കൃപാസനം അഖണ്ഡ ജപമാല മഹാറാലി: വിശ്വാസസഹസ്രങ്ങള്ക്ക് സായൂജ്യം
1464244
Sunday, October 27, 2024 4:49 AM IST
ചേര്ത്തല: ലോകസമാധാനത്തിനായി കൃപാസനം ഡയറക്ടര് ഫാ.വി.പി. ജോസഫ് വലിയവീട്ടില് നയിച്ച അഖണ്ഡ ജപമാല മഹാറാലിയില് പങ്കെടുത്ത് സായൂജ്യരായത് ജനസഹസ്രങ്ങള്. യുദ്ധങ്ങള് അവസാനിക്കാന് രാജ്യങ്ങള് തമ്മില് സഹവര്ത്തിത്വം പുലരാന് കൃപാസനം മരിയന് പ്രത്യക്ഷീകരണ സന്നിധാനത്തുനിന്ന് ഇന്നലെ രാവിലെ ആറോടെ അര്ത്തുങ്കല് ബസിലിക്കയിലേക്ക് അഖണ്ഡ ജപമാല മഹാറാലി പുറപ്പെട്ടു.
മഹാറാലിയില് പങ്കെടുക്കാന് സംസ്ഥാനത്തിന്റെ വിവിധഭാഗങ്ങളില്നിന്നു ഭക്തസഹ്രസങ്ങള് കലവൂരിലേക്ക് ഒഴികിയെത്തി. ജപമാലറാലി മാരാരിക്കുളം ബീച്ചിലെത്തിച്ചേര്ന്നപ്പോള് കോഴിക്കോട് രൂപതാധ്യക്ഷന് ഡോ. വര്ഗീസ് ചക്കാലയ്ക്കല് ഉദ്ഘാടനം ചെയ്തു.
തുടര്ന്ന് ഡോ. വര്ഗീസ് ചക്കാലയ്ക്കല് ഫ്ളാഗ് ഓഫ് കര്മം നിര്വഹിച്ച് കൃപാസനം ഡയറക്ടര് വിജയകുമാറിന് പതാക കൈമാറി. പ്രീതികുളങ്ങര, പെരുമ്പന, വാറാന്കവല ജംഗ്ഷന് വഴി കടപ്പുറത്തിന്റെ സമാന്തര റോഡുകളിലൂടെ അര്ത്തുങ്കല് ബസിലിക്കയിലെത്തിയപ്പോള് ബസിലിക്ക റെക്ടര് ഡോ. യേശുദാസ് കാട്ടുങ്കല്തയ്യിലിന്റെ നേതൃത്വത്തില് സ്വീകരണം നല്കി.
തുടര്ന്ന് ആലപ്പുഴ രൂപത മെത്രാന് ഡോ. ജയിംസ് റാഫേല് ആനാപറമ്പില് പരിശുദ്ധ കുര്ബാന അര്പ്പിച്ച് സന്ദേശം നല്കി. വികാരി ജനറാൾ മോണ്.ജോയ് പുത്തന്വീട്ടില്, എപ്പിസ്കോപ്പല് വികാര് ഫാ. പോള് ജെ. അറയ്ക്കല് എന്നിവര് തിരുവചന സന്ദേശങ്ങള് നല്കി. കോഴിക്കോട് രൂപതാധ്യക്ഷന് ഡോ. വര്ഗീസ് ചക്കാലയ്ക്കല് പരിശുദ്ധ കുര്ബാന അര്പ്പിച്ച് സന്ദേശം നല്കി.
ബസിലിക്ക മുന് റെക്ടര് ഫാ.സ്റ്റീഫന് ജെ. പുന്നയ്ക്കല്, ആലപ്പുഴ രൂപത കെഎല്സിഎ ബിസിസി ലയ്റ്റി കമ്മീഷന് ഡയറക്ടര് ഫാ. ജോണ്സണ് പുത്തന്വീട്ടില് എന്നിവര് തിരുവചന സന്ദേശങ്ങല് നല്കി.
എറണാകുളം-അങ്കമാലി അതിരൂപത അപ്പസ്തോലിക് അഡ്മിനിസ്ട്രേറ്റര് മാര് ബോസ്കോ പുത്തൂര് വിശുദ്ധ കുര്ബാനയര്പ്പിച്ച് സമാപനസന്ദേശം നല്കി. മരിയന് പ്രത്യക്ഷീകരണ നൊവേനയ്ക്ക് സിസ്റ്റര് ജോമോള് ജോസഫ് നേതൃത്വം നല്കി. ദിവ്യകാരുണ്യ ആരാധനയ്ക്ക് ഫാ. അലക്സ് കൊച്ചീക്കാരന്വീട്ടില്, ഫാ. ജോസഫ് അല്ഫോന്സ് കൊല്ലാപറമ്പില്, ഫാ. അലക്സാണ്ടര്, ബ്രദര് എഡ്വേര്ഡ് തുറവൂര് എന്നിവര് നേതൃത്വം നൽകി.
തുടര്ന്ന് നടന്ന സമാപന ആരാധനയും സന്ദേശവും ആശീര്വാദവും കൃപാസനം സ്ഥാപക ഡയറക്ടര് ഡോ.വി.പി. ജോസഫ് വലിയവീട്ടില് നിര്വഹിച്ചു.