്നത് ഇക്കഴിഞ്ഞ ജനുവരിയിലാണ്. ക്രൈസ്തവർക്കെതിരേയുള്ള ആക്രമണങ്ങളുടെ എണ്ണം പ്രതിവർഷം ആയിരത്തോടടുത്തു.
ഗോവധനിരോധനം, മൂർച്ചകൂട്ടിയ മതപരിവർത്തന നിരോധന നിയമങ്ങൾ, എഫ്സിആർഎ... നുണപ്രചാരണങ്ങളിലൂടെ സർക്കാരുകൾ ന്യൂനപക്ഷങ്ങളെ സംശയനിഴലിലാക്കുകയാണ്. ഹിറ്റ്‌ലർ ആദ്യമുണ്ടാക്കിയത് കോൺസൻട്രേഷൻ ക്യാന്പുകളല്ല, സംശയമാണ്. ന്യൂനപക്ഷമായ യഹൂദർ ഭൂരിപക്ഷത്തിനു ഭീഷണിയാണെന്നും അവകാശങ്ങൾ തട്ടിയെടുക്കുന്നെന്നും അവർ നാളെ ഭൂരിപക്ഷമാകുമെന്നുമൊക്കെയുള്ള നുണകൾ സംശയങ്ങളായി വിതച്ചു. നാട്ടിലും വിദേശത്തുമുള്ള കുഴലൂത്തുകാരെക്കൊണ്ട് ഹിന്ദുത്വ സമൂഹമാധ്യമങ്ങളിലുൾപ്പടെ ചെയ്യിക്കുന്നതും മറ്റൊന്നല്ല. ഇടയ്ക്കിടെ നൈജീരിയ, പാക്കിസ്ഥാൻ, അഫ്ഗാനിസ്ഥാൻ എന്നിങ്ങനെ താളമിടീക്കുകയും ചെയ്യും. തിരിച്ചറിയണം.
പ്രതിപക്ഷവും സഭാനേതൃത്വങ്ങളും പരന്പരാഗത ജനാധിപത്യ പ്രതികരണങ്ങളിൽ അടയിരിക്കുന്നതും സ്ഥിതി വഷളാക്കിക്കഴിഞ്ഞു. ജനാധിപത്യസംരക്ഷണത്തിനിറങ്ങിയ വിദ്യാർഥികളുടെ ഭയരാഹിത്യവും ഊർജസ്വലതയും ഉടയാടയുടയാത്ത പ്രതിഷേധ-പ്രതികരണക്കാരിൽനിന്ന് ആരും പ്രതീക്ഷിക്കുന്നില്ല. പക്ഷേ, ഭരണഘടനാസ്ഥാപനങ്ങളും ഉദ്യോഗസ്ഥരും തിരുത്തൽശക്തിയായിരുന്ന മാധ്യമങ്ങളും ഭരിക്കുന്നവരുടെ മടിയിലിരുന്നു കൊഞ്ചുന്ന ഇലപൊഴിയുംകാലത്ത് നിങ്ങളുടെ നിശബ്ദതയോളം പോന്ന ദുർബല പ്രതികരണങ്ങൾ ഒളിച്ചോട്ടമോ അസാന്നിധ്യമോ ആയി രേഖപ്പെടുത്തും. ചരിത്രം ഒരിക്കലതു വിചാരണയ്ക്കെടുക്കുകതന്നെ ചെയ്യും.
ഛത്തീസ്ഗഡ് മുഴക്കുന്നത് അപായമണിയാണ്. പള്ളിയിലാണോ ക്ഷേത്രത്തിലാണോ മോസ്കിലാണോ പാർട്ടി ഓഫിസിലാണോ സ്വന്തം വീട്ടിലാണോ തെരുവിലാണോ നിങ്ങൾ കിടന്നുറങ്ങുന്നതെന്നതു പ്രധാനമല്ല. നിഷ്ക്രിയതയുടെ കിടക്കവിട്ടെഴുന്നേൽക്കാത്തതേ പ്രശ്നമുള്ളൂ. വോട്ടും ഐക്യവും ജനാധിപത്യവും മതേതരത്വവുമൊക്കെ മോഷ്ടിക്കപ്പെടുന്പോൾ, നാം ഹിന്ദുക്കളും ക്രിസ്ത്യാനികളും മുസ്‌ലിംകളും നിരീശ്വരവാദികളുമൊക്കെയായ മതേതര ഇന്ത്യക്കാർ മുന്നോട്ടു നീങ്ങി നിൽക്കണം. ഇപ്പോഴവർ ചോദിക്കുന്നത് നമ്മുടേതാണ്, ഇന്ത്യയെന്ന അടിയാധാരമാണ്. വിട്ടുകൊടുക്കാനോ..?
19-10-2026
ബേക്കറികൾ വഴി 15 ശതമാനം വരെ ആൽക്കഹോളുള്ള വൈൻ വിൽക്കാൻ തുടങ്ങിയത് സർക്കാർ അറിഞ്ഞില്ലെങ്കിൽ പ്രഥമദൃഷ്ട്യാ മദ്യക്കള്ളക്കടത്ത് എന്നേ പറയാനുള്ളൂ. ഇടതുസർക്കാരിന്‍റെ ‘മദ്യകേരള’ നയങ്ങൾ സർക്കാർ മാറിയതു വകവയ്ക്കാതെ ഉദ്യോഗസ്ഥർ നടപ്പാക്കുകയാണെങ്കിൽ ഇനിയും പലതും സംഭവിക്കും. ബേക്കറി വഴി വൈൻ വിൽക്കാൻ തുടങ്ങിയത് മാധ്യമങ്ങളിലൂടെയാണ് താൻ അറിഞ്ഞതെന്നാണ് എക്സൈസ് മന്ത്രി പറഞ്ഞത്. ഇത്രയൊക്കെ വിലയേ ഇപ്പോൾ മന്ത്രിമാർക്കുള്ളോ? തീരുമാനം റദ്ദാക്കാൻ നിർദേശം നൽകിയ മുഖ്യമന്ത്രി, എക്സൈസ് വകുപ്പിൽ മാത്രമേ മന്ത്രിക്കു മുകളിൽ ഉദ്യോഗസ്ഥർ ഭരിക്കുന്നുള്ളോ എന്നുകൂടി പരിശോധിക്കണം. അല്ലെങ്കിൽ ഇനിയും നാണംകെടേണ്ടിവരും.
മദ്യക്കടകളിലും ബാറുകളിലും വിൽക്കുന്ന ബിയറിൽപോലും പരമാവധി എട്ടു ശതമാനം ആൽക്കഹോൾ മാത്രമാണ് എന്നിരിക്കെയാണ് കുട്ടികൾ ഏറ്റവും കൂടുതൽ എത്തുന്ന ബേക്കറികളിൽ 15 ശതമാനം ആൽക്കഹോളുള്ള വൈൻ വിൽക്കുന്നത്. 2026 ജൂണ്‍ 24ന് എക്സൈസ് കമ്മിഷണർ ശ്രീറാം സാംബശിവ റാവു ആണ് വീര്യമുള്ള ഹോർട്ടി വൈൻ വിൽപനയ്ക്ക് അനുമതി നൽകിയത്. 2024 ജനുവരി 24ന് ഇടതു സർക്കാർ അബ്കാരി നിയമത്തിൽ വരുത്തിയ ഭേദഗതി പ്രകാരം, സൂപ്പർ മാർക്കറ്റുകൾ, ഷോപ്പിംഗ് മാളുകൾ, 100 ചതുരശ്ര മീറ്ററിൽ കുറയാത്ത വിസ്തീർണമുള്ള ബേക്കറികൾ എന്നിവിടങ്ങളിൽ ഹോർട്ടി വൈൻ വിൽക്കാൻ അനുമതി നൽകാമായിരുന്നു.
പക്ഷേ, നൽകിയില്ല. കാരണം, തദ്ദേശ-നിയമസഭാ തെരഞ്ഞെടുപ്പുകൾ ആസന്നമായിരുന്നു. ആ ചട്ടങ്ങളുടെ അടിസ്ഥാനത്തിൽ 2025 നവംബറിൽ ചാലക്കുടിയിലെ ബേക്കറി അപേക്ഷിച്ച ലൈസൻസിനാണ് കഴിഞ്ഞ ദിവസം അനുമതി ലഭിച്ചത്. കച്ചവടവും തുടങ്ങി. വീണ്ടും അധികാരത്തിലെത്തിയാൽ നടപ്പാക്കാമെന്ന ദുഷ്ടലാക്കോടെ പശ്ചാത്തലമൊരുക്കിവച്ചിരുന്ന കാര്യം വെള്ളമൊഴിക്കാതെ വിഴുങ്ങിക്കൊണ്ടാണ്, ബേക്കറി വഴി വൈൻ വിൽക്കാൻ അനുമതി നൽകിയത് യുഡിഎഫ് അല്ലേയെന്ന് അന്നത്തെ എക്സൈസ് മന്ത്രി എം.ബി. രാജേഷ് ഇന്നലെ ചോദിച്ചത്. രാഷ്‌ട്രീയത്തിൽ സത്യസന്ധത വേണ്ടെന്നായി.
കർഷകരെ രക്ഷിക്കാനാണെന്നു പറഞ്ഞാണ് ഇടതു സർക്കാർ പഴങ്ങളിൽനിന്നും മറ്റു കാർഷികവിഭവങ്ങളിൽനിന്നുമുള്ള വൈൻ ഉത്പാദിപ്പിക്കാൻ അനുമതി നൽകിയത്. 10 വർഷത്തെ ഭരണത്തിനിടെ ഒരു തവണപോലും കൊയ്ത നെല്ല് പാടത്തുനിന്നു സമയത്തു ശേഖരിച്ചിട്ടില്ല. ഒരിക്കൽപോലും നെല്ലിന്‍റെ വില സമയത്തു കൊടുത്തിട്ടില്ല. റബറിന്‍റെ താങ്ങുവില പ്രകടനപത്രികയിലല്ലാതെ വർധിപ്പിച്ചില്ല.
വന്യജീവിശല്യത്തിന് ഒരു പരിഹാരവുമുണ്ടാക്കിയില്ലെന്നു മാത്രമല്ല, വനംവകുപ്പ് ഉദ്യോഗസ്ഥർ കുടിയേറ്റ കർഷകരെ ഇത്രയേറെ ദ്രോഹിച്ച മറ്റൊരു കാലവുമില്ല. നാളികേരം, സുഗന്ധവ്യഞ്ജനം, പച്ചക്കറി... എല്ലായിടത്തും പരാതികളേ ഉണ്ടായിരുന്നുള്ളൂ. ഒടുവിൽ കർഷകരക്ഷയ്ക്കു കണ്ടുപിടിച്ച ഒറ്റമൂലിയാണ് വൈൻ നിർമാണം. പക്ഷേ, അതിൽനിന്നു സർക്കാരിനു ലഭിക്കുന്ന നികുതി 86 ശതമാനമാണെന്നു തിരിച്ചറിയുന്പോഴാണ് യഥാർഥ വരുമാനവും രക്ഷയും ആർക്കാണെന്നു വെളിവാകുന്നത്.
നിലവിൽ നാല് സ്ഥാപനങ്ങൾക്കാണ് വൈൻ നിർമിക്കാനുള്ള അനുമതി. 10,000 രൂപ നൽകി ലൈസൻസെടുത്താൽ 20 ശതമാനം കമ്മീഷനോടെ കടകളിൽ വിൽക്കാം. മദ്യശാലകളിലെന്നപോലെ ബേക്കറികളിലും മാടക്കടകളിലുമൊന്നും 23 വയസിനു താഴെയുള്ളവർക്കാണ് വൈൻ വിൽക്കുന്നതെന്ന് ഉറപ്പാക്കാനാവില്ല. തന്നെയല്ല, പത്തോ ഇരുപതോ കൊടുത്താൽ കുട്ടികൾക്കു വാങ്ങിക്കൊടുക്കാനാണോ ആളില്ലാത്തത്? മദ്യക്കടകളിലെ ക്യൂവിൽ തലമറച്ചുനിൽക്കാതെ ബിയറിനേക്കാൾ വീര്യമുള്ള വൈൻ വാങ്ങാമെന്നതും സൗകര്യമാണ്. ഇരുന്നു കഴിക്കാനായില്ലെങ്കിലെന്താ, മദ്യവും ടച്ചിംഗ്സും ഭക്ഷണവുമെല്ലാം ഒരേ മേൽക്കൂരയ്ക്കു താഴെ ലഭ്യമാകുമല്ലോ! അബ്കാരി ചരിത്രത്തിലെ ഏറ്റവും ഉദാരമായ മദ്യവിൽപനയായി ഇതു മാറുമെന്നതിൽ ആർക്കുമില്ല സംശയം.
ഉത്തരവ് റദ്ദാക്കാൻ മുഖ്യമന്ത്രി നിർദേശിച്ചിട്ടുണ്ടെങ്കിലും നടപടിക്രമങ്ങൾ പാലിച്ചു മാത്രമേ അതു നടപ്പാക്കാനാകൂ. ഒട്ടും വൈകരുതെന്ന് അഭ്യർഥിക്കുന്നു. ഒരിടത്ത് യുവാക്കളെ രക്ഷിക്കാൻ മയക്കുമരുന്നുവേട്ടയുടെ തൂഫാൻ. മറുവശത്ത് അവർക്കു നീന്തിത്തുടിക്കാൻ മദ്യപ്പുഴ... എങ്ങനെയും പണമുണ്ടാക്കണമെന്നാണെങ്കിൽ വേറെ എന്തൊക്കെ വഴികളുണ്ട്, അന്തസുള്ളത്!
17-10-2026
കിഫ്ബി അഴിമതിയുടെ കൂത്തരങ്ങായിരുന്നോ എന്ന് അന്തിമ നിഗമനത്തിലെത്താറായിട്ടില്ല. പക്ഷേ, അതിന്‍റെ സാധ്യതകളുള്ള ക്രമക്കേടുകൾ യുഡിഎഫ് സർക്കാർ നിയോഗിച്ച വിദഗ്ധ സമിതി കണ്ടെത്തിയിരിക്കുന്നു. അതൊരു സമാന്തര ധനവകുപ്പായെന്നും ചട്ടലംഘനങ്ങളും ഭൂമി കുംഭകോണവും അനാവശ്യ നിയമനങ്ങളും ഉൾപ്പടെയുള്ള ക്രമക്കേടുകൾ നടത്തിയെന്നുമാണ് കണ്ടെത്തൽ. ഇതെല്ലാം മുൻ ധനമന്ത്രിയും സിപിഎം നേതാവുമായ ഡോ. തോമസ് ഐസക് കാര്യകാരണസഹിതം നിഷേധിച്ചിട്ടുമുണ്ട്. പക്ഷേ, അതുമാത്രം പോരാ; വാർത്താസമ്മേളനത്തിലെന്നപോലെ ഓഡിറ്റിംഗിലും അന്വേഷണമുണ്ടായാൽ അവിടെയും മുൻ സർക്കാരിനു സത്യസന്ധത തെളിയിക്കാനാകണം. കാരണം, കാവൽക്കാർ കള്ളന്മാരാകരുതെന്ന മുദ്രാവാക്യം നിങ്ങളും ഏറെ ഏറ്റുവിളിച്ചതാണ്.
1999ൽ സംസ്ഥാനത്ത് അടിസ്ഥാനസൗകര്യ വികസനപദ്ധതികള്‍ നടപ്പാക്കാൻ നായനാർ സർക്കാർ ധനവകുപ്പിന് കീഴില്‍ രൂപീകരിച്ച ബോര്‍ഡാണ് കിഫ്ബി (കേരള ഇൻഫ്രാസ്ട്രക്ചർ ഇൻവെസ്റ്റ്മെന്‍റ് ഫണ്ട് ബോർഡ്). 2016ൽ ഒന്നാം പിണറായി സർക്കാരിന്‍റെ കാലത്താണ് വിദേശഫണ്ട് ശേഖരണ അനുമതിയും കൂടുതൽ അധികാരങ്ങളും നൽകി മുഖ്യമന്ത്രി അധ്യക്ഷനായി കിഫ്ബിയെ പൊളിച്ചടുക്കിയത്. ആരോപണങ്ങൾ പലതും ഉണ്ടായെങ്കിലും സർക്കാരിനു തുടർച്ചയുണ്ടായതോടെ കിഫ്ബിയും തുടർന്നു. പക്ഷേ, യുഡിഎഫ് സർക്കാർ നിയോഗിച്ച, മുൻ അഡീഷണൽ ചീഫ് സെക്രട്ടറി സുധാ പിള്ള അധ്യക്ഷയായ വിദഗ്ധ സമിതി ക്രമക്കേടുകൾ പുറത്തു കൊണ്ടുവന്നു. സിഎംആർഎൽ-എക്സാലോജിക് മാസപ്പടി കേസിനൊപ്പം കിഫ്ബിയും ഇടതുപക്ഷത്തിന്‍റെ ഉറക്കം കെടുത്തും.
മാനദണ്ഡങ്ങൾ മറികടന്ന് വാങ്ങിക്കൂട്ടിയ വായ്പകൾ, പലിശച്ചെലവിനു പുറമേ കിഫ്ബിയുടെ ധനസമാഹരണ മാതൃകയുടെ അധികച്ചെലവ്, രാജ്യാന്തരവിപണിയിൽ ഇന്ത്യൻ രൂപയിൽ ഇറക്കിയ മസാല ബോണ്ടിന്‍റെ അധികച്ചെലവ്, അധികപലിശ, ഫെയർ വാല്യുവിന്‍റെ അഞ്ചിരട്ടി വിലയ്ക്ക് ആവശ്യത്തിലേറെ ഭൂമി വാങ്ങിക്കൂട്ടൽ, 40 തസ്തികകളുടെ അനുമതി മറികടന്ന് 498 നിയമനങ്ങൾ, കടം പെരുകുന്പോഴും നിക്ഷേപം വർധിപ്പിക്കൽ... ക്രമക്കേടുകൾ അക്കമിട്ടു നിരത്തിയിട്ടുണ്ട് വിദഗ്ധസമിതി. സ്ഥലത്തിന്‍റെ ആവശ്യം തിരുവനന്തപുരത്തും കൊച്ചിയിലും ആയിരുന്നിട്ടും എന്തിനെന്നു പറയാതെ, കിഫ്ബി സിഇഒ ഡോ. കെ.എം. ഏബ്രഹാമിന്‍റെ നിർദേശത്തിന്‍റെ മാത്രം അടിസ്ഥാനത്തിൽ കണ്ണൂരിലും പാലക്കാട്ടും 5,366 ഏക്കർ ഭൂമി ഏറ്റെടുക്കാൻ 12,727 കോടി രൂപ ചെലവഴിച്ചതായും കണ്ടെത്തി. ഇതിലേറെയും അഞ്ചു വർഷമായി ഉപയോഗിക്കാതെ കിടക്കുകയാണ്.
നഷ്‌ടക്കണക്കുകൾ തെറ്റാണെന്നും കിഫ്ബി ഭാവികേരളത്തിന്‍റെ അടിസ്ഥാന സൗകര്യങ്ങൾ സൃഷ്‌ടിച്ചുകഴിഞ്ഞെന്നുമാണ് മുൻ ധനകാര്യമന്ത്രി ഡോ. തോമസ് ഐസക് ന്യായീകരിച്ചത്. ഫെയർ വാല്യുവിന്‍റെ അഞ്ചിരട്ടിക്കു ഭൂമി വാങ്ങിയെന്ന ആരോപണത്തിന്, കേരളത്തിൽ എവിടെയെങ്കിലും ഫെയർ വാല്യുവിന് ഭൂമി ലഭിക്കുമോയെന്നു വ്യക്തമാക്കണമെന്ന് അദ്ദേഹം യുഡിഎഫിനെ വെല്ലുവിളിക്കുകയും ചെയ്തു. ആരുടെ ഭൂമിയാണ് ഏറ്റെടുത്തതെന്നത് അടക്കമുള്ള വിവരങ്ങൾ പുറത്തുവിടാൻ സർക്കാരിന് പൂർണസ്വാതന്ത്ര്യമുണ്ടെന്നും അദ്ദേഹം ചൂണ്ടിക്കാട്ടി. സ്ഥിരം ജീവനക്കാർ 40 മാത്രമാണെന്നും ബാക്കി കരാറുകാരാണെന്നുമായിരുന്നു ന്യായീകരണം. ഒരു ക്രമക്കേടുമില്ലെന്നു സിപിഎമ്മിന് അത്ര ഉറപ്പാണെങ്കിൽ മാനനഷ്‌ടത്തിനു കേസ് കൊടുക്കാൻ വൈകരുത്.
ഇവിടെ പ്രധാന ചോദ്യം, കേരളത്തിന്‍റെ അടിസ്ഥാനസൗകര്യങ്ങൾ സാധ്യമായോ എന്നതിലുപരി, അതു കിഫ്ബിയിലൂടെ നടത്തിയതുകൊണ്ട്, സർക്കാരിനു ലാഭത്തിനു പകരം നഷ്‌ടമാണോ ഉണ്ടായത് എന്നതാണ്. സംസ്ഥാന സർക്കാർ കിഫ്ബിക്ക് കൈമാറിയ മോട്ടോർ വാഹന നികുതിയും പെട്രോൾ സെസും അടക്കമുള്ള 61,678.46 കോടി രൂപ സർക്കാർ വകുപ്പുകൾ നേരിട്ടു ചെലവഴിച്ചിരുന്നെങ്കിൽ 48,574.82 കോടി മതിയായിരുന്നു. നഷ്ടം 13,103 കോടി രൂപ! മാത്രമല്ല, കിഫ്ബി എടുത്ത വായ്പകൾ കേന്ദ്രം സംസ്ഥാന സർക്കാരിന്‍റെ അക്കൗണ്ടിൽ വരവു വച്ചതിനാൽ സംസ്ഥാനത്തിന്‍റെ കടമെടുപ്പു പരിധി കുറയുകയും ചെയ്തു. ഫലത്തിൽ അടിസ്ഥാനസൗകര്യ വികസനം എന്ന പുകമറ മാറ്റിയാൽ കിഫ്ബി നഷ്‌ടക്കച്ചവടമായെന്നു പറയേണ്ടിവരും.
സിഎജി ഓഡിറ്റിംഗ് നടത്താനും കിഫ്ബിയുടെ പ്രവർത്തനം ഭാഗികമായി മരവിപ്പിച്ച് സംവിധാനം ഉടച്ചുവാർക്കാനുമാണ് വിദഗ്ധ സമിതിയുടെ നിർദേശമെന്നു പറയാം. പക്ഷേ, പോയ സർക്കാർ നഷ്ടം വരുത്തിയെങ്കിൽ വന്ന സർക്കാർ അതു തിരിച്ചുപിടിക്കുകയൊന്നുമില്ല. പോയതു പോയി. വിദഗ്ധ സമിതിയുടെ കണ്ടെത്തൽ ശരിയാണെങ്കിൽ, കിഫ്ബി പരീക്ഷണത്തിലൂടെ പോയത് ജനങ്ങളുടെ നികുതിപ്പണമാണ്. അതിന് ഉത്തരവാദിയുണ്ടാകണം. ഭൂമി വാങ്ങിക്കൂട്ടിയതിൽ ലാഭം കൊയ്തവരുണ്ടോ, കിഫ്ബിയിലെ ആ 458 കരാർ ജീവനക്കാർ ആരാണ്, ധനവകുപ്പിനെ മറികടന്നുള്ള തീരുമാനങ്ങൾ ആരുടേതാണ്, മാനദണ്ഡങ്ങൾ ലംഘിച്ച് പൊതുമുതൽ ധൂർത്തടിച്ചവർക്കെതിരേ നടപടിയുണ്ടാകുമോ, സിഎംആർഎൽ-എക്സാലോജിക് മാസപ്പടി കേസിലെ ആരോപണം പോലെ പണിയെടുക്കാതെ കൂലി കൈപ്പറ്റിയവരുണ്ടോ... തുടങ്ങിയ നിരവധി ചോദ്യങ്ങൾ ബാക്കിയുണ്ട്.
ഖജനാവ് കാലിയായിരിക്കെ, അടിസ്ഥാനവികസനത്തിൽ സർക്കാരിനെ രക്ഷിക്കാൻ സൃഷ്‌ടിച്ച കിഫ്ബി എന്ന ടെസ്റ്റ് ട്യൂബ് ശിശു മുടിയനായ പുത്രനായെങ്കിൽ ഇനി തീറ്റിപ്പോറ്റരുത്. കാരണം, സർക്കാരിന്‍റെ സൃഷ്‌ടിയാണെങ്കിലും മുടിപ്പിച്ചതു പൊതുപ്പണമാണ്. ഇതു യുഡിഎഫ്-എൽഡിഎഫ് ഇടപാടല്ല, നികുതിപ്പണ കുംഭകോണമാണ്.
16-10-2026
മാനസികാരോഗ്യ പ്രശ്നങ്ങളുള്ളവരെ പൊലിസ് ലോക്കപ്പുകളിലോ ജയിലുകളിലോ അല്ല ആശുപത്രികളിലാണ് പാർപ്പിക്കേണ്ടതെന്ന സർക്കാർ വിജ്ഞാപനം ചങ്ങലയ്ക്കു ഭ്രാന്തുപിടിക്കുന്ന കാലത്തിന് അനുയോജ്യം തന്നെ. മനോരോഗികളെ ദ്രോഹിക്കുകയും തല്ലിക്കൊല്ലുകയും അവരുടെ ചെയ്തികളെ വിദ്വേഷപ്രചാരണത്തിന് ഉപയോഗിക്കുകയും ചെയ്യുന്നവരെയും ചങ്ങലയ്ക്കിടേണ്ടതുണ്ട്.
ജനങ്ങളെ കൊല്ലാക്കൊല ചെയ്യുന്ന തെരുവുനായകളെ തൊടാൻ മുട്ടിടിക്കുന്ന കേരളത്തിലാണ് മാനസികാരോഗ്യ പ്രശ്നങ്ങളുള്ളവരെ ദ്രോഹിക്കുകയും തല്ലിക്കൊല്ലുകയും ചെയ്യുന്നത്. ഇനി ഇതാവർത്തിക്കരുത്. വിജ്ഞാപനം ഇറക്കാൻ ഒരുദ്യോഗസ്ഥനായാലും മതി; നടപ്പാക്കണമെങ്കിൽ ഇച്ഛാശക്തിയുള്ള ഭരണാധികാരിതന്നെ വേണമെന്നുകൂടി ഓർമിപ്പിക്കട്ടെ.
മാനസികാരോഗ്യ പ്രശ്നങ്ങള്‍ നേരിടുന്നവരും അലഞ്ഞു തിരിഞ്ഞു നടക്കുന്നവരും സ്വന്തമായി കാര്യങ്ങള്‍ നോക്കാന്‍ കഴിയാത്തവരുമായ വ്യക്തികളുടെ സംരക്ഷണവും സുരക്ഷിതത്വവും ഉറപ്പാക്കുന്നതിനായാണ് സംസ്ഥാന സര്‍ക്കാര്‍ പുതിയ സ്റ്റാന്‍ഡേര്‍ഡ് ഓപ്പറേറ്റിംഗ് പ്രൊട്ടോകോൾ (എസ്ഒപി) വിജ്ഞാപനം ചെയ്തത്. മാനസികാരോഗ്യ നിയമം 2017ലെ സെക്ഷന് 100 പ്രകാരമാണിത്. പരാതികള്‍ ജില്ലാതല മേല്‍നോട്ട സമിതിക്കു സമര്‍പ്പിക്കാം.
പൊലിസ് സ്റ്റേഷനുകള്‍, പട്രോളിംഗ് ഓഫിസര്‍മാര്‍, ട്രാഫിക് പൊലിസ്, റെയില്‍വേ പൊലിസ്, വനിതാ പൊലിസ് യൂണിറ്റുകള്‍ എന്നിവരുള്‍പ്പടെ കേരളത്തിലെ എല്ലാ പൊലിസ് ഉദ്യോഗസ്ഥര്ക്കും യൂണിറ്റുകള്‍ക്കും പ്രൊട്ടോകോള് ബാധകമാണ്. പ്രധാന നിർദേശങ്ങൾ ഇങ്ങനെ: “മാനസികാരോഗ്യ പ്രശ്നങ്ങളുള്ളവര്‍ക്ക് പ്രധാനം ശിക്ഷയല്ല, ചികിത്സയാണ്. പൊലിസ് സംരക്ഷണത്തില്‍ എടുക്കുന്ന വ്യക്തികളെ 24 മണിക്കൂറിനകം ആരോഗ്യകേന്ദ്രത്തില്‍ എത്തിക്കണം. അലഞ്ഞുതിരിഞ്ഞു നടക്കുന്ന ഇത്തരക്കാർക്കായി മിസിംഗ് പേഴ്സണ്‍ എഫ്‌ഐആര്‍ രജിസ്റ്റര്‍ ചെയ്യണം.
കുടുംബാംഗങ്ങളെ കണ്ടെത്തണം. വൈദ്യസഹായം ലഭിക്കുന്നതുവരെ സംരക്ഷിക്കാന്‍ പൊലിസ് സ്റ്റേഷനുകളില്‍ സേഫ് റൂമുകള്‍ സജ്ജീകരിക്കണം. ഇവരെ സംരക്ഷണത്തില്‍ എടുക്കുമ്പോള്‍ കയര്‍, ചങ്ങല, കമ്പി, ബെല്‍റ്റുകള്‍ എന്നിവ ഉപയോഗിക്കാനോ, കഴുത്തിലോ നെഞ്ചിലോ വയറിലോ ബലപ്രയോഗം നടത്താനോ പാടില്ല. മാനസികാസ്വാസ്ഥ്യം ഇല്ലെന്ന് മെഡിക്കല്‍ ഓഫിസര്‍ കണ്ടെത്തിയാല്‍, സെക്ഷന് 100(6) പ്രകാരമുള്ള നിയമപരമായ നടപടികള്‍ സ്വീകരിക്കണം. വ്യക്തി സുരക്ഷിതമായി കുടുംബത്തിലേക്ക് മടങ്ങുന്നതു വരെയോ നിയമപരമായ പരിചരണത്തില്‍ എത്തുന്നതുവരെയോ കേസ് തുടരണം.”
ലോകാരോഗ്യ സംഘടനയുടെ കണക്കനുസരിച്ച്, ഇന്ത്യയിൽ 20 കോടിയിലധികം ആളുകൾ ഏതെങ്കിലും തരത്തിലുള്ള മാനസികാരോഗ്യ പ്രശ്നങ്ങൾ നേരിടുന്നവരാണ്; ഏകദേശം ഏഴിൽ ഒരാൾ. ദേശീയ മാനസികാരോഗ്യ സർവേ പ്രകാരം കേരളത്തിലെ മുതിർന്നവരിൽ ഏകദേശം 11.36 ശതമാനം ആളുകൾ ഏതെങ്കിലും തരത്തിലുള്ള മാനസികാരോഗ്യ പ്രശ്നങ്ങൾ അനുഭവിക്കുന്നവരാണ്; എട്ടു പേരിൽ ഒരാൾ. പക്ഷേ, മാനസികാരോഗ്യ പരിചരണം ആവശ്യമുള്ളവരിൽ 80 മുതൽ 83 വരെ ശതമാനം ആളുകൾക്ക് ഇന്ത്യയിൽ കൃത്യമായ സമയത്ത് ചികിത്സ ലഭിക്കുന്നില്ല.
ഇതിലേറെയും ദരിദ്രരും അനാഥരുമാണെന്ന് എടുത്തുപറയേണ്ടതില്ലല്ലോ. ഇങ്ങനെ മാനസികാസ്വാസ്ഥ്യവുമായി തെരുവിലലഞ്ഞിരുന്ന തമിഴ്നാട് സ്വദേശിയെയാണ് കഴിഞ്ഞദിവസം പാലക്കാട് മൂലത്തറയിൽ ആൾക്കൂട്ടം തല്ലിക്കൊന്നത്. എത്ര ക്രൂരമാണിത്. അടുത്തയിടെ പ്രാർഥനാസമയത്ത് പള്ളിയിലെത്തിയ ഇതരമതസ്ഥൻ മാനസികാസ്വാസ്ഥ്യമുള്ളയാളാണെന്നു പൊലിസ് പറഞ്ഞിരുന്നു. എന്നിട്ടും അതിനെ വിദ്വേഷപ്രചാരണത്തിന് ഉപയോഗിക്കാൻ വൃഥാ ശ്രമിച്ചവരുണ്ട്.
മസ്തിഷ്കത്തിന്‍റെ താളം തെറ്റിയവരെ തിരിച്ചറിയാതിരിക്കുന്നതും അവരുടെ പ്രവൃത്തികളെ ദുർവ്യാഖ്യാനിക്കുന്നതും മനോരോഗം അല്ലെങ്കിൽ കുറ്റകൃത്യമാണ്. അവർക്കും വേണം ചികിത്സ, അല്ലെങ്കിൽ ശിക്ഷ. സർക്കാരിന്‍റെ വിജ്ഞാപനം പ്രധാനമായും ഉദ്യോഗസ്ഥർക്കുവേണ്ടിയാണ്. ഇതിന്‍റെ രണ്ടാം ഭാഗം പൊതുജനത്തിനുള്ള ബോധവത്കരണമാകട്ടെ.
ഒരു മനോരോഗിക്കും അറിയില്ല, അവരെന്താണു ചെയ്യുന്നതെന്ന്. പക്ഷേ, അവർ മനുഷ്യരാണ്; വിശപ്പുള്ള, വേദനയുള്ള, തണുപ്പും ചൂടുമറിയുന്ന നിസഹായർ. അവരോട് എങ്ങനെ പെരുമാറണമെന്ന് നാമോരോരുത്തരും പഠിക്കണം. ആരറിഞ്ഞു, നാളെ നമ്മുടെ വീട്ടിലൊരാൾക്ക് അത്തരം പരിചരണം വേണ്ടിവരില്ലെന്ന്.
15-10-2026
അഫ്ഗാനിസ്ഥാനിലെയോ ഇറാനിലെയോ ഇസ്‌ലാമിക തീവ്രവാദികൾക്കുമാത്രം മനസിലാകുന്ന ഭാഷ‍യിൽ അമേരിക്ക കഴിഞ്ഞദിവസം ഒരു പ്രാകൃത പ്രസ്താവന നടത്തി. ഒരാളെ കൊല്ലുന്നതിന്‍റെ തത്സമയ സംപ്രേഷണം ലോകത്തെ കാണിക്കും. 2009ല് ടെക്സസിലെ ഫോര്‍ട്ട് ഹുഡ് മിലിട്ടറി ബേസില്‍ 13 അമേരിക്കന്‍ സൈനികരുടെ മരണത്തിനിടയാക്കിയ ഇസ്‌ലാമിക തീവ്രവാദിയും മുന്‍ മേജറുമായ നിദാല്‍ ഹസന്‍റെ വധശിക്ഷ തത്സമയം സംപ്രേഷണം ചെയ്യുമെന്നായിരുന്നു പ്രതിരോധ സെക്രട്ടറി പിറ്റ് ഹെഗ്‌സെത്തിന്‍റെ ‘വീരവാദം’. പക്ഷേ, ആരും കൈയടിച്ചില്ല. മറിച്ച്, ലോകത്തിനു മുന്നിൽ അമേരിക്ക ചെറുതായിപ്പോയി. എത്ര വലിയ കുറ്റവാളിയായാലും ഒരു മനുഷ്യനെ കൊല്ലുന്നതു കണ്ടുകൊണ്ടിരിക്കാൻ ആർക്കാണു കൊതിയെന്ന് ലോകം അമേരിക്കയോടു ചോദിക്കുന്നു. പെന്‍റഗണെ താലിബാൻ ബാധിച്ചോ?
മുൻ യുഎസ് സൈനിക മേജറും മനോരോഗ വിദഗ്ധനുമായ നിദാൽ ഹസൻ നിരപരാധികളെ കൊന്നത് ഇസ്‌ലാമിക തീവ്രവാദത്തിന്‍റെ സ്വാധീനത്തിൽ മാത്രമാണ്. സൈനിക വിചാരണയ്ക്കിടെ അയാൾ കുറ്റം സമ്മതിക്കുകയും ചെയ്തു. അമേരിക്കൻ സൈന്യത്തിൽനിന്നു മുസ്‌ലിം ജനതയെയും അഫ്ഗാനിസ്ഥാനിലെ താലിബാനെയും സംരക്ഷിക്കുകയായിരുന്നു തന്‍റെ ലക്ഷ്യമെന്നായിരുന്നു നിദാലിന്‍റെ വിശദീകരണം. ആക്രമണത്തിനിടെ വെടിയേറ്റ ഹസൻ നിലവിൽ വീൽചെയറിലാണു കഴിയുന്നത്. ഡിസംബർ മൂന്നിനു നടത്താനിരിക്കുന്ന വധശിക്ഷ ഇന്‍റർനെറ്റിലൂടെ ലോകത്തെ കാണിക്കാനാണ് പെന്‍റഗൺ തീരുമാനം.
പല തോക്കുകളിൽനിന്നു ഫയറിംഗ് സ്ക്വാഡ് ഒരേസമയം വെടിയുതിർത്താണു ശിക്ഷ നടപ്പാക്കുന്നത്. വധശിക്ഷകൾ പരസ്യമായി നടത്താറുള്ളത് പ്രധാനമായും ഇസ്‌ലാമിക രാജ്യങ്ങളാണ്. അഫ്ഗാനിസ്ഥാനിലെയും ഇറാനിലെയും തെരുവുകളിൽ ദൈവനാമത്തിൽ അരങ്ങേറുന്ന ഇത്തരം പ്രാകൃത കാഴ്ചകളുണ്ട്. അതേ ശൈലിയിലേക്ക് അമേരിക്ക മാറിയതാണ് വിമർശനത്തിനിടയാക്കുന്നത്. കുട്ടികൾ ഉൾപ്പടെ കാണാനിടയുള്ള ദൃശ്യത്തിനെതിരേ ഐക്യരാഷ്‌ട്രസഭയും കത്തോലിക്കാ സഭയും വിവിധ രാഷ്‌ട്രനേതാക്കളും മനുഷ്യാവകാശ സംഘടനകളുമൊക്കെ രംഗത്തെത്തിയിട്ടുണ്ട്.
ഫയറിംഗ് സ്ക്വാഡിനെ ഉപയോഗിച്ച് വധശിക്ഷ നടപ്പാക്കി തത്സമയം സംപ്രേഷണം ചെയ്യുന്നത് പരസ്യമായ വധശിക്ഷയ്ക്കു തുല്യമാണെന്നും ക്രൂരവും മനുഷ്യത്വരഹിതവും അപമാനകരവും മാത്രമല്ല, പീഡനനിരോധനം സംബന്ധിച്ച അന്താരാഷ്‌ട്ര നിയമങ്ങളുടെ ലംഘനമാണെന്നും യുഎൻ മനുഷ്യാവകാശ ഓഫീസ് (ഒഎച്ച്സിഎച്ച്ആർ) വ്യക്തമാക്കി. വധശിക്ഷതന്നെ അംഗീകരിക്കാനാകില്ലെന്നും അതു മനുഷ്യന്‍റെ അന്തസിനെ ചോദ്യം ചെയ്യുന്നതാണെന്നും, സഭ ഇതിനെ എതിർക്കുന്നുവെന്നുമാണ് ലെയോ പതിനാലാമൻ മാർപാപ്പ പ്രതികരിച്ചത്.
വത്തിക്കാൻ സ്റ്റേറ്റ് സെക്രട്ടറി കർദിനാൾ പിയെത്രോ പരോളിൻ പറഞ്ഞത്, മരണത്തെ ഒരു കാഴ്ചവസ്തുവാക്കി മാറ്റുന്നത് തികച്ചും അനുചിതമാണെന്നാണ്. “കുറ്റവാളി എത്ര വലിയ തെറ്റ് ചെയ്ത ആളാണെങ്കിലും, ആധുനിക കാലത്ത് ഇത്തരം രീതികൾ ഉപയോഗിക്കുന്നത് തികച്ചും അവിശ്വസനീയവും അസ്വീകാര്യവുമാണ്.” ഇത്തരം നടപടി ക്രൂരതയെ പ്രോത്സാഹിപ്പിക്കുന്നതാണെന്നും പുനഃപരിശോധിക്കണമെന്നും അമേരിക്കന്‍ കത്തോലിക്കാ മെത്രാന്‍ സമിതി അധ്യക്ഷന്‍ ആര്‍ച്ച്ബിഷപ് പോള്‍ കോക്ലിയും ആവശ്യപ്പെട്ടു.
അത്തരമൊരു സംപ്രേഷണം നടത്തുമോയെന്ന കാര്യത്തിൽ സംശയമുണ്ടെന്നും നടത്തിയാൽ താനതു കാണില്ലെന്നുമാണ് അമേരിക്കൻ വൈസ് പ്രസിഡന്‍റ് ജെ.ഡി. വാൻസ് പറഞ്ഞത്. പ്രസിഡന്‍റ് ട്രംപിന്‍റെ റിപ്പബ്ലിക്കൻ പാർട്ടിയുടെ പ്രതിനിധി ഓസ്റ്റിന്‍ സ്‌കോട്ട്, ഹസന്‍റെ ശിക്ഷയെ പിന്തുണച്ചെങ്കിലും വധശിക്ഷകള്‍ ലൈവായി സംപ്രേഷണം ചെയ്യുന്നത് ജിഹാദി സംഘടനകളുടെ രീതിയാണെന്നും അമേരിക്ക അതിനേക്കാള്‍ ഉയര്‍ന്ന മൂല്യങ്ങള്‍ പുലര്‍ത്തണമെന്നും അഭിപ്രായപ്പെട്ടു. ഡെമോക്രാറ്റ് സെനറ്റര്‍ മാര്‍ക്ക് കെല്ലിയും ഹസന്‍ ശിക്ഷിക്കപ്പെടണമെന്നു പറഞ്ഞെങ്കിലും പരസ്യ വധശിക്ഷകള്‍ ഇറാനും താലിബാനും പിന്തുടരുന്ന രീതിയാണെന്നു വിമര്‍ശിച്ചു.
പ്രാകൃത പ്രഖ്യാപനത്തിലൂടെ ലോകത്തിനു മുന്നിൽ തങ്ങൾ ചെറുതാകുകയാണെന്നു തോന്നിയതിനാലാകാം, വധശിക്ഷ ഓൺലൈനിലൂടെ സംപ്രേഷണം ചെയ്യാനുള്ള തീരുമാനത്തിന് അംഗീകാരം നൽകിയെങ്കിലും അന്തിമ തീരുമാനമെടുക്കേണ്ടതുണ്ടെന്ന് പ്രസിഡന്‍റ് ഡോണൾഡ് ട്രംപ് പറഞ്ഞു. അന്തിമതീരുമാനം എന്തായാലും, വധശിക്ഷതന്നെ ഇല്ലാതാക്കുന്നതിനെക്കുറിച്ചു ലോകം ചർച്ച ചെയ്യവേ അതു പ്രദർശിപ്പിക്കുന്നത് ആധുനിക സംസ്കാരത്തെ ആക്രമിക്കുന്നതിനു തുല്യമാണ്.
വധശിക്ഷയ്ക്കു വിധിക്കപ്പെടുന്നയാൾ തീവ്രവാദിയാണോ എന്നതല്ല ഇപ്പോഴത്തെ വിഷയം. അതു കോടതി തെളിയിച്ചുകഴിഞ്ഞു. പക്ഷേ, കൊല്ലുന്നതു കാണാൻ ലോകത്തെ നിർബന്ധിക്കുന്നതും തീവ്രവാദമല്ലേ? ഡിസംബർ മൂന്നിനാണ് വധശിക്ഷ. അമേരിക്ക തീരുമാനത്തിൽനിന്നു പിന്മാറും. ഇല്ലെങ്കിൽ അതൊരു പരിഷ്കൃതലോകമാണെന്ന സങ്കൽപത്തിൽനിന്നു ലോകം പിന്മാറും.
14-10-2026
കാണൂ! അധികാരത്തിലിരിക്കെ പ്രതിഷേധക്കാരെ തല്ലിച്ചതച്ചിട്ട് "രക്ഷാപ്രവർത്തന'മെന്നു വിശേഷിപ്പിച്ച ക്രൂരഫലിതക്കാർ പ്രതിഷേധ സ്വാതന്ത്ര്യത്തെക്കുറിച്ച് പ്രസംഗിക്കുന്നു. വല്ലപ്പോഴുമുള്ള വാർത്താസമ്മേളനങ്ങളിലും പാർട്ട് ടൈം രാഷ്‌ട്രീയ പ്രവർത്തനത്തിലും ഒരു വ്യാഴവട്ടക്കാലം മുഴുകിയിരുന്നവർ "ശിവതാണ്ഡവ'ത്തിനിറങ്ങിയിരിക്കുന്നു. സ്വന്തം കസേരയല്ലാതെ മറ്റൊരു ലക്ഷ്യവുമില്ലാത്ത ആൾക്കൂട്ട പ്രതിപക്ഷമുന്നണി ഒന്നിച്ചൊരു ലോറിയിൽ കയറിയിരിക്കുന്നു. സർക്കാരിന്‍റെ ആസ്ഥാന വിദൂഷകരായ ഗോദിമീഡിയയുടെ നഗ്നതയിലേക്കു വിരൽ ചൂണ്ടി കുട്ടികൾ കൂക്കിവിളിക്കുന്നു.
കോടതികളുടെ നിഷ്ക്രിയ ഫയലുകൾ തുറക്കപ്പെടുന്നു. ജനം കാത്തിരുന്ന കാഴ്ചകൾ! അതേ, അഴിമതിയിലും വർഗീയതയിലും വോട്ടുകൊള്ളയിലും മുങ്ങിയ മോദി സർക്കാരിനെതിരേ ഇന്ത്യൻ യുവത തുറന്നുവിട്ട പ്രതിഷേധസമരങ്ങൾ ഡൽഹിയെ ജനാധിപത്യത്തിന്‍റെ ശുദ്ധീകരണസ്ഥലമാക്കിയിരിക്കുന്നു. ഈ തീക്കനൽ, വിയർപ്പിന്‍റെ അസുഖമുള്ള പ്രതിപക്ഷ ദേശീയ നേതാക്കളെ ഉത്തരവാദിത്വബോധമുള്ളവരാക്കിയാൽ ജനാധിപത്യത്തിന്‍റെ അമ്മ കേന്ദ്ര-സംസ്ഥാനങ്ങളിൽ ഏകാധിപതികളെ പ്രസവിക്കില്ല.
2014ലാണ് ഒന്നാം മോദി സർക്കാർ അധികാരത്തിലെത്തിയത്. യുപിഎ സർക്കാരിന്‍റെ അഴിമതിക്കെതിരേ 2011ൽ അണ്ണാ ഹസാരെ നടത്തിയ ജൻ ലോക്പാൽ സമരമാണ് ബിജെപി മുതലാക്കിയത്; ഒപ്പം വർഗീയതയും ഭിന്നിപ്പിക്കൽ രാഷ്‌ട്രീയവും. പക്ഷേ, അധികാരത്തിലെത്തിയ ബിജെപി പ്രസംഗിച്ചതെല്ലാം മുഖംമൂടികൾപോലെ അഴിച്ചുവച്ചു.
റഫാൽ ഇടപാടുകൾ, ഇലക്‌ടറൽ ബോണ്ട്, പിഎം കെയേഴ്സ് ഫണ്ട് ദുരൂഹതകൾ, പെഗാസസ് ചാരപ്പണി, ചങ്ങാത്ത മുതലാളിമാർക്കുവേണ്ടിയുള്ള തുടർച്ചയായ അധികാര ദുർവിനിയോഗങ്ങൾ, അഭിപ്രായസ്വാതന്ത്ര്യനിഷേധം, വിദ്യാഭ്യാസ കാവിവത്കരണം, ഭരണഘടനാ സ്ഥാപനങ്ങളുടെ ദുർവിനിയോഗം, ജഡ്ജിനിയമന ആരോപണങ്ങൾ, മതപരിവർത്തന-എഫ്സിആർഎ-ഗോഹത്യ നിരോധന നിയമങ്ങൾ ഉപയോഗിച്ചുള്ള ന്യൂനപക്ഷ-ദളിത്-ആദിവാസി വേട്ടകൾ, ഘർവാപ്പസിയുടെ ഇരട്ടത്താപ്പ്, വർഗീയ സംഘടനകളെ പേപ്പട്ടികളെയെന്നോണം അഴിച്ചുവിടൽ, അന്വേഷണ ഏജൻസികളെ ഉപയോഗിച്ചുള്ള പ്രതിപക്ഷവേട്ട, കുതിരക്കച്ചവടം, ഇന്ത്യ പിന്നിലായിപ്പോയ മാധ്യമസ്വാതന്ത്ര്യ-ലിംഗവ്യത്യാസ-സന്തോഷസൂചിക-സമാധാന-അഴിമതി-വായുഗുണനിലവാര ആഗോള റിപ്പോർട്ടുകൾ, തൊഴിലില്ലായ്മ, വിലക്കയറ്റം, പണപ്പെരുപ്പം, രൂപയുടെ ചരിത്ര മൂല്യത്തകർച്ച, ഇന്ധനവിലവർധന, മണിപ്പുർ കലാപം, കാർഷികമേഖലയുടെ തകർച്ച, വോട്ടുകൊള്ള... എല്ലാം മറച്ചുവയ്ക്കാൻ സർക്കാർ സ്ഥാപനങ്ങളെയും ഗോദിമീഡിയയെയും കൈവെള്ളയിലാക്കി. പക്ഷേ, ഫലപ്രദമോ തുടർച്ചയോ സ്ഥിരതയോ ഉള്ള ഒരൊറ്റ ജനകീയ പ്രക്ഷോഭം നടത്തിയില്ല പ്രതിപക്ഷം.
കഴിഞ്ഞ 12 വർഷത്തിനിടെ ഇന്ത്യയിൽ നടന്ന കരുത്തുറ്റ ഒരേയൊരു സമരം "ഗതികെട്ട' കർഷകരുടേതായിരുന്നു. 2020 സെപ്റ്റംബറിൽ പാർലമെന്‍റ് പാസാക്കിയ മൂന്നു കാർഷികനിയമങ്ങൾക്കെതിരേ അവർ ആഞ്ഞടിച്ചു. ഡൽഹിയിലെത്തിയ ഏകദേശം 50 കർഷക സംഘടനകൾ സർക്കാരിനെ വിറപ്പിച്ചു. അധ്വാനിക്കാതെ അപ്പം തിന്നാനെത്തിയ പ്രധാനപ്രതിപക്ഷമായ കോണ്ഗ്രസ് ഉൾപ്പടെയുള്ള പ്രതിപക്ഷ പാർട്ടികളെ കർഷകർ നിശ്ചിത അകലത്തിൽ മാത്രം നിർത്തി. രാജ്യദ്രോഹി-തീവ്രവാദി-വിദേശചാര ആരോപണങ്ങൾ ഏശിയില്ല. 2021 നവംബർ 19ന് മൂന്നു കാർഷിക നിയമങ്ങളും പിൻവലിക്കുന്നതായി പ്രധാനമന്ത്രി നരേന്ദ്ര മോദിക്കു പ്രഖ്യാപിക്കേണ്ടിവന്നു. എന്നിട്ടും പഠിച്ചില്ല പ്രതിപക്ഷം. മുകളിൽ ചൂണ്ടിക്കാണിച്ച അപചയങ്ങളെല്ലാം നിലനിന്നിട്ടും തട്ടിക്കൂട്ട് മുന്നണിയുടെ പായ വിരിച്ച് പ്രതിപക്ഷം സുഖമായുറങ്ങി. ഭരിക്കുന്നിടത്ത് അഴിമതിക്കാരായി, തെരഞ്ഞെടുപ്പിൽ പരസ്പരം കാലുവാരി.
തെരഞ്ഞെടുപ്പിലെ വോട്ടുതട്ടിപ്പുകൾ ആദ്യം തെളിവു സഹിതം വിളിച്ചുപറഞ്ഞത് 2025 ഓഗസ്റ്റ് ഏഴിന് ലോക്സഭാ പ്രതിപക്ഷനേതാവ് രാഹുൽ ഗാന്ധിയാണ്. അദ്ദേഹം തെരഞ്ഞെടുപ്പുകാല ഭാരതയാത്രകൾ നടത്തി ആളുകൾക്കു പ്രതീക്ഷ കൊടുത്തു. പക്ഷേ, ഒന്നിനും തുടർച്ചയില്ല. ലോക്സഭയിൽ സാന്നിധ്യമുണ്ടാകേണ്ട സമയത്ത് അദ്ദേഹം വിനോദമെന്ന് ആക്ഷേപിക്കപ്പെട്ട യാത്രകളിൽ അഭിരമിച്ചു. പ്രമുഖ നേതാക്കൾ പാർട്ടിയിൽനിന്നു വിട്ടുപോയി. കോണ്ഗ്രസും ആം ആദ്മിയും തൃണമൂലും ഡിഎംകെയും ഉൾപ്പടെ സ്വന്തം താത്പര്യങ്ങൾക്കുവേണ്ടി ഇന്ത്യ മുന്നണിയുടെ ലക്ഷ്യത്തിനു തുരങ്കം പണിതു.
ബിജെപിക്കാർക്കും അണികൾക്കുംവേണ്ടി മാത്രമല്ല സർക്കാരെന്നു ഭരിക്കുന്നവരും, തെരഞ്ഞെടുത്ത ജനത്തോട് ഉത്തരവാദിത്വമുണ്ടെന്ന് പ്രതിപക്ഷവും മറന്നു. ആ ജനാധിപത്യ ശൂന്യതയിലേക്കാണ് കോക്രോച്ച് ജനതാ പാർട്ടി ഇരച്ചെത്തിയത്. നീറ്റ്-പ്ലസ് ടു കെടുകാര്യസ്ഥതയ്ക്കെതിരേ തെരുവിലിറങ്ങിയ കുട്ടികൾ വിദ്യാഭ്യാസമന്ത്രി ധർമേന്ദ്ര പ്രധാനെ രാജിവയ്പിച്ചു. നഗ്നത മറയ്ക്കാൻ പരന്പരാഗത പ്രതിപക്ഷവും ഇറങ്ങിയെന്നത് 2024-26 ചരിത്രത്തിൽ അടയാളപ്പെടുത്തിക്കഴിഞ്ഞു.
നന്ദി ഇന്ത്യൻ യുവത്വത്തോടാണ്. തകർക്കപ്പെട്ട ജനാധിപത്യത്തിന്‍റെ കല്ലുകൾ അവർ പെറുക്കിക്കൂട്ടുന്ന തോന്നലുണ്ട്. പക്ഷേ, തിളച്ച വെള്ളത്തിൽ വീണ രാജ്യം അമിത പ്രതീക്ഷയിലല്ല. ഭരണമുണ്ടായിരുന്നപ്പോൾ അഹന്തയും അഴിമതിയും സ്വജനപക്ഷപാതവും ഉറപ്പാക്കിയ പ്രതിപക്ഷ നേതാക്കളാണ് ഡൽഹിയിൽ കൈകോർത്തിരിക്കുന്നത്. സ്വയം വെളുപ്പിക്കാൻ അവസരം കാത്തിരിക്കുന്ന വ്യക്തികളും അക്രമത്തിലും ഏകാധിപത്യപ്രവണതയിലും മാർക്കുതട്ടിപ്പിലും പിടിക്കപ്പെട്ട വിദ്യാർഥിസംഘടനകളും സംശയനിഴലിലുള്ള മതസംഘടനകളുമൊക്കെ ഡൽഹിയിൽ മുങ്ങിനിവരുന്നുണ്ട്.
രണ്ടാം സ്വാതന്ത്ര്യസമരമെന്നത് വിശേഷണമാണ്. സിജെപിയുടേത് ഉൾപ്പടെ പ്രസംഗങ്ങൾ ഗംഭീരമാണ്. പക്ഷേ, ഇന്ത്യൻ സ്വാതന്ത്ര്യസമരം പ്രവൃത്തി-മൂല്യ കേന്ദ്രീകൃതമായിരുന്നു. ഇതും അങ്ങനെയാകട്ടെ. അതെന്തായാലും യുവജനങ്ങൾ തെളിച്ച ശുദ്ധീകരണസ്ഥലത്തിൽ കറകളഞ്ഞെത്തട്ടെ ഇന്ത്യൻ രാഷ്‌ട്രീയം! ഇല്ലെങ്കിൽ അവസാന ചിരി നരകത്തിന്‍റേതു തന്നെയായിരിക്കും.
13-10-2026
സുപ്രീംകോടതിയിലെയും വിവിധ ഹൈക്കോടതികളിലെയും ജഡ്ജിമാരെ കൊളീജിയത്തിന് പകരം പ്രധാനമന്ത്രി നരേന്ദ്ര മോദി നേരിട്ടാണ് നിയമിക്കുന്നത്.’’- മദ്രാസ് ഹൈക്കോടതി മുന്‍ ജഡ്ജി ജസ്റ്റീസ് കെ. ചന്ദ്രു (ഒക്‌ടോബർ 10, ചെന്നൈ). ഒറ്റപ്പെട്ടതല്ല, ജസ്റ്റീസ് ചന്ദ്രുവിന്‍റെ വാക്കുകൾ. ഇന്ത്യയിലെ പ്രമുഖ ന്യായാധിപർ ഏതാനും വർഷങ്ങളായി ഉന്നയിക്കുന്ന ആശങ്കകളിൽ മൂർച്ചയേറിയ ഒന്നു മാത്രം. ചരിത്രത്തിലെ ഏറ്റവും സംശയനിഴലിലായ മുഖ്യ തെരഞ്ഞെടുപ്പ് കമ്മിഷണർക്കെതിരേയുള്ള പരാതികളൊക്കെയും കോടതികൾ അവഗണിച്ചതോടെയാണ് ജനം തെരുവിലിറങ്ങിയത്. ജുഡീഷ്യറിയെന്ന ജനാധിപത്യത്തിന്‍റെ ഒടുവിലത്തെ തൂണും വീഴുംമുന്പ് ജാഗ്രത പാലിക്കാൻ സമയമായിരിക്കുന്നു.
അങ്ങേയറ്റം മനുഷ്യസ്നേഹിയായ ജസ്റ്റീസ് ചന്ദ്രുവിന്‍റെ വാക്കുകൾ ഇന്ത്യൻ ജനാധിപത്യത്തിന്‍റെ നേർചിത്രമായിട്ടുണ്ട്. നടൻ സൂര്യ വക്കീലായി പ്രധാന വേഷത്തിലെത്തിയ ‘ജയ് ഭീം’ എന്ന തമിഴ് സിനിമയുടെ പ്രചോദനം ജസ്റ്റീസ് ചന്ദ്രുവായിരുന്നു. "2014ല് അധികാരത്തില്‍ വന്ന മോദി സര്‍ക്കാര്‍, ദേശീയ ജുഡീഷ്യല്‍ നിയമന കമ്മിഷന് (എൻജെഎസി) കൊണ്ടുവരാന്‍ ശ്രമിച്ചെങ്കിലും സുപ്രീംകോടതി ആ നിയമനിര്‍മാണം റദ്ദാക്കുകയായിരുന്നു. അതിനുശേഷം സുപ്രീംകോടതി, ഹൈക്കോടതി ജഡ്ജിമാരുടെ നിയമനങ്ങള്‍ കൊളീജിയത്തിനു പകരമായി മോദി നേരിട്ടാണു നടത്തുന്നത്. എന്‍ജെഎസിയേക്കാള്‍ കൂടുതല്‍ നേട്ടമുണ്ടാക്കുന്ന മറ്റ് വഴികള്‍ കണ്ടെത്തിയതിനാലാണ് അത് പുനരുജ്ജീവിപ്പിക്കാന്‍ സര്‍ക്കാര്‍ ശ്രമിക്കാതിരുന്നത്.''
ജസ്റ്റീസ് ചന്ദ്രുവിനുമുന്പ് ആദ്യ അപായമണി മുഴങ്ങിയത് 2018 ജനുവരി 12നായിരുന്നു. സുപ്രീംകോടതി ചീഫ് ജസ്റ്റീസ് ആയിരുന്ന ദീപക് മിശ്ര പ്രത്യേക കേസുകൾ നിശ്ചിത ജഡ്ജിമാരുടെ ബെഞ്ചുകൾക്കു മാത്രം നൽകുന്നതിനെതിരേ, അന്നു വാർത്താസമ്മേളനം നടത്തിയ ജസ്റ്റീസുമാരായ ജെ. ചെലമേശ്വർ, രഞ്ജൻ ഗൊഗോയ്, മദൻ ബി. ലോഖുർ, കുര്യൻ ജോസഫ് എന്നിവർ പറഞ്ഞത്, രാജ്യത്തെ ജുഡീഷ്യറിയും ജനാധിപത്യവും വലിയ ഭീഷണി നേരിടുന്നു എന്നായിരുന്നു. ഗോദി മീഡിയയിലൊഴികെ അന്നതു വലിയ വാർത്തയായിരുന്നെങ്കിലും ക്രമേണ അതൊക്കെ നിസാര സംഭവങ്ങളായി സാമാന്യവത്കരിക്കപ്പെട്ടു. പ്രതിപക്ഷത്തിന്‍റെ കുപ്രസിദ്ധമായ ആലസ്യത്തിന്‍റെ പരിണതഫലവുമായിരുന്നു. പക്ഷേ, രാജ്യം അതിനു വില കൊടുത്തുതുടങ്ങി.
ബിജെപി നേതാക്കളുടെയും മന്ത്രിമാരുടെയും തെരഞ്ഞെടുപ്പുകാലത്തെ ക്രൂരമായ വിദ്വേഷപ്രസംഗങ്ങൾ തെരഞ്ഞെടുപ്പു കമ്മിഷൻ കണ്ടില്ലെന്നു നടിച്ചു. പ്രതിപക്ഷത്തെ വെറുതേ വിട്ടുമില്ല. കോടതിയുടെ നിശബ്ദത ജനാധിപത്യത്തെ തളർത്തുകയായിരുന്നു. ന്യൂനപക്ഷ ആക്രമണങ്ങളും ബുൾഡോസർരാജുമൊക്കെ കോടതികളിലെത്തിയപ്പോൾ ഉപദേശങ്ങളിലും നിരീക്ഷണങ്ങളിലും ന്യായാധിപർ ഒളിച്ചു. ബാബറി മസ്ജിദ് കേസിലൊഴികെയുള്ള ആരാധനാലയങ്ങളുടെ കാര്യത്തിൽ 1947ലെ തത്‌സ്ഥിതി നിലനിർത്തണമെന്ന 1991ലെ ആരാധനാലയ സംരക്ഷണ നിയമം നിലനിൽക്കേ, കോടതികൾ ഹിന്ദുത്വയുടെ പുതിയ ഹർജികൾ ഫയലിൽ സ്വീകരിക്കുകയും തുടർനടപടികൾക്കു നിർദേശിക്കുകയും ചെയ്തു. വാരാണസിയിലെ ഗ്യാൻവാപി മോസ്ക്, യുപിയിലെ മഥുര ഷാഹി ഈദ്ഗാഹ്, മധ്യപ്രദേശ് കമാൽ മൗല മസ്ജിദ് എന്നിവയുൾപ്പടെ രാജ്യത്തുടനീളമുള്ള പല ആരാധനാലയങ്ങളും കേസിലായിക്കഴിഞ്ഞു. ഇക്കഴിഞ്ഞ ആറാംതീയതി മദ്രാസ് ഹൈക്കോടതിയുടെ മധുര ബെഞ്ചിലെ ഡിവിഷൻ ബെഞ്ച് കൻസിയോൺ പബ്ലിക് ചാരിറ്റബിൾ ട്രസ്റ്റുമായി ബന്ധപ്പെട്ട കേസിൽ പുറപ്പെടുവിച്ച വിധിയിൽ ക്രൈസ്തവ മതത്തെക്കുറിച്ച്, “എല്ലാവരെയും യേശുക്രിസ്തുവിന്‍റെ അനുയായികളാക്കുക എന്നതാണ് ക്രിസ്തുമതത്തിന്‍റെ ദൈവശാസ്ത്രപരമായ ദൗത്യം”എന്നും ""പുള്ളിപ്പുലി തന്‍റെ പുള്ളികൾ മാറ്റില്ല'' എന്നും പരാമർശിച്ചിരുന്നു. പക്ഷേ, ഘർവാപസിക്കാരായ മൗലികവാദ ഹിന്ദു സംഘടനകളെ പരാമർശിക്കുമ്പോൾ, അതു ഹിന്ദു സംഘടനകളുടെ പൊതുസ്വഭാവമായി ചിത്രീകരിക്കാൻ തയാറായുമില്ല. എന്താണു സംഭവിക്കുന്നത്?
"ഏഴെട്ടു വർഷങ്ങൾക്കിടെ രാജ്യത്തെ ഹൈക്കോടതികളിലുടനീളം ഒരു പ്രത്യേക പ്രത്യയശാസ്ത്രത്തിന്‍റെ ജഡ്ജിമാരെ നിയമിച്ചിട്ടുണ്ട്. ഈ സാഹചര്യത്തെ മറികടക്കാൻ കഴിയുമെന്ന് ഞാൻ കരുതുന്നില്ല.’’- സുപ്രീംകോടതി അഭിഭാഷകൻ ദുഷ്യന്ത് ദവേ. (2023 ഫെബ്രുവരി 19). ദവേയുടെ വാക്കുകളിൽ ഭരണഘടനയുടെ പിടച്ചിലുണ്ട്. കോടതികൾക്കു പുറത്ത് ന്യൂനപക്ഷങ്ങളുടെയും ദളിതരുടെയും ആദിവാസികളുടെയും വക്കാലത്തുമായി ജനാധിപത്യം ഒരേ നിൽപാണ്.
എസ്ഐആർ സമരത്തിൽ സുപ്രീംകോടതി ഞായറാഴ്ച പുറപ്പെടുവിച്ച ഉത്തരവിലൂടെ നീതിന്യായ വ്യവസ്ഥയിലുള്ള ജനങ്ങളുടെ വിശ്വാസം തിരിച്ചുവന്നുവെന്ന് പിന്നീട് പറഞ്ഞെങ്കിലും സുപ്രീംകോടതി അഭിഭാഷകൻ കപിൽ സിബൽ തൊട്ടുമുന്പു പറഞ്ഞ വാക്കുകൾ നിരാശയുടെ പടിവാതിൽക്കൽ നിൽക്കുന്ന എല്ലാവരുടേതുമായി. ""എസ്ഐആറിലൂടെ നിരവധിപ്പേരെ അനധികൃതമായി ഒഴിവാക്കിയതു സംബന്ധിച്ച് സുപ്രീംകോടതിയെ പലതവണ സമീപിച്ചെങ്കിലും യാതൊരു ആശ്വാസവും ലഭിച്ചില്ല. ഇക്കാലത്ത് ഭരണഘടനയെ സംരക്ഷിക്കാൻ സുപ്രീംകോടതിക്കു കഴിയുമെങ്കിലും അവിടെ വീണ്ടും വീണ്ടും പോകുന്നതുകൊണ്ട് ഇനി പ്രയോജനമില്ലെന്ന് കരുതുന്നു.’’ഡൽഹിയിൽ ഒക്‌ടോബർ 11നാണ് അദ്ദേഹം ഇതു പറഞ്ഞത്.
ഏതാനും അഭിഭാഷകർക്കും ജഡ്ജിമാർക്കുമേ സർക്കാരിനെതിരേ പ്രതികരിക്കാൻ ധൈര്യമുള്ളൂ. പക്ഷേ, മുന്പെങ്ങുമില്ലാത്തവിധം ഇന്ത്യൻ ജുഡീഷ്യറിയെ ബാധിച്ചെന്നു കരുതാവുന്ന ചരിത്രപരമായ നിശബ്‌ദതയും വിധേയത്വവും തിരിച്ചറിയാൻ അതുതന്നെ ധാരാളം. ഈ നിമിഷംവരെ ഇന്ത്യയിലെ ജനങ്ങളുടെ പ്രതീക്ഷയാണ് കോടതികൾ. ജനാധിപത്യത്തെ പുനഃസ്ഥാപിക്കുന്ന പരാമർശങ്ങളും വിധികളും പല ജഡ്ജിമാരും പുറപ്പെടുവിക്കുന്നുണ്ട്. പക്ഷേ, നീതിന്യായ സംവിധാനം ഏതാനും ജഡ്ജിമാരുടെ മാത്രം നീതിനിഷ്ഠയാലല്ല വിലയിരുത്തപ്പെടേണ്ടത്. ജനം ജഡ്ജിയെ അല്ല, കോടതിയെ ആണ് സമീപിക്കുന്നത്. പക്ഷേ, നീതി ലഭിക്കുമെന്ന ആത്മവിശ്വാസം കൂടുതൽ ആളുകളിൽനിന്നു ചോർന്നുപോകുകയാണ്.
ജനങ്ങൾ ചെയ്യേണ്ടത്, കോടതികൾക്ക് ഒരപചയവും സംഭവിക്കുന്നില്ലെന്ന് ആശ്വസിച്ചിരിക്കുകയല്ല, ഉറപ്പാക്കുകയാണ്. ന്യായാധിപർ ചെയ്യേണ്ടത്, വിധിയെഴുതാനുള്ള കടലാസിനും മസ്തിഷ്കത്തിനുമിടയിൽ ഒരു യജമാനന്‍റെ മുഖം തെളിയുന്നില്ലെന്ന് ഉറപ്പാക്കുകയും. സർക്കാരിന്‍റെ മാത്രം ജീർണതയല്ല പാറ്റകൾ പെരുകാനിടയാക്കിയതെന്ന് ആത്മവിമർശനത്തോടെ കോടതികൾ തിരിച്ചറിയണമെന്ന് ജനം താത്പര്യപ്പെടുന്നു.
12-10-2026
ഇതിലും വലിയ അടിമത്തങ്ങളെയും അടിച്ചമർത്തലുകളെയും നേരിട്ട ജനതയാണ്; പേടിപ്പിച്ചിട്ടു കാര്യമുണ്ടെന്നു തോന്നുന്നില്ല. ബിജെപിയെ അധികാരത്തിലെത്തിക്കാൻ കോടിക്കണക്കിനു വോട്ട് കൊള്ളയടിച്ചെന്ന ആരോപണം നേരിടുന്ന, പണ്ടേ സംശയനിഴലിലുള്ള ഒരുദ്യോഗസ്ഥനെ, ചീഫ് ഇലക്ഷൻ കമ്മിഷണറെ സംരക്ഷിക്കാനാണ് ഭരണകൂടം രാജ്യത്തെ മുൾമുനയിലാക്കുന്നത്; പ്രതിഷേധങ്ങളെ അടിച്ചമർത്തുന്നത്. പക്ഷേ, രാജാവ് നഗ്നനാണെന്നു വിളിച്ചുപറയാൻ ധൈര്യമുള്ള കൂടുതൽ "കുട്ടികൾ' ജനാധിപത്യത്തിന്‍റെ തെരുവുകളെ കീഴടക്കുകയാണ്.
പ്രഖ്യാപിച്ചാലും ഇല്ലെങ്കിലും അടിയന്തരാവസ്ഥയെയും ഏകാധിപത്യത്തെയും വേണ്ടവിധം "കൈകാര്യം' ചെയ്ത ജനതയാണിത്. 56 ഇഞ്ച് ഏകാധിപത്യ അരക്ഷിതാവസ്ഥയ്ക്ക് ജനം വഴങ്ങില്ല. മോദിസർക്കാർ ജനാധിപത്യത്തിനു വഴങ്ങിയേ തീരൂ.
രാജ്യം തിളയ്ക്കുന്നത്, ജനാധിപത്യത്തിന്‍റെ അടിസ്ഥാനമായ വോട്ട് മോഷ്ടിച്ചെന്ന ആരോപണം നേരിടുന്ന മുഖ്യതെരഞ്ഞെടുപ്പ് കമ്മിഷണർ ഗ്യാനേഷ്കുമാറിനെ പുറത്താക്കണമെന്ന് ആവശ്യപ്പെട്ടാണ്. സിജെപി എന്ന യുവമുന്നേറ്റവും പ്രതിപക്ഷപാർട്ടികളും നടത്തുന്ന സമരം കേന്ദ്രം അടിച്ചമർത്തുകയാണ്. തലസ്ഥാനത്തുമാത്രം പതിനായിരക്കണക്കിനു വരുന്ന പൊലിസ് സേനയെയും അർധസൈനികവിഭാഗത്തെയും വിന്യസിച്ചിരിക്കുന്നു.
സമരവേദികൾ അടച്ചു. ഗതാഗതം, ഇന്‍റർനെറ്റ്, കുടിവെള്ളം, ഭക്ഷണം... എല്ലാം നിരോധിച്ചു. എംപിമാരും മുൻ മുഖ്യമന്ത്രിമാരും ഉൾപ്പടെയുള്ളവരെ തടവിലാക്കുന്നു. ആയിരങ്ങളെ കസ്റ്റഡിയിലെടുക്കുന്നു. മാധ്യമപ്രവർത്തകരെ വലിച്ചിഴയ്ക്കുന്നു... എന്നിട്ട് ജന്തർ മന്തറിലെ സമരത്തിന് ആളില്ലെന്ന് ബിജെപി ഭക്തരുടെ കീർത്തനം! ലോകത്തിനുമുന്നിൽ രാജ്യം നാണംകെട്ടു. പ്രതികരിച്ച ഐക്യരാഷ്ട്രസഭയോടുപോലും കലിപ്പ്. സ്വതന്ത്ര ഇന്ത്യ കണ്ട ഏറ്റവും വലിയ ജനാധിപത്യവേട്ട! എന്തായിരിക്കാം കാരണം? ഗ്യാനേഷ്കുമാറെന്ന പാവയെ ചലിപ്പിക്കുന്ന ചരടുകളിലേക്കു നീളുന്ന കഥ കേൾക്കണം.
2024 ലോക്സഭാ തെരഞ്ഞെടുപ്പിൽ രജിസ്റ്റർ ചെയ്ത വോട്ടർമാരുടെ എണ്ണം 96 കോടിയായിരുന്നു. നാനൂറിലേറെ സീറ്റുകൾ നേടുമെന്ന് മോദി അവകാശപ്പെട്ടെങ്കിലും കിട്ടിയത് വെറും 240. മറ്റുള്ളവരുടെ പിന്തുണയിൽ ഭരണം തട്ടിക്കൂട്ടി. വർഗീയധ്രുവീകരണത്തിലൂടെ ഇനി വോട്ട് നേടാനാകില്ലെന്ന് ഉറപ്പായി. വികസന പൊള്ളത്തരങ്ങൾ ആഗോള റിപ്പോർട്ടുകളിൽ ഉൾപ്പടെ നിലംപൊത്തി. വാഴ്ത്തുപാട്ടുകാരായ ഗോദി മീഡിയയെ ജനം ഓടിച്ചിട്ടു തല്ലുന്ന സ്ഥിതിയായി. അന്വേഷണ ഏജൻസികളെ ഇറക്കി പ്രതിപക്ഷത്തെയും വിമർശകരെയും ഭീഷണിപ്പെടുത്തിയിട്ടും കുതിരക്കന്പോളത്തിൽ ജനപ്രതിനിധികളെ മൊത്തക്കച്ചവടം നടത്തിയിട്ടും സർക്കാരിന്‍റെ അരക്ഷിതാവസ്ഥയ്ക്കു ശമനമില്ല. കഥയുടെ രണ്ടാം അധ്യായം അവിടെ തുടങ്ങി.
സന്പൂർണവിധേയനായ ഗ്യാനേഷ് കുമാറിനെ മുഖ്യ തെരഞ്ഞെടുപ്പ് കമ്മിഷണറാക്കി. 96 കോടി വോട്ടർമാരുടെ ലിസ്റ്റ് പരിശോധിക്കാൻ തുടങ്ങിയ എസ്ഐആർ (തീവ്ര വോട്ടർപട്ടിക പരിഷ്കരണം) പൂർത്തിയാകുന്നതിനു മുന്പുതന്നെ 13.3 കോടി വോട്ടർമാരെ വെട്ടിനിരത്തി. രണ്ടു കോടിയോളം ആളുകൾ മരിച്ചവരോ സ്ഥലത്തില്ലാത്തവരോ ആണ്. രണ്ടു കോടിയോളം പേർ അപ്പീലിലൂടെ തിരിച്ചെത്തി.
സ്ത്രീകളും കുടിയേറ്റക്കാരും ഇതരസംസ്ഥാന തൊഴിലാളികളും ന്യൂനപക്ഷങ്ങളും ഉൾപ്പടെ ബാക്കി ഒന്പതു കോടിയോളം വോട്ടർമാർ പുറത്ത്. ഇത് തെരഞ്ഞെടുപ്പുകളുടെ വിധി അട്ടിമറിക്കാൻ പോന്ന സംഖ്യയാണ്. മാത്രമല്ല, അപ്പീലിലൂടെ വോട്ടർമാർ തിരിച്ചെത്തിയപ്പോഴേക്കും പല തെരഞ്ഞെടുപ്പുകളും കഴിഞ്ഞിരുന്നു. കോടതികൾ നോക്കുകുത്തിയായി.
കള്ളവോട്ടുകളുടെ പട്ടിക പ്രതിപക്ഷനേതാവ് രാഹുൽഗാന്ധി പ്രദർശിപ്പിച്ചു. അതിനു കൃത്യമായ മറുപടി പറയാതെ രോഷാകുലനായ ഗ്യാനേഷ്കുമാറിന്‍റെ പ്രകടനം വോട്ടർ പട്ടികയുടെയും തെരഞ്ഞെടുപ്പ് പ്രക്രിയയുടെയും വിശ്വാസ്യത സംശയത്തിലാക്കിയെന്നു പറഞ്ഞത്, മുൻ മുഖ്യ തെരഞ്ഞെടുപ്പു കമ്മിഷണർമാരായ എസ്.വൈ. ഖുറേഷി, ഒ.പി. റാവത്ത്, മുൻ തെരഞ്ഞെടുപ്പ് കമ്മിഷണർ അശോക് ലവാസ എന്നിവരാണ്. ഭരണപിന്തുണയുടെ ധാർഷ്‌ട്യത്തിൽ ഗ്യാനേഷ് കൂടുതൽ വേലകളിറക്കി.
എസ്ഐആറിൽ, 2003ലെ വോട്ടർ പട്ടിക പരിഷ്കരണത്തിൽ മാതാപിതാക്കളുടെ പേരുണ്ടോ എന്നതും വോട്ടപേക്ഷകർക്കു സ്ഥാപിക്കേണ്ടിവന്നു. ഇങ്ങനെ ഫോം-6 മാറ്റാനുള്ള നിർദേശം തങ്ങൾ നൽകിയിട്ടില്ലെന്നു സുപ്രീംകോടതി വ്യക്തമാക്കി. ഇതിനിടെയാണ്, ഗ്യാനേഷ്കുമാറിന്‍റെ ഏകാധിപത്യ തീരുമാനങ്ങൾക്കെതിരേ മറ്റു രണ്ടു കമ്മിഷണർമാരും 10 മാസത്തിനിടെ 14 തവണ ഔദ്യോഗികമായി എതിർപ്പു രേഖപ്പെടുത്തിയിരുന്നെന്ന ഇന്ത്യൻ എക്സ്പ്രസ് റിപ്പോർട്ട് പുറത്തുവന്നത്. ഇതോടെ, നിയമസംവിധാനങ്ങളിൽപോലും പ്രതീക്ഷയില്ലാതായ ജനം തെരുവിലിറങ്ങി.
സുപ്രീംകോടതി ചീഫ് ജസ്റ്റീസിനെ ഒഴിവാക്കി ഏകാധിപത്യരീതിയിൽ തെരഞ്ഞെടുത്ത സർക്കാർ പാവയായ ചീഫ് ഇലക്ഷൻ കമ്മിഷണർക്ക് ആജീവനാന്തനിയമപരിക്ഷ കൊടുത്തത് മുഖപ്രസംഗത്തിൽ ദീപിക പലവട്ടം ചൂണ്ടിക്കാണിച്ചിരുന്നു. ആ "കരിനിയമം' എന്തിനായിരുന്നെന്ന് ഇപ്പോൾ ബോധ്യമാകുകയാണ്. 2023 ഓഗസ്റ്റിൽ പാർലമെന്‍റിൽ 146 എംപിമാരെ പുറത്താക്കി പാസാക്കിയ The Chief Election Commissioner and other Election Commissioners (Appointment, Conditions of Service and Term of Office) Act, 2023, 16ാം വകുപ്പനുസരിച്ച്, തെരഞ്ഞെടുപ്പ് കമ്മിഷൻ കൃത്യനിർവഹണവുമായി ബന്ധപ്പെട്ട് എന്തു തീരുമാനമെടുത്താലും അതിനെതിരേ സിവിലോ ക്രിമിനലോ ആയ ഒരു കേസും അവർക്കെതിരേ ജോലിക്കാലത്തോ പിന്നീടോ എടുക്കാനാകില്ല. എന്തു തോന്ന്യാസവും കാണിക്കാനുള്ള ലൈസൻസ്! "ആ പണി' അദ്ദേഹം നന്നായി ചെയ്തുകൊടുത്തെന്നുവേണം കരുതാൻ. ഇല്ലെന്ന് അദ്ദേഹവും തെളിയിക്കുന്നില്ല.
ഗ്യാനേഷ്കുമാർ രാജി വയ്ക്കണം. ജനാധിപത്യമൂല്യങ്ങളെ വീണ്ടെടുക്കണം. പ്രതിപക്ഷം, നാണംകെട്ട തമ്മിലടി അവസാനിപ്പിക്കണം. അടിയന്തരാവസ്ഥയേക്കാൾ ഭയാനകമാണ് സ്ഥിതി. ഇന്ദിരാഗാന്ധി വോട്ട് മോഷ്ടിച്ചില്ല. അതുകൊണ്ട് അടിയന്തരാവസ്ഥ പ്രഖ്യാപിച്ച അവരെ ജനം പുറത്താക്കി. അതേ ജനം അവരെ തിരിച്ചുവിളിക്കുകയും ചെയ്തു. ആ സ്വാതന്ത്ര്യമാണ് തട്ടിയെടുക്കുന്നതെങ്കിൽ പാവകളുടെ ചരടുവലിക്കാരേ, ജനം നിങ്ങളോടു കരുണ കാണിക്കില്ല.
10-10-2026
നിയമസംരക്ഷണവും സഹായകേന്ദ്രങ്ങളുമൊക്കെയുണ്ടെങ്കിലും ഗാർഹിക പീഡനത്തിന് കുറവൊന്നുമില്ല. കഴിഞ്ഞ മൂന്നു വർഷത്തിനിടെ ഈ വിഭാഗത്തിൽ പതിനായിരത്തിലേറെ കേസുകളാണ് കേരളത്തിൽ രജിസ്റ്റർ ചെയ്തിട്ടുള്ളത്. പുറത്തറിയാത്തവ ഇതിന്‍റെ എത്രയോ ഇരട്ടിയാണ്. വിദ്യാഭ്യാസം, ജോലി തുടങ്ങിയ ഉയർന്ന സാമൂഹിക മാനദണ്ഡങ്ങളൊന്നും ഗാർഹികപീഡനമെന്ന ക്രൂരതയ്ക്ക് മറുമരുന്നാകുന്നില്ല എന്നതാണ് കേരളത്തിന്‍റെ അനുഭവം.
അതൊരു മനോഭാവമാണ്. തലമുറ തലമുറയായി കൈമാറിവരുന്ന പുരുഷാധിപത്യ കാഴ്ചപ്പാടിന്‍റെ ഉപോത്പന്നം. അതുകൊണ്ടാണ് നിയമങ്ങളും ചട്ടങ്ങളും ശിക്ഷകളുംകൊണ്ടു മാത്രം ഗാർഹിക പീഡനങ്ങളെ ഇല്ലാതാക്കാനാകാത്തത്. പുരുഷ മേൽക്കോയ്മയ്ക്ക് അനുകൂലമായി പ്രവർത്തിക്കുന്ന നിരവധി സാമൂഹിക ഘടകങ്ങളെ മറികടക്കുക അത്ര എളുപ്പമല്ല.
സ്ത്രീ-പുരുഷ തുല്യത വേണമെന്ന് എല്ലാ വേദികളിൽനിന്നും നമ്മൾ ഉച്ചത്തിൽ ഘോഷിക്കുന്നുണ്ട്. പക്ഷേ, നടക്കുന്നില്ല. നിയമനിർമാണ സഭകളിലെ പ്രാതിനിധ്യംതൊട്ട് വീട്ടുജോലികളിലെ തുല്യത വരെ പുരോഗമനത്തിന്‍റെ വാക്ചാതുര്യം മാത്രമായൊടുങ്ങുന്നു. സ്ത്രീകളുടെ സ്വാതന്ത്ര്യപ്രഖ്യാപനങ്ങൾക്കെതിരേ ശാരീരികാക്രമണങ്ങൾ പെരുകിവരുന്നതും ഭയാനകമായ അവസ്ഥയാണ്. അവരെ മാനസികമായി തകർക്കാൻ സോഷ്യൽ മീഡിയ എന്ന ഡിജിറ്റൽ ആയുധംകൂടി വന്നതോടെ സ്ത്രീസുരക്ഷയുടെയും സ്ത്രീസമത്വത്തിന്‍റെയും കാര്യത്തിൽ പിറകിലേക്കാണ് നമ്മുടെ പോക്ക്.
‘സഹനം മതി, ഇനി ശബ്‌ദമുയർത്താം’ എന്ന സന്ദേശവുമായി കേരള പൊലിസ് രംഗത്തെത്തിയതിനെ മേൽപ്പറഞ്ഞ കാര്യങ്ങളെല്ലാം കണക്കിലെടുത്തുതന്നെ നമുക്കു സ്വാഗതം ചെയ്യുകയും അഭിനന്ദിക്കുകയും ചെയ്യാം. ‘സ്പീക് അപ്’എന്ന ദൗത്യസേന രൂപീകരിച്ചുകൊണ്ടാണ് ഗാർഹിക പീഡനത്തിനെതിരായ പുതിയ നീക്കം. സാമ്പത്തികമോ കുടുംബപരമോ ആയ ഭയം മൂലം ഒരു സ്ത്രീക്കും നീതി നിഷേധിക്കപ്പെടാത്ത തരത്തിൽ ശക്തമായ ഇടപെടലാണ് പൊലിസ് നടത്തുക എന്നാണ് ആഭ്യന്തരമന്ത്രി രമേശ് ചെന്നിത്തലയുടെ ഉറച്ച വാക്കുകൾ. മയക്കുമരുന്നിനെതിരായ ‘തൂഫാൻ’ വിജയിച്ചുകൊണ്ടിരിക്കുന്നത് നമ്മൾ കാണുന്നുണ്ട്. അതേ നിശ്ചയദാർഢ്യവും ആർജവവും ഉണ്ടായാൽ ‘സ്പീക് അപ്പും’ അതിന്‍റെ തലത്തിൽ വിജയിക്കും.
ഗാർഹിക അതിക്രമം തടയുക, അതിജീവിതകൾക്കു നിയമസഹായവും കൗൺസലിംഗും ഉറപ്പാക്കുക, സുരക്ഷിതമായ താമസവും ഉപജീവന പിന്തുണയും ലഭ്യമാക്കുക എന്നിവയാണ് സ്പീക്ക് അപ്പിന്‍റെ പ്രധാന ലക്ഷ്യങ്ങൾ. പരാതി നൽകാൻ കഴിയാത്ത സാഹചര്യത്തിലുള്ള സ്ത്രീകൾക്കു സുരക്ഷിതമായി സഹായം തേടാനുള്ള സംവിധാനവും വാഗ്ദാനം ചെയ്യുന്നുണ്ട്.
പരമ്പരാഗത പൊലിസ് വഴികളിൽനിന്നു മാറി അതിജീവിതകളുടെ സ്വകാര്യതയ്ക്ക് പൂർണ മുൻഗണന നൽകുമെന്നതാണ് ഇതിന്‍റെ ഏറ്റവും പ്രധാന കാര്യം. ഗാർഹിക പീഡനവും അതോടനുബന്ധിച്ചുള്ള പരാതിയും കേസുമെല്ലാം ഏറ്റവുമധികം വൈകാരിക സമ്മർദമുണ്ടാക്കുന്ന കാര്യങ്ങളാണ്. അവിടെ സഹാനുഭൂതിയും കൃത്യസമയത്തെ നിയമ, സാങ്കേതിക സഹായങ്ങളുമാണ് വേണ്ടത്. അതിനുപകരിക്കുന്ന വിധത്തിലാവണം ദൗത്യസേനയിലെ അംഗങ്ങളുടെ തെരഞ്ഞെടുപ്പ്. സ്ത്രീസുരക്ഷയ്ക്കു വേണ്ടി തുടങ്ങിവയ്ക്കുന്ന പല പൊലിസ് സംവിധാനങ്ങളും കാലക്രമേണ വ്യവസ്ഥാപിത പൊലിസ് ശൈലിയിലേക്ക് വഴിമാറുന്നതാണ് നമ്മുടെ അനുഭവം.
പോക്സോ നിയമത്തിലെ വ്യവസ്ഥകൾക്ക് സമാനമായി അതിജീവിതകളുടെ വ്യക്തിവിവരങ്ങൾ പൂർണമായും രഹസ്യമായി സൂക്ഷിക്കുമെന്നതും സ്ത്രീകളെ പരാതിയുമായി മുന്നോട്ടു വരാൻ പ്രേരിപ്പിക്കും. കർശനമായ അനന്തര നടപടികളാണ് പിന്നെ വേണ്ടത്. അതും അതിവേഗത്തിൽ. കേസും കൂട്ടവുമായി കാര്യങ്ങൾ നീണ്ടുപോയാൽ അതുതന്നെ മറ്റൊരു പീഡനമായി മാറും. ഇക്കാര്യത്തിൽ ഫാസ്റ്റ് ട്രാക്ക് കോടതികൾ സഹായകരമാകും.
സ്ത്രീസുരക്ഷ ഉറപ്പാക്കുന്നതിനായി നിർമിച്ച നിയമങ്ങൾ ചില സാഹചര്യങ്ങളിൽ വ്യക്തിപരമായ വൈരാഗ്യം തീർക്കാനും പ്രതികാരത്തിനുമുള്ള ആയുധമായി ദുരുപയോഗം ചെയ്യപ്പെടുന്നതായി സുപ്രീംകോടതിയും വിവിധ ഹൈക്കോടതികളും ആവർത്തിച്ച് വ്യക്തമാക്കിയ കാര്യവും ഓർക്കേണ്ടതുണ്ട്. യഥാർഥ ഇരകൾക്ക് നീതി ഉറപ്പാക്കാൻ നിർമിച്ച നിയമങ്ങളുടെ ദുരുപയോഗം നീതിന്യായ വ്യവസ്ഥയ്ക്ക് വലിയ വെല്ലുവിളിയാണ്. സ്പീക് അപ്പും കോടതികളുടെ നിരീക്ഷണത്തെ ജാഗ്രതയോടെ ഏറ്റെടുക്കേണ്ടതുണ്ട്.
ഗാർഹിക പീഡനങ്ങളുടെ മനഃശാസ്ത്ര അടിത്തറ എന്നത് പീഡിപ്പിക്കുന്ന വ്യക്തിയുടെ മാനസികാവസ്ഥ, ഇരയാക്കപ്പെടുന്ന വ്യക്തിയുടെ പ്രതികരണങ്ങൾ, അവർ തമ്മിലുള്ള ബന്ധത്തിന്‍റെ സങ്കീർണതകൾ എന്നിവയെ ആശ്രയിച്ചിരിക്കുന്നു. പെട്ടെന്നുണ്ടാകുന്ന ദേഷ്യത്തിലുപരി, ആഴത്തിലുള്ള ചില മാനസിക ഘടകങ്ങളാണ് അക്രമത്തിലെത്തുന്നത്. സാമ്പത്തികം, സാമൂഹിക ബന്ധങ്ങൾ, വ്യക്തിസ്വാതന്ത്ര്യം എന്നിവയെല്ലാം നിയന്ത്രിച്ച് തങ്ങളുടെ അധികാരം സ്ഥാപിക്കാൻ നടത്തുന്ന ശ്രമങ്ങളുടെ അനന്തരഫലം.
സ്വന്തം വീട്ടിലെ അധികാരഘടന കണ്ടുവളർന്നവർ, പ്രശ്നങ്ങൾ പരിഹരിക്കാനുള്ള വഴി ആണധികാരത്തിന്‍റേതാണെന്ന് തെറ്റായി മനസിലാക്കുന്നതും ഇത് തലമുറകളിലേക്ക് കൈമാറുന്നതും നിയമത്തിനും ശിക്ഷയ്ക്കുമൊക്കെ അപ്പുറം സമൂഹം ഏറ്റെടുക്കേണ്ട വിഷയമാണ്. ഇതിന്‍റെതന്നെ മറുവശമാണ് ഇരകളായി മാറുന്നവർ പഠിച്ചെടുക്കുന്ന നിസഹായത. തുടർച്ചയായി പീഡനം നേരിടുമ്പോൾ, അതിൽനിന്ന് രക്ഷപ്പെടാൻ യാതൊരു വഴിയുമില്ലെന്ന് ഇരകളുടെ മനസ് ഉറപ്പിക്കുന്നു. പിന്നീട് അനുകൂല സാഹചര്യമുണ്ടായാൽപോലും പ്രതികരിക്കാൻ അവർ ഭയപ്പെടുന്നു. സാമൂഹികാന്തസിന്‍റെ പേരിൽ സ്വന്തം വീട്ടിൽനിന്ന് പിന്തുണ കിട്ടാത്തതും കാര്യങ്ങൾ വഷളാക്കുന്നുണ്ട്.
സർക്കാരിന്‍റെ സ്പീക് അപ് സംവിധാനത്തെ പിന്തുണയ്ക്കുന്നതിനൊപ്പംതന്നെ പുരുഷാധിപത്യ മനോഭാവത്തിൽ മാറ്റംവരുത്താനുള്ള സാമൂഹിക ഇടപെടലിനെക്കുറിച്ചുകൂടി ഗൗരവമായി ചിന്തിക്കേണ്ടതുണ്ട് എന്ന കാര്യം അടിവരയിട്ട് പറയട്ടെ.
09-10-2026
വിളനാശം സംഭവിക്കുമ്പോൾ കർഷകർക്ക് താങ്ങാകാനാണ് വിള ഇൻഷ്വറൻസ്, പ്രകൃതിക്ഷോഭ ദുരിതാശ്വാസം തുടങ്ങിയ പദ്ധതികൾ. ശരിയായ രീതിയിൽ പ്രവർത്തിച്ചാൽ കർഷകർക്ക് തുണയാകുന്നതാണ് ഈ പദ്ധതികളെന്നതിന് സംശയമില്ല. എന്നാൽ, പതിവു കെടുകാര്യസ്ഥതയും ചുവപ്പുനാടകളും കാരണം കർഷകർക്ക് ഈ പദ്ധതിയുടെയൊന്നും യഥാർഥ ഗുണം കിട്ടുന്നില്ലെന്നതാണ് വസ്തുത.
ഏറെ ക്ലേശം സഹിച്ച് വിളവെടുക്കുന്ന കർഷകർ ന്യായമായ വില കിട്ടാൻ പെടുന്ന പെടാപ്പാടുകൾ നമ്മൾ കണ്ടുകൊണ്ടിരിക്കുന്നു. ഓരോ സീസണിലും പ്രശ്നങ്ങളുണ്ടാകുമ്പോൾ അടുത്ത തവണ ശരിയാക്കാം എന്നു പറയുന്നതല്ലാതെ ഒന്നും നടക്കുന്നില്ല. നെൽകർഷകരുടെ പ്രശ്നങ്ങൾ പറയാൻ തുടങ്ങിയിട്ട് വർഷങ്ങളായി. സംഭരണത്തിലെ പ്രശ്നങ്ങൾ പരിഹരിക്കപ്പെടുന്നേയില്ല. വനമേഖലകളിൽ കാട്ടുമൃഗങ്ങൾ കൃഷി നശിപ്പിക്കുന്നതിന് ശമനമില്ല. വനത്തിൽനിന്നകലെയുള്ള പ്രദേശങ്ങളിൽപോലും കാട്ടുപന്നിയും കുരങ്ങുമൊക്കെ നിർബാധം വിഹരിക്കുന്നു. കാട്ടാനയും കടുവയും മനുഷ്യരെ കൊന്നുകൊണ്ടിരിക്കുന്നു. ഒന്നിനും ഒരു മാറ്റവുമില്ല. കർഷകരുടെ മുറവിളികൾ ബധിര കർണങ്ങളിൽ ഒരു ചലനവും സൃഷ്‌ടിക്കാതെ ഒടുങ്ങുന്നു. അതിനിടയിൽ തെരഞ്ഞെടുപ്പുകൾ വരുന്നുണ്ട്. മന്ത്രിസഭകൾ മാറുന്നുണ്ട്. നൽകുന്ന വാഗ്ദാനങ്ങൾക്കു കീഴിലെ ഒപ്പുകൾ മാറുന്നുണ്ട്. പക്ഷേ, യഥാർഥ അവസ്ഥയ്ക്കു മാത്രം മാറ്റമൊന്നുമില്ല.
കേരളത്തിലെ വിള ഇൻഷ്വറൻസ്, പ്രകൃതിക്ഷോഭ ദുരിതാശ്വാസ കുടിശികയെക്കുറിച്ചുള്ള വിവരങ്ങൾ ആരെയും അസ്വസ്ഥരാക്കുന്നതാണ്. ഇരുപദ്ധതികളിലുമായി കർഷകർക്ക് മൊത്തം നൽകാനുള്ളത് 133 കോടി രൂപയാണ്. 2025 മേയ് മുതലുള്ള അപേക്ഷകളിലെ കുടിശികയാണിതെന്ന് വിവരാവകാശ രേഖകൾ വ്യക്തമാക്കുന്നു. ഏറെ പ്രതീക്ഷകളോടെയാണ് കർഷകർ പ്രീമിയമടച്ച് സംസ്ഥാന വിള ഇൻഷ്വറൻസ് പദ്ധതിയിൽ ചേർന്നത്. ഇവരിൽ 14,971 കർഷകർക്കാണ് തുക കിട്ടാനുള്ളത്. ഇവർക്കു കിട്ടാനുള്ള 43.22 കോടി രൂപ കഴിഞ്ഞ മാസംവരെ കുടിശികയാണ്. 2025 മേയ് നാലു മുതലുള്ള അപേക്ഷകളിലെ തുക ഇനിയും വിതരണം ചെയ്തിട്ടില്ലെന്നാണ് സർക്കാർതന്നെ അറിയിച്ചിട്ടുള്ളത്. മലപ്പുറം ജില്ലയിലെ കർഷകർക്കാണ് വിള ഇൻഷ്വറൻസ് ആനുകൂല്യത്തിൽ കൂടുതൽ കിട്ടാനുള്ളത്. 12.72 കോടി രൂപയാണ് അവരുടെ വിഹിതം. കോഴിക്കോട് ജില്ലയിൽ 6.45കോടി രൂപയും വയനാട് ജില്ലയിൽ 5.42 കോടിയും തിരുവനന്തപുരം ജില്ലയിൽ 4.94 കോടി രൂപയും മുടങ്ങിക്കിടക്കുന്നു.
വിള നശിക്കുമ്പോൾ കർഷകനുണ്ടാകുന്ന ആഘാതം വളരെ വലുതാണ്. ഇതുപോലുള്ള സമാശ്വാസ പദ്ധതികൾ അനിശ്ചിതമായി മുടങ്ങുമ്പോൾ അവരുടെ ജീവിതം തികച്ചും വഴിമുട്ടുന്നു. ഇത്തരം സാഹചര്യങ്ങളാണ് കൃഷി ഉപേക്ഷിക്കാനും ജീവനൊടുക്കാനുംവരെ കർഷകരെ പ്രേരിപ്പിക്കുന്നത്. കാരണം, സാമ്പത്തിക പ്രതിസന്ധിയായാലും സംവിധാനങ്ങളുടെ മെല്ലെപ്പോക്കായാലും സർക്കാരിന്‍റെ കെടുകാര്യസ്ഥതയായേ വിലയിരുത്താനാകൂ. വയനാട്ടിൽ നടന്ന കാപ്പിദിനാഘോഷം ഉദ്ഘാടനം ചെയ്ത കൃഷിമന്ത്രി ടി. സിദ്ദിഖ് പറഞ്ഞത് വിള ഇൻഷ്വറൻസ് കുടിശിക തീർപ്പാക്കാൻ ആറു കോടി രൂപ നീക്കിവച്ചിട്ടുണ്ടെന്നാണ്. തുക വിതരണത്തിനുള്ള നടപടികളെല്ലാം പൂർത്തിയായെന്നും മന്ത്രി അവകാശപ്പെട്ടു. പ്രകൃതിക്ഷോഭത്തിൽ കാർഷികവിളകൾക്ക് സംഭവിച്ച നാശത്തിനുള്ള സഹായധനം ഈ മാസം അവസാനത്തോടെ നൽകുമെന്ന ഉറപ്പും മന്ത്രി നൽകി.
കണക്കുകൾ നോക്കുമ്പോൾ, വിള ഇൻഷ്വറൻസ് കുടിശിക തീർക്കാൻ മന്ത്രി പ്രഖ്യാപിച്ച ആറുകോടി രൂപ എങ്ങുമെത്തില്ലെന്നു കാണാം. പ്രകൃതിക്ഷോഭ ദുരിതാശ്വാസത്തിന് അർഹതയുള്ള 1,52, 665 കർഷകർക്ക് 2021 ഒക്‌ടോബർ മുതലുള്ള ആനുകൂല്യം കിട്ടാനുണ്ടെന്ന സത്യവും തിരിച്ചറിയണം. ഈയിനത്തിൽ കഴിഞ്ഞ മാസം വരെയുള്ള കുടിശിക 90.81 കോടി രൂപയാണ്. ഈ മാസംതന്നെ ഇതു കൊടുത്തുതീർക്കുമെന്ന മന്ത്രിയുടെ വാക്കുകൾ ഏറ്റവും വലിയ ശുഭാപ്തിവിശ്വാസിക്കുപോലും വെള്ളം കൂട്ടാതെ വിഴുങ്ങാനാകില്ല. ഉരുൾപൊട്ടൽ എല്ലാം തകർത്ത വയനാട്ടുകാർക്കാണ് പ്രകൃതിക്ഷോഭ ദുരിതാശ്വാസ തുക ഏറ്റവും കൂടുതൽ കിട്ടാനുള്ളത്.
പ്രഖ്യാപനങ്ങളും വാഗ്ദാനങ്ങളും കേൾക്കുമ്പോൾ കൈയടിച്ച് തളർന്നവരാണ് കർഷകർ. ദുരിതത്തിൽനിന്ന് കൈപിടിച്ചുയർത്തുന്ന യഥാർഥ ആക്‌ഷനാണ് അവർക്കിപ്പോൾ വേണ്ടത്. ഇതുവരെ 27 വിളകൾക്കായിരുന്നു ഇൻഷ്വറൻസ് പരിരക്ഷണം. അത് 13 വിളകൾക്കുകൂടി ബാധകമാക്കിയത് മാർച്ചിലാണ്. നല്ല കാര്യം. പക്ഷേ, ഇൻഷ്വറൻസ് തുക യഥാസമയം കിട്ടാതെ കർഷകരെങ്ങനെ തകർച്ചയിൽനിന്ന് കരകയറും എന്നതുകൂടി ഭരിക്കുന്നവരും ബന്ധപ്പെട്ടവരും വിശദീകരിക്കണം.
സ്വന്തമായി ആഹാരവും ഇന്ധനവും ഉത്പാദിപ്പിക്കുകയും സ്വന്തം വീട് നിർമിക്കുകയും ചെയ്യുന്ന കർഷകരാണ് ഈ ലോകത്തിലെ ഏറ്റവും ഉത്പാദനക്ഷമതയുള്ളവരും സ്വതന്ത്രരും സന്തുഷ്‌ടരുമായ മനുഷ്യരെന്ന് പറഞ്ഞത് ഗാന്ധിജിയാണ്. ഗാന്ധിജി സ്വപ്നം കണ്ട സന്തുഷ്‌ടരായ കർഷകരുടെ അവസ്ഥ ഇപ്പോൾ എങ്ങനെയാണ് എന്നതാണ് ഏറ്റവും ദുഃഖകരം. അദ്ദേഹം ഒരു കാര്യം കൂടി ഉറപ്പിച്ചു പറഞ്ഞിട്ടുണ്ട്. കർഷകർ തങ്ങളുടെ അഹിംസാത്മകമായ ശക്തി തിരിച്ചറിഞ്ഞാൽ അവർക്കു മുന്നിൽ നിൽക്കാൻ ഒരു ശക്തിക്കും കഴിയില്ലെന്നതാണത്. ഭരണാധികാരികളുടെ നിസംഗതയും ഉഴുതുമറിക്കേണ്ട അധികഭാരമാണ് ഇപ്പോൾ കർഷകരുടെ ചുമലിൽ.
08-10-2026
സ്വതന്ത്രമായി പ്രവർത്തിക്കേണ്ട ഇലക്ഷൻ കമ്മിഷൻ ഭരണകക്ഷിക്കുവേണ്ടിയാണ് ഇതെല്ലാം ചെയ്യുന്നത് എന്നുകൂടി ആരോപണമുയരുമ്പോൾ ഇന്ത്യൻ ജനാധിപത്യമാണ് ചിതറുന്നത്. ഇലക്ഷൻ കമ്മിഷന്‍റെ നിയമനംതൊട്ടുള്ള കാര്യങ്ങൾ വിലയിരുത്തുമ്പോൾ ഇതൊരു ആസൂത്രിത ഗൂഢാലോചനയുടെ ഭാഗമാണെന്നുതന്നെ സംശയിക്കേണ്ടിവരും.
താനാണ് നരേന്ദ്ര മോദിയുടെ അവസാനത്തെ സൈനികൻ എന്നെങ്ങാനും മുഖ്യ തെരഞ്ഞെടുപ്പ് കമ്മിഷണർ ഗ്യാനേഷ് കുമാറിന് തോന്നിയോ? രാജ്യം സമരത്തീച്ചൂളയിലെരിയന്പോഴും രാഷ്‌ട്രീയ അസ്വസ്ഥതകൾ ജനജീവിതത്തെ നേരിട്ടു ബാധിക്കുന്ന അപകടകരമായ തിരിവുകൾ എടുക്കുന്പോഴും പ്രതിപക്ഷം കാതലായ ചോദ്യങ്ങൾ ഉന്നയിക്കുന്പോഴും സുപ്രീംകോടതിതന്നെ നിരവധി വ്യാജങ്ങൾ പൊളിച്ചടുക്കുന്പോഴും ഈ കമ്മിഷണറെന്താ പ്രതികരിക്കാത്തത്? സുപ്രധാന ഭരണഘടനാ സ്ഥാപനത്തിനു നിർണായക ഉത്തരവാദിത്വങ്ങളുണ്ടെന്നത് അദ്ദേഹം മറന്നുപോയോ?
ഗ്യാനേഷ് കുമാറിന്‍റെ രാജി ആവശ്യപ്പെട്ടും എസ്ഐആർ ക്രമക്കേടുകൾ തിരുത്തണമെന്നാവശ്യപ്പെട്ടും പ്രതിപക്ഷം നടത്തുന്ന സമരം ഏതാനും ദിവസങ്ങളായി ഡൽഹിയിൽ തിളയ്ക്കുകയാണ്. കോൺഗ്രസിന്‍റെ നേതൃത്വത്തിൽ പ്രതിപക്ഷ ഇന്ത്യ മുന്നണി ഒറ്റക്കെട്ടായി സമരമുഖത്തുണ്ട്. 10 മുതൽ കോക്രോച്ച് ജനതാ പാർട്ടിയും (സിജെപി) സമരം കടുപ്പിക്കാൻ തീരുമാനിച്ചിരിക്കുന്നു. ജന്തർ മന്തർ കേന്ദ്രീകരിച്ചുള്ള സമരത്തിനു നേതൃത്വം നൽകിയ കോൺഗ്രസ് നേതാക്കളായ രാഹുൽ ഗാന്ധിയെയും പ്രിയങ്ക ഗാന്ധിയെയുമടക്കം ഇന്നലെ പൊലിസ് കസ്റ്റഡിയിലെടുത്തു.
എന്തിനുവേണ്ടിയാണ് ഈ സമരം എന്നു തിരിച്ചറിഞ്ഞ്, ഭരണഘടനാ മൂല്യങ്ങൾക്കനുസൃതമായി പ്രവർത്തിക്കാനുള്ള ബാധ്യത ഭരണഘടനാ സ്ഥാപനമായ ഇലക്ഷൻ കമ്മിഷനുണ്ട്. താൻ പിടിച്ച മുയലിന്‍റെ കൊമ്പുകളെണ്ണി രസിക്കുന്ന മുഖ്യ കമ്മിഷണർ രാജ്യത്തെ അസ്ഥിരതയിലേക്കു തള്ളിവിടുന്നതിൽനിന്ന് പിൻമാറണം. എല്ലാ ധാർമിക, ഭരണഘടനാ മര്യാദകളും കാറ്റിൽപറത്തിയ അദ്ദേഹം എത്രയും പെട്ടെന്ന് രാജിവച്ചൊഴിയുകയാണു വേണ്ടത്. അത്രയെങ്കിലും ജ്ഞാനവും വിവേകവും രാജ്യം അദ്ദേഹത്തിൽനിന്നു പ്രതീക്ഷിക്കുന്നുണ്ട്.
ഉറങ്ങുന്നവരെ ഉണർത്താം. ഉറക്കം നടിക്കുന്നവരെ എന്തു ചെയ്യാൻ! ഒരു ജനാധിപത്യത്തിൽ പൗരന്‍റെ അടിസ്ഥാന അവകാശമാണ് വോട്ടവകാശം. അതിനു വ്യവസ്ഥാപിത രീതികളുണ്ട്. വോട്ടർപട്ടികയിൽ അനധികൃതമായി ആരെങ്കിലും ഉൾപ്പെട്ടിട്ടുണ്ടെങ്കിൽ അവരെ നീക്കംചെയ്യാനും വ്യവസ്ഥാപിത മാർഗങ്ങളുണ്ട്. അതിനെയെല്ലാം അട്ടിമറിച്ച് പ്രത്യേക തീവ്ര പരിഷ്കരണത്തിന്‍റെ (എസ്ഐആർ) മറവിൽ പത്തു കോടിയിലധികം വോട്ടർമാരെ നിഷ്കാസനം ചെയ്തതിനെയാണ് പ്രതിപക്ഷം ചോദ്യംചെയ്യുന്നത്. നിർണായക ആപ്പുകളിൽ കൃത്രിമം നടത്തിയെന്നാണ് അവർ ആരോപിക്കുന്നത്.
ഫോം ആറിലെ ചോദ്യം തിരുത്താൻ നിയമനിർമാണം വഴിയേ സാധിക്കൂ എന്നിരിക്കെ അങ്ങനെ ചെയ്തതിനുനേരേയാണ് അവർ വിരൽ ചൂണ്ടിയത്. ഇങ്ങനെയൊരു തിരുത്തലിന് അനുമതി നൽകിയിട്ടില്ലെന്നാണ് സുപ്രീംകോടതി അസന്ദിഗ്ധമായി വ്യക്തമാക്കിയത്. കമ്മിഷന്‍റെ പല നിർണായക തീരുമാനങ്ങളിലും അംഗങ്ങളുടെ ഭൂരിപക്ഷ സമ്മതം ഉണ്ടായിരുന്നില്ലെന്ന വസ്തുതയാണ് ഇന്ത്യൻ എക്സ്പ്രസ് പത്രം വെളിപ്പെടുത്തിയത്.
ഈ ചോദ്യങ്ങൾക്കൊന്നും ഉത്തരമില്ലാതെ വന്നപ്പോഴാണ് സമരം തെരുവിലെത്തിയത്. ഇന്ത്യക്കാർ എന്ന സ്വത്വംപോലും നഷ്‌ടപ്പെടുമോ എന്ന് ജനങ്ങൾ ഇത്രത്തോളം ആശങ്കപ്പെടുന്ന ഒരു കാലം രാജ്യചരിത്രത്തിൽ ഉണ്ടായിട്ടില്ല. വോട്ടർപട്ടികയിൽ ഇടംപിടിക്കാൻ മുതുമുത്തച്ഛന്മാർ സഞ്ചരിച്ച വഴികളിലൂടെ തിരിഞ്ഞുനടക്കേണ്ടിവരുമെന്ന് ആരും സ്വപ്നത്തിൽപോലും ചിന്തിച്ചിരുന്നില്ല. ഭരണഘടനാ ശിൽപികളുടെ വിശാല കാഴ്ചപ്പാടെവിടെ, ഇന്നത്തെ പാവനാടകക്കാരുടെ വിലകുറഞ്ഞ ഭരണതന്ത്രങ്ങളെവിടെ?
സ്വതന്ത്രമായി പ്രവർത്തിക്കേണ്ട ഇലക്ഷൻ കമ്മിഷൻ ഭരണകക്ഷിക്കുവേണ്ടിയാണ് ഇതെല്ലാം ചെയ്യുന്നത് എന്നുകൂടി ആരോപണമുയരുമ്പോൾ ഇന്ത്യൻ ജനാധിപത്യമാണ് ചിതറുന്നത്. ഇലക്ഷൻ കമ്മിഷന്‍റെ നിയമനം തൊട്ടുള്ള കാര്യങ്ങൾ വിലയിരുത്തുമ്പോൾ ഇതൊരു ആസൂത്രിത ഗൂഢാലോചനയുടെ ഭാഗമാണെന്നുതന്നെ സംശയിക്കേണ്ടിവരും. സുപ്രീംകോടതി നിർദേശങ്ങളെപ്പോലും തൃണവൽഗണിക്കുന്ന ജനാധിപത്യ ധ്വംസനമാണ് അരങ്ങേറുന്നത്.
കൃത്യവും വ്യക്തവുമായ ആരോപണങ്ങളോടു മുഖ്യ കമ്മിഷണർ പ്രതികരിക്കാത്തതെന്തേ? അഴകൊഴമ്പൻ വിശദീകരണങ്ങളല്ലാതെ കഴമ്പുള്ള ഒരു മറുപടിയും ഇതുവരെ പുറത്തുവന്നിട്ടില്ല. ആരോപണങ്ങൾ തെറ്റാണെങ്കിൽ അത് തെളിവു സഹിതം പറയട്ടെ. രാജ്യത്തെ ശിഥിലീകരിക്കാനാണ് ആരോപണങ്ങളെങ്കിൽ നിയമനടപടി സ്വീകരിക്കട്ടെ. എസ്ഐആർ ക്രമക്കേടുകളെക്കുറിച്ച് ലോക്സഭാ പ്രതിപക്ഷനേതാവ് രാഹുൽ ഗാന്ധി ആദ്യമായി ആരോപണമുന്നയിച്ചപ്പോൾ അദ്ദേഹത്തെ അറസ്റ്റ് ചെയ്യും, ജയിലിലടയ്ക്കും എന്നൊക്കെയായിരുന്നു ആക്രോശങ്ങൾ. എന്നാൽ, തെളിവുകൾ ഓരോന്നായി പുറത്തുവന്നപ്പോൾ അതെല്ലാം മാഞ്ഞു.
കാര്യങ്ങൾ കോടതിയിലെത്തിയാൽ നീതിപീഠത്തിന്‍റെ ചോദ്യങ്ങൾക്കു മുന്നിൽ വിയർക്കേണ്ടിവരും എന്നതുകൊണ്ടല്ലേ നിയമനടപടികൾക്കു പോകാത്തത്? അതുകൊണ്ടാണ് ഇതുപോലുള്ള വിദ്വാന്മാർ മൗനം ഭൂഷണം എന്ന തത്വത്തിൽ ഉറച്ചുനിൽക്കുന്നത് എന്നാണ് സാമാന‍്യജനത്തിന്‍റെ ചിന്ത. സമരം തെരുവിൽ കനക്കുമ്പോൾ, രാജ്യമാകെ വ്യാപിക്കുമ്പോൾ അതു ചിലപ്പോൾ വിചാരിച്ച വഴിയിലൂടെ പോയെന്നുവരില്ല.
വിവേകം വൈകാരികതയ്ക്കു വഴിമാറിയാൽ സോഷ്യൽ മീഡിയ അഴിഞ്ഞാടുന്ന ഇക്കാലത്ത് എന്തു വേണമെങ്കിലും സംഭവിക്കാം. ആ സാഹചര്യംകൂടി തിരിച്ചറിയേണ്ട ഉത്തരവാദിത്വം ഇലക്ഷൻ കമ്മിഷനുണ്ട്. എന്തുകൊണ്ടാണ് ജനങ്ങൾക്ക് സമരമുഖം തുറക്കേണ്ടിവന്നത് എന്നതിനെക്കുറിച്ച് കമ്മിഷൻ ചിന്തിക്കണം. പാവനാടകം അരങ്ങുതകർക്കുമ്പോൾ തിരശീലയ്ക്കു പിന്നിൽ ചരടുവലിക്കുന്നവരും ചിന്തിക്കണം.
ഇന്ത്യൻ ജനാധിപത്യത്തിന്‍റെ കാവലാളായ തെരഞ്ഞെടുപ്പു കമ്മിഷന്‍റെ വിശ്വാസ്യത വൻതോതിൽ ചോദ്യംചെയ്യപ്പെടുന്ന സാഹചര്യമാണ് ഈ സമരം സൃഷ്‌ടിച്ചിരിക്കുന്നത്. വോട്ടർപട്ടികയിലെ സുതാര്യത ഒരു പൗരന്‍റെ അടിസ്ഥാന അവകാശവുമായി ബന്ധപ്പെട്ടിരിക്കുന്നതിനാൽ, സുപ്രീംകോടതിയുടെ വരാനിരിക്കുന്ന നിലപാടുകളും തെരഞ്ഞെടുപ്പു കമ്മിഷൻ നൽകുന്ന വിശദീകരണങ്ങളും ഈ രാഷ്‌ട്രീയ പ്രതിസന്ധി പരിഹരിക്കുന്നതിൽ നിർണായകമാകും.
സ്വാതന്ത്ര്യവും പരമാധികാര റിപ്പബ്ലിക്കും ജനാധിപത്യവും നമ്മൾ നേടിയെടുത്തതും ഇതുവരെ കാത്തുസൂക്ഷിച്ചതും ഏറെ വെല്ലുവിളികളെ അതിജീവിച്ച് മഹത്തായ ത്യാഗങ്ങളിലൂടെയാണ്. അത് ഇനിയും തുടരാൻ രാജ്യം പ്രതിജ്ഞാബദ്ധമാകണം. അതിനെ അട്ടിമറിക്കാൻ ഒരു സങ്കുചിത അജൻഡയെയും അനുവദിച്ചുകൂടാ.
07-10-2026
ഇന്ത്യയിലെ സ്ത്രീസുരക്ഷയുടെ ദയനീയ യാഥാർഥ്യത്തിലേക്ക് സുപ്രീംകോടതി ഒരിക്കൽകൂടി വിരൽ ചൂണ്ടിയിരിക്കുന്നു. “ഇനി എന്തെങ്കിലും അതിക്രമം നടത്തിയാൽ തങ്ങൾ തീർന്നുപോകും” (അബ് കുച്ച് കിയാ തോ മർ ജായേംഗേ) എന്ന ഭയം കുറ്റവാളികളുടെ ഉള്ളിൽ ജനിപ്പിക്കാൻ പൊലിസിന് സാധിക്കണമെന്നും, നിയമങ്ങൾ കടലാസ്പുലികളാകാതെ പ്രയോഗതലത്തിൽ പ്രതിരോധ നടപടികൾ ഉണ്ടാകണമെന്നും കടുപ്പിച്ചു പറഞ്ഞിരിക്കുകയാണ് പരമോന്നത കോടതി.
ഒരു കുറ്റകൃത്യം നടന്നശേഷമുള്ള അന്വേഷണത്തിലെ മികവല്ല പൊലിസിന്‍റെ യഥാർഥ മിടുക്ക്. കുറ്റകൃത്യങ്ങൾ നടക്കുന്നില്ല എന്ന് ഉറപ്പാക്കുന്നതിലാണ്. ഡൽഹിയിലെ പാർക്കിൽ പ്രായപൂർത്തിയാകാത്ത പെൺകുട്ടി കൂട്ടബലാത്സംഗത്തിനിരയായതും ഓടിക്കൊണ്ടിരുന്ന സ്ലീപ്പർ ബസിൽ പ്രായപൂർത്തിയാകാത്ത പെൺകുട്ടിക്കു നേരേ ലൈംഗികാതിക്രമം ഉണ്ടായതുമാണ് സ്വമേധയാ കേസെടുക്കുന്നതിന് സുപ്രീംകോടതിയെ പ്രേരിപ്പിച്ചത്.
ഡൽഹിയിൽ, ഓടുന്ന സ്ലീപ്പർ ബസിലും കോളജിന് തൊട്ടടുത്തുള്ള പാർക്കിലും നടന്ന ക്രൂരമായ കൂട്ടബലാത്സംഗ സംഭവങ്ങളിൽ നേരത്തേതന്നെ പൊതുജനങ്ങൾ മുന്നറിയിപ്പ് നൽകിയിട്ടും പ്രതിരോധ നടപടികൾ എടുത്തില്ലെന്ന വിചാരണക്കോടതിയുടെയും സുപ്രീംകോടതിയുടെയും കണ്ടെത്തൽ ഞെട്ടിക്കുന്നതാണ്. ഇതൊരു ഒറ്റപ്പെട്ട സംഭവമല്ല. രാജ്യത്തുടനീളം ഭരണസംവിധാനങ്ങളും രാഷ്‌ട്രീയ നേതൃത്വങ്ങളും സ്ത്രീസുരക്ഷയെ എത്രത്തോളം ലളിതവത്കരിച്ചാണ് കാണുന്നത് എന്നതിന്‍റെ തെളിവാണ്. നാഷണൽ ക്രൈം റിക്കാർഡ്സ് ബ്യൂറോയുടെ കണക്കുകൾ പ്രകാരം പ്രതിവർഷം സ്ത്രീകൾക്കെതിരേയുള്ള 4.4 ലക്ഷത്തിലധികം കുറ്റകൃത്യങ്ങളാണ് രാജ്യത്ത് റിപ്പോർട്ട് ചെയ്യപ്പെടുന്നത്. ഓരോ മൂന്നു മിനിറ്റിലും ഒരു സ്ത്രീ അതിക്രമത്തിനിരയാകുന്നു. ഓരോ 77 മിനിറ്റിലും സ്ത്രീധനപീഡനം മൂലമുള്ള മരണം നടക്കുന്നു.
നിയമങ്ങളുടെ അഭാവമല്ല ഇവിടെ പ്രശ്നം. ഭരണഘടനയുടെ 14, 15, 21 വകുപ്പുകൾ മുതൽ ഗാർഹികപീഡനവിരുദ്ധ നിയമം, തൊഴിലിടങ്ങളിലെ ലൈംഗികാതിക്രമ വിരുദ്ധ നിയമം, പോക്സോ വരെ ശക്തമായ നിയമങ്ങൾ നമുക്കുണ്ട്. എന്നാൽ, പ്രയോഗത്തിൽ അവ അട്ടിമറിക്കപ്പെടുന്നു. 2012ലെ നിർഭയ സംഭവത്തിനുശേഷം കോടികൾ വകയിരുത്തി രൂപീകരിച്ച നിർഭയ ഫണ്ടിന്‍റെ ഭൂരിഭാഗവും ഉപയോഗിക്കാതെ കിടക്കുന്നു എന്ന വസ്തുത മാത്രം മതി, ഭരണകൂടങ്ങളുടെ കുറ്റകരമായ ഉത്തരവാദിത്വമില്ലായ്മ വ്യക്തമാകാൻ.
തോംസൺ റോയിട്ടേഴ്സ് ഫൗണ്ടേഷൻ അവസാനമായി 2018ൽ തയാറാക്കിയ സ്ത്രീസുരക്ഷാ സർവേ റിപ്പോർട്ട് പ്രകാരം, സ്ത്രീകൾക്കെതിരായ അതിക്രമങ്ങൾ ഏറ്റവും കൂടുതലുള്ള രാജ്യങ്ങളുടെ പട്ടികയിൽ ഇന്ത്യയാണ് ഒന്നാമത്. രണ്ടാം സ്ഥാനത്ത് അഫ്ഗാനിസ്ഥാനാണ്. സിറിയ, സൊമാലിയ, സൗദി അറേബ്യ, പാക്കിസ്ഥാൻ, കോംഗോ, യെമൻ, നൈജീരിയ, അമേരിക്ക എന്നീ രാജ്യങ്ങളാണ് ആദ്യ പത്തു സ്ഥാനങ്ങളിൽ.
സ്ത്രീപീഡനം വർധിക്കുന്നു എന്നുപറയുന്നത് കണക്കുകളിൽ മാത്രമാണ്. യഥാർഥത്തിൽ, കേസുകളുടെ എണ്ണം കൂടുന്നു എന്നാണു പറയേണ്ടത്. സ്ത്രീധനത്തിന്‍റെ പേരിലുള്ള ഉപദ്രവങ്ങൾ കുടുംബഭദ്രതയ്ക്കുവേണ്ടി സഹിക്കേണ്ടതാണെന്ന സ്ത്രീകളുടെ ധാരണയിൽ മാറ്റം വരുന്നതാണ് കൂടുതൽ കേസുകൾ രജിസ്റ്റർ ചെയ്യാൻ ഇടയാക്കുന്നത്. പീഡനങ്ങളും അവകാശലംഘനങ്ങളും അതിക്രമങ്ങളും തിരിച്ചറിഞ്ഞു പ്രതികരിക്കാനും പരാതിപ്പെടാനും തയാറാകുന്നവരുടെ എണ്ണം കൂടിവരുന്നുണ്ടെന്നത് ആശാവഹമാണ്.
ഏറ്റവും പുരോഗമനപരമെന്ന് അവകാശപ്പെടുന്ന രാഷ്‌ട്രീയകക്ഷികളിലും സംഘടനകളിലും പോലും പുരുഷ മേധാവിത്വം കൊടികുത്തി വാഴുന്നുവെന്നതാണ് ഇന്ത്യൻ യാഥാർഥ്യം. രാഷ്‌ട്രീയസംഘടനാ രംഗത്തും സ്ഥാപനങ്ങൾക്കകത്തും സ്ത്രീകൾ നേരിടുന്ന അതിക്രമങ്ങൾ മൂടിവയ്ക്കുകയോ ലളിതവത്കരിക്കുകയോ ചെയ്യുന്നു. ഇതിന്‍റെ ഏറ്റവും ഒടുവിലത്തെ, വ്യക്തമായ ഉദാഹരണമാണ് സിപിഎം പാലക്കാട് ജില്ലാ സെക്രട്ടറിയായിരുന്ന ഇ.എൻ. സുരേഷ് ബാബുവിനെതിരായ അച്ചടക്ക നടപടിയുമായി ബന്ധപ്പെട്ട വിവാദങ്ങൾ. യുവതിയോടു മോശമായി പെരുമാറിയെന്ന പരാതിയുടെ പശ്ചാത്തലത്തിലാണു നടപടിയെന്നാണ് അറിയുന്നത്. ഇതു ശരിയാണെങ്കിൽ പൊലിസിനെ അറിയിക്കാത്തതും നിയമനടപടികളുമായി മുന്നോട്ടു പോകാത്തതും ഗുരുതരമായ തെറ്റാണ്. പാർട്ടി സംവിധാനങ്ങളുടെ ഇരുമ്പുമറയ്ക്കുള്ളിൽ ഇല്ലാതാകേണ്ടതല്ല സ്ത്രീവിരുദ്ധ കുറ്റകൃത്യങ്ങൾ.
പരാതികൾ ലഭിക്കുമ്പോൾ നിയമപരമായ അന്വേഷണത്തിനും പൊലിസ് നടപടികൾക്കും കൈമാറുന്നതിനു പകരം, കാര്യങ്ങൾ മൂടിവയ്ക്കാനും സംഘടനാപരമായി കൈകാര്യം ചെയ്യാനും രാഷ്‌ട്രീയ നേതൃത്വങ്ങൾ ശ്രമിക്കുന്നത് കുറ്റവാളികൾക്ക് കൂടുതൽ സംരക്ഷണം നൽകുകയേ ഉള്ളൂ. തെളിവുകൾ സഹിതം പരാതികൾ ഉയരുമ്പോഴും അത് മാധ്യമസൃഷ്‌ടിയാണെന്ന് വരുത്തിത്തീർക്കുന്നത് നീതിപൂർവമായ സമീപനമല്ല. തൊഴിലിടങ്ങളിലോ പൊതുമണ്ഡലങ്ങളിലോ ഇത്തരം കാര്യങ്ങളിൽ വിട്ടുവീഴ്ചയില്ലാത്ത നടപടിയാണ് ഉണ്ടാകേണ്ടത്. അങ്ങനെ ചെയ്യുന്നില്ലെങ്കിൽ രാഷ്‌ട്രീയ കക്ഷികൾക്ക് നീതിയെക്കുറിച്ച് സംസാരിക്കാൻ എന്താണവകാശം?
അതിവേഗമുള്ള നീതിനിർവഹണമാണ് അനിവാര്യമായ മറ്റൊരു കാര്യം. സ്പെഷ്യൽ ഫാസ്റ്റ് ട്രാക്ക് കോടതികൾ വഴി ഇത്തരം കേസുകളിൽ കൃത്യസമയത്ത് ശിക്ഷ ഉറപ്പാക്കേണ്ടതുണ്ട്. അതുപോലെ, പൊലിസിലെ സ്ത്രീ പ്രാതിനിധ്യം നിലവിലെ പത്ത് ശതമാനത്തിൽനിന്ന് ചുരുങ്ങിയത് 33 ശതമാനമെങ്കിലും ആയി ഉയർത്തണം.
നിയമങ്ങളിൽ കർശന വ്യവസ്ഥകൾ എഴുതിവച്ചതുകൊണ്ടു മാത്രമായില്ല. തെരുവുകളിലും തൊഴിലിടങ്ങളിലും വീടുകളിലും ഭയരഹിതമായി ജീവിക്കാനുള്ള സാഹചര്യമൊരുക്കുക എന്നതാണ് ഒരു ജനാധിപത്യ രാജ്യത്തിനുവേണ്ട പ്രാഥമിക കടമ. അതു നിറവേറ്റുന്നതിൽ അധികാരികൾ പരാജയപ്പെട്ടാൽ, സുപ്രീംകോടതി ചൂണ്ടിക്കാണിച്ചതുപോലെ അത് മൊത്തം വ്യവസ്ഥിതിയുടെതന്നെ തകർച്ചയായി മാറും. സ്ത്രീകൾക്കും ദുർബല വിഭാഗങ്ങൾക്കും സാമൂഹിക വിലക്കുകൾ ഏർപ്പെടുത്തി അവർക്കെതിരായ കുറ്റകൃത്യങ്ങൾ കുറഞ്ഞു എന്നു വീമ്പിളക്കുന്നത് നാണംകെട്ട ഭരണനിർവഹണമാണ്. എല്ലാവർക്കും ഭയരഹിതമായും സ്വതന്ത്രമായും പുറത്തിറങ്ങി നടക്കാനും തുല്യനീതിയോടെ ജീവിക്കാനും അവസരം ഉണ്ടാക്കുകയാണു വേണ്ടത്.
06-10-2026
ഗർഭസ്ഥശിശുവിനെ നിയമത്തിനു മുന്നിൽ സ്വതന്ത്ര വ്യക്തിയായി അംഗീകരിച്ച് അമേരിക്കയിലെ ന്യൂ മെക്സിക്കോ സംസ്ഥാന കോടതി പുറപ്പെടുവിച്ച വിധി മനുഷ്യജീവന്‍റെ അമൂല്യത തിരിച്ചറിഞ്ഞ ചരിത്രമുഹൂർത്തമാണ്. അന്യായമായ മരണത്തിന് അബോർഷൻ ക്ലിനിക്കിൽനിന്ന് രണ്ടു ലക്ഷം ഡോളർ (ഏകദേശം 1.92 കോടി രൂപ) നഷ്‌ടപരിഹാരം ഈടാക്കിയാണ് കേസ് ഒത്തുതീർപ്പാക്കിയത്. ഗർഭഛിദ്ര ക്ലിനിക്കിനെതിരേ ഇങ്ങനെയൊരു നടപടി അമേരിക്കയുടെ നിയമചരിത്രത്തിൽ ആദ്യമാണ്. പിറവിയെടുക്കാൻ കൊതിക്കുന്ന അസംഖ്യം കുഞ്ഞുങ്ങൾക്കുവേണ്ടി ഉച്ചൈസ്തരം മുഴങ്ങുന്ന ഈ വിധി എവിടെയും വാഴ്ത്തപ്പെടേണ്ടതുതന്നെ.
2020ലാണ് 26 ആഴ്ച വളർച്ച പൂർത്തിയാക്കിയ കുഞ്ഞിനെ അബോർഷനു വിധേയമാക്കിയത്. ഗർഭഛിദ്രം നടത്തുമ്പോൾ അമ്മ കഠിനമായ മെത്താംഫെറ്റമിൻ ലഹരിമരുന്നിന്‍റെ സ്വാധീനത്തിലായിരുന്നു. ഇത്തരമൊരു വ്യക്തിയിൽനിന്ന് ബോധപൂർവമായ സമ്മതം നേടുന്നത് അസാധ്യമാണെന്ന് പ്രമുഖ അഭിഭാഷകൻ മൈക് സെയ്ബൽ ചൂണ്ടിക്കാട്ടിയത് കോടതിവിധിയെ ഏറെ സ്വാധീനിച്ചു.
മുൻകാലങ്ങളിൽ അബോർഷൻ കേസുകളിൽ അമ്മമാർക്ക് ഏൽക്കുന്ന പരിക്കുകൾക്കു മാത്രമായിരുന്നു നഷ്‌ടപരിഹാരം. ഇവിടെ അമ്മയും, ഗർഭസ്ഥശിശുവിനുവേണ്ടി കേസ് നടത്താൻ രൂപവത്കരിച്ച പ്രത്യേക സംവിധാനവും സംയുക്തമായാണ് കേസ് ഫയൽ ചെയ്തത്. ന്യൂ മെക്സിക്കോയിലെ "റോംഗ്ഫുൾ ഡെത്ത് ആക്‌ട്’ പ്രകാരം ഗർഭസ്ഥശിശുവിനും നിയമപരമായ സംരക്ഷണത്തിനും ജീവിക്കാനും അവകാശമുള്ള വ്യക്തിത്വമുണ്ടെന്നാണ് കോടതി നിരീക്ഷിച്ചത്.
അമേരിക്കയിലെ എല്ലാ സംസ്ഥാനങ്ങളിലും ഗർഭഛിദ്രം സംബന്ധിച്ച് ഒരേ നിയമമല്ല നിലവിലുള്ളത്. 2022 ജൂണിൽ അമേരിക്കൻ സുപ്രീംകോടതിയുടെ ചരിത്രവിധിയിലൂടെ ഗർഭഛിദ്രത്തിനുള്ള ഭരണഘടനാ അവകാശം ഇല്ലാതായി. തുടർന്ന് ഗർഭഛിദ്രം നിയമവിധേയമാക്കണോ അതോ നിരോധിക്കണോ എന്നു തീരുമാനിക്കാനുള്ള പൂർണ അധികാരം ഓരോ സംസ്ഥാന സർക്കാരിനും ലഭിച്ചു. ടെക്സസ്, അലബാമ, മിസിസിപ്പി, ഇന്ത്യാന തുടങ്ങി പതിമൂന്നു സംസ്ഥാനങ്ങളിൽ ഗർഭഛിദ്രം ഏതാണ്ട് പൂർണമായി നിരോധിച്ചിട്ടുണ്ട്.
അമ്മയുടെ ജീവന് ഭീഷണിയുള്ള അപൂർവ സാഹചര്യങ്ങളിൽ മാത്രമാണ് ഇവിടെ ഇളവുകൾ അനുവദിക്കുന്നത്. ഫ്ലോറിഡ, ജോർജിയ തുടങ്ങിയ ചില സംസ്ഥാനങ്ങളിൽ ഗർഭധാരണത്തിന്‍റെ ആദ്യത്തെ ആറ് ആഴ്ചകൾക്കോ അല്ലെങ്കിൽ 12-15 ആഴ്ചകൾക്കോ ശേഷമുള്ള ഗർഭഛിദ്രം തടഞ്ഞിരിക്കുന്നു. കലിഫോർണിയ, ന്യൂയോർക്ക്, വാഷിംഗ്ടൺ, ഇല്ലിനോയ് തുടങ്ങിയ ഡെമോക്രാറ്റിക് ഭരണമുള്ള സംസ്ഥാനങ്ങളിൽ ഗർഭഛിദ്രം മൗലികാവകാശവും നിയമവിധേയവുമാണ്.
ഈ സാഹചര്യത്തിലാണ് ന്യൂ മെക്സിക്കോ കോടതിവിധിയുടെ ചരിത്രപരമായ പ്രാധാന്യം. അമേരിക്കയിലെങ്ങും ഈ വിധി ഗൗരവമേറിയ ചർച്ചകൾക്ക് വഴിതെളിച്ചിരിക്കുകയാണ്. അമേരിക്കയിൽ മാത്രമല്ല, ലോകമെങ്ങുമുള്ള പ്രോ-ലൈഫ് പ്രസ്ഥാനങ്ങൾക്ക് ഏറെ പ്രചോദനവും ആത്മവിശ്വാസവും പകരുന്നതുമാണ് ഈ വിധി. ആധുനികതയുടെയും വ്യക്തിസ്വാതന്ത്ര്യത്തിന്‍റെയും മറവിൽ ഗർഭപാത്രങ്ങളെ കൊലക്കളങ്ങളാക്കുന്ന വ്യാകരണങ്ങൾക്ക് ഈ വിധി വലിയൊരു തിരുത്താണ് നൽകുന്നത്.
കഠിനമായ ലഹരിമരുന്നിന്‍റെ സ്വാധീനത്തിലായിരുന്ന അമ്മയിൽനിന്നു നേടിയെടുത്ത വ്യാജ സമ്മതപത്രത്തിന്‍റെ പിൻബലത്തിൽ ക്രൂരമായി ഇല്ലാതാക്കപ്പെട്ട ആ കുഞ്ഞിനെ സാങ്കല്പിക "വ്യക്തി'യായി കണ്ടു കേസ് നടത്താൻ കഴിഞ്ഞത് കേവലം ഒരു നിയമതന്ത്രമല്ല; മറിച്ച്, ജനിച്ചിട്ടില്ലെങ്കിലും സ്വന്തമായി വ്യക്തിത്വവും നിയമപരമായ അവകാശങ്ങളുമുള്ള, പ്രപഞ്ചത്തിന്‍റെ ഭാഗമാണ് ഓരോ ഗർഭസ്ഥശിശുവും എന്ന മഹത്തായ പ്രഖ്യാപനമാണ്.
സ്വതന്ത്ര ചിന്തയുടെയും ശരീരത്തിന്മേലുള്ള അവകാശങ്ങളുടെയും തിളക്കമുള്ള ലേബലുകളിൽ പൊതിഞ്ഞാണ് പലപ്പോഴും ഗർഭച്ഛിദ്രം എന്ന ക്രൂരത സമൂഹത്തിൽ വിറ്റഴിക്കപ്പെടുന്നത്. എന്നാൽ, ഈ വാഗ്ദാനങ്ങളുടെയും വ്യാജ പ്രലോഭനങ്ങളുടെയും അപ്പുറത്ത്, സ്വന്തം ഗർഭപാത്രത്തിൽ തുടിച്ച ജീവനെ ഇല്ലാതാക്കാൻ നിർബന്ധിതരാകുന്ന സ്ത്രീകൾ അനുഭവിക്കുന്ന ആഴത്തിലുള്ള ശാരീരിക-മാനസിക ആഘാതങ്ങളെ ലോകം ബോധപൂർവം കണ്ടില്ലെന്നു നടിക്കുകയാണ്.
ഗർഭഛിദ്രം സ്ത്രീക്കു നൽകുന്നത് സ്വാതന്ത്ര്യമല്ല; മറിച്ച്, ആജീവനാന്തം പേറേണ്ടിവരുന്ന ആത്മീയവും മാനസികവുമായ അനാഥത്വമാണ്. അബോർഷൻ സംസ്കാരത്തിന്‍റെ യഥാർഥ ഇരകൾ സ്ത്രീകളാണെന്ന സത്യം വിളിച്ചുപറയാനും പ്രതിസന്ധികളിൽ അവർക്കു യഥാർഥ താങ്ങാകാനും സമൂഹം തയാറാകേണ്ട സമയം അതിക്രമിച്ചിരിക്കുന്നു.
പലപ്പോഴും പുരുഷന്‍റെയോ കുടുംബത്തിന്‍റെയോ സ്വാർഥതയ്ക്കും സമൂഹത്തിന്‍റെ ഭീഷണികൾക്കും മുന്നിൽ നിസഹായരായി അടിയറവ് പറയേണ്ടിവരുന്ന ഇരകളാണ് ഭൂരിഭാഗം സ്ത്രീകളും. ഉത്തരവാദിത്വങ്ങളിൽനിന്ന് ഓടിയൊളിക്കുന്ന പങ്കാളികളും ലാഭം മാത്രം ലക്ഷ്യമിടുന്ന അബോർഷൻ മാഫിയയും ചേർന്ന് ഒരു സ്ത്രീയെ അവളുടെ മാതൃത്വത്തിൽനിന്ന് നിഷ്കരുണം അറത്തുമാറ്റുകയാണ്.
ഒരു സമൂഹം എത്രത്തോളം പുരോഗമിച്ചുവെന്നു വിലയിരുത്തേണ്ടത്, അവിടെയുള്ള ഏറ്റവും ബലഹീനരായ ജീവനുകളെ അത് എത്രത്തോളം സംരക്ഷിക്കുന്നു എന്നതിനെ ആധാരമാക്കിയാണ്. ഗർഭഛിദ്രം എന്നതു സ്വാതന്ത്ര്യത്തിന്‍റെ അടയാളമല്ല; മറിച്ച്, ധാർമികമായ അധഃപതനത്തിന്‍റെയും ക്രൂരതയുടെയും പ്രതിഫലനമാണ്. ജീവൻ പ്രകൃതിയുടെ ദാനമാണ്. അതിനെ ഇല്ലാതാക്കാൻ ഏതു ലാഭക്കൊതിക്കാർക്കും വ്യക്തികൾക്കും അവകാശമില്ലെന്ന് ഈ കോടതിവിധി ഓർമിപ്പിക്കുന്നു. മാതൃഗർഭത്തെ മരണത്തിന്‍റെ അറയായല്ല, ജീവന്‍റെ പവിത്രമായ സങ്കേതമായി തിരിച്ചുപിടിക്കാൻ ലോകത്തിന് വലിയൊരു വഴികാട്ടിയാണ് ഈ വിധി.
05-10-2026
ജപ്പാനിലെ ഐച്ചി-നഗോയയില്‍ നടന്ന 20-ാമത് ഏഷ്യന്‍ ഗെയിംസ്‌ ഇന്ത്യന്‍ കായികരംഗത്തിന്‍റെ അഭിമാനം വീണ്ടും ഉയര്‍ത്തിപ്പിടിച്ചിരിക്കുന്നു. 85 മെഡലുകളും നാലാം സ്ഥാനവുമായാണ് ഇന്ത്യന്‍ താരങ്ങളുടെ മടക്കം; 21 സ്വര്‍ണവും 27 വെള്ളിയും 37 വെങ്കലവും. 2023ലെ ഹ്വാങ്‌ഷൂ ഗെയിംസിലെ 106 മെഡലിനു തൊട്ടുപിന്നിലാണ് ഈ നേട്ടം.
അതേസമയം, ഇത്തവണ അയച്ച സംഘത്തിന്‍റെ വലിപ്പം 25 ശതമാനം കുറവായിരുന്നു. ആ നിലയ്ക്ക് തിളക്കത്തിന് ഒട്ടും കുറവില്ല. ഇന്ത്യക്ക് തുല്യം സ്വര്‍ണം നേടിയ ഉസ്‌ബക്കിസ്ഥാനെ കൂടുതല്‍ വെള്ളിയുടെ മികവിലാണ് ഇന്ത്യ അഞ്ചാംസ്ഥാനത്തേക്കു തള്ളിയത്‌. പരമ്പരാഗതമായി ആധിപത്യം പുലര്‍ത്തുന്ന ഇനങ്ങളില്‍ മാത്രമായിരുന്നില്ല ഇന്ത്യ വിജയം കൊയ്‌തത്‌. ഇതില്‍ ആര്‍ച്ചറിയിലെ അഞ്ച്‌ സ്വര്‍ണമെഡല്‍ ഏറ്റവും വലിയ കരുത്തായി മാറി.
15 മെഡലുകള്‍ സമ്മാനിച്ച ഷൂട്ടിംഗ്‌ സംഘവും മൂന്ന് സ്വര്‍ണം നേടിയ ബോക്‌സിംഗ്‌ താരങ്ങളും ഇന്ത്യയുടെ മുന്നേറ്റത്തിന് ആക്കംകൂട്ടി. അന്പെയ്ത്തിൽനിന്നായിരുന്നു ഇത്തവണ ഏറ്റവും കൂടുതൽ സ്വർണം, ഒന്പത്. വനിതാ ഹോക്കി ടീം 44 വര്‍ഷത്തിനുശേഷം സ്വര്‍ണം തിരിച്ചുപിടിച്ചത്‌ ആവേശോജ്വലമായി. ഒപ്പം പുരുഷ ഹോക്കി ടീം സ്വർണം നിലനിർത്തിയതും. ഇരു ടീമുകളും ഒളിമ്പിക്‌സ്‌ യോഗ്യതയും നേടി.
ക്രിക്കറ്റില്‍ പുരുഷ-വനിതാ ടീമുകള്‍ സ്വര്‍ണം നിലനിര്‍ത്തി. കേരളത്തിന്‍റെ സ്വന്തം സഞ്‌ജു സാംസണ്‍ന്‍റെ സ്വര്‍ണത്തിളക്കം മലയാളികള്‍ക്കും അഭിമാനമായി.പുതിയ ആകാശങ്ങള്‍ വെട്ടിപ്പിടിക്കുന്ന ഇന്ത്യയെയും ജപ്പാനില്‍ കണ്ടു. വനിതകളുടെ ഗോള്‍ഫില്‍ പ്രണവി ഉര്‍സ്‌ നേടിയ സ്വര്‍ണം ചരിത്രനേട്ടമായിരുന്നു. അതുപോലെ മിക്‌സഡ്‌ മാര്‍ഷ്യല്‍ ആര്‍ട്‌സ്‌, സോഫ്‌റ്റ്‌ ടെന്നീസ് തുടങ്ങിയ ഇനങ്ങളിലും ഇന്ത്യ ആദ്യമായി മെഡല്‍പട്ടികയിലെത്തി.
ഇന്ത്യക്ക് ഏറ്റവും കൂടുതല്‍ മെഡലുകള്‍ സമ്മാനിച്ചത്‌ അത്‌ലറ്റിക്‌സ്‌ തന്നെ. 24 മെഡലുകള്‍. ഇതിൽ വനിതകളുടെ 4x400 റിലേ ടീം നേടിയതു മാത്രമാണ് ഏക സ്വര്‍ണം. കിരണ്‍ പഹല്‍, പൂവമ്മ, പ്രാചി ചൗധരി, വിദ്യ രാംരാജ്‌ എന്നിവരാണ് ഇന്ത്യന്‍ പതാക ഉയര്‍ത്തിപ്പിടിച്ചത്‌. 10,000 മീറ്റര്‍, 1,500 മീറ്റര്‍ വെള്ളിയും 5,000 മീറ്ററില്‍ വെങ്കലവും നേടിയ ഗുല്‍വീര്‍ സിംഗിന്‍റെ നേട്ടവും എടുത്തുപറയേണ്ടതാണ്.
കേരളത്തിന്‍റെ താരങ്ങളും ഇന്ത്യന്‍ വിജയങ്ങളില്‍ വലിയ പങ്കുവഹിച്ചു. ഫൈനലില്‍ പാക്കിസ്ഥാനെ വീഴ്‌ത്തി ഇന്ത്യ ക്രിക്കറ്റ്‌ സ്വര്‍ണമണിഞ്ഞപ്പോള്‍ സഞ്‌ജു സാംസണ്‍ ഏഷ്യന്‍ ഗെയിംസ്‌ ക്രിക്കറ്റില്‍ സ്വർണമണിയുന്ന ആദ്യ മലയാളി താരമായി. ബാറ്റിംഗില്‍ പ്രതീക്ഷിച്ചത്ര തിളങ്ങാനായില്ലെങ്കിലും വിക്കറ്റ്‌ കീപ്പിംഗും സെമിയിലെ ഉജ്വല ക്യാച്ചും മറക്കാനാകില്ല. ലോംഗ്‌ജംപില്‍ മുരളി ശ്രീശങ്കറിന്‍റെയും ആന്‍സി സോജന്‍റെയും വെള്ളിക്ക്‌ മാറ്റ്‌ ഏറെയായിരുന്നു.
ട്രാക്കില്‍ ഇരട്ട മെഡലുമായാണ് ടി.എസ്. മനു മടങ്ങിയത്‌. മിക്‌സഡ്‌ 4x400 റിലേയില്‍ വെള്ളിയും പുരുഷ വിഭാഗം 4x400 റിലേയില്‍ വെങ്കലവും മനു ഉള്‍പ്പെട്ട ഇന്ത്യ സ്വന്തമാക്കി. സെയ്‌ലിംഗ്‌ ചരിത്രത്തില്‍ ആദ്യമായി മെഡല്‍ നേടിയായിരുന്നു മറ്റൊരു മലയാളിക്കുതിപ്പ്‌. പുരുഷന്മാരുടെ സ്‌കിഫ്‌ ഇനത്തിലാണ് ബന്ധുക്കള്‍കൂടിയായ മനു ഫ്രാന്‍സിസും പ്രിന്‍സ്‌ നോബിളും ചേര്‍ന്ന്‌ വെള്ളി മെഡല്‍ നേടിയത്‌.
2018ലെ പ്രളയസമയത്ത്‌ സ്‌തുത്യര്‍ഹമായ രക്ഷാപ്രവര്‍ത്തനം നടത്തിയവരാണ് ഈ മത്സ്യത്തൊഴിലാളി യുവാക്കള്‍. കോഴിക്കോട് തിരുവമ്പാടി സ്വദേശിയായ വിദര്‍ശ കെ. വിനോദ്‌ വനിതകളുടെ 10 മീറ്റര്‍ എയര്‍ റൈഫിൾ ടീം ഇനത്തില്‍ നേടിയ വെള്ളിമെഡല്‍ മറ്റൊരു മലയാളി നേട്ടമായി. ഏഷ്യന്‍ ഗെയിംസ്‌ ഷൂട്ടിംഗിലെ ആദ്യ മലയാളി മെഡലായിരുന്നു അത്.
അതേസമയം, ബാഡ്‌മിന്‍റണ്‍, ടേബിള്‍ ടെന്നീസ് തുടങ്ങിയ ഇനങ്ങളില്‍ ഇന്ത്യക്ക് മുന്നേറാന്‍ കഴിഞ്ഞില്ല എന്നത് നിരാശയായി. ഏഷ്യന്‍ ഗെയിംസിലെ നാലാം സ്ഥാനം മികച്ചതാണെങ്കിലും ചൈന, ജപ്പാന്‍, ദക്ഷിണ കൊറിയ എന്നീ ലോകത്തിലെ തന്നെ മുന്‍നിര രാജ്യങ്ങളുമായുള്ള മെഡല്‍ വ്യത്യാസം വലുതാണെന്ന വസ്തുത കാണാതിരുന്നുകൂടാ.
അത്‌ലറ്റിക്‌സ്‌ ഉള്‍പ്പടെയുള്ള ചില അടിസ്ഥാന ഇനങ്ങളില്‍ വരുംകാലങ്ങളില്‍ കൂടുതല്‍ സ്ഥിരതയുള്ള പ്രകടനം ഉറപ്പാക്കേണ്ടതുണ്ട്. ലോംഗ്‌ജംപില്‍ ആന്‍സി സോജനു തന്‍റെ ദേശീയ റിക്കാര്‍ഡിനടുത്ത്‌ എത്താനായില്ലെങ്കിലും പ്രതികൂല കാലാവസ്ഥയില്‍ നേടിയ വെള്ളിയുടെ വില വളരെ വലുതാണ്. ഭാവിയില്‍ ഒളിമ്പിക്‌ മെഡല്‍ നേടിത്തരാന്‍ സാധ്യതയുള്ള അത്‌ലറ്റാണ് ആന്‍സി.
ഈ അഭിമാന താരത്തിനെതിരേയുണ്ടായ സൈബര്‍ ആക്രമണം തികച്ചും പ്രതിഷേധാര്‍ഹമാണ് എന്ന കാര്യവും പറയാതെവയ്യ. മനോവൈകല്യം ബാധിച്ചവരുടെ അത്തരം ജല്‌പനങ്ങള്‍ വകവയ്ക്കാതെ മുന്നേറാന്‍ ആന്‍സിക്കു സാധിക്കട്ടെ. ശ്രീശങ്കറിനെയും പ്രതികൂല കാലാവസ്ഥയാണു ചതിച്ചത്‌. ടേക്ക്‌ ഓഫ്‌ ബോര്‍ഡ്‌ നനഞ്ഞു കിടന്നതുകൊണ്ട്‌ ചെറിയ പരിക്കുമുണ്ടായി. മനുവിനും ഏറെ മുന്നോട്ടുപോകാനുണ്ട്‌.
എപ്പോഴും പറയാറുള്ളതുപോലെ, കേരളത്തില്‍ സ്‌പോര്‍ട്‌സ്‌ ഇന്‍ഫ്രാസ്‌ട്രക്‌ചര്‍ ശക്തമാക്കേണ്ടതിന്‍റെ ആവശ്യകത ഒരോ വലിയ ചാമ്പ്യന്‍ഷിപ്പും നമ്മെ ബോധ്യപ്പെടുത്തുന്നുണ്ട്‌. അതിനു വേണ്ടത് സ്‌കൂള്‍ കായികരംഗത്തെ ഉയര്‍ത്തിക്കൊണ്ടുവരികയാണ്. എങ്കിലേ അത്‌ലറ്റിക്‌സില്‍ കേരളത്തിന്‍റെ പഴയകാല പ്രൗഢി തിരിച്ചുകൊണ്ടുവരാനാകൂ.
2028ലെ ലോസ്‌ ആഞ്ചലസ്‌ ഒളിമ്പിക്‌സ്‌ ലക്ഷ്യമിട്ടു നീങ്ങുന്ന ഇന്ത്യക്ക് വലിയ ആത്മവിശ്വാസമാണ് ഐച്ചി-നഗോയ നല്‍കുന്നത്‌. അടിസ്ഥാനസൗകര്യ വികസനം, ആധുനിക പരിശീലന രീതികള്‍, സപ്പോര്‍ട്ട്‌ സ്‌റ്റാഫിന്‍റെ സേവനം എന്നിവ കൂടുതല്‍ ശക്തീകരിച്ചാല്‍ കൂടുതല്‍ ഉയരങ്ങള്‍ നമുക്ക് അപ്രാപ്യമല്ല.
03-10-2026
ലൈഫ് മിഷന്‍ എന്ന സ്വപ്‌നപദ്ധതിയുടെ ഭാഗമായി കൊച്ചി മുണ്ടംവേലിയില്‍ നിര്‍മിച്ച പി ആന്‍ഡ്‌ ടി ഫ്‌ളാറ്റുകളില്‍ ഏറെ പ്രതീക്ഷയോടെ താമസിക്കാനെത്തിയവര്‍ കൊടിയ ദുരിതത്തിലാണ്. താമസമാരംഭിച്ച്‌ മാസങ്ങള്‍ക്കകം ചോര്‍ച്ചയും മറ്റു ഗുരുതരമായ പ്രശ്‌നങ്ങളും കാരണം ഫ്‌ളാറ്റുകള്‍ വാസയോഗ്യമല്ലാതായി. ഇതിന്‍റെ നിര്‍മാണവുമായി ബന്ധപ്പെട്ട നിരവധി ക്രമക്കേടുകള്‍ പുറത്തു വന്നു.
ഒടുവില്‍ മുഖ്യമന്ത്രി വി.ഡി. സതീശന്‍ ശക്തമായ നിലപാടെടുക്കുകയും വിജിലന്‍സ്‌ അന്വേഷണത്തിന് ഉത്തരവിടുകയും ചെയ്തു. 17 കോടി രൂപ ചെലവിട്ട പദ്ധതിയില്‍ തുടക്കംമുതലേ വലിയ ക്രമക്കേടുകള്‍ ഉണ്ടായതായാണ് കണ്ടെത്തിയത്‌. ജിസിഡിഎ ഉദ്യോഗസ്ഥരും കരാറുകാരും പ്രതിക്കൂട്ടിലാണ്. ഉന്നത ഉദ്യോഗസ്ഥരടക്കം ആറുപേര്‍ക്കെതിരേയാണ് പ്രാഥമികാന്വേഷണം നടക്കുക. നഷ്ടം പ്രതികളില്‍നിന്നുതന്നെ ഈടാക്കാനാണ് നീക്കം.
കഴിഞ്ഞ ഇടതുപക്ഷ സര്‍ക്കാരിന്‍റെ കാലത്താണ് തോപ്പുംപടി രാമേശ്വരം വില്ലേജിലെ മുണ്ടംവേലിയില്‍ ഫ്‌ളാറ്റ്‌ സമുച്ചയം നിര്‍മിച്ചത്‌. എറണാകുളം ഗാന്ധിനഗര്‍ പി ആന്‍ഡ്‌ ടി കോളനിയിലെ 77 കുടുംബങ്ങളെ പുനരധിവസിപ്പിക്കുകയായിരുന്നു ലക്ഷ്യം. വെള്ളപ്പൊക്കത്തിലും കഷ്ടപ്പാടിലുമായിരുന്നു അവര്‍. അത്യാധുനിക സൗകര്യങ്ങളുള്ള ഫ്‌ളാറ്റുകള്‍ എന്നായിരുന്നു അവകാശവാദം. 2023ലാണ് കൊട്ടിഘോഷിച്ചുകൊണ്ട്‌ ഉദ്‌ഘാടന മാമാങ്കം നടത്തിയത്.
2024 ജനുവരി അവസാനം വലിയ ആശ്വാസത്തോടെ താമസക്കാരുമെത്തി. അവര്‍ക്ക്‌ പിന്നീടങ്ങോട്ട്‌ ദുരിതദിനങ്ങളായിരുന്നു. സെപ്‌റ്റിക്‌ ടാങ്ക്‌ നിറഞ്ഞൊഴുകാനും ഭിത്തികളിലൂടെ വെള്ളം ഒലിച്ചിറങ്ങാനും തുടങ്ങി. ഭക്ഷണമുണ്ടാക്കാനോ ഉറങ്ങാനോ കഴിയാതായി. അടുക്കളയില്‍നിന്നുള്ള മലിനജലം എല്ലാ ഫ്‌ളാറ്റുകളിലുമെത്തി. ഫാനുകള്‍ തറപൊത്തി. ചുമരില്‍ തൊട്ടാല്‍ ഷോക്ക്‌.
തൊട്ടടുത്തുകൂടിയാണ് 110 കെവി ലൈന്‍ പോകുന്നത്. താമസക്കാര്‍ സമരം തുടങ്ങി. ഒടുവില്‍ കെട്ടിടം പൊളിക്കുമെന്ന്‌ മുഖ്യമന്ത്രി പ്രഖ്യാപിച്ചു. നന്നാക്കിയെടുക്കാന്‍ 27 കോടി രൂപയെങ്കിലും ഇനിയും വേണ്ടിവരുമെന്നാണ് മദ്രാസ് ഐഐടി നടത്തിയ പഠനത്തില്‍ തെളിഞ്ഞത്‌. എന്നാലും താമസിക്കാനാകുമോ എന്ന് ഉറപ്പുമില്ല. കരാറുകാരുടെയും ഉദ്യോഗസ്ഥരുടെയും പരസ്‌പരമുള്ള പഴിചാരല്‍ മഹാമഹം പതിവുപോലെ നടക്കുന്നുണ്ട്‌.
തൃശൂര്‍ ഡിസ്‌ട്രിക്ട്‌ ലേബര്‍ കോണ്‍ട്രാക്ട്‌ കോ-ഓപ്പറേറ്റീവ്‌ സൊസൈറ്റിയാണ് കരാറുകാര്‍. എസ്റ്റിമേറ്റ്‌ ചുരുക്കി ജിസിഡിഎ കുഴപ്പത്തിലാക്കി എന്ന് കരാറുകാരും, കരാറുകാരാണ് കുഴപ്പക്കാര്‍ എന്നു ജിസിഡിഎയും കുറ്റപ്പെടുത്തുന്നു. കരാര്‍ നല്കിയതിലും കരാറുകാര്‍ക്ക്‌ മൊബിലൈസേഷന്‍ ഫണ്ട് നല്കിയതിലും ചട്ടലംഘനമുണ്ടായെന്നും ആരോപണമുണ്ട്. 2.48 കോടി രൂപയാണ് കരാറുകാര്‍ക്ക്‌ ലൈഫ് മിഷനില്‍നിന്ന്‌ സ്ഥിരീകരണമില്ലാതെ നല്‌കിയതെന്നാണ് ആരോപണം.
ജിസിഡിഎ ഓഡിറ്റിംഗ് വിഭാഗത്തിനു പരിശോധനയ്‌ക്ക്‌ സമയം അനുവദിക്കാതെ പണം നല്‍കാന്‍ ചെയര്‍മാന്‍ ആവശ്യപ്പെട്ടുവത്രേ. ഈ തിടുക്കമാണ് സംശയത്തിന്‍റെ നിഴല്‍ വീഴ്‌ത്തുന്നത്‌. ലൈഫ് പദ്ധതിക്കു കീഴില്‍ മുണ്ടംവേലിയില്‍ ഫ്‌ളാറ്റ്‌ നിര്‍മിക്കാനുള്ള പദ്ധതിയുടെ പ്രോജക്ട് മാനേജ്‌മെന്‍റ് കണ്‍സള്‍ട്ടന്‍സിയായാണ് ടിഡിഎല്‍സിയെ ആദ്യം നിയമിച്ചത്‌. പിന്നീട് ഇതേ കമ്പനിക്കുതന്നെ നിര്‍മാണകരാറും നല്‌കുകയായിരുന്നു.
നിര്‍മാണത്തിന്‍റെ ഗുണനിലവാരം പരിശോധിക്കേണ്ട കണ്‍സള്‍ട്ടന്‍സിതന്നെ കരാറുകാരെന്ന വേഷപ്പകര്‍ച്ചയില്‍. അവിടെയും എന്തോ ചീഞ്ഞുനാറുന്നുണ്ടായിരുന്നു. ഉദ്യോഗസ്ഥരും കരാറുകാരും രാഷ്‌ട്രീയക്കാരും ചേർന്നുള്ള കള്ളക്കളികള്‍ ഈ നാട്ടില്‍ ആദ്യമല്ല. ഏതു വലിയ പദ്ധതി വരുമ്പോഴും ഇവര്‍ക്ക്‌ ആഹ്‌ളാദമാണ്. പദ്ധതി വലുതാകുംതോറും വെട്ടിപ്പിന്‍റെ വ്യാപ്‌തിയും കൂട്ടാമല്ലോ! ഒരുളുപ്പുമില്ലാതെ പാവപ്പെട്ടവരെ പറ്റിക്കുന്നതിനു കൂട്ടുനിന്ന എല്ലാവരെയും മാതൃകാപരമായി ശിക്ഷിക്കേണ്ടതുണ്ട്‌.
മുഖ്യമന്ത്രി പ്രഖ്യാപിച്ച വിജിലന്‍സ്‌ അന്വേഷണം എല്ലാവരിലേക്കുമെത്തട്ടെ. ചെയ്ത തെറ്റിനെ ഒരു നാണവുമില്ലാതെ ന്യായീകരിക്കുന്ന രാഷ്‌ട്രീയനേതാക്കളുടെ തൊലിക്കട്ടിക്കു നേരേ ഏതു ചാട്ടവാറാണ് ഉയരുക എന്നതാണ് മറ്റൊരു ചോദ്യം. ദുരിതത്തിലുഴലുന്ന താമസക്കാര്‍ സര്‍ക്കാര്‍ മാറിയപ്പോള്‍ ഒതളങ്ങപോലെ ഉരുളുകയാണെന്നു പറഞ്ഞ സിപിഎം നേതാവും മുന്‍ എംഎല്‍എയുമായ കെ.ജെ. മാക്‌സിയുടെ വാക്കുകള്‍ ഇടതുമുന്നണിയുടെ പുരോഗമനനാട്യത്തിന്‍റെ കാപട്യം വിളിച്ചോതുന്നതായി.
എതിര്‍ത്തും അനുകൂലിച്ചും രാഷ്‌ട്രീയകക്ഷികളും രംഗത്തെത്തിയതോടെ കൊടിയ അഴിമതിയുടെ പ്രശ്നം സങ്കുചിത രാഷ്‌ട്രീയപോരാട്ടമായി ചുരുങ്ങിയേക്കുമെന്ന ആശങ്കയും ഉയരുന്നു. വിലകുറഞ്ഞ രാഷ്‌ട്രീയത്തിന്‍റെ വിഷപ്പുകയും അഴിമതിയുടെ കരാള ദുര്‍ഭൂതങ്ങളും ചേര്‍ന്ന്‌ സമൂഹത്തെ വിഴുങ്ങുന്നതു നോക്കിനില്‍ക്കാനല്ല ഭരണകൂടങ്ങള്‍. നീതിയുടെ പക്ഷത്തു നിലയുറപ്പിക്കുകയാണ് അവരുടെ ചുമതല. ലൈഫ് മിഷന്‍ പദ്ധതിയുമായി ബന്ധപ്പെട്ട് മറ്റു പലയിടത്തും അഴിമതി ആരോപണങ്ങളുണ്ട്‌.
അതും അന്വേഷിച്ച്‌ സത്യം പുറത്തുകൊണ്ടുവരട്ടെ. കുറ്റക്കാരെ ശിക്ഷിക്കട്ടെ. ഈ പദ്ധതിയുടെ യഥാര്‍ഥ ഗുണഭോക്‌താക്കളായി ലക്ഷക്കണക്കിനു പേരുണ്ടെന്നതും മറന്നുകൂടാ. രാഷ്‌ട്രീയവിജയത്തിനാകരുത്‌ മുന്‍ഗണന. പകരം, സാമൂഹിക സുരക്ഷിതത്വവും നീതിയും മേല്‍ക്കൈ നേടട്ടെ.
02-10-2026
ഗാന്ധിജയന്തി ദിനത്തിലും നാം ആ വെടിയുണ്ടയുടെ ആഘാതം മറക്കരുത്. മഹാത്മജിയുടെ ഓരോ ജന്മദിനത്തിലും ഇന്ത്യൻ ജനത എടുക്കുന്ന പ്രതിജ്ഞകൾക്കു പിന്നിലെ ആശയദൃഢതയ്ക്ക് അമരത്വം നൽകിയ ആ വെടിയുണ്ട. സത്യത്തിലും അഹിംസയിലും അടിയുറച്ചുനിന്ന അചഞ്ചലമായ ആ നിശ്ചയദാർഢ്യത്തെ തരിമ്പും പോറലേൽപിക്കാൻ കഴിയാതിരുന്ന ആ വെടിയുണ്ട. ഹിന്ദുത്വ അസഹിഷ്ണുതയുടെ ആ വെടിയുണ്ടകൾക്കു മുന്നിലേക്കെത്തുംമുമ്പ് ഗാന്ധിജി ജീവിച്ച സമരജീവിതത്തിനും താണ്ടിയ കനൽവഴികൾക്കും തുടക്കമിട്ട നിമിഷമായിവേണം ഗാന്ധിജയന്തിയെ ഓരോ ഇന്ത്യക്കാരനും തിരിച്ചറിയാൻ. അത് വെറുമൊരു ജന്മദിനാഘോഷമല്ല.
തിരിച്ചറിവുകളുടെ നിമിത്തമാണ്. ഓർമകൾ ഉണ്ടായിരിക്കേണ്ടതിന്‍റെ ഓർമപ്പെടുത്തൽ. മാനവികതയ്ക്കുനേരേ പുതിയ ബരേറ്റ തോക്കുകൾ ചൂണ്ടി വേതാളനൃത്തം ചവിട്ടുന്ന ഹിന്ദുത്വയെ ചെറുക്കണമെന്ന ബോധ്യത്തിന്‍റെ പുനരർപ്പണദിനം. ഗാന്ധിജിയെയും അദ്ദേഹത്തിന്‍റെ മൂല്യങ്ങളാൽ ജ്വലിച്ചുനിൽക്കുന്ന ഇന്ത്യയെയും ഘാതകർക്ക് വിട്ടുകൊടുക്കില്ലെന്ന ദൃഢപ്രതിജ്ഞയുടെ മുഴക്കമാകണം ഗാന്ധിജയന്തിദിനത്തിൽ ഉയരേണ്ടത്. പുതിയ പൂമ്പാറ്റകൾ പൊടിച്ചുയരേണ്ട സുദിനമാണിത്.
എന്‍റെ ജീവിതമാണ് എന്‍റെ സന്ദേശം എന്ന, മഹാത്മാവിന്‍റെ ആത്മഗാഥ വരുംതലമുറകളിലേക്ക് കൈമാറുകയാണ് ഓരോ ഇന്ത്യക്കാരന്‍റെയും ഉത്തരവാദിത്വം. വാക്കുകളും പ്രവൃത്തിയും തമ്മിൽ വൈരുധ്യങ്ങളില്ലാത്ത ഒരു പൂർണജീവിതത്തെ ഈ ധന്യനിമിഷത്തിൽ നാം ദർശിക്കുന്നു. ചുരുക്കത്തിൽ, ഗാന്ധിജയന്തി ഗാന്ധിയൻ ജ്വാലയുടെ തുടിപ്പാണെങ്കിൽ, രക്തസാക്ഷിത്വദിനം ആ ജ്വാല അണയാതെ സൂക്ഷിക്കേണ്ടതിന്‍റെ ഉത്തരവാദിത്വം ഓരോ ഇന്ത്യക്കാരനെയും ഓർമിപ്പിക്കുന്ന ദിനമാണ്. ഈ രണ്ടു ബിന്ദുക്കളെയും സംയോജിപ്പിക്കുന്ന സത്തയാണ് ഗാന്ധിജിയുടെ മഹത്വം.
ഹിംസയുടെയും അസത്യത്തിന്‍റെയും വിത്തുകൾമാത്രം മുളപൊട്ടുന്ന സമകാല ഇന്ത്യ ഗാന്ധിജിയെ ഓരോ ശ്വാസത്തിലും തേടുന്നുണ്ട്. നിഷ്കളങ്കമായ ദൃഢതയുടെയും ധീരമായ ബോധ്യങ്ങളുടെയും പുതിയ ദണ്ഡിയാത്രകൾക്കായി രാജ്യം കാത്തിരിക്കുന്നുണ്ട്. ലക്ഷ്യവും മാർഗവും ശുദ്ധമായ പുതിയ ദണ്ഡിയാത്ര. ആഗോള ചട്ടമ്പിമാരുടെ ഭീഷണി തീരുവകളായും മിസൈലുകളായും ഭൂഗോളത്തെ ഭയാശങ്കയിലാഴ്ത്തുമ്പോൾ ഗ്രാമസ്വരാജെന്ന കാലാതിശായിയായ മഹദ്‌ദർശനത്തിന്‍റെ ആഴം വർധിച്ചുവരികയാണ്.
രക്തവും മാംസവുമുള്ള ഇങ്ങനെയൊരു മനുഷ്യൻ ഈ ഭൂമിയിൽ ജീവിച്ചിരുന്നു എന്ന് വരുംതലമുറകൾ വിശ്വസിക്കാൻപോലും മടിച്ചേക്കാം എന്ന് വിഖ്യാത ശാസ്ത്രജ്ഞൻ ആൽബർട്ട് ഐൻസ്റ്റീൻ പറഞ്ഞത് വെറുതെയല്ല. അതിന്‍റെ കാരണം കവിഗുരു രബീന്ദ്രനാഥ ടാഗോറിന്‍റെ ഈ വാക്കുകളിലുണ്ട്. “ഏറ്റവും ദരിദ്രരും എളിയവരുമായ ഡൽഹിയിലെയും ഗ്രാമങ്ങളിലെയും സാധാരണക്കാരുടെ വീട്ടുപടിക്കൽ ഗാന്ധിജി എത്തിച്ചേർന്നത് അവരുടെ സ്വന്തം വസ്ത്രങ്ങളണിഞ്ഞാണ്.
അദ്ദേഹം സംസാരിച്ചത് അവരുടെ ഭാഷയിലായിരുന്നു, അല്ലാതെ വൻ തത്ത്വചിന്തകളായിരുന്നില്ല.’’ ഇന്ത്യ ഞങ്ങൾക്ക് മോഹൻദാസ് കരംചന്ദ് ഗാന്ധിയെ തന്നു; ഞങ്ങൾ മഹാത്മാവിനെ ഇന്ത്യക്ക് തിരിച്ചുനൽകിയെന്ന് നിറഞ്ഞ കൃതാർഥതയോടെ ദക്ഷിണാഫ്രിക്കൻ നേതാവ് നെൽസൺ മണ്ടേല പറയുമ്പോൾ ഗാന്ധിജി ലോകത്തിന്‍റെതന്നെ സ്വത്തും സ്വത്വവുമാണെന്ന് നാം അഭിമാനത്തോടെ തിരിച്ചറിയുന്നു. അമേരിക്കൻ പൗരാവകാശ പ്രവർത്തകനായിരുന്ന മാർട്ടിൻ ലൂഥർ കിംഗ് ജൂനിയർ, യേശുക്രിസ്തു തനിക്കു നൽകിയ സന്ദേശത്തിനനുസരിച്ച് ജീവിക്കാനുള്ള വഴികാണിച്ചുകൊടുത്ത വെളിച്ചമായാണ് ഗാന്ധിജിയെ കാണുന്നത്.
അതേസമയം, അക്രമത്തിന്‍റെ ആക്രോശങ്ങളും വടിവാൾ തലപ്പുകളിൽനിന്നിറ്റുന്ന ചോരത്തുള്ളികളും ജനങ്ങളെ ബന്ദികളാക്കുന്ന സമരാഭാസങ്ങളും ഗാന്ധിജിയുടെ ലളിതസുന്ദരവും അതേസമയം കാരിരുമ്പ് പിളർക്കാൻ കരുത്തുള്ളതുമായ സമരരീതികളിലേക്കുള്ള തിരിച്ചുപോക്ക് ആവശ്യപ്പെടുന്നുണ്ട്. ലക്ഷ്യം മാത്രമല്ല, മാർഗവും വിശുദ്ധമാകണമെന്ന വാക്കുകൾ വീണ്ടുംവീണ്ടും സമരമുഖങ്ങളിൽ ഉയർന്നേതീരൂ.
ആശയപരമായ ഭിന്നതകൾക്ക് അക്രമം കൊണ്ടാകരുത് മറുപടി. പൊതുമുതലുകൾ ഭരണകക്ഷിയുടേതല്ല, പൊതുജനങ്ങളുടേതാണ് എന്ന തിരിച്ചറിവു വേണം. അക്രമം ആത്യന്തികമായി നാശവും ഭിന്നതയുമേ വളർത്തൂ എന്ന ഗാന്ധിയൻ പാഠം ഇവിടെ നാം മറന്നുപോകരുത്. ഗാന്ധിജിക്ക് സത്യഗ്രഹം എന്നത് ആത്മവീര്യവും സഹനവുമായിരുന്നു. പൊലിസിനുനേരേയോ പൊതുജനങ്ങൾക്കുനേരേയോ നടത്തുന്ന അക്രമം ജനാധിപത്യപരമായ സംവാദത്തിനുള്ള സാധ്യത അടയ്ക്കലാണ്. സത്യഗ്രഹത്തിലൂടെ ധാർമികശക്തിയുടെ വിജയമാണ് ഗാന്ധിജി ആഗ്രഹിച്ചത്.
ഗാന്ധിജിയുടെ സ്വപ്നങ്ങളിലെ ഇന്ത്യയുടെ അടിത്തറ ഗ്രാമസ്വരാജ് ആയിരുന്നു. സ്വയംപര്യാപ്തവും ശക്തീകരിക്കപ്പെട്ടതുമായ ഗ്രാമങ്ങളാണ് രാജ്യത്തിന്‍റെ യഥാർഥ നട്ടെല്ലെന്ന് അദ്ദേഹം വിശ്വസിച്ചു. ഇന്നത്തെ നഗരകേന്ദ്രീകൃത വളർച്ചയും പ്രാദേശിക സമ്പദ്‌വ്യവസ്ഥകളുടെ തകർച്ചയും ഗ്രാമീണമേഖലകളിൽ സൃഷ്‌ടിക്കുന്ന ദുരിതങ്ങൾ നാം കാണുന്നുണ്ട്. പരിസ്ഥിതി സൗഹൃദപരമായ വികസനത്തിനും പ്രാദേശിക തൊഴിലവസരങ്ങൾ വർധിപ്പിക്കുന്നതിനും ഗ്രാമസ്വരാജ് എന്ന ആശയം പുനരുജ്ജീവിപ്പിക്കേണ്ടതിനെക്കുറിച്ച് ഓർക്കാൻ ഇതിലും നല്ലൊരു ദിവസമുണ്ടോ.
പാർശ്വവത്കരിക്കപ്പെട്ടവരുടെയും സാധാരണക്കാരുടെയും പ്രശ്നങ്ങൾക്ക് മുൻഗണന നൽകുന്ന ഗാന്ധിയൻ മോഡലിന് അസത്യങ്ങളും അർധസത്യങ്ങളും നിർമിതസത്യങ്ങളും വാർത്തകളുടെ പേരിൽ അതിവേഗം ഉലകംചുറ്റുന്ന സോഷ്യൽ മീഡിയയുടെ കാലത്ത് ഏറെ പ്രസക്തിയുണ്ട്. കർഷകരുടെയും സാധാരണക്കാരുടെയും പ്രശ്നങ്ങളെ മറയില്ലാതെ അഭിമുഖീകരിക്കുന്ന ദീപികയുടെ മാധ്യമശൈലിയിൽ ഗാന്ധിയൻ ദർശനവും ഉൾച്ചേർന്നിട്ടുണ്ടെന്ന് അഭിമാനത്തോടെ പറയാനാകും.
പുനരർപ്പണത്തിന്‍റെ ഈ ഗാന്ധിജയന്തിയും സത്യത്തിനും നീതിക്കും വേണ്ടിയുള്ള പോരാട്ടങ്ങളുടെ തുടർച്ചയായി കൊണ്ടാടാനിടയാക്കട്ടെ.
01-10-2026
കേരളത്തിൽ വന്യജീവികൾക്കു മാത്രമായി ഒരു ജില്ലാ കളക്‌ടറോ! അവയുടെ സ്വൈരവിഹാരത്തിനു സുഗമമായ പാതയൊരുക്കാൻ ഒരു സർക്കാർ ഉദ്യോഗസ്ഥൻ. അവയ്ക്കു നിർബാധം കൃഷിയിടങ്ങളിലേക്കും ജനവാസമേഖലയിലേക്കുമിറങ്ങാം. ജീവൻ വേണമെങ്കിൽ മനുഷ്യർ മുറിയടച്ച്, ശ്വാസംപിടിച്ച് വീടിനുള്ളിലിരുന്നോളണം. എന്തൊരു ദുരന്തമാണ് ഇടുക്കിയിലെ ജില്ലാ കളക്‌ടർ! അടുത്ത ദിവസങ്ങളിൽ ആ മഹാനുഭാവൻ പുറപ്പെടുവിച്ച ഉത്തരവുകൾ കാണുമ്പോൾ ആരും പറഞ്ഞുപോകും.
വന്യമൃഗങ്ങൾ സഞ്ചരിക്കുന്ന വഴിയിൽ ഒരു വേലിയോ മതിലോ കെട്ടിടമോ കണ്ടുപോകരുത്. എല്ലാം പൊളിച്ചടുക്കണം. ഇതായിരുന്നു ആദ്യ ഉത്തരവ്. പിന്നെയിതാ, ജനങ്ങളുടെ സുരക്ഷയ്ക്കായി ‘ചരിത്രം കുറിച്ച’ അടുത്ത ഉത്തരവ്. ജീവൻ വേണമെങ്കിൽ വൈകുന്നേരം ആറുമണിയോടെ വീട്ടിൽ കയറിക്കോണം. രാവിലെ ആറുവരെ പുറത്തിറങ്ങാൻ പാടില്ല!ഈ ഉത്തരവുകളെ ആനമണ്ടത്തരം എന്നു വിളിച്ചാൽ കാട്ടാനപോലും കൂടുതൽ ക്രുദ്ധനായി ചിന്നംവിളിച്ച് പാഞ്ഞടുക്കും.
അൽപം വെളിവ് വന്യമൃഗങ്ങൾക്കുമുണ്ടല്ലോ! ബാല പ്രസിദ്ധീകരണങ്ങളിൽ ‘മൃഗാധിപത്യം വന്നാൽ’ എന്നൊക്കെ കുട്ടികളെ സന്തോഷിപ്പിക്കാൻ ചിത്രകഥകൾ വരാറുണ്ട്. ഉത്തരവാദപ്പെട്ട ഒരു സർക്കാർ ഉദ്യോഗസ്ഥൻ അതിലും ബാലിശമായി പെരുമാറുന്നുവെന്നുവന്നാൽ നാടിന്‍റെ അവസ്ഥയെന്താകും? സർക്കാരും മന്ത്രിമാരും ഇതൊന്നും കാണുന്നില്ലേ?
ദുരന്തനിവാരണത്തിന്‍റെ പേരിലാണ് ഇടുക്കി ജില്ലാ കളക്‌ടർ ഡോ. ദിനേശൻ ചെറുവാട്ടിന്‍റെ ഉത്തരവ് മേളാങ്കം. ദുരന്തനിവാരണ അഥോറിറ്റി ചെയർപേഴ്സനെന്ന മഹനീയ പദവികൂടി അദ്ദേഹത്തിനുണ്ടല്ലോ. ദോഷം പറയരുതല്ലോ, ജനങ്ങളെ കളക്‌ടർ മറന്നു എന്നൊന്നും പറയാൻ പറ്റില്ല. അവരുടെ സുരക്ഷ തന്നെയാണ് അദ്ദേഹത്തിനു മുഖ്യം. വനമേഖലയോടു ചേർന്നുകിടക്കുന്ന തോട്ടങ്ങളിൽ രാത്രിസമയത്തെ മനുഷ്യസഞ്ചാരം എന്തൊരപകടമാണ്! അപ്പോൾ മനുഷ്യരുടെ രക്ഷയ്ക്ക് അവരെ പൂട്ടിയിടുകയല്ലാതെ എന്തുചെയ്യാൻ. സ്ത്രീപീഡനങ്ങളുടെ വാർത്തകൾ ദിവസവും പെരുകുന്നു.
കവർച്ച, മോഷണം എന്നിവയൊക്കെ കൂടുന്നു. സ്ത്രീകൾ പുറത്തിറങ്ങരുത്, ഇറങ്ങിയാൽതന്നെ ആഭരണങ്ങളും വിലപിടിച്ച വസ്തുക്കളും കൈയിൽ കരുതരുത് എന്നൊക്കെയുള്ള ഉത്തരവാകും അടുത്തുവരാൻ പോകുന്നത്! വാഹനാപകടം കുറയ്ക്കാൻ വാഹനങ്ങൾ നിരത്തിലിറക്കാൻ പാടില്ലെന്നങ്ങ് പറഞ്ഞാൽപോരേ. ഇത്ര എളുപ്പമുള്ള പരിഹാരങ്ങൾ ഇത്രകാലമായിട്ടും ആർക്കും തോന്നിയില്ലല്ലോ!
തോട്ടങ്ങളിൽ രാത്രിസമയത്തെ ജോലികൾ നിർത്തിവയ്പിക്കുന്നതിന് തൊഴിലാളികൾക്കും തോട്ടം ഉടമകൾക്കും കർശന നിർദേശം നൽകണമെന്ന് മൂന്നാർ, പീരുമേട്, ഉടുമ്പൻചോല താലൂക്കുകളിലെ പ്ലാന്‍റേഷൻ ഇൻസ്പെക്‌ടർമാർക്കാണ് കളക്‌ടറുടെ കല്ലേപ്പിളർക്കുന്ന ഉത്തരവ്. വനമേഖലയോടു ചേർന്നുള്ള പ്രദേശം എന്ന നിർവചനം വിശാലമാണ്. ചുരുക്കത്തിൽ ജില്ലയിലെ ജനജീവിതം മുഴുവൻ കളക്‌ടർക്കും വന്യമൃഗങ്ങൾക്കും അടിയറവയ്ക്കേണ്ട അവസ്ഥ. അങ്ങനെയാണ് ഇടുക്കി ജില്ലയുടെ ഭൂമിശാസ്ത്രവും വനവിസ്തൃതിയും.
ഉത്തരവ് വനമേഖലയ്ക്കുള്ളിലൂടെയുള്ള സംസ്ഥാന, ദേശീയപാതകൾ വഴി സഞ്ചരിക്കുന്നതും വിലക്കിയേക്കും. അതുമാത്രമല്ല കെടുതി. വൈകുന്നേരം ആറിനും രാവിലെ ആറിനുമിടയിൽ അത്യാവശ്യകാര്യത്തിന് പുറത്തിറങ്ങുന്ന ആരെയെങ്കിലും വന്യമൃഗങ്ങൾ ആക്രമിച്ചാൽ നഷ്‌ടപരിഹാരം കൊടുക്കാതെയിരിക്കാം. സർക്കാരുത്തരവ് ലംഘിച്ച് രാത്രി പുറത്തിറങ്ങി മൂത്രമൊഴിക്കാൻ പാടുണ്ടോ! അതുമല്ല, മനുഷ്യർക്കു തുക കൊടുക്കാതിരിക്കാൻ എന്തുണ്ട് വഴി എന്ന് 24 മണിക്കൂറും ചിന്തിച്ചുകൊണ്ടിരിക്കുന്ന ഇൻഷ്വറൻസുകാർക്ക് ഇതിൽപരം ആനന്ദം വേറെയുണ്ടാകാനുണ്ടോ.
വന്യമൃഗങ്ങളും വന്യഭാവമുള്ള ഉദ്യോഗസ്ഥരും ഒരുപോലെ ആക്രമിക്കുമ്പോൾ ഏതു മനുഷ്യത്താരയിലേക്കാണ് മലയോരത്തെ അധ്വാനിക്കുന്ന കർഷകരും തൊഴിലാളികളും പാവപ്പെട്ടവരും ഓടിക്കയറേണ്ടത്? പഠിച്ചതേ പാടൂ എന്നു ശഠിക്കുന്ന ഉദ്യോഗസ്ഥരുടെ വാറോലകൾക്കു മുന്നിൽ തലയാട്ടി നിൽക്കുകയല്ല രാഷ്‌ട്രീയ നേതൃത്വത്തിന്‍റെ ചുമതല എന്നറിയാത്തവരല്ല റവന്യുമന്ത്രിയും വനംമന്ത്രിയും.
ഉദ്യോഗസ്ഥ ഭരണം മാത്രമേ നടക്കൂ എന്നുവന്നാൽപിന്നെ ഇവിടെ തെരഞ്ഞെടുപ്പു മാമാങ്കങ്ങളും ഭരണമാറ്റവും എന്തിനാണ്? ഭരണത്തലപ്പത്തുള്ളവരും ഉദ്യോഗസ്ഥപ്രമുഖരുമൊക്കെ കൂട്ടത്തോടെ വിദേശത്തുപോയി പലതും പഠിച്ചുവരുന്നുണ്ട്. എന്നാൽ, വേണ്ടതൊന്നും പഠിക്കുന്നില്ലേ എന്നതാണ് സംശയം. വികസിത രാജ്യങ്ങളിലൊക്കെ വന്യജീവി ആക്രമണം കുറയ്ക്കുന്നതിനായി പ്രകൃതിക്കും മൃഗങ്ങൾക്കും മനുഷ്യർക്കും ഹാനികരമാകാത്ത രീതിയിൽ അത്യാധുനിക സാങ്കേതികവിദ്യയും ശാസ്ത്രീയ പ്രതിരോധ സംവിധാനങ്ങളുമാണ് ഉപയോഗിക്കുന്നത്. അല്ലാതെ തിരുമണ്ടൻ ഉത്തരവുകളിറക്കിയല്ല പ്രതിരോധം.
റോഡുകളും ജനവാസമേഖലകളും കാടിനെ വിഭജിക്കുമ്പോൾ മൃഗങ്ങൾക്ക് സുരക്ഷിതമായി സഞ്ചരിക്കാൻ കാനഡ, അമേരിക്ക, ജർമനി, നെതർലൻഡ്സ് തുടങ്ങിയ രാജ്യങ്ങൾ എക്കോ ബ്രിഡ്ജുകൾ, ഓവർപാസ്, അണ്ടർപാസ് എന്നിവ നിർമിക്കുന്നു. കാടിന്‍റെ സ്വാഭാവിക അന്തരീക്ഷം നിലനിർത്തിക്കൊണ്ട് മൃഗങ്ങൾക്ക് സഞ്ചരിക്കാം. ജനവാസ മേഖലകളിലേക്കോ റോഡുകളിലേക്കോ മൃഗങ്ങൾ ഇറങ്ങുന്നത് ഇത് 80 ശതമാനം വരെ കുറയ്ക്കുന്നു എന്നാണ് അവിടത്തെ അനുഭവം.
കാടിന്‍റെ അതിർത്തികളിൽ താപനിലയും മൃഗങ്ങളുടെ ശബ്ദവും തിരിച്ചറിയുന്ന എഐ ക്യാമറകൾ ഉപയോഗിക്കുന്നു. മൃഗങ്ങൾ അതിർത്തി കടക്കുമ്പോൾതന്നെ പ്രദേശവാസികൾക്കും ഫോറസ്റ്റ് റേഞ്ചർമാർക്കും എസ്എംഎസ് വഴിയോ ആപ്പ് വഴിയോ ഓട്ടോമാറ്റിക് മുന്നറിയിപ്പ് ലഭിക്കും. ജിപിഎസ്-സാറ്റലൈറ്റ് ട്രാക്കിംഗ്, ബയോ ഫെൻസിംഗ്, വിദേശസസ്യങ്ങളെ നീക്കംചെയ്ത് കാടിന്‍റെ സ്വാഭാവികത പുനഃസ്ഥാപിക്കൽ, കാടിനുള്ളിൽ സോളാർ പമ്പുകൾ ഉപയോഗിച്ച് കൃത്രിമ കുളങ്ങളും ജലാശയങ്ങളും സജ്ജീകരിച്ച് വേനൽകാലത്തും കുടിവെള്ളം ഉറപ്പാക്കൽ എന്നിങ്ങനെ എത്രയോ മാർഗങ്ങൾ അതതിടത്തെ സാഹചര്യങ്ങളുപയോഗിച്ച് ചെയ്യാനാകും.
വന്യജീവി സംരക്ഷണത്തിന് ആദ്യം നിയമങ്ങളുണ്ടാക്കിയ പല രാജ്യങ്ങളും അതു പരിഷ്കരിക്കുകയും കള്ളിംഗ് ഉൾപ്പടെയുള്ള മാർഗങ്ങളിലൂടെ വന്യജീവികളുടെ എണ്ണം നിയന്ത്രിക്കുകയും ചെയ്യുന്നു.ഈ വിഷയത്തിൽ അവഗാഹമുണ്ടെന്നു പറയുന്ന ജില്ലാ കളക്‌ടർക്ക് ഇതൊന്നും അറിയാത്തതല്ല. പക്ഷേ, മരണമെന്ന അനിവാര്യത ഒഴിവാക്കാൻ ഇനിയാരും ജനിക്കാൻ പാടില്ല എന്ന് ഉത്തരവിടുന്നതാണല്ലോ എളുപ്പം! ഇത്രയും എഴുതുന്നതിനിടയിൽ പതിവില്ലാതെ നിരവധി ആശ്ചര്യചിഹ്നങ്ങൾ ഉപയോഗിക്കേണ്ടിവന്നു. ഈ ആശ്ചര്യചിഹ്നങ്ങൾ ഇടുക്കി ജില്ലയിലെ ‘ഇര’കൾ രോഷചിഹ്നങ്ങളായാണ് വായിച്ചെടുക്കുക എന്ന് ആരും മറക്കരുത്.
ജില്ലയിൽ എന്താണ് നടക്കുന്നതെന്ന് മന്ത്രിമാർ അറിയണം. പ്രതികരിക്കണം. അവർക്കതിനായില്ലെങ്കിൽ മുഖ്യമന്ത്രി ഇടപെടണം. ജനങ്ങൾക്കു വേണ്ടതു നീതിയും, ഒപ്പം ജീവനും സ്വത്തിനും സംരക്ഷണവുമാണ്, അല്ലാതെ തുഗ്ളക് കളക്‌ടർമാരെയല്ല.
30-09-2026
ലോകാരോഗ്യസംഘടനയും യൂണിസെഫും ചേർന്നു പുറത്തിറക്കിയ, ജോയിന്‍റ് മോണിറ്ററി പ്രോഗ്രാം (ജെഎംപി) റിപ്പോർട്ടിന്‍റെ മുൻപേജുകളിൽ ഇന്ത്യയിൽനിന്നുള്ള പ്രസാദാത്മകമായ ചില ചിത്രങ്ങളുണ്ട്. ഗുജറാത്തിലെ രാജ്കോട്ട് ജില്ലയിലെ ഖിജിദിയ പ്രൈമറി സ്കൂൾ വിദ്യാർഥിനി ശരിയായ വ്യക്തിശുചിത്വത്തിന്‍റെ മാതൃക മറ്റ് വിദ്യാർഥികൾക്ക് സോദാഹരണം വിവരിക്കുന്നതാണ് ചിത്രത്തിലുള്ളത്. ഈ മാസം 22നാണ് ‘സ്കൂളുകളിലെ കുടിവെള്ളം, ശുചിത്വം, വ്യക്തിശുചിത്വം എന്നിവയിലെ പുരോഗതി-2015-2025’ എന്ന റിപ്പോർട്ട് പുറത്തുവിട്ടത്.
എന്നാൽ, ചിത്രങ്ങളിലെ തെളിച്ചം റിപ്പോർട്ടിനകത്തേക്കു കടക്കുമ്പോൾ കാണാനില്ല. ശതമാനക്കണക്കുകളിലൂടെ പുരോഗതിയുടെ ചിത്രം വരച്ചിടാൻ പരമാവധി ശ്രമിക്കുന്നുണ്ടെങ്കിലും വസ്തുതകളുടെ യാഥാർഥ്യം ഞെട്ടിക്കുന്നതാണ്. സ്കൂളുകളിൽ ശുചിമുറി സൗകര്യങ്ങളില്ലാത്ത കുട്ടികളുടെ അഞ്ചിലൊന്ന് ഇന്ത്യയിലാണ്. ലോകത്തിലെ ഏറ്റവും ഉയർന്ന നിരക്കാണിത്. 2025ലെ കണക്കനുസരിച്ച് ഇന്ത്യയിൽ 1.2 കോടി കുട്ടികൾ ഇപ്പോഴും സ്കൂളുകളിൽ യാതൊരുവിധ കുടിവെള്ള സൗകര്യവുമില്ലാത്ത സാഹചര്യത്തിലാണ് പഠിക്കുന്നത്.
2025ൽ ലോകത്ത് സ്കൂളുകളിൽ ശുചിമുറി സൗകര്യമില്ലാത്ത ആകെ കുട്ടികളുടെ പകുതിയിലധികവും കേന്ദ്രീകരിച്ചിരിക്കുന്ന പ്രധാന രാജ്യങ്ങളിലൊന്ന് ഇന്ത്യയാണ്. ഇന്ത്യയിൽ അഞ്ചു കോടി കുട്ടികൾക്ക് സ്കൂളുകളിൽ യാതൊരുവിധ ശുചിമുറി സൗകര്യവുമില്ല. ഈ വിവരവും ഇതേ റിപ്പോർട്ടിൽതന്നെയാണുള്ളത്. ഇന്ത്യയിൽനിന്നുള്ള സമീപകാല ദേശീയ വിവരങ്ങൾ ലഭ്യമല്ലെന്ന കുറ്റസമ്മതംകൂടി വായിക്കുമ്പോൾ കാര്യങ്ങളുടെ അവസ്ഥ ഏതാണ്ട് പിടികിട്ടും. ഇന്ത്യയിലെ സ്കൂളുകളിലെ ശുചിത്വസേവനങ്ങളുടെ കണക്കുകൾ 2024 വരെയുള്ളതു മാത്രമേ ജെഎംപി തയാറാക്കിയിട്ടുള്ളൂ.
ഇരുപത്തൊന്നാം നൂറ്റാണ്ടിലെ സാങ്കേതിക, സാമ്പത്തിക വളർച്ചയിൽ ഇന്ത്യ മുന്നേറുന്നുണ്ടെങ്കിലും അടിസ്ഥാന ജനക്ഷേമ സേവനങ്ങളിൽ വലിയൊരു ശതമാനം ജനങ്ങൾ ഇന്നും പുറത്താണെന്ന് ഈ റിപ്പോർട്ടിൽനിന്ന് വായിച്ചെടുക്കാം. ആനുകൂല്യങ്ങൾ പൂർണമായും താഴെത്തട്ടിൽ എത്തുന്നില്ല. അതിനാൽ വലിയൊരു വിഭാഗം കുട്ടികൾ സ്കൂളുകളിൽ ദുരിതമയമായ സാഹചര്യങ്ങളിലൂടെ കടന്നുപോകുന്നു.
ഇനി രാജ്യത്തെ സ്കൂളുകളിലെ ശുചിത്വസൗകര്യങ്ങളെക്കുറിച്ച് പ്രതിപാദിക്കുന്ന നമ്മുടെതന്നെ ചില റിപ്പോർട്ടുകൾ കാണാം. കേന്ദ്ര പൊതുമേഖലാ സ്ഥാപനങ്ങൾ വഴി നിർമിച്ച സ്കൂൾ ശുചിമുറികളുടെ അവസ്ഥ പരിശോധിച്ചുള്ള സിഎജി (കംപ്ട്രോളർ ആൻഡ് ഓഡിറ്റർ ജനറൽ) ഓഡിറ്റ് റിപ്പോർട്ടിൽ പറയുന്നത് പരിശോധിച്ച സ്കൂളുകളിലെ 72 ശതമാനം ശുചിമുറികളിലും പൈപ്പ് വെള്ള സൗകര്യം ഉണ്ടായിരുന്നില്ല എന്നാണ്. 30 ശതമാനം ശുചിമുറികളും ഉപയോഗശൂന്യമായ നിലയിലായിരുന്നു.
55 ശതമാനം നിർമിതികളിലും കൈകഴുകാനുള്ള സൗകര്യങ്ങളോ സോപ്പോ ലഭ്യമായിരുന്നില്ല. പദ്ധതികളിൽ രേഖപ്പെടുത്തിയ പല ശുചിമുറികളും (11 ശതമാനത്തോളം) ഭാഗികമായി മാത്രം നിർമിക്കപ്പെട്ടതോ നിലവിലില്ലാത്തതോ ആയിരുന്നു എന്നതാണ് ഇന്ത്യൻ അവസ്ഥയുടെ ഏറ്റവും ദയനീയ ചിത്രം.കാൽ ഭാഗത്തോളം ഗ്രാമീണ സ്കൂളുകളിലും പെൺകുട്ടികൾക്ക് ഉപയോഗപ്രദമായ ശുചിമുറികളില്ലെന്ന് ‘പ്രഥം’ എന്ന സന്നദ്ധ സംഘടന നടത്തിയ സർവേയിൽ പറയുന്നു.
‘ലഭ്യമാണ്’എന്ന് രേഖകളിൽ കാണുന്ന പല ശുചിമുറികളും പൂട്ടിയിട്ടിരിക്കുന്നതായാണു കണ്ടത്. ഇതെല്ലാം വ്യക്തമാക്കുന്നത്, നമ്മുടെ ഭാവി തലമുറ വളരുന്ന സ്കൂളുകളിലെ പ്രാഥമിക സൗകര്യങ്ങൾ ഇപ്പോഴും നിരാശാജനകമാണ് എന്നാണ്. ലോകത്തിലെ മൂന്നാമത്തെ വലിയ സാമ്പത്തികശക്തിയാകുമെന്ന് ഊറ്റം കൊള്ളുമ്പോഴും ഏറ്റവും അടിസ്ഥാനപരമായ കാര്യങ്ങളിൽ ഇതാണ് അവസ്ഥ. ബഹിരാകാശ ശക്തിയായും യുദ്ധസാമഗ്രികളുടെ നിർമാണത്തിലെ കേമൻമാരായും മേനി നടിക്കുന്നതിനിടയിൽ നമ്മുടെ കുഞ്ഞുങ്ങൾ വൃത്തിഹീനമായ സാഹചര്യങ്ങളിലും ശുദ്ധമായ കുടിവെള്ളമില്ലാതെയുമൊക്കെയാണ് പഠിക്കുന്നത് എന്ന കാര്യം ആർക്കും നാണക്കേടായി അനുഭവപ്പെടുന്നില്ല.
ഏറ്റവും പ്രധാനം, സുതാര്യവും കൃത്യവുമായ ദേശീയ ഡാറ്റകൾ ശേഖരിക്കുകയാണ്. കാര്യങ്ങളുടെ നിജസ്ഥിതി അറിയാതെ എങ്ങനെയാണ് പുരോഗതിയുണ്ടാക്കുക? ഇരുപത്തൊന്നാം നൂറ്റാണ്ടിലെ ഡിജിറ്റൽ ഇന്ത്യയെക്കുറിച്ച് വാതോരാതെ പറയുന്നവർ മുൻഗണനാക്രമത്തിൽ ഇക്കാര്യം കൂടി അടിയന്തരമായി ഉൾപ്പെടുത്തണം.
29-09-2026
അങ്ങേയറ്റത്തെ ലാഭക്കൊതി മാത്രമുള്ള മരുന്നുകമ്പനികളുടെ ക്രൂരതയ്ക്കു കടിഞ്ഞാണിടാൻ കോടതികൾതന്നെ വേണ്ടിവരുന്നു എന്നത് ജനാധിപത്യത്തിന്‍റെ ദയനീയമുഖമാണു വെളിപ്പെടുത്തുന്നത്. സാധാരണക്കാരന് താങ്ങാനാകാത്തവിധം രാജ്യത്ത് അവശ്യമരുന്നുകളുടെ വില വർധിക്കുന്നതിൽ കഴിഞ്ഞദിവസം സുപ്രീംകോടതിയും ഇന്നലെ കേരള ഹൈക്കോടതിയും നടത്തിയ ഇടപെടലുകൾ ആശ്വാസമായി. എങ്കിലും, രാജ്യത്തെ ആരോഗ്യമേഖലയുടെ വലിയ പ്രതിസന്ധിയിലേക്കാണ് ഇതു വിരൽചൂണ്ടുന്നത്.
ലാഭം മാത്രം ലക്ഷ്യമിട്ടു മരുന്നുകമ്പനികൾ വരുത്തുന്ന നിരക്കുവർധന സാർവത്രിക ആരോഗ്യപരിരക്ഷ എന്ന സങ്കൽപത്തെത്തന്നെ തകിടംമറിക്കുന്നുവെന്നാണ് സുപ്രീംകോടതി നിരീക്ഷിച്ചത്. വിപണിയിലുള്ള ഏകദേശം 82 ശതമാനം മരുന്നുകൾക്കും നിലവിൽ സർക്കാർ തലത്തിൽ വിലനിയന്ത്രണമില്ലെന്നു ചൂണ്ടിക്കാട്ടിയതും സുപ്രീംകോടതി തന്നെ. ഇതിനു പിന്നാലെ, വിലനിയന്ത്രണ പട്ടികയിൽ ഉൾപ്പെടാത്ത മരുന്നുകളുടെ അനിയന്ത്രിതമായ വിലവർധനയിൽ കേന്ദ്രസർക്കാർ അടിയന്തരമായി ഇടപെടണമെന്ന് കേരള ഹൈക്കോടതി ഇന്നലെ ഉത്തരവിട്ടു.
ജനങ്ങളുടെ ജീവിക്കാനുള്ള അവകാശത്തെ സംരക്ഷിക്കാൻ ജുഡീഷ്യറിക്ക് ശക്തമായി നിരന്തരം ഇടപെടേണ്ടിവരുന്നു എന്നത് ഭരണകൂടങ്ങളുടെ നിഷ്ക്രിയത്വത്തെയാണു കാണിക്കുന്നത്. ഒപ്പം, വൻകിട മരുന്നുകമ്പനികളുടെയും സർക്കാരിന്‍റെയും അവിശുദ്ധ കൂട്ടുകെട്ടും മറനീക്കുന്നു. പേറ്റന്‍റുള്ള ജീവൻരക്ഷാ മരുന്നുകൾക്ക് കമ്പനികൾ അമിതവില ഈടാക്കുകയാണെങ്കിൽ കേന്ദ്രസർക്കാരിന് അതിൽ ഇടപെടാമെന്നും, പേറ്റന്‍റ് നിയമത്തിലെ 100-ാം വകുപ്പ് ഉപയോഗിച്ച് ഈ മരുന്നുകൾ ഉത്പാദിപ്പിച്ച് കുറഞ്ഞവിലയ്ക്ക് സാധാരണക്കാർക്ക് ലഭ്യമാക്കാമെന്നുമാണ് കേരള ഹൈക്കോടതിയുടെ ചരിത്രവിധി. ജസ്റ്റീസ് ഹരിശങ്കർ വി. മേനോനാണ് വിധി പ്രസ്താവിച്ചത്.
അമിതവിലയുള്ള പേറ്റന്‍റ് മരുന്നുകൾ വാണിജ്യപരമായല്ലാതെ കേന്ദ്രസർക്കാരിന് നേരിട്ടു നിർമിച്ച് പാവപ്പെട്ട രോഗികൾക്ക് വിതരണം ചെയ്യാം. നിലവിൽ വിപണിയിലുള്ള മരുന്നുകൾ സാധാരണക്കാർക്ക് താങ്ങാൻ കഴിയുന്നതാണോ എന്നു പരിശോധിക്കാനും കേന്ദ്രസർക്കാരിനോട് കോടതി ആവശ്യപ്പെട്ടു. ഇതിനായി രോഗബാധിതരുടെ എണ്ണം, മരുന്ന് ഉപയോഗിക്കുന്നവർ, വിലക്കൂടുതൽ മൂലം മരുന്നു വാങ്ങാൻ കഴിയാത്തവർ തുടങ്ങിയ കൃത്യമായ വിവരങ്ങൾ ശേഖരിച്ചു വേണം തീരുമാനമെടുക്കാൻ.
ഭരണഘടന ഉറപ്പുനൽകുന്ന ജീവിക്കാനുള്ള അവകാശത്തിന്‍റെ ഭാഗമാണ് ആരോഗ്യസംരക്ഷണമെന്നും, ജീവൻരക്ഷാ മരുന്നുകൾ രോഗികൾക്ക് ലഭ്യമാക്കാൻ സർക്കാർ ബാധ്യസ്ഥരാണെന്നും കോടതി ഓർമിപ്പിച്ചു.സ്തനാർബുദത്തിനുള്ള ‘റിബോസിക്ലിബ്’’(Ribociclib) എന്ന മരുന്നിന് പ്രതിമാസം 75,000 രൂപയോളം ചെലവു വരുന്നതു ചൂണ്ടിക്കാട്ടി ഒരു അർബുദരോഗി നൽകിയ ഹർജിയാണ് കോടതി പരിഗണിച്ചത്. ഹർജിക്കാരി പിന്നീട് മരിച്ചെങ്കിലും, പൊതുതാത്പര്യം മുൻനിർത്തി അമിക്കസ്‌ക്യൂറിയെ ചുമതലപ്പെടുത്തി ഹൈക്കോടതി ഈ കേസ് സ്വമേധയാ തുടർന്നുകൊണ്ടു പോകുകയായിരുന്നു.
കേരള ഹൈക്കോടതിയിൽ ഈ ഹർജി 57 തവണ ലിസ്റ്റ് ചെയ്യപ്പെട്ടിട്ടും അന്തിമതീരുമാനത്തിൽ എത്താൻ സാധിക്കാത്തതിനെ സുപ്രീംകോടതി കടുത്ത ഭാഷയിലാണ് വിമർശിച്ചത്. ഈ ഹർജിയിൽ എത്രയും വേഗം വാദം പൂർത്തിയാക്കി അന്തിമവിധി പ്രസ്താവിക്കാൻ കേരള ഹൈക്കോടതിക്ക് കർശന നിർദേശവും നൽകി. ഇതിന്‍റെ തുടർച്ചയായിട്ടാണ് കേരള ഹൈക്കോടതി വിശദമായ വാദം കേട്ട് ഇന്നലെ വിധിപറഞ്ഞത്.
മറ്റൊരു കേസ് പരിഗണിക്കവെ, 2700 രൂപ വിലയുള്ള കാൻസർ മരുന്ന് 27,000 രൂപയ്ക്ക് വിൽക്കുന്നതു കണ്ട് കോടതി അമ്പരന്നു. ഇതെന്തൊരു പകൽക്കൊള്ളയെന്ന് കോടതിക്കു ചോദിക്കേണ്ടി വന്നു. ഇതെല്ലാം ചൂണ്ടിക്കാട്ടുന്നത് സർക്കാരുകളുടെ മാപ്പില്ലാത്ത അലംഭാവമാണ്. ജീവൻരക്ഷാ മരുന്നുകളുടെ ഉത്പാദനച്ചെലവും വിപണിവിലയും തമ്മിലുള്ള ഭീമമായ അന്തരം, അസംസ്കൃത വസ്തുക്കളുടെ ഇറക്കുമതിച്ചെലവിലെ വർധന, പാരന്‍റ് കമ്പനികളുടെ പേറ്റന്‍റ് കുത്തക, നാഷണൽ ഫാർമസ്യൂട്ടിക്കൽ പ്രൈസിംഗ് അഥോറിറ്റിയുടെ (എൻപിപിഎ) അനാസ്ഥ എന്നിവയാണ് മരുന്നുകളുടെ വിലക്കയറ്റത്തിന് പ്രധാന കാരണം.
കൃത്യമായ വിലനിയന്ത്രണ പരിധിയിൽ വരാത്ത അനുബന്ധ മരുന്നുകൾക്ക് കമ്പനികൾ തോന്നുംപടി വില ഈടാക്കുകയാണ്. മരുന്നുനിർമാണത്തിന് ആവശ്യമായ പ്ലാറ്റിനം അസംസ്കൃത വസ്തുക്കളുടെ ഇറക്കുമതിച്ചെലവിലും ആഗോളവിപണിയിലെ ഉത്പാദനച്ചെലവിലും വൻ വർധനയുണ്ടായെന്ന കാരണം പറഞ്ഞാണ് അത്യാവശ്യ അർബുദ ചികിത്സയ്ക്ക് ഉപയോഗിക്കുന്ന പ്രധാന മരുന്നുകളുടെ പരമാവധി വിൽപ്പനവിലയിൽ 50 ശതമാനംവരെ വർധന വരുത്താൻ കേന്ദ്രസർക്കാർ ജൂണിൽ അനുമതി നൽകിയത്.
മരുന്നുകമ്പനികളുടെ കാര്യം വരുമ്പോൾ കാണിക്കുന്ന ശുഷ്കാന്തി സാധാരണ ജനങ്ങളുടെ കാര്യത്തിൽ കാണാനില്ല. മരുന്നുകൾ വിലക്കുറവിൽ ലഭിക്കാൻ കാരുണ്യ, ജൻ ഔഷധി കേന്ദ്രങ്ങളെ ആശ്രയിക്കുന്നവരാണ് വലിയൊരു വിഭാഗം ജനങ്ങൾ. ഇവിടെ ഗുണമേന്മയുള്ള, അവശ്യമരുന്നുകളുടെ ലഭ്യത ഉറപ്പുവരുത്തേണ്ട സർക്കാർ ഉറങ്ങുകയാണ്.
കൂടുതൽ മരുന്നുകളെ അവശ്യമരുന്നുകളുടെ പട്ടികയിൽ ഉൾപ്പെടുത്തുകയും, ന്യായവില ഉറപ്പാക്കാൻ കേന്ദ്ര-സംസ്ഥാന സർക്കാരുകൾ ഉടനടി നിയമനിർമാണം നടത്തുകയും വേണം. മരുന്നുകമ്പനികളുടെ അമിതലാഭത്തേക്കാൾ പ്രധാനം ജനങ്ങളുടെ ജീവനാണെന്നു തിരിച്ചറിഞ്ഞ് ഭരണകൂടങ്ങൾ അടിയന്തര നടപടികൾ സ്വീകരിക്കേണ്ട സമയം അതിക്രമിച്ചിരിക്കുന്നു.
28-09-2026
വിവാദങ്ങളിൽനിന്ന് വിവാദങ്ങളിലേക്കാണ് തെരഞ്ഞെടുപ്പു കമ്മിഷന്‍റെയും മുഖ്യ കമ്മിഷണറുടെയും പോക്ക്. വോട്ടർപട്ടികയിലെ പ്രത്യേക തീവ്ര പരിഷ്കരണവും (എസ്ഐആർ) മുഖ്യ തെരഞ്ഞെടുപ്പു കമ്മിഷണർ ഗ്യാനേഷ് കുമാറും സഹ കമ്മിഷണർമാരും തമ്മിലുള്ള അഭിപ്രായവ്യത്യാസം സൃഷ്‌ടിച്ച ജനാധിപത്യ പ്രതിസന്ധികളും രാജ്യത്തെ പിടിച്ചുലയ്ക്കുന്നതിനിടയിലാണ് വിഐപി വോട്ടർമാർ എന്ന പുതിയ വരേണ്യ വിഭാഗത്തിനുവേണ്ടി കമ്മിഷൻ അതിന്‍റെ സംവിധാനങ്ങളിൽ മാറ്റം വരുത്തുന്നത്. ഭരണഘടനയനുസരിച്ച് അവകാശങ്ങൾ എല്ലാ പൗരർക്കും തുല്യമാണെന്നിരിക്കെ വിഐപി പരിഗണന ഭരണഘടനയെ നിന്ദിക്കുന്നതല്ലേ എന്ന ചോദ്യത്തിന് ഏറെ പ്രസക്തിയുണ്ട്.
ബിൽഒ (ബൂത്ത് ലെവൽ ഓഫിസർ) ആപ്പിലാണ് പുതിയ ഫീച്ചർ ചേർത്തിരിക്കുന്നത്. പ്രമുഖ വോട്ടർമാരെ എളുപ്പത്തിൽ തിരിച്ചറിയാനും രേഖപ്പെടുത്താനുംവേണ്ടി ‘മാർക്ക് വിഐപി’ എന്ന അപ്ഡേറ്റ് ആപ്പിൽ ഉൾപ്പെടുത്തുകയായിരുന്നു. എസ്ഐആർ നടപടികൾക്കിടെ ഡൽഹിയിലെ പല പ്രമുഖർക്കും നോട്ടീസ് ലഭിച്ചതിനു പിന്നാലെയാണ് പുതിയ നീക്കം. കേന്ദ്ര-സംസ്ഥാന മന്ത്രിമാർ, അവരുടെ കുടുംബാംഗങ്ങൾ, രാഷ്‌ട്രീയ നേതാക്കൾ, ജഡ്ജിമാർ, അഭിഭാഷകർ, ഐഎഎസ്-ഐപിഎസ് ഉദ്യോഗസ്ഥർ, മാധ്യമപ്രവർത്തകർ, സാമൂഹിക പ്രവർത്തകർ, കലാകാരന്മാർ എന്നിവരാണ് കമ്മിഷന്‍റെ കണക്കിൽ വിഐപികൾ. ഇത്തരക്കാരുടെ പേരുകൾ വെട്ടിമാറ്റുന്നത് കമ്മിഷന് നാണക്കേടുണ്ടാക്കും എന്നതാണത്രെ കമ്മിഷന്‍റെ വിശദീകരണം!
1950ലെ ജനപ്രാതിനിധ്യ നിയമപ്രകാരം ഒരു പൗരനും വോട്ടർപട്ടികയിൽ പ്രത്യേക പദവി നൽകാൻ വ്യവസ്ഥയില്ല എന്നതാണ് വസ്തുത. വിഐപി എന്നൊരു വിഭാഗത്തിന് സാധാരണ പൗരൻ കടന്നുപോകേണ്ട പരിശോധനകളിൽനിന്ന് പൂർണമായ ഇളവ് നൽകാനൊന്നും ചട്ടങ്ങളില്ല. സാധാരണക്കാർ ജോലിയും മറ്റ് അത്യാവശ്യ കാര്യങ്ങളും ഉപേക്ഷിച്ച് മണിക്കൂറുകൾ വരിനിന്ന് കഷ്‌ടപ്പെടുമ്പോൾ വിഐപികൾ എന്ന പേരിൽ ചിലർ എളുപ്പത്തിൽ പട്ടികയിൽ ഇടംപിടിക്കുന്നത് ജനാധിപത്യത്തിലെ തുല്യപരിഗണനയ്ക്കു നേരേ കൊഞ്ഞനം കുത്തുന്നതിനു തുല്യമാണ്. ഡൽഹി മുഖ്യമന്ത്രി രേഖാ ഗുപ്തയുടെ കാര്യം ഉദാഹരണമാണ്. ഇവരുടെ പേര് 2002ലെ വോട്ടർപട്ടികയുമായി പൊരുത്തപ്പെടുന്നില്ലെന്നു കണ്ട് നോട്ടീസയയ്ക്കാൻ ആദ്യം തീരുമാനിച്ചിരുന്നു. എന്നാൽ, പിന്നീട് ഹിയറിംഗ് പോലുമില്ലാതെ മണിക്കൂറുകൾക്കകം പ്രശ്നം പരിഹരിച്ച് പട്ടികയിൽ ഇടംനൽകി.
ദക്ഷിണ-മധ്യ ഡൽഹിയിൽ വിഐപികൾ കൂടുതലുള്ള മേഖലകളിൽ ഹിയറിംഗിനു വിളിക്കാൻ തയാറാകുന്നില്ല. പകരം, ബിഎൽഒമാർ വീടുകളിലേക്കു ചെല്ലുകയാണെന്ന് മാധ്യമ കൂട്ടായ്മയായ ‘റിപ്പോർട്ടേഴ്സ് കളക്‌ടീവ്’ നടത്തിയ അന്വേഷണത്തിൽ വ്യക്തമായിട്ടുണ്ട്. പ്രധാന വ്യക്തി വീട്ടിലില്ലെങ്കിൽ സെക്യൂരിറ്റി ജീവനക്കാരിൽനിന്ന് വിവരങ്ങൾ ശേഖരിച്ച് കാര്യങ്ങൾ തീർപ്പാക്കുന്ന രീതിയുമുണ്ടത്രെ! ശരിയായ വിവരമില്ലെങ്കിൽ വ്യാജരേഖകളും വിവരങ്ങളും നിർമിക്കുന്നതായും ആരോപണമുണ്ട്. എസ്ഐആർ വോട്ടർമാരെ പുറത്താക്കാനുള്ള പ്രക്രിയയാണെന്ന ആരോപണത്തിന് തെളിവുകൾ ഓരോന്നായി പുറത്തുവന്നുകൊണ്ടിരിക്കെയാണ് കമ്മിഷൻ വക വിഐപി സംരക്ഷണം. ഇത് രാജ്യത്തെ സാധാരണ പൗരന്മാരോടുള്ള നീതിനിഷേധവും തികഞ്ഞ ഭരണഘടനാ നിന്ദയുമാണ്. ഡൽഹിയിലെ 1.45 കോടി വോട്ടർമാരിൽ പകുതിയിലേറെപ്പേരും ഇപ്പോഴത്തെ പരിഷ്കരണത്തിൽ പുറത്താക്കൽ ഭീഷണിയിലാണെന്നതും ഇതിനോടു ചേർത്തുവായിക്കണം.
തെരഞ്ഞെടുപ്പുകളിൽ പ്രമുഖർക്ക് വോട്ടവകാശം വിനിയോഗിക്കുന്നതിൽ സാങ്കേതിക തടസങ്ങൾ ഉണ്ടാകില്ലെന്ന് ഉറപ്പാക്കുകയാണ് ബിഎൽഒ ആപ്പിലെ പുതിയ ഫീച്ചറിന്‍റെ ലക്ഷ്യമെന്നാണ് കമ്മിഷൻ വിശദീകരിക്കുന്നത്. പക്ഷേ, പൗരന്മാരെ സംബന്ധിച്ച് ‘പ്രമുഖർ’ എവിടെനിന്നു വരുന്നു എന്ന കാതലായ ചോദ്യത്തിന് ഉത്തരമില്ല. ഒരു വോട്ടറെ വിഐപിയെന്ന് തിരിച്ചറിയുന്ന പരമ്പരാഗത രീതിയെക്കുറിച്ച് തെരഞ്ഞെടുപ്പു കമ്മിഷന്‍റെ ഒരു മുൻ ഉദ്യോഗസ്ഥൻ പറയുന്നത് “ജിസ്ക നാം കട്നേ പേ ബദ്നാമി ഹോ” (ഒരാളുടെ പേര് വെട്ടിമാറ്റിയാൽ നമുക്ക് അപമാനം ഉണ്ടാകുമെങ്കിൽ ആ വ്യക്തി) എന്നാണ്. നമുക്ക് എന്നു പറഞ്ഞാൽ കമ്മിഷന് എന്നാണ്. എത്ര ലളിതസുന്ദരമായ നിർവചനം!
നമ്മുടെ ജനാധിപത്യം ഇപ്പോൾ ഇങ്ങനെയൊക്കെയാണ് പ്രവർത്തിക്കുന്നത്. ബംഗാളിൽതന്നെ നോക്കൂ. 2026ലെ നിയമസഭാ തെരഞ്ഞെടുപ്പിനു മുന്നോടിയായി നടന്ന എസ്ഐആർ നടപടികൾ തികച്ചും തെറ്റായിരുന്നുവെന്ന് തെളിഞ്ഞുകഴിഞ്ഞു. ഇക്കാര്യത്തിൽ തെരഞ്ഞെടുപ്പു കമ്മിഷനിലെ ഭിന്നതയും പുറത്തുവന്നു. ആ നിലയ്ക്ക് തെറ്റായ വോട്ടർപട്ടിക പ്രകാരം നടത്തിയ ഇലക്ഷൻ റദ്ദാക്കേണ്ടതല്ലേ? ധാർമികമായും നീതിയുക്തമായും ചിന്തിച്ചാൽ പുതിയ മന്ത്രിസഭയ്ക്ക് നിലനിൽക്കാൻ അർഹതയുണ്ടോ? സുവേന്ദു അധികാരിയുടെ മന്ത്രിസഭയുടെ പ്രവർത്തനരീതികൾ പരിശോധിച്ചാൽ വ്യക്തമായ ഉദ്ദേശ്യത്തോടെ ജനാധിപത്യം അട്ടിമറിക്കാൻ നടത്തിയ ഗൂഢാലോചനയെന്ന ആരോപണത്തിന് കൂടുതൽ മിഴിവ് ലഭിക്കുന്നുണ്ട്.
ജനാധിപത്യത്തിന്‍റെ ഏറ്റവും അടിസ്ഥാനപരമായ തത്വം ‘ഒരു പൗരൻ, ഒരു വോട്ട്, ഒരേ മൂല്യം’ എന്നതാണെന്ന് അറിയാത്തവരല്ല ആരും. എന്നാൽ, നമ്മുടെ രാജ്യത്ത് ഒരു കാര്യത്തിലും അങ്ങനെയല്ല നടക്കുന്നത് എന്നും എല്ലാവർക്കുമറിയാം. നമ്മുടെ പൊതുബോധം അതിനനുസരിച്ച് യാന്ത്രികമായി കണ്ടീഷൻ ചെയ്യപ്പെട്ടിരിക്കുന്നു. വോട്ട് പോലെയുള്ള ഒരു അടിസ്ഥാന ജനാധിപത്യ അവകാശത്തിൽ വിഐപി സംസ്കാരം കൊണ്ടുവരുന്നത് ജനാധിപത്യത്തിന്‍റെ ധാർമികമൂല്യങ്ങളെ തകർക്കുമെന്ന കാര്യത്തിൽ യാതൊരു സംശയവുമില്ല.
26-09-2026
വന്യജീവി ആക്രമണത്തോളംതന്നെ ഭീകരമാണ് ചില ഉദ്യോഗസ്ഥരുടെ തലതിരിഞ്ഞ ഉത്തരവുകളുണ്ടാക്കുന്ന കെടുതികൾ. ഇടുക്കി ജില്ലയിലെ വന്യജീവി ആക്രമണങ്ങൾ, അവയുടെ സഞ്ചാരപാതകൾ കൊട്ടിയടച്ചതുകൊണ്ടാണെന്ന ജില്ലാ കളക്‌ടറുടെ വിചിത്രമായ കണ്ടെത്തലാണ് ഇതിൽ ഏറ്റവും പുതിയത്. ഈ കണ്ടെത്തലിന്‍റെ അടിസ്ഥാനത്തിൽ, വന്യജീവികളുടെ സ്വാഭാവിക സഞ്ചാരത്തിനു തടസമാകുന്ന വേലികളും കെട്ടിടനിർമാണങ്ങളും പൊളിക്കണമെന്നാണ് ഇടുക്കി ജില്ലാ കളക്‌ടർ ഡോ. ദിനേശൻ ചെറുവാട്ട് ഉത്തരവിട്ടത്. ഇതനുസരിച്ചുള്ള നടപടികളും അടിയന്തരപ്രാധാന്യത്തോടെ ആരംഭിച്ചുകഴിഞ്ഞു.
ഇടുക്കി പന്തടിക്കളത്ത് കാട്ടാന ആക്രമണത്തിൽ ആദിവാസി യുവാവ് മരിച്ചതിനു പിന്നാലെയാണ് ഉത്തരവും നടപടികളും. പന്തടിക്കളം ഉന്നതിക്കു സമീപം വൈദ്യുതവേലികൾ മുറിച്ചുനീക്കുകയും ചിന്നക്കനാൽ, ശാന്തൻപാറ മേഖലകളിലായി നിരവധി സോളാർ വേലികൾ നീക്കംചെയ്യുകയും ചെയ്തു. കൈയേറിയ സർക്കാർ ഭൂമിയിലെ അനധികൃത വൈദ്യുതവേലികളും അനധികൃത സോളാർ വേലികളുമാണ് നീക്കംചെയ്തതെന്നാണ് അധികൃതർ പറയുന്നത്. യാതൊരു പഠനത്തിന്‍റെയും സർവേയുടെയും പിൻബലമില്ലാത്ത, ജില്ലാ കളക്‌ടറുടെ അസംബന്ധജടിലമായ കണ്ടെത്തലിനു പിന്നാലെ വന്ന ഉത്തരവിനെതിരേ ഇടുക്കി ജില്ലയിൽ ജനരോഷം ആഞ്ഞടിക്കുകയാണ്.
ദുരന്തനിവാരണ അഥോറിറ്റി അധ്യക്ഷൻ എന്ന നിലയിലാണ് കളക്‌ടറുടെ ഉത്തരവ്. മനുഷ്യരുടെ ദുരന്തമാണോ മൃഗങ്ങളുടെ വിളയാട്ടമാണോ പ്രഥമ പരിഗണനയിലുള്ളത് എന്നതാണ് ചോദ്യം. സംസ്ഥാന ഭരണകൂടം വേലി കെട്ടിയില്ലെങ്കിൽ നാളെ സംസ്ഥാനത്തെവിടേക്കും ഈ ഉദ്യോഗസ്ഥ മുഷ്ക് വ്യാപിച്ചേക്കാം. വന്യജീവികളുടെ സഞ്ചാരപാത നിർണയിക്കുന്നത് വനംവകുപ്പാണെന്നിരിക്കെ എന്തു സംഭവിക്കുമെന്ന് മുൻ അനുഭവങ്ങളിൽനിന്ന് നമുക്കറിയാം. ദന്തഗോപുരവാസികളായ വനംവകുപ്പുദ്യോഗസ്ഥരുടെ ധാർഷ്‌ട്യം നിറഞ്ഞ തുല്യംചാർത്തലുകൾകൊണ്ട് അല്ലെങ്കിൽതന്നെ പൊറുതിമുട്ടിയിരിക്കുകയാണ് മലയോരവാസികൾ.
മനുഷ്യ-വന്യജീവി സംഘർഷം എന്ന ഓമനപ്പേരിട്ട്, മനുഷ്യർ നിരന്തരം വന്യമൃഗങ്ങളെ ആക്രമിക്കുകയാണെന്ന പ്രതീതിയുണ്ടാക്കി വന്യമൃഗ ആക്രമണങ്ങളെ സ്വാഭാവിക ചെറുത്തുനിൽപു മാത്രമാണെന്ന രീതിയിൽ ചിത്രീകരിക്കാനുള്ള കുത്സിതശ്രമമാണ് വനംവകുപ്പിന്‍റെ ഭാഗത്തുനിന്ന് എപ്പോഴും ഉണ്ടാകാറുള്ളത്. കാട്ടിൽ കഴിയേണ്ട വന്യജീവികൾ നാട്ടിലിറങ്ങി മനുഷ്യരെ ആക്രമിക്കുകയാണെന്ന വസ്തുത ബോധപൂർവം തമസ്കരിക്കപ്പെടുന്നു.
വനത്തിനുള്ളിൽ വെള്ളവും ഭക്ഷണവും കിട്ടാതെവരുമ്പോഴാണ് വന്യജീവികൾ നാട്ടിലിറങ്ങുന്നത്. കാട്ടിലെ ആവാസവ്യവസ്ഥയിലുണ്ടായ മാറ്റവും മാംസഭോജികളായ മൃഗങ്ങളെ നാട്ടിലെത്തിക്കുന്നു. ഇതു സംബന്ധിച്ചുണ്ടായിട്ടുള്ള ശാസ്ത്രീയ പഠനങ്ങളൊന്നും പരിഗണിക്കാതെയാണ് വനംവകുപ്പും റവന്യു വകുപ്പും ചേർന്ന് ജനങ്ങളെ കൊലയ്ക്കു കൊടുക്കുന്ന ഏകപക്ഷീയ തീരുമാനങ്ങളെടുക്കുന്നത്. വനം ചീഫ് കൺസർവേറ്ററുടെ നിർദേശമനുസരിച്ചാണ് ഉത്തരവെന്നാണ് പറയുന്നത്. വന്യജീവികളെ വനത്തിനുള്ളിൽ നിർത്തി സംരക്ഷിക്കേണ്ട ഉത്തരവാദിത്വം വനംവകുപ്പിനാണ്. എന്നാൽ, വന്യമൃഗങ്ങൾക്കുവേണ്ടി മനുഷ്യർ തങ്ങളുണ്ടാക്കിയതെല്ലാം ഒഴിഞ്ഞുകൊടുക്കണമെന്ന ക്രൂരമായ സാഹചര്യമാണ് പുതിയ നിർദേശംകൊണ്ടുണ്ടായിരിക്കുന്നത്.
കർഷകർ അവർക്കവകാശപ്പെട്ട ഭൂമിയിലാണ് കെട്ടിടങ്ങളും മതിലുകളുമൊക്കെ നിർമിച്ചിരിക്കുന്നത്. നിയമവിധേയമായ രീതിയിൽ കൃഷി ചെയ്തു ജീവിക്കുന്നവർക്കെതിരേയാണ് ഫലത്തിൽ ഈ ഉത്തരവ്. മൃഗങ്ങളെ തടയാൻ വനാതിർത്തിയിൽ കെട്ടുന്ന വേലികൾപോലും മതിയാകാത്ത സാഹചര്യമാണ് നിലവിലുള്ളത്. ഉള്ള വേലികൾകൂടി പൊളിച്ചുകളഞ്ഞാൽ തങ്ങളുടെ ജീവനും ജീവിതോപാധികൾക്കും എന്തു സുരക്ഷയെന്ന ചോദ്യത്തിനാണ് ഉദ്യോഗസ്ഥരും ഭരണകൂടവും മറുപടി നൽകേണ്ടത്.
ആനത്താരകൾ തടഞ്ഞുള്ള അനധികൃത വൈദ്യുതവേലികളാണ് പൊളിച്ചുമാറ്റുന്നതെന്നും ആശങ്കയ്ക്ക് അടിസ്ഥാനമില്ലെന്നുമാണ് വനം മന്ത്രി ഷിബു ബേബി ജോൺ ഇന്നലെ പറഞ്ഞത്. ആനത്താരയിൽ സ്ഥിതിചെയ്യുന്ന വൻകിട റിസോർട്ടുകളെക്കുറിച്ചും അദ്ദേഹം സൂചിപ്പിച്ചു. ആവശ്യമെങ്കിൽ നീക്കം ചെയ്യേണ്ട ആനകളെ നീക്കംചെയ്യുമെന്നും അദ്ദേഹം പറയുന്നു.
വൈദ്യുതിവേലിയെപ്പോലും വകവയ്ക്കാത്ത വന്യമൃഗങ്ങൾ മന്ത്രി വാക്കുകൾകൊണ്ട് കെട്ടുന്ന വേലിയെ എങ്ങനെ കൈകാര്യം ചെയ്യുമെന്ന് ഊഹിക്കാവുന്നതേയുള്ളൂ. ഇത്തരം വാഗ്ദാനവേലികൾ വർഷങ്ങളായി മന്ത്രിമാരും ഉദ്യോഗസ്ഥരും കെട്ടിപ്പൊക്കുന്നുണ്ട്. കൃത്യമായ ഇടവേളകളിൽ, പാവപ്പെട്ട മനുഷ്യരുടെ ജീവൻ നഷ്‌ടപ്പെടുന്നതിനു മാത്രം ഒരു കുറവുമില്ല. വളരെ ശക്തവും വ്യക്തവുമായ നടപടികൾകൊണ്ടു മാത്രമേ ജനങ്ങളുടെ വിശ്വാസം വീണ്ടെടുക്കാനാകൂ. അതിനുള്ള പ്രായോഗിക നടപടികൾക്കാണ് മന്ത്രി നേതൃത്വം നൽകേണ്ടത്. വനംവകുപ്പുദ്യോഗസ്ഥരുടെ ധാർഷ്‌ട്യത്തെ രാഷ്‌ട്രീയ നേതൃത്വത്തിന് എത്രത്തോളം നിയന്ത്രിക്കാനാകും എന്നതിനെ ആശ്രയിച്ചിരിക്കും നടപടികളുടെ ഫലപ്രാപ്തി.
ഇടുക്കി ജില്ലാ കളക്‌ടറുടെ വിവാദ ഉത്തരവ് എത്രയും പെട്ടെന്നു പിൻവലിക്കുകയും ശാസ്ത്രീയ മാർഗങ്ങളിലൂടെ ശരിയായ കാരണം കണ്ടെത്തി വന്യമൃഗങ്ങൾ നാട്ടിലിറങ്ങുന്നത് തടയുകയുമാണ് അടിയന്തരാവശ്യം. അതിൽ കുറഞ്ഞൊന്നുകൊണ്ടും മലയോരത്തെ അധ്വാനിക്കുന്ന കർഷകർ തൃപ്തിപ്പെടുകയില്ല. കാരണം, അവരെ സംബന്ധിച്ചിടത്തോളം ഇത് മനുഷ്യരും മൃഗങ്ങളുമായുള്ള വെറുമൊരു ടെന്നീസ് മത്സരമല്ല, അവരുടെ ജീവനും ജീവിതവുമാണ്.
25-09-2026
ഗ്യാനേഷ് കുമാർ മുഖ്യ തെരഞ്ഞെടുപ്പ് കമ്മിഷണറായതു മുതൽ, ആർക്കൊക്കെ വോട്ട് ചെയ്യാം, ആർക്കൊക്കെ വോട്ട് ചെയ്യാനാകില്ല എന്ന് സർക്കാരാണ് തീരുമാനിക്കുന്നതെന്ന് കോക്രോച്ച് ജനതാപാർട്ടി സ്ഥാപകൻ അഭിജിത് ദിപ്കെ പറഞ്ഞതിൽ എല്ലാമുണ്ട്. ഇന്ത്യൻ ജനാധിപത്യത്തിന്‍റെ വർത്തമാനവും ഭാവിയുമെല്ലാം. തങ്ങൾക്കനുകൂലമായ വോട്ടർമാരെ തെരഞ്ഞെടുത്ത് ജനാധിപത്യത്തിന്‍റ വ്യാജലേബലിൽ സ്വയം ഭരണത്തിൽ അവരോധിക്കുന്ന ഫാസിസ്റ്റ് തന്ത്രം നമ്മുടെ രാജ്യത്തും പിടിമുറുക്കുന്നുവെന്ന സത്യം പകൽപോലെ വ്യക്തം.
നിക്കരാഗ്വയിൽ ഡാനിയൽ ഒർട്ടേഗ തെരഞ്ഞെടുപ്പ് ശല്യമാണെന്നും പ്രതിപക്ഷം ബാധ്യതയാണെന്നും പ്രഖ്യാപിച്ചപ്പോൾ നമ്മൾ ചിരിച്ചു, അവരെ പുച്ഛിച്ചു. അപ്പോഴും തലയ്ക്കു മുകളിൽ ആടിക്കൊണ്ടിരുന്ന ഡെമോക്ലീസിന്‍റെ വാൾ നമ്മൾ കണ്ടില്ല. ‘കോൺഗ്രസ് മുക്ത് ഭാരതി’ൽനിന്ന് ‘ചുനാവ് മുക്ത ഭാരതി’ലേക്കുള്ള ദൂരം വളരെ കുറഞ്ഞിരിക്കുന്നു. സുകുമാർ സെൻ, ടി.എൻ. ശേഷൻ, എസ്.വൈ. ഖുറേഷി... എന്നിവർക്കൊപ്പം ഗ്യാനേഷ് കുമാർ എന്ന പേരും ചേർത്തുവയ്ക്കേണ്ടിവരുന്നു എന്നതിൽ ഇന്ത്യക്കാരെന്ന നിലയിൽ നമുക്കോരോരുത്തർക്കും ലജ്ജിച്ചു തലതാഴ്ത്താം.
ഒരു ദേശീയ പത്രം പുറത്തുകൊണ്ടുവന്നിരിക്കുന്ന വിവരങ്ങൾ തെരഞ്ഞെടുപ്പ് കമ്മിഷൻ എന്ന ഭരണഘടനാസ്ഥാപനത്തിന്‍റെ അടിത്തറയിളക്കുന്നതാണ്. മുഖ്യ തെരഞ്ഞെടുപ്പ് കമ്മിഷണറും രണ്ട് അംഗങ്ങളും ചേർന്ന കമ്മിഷനിൽ നിയമവ്യവസ്ഥയെ കാറ്റിൽപറത്തുന്ന കാര്യങ്ങൾ നടക്കുന്നുവെന്ന ഞെട്ടിക്കുന്ന വിവരങ്ങളാണ് പുറത്തുവന്നത്. തെരഞ്ഞെടുപ്പ് കമ്മിഷന്‍റേതായി പുറത്തുവന്ന പല തീരുമാനങ്ങളിലും രണ്ടു തെരഞ്ഞടുപ്പ് കമ്മിഷണർമാർ ശക്തമായ വിയോജിപ്പ് രേഖപ്പെടുത്തിയിരുന്നു എന്ന കാര്യമാണ് പത്രം വെളിപ്പെടുത്തിയത്. അതായത് നടപ്പായത് ഗ്യാനേഷ് കുമാറിന്‍റെ സ്വേച്ഛാധിപത്യം. പിറകിൽ കേന്ദ്രം ഭരിക്കുന്ന ബിജെപിയുടെ നിഴലും തെളിഞ്ഞുവരുന്നു.
കമ്മിഷനിൽ വിയോജിപ്പുണ്ടായാൽ ഭൂരിപക്ഷ പ്രകാരം തീരുമാനമെടുക്കണമെന്നാണ് നിയമം. 2025 ഒക്‌ടോബർ മുതൽ 2026 ഓഗസ്റ്റ് വരെയുള്ള കാലത്തുമാത്രം, തങ്ങളുടെ അറിവോ സമ്മതമോ ഇല്ലാതെ എടുത്ത പതിനാല് തീരുമാനങ്ങളിൽ സഹകമ്മിഷണർമാരായ സുഖ്ബിർ സിംഗ് സന്ധുവും വിവേക് ജോഷിയും വിയോജിപ്പ് അറിയിച്ചിട്ടുണ്ട്. വിയോജിപ്പുകൾക്ക് തരിമ്പും വില കൽപിക്കാതെ തീരുമാനമെടുത്തെങ്കിൽ അതിനർഥം തെരഞ്ഞെടുപ്പ് കമ്മിഷൻ വെറും നോക്കുകുത്തിയായി എന്നല്ലാതെ മറ്റെന്താണ്?
പുതിയ വോട്ടർമാർക്കുള്ള ഫോം ആറിൽ മാറ്റം വരുത്താൻ തെരഞ്ഞെടുപ്പ് കമ്മിഷന് അധികാരമില്ലെന്നും അതിന് കേന്ദ്രസർക്കാർ ചട്ടങ്ങളിൽ ഭേദഗതി വരുത്തണമെന്നും വിവേക് ജോഷി ചൂണ്ടിക്കാണിച്ചിരുന്നു. അതുപോലെ, വോട്ടർപട്ടികയുടെ തീവ്ര പരിഷ്കരണത്തിൽ (എസ്ഐആർ) കഴിഞ്ഞ എസ്ഐആറിൽ അപേക്ഷകന്‍റെ മാതാപിതാക്കളുടെയോ അവരുടെ മാതാപിതാക്കളുടെയോ പേരുണ്ടോ എന്ന് ചോദ്യം ഉന്നയിക്കുന്ന രീതിയിൽ മാറ്റങ്ങൾ വരുത്തിയത് ‘അനധികൃതവും നിയമവിരുദ്ധവുമാണ്’ എന്ന് ഇലക്ഷൻ കമ്മിഷണർ സന്ധുവും രേഖപ്പെടുത്തിയിട്ടുണ്ട്.
വോട്ടർപട്ടിക ഡാറ്റാബേസിന്‍റെ കേന്ദ്രീകരണത്തെയും ഫീൽഡ് ഓഫിസർമാർക്ക് ERONet പോർട്ടലിലേക്ക് പൂർണമായ പ്രവേശനം നൽകാത്തതിനെയും രണ്ട് കമ്മിഷണർമാരും എതിർത്തിരുന്നു. വോട്ടർമാരുടെ യോഗ്യത നിശ്ചയിക്കാനുള്ള നിയമപരമായ അധികാരമുള്ള ബൂത്ത് ലെവൽ ഓഫിസർമാരെ മറികടന്ന് കേന്ദ്ര ഡാറ്റാബേസിൽ മാറ്റംവരുത്തി വോട്ടർമാരെ ചേർക്കുകയും ഒഴിവാക്കുകയും ചെയ്തുവെന്നതാണ് ഈ തീരുമാനങ്ങളുടെ ഗുരുതരമായ ഭവിഷ്യത്ത്.
ബംഗാളിൽ 27 ലക്ഷത്തോളം പേരാണ് വോട്ടർപട്ടികയിൽനിന്ന് പുറത്തായത്. എന്നാൽ ട്രൈബ്യൂണലുകളിൽ വന്ന അപ്പീലിൽ ഒഴിവാക്കപ്പെട്ടവരിൽ പത്തിൽ ഒമ്പതു പേരെയും യോഗ്യരാണെന്നു കണ്ടെത്തി തിരിച്ചെടുത്തു. വ്യവസ്ഥാപിത മാർഗങ്ങളിലൂടെ വോട്ടർമാരെ സ്ഥിരീകരിക്കുന്നതിനു മുമ്പുതന്നെ വോട്ടർപട്ടികയിൽനിന്ന് ഒഴിവാക്കുന്നതും വോട്ടവകാശം തെളിയിക്കാനുള്ള ബാധ്യത പൗരന്‍റെ തലയിൽ കെട്ടിവയ്ക്കുന്നതും ഭരണഘടന ഉറപ്പുനൽകുന്ന സാർവത്രിക വോട്ടവകാശത്തിനു ഭീഷണിയാണ്.
സിഇസി സ്ഥാനത്തേക്കുള്ള ഗ്യാനേഷ് കുമാറിന്‍റെ തെരഞ്ഞെടുപ്പുതന്നെ വിവാദത്തോടെയായിരുന്നു. സുപ്രീംകോടതിയുടെ അനൂപ് ബരൺവാൾ കേസിലെ ഭരണഘടനാ ബെഞ്ചിന്‍റെ വിധിയെ മറികടന്ന്, ചീഫ് ജസ്റ്റീസിനെ ഒഴിവാക്കി കേന്ദ്രമന്ത്രിയെ ഉൾപ്പെടുത്തി രൂപീകരിച്ച സമിതിയാണ് തെരഞ്ഞെടുപ്പ് നടത്തിയത്. “സ്വതന്ത്രമായ തെരഞ്ഞെടുപ്പ് നടക്കാൻ തെരഞ്ഞെടുപ്പ് കമ്മിഷൻ സ്വതന്ത്രമാകണം; അത് അങ്ങനെയാണെന്ന് ജനങ്ങൾക്ക് ബോധ്യപ്പെടുകയും വേണം.” കഴിഞ്ഞ ദിവസം ഇതേ വിഷയത്തിൽ ജസ്റ്റീസ് ദിപാങ്കർ ദത്ത നടത്തിയ ഈ നിരീക്ഷണം ജനാധിപത്യം നിലനിൽക്കണമെന്ന് ആഗ്രഹിക്കുന്നവർ ഹൃദയത്തോട് ചേർത്തുപിടിക്കണം.
ഈ സാഹചര്യത്തിൽ ‘വോട്ട് ചോരി’യുടെ മുഖ്യ കാരണക്കാരനായ മുഖ്യ തെരഞ്ഞടുപ്പ് കമ്മിഷണർ രാജിവയ്ക്കണമെന്ന് പ്രതിപക്ഷ കക്ഷികൾ ആവശ്യപ്പെട്ടിട്ടുണ്ട്. ജൻ സി പോരാളികളായ കോക്രോച്ച് ജനതാ പാർട്ടി രാജ്യവ്യാപക പ്രക്ഷോഭത്തിനൊരുങ്ങുകയാണ് . ഒരു ജൻ സി പ്രക്ഷോഭത്തിന്‍റെ ചൂടും ചൂരും അനുഭവിച്ചറിഞ്ഞതാണ് കേന്ദ്രസർക്കാർ. രാജ്യം ഒരിക്കൽകൂടി പാറ്റകൾക്കു നേരേ ഉറ്റുനോക്കുന്ന സാഹചര്യമാണ് ഉരുത്തിരിയുന്നത്.
ജനാധിപത്യത്തോട് തെല്ലെങ്കിലും പ്രതിബദ്ധതയുണ്ടെങ്കിൽ കേന്ദ്രസർക്കാർ രാജ്യമെങ്ങും പടരാനിടയുള്ള പ്രക്ഷോഭം ഒഴിവാക്കാനുള്ള വിവേകം കാണിക്കണം. കമ്മിഷനിലുള്ള ജനവിശ്വാസം വീണ്ടെടുക്കാൻ മുഖ്യ കമ്മിഷണർ രാജിവയ്ക്കണം. കേന്ദ്രസർക്കാരിന്‍റെ കുഴലൂത്തുകാർക്കുള്ളതല്ല മുഖ്യ തെരഞ്ഞെടുപ്പു കമ്മിഷണർ എന്ന സ്ഥാനം. കമ്മിഷനിലെ അഭിപ്രായവ്യത്യാസം ജനാധിപത്യത്തിന്‍റെ തെളിവാണെന്നും മറ്റുമുള്ള പ്രചാരവേലയുമായി ഫാസിസത്തിന്‍റെ ഗെയിംപ്ലാൻ തുടരാനാണ് ബിജെപിയുടെയും കേന്ദ്രസർക്കാരിന്‍റെയും ഭാവമെങ്കിൽ ജന്തർമന്തറിലെ മുൻ അനുഭവം ഒന്നോർക്കുന്നത് നല്ലതാണ്. അധികാരക്കസേരകൾക്കുമേൽ യുവശക്തിയുടെ സുനാമി ആഞ്ഞടിക്കുന്ന കാലം വിദൂരമല്ല.
24-09-2026
ഇഡി കുരുക്കെറിഞ്ഞു, സംസ്ഥാന സർക്കാർ ഒരു മുഴം നീട്ടിയെറിഞ്ഞു. സിഎംആർഎൽ-എക്സാലോജിക് ഇടപാട്, ഹവാല ആരോപണങ്ങളിൽ എൻഫോഴ്സ്മെന്‍റ് ഡയറക്‌ടറേറ്റ് (ഇഡി) നൽകിയ കത്തിനെത്തുടർന്ന് പ്രഖ്യാപിച്ച ക്രൈംബ്രാഞ്ച് അന്വേഷണം അങ്ങനെയൊരു ചിത്രമാണ് വരയ്ക്കുന്നത്. എഫ്ഐആർ രജിസ്റ്റർ ചെയ്ത് കേസെടുക്കണമെന്ന ഇഡി ആവശ്യം അംഗീകരിച്ചതുമില്ല, അന്വേഷണം തള്ളിയതുമില്ല. എല്ലാറ്റിനും ആവശ്യമായ സമയവും സാവകാശവും ലഭിക്കുകയും ചെയ്യും.
മുൻ മുഖ്യമന്ത്രി പിണറായി വിജയൻ, മുൻ മന്ത്രി പി. എ. മുഹമ്മദ് റിയാസ്, ഭാര്യ ടി. വീണ എന്നിവർ ഉൾപ്പെടെയുള്ളവർക്കെതിരേയാണ് സർക്കാർ ക്രൈംബ്രാഞ്ചിന്‍റെ ഉന്നതതല അന്വേഷണം പ്രഖ്യാപിച്ചത്. കരിമണൽ കമ്പനിയിൽനിന്നുള്ള മാസപ്പടിയും ദുബായിലേക്കുള്ള ഹവാല ഇടപാടുമെല്ലാം സമയപരിധിയില്ലാതെ അന്വേഷിക്കും. തെളിവുണ്ടെങ്കിൽ കേസെടുക്കും. അഴിമതിയുണ്ടെന്നു കണ്ടെത്തിയാൽ വിജിലൻസും അന്വേഷിക്കും. ക്രൈംബ്രാഞ്ച് എഡിജിപി എച്ച്. വെങ്കിടേഷിന്‍റെ നേതൃത്വത്തിലുള്ള പ്രത്യേക സംഘത്തിനാണ് അന്വേഷണച്ചുമതല.
ഇഡിയുടെ കത്തിൽ അഴിമതിനിരോധന നിയമം, ബിഎൻഎസ്എസ്, ബിഎൻഎസ് അടക്കം ചുമത്തി കേസെടുക്കാവുന്ന കുറ്റകൃത്യങ്ങളുണ്ടെന്ന നിഗമനമാണ് അഡ്വക്കറ്റ് ജനറൽ സർക്കാരിനു നല്കിയത്. വിജിലൻസിന് വിട്ടാൽ അന്വേഷണം പരിമിതപ്പെടുത്തേണ്ടിവരുമെന്നും എല്ലാം അന്വേഷിക്കണമെന്നും ആഭ്യന്തരമന്ത്രി നിലപാടെടുത്തതോടെയാണ് ക്രൈംബ്രാഞ്ച് അന്വേഷണത്തിന് തീരുമാനമായത്.
മാസപ്പടിയും അഴിമതിയും ഹവാലയുമൊക്കെ ഗൗരവമുള്ള കുറ്റകൃത്യങ്ങളാണ്. അതേക്കുറിച്ചുള്ള അന്വേഷണത്തിൽ വെള്ളം ചേർക്കരുത്. അനാശാസ്യമായ രാഷ്‌ട്രീയ സമവായങ്ങളും തിരശീലയ്ക്കു പിന്നിലെ നാടകങ്ങളും കണ്ട് മടുത്തവരാണ് നമ്മൾ. ക്രൈംബ്രാഞ്ച് ശക്തമായി അന്വേഷിക്കട്ടെ. തെളിവുണ്ടെങ്കിൽ കേസെടുക്കട്ടെ. വിജിലൻസ് അന്വേഷിക്കേണ്ടത് അവരും ഇഡി അന്വേഷിക്കേണ്ടത് അവരും അന്വേഷിക്കട്ടെ. ആർജവമുള്ള, തീർത്തും സുതാര്യമായ അന്വേഷണമാണ് ജനം പ്രതീക്ഷിക്കുന്നത്.
അന്വേഷണത്തിനു കീഴടങ്ങില്ലെന്ന ഉറച്ച നിലപാടിലാണ് സിപിഎം. നിയമപരമായും രാഷ്‌ട്രീയമായും പോരാടുമെന്ന് സംസ്ഥാന സെക്രട്ടറി എം. വി. ഗോവിന്ദൻ തറപ്പിച്ചു പറഞ്ഞിട്ടുണ്ട്. കേന്ദ്രസർക്കാരിന്‍റെ തലപ്പത്തുള്ള ബിജെപിയുടെ അജൻഡയ്ക്ക് യുഡിഎഫ് വഴങ്ങുകയാണെന്ന ആരോപണവുമുണ്ട്. ഇനി മുമ്പു കണ്ടതുപോലെ, പ്രതിഷേധമെന്ന പേരിൽ അന്വേഷണ ഉദ്യോഗസ്ഥരെ തടയുകയും ക്രമസമാധാനത്തകർച്ചയുണ്ടാക്കുകയും ചെയ്യുമോ എന്നേ അറിയാനുള്ളൂ.
എന്തുകൊണ്ട് ഭരണം നഷ്ടപ്പെട്ടു എന്നതിനെക്കുറിച്ച് സിപിഎമ്മിന് വലിയ വേവലാതിയൊന്നും കാണുന്നില്ല. തെരഞ്ഞെടുപ്പിൽ കുറെ സ്വന്തക്കാർ തിരിച്ചുകുത്തി. തോറ്റു. അടുത്ത തെരഞ്ഞെടുപ്പാകുമ്പോൾ അത് തിരിച്ചുപിടിക്കാം എന്ന സിംപിൾ ഫോർമുലയാണ് സൈദ്ധാന്തിക വീരന്മാരുള്ള പാർട്ടിയുടേത്. ഭരണം കിട്ടിയപ്പോഴുണ്ടായ അഹങ്കാരം, അങ്ങേയറ്റത്തെ പരപുച്ഛം, സ്വന്തക്കാരെ പിൻവാതിലിലൂടെ തിരുകിക്കയറ്റൽ, നഗ്നമായ അഴിമതി, ജനാധിപത്യത്തിന്‍റെ തരിമ്പുമില്ലാത്ത സ്വേച്ഛാധിപത്യം തുടങ്ങി അത്രതന്നെ സിംപിളായ കാര്യങ്ങളിൽ തലച്ചോറു പുകയ്ക്കാൻ ആ പാർട്ടിയിലാർക്കും നേരമില്ല. കേസുകളിലുൾപ്പെട്ട നേതാക്കളെയും അവർക്കു കൂട്ടുനിന്ന ഉന്നത ഉദ്യോഗസ്ഥനെയും നാൽപ്പതിലധികം ക്രിമിനൽ കേസുള്ള സഹയാത്രികനെയുമൊക്കെ സൈബറിടത്തിലും പുറത്തും അന്തംവിട്ട് പിന്താങ്ങുന്നതിനപ്പുറം എന്ത് ഹൃദയപക്ഷം?
ഉന്നതതല ക്രൈംബ്രാഞ്ച് അന്വേഷണം സിപിഎമ്മിനെ സംബന്ധിച്ചിടത്തോളം അപ്രതീക്ഷിതമായിരുന്നു. കാര്യങ്ങളൊരു വിജിലൻസ് അന്വേഷണത്തിലൊതുങ്ങുമെന്ന പ്രതീക്ഷയായിരുന്നു അവർക്ക്. കേസ് രജിസ്റ്റർ ചെയ്തില്ല എന്നതു മാത്രമാണൊരാശ്വാസം. എന്നാൽ അന്വേഷണം തുടങ്ങിയാൽ പുറത്തുവരുന്ന വിവരങ്ങളെ പ്രതിരോധിക്കുകയെന്ന ഭാരം പാർട്ടി ഏറ്റെടുക്കേണ്ടിവരും. രാഷ്‌ട്രീയ എതിരാളികളുടെ വ്യാഖ്യാനങ്ങൾക്ക് മറുഭാഷ്യം ചമയ്ക്കേണ്ടിയും വരും. മൊത്തത്തിൽ രാഷ്‌ട്രീയരംഗം കലുഷിതമാകുമെന്ന് ചുരുക്കം.
മുമ്പ് വി. എസ്. അച്യുതാനന്ദനെതിരേ കേസും കൂട്ടവും അന്വേഷണവുമുണ്ടായപ്പോൾ നിഷ്പക്ഷതയുടെ മുഖംമൂടിയണിഞ്ഞ് മാറിനിൽക്കുകയായിരുന്നു സിപിഎം പാർട്ടി സംവിധാനം. എന്നാലിന്ന് പിണറായിക്കും മുഹമ്മദ് റിയാസിനും പിന്നിൽ പാർട്ടി ഒന്നടങ്കമുണ്ട്. തനിക്കെതിരേ ഉണ്ടായ ആരോപണങ്ങളെക്കുറിച്ച് മുഹമ്മദ് റിയാസ് സംസ്ഥാന സെക്രട്ടേറിയറ്റിൽ വിശദീകരിക്കുകയും പാർട്ടി അത് അംഗീകരിക്കുകയും ചെയ്തിട്ടുണ്ട്. അതിൽ മുറുമുറുപ്പുള്ള അണികളുണ്ടെന്നതും പരസ്യമായ രഹസ്യം.
പൊതുസമൂഹത്തെ സംബന്ധിച്ചിടത്തോളം ഇതൊന്നുമല്ല വിഷയം. ജനങ്ങൾക്ക് ഉപയുക്തമാകുന്ന ഭരണം നടക്കണം. പ്രകൃതിയുടെ താളംതെറ്റൽ ഇപ്പോൾത്തന്നെ സാധാരണ ജനജീവിതത്തെ ബാധിക്കുന്നുണ്ട്. അതിനൊപ്പം ഭരണത്തിന്‍റെ താളംതെറ്റൽ കൂടിയാകുമ്പോൾ ജീവിതം ദുരിതമയമാകും. അതിനു പ്രതിവിധിയായിട്ടാണ് ഭരണക്കാർ ചെയ്തുവച്ച കെടുതികളെക്കുറിച്ച് സത്യസന്ധമായി അന്വേഷിക്കുന്നതും നീതി നടപ്പാക്കാനുള്ള നടപടികൾ സ്വീകരിക്കുന്നതും. അന്വേഷണം നേരായ വഴിക്ക് നടന്നില്ലെങ്കിൽ മൊത്തം സിസ്റ്റത്തിലുള്ള വിശ്വാസത്തെ ബാധിക്കും. അന്വേഷണത്തിനു വിധേയരാകുന്നവരുടെ പ്രതിരോധം വഴിവിട്ടാലും അന്തരീക്ഷം കലങ്ങും. അതുകൊണ്ടുതന്നെ ഉയർന്ന രാഷ്‌ട്രീയവിവേകമാണ് ഈ വിഷയത്തിൽ എല്ലാവരിൽനിന്നും പ്രതീക്ഷിക്കുന്നത്.
23-09-2026
പരിസ്ഥിതിലോലമെന്ന പേരിൽ കാപട്യത്തിന്‍റെ ചൂതുകളി അരുതെന്ന് നമ്മൾ പലവട്ടം പറഞ്ഞതാണ്. പച്ചമനുഷ്യരെ പ്രകൃതിസ്നേഹത്തിന്‍റെ വ്യാജഹാരമണിയിച്ച് കുടിയിറക്കരുതെന്ന് പലവട്ടം താക്കീത് ചെയ്തതാണ്. 12 വർഷവും ഏഴ് കരട് വിജ്ഞാപനങ്ങളും കടന്ന് പരിസ്ഥിതിലോല മേഖല (ഇഎസ്എ) അന്തിമവിജ്ഞാപനത്തിലേക്കുള്ള അവസാന മണിക്കൂറുകളിലെത്തിയിരിക്കുന്നു. പറ‍യാനുള്ളതു പറയാൻ ഇനിയൊരവസരം കിട്ടിയെന്നുവരില്ല.
പൊതുജനങ്ങൾക്കും സംഘടനകൾക്കും പ്രതികരിക്കാനുള്ള അവസരം രണ്ടു ദിവസംകൂടി മാത്രം. പരമാവധി കരുത്തോടെ നമുക്കു പറയാം, ജനവാസത്തെ വനവാസമാക്കുന്ന മന്ഥരാ കൗശലങ്ങൾ ഇവിടെ വേണ്ടാ. കർഷകരെയും ദളിതരെയും ആദിവാസികളെയും നിരന്തരം വിഡ്ഢികളാക്കുന്ന കള്ളക്കളി ഇവിടെ വേണ്ടാ. നീതിപൂർവമായ അന്തിമവിജ്ഞാപനം പുകമറയിലാക്കുന്നത് കേന്ദ്രസർക്കാരിന്‍റെ രാഷ്‌ട്രീയമാണെങ്കിൽ ആ അളിഞ്ഞ രാഷ്‌ട്രീയക്കളി ഇവിടെ വേണ്ടാ. ഈ വിഷയത്തിൽ സംസ്ഥാന സർക്കാരിന്‍റെ പിടിപ്പുകേടുണ്ടെങ്കിൽ അത് തിരുത്താതെയുള്ള കണ്ണുപൊത്തിക്കളി വേണ്ടാ.
വലിയൊരു വിഭാഗം മനുഷ്യരുടെ ജീവിതമാണ് നിശ്ചലമായിരിക്കുന്നത്. അവർക്കും കൃഷി ചെയ്യേണ്ടേ? അവർക്കും വീടു വയ്ക്കേണ്ടേ? ആവശ്യം വന്നാൽ ഭൂമി വിൽക്കേണ്ടേ? എത്ര കാലമാണ് ഈ അനിശ്ചിതത്വം തുടരുക? കേന്ദ്രത്തിന് സംസ്ഥാന സർക്കാരിനെ കുറ്റം പറയാം; സംസ്ഥാനത്തിന് കേന്ദ്രത്തെയും. കാര്യങ്ങൾ കരയോടടുക്കുന്നെന്ന് തോന്നിക്കുമ്പോൾ കാണാം, പ്രകൃതിസ്നേഹികളുടെ കുപ്പായമണിഞ്ഞ് ചില സ്ഥാപിത താത്പര്യക്കാർ പൊതുതാത്പര്യ ഹർജിയും ദുരൂഹ പ്രക്ഷോഭങ്ങളുമായി രംഗത്തെത്തുന്നത്. അതു മറയാക്കി വീണ്ടും കരടുകൾ. എല്ലാ ക്ഷമയ്ക്കും ഒരതിരുണ്ടെന്ന് മറക്കരുത്.
ജനവാസ മേഖലകളും തോട്ടങ്ങളും കൃഷിയിടങ്ങളും ഒഴിവാക്കി 9993.7 ചതുരശ്ര കിലോമീറ്റർ പരിസ്ഥിതിലോല പ്രദേശം 8590.69 ചതുരശ്ര കിലോമീറ്ററായി പുതുക്കി നിശ്ചയിക്കണമെന്ന കേരളത്തിന്‍റെ ആവശ്യത്തിന് പുല്ലുവിലയാണ് കേന്ദ്രം കൽപിച്ചത്. അതിർത്തികൾ തരംതിരിച്ചുള്ള ഫീൽഡ് സർവേകൾ നടത്താൻ സംസ്ഥാന സർക്കാർ കാണിച്ച അലംഭാവമാണ് കേന്ദ്രത്തിന്‍റെ പിടിവള്ളി. കഴിഞ്ഞ ഇടതു സർക്കാരുകൾക്ക് മുദ്രാവാക്യത്തിലും പ്രസ്താവനകളിലും പ്രത്യയശാസ്ത്രം പിഴച്ചില്ല. പക്ഷേ, ഗൃഹപാഠത്തിലും പ്രായോഗിക സമീപനങ്ങളിലും പിഴച്ചു. പ്രത്യയശാസ്ത്രത്തിനപ്പുറം സ്വന്തം ജനങ്ങളെ കണ്ട തമിഴ്നാടും ഗോവയുമൊക്കെ വേണ്ട സമയത്ത് വേണ്ടതു ചെയ്ത് അവരുടെ ജനവാസകേന്ദ്രങ്ങളെ സംരക്ഷിച്ചു.
ഇനി പറയുന്ന കാര്യങ്ങൾ ക്ഷീരബലപോലെ പലയാവർത്തിച്ചതുതന്നെ. എങ്കിലും എങ്ങനെ പറയാതിരിക്കും? അതിജീവനത്തിനായുള്ള അന്തിമപോരാട്ട വേദിയല്ലേ.
കേരളത്തിന്‍റെ തനതു ഭൂപ്രകൃതി പരിഗണിക്കാത്ത ഒരു പരിസ്ഥിതി മേഖലയും ലോലമാകില്ല, കലുഷിതമാകുകയേ ഉള്ളൂ. ഇവിടെ വനഭൂമിയും കൃഷിഭൂമിയും തോട്ടങ്ങളും ജനപദങ്ങളും ഇടകലർന്നാണ്. ഒരു റവന്യു വില്ലേജിന്‍റെ ഒരറ്റത്ത് വനമുണ്ടായാൽ വില്ലേജ് മുഴുവൻ ഇഎസ്എയിൽപ്പെടുത്തുന്നത് അന്യായമാണ്. എന്നുവച്ചാൽ ഇത്തരം പ്രദേശങ്ങൾ ഇഎസ്എയിൽ വരാൻ പാടില്ല എന്നതുതന്നെ.
കൂടാതെ, കൃത്യമായ ജിഐഎസ്, കഡസ്ട്രല്‍, ജിയോ കോ- ഓര്‍ഡിനേറ്റ് മാപ്പ് ജനങ്ങളറിയണം. ഏത് പ്രദേശം ഉൾപ്പെടുത്തി, ഏത് ഒഴിവാക്കി എന്നതിൽ സംശയം പാടില്ല.
കൃത്രിമ കണക്കുകളിലൂടെ നെഞ്ചുവിരിച്ച് വികസിക്കുന്ന വനപ്രദേശത്തെ ശാസ്ത്രീയ കണക്കുകളിലൂടെ ഒതുക്കണം. കരടു വിജ്ഞാപനം മലയാളഭാഷയിൽത്തന്നെ പറയണമെന്ന കോടതി ഉത്തരവും ജലരേഖയായി.
ഒരു വില്ലേജ് ഇഎസ്എ പട്ടികയിൽപ്പെട്ടാൽ അവിടത്തെ ജനങ്ങളും ജീവിതവുംകൂടിയാണ് പെടുന്നതെന്ന് കേന്ദ്ര-സംസ്ഥാന സർക്കാരുകൾ തിരിച്ചറിയണം. കാരണം, അങ്ങനെ ഉൾപ്പെട്ടാൽ, ഭൂമി കൈമാറ്റം, രജിസ്‌ട്രേഷന്‍, ബാങ്കിംഗ് ഇടപാടുകള്‍, കൃഷി, മറ്റ് നിയമാനുസൃത പ്രവര്‍ത്തനങ്ങള്‍ എന്നിവയൊക്കെ തടസപ്പെടുകയാണ്. ഇക്കാര്യത്തിൽ വിശദീകരണം നൽകാൻ സംസ്ഥാന സർക്കാരിനും ബാധ്യതയുണ്ട്.
ഉമ്മൻ വി. ഉമ്മൻ കമ്മിഷൻ റിപ്പോർട്ടിലൂടെ കരടുവിജ്ഞാപനങ്ങളിലേക്കു വ്യാപിച്ച തെറ്റ് ഇതുവരെ തിരുത്താതെ പോയത് ഏറെ ആശങ്കയുണ്ടാക്കുന്നു. ആദ്യ കരടുവിജ്ഞാപനം തൊട്ട് റിപ്പോർട്ടും റിപ്പോർട്ടിന്മേൽ റിപ്പോർട്ടുമൊക്കെ സംസ്ഥാന സർക്കാർ നൽകിയെങ്കിലും അടിസ്ഥാനപരമായ തെറ്റു മാത്രം തിരുത്തിയില്ല.
കഴിഞ്ഞ സർക്കാർ നൽകിയ റിപ്പോർട്ടിന്‍റെ ഏകദേശ പകർപ്പ് തന്നെയാണ് ഇപ്പോഴത്തെ സർക്കാരും നൽകുന്നതെന്നാണ് സർക്കാരിന്‍റെ നീക്കങ്ങളിൽനിന്ന് മനസിലാകുന്നത്. അങ്ങനെ വരുമ്പോൾ 1600ലധികം ചതുരശ്ര കിലോമീറ്റർ ജനവാസകേന്ദ്രങ്ങൾ വനഭൂമിയായി മാറും. ഈ സാഹചര്യം ഒഴിവാക്കാൻ അടിയന്തരമായി സംസ്ഥാന സർക്കാർ ഇടപെടണം.
ജനങ്ങളുടെ ജീവിതവും ജീവിതോപാധികളും സംരക്ഷിക്കുന്നതും പരിസ്ഥിതി സംരക്ഷിക്കുന്നതും പരസ്പര പൂരകങ്ങളാണ്. പശ്ചിമഘട്ടം മനുഷ്യരാശിയുടെ അപൂർവ സമ്പത്താണ്. അത് സംരക്ഷിക്കപ്പെടണമെന്ന കാര്യത്തിൽ തർക്കമേയില്ല. പക്ഷേ, അത് മുഷ്കിന്‍റെയും പിടിവാശിയുടെയും നിക്ഷിപ്ത താത്പര്യങ്ങളുടെയും പേരിലാകരുത്.
അവസാനമായി ഒന്നേ പറയാനുള്ളൂ. നമുക്ക് പ്രതികരിച്ചുകൊണ്ടേയിരിക്കാം. ഉഴുതുമറിച്ച മണ്ണും അതിൽ വീണ വിയർപ്പുതുള്ളികളും അതിൽ നാമ്പിട്ട സസ്യജാലങ്ങളും സത്യമാണെങ്കിൽ നീതി പുലർന്നേ തീരൂ. എല്ലാ നെറികേടുകളും തുടച്ചുനീക്കുന്ന ഒരു അന്ത്യവിധിയുണ്ടാകുമെന്ന കാര്യം ആരും മറക്കരുത്.
22-09-2026
ദേശീയതലത്തിലുണ്ടാകുന്ന കൽക്കരി ക്ഷാമവും വിലവർധനയും കേരളത്തിന് ഇരട്ടി ആഘാതമാകും. സ്വന്തമായി കൽക്കരി ഖനികളോ വലിയ താപവൈദ്യുതനിലയങ്ങളോ കേരളത്തിലില്ല. ആഭ്യന്തര ആവശ്യത്തിനുള്ള വൈദ്യുതിയുടെ സിംഹഭാഗവും കേന്ദ്ര പൂളിൽനിന്നുള്ള വിഹിതത്തെയും പുറത്തുനിന്നുള്ള കരാറുകളെയും ആശ്രയിച്ചാണ് കണ്ടെത്തുന്നത്. രാജ്യത്തെ താപനിലയങ്ങളുടെ പ്രവർത്തനം തടസപ്പെടുമ്പോൾ പുറത്തുനിന്ന് ഉയർന്ന വിലയ്ക്ക് വൈദ്യുതി വാങ്ങേണ്ടിവരുന്നത് കെഎസ്ഇബിക്ക് വൻ സാമ്പത്തിക ബാധ്യതയാകും. മൺസൂൺ മഴയിൽ ഉണ്ടാകുന്ന വ്യതിയാനങ്ങൾ മൂലം സംസ്ഥാനത്തെ ജലവൈദ്യുത നിലയങ്ങളിലെ ഉത്പാദനം കുറയുമ്പോഴും പ്രതിസന്ധി കൂടുതൽ രൂക്ഷമാകുന്നു. എല്ലാ പ്രതിസന്ധിയും ആത്യന്തികമായി ഉപയോക്താവിലേക്കാണല്ലോ ഇടിച്ചിറങ്ങുക.
കേരളത്തിൽ കഴിഞ്ഞ വ്യാഴാഴ്ച രേഖപ്പെടുത്തിയ 99.92 ദശലക്ഷം യൂണിറ്റ് ഉപയോഗത്തിനുശേഷം ശനിയാഴ്ചയാണ് ഉപയോഗത്തില്‍ കുറവുണ്ടായത്. അതേസമയം, ഉപയോഗം കുറഞ്ഞിട്ടും പ്രതീക്ഷിച്ചതുപോലെ വൈദ്യുതി ലഭിക്കാത്തതിനെത്തുടര്‍ന്ന് ശനിയാഴ്ച പീക് സമയത്ത് ഒന്നിലേറെ തവണ വൈദ്യുതിനിയന്ത്രണം ഏര്‍പ്പെടുത്തേണ്ടിയും വന്നു. ഞായറാഴ്ചയും പ്രതീക്ഷിച്ച അളവില്‍ വൈദ്യുതി കിട്ടിയില്ലെന്നാണ് കെഎസ്ഇബി വൃത്തങ്ങള്‍ അറിയിച്ചത്. മുന്‍ വര്‍ഷങ്ങളിൽ സെപ്റ്റംബറിലെ ആവശ്യകതയേക്കാള്‍ 1,200 മെഗാവാട്ട് വരെ വര്‍ധനയാണ് സംസ്ഥാനത്തുള്ളത്.
ഇന്ത്യയുടെ ഊർജസുരക്ഷയിൽ കരിനിഴൽ വീഴ്ത്തിക്കൊണ്ടാണ് താപവൈദ്യുത നിലയങ്ങളിലെ കൽക്കരി ശേഖരം അപകടകരമാംവിധം താഴേക്ക് പോകുന്നുവെന്ന വിവരം പുറത്തുവരുന്നത്. പ്രമുഖ റേറ്റിംഗ് ഏജൻസിയായ ക്രിസിലിന്‍റെ ഏറ്റവും പുതിയ റിപ്പോർട്ട് പ്രകാരം കഷ്‌ടിച്ച് നാല് ദിവസത്തേക്കുവേണ്ട കൽക്കരിയേ താപവൈദ്യുത നിലയങ്ങളിലുള്ളൂ. വൈദ്യുതിയുടെ ആവശ്യം കൂടിയതും കൽക്കരി വിതരണത്തിലെ തടസങ്ങളുമാണ് പ്രതിസന്ധിക്കു കാരണം.
സെപ്റ്റംബര്‍ 19ലെ കണക്കുപ്രകാരം 190 നിലയങ്ങളിലായി 15.3 മെട്രിക് ടണ്‍ കല്‍ക്കരിയാണുള്ളത്. അന്നേ ദിവസത്തെ കല്‍ക്കരി ഉപയോഗം 2.70 ദശലക്ഷം ടണിനും താഴെയായിരുന്നു. ഈ ഉപയോഗനിരക്കില്‍ നിലയങ്ങള്‍ 85 ശതമാനം ശേഷിയില്‍ പ്രവര്‍ത്തിച്ചാല്‍പോലും കല്‍ക്കരി ശേഖരം പല നിലയങ്ങളിലും 26ന് മുമ്പുതന്നെ തീരും. എഴുപതിലധികം നിലയങ്ങളിലെ ശേഖരം അപകടകരമാംവിധത്തില്‍ കുറഞ്ഞ അളവിലാണ്. റെയില്‍വേ വഴി കല്‍ക്കരി എത്തിക്കുന്ന 128 താപനിലയങ്ങളില്‍ 60 എണ്ണത്തിലും സംഭരണം ഗുരുതരമായ പ്രതിസന്ധിയിലാണ്.
നമ്മുടെ വിതരണശൃംഖലയിലെ ആസൂത്രണമില്ലായ്മയും സംഭരണത്തിലെ പാളിച്ചകൾക്ക് വലിയ കാരണമാണ്. കൽക്കരി ഖനികളിൽ ആവശ്യത്തിന് ശേഖരമുണ്ടായിട്ടും അവ യഥാസമയം നിലയങ്ങളിൽ എത്തിക്കാൻ സാധിക്കുന്നില്ല. റെയിൽവേ റേക്കുകളുടെ കുറവും മഴക്കാലത്ത് കിഴക്കൻ മേഖലയിലുണ്ടാകുന്ന ഗതാഗത തടസങ്ങളും പ്രതിസന്ധിയുടെ വ്യാപ്തി കൂട്ടി.
ഇന്ത്യയുടെ മൊത്തം വൈദ്യുതി ഉത്പാദനത്തിന്‍റെ 70 ശതമാനത്തോളം ഇപ്പോഴും താപവൈദ്യുതനിലയങ്ങളെ ആശ്രയിച്ചാണ്. പുനരുപയോഗ ഊർജമേഖലയിൽ രാജ്യം മുന്നേറ്റമുണ്ടാക്കിയെങ്കിലും പീക് സമയങ്ങളിൽ തടസമില്ലാത്ത വൈദ്യുതി ഉറപ്പാക്കാൻ കൽക്കരിയെത്തന്നെ ആശ്രയിക്കേണ്ട അവസ്ഥയാണ്. അതിനാൽ, താത്കാലികമായി റോഡ് മാർഗം കൽക്കരി കൊണ്ടുപോകാൻ അനുമതി നൽകിയതുകൊണ്ടോ, അടിയന്തര ഇറക്കുമതി നടത്തിയതുകൊണ്ടോ ഈ വിഷയം പൂർണമായി പരിഹരിക്കപ്പെടില്ല.
ചരക്കുതീവണ്ടികൾക്കായി കൂടുതൽ കോറിഡോറുകൾ നിർമിക്കുകയും റെയിൽ-കടൽ മാർഗങ്ങൾ പരമാവധി പ്രയോജനപ്പെടുത്തുകയും വേണം. കൽക്കരി ഖനികളുടെ തൊട്ടടുത്തുതന്നെ നിലയങ്ങൾ നിർമിച്ച് ഉത്പാദിപ്പിക്കുന്ന വൈദ്യുതി ദീർഘദൂര ട്രാൻസ്മിഷൻ ലൈനുകൾ വഴി വിതരണം ചെയ്യുന്ന പിറ്റ്ഹെഡ് രീതിയെക്കുറിച്ചും വിദഗ്ധർ പറയുന്നുണ്ട്.
പുനരുപയോഗിക്കാവുന്ന ഊർജം വൻതോതിൽ സംഭരിക്കാൻ സാധിക്കുന്ന വലിയ ബാറ്ററി സ്റ്റോറേജ്, പമ്പ്ഡ് സ്റ്റോറേജ് ഹൈഡ്രോ പദ്ധതികൾ എന്നിവയുടെ സാധ്യതകളും പരിശോധിക്കാവുന്നതാണ്. ഊർജവിതരണ ശൃംഖലയെ കൂടുതൽ കരുത്തുറ്റതാക്കാനുള്ള സമഗ്രമായ നയരൂപീകരണവും ശക്തമായ ഇച്ഛാശക്തിയുമാണ് കേന്ദ്ര-സംസ്ഥാന സർക്കാരുകളിൽനിന്ന് ഇപ്പോൾ ഉണ്ടാകേണ്ടത്.
സൗരോർജത്തിലും ചെറുകിട ജലവൈദ്യുത പദ്ധതികളിലും കേരളം കൂടുതൽ സ്വയംപര്യാപ്തത കൈവരിക്കേണ്ടതുണ്ട്. വേനൽക്കാലത്തെയും മഴക്കാലത്തെയും വൈദ്യുതി ആവശ്യകത കൃത്യമായി മുൻകൂട്ടി കണ്ട് ദീർഘകാല വൈദ്യുതിവാങ്ങൽ കരാറുകളിൽ ഒപ്പുവയ്ക്കാനും പ്രാദേശിക ഉത്പാദനം കൂട്ടാനും സംസ്ഥാന സർക്കാർ മുൻകൈയടുക്കണം. ഉത്തരവാദിത്വത്തോടെയുള്ള ഉപയോഗവും മറ്റൊരു പ്രധാന കാര്യമാണ്. കേന്ദ്രസർക്കാരിന്‍റെ കൽക്കരി-ലോജിസ്റ്റിക്സ് പരിഷ്കാരങ്ങൾക്കൊപ്പം സംസ്ഥാനത്തിന്‍റെ ഊർജ ആസൂത്രണവും സമഗ്രമായി മാറിയെങ്കിൽ മാത്രമേ വരാനിരിക്കുന്ന ഇരുട്ടടിയെ മറികടക്കാൻ കേരളത്തിനാകൂ.
21-09-2026
ജനാധിപത്യത്തെ നോക്കുകുത്തിയാക്കുന്ന വൃത്തികെട്ട രാഷ്‌ട്രീയക്കളികളിലൂടെ ബംഗാൾ രാഷ്‌ട്രീയം വീണ്ടും കലുഷിതമായിരിക്കുന്നു. സാധാരണഗതിയിൽ നടന്നുപോകേണ്ട ഒരു നിയമസഭാ ഉപതെരഞ്ഞെടുപ്പാണ് കുതികാൽവെട്ടും കുതന്ത്രങ്ങളും വഴി ദേശീയ ശ്രദ്ധ ഒരിക്കൽകൂടി ബംഗാളിലേക്കു തിരിച്ചുവിട്ടത്. ഭവാനിപ്പുരിലും നന്ദിഗ്രാമിലും ജയിച്ചിരുന്ന മുഖ്യമന്ത്രി സുവേന്ദു അധികാരി ഒഴിഞ്ഞ നന്ദിഗ്രാമിൽ ഒക്‌ടോബർ ആറിന് നടക്കുന്ന ഉപതെരഞ്ഞെടുപ്പിനുള്ള പ്രചാരണം മുറുകവേയാണ് നാടകീയ സംഭവങ്ങൾ അരങ്ങേറിയത്.
കഴിഞ്ഞ വെള്ളിയാഴ്ചയാണ് കാര്യങ്ങൾ കീഴ്മേൽ മറിഞ്ഞത്. നന്ദിഗ്രാം ഉപതെരഞ്ഞെടുപ്പിൽ മമത ബാനർജി വിഭാഗം പ്രഖ്യാപിച്ചിരുന്ന സ്ഥാനാർഥി സഞ്ചിത പ്രധാൻ ഡേ, പശ്ചിമ ബംഗാൾ മുഖ്യമന്ത്രി സുവേന്ദു അധികാരിയുമായി കൂടിക്കാഴ്ച നടത്തിയതിന് പിന്നാലെ അപ്രതീക്ഷിതമായി മത്സരരംഗത്തുനിന്നു പിന്മാറി. ഇതിനു പിന്നാലെ ഇന്ത്യാ മുന്നണിയുടെ വിശാല താൽപര്യം മുൻനിർത്തി കോൺഗ്രസ് സ്ഥാനാർഥിയായ മിലൻ പ്രധാനെ പിന്തുണയ്ക്കുന്നതായി മമത ബാനർജി പ്രഖ്യാപിച്ചു. മമത ബാനർജിയുടെ പിന്തുണ പ്രഖ്യാപനം വന്ന് മണിക്കൂറുകൾക്കകം കോൺഗ്രസ് സ്ഥാനാർഥി മിലൻ പ്രധാനെ പൊലിസ് അറസ്റ്റ് ചെയ്തു. 2007ലെ ഭൂമി ഏറ്റെടുക്കൽ വിരുദ്ധ സമരവുമായി ബന്ധപ്പെട്ട പഴയ കേസ് കുത്തിപ്പൊക്കിയായിരുന്നു പെട്ടെന്നുള്ള പൊലിസ് നടപടി.
ഇതുകൂടാതെ ‘ഓൾ ഇന്ത്യ തൃണമൂൽ കോൺഗ്രസ്’ എന്ന പേരും ഔദ്യോഗിക ചിഹ്നവും ഉപയോഗിക്കുന്നതിൽനിന്ന് ഇരു തൃണമൂൽ വിഭാഗങ്ങളെയും വ്യാഴാഴ്ച തെരഞ്ഞെടുപ്പ് കമ്മീഷൻ വിലക്കിയിരുന്നു.
മമത ബാനർജിയുടെ വിഭാഗത്തിന് ‘മമത ഓൾ ഇന്ത്യ തൃണമൂൽ കോൺഗ്രസ്’ എന്ന പേരും ‘ഫുട്ബോൾ കളിക്കാരൻ’ ചിഹ്നവും അനുവദിച്ചു. അരൂപ് റോയ് നയിക്കുന്ന വിമതവിഭാഗത്തിനാകട്ടെ ‘ഡെമോക്രാറ്റിക് തൃണമൂൽ കോൺഗ്രസ്’ എന്ന പേരും ‘എൻവലപ്’ ചിഹ്നവും അനുവദിച്ചു. തെരഞ്ഞെടുപ്പ് കമ്മീഷന്‍റെ നടപടി ബിജെപിയെ സഹായിക്കാനാണെന്ന വ്യാപകവിമർശനത്തിനിടെയാണ് മമതയെ ഞെട്ടിച്ച സംഭവങ്ങളുണ്ടായത്.
1998മുതൽ തൃണമൂൽ കോൺഗ്രസിന്‍റെ വളർച്ചയിൽ പ്രധാന പങ്കു വഹിച്ചതാണ് മമത സ്വയം രൂപപ്പെടുത്തിയ ഔദ്യോഗിക ചിഹ്നം. അതു നഷ്‌ടപ്പെടുന്നതോടെ പാർട്ടിയുടെ വ്യക്തിത്വം തന്നെയാണ് ഇല്ലാതാവുകയെന്ന് എതിരാളികൾക്ക് നന്നായറിയാം. കേന്ദ്രഭരണകക്ഷിയുടെ രാഷ്‌ട്രീയക്കളികളിൽ തെരഞ്ഞെടുപ്പു കമ്മീഷൻ കൂടി പങ്കാളിയാകുന്നതാണ് ജനാധിപത്യ ബോധമുള്ളവരെ ഞെട്ടിക്കുന്നത്.
ഏതായാലും പേരും ചിഹ്നവും മരവിപ്പിച്ച നടപടിക്കെതിരേ സുപ്രീംകോടതിയെ സമീപിച്ച മമത നിയമവഴിയിലും പോർമുഖം തുറന്നിട്ടുണ്ട്. നിലവിലുള്ള സംഘടനാ ചട്ടക്കൂട് സൂക്ഷ്മമായി പരിശോധിക്കാതെയാണ് തെരഞ്ഞെടുപ്പ് കമ്മീഷന്‍റെ ഇടക്കാല ഉത്തരവ്, ഭരണഘടനയുടെ പത്താം ഷെഡ്യൂൾ പ്രകാരം അയോഗ്യതാ നടപടികൾ നേരിടുന്ന വിമത എംഎൽഎമാരുടെ വാദം സ്വീകരിച്ചത് ഭരണഘടനാവിരുദ്ധമാണ് തുടങ്ങിയ ആരോപണങ്ങളാണ് സുപ്രീംകോടതിയിൽ പരിശോധനയ്ക്കു വരിക.
പത്തൊൻപതു വർഷം പഴക്കമുള്ള കേസിൽ പൊടുന്നനെ വന്ന അറസ്റ്റ് നടപടിയാണ് ഭരണകക്ഷിയുടെ ദുഷ്‌ടലാക്കായി കോൺഗ്രസും മറ്റു പ്രതിപക്ഷ കക്ഷികളും ചൂണ്ടിക്കാണിക്കുന്നത്. സാധാരണ പൊലിസ് നടപടി മാത്രമെന്ന് പറഞ്ഞു കൈകഴുകാനുള്ള അധികാരികളുടെ ശ്രമം തീർത്തും അപഹാസ്യമായിരുന്നു. കോൺഗ്രസ് സ്ഥാനാർഥി ഒക്‌ടോബർ മൂന്നു വരെ റിമാൻഡിലായതോടെ അദ്ദേഹത്തിന്‍റെ തെരഞ്ഞെടുപ്പ് പ്രചാരണവും താറുമാറായി. എതിരാളികളുടെ ഒരു ലക്ഷ്യവും അതുതന്നെയാകും.
മമതയ്ക്ക് നന്ദിഗ്രാമിനെ മറക്കാനാകില്ല. ഇന്ത്യൻ രാഷ്‌ട്രീയത്തിലും പശ്ചിമ ബംഗാളിന്‍റെ ചരിത്രത്തിലും നിർണായക വഴിത്തിരിവുണ്ടാക്കിയ ഒന്നാണ് നന്ദിഗ്രാം സമരം. മൂന്ന് പതിറ്റാണ്ടിലേറെ നീണ്ട ഇടതുപക്ഷ ഭരണത്തിന്‍റെ തകർച്ചയ്ക്കും മമത ബാനർജിയുടെയും തൃണമൂൽ കോൺഗ്രസിന്‍റെയും വളർച്ചയ്ക്കും പ്രധാന കാരണം ഈ പ്രക്ഷോഭമായിരുന്നു. പ്രത്യേക സാമ്പത്തികമേഖലയ്ക്കെതിരായ സമരത്തിനിടെ 2007 മാർച്ച് 14നു നടന്ന വെടിവയ്പ്പിൽ കൊല്ലപ്പെട്ട 14 കർഷകരുടെ ചോരയിലാണ് മമത രാഷ്‌ട്രീയ പടയോട്ടം തുടങ്ങിയത്. അതേ നന്ദിഗ്രാം തന്നെ ഇപ്പോൾ കോമാളിരൂപത്തിൽ മമതയെ നോക്കി പല്ലിളിച്ചുകാട്ടുന്നു.
രാജ്യത്തിന്‍റെ മറ്റു പല ഭാഗങ്ങളിലെന്നപോലെ നന്ദിഗ്രാമിലും നിശബ്‌ദമായ നിലവിളിക്കുന്നത് ജനാധിപത്യം തന്നെയാണ്. അധികാരക്കൊതിയും വോട്ട് ബാങ്ക് ലക്ഷ്യമിട്ടുള്ള തന്ത്രങ്ങളും ഭരണഘടന മുന്നോട്ടുവയ്ക്കുന്ന മൂല്യങ്ങളെക്കാൾ വലിയ പ്രാധാന്യം നേടുന്ന ദയനീയ കാഴ്ച. അധികാരത്തിന്‍റെ ഹുങ്കിൽ വ്യക്തിഹത്യയും വർഗീയതയും ഭീഷണിയും വഴി രാഷ്‌ട്രീയ എതിരാളികളെ ഇല്ലാതാക്കാൻ ഏതറ്റംവരെയും പോകുന്ന രാഷ്‌ട്രീയകക്ഷികൾ വെറുപ്പിന്‍റെയും വിഭജനത്തിന്‍റെയും സന്ദേശമാണ് ജനങ്ങൾക്കു നൽകുന്നത്. ഇതൊന്നും നന്ദിഗ്രാം ഉപതെരഞ്ഞെടുപ്പോടുകൂടി അവസാനിക്കാൻ പോകുന്നില്ല എന്ന സൂചനകളാണ് നമ്മെ അതിലേറെ അസ്വസ്ഥമാക്കുന്നത്.
19-09-2026
ലോകത്തെ കരുത്തുറ്റ സാമ്പത്തിക-സാങ്കേതിക ശക്തികളിലൊന്നായി വളർന്നുപന്തലിച്ച നവഭാരതത്തെ ഡോണൾഡ് ട്രംപും അദ്ദേഹത്തിന്‍റെ ഭരണകൂടവും ഇനിയെങ്കിലും തിരിച്ചറിയണം. 140 കോടി ജനങ്ങളുടെ പരമാധികാരത്തെയും ആത്മാഭിമാനത്തെയും 100 ശതമാനം തീരുവഭീഷണിമുനയിൽ നിർത്തി വരുതിയിലാക്കാമെന്നതു കേവല വ്യാമോഹം മാത്രമാണ്. റഷ്യയിൽനിന്ന് ക്രൂഡ് ഓയിൽ വാങ്ങുന്ന ഇന്ത്യയും ചൈനയും ഉൾപ്പടെയുള്ള രാജ്യങ്ങൾക്കുമേൽ 100 ശതമാനം വരെ കടുത്ത നികുതി ചുമത്താൻ വ്യവസ്ഥ ചെയ്യുന്ന ‘ലിൻഡ്സെ ഒ. ഗ്രഹാം സാംഗ്‌ഷനിംഗ് റഷ്യ ആൻഡ് ഇറാൻ ആക്‌ട് 2026’ പാസാക്കിയതിലൂടെ അമേരിക്കയുടെ അഹങ്കാരവും നയതന്ത്രപരമായ ഇരട്ടത്താപ്പുമാണ് വീണ്ടും ലോകത്തിനു മുന്നിൽ അനാവൃതമായിരിക്കുന്നത്.
യുക്രെയ്നെതിരായ അധിനിവേശത്തിന്‍റെ പശ്ചാത്തലത്തിൽ റഷ്യൻ വരുമാനം തടയുകയാണ് ഉപരോധത്തിന്‍റെ ലക്ഷ്യമെന്ന് യുഎസ് സെനറ്റ് ഫോറിൻ റിലേഷൻസ് കമ്മിറ്റി വ്യക്തമാക്കുന്നു. ജനപ്രതിനിധിസഭയും സെനറ്റും പാസാക്കിയ ബിൽ ഉടൻതന്നെ പ്രസിഡന്‍റ് ഡോണൾഡ് ട്രംപ് ഒപ്പുവച്ച് നിയമമാക്കുമെന്നാണു കരുതുന്നത്.
സ്വന്തം കാര്യത്തിലേക്കു വരുമ്പോൾ അമേരിക്ക കാണിക്കുന്ന കപടതയും സ്വാർഥതയും തികച്ചും ജുഗുപ്സാവഹമാണ്. റഷ്യൻ എണ്ണയ്ക്കും പ്രകൃതിവാതകത്തിനുംമേൽ ലോകരാജ്യങ്ങൾക്കു വിലക്കേർപ്പെടുത്തുകയും ഉപരോധമേർപ്പെടുത്തുകയും ചെയ്യുന്ന അമേരിക്ക, തങ്ങളുടെ സ്വന്തം ആണവനിലയങ്ങൾക്ക് ആവശ്യമായ യുറേനിയം ഇറക്കുമതി ചെയ്യാൻ ഇതേ ഉപരോധ ബില്ലിൽ റഷ്യക്കു പ്രത്യേക ഇളവുകൾ അനുവദിച്ചിരിക്കുന്നു! തങ്ങളുടെ സിവിലിയൻ ആണവനിലയങ്ങളുടെ 26 ശതമാനത്തോളം യുറേനിയം ആവശ്യങ്ങൾക്കായി ഇന്നും റഷ്യയെ പൂർണമായി ആശ്രയിക്കുന്നവർ,
ഇന്ത്യ സ്വന്തം ജനങ്ങളുടെ ഊർജസുരക്ഷ ഉറപ്പാക്കാൻ കുറഞ്ഞ വിലയിൽ റഷ്യൻ എണ്ണ വാങ്ങുമ്പോൾ ഉപരോധഭീഷണി മുഴക്കുന്നത് എന്തു ന്യായത്തിന്‍റെ അടിസ്ഥാനത്തിലാണ്? പശ്ചിമേഷ്യൻ സംഘർഷങ്ങളിലും റഷ്യ-യുക്രെയ്ൻ തർക്കങ്ങളിലും കാര്യമാത്രപ്രസക്തമായി ഇടപെട്ടു സമാധാനം കൊണ്ടുവരാൻ കഴിയാതെ കാര്യങ്ങൾ കൂടുതൽ വഷളാക്കിയ ട്രംപ് ഭരണകൂടം, സ്വന്തം വീഴ്ചകൾ മറയ്ക്കാനാണു സൗഹൃദരാജ്യങ്ങളെ നികുതിഭീഷണിയിലാക്കി നിശബ്‌ദരാക്കാൻ നോക്കുന്നത്.
എവിടെനിന്ന് ഇന്ധനം വാങ്ങണം, ആരുമായി വ്യാപാരം നടത്തണം എന്ന് സ്വതന്ത്ര ജനാധിപത്യരാജ്യങ്ങളോടു കല്പിക്കാൻ അമേരിക്കയ്ക്ക് യാതൊരു അവകാശവുമില്ല. സ്വന്തം രാജ്യത്തുപോലും ട്രംപിന്‍റെ ഇത്തരം ഏകപക്ഷീയമായ വിദേശനയങ്ങൾക്കും സൈനികനീക്കങ്ങൾക്കുമുള്ള ജനപിന്തുണ കൂപ്പുകുത്തുകയാണ്. ഫോക്സ് ന്യൂസ് നടത്തിയ സർവേയിൽ 61 ശതമാനം വോട്ടർമാരും ട്രംപിന്‍റെ പ്രവർത്തനങ്ങളിൽ കടുത്ത അതൃപ്തി രേഖപ്പെടുത്തിയതും വിദേശനയത്തിനുള്ള ജനപിന്തുണ 37 ശതമാനമായി താഴ്ന്നതും, അമേരിക്കൻ ജനതയ്ക്കുപോലും ഈ നയതന്ത്ര പരാജയത്തോടും യുദ്ധവെറിയോടും താത്പര്യമില്ലെന്ന് വ്യക്തമാക്കുന്നു. ഇറാനെതിരേയുള്ള സൈനികനീക്കം തെറ്റായിരുന്നുവെന്നും ആഭ്യന്തരസുരക്ഷയെ ബാധിക്കുമെന്നും അവിടത്തെ ഭൂരിപക്ഷം ജനങ്ങളും വിശ്വസിക്കുന്നു.
അമേരിക്കയുടെ ഇത്തരം തീരുവഭീഷണികൾക്കു മുന്നിൽ പണയം വയ്ക്കാനുള്ളതല്ല ഇന്ത്യയുടെ സാമ്പത്തിക പരമാധികാരവും വ്യാപാര സ്വാതന്ത്ര്യവും. ഉഭയകക്ഷി ബന്ധത്തെയും ആഗോള ഊർജവിപണിയെയും ദോഷകരമായി ബാധിക്കുന്ന ഇത്തരം ഏകപക്ഷീയമായ കടന്നുകയറ്റങ്ങൾക്കെതിരേ വിദേശകാര്യ മന്ത്രാലയം കൈക്കൊണ്ട ഉറച്ച നിലപാട് അഭിനന്ദനാർഹമാണ്. യുഎസ് തീരുവ ഭീഷണി ഇരു രാജ്യങ്ങളും തമ്മിലുള്ള ഉഭയകക്ഷി ബന്ധത്തെയും ആഗോള ഊർജവിപണിയെയും ബാധിക്കുമെന്ന് മുന്നറിയിപ്പു നൽകിയ ഇന്ത്യ,
രാജ്യത്തിന്‍റെ സാമ്പത്തിക-വ്യാപാര താത്പര്യങ്ങൾ സംരക്ഷിക്കാൻ ആവശ്യമായ എല്ലാ നടപടികളും സ്വീകരിക്കുമെന്നും വ്യക്തമാക്കിയിട്ടുണ്ട്. സ്വന്തം രാജ്യത്തിന്‍റെ സാമ്പത്തിക താത്പര്യങ്ങൾ സംരക്ഷിക്കാൻ ആവശ്യമായ തിരിച്ചടികൾ നൽകാൻ ഇന്ത്യ ഒട്ടും മടിക്കരുത്. ലോക പൊലിസ് ചമഞ്ഞ് ഇന്ത്യപോലുള്ള രാജ്യങ്ങളുടെ സ്വാതന്ത്ര്യത്തിന്മേൽ കുതിരകയറുന്ന അമേരിക്കൻ തന്ത്രങ്ങൾ ഇനിയും വിലപ്പോകില്ലെന്ന് അവരെ കൃത്യമായി ബോധ്യപ്പെടുത്താൻ സമയമായി.
അമേരിക്ക പാസാക്കിയ പുതിയ ഉപരോധബിൽ യുക്രെയ്നിലെ സമാധാനനീക്കങ്ങളെ കൂടുതൽ സങ്കീർണമാക്കുമെന്ന് റഷ്യ വ്യക്തമാക്കിക്കഴിഞ്ഞു. വർഷങ്ങളായി തുടരുന്ന ശത്രുതയിലും രക്തച്ചൊരിച്ചിലിലും ഇരു രാജ്യങ്ങളിലെയും ജനങ്ങൾ വലഞ്ഞുനിൽക്കുമ്പോൾ, സമാധാനത്തിനു വഴിയിടാതെ വീണ്ടും പ്രകോപനങ്ങളും ഉപരോധങ്ങളും സൃഷ്‌ടിക്കുന്ന അമേരിക്കൻ നിലപാട് കേവലം ക്രൂരതയെന്നല്ലാതെ മറ്റൊന്നും പറയാനില്ല. തീ തുപ്പുന്ന ബോംബുകൾക്കും സാമ്പത്തിക തകർച്ചയ്ക്കുമിടയിൽ ജീവനുവേണ്ടി നെട്ടോട്ടമോടുന്ന മനുഷ്യരുടെ കണ്ണീരു കാണാതെ, ആഗോള മേധാവിത്വത്തിനും ആയുധ-വ്യാപാര താത്പര്യങ്ങൾക്കുംവേണ്ടി നിലകൊള്ളുന്ന രാഷ്‌ട്രീയക്കളി അവസാനിപ്പിക്കേണ്ട സമയം അതിക്രമിച്ചിരിക്കുന്നു.
18-09-2026
മുടിയനായ പുത്രൻ എന്ന നാടകത്തിൽ ഒഎൻവി കുറുപ്പ് എഴുതി ജി. ദേവരാജൻ സംഗീതം നൽകി കെപിഎസി സുലോചന പാടിയ പ്രശസ്തമായ ഒരു ഗാനമുണ്ട്. “അമ്പിളിയമ്മാവാ താമരക്കുമ്പിളിലെന്തൊണ്ട്‍...” എന്നു തുടങ്ങുന്ന ആ ഗാനം കുട്ടികളെയും മുതിർന്നവരെയും ഒരുപോലെ സന്തോഷിപ്പിക്കുന്നു. ഭൂമിയിലെ മനുഷ്യരെയും വിണ്ണകത്തെ അദ്ഭുതങ്ങളെയും മനോഹരമായ ഭാവനയിലൂടെ ബന്ധിപ്പിക്കുകയാണ് കവി. പക്ഷേ, ഇന്ന് “മാനത്തെ മാളികയിൽ ഇരിക്കുന്ന നാണംകുണുങ്ങിയുടെ കൈയിൽനിന്ന്” കുപ്പിവള ചോദിച്ചാൽ കിട്ടുക മാരകമായ ലേസർ കിരണങ്ങളും ബഹിരാകാശ അവശിഷ്‌ടങ്ങളുടെ പെരുമഴയുമാകും! ആഹ്ലാദകാരിയായ ഭാവനയിൽനിന്നുവഴിമാറി മനുഷ്യർ ഭയാനകമായ വികലഭാവനയിൽ അഭിരമിക്കുകയാണിപ്പോൾ.
ബഹിരാകാശം ആരുടേതാണ് എന്ന ചോദ്യം വീണ്ടും മനുഷ്യരാശിക്കുമേൽ ഡെമോക്ലീസിന്‍റെ വാൾപോലെ തൂങ്ങിനിൽക്കുന്നു. പ്രപഞ്ചം മുഴുവൻ തങ്ങളുടെ കുടിപ്പകയും യുദ്ധക്കൊതിയും തീർക്കാനുള്ള പടനിലങ്ങളാണെന്നാണ് അൽപബുദ്ധികളായ രാഷ്‌ട്രത്തലവന്മാർ കരുതുന്നത്.
ഭൂമിയുടെ ഭ്രമണപഥത്തിൽ ശത്രുരാജ്യങ്ങളുടെ ആക്രമണങ്ങളെ ചെറുക്കാൻ തങ്ങൾ ‘ഓൺ-ഓർബിറ്റ് സ്പേസ് കൺട്രോൾ ആയുധങ്ങൾ’ സജ്ജമാക്കിയിട്ടുണ്ടെന്ന അമേരിക്കൻ വ്യോമസേനാ സെക്രട്ടറി ട്രോയ് മെയിൻകിന്‍റെ വെളിപ്പെടുത്തലാണ് ബഹിരാകാശയുദ്ധത്തിന്‍റെ സാധ്യതകൾ വീണ്ടും ചർച്ചയാകാൻ കാരണം.ഭൂമിയിലെ യുദ്ധങ്ങൾ കരയും കടലും ആകാശവും സൈബറിടവും കടന്ന് അഞ്ചാമത്തെ യുദ്ധക്കളത്തിലെത്തിയിരിക്കുന്നു. ഇത് ഭൂമിയെന്ന ഗ്രഹത്തെത്തന്നെ ഇല്ലാതാക്കുമോ?
ചൈനയും റഷ്യയും ഉയർത്തുന്ന വെല്ലുവിളികളെ പ്രതിരോധിക്കുക മാത്രമാണ് ലക്ഷ്യമെന്നാണ് പതിവുപോലെ അമേരിക്കയുടെ ഭാഷ്യം. രണ്ടാം ലോകയുദ്ധകാലത്തെ വി-2 റോക്കറ്റുകളിൽ തുടങ്ങി, ശീതയുദ്ധകാലത്തെ സോവ്യറ്റ്-അമേരിക്കൻ മത്സരത്തിലൂടെ വളർന്ന ബഹിരാകാശ സാങ്കേതികവിദ്യ ഇന്ന് മനുഷ്യന്‍റെ ദൈനംദിന ജീവിതത്തിന്‍റെ അവിഭാജ്യഘടകമാണ്.
വാർത്താവിനിമയം, ഇന്‍റർനെറ്റ്, വിമാന-കപ്പൽ ഗതാഗതത്തെ നിയന്ത്രിക്കുന്ന ജിപിഎസ്, ഉപഗ്രഹ ബാങ്കിംഗ്, കാലാവസ്ഥാ പ്രവചനം എന്നിവ മുതൽ ദുരന്തനിവാരണം വരെയുള്ള സകല മേഖലകളും നിലനിൽക്കുന്നത് ഉപഗ്രഹ ശൃംഖലകളെ ആശ്രയിച്ചാണ്. ഭ്രമണപഥത്തിലെ ചെറിയ ഏറ്റുമുട്ടൽപോലും സമാധാനപരമായ ജീവിതവഴികളെ നിമിഷനേരംകൊണ്ട് തകിടംമറിക്കും. ഉപഗ്രഹവിരുദ്ധ മിസൈലുകളോ ലേസർ ആയുധങ്ങളോ ഉപയോഗിച്ച് നടത്തുന്ന ആക്രമണങ്ങൾ സൃഷ്‌ടിക്കുന്ന ബഹിരാകാശ അവശിഷ്‌ടങ്ങൾ വരുംതലമുറകൾക്ക് ഭ്രമണപഥംതന്നെ അപ്രാപ്യമാക്കുന്ന പ്രതിസന്ധിയിലെത്തിച്ചേക്കും.
ഐക്യരാഷ്‌ട്രസഭയുടെ നേതൃത്വത്തിൽ 1967ൽ ഒപ്പുവച്ച "ഔട്ടർ സ്പേസ് ട്രീറ്റി' ബഹിരാകാശത്ത് ആണവായുധങ്ങളും മറ്റ് കൂട്ട നശീകരണ ആയുധങ്ങളും വിന്യസിക്കുന്നത് കർശനമായി നിരോധിച്ചിരുന്നു. മുഴുവൻ മനുഷ്യരാശിയുടെയും നന്മയ്ക്കായി ഉപയോഗിക്കേണ്ട പൊതുസ്വത്താണ് ബഹിരാകാശമെന്ന സങ്കൽപമാണ് ഈ കരാറിന്‍റെ അടിത്തറ. എന്നാൽ, പുതുതായി വികസിപ്പിച്ച ലേസറുകൾ, മൈക്രോവേവ് ആയുധങ്ങൾ, ജാമറുകൾ, കില്ലർ ഉപഗ്രഹങ്ങൾ എന്നിവയെ തടയാൻ പഴഞ്ചൻ നിയമങ്ങൾക്കു സാധിക്കുന്നില്ല.
ആയുധങ്ങളുടെ ഭൗതികരൂപത്തെ നിരോധിക്കുന്നതിനു പകരം, ബഹിരാകാശത്ത് നാശനഷ്‌ടം വരുത്തുന്ന രാജ്യങ്ങളുടെ വിനാശകരമായ പെരുമാറ്റത്തെയും ആക്രമണങ്ങളെയും കുറ്റകരമാക്കുന്ന പുതിയ രാജ്യാന്തര നിയമങ്ങളാണ് ഇനി വേണ്ടത്.
ബഹിരാകാശത്ത് ആയുധങ്ങൾ വിന്യസിക്കുന്നതും ഭീഷണിപ്പെടുത്തുന്നതും നിരോധിക്കാൻ റഷ്യയും ചൈനയും ചേർന്ന് 2008ൽ ഒരു ഉടമ്പടി തയാറാക്കിയെങ്കിലും അമേരിക്ക ഇത് നിരസിക്കുകയായിരുന്നു. ബഹിരാകാശത്തെ ആയുധമത്സരം തടയുന്നതിനുള്ള പ്രമേയത്തെ ഐക്യരാഷ്‌ട്രസഭയിൽ ഭൂരിപക്ഷം രാജ്യങ്ങളും പിന്തുണയ്ക്കുമ്പോൾ അമേരിക്ക മാത്രമാണ് എതിർക്കുന്നത്.
ബഹിരാകാശത്ത് ആയുധങ്ങളുണ്ടെന്നു പറയുമ്പോഴും ഏതു തരത്തിലുള്ള ആയുധങ്ങളാണെന്ന് മെയിൻക് വെളിപ്പെടുത്തുന്നില്ല. ആന്‍റി സാറ്റലൈറ്റ് മിസൈലുകൾ തൊട്ട് ബഹിരാകാശത്തുനിന്ന് ഭൂമിയിലെ ലക്ഷ്യങ്ങളിലേക്ക് ടങ്സ്റ്റൺ പോലുള്ള ഭാരിച്ച ലോഹങ്ങളുടെ ദണ്ഡുകൾ അതിവേഗത്തിൽ പതിപ്പിച്ച്, സ്ഫോടകവസ്തുക്കൾ ഇല്ലാതെതന്നെ കൂറ്റൻ സ്ഫോടനത്തിനു തുല്യമായ പ്രഹരമുണ്ടാക്കുന്ന ‘കൈനറ്റിക് ബോംബാർഡ്‌മെന്‍റ്’ വരെ എത്തിനിൽക്കുകയാണ് ബഹിരാകാശ യുദ്ധസന്നാഹങ്ങൾ.
‘മിഷൻ ശക്തി’പരീക്ഷണത്തിലൂടെ ഇന്ത്യയും ബഹിരാകാശ ആയുധശേഷിയുള്ള ലോകത്തിലെ നാലാമത്തെ ശക്തിയായി. അമേരിക്കയ്ക്കു പിന്നാലെ മറ്റു രാജ്യങ്ങളും സ്വന്തം ബഹിരാകാശ ആയുധങ്ങൾ പരസ്യമാക്കാൻ തുടങ്ങിയാൽ പ്രതിസന്ധി നിയന്ത്രണാതീതമാകും. ഐക്യരാഷ്‌ട്രസഭയുടെ നേതൃത്വത്തിൽ ശക്തമായ നിരീക്ഷണ സംവിധാനവും വിനാശകരമായ പ്രവർത്തനങ്ങൾ നടത്തുന്ന രാജ്യങ്ങൾക്കെതിരേ ശക്തമായ സാമ്പത്തിക-വ്യാപാര ഉപരോധങ്ങൾ ഏർപ്പെടുത്താനുള്ള വിചാരണാധികാരവും രൂപപ്പെടേണ്ടതുണ്ട്.
അമ്പിളിമാമനും നക്ഷത്രവിളക്കുകളും തിളങ്ങുന്നത് കാണാൻ നമ്മുടെ കുഞ്ഞുങ്ങൾ ആഹ്ലാദത്തോടെ ആകാശത്തേക്കു നോക്കുമ്പോൾ അവരെ ലേസർ രശ്മികൾ കരിച്ചുകളയരുത്. മറ്റൊരു ഡെമോക്ലീസ് വാളിനു കീഴെയാകരുത് സൂര്യനു ചുറ്റുമുള്ള ഭൂമിയുടെ സഞ്ചാരം.
17-09-2026
സ്ഥാപനയുടമ ഉൾപ്പെട്ട സ്പോൺസർഷിപ്പ് തട്ടിപ്പ് കേസിന്‍റെ പേരിലാണ് പൊലിസിന്‍റെ പ്രത്യേക അന്വേഷണസംഘം റിപ്പോർട്ടർ ചാനലിന്‍റെ ന്യൂസ് ഡെസ്കിൽ കയറി എഡിറ്ററുടെ കസേരയിലിരുന്നത്. പുലർച്ചെ ആറോടെയാണ് കൊച്ചി കളമശേരിയിലുള്ള ചാനൽ ആസ്ഥാനത്ത് പൊലിസ് എത്തിയത്. വാർത്താസംപ്രേഷണം തടസപ്പെടുന്ന രീതിയിൽ പൊലിസ് പെരുമാറിയെന്നും മാധ്യമപ്രവർത്തകരുടെ ഫോണുകൾ പിടിച്ചെടുത്തുവെന്നുമുള്ള ഗുരുതരമായ ആരോപണം ചാനൽ പ്രവർത്തകർ ഉയർത്തിയതോടെ റെയ്ഡിനെ എതിർത്തും പിന്തുണച്ചും ആളുകൾ രണ്ടു ചേരിയിലാകുന്നതാണു കണ്ടത്. ഭരണകൂട ഭീകരതയെന്ന് പ്രതിപക്ഷം ഒച്ചവയ്ക്കുമ്പോൾ നിയമപരമായ സാധാരണ നടപടിയെന്നാണ് മുഖ്യമന്ത്രി വി.ഡി. സതീശൻ പൊലിസ് നടപടിയെ വ്യാഖ്യാനിച്ചത്. പിണറായി വിജയൻ മുഖ്യമന്ത്രിയായിരിക്കെ വിവിധ മാധ‍്യമസ്ഥാപനങ്ങളിൽ പൊലിസ് നടപടികളുണ്ടായതിന്‍റെ ലിസ്റ്റും മുഖ്യമന്ത്രി എടുത്തുപറഞ്ഞു.
നിയമം ഇരുതലമൂർച്ചയുള്ള വാളാണ്; അതുപോലെയാണ് മാധ്യമസ്വാതന്ത്ര്യവും. ശരിയായ രീതിയിൽ വിനിയോഗിച്ചില്ലെങ്കിൽ മുറിവേൽക്കും. കേരളത്തിൽ നിരവധി പത്രമാധ്യമങ്ങളുണ്ട്, വാർത്താ ചാനലുകളുണ്ട്, ഓൺലൈൻ ന്യൂസ് പോർട്ടലുകളുണ്ട്. ഒരേ ആശയത്തെ, സംഭവത്തെ പല വർണങ്ങളിൽ പ്രതിഫലിപ്പിക്കുന്നവയാണവ. ഇന്ത്യയിൽതന്നെ ഒട്ടുമിക്ക മാധ്യമങ്ങളും വ്യക്തമായ രാഷ്‌ട്രീയചായ്‌വും ബിസിനസ് താത്പര്യങ്ങളുമുള്ളവയാണ്. ഈ സ്ഥാപനങ്ങളിലെല്ലാം നിരവധി ജേണലിസ്റ്റുകൾ ജോലി ചെയ്യുന്നുണ്ട്. സ്ഥാപന യുടമകളുടെ രാഷ്‌ട്രീയവും ബിസിനസ് താത്പര്യങ്ങളും അവരെ പല കുഴപ്പങ്ങളിലും ചാടിക്കാറുണ്ട്. അതിന്‍റെ തുടർച്ചയായ ഭരണകൂട-പൊലിസ് നടപടികൾ സാധാരണ അവരുടെ സ്ഥാപനങ്ങളിലെ മാധ്യമപ്രവർത്തകരിലേക്കു നീളാറില്ല. പത്രം നടത്തുന്ന കോർപറേറ്റ് മുതലാളിമാർക്കെതിരേ പലതരത്തിലുള്ള കേസുകളുണ്ടാകാറുണ്ട്. അപ്പോഴൊന്നും പൊലിസ് ന്യൂസ് ഡെസ്കിൽ കയറി വിളയാടാറുമില്ല.
റിപ്പോർട്ടർ ചാനലിന്‍റെ ഉടമയ്ക്കെതിരേയുള്ള കേസിന്‍റെ ന്യായാന്യായങ്ങളെക്കുച്ചോ അതു പ്രതിരോധിക്കാൻ ചാനലിനെ മറയാക്കി എന്ന ആരോപണത്തെക്കുറിച്ചോ അല്ല പറയാനുദ്ദേശിക്കുന്നത്. മാധ്യമരംഗം അകപ്പെട്ട ചതിക്കുഴികളെക്കുറിച്ചാണ്. ഒരു മാധ്യമസ്ഥാപനത്തിന്‍റെ ന്യൂസ്റൂമിലേക്ക് കടന്നുകയറുമ്പോൾ പൊലിസ് പാലിക്കേണ്ട ജനാധിപത്യ മര്യാദയിൽ വന്ന ജാഗ്രതക്കുറവിനെ വേണ്ടരീതിയിൽ പ്രതിരോധിക്കാൻപോലും കഴിയാതെ ഇരുൾമുറിയിൽ പരസ്പരം വാൾ വീശുന്ന മാധ്യമലോകത്തിന്‍റെ ചിത്രമാണ് നമ്മെ അങ്ങേയറ്റം ആശങ്കപ്പെടുത്തുന്നത്. ചാനൽ ഉടമയുടെയും ചാനലിന്‍റെയും മാധ്യമ ധാർമികതയെക്കുറിച്ചുള്ള ചർച്ച നടക്കട്ടെ. ആ ചർച്ച, ദൃശ്യമാധ്യമരംഗത്തെ കിടമത്സരവും റേറ്റിംഗ് യുദ്ധവും അനുദിനം വഷളാക്കുന്ന സ്വതന്ത്ര മാധ്യമപ്രവർത്തനത്തിന്‍റെ ഭാവിയിലേക്കും കോർപറേറ്റ്, ഭരണകൂട താത്പര്യങ്ങൾക്കു ചൂട്ടുപിടിക്കുന്ന മാധ്യമങ്ങളുടെ നിലവാരത്തകർച്ചയിലേക്കും നീളട്ടെ.
ചാനലുകളുടെ കിടമത്സരം സർവസീമകളും ലംഘിക്കുന്ന കാലത്ത് എതിരാളികളുടെ തകർച്ച അന്തംവിട്ട് ആഘോഷിക്കുന്ന ചാനലുകളുടെ കാഴ്ച നൽകുന്ന അസ്വസ്ഥതയും ഒരുവശത്തുണ്ട്. ഈയൊരു സാഹചര്യമാണ് പൊലിസിനും ഭരണകൂടത്തിനും പൊതുസമൂഹത്തിനും ന്യൂസ്മുറിയിലേക്കു നീളുന്ന ഇത്തരം റെയ്ഡുകളെ ന്യായീകരിക്കാനുള്ള വീര്യം നൽകുന്നത്. എന്തുതന്നെയായാലും കേസുമായി നേരിട്ടു ബന്ധമില്ലാത്ത മാധ്യമപ്രവർത്തകരെ ന്യൂസ് റൂമിൽ കയറി ആശങ്കയുടെ മുൾമുനയിൽ നിർത്തിയത് തീർത്തും അപലപനീയമാണ്.
ഇതിന്‍റെ മറുവശവും കാണാതിരുന്നുകൂടാ. മാധ്യമപ്രവർത്തനത്തിന്‍റെ എല്ലാ ധാർമികതയും വെടിഞ്ഞ് സ്വന്തം താത്പര്യം സംരക്ഷിക്കാൻ മാത്രം മാധ്യമസ്ഥാപനങ്ങൾ തുടങ്ങുകയും വാങ്ങുകയും ചെയ്യുന്ന വ്യക്തികളും കോർപറേറ്റ് കമ്പനികളും മാധ്യമസ്വാതന്ത്ര്യം എന്ന പവിത്രമായ മൂല്യത്തെയാണ് ചവിട്ടിമെതിക്കുന്നത്. തെറ്റും ശരിയും സത്യവും മിഥ്യയുമെല്ലാം കൂടിക്കുഴഞ്ഞ് ആരെ പിന്തുണയ്ക്കണം, ആരെ എതിർക്കണം എന്നറിയാത്ത സാമൂഹിക-രാഷ്‌ട്രീയ-സാമ്പത്തിക കുഴമറിച്ചിലിന്‍റെ കാലത്തിലൂടെയാണ് നാം കടന്നുപോകുന്നത്.
സ്ഥാപിത താത്പര്യക്കാർ മേയുന്ന മാധ്യമരംഗത്തെ ശുദ്ധീകരിക്കുന്ന പ്രക്രിയയും സമാന്തരമായി നടക്കേണ്ടതുണ്ട്. എന്തിന്‍റെ പേരിലായാലും ഇപ്പൊഴീ നടപടിയെ ന്യായീകരിച്ചാൽ ഇതൊരു കീഴ്‌വഴക്കമായി മാറും. അങ്ങനെയാണ് നമ്മുടെ ഭരണകൂട-പൊലിസ് സ്വഭാവം. അതോടെ സ്വതന്ത്രവും സത്യസന്ധവുമായ മാധ്യമപ്രവർത്തനം അസാധ്യമായിത്തീരുകയും ചെയ്യും. വസ്തുതകൾ എന്ന ഒന്നില്ല, വ്യാഖ്യാനങ്ങൾ മാത്രമേയുള്ളൂ, എന്നു പറഞ്ഞത് ഫ്രെഡറിക് നീച്ചേ ആണ്. വസ്തുതകൾ വിശുദ്ധമാണ്, അഭിപ്രായം സ്വതന്ത്രവും എന്നു പ്രഖ്യാപിച്ചത് സി.പി. സ്കോട്ടും. മനുഷ്യർ ചിന്തിച്ചുതുടങ്ങിയ കാലം മുതൽ വസ്തുതകളും വ്യാഖ്യാനങ്ങളും കെട്ടുപിണഞ്ഞ് പുകമറ സൃഷ്‌ടിച്ചുകൊണ്ടിരിക്കുന്നു. അതിനുള്ളിൽ മറഞ്ഞിരിക്കുന്ന സത്യവും ധർമവും നീതിയും പുറത്തു കൊണ്ടുവരാൻ അവിരാമം ശ്രമിച്ച മാധ്യമപ്രവർത്തകരുടെ ചരിത്രവും നമ്മുടെ മുന്നിലുണ്ട്.
ഒരേ വസ്തുതയിൽതന്നെ വ്യത്യസ്ത നിലപാടുകളുണ്ടാകുന്നതു വ്യാഖ്യാനങ്ങളുടെ വൈവിധ്യംകൊണ്ടാണ്. അത്തരം വൈവിധ്യങ്ങൾ നിർഭയം പ്രകടിപ്പിക്കാനാകും എന്നിടത്താണ് ജനാധിപത്യത്തിന്‍റെ വിജയം. വിരുദ്ധ നിലപാടുകളുടെ വസന്തം പൂക്കുന്നയിടമാണ് ജനാധിപത്യം. അത്തരം വിരുദ്ധ നിലപാടുകളുള്ള, സ്വതന്ത്ര മാധ്യമങ്ങളാണ് ജനാധിപത്യത്തിന്‍റെ യഥാർഥ നാലാം തൂൺ. തട്ടിപ്പുകൾ നടത്തി രക്ഷപ്പെടാൻ മാധ്യമസ്ഥാപനങ്ങളെ മറയാക്കുന്ന മാധ്യമ നെറികേടിനെയും പൊലിസ് എഡിറ്ററുടെ കസേരയിൽ കയറിയിരിക്കുന്ന അശ്ലീലത്തെയും ഒരുപോലെ നേരിടുകയെന്ന സങ്കീർണമായ ദൗത്യമാണ് മാധ്യമരംഗത്തിന്‍റെ ജനാധിപത്യ ഭാവിക്കുവേണ്ടി ഏറ്റെടുക്കേണ്ടത്.
16-09-2026
ഡ്രൈവിംഗ് ടെസ്റ്റ് എന്നതു കേവലം ഔദ്യോഗികമായ നടപടിക്രമം മാത്രമല്ല. ഒരു സമൂഹം തങ്ങളുടെ ഡ്രൈവർമാരിൽനിന്ന് എന്താണ് പ്രതീക്ഷിക്കുന്നത് എന്നതിന്‍റെ നേർസാക്ഷ്യം കൂടിയാണ്. ഡ്രൈവിംഗ് ലൈസൻസ് വലിയ അംഗീകാരമായി ആഗോളതലത്തിൽതന്നെ കരുതുന്നുണ്ട്. എങ്കിലും അതിലേക്കുള്ള വഴി ഓരോ രാജ്യത്തും വ്യത്യസ്തമാണ്. ലോകത്തിന്‍റെ വിവിധ ഭാഗങ്ങളിലെ റോഡ് സംസ്കാരവും വളരെ വ്യത്യസ്തമാണ്. കർശനമായ രാജ്യാന്തര നിലവാരത്തിൽനിന്ന് ഏറെ അകലെയാണ് ഇന്ത്യൻ ഡ്രൈവിംഗ് ടെസ്റ്റ് എന്ന വിമർശനം നേരത്തേയുള്ളതാണ്.
അപഹാസ്യമായ വിധത്തിൽ വളരെ എളുപ്പമെന്ന് വിശേഷിപ്പിക്കപ്പെടുന്ന പരീക്ഷണങ്ങൾപോലും മറികടക്കുന്ന വിധമുള്ള അഴിമതിയും ഇവിടെ കൊടികുത്തിവാഴുന്നു. റോഡ് നിയമങ്ങൾ കർശനമായി പാലിക്കുന്നതിനൊപ്പം ഉയർന്ന റോഡ് സംസ്കാരവുംകൂടി ചേർന്നാലേ രാജ്യത്തെ പാതകൾ സുരക്ഷിതമാകൂ എന്നതിൽ സംശയമില്ല. പക്ഷേ, പൂച്ചയ്ക്കാരു മണികെട്ടും എന്ന പതിവുചോദ്യം നമ്മെ തുറിച്ചുനോക്കുന്നു.
ഈ സാഹചര്യത്തിലാണ് കേരളത്തിലെ മോട്ടോർ വാഹന വകുപ്പ് ഡ്രൈവിംഗ് ലൈസൻസ് പരീക്ഷയിൽ കാതലായ മാറ്റം കൊണ്ടുവരുന്നത്. റോഡിലെ അപകടസാധ്യതകൾ മുൻകൂട്ടി തിരിച്ചറിയാനുള്ള ഡ്രൈവറുടെ കഴിവ് പരിശോധിക്കുന്ന കംപ്യൂട്ടർ അധിഷ്ഠിത ‘ഹസാർഡ് പെർസെപ്ഷൻ ടെസ്റ്റ്’ ഡിസംബർ ഒന്നുമുതൽ ഡ്രൈവിംഗ് ടെസ്റ്റിന്‍റെ ഭാഗമാകുകയാണ്. ആദ്യം ഓണ്‍ലൈൻ ലേണേഴ്സ് ടെസ്റ്റ്, തുടർന്ന് ഹസാർഡ് പെർസെപ്ഷൻ ടെസ്റ്റ്, ഗ്രൗണ്ട് ടെസ്റ്റ്, റോഡ് ടെസ്റ്റ് എന്നിങ്ങനെയാകും പരീക്ഷയുടെ വിവിധ ഘട്ടങ്ങൾ.
ലേണേഴ്സ് ലൈസൻസ് ടെസ്റ്റ് വിജയിച്ചശേഷം അടുത്ത ഘട്ടത്തിലേക്ക് കടക്കുന്നതിനു നിർബന്ധമായും 30 ദിവസത്തെ ഇടവേളയും ഉണ്ടായിരിക്കണം. വീഡിയോ ഗെയിം മാതൃകയിലുള്ള ‘ഹസാർഡ് പെർസെപ്ഷൻ ടെസ്റ്റി’ൽ ആകെ 100 മാർക്കാണുണ്ടാകുക. 60 മാർക്ക് കിട്ടുന്നവർ അടുത്ത ഘട്ടത്തിന് യോഗ്യത നേടും. വ്യത്യസ്ത കാലാവസ്ഥകളിലെ ഡ്രൈവിംഗ്, രാത്രികാല ഡ്രൈവിംഗ്, അപ്രതീക്ഷിത തടസങ്ങൾ എന്നിവ മുൻകൂട്ടി തിരിച്ചറിഞ്ഞ് വാഹനം നിയന്ത്രിക്കുന്നതടക്കമുള്ള കാര്യങ്ങൾ നിലവിലെ റോഡ് ടെസ്റ്റിൽ സമഗ്രമായി പരിശോധിക്കാൻ കഴിയാത്ത സാഹചര്യത്തിലാണ് പുതിയ സംവിധാനം കൊണ്ടുവരുന്നതെന്ന് വകുപ്പ് വ്യക്തമാക്കിയിട്ടുമുണ്ട്.
നമ്മുടെ റോഡുകളിൽ വണ്ടിയോടിക്കുന്നവരെ രാജ്യാന്തര നിലവാരത്തിലെത്തിക്കുക എന്ന ലക്ഷ്യത്തോടെയുള്ള ഈ മാറ്റത്തെ സർവാത്മനാ സ്വാഗതം ചെയ്യേണ്ടതുണ്ട്. അതേസമയം, പൂർണലക്ഷ്യം ഇനിയുമകലെയാണെന്ന കാര്യവും മറക്കരുത്. പത്തുവർഷം വണ്ടിയോടിച്ചിട്ടും സൈഡ് ഇൻഡിക്കേറ്റർ സ്വിച്ച് എവിടെയെന്നറിയാത്ത ഡ്രൈവർമാരുള്ള നാടാണിത്! അതുപോലെ രാത്രിയാത്രയിൽ ഹെഡ്‌ലൈറ്റ് ഡിം ചെയ്യുന്നത് പൗരുഷത്തെ ബാധിക്കുന്ന വലിയ പ്രശ്നമായി കരുതുന്നവരുമുണ്ട്. അതുമല്ല, റോഡിൽ വരച്ചുവച്ചിരിക്കുന്ന സീബ്രാലൈനുകളും കാൽനടക്കാരും സൈക്കിൾ യാത്രികരും വലിയ ശല്യമാണെന്ന് പുച്ഛിക്കുന്നവരും കുറവല്ല. ഇവരെയൊക്കെ മര്യാദ പഠിപ്പിക്കാൻ ഏതു ഭഗീരഥൻ വരുമെന്ന ചോദ്യത്തിനും ഉത്തരം കാണണം.
അപരനെ പരിഗണിക്കുകയും ബഹുമാനിക്കുകയും ചെയ്യുക എന്ന അടിസ്ഥാനതത്വമാണ് റോഡിലും പുലർത്തേണ്ടത്. ഇക്കാര്യം പാഠ്യപദ്ധതിയിൽ ഉൾപ്പെടുത്തി ചെറുപ്പം മുതലേ പഠിപ്പിച്ചെടുക്കണം. ഇക്കാര്യത്തിൽ ഹിമാലയൻ നഗരങ്ങളിലെ ഡ്രൈവർമാരെ മാതൃകയാക്കാവുന്നതാണ്. ഒരു ബ്ലോക്ക് വന്നാൽ അവിടെ അതിവേഗം അത് പരിഹരിക്കപ്പെടും. ഇവിടെയാണെങ്കിലോ? ഹോൺ ശബ്ദവും തെറിവിളികളുംകൊണ്ട് പ്രദേശമാകെ പൊട്ടിത്തെറിക്കും!
മറ്റു രാജ്യങ്ങളിൽ ഡ്രൈവിംഗ് ടെസ്റ്റുകൾക്കായി അത്യാധുനിക മാർഗങ്ങൾ ഇപ്പോഴേ സ്വീകരിച്ചിട്ടുണ്ട്. ചൈന, കസാക്കിസ്ഥാൻ തുടങ്ങിയ രാജ്യങ്ങളിൽ വാഹനത്തിനുള്ളിൽ ഒരു പരിശോധകന്‍റെ സാന്നിധ്യമില്ലാതെതന്നെ, ക്യാമറകളും ഓൺ-ബോർഡ് കംപ്യൂട്ടറുകളും ഘടിപ്പിച്ച ട്രാക്കുകളിലൂടെ ഡ്രൈവറുടെ കൃത്യത തത്സമയം വിലയിരുത്തുന്നുണ്ട്. യുകെ ഉൾപ്പടെയുള്ള രാജ്യങ്ങൾ ഡ്രൈവിംഗ് ടെസ്റ്റുകളിൽ സാറ്റലൈറ്റ് നാവിഗേഷൻ സംവിധാനങ്ങൾ ഉൾപ്പെടുത്തിയിരിക്കുന്നു. സ്ലോവേനിയ ഇന്ധനക്ഷമതയുള്ളതും പരിസ്ഥിതി സൗഹൃദപരവുമായ ഡ്രൈവിംഗ് രീതികൾ പരിശോധിക്കുമ്പോൾ, ജർമനി രാത്രികാല ഡ്രൈവിംഗും മോട്ടോർവേ ഡ്രൈവിംഗും നിർബന്ധിത പരിശീലനത്തിന്‍റെ ഭാഗമാക്കുന്നു.
ഇന്ത്യയിലാകട്ടെ, ലൈസൻസ് ലഭിച്ച പല ഡ്രൈവർമാർക്കും അടിസ്ഥാന നൈപുണ്യങ്ങൾ ഉണ്ടാകാറില്ല. ലെയ്ൻ അച്ചടക്കം, കണ്ണാടികളുടെ ശരിയായ ഉപയോഗം, സുരക്ഷിതമായ അകലം പാലിക്കൽ എന്നിവയൊക്കെ ലൈസൻസ് കിട്ടിയ ശേഷമാണ് അവർ പഠിക്കുന്നത്. ചുരുക്കത്തിൽ, യഥാർഥ റോഡുകൾ തന്നെയാണ് ഇവിടെ ഡ്രൈവിംഗ് പരിശീലനകേന്ദ്രങ്ങളായി മാറുന്നത്. കാർ ഉടമസ്ഥർ അതിവേഗം കൂടുന്ന ഇന്ത്യയിൽ, നിയന്ത്രണങ്ങൾ കടുപ്പിക്കുന്നതിനേക്കാൾ കൂടുതൽ ആളുകൾക്ക് ഡ്രൈവിംഗ് സൗകര്യം ലഭ്യമാക്കുന്നതിനാണ് മുൻഗണന നൽകുന്നത്. അതോടെ, നമ്മുടെ നാട്ടിലെ റോഡ് സംസ്കാരം എന്നത് പരസ്പര സഹകരണം, നിയന്ത്രിത അരാജകത്വം, അനുമാനങ്ങളെ അടിസ്ഥാനമാക്കിയുള്ള അലിഖിത നിയമങ്ങൾ എന്നിവയുടെ അപൂർവ മിശ്രിതമായി മാറുന്നു.
വലിയ ശബ്‌ദഘോഷം ഉണ്ടാക്കുന്നവരും വലിയ വാഹനങ്ങളുമാണ് ഇന്ത്യൻ റോഡിലെ അധികാരികൾ. ചെറിയ വാഹനങ്ങളും കാൽനടക്കാരുമെല്ലാം വിനീതവിധേയരായി അവർക്കു മുന്നിൽനിന്ന് ഓടിമാറേണ്ടിവരുന്നു. അതേസമയം, തെരുവുമൃഗങ്ങൾക്കു മുന്നിൽ മാത്രം എല്ലാവരും സമന്മാരാണ്! സുരക്ഷിത ഡ്രൈവിംഗ് സംസ്കാരം വളർത്താനുള്ള ഏതൊരു നീക്കത്തെയും പിന്തുണച്ചേ മതിയാകൂ. അത്രത്തോളമാണ് വാഹനപ്പെരുപ്പം. അച്ചടക്കത്തോടെ റോഡിൽ പെരുമാറിയില്ലെങ്കിൽ നഷ്‌ടമാകുന്ന മനുഷ്യജീവനും പാഴാകുന്ന സമയത്തിനും പകരംവയ്ക്കാനൊന്നുമില്ലെന്ന് മറക്കരുത്.
ADVERTISEMENT
ADVERTISEMENT
SPACE FOR ADVERTISEMENT
Copyright © 2026, Rashtra Deepika Ltd. All Rights Reserved.
Design and Development 
Corehub Solutions
Contact Numbers :
+91 481 2566706, 2566707, 2566708
About Us Feedback Privacy Policy Terms and Conditions for Online Payment
E-paper LOGIN
LOGIN